𑁭𑁧. 𑀫𑀳𑀸𑀓𑀭𑀼𑀡𑀸𑀜𑀸𑀡𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁧𑁭. 𑀫𑀳𑀸𑀓𑀭𑀼𑀡𑀸𑀜𑀸𑀡𑀦𑀺𑀤𑁆𑀤𑁂𑀲𑁂 𑀩𑀳𑀼𑀓𑁂𑀳𑀺 𑀆𑀓𑀸𑀭𑁂𑀳𑀻𑀢𑀺 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑁂𑀳𑀺 𑀏𑀓𑀽𑀦𑀦𑀯𑀼𑀢𑀺𑀬𑀸 𑀧𑀓𑀸𑀭𑁂𑀳𑀺. 𑀧𑀲𑁆𑀲𑀦𑁆𑀢𑀸𑀦𑀦𑁆𑀢𑀺 𑀜𑀸𑀡𑀘𑀓𑁆𑀔𑀼𑀦𑀸 𑀘 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀘 𑀑𑀮𑁄𑀓𑁂𑀦𑁆𑀢𑀸𑀦𑀁. 𑀑𑀓𑁆𑀓𑀫𑀢𑀻𑀢𑀺 𑀑𑀢𑀭𑀢𑀺 𑀧𑀯𑀺𑀲𑀢𑀺. 𑀆𑀤𑀺𑀢𑁆𑀢𑁄𑀢𑀺 𑀤𑀼𑀓𑁆𑀔𑀮𑀓𑁆𑀔𑀡𑀯𑀲𑁂𑀦 𑀧𑀻𑀴𑀸𑀬𑁄𑀕𑀢𑁄 𑀲𑀦𑁆𑀢𑀸𑀧𑀦𑀝𑁆𑀞𑁂𑀦 𑀆𑀤𑀻𑀧𑀺𑀢𑁄. ‘‘𑀬𑀤𑀦𑀺𑀘𑁆𑀘𑀁, 𑀢𑀁 𑀤𑀼𑀓𑁆𑀔’’𑀦𑁆𑀢𑀺 (𑀲𑀁. 𑀦𑀺. 𑁩.𑁧𑁫) 𑀯𑀼𑀢𑁆𑀢𑀢𑁆𑀢𑀸 𑀲𑀩𑁆𑀩𑀲𑀗𑁆𑀔𑀢𑀲𑁆𑀲 𑀘𑁂𑀯 𑀤𑀼𑀓𑁆𑀔𑀮𑀓𑁆𑀔𑀡𑀯𑀲𑁂𑀦 𑀧𑀻𑀴𑀺𑀢𑀢𑁆𑀢𑀸 𑀤𑀼𑀓𑁆𑀔𑀲𑁆𑀲 𑀘 𑀓𑀭𑀼𑀡𑀸𑀬 𑀫𑀽𑀮𑀪𑀽𑀢𑀢𑁆𑀢𑀸 𑀧𑀞𑀫𑀁 𑀤𑀼𑀓𑁆𑀔𑀮𑀓𑁆𑀔𑀡𑀯𑀲𑁂𑀦 ‘‘𑀆𑀤𑀺𑀢𑁆𑀢𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀭𑀸𑀕𑀸𑀤𑀻𑀳𑀺 𑀆𑀤𑀺𑀢𑁆𑀢𑀢𑀁 𑀧𑀦 𑀉𑀧𑀭𑀺 𑀯𑀓𑁆𑀔𑀢𑀺. 𑀅𑀣 𑀯𑀸 𑀆𑀤𑀺𑀢𑁆𑀢𑁄𑀢𑀺 𑀭𑀸𑀕𑀸𑀤𑀻𑀳𑀺𑀬𑁂𑀯 𑀆𑀤𑀺𑀢𑁆𑀢𑁄. 𑀉𑀧𑀭𑀺 𑀧𑀦 ‘‘𑀢𑀲𑁆𑀲 𑀦𑀢𑁆𑀣𑀜𑁆𑀜𑁄 𑀓𑁄𑀘𑀺 𑀦𑀺𑀩𑁆𑀩𑀸𑀧𑁂𑀢𑀸’’𑀢𑀺 𑀅𑀢𑁆𑀣𑀸𑀧𑁂𑀓𑁆𑀔𑀦𑀯𑀲𑁂𑀦 𑀧𑀼𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑀸 𑀮𑀼𑀚𑁆𑀚𑀦𑀧𑀮𑀼𑀚𑁆𑀚𑀦𑀝𑁆𑀞𑁂𑀦 𑀮𑁄𑀓𑁄, 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦 𑀲𑀦𑁆𑀦𑀺𑀯𑀲𑀦𑁆𑀢𑀺 𑀏𑀢𑁆𑀣 𑀲𑀢𑁆𑀢𑀸𑀢𑀺 𑀲𑀦𑁆𑀦𑀺𑀯𑀸𑀲𑁄, 𑀮𑁄𑀓𑁄𑀯 𑀲𑀦𑁆𑀦𑀺𑀯𑀸𑀲𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄. 𑀤𑀼𑀓𑁆𑀔𑀺𑀢𑀁 𑀔𑀦𑁆𑀥𑀲𑀦𑁆𑀢𑀸𑀦𑀁 𑀉𑀧𑀸𑀤𑀸𑀬 𑀲𑀢𑁆𑀢𑀯𑁄𑀳𑀸𑀭𑀲𑀩𑁆𑀪𑀸𑀯𑀢𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑀬𑁄𑀕𑀢𑁄 𑀲𑀢𑁆𑀢𑀲𑀫𑀽𑀳𑁄𑀧𑀺 𑀮𑁄𑀓𑀲𑀦𑁆𑀦𑀺𑀯𑀸𑀲𑁄. 𑀲𑁄𑀧𑀺 𑀘 𑀲𑀳𑀔𑀦𑁆𑀥𑀓𑁄𑀬𑁂𑀯. 𑀉𑀬𑁆𑀬𑀼𑀢𑁆𑀢𑁄𑀢𑀺 𑀅𑀦𑁂𑀓𑁂𑀲𑀼 𑀓𑀺𑀘𑁆𑀘𑁂𑀲𑀼 𑀦𑀺𑀘𑁆𑀘𑀩𑁆𑀬𑀸𑀧𑀸𑀭𑀢𑀸𑀬 𑀓𑀢𑀬𑁄𑀕𑁄 𑀓𑀢𑀉𑀲𑁆𑀲𑀸𑀳𑁄, 𑀲𑀢𑀢𑀓𑀺𑀘𑁆𑀘𑁂𑀲𑀼 𑀲𑀉𑀲𑁆𑀲𑀼𑀓𑁆𑀓𑁄𑀢𑀺 𑀅𑀢𑁆𑀣𑁄. 𑀖𑀝𑁆𑀝𑀦𑀬𑀼𑀢𑁆𑀢𑁄𑀢𑀺 𑀯𑀸 𑀉𑀬𑁆𑀬𑀼𑀢𑁆𑀢𑁄. 𑀧𑀬𑀸𑀢𑁄𑀢𑀺 𑀧𑀩𑁆𑀩𑀢𑁂𑀬𑁆𑀬𑀸 𑀦𑀤𑀻 𑀯𑀺𑀬 𑀅𑀦𑀯𑀝𑁆𑀞𑀺𑀢𑀕𑀫𑀦𑁂𑀦 𑀫𑀭𑀡𑀸𑀬 𑀬𑀸𑀢𑀼𑀁 𑀆𑀭𑀤𑁆𑀥𑁄. 𑀓𑀼𑀫𑁆𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄𑀢𑀺 𑀓𑀼𑀘𑁆𑀙𑀺𑀢𑀁 𑀫𑀺𑀘𑁆𑀙𑀸𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑁄. 𑀉𑀧𑀭𑀺 𑀧𑀦 ‘‘𑀯𑀺𑀧𑀣𑀧𑀓𑁆𑀔𑀦𑁆𑀤𑁄’’𑀢𑀺 𑀦𑀸𑀦𑀸𑀧𑀤𑁂𑀳𑀺 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀁.

𑀉𑀧𑀦𑀻𑀬𑀢𑀻𑀢𑀺 𑀚𑀭𑀸𑀯𑀲𑁂𑀦 𑀫𑀭𑀡𑀸𑀬 𑀉𑀧𑀦𑀻𑀬𑀢𑀺 𑀳𑀭𑀻𑀬𑀢𑀺. 𑀚𑀭𑀸 𑀳𑀺 ‘‘𑀆𑀬𑀼𑀦𑁄 𑀲𑀁𑀳𑀸𑀦𑀻’’𑀢𑀺 (𑀲𑀁. 𑀦𑀺. 𑁨.𑁨) 𑀯𑀼𑀢𑁆𑀢𑀸. 𑀅𑀤𑁆𑀥𑀼𑀯𑁄𑀢𑀺 𑀦 𑀣𑀺𑀭𑁄, 𑀲𑀤𑀸 𑀢𑀣𑁂𑀯 𑀦 𑀳𑁄𑀢𑀺. 𑀬𑀲𑁆𑀫𑀸 𑀅𑀤𑁆𑀥𑀼𑀯𑁄, 𑀢𑀲𑁆𑀫𑀸 𑀉𑀧𑀦𑀻𑀬𑀢𑀻𑀢𑀺 𑀧𑀼𑀭𑀺𑀫𑀲𑁆𑀲 𑀓𑀸𑀭𑀡𑀯𑀘𑀦𑀫𑁂𑀢𑀁. 𑀏𑀢𑁂𑀦 𑀲𑀓𑀸𑀭𑀡𑀁 𑀚𑀭𑀸𑀤𑀼𑀓𑁆𑀔𑀁 𑀯𑀼𑀢𑁆𑀢𑀁. 𑀢𑀁 𑀚𑀭𑀸𑀤𑀼𑀓𑁆𑀔𑀁 𑀤𑀺𑀲𑁆𑀯𑀸 𑀚𑀭𑀸𑀧𑀸𑀭𑀺𑀚𑀼𑀜𑁆𑀜𑀭𑀳𑀺𑀢𑀸𑀧𑀺 𑀯𑀺𑀜𑁆𑀜𑀽 𑀧𑀩𑁆𑀩𑀚𑀦𑁆𑀢𑀺. 𑀅𑀢𑀸𑀡𑁄𑀢𑀺 𑀢𑀸𑀬𑀺𑀢𑀼𑀁 𑀭𑀓𑁆𑀔𑀺𑀢𑀼𑀁 𑀲𑀫𑀢𑁆𑀣𑁂𑀦 𑀭𑀳𑀺𑀢𑁄, 𑀅𑀦𑀸𑀭𑀓𑁆𑀔𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀦𑀪𑀺𑀲𑁆𑀲𑀭𑁄𑀢𑀺 𑀅𑀪𑀺𑀲𑀭𑀺𑀢𑁆𑀯𑀸 𑀅𑀪𑀺𑀕𑀦𑁆𑀢𑁆𑀯𑀸 𑀩𑁆𑀬𑀸𑀳𑀭𑀡𑁂𑀦 𑀅𑀲𑁆𑀲𑀸𑀲𑁂𑀢𑀼𑀁 𑀲𑀫𑀢𑁆𑀣𑁂𑀦 𑀭𑀳𑀺𑀢𑁄, 𑀅𑀲𑀳𑀸𑀬𑁄𑀢𑀺 𑀯𑀸 𑀅𑀢𑁆𑀣𑁄. 𑀬𑀲𑁆𑀫𑀸 𑀅𑀦𑀪𑀺𑀲𑁆𑀲𑀭𑁄, 𑀢𑀲𑁆𑀫𑀸 𑀅𑀢𑀸𑀡𑁄𑀢𑀺 𑀧𑀼𑀭𑀺𑀫𑀲𑁆𑀲 𑀓𑀸𑀭𑀡𑀯𑀘𑀦𑀫𑁂𑀢𑀁. 𑀏𑀢𑁂𑀦 𑀲𑀓𑀸𑀭𑀡𑀁 𑀧𑀺𑀬𑀯𑀺𑀧𑁆𑀧𑀬𑁄𑀕𑀤𑀼𑀓𑁆𑀔𑀁 𑀯𑀼𑀢𑁆𑀢𑀁. 𑀢𑀁 𑀧𑀺𑀬𑀯𑀺𑀧𑁆𑀧𑀬𑁄𑀕𑀤𑀼𑀓𑁆𑀔𑀁 𑀤𑀺𑀲𑁆𑀯𑀸 𑀜𑀸𑀢𑀺𑀧𑀸𑀭𑀺𑀚𑀼𑀜𑁆𑀜𑀭𑀳𑀺𑀢𑀸𑀧𑀺 𑀯𑀺𑀜𑁆𑀜𑀽 𑀧𑀩𑁆𑀩𑀚𑀦𑁆𑀢𑀺. 𑀅𑀲𑁆𑀲𑀓𑁄𑀢𑀺 𑀲𑀓𑀪𑀡𑁆𑀟𑀭𑀳𑀺𑀢𑁄. 𑀲𑀩𑁆𑀩𑀁 𑀧𑀳𑀸𑀬 𑀕𑀫𑀦𑀻𑀬𑀦𑁆𑀢𑀺 𑀲𑀓𑀪𑀡𑁆𑀟𑀦𑁆𑀢𑀺 𑀲𑀮𑁆𑀮𑀓𑁆𑀔𑀺𑀢𑀁 𑀲𑀩𑁆𑀩𑀁 𑀧𑀳𑀸𑀬 𑀮𑁄𑀓𑁂𑀦 𑀕𑀦𑁆𑀢𑀩𑁆𑀩𑀁. 𑀬𑀲𑁆𑀫𑀸 𑀲𑀩𑁆𑀩𑀁 𑀧𑀳𑀸𑀬 𑀕𑀫𑀦𑀻𑀬𑀁, 𑀢𑀲𑁆𑀫𑀸 𑀅𑀲𑁆𑀲𑀓𑁄𑀢𑀺 𑀧𑀼𑀭𑀺𑀫𑀲𑁆𑀲 𑀓𑀸𑀭𑀡𑀯𑀘𑀦𑀫𑁂𑀢𑀁. 𑀏𑀢𑁂𑀦 𑀲𑀓𑀸𑀭𑀡𑀁 𑀫𑀭𑀡𑀤𑀼𑀓𑁆𑀔𑀁 𑀯𑀼𑀢𑁆𑀢𑀁. 𑀢𑀁 𑀤𑀺𑀲𑁆𑀯𑀸 𑀪𑁄𑀕𑀧𑀸𑀭𑀺𑀚𑀼𑀜𑁆𑀜𑀭𑀳𑀺𑀢𑀸𑀧𑀺 𑀯𑀺𑀜𑁆𑀜𑀽 𑀧𑀩𑁆𑀩𑀚𑀦𑁆𑀢𑀺. 𑀅𑀜𑁆𑀜𑀢𑁆𑀣 ‘‘𑀓𑀫𑁆𑀫𑀲𑁆𑀲𑀓𑀸 𑀫𑀸𑀡𑀯𑀲𑀢𑁆𑀢𑀸’’𑀢𑀺 (𑀫. 𑀦𑀺. 𑁩.𑁨𑁮𑁯) 𑀯𑀼𑀢𑁆𑀢𑀁, 𑀇𑀥 𑀘 𑀭𑀝𑁆𑀞𑀧𑀸𑀮𑀲𑀼𑀢𑁆𑀢𑁂 𑀘 ‘‘𑀅𑀲𑁆𑀲𑀓𑁄 𑀮𑁄𑀓𑁄’’𑀢𑀺 (𑀫. 𑀦𑀺. 𑁨.𑁩𑁦𑁫) 𑀯𑀼𑀢𑁆𑀢𑀁, 𑀢𑀁 𑀓𑀣𑀁 𑀬𑀼𑀚𑁆𑀚𑀢𑀻𑀢𑀺 𑀘𑁂? 𑀧𑀳𑀸𑀬 𑀕𑀫𑀦𑀻𑀬𑀁 𑀲𑀦𑁆𑀥𑀸𑀬 ‘‘𑀅𑀲𑁆𑀲𑀓𑁄’’𑀢𑀺 𑀯𑀼𑀢𑁆𑀢𑀁, 𑀓𑀫𑁆𑀫𑀁 𑀧𑀦 𑀦 𑀧𑀳𑀸𑀬 𑀕𑀫𑀦𑀻𑀬𑀁. 𑀢𑀲𑁆𑀫𑀸 ‘‘𑀓𑀫𑁆𑀫𑀲𑁆𑀲𑀓𑀸’’𑀢𑀺 𑀯𑀼𑀢𑁆𑀢𑀁. 𑀭𑀝𑁆𑀞𑀧𑀸𑀮𑀲𑀼𑀢𑁆𑀢𑁂𑀬𑁂𑀯 𑀘 𑀏𑀯𑀫𑁂𑀢𑀁 𑀯𑀼𑀢𑁆𑀢𑀁 ‘‘𑀢𑁆𑀯𑀁 𑀧𑀦 𑀬𑀣𑀸𑀓𑀫𑁆𑀫𑀁 𑀕𑀫𑀺𑀲𑁆𑀲𑀲𑀻’’𑀢𑀺 (𑀫. 𑀦𑀺. 𑁨.𑁩𑁦𑁬). 𑀊𑀦𑁄𑀢𑀺 𑀧𑀸𑀭𑀺𑀧𑀽𑀭𑀺𑀭𑀳𑀺𑀢𑁄. 𑀅𑀢𑀺𑀢𑁆𑀢𑁄𑀢𑀺 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀧𑀢𑁆𑀣𑀦𑀸𑀬𑀧𑀺 𑀦 𑀲𑀼𑀳𑀺𑀢𑁄. 𑀇𑀤𑀁 𑀊𑀦𑀪𑀸𑀯𑀲𑁆𑀲 𑀓𑀸𑀭𑀡𑀯𑀘𑀦𑀁. 𑀢𑀡𑁆𑀳𑀸𑀤𑀸𑀲𑁄𑀢𑀺 𑀢𑀡𑁆𑀳𑀸𑀬 𑀯𑀲𑁂 𑀯𑀢𑁆𑀢𑀦𑀢𑁄 𑀢𑀡𑁆𑀳𑀸𑀬 𑀤𑀸𑀲𑀪𑀽𑀢𑁄. 𑀇𑀤𑀁 𑀅𑀢𑀺𑀢𑁆𑀢𑀪𑀸𑀯𑀲𑁆𑀲 𑀓𑀸𑀭𑀡𑀯𑀘𑀦𑀁. 𑀏𑀢𑁂𑀦 𑀇𑀘𑁆𑀙𑀸𑀭𑁄𑀕𑀸𑀧𑀤𑁂𑀲𑁂𑀦 𑀲𑀓𑀸𑀭𑀡𑀁 𑀩𑁆𑀬𑀸𑀥𑀺𑀤𑀼𑀓𑁆𑀔𑀁 𑀯𑀼𑀢𑁆𑀢𑀁. 𑀢𑀁 𑀩𑁆𑀬𑀸𑀥𑀺𑀤𑀼𑀓𑁆𑀔𑀁 𑀤𑀺𑀲𑁆𑀯𑀸 𑀩𑁆𑀬𑀸𑀥𑀺𑀧𑀸𑀭𑀺𑀚𑀼𑀜𑁆𑀜𑀭𑀳𑀺𑀢𑀸𑀧𑀺 𑀯𑀺𑀜𑁆𑀜𑀽 𑀧𑀩𑁆𑀩𑀚𑀦𑁆𑀢𑀺. 𑀅𑀢𑀸𑀬𑀦𑁄𑀢𑀺 𑀧𑀼𑀢𑁆𑀢𑀸𑀤𑀻𑀳𑀺𑀧𑀺 𑀢𑀸𑀬𑀦𑀲𑁆𑀲 𑀅𑀪𑀸𑀯𑀢𑁄 𑀅𑀢𑀸𑀬𑀦𑁄 𑀅𑀦𑀸𑀭𑀓𑁆𑀔𑁄, 𑀅𑀮𑀩𑁆𑀪𑀦𑁂𑀬𑁆𑀬𑀔𑁂𑀫𑁄 𑀯𑀸. 𑀅𑀮𑁂𑀡𑁄𑀢𑀺 𑀅𑀮𑁆𑀮𑀻𑀬𑀺𑀢𑀼𑀁 𑀦𑀺𑀲𑁆𑀲𑀺𑀢𑀼𑀁 𑀅𑀦𑀭𑀳𑁄 𑀅𑀮𑁆𑀮𑀻𑀦𑀸𑀦𑀫𑁆𑀧𑀺 𑀘 𑀮𑁂𑀡𑀓𑀺𑀘𑁆𑀘𑀸𑀓𑀸𑀭𑀓𑁄. 𑀅𑀲𑀭𑀡𑁄𑀢𑀺 𑀦𑀺𑀲𑁆𑀲𑀺𑀢𑀸𑀦𑀁 𑀦 𑀪𑀬𑀲𑀸𑀭𑀓𑁄 𑀦 𑀪𑀬𑀯𑀺𑀦𑀸𑀲𑀓𑁄. 𑀅𑀲𑀭𑀡𑀻𑀪𑀽𑀢𑁄𑀢𑀺 𑀧𑀼𑀭𑁂 𑀉𑀧𑁆𑀧𑀢𑁆𑀢𑀺𑀬𑀸 𑀅𑀢𑁆𑀢𑀦𑁄 𑀅𑀪𑀸𑀯𑁂𑀦𑁂𑀯 𑀅𑀲𑀭𑀡𑁄, 𑀉𑀧𑁆𑀧𑀢𑁆𑀢𑀺𑀲𑀫𑀓𑀸𑀮𑀫𑁂𑀯 𑀅𑀲𑀭𑀡𑀻𑀪𑀽𑀢𑁄𑀢𑀺 𑀅𑀢𑁆𑀣𑁄.

𑀉𑀤𑁆𑀥𑀢𑁄𑀢𑀺 𑀲𑀩𑁆𑀩𑀸𑀓𑀼𑀲𑀮𑁂𑀲𑀼 𑀉𑀤𑁆𑀥𑀘𑁆𑀘𑀲𑁆𑀲 𑀉𑀧𑁆𑀧𑀚𑁆𑀚𑀦𑀢𑁄 𑀲𑀢𑁆𑀢𑀲𑀦𑁆𑀢𑀸𑀦𑁂 𑀘 𑀅𑀓𑀼𑀲𑀮𑀼𑀧𑁆𑀧𑀢𑁆𑀢𑀺𑀩𑀸𑀳𑀼𑀮𑁆𑀮𑀢𑁄 𑀅𑀓𑀼𑀲𑀮𑀲𑀫𑀗𑁆𑀕𑀻𑀮𑁄𑀓𑁄 𑀢𑁂𑀦 𑀉𑀤𑁆𑀥𑀘𑁆𑀘𑁂𑀦 𑀉𑀤𑁆𑀥𑀢𑁄. 𑀅𑀯𑀽𑀧𑀲𑀦𑁆𑀢𑁄𑀢𑀺 𑀅𑀯𑀽𑀧𑀲𑀫𑀦𑀮𑀓𑁆𑀔𑀡𑀲𑁆𑀲 𑀉𑀤𑁆𑀥𑀘𑁆𑀘𑀲𑁆𑀲𑁂𑀯 𑀬𑁄𑀕𑁂𑀦 𑀅𑀯𑀽𑀧𑀲𑀦𑁆𑀢𑁄 𑀪𑀦𑁆𑀢𑀫𑀺𑀕𑀧𑀝𑀺𑀪𑀸𑀕𑁄. ‘‘𑀉𑀧𑀦𑀻𑀬𑀢𑀺 𑀮𑁄𑀓𑁄’’𑀢𑀺𑀆𑀤𑀻𑀲𑀼 𑀘𑀢𑀽𑀲𑀼 𑀘 ‘‘𑀉𑀤𑁆𑀥𑀢𑁄 𑀮𑁄𑀓𑁄’’𑀢𑀺 𑀘 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀮𑁄𑀓𑁄𑀢𑀺 𑀆𑀕𑀢𑀁, 𑀲𑁂𑀲𑁂𑀲𑀼 𑀮𑁄𑀓𑀲𑀦𑁆𑀦𑀺𑀯𑀸𑀲𑁄𑀢𑀺. 𑀉𑀪𑀬𑀣𑀸𑀧𑀺 𑀮𑁄𑀓𑁄𑀬𑁂𑀯. 𑀲𑀲𑀮𑁆𑀮𑁄𑀢𑀺 𑀧𑀻𑀴𑀸𑀚𑀦𑀓𑀢𑀸𑀬 𑀅𑀦𑁆𑀢𑁄𑀢𑀼𑀤𑀦𑀢𑀸𑀬 𑀤𑀼𑀦𑁆𑀦𑀻𑀳𑀭𑀡𑀻𑀬𑀢𑀸𑀬 𑀘 𑀲𑀮𑁆𑀮𑀸𑀢𑀺 𑀲𑀗𑁆𑀔𑀁 𑀕𑀢𑁂𑀳𑀺 𑀭𑀸𑀕𑀸𑀤𑀻𑀳𑀺 𑀲𑀮𑁆𑀮𑁂𑀳𑀺 𑀲𑀳𑀯𑀢𑁆𑀢𑀦𑀓𑁄. 𑀯𑀺𑀤𑁆𑀥𑁄𑀢𑀺 𑀫𑀺𑀕𑀸𑀤𑀬𑁄 𑀓𑀤𑀸𑀘𑀺 𑀧𑀭𑁂𑀳𑀺 𑀯𑀺𑀤𑁆𑀥𑀸 𑀳𑁄𑀦𑁆𑀢𑀺, 𑀅𑀬𑀁 𑀧𑀦 𑀮𑁄𑀓𑁄 𑀦𑀺𑀘𑁆𑀘𑀁 𑀅𑀢𑁆𑀢𑀦𑀸𑀯 𑀯𑀺𑀤𑁆𑀥𑁄. 𑀧𑀼𑀣𑀼𑀲𑀮𑁆𑀮𑁂𑀳𑀻𑀢𑀺 ‘‘𑀲𑀢𑁆𑀢 𑀲𑀮𑁆𑀮𑀸𑀦𑀺 𑁋 𑀭𑀸𑀕𑀲𑀮𑁆𑀮𑀁, 𑀤𑁄𑀲𑀲𑀮𑁆𑀮𑀁, 𑀫𑁄𑀳𑀲𑀮𑁆𑀮𑀁, 𑀫𑀸𑀦𑀲𑀮𑁆𑀮𑀁, 𑀤𑀺𑀝𑁆𑀞𑀺𑀲𑀮𑁆𑀮𑀁, 𑀓𑀺𑀮𑁂𑀲𑀲𑀮𑁆𑀮𑀁, 𑀤𑀼𑀘𑁆𑀘𑀭𑀺𑀢𑀲𑀮𑁆𑀮’’𑀦𑁆𑀢𑀺 (𑀫𑀳𑀸𑀦𑀺. 𑁧𑁭𑁪) 𑀯𑀼𑀢𑁆𑀢𑁂𑀳𑀺 𑀲𑀢𑁆𑀢𑀳𑀺 𑀲𑀮𑁆𑀮𑁂𑀳𑀺. 𑀢𑀲𑁆𑀲𑀸𑀢𑀺 𑀢𑀲𑁆𑀲 𑀮𑁄𑀓𑀲𑀦𑁆𑀦𑀺𑀯𑀸𑀲𑀲𑁆𑀲. 𑀲𑀮𑁆𑀮𑀸𑀦𑀁 𑀉𑀤𑁆𑀥𑀢𑀸𑀢𑀺 𑀢𑁂𑀲𑀁 𑀲𑀮𑁆𑀮𑀸𑀦𑀁 𑀲𑀢𑁆𑀢𑀲𑀦𑁆𑀢𑀸𑀦𑀢𑁄 𑀉𑀤𑁆𑀥𑀭𑀺𑀢𑀸 𑀧𑀼𑀕𑁆𑀕𑀮𑁄. 𑀅𑀜𑁆𑀜𑀢𑁆𑀭 𑀫𑀬𑀸𑀢𑀺 𑀫𑀁 𑀞𑀧𑁂𑀢𑁆𑀯𑀸. 𑀬𑁂𑀧𑀺 𑀪𑀕𑀯𑀢𑁄 𑀲𑀸𑀯𑀓𑀸 𑀲𑀮𑁆𑀮𑀸𑀦𑀺 𑀉𑀤𑁆𑀥𑀭𑀦𑁆𑀢𑀺, 𑀢𑁂𑀲𑀁 𑀪𑀕𑀯𑀢𑁄 𑀯𑀘𑀦𑁂𑀦𑁂𑀯 𑀉𑀤𑁆𑀥𑀭𑀡𑀢𑁄 𑀪𑀕𑀯𑀸𑀯 𑀉𑀤𑁆𑀥𑀭𑀢𑀺 𑀦𑀸𑀫. 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑀸𑀯𑀭𑀡𑁄𑀢𑀺 𑀅𑀯𑀺𑀚𑁆𑀚𑀸 𑀏𑀯 𑀲𑀪𑀸𑀯𑀤𑀲𑁆𑀲𑀦𑀘𑁆𑀙𑀸𑀤𑀦𑁂𑀦 𑀅𑀦𑁆𑀥𑀁 𑀯𑀺𑀬 𑀓𑀭𑁄𑀢𑀻𑀢𑀺 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑁄, 𑀲𑁄𑀯 𑀲𑀪𑀸𑀯𑀸𑀯𑀕𑀫𑀦𑀦𑀺𑀯𑀸𑀭𑀡𑁂𑀦 𑀆𑀯𑀭𑀡𑀁 𑀏𑀢𑀲𑁆𑀲𑀸𑀢𑀺 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑀸𑀯𑀭𑀡𑁄. 𑀓𑀺𑀮𑁂𑀲𑀧𑀜𑁆𑀚𑀭𑀧𑀓𑁆𑀔𑀺𑀢𑁆𑀢𑁄𑀢𑀺 𑀓𑀺𑀮𑁂𑀲𑀸 𑀏𑀯 𑀓𑀼𑀲𑀮𑀕𑀫𑀦𑀲𑀦𑁆𑀦𑀺𑀭𑀼𑀚𑁆𑀛𑀦𑀝𑁆𑀞𑁂𑀦 𑀧𑀜𑁆𑀚𑀭𑁄𑀢𑀺 𑀓𑀺𑀮𑁂𑀲𑀧𑀜𑁆𑀚𑀭𑁄, 𑀅𑀯𑀺𑀚𑁆𑀚𑀸𑀧𑀪𑀯𑁂 𑀓𑀺𑀮𑁂𑀲𑀧𑀜𑁆𑀚𑀭𑁂 𑀧𑀓𑁆𑀔𑀺𑀢𑁆𑀢𑁄 𑀧𑀸𑀢𑀺𑀢𑁄. 𑀆𑀮𑁄𑀓𑀁 𑀤𑀲𑁆𑀲𑁂𑀢𑀸𑀢𑀺 𑀧𑀜𑁆𑀜𑀸𑀮𑁄𑀓𑀁 𑀤𑀲𑁆𑀲𑀦𑀲𑀻𑀮𑁄, 𑀧𑀜𑁆𑀜𑀸𑀮𑁄𑀓𑀲𑁆𑀲 𑀤𑀲𑁆𑀲𑁂𑀢𑀸𑀢𑀺 𑀯𑀸 𑀅𑀢𑁆𑀣𑁄. 𑀅𑀯𑀺𑀚𑁆𑀚𑀸𑀕𑀢𑁄𑀢𑀺 𑀅𑀯𑀺𑀚𑁆𑀚𑀁 𑀕𑀢𑁄 𑀧𑀯𑀺𑀝𑁆𑀞𑁄. 𑀦 𑀓𑁂𑀯𑀮𑀁 𑀅𑀯𑀺𑀚𑁆𑀚𑀸𑀬 𑀆𑀯𑀭𑀡𑀫𑀢𑁆𑀢𑀫𑁂𑀯, 𑀅𑀣 𑀔𑁄 𑀕𑀳𑀦𑀕𑀢𑁄 𑀯𑀺𑀬 𑀅𑀯𑀺𑀚𑁆𑀚𑀸𑀓𑁄𑀲𑀲𑁆𑀲 𑀅𑀦𑁆𑀢𑁄 𑀧𑀯𑀺𑀝𑁆𑀞𑁄𑀢𑀺 𑀧𑀼𑀭𑀺𑀫𑀢𑁄 𑀯𑀺𑀲𑁂𑀲𑁄. 𑀅𑀡𑁆𑀟𑀪𑀽𑀢𑁄𑀢𑀺𑀆𑀤𑀬𑁄 𑀘 𑀯𑀺𑀲𑁂𑀲𑀸𑀬𑁂𑀯. 𑀅𑀡𑁆𑀟𑀪𑀽𑀢𑁄𑀢𑀺 𑀅𑀡𑁆𑀟𑁂 𑀪𑀽𑀢𑁄 𑀦𑀺𑀩𑁆𑀩𑀢𑁆𑀢𑁄. 𑀬𑀣𑀸 𑀳𑀺 𑀅𑀡𑁆𑀟𑁂 𑀦𑀺𑀩𑁆𑀩𑀢𑁆𑀢𑀸 𑀏𑀓𑀘𑁆𑀘𑁂 𑀲𑀢𑁆𑀢𑀸 ‘‘𑀅𑀡𑁆𑀟𑀪𑀽𑀢𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀏𑀯𑀫𑀬𑀁 𑀮𑁄𑀓𑁄 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑁂 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 ‘‘𑀅𑀡𑁆𑀟𑀪𑀽𑀢𑁄’’𑀢𑀺 𑀯𑀼𑀘𑁆𑀘𑀢𑀺. 𑀧𑀭𑀺𑀬𑁄𑀦𑀤𑁆𑀥𑁄𑀢𑀺 𑀢𑁂𑀦 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑁂𑀦 𑀲𑀫𑀦𑁆𑀢𑀢𑁄 𑀑𑀦𑀤𑁆𑀥𑁄 𑀩𑀤𑁆𑀥𑁄 𑀯𑁂𑀞𑀺𑀢𑁄.

𑀢𑀦𑁆𑀢𑀸𑀓𑀼𑀮𑀓𑀚𑀸𑀢𑁄𑀢𑀺 𑀢𑀦𑁆𑀢𑀁 𑀯𑀺𑀬 𑀆𑀓𑀼𑀮𑀪𑀽𑀢𑁄. 𑀬𑀣𑀸 𑀦𑀸𑀫 𑀤𑀼𑀦𑁆𑀦𑀺𑀓𑁆𑀔𑀺𑀢𑁆𑀢𑀁 𑀫𑀽𑀲𑀺𑀓𑀘𑁆𑀙𑀺𑀦𑁆𑀦𑀁 𑀧𑁂𑀲𑀓𑀸𑀭𑀸𑀦𑀁 𑀢𑀦𑁆𑀢𑀁 𑀢𑀳𑀺𑀁 𑀢𑀳𑀺𑀁 𑀆𑀓𑀼𑀮𑀁 𑀳𑁄𑀢𑀺, 𑀇𑀤𑀁 𑀅𑀕𑁆𑀕𑀁 𑀇𑀤𑀁 𑀫𑀽𑀮𑀦𑁆𑀢𑀺 𑀅𑀕𑁆𑀕𑁂𑀦 𑀯𑀸 𑀅𑀕𑁆𑀕𑀁, 𑀫𑀽𑀮𑁂𑀦 𑀯𑀸 𑀫𑀽𑀮𑀁 𑀲𑀫𑀸𑀦𑁂𑀢𑀼𑀁 𑀤𑀼𑀓𑁆𑀓𑀭𑀁 𑀳𑁄𑀢𑀺, 𑀏𑀯𑀫𑁂𑀯 𑀲𑀢𑁆𑀢𑀸 𑀧𑀘𑁆𑀘𑀬𑀸𑀓𑀸𑀭𑁂 𑀔𑀮𑀺𑀢𑀸 𑀆𑀓𑀼𑀮𑀸 𑀩𑁆𑀬𑀸𑀓𑀼𑀮𑀸 𑀳𑁄𑀦𑁆𑀢𑀺, 𑀦 𑀲𑀓𑁆𑀓𑁄𑀦𑁆𑀢𑀺 𑀧𑀘𑁆𑀘𑀬𑀸𑀓𑀸𑀭𑀁 𑀉𑀚𑀼𑀁 𑀓𑀸𑀢𑀼𑀁. 𑀢𑀢𑁆𑀣 𑀢𑀦𑁆𑀢𑀁 𑀧𑀘𑁆𑀘𑀢𑁆𑀢𑀧𑀼𑀭𑀺𑀲𑀓𑀸𑀭𑁂 𑀞𑀢𑁆𑀯𑀸 𑀲𑀓𑁆𑀓𑀸𑀧𑀺 𑀪𑀯𑁂𑀬𑁆𑀬 𑀉𑀚𑀼𑀁 𑀓𑀸𑀢𑀼𑀁, 𑀞𑀧𑁂𑀢𑁆𑀯𑀸 𑀧𑀦 𑀤𑁆𑀯𑁂 𑀩𑁄𑀥𑀺𑀲𑀢𑁆𑀢𑁂 𑀅𑀜𑁆𑀜𑁄 𑀲𑀢𑁆𑀢𑁄 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀧𑀘𑁆𑀘𑀬𑀸𑀓𑀸𑀭𑀁 𑀉𑀚𑀼𑀁 𑀓𑀸𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺. 𑀬𑀣𑀸 𑀧𑀦 𑀆𑀓𑀼𑀮𑀁 𑀢𑀦𑁆𑀢𑀁 𑀓𑀜𑁆𑀚𑀺𑀓𑀁 𑀤𑀢𑁆𑀯𑀸 𑀓𑁄𑀘𑁆𑀙𑁂𑀦 𑀧𑀳𑀝𑀁 𑀢𑀢𑁆𑀣 𑀢𑀢𑁆𑀣 𑀓𑀼𑀮𑀓𑀚𑀸𑀢𑀁 𑀳𑁄𑀢𑀺 𑀕𑀡𑁆𑀞𑀺𑀩𑀤𑁆𑀥𑀁, 𑀏𑀯𑀫𑀬𑀁 𑀮𑁄𑀓𑁄 𑀧𑀘𑁆𑀘𑀬𑁂𑀲𑀼 𑀧𑀓𑁆𑀔𑀮𑀺𑀢𑁆𑀯𑀸 𑀧𑀘𑁆𑀘𑀬𑁂 𑀉𑀚𑀼𑀁 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀕𑀢𑀯𑀲𑁂𑀦 𑀓𑀼𑀮𑀓𑀚𑀸𑀢𑁄 𑀳𑁄𑀢𑀺 𑀕𑀡𑁆𑀞𑀺𑀩𑀤𑁆𑀥𑁄. 𑀬𑁂 𑀳𑀺 𑀓𑁂𑀘𑀺 𑀤𑀺𑀝𑁆𑀞𑀺𑀬𑁄 𑀦𑀺𑀲𑁆𑀲𑀺𑀢𑀸, 𑀲𑀩𑁆𑀩𑁂 𑀢𑁂 𑀧𑀘𑁆𑀘𑀬𑀁 𑀉𑀚𑀼𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺𑀬𑁂𑀯. 𑀓𑀼𑀮𑀸𑀕𑀡𑁆𑀞𑀺𑀓𑀚𑀸𑀢𑁄𑀢𑀺 𑀓𑀼𑀮𑀸𑀕𑀡𑁆𑀞𑀺𑀓𑀁 𑀯𑀺𑀬 𑀪𑀽𑀢𑁄. 𑀓𑀼𑀮𑀸𑀕𑀡𑁆𑀞𑀺𑀓𑀁 𑀯𑀼𑀘𑁆𑀘𑀢𑀺 𑀧𑁂𑀲𑀓𑀸𑀭𑀓𑀜𑁆𑀚𑀺𑀓𑀲𑀼𑀢𑁆𑀢𑀁. ‘‘𑀓𑀼𑀮𑀸 𑀦𑀸𑀫 𑀲𑀓𑀼𑀡𑀺𑀓𑀸, 𑀢𑀲𑁆𑀲𑀸 𑀓𑀼𑀮𑀸𑀯𑀓𑁄’’𑀢𑀺𑀧𑀺 𑀏𑀓𑁂. 𑀬𑀣𑀸 𑀢𑀤𑀼𑀪𑀬𑀫𑁆𑀧𑀺 𑀆𑀓𑀼𑀮𑀁 𑀅𑀕𑁆𑀕𑁂𑀦 𑀯𑀸 𑀅𑀕𑁆𑀕𑀁, 𑀫𑀽𑀮𑁂𑀦 𑀯𑀸 𑀫𑀽𑀮𑀁 𑀲𑀫𑀸𑀦𑁂𑀢𑀼𑀁 𑀤𑀼𑀓𑁆𑀓𑀭𑀦𑁆𑀢𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁. 𑀫𑀼𑀜𑁆𑀚𑀧𑀩𑁆𑀩𑀚𑀪𑀽𑀢𑁄𑀢𑀺 𑀫𑀼𑀜𑁆𑀚𑀢𑀺𑀡𑀁 𑀯𑀺𑀬 𑀧𑀩𑁆𑀩𑀚𑀢𑀺𑀡𑀁 𑀯𑀺𑀬 𑀘 𑀪𑀽𑀢𑁄 𑀫𑀼𑀜𑁆𑀚𑀢𑀺𑀡𑀧𑀩𑁆𑀩𑀚𑀢𑀺𑀡𑀲𑀤𑀺𑀲𑁄 𑀚𑀸𑀢𑁄. 𑀬𑀣𑀸 𑀢𑀸𑀦𑀺 𑀢𑀺𑀡𑀸𑀦𑀺 𑀓𑁄𑀝𑁆𑀝𑁂𑀢𑁆𑀯𑀸 𑀓𑁄𑀝𑁆𑀝𑁂𑀢𑁆𑀯𑀸 𑀓𑀢𑀭𑀚𑁆𑀚𑀼 𑀚𑀺𑀡𑁆𑀡𑀓𑀸𑀮𑁂 𑀓𑀢𑁆𑀣𑀘𑀺 𑀧𑀢𑀺𑀢𑀁 𑀕𑀳𑁂𑀢𑁆𑀯𑀸 𑀢𑁂𑀲𑀁 𑀢𑀺𑀡𑀸𑀦𑀁 ‘‘𑀇𑀤𑀁 𑀅𑀕𑁆𑀕𑀁 𑀇𑀤𑀁 𑀫𑀽𑀮’’𑀦𑁆𑀢𑀺 𑀅𑀕𑁆𑀕𑁂𑀦 𑀯𑀸 𑀅𑀕𑁆𑀕𑀁, 𑀫𑀽𑀮𑁂𑀦 𑀯𑀸 𑀫𑀽𑀮𑀁 𑀲𑀫𑀸𑀦𑁂𑀢𑀼𑀁 𑀤𑀼𑀓𑁆𑀓𑀭𑀁, 𑀢𑀫𑁆𑀧𑀺 𑀧𑀘𑁆𑀘𑀢𑁆𑀢𑀧𑀼𑀭𑀺𑀲𑀓𑀸𑀭𑁂 𑀞𑀢𑁆𑀯𑀸 𑀲𑀓𑁆𑀓𑀸 𑀪𑀯𑁂𑀬𑁆𑀬 𑀉𑀚𑀼𑀁 𑀓𑀸𑀢𑀼𑀁, 𑀞𑀧𑁂𑀢𑁆𑀯𑀸 𑀧𑀦 𑀤𑁆𑀯𑁂 𑀩𑁄𑀥𑀺𑀲𑀢𑁆𑀢𑁂 𑀅𑀜𑁆𑀜𑁄 𑀲𑀢𑁆𑀢𑁄 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀧𑀘𑁆𑀘𑀬𑀸𑀓𑀸𑀭𑀁 𑀉𑀚𑀼𑀁 𑀓𑀸𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺. 𑀏𑀯𑀫𑀬𑀁 𑀮𑁄𑀓𑁄 𑀧𑀘𑁆𑀘𑀬𑀸𑀓𑀸𑀭𑀁 𑀉𑀚𑀼𑀁 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀕𑀢𑀯𑀲𑁂𑀦 𑀕𑀡𑁆𑀞𑀺𑀚𑀸𑀢𑁄 𑀳𑀼𑀢𑁆𑀯𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀲𑀁𑀲𑀸𑀭𑀁 𑀦𑀸𑀢𑀺𑀯𑀢𑁆𑀢𑀢𑀺.

𑀢𑀢𑁆𑀣 𑀅𑀧𑀸𑀬𑁄𑀢𑀺 𑀦𑀺𑀭𑀬𑁄 𑀢𑀺𑀭𑀘𑁆𑀙𑀸𑀦𑀬𑁄𑀦𑀺 𑀧𑁂𑀢𑁆𑀢𑀺𑀯𑀺𑀲𑀬𑁄 𑀅𑀲𑀼𑀭𑀓𑀸𑀬𑁄. 𑀲𑀩𑁆𑀩𑁂𑀧𑀺 𑀳𑀺 𑀢𑁂 𑀯𑀟𑁆𑀠𑀺𑀲𑀗𑁆𑀔𑀸𑀢𑀲𑁆𑀲 𑀆𑀬𑀲𑁆𑀲 𑀅𑀪𑀸𑀯𑀢𑁄 ‘‘𑀅𑀧𑀸𑀬𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀣𑀸 𑀤𑀼𑀓𑁆𑀔𑀲𑁆𑀲 𑀕𑀢𑀺𑀪𑀸𑀯𑀢𑁄 𑀤𑀼𑀕𑁆𑀕𑀢𑀺. 𑀲𑀼𑀔𑀲𑀫𑀼𑀲𑁆𑀲𑀬𑀢𑁄 𑀯𑀺𑀦𑀺𑀧𑀢𑀺𑀢𑀢𑁆𑀢𑀸 𑀯𑀺𑀦𑀺𑀧𑀸𑀢𑁄. 𑀇𑀢𑀭𑁄 𑀧𑀦 𑁋

‘‘𑀔𑀦𑁆𑀥𑀸𑀦𑀜𑁆𑀘 𑀧𑀝𑀺𑀧𑀸𑀝𑀺, 𑀥𑀸𑀢𑀼𑀆𑀬𑀢𑀦𑀸𑀦 𑀘;

𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀁 𑀯𑀢𑁆𑀢𑀫𑀸𑀦𑀸, 𑀲𑀁𑀲𑀸𑀭𑁄𑀢𑀺 𑀧𑀯𑀼𑀘𑁆𑀘𑀢𑀺’’.

𑀢𑀁 𑀲𑀩𑁆𑀩𑀫𑁆𑀧𑀺 𑀦𑀸𑀢𑀺𑀯𑀢𑁆𑀢𑀢𑀺 𑀦𑀸𑀢𑀺𑀓𑁆𑀓𑀫𑀢𑀺. 𑀅𑀣 𑀔𑁄 𑀘𑀼𑀢𑀺𑀢𑁄 𑀧𑀝𑀺𑀲𑀦𑁆𑀥𑀺𑀁, 𑀧𑀝𑀺𑀲𑀦𑁆𑀥𑀺𑀢𑁄 𑀘𑀼𑀢𑀺𑀦𑁆𑀢𑀺 𑀏𑀯𑀁 𑀧𑀼𑀦𑀧𑁆𑀧𑀼𑀦𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀬𑁄 𑀕𑀡𑁆𑀳𑀫𑀸𑀦𑁄 𑀢𑀻𑀲𑀼 𑀪𑀯𑁂𑀲𑀼 𑀘𑀢𑀽𑀲𑀼 𑀬𑁄𑀦𑀻𑀲𑀼 𑀧𑀜𑁆𑀘𑀲𑀼 𑀕𑀢𑀻𑀲𑀼 𑀲𑀢𑁆𑀢𑀲𑀼 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀲𑀼 𑀦𑀯𑀲𑀼 𑀲𑀢𑁆𑀢𑀸𑀯𑀸𑀲𑁂𑀲𑀼 𑀫𑀳𑀸𑀲𑀫𑀼𑀤𑁆𑀤𑁂 𑀯𑀸𑀢𑀼𑀓𑁆𑀔𑀺𑀢𑁆𑀢𑀦𑀸𑀯𑀸 𑀯𑀺𑀬 𑀬𑀦𑁆𑀢𑀕𑁄𑀡𑁄 𑀯𑀺𑀬 𑀘 𑀧𑀭𑀺𑀩𑁆𑀪𑀫𑀢𑀺𑀬𑁂𑀯. 𑀅𑀯𑀺𑀚𑁆𑀚𑀸𑀯𑀺𑀲𑀤𑁄𑀲𑀲𑀮𑁆𑀮𑀺𑀢𑁆𑀢𑁄𑀢𑀺 𑀅𑀯𑀺𑀚𑁆𑀚𑀸𑀬𑁂𑀯 𑀅𑀓𑀼𑀲𑀮𑀼𑀧𑁆𑀧𑀸𑀤𑀦𑁂𑀦 𑀓𑀼𑀲𑀮𑀚𑀻𑀯𑀺𑀢𑀦𑀸𑀲𑀦𑀢𑁄 𑀯𑀺𑀲𑀦𑁆𑀢𑀺 𑀅𑀯𑀺𑀚𑁆𑀚𑀸𑀯𑀺𑀲𑀁, 𑀢𑀤𑁂𑀯 𑀲𑀦𑁆𑀢𑀸𑀦𑀤𑀽𑀲𑀦𑀢𑁄 𑀅𑀯𑀺𑀚𑁆𑀚𑀸𑀯𑀺𑀲𑀤𑁄𑀲𑁄, 𑀢𑁂𑀦 𑀅𑀦𑀼𑀲𑀬𑀧𑀭𑀺𑀬𑀼𑀝𑁆𑀞𑀸𑀦𑀤𑀼𑀘𑁆𑀘𑀭𑀺𑀢𑀪𑀽𑀢𑁂𑀦 𑀪𑀼𑀲𑀁 𑀮𑀺𑀢𑁆𑀢𑁄 𑀫𑀓𑁆𑀔𑀺𑀢𑁄𑀢𑀺 𑀅𑀯𑀺𑀚𑁆𑀚𑀸𑀯𑀺𑀲𑀤𑁄𑀲𑀲𑀮𑁆𑀮𑀺𑀢𑁆𑀢𑁄. 𑀓𑀺𑀮𑁂𑀲𑀓𑀮𑀮𑀻𑀪𑀽𑀢𑁄𑀢𑀺 𑀅𑀯𑀺𑀚𑁆𑀚𑀸𑀤𑀺𑀫𑀽𑀮𑀓𑀸 𑀓𑀺𑀮𑁂𑀲𑀸 𑀏𑀯 𑀑𑀲𑀻𑀤𑀦𑀝𑁆𑀞𑁂𑀦 𑀓𑀮𑀮𑀁 𑀓𑀤𑁆𑀤𑀫𑁄𑀢𑀺 𑀓𑀺𑀮𑁂𑀲𑀓𑀮𑀮𑀁, 𑀢𑀤𑀲𑁆𑀲 𑀅𑀢𑁆𑀣𑀻𑀢𑀺 𑀓𑀺𑀮𑁂𑀲𑀓𑀮𑀮𑀻, 𑀏𑀯𑀁𑀪𑀽𑀢𑁄. 𑀭𑀸𑀕𑀤𑁄𑀲𑀫𑁄𑀳𑀚𑀝𑀸𑀚𑀝𑀺𑀢𑁄𑀢𑀺 𑀮𑁄𑀪𑀧𑀝𑀺𑀖𑀸𑀯𑀺𑀚𑁆𑀚𑀸𑀲𑀗𑁆𑀔𑀸𑀢𑀸 𑀭𑀸𑀕𑀤𑁄𑀲𑀫𑁄𑀳𑀸 𑀏𑀯 𑀭𑀽𑀧𑀸𑀤𑀻𑀲𑀼 𑀆𑀭𑀫𑁆𑀫𑀡𑁂𑀲𑀼 𑀳𑁂𑀝𑁆𑀞𑀼𑀧𑀭𑀺𑀬𑀯𑀲𑁂𑀦 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀚𑁆𑀚𑀦𑀢𑁄 𑀲𑀁𑀲𑀺𑀩𑁆𑀩𑀦𑀝𑁆𑀞𑁂𑀦 𑀯𑁂𑀴𑀼𑀕𑀼𑀫𑁆𑀩𑀸𑀤𑀻𑀦𑀁 𑀲𑀸𑀔𑀸𑀚𑀸𑀮𑀲𑀗𑁆𑀔𑀸𑀢𑀸 𑀚𑀝𑀸 𑀯𑀺𑀬𑀸𑀢𑀺 𑀚𑀝𑀸, 𑀢𑀸𑀬 𑀭𑀸𑀕𑀤𑁄𑀲𑀫𑁄𑀳𑀚𑀝𑀸𑀬 𑀚𑀝𑀺𑀢𑁄. 𑀬𑀣𑀸 𑀦𑀸𑀫 𑀯𑁂𑀴𑀼𑀚𑀝𑀸𑀤𑀻𑀳𑀺 𑀯𑁂𑀴𑀼𑀆𑀤𑀬𑁄, 𑀏𑀯𑀁 𑀢𑀸𑀬 𑀚𑀝𑀸𑀬 𑀅𑀬𑀁 𑀮𑁄𑀓𑁄 𑀚𑀝𑀺𑀢𑁄 𑀯𑀺𑀦𑀤𑁆𑀥𑁄 𑀲𑀁𑀲𑀺𑀩𑁆𑀩𑀺𑀢𑁄𑀢𑀺 𑀅𑀢𑁆𑀣𑁄. 𑀚𑀝𑀁 𑀯𑀺𑀚𑀝𑁂𑀢𑀸𑀢𑀺 𑀇𑀫𑀁 𑀏𑀯𑀁 𑀢𑁂𑀥𑀸𑀢𑀼𑀓𑀁 𑀮𑁄𑀓𑀁 𑀚𑀝𑁂𑀢𑁆𑀯𑀸 𑀞𑀺𑀢𑀁 𑀚𑀝𑀁 𑀯𑀺𑀚𑀝𑁂𑀢𑀸 𑀲𑀁𑀙𑀺𑀦𑁆𑀤𑀺𑀢𑀸 𑀲𑀫𑁆𑀧𑀤𑀸𑀮𑀬𑀺𑀢𑀸.

𑀢𑀡𑁆𑀳𑀸𑀲𑀗𑁆𑀖𑀸𑀝𑀧𑀝𑀺𑀫𑀼𑀓𑁆𑀓𑁄𑀢𑀺 𑀢𑀡𑁆𑀳𑀸 𑀏𑀯 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀁 𑀧𑀯𑀢𑁆𑀢𑀺𑀢𑁄 𑀲𑀗𑁆𑀖𑀝𑀺𑀢𑀝𑁆𑀞𑁂𑀦 𑀲𑀗𑁆𑀖𑀸𑀝𑁄𑀢𑀺 𑀢𑀡𑁆𑀳𑀸𑀲𑀗𑁆𑀖𑀸𑀝𑁄, 𑀢𑀲𑁆𑀫𑀺𑀁 𑀢𑀡𑁆𑀳𑀸𑀲𑀗𑁆𑀖𑀸𑀝𑁂 𑀧𑀝𑀺𑀫𑀼𑀓𑁆𑀓𑁄 𑀅𑀦𑀼𑀧𑀯𑀺𑀝𑁆𑀞𑁄 𑀅𑀦𑁆𑀢𑁄𑀕𑀢𑁄𑀢𑀺 𑀢𑀡𑁆𑀳𑀸𑀲𑀗𑁆𑀖𑀸𑀝𑀧𑀝𑀺𑀫𑀼𑀓𑁆𑀓𑁄. 𑀢𑀡𑁆𑀳𑀸𑀚𑀸𑀮𑁂𑀦 𑀑𑀢𑁆𑀣𑀝𑁄𑀢𑀺 𑀢𑀡𑁆𑀳𑀸 𑀏𑀯 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀲𑀁𑀲𑀺𑀩𑁆𑀩𑀦𑀝𑁆𑀞𑁂𑀦 𑀚𑀸𑀮𑀦𑁆𑀢𑀺 𑀢𑀡𑁆𑀳𑀸𑀚𑀸𑀮𑀁, 𑀢𑁂𑀦 𑀢𑀡𑁆𑀳𑀸𑀚𑀸𑀮𑁂𑀦 𑀑𑀢𑁆𑀣𑀝𑁄 𑀲𑀫𑀦𑁆𑀢𑀢𑁄 𑀙𑀸𑀤𑀺𑀢𑁄 𑀧𑀮𑀺𑀯𑁂𑀞𑀺𑀢𑁄. 𑀢𑀡𑁆𑀳𑀸𑀲𑁄𑀢𑁂𑀦 𑀯𑀼𑀬𑁆𑀳𑀢𑀻𑀢𑀺 𑀢𑀡𑁆𑀳𑀸 𑀏𑀯 𑀲𑀁𑀲𑀸𑀭𑁂 𑀆𑀓𑀟𑁆𑀠𑀦𑀝𑁆𑀞𑁂𑀦 𑀲𑁄𑀢𑁄𑀢𑀺 𑀢𑀡𑁆𑀳𑀸𑀲𑁄𑀢𑁄, 𑀢𑁂𑀦 𑀢𑀡𑁆𑀳𑀸𑀲𑁄𑀢𑁂𑀦 𑀯𑀼𑀬𑁆𑀳𑀢𑀺 𑀆𑀓𑀟𑁆𑀠𑀻𑀬𑀢𑀺. 𑀢𑀡𑁆𑀳𑀸𑀲𑀜𑁆𑀜𑁄𑀚𑀦𑁂𑀦 𑀲𑀜𑁆𑀜𑀼𑀢𑁆𑀢𑁄𑀢𑀺 𑀢𑀡𑁆𑀳𑀸 𑀏𑀯 𑀮𑁄𑀓𑀁 𑀯𑀝𑁆𑀝𑀲𑁆𑀫𑀺𑀁 𑀲𑀁𑀬𑁄𑀚𑀦𑀢𑁄 𑀩𑀦𑁆𑀥𑀦𑀢𑁄 𑀲𑀁𑀬𑁄𑀚𑀦𑀦𑁆𑀢𑀺 𑀢𑀡𑁆𑀳𑀸𑀲𑀁𑀬𑁄𑀚𑀦𑀁, 𑀢𑁂𑀦 𑀢𑀡𑁆𑀳𑀸𑀲𑀁𑀬𑁄𑀚𑀦𑁂𑀦 𑀲𑀜𑁆𑀜𑀼𑀢𑁆𑀢𑁄 𑀩𑀤𑁆𑀥𑁄. 𑀢𑀡𑁆𑀳𑀸𑀦𑀼𑀲𑀬𑁂𑀦 𑀅𑀦𑀼𑀲𑀝𑁄𑀢𑀺 𑀢𑀡𑁆𑀳𑀸 𑀏𑀯 𑀅𑀦𑀼𑀲𑀬𑀦𑀝𑁆𑀞𑁂𑀦 𑀅𑀦𑀼𑀲𑀬𑁄𑀢𑀺 𑀢𑀡𑁆𑀳𑀸𑀦𑀼𑀲𑀬𑁄, 𑀢𑁂𑀦 𑀢𑀡𑁆𑀳𑀸𑀦𑀼𑀲𑀬𑁂𑀦 𑀅𑀦𑀼𑀲𑀝𑁄 𑀅𑀦𑀼𑀕𑀢𑁄 𑀣𑀸𑀫𑀕𑀢𑁄. 𑀢𑀡𑁆𑀳𑀸𑀲𑀦𑁆𑀢𑀸𑀧𑁂𑀦 𑀲𑀦𑁆𑀢𑀧𑁆𑀧𑀢𑀻𑀢𑀺 𑀢𑀡𑁆𑀳𑀸 𑀏𑀯 𑀧𑀯𑀢𑁆𑀢𑀺𑀓𑀸𑀮𑁂 𑀨𑀮𑀓𑀸𑀮𑁂 𑀘 𑀮𑁄𑀓𑀁 𑀲𑀦𑁆𑀢𑀸𑀧𑁂𑀢𑀻𑀢𑀺 𑀲𑀦𑁆𑀢𑀸𑀧𑁄, 𑀢𑁂𑀦 𑀢𑀡𑁆𑀳𑀸𑀲𑀦𑁆𑀢𑀸𑀧𑁂𑀦 𑀲𑀦𑁆𑀢𑀧𑁆𑀧𑀢𑀺 𑀲𑀦𑁆𑀢𑀸𑀧𑀻𑀬𑀢𑀺. 𑀢𑀡𑁆𑀳𑀸𑀧𑀭𑀺𑀴𑀸𑀳𑁂𑀦 𑀧𑀭𑀺𑀟𑀬𑁆𑀳𑀢𑀻𑀢𑀺 𑀢𑀡𑁆𑀳𑀸 𑀏𑀯 𑀩𑀮𑀯𑀪𑀽𑀢𑀸 𑀧𑀯𑀢𑁆𑀢𑀺𑀓𑀸𑀮𑁂 𑀨𑀮𑀓𑀸𑀮𑁂 𑀘 𑀲𑀫𑀦𑁆𑀢𑀢𑁄 𑀤𑀳𑀦𑀝𑁆𑀞𑁂𑀦 𑀫𑀳𑀸𑀧𑀭𑀺𑀴𑀸𑀳𑁄𑀢𑀺 𑀢𑀡𑁆𑀳𑀸𑀧𑀭𑀺𑀴𑀸𑀳𑁄, 𑀢𑁂𑀦 𑀢𑀡𑁆𑀳𑀸𑀧𑀭𑀺𑀴𑀸𑀳𑁂𑀦 𑀧𑀭𑀺𑀟𑀬𑁆𑀳𑀢𑀺 𑀲𑀫𑀦𑁆𑀢𑀢𑁄 𑀟𑀳𑀻𑀬𑀢𑀺. 𑀤𑀺𑀝𑁆𑀞𑀺𑀲𑀗𑁆𑀖𑀸𑀝𑀸𑀤𑀬𑁄 𑀇𑀫𑀺𑀦𑀸𑀯 𑀦𑀬𑁂𑀦 𑀬𑁄𑀚𑁂𑀢𑀩𑁆𑀩𑀸.

𑀅𑀦𑀼𑀕𑀢𑁄𑀢𑀺 𑀅𑀦𑀼𑀧𑀯𑀺𑀝𑁆𑀞𑁄. 𑀅𑀦𑀼𑀲𑀝𑁄𑀢𑀺 𑀅𑀦𑀼𑀥𑀸𑀯𑀺𑀢𑁄. 𑀅𑀪𑀺𑀪𑀽𑀢𑁄𑀢𑀺 𑀧𑀻𑀴𑀺𑀢𑁄. 𑀅𑀩𑁆𑀪𑀸𑀳𑀢𑁄𑀢𑀺 𑀅𑀪𑀺𑀆𑀳𑀢𑁄 𑀅𑀪𑀺𑀫𑀼𑀔𑀁 𑀪𑀼𑀲𑀁 𑀧𑀳𑀢𑁄. 𑀤𑀼𑀓𑁆𑀔𑁂 𑀧𑀢𑀺𑀝𑁆𑀞𑀺𑀢𑁄𑀢𑀺 𑀤𑀼𑀓𑁆𑀔𑁂 𑀔𑀦𑁆𑀥𑀧𑀜𑁆𑀘𑀓𑁂 𑀲𑀼𑀔𑀯𑀺𑀧𑀮𑁆𑀮𑀸𑀲𑁂𑀦 𑀧𑀢𑀺𑀝𑁆𑀞𑀺𑀢𑁄 𑀅𑀪𑀺𑀦𑀺𑀯𑀺𑀝𑁆𑀞𑁄.

𑀢𑀡𑁆𑀳𑀸𑀬 𑀉𑀟𑁆𑀟𑀺𑀢𑁄𑀢𑀺 𑀢𑀡𑁆𑀳𑀸𑀬 𑀉𑀮𑁆𑀮𑀗𑁆𑀖𑀺𑀢𑁄. 𑀘𑀓𑁆𑀔𑀼 𑀳𑀺 𑀢𑀡𑁆𑀳𑀸𑀭𑀚𑁆𑀚𑀼𑀦𑀸 𑀆𑀯𑀼𑀦𑀺𑀢𑁆𑀯𑀸 𑀭𑀽𑀧𑀦𑀸𑀕𑀤𑀦𑁆𑀢𑁂 𑀉𑀟𑁆𑀟𑀺𑀢𑀁, 𑀲𑁄𑀢𑀸𑀤𑀻𑀦𑀺 𑀢𑀡𑁆𑀳𑀸𑀭𑀚𑁆𑀚𑀼𑀦𑀸 𑀆𑀯𑀼𑀦𑀺𑀢𑁆𑀯𑀸 𑀲𑀤𑁆𑀤𑀸𑀤𑀺𑀦𑀸𑀕𑀤𑀦𑁆𑀢𑁂𑀲𑀼 𑀉𑀟𑁆𑀟𑀺𑀢𑀸𑀦𑀺. 𑀢𑀁𑀲𑀫𑀗𑁆𑀕𑀻𑀮𑁄𑀓𑁄𑀧𑀺 𑀉𑀟𑁆𑀟𑀺𑀢𑁄𑀬𑁂𑀯 𑀦𑀸𑀫. 𑀚𑀭𑀸𑀧𑀸𑀓𑀸𑀭𑀧𑀭𑀺𑀓𑁆𑀔𑀺𑀢𑁆𑀢𑁄𑀢𑀺 𑀅𑀦𑀢𑀺𑀓𑁆𑀓𑀫𑀦𑀻𑀬𑀝𑁆𑀞𑁂𑀦 𑀧𑀸𑀓𑀸𑀭𑀪𑀽𑀢𑀸𑀬 𑀚𑀭𑀸𑀬 𑀧𑀭𑀺𑀯𑀸𑀭𑀺𑀢𑁄. 𑀫𑀘𑁆𑀘𑀼𑀧𑀸𑀲𑁂𑀦 𑀧𑀭𑀺𑀓𑁆𑀔𑀺𑀢𑁆𑀢𑁄𑀢𑀺 𑀤𑀼𑀫𑁆𑀫𑁄𑀘𑀦𑀻𑀬𑀝𑁆𑀞𑁂𑀦 𑀧𑀸𑀲𑀪𑀽𑀢𑁂𑀦 𑀫𑀭𑀡𑁂𑀦 𑀩𑀤𑁆𑀥𑁄. 𑀫𑀳𑀸𑀩𑀦𑁆𑀥𑀦𑀩𑀤𑁆𑀥𑁄𑀢𑀺 𑀤𑀴𑁆𑀳𑀢𑁆𑀢𑀸 𑀤𑀼𑀘𑁆𑀙𑁂𑀤𑀢𑁆𑀢𑀸 𑀘 𑀫𑀳𑀦𑁆𑀢𑁂𑀳𑀺 𑀩𑀦𑁆𑀥𑀦𑁂𑀳𑀺 𑀩𑀤𑁆𑀥𑁄. 𑀭𑀸𑀕𑀩𑀦𑁆𑀥𑀦𑁂𑀦𑀸𑀢𑀺 𑀭𑀸𑀕𑁄 𑀏𑀯 𑀩𑀦𑁆𑀥𑀢𑀺 𑀲𑀁𑀲𑀸𑀭𑀢𑁄 𑀘𑀮𑀺𑀢𑀼𑀁 𑀦 𑀤𑁂𑀢𑀻𑀢𑀺 𑀭𑀸𑀕𑀩𑀦𑁆𑀥𑀦𑀁. 𑀢𑁂𑀦 𑀭𑀸𑀕𑀩𑀦𑁆𑀥𑀦𑁂𑀦. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀓𑀺𑀮𑁂𑀲𑀩𑀦𑁆𑀥𑀦𑁂𑀦𑀸𑀢𑀺 𑀯𑀼𑀢𑁆𑀢𑀸𑀯𑀲𑁂𑀲𑁂𑀦 𑀓𑀺𑀮𑁂𑀲𑀩𑀦𑁆𑀥𑀦𑁂𑀦. 𑀤𑀼𑀘𑁆𑀘𑀭𑀺𑀢𑀩𑀦𑁆𑀥𑀦𑁂𑀦𑀸𑀢𑀺 𑀢𑀺𑀯𑀺𑀥𑁂𑀦. 𑀲𑀼𑀘𑀭𑀺𑀢𑀁 𑀧𑀦 𑀩𑀦𑁆𑀥𑀦𑀫𑁄𑀓𑁆𑀔𑀲𑁆𑀲 𑀳𑁂𑀢𑀼𑀪𑀽𑀢𑀁 𑀩𑀦𑁆𑀥𑀦𑀫𑁄𑀓𑁆𑀔𑀪𑀽𑀢𑀜𑁆𑀘 𑀅𑀢𑁆𑀣𑀺. 𑀢𑀲𑁆𑀫𑀸 𑀢𑀁 𑀦 𑀕𑀳𑁂𑀢𑀩𑁆𑀩𑀁.

𑀩𑀦𑁆𑀥𑀦𑀁 𑀫𑁄𑀘𑁂𑀢𑀸𑀢𑀺 𑀢𑀲𑁆𑀲 𑀩𑀦𑁆𑀥𑀦𑀁 𑀫𑁄𑀘𑁂𑀢𑀸. 𑀩𑀦𑁆𑀥𑀦𑀸 𑀫𑁄𑀘𑁂𑀢𑀸𑀢𑀺𑀧𑀺 𑀧𑀸𑀞𑁄, 𑀩𑀦𑁆𑀥𑀦𑀢𑁄 𑀢𑀁 𑀫𑁄𑀘𑁂𑀢𑀸𑀢𑀺 𑀅𑀢𑁆𑀣𑁄. 𑀫𑀳𑀸𑀲𑀫𑁆𑀩𑀸𑀥𑀧𑁆𑀧𑀝𑀺𑀧𑀦𑁆𑀦𑁄𑀢𑀺 𑀓𑀼𑀲𑀮𑀲𑀜𑁆𑀘𑀸𑀭𑀧𑀻𑀴𑀦𑁂𑀦 𑀫𑀳𑀸𑀲𑀫𑁆𑀩𑀸𑀥𑀲𑀗𑁆𑀔𑀸𑀢𑀁 𑀭𑀸𑀕𑀤𑁄𑀲𑀫𑁄𑀳𑀫𑀸𑀦𑀤𑀺𑀝𑁆𑀞𑀺𑀓𑀺𑀮𑁂𑀲𑀤𑀼𑀘𑁆𑀘𑀭𑀺𑀢𑀕𑀳𑀦𑀁 𑀧𑀝𑀺𑀧𑀦𑁆𑀦𑁄. 𑀑𑀓𑀸𑀲𑀁 𑀤𑀲𑁆𑀲𑁂𑀢𑀸𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀫𑀸𑀥𑀺𑀧𑀜𑁆𑀜𑀸𑀑𑀓𑀸𑀲𑀁 𑀤𑀲𑁆𑀲𑁂𑀢𑀸. 𑀫𑀳𑀸𑀧𑀮𑀺𑀩𑁄𑀥𑁂𑀦 𑀧𑀮𑀺𑀩𑀼𑀤𑁆𑀥𑁄𑀢𑀺 𑀫𑀳𑀸𑀦𑀺𑀯𑀸𑀭𑀡𑁂𑀦 𑀦𑀺𑀯𑀼𑀢𑁄. 𑀫𑀳𑀸𑀮𑁂𑀧𑁂𑀦 𑀯𑀸 𑀮𑀺𑀢𑁆𑀢𑁄. 𑀧𑀮𑀺𑀩𑁄𑀥𑁄𑀢𑀺 𑀘 𑀭𑀸𑀕𑀸𑀤𑀺𑀲𑀢𑁆𑀢𑀯𑀺𑀥𑁄 𑀏𑀯. ‘‘𑀢𑀡𑁆𑀳𑀸𑀤𑀺𑀝𑁆𑀞𑀺𑀧𑀮𑀺𑀩𑁄𑀥𑁄’’𑀢𑀺 𑀏𑀓𑁂. 𑀧𑀮𑀺𑀩𑁄𑀥𑀁 𑀙𑁂𑀢𑀸𑀢𑀺 𑀢𑀁 𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑀸. 𑀫𑀳𑀸𑀧𑀧𑀸𑀢𑁂𑀢𑀺 𑀧𑀜𑁆𑀘𑀕𑀢𑀺𑀧𑀧𑀸𑀢𑁂, 𑀚𑀸𑀢𑀺𑀚𑀭𑀸𑀫𑀭𑀡𑀧𑀧𑀸𑀢𑁂 𑀯𑀸. 𑀢𑀁 𑀲𑀩𑁆𑀩𑀫𑁆𑀧𑀺 𑀤𑀼𑀭𑀼𑀢𑁆𑀢𑀭𑀡𑀝𑁆𑀞𑁂𑀦 𑀧𑀧𑀸𑀢𑁄. 𑀧𑀧𑀸𑀢𑀸 𑀉𑀤𑁆𑀥𑀢𑀸𑀢𑀺 𑀢𑀫𑁆𑀳𑀸 𑀧𑀧𑀸𑀢𑀢𑁄 𑀉𑀤𑁆𑀥𑀭𑀺𑀢𑀸. 𑀫𑀳𑀸𑀓𑀦𑁆𑀢𑀸𑀭𑀧𑁆𑀧𑀝𑀺𑀧𑀦𑁆𑀦𑁄𑀢𑀺 𑀚𑀸𑀢𑀺𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀓𑀦𑁆𑀢𑀸𑀭𑀁 𑀧𑀝𑀺𑀧𑀦𑁆𑀦𑁄. 𑀲𑀩𑁆𑀩𑀫𑁆𑀧𑀺 𑀢𑀁 𑀤𑀼𑀭𑀢𑀺𑀓𑁆𑀓𑀫𑀦𑀝𑁆𑀞𑁂𑀦 𑀓𑀦𑁆𑀢𑀸𑀭𑁄, 𑀢𑀁 𑀓𑀦𑁆𑀢𑀸𑀭𑀁 𑀢𑀸𑀭𑁂𑀢𑀸. 𑀓𑀦𑁆𑀢𑀸𑀭𑀸 𑀢𑀸𑀭𑁂𑀢𑀸𑀢𑀺 𑀯𑀸 𑀧𑀸𑀞𑁄. 𑀫𑀳𑀸𑀲𑀁𑀲𑀸𑀭𑀧𑁆𑀧𑀝𑀺𑀧𑀦𑁆𑀦𑁄𑀢𑀺 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀁 𑀔𑀦𑁆𑀥𑀲𑀦𑁆𑀢𑀸𑀦𑀁 𑀧𑀝𑀺𑀧𑀦𑁆𑀦𑁄. 𑀲𑀁𑀲𑀸𑀭𑀸 𑀫𑁄𑀘𑁂𑀢𑀸𑀢𑀺 𑀲𑀁𑀲𑀸𑀭𑀢𑁄 𑀫𑁄𑀘𑁂𑀢𑀸. 𑀲𑀁𑀲𑀸𑀭𑀁 𑀫𑁄𑀘𑁂𑀢𑀸𑀢𑀺 𑀯𑀸 𑀧𑀸𑀞𑁄. 𑀫𑀳𑀸𑀯𑀺𑀤𑀼𑀕𑁆𑀕𑁂𑀢𑀺 𑀲𑀁𑀲𑀸𑀭𑀯𑀺𑀤𑀼𑀕𑁆𑀕𑁂. 𑀲𑀁𑀲𑀸𑀭𑁄𑀬𑁂𑀯 𑀳𑀺 𑀤𑀼𑀕𑁆𑀕𑀫𑀦𑀝𑁆𑀞𑁂𑀦 𑀯𑀺𑀤𑀼𑀕𑁆𑀕𑁄. 𑀲𑀫𑁆𑀧𑀭𑀺𑀯𑀢𑁆𑀢𑀢𑀻𑀢𑀺 𑀪𑀼𑀲𑀁 𑀦𑀺𑀯𑀢𑁆𑀢𑀺𑀢𑁆𑀯𑀸 𑀘𑀭𑀢𑀺. 𑀫𑀳𑀸𑀧𑀮𑀺𑀧𑁂𑀢𑀺 𑀫𑀳𑀦𑁆𑀢𑁂 𑀓𑀸𑀫𑀓𑀤𑁆𑀤𑀫𑁂. 𑀓𑀸𑀫𑁄 𑀳𑀺 𑀑𑀲𑀻𑀤𑀦𑀝𑁆𑀞𑁂𑀦 𑀧𑀮𑀺𑀧𑁄. 𑀧𑀮𑀺𑀧𑀦𑁆𑀦𑁄𑀢𑀺 𑀮𑀕𑁆𑀕𑁄. 𑀫𑀳𑀸𑀧𑀮𑀺𑀧𑀧𑀮𑀺𑀧𑀦𑁆𑀦𑁄𑀢𑀺𑀧𑀺 𑀧𑀸𑀞𑁄.

𑀅𑀩𑁆𑀪𑀸𑀳𑀢𑁄𑀢𑀺 𑀲𑀩𑁆𑀩𑁄𑀧𑀤𑁆𑀤𑀯𑁂𑀳𑀺 𑀅𑀩𑁆𑀪𑀸𑀳𑀢𑁄. 𑀭𑀸𑀕𑀕𑁆𑀕𑀺𑀦𑀸𑀢𑀺 𑀭𑀸𑀕𑀸𑀤𑀬𑁄𑀬𑁂𑀯 𑀅𑀦𑀼𑀤𑀳𑀦𑀝𑁆𑀞𑁂𑀦 𑀅𑀕𑁆𑀕𑀺, 𑀢𑁂𑀦 𑀭𑀸𑀕𑀕𑁆𑀕𑀺𑀦𑀸. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀉𑀦𑁆𑀦𑀻𑀢𑀓𑁄𑀢𑀺 𑀉𑀕𑁆𑀕𑀳𑁂𑀢𑁆𑀯𑀸 𑀦𑀻𑀢𑁄, 𑀚𑀸𑀢𑀺𑀬𑀸 𑀉𑀕𑁆𑀕𑀳𑁂𑀢𑁆𑀯𑀸 𑀚𑀭𑀸𑀤𑀺𑀉𑀧𑀤𑁆𑀤𑀯𑀸𑀬 𑀦𑀻𑀢𑁄𑀢𑀺 𑀅𑀢𑁆𑀣𑁄. 𑀓-𑀓𑀸𑀭𑁄 𑀧𑀦𑁂𑀢𑁆𑀣 𑀅𑀦𑀼𑀓𑀫𑁆𑀧𑀸𑀬 𑀤𑀝𑁆𑀞𑀩𑁆𑀩𑁄. 𑀳𑀜𑁆𑀜𑀢𑀺 𑀦𑀺𑀘𑁆𑀘𑀫𑀢𑀸𑀡𑁄𑀢𑀺 𑀧𑀭𑀺𑀢𑁆𑀢𑀸𑀬𑀓𑁂𑀦 𑀭𑀳𑀺𑀢𑁄 𑀲𑀢𑀢𑀁 𑀧𑀻𑀴𑀻𑀬𑀢𑀺. 𑀧𑀢𑁆𑀢𑀤𑀡𑁆𑀟𑁄𑀢𑀺 𑀭𑀸𑀚𑀸𑀤𑀻𑀳𑀺 𑀮𑀤𑁆𑀥𑀆𑀡𑁄. 𑀢𑀓𑁆𑀓𑀭𑁄𑀢𑀺 𑀘𑁄𑀭𑁄. 𑀯𑀚𑁆𑀚𑀩𑀦𑁆𑀥𑀦𑀩𑀤𑁆𑀥𑁄𑀢𑀺 𑀭𑀸𑀕𑀸𑀤𑀺𑀯𑀚𑁆𑀚𑀩𑀦𑁆𑀥𑀦𑁂𑀳𑀺 𑀩𑀤𑁆𑀥𑁄. 𑀆𑀖𑀸𑀢𑀦𑀧𑀘𑁆𑀘𑀼𑀧𑀝𑁆𑀞𑀺𑀢𑁄𑀢𑀺 𑀫𑀭𑀡𑀥𑀫𑁆𑀫𑀕𑀡𑁆𑀞𑀺𑀓𑀝𑁆𑀞𑀸𑀦𑀁 𑀉𑀧𑁂𑀘𑁆𑀘 𑀞𑀺𑀢𑁄. 𑀓𑁄𑀘𑀺 𑀩𑀦𑁆𑀥𑀦𑀸 𑀫𑁄𑀘𑁂𑀢𑀸. 𑀓𑁄𑀘𑀺 𑀩𑀦𑁆𑀥𑀦𑀁 𑀫𑁄𑀘𑁂𑀢𑀸𑀢𑀺𑀧𑀺 𑀧𑀸𑀞𑁄. 𑀅𑀦𑀸𑀣𑁄𑀢𑀺 𑀦𑀢𑁆𑀣𑀺 𑀏𑀢𑀲𑁆𑀲 𑀦𑀸𑀣𑁄 𑀇𑀲𑁆𑀲𑀭𑁄, 𑀲𑀬𑀁 𑀯𑀸 𑀦 𑀦𑀸𑀣𑁄 𑀦 𑀇𑀲𑁆𑀲𑀭𑁄𑀢𑀺 𑀅𑀦𑀸𑀣𑁄, 𑀅𑀲𑀭𑀡𑁄𑀢𑀺 𑀯𑀸 𑀅𑀢𑁆𑀣𑁄. 𑀧𑀭𑀫𑀓𑀸𑀧𑀜𑁆𑀜𑀧𑁆𑀧𑀢𑁆𑀢𑁄𑀢𑀺 𑀚𑀭𑀸𑀤𑀺𑀧𑀝𑀺𑀩𑀸𑀳𑀦𑁂 𑀅𑀧𑁆𑀧𑀳𑀼𑀢𑀸𑀬 𑀅𑀢𑀻𑀯 𑀓𑀧𑀡𑀪𑀸𑀯𑀁 𑀧𑀢𑁆𑀢𑁄. 𑀢𑀸𑀬𑁂𑀢𑀸𑀢𑀺 𑀭𑀓𑁆𑀔𑀺𑀢𑀸. 𑀢𑀸𑀬𑀺𑀢𑀸𑀢𑀺 𑀯𑀸 𑀧𑀸𑀞𑁄 𑀲𑀼𑀦𑁆𑀤𑀭𑁄. 𑀤𑀼𑀓𑁆𑀔𑀸𑀪𑀺𑀢𑀼𑀦𑁆𑀦𑁄𑀢𑀺 𑀚𑀸𑀢𑀺𑀤𑀼𑀓𑁆𑀔𑀸𑀤𑀻𑀳𑀺 𑀅𑀦𑁂𑀓𑁂𑀳𑀺 𑀤𑀼𑀓𑁆𑀔𑁂𑀳𑀺 𑀅𑀪𑀺𑀢𑀼𑀦𑁆𑀦𑁄 𑀅𑀢𑀺𑀩𑁆𑀬𑀸𑀥𑀺𑀢𑁄 𑀅𑀢𑀺𑀓𑀫𑁆𑀧𑀺𑀢𑁄 𑀘. 𑀘𑀺𑀭𑀭𑀢𑁆𑀢𑀁 𑀧𑀻𑀴𑀺𑀢𑁄𑀢𑀺 𑀤𑀼𑀓𑁆𑀔𑁂𑀳𑁂𑀯 𑀤𑀻𑀖𑀫𑀤𑁆𑀥𑀸𑀦𑀁 𑀧𑀻𑀴𑀺𑀢𑁄 𑀖𑀝𑁆𑀝𑀺𑀢𑁄. 𑀕𑀥𑀺𑀢𑁄𑀢𑀺 𑀕𑁂𑀥𑁂𑀦 𑀕𑀺𑀤𑁆𑀥𑁄, 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑁂𑀦 𑀯𑀸 𑀕𑀦𑁆𑀣𑀺𑀢𑁄. 𑀦𑀺𑀘𑁆𑀘𑀁 𑀧𑀺𑀧𑀸𑀲𑀺𑀢𑁄𑀢𑀺 𑀧𑀸𑀢𑀼𑀁 𑀪𑀼𑀜𑁆𑀚𑀺𑀢𑀼𑀁 𑀇𑀘𑁆𑀙𑀸 𑀧𑀺𑀧𑀸𑀲𑀸, 𑀲𑀸 𑀢𑀡𑁆𑀳𑀸 𑀏𑀯, 𑀢𑀡𑁆𑀳𑀸𑀧𑀺𑀧𑀸𑀲𑀸𑀬 𑀦𑀺𑀭𑀦𑁆𑀢𑀭𑀁 𑀧𑀺𑀧𑀸𑀲𑀺𑀢𑁄.

𑀅𑀦𑁆𑀥𑁄𑀢𑀺 𑀤𑀲𑁆𑀲𑀦𑀝𑁆𑀞𑁂𑀦 𑀘𑀓𑁆𑀔𑀽𑀢𑀺 𑀲𑀗𑁆𑀔𑀁 𑀕𑀢𑀸𑀬 𑀧𑀜𑁆𑀜𑀸𑀬 𑀅𑀪𑀸𑀯𑀢𑁄 𑀓𑀸𑀡𑁄. 𑀧𑀜𑁆𑀜𑀸 𑀳𑀺 𑀥𑀫𑁆𑀫𑀲𑀪𑀸𑀯𑀁 𑀧𑀲𑁆𑀲𑀢𑀺. 𑀅𑀘𑀓𑁆𑀔𑀼𑀓𑁄𑀢𑀺 𑀢𑀁 𑀧𑀦 𑀅𑀦𑁆𑀥𑀢𑁆𑀢𑀁 𑀦 𑀧𑀘𑁆𑀙𑀸 𑀲𑀫𑁆𑀪𑀽𑀢𑀁, 𑀧𑀓𑀢𑀺𑀬𑀸 𑀏𑀯 𑀅𑀯𑀺𑀚𑁆𑀚𑀫𑀸𑀦𑀘𑀓𑁆𑀔𑀼𑀓𑁄𑀢𑀺 𑀢𑀫𑁂𑀯 𑀅𑀦𑁆𑀥𑀢𑁆𑀢𑀁 𑀯𑀺𑀲𑁂𑀲𑁂𑀢𑀺. 𑀳𑀢𑀦𑁂𑀢𑁆𑀢𑁄𑀢𑀺 𑀦𑀬𑀦𑀝𑁆𑀞𑁂𑀦 𑀦𑁂𑀢𑁆𑀢𑀦𑁆𑀢𑀺 𑀲𑀗𑁆𑀔𑀁 𑀕𑀢𑀸𑀬 𑀧𑀜𑁆𑀜𑀸𑀬 𑀅𑀪𑀸𑀯𑀢𑁄𑀬𑁂𑀯 𑀯𑀺𑀦𑀝𑁆𑀞𑀦𑁂𑀢𑁆𑀢𑀓𑁄. 𑀲𑀫𑀯𑀺𑀲𑀫𑀁 𑀤𑀲𑁆𑀲𑁂𑀦𑁆𑀢𑀁 𑀅𑀢𑁆𑀢𑀪𑀸𑀯𑀁 𑀦𑁂𑀢𑀻𑀢𑀺 𑀦𑁂𑀢𑁆𑀢𑀦𑁆𑀢𑀺 𑀳𑀺 𑀯𑀼𑀢𑁆𑀢𑀁. 𑀧𑀜𑁆𑀜𑀸𑀬 𑀲𑀼𑀕𑀢𑀺𑀜𑁆𑀘 𑀅𑀕𑀢𑀺𑀜𑁆𑀘 𑀦𑀬𑀢𑀺. 𑀳𑀢𑀦𑁂𑀢𑁆𑀢𑀢𑁆𑀢𑀸𑀬𑁂𑀯𑀲𑁆𑀲 𑀦𑁂𑀢𑀼𑀅𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀅𑀧𑀭𑀺𑀡𑀸𑀬𑀓𑁄𑀢𑀺 𑀆𑀳, 𑀅𑀯𑀺𑀚𑁆𑀚𑀫𑀸𑀦𑀦𑁂𑀢𑁆𑀢𑀓𑁄𑀢𑀺 𑀅𑀢𑁆𑀣𑁄. 𑀅𑀜𑁆𑀜𑁄𑀧𑀺𑀲𑁆𑀲 𑀦𑁂𑀢𑀸 𑀦 𑀯𑀺𑀚𑁆𑀚𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀺𑀧𑀣𑀧𑀓𑁆𑀔𑀦𑁆𑀤𑁄𑀢𑀺 𑀯𑀺𑀧𑀭𑀻𑀢𑁄, 𑀯𑀺𑀲𑀫𑁄 𑀯𑀸 𑀧𑀣𑁄 𑀯𑀺𑀧𑀣𑁄, 𑀢𑀁 𑀯𑀺𑀧𑀣𑀁 𑀧𑀓𑁆𑀔𑀦𑁆𑀤𑁄 𑀧𑀯𑀺𑀝𑁆𑀞𑁄 𑀧𑀝𑀺𑀧𑀦𑁆𑀦𑁄𑀢𑀺 𑀯𑀺𑀧𑀣𑀧𑀓𑁆𑀔𑀦𑁆𑀤𑁄, 𑀫𑀺𑀘𑁆𑀙𑀸𑀧𑀣𑀲𑀗𑁆𑀔𑀸𑀢𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀧𑀝𑀺𑀧𑀦𑁆𑀦𑁄𑀢𑀺 𑀅𑀢𑁆𑀣𑁄. 𑀅𑀜𑁆𑀚𑀲𑀸𑀧𑀭𑀤𑁆𑀥𑁄𑀢𑀺 𑀅𑀜𑁆𑀚𑀲𑁂 𑀉𑀚𑀼𑀫𑀕𑁆𑀕𑀲𑁆𑀫𑀺𑀁 𑀫𑀚𑁆𑀛𑀺𑀫𑀧𑀝𑀺𑀧𑀤𑀸𑀬 𑀅𑀧𑀭𑀤𑁆𑀥𑁄 𑀯𑀺𑀭𑀤𑁆𑀥𑁄. 𑀅𑀭𑀺𑀬𑀧𑀣𑀁 𑀆𑀦𑁂𑀢𑀸𑀢𑀺 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀉𑀧𑀦𑁂𑀢𑀸 𑀧𑀝𑀺𑀧𑀸𑀤𑀬𑀺𑀢𑀸. 𑀫𑀳𑁄𑀖𑀧𑀓𑁆𑀔𑀦𑁆𑀤𑁄𑀢𑀺 𑀬𑀲𑁆𑀲 𑀲𑀁𑀯𑀺𑀚𑁆𑀚𑀦𑁆𑀢𑀺, 𑀢𑀁 𑀯𑀝𑁆𑀝𑀲𑁆𑀫𑀺𑀁 𑀑𑀳𑀦𑀦𑁆𑀢𑀺 𑀑𑀲𑀻𑀤𑀸𑀧𑁂𑀦𑁆𑀢𑀻𑀢𑀺 𑀑𑀖𑀸, 𑀧𑀓𑀢𑀺𑀑𑀖𑀢𑁄 𑀫𑀳𑀦𑁆𑀢𑀸 𑀑𑀖𑀸𑀢𑀺 𑀫𑀳𑁄𑀖𑀸. 𑀢𑁂 𑀓𑀸𑀫𑁄𑀖𑁄 𑀪𑀯𑁄𑀖𑁄 𑀤𑀺𑀝𑁆𑀞𑁄𑀖𑁄 𑀅𑀯𑀺𑀚𑁆𑀚𑁄𑀖𑁄𑀢𑀺 𑀘𑀢𑀼𑀧𑁆𑀧𑀪𑁂𑀤𑀸. 𑀢𑁂 𑀫𑀳𑁄𑀖𑁂 𑀧𑀓𑁆𑀔𑀦𑁆𑀤𑁄 𑀧𑀯𑀺𑀝𑁆𑀞𑁄𑀢𑀺 𑀫𑀳𑁄𑀖𑀧𑀓𑁆𑀔𑀦𑁆𑀤𑁄, 𑀲𑀁𑀲𑀸𑀭𑀲𑀗𑁆𑀔𑀸𑀢𑀁 𑀫𑀳𑁄𑀖𑀁 𑀯𑀸 𑀧𑀓𑁆𑀔𑀦𑁆𑀤𑁄𑀢𑀺.

𑁧𑁧𑁮. 𑀇𑀤𑀸𑀦𑀺 𑀏𑀓𑀼𑀢𑁆𑀢𑀭𑀺𑀓𑀦𑀬𑁄. 𑀢𑀢𑁆𑀣 𑀤𑁆𑀯𑀻𑀳𑀺 𑀤𑀺𑀝𑁆𑀞𑀺𑀕𑀢𑁂𑀳𑀻𑀢𑀺 𑀲𑀲𑁆𑀲𑀢𑀼𑀘𑁆𑀙𑁂𑀤𑀤𑀺𑀝𑁆𑀞𑀻𑀳𑀺. 𑀢𑀢𑁆𑀣 𑀤𑀺𑀝𑁆𑀞𑀺𑀬𑁂𑀯 𑀤𑀺𑀝𑁆𑀞𑀺𑀕𑀢𑀁 ‘‘𑀕𑀽𑀣𑀕𑀢𑀁 𑀫𑀼𑀢𑁆𑀢𑀕𑀢’’𑀦𑁆𑀢𑀺𑀆𑀤𑀻𑀦𑀺 (𑀅. 𑀦𑀺. 𑁯.𑁧𑁧) 𑀯𑀺𑀬. 𑀕𑀦𑁆𑀢𑀩𑁆𑀩𑀸𑀪𑀸𑀯𑀢𑁄 𑀯𑀸 𑀤𑀺𑀝𑁆𑀞𑀺𑀬𑀸 𑀕𑀢𑀫𑀢𑁆𑀢𑀫𑁂𑀯𑁂𑀢𑀦𑁆𑀢𑀺 𑀤𑀺𑀝𑁆𑀞𑀺𑀕𑀢𑀁, 𑀤𑀺𑀝𑁆𑀞𑀻𑀲𑀼 𑀕𑀢𑀁 𑀇𑀤𑀁 𑀤𑀲𑁆𑀲𑀦𑀁 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀅𑀦𑁆𑀢𑁄𑀕𑀥𑀢𑁆𑀢𑀸𑀢𑀺𑀧𑀺 𑀤𑀺𑀝𑁆𑀞𑀺𑀕𑀢𑀁. 𑀤𑁆𑀯𑀸𑀲𑀝𑁆𑀞𑀺𑀢𑁂𑀲𑀝𑁆𑀞𑀺𑀤𑀺𑀝𑁆𑀞𑀺𑀬𑁄𑀧𑀺 𑀳𑀺 𑀲𑀲𑁆𑀲𑀢𑀤𑀺𑀝𑁆𑀞𑀺 𑀉𑀘𑁆𑀙𑁂𑀤𑀤𑀺𑀝𑁆𑀞𑀻𑀢𑀺 𑀤𑁆𑀯𑁂𑀯 𑀤𑀺𑀝𑁆𑀞𑀺𑀬𑁄 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀲𑀗𑁆𑀔𑁂𑀧𑁂𑀦 𑀲𑀩𑁆𑀩𑀸 𑀤𑀺𑀝𑁆𑀞𑀺𑀬𑁄 𑀅𑀦𑁆𑀢𑁄 𑀓𑀭𑁄𑀦𑁆𑀢𑁄 ‘‘𑀤𑁆𑀯𑀻𑀳𑀺 𑀤𑀺𑀝𑁆𑀞𑀺𑀕𑀢𑁂𑀳𑀻’’𑀢𑀺 𑀯𑀼𑀢𑁆𑀢𑀁. 𑀧𑀭𑀺𑀬𑀼𑀝𑁆𑀞𑀺𑀢𑁄𑀢𑀺 𑀧𑀭𑀺𑀬𑀼𑀝𑁆𑀞𑀸𑀦𑀁 𑀧𑀢𑁆𑀢𑁄 𑀲𑀫𑀼𑀤𑀸𑀘𑀸𑀭𑀁 𑀧𑀢𑁆𑀢𑁄, 𑀉𑀧𑁆𑀧𑀚𑁆𑀚𑀺𑀢𑀼𑀁 𑀅𑀧𑁆𑀧𑀤𑀸𑀦𑁂𑀦 𑀓𑀼𑀲𑀮𑀘𑀸𑀭𑀲𑁆𑀲 𑀕𑀳𑀡𑀁 𑀧𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀤𑁆𑀯𑀻𑀳𑀺, 𑀪𑀺𑀓𑁆𑀔𑀯𑁂, 𑀤𑀺𑀝𑁆𑀞𑀺𑀕𑀢𑁂𑀳𑀺 𑀧𑀭𑀺𑀬𑀼𑀝𑁆𑀞𑀺𑀢𑀸 𑀤𑁂𑀯𑀫𑀦𑀼𑀲𑁆𑀲𑀸 𑀑𑀮𑀻𑀬𑀦𑁆𑀢𑀺 𑀏𑀓𑁂, 𑀅𑀢𑀺𑀥𑀸𑀯𑀦𑁆𑀢𑀺 𑀏𑀓𑁂, 𑀘𑀓𑁆𑀔𑀼𑀫𑀦𑁆𑀢𑁄 𑀘 𑀧𑀲𑁆𑀲𑀦𑁆𑀢𑀻’’𑀢𑀺𑀆𑀤𑀺 (𑀇𑀢𑀺𑀯𑀼. 𑁪𑁯).

𑀢𑀻𑀳𑀺 𑀤𑀼𑀘𑁆𑀘𑀭𑀺𑀢𑁂𑀳𑀻𑀢𑀺 𑀢𑀺𑀯𑀺𑀥𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦 𑀘𑀢𑀼𑀩𑁆𑀩𑀺𑀥𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦 𑀢𑀺𑀯𑀺𑀥𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦. 𑀯𑀺𑀧𑁆𑀧𑀝𑀺𑀧𑀦𑁆𑀦𑁄𑀢𑀺 𑀯𑀺𑀭𑀽𑀧𑀁 𑀧𑀝𑀺𑀧𑀦𑁆𑀦𑁄, 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑁄𑀢𑀺 𑀅𑀢𑁆𑀣𑁄. 𑀬𑁄𑀕𑁂𑀳𑀺 𑀬𑀼𑀢𑁆𑀢𑁄𑀢𑀺 𑀯𑀝𑁆𑀝𑀲𑁆𑀫𑀺𑀁 𑀬𑁄𑀚𑁂𑀦𑁆𑀢𑀻𑀢𑀺 𑀬𑁄𑀕𑀸, 𑀈𑀢𑀺𑀅𑀢𑁆𑀣𑁂𑀦 𑀯𑀸 𑀬𑁄𑀕𑀸, 𑀢𑁂𑀳𑀺 𑀬𑁄𑀕𑁂𑀳𑀺 𑀬𑀼𑀢𑁆𑀢𑁄 𑀲𑀫𑀧𑁆𑀧𑀺𑀢𑁄. 𑀘𑀢𑀼𑀬𑁄𑀕𑀬𑁄𑀚𑀺𑀢𑁄𑀢𑀺 𑀓𑀸𑀫𑀬𑁄𑀕𑁄, 𑀪𑀯𑀬𑁄𑀕𑁄, 𑀤𑀺𑀝𑁆𑀞𑀺𑀬𑁄𑀕𑁄, 𑀅𑀯𑀺𑀚𑁆𑀚𑀸𑀬𑁄𑀕𑁄𑀢𑀺 𑀇𑀫𑁂𑀳𑀺 𑀘𑀢𑀽𑀳𑀺 𑀬𑁄𑀕𑁂𑀳𑀺 𑀲𑀓𑀝𑀲𑁆𑀫𑀺𑀁 𑀬𑁄𑀕𑁄 𑀯𑀺𑀬 𑀯𑀝𑁆𑀝𑀲𑁆𑀫𑀺𑀁 𑀬𑁄𑀚𑀺𑀢𑁄. 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑁄 𑀭𑀸𑀕𑁄 𑀓𑀸𑀫𑀬𑁄𑀕𑁄. 𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀙𑀦𑁆𑀤𑀭𑀸𑀕𑁄, 𑀛𑀸𑀦𑀦𑀺𑀓𑀦𑁆𑀢𑀺 𑀘, 𑀲𑀲𑁆𑀲𑀢𑀤𑀺𑀝𑁆𑀞𑀺𑀲𑀳𑀚𑀸𑀢𑁄 𑀭𑀸𑀕𑁄 𑀪𑀯𑀯𑀲𑁂𑀦 𑀧𑀢𑁆𑀣𑀦𑀸 𑀪𑀯𑀬𑁄𑀕𑁄. 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀬𑁄 𑀤𑀺𑀝𑁆𑀞𑀺𑀬𑁄𑀕𑁄. 𑀅𑀝𑁆𑀞𑀲𑀼 𑀞𑀸𑀦𑁂𑀲𑀼 𑀅𑀜𑁆𑀜𑀸𑀡𑀁 𑀅𑀯𑀺𑀚𑁆𑀚𑀸𑀬𑁄𑀕𑁄. 𑀢𑁂 𑀏𑀯 𑀘𑀢𑁆𑀢𑀸𑀭𑁄 𑀩𑀮𑀯𑀪𑀽𑀢𑀸 𑀑𑀖𑀸, 𑀤𑀼𑀩𑁆𑀩𑀮𑀪𑀽𑀢𑀸 𑀬𑁄𑀕𑀸.

𑀘𑀢𑀽𑀳𑀺 𑀕𑀦𑁆𑀣𑁂𑀳𑀻𑀢𑀺 𑀬𑀲𑁆𑀲 𑀲𑀁𑀯𑀺𑀚𑁆𑀚𑀦𑁆𑀢𑀺, 𑀢𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀝𑁆𑀝𑀲𑁆𑀫𑀺𑀁 𑀕𑀦𑁆𑀣𑁂𑀦𑁆𑀢𑀺 𑀖𑀝𑁂𑀦𑁆𑀢𑀻𑀢𑀺 𑀕𑀦𑁆𑀣𑀸. 𑀢𑁂 𑀅𑀪𑀺𑀚𑁆𑀛𑀸 𑀓𑀸𑀬𑀕𑀦𑁆𑀣𑁄, 𑀩𑁆𑀬𑀸𑀧𑀸𑀤𑁄 𑀓𑀸𑀬𑀕𑀦𑁆𑀣𑁄, 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄 𑀓𑀸𑀬𑀕𑀦𑁆𑀣𑁄, 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑁄 𑀓𑀸𑀬𑀕𑀦𑁆𑀣𑁄𑀢𑀺 𑀘𑀢𑀼𑀧𑁆𑀧𑀪𑁂𑀤𑀸. 𑀅𑀪𑀺𑀚𑁆𑀛𑀸𑀬𑀦𑁆𑀢𑀺 𑀏𑀢𑀸𑀬, 𑀲𑀬𑀁 𑀯𑀸 𑀅𑀪𑀺𑀚𑁆𑀛𑀸𑀬𑀢𑀺, 𑀅𑀪𑀺𑀚𑁆𑀛𑀸𑀬𑀦𑀫𑀢𑁆𑀢𑀫𑁂𑀯 𑀯𑀸 𑀏𑀲𑀸𑀢𑀺 𑀅𑀪𑀺𑀚𑁆𑀛𑀸, 𑀮𑁄𑀪𑁄𑀬𑁂𑀯. 𑀦𑀸𑀫𑀓𑀸𑀬𑀁 𑀕𑀦𑁆𑀣𑁂𑀢𑀺 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀝𑁆𑀝𑀲𑁆𑀫𑀺𑀁 𑀖𑀝𑁂𑀢𑀻𑀢𑀺 𑀓𑀸𑀬𑀕𑀦𑁆𑀣𑁄. 𑀩𑁆𑀬𑀸𑀧𑀚𑁆𑀚𑀢𑀺 𑀢𑁂𑀦 𑀘𑀺𑀢𑁆𑀢𑀁 𑀧𑀽𑀢𑀺𑀪𑀸𑀯𑀁 𑀕𑀘𑁆𑀙𑀢𑀺, 𑀩𑁆𑀬𑀸𑀧𑀸𑀤𑀬𑀢𑀺 𑀯𑀸 𑀯𑀺𑀦𑀬𑀸𑀘𑀸𑀭𑀭𑀽𑀧𑀲𑀫𑁆𑀧𑀢𑁆𑀢𑀺𑀳𑀺𑀢𑀲𑀼𑀔𑀸𑀤𑀻𑀦𑀻𑀢𑀺 𑀩𑁆𑀬𑀸𑀧𑀸𑀤𑁄. 𑀇𑀢𑁄 𑀩𑀳𑀺𑀤𑁆𑀥𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀻𑀮𑁂𑀦 𑀲𑀼𑀤𑁆𑀥𑀺 𑀯𑀢𑁂𑀦 𑀲𑀼𑀤𑁆𑀥𑀺 𑀲𑀻𑀮𑀯𑀢𑁂𑀦 𑀲𑀼𑀤𑁆𑀥𑀻𑀢𑀺 𑀧𑀭𑀸𑀫𑀲𑀦𑀁 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄. 𑀲𑀩𑁆𑀩𑀜𑁆𑀜𑀼𑀪𑀸𑀲𑀺𑀢𑀫𑁆𑀧𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀲𑀲𑁆𑀲𑀢𑁄 𑀮𑁄𑀓𑁄, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺𑀆𑀤𑀺𑀦𑀸 𑀆𑀓𑀸𑀭𑁂𑀦 𑀅𑀪𑀺𑀦𑀺𑀯𑀺𑀲𑀢𑀻𑀢𑀺 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑁄. 𑀢𑁂𑀳𑀺 𑀘𑀢𑀽𑀳𑀺 𑀕𑀦𑁆𑀣𑁂𑀳𑀺 𑀕𑀦𑁆𑀣𑀺𑀢𑁄, 𑀩𑀤𑁆𑀥𑁄𑀢𑀺 𑀅𑀢𑁆𑀣𑁄.

𑀘𑀢𑀽𑀳𑀺 𑀉𑀧𑀸𑀤𑀸𑀦𑁂𑀳𑀻𑀢𑀺 𑀪𑀼𑀲𑀁 𑀆𑀤𑀺𑀬𑀦𑁆𑀢𑀺 𑀤𑀴𑁆𑀳𑀕𑁆𑀕𑀸𑀳𑀁 𑀕𑀡𑁆𑀳𑀦𑁆𑀢𑀻𑀢𑀺 𑀉𑀧𑀸𑀤𑀸𑀦𑀸. 𑀢𑁂 𑀓𑀸𑀫𑀼𑀧𑀸𑀤𑀸𑀦𑀁 𑀤𑀺𑀝𑁆𑀞𑀼𑀧𑀸𑀤𑀸𑀦𑀁 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀁 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀦𑁆𑀢𑀺 𑀘𑀢𑀼𑀧𑁆𑀧𑀪𑁂𑀤𑀸. 𑀯𑀢𑁆𑀣𑀼𑀲𑀗𑁆𑀔𑀸𑀢𑀁 𑀓𑀸𑀫𑀁 𑀉𑀧𑀸𑀤𑀺𑀬𑀢𑀻𑀢𑀺 𑀓𑀸𑀫𑀼𑀧𑀸𑀤𑀸𑀦𑀁, 𑀓𑀸𑀫𑁄 𑀘 𑀲𑁄 𑀉𑀧𑀸𑀤𑀸𑀦𑀜𑁆𑀘𑀸𑀢𑀺𑀧𑀺 𑀓𑀸𑀫𑀼𑀧𑀸𑀤𑀸𑀦𑀁. 𑀤𑀺𑀝𑁆𑀞𑀺 𑀘 𑀲𑀸 𑀉𑀧𑀸𑀤𑀸𑀦𑀜𑁆𑀘𑀸𑀢𑀺 𑀤𑀺𑀝𑁆𑀞𑀼𑀧𑀸𑀤𑀸𑀦𑀁, 𑀤𑀺𑀝𑁆𑀞𑀺𑀁 𑀉𑀧𑀸𑀤𑀺𑀬𑀢𑀻𑀢𑀺𑀧𑀺 𑀤𑀺𑀝𑁆𑀞𑀼𑀧𑀸𑀤𑀸𑀦𑀁. ‘‘𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸’’𑀢𑀺𑀆𑀤𑀻𑀲𑀼 (𑀧𑀝𑀺. 𑀫. 𑁧.𑁧𑁪𑁭) 𑀳𑀺 𑀧𑀼𑀭𑀺𑀫𑀤𑀺𑀝𑁆𑀞𑀺𑀁 𑀉𑀢𑁆𑀢𑀭𑀤𑀺𑀝𑁆𑀞𑀺 𑀉𑀧𑀸𑀤𑀺𑀬𑀢𑀺. 𑀲𑀻𑀮𑀩𑁆𑀩𑀢𑀁 𑀉𑀧𑀸𑀤𑀺𑀬𑀢𑀻𑀢𑀺 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀁, 𑀲𑀻𑀮𑀩𑁆𑀩𑀢𑀜𑁆𑀘 𑀢𑀁 𑀉𑀧𑀸𑀤𑀸𑀦𑀜𑁆𑀘𑀸𑀢𑀺𑀧𑀺 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀁. 𑀕𑁄𑀲𑀻𑀮𑀕𑁄𑀯𑀢𑀸𑀤𑀻𑀦𑀺 𑀳𑀺 𑀏𑀯𑀁 𑀯𑀺𑀲𑀼𑀤𑁆𑀥𑀻𑀢𑀺 𑀅𑀪𑀺𑀦𑀺𑀯𑁂𑀲𑀢𑁄 𑀲𑀬𑀫𑁂𑀯 𑀉𑀧𑀸𑀤𑀸𑀦𑀸𑀦𑀺. 𑀯𑀤𑀦𑁆𑀢𑀺 𑀏𑀢𑁂𑀦𑀸𑀢𑀺 𑀯𑀸𑀤𑁄, 𑀉𑀧𑀸𑀤𑀺𑀬𑀦𑁆𑀢𑀺 𑀏𑀢𑁂𑀦𑀸𑀢𑀺 𑀉𑀧𑀸𑀤𑀸𑀦𑀁. 𑀓𑀺𑀁 𑀯𑀤𑀦𑁆𑀢𑀺, 𑀉𑀧𑀸𑀤𑀺𑀬𑀦𑁆𑀢𑀺 𑀯𑀸? 𑀅𑀢𑁆𑀢𑀸𑀦𑀁. 𑀅𑀢𑁆𑀢𑀦𑁄 𑀯𑀸𑀤𑀼𑀧𑀸𑀤𑀸𑀦𑀁 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁, 𑀅𑀢𑁆𑀢𑀯𑀸𑀤𑀫𑀢𑁆𑀢𑀫𑁂𑀯 𑀯𑀸 𑀅𑀢𑁆𑀢𑀸𑀢𑀺 𑀉𑀧𑀸𑀤𑀺𑀬𑀦𑁆𑀢𑀺 𑀏𑀢𑁂𑀦𑀸𑀢𑀺 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁. 𑀞𑀧𑁂𑀢𑁆𑀯𑀸 𑀇𑀫𑀸 𑀤𑁆𑀯𑁂 𑀤𑀺𑀝𑁆𑀞𑀺𑀬𑁄 𑀲𑀩𑁆𑀩𑀸𑀧𑀺 𑀤𑀺𑀝𑁆𑀞𑀻 𑀤𑀺𑀝𑁆𑀞𑀼𑀧𑀸𑀤𑀸𑀦𑀁. 𑀢𑁂𑀳𑀺 𑀘𑀢𑀽𑀳𑀺 𑀉𑀧𑀸𑀤𑀸𑀦𑁂𑀳𑀺. 𑀉𑀧𑀸𑀤𑀻𑀬𑀢𑀻𑀢𑀺 𑀪𑀼𑀲𑀁 𑀕𑀡𑁆𑀳𑀻𑀬𑀢𑀺. 𑀉𑀧𑀸𑀤𑀺𑀬𑀢𑀻𑀢𑀺 𑀯𑀸 𑀧𑀸𑀞𑁄, 𑀮𑁄𑀓𑁄 𑀉𑀧𑀸𑀤𑀸𑀦𑁂𑀳𑀺 𑀢𑀁 𑀢𑀁 𑀆𑀭𑀫𑁆𑀫𑀡𑀁 𑀪𑀼𑀲𑀁 𑀕𑀡𑁆𑀳𑀸𑀢𑀻𑀢𑀺 𑀅𑀢𑁆𑀣𑁄.

𑀧𑀜𑁆𑀘𑀕𑀢𑀺𑀲𑀫𑀸𑀭𑀼𑀴𑁆𑀳𑁄𑀢𑀺 𑀲𑀼𑀓𑀢𑀤𑀼𑀓𑁆𑀓𑀝𑀓𑀸𑀭𑀡𑁂𑀳𑀺 𑀕𑀫𑁆𑀫𑀢𑀺 𑀉𑀧𑀲𑀗𑁆𑀓𑀫𑀻𑀬𑀢𑀻𑀢𑀺 𑀕𑀢𑀺, 𑀲𑀳𑁄𑀓𑀸𑀲𑀓𑀸 𑀔𑀦𑁆𑀥𑀸. 𑀦𑀺𑀭𑀬𑁄 𑀢𑀺𑀭𑀘𑁆𑀙𑀸𑀦𑀬𑁄𑀦𑀺 𑀧𑁂𑀢𑁆𑀢𑀺𑀯𑀺𑀲𑀬𑁄 𑀫𑀦𑀼𑀲𑁆𑀲𑀸 𑀤𑁂𑀯𑀸𑀢𑀺 𑀇𑀫𑀸 𑀧𑀜𑁆𑀘 𑀕𑀢𑀺𑀬𑁄 𑀯𑁄𑀓𑁆𑀓𑀫𑀦𑀪𑀸𑀯𑁂𑀦 𑀪𑀼𑀲𑀁 𑀆𑀭𑀼𑀴𑁆𑀳𑁄. 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀻𑀢𑀺 𑀭𑀽𑀧𑀲𑀤𑁆𑀤𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀲𑀗𑁆𑀔𑀸𑀢𑁂𑀳𑀺 𑀧𑀜𑁆𑀘𑀳𑀺 𑀯𑀢𑁆𑀣𑀼𑀓𑀸𑀫𑀓𑁄𑀝𑁆𑀞𑀸𑀲𑁂𑀳𑀺. 𑀭𑀚𑁆𑀚𑀢𑀻𑀢𑀺 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀧𑀝𑀺𑀘𑁆𑀘 𑀭𑀸𑀕𑀼𑀧𑁆𑀧𑀸𑀤𑀦𑁂𑀦 𑀢𑁂𑀳𑀺 𑀭𑀜𑁆𑀚𑀻𑀬𑀢𑀺, 𑀲𑀸𑀭𑀢𑁆𑀢𑁄 𑀓𑀭𑀻𑀬𑀢𑀻𑀢𑀺 𑀅𑀢𑁆𑀣𑁄. 𑀧𑀜𑁆𑀘𑀳𑀺 𑀦𑀻𑀯𑀭𑀡𑁂𑀳𑀻𑀢𑀺 𑀘𑀺𑀢𑁆𑀢𑀁 𑀦𑀻𑀯𑀭𑀦𑁆𑀢𑀺 𑀧𑀭𑀺𑀬𑁄𑀦𑀦𑁆𑀥𑀦𑁆𑀢𑀻𑀢𑀺 𑀦𑀻𑀯𑀭𑀡𑀸. 𑀓𑀸𑀫𑀘𑁆𑀙𑀦𑁆𑀤𑀩𑁆𑀬𑀸𑀧𑀸𑀤𑀣𑀺𑀦𑀫𑀺𑀤𑁆𑀥𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀯𑀺𑀘𑀺𑀓𑀺𑀘𑁆𑀙𑀸𑀲𑀗𑁆𑀔𑀸𑀢𑁂𑀳𑀺 𑀧𑀜𑁆𑀘𑀳𑀺 𑀦𑀻𑀯𑀭𑀡𑁂𑀳𑀺. 𑀑𑀢𑁆𑀣𑀝𑁄𑀢𑀺 𑀉𑀧𑀭𑀺𑀢𑁄 𑀧𑀺𑀳𑀺𑀢𑁄.

𑀙𑀳𑀺 𑀯𑀺𑀯𑀸𑀤𑀫𑀽𑀮𑁂𑀳𑀻𑀢𑀺 𑀙𑀳𑀺 𑀯𑀺𑀯𑀸𑀤𑀲𑁆𑀲 𑀫𑀽𑀮𑁂𑀳𑀺. 𑀬𑀣𑀸𑀳 𑁋

‘‘𑀙𑀬𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀯𑀺𑀯𑀸𑀤𑀫𑀽𑀮𑀸𑀦𑀺. 𑀓𑀢𑀫𑀸𑀦𑀺 𑀙? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑁄𑀥𑀦𑁄 𑀳𑁄𑀢𑀺 𑀉𑀧𑀦𑀸𑀳𑀻. 𑀬𑁄 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑁄𑀥𑀦𑁄 𑀳𑁄𑀢𑀺 𑀉𑀧𑀦𑀸𑀳𑀻. 𑀲𑁄 𑀲𑀢𑁆𑀣𑀭𑀺𑀧𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀥𑀫𑁆𑀫𑁂𑀧𑀺, 𑀲𑀗𑁆𑀖𑁂𑀧𑀺, 𑀲𑀺𑀓𑁆𑀔𑀸𑀬𑀧𑀺 𑀦 𑀧𑀭𑀺𑀧𑀽𑀭𑀓𑀸𑀭𑀻. 𑀬𑁄 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀥𑀫𑁆𑀫𑁂𑀧𑀺, 𑀲𑀗𑁆𑀖𑁂𑀧𑀺, 𑀲𑀺𑀓𑁆𑀔𑀸𑀬𑀧𑀺 𑀦 𑀧𑀭𑀺𑀧𑀽𑀭𑀓𑀸𑀭𑀻, 𑀲𑁄 𑀲𑀗𑁆𑀖𑁂 𑀯𑀺𑀯𑀸𑀤𑀁 𑀚𑀦𑁂𑀢𑀺. 𑀬𑁄 𑀳𑁄𑀢𑀺 𑀯𑀺𑀯𑀸𑀤𑁄 𑀩𑀳𑀼𑀚𑀦𑀸𑀳𑀺𑀢𑀸𑀬 𑀩𑀳𑀼𑀚𑀦𑀸𑀲𑀼𑀔𑀸𑀬 𑀩𑀳𑀼𑀦𑁄 𑀚𑀦𑀲𑁆𑀲 𑀅𑀦𑀢𑁆𑀣𑀸𑀬 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁. 𑀏𑀯𑀭𑀽𑀧𑀁 𑀘𑁂 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀯𑀺𑀯𑀸𑀤𑀫𑀽𑀮𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀲𑀫𑀦𑀼𑀧𑀲𑁆𑀲𑁂𑀬𑁆𑀬𑀸𑀣, 𑀢𑀢𑁆𑀭 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀢𑀲𑁆𑀲𑁂𑀯 𑀧𑀸𑀧𑀓𑀲𑁆𑀲 𑀯𑀺𑀯𑀸𑀤𑀫𑀽𑀮𑀲𑁆𑀲 𑀧𑀳𑀸𑀦𑀸𑀬 𑀯𑀸𑀬𑀫𑁂𑀬𑁆𑀬𑀸𑀣. 𑀏𑀯𑀭𑀽𑀧𑀁 𑀘𑁂 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀯𑀺𑀯𑀸𑀤𑀫𑀽𑀮𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀦 𑀲𑀫𑀦𑀼𑀧𑀲𑁆𑀲𑁂𑀬𑁆𑀬𑀸𑀣. 𑀢𑀢𑁆𑀭 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀢𑀲𑁆𑀲𑁂𑀯 𑀧𑀸𑀧𑀓𑀲𑁆𑀲 𑀯𑀺𑀯𑀸𑀤𑀫𑀽𑀮𑀲𑁆𑀲 𑀆𑀬𑀢𑀺𑀁 𑀅𑀦𑀯𑀲𑁆𑀲𑀯𑀸𑀬 𑀧𑀝𑀺𑀧𑀚𑁆𑀚𑁂𑀬𑁆𑀬𑀸𑀣. 𑀏𑀯𑀫𑁂𑀢𑀲𑁆𑀲 𑀧𑀸𑀧𑀓𑀲𑁆𑀲 𑀯𑀺𑀯𑀸𑀤𑀫𑀽𑀮𑀲𑁆𑀲 𑀧𑀳𑀸𑀦𑀁 𑀳𑁄𑀢𑀺. 𑀏𑀯𑀫𑁂𑀢𑀲𑁆𑀲 𑀧𑀸𑀧𑀓𑀲𑁆𑀲 𑀯𑀺𑀯𑀸𑀤𑀫𑀽𑀮𑀲𑁆𑀲 𑀆𑀬𑀢𑀺𑀁 𑀅𑀦𑀯𑀲𑁆𑀲𑀯𑁄 𑀳𑁄𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀫𑀓𑁆𑀔𑀻 𑀳𑁄𑀢𑀺 𑀧𑀴𑀸𑀲𑀻. 𑀇𑀲𑁆𑀲𑀼𑀓𑀻 𑀳𑁄𑀢𑀺 𑀫𑀘𑁆𑀙𑀭𑀻. 𑀲𑀞𑁄 𑀳𑁄𑀢𑀺 𑀫𑀸𑀬𑀸𑀯𑀻. 𑀧𑀸𑀧𑀺𑀘𑁆𑀙𑁄 𑀳𑁄𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺. 𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀻 𑀳𑁄𑀢𑀺 𑀆𑀥𑀸𑀦𑀕𑁆𑀕𑀸𑀳𑀻 𑀤𑀼𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀻. 𑀬𑁄 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀻 𑀳𑁄𑀢𑀺 𑀆𑀥𑀸𑀦𑀕𑁆𑀕𑀸𑀳𑀻 𑀤𑀼𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀻, 𑀲𑁄 𑀲𑀢𑁆𑀣𑀭𑀺𑀧𑀺…𑀧𑁂… 𑀆𑀬𑀢𑀺𑀁 𑀅𑀦𑀯𑀲𑁆𑀲𑀯𑁄 𑀳𑁄𑀢𑀻’’𑀢𑀺 (𑀧𑀭𑀺. 𑁨𑁭𑁨; 𑀅. 𑀦𑀺. 𑁬.𑁩𑁬).

𑀢𑀢𑁆𑀣 𑀓𑁄𑀥𑀦𑁄𑀢𑀺 𑀓𑀼𑀚𑁆𑀛𑀦𑀮𑀓𑁆𑀔𑀡𑁂𑀦 𑀓𑁄𑀥𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀉𑀧𑀦𑀸𑀳𑀻𑀢𑀺 𑀯𑁂𑀭𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑀮𑀓𑁆𑀔𑀡𑁂𑀦 𑀉𑀧𑀦𑀸𑀳𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀦𑁆𑀢𑀺 𑀤𑁆𑀯𑀺𑀦𑁆𑀦𑀁 𑀪𑀺𑀓𑁆𑀔𑀽𑀦𑀁 𑀯𑀺𑀯𑀸𑀤𑁄 𑀓𑀣𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀢𑀻𑀢𑀺? 𑀓𑁄𑀲𑀫𑁆𑀩𑀓𑀓𑁆𑀔𑀦𑁆𑀥𑀓𑁂 (𑀫𑀳𑀸𑀯. 𑁪𑁫𑁧 𑀆𑀤𑀬𑁄) 𑀯𑀺𑀬 𑀤𑁆𑀯𑀻𑀲𑀼 𑀪𑀺𑀓𑁆𑀔𑀽𑀲𑀼 𑀯𑀺𑀯𑀸𑀤𑀁 𑀆𑀧𑀦𑁆𑀦𑁂𑀲𑀼 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀢𑁂𑀲𑀁 𑀅𑀦𑁆𑀢𑁂𑀯𑀸𑀲𑀺𑀓𑀸 𑀯𑀺𑀯𑀤𑀦𑁆𑀢𑀺, 𑀢𑁂𑀲𑀁 𑀑𑀯𑀸𑀤𑀁 𑀕𑀡𑁆𑀳𑀦𑁆𑀢𑁄 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀯𑀺𑀯𑀤𑀢𑀺, 𑀢𑀢𑁄 𑀢𑁂𑀲𑀁 𑀉𑀧𑀝𑁆𑀞𑀸𑀓𑀸𑀧𑀺 𑀯𑀺𑀯𑀤𑀦𑁆𑀢𑀺. 𑀅𑀣 𑀫𑀦𑀼𑀲𑁆𑀲𑀸𑀦𑀁 𑀆𑀭𑀓𑁆𑀔𑀤𑁂𑀯𑀢𑀸 𑀤𑁆𑀯𑁂 𑀓𑁄𑀝𑁆𑀞𑀸𑀲𑀸 𑀳𑁄𑀦𑁆𑀢𑀺. 𑀥𑀫𑁆𑀫𑀯𑀸𑀤𑀻𑀦𑀁 𑀆𑀭𑀓𑁆𑀔𑀤𑁂𑀯𑀢𑀸 𑀥𑀫𑁆𑀫𑀯𑀸𑀤𑀺𑀦𑀺𑀬𑁄 𑀳𑁄𑀦𑁆𑀢𑀺 𑀅𑀥𑀫𑁆𑀫𑀯𑀸𑀤𑀻𑀦𑀁 𑀅𑀥𑀫𑁆𑀫𑀯𑀸𑀤𑀺𑀦𑀺𑀬𑁄. 𑀢𑀢𑁄 𑀆𑀭𑀓𑁆𑀔𑀤𑁂𑀯𑀢𑀸𑀦𑀁 𑀫𑀺𑀢𑁆𑀢𑀸 𑀪𑀼𑀫𑁆𑀫𑀝𑁆𑀞𑀤𑁂𑀯𑀢𑀸 𑀪𑀺𑀚𑁆𑀚𑀦𑁆𑀢𑀺. 𑀏𑀯𑀁 𑀧𑀭𑀫𑁆𑀧𑀭𑀸𑀬 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀞𑀧𑁂𑀢𑁆𑀯𑀸 𑀅𑀭𑀺𑀬𑀲𑀸𑀯𑀓𑁂 𑀲𑀩𑁆𑀩𑁂 𑀤𑁂𑀯𑀫𑀦𑀼𑀲𑁆𑀲𑀸 𑀤𑁆𑀯𑁂 𑀓𑁄𑀝𑁆𑀞𑀸𑀲𑀸 𑀳𑁄𑀦𑁆𑀢𑀺. 𑀥𑀫𑁆𑀫𑀯𑀸𑀤𑀻𑀳𑀺 𑀧𑀦 𑀅𑀥𑀫𑁆𑀫𑀯𑀸𑀤𑀺𑀦𑁄𑀯 𑀩𑀳𑀼𑀢𑀭𑀸 𑀳𑁄𑀦𑁆𑀢𑀺. 𑀢𑀢𑁄 𑀬𑀁 𑀩𑀳𑀼𑀓𑁂𑀳𑀺 𑀕𑀳𑀺𑀢𑀁, 𑀲𑀩𑁆𑀩𑀁 𑀢𑀁 𑀲𑀘𑁆𑀘𑀦𑁆𑀢𑀺 𑀥𑀫𑁆𑀫𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀩𑀳𑀼𑀢𑀭𑀸𑀯 𑀅𑀥𑀫𑁆𑀫𑀁 𑀕𑀡𑁆𑀳𑀦𑁆𑀢𑀺. 𑀢𑁂 𑀅𑀥𑀫𑁆𑀫𑀁 𑀧𑀼𑀭𑀓𑁆𑀔𑀢𑁆𑀯𑀸 𑀯𑀺𑀳𑀭𑀦𑁆𑀢𑀸 𑀅𑀧𑀸𑀬𑁂𑀲𑀼 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀏𑀯𑀁 𑀤𑁆𑀯𑀺𑀦𑁆𑀦𑀁 𑀪𑀺𑀓𑁆𑀔𑀽𑀦𑀁 𑀯𑀺𑀯𑀸𑀤𑁄 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀳𑁄𑀢𑀺. 𑀅𑀚𑁆𑀛𑀢𑁆𑀢𑀁 𑀯𑀸𑀢𑀺 𑀢𑀼𑀫𑁆𑀳𑀸𑀓𑀁 𑀅𑀩𑁆𑀪𑀦𑁆𑀢𑀭𑀧𑀭𑀺𑀲𑀸𑀬 𑀯𑀸. 𑀩𑀳𑀺𑀤𑁆𑀥𑀸 𑀯𑀸𑀢𑀺 𑀧𑀭𑁂𑀲𑀁 𑀧𑀭𑀺𑀲𑀸𑀬 𑀯𑀸. 𑀫𑀓𑁆𑀔𑀻𑀢𑀺 𑀧𑀭𑁂𑀲𑀁 𑀕𑀼𑀡𑀫𑀓𑁆𑀔𑀡𑀮𑀓𑁆𑀔𑀡𑁂𑀦 𑀫𑀓𑁆𑀔𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀧𑀴𑀸𑀲𑀻𑀢𑀺 𑀬𑀼𑀕𑀕𑁆𑀕𑀸𑀳𑀮𑀓𑁆𑀔𑀡𑁂𑀦 𑀧𑀴𑀸𑀲𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀇𑀲𑁆𑀲𑀼𑀓𑀻𑀢𑀺 𑀧𑀭𑁂𑀲𑀁 𑀲𑀓𑁆𑀓𑀸𑀭𑀸𑀤𑀺𑀇𑀲𑁆𑀲𑀸𑀬𑀦𑀮𑀓𑁆𑀔𑀡𑀸𑀬 𑀇𑀲𑁆𑀲𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀫𑀘𑁆𑀙𑀭𑀻𑀢𑀺 𑀆𑀯𑀸𑀲𑀫𑀘𑁆𑀙𑀭𑀺𑀬𑀸𑀤𑀻𑀳𑀺 𑀧𑀜𑁆𑀘𑀳𑀺 𑀫𑀘𑁆𑀙𑀭𑀺𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀲𑀞𑁄𑀢𑀺 𑀓𑁂𑀭𑀸𑀝𑀺𑀓𑁄. 𑀫𑀸𑀬𑀸𑀯𑀻𑀢𑀺 𑀓𑀢𑀧𑀸𑀧𑀧𑀝𑀺𑀘𑁆𑀙𑀸𑀤𑀓𑁄. 𑀧𑀸𑀧𑀺𑀘𑁆𑀙𑁄𑀢𑀺 𑀅𑀲𑀦𑁆𑀢𑀲𑀫𑁆𑀪𑀸𑀯𑀦𑀺𑀘𑁆𑀙𑀓𑁄 𑀤𑀼𑀲𑁆𑀲𑀻𑀮𑁄. 𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀢𑀺 𑀦𑀢𑁆𑀣𑀺𑀓𑀯𑀸𑀤𑀻 𑀅𑀳𑁂𑀢𑀼𑀓𑀯𑀸𑀤𑀻 𑀅𑀓𑀺𑀭𑀺𑀬𑀯𑀸𑀤𑀻. 𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀻𑀢𑀺 𑀲𑀬𑀁 𑀤𑀺𑀝𑁆𑀞𑀺𑀫𑁂𑀯 𑀧𑀭𑀸𑀫𑀲𑀢𑀺. 𑀆𑀥𑀸𑀦𑀕𑁆𑀕𑀸𑀳𑀻𑀢𑀺 𑀤𑀴𑁆𑀳𑀕𑁆𑀕𑀸𑀳𑀻. 𑀤𑀼𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀻𑀢𑀺 𑀦 𑀲𑀓𑁆𑀓𑀸 𑀳𑁄𑀢𑀺 𑀕𑀳𑀺𑀢𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀢𑀼𑀁. 𑀔𑀼𑀤𑁆𑀤𑀓𑀯𑀢𑁆𑀣𑀼𑀯𑀺𑀪𑀗𑁆𑀕𑁂 𑀧𑀦 ‘‘𑀢𑀢𑁆𑀣 𑀓𑀢𑀫𑀸𑀦𑀺 𑀙 𑀯𑀺𑀯𑀸𑀤𑀫𑀽𑀮𑀸𑀦𑀺? 𑀓𑁄𑀥𑁄 𑀫𑀓𑁆𑀔𑁄 𑀇𑀲𑁆𑀲𑀸 𑀲𑀸𑀞𑁂𑀬𑁆𑀬𑀁 𑀧𑀸𑀧𑀺𑀘𑁆𑀙𑀢𑀸 𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀺𑀢𑀸, 𑀇𑀫𑀸𑀦𑀺 𑀙 𑀯𑀺𑀯𑀸𑀤𑀫𑀽𑀮𑀸𑀦𑀻’’𑀢𑀺 (𑀯𑀺𑀪. 𑁯𑁪𑁪) 𑀧𑀥𑀸𑀦𑀯𑀲𑁂𑀦 𑀏𑀓𑁂𑀓𑁄𑀬𑁂𑀯 𑀥𑀫𑁆𑀫𑁄 𑀯𑀼𑀢𑁆𑀢𑁄.

𑀙𑀳𑀺 𑀢𑀡𑁆𑀳𑀸𑀓𑀸𑀬𑁂𑀳𑀻𑀢𑀺 ‘‘𑀭𑀽𑀧𑀢𑀡𑁆𑀳𑀸, 𑀲𑀤𑁆𑀤𑀢𑀡𑁆𑀳𑀸, 𑀕𑀦𑁆𑀥𑀢𑀡𑁆𑀳𑀸, 𑀭𑀲𑀢𑀡𑁆𑀳𑀸, 𑀨𑁄𑀝𑁆𑀞𑀩𑁆𑀩𑀢𑀡𑁆𑀳𑀸, 𑀥𑀫𑁆𑀫𑀢𑀡𑁆𑀳𑀸’’𑀢𑀺 (𑀯𑀺𑀪. 𑁯𑁪𑁪) 𑀯𑀼𑀢𑁆𑀢𑀸𑀳𑀺 𑀙𑀳𑀺 𑀢𑀡𑁆𑀳𑀸𑀳𑀺. 𑀢𑀢𑁆𑀣 𑀬𑀲𑁆𑀫𑀸 𑀏𑀓𑁂𑀓𑀸𑀬𑁂𑀯 𑀢𑀡𑁆𑀳𑀸 𑀅𑀦𑁂𑀓𑀯𑀺𑀲𑀬𑀢𑁆𑀢𑀸 𑀏𑀓𑁂𑀓𑀲𑁆𑀫𑀺𑀫𑁆𑀧𑀺 𑀯𑀺𑀲𑀬𑁂 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀢𑁆𑀢𑀺𑀢𑁄 𑀅𑀦𑁂𑀓𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀲𑀫𑀽𑀳𑀝𑁆𑀞𑁂𑀦 𑀓𑀸𑀬𑀲𑀤𑁆𑀤𑁂𑀦 𑀬𑁄𑀚𑁂𑀢𑁆𑀯𑀸 𑀢𑀡𑁆𑀳𑀸𑀓𑀸𑀬𑀸𑀢𑀺 𑀯𑀼𑀢𑁆𑀢𑀁. 𑀢𑀡𑁆𑀳𑀸𑀓𑀸𑀬𑀸𑀢𑀺 𑀯𑀼𑀢𑁆𑀢𑁂𑀧𑀺 𑀢𑀡𑁆𑀳𑀸 𑀏𑀯. 𑀭𑀚𑁆𑀚𑀢𑀻𑀢𑀺 𑀲𑀬𑀁 𑀆𑀭𑀫𑁆𑀫𑀡𑁂 𑀭𑀚𑁆𑀚𑀢𑀺, 𑀲𑀸𑀭𑀢𑁆𑀢𑁄 𑀳𑁄𑀢𑀺.

𑀙𑀳𑀺 𑀤𑀺𑀝𑁆𑀞𑀺𑀕𑀢𑁂𑀳𑀻𑀢𑀺 𑀲𑀩𑁆𑀩𑀸𑀲𑀯𑀲𑀼𑀢𑁆𑀢𑁂 𑀯𑀼𑀢𑁆𑀢𑁂𑀳𑀺. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 𑁋

‘‘𑀢𑀲𑁆𑀲 𑀏𑀯𑀁 𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀭𑁄𑀢𑁄 𑀙𑀦𑁆𑀦𑀁 𑀤𑀺𑀝𑁆𑀞𑀻𑀦𑀁 𑀅𑀜𑁆𑀜𑀢𑀭𑀸 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺. ‘𑀅𑀢𑁆𑀣𑀺 𑀫𑁂 𑀅𑀢𑁆𑀢𑀸’𑀢𑀺 𑀯𑀸 𑀅𑀲𑁆𑀲 𑀲𑀘𑁆𑀘𑀢𑁄 𑀣𑁂𑀢𑀢𑁄 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺, ‘𑀦𑀢𑁆𑀣𑀺 𑀫𑁂 𑀅𑀢𑁆𑀢𑀸’𑀢𑀺 𑀯𑀸 𑀅𑀲𑁆𑀲 𑀲𑀘𑁆𑀘𑀢𑁄 𑀣𑁂𑀢𑀢𑁄 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺, ‘𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀲𑀜𑁆𑀚𑀸𑀦𑀸𑀫𑀻’𑀢𑀺 𑀯𑀸 𑀅𑀲𑁆𑀲 𑀲𑀘𑁆𑀘𑀢𑁄 𑀣𑁂𑀢𑀢𑁄 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺, ‘𑀅𑀢𑁆𑀢𑀦𑀸𑀯 𑀅𑀦𑀢𑁆𑀢𑀸𑀦𑀁 𑀲𑀜𑁆𑀚𑀸𑀦𑀸𑀫𑀻’𑀢𑀺 𑀯𑀸 𑀅𑀲𑁆𑀲 𑀲𑀘𑁆𑀘𑀢𑁄 𑀣𑁂𑀢𑀢𑁄 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺, ‘𑀅𑀦𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀲𑀜𑁆𑀚𑀸𑀦𑀸𑀫𑀻’𑀢𑀺 𑀯𑀸 𑀅𑀲𑁆𑀲 𑀲𑀘𑁆𑀘𑀢𑁄 𑀣𑁂𑀢𑀢𑁄 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺. 𑀅𑀣 𑀯𑀸 𑀧𑀦𑀲𑁆𑀲 𑀏𑀯𑀁 𑀤𑀺𑀝𑁆𑀞𑀺 𑀳𑁄𑀢𑀺 ‘𑀬𑁄 𑀫𑁂 𑀅𑀬𑀁 𑀅𑀢𑁆𑀢𑀸 𑀯𑀤𑁄 𑀯𑁂𑀤𑁂𑀬𑁆𑀬𑁄 𑀢𑀢𑁆𑀭 𑀢𑀢𑁆𑀭 𑀓𑀮𑁆𑀬𑀸𑀡𑀧𑀸𑀧𑀓𑀸𑀦𑀁 𑀓𑀫𑁆𑀫𑀸𑀦𑀁 𑀯𑀺𑀧𑀸𑀓𑀁 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀲𑁄 𑀘 𑀔𑁄 𑀧𑀦 𑀫𑁂 𑀅𑀬𑀁 𑀅𑀢𑁆𑀢𑀸 𑀦𑀺𑀘𑁆𑀘𑁄 𑀥𑀼𑀯𑁄 𑀲𑀲𑁆𑀲𑀢𑁄 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄 𑀲𑀲𑁆𑀲𑀢𑀺𑀲𑀫𑀁 𑀢𑀣𑁂𑀯 𑀞𑀲𑁆𑀲𑀢𑀻’’’𑀢𑀺 (𑀫. 𑀦𑀺. 𑁧.𑁧𑁯).

𑀢𑀢𑁆𑀣 𑀅𑀢𑁆𑀣𑀺 𑀫𑁂 𑀅𑀢𑁆𑀢𑀸𑀢𑀺 𑀲𑀲𑁆𑀲𑀢𑀤𑀺𑀝𑁆𑀞𑀺 𑀲𑀩𑁆𑀩𑀓𑀸𑀮𑁂𑀲𑀼 𑀅𑀢𑁆𑀢𑀦𑁄 𑀅𑀢𑁆𑀣𑀺𑀢𑀁 𑀕𑀡𑁆𑀳𑀸𑀢𑀺. 𑀲𑀘𑁆𑀘𑀢𑁄 𑀣𑁂𑀢𑀢𑁄𑀢𑀺 𑀪𑀽𑀢𑀢𑁄 𑀘 𑀣𑀺𑀭𑀢𑁄 𑀘, ‘‘𑀇𑀤𑀁 𑀲𑀘𑁆𑀘’’𑀦𑁆𑀢𑀺 𑀲𑀼𑀝𑁆𑀞𑀼 𑀤𑀴𑁆𑀳𑀪𑀸𑀯𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀢𑁆𑀣𑀺 𑀫𑁂 𑀅𑀢𑁆𑀢𑀸𑀢𑀺 𑀉𑀘𑁆𑀙𑁂𑀤𑀤𑀺𑀝𑁆𑀞𑀺 𑀲𑀢𑁄 𑀲𑀢𑁆𑀢𑀲𑁆𑀲 𑀢𑀢𑁆𑀣 𑀢𑀢𑁆𑀣 𑀯𑀺𑀪𑀯𑀕𑁆𑀕𑀳𑀡𑀢𑁄. 𑀅𑀣 𑀯𑀸 𑀧𑀼𑀭𑀺𑀫𑀸𑀧𑀺 𑀢𑀻𑀲𑀼 𑀓𑀸𑀮𑁂𑀲𑀼 𑀅𑀢𑁆𑀣𑀻𑀢𑀺 𑀕𑀳𑀡𑀢𑁄 𑀲𑀲𑁆𑀲𑀢𑀤𑀺𑀝𑁆𑀞𑀺, 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁂𑀯 𑀅𑀢𑁆𑀣𑀻𑀢𑀺 𑀕𑀡𑁆𑀳𑀦𑁆𑀢𑀻 𑀉𑀘𑁆𑀙𑁂𑀤𑀤𑀺𑀝𑁆𑀞𑀺, 𑀧𑀘𑁆𑀙𑀺𑀫𑀸𑀧𑀺 𑀅𑀢𑀻𑀢𑀸𑀦𑀸𑀕𑀢𑁂𑀲𑀼 𑀦𑀢𑁆𑀣𑀻𑀢𑀺 𑀕𑀳𑀡𑀢𑁄 ‘‘𑀪𑀲𑁆𑀲𑀦𑁆𑀢𑀸 𑀆𑀳𑀼𑀢𑀺𑀬𑁄’’𑀢𑀺 𑀕𑀳𑀺𑀢𑀤𑀺𑀝𑁆𑀞𑀺𑀕𑀢𑀺𑀓𑀸𑀦𑀁 𑀯𑀺𑀬 𑀉𑀘𑁆𑀙𑁂𑀤𑀤𑀺𑀝𑁆𑀞𑀺. 𑀅𑀢𑀻𑀢𑁂 𑀏𑀯 𑀦𑀢𑁆𑀣𑀻𑀢𑀺 𑀕𑀡𑁆𑀳𑀦𑁆𑀢𑀻 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀓𑀲𑁆𑀲 𑀯𑀺𑀬 𑀲𑀲𑁆𑀲𑀢𑀤𑀺𑀝𑁆𑀞𑀺. 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀲𑀜𑁆𑀚𑀸𑀦𑀸𑀫𑀻𑀢𑀺 𑀲𑀜𑁆𑀜𑀸𑀓𑁆𑀔𑀦𑁆𑀥𑀲𑀻𑀲𑁂𑀦 𑀔𑀦𑁆𑀥𑁂 𑀅𑀢𑁆𑀢𑀸𑀢𑀺 𑀕𑀳𑁂𑀢𑁆𑀯𑀸 𑀲𑀜𑁆𑀜𑀸𑀬 𑀅𑀯𑀲𑁂𑀲𑀓𑁆𑀔𑀦𑁆𑀥𑁂 𑀲𑀜𑁆𑀚𑀸𑀦𑀢𑁄 𑀇𑀫𑀺𑀦𑀸 𑀅𑀢𑁆𑀢𑀦𑀸 𑀇𑀫𑀁 𑀅𑀢𑁆𑀢𑀸𑀦𑀁 𑀲𑀜𑁆𑀚𑀸𑀦𑀸𑀫𑀻𑀢𑀺 𑀳𑁄𑀢𑀺. 𑀅𑀢𑁆𑀢𑀦𑀸𑀯 𑀅𑀦𑀢𑁆𑀢𑀸𑀦𑀦𑁆𑀢𑀺 𑀲𑀜𑁆𑀜𑀸𑀓𑁆𑀔𑀦𑁆𑀥𑀁𑀬𑁂𑀯 𑀅𑀢𑁆𑀢𑀸𑀢𑀺 𑀕𑀳𑁂𑀢𑁆𑀯𑀸, 𑀇𑀢𑀭𑁂 𑀘𑀢𑁆𑀢𑀸𑀭𑁄𑀧𑀺 𑀅𑀦𑀢𑁆𑀢𑀸𑀢𑀺 𑀕𑀳𑁂𑀢𑁆𑀯𑀸 𑀲𑀜𑁆𑀜𑀸𑀬 𑀢𑁂 𑀲𑀜𑁆𑀚𑀸𑀦𑀢𑁄 𑀏𑀯𑀁 𑀳𑁄𑀢𑀺. 𑀅𑀦𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀦𑁆𑀢𑀺 𑀲𑀜𑁆𑀜𑀸𑀓𑁆𑀔𑀦𑁆𑀥𑀁 𑀅𑀦𑀢𑁆𑀢𑀸𑀢𑀺 𑀕𑀳𑁂𑀢𑁆𑀯𑀸, 𑀇𑀢𑀭𑁂 𑀘𑀢𑁆𑀢𑀸𑀭𑁄𑀧𑀺 𑀅𑀢𑁆𑀢𑀸𑀢𑀺 𑀕𑀳𑁂𑀢𑁆𑀯𑀸 𑀲𑀜𑁆𑀜𑀸𑀬 𑀢𑁂 𑀲𑀜𑁆𑀚𑀸𑀦𑀢𑁄 𑀏𑀯𑀁 𑀳𑁄𑀢𑀺. 𑀲𑀩𑁆𑀩𑀸𑀧𑀺 𑀲𑀲𑁆𑀲𑀢𑀼𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑁄𑀯. 𑀯𑀤𑁄 𑀯𑁂𑀤𑁂𑀬𑁆𑀬𑁄𑀢𑀺𑀆𑀤𑀬𑁄 𑀧𑀦 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀸 𑀏𑀯 𑀅𑀪𑀺𑀦𑀺𑀯𑁂𑀲𑀸𑀓𑀸𑀭𑀸. 𑀢𑀢𑁆𑀣 𑀯𑀤𑀢𑀻𑀢𑀺 𑀯𑀤𑁄, 𑀯𑀘𑀻𑀓𑀫𑁆𑀫𑀲𑁆𑀲 𑀓𑀸𑀭𑀓𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑁂𑀤𑀬𑀢𑀻𑀢𑀺 𑀯𑁂𑀤𑁂𑀬𑁆𑀬𑁄, 𑀚𑀸𑀦𑀸𑀢𑀺 𑀅𑀦𑀼𑀪𑀯𑀢𑀺 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀺𑀁 𑀯𑁂𑀤𑁂𑀢𑀻𑀢𑀺? 𑀢𑀢𑁆𑀭 𑀢𑀢𑁆𑀭 𑀓𑀮𑁆𑀬𑀸𑀡𑀧𑀸𑀧𑀓𑀸𑀦𑀁 𑀓𑀫𑁆𑀫𑀸𑀦𑀁 𑀯𑀺𑀧𑀸𑀓𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀢𑀢𑁆𑀭 𑀢𑀢𑁆𑀭𑀸𑀢𑀺 𑀢𑁂𑀲𑀼 𑀢𑁂𑀲𑀼 𑀬𑁄𑀦𑀺𑀕𑀢𑀺𑀞𑀺𑀢𑀺𑀦𑀺𑀯𑀸𑀲𑀦𑀺𑀓𑀸𑀬𑁂𑀲𑀼 𑀆𑀭𑀫𑁆𑀫𑀡𑁂𑀲𑀼 𑀯𑀸. 𑀦𑀺𑀘𑁆𑀘𑁄𑀢𑀺 𑀉𑀧𑁆𑀧𑀸𑀤𑀯𑀬𑀭𑀳𑀺𑀢𑁄. 𑀥𑀼𑀯𑁄𑀢𑀺 𑀣𑀺𑀭𑁄 𑀲𑀸𑀭𑀪𑀽𑀢𑁄. 𑀲𑀲𑁆𑀲𑀢𑁄𑀢𑀺 𑀲𑀩𑁆𑀩𑀓𑀸𑀮𑀺𑀓𑁄. 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄𑀢𑀺 𑀅𑀢𑁆𑀢𑀦𑁄 𑀧𑀓𑀢𑀺𑀪𑀸𑀯𑀁 𑀅𑀯𑀺𑀚𑀳𑀦𑀥𑀫𑁆𑀫𑁄, 𑀓𑀓𑀡𑁆𑀝𑀓𑁄 𑀯𑀺𑀬 𑀦𑀸𑀦𑀧𑁆𑀧𑀓𑀸𑀭𑀢𑀁 𑀦𑀸𑀧𑀚𑁆𑀚𑀢𑀺. 𑀲𑀲𑁆𑀲𑀢𑀺𑀲𑀫𑀦𑁆𑀢𑀺 𑀘𑀦𑁆𑀤𑀲𑀽𑀭𑀺𑀬𑀲𑀫𑀼𑀤𑁆𑀤𑀫𑀳𑀸𑀧𑀣𑀯𑀻𑀧𑀩𑁆𑀩𑀢𑀸 𑀮𑁄𑀓𑀯𑁄𑀳𑀸𑀭𑁂𑀦 𑀲𑀲𑁆𑀲𑀢𑀺𑀬𑁄𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀲𑀲𑁆𑀲𑀢𑀻𑀳𑀺 𑀲𑀫𑀁 𑀲𑀲𑁆𑀲𑀢𑀺𑀲𑀫𑀁. 𑀬𑀸𑀯 𑀲𑀲𑁆𑀲𑀢𑀺𑀬𑁄 𑀢𑀺𑀝𑁆𑀞𑀦𑁆𑀢𑀺, 𑀢𑀸𑀯 𑀢𑀣𑁂𑀯 𑀞𑀲𑁆𑀲𑀢𑀻𑀢𑀺 𑀕𑀡𑁆𑀳𑀢𑁄 𑀏𑀯𑀁 𑀤𑀺𑀝𑁆𑀞𑀺 𑀳𑁄𑀢𑀺.

𑀔𑀼𑀤𑁆𑀤𑀓𑀯𑀢𑁆𑀣𑀼𑀯𑀺𑀪𑀗𑁆𑀕𑁂 𑀧𑀦 ‘‘𑀢𑀢𑁆𑀭 𑀢𑀢𑁆𑀭 𑀤𑀻𑀖𑀭𑀢𑁆𑀢𑀁 𑀓𑀮𑁆𑀬𑀸𑀡𑀧𑀸𑀧𑀓𑀸𑀦𑀁 𑀓𑀫𑁆𑀫𑀸𑀦𑀁 𑀯𑀺𑀧𑀸𑀓𑀁 𑀧𑀘𑁆𑀘𑀦𑀼𑀪𑁄𑀢𑀺, 𑀦 𑀲𑁄 𑀚𑀸𑀢𑁄 𑀦𑀸𑀳𑁄𑀲𑀺, 𑀦 𑀲𑁄 𑀚𑀸𑀢𑁄 𑀦 𑀪𑀯𑀺𑀲𑁆𑀲𑀢𑀺, 𑀦𑀺𑀘𑁆𑀘𑁄 𑀥𑀼𑀯𑁄 𑀲𑀲𑁆𑀲𑀢𑁄 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄𑀢𑀺 𑀯𑀸 𑀧𑀦𑀲𑁆𑀲 𑀲𑀘𑁆𑀘𑀢𑁄 𑀣𑁂𑀢𑀢𑁄 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀻’’𑀢𑀺 (𑀯𑀺𑀪. 𑁯𑁪𑁮) 𑀙 𑀤𑀺𑀝𑁆𑀞𑀻 𑀏𑀯𑀁 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀸.

𑀢𑀢𑁆𑀣 𑀦 𑀲𑁄 𑀚𑀸𑀢𑁄 𑀦𑀸𑀳𑁄𑀲𑀻𑀢𑀺 𑀲𑁄 𑀅𑀢𑁆𑀢𑀸 𑀅𑀚𑀸𑀢𑀺𑀥𑀫𑁆𑀫𑀢𑁄 𑀦 𑀚𑀸𑀢𑁄 𑀦𑀸𑀫, 𑀲𑀤𑀸 𑀯𑀺𑀚𑁆𑀚𑀫𑀸𑀦𑁄𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯 𑀅𑀢𑀻𑀢𑁂 𑀦𑀸𑀳𑁄𑀲𑀺, 𑀅𑀦𑀸𑀕𑀢𑁂 𑀦 𑀪𑀯𑀺𑀲𑁆𑀲𑀢𑀺. 𑀬𑁄 𑀳𑀺 𑀚𑀸𑀢𑁄, 𑀲𑁄 𑀅𑀳𑁄𑀲𑀺. 𑀬𑁄 𑀘 𑀚𑀸𑀬𑀺𑀲𑁆𑀲𑀢𑀺, 𑀲𑁄 𑀪𑀯𑀺𑀲𑁆𑀲𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀅𑀣 𑀯𑀸 𑀦 𑀲𑁄 𑀚𑀸𑀢𑁄 𑀦𑀸𑀳𑁄𑀲𑀻𑀢𑀺 𑀲𑁄 𑀲𑀤𑀸 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀅𑀢𑀻𑀢𑁂𑀧𑀺 𑀦 𑀚𑀸𑀢𑀼 𑀦 𑀅𑀳𑁄𑀲𑀺, 𑀅𑀦𑀸𑀕𑀢𑁂𑀧𑀺 𑀦 𑀚𑀸𑀢𑀼 𑀦 𑀪𑀯𑀺𑀲𑁆𑀲𑀢𑀺. 𑀅𑀦𑀼𑀲𑀬𑀸 𑀯𑀼𑀢𑁆𑀢𑀢𑁆𑀣𑀸.

𑀲𑀢𑁆𑀢𑀳𑀺 𑀲𑀜𑁆𑀜𑁄𑀚𑀦𑁂𑀳𑀻𑀢𑀺 𑀲𑀢𑁆𑀢𑀓𑀦𑀺𑀧𑀸𑀢𑁂 𑀯𑀼𑀢𑁆𑀢𑁂𑀳𑀺. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 𑁋

‘‘𑀲𑀢𑁆𑀢𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀲𑀁𑀬𑁄𑀚𑀦𑀸𑀦𑀺. 𑀓𑀢𑀫𑀸𑀦𑀺 𑀲𑀢𑁆𑀢? 𑀅𑀦𑀼𑀦𑀬𑀲𑀁𑀬𑁄𑀚𑀦𑀁, 𑀧𑀝𑀺𑀖𑀲𑀁𑀬𑁄𑀚𑀦𑀁, 𑀤𑀺𑀝𑁆𑀞𑀺𑀲𑀁𑀬𑁄𑀚𑀦𑀁, 𑀯𑀺𑀘𑀺𑀓𑀺𑀘𑁆𑀙𑀸𑀲𑀁𑀬𑁄𑀚𑀦𑀁, 𑀫𑀸𑀦𑀲𑀁𑀬𑁄𑀚𑀦𑀁, 𑀪𑀯𑀭𑀸𑀕𑀲𑀁𑀬𑁄𑀚𑀦𑀁, 𑀅𑀯𑀺𑀚𑁆𑀚𑀸𑀲𑀁𑀬𑁄𑀚𑀦𑀁. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀲𑀁𑀬𑁄𑀚𑀦𑀸𑀦𑀻’’𑀢𑀺 (𑀅. 𑀦𑀺. 𑁭.𑁮).

𑀢𑀢𑁆𑀣 𑀅𑀦𑀼𑀦𑀬𑀲𑀁𑀬𑁄𑀚𑀦𑀦𑁆𑀢𑀺 𑀓𑀸𑀫𑀭𑀸𑀕𑀲𑀁𑀬𑁄𑀚𑀦𑀁. 𑀲𑀩𑁆𑀩𑀸𑀦𑁂𑀯𑁂𑀢𑀸𑀦𑀺 𑀩𑀦𑁆𑀥𑀦𑀝𑁆𑀞𑁂𑀦 𑀲𑀁𑀬𑁄𑀚𑀦𑀸𑀦𑀺.

𑀲𑀢𑁆𑀢𑀳𑀺 𑀫𑀸𑀦𑁂𑀳𑀻𑀢𑀺 𑀔𑀼𑀤𑁆𑀤𑀓𑀯𑀢𑁆𑀣𑀼𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑁂𑀳𑀺. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 𑁋

‘‘𑀫𑀸𑀦𑁄, 𑀅𑀢𑀺𑀫𑀸𑀦𑁄, 𑀫𑀸𑀦𑀸𑀢𑀺𑀫𑀸𑀦𑁄, 𑀑𑀫𑀸𑀦𑁄, 𑀅𑀥𑀺𑀫𑀸𑀦𑁄, 𑀅𑀲𑁆𑀫𑀺𑀫𑀸𑀦𑁄, 𑀫𑀺𑀘𑁆𑀙𑀸𑀫𑀸𑀦𑁄’’𑀢𑀺 (𑀯𑀺𑀪. 𑁯𑁫𑁦).

𑀢𑀢𑁆𑀣 𑀫𑀸𑀦𑁄𑀢𑀺 𑀲𑁂𑀬𑁆𑀬𑀸𑀤𑀺𑀯𑀲𑁂𑀦 𑀧𑀼𑀕𑁆𑀕𑀮𑀁 𑀅𑀦𑀸𑀫𑀲𑀺𑀢𑁆𑀯𑀸 𑀚𑀸𑀢𑀺𑀆𑀤𑀻𑀲𑀼 𑀯𑀢𑁆𑀣𑀼𑀯𑀲𑁂𑀦𑁂𑀯 𑀉𑀦𑁆𑀦𑀢𑀺. 𑀅𑀢𑀺𑀫𑀸𑀦𑁄𑀢𑀺 𑀚𑀸𑀢𑀺𑀆𑀤𑀻𑀳𑀺 ‘‘𑀫𑀬𑀸 𑀲𑀤𑀺𑀲𑁄 𑀦𑀢𑁆𑀣𑀻’’𑀢𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀉𑀦𑁆𑀦𑀢𑀺. 𑀫𑀸𑀦𑀸𑀢𑀺𑀫𑀸𑀦𑁄𑀢𑀺 ‘‘𑀅𑀬𑀁 𑀧𑀼𑀩𑁆𑀩𑁂 𑀫𑀬𑀸 𑀲𑀤𑀺𑀲𑁄, 𑀇𑀤𑀸𑀦𑀺 𑀅𑀳𑀁 𑀲𑁂𑀝𑁆𑀞𑁄, 𑀅𑀬𑀁 𑀳𑀻𑀦𑀢𑀭𑁄’’𑀢𑀺 𑀉𑀧𑁆𑀧𑀦𑁆𑀦𑀫𑀸𑀦𑁄. 𑀑𑀫𑀸𑀦𑁄𑀢𑀺 𑀚𑀸𑀢𑀺𑀆𑀤𑀻𑀳𑀺 𑀅𑀢𑁆𑀢𑀸𑀦𑀁 𑀳𑁂𑀝𑁆𑀞𑀸 𑀓𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑁄, 𑀳𑀻𑀦𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄𑀬𑁂𑀯. 𑀅𑀥𑀺𑀫𑀸𑀦𑁄𑀢𑀺 𑀅𑀦𑀥𑀺𑀕𑀢𑁂𑀬𑁂𑀯 𑀘𑀢𑀼𑀲𑀘𑁆𑀘𑀥𑀫𑁆𑀫𑁂 𑀅𑀥𑀺𑀕𑀢𑁄𑀢𑀺 𑀫𑀸𑀦𑁄. 𑀅𑀬𑀁 𑀧𑀦 𑀅𑀥𑀺𑀫𑀸𑀦𑁄 𑀧𑀭𑀺𑀲𑀼𑀤𑁆𑀥𑀲𑀻𑀮𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑁂 𑀅𑀧𑁆𑀧𑀫𑀢𑁆𑀢𑀲𑁆𑀲 𑀦𑀸𑀫𑀭𑀽𑀧𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂𑀦 𑀯𑀺𑀢𑀺𑀡𑁆𑀡𑀓𑀗𑁆𑀔𑀲𑁆𑀲 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀦𑁆𑀢𑀲𑁆𑀲 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀲𑁆𑀲 𑀧𑀼𑀣𑀼𑀚𑁆𑀚𑀦𑀲𑁆𑀲 𑀉𑀧𑁆𑀧𑀚𑁆𑀚𑀢𑀺, 𑀦 𑀅𑀜𑁆𑀜𑁂𑀲𑀁. 𑀅𑀲𑁆𑀫𑀺𑀫𑀸𑀦𑁄𑀢𑀺 𑀭𑀽𑀧𑀸𑀤𑀻𑀲𑀼 𑀔𑀦𑁆𑀥𑁂𑀲𑀼 𑀅𑀲𑁆𑀫𑀻𑀢𑀺 𑀫𑀸𑀦𑁄, ‘‘𑀅𑀳𑀁 𑀭𑀽𑀧’’𑀦𑁆𑀢𑀺𑀆𑀤𑀺𑀯𑀲𑁂𑀦 𑀉𑀧𑁆𑀧𑀦𑁆𑀦𑀫𑀸𑀦𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀺𑀘𑁆𑀙𑀸𑀫𑀸𑀦𑁄𑀢𑀺 𑀧𑀸𑀧𑀓𑁂𑀦 𑀓𑀫𑁆𑀫𑀸𑀬𑀢𑀦𑀸𑀤𑀺𑀦𑀸 𑀉𑀧𑁆𑀧𑀦𑁆𑀦𑀫𑀸𑀦𑁄.

𑀮𑁄𑀓𑀥𑀫𑁆𑀫𑀸 𑀯𑀼𑀢𑁆𑀢𑀢𑁆𑀣𑀸. 𑀲𑀫𑁆𑀧𑀭𑀺𑀯𑀢𑁆𑀢𑀢𑀻𑀢𑀺 𑀮𑁄𑀓𑀥𑀫𑁆𑀫𑁂𑀳𑀺 𑀳𑁂𑀢𑀼𑀪𑀽𑀢𑁂𑀳𑀺 𑀮𑀸𑀪𑀸𑀤𑀻𑀲𑀼 𑀘𑀢𑀽𑀲𑀼 𑀅𑀦𑀼𑀭𑁄𑀥𑀯𑀲𑁂𑀦, 𑀅𑀮𑀸𑀪𑀸𑀤𑀻𑀲𑀼 𑀘𑀢𑀽𑀲𑀼 𑀧𑀝𑀺𑀯𑀺𑀭𑁄𑀥𑀯𑀲𑁂𑀦 𑀪𑀼𑀲𑀁 𑀦𑀺𑀯𑀢𑁆𑀢𑀢𑀺, 𑀧𑀓𑀢𑀺𑀪𑀸𑀯𑀁 𑀚𑀳𑀸𑀢𑀻𑀢𑀺 𑀅𑀢𑁆𑀣𑁄. 𑀫𑀺𑀘𑁆𑀙𑀢𑁆𑀢𑀸𑀧𑀺 𑀯𑀼𑀢𑁆𑀢𑀢𑁆𑀣𑀸. 𑀦𑀺𑀬𑁆𑀬𑀸𑀢𑁄𑀢𑀺 𑀕𑀢𑁄 𑀧𑀓𑁆𑀔𑀦𑁆𑀤𑁄, 𑀅𑀪𑀺𑀪𑀽𑀢𑁄𑀢𑀺 𑀅𑀢𑁆𑀣𑁄.

𑀅𑀝𑁆𑀞𑀳𑀺 𑀧𑀼𑀭𑀺𑀲𑀤𑁄𑀲𑁂𑀳𑀻𑀢𑀺 𑀅𑀝𑁆𑀞𑀓𑀦𑀺𑀧𑀸𑀢𑁂 𑀉𑀧𑀫𑀸𑀳𑀺 𑀲𑀳, 𑀔𑀼𑀤𑁆𑀤𑀓𑀯𑀢𑁆𑀣𑀼𑀯𑀺𑀪𑀗𑁆𑀕𑁂 𑀉𑀧𑀫𑀁 𑀯𑀺𑀦𑀸 𑀯𑀼𑀢𑁆𑀢𑁂𑀳𑀺. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 𑁋

‘‘𑀓𑀢𑀫𑁂 𑀅𑀝𑁆𑀞 𑀧𑀼𑀭𑀺𑀲𑀤𑁄𑀲𑀸? 𑀇𑀥 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀁 𑀆𑀧𑀢𑁆𑀢𑀺𑀬𑀸 𑀘𑁄𑀤𑁂𑀦𑁆𑀢𑀺. 𑀲𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀳𑀺 𑀆𑀧𑀢𑁆𑀢𑀺𑀬𑀸 𑀘𑁄𑀤𑀺𑀬𑀫𑀸𑀦𑁄 ‘𑀦 𑀲𑀭𑀸𑀫𑀺 𑀦 𑀲𑀭𑀸𑀫𑀻’𑀢𑀺 𑀅𑀲𑁆𑀲𑀢𑀺𑀬𑀸𑀯 𑀦𑀺𑀩𑁆𑀩𑁂𑀞𑁂𑀢𑀺. 𑀅𑀬𑀁 𑀧𑀞𑀫𑁄 𑀧𑀼𑀭𑀺𑀲𑀤𑁄𑀲𑁄.

‘‘𑀧𑀼𑀦 𑀘𑀧𑀭𑀁 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀁 𑀆𑀧𑀢𑁆𑀢𑀺𑀬𑀸 𑀘𑁄𑀤𑁂𑀦𑁆𑀢𑀺. 𑀲𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀳𑀺 𑀆𑀧𑀢𑁆𑀢𑀺𑀬𑀸 𑀘𑁄𑀤𑀺𑀬𑀫𑀸𑀦𑁄 𑀘𑁄𑀤𑀓𑀁𑀬𑁂𑀯 𑀧𑀝𑀺𑀧𑁆𑀨𑀭𑀢𑀺 ‘𑀓𑀺𑀁 𑀦𑀼 𑀔𑁄 𑀢𑀼𑀬𑁆𑀳𑀁 𑀩𑀸𑀮𑀲𑁆𑀲 𑀅𑀩𑁆𑀬𑀢𑁆𑀢𑀲𑁆𑀲 𑀪𑀡𑀺𑀢𑁂𑀦, 𑀢𑁆𑀯𑀫𑁆𑀧𑀺 𑀦𑀸𑀫 𑀫𑀁 𑀪𑀡𑀺𑀢𑀩𑁆𑀩𑀁 𑀫𑀜𑁆𑀜𑀲𑀻’𑀢𑀺? 𑀅𑀬𑀁 𑀤𑀼𑀢𑀺𑀬𑁄 𑀧𑀼𑀭𑀺𑀲𑀤𑁄𑀲𑁄.

‘‘𑀧𑀼𑀦 𑀘𑀧𑀭𑀁 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀁 𑀆𑀧𑀢𑁆𑀢𑀺𑀬𑀸 𑀘𑁄𑀤𑁂𑀦𑁆𑀢𑀺. 𑀲𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀳𑀺 𑀆𑀧𑀢𑁆𑀢𑀺𑀬𑀸 𑀘𑁄𑀤𑀺𑀬𑀫𑀸𑀦𑁄 𑀘𑁄𑀤𑀓𑀁𑀬𑁂𑀯 𑀧𑀘𑁆𑀘𑀸𑀭𑁄𑀧𑁂𑀢𑀺 ‘𑀢𑁆𑀯𑀫𑁆𑀧𑀺 𑀔𑁄𑀲𑀺 𑀇𑀢𑁆𑀣𑀦𑁆𑀦𑀸𑀫𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄, 𑀢𑁆𑀯𑀁 𑀢𑀸𑀯 𑀧𑀞𑀫𑀁 𑀧𑀝𑀺𑀓𑀭𑁄𑀳𑀻’𑀢𑀺. 𑀅𑀬𑀁 𑀢𑀢𑀺𑀬𑁄 𑀧𑀼𑀭𑀺𑀲𑀤𑁄𑀲𑁄.

‘‘𑀧𑀼𑀦 𑀘𑀧𑀭𑀁 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀁 𑀆𑀧𑀢𑁆𑀢𑀺𑀬𑀸 𑀘𑁄𑀤𑁂𑀦𑁆𑀢𑀺. 𑀲𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀳𑀺 𑀆𑀧𑀢𑁆𑀢𑀺𑀬𑀸 𑀘𑁄𑀤𑀺𑀬𑀫𑀸𑀦𑁄 𑀅𑀜𑁆𑀜𑁂𑀦𑀜𑁆𑀜𑀁 𑀧𑀝𑀺𑀘𑀭𑀢𑀺, 𑀩𑀳𑀺𑀤𑁆𑀥𑀸 𑀓𑀣𑀁 𑀅𑀧𑀦𑀸𑀫𑁂𑀢𑀺, 𑀓𑁄𑀧𑀜𑁆𑀘 𑀤𑁄𑀲𑀜𑁆𑀘 𑀅𑀧𑁆𑀧𑀘𑁆𑀘𑀬𑀜𑁆𑀘 𑀧𑀸𑀢𑀼𑀓𑀭𑁄𑀢𑀺. 𑀅𑀬𑀁 𑀘𑀢𑀼𑀢𑁆𑀣𑁄 𑀧𑀼𑀭𑀺𑀲𑀤𑁄𑀲𑁄.

‘‘𑀧𑀼𑀦 𑀘𑀧𑀭𑀁 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀁 𑀆𑀧𑀢𑁆𑀢𑀺𑀬𑀸 𑀘𑁄𑀤𑁂𑀦𑁆𑀢𑀺. 𑀲𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀳𑀺 𑀆𑀧𑀢𑁆𑀢𑀺𑀬𑀸 𑀘𑁄𑀤𑀺𑀬𑀫𑀸𑀦𑁄 𑀲𑀗𑁆𑀖𑀫𑀚𑁆𑀛𑁂 𑀩𑀸𑀳𑀸𑀯𑀺𑀓𑁆𑀔𑁂𑀧𑀓𑀁 𑀪𑀡𑀢𑀺. 𑀅𑀬𑀁 𑀧𑀜𑁆𑀘𑀫𑁄 𑀧𑀼𑀭𑀺𑀲𑀤𑁄𑀲𑁄.

‘‘𑀧𑀼𑀦 𑀘𑀧𑀭𑀁 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀁 𑀆𑀧𑀢𑁆𑀢𑀺𑀬𑀸 𑀘𑁄𑀤𑁂𑀦𑁆𑀢𑀺. 𑀲𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀳𑀺 𑀆𑀧𑀢𑁆𑀢𑀺𑀬𑀸 𑀘𑁄𑀤𑀺𑀬𑀫𑀸𑀦𑁄 𑀅𑀦𑀸𑀤𑀺𑀬𑀺𑀢𑁆𑀯𑀸 𑀲𑀗𑁆𑀖𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀘𑁄𑀤𑀓𑀁 𑀲𑀸𑀧𑀢𑁆𑀢𑀺𑀓𑁄𑀯 𑀬𑁂𑀦 𑀓𑀸𑀫𑀁 𑀧𑀓𑁆𑀓𑀫𑀢𑀺. 𑀅𑀬𑀁 𑀙𑀝𑁆𑀞𑁄 𑀧𑀼𑀭𑀺𑀲𑀤𑁄𑀲𑁄.

‘‘𑀧𑀼𑀦 𑀘𑀧𑀭𑀁 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀁 𑀆𑀧𑀢𑁆𑀢𑀺𑀬𑀸 𑀘𑁄𑀤𑁂𑀦𑁆𑀢𑀺. 𑀲𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀳𑀺 𑀆𑀧𑀢𑁆𑀢𑀺𑀬𑀸 𑀘𑁄𑀤𑀺𑀬𑀫𑀸𑀦𑁄 ‘𑀦𑁂𑀯𑀸𑀳𑀁 𑀆𑀧𑀦𑁆𑀦𑁄𑀫𑁆𑀳𑀺, 𑀦 𑀧𑀦𑀸𑀳𑀁 𑀅𑀦𑀸𑀧𑀦𑁆𑀦𑁄𑀫𑁆𑀳𑀻’𑀢𑀺 𑀲𑁄 𑀢𑀼𑀡𑁆𑀳𑀻𑀪𑀽𑀢𑁄 𑀲𑀗𑁆𑀖𑀁 𑀯𑀺𑀳𑁂𑀲𑁂𑀢𑀺. 𑀅𑀬𑀁 𑀲𑀢𑁆𑀢𑀫𑁄 𑀧𑀼𑀭𑀺𑀲𑀤𑁄𑀲𑁄.

‘‘𑀧𑀼𑀦 𑀘𑀧𑀭𑀁 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀁 𑀆𑀧𑀢𑁆𑀢𑀺𑀬𑀸 𑀘𑁄𑀤𑁂𑀦𑁆𑀢𑀺. 𑀲𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀳𑀺 𑀆𑀧𑀢𑁆𑀢𑀺𑀬𑀸 𑀘𑁄𑀤𑀺𑀬𑀫𑀸𑀦𑁄 𑀏𑀯𑀫𑀸𑀳 𑁋 ‘𑀓𑀺𑀁 𑀦𑀼 𑀔𑁄 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀅𑀢𑀺𑀩𑀸𑀴𑁆𑀳𑀁 𑀫𑀬𑀺 𑀩𑁆𑀬𑀸𑀯𑀝𑀸? 𑀇𑀤𑀸𑀦𑀸𑀳𑀁 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀺𑀲𑁆𑀲𑀸𑀫𑀻’𑀢𑀺. 𑀲𑁄 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀺𑀢𑁆𑀯𑀸 𑀏𑀯𑀫𑀸𑀳 ‘𑀇𑀤𑀸𑀦𑀺 𑀔𑁄 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀅𑀢𑁆𑀢𑀫𑀦𑀸 𑀳𑁄𑀣𑀸’𑀢𑀺. 𑀅𑀬𑀁 𑀅𑀝𑁆𑀞𑀫𑁄 𑀧𑀼𑀭𑀺𑀲𑀤𑁄𑀲𑁄. 𑀇𑀫𑁂 𑀅𑀝𑁆𑀞 𑀧𑀼𑀭𑀺𑀲𑀤𑁄𑀲𑀸’’𑀢𑀺 (𑀯𑀺𑀪. 𑁯𑁫𑁭; 𑀅. 𑀦𑀺. 𑁮.𑁧𑁪).

𑀢𑀢𑁆𑀣 𑀧𑀼𑀭𑀺𑀲𑀤𑁄𑀲𑀸𑀢𑀺 𑀧𑀼𑀭𑀺𑀲𑀸𑀦𑀁 𑀤𑁄𑀲𑀸, 𑀢𑁂 𑀧𑀦 𑀧𑀼𑀭𑀺𑀲𑀲𑀦𑁆𑀢𑀸𑀦𑀁 𑀤𑀽𑀲𑁂𑀦𑁆𑀢𑀻𑀢𑀺 𑀤𑁄𑀲𑀸. 𑀦 𑀲𑀭𑀸𑀫𑀺 𑀦 𑀲𑀭𑀸𑀫𑀻𑀢𑀺 ‘‘𑀫𑀬𑀸 𑀏𑀢𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀝𑁆𑀞𑀸𑀦𑀁 𑀦𑀲𑁆𑀲𑀭𑀸𑀫𑀺 𑀦 𑀲𑀮𑁆𑀮𑀓𑁆𑀔𑁂𑀫𑀻’’𑀢𑀺 𑀏𑀯𑀁 𑀅𑀲𑁆𑀲𑀢𑀺𑀪𑀸𑀯𑁂𑀦 𑀦𑀺𑀩𑁆𑀩𑁂𑀞𑁂𑀢𑀺 𑀫𑁄𑀘𑁂𑀢𑀺. 𑀘𑁄𑀤𑀓𑀁𑀬𑁂𑀯 𑀧𑀝𑀺𑀧𑁆𑀨𑀭𑀢𑀻𑀢𑀺 𑀧𑀝𑀺𑀯𑀺𑀭𑀼𑀤𑁆𑀥𑁄 𑀳𑀼𑀢𑁆𑀯𑀸 𑀨𑀭𑀢𑀺, 𑀧𑀝𑀺𑀆𑀡𑀺𑀪𑀸𑀯𑁂𑀦 𑀢𑀺𑀝𑁆𑀞𑀢𑀺. 𑀓𑀺𑀁 𑀦𑀼 𑀔𑁄 𑀢𑀼𑀬𑁆𑀳𑀦𑁆𑀢𑀺 𑀢𑀼𑀬𑁆𑀳𑀁 𑀩𑀸𑀮𑀲𑁆𑀲 𑀅𑀩𑁆𑀬𑀢𑁆𑀢𑀲𑁆𑀲 𑀪𑀡𑀺𑀢𑁂𑀦 𑀦𑀸𑀫 𑀓𑀺𑀁, 𑀬𑁄 𑀢𑁆𑀯𑀁 𑀦𑁂𑀯 𑀯𑀢𑁆𑀣𑀼𑀁, 𑀦 𑀆𑀧𑀢𑁆𑀢𑀺𑀁, 𑀦 𑀘𑁄𑀤𑀦𑀁 𑀚𑀸𑀦𑀸𑀲𑀻𑀢𑀺 𑀤𑀻𑀧𑁂𑀢𑀺. 𑀢𑁆𑀯𑀫𑁆𑀧𑀺 𑀦𑀸𑀫 𑀏𑀯𑀁 𑀓𑀺𑀜𑁆𑀘𑀺 𑀅𑀚𑀸𑀦𑀦𑁆𑀢𑁄 𑀪𑀡𑀺𑀢𑀩𑁆𑀩𑀁 𑀫𑀜𑁆𑀜𑀲𑀻𑀢𑀺 𑀅𑀚𑁆𑀛𑁄𑀢𑁆𑀣𑀭𑀢𑀺. 𑀧𑀘𑁆𑀘𑀸𑀭𑁄𑀧𑁂𑀢𑀻𑀢𑀺 ‘‘𑀢𑁆𑀯𑀫𑁆𑀧𑀺 𑀔𑁄𑀲𑀻’’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑁄 𑀧𑀢𑀺𑀆𑀭𑁄𑀧𑁂𑀢𑀺. 𑀧𑀝𑀺𑀓𑀭𑁄𑀳𑀻𑀢𑀺 𑀤𑁂𑀲𑀦𑀸𑀕𑀸𑀫𑀺𑀦𑀺𑀁 𑀤𑁂𑀲𑁂𑀳𑀺, 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀢𑁄 𑀯𑀼𑀝𑁆𑀞𑀸𑀳𑀺, 𑀢𑀢𑁄 𑀲𑀼𑀤𑁆𑀥𑀦𑁆𑀢𑁂 𑀧𑀢𑀺𑀝𑁆𑀞𑀺𑀢𑁄 𑀅𑀜𑁆𑀜𑀁 𑀘𑁄𑀤𑁂𑀲𑁆𑀲𑀲𑀻𑀢𑀺 𑀤𑀻𑀧𑁂𑀢𑀺. 𑀅𑀜𑁆𑀜𑁂𑀦𑀜𑁆𑀜𑀁 𑀧𑀝𑀺𑀘𑀭𑀢𑀻𑀢𑀺 𑀅𑀜𑁆𑀜𑁂𑀦 𑀓𑀸𑀭𑀡𑁂𑀦, 𑀯𑀘𑀦𑁂𑀦 𑀯𑀸 𑀅𑀜𑁆𑀜𑀁 𑀓𑀸𑀭𑀡𑀁, 𑀯𑀘𑀦𑀁 𑀯𑀸 𑀧𑀝𑀺𑀘𑁆𑀙𑀸𑀤𑁂𑀢𑀺. ‘‘𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄𑀲𑀻’’𑀢𑀺 𑀯𑀼𑀢𑁆𑀢𑁄 ‘‘𑀓𑁄 𑀆𑀧𑀦𑁆𑀦𑁄, 𑀓𑀺𑀁 𑀆𑀧𑀦𑁆𑀦𑁄, 𑀓𑀺𑀲𑁆𑀫𑀺𑀁 𑀆𑀧𑀦𑁆𑀦𑁄, 𑀓𑀣𑀁 𑀆𑀧𑀦𑁆𑀦𑁄, 𑀓𑀁 𑀪𑀡𑀣, 𑀓𑀺𑀁 𑀪𑀡𑀣𑀸’’𑀢𑀺 𑀪𑀡𑀢𑀺. ‘‘𑀏𑀯𑀭𑀽𑀧𑀁 𑀓𑀺𑀜𑁆𑀘𑀺 𑀢𑀬𑀸 𑀤𑀺𑀝𑁆𑀞’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀦 𑀲𑀼𑀡𑀸𑀫𑀻’’𑀢𑀺 𑀲𑁄𑀢𑀁 𑀉𑀧𑀦𑁂𑀢𑀺. 𑀩𑀳𑀺𑀤𑁆𑀥𑀸 𑀓𑀣𑀁 𑀅𑀧𑀦𑀸𑀫𑁂𑀢𑀻𑀢𑀺 ‘‘𑀇𑀢𑁆𑀣𑀦𑁆𑀦𑀸𑀫𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄𑀲𑀻’’𑀢𑀺 𑀧𑀼𑀝𑁆𑀞𑁄 ‘‘𑀧𑀸𑀝𑀮𑀺𑀧𑀼𑀢𑁆𑀢𑀁 𑀕𑀢𑁄𑀫𑁆𑀳𑀻’’𑀢𑀺 𑀯𑀢𑁆𑀯𑀸 𑀧𑀼𑀦 ‘‘𑀦 𑀢𑀯 𑀧𑀸𑀝𑀮𑀺𑀧𑀼𑀢𑁆𑀢𑀕𑀫𑀦𑀁 𑀧𑀼𑀘𑁆𑀙𑀸𑀫𑀸’’𑀢𑀺 𑀯𑀼𑀢𑁆𑀢𑁂 𑀢𑀢𑁄 𑀭𑀸𑀚𑀕𑀳𑀁 𑀕𑀢𑁄𑀫𑁆𑀳𑀻𑀢𑀺. ‘‘𑀭𑀸𑀚𑀕𑀳𑀁 𑀯𑀸 𑀬𑀸𑀳𑀺 𑀩𑁆𑀭𑀸𑀳𑁆𑀫𑀡𑀕𑁂𑀳𑀁 𑀯𑀸, 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄𑀲𑀻’’𑀢𑀺. ‘‘𑀢𑀢𑁆𑀣 𑀫𑁂 𑀲𑀽𑀓𑀭𑀫𑀁𑀲𑀁 𑀮𑀤𑁆𑀥’’𑀦𑁆𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑁄 𑀓𑀣𑀁 𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑀺𑀧𑀢𑀺. 𑀓𑁄𑀧𑀦𑁆𑀢𑀺 𑀓𑀼𑀧𑀺𑀢𑀪𑀸𑀯𑀁, 𑀤𑁄𑀲𑀦𑁆𑀢𑀺 𑀤𑀼𑀝𑁆𑀞𑀪𑀸𑀯𑀁. 𑀉𑀪𑀬𑀫𑁆𑀧𑁂𑀢𑀁 𑀓𑁄𑀥𑀲𑁆𑀲𑁂𑀯 𑀦𑀸𑀫𑀁. 𑀅𑀧𑁆𑀧𑀘𑁆𑀘𑀬𑀦𑁆𑀢𑀺 𑀅𑀲𑀦𑁆𑀢𑀼𑀝𑁆𑀞𑀸𑀓𑀸𑀭𑀁, 𑀤𑁄𑀫𑀦𑀲𑁆𑀲𑀲𑁆𑀲𑁂𑀢𑀁 𑀦𑀸𑀫𑀁. 𑀧𑀸𑀢𑀼𑀓𑀭𑁄𑀢𑀻𑀢𑀺 𑀤𑀲𑁆𑀲𑁂𑀢𑀺 𑀧𑀓𑀸𑀲𑁂𑀢𑀺. 𑀩𑀸𑀳𑀸𑀯𑀺𑀓𑁆𑀔𑁂𑀧𑀓𑀁 𑀪𑀡𑀢𑀻𑀢𑀺 𑀩𑀸𑀳𑀁 𑀯𑀺𑀓𑁆𑀔𑀺𑀧𑀺𑀢𑁆𑀯𑀸 𑀯𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀮𑀚𑁆𑀚𑀺𑀯𑀘𑀦𑀁 𑀯𑀤𑀢𑀺. 𑀅𑀦𑀸𑀤𑀺𑀬𑀺𑀢𑁆𑀯𑀸𑀢𑀺 𑀘𑀺𑀢𑁆𑀢𑀻𑀓𑀸𑀭𑁂𑀦 𑀅𑀕𑁆𑀕𑀳𑁂𑀢𑁆𑀯𑀸 𑀅𑀯𑀚𑀸𑀦𑀺𑀢𑁆𑀯𑀸, 𑀅𑀦𑀸𑀤𑀭𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀯𑀺𑀳𑁂𑀲𑁂𑀢𑀻𑀢𑀺 𑀯𑀺𑀳𑁂𑀞𑁂𑀢𑀺 𑀩𑀸𑀥𑀢𑀺. 𑀅𑀢𑀺𑀩𑀸𑀴𑁆𑀳𑀦𑁆𑀢𑀺 𑀅𑀢𑀺𑀤𑀴𑁆𑀳𑀁 𑀅𑀢𑀺𑀧𑁆𑀧𑀫𑀸𑀡𑀁. 𑀫𑀬𑀺 𑀩𑁆𑀬𑀸𑀯𑀝𑀸𑀢𑀺 𑀫𑀬𑀺 𑀩𑁆𑀬𑀸𑀧𑀸𑀭𑀁 𑀆𑀧𑀦𑁆𑀦𑀸. 𑀳𑀻𑀦𑀸𑀬𑀸𑀯𑀢𑁆𑀢𑀺𑀢𑁆𑀯𑀸𑀢𑀺 𑀳𑀻𑀦𑀲𑁆𑀲 𑀕𑀺𑀳𑀺𑀪𑀸𑀯𑀲𑁆𑀲 𑀅𑀢𑁆𑀣𑀸𑀬 𑀆𑀯𑀢𑁆𑀢𑀺𑀢𑁆𑀯𑀸, 𑀕𑀺𑀳𑀻 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀫𑀦𑀸 𑀳𑁄𑀣𑀸𑀢𑀺 𑀢𑀼𑀝𑁆𑀞𑀘𑀺𑀢𑁆𑀢𑀸 𑀳𑁄𑀣, ‘‘𑀫𑀬𑀸 𑀮𑀪𑀺𑀢𑀩𑁆𑀩𑀁 𑀮𑀪𑀣, 𑀫𑀬𑀸 𑀯𑀲𑀺𑀢𑀩𑁆𑀩𑀝𑁆𑀞𑀸𑀦𑁂 𑀯𑀲𑀣, 𑀨𑀸𑀲𑀼𑀯𑀺𑀳𑀸𑀭𑁄 𑀯𑁄 𑀫𑀬𑀸 𑀓𑀢𑁄’’𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀤𑀢𑀺. 𑀤𑀼𑀲𑁆𑀲𑀢𑀻𑀢𑀺 𑀤𑀼𑀝𑁆𑀞𑁄 𑀳𑁄𑀢𑀺.

𑀦𑀯𑀳𑀺 𑀆𑀖𑀸𑀢𑀯𑀢𑁆𑀣𑀽𑀳𑀻𑀢𑀺 𑀲𑀢𑁆𑀢𑁂𑀲𑀼 𑀉𑀧𑁆𑀧𑀢𑁆𑀢𑀺𑀯𑀲𑁂𑀦𑁂𑀯 𑀓𑀣𑀺𑀢𑀸𑀦𑀺. 𑀬𑀣𑀸𑀳 𑁋

‘‘𑀦𑀯𑀬𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀆𑀖𑀸𑀢𑀯𑀢𑁆𑀣𑀽𑀦𑀺. 𑀓𑀢𑀫𑀸𑀦𑀺 𑀦𑀯? ‘𑀅𑀦𑀢𑁆𑀣𑀁 𑀫𑁂 𑀅𑀘𑀭𑀻’𑀢𑀺 𑀆𑀖𑀸𑀢𑀁 𑀩𑀦𑁆𑀥𑀢𑀺, ‘𑀅𑀦𑀢𑁆𑀣𑀁 𑀫𑁂 𑀘𑀭𑀢𑀻’𑀢𑀺 𑀆𑀖𑀸𑀢𑀁 𑀩𑀦𑁆𑀥𑀢𑀺, ‘𑀅𑀦𑀢𑁆𑀣𑀁 𑀫𑁂 𑀘𑀭𑀺𑀲𑁆𑀲𑀢𑀻’𑀢𑀺 𑀆𑀖𑀸𑀢𑀁 𑀩𑀦𑁆𑀥𑀢𑀺, ‘𑀧𑀺𑀬𑀲𑁆𑀲 𑀫𑁂 𑀫𑀦𑀸𑀧𑀲𑁆𑀲 𑀅𑀦𑀢𑁆𑀣𑀁 𑀅𑀘𑀭𑀺, 𑀅𑀦𑀢𑁆𑀣𑀁 𑀘𑀭𑀢𑀺, 𑀅𑀦𑀢𑁆𑀣𑀁 𑀘𑀭𑀺𑀲𑁆𑀲𑀢𑀻’𑀢𑀺 𑀆𑀖𑀸𑀢𑀁 𑀩𑀦𑁆𑀥𑀢𑀺, ‘𑀅𑀧𑁆𑀧𑀺𑀬𑀲𑁆𑀲 𑀫𑁂 𑀅𑀫𑀦𑀸𑀧𑀲𑁆𑀲 𑀅𑀢𑁆𑀣𑀁 𑀅𑀘𑀭𑀺, 𑀅𑀢𑁆𑀣𑀁 𑀘𑀭𑀢𑀺, 𑀅𑀢𑁆𑀣𑀁 𑀘𑀭𑀺𑀲𑁆𑀲𑀢𑀻’𑀢𑀺 𑀆𑀖𑀸𑀢𑀁 𑀩𑀦𑁆𑀥𑀢𑀺. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀦𑀯 𑀆𑀖𑀸𑀢𑀯𑀢𑁆𑀣𑀽𑀦𑀻’’𑀢𑀺 (𑀅. 𑀦𑀺. 𑁯.𑁨𑁯).

𑀢𑀢𑁆𑀣 𑀆𑀖𑀸𑀢𑀯𑀢𑁆𑀣𑀽𑀦𑀻𑀢𑀺 𑀆𑀖𑀸𑀢𑀓𑀸𑀭𑀡𑀸𑀦𑀺. 𑀆𑀖𑀸𑀢𑀦𑁆𑀢𑀺 𑀘𑁂𑀢𑁆𑀣 𑀓𑁄𑀧𑁄, 𑀲𑁄𑀬𑁂𑀯 𑀉𑀧𑀭𑀽𑀧𑀭𑀺 𑀓𑁄𑀧𑀲𑁆𑀲 𑀯𑀢𑁆𑀣𑀼𑀢𑁆𑀢𑀸 𑀆𑀖𑀸𑀢𑀯𑀢𑁆𑀣𑀼. 𑀆𑀖𑀸𑀢𑀁 𑀩𑀦𑁆𑀥𑀢𑀻𑀢𑀺 𑀓𑁄𑀧𑀁 𑀩𑀦𑁆𑀥𑀢𑀺 𑀓𑀭𑁄𑀢𑀺 𑀉𑀧𑁆𑀧𑀸𑀤𑁂𑀢𑀺. ‘‘𑀅𑀢𑁆𑀣𑀁 𑀫𑁂 𑀦𑀸𑀘𑀭𑀺, 𑀦 𑀘𑀭𑀢𑀺, 𑀦 𑀘𑀭𑀺𑀲𑁆𑀲𑀢𑀺. 𑀧𑀺𑀬𑀲𑁆𑀲 𑀫𑁂 𑀫𑀦𑀸𑀧𑀲𑁆𑀲 𑀅𑀢𑁆𑀣𑀁 𑀦𑀸𑀘𑀭𑀺, 𑀦 𑀘𑀭𑀢𑀺, 𑀦 𑀘𑀭𑀺𑀲𑁆𑀲𑀢𑀺. 𑀅𑀧𑁆𑀧𑀺𑀬𑀲𑁆𑀲 𑀫𑁂 𑀅𑀫𑀦𑀸𑀧𑀲𑁆𑀲 𑀅𑀦𑀢𑁆𑀣𑀁 𑀦𑀸𑀘𑀭𑀺, 𑀦 𑀘𑀭𑀢𑀺, 𑀦 𑀘𑀭𑀺𑀲𑁆𑀲𑀢𑀻’’𑀢𑀺 (𑀫𑀳𑀸𑀦𑀺. 𑁮𑁫; 𑀯𑀺𑀪. 𑁯𑁬𑁦; 𑀥. 𑀲. 𑁧𑁦𑁬𑁬) 𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀸𑀦𑀺 𑀅𑀧𑀭𑀸𑀦𑀺𑀧𑀺 𑀦𑀯 𑀆𑀖𑀸𑀢𑀯𑀢𑁆𑀣𑀽𑀦𑀺 𑀇𑀫𑁂𑀳𑁂𑀯 𑀦𑀯𑀳𑀺 𑀲𑀗𑁆𑀕𑀳𑀺𑀢𑀸𑀦𑀺. 𑀆𑀖𑀸𑀢𑀺𑀢𑁄𑀢𑀺 𑀖𑀝𑁆𑀝𑀺𑀢𑁄.

𑀦𑀯𑀯𑀺𑀥𑀫𑀸𑀦𑁂𑀳𑀻𑀢𑀺 𑀓𑀢𑀫𑁂 𑀦𑀯𑀯𑀺𑀥𑀫𑀸𑀦𑀸? 𑀲𑁂𑀬𑁆𑀬𑀲𑁆𑀲 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄, 𑀲𑁂𑀬𑁆𑀬𑀲𑁆𑀲 𑀲𑀤𑀺𑀲𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄, 𑀲𑁂𑀬𑁆𑀬𑀲𑁆𑀲 𑀳𑀻𑀦𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄. 𑀲𑀤𑀺𑀲𑀲𑁆𑀲 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄, 𑀲𑀤𑀺𑀲𑀲𑁆𑀲 𑀲𑀤𑀺𑀲𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄, 𑀲𑀤𑀺𑀲𑀲𑁆𑀲 𑀳𑀻𑀦𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄. 𑀳𑀻𑀦𑀲𑁆𑀲 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄, 𑀳𑀻𑀦𑀲𑁆𑀲 𑀲𑀤𑀺𑀲𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄, 𑀳𑀻𑀦𑀲𑁆𑀲 𑀳𑀻𑀦𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄. 𑀇𑀫𑁂 𑀦𑀯𑀯𑀺𑀥𑀫𑀸𑀦𑀸 (𑀯𑀺𑀪. 𑁯𑁬𑁨).

𑀏𑀢𑁆𑀣 𑀧𑀦 𑀲𑁂𑀬𑁆𑀬𑀲𑁆𑀲 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄 𑀭𑀸𑀚𑀽𑀦𑀜𑁆𑀘𑁂𑀯 𑀧𑀩𑁆𑀩𑀚𑀺𑀢𑀸𑀦𑀜𑁆𑀘 𑀉𑀧𑁆𑀧𑀚𑁆𑀚𑀢𑀺. 𑀭𑀸𑀚𑀸 𑀳𑀺 ‘‘𑀭𑀝𑁆𑀞𑁂𑀦 𑀯𑀸 𑀥𑀦𑁂𑀦 𑀯𑀸 𑀯𑀸𑀳𑀦𑁂𑀳𑀺 𑀯𑀸 𑀓𑁄 𑀫𑀬𑀸 𑀲𑀤𑀺𑀲𑁄 𑀅𑀢𑁆𑀣𑀻’’𑀢𑀺 𑀏𑀢𑀁 𑀫𑀸𑀦𑀁 𑀓𑀭𑁄𑀢𑀺, 𑀧𑀩𑁆𑀩𑀚𑀺𑀢𑁄𑀧𑀺 ‘‘𑀲𑀻𑀮𑀥𑀼𑀢𑀗𑁆𑀕𑀸𑀤𑀻𑀳𑀺 𑀓𑁄 𑀫𑀬𑀸 𑀲𑀤𑀺𑀲𑁄 𑀅𑀢𑁆𑀣𑀻’’𑀢𑀺 𑀏𑀢𑀁 𑀫𑀸𑀦𑀁 𑀓𑀭𑁄𑀢𑀺.

𑀲𑁂𑀬𑁆𑀬𑀲𑁆𑀲 𑀲𑀤𑀺𑀲𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄𑀧𑀺 𑀏𑀢𑁂𑀲𑀁𑀬𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀭𑀸𑀚𑀸 𑀳𑀺 ‘‘𑀭𑀝𑁆𑀞𑁂𑀦 𑀯𑀸 𑀥𑀦𑁂𑀦 𑀯𑀸 𑀯𑀸𑀳𑀦𑁂𑀳𑀺 𑀯𑀸 𑀅𑀜𑁆𑀜𑀭𑀸𑀚𑀽𑀳𑀺 𑀲𑀤𑁆𑀥𑀺𑀁 𑀫𑀬𑁆𑀳𑀁 𑀓𑀺𑀁 𑀦𑀸𑀦𑀸𑀓𑀭𑀡’’𑀦𑁆𑀢𑀺 𑀏𑀢𑀁 𑀫𑀸𑀦𑀁 𑀓𑀭𑁄𑀢𑀺, 𑀧𑀩𑁆𑀩𑀚𑀺𑀢𑁄𑀧𑀺 ‘‘𑀲𑀻𑀮𑀥𑀼𑀢𑀗𑁆𑀕𑀸𑀤𑀻𑀳𑀺 𑀅𑀜𑁆𑀜𑁂𑀦 𑀪𑀺𑀓𑁆𑀔𑀼𑀦𑀸 𑀫𑀬𑁆𑀳𑀁 𑀓𑀺𑀁 𑀦𑀸𑀦𑀸𑀓𑀭𑀡’’𑀦𑁆𑀢𑀺 𑀏𑀢𑀁 𑀫𑀸𑀦𑀁 𑀓𑀭𑁄𑀢𑀺.

𑀲𑁂𑀬𑁆𑀬𑀲𑁆𑀲 𑀳𑀻𑀦𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄𑀧𑀺 𑀏𑀢𑁂𑀲𑀁𑀬𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀬𑀲𑁆𑀲 𑀳𑀺 𑀭𑀜𑁆𑀜𑁄 𑀭𑀝𑁆𑀞𑀁 𑀯𑀸 𑀥𑀦𑀁 𑀯𑀸 𑀯𑀸𑀳𑀦𑀸𑀤𑀻𑀦𑀺 𑀯𑀸 𑀦𑀸𑀢𑀺𑀲𑀫𑁆𑀧𑀦𑁆𑀦𑀸𑀦𑀺 𑀳𑁄𑀦𑁆𑀢𑀺, 𑀲𑁄 ‘‘𑀫𑀬𑁆𑀳𑀁 𑀭𑀸𑀚𑀸𑀢𑀺 𑀯𑁄𑀳𑀸𑀭𑀲𑀼𑀔𑀫𑀢𑁆𑀢𑀓𑀫𑁂𑀯, 𑀓𑀺𑀁 𑀭𑀸𑀚𑀸 𑀦𑀸𑀫 𑀅𑀳’’𑀦𑁆𑀢𑀺 𑀏𑀢𑀁 𑀫𑀸𑀦𑀁 𑀓𑀭𑁄𑀢𑀺, 𑀧𑀩𑁆𑀩𑀚𑀺𑀢𑁄𑀧𑀺 𑀅𑀧𑁆𑀧𑀮𑀸𑀪𑀲𑀓𑁆𑀓𑀸𑀭𑁄 ‘‘𑀅𑀳𑀁 𑀥𑀫𑁆𑀫𑀓𑀣𑀺𑀓𑁄 𑀩𑀳𑀼𑀲𑁆𑀲𑀼𑀢𑁄 𑀫𑀳𑀸𑀣𑁂𑀭𑁄𑀢𑀺 𑀓𑀣𑀸𑀫𑀢𑁆𑀢𑀫𑁂𑀯, 𑀓𑀺𑀁 𑀥𑀫𑁆𑀫𑀓𑀣𑀺𑀓𑁄 𑀦𑀸𑀫𑀸𑀳𑀁, 𑀓𑀺𑀁 𑀩𑀳𑀼𑀲𑁆𑀲𑀼𑀢𑁄 𑀦𑀸𑀫𑀸𑀳𑀁, 𑀓𑀺𑀁 𑀫𑀳𑀸𑀣𑁂𑀭𑁄 𑀦𑀸𑀫𑀸𑀳𑀁, 𑀬𑀲𑁆𑀲 𑀫𑁂 𑀮𑀸𑀪𑀲𑀓𑁆𑀓𑀸𑀭𑁄 𑀦𑀢𑁆𑀣𑀻’’𑀢𑀺 𑀏𑀢𑀁 𑀫𑀸𑀦𑀁 𑀓𑀭𑁄𑀢𑀺.

𑀲𑀤𑀺𑀲𑀲𑁆𑀲 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑀸𑀤𑀬𑁄 𑀅𑀫𑀘𑁆𑀘𑀸𑀤𑀻𑀦𑀁 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀅𑀫𑀘𑁆𑀘𑁄 𑀯𑀸 𑀳𑀺 𑀭𑀝𑁆𑀞𑀺𑀬𑁄 𑀯𑀸 ‘‘𑀪𑁄𑀕𑀬𑀸𑀦𑀯𑀸𑀳𑀦𑀸𑀤𑀻𑀳𑀺 𑀓𑁄 𑀫𑀬𑀸 𑀲𑀤𑀺𑀲𑁄 𑀅𑀜𑁆𑀜𑁄 𑀭𑀸𑀚𑀧𑀼𑀭𑀺𑀲𑁄 𑀅𑀢𑁆𑀣𑀻’’𑀢𑀺 𑀯𑀸, ‘‘𑀫𑀬𑁆𑀳𑀁 𑀅𑀜𑁆𑀜𑁂𑀳𑀺 𑀲𑀤𑁆𑀥𑀺𑀁 𑀓𑀺𑀁 𑀦𑀸𑀦𑀸𑀓𑀭𑀡’’𑀦𑁆𑀢𑀺 𑀯𑀸, ‘‘𑀅𑀫𑀘𑁆𑀘𑁄𑀢𑀺 𑀦𑀸𑀫𑀫𑁂𑀯 𑀫𑀬𑁆𑀳𑀁, 𑀖𑀸𑀲𑀘𑁆𑀙𑀸𑀤𑀦𑀫𑀢𑁆𑀢𑀫𑁆𑀧𑀺 𑀫𑁂 𑀦𑀢𑁆𑀣𑀺, 𑀓𑀺𑀁 𑀅𑀫𑀘𑁆𑀘𑁄 𑀦𑀸𑀫𑀸𑀳’’𑀦𑁆𑀢𑀺 𑀯𑀸 𑀏𑀢𑀁 𑀫𑀸𑀦𑀁 𑀓𑀭𑁄𑀢𑀺.

𑀳𑀻𑀦𑀲𑁆𑀲 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑀸𑀤𑀬𑁄 𑀤𑀸𑀲𑀸𑀤𑀻𑀦𑀁 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀤𑀸𑀲𑁄 𑀳𑀺 ‘‘𑀫𑀸𑀢𑀺𑀢𑁄 𑀯𑀸 𑀧𑀺𑀢𑀺𑀢𑁄 𑀯𑀸 𑀓𑁄 𑀫𑀬𑀸 𑀲𑀤𑀺𑀲𑁄 𑀅𑀜𑁆𑀜𑁄 𑀤𑀸𑀲𑁄 𑀦𑀸𑀫 𑀅𑀢𑁆𑀣𑀺, 𑀅𑀜𑁆𑀜𑁂 𑀚𑀻𑀯𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀓𑀼𑀘𑁆𑀙𑀺𑀳𑁂𑀢𑀼 𑀤𑀸𑀲𑀸 𑀦𑀸𑀫 𑀚𑀸𑀢𑀸, 𑀅𑀳𑀁 𑀧𑀦 𑀧𑀯𑁂𑀡𑀺𑀆𑀕𑀢𑀢𑁆𑀢𑀸 𑀲𑁂𑀬𑁆𑀬𑁄’’𑀢𑀺 𑀯𑀸, ‘‘𑀧𑀯𑁂𑀡𑀺𑀆𑀕𑀢𑀪𑀸𑀯𑁂𑀦 𑀉𑀪𑀢𑁄𑀲𑀼𑀤𑁆𑀥𑀺𑀓𑀤𑀸𑀲𑀢𑁆𑀢𑁂𑀦 𑀅𑀲𑀼𑀓𑀤𑀸𑀲𑁂𑀦 𑀦𑀸𑀫 𑀲𑀤𑁆𑀥𑀺𑀁 𑀫𑀬𑁆𑀳𑀁 𑀓𑀺𑀁 𑀦𑀸𑀦𑀸𑀓𑀭𑀡’’𑀦𑁆𑀢𑀺 𑀯𑀸, ‘‘𑀓𑀼𑀘𑁆𑀙𑀺𑀯𑀲𑁂𑀦𑀸𑀳𑀁 𑀤𑀸𑀲𑀩𑁆𑀬𑀁 𑀉𑀧𑀕𑀢𑁄, 𑀫𑀸𑀢𑀸𑀧𑀺𑀢𑀼𑀓𑁄𑀝𑀺𑀬𑀸 𑀧𑀦 𑀫𑁂 𑀤𑀸𑀲𑀝𑁆𑀞𑀸𑀦𑀁 𑀦𑀢𑁆𑀣𑀺, 𑀓𑀺𑀁 𑀤𑀸𑀲𑁄 𑀦𑀸𑀫 𑀅𑀳’’𑀦𑁆𑀢𑀺 𑀯𑀸 𑀏𑀢𑀁 𑀫𑀸𑀦𑀁 𑀓𑀭𑁄𑀢𑀺. 𑀬𑀣𑀸 𑀘 𑀤𑀸𑀲𑁄, 𑀏𑀯𑀁 𑀧𑀼𑀓𑁆𑀓𑀼𑀲𑀘𑀡𑁆𑀟𑀸𑀮𑀸𑀤𑀬𑁄𑀧𑀺 𑀏𑀢𑀁 𑀫𑀸𑀦𑀁 𑀓𑀭𑁄𑀦𑁆𑀢𑀺𑀬𑁂𑀯. 𑀏𑀢𑁆𑀣 𑀘 𑀲𑁂𑀬𑁆𑀬𑀲𑁆𑀲 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀉𑀧𑁆𑀧𑀦𑁆𑀦𑀫𑀸𑀦𑁄𑀯 𑀬𑀸𑀣𑀸𑀯𑀫𑀸𑀦𑁄, 𑀇𑀢𑀭𑁂 𑀤𑁆𑀯𑁂 𑀅𑀬𑀸𑀣𑀸𑀯𑀫𑀸𑀦𑀸. 𑀢𑀣𑀸 𑀲𑀤𑀺𑀲𑀲𑁆𑀲 𑀲𑀤𑀺𑀲𑁄𑀳𑀫𑀲𑁆𑀫𑀻𑀢𑀺 𑀳𑀻𑀦𑀲𑁆𑀲 𑀳𑀻𑀦𑁄𑀳𑀫𑀲𑁆𑀫𑀻𑀢𑀺 𑀉𑀧𑁆𑀧𑀦𑁆𑀦𑀫𑀸𑀦𑁄𑀯 𑀬𑀸𑀣𑀸𑀯𑀫𑀸𑀦𑁄, 𑀇𑀢𑀭𑁂 𑀤𑁆𑀯𑁂 𑀅𑀬𑀸𑀣𑀸𑀯𑀫𑀸𑀦𑀸. 𑀢𑀢𑁆𑀣 𑀬𑀸𑀣𑀸𑀯𑀫𑀸𑀦𑀸 𑀅𑀭𑀳𑀢𑁆𑀢𑀫𑀕𑁆𑀕𑀯𑀚𑁆𑀛𑀸, 𑀅𑀬𑀸𑀣𑀸𑀯𑀫𑀸𑀦𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀯𑀚𑁆𑀛𑀸𑀢𑀺.

𑀢𑀡𑁆𑀳𑀸𑀫𑀽𑀮𑀓𑀸 𑀯𑀼𑀢𑁆𑀢𑀸𑀬𑁂𑀯. 𑀭𑀚𑁆𑀚𑀢𑀻𑀢𑀺 𑀦 𑀓𑁂𑀯𑀮𑀁 𑀭𑀸𑀕𑁂𑀦𑁂𑀯 𑀭𑀚𑁆𑀚𑀢𑀺, 𑀅𑀣 𑀔𑁄 𑀢𑀡𑁆𑀳𑀸𑀫𑀽𑀮𑀓𑀸𑀦𑀁 𑀧𑀭𑀺𑀬𑁂𑀲𑀦𑀸𑀤𑀻𑀦𑀫𑁆𑀧𑀺 𑀲𑀫𑁆𑀪𑀯𑀢𑁄 𑀢𑀡𑁆𑀳𑀸𑀫𑀽𑀮𑀓𑁂𑀳𑀺 𑀲𑀩𑁆𑀩𑁂𑀳𑀺 𑀅𑀓𑀼𑀲𑀮𑀥𑀫𑁆𑀫𑁂𑀳𑀺 𑀭𑀚𑁆𑀚𑀢𑀺, 𑀬𑀼𑀚𑁆𑀚𑀢𑀺 𑀩𑀚𑁆𑀛𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀤𑀲𑀳𑀺 𑀓𑀺𑀮𑁂𑀲𑀯𑀢𑁆𑀣𑀽𑀳𑀻𑀢𑀺 𑀓𑀢𑀫𑀸𑀦𑀺 𑀤𑀲 𑀓𑀺𑀮𑁂𑀲𑀯𑀢𑁆𑀣𑀽𑀦𑀺? 𑀮𑁄𑀪𑁄, 𑀤𑁄𑀲𑁄, 𑀫𑁄𑀳𑁄, 𑀫𑀸𑀦𑁄, 𑀤𑀺𑀝𑁆𑀞𑀺, 𑀯𑀺𑀘𑀺𑀓𑀺𑀘𑁆𑀙𑀸, 𑀣𑀺𑀦𑀁, 𑀉𑀤𑁆𑀥𑀘𑁆𑀘𑀁, 𑀅𑀳𑀺𑀭𑀺𑀓𑀁, 𑀅𑀦𑁄𑀢𑁆𑀢𑀧𑁆𑀧𑀦𑁆𑀢𑀺 𑀇𑀫𑀸𑀦𑀺 𑀤𑀲 𑀓𑀺𑀮𑁂𑀲𑀯𑀢𑁆𑀣𑀽𑀦𑀺 (𑀯𑀺𑀪. 𑁯𑁬𑁬).

𑀢𑀢𑁆𑀣 𑀓𑀺𑀮𑁂𑀲𑀸 𑀏𑀯 𑀓𑀺𑀮𑁂𑀲𑀯𑀢𑁆𑀣𑀽𑀦𑀺, 𑀯𑀲𑀦𑁆𑀢𑀺 𑀯𑀸 𑀏𑀢𑁆𑀣 𑀅𑀔𑀻𑀡𑀸𑀲𑀯𑀸 𑀲𑀢𑁆𑀢𑀸 𑀮𑁄𑀪𑀸𑀤𑀻𑀲𑀼 𑀧𑀢𑀺𑀝𑁆𑀞𑀺𑀢𑀢𑁆𑀢𑀸𑀢𑀺 𑀯𑀢𑁆𑀣𑀽𑀦𑀺, 𑀓𑀺𑀮𑁂𑀲𑀸 𑀘 𑀢𑁂 𑀢𑀧𑁆𑀧𑀢𑀺𑀝𑁆𑀞𑀸𑀦𑀁 𑀲𑀢𑁆𑀢𑀸𑀦𑀁 𑀯𑀢𑁆𑀣𑀽𑀦𑀺 𑀘𑀸𑀢𑀺 𑀓𑀺𑀮𑁂𑀲𑀯𑀢𑁆𑀣𑀽𑀦𑀺. 𑀬𑀲𑁆𑀫𑀸 𑀘𑁂𑀢𑁆𑀣 𑀅𑀦𑀦𑁆𑀢𑀭𑀧𑀘𑁆𑀘𑀬𑀸𑀤𑀺𑀪𑀸𑀯𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑀸𑀧𑀺 𑀓𑀺𑀮𑁂𑀲𑀸 𑀯𑀲𑀦𑁆𑀢𑀺 𑀏𑀯 𑀦𑀸𑀫, 𑀢𑀲𑁆𑀫𑀸 𑀓𑀺𑀮𑁂𑀲𑀸𑀦𑀁 𑀯𑀢𑁆𑀣𑀽𑀦𑀻𑀢𑀺𑀧𑀺 𑀓𑀺𑀮𑁂𑀲𑀯𑀢𑁆𑀣𑀽𑀦𑀺. 𑀮𑀼𑀩𑁆𑀪𑀦𑁆𑀢𑀺 𑀢𑁂𑀦, 𑀲𑀬𑀁 𑀯𑀸 𑀮𑀼𑀩𑁆𑀪𑀢𑀺, 𑀮𑀼𑀩𑁆𑀪𑀦𑀫𑀢𑁆𑀢𑀫𑁂𑀯 𑀯𑀸 𑀢𑀦𑁆𑀢𑀺 𑀮𑁄𑀪𑁄. 𑀤𑀼𑀲𑁆𑀲𑀦𑁆𑀢𑀺 𑀢𑁂𑀦, 𑀲𑀬𑀁 𑀯𑀸 𑀤𑀼𑀲𑁆𑀲𑀢𑀺, 𑀤𑀼𑀲𑁆𑀲𑀦𑀫𑀢𑁆𑀢𑀫𑁂𑀯 𑀯𑀸 𑀢𑀦𑁆𑀢𑀺 𑀤𑁄𑀲𑁄. 𑀫𑀼𑀬𑁆𑀳𑀦𑁆𑀢𑀺 𑀢𑁂𑀦, 𑀲𑀬𑀁 𑀯𑀸 𑀫𑀼𑀬𑁆𑀳𑀢𑀺, 𑀫𑀼𑀬𑁆𑀳𑀦𑀫𑀢𑁆𑀢𑀫𑁂𑀯 𑀯𑀸 𑀢𑀦𑁆𑀢𑀺 𑀫𑁄𑀳𑁄. 𑀫𑀜𑁆𑀜𑀢𑀻𑀢𑀺 𑀫𑀸𑀦𑁄. 𑀤𑀺𑀝𑁆𑀞𑀺𑀆𑀤𑀬𑁄 𑀯𑀼𑀢𑁆𑀢𑀢𑁆𑀣𑀸𑀯. 𑀦 𑀳𑀺𑀭𑀻𑀬𑀢𑀻𑀢𑀺 𑀅𑀳𑀺𑀭𑀺𑀓𑁄, 𑀢𑀲𑁆𑀲 𑀪𑀸𑀯𑁄 𑀅𑀳𑀺𑀭𑀺𑀓𑀁. 𑀦 𑀑𑀢𑁆𑀢𑀧𑁆𑀧𑀢𑀻𑀢𑀺 𑀅𑀦𑁄𑀢𑁆𑀢𑀧𑁆𑀧𑀻, 𑀢𑀲𑁆𑀲 𑀪𑀸𑀯𑁄 𑀅𑀦𑁄𑀢𑁆𑀢𑀧𑁆𑀧𑀁. 𑀢𑁂𑀲𑀼 𑀅𑀳𑀺𑀭𑀺𑀓𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀳𑀺 𑀅𑀚𑀺𑀕𑀼𑀘𑁆𑀙𑀦𑀮𑀓𑁆𑀔𑀡𑀁, 𑀅𑀦𑁄𑀢𑁆𑀢𑀧𑁆𑀧𑀁 𑀢𑁂𑀳𑁂𑀯 𑀅𑀲𑀸𑀭𑀚𑁆𑀚𑀦𑀮𑀓𑁆𑀔𑀡𑀁, 𑀓𑀺𑀮𑀺𑀲𑁆𑀲𑀢𑀻𑀢𑀺 𑀉𑀧𑀢𑀸𑀧𑀻𑀬𑀢𑀺 𑀯𑀺𑀩𑀸𑀥𑀻𑀬𑀢𑀺.

𑀤𑀲𑀳𑀺 𑀆𑀖𑀸𑀢𑀯𑀢𑁆𑀣𑀽𑀳𑀻𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑁂𑀳𑀺 𑀦𑀯𑀳𑀺 𑀘 ‘‘𑀅𑀝𑁆𑀞𑀸𑀦𑁂 𑀯𑀸 𑀧𑀦𑀸𑀖𑀸𑀢𑁄 𑀚𑀸𑀬𑀢𑀻’’𑀢𑀺 (𑀥. 𑀲. 𑁧𑁦𑁬𑁬) 𑀯𑀼𑀢𑁆𑀢𑁂𑀦 𑀘𑀸𑀢𑀺 𑀤𑀲𑀳𑀺. 𑀅𑀦𑀢𑁆𑀣𑀁 𑀫𑁂 𑀅𑀘𑀭𑀻𑀢𑀺𑀆𑀤𑀻𑀦𑀺𑀧𑀺 𑀳𑀺 𑀅𑀯𑀺𑀓𑀧𑁆𑀧𑁂𑀢𑁆𑀯𑀸 𑀔𑀸𑀡𑀼𑀓𑀡𑁆𑀝𑀓𑀸𑀤𑀺𑀫𑁆𑀳𑀺𑀧𑀺 𑀅𑀝𑁆𑀞𑀸𑀦𑁂 𑀆𑀖𑀸𑀢𑁄 𑀉𑀧𑁆𑀧𑀚𑁆𑀚𑀢𑀺.

𑀤𑀲𑀳𑀺 𑀅𑀓𑀼𑀲𑀮𑀓𑀫𑁆𑀫𑀧𑀣𑁂𑀳𑀻𑀢𑀺 𑀓𑀢𑀫𑁂 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑀸 (𑀤𑀻. 𑀦𑀺. 𑁩.𑁩𑁬𑁦)? 𑀧𑀸𑀡𑀸𑀢𑀺𑀧𑀸𑀢𑁄, 𑀅𑀤𑀺𑀦𑁆𑀦𑀸𑀤𑀸𑀦𑀁, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑁄, 𑀫𑀼𑀲𑀸𑀯𑀸𑀤𑁄, 𑀧𑀺𑀲𑀼𑀡𑀸 𑀯𑀸𑀘𑀸, 𑀨𑀭𑀼𑀲𑀸 𑀯𑀸𑀘𑀸, 𑀲𑀫𑁆𑀨𑀧𑁆𑀧𑀮𑀸𑀧𑁄, 𑀅𑀪𑀺𑀚𑁆𑀛𑀸, 𑀩𑁆𑀬𑀸𑀧𑀸𑀤𑁄, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺. 𑀇𑀫𑁂 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑀸. 𑀢𑀢𑁆𑀣 𑀅𑀓𑀼𑀲𑀮𑀓𑀫𑁆𑀫𑀸𑀦𑀺 𑀘 𑀢𑀸𑀦𑀺 𑀧𑀣𑀸 𑀘 𑀤𑀼𑀕𑁆𑀕𑀢𑀺𑀬𑀸𑀢𑀺 𑀅𑀓𑀼𑀲𑀮𑀓𑀫𑁆𑀫𑀧𑀣𑀸. 𑀲𑀫𑀦𑁆𑀦𑀸𑀕𑀢𑁄𑀢𑀺 𑀲𑀫𑀗𑁆𑀕𑀻𑀪𑀽𑀢𑁄.

𑀤𑀲𑀳𑀺 𑀲𑀜𑁆𑀜𑁄𑀚𑀦𑁂𑀳𑀻𑀢𑀺 𑀓𑀢𑀫𑀸𑀦𑀺 𑀤𑀲 𑀲𑀁𑀬𑁄𑀚𑀦𑀸𑀦𑀺 (𑀥. 𑀲. 𑁧𑁧𑁧𑁮)? 𑀓𑀸𑀫𑀭𑀸𑀕𑀲𑀁𑀬𑁄𑀚𑀦𑀁, 𑀧𑀝𑀺𑀖𑀲𑀁𑀬𑁄𑀚𑀦𑀁, 𑀫𑀸𑀦𑀲𑀁𑀬𑁄𑀚𑀦𑀁, 𑀤𑀺𑀝𑁆𑀞𑀺𑀲𑀁𑀬𑁄𑀚𑀦𑀁, 𑀯𑀺𑀘𑀺𑀓𑀺𑀘𑁆𑀙𑀸𑀲𑀁𑀬𑁄𑀚𑀦𑀁, 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀲𑀁𑀬𑁄𑀚𑀦𑀁, 𑀪𑀯𑀭𑀸𑀕𑀲𑀁𑀬𑁄𑀚𑀦𑀁, 𑀇𑀲𑁆𑀲𑀸𑀲𑀁𑀬𑁄𑀚𑀦𑀁, 𑀫𑀘𑁆𑀙𑀭𑀺𑀬𑀲𑀁𑀬𑁄𑀚𑀦𑀁, 𑀅𑀯𑀺𑀚𑁆𑀚𑀸𑀲𑀁𑀬𑁄𑀚𑀦𑀁, 𑀇𑀫𑀸𑀦𑀺 𑀤𑀲 𑀲𑀁𑀬𑁄𑀚𑀦𑀸𑀦𑀺. 𑀫𑀺𑀘𑁆𑀙𑀢𑁆𑀢𑀸 𑀯𑀼𑀢𑁆𑀢𑀸𑀬𑁂𑀯.

𑀤𑀲𑀯𑀢𑁆𑀣𑀼𑀓𑀸𑀬 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸𑀢𑀺 𑀓𑀢𑀫𑀸 𑀤𑀲𑀯𑀢𑁆𑀣𑀼𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 (𑀯𑀺𑀪. 𑁯𑁭𑁧)? 𑀦𑀢𑁆𑀣𑀺 𑀤𑀺𑀦𑁆𑀦𑀁, 𑀦𑀢𑁆𑀣𑀺 𑀬𑀺𑀝𑁆𑀞𑀁, 𑀦𑀢𑁆𑀣𑀺 𑀳𑀼𑀢𑀁, 𑀦𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄, 𑀦𑀢𑁆𑀣𑀺 𑀅𑀬𑀁 𑀮𑁄𑀓𑁄, 𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀦𑀢𑁆𑀣𑀺 𑀫𑀸𑀢𑀸, 𑀦𑀢𑁆𑀣𑀺 𑀧𑀺𑀢𑀸, 𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀦𑀢𑁆𑀣𑀺 𑀮𑁄𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀫𑁆𑀫𑀕𑁆𑀕𑀢𑀸 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀸 𑀬𑁂 𑀇𑀫𑀜𑁆𑀘 𑀮𑁄𑀓𑀁 𑀧𑀭𑀜𑁆𑀘 𑀮𑁄𑀓𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀦𑁆𑀢𑀺. 𑀅𑀬𑀁 𑀤𑀲𑀯𑀢𑁆𑀣𑀼𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺.

𑀢𑀢𑁆𑀣 𑀤𑀲𑀯𑀢𑁆𑀣𑀼𑀓𑀸𑀢𑀺 𑀤𑀲 𑀯𑀢𑁆𑀣𑀽𑀦𑀺 𑀏𑀢𑀺𑀲𑁆𑀲𑀸𑀢𑀺 𑀤𑀲𑀯𑀢𑁆𑀣𑀼𑀓𑀸. 𑀦𑀢𑁆𑀣𑀺 𑀤𑀺𑀦𑁆𑀦𑀦𑁆𑀢𑀺 𑀤𑀺𑀦𑁆𑀦𑀁 𑀦𑀸𑀫 𑀅𑀢𑁆𑀣𑀺, 𑀲𑀓𑁆𑀓𑀸 𑀓𑀲𑁆𑀲𑀘𑀺 𑀓𑀺𑀜𑁆𑀘𑀺 𑀤𑀸𑀢𑀼𑀦𑁆𑀢𑀺 𑀚𑀸𑀦𑀸𑀢𑀺. 𑀤𑀺𑀦𑁆𑀦𑀲𑁆𑀲 𑀧𑀦 𑀨𑀮𑀁 𑀯𑀺𑀧𑀸𑀓𑁄 𑀦𑀢𑁆𑀣𑀻𑀢𑀺 𑀕𑀡𑁆𑀳𑀸𑀢𑀺. 𑀦𑀢𑁆𑀣𑀺 𑀬𑀺𑀝𑁆𑀞𑀦𑁆𑀢𑀺 𑀬𑀺𑀝𑁆𑀞𑀁 𑀯𑀼𑀘𑁆𑀘𑀢𑀺 𑀫𑀳𑀸𑀬𑀸𑀕𑁄, 𑀢𑀁 𑀬𑀚𑀺𑀢𑀼𑀁 𑀲𑀓𑁆𑀓𑀸𑀢𑀺 𑀚𑀸𑀦𑀸𑀢𑀺. 𑀬𑀺𑀝𑁆𑀞𑀲𑁆𑀲 𑀧𑀦 𑀨𑀮𑀁 𑀯𑀺𑀧𑀸𑀓𑁄 𑀦𑀢𑁆𑀣𑀻𑀢𑀺 𑀕𑀡𑁆𑀳𑀸𑀢𑀺. 𑀳𑀼𑀢𑀦𑁆𑀢𑀺 𑀆𑀳𑀼𑀦𑀧𑀸𑀳𑀼𑀦𑀫𑀗𑁆𑀕𑀮𑀓𑀺𑀭𑀺𑀬𑀸, 𑀢𑀁 𑀓𑀸𑀢𑀼𑀁 𑀲𑀓𑁆𑀓𑀸𑀢𑀺 𑀚𑀸𑀦𑀸𑀢𑀺. 𑀢𑀲𑁆𑀲 𑀧𑀦 𑀨𑀮𑀁 𑀯𑀺𑀧𑀸𑀓𑁄 𑀦𑀢𑁆𑀣𑀻𑀢𑀺 𑀕𑀡𑁆𑀳𑀸𑀢𑀺. 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀦𑁆𑀢𑀺 𑀏𑀢𑁆𑀣 𑀤𑀲 𑀓𑀼𑀲𑀮𑀓𑀫𑁆𑀫𑀧𑀣𑀸 𑀲𑀼𑀓𑀢𑀓𑀫𑁆𑀫𑀸𑀦𑀺 𑀦𑀸𑀫, 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑀸 𑀤𑀼𑀓𑁆𑀓𑀝𑀓𑀫𑁆𑀫𑀸𑀦𑀺 𑀦𑀸𑀫. 𑀢𑁂𑀲𑀁 𑀅𑀢𑁆𑀣𑀺𑀪𑀸𑀯𑀁 𑀚𑀸𑀦𑀸𑀢𑀺. 𑀨𑀮𑀁 𑀯𑀺𑀧𑀸𑀓𑁄 𑀧𑀦 𑀦𑀢𑁆𑀣𑀻𑀢𑀺 𑀕𑀡𑁆𑀳𑀸𑀢𑀺. 𑀦𑀢𑁆𑀣𑀺 𑀅𑀬𑀁 𑀮𑁄𑀓𑁄𑀢𑀺 𑀧𑀭𑀮𑁄𑀓𑁂 𑀞𑀺𑀢𑁄 𑀇𑀫𑀁 𑀮𑁄𑀓𑀁 𑀦𑀢𑁆𑀣𑀻𑀢𑀺 𑀕𑀡𑁆𑀳𑀸𑀢𑀺. 𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄𑀢𑀺 𑀇𑀥𑀮𑁄𑀓𑁂 𑀞𑀺𑀢𑁄 𑀧𑀭𑀮𑁄𑀓𑀁 𑀦𑀢𑁆𑀣𑀻𑀢𑀺 𑀕𑀡𑁆𑀳𑀸𑀢𑀺. 𑀦𑀢𑁆𑀣𑀺 𑀫𑀸𑀢𑀸 𑀦𑀢𑁆𑀣𑀺 𑀧𑀺𑀢𑀸𑀢𑀺 𑀫𑀸𑀢𑀸𑀧𑀺𑀢𑀽𑀦𑀁 𑀅𑀢𑁆𑀣𑀺𑀪𑀸𑀯𑀁 𑀚𑀸𑀦𑀸𑀢𑀺. 𑀢𑁂𑀲𑀼 𑀓𑀢𑀧𑁆𑀧𑀘𑁆𑀘𑀬𑁂𑀦 𑀓𑁄𑀘𑀺 𑀨𑀮𑀁 𑀯𑀺𑀧𑀸𑀓𑁄 𑀦𑀢𑁆𑀣𑀻𑀢𑀺 𑀕𑀡𑁆𑀳𑀸𑀢𑀺. 𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸𑀢𑀺 𑀘𑀯𑀦𑀓𑀉𑀧𑀧𑀚𑁆𑀚𑀦𑀓𑀲𑀢𑁆𑀢𑀸 𑀦𑀢𑁆𑀣𑀻𑀢𑀺 𑀕𑀡𑁆𑀳𑀸𑀢𑀺. 𑀲𑀫𑁆𑀫𑀕𑁆𑀕𑀢𑀸 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀸𑀢𑀺 𑀅𑀦𑀼𑀮𑁄𑀫𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑀸 𑀥𑀫𑁆𑀫𑀺𑀓𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀮𑁄𑀓𑀲𑁆𑀫𑀺𑀁 𑀦𑀢𑁆𑀣𑀻𑀢𑀺 𑀕𑀡𑁆𑀳𑀸𑀢𑀺. 𑀬𑁂 𑀇𑀫𑀜𑁆𑀘 𑀮𑁄𑀓𑀁…𑀧𑁂… 𑀧𑀯𑁂𑀤𑁂𑀦𑁆𑀢𑀻𑀢𑀺 𑀇𑀫𑀜𑁆𑀘 𑀧𑀭𑀜𑁆𑀘 𑀮𑁄𑀓𑀁 𑀅𑀢𑁆𑀢𑀦𑀸𑀯 𑀅𑀪𑀺𑀯𑀺𑀲𑀺𑀝𑁆𑀞𑁂𑀦 𑀜𑀸𑀡𑁂𑀦 𑀜𑀢𑁆𑀯𑀸 𑀧𑀯𑁂𑀤𑀦𑀲𑀫𑀢𑁆𑀣𑁄 𑀲𑀩𑁆𑀩𑀜𑁆𑀜𑀽 𑀩𑀼𑀤𑁆𑀥𑁄 𑀦𑀢𑁆𑀣𑀻𑀢𑀺 𑀕𑀡𑁆𑀳𑀸𑀢𑀺.

𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸𑀢𑀺 ‘‘𑀲𑀲𑁆𑀲𑀢𑁄 𑀮𑁄𑀓𑁄’’𑀢𑀺𑀆𑀤𑀺𑀓𑀁 𑀏𑀓𑁂𑀓𑀁 𑀅𑀦𑁆𑀢𑀁 𑀪𑀸𑀕𑀁 𑀕𑀡𑁆𑀳𑀸𑀢𑀻𑀢𑀺 𑀅𑀦𑁆𑀢𑀕𑁆𑀕𑀸𑀳𑀺𑀓𑀸. 𑀅𑀣 𑀯𑀸 𑀅𑀦𑁆𑀢𑀲𑁆𑀲 𑀕𑀸𑀳𑁄 𑀅𑀦𑁆𑀢𑀕𑁆𑀕𑀸𑀳𑁄, 𑀅𑀦𑁆𑀢𑀕𑁆𑀕𑀸𑀳𑁄 𑀅𑀲𑁆𑀲𑀸 𑀅𑀢𑁆𑀣𑀻𑀢𑀺 𑀅𑀦𑁆𑀢𑀕𑁆𑀕𑀸𑀳𑀺𑀓𑀸. 𑀢𑀸𑀬 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬. 𑀲𑀸 𑀧𑀦 𑀯𑀼𑀢𑁆𑀢𑀸𑀬𑁂𑀯.

𑀅𑀝𑁆𑀞𑀲𑀢𑀢𑀡𑁆𑀳𑀸𑀧𑀧𑀜𑁆𑀘𑀲𑀢𑁂𑀳𑀻𑀢𑀺 𑀅𑀝𑁆𑀞𑀼𑀢𑁆𑀢𑀭𑀁 𑀲𑀢𑀁 𑀅𑀝𑁆𑀞𑀲𑀢𑀁. 𑀲𑀁𑀲𑀸𑀭𑁂 𑀧𑀧𑀜𑁆𑀘𑁂𑀢𑀺 𑀘𑀺𑀭𑀁 𑀯𑀲𑀸𑀧𑁂𑀢𑀻𑀢𑀺 𑀧𑀧𑀜𑁆𑀘𑁄, 𑀢𑀡𑁆𑀳𑀸 𑀏𑀯 𑀧𑀧𑀜𑁆𑀘𑁄 𑀢𑀡𑁆𑀳𑀸𑀧𑀧𑀜𑁆𑀘𑁄, 𑀆𑀭𑀫𑁆𑀫𑀡𑀪𑁂𑀤𑁂𑀦 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀢𑁆𑀢𑀺𑀯𑀲𑁂𑀦 𑀘 𑀢𑀡𑁆𑀳𑀸𑀦𑀁 𑀩𑀳𑀼𑀓𑀢𑁆𑀢𑀸 𑀩𑀳𑀼𑀯𑀘𑀦𑀁 𑀓𑀢𑁆𑀯𑀸 𑀢𑀡𑁆𑀳𑀸𑀧𑀧𑀜𑁆𑀘𑀸𑀦𑀁 𑀲𑀢𑀁 𑀢𑀡𑁆𑀳𑀸𑀧𑀧𑀜𑁆𑀘𑀲𑀢𑀁. 𑀢𑁂𑀦 ‘‘𑀢𑀡𑁆𑀳𑀸𑀧𑀧𑀜𑁆𑀘𑀲𑀢𑁂𑀦𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀯𑀘𑀦𑀯𑀺𑀧𑀮𑁆𑀮𑀸𑀲𑀯𑀲𑁂𑀦 ‘‘𑀢𑀡𑁆𑀳𑀸𑀧𑀧𑀜𑁆𑀘𑀲𑀢𑁂𑀳𑀻’’𑀢𑀺 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄 𑀓𑀢𑁄. 𑀅𑀝𑁆𑀞𑀲𑀢𑀦𑁆𑀢𑀺 𑀲𑀗𑁆𑀔𑀸𑀢𑁂𑀦 𑀢𑀡𑁆𑀳𑀸𑀧𑀧𑀜𑁆𑀘𑀲𑀢𑁂𑀦𑀸𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀅𑀝𑁆𑀞 𑀅𑀩𑁆𑀩𑁄𑀳𑀸𑀭𑀺𑀓𑀸𑀦𑀺 𑀓𑀢𑁆𑀯𑀸 𑀲𑀢𑀫𑁂𑀯 𑀕𑀳𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀔𑀼𑀤𑁆𑀤𑀓𑀯𑀢𑁆𑀣𑀼𑀯𑀺𑀪𑀗𑁆𑀕𑁂 𑀧𑀦 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀻𑀢𑀺 𑀆𑀕𑀢𑀁. 𑀬𑀣𑀸𑀳 𑁋

‘‘𑀅𑀝𑁆𑀞𑀸𑀭𑀲 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺 𑀅𑀚𑁆𑀛𑀢𑁆𑀢𑀺𑀓𑀲𑁆𑀲 𑀉𑀧𑀸𑀤𑀸𑀬, 𑀅𑀝𑁆𑀞𑀸𑀭𑀲 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺 𑀩𑀸𑀳𑀺𑀭𑀲𑁆𑀲 𑀉𑀧𑀸𑀤𑀸𑀬, 𑀢𑀤𑁂𑀓𑀚𑁆𑀛𑀁 𑀅𑀪𑀺𑀲𑀜𑁆𑀜𑀼𑀳𑀺𑀢𑁆𑀯𑀸 𑀅𑀪𑀺𑀲𑀗𑁆𑀔𑀺𑀧𑀺𑀢𑁆𑀯𑀸 𑀙𑀢𑁆𑀢𑀺𑀁𑀲 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀇𑀢𑀺 𑀅𑀢𑀻𑀢𑀸𑀦𑀺 𑀙𑀢𑁆𑀢𑀺𑀁𑀲 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺, 𑀅𑀦𑀸𑀕𑀢𑀸𑀦𑀺 𑀙𑀢𑁆𑀢𑀺𑀁𑀲 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺, 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀺 𑀙𑀢𑁆𑀢𑀺𑀁𑀲 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺 𑀢𑀤𑁂𑀓𑀚𑁆𑀛𑀁 𑀅𑀪𑀺𑀲𑀜𑁆𑀜𑀼𑀳𑀺𑀢𑁆𑀯𑀸 𑀅𑀪𑀺𑀲𑀗𑁆𑀔𑀺𑀧𑀺𑀢𑁆𑀯𑀸 𑀅𑀝𑁆𑀞𑀢𑀡𑁆𑀳𑀸𑀯𑀺𑀘𑀭𑀺𑀢𑀲𑀢𑀁 𑀳𑁄𑀢𑀻’’𑀢𑀺 (𑀯𑀺𑀪. 𑁮𑁪𑁨).

𑀢𑀡𑁆𑀳𑀸𑀧𑀧𑀜𑁆𑀘𑀸𑀬𑁂𑀯 𑀧𑀦𑁂𑀢𑁆𑀣 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀻𑀢𑀺 𑀯𑀼𑀢𑁆𑀢𑀸. 𑀢𑀡𑁆𑀳𑀸𑀲𑀫𑀼𑀤𑀸𑀘𑀸𑀭𑀸 𑀢𑀡𑁆𑀳𑀸𑀧𑀯𑀢𑁆𑀢𑀺𑀬𑁄𑀢𑀺 𑀅𑀢𑁆𑀣𑁄. 𑀅𑀚𑁆𑀛𑀢𑁆𑀢𑀺𑀓𑀲𑁆𑀲 𑀉𑀧𑀸𑀤𑀸𑀬𑀸𑀢𑀺 𑀅𑀚𑁆𑀛𑀢𑁆𑀢𑀺𑀓𑀁 𑀔𑀦𑁆𑀥𑀧𑀜𑁆𑀘𑀓𑀁 𑀉𑀧𑀸𑀤𑀸𑀬. 𑀇𑀤𑀜𑁆𑀳𑀺 𑀉𑀧𑀬𑁄𑀕𑀢𑁆𑀣𑁂 𑀲𑀸𑀫𑀺𑀯𑀘𑀦𑀁. 𑀯𑀺𑀢𑁆𑀣𑀸𑀭𑁄 𑀧𑀦𑀲𑁆𑀲 𑀢𑀲𑁆𑀲 𑀦𑀺𑀤𑁆𑀤𑁂𑀲𑁂 (𑀯𑀺𑀪. 𑁯𑁭𑁩) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀧𑀦 𑀅𑀧𑀭𑁄 𑀦𑀬𑁄 𑁋 𑀭𑀽𑀧𑀸𑀭𑀫𑁆𑀫𑀡𑀸𑀬𑁂𑀯 𑀓𑀸𑀫𑀢𑀡𑁆𑀳𑀸, 𑀪𑀯𑀢𑀡𑁆𑀳𑀸, 𑀯𑀺𑀪𑀯𑀢𑀡𑁆𑀳𑀸𑀢𑀺 𑀢𑀺𑀲𑁆𑀲𑁄 𑀢𑀡𑁆𑀳𑀸 𑀳𑁄𑀦𑁆𑀢𑀺, 𑀢𑀣𑀸 𑀲𑀤𑁆𑀤𑀸𑀤𑀺𑀆𑀭𑀫𑁆𑀫𑀡𑀸𑀢𑀺 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀅𑀝𑁆𑀞𑀸𑀭𑀲 𑀢𑀡𑁆𑀳𑀸 𑀳𑁄𑀦𑁆𑀢𑀺, 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸 𑀅𑀝𑁆𑀞𑀸𑀭𑀲, 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸 𑀅𑀝𑁆𑀞𑀸𑀭𑀲𑀸𑀢𑀺 𑀙𑀢𑁆𑀢𑀺𑀁𑀲 𑀳𑁄𑀦𑁆𑀢𑀺. 𑀢𑀸 𑀏𑀯 𑀅𑀢𑀻𑀢𑀸𑀭𑀫𑁆𑀫𑀡𑀸 𑀙𑀢𑁆𑀢𑀺𑀁𑀲, 𑀅𑀦𑀸𑀕𑀢𑀸𑀭𑀫𑁆𑀫𑀡𑀸 𑀙𑀢𑁆𑀢𑀺𑀁𑀲, 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸 𑀙𑀢𑁆𑀢𑀺𑀁𑀲𑀸𑀢𑀺 𑀅𑀝𑁆𑀞𑀢𑀡𑁆𑀳𑀸𑀯𑀺𑀘𑀭𑀺𑀢𑀲𑀢𑀁 𑀳𑁄𑀢𑀺. 𑀧𑀧𑀜𑁆𑀘𑀺𑀢𑁄𑀢𑀺 𑀆𑀭𑀫𑁆𑀫𑀡𑁂, 𑀲𑀁𑀲𑀸𑀭𑁂 𑀯𑀸 𑀧𑀧𑀜𑁆𑀘𑀺𑀢𑁄 𑀘𑀺𑀭𑀯𑀸𑀲𑀺𑀢𑁄.

𑀤𑁆𑀯𑀸𑀲𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀕𑀢𑁂𑀳𑀻𑀢𑀺 ‘‘𑀓𑀢𑀫𑀸𑀦𑀺 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀩𑁆𑀭𑀳𑁆𑀫𑀚𑀸𑀮𑁂 𑀯𑁂𑀬𑁆𑀬𑀸𑀓𑀭𑀡𑁂 𑀯𑀼𑀢𑁆𑀢𑀸𑀦𑀺 𑀪𑀕𑀯𑀢𑀸? 𑀘𑀢𑁆𑀢𑀸𑀭𑁄 𑀲𑀲𑁆𑀲𑀢𑀯𑀸𑀤𑀸, 𑀘𑀢𑁆𑀢𑀸𑀭𑁄 𑀏𑀓𑀘𑁆𑀘𑀲𑀲𑁆𑀲𑀢𑀯𑀸𑀤𑀸, 𑀘𑀢𑁆𑀢𑀸𑀭𑁄 𑀅𑀦𑁆𑀢𑀸𑀦𑀦𑁆𑀢𑀺𑀓𑀸, 𑀘𑀢𑁆𑀢𑀸𑀭𑁄 𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀓𑀸, 𑀤𑁆𑀯𑁂 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀺𑀓𑀸, 𑀲𑁄𑀴𑀲 𑀲𑀜𑁆𑀜𑀻𑀯𑀸𑀤𑀸, 𑀅𑀝𑁆𑀞 𑀅𑀲𑀜𑁆𑀜𑀻𑀯𑀸𑀤𑀸, 𑀅𑀝𑁆𑀞 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀯𑀸𑀤𑀸, 𑀲𑀢𑁆𑀢 𑀉𑀘𑁆𑀙𑁂𑀤𑀯𑀸𑀤𑀸, 𑀧𑀜𑁆𑀘 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑀸𑀢𑀺 𑀇𑀫𑀸𑀦𑀺 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀩𑁆𑀭𑀳𑁆𑀫𑀚𑀸𑀮𑁂 𑀯𑁂𑀬𑁆𑀬𑀸𑀓𑀭𑀡𑁂 𑀯𑀼𑀢𑁆𑀢𑀸𑀦𑀺 𑀪𑀕𑀯𑀢𑀸’’𑀢𑀺 (𑀯𑀺𑀪. 𑁯𑁭𑁭). 𑀯𑀺𑀢𑁆𑀣𑀸𑀭𑁄 𑀧𑀦𑁂𑀢𑁆𑀣 𑀩𑁆𑀭𑀳𑁆𑀫𑀚𑀸𑀮𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑀅𑀳𑀜𑁆𑀘𑀫𑁆𑀳𑀺 𑀢𑀺𑀡𑁆𑀡𑁄𑀢𑀺 𑀅𑀳𑀜𑁆𑀘 𑀘𑀢𑀼𑀭𑁄𑀖𑀁, 𑀲𑀁𑀲𑀸𑀭𑀲𑀫𑀼𑀤𑁆𑀤𑀁 𑀯𑀸 𑀢𑀺𑀡𑁆𑀡𑁄 𑀅𑀫𑁆𑀳𑀺 𑀪𑀯𑀸𑀫𑀺. 𑀫𑀼𑀢𑁆𑀢𑁄𑀢𑀺 𑀭𑀸𑀕𑀸𑀤𑀺𑀩𑀦𑁆𑀥𑀦𑁂𑀳𑀺 𑀫𑀼𑀢𑁆𑀢𑁄. 𑀤𑀦𑁆𑀢𑁄𑀢𑀺 𑀦𑀺𑀩𑁆𑀩𑀺𑀲𑁂𑀯𑀦𑁄 𑀦𑀺𑀧𑁆𑀧𑀭𑀺𑀧𑁆𑀨𑀦𑁆𑀤𑁄. 𑀲𑀦𑁆𑀢𑁄𑀢𑀺 𑀲𑀻𑀢𑀻𑀪𑀽𑀢𑁄. 𑀅𑀲𑁆𑀲𑀢𑁆𑀣𑁄𑀢𑀺 𑀦𑀺𑀩𑁆𑀩𑀸𑀦𑀤𑀲𑁆𑀲𑀦𑁂 𑀮𑀤𑁆𑀥𑀲𑁆𑀲𑀸𑀲𑁄. 𑀧𑀭𑀺𑀦𑀺𑀩𑁆𑀩𑀼𑀢𑁄𑀢𑀺 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀼𑀢𑁄. 𑀧𑀳𑁄𑀫𑀻𑀢𑀺 𑀲𑀫𑀢𑁆𑀣𑁄𑀫𑁆𑀳𑀺. 𑀔𑁄𑀇𑀢𑀺 𑀏𑀓𑀁𑀲𑀢𑁆𑀣𑁂 𑀦𑀺𑀧𑀸𑀢𑁄. 𑀧𑀭𑁂 𑀘 𑀧𑀭𑀺𑀦𑀺𑀩𑁆𑀩𑀸𑀧𑁂𑀢𑀼𑀦𑁆𑀢𑀺 𑀏𑀢𑁆𑀣 𑀧𑀭𑁂 𑀘-𑀲𑀤𑁆𑀤𑁄 ‘‘𑀧𑀭𑁂 𑀘 𑀢𑀸𑀭𑁂𑀢𑀼’’𑀦𑁆𑀢𑀺𑀆𑀤𑀻𑀳𑀺𑀧𑀺 𑀬𑁄𑀚𑁂𑀢𑀩𑁆𑀩𑁄𑀢𑀺.

𑀫𑀳𑀸𑀓𑀭𑀼𑀡𑀸𑀜𑀸𑀡𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.