𑁪𑁧-𑁪𑁨. 𑀔𑀦𑁆𑀢𑀺𑀜𑀸𑀡𑀧𑀭𑀺𑀬𑁄𑀕𑀸𑀳𑀡𑀜𑀸𑀡𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁯𑁨-𑁯𑁩. 𑀔𑀦𑁆𑀢𑀺𑀜𑀸𑀡𑀧𑀭𑀺𑀬𑁄𑀕𑀸𑀳𑀡𑀜𑀸𑀡𑀦𑀺𑀤𑁆𑀤𑁂𑀲𑁂𑀲𑀼 𑀭𑀽𑀧𑀁 𑀅𑀦𑀺𑀘𑁆𑀘𑀢𑁄 𑀯𑀺𑀤𑀺𑀢𑀦𑁆𑀢𑀺 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀬 𑀅𑀦𑀺𑀘𑁆𑀘𑀦𑁆𑀢𑀺 𑀜𑀸𑀢𑀁. 𑀭𑀽𑀧𑀁 𑀤𑀼𑀓𑁆𑀔𑀢𑁄 𑀯𑀺𑀤𑀺𑀢𑀦𑁆𑀢𑀺 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀬 𑀤𑀼𑀓𑁆𑀔𑀦𑁆𑀢𑀺 𑀜𑀸𑀢𑀁. 𑀭𑀽𑀧𑀁 𑀅𑀦𑀢𑁆𑀢𑀢𑁄 𑀯𑀺𑀤𑀺𑀢𑀦𑁆𑀢𑀺 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀬 𑀅𑀦𑀢𑁆𑀢𑀸𑀢𑀺 𑀜𑀸𑀢𑀁. 𑀬𑀁 𑀬𑀁 𑀯𑀺𑀤𑀺𑀢𑀁, 𑀢𑀁 𑀢𑀁 𑀔𑀫𑀢𑀻𑀢𑀺 𑀬𑀁 𑀬𑀁 𑀭𑀽𑀧𑀁 𑀅𑀦𑀺𑀘𑁆𑀘𑀸𑀤𑀺𑀢𑁄 𑀯𑀺𑀤𑀺𑀢𑀁, 𑀢𑀁 𑀢𑀁 𑀭𑀽𑀧𑀁 𑀅𑀦𑀺𑀘𑁆𑀘𑀸𑀤𑀺𑀢𑁄 𑀔𑀫𑀢𑀺 𑀭𑀼𑀘𑁆𑀘𑀢𑀺. ‘‘𑀭𑀽𑀧𑀁 𑀅𑀦𑀺𑀘𑁆𑀘𑀢𑁄 𑀯𑀺𑀤𑀺𑀢𑀁, 𑀬𑀁 𑀬𑀁 𑀯𑀺𑀤𑀺𑀢𑀁, 𑀢𑀁 𑀢𑀁 𑀔𑀫𑀢𑀻’’𑀢𑀺 𑀯𑀺𑀲𑀼𑀁 𑀯𑀺𑀲𑀼𑀜𑁆𑀘 𑀓𑀢𑁆𑀯𑀸 𑀓𑁂𑀲𑀼𑀘𑀺 𑀧𑁄𑀢𑁆𑀣𑀓𑁂𑀲𑀼 𑀮𑀺𑀔𑀺𑀢𑀁. ‘‘𑀯𑁂𑀤𑀦𑀸 𑀲𑀜𑁆𑀜𑀸 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀢𑁄 𑀯𑀺𑀤𑀺𑀢𑀸’’𑀢𑀺𑀆𑀤𑀺𑀦𑀸 𑀮𑀺𑀗𑁆𑀕𑀯𑀘𑀦𑀸𑀦𑀺 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀨𑀼𑀲𑀢𑀻𑀢𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑀨𑀼𑀲𑀦𑁂𑀦 𑀨𑀼𑀲𑀢𑀺 𑀨𑀭𑀢𑀺. 𑀧𑀭𑀺𑀬𑁄𑀕𑀳𑀢𑀻𑀢𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀦 𑀧𑀯𑀺𑀲𑀢𑀺. 𑀧𑀭𑀺𑀬𑁄𑀕𑀸𑀳𑀢𑀻𑀢𑀺𑀧𑀺 𑀧𑀸𑀞𑁄.

𑀔𑀦𑁆𑀢𑀺𑀜𑀸𑀡𑀧𑀭𑀺𑀬𑁄𑀕𑀸𑀳𑀡𑀜𑀸𑀡𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.