𑁧𑁦. 𑀲𑀼𑀜𑁆𑀜𑀓𑀣𑀸

𑀲𑀼𑀜𑁆𑀜𑀓𑀣𑀸𑀯𑀡𑁆𑀡𑀦𑀸

𑁪𑁬. 𑀇𑀤𑀸𑀦𑀺 𑀮𑁄𑀓𑀼𑀢𑁆𑀢𑀭𑀩𑀮𑀧𑀭𑀺𑀬𑁄𑀲𑀸𑀦𑀸𑀬 𑀩𑀮𑀓𑀣𑀸𑀬 𑀅𑀦𑀦𑁆𑀢𑀭𑀁 𑀓𑀣𑀺𑀢𑀸𑀬 𑀮𑁄𑀓𑀼𑀢𑁆𑀢𑀭𑀲𑀼𑀜𑁆𑀜𑀢𑀸𑀧𑀭𑀺𑀬𑁄𑀲𑀸𑀦𑀸𑀬 𑀲𑀼𑀢𑁆𑀢𑀦𑁆𑀢𑀧𑀼𑀩𑁆𑀩𑀗𑁆𑀕𑀫𑀸𑀬 𑀲𑀼𑀜𑁆𑀜𑀢𑀸𑀓𑀣𑀸𑀬 𑀅𑀧𑀼𑀩𑁆𑀩𑀢𑁆𑀣𑀸𑀦𑀼𑀯𑀡𑁆𑀡𑀦𑀸. 𑀲𑀼𑀢𑁆𑀢𑀦𑁆𑀢𑁂 𑀢𑀸𑀯 𑀅𑀣𑀸𑀢𑀺 𑀯𑀘𑀦𑁄𑀧𑀸𑀤𑀸𑀦𑁂 𑀦𑀺𑀧𑀸𑀢𑁄. 𑀏𑀢𑁂𑀦 𑀆𑀬𑀲𑁆𑀫𑀸𑀢𑀺𑀆𑀤𑀺𑀯𑀘𑀦𑀲𑁆𑀲 𑀉𑀧𑀸𑀤𑀸𑀦𑀁 𑀓𑀢𑀁 𑀳𑁄𑀢𑀺. 𑀔𑁄𑀢𑀺 𑀧𑀤𑀧𑀽𑀭𑀡𑀢𑁆𑀣𑁂 𑀦𑀺𑀧𑀸𑀢𑁄. 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀪𑀼𑀫𑁆𑀫𑀢𑁆𑀣𑁂 𑀓𑀭𑀡𑀯𑀘𑀦𑀁. 𑀢𑀲𑁆𑀫𑀸 𑀬𑀢𑁆𑀣 𑀪𑀕𑀯𑀸, 𑀢𑀢𑁆𑀣 𑀉𑀧𑀲𑀗𑁆𑀓𑀫𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀬𑁂𑀦 𑀯𑀸 𑀓𑀸𑀭𑀡𑁂𑀦 𑀪𑀕𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄, 𑀢𑁂𑀦𑁂𑀯 𑀓𑀸𑀭𑀡𑁂𑀦 𑀉𑀧𑀲𑀗𑁆𑀓𑀫𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀓𑁂𑀦 𑀘 𑀓𑀸𑀭𑀡𑁂𑀦 𑀪𑀕𑀯𑀸 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄? 𑀦𑀸𑀦𑀧𑁆𑀧𑀓𑀸𑀭𑀕𑀼𑀡𑀯𑀺𑀲𑁂𑀲𑀸𑀥𑀺𑀕𑀫𑀸𑀥𑀺𑀧𑁆𑀧𑀸𑀬𑁂𑀦, 𑀲𑀸𑀤𑀼𑀨𑀮𑀽𑀧𑀪𑁄𑀕𑀸𑀥𑀺𑀧𑁆𑀧𑀸𑀬𑁂𑀦 𑀤𑀺𑀚𑀕𑀡𑁂𑀳𑀺 𑀦𑀺𑀘𑁆𑀘𑀨𑀮𑀺𑀢𑀫𑀳𑀸𑀭𑀼𑀓𑁆𑀔𑁄 𑀯𑀺𑀬, 𑀢𑁂𑀦 𑀓𑀸𑀭𑀡𑁂𑀦 𑀉𑀧𑀲𑀗𑁆𑀓𑀫𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀉𑀧𑀲𑀗𑁆𑀓𑀫𑀻𑀢𑀺 𑀘 𑀕𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀧𑀲𑀗𑁆𑀓𑀫𑀺𑀢𑁆𑀯𑀸𑀢𑀺 𑀉𑀧𑀲𑀗𑁆𑀓𑀫𑀦𑀧𑀭𑀺𑀬𑁄𑀲𑀸𑀦𑀤𑀻𑀧𑀦𑀁. 𑀅𑀣 𑀯𑀸 𑀏𑀯𑀜𑁆𑀘 𑀕𑀢𑁄 𑀢𑀢𑁄 𑀆𑀲𑀦𑁆𑀦𑀢𑀭𑀁 𑀞𑀸𑀦𑀁 𑀪𑀕𑀯𑀢𑁄 𑀲𑀫𑀻𑀧𑀲𑀗𑁆𑀔𑀸𑀢𑀁 𑀕𑀦𑁆𑀢𑁆𑀯𑀸𑀢𑀺𑀧𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀪𑀺𑀯𑀸𑀤𑁂𑀢𑁆𑀯𑀸𑀢𑀺 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸. 𑀇𑀤𑀸𑀦𑀺 𑀬𑁂𑀦𑀝𑁆𑀞𑁂𑀦 𑀮𑁄𑀓𑁂 𑀅𑀕𑁆𑀕𑀧𑀼𑀕𑁆𑀕𑀮𑀲𑁆𑀲 𑀉𑀧𑀝𑁆𑀞𑀸𑀦𑀁 𑀆𑀕𑀢𑁄, 𑀢𑀁 𑀧𑀼𑀘𑁆𑀙𑀺𑀢𑀼𑀓𑀸𑀫𑁄 𑀤𑀲𑀦𑀔𑀲𑀫𑁄𑀥𑀸𑀦𑀲𑀫𑀼𑀚𑁆𑀚𑀮𑀁 𑀅𑀜𑁆𑀚𑀮𑀺𑀁 𑀲𑀺𑀭𑀲𑀺 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀦𑁆𑀢𑀺 𑀘 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄 ‘‘𑀯𑀺𑀲𑀫𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀧𑀭𑀺𑀳𑀭𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁭𑁦) 𑀯𑀺𑀬. 𑀢𑀲𑁆𑀫𑀸 𑀬𑀣𑀸 𑀦𑀺𑀲𑀺𑀦𑁆𑀦𑁄 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀢𑀣𑀸 𑀦𑀺𑀲𑀻𑀤𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀪𑀼𑀫𑁆𑀫𑀢𑁆𑀣𑁂 𑀯𑀸 𑀏𑀢𑀁 𑀉𑀧𑀬𑁄𑀕𑀯𑀘𑀦𑀁. 𑀦𑀺𑀲𑀻𑀤𑀻𑀢𑀺 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀲𑀺. 𑀧𑀡𑁆𑀟𑀺𑀢𑀸 𑀳𑀺 𑀤𑁂𑀯𑀫𑀦𑀼𑀲𑁆𑀲𑀸 𑀕𑀭𑀼𑀝𑁆𑀞𑀸𑀦𑀻𑀬𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀲𑀦𑀓𑀼𑀲𑀮𑀢𑀸𑀬 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀦𑁆𑀢𑀺, 𑀅𑀬𑀜𑁆𑀘 𑀣𑁂𑀭𑁄 𑀢𑁂𑀲𑀁 𑀅𑀜𑁆𑀜𑀢𑀭𑁄, 𑀢𑀲𑁆𑀫𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺.

𑀓𑀣𑀁 𑀦𑀺𑀲𑀺𑀦𑁆𑀦𑁄 𑀧𑀦 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀳𑁄𑀢𑀻𑀢𑀺? 𑀙 𑀦𑀺𑀲𑀚𑁆𑀚𑀤𑁄𑀲𑁂 𑀯𑀚𑁆𑀚𑁂𑀢𑁆𑀯𑀸. 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀢𑀺𑀤𑀽𑀭𑀁 𑀅𑀘𑁆𑀘𑀸𑀲𑀦𑁆𑀦𑀁 𑀉𑀧𑀭𑀺𑀯𑀸𑀢𑀁 𑀉𑀦𑁆𑀦𑀢𑀧𑁆𑀧𑀤𑁂𑀲𑀁 𑀅𑀢𑀺𑀲𑀫𑁆𑀫𑀼𑀔𑀁 𑀅𑀢𑀺𑀧𑀘𑁆𑀙𑀸𑀢𑀺. 𑀅𑀢𑀺𑀤𑀽𑀭𑁂 𑀦𑀺𑀲𑀺𑀦𑁆𑀦𑁄 𑀳𑀺 𑀲𑀘𑁂 𑀓𑀣𑁂𑀢𑀼𑀓𑀸𑀫𑁄 𑀳𑁄𑀢𑀺, 𑀉𑀘𑁆𑀘𑀸𑀲𑀤𑁆𑀤𑁂𑀦 𑀓𑀣𑁂𑀢𑀩𑁆𑀩𑀁 𑀳𑁄𑀢𑀺. 𑀅𑀘𑁆𑀘𑀸𑀲𑀦𑁆𑀦𑁂 𑀦𑀺𑀲𑀺𑀦𑁆𑀦𑁄 𑀲𑀗𑁆𑀖𑀝𑁆𑀝𑀦𑀁 𑀓𑀭𑁄𑀢𑀺. 𑀉𑀧𑀭𑀺𑀯𑀸𑀢𑁂 𑀦𑀺𑀲𑀺𑀦𑁆𑀦𑁄 𑀲𑀭𑀻𑀭𑀕𑀦𑁆𑀥𑁂𑀦 𑀩𑀸𑀥𑀢𑀺. 𑀉𑀦𑁆𑀦𑀢𑀧𑁆𑀧𑀤𑁂𑀲𑁂 𑀦𑀺𑀲𑀺𑀦𑁆𑀦𑁄 𑀅𑀕𑀸𑀭𑀯𑀁 𑀧𑀓𑀸𑀲𑁂𑀢𑀺. 𑀅𑀢𑀺𑀲𑀫𑁆𑀫𑀼𑀔𑀸 𑀦𑀺𑀲𑀺𑀦𑁆𑀦𑁄 𑀲𑀘𑁂 𑀤𑀝𑁆𑀞𑀼𑀓𑀸𑀫𑁄 𑀳𑁄𑀢𑀺, 𑀘𑀓𑁆𑀔𑀼𑀦𑀸 𑀘𑀓𑁆𑀔𑀼𑀁 𑀆𑀳𑀘𑁆𑀘 𑀤𑀝𑁆𑀞𑀩𑁆𑀩𑀁 𑀳𑁄𑀢𑀺. 𑀅𑀢𑀺𑀧𑀘𑁆𑀙𑀸 𑀦𑀺𑀲𑀺𑀦𑁆𑀦𑁄 𑀲𑀘𑁂 𑀤𑀝𑁆𑀞𑀼𑀓𑀸𑀫𑁄 𑀳𑁄𑀢𑀺, 𑀕𑀻𑀯𑀁 𑀧𑀲𑀸𑀭𑁂𑀢𑁆𑀯𑀸 𑀤𑀝𑁆𑀞𑀩𑁆𑀩𑀁 𑀳𑁄𑀢𑀺. 𑀢𑀲𑁆𑀫𑀸 𑀅𑀬𑀫𑁆𑀧𑀺 𑀏𑀢𑁂 𑀙 𑀦𑀺𑀲𑀚𑁆𑀚𑀤𑁄𑀲𑁂 𑀯𑀚𑁆𑀚𑁂𑀢𑁆𑀯𑀸 𑀦𑀺𑀲𑀻𑀤𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀻’’𑀢𑀺. 𑀏𑀢𑀤𑀯𑁄𑀘𑀸𑀢𑀺 𑀏𑀢𑀁 𑀅𑀯𑁄𑀘.

𑀲𑀼𑀜𑁆𑀜𑁄 𑀮𑁄𑀓𑁄 𑀲𑀼𑀜𑁆𑀜𑁄 𑀮𑁄𑀓𑁄𑀢𑀺, 𑀪𑀦𑁆𑀢𑁂, 𑀯𑀼𑀘𑁆𑀘𑀢𑀻𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀧𑀝𑀺𑀧𑀦𑁆𑀦𑁂𑀳𑀺 𑀢𑁂𑀳𑀺 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 ‘‘𑀲𑀼𑀜𑁆𑀜𑁄 𑀮𑁄𑀓𑁄 𑀲𑀼𑀜𑁆𑀜𑁄 𑀮𑁄𑀓𑁄’’𑀢𑀺 𑀓𑀣𑀻𑀬𑀢𑀻𑀢𑀺 𑀅𑀢𑁆𑀣𑁄. 𑀢𑀳𑀺𑀁 𑀢𑀳𑀺𑀁 𑀢𑀸𑀤𑀺𑀲𑀸𑀦𑀁 𑀯𑀘𑀦𑀸𑀦𑀁 𑀩𑀳𑀼𑀓𑀢𑁆𑀢𑀸 𑀢𑁂𑀲𑀁 𑀲𑀩𑁆𑀩𑁂𑀲𑀁 𑀲𑀗𑁆𑀕𑀡𑁆𑀳𑀦𑀢𑁆𑀣𑀁 𑀆𑀫𑁂𑀟𑀺𑀢𑀯𑀘𑀦𑀁 𑀓𑀢𑀁. 𑀏𑀯𑀜𑁆𑀳𑀺 𑀯𑀼𑀢𑁆𑀢𑁂 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀯𑀘𑀦𑀸𑀦𑀺 𑀲𑀗𑁆𑀕𑀳𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀓𑀺𑀢𑁆𑀢𑀸𑀯𑀢𑀸𑀢𑀺 𑀓𑀺𑀢𑁆𑀢𑀓𑁂𑀦 𑀧𑀭𑀺𑀫𑀸𑀡𑁂𑀦. 𑀦𑀼-𑀇𑀢𑀺 𑀲𑀁𑀲𑀬𑀢𑁆𑀣𑁂 𑀦𑀺𑀧𑀸𑀢𑁄. 𑀲𑀼𑀜𑁆𑀜𑀁 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸𑀢𑀺 ‘‘𑀓𑀸𑀭𑀓𑁄 𑀯𑁂𑀤𑀓𑁄 𑀲𑀬𑀁𑀯𑀲𑀻’’𑀢𑀺 𑀏𑀯𑀁 𑀮𑁄𑀓𑀧𑀭𑀺𑀓𑀧𑁆𑀧𑀺𑀢𑁂𑀦 𑀅𑀢𑁆𑀢𑀦𑀸 𑀘 𑀅𑀢𑁆𑀢𑀸𑀪𑀸𑀯𑀢𑁄𑀬𑁂𑀯 𑀅𑀢𑁆𑀢𑀦𑁄 𑀲𑀦𑁆𑀢𑀓𑁂𑀦 𑀧𑀭𑀺𑀓𑁆𑀔𑀸𑀭𑁂𑀦 𑀘 𑀲𑀼𑀜𑁆𑀜𑀁. 𑀲𑀩𑁆𑀩𑀁 𑀘𑀓𑁆𑀔𑀸𑀤𑀺 𑀮𑁄𑀓𑀺𑀬𑀁 𑀥𑀫𑁆𑀫𑀚𑀸𑀢𑀁, 𑀢𑀁𑀬𑁂𑀯 𑀮𑀼𑀚𑁆𑀚𑀦𑀧𑀮𑀼𑀚𑁆𑀚𑀦𑀝𑁆𑀞𑁂𑀦 𑀮𑁄𑀓𑁄 𑀦𑀸𑀫. 𑀬𑀲𑁆𑀫𑀸 𑀘 𑀅𑀢𑁆𑀢𑀸 𑀘 𑀏𑀢𑁆𑀣 𑀦𑀢𑁆𑀣𑀺, 𑀅𑀢𑁆𑀢𑀦𑀺𑀬𑀜𑁆𑀘 𑀏𑀢𑁆𑀣 𑀦𑀢𑁆𑀣𑀺, 𑀢𑀲𑁆𑀫𑀸 𑀲𑀼𑀜𑁆𑀜𑁄 𑀮𑁄𑀓𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄. 𑀮𑁄𑀓𑀼𑀢𑁆𑀢𑀭𑁄𑀧𑀺 𑀘 𑀥𑀫𑁆𑀫𑁄 𑀅𑀢𑁆𑀢𑀢𑁆𑀢𑀦𑀺𑀬𑁂𑀳𑀺 𑀲𑀼𑀜𑁆𑀜𑁄 𑀏𑀯, 𑀧𑀼𑀘𑁆𑀙𑀸𑀦𑀼𑀭𑀽𑀧𑁂𑀦 𑀧𑀦 𑀮𑁄𑀓𑀺𑀬𑁄𑀯 𑀥𑀫𑁆𑀫𑁄 𑀯𑀼𑀢𑁆𑀢𑁄. 𑀲𑀼𑀜𑁆𑀜𑁄𑀢𑀺 𑀘 𑀥𑀫𑁆𑀫𑁄 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀦 𑀳𑁄𑀢𑀺, 𑀢𑀲𑁆𑀫𑀺𑀁 𑀥𑀫𑁆𑀫𑁂 𑀅𑀢𑁆𑀢𑀢𑁆𑀢𑀦𑀺𑀬𑀲𑀸𑀭𑀲𑁆𑀲 𑀦𑀢𑁆𑀣𑀺𑀪𑀸𑀯𑁄 𑀯𑀼𑀢𑁆𑀢𑁄 𑀳𑁄𑀢𑀺. 𑀮𑁄𑀓𑁂 𑀘 ‘‘𑀲𑀼𑀜𑁆𑀜𑀁 𑀖𑀭𑀁, 𑀲𑀼𑀜𑁆𑀜𑁄 𑀖𑀝𑁄’’𑀢𑀺 𑀯𑀼𑀢𑁆𑀢𑁂 𑀖𑀭𑀲𑁆𑀲 𑀖𑀝𑀲𑁆𑀲 𑀘 𑀦𑀢𑁆𑀣𑀺𑀪𑀸𑀯𑁄 𑀯𑀼𑀢𑁆𑀢𑁄 𑀦 𑀳𑁄𑀢𑀺, 𑀢𑀲𑁆𑀫𑀺𑀁 𑀖𑀭𑁂 𑀖𑀝𑁂 𑀘 𑀅𑀜𑁆𑀜𑀲𑁆𑀲 𑀦𑀢𑁆𑀣𑀺𑀪𑀸𑀯𑁄 𑀯𑀼𑀢𑁆𑀢𑁄 𑀳𑁄𑀢𑀺. 𑀪𑀕𑀯𑀢𑀸 𑀘 ‘‘𑀇𑀢𑀺 𑀬𑀜𑁆𑀳𑀺 𑀔𑁄 𑀢𑀢𑁆𑀣 𑀦 𑀳𑁄𑀢𑀺, 𑀢𑁂𑀦 𑀢𑀁 𑀲𑀼𑀜𑁆𑀜𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀬𑀁 𑀧𑀦 𑀢𑀢𑁆𑀣 𑀅𑀯𑀲𑀺𑀝𑁆𑀞𑀁 𑀳𑁄𑀢𑀺, 𑀢𑀁 𑀲𑀦𑁆𑀢𑀁 𑀇𑀤𑀫𑀢𑁆𑀣𑀻𑀢𑀺 𑀧𑀚𑀸𑀦𑀸𑀢𑀻’’𑀢𑀺 𑀅𑀬𑀫𑁂𑀯 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀢𑀣𑀸 𑀜𑀸𑀬𑀕𑀦𑁆𑀣𑁂 𑀘 𑀲𑀤𑁆𑀤𑀕𑀦𑁆𑀣𑁂 𑀘 𑀅𑀬𑀫𑁂𑀯 𑀅𑀢𑁆𑀣𑁄. 𑀇𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑀦𑁆𑀢𑁂 𑀅𑀦𑀢𑁆𑀢𑀮𑀓𑁆𑀔𑀡𑀫𑁂𑀯 𑀓𑀣𑀺𑀢𑀁.

𑁪𑁭. 𑀲𑀼𑀢𑁆𑀢𑀦𑁆𑀢𑀦𑀺𑀤𑁆𑀤𑁂𑀲𑁂 𑀲𑀼𑀜𑁆𑀜𑀲𑀼𑀜𑁆𑀜𑀦𑁆𑀢𑀺𑀆𑀤𑀻𑀦𑀺 𑀧𑀜𑁆𑀘𑀯𑀻𑀲𑀢𑀺 𑀫𑀸𑀢𑀺𑀓𑀸𑀧𑀤𑀸𑀦𑀺 𑀲𑀼𑀜𑁆𑀜𑀲𑀫𑁆𑀩𑀦𑁆𑀥𑁂𑀦 𑀉𑀤𑁆𑀤𑀺𑀲𑀺𑀢𑁆𑀯𑀸 𑀢𑁂𑀲𑀁 𑀦𑀺𑀤𑁆𑀤𑁂𑀲𑁄 𑀓𑀢𑁄. 𑀢𑀢𑁆𑀣 𑀫𑀸𑀢𑀺𑀓𑀸𑀬 𑀢𑀸𑀯 𑀲𑀼𑀜𑁆𑀜𑀲𑀗𑁆𑀔𑀸𑀢𑀁 𑀲𑀼𑀜𑁆𑀜𑀁, 𑀦 𑀅𑀜𑁆𑀜𑁂𑀦 𑀉𑀧𑀧𑀤𑁂𑀦 𑀯𑀺𑀲𑁂𑀲𑀺𑀢𑀦𑁆𑀢𑀺 𑀲𑀼𑀜𑁆𑀜𑀲𑀼𑀜𑁆𑀜𑀁. 𑀅𑀲𑀼𑀓𑀦𑁆𑀢𑀺 𑀅𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 𑀘𑁂𑀢𑁆𑀣 𑀲𑀼𑀜𑁆𑀜𑀢𑁆𑀢𑀫𑁂𑀯 𑀯𑀸 𑀅𑀧𑁂𑀓𑁆𑀔𑀺𑀢𑁆𑀯𑀸 𑀦𑀧𑀼𑀁𑀲𑀓𑀯𑀘𑀦𑀁 𑀓𑀢𑀁. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀲𑀗𑁆𑀔𑀸𑀭𑁄𑀬𑁂𑀯 𑀲𑁂𑀲𑀲𑀗𑁆𑀔𑀸𑀭𑁂𑀳𑀺 𑀲𑀼𑀜𑁆𑀜𑁄𑀢𑀺 𑀲𑀗𑁆𑀔𑀸𑀭𑀲𑀼𑀜𑁆𑀜𑀁. 𑀚𑀭𑀸𑀪𑀗𑁆𑀕𑀯𑀲𑁂𑀦 𑀯𑀺𑀭𑀽𑀧𑁄 𑀧𑀭𑀺𑀡𑀸𑀫𑁄 𑀯𑀺𑀧𑀭𑀺𑀡𑀸𑀫𑁄, 𑀢𑁂𑀦 𑀯𑀺𑀧𑀭𑀺𑀡𑀸𑀫𑁂𑀦 𑀲𑀼𑀜𑁆𑀜𑀁 𑀯𑀺𑀧𑀭𑀺𑀡𑀸𑀫𑀲𑀼𑀜𑁆𑀜𑀁. 𑀅𑀕𑁆𑀕𑀜𑁆𑀘 𑀢𑀁 𑀅𑀢𑁆𑀢𑀢𑁆𑀢𑀦𑀺𑀬𑁂𑀳𑀺, 𑀲𑀩𑁆𑀩𑀲𑀗𑁆𑀔𑀸𑀭𑁂𑀳𑀺 𑀯𑀸 𑀲𑀼𑀜𑁆𑀜𑀜𑁆𑀘𑀸𑀢𑀺 𑀅𑀕𑁆𑀕𑀲𑀼𑀜𑁆𑀜𑀁. 𑀮𑀓𑁆𑀔𑀡𑀫𑁂𑀯 𑀲𑁂𑀲𑀮𑀓𑁆𑀔𑀡𑁂𑀳𑀺 𑀲𑀼𑀜𑁆𑀜𑀦𑁆𑀢𑀺 𑀮𑀓𑁆𑀔𑀡𑀲𑀼𑀜𑁆𑀜𑀁. 𑀦𑁂𑀓𑁆𑀔𑀫𑁆𑀫𑀸𑀤𑀺𑀦𑀸 𑀯𑀺𑀓𑁆𑀔𑀫𑁆𑀪𑀦𑁂𑀦 𑀲𑀼𑀜𑁆𑀜𑀁. 𑀯𑀺𑀓𑁆𑀔𑀫𑁆𑀪𑀦𑀲𑀼𑀜𑁆𑀜𑀁. 𑀢𑀤𑀗𑁆𑀕𑀲𑀼𑀜𑁆𑀜𑀸𑀤𑀻𑀲𑀼𑀧𑀺 𑀘𑀢𑀽𑀲𑀼 𑀏𑀲𑁂𑀯 𑀦𑀬𑁄. 𑀅𑀚𑁆𑀛𑀢𑁆𑀢𑀜𑁆𑀘 𑀢𑀁 𑀅𑀢𑁆𑀢𑀢𑁆𑀢𑀦𑀺𑀬𑀸𑀤𑀻𑀳𑀺 𑀲𑀼𑀜𑁆𑀜𑀜𑁆𑀘𑀸𑀢𑀺 𑀅𑀚𑁆𑀛𑀢𑁆𑀢𑀲𑀼𑀜𑁆𑀜𑀁. 𑀩𑀳𑀺𑀤𑁆𑀥𑀸 𑀘 𑀢𑀁 𑀅𑀢𑁆𑀢𑀢𑁆𑀢𑀦𑀺𑀬𑀸𑀤𑀻𑀳𑀺 𑀲𑀼𑀜𑁆𑀜𑀜𑁆𑀘𑀸𑀢𑀺 𑀩𑀳𑀺𑀤𑁆𑀥𑀸𑀲𑀼𑀜𑁆𑀜𑀁. 𑀢𑀤𑀼𑀪𑀬𑀁 𑀅𑀢𑁆𑀢𑀢𑁆𑀢𑀦𑀺𑀬𑀸𑀤𑀻𑀳𑀺 𑀲𑀼𑀜𑁆𑀜𑀦𑁆𑀢𑀺 𑀤𑀼𑀪𑀢𑁄𑀲𑀼𑀜𑁆𑀜𑀁. 𑀲𑀫𑀸𑀦𑁄 𑀪𑀸𑀕𑁄 𑀏𑀢𑀲𑁆𑀲𑀸𑀢𑀺 𑀲𑀪𑀸𑀕𑀁, 𑀲𑀪𑀸𑀕𑀜𑁆𑀘 𑀢𑀁 𑀅𑀢𑁆𑀢𑀢𑁆𑀢𑀦𑀺𑀬𑀸𑀤𑀻𑀳𑀺 𑀲𑀼𑀜𑁆𑀜𑀜𑁆𑀘𑀸𑀢𑀺 𑀲𑀪𑀸𑀕𑀲𑀼𑀜𑁆𑀜𑀁, 𑀲𑀤𑀺𑀲𑀲𑀼𑀜𑁆𑀜𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀕𑀢𑀁 𑀲𑀪𑀸𑀕𑀁 𑀯𑀺𑀲𑀪𑀸𑀕𑀁, 𑀯𑀺𑀲𑀪𑀸𑀕𑀜𑁆𑀘 𑀢𑀁 𑀅𑀢𑁆𑀢𑀢𑁆𑀢𑀦𑀺𑀬𑀸𑀤𑀻𑀳𑀺 𑀲𑀼𑀜𑁆𑀜𑀜𑁆𑀘𑀸𑀢𑀺 𑀯𑀺𑀲𑀪𑀸𑀕𑀲𑀼𑀜𑁆𑀜𑀁, 𑀯𑀺𑀲𑀤𑀺𑀲𑀲𑀼𑀜𑁆𑀜𑀦𑁆𑀢𑀺 𑀅𑀢𑁆𑀣𑁄. 𑀓𑁂𑀲𑀼𑀘𑀺 𑀧𑁄𑀢𑁆𑀣𑀓𑁂𑀲𑀼 𑀲𑀪𑀸𑀕𑀲𑀼𑀜𑁆𑀜𑀁 𑀯𑀺𑀲𑀪𑀸𑀕𑀲𑀼𑀜𑁆𑀜𑀁 𑀦𑀺𑀲𑁆𑀲𑀭𑀡𑀲𑀼𑀜𑁆𑀜𑀸𑀦𑀦𑁆𑀢𑀭𑀁 𑀮𑀺𑀔𑀺𑀢𑀁. 𑀦𑁂𑀓𑁆𑀔𑀫𑁆𑀫𑀸𑀤𑀺𑀏𑀲𑀦𑀸 𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀦𑀸 𑀲𑀼𑀜𑁆𑀜𑀸𑀢𑀺 𑀏𑀲𑀦𑀸𑀲𑀼𑀜𑁆𑀜𑀁. 𑀧𑀭𑀺𑀕𑁆𑀕𑀳𑀲𑀼𑀜𑁆𑀜𑀸𑀤𑀻𑀲𑀼 𑀢𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀓𑀸𑀭𑀫𑁆𑀫𑀡𑁂 𑀧𑀢𑀺𑀝𑁆𑀞𑀺𑀢𑀢𑁆𑀢𑀸 𑀦𑀸𑀦𑀸𑀭𑀫𑁆𑀫𑀡𑀯𑀺𑀓𑁆𑀔𑁂𑀧𑀸𑀪𑀸𑀯𑀢𑁄 𑀏𑀓𑀢𑁆𑀢𑀜𑁆𑀘 𑀢𑀁 𑀦𑀸𑀦𑀢𑁆𑀢𑁂𑀦 𑀲𑀼𑀜𑁆𑀜𑀜𑁆𑀘𑀸𑀢𑀺 𑀏𑀓𑀢𑁆𑀢𑀲𑀼𑀜𑁆𑀜𑀁. 𑀢𑀩𑁆𑀩𑀺𑀧𑀭𑀻𑀢𑁂𑀦 𑀦𑀸𑀦𑀢𑁆𑀢𑀜𑁆𑀘 𑀢𑀁 𑀏𑀓𑀢𑁆𑀢𑁂𑀦 𑀲𑀼𑀜𑁆𑀜𑀜𑁆𑀘𑀸𑀢𑀺 𑀦𑀸𑀦𑀢𑁆𑀢𑀲𑀼𑀜𑁆𑀜𑀁. 𑀦𑁂𑀓𑁆𑀔𑀫𑁆𑀫𑀸𑀤𑀺𑀔𑀦𑁆𑀢𑀺 𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀦𑀸 𑀲𑀼𑀜𑁆𑀜𑀸𑀢𑀺 𑀔𑀦𑁆𑀢𑀺𑀲𑀼𑀜𑁆𑀜𑀁. 𑀅𑀥𑀺𑀝𑁆𑀞𑀸𑀦𑀲𑀼𑀜𑁆𑀜𑁂 𑀧𑀭𑀺𑀬𑁄𑀕𑀸𑀳𑀦𑀲𑀼𑀜𑁆𑀜𑁂 𑀘 𑀏𑀲𑁂𑀯 𑀦𑀬𑁄. 𑀧𑀭𑀺𑀬𑁄𑀕𑀳𑀦𑀲𑀼𑀜𑁆𑀜𑀦𑁆𑀢𑀺𑀧𑀺 𑀧𑀸𑀞𑁄. 𑀲𑀫𑁆𑀧𑀚𑀸𑀦𑀲𑁆𑀲𑀸𑀢𑀺 𑀲𑀫𑁆𑀧𑀚𑀜𑁆𑀜𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀲𑁆𑀲 𑀅𑀭𑀳𑀢𑁄. 𑀧𑀯𑀢𑁆𑀢𑀧𑀭𑀺𑀬𑀸𑀤𑀸𑀦𑀦𑁆𑀢𑀺 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀁. 𑀲𑀩𑁆𑀩𑀲𑀼𑀜𑁆𑀜𑀢𑀸𑀦𑀦𑁆𑀢𑀺 𑀲𑀩𑁆𑀩𑀲𑀼𑀜𑁆𑀜𑀸𑀦𑀁. 𑀧𑀭𑀫𑀢𑁆𑀣𑀲𑀼𑀜𑁆𑀜𑀦𑁆𑀢𑀺 𑀲𑀩𑁆𑀩𑀲𑀗𑁆𑀔𑀸𑀭𑀸𑀪𑀸𑀯𑀢𑁄 𑀉𑀢𑁆𑀢𑀫𑀢𑁆𑀣𑀪𑀽𑀢𑀁 𑀲𑀼𑀜𑁆𑀜𑀁.

𑁪𑁮. 𑀫𑀸𑀢𑀺𑀓𑀸𑀦𑀺𑀤𑁆𑀤𑁂𑀲𑁂 𑀦𑀺𑀘𑁆𑀘𑁂𑀦 𑀯𑀸𑀢𑀺 𑀪𑀗𑁆𑀕𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑀲𑁆𑀲 𑀓𑀲𑁆𑀲𑀘𑀺 𑀦𑀺𑀘𑁆𑀘𑀲𑁆𑀲 𑀅𑀪𑀸𑀯𑀢𑁄 𑀦𑀺𑀘𑁆𑀘𑁂𑀦 𑀘 𑀲𑀼𑀜𑁆𑀜𑀁. 𑀥𑀼𑀯𑁂𑀦 𑀯𑀸𑀢𑀺 𑀯𑀺𑀚𑁆𑀚𑀫𑀸𑀦𑀓𑀸𑀮𑁂𑀧𑀺 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬 𑀣𑀺𑀭𑀲𑁆𑀲 𑀓𑀲𑁆𑀲𑀘𑀺 𑀅𑀪𑀸𑀯𑀢𑁄 𑀥𑀼𑀯𑁂𑀦 𑀘 𑀲𑀼𑀜𑁆𑀜𑀁. 𑀲𑀲𑁆𑀲𑀢𑁂𑀦 𑀯𑀸𑀢𑀺 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀲𑁆𑀲 𑀲𑀩𑁆𑀩𑀓𑀸𑀮𑁂 𑀯𑀺𑀚𑁆𑀚𑀫𑀸𑀦𑀲𑁆𑀲 𑀓𑀲𑁆𑀲𑀘𑀺 𑀅𑀪𑀸𑀯𑀢𑁄 𑀲𑀲𑁆𑀲𑀢𑁂𑀦 𑀘 𑀲𑀼𑀜𑁆𑀜𑀁. 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁂𑀦 𑀯𑀸𑀢𑀺 𑀚𑀭𑀸𑀪𑀗𑁆𑀕𑀯𑀲𑁂𑀦 𑀅𑀯𑀺𑀧𑀭𑀺𑀡𑀸𑀫𑀧𑀓𑀢𑀺𑀓𑀲𑁆𑀲 𑀓𑀲𑁆𑀲𑀘𑀺 𑀅𑀪𑀸𑀯𑀢𑁄 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁂𑀦 𑀘 𑀲𑀼𑀜𑁆𑀜𑀁. 𑀲𑀼𑀢𑁆𑀢𑀦𑁆𑀢𑁂 𑀅𑀢𑁆𑀢𑀲𑀼𑀜𑁆𑀜𑀢𑀸𑀬 𑀏𑀯 𑀯𑀼𑀢𑁆𑀢𑀸𑀬𑀧𑀺 𑀦𑀺𑀘𑁆𑀘𑀲𑀼𑀜𑁆𑀜𑀢𑀜𑁆𑀘 𑀲𑀼𑀔𑀲𑀼𑀜𑁆𑀜𑀢𑀜𑁆𑀘 𑀤𑀲𑁆𑀲𑁂𑀢𑀼𑀁 𑀇𑀥 𑀦𑀺𑀘𑁆𑀘𑁂𑀦 𑀯𑀸𑀢𑀺𑀆𑀤𑀻𑀦𑀺𑀧𑀺 𑀯𑀼𑀢𑁆𑀢𑀸𑀦𑀺. 𑀅𑀦𑀺𑀘𑁆𑀘𑀲𑁆𑀲𑁂𑀯 𑀳𑀺 𑀧𑀻𑀴𑀸𑀬𑁄𑀕𑁂𑀦 𑀤𑀼𑀓𑁆𑀔𑀢𑁆𑀢𑀸 𑀦𑀺𑀘𑁆𑀘𑀲𑀼𑀜𑁆𑀜𑀢𑀸𑀬 𑀯𑀼𑀢𑁆𑀢𑀸𑀬 𑀲𑀼𑀔𑀲𑀼𑀜𑁆𑀜𑀢𑀸𑀧𑀺 𑀯𑀼𑀢𑁆𑀢𑀸𑀯 𑀳𑁄𑀢𑀺. 𑀭𑀽𑀧𑀸𑀤𑀬𑁄 𑀧𑀦𑁂𑀢𑁆𑀣 𑀙 𑀯𑀺𑀲𑀬𑀸, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀙 𑀯𑀺𑀜𑁆𑀜𑀸𑀡𑀸𑀦𑀺, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀬𑁄 𑀙 𑀨𑀲𑁆𑀲𑀸, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸𑀤𑀬𑁄 𑀙 𑀯𑁂𑀤𑀦𑀸 𑀙 𑀲𑀗𑁆𑀔𑀺𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄𑀢𑀺𑀆𑀤𑀻𑀲𑀼 𑀧𑀼𑀦𑀸𑀢𑀺 𑀅𑀢𑁆𑀢𑀦𑁄 𑀓𑀸𑀭𑀓𑀁, 𑀧𑀽𑀭𑁂𑀢𑀺 𑀘𑀲𑁆𑀲 𑀅𑀚𑁆𑀛𑀸𑀲𑀬𑀁, 𑀧𑀼𑀚𑁆𑀚𑀜𑁆𑀘 𑀪𑀯𑀁 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀧𑀼𑀜𑁆𑀜𑀁, 𑀅𑀪𑀺𑀲𑀗𑁆𑀔𑀭𑁄𑀢𑀺 𑀯𑀺𑀧𑀸𑀓𑀁 𑀓𑀝𑀢𑁆𑀢𑀸𑀭𑀽𑀧𑀜𑁆𑀘𑀸𑀢𑀺 𑀅𑀪𑀺𑀲𑀗𑁆𑀔𑀸𑀭𑁄, 𑀧𑀼𑀜𑁆𑀜𑀁 𑀅𑀪𑀺𑀲𑀗𑁆𑀔𑀸𑀭𑁄 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄. 𑀧𑀼𑀜𑁆𑀜𑀧𑀝𑀺𑀧𑀓𑁆𑀔𑀢𑁄 𑀅𑀧𑀼𑀜𑁆𑀜𑀁 𑀅𑀪𑀺𑀲𑀗𑁆𑀔𑀸𑀭𑁄 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄. 𑀦 𑀇𑀜𑁆𑀚𑀁 𑀅𑀦𑁂𑀜𑁆𑀚𑀁, 𑀅𑀦𑁂𑀜𑁆𑀚𑀁 𑀪𑀯𑀁 𑀅𑀪𑀺𑀲𑀗𑁆𑀔𑀭𑁄𑀢𑀻𑀢𑀺 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁄. 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀤𑀸𑀦𑀲𑀻𑀮𑀪𑀸𑀯𑀦𑀸𑀯𑀲𑁂𑀦 𑀧𑀯𑀢𑁆𑀢𑀸 𑀅𑀝𑁆𑀞 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑁂𑀢𑀦𑀸, 𑀪𑀸𑀯𑀦𑀸𑀯𑀲𑁂𑀦𑁂𑀯 𑀧𑀯𑀢𑁆𑀢𑀸 𑀧𑀜𑁆𑀘 𑀭𑀽𑀧𑀸𑀯𑀘𑀭𑀓𑀼𑀲𑀮𑀘𑁂𑀢𑀦𑀸𑀢𑀺 𑀢𑁂𑀭𑀲 𑀘𑁂𑀢𑀦𑀸 𑀳𑁄𑀦𑁆𑀢𑀺, 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀸 𑀤𑁆𑀯𑀸𑀤𑀲 𑀅𑀓𑀼𑀲𑀮𑀘𑁂𑀢𑀦𑀸, 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁄 𑀪𑀸𑀯𑀦𑀸𑀯𑀲𑁂𑀦𑁂𑀯 𑀧𑀯𑀢𑁆𑀢𑀸 𑀘𑀢𑀲𑁆𑀲𑁄 𑀅𑀭𑀽𑀧𑀸𑀯𑀘𑀭𑀘𑁂𑀢𑀦𑀸𑀢𑀺 𑀢𑀬𑁄𑀧𑀺 𑀲𑀗𑁆𑀔𑀸𑀭𑀸 𑀏𑀓𑀽𑀦𑀢𑀺𑀁𑀲 𑀘𑁂𑀢𑀦𑀸 𑀳𑁄𑀦𑁆𑀢𑀺. 𑀓𑀸𑀬𑀲𑀗𑁆𑀔𑀸𑀭𑁄𑀢𑀺𑀆𑀤𑀻𑀲𑀼 𑀓𑀸𑀬𑀢𑁄 𑀯𑀸 𑀧𑀯𑀢𑁆𑀢𑁄, 𑀓𑀸𑀬𑀲𑁆𑀲 𑀯𑀸 𑀲𑀗𑁆𑀔𑀸𑀭𑁄𑀢𑀺 𑀓𑀸𑀬𑀲𑀗𑁆𑀔𑀸𑀭𑁄. 𑀯𑀘𑀻𑀲𑀗𑁆𑀔𑀸𑀭𑀘𑀺𑀢𑁆𑀢𑀲𑀗𑁆𑀔𑀸𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀁 𑀢𑀺𑀓𑁄 𑀓𑀫𑁆𑀫𑀸𑀬𑀽𑀳𑀦𑀓𑁆𑀔𑀡𑁂 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀻𑀦𑀁 𑀤𑁆𑀯𑀸𑀭𑀢𑁄 𑀧𑀯𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑁄. 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀳𑀺 𑀓𑀸𑀬𑀤𑁆𑀯𑀸𑀭𑀢𑁄 𑀧𑀯𑀢𑁆𑀢𑀸 𑀅𑀝𑁆𑀞 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑁂𑀢𑀦𑀸, 𑀤𑁆𑀯𑀸𑀤𑀲 𑀅𑀓𑀼𑀲𑀮𑀘𑁂𑀢𑀦𑀸, 𑀅𑀪𑀺𑀜𑁆𑀜𑀸𑀘𑁂𑀢𑀦𑀸 𑀘𑀸𑀢𑀺 𑀏𑀓𑀯𑀻𑀲𑀢𑀺 𑀘𑁂𑀢𑀦𑀸 𑀓𑀸𑀬𑀲𑀗𑁆𑀔𑀸𑀭𑁄 𑀦𑀸𑀫, 𑀢𑀸 𑀏𑀯 𑀘 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀯𑀘𑀻𑀤𑁆𑀯𑀸𑀭𑀢𑁄 𑀧𑀯𑀢𑁆𑀢𑀸 𑀯𑀘𑀻𑀲𑀗𑁆𑀔𑀸𑀭𑁄 𑀦𑀸𑀫, 𑀫𑀦𑁄𑀤𑁆𑀯𑀸𑀭𑁂 𑀧𑀯𑀢𑁆𑀢𑀸 𑀧𑀦 𑀲𑀩𑁆𑀩𑀸𑀧𑀺 𑀏𑀓𑀽𑀦𑀢𑀺𑀁𑀲 𑀘𑁂𑀢𑀦𑀸 𑀘𑀺𑀢𑁆𑀢𑀲𑀗𑁆𑀔𑀸𑀭𑁄 𑀦𑀸𑀫. 𑀅𑀢𑀻𑀢𑀸 𑀲𑀗𑁆𑀔𑀸𑀭𑀸𑀢𑀺𑀆𑀤𑀻𑀲𑀼 𑀲𑀩𑁆𑀩𑁂𑀧𑀺 𑀲𑀗𑁆𑀔𑀢𑀥𑀫𑁆𑀫𑀸 𑀲𑀓𑀓𑁆𑀔𑀡𑀁 𑀧𑀢𑁆𑀯𑀸 𑀦𑀺𑀭𑀼𑀤𑁆𑀥𑀸 𑀅𑀢𑀻𑀢𑀸 𑀲𑀗𑁆𑀔𑀸𑀭𑀸, 𑀲𑀓𑀓𑁆𑀔𑀡𑀁 𑀅𑀧𑁆𑀧𑀢𑁆𑀢𑀸 𑀅𑀦𑀸𑀕𑀢𑀸 𑀲𑀗𑁆𑀔𑀸𑀭𑀸, 𑀲𑀓𑀓𑁆𑀔𑀡𑀁 𑀧𑀢𑁆𑀢𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀲𑀗𑁆𑀔𑀸𑀭𑀸𑀢𑀺.

𑀯𑀺𑀧𑀭𑀺𑀡𑀸𑀫𑀲𑀼𑀜𑁆𑀜𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀤𑀲𑁆𑀲𑁂𑀢𑁆𑀯𑀸 𑀢𑀲𑁆𑀲 𑀢𑀲𑁆𑀲 𑀯𑀺𑀧𑀭𑀺𑀡𑀸𑀫𑁄 𑀲𑀼𑀔𑁂𑀦 𑀯𑀢𑁆𑀢𑀼𑀁 𑀲𑀓𑁆𑀓𑀸𑀢𑀺 𑀧𑀞𑀫𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀥𑀫𑁆𑀫𑀸 𑀤𑀲𑁆𑀲𑀺𑀢𑀸. 𑀢𑀢𑁆𑀣 𑀚𑀸𑀢𑀁 𑀭𑀽𑀧𑀦𑁆𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀭𑀽𑀧𑀁. 𑀲𑀪𑀸𑀯𑁂𑀦 𑀲𑀼𑀜𑁆𑀜𑀦𑁆𑀢𑀺 𑀏𑀢𑁆𑀣 𑀲𑀬𑀁 𑀪𑀸𑀯𑁄 𑀲𑀪𑀸𑀯𑁄, 𑀲𑀬𑀫𑁂𑀯 𑀉𑀧𑁆𑀧𑀸𑀤𑁄𑀢𑀺 𑀅𑀢𑁆𑀣𑁄. 𑀲𑀢𑁄 𑀯𑀸 𑀪𑀸𑀯𑁄 𑀲𑀪𑀸𑀯𑁄, 𑀅𑀢𑁆𑀢𑀢𑁄𑀬𑁂𑀯 𑀉𑀧𑁆𑀧𑀸𑀤𑁄𑀢𑀺 𑀅𑀢𑁆𑀣𑁄. 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑁆𑀢𑀸 𑀧𑀘𑁆𑀘𑀬𑀁 𑀯𑀺𑀦𑀸 𑀲𑀬𑀫𑁂𑀯 𑀪𑀸𑀯𑁄, 𑀅𑀢𑁆𑀢𑀢𑁄 𑀏𑀯 𑀯𑀸 𑀪𑀸𑀯𑁄 𑀏𑀢𑀲𑁆𑀫𑀺𑀁 𑀦𑀢𑁆𑀣𑀻𑀢𑀺 𑀲𑀪𑀸𑀯𑁂𑀦 𑀲𑀼𑀜𑁆𑀜𑀁, 𑀲𑀬𑀫𑁂𑀯 𑀪𑀸𑀯𑁂𑀦, 𑀅𑀢𑁆𑀢𑀢𑁄 𑀏𑀯 𑀯𑀸 𑀪𑀸𑀯𑁂𑀦 𑀲𑀼𑀜𑁆𑀜𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣 𑀯𑀸 𑀲𑀓𑀲𑁆𑀲 𑀪𑀸𑀯𑁄 𑀲𑀪𑀸𑀯𑁄. 𑀧𑀣𑀯𑀻𑀥𑀸𑀢𑀼𑀆𑀤𑀻𑀲𑀼 𑀳𑀺 𑀅𑀦𑁂𑀓𑁂𑀲𑀼 𑀭𑀽𑀧𑀸𑀭𑀽𑀧𑀥𑀫𑁆𑀫𑁂𑀲𑀼 𑀏𑀓𑁂𑀓𑁄 𑀥𑀫𑁆𑀫𑁄 𑀧𑀭𑀁 𑀉𑀧𑀸𑀤𑀸𑀬 𑀲𑀓𑁄 𑀦𑀸𑀫. 𑀪𑀸𑀯𑁄𑀢𑀺 𑀘 𑀥𑀫𑁆𑀫𑀧𑀭𑀺𑀬𑀸𑀬𑀯𑀘𑀦𑀫𑁂𑀢𑀁. 𑀏𑀓𑀲𑁆𑀲 𑀘 𑀥𑀫𑁆𑀫𑀲𑁆𑀲 𑀅𑀜𑁆𑀜𑁄 𑀪𑀸𑀯𑀲𑀗𑁆𑀔𑀸𑀢𑁄 𑀥𑀫𑁆𑀫𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀲𑀓𑀲𑁆𑀲 𑀅𑀜𑁆𑀜𑁂𑀦 𑀪𑀸𑀯𑁂𑀦 𑀲𑀼𑀜𑁆𑀜𑀁, 𑀲𑀓𑁄 𑀅𑀜𑁆𑀜𑁂𑀦 𑀪𑀸𑀯𑁂𑀦 𑀲𑀼𑀜𑁆𑀜𑁄𑀢𑀺 𑀅𑀢𑁆𑀣𑁄. 𑀢𑁂𑀦 𑀏𑀓𑀲𑁆𑀲 𑀥𑀫𑁆𑀫𑀲𑁆𑀲 𑀏𑀓𑀲𑀪𑀸𑀯𑀢𑀸 𑀯𑀼𑀢𑁆𑀢𑀸 𑀳𑁄𑀢𑀺. 𑀅𑀣 𑀯𑀸 𑀲𑀪𑀸𑀯𑁂𑀦 𑀲𑀼𑀜𑁆𑀜𑀦𑁆𑀢𑀺 𑀲𑀼𑀜𑁆𑀜𑀲𑀪𑀸𑀯𑁂𑀦𑁂𑀯 𑀲𑀼𑀜𑁆𑀜𑀁. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀲𑀼𑀜𑁆𑀜𑀲𑀼𑀜𑁆𑀜𑀢𑀸𑀬 𑀏𑀯 𑀲𑀼𑀜𑁆𑀜𑀁, 𑀦 𑀅𑀜𑁆𑀜𑀸𑀳𑀺 𑀧𑀭𑀺𑀬𑀸𑀬𑀲𑀼𑀜𑁆𑀜𑀢𑀸𑀳𑀺 𑀲𑀼𑀜𑁆𑀜𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀲𑀘𑁂 𑀧𑀦 𑀓𑁂𑀘𑀺 𑀯𑀤𑁂𑀬𑁆𑀬𑀼𑀁 ‘‘𑀲𑀓𑁄 𑀪𑀸𑀯𑁄 𑀲𑀪𑀸𑀯𑁄, 𑀢𑁂𑀦 𑀲𑀪𑀸𑀯𑁂𑀦 𑀲𑀼𑀜𑁆𑀜’’𑀦𑁆𑀢𑀺. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀪𑀸𑀯𑁄𑀢𑀺 𑀥𑀫𑁆𑀫𑁄, 𑀲𑁄 𑀧𑀭𑀁 𑀉𑀧𑀸𑀤𑀸𑀬 𑀲𑀧𑀤𑁂𑀦 𑀯𑀺𑀲𑁂𑀲𑀺𑀢𑁄 𑀲𑀪𑀸𑀯𑁄 𑀦𑀸𑀫 𑀳𑁄𑀢𑀺. 𑀥𑀫𑁆𑀫𑀲𑁆𑀲 𑀓𑀲𑁆𑀲𑀘𑀺 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸 ‘‘𑀚𑀸𑀢𑀁 𑀭𑀽𑀧𑀁 𑀲𑀪𑀸𑀯𑁂𑀦 𑀲𑀼𑀜𑁆𑀜’’𑀦𑁆𑀢𑀺 𑀭𑀽𑀧𑀲𑁆𑀲 𑀅𑀯𑀺𑀚𑁆𑀚𑀫𑀸𑀦𑀢𑀸 𑀯𑀼𑀢𑁆𑀢𑀸 𑀳𑁄𑀢𑀻𑀢𑀺. 𑀏𑀯𑀁 𑀲𑀢𑀺 ‘‘𑀚𑀸𑀢𑀁 𑀭𑀽𑀧’’𑀦𑁆𑀢𑀺𑀯𑀘𑀦𑁂𑀦 𑀯𑀺𑀭𑀼𑀚𑁆𑀛𑀢𑀺. 𑀦 𑀳𑀺 𑀉𑀧𑁆𑀧𑀸𑀤𑀭𑀳𑀺𑀢𑀁 𑀚𑀸𑀢𑀁 𑀦𑀸𑀫 𑀳𑁄𑀢𑀺. 𑀦𑀺𑀩𑁆𑀩𑀸𑀦𑀜𑁆𑀳𑀺 𑀉𑀧𑁆𑀧𑀸𑀤𑀭𑀳𑀺𑀢𑀁, 𑀢𑀁 𑀚𑀸𑀢𑀁 𑀦𑀸𑀫 𑀦 𑀳𑁄𑀢𑀺, 𑀚𑀸𑀢𑀺𑀚𑀭𑀸𑀫𑀭𑀡𑀸𑀦𑀺 𑀘 𑀉𑀧𑁆𑀧𑀸𑀤𑀭𑀳𑀺𑀢𑀸𑀦𑀺 𑀚𑀸𑀢𑀸𑀦𑀺 𑀦𑀸𑀫 𑀦 𑀳𑁄𑀦𑁆𑀢𑀺. 𑀢𑁂𑀦𑁂𑀯𑁂𑀢𑁆𑀣 ‘‘𑀚𑀸𑀢𑀸 𑀚𑀸𑀢𑀺 𑀲𑀪𑀸𑀯𑁂𑀦 𑀲𑀼𑀜𑁆𑀜𑀸, 𑀚𑀸𑀢𑀁 𑀚𑀭𑀸𑀫𑀭𑀡𑀁 𑀲𑀪𑀸𑀯𑁂𑀦 𑀲𑀼𑀜𑁆𑀜’’𑀦𑁆𑀢𑀺 𑀏𑀯𑀁 𑀅𑀦𑀼𑀤𑁆𑀥𑀭𑀺𑀢𑁆𑀯𑀸 𑀪𑀯𑀫𑁂𑀯 𑀅𑀯𑀲𑀸𑀦𑀁 𑀓𑀢𑁆𑀯𑀸 𑀦𑀺𑀤𑁆𑀤𑀺𑀝𑁆𑀞𑀁. 𑀬𑀤𑀺 𑀉𑀧𑁆𑀧𑀸𑀤𑀭𑀳𑀺𑀢𑀲𑁆𑀲𑀸𑀧𑀺 ‘‘𑀚𑀸𑀢’’𑀦𑁆𑀢𑀺𑀯𑀘𑀦𑀁 𑀬𑀼𑀚𑁆𑀚𑁂𑀬𑁆𑀬, ‘‘𑀚𑀸𑀢𑀸 𑀚𑀸𑀢𑀺, 𑀚𑀸𑀢𑀁 𑀚𑀭𑀸𑀫𑀭𑀡’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁 𑀪𑀯𑁂𑀬𑁆𑀬. 𑀬𑀲𑁆𑀫𑀸 𑀉𑀧𑁆𑀧𑀸𑀤𑀭𑀳𑀺𑀢𑁂𑀲𑀼 𑀚𑀸𑀢𑀺𑀚𑀭𑀸𑀫𑀭𑀡𑁂𑀲𑀼 ‘‘𑀚𑀸𑀢’’𑀦𑁆𑀢𑀺𑀯𑀘𑀦𑀁 𑀦 𑀯𑀼𑀢𑁆𑀢𑀁, 𑀢𑀲𑁆𑀫𑀸 ‘‘𑀲𑀪𑀸𑀯𑁂𑀦 𑀲𑀼𑀜𑁆𑀜𑀁 𑀅𑀯𑀺𑀚𑁆𑀚𑀫𑀸𑀦’’𑀦𑁆𑀢𑀺 𑀯𑀘𑀦𑀁 𑀅𑀯𑀺𑀚𑁆𑀚𑀫𑀸𑀦𑀲𑁆𑀲 𑀉𑀧𑁆𑀧𑀸𑀤𑀭𑀳𑀺𑀢𑀢𑁆𑀢𑀸 ‘‘𑀚𑀸𑀢’’𑀦𑁆𑀢𑀺𑀯𑀘𑀦𑁂𑀦 𑀯𑀺𑀭𑀼𑀚𑁆𑀛𑀢𑀺. 𑀅𑀯𑀺𑀚𑁆𑀚𑀫𑀸𑀦𑀲𑁆𑀲 𑀘 ‘‘𑀲𑀼𑀜𑁆𑀜’’𑀦𑁆𑀢𑀺𑀯𑀘𑀦𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑁂𑀦 𑀮𑁄𑀓𑀯𑀘𑀦𑁂𑀦 𑀘 𑀪𑀕𑀯𑀢𑁄 𑀯𑀘𑀦𑁂𑀦 𑀘 𑀜𑀸𑀬𑀲𑀤𑁆𑀤𑀕𑀦𑁆𑀣𑀯𑀘𑀦𑁂𑀦 𑀘 𑀯𑀺𑀭𑀼𑀚𑁆𑀛𑀢𑀺, 𑀅𑀦𑁂𑀓𑀸𑀳𑀺 𑀘 𑀬𑀼𑀢𑁆𑀢𑀻𑀳𑀺 𑀯𑀺𑀭𑀼𑀚𑁆𑀛𑀢𑀺, 𑀢𑀲𑁆𑀫𑀸 𑀢𑀁 𑀯𑀘𑀦𑀁 𑀓𑀘𑀯𑀭𑀫𑀺𑀯 𑀙𑀟𑁆𑀟𑀺𑀢𑀩𑁆𑀩𑀁. ‘‘𑀬𑀁, 𑀪𑀺𑀓𑁆𑀔𑀯𑁂, 𑀅𑀢𑁆𑀣𑀺𑀲𑀫𑁆𑀫𑀢𑀁 𑀮𑁄𑀓𑁂 𑀧𑀡𑁆𑀟𑀺𑀢𑀸𑀦𑀁, 𑀅𑀳𑀫𑁆𑀧𑀺 𑀢𑀁 𑀅𑀢𑁆𑀣𑀻𑀢𑀺 𑀯𑀤𑀸𑀫𑀺. 𑀬𑀁, 𑀪𑀺𑀓𑁆𑀔𑀯𑁂, 𑀦𑀢𑁆𑀣𑀺𑀲𑀫𑁆𑀫𑀢𑀁 𑀮𑁄𑀓𑁂 𑀧𑀡𑁆𑀟𑀺𑀢𑀸𑀦𑀁, 𑀅𑀳𑀫𑁆𑀧𑀺 𑀢𑀁 𑀦𑀢𑁆𑀣𑀻𑀢𑀺 𑀯𑀤𑀸𑀫𑀺. 𑀓𑀺𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀢𑁆𑀣𑀺𑀲𑀫𑁆𑀫𑀢𑀁 𑀮𑁄𑀓𑁂 𑀧𑀡𑁆𑀟𑀺𑀢𑀸𑀦𑀁, 𑀬𑀫𑀳𑀁 𑀅𑀢𑁆𑀣𑀻𑀢𑀺 𑀯𑀤𑀸𑀫𑀺? 𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁 𑀅𑀢𑁆𑀣𑀺𑀲𑀫𑁆𑀫𑀢𑀁 𑀮𑁄𑀓𑁂 𑀧𑀡𑁆𑀟𑀺𑀢𑀸𑀦𑀁, 𑀅𑀳𑀫𑁆𑀧𑀺 𑀢𑀁 𑀅𑀢𑁆𑀣𑀻𑀢𑀺 𑀯𑀤𑀸𑀫𑀻’’𑀢𑀺𑀆𑀤𑀻𑀳𑀺 (𑀲𑀁. 𑀦𑀺. 𑁩.𑁯𑁪) 𑀅𑀦𑁂𑀓𑁂𑀳𑀺 𑀩𑀼𑀤𑁆𑀥𑀯𑀘𑀦𑀧𑁆𑀧𑀫𑀸𑀡𑁂𑀳𑀺 𑀅𑀦𑁂𑀓𑀸𑀳𑀺 𑀘 𑀬𑀼𑀢𑁆𑀢𑀻𑀳𑀺 𑀥𑀫𑁆𑀫𑀸 𑀲𑀓𑀓𑁆𑀔𑀡𑁂 𑀯𑀺𑀚𑁆𑀚𑀫𑀸𑀦𑀸 𑀏𑀯𑀸𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁.

𑀯𑀺𑀕𑀢𑀁 𑀭𑀽𑀧𑀦𑁆𑀢𑀺 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀪𑀗𑁆𑀕𑀁 𑀧𑀢𑁆𑀯𑀸 𑀦𑀺𑀭𑀼𑀤𑁆𑀥𑀁 𑀅𑀢𑀻𑀢𑀁 𑀭𑀽𑀧𑀁. 𑀯𑀺𑀧𑀭𑀺𑀡𑀢𑀜𑁆𑀘𑁂𑀯 𑀲𑀼𑀜𑁆𑀜𑀜𑁆𑀘𑀸𑀢𑀺 𑀚𑀭𑀸𑀪𑀗𑁆𑀕𑀯𑀲𑁂𑀦 𑀯𑀺𑀭𑀽𑀧𑀁 𑀧𑀭𑀺𑀡𑀸𑀫𑀁 𑀧𑀢𑁆𑀢𑀜𑁆𑀘 𑀯𑀢𑁆𑀢𑀫𑀸𑀦𑀲𑁆𑀲𑁂𑀯 𑀯𑀺𑀧𑀭𑀺𑀡𑀸𑀫𑀲𑀩𑁆𑀪𑀸𑀯𑀢𑁄 𑀅𑀢𑀻𑀢𑀲𑁆𑀲 𑀯𑀺𑀧𑀭𑀺𑀡𑀸𑀫𑀸𑀪𑀸𑀯𑀢𑁄 𑀢𑁂𑀦 𑀯𑀺𑀧𑀭𑀺𑀡𑀸𑀫𑁂𑀦 𑀲𑀼𑀜𑁆𑀜𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀚𑀸𑀢𑀸 𑀯𑁂𑀤𑀦𑀸𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀚𑀸𑀢𑀺𑀚𑀭𑀸𑀫𑀭𑀡𑀁 𑀧𑀦 𑀅𑀦𑀺𑀧𑁆𑀨𑀦𑁆𑀦𑀢𑁆𑀢𑀸 𑀲𑀓𑀪𑀸𑀯𑁂𑀦 𑀅𑀦𑀼𑀧𑀮𑀩𑁆𑀪𑀦𑀻𑀬𑀢𑁄 𑀇𑀥 𑀦 𑀬𑀼𑀚𑁆𑀚𑀢𑀺, 𑀢𑀲𑁆𑀫𑀸 ‘‘𑀚𑀸𑀢𑀸 𑀚𑀸𑀢𑀺, 𑀚𑀸𑀢𑀁 𑀚𑀭𑀸𑀫𑀭𑀡’’𑀦𑁆𑀢𑀺𑀆𑀤𑀺𑀓𑁂 𑀤𑁆𑀯𑁂 𑀦𑀬𑁂 𑀧𑀳𑀸𑀬 𑀪𑀯𑀸𑀤𑀺𑀓𑀫𑁂𑀯 𑀦𑀬𑀁 𑀧𑀭𑀺𑀬𑁄𑀲𑀸𑀦𑀁 𑀓𑀢𑁆𑀯𑀸 𑀞𑀧𑀺𑀢𑀁.

𑀅𑀕𑁆𑀕𑀦𑁆𑀢𑀺 𑀅𑀕𑁆𑀕𑁂 𑀪𑀯𑀁. 𑀲𑁂𑀝𑁆𑀞𑀦𑁆𑀢𑀺 𑀅𑀢𑀺𑀯𑀺𑀬 𑀧𑀲𑀁𑀲𑀦𑀻𑀬𑀁. 𑀯𑀺𑀲𑀺𑀝𑁆𑀞𑀦𑁆𑀢𑀺 𑀅𑀢𑀺𑀲𑀬𑀪𑀽𑀢𑀁. 𑀯𑀺𑀲𑁂𑀝𑁆𑀞𑀦𑁆𑀢𑀺𑀧𑀺 𑀧𑀸𑀞𑁄. 𑀢𑀺𑀥𑀸𑀧𑀺 𑀧𑀲𑀢𑁆𑀣𑀁 𑀦𑀺𑀩𑁆𑀩𑀸𑀦𑀁 𑀲𑀫𑁆𑀫𑀸𑀧𑀝𑀺𑀧𑀤𑀸𑀬 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀢𑁄 𑀧𑀤𑀁 𑀦𑀸𑀫. 𑀬𑀤𑀺𑀤𑀦𑁆𑀢𑀺 𑀬𑀁 𑀇𑀤𑀁. 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀁 𑀦𑀺𑀩𑁆𑀩𑀸𑀦𑀁 𑀦𑀺𑀤𑀲𑁆𑀲𑁂𑀢𑀺. 𑀬𑀲𑁆𑀫𑀸 𑀦𑀺𑀩𑁆𑀩𑀸𑀦𑀁 𑀆𑀕𑀫𑁆𑀫 𑀲𑀩𑁆𑀩𑀲𑀗𑁆𑀔𑀸𑀭𑀸𑀦𑀁 𑀲𑀫𑀣𑁄 𑀳𑁄𑀢𑀺, 𑀔𑀦𑁆𑀥𑀽𑀧𑀥𑀺𑀓𑀺𑀮𑁂𑀲𑀽𑀧𑀥𑀺𑀅𑀪𑀺𑀲𑀗𑁆𑀔𑀸𑀭𑀽𑀧𑀥𑀺𑀓𑀸𑀫𑀕𑀼𑀡𑀽𑀧𑀥𑀺𑀲𑀗𑁆𑀔𑀸𑀢𑀸𑀦𑀁 𑀉𑀧𑀥𑀻𑀦𑀁 𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀳𑁄𑀢𑀺, 𑀢𑀡𑁆𑀳𑀸𑀦𑀁 𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀘 𑀳𑁄𑀢𑀺, 𑀢𑀲𑁆𑀫𑀸 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄𑀢𑀺 𑀯𑀼𑀘𑁆𑀘𑀢𑀺. 𑀦𑀺𑀩𑁆𑀩𑀸𑀦𑀦𑁆𑀢𑀺 𑀲𑀪𑀸𑀯𑀮𑀓𑁆𑀔𑀡𑁂𑀦 𑀦𑀺𑀕𑀫𑀺𑀢𑀁.

𑀮𑀓𑁆𑀔𑀡𑁂𑀲𑀼 𑀳𑀺 ‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀩𑀸𑀮𑀲𑁆𑀲 𑀩𑀸𑀮𑀮𑀓𑁆𑀔𑀡𑀸𑀦𑀺 𑀩𑀸𑀮𑀦𑀺𑀫𑀺𑀢𑁆𑀢𑀸𑀦𑀺 𑀩𑀸𑀮𑀸𑀧𑀤𑀸𑀦𑀸𑀦𑀺. 𑀓𑀢𑀫𑀸𑀦𑀺 𑀢𑀻𑀡𑀺? 𑀇𑀥, 𑀪𑀺𑀓𑁆𑀔𑀯𑁂, 𑀩𑀸𑀮𑁄 𑀤𑀼𑀘𑁆𑀘𑀺𑀦𑁆𑀢𑀺𑀢𑀘𑀺𑀦𑁆𑀢𑀻 𑀘 𑀳𑁄𑀢𑀺 𑀤𑀼𑀩𑁆𑀪𑀸𑀲𑀺𑀢𑀪𑀸𑀲𑀻 𑀘 𑀤𑀼𑀓𑁆𑀓𑀝𑀓𑀫𑁆𑀫𑀓𑀸𑀭𑀻 𑀘. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀡𑀺 𑀩𑀸𑀮𑀲𑁆𑀲 𑀩𑀸𑀮𑀮𑀓𑁆𑀔𑀡𑀸𑀦𑀺 𑀩𑀸𑀮𑀦𑀺𑀫𑀺𑀢𑁆𑀢𑀸𑀦𑀺 𑀩𑀸𑀮𑀸𑀧𑀤𑀸𑀦𑀸𑀦𑀻’’𑀢𑀺 (𑀅. 𑀦𑀺. 𑁩.𑁩; 𑀫. 𑀦𑀺. 𑁩.𑁨𑁪𑁬) 𑀯𑀼𑀢𑁆𑀢𑀁. 𑀧𑀡𑁆𑀟𑀺𑀢𑁂𑀳𑀺 𑀩𑀸𑀮𑀲𑁆𑀲 𑀩𑀸𑀮𑁄𑀢𑀺 𑀲𑀮𑁆𑀮𑀓𑁆𑀔𑀡𑀢𑁄 𑀢𑀺𑀯𑀺𑀥𑀁 𑀩𑀸𑀮𑀮𑀓𑁆𑀔𑀡𑀁. ‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑀲𑁆𑀲 𑀧𑀡𑁆𑀟𑀺𑀢𑀮𑀓𑁆𑀔𑀡𑀸𑀦𑀺 𑀧𑀡𑁆𑀟𑀺𑀢𑀦𑀺𑀫𑀺𑀢𑁆𑀢𑀸𑀦𑀺 𑀧𑀡𑁆𑀟𑀺𑀢𑀸𑀧𑀤𑀸𑀦𑀸𑀦𑀺. 𑀓𑀢𑀫𑀸𑀦𑀺 𑀢𑀻𑀡𑀺? 𑀇𑀥, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑁄 𑀲𑀼𑀘𑀺𑀦𑁆𑀢𑀺𑀢𑀘𑀺𑀦𑁆𑀢𑀻 𑀘 𑀳𑁄𑀢𑀺 𑀲𑀼𑀪𑀸𑀲𑀺𑀢𑀪𑀸𑀲𑀻 𑀘 𑀲𑀼𑀓𑀢𑀓𑀫𑁆𑀫𑀓𑀸𑀭𑀻 𑀘. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀡𑀺 𑀧𑀡𑁆𑀟𑀺𑀢𑀲𑁆𑀲 𑀧𑀡𑁆𑀟𑀺𑀢𑀮𑀓𑁆𑀔𑀡𑀸𑀦𑀺 𑀧𑀡𑁆𑀟𑀺𑀢𑀦𑀺𑀫𑀺𑀢𑁆𑀢𑀸𑀦𑀺 𑀧𑀡𑁆𑀟𑀺𑀢𑀸𑀧𑀤𑀸𑀦𑀸𑀦𑀻’’𑀢𑀺 (𑀅. 𑀦𑀺. 𑁩.𑁩; 𑀫. 𑀦𑀺. 𑁩.𑁨𑁫𑁩) 𑀯𑀼𑀢𑁆𑀢𑀁. 𑀧𑀡𑁆𑀟𑀺𑀢𑁂𑀳𑀺 𑀧𑀡𑁆𑀟𑀺𑀢𑀲𑁆𑀲 𑀧𑀡𑁆𑀟𑀺𑀢𑁄𑀢𑀺 𑀲𑀮𑁆𑀮𑀓𑁆𑀔𑀡𑀢𑁄 𑀢𑀺𑀯𑀺𑀥𑀁 𑀧𑀡𑁆𑀟𑀺𑀢𑀮𑀓𑁆𑀔𑀡𑀁.

‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀢𑀲𑁆𑀲 𑀲𑀗𑁆𑀔𑀢𑀮𑀓𑁆𑀔𑀡𑀸𑀦𑀺. 𑀓𑀢𑀫𑀸𑀦𑀺 𑀢𑀻𑀡𑀺? 𑀉𑀧𑁆𑀧𑀸𑀤𑁄 𑀧𑀜𑁆𑀜𑀸𑀬𑀢𑀺, 𑀯𑀬𑁄 𑀧𑀜𑁆𑀜𑀸𑀬𑀢𑀺, 𑀞𑀺𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁 𑀧𑀜𑁆𑀜𑀸𑀬𑀢𑀺. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀡𑀺 𑀲𑀗𑁆𑀔𑀢𑀲𑁆𑀲 𑀲𑀗𑁆𑀔𑀢𑀮𑀓𑁆𑀔𑀡𑀸𑀦𑀻’’𑀢𑀺 (𑀅. 𑀦𑀺. 𑁩.𑁪𑁭-𑁪𑁮) 𑀯𑀼𑀢𑁆𑀢𑀁. 𑀉𑀧𑁆𑀧𑀸𑀤𑁄 𑀏𑀯 𑀲𑀗𑁆𑀔𑀢𑀫𑀺𑀢𑀺 𑀮𑀓𑁆𑀔𑀡𑀦𑁆𑀢𑀺 𑀲𑀗𑁆𑀔𑀢𑀮𑀓𑁆𑀔𑀡𑀁. 𑀏𑀯𑀫𑀺𑀢𑀭𑀤𑁆𑀯𑀬𑁂𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀺𑀦𑀸 𑀉𑀧𑁆𑀧𑀸𑀤𑀓𑁆𑀔𑀡𑁂 𑀲𑁂𑀲𑀤𑁆𑀯𑀺𑀦𑁆𑀦𑀁, 𑀞𑀺𑀢𑀺𑀓𑁆𑀔𑀡𑁂 𑀲𑁂𑀲𑀤𑁆𑀯𑀺𑀦𑁆𑀦𑀁, 𑀪𑀗𑁆𑀕𑀓𑁆𑀔𑀡𑁂 𑀘 𑀲𑁂𑀲𑀤𑁆𑀯𑀺𑀦𑁆𑀦𑀁 𑀅𑀪𑀸𑀯𑁄 𑀤𑀲𑁆𑀲𑀺𑀢𑁄. 𑀬𑀁 𑀧𑀦𑁂𑀢𑁆𑀣 𑀧𑁂𑀬𑁆𑀬𑀸𑀮𑀫𑀼𑀔𑁂𑀦 𑀚𑀸𑀢𑀺𑀬𑀸 𑀘 𑀚𑀭𑀸𑀫𑀭𑀡𑀲𑁆𑀲 𑀘 𑀉𑀧𑁆𑀧𑀸𑀤𑀸𑀤𑀺𑀮𑀓𑁆𑀔𑀡𑀁 𑀯𑀼𑀢𑁆𑀢𑀁, 𑀢𑀁 𑀯𑀺𑀧𑀭𑀺𑀡𑀸𑀫𑀲𑀼𑀜𑁆𑀜𑀢𑀸𑀬 𑀚𑀸𑀢𑀺𑀚𑀭𑀸𑀫𑀭𑀡𑀸𑀦𑀺 𑀳𑀺𑀢𑁆𑀯𑀸 𑀪𑀯𑀧𑀭𑀺𑀬𑁄𑀲𑀸𑀦𑀲𑁆𑀲𑁂𑀯 𑀦𑀬𑀲𑁆𑀲 𑀯𑀘𑀦𑁂𑀦 𑀘 𑀉𑀧𑁆𑀧𑀸𑀤𑀸𑀤𑀻𑀦𑀁 𑀉𑀧𑁆𑀧𑀸𑀤𑀸𑀤𑀺𑀅𑀯𑀘𑀦𑀲𑀫𑀬𑁂𑀦 𑀘 𑀯𑀺𑀭𑀼𑀚𑁆𑀛𑀢𑀺. 𑀮𑀓𑁆𑀔𑀡𑀲𑁄𑀢𑁂 𑀧𑀢𑀺𑀢𑀢𑁆𑀢𑀸 𑀧𑀦 𑀲𑁄𑀢𑀧𑀢𑀺𑀢𑀁 𑀓𑀢𑁆𑀯𑀸 𑀮𑀺𑀔𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸 𑀘 𑀅𑀪𑀺𑀥𑀫𑁆𑀫𑁂 (𑀥. 𑀲. 𑁫𑁬𑁨-𑁫𑁬𑁫) 𑀅𑀳𑁂𑀢𑀼𑀓𑀯𑀺𑀧𑀸𑀓𑀫𑀦𑁄𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁 𑀲𑀗𑁆𑀕𑀳𑀯𑀸𑀭𑁂 𑀮𑀩𑁆𑀪𑀫𑀸𑀦𑀫𑁆𑀧𑀺 𑀛𑀸𑀦𑀗𑁆𑀕𑀁 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑁄𑀢𑁂 𑀧𑀢𑀺𑀢𑁆𑀯𑀸 𑀕𑀢𑀦𑁆𑀢𑀺 𑀦 𑀉𑀤𑁆𑀥𑀝𑀦𑁆𑀢𑀺 𑀯𑀼𑀢𑁆𑀢𑀁, 𑀏𑀯𑀫𑀺𑀥𑀸𑀧𑀺 𑀲𑁄𑀢𑀧𑀢𑀺𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀣 𑀯𑀸 𑀚𑀸𑀢𑀺𑀚𑀭𑀸𑀫𑀭𑀡𑀯𑀦𑁆𑀢𑀸𑀦𑀁 𑀲𑀗𑁆𑀔𑀸𑀭𑀸𑀦𑀁 𑀉𑀧𑁆𑀧𑀸𑀤𑀸𑀤𑀬𑁄 ‘‘𑀚𑀸𑀢𑀺𑀚𑀭𑀸𑀫𑀭𑀡𑀁 𑀅𑀦𑀺𑀘𑁆𑀘𑀢𑁄’’𑀢𑀺𑀆𑀤𑀻𑀲𑀼 (𑀧𑀝𑀺. 𑀫. 𑁧.𑁭𑁩; 𑁨.𑁪) 𑀯𑀺𑀬 𑀢𑁂𑀲𑀁 𑀯𑀺𑀬 𑀓𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀦𑁂𑀓𑁆𑀔𑀫𑁆𑀫𑁂𑀦 𑀓𑀸𑀫𑀘𑁆𑀙𑀦𑁆𑀤𑁄 𑀯𑀺𑀓𑁆𑀔𑀫𑁆𑀪𑀺𑀢𑁄 𑀘𑁂𑀯 𑀲𑀼𑀜𑁆𑀜𑁄 𑀘𑀸𑀢𑀺 𑀓𑀸𑀫𑀘𑁆𑀙𑀦𑁆𑀤𑁄 𑀦𑁂𑀓𑁆𑀔𑀫𑁆𑀫𑁂𑀦 𑀯𑀺𑀓𑁆𑀔𑀫𑁆𑀪𑀺𑀢𑁄 𑀘𑁂𑀯 𑀦𑁂𑀓𑁆𑀔𑀫𑁆𑀫𑀲𑁆𑀲 𑀢𑀢𑁆𑀣 𑀅𑀪𑀸𑀯𑀢𑁄 𑀢𑁂𑀦𑁂𑀯 𑀯𑀺𑀓𑁆𑀔𑀫𑁆𑀪𑀦𑀲𑀗𑁆𑀔𑀸𑀢𑁂𑀦 𑀦𑁂𑀓𑁆𑀔𑀫𑁆𑀫𑁂𑀦 𑀲𑀼𑀜𑁆𑀜𑁄 𑀘. 𑀏𑀯𑀁 𑀲𑁂𑀲𑁂𑀲𑀼𑀧𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀢𑀤𑀗𑁆𑀕𑀧𑁆𑀧𑀳𑀸𑀦𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑁂𑀲𑀼𑀧𑀺 𑀘𑁂𑀢𑁆𑀣 𑀢𑀤𑀗𑁆𑀕𑀯𑀲𑁂𑀦 𑀘 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀘 𑀧𑀳𑀻𑀦𑀁 𑀤𑀽𑀭𑀻𑀓𑀢𑀫𑁂𑀯 𑀳𑁄𑀢𑀻𑀢𑀺 𑀇𑀫𑀺𑀦𑀸 𑀤𑀽𑀭𑀻𑀓𑀭𑀡𑀝𑁆𑀞𑁂𑀦 𑀯𑀺𑀓𑁆𑀔𑀫𑁆𑀪𑀦𑀁 𑀯𑀼𑀢𑁆𑀢𑀁.

𑀦𑁂𑀓𑁆𑀔𑀫𑁆𑀫𑁂𑀦 𑀓𑀸𑀫𑀘𑁆𑀙𑀦𑁆𑀤𑁄 𑀢𑀤𑀗𑁆𑀕𑀲𑀼𑀜𑁆𑀜𑁄𑀢𑀺 𑀦𑁂𑀓𑁆𑀔𑀫𑁆𑀫𑁂𑀦 𑀧𑀳𑀻𑀦𑁄 𑀓𑀸𑀫𑀘𑁆𑀙𑀦𑁆𑀤𑁄 𑀢𑁂𑀦 𑀦𑁂𑀓𑁆𑀔𑀫𑁆𑀫𑀲𑀗𑁆𑀔𑀸𑀢𑁂𑀦 𑀅𑀗𑁆𑀕𑁂𑀦 𑀲𑀼𑀜𑁆𑀜𑁄. 𑀅𑀣 𑀯𑀸 𑀬𑁄 𑀓𑁄𑀘𑀺 𑀓𑀸𑀫𑀘𑁆𑀙𑀦𑁆𑀤𑁄 𑀦𑁂𑀓𑁆𑀔𑀫𑁆𑀫𑀲𑁆𑀲 𑀢𑀢𑁆𑀣 𑀅𑀪𑀸𑀯𑀢𑁄 𑀦𑁂𑀓𑁆𑀔𑀫𑁆𑀫𑁂𑀦 𑀢𑁂𑀦 𑀅𑀗𑁆𑀕𑁂𑀦 𑀲𑀼𑀜𑁆𑀜𑁄. 𑀏𑀯𑀁 𑀲𑁂𑀲𑁂𑀲𑀼𑀧𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀢𑀲𑁆𑀲 𑀢𑀲𑁆𑀲 𑀅𑀗𑁆𑀕𑀲𑁆𑀲 𑀢𑀢𑁆𑀣 𑀢𑀢𑁆𑀣 𑀅𑀪𑀸𑀯𑀫𑀢𑁆𑀢𑁂𑀦𑁂𑀯 𑀘𑁂𑀢𑁆𑀣 𑀉𑀧𑀘𑀸𑀭𑀧𑁆𑀧𑀦𑀸𑀛𑀸𑀦𑀯𑀲𑁂𑀦 𑀘 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀘 𑀢𑀤𑀗𑁆𑀕𑀲𑀼𑀜𑁆𑀜𑀢𑀸 𑀦𑀺𑀤𑁆𑀤𑀺𑀝𑁆𑀞𑀸. 𑀧𑀳𑀸𑀦𑀤𑀻𑀧𑀓𑀲𑁆𑀲 𑀯𑀘𑀦𑀲𑁆𑀲 𑀅𑀪𑀸𑀯𑁂𑀦 𑀧𑀦 𑀯𑀺𑀯𑀝𑁆𑀝𑀦𑀸𑀦𑀼𑀧𑀲𑁆𑀲𑀦𑀁𑀬𑁂𑀯 𑀧𑀭𑀺𑀬𑁄𑀲𑀸𑀦𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀸 𑀦𑀺𑀤𑁆𑀤𑀺𑀝𑁆𑀞𑀸, 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸 𑀦 𑀦𑀺𑀤𑁆𑀤𑀺𑀝𑁆𑀞𑀸. 𑀦𑁂𑀓𑁆𑀔𑀫𑁆𑀫𑁂𑀦 𑀓𑀸𑀫𑀘𑁆𑀙𑀦𑁆𑀤𑁄 𑀲𑀫𑀼𑀘𑁆𑀙𑀺𑀦𑁆𑀦𑁄 𑀘𑁂𑀯 𑀲𑀼𑀜𑁆𑀜𑁄 𑀘𑀸𑀢𑀺𑀆𑀤𑀻𑀲𑀼 𑀯𑀺𑀓𑁆𑀔𑀫𑁆𑀪𑀦𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀤𑀗𑁆𑀕𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀧𑀳𑀻𑀦𑀸𑀦𑀺𑀧𑀺 𑀘𑁂𑀢𑁆𑀣 𑀲𑀫𑀼𑀤𑀸𑀘𑀸𑀭𑀸𑀪𑀸𑀯𑀢𑁄 𑀲𑀫𑀼𑀘𑁆𑀙𑀺𑀦𑁆𑀦𑀸𑀦𑀺 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀲𑀫𑀼𑀘𑁆𑀙𑁂𑀤𑁄 𑀯𑀼𑀢𑁆𑀢𑁄, 𑀢𑀁𑀢𑀁𑀲𑀫𑀼𑀘𑁆𑀙𑁂𑀤𑀓𑀺𑀘𑁆𑀘𑀲𑀸𑀥𑀦𑀯𑀲𑁂𑀦 𑀯𑀸 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀦𑁂𑀓𑁆𑀔𑀫𑁆𑀫𑀸𑀤𑀺𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺𑀧𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀦𑀺𑀲𑁆𑀲𑀭𑀡𑀲𑀼𑀜𑁆𑀜𑁂𑀲𑀼 𑀘 𑀇𑀥 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀤𑀗𑁆𑀕𑀯𑀺𑀓𑁆𑀔𑀫𑁆𑀪𑀦𑀲𑀫𑀼𑀘𑁆𑀙𑁂𑀤𑀧𑀳𑀸𑀦𑁂𑀲𑀼 𑀧𑀦𑁂𑀢𑁆𑀣 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀫𑀢𑁆𑀢𑀢𑁆𑀢𑀁 𑀦𑀺𑀲𑁆𑀲𑀝𑀫𑀢𑁆𑀢𑀢𑁆𑀢𑀜𑁆𑀘 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀧𑀜𑁆𑀘𑀲𑀼𑀧𑀺 𑀏𑀢𑁂𑀲𑀼 𑀲𑀼𑀜𑁆𑀜𑁂𑀲𑀼 𑀦𑁂𑀓𑁆𑀔𑀫𑁆𑀫𑀸𑀤𑀻𑀦𑀺𑀬𑁂𑀯 𑀯𑀺𑀓𑁆𑀔𑀫𑁆𑀪𑀦𑀢𑀤𑀗𑁆𑀕𑀲𑀫𑀼𑀘𑁆𑀙𑁂𑀤𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀦𑀺𑀲𑁆𑀲𑀭𑀡𑀦𑀸𑀫𑁂𑀦 𑀯𑀼𑀢𑁆𑀢𑀸𑀦𑀺. 𑀅𑀚𑁆𑀛𑀢𑁆𑀢𑀦𑁆𑀢𑀺 𑀅𑀚𑁆𑀛𑀢𑁆𑀢𑀪𑀽𑀢𑀁. 𑀩𑀳𑀺𑀤𑁆𑀥𑀸𑀢𑀺 𑀩𑀳𑀺𑀤𑁆𑀥𑀸𑀪𑀽𑀢𑀁. 𑀤𑀼𑀪𑀢𑁄𑀲𑀼𑀜𑁆𑀜𑀦𑁆𑀢𑀺 𑀉𑀪𑀬𑀲𑀼𑀜𑁆𑀜𑀁. 𑀧𑀘𑁆𑀘𑀢𑁆𑀢𑀸𑀤𑀻𑀲𑀼𑀧𑀺 𑀳𑀺 𑀢𑁄-𑀇𑀢𑀺𑀯𑀘𑀦𑀁 𑀳𑁄𑀢𑀺𑀬𑁂𑀯.

𑀙 𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦𑀸𑀤𑀻𑀦𑀺 𑀙𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦𑀸𑀤𑀻𑀦𑀁 𑀪𑀸𑀯𑁂𑀦 𑀲𑀪𑀸𑀕𑀸𑀦𑀺. 𑀧𑀭𑁂𑀳𑀺 𑀯𑀺𑀲𑀪𑀸𑀕𑀸𑀦𑀺. 𑀯𑀺𑀜𑁆𑀜𑀸𑀡𑀓𑀸𑀬𑀸𑀢𑀺𑀆𑀤𑀻𑀲𑀼 𑀘𑁂𑀢𑁆𑀣 𑀓𑀸𑀬𑀯𑀘𑀦𑁂𑀦 𑀯𑀺𑀜𑁆𑀜𑀸𑀡𑀸𑀤𑀻𑀦𑀺𑀬𑁂𑀯 𑀯𑀼𑀢𑁆𑀢𑀸𑀦𑀺. 𑀦𑁂𑀓𑁆𑀔𑀫𑁆𑀫𑁂𑀲𑀦𑀸𑀤𑀻𑀲𑀼 𑀦𑁂𑀓𑁆𑀔𑀫𑁆𑀫𑀸𑀤𑀻𑀦𑀺𑀬𑁂𑀯 𑀢𑀤𑀢𑁆𑀣𑀺𑀓𑁂𑀳𑀺 𑀯𑀺𑀜𑁆𑀜𑀽𑀳𑀺 𑀏𑀲𑀻𑀬𑀦𑁆𑀢𑀻𑀢𑀺 𑀏𑀲𑀦𑀸. 𑀅𑀣 𑀯𑀸 𑀧𑀼𑀩𑁆𑀩𑀪𑀸𑀕𑁂 𑀦𑁂𑀓𑁆𑀔𑀫𑁆𑀫𑀸𑀤𑀻𑀦𑀁 𑀏𑀲𑀦𑀸𑀧𑀺 𑀓𑀸𑀫𑀘𑁆𑀙𑀦𑁆𑀤𑀸𑀤𑀻𑀳𑀺 𑀲𑀼𑀜𑁆𑀜𑀸, 𑀓𑀺𑀁 𑀧𑀦 𑀦𑁂𑀓𑁆𑀔𑀫𑁆𑀫𑀸𑀤𑀻𑀦𑀻𑀢𑀺𑀧𑀺 𑀯𑀼𑀢𑁆𑀢𑀁 𑀳𑁄𑀢𑀺? 𑀧𑀭𑀺𑀕𑁆𑀕𑀳𑀸𑀤𑀻𑀲𑀼 𑀦𑁂𑀓𑁆𑀔𑀫𑁆𑀫𑀸𑀤𑀻𑀦𑀺𑀬𑁂𑀯 𑀧𑀼𑀩𑁆𑀩𑀪𑀸𑀕𑁂 𑀏𑀲𑀺𑀢𑀸𑀦𑀺 𑀅𑀧𑀭𑀪𑀸𑀕𑁂 𑀧𑀭𑀺𑀕𑁆𑀕𑀬𑁆𑀳𑀦𑁆𑀢𑀻𑀢𑀺 𑀧𑀭𑀺𑀕𑁆𑀕𑀳𑁄𑀢𑀺, 𑀧𑀭𑀺𑀕𑁆𑀕𑀳𑀺𑀢𑀸𑀦𑀺 𑀧𑀢𑁆𑀢𑀺𑀯𑀲𑁂𑀦 𑀧𑀝𑀺𑀮𑀩𑁆𑀪𑀦𑁆𑀢𑀻𑀢𑀺 𑀧𑀝𑀺𑀮𑀸𑀪𑁄𑀢𑀺, 𑀧𑀝𑀺𑀮𑀤𑁆𑀥𑀸𑀦𑀺 𑀜𑀸𑀡𑀯𑀲𑁂𑀦 𑀧𑀝𑀺𑀯𑀺𑀚𑁆𑀛𑀻𑀬𑀦𑁆𑀢𑀻𑀢𑀺 𑀧𑀝𑀺𑀯𑁂𑀥𑁄𑀢𑀺 𑀘 𑀯𑀼𑀢𑁆𑀢𑀸𑀦𑀺. 𑀏𑀓𑀢𑁆𑀢𑀲𑀼𑀜𑁆𑀜𑀜𑁆𑀘 𑀦𑀸𑀦𑀢𑁆𑀢𑀲𑀼𑀜𑁆𑀜𑀜𑁆𑀘 𑀲𑀓𑀺𑀁𑀬𑁂𑀯 𑀧𑀼𑀘𑁆𑀙𑀺𑀢𑁆𑀯𑀸 𑀏𑀓𑀢𑁆𑀢𑀲𑀼𑀜𑁆𑀜𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀦𑀸𑀦𑀢𑁆𑀢𑀲𑀼𑀜𑁆𑀜𑀁 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸𑀯 𑀲𑀓𑀺𑀁 𑀦𑀺𑀕𑀫𑀦𑀁 𑀓𑀢𑀁. 𑀓𑀲𑁆𑀫𑀸 𑀦 𑀯𑀺𑀲𑁆𑀲𑀚𑁆𑀚𑀺𑀢𑀦𑁆𑀢𑀺 𑀘𑁂? 𑀯𑀼𑀢𑁆𑀢𑀧𑀭𑀺𑀬𑀸𑀬𑁂𑀦𑁂𑀯𑁂𑀢𑁆𑀣 𑀬𑁄𑀚𑀦𑀸 𑀜𑀸𑀬𑀢𑀻𑀢𑀺 𑀦 𑀯𑀺𑀲𑁆𑀲𑀚𑁆𑀚𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀁 𑀧𑀦𑁂𑀢𑁆𑀣 𑀬𑁄𑀚𑀦𑀸 𑁋 𑀦𑁂𑀓𑁆𑀔𑀫𑁆𑀫𑀁 𑀏𑀓𑀢𑁆𑀢𑀁, 𑀓𑀸𑀫𑀘𑁆𑀙𑀦𑁆𑀤𑁄 𑀦𑀸𑀦𑀢𑁆𑀢𑀁, 𑀓𑀸𑀫𑀘𑁆𑀙𑀦𑁆𑀤𑁄 𑀦𑀸𑀦𑀢𑁆𑀢𑀁, 𑀦𑁂𑀓𑁆𑀔𑀫𑁆𑀫𑁂𑀓𑀢𑁆𑀢𑁂𑀦 𑀲𑀼𑀜𑁆𑀜𑀦𑁆𑀢𑀺. 𑀏𑀯𑀁 𑀲𑁂𑀲𑁂𑀲𑀼𑀧𑀺 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀔𑀦𑁆𑀢𑀺𑀆𑀤𑀻𑀲𑀼 𑀦𑁂𑀓𑁆𑀔𑀫𑁆𑀫𑀸𑀤𑀻𑀦𑀺𑀬𑁂𑀯 𑀔𑀫𑀦𑀢𑁄 𑀭𑀼𑀘𑁆𑀘𑀦𑀢𑁄 𑀔𑀦𑁆𑀢𑀻𑀢𑀺, 𑀭𑁄𑀘𑀺𑀢𑀸𑀦𑀺𑀬𑁂𑀯 𑀧𑀯𑀺𑀲𑀺𑀢𑁆𑀯𑀸 𑀢𑀺𑀝𑁆𑀞𑀦𑀢𑁄 𑀅𑀥𑀺𑀝𑁆𑀞𑀸𑀦𑀦𑁆𑀢𑀺, 𑀧𑀯𑀺𑀲𑀺𑀢𑁆𑀯𑀸 𑀞𑀺𑀢𑀸𑀦𑀁 𑀬𑀣𑀸𑀭𑀼𑀘𑀺𑀫𑁂𑀯 𑀲𑁂𑀯𑀦𑀢𑁄 𑀧𑀭𑀺𑀬𑁄𑀕𑀸𑀳𑀦𑀦𑁆𑀢𑀺 𑀘 𑀯𑀼𑀢𑁆𑀢𑀸𑀦𑀺. 𑀇𑀥 𑀲𑀫𑁆𑀧𑀚𑀸𑀦𑁄𑀢𑀺𑀆𑀤𑀺𑀓𑁄 𑀧𑀭𑀫𑀢𑁆𑀣𑀲𑀼𑀜𑁆𑀜𑀦𑀺𑀤𑁆𑀤𑁂𑀲𑁄 𑀧𑀭𑀺𑀦𑀺𑀩𑁆𑀩𑀸𑀦𑀜𑀸𑀡𑀦𑀺𑀤𑁆𑀤𑁂𑀲𑁂 𑀯𑀡𑁆𑀡𑀺𑀢𑁄𑀬𑁂𑀯.

𑀇𑀫𑁂𑀲𑀼 𑀘 𑀲𑀩𑁆𑀩𑁂𑀲𑀼 𑀲𑀼𑀜𑁆𑀜𑁂𑀲𑀼 𑀲𑀗𑁆𑀔𑀸𑀭𑀲𑀼𑀜𑁆𑀜𑀁 𑀯𑀺𑀧𑀭𑀺𑀡𑀸𑀫𑀲𑀼𑀜𑁆𑀜𑀁 𑀮𑀓𑁆𑀔𑀡𑀲𑀼𑀜𑁆𑀜𑀜𑁆𑀘 𑀬𑀣𑀸𑀯𑀼𑀢𑁆𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀜𑁆𑀜𑀫𑀜𑁆𑀜𑀅𑀲𑀫𑁆𑀫𑀺𑀲𑁆𑀲𑀢𑀸𑀤𑀲𑁆𑀲𑀦𑀢𑁆𑀣𑀁. 𑀬𑀢𑁆𑀣 𑀧𑀦 𑀅𑀓𑀼𑀲𑀮𑀧𑀓𑁆𑀔𑀺𑀓𑀸𑀦𑀁 𑀓𑀼𑀲𑀮𑀧𑀓𑁆𑀔𑀺𑀓𑁂𑀦 𑀲𑀼𑀜𑁆𑀜𑀢𑀸 𑀯𑀼𑀢𑁆𑀢𑀸, 𑀢𑁂𑀦 𑀅𑀓𑀼𑀲𑀮𑁂 𑀆𑀤𑀻𑀦𑀯𑀤𑀲𑁆𑀲𑀦𑀢𑁆𑀣𑀁. 𑀬𑀢𑁆𑀣 𑀧𑀦 𑀓𑀼𑀲𑀮𑀧𑀓𑁆𑀔𑀺𑀓𑀸𑀦𑀁 𑀅𑀓𑀼𑀲𑀮𑀧𑀓𑁆𑀔𑀺𑀓𑁂𑀦 𑀲𑀼𑀜𑁆𑀜𑀢𑀸 𑀯𑀼𑀢𑁆𑀢𑀸, 𑀢𑁂𑀦 𑀓𑀼𑀲𑀮𑁂 𑀆𑀦𑀺𑀲𑀁𑀲𑀤𑀲𑁆𑀲𑀦𑀢𑁆𑀣𑀁. 𑀬𑀢𑁆𑀣 𑀅𑀢𑁆𑀢𑀢𑁆𑀢𑀦𑀺𑀬𑀸𑀤𑀻𑀳𑀺 𑀲𑀼𑀜𑁆𑀜𑀢𑀸 𑀯𑀼𑀢𑁆𑀢𑀸, 𑀢𑀁 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀦𑀺𑀩𑁆𑀩𑀺𑀤𑀸𑀚𑀦𑀦𑀢𑁆𑀣𑀁. 𑀅𑀕𑁆𑀕𑀲𑀼𑀜𑁆𑀜𑀁 𑀧𑀭𑀫𑀢𑁆𑀣𑀲𑀼𑀜𑁆𑀜𑀜𑁆𑀘 𑀦𑀺𑀩𑁆𑀩𑀸𑀦𑁂 𑀉𑀲𑁆𑀲𑀸𑀳𑀚𑀦𑀦𑀢𑁆𑀣𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑁂𑀲𑀼 𑀅𑀕𑁆𑀕𑀲𑀼𑀜𑁆𑀜𑀜𑁆𑀘 𑀧𑀭𑀫𑀢𑁆𑀣𑀲𑀼𑀜𑁆𑀜𑀜𑁆𑀘𑀸𑀢𑀺 𑀤𑁆𑀯𑁂 𑀲𑀼𑀜𑁆𑀜𑀸𑀦𑀺 𑀅𑀢𑁆𑀣𑀢𑁄 𑀏𑀓𑀫𑁂𑀯 𑀦𑀺𑀩𑁆𑀩𑀸𑀦𑀁 𑀅𑀕𑁆𑀕𑀧𑀭𑀫𑀢𑁆𑀣𑀯𑀲𑁂𑀦 𑀲𑀉𑀧𑀸𑀤𑀺𑀲𑁂𑀲𑀅𑀦𑀼𑀧𑀸𑀤𑀺𑀲𑁂𑀲𑀯𑀲𑁂𑀦 𑀘 𑀤𑁆𑀯𑀺𑀥𑀸 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀢𑀸𑀦𑀺 𑀤𑁆𑀯𑁂 𑀅𑀢𑁆𑀢𑀢𑁆𑀢𑀦𑀺𑀬𑀲𑀼𑀜𑁆𑀜𑀢𑁄 𑀲𑀗𑁆𑀔𑀸𑀭𑀲𑀼𑀜𑁆𑀜𑀢𑁄 𑀘 𑀲𑀪𑀸𑀕𑀸𑀦𑀺. ‘‘𑀲𑀼𑀜𑁆𑀜𑀲𑀼𑀜𑁆𑀜𑀁 𑀅𑀚𑁆𑀛𑀢𑁆𑀢𑀲𑀼𑀜𑁆𑀜𑀁 𑀩𑀳𑀺𑀤𑁆𑀥𑀸𑀲𑀼𑀜𑁆𑀜𑀁 𑀤𑀼𑀪𑀢𑁄𑀲𑀼𑀜𑁆𑀜𑀁 𑀲𑀪𑀸𑀕𑀲𑀼𑀜𑁆𑀜𑀁 𑀯𑀺𑀲𑀪𑀸𑀕𑀲𑀼𑀜𑁆𑀜’’𑀦𑁆𑀢𑀺 𑀇𑀫𑀸𑀦𑀺 𑀙 𑀲𑀼𑀜𑁆𑀜𑀸𑀦𑀺 𑀲𑀼𑀜𑁆𑀜𑀲𑀼𑀜𑁆𑀜𑀫𑁂𑀯 𑀳𑁄𑀢𑀺. 𑀅𑀚𑁆𑀛𑀢𑁆𑀢𑀸𑀤𑀺𑀪𑁂𑀤𑀢𑁄 𑀧𑀦 𑀙𑀥𑀸 𑀯𑀼𑀢𑁆𑀢𑀸𑀦𑀺. 𑀢𑀸𑀦𑀺 𑀙 𑀘 𑀅𑀢𑁆𑀢𑀢𑁆𑀢𑀦𑀺𑀬𑀸𑀤𑀺𑀲𑀼𑀜𑁆𑀜𑀢𑁄 𑀲𑀪𑀸𑀕𑀸𑀦𑀺. 𑀲𑀗𑁆𑀔𑀸𑀭𑀯𑀺𑀧𑀭𑀺𑀡𑀸𑀫𑀮𑀓𑁆𑀔𑀡𑀲𑀼𑀜𑁆𑀜𑀸𑀦𑀺, 𑀯𑀺𑀓𑁆𑀔𑀫𑁆𑀪𑀦𑀢𑀤𑀗𑁆𑀕𑀲𑀫𑀼𑀘𑁆𑀙𑁂𑀤𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀦𑀺𑀲𑁆𑀲𑀭𑀡𑀲𑀼𑀜𑁆𑀜𑀸𑀦𑀺, 𑀏𑀲𑀦𑀸𑀧𑀭𑀺𑀕𑁆𑀕𑀳𑀧𑀝𑀺𑀮𑀸𑀪𑀧𑀝𑀺𑀯𑁂𑀥𑀲𑀼𑀜𑁆𑀜𑀸𑀦𑀺, 𑀏𑀓𑀢𑁆𑀢𑀦𑀸𑀦𑀢𑁆𑀢𑀲𑀼𑀜𑁆𑀜𑀸𑀦𑀺, 𑀔𑀦𑁆𑀢𑀺𑀅𑀥𑀺𑀝𑁆𑀞𑀸𑀦𑀧𑀭𑀺𑀬𑁄𑀕𑀸𑀳𑀦𑀲𑀼𑀜𑁆𑀜𑀸𑀦𑀺 𑀘𑀸𑀢𑀺 𑀲𑀢𑁆𑀢𑀭𑀲 𑀲𑀼𑀜𑁆𑀜𑀸𑀦𑀺 𑀅𑀢𑁆𑀢𑀦𑀺 𑀅𑀯𑀺𑀚𑁆𑀚𑀫𑀸𑀦𑁂𑀳𑀺 𑀢𑁂𑀳𑀺 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀲𑀼𑀜𑁆𑀜𑀢𑁆𑀢𑀸 𑀅𑀯𑀺𑀚𑁆𑀚𑀫𑀸𑀦𑀸𑀦𑀁 𑀯𑀲𑁂𑀦 𑀯𑀺𑀲𑀼𑀁 𑀯𑀺𑀲𑀼𑀁 𑀯𑀼𑀢𑁆𑀢𑀸𑀦𑀺. 𑀲𑀗𑁆𑀔𑀸𑀭𑀯𑀺𑀧𑀭𑀺𑀡𑀸𑀫𑀮𑀓𑁆𑀔𑀡𑀲𑀼𑀜𑁆𑀜𑀸𑀦𑀺 𑀧𑀦 𑀇𑀢𑀭𑁂𑀦 𑀇𑀢𑀭𑁂𑀦 𑀅𑀲𑀫𑁆𑀫𑀺𑀲𑁆𑀲𑀯𑀲𑁂𑀦 𑀲𑀪𑀸𑀕𑀸𑀦𑀺, 𑀯𑀺𑀓𑁆𑀔𑀫𑁆𑀪𑀦𑀸𑀤𑀻𑀦𑀺 𑀧𑀜𑁆𑀘 𑀓𑀼𑀲𑀮𑀧𑀓𑁆𑀔𑁂𑀦 𑀲𑀼𑀜𑁆𑀜𑀢𑁆𑀢𑀸 𑀲𑀪𑀸𑀕𑀸𑀦𑀺, 𑀏𑀲𑀦𑀸𑀤𑀻𑀦𑀺 𑀘𑀢𑁆𑀢𑀸𑀭𑀺, 𑀔𑀦𑁆𑀢𑀺𑀆𑀤𑀻𑀦𑀺 𑀘 𑀢𑀻𑀡𑀺 𑀅𑀓𑀼𑀲𑀮𑀧𑀓𑁆𑀔𑁂𑀦 𑀲𑀼𑀜𑁆𑀜𑀢𑁆𑀢𑀸 𑀲𑀪𑀸𑀕𑀸𑀦𑀺, 𑀏𑀓𑀢𑁆𑀢𑀦𑀸𑀦𑀢𑁆𑀢𑀲𑀼𑀜𑁆𑀜𑀸𑀦𑀺 𑀅𑀜𑁆𑀜𑀫𑀜𑁆𑀜𑀧𑀝𑀺𑀧𑀓𑁆𑀔𑀯𑀲𑁂𑀦 𑀲𑀪𑀸𑀕𑀸𑀦𑀺.

𑀲𑀩𑁆𑀩𑁂 𑀥𑀫𑁆𑀫𑀸 𑀲𑀫𑀸𑀲𑁂𑀦, 𑀢𑀺𑀥𑀸 𑀤𑁆𑀯𑁂𑀥𑀸 𑀢𑀣𑁂𑀓𑀥𑀸;

𑀲𑀼𑀜𑁆𑀜𑀸𑀢𑀺 𑀲𑀼𑀜𑁆𑀜𑀢𑁆𑀣𑀯𑀺𑀤𑀽, 𑀯𑀡𑁆𑀡𑀬𑀦𑁆𑀢𑀻𑀥 𑀲𑀸𑀲𑀦𑁂.

𑀓𑀣𑀁? 𑀲𑀩𑁆𑀩𑁂 𑀢𑀸𑀯 𑀮𑁄𑀓𑀺𑀬𑀸 𑀥𑀫𑁆𑀫𑀸 𑀥𑀼𑀯𑀲𑀼𑀪𑀲𑀼𑀔𑀅𑀢𑁆𑀢𑀯𑀺𑀭𑀳𑀺𑀢𑀢𑁆𑀢𑀸 𑀥𑀼𑀯𑀲𑀼𑀪𑀲𑀼𑀔𑀅𑀢𑁆𑀢𑀲𑀼𑀜𑁆𑀜𑀸. 𑀫𑀕𑁆𑀕𑀨𑀮𑀥𑀫𑁆𑀫𑀸 𑀥𑀼𑀯𑀲𑀼𑀔𑀢𑁆𑀢𑀯𑀺𑀭𑀳𑀺𑀢𑀢𑁆𑀢𑀸 𑀥𑀼𑀯𑀲𑀼𑀔𑀢𑁆𑀢𑀲𑀼𑀜𑁆𑀜𑀸. 𑀅𑀦𑀺𑀘𑁆𑀘𑀢𑁆𑀢𑀸𑀬𑁂𑀯 𑀲𑀼𑀔𑁂𑀦 𑀲𑀼𑀜𑁆𑀜𑀸. 𑀅𑀦𑀸𑀲𑀯𑀢𑁆𑀢𑀸 𑀦 𑀲𑀼𑀪𑁂𑀦 𑀲𑀼𑀜𑁆𑀜𑀸. 𑀦𑀺𑀩𑁆𑀩𑀸𑀦𑀥𑀫𑁆𑀫𑁄 𑀅𑀢𑁆𑀢𑀲𑁆𑀲𑁂𑀯 𑀅𑀪𑀸𑀯𑀢𑁄 𑀅𑀢𑁆𑀢𑀲𑀼𑀜𑁆𑀜𑁄. 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸 𑀧𑀦 𑀲𑀩𑁆𑀩𑁂𑀧𑀺 𑀲𑀗𑁆𑀔𑀢𑀸 𑀥𑀫𑁆𑀫𑀸 𑀲𑀢𑁆𑀢𑀲𑁆𑀲 𑀓𑀲𑁆𑀲𑀘𑀺 𑀅𑀪𑀸𑀯𑀢𑁄 𑀲𑀢𑁆𑀢𑀲𑀼𑀜𑁆𑀜𑀸. 𑀅𑀲𑀗𑁆𑀔𑀢𑁄 𑀦𑀺𑀩𑁆𑀩𑀸𑀦𑀥𑀫𑁆𑀫𑁄 𑀢𑁂𑀲𑀁 𑀲𑀗𑁆𑀔𑀸𑀭𑀸𑀦𑀫𑁆𑀧𑀺 𑀅𑀪𑀸𑀯𑀢𑁄 𑀲𑀗𑁆𑀔𑀸𑀭𑀲𑀼𑀜𑁆𑀜𑁄. 𑀲𑀗𑁆𑀔𑀢𑀸𑀲𑀗𑁆𑀔𑀢𑀸 𑀧𑀦 𑀲𑀩𑁆𑀩𑁂𑀧𑀺 𑀥𑀫𑁆𑀫𑀸 𑀅𑀢𑁆𑀢𑀲𑀗𑁆𑀔𑀸𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀪𑀸𑀯𑀢𑁄 𑀅𑀢𑁆𑀢𑀲𑀼𑀜𑁆𑀜𑀸𑀢𑀺.

𑀲𑀤𑁆𑀥𑀫𑁆𑀫𑀧𑁆𑀧𑀓𑀸𑀲𑀺𑀦𑀺𑀬𑀸 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑀅𑀝𑁆𑀞𑀓𑀣𑀸𑀬

𑀲𑀼𑀜𑁆𑀜𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀬𑀼𑀕𑀦𑀤𑁆𑀥𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑀸 𑀘 𑀫𑀚𑁆𑀛𑀺𑀫𑀯𑀕𑁆𑀕𑀲𑁆𑀲 𑀅𑀧𑀼𑀩𑁆𑀩𑀢𑁆𑀣𑀸𑀦𑀼𑀯𑀡𑁆𑀡𑀦𑀸.