𑁪. 𑀫𑁂𑀢𑁆𑀢𑀸𑀓𑀣𑀸

𑀫𑁂𑀢𑁆𑀢𑀸𑀓𑀣𑀸𑀯𑀡𑁆𑀡𑀦𑀸

𑁨𑁨. 𑀇𑀤𑀸𑀦𑀺 𑀩𑁄𑀚𑁆𑀛𑀗𑁆𑀕𑀓𑀣𑀸𑀦𑀦𑁆𑀢𑀭𑀁 𑀓𑀣𑀺𑀢𑀸𑀬 𑀩𑁄𑀚𑁆𑀛𑀗𑁆𑀕𑀓𑀣𑀸𑀕𑀢𑀺𑀬𑀸 𑀲𑀼𑀢𑁆𑀢𑀦𑁆𑀢𑀧𑀼𑀩𑁆𑀩𑀗𑁆𑀕𑀫𑀸𑀬 𑀫𑁂𑀢𑁆𑀢𑀸𑀓𑀣𑀸𑀬 𑀅𑀧𑀼𑀩𑁆𑀩𑀢𑁆𑀣𑀸𑀦𑀼𑀯𑀡𑁆𑀡𑀦𑀸. 𑀢𑀢𑁆𑀣 𑀲𑀼𑀢𑁆𑀢𑀦𑁆𑀢𑁂 𑀢𑀸𑀯 𑀆𑀲𑁂𑀯𑀺𑀢𑀸𑀬𑀸𑀢𑀺 𑀆𑀤𑀭𑁂𑀦 𑀲𑁂𑀯𑀺𑀢𑀸𑀬. 𑀪𑀸𑀯𑀺𑀢𑀸𑀬𑀸𑀢𑀺 𑀯𑀟𑁆𑀠𑀺𑀢𑀸𑀬. 𑀩𑀳𑀼𑀮𑀻𑀓𑀢𑀸𑀬𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀓𑀢𑀸𑀬. 𑀬𑀸𑀦𑀻𑀓𑀢𑀸𑀬𑀸𑀢𑀺 𑀬𑀼𑀢𑁆𑀢𑀬𑀸𑀦𑀲𑀤𑀺𑀲𑀸𑀬 𑀓𑀢𑀸𑀬. 𑀯𑀢𑁆𑀣𑀼𑀓𑀢𑀸𑀬𑀸𑀢𑀺 𑀧𑀢𑀺𑀝𑁆𑀞𑀸𑀦𑀝𑁆𑀞𑁂𑀦 𑀯𑀢𑁆𑀣𑀼 𑀯𑀺𑀬 𑀓𑀢𑀸𑀬. 𑀅𑀦𑀼𑀝𑁆𑀞𑀺𑀢𑀸𑀬𑀸𑀢𑀺 𑀧𑀘𑁆𑀘𑀼𑀧𑀝𑁆𑀞𑀺𑀢𑀸𑀬. 𑀧𑀭𑀺𑀘𑀺𑀢𑀸𑀬𑀸𑀢𑀺 𑀲𑀫𑀦𑁆𑀢𑀢𑁄 𑀘𑀺𑀢𑀸𑀬 𑀉𑀧𑀘𑀺𑀢𑀸𑀬. 𑀲𑀼𑀲𑀫𑀸𑀭𑀤𑁆𑀥𑀸𑀬𑀸𑀢𑀺 𑀲𑀼𑀝𑁆𑀞𑀼 𑀲𑀫𑀸𑀭𑀤𑁆𑀥𑀸𑀬 𑀲𑀼𑀓𑀢𑀸𑀬. 𑀆𑀦𑀺𑀲𑀁𑀲𑀸𑀢𑀺 𑀕𑀼𑀡𑀸. 𑀧𑀸𑀝𑀺𑀓𑀗𑁆𑀔𑀸𑀢𑀺 𑀧𑀝𑀺𑀓𑀗𑁆𑀔𑀺𑀢𑀩𑁆𑀩𑀸 𑀇𑀘𑁆𑀙𑀺𑀢𑀩𑁆𑀩𑀸. 𑀲𑀼𑀔𑀁 𑀲𑀼𑀧𑀢𑀻𑀢𑀺 𑀬𑀣𑀸 𑀲𑁂𑀲𑀚𑀦𑀸 𑀲𑀫𑁆𑀧𑀭𑀺𑀯𑀢𑁆𑀢𑀫𑀸𑀦𑀸 𑀓𑀸𑀓𑀘𑁆𑀙𑀫𑀸𑀦𑀸 𑀤𑀼𑀓𑁆𑀔𑀁 𑀲𑀼𑀧𑀦𑁆𑀢𑀺, 𑀏𑀯𑀁 𑀅𑀲𑀼𑀧𑀺𑀢𑁆𑀯𑀸 𑀲𑀼𑀔𑀁 𑀲𑀼𑀧𑀢𑀺. 𑀦𑀺𑀤𑁆𑀤𑀁 𑀑𑀓𑁆𑀓𑀦𑁆𑀢𑁄𑀧𑀺 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀦𑁆𑀦𑁄 𑀯𑀺𑀬 𑀳𑁄𑀢𑀺. 𑀲𑀼𑀔𑀁 𑀧𑀝𑀺𑀩𑀼𑀚𑁆𑀛𑀢𑀻𑀢𑀺 𑀬𑀣𑀸 𑀅𑀜𑁆𑀜𑁂 𑀦𑀺𑀢𑁆𑀣𑀼𑀦𑀦𑁆𑀢𑀸 𑀯𑀺𑀚𑀫𑁆𑀪𑀦𑁆𑀢𑀸 𑀲𑀫𑁆𑀧𑀭𑀺𑀯𑀢𑁆𑀢𑀦𑁆𑀢𑀸 𑀤𑀼𑀓𑁆𑀔𑀁 𑀧𑀝𑀺𑀩𑀼𑀚𑁆𑀛𑀦𑁆𑀢𑀺, 𑀏𑀯𑀁 𑀅𑀧𑀝𑀺𑀩𑀼𑀚𑁆𑀛𑀺𑀢𑁆𑀯𑀸 𑀯𑀺𑀓𑀲𑀫𑀸𑀦𑀫𑀺𑀯 𑀧𑀤𑀼𑀫𑀁 𑀲𑀼𑀔𑀁 𑀦𑀺𑀩𑁆𑀩𑀺𑀓𑀸𑀭𑀁 𑀧𑀝𑀺𑀩𑀼𑀚𑁆𑀛𑀢𑀺. 𑀦 𑀧𑀸𑀧𑀓𑀁 𑀲𑀼𑀧𑀺𑀦𑀁 𑀧𑀲𑁆𑀲𑀢𑀻𑀢𑀺 𑀲𑀼𑀧𑀺𑀦𑀁 𑀧𑀲𑁆𑀲𑀦𑁆𑀢𑁄𑀧𑀺 𑀪𑀤𑁆𑀤𑀓𑀫𑁂𑀯 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺. 𑀘𑁂𑀢𑀺𑀬𑀁 𑀯𑀦𑁆𑀤𑀦𑁆𑀢𑁄 𑀯𑀺𑀬 𑀧𑀽𑀚𑀁 𑀓𑀭𑁄𑀦𑁆𑀢𑁄 𑀯𑀺𑀬 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀯𑀺𑀬 𑀘 𑀳𑁄𑀢𑀺. 𑀬𑀣𑀸 𑀧𑀦𑀜𑁆𑀜𑁂 𑀅𑀢𑁆𑀢𑀸𑀦𑀁 𑀘𑁄𑀭𑁂𑀳𑀺 𑀧𑀭𑀺𑀯𑀸𑀭𑀺𑀢𑀁 𑀯𑀺𑀬 𑀯𑀸𑀴𑁂𑀳𑀺 𑀉𑀧𑀤𑁆𑀤𑀼𑀢𑀁 𑀯𑀺𑀬 𑀧𑀧𑀸𑀢𑁂 𑀧𑀢𑀦𑁆𑀢𑀁 𑀯𑀺𑀬 𑀘 𑀧𑀲𑁆𑀲𑀦𑁆𑀢𑀺, 𑀦 𑀏𑀯𑀁 𑀧𑀸𑀧𑀓𑀁 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺. 𑀫𑀦𑀼𑀲𑁆𑀲𑀸𑀦𑀁 𑀧𑀺𑀬𑁄 𑀳𑁄𑀢𑀻𑀢𑀺 𑀉𑀭𑁂 𑀆𑀫𑀼𑀢𑁆𑀢𑀫𑀼𑀢𑁆𑀢𑀸𑀳𑀸𑀭𑁄 𑀯𑀺𑀬 𑀲𑀻𑀲𑁂 𑀧𑀺𑀴𑀦𑁆𑀥𑀫𑀸𑀮𑀸 𑀯𑀺𑀬 𑀘 𑀫𑀦𑀼𑀲𑁆𑀲𑀸𑀦𑀁 𑀧𑀺𑀬𑁄 𑀳𑁄𑀢𑀺 𑀫𑀦𑀸𑀧𑁄. 𑀅𑀫𑀦𑀼𑀲𑁆𑀲𑀸𑀦𑀁 𑀧𑀺𑀬𑁄 𑀳𑁄𑀢𑀻𑀢𑀺 𑀬𑀣𑁂𑀯 𑀘 𑀫𑀦𑀼𑀲𑁆𑀲𑀸𑀦𑀁, 𑀏𑀯𑀁 𑀅𑀫𑀦𑀼𑀲𑁆𑀲𑀸𑀦𑀫𑁆𑀧𑀺 𑀧𑀺𑀬𑁄 𑀳𑁄𑀢𑀺. 𑀤𑁂𑀯𑀢𑀸 𑀭𑀓𑁆𑀔𑀦𑁆𑀢𑀻𑀢𑀺 𑀧𑀼𑀢𑁆𑀢𑀫𑀺𑀯 𑀫𑀸𑀢𑀸𑀧𑀺𑀢𑀭𑁄 𑀤𑁂𑀯𑀢𑀸 𑀭𑀓𑁆𑀔𑀦𑁆𑀢𑀺. 𑀦𑀸𑀲𑁆𑀲 𑀅𑀕𑁆𑀕𑀺 𑀯𑀸 𑀯𑀺𑀲𑀁 𑀯𑀸 𑀲𑀢𑁆𑀣𑀁 𑀯𑀸 𑀓𑀫𑀢𑀻𑀢𑀺 𑀫𑁂𑀢𑁆𑀢𑀸𑀯𑀺𑀳𑀸𑀭𑀺𑀲𑁆𑀲 𑀓𑀸𑀬𑁂 𑀅𑀕𑁆𑀕𑀺 𑀯𑀸 𑀯𑀺𑀲𑀁 𑀯𑀸 𑀲𑀢𑁆𑀣𑀁 𑀯𑀸 𑀦 𑀓𑀫𑀢𑀺 𑀦 𑀧𑀯𑀺𑀲𑀢𑀺, 𑀦𑀸𑀲𑁆𑀲 𑀓𑀸𑀬𑀁 𑀯𑀺𑀓𑁄𑀧𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀼𑀯𑀝𑀁 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀻𑀢𑀺 𑀫𑁂𑀢𑁆𑀢𑀸𑀯𑀺𑀳𑀸𑀭𑀺𑀦𑁄 𑀔𑀺𑀧𑁆𑀧𑀫𑁂𑀯 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺, 𑀦𑀢𑁆𑀣𑀺 𑀢𑀲𑁆𑀲 𑀤𑀦𑁆𑀥𑀸𑀬𑀺𑀢𑀢𑁆𑀢𑀁. 𑀫𑀼𑀔𑀯𑀡𑁆𑀡𑁄 𑀯𑀺𑀧𑁆𑀧𑀲𑀻𑀤𑀢𑀻𑀢𑀺 𑀩𑀦𑁆𑀥𑀦𑀸 𑀧𑀫𑀼𑀢𑁆𑀢𑀢𑀸𑀮𑀧𑀓𑁆𑀓𑀁 𑀯𑀺𑀬 𑀘𑀲𑁆𑀲 𑀯𑀺𑀧𑁆𑀧𑀲𑀦𑁆𑀦𑀯𑀡𑁆𑀡𑀁 𑀫𑀼𑀔𑀁 𑀳𑁄𑀢𑀺. 𑀅𑀲𑀫𑁆𑀫𑀽𑀴𑁆𑀳𑁄 𑀓𑀸𑀮𑀁 𑀓𑀭𑁄𑀢𑀻𑀢𑀺 𑀫𑁂𑀢𑁆𑀢𑀸𑀯𑀺𑀳𑀸𑀭𑀺𑀦𑁄 𑀲𑀫𑁆𑀫𑁄𑀳𑀫𑀭𑀡𑀁 𑀦𑀸𑀫 𑀦𑀢𑁆𑀣𑀺, 𑀅𑀲𑀫𑁆𑀫𑀽𑀴𑁆𑀳𑁄 𑀦𑀺𑀤𑁆𑀤𑀁 𑀑𑀓𑁆𑀓𑀫𑀦𑁆𑀢𑁄 𑀯𑀺𑀬 𑀓𑀸𑀮𑀁 𑀓𑀭𑁄𑀢𑀺. 𑀉𑀢𑁆𑀢𑀭𑀺 𑀅𑀧𑁆𑀧𑀝𑀺𑀯𑀺𑀚𑁆𑀛𑀦𑁆𑀢𑁄𑀢𑀺 𑀫𑁂𑀢𑁆𑀢𑀸𑀲𑀫𑀸𑀧𑀢𑁆𑀢𑀺𑀢𑁄 𑀉𑀢𑁆𑀢𑀭𑀺𑀁 𑀅𑀭𑀳𑀢𑁆𑀢𑀁 𑀅𑀥𑀺𑀕𑀦𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀇𑀢𑁄 𑀘𑀯𑀺𑀢𑁆𑀯𑀸 𑀲𑀼𑀢𑁆𑀢𑀧𑁆𑀧𑀩𑀼𑀤𑁆𑀥𑁄 𑀯𑀺𑀬 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑁄 𑀳𑁄𑀢𑀻𑀢𑀺 𑀩𑁆𑀭𑀳𑁆𑀫𑀮𑁄𑀓𑀁 𑀉𑀧𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄.

𑀫𑁂𑀢𑁆𑀢𑀸𑀦𑀺𑀤𑁆𑀤𑁂𑀲𑁂 𑀅𑀦𑁄𑀥𑀺𑀲𑁄 𑀨𑀭𑀡𑀸𑀢𑀺 𑀑𑀥𑀺 𑀫𑀭𑀺𑀬𑀸𑀤𑀸, 𑀦 𑀑𑀥𑀺 𑀅𑀦𑁄𑀥𑀺. 𑀢𑀢𑁄 𑀅𑀦𑁄𑀥𑀺𑀲𑁄, 𑀅𑀦𑁄𑀥𑀺𑀢𑁄𑀢𑀺 𑀅𑀢𑁆𑀣𑁄, 𑀦𑀺𑀧𑁆𑀧𑀤𑁂𑀲𑀢𑁄 𑀨𑀼𑀲𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀑𑀥𑀺𑀲𑁄𑀢𑀺 𑀧𑀤𑁂𑀲𑀯𑀲𑁂𑀦. 𑀤𑀺𑀲𑀸𑀨𑀭𑀡𑀸𑀢𑀺 𑀤𑀺𑀲𑀸𑀲𑀼 𑀨𑀭𑀡𑀸. 𑀲𑀩𑁆𑀩𑁂𑀢𑀺 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀁. 𑀲𑀢𑁆𑀢𑀸𑀢𑀺𑀧𑀤𑀲𑁆𑀲 𑀅𑀢𑁆𑀣𑁄 𑀜𑀸𑀡𑀓𑀣𑀸𑀫𑀸𑀢𑀺𑀓𑀸𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑁄, 𑀭𑀼𑀴𑁆𑀳𑀻𑀲𑀤𑁆𑀤𑁂𑀦 𑀧𑀦 𑀯𑀻𑀢𑀭𑀸𑀕𑁂𑀲𑀼𑀧𑀺 𑀅𑀬𑀁 𑀯𑁄𑀳𑀸𑀭𑁄 𑀯𑀢𑁆𑀢𑀢𑀺 𑀯𑀺𑀮𑀻𑀯𑀫𑀬𑁂𑀧𑀺 𑀩𑀻𑀚𑀦𑀺𑀯𑀺𑀲𑁂𑀲𑁂 𑀢𑀸𑀮𑀯𑀡𑁆𑀝𑀯𑁄𑀳𑀸𑀭𑁄 𑀯𑀺𑀬. 𑀅𑀯𑁂𑀭𑀸𑀢𑀺 𑀯𑁂𑀭𑀭𑀳𑀺𑀢𑀸. 𑀅𑀩𑁆𑀬𑀸𑀧𑀚𑁆𑀚𑀸𑀢𑀺 𑀩𑁆𑀬𑀸𑀧𑀸𑀤𑀭𑀳𑀺𑀢𑀸. 𑀅𑀦𑀻𑀖𑀸𑀢𑀺 𑀦𑀺𑀤𑁆𑀤𑀼𑀓𑁆𑀔𑀸. 𑀅𑀦𑀺𑀕𑁆𑀖𑀸𑀢𑀺𑀧𑀺 𑀧𑀸𑀞𑁄. 𑀲𑀼𑀔𑀻 𑀅𑀢𑁆𑀢𑀸𑀦𑀁𑀧𑀭𑀺𑀳𑀭𑀦𑁆𑀢𑀽𑀢𑀺 𑀲𑀼𑀔𑀺𑀢𑀸 𑀳𑀼𑀢𑁆𑀯𑀸 𑀅𑀢𑁆𑀢𑀪𑀸𑀯𑀁 𑀯𑀢𑁆𑀢𑀬𑀦𑁆𑀢𑀼. ‘‘𑀅𑀯𑁂𑀭𑀸’’𑀢𑀺 𑀘 𑀲𑀓𑀲𑀦𑁆𑀢𑀸𑀦𑁂 𑀘 𑀧𑀭𑁂 𑀧𑀝𑀺𑀘𑁆𑀘, 𑀧𑀭𑀲𑀦𑁆𑀢𑀸𑀦𑁂 𑀘 𑀇𑀢𑀭𑁂 𑀧𑀝𑀺𑀘𑁆𑀘 𑀯𑁂𑀭𑀸𑀪𑀸𑀯𑁄 𑀤𑀲𑁆𑀲𑀺𑀢𑁄, ‘‘𑀅𑀩𑁆𑀬𑀸𑀧𑀚𑁆𑀚𑀸’’𑀢𑀺𑀆𑀤𑀻𑀲𑀼 𑀯𑁂𑀭𑀸𑀪𑀸𑀯𑀸 𑀢𑀫𑁆𑀫𑀽𑀮𑀓𑀩𑁆𑀬𑀸𑀧𑀸𑀤𑀸𑀪𑀸𑀯𑁄, ‘‘𑀅𑀦𑀻𑀖𑀸’’𑀢𑀺 𑀩𑁆𑀬𑀸𑀧𑀸𑀤𑀸𑀪𑀸𑀯𑀸 𑀢𑀫𑁆𑀫𑀽𑀮𑀓𑀤𑀼𑀓𑁆𑀔𑀸𑀪𑀸𑀯𑁄, ‘‘𑀲𑀼𑀔𑀻 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀦𑁆𑀢𑀽’’𑀢𑀺 𑀤𑀼𑀓𑁆𑀔𑀸𑀪𑀸𑀯𑀸𑀲𑀼𑀔𑁂𑀦 𑀅𑀢𑁆𑀢𑀪𑀸𑀯𑀧𑀭𑀺𑀳𑀭𑀡𑀁 𑀤𑀲𑁆𑀲𑀺𑀢𑀦𑁆𑀢𑀺 𑀏𑀯𑀫𑁂𑀢𑁆𑀣 𑀯𑀘𑀦𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄𑀢𑀺. 𑀇𑀫𑁂𑀲𑀼 𑀘 ‘‘𑀅𑀯𑁂𑀭𑀸 𑀳𑁄𑀦𑁆𑀢𑀽’’𑀢𑀺𑀆𑀤𑀻𑀲𑀼 𑀘𑀢𑀽𑀲𑀼𑀧𑀺 𑀯𑀘𑀦𑁂𑀲𑀼 𑀬𑀁 𑀬𑀁 𑀧𑀸𑀓𑀝𑀁 𑀳𑁄𑀢𑀺, 𑀢𑀲𑁆𑀲 𑀢𑀲𑁆𑀲 𑀯𑀲𑁂𑀦 𑀫𑁂𑀢𑁆𑀢𑀸𑀬 𑀨𑀭𑀢𑀺.

𑀧𑀸𑀡𑀸𑀢𑀺𑀆𑀤𑀻𑀲𑀼 𑀧𑀸𑀡𑀦𑀢𑀸𑀬 𑀧𑀸𑀡𑀸, 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀪𑀽𑀢𑀢𑁆𑀢𑀸 𑀪𑀽𑀢𑀸, 𑀅𑀪𑀺𑀦𑀺𑀩𑁆𑀩𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀧𑀼𑀁 𑀯𑀼𑀘𑁆𑀘𑀢𑀺 𑀦𑀺𑀭𑀬𑁄, 𑀢𑀁 𑀧𑀼𑀁 𑀕𑀮𑀦𑁆𑀢𑀺 𑀕𑀘𑁆𑀙𑀦𑁆𑀢𑀻𑀢𑀺 𑀧𑀼𑀕𑁆𑀕𑀮𑀸. 𑀅𑀢𑁆𑀢𑀪𑀸𑀯𑁄 𑀯𑀼𑀘𑁆𑀘𑀢𑀺 𑀲𑀭𑀻𑀭𑀁, 𑀔𑀦𑁆𑀥𑀧𑀜𑁆𑀘𑀓𑀫𑁂𑀯 𑀯𑀸, 𑀢𑀁 𑀉𑀧𑀸𑀤𑀸𑀬 𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀲𑀩𑁆𑀪𑀸𑀯𑀢𑁄, 𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀧𑀭𑀺𑀬𑀸𑀧𑀦𑁆𑀦𑀸 𑀧𑀭𑀺𑀘𑁆𑀙𑀺𑀦𑁆𑀦𑀸 𑀅𑀦𑁆𑀢𑁄𑀕𑀥𑀸𑀢𑀺 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑀸. 𑀬𑀣𑀸 𑀘 𑀲𑀢𑁆𑀢𑀸𑀢𑀺 𑀯𑀘𑀦𑀁, 𑀏𑀯𑀁 𑀲𑁂𑀲𑀸𑀦𑀺𑀧𑀺 𑀭𑀼𑀴𑁆𑀳𑀻𑀯𑀲𑁂𑀦 𑀆𑀭𑁄𑀧𑁂𑀢𑁆𑀯𑀸 𑀲𑀩𑁆𑀩𑀸𑀦𑁂𑀢𑀸𑀦𑀺 𑀲𑀩𑁆𑀩𑀲𑀢𑁆𑀢𑀯𑁂𑀯𑀘𑀦𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀓𑀸𑀫𑀜𑁆𑀘 𑀅𑀜𑁆𑀜𑀸𑀦𑀺𑀧𑀺 ‘‘𑀲𑀩𑁆𑀩𑁂 𑀚𑀦𑁆𑀢𑀽 𑀲𑀩𑁆𑀩𑁂 𑀚𑀻𑀯𑀸’’𑀢𑀺𑀆𑀤𑀻𑀦𑀺 𑀲𑀩𑁆𑀩𑀲𑀢𑁆𑀢𑀯𑁂𑀯𑀘𑀦𑀸𑀦𑀺 𑀅𑀢𑁆𑀣𑀺, 𑀧𑀸𑀓𑀝𑀯𑀲𑁂𑀦 𑀧𑀦 𑀇𑀫𑀸𑀦𑁂𑀯 𑀧𑀜𑁆𑀘 𑀕𑀳𑁂𑀢𑁆𑀯𑀸 ‘‘𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀦𑁄𑀥𑀺𑀲𑁄 𑀨𑀭𑀡𑀸 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀬𑁂 𑀧𑀦 ‘‘𑀲𑀢𑁆𑀢𑀸 𑀧𑀸𑀡𑀸’’𑀢𑀺𑀆𑀤𑀻𑀦𑀁 𑀦 𑀓𑁂𑀯𑀮𑀁 𑀯𑀘𑀦𑀫𑀢𑁆𑀢𑀢𑁄𑀯, 𑀅𑀣 𑀔𑁄 𑀅𑀢𑁆𑀣𑀢𑁄𑀧𑀺 𑀦𑀸𑀦𑀢𑁆𑀢𑀫𑁂𑀯 𑀇𑀘𑁆𑀙𑁂𑀬𑁆𑀬𑀼𑀁, 𑀢𑁂𑀲𑀁 𑀅𑀦𑁄𑀥𑀺𑀲𑁄 𑀨𑀭𑀡𑀸 𑀯𑀺𑀭𑀼𑀚𑁆𑀛𑀢𑀺. 𑀢𑀲𑁆𑀫𑀸 𑀢𑀣𑀸 𑀅𑀢𑁆𑀣𑀁 𑀅𑀕𑁆𑀕𑀳𑁂𑀢𑁆𑀯𑀸 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀆𑀓𑀸𑀭𑁂𑀲𑀼 𑀅𑀜𑁆𑀜𑀢𑀭𑀯𑀲𑁂𑀦 𑀅𑀦𑁄𑀥𑀺𑀲𑁄 𑀫𑁂𑀢𑁆𑀢𑀸𑀬 𑀨𑀭𑀢𑀺.

𑀑𑀥𑀺𑀲𑁄 𑀨𑀭𑀡𑁂 𑀧𑀦 𑀇𑀢𑁆𑀣𑀺𑀬𑁄 𑀧𑀼𑀭𑀺𑀲𑀸𑀢𑀺 𑀮𑀺𑀗𑁆𑀕𑀯𑀲𑁂𑀦 𑀯𑀼𑀢𑁆𑀢𑀁, 𑀅𑀭𑀺𑀬𑀸 𑀅𑀦𑀭𑀺𑀬𑀸𑀢𑀺 𑀅𑀭𑀺𑀬𑀧𑀼𑀣𑀼𑀚𑁆𑀚𑀦𑀯𑀲𑁂𑀦, 𑀤𑁂𑀯𑀸𑀫𑀦𑀼𑀲𑁆𑀲𑀸 𑀯𑀺𑀦𑀺𑀧𑀸𑀢𑀺𑀓𑀸𑀢𑀺 𑀉𑀧𑀧𑀢𑁆𑀢𑀺𑀯𑀲𑁂𑀦. 𑀤𑀺𑀲𑀸𑀨𑀭𑀡𑁂𑀧𑀺 𑀤𑀺𑀲𑀸𑀯𑀺𑀪𑀸𑀕𑀁 𑀅𑀓𑀢𑁆𑀯𑀸 𑀲𑀩𑁆𑀩𑀤𑀺𑀲𑀸𑀲𑀼 ‘‘𑀲𑀩𑁆𑀩𑁂 𑀲𑀢𑁆𑀢𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀨𑀭𑀡𑀢𑁄 𑀅𑀦𑁄𑀥𑀺𑀲𑁄 𑀨𑀭𑀡𑀸 𑀳𑁄𑀢𑀺, 𑀲𑀩𑁆𑀩𑀤𑀺𑀲𑀸𑀲𑀼 ‘‘𑀲𑀩𑁆𑀩𑀸 𑀇𑀢𑁆𑀣𑀺𑀬𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀨𑀭𑀡𑀢𑁄 𑀑𑀥𑀺𑀲𑁄 𑀨𑀭𑀡𑀸.

𑀬𑀲𑁆𑀫𑀸 𑀧𑀦 𑀅𑀬𑀁 𑀢𑀺𑀯𑀺𑀥𑀸𑀧𑀺 𑀫𑁂𑀢𑁆𑀢𑀸𑀨𑀭𑀡𑀸 𑀅𑀧𑁆𑀧𑀦𑀸𑀧𑀢𑁆𑀢𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀸, 𑀢𑀲𑁆𑀫𑀸 𑀢𑀻𑀲𑀼 𑀯𑀸𑀭𑁂𑀲𑀼 𑀅𑀧𑁆𑀧𑀦𑀸 𑀕𑀳𑁂𑀢𑀩𑁆𑀩𑀸. 𑀅𑀦𑁄𑀥𑀺𑀲𑁄 𑀨𑀭𑀡𑁂 𑀢𑀸𑀯 ‘‘𑀲𑀩𑁆𑀩𑁂 𑀲𑀢𑁆𑀢𑀸 𑀅𑀯𑁂𑀭𑀸 𑀳𑁄𑀦𑁆𑀢𑀽’’𑀢𑀺 𑀏𑀓𑀸, ‘‘𑀅𑀩𑁆𑀬𑀸𑀧𑀚𑁆𑀚𑀸 𑀳𑁄𑀦𑁆𑀢𑀽’’𑀢𑀺 𑀏𑀓𑀸 ‘‘𑀅𑀦𑀻𑀖𑀸 𑀳𑁄𑀦𑁆𑀢𑀽’’𑀢𑀺 𑀏𑀓𑀸, ‘‘𑀲𑀼𑀔𑀻 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀦𑁆𑀢𑀽’’𑀢𑀺 𑀏𑀓𑀸. 𑀢𑀸𑀦𑀺𑀧𑀺 𑀳𑀺 𑀘𑀢𑁆𑀢𑀸𑀭𑀺 𑀳𑀺𑀢𑁄𑀧𑀲𑀁𑀳𑀸𑀭𑀯𑀲𑁂𑀦𑁂𑀯 𑀯𑀼𑀢𑁆𑀢𑀸𑀦𑀺. 𑀳𑀺𑀢𑁄𑀧𑀲𑀁𑀳𑀸𑀭𑀮𑀓𑁆𑀔𑀡𑀸 𑀳𑀺 𑀫𑁂𑀢𑁆𑀢𑀸. 𑀇𑀢𑀺 ‘‘𑀲𑀢𑁆𑀢𑀸’’𑀢𑀺𑀆𑀤𑀻𑀲𑀼 𑀧𑀜𑁆𑀘𑀲𑀼 𑀆𑀓𑀸𑀭𑁂𑀲𑀼 𑀘𑀢𑀲𑁆𑀲𑀦𑁆𑀦𑀁 𑀘𑀢𑀲𑁆𑀲𑀦𑁆𑀦𑀁 𑀅𑀧𑁆𑀧𑀦𑀸𑀦𑀁 𑀯𑀲𑁂𑀦 𑀯𑀻𑀲𑀢𑀺 𑀅𑀧𑁆𑀧𑀦𑀸 𑀳𑁄𑀦𑁆𑀢𑀺, 𑀑𑀥𑀺𑀲𑁄 𑀨𑀭𑀡𑁂 ‘‘𑀲𑀩𑁆𑀩𑀸 𑀇𑀢𑁆𑀣𑀺𑀬𑁄’’𑀢𑀺𑀆𑀤𑀻𑀲𑀼 𑀲𑀢𑁆𑀢𑀲𑀼 𑀆𑀓𑀸𑀭𑁂𑀲𑀼 𑀘𑀢𑀲𑁆𑀲𑀦𑁆𑀦𑀁 𑀘𑀢𑀲𑁆𑀲𑀦𑁆𑀦𑀁 𑀯𑀲𑁂𑀦 𑀅𑀝𑁆𑀞𑀯𑀻𑀲𑀢𑀺 𑀅𑀧𑁆𑀧𑀦𑀸. 𑀤𑀺𑀲𑀸𑀨𑀭𑀡𑁂 𑀧𑀦 ‘‘𑀲𑀩𑁆𑀩𑁂 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀲𑀢𑁆𑀢𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀏𑀓𑀫𑁂𑀓𑀺𑀲𑁆𑀲𑀸 𑀤𑀺𑀲𑀸𑀬 𑀯𑀻𑀲𑀢𑀺 𑀯𑀻𑀲𑀢𑀺 𑀓𑀢𑁆𑀯𑀸 𑀤𑁆𑀯𑁂 𑀲𑀢𑀸𑀦𑀺, ‘‘𑀲𑀩𑁆𑀩𑀸 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀇𑀢𑁆𑀣𑀺𑀬𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀏𑀓𑀫𑁂𑀓𑀺𑀲𑁆𑀲𑀸 𑀤𑀺𑀲𑀸𑀬 𑀅𑀝𑁆𑀞𑀯𑀻𑀲𑀢𑀺 𑀅𑀝𑁆𑀞𑀯𑀻𑀲𑀢𑀺 𑀓𑀢𑁆𑀯𑀸 𑀅𑀲𑀻𑀢𑀺 𑀤𑁆𑀯𑁂 𑀲𑀢𑀸𑀦𑀻𑀢𑀺 𑀘𑀢𑁆𑀢𑀸𑀭𑀺 𑀲𑀢𑀸𑀦𑀺 𑀅𑀲𑀻𑀢𑀺 𑀘 𑀅𑀧𑁆𑀧𑀦𑀸. 𑀇𑀢𑀺 𑀲𑀩𑁆𑀩𑀸𑀦𑀺𑀧𑀺 𑀇𑀥 𑀯𑀼𑀢𑁆𑀢𑀸𑀦𑀺 𑀅𑀝𑁆𑀞𑀯𑀻𑀲𑀸𑀥𑀺𑀓𑀸𑀦𑀺 𑀧𑀜𑁆𑀘 𑀅𑀧𑁆𑀧𑀦𑀸𑀲𑀢𑀸𑀦𑀺 𑀳𑁄𑀦𑁆𑀢𑀺. 𑀬𑀣𑀸 𑀘 𑀫𑁂𑀢𑁆𑀢𑀸𑀬 𑀢𑀺𑀯𑀺𑀥𑁂𑀦 𑀨𑀭𑀡𑀸 𑀯𑀼𑀢𑁆𑀢𑀸, 𑀢𑀣𑀸 𑀓𑀭𑀼𑀡𑀸𑀫𑀼𑀤𑀺𑀢𑀸𑀉𑀧𑁂𑀓𑁆𑀔𑀸𑀦𑀫𑁆𑀧𑀺 𑀯𑀼𑀢𑁆𑀢𑀸𑀯 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁧. 𑀇𑀦𑁆𑀤𑁆𑀭𑀺𑀬𑀯𑀸𑀭𑀯𑀡𑁆𑀡𑀦𑀸

𑁨𑁩. 𑀅𑀣 𑀫𑁂𑀢𑁆𑀢𑀽𑀧𑀲𑀁𑀳𑀸𑀭𑀸𑀓𑀸𑀭𑀁 𑀇𑀦𑁆𑀤𑁆𑀭𑀺𑀬𑀸𑀤𑀺𑀧𑀭𑀺𑀪𑀸𑀯𑀦𑀜𑁆𑀘 𑀤𑀲𑁆𑀲𑁂𑀢𑀼𑀁 𑀲𑀩𑁆𑀩𑁂𑀲𑀁 𑀲𑀢𑁆𑀢𑀸𑀦𑀁 𑀧𑀻𑀴𑀦𑀁 𑀯𑀚𑁆𑀚𑁂𑀢𑁆𑀯𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀻𑀴𑀦𑀦𑁆𑀢𑀺 𑀅𑀩𑁆𑀪𑀦𑁆𑀢𑀭𑀢𑁄 𑀲𑀭𑀻𑀭𑀧𑀻𑀴𑀦𑀁. 𑀉𑀧𑀖𑀸𑀢𑀦𑁆𑀢𑀺 𑀩𑀸𑀳𑀺𑀭𑀢𑁄 𑀲𑀭𑀻𑀭𑁄𑀧𑀖𑀸𑀢𑀁. 𑀲𑀦𑁆𑀢𑀸𑀧𑀦𑁆𑀢𑀺 𑀬𑀣𑀸 𑀢𑀣𑀸 𑀯𑀸 𑀘𑀺𑀢𑁆𑀢𑀲𑀦𑁆𑀢𑀸𑀧𑀦𑀁. 𑀧𑀭𑀺𑀬𑀸𑀤𑀸𑀦𑀦𑁆𑀢𑀺 𑀧𑀓𑀢𑀺𑀬𑀸 𑀚𑀻𑀯𑀺𑀢𑀸𑀤𑀺𑀧𑀭𑀺𑀓𑁆𑀔𑀬𑀁. 𑀯𑀺𑀳𑁂𑀲𑀦𑁆𑀢𑀺 𑀧𑀭𑀢𑁄 𑀚𑀻𑀯𑀺𑀢𑀯𑀺𑀳𑁂𑀞𑀦𑀁. 𑀯𑀚𑁆𑀚𑁂𑀢𑁆𑀯𑀸𑀢𑀺 𑀧𑀻𑀴𑀦𑀸𑀤𑀻𑀲𑀼 𑀏𑀓𑁂𑀓𑀁 𑀅𑀢𑁆𑀢𑀦𑁄 𑀘𑀺𑀢𑁆𑀢𑁂𑀦𑁂𑀯 𑀅𑀧𑀦𑁂𑀢𑁆𑀯𑀸. 𑀇𑀫𑀸𑀦𑀺 𑀧𑀻𑀴𑀦𑀸𑀤𑀻𑀦𑀺 𑀧𑀜𑁆𑀘 𑀧𑀤𑀸𑀦𑀺 𑀫𑁂𑀢𑁆𑀢𑁄𑀧𑀲𑀁𑀳𑀸𑀭𑀲𑁆𑀲 𑀧𑀝𑀺𑀧𑀓𑁆𑀔𑀯𑀺𑀯𑀚𑁆𑀚𑀦𑀯𑀲𑁂𑀦 𑀯𑀼𑀢𑁆𑀢𑀸𑀦𑀺, 𑀅𑀧𑀻𑀴𑀦𑀸𑀬𑀸𑀢𑀺𑀆𑀤𑀻𑀦𑀺 𑀫𑁂𑀢𑁆𑀢𑁄𑀧𑀲𑀁𑀳𑀸𑀭𑀯𑀲𑁂𑀦. 𑀅𑀧𑀻𑀴𑀦𑀸𑀬𑀸𑀢𑀺 𑀅𑀧𑀻𑀴𑀦𑀸𑀓𑀸𑀭𑁂𑀦, 𑀲𑀩𑁆𑀩𑁂 𑀲𑀢𑁆𑀢𑁂 𑀫𑁂𑀢𑁆𑀢𑀸𑀬𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀫𑀸 𑀯𑁂𑀭𑀺𑀦𑁄 𑀫𑀸 𑀤𑀼𑀓𑁆𑀔𑀺𑀦𑁄 𑀫𑀸 𑀤𑀼𑀓𑁆𑀔𑀺𑀢𑀢𑁆𑀢𑀸𑀢𑀺 𑀇𑀫𑀸𑀦𑀺𑀧𑀺 𑀢𑀻𑀡𑀺 𑀫𑁂𑀢𑁆𑀢𑁄𑀧𑀲𑀁𑀳𑀸𑀭𑀲𑁆𑀲 𑀧𑀝𑀺𑀧𑀓𑁆𑀔𑀧𑀝𑀺𑀓𑁆𑀔𑁂𑀧𑀯𑀘𑀦𑀸𑀦𑀺. 𑀫𑀸-𑀯𑀘𑀦𑀲𑁆𑀲 𑀫𑀸 𑀳𑁄𑀦𑁆𑀢𑀽𑀢𑀺 𑀅𑀢𑁆𑀣𑁄. 𑀅𑀯𑁂𑀭𑀺𑀦𑁄 𑀲𑀼𑀔𑀺𑀦𑁄 𑀲𑀼𑀔𑀺𑀢𑀢𑁆𑀢𑀸𑀢𑀺 𑀇𑀫𑀸𑀦𑀺 𑀢𑀻𑀡𑀺 𑀫𑁂𑀢𑁆𑀢𑁄𑀧𑀲𑀁𑀳𑀸𑀭𑀯𑀘𑀦𑀸𑀦𑀺. ‘‘𑀅𑀩𑁆𑀬𑀸𑀧𑀚𑁆𑀚𑀸 𑀅𑀦𑀻𑀖𑀸’’𑀢𑀺 𑀇𑀤𑀁 𑀤𑁆𑀯𑀬𑀁 ‘‘𑀲𑀼𑀔𑀺𑀦𑁄’’𑀢𑀺 𑀯𑀘𑀦𑁂𑀦 𑀲𑀗𑁆𑀕𑀳𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀼𑀔𑀺𑀢𑀢𑁆𑀢𑀸𑀢𑀺 𑀢𑀲𑁆𑀲𑁂𑀯 𑀲𑀼𑀔𑀲𑁆𑀲 𑀦𑀺𑀘𑁆𑀘𑀧𑁆𑀧𑀯𑀢𑁆𑀢𑀺𑀤𑀲𑁆𑀲𑀦𑀁. ‘‘𑀲𑀼𑀔𑀺𑀢𑀢𑁆𑀢𑀸’’𑀢𑀺 𑀘 ‘‘𑀲𑀼𑀔𑀻 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀦𑁆𑀢𑀽’’𑀢𑀺 𑀘 𑀅𑀢𑁆𑀣𑀢𑁄 𑀏𑀓𑀁. ‘‘𑀅𑀧𑀻𑀴𑀦𑀸𑀬𑀸’’𑀢𑀺𑀆𑀤𑀻𑀳𑀺 𑀯𑀸 𑀅𑀩𑁆𑀬𑀸𑀧𑀚𑁆𑀚𑀸𑀦𑀻𑀖𑀯𑀘𑀦𑀸𑀦𑀺 𑀲𑀗𑁆𑀕𑀳𑀺𑀢𑀸𑀦𑀺. 𑀅𑀝𑁆𑀞𑀳𑀸𑀓𑀸𑀭𑁂𑀳𑀻𑀢𑀺 ‘‘𑀅𑀧𑀻𑀴𑀦𑀸𑀬𑀸’’𑀢𑀺𑀆𑀤𑀬𑁄 𑀧𑀜𑁆𑀘 𑀫𑁂𑀢𑁆𑀢𑁄𑀧𑀲𑀁𑀳𑀸𑀭𑀸𑀓𑀸𑀭𑀸 ‘‘𑀅𑀯𑁂𑀭𑀺𑀦𑁄 𑀳𑁄𑀦𑁆𑀢𑀽’’𑀢𑀺𑀆𑀤𑀬𑁄 𑀢𑀬𑁄 𑀫𑁂𑀢𑁆𑀢𑁄𑀧𑀲𑀁𑀳𑀸𑀭𑀸𑀓𑀸𑀭𑀸𑀢𑀺 𑀇𑀫𑁂𑀳𑀺 𑀅𑀝𑁆𑀞𑀳𑀸𑀓𑀸𑀭𑁂𑀳𑀺. 𑀫𑁂𑀢𑁆𑀢𑀸𑀬𑀢𑀻𑀢𑀺 𑀲𑀺𑀦𑀺𑀬𑁆𑀳𑀢𑀺. 𑀢𑀁 𑀥𑀫𑁆𑀫𑀁 𑀘𑁂𑀢𑀬𑀢𑀻𑀢𑀺 𑀢𑀁 𑀳𑀺𑀢𑁄𑀧𑀲𑀁𑀳𑀸𑀭𑀁 𑀘𑁂𑀢𑀬𑀢𑀺 𑀅𑀪𑀺𑀲𑀦𑁆𑀤𑀳𑀢𑀺, 𑀧𑀯𑀢𑁆𑀢𑁂𑀢𑀻𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀩𑁆𑀬𑀸𑀧𑀸𑀤𑀧𑀭𑀺𑀬𑀼𑀝𑁆𑀞𑀸𑀦𑁂𑀳𑀺 𑀯𑀺𑀫𑀼𑀘𑁆𑀘𑀢𑀻𑀢𑀺 𑀫𑁂𑀢𑁆𑀢𑀸𑀬 𑀧𑀝𑀺𑀧𑀓𑁆𑀔𑀪𑀽𑀢𑁂𑀳𑀺 𑀲𑀩𑁆𑀩𑁂𑀳𑀺 𑀩𑁆𑀬𑀸𑀧𑀸𑀤𑀲𑀫𑀼𑀤𑀸𑀘𑀸𑀭𑁂𑀳𑀺 𑀯𑀺𑀓𑁆𑀔𑀫𑁆𑀪𑀦𑀢𑁄 𑀯𑀺𑀫𑀼𑀘𑁆𑀘𑀢𑀺. 𑀫𑁂𑀢𑁆𑀢𑀸 𑀘 𑀘𑁂𑀢𑁄 𑀘 𑀯𑀺𑀫𑀼𑀢𑁆𑀢𑀺 𑀘𑀸𑀢𑀺 𑀏𑀓𑀸𑀬𑁂𑀯 𑀫𑁂𑀢𑁆𑀢𑀸 𑀢𑀺𑀥𑀸 𑀯𑀡𑁆𑀡𑀺𑀢𑀸.

𑀅𑀯𑁂𑀭𑀺𑀦𑁄 𑀔𑁂𑀫𑀺𑀦𑁄 𑀲𑀼𑀔𑀺𑀦𑁄𑀢𑀺 𑀇𑀫𑀸𑀦𑀺 𑀢𑀻𑀡𑀺 𑀧𑀤𑀸𑀦𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑁂 𑀆𑀓𑀸𑀭𑁂 𑀲𑀗𑁆𑀔𑁂𑀧𑁂𑀦 𑀲𑀗𑁆𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀸𑀦𑀺. 𑀲𑀤𑁆𑀥𑀸𑀬 𑀅𑀥𑀺𑀫𑀼𑀘𑁆𑀘𑀢𑀻𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀫𑁂𑀢𑁆𑀢𑀸𑀬 𑀲𑀫𑁆𑀧𑀬𑀼𑀢𑁆𑀢𑀸𑀦𑀺𑀬𑁂𑀯. 𑀆𑀲𑁂𑀯𑀦𑀸𑀢𑀺𑀆𑀤𑀻𑀲𑀼 𑀙𑀲𑀼 𑀯𑀸𑀭𑁂𑀲𑀼 𑀆𑀲𑁂𑀯𑀻𑀬𑀢𑀺 𑀏𑀢𑁂𑀳𑀺 𑀫𑁂𑀢𑁆𑀢𑀸𑀢𑀺 𑀆𑀲𑁂𑀯𑀦𑀸. 𑀢𑀣𑀸 𑀪𑀸𑀯𑀦𑀸 𑀩𑀳𑀼𑀮𑀻𑀓𑀫𑁆𑀫𑀁. 𑀅𑀮𑀗𑁆𑀓𑀸𑀭𑀸𑀢𑀺 𑀯𑀺𑀪𑀽𑀲𑀦𑀸. 𑀲𑁆𑀯𑀸𑀮𑀗𑁆𑀓𑀢𑀸𑀢𑀺 𑀲𑀼𑀝𑁆𑀞𑀼 𑀅𑀮𑀗𑁆𑀓𑀢𑀸 𑀪𑀽𑀲𑀺𑀢𑀸. 𑀧𑀭𑀺𑀓𑁆𑀔𑀸𑀭𑀸𑀢𑀺 𑀲𑀫𑁆𑀪𑀸𑀭𑀸. 𑀲𑀼𑀧𑀭𑀺𑀓𑁆𑀔𑀢𑀸𑀢𑀺 𑀲𑀼𑀝𑁆𑀞𑀼 𑀲𑀫𑁆𑀪𑀢𑀸. 𑀧𑀭𑀺𑀯𑀸𑀭𑀸𑀢𑀺 𑀭𑀓𑁆𑀔𑀦𑀝𑁆𑀞𑁂𑀦. 𑀧𑀼𑀦 𑀆𑀲𑁂𑀯𑀦𑀸𑀤𑀻𑀦𑀺 𑀅𑀝𑁆𑀞𑀯𑀻𑀲𑀢𑀺 𑀧𑀤𑀸𑀦𑀺 𑀫𑁂𑀢𑁆𑀢𑀸𑀬 𑀯𑀡𑁆𑀡𑀪𑀡𑀦𑀢𑁆𑀣𑀁 𑀯𑀼𑀢𑁆𑀢𑀸𑀦𑀺. 𑀢𑀢𑁆𑀣 𑀧𑀸𑀭𑀺𑀧𑀽𑀭𑀻𑀢𑀺 𑀧𑀭𑀺𑀧𑀼𑀡𑁆𑀡𑀪𑀸𑀯𑀸. 𑀲𑀳𑀕𑀢𑀸𑀢𑀺 𑀫𑁂𑀢𑁆𑀢𑀸𑀬 𑀲𑀳𑀕𑀢𑀸. 𑀢𑀣𑀸 𑀲𑀳𑀚𑀸𑀢𑀸𑀤𑀬𑁄. 𑀧𑀓𑁆𑀔𑀦𑁆𑀤𑀦𑀸𑀢𑀺 𑀫𑁂𑀢𑁆𑀢𑀸𑀬 𑀧𑀯𑀺𑀲𑀦𑀸, 𑀧𑀓𑁆𑀔𑀦𑁆𑀤𑀢𑀺 𑀏𑀢𑁂𑀳𑀺 𑀫𑁂𑀢𑁆𑀢𑀸𑀢𑀺 𑀯𑀸 𑀧𑀓𑁆𑀔𑀦𑁆𑀤𑀦𑀸. 𑀢𑀣𑀸 𑀲𑀁𑀲𑀻𑀤𑀦𑀸𑀤𑀬𑁄. 𑀏𑀢𑀁 𑀲𑀦𑁆𑀢𑀦𑁆𑀢𑀺 𑀨𑀲𑁆𑀲𑀦𑀸𑀢𑀺 𑀏𑀲𑀸 𑀫𑁂𑀢𑁆𑀢𑀸 𑀲𑀦𑁆𑀢𑀸𑀢𑀺 𑀏𑀢𑁂𑀳𑀺 𑀨𑀲𑁆𑀲𑀦𑀸 𑀳𑁄𑀢𑀻𑀢𑀺 𑀏𑀢𑀁 𑀲𑀦𑁆𑀢𑀦𑁆𑀢𑀺 𑀨𑀲𑁆𑀲𑀦𑀸 ‘‘𑀏𑀢𑀤𑀕𑁆𑀕’’𑀦𑁆𑀢𑀺𑀆𑀤𑀻𑀲𑀼 (𑀅. 𑀦𑀺. 𑁧.𑁧𑁮𑁮 𑀆𑀤𑀬𑁄) 𑀯𑀺𑀬 𑀦𑀧𑀼𑀁𑀲𑀓𑀯𑀘𑀦𑀁. 𑀲𑁆𑀯𑀸𑀥𑀺𑀝𑁆𑀞𑀺𑀢𑀸𑀢𑀺 𑀲𑀼𑀝𑁆𑀞𑀼 𑀧𑀢𑀺𑀝𑁆𑀞𑀺𑀢𑀸. 𑀲𑀼𑀲𑀫𑀼𑀕𑁆𑀕𑀢𑀸𑀢𑀺 𑀲𑀼𑀝𑁆𑀞𑀼 𑀲𑀫𑀼𑀲𑁆𑀲𑀺𑀢𑀸. 𑀲𑀼𑀯𑀺𑀫𑀼𑀢𑁆𑀢𑀸𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀘𑁆𑀘𑀦𑀻𑀓𑁂𑀳𑀺 𑀲𑀼𑀝𑁆𑀞𑀼 𑀯𑀺𑀫𑀼𑀢𑁆𑀢𑀸. 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀻𑀢𑀺 𑀫𑁂𑀢𑁆𑀢𑀸𑀲𑀫𑁆𑀧𑀬𑀼𑀢𑁆𑀢𑀸 𑀳𑀼𑀢𑁆𑀯𑀸 𑀫𑁂𑀢𑁆𑀢𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺. 𑀚𑁄𑀢𑁂𑀦𑁆𑀢𑀻𑀢𑀺 𑀧𑀸𑀓𑀝𑀁 𑀓𑀭𑁄𑀦𑁆𑀢𑀺. 𑀧𑀢𑀸𑀧𑁂𑀦𑁆𑀢𑀻𑀢𑀺 𑀯𑀺𑀭𑁄𑀘𑁂𑀦𑁆𑀢𑀺.

𑁨-𑁪. 𑀩𑀮𑀸𑀤𑀺𑀯𑀸𑀭𑀢𑁆𑀢𑀬𑀯𑀡𑁆𑀡𑀦𑀸

𑁨𑁪-𑁨𑁭. 𑀇𑀦𑁆𑀤𑁆𑀭𑀺𑀬𑀯𑀸𑀭𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀩𑀮𑀯𑀸𑀭𑁄𑀧𑀺 𑀯𑁂𑀤𑀺𑀢𑀩𑁆𑀩𑁄. 𑀩𑁄𑀚𑁆𑀛𑀗𑁆𑀕𑀫𑀕𑁆𑀕𑀗𑁆𑀕𑀯𑀸𑀭𑀸 𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀸, 𑀦 𑀬𑀣𑀸𑀮𑀓𑁆𑀔𑀡𑀯𑀲𑁂𑀦. 𑀫𑀕𑁆𑀕𑀗𑁆𑀕𑀯𑀸𑀭𑁂 𑀲𑀫𑁆𑀫𑀸𑀯𑀸𑀘𑀸𑀓𑀫𑁆𑀫𑀦𑁆𑀢𑀸𑀚𑀻𑀯𑀸 𑀫𑁂𑀢𑁆𑀢𑀸𑀬 𑀧𑀼𑀩𑁆𑀩𑀪𑀸𑀕𑀯𑀲𑁂𑀦 𑀯𑀼𑀢𑁆𑀢𑀸, 𑀦 𑀅𑀧𑁆𑀧𑀦𑀸𑀯𑀲𑁂𑀦. 𑀦 𑀳𑀺 𑀏𑀢𑁂 𑀫𑁂𑀢𑁆𑀢𑀸𑀬 𑀲𑀳 𑀪𑀯𑀦𑁆𑀢𑀺. 𑀲𑀩𑁆𑀩𑁂𑀲𑀁 𑀧𑀸𑀡𑀸𑀦𑀦𑁆𑀢𑀺𑀆𑀤𑀻𑀦𑀁 𑀲𑁂𑀲𑀯𑀸𑀭𑀸𑀦𑀫𑁆𑀧𑀺 𑀲𑀢𑁆𑀢𑀯𑀸𑀭𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀫𑁂𑀢𑁆𑀢𑀸𑀪𑀸𑀯𑀦𑀸𑀯𑀺𑀥𑀸𑀦𑀁 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀢𑁄 (𑀯𑀺𑀲𑀼𑀤𑁆𑀥𑀺. 𑁧.𑁨𑁪𑁦 𑀆𑀤𑀬𑁄) 𑀕𑀳𑁂𑀢𑀩𑁆𑀩𑀦𑁆𑀢𑀺.

𑀫𑁂𑀢𑁆𑀢𑀸𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.