𑁨. 𑀲𑀦𑁆𑀣𑀯𑀯𑀕𑁆𑀕𑁄

[𑁧𑁬𑁧] 𑁧. 𑀇𑀦𑁆𑀤𑀲𑀫𑀸𑀦𑀕𑁄𑀢𑁆𑀢𑀚𑀸𑀢𑀓𑀯𑀡𑁆𑀡𑀦𑀸

𑀦 𑀲𑀦𑁆𑀣𑀯𑀁 𑀓𑀸𑀧𑀼𑀭𑀺𑀲𑁂𑀦 𑀓𑀬𑀺𑀭𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀤𑀼𑀩𑁆𑀩𑀘𑀚𑀸𑀢𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀲𑁆𑀲 𑀯𑀢𑁆𑀣𑀼 𑀦𑀯𑀓𑀦𑀺𑀧𑀸𑀢𑁂 𑀕𑀺𑀚𑁆𑀛𑀚𑀸𑀢𑀓𑁂 (𑀚𑀸. 𑁧.𑁯.𑁧 𑀆𑀤𑀬𑁄) 𑀆𑀯𑀺𑀪𑀯𑀺𑀲𑁆𑀲𑀢𑀺. 𑀲𑀢𑁆𑀣𑀸 𑀧𑀦 𑀢𑀁 𑀪𑀺𑀓𑁆𑀔𑀼𑀁 ‘‘𑀧𑀼𑀩𑁆𑀩𑁂𑀧𑀺 𑀢𑁆𑀯𑀁, 𑀪𑀺𑀓𑁆𑀔𑀼, 𑀤𑀼𑀩𑁆𑀩𑀘𑀢𑀸𑀬 𑀧𑀡𑁆𑀟𑀺𑀢𑀸𑀦𑀁 𑀯𑀘𑀦𑀁 𑀅𑀓𑀢𑁆𑀯𑀸 𑀫𑀢𑁆𑀢𑀳𑀢𑁆𑀣𑀺𑀧𑀸𑀤𑁂𑀳𑀺 𑀲𑀜𑁆𑀘𑀼𑀡𑁆𑀡𑀺𑀢𑁄’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀼𑀟𑁆𑀠𑀺𑀧𑁆𑀧𑀢𑁆𑀢𑁄 𑀖𑀭𑀸𑀯𑀸𑀲𑀁 𑀧𑀳𑀸𑀬 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀧𑀜𑁆𑀘𑀦𑁆𑀦𑀁 𑀇𑀲𑀺𑀲𑀢𑀸𑀦𑀁 𑀕𑀡𑀲𑀢𑁆𑀣𑀸 𑀳𑀼𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀢𑀤𑀸 𑀢𑁂𑀲𑀼 𑀢𑀸𑀧𑀲𑁂𑀲𑀼 𑀇𑀦𑁆𑀤𑀲𑀫𑀸𑀦𑀕𑁄𑀢𑁆𑀢𑁄 𑀦𑀸𑀫𑁂𑀓𑁄 𑀢𑀸𑀧𑀲𑁄 𑀅𑀳𑁄𑀲𑀺 𑀤𑀼𑀩𑁆𑀩𑀘𑁄 𑀅𑀦𑁄𑀯𑀸𑀤𑀓𑁄. 𑀲𑁄 𑀏𑀓𑀁 𑀳𑀢𑁆𑀣𑀺𑀧𑁄𑀢𑀓𑀁 𑀧𑁄𑀲𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀲𑀼𑀢𑁆𑀯𑀸 𑀢𑀁 𑀧𑀓𑁆𑀓𑁄𑀲𑀺𑀢𑁆𑀯𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀳𑀢𑁆𑀣𑀺𑀧𑁄𑀢𑀓𑀁 𑀧𑁄𑀲𑁂𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀲𑀘𑁆𑀘𑀁, 𑀆𑀘𑀭𑀺𑀬, 𑀫𑀢𑀫𑀸𑀢𑀺𑀓𑀁 𑀏𑀓𑀁 𑀳𑀢𑁆𑀣𑀺𑀧𑁄𑀢𑀓𑀁 𑀧𑁄𑀲𑁂𑀫𑀻’’𑀢𑀺. ‘‘𑀳𑀢𑁆𑀣𑀺𑀦𑁄 𑀦𑀸𑀫 𑀯𑀼𑀟𑁆𑀠𑀺𑀧𑁆𑀧𑀢𑁆𑀢𑀸 𑀧𑁄𑀲𑀓𑁂𑀬𑁂𑀯 𑀫𑀸𑀭𑁂𑀦𑁆𑀢𑀺, 𑀫𑀸 𑀢𑀁 𑀧𑁄𑀲𑁂𑀳𑀻’’𑀢𑀺. ‘‘𑀢𑁂𑀦 𑀯𑀺𑀦𑀸 𑀯𑀢𑁆𑀢𑀺𑀢𑀼𑀁 𑀦 𑀲𑀓𑁆𑀓𑁄𑀫𑀺 𑀆𑀘𑀭𑀺𑀬𑀸’’𑀢𑀺. ‘‘𑀢𑁂𑀦 𑀳𑀺 𑀧𑀜𑁆𑀜𑀸𑀬𑀺𑀲𑁆𑀲𑀲𑀻’’𑀢𑀺. 𑀲𑁄 𑀢𑁂𑀦 𑀧𑁄𑀲𑀺𑀬𑀫𑀸𑀦𑁄 𑀅𑀧𑀭𑀪𑀸𑀕𑁂 𑀫𑀳𑀸𑀲𑀭𑀻𑀭𑁄 𑀅𑀳𑁄𑀲𑀺.

𑀅𑀣𑁂𑀓𑀲𑁆𑀫𑀺𑀁 𑀓𑀸𑀮𑁂 𑀢𑁂 𑀇𑀲𑀬𑁄 𑀯𑀦𑀫𑀽𑀮𑀨𑀮𑀸𑀨𑀮𑀢𑁆𑀣𑀸𑀬 𑀤𑀽𑀭𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣𑁂𑀯 𑀓𑀢𑀺𑀧𑀸𑀳𑀁 𑀯𑀲𑀺𑀁𑀲𑀼. 𑀳𑀢𑁆𑀣𑀻𑀧𑀺 𑀅𑀕𑁆𑀕𑀤𑀓𑁆𑀔𑀺𑀡𑀯𑀸𑀢𑁂 𑀧𑀪𑀺𑀦𑁆𑀦𑀫𑀤𑁄 𑀳𑀼𑀢𑁆𑀯𑀸 𑀢𑀲𑁆𑀲 𑀧𑀡𑁆𑀡𑀲𑀸𑀮𑀁 𑀯𑀺𑀤𑁆𑀥𑀁𑀲𑁂𑀢𑁆𑀯𑀸 𑀧𑀸𑀦𑀻𑀬𑀖𑀝𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀸𑀲𑀸𑀡𑀨𑀮𑀓𑀁 𑀔𑀺𑀧𑀺𑀢𑁆𑀯𑀸 𑀆𑀮𑀫𑁆𑀩𑀦𑀨𑀮𑀓𑀁 𑀮𑀼𑀜𑁆𑀘𑀺𑀢𑁆𑀯𑀸 ‘‘𑀢𑀁 𑀢𑀸𑀧𑀲𑀁 𑀫𑀸𑀭𑁂𑀢𑁆𑀯𑀸𑀯 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀏𑀓𑀁 𑀕𑀳𑀦𑀝𑁆𑀞𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀢𑀲𑁆𑀲 𑀆𑀕𑀫𑀦𑀫𑀕𑁆𑀕𑀁 𑀑𑀮𑁄𑀓𑁂𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀇𑀦𑁆𑀤𑀲𑀫𑀸𑀦𑀕𑁄𑀢𑁆𑀢𑁄 𑀢𑀲𑁆𑀲 𑀕𑁄𑀘𑀭𑀁 𑀕𑀳𑁂𑀢𑁆𑀯𑀸 𑀲𑀩𑁆𑀩𑁂𑀲𑀁 𑀧𑀼𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑁄 𑀢𑀁 𑀤𑀺𑀲𑁆𑀯𑀸 𑀧𑀓𑀢𑀺𑀲𑀜𑁆𑀜𑀸𑀬𑁂𑀯𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀅𑀣 𑀦𑀁 𑀲𑁄 𑀳𑀢𑁆𑀣𑀻 𑀕𑀳𑀦𑀝𑁆𑀞𑀸𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑁄𑀡𑁆𑀟𑀸𑀬 𑀧𑀭𑀸𑀫𑀲𑀺𑀢𑁆𑀯𑀸 𑀪𑀽𑀫𑀺𑀬𑀁 𑀧𑀸𑀢𑁂𑀢𑁆𑀯𑀸 𑀲𑀻𑀲𑀁 𑀧𑀸𑀤𑁂𑀦 𑀅𑀓𑁆𑀓𑀫𑀺𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀢𑁆𑀯𑀸 𑀫𑀤𑁆𑀤𑀺𑀢𑁆𑀯𑀸 𑀓𑁄𑀜𑁆𑀘𑀦𑀸𑀤𑀁 𑀓𑀢𑁆𑀯𑀸 𑀅𑀭𑀜𑁆𑀜𑀁 𑀧𑀸𑀯𑀺𑀲𑀺. 𑀲𑁂𑀲𑀢𑀸𑀧𑀲𑀸 𑀢𑀁 𑀧𑀯𑀢𑁆𑀢𑀺𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀆𑀭𑁄𑀘𑁂𑀲𑀼𑀁. 𑀩𑁄𑀥𑀺𑀲𑀢𑁆𑀢𑁄 ‘‘𑀓𑀸𑀧𑀼𑀭𑀺𑀲𑁂𑀳𑀺 𑀦𑀸𑀫 𑀲𑀤𑁆𑀥𑀺𑀁 𑀲𑀁𑀲𑀕𑁆𑀕𑁄 𑀦 𑀓𑀸𑀢𑀩𑁆𑀩𑁄’’𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀆𑀳 𑁋

𑁨𑁧. ‘‘𑀦 𑀲𑀦𑁆𑀣𑀯𑀁 𑀓𑀸𑀧𑀼𑀭𑀺𑀲𑁂𑀦 𑀓𑀬𑀺𑀭𑀸, 𑀅𑀭𑀺𑀬𑁄 𑀅𑀦𑀭𑀺𑀬𑁂𑀦 𑀧𑀚𑀸𑀦𑀫𑀢𑁆𑀣𑀁;

𑀘𑀺𑀭𑀸𑀦𑀼𑀯𑀼𑀢𑁆𑀣𑁄𑀧𑀺 𑀓𑀭𑁄𑀢𑀺 𑀧𑀸𑀧𑀁, 𑀕𑀚𑁄 𑀬𑀣𑀸 𑀇𑀦𑁆𑀤𑀲𑀫𑀸𑀦𑀕𑁄𑀢𑁆𑀢𑀁.

𑁨𑁨. ‘‘𑀬𑀁 𑀢𑁆𑀯𑁂𑀯 𑀚𑀜𑁆𑀜𑀸 𑀲𑀤𑀺𑀲𑁄 𑀫𑀫𑀦𑁆𑀢𑀺, 𑀲𑀻𑀮𑁂𑀦 𑀧𑀜𑁆𑀜𑀸𑀬 𑀲𑀼𑀢𑁂𑀦 𑀘𑀸𑀧𑀺;

𑀢𑁂𑀦𑁂𑀯 𑀫𑁂𑀢𑁆𑀢𑀺𑀁 𑀓𑀬𑀺𑀭𑀸𑀣 𑀲𑀤𑁆𑀥𑀺𑀁, 𑀲𑀼𑀔𑁄 𑀳𑀯𑁂 𑀲𑀧𑁆𑀧𑀼𑀭𑀺𑀲𑁂𑀦 𑀲𑀗𑁆𑀕𑀫𑁄’’𑀢𑀺.

𑀢𑀢𑁆𑀣 𑀦 𑀲𑀦𑁆𑀣𑀯𑀁 𑀓𑀸𑀧𑀼𑀭𑀺𑀲𑁂𑀦 𑀓𑀬𑀺𑀭𑀸𑀢𑀺 𑀓𑀼𑀘𑁆𑀙𑀺𑀢𑁂𑀦 𑀓𑁄𑀥𑀧𑀼𑀭𑀺𑀲𑁂𑀦 𑀲𑀤𑁆𑀥𑀺𑀁 𑀢𑀡𑁆𑀳𑀸𑀲𑀦𑁆𑀣𑀯𑀁 𑀯𑀸 𑀫𑀺𑀢𑁆𑀢𑀲𑀦𑁆𑀣𑀯𑀁 𑀯𑀸 𑀦 𑀓𑀬𑀺𑀭𑀸𑀣. 𑀅𑀭𑀺𑀬𑁄 𑀅𑀦𑀭𑀺𑀬𑁂𑀦 𑀧𑀚𑀸𑀦𑀫𑀢𑁆𑀣𑀦𑁆𑀢𑀺 𑀅𑀭𑀺𑀬𑁄𑀢𑀺 𑀘𑀢𑁆𑀢𑀸𑀭𑁄 𑀅𑀭𑀺𑀬𑀸 𑀆𑀘𑀸𑀭𑀅𑀭𑀺𑀬𑁄 𑀮𑀺𑀗𑁆𑀕𑀅𑀭𑀺𑀬𑁄 𑀤𑀲𑁆𑀲𑀦𑀅𑀭𑀺𑀬𑁄 𑀧𑀝𑀺𑀯𑁂𑀥𑀅𑀭𑀺𑀬𑁄𑀢𑀺. 𑀢𑁂𑀲𑀼 𑀆𑀘𑀸𑀭𑀅𑀭𑀺𑀬𑁄 𑀇𑀥 𑀅𑀥𑀺𑀧𑁆𑀧𑁂𑀢𑁄. 𑀲𑁄 𑀧𑀚𑀸𑀦𑀫𑀢𑁆𑀣𑀁 𑀅𑀢𑁆𑀣𑀁 𑀧𑀚𑀸𑀦𑀦𑁆𑀢𑁄 𑀅𑀢𑁆𑀣𑀸𑀦𑀢𑁆𑀣𑀓𑀼𑀲𑀮𑁄 𑀆𑀘𑀸𑀭𑁂 𑀞𑀺𑀢𑁄 𑀅𑀭𑀺𑀬𑀧𑀼𑀕𑁆𑀕𑀮𑁄 𑀅𑀦𑀭𑀺𑀬𑁂𑀦 𑀦𑀺𑀮𑁆𑀮𑀚𑁆𑀚𑁂𑀦 𑀤𑀼𑀲𑁆𑀲𑀻𑀮𑁂𑀦 𑀲𑀤𑁆𑀥𑀺𑀁 𑀲𑀦𑁆𑀣𑀯𑀁 𑀦 𑀓𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀓𑀺𑀁 𑀓𑀸𑀭𑀡𑀸? 𑀘𑀺𑀭𑀸𑀦𑀼𑀯𑀼𑀢𑁆𑀣𑁄𑀧𑀺 𑀓𑀭𑁄𑀢𑀺 𑀧𑀸𑀧𑀦𑁆𑀢𑀺, 𑀬𑀲𑁆𑀫𑀸 𑀅𑀦𑀭𑀺𑀬𑁄 𑀘𑀺𑀭𑀁 𑀏𑀓𑀢𑁄 𑀅𑀦𑀼𑀯𑀼𑀢𑁆𑀣𑁄𑀧𑀺 𑀢𑀁 𑀏𑀓𑀢𑁄 𑀦𑀺𑀯𑀸𑀲𑀁 𑀅𑀕𑀡𑁂𑀢𑁆𑀯𑀸 𑀓𑀭𑁄𑀢𑀺 𑀧𑀸𑀧𑀁 𑀮𑀸𑀫𑀓𑀓𑀫𑁆𑀫𑀁 𑀓𑀭𑁄𑀢𑀺𑀬𑁂𑀯. 𑀬𑀣𑀸 𑀓𑀺𑀁? 𑀕𑀚𑁄 𑀬𑀣𑀸 𑀇𑀦𑁆𑀤𑀲𑀫𑀸𑀦𑀕𑁄𑀢𑁆𑀢𑀦𑁆𑀢𑀺, 𑀬𑀣𑀸 𑀲𑁄 𑀕𑀚𑁄 𑀇𑀦𑁆𑀤𑀲𑀫𑀸𑀦𑀕𑁄𑀢𑁆𑀢𑀁 𑀫𑀸𑀭𑁂𑀦𑁆𑀢𑁄 𑀧𑀸𑀧𑀁 𑀅𑀓𑀸𑀲𑀻𑀢𑀺 𑀅𑀢𑁆𑀣𑁄. 𑀬𑀁 𑀢𑁆𑀯𑁂𑀯 𑀚𑀜𑁆𑀜𑀸 𑀲𑀤𑀺𑀲𑁄 𑀫𑀫𑀦𑁆𑀢𑀺𑀆𑀤𑀻𑀲𑀼 𑀬𑀁 𑀢𑁆𑀯𑁂𑀯 𑀧𑀼𑀕𑁆𑀕𑀮𑀁 ‘‘𑀅𑀬𑀁 𑀫𑀫 𑀲𑀻𑀮𑀸𑀤𑀻𑀳𑀺 𑀲𑀤𑀺𑀲𑁄’’𑀢𑀺 𑀚𑀸𑀦𑁂𑀬𑁆𑀬, 𑀢𑁂𑀦𑁂𑀯 𑀲𑀤𑁆𑀥𑀺𑀁 𑀫𑁂𑀢𑁆𑀢𑀺𑀁 𑀓𑀬𑀺𑀭𑀸𑀣, 𑀲𑀧𑁆𑀧𑀼𑀭𑀺𑀲𑁂𑀦 𑀲𑀤𑁆𑀥𑀺𑀁 𑀲𑀫𑀸𑀕𑀫𑁄 𑀲𑀼𑀔𑀸𑀯𑀳𑁄𑀢𑀺.

𑀏𑀯𑀁 𑀩𑁄𑀥𑀺𑀲𑀢𑁆𑀢𑁄 ‘‘𑀅𑀦𑁄𑀯𑀸𑀤𑀓𑁂𑀦 𑀦𑀸𑀫 𑀦 𑀪𑀯𑀺𑀢𑀩𑁆𑀩𑀁, 𑀲𑀼𑀲𑀺𑀓𑁆𑀔𑀺𑀢𑁂𑀦 𑀪𑀯𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀇𑀲𑀺𑀕𑀡𑀁 𑀑𑀯𑀤𑀺𑀢𑁆𑀯𑀸 𑀇𑀦𑁆𑀤𑀲𑀫𑀸𑀦𑀕𑁄𑀢𑁆𑀢𑀲𑁆𑀲 𑀲𑀭𑀻𑀭𑀓𑀺𑀘𑁆𑀘𑀁 𑀓𑀸𑀭𑁂𑀢𑁆𑀯𑀸 𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀪𑀸𑀯𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑁄 𑀅𑀳𑁄𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀇𑀦𑁆𑀤𑀲𑀫𑀸𑀦𑀕𑁄𑀢𑁆𑀢𑁄 𑀅𑀬𑀁 𑀤𑀼𑀩𑁆𑀩𑀘𑁄 𑀅𑀳𑁄𑀲𑀺, 𑀕𑀡𑀲𑀢𑁆𑀣𑀸 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀇𑀦𑁆𑀤𑀲𑀫𑀸𑀦𑀕𑁄𑀢𑁆𑀢𑀚𑀸𑀢𑀓𑀯𑀡𑁆𑀡𑀦𑀸 𑀧𑀞𑀫𑀸.

[𑁧𑁬𑁨] 𑁨. 𑀲𑀦𑁆𑀣𑀯𑀚𑀸𑀢𑀓𑀯𑀡𑁆𑀡𑀦𑀸

𑀦 𑀲𑀦𑁆𑀣𑀯𑀲𑁆𑀫𑀸 𑀧𑀭𑀫𑀢𑁆𑀣𑀺 𑀧𑀸𑀧𑀺𑀬𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀕𑁆𑀕𑀺𑀚𑀼𑀳𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀳𑁂𑀝𑁆𑀞𑀸 𑀦𑀗𑁆𑀕𑀼𑀝𑁆𑀞𑀚𑀸𑀢𑀓𑁂 (𑀚𑀸. 𑁧.𑁧.𑁧𑁪𑁪 𑀆𑀤𑀬𑁄) 𑀓𑀣𑀺𑀢𑀲𑀤𑀺𑀲𑀫𑁂𑀯. 𑀪𑀺𑀓𑁆𑀔𑀽 𑀢𑁂 𑀅𑀕𑁆𑀕𑀺𑀁 𑀚𑀼𑀳𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀪𑀦𑁆𑀢𑁂, 𑀚𑀝𑀺𑀮𑀸 𑀦𑀸𑀦𑀧𑁆𑀧𑀓𑀸𑀭𑀁 𑀫𑀺𑀘𑁆𑀙𑀸𑀢𑀧𑀁 𑀓𑀭𑁄𑀦𑁆𑀢𑀺, 𑀅𑀢𑁆𑀣𑀺 𑀦𑀼 𑀔𑁄 𑀏𑀢𑁆𑀣 𑀯𑀼𑀟𑁆𑀠𑀻’’𑀢𑀺 𑀪𑀕𑀯𑀦𑁆𑀢𑀁 𑀧𑀼𑀘𑁆𑀙𑀺𑀁𑀲𑀼. ‘‘𑀦, 𑀪𑀺𑀓𑁆𑀔𑀯𑁂, 𑀏𑀢𑁆𑀣𑀓𑀸𑀘𑀺 𑀯𑀼𑀟𑁆𑀠𑀺 𑀦𑀸𑀫 𑀅𑀢𑁆𑀣𑀺, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸𑀧𑀺 𑀅𑀕𑁆𑀕𑀺𑀚𑀼𑀳𑀦𑁂 𑀯𑀼𑀟𑁆𑀠𑀺 𑀅𑀢𑁆𑀣𑀻𑀢𑀺 𑀲𑀜𑁆𑀜𑀸𑀬 𑀘𑀺𑀭𑀁 𑀅𑀕𑁆𑀕𑀺𑀁 𑀚𑀼𑀳𑀺𑀢𑁆𑀯𑀸 𑀢𑀲𑁆𑀫𑀺𑀁 𑀓𑀫𑁆𑀫𑁂 𑀅𑀯𑀼𑀟𑁆𑀠𑀺𑀫𑁂𑀯 𑀤𑀺𑀲𑁆𑀯𑀸 𑀅𑀕𑁆𑀕𑀺𑀁 𑀉𑀤𑀓𑁂𑀦 𑀦𑀺𑀩𑁆𑀩𑀸𑀧𑁂𑀢𑁆𑀯𑀸 𑀲𑀸𑀔𑀸𑀤𑀻𑀳𑀺 𑀧𑁄𑀣𑁂𑀢𑁆𑀯𑀸 𑀧𑀼𑀦 𑀦𑀺𑀯𑀢𑁆𑀢𑀺𑀢𑁆𑀯𑀸𑀧𑀺 𑀦 𑀑𑀮𑁄𑀓𑁂𑀲𑀼’’𑀦𑁆𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺. 𑀫𑀸𑀢𑀸𑀧𑀺𑀢𑀭𑁄 𑀢𑀲𑁆𑀲 𑀚𑀸𑀢𑀕𑁆𑀕𑀺𑀁 𑀕𑀳𑁂𑀢𑁆𑀯𑀸 𑀢𑀁 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑁂 𑀞𑀺𑀢𑀁 𑀆𑀳𑀁𑀲𑀼 𑁋 ‘‘𑀓𑀺𑀁, 𑀢𑀸𑀢, 𑀚𑀸𑀢𑀕𑁆𑀕𑀺𑀁 𑀕𑀳𑁂𑀢𑁆𑀯𑀸 𑀅𑀭𑀜𑁆𑀜𑁂 𑀅𑀕𑁆𑀕𑀺𑀁 𑀧𑀭𑀺𑀘𑀭𑀺𑀲𑁆𑀲𑀲𑀺, 𑀉𑀤𑀸𑀳𑀼 𑀢𑀬𑁄 𑀯𑁂𑀤𑁂 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀓𑀼𑀝𑀼𑀫𑁆𑀩𑀁 𑀲𑀡𑁆𑀞𑀧𑁂𑀢𑁆𑀯𑀸 𑀖𑀭𑀸𑀯𑀸𑀲𑀁 𑀯𑀲𑀺𑀲𑁆𑀲𑀲𑀻’’𑀢𑀺. 𑀲𑁄 ‘‘𑀦 𑀫𑁂 𑀖𑀭𑀸𑀯𑀸𑀲𑁂𑀦 𑀅𑀢𑁆𑀣𑁄, 𑀅𑀭𑀜𑁆𑀜𑁂 𑀅𑀕𑁆𑀕𑀺𑀁 𑀧𑀭𑀺𑀘𑀭𑀺𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀚𑀸𑀢𑀕𑁆𑀕𑀺𑀁 𑀕𑀳𑁂𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀯𑀦𑁆𑀤𑀺𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀧𑀡𑁆𑀡𑀲𑀸𑀮𑀸𑀬 𑀯𑀸𑀲𑀁 𑀓𑀧𑁆𑀧𑁂𑀢𑁆𑀯𑀸 𑀅𑀕𑁆𑀕𑀺𑀁 𑀧𑀭𑀺𑀘𑀭𑀺. 𑀲𑁄 𑀏𑀓𑀤𑀺𑀯𑀲𑀁 𑀦𑀺𑀫𑀦𑁆𑀢𑀺𑀢𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀲𑀧𑁆𑀧𑀺𑀦𑀸 𑀧𑀸𑀬𑀸𑀲𑀁 𑀮𑀪𑀺𑀢𑁆𑀯𑀸 ‘‘𑀇𑀫𑀁 𑀧𑀸𑀬𑀸𑀲𑀁 𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀬𑀚𑀺𑀲𑁆𑀲𑀸𑀫𑀻’’𑀢𑀺 𑀢𑀁 𑀧𑀸𑀬𑀸𑀲𑀁 𑀆𑀳𑀭𑀺𑀢𑁆𑀯𑀸 𑀅𑀕𑁆𑀕𑀺𑀁 𑀚𑀸𑀮𑁂𑀢𑁆𑀯𑀸 ‘‘𑀅𑀕𑁆𑀕𑀺𑀁 𑀢𑀸𑀯 𑀪𑀯𑀦𑁆𑀢𑀁 𑀲𑀧𑁆𑀧𑀺𑀬𑀼𑀢𑁆𑀢𑀁 𑀧𑀸𑀬𑀸𑀲𑀁 𑀧𑀸𑀬𑁂𑀫𑀻’’𑀢𑀺 𑀧𑀸𑀬𑀸𑀲𑀁 𑀅𑀕𑁆𑀕𑀺𑀫𑁆𑀳𑀺 𑀧𑀓𑁆𑀔𑀺𑀧𑀺. 𑀩𑀳𑀼𑀲𑀺𑀦𑁂𑀳𑁂 𑀧𑀸𑀬𑀸𑀲𑁂 𑀅𑀕𑁆𑀕𑀺𑀫𑁆𑀳𑀺 𑀧𑀓𑁆𑀔𑀺𑀢𑁆𑀢𑀫𑀢𑁆𑀢𑁂𑀬𑁂𑀯 𑀅𑀕𑁆𑀕𑀺 𑀚𑀮𑀺𑀢𑁆𑀯𑀸 𑀧𑀘𑁆𑀘𑀼𑀕𑁆𑀕𑀢𑀸𑀳𑀺 𑀅𑀘𑁆𑀘𑀻𑀳𑀺 𑀧𑀡𑁆𑀡𑀲𑀸𑀮𑀁 𑀛𑀸𑀧𑁂𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀪𑀻𑀢𑀢𑀲𑀺𑀢𑁄 𑀧𑀮𑀸𑀬𑀺𑀢𑁆𑀯𑀸 𑀩𑀳𑀺 𑀞𑀢𑁆𑀯𑀸 ‘‘𑀓𑀸𑀧𑀼𑀭𑀺𑀲𑁂𑀳𑀺 𑀦𑀸𑀫 𑀲𑀦𑁆𑀣𑀯𑁄 𑀦 𑀓𑀸𑀢𑀩𑁆𑀩𑁄, 𑀇𑀤𑀸𑀦𑀺 𑀫𑁂 𑀇𑀫𑀺𑀦𑀸 𑀅𑀕𑁆𑀕𑀺𑀦𑀸 𑀓𑀺𑀘𑁆𑀙𑁂𑀦 𑀓𑀢𑀸 𑀧𑀡𑁆𑀡𑀲𑀸𑀮𑀸 𑀛𑀸𑀧𑀺𑀢𑀸’’𑀢𑀺 𑀯𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁨𑁩. ‘‘𑀦 𑀲𑀦𑁆𑀣𑀯𑀲𑁆𑀫𑀸 𑀧𑀭𑀫𑀢𑁆𑀣𑀺 𑀧𑀸𑀧𑀺𑀬𑁄, 𑀬𑁄 𑀲𑀦𑁆𑀣𑀯𑁄 𑀓𑀸𑀧𑀼𑀭𑀺𑀲𑁂𑀦 𑀳𑁄𑀢𑀺;

𑀲𑀦𑁆𑀢𑀧𑁆𑀧𑀺𑀢𑁄 𑀲𑀧𑁆𑀧𑀺𑀦𑀸 𑀧𑀸𑀬𑀲𑁂𑀦, 𑀓𑀺𑀘𑁆𑀙𑀸𑀓𑀢𑀁 𑀧𑀡𑁆𑀡𑀓𑀼𑀝𑀺𑀁 𑀅𑀤𑀬𑁆𑀳𑀻’’𑀢𑀺.

𑀢𑀢𑁆𑀣 𑀦 𑀲𑀦𑁆𑀣𑀯𑀲𑁆𑀫𑀸𑀢𑀺 𑀢𑀡𑁆𑀳𑀸𑀲𑀦𑁆𑀣𑀯𑀸𑀧𑀺 𑀘 𑀫𑀺𑀢𑁆𑀢𑀲𑀦𑁆𑀣𑀯𑀸𑀧𑀺 𑀘𑀸𑀢𑀺 𑀤𑀼𑀯𑀺𑀥𑀸𑀧𑀺 𑀏𑀢𑀲𑁆𑀫𑀸 𑀲𑀦𑁆𑀣𑀯𑀸 𑀧𑀭𑀁 𑀉𑀢𑁆𑀢𑀭𑀺 𑀅𑀜𑁆𑀜𑀁 𑀧𑀸𑀧𑀢𑀭𑀁 𑀦𑀢𑁆𑀣𑀺, 𑀮𑀸𑀫𑀓𑀢𑀭𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀬𑁄 𑀲𑀦𑁆𑀣𑀯𑁄 𑀓𑀸𑀧𑀼𑀭𑀺𑀲𑁂𑀦𑀸𑀢𑀺 𑀬𑁄 𑀧𑀸𑀧𑀓𑁂𑀦 𑀓𑀸𑀧𑀼𑀭𑀺𑀲𑁂𑀦 𑀲𑀤𑁆𑀥𑀺𑀁 𑀤𑀼𑀯𑀺𑀥𑁄𑀧𑀺 𑀲𑀦𑁆𑀣𑀯𑁄, 𑀢𑀢𑁄 𑀧𑀸𑀧𑀢𑀭𑀁 𑀅𑀜𑁆𑀜𑀁 𑀦𑀢𑁆𑀣𑀺. 𑀓𑀲𑁆𑀫𑀸? 𑀲𑀦𑁆𑀢𑀧𑁆𑀧𑀺𑀢𑁄 …𑀧𑁂…𑀅𑀤𑀬𑁆𑀳𑀻𑀢𑀺, 𑀬𑀲𑁆𑀫𑀸 𑀲𑀧𑁆𑀧𑀺𑀦𑀸 𑀘 𑀧𑀸𑀬𑀸𑀲𑁂𑀦 𑀘 𑀲𑀦𑁆𑀢𑀧𑁆𑀧𑀺𑀢𑁄𑀧𑀺 𑀅𑀬𑀁 𑀅𑀕𑁆𑀕𑀺 𑀫𑀬𑀸 𑀓𑀺𑀘𑁆𑀙𑁂𑀦 𑀓𑀢𑀁 𑀧𑀡𑁆𑀡𑀲𑀸𑀮𑀁 𑀛𑀸𑀧𑁂𑀲𑀻𑀢𑀺 𑀅𑀢𑁆𑀣𑁄.

𑀲𑁄 𑀏𑀯𑀁 𑀯𑀢𑁆𑀯𑀸 ‘‘𑀦 𑀫𑁂 𑀢𑀬𑀸 𑀫𑀺𑀢𑁆𑀢𑀤𑀼𑀩𑁆𑀪𑀺𑀦𑀸 𑀅𑀢𑁆𑀣𑁄’’𑀢𑀺 𑀢𑀁 𑀅𑀕𑁆𑀕𑀺𑀁 𑀉𑀤𑀓𑁂𑀦 𑀦𑀺𑀩𑁆𑀩𑀸𑀧𑁂𑀢𑁆𑀯𑀸 𑀲𑀸𑀔𑀸𑀳𑀺 𑀧𑁄𑀣𑁂𑀢𑁆𑀯𑀸 𑀅𑀦𑁆𑀢𑁄𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀏𑀓𑀁 𑀲𑀸𑀫𑀫𑀺𑀕𑀺𑀁 𑀲𑀻𑀳𑀲𑁆𑀲 𑀘 𑀩𑁆𑀬𑀕𑁆𑀖𑀲𑁆𑀲 𑀘 𑀤𑀻𑀧𑀺𑀦𑁄 𑀘 𑀫𑀼𑀔𑀁 𑀮𑁂𑀳𑀦𑁆𑀢𑀺𑀁 𑀤𑀺𑀲𑁆𑀯𑀸 ‘‘𑀲𑀧𑁆𑀧𑀼𑀭𑀺𑀲𑁂𑀳𑀺 𑀲𑀤𑁆𑀥𑀺𑀁 𑀲𑀦𑁆𑀣𑀯𑀸 𑀧𑀭𑀁 𑀲𑁂𑀬𑁆𑀬𑁄 𑀦𑀸𑀫 𑀦𑀢𑁆𑀣𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁨𑁪. ‘‘𑀦 𑀲𑀦𑁆𑀣𑀯𑀲𑁆𑀫𑀸 𑀧𑀭𑀫𑀢𑁆𑀣𑀺 𑀲𑁂𑀬𑁆𑀬𑁄, 𑀬𑁄 𑀲𑀦𑁆𑀣𑀯𑁄 𑀲𑀧𑁆𑀧𑀼𑀭𑀺𑀲𑁂𑀦 𑀳𑁄𑀢𑀺;

𑀲𑀻𑀳𑀲𑁆𑀲 𑀩𑁆𑀬𑀕𑁆𑀖𑀲𑁆𑀲 𑀘 𑀤𑀻𑀧𑀺𑀦𑁄 𑀘, 𑀲𑀸𑀫𑀸 𑀫𑀼𑀔𑀁 𑀮𑁂𑀳𑀢𑀺 𑀲𑀦𑁆𑀣𑀯𑁂𑀦𑀸’’𑀢𑀺.

𑀢𑀢𑁆𑀣 𑀲𑀸𑀫𑀸 𑀫𑀼𑀔𑀁 𑀮𑁂𑀳𑀢𑀺 𑀲𑀦𑁆𑀣𑀯𑁂𑀦𑀸𑀢𑀺 𑀲𑀸𑀫𑀸 𑀦𑀸𑀫 𑀫𑀺𑀕𑀻 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀚𑀦𑀸𑀦𑀁 𑀲𑀦𑁆𑀣𑀯𑁂𑀦 𑀲𑀺𑀦𑁂𑀳𑁂𑀦 𑀫𑀼𑀔𑀁 𑀮𑁂𑀳𑀢𑀻𑀢𑀺.

𑀏𑀯𑀁 𑀯𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀅𑀦𑁆𑀢𑁄𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀚𑀻𑀯𑀺𑀢𑀧𑀭𑀺𑀬𑁄𑀲𑀸𑀦𑁂 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑁄 𑀅𑀳𑁄𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑁂𑀦 𑀲𑀫𑀬𑁂𑀦 𑀢𑀸𑀧𑀲𑁄 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀦𑁆𑀣𑀯𑀚𑀸𑀢𑀓𑀯𑀡𑁆𑀡𑀦𑀸 𑀤𑀼𑀢𑀺𑀬𑀸.

[𑁧𑁬𑁩] 𑁩. 𑀲𑀼𑀲𑀻𑀫𑀚𑀸𑀢𑀓𑀯𑀡𑁆𑀡𑀦𑀸

𑀓𑀸𑀴𑀸 𑀫𑀺𑀕𑀸 𑀲𑁂𑀢𑀤𑀦𑁆𑀢𑀸 𑀢𑀯𑀻𑀫𑁂𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀙𑀦𑁆𑀤𑀓𑀤𑀸𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀸𑀯𑀢𑁆𑀣𑀺𑀬𑀜𑁆𑀳𑀺 𑀓𑀤𑀸𑀘𑀺 𑀏𑀓𑀫𑁂𑀯 𑀓𑀼𑀮𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀸𑀦𑀁 𑀤𑁂𑀢𑀺, 𑀓𑀤𑀸𑀘𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀤𑁂𑀢𑀺, 𑀓𑀤𑀸𑀘𑀺 𑀕𑀡𑀩𑀦𑁆𑀥𑀦𑁂𑀦 𑀩𑀳𑀽 𑀏𑀓𑀢𑁄 𑀳𑀼𑀢𑁆𑀯𑀸 𑀤𑁂𑀦𑁆𑀢𑀺, 𑀓𑀤𑀸𑀘𑀺 𑀯𑀻𑀣𑀺𑀲𑀪𑀸𑀕𑁂𑀦, 𑀓𑀤𑀸𑀘𑀺 𑀲𑀓𑀮𑀦𑀕𑀭𑀯𑀸𑀲𑀺𑀦𑁄 𑀙𑀦𑁆𑀤𑀓𑀁 𑀲𑀁𑀳𑀭𑀺𑀢𑁆𑀯𑀸 𑀤𑀸𑀦𑀁 𑀤𑁂𑀦𑁆𑀢𑀺. 𑀇𑀫𑀲𑁆𑀫𑀺𑀁 𑀧𑀦 𑀓𑀸𑀮𑁂 𑀲𑀓𑀮𑀦𑀕𑀭𑀯𑀸𑀲𑀺𑀦𑁄 𑀙𑀦𑁆𑀤𑀓𑀁 𑀲𑀁𑀳𑀭𑀺𑀢𑁆𑀯𑀸 𑀲𑀩𑁆𑀩𑀧𑀭𑀺𑀓𑁆𑀔𑀸𑀭𑀤𑀸𑀦𑀁 𑀲𑀚𑁆𑀚𑁂𑀢𑁆𑀯𑀸 𑀤𑁆𑀯𑁂 𑀓𑁄𑀝𑁆𑀞𑀸𑀲𑀸 𑀳𑀼𑀢𑁆𑀯𑀸 𑀏𑀓𑀘𑁆𑀘𑁂 ‘‘𑀇𑀫𑀁 𑀲𑀩𑁆𑀩𑀧𑀭𑀺𑀓𑁆𑀔𑀸𑀭𑀤𑀸𑀦𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀤𑀲𑁆𑀲𑀸𑀫𑀸’’𑀢𑀺 𑀆𑀳𑀁𑀲𑀼, 𑀏𑀓𑀘𑁆𑀘𑁂 ‘‘𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲𑀸’’𑀢𑀺. 𑀏𑀯𑀁 𑀧𑀼𑀦𑀧𑁆𑀧𑀼𑀦𑀁 𑀓𑀣𑀸𑀬 𑀯𑀢𑁆𑀢𑀫𑀸𑀦𑀸𑀬 𑀅𑀜𑁆𑀜𑀢𑀺𑀢𑁆𑀣𑀺𑀬𑀲𑀸𑀯𑀓𑁂𑀳𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀜𑁆𑀜𑁂𑀯, 𑀩𑀼𑀤𑁆𑀥𑀲𑀸𑀯𑀓𑁂𑀳𑀺 ‘‘‘𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲𑁂𑀯𑀸’𑀢𑀺 𑀯𑀼𑀢𑁆𑀢𑁂 𑀲𑀫𑁆𑀩𑀳𑀼𑀮𑀁 𑀓𑀭𑀺𑀲𑀸𑀫𑀸’’𑀢𑀺 𑀲𑀫𑁆𑀩𑀳𑀼𑀮𑀸𑀬 𑀓𑀣𑀸𑀬 ‘‘𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀲𑁆𑀲𑀸𑀫𑀸’’𑀢𑀺 𑀯𑀤𑀦𑁆𑀢𑀸𑀬𑁂𑀯 𑀩𑀳𑀼𑀓𑀸 𑀚𑀸𑀢𑀸, 𑀢𑁂𑀲𑀜𑁆𑀜𑁂𑀯 𑀓𑀣𑀸 𑀧𑀢𑀺𑀝𑁆𑀞𑀸𑀲𑀺. 𑀅𑀜𑁆𑀜𑀢𑀺𑀢𑁆𑀣𑀺𑀬𑀲𑀸𑀯𑀓𑀸 𑀩𑀼𑀤𑁆𑀥𑀸𑀦𑀁 𑀤𑀸𑀢𑀩𑁆𑀩𑀤𑀸𑀦𑀲𑁆𑀲 𑀅𑀦𑁆𑀢𑀭𑀸𑀬𑀁 𑀓𑀸𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀦𑀸𑀕𑀭𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀩𑁆𑀩𑀧𑀭𑀺𑀓𑁆𑀔𑀸𑀭𑁂 𑀅𑀤𑀁𑀲𑀼. 𑀲𑀢𑁆𑀣𑀸 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀫𑀳𑀸𑀚𑀦𑀁 𑀫𑀕𑁆𑀕𑀨𑀮𑁂𑀳𑀺 𑀧𑀩𑁄𑀥𑁂𑀢𑁆𑀯𑀸 𑀚𑁂𑀢𑀯𑀦𑀯𑀺𑀳𑀸𑀭𑀫𑁂𑀯 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀯𑀢𑁆𑀢𑁂 𑀤𑀲𑁆𑀲𑀺𑀢𑁂 𑀕𑀦𑁆𑀥𑀓𑀼𑀝𑀺𑀧𑁆𑀧𑀫𑀼𑀔𑁂 𑀞𑀢𑁆𑀯𑀸 𑀲𑀼𑀕𑀢𑁄𑀯𑀸𑀤𑀁 𑀤𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀁 𑀧𑀸𑀯𑀺𑀲𑀺.

𑀲𑀸𑀬𑀦𑁆𑀳𑀲𑀫𑀬𑁂 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀆𑀯𑀼𑀲𑁄, 𑀅𑀜𑁆𑀜𑀢𑀺𑀢𑁆𑀣𑀺𑀬𑀲𑀸𑀯𑀓𑀸 𑀩𑀼𑀤𑁆𑀥𑀸𑀦𑀁 𑀤𑀸𑀢𑀩𑁆𑀩𑀤𑀸𑀦𑀲𑁆𑀲 𑀅𑀦𑁆𑀢𑀭𑀸𑀬𑀓𑀭𑀡𑀢𑁆𑀣𑀸𑀬 𑀯𑀸𑀬𑀫𑀦𑁆𑀢𑀸𑀧𑀺 𑀅𑀦𑁆𑀢𑀭𑀸𑀬𑀁 𑀓𑀸𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼, 𑀢𑀁 𑀲𑀩𑁆𑀩𑀧𑀭𑀺𑀓𑁆𑀔𑀸𑀭𑀤𑀸𑀦𑀁 𑀩𑀼𑀤𑁆𑀥𑀸𑀦𑀁𑀬𑁂𑀯 𑀧𑀸𑀤𑀫𑀽𑀮𑀁 𑀆𑀕𑀢𑀁, 𑀅𑀳𑁄 𑀩𑀼𑀤𑁆𑀥𑀩𑀮𑀁 𑀦𑀸𑀫 𑀫𑀳𑀦𑁆𑀢’’𑀦𑁆𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀏𑀢𑁂 𑀅𑀜𑁆𑀜𑀢𑀺𑀢𑁆𑀣𑀺𑀬𑀲𑀸𑀯𑀓𑀸 𑀇𑀤𑀸𑀦𑁂𑀯 𑀫𑀬𑁆𑀳𑀁 𑀤𑀸𑀢𑀩𑁆𑀩𑀤𑀸𑀦𑀲𑁆𑀲 𑀅𑀦𑁆𑀢𑀭𑀸𑀬𑀓𑀭𑀡𑀢𑁆𑀣𑀸𑀬 𑀯𑀸𑀬𑀫𑀦𑁆𑀢𑀺, 𑀧𑀼𑀩𑁆𑀩𑁂𑀧𑀺 𑀯𑀸𑀬𑀫𑀺𑀁𑀲𑀼, 𑀲𑁄 𑀧𑀦 𑀧𑀭𑀺𑀓𑁆𑀔𑀸𑀭𑁄 𑀲𑀩𑁆𑀩𑀓𑀸𑀮𑁂𑀧𑀺 𑀫𑀫𑁂𑀯 𑀧𑀸𑀤𑀫𑀽𑀮𑀁 𑀆𑀕𑀘𑁆𑀙𑀢𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀲𑀼𑀲𑀻𑀫𑁄 𑀦𑀸𑀫 𑀭𑀸𑀚𑀸 𑀅𑀳𑁄𑀲𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀧𑀼𑀭𑁄𑀳𑀺𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺, 𑀢𑀲𑁆𑀲 𑀲𑁄𑀴𑀲𑀯𑀲𑁆𑀲𑀺𑀓𑀓𑀸𑀮𑁂 𑀧𑀺𑀢𑀸 𑀓𑀸𑀮𑀫𑀓𑀸𑀲𑀺. 𑀲𑁄 𑀧𑀦 𑀥𑀭𑀫𑀸𑀦𑀓𑀸𑀮𑁂 𑀭𑀜𑁆𑀜𑁄 𑀳𑀢𑁆𑀣𑀺𑀫𑀗𑁆𑀕𑀮𑀓𑀸𑀭𑀓𑁄 𑀅𑀳𑁄𑀲𑀺. 𑀳𑀢𑁆𑀣𑀻𑀦𑀁 𑀫𑀗𑁆𑀕𑀮𑀓𑀭𑀡𑀝𑁆𑀞𑀸𑀦𑁂 𑀆𑀪𑀢𑀉𑀧𑀓𑀭𑀡𑀪𑀡𑁆𑀟𑀜𑁆𑀘 𑀳𑀢𑁆𑀣𑀸𑀮𑀗𑁆𑀓𑀸𑀭𑀜𑁆𑀘 𑀲𑀩𑁆𑀩𑀁 𑀲𑁄𑀬𑁂𑀯 𑀅𑀮𑀢𑁆𑀣. 𑀏𑀯𑀫𑀲𑁆𑀲 𑀏𑀓𑁂𑀓𑀲𑁆𑀫𑀺𑀁 𑀫𑀗𑁆𑀕𑀮𑁂 𑀓𑁄𑀝𑀺𑀫𑀢𑁆𑀢𑀁 𑀥𑀦𑀁 𑀉𑀧𑁆𑀧𑀚𑁆𑀚𑀢𑀺. 𑀅𑀣 𑀢𑀲𑁆𑀫𑀺𑀁 𑀓𑀸𑀮𑁂 𑀳𑀢𑁆𑀣𑀺𑀫𑀗𑁆𑀕𑀮𑀙𑀡𑁄 𑀲𑀫𑁆𑀧𑀸𑀧𑀼𑀡𑀺. 𑀲𑁂𑀲𑀸 𑀩𑁆𑀭𑀸𑀳𑁆𑀫𑀡𑀸 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀳𑀢𑁆𑀣𑀺𑀫𑀗𑁆𑀕𑀮𑀙𑀡𑁄 𑀲𑀫𑁆𑀧𑀢𑁆𑀢𑁄, 𑀫𑀗𑁆𑀕𑀮𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀧𑀼𑀭𑁄𑀳𑀺𑀢𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀦 𑀧𑀼𑀢𑁆𑀢𑁄 𑀅𑀢𑀺𑀤𑀳𑀭𑁄, 𑀦𑁂𑀯 𑀢𑀬𑁄 𑀯𑁂𑀤𑁂 𑀚𑀸𑀦𑀸𑀢𑀺, 𑀦 𑀳𑀢𑁆𑀣𑀺𑀲𑀼𑀢𑁆𑀢𑀁, 𑀫𑀬𑀁 𑀳𑀢𑁆𑀣𑀺𑀫𑀗𑁆𑀕𑀮𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀆𑀳𑀁𑀲𑀼. 𑀭𑀸𑀚𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀩𑁆𑀭𑀸𑀳𑁆𑀫𑀡𑀸 𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑀲𑁆𑀲 𑀳𑀢𑁆𑀣𑀺𑀫𑀗𑁆𑀕𑀮𑀁 𑀓𑀸𑀢𑀼𑀁 𑀅𑀤𑀢𑁆𑀯𑀸 ‘‘𑀳𑀢𑁆𑀣𑀺𑀫𑀗𑁆𑀕𑀮𑀁 𑀓𑀢𑁆𑀯𑀸 𑀫𑀬𑀁 𑀥𑀦𑀁 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀳𑀝𑁆𑀞𑀢𑀼𑀝𑁆𑀞𑀸 𑀯𑀺𑀘𑀭𑀦𑁆𑀢𑀺. 𑀅𑀣 ‘‘𑀘𑀢𑀼𑀢𑁆𑀣𑁂 𑀤𑀺𑀯𑀲𑁂 𑀳𑀢𑁆𑀣𑀺𑀫𑀗𑁆𑀕𑀮𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀫𑀸𑀢𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 ‘‘𑀳𑀢𑁆𑀣𑀺𑀫𑀗𑁆𑀕𑀮𑀓𑀭𑀡𑀁 𑀦𑀸𑀫 𑀬𑀸𑀯 𑀲𑀢𑁆𑀢𑀫𑀸 𑀓𑀼𑀮𑀧𑀭𑀺𑀯𑀝𑁆𑀝𑀸 𑀅𑀫𑁆𑀳𑀸𑀓𑀁 𑀯𑀁𑀲𑁄, 𑀯𑀁𑀲𑁄 𑀘 𑀦𑁄 𑀑𑀲𑀓𑁆𑀓𑀺𑀲𑁆𑀲𑀢𑀺, 𑀥𑀦𑀸 𑀘 𑀧𑀭𑀺𑀳𑀸𑀬𑀺𑀲𑁆𑀲𑀸𑀫𑀸’’𑀢𑀺 𑀅𑀦𑀼𑀲𑁄𑀘𑀫𑀸𑀦𑀸 𑀧𑀭𑁄𑀤𑀺.

𑀩𑁄𑀥𑀺𑀲𑀢𑁆𑀢𑁄 ‘‘𑀓𑀲𑁆𑀫𑀸, 𑀅𑀫𑁆𑀫, 𑀭𑁄𑀤𑀲𑀻’’𑀢𑀺 𑀯𑀢𑁆𑀯𑀸 𑀢𑀁 𑀓𑀸𑀭𑀡𑀁 𑀲𑀼𑀢𑁆𑀯𑀸 ‘‘𑀦𑀦𑀼, 𑀅𑀫𑁆𑀫, 𑀅𑀳𑀁 𑀫𑀗𑁆𑀕𑀮𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀳. ‘‘𑀢𑀸𑀢, 𑀢𑁆𑀯𑀁 𑀦𑁂𑀯 𑀢𑀬𑁄 𑀯𑁂𑀤𑁂 𑀚𑀸𑀦𑀸𑀲𑀺, 𑀦 𑀳𑀢𑁆𑀣𑀺𑀲𑀼𑀢𑁆𑀢𑀁, 𑀓𑀣𑀁 𑀫𑀗𑁆𑀕𑀮𑀁 𑀓𑀭𑀺𑀲𑁆𑀲𑀲𑀻’’𑀢𑀺. ‘‘𑀅𑀫𑁆𑀫, 𑀓𑀤𑀸 𑀧𑀦 𑀳𑀢𑁆𑀣𑀺𑀫𑀗𑁆𑀕𑀮𑀁 𑀓𑀭𑀺𑀲𑁆𑀲𑀢𑀻’’𑀢𑀺? ‘‘𑀇𑀢𑁄 𑀘𑀢𑀼𑀢𑁆𑀣𑁂 𑀤𑀺𑀯𑀲𑁂, 𑀢𑀸𑀢𑀸’’𑀢𑀺. ‘‘𑀅𑀫𑁆𑀫, 𑀢𑀬𑁄 𑀧𑀦 𑀯𑁂𑀤𑁂 𑀧𑀕𑀼𑀡𑁂 𑀓𑀢𑁆𑀯𑀸 𑀳𑀢𑁆𑀣𑀺𑀲𑀼𑀢𑁆𑀢𑀁 𑀚𑀸𑀦𑀦𑀓𑀆𑀘𑀭𑀺𑀬𑁄 𑀓𑀳𑀁 𑀯𑀲𑀢𑀻’’𑀢𑀺? ‘‘𑀢𑀸𑀢, 𑀏𑀯𑀭𑀽𑀧𑁄 𑀤𑀺𑀲𑀸𑀧𑀸𑀫𑁄𑀓𑁆𑀔𑁄 𑀆𑀘𑀭𑀺𑀬𑁄 𑀇𑀢𑁄 𑀯𑀻𑀲𑀬𑁄𑀚𑀦𑀲𑀢𑀫𑀢𑁆𑀣𑀓𑁂 𑀕𑀦𑁆𑀥𑀸𑀭𑀭𑀝𑁆𑀞𑁂 𑀢𑀓𑁆𑀓𑀲𑀺𑀮𑀸𑀬𑀁 𑀯𑀲𑀢𑀻’’𑀢𑀺. ‘‘𑀅𑀫𑁆𑀫, 𑀅𑀫𑁆𑀳𑀸𑀓𑀁 𑀯𑀁𑀲𑀁 𑀦 𑀦𑀸𑀲𑁂𑀲𑁆𑀲𑀸𑀫𑀺, 𑀅𑀳𑀁 𑀲𑁆𑀯𑁂 𑀏𑀓𑀤𑀺𑀯𑀲𑁂𑀦𑁂𑀯 𑀢𑀓𑁆𑀓𑀲𑀺𑀮𑀁 𑀕𑀦𑁆𑀢𑁆𑀯𑀸 𑀏𑀓𑀭𑀢𑁆𑀢𑁂𑀦𑁂𑀯 𑀢𑀬𑁄 𑀯𑁂𑀤𑁂 𑀘 𑀳𑀢𑁆𑀣𑀺𑀲𑀼𑀢𑁆𑀢𑀜𑁆𑀘 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀆𑀕𑀦𑁆𑀢𑁆𑀯𑀸 𑀘𑀢𑀼𑀢𑁆𑀣𑁂 𑀤𑀺𑀯𑀲𑁂 𑀳𑀢𑁆𑀣𑀺𑀫𑀗𑁆𑀕𑀮𑀁 𑀓𑀭𑀺𑀲𑁆𑀲𑀸𑀫𑀺, 𑀫𑀸 𑀭𑁄𑀤𑀻’’𑀢𑀺 𑀫𑀸𑀢𑀭𑀁 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀩𑁄𑀥𑀺𑀲𑀢𑁆𑀢𑁄 𑀧𑀸𑀢𑁄𑀯 𑀪𑀼𑀜𑁆𑀚𑀺𑀢𑁆𑀯𑀸 𑀏𑀓𑀓𑁄𑀯 𑀦𑀺𑀓𑁆𑀔𑀫𑀺𑀢𑁆𑀯𑀸 𑀏𑀓𑀤𑀺𑀯𑀲𑁂𑀦𑁂𑀯 𑀢𑀓𑁆𑀓𑀲𑀺𑀮𑀁 𑀕𑀦𑁆𑀢𑁆𑀯𑀸 𑀆𑀘𑀭𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺.

𑀅𑀣 𑀦𑀁 𑀆𑀘𑀭𑀺𑀬𑁄 ‘‘𑀓𑀼𑀢𑁄 𑀆𑀕𑀢𑁄𑀲𑀺, 𑀢𑀸𑀢𑀸’’𑀢𑀺 𑀧𑀼𑀘𑁆𑀙𑀺. ‘‘𑀩𑀸𑀭𑀸𑀡𑀲𑀺𑀢𑁄, 𑀆𑀘𑀭𑀺𑀬𑀸’’𑀢𑀺. ‘‘𑀓𑁂𑀦𑀢𑁆𑀣𑁂𑀦𑀸’’𑀢𑀺? ‘‘𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀢𑀬𑁄 𑀯𑁂𑀤𑁂 𑀘 𑀳𑀢𑁆𑀣𑀺𑀲𑀼𑀢𑁆𑀢𑀜𑁆𑀘 𑀉𑀕𑁆𑀕𑀡𑁆𑀳𑀦𑀢𑁆𑀣𑀸𑀬𑀸’’𑀢𑀺. ‘‘𑀲𑀸𑀥𑀼, 𑀢𑀸𑀢, 𑀉𑀕𑁆𑀕𑀡𑁆𑀳𑀸’’𑀢𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀆𑀘𑀭𑀺𑀬, 𑀫𑀬𑁆𑀳𑀁 𑀓𑀫𑁆𑀫𑀁 𑀅𑀘𑁆𑀘𑀸𑀬𑀺𑀓’’𑀦𑁆𑀢𑀺 𑀲𑀩𑁆𑀩𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀅𑀳𑀁 𑀏𑀓𑀤𑀺𑀯𑀲𑁂𑀦𑁂𑀯 𑀯𑀻𑀲𑀬𑁄𑀚𑀦𑀲𑀢𑀁 𑀆𑀕𑀢𑁄, 𑀅𑀚𑁆𑀚𑁂𑀯𑁂𑀓𑀭𑀢𑁆𑀢𑀺𑀁 𑀫𑀬𑁆𑀳𑀫𑁂𑀯 𑀑𑀓𑀸𑀲𑀁 𑀓𑀭𑁄𑀣, 𑀇𑀢𑁄 𑀢𑀢𑀺𑀬𑀤𑀺𑀯𑀲𑁂 𑀳𑀢𑁆𑀣𑀺𑀫𑀗𑁆𑀕𑀮𑀁 𑀪𑀯𑀺𑀲𑁆𑀲𑀢𑀺, 𑀅𑀳𑀁 𑀏𑀓𑁂𑀦𑁂𑀯 𑀉𑀤𑁆𑀤𑁂𑀲𑀫𑀕𑁆𑀕𑁂𑀦 𑀲𑀩𑁆𑀩𑀁 𑀉𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀆𑀘𑀭𑀺𑀬𑀁 𑀑𑀓𑀸𑀲𑀁 𑀓𑀸𑀭𑁂𑀢𑁆𑀯𑀸 𑀆𑀘𑀭𑀺𑀬𑀲𑁆𑀲 𑀪𑀼𑀢𑁆𑀢𑀓𑀸𑀮𑁂 𑀲𑀬𑀁 𑀪𑀼𑀜𑁆𑀚𑀺𑀢𑁆𑀯𑀸 𑀆𑀘𑀭𑀺𑀬𑀲𑁆𑀲 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀲𑀳𑀲𑁆𑀲𑀢𑁆𑀣𑀯𑀺𑀓𑀁 𑀧𑀼𑀭𑀢𑁄 𑀞𑀧𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀧𑀭𑀺𑀬𑀢𑁆𑀢𑀺𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀭𑀼𑀡𑁂 𑀉𑀕𑁆𑀕𑀘𑁆𑀙𑀦𑁆𑀢𑁂 𑀢𑀬𑁄 𑀯𑁂𑀤𑁂 𑀘 𑀳𑀢𑁆𑀣𑀺𑀲𑀼𑀢𑁆𑀢𑀜𑁆𑀘 𑀦𑀺𑀝𑁆𑀞𑀧𑁂𑀢𑁆𑀯𑀸 ‘‘𑀅𑀜𑁆𑀜𑁄𑀧𑀺 𑀅𑀢𑁆𑀣𑀺, 𑀆𑀘𑀭𑀺𑀬𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀦𑀢𑁆𑀣𑀺 𑀢𑀸𑀢, 𑀲𑀩𑁆𑀩𑀁 𑀦𑀺𑀝𑁆𑀞𑀺𑀢’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀆𑀘𑀭𑀺𑀬, 𑀇𑀫𑀲𑁆𑀫𑀺𑀁 𑀕𑀦𑁆𑀣𑁂 𑀏𑀢𑁆𑀢𑀓𑀁 𑀧𑀤𑀧𑀘𑁆𑀘𑀸𑀪𑀝𑁆𑀞𑀁, 𑀏𑀢𑁆𑀢𑀓𑀁 𑀲𑀚𑁆𑀛𑀸𑀬𑀲𑀫𑁆𑀫𑁄𑀳𑀝𑁆𑀞𑀸𑀦𑀁, 𑀇𑀢𑁄 𑀧𑀝𑁆𑀞𑀸𑀬 𑀢𑀼𑀫𑁆𑀳𑁂 𑀅𑀦𑁆𑀢𑁂𑀯𑀸𑀲𑀺𑀓𑁂 𑀏𑀯𑀁 𑀯𑀸𑀘𑁂𑀬𑁆𑀬𑀸𑀣𑀸’’𑀢𑀺 𑀆𑀘𑀭𑀺𑀬𑀲𑁆𑀲 𑀲𑀺𑀧𑁆𑀧𑀁 𑀲𑁄𑀥𑁂𑀢𑁆𑀯𑀸 𑀧𑀸𑀢𑁄𑀯 𑀪𑀼𑀜𑁆𑀚𑀺𑀢𑁆𑀯𑀸 𑀆𑀘𑀭𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀤𑀺𑀯𑀲𑁂𑀦𑁂𑀯 𑀩𑀸𑀭𑀸𑀡𑀲𑀺𑀁 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀫𑀸𑀢𑀭𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀉𑀕𑁆𑀕𑀳𑀺𑀢𑀁 𑀢𑁂, 𑀢𑀸𑀢, 𑀲𑀺𑀧𑁆𑀧’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀆𑀫, 𑀅𑀫𑁆𑀫𑀸’’𑀢𑀺 𑀯𑀢𑁆𑀯𑀸 𑀫𑀸𑀢𑀭𑀁 𑀧𑀭𑀺𑀢𑁄𑀲𑁂𑀲𑀺.

𑀧𑀼𑀦𑀤𑀺𑀯𑀲𑁂 𑀳𑀢𑁆𑀣𑀺𑀫𑀗𑁆𑀕𑀮𑀙𑀡𑁄 𑀧𑀝𑀺𑀬𑀸𑀤𑀺𑀬𑀺𑀢𑁆𑀣. 𑀲𑀢𑀫𑀢𑁆𑀢𑁂 𑀳𑀢𑁆𑀣𑀺𑀲𑁄𑀡𑁆𑀟𑀸𑀮𑀗𑁆𑀓𑀸𑀭𑁂 𑀘 𑀲𑀼𑀯𑀡𑁆𑀡𑀤𑁆𑀥𑀚𑁂 𑀳𑁂𑀫𑀚𑀸𑀮𑀲𑀜𑁆𑀙𑀦𑁆𑀦𑁂 𑀓𑀢𑁆𑀯𑀸 𑀞𑀧𑁂𑀲𑀼𑀁, 𑀭𑀸𑀚𑀗𑁆𑀕𑀡𑀁 𑀅𑀮𑀗𑁆𑀓𑀭𑀺𑀁𑀲𑀼. 𑀩𑁆𑀭𑀸𑀳𑁆𑀫𑀡𑀸 ‘‘𑀫𑀬𑀁 𑀳𑀢𑁆𑀣𑀺𑀫𑀗𑁆𑀕𑀮𑀁 𑀓𑀭𑀺𑀲𑁆𑀲𑀸𑀫, 𑀫𑀬𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀫𑀡𑁆𑀟𑀺𑀢𑀧𑀲𑀸𑀥𑀺𑀢𑀸 𑀅𑀝𑁆𑀞𑀁𑀲𑀼. 𑀲𑀼𑀲𑀻𑀫𑁄𑀧𑀺 𑀭𑀸𑀚𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑁄 𑀉𑀧𑀓𑀭𑀡𑀪𑀡𑁆𑀟𑀁 𑀕𑀸𑀳𑀸𑀧𑁂𑀢𑁆𑀯𑀸 𑀫𑀗𑁆𑀕𑀮𑀝𑁆𑀞𑀸𑀦𑀁 𑀅𑀕𑀫𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀓𑀼𑀫𑀸𑀭𑀧𑀭𑀺𑀳𑀸𑀭𑁂𑀦 𑀅𑀮𑀗𑁆𑀓𑀢𑁄 𑀅𑀢𑁆𑀢𑀦𑁄 𑀧𑀭𑀺𑀲𑀸𑀬 𑀧𑀼𑀭𑀓𑁆𑀔𑀢𑀧𑀭𑀺𑀯𑀸𑀭𑀺𑀢𑁄 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀲𑀘𑁆𑀘𑀁 𑀓𑀺𑀭, 𑀫𑀳𑀸𑀭𑀸𑀚, 𑀢𑀼𑀫𑁆𑀳𑁂 𑀅𑀫𑁆𑀳𑀸𑀓𑀁 𑀯𑀁𑀲𑀜𑁆𑀘 𑀅𑀢𑁆𑀢𑀦𑁄 𑀯𑀁𑀲𑀜𑁆𑀘 𑀦𑀸𑀲𑁂𑀢𑁆𑀯𑀸 ‘𑀅𑀜𑁆𑀜𑁂𑀳𑀺 𑀩𑁆𑀭𑀸𑀳𑁆𑀫𑀡𑁂𑀳𑀺 𑀳𑀢𑁆𑀣𑀺𑀫𑀗𑁆𑀕𑀮𑀁 𑀓𑀸𑀭𑁂𑀢𑁆𑀯𑀸 𑀳𑀢𑁆𑀣𑀸𑀮𑀗𑁆𑀓𑀸𑀭𑀜𑁆𑀘 𑀉𑀧𑀓𑀭𑀡𑀸𑀦𑀺 𑀘 𑀢𑁂𑀲𑀁 𑀤𑀲𑁆𑀲𑀸𑀫𑀸’𑀢𑀺 𑀅𑀯𑀘𑀼𑀢𑁆𑀣𑀸’’𑀢𑀺 𑀯𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁨𑁫. ‘‘𑀓𑀸𑀴𑀸 𑀫𑀺𑀕𑀸 𑀲𑁂𑀢𑀤𑀦𑁆𑀢𑀸 𑀢𑀯𑀻𑀫𑁂, 𑀧𑀭𑁄𑀲𑀢𑀁 𑀳𑁂𑀫𑀚𑀸𑀮𑀸𑀪𑀺𑀙𑀦𑁆𑀦𑀸;

𑀢𑁂 𑀢𑁂 𑀤𑀤𑀸𑀫𑀻𑀢𑀺 𑀲𑀼𑀲𑀻𑀫 𑀩𑁆𑀭𑀽𑀲𑀺, 𑀅𑀦𑀼𑀲𑁆𑀲𑀭𑀁 𑀧𑁂𑀢𑁆𑀢𑀺𑀧𑀺𑀢𑀸𑀫𑀳𑀸𑀦’’𑀦𑁆𑀢𑀺.

𑀢𑀢𑁆𑀣 𑀢𑁂 𑀢𑁂 𑀤𑀤𑀸𑀫𑀻𑀢𑀺 𑀲𑀼𑀲𑀻𑀫 𑀩𑁆𑀭𑀽𑀲𑀻𑀢𑀺 𑀢𑁂 𑀏𑀢𑁂 𑀢𑀯 𑀲𑀦𑁆𑀢𑀓𑁂 ‘‘𑀓𑀸𑀴𑀸 𑀫𑀺𑀕𑀸 𑀲𑁂𑀢𑀤𑀦𑁆𑀢𑀸’’𑀢𑀺 𑀏𑀯𑀁 𑀕𑀢𑁂 𑀧𑀭𑁄𑀲𑀢𑀁 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑁂 𑀳𑀢𑁆𑀣𑀻 𑀅𑀜𑁆𑀜𑁂𑀲𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀤𑀤𑀸𑀫𑀻𑀢𑀺 𑀲𑀘𑁆𑀘𑀁 𑀓𑀺𑀭, 𑀪𑁄 𑀲𑀼𑀲𑀻𑀫, 𑀏𑀯𑀁 𑀩𑁆𑀭𑀽𑀲𑀻𑀢𑀺 𑀅𑀢𑁆𑀣𑁄. 𑀅𑀦𑀼𑀲𑁆𑀲𑀭𑀁 𑀧𑁂𑀢𑁆𑀢𑀺𑀧𑀺𑀢𑀸𑀫𑀳𑀸𑀦𑀦𑁆𑀢𑀺 𑀅𑀫𑁆𑀳𑀸𑀓𑀜𑁆𑀘 𑀅𑀢𑁆𑀢𑀦𑁄 𑀘 𑀯𑀁𑀲𑁂 𑀧𑀺𑀢𑀼𑀧𑀺𑀢𑀸𑀫𑀳𑀸𑀦𑀁 𑀆𑀘𑀺𑀡𑁆𑀡𑀁 𑀲𑀭𑀦𑁆𑀢𑁄𑀬𑁂𑀯. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀫𑀳𑀸𑀭𑀸𑀚, 𑀬𑀸𑀯 𑀲𑀢𑁆𑀢𑀫𑀓𑀼𑀮𑀧𑀭𑀺𑀯𑀝𑁆𑀝𑀸 𑀢𑀼𑀫𑁆𑀳𑀸𑀓𑀁 𑀧𑁂𑀢𑁆𑀢𑀺𑀧𑀺𑀢𑀸𑀫𑀳𑀸𑀦𑀁 𑀅𑀫𑁆𑀳𑀸𑀓𑀁 𑀧𑁂𑀢𑁆𑀢𑀺𑀧𑀺𑀢𑀸𑀫𑀳𑀸 𑀘 𑀳𑀢𑁆𑀣𑀺𑀫𑀗𑁆𑀕𑀮𑀁 𑀓𑀭𑁄𑀦𑁆𑀢𑀺, 𑀲𑁄 𑀢𑁆𑀯𑀁 𑀏𑀯𑀁 𑀅𑀦𑀼𑀲𑁆𑀲𑀭𑀦𑁆𑀢𑁄𑀧𑀺 𑀅𑀫𑁆𑀳𑀸𑀓𑀜𑁆𑀘 𑀅𑀢𑁆𑀢𑀦𑁄 𑀘 𑀯𑀁𑀲𑀁 𑀦𑀸𑀲𑁂𑀢𑁆𑀯𑀸 𑀲𑀘𑁆𑀘𑀁 𑀓𑀺𑀭 𑀏𑀯𑀁 𑀩𑁆𑀭𑀽𑀲𑀻𑀢𑀺.

𑀲𑀼𑀲𑀻𑀫𑁄 𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁨𑁬. ‘‘𑀓𑀸𑀴𑀸 𑀫𑀺𑀕𑀸 𑀲𑁂𑀢𑀤𑀦𑁆𑀢𑀸 𑀫𑀫𑀻𑀫𑁂, 𑀧𑀭𑁄𑀲𑀢𑀁 𑀳𑁂𑀫𑀚𑀸𑀮𑀸𑀪𑀺𑀙𑀦𑁆𑀦𑀸;

𑀢𑁂 𑀢𑁂 𑀤𑀤𑀸𑀫𑀻𑀢𑀺 𑀯𑀤𑀸𑀫𑀺 𑀫𑀸𑀡𑀯, 𑀅𑀦𑀼𑀲𑁆𑀲𑀭𑀁 𑀧𑁂𑀢𑁆𑀢𑀺𑀧𑀺𑀢𑀸𑀫𑀳𑀸𑀦’’𑀦𑁆𑀢𑀺.

𑀢𑀢𑁆𑀣 𑀢𑁂 𑀢𑁂 𑀤𑀤𑀸𑀫𑀻𑀢𑀺 𑀢𑁂 𑀏𑀢𑁂 𑀳𑀢𑁆𑀣𑀻 𑀅𑀜𑁆𑀜𑁂𑀲𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀤𑀤𑀸𑀫𑀻𑀢𑀺 𑀲𑀘𑁆𑀘𑀫𑁂𑀯 𑀫𑀸𑀡𑀯 𑀯𑀤𑀸𑀫𑀺, 𑀦𑁂𑀯 𑀳𑀢𑁆𑀣𑀻 𑀩𑁆𑀭𑀸𑀳𑁆𑀫𑀡𑀸𑀦𑀁 𑀤𑀤𑀸𑀫𑀻𑀢𑀺 𑀅𑀢𑁆𑀣𑁄. 𑀅𑀦𑀼𑀲𑁆𑀲𑀭𑀦𑁆𑀢𑀺 𑀧𑁂𑀢𑁆𑀢𑀺𑀧𑀺𑀢𑀸𑀫𑀳𑀸𑀦𑀁 𑀓𑀺𑀭𑀺𑀬𑀁 𑀅𑀦𑀼𑀲𑁆𑀲𑀭𑀸𑀫𑀺𑀬𑁂𑀯, 𑀦𑁄 𑀦𑀸𑀦𑀼𑀲𑁆𑀲𑀭𑀸𑀫𑀺, 𑀅𑀫𑁆𑀳𑀸𑀓𑀁 𑀧𑁂𑀢𑁆𑀢𑀺𑀧𑀺𑀢𑀸𑀫𑀳𑀸𑀦𑀁 𑀳𑀢𑁆𑀣𑀺𑀫𑀗𑁆𑀕𑀮𑀁 𑀢𑀼𑀫𑁆𑀳𑀸𑀓𑀁 𑀧𑁂𑀢𑁆𑀢𑀺𑀧𑀺𑀢𑀸𑀫𑀳𑀸 𑀓𑀭𑁄𑀦𑁆𑀢𑀻𑀢𑀺 𑀧𑀦 𑀅𑀦𑀼𑀲𑁆𑀲𑀭𑀦𑁆𑀢𑁄𑀧𑀺 𑀏𑀯𑀁 𑀯𑀤𑀸𑀫𑀺𑀬𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑁂𑀯𑀫𑀸𑀳.

𑀅𑀣 𑀦𑀁 𑀩𑁄𑀥𑀺𑀲𑀢𑁆𑀢𑁄 𑀏𑀢𑀤𑀯𑁄𑀘 𑁋 ‘‘𑀫𑀳𑀸𑀭𑀸𑀚, 𑀅𑀫𑁆𑀳𑀸𑀓𑀜𑁆𑀘 𑀅𑀢𑁆𑀢𑀦𑁄 𑀘 𑀯𑀁𑀲𑀁 𑀅𑀦𑀼𑀲𑁆𑀲𑀭𑀦𑁆𑀢𑁄𑀬𑁂𑀯 𑀓𑀲𑁆𑀫𑀸 𑀫𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑁂𑀳𑀺 𑀳𑀢𑁆𑀣𑀺𑀫𑀗𑁆𑀕𑀮𑀁 𑀓𑀸𑀭𑀸𑀧𑁂𑀣𑀸’’𑀢𑀺. ‘‘𑀢𑁆𑀯𑀁 𑀓𑀺𑀭, 𑀢𑀸𑀢, 𑀢𑀬𑁄 𑀯𑁂𑀤𑁂 𑀳𑀢𑁆𑀣𑀺𑀲𑀼𑀢𑁆𑀢𑀜𑁆𑀘 𑀦 𑀚𑀸𑀦𑀸𑀲𑀻’’𑀢𑀺 𑀫𑀬𑁆𑀳𑀁 𑀆𑀭𑁄𑀘𑁂𑀲𑀼𑀁, 𑀢𑁂𑀦𑀸𑀳𑀁 𑀅𑀜𑁆𑀜𑁂𑀳𑀺 𑀩𑁆𑀭𑀸𑀳𑁆𑀫𑀡𑁂𑀳𑀺 𑀓𑀸𑀭𑀸𑀧𑁂𑀫𑀻𑀢𑀺. ‘‘𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀏𑀢𑁆𑀢𑀓𑁂𑀲𑀼 𑀩𑁆𑀭𑀸𑀳𑁆𑀫𑀡𑁂𑀲𑀼 𑀏𑀓𑀩𑁆𑀭𑀸𑀳𑁆𑀫𑀡𑁄𑀧𑀺 𑀢𑀻𑀲𑀼 𑀯𑁂𑀤𑁂𑀲𑀼 𑀯𑀸 𑀳𑀢𑁆𑀣𑀺𑀲𑀼𑀢𑁆𑀢𑁂𑀲𑀼 𑀯𑀸 𑀏𑀓𑀤𑁂𑀲𑀫𑁆𑀧𑀺 𑀬𑀤𑀺 𑀫𑀬𑀸 𑀲𑀤𑁆𑀥𑀺𑀁 𑀓𑀣𑁂𑀢𑀼𑀁 𑀲𑀫𑀢𑁆𑀢𑁄 𑀅𑀢𑁆𑀣𑀺, 𑀉𑀝𑁆𑀞𑀳𑀢𑀼, 𑀢𑀬𑁄𑀧𑀺 𑀯𑁂𑀤𑁂 𑀳𑀢𑁆𑀣𑀺𑀲𑀼𑀢𑁆𑀢𑀜𑁆𑀘 𑀲𑀤𑁆𑀥𑀺𑀁 𑀳𑀢𑁆𑀣𑀺𑀫𑀗𑁆𑀕𑀮𑀓𑀭𑀡𑁂𑀦 𑀫𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑁄 𑀲𑀓𑀮𑀚𑀫𑁆𑀩𑀼𑀤𑀻𑀧𑁂𑀧𑀺 𑀚𑀸𑀦𑀦𑁆𑀢𑁄 𑀦𑀸𑀫 𑀦𑀢𑁆𑀣𑀻’’𑀢𑀺 𑀲𑀻𑀳𑀦𑀸𑀤𑀁 𑀦𑀤𑀺. 𑀏𑀓𑀩𑁆𑀭𑀸𑀳𑁆𑀫𑀡𑁄𑀧𑀺 𑀢𑀲𑁆𑀲 𑀧𑀝𑀺𑀲𑀢𑁆𑀢𑀼 𑀳𑀼𑀢𑁆𑀯𑀸 𑀉𑀝𑁆𑀞𑀸𑀢𑀼𑀁 𑀦𑀸𑀲𑀓𑁆𑀔𑀺. 𑀩𑁄𑀥𑀺𑀲𑀢𑁆𑀢𑁄 𑀅𑀢𑁆𑀢𑀦𑁄 𑀓𑀼𑀮𑀯𑀁𑀲𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀫𑀗𑁆𑀕𑀮𑀁 𑀓𑀢𑁆𑀯𑀸 𑀩𑀳𑀼𑀁 𑀥𑀦𑀁 𑀆𑀤𑀸𑀬 𑀅𑀢𑁆𑀢𑀦𑁄 𑀦𑀺𑀯𑁂𑀲𑀦𑀁 𑀅𑀕𑀫𑀸𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀓𑁂𑀘𑀺 𑀲𑁄𑀢𑀸𑀧𑀦𑁆𑀦𑀸 𑀅𑀳𑁂𑀲𑀼𑀁, 𑀓𑁂𑀘𑀺 𑀲𑀓𑀤𑀸𑀕𑀸𑀫𑀺𑀦𑁄, 𑀓𑁂𑀘𑀺 𑀅𑀦𑀸𑀕𑀸𑀫𑀺𑀦𑁄, 𑀓𑁂𑀘𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. ‘‘𑀢𑀤𑀸 𑀫𑀸𑀢𑀸 𑀫𑀳𑀸𑀫𑀸𑀬𑀸 𑀅𑀳𑁄𑀲𑀺, 𑀧𑀺𑀢𑀸 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸, 𑀲𑀼𑀲𑀻𑀫𑁄 𑀭𑀸𑀚𑀸 𑀆𑀦𑀦𑁆𑀤𑁄, 𑀤𑀺𑀲𑀸𑀧𑀸𑀫𑁄𑀓𑁆𑀔𑁄 𑀆𑀘𑀭𑀺𑀬𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀫𑀸𑀡𑀯𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀼𑀲𑀻𑀫𑀚𑀸𑀢𑀓𑀯𑀡𑁆𑀡𑀦𑀸 𑀢𑀢𑀺𑀬𑀸.

[𑁧𑁬𑁪] 𑁪. 𑀕𑀺𑀚𑁆𑀛𑀚𑀸𑀢𑀓𑀯𑀡𑁆𑀡𑀦𑀸

𑀬𑀁 𑀦𑀼 𑀕𑀺𑀚𑁆𑀛𑁄 𑀬𑁄𑀚𑀦𑀲𑀢𑀦𑁆𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀫𑀸𑀢𑀼𑀧𑁄𑀲𑀓𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀲𑀸𑀫𑀚𑀸𑀢𑀓𑁂 (𑀚𑀸. 𑁨.𑁨𑁨.𑁨𑁯𑁬 𑀆𑀤𑀬𑁄) 𑀆𑀯𑀺𑀪𑀯𑀺𑀲𑁆𑀲𑀢𑀺. 𑀲𑀢𑁆𑀣𑀸 𑀧𑀦 𑀢𑀁 𑀪𑀺𑀓𑁆𑀔𑀼𑀁 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀪𑀺𑀓𑁆𑀔𑀼, 𑀕𑀺𑀳𑀻 𑀧𑁄𑀲𑁂𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀓𑀺𑀁 𑀧𑀦 𑀢𑁂 𑀳𑁄𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀫𑀸𑀢𑀸𑀧𑀺𑀢𑀭𑁄 𑀫𑁂, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀲𑀸𑀥𑀼 𑀲𑀸𑀥𑀽’’𑀢𑀺 𑀢𑀲𑁆𑀲 𑀲𑀸𑀥𑀼𑀓𑀸𑀭𑀁 𑀤𑀢𑁆𑀯𑀸 ‘‘𑀫𑀸, 𑀪𑀺𑀓𑁆𑀔𑀯𑁂, 𑀇𑀫𑀁 𑀪𑀺𑀓𑁆𑀔𑀼𑀁 𑀉𑀚𑁆𑀛𑀸𑀬𑀺𑀢𑁆𑀣, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸𑀧𑀺 𑀕𑀼𑀡𑀯𑀲𑁂𑀦 𑀅𑀜𑁆𑀜𑀸𑀢𑀓𑀸𑀦𑀫𑁆𑀧𑀺 𑀉𑀧𑀓𑀸𑀭𑀁 𑀅𑀓𑀁𑀲𑀼, 𑀇𑀫𑀲𑁆𑀲 𑀧𑀦 𑀫𑀸𑀢𑀸𑀧𑀺𑀢𑀽𑀦𑀁 𑀉𑀧𑀓𑀸𑀭𑀓𑀭𑀡𑀁 𑀪𑀸𑀭𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀕𑀺𑀚𑁆𑀛𑀓𑀽𑀝𑀧𑀩𑁆𑀩𑀢𑁂 𑀕𑀺𑀚𑁆𑀛𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀧𑁄𑀲𑁂𑀢𑀺. 𑀅𑀣𑁂𑀓𑀲𑁆𑀫𑀺𑀁 𑀓𑀸𑀮𑁂 𑀫𑀳𑀢𑀻 𑀯𑀸𑀢𑀯𑀼𑀝𑁆𑀞𑀺 𑀅𑀳𑁄𑀲𑀺. 𑀕𑀺𑀚𑁆𑀛𑀸 𑀯𑀸𑀢𑀯𑀼𑀝𑁆𑀞𑀺𑀁 𑀲𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀲𑀻𑀢𑀪𑀬𑁂𑀦 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀧𑀸𑀓𑀸𑀭𑀲𑀫𑀻𑀧𑁂 𑀘 𑀧𑀭𑀺𑀔𑀸𑀲𑀫𑀻𑀧𑁂 𑀘 𑀲𑀻𑀢𑁂𑀦 𑀓𑀫𑁆𑀧𑀫𑀸𑀦𑀸 𑀦𑀺𑀲𑀻𑀤𑀺𑀁𑀲𑀼. 𑀢𑀤𑀸 𑀩𑀸𑀭𑀸𑀡𑀲𑀺𑀲𑁂𑀝𑁆𑀞𑀺 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀦𑁆𑀳𑀸𑀬𑀺𑀢𑀼𑀁 𑀕𑀘𑁆𑀙𑀦𑁆𑀢𑁄 𑀢𑁂 𑀕𑀺𑀚𑁆𑀛𑁂 𑀓𑀺𑀮𑀫𑀦𑁆𑀢𑁂 𑀤𑀺𑀲𑁆𑀯𑀸 𑀏𑀓𑀲𑁆𑀫𑀺𑀁 𑀅𑀦𑁄𑀯𑀲𑁆𑀲𑀓𑀝𑁆𑀞𑀸𑀦𑁂 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀅𑀕𑁆𑀕𑀺𑀁 𑀓𑀸𑀭𑀸𑀧𑁂𑀢𑁆𑀯𑀸 𑀕𑁄𑀲𑀼𑀲𑀸𑀦𑀁 𑀧𑁂𑀲𑁂𑀢𑁆𑀯𑀸 𑀕𑁄𑀫𑀁𑀲𑀁 𑀆𑀳𑀭𑀸𑀧𑁂𑀢𑁆𑀯𑀸 𑀢𑁂𑀲𑀁 𑀤𑀸𑀧𑁂𑀢𑁆𑀯𑀸 𑀆𑀭𑀓𑁆𑀔𑀁 𑀞𑀧𑁂𑀲𑀺. 𑀕𑀺𑀚𑁆𑀛𑀸 𑀯𑀽𑀧𑀲𑀦𑁆𑀢𑀸𑀬 𑀯𑀸𑀢𑀯𑀼𑀝𑁆𑀞𑀺𑀬𑀸 𑀓𑀮𑁆𑀮𑀲𑀭𑀻𑀭𑀸 𑀳𑀼𑀢𑁆𑀯𑀸 𑀧𑀩𑁆𑀩𑀢𑀫𑁂𑀯 𑀅𑀕𑀫𑀁𑀲𑀼. 𑀢𑁂 𑀢𑀢𑁆𑀣𑁂𑀯 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀏𑀯𑀁 𑀫𑀦𑁆𑀢𑀬𑀺𑀁𑀲𑀼 𑁋 ‘‘𑀩𑀸𑀭𑀸𑀡𑀲𑀺𑀲𑁂𑀝𑁆𑀞𑀺𑀦𑀸 𑀅𑀫𑁆𑀳𑀸𑀓𑀁 𑀉𑀧𑀓𑀸𑀭𑁄 𑀓𑀢𑁄, 𑀓𑀢𑀽𑀧𑀓𑀸𑀭𑀲𑁆𑀲 𑀘 𑀦𑀸𑀫 𑀧𑀘𑁆𑀘𑀼𑀧𑀓𑀸𑀭𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀢𑀲𑁆𑀫𑀸 𑀇𑀢𑁄 𑀧𑀝𑁆𑀞𑀸𑀬 𑀢𑀼𑀫𑁆𑀳𑁂𑀲𑀼 𑀬𑁄 𑀬𑀁 𑀯𑀢𑁆𑀣𑀁 𑀯𑀸 𑀆𑀪𑀭𑀡𑀁 𑀯𑀸 𑀮𑀪𑀢𑀺, 𑀢𑁂𑀦 𑀢𑀁 𑀩𑀸𑀭𑀸𑀡𑀲𑀺𑀲𑁂𑀝𑁆𑀞𑀺𑀲𑁆𑀲 𑀕𑁂𑀳𑁂 𑀆𑀓𑀸𑀲𑀗𑁆𑀕𑀡𑁂 𑀧𑀸𑀢𑁂𑀢𑀩𑁆𑀩’’𑀦𑁆𑀢𑀺.

𑀢𑀢𑁄 𑀧𑀝𑁆𑀞𑀸𑀬 𑀕𑀺𑀚𑁆𑀛𑀸 𑀫𑀦𑀼𑀲𑁆𑀲𑀸𑀦𑀁 𑀯𑀢𑁆𑀣𑀸𑀪𑀭𑀡𑀸𑀦𑀺 𑀆𑀢𑀧𑁂 𑀲𑀼𑀓𑁆𑀔𑀸𑀧𑁂𑀦𑁆𑀢𑀸𑀦𑀁 𑀧𑀫𑀸𑀤𑀁 𑀑𑀮𑁄𑀓𑁂𑀢𑁆𑀯𑀸 𑀲𑁂𑀦𑀸 𑀯𑀺𑀬 𑀫𑀁𑀲𑀧𑁂𑀲𑀺𑀁 𑀲𑀳𑀲𑀸 𑀕𑀳𑁂𑀢𑁆𑀯𑀸 𑀩𑀸𑀭𑀸𑀡𑀲𑀺𑀲𑁂𑀝𑁆𑀞𑀺𑀲𑁆𑀲 𑀕𑁂𑀳𑁂 𑀆𑀓𑀸𑀲𑀗𑁆𑀕𑀡𑁂 𑀧𑀸𑀢𑁂𑀦𑁆𑀢𑀺. 𑀲𑁄 𑀕𑀺𑀚𑁆𑀛𑀸𑀦𑀁 𑀆𑀳𑀭𑀡𑀪𑀸𑀯𑀁 𑀜𑀢𑁆𑀯𑀸 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀯𑀺𑀲𑀼𑀁𑀬𑁂𑀯 𑀞𑀧𑁂𑀲𑀺. ‘‘𑀕𑀺𑀚𑁆𑀛𑀸 𑀦𑀕𑀭𑀁 𑀯𑀺𑀮𑀼𑀫𑁆𑀧𑀦𑁆𑀢𑀻’’𑀢𑀺 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 ‘‘𑀏𑀓𑀁 𑀕𑀺𑀚𑁆𑀛𑀫𑁆𑀧𑀺 𑀢𑀸𑀯 𑀕𑀡𑁆𑀳𑀣, 𑀲𑀩𑁆𑀩𑀁 𑀆𑀳𑀭𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀢𑀢𑁆𑀣 𑀢𑀢𑁆𑀣 𑀧𑀸𑀲𑁂 𑀘𑁂𑀯 𑀚𑀸𑀮𑀸𑀦𑀺 𑀘 𑀑𑀟𑁆𑀟𑀸𑀧𑁂𑀲𑀺. 𑀫𑀸𑀢𑀼𑀧𑁄𑀲𑀓𑀕𑀺𑀚𑁆𑀛𑁄 𑀧𑀸𑀲𑁂 𑀩𑀚𑁆𑀛𑀺, 𑀢𑀁 𑀕𑀳𑁂𑀢𑁆𑀯𑀸 ‘‘𑀭𑀜𑁆𑀜𑁄 𑀤𑀲𑁆𑀲𑁂𑀲𑁆𑀲𑀸𑀫𑀸’’𑀢𑀺 𑀦𑁂𑀦𑁆𑀢𑀺. 𑀩𑀸𑀭𑀸𑀡𑀲𑀺𑀲𑁂𑀝𑁆𑀞𑀺 𑀭𑀸𑀚𑀼𑀧𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑁄 𑀢𑁂 𑀫𑀦𑀼𑀲𑁆𑀲𑁂 𑀕𑀺𑀚𑁆𑀛𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀫𑀸 𑀇𑀫𑀁 𑀕𑀺𑀚𑁆𑀛𑀁 𑀩𑀸𑀥𑀬𑀺𑀁𑀲𑀽’’𑀢𑀺 𑀲𑀤𑁆𑀥𑀺𑀜𑁆𑀜𑁂𑀯 𑀅𑀕𑀫𑀸𑀲𑀺. 𑀕𑀺𑀚𑁆𑀛𑀁 𑀭𑀜𑁆𑀜𑁄 𑀤𑀲𑁆𑀲𑁂𑀲𑀼𑀁. 𑀅𑀣 𑀦𑀁 𑀭𑀸𑀚𑀸 𑀧𑀼𑀘𑁆𑀙𑀺 𑁋 ‘‘𑀢𑀼𑀫𑁆𑀳𑁂 𑀦𑀕𑀭𑀁 𑀯𑀺𑀮𑀼𑀫𑁆𑀧𑀺𑀢𑁆𑀯𑀸 𑀯𑀢𑁆𑀣𑀸𑀤𑀻𑀦𑀺 𑀕𑀡𑁆𑀳𑀣𑀸’’𑀢𑀺. ‘‘𑀆𑀫, 𑀫𑀳𑀸𑀭𑀸𑀚𑀸’’𑀢𑀺. ‘‘𑀓𑀲𑁆𑀲 𑀢𑀸𑀦𑀺 𑀤𑀺𑀦𑁆𑀦𑀸𑀦𑀻’’𑀢𑀺? ‘‘𑀩𑀸𑀭𑀸𑀡𑀲𑀺𑀲𑁂𑀝𑁆𑀞𑀺𑀲𑁆𑀲𑀸’’𑀢𑀺. ‘‘𑀓𑀺𑀁𑀓𑀸𑀭𑀡𑀸’’𑀢𑀺? ‘‘𑀅𑀫𑁆𑀳𑀸𑀓𑀁 𑀢𑁂𑀦 𑀚𑀻𑀯𑀺𑀢𑀁 𑀤𑁆𑀯𑀺𑀦𑁆𑀦𑀁, 𑀉𑀧𑀓𑀸𑀭𑀲𑁆𑀲 𑀦𑀸𑀫 𑀧𑀘𑁆𑀘𑀼𑀧𑀓𑀸𑀭𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀢𑀲𑁆𑀫𑀸 𑀅𑀤𑀫𑁆𑀳𑀸’’𑀢𑀺. 𑀅𑀣 𑀦𑀁 𑀭𑀸𑀚𑀸 ‘‘𑀕𑀺𑀚𑁆𑀛𑀸 𑀓𑀺𑀭 𑀬𑁄𑀚𑀦𑀲𑀢𑀫𑀢𑁆𑀣𑀓𑁂 𑀞𑀢𑁆𑀯𑀸 𑀓𑀼𑀡𑀧𑀁 𑀧𑀲𑁆𑀲𑀦𑁆𑀢𑀺, 𑀓𑀲𑁆𑀫𑀸 𑀢𑁆𑀯𑀁 𑀅𑀢𑁆𑀢𑀦𑁄 𑀑𑀟𑁆𑀟𑀺𑀢𑀁 𑀧𑀸𑀲𑀁 𑀦 𑀧𑀲𑁆𑀲𑀲𑀻’’𑀢𑀺 𑀯𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁨𑁭. ‘‘𑀬𑀁 𑀦𑀼 𑀕𑀺𑀚𑁆𑀛𑁄 𑀬𑁄𑀚𑀦𑀲𑀢𑀁, 𑀓𑀼𑀡𑀧𑀸𑀦𑀺 𑀅𑀯𑁂𑀓𑁆𑀔𑀢𑀺;

𑀓𑀲𑁆𑀫𑀸 𑀚𑀸𑀮𑀜𑁆𑀘 𑀧𑀸𑀲𑀜𑁆𑀘, 𑀆𑀲𑀚𑁆𑀚𑀸𑀧𑀺 𑀦 𑀩𑀼𑀚𑁆𑀛𑀲𑀻’’𑀢𑀺.

𑀢𑀢𑁆𑀣 𑀬𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀦𑀽𑀢𑀺 𑀦𑀸𑀫𑀢𑁆𑀣𑁂 𑀦𑀺𑀧𑀸𑀢𑁄. 𑀕𑀺𑀚𑁆𑀛𑁄 𑀦𑀸𑀫 𑀬𑁄𑀚𑀦𑀲𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑀸𑀦𑀺 𑀓𑀼𑀡𑀧𑀸𑀦𑀺 𑀅𑀯𑁂𑀓𑁆𑀔𑀢𑀺, 𑀧𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀆𑀲𑀚𑁆𑀚𑀸𑀧𑀻𑀢𑀺 𑀆𑀲𑀸𑀤𑁂𑀢𑁆𑀯𑀸𑀧𑀺, 𑀲𑀫𑁆𑀧𑀸𑀧𑀼𑀡𑀺𑀢𑁆𑀯𑀸𑀧𑀻𑀢𑀺 𑀅𑀢𑁆𑀣𑁄. ‘‘𑀢𑁆𑀯𑀁 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀑𑀟𑁆𑀟𑀺𑀢𑀁 𑀚𑀸𑀮𑀜𑁆𑀘 𑀧𑀸𑀲𑀜𑁆𑀘 𑀧𑀢𑁆𑀯𑀸𑀧𑀺 𑀓𑀲𑁆𑀫𑀸 𑀦 𑀩𑀼𑀚𑁆𑀛𑀲𑀻’’𑀢𑀺 𑀧𑀼𑀘𑁆𑀙𑀺.

𑀕𑀺𑀚𑁆𑀛𑁄 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁨𑁮. ‘‘𑀬𑀤𑀸 𑀧𑀭𑀸𑀪𑀯𑁄 𑀳𑁄𑀢𑀺, 𑀧𑁄𑀲𑁄 𑀚𑀻𑀯𑀺𑀢𑀲𑀗𑁆𑀔𑀬𑁂;

𑀅𑀣 𑀚𑀸𑀮𑀜𑁆𑀘 𑀧𑀸𑀲𑀜𑁆𑀘, 𑀆𑀲𑀚𑁆𑀚𑀸𑀧𑀺 𑀦 𑀩𑀼𑀚𑁆𑀛𑀢𑀻’’𑀢𑀺.

𑀢𑀢𑁆𑀣 𑀧𑀭𑀸𑀪𑀯𑁄𑀢𑀺 𑀯𑀺𑀦𑀸𑀲𑁄. 𑀧𑁄𑀲𑁄𑀢𑀺 𑀲𑀢𑁆𑀢𑁄.

𑀕𑀺𑀚𑁆𑀛𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀲𑁂𑀝𑁆𑀞𑀺𑀁 𑀧𑀼𑀘𑁆𑀙𑀺 𑁋 ‘‘𑀲𑀘𑁆𑀘𑀁 𑀓𑀺𑀭, 𑀫𑀳𑀸𑀲𑁂𑀝𑁆𑀞𑀺, 𑀕𑀺𑀚𑁆𑀛𑁂𑀳𑀺 𑀢𑀼𑀫𑁆𑀳𑀸𑀓𑀁 𑀕𑁂𑀳𑁂 𑀯𑀢𑁆𑀣𑀸𑀤𑀻𑀦𑀺 𑀆𑀪𑀢𑀸𑀦𑀻’’𑀢𑀺. ‘‘𑀲𑀘𑁆𑀘𑀁, 𑀤𑁂𑀯𑀸’’𑀢𑀺. ‘‘𑀓𑀳𑀁 𑀢𑀸𑀦𑀻’’𑀢𑀺? ‘‘𑀤𑁂𑀯, 𑀫𑀬𑀸 𑀢𑀸𑀦𑀺 𑀲𑀩𑁆𑀩𑀸𑀦𑀺 𑀯𑀺𑀲𑀼𑀁 𑀞𑀧𑀺𑀢𑀸𑀦𑀺, 𑀬𑀁 𑀬𑁂𑀲𑀁 𑀲𑀦𑁆𑀢𑀓𑀁, 𑀢𑀁 𑀢𑁂𑀲𑀁 𑀤𑀲𑁆𑀲𑀸𑀫𑀺, 𑀇𑀫𑀁 𑀕𑀺𑀚𑁆𑀛𑀁 𑀯𑀺𑀲𑁆𑀲𑀚𑁆𑀚𑁂𑀣𑀸’’𑀢𑀺 𑀕𑀺𑀚𑁆𑀛𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀢𑁆𑀯𑀸 𑀫𑀳𑀸𑀲𑁂𑀝𑁆𑀞𑀺𑀁 𑀲𑀩𑁆𑀩𑁂𑀲𑀁 𑀲𑀦𑁆𑀢𑀓𑀸𑀦𑀺 𑀤𑀸𑀧𑁂𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀫𑀸𑀢𑀼𑀧𑁄𑀲𑀓𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. ‘‘𑀢𑀤𑀸 𑀭𑀸𑀚𑀸 𑀆𑀦𑀦𑁆𑀤𑁄 𑀅𑀳𑁄𑀲𑀺, 𑀩𑀸𑀭𑀸𑀡𑀲𑀺𑀲𑁂𑀝𑁆𑀞𑀺 𑀲𑀸𑀭𑀺𑀧𑀼𑀢𑁆𑀢𑁄, 𑀫𑀸𑀢𑀼𑀧𑁄𑀲𑀓𑀕𑀺𑀚𑁆𑀛𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀕𑀺𑀚𑁆𑀛𑀚𑀸𑀢𑀓𑀯𑀡𑁆𑀡𑀦𑀸 𑀘𑀢𑀼𑀢𑁆𑀣𑀸.

[𑁧𑁬𑁫] 𑁫. 𑀦𑀓𑀼𑀮𑀚𑀸𑀢𑀓𑀯𑀡𑁆𑀡𑀦𑀸

𑀲𑀤𑁆𑀥𑀺𑀁 𑀓𑀢𑁆𑀯𑀸 𑀅𑀫𑀺𑀢𑁆𑀢𑁂𑀦𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑁂𑀡𑀺𑀪𑀡𑁆𑀟𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀳𑁂𑀝𑁆𑀞𑀸 𑀉𑀭𑀕𑀚𑀸𑀢𑀓𑁂 (𑀚𑀸. 𑁧.𑁨.𑁭-𑁮) 𑀓𑀣𑀺𑀢𑀲𑀤𑀺𑀲𑀫𑁂𑀯. 𑀇𑀥𑀸𑀧𑀺 𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀫𑁂 𑀤𑁆𑀯𑁂 𑀫𑀳𑀸𑀫𑀢𑁆𑀢𑀸 𑀇𑀤𑀸𑀦𑁂𑀯 𑀫𑀬𑀸 𑀲𑀫𑀕𑁆𑀕𑀸 𑀓𑀢𑀸, 𑀧𑀼𑀩𑁆𑀩𑁂𑀧𑀸𑀳𑀁 𑀇𑀫𑁂 𑀲𑀫𑀕𑁆𑀕𑁂 𑀅𑀓𑀸𑀲𑀺𑀁𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀏𑀓𑀲𑁆𑀫𑀺𑀁 𑀕𑀸𑀫𑀓𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀳𑁂𑀢𑁆𑀯𑀸 𑀖𑀭𑀸𑀯𑀸𑀲𑀁 𑀧𑀳𑀸𑀬 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀉𑀜𑁆𑀙𑀸𑀘𑀭𑀺𑀬𑀸𑀬 𑀯𑀦𑀫𑀽𑀮𑀨𑀮𑀸𑀳𑀸𑀭𑁄 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀢𑀲𑁆𑀲 𑀘𑀗𑁆𑀓𑀫𑀦𑀓𑁄𑀝𑀺𑀬𑀁 𑀏𑀓𑀲𑁆𑀫𑀺𑀁 𑀯𑀫𑁆𑀫𑀺𑀓𑁂 𑀦𑀓𑀼𑀮𑁄, 𑀢𑀲𑁆𑀲𑁂𑀯 𑀲𑀦𑁆𑀢𑀺𑀓𑁂 𑀏𑀓𑀲𑁆𑀫𑀺𑀁 𑀭𑀼𑀓𑁆𑀔𑀩𑀺𑀮𑁂 𑀲𑀧𑁆𑀧𑁄 𑀘 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀢𑁂 𑀉𑀪𑁄𑀧𑀺 𑀅𑀳𑀺𑀦𑀓𑀼𑀮𑀸 𑀦𑀺𑀘𑁆𑀘𑀓𑀸𑀮𑀁 𑀓𑀮𑀳𑀁 𑀓𑀭𑁄𑀦𑁆𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀢𑁂𑀲𑀁 𑀓𑀮𑀳𑁂 𑀆𑀤𑀻𑀦𑀯𑀜𑁆𑀘 𑀫𑁂𑀢𑁆𑀢𑀸𑀪𑀸𑀯𑀦𑀸𑀬 𑀘 𑀆𑀦𑀺𑀲𑀁𑀲𑀁 𑀓𑀣𑁂𑀢𑁆𑀯𑀸 ‘‘𑀓𑀮𑀳𑀁 𑀦𑀸𑀫 𑀅𑀓𑀢𑁆𑀯𑀸 𑀲𑀫𑀕𑁆𑀕𑀯𑀸𑀲𑀁 𑀯𑀲𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀑𑀯𑀤𑀺𑀢𑁆𑀯𑀸 𑀉𑀪𑁄𑀧𑀺 𑀢𑁂 𑀲𑀫𑀕𑁆𑀕𑁂 𑀅𑀓𑀸𑀲𑀺. 𑀅𑀣 𑀲𑀧𑁆𑀧𑀲𑁆𑀲 𑀩𑀳𑀺𑀦𑀺𑀓𑁆𑀔𑀦𑁆𑀢𑀓𑀸𑀮𑁂 𑀦𑀓𑀼𑀮𑁄 𑀘𑀗𑁆𑀓𑀫𑀦𑀓𑁄𑀝𑀺𑀬𑀁 𑀯𑀫𑁆𑀫𑀺𑀓𑀲𑁆𑀲 𑀩𑀺𑀮𑀤𑁆𑀯𑀸𑀭𑁂 𑀲𑀻𑀲𑀁 𑀦𑀻𑀳𑀭𑀺𑀢𑁆𑀯𑀸 𑀫𑀼𑀔𑀁 𑀯𑀺𑀯𑀭𑀺𑀢𑁆𑀯𑀸 𑀦𑀺𑀧𑀦𑁆𑀦𑁄 𑀅𑀲𑁆𑀲𑀲𑀦𑁆𑀢𑁄 𑀧𑀲𑁆𑀲𑀲𑀦𑁆𑀢𑁄 𑀦𑀺𑀤𑁆𑀤𑀁 𑀉𑀧𑀕𑀜𑁆𑀙𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀢𑀣𑀸 𑀦𑀺𑀤𑁆𑀤𑀸𑀬𑀫𑀸𑀦𑀁 𑀤𑀺𑀲𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀢𑁂 𑀦𑀺𑀲𑁆𑀲𑀸𑀬 𑀪𑀬𑀁 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀧𑀼𑀘𑁆𑀙𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁨𑁯. ‘‘𑀲𑀦𑁆𑀥𑀺𑀁 𑀓𑀢𑁆𑀯𑀸 𑀅𑀫𑀺𑀢𑁆𑀢𑁂𑀦, 𑀅𑀡𑁆𑀟𑀚𑁂𑀦 𑀚𑀮𑀸𑀩𑀼𑀚;

𑀯𑀺𑀯𑀭𑀺𑀬 𑀤𑀸𑀞𑀁 𑀲𑁂𑀲𑀺, 𑀓𑀼𑀢𑁄 𑀢𑁂 𑀪𑀬𑀫𑀸𑀕𑀢’’𑀦𑁆𑀢𑀺.

𑀢𑀢𑁆𑀣 𑀲𑀦𑁆𑀥𑀺𑀁 𑀓𑀢𑁆𑀯𑀸𑀢𑀺 𑀫𑀺𑀢𑁆𑀢𑀪𑀸𑀯𑀁 𑀓𑀭𑀺𑀢𑁆𑀯𑀸. 𑀅𑀡𑁆𑀟𑀚𑁂𑀦𑀸𑀢𑀺 𑀅𑀡𑁆𑀟𑀓𑁄𑀲𑁂 𑀦𑀺𑀩𑁆𑀩𑀢𑁆𑀢𑁂𑀦 𑀦𑀸𑀕𑁂𑀦. 𑀚𑀮𑀸𑀩𑀼𑀚𑀸𑀢𑀺 𑀦𑀓𑀼𑀮𑀁 𑀆𑀮𑀧𑀢𑀺. 𑀲𑁄 𑀳𑀺 𑀚𑀮𑀸𑀩𑀼𑀫𑁆𑀳𑀺 𑀚𑀸𑀢𑀢𑁆𑀢𑀸 ‘‘𑀚𑀮𑀸𑀩𑀼𑀚𑁄’’𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀯𑀭𑀺𑀬𑀸𑀢𑀺 𑀯𑀺𑀯𑀭𑀺𑀢𑁆𑀯𑀸.

𑀏𑀯𑀁 𑀩𑁄𑀥𑀺𑀲𑀢𑁆𑀢𑁂𑀦 𑀯𑀼𑀢𑁆𑀢𑁄 𑀦𑀓𑀼𑀮𑁄 ‘‘𑀅𑀬𑁆𑀬, 𑀧𑀘𑁆𑀘𑀸𑀫𑀺𑀢𑁆𑀢𑁄 𑀦𑀸𑀫 𑀦 𑀅𑀯𑀚𑀸𑀦𑀺𑀢𑀩𑁆𑀩𑁄 𑀆𑀲𑀗𑁆𑀓𑀺𑀢𑀩𑁆𑀩𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁩𑁦. ‘‘𑀲𑀗𑁆𑀓𑁂𑀣𑁂𑀯 𑀅𑀫𑀺𑀢𑁆𑀢𑀲𑁆𑀫𑀺𑀁, 𑀫𑀺𑀢𑁆𑀢𑀲𑁆𑀫𑀺𑀫𑁆𑀧𑀺 𑀦 𑀯𑀺𑀲𑁆𑀲𑀲𑁂;

𑀅𑀪𑀬𑀸 𑀪𑀬𑀫𑀼𑀧𑁆𑀧𑀦𑁆𑀦𑀁, 𑀅𑀧𑀺 𑀫𑀽𑀮𑀸𑀦𑀺 𑀓𑀦𑁆𑀢𑀢𑀻’’𑀢𑀺.

𑀢𑀢𑁆𑀣 𑀅𑀪𑀬𑀸 𑀪𑀬𑀫𑀼𑀧𑁆𑀧𑀦𑁆𑀦𑀦𑁆𑀢𑀺 𑀦 𑀇𑀢𑁄 𑀢𑁂 𑀪𑀬𑀫𑀼𑀧𑁆𑀧𑀦𑁆𑀦𑀦𑁆𑀢𑀺 𑀅𑀪𑀬𑁄, 𑀓𑁄 𑀲𑁄? 𑀫𑀺𑀢𑁆𑀢𑁄. 𑀬𑀜𑁆𑀳𑀺 𑀫𑀺𑀢𑁆𑀢𑀲𑁆𑀫𑀺𑀫𑁆𑀧𑀺 𑀯𑀺𑀲𑁆𑀲𑀸𑀲𑁂 𑀲𑀢𑀺 𑀢𑀢𑁄 𑀪𑀬𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀫𑀽𑀮𑀸𑀦𑀺𑀧𑀺 𑀓𑀦𑁆𑀢𑀢𑀺, 𑀫𑀺𑀢𑁆𑀢𑀲𑁆𑀲 𑀲𑀩𑁆𑀩𑀭𑀦𑁆𑀥𑀸𑀦𑀁 𑀯𑀺𑀤𑀺𑀢𑀢𑁆𑀢𑀸 𑀫𑀽𑀮𑀖𑀘𑁆𑀘𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄.

𑀅𑀣 𑀦𑀁 𑀩𑁄𑀥𑀺𑀲𑀢𑁆𑀢𑁄 ‘‘𑀫𑀸 𑀪𑀸𑀬𑀺, 𑀬𑀣𑀸 𑀲𑀧𑁆𑀧𑁄 𑀢𑀬𑀺 𑀦 𑀤𑀼𑀩𑁆𑀪𑀢𑀺, 𑀏𑀯𑀫𑀳𑀁 𑀓𑀭𑀺𑀲𑁆𑀲𑀸𑀫𑀺, 𑀢𑁆𑀯𑀁 𑀇𑀢𑁄 𑀧𑀝𑁆𑀞𑀸𑀬 𑀢𑀲𑁆𑀫𑀺𑀁 𑀆𑀲𑀗𑁆𑀓𑀁 𑀫𑀸 𑀓𑀭𑀻’’𑀢𑀺 𑀑𑀯𑀤𑀺𑀢𑁆𑀯𑀸 𑀘𑀢𑁆𑀢𑀸𑀭𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀪𑀸𑀯𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑁄 𑀅𑀳𑁄𑀲𑀺. 𑀢𑁂𑀧𑀺 𑀬𑀣𑀸𑀓𑀫𑁆𑀫𑀁 𑀕𑀢𑀸.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀲𑀧𑁆𑀧𑁄 𑀘 𑀦𑀓𑀼𑀮𑁄 𑀘 𑀇𑀫𑁂 𑀤𑁆𑀯𑁂 𑀫𑀳𑀸𑀫𑀢𑁆𑀢𑀸 𑀅𑀳𑁂𑀲𑀼𑀁, 𑀢𑀸𑀧𑀲𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀦𑀓𑀼𑀮𑀚𑀸𑀢𑀓𑀯𑀡𑁆𑀡𑀦𑀸 𑀧𑀜𑁆𑀘𑀫𑀸.

[𑁧𑁬𑁬] 𑁬. 𑀉𑀧𑀲𑀸𑀴𑀓𑀚𑀸𑀢𑀓𑀯𑀡𑁆𑀡𑀦𑀸

𑀉𑀧𑀲𑀸𑀴𑀓𑀦𑀸𑀫𑀸𑀦𑀻𑀢𑀺 𑀇𑀤𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀉𑀧𑀲𑀸𑀴𑀓𑀁 𑀦𑀸𑀫 𑀲𑀼𑀲𑀸𑀦𑀲𑀼𑀤𑁆𑀥𑀺𑀓𑀁 𑀩𑁆𑀭𑀸𑀳𑁆𑀫𑀡𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑁄 𑀓𑀺𑀭 𑀅𑀟𑁆𑀠𑁄 𑀅𑀳𑁄𑀲𑀺 𑀫𑀳𑀤𑁆𑀥𑀦𑁄, 𑀤𑀺𑀝𑁆𑀞𑀺𑀕𑀢𑀺𑀓𑀢𑁆𑀢𑀸 𑀧𑀦 𑀥𑀼𑀭𑀯𑀺𑀳𑀸𑀭𑁂 𑀯𑀲𑀦𑁆𑀢𑀸𑀦𑀫𑁆𑀧𑀺 𑀩𑀼𑀤𑁆𑀥𑀸𑀦𑀁 𑀲𑀗𑁆𑀕𑀳𑀁 𑀦𑀸𑀫 𑀦 𑀅𑀓𑀸𑀲𑀺. 𑀧𑀼𑀢𑁆𑀢𑁄 𑀧𑀦𑀲𑁆𑀲 𑀧𑀡𑁆𑀟𑀺𑀢𑁄 𑀅𑀳𑁄𑀲𑀺 𑀜𑀸𑀡𑀲𑀫𑁆𑀧𑀦𑁆𑀦𑁄. 𑀲𑁄 𑀫𑀳𑀮𑁆𑀮𑀓𑀓𑀸𑀮𑁂 𑀧𑀼𑀢𑁆𑀢𑀁 𑀆𑀳 𑁋 ‘‘𑀫𑀸 𑀔𑁄 𑀫𑀁, 𑀢𑀸𑀢, 𑀅𑀜𑁆𑀜𑀲𑁆𑀲 𑀯𑀲𑀮𑀲𑁆𑀲 𑀛𑀸𑀧𑀺𑀢𑀲𑀼𑀲𑀸𑀦𑁂 𑀛𑀸𑀧𑁂𑀳𑀺, 𑀏𑀓𑀲𑁆𑀫𑀺𑀁 𑀧𑀦 𑀅𑀦𑀼𑀘𑁆𑀙𑀺𑀝𑁆𑀞𑀲𑀼𑀲𑀸𑀦𑁂𑀬𑁂𑀯 𑀫𑀁 𑀛𑀸𑀧𑁂𑀬𑁆𑀬𑀸𑀲𑀻’’𑀢𑀺. ‘‘𑀢𑀸𑀢, 𑀅𑀳𑀁 𑀢𑀼𑀫𑁆𑀳𑀸𑀓𑀁 𑀛𑀸𑀧𑁂𑀢𑀩𑁆𑀩𑀬𑀼𑀢𑁆𑀢𑀓𑀁 𑀞𑀸𑀦𑀁 𑀦 𑀚𑀸𑀦𑀸𑀫𑀺, 𑀲𑀸𑀥𑀼 𑀯𑀢 𑀫𑀁 𑀆𑀤𑀸𑀬 𑀕𑀦𑁆𑀢𑁆𑀯𑀸 ‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀫𑀁 𑀛𑀸𑀧𑁂𑀬𑁆𑀬𑀸𑀲𑀻’𑀢𑀺 𑀢𑀼𑀫𑁆𑀳𑁂𑀯 𑀆𑀘𑀺𑀓𑁆𑀔𑀣𑀸’’𑀢𑀺. 𑀩𑁆𑀭𑀸𑀳𑁆𑀫𑀡𑁄 ‘‘𑀲𑀸𑀥𑀼, 𑀢𑀸𑀢𑀸’’𑀢𑀺 𑀢𑀁 𑀆𑀤𑀸𑀬 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀺𑀚𑁆𑀛𑀓𑀽𑀝𑀫𑀢𑁆𑀣𑀓𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 ‘‘𑀢𑀸𑀢, 𑀇𑀤𑀁 𑀅𑀜𑁆𑀜𑀲𑁆𑀲 𑀯𑀲𑀮𑀲𑁆𑀲 𑀅𑀛𑀸𑀧𑀺𑀢𑀝𑁆𑀞𑀸𑀦𑀁, 𑀏𑀢𑁆𑀣 𑀫𑀁 𑀛𑀸𑀧𑁂𑀬𑁆𑀬𑀸𑀲𑀻’’𑀢𑀺 𑀯𑀢𑁆𑀯𑀸 𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀧𑀩𑁆𑀩𑀢𑀸 𑀑𑀢𑀭𑀺𑀢𑀼𑀁 𑀆𑀭𑀪𑀺.

𑀲𑀢𑁆𑀣𑀸 𑀧𑀦 𑀢𑀁 𑀤𑀺𑀯𑀲𑀁 𑀧𑀘𑁆𑀘𑀽𑀲𑀓𑀸𑀮𑁂 𑀩𑁄𑀥𑀦𑁂𑀬𑁆𑀬𑀩𑀦𑁆𑀥𑀯𑁂 𑀑𑀮𑁄𑀓𑁂𑀦𑁆𑀢𑁄 𑀢𑁂𑀲𑀁 𑀧𑀺𑀢𑀸𑀧𑀼𑀢𑁆𑀢𑀸𑀦𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲 𑀉𑀧𑀦𑀺𑀲𑁆𑀲𑀬𑀁 𑀅𑀤𑁆𑀤𑀲. 𑀢𑀲𑁆𑀫𑀸 𑀫𑀕𑁆𑀕𑀁 𑀕𑀳𑁂𑀢𑁆𑀯𑀸 𑀞𑀺𑀢𑀮𑀼𑀤𑁆𑀤𑀓𑁄 𑀯𑀺𑀬 𑀧𑀩𑁆𑀩𑀢𑀧𑀸𑀤𑀁 𑀕𑀦𑁆𑀢𑁆𑀯𑀸 𑀢𑁂𑀲𑀁 𑀧𑀩𑁆𑀩𑀢𑀫𑀢𑁆𑀣𑀓𑀸 𑀑𑀢𑀭𑀦𑁆𑀢𑀸𑀦𑀁 𑀆𑀕𑀫𑀬𑀫𑀸𑀦𑁄 𑀦𑀺𑀲𑀻𑀤𑀺, 𑀢𑁂 𑀑𑀢𑀭𑀦𑁆𑀢𑀸 𑀲𑀢𑁆𑀣𑀸𑀭𑀁 𑀅𑀤𑁆𑀤𑀲𑀁𑀲𑀼. 𑀲𑀢𑁆𑀣𑀸 𑀧𑀝𑀺𑀲𑀦𑁆𑀣𑀸𑀭𑀁 𑀓𑀭𑁄𑀦𑁆𑀢𑁄 ‘‘𑀓𑀳𑀁 𑀕𑀫𑀺𑀲𑁆𑀲𑀣 𑀩𑁆𑀭𑀸𑀳𑁆𑀫𑀡𑀸’’𑀢𑀺 𑀧𑀼𑀘𑁆𑀙𑀺. 𑀫𑀸𑀡𑀯𑁄 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 ‘‘𑀢𑁂𑀦 𑀳𑀺 𑀏𑀳𑀺, 𑀢𑀯 𑀧𑀺𑀢𑀭𑀸 𑀆𑀘𑀺𑀓𑁆𑀔𑀺𑀢𑀝𑁆𑀞𑀸𑀦𑀁 𑀕𑀘𑁆𑀙𑀸𑀫𑀸’’𑀢𑀺 𑀉𑀪𑁄 𑀧𑀺𑀢𑀸𑀧𑀼𑀢𑁆𑀢𑁂 𑀕𑀳𑁂𑀢𑁆𑀯𑀸 𑀧𑀩𑁆𑀩𑀢𑀫𑀢𑁆𑀣𑀓𑀁 𑀆𑀭𑀼𑀬𑁆𑀳 ‘‘𑀓𑀢𑀭𑀁 𑀞𑀸𑀦’’𑀦𑁆𑀢𑀺 𑀧𑀼𑀘𑁆𑀙𑀺. 𑀫𑀸𑀡𑀯𑁄 ‘‘𑀇𑀫𑁂𑀲𑀁 𑀢𑀺𑀡𑁆𑀡𑀁 𑀧𑀩𑁆𑀩𑀢𑀸𑀦𑀁 𑀅𑀦𑁆𑀢𑀭𑀁 𑀆𑀘𑀺𑀓𑁆𑀔𑀺, 𑀪𑀦𑁆𑀢𑁂’’𑀢𑀺 𑀆𑀳. 𑀲𑀢𑁆𑀣𑀸 ‘‘𑀦 𑀔𑁄, 𑀫𑀸𑀡𑀯, 𑀢𑀯 𑀧𑀺𑀢𑀸 𑀇𑀤𑀸𑀦𑁂𑀯 𑀲𑀼𑀲𑀸𑀦𑀲𑀼𑀤𑁆𑀥𑀺𑀓𑁄, 𑀧𑀼𑀩𑁆𑀩𑁂𑀧𑀺 𑀲𑀼𑀲𑀸𑀦𑀲𑀼𑀤𑁆𑀥𑀺𑀓𑁄𑀯, 𑀦 𑀘𑁂𑀲 𑀇𑀤𑀸𑀦𑁂𑀯 ‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀫𑀁 𑀛𑀸𑀧𑁂𑀬𑁆𑀬𑀸𑀲𑀻’𑀢𑀺 𑀢𑀯 𑀆𑀘𑀺𑀓𑁆𑀔𑀢𑀺, 𑀧𑀼𑀩𑁆𑀩𑁂𑀧𑀺 𑀇𑀫𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀅𑀢𑁆𑀢𑀦𑁄 𑀛𑀸𑀧𑀺𑀢𑀪𑀸𑀯𑀁 𑀆𑀘𑀺𑀓𑁆𑀔𑀻’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀇𑀫𑀲𑁆𑀫𑀺𑀜𑁆𑀜𑁂𑀯 𑀭𑀸𑀚𑀕𑀳𑁂 𑀅𑀬𑀫𑁂𑀯 𑀉𑀧𑀲𑀸𑀴𑀓𑁄 𑀩𑁆𑀭𑀸𑀳𑁆𑀫𑀡𑁄 𑀅𑀬𑀫𑁂𑀯𑀲𑁆𑀲 𑀧𑀼𑀢𑁆𑀢𑁄 𑀅𑀳𑁄𑀲𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀫𑀕𑀥𑀭𑀝𑁆𑀞𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀧𑀭𑀺𑀧𑀼𑀡𑁆𑀡𑀲𑀺𑀧𑁆𑀧𑁄 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀛𑀸𑀦𑀓𑀻𑀴𑀁 𑀓𑀻𑀴𑀦𑁆𑀢𑁄 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀘𑀺𑀭𑀁 𑀯𑀲𑀺𑀢𑁆𑀯𑀸 𑀮𑁄𑀡𑀫𑁆𑀩𑀺𑀮𑀲𑁂𑀯𑀦𑀢𑁆𑀣𑀸𑀬 𑀕𑀺𑀚𑁆𑀛𑀓𑀽𑀝𑁂 𑀧𑀡𑁆𑀡𑀲𑀸𑀮𑀸𑀬𑀁 𑀯𑀺𑀳𑀸𑀲𑀺. 𑀢𑀤𑀸 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀇𑀫𑀺𑀦𑀸𑀯 𑀦𑀺𑀬𑀸𑀫𑁂𑀦 𑀧𑀼𑀢𑁆𑀢𑀁 𑀯𑀢𑁆𑀯𑀸 𑀧𑀼𑀢𑁆𑀢𑁂𑀦 ‘‘𑀢𑀼𑀫𑁆𑀳𑁂𑀬𑁂𑀯 𑀫𑁂 𑀢𑀣𑀸𑀭𑀽𑀧𑀁 𑀞𑀸𑀦𑀁 𑀆𑀘𑀺𑀓𑁆𑀔𑀣𑀸’’𑀢𑀺 𑀯𑀼𑀢𑁆𑀢𑁂 ‘‘𑀇𑀤𑀫𑁂𑀯 𑀞𑀸𑀦’’𑀦𑁆𑀢𑀺 𑀆𑀘𑀺𑀓𑁆𑀔𑀺𑀢𑁆𑀯𑀸 𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀑𑀢𑀭𑀦𑁆𑀢𑁄 𑀩𑁄𑀥𑀺𑀲𑀢𑁆𑀢𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀉𑀧𑀲𑀗𑁆𑀓𑀫𑀺. 𑀩𑁄𑀥𑀺𑀲𑀢𑁆𑀢𑁄 𑀇𑀫𑀺𑀦𑀸𑀯 𑀦𑀺𑀬𑀸𑀫𑁂𑀦 𑀧𑀼𑀘𑁆𑀙𑀺𑀢𑁆𑀯𑀸 𑀫𑀸𑀡𑀯𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀏𑀳𑀺, 𑀢𑀯 𑀧𑀺𑀢𑀭𑀸 𑀆𑀘𑀺𑀓𑁆𑀔𑀺𑀢𑀝𑁆𑀞𑀸𑀦𑀲𑁆𑀲 𑀉𑀘𑁆𑀙𑀺𑀝𑁆𑀞𑀪𑀸𑀯𑀁 𑀯𑀸 𑀅𑀦𑀼𑀘𑁆𑀙𑀺𑀝𑁆𑀞𑀪𑀸𑀯𑀁 𑀯𑀸 𑀚𑀸𑀦𑀺𑀲𑁆𑀲𑀸𑀫𑀸’’𑀢𑀺 𑀢𑁂𑀳𑀺 𑀲𑀤𑁆𑀥𑀺𑀁 𑀧𑀩𑁆𑀩𑀢𑀫𑀢𑁆𑀣𑀓𑀁 𑀆𑀭𑀼𑀬𑁆𑀳 ‘‘𑀇𑀤𑀁 𑀢𑀺𑀡𑁆𑀡𑀁 𑀧𑀩𑁆𑀩𑀢𑀸𑀦𑀁 𑀅𑀦𑁆𑀢𑀭𑀁 𑀅𑀦𑀼𑀘𑁆𑀙𑀺𑀝𑁆𑀞𑀝𑁆𑀞𑀸𑀦’’𑀦𑁆𑀢𑀺 𑀫𑀸𑀡𑀯𑁂𑀦 𑀯𑀼𑀢𑁆𑀢𑁂 ‘‘𑀫𑀸𑀡𑀯, 𑀇𑀫𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀛𑀸𑀧𑀺𑀢𑀓𑀸𑀦𑀁 𑀧𑀫𑀸𑀡𑀁 𑀦𑀢𑁆𑀣𑀺, 𑀢𑀯𑁂𑀯 𑀧𑀺𑀢𑀸 𑀇𑀫𑀲𑁆𑀫𑀺𑀁𑀬𑁂𑀯 𑀭𑀸𑀚𑀕𑀳𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂𑀬𑁂𑀯 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀉𑀧𑀲𑀸𑀴𑀓𑁄𑀬𑁂𑀯 𑀦𑀸𑀫 𑀳𑀼𑀢𑁆𑀯𑀸 𑀇𑀫𑀲𑁆𑀫𑀺𑀁𑀬𑁂𑀯 𑀧𑀩𑁆𑀩𑀢𑀦𑁆𑀢𑀭𑁂 𑀘𑀼𑀤𑁆𑀤𑀲 𑀚𑀸𑀢𑀺𑀲𑀳𑀲𑁆𑀲𑀸𑀦𑀺 𑀛𑀸𑀧𑀺𑀢𑁄. 𑀧𑀣𑀯𑀺𑀬𑀜𑁆𑀳𑀺 𑀅𑀛𑀸𑀧𑀺𑀢𑀝𑁆𑀞𑀸𑀦𑀁 𑀯𑀸 𑀅𑀲𑀼𑀲𑀸𑀦𑀝𑁆𑀞𑀸𑀦𑀁 𑀯𑀸 𑀲𑀻𑀲𑀸𑀦𑀁 𑀅𑀦𑀺𑀯𑁂𑀲𑀺𑀢𑀝𑁆𑀞𑀸𑀦𑀁 𑀯𑀸 𑀮𑀤𑁆𑀥𑀼𑀁 𑀦 𑀲𑀓𑁆𑀓𑀸’’𑀢𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀇𑀫𑀁 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋

𑁩𑁧. ‘‘𑀉𑀧𑀲𑀸𑀴𑀓𑀦𑀸𑀫𑀸𑀦𑀺, 𑀲𑀳𑀲𑁆𑀲𑀸𑀦𑀺 𑀘𑀢𑀼𑀤𑁆𑀤𑀲;

𑀅𑀲𑁆𑀫𑀺𑀁 𑀧𑀤𑁂𑀲𑁂 𑀤𑀟𑁆𑀠𑀸𑀦𑀺, 𑀦𑀢𑁆𑀣𑀺 𑀮𑁄𑀓𑁂 𑀅𑀦𑀸𑀫𑀢𑀁.

𑁩𑁨. ‘‘𑀬𑀫𑁆𑀳𑀺 𑀲𑀘𑁆𑀘𑀜𑁆𑀘 𑀥𑀫𑁆𑀫𑁄 𑀘, 𑀅𑀳𑀺𑀁𑀲𑀸 𑀲𑀁𑀬𑀫𑁄 𑀤𑀫𑁄;

𑀏𑀢𑀁 𑀅𑀭𑀺𑀬𑀸 𑀲𑁂𑀯𑀦𑁆𑀢𑀺, 𑀏𑀢𑀁 𑀮𑁄𑀓𑁂 𑀅𑀦𑀸𑀫𑀢’’𑀦𑁆𑀢𑀺.

𑀢𑀢𑁆𑀣 𑀅𑀦𑀸𑀫𑀢𑀦𑁆𑀢𑀺 𑀫𑀢𑀝𑁆𑀞𑀸𑀦𑀁. 𑀢𑀜𑁆𑀳𑀺 𑀉𑀧𑀘𑀸𑀭𑀯𑀲𑁂𑀦 ‘‘𑀅𑀫𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀧𑀝𑀺𑀲𑁂𑀥𑁂𑀦𑁆𑀢𑁄 ‘‘𑀅𑀦𑀸𑀫𑀢’’𑀦𑁆𑀢𑀺 𑀆𑀳. ‘‘𑀅𑀦𑀫𑀢’’𑀦𑁆𑀢𑀺𑀧𑀺 𑀧𑀸𑀞𑁄, 𑀮𑁄𑀓𑀲𑁆𑀫𑀺𑀜𑁆𑀳𑀺 𑀅𑀦𑀫𑀢𑀝𑁆𑀞𑀸𑀦𑀁 𑀅𑀲𑀼𑀲𑀸𑀦𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀬𑀫𑁆𑀳𑀺 𑀲𑀘𑁆𑀘𑀜𑁆𑀘 𑀥𑀫𑁆𑀫𑁄 𑀘𑀸𑀢𑀺 𑀬𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀘𑀢𑀼𑀲𑀘𑁆𑀘𑀯𑀢𑁆𑀣𑀼𑀓𑀁 𑀧𑀼𑀩𑁆𑀩𑀪𑀸𑀕𑀲𑀘𑁆𑀘𑀜𑀸𑀡𑀜𑁆𑀘 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀘 𑀅𑀢𑁆𑀣𑀺. 𑀅𑀳𑀺𑀁𑀲𑀸𑀢𑀺 𑀧𑀭𑁂𑀲𑀁 𑀅𑀯𑀺𑀳𑁂𑀲𑀸 𑀅𑀯𑀺𑀳𑁂𑀞𑀦𑀸. 𑀲𑀁𑀬𑀫𑁄𑀢𑀺 𑀲𑀻𑀮𑀲𑀁𑀬𑀫𑁄. 𑀤𑀫𑁄𑀢𑀺 𑀇𑀦𑁆𑀤𑁆𑀭𑀺𑀬𑀤𑀫𑀦𑀁. 𑀇𑀤𑀜𑁆𑀘 𑀕𑀼𑀡𑀚𑀸𑀢𑀁 𑀬𑀫𑁆𑀳𑀺 𑀧𑀼𑀕𑁆𑀕𑀮𑁂 𑀅𑀢𑁆𑀣𑀺, 𑀏𑀢𑀁 𑀅𑀭𑀺𑀬𑀸 𑀲𑁂𑀯𑀦𑁆𑀢𑀻𑀢𑀺, 𑀅𑀭𑀺𑀬𑀸 𑀩𑀼𑀤𑁆𑀥𑀸 𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀘 𑀩𑀼𑀤𑁆𑀥𑀲𑀸𑀯𑀓𑀸 𑀘 𑀏𑀢𑀁 𑀞𑀸𑀦𑀁 𑀲𑁂𑀯𑀦𑁆𑀢𑀺, 𑀏𑀯𑀭𑀽𑀧𑀁 𑀧𑀼𑀕𑁆𑀕𑀮𑀁 𑀉𑀧𑀲𑀗𑁆𑀓𑀫𑀦𑁆𑀢𑀺 𑀪𑀚𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀏𑀢𑀁 𑀮𑁄𑀓𑁂 𑀅𑀦𑀸𑀫𑀢𑀦𑁆𑀢𑀺 𑀏𑀢𑀁 𑀕𑀼𑀡𑀚𑀸𑀢𑀁 𑀮𑁄𑀓𑁂 𑀅𑀫𑀢𑀪𑀸𑀯𑀲𑀸𑀥𑀦𑀢𑁄 𑀅𑀦𑀸𑀫𑀢𑀁 𑀦𑀸𑀫.

𑀏𑀯𑀁 𑀩𑁄𑀥𑀺𑀲𑀢𑁆𑀢𑁄 𑀧𑀺𑀢𑀸𑀧𑀼𑀢𑁆𑀢𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀘𑀢𑁆𑀢𑀸𑀭𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀪𑀸𑀯𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑁄 𑀅𑀳𑁄𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀪𑁄 𑀧𑀺𑀢𑀸𑀧𑀼𑀢𑁆𑀢𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼. ‘‘𑀢𑀤𑀸 𑀧𑀺𑀢𑀸𑀧𑀼𑀢𑁆𑀢𑀸𑀯 𑀏𑀢𑀭𑀳𑀺 𑀧𑀺𑀢𑀸𑀧𑀼𑀢𑁆𑀢𑀸 𑀅𑀳𑁂𑀲𑀼𑀁, 𑀢𑀸𑀧𑀲𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀉𑀧𑀲𑀸𑀴𑀓𑀚𑀸𑀢𑀓𑀯𑀡𑁆𑀡𑀦𑀸 𑀙𑀝𑁆𑀞𑀸.

[𑁧𑁬𑁭] 𑁭. 𑀲𑀫𑀺𑀤𑁆𑀥𑀺𑀚𑀸𑀢𑀓𑀯𑀡𑁆𑀡𑀦𑀸

𑀅𑀪𑀼𑀢𑁆𑀯𑀸 𑀪𑀺𑀓𑁆𑀔𑀲𑀺 𑀪𑀺𑀓𑁆𑀔𑀽𑀢𑀺 𑀇𑀤𑀁 𑀲𑀢𑁆𑀣𑀸 𑀭𑀸𑀚𑀕𑀳𑀁 𑀉𑀧𑀦𑀺𑀲𑁆𑀲𑀸𑀬 𑀢𑀧𑁄𑀤𑀸𑀭𑀸𑀫𑁂 𑀯𑀺𑀳𑀭𑀦𑁆𑀢𑁄 𑀲𑀫𑀺𑀤𑁆𑀥𑀺𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀓𑀤𑀺𑀯𑀲𑀜𑁆𑀳𑀺 𑀆𑀬𑀲𑁆𑀫𑀸 𑀲𑀫𑀺𑀤𑁆𑀥𑀺 𑀲𑀩𑁆𑀩𑀭𑀢𑁆𑀢𑀺𑀁 𑀧𑀥𑀸𑀦𑀁 𑀧𑀤𑀳𑀺𑀢𑁆𑀯𑀸 𑀅𑀭𑀼𑀡𑀼𑀕𑁆𑀕𑀫𑀦𑀯𑁂𑀮𑀸𑀬 𑀦𑁆𑀳𑀢𑁆𑀯𑀸 𑀲𑀼𑀯𑀡𑁆𑀡𑀯𑀡𑁆𑀡𑀁 𑀅𑀢𑁆𑀢𑀪𑀸𑀯𑀁 𑀲𑀼𑀓𑁆𑀔𑀸𑀧𑀬𑀫𑀸𑀦𑁄 𑀅𑀦𑁆𑀢𑀭𑀯𑀸𑀲𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀉𑀢𑁆𑀢𑀭𑀸𑀲𑀗𑁆𑀕𑀁 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀅𑀝𑁆𑀞𑀸𑀲𑀺 𑀲𑀼𑀧𑀭𑀺𑀓𑀫𑁆𑀫𑀓𑀢𑀸 𑀯𑀺𑀬 𑀲𑀼𑀯𑀡𑁆𑀡𑀧𑀝𑀺𑀫𑀸. 𑀅𑀢𑁆𑀢𑀪𑀸𑀯𑀲𑀫𑀺𑀤𑁆𑀥𑀺𑀬𑀸𑀬𑁂𑀯 𑀳𑀺𑀲𑁆𑀲 ‘‘𑀲𑀫𑀺𑀤𑁆𑀥𑀻’’𑀢𑀺 𑀦𑀸𑀫𑀁 𑀅𑀳𑁄𑀲𑀺. 𑀅𑀣𑀲𑁆𑀲 𑀲𑀭𑀻𑀭𑀲𑁄𑀪𑀕𑁆𑀕𑀁 𑀤𑀺𑀲𑁆𑀯𑀸 𑀏𑀓𑀸 𑀤𑁂𑀯𑀥𑀻𑀢𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸 𑀣𑁂𑀭𑀁 𑀏𑀯𑀫𑀸𑀳 𑁋 ‘‘𑀢𑁆𑀯𑀁 𑀔𑁄𑀲𑀺, 𑀪𑀺𑀓𑁆𑀔𑀼, 𑀤𑀳𑀭𑁄 𑀬𑀼𑀯𑀸 𑀲𑀼𑀲𑀼 𑀓𑀸𑀴𑀓𑁂𑀲𑁄 𑀪𑀤𑁆𑀭𑁂𑀦 𑀬𑁄𑀩𑁆𑀩𑀦𑁂𑀦 𑀲𑀫𑀦𑁆𑀦𑀸𑀕𑀢𑁄 𑀅𑀪𑀺𑀭𑀽𑀧𑁄 𑀤𑀲𑁆𑀲𑀦𑀻𑀬𑁄 𑀧𑀸𑀲𑀸𑀤𑀺𑀓𑁄, 𑀏𑀯𑀭𑀽𑀧𑀲𑁆𑀲 𑀢𑀯 𑀓𑀸𑀫𑁂 𑀅𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀓𑁄 𑀅𑀢𑁆𑀣𑁄 𑀧𑀩𑁆𑀩𑀚𑁆𑀚𑀸𑀬, 𑀓𑀸𑀫𑁂 𑀢𑀸𑀯 𑀧𑀭𑀺𑀪𑀼𑀜𑁆𑀚𑀲𑁆𑀲𑀼, 𑀧𑀘𑁆𑀙𑀸 𑀧𑀩𑁆𑀩𑀚𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑀺𑀲𑁆𑀲𑀲𑀻’’𑀢𑀺. 𑀅𑀣 𑀦𑀁 𑀣𑁂𑀭𑁄 𑀆𑀳 𑁋 ‘‘𑀤𑁂𑀯𑀥𑀻𑀢𑁂, ‘𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀯𑀬𑁂 𑀞𑀺𑀢𑁄 𑀫𑀭𑀺𑀲𑁆𑀲𑀸𑀫𑀻’𑀢𑀺 𑀫𑀫 𑀫𑀭𑀡𑀓𑀸𑀮𑀁 𑀦 𑀚𑀸𑀦𑀸𑀫𑀺, 𑀏𑀲 𑀫𑁂 𑀓𑀸𑀮𑁄 𑀧𑀝𑀺𑀘𑁆𑀙𑀦𑁆𑀦𑁄, 𑀢𑀲𑁆𑀫𑀸 𑀢𑀭𑀼𑀡𑀓𑀸𑀮𑁂𑀬𑁂𑀯 𑀲𑀫𑀡𑀥𑀫𑁆𑀫𑀁 𑀓𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑀸 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀸 𑀧𑀝𑀺𑀲𑀦𑁆𑀣𑀸𑀭𑀁 𑀅𑀮𑀪𑀺𑀢𑁆𑀯𑀸 𑀢𑀢𑁆𑀣𑁂𑀯 𑀅𑀦𑁆𑀢𑀭𑀥𑀸𑀬𑀺. 𑀣𑁂𑀭𑁄 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 ‘‘𑀦 𑀔𑁄, 𑀲𑀫𑀺𑀤𑁆𑀥𑀺, 𑀢𑁆𑀯𑀜𑁆𑀜𑁂𑀯 𑀏𑀢𑀭𑀳𑀺 𑀤𑁂𑀯𑀥𑀻𑀢𑀸𑀬 𑀧𑀮𑁄𑀪𑀺𑀢𑁄, 𑀧𑀼𑀩𑁆𑀩𑁂𑀧𑀺 𑀤𑁂𑀯𑀥𑀻𑀢𑀭𑁄 𑀧𑀩𑁆𑀩𑀚𑀺𑀢𑁂 𑀧𑀮𑁄𑀪𑀺𑀁𑀲𑀼𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀏𑀓𑀲𑁆𑀫𑀺𑀁 𑀓𑀸𑀲𑀺𑀕𑀸𑀫𑀓𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀲𑀩𑁆𑀩𑀲𑀺𑀧𑁆𑀧𑁂𑀲𑀼 𑀦𑀺𑀧𑁆𑀨𑀢𑁆𑀢𑀺𑀁 𑀧𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀏𑀓𑀁 𑀚𑀸𑀢𑀲𑁆𑀲𑀭𑀁 𑀦𑀺𑀲𑁆𑀲𑀸𑀬 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀲𑁄 𑀲𑀩𑁆𑀩𑀭𑀢𑁆𑀢𑀺𑀁 𑀧𑀥𑀸𑀦𑀁 𑀧𑀤𑀳𑀺𑀢𑁆𑀯𑀸 𑀅𑀭𑀼𑀡𑀼𑀕𑁆𑀕𑀫𑀦𑀯𑁂𑀮𑀸𑀬 𑀦𑁆𑀳𑀢𑁆𑀯𑀸 𑀏𑀓𑀁 𑀯𑀓𑁆𑀓𑀮𑀁 𑀦𑀺𑀯𑀸𑀲𑁂𑀢𑁆𑀯𑀸 𑀏𑀓𑀁 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀲𑀭𑀻𑀭𑀁 𑀯𑁄𑀤𑀓𑀁 𑀓𑀭𑁄𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀅𑀣𑀲𑁆𑀲 𑀭𑀽𑀧𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀁 𑀅𑀢𑁆𑀢𑀪𑀸𑀯𑀁 𑀑𑀮𑁄𑀓𑁂𑀢𑁆𑀯𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸 𑀏𑀓𑀸 𑀤𑁂𑀯𑀥𑀻𑀢𑀸 𑀩𑁄𑀥𑀺𑀲𑀢𑁆𑀢𑀁 𑀧𑀮𑁄𑀪𑀬𑀫𑀸𑀦𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁩𑁩. ‘‘𑀅𑀪𑀼𑀢𑁆𑀯𑀸 𑀪𑀺𑀓𑁆𑀔𑀲𑀺 𑀪𑀺𑀓𑁆𑀔𑀼, 𑀦 𑀳𑀺 𑀪𑀼𑀢𑁆𑀯𑀸𑀦 𑀪𑀺𑀓𑁆𑀔𑀲𑀺;

𑀪𑀼𑀢𑁆𑀯𑀸𑀦 𑀪𑀺𑀓𑁆𑀔𑀼 𑀪𑀺𑀓𑁆𑀔𑀲𑁆𑀲𑀼, 𑀫𑀸 𑀢𑀁 𑀓𑀸𑀮𑁄 𑀉𑀧𑀘𑁆𑀘𑀕𑀸’’𑀢𑀺.

𑀢𑀢𑁆𑀣 𑀅𑀪𑀼𑀢𑁆𑀯𑀸 𑀪𑀺𑀓𑁆𑀔𑀲𑀺 𑀪𑀺𑀓𑁆𑀔𑀽𑀢𑀺 𑀪𑀺𑀓𑁆𑀔𑀼 𑀢𑁆𑀯𑀁 𑀤𑀳𑀭𑀓𑀸𑀮𑁂 𑀓𑀺𑀮𑁂𑀲𑀓𑀸𑀫𑀯𑀲𑁂𑀦 𑀯𑀢𑁆𑀣𑀼𑀓𑀸𑀫𑁂 𑀅𑀪𑀼𑀢𑁆𑀯𑀸𑀯 𑀪𑀺𑀓𑁆𑀔𑀸𑀬 𑀘𑀭𑀲𑀺. 𑀦 𑀳𑀺 𑀪𑀼𑀢𑁆𑀯𑀸𑀦 𑀪𑀺𑀓𑁆𑀔𑀲𑀻𑀢𑀺 𑀦𑀦𑀼 𑀦𑀸𑀫 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀪𑀼𑀢𑁆𑀯𑀸 𑀪𑀺𑀓𑁆𑀔𑀸𑀬 𑀘𑀭𑀺𑀢𑀩𑁆𑀩𑀁, 𑀓𑀸𑀫𑁂 𑀅𑀪𑀼𑀢𑁆𑀯𑀸𑀯 𑀪𑀺𑀓𑁆𑀔𑀸𑀘𑀭𑀺𑀬𑀁 𑀉𑀧𑀕𑀢𑁄𑀲𑀺. 𑀪𑀼𑀢𑁆𑀯𑀸𑀦 𑀪𑀺𑀓𑁆𑀔𑀼 𑀪𑀺𑀓𑁆𑀔𑀲𑁆𑀲𑀽𑀢𑀺 𑀪𑀺𑀓𑁆𑀔𑀼 𑀤𑀳𑀭𑀓𑀸𑀮𑁂 𑀢𑀸𑀯 𑀓𑀸𑀫𑁂 𑀪𑀼𑀜𑁆𑀚𑀺𑀢𑁆𑀯𑀸 𑀧𑀘𑁆𑀙𑀸 𑀫𑀳𑀮𑁆𑀮𑀓𑀓𑀸𑀮𑁂 𑀪𑀺𑀓𑁆𑀔𑀲𑁆𑀲𑀼. 𑀫𑀸 𑀢𑀁 𑀓𑀸𑀮𑁄 𑀉𑀧𑀘𑁆𑀘𑀕𑀸𑀢𑀺 𑀅𑀬𑀁 𑀓𑀸𑀫𑁂 𑀪𑀼𑀜𑁆𑀚𑀦𑀓𑀸𑀮𑁄 𑀤𑀳𑀭𑀓𑀸𑀮𑁄, 𑀢𑀁 𑀫𑀸 𑀅𑀢𑀺𑀓𑁆𑀓𑀫𑀢𑀽𑀢𑀺.

𑀩𑁄𑀥𑀺𑀲𑀢𑁆𑀢𑁄 𑀤𑁂𑀯𑀢𑀸𑀬 𑀯𑀘𑀦𑀁 𑀲𑀼𑀢𑁆𑀯𑀸 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑀁 𑀧𑀓𑀸𑀲𑁂𑀦𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁩𑁪. ‘‘𑀓𑀸𑀮𑀁 𑀯𑁄𑀳𑀁 𑀦 𑀚𑀸𑀦𑀸𑀫𑀺, 𑀙𑀦𑁆𑀦𑁄 𑀓𑀸𑀮𑁄 𑀦 𑀤𑀺𑀲𑁆𑀲𑀢𑀺;

𑀢𑀲𑁆𑀫𑀸 𑀅𑀪𑀼𑀢𑁆𑀯𑀸 𑀪𑀺𑀓𑁆𑀔𑀸𑀫𑀺, 𑀫𑀸 𑀫𑀁 𑀓𑀸𑀮𑁄 𑀉𑀧𑀘𑁆𑀘𑀕𑀸’’𑀢𑀺.

𑀢𑀢𑁆𑀣 𑀓𑀸𑀮𑀁 𑀯𑁄𑀳𑀁 𑀦 𑀚𑀸𑀦𑀸𑀫𑀻𑀢𑀺 𑀯𑁄𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀅𑀳𑀁 𑀧𑀦 ‘‘𑀧𑀞𑀫𑀯𑀬𑁂 𑀯𑀸 𑀫𑀬𑀸 𑀫𑀭𑀺𑀢𑀩𑁆𑀩𑀁 𑀫𑀚𑁆𑀛𑀺𑀫𑀯𑀬𑁂 𑀯𑀸 𑀧𑀘𑁆𑀙𑀺𑀫𑀯𑀬𑁂 𑀯𑀸’’𑀢𑀺 𑀏𑀯𑀁 𑀅𑀢𑁆𑀢𑀦𑁄 𑀫𑀭𑀡𑀓𑀸𑀮𑀁 𑀦 𑀚𑀸𑀦𑀸𑀫𑀺. 𑀧𑀡𑁆𑀟𑀺𑀢𑁂𑀦 𑀳𑀺 𑀧𑀼𑀕𑁆𑀕𑀮𑁂𑀦 𑁋

‘‘𑀚𑀻𑀯𑀺𑀢𑀁 𑀩𑁆𑀬𑀸𑀥𑀺 𑀓𑀸𑀮𑁄 𑀘, 𑀤𑁂𑀳𑀦𑀺𑀓𑁆𑀔𑁂𑀧𑀦𑀁 𑀕𑀢𑀺;

𑀧𑀜𑁆𑀘𑁂𑀢𑁂 𑀚𑀻𑀯𑀮𑁄𑀓𑀲𑁆𑀫𑀺𑀁, 𑀅𑀦𑀺𑀫𑀺𑀢𑁆𑀢𑀸 𑀦 𑀦𑀸𑀬𑀭𑁂’’𑀢𑀺.

𑀙𑀦𑁆𑀦𑁄 𑀓𑀸𑀮𑁄 𑀦 𑀤𑀺𑀲𑁆𑀲𑀢𑀻𑀢𑀺 𑀬𑀲𑁆𑀫𑀸 ‘‘𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀯𑀬𑀓𑀸𑀮𑁂 𑀳𑁂𑀫𑀦𑁆𑀢𑀸𑀤𑀺𑀉𑀢𑀼𑀓𑀸𑀮𑁂 𑀯𑀸 𑀫𑀬𑀸 𑀫𑀭𑀺𑀢𑀩𑁆𑀩’’𑀦𑁆𑀢𑀺 𑀫𑀬𑁆𑀳𑀫𑁆𑀧𑁂𑀲 𑀙𑀦𑁆𑀦𑁄 𑀳𑀼𑀢𑁆𑀯𑀸 𑀓𑀸𑀮𑁄 𑀦 𑀤𑀺𑀲𑁆𑀲𑀢𑀺, 𑀲𑀼𑀧𑁆𑀧𑀝𑀺𑀘𑁆𑀙𑀦𑁆𑀦𑁄 𑀳𑀼𑀢𑁆𑀯𑀸 𑀞𑀺𑀢𑁄 𑀦 𑀧𑀜𑁆𑀜𑀸𑀬𑀢𑀺. 𑀢𑀲𑁆𑀫𑀸 𑀅𑀪𑀼𑀢𑁆𑀯𑀸 𑀪𑀺𑀓𑁆𑀔𑀸𑀫𑀻𑀢𑀺 𑀢𑁂𑀦 𑀓𑀸𑀭𑀡𑁂𑀦 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀅𑀪𑀼𑀢𑁆𑀯𑀸 𑀪𑀺𑀓𑁆𑀔𑀸𑀫𑀺. 𑀫𑀸 𑀫𑀁 𑀓𑀸𑀮𑁄 𑀉𑀧𑀘𑁆𑀘𑀕𑀸𑀢𑀺 𑀫𑀁 𑀲𑀫𑀡𑀥𑀫𑁆𑀫𑀓𑀭𑀡𑀓𑀸𑀮𑁄 𑀫𑀸 𑀅𑀢𑀺𑀓𑁆𑀓𑀫𑀢𑀽𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀤𑀳𑀭𑁄𑀯 𑀲𑀫𑀸𑀦𑁄 𑀧𑀩𑁆𑀩𑀚𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀫𑀻𑀢𑀺. 𑀤𑁂𑀯𑀥𑀻𑀢𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀢𑀢𑁆𑀣𑁂𑀯 𑀅𑀦𑁆𑀢𑀭𑀥𑀸𑀬𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀤𑁂𑀯𑀥𑀻𑀢𑀸 𑀅𑀬𑀁 𑀤𑁂𑀯𑀥𑀻𑀢𑀸 𑀅𑀳𑁄𑀲𑀺, 𑀅𑀳𑀫𑁂𑀯 𑀢𑁂𑀦 𑀲𑀫𑀬𑁂𑀦 𑀢𑀸𑀧𑀲𑁄 𑀅𑀳𑁄𑀲𑀺’’𑀦𑁆𑀢𑀺.

𑀲𑀫𑀺𑀤𑁆𑀥𑀺𑀚𑀸𑀢𑀓𑀯𑀡𑁆𑀡𑀦𑀸 𑀲𑀢𑁆𑀢𑀫𑀸.

[𑁧𑁬𑁮] 𑁮. 𑀲𑀓𑀼𑀡𑀕𑁆𑀖𑀺𑀚𑀸𑀢𑀓𑀯𑀡𑁆𑀡𑀦𑀸

𑀲𑁂𑀦𑁄 𑀩𑀮𑀲𑀸 𑀧𑀢𑀫𑀸𑀦𑁄𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀢𑁆𑀢𑀚𑁆𑀛𑀸𑀲𑀬𑀁 𑀲𑀓𑀼𑀡𑁄𑀯𑀸𑀤𑀲𑀼𑀢𑁆𑀢𑀁 (𑀲𑀁. 𑀦𑀺. 𑁫.𑁩𑁭𑁨) 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀓𑀤𑀺𑀯𑀲𑀜𑁆𑀳𑀺 𑀲𑀢𑁆𑀣𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀕𑁄𑀘𑀭𑁂, 𑀪𑀺𑀓𑁆𑀔𑀯𑁂, 𑀘𑀭𑀣 𑀲𑀓𑁂 𑀧𑁂𑀢𑁆𑀢𑀺𑀓𑁂 𑀯𑀺𑀲𑀬𑁂’’𑀢𑀺 (𑀲𑀁. 𑀦𑀺. 𑁫.𑁩𑁭𑁨) 𑀇𑀫𑀁 𑀲𑀁𑀬𑀼𑀢𑁆𑀢𑀫𑀳𑀸𑀯𑀕𑁆𑀕𑁂 𑀲𑀼𑀢𑁆𑀢𑀦𑁆𑀢𑀁 𑀓𑀣𑁂𑀦𑁆𑀢𑁄 ‘‘𑀢𑀼𑀫𑁆𑀳𑁂 𑀢𑀸𑀯 𑀢𑀺𑀝𑁆𑀞𑀣, 𑀧𑀼𑀩𑁆𑀩𑁂 𑀢𑀺𑀭𑀘𑁆𑀙𑀸𑀦𑀕𑀢𑀸𑀧𑀺 𑀲𑀓𑀁 𑀧𑁂𑀢𑁆𑀢𑀺𑀓𑀯𑀺𑀲𑀬𑀁 𑀧𑀳𑀸𑀬 𑀅𑀕𑁄𑀘𑀭𑁂 𑀘𑀭𑀦𑁆𑀢𑀸 𑀧𑀘𑁆𑀘𑀸𑀫𑀺𑀢𑁆𑀢𑀸𑀦𑀁 𑀳𑀢𑁆𑀣𑀧𑀣𑀁 𑀕𑀦𑁆𑀢𑁆𑀯𑀸𑀧𑀺 𑀅𑀢𑁆𑀢𑀦𑁄 𑀧𑀜𑁆𑀜𑀸𑀲𑀫𑁆𑀧𑀢𑁆𑀢𑀺𑀬𑀸 𑀉𑀧𑀸𑀬𑀓𑁄𑀲𑀮𑁆𑀮𑁂𑀦 𑀧𑀘𑁆𑀘𑀸𑀫𑀺𑀢𑁆𑀢𑀸𑀦𑀁 𑀳𑀢𑁆𑀣𑀸 𑀫𑀼𑀘𑁆𑀘𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀮𑀸𑀧𑀲𑀓𑀼𑀡𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀦𑀗𑁆𑀕𑀮𑀓𑀝𑁆𑀞𑀓𑀭𑀡𑁂 𑀮𑁂𑀟𑁆𑀟𑀼𑀝𑁆𑀞𑀸𑀦𑁂 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀲𑁄 𑀏𑀓𑀤𑀺𑀯𑀲𑀁 ‘‘𑀲𑀓𑀯𑀺𑀲𑀬𑁂 𑀕𑁄𑀘𑀭𑀕𑀳𑀡𑀁 𑀧𑀳𑀸𑀬 𑀧𑀭𑀯𑀺𑀲𑀬𑁂 𑀕𑁄𑀘𑀭𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀅𑀝𑀯𑀺𑀧𑀭𑀺𑀬𑀦𑁆𑀢𑀁 𑀅𑀕𑀫𑀸𑀲𑀺. 𑀅𑀣 𑀦𑀁 𑀢𑀢𑁆𑀣 𑀕𑁄𑀘𑀭𑀁 𑀕𑀡𑁆𑀳𑀦𑁆𑀢𑀁 𑀤𑀺𑀲𑁆𑀯𑀸 𑀲𑀓𑀼𑀡𑀕𑁆𑀖𑀺 𑀲𑀳𑀲𑀸 𑀅𑀚𑁆𑀛𑀧𑁆𑀧𑀢𑁆𑀢𑀸 𑀅𑀕𑁆𑀕𑀳𑁂𑀲𑀺. 𑀲𑁄 𑀲𑀓𑀼𑀡𑀕𑁆𑀖𑀺𑀬𑀸 𑀳𑀭𑀺𑀬𑀫𑀸𑀦𑁄 𑀏𑀯𑀁 𑀧𑀭𑀺𑀤𑁂𑀯𑀲𑀺 𑁋 ‘‘𑀫𑀬𑀫𑁂𑀯𑀫𑁆𑀳 𑀅𑀮𑀓𑁆𑀔𑀺𑀓𑀸, 𑀫𑀬𑀁 𑀅𑀧𑁆𑀧𑀧𑀼𑀜𑁆𑀜𑀸, 𑀬𑁂 𑀫𑀬𑀁 𑀅𑀕𑁄𑀘𑀭𑁂 𑀘𑀭𑀺𑀫𑁆𑀳 𑀧𑀭𑀯𑀺𑀲𑀬𑁂, 𑀲𑀘𑁂𑀚𑁆𑀚 𑀫𑀬𑀁 𑀕𑁄𑀘𑀭𑁂 𑀘𑀭𑁂𑀬𑁆𑀬𑀸𑀫 𑀲𑀓𑁂 𑀧𑁂𑀢𑁆𑀢𑀺𑀓𑁂 𑀯𑀺𑀲𑀬𑁂, 𑀦 𑀫𑁆𑀬𑀸𑀬𑀁 𑀲𑀓𑀼𑀡𑀕𑁆𑀖𑀺 𑀅𑀮𑀁 𑀅𑀪𑀯𑀺𑀲𑁆𑀲 𑀬𑀤𑀺𑀤𑀁 𑀬𑀼𑀤𑁆𑀥𑀸𑀬𑀸’’𑀢𑀺. ‘‘𑀓𑁄 𑀧𑀦, 𑀢𑁂 𑀮𑀸𑀧, 𑀕𑁄𑀘𑀭𑁄 𑀲𑀓𑁄 𑀧𑁂𑀢𑁆𑀢𑀺𑀓𑁄 𑀯𑀺𑀲𑀬𑁄’’𑀢𑀺? ‘‘𑀬𑀤𑀺𑀤𑀁 𑀦𑀗𑁆𑀕𑀮𑀓𑀝𑁆𑀞𑀓𑀭𑀡𑀁 𑀮𑁂𑀟𑁆𑀟𑀼𑀝𑁆𑀞𑀸𑀦’’𑀦𑁆𑀢𑀺. 𑀅𑀣 𑀦𑀁 𑀲𑀓𑀼𑀡𑀕𑁆𑀖𑀺 𑀲𑀓𑁂 𑀩𑀮𑁂 𑀅𑀧𑀢𑁆𑀣𑀤𑁆𑀥𑀸 𑀅𑀫𑀼𑀜𑁆𑀘𑀺 𑁋 ‘‘𑀕𑀘𑁆𑀙 𑀔𑁄, 𑀢𑁆𑀯𑀁 𑀮𑀸𑀧, 𑀢𑀢𑁆𑀭𑀧𑀺 𑀫𑁂 𑀕𑀦𑁆𑀢𑁆𑀯𑀸 𑀦 𑀫𑁄𑀓𑁆𑀔𑀲𑀻’’𑀢𑀺. 𑀲𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀫𑀳𑀦𑁆𑀢𑀁 𑀮𑁂𑀟𑁆𑀟𑀼𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 ‘‘𑀏𑀳𑀺 𑀔𑁄 𑀤𑀸𑀦𑀺 𑀲𑀓𑀼𑀡𑀕𑁆𑀖𑀻’’𑀢𑀺 𑀲𑁂𑀦𑀁 𑀅𑀯𑁆𑀳𑀬𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀲𑀓𑀼𑀡𑀕𑁆𑀖𑀺 𑀲𑀓𑁂 𑀩𑀮𑁂 𑀅𑀧𑀢𑁆𑀣𑀤𑁆𑀥𑀸 𑀉𑀪𑁄 𑀧𑀓𑁆𑀔𑁂 𑀲𑀦𑁆𑀦𑀬𑁆𑀳 𑀮𑀸𑀧𑀲𑀓𑀼𑀡𑀁 𑀲𑀳𑀲𑀸 𑀅𑀚𑁆𑀛𑀧𑁆𑀧𑀢𑁆𑀢𑀸. 𑀬𑀤𑀸 𑀧𑀦 𑀢𑀁 𑀮𑀸𑀧𑁄 ‘‘𑀩𑀳𑀼𑀆𑀕𑀢𑀸 𑀔𑁄 𑀫𑁆𑀬𑀸𑀬𑀁 𑀲𑀓𑀼𑀡𑀕𑁆𑀖𑀻’’𑀢𑀺 𑀅𑀜𑁆𑀜𑀸𑀲𑀺, 𑀅𑀣 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀢𑀲𑁆𑀲𑁂𑀯 𑀮𑁂𑀟𑁆𑀟𑀼𑀲𑁆𑀲 𑀅𑀦𑁆𑀢𑀭𑀁 𑀧𑀘𑁆𑀘𑀸𑀧𑀸𑀤𑀺. 𑀲𑀓𑀼𑀡𑀕𑁆𑀖𑀺 𑀯𑁂𑀕𑀁 𑀲𑀦𑁆𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀢𑀢𑁆𑀣𑁂𑀯 𑀉𑀭𑀁 𑀧𑀘𑁆𑀘𑀢𑀸𑀴𑁂𑀲𑀺. 𑀏𑀯𑀁 𑀲𑀸 𑀪𑀺𑀦𑁆𑀦𑁂𑀦 𑀳𑀤𑀬𑁂𑀦 𑀦𑀺𑀓𑁆𑀔𑀦𑁆𑀢𑁂𑀳𑀺 𑀅𑀓𑁆𑀔𑀻𑀳𑀺 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑀺.

𑀲𑀢𑁆𑀣𑀸 𑀇𑀫𑀁 𑀅𑀢𑀻𑀢𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀏𑀯𑀁, 𑀪𑀺𑀓𑁆𑀔𑀯𑁂, 𑀢𑀺𑀭𑀘𑁆𑀙𑀸𑀦𑀕𑀢𑀸𑀧𑀺 𑀅𑀕𑁄𑀘𑀭𑁂 𑀘𑀭𑀦𑁆𑀢𑀸 𑀲𑀧𑀢𑁆𑀢𑀳𑀢𑁆𑀣𑀁 𑀕𑀘𑁆𑀙𑀦𑁆𑀢𑀺, 𑀕𑁄𑀘𑀭𑁂 𑀧𑀦 𑀲𑀓𑁂 𑀧𑁂𑀢𑁆𑀢𑀺𑀓𑁂 𑀯𑀺𑀲𑀬𑁂 𑀘𑀭𑀦𑁆𑀢𑀸 𑀲𑀧𑀢𑁆𑀢𑁂 𑀦𑀺𑀕𑁆𑀕𑀡𑁆𑀳𑀦𑁆𑀢𑀺, 𑀢𑀲𑁆𑀫𑀸 𑀢𑀼𑀫𑁆𑀳𑁂𑀧𑀺 𑀫𑀸 𑀅𑀕𑁄𑀘𑀭𑁂 𑀘𑀭𑀣 𑀧𑀭𑀯𑀺𑀲𑀬𑁂. 𑀅𑀕𑁄𑀘𑀭𑁂, 𑀪𑀺𑀓𑁆𑀔𑀯𑁂, 𑀘𑀭𑀢𑀁 𑀧𑀭𑀯𑀺𑀲𑀬𑁂 𑀮𑀘𑁆𑀙𑀢𑀺 𑀫𑀸𑀭𑁄 𑀑𑀢𑀸𑀭𑀁, 𑀮𑀘𑁆𑀙𑀢𑀺 𑀫𑀸𑀭𑁄 𑀆𑀭𑀫𑁆𑀫𑀡𑀁. 𑀓𑁄 𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀅𑀕𑁄𑀘𑀭𑁄 𑀧𑀭𑀯𑀺𑀲𑀬𑁄? 𑀬𑀤𑀺𑀤𑀁 𑀧𑀜𑁆𑀘 𑀓𑀸𑀫𑀕𑀼𑀡𑀸. 𑀓𑀢𑀫𑁂 𑀧𑀜𑁆𑀘? 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀭𑀽𑀧𑀸…𑀧𑁂… 𑀅𑀬𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀅𑀕𑁄𑀘𑀭𑁄 𑀧𑀭𑀯𑀺𑀲𑀬𑁄’’𑀢𑀺 𑀯𑀢𑁆𑀯𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀧𑀞𑀫𑀁 𑀕𑀸𑀣𑀫𑀸𑀳 𑁋

𑁩𑁫. ‘‘𑀲𑁂𑀦𑁄 𑀩𑀮𑀲𑀸 𑀧𑀢𑀫𑀸𑀦𑁄, 𑀮𑀸𑀧𑀁 𑀕𑁄𑀘𑀭𑀞𑀸𑀬𑀺𑀦𑀁;

𑀲𑀳𑀲𑀸 𑀅𑀚𑁆𑀛𑀧𑁆𑀧𑀢𑁆𑀢𑁄𑀯, 𑀫𑀭𑀡𑀁 𑀢𑁂𑀦𑀼𑀧𑀸𑀕𑀫𑀻’’𑀢𑀺.

𑀢𑀢𑁆𑀣 𑀩𑀮𑀲𑀸 𑀧𑀢𑀫𑀸𑀦𑁄𑀢𑀺 ‘‘𑀮𑀸𑀧𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀩𑀮𑁂𑀦 𑀣𑀸𑀫𑁂𑀦 𑀧𑀢𑀫𑀸𑀦𑁄. 𑀕𑁄𑀘𑀭𑀞𑀸𑀬𑀺𑀦𑀦𑁆𑀢𑀺 𑀲𑀓𑀯𑀺𑀲𑀬𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑁄𑀘𑀭𑀢𑁆𑀣𑀸𑀬 𑀅𑀝𑀯𑀺𑀧𑀭𑀺𑀬𑀦𑁆𑀢𑁂 𑀞𑀺𑀢𑀁. 𑀅𑀚𑁆𑀛𑀧𑁆𑀧𑀢𑁆𑀢𑁄𑀢𑀺 𑀲𑀫𑁆𑀧𑀢𑁆𑀢𑁄. 𑀫𑀭𑀡𑀁 𑀢𑁂𑀦𑀼𑀧𑀸𑀕𑀫𑀻𑀢𑀺 𑀢𑁂𑀦 𑀓𑀸𑀭𑀡𑁂𑀦 𑀫𑀭𑀡𑀁 𑀧𑀢𑁆𑀢𑁄.

𑀢𑀲𑁆𑀫𑀺𑀁 𑀧𑀦 𑀫𑀭𑀡𑀁 𑀧𑀢𑁆𑀢𑁂 𑀮𑀸𑀧𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 ‘‘𑀤𑀺𑀝𑁆𑀞𑀸 𑀯𑀢 𑀫𑁂 𑀧𑀘𑁆𑀘𑀸𑀫𑀺𑀢𑁆𑀢𑀲𑁆𑀲 𑀧𑀺𑀝𑁆𑀞𑀻’’𑀢𑀺 𑀢𑀲𑁆𑀲 𑀳𑀤𑀬𑁂 𑀞𑀢𑁆𑀯𑀸 𑀉𑀤𑀸𑀦𑀁 𑀉𑀤𑀸𑀦𑁂𑀦𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳 𑁋

𑁩𑁬. ‘‘𑀲𑁄𑀳𑀁 𑀦𑀬𑁂𑀦 𑀲𑀫𑁆𑀧𑀦𑁆𑀦𑁄, 𑀧𑁂𑀢𑁆𑀢𑀺𑀓𑁂 𑀕𑁄𑀘𑀭𑁂 𑀭𑀢𑁄;

𑀅𑀧𑁂𑀢𑀲𑀢𑁆𑀢𑀼 𑀫𑁄𑀤𑀸𑀫𑀺, 𑀲𑀫𑁆𑀧𑀲𑁆𑀲𑀁 𑀅𑀢𑁆𑀣𑀫𑀢𑁆𑀢𑀦𑁄’’𑀢𑀺.

𑀢𑀢𑁆𑀣 𑀦𑀬𑁂𑀦𑀸𑀢𑀺 𑀉𑀧𑀸𑀬𑁂𑀦. 𑀅𑀢𑁆𑀣𑀫𑀢𑁆𑀢𑀦𑁄𑀢𑀺 𑀅𑀢𑁆𑀢𑀦𑁄 𑀅𑀭𑁄𑀕𑀪𑀸𑀯𑀲𑀗𑁆𑀔𑀸𑀢𑀁 𑀯𑀼𑀟𑁆𑀠𑀺𑀁.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺, 𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀩𑀳𑀽 𑀪𑀺𑀓𑁆𑀔𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀼. ‘‘𑀢𑀤𑀸 𑀲𑁂𑀦𑁄 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀮𑀸𑀧𑁄 𑀧𑀦 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀲𑀓𑀼𑀡𑀕𑁆𑀖𑀺𑀚𑀸𑀢𑀓𑀯𑀡𑁆𑀡𑀦𑀸 𑀅𑀝𑁆𑀞𑀫𑀸.

[𑁧𑁬𑁯] 𑁯. 𑀅𑀭𑀓𑀚𑀸𑀢𑀓𑀯𑀡𑁆𑀡𑀦𑀸

𑀬𑁄 𑀯𑁂 𑀫𑁂𑀢𑁆𑀢𑁂𑀦 𑀘𑀺𑀢𑁆𑀢𑁂𑀦𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀫𑁂𑀢𑁆𑀢𑀲𑀼𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀏𑀓𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀲𑀢𑁆𑀣𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀫𑁂𑀢𑁆𑀢𑀸𑀬, 𑀪𑀺𑀓𑁆𑀔𑀯𑁂, 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀆𑀲𑁂𑀯𑀺𑀢𑀸𑀬 𑀪𑀸𑀯𑀺𑀢𑀸𑀬 𑀩𑀳𑀼𑀮𑀻𑀓𑀢𑀸𑀬 𑀬𑀸𑀦𑀻𑀓𑀢𑀸𑀬 𑀯𑀢𑁆𑀣𑀼𑀓𑀢𑀸𑀬 𑀅𑀦𑀼𑀝𑁆𑀞𑀺𑀢𑀸𑀬 𑀧𑀭𑀺𑀘𑀺𑀢𑀸𑀬 𑀲𑀼𑀲𑀫𑀸𑀭𑀤𑁆𑀥𑀸𑀬 𑀏𑀓𑀸𑀤𑀲𑀸𑀦𑀺𑀲𑀁𑀲𑀸 𑀧𑀸𑀝𑀺𑀓𑀗𑁆𑀔𑀸. 𑀓𑀢𑀫𑁂 𑀏𑀓𑀸𑀤𑀲? 𑀲𑀼𑀔𑀁 𑀲𑀼𑀧𑀢𑀺, 𑀲𑀼𑀔𑀁 𑀧𑀝𑀺𑀩𑀼𑀚𑁆𑀛𑀢𑀺, 𑀦 𑀧𑀸𑀧𑀓𑀁 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺, 𑀫𑀦𑀼𑀲𑁆𑀲𑀸𑀦𑀁 𑀧𑀺𑀬𑁄 𑀳𑁄𑀢𑀺, 𑀅𑀫𑀦𑀼𑀲𑁆𑀲𑀸𑀦𑀁 𑀧𑀺𑀬𑁄 𑀳𑁄𑀢𑀺, 𑀤𑁂𑀯𑀢𑀸 𑀭𑀓𑁆𑀔𑀦𑁆𑀢𑀺, 𑀦𑀸𑀲𑁆𑀲 𑀅𑀕𑁆𑀕𑀺 𑀯𑀸 𑀯𑀺𑀲𑀁 𑀯𑀸 𑀲𑀢𑁆𑀣𑀁 𑀯𑀸 𑀓𑀫𑀢𑀺, 𑀢𑀼𑀯𑀝𑀁 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺, 𑀫𑀼𑀔𑀯𑀡𑁆𑀡𑁄 𑀯𑀺𑀧𑁆𑀧𑀲𑀻𑀤𑀢𑀺, 𑀅𑀲𑀫𑁆𑀫𑀽𑀴𑁆𑀳𑁄 𑀓𑀸𑀮𑀁 𑀓𑀭𑁄𑀢𑀺, 𑀉𑀢𑁆𑀢𑀭𑀺 𑀅𑀧𑁆𑀧𑀝𑀺𑀯𑀺𑀚𑁆𑀛𑀦𑁆𑀢𑁄 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑁄 𑀳𑁄𑀢𑀺. 𑀫𑁂𑀢𑁆𑀢𑀸𑀬, 𑀪𑀺𑀓𑁆𑀔𑀯𑁂, 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀆𑀲𑁂𑀯𑀺𑀢𑀸𑀬…𑀧𑁂… 𑀲𑀼𑀲𑀫𑀸𑀭𑀤𑁆𑀥𑀸𑀬 𑀇𑀫𑁂 𑀏𑀓𑀸𑀤𑀲𑀸𑀦𑀺𑀲𑀁𑀲𑀸 𑀧𑀸𑀝𑀺𑀓𑀗𑁆𑀔𑀸’’𑀢𑀺 (𑀅. 𑀦𑀺. 𑁧𑁧.𑁧𑁫). 𑀇𑀫𑁂 𑀏𑀓𑀸𑀤𑀲𑀸𑀦𑀺𑀲𑀁𑀲𑁂 𑀕𑀳𑁂𑀢𑁆𑀯𑀸 𑀞𑀺𑀢𑀁 𑀫𑁂𑀢𑁆𑀢𑀸𑀪𑀸𑀯𑀦𑀁 𑀯𑀡𑁆𑀡𑁂𑀢𑁆𑀯𑀸 ‘‘𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀦𑀸𑀫 𑀲𑀩𑁆𑀩𑀲𑀢𑁆𑀢𑁂𑀲𑀼 𑀑𑀤𑀺𑀲𑁆𑀲𑀓𑀸𑀦𑁄𑀤𑀺𑀲𑁆𑀲𑀓𑀯𑀲𑁂𑀦 𑀫𑁂𑀢𑁆𑀢𑀸 𑀪𑀸𑀯𑁂𑀢𑀩𑁆𑀩𑀸, 𑀳𑀺𑀢𑁄𑀧𑀺 𑀳𑀺𑀢𑁂𑀦 𑀨𑀭𑀺𑀢𑀩𑁆𑀩𑁄, 𑀅𑀳𑀺𑀢𑁄𑀧𑀺 𑀳𑀺𑀢𑁂𑀦 𑀨𑀭𑀺𑀢𑀩𑁆𑀩𑁄, 𑀫𑀚𑁆𑀛𑀢𑁆𑀢𑁄𑀧𑀺 𑀳𑀺𑀢𑁂𑀦 𑀨𑀭𑀺𑀢𑀩𑁆𑀩𑁄. 𑀏𑀯𑀁 𑀲𑀩𑁆𑀩𑀲𑀢𑁆𑀢𑁂𑀲𑀼 𑀑𑀤𑀺𑀲𑁆𑀲𑀓𑀸𑀦𑁄𑀤𑀺𑀲𑁆𑀲𑀓𑀯𑀲𑁂𑀦 𑀫𑁂𑀢𑁆𑀢𑀸 𑀪𑀸𑀯𑁂𑀢𑀩𑁆𑀩𑀸, 𑀓𑀭𑀼𑀡𑀸 𑀫𑀼𑀤𑀺𑀢𑀸 𑀉𑀧𑁂𑀓𑁆𑀔𑀸 𑀪𑀸𑀯𑁂𑀢𑀩𑁆𑀩𑀸, 𑀘𑀢𑀽𑀲𑀼 𑀩𑁆𑀭𑀳𑁆𑀫𑀯𑀺𑀳𑀸𑀭𑁂𑀲𑀼 𑀓𑀫𑁆𑀫𑀁 𑀓𑀸𑀢𑀩𑁆𑀩𑀫𑁂𑀯. 𑀏𑀯𑀁 𑀓𑀭𑁄𑀦𑁆𑀢𑁄 𑀳𑀺 𑀫𑀕𑁆𑀕𑀁 𑀯𑀸 𑀨𑀮𑀁 𑀯𑀸 𑀅𑀮𑀪𑀦𑁆𑀢𑁄𑀧𑀺 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑁄 𑀅𑀳𑁄𑀲𑀺, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸𑀧𑀺 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀫𑁂𑀢𑁆𑀢𑀁 𑀪𑀸𑀯𑁂𑀢𑁆𑀯𑀸 𑀲𑀢𑁆𑀢 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀓𑀧𑁆𑀧𑁂 𑀩𑁆𑀭𑀳𑁆𑀫𑀮𑁄𑀓𑀲𑁆𑀫𑀺𑀁𑀬𑁂𑀯 𑀯𑀲𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀏𑀓𑀲𑁆𑀫𑀺𑀁 𑀓𑀧𑁆𑀧𑁂 𑀩𑁄𑀥𑀺𑀲𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀓𑀸𑀫𑁂 𑀧𑀳𑀸𑀬 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀘𑀢𑀼𑀦𑁆𑀦𑀁 𑀩𑁆𑀭𑀳𑁆𑀫𑀯𑀺𑀳𑀸𑀭𑀸𑀦𑀁 𑀮𑀸𑀪𑀻 𑀅𑀭𑀓𑁄 𑀦𑀸𑀫 𑀲𑀢𑁆𑀣𑀸 𑀳𑀼𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀯𑀸𑀲𑀁 𑀓𑀧𑁆𑀧𑁂𑀲𑀺, 𑀢𑀲𑁆𑀲 𑀫𑀳𑀸 𑀧𑀭𑀺𑀯𑀸𑀭𑁄 𑀅𑀳𑁄𑀲𑀺. 𑀲𑁄 𑀇𑀲𑀺𑀕𑀡𑀁 𑀑𑀯𑀤𑀦𑁆𑀢𑁄 ‘‘𑀧𑀩𑁆𑀩𑀚𑀺𑀢𑁂𑀦 𑀦𑀸𑀫 𑀫𑁂𑀢𑁆𑀢𑀸 𑀪𑀸𑀯𑁂𑀢𑀩𑁆𑀩𑀸, 𑀓𑀭𑀼𑀡𑀸 𑀫𑀼𑀤𑀺𑀢𑀸 𑀉𑀧𑁂𑀓𑁆𑀔𑀸 𑀪𑀸𑀯𑁂𑀢𑀩𑁆𑀩𑀸. 𑀫𑁂𑀢𑁆𑀢𑀘𑀺𑀢𑁆𑀢𑀜𑁆𑀳𑀺 𑀦𑀸𑀫𑁂𑀢𑀁 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀁 𑀩𑁆𑀭𑀳𑁆𑀫𑀮𑁄𑀓𑀧𑀭𑀸𑀬𑀡𑀢𑀁 𑀲𑀸𑀥𑁂𑀢𑀻’’𑀢𑀺 𑀫𑁂𑀢𑁆𑀢𑀸𑀬 𑀆𑀦𑀺𑀲𑀁𑀲𑀁 𑀧𑀓𑀸𑀲𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀆𑀳 𑁋

𑁩𑁭. ‘‘𑀬𑁄 𑀯𑁂 𑀫𑁂𑀢𑁆𑀢𑁂𑀦 𑀘𑀺𑀢𑁆𑀢𑁂𑀦, 𑀲𑀩𑁆𑀩𑀮𑁄𑀓𑀸𑀦𑀼𑀓𑀫𑁆𑀧𑀢𑀺;

𑀉𑀤𑁆𑀥𑀁 𑀅𑀥𑁄 𑀘 𑀢𑀺𑀭𑀺𑀬𑀁, 𑀅𑀧𑁆𑀧𑀫𑀸𑀡𑁂𑀦 𑀲𑀩𑁆𑀩𑀲𑁄.

𑁩𑁮. ‘‘𑀅𑀧𑁆𑀧𑀫𑀸𑀡𑀁 𑀳𑀺𑀢𑀁 𑀘𑀺𑀢𑁆𑀢𑀁, 𑀧𑀭𑀺𑀧𑀼𑀡𑁆𑀡𑀁 𑀲𑀼𑀪𑀸𑀯𑀺𑀢𑀁;

𑀬𑀁 𑀧𑀫𑀸𑀡𑀓𑀢𑀁 𑀓𑀫𑁆𑀫𑀁, 𑀦 𑀢𑀁 𑀢𑀢𑁆𑀭𑀸𑀯𑀲𑀺𑀲𑁆𑀲𑀢𑀻’’𑀢𑀺.

𑀢𑀢𑁆𑀣 𑀬𑁄 𑀯𑁂 𑀫𑁂𑀢𑁆𑀢𑁂𑀦 𑀘𑀺𑀢𑁆𑀢𑁂𑀦, 𑀲𑀩𑁆𑀩𑀮𑁄𑀓𑀸𑀦𑀼𑀓𑀫𑁆𑀧𑀢𑀻𑀢𑀺 𑀔𑀢𑁆𑀢𑀺𑀬𑀸𑀤𑀻𑀲𑀼 𑀯𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀲𑀼 𑀯𑀸 𑀬𑁄 𑀓𑁄𑀘𑀺 𑀅𑀧𑁆𑀧𑀫𑀸𑀡𑁂𑀦 𑀫𑁂𑀢𑁆𑀢𑁂𑀦 𑀘𑀺𑀢𑁆𑀢𑁂𑀦 𑀲𑀓𑀮𑀁 𑀲𑀢𑁆𑀢𑀮𑁄𑀓𑀁 𑀅𑀦𑀼𑀓𑀫𑁆𑀧𑀢𑀺. 𑀉𑀤𑁆𑀥𑀦𑁆𑀢𑀺 𑀧𑀣𑀯𑀺𑀢𑁄 𑀬𑀸𑀯 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀩𑁆𑀭𑀳𑁆𑀫𑀮𑁄𑀓𑀸. 𑀅𑀥𑁄𑀢𑀺 𑀧𑀣𑀯𑀺𑀬𑀸 𑀳𑁂𑀝𑁆𑀞𑀸 𑀉𑀲𑁆𑀲𑀤𑁂 𑀫𑀳𑀸𑀦𑀺𑀭𑀬𑁂. 𑀢𑀺𑀭𑀺𑀬𑀦𑁆𑀢𑀺 𑀫𑀦𑀼𑀲𑁆𑀲𑀮𑁄𑀓𑁂, 𑀬𑀢𑁆𑀢𑀓𑀸𑀦𑀺 𑀘𑀓𑁆𑀓𑀯𑀸𑀴𑀸𑀦𑀺 𑀘 𑀢𑁂𑀲𑀼 𑀲𑀩𑁆𑀩𑁂𑀲𑀼 𑀏𑀢𑁆𑀢𑀓𑁂 𑀞𑀸𑀦𑁂 𑀦𑀺𑀩𑁆𑀩𑀢𑁆𑀢𑀸 𑀲𑀩𑁆𑀩𑁂 𑀲𑀢𑁆𑀢𑀸 𑀅𑀯𑁂𑀭𑀸 𑀳𑁄𑀦𑁆𑀢𑀼, 𑀅𑀩𑁆𑀬𑀸𑀧𑀚𑁆𑀛𑀸 𑀅𑀦𑀻𑀖𑀸, 𑀲𑀼𑀔𑀻 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀦𑁆𑀢𑀽𑀢𑀺 𑀏𑀯𑀁 𑀪𑀸𑀯𑀺𑀢𑁂𑀦 𑀫𑁂𑀢𑁆𑀢𑁂𑀦 𑀘𑀺𑀢𑁆𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀧𑁆𑀧𑀫𑀸𑀡𑁂𑀦𑀸𑀢𑀺 𑀅𑀧𑁆𑀧𑀫𑀸𑀡𑀲𑀢𑁆𑀢𑀸𑀦𑀁 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀢𑁆𑀢𑀸 𑀅𑀧𑁆𑀧𑀫𑀸𑀡𑁂𑀦. 𑀲𑀩𑁆𑀩𑀲𑁄𑀢𑀺 𑀲𑀩𑁆𑀩𑀸𑀓𑀸𑀭𑁂𑀦, 𑀉𑀤𑁆𑀥𑀁 𑀅𑀥𑁄 𑀢𑀺𑀭𑀺𑀬𑀦𑁆𑀢𑀺 𑀏𑀯𑀁 𑀲𑀩𑁆𑀩𑀲𑀼𑀕𑀢𑀺𑀤𑀼𑀕𑁆𑀕𑀢𑀺𑀯𑀲𑁂𑀦𑀸𑀢𑀺 𑀅𑀢𑁆𑀣𑁄.

𑀅𑀧𑁆𑀧𑀫𑀸𑀡𑀁 𑀳𑀺𑀢𑀁 𑀘𑀺𑀢𑁆𑀢𑀦𑁆𑀢𑀺 𑀅𑀧𑁆𑀧𑀫𑀸𑀡𑀁 𑀓𑀢𑁆𑀯𑀸 𑀪𑀸𑀯𑀺𑀢𑀁 𑀲𑀩𑁆𑀩𑀲𑀢𑁆𑀢𑁂𑀲𑀼 𑀳𑀺𑀢𑀘𑀺𑀢𑁆𑀢𑀁. 𑀧𑀭𑀺𑀧𑀼𑀡𑁆𑀡𑀦𑁆𑀢𑀺 𑀅𑀯𑀺𑀓𑀮𑀁. 𑀲𑀼𑀪𑀸𑀯𑀺𑀢𑀦𑁆𑀢𑀺 𑀲𑀼𑀯𑀟𑁆𑀠𑀺𑀢𑀁, 𑀅𑀧𑁆𑀧𑀦𑀸𑀘𑀺𑀢𑁆𑀢𑀲𑁆𑀲𑁂𑀢𑀁 𑀦𑀸𑀫𑀁. 𑀬𑀁 𑀧𑀫𑀸𑀡𑀓𑀢𑀁 𑀓𑀫𑁆𑀫𑀦𑁆𑀢𑀺 𑀬𑀁 ‘‘𑀅𑀧𑁆𑀧𑀫𑀸𑀡𑀁 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡’’𑀦𑁆𑀢𑀺 𑀏𑀯𑀁 𑀆𑀭𑀫𑁆𑀫𑀡𑀢𑁆𑀢𑀺𑀓𑀯𑀲𑁂𑀦 𑀘 𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑀺𑀯𑀲𑁂𑀦 𑀘 𑀅𑀯𑀟𑁆𑀠𑀺𑀢𑁆𑀯𑀸 𑀓𑀢𑀁 𑀧𑀭𑀺𑀢𑁆𑀢𑀁 𑀓𑀸𑀫𑀸𑀯𑀘𑀭𑀓𑀫𑁆𑀫𑀁. 𑀦 𑀢𑀁 𑀢𑀢𑁆𑀭𑀸𑀯𑀲𑀺𑀲𑁆𑀲𑀢𑀻𑀢𑀺 𑀢𑀁 𑀧𑀭𑀺𑀢𑁆𑀢𑀁 𑀓𑀫𑁆𑀫𑀁 𑀬𑀁 𑀢𑀁 ‘‘𑀅𑀧𑁆𑀧𑀫𑀸𑀡𑀁 𑀳𑀺𑀢𑀁 𑀘𑀺𑀢𑁆𑀢’’𑀦𑁆𑀢𑀺 𑀲𑀗𑁆𑀔𑀕𑀢𑀁 𑀭𑀽𑀧𑀸𑀯𑀘𑀭𑀓𑀫𑁆𑀫𑀁, 𑀢𑀢𑁆𑀭 𑀦 𑀅𑀯𑀲𑀺𑀲𑁆𑀲𑀢𑀺. 𑀬𑀣𑀸 𑀦𑀸𑀫 𑀫𑀳𑁄𑀖𑁂𑀦 𑀅𑀚𑁆𑀛𑁄𑀢𑁆𑀣𑀝𑀁 𑀧𑀭𑀺𑀢𑁆𑀢𑁄𑀤𑀓𑀁 𑀑𑀖𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀢𑁂𑀦 𑀅𑀲𑀁𑀳𑀻𑀭𑀫𑀸𑀦𑀁 𑀦𑀸𑀯𑀲𑀺𑀲𑁆𑀲𑀢𑀺 𑀦 𑀢𑀺𑀝𑁆𑀞𑀢𑀺, 𑀅𑀣 𑀔𑁄 𑀫𑀳𑁄𑀖𑁄𑀯 𑀢𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀏𑀯𑀫𑁂𑀯 𑀢𑀁 𑀧𑀭𑀺𑀢𑁆𑀢𑀓𑀫𑁆𑀫𑀁 𑀢𑀲𑁆𑀲 𑀫𑀳𑀕𑁆𑀕𑀢𑀓𑀫𑁆𑀫𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀢𑁂𑀦 𑀫𑀳𑀕𑁆𑀕𑀢𑀓𑀫𑁆𑀫𑁂𑀦 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀕𑁆𑀕𑀳𑀺𑀢𑀯𑀺𑀧𑀸𑀓𑁄𑀓𑀸𑀲𑀁 𑀳𑀼𑀢𑁆𑀯𑀸 𑀦 𑀅𑀯𑀲𑀺𑀲𑁆𑀲𑀢𑀺 𑀦 𑀢𑀺𑀝𑁆𑀞𑀢𑀺, 𑀦 𑀲𑀓𑁆𑀓𑁄𑀢𑀺 𑀅𑀢𑁆𑀢𑀦𑁄 𑀯𑀺𑀧𑀸𑀓𑀁 𑀤𑀸𑀢𑀼𑀁, 𑀅𑀣 𑀔𑁄 𑀫𑀳𑀕𑁆𑀕𑀢𑀓𑀫𑁆𑀫𑀫𑁂𑀯 𑀢𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀢𑀺𑀝𑁆𑀞𑀢𑀺 𑀯𑀺𑀧𑀸𑀓𑀁 𑀤𑁂𑀢𑀻𑀢𑀺.

𑀏𑀯𑀁 𑀩𑁄𑀥𑀺𑀲𑀢𑁆𑀢𑁄 𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀁 𑀫𑁂𑀢𑁆𑀢𑀸𑀪𑀸𑀯𑀦𑀸𑀬 𑀆𑀦𑀺𑀲𑀁𑀲𑀁 𑀓𑀣𑁂𑀢𑁆𑀯𑀸 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑁄 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀲𑀢𑁆𑀢 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀓𑀧𑁆𑀧𑁂 𑀦 𑀇𑀫𑀁 𑀮𑁄𑀓𑀁 𑀧𑀼𑀦 𑀅𑀕𑀫𑀸𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀇𑀲𑀺𑀕𑀡𑁄 𑀩𑀼𑀤𑁆𑀥𑀧𑀭𑀺𑀲𑀸 𑀅𑀳𑁄𑀲𑀺, 𑀅𑀭𑀓𑁄 𑀧𑀦 𑀲𑀢𑁆𑀣𑀸 𑀅𑀳𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺.

𑀅𑀭𑀓𑀚𑀸𑀢𑀓𑀯𑀡𑁆𑀡𑀦𑀸 𑀦𑀯𑀫𑀸.

[𑁧𑁭𑁦] 𑁧𑁦. 𑀓𑀓𑀡𑁆𑀝𑀓𑀚𑀸𑀢𑀓𑀯𑀡𑁆𑀡𑀦𑀸

𑀦𑀸𑀬𑀁 𑀧𑀼𑀭𑁂 𑀉𑀡𑁆𑀡𑀫𑀢𑀻𑀢𑀺 𑀇𑀤𑀁 𑀓𑀓𑀡𑁆𑀝𑀓𑀚𑀸𑀢𑀓𑀁 𑀫𑀳𑀸𑀉𑀫𑀗𑁆𑀕𑀚𑀸𑀢𑀓𑁂 (𑀚𑀸. 𑁨.𑁨𑁨.𑁫𑁯𑁦 𑀆𑀤𑀬𑁄) 𑀆𑀯𑀺𑀪𑀯𑀺𑀲𑁆𑀲𑀢𑀺.

𑀓𑀓𑀡𑁆𑀝𑀓𑀚𑀸𑀢𑀓𑀯𑀡𑁆𑀡𑀦𑀸 𑀤𑀲𑀫𑀸.

𑀲𑀦𑁆𑀣𑀯𑀯𑀕𑁆𑀕𑁄 𑀤𑀼𑀢𑀺𑀬𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀇𑀦𑁆𑀤𑀲𑀫𑀸𑀦𑀕𑁄𑀢𑁆𑀢𑀜𑁆𑀘, 𑀲𑀦𑁆𑀣𑀯𑀁 𑀲𑀼𑀲𑀻𑀫𑀁 𑀕𑀺𑀚𑁆𑀛𑀁;

𑀦𑀓𑀼𑀮𑀁 𑀉𑀧𑀲𑀸𑀴𑀓𑀁, 𑀲𑀫𑀺𑀤𑁆𑀥𑀺 𑀘 𑀲𑀓𑀼𑀡𑀕𑁆𑀖𑀺;

𑀅𑀭𑀓𑀜𑁆𑀘 𑀓𑀓𑀡𑁆𑀝𑀓𑀁.