𑁬. 𑀦𑀢𑀁𑀤𑀴𑁆𑀳𑀯𑀕𑁆𑀕𑁄

[𑁨𑁦𑁧] 𑁧. 𑀩𑀦𑁆𑀥𑀦𑀸𑀕𑀸𑀭𑀚𑀸𑀢𑀓𑀯𑀡𑁆𑀡𑀦𑀸

𑀦 𑀢𑀁 𑀤𑀴𑁆𑀳𑀁 𑀩𑀦𑁆𑀥𑀦𑀫𑀸𑀳𑀼 𑀥𑀻𑀭𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀩𑀦𑁆𑀥𑀦𑀸𑀕𑀸𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀲𑁆𑀫𑀺𑀁 𑀓𑀺𑀭 𑀓𑀸𑀮𑁂 𑀩𑀳𑀽 𑀲𑀦𑁆𑀥𑀺𑀘𑁆𑀙𑁂𑀤𑀓𑀧𑀦𑁆𑀣𑀖𑀸𑀢𑀓𑀘𑁄𑀭𑁂 𑀆𑀦𑁂𑀢𑁆𑀯𑀸 𑀓𑁄𑀲𑀮𑀭𑀜𑁆𑀜𑁄 𑀤𑀲𑁆𑀲𑁂𑀲𑀼𑀁. 𑀢𑁂 𑀭𑀸𑀚𑀸 𑀅𑀤𑁆𑀤𑀼𑀩𑀦𑁆𑀥𑀦𑀭𑀚𑁆𑀚𑀼𑀩𑀦𑁆𑀥𑀦𑀲𑀗𑁆𑀔𑀮𑀺𑀓𑀩𑀦𑁆𑀥𑀦𑁂𑀳𑀺 𑀩𑀦𑁆𑀥𑀸𑀧𑁂𑀲𑀺. 𑀢𑀺𑀁𑀲𑀫𑀢𑁆𑀢𑀸 𑀚𑀸𑀦𑀧𑀤𑀸 𑀪𑀺𑀓𑁆𑀔𑀽 𑀲𑀢𑁆𑀣𑀸𑀭𑀁 𑀤𑀝𑁆𑀞𑀼𑀓𑀸𑀫𑀸 𑀆𑀕𑀦𑁆𑀢𑁆𑀯𑀸 𑀤𑀺𑀲𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀸 𑀩𑀦𑁆𑀥𑀦𑀸𑀕𑀸𑀭𑀁 𑀕𑀦𑁆𑀢𑁆𑀯𑀸 𑀢𑁂 𑀘𑁄𑀭𑁂 𑀤𑀺𑀲𑁆𑀯𑀸 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑀸 𑀲𑀸𑀬𑀦𑁆𑀳𑀲𑀫𑀬𑁂 𑀢𑀣𑀸𑀕𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀅𑀚𑁆𑀚 𑀅𑀫𑁆𑀳𑁂𑀳𑀺 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁂𑀳𑀺 𑀩𑀦𑁆𑀥𑀦𑀸𑀕𑀸𑀭𑁂 𑀩𑀳𑀽 𑀘𑁄𑀭𑀸 𑀅𑀤𑁆𑀤𑀼𑀩𑀦𑁆𑀥𑀦𑀸𑀤𑀻𑀳𑀺 𑀩𑀤𑁆𑀥𑀸 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑁆𑀢𑀸 𑀤𑀺𑀝𑁆𑀞𑀸, 𑀢𑁂 𑀢𑀸𑀦𑀺 𑀩𑀦𑁆𑀥𑀦𑀸𑀦𑀺 𑀙𑀺𑀦𑁆𑀤𑀺𑀢𑁆𑀯𑀸 𑀧𑀮𑀸𑀬𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀅𑀢𑁆𑀣𑀺 𑀦𑀼 𑀔𑁄 𑀢𑁂𑀳𑀺 𑀩𑀦𑁆𑀥𑀦𑁂𑀳𑀺 𑀣𑀺𑀭𑀢𑀭𑀁 𑀦𑀸𑀫 𑀅𑀜𑁆𑀜𑀁 𑀩𑀦𑁆𑀥𑀦’’𑀦𑁆𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀲𑀢𑁆𑀣𑀸 ‘‘𑀪𑀺𑀓𑁆𑀔𑀯𑁂, 𑀓𑀺𑀁 𑀩𑀦𑁆𑀥𑀦𑀸𑀦𑀺 𑀦𑀸𑀫𑁂𑀢𑀸𑀦𑀺, 𑀬𑀁 𑀧𑀦𑁂𑀢𑀁 𑀥𑀦𑀥𑀜𑁆𑀜𑀧𑀼𑀢𑁆𑀢𑀤𑀸𑀭𑀸𑀤𑀻𑀲𑀼 𑀢𑀡𑁆𑀳𑀸𑀲𑀗𑁆𑀔𑀸𑀢𑀁 𑀓𑀺𑀮𑁂𑀲𑀩𑀦𑁆𑀥𑀦𑀁, 𑀏𑀢𑀁 𑀏𑀢𑁂𑀳𑀺 𑀩𑀦𑁆𑀥𑀦𑁂𑀳𑀺 𑀲𑀢𑀕𑀼𑀡𑁂𑀦 𑀲𑀳𑀲𑁆𑀲𑀕𑀼𑀡𑁂𑀦 𑀣𑀺𑀭𑀢𑀭𑀁, 𑀏𑀯𑀁 𑀫𑀳𑀦𑁆𑀢𑀫𑁆𑀧𑀺 𑀧𑀦𑁂𑀢𑀁 𑀤𑀼𑀘𑁆𑀙𑀺𑀦𑁆𑀤𑀦𑀺𑀬𑀁 𑀩𑀦𑁆𑀥𑀦𑀁 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀙𑀺𑀦𑁆𑀤𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀧𑀩𑁆𑀩𑀚𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀏𑀓𑀲𑁆𑀫𑀺𑀁 𑀤𑀼𑀕𑁆𑀕𑀢𑀕𑀳𑀧𑀢𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺, 𑀢𑀲𑁆𑀲 𑀯𑀬𑀧𑁆𑀧𑀢𑁆𑀢𑀲𑁆𑀲 𑀧𑀺𑀢𑀸 𑀓𑀸𑀮𑀫𑀓𑀸𑀲𑀺. 𑀲𑁄 𑀪𑀢𑀺𑀁 𑀓𑀢𑁆𑀯𑀸 𑀫𑀸𑀢𑀭𑀁 𑀧𑁄𑀲𑁂𑀲𑀺, 𑀅𑀣𑀲𑁆𑀲 𑀫𑀸𑀢𑀸 𑀅𑀦𑀺𑀘𑁆𑀙𑀫𑀸𑀦𑀲𑁆𑀲𑁂𑀯 𑀏𑀓𑀁 𑀓𑀼𑀮𑀥𑀻𑀢𑀭𑀁 𑀕𑁂𑀳𑁂 𑀓𑀢𑁆𑀯𑀸 𑀅𑀧𑀭𑀪𑀸𑀕𑁂 𑀓𑀸𑀮𑀫𑀓𑀸𑀲𑀺. 𑀪𑀭𑀺𑀬𑀸𑀬𑀧𑀺𑀲𑁆𑀲 𑀓𑀼𑀘𑁆𑀙𑀺𑀬𑀁 𑀕𑀩𑁆𑀪𑁄 𑀧𑀢𑀺𑀝𑁆𑀞𑀸𑀲𑀺. 𑀲𑁄 𑀕𑀩𑁆𑀪𑀲𑁆𑀲 𑀧𑀢𑀺𑀝𑁆𑀞𑀺𑀢𑀪𑀸𑀯𑀁 𑀅𑀚𑀸𑀦𑀦𑁆𑀢𑁄 ‘‘𑀪𑀤𑁆𑀤𑁂, 𑀢𑁆𑀯𑀁 𑀪𑀢𑀺𑀁 𑀓𑀢𑁆𑀯𑀸 𑀚𑀻𑀯𑀸𑀳𑀺, 𑀅𑀳𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀲𑀸𑀧𑀺 ‘‘𑀕𑀩𑁆𑀪𑁄 𑀫𑁂 𑀧𑀢𑀺𑀝𑁆𑀞𑀺𑀢𑁄, 𑀫𑀬𑀺 𑀯𑀺𑀚𑀸𑀢𑀸𑀬 𑀤𑀸𑀭𑀓𑀁 𑀤𑀺𑀲𑁆𑀯𑀸 𑀧𑀩𑁆𑀩𑀚𑀺𑀲𑁆𑀲𑀲𑀻’’𑀢𑀺 𑀆𑀳. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀲𑁆𑀲𑀸 𑀯𑀺𑀚𑀸𑀢𑀓𑀸𑀮𑁂 ‘‘𑀪𑀤𑁆𑀤𑁂, 𑀢𑁆𑀯𑀁 𑀲𑁄𑀢𑁆𑀣𑀺𑀦𑀸 𑀯𑀺𑀚𑀸𑀢𑀸, 𑀇𑀤𑀸𑀦𑀸𑀳𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀆𑀧𑀼𑀘𑁆𑀙𑀺. 𑀅𑀣 𑀦𑀁 𑀲𑀸 ‘‘𑀧𑀼𑀢𑁆𑀢𑀓𑀲𑁆𑀲 𑀢𑀸𑀯 𑀣𑀦𑀧𑀸𑀦𑀢𑁄 𑀅𑀧𑀕𑀫𑀦𑀓𑀸𑀮𑀁 𑀆𑀕𑀫𑁂𑀳𑀻’’𑀢𑀺 𑀯𑀢𑁆𑀯𑀸 𑀧𑀼𑀦 𑀕𑀩𑁆𑀪𑀁 𑀕𑀡𑁆𑀳𑀺.

𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑀁 𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 𑀕𑀦𑁆𑀢𑀼𑀁 𑀦 𑀲𑀓𑁆𑀓𑀸, 𑀇𑀫𑀺𑀲𑁆𑀲𑀸 𑀅𑀦𑀸𑀘𑀺𑀓𑁆𑀔𑀺𑀢𑁆𑀯𑀸𑀯 𑀧𑀮𑀸𑀬𑀺𑀢𑁆𑀯𑀸 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑀲𑁆𑀲𑀸 𑀅𑀦𑀸𑀘𑀺𑀓𑁆𑀔𑀺𑀢𑁆𑀯𑀸 𑀭𑀢𑁆𑀣𑀺𑀪𑀸𑀕𑁂 𑀉𑀝𑁆𑀞𑀸𑀬 𑀧𑀮𑀸𑀬𑀺. 𑀅𑀣 𑀦𑀁 𑀦𑀕𑀭𑀕𑀼𑀢𑁆𑀢𑀺𑀓𑀸 𑀅𑀕𑁆𑀕𑀳𑁂𑀲𑀼𑀁. 𑀲𑁄 ‘‘𑀅𑀳𑀁, 𑀲𑀸𑀫𑀺, 𑀫𑀸𑀢𑀼𑀧𑁄𑀲𑀓𑁄 𑀦𑀸𑀫, 𑀯𑀺𑀲𑁆𑀲𑀚𑁆𑀚𑁂𑀣 𑀫’’𑀦𑁆𑀢𑀺 𑀢𑁂𑀳𑀺 𑀅𑀢𑁆𑀢𑀸𑀦𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀢𑁆𑀯𑀸 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀯𑀲𑀺𑀢𑁆𑀯𑀸 𑀅𑀕𑁆𑀕𑀤𑁆𑀯𑀸𑀭𑁂𑀦𑁂𑀯 𑀦𑀺𑀓𑁆𑀔𑀫𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀛𑀸𑀦𑀓𑀻𑀴𑀁 𑀓𑀻𑀴𑀦𑁆𑀢𑁄 𑀯𑀺𑀳𑀸𑀲𑀺. 𑀲𑁄 𑀢𑀢𑁆𑀣 𑀯𑀲𑀦𑁆𑀢𑁄 ‘‘𑀏𑀯𑀭𑀽𑀧𑀫𑁆𑀧𑀺 𑀦𑀸𑀫 𑀫𑁂 𑀤𑀼𑀘𑁆𑀙𑀺𑀦𑁆𑀤𑀦𑀺𑀬𑀁 𑀧𑀼𑀢𑁆𑀢𑀤𑀸𑀭𑀩𑀦𑁆𑀥𑀦𑀁 𑀓𑀺𑀮𑁂𑀲𑀩𑀦𑁆𑀥𑀦𑀁 𑀙𑀺𑀦𑁆𑀤𑀺𑀢’’𑀦𑁆𑀢𑀺 𑀉𑀤𑀸𑀦𑀁 𑀉𑀤𑀸𑀦𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀅𑀯𑁄𑀘 𑁋

𑁧𑁦𑁧. ‘‘𑀦 𑀢𑀁 𑀤𑀴𑁆𑀳𑀁 𑀩𑀦𑁆𑀥𑀦𑀫𑀸𑀳𑀼 𑀥𑀻𑀭𑀸, 𑀬𑀤𑀸𑀬𑀲𑀁 𑀤𑀸𑀭𑀼𑀚𑀧𑀩𑁆𑀩𑀚𑀜𑁆𑀘;

𑀲𑀸𑀭𑀢𑁆𑀢𑀭𑀢𑁆𑀢𑀸 𑀫𑀡𑀺𑀓𑀼𑀡𑁆𑀟𑀮𑁂𑀲𑀼, 𑀧𑀼𑀢𑁆𑀢𑁂𑀲𑀼 𑀤𑀸𑀭𑁂𑀲𑀼 𑀘 𑀬𑀸 𑀅𑀧𑁂𑀓𑁆𑀔𑀸.

𑁧𑁦𑁨. ‘‘𑀏𑀢𑀁 𑀤𑀴𑁆𑀳𑀁 𑀩𑀦𑁆𑀥𑀦𑀫𑀸𑀳𑀼 𑀥𑀻𑀭𑀸, 𑀑𑀳𑀸𑀭𑀺𑀦𑀁 𑀲𑀻𑀣𑀺𑀮𑀁 𑀤𑀼𑀧𑁆𑀧𑀫𑀼𑀜𑁆𑀘𑀁;

𑀏𑀢𑀫𑁆𑀧𑀺 𑀙𑁂𑀢𑁆𑀯𑀸𑀦 𑀯𑀚𑀦𑁆𑀢𑀺 𑀥𑀻𑀭𑀸, 𑀅𑀦𑀧𑁂𑀓𑁆𑀔𑀺𑀦𑁄 𑀓𑀸𑀫𑀲𑀼𑀔𑀁 𑀧𑀳𑀸𑀬𑀸’’𑀢𑀺.

𑀢𑀢𑁆𑀣 𑀥𑀻𑀭𑀸𑀢𑀺 𑀥𑀺𑀢𑀺𑀫𑀦𑁆𑀢𑀸, 𑀥𑀺𑀓𑁆𑀓𑀢𑀧𑀸𑀧𑀸𑀢𑀺 𑀥𑀻𑀭𑀸. 𑀅𑀣 𑀯𑀸 𑀥𑀻 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸, 𑀢𑀸𑀬 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀸𑀢𑀺 𑀥𑀻𑀭𑀸, 𑀩𑀼𑀤𑁆𑀥𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀩𑀼𑀤𑁆𑀥𑀲𑀸𑀯𑀓𑀸 𑀩𑁄𑀥𑀺𑀲𑀢𑁆𑀢𑀸 𑀘 𑀇𑀫𑁂 𑀥𑀻𑀭𑀸 𑀦𑀸𑀫. 𑀬𑀤𑀸𑀬𑀲𑀦𑁆𑀢𑀺𑀆𑀤𑀻𑀲𑀼 𑀬𑀁 𑀲𑀗𑁆𑀔𑀮𑀺𑀓𑀲𑀗𑁆𑀔𑀸𑀢𑀁 𑀅𑀬𑀲𑀸 𑀦𑀺𑀩𑁆𑀩𑀢𑁆𑀢𑀁 𑀆𑀬𑀲𑀁, 𑀬𑀁 𑀅𑀤𑁆𑀤𑀼𑀩𑀦𑁆𑀥𑀦𑀲𑀗𑁆𑀔𑀸𑀢𑀁 𑀤𑀸𑀭𑀼𑀚𑀁, 𑀬𑀜𑁆𑀘 𑀧𑀩𑁆𑀩𑀚𑀢𑀺𑀡𑁂𑀳𑀺 𑀯𑀸 𑀅𑀜𑁆𑀜𑁂𑀳𑀺 𑀯𑀸 𑀯𑀸𑀓𑀸𑀤𑀻𑀳𑀺 𑀭𑀚𑁆𑀚𑀼𑀁 𑀓𑀢𑁆𑀯𑀸 𑀓𑀢𑀭𑀚𑁆𑀚𑀼𑀩𑀦𑁆𑀥𑀦𑀁, 𑀢𑀁 𑀆𑀬𑀲𑀸𑀤𑀺𑀁 𑀙𑀺𑀦𑁆𑀤𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀪𑀸𑀯𑁂𑀦 𑀥𑀻𑀭𑀸 𑀤𑀴𑁆𑀳𑀁 𑀣𑀺𑀭𑀦𑁆𑀢𑀺 𑀦𑀸𑀳𑀼 𑀦 𑀓𑀣𑁂𑀦𑁆𑀢𑀺. 𑀲𑀸𑀭𑀢𑁆𑀢𑀭𑀢𑁆𑀢𑀸𑀢𑀺 𑀲𑀸𑀭𑀢𑁆𑀢𑀸 𑀳𑀼𑀢𑁆𑀯𑀸 𑀭𑀢𑁆𑀢𑀸, 𑀩𑀮𑀯𑀭𑀸𑀕𑀭𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀫𑀡𑀺𑀓𑀼𑀡𑁆𑀟𑀮𑁂𑀲𑀽𑀢𑀺 𑀫𑀡𑀻𑀲𑀼 𑀘 𑀓𑀼𑀡𑁆𑀟𑀮𑁂𑀲𑀼 𑀘, 𑀫𑀡𑀺𑀬𑀼𑀢𑁆𑀢𑁂𑀲𑀼 𑀯𑀸 𑀓𑀼𑀡𑁆𑀟𑀮𑁂𑀲𑀼.

𑀏𑀢𑀁 𑀤𑀴𑁆𑀳𑀦𑁆𑀢𑀺 𑀬𑁂 𑀫𑀡𑀺𑀓𑀼𑀡𑁆𑀟𑀮𑁂𑀲𑀼 𑀲𑀸𑀭𑀢𑁆𑀢𑀭𑀢𑁆𑀢𑀸, 𑀢𑁂𑀲𑀁 𑀬𑁄 𑀘 𑀲𑀸𑀭𑀸𑀕𑁄, 𑀬𑀸 𑀘 𑀢𑁂𑀲𑀁 𑀧𑀼𑀢𑁆𑀢𑀤𑀸𑀭𑁂𑀲𑀼 𑀅𑀧𑁂𑀓𑁆𑀔𑀸 𑀢𑀡𑁆𑀳𑀸, 𑀏𑀢𑀁 𑀓𑀺𑀮𑁂𑀲𑀫𑀬𑀁 𑀩𑀦𑁆𑀥𑀦𑀁 𑀤𑀴𑁆𑀳𑀁 𑀣𑀺𑀭𑀦𑁆𑀢𑀺 𑀥𑀻𑀭𑀸 𑀆𑀳𑀼. 𑀑𑀳𑀸𑀭𑀺𑀦𑀦𑁆𑀢𑀺 𑀆𑀓𑀟𑁆𑀠𑀺𑀢𑁆𑀯𑀸 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀧𑀸𑀢𑀦𑀢𑁄 𑀅𑀯𑀳𑀭𑀢𑀺 𑀳𑁂𑀝𑁆𑀞𑀸 𑀳𑀭𑀢𑀻𑀢𑀺 𑀑𑀳𑀸𑀭𑀺𑀦𑀁. 𑀲𑀺𑀣𑀺𑀮𑀦𑁆𑀢𑀺 𑀩𑀦𑁆𑀥𑀦𑀝𑁆𑀞𑀸𑀦𑁂 𑀙𑀯𑀺𑀘𑀫𑁆𑀫𑀫𑀁𑀲𑀸𑀦𑀺 𑀦 𑀙𑀺𑀦𑁆𑀤𑀢𑀺, 𑀮𑁄𑀳𑀺𑀢𑀁 𑀦 𑀦𑀻𑀳𑀭𑀢𑀺, 𑀩𑀦𑁆𑀥𑀦𑀪𑀸𑀯𑀫𑁆𑀧𑀺 𑀦 𑀚𑀸𑀦𑀸𑀧𑁂𑀢𑀺, 𑀣𑀮𑀧𑀣𑀚𑀮𑀧𑀣𑀸𑀤𑀻𑀲𑀼 𑀓𑀫𑁆𑀫𑀸𑀦𑀺 𑀓𑀸𑀢𑀼𑀁 𑀤𑁂𑀢𑀻𑀢𑀺 𑀲𑀺𑀣𑀺𑀮𑀁. 𑀤𑀼𑀧𑁆𑀧𑀫𑀼𑀜𑁆𑀘𑀦𑁆𑀢𑀺 𑀢𑀡𑁆𑀳𑀸𑀮𑁄𑀪𑀯𑀲𑁂𑀦 𑀳𑀺 𑀏𑀓𑀯𑀸𑀭𑀫𑁆𑀧𑀺 𑀉𑀧𑁆𑀧𑀦𑁆𑀦𑀁 𑀓𑀺𑀮𑁂𑀲𑀩𑀦𑁆𑀥𑀦𑀁 𑀤𑀝𑁆𑀞𑀝𑁆𑀞𑀸𑀦𑀢𑁄 𑀓𑀘𑁆𑀙𑀧𑁄 𑀯𑀺𑀬 𑀤𑀼𑀫𑁆𑀫𑁄𑀘𑀬𑀁 𑀳𑁄𑀢𑀻𑀢𑀺 𑀤𑀼𑀧𑁆𑀧𑀫𑀼𑀜𑁆𑀘𑀁. 𑀏𑀢𑀫𑁆𑀧𑀺 𑀙𑁂𑀢𑁆𑀯𑀸𑀦𑀸𑀢𑀺 𑀏𑀢𑀁 𑀏𑀯𑀁 𑀤𑀴𑁆𑀳𑀫𑁆𑀧𑀺 𑀓𑀺𑀮𑁂𑀲𑀩𑀦𑁆𑀥𑀦𑀁 𑀜𑀸𑀡𑀔𑀕𑁆𑀕𑁂𑀦 𑀙𑀺𑀦𑁆𑀤𑀺𑀢𑁆𑀯𑀸 𑀅𑀬𑀤𑀸𑀫𑀸𑀦𑀺 𑀙𑀺𑀦𑁆𑀤𑀺𑀢𑁆𑀯𑀸 𑀫𑀢𑁆𑀢𑀯𑀭𑀯𑀸𑀭𑀡𑀸 𑀯𑀺𑀬 𑀧𑀜𑁆𑀚𑀭𑁂 𑀙𑀺𑀦𑁆𑀤𑀺𑀢𑁆𑀯𑀸 𑀲𑀻𑀳𑀧𑁄𑀢𑀓𑀸 𑀯𑀺𑀬 𑀘 𑀥𑀻𑀭𑀸 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑁂 𑀉𑀓𑁆𑀓𑀸𑀭𑀪𑀽𑀫𑀺𑀁 𑀯𑀺𑀬 𑀚𑀺𑀕𑀼𑀘𑁆𑀙𑀫𑀸𑀦𑀸 𑀅𑀦𑀧𑁂𑀓𑁆𑀔𑀺𑀦𑁄 𑀳𑀼𑀢𑁆𑀯𑀸 𑀓𑀸𑀫𑀲𑀼𑀔𑀁 𑀧𑀳𑀸𑀬 𑀯𑀚𑀦𑁆𑀢𑀺 𑀧𑀓𑁆𑀓𑀫𑀦𑁆𑀢𑀺, 𑀧𑀓𑁆𑀓𑀫𑀺𑀢𑁆𑀯𑀸 𑀘 𑀧𑀦 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀛𑀸𑀦𑀲𑀼𑀔𑁂𑀦 𑀯𑀻𑀢𑀺𑀦𑀸𑀫𑁂𑀦𑁆𑀢𑀻𑀢𑀺.

𑀏𑀯𑀁 𑀩𑁄𑀥𑀺𑀲𑀢𑁆𑀢𑁄 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀢𑁆𑀯𑀸 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑁄 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑁄 𑀅𑀳𑁄𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀓𑁂𑀘𑀺 𑀲𑁄𑀢𑀸𑀧𑀦𑁆𑀦𑀸, 𑀓𑁂𑀘𑀺 𑀲𑀓𑀤𑀸𑀕𑀸𑀫𑀺𑀦𑁄, 𑀓𑁂𑀘𑀺 𑀅𑀦𑀸𑀕𑀸𑀫𑀺𑀦𑁄, 𑀓𑁂𑀘𑀺 𑀅𑀭𑀳𑀦𑁆𑀢𑁄 𑀅𑀳𑁂𑀲𑀼𑀁. ‘‘𑀢𑀤𑀸 𑀫𑀸𑀢𑀸 𑀫𑀳𑀸𑀫𑀸𑀬𑀸 𑀅𑀳𑁄𑀲𑀺, 𑀧𑀺𑀢𑀸 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸, 𑀪𑀭𑀺𑀬𑀸 𑀭𑀸𑀳𑀼𑀮𑀫𑀸𑀢𑀸, 𑀧𑀼𑀢𑁆𑀢𑁄 𑀭𑀸𑀳𑀼𑀮𑁄, 𑀧𑀼𑀢𑁆𑀢𑀤𑀸𑀭𑀁 𑀧𑀳𑀸𑀬 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁄 𑀧𑀼𑀭𑀺𑀲𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀩𑀦𑁆𑀥𑀦𑀸𑀕𑀸𑀭𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁨𑁦𑁨] 𑁨. 𑀓𑁂𑀴𑀺𑀲𑀻𑀮𑀚𑀸𑀢𑀓𑀯𑀡𑁆𑀡𑀦𑀸

𑀳𑀁𑀲𑀸 𑀓𑁄𑀜𑁆𑀘𑀸 𑀫𑀬𑀽𑀭𑀸 𑀘𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀆𑀬𑀲𑁆𑀫𑀦𑁆𑀢𑀁 𑀮𑀓𑀼𑀡𑁆𑀟𑀓𑀪𑀤𑁆𑀤𑀺𑀬𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭𑀸𑀬𑀲𑁆𑀫𑀸 𑀩𑀼𑀤𑁆𑀥𑀲𑀸𑀲𑀦𑁂 𑀧𑀸𑀓𑀝𑁄 𑀅𑀳𑁄𑀲𑀺 𑀧𑀜𑁆𑀜𑀸𑀢𑁄 𑀫𑀥𑀼𑀭𑀲𑁆𑀲𑀭𑁄 𑀫𑀥𑀼𑀭𑀥𑀫𑁆𑀫𑀓𑀣𑀺𑀓𑁄 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑁄 𑀫𑀳𑀸𑀔𑀻𑀡𑀸𑀲𑀯𑁄 𑀅𑀲𑀻𑀢𑀺𑀬𑀸 𑀫𑀳𑀸𑀣𑁂𑀭𑀸𑀦𑀁 𑀅𑀦𑁆𑀢𑀭𑁄 𑀧𑀫𑀸𑀡𑁂𑀦 𑀑𑀫𑀓𑁄 𑀮𑀓𑀼𑀡𑁆𑀟𑀓𑁄 𑀲𑀸𑀫𑀡𑁂𑀭𑁄 𑀯𑀺𑀬, 𑀔𑀼𑀤𑁆𑀤𑀓𑁄 𑀓𑀻𑀴𑀦𑀢𑁆𑀣𑀸𑀬 𑀓𑀢𑁄 𑀯𑀺𑀬. 𑀢𑀲𑁆𑀫𑀺𑀁 𑀏𑀓𑀤𑀺𑀯𑀲𑀁 𑀢𑀣𑀸𑀕𑀢𑀁 𑀯𑀦𑁆𑀤𑀺𑀢𑁆𑀯𑀸 𑀚𑁂𑀢𑀯𑀦𑀓𑁄𑀝𑁆𑀞𑀓𑀁 𑀕𑀢𑁂 𑀚𑀦𑀧𑀤𑀸 𑀢𑀺𑀁𑀲𑀫𑀢𑁆𑀢𑀸 𑀪𑀺𑀓𑁆𑀔𑀽 ‘‘𑀤𑀲𑀩𑀮𑀁 𑀯𑀦𑁆𑀤𑀺𑀲𑁆𑀲𑀸𑀫𑀸’’𑀢𑀺 𑀚𑁂𑀢𑀯𑀦𑀁 𑀧𑀯𑀺𑀲𑀦𑁆𑀢𑀸 𑀯𑀺𑀳𑀸𑀭𑀓𑁄𑀝𑁆𑀞𑀓𑁂 𑀣𑁂𑀭𑀁 𑀤𑀺𑀲𑁆𑀯𑀸 ‘‘𑀲𑀸𑀫𑀡𑁂𑀭𑁄 𑀏𑀲𑁄’’𑀢𑀺 𑀲𑀜𑁆𑀜𑀸𑀬 𑀣𑁂𑀭𑀁 𑀘𑀻𑀯𑀭𑀓𑀡𑁆𑀡𑁂 𑀕𑀡𑁆𑀳𑀦𑁆𑀢𑀸 𑀳𑀢𑁆𑀣𑁂 𑀕𑀡𑁆𑀳𑀦𑁆𑀢𑀸 𑀲𑀻𑀲𑀁 𑀕𑀡𑁆𑀳𑀦𑁆𑀢𑀸 𑀦𑀸𑀲𑀸𑀬 𑀧𑀭𑀸𑀫𑀲𑀦𑁆𑀢𑀸 𑀓𑀡𑁆𑀡𑁂𑀲𑀼 𑀕𑀳𑁂𑀢𑁆𑀯𑀸 𑀘𑀸𑀮𑁂𑀢𑁆𑀯𑀸 𑀳𑀢𑁆𑀣𑀓𑀼𑀓𑁆𑀓𑀼𑀘𑁆𑀘𑀁 𑀓𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀲𑀸𑀫𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀺𑀢𑁆𑀯𑀸 𑀲𑀢𑁆𑀣𑀸𑀭𑀸 𑀫𑀥𑀼𑀭𑀧𑀝𑀺𑀲𑀦𑁆𑀣𑀸𑀭𑁂 𑀓𑀢𑁂 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀪𑀦𑁆𑀢𑁂, 𑀮𑀓𑀼𑀡𑁆𑀟𑀓𑀪𑀤𑁆𑀤𑀺𑀬𑀢𑁆𑀣𑁂𑀭𑁄 𑀓𑀺𑀭 𑀦𑀸𑀫𑁂𑀓𑁄 𑀢𑀼𑀫𑁆𑀳𑀸𑀓𑀁 𑀲𑀸𑀯𑀓𑁄 𑀫𑀥𑀼𑀭𑀥𑀫𑁆𑀫𑀓𑀣𑀺𑀓𑁄 𑀅𑀢𑁆𑀣𑀺, 𑀓𑀳𑀁 𑀲𑁄 𑀇𑀤𑀸𑀦𑀻’’𑀢𑀺. ‘‘𑀓𑀺𑀁 𑀧𑀦, 𑀪𑀺𑀓𑁆𑀔𑀯𑁂, 𑀤𑀝𑁆𑀞𑀼𑀓𑀸𑀫𑀢𑁆𑀣𑀸’’𑀢𑀺? ‘‘𑀆𑀫, 𑀪𑀦𑁆𑀢𑁂’’𑀢𑀺. ‘‘𑀬𑀁, 𑀪𑀺𑀓𑁆𑀔𑀯𑁂, 𑀢𑀼𑀫𑁆𑀳𑁂 𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀤𑀺𑀲𑁆𑀯𑀸 𑀘𑀻𑀯𑀭𑀓𑀡𑁆𑀡𑀸𑀤𑀻𑀲𑀼 𑀕𑀡𑁆𑀳𑀦𑁆𑀢𑀸 𑀳𑀢𑁆𑀣𑀓𑀼𑀓𑁆𑀓𑀼𑀘𑁆𑀘𑀁 𑀓𑀢𑁆𑀯𑀸 𑀆𑀕𑀢𑀸, 𑀏𑀲 𑀲𑁄’’𑀢𑀺. ‘‘𑀪𑀦𑁆𑀢𑁂, 𑀏𑀯𑀭𑀽𑀧𑁄 𑀧𑀢𑁆𑀣𑀺𑀢𑀧𑀢𑁆𑀣𑀦𑁄 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀦𑁆𑀦𑁄 𑀲𑀸𑀯𑀓𑁄 𑀓𑀺𑀁𑀓𑀸𑀭𑀡𑀸 𑀅𑀧𑁆𑀧𑁂𑀲𑀓𑁆𑀔𑁄 𑀚𑀸𑀢𑁄’’𑀢𑀺? 𑀲𑀢𑁆𑀣𑀸 ‘‘𑀅𑀢𑁆𑀢𑀦𑀸 𑀓𑀢𑀧𑀸𑀧𑀓𑀫𑁆𑀫𑀁 𑀦𑀺𑀲𑁆𑀲𑀸𑀬𑀸’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀅𑀳𑁄𑀲𑀺. 𑀢𑀤𑀸 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀚𑀺𑀡𑁆𑀡𑀁 𑀚𑀭𑀸𑀧𑁆𑀧𑀢𑁆𑀢𑀁 𑀳𑀢𑁆𑀣𑀺𑀁 𑀯𑀸 𑀅𑀲𑁆𑀲𑀁 𑀯𑀸 𑀕𑁄𑀡𑀁 𑀯𑀸 𑀤𑀲𑁆𑀲𑁂𑀢𑀼𑀁 𑀦 𑀲𑀓𑁆𑀓𑀸, 𑀓𑁂𑀴𑀺𑀲𑀻𑀮𑁄 𑀳𑀼𑀢𑁆𑀯𑀸 𑀢𑀣𑀸𑀭𑀽𑀧𑀁 𑀤𑀺𑀲𑁆𑀯𑀸𑀯 𑀅𑀦𑀼𑀩𑀦𑁆𑀥𑀸𑀧𑁂𑀢𑀺, 𑀚𑀺𑀡𑁆𑀡𑀲𑀓𑀝𑀫𑁆𑀧𑀺 𑀤𑀺𑀲𑁆𑀯𑀸 𑀪𑀺𑀦𑁆𑀤𑀸𑀧𑁂𑀢𑀺, 𑀚𑀺𑀡𑁆𑀡𑀫𑀸𑀢𑀼𑀕𑀸𑀫𑁂 𑀤𑀺𑀲𑁆𑀯𑀸 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀉𑀤𑀭𑁂 𑀧𑀳𑀭𑀸𑀧𑁂𑀢𑁆𑀯𑀸 𑀧𑀸𑀢𑀸𑀧𑁂𑀢𑁆𑀯𑀸 𑀧𑀼𑀦 𑀉𑀝𑁆𑀞𑀸𑀧𑁂𑀢𑁆𑀯𑀸 𑀪𑀸𑀬𑀸𑀧𑁂𑀢𑀺, 𑀚𑀺𑀡𑁆𑀡𑀧𑀼𑀭𑀺𑀲𑁂 𑀤𑀺𑀲𑁆𑀯𑀸 𑀮𑀗𑁆𑀖𑀓𑁂 𑀯𑀺𑀬 𑀪𑀽𑀫𑀺𑀬𑀁 𑀲𑀁𑀧𑀭𑀺𑀯𑀢𑁆𑀢𑀓𑀸𑀤𑀺𑀓𑀻𑀴𑀁 𑀓𑀻𑀴𑀸𑀧𑁂𑀢𑀺, 𑀅𑀧𑀲𑁆𑀲𑀦𑁆𑀢𑁄 ‘‘𑀅𑀲𑀼𑀓𑀖𑀭𑁂 𑀓𑀺𑀭 𑀫𑀳𑀮𑁆𑀮𑀓𑁄 𑀅𑀢𑁆𑀣𑀻’’𑀢𑀺 𑀲𑀼𑀢𑁆𑀯𑀸𑀧𑀺 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀓𑀻𑀴𑀢𑀺. 𑀫𑀦𑀼𑀲𑁆𑀲𑀸 𑀮𑀚𑁆𑀚𑀦𑁆𑀢𑀸 𑀅𑀢𑁆𑀢𑀦𑁄 𑀫𑀸𑀢𑀸𑀧𑀺𑀢𑀭𑁄 𑀢𑀺𑀭𑁄𑀭𑀝𑁆𑀞𑀸𑀦𑀺 𑀧𑁂𑀲𑁂𑀦𑁆𑀢𑀺, 𑀫𑀸𑀢𑀼𑀧𑀝𑁆𑀞𑀸𑀦𑀥𑀫𑁆𑀫𑁄 𑀧𑀺𑀢𑀼𑀧𑀝𑁆𑀞𑀸𑀦𑀥𑀫𑁆𑀫𑁄 𑀧𑀘𑁆𑀙𑀺𑀚𑁆𑀚𑀺, 𑀭𑀸𑀚𑀲𑁂𑀯𑀓𑀸𑀧𑀺 𑀓𑁂𑀴𑀺𑀲𑀻𑀮𑀸𑀯 𑀅𑀳𑁂𑀲𑀼𑀁. 𑀫𑀢𑀫𑀢𑀸 𑀘𑀢𑁆𑀢𑀸𑀭𑁄 𑀅𑀧𑀸𑀬𑁂 𑀧𑀽𑀭𑁂𑀦𑁆𑀢𑀺, 𑀤𑁂𑀯𑀧𑀭𑀺𑀲𑀸 𑀧𑀭𑀺𑀳𑀸𑀬𑀢𑀺.

𑀲𑀓𑁆𑀓𑁄 𑀅𑀪𑀺𑀦𑀯𑁂 𑀤𑁂𑀯𑀧𑀼𑀢𑁆𑀢𑁂 𑀅𑀧𑀲𑁆𑀲𑀦𑁆𑀢𑁄 ‘‘𑀓𑀺𑀁 𑀦𑀼 𑀔𑁄 𑀓𑀸𑀭𑀡’’𑀦𑁆𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀢𑀁 𑀓𑀸𑀭𑀡𑀁 𑀜𑀢𑁆𑀯𑀸 ‘‘𑀤𑀫𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀫𑀳𑀮𑁆𑀮𑀓𑀯𑀡𑁆𑀡𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀚𑀺𑀡𑁆𑀡𑀬𑀸𑀦𑀓𑁂 𑀤𑁆𑀯𑁂 𑀢𑀓𑁆𑀓𑀘𑀸𑀝𑀺𑀬𑁄 𑀆𑀭𑁄𑀧𑁂𑀢𑁆𑀯𑀸 𑀤𑁆𑀯𑁂 𑀚𑀭𑀕𑁄𑀡𑁂 𑀬𑁄𑀚𑁂𑀢𑁆𑀯𑀸 𑀏𑀓𑀲𑁆𑀫𑀺𑀁 𑀙𑀡𑀤𑀺𑀯𑀲𑁂 𑀅𑀮𑀗𑁆𑀓𑀢𑀳𑀢𑁆𑀣𑀺𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀩𑁆𑀭𑀳𑁆𑀫𑀤𑀢𑁆𑀢𑁂 𑀅𑀮𑀗𑁆𑀓𑀢𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀭𑁄𑀦𑁆𑀢𑁂 𑀧𑀺𑀮𑁄𑀢𑀺𑀓𑀦𑀺𑀯𑀢𑁆𑀣𑁄 𑀢𑀁 𑀬𑀸𑀦𑀓𑀁 𑀧𑀸𑀚𑁂𑀦𑁆𑀢𑁄 𑀭𑀜𑁆𑀜𑁄 𑀅𑀪𑀺𑀫𑀼𑀔𑁄 𑀅𑀕𑀫𑀸𑀲𑀺. 𑀭𑀸𑀚𑀸 𑀚𑀺𑀡𑁆𑀡𑀬𑀸𑀦𑀓𑀁 𑀤𑀺𑀲𑁆𑀯𑀸 ‘‘𑀏𑀢𑀁 𑀬𑀸𑀦𑀓𑀁 𑀅𑀧𑀦𑁂𑀣𑀸’’𑀢𑀺 𑀯𑀤𑀢𑀺. 𑀫𑀦𑀼𑀲𑁆𑀲𑀸 ‘‘𑀓𑀳𑀁, 𑀤𑁂𑀯, 𑀦 𑀧𑀲𑁆𑀲𑀸𑀫𑀸’’𑀢𑀺 𑀆𑀳𑀁𑀲𑀼. 𑀲𑀓𑁆𑀓𑁄 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀭𑀜𑁆𑀜𑁄𑀬𑁂𑀯 𑀤𑀲𑁆𑀲𑁂𑀲𑀺. 𑀅𑀣 𑀦𑀁 𑀩𑀳𑀼𑀲𑀫𑁆𑀧𑀢𑁆𑀢𑁂 𑀢𑀲𑁆𑀫𑀺𑀁 𑀢𑀲𑁆𑀲 𑀉𑀧𑀭𑀺𑀪𑀸𑀕𑁂𑀦 𑀧𑀸𑀚𑁂𑀦𑁆𑀢𑁄 𑀭𑀜𑁆𑀜𑁄 𑀫𑀢𑁆𑀣𑀓𑁂 𑀏𑀓𑀁 𑀘𑀸𑀝𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀦𑀺𑀯𑀢𑁆𑀢𑀸𑀧𑁂𑀦𑁆𑀢𑁄 𑀤𑀼𑀢𑀺𑀬𑀁 𑀪𑀺𑀦𑁆𑀤𑀺. 𑀅𑀣𑀲𑁆𑀲 𑀲𑀻𑀲𑀢𑁄 𑀧𑀝𑁆𑀞𑀸𑀬 𑀇𑀢𑁄 𑀘𑀺𑀢𑁄 𑀘 𑀢𑀓𑁆𑀓𑀁 𑀧𑀕𑁆𑀖𑀭𑀢𑀺, 𑀲𑁄 𑀢𑁂𑀦 𑀅𑀝𑁆𑀝𑀻𑀬𑀢𑀺 𑀳𑀭𑀸𑀬𑀢𑀺 𑀚𑀺𑀕𑀼𑀘𑁆𑀙𑀢𑀺. 𑀅𑀣𑀲𑁆𑀲 𑀢𑀁 𑀉𑀧𑀤𑁆𑀤𑀼𑀢𑀪𑀸𑀯𑀁 𑀜𑀢𑁆𑀯𑀸 𑀲𑀓𑁆𑀓𑁄 𑀬𑀸𑀦𑀓𑀁 𑀅𑀦𑁆𑀢𑀭𑀥𑀸𑀧𑁂𑀢𑁆𑀯𑀸 𑀲𑀓𑁆𑀓𑀢𑁆𑀢𑀪𑀸𑀯𑀁 𑀫𑀸𑀧𑁂𑀢𑁆𑀯𑀸 𑀯𑀚𑀺𑀭𑀳𑀢𑁆𑀣𑁄 𑀆𑀓𑀸𑀲𑁂 𑀞𑀢𑁆𑀯𑀸 ‘‘𑀧𑀸𑀧 𑀅𑀥𑀫𑁆𑀫𑀺𑀓𑀭𑀸𑀚, 𑀓𑀺𑀁 𑀢𑁆𑀯𑀁 𑀫𑀳𑀮𑁆𑀮𑀓𑁄 𑀦 𑀪𑀯𑀺𑀲𑁆𑀲𑀲𑀺, 𑀢𑀯 𑀲𑀭𑀻𑀭𑀁 𑀚𑀭𑀸 𑀦 𑀧𑀳𑀭𑀺𑀲𑁆𑀲𑀢𑀺, 𑀓𑁂𑀴𑀺𑀲𑀻𑀮𑁄 𑀳𑀼𑀢𑁆𑀯𑀸 𑀯𑀼𑀟𑁆𑀠𑁂 𑀯𑀺𑀳𑁂𑀞𑀦𑀓𑀫𑁆𑀫𑀁 𑀓𑀭𑁄𑀲𑀺, 𑀏𑀓𑀓𑀁 𑀢𑀁 𑀦𑀺𑀲𑁆𑀲𑀸𑀬 𑀏𑀢𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀫𑀢𑀫𑀢𑀸 𑀅𑀧𑀸𑀬𑁂 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀫𑀦𑀼𑀲𑁆𑀲𑀸 𑀫𑀸𑀢𑀸𑀧𑀺𑀢𑀭𑁄 𑀧𑀝𑀺𑀚𑀕𑁆𑀕𑀺𑀢𑀼𑀁 𑀦 𑀮𑀪𑀦𑁆𑀢𑀺. 𑀲𑀘𑁂 𑀇𑀫𑀫𑁆𑀳𑀸 𑀓𑀫𑁆𑀫𑀸 𑀦 𑀯𑀺𑀭𑀫𑀺𑀲𑁆𑀲𑀲𑀺, 𑀯𑀚𑀺𑀭𑁂𑀦 𑀢𑁂 𑀲𑀻𑀲𑀁 𑀧𑀤𑀸𑀮𑁂𑀲𑁆𑀲𑀸𑀫𑀺, 𑀫𑀸 𑀇𑀢𑁄 𑀧𑀝𑁆𑀞𑀸𑀬𑁂𑀢𑀁 𑀓𑀫𑁆𑀫𑀁 𑀅𑀓𑀢𑁆𑀣𑀸’’𑀢𑀺 𑀲𑀦𑁆𑀢𑀚𑁆𑀚𑁂𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀦𑀁 𑀕𑀼𑀡𑀁 𑀓𑀣𑁂𑀢𑁆𑀯𑀸 𑀯𑀼𑀟𑁆𑀠𑀸𑀧𑀘𑀸𑀬𑀺𑀓𑀓𑀫𑁆𑀫𑀲𑁆𑀲 𑀆𑀦𑀺𑀲𑀁𑀲𑀁 𑀧𑀓𑀸𑀲𑁂𑀢𑁆𑀯𑀸 𑀑𑀯𑀤𑀺𑀢𑁆𑀯𑀸 𑀲𑀓𑀝𑁆𑀞𑀸𑀦𑀫𑁂𑀯 𑀅𑀕𑀫𑀸𑀲𑀺. 𑀭𑀸𑀚𑀸 𑀢𑀢𑁄 𑀧𑀝𑁆𑀞𑀸𑀬 𑀢𑀣𑀸𑀭𑀽𑀧𑀁 𑀓𑀫𑁆𑀫𑀁 𑀓𑀸𑀢𑀼𑀁 𑀘𑀺𑀢𑁆𑀢𑀫𑁆𑀧𑀺 𑀦 𑀉𑀧𑁆𑀧𑀸𑀤𑁂𑀲𑀺.

𑀲𑀢𑁆𑀣𑀸 𑀇𑀫𑀁 𑀅𑀢𑀻𑀢𑀁 𑀆𑀳𑀭𑀺𑀢𑁆𑀯𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀯𑁄𑀘 𑁋

𑁧𑁦𑁩. ‘‘𑀳𑀁𑀲𑀸 𑀓𑁄𑀜𑁆𑀘𑀸 𑀫𑀬𑀽𑀭𑀸 𑀘, 𑀳𑀢𑁆𑀣𑀬𑁄 𑀧𑀲𑀤𑀸 𑀫𑀺𑀕𑀸;

𑀲𑀩𑁆𑀩𑁂 𑀲𑀻𑀳𑀲𑁆𑀲 𑀪𑀸𑀬𑀦𑁆𑀢𑀺, 𑀦𑀢𑁆𑀣𑀺 𑀓𑀸𑀬𑀲𑁆𑀫𑀺 𑀢𑀼𑀮𑁆𑀬𑀢𑀸.

𑁧𑁦𑁪. ‘‘𑀏𑀯𑀫𑁂𑀯 𑀫𑀦𑀼𑀲𑁆𑀲𑁂𑀲𑀼, 𑀤𑀳𑀭𑁄 𑀘𑁂𑀧𑀺 𑀧𑀜𑁆𑀜𑀯𑀸;

𑀲𑁄 𑀳𑀺 𑀢𑀢𑁆𑀣 𑀫𑀳𑀸 𑀳𑁄𑀢𑀺, 𑀦𑁂𑀯 𑀩𑀸𑀮𑁄 𑀲𑀭𑀻𑀭𑀯𑀸’’𑀢𑀺.

𑀢𑀢𑁆𑀣 𑀧𑀲𑀤𑀸 𑀫𑀺𑀕𑀸𑀢𑀺 𑀧𑀲𑀤𑀲𑀗𑁆𑀔𑀸𑀢𑀸 𑀫𑀺𑀕𑀸, 𑀧𑀲𑀤𑀸 𑀫𑀺𑀕𑀸 𑀘 𑀅𑀯𑀲𑁂𑀲𑀸 𑀫𑀺𑀕𑀸 𑀘𑀸𑀢𑀺𑀧𑀺 𑀅𑀢𑁆𑀣𑁄. ‘‘𑀧𑀲𑀤𑀫𑀺𑀕𑀸’’𑀢𑀺𑀧𑀺 𑀧𑀸𑀞𑁄, 𑀧𑀲𑀤𑀸 𑀫𑀺𑀕𑀸𑀢𑀺 𑀅𑀢𑁆𑀣𑁄. 𑀦𑀢𑁆𑀣𑀺 𑀓𑀸𑀬𑀲𑁆𑀫𑀺 𑀢𑀼𑀮𑁆𑀬𑀢𑀸𑀢𑀺 𑀲𑀭𑀻𑀭𑁂 𑀧𑀫𑀸𑀡𑀁 𑀦𑀸𑀫 𑀦𑀢𑁆𑀣𑀺. 𑀬𑀤𑀺 𑀪𑀯𑁂𑀬𑁆𑀬, 𑀫𑀳𑀸𑀲𑀭𑀻𑀭𑀸 𑀳𑀢𑁆𑀣𑀺𑀦𑁄 𑀘𑁂𑀯 𑀧𑀲𑀤𑀫𑀺𑀕𑀸 𑀘 𑀲𑀻𑀳𑀁 𑀫𑀸𑀭𑁂𑀬𑁆𑀬𑀼𑀁, 𑀲𑀻𑀳𑁄 𑀳𑀁𑀲𑀸𑀤𑀬𑁄 𑀔𑀼𑀤𑁆𑀤𑀓𑀲𑀭𑀻𑀭𑁂𑀬𑁂𑀯 𑀫𑀸𑀭𑁂𑀬𑁆𑀬, 𑀔𑀼𑀤𑁆𑀤𑀓𑀸𑀬𑁂𑀯 𑀲𑀻𑀳𑀲𑁆𑀲 𑀪𑀸𑀬𑁂𑀬𑁆𑀬𑀼𑀁, 𑀦 𑀫𑀳𑀦𑁆𑀢𑀸. 𑀬𑀲𑁆𑀫𑀸 𑀧𑀦𑁂𑀢𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀲𑀩𑁆𑀩𑁂𑀧𑀺 𑀢𑁂 𑀲𑀻𑀳𑀲𑁆𑀲 𑀪𑀸𑀬𑀦𑁆𑀢𑀺. 𑀲𑀭𑀻𑀭𑀯𑀸𑀢𑀺 𑀩𑀸𑀮𑁄 𑀫𑀳𑀸𑀲𑀭𑀻𑀭𑁄𑀧𑀺 𑀫𑀳𑀸 𑀦𑀸𑀫 𑀦 𑀳𑁄𑀢𑀺, 𑀢𑀲𑁆𑀫𑀸 𑀮𑀓𑀼𑀡𑁆𑀟𑀓𑀪𑀤𑁆𑀤𑀺𑀬𑁄 𑀲𑀭𑀻𑀭𑁂𑀦 𑀔𑀼𑀤𑁆𑀤𑀓𑁄𑀧𑀺 𑀫𑀸 𑀢𑀁 𑀜𑀸𑀡𑁂𑀦𑀧𑀺 𑀔𑀼𑀤𑁆𑀤𑀓𑁄𑀢𑀺 𑀫𑀜𑁆𑀜𑀺𑀢𑁆𑀣𑀸𑀢𑀺 𑀅𑀢𑁆𑀣𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀢𑁂𑀲𑀼 𑀪𑀺𑀓𑁆𑀔𑀽𑀲𑀼 𑀓𑁂𑀘𑀺 𑀲𑁄𑀢𑀸𑀧𑀦𑁆𑀦𑀸, 𑀓𑁂𑀘𑀺 𑀲𑀓𑀤𑀸𑀕𑀸𑀫𑀺𑀦𑁄, 𑀓𑁂𑀘𑀺 𑀅𑀦𑀸𑀕𑀸𑀫𑀺𑀦𑁄, 𑀓𑁂𑀘𑀺 𑀅𑀭𑀳𑀦𑁆𑀢𑁄 𑀅𑀳𑁂𑀲𑀼𑀁. ‘‘𑀢𑀤𑀸 𑀭𑀸𑀚𑀸 𑀮𑀓𑀼𑀡𑁆𑀟𑀓𑀪𑀤𑁆𑀤𑀺𑀬𑁄 𑀅𑀳𑁄𑀲𑀺, 𑀲𑁄 𑀢𑀸𑀬 𑀓𑁂𑀴𑀺𑀲𑀻𑀮𑀢𑀸𑀬 𑀧𑀭𑁂𑀲𑀁 𑀓𑁂𑀴𑀺𑀦𑀺𑀲𑁆𑀲𑀬𑁄 𑀚𑀸𑀢𑁄, 𑀲𑀓𑁆𑀓𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑁂𑀴𑀺𑀲𑀻𑀮𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁨𑁦𑁩] 𑁩. 𑀔𑀦𑁆𑀥𑀚𑀸𑀢𑀓𑀯𑀡𑁆𑀡𑀦𑀸

𑀯𑀺𑀭𑀽𑀧𑀓𑁆𑀔𑁂𑀳𑀺 𑀫𑁂 𑀫𑁂𑀢𑁆𑀢𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀁 𑀓𑀺𑀭 𑀚𑀦𑁆𑀢𑀸𑀖𑀭𑀤𑁆𑀯𑀸𑀭𑁂 𑀓𑀝𑁆𑀞𑀸𑀦𑀺 𑀨𑀸𑀮𑁂𑀦𑁆𑀢𑀁 𑀧𑀽𑀢𑀺𑀭𑀼𑀓𑁆𑀔𑀦𑁆𑀢𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀏𑀓𑁄 𑀲𑀧𑁆𑀧𑁄 𑀧𑀸𑀤𑀗𑁆𑀕𑀼𑀮𑀺𑀬𑀁 𑀟𑀁𑀲𑀺, 𑀲𑁄 𑀢𑀢𑁆𑀣𑁂𑀯 𑀫𑀢𑁄. 𑀢𑀲𑁆𑀲 𑀫𑀢𑀪𑀸𑀯𑁄 𑀲𑀓𑀮𑀯𑀺𑀳𑀸𑀭𑁂 𑀧𑀸𑀓𑀝𑁄 𑀅𑀳𑁄𑀲𑀺. 𑀥𑀫𑁆𑀫𑀲𑀪𑀸𑀬𑀁 𑀪𑀺𑀓𑁆𑀔𑀽 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀆𑀯𑀼𑀲𑁄, 𑀅𑀲𑀼𑀓𑁄 𑀓𑀺𑀭 𑀪𑀺𑀓𑁆𑀔𑀼 𑀚𑀦𑁆𑀢𑀸𑀖𑀭𑀤𑁆𑀯𑀸𑀭𑁂 𑀓𑀝𑁆𑀞𑀸𑀦𑀺 𑀨𑀸𑀮𑁂𑀦𑁆𑀢𑁄 𑀲𑀧𑁆𑀧𑁂𑀦 𑀤𑀝𑁆𑀞𑁄 𑀢𑀢𑁆𑀣𑁂𑀯 𑀫𑀢𑁄’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀲𑀘𑁂 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀘𑀢𑁆𑀢𑀸𑀭𑀺 𑀅𑀳𑀺𑀭𑀸𑀚𑀓𑀼𑀮𑀸𑀦𑀺 𑀆𑀭𑀩𑁆𑀪 𑀫𑁂𑀢𑁆𑀢𑀁 𑀅𑀪𑀸𑀯𑀬𑀺𑀲𑁆𑀲, 𑀦 𑀦𑀁 𑀲𑀧𑁆𑀧𑁄 𑀟𑀁𑀲𑁂𑀬𑁆𑀬. 𑀧𑁄𑀭𑀸𑀡𑀓𑀢𑀸𑀧𑀲𑀸𑀧𑀺 𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀘𑀢𑀽𑀲𑀼 𑀅𑀳𑀺𑀭𑀸𑀚𑀓𑀼𑀮𑁂𑀲𑀼 𑀫𑁂𑀢𑁆𑀢𑀁 𑀪𑀸𑀯𑁂𑀢𑁆𑀯𑀸 𑀢𑀸𑀦𑀺 𑀅𑀳𑀺𑀭𑀸𑀚𑀓𑀼𑀮𑀸𑀦𑀺 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀦𑀓𑀪𑀬𑀢𑁄 𑀫𑀼𑀘𑁆𑀘𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀓𑀸𑀲𑀺𑀭𑀝𑁆𑀞𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀓𑀸𑀫𑁂 𑀧𑀳𑀸𑀬 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀏𑀓𑀲𑁆𑀫𑀺𑀁 𑀕𑀗𑁆𑀕𑀸𑀦𑀺𑀯𑀢𑁆𑀢𑀦𑁂 𑀅𑀲𑁆𑀲𑀫𑀧𑀤𑀁 𑀫𑀸𑀧𑁂𑀢𑁆𑀯𑀸 𑀛𑀸𑀦𑀓𑀻𑀴𑀁 𑀓𑀻𑀴𑀦𑁆𑀢𑁄 𑀇𑀲𑀺𑀕𑀡𑀧𑀭𑀺𑀯𑀼𑀢𑁄 𑀯𑀺𑀳𑀸𑀲𑀺. 𑀢𑀤𑀸 𑀕𑀗𑁆𑀕𑀸𑀢𑀻𑀭𑁂 𑀦𑀸𑀦𑀧𑁆𑀧𑀓𑀸𑀭𑀸 𑀤𑀻𑀖𑀚𑀸𑀢𑀺𑀓𑀸 𑀇𑀲𑀻𑀦𑀁 𑀧𑀭𑀺𑀧𑀦𑁆𑀣𑀁 𑀓𑀭𑁄𑀦𑁆𑀢𑀺, 𑀬𑁂𑀪𑀼𑀬𑁆𑀬𑁂𑀦 𑀇𑀲𑀬𑁄 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑀦𑁆𑀢𑀺. 𑀢𑀸𑀧𑀲𑀸 𑀢𑀫𑀢𑁆𑀣𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀆𑀭𑁄𑀘𑁂𑀲𑀼𑀁. 𑀩𑁄𑀥𑀺𑀲𑀢𑁆𑀢𑁄 𑀲𑀩𑁆𑀩𑁂 𑀢𑀸𑀧𑀲𑁂 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 ‘‘𑀲𑀘𑁂 𑀢𑀼𑀫𑁆𑀳𑁂 𑀘𑀢𑀽𑀲𑀼 𑀅𑀳𑀺𑀭𑀸𑀚𑀓𑀼𑀮𑁂𑀲𑀼 𑀫𑁂𑀢𑁆𑀢𑀁 𑀪𑀸𑀯𑁂𑀬𑁆𑀬𑀸𑀣, 𑀦 𑀯𑁄 𑀲𑀧𑁆𑀧𑀸 𑀟𑀁𑀲𑁂𑀬𑁆𑀬𑀼𑀁, 𑀢𑀲𑁆𑀫𑀸 𑀇𑀢𑁄 𑀧𑀝𑁆𑀞𑀸𑀬 𑀘𑀢𑀽𑀲𑀼 𑀅𑀳𑀺𑀭𑀸𑀚𑀓𑀼𑀮𑁂𑀲𑀼 𑀏𑀯𑀁 𑀫𑁂𑀢𑁆𑀢𑀁 𑀪𑀸𑀯𑁂𑀣𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁦𑁫. ‘‘𑀯𑀺𑀭𑀽𑀧𑀓𑁆𑀔𑁂𑀳𑀺 𑀫𑁂 𑀫𑁂𑀢𑁆𑀢𑀁, 𑀫𑁂𑀢𑁆𑀢𑀁 𑀏𑀭𑀸𑀧𑀣𑁂𑀳𑀺 𑀫𑁂;

𑀙𑀩𑁆𑀬𑀸𑀧𑀼𑀢𑁆𑀢𑁂𑀳𑀺 𑀫𑁂 𑀫𑁂𑀢𑁆𑀢𑀁, 𑀫𑁂𑀢𑁆𑀢𑀁 𑀓𑀡𑁆𑀳𑀸𑀕𑁄𑀢𑀫𑀓𑁂𑀳𑀺 𑀘𑀸’’𑀢𑀺.

𑀢𑀢𑁆𑀣 𑀯𑀺𑀭𑀽𑀧𑀓𑁆𑀔𑁂𑀳𑀺 𑀫𑁂 𑀫𑁂𑀢𑁆𑀢𑀦𑁆𑀢𑀺 𑀯𑀺𑀭𑀽𑀧𑀓𑁆𑀔𑀦𑀸𑀕𑀭𑀸𑀚𑀓𑀼𑀮𑁂𑀳𑀺 𑀲𑀤𑁆𑀥𑀺𑀁 𑀫𑀬𑁆𑀳𑀁 𑀫𑁂𑀢𑁆𑀢𑀁. 𑀏𑀭𑀸𑀧𑀣𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑀸𑀦𑀺𑀧𑀺 𑀳𑀺 𑀏𑀭𑀸𑀧𑀣𑀦𑀸𑀕𑀭𑀸𑀚𑀓𑀼𑀮𑀁 𑀙𑀩𑁆𑀬𑀸𑀧𑀼𑀢𑁆𑀢𑀦𑀸𑀕𑀭𑀸𑀚𑀓𑀼𑀮𑀁 𑀓𑀡𑁆𑀳𑀸𑀕𑁄𑀢𑀫𑀓𑀦𑀸𑀕𑀭𑀸𑀚𑀓𑀼𑀮𑀦𑁆𑀢𑀺 𑀦𑀸𑀕𑀭𑀸𑀚𑀓𑀼𑀮𑀸𑀦𑁂𑀯.

𑀏𑀯𑀁 𑀘𑀢𑁆𑀢𑀸𑀭𑀺 𑀦𑀸𑀕𑀭𑀸𑀚𑀓𑀼𑀮𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 ‘‘𑀲𑀘𑁂 𑀢𑀼𑀫𑁆𑀳𑁂 𑀏𑀢𑁂𑀲𑀼 𑀫𑁂𑀢𑁆𑀢𑀁 𑀪𑀸𑀯𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀣, 𑀤𑀻𑀖𑀚𑀸𑀢𑀺𑀓𑀸 𑀯𑁄 𑀦 𑀟𑀁𑀲𑀺𑀲𑁆𑀲𑀦𑁆𑀢𑀺 𑀦 𑀯𑀺𑀳𑁂𑀞𑁂𑀲𑁆𑀲𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

‘‘𑀅𑀧𑀸𑀤𑀓𑁂𑀳𑀺 𑀫𑁂 𑀫𑁂𑀢𑁆𑀢𑀁, 𑀫𑁂𑀢𑁆𑀢𑀁 𑀤𑁆𑀯𑀺𑀧𑀸𑀤𑀓𑁂𑀳𑀺 𑀫𑁂;

𑀘𑀢𑀼𑀧𑁆𑀧𑀤𑁂𑀳𑀺 𑀫𑁂 𑀫𑁂𑀢𑁆𑀢𑀁, 𑀫𑁂𑀢𑁆𑀢𑀁 𑀩𑀳𑀼𑀧𑁆𑀧𑀤𑁂𑀳𑀺 𑀫𑁂’’𑀢𑀺.

𑀢𑀢𑁆𑀣 𑀧𑀞𑀫𑀧𑀤𑁂𑀦 𑀑𑀤𑀺𑀲𑁆𑀲𑀓𑀁 𑀓𑀢𑁆𑀯𑀸 𑀲𑀩𑁆𑀩𑁂𑀲𑀼 𑀅𑀧𑀸𑀤𑀓𑁂𑀲𑀼 𑀤𑀻𑀖𑀚𑀸𑀢𑀺𑀓𑁂𑀲𑀼 𑀘𑁂𑀯 𑀫𑀘𑁆𑀙𑁂𑀲𑀼 𑀘 𑀫𑁂𑀢𑁆𑀢𑀸𑀪𑀸𑀯𑀦𑀸 𑀤𑀲𑁆𑀲𑀺𑀢𑀸, 𑀤𑀼𑀢𑀺𑀬𑀧𑀤𑁂𑀦 𑀫𑀦𑀼𑀲𑁆𑀲𑁂𑀲𑀼 𑀘𑁂𑀯 𑀧𑀓𑁆𑀔𑀺𑀚𑀸𑀢𑁂𑀲𑀼 𑀘, 𑀢𑀢𑀺𑀬𑀧𑀤𑁂𑀦 𑀳𑀢𑁆𑀣𑀺𑀅𑀲𑁆𑀲𑀸𑀤𑀻𑀲𑀼 𑀲𑀩𑁆𑀩𑀘𑀢𑀼𑀧𑁆𑀧𑀤𑁂𑀲𑀼, 𑀘𑀢𑀼𑀢𑁆𑀣𑀧𑀤𑁂𑀦 𑀯𑀺𑀘𑁆𑀙𑀺𑀓𑀲𑀢𑀧𑀤𑀺𑀉𑀘𑁆𑀘𑀸𑀮𑀺𑀗𑁆𑀕𑀧𑀸𑀡𑀓𑀫𑀓𑁆𑀓𑀝𑀓𑀸𑀤𑀻𑀲𑀼.

𑀏𑀯𑀁 𑀲𑀭𑀽𑀧𑁂𑀦 𑀫𑁂𑀢𑁆𑀢𑀸𑀪𑀸𑀯𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀆𑀬𑀸𑀘𑀦𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀫𑀸 𑀫𑀁 𑀅𑀧𑀸𑀤𑀓𑁄 𑀳𑀺𑀁𑀲𑀺, 𑀫𑀸 𑀫𑀁 𑀳𑀺𑀁𑀲𑀺 𑀤𑁆𑀯𑀺𑀧𑀸𑀤𑀓𑁄;

𑀫𑀸 𑀫𑀁 𑀘𑀢𑀼𑀧𑁆𑀧𑀤𑁄 𑀳𑀺𑀁𑀲𑀺, 𑀫𑀸 𑀫𑀁 𑀳𑀺𑀁𑀲𑀺 𑀩𑀳𑀼𑀧𑁆𑀧𑀤𑁄’’𑀢𑀺.

𑀢𑀢𑁆𑀣 𑀫𑀸 𑀫𑀦𑁆𑀢𑀺 𑀏𑀢𑁂𑀲𑀼 𑀅𑀧𑀸𑀤𑀓𑀸𑀤𑀻𑀲𑀼 𑀓𑁄𑀘𑀺 𑀏𑀓𑁄𑀧𑀺 𑀫𑀸 𑀫𑀁 𑀳𑀺𑀁𑀲𑀢𑀼, 𑀫𑀸 𑀯𑀺𑀳𑁂𑀞𑁂𑀢𑀽𑀢𑀺 𑀏𑀯𑀁 𑀆𑀬𑀸𑀘𑀦𑁆𑀢𑀸 𑀫𑁂𑀢𑁆𑀢𑀁 𑀪𑀸𑀯𑁂𑀣𑀸𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀅𑀦𑁄𑀤𑀺𑀲𑁆𑀲𑀓𑀯𑀲𑁂𑀦 𑀫𑁂𑀢𑁆𑀢𑀸𑀪𑀸𑀯𑀦𑀁 𑀤𑀲𑁆𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀲𑀩𑁆𑀩𑁂 𑀲𑀢𑁆𑀢𑀸 𑀲𑀩𑁆𑀩𑁂 𑀧𑀸𑀡𑀸, 𑀲𑀩𑁆𑀩𑁂 𑀪𑀽𑀢𑀸 𑀘 𑀓𑁂𑀯𑀮𑀸;

𑀲𑀩𑁆𑀩𑁂 𑀪𑀤𑁆𑀭𑀸𑀦𑀺 𑀧𑀲𑁆𑀲𑀦𑁆𑀢𑀼, 𑀫𑀸 𑀓𑀜𑁆𑀘𑀺 𑀧𑀸𑀧𑀫𑀸𑀕𑀫𑀸’’𑀢𑀺.

𑀢𑀢𑁆𑀣 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦 𑀯𑀝𑁆𑀝𑁂 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀆𑀲𑀢𑁆𑀢𑀸 𑀯𑀺𑀲𑀢𑁆𑀢𑀸 𑀮𑀕𑁆𑀕𑀸 𑀮𑀕𑁆𑀕𑀺𑀢𑀸𑀢𑀺 𑀲𑀢𑁆𑀢𑀸, 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀧𑀯𑀢𑁆𑀢𑀦𑀲𑀗𑁆𑀔𑀸𑀢𑁂𑀦 𑀧𑀸𑀡𑀦𑀯𑀲𑁂𑀦 𑀧𑀸𑀡𑀸, 𑀪𑀽𑀢𑀪𑀸𑀯𑀺𑀢𑀦𑀺𑀩𑁆𑀩𑀢𑁆𑀢𑀦𑀯𑀲𑁂𑀦 𑀪𑀽𑀢𑀸𑀢𑀺 𑀏𑀯𑀁 𑀯𑀘𑀦𑀫𑀢𑁆𑀢𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀯𑀺𑀲𑁂𑀲𑁂𑀦 𑀧𑀦 𑀲𑀩𑁆𑀩𑀸𑀦𑀺𑀧𑁂𑀢𑀸𑀦𑀺 𑀧𑀤𑀸𑀦𑀺 𑀲𑀩𑁆𑀩𑀲𑀢𑁆𑀢𑀲𑀗𑁆𑀕𑀸𑀳𑀓𑀸𑀦𑁂𑀯. 𑀓𑁂𑀯𑀮𑀸𑀢𑀺 𑀲𑀓𑀮𑀸. 𑀇𑀤𑀁 𑀲𑀩𑁆𑀩𑀲𑀤𑁆𑀤𑀲𑁆𑀲𑁂𑀯 𑀳𑀺 𑀧𑀭𑀺𑀬𑀸𑀬𑀯𑀘𑀦𑀁. 𑀪𑀤𑁆𑀭𑀸𑀦𑀺 𑀧𑀲𑁆𑀲𑀦𑁆𑀢𑀽𑀢𑀺 𑀲𑀩𑁆𑀩𑁂𑀧𑁂𑀢𑁂 𑀲𑀢𑁆𑀢𑀸 𑀪𑀤𑁆𑀭𑀸𑀦𑀺 𑀲𑀸𑀥𑀽𑀦𑀺 𑀓𑀮𑁆𑀬𑀸𑀡𑀸𑀦𑁂𑀯 𑀧𑀲𑁆𑀲𑀦𑁆𑀢𑀼. 𑀫𑀸 𑀓𑀜𑁆𑀘𑀺 𑀧𑀸𑀧𑀫𑀸𑀕𑀫𑀸𑀢𑀺 𑀏𑀢𑁂𑀲𑀼 𑀓𑀜𑁆𑀘𑀺 𑀏𑀓𑀁 𑀲𑀢𑁆𑀢𑀫𑁆𑀧𑀺 𑀧𑀸𑀧𑀁 𑀮𑀸𑀫𑀓𑀁 𑀤𑀼𑀓𑁆𑀔𑀁 𑀫𑀸 𑀆𑀕𑀫𑀸, 𑀫𑀸 𑀆𑀕𑀘𑁆𑀙𑀢𑀼 𑀫𑀸 𑀧𑀸𑀧𑀼𑀡𑀸𑀢𑀼, 𑀲𑀩𑁆𑀩𑁂 𑀅𑀯𑁂𑀭𑀸 𑀅𑀩𑁆𑀬𑀸𑀧𑀚𑁆𑀚𑀸 𑀲𑀼𑀔𑀻 𑀦𑀺𑀤𑁆𑀤𑀼𑀓𑁆𑀔𑀸 𑀳𑁄𑀦𑁆𑀢𑀽𑀢𑀺.

𑀏𑀯𑀁 ‘‘𑀲𑀩𑁆𑀩𑀲𑀢𑁆𑀢𑁂𑀲𑀼 𑀅𑀦𑁄𑀤𑀺𑀲𑁆𑀲𑀓𑀯𑀲𑁂𑀦 𑀫𑁂𑀢𑁆𑀢𑀁 𑀪𑀸𑀯𑁂𑀣𑀸’’𑀢𑀺 𑀯𑀢𑁆𑀯𑀸 𑀧𑀼𑀦 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀕𑀼𑀡𑁂 𑀅𑀦𑀼𑀲𑁆𑀲𑀭𑀸𑀧𑁂𑀢𑀼𑀁 𑁋

𑁧𑁦𑁬. ‘‘𑀅𑀧𑁆𑀧𑀫𑀸𑀡𑁄 𑀩𑀼𑀤𑁆𑀥𑁄, 𑀅𑀧𑁆𑀧𑀫𑀸𑀡𑁄 𑀥𑀫𑁆𑀫𑁄;

𑀅𑀧𑁆𑀧𑀫𑀸𑀡𑁄 𑀲𑀗𑁆𑀖𑁄’’𑀢𑀺 𑀆𑀳.

𑀢𑀢𑁆𑀣 𑀧𑀫𑀸𑀡𑀓𑀭𑀸𑀦𑀁 𑀓𑀺𑀮𑁂𑀲𑀸𑀦𑀁 𑀅𑀪𑀸𑀯𑁂𑀦 𑀕𑀼𑀡𑀸𑀦𑀜𑁆𑀘 𑀧𑀫𑀸𑀡𑀸𑀪𑀸𑀯𑁂𑀦 𑀩𑀼𑀤𑁆𑀥𑀭𑀢𑀦𑀁 𑀅𑀧𑁆𑀧𑀫𑀸𑀡𑀁. 𑀥𑀫𑁆𑀫𑁄𑀢𑀺 𑀦𑀯𑀯𑀺𑀥𑁄 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄. 𑀢𑀲𑁆𑀲𑀧𑀺 𑀧𑀫𑀸𑀡𑀁 𑀓𑀸𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀅𑀧𑁆𑀧𑀫𑀸𑀡𑁄. 𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀥𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀲𑀗𑁆𑀖𑁄𑀧𑀺 𑀅𑀧𑁆𑀧𑀫𑀸𑀡𑁄.

𑀇𑀢𑀺 𑀩𑁄𑀥𑀺𑀲𑀢𑁆𑀢𑁄 ‘‘𑀇𑀫𑁂𑀲𑀁 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀕𑀼𑀡𑁂 𑀅𑀦𑀼𑀲𑁆𑀲𑀭𑀣𑀸’’𑀢𑀺 𑀯𑀢𑁆𑀯𑀸 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀅𑀧𑁆𑀧𑀫𑀸𑀡𑀕𑀼𑀡𑀢𑀁 𑀤𑀲𑁆𑀲𑁂𑀢𑁆𑀯𑀸 𑀲𑀧𑁆𑀧𑀫𑀸𑀡𑁂 𑀲𑀢𑁆𑀢𑁂 𑀤𑀲𑁆𑀲𑁂𑀢𑀼𑀁 𑁋

‘‘𑀧𑀫𑀸𑀡𑀯𑀦𑁆𑀢𑀸𑀦𑀺 𑀲𑀭𑀻𑀲𑀧𑀸𑀦𑀺, 𑀅𑀳𑀺 𑀯𑀺𑀘𑁆𑀙𑀺𑀓 𑀲𑀢𑀧𑀤𑀻;

𑀉𑀡𑁆𑀡𑀦𑀸𑀪𑀺 𑀲𑀭𑀩𑀽 𑀫𑀽𑀲𑀺𑀓𑀸’’𑀢𑀺 𑀆𑀳.

𑀢𑀢𑁆𑀣 𑀲𑀭𑀻𑀲𑀧𑀸𑀦𑀻𑀢𑀺 𑀲𑀧𑁆𑀧𑀤𑀻𑀖𑀚𑀸𑀢𑀺𑀓𑀸𑀦𑀁 𑀦𑀸𑀫𑀁. 𑀢𑁂 𑀳𑀺 𑀲𑀭𑀦𑁆𑀢𑀸 𑀕𑀘𑁆𑀙𑀦𑁆𑀢𑀺, 𑀲𑀺𑀭𑁂𑀦 𑀯𑀸 𑀲𑀧𑀦𑁆𑀢𑀻𑀢𑀺 𑀲𑀭𑀻𑀲𑀧𑀸. ‘‘𑀅𑀳𑀻’’𑀢𑀺𑀆𑀤𑀺 𑀢𑁂𑀲𑀁 𑀲𑀭𑀽𑀧𑀢𑁄 𑀦𑀺𑀤𑀲𑁆𑀲𑀦𑀁. 𑀢𑀢𑁆𑀣 𑀉𑀡𑁆𑀡𑀦𑀸𑀪𑀻𑀢𑀺 𑀫𑀓𑁆𑀓𑀝𑀓𑁄. 𑀢𑀲𑁆𑀲 𑀳𑀺 𑀦𑀸𑀪𑀺𑀢𑁄 𑀉𑀡𑁆𑀡𑀸𑀲𑀤𑀺𑀲𑀁 𑀲𑀼𑀢𑁆𑀢𑀁 𑀦𑀺𑀓𑁆𑀔𑀫𑀢𑀺, 𑀢𑀲𑁆𑀫𑀸 ‘‘𑀉𑀡𑁆𑀡𑀦𑀸𑀪𑀻’’𑀢𑀺 𑀯𑀼𑀘𑁆𑀘𑀢𑀺. 𑀲𑀭𑀩𑀽𑀢𑀺 𑀖𑀭𑀕𑁄𑀴𑀺𑀓𑀸.

𑀇𑀢𑀺 𑀩𑁄𑀥𑀺𑀲𑀢𑁆𑀢𑁄 ‘‘𑀬𑀲𑁆𑀫𑀸 𑀏𑀢𑁂𑀲𑀁 𑀅𑀦𑁆𑀢𑁄𑀭𑀸𑀕𑀸𑀤𑀬𑁄 𑀧𑀫𑀸𑀡𑀓𑀭𑀸 𑀥𑀫𑁆𑀫𑀸 𑀅𑀢𑁆𑀣𑀺, 𑀢𑀲𑁆𑀫𑀸 𑀢𑀸𑀦𑀺 𑀲𑀭𑀻𑀲𑀧𑀸𑀤𑀻𑀦𑀺 𑀧𑀫𑀸𑀡𑀯𑀦𑁆𑀢𑀸𑀦𑀻’’𑀢𑀺 𑀤𑀲𑁆𑀲𑁂𑀢𑁆𑀯𑀸 ‘‘𑀅𑀧𑁆𑀧𑀫𑀸𑀡𑀸𑀦𑀁 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀆𑀦𑀼𑀪𑀸𑀯𑁂𑀦 𑀇𑀫𑁂 𑀧𑀫𑀸𑀡𑀯𑀦𑁆𑀢𑀸 𑀲𑀢𑁆𑀢𑀸 𑀭𑀢𑁆𑀢𑀺𑀦𑁆𑀤𑀺𑀯𑀁 𑀧𑀭𑀺𑀢𑁆𑀢𑀓𑀫𑁆𑀫𑀁 𑀓𑀭𑁄𑀦𑁆𑀢𑀽𑀢𑀺 𑀏𑀯𑀁 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀕𑀼𑀡𑁂 𑀅𑀦𑀼𑀲𑁆𑀲𑀭𑀣𑀸’’𑀢𑀺 𑀯𑀢𑁆𑀯𑀸 𑀢𑀢𑁄 𑀉𑀢𑁆𑀢𑀭𑀺 𑀓𑀢𑁆𑀢𑀩𑁆𑀩𑀁 𑀤𑀲𑁆𑀲𑁂𑀢𑀼𑀁 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀓𑀢𑀸 𑀫𑁂 𑀭𑀓𑁆𑀔𑀸 𑀓𑀢𑀸 𑀫𑁂 𑀧𑀭𑀺𑀢𑁆𑀢𑀸, 𑀧𑀝𑀺𑀓𑁆𑀓𑀫𑀦𑁆𑀢𑀼 𑀪𑀽𑀢𑀸𑀦𑀺;

𑀲𑁄𑀳𑀁 𑀦𑀫𑁄 𑀪𑀕𑀯𑀢𑁄, 𑀦𑀫𑁄 𑀲𑀢𑁆𑀢𑀦𑁆𑀦𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦’’𑀦𑁆𑀢𑀺.

𑀢𑀢𑁆𑀣 𑀓𑀢𑀸 𑀫𑁂 𑀭𑀓𑁆𑀔𑀸𑀢𑀺 𑀫𑀬𑀸 𑀭𑀢𑀦𑀢𑁆𑀢𑀬𑀕𑀼𑀡𑁂 𑀅𑀦𑀼𑀲𑁆𑀲𑀭𑀦𑁆𑀢𑁂𑀦 𑀅𑀢𑁆𑀢𑀦𑁄 𑀭𑀓𑁆𑀔𑀸 𑀕𑀼𑀢𑁆𑀢𑀺 𑀓𑀢𑀸. 𑀓𑀢𑀸 𑀫𑁂 𑀧𑀭𑀺𑀢𑁆𑀢𑀸𑀢𑀺 𑀧𑀭𑀺𑀢𑁆𑀢𑀸𑀡𑀫𑁆𑀧𑀺 𑀫𑁂 𑀅𑀢𑁆𑀢𑀦𑁄 𑀓𑀢𑀁. 𑀧𑀝𑀺𑀓𑁆𑀓𑀫𑀦𑁆𑀢𑀼 𑀪𑀽𑀢𑀸𑀦𑀻𑀢𑀺 𑀫𑀬𑀺 𑀅𑀳𑀺𑀢𑀚𑁆𑀛𑀸𑀲𑀬𑀸𑀦𑀺 𑀪𑀽𑀢𑀸𑀦𑀺 𑀧𑀝𑀺𑀓𑁆𑀓𑀫𑀦𑁆𑀢𑀼 𑀅𑀧𑀕𑀘𑁆𑀙𑀦𑁆𑀢𑀼. 𑀲𑁄𑀳𑀁 𑀦𑀫𑁄 𑀪𑀕𑀯𑀢𑁄𑀢𑀺 𑀲𑁄 𑀅𑀳𑀁 𑀏𑀯𑀁 𑀓𑀢𑀧𑀭𑀺𑀢𑁆𑀢𑁄 𑀅𑀢𑀻𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀲𑀩𑁆𑀩𑀲𑁆𑀲𑀧𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀦𑀫𑁄 𑀓𑀭𑁄𑀫𑀺. 𑀦𑀫𑁄 𑀲𑀢𑁆𑀢𑀦𑁆𑀦𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀦𑁆𑀢𑀺 𑀯𑀺𑀲𑁂𑀲𑁂𑀦 𑀧𑀦 𑀅𑀢𑀻𑀢𑁂 𑀧𑀝𑀺𑀧𑀸𑀝𑀺𑀬𑀸 𑀧𑀭𑀺𑀦𑀺𑀩𑁆𑀩𑀼𑀢𑀸𑀦𑀁 𑀲𑀢𑁆𑀢𑀦𑁆𑀦𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀦𑀫𑁄 𑀓𑀭𑁄𑀫𑀻𑀢𑀺.

𑀏𑀯𑀁 ‘‘𑀦𑀫𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑀸𑀧𑀺 𑀲𑀢𑁆𑀢 𑀩𑀼𑀤𑁆𑀥𑁂 𑀅𑀦𑀼𑀲𑁆𑀲𑀭𑀣𑀸’’𑀢𑀺 𑀩𑁄𑀥𑀺𑀲𑀢𑁆𑀢𑁄 𑀇𑀲𑀺𑀕𑀡𑀲𑁆𑀲 𑀇𑀫𑀁 𑀧𑀭𑀺𑀢𑁆𑀢𑀁 𑀩𑀦𑁆𑀥𑀺𑀢𑁆𑀯𑀸 𑀅𑀤𑀸𑀲𑀺. 𑀆𑀤𑀺𑀢𑁄 𑀧𑀦 𑀧𑀝𑁆𑀞𑀸𑀬 𑀤𑁆𑀯𑀻𑀳𑀺 𑀕𑀸𑀣𑀸𑀳𑀺 𑀘𑀢𑀽𑀲𑀼 𑀅𑀳𑀺𑀭𑀸𑀚𑀓𑀼𑀮𑁂𑀲𑀼 𑀫𑁂𑀢𑁆𑀢𑀸𑀬 𑀤𑀻𑀧𑀺𑀢𑀢𑁆𑀢𑀸 𑀑𑀤𑀺𑀲𑁆𑀲𑀓𑀸𑀦𑁄𑀤𑀺𑀲𑁆𑀲𑀓𑀯𑀲𑁂𑀦 𑀯𑀸 𑀤𑁆𑀯𑀺𑀦𑁆𑀦𑀁 𑀫𑁂𑀢𑁆𑀢𑀸𑀪𑀸𑀯𑀦𑀸𑀦𑀁 𑀤𑀻𑀧𑀺𑀢𑀢𑁆𑀢𑀸 𑀇𑀤𑀁 𑀧𑀭𑀺𑀢𑁆𑀢𑀁 𑀇𑀥 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁, 𑀅𑀜𑁆𑀜𑀁 𑀯𑀸 𑀓𑀸𑀭𑀡𑀁 𑀧𑀭𑀺𑀬𑁂𑀲𑀺𑀢𑀩𑁆𑀩𑀁. 𑀢𑀢𑁄 𑀧𑀝𑁆𑀞𑀸𑀬 𑀇𑀲𑀺𑀕𑀡𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀑𑀯𑀸𑀤𑁂 𑀞𑀢𑁆𑀯𑀸 𑀫𑁂𑀢𑁆𑀢𑀁 𑀪𑀸𑀯𑁂𑀲𑀺, 𑀩𑀼𑀤𑁆𑀥𑀕𑀼𑀡𑁂 𑀅𑀦𑀼𑀲𑁆𑀲𑀭𑀺. 𑀏𑀯𑀫𑁂𑀢𑁂𑀲𑀼 𑀩𑀼𑀤𑁆𑀥𑀕𑀼𑀡𑁂 𑀅𑀦𑀼𑀲𑁆𑀲𑀭𑀦𑁆𑀢𑁂𑀲𑀼𑀬𑁂𑀯 𑀲𑀩𑁆𑀩𑁂 𑀤𑀻𑀖𑀚𑀸𑀢𑀺𑀓𑀸 𑀧𑀝𑀺𑀓𑁆𑀓𑀫𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀪𑀸𑀯𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑁄 𑀅𑀳𑁄𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀇𑀲𑀺𑀕𑀡𑁄 𑀩𑀼𑀤𑁆𑀥𑀧𑀭𑀺𑀲𑀸 𑀅𑀳𑁄𑀲𑀺, 𑀕𑀡𑀲𑀢𑁆𑀣𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀔𑀦𑁆𑀥𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

[𑁨𑁦𑁪] 𑁪. 𑀯𑀻𑀭𑀓𑀚𑀸𑀢𑀓𑀯𑀡𑁆𑀡𑀦𑀸

𑀅𑀧𑀺 𑀯𑀻𑀭𑀓 𑀧𑀲𑁆𑀲𑁂𑀲𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀼𑀕𑀢𑀸𑀮𑀬𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀤𑁂𑀯𑀤𑀢𑁆𑀢𑀲𑁆𑀲 𑀧𑀭𑀺𑀲𑀁 𑀕𑀳𑁂𑀢𑁆𑀯𑀸 𑀆𑀕𑀢𑁂𑀲𑀼 𑀳𑀺 𑀣𑁂𑀭𑁂𑀲𑀼 𑀲𑀢𑁆𑀣𑀸 ‘‘𑀲𑀸𑀭𑀺𑀧𑀼𑀢𑁆𑀢, 𑀤𑁂𑀯𑀤𑀢𑁆𑀢𑁄 𑀢𑀼𑀫𑁆𑀳𑁂 𑀤𑀺𑀲𑁆𑀯𑀸 𑀓𑀺𑀁 𑀅𑀓𑀸𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀼𑀕𑀢𑀸𑀮𑀬𑀁, 𑀪𑀦𑁆𑀢𑁂, 𑀤𑀲𑁆𑀲𑁂𑀲𑀻’’𑀢𑀺 𑀯𑀼𑀢𑁆𑀢𑁂 ‘‘𑀦 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀇𑀤𑀸𑀦𑁂𑀯 𑀤𑁂𑀯𑀤𑀢𑁆𑀢𑁄 𑀫𑀫 𑀅𑀦𑀼𑀓𑀺𑀭𑀺𑀬𑀁 𑀓𑀭𑁄𑀦𑁆𑀢𑁄 𑀯𑀺𑀦𑀸𑀲𑀁 𑀧𑀢𑁆𑀢𑁄, 𑀧𑀼𑀩𑁆𑀩𑁂𑀧𑀺 𑀯𑀺𑀦𑀸𑀲𑀁 𑀧𑀸𑀧𑀼𑀡𑀻’’𑀢𑀺 𑀯𑀢𑁆𑀯𑀸 𑀣𑁂𑀭𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀉𑀤𑀓𑀓𑀸𑀓𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀏𑀓𑀁 𑀲𑀭𑀁 𑀉𑀧𑀦𑀺𑀲𑁆𑀲𑀸𑀬 𑀯𑀲𑀺, ‘‘𑀯𑀻𑀭𑀓𑁄’’𑀢𑀺𑀲𑁆𑀲 𑀦𑀸𑀫𑀁 𑀅𑀳𑁄𑀲𑀺. 𑀢𑀤𑀸 𑀓𑀸𑀲𑀺𑀭𑀝𑁆𑀞𑁂 𑀤𑀼𑀩𑁆𑀪𑀺𑀓𑁆𑀔𑀁 𑀅𑀳𑁄𑀲𑀺, 𑀫𑀦𑀼𑀲𑁆𑀲𑀸 𑀓𑀸𑀓𑀪𑀢𑁆𑀢𑀁 𑀯𑀸 𑀤𑀸𑀢𑀼𑀁 𑀬𑀓𑁆𑀔𑀦𑀸𑀕𑀩𑀮𑀺𑀓𑀫𑁆𑀫𑀁 𑀯𑀸 𑀓𑀸𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀙𑀸𑀢𑀓𑀭𑀝𑁆𑀞𑀢𑁄 𑀓𑀸𑀓𑀸 𑀬𑁂𑀪𑀼𑀬𑁆𑀬𑁂𑀦 𑀅𑀭𑀜𑁆𑀜𑀁 𑀧𑀯𑀺𑀲𑀺𑀁𑀲𑀼. 𑀢𑀢𑁆𑀣𑁂𑀓𑁄 𑀩𑀸𑀭𑀸𑀡𑀲𑀺𑀯𑀸𑀲𑀻 𑀲𑀯𑀺𑀝𑁆𑀞𑀓𑁄 𑀦𑀸𑀫 𑀓𑀸𑀓𑁄 𑀓𑀸𑀓𑀺𑀁 𑀆𑀤𑀸𑀬 𑀯𑀻𑀭𑀓𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀢𑀁 𑀲𑀭𑀁 𑀦𑀺𑀲𑁆𑀲𑀸𑀬 𑀏𑀓𑀫𑀦𑁆𑀢𑁂 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀲𑁄 𑀏𑀓𑀤𑀺𑀯𑀲𑀁 𑀢𑀲𑁆𑀫𑀺𑀁 𑀲𑀭𑁂 𑀕𑁄𑀘𑀭𑀁 𑀕𑀡𑁆𑀳𑀦𑁆𑀢𑁄 𑀯𑀻𑀭𑀓𑀁 𑀲𑀭𑀁 𑀑𑀢𑀭𑀺𑀢𑁆𑀯𑀸 𑀫𑀘𑁆𑀙𑁂 𑀔𑀸𑀤𑀺𑀢𑁆𑀯𑀸 𑀧𑀘𑁆𑀘𑀼𑀢𑁆𑀢𑀭𑀺𑀢𑁆𑀯𑀸 𑀲𑀭𑀻𑀭𑀁 𑀲𑀼𑀓𑁆𑀔𑀸𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀇𑀫𑀁 𑀉𑀤𑀓𑀓𑀸𑀓𑀁 𑀦𑀺𑀲𑁆𑀲𑀸𑀬 𑀲𑀓𑁆𑀓𑀸 𑀩𑀳𑀽 𑀫𑀘𑁆𑀙𑁂 𑀮𑀤𑁆𑀥𑀼𑀁, 𑀇𑀫𑀁 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀓𑀺𑀁, 𑀲𑀫𑁆𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀇𑀘𑁆𑀙𑀸𑀫𑀺 𑀢𑀁 𑀲𑀸𑀫𑀺 𑀉𑀧𑀝𑁆𑀞𑀳𑀺𑀢𑀼’’𑀦𑁆𑀢𑀺 𑀯𑀢𑁆𑀯𑀸 ‘‘𑀲𑀸𑀥𑀽’’𑀢𑀺 𑀢𑁂𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑁄 𑀢𑀢𑁄 𑀧𑀝𑁆𑀞𑀸𑀬 𑀉𑀧𑀝𑁆𑀞𑀸𑀲𑀺. 𑀯𑀻𑀭𑀓𑁄𑀧𑀺 𑀢𑀢𑁄 𑀧𑀝𑁆𑀞𑀸𑀬 𑀅𑀢𑁆𑀢𑀦𑁄 𑀬𑀸𑀧𑀦𑀫𑀢𑁆𑀢𑀁 𑀔𑀸𑀤𑀺𑀢𑁆𑀯𑀸 𑀫𑀘𑁆𑀙𑁂 𑀉𑀤𑁆𑀥𑀭𑀺𑀢𑁆𑀯𑀸 𑀲𑀯𑀺𑀝𑁆𑀞𑀓𑀲𑁆𑀲 𑀤𑁂𑀢𑀺. 𑀲𑁄𑀧𑀺 𑀅𑀢𑁆𑀢𑀦𑁄 𑀬𑀸𑀧𑀦𑀫𑀢𑁆𑀢𑀁 𑀔𑀸𑀤𑀺𑀢𑁆𑀯𑀸 𑀲𑁂𑀲𑀁 𑀓𑀸𑀓𑀺𑀬𑀸 𑀤𑁂𑀢𑀺.

𑀢𑀲𑁆𑀲 𑀅𑀧𑀭𑀪𑀸𑀕𑁂 𑀫𑀸𑀦𑁄 𑀉𑀧𑁆𑀧𑀚𑁆𑀚𑀺 𑁋 ‘‘𑀅𑀬𑀫𑁆𑀧𑀺 𑀉𑀤𑀓𑀓𑀸𑀓𑁄 𑀓𑀸𑀴𑀓𑁄, 𑀅𑀳𑀫𑁆𑀧𑀺 𑀓𑀸𑀴𑀓𑁄, 𑀅𑀓𑁆𑀔𑀺𑀢𑀼𑀡𑁆𑀟𑀧𑀸𑀤𑁂𑀳𑀺𑀧𑀺 𑀏𑀢𑀲𑁆𑀲 𑀘 𑀫𑀬𑁆𑀳𑀜𑁆𑀘 𑀦𑀸𑀦𑀸𑀓𑀭𑀡𑀁 𑀦𑀢𑁆𑀣𑀺, 𑀇𑀢𑁄 𑀧𑀝𑁆𑀞𑀸𑀬 𑀇𑀫𑀺𑀦𑀸 𑀕𑀳𑀺𑀢𑀫𑀘𑁆𑀙𑁂𑀳𑀺 𑀫𑀬𑁆𑀳𑀁 𑀓𑀫𑁆𑀫𑀁 𑀦𑀢𑁆𑀣𑀺, 𑀅𑀳𑀫𑁂𑀯 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀯𑀻𑀭𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀲𑀫𑁆𑀫, 𑀇𑀢𑁄 𑀧𑀝𑁆𑀞𑀸𑀬 𑀅𑀳𑀫𑁂𑀯 𑀲𑀭𑀁 𑀑𑀢𑀭𑀺𑀢𑁆𑀯𑀸 𑀫𑀘𑁆𑀙𑁂 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 ‘‘𑀦 𑀢𑁆𑀯𑀁, 𑀲𑀫𑁆𑀫, 𑀉𑀤𑀓𑀁 𑀑𑀢𑀭𑀺𑀢𑁆𑀯𑀸 𑀫𑀘𑁆𑀙𑁂 𑀕𑀡𑁆𑀳𑀦𑀓𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄, 𑀫𑀸 𑀦𑀲𑁆𑀲𑀻’’𑀢𑀺 𑀢𑁂𑀦 𑀯𑀸𑀭𑀺𑀬𑀫𑀸𑀦𑁄𑀧𑀺 𑀯𑀘𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀲𑀭𑀁 𑀑𑀭𑀼𑀬𑁆𑀳 𑀉𑀤𑀓𑀁 𑀧𑀯𑀺𑀲𑀺𑀢𑁆𑀯𑀸 𑀉𑀫𑁆𑀫𑀼𑀚𑁆𑀚𑀫𑀸𑀦𑁄 𑀲𑁂𑀯𑀸𑀮𑀁 𑀙𑀺𑀦𑁆𑀤𑀺𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑀼𑀁 𑀦𑀸𑀲𑀓𑁆𑀔𑀺, 𑀲𑁂𑀯𑀸𑀮𑀦𑁆𑀢𑀭𑁂 𑀮𑀕𑁆𑀕𑀺, 𑀅𑀕𑁆𑀕𑀢𑀼𑀡𑁆𑀟𑀫𑁂𑀯 𑀧𑀜𑁆𑀜𑀸𑀬𑀺. 𑀲𑁄 𑀦𑀺𑀭𑀲𑁆𑀲𑀸𑀲𑁄 𑀅𑀦𑁆𑀢𑁄𑀉𑀤𑀓𑁂𑀬𑁂𑀯 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑀺. 𑀅𑀣𑀲𑁆𑀲 𑀪𑀭𑀺𑀬𑀸 𑀆𑀕𑀫𑀦𑀁 𑀅𑀧𑀲𑁆𑀲𑀫𑀸𑀦𑀸 𑀢𑀁 𑀧𑀯𑀢𑁆𑀢𑀺𑀁 𑀚𑀸𑀦𑀦𑀢𑁆𑀣𑀁 𑀯𑀻𑀭𑀓𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀲𑀸𑀫𑀺, 𑀲𑀯𑀺𑀝𑁆𑀞𑀓𑁄 𑀦 𑀧𑀜𑁆𑀜𑀸𑀬𑀢𑀺, 𑀓𑀳𑀁 𑀦𑀼 𑀔𑁄 𑀲𑁄’’𑀢𑀺 𑀧𑀼𑀘𑁆𑀙𑀫𑀸𑀦𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁦𑁭. ‘‘𑀅𑀧𑀺 𑀯𑀻𑀭𑀓 𑀧𑀲𑁆𑀲𑁂𑀲𑀺, 𑀲𑀓𑀼𑀡𑀁 𑀫𑀜𑁆𑀚𑀼𑀪𑀸𑀡𑀓𑀁;

𑀫𑀬𑀽𑀭𑀕𑀻𑀯𑀲𑀗𑁆𑀓𑀸𑀲𑀁, 𑀧𑀢𑀺𑀁 𑀫𑀬𑁆𑀳𑀁 𑀲𑀯𑀺𑀝𑁆𑀞𑀓’’𑀦𑁆𑀢𑀺.

𑀢𑀢𑁆𑀣 𑀅𑀧𑀺, 𑀯𑀻𑀭𑀓, 𑀧𑀲𑁆𑀲𑁂𑀲𑀻𑀢𑀺, 𑀲𑀸𑀫𑀺 𑀯𑀻𑀭𑀓, 𑀅𑀧𑀺 𑀧𑀲𑁆𑀲𑀲𑀺. 𑀫𑀜𑁆𑀚𑀼𑀪𑀸𑀡𑀓𑀦𑁆𑀢𑀺 𑀫𑀜𑁆𑀚𑀼𑀪𑀸𑀡𑀺𑀦𑀁. 𑀲𑀸 𑀳𑀺 𑀭𑀸𑀕𑀯𑀲𑁂𑀦 ‘‘𑀫𑀥𑀼𑀭𑀲𑁆𑀲𑀭𑁄 𑀫𑁂 𑀧𑀢𑀻’’𑀢𑀺 𑀫𑀜𑁆𑀜𑀢𑀺, 𑀢𑀲𑁆𑀫𑀸 𑀏𑀯𑀫𑀸𑀳. 𑀫𑀬𑀽𑀭𑀕𑀻𑀯𑀲𑀗𑁆𑀓𑀸𑀲𑀦𑁆𑀢𑀺 𑀫𑁄𑀭𑀕𑀻𑀯𑀲𑀫𑀸𑀦𑀯𑀡𑁆𑀡𑀁.

𑀢𑀁 𑀲𑀼𑀢𑁆𑀯𑀸 𑀯𑀻𑀭𑀓𑁄 ‘‘𑀆𑀫, 𑀚𑀸𑀦𑀸𑀫𑀺 𑀢𑁂 𑀲𑀸𑀫𑀺𑀓𑀲𑁆𑀲 𑀕𑀢𑀝𑁆𑀞𑀸𑀦’’𑀦𑁆𑀢𑀺 𑀯𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁦𑁮. ‘‘𑀉𑀤𑀓𑀣𑀮𑀘𑀭𑀲𑁆𑀲 𑀧𑀓𑁆𑀔𑀺𑀦𑁄, 𑀦𑀺𑀘𑁆𑀘𑀁 𑀆𑀫𑀓𑀫𑀘𑁆𑀙𑀪𑁄𑀚𑀺𑀦𑁄;

𑀢𑀲𑁆𑀲𑀸𑀦𑀼𑀓𑀭𑀁 𑀲𑀯𑀺𑀝𑁆𑀞𑀓𑁄, 𑀲𑁂𑀯𑀸𑀮𑁂 𑀧𑀮𑀺𑀕𑀼𑀡𑁆𑀞𑀺𑀢𑁄 𑀫𑀢𑁄’’𑀢𑀺.

𑀢𑀢𑁆𑀣 𑀉𑀤𑀓𑀣𑀮𑀘𑀭𑀲𑁆𑀲𑀸𑀢𑀺 𑀉𑀤𑀓𑁂 𑀘 𑀣𑀮𑁂 𑀘 𑀘𑀭𑀺𑀢𑀼𑀁 𑀲𑀫𑀢𑁆𑀣𑀲𑁆𑀲. 𑀧𑀓𑁆𑀔𑀺𑀦𑁄𑀢𑀺 𑀅𑀢𑁆𑀢𑀸𑀦𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀢𑀲𑁆𑀲𑀸𑀦𑀼𑀓𑀭𑀦𑁆𑀢𑀺 𑀢𑀲𑁆𑀲 𑀅𑀦𑀼𑀓𑀭𑁄𑀦𑁆𑀢𑁄. 𑀲𑁂𑀯𑀸𑀮𑁂 𑀧𑀮𑀺𑀕𑀼𑀡𑁆𑀞𑀺𑀢𑁄 𑀫𑀢𑁄𑀢𑀺 𑀉𑀤𑀓𑀁 𑀧𑀯𑀺𑀲𑀺𑀢𑁆𑀯𑀸 𑀲𑁂𑀯𑀸𑀮𑀁 𑀙𑀺𑀦𑁆𑀤𑀺𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀲𑁂𑀯𑀸𑀮𑀧𑀭𑀺𑀬𑁄𑀦𑀤𑁆𑀥𑁄 𑀅𑀦𑁆𑀢𑁄𑀉𑀤𑀓𑁂𑀬𑁂𑀯 𑀫𑀢𑁄, 𑀧𑀲𑁆𑀲, 𑀏𑀢𑀲𑁆𑀲 𑀢𑀼𑀡𑁆𑀟𑀁 𑀤𑀺𑀲𑁆𑀲𑀢𑀻𑀢𑀺. 𑀢𑀁 𑀲𑀼𑀢𑁆𑀯𑀸 𑀓𑀸𑀓𑀻 𑀧𑀭𑀺𑀤𑁂𑀯𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀫𑁂𑀯 𑀅𑀕𑀫𑀸𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀲𑀯𑀺𑀝𑁆𑀞𑀓𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀯𑀻𑀭𑀓𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀯𑀻𑀭𑀓𑀚𑀸𑀢𑀓𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.

[𑁨𑁦𑁫] 𑁫. 𑀕𑀗𑁆𑀕𑁂𑀬𑁆𑀬𑀚𑀸𑀢𑀓𑀯𑀡𑁆𑀡𑀦𑀸

𑀲𑁄𑀪𑀢𑀺 𑀫𑀘𑁆𑀙𑁄 𑀕𑀗𑁆𑀕𑁂𑀬𑁆𑀬𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁆𑀯𑁂 𑀤𑀳𑀭𑀪𑀺𑀓𑁆𑀔𑀽 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑁂 𑀓𑀺𑀭 𑀲𑀸𑀯𑀢𑁆𑀣𑀺𑀯𑀸𑀲𑀺𑀦𑁄 𑀓𑀼𑀮𑀧𑀼𑀢𑁆𑀢𑀸 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀲𑀼𑀪𑀪𑀸𑀯𑀦𑀁 𑀅𑀦𑀼𑀦𑀼𑀬𑀼𑀜𑁆𑀚𑀺𑀢𑁆𑀯𑀸 𑀭𑀽𑀧𑀧𑀲𑀁𑀲𑀓𑀸 𑀳𑀼𑀢𑁆𑀯𑀸 𑀭𑀽𑀧𑀁 𑀉𑀧𑀮𑀸𑀴𑁂𑀦𑁆𑀢𑀸 𑀯𑀺𑀘𑀭𑀺𑀁𑀲𑀼. 𑀢𑁂 𑀏𑀓𑀤𑀺𑀯𑀲𑀁 ‘‘𑀢𑁆𑀯𑀁 𑀦 𑀲𑁄𑀪𑀲𑀺, 𑀅𑀳𑀁 𑀲𑁄𑀪𑀸𑀫𑀻’’𑀢𑀺 𑀭𑀽𑀧𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀯𑀺𑀯𑀸𑀤𑀸 𑀅𑀯𑀺𑀤𑀽𑀭𑁂 𑀦𑀺𑀲𑀺𑀦𑁆𑀦𑀁 𑀏𑀓𑀁 𑀫𑀳𑀮𑁆𑀮𑀓𑀢𑁆𑀣𑁂𑀭𑀁 𑀤𑀺𑀲𑁆𑀯𑀸 ‘‘𑀏𑀲𑁄 𑀅𑀫𑁆𑀳𑀸𑀓𑀁 𑀲𑁄𑀪𑀦𑀪𑀸𑀯𑀁 𑀯𑀸 𑀅𑀲𑁄𑀪𑀦𑀪𑀸𑀯𑀁 𑀯𑀸 𑀚𑀸𑀦𑀺𑀲𑁆𑀲𑀢𑀻’’𑀢𑀺 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀓𑁄 𑀅𑀫𑁆𑀳𑁂𑀲𑀼 𑀲𑁄𑀪𑀦𑁄’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀲𑁄 ‘‘𑀆𑀯𑀼𑀲𑁄, 𑀢𑀼𑀫𑁆𑀳𑁂𑀳𑀺 𑀅𑀳𑀫𑁂𑀯 𑀲𑁄𑀪𑀦𑀢𑀭𑁄’’𑀢𑀺 𑀆𑀳. 𑀤𑀳𑀭𑀸 ‘‘𑀅𑀬𑀁 𑀫𑀳𑀮𑁆𑀮𑀓𑁄 𑀅𑀫𑁆𑀳𑁂𑀳𑀺 𑀧𑀼𑀘𑁆𑀙𑀺𑀢𑀁 𑀅𑀓𑀣𑁂𑀢𑁆𑀯𑀸 𑀅𑀧𑀼𑀘𑁆𑀙𑀺𑀢𑀁 𑀓𑀣𑁂𑀢𑀻’’𑀢𑀺 𑀢𑀁 𑀧𑀭𑀺𑀪𑀸𑀲𑀺𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. 𑀲𑀸 𑀢𑁂𑀲𑀁 𑀓𑀺𑀭𑀺𑀬𑀸 𑀪𑀺𑀓𑁆𑀔𑀼𑀲𑀗𑁆𑀖𑁂 𑀧𑀸𑀓𑀝𑀸 𑀚𑀸𑀢𑀸. 𑀅𑀣𑁂𑀓𑀤𑀺𑀯𑀲𑀁 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀆𑀯𑀼𑀲𑁄, 𑀅𑀲𑀼𑀓𑁄 𑀫𑀳𑀮𑁆𑀮𑀓𑁄 𑀣𑁂𑀭𑁄 𑀓𑀺𑀭 𑀢𑁂 𑀭𑀽𑀧𑀦𑀺𑀲𑁆𑀲𑀺𑀢𑀓𑁂 𑀤𑀳𑀭𑁂 𑀮𑀚𑁆𑀚𑀸𑀧𑁂𑀲𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀫𑁂 𑀤𑁆𑀯𑁂 𑀤𑀳𑀭𑀸 𑀇𑀤𑀸𑀦𑁂𑀯 𑀭𑀽𑀧𑀧𑀲𑀁𑀲𑀓𑀸, 𑀧𑀼𑀩𑁆𑀩𑁂𑀧𑁂𑀢𑁂 𑀭𑀽𑀧𑀫𑁂𑀯 𑀉𑀧𑀮𑀸𑀴𑁂𑀦𑁆𑀢𑀸 𑀯𑀺𑀘𑀭𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀕𑀗𑁆𑀕𑀸𑀢𑀻𑀭𑁂 𑀭𑀼𑀓𑁆𑀔𑀤𑁂𑀯𑀢𑀸 𑀅𑀳𑁄𑀲𑀺. 𑀢𑀤𑀸 𑀕𑀗𑁆𑀕𑀸𑀬𑀫𑀼𑀦𑀸𑀦𑀁 𑀲𑀫𑀸𑀕𑀫𑀝𑁆𑀞𑀸𑀦𑁂 𑀕𑀗𑁆𑀕𑁂𑀬𑁆𑀬𑁄 𑀘 𑀬𑀸𑀫𑀼𑀦𑁂𑀬𑁆𑀬𑁄 𑀘 𑀤𑁆𑀯𑁂 𑀫𑀘𑁆𑀙𑀸 ‘‘𑀅𑀳𑀁 𑀲𑁄𑀪𑀸𑀫𑀺, 𑀢𑁆𑀯𑀁 𑀦 𑀲𑁄𑀪𑀲𑀻’’𑀢𑀺 𑀭𑀽𑀧𑀁 𑀦𑀺𑀲𑁆𑀲𑀸𑀬 𑀯𑀺𑀯𑀤𑀫𑀸𑀦𑀸 𑀅𑀯𑀺𑀤𑀽𑀭𑁂 𑀕𑀗𑁆𑀕𑀸𑀢𑀻𑀭𑁂 𑀓𑀘𑁆𑀙𑀧𑀁 𑀦𑀺𑀧𑀦𑁆𑀦𑀁 𑀤𑀺𑀲𑁆𑀯𑀸 ‘‘𑀏𑀲𑁄 𑀅𑀫𑁆𑀳𑀸𑀓𑀁 𑀲𑁄𑀪𑀦𑀪𑀸𑀯𑀁 𑀯𑀸 𑀅𑀲𑁄𑀪𑀦𑀪𑀸𑀯𑀁 𑀯𑀸 𑀚𑀸𑀦𑀺𑀲𑁆𑀲𑀢𑀻’’𑀢𑀺 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄, 𑀲𑀫𑁆𑀫 𑀓𑀘𑁆𑀙𑀧, 𑀕𑀗𑁆𑀕𑁂𑀬𑁆𑀬𑁄 𑀲𑁄𑀪𑀢𑀺, 𑀉𑀤𑀸𑀳𑀼 𑀬𑀸𑀫𑀼𑀦𑁂𑀬𑁆𑀬𑁄’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀓𑀘𑁆𑀙𑀧𑁄 ‘‘𑀕𑀗𑁆𑀕𑁂𑀬𑁆𑀬𑁄𑀧𑀺 𑀲𑁄𑀪𑀢𑀺, 𑀬𑀸𑀫𑀼𑀦𑁂𑀬𑁆𑀬𑁄𑀧𑀺 𑀲𑁄𑀪𑀢𑀺, 𑀢𑀼𑀫𑁆𑀳𑁂𑀳𑀺 𑀧𑀦 𑀤𑁆𑀯𑀻𑀳𑀺 𑀅𑀳𑀫𑁂𑀯 𑀅𑀢𑀺𑀭𑁂𑀓𑀢𑀭𑀁 𑀲𑁄𑀪𑀸𑀫𑀻’’𑀢𑀺 𑀇𑀫𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁦𑁯. ‘‘𑀲𑁄𑀪𑀢𑀺 𑀫𑀘𑁆𑀙𑁄 𑀕𑀗𑁆𑀕𑁂𑀬𑁆𑀬𑁄, 𑀅𑀣𑁄 𑀲𑁄𑀪𑀢𑀺 𑀬𑀸𑀫𑀼𑀦𑁄;

𑀘𑀢𑀼𑀧𑁆𑀧𑀤𑁄𑀬𑀁 𑀧𑀼𑀭𑀺𑀲𑁄, 𑀦𑀺𑀕𑁆𑀭𑁄𑀥𑀧𑀭𑀺𑀫𑀡𑁆𑀟𑀮𑁄;

𑀈𑀲𑀓𑀸𑀬𑀢𑀕𑀻𑀯𑁄 𑀘, 𑀲𑀩𑁆𑀩𑁂𑀯 𑀅𑀢𑀺𑀭𑁄𑀘𑀢𑀻’’𑀢𑀺.

𑀢𑀢𑁆𑀣 𑀘𑀢𑀼𑀧𑁆𑀧𑀤𑁄𑀬𑀦𑁆𑀢𑀺 𑀘𑀢𑀼𑀧𑁆𑀧𑀤𑁄 𑀅𑀬𑀁. 𑀧𑀼𑀭𑀺𑀲𑁄𑀢𑀺 𑀅𑀢𑁆𑀢𑀸𑀦𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀦𑀺𑀕𑁆𑀭𑁄𑀥𑀧𑀭𑀺𑀫𑀡𑁆𑀟𑀮𑁄𑀢𑀺 𑀲𑀼𑀚𑀸𑀢𑁄 𑀦𑀺𑀕𑁆𑀭𑁄𑀥𑁄 𑀯𑀺𑀬 𑀧𑀭𑀺𑀫𑀡𑁆𑀟𑀮𑁄. 𑀈𑀲𑀓𑀸𑀬𑀢𑀕𑀻𑀯𑁄𑀢𑀺 𑀭𑀣𑀻𑀲𑀸 𑀯𑀺𑀬 𑀆𑀬𑀢𑀕𑀻𑀯𑁄. 𑀲𑀩𑁆𑀩𑁂𑀯 𑀅𑀢𑀺𑀭𑁄𑀘𑀢𑀻𑀢𑀺 𑀏𑀯𑀁 𑀲𑀡𑁆𑀞𑀸𑀦𑀲𑀫𑁆𑀧𑀦𑁆𑀦𑁄 𑀓𑀘𑁆𑀙𑀧𑁄 𑀲𑀩𑁆𑀩𑁂𑀯 𑀅𑀢𑀺𑀭𑁄𑀘𑀢𑀺, 𑀅𑀳𑀫𑁂𑀯 𑀲𑀩𑁆𑀩𑁂 𑀢𑀼𑀫𑁆𑀳𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑁄𑀪𑀸𑀫𑀻𑀢𑀺 𑀯𑀤𑀢𑀺.

𑀫𑀘𑁆𑀙𑀸 𑀢𑀲𑁆𑀲 𑀓𑀣𑀁 𑀳𑀼𑀢𑁆𑀯𑀸 ‘‘𑀅𑀫𑁆𑀪𑁄! 𑀧𑀸𑀧𑀓𑀘𑁆𑀙𑀧 𑀅𑀫𑁆𑀳𑁂𑀳𑀺 𑀧𑀼𑀘𑁆𑀙𑀺𑀢𑀁 𑀅𑀓𑀣𑁂𑀢𑁆𑀯𑀸 𑀅𑀜𑁆𑀜𑀫𑁂𑀯 𑀓𑀣𑁂𑀲𑀻’’𑀢𑀺 𑀯𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁧𑁦. ‘‘𑀬𑀁 𑀧𑀼𑀘𑁆𑀙𑀺𑀢𑁄 𑀦 𑀢𑀁 𑀅𑀓𑁆𑀔𑀸𑀲𑀺, 𑀅𑀜𑁆𑀜𑀁 𑀅𑀓𑁆𑀔𑀸𑀲𑀺 𑀧𑀼𑀘𑁆𑀙𑀺𑀢𑁄;

𑀅𑀢𑁆𑀣𑀧𑁆𑀧𑀲𑀁𑀲𑀓𑁄 𑀧𑁄𑀲𑁄, 𑀦𑀸𑀬𑀁 𑀅𑀲𑁆𑀫𑀸𑀓 𑀭𑀼𑀘𑁆𑀘𑀢𑀻’’𑀢𑀺.

𑀢𑀢𑁆𑀣 𑀅𑀢𑁆𑀢𑀧𑁆𑀧𑀲𑀁𑀲𑀓𑁄𑀢𑀺 𑀅𑀢𑁆𑀢𑀸𑀦𑀁 𑀧𑀲𑀁𑀲𑀦𑀲𑀻𑀮𑁄 𑀅𑀢𑁆𑀢𑀼𑀓𑁆𑀓𑀁𑀲𑀓𑁄 𑀧𑁄𑀲𑁄. 𑀦𑀸𑀬𑀁 𑀅𑀲𑁆𑀫𑀸𑀓 𑀭𑀼𑀘𑁆𑀘𑀢𑀻𑀢𑀺 𑀅𑀬𑀁 𑀧𑀸𑀧𑀓𑀘𑁆𑀙𑀧𑁄 𑀅𑀫𑁆𑀳𑀸𑀓𑀁 𑀦 𑀭𑀼𑀘𑁆𑀘𑀢𑀺 𑀦 𑀔𑀫𑀢𑀻𑀢𑀺 𑀓𑀘𑁆𑀙𑀧𑀲𑁆𑀲 𑀉𑀧𑀭𑀺 𑀉𑀤𑀓𑀁 𑀔𑀺𑀧𑀺𑀢𑁆𑀯𑀸 𑀲𑀓𑀝𑁆𑀞𑀸𑀦𑀫𑁂𑀯 𑀕𑀫𑀺𑀁𑀲𑀼.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀤𑁆𑀯𑁂 𑀫𑀘𑁆𑀙𑀸 𑀤𑁆𑀯𑁂 𑀤𑀳𑀭𑀪𑀺𑀓𑁆𑀔𑀽 𑀅𑀳𑁂𑀲𑀼𑀁, 𑀓𑀘𑁆𑀙𑀧𑁄 𑀫𑀳𑀮𑁆𑀮𑀓𑁄, 𑀇𑀫𑀲𑁆𑀲 𑀓𑀸𑀭𑀡𑀲𑁆𑀲 𑀧𑀘𑁆𑀘𑀓𑁆𑀔𑀓𑀸𑀭𑀺𑀓𑀸 𑀕𑀗𑁆𑀕𑀸𑀢𑀻𑀭𑁂 𑀦𑀺𑀩𑁆𑀩𑀢𑁆𑀢𑀭𑀼𑀓𑁆𑀔𑀤𑁂𑀯𑀢𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀕𑀗𑁆𑀕𑁂𑀬𑁆𑀬𑀚𑀸𑀢𑀓𑀯𑀡𑁆𑀡𑀦𑀸 𑀧𑀜𑁆𑀘𑀫𑀸.

[𑁨𑁦𑁬] 𑁬. 𑀓𑀼𑀭𑀼𑀗𑁆𑀕𑀫𑀺𑀕𑀚𑀸𑀢𑀓𑀯𑀡𑁆𑀡𑀦𑀸

𑀇𑀗𑁆𑀖 𑀯𑀝𑁆𑀝𑀫𑀬𑀁 𑀧𑀸𑀲𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁂𑀯𑀤𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀤𑀸 𑀳𑀺 𑀲𑀢𑁆𑀣𑀸 ‘‘𑀤𑁂𑀯𑀤𑀢𑁆𑀢𑁄 𑀯𑀥𑀸𑀬 𑀧𑀭𑀺𑀲𑀓𑁆𑀓𑀢𑀻’’𑀢𑀺 𑀲𑀼𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀤𑁂𑀯𑀤𑀢𑁆𑀢𑁄 𑀇𑀤𑀸𑀦𑁂𑀯 𑀫𑀬𑁆𑀳𑀁 𑀯𑀥𑀸𑀬 𑀧𑀭𑀺𑀲𑀓𑁆𑀓𑀢𑀺, 𑀧𑀼𑀩𑁆𑀩𑁂𑀧𑀺 𑀧𑀭𑀺𑀲𑀓𑁆𑀓𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀓𑀼𑀭𑀼𑀗𑁆𑀕𑀫𑀺𑀕𑁄 𑀳𑀼𑀢𑁆𑀯𑀸 𑀅𑀭𑀜𑁆𑀜𑁂 𑀏𑀓𑀲𑁆𑀲 𑀲𑀭𑀲𑁆𑀲 𑀅𑀯𑀺𑀤𑀽𑀭𑁂 𑀏𑀓𑀲𑁆𑀫𑀺𑀁 𑀕𑀼𑀫𑁆𑀩𑁂 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀢𑀲𑁆𑀲𑁂𑀯 𑀲𑀭𑀲𑁆𑀲 𑀅𑀯𑀺𑀤𑀽𑀭𑁂 𑀏𑀓𑀲𑁆𑀫𑀺𑀁 𑀭𑀼𑀓𑁆𑀔𑀕𑁆𑀕𑁂 𑀲𑀢𑀧𑀢𑁆𑀢𑁄, 𑀲𑀭𑀲𑁆𑀫𑀺𑀁 𑀧𑀦 𑀓𑀘𑁆𑀙𑀧𑁄 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀏𑀯𑀁 𑀢𑁂 𑀢𑀬𑁄𑀧𑀺 𑀲𑀳𑀸𑀬𑀓𑀸 𑀅𑀜𑁆𑀜𑀫𑀜𑁆𑀜𑀁 𑀧𑀺𑀬𑀲𑀁𑀯𑀸𑀲𑀁 𑀯𑀲𑀺𑀁𑀲𑀼. 𑀅𑀣𑁂𑀓𑁄 𑀫𑀺𑀕𑀮𑀼𑀤𑁆𑀤𑀓𑁄 𑀅𑀭𑀜𑁆𑀜𑁂 𑀘𑀭𑀦𑁆𑀢𑁄 𑀧𑀸𑀦𑀻𑀬𑀢𑀺𑀢𑁆𑀣𑁂 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀤𑀯𑀮𑀜𑁆𑀚𑀁 𑀤𑀺𑀲𑁆𑀯𑀸 𑀮𑁄𑀳𑀦𑀺𑀕𑀴𑀲𑀤𑀺𑀲𑀁 𑀯𑀝𑁆𑀝𑀫𑀬𑀁 𑀧𑀸𑀲𑀁 𑀑𑀟𑁆𑀟𑁂𑀢𑁆𑀯𑀸 𑀅𑀕𑀫𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀧𑀸𑀦𑀻𑀬𑀁 𑀧𑀸𑀢𑀼𑀁 𑀆𑀕𑀢𑁄 𑀧𑀞𑀫𑀬𑀸𑀫𑁂𑀬𑁂𑀯 𑀧𑀸𑀲𑁂 𑀩𑀚𑁆𑀛𑀺𑀢𑁆𑀯𑀸 𑀩𑀤𑁆𑀥𑀭𑀯𑀁 𑀭𑀯𑀺. 𑀢𑀲𑁆𑀲 𑀢𑁂𑀦 𑀲𑀤𑁆𑀤𑁂𑀦 𑀭𑀼𑀓𑁆𑀔𑀕𑁆𑀕𑀢𑁄 𑀲𑀢𑀧𑀢𑁆𑀢𑁄 𑀉𑀤𑀓𑀢𑁄 𑀘 𑀓𑀘𑁆𑀙𑀧𑁄 𑀆𑀕𑀦𑁆𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀓𑀸𑀢𑀩𑁆𑀩’’𑀦𑁆𑀢𑀺 𑀫𑀦𑁆𑀢𑀬𑀺𑀁𑀲𑀼. 𑀅𑀣 𑀲𑀢𑀧𑀢𑁆𑀢𑁄 𑀓𑀘𑁆𑀙𑀧𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀲𑀫𑁆𑀫, 𑀢𑀯 𑀤𑀦𑁆𑀢𑀸 𑀅𑀢𑁆𑀣𑀺, 𑀢𑁆𑀯𑀁 𑀇𑀫𑀁 𑀧𑀸𑀲𑀁 𑀙𑀺𑀦𑁆𑀤, 𑀅𑀳𑀁 𑀕𑀦𑁆𑀢𑁆𑀯𑀸 𑀬𑀣𑀸 𑀲𑁄 𑀦𑀸𑀕𑀘𑁆𑀙𑀢𑀺, 𑀢𑀣𑀸 𑀓𑀭𑀺𑀲𑁆𑀲𑀸𑀫𑀺, 𑀏𑀯𑀁 𑀅𑀫𑁆𑀳𑁂𑀳𑀺 𑀤𑁆𑀯𑀻𑀳𑀺𑀧𑀺 𑀓𑀢𑀧𑀭𑀓𑁆𑀓𑀫𑁂𑀦 𑀲𑀳𑀸𑀬𑁄 𑀦𑁄 𑀚𑀻𑀯𑀺𑀢𑀁 𑀮𑀪𑀺𑀲𑁆𑀲𑀢𑀻’’𑀢𑀺 𑀇𑀫𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁧𑁧. ‘‘𑀇𑀗𑁆𑀖 𑀯𑀝𑁆𑀝𑀫𑀬𑀁 𑀧𑀸𑀲𑀁, 𑀙𑀺𑀦𑁆𑀤 𑀤𑀦𑁆𑀢𑁂𑀳𑀺 𑀓𑀘𑁆𑀙𑀧;

𑀅𑀳𑀁 𑀢𑀣𑀸 𑀓𑀭𑀺𑀲𑁆𑀲𑀸𑀫𑀺, 𑀬𑀣𑀸 𑀦𑁂𑀳𑀺𑀢𑀺 𑀮𑀼𑀤𑁆𑀤𑀓𑁄’’𑀢𑀺.

𑀅𑀣 𑀓𑀘𑁆𑀙𑀧𑁄 𑀘𑀫𑁆𑀫𑀯𑀭𑀢𑁆𑀢𑀁 𑀔𑀸𑀤𑀺𑀢𑀼𑀁 𑀆𑀭𑀪𑀺, 𑀲𑀢𑀧𑀢𑁆𑀢𑁄 𑀮𑀼𑀤𑁆𑀤𑀓𑀲𑁆𑀲 𑀯𑀲𑀦𑀕𑀸𑀫𑀁 𑀕𑀢𑁄 𑀅𑀯𑀺𑀤𑀽𑀭𑁂 𑀭𑀼𑀓𑁆𑀔𑁂 𑀦𑀺𑀲𑀻𑀤𑀺. 𑀮𑀼𑀤𑁆𑀤𑀓𑁄 𑀧𑀘𑁆𑀘𑀽𑀲𑀓𑀸𑀮𑁂𑀬𑁂𑀯 𑀲𑀢𑁆𑀢𑀺𑀁 𑀕𑀳𑁂𑀢𑁆𑀯𑀸 𑀦𑀺𑀓𑁆𑀔𑀫𑀺. 𑀲𑀓𑀼𑀡𑁄 𑀢𑀲𑁆𑀲 𑀦𑀺𑀓𑁆𑀔𑀫𑀦𑀪𑀸𑀯𑀁 𑀜𑀢𑁆𑀯𑀸 𑀯𑀲𑁆𑀲𑀺𑀢𑁆𑀯𑀸 𑀧𑀓𑁆𑀔𑁂 𑀧𑀧𑁆𑀨𑁄𑀝𑁂𑀢𑁆𑀯𑀸 𑀢𑀁 𑀧𑀼𑀭𑀺𑀫𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀦𑁆𑀢𑀁 𑀫𑀼𑀔𑁂 𑀧𑀳𑀭𑀺. 𑀮𑀼𑀤𑁆𑀤𑁄 ‘‘𑀓𑀸𑀴𑀓𑀡𑁆𑀡𑀺𑀦𑀸 𑀲𑀓𑀼𑀡𑁂𑀦𑀫𑁆𑀳𑀺 𑀧𑀳𑀝𑁄’’𑀢𑀺 𑀦𑀺𑀯𑀢𑁆𑀢𑀺𑀢𑁆𑀯𑀸 𑀣𑁄𑀓𑀁 𑀲𑀬𑀺𑀢𑁆𑀯𑀸 𑀧𑀼𑀦 𑀲𑀢𑁆𑀢𑀺𑀁 𑀕𑀳𑁂𑀢𑁆𑀯𑀸 𑀉𑀝𑁆𑀞𑀸𑀲𑀺. 𑀲𑀓𑀼𑀡𑁄 ‘‘𑀅𑀬𑀁 𑀧𑀞𑀫𑀁 𑀧𑀼𑀭𑀺𑀫𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀦𑁆𑀢𑁄 𑀇𑀤𑀸𑀦𑀺 𑀧𑀘𑁆𑀙𑀺𑀫𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀕𑀦𑁆𑀢𑁆𑀯𑀸 𑀧𑀘𑁆𑀙𑀺𑀫𑀕𑁂𑀳𑁂 𑀦𑀺𑀲𑀻𑀤𑀺. 𑀮𑀼𑀤𑁆𑀤𑁄𑀧𑀺 ‘‘𑀧𑀼𑀭𑀺𑀫𑀤𑁆𑀯𑀸𑀭𑁂𑀦 𑀫𑁂 𑀦𑀺𑀓𑁆𑀔𑀦𑁆𑀢𑁂𑀦 𑀓𑀸𑀴𑀓𑀡𑁆𑀡𑀻 𑀲𑀓𑀼𑀡𑁄 𑀤𑀺𑀝𑁆𑀞𑁄, 𑀇𑀤𑀸𑀦𑀺 𑀧𑀘𑁆𑀙𑀺𑀫𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀻’’𑀢𑀺 𑀧𑀘𑁆𑀙𑀺𑀫𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺, 𑀲𑀓𑀼𑀡𑁄 𑀧𑀼𑀦 𑀯𑀲𑁆𑀲𑀺𑀢𑁆𑀯𑀸 𑀕𑀦𑁆𑀢𑁆𑀯𑀸 𑀫𑀼𑀔𑁂 𑀧𑀳𑀭𑀺. 𑀮𑀼𑀤𑁆𑀤𑁄 ‘‘𑀧𑀼𑀦𑀧𑀺 𑀓𑀸𑀴𑀓𑀡𑁆𑀡𑀻𑀲𑀓𑀼𑀡𑁂𑀦 𑀧𑀳𑀝𑁄, 𑀦 𑀤𑀸𑀦𑀺 𑀫𑁂 𑀏𑀲 𑀦𑀺𑀓𑁆𑀔𑀫𑀺𑀢𑀼𑀁 𑀤𑁂𑀢𑀻’’𑀢𑀺 𑀦𑀺𑀯𑀢𑁆𑀢𑀺𑀢𑁆𑀯𑀸 𑀬𑀸𑀯 𑀅𑀭𑀼𑀡𑀼𑀕𑁆𑀕𑀫𑀦𑀸 𑀲𑀬𑀺𑀢𑁆𑀯𑀸 𑀅𑀭𑀼𑀡𑀼𑀕𑁆𑀕𑀫𑀦𑀯𑁂𑀮𑀸𑀬 𑀲𑀢𑁆𑀢𑀺𑀁 𑀕𑀳𑁂𑀢𑁆𑀯𑀸 𑀦𑀺𑀓𑁆𑀔𑀫𑀺. 𑀲𑀓𑀼𑀡𑁄 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 ‘‘𑀮𑀼𑀤𑁆𑀤𑁄 𑀆𑀕𑀘𑁆𑀙𑀢𑀻’’𑀢𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀓𑀣𑁂𑀲𑀺.

𑀢𑀲𑁆𑀫𑀺𑀁 𑀔𑀡𑁂 𑀓𑀘𑁆𑀙𑀧𑁂𑀦 𑀏𑀓𑀫𑁂𑀯 𑀘𑀫𑁆𑀫𑀯𑀤𑁆𑀥𑀁 𑀞𑀧𑁂𑀢𑁆𑀯𑀸 𑀲𑁂𑀲𑀯𑀭𑀢𑁆𑀢𑀸 𑀔𑀸𑀤𑀺𑀢𑀸 𑀳𑁄𑀦𑁆𑀢𑀺. 𑀤𑀦𑁆𑀢𑀸 𑀧𑀦𑀲𑁆𑀲 𑀧𑀢𑀦𑀸𑀓𑀸𑀭𑀧𑁆𑀧𑀢𑁆𑀢𑀸 𑀚𑀸𑀢𑀸, 𑀫𑀼𑀔𑀢𑁄 𑀮𑁄𑀳𑀺𑀢𑀁 𑀧𑀕𑁆𑀖𑀭𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀮𑀼𑀤𑁆𑀤𑀧𑀼𑀢𑁆𑀢𑀁 𑀲𑀢𑁆𑀢𑀺𑀁 𑀕𑀳𑁂𑀢𑁆𑀯𑀸 𑀅𑀲𑀦𑀺𑀯𑁂𑀕𑁂𑀦 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀢𑀁 𑀯𑀤𑁆𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀯𑀦𑀁 𑀧𑀸𑀯𑀺𑀲𑀺, 𑀲𑀓𑀼𑀡𑁄 𑀭𑀼𑀓𑁆𑀔𑀕𑁆𑀕𑁂 𑀦𑀺𑀲𑀻𑀤𑀺, 𑀓𑀘𑁆𑀙𑀧𑁄 𑀧𑀦 𑀤𑀼𑀩𑁆𑀩𑀮𑀢𑁆𑀢𑀸 𑀢𑀢𑁆𑀣𑁂𑀯 𑀦𑀺𑀧𑀚𑁆𑀚𑀺. 𑀮𑀼𑀤𑁆𑀤𑁄 𑀓𑀘𑁆𑀙𑀧𑀁 𑀕𑀳𑁂𑀢𑁆𑀯𑀸 𑀧𑀲𑀺𑀩𑁆𑀩𑀓𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀔𑀸𑀡𑀼𑀓𑁂 𑀮𑀕𑁆𑀕𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀓𑀘𑁆𑀙𑀧𑀲𑁆𑀲 𑀕𑀳𑀺𑀢𑀪𑀸𑀯𑀁 𑀜𑀢𑁆𑀯𑀸 ‘‘𑀲𑀳𑀸𑀬𑀲𑁆𑀲 𑀚𑀻𑀯𑀺𑀢𑀤𑀸𑀦𑀁 𑀤𑀲𑁆𑀲𑀸𑀫𑀻’’𑀢𑀺 𑀤𑀼𑀩𑁆𑀩𑀮𑁄 𑀯𑀺𑀬 𑀳𑀼𑀢𑁆𑀯𑀸 𑀮𑀼𑀤𑁆𑀤𑀲𑁆𑀲 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀺. 𑀲𑁄 ‘‘𑀤𑀼𑀩𑁆𑀩𑀮𑁄 𑀏𑀲 𑀪𑀯𑀺𑀲𑁆𑀲𑀢𑀺, 𑀫𑀸𑀭𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀲𑀢𑁆𑀢𑀺𑀁 𑀆𑀤𑀸𑀬 𑀅𑀦𑀼𑀩𑀦𑁆𑀥𑀺. 𑀩𑁄𑀥𑀺𑀲𑀢𑁆𑀢𑁄 𑀦𑀸𑀢𑀺𑀤𑀽𑀭𑁂 𑀦𑀸𑀘𑁆𑀘𑀸𑀲𑀦𑁆𑀦𑁂 𑀕𑀘𑁆𑀙𑀦𑁆𑀢𑁄 𑀢𑀁 𑀆𑀤𑀸𑀬 𑀅𑀭𑀜𑁆𑀜𑀁 𑀧𑀸𑀯𑀺𑀲𑀺, 𑀤𑀽𑀭𑀁 𑀕𑀢𑀪𑀸𑀯𑀁 𑀜𑀢𑁆𑀯𑀸 𑀧𑀤𑀁 𑀯𑀜𑁆𑀘𑁂𑀢𑁆𑀯𑀸 𑀅𑀜𑁆𑀜𑁂𑀦 𑀫𑀕𑁆𑀕𑁂𑀦 𑀯𑀸𑀢𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀲𑀺𑀗𑁆𑀕𑁂𑀦 𑀧𑀲𑀺𑀩𑁆𑀩𑀓𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀪𑀽𑀫𑀺𑀬𑀁 𑀧𑀸𑀢𑁂𑀢𑁆𑀯𑀸 𑀨𑀸𑀮𑁂𑀢𑁆𑀯𑀸 𑀓𑀘𑁆𑀙𑀧𑀁 𑀦𑀻𑀳𑀭𑀺. 𑀲𑀢𑀧𑀢𑁆𑀢𑁄𑀧𑀺 𑀭𑀼𑀓𑁆𑀔𑀸 𑀑𑀢𑀭𑀺. 𑀩𑁄𑀥𑀺𑀲𑀢𑁆𑀢𑁄 𑀤𑁆𑀯𑀺𑀦𑁆𑀦𑀫𑁆𑀧𑀺 𑀑𑀯𑀸𑀤𑀁 𑀤𑀤𑀫𑀸𑀦𑁄 ‘‘𑀅𑀳𑀁 𑀢𑀼𑀫𑁆𑀳𑁂 𑀦𑀺𑀲𑁆𑀲𑀸𑀬 𑀚𑀻𑀯𑀺𑀢𑀁 𑀮𑀪𑀺𑀁, 𑀢𑀼𑀫𑁆𑀳𑁂𑀳𑀺 𑀲𑀳𑀸𑀬𑀓𑀲𑁆𑀲 𑀓𑀢𑁆𑀢𑀩𑁆𑀩𑀁 𑀫𑀬𑁆𑀳𑀁 𑀓𑀢𑀁, 𑀇𑀤𑀸𑀦𑀺 𑀮𑀼𑀤𑁆𑀤𑁄 𑀆𑀕𑀦𑁆𑀢𑁆𑀯𑀸 𑀢𑀼𑀫𑁆𑀳𑁂 𑀕𑀡𑁆𑀳𑁂𑀬𑁆𑀬, 𑀢𑀲𑁆𑀫𑀸, 𑀲𑀫𑁆𑀫 𑀲𑀢𑀧𑀢𑁆𑀢, 𑀢𑁆𑀯𑀁 𑀅𑀢𑁆𑀢𑀦𑁄 𑀧𑀼𑀢𑁆𑀢𑀓𑁂 𑀕𑀳𑁂𑀢𑁆𑀯𑀸 𑀅𑀜𑁆𑀜𑀢𑁆𑀣 𑀬𑀸𑀳𑀺, 𑀢𑁆𑀯𑀫𑁆𑀧𑀺, 𑀲𑀫𑁆𑀫 𑀓𑀘𑁆𑀙𑀧, 𑀉𑀤𑀓𑀁 𑀧𑀯𑀺𑀲𑀸𑀳𑀻’’𑀢𑀺 𑀆𑀳. 𑀢𑁂 𑀢𑀣𑀸 𑀅𑀓𑀁𑀲𑀼.

𑀲𑀢𑁆𑀣𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁧𑁨. ‘‘𑀓𑀘𑁆𑀙𑀧𑁄 𑀧𑀸𑀯𑀺𑀲𑀻 𑀯𑀸𑀭𑀺𑀁, 𑀓𑀼𑀭𑀼𑀗𑁆𑀕𑁄 𑀧𑀸𑀯𑀺𑀲𑀻 𑀯𑀦𑀁;

𑀲𑀢𑀧𑀢𑁆𑀢𑁄 𑀤𑀼𑀫𑀕𑁆𑀕𑀫𑁆𑀳𑀸, 𑀤𑀽𑀭𑁂 𑀧𑀼𑀢𑁆𑀢𑁂 𑀅𑀧𑀸𑀦𑀬𑀻’’𑀢𑀺.

𑀢𑀢𑁆𑀣 𑀅𑀧𑀸𑀦𑀬𑀻𑀢𑀺 𑀆𑀦𑀬𑀺, 𑀕𑀳𑁂𑀢𑁆𑀯𑀸 𑀅𑀕𑀫𑀸𑀲𑀻𑀢𑀺 𑀅𑀢𑁆𑀣𑁄;

𑀮𑀼𑀤𑁆𑀤𑁄𑀧𑀺 𑀢𑀁 𑀞𑀸𑀦𑀁 𑀆𑀕𑀦𑁆𑀢𑁆𑀯𑀸 𑀓𑀜𑁆𑀘𑀺 𑀅𑀧𑀲𑁆𑀲𑀺𑀢𑁆𑀯𑀸 𑀙𑀺𑀦𑁆𑀦𑀧𑀲𑀺𑀩𑁆𑀩𑀓𑀁 𑀕𑀳𑁂𑀢𑁆𑀯𑀸 𑀤𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀅𑀢𑁆𑀢𑀦𑁄 𑀕𑁂𑀳𑀁 𑀅𑀕𑀫𑀸𑀲𑀺. 𑀢𑁂 𑀢𑀬𑁄𑀧𑀺 𑀲𑀳𑀸𑀬𑀸 𑀬𑀸𑀯𑀚𑀻𑀯𑀁 𑀯𑀺𑀲𑁆𑀲𑀸𑀲𑀁 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑀸.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀮𑀼𑀤𑁆𑀤𑀓𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀲𑀢𑀧𑀢𑁆𑀢𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀓𑀘𑁆𑀙𑀧𑁄 𑀫𑁄𑀕𑁆𑀕𑀮𑁆𑀮𑀸𑀦𑁄, 𑀓𑀼𑀭𑀼𑀗𑁆𑀕𑀫𑀺𑀕𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑀼𑀭𑀼𑀗𑁆𑀕𑀫𑀺𑀕𑀚𑀸𑀢𑀓𑀯𑀡𑁆𑀡𑀦𑀸 𑀙𑀝𑁆𑀞𑀸.

[𑁨𑁦𑁭] 𑁭. 𑀅𑀲𑁆𑀲𑀓𑀚𑀸𑀢𑀓𑀯𑀡𑁆𑀡𑀦𑀸

𑀅𑀬𑀫𑀲𑁆𑀲𑀓𑀭𑀸𑀚𑁂𑀦𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀧𑀮𑁄𑀪𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀳𑀺 𑀪𑀺𑀓𑁆𑀔𑀼 𑀲𑀢𑁆𑀣𑀸𑀭𑀸 ‘‘𑀲𑀘𑁆𑀘𑀁 𑀓𑀺𑀭, 𑀢𑁆𑀯𑀁 𑀪𑀺𑀓𑁆𑀔𑀼, 𑀉𑀓𑁆𑀓𑀡𑁆𑀞𑀺𑀢𑁄𑀲𑀻’’𑀢𑀺 𑀧𑀼𑀝𑁆𑀞𑁄 ‘‘𑀲𑀘𑁆𑀘’’𑀦𑁆𑀢𑀺 𑀯𑀢𑁆𑀯𑀸 ‘‘𑀓𑁂𑀦 𑀉𑀓𑁆𑀓𑀡𑁆𑀞𑀸𑀧𑀺𑀢𑁄𑀲𑀻’’𑀢𑀺 𑀯𑀼𑀢𑁆𑀢𑁂 ‘‘𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀬𑀸’’𑀢𑀺 𑀆𑀳. 𑀅𑀣 𑀦𑀁 𑀲𑀢𑁆𑀣𑀸 ‘‘𑀦 𑀇𑀤𑀸𑀦𑁂𑀯 𑀢𑀲𑁆𑀲𑀸 𑀪𑀺𑀓𑁆𑀔𑀼 𑀇𑀢𑁆𑀣𑀺𑀬𑀸 𑀢𑀬𑀺 𑀲𑀺𑀦𑁂𑀳𑁄 𑀅𑀢𑁆𑀣𑀺, 𑀧𑀼𑀩𑁆𑀩𑁂𑀧𑀺 𑀢𑁆𑀯𑀁 𑀢𑀁 𑀦𑀺𑀲𑁆𑀲𑀸𑀬 𑀫𑀳𑀸𑀤𑀼𑀓𑁆𑀔𑀁 𑀧𑀢𑁆𑀢𑁄’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀓𑀸𑀲𑀺𑀭𑀝𑁆𑀞𑁂 𑀧𑀸𑀝𑀮𑀺𑀦𑀕𑀭𑁂 𑀅𑀲𑁆𑀲𑀓𑁄 𑀦𑀸𑀫 𑀭𑀸𑀚𑀸 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀲𑁆𑀲 𑀉𑀧𑀭𑀻 𑀦𑀸𑀫 𑀅𑀕𑁆𑀕𑀫𑀳𑁂𑀲𑀻 𑀧𑀺𑀬𑀸 𑀅𑀳𑁄𑀲𑀺 𑀫𑀦𑀸𑀧𑀸 𑀅𑀪𑀺𑀭𑀽𑀧𑀸 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸 𑀅𑀢𑀺𑀓𑁆𑀓𑀦𑁆𑀢𑀸 𑀫𑀸𑀦𑀼𑀲𑀯𑀡𑁆𑀡𑀁, 𑀅𑀧𑀢𑁆𑀢𑀸 𑀤𑀺𑀩𑁆𑀩𑀯𑀡𑁆𑀡𑀁. 𑀲𑀸 𑀓𑀸𑀮𑀫𑀓𑀸𑀲𑀺, 𑀢𑀲𑁆𑀲𑀸 𑀓𑀸𑀮𑀓𑀺𑀭𑀺𑀬𑀸𑀬 𑀭𑀸𑀚𑀸 𑀲𑁄𑀓𑀸𑀪𑀺𑀪𑀽𑀢𑁄 𑀅𑀳𑁄𑀲𑀺 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄. 𑀲𑁄 𑀢𑀲𑁆𑀲𑀸 𑀲𑀭𑀻𑀭𑀁 𑀤𑁄𑀡𑀺𑀬𑀁 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀢𑁂𑀮𑀓𑀮𑀮𑀁 𑀧𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀳𑁂𑀝𑁆𑀞𑀸𑀫𑀜𑁆𑀘𑁂 𑀞𑀧𑀸𑀧𑁂𑀢𑁆𑀯𑀸 𑀦𑀺𑀭𑀸𑀳𑀸𑀭𑁄 𑀭𑁄𑀤𑀫𑀸𑀦𑁄 𑀧𑀭𑀺𑀤𑁂𑀯𑀫𑀸𑀦𑁄 𑀦𑀺𑀧𑀚𑁆𑀚𑀺. 𑀫𑀸𑀢𑀸𑀧𑀺𑀢𑀭𑁄 𑀅𑀯𑀲𑁂𑀲𑀜𑀸𑀢𑀓𑀸 𑀫𑀺𑀢𑁆𑀢𑀸𑀫𑀘𑁆𑀘𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀤𑀬𑁄𑀧𑀺 ‘‘𑀫𑀸 𑀲𑁄𑀘𑀺, 𑀫𑀳𑀸𑀭𑀸𑀚, 𑀅𑀦𑀺𑀘𑁆𑀘𑀸 𑀲𑀗𑁆𑀔𑀸𑀭𑀸’’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑀸 𑀲𑀜𑁆𑀜𑀸𑀧𑁂𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀢𑀲𑁆𑀲 𑀯𑀺𑀮𑀧𑀦𑁆𑀢𑀲𑁆𑀲𑁂𑀯 𑀲𑀢𑁆𑀢 𑀤𑀺𑀯𑀲𑀸 𑀅𑀢𑀺𑀓𑁆𑀓𑀦𑁆𑀢𑀸. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀧𑀜𑁆𑀘𑀸𑀪𑀺𑀜𑁆𑀜𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀻 𑀢𑀸𑀧𑀲𑁄 𑀳𑀼𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀯𑀺𑀳𑀭𑀦𑁆𑀢𑁄 𑀆𑀮𑁄𑀓𑀁 𑀯𑀟𑁆𑀠𑁂𑀢𑁆𑀯𑀸 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀚𑀫𑁆𑀩𑀼𑀤𑀻𑀧𑀁 𑀑𑀮𑁄𑀓𑁂𑀦𑁆𑀢𑁄 𑀢𑀁 𑀭𑀸𑀚𑀸𑀦𑀁 𑀢𑀣𑀸 𑀧𑀭𑀺𑀤𑁂𑀯𑀫𑀸𑀦𑀁 𑀤𑀺𑀲𑁆𑀯𑀸 ‘‘𑀏𑀢𑀲𑁆𑀲 𑀫𑀬𑀸 𑀅𑀯𑀲𑁆𑀲𑀬𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀇𑀤𑁆𑀥𑀸𑀦𑀼𑀪𑀸𑀯𑁂𑀦 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸 𑀭𑀜𑁆𑀜𑁄 𑀉𑀬𑁆𑀬𑀸𑀦𑁂 𑀑𑀢𑀭𑀺𑀢𑁆𑀯𑀸 𑀫𑀗𑁆𑀕𑀮𑀲𑀺𑀮𑀸𑀧𑀝𑁆𑀝𑁂 𑀓𑀜𑁆𑀘𑀦𑀧𑀝𑀺𑀫𑀸 𑀯𑀺𑀬 𑀦𑀺𑀲𑀻𑀤𑀺.

𑀅𑀣𑁂𑀓𑁄 𑀧𑀸𑀝𑀮𑀺𑀦𑀕𑀭𑀯𑀸𑀲𑀻 𑀩𑁆𑀭𑀸𑀳𑁆𑀫𑀡𑀫𑀸𑀡𑀯𑁄 𑀉𑀬𑁆𑀬𑀸𑀦𑀁 𑀕𑀢𑁄 𑀩𑁄𑀥𑀺𑀲𑀢𑁆𑀢𑀁 𑀤𑀺𑀲𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀩𑁄𑀥𑀺𑀲𑀢𑁆𑀢𑁄 𑀢𑁂𑀦 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 ‘‘𑀓𑀺𑀁, 𑀫𑀸𑀡𑀯, 𑀭𑀸𑀚𑀸 𑀥𑀫𑁆𑀫𑀺𑀓𑁄’’𑀢𑀺 𑀧𑀼𑀘𑁆𑀙𑀺. ‘‘𑀆𑀫, 𑀪𑀦𑁆𑀢𑁂, 𑀥𑀫𑁆𑀫𑀺𑀓𑁄 𑀭𑀸𑀚𑀸, 𑀪𑀭𑀺𑀬𑀸 𑀧𑀦𑀲𑁆𑀲 𑀓𑀸𑀮𑀓𑀢𑀸, 𑀲𑁄 𑀢𑀲𑁆𑀲𑀸 𑀲𑀭𑀻𑀭𑀁 𑀤𑁄𑀡𑀺𑀬𑀁 𑀧𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀯𑀺𑀮𑀧𑀫𑀸𑀦𑁄 𑀦𑀺𑀧𑀦𑁆𑀦𑁄, 𑀅𑀚𑁆𑀚 𑀲𑀢𑁆𑀢𑀫𑁄 𑀤𑀺𑀯𑀲𑁄, 𑀓𑀺𑀲𑁆𑀲 𑀢𑀼𑀫𑁆𑀳𑁂 𑀭𑀸𑀚𑀸𑀦𑀁 𑀏𑀯𑀭𑀽𑀧𑀸 𑀤𑀼𑀓𑁆𑀔𑀸 𑀦 𑀫𑁄𑀘𑁂𑀣, 𑀬𑀼𑀢𑁆𑀢𑀁 𑀦𑀼 𑀔𑁄 𑀢𑀼𑀫𑁆𑀳𑀸𑀤𑀺𑀲𑁂𑀲𑀼 𑀲𑀻𑀮𑀯𑀦𑁆𑀢𑁂𑀲𑀼 𑀲𑀁𑀯𑀺𑀚𑁆𑀚𑀫𑀸𑀦𑁂𑀲𑀼 𑀭𑀜𑁆𑀜𑁄 𑀏𑀯𑀭𑀽𑀧𑀁 𑀤𑀼𑀓𑁆𑀔𑀁 𑀅𑀦𑀼𑀪𑀯𑀺𑀢𑀼’’𑀦𑁆𑀢𑀺. ‘‘𑀦 𑀔𑁄 𑀅𑀳𑀁, 𑀫𑀸𑀡𑀯, 𑀭𑀸𑀚𑀸𑀦𑀁 𑀚𑀸𑀦𑀸𑀫𑀺, 𑀲𑀘𑁂 𑀧𑀦 𑀲𑁄 𑀆𑀕𑀦𑁆𑀢𑁆𑀯𑀸 𑀫𑀁 𑀧𑀼𑀘𑁆𑀙𑁂𑀬𑁆𑀬, 𑀅𑀳𑀫𑁂𑀯𑀲𑁆𑀲 𑀢𑀲𑁆𑀲𑀸 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑁂𑀬𑁂𑀯 𑀢𑀁 𑀓𑀣𑀸𑀧𑁂𑀬𑁆𑀬’’𑀦𑁆𑀢𑀺. ‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀬𑀸𑀯 𑀭𑀸𑀚𑀸𑀦𑀁 𑀆𑀦𑁂𑀫𑀺, 𑀢𑀸𑀯 𑀇𑀫𑁂𑀯 𑀦𑀺𑀲𑀻𑀤𑀣𑀸’’𑀢𑀺 𑀫𑀸𑀡𑀯𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀢𑀲𑁆𑀲 𑀤𑀺𑀩𑁆𑀩𑀘𑀓𑁆𑀔𑀼𑀓𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀆𑀳.

𑀭𑀸𑀚𑀸 ‘‘𑀉𑀧𑀭𑀺𑀁 𑀓𑀺𑀭 𑀤𑀝𑁆𑀞𑀼𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀢𑀼𑀝𑁆𑀞𑀫𑀸𑀦𑀲𑁄 𑀭𑀣𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑁋 ‘‘𑀲𑀘𑁆𑀘𑀁 𑀓𑀺𑀭 𑀢𑀼𑀫𑁆𑀳𑁂 𑀤𑁂𑀯𑀺𑀬𑀸 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑀁 𑀚𑀸𑀦𑀸𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀆𑀫, 𑀫𑀳𑀸𑀭𑀸𑀚𑀸’’𑀢𑀺. ‘‘𑀓𑀢𑁆𑀣 𑀦𑀺𑀩𑁆𑀩𑀢𑁆𑀢𑀸’’𑀢𑀺? ‘‘𑀲𑀸 𑀔𑁄, 𑀫𑀳𑀸𑀭𑀸𑀚, 𑀭𑀽𑀧𑀲𑁆𑀫𑀺𑀁𑀬𑁂𑀯 𑀫𑀢𑁆𑀢𑀸 𑀧𑀫𑀸𑀤𑀫𑀸𑀕𑀫𑁆𑀫 𑀓𑀮𑁆𑀬𑀸𑀡𑀓𑀫𑁆𑀫𑀁 𑀅𑀓𑀢𑁆𑀯𑀸 𑀇𑀫𑀲𑁆𑀫𑀺𑀁𑀬𑁂𑀯 𑀉𑀬𑁆𑀬𑀸𑀦𑁂 𑀕𑁄𑀫𑀬𑀧𑀸𑀡𑀓𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀸’’𑀢𑀺. ‘‘𑀦𑀸𑀳𑀁 𑀲𑀤𑁆𑀤𑀳𑀸𑀫𑀻’’𑀢𑀺. ‘‘𑀢𑁂𑀦 𑀳𑀺 𑀢𑁂 𑀤𑀲𑁆𑀲𑁂𑀢𑁆𑀯𑀸 𑀓𑀣𑀸𑀧𑁂𑀫𑀻’’𑀢𑀺. ‘‘𑀲𑀸𑀥𑀼 𑀓𑀣𑀸𑀧𑁂𑀣𑀸’’𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 ‘‘𑀉𑀪𑁄𑀧𑀺 𑀕𑁄𑀫𑀬𑀧𑀺𑀡𑁆𑀟𑀁 𑀯𑀝𑁆𑀝𑀬𑀫𑀸𑀦𑀸 𑀭𑀜𑁆𑀜𑁄 𑀧𑀼𑀭𑀢𑁄 𑀆𑀕𑀘𑁆𑀙𑀦𑁆𑀢𑀽’’𑀢𑀺 𑀢𑁂𑀲𑀁 𑀆𑀕𑀫𑀦𑀁 𑀅𑀓𑀸𑀲𑀺. 𑀢𑁂 𑀢𑀣𑁂𑀯 𑀆𑀕𑀫𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀬𑀁 𑀢𑁂, 𑀫𑀳𑀸𑀭𑀸𑀚, 𑀉𑀧𑀭𑀺𑀤𑁂𑀯𑀻, 𑀢𑀁 𑀚𑀳𑀺𑀢𑁆𑀯𑀸 𑀕𑁄𑀫𑀬𑀧𑀸𑀡𑀓𑀲𑁆𑀲 𑀧𑀘𑁆𑀙𑀢𑁄 𑀧𑀘𑁆𑀙𑀢𑁄 𑀕𑀘𑁆𑀙𑀢𑀺, 𑀧𑀲𑁆𑀲𑀣 𑀦’’𑀦𑁆𑀢𑀺 𑀆𑀳. 𑀪𑀦𑁆𑀢𑁂 ‘‘‘𑀉𑀧𑀭𑀻 𑀦𑀸𑀫 𑀕𑁄𑀫𑀬𑀧𑀸𑀡𑀓𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀻’𑀢𑀺 𑀦 𑀲𑀤𑁆𑀤𑀳𑀸𑀫𑀳’’𑀦𑁆𑀢𑀺. ‘‘𑀓𑀣𑀸𑀧𑁂𑀫𑀺 𑀦𑀁, 𑀫𑀳𑀸𑀭𑀸𑀚𑀸’’𑀢𑀺. ‘‘𑀓𑀣𑀸𑀧𑁂𑀣, 𑀪𑀦𑁆𑀢𑁂’’𑀢𑀺.

𑀩𑁄𑀥𑀺𑀲𑀢𑁆𑀢𑁄 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀢𑀁 𑀓𑀣𑀸𑀧𑁂𑀦𑁆𑀢𑁄 ‘‘𑀉𑀧𑀭𑀻’’𑀢𑀺 𑀆𑀳. 𑀲𑀸 𑀫𑀦𑀼𑀲𑁆𑀲𑀪𑀸𑀲𑀸𑀬 ‘‘𑀓𑀺𑀁, 𑀪𑀦𑁆𑀢𑁂’’𑀢𑀺 𑀆𑀳. ‘‘𑀢𑁆𑀯𑀁 𑀅𑀢𑀻𑀢𑀪𑀯𑁂 𑀓𑀸 𑀦𑀸𑀫 𑀅𑀳𑁄𑀲𑀻’’𑀢𑀺? ‘‘𑀪𑀦𑁆𑀢𑁂, 𑀅𑀲𑁆𑀲𑀓𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀻 𑀉𑀧𑀭𑀻 𑀦𑀸𑀫 𑀅𑀳𑁄𑀲𑀺’’𑀦𑁆𑀢𑀺. ‘‘𑀓𑀺𑀁 𑀧𑀦 𑀢𑁂 𑀇𑀤𑀸𑀦𑀺 𑀅𑀲𑁆𑀲𑀓𑀭𑀸𑀚𑀸 𑀧𑀺𑀬𑁄, 𑀉𑀤𑀸𑀳𑀼 𑀕𑁄𑀫𑀬𑀧𑀸𑀡𑀓𑁄’’𑀢𑀺? ‘‘𑀪𑀦𑁆𑀢𑁂, 𑀲𑁄 𑀫𑀬𑁆𑀳𑀁 𑀧𑀼𑀭𑀺𑀫𑀚𑀸𑀢𑀺𑀬𑀸 𑀲𑀸𑀫𑀺𑀓𑁄, 𑀢𑀤𑀸 𑀅𑀳𑀁 𑀇𑀫𑀲𑁆𑀫𑀺𑀁 𑀉𑀬𑁆𑀬𑀸𑀦𑁂 𑀢𑁂𑀦 𑀲𑀤𑁆𑀥𑀺𑀁 𑀭𑀽𑀧𑀲𑀤𑁆𑀤𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑁂 𑀅𑀦𑀼𑀪𑀯𑀫𑀸𑀦𑀸 𑀯𑀺𑀘𑀭𑀺𑀁. 𑀇𑀤𑀸𑀦𑀺 𑀧𑀦 𑀫𑁂 𑀪𑀯𑀲𑀗𑁆𑀔𑁂𑀧𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑁄 𑀓𑀺𑀁 𑀳𑁄𑀢𑀺, 𑀅𑀳𑀜𑁆𑀳𑀺 𑀇𑀤𑀸𑀦𑀺 𑀅𑀲𑁆𑀲𑀓𑀭𑀸𑀚𑀸𑀦𑀁 𑀫𑀸𑀭𑁂𑀢𑁆𑀯𑀸 𑀢𑀲𑁆𑀲 𑀕𑀮𑀮𑁄𑀳𑀺𑀢𑁂𑀦 𑀫𑀬𑁆𑀳𑀁 𑀲𑀸𑀫𑀺𑀓𑀲𑁆𑀲 𑀕𑁄𑀫𑀬𑀧𑀸𑀡𑀓𑀲𑁆𑀲 𑀧𑀸𑀤𑁂 𑀫𑀓𑁆𑀔𑁂𑀬𑁆𑀬’’𑀦𑁆𑀢𑀺 𑀯𑀢𑁆𑀯𑀸 𑀧𑀭𑀺𑀲𑀫𑀚𑁆𑀛𑁂 𑀫𑀦𑀼𑀲𑁆𑀲𑀪𑀸𑀲𑀸𑀬 𑀇𑀫𑀸 𑀕𑀸𑀣𑀸 𑀅𑀯𑁄𑀘 𑁋

𑁧𑁧𑁩. ‘‘𑀅𑀬𑀫𑀲𑁆𑀲𑀓𑀭𑀸𑀚𑁂𑀦, 𑀤𑁂𑀲𑁄 𑀯𑀺𑀘𑀭𑀺𑀢𑁄 𑀫𑀬𑀸;

𑀅𑀦𑀼𑀓𑀸𑀫𑀬 𑀓𑀸𑀫𑁂𑀦, 𑀧𑀺𑀬𑁂𑀦 𑀧𑀢𑀺𑀦𑀸 𑀲𑀳.

𑁧𑁧𑁪. ‘‘𑀦𑀯𑁂𑀦 𑀲𑀼𑀔𑀤𑀼𑀓𑁆𑀔𑁂𑀦, 𑀧𑁄𑀭𑀸𑀡𑀁 𑀅𑀧𑀺𑀥𑀻𑀬𑀢𑀺;

𑀢𑀲𑁆𑀫𑀸 𑀅𑀲𑁆𑀲𑀓𑀭𑀜𑁆𑀜𑀸𑀯, 𑀓𑀻𑀝𑁄 𑀧𑀺𑀬𑀢𑀭𑁄 𑀫𑀫𑀸’’𑀢𑀺.

𑀢𑀢𑁆𑀣 𑀅𑀬𑀫𑀲𑁆𑀲𑀓𑀭𑀸𑀚𑁂𑀦, 𑀤𑁂𑀲𑁄 𑀯𑀺𑀘𑀭𑀺𑀢𑁄 𑀫𑀬𑀸𑀢𑀺 𑀅𑀬𑀁 𑀭𑀫𑀡𑀻𑀬𑁄 𑀉𑀬𑁆𑀬𑀸𑀦𑀧𑀤𑁂𑀲𑁄 𑀧𑀼𑀩𑁆𑀩𑁂 𑀫𑀬𑀸 𑀅𑀲𑁆𑀲𑀓𑀭𑀸𑀚𑁂𑀦 𑀲𑀤𑁆𑀥𑀺𑀁 𑀯𑀺𑀘𑀭𑀺𑀢𑁄. 𑀅𑀦𑀼𑀓𑀸𑀫𑀬 𑀓𑀸𑀫𑁂𑀦𑀸𑀢𑀺 𑀅𑀦𑀽𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀫𑀬𑀸 𑀢𑀁 𑀓𑀸𑀫𑀬𑀫𑀸𑀦𑀸𑀬 𑀢𑁂𑀦 𑀫𑀁 𑀓𑀸𑀫𑀬𑀫𑀸𑀦𑁂𑀦 𑀲𑀳𑀸𑀢𑀺 𑀅𑀢𑁆𑀣𑁄. 𑀧𑀺𑀬𑁂𑀦𑀸𑀢𑀺 𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀧𑀺𑀬𑁂𑀦. 𑀦𑀯𑁂𑀦 𑀲𑀼𑀔𑀤𑀼𑀓𑁆𑀔𑁂𑀦, 𑀧𑁄𑀭𑀸𑀡𑀁 𑀅𑀧𑀺𑀥𑀻𑀬𑀢𑀻𑀢𑀺, 𑀪𑀦𑁆𑀢𑁂, 𑀦𑀯𑁂𑀦 𑀳𑀺 𑀲𑀼𑀔𑁂𑀦 𑀧𑁄𑀭𑀸𑀡𑀁 𑀲𑀼𑀔𑀁, 𑀦𑀯𑁂𑀦 𑀘 𑀤𑀼𑀓𑁆𑀔𑁂𑀦 𑀧𑁄𑀭𑀸𑀡𑀁 𑀤𑀼𑀓𑁆𑀔𑀁 𑀧𑀺𑀥𑀻𑀬𑀢𑀺 𑀧𑀝𑀺𑀘𑁆𑀙𑀸𑀤𑀻𑀬𑀢𑀺, 𑀏𑀲𑀸 𑀮𑁄𑀓𑀲𑁆𑀲 𑀥𑀫𑁆𑀫𑀢𑀸𑀢𑀺 𑀤𑀻𑀧𑁂𑀢𑀺. 𑀢𑀲𑁆𑀫𑀸 𑀅𑀲𑁆𑀲𑀓𑀭𑀜𑁆𑀜𑀸𑀯, 𑀓𑀻𑀝𑁄 𑀧𑀺𑀬𑀢𑀭𑁄 𑀫𑀫𑀸𑀢𑀺 𑀬𑀲𑁆𑀫𑀸 𑀦𑀯𑁂𑀦 𑀧𑁄𑀭𑀸𑀡𑀁 𑀧𑀺𑀥𑀻𑀬𑀢𑀺, 𑀢𑀲𑁆𑀫𑀸 𑀫𑀫 𑀅𑀲𑁆𑀲𑀓𑀭𑀸𑀚𑀢𑁄 𑀲𑀢𑀕𑀼𑀡𑁂𑀦 𑀲𑀳𑀲𑁆𑀲𑀕𑀼𑀡𑁂𑀦 𑀓𑀻𑀝𑁄𑀯 𑀧𑀺𑀬𑀢𑀭𑁄𑀢𑀺.

𑀢𑀁 𑀲𑀼𑀢𑁆𑀯𑀸 𑀅𑀲𑁆𑀲𑀓𑀭𑀸𑀚𑀸 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑀼𑀢𑁆𑀯𑀸 𑀢𑀢𑁆𑀣 𑀞𑀺𑀢𑁄𑀯 𑀓𑀼𑀡𑀧𑀁 𑀦𑀻𑀳𑀭𑀸𑀧𑁂𑀢𑁆𑀯𑀸 𑀲𑀻𑀲𑀁 𑀦𑁆𑀳𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀅𑀜𑁆𑀜𑀁 𑀅𑀕𑁆𑀕𑀫𑀳𑁂𑀲𑀺𑀁 𑀓𑀢𑁆𑀯𑀸 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀭𑀸𑀚𑀸𑀦𑀁 𑀑𑀯𑀤𑀺𑀢𑁆𑀯𑀸 𑀦𑀺𑀲𑁆𑀲𑁄𑀓𑀁 𑀓𑀢𑁆𑀯𑀸 𑀳𑀺𑀫𑀯𑀦𑁆𑀢𑀫𑁂𑀯 𑀅𑀕𑀫𑀸𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. ‘‘𑀢𑀤𑀸 𑀉𑀧𑀭𑀻 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸 𑀅𑀳𑁄𑀲𑀺, 𑀅𑀲𑁆𑀲𑀓𑀭𑀸𑀚𑀸 𑀉𑀓𑁆𑀓𑀡𑁆𑀞𑀺𑀢𑁄 𑀪𑀺𑀓𑁆𑀔𑀼, 𑀫𑀸𑀡𑀯𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀢𑀸𑀧𑀲𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀅𑀲𑁆𑀲𑀓𑀚𑀸𑀢𑀓𑀯𑀡𑁆𑀡𑀦𑀸 𑀲𑀢𑁆𑀢𑀫𑀸.

[𑁨𑁦𑁮] 𑁮. 𑀲𑀼𑀲𑀼𑀫𑀸𑀭𑀚𑀸𑀢𑀓𑀯𑀡𑁆𑀡𑀦𑀸

𑀅𑀮𑀁 𑀫𑁂𑀢𑁂𑀳𑀺 𑀅𑀫𑁆𑀩𑁂𑀳𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁂𑀯𑀤𑀢𑁆𑀢𑀲𑁆𑀲 𑀯𑀥𑀸𑀬 𑀧𑀭𑀺𑀲𑀓𑁆𑀓𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀤𑀸 𑀳𑀺 𑀲𑀢𑁆𑀣𑀸 ‘‘𑀤𑁂𑀯𑀤𑀢𑁆𑀢𑁄 𑀯𑀥𑀸𑀬 𑀧𑀭𑀺𑀲𑀓𑁆𑀓𑀢𑀻’’𑀢𑀺 𑀲𑀼𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀤𑁂𑀯𑀤𑀢𑁆𑀢𑁄 𑀫𑀬𑁆𑀳𑀁 𑀯𑀥𑀸𑀬 𑀧𑀭𑀺𑀲𑀓𑁆𑀓𑀢𑀺, 𑀧𑀼𑀩𑁆𑀩𑁂𑀧𑀺 𑀧𑀭𑀺𑀲𑀓𑁆𑀓𑀺𑀬𑁂𑀯, 𑀲𑀦𑁆𑀢𑀸𑀲𑀫𑀢𑁆𑀢𑀫𑁆𑀧𑀺 𑀧𑀦 𑀓𑀸𑀢𑀼𑀁 𑀦 𑀲𑀓𑁆𑀔𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀩𑁄𑀥𑀺𑀲𑀢𑁆𑀢𑁄 𑀓𑀧𑀺𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀦𑀸𑀕𑀩𑀮𑁄 𑀣𑀸𑀫𑀲𑀫𑁆𑀧𑀦𑁆𑀦𑁄 𑀫𑀳𑀸𑀲𑀭𑀻𑀭𑁄 𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸 𑀕𑀗𑁆𑀕𑀸𑀦𑀺𑀯𑀢𑁆𑀢𑀦𑁂 𑀅𑀭𑀜𑁆𑀜𑀸𑀬𑀢𑀦𑁂 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀢𑀤𑀸 𑀕𑀗𑁆𑀕𑀸𑀬 𑀏𑀓𑁄 𑀲𑀼𑀲𑀼𑀫𑀸𑀭𑁄 𑀯𑀲𑀺. 𑀅𑀣𑀲𑁆𑀲 𑀪𑀭𑀺𑀬𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀭𑀻𑀭𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀳𑀤𑀬𑀫𑀁𑀲𑁂 𑀤𑁄𑀳𑀴𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀲𑀼𑀲𑀼𑀫𑀸𑀭𑀁 𑀆𑀳 𑁋 ‘‘𑀅𑀳𑀁 𑀲𑀸𑀫𑀺, 𑀏𑀢𑀲𑁆𑀲 𑀓𑀧𑀺𑀭𑀸𑀚𑀲𑁆𑀲 𑀳𑀤𑀬𑀫𑀁𑀲𑀁 𑀔𑀸𑀤𑀺𑀢𑀼𑀓𑀸𑀫𑀸’’𑀢𑀺. ‘‘𑀪𑀤𑁆𑀤𑁂, 𑀫𑀬𑀁 𑀚𑀮𑀕𑁄𑀘𑀭𑀸, 𑀏𑀲𑁄 𑀣𑀮𑀕𑁄𑀘𑀭𑁄, 𑀓𑀺𑀦𑁆𑀢𑀺 𑀦𑀁 𑀕𑀡𑁆𑀳𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀸𑀫𑀸’’𑀢𑀺. ‘‘𑀬𑁂𑀦 𑀓𑁂𑀦𑀘𑀺 𑀉𑀧𑀸𑀬𑁂𑀦 𑀕𑀡𑁆𑀳, 𑀲𑀘𑁂 𑀦 𑀮𑀪𑀺𑀲𑁆𑀲𑀸𑀫𑀺, 𑀫𑀭𑀺𑀲𑁆𑀲𑀸𑀫𑀻’’𑀢𑀺. ‘‘𑀢𑁂𑀦 𑀳𑀺 𑀫𑀸 𑀲𑁄𑀘𑀺, 𑀅𑀢𑁆𑀣𑁂𑀓𑁄 𑀉𑀧𑀸𑀬𑁄, 𑀔𑀸𑀤𑀸𑀧𑁂𑀲𑁆𑀲𑀸𑀫𑀺 𑀢𑀁 𑀢𑀲𑁆𑀲 𑀳𑀤𑀬𑀫𑀁𑀲’’𑀦𑁆𑀢𑀺 𑀲𑀼𑀲𑀼𑀫𑀸𑀭𑀺𑀁 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀕𑀗𑁆𑀕𑀸𑀬 𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀕𑀗𑁆𑀕𑀸𑀢𑀻𑀭𑁂 𑀦𑀺𑀲𑀺𑀦𑁆𑀦𑀓𑀸𑀮𑁂 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀯𑀸𑀦𑀭𑀺𑀦𑁆𑀤, 𑀇𑀫𑀲𑁆𑀫𑀺𑀁 𑀧𑀤𑁂𑀲𑁂 𑀓𑀲𑀸𑀬𑀨𑀮𑀸𑀦𑀺 𑀔𑀸𑀤𑀦𑁆𑀢𑁄 𑀓𑀺𑀁 𑀢𑁆𑀯𑀁 𑀦𑀺𑀯𑀺𑀝𑁆𑀞𑀝𑁆𑀞𑀸𑀦𑁂𑀬𑁂𑀯 𑀘𑀭𑀲𑀺, 𑀧𑀸𑀭𑀕𑀗𑁆𑀕𑀸𑀬 𑀅𑀫𑁆𑀩𑀮𑀩𑀼𑀚𑀸𑀤𑀻𑀦𑀁 𑀫𑀥𑀼𑀭𑀨𑀮𑀸𑀦𑀁 𑀅𑀦𑁆𑀢𑁄 𑀦𑀢𑁆𑀣𑀺, 𑀓𑀺𑀁 𑀢𑁂 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀨𑀮𑀸𑀨𑀮𑀁 𑀔𑀸𑀤𑀺𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺? ‘‘𑀓𑀼𑀫𑁆𑀪𑀻𑀮𑀭𑀸𑀚, 𑀕𑀗𑁆𑀕𑀸 𑀫𑀳𑁄𑀤𑀓𑀸 𑀯𑀺𑀢𑁆𑀣𑀺𑀡𑁆𑀡𑀸, 𑀓𑀣𑀁 𑀢𑀢𑁆𑀣 𑀕𑀫𑀺𑀲𑁆𑀲𑀸𑀫𑀻’’𑀢𑀺? ‘‘𑀲𑀘𑁂 𑀇𑀘𑁆𑀙𑀲𑀺, 𑀅𑀳𑀁 𑀢𑀁 𑀫𑀫 𑀧𑀺𑀝𑁆𑀞𑀺𑀁 𑀆𑀭𑁄𑀧𑁂𑀢𑁆𑀯𑀸 𑀦𑁂𑀲𑁆𑀲𑀸𑀫𑀻’’𑀢𑀺. 𑀲𑁄 𑀲𑀤𑁆𑀤𑀳𑀺𑀢𑁆𑀯𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. ‘‘𑀢𑁂𑀦 𑀳𑀺 𑀏𑀳𑀺 𑀧𑀺𑀝𑁆𑀞𑀺𑀁 𑀫𑁂 𑀅𑀪𑀺𑀭𑀽𑀳𑀸’’𑀢𑀺 𑀘 𑀯𑀼𑀢𑁆𑀢𑁂 𑀢𑀁 𑀅𑀪𑀺𑀭𑀼𑀳𑀺. 𑀲𑀼𑀲𑀼𑀫𑀸𑀭𑁄 𑀣𑁄𑀓𑀁 𑀦𑁂𑀢𑁆𑀯𑀸 𑀉𑀤𑀓𑁂 𑀑𑀲𑀻𑀤𑀸𑀧𑁂𑀲𑀺.

𑀩𑁄𑀥𑀺𑀲𑀢𑁆𑀢𑁄 ‘‘𑀲𑀫𑁆𑀫, 𑀉𑀤𑀓𑁂 𑀫𑀁 𑀑𑀲𑀻𑀤𑀸𑀧𑁂𑀲𑀺, 𑀓𑀺𑀁 𑀦𑀼 𑀔𑁄 𑀏𑀢’’𑀦𑁆𑀢𑀺 𑀆𑀳. ‘‘𑀦𑀸𑀳𑀁 𑀢𑀁 𑀥𑀫𑁆𑀫𑀲𑀼𑀥𑀫𑁆𑀫𑀢𑀸𑀬 𑀕𑀳𑁂𑀢𑁆𑀯𑀸 𑀕𑀘𑁆𑀙𑀸𑀫𑀺, 𑀪𑀭𑀺𑀬𑀸𑀬 𑀧𑀦 𑀫𑁂 𑀢𑀯 𑀳𑀤𑀬𑀫𑀁𑀲𑁂 𑀤𑁄𑀳𑀴𑁄 𑀉𑀧𑁆𑀧𑀦𑁆𑀦𑁄, 𑀢𑀫𑀳𑀁 𑀢𑀯 𑀳𑀤𑀬𑀁 𑀔𑀸𑀤𑀸𑀧𑁂𑀢𑀼𑀓𑀸𑀫𑁄’’𑀢𑀺. ‘‘𑀲𑀫𑁆𑀫, 𑀓𑀣𑁂𑀦𑁆𑀢𑁂𑀦 𑀢𑁂 𑀲𑀼𑀦𑁆𑀤𑀭𑀁 𑀓𑀢𑀁. 𑀲𑀘𑁂 𑀳𑀺 𑀅𑀫𑁆𑀳𑀸𑀓𑀁 𑀉𑀤𑀭𑁂 𑀳𑀤𑀬𑀁 𑀪𑀯𑁂𑀬𑁆𑀬, 𑀲𑀸𑀔𑀕𑁆𑀕𑁂𑀲𑀼 𑀘𑀭𑀦𑁆𑀢𑀸𑀦𑀁 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀁 𑀪𑀯𑁂𑀬𑁆𑀬𑀸’’𑀢𑀺. ‘‘𑀓𑀳𑀁 𑀧𑀦 𑀢𑀼𑀫𑁆𑀳𑁂 𑀞𑀧𑁂𑀣𑀸’’𑀢𑀺? 𑀩𑁄𑀥𑀺𑀲𑀢𑁆𑀢𑁄 𑀅𑀯𑀺𑀤𑀽𑀭𑁂 𑀏𑀓𑀁 𑀉𑀤𑀼𑀫𑁆𑀩𑀭𑀁 𑀧𑀓𑁆𑀓𑀨𑀮𑀧𑀺𑀡𑁆𑀟𑀺𑀲𑀜𑁆𑀙𑀦𑁆𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀲𑁆𑀲𑁂𑀢𑀸𑀦𑀺 𑀅𑀫𑁆𑀳𑀸𑀓𑀁 𑀳𑀤𑀬𑀸𑀦𑀺 𑀏𑀢𑀲𑁆𑀫𑀺𑀁 𑀉𑀤𑀼𑀫𑁆𑀩𑀭𑁂 𑀑𑀮𑀫𑁆𑀩𑀦𑁆𑀢𑀻’’𑀢𑀺 𑀆𑀳. ‘‘𑀲𑀘𑁂 𑀫𑁂 𑀳𑀤𑀬𑀁 𑀤𑀲𑁆𑀲𑀲𑀺, 𑀅𑀳𑀁 𑀢𑀁 𑀦 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺. ‘‘𑀢𑁂𑀦 𑀳𑀺 𑀫𑀁 𑀏𑀢𑁆𑀣 𑀦𑁂𑀳𑀺, 𑀅𑀳𑀁 𑀢𑁂 𑀭𑀼𑀓𑁆𑀔𑁂 𑀑𑀮𑀫𑁆𑀩𑀦𑁆𑀢𑀁 𑀤𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑀁 𑀆𑀤𑀸𑀬 𑀢𑀢𑁆𑀣 𑀅𑀕𑀫𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀧𑀺𑀝𑁆𑀞𑀺𑀢𑁄 𑀉𑀧𑁆𑀧𑀢𑀺𑀢𑁆𑀯𑀸 𑀉𑀤𑀼𑀫𑁆𑀩𑀭𑀭𑀼𑀓𑁆𑀔𑁂 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀲𑀫𑁆𑀫, 𑀩𑀸𑀮 𑀲𑀼𑀲𑀼𑀫𑀸𑀭, ‘𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀳𑀤𑀬𑀁 𑀦𑀸𑀫 𑀭𑀼𑀓𑁆𑀔𑀕𑁆𑀕𑁂 𑀳𑁄𑀢𑀻’𑀢𑀺 𑀲𑀜𑁆𑀜𑀻 𑀅𑀳𑁄𑀲𑀺, 𑀩𑀸𑀮𑁄𑀲𑀺, 𑀅𑀳𑀁 𑀢𑀁 𑀯𑀜𑁆𑀘𑁂𑀲𑀺𑀁, 𑀢𑀯 𑀨𑀮𑀸𑀨𑀮𑀁 𑀢𑀯𑁂𑀯 𑀳𑁄𑀢𑀼, 𑀲𑀭𑀻𑀭𑀫𑁂𑀯 𑀧𑀦 𑀢𑁂 𑀫𑀳𑀦𑁆𑀢𑀁 𑀧𑀜𑁆𑀜𑀸 𑀧𑀦 𑀦𑀢𑁆𑀣𑀻’’𑀢𑀺 𑀯𑀢𑁆𑀯𑀸 𑀇𑀫𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀅𑀯𑁄𑀘 𑁋

𑁧𑁧𑁫. ‘‘𑀅𑀮𑀁 𑀫𑁂𑀢𑁂𑀳𑀺 𑀅𑀫𑁆𑀩𑁂𑀳𑀺, 𑀚𑀫𑁆𑀩𑀽𑀳𑀺 𑀧𑀦𑀲𑁂𑀳𑀺 𑀘;

𑀬𑀸𑀦𑀺 𑀧𑀸𑀭𑀁 𑀲𑀫𑀼𑀤𑁆𑀤𑀲𑁆𑀲, 𑀯𑀭𑀁 𑀫𑀬𑁆𑀳𑀁 𑀉𑀤𑀼𑀫𑁆𑀩𑀭𑁄.

𑁧𑁧𑁬. ‘‘𑀫𑀳𑀢𑀻 𑀯𑀢 𑀢𑁂 𑀩𑁄𑀦𑁆𑀤𑀺, 𑀦 𑀘 𑀧𑀜𑁆𑀜𑀸 𑀢𑀤𑀽𑀧𑀺𑀓𑀸;

𑀲𑀼𑀲𑀼𑀫𑀸𑀭 𑀯𑀜𑁆𑀘𑀺𑀢𑁄 𑀫𑁂𑀲𑀺, 𑀕𑀘𑁆𑀙 𑀤𑀸𑀦𑀺 𑀬𑀣𑀸𑀲𑀼𑀔’’𑀦𑁆𑀢𑀺.

𑀢𑀢𑁆𑀣 𑀅𑀮𑀁 𑀫𑁂𑀢𑁂𑀳𑀻𑀢𑀺 𑀬𑀸𑀦𑀺 𑀢𑀬𑀸 𑀤𑀻𑀧𑀓𑁂 𑀦𑀺𑀤𑁆𑀤𑀺𑀝𑁆𑀞𑀸𑀦𑀺, 𑀏𑀢𑁂𑀳𑀺 𑀫𑀬𑁆𑀳𑀁 𑀅𑀮𑀁. 𑀯𑀭𑀁 𑀫𑀬𑁆𑀳𑀁 𑀉𑀤𑀼𑀫𑁆𑀩𑀭𑁄𑀢𑀺 𑀫𑀬𑁆𑀳𑀁 𑀅𑀬𑀫𑁂𑀯 𑀉𑀤𑀼𑀫𑁆𑀩𑀭𑀭𑀼𑀓𑁆𑀔𑁄 𑀯𑀭𑀁. 𑀩𑁄𑀦𑁆𑀤𑀻𑀢𑀺 𑀲𑀭𑀻𑀭𑀁. 𑀢𑀤𑀽𑀧𑀺𑀓𑀸𑀢𑀺 𑀧𑀜𑁆𑀜𑀸 𑀧𑀦 𑀢𑁂 𑀢𑀤𑀽𑀧𑀺𑀓𑀸 𑀢𑀲𑁆𑀲 𑀲𑀭𑀻𑀭𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀸 𑀦𑀢𑁆𑀣𑀺. 𑀕𑀘𑁆𑀙 𑀤𑀸𑀦𑀺 𑀬𑀣𑀸𑀲𑀼𑀔𑀦𑁆𑀢𑀺 𑀇𑀤𑀸𑀦𑀺 𑀬𑀣𑀸𑀲𑀼𑀔𑀁 𑀕𑀘𑁆𑀙, 𑀦𑀢𑁆𑀣𑀺 𑀢𑁂 𑀳𑀤𑀬𑀫𑀁𑀲𑀕𑀳𑀡𑀽𑀧𑀸𑀬𑁄𑀢𑀺 𑀅𑀢𑁆𑀣𑁄. 𑀲𑀼𑀲𑀼𑀫𑀸𑀭𑁄 𑀲𑀳𑀲𑁆𑀲𑀁 𑀧𑀭𑀸𑀚𑀺𑀢𑁄 𑀯𑀺𑀬 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀧𑀚𑁆𑀛𑀸𑀬𑀦𑁆𑀢𑁄𑀯 𑀅𑀢𑁆𑀢𑀦𑁄 𑀦𑀺𑀯𑀸𑀲𑀝𑁆𑀞𑀸𑀦𑀫𑁂𑀯 𑀕𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀲𑀼𑀲𑀼𑀫𑀸𑀭𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀲𑀼𑀲𑀼𑀫𑀸𑀭𑀻 𑀘𑀺𑀜𑁆𑀘𑀫𑀸𑀡𑀯𑀺𑀓𑀸, 𑀓𑀧𑀺𑀭𑀸𑀚𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀼𑀲𑀼𑀫𑀸𑀭𑀚𑀸𑀢𑀓𑀯𑀡𑁆𑀡𑀦𑀸 𑀅𑀝𑁆𑀞𑀫𑀸.

[𑁨𑁦𑁯] 𑁯. 𑀓𑀼𑀓𑁆𑀓𑀼𑀝𑀚𑀸𑀢𑀓𑀯𑀡𑁆𑀡𑀦𑀸

𑀤𑀺𑀝𑁆𑀞𑀸 𑀫𑀬𑀸 𑀯𑀦𑁂 𑀭𑀼𑀓𑁆𑀔𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀤𑀳𑀭𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭 𑀅𑀢𑁆𑀢𑀦𑁄 𑀲𑀭𑀻𑀭𑀲𑁆𑀲 𑀕𑀼𑀢𑁆𑀢𑀺𑀓𑀫𑁆𑀫𑁂 𑀙𑁂𑀓𑁄 𑀅𑀳𑁄𑀲𑀺. ‘‘𑀲𑀭𑀻𑀭𑀲𑁆𑀲 𑀫𑁂 𑀦 𑀲𑀼𑀔𑀁 𑀪𑀯𑁂𑀬𑁆𑀬𑀸’’𑀢𑀺 𑀪𑀬𑁂𑀦 𑀅𑀢𑀺𑀲𑀻𑀢𑀁 𑀅𑀘𑁆𑀘𑀼𑀡𑁆𑀳𑀁 𑀧𑀭𑀺𑀪𑁄𑀕𑀁 𑀦 𑀓𑀭𑁄𑀢𑀺, ‘‘𑀲𑀻𑀢𑀼𑀡𑁆𑀳𑁂𑀳𑀺 𑀲𑀭𑀻𑀭𑀁 𑀓𑀺𑀮𑀫𑁂𑀬𑁆𑀬𑀸’’𑀢𑀺 𑀪𑀬𑁂𑀦 𑀩𑀳𑀺 𑀦 𑀦𑀺𑀓𑁆𑀔𑀫𑀢𑀺, 𑀅𑀢𑀺𑀓𑀺𑀮𑀺𑀦𑁆𑀦𑀉𑀢𑁆𑀢𑀡𑁆𑀟𑀼𑀮𑀸𑀤𑀻𑀦𑀺 𑀦 𑀪𑀼𑀜𑁆𑀚𑀢𑀺. 𑀢𑀲𑁆𑀲 𑀲𑀸 𑀲𑀭𑀻𑀭𑀕𑀼𑀢𑁆𑀢𑀺𑀓𑀼𑀲𑀮𑀢𑀸 𑀲𑀗𑁆𑀖𑀫𑀚𑁆𑀛𑁂 𑀧𑀸𑀓𑀝𑀸 𑀚𑀸𑀢𑀸. 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀆𑀯𑀼𑀲𑁄, 𑀅𑀲𑀼𑀓𑁄 𑀤𑀳𑀭𑁄 𑀓𑀺𑀭 𑀪𑀺𑀓𑁆𑀔𑀼 𑀲𑀭𑀻𑀭𑀕𑀼𑀢𑁆𑀢𑀺𑀓𑀫𑁆𑀫𑁂 𑀙𑁂𑀓𑁄’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀅𑀬𑀁 𑀤𑀳𑀭𑁄 𑀇𑀤𑀸𑀦𑁂𑀯 𑀲𑀭𑀻𑀭𑀕𑀼𑀢𑁆𑀢𑀺𑀓𑀫𑁆𑀫𑁂 𑀙𑁂𑀓𑁄, 𑀧𑀼𑀩𑁆𑀩𑁂𑀧𑀺 𑀙𑁂𑀓𑁄𑀯 𑀅𑀳𑁄𑀲𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀅𑀭𑀜𑁆𑀜𑀸𑀬𑀢𑀦𑁂 𑀭𑀼𑀓𑁆𑀔𑀤𑁂𑀯𑀢𑀸 𑀅𑀳𑁄𑀲𑀺. 𑀅𑀣𑁂𑀓𑁄 𑀲𑀓𑀼𑀡𑀮𑀼𑀤𑁆𑀤𑀓𑁄 𑀏𑀓𑀁 𑀤𑀻𑀧𑀓𑀓𑀼𑀓𑁆𑀓𑀼𑀝𑀫𑀸𑀤𑀸𑀬 𑀯𑀸𑀮𑀭𑀚𑁆𑀚𑀼𑀜𑁆𑀘 𑀬𑀝𑁆𑀞𑀺𑀜𑁆𑀘 𑀕𑀳𑁂𑀢𑁆𑀯𑀸 𑀅𑀭𑀜𑁆𑀜𑁂 𑀓𑀼𑀓𑁆𑀓𑀼𑀝𑁂 𑀩𑀦𑁆𑀥𑀦𑁆𑀢𑁄 𑀏𑀓𑀁 𑀧𑀮𑀸𑀬𑀺𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀝𑁆𑀞𑀁 𑀧𑁄𑀭𑀸𑀡𑀓𑀼𑀓𑁆𑀓𑀼𑀝𑀁 𑀩𑀦𑁆𑀥𑀺𑀢𑀼𑀁 𑀆𑀭𑀪𑀺. 𑀲𑁄 𑀯𑀸𑀮𑀧𑀸𑀲𑁂 𑀓𑀼𑀲𑀮𑀢𑀸𑀬 𑀅𑀢𑁆𑀢𑀸𑀦𑀁 𑀩𑀦𑁆𑀥𑀺𑀢𑀼𑀁 𑀦 𑀤𑁂𑀢𑀺, 𑀉𑀝𑁆𑀞𑀸𑀬𑀼𑀝𑁆𑀞𑀸𑀬 𑀦𑀺𑀮𑀻𑀬𑀢𑀺. 𑀮𑀼𑀤𑁆𑀤𑀓𑁄 𑀅𑀢𑁆𑀢𑀸𑀦𑀁 𑀲𑀸𑀔𑀸𑀧𑀮𑁆𑀮𑀯𑁂𑀳𑀺 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀬𑀝𑁆𑀞𑀺𑀜𑁆𑀘 𑀧𑀸𑀲𑀜𑁆𑀘 𑀑𑀟𑁆𑀟𑁂𑀢𑀺. 𑀓𑀼𑀓𑁆𑀓𑀼𑀝𑁄 𑀢𑀁 𑀮𑀚𑁆𑀚𑀸𑀧𑁂𑀢𑀼𑀓𑀸𑀫𑁄 𑀫𑀸𑀦𑀼𑀲𑀺𑀁 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁧𑁭. ‘‘𑀤𑀺𑀝𑁆𑀞𑀸 𑀫𑀬𑀸 𑀯𑀦𑁂 𑀭𑀼𑀓𑁆𑀔𑀸, 𑀅𑀲𑁆𑀲𑀓𑀡𑁆𑀡𑀸 𑀯𑀺𑀪𑀻𑀝𑀓𑀸;

𑀦 𑀢𑀸𑀦𑀺 𑀏𑀯𑀁 𑀲𑀓𑁆𑀓𑀦𑁆𑀢𑀺, 𑀬𑀣𑀸 𑀢𑁆𑀯𑀁 𑀭𑀼𑀓𑁆𑀔 𑀲𑀓𑁆𑀓𑀲𑀻’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀲𑀫𑁆𑀫 𑀮𑀼𑀤𑁆𑀤𑀓, 𑀫𑀬𑀸 𑀇𑀫𑀲𑁆𑀫𑀺𑀁 𑀯𑀦𑁂 𑀚𑀸𑀢𑀸 𑀩𑀳𑀽 𑀅𑀲𑁆𑀲𑀓𑀡𑁆𑀡𑀸 𑀘 𑀯𑀺𑀪𑀻𑀝𑀓𑀸 𑀘 𑀭𑀼𑀓𑁆𑀔𑀸 𑀤𑀺𑀝𑁆𑀞𑀧𑀼𑀩𑁆𑀩𑀸, 𑀢𑀸𑀦𑀺 𑀧𑀦 𑀭𑀼𑀓𑁆𑀔𑀸𑀦𑀺 𑀬𑀣𑀸 𑀢𑁆𑀯𑀁 𑀲𑀓𑁆𑀓𑀲𑀺 𑀲𑀗𑁆𑀓𑀫𑀲𑀺 𑀇𑀢𑁄 𑀘𑀺𑀢𑁄 𑀘 𑀯𑀺𑀘𑀭𑀲𑀺, 𑀏𑀯𑀁 𑀦 𑀲𑀓𑁆𑀓𑀦𑁆𑀢𑀺 𑀦 𑀲𑀗𑁆𑀓𑀫𑀦𑁆𑀢𑀺 𑀦 𑀯𑀺𑀘𑀭𑀦𑁆𑀢𑀻𑀢𑀺.

𑀏𑀯𑀁 𑀯𑀢𑁆𑀯𑀸 𑀘 𑀧𑀦 𑀲𑁄 𑀓𑀼𑀓𑁆𑀓𑀼𑀝𑁄 𑀧𑀮𑀸𑀬𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀅𑀕𑀫𑀸𑀲𑀺. 𑀢𑀲𑁆𑀲 𑀧𑀮𑀸𑀬𑀺𑀢𑁆𑀯𑀸 𑀕𑀢𑀓𑀸𑀮𑁂 𑀮𑀼𑀤𑁆𑀤𑀓𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁧𑁮. ‘‘𑀧𑁄𑀭𑀸𑀡𑀓𑀼𑀓𑁆𑀓𑀼𑀝𑁄 𑀅𑀬𑀁, 𑀪𑁂𑀢𑁆𑀯𑀸 𑀧𑀜𑁆𑀚𑀭𑀫𑀸𑀕𑀢𑁄;

𑀓𑀼𑀲𑀮𑁄 𑀯𑀸𑀮𑀧𑀸𑀲𑀸𑀦𑀁, 𑀅𑀧𑀓𑁆𑀓𑀫𑀢𑀺 𑀪𑀸𑀲𑀢𑀻’’𑀢𑀺.

𑀢𑀢𑁆𑀣 𑀓𑀼𑀲𑀮𑁄 𑀯𑀸𑀮𑀧𑀸𑀲𑀸𑀦𑀦𑁆𑀢𑀺 𑀯𑀸𑀮𑀫𑀬𑁂𑀲𑀼 𑀧𑀸𑀲𑁂𑀲𑀼 𑀓𑀼𑀲𑀮𑁄 𑀅𑀢𑁆𑀢𑀸𑀦𑀁 𑀩𑀦𑁆𑀥𑀺𑀢𑀼𑀁 𑀅𑀤𑀢𑁆𑀯𑀸 𑀅𑀧𑀓𑁆𑀓𑀫𑀢𑀺 𑀘𑁂𑀯 𑀪𑀸𑀲𑀢𑀺 𑀘, 𑀪𑀸𑀲𑀺𑀢𑁆𑀯𑀸 𑀘 𑀧𑀦 𑀧𑀮𑀸𑀢𑁄𑀢𑀺 𑀏𑀯𑀁 𑀯𑀢𑁆𑀯𑀸 𑀮𑀼𑀤𑁆𑀤𑀓𑁄 𑀅𑀭𑀜𑁆𑀜𑁂 𑀘𑀭𑀺𑀢𑁆𑀯𑀸 𑀬𑀣𑀸𑀮𑀤𑁆𑀥𑀫𑀸𑀤𑀸𑀬 𑀕𑁂𑀳𑀫𑁂𑀯 𑀕𑀢𑁄.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀮𑀼𑀤𑁆𑀤𑀓𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀓𑀼𑀓𑁆𑀓𑀼𑀝𑁄 𑀓𑀸𑀬𑀕𑀼𑀢𑁆𑀢𑀺𑀓𑀼𑀲𑀮𑁄 𑀤𑀳𑀭𑀪𑀺𑀓𑁆𑀔𑀼, 𑀢𑀲𑁆𑀲 𑀧𑀦 𑀓𑀸𑀭𑀡𑀲𑁆𑀲 𑀧𑀘𑁆𑀘𑀓𑁆𑀔𑀓𑀸𑀭𑀺𑀓𑀸 𑀭𑀼𑀓𑁆𑀔𑀤𑁂𑀯𑀢𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑀼𑀓𑁆𑀓𑀼𑀝𑀚𑀸𑀢𑀓𑀯𑀡𑁆𑀡𑀦𑀸 𑀦𑀯𑀫𑀸.

[𑁨𑁧𑁦] 𑁧𑁦. 𑀓𑀦𑁆𑀤𑀕𑀮𑀓𑀚𑀸𑀢𑀓𑀯𑀡𑁆𑀡𑀦𑀸

𑀅𑀫𑁆𑀪𑁄 𑀓𑁄 𑀦𑀸𑀫𑀬𑀁 𑀭𑀼𑀓𑁆𑀔𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀼𑀕𑀢𑀸𑀮𑀬𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀤𑀸 𑀳𑀺 𑀲𑀢𑁆𑀣𑀸 ‘‘𑀤𑁂𑀯𑀤𑀢𑁆𑀢𑁄 𑀲𑀼𑀕𑀢𑀸𑀮𑀬𑀁 𑀅𑀓𑀸𑀲𑀻’’𑀢𑀺 𑀲𑀼𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀤𑁂𑀯𑀤𑀢𑁆𑀢𑁄 𑀫𑀬𑁆𑀳𑀁 𑀅𑀦𑀼𑀓𑀺𑀭𑀺𑀬𑀁 𑀓𑀭𑁄𑀦𑁆𑀢𑁄 𑀯𑀺𑀦𑀸𑀲𑀁 𑀧𑀢𑁆𑀢𑁄, 𑀧𑀼𑀩𑁆𑀩𑁂𑀧𑀺 𑀧𑀸𑀧𑀼𑀡𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀭𑀼𑀓𑁆𑀔𑀓𑁄𑀝𑁆𑀝𑀓𑀲𑀓𑀼𑀡𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺, ‘‘𑀔𑀤𑀺𑀭𑀯𑀦𑀺𑀬𑁄’’𑀢𑀺𑀲𑁆𑀲 𑀦𑀸𑀫𑀁 𑀅𑀳𑁄𑀲𑀺. 𑀲𑁄 𑀔𑀤𑀺𑀭𑀯𑀦𑁂𑀬𑁂𑀯 𑀕𑁄𑀘𑀭𑀁 𑀕𑀡𑁆𑀳𑀺, 𑀢𑀲𑁆𑀲𑁂𑀓𑁄 𑀓𑀦𑁆𑀤𑀕𑀮𑀓𑁄 𑀦𑀸𑀫 𑀲𑀳𑀸𑀬𑁄 𑀅𑀳𑁄𑀲𑀺, 𑀲𑁄 𑀲𑀺𑀫𑁆𑀩𑀮𑀺𑀧𑀸𑀮𑀺𑀪𑀤𑁆𑀤𑀓𑀯𑀦𑁂 𑀕𑁄𑀘𑀭𑀁 𑀕𑀡𑁆𑀳𑀸𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀔𑀤𑀺𑀭𑀯𑀦𑀺𑀬𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀔𑀤𑀺𑀭𑀯𑀦𑀺𑀬𑁄 ‘‘𑀲𑀳𑀸𑀬𑁄 𑀫𑁂 𑀆𑀕𑀢𑁄’’𑀢𑀺 𑀓𑀦𑁆𑀤𑀕𑀮𑀓𑀁 𑀕𑀳𑁂𑀢𑁆𑀯𑀸 𑀔𑀤𑀺𑀭𑀯𑀦𑀁 𑀧𑀯𑀺𑀲𑀺𑀢𑁆𑀯𑀸 𑀔𑀤𑀺𑀭𑀔𑀦𑁆𑀥𑀁 𑀢𑀼𑀡𑁆𑀟𑁂𑀦 𑀧𑀳𑀭𑀺𑀢𑁆𑀯𑀸 𑀭𑀼𑀓𑁆𑀔𑀢𑁄 𑀧𑀸𑀡𑀓𑁂 𑀦𑀻𑀳𑀭𑀺𑀢𑁆𑀯𑀸 𑀅𑀤𑀸𑀲𑀺. 𑀓𑀦𑁆𑀤𑀕𑀮𑀓𑁄 𑀤𑀺𑀦𑁆𑀦𑁂 𑀤𑀺𑀦𑁆𑀦𑁂 𑀫𑀥𑀼𑀭𑀧𑀽𑀯𑁂 𑀯𑀺𑀬 𑀙𑀺𑀦𑁆𑀤𑀺𑀢𑁆𑀯𑀸 𑀙𑀺𑀦𑁆𑀤𑀺𑀢𑁆𑀯𑀸 𑀔𑀸𑀤𑀺. 𑀢𑀲𑁆𑀲 𑀔𑀸𑀤𑀦𑁆𑀢𑀲𑁆𑀲𑁂𑀯 𑀫𑀸𑀦𑁄 𑀉𑀧𑁆𑀧𑀚𑁆𑀚𑀺 𑁋 ‘‘𑀅𑀬𑀫𑁆𑀧𑀺 𑀭𑀼𑀓𑁆𑀔𑀓𑁄𑀝𑁆𑀝𑀓𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑁄, 𑀅𑀳𑀫𑁆𑀧𑀺, 𑀓𑀺𑀁 𑀫𑁂 𑀏𑀢𑁂𑀦 𑀤𑀺𑀦𑁆𑀦𑀕𑁄𑀘𑀭𑁂𑀦, 𑀲𑀬𑀫𑁂𑀯 𑀔𑀤𑀺𑀭𑀯𑀦𑁂 𑀕𑁄𑀘𑀭𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀔𑀤𑀺𑀭𑀯𑀦𑀺𑀬𑀁 𑀆𑀳 𑁋 ‘‘𑀲𑀫𑁆𑀫, 𑀫𑀸 𑀢𑁆𑀯𑀁 𑀤𑀼𑀓𑁆𑀔𑀁 𑀅𑀦𑀼𑀪𑀯𑀺, 𑀅𑀳𑀫𑁂𑀯 𑀔𑀤𑀺𑀭𑀯𑀦𑁂 𑀕𑁄𑀘𑀭𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺.

𑀅𑀣 𑀦𑀁 𑀲𑁄 ‘‘𑀳𑀦𑁆𑀤 𑀢𑁆𑀯𑀁 𑀲𑀫𑁆𑀫, 𑀲𑀺𑀫𑁆𑀩𑀮𑀺𑀧𑀸𑀮𑀺𑀪𑀤𑁆𑀤𑀓𑀸𑀤𑀺𑀯𑀦𑁂 𑀦𑀺𑀲𑁆𑀲𑀸𑀭𑁂 𑀕𑁄𑀘𑀭𑀕𑁆𑀕𑀳𑀡𑀓𑀼𑀮𑁂 𑀚𑀸𑀢𑁄, 𑀔𑀤𑀺𑀭𑀸 𑀦𑀸𑀫 𑀚𑀸𑀢𑀲𑀸𑀭𑀸 𑀣𑀤𑁆𑀥𑀸, 𑀫𑀸 𑀢𑁂 𑀏𑀢𑀁 𑀭𑀼𑀘𑁆𑀘𑀻’’𑀢𑀺 𑀆𑀳. 𑀓𑀦𑁆𑀤𑀕𑀮𑀓𑁄 ‘‘𑀓𑀺𑀁 𑀤𑀸𑀦𑀸𑀳𑀁 𑀦 𑀭𑀼𑀓𑁆𑀔𑀓𑁄𑀝𑁆𑀝𑀓𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑁄’’𑀢𑀺 𑀢𑀲𑁆𑀲 𑀯𑀘𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀔𑀤𑀺𑀭𑀭𑀼𑀓𑁆𑀔𑀁 𑀢𑀼𑀡𑁆𑀟𑁂𑀦 𑀧𑀳𑀭𑀺. 𑀢𑀸𑀯𑀤𑁂𑀯𑀲𑁆𑀲 𑀢𑀼𑀡𑁆𑀟𑀁 𑀪𑀺𑀚𑁆𑀚𑀺, 𑀅𑀓𑁆𑀔𑀻𑀦𑀺 𑀦𑀺𑀓𑁆𑀔𑀫𑀦𑀸𑀓𑀸𑀭𑀧𑁆𑀧𑀢𑁆𑀢𑀸𑀦𑀺 𑀚𑀸𑀢𑀸𑀦𑀺, 𑀲𑀻𑀲𑀁 𑀨𑀮𑀺𑀢𑀁. 𑀲𑁄 𑀔𑀦𑁆𑀥𑁂 𑀧𑀢𑀺𑀝𑁆𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀪𑀽𑀫𑀺𑀬𑀁 𑀧𑀢𑀺𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁧𑁧𑁯. ‘‘𑀅𑀫𑁆𑀪𑁄 𑀓𑁄 𑀦𑀸𑀫𑀬𑀁 𑀭𑀼𑀓𑁆𑀔𑁄, 𑀲𑀺𑀦𑁆𑀦𑀧𑀢𑁆𑀢𑁄 𑀲𑀓𑀡𑁆𑀝𑀓𑁄;

𑀬𑀢𑁆𑀣 𑀏𑀓𑀧𑁆𑀧𑀳𑀸𑀭𑁂𑀦, 𑀉𑀢𑁆𑀢𑀫𑀗𑁆𑀕𑀁 𑀯𑀺𑀪𑀺𑀚𑁆𑀚𑀺𑀢’’𑀦𑁆𑀢𑀺.

𑀢𑀢𑁆𑀣 𑀅𑀫𑁆𑀪𑁄 𑀓𑁄 𑀦𑀸𑀫𑀬𑀁 𑀭𑀼𑀓𑁆𑀔𑁄𑀢𑀺, 𑀪𑁄 𑀔𑀤𑀺𑀭𑀯𑀦𑀺𑀬, 𑀓𑁄 𑀦𑀸𑀫 𑀅𑀬𑀁 𑀭𑀼𑀓𑁆𑀔𑁄. ‘‘𑀓𑁄 𑀦𑀸𑀫 𑀲𑁄’’𑀢𑀺𑀧𑀺 𑀧𑀸𑀞𑁄. 𑀲𑀺𑀦𑁆𑀦𑀧𑀢𑁆𑀢𑁄𑀢𑀺 𑀲𑀼𑀔𑀼𑀫𑀧𑀢𑁆𑀢𑁄. 𑀬𑀢𑁆𑀣 𑀏𑀓𑀧𑁆𑀧𑀳𑀸𑀭𑁂𑀦𑀸𑀢𑀺 𑀬𑀲𑁆𑀫𑀺𑀁 𑀭𑀼𑀓𑁆𑀔𑁂 𑀏𑀓𑁂𑀦𑁂𑀯 𑀧𑀳𑀸𑀭𑁂𑀦. 𑀉𑀢𑁆𑀢𑀫𑀗𑁆𑀕𑀁 𑀯𑀺𑀪𑀺𑀚𑁆𑀚𑀺𑀢𑀦𑁆𑀢𑀺 𑀲𑀻𑀲𑀁 𑀪𑀺𑀦𑁆𑀦𑀁, 𑀦 𑀓𑁂𑀯𑀮𑀜𑁆𑀘 𑀲𑀻𑀲𑀁, 𑀢𑀼𑀡𑁆𑀟𑀫𑁆𑀧𑀺 𑀪𑀺𑀦𑁆𑀦𑀁. 𑀲𑁄 𑀯𑁂𑀤𑀦𑀸𑀧𑁆𑀧𑀢𑁆𑀢𑀢𑀸𑀬 𑀔𑀤𑀺𑀭𑀭𑀼𑀓𑁆𑀔𑀁 ‘‘𑀓𑀺𑀁 𑀭𑀼𑀓𑁆𑀔𑁄 𑀦𑀸𑀫𑁂𑀲𑁄’’𑀢𑀺 𑀚𑀸𑀦𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀯𑁂𑀤𑀦𑀸𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸 𑀇𑀫𑀸𑀬 𑀕𑀸𑀣𑀸𑀬 𑀯𑀺𑀧𑁆𑀧𑀮𑀧𑀺.

𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀔𑀤𑀺𑀭𑀯𑀦𑀺𑀬𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁧𑁨𑁦. ‘‘𑀅𑀘𑀸𑀭𑀺 𑀯𑀢𑀸𑀬𑀁 𑀯𑀺𑀢𑀼𑀤𑀁 𑀯𑀦𑀸𑀦𑀺, 𑀓𑀝𑁆𑀞𑀗𑁆𑀕𑀭𑀼𑀓𑁆𑀔𑁂𑀲𑀼 𑀅𑀲𑀸𑀭𑀓𑁂𑀲𑀼;

𑀅𑀣𑀸𑀲𑀤𑀸 𑀔𑀤𑀺𑀭𑀁 𑀚𑀸𑀢𑀲𑀸𑀭𑀁, 𑀬𑀢𑁆𑀣𑀩𑁆𑀪𑀺𑀤𑀸 𑀕𑀭𑀼𑀴𑁄 𑀉𑀢𑁆𑀢𑀫𑀗𑁆𑀕’’𑀦𑁆𑀢𑀺.

𑀢𑀢𑁆𑀣 𑀅𑀘𑀸𑀭𑀺 𑀯𑀢𑀸𑀬𑀦𑁆𑀢𑀺 𑀅𑀘𑀭𑀺 𑀯𑀢 𑀅𑀬𑀁. 𑀯𑀺𑀢𑀼𑀤𑀁 𑀯𑀦𑀸𑀦𑀻𑀢𑀺 𑀦𑀺𑀲𑁆𑀲𑀸𑀭𑀲𑀺𑀫𑁆𑀩𑀮𑀺𑀧𑀸𑀮𑀺𑀪𑀤𑁆𑀤𑀓𑀯𑀦𑀸𑀦𑀺 𑀯𑀺𑀢𑀼𑀤𑀦𑁆𑀢𑁄 𑀯𑀺𑀚𑁆𑀛𑀦𑁆𑀢𑁄. 𑀓𑀝𑁆𑀞𑀗𑁆𑀕𑀭𑀼𑀓𑁆𑀔𑁂𑀲𑀽𑀢𑀺 𑀯𑀦𑀓𑀝𑁆𑀞𑀓𑁄𑀝𑁆𑀞𑀸𑀲𑁂𑀲𑀼 𑀭𑀼𑀓𑁆𑀔𑁂𑀲𑀼. 𑀅𑀲𑀸𑀭𑀓𑁂𑀲𑀽𑀢𑀺 𑀦𑀺𑀲𑁆𑀲𑀸𑀭𑁂𑀲𑀼 𑀧𑀸𑀮𑀺𑀪𑀤𑁆𑀤𑀓𑀲𑀺𑀫𑁆𑀩𑀮𑀺𑀆𑀤𑀻𑀲𑀼. 𑀅𑀣𑀸𑀲𑀤𑀸 𑀔𑀤𑀺𑀭𑀁 𑀚𑀸𑀢𑀲𑀸𑀭𑀦𑁆𑀢𑀺 𑀅𑀣 𑀧𑁄𑀢𑀓𑀓𑀸𑀮𑀢𑁄 𑀧𑀝𑁆𑀞𑀸𑀬 𑀚𑀸𑀢𑀲𑀸𑀭𑀁 𑀔𑀤𑀺𑀭𑀁 𑀲𑀫𑁆𑀧𑀸𑀧𑀼𑀡𑀺. 𑀬𑀢𑁆𑀣𑀩𑁆𑀪𑀺𑀤𑀸 𑀕𑀭𑀼𑀴𑁄 𑀉𑀢𑁆𑀢𑀫𑀗𑁆𑀕𑀦𑁆𑀢𑀺 𑀬𑀢𑁆𑀣𑀩𑁆𑀪𑀺𑀤𑀸𑀢𑀺 𑀬𑀲𑁆𑀫𑀺𑀁 𑀔𑀤𑀺𑀭𑁂 𑀅𑀪𑀺𑀦𑁆𑀤𑀺 𑀧𑀤𑀸𑀮𑀬𑀺. 𑀕𑀭𑀼𑀴𑁄𑀢𑀺 𑀲𑀓𑀼𑀡𑁄. 𑀲𑀩𑁆𑀩𑀲𑀓𑀼𑀡𑀸𑀦𑀜𑁆𑀳𑁂𑀢𑀁 𑀲𑀕𑀸𑀭𑀯𑀲𑀧𑁆𑀧𑀢𑀺𑀲𑁆𑀲 𑀯𑀘𑀦𑀁.

𑀇𑀢𑀺 𑀦𑀁 𑀔𑀤𑀺𑀭𑀯𑀦𑀺𑀬𑁄 𑀯𑀢𑁆𑀯𑀸 ‘‘𑀪𑁄 𑀓𑀦𑁆𑀤𑀕𑀮𑀓, 𑀬𑀢𑁆𑀣 𑀢𑁆𑀯𑀁 𑀉𑀢𑁆𑀢𑀫𑀗𑁆𑀕𑀁 𑀅𑀪𑀺𑀦𑁆𑀤𑀺, 𑀔𑀤𑀺𑀭𑁄 𑀦𑀸𑀫𑁂𑀲𑁄 𑀲𑀸𑀭𑀭𑀼𑀓𑁆𑀔𑁄’’𑀢𑀺 𑀆𑀳. 𑀲𑁄 𑀢𑀢𑁆𑀣𑁂𑀯 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀓𑀦𑁆𑀤𑀕𑀮𑀓𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀔𑀤𑀺𑀭𑀯𑀦𑀺𑀬𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀓𑀦𑁆𑀤𑀕𑀮𑀓𑀚𑀸𑀢𑀓𑀯𑀡𑁆𑀡𑀦𑀸 𑀤𑀲𑀫𑀸.