𑁨. 𑀅𑀯𑀺𑀤𑀽𑀭𑁂𑀦𑀺𑀤𑀸𑀦𑀓𑀣𑀸

𑀢𑀼𑀲𑀺𑀢𑀧𑀼𑀭𑁂 𑀯𑀲𑀦𑁆𑀢𑁂𑀬𑁂𑀯 𑀧𑀦 𑀩𑁄𑀥𑀺𑀲𑀢𑁆𑀢𑁂 𑀩𑀼𑀤𑁆𑀥𑀓𑁄𑀮𑀸𑀳𑀮𑀁 𑀦𑀸𑀫 𑀉𑀤𑀧𑀸𑀤𑀺. 𑀮𑁄𑀓𑀲𑁆𑀫𑀺𑀜𑁆𑀳𑀺 𑀢𑀻𑀡𑀺 𑀓𑁄𑀮𑀸𑀳𑀮𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺 𑁋 𑀓𑀧𑁆𑀧𑀓𑁄𑀮𑀸𑀳𑀮𑀁, 𑀩𑀼𑀤𑁆𑀥𑀓𑁄𑀮𑀸𑀳𑀮𑀁, 𑀘𑀓𑁆𑀓𑀯𑀢𑁆𑀢𑀺𑀓𑁄𑀮𑀸𑀳𑀮𑀦𑁆𑀢𑀺. 𑀢𑀢𑁆𑀣 ‘‘𑀯𑀲𑁆𑀲𑀲𑀢𑀲𑀳𑀲𑁆𑀲𑀲𑁆𑀲 𑀅𑀘𑁆𑀘𑀬𑁂𑀦 𑀓𑀧𑁆𑀧𑀼𑀝𑁆𑀞𑀸𑀦𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀮𑁄𑀓𑀩𑁆𑀬𑀽𑀳𑀸 𑀦𑀸𑀫 𑀓𑀸𑀫𑀸𑀯𑀘𑀭𑀤𑁂𑀯𑀸 𑀫𑀼𑀢𑁆𑀢𑀲𑀺𑀭𑀸 𑀯𑀺𑀓𑀺𑀡𑁆𑀡𑀓𑁂𑀲𑀸 𑀭𑀼𑀤𑀫𑀼𑀔𑀸 𑀅𑀲𑁆𑀲𑀽𑀦𑀺 𑀳𑀢𑁆𑀣𑁂𑀳𑀺 𑀧𑀼𑀜𑁆𑀙𑀫𑀸𑀦𑀸 𑀭𑀢𑁆𑀢𑀯𑀢𑁆𑀣𑀦𑀺𑀯𑀢𑁆𑀣𑀸 𑀅𑀢𑀺𑀯𑀺𑀬 𑀯𑀺𑀭𑀽𑀧𑀯𑁂𑀲𑀥𑀸𑀭𑀺𑀦𑁄 𑀳𑀼𑀢𑁆𑀯𑀸 𑀫𑀦𑀼𑀲𑁆𑀲𑀧𑀣𑁂 𑀯𑀺𑀘𑀭𑀦𑁆𑀢𑀸 𑀏𑀯𑀁 𑀆𑀭𑁄𑀘𑁂𑀦𑁆𑀢𑀺 ‘‘𑀫𑀸𑀭𑀺𑀲𑀸 𑀇𑀢𑁄 𑀯𑀲𑁆𑀲𑀲𑀢𑀲𑀳𑀲𑁆𑀲𑀲𑁆𑀲 𑀅𑀘𑁆𑀘𑀬𑁂𑀦 𑀓𑀧𑁆𑀧𑀼𑀝𑁆𑀞𑀸𑀦𑀁 𑀪𑀯𑀺𑀲𑁆𑀲𑀢𑀺, 𑀅𑀬𑀁 𑀮𑁄𑀓𑁄 𑀯𑀺𑀦𑀲𑁆𑀲𑀺𑀲𑁆𑀲𑀢𑀺, 𑀫𑀳𑀸𑀲𑀫𑀼𑀤𑁆𑀤𑁄𑀧𑀺 𑀲𑀼𑀲𑁆𑀲𑀺𑀲𑁆𑀲𑀢𑀺, 𑀅𑀬𑀜𑁆𑀘 𑀫𑀳𑀸𑀧𑀣𑀯𑀻 𑀲𑀺𑀦𑁂𑀭𑀼 𑀘 𑀧𑀩𑁆𑀩𑀢𑀭𑀸𑀚𑀸 𑀉𑀟𑁆𑀟𑀬𑁆𑀳𑀺𑀲𑁆𑀲𑀦𑁆𑀢𑀺 𑀯𑀺𑀦𑀲𑁆𑀲𑀺𑀲𑁆𑀲𑀦𑁆𑀢𑀺, 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀮𑁄𑀓𑀯𑀺𑀦𑀸𑀲𑁄 𑀪𑀯𑀺𑀲𑁆𑀲𑀢𑀺, 𑀫𑁂𑀢𑁆𑀢𑀁 𑀫𑀸𑀭𑀺𑀲𑀸 𑀪𑀸𑀯𑁂𑀣, 𑀓𑀭𑀼𑀡𑀁, 𑀫𑀼𑀤𑀺𑀢𑀁, 𑀉𑀧𑁂𑀓𑁆𑀔𑀁 𑀫𑀸𑀭𑀺𑀲𑀸 𑀪𑀸𑀯𑁂𑀣, 𑀫𑀸𑀢𑀭𑀁 𑀉𑀧𑀝𑁆𑀞𑀳𑀣, 𑀧𑀺𑀢𑀭𑀁 𑀉𑀧𑀝𑁆𑀞𑀳𑀣, 𑀓𑀼𑀮𑁂 𑀚𑁂𑀝𑁆𑀞𑀸𑀧𑀘𑀸𑀬𑀺𑀦𑁄 𑀳𑁄𑀣𑀸’’𑀢𑀺. 𑀇𑀤𑀁 𑀓𑀧𑁆𑀧𑀓𑁄𑀮𑀸𑀳𑀮𑀁 𑀦𑀸𑀫. 𑀯𑀲𑁆𑀲𑀲𑀳𑀲𑁆𑀲𑀲𑁆𑀲 𑀅𑀘𑁆𑀘𑀬𑁂𑀦 𑀧𑀦 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀮𑁄𑀓𑀧𑀸𑀮𑀤𑁂𑀯𑀢𑀸 ‘‘𑀇𑀢𑁄 𑀫𑀸𑀭𑀺𑀲𑀸 𑀯𑀲𑁆𑀲𑀲𑀳𑀲𑁆𑀲𑀲𑁆𑀲 𑀅𑀘𑁆𑀘𑀬𑁂𑀦 𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀉𑀕𑁆𑀖𑁄𑀲𑁂𑀦𑁆𑀢𑀸 𑀆𑀳𑀺𑀡𑁆𑀟𑀦𑁆𑀢𑀺. 𑀇𑀤𑀁 𑀩𑀼𑀤𑁆𑀥𑀓𑁄𑀮𑀸𑀳𑀮𑀁 𑀦𑀸𑀫. 𑀯𑀲𑁆𑀲𑀲𑀢𑀲𑁆𑀲 𑀅𑀘𑁆𑀘𑀬𑁂𑀦 𑀘𑀓𑁆𑀓𑀯𑀢𑁆𑀢𑀻 𑀭𑀸𑀚𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀤𑁂𑀯𑀢𑀸 ‘‘𑀇𑀢𑁄 𑀫𑀸𑀭𑀺𑀲𑀸 𑀯𑀲𑁆𑀲𑀲𑀢𑀲𑁆𑀲 𑀅𑀘𑁆𑀘𑀬𑁂𑀦 𑀘𑀓𑁆𑀓𑀯𑀢𑁆𑀢𑀻 𑀭𑀸𑀚𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀉𑀕𑁆𑀖𑁄𑀲𑁂𑀦𑁆𑀢𑀺𑀬𑁄 𑀆𑀳𑀺𑀡𑁆𑀟𑀦𑁆𑀢𑀺. 𑀇𑀤𑀁 𑀘𑀓𑁆𑀓𑀯𑀢𑁆𑀢𑀺𑀓𑁄𑀮𑀸𑀳𑀮𑀁 𑀦𑀸𑀫. 𑀇𑀫𑀸𑀦𑀺 𑀢𑀻𑀡𑀺 𑀓𑁄𑀮𑀸𑀳𑀮𑀸𑀦𑀺 𑀫𑀳𑀦𑁆𑀢𑀸𑀦𑀺 𑀳𑁄𑀦𑁆𑀢𑀺.

𑀢𑁂𑀲𑀼 𑀩𑀼𑀤𑁆𑀥𑀓𑁄𑀮𑀸𑀳𑀮𑀲𑀤𑁆𑀤𑀁 𑀲𑀼𑀢𑁆𑀯𑀸 𑀲𑀓𑀮𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀤𑁂𑀯𑀢𑀸 𑀏𑀓𑀢𑁄 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀅𑀲𑀼𑀓𑁄 𑀦𑀸𑀫 𑀲𑀢𑁆𑀢𑁄 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀸𑀘𑀦𑁆𑀢𑀺. 𑀆𑀬𑀸𑀘𑀫𑀸𑀦𑀸 𑀘 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀆𑀬𑀸𑀘𑀦𑁆𑀢𑀺. 𑀢𑀤𑀸 𑀧𑀦 𑀲𑀩𑁆𑀩𑀸𑀧𑀺 𑀤𑁂𑀯𑀢𑀸 𑀏𑀓𑁂𑀓𑀘𑀓𑁆𑀓𑀯𑀸𑀴𑁂 𑀘𑀢𑀼𑀫𑀳𑀸𑀭𑀸𑀚𑀲𑀓𑁆𑀓𑀲𑀼𑀬𑀸𑀫𑀲𑀦𑁆𑀢𑀼𑀲𑀺𑀢𑀲𑀼𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀺𑀫𑀳𑀸𑀩𑁆𑀭𑀳𑁆𑀫𑁂𑀳𑀺 𑀲𑀤𑁆𑀥𑀺𑀁 𑀏𑀓𑀘𑀓𑁆𑀓𑀯𑀸𑀴𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀢𑀼𑀲𑀺𑀢𑀪𑀯𑀦𑁂 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀫𑀸𑀭𑀺𑀲𑀸 𑀢𑀼𑀫𑁆𑀳𑁂𑀳𑀺 𑀤𑀲 𑀧𑀸𑀭𑀫𑀺𑀬𑁄 𑀧𑀽𑀭𑁂𑀦𑁆𑀢𑁂𑀳𑀺 𑀦 𑀲𑀓𑁆𑀓𑀲𑀫𑁆𑀧𑀢𑁆𑀢𑀺𑀁, 𑀦 𑀫𑀸𑀭𑀲𑀫𑁆𑀧𑀢𑁆𑀢𑀺𑀁, 𑀦 𑀩𑁆𑀭𑀳𑁆𑀫𑀲𑀫𑁆𑀧𑀢𑁆𑀢𑀺𑀁, 𑀦 𑀘𑀓𑁆𑀓𑀯𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀁 𑀧𑀢𑁆𑀣𑁂𑀦𑁆𑀢𑁂𑀳𑀺 𑀧𑀽𑀭𑀺𑀢𑀸, 𑀮𑁄𑀓𑀦𑀺𑀢𑁆𑀣𑀭𑀡𑀢𑁆𑀣𑀸𑀬 𑀧𑀦 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀣𑁂𑀦𑁆𑀢𑁂𑀳𑀺 𑀧𑀽𑀭𑀺𑀢𑀸, 𑀲𑁄 𑀯𑁄 𑀇𑀤𑀸𑀦𑀺 𑀓𑀸𑀮𑁄 𑀫𑀸𑀭𑀺𑀲𑀸 𑀩𑀼𑀤𑁆𑀥𑀢𑁆𑀢𑀸𑀬 𑀲𑀫𑀬𑁄, 𑀫𑀸𑀭𑀺𑀲𑀸 𑀩𑀼𑀤𑁆𑀥𑀢𑁆𑀢𑀸𑀬 𑀲𑀫𑀬𑁄’’𑀢𑀺 𑀬𑀸𑀘𑀺𑀁𑀲𑀼.

𑀅𑀣 𑀫𑀳𑀸𑀲𑀢𑁆𑀢𑁄 𑀤𑁂𑀯𑀢𑀸𑀦𑀁 𑀧𑀝𑀺𑀜𑁆𑀜𑀁 𑀅𑀤𑀢𑁆𑀯𑀸𑀯 𑀓𑀸𑀮𑀤𑀻𑀧𑀤𑁂𑀲𑀓𑀼𑀮𑀚𑀦𑁂𑀢𑁆𑀢𑀺𑀆𑀬𑀼𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀧𑀜𑁆𑀘𑀫𑀳𑀸𑀯𑀺𑀮𑁄𑀓𑀦𑀁 𑀦𑀸𑀫 𑀯𑀺𑀮𑁄𑀓𑁂𑀲𑀺. 𑀢𑀢𑁆𑀣 ‘‘𑀓𑀸𑀮𑁄 𑀦𑀼 𑀔𑁄, 𑀅𑀓𑀸𑀮𑁄 𑀦𑀼 𑀔𑁄’’𑀢𑀺 𑀧𑀞𑀫𑀁 𑀓𑀸𑀮𑀁 𑀯𑀺𑀮𑁄𑀓𑁂𑀲𑀺. 𑀢𑀢𑁆𑀣 𑀯𑀲𑁆𑀲𑀲𑀢𑀲𑀳𑀲𑁆𑀲𑀢𑁄 𑀉𑀤𑁆𑀥𑀁 𑀯𑀟𑁆𑀠𑀺𑀢𑀆𑀬𑀼𑀓𑀸𑀮𑁄 𑀓𑀸𑀮𑁄 𑀦𑀸𑀫 𑀦 𑀳𑁄𑀢𑀺. 𑀓𑀲𑁆𑀫𑀸? 𑀢𑀤𑀸 𑀳𑀺 𑀲𑀢𑁆𑀢𑀸𑀦𑀁 𑀚𑀸𑀢𑀺𑀚𑀭𑀸𑀫𑀭𑀡𑀸𑀦𑀺 𑀦 𑀧𑀜𑁆𑀜𑀸𑀬𑀦𑁆𑀢𑀺. 𑀩𑀼𑀤𑁆𑀥𑀸𑀦𑀜𑁆𑀘 𑀥𑀫𑁆𑀫𑀤𑁂𑀲𑀦𑀸 𑀢𑀺𑀮𑀓𑁆𑀔𑀡𑀫𑀼𑀢𑁆𑀢𑀸 𑀦𑀸𑀫 𑀦𑀢𑁆𑀣𑀺. 𑀢𑁂𑀲𑀁 ‘‘𑀅𑀦𑀺𑀘𑁆𑀘𑀁, 𑀤𑀼𑀓𑁆𑀔𑀁, 𑀅𑀦𑀢𑁆𑀢𑀸’’𑀢𑀺 𑀓𑀣𑁂𑀦𑁆𑀢𑀸𑀦𑀁 ‘‘𑀓𑀺𑀁 𑀦𑀸𑀫𑁂𑀢𑀁 𑀓𑀣𑁂𑀦𑁆𑀢𑀻’’𑀢𑀺 𑀦𑁂𑀯 𑀲𑁄𑀢𑀩𑁆𑀩𑀁 𑀦 𑀲𑀤𑁆𑀥𑀸𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀺, 𑀢𑀢𑁄 𑀅𑀪𑀺𑀲𑀫𑀬𑁄 𑀦 𑀳𑁄𑀢𑀺, 𑀢𑀲𑁆𑀫𑀺𑀁 𑀅𑀲𑀢𑀺 𑀅𑀦𑀺𑀬𑁆𑀬𑀸𑀦𑀺𑀓𑀁 𑀲𑀸𑀲𑀦𑀁 𑀳𑁄𑀢𑀺. 𑀢𑀲𑁆𑀫𑀸 𑀲𑁄 𑀅𑀓𑀸𑀮𑁄. 𑀯𑀲𑁆𑀲𑀲𑀢𑀢𑁄 𑀊𑀦𑀆𑀬𑀼𑀓𑀸𑀮𑁄𑀧𑀺 𑀓𑀸𑀮𑁄 𑀦 𑀳𑁄𑀢𑀺. 𑀓𑀲𑁆𑀫𑀸? 𑀢𑀤𑀸 𑀲𑀢𑁆𑀢𑀸 𑀉𑀲𑁆𑀲𑀦𑁆𑀦𑀓𑀺𑀮𑁂𑀲𑀸 𑀳𑁄𑀦𑁆𑀢𑀺, 𑀉𑀲𑁆𑀲𑀦𑁆𑀦𑀓𑀺𑀮𑁂𑀲𑀸𑀦𑀜𑁆𑀘 𑀤𑀺𑀦𑁆𑀦𑁄 𑀑𑀯𑀸𑀤𑁄 𑀑𑀯𑀸𑀤𑀝𑁆𑀞𑀸𑀦𑁂 𑀦 𑀢𑀺𑀝𑁆𑀞𑀢𑀺, 𑀉𑀤𑀓𑁂 𑀤𑀡𑁆𑀟𑀭𑀸𑀚𑀺 𑀯𑀺𑀬 𑀔𑀺𑀧𑁆𑀧𑀁 𑀯𑀺𑀕𑀘𑁆𑀙𑀢𑀺. 𑀢𑀲𑁆𑀫𑀸 𑀲𑁄𑀧𑀺 𑀅𑀓𑀸𑀮𑁄. 𑀯𑀲𑁆𑀲𑀲𑀢𑀲𑀳𑀲𑁆𑀲𑀢𑁄 𑀧𑀦 𑀧𑀝𑁆𑀞𑀸𑀬 𑀳𑁂𑀝𑁆𑀞𑀸, 𑀯𑀲𑁆𑀲𑀲𑀢𑀢𑁄 𑀧𑀝𑁆𑀞𑀸𑀬 𑀉𑀤𑁆𑀥𑀁 𑀆𑀬𑀼𑀓𑀸𑀮𑁄 𑀓𑀸𑀮𑁄 𑀦𑀸𑀫. 𑀢𑀤𑀸 𑀘 𑀯𑀲𑁆𑀲𑀲𑀢𑀓𑀸𑀮𑁄. 𑀅𑀣 𑀫𑀳𑀸𑀲𑀢𑁆𑀢𑁄 ‘‘𑀦𑀺𑀩𑁆𑀩𑀢𑁆𑀢𑀺𑀢𑀩𑁆𑀩𑀓𑀸𑀮𑁄’’𑀢𑀺 𑀓𑀸𑀮𑀁 𑀧𑀲𑁆𑀲𑀺.

𑀢𑀢𑁄 𑀤𑀻𑀧𑀁 𑀯𑀺𑀮𑁄𑀓𑁂𑀦𑁆𑀢𑁄 𑀲𑀧𑀭𑀺𑀯𑀸𑀭𑁂 𑀘𑀢𑁆𑀢𑀸𑀭𑁄 𑀤𑀻𑀧𑁂 𑀑𑀮𑁄𑀓𑁂𑀢𑁆𑀯𑀸 ‘‘𑀢𑀻𑀲𑀼 𑀤𑀻𑀧𑁂𑀲𑀼 𑀩𑀼𑀤𑁆𑀥𑀸 𑀦 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀚𑀫𑁆𑀩𑀼𑀤𑀻𑀧𑁂𑀬𑁂𑀯 𑀦𑀺𑀩𑁆𑀩𑀢𑁆𑀢𑀦𑁆𑀢𑀻’’𑀢𑀺 𑀤𑀻𑀧𑀁 𑀧𑀲𑁆𑀲𑀺.

𑀢𑀢𑁄 ‘‘𑀚𑀫𑁆𑀩𑀼𑀤𑀻𑀧𑁄 𑀦𑀸𑀫 𑀫𑀳𑀸 𑀤𑀲𑀬𑁄𑀚𑀦𑀲𑀳𑀲𑁆𑀲𑀧𑀭𑀺𑀫𑀸𑀡𑁄, 𑀓𑀢𑀭𑀲𑁆𑀫𑀺𑀁 𑀦𑀼 𑀔𑁄 𑀧𑀤𑁂𑀲𑁂 𑀩𑀼𑀤𑁆𑀥𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀻’’𑀢𑀺 𑀑𑀓𑀸𑀲𑀁 𑀯𑀺𑀮𑁄𑀓𑁂𑀦𑁆𑀢𑁄 𑀫𑀚𑁆𑀛𑀺𑀫𑀤𑁂𑀲𑀁 𑀧𑀲𑁆𑀲𑀺. 𑀫𑀚𑁆𑀛𑀺𑀫𑀤𑁂𑀲𑁄 𑀦𑀸𑀫 𑁋 ‘‘𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀕𑀚𑀗𑁆𑀕𑀮𑀁 𑀦𑀸𑀫 𑀦𑀺𑀕𑀫𑁄, 𑀢𑀲𑁆𑀲 𑀅𑀧𑀭𑁂𑀦 𑀫𑀳𑀸𑀲𑀸𑀮𑁄, 𑀢𑀢𑁄 𑀧𑀭𑀁 𑀧𑀘𑁆𑀘𑀦𑁆𑀢𑀺𑀫𑀸 𑀚𑀦𑀧𑀤𑀸, 𑀑𑀭𑀢𑁄 𑀫𑀚𑁆𑀛𑁂. 𑀧𑀼𑀩𑁆𑀩𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬 𑀲𑀮𑁆𑀮𑀯𑀢𑀻 𑀦𑀸𑀫 𑀦𑀤𑀻, 𑀢𑀢𑁄 𑀧𑀭𑀁 𑀧𑀘𑁆𑀘𑀦𑁆𑀢𑀺𑀫𑀸 𑀚𑀦𑀧𑀤𑀸, 𑀑𑀭𑀢𑁄 𑀫𑀚𑁆𑀛𑁂. 𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬 𑀲𑁂𑀢𑀓𑀡𑁆𑀡𑀺𑀓𑀁 𑀦𑀸𑀫 𑀦𑀺𑀕𑀫𑁄, 𑀢𑀢𑁄 𑀧𑀭𑀁 𑀧𑀘𑁆𑀘𑀦𑁆𑀢𑀺𑀫𑀸 𑀚𑀦𑀧𑀤𑀸, 𑀑𑀭𑀢𑁄 𑀫𑀚𑁆𑀛𑁂. 𑀧𑀘𑁆𑀙𑀺𑀫𑀸𑀬 𑀤𑀺𑀲𑀸𑀬 𑀣𑀽𑀡𑀁 𑀦𑀸𑀫 𑀩𑁆𑀭𑀸𑀳𑁆𑀫𑀡𑀕𑀸𑀫𑁄, 𑀢𑀢𑁄 𑀧𑀭𑀁 𑀧𑀘𑁆𑀘𑀦𑁆𑀢𑀺𑀫𑀸 𑀚𑀦𑀧𑀤𑀸, 𑀑𑀭𑀢𑁄 𑀫𑀚𑁆𑀛𑁂. 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬 𑀉𑀲𑀻𑀭𑀤𑁆𑀥𑀚𑁄 𑀦𑀸𑀫 𑀧𑀩𑁆𑀩𑀢𑁄, 𑀢𑀢𑁄 𑀧𑀭𑀁 𑀧𑀘𑁆𑀘𑀦𑁆𑀢𑀺𑀫𑀸 𑀚𑀦𑀧𑀤𑀸, 𑀑𑀭𑀢𑁄 𑀫𑀚𑁆𑀛𑁂’’𑀢𑀺 𑀏𑀯𑀁 𑀯𑀺𑀦𑀬𑁂 (𑀫𑀳𑀸𑀯. 𑁨𑁫𑁯) 𑀯𑀼𑀢𑁆𑀢𑁄 𑀧𑀤𑁂𑀲𑁄. 𑀲𑁄 𑀆𑀬𑀸𑀫𑀢𑁄 𑀢𑀻𑀡𑀺 𑀬𑁄𑀚𑀦𑀲𑀢𑀸𑀦𑀺, 𑀯𑀺𑀢𑁆𑀣𑀸𑀭𑀢𑁄 𑀅𑀟𑁆𑀠𑀢𑁂𑀬𑁆𑀬𑀸𑀦𑀺, 𑀧𑀭𑀺𑀓𑁆𑀔𑁂𑀧𑀢𑁄 𑀦𑀯 𑀬𑁄𑀚𑀦𑀲𑀢𑀸𑀦𑀻𑀢𑀺 𑀏𑀢𑀲𑁆𑀫𑀺𑀁 𑀧𑀤𑁂𑀲𑁂 𑀩𑀼𑀤𑁆𑀥𑀸, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸, 𑀅𑀕𑁆𑀕𑀲𑀸𑀯𑀓𑀸, 𑀅𑀲𑀻𑀢𑀺 𑀫𑀳𑀸𑀲𑀸𑀯𑀓𑀸, 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸 𑀅𑀜𑁆𑀜𑁂 𑀘 𑀫𑀳𑁂𑀲𑀓𑁆𑀔𑀸 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀫𑀳𑀸𑀲𑀸𑀮𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀇𑀤𑀜𑁆𑀘𑁂𑀢𑁆𑀣 𑀓𑀧𑀺𑀮𑀯𑀢𑁆𑀣𑀼 𑀦𑀸𑀫 𑀦𑀕𑀭𑀁, 𑀢𑀢𑁆𑀣 𑀫𑀬𑀸 𑀦𑀺𑀩𑁆𑀩𑀢𑁆𑀢𑀺𑀢𑀩𑁆𑀩𑀦𑁆𑀢𑀺 𑀦𑀺𑀝𑁆𑀞𑀁 𑀅𑀕𑀫𑀸𑀲𑀺.

𑀢𑀢𑁄 𑀓𑀼𑀮𑀁 𑀯𑀺𑀮𑁄𑀓𑁂𑀦𑁆𑀢𑁄 ‘‘𑀩𑀼𑀤𑁆𑀥𑀸 𑀦𑀸𑀫 𑀯𑁂𑀲𑁆𑀲𑀓𑀼𑀮𑁂 𑀯𑀸 𑀲𑀼𑀤𑁆𑀤𑀓𑀼𑀮𑁂 𑀯𑀸 𑀦 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀮𑁄𑀓𑀲𑀫𑁆𑀫𑀢𑁂 𑀧𑀦 𑀔𑀢𑁆𑀢𑀺𑀬𑀓𑀼𑀮𑁂 𑀯𑀸 𑀩𑁆𑀭𑀸𑀳𑁆𑀫𑀡𑀓𑀼𑀮𑁂𑀯𑀸𑀢𑀺 𑀤𑁆𑀯𑀻𑀲𑀼𑀬𑁂𑀯 𑀓𑀼𑀮𑁂𑀲𑀼 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀇𑀤𑀸𑀦𑀺 𑀘 𑀔𑀢𑁆𑀢𑀺𑀬𑀓𑀼𑀮𑀁 𑀮𑁄𑀓𑀲𑀫𑁆𑀫𑀢𑀁, 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀸𑀫𑀺. 𑀲𑀼𑀤𑁆𑀥𑁄𑀤𑀦𑁄 𑀦𑀸𑀫 𑀭𑀸𑀚𑀸 𑀫𑁂 𑀧𑀺𑀢𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀓𑀼𑀮𑀁 𑀧𑀲𑁆𑀲𑀺.

𑀢𑀢𑁄 𑀫𑀸𑀢𑀭𑀁 𑀯𑀺𑀮𑁄𑀓𑁂𑀦𑁆𑀢𑁄 ‘‘𑀩𑀼𑀤𑁆𑀥𑀫𑀸𑀢𑀸 𑀦𑀸𑀫 𑀮𑁄𑀮𑀸 𑀲𑀼𑀭𑀸𑀥𑀼𑀢𑁆𑀢𑀸 𑀦 𑀳𑁄𑀢𑀺, 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀧𑀦 𑀧𑀽𑀭𑀺𑀢𑀧𑀸𑀭𑀫𑀻 𑀚𑀸𑀢𑀺𑀢𑁄 𑀧𑀝𑁆𑀞𑀸𑀬 𑀅𑀔𑀡𑁆𑀟𑀧𑀜𑁆𑀘𑀲𑀻𑀮𑀸𑀬𑁂𑀯 𑀳𑁄𑀢𑀺. 𑀅𑀬𑀜𑁆𑀘 𑀫𑀳𑀸𑀫𑀸𑀬𑀸 𑀦𑀸𑀫 𑀤𑁂𑀯𑀻 𑀏𑀤𑀺𑀲𑀻, 𑀅𑀬𑀁 𑀫𑁂 𑀫𑀸𑀢𑀸 𑀪𑀯𑀺𑀲𑁆𑀲𑀢𑀺, 𑀓𑀺𑀢𑁆𑀢𑀓𑀁 𑀧𑀦𑀲𑁆𑀲𑀸 𑀆𑀬𑀽𑀢𑀺 𑀤𑀲𑀦𑁆𑀦𑀁 𑀫𑀸𑀲𑀸𑀦𑀁 𑀉𑀧𑀭𑀺 𑀲𑀢𑁆𑀢 𑀤𑀺𑀯𑀲𑀸𑀦𑀻’’𑀢𑀺 𑀧𑀲𑁆𑀲𑀺.

𑀇𑀢𑀺 𑀇𑀫𑀁 𑀧𑀜𑁆𑀘𑀫𑀳𑀸𑀯𑀺𑀮𑁄𑀓𑀦𑀁 𑀯𑀺𑀮𑁄𑀓𑁂𑀢𑁆𑀯𑀸 ‘‘𑀓𑀸𑀮𑁄 𑀫𑁂 𑀫𑀸𑀭𑀺𑀲𑀸 𑀩𑀼𑀤𑁆𑀥𑀪𑀸𑀯𑀸𑀬𑀸’’𑀢𑀺 𑀤𑁂𑀯𑀢𑀸𑀦𑀁 𑀲𑀗𑁆𑀕𑀳𑀁 𑀓𑀭𑁄𑀦𑁆𑀢𑁄 𑀧𑀝𑀺𑀜𑁆𑀜𑀁 𑀤𑀢𑁆𑀯𑀸 ‘‘𑀕𑀘𑁆𑀙𑀣, 𑀢𑀼𑀫𑁆𑀳𑁂’’𑀢𑀺 𑀢𑀸 𑀤𑁂𑀯𑀢𑀸 𑀉𑀬𑁆𑀬𑁄𑀚𑁂𑀢𑁆𑀯𑀸 𑀢𑀼𑀲𑀺𑀢𑀤𑁂𑀯𑀢𑀸𑀳𑀺 𑀧𑀭𑀺𑀯𑀼𑀢𑁄 𑀢𑀼𑀲𑀺𑀢𑀧𑀼𑀭𑁂 𑀦𑀦𑁆𑀤𑀦𑀯𑀦𑀁 𑀧𑀸𑀯𑀺𑀲𑀺. 𑀲𑀩𑁆𑀩𑀤𑁂𑀯𑀮𑁄𑀓𑁂𑀲𑀼 𑀳𑀺 𑀦𑀦𑁆𑀤𑀦𑀯𑀦𑀁 𑀅𑀢𑁆𑀣𑀺𑀬𑁂𑀯. 𑀢𑀢𑁆𑀣 𑀦𑀁 𑀤𑁂𑀯𑀢𑀸 ‘‘𑀇𑀢𑁄 𑀘𑀼𑀢𑁄 𑀲𑀼𑀕𑀢𑀺𑀁 𑀕𑀘𑁆𑀙, 𑀇𑀢𑁄 𑀘𑀼𑀢𑁄 𑀲𑀼𑀕𑀢𑀺𑀁 𑀕𑀘𑁆𑀙𑀸’’𑀢𑀺 𑀧𑀼𑀩𑁆𑀩𑁂 𑀓𑀢𑀓𑀼𑀲𑀮𑀓𑀫𑁆𑀫𑁄𑀓𑀸𑀲𑀁 𑀲𑀸𑀭𑀬𑀫𑀸𑀦𑀸 𑀯𑀺𑀘𑀭𑀦𑁆𑀢𑀺. 𑀲𑁄 𑀏𑀯𑀁 𑀤𑁂𑀯𑀢𑀸𑀳𑀺 𑀓𑀼𑀲𑀮𑀁 𑀲𑀸𑀭𑀬𑀫𑀸𑀦𑀸𑀳𑀺 𑀧𑀭𑀺𑀯𑀼𑀢𑁄 𑀢𑀢𑁆𑀣 𑀯𑀺𑀘𑀭𑀦𑁆𑀢𑁄 𑀘𑀯𑀺𑀢𑁆𑀯𑀸 𑀫𑀳𑀸𑀫𑀸𑀬𑀸𑀬 𑀤𑁂𑀯𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺.

𑀢𑀲𑁆𑀲 𑀆𑀯𑀺𑀪𑀸𑀯𑀢𑁆𑀣𑀁 𑀅𑀬𑀫𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀢𑀤𑀸 𑀓𑀺𑀭 𑀓𑀧𑀺𑀮𑀯𑀢𑁆𑀣𑀼𑀦𑀕𑀭𑁂 𑀆𑀲𑀸𑀴𑁆𑀳𑀺𑀦𑀓𑁆𑀔𑀢𑁆𑀢𑀁 𑀲𑀗𑁆𑀖𑀼𑀝𑁆𑀞𑀁 𑀅𑀳𑁄𑀲𑀺, 𑀫𑀳𑀸𑀚𑀦𑁄 𑀦𑀓𑁆𑀔𑀢𑁆𑀢𑀁 𑀓𑀻𑀴𑀢𑀺. 𑀫𑀳𑀸𑀫𑀸𑀬𑀸𑀧𑀺 𑀤𑁂𑀯𑀻 𑀧𑀼𑀭𑁂 𑀧𑀼𑀡𑁆𑀡𑀫𑀸𑀬 𑀲𑀢𑁆𑀢𑀫𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀯𑀺𑀕𑀢𑀲𑀼𑀭𑀸𑀧𑀸𑀦𑀁 𑀫𑀸𑀮𑀸𑀕𑀦𑁆𑀥𑀯𑀺𑀪𑀽𑀢𑀺𑀲𑀫𑁆𑀧𑀦𑁆𑀦𑀁 𑀦𑀓𑁆𑀔𑀢𑁆𑀢𑀓𑀻𑀴𑀁 𑀅𑀦𑀼𑀪𑀯𑀫𑀸𑀦𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀧𑀸𑀢𑁄𑀯 𑀉𑀝𑁆𑀞𑀸𑀬 𑀕𑀦𑁆𑀥𑁄𑀤𑀓𑁂𑀦 𑀦𑁆𑀳𑀸𑀬𑀺𑀢𑁆𑀯𑀸 𑀘𑀢𑁆𑀢𑀸𑀭𑀺 𑀲𑀢𑀲𑀳𑀲𑁆𑀲𑀸𑀦𑀺 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑀯𑀺𑀪𑀽𑀲𑀺𑀢𑀸 𑀯𑀭𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀉𑀧𑁄𑀲𑀣𑀗𑁆𑀕𑀸𑀦𑀺 𑀅𑀥𑀺𑀝𑁆𑀞𑀸𑀬 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀁 𑀲𑀺𑀭𑀺𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀲𑀺𑀭𑀺𑀲𑀬𑀦𑁂 𑀦𑀺𑀧𑀦𑁆𑀦𑀸 𑀦𑀺𑀤𑁆𑀤𑀁 𑀑𑀓𑁆𑀓𑀫𑀫𑀸𑀦𑀸 𑀇𑀫𑀁 𑀲𑀼𑀧𑀺𑀦𑀁 𑀅𑀤𑁆𑀤𑀲 𑁋 ‘𑀘𑀢𑁆𑀢𑀸𑀭𑁄 𑀓𑀺𑀭 𑀦𑀁 𑀫𑀳𑀸𑀭𑀸𑀚𑀸𑀦𑁄 𑀲𑀬𑀦𑁂𑀦𑁂𑀯 𑀲𑀤𑁆𑀥𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀁 𑀦𑁂𑀢𑁆𑀯𑀸 𑀲𑀝𑁆𑀞𑀺𑀬𑁄𑀚𑀦𑀺𑀓𑁂 𑀫𑀦𑁄𑀲𑀺𑀮𑀸𑀢𑀮𑁂 𑀲𑀢𑁆𑀢𑀬𑁄𑀚𑀦𑀺𑀓𑀲𑁆𑀲 𑀫𑀳𑀸𑀲𑀸𑀮𑀭𑀼𑀓𑁆𑀔𑀲𑁆𑀲 𑀳𑁂𑀝𑁆𑀞𑀸 𑀞𑀧𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼. 𑀅𑀣 𑀦𑁂𑀲𑀁 𑀤𑁂𑀯𑀺𑀬𑁄 𑀆𑀕𑀦𑁆𑀢𑁆𑀯𑀸 𑀤𑁂𑀯𑀺𑀁 𑀅𑀦𑁄𑀢𑀢𑁆𑀢𑀤𑀳𑀁 𑀦𑁂𑀢𑁆𑀯𑀸 𑀫𑀦𑀼𑀲𑁆𑀲𑀫𑀮𑀳𑀭𑀡𑀢𑁆𑀣𑀁 𑀦𑁆𑀳𑀸𑀧𑁂𑀢𑁆𑀯𑀸 𑀤𑀺𑀩𑁆𑀩𑀯𑀢𑁆𑀣𑀁 𑀦𑀺𑀯𑀸𑀲𑀸𑀧𑁂𑀢𑁆𑀯𑀸 𑀕𑀦𑁆𑀥𑁂𑀳𑀺 𑀯𑀺𑀮𑀺𑀫𑁆𑀧𑀸𑀧𑁂𑀢𑁆𑀯𑀸 𑀤𑀺𑀩𑁆𑀩𑀧𑀼𑀧𑁆𑀨𑀸𑀦𑀺 𑀧𑀺𑀴𑀦𑁆𑀥𑀸𑀧𑁂𑀢𑁆𑀯𑀸 𑀢𑀢𑁄 𑀅𑀯𑀺𑀤𑀽𑀭𑁂 𑀏𑀓𑁄 𑀭𑀚𑀢𑀧𑀩𑁆𑀩𑀢𑁄 𑀅𑀢𑁆𑀣𑀺, 𑀢𑀲𑁆𑀲 𑀅𑀦𑁆𑀢𑁄 𑀓𑀦𑀓𑀯𑀺𑀫𑀸𑀦𑀁 𑀅𑀢𑁆𑀣𑀺, 𑀢𑀢𑁆𑀣 𑀧𑀸𑀘𑀻𑀦𑀲𑀻𑀲𑀓𑀁 𑀤𑀺𑀩𑁆𑀩𑀲𑀬𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀦𑀺𑀧𑀚𑁆𑀚𑀸𑀧𑁂𑀲𑀼𑀁. 𑀅𑀣 𑀩𑁄𑀥𑀺𑀲𑀢𑁆𑀢𑁄 𑀲𑁂𑀢𑀯𑀭𑀯𑀸𑀭𑀡𑁄 𑀳𑀼𑀢𑁆𑀯𑀸 𑀢𑀢𑁄 𑀅𑀯𑀺𑀤𑀽𑀭𑁂 𑀏𑀓𑁄 𑀲𑀼𑀯𑀡𑁆𑀡𑀧𑀩𑁆𑀩𑀢𑁄 𑀅𑀢𑁆𑀣𑀺, 𑀢𑀢𑁆𑀣 𑀯𑀺𑀘𑀭𑀺𑀢𑁆𑀯𑀸 𑀢𑀢𑁄 𑀑𑀭𑀼𑀬𑁆𑀳 𑀭𑀚𑀢𑀧𑀩𑁆𑀩𑀢𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀉𑀢𑁆𑀢𑀭𑀤𑀺𑀲𑀢𑁄 𑀆𑀕𑀫𑁆𑀫 𑀭𑀚𑀢𑀤𑀸𑀫𑀯𑀡𑁆𑀡𑀸𑀬 𑀲𑁄𑀡𑁆𑀟𑀸𑀬 𑀲𑁂𑀢𑀧𑀤𑀼𑀫𑀁 𑀕𑀳𑁂𑀢𑁆𑀯𑀸 𑀓𑁄𑀜𑁆𑀘𑀦𑀸𑀤𑀁 𑀦𑀤𑀺𑀢𑁆𑀯𑀸 𑀓𑀦𑀓𑀯𑀺𑀫𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀫𑀸𑀢𑀼𑀲𑀬𑀦𑀁 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀤𑀓𑁆𑀔𑀺𑀡𑀧𑀲𑁆𑀲𑀁 𑀨𑀸𑀮𑁂𑀢𑁆𑀯𑀸 𑀓𑀼𑀘𑁆𑀙𑀺𑀁 𑀧𑀯𑀺𑀝𑁆𑀞𑀲𑀤𑀺𑀲𑁄 𑀅𑀳𑁄𑀲𑀻’𑀢𑀺. 𑀏𑀯𑀁 𑀉𑀢𑁆𑀢𑀭𑀸𑀲𑀸𑀴𑁆𑀳𑀦𑀓𑁆𑀔𑀢𑁆𑀢𑁂𑀦 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺.

𑀧𑀼𑀦𑀤𑀺𑀯𑀲𑁂 𑀧𑀩𑀼𑀤𑁆𑀥𑀸 𑀤𑁂𑀯𑀻 𑀢𑀁 𑀲𑀼𑀧𑀺𑀦𑀁 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀘𑀢𑀼𑀲𑀝𑁆𑀞𑀺𑀫𑀢𑁆𑀢𑁂 𑀩𑁆𑀭𑀸𑀳𑁆𑀫𑀡𑀧𑀸𑀫𑁄𑀓𑁆𑀔𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀕𑁄𑀫𑀬𑀳𑀭𑀺𑀢𑀽𑀧𑀮𑀺𑀢𑁆𑀢𑀸𑀬 𑀮𑀸𑀚𑀸𑀤𑀻𑀳𑀺 𑀓𑀢𑀫𑀗𑁆𑀕𑀮𑀲𑀓𑁆𑀓𑀸𑀭𑀸𑀬 𑀪𑀽𑀫𑀺𑀬𑀸 𑀫𑀳𑀸𑀭𑀳𑀸𑀦𑀺 𑀆𑀲𑀦𑀸𑀦𑀺 𑀧𑀜𑁆𑀜𑀸𑀧𑁂𑀢𑁆𑀯𑀸 𑀢𑀢𑁆𑀣 𑀦𑀺𑀲𑀺𑀦𑁆𑀦𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀧𑁆𑀧𑀺𑀫𑀥𑀼𑀲𑀓𑁆𑀔𑀭𑀸𑀪𑀺𑀲𑀗𑁆𑀔𑀢𑀲𑁆𑀲 𑀯𑀭𑀧𑀸𑀬𑀸𑀲𑀲𑁆𑀲 𑀲𑀼𑀯𑀡𑁆𑀡𑀭𑀚𑀢𑀧𑀸𑀢𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀼𑀯𑀡𑁆𑀡𑀭𑀚𑀢𑀧𑀸𑀢𑀻𑀳𑀺𑀬𑁂𑀯 𑀧𑀝𑀺𑀓𑀼𑀚𑁆𑀚𑀺𑀢𑁆𑀯𑀸 𑀅𑀤𑀸𑀲𑀺, 𑀅𑀜𑁆𑀜𑁂𑀳𑀺 𑀘 𑀅𑀳𑀢𑀯𑀢𑁆𑀣𑀓𑀧𑀺𑀮𑀕𑀸𑀯𑀺𑀤𑀸𑀦𑀸𑀤𑀻𑀳𑀺 𑀢𑁂 𑀲𑀦𑁆𑀢𑀧𑁆𑀧𑁂𑀲𑀺. 𑀅𑀣 𑀦𑁂𑀲𑀁 𑀲𑀩𑁆𑀩𑀓𑀸𑀫𑁂𑀳𑀺 𑀲𑀦𑁆𑀢𑀧𑁆𑀧𑀺𑀢𑀸𑀦𑀁 𑀲𑀼𑀧𑀺𑀦𑀁 𑀆𑀭𑁄𑀘𑀸𑀧𑁂𑀢𑁆𑀯𑀸 ‘‘𑀓𑀺𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀼𑀘𑁆𑀙𑀺. 𑀩𑁆𑀭𑀸𑀳𑁆𑀫𑀡𑀸 𑀆𑀳𑀁𑀲𑀼 ‘‘𑀫𑀸 𑀘𑀺𑀦𑁆𑀢𑀬𑀺, 𑀫𑀳𑀸𑀭𑀸𑀚, 𑀤𑁂𑀯𑀺𑀬𑀸 𑀢𑁂 𑀓𑀼𑀘𑁆𑀙𑀺𑀫𑁆𑀳𑀺 𑀕𑀩𑁆𑀪𑁄 𑀧𑀢𑀺𑀝𑁆𑀞𑀺𑀢𑁄, 𑀲𑁄 𑀘 𑀔𑁄 𑀧𑀼𑀭𑀺𑀲𑀕𑀩𑁆𑀪𑁄, 𑀦 𑀇𑀢𑁆𑀣𑀺𑀕𑀩𑁆𑀪𑁄, 𑀧𑀼𑀢𑁆𑀢𑁄 𑀢𑁂 𑀪𑀯𑀺𑀲𑁆𑀲𑀢𑀺. 𑀲𑁄 𑀲𑀘𑁂 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀺𑀲𑁆𑀲𑀢𑀺, 𑀭𑀸𑀚𑀸 𑀪𑀯𑀺𑀲𑁆𑀲𑀢𑀺 𑀘𑀓𑁆𑀓𑀯𑀢𑁆𑀢𑀻; 𑀲𑀘𑁂 𑀅𑀕𑀸𑀭𑀸 𑀦𑀺𑀓𑁆𑀔𑀫𑁆𑀫 𑀧𑀩𑁆𑀩𑀚𑀺𑀲𑁆𑀲𑀢𑀺, 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺 𑀮𑁄𑀓𑁂 𑀯𑀺𑀯𑀝𑁆𑀝𑀘𑁆𑀙𑀤𑁄’’𑀢𑀺.

𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀦 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀓𑁆𑀔𑀡𑁂 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀲𑀓𑀮𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀲𑀗𑁆𑀓𑀫𑁆𑀧𑀺 𑀲𑀫𑁆𑀧𑀓𑀫𑁆𑀧𑀺 𑀲𑀫𑁆𑀧𑀯𑁂𑀥𑀺. 𑀩𑀸𑀢𑁆𑀢𑀺𑀁𑀲𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺 𑀧𑀸𑀢𑀼𑀭𑀳𑁂𑀲𑀼𑀁 𑁋 𑀤𑀲𑀲𑀼 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂𑀲𑀼 𑀅𑀧𑁆𑀧𑀫𑀸𑀡𑁄 𑀑𑀪𑀸𑀲𑁄 𑀨𑀭𑀺. 𑀢𑀲𑁆𑀲 𑀢𑀁 𑀲𑀺𑀭𑀺𑀁 𑀤𑀝𑁆𑀞𑀼𑀓𑀸𑀫𑀸 𑀯𑀺𑀬 𑀅𑀦𑁆𑀥𑀸 𑀘𑀓𑁆𑀔𑀽𑀦𑀺 𑀧𑀝𑀺𑀮𑀪𑀺𑀁𑀲𑀼, 𑀩𑀥𑀺𑀭𑀸 𑀲𑀤𑁆𑀤𑀁 𑀲𑀼𑀡𑀺𑀁𑀲𑀼, 𑀫𑀽𑀕𑀸 𑀲𑀫𑀸𑀮𑀧𑀺𑀁𑀲𑀼, 𑀔𑀼𑀚𑁆𑀚𑀸 𑀉𑀚𑀼𑀕𑀢𑁆𑀢𑀸 𑀅𑀳𑁂𑀲𑀼𑀁, 𑀧𑀗𑁆𑀕𑀼𑀮𑀸 𑀧𑀤𑀲𑀸 𑀕𑀫𑀦𑀁 𑀧𑀝𑀺𑀮𑀪𑀺𑀁𑀲𑀼, 𑀩𑀦𑁆𑀥𑀦𑀕𑀢𑀸 𑀲𑀩𑁆𑀩𑀲𑀢𑁆𑀢𑀸 𑀅𑀦𑁆𑀤𑀼𑀩𑀦𑁆𑀥𑀦𑀸𑀤𑀻𑀳𑀺 𑀫𑀼𑀘𑁆𑀘𑀺𑀁𑀲𑀼, 𑀲𑀩𑁆𑀩𑀦𑀭𑀓𑁂𑀲𑀼 𑀅𑀕𑁆𑀕𑀺 𑀦𑀺𑀩𑁆𑀩𑀸𑀬𑀺, 𑀧𑁂𑀢𑁆𑀢𑀺𑀯𑀺𑀲𑀬𑁂 𑀔𑀼𑀧𑁆𑀧𑀺𑀧𑀸𑀲𑀸 𑀯𑀽𑀧𑀲𑀫𑀺, 𑀢𑀺𑀭𑀘𑁆𑀙𑀸𑀦𑀸𑀦𑀁 𑀪𑀬𑀁 𑀦𑀸𑀳𑁄𑀲𑀺, 𑀲𑀩𑁆𑀩𑀲𑀢𑁆𑀢𑀸𑀦𑀁 𑀭𑁄𑀕𑁄 𑀯𑀽𑀧𑀲𑀫𑀺, 𑀲𑀩𑁆𑀩𑀲𑀢𑁆𑀢𑀸 𑀧𑀺𑀬𑀁𑀯𑀤𑀸 𑀅𑀳𑁂𑀲𑀼𑀁, 𑀫𑀥𑀼𑀭𑁂𑀦𑀸𑀓𑀸𑀭𑁂𑀦 𑀅𑀲𑁆𑀲𑀸 𑀳𑀲𑀺𑀁𑀲𑀼, 𑀯𑀸𑀭𑀡𑀸 𑀕𑀚𑁆𑀚𑀺𑀁𑀲𑀼, 𑀲𑀩𑁆𑀩𑀢𑀽𑀭𑀺𑀬𑀸𑀦𑀺 𑀲𑀓𑀲𑀓𑀦𑀺𑀦𑁆𑀦𑀸𑀤𑀁 𑀫𑀼𑀜𑁆𑀘𑀺𑀁𑀲𑀼, 𑀅𑀖𑀝𑁆𑀝𑀺𑀢𑀸𑀦𑀺𑀬𑁂𑀯 𑀫𑀦𑀼𑀲𑁆𑀲𑀸𑀦𑀁 𑀳𑀢𑁆𑀣𑀽𑀧𑀕𑀸𑀤𑀻𑀦𑀺 𑀆𑀪𑀭𑀡𑀸𑀦𑀺 𑀯𑀺𑀭𑀯𑀺𑀁𑀲𑀼, 𑀲𑀩𑁆𑀩𑀤𑀺𑀲𑀸 𑀯𑀺𑀧𑁆𑀧𑀲𑀦𑁆𑀦𑀸 𑀅𑀳𑁂𑀲𑀼𑀁, 𑀲𑀢𑁆𑀢𑀸𑀦𑀁 𑀲𑀼𑀔𑀁 𑀉𑀧𑁆𑀧𑀸𑀤𑀬𑀫𑀸𑀦𑁄 𑀫𑀼𑀤𑀼𑀲𑀻𑀢𑀮𑀯𑀸𑀢𑁄 𑀯𑀸𑀬𑀺, 𑀅𑀓𑀸𑀮𑀫𑁂𑀖𑁄 𑀯𑀲𑁆𑀲𑀺, 𑀧𑀣𑀯𑀺𑀢𑁄𑀧𑀺 𑀉𑀤𑀓𑀁 𑀉𑀩𑁆𑀪𑀺𑀚𑁆𑀚𑀺𑀢𑁆𑀯𑀸 𑀯𑀺𑀲𑁆𑀲𑀦𑁆𑀤𑀺, 𑀧𑀓𑁆𑀔𑀺𑀦𑁄 𑀆𑀓𑀸𑀲𑀕𑀫𑀦𑀁 𑀯𑀺𑀚𑀳𑀺𑀁𑀲𑀼, 𑀦𑀤𑀺𑀬𑁄 𑀅𑀲𑀦𑁆𑀤𑀫𑀸𑀦𑀸 𑀅𑀝𑁆𑀞𑀁𑀲𑀼, 𑀫𑀳𑀸𑀲𑀫𑀼𑀤𑁆𑀤𑁂 𑀫𑀥𑀼𑀭𑀁 𑀉𑀤𑀓𑀁 𑀅𑀳𑁄𑀲𑀺, 𑀲𑀩𑁆𑀩𑀢𑁆𑀣𑀓𑀫𑁂𑀯 𑀧𑀜𑁆𑀘𑀯𑀡𑁆𑀡𑁂𑀳𑀺 𑀧𑀤𑀼𑀫𑁂𑀳𑀺 𑀲𑀜𑁆𑀙𑀦𑁆𑀦𑀢𑀮𑁄 𑀅𑀳𑁄𑀲𑀺, 𑀣𑀮𑀚𑀚𑀮𑀚𑀸𑀤𑀻𑀦𑀺 𑀲𑀩𑁆𑀩𑀧𑀼𑀧𑁆𑀨𑀸𑀦𑀺 𑀧𑀼𑀧𑁆𑀨𑀺𑀁𑀲𑀼, 𑀭𑀼𑀓𑁆𑀔𑀸𑀦𑀁 𑀔𑀦𑁆𑀥𑁂𑀲𑀼 𑀔𑀦𑁆𑀥𑀧𑀤𑀼𑀫𑀸𑀦𑀺, 𑀲𑀸𑀔𑀸𑀲𑀼 𑀲𑀸𑀔𑀸𑀧𑀤𑀼𑀫𑀸𑀦𑀺, 𑀮𑀢𑀸𑀲𑀼 𑀮𑀢𑀸𑀧𑀤𑀼𑀫𑀸𑀦𑀺 𑀧𑀼𑀧𑁆𑀨𑀺𑀁𑀲𑀼, 𑀣𑀮𑁂 𑀲𑀺𑀮𑀸𑀢𑀮𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀉𑀧𑀭𑀽𑀧𑀭𑀺 𑀲𑀢𑁆𑀢 𑀲𑀢𑁆𑀢 𑀳𑀼𑀢𑁆𑀯𑀸 𑀤𑀡𑁆𑀟𑀧𑀤𑀼𑀫𑀸𑀦𑀺 𑀦𑀸𑀫 𑀦𑀺𑀓𑁆𑀔𑀫𑀺𑀁𑀲𑀼, 𑀆𑀓𑀸𑀲𑁂 𑀑𑀮𑀫𑁆𑀩𑀓𑀧𑀤𑀼𑀫𑀸𑀦𑀺 𑀦𑀸𑀫 𑀦𑀺𑀩𑁆𑀩𑀢𑁆𑀢𑀺𑀁𑀲𑀼, 𑀲𑀫𑀦𑁆𑀢𑀢𑁄 𑀧𑀼𑀧𑁆𑀨𑀯𑀲𑁆𑀲𑀸 𑀯𑀲𑁆𑀲𑀺𑀁𑀲𑀼, 𑀆𑀓𑀸𑀲𑁂 𑀤𑀺𑀩𑁆𑀩𑀢𑀽𑀭𑀺𑀬𑀸𑀦𑀺 𑀯𑀚𑁆𑀚𑀺𑀁𑀲𑀼, 𑀲𑀓𑀮𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼 𑀯𑀝𑁆𑀝𑁂𑀢𑁆𑀯𑀸 𑀯𑀺𑀲𑁆𑀲𑀝𑁆𑀞𑀫𑀸𑀮𑀸𑀕𑀼𑀴𑁄 𑀯𑀺𑀬, 𑀉𑀧𑁆𑀧𑀻𑀴𑁂𑀢𑁆𑀯𑀸 𑀩𑀤𑁆𑀥𑀫𑀸𑀮𑀸𑀓𑀮𑀸𑀧𑁄 𑀯𑀺𑀬, 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀁 𑀫𑀸𑀮𑀸𑀲𑀦𑀁 𑀯𑀺𑀬 𑀘 𑀏𑀓𑀫𑀸𑀮𑀸𑀫𑀸𑀮𑀺𑀦𑀻 𑀯𑀺𑀧𑁆𑀨𑀼𑀭𑀦𑁆𑀢𑀯𑀸𑀴𑀩𑀻𑀚𑀦𑀻 𑀧𑀼𑀧𑁆𑀨𑀥𑀽𑀫𑀕𑀦𑁆𑀥𑀧𑀭𑀺𑀯𑀸𑀲𑀺𑀢𑀸 𑀧𑀭𑀫𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀸 𑀅𑀳𑁄𑀲𑀺.

𑀏𑀯𑀁 𑀕𑀳𑀺𑀢𑀧𑀝𑀺𑀲𑀦𑁆𑀥𑀺𑀓𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀢𑁄 𑀧𑀝𑁆𑀞𑀸𑀬 𑀩𑁄𑀥𑀺𑀲𑀢𑁆𑀢𑀲𑁆𑀲 𑀘𑁂𑀯 𑀩𑁄𑀥𑀺𑀲𑀢𑁆𑀢𑀫𑀸𑀢𑀼𑀬𑀸 𑀘 𑀉𑀧𑀤𑁆𑀤𑀯𑀦𑀺𑀯𑀸𑀭𑀡𑀢𑁆𑀣𑀁 𑀔𑀕𑁆𑀕𑀳𑀢𑁆𑀣𑀸 𑀘𑀢𑁆𑀢𑀸𑀭𑁄 𑀤𑁂𑀯𑀧𑀼𑀢𑁆𑀢𑀸 𑀆𑀭𑀓𑁆𑀔𑀁 𑀕𑀡𑁆𑀳𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑀫𑀸𑀢𑀼 𑀧𑀦 𑀧𑀼𑀭𑀺𑀲𑁂𑀲𑀼 𑀭𑀸𑀕𑀘𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀺, 𑀮𑀸𑀪𑀕𑁆𑀕𑀬𑀲𑀕𑁆𑀕𑀧𑁆𑀧𑀢𑁆𑀢𑀸 𑀘 𑀅𑀳𑁄𑀲𑀺 𑀲𑀼𑀔𑀺𑀦𑀻 𑀅𑀓𑀺𑀮𑀦𑁆𑀢𑀓𑀸𑀬𑀸. 𑀩𑁄𑀥𑀺𑀲𑀢𑁆𑀢𑀜𑁆𑀘 𑀅𑀦𑁆𑀢𑁄𑀓𑀼𑀘𑁆𑀙𑀺𑀕𑀢𑀁 𑀯𑀺𑀧𑁆𑀧𑀲𑀦𑁆𑀦𑁂 𑀫𑀡𑀺𑀭𑀢𑀦𑁂 𑀆𑀯𑀼𑀢𑀧𑀡𑁆𑀟𑀼𑀲𑀼𑀢𑁆𑀢𑀁 𑀯𑀺𑀬 𑀧𑀲𑁆𑀲𑀢𑀺. 𑀬𑀲𑁆𑀫𑀸 𑀘 𑀩𑁄𑀥𑀺𑀲𑀢𑁆𑀢𑁂𑀦 𑀯𑀲𑀺𑀢𑀓𑀼𑀘𑁆𑀙𑀺 𑀦𑀸𑀫 𑀘𑁂𑀢𑀺𑀬𑀕𑀩𑁆𑀪𑀲𑀤𑀺𑀲𑀸 𑀳𑁄𑀢𑀺, 𑀦 𑀲𑀓𑁆𑀓𑀸 𑀅𑀜𑁆𑀜𑁂𑀦 𑀲𑀢𑁆𑀢𑁂𑀦 𑀆𑀯𑀲𑀺𑀢𑀼𑀁 𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀸, 𑀢𑀲𑁆𑀫𑀸 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀲𑀢𑁆𑀢𑀸𑀳𑀚𑀸𑀢𑁂 𑀩𑁄𑀥𑀺𑀲𑀢𑁆𑀢𑁂 𑀓𑀸𑀮𑀁 𑀓𑀢𑁆𑀯𑀸 𑀢𑀼𑀲𑀺𑀢𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑀢𑀺. 𑀬𑀣𑀸 𑀘 𑀅𑀜𑁆𑀜𑀸 𑀇𑀢𑁆𑀣𑀺𑀬𑁄 𑀤𑀲 𑀫𑀸𑀲𑁂 𑀅𑀧𑀢𑁆𑀯𑀸𑀧𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸𑀧𑀺 𑀦𑀺𑀲𑀺𑀦𑁆𑀦𑀸𑀧𑀺 𑀦𑀺𑀧𑀦𑁆𑀦𑀸𑀧𑀺 𑀯𑀺𑀚𑀸𑀬𑀦𑁆𑀢𑀺, 𑀦 𑀏𑀯𑀁 𑀩𑁄𑀥𑀺𑀲𑀢𑁆𑀢𑀫𑀸𑀢𑀸. 𑀲𑀸 𑀧𑀦 𑀩𑁄𑀥𑀺𑀲𑀢𑁆𑀢𑀁 𑀤𑀲 𑀫𑀸𑀲𑁂 𑀓𑀼𑀘𑁆𑀙𑀺𑀦𑀸 𑀧𑀭𑀺𑀳𑀭𑀺𑀢𑁆𑀯𑀸 𑀞𑀺𑀢𑀸𑀯 𑀯𑀺𑀚𑀸𑀬𑀢𑀺. 𑀅𑀬𑀁 𑀩𑁄𑀥𑀺𑀲𑀢𑁆𑀢𑀫𑀸𑀢𑀼𑀥𑀫𑁆𑀫𑀢𑀸.

𑀫𑀳𑀸𑀫𑀸𑀬𑀸𑀧𑀺 𑀤𑁂𑀯𑀻 𑀧𑀢𑁆𑀢𑁂𑀦 𑀢𑁂𑀮𑀁 𑀯𑀺𑀬 𑀤𑀲 𑀫𑀸𑀲𑁂 𑀓𑀼𑀘𑁆𑀙𑀺𑀦𑀸 𑀩𑁄𑀥𑀺𑀲𑀢𑁆𑀢𑀁 𑀧𑀭𑀺𑀳𑀭𑀺𑀢𑁆𑀯𑀸 𑀧𑀭𑀺𑀧𑀼𑀡𑁆𑀡𑀕𑀩𑁆𑀪𑀸 𑀜𑀸𑀢𑀺𑀖𑀭𑀁 𑀕𑀦𑁆𑀢𑀼𑀓𑀸𑀫𑀸 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀲𑁆𑀲 𑀆𑀭𑁄𑀘𑁂𑀲𑀺 𑁋 ‘‘𑀇𑀘𑁆𑀙𑀸𑀫𑀳𑀁, 𑀤𑁂𑀯, 𑀓𑀼𑀮𑀲𑀦𑁆𑀢𑀓𑀁 𑀤𑁂𑀯𑀤𑀳𑀦𑀕𑀭𑀁 𑀕𑀦𑁆𑀢𑀼’’𑀦𑁆𑀢𑀺. 𑀭𑀸𑀚𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀓𑀧𑀺𑀮𑀯𑀢𑁆𑀣𑀼𑀢𑁄 𑀬𑀸𑀯 𑀤𑁂𑀯𑀤𑀳𑀦𑀕𑀭𑀸 𑀫𑀕𑁆𑀕𑀁 𑀲𑀫𑀁 𑀓𑀸𑀭𑁂𑀢𑁆𑀯𑀸 𑀓𑀤𑀮𑀺𑀧𑀼𑀡𑁆𑀡𑀖𑀝𑀥𑀚𑀧𑀝𑀸𑀓𑀸𑀤𑀻𑀳𑀺 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀤𑁂𑀯𑀺 𑀲𑀼𑀯𑀡𑁆𑀡𑀲𑀺𑀯𑀺𑀓𑀸𑀬 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀅𑀫𑀘𑁆𑀘𑀲𑀳𑀲𑁆𑀲𑁂𑀦 𑀉𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀧𑁂𑀲𑁂𑀲𑀺. 𑀤𑁆𑀯𑀺𑀦𑁆𑀦𑀁 𑀧𑀦 𑀦𑀕𑀭𑀸𑀦𑀁 𑀅𑀦𑁆𑀢𑀭𑁂 𑀉𑀪𑀬𑀦𑀕𑀭𑀯𑀸𑀲𑀻𑀦𑀫𑁆𑀧𑀺 𑀮𑀼𑀫𑁆𑀩𑀺𑀦𑀻𑀯𑀦𑀁 𑀦𑀸𑀫 𑀫𑀗𑁆𑀕𑀮𑀲𑀸𑀮𑀯𑀦𑀁 𑀅𑀢𑁆𑀣𑀺, 𑀢𑀲𑁆𑀫𑀺𑀁 𑀲𑀫𑀬𑁂 𑀫𑀽𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀕𑁆𑀕𑀲𑀸𑀔𑀸 𑀲𑀩𑁆𑀩𑀁 𑀏𑀓𑀧𑀸𑀮𑀺𑀨𑀼𑀮𑁆𑀮𑀁 𑀅𑀳𑁄𑀲𑀺, 𑀲𑀸𑀔𑀦𑁆𑀢𑀭𑁂𑀳𑀺 𑀘𑁂𑀯 𑀧𑀼𑀧𑁆𑀨𑀦𑁆𑀢𑀭𑁂𑀳𑀺 𑀘 𑀧𑀜𑁆𑀘𑀯𑀡𑁆𑀡𑀸 𑀪𑀫𑀭𑀕𑀡𑀸 𑀦𑀸𑀦𑀧𑁆𑀧𑀓𑀸𑀭𑀸 𑀘 𑀲𑀓𑀼𑀡𑀲𑀗𑁆𑀖𑀸 𑀫𑀥𑀼𑀭𑀲𑁆𑀲𑀭𑁂𑀦 𑀯𑀺𑀓𑀽𑀚𑀦𑁆𑀢𑀸 𑀯𑀺𑀘𑀭𑀦𑁆𑀢𑀺. 𑀲𑀓𑀮𑀁 𑀮𑀼𑀫𑁆𑀩𑀺𑀦𑀻𑀯𑀦𑀁 𑀘𑀺𑀢𑁆𑀢𑀮𑀢𑀸𑀯𑀦𑀲𑀤𑀺𑀲𑀁, 𑀫𑀳𑀸𑀦𑀼𑀪𑀸𑀯𑀲𑁆𑀲 𑀭𑀜𑁆𑀜𑁄 𑀲𑀼𑀲𑀚𑁆𑀚𑀺𑀢𑀁 𑀆𑀧𑀸𑀦𑀫𑀡𑁆𑀟𑀮𑀁 𑀯𑀺𑀬 𑀅𑀳𑁄𑀲𑀺. 𑀤𑁂𑀯𑀺𑀬𑀸 𑀢𑀁 𑀤𑀺𑀲𑁆𑀯𑀸 𑀲𑀸𑀮𑀯𑀦𑀓𑀻𑀴𑀁 𑀓𑀻𑀴𑀺𑀢𑀼𑀓𑀸𑀫𑀢𑀸𑀘𑀺𑀢𑁆𑀢𑀁 𑀉𑀤𑀧𑀸𑀤𑀺. 𑀅𑀫𑀘𑁆𑀘𑀸 𑀤𑁂𑀯𑀺𑀁 𑀕𑀳𑁂𑀢𑁆𑀯𑀸 𑀲𑀸𑀮𑀯𑀦𑀁 𑀧𑀯𑀺𑀲𑀺𑀁𑀲𑀼. 𑀲𑀸 𑀫𑀗𑁆𑀕𑀮𑀲𑀸𑀮𑀫𑀽𑀮𑀁 𑀕𑀦𑁆𑀢𑁆𑀯𑀸 𑀲𑀸𑀮𑀲𑀸𑀔𑀁 𑀕𑀡𑁆𑀳𑀺𑀢𑀼𑀓𑀸𑀫𑀸 𑀅𑀳𑁄𑀲𑀺, 𑀲𑀸𑀮𑀲𑀸𑀔𑀸 𑀲𑀼𑀲𑁂𑀤𑀺𑀢𑀯𑁂𑀢𑁆𑀢𑀕𑁆𑀕𑀁 𑀯𑀺𑀬 𑀑𑀦𑀫𑀺𑀢𑁆𑀯𑀸 𑀤𑁂𑀯𑀺𑀬𑀸 𑀳𑀢𑁆𑀣𑀧𑀣𑀁 𑀉𑀧𑀕𑀜𑁆𑀙𑀺. 𑀲𑀸 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑀲𑀸𑀔𑀁 𑀅𑀕𑁆𑀕𑀳𑁂𑀲𑀺. 𑀢𑀸𑀯𑀤𑁂𑀯 𑀘𑀲𑁆𑀲𑀸 𑀓𑀫𑁆𑀫𑀚𑀯𑀸𑀢𑀸 𑀘𑀮𑀺𑀁𑀲𑀼. 𑀅𑀣𑀲𑁆𑀲𑀸 𑀲𑀸𑀡𑀺𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀫𑀳𑀸𑀚𑀦𑁄 𑀧𑀝𑀺𑀓𑁆𑀓𑀫𑀺. 𑀲𑀸𑀮𑀲𑀸𑀔𑀁 𑀕𑀳𑁂𑀢𑁆𑀯𑀸 𑀢𑀺𑀝𑁆𑀞𑀫𑀸𑀦𑀸𑀬 𑀏𑀯𑀲𑁆𑀲𑀸 𑀕𑀩𑁆𑀪𑀯𑀼𑀝𑁆𑀞𑀸𑀦𑀁 𑀅𑀳𑁄𑀲𑀺. 𑀢𑀗𑁆𑀔𑀡𑀁𑀬𑁂𑀯 𑀘𑀢𑁆𑀢𑀸𑀭𑁄 𑀯𑀺𑀲𑀼𑀤𑁆𑀥𑀘𑀺𑀢𑁆𑀢𑀸 𑀫𑀳𑀸𑀩𑁆𑀭𑀳𑁆𑀫𑀸𑀦𑁄 𑀲𑀼𑀯𑀡𑁆𑀡𑀚𑀸𑀮𑀁 𑀆𑀤𑀸𑀬 𑀲𑀫𑁆𑀧𑀢𑁆𑀢𑀸 𑀢𑁂𑀦 𑀲𑀼𑀯𑀡𑁆𑀡𑀚𑀸𑀮𑁂𑀦 𑀩𑁄𑀥𑀺𑀲𑀢𑁆𑀢𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀫𑀸𑀢𑀼 𑀧𑀼𑀭𑀢𑁄 𑀞𑀧𑁂𑀢𑁆𑀯𑀸 ‘‘𑀅𑀢𑁆𑀢𑀫𑀦𑀸, 𑀤𑁂𑀯𑀺, 𑀳𑁄𑀳𑀺, 𑀫𑀳𑁂𑀲𑀓𑁆𑀔𑁄 𑀢𑁂 𑀧𑀼𑀢𑁆𑀢𑁄 𑀉𑀧𑁆𑀧𑀦𑁆𑀦𑁄’’𑀢𑀺 𑀆𑀳𑀁𑀲𑀼.

𑀬𑀣𑀸 𑀧𑀦 𑀅𑀜𑁆𑀜𑁂 𑀲𑀢𑁆𑀢𑀸 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀦𑁆𑀢𑀸 𑀧𑀝𑀺𑀓𑀽𑀮𑁂𑀦 𑀅𑀲𑀼𑀘𑀺𑀦𑀸 𑀫𑀓𑁆𑀔𑀺𑀢𑀸 𑀦𑀺𑀓𑁆𑀔𑀫𑀦𑁆𑀢𑀺, 𑀦 𑀏𑀯𑀁 𑀩𑁄𑀥𑀺𑀲𑀢𑁆𑀢𑁄. 𑀲𑁄 𑀧𑀦 𑀥𑀫𑁆𑀫𑀸𑀲𑀦𑀢𑁄 𑀑𑀢𑀭𑀦𑁆𑀢𑁄 𑀥𑀫𑁆𑀫𑀓𑀣𑀺𑀓𑁄 𑀯𑀺𑀬, 𑀦𑀺𑀲𑁆𑀲𑁂𑀡𑀺𑀢𑁄 𑀑𑀢𑀭𑀦𑁆𑀢𑁄 𑀧𑀼𑀭𑀺𑀲𑁄 𑀯𑀺𑀬, 𑀘 𑀤𑁆𑀯𑁂 𑀘 𑀳𑀢𑁆𑀣𑁂 𑀤𑁆𑀯𑁂 𑀘 𑀧𑀸𑀤𑁂 𑀧𑀲𑀸𑀭𑁂𑀢𑁆𑀯𑀸 𑀞𑀺𑀢𑀓𑁄𑀯 𑀫𑀸𑀢𑀼𑀓𑀼𑀘𑁆𑀙𑀺𑀲𑀫𑁆𑀪𑀯𑁂𑀦 𑀓𑁂𑀦𑀘𑀺 𑀅𑀲𑀼𑀘𑀺𑀦𑀸 𑀅𑀫𑀓𑁆𑀔𑀺𑀢𑁄 𑀲𑀼𑀤𑁆𑀥𑁄 𑀯𑀺𑀲𑀤𑁄 𑀓𑀸𑀲𑀺𑀓𑀯𑀢𑁆𑀣𑁂 𑀦𑀺𑀓𑁆𑀔𑀺𑀢𑁆𑀢𑀫𑀡𑀺𑀭𑀢𑀦𑀁 𑀯𑀺𑀬 𑀚𑁄𑀢𑀬𑀦𑁆𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀘 𑀩𑁄𑀥𑀺𑀲𑀢𑁆𑀢𑀫𑀸𑀢𑀼𑀬𑀸 𑀘 𑀲𑀓𑁆𑀓𑀸𑀭𑀢𑁆𑀣𑀁 𑀆𑀓𑀸𑀲𑀢𑁄 𑀤𑁆𑀯𑁂 𑀉𑀤𑀓𑀥𑀸𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀘 𑀫𑀸𑀢𑀼𑀬𑀸 𑀘 𑀲𑀭𑀻𑀭𑁂 𑀉𑀢𑀼𑀁 𑀕𑀸𑀳𑀸𑀧𑁂𑀲𑀼𑀁.

𑀅𑀣 𑀦𑀁 𑀲𑀼𑀯𑀡𑁆𑀡𑀚𑀸𑀮𑁂𑀦 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀞𑀺𑀢𑀸𑀦𑀁 𑀩𑁆𑀭𑀳𑁆𑀫𑀸𑀦𑀁 𑀳𑀢𑁆𑀣𑀢𑁄 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀫𑀗𑁆𑀕𑀮𑀲𑀫𑁆𑀫𑀢𑀸𑀬 𑀲𑀼𑀔𑀲𑀫𑁆𑀨𑀲𑁆𑀲𑀸𑀬 𑀅𑀚𑀺𑀦𑀧𑁆𑀧𑀯𑁂𑀡𑀺𑀬𑀸 𑀕𑀡𑁆𑀳𑀺𑀁𑀲𑀼, 𑀢𑁂𑀲𑀁 𑀳𑀢𑁆𑀣𑀢𑁄 𑀫𑀦𑀼𑀲𑁆𑀲𑀸 𑀤𑀼𑀓𑀽𑀮𑀘𑀼𑀫𑁆𑀩𑀝𑀓𑁂𑀦. 𑀫𑀦𑀼𑀲𑁆𑀲𑀸𑀦𑀁 𑀳𑀢𑁆𑀣𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀸𑀬 𑀧𑀼𑀭𑀢𑁆𑀣𑀺𑀫𑀤𑀺𑀲𑀁 𑀑𑀮𑁄𑀓𑁂𑀲𑀺, 𑀅𑀦𑁂𑀓𑀸𑀦𑀺 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑀸𑀦𑀺 𑀏𑀓𑀗𑁆𑀕𑀡𑀸𑀦𑀺 𑀅𑀳𑁂𑀲𑀼𑀁. 𑀢𑀢𑁆𑀣 𑀤𑁂𑀯𑀫𑀦𑀼𑀲𑁆𑀲𑀸 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑀬𑀫𑀸𑀦𑀸 ‘‘𑀫𑀳𑀸𑀧𑀼𑀭𑀺𑀲, 𑀇𑀥 𑀢𑀼𑀫𑁆𑀳𑁂𑀳𑀺 𑀲𑀤𑀺𑀲𑁄 𑀅𑀜𑁆𑀜𑁄 𑀦𑀢𑁆𑀣𑀺, 𑀓𑀼𑀢𑁂𑀢𑁆𑀣 𑀉𑀢𑁆𑀢𑀭𑀺𑀢𑀭𑁄’’𑀢𑀺 𑀆𑀳𑀁𑀲𑀼. 𑀏𑀯𑀁 𑀘𑀢𑀲𑁆𑀲𑁄 𑀤𑀺𑀲𑀸, 𑀘𑀢𑀲𑁆𑀲𑁄 𑀅𑀦𑀼𑀤𑀺𑀲𑀸, 𑀳𑁂𑀝𑁆𑀞𑀸, 𑀉𑀧𑀭𑀻𑀢𑀺 𑀤𑀲 𑀤𑀺𑀲𑀸 𑀅𑀦𑀼𑀯𑀺𑀮𑁄𑀓𑁂𑀢𑁆𑀯𑀸 𑀅𑀢𑁆𑀢𑀦𑀸 𑀲𑀤𑀺𑀲𑀁 𑀓𑀜𑁆𑀘𑀺 𑀅𑀤𑀺𑀲𑁆𑀯𑀸 ‘‘𑀅𑀬𑀁 𑀉𑀢𑁆𑀢𑀭𑀸𑀤𑀺𑀲𑀸’’𑀢𑀺 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑁂𑀦 𑀅𑀕𑀫𑀸𑀲𑀺, 𑀫𑀳𑀸𑀩𑁆𑀭𑀳𑁆𑀫𑀼𑀦𑀸 𑀲𑁂𑀢𑀘𑁆𑀙𑀢𑁆𑀢𑀁 𑀥𑀸𑀭𑀺𑀬𑀫𑀸𑀦𑁄, 𑀲𑀼𑀬𑀸𑀫𑁂𑀦 𑀯𑀸𑀴𑀩𑀻𑀚𑀦𑀺𑀁, 𑀅𑀜𑁆𑀜𑀸𑀳𑀺 𑀘 𑀤𑁂𑀯𑀢𑀸𑀳𑀺 𑀲𑁂𑀲𑀭𑀸𑀚𑀓𑀓𑀼𑀥𑀪𑀡𑁆𑀟𑀳𑀢𑁆𑀣𑀸𑀳𑀺 𑀅𑀦𑀼𑀕𑀫𑁆𑀫𑀫𑀸𑀦𑁄. 𑀢𑀢𑁄 𑀲𑀢𑁆𑀢𑀫𑀧𑀤𑁂 𑀞𑀺𑀢𑁄 ‘‘𑀅𑀕𑁆𑀕𑁄𑀳𑀫𑀲𑁆𑀫𑀺𑀁 𑀮𑁄𑀓𑀲𑁆𑀲𑀸’’𑀢𑀺𑀆𑀤𑀺𑀓𑀁 𑀆𑀲𑀪𑀺𑀁 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀦𑁆𑀢𑁄 𑀲𑀻𑀳𑀦𑀸𑀤𑀁 𑀦𑀤𑀺.

𑀩𑁄𑀥𑀺𑀲𑀢𑁆𑀢𑁄 𑀳𑀺 𑀢𑀻𑀲𑀼 𑀅𑀢𑁆𑀢𑀪𑀸𑀯𑁂𑀲𑀼 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀦𑁆𑀢𑀫𑀢𑁆𑀢𑁄𑀯 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀲𑀺 𑀫𑀳𑁄𑀲𑀥𑀢𑁆𑀢𑀪𑀸𑀯𑁂, 𑀯𑁂𑀲𑁆𑀲𑀦𑁆𑀢𑀭𑀢𑁆𑀢𑀪𑀸𑀯𑁂, 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂𑀢𑀺. 𑀫𑀳𑁄𑀲𑀥𑀢𑁆𑀢𑀪𑀸𑀯𑁂 𑀓𑀺𑀭𑀲𑁆𑀲 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀦𑁆𑀢𑀫𑀢𑁆𑀢𑀲𑁆𑀲𑁂𑀯 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀆𑀕𑀦𑁆𑀢𑁆𑀯𑀸 𑀘𑀦𑁆𑀤𑀦𑀲𑀸𑀭𑀁 𑀳𑀢𑁆𑀣𑁂 𑀞𑀧𑁂𑀢𑁆𑀯𑀸 𑀕𑀢𑁄, 𑀲𑁄 𑀢𑀁 𑀫𑀼𑀝𑁆𑀞𑀺𑀬𑀁 𑀓𑀢𑁆𑀯𑀸𑀯 𑀦𑀺𑀓𑁆𑀔𑀦𑁆𑀢𑁄. 𑀅𑀣 𑀦𑀁 𑀫𑀸𑀢𑀸 ‘‘𑀢𑀸𑀢, 𑀓𑀺𑀁 𑀕𑀳𑁂𑀢𑁆𑀯𑀸 𑀆𑀕𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀑𑀲𑀥𑀁, 𑀅𑀫𑁆𑀫𑀸’’𑀢𑀺. 𑀇𑀢𑀺 𑀑𑀲𑀥𑀁 𑀕𑀳𑁂𑀢𑁆𑀯𑀸 𑀆𑀕𑀢𑀢𑁆𑀢𑀸 ‘‘𑀑𑀲𑀥𑀤𑀸𑀭𑀓𑁄’’𑀢𑁆𑀯𑁂𑀯𑀲𑁆𑀲 𑀦𑀸𑀫𑀁 𑀅𑀓𑀁𑀲𑀼. 𑀢𑀁 𑀑𑀲𑀥𑀁 𑀕𑀳𑁂𑀢𑁆𑀯𑀸 𑀘𑀸𑀝𑀺𑀬𑀁 𑀧𑀓𑁆𑀔𑀺𑀧𑀺𑀁𑀲𑀼, 𑀆𑀕𑀢𑀸𑀕𑀢𑀸𑀦𑀁 𑀅𑀦𑁆𑀥𑀩𑀥𑀺𑀭𑀸𑀤𑀻𑀦𑀁 𑀢𑀤𑁂𑀯 𑀲𑀩𑁆𑀩𑀭𑁄𑀕𑀯𑀽𑀧𑀲𑀫𑀸𑀬 𑀪𑁂𑀲𑀚𑁆𑀚𑀁 𑀅𑀳𑁄𑀲𑀺. 𑀢𑀢𑁄 ‘‘𑀫𑀳𑀦𑁆𑀢𑀁 𑀇𑀤𑀁 𑀑𑀲𑀥𑀁, 𑀫𑀳𑀦𑁆𑀢𑀁 𑀇𑀤𑀁 𑀑𑀲𑀥’’𑀦𑁆𑀢𑀺 𑀉𑀧𑁆𑀧𑀦𑁆𑀦𑀯𑀘𑀦𑀁 𑀉𑀧𑀸𑀤𑀸𑀬 ‘‘𑀫𑀳𑁄𑀲𑀥𑁄’’𑀢𑁆𑀯𑁂𑀯𑀲𑁆𑀲 𑀦𑀸𑀫𑀁 𑀚𑀸𑀢𑀁. 𑀯𑁂𑀲𑁆𑀲𑀦𑁆𑀢𑀭𑀢𑁆𑀢𑀪𑀸𑀯𑁂 𑀧𑀦 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀦𑁆𑀢𑁄 𑀤𑀓𑁆𑀔𑀺𑀡𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 ‘‘𑀅𑀢𑁆𑀣𑀺 𑀦𑀼 𑀔𑁄, 𑀅𑀫𑁆𑀫, 𑀓𑀺𑀜𑁆𑀘𑀺 𑀕𑁂𑀳𑀲𑁆𑀫𑀺𑀁, 𑀤𑀸𑀦𑀁 𑀤𑀲𑁆𑀲𑀸𑀫𑀻’’𑀢𑀺 𑀯𑀤𑀦𑁆𑀢𑁄 𑀦𑀺𑀓𑁆𑀔𑀫𑀺. 𑀅𑀣𑀲𑁆𑀲 𑀫𑀸𑀢𑀸 ‘‘𑀲𑀥𑀦𑁂 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄𑀲𑀺, 𑀢𑀸𑀢𑀸’’𑀢𑀺 𑀧𑀼𑀢𑁆𑀢𑀲𑁆𑀲 𑀳𑀢𑁆𑀣𑀁 𑀅𑀢𑁆𑀢𑀦𑁄 𑀳𑀢𑁆𑀣𑀢𑀮𑁂 𑀓𑀢𑁆𑀯𑀸 𑀲𑀳𑀲𑁆𑀲𑀢𑁆𑀣𑀯𑀺𑀓𑀁 𑀞𑀧𑁂𑀲𑀺. 𑀇𑀫𑀲𑁆𑀫𑀺𑀁 𑀧𑀦 𑀅𑀢𑁆𑀢𑀪𑀸𑀯𑁂 𑀇𑀫𑀁 𑀲𑀻𑀳𑀦𑀸𑀤𑀁 𑀦𑀤𑀻𑀢𑀺 𑀏𑀯𑀁 𑀩𑁄𑀥𑀺𑀲𑀢𑁆𑀢𑁄 𑀢𑀻𑀲𑀼 𑀅𑀢𑁆𑀢𑀪𑀸𑀯𑁂𑀲𑀼 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀦𑁆𑀢𑀫𑀢𑁆𑀢𑁄𑀯 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀲𑀺. 𑀬𑀣𑀸 𑀘 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀓𑁆𑀔𑀡𑁂, 𑀚𑀸𑀢𑀓𑁆𑀔𑀡𑁂𑀧𑀺𑀲𑁆𑀲 𑀤𑁆𑀯𑀢𑁆𑀢𑀺𑀁𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺 𑀧𑀸𑀢𑀼𑀭𑀳𑁂𑀲𑀼𑀁. 𑀬𑀲𑁆𑀫𑀺𑀁 𑀧𑀦 𑀲𑀫𑀬𑁂 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 𑀮𑀼𑀫𑁆𑀩𑀺𑀦𑀻𑀯𑀦𑁂 𑀚𑀸𑀢𑁄, 𑀢𑀲𑁆𑀫𑀺𑀁𑀬𑁂𑀯 𑀲𑀫𑀬𑁂 𑀭𑀸𑀳𑀼𑀮𑀫𑀸𑀢𑀸 𑀤𑁂𑀯𑀻, 𑀆𑀦𑀦𑁆𑀤𑀢𑁆𑀣𑁂𑀭𑁄, 𑀙𑀦𑁆𑀦𑁄 𑀅𑀫𑀘𑁆𑀘𑁄, 𑀓𑀸𑀴𑀼𑀤𑀸𑀬𑀻 𑀅𑀫𑀘𑁆𑀘𑁄, 𑀓𑀡𑁆𑀟𑀓𑁄 𑀅𑀲𑁆𑀲𑀭𑀸𑀚𑀸, 𑀫𑀳𑀸𑀩𑁄𑀥𑀺𑀭𑀼𑀓𑁆𑀔𑁄, 𑀘𑀢𑀲𑁆𑀲𑁄 𑀦𑀺𑀥𑀺𑀓𑀼𑀫𑁆𑀪𑀺𑀬𑁄 𑀘 𑀚𑀸𑀢𑀸. 𑀢𑀢𑁆𑀣 𑀏𑀓𑀸 𑀕𑀸𑀯𑀼𑀢𑀧𑁆𑀧𑀫𑀸𑀡𑀸, 𑀏𑀓𑀸 𑀅𑀟𑁆𑀠𑀬𑁄𑀚𑀦𑀧𑁆𑀧𑀫𑀸𑀡𑀸, 𑀏𑀓𑀸 𑀢𑀺𑀕𑀸𑀯𑀼𑀢𑀧𑁆𑀧𑀫𑀸𑀡𑀸, 𑀏𑀓𑀸 𑀬𑁄𑀚𑀦𑀧𑁆𑀧𑀫𑀸𑀡𑀸 𑀅𑀳𑁄𑀲𑀻𑀢𑀺. 𑀇𑀫𑁂 𑀲𑀢𑁆𑀢 𑀲𑀳𑀚𑀸𑀢𑀸 𑀦𑀸𑀫.

𑀉𑀪𑀬𑀦𑀕𑀭𑀯𑀸𑀲𑀺𑀦𑁄 𑀩𑁄𑀥𑀺𑀲𑀢𑁆𑀢𑀁 𑀕𑀳𑁂𑀢𑁆𑀯𑀸 𑀓𑀧𑀺𑀮𑀯𑀢𑁆𑀣𑀼𑀦𑀕𑀭𑀫𑁂𑀯 𑀅𑀕𑀫𑀁𑀲𑀼. 𑀢𑀁 𑀤𑀺𑀯𑀲𑀁𑀬𑁂𑀯 𑀘 ‘‘𑀓𑀧𑀺𑀮𑀯𑀢𑁆𑀣𑀼𑀦𑀕𑀭𑁂 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀲𑁆𑀲 𑀧𑀼𑀢𑁆𑀢𑁄 𑀚𑀸𑀢𑁄, 𑀅𑀬𑀁 𑀓𑀼𑀫𑀸𑀭𑁄 𑀩𑁄𑀥𑀺𑀢𑀮𑁂 𑀦𑀺𑀲𑀻𑀤𑀺𑀢𑁆𑀯𑀸 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑀸𑀯𑀢𑀺𑀁𑀲𑀪𑀯𑀦𑁂 𑀳𑀝𑁆𑀞𑀢𑀼𑀝𑁆𑀞𑀸 𑀤𑁂𑀯𑀲𑀗𑁆𑀖𑀸 𑀘𑁂𑀮𑀼𑀓𑁆𑀔𑁂𑀧𑀸𑀤𑀻𑀦𑀺 𑀧𑀯𑀢𑁆𑀢𑁂𑀦𑁆𑀢𑀸 𑀓𑀻𑀴𑀺𑀁𑀲𑀼. 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀲𑁆𑀲 𑀓𑀼𑀮𑀽𑀧𑀓𑁄 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀻 𑀓𑀸𑀴𑀤𑁂𑀯𑀻𑀮𑁄 𑀦𑀸𑀫 𑀢𑀸𑀧𑀲𑁄 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀤𑀺𑀯𑀸𑀯𑀺𑀳𑀸𑀭𑀢𑁆𑀣𑀸𑀬 𑀢𑀸𑀯𑀢𑀺𑀁𑀲𑀪𑀯𑀦𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀺𑀦𑁆𑀦𑁄 𑀢𑀸 𑀤𑁂𑀯𑀢𑀸 𑀓𑀻𑀴𑀫𑀸𑀦𑀸 𑀤𑀺𑀲𑁆𑀯𑀸 ‘‘𑀓𑀺𑀁𑀓𑀸𑀭𑀡𑀸 𑀢𑀼𑀫𑁆𑀳𑁂 𑀏𑀯𑀁 𑀢𑀼𑀝𑁆𑀞𑀫𑀸𑀦𑀲𑀸 𑀓𑀻𑀴𑀣, 𑀫𑀬𑁆𑀳𑀫𑁆𑀧𑁂𑀢𑀁 𑀓𑀸𑀭𑀡𑀁 𑀓𑀣𑁂𑀣𑀸’’𑀢𑀺 𑀧𑀼𑀘𑁆𑀙𑀺. 𑀤𑁂𑀯𑀢𑀸 𑀆𑀳𑀁𑀲𑀼 ‘‘𑀫𑀸𑀭𑀺𑀲, 𑀲𑀼𑀤𑁆𑀥𑁄𑀤𑀦𑀭𑀜𑁆𑀜𑁄 𑀧𑀼𑀢𑁆𑀢𑁄 𑀚𑀸𑀢𑁄, 𑀲𑁄 𑀩𑁄𑀥𑀺𑀢𑀮𑁂 𑀦𑀺𑀲𑀻𑀤𑀺𑀢𑁆𑀯𑀸 𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀲𑁆𑀲𑀢𑀺, 𑀢𑀲𑁆𑀲 𑀅𑀦𑀦𑁆𑀢𑀁 𑀩𑀼𑀤𑁆𑀥𑀮𑀻𑀴𑀁 𑀤𑀝𑁆𑀞𑀼𑀁 𑀥𑀫𑁆𑀫𑀜𑁆𑀘 𑀲𑁄𑀢𑀼𑀁 𑀮𑀘𑁆𑀙𑀸𑀫𑀸𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀢𑀼𑀝𑁆𑀞𑀸𑀫𑁆𑀳𑀸’’𑀢𑀺. 𑀢𑀸𑀧𑀲𑁄 𑀢𑀸𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀔𑀺𑀧𑁆𑀧𑀁 𑀤𑁂𑀯𑀮𑁄𑀓𑀢𑁄 𑀑𑀭𑀼𑀬𑁆𑀳 𑀭𑀸𑀚𑀦𑀺𑀯𑁂𑀲𑀦𑀁 𑀧𑀯𑀺𑀲𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 ‘‘𑀧𑀼𑀢𑁆𑀢𑁄 𑀓𑀺𑀭 𑀢𑁂, 𑀫𑀳𑀸𑀭𑀸𑀚, 𑀚𑀸𑀢𑁄, 𑀧𑀲𑁆𑀲𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀆𑀳. 𑀭𑀸𑀚𑀸 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀁 𑀓𑀼𑀫𑀸𑀭𑀁 𑀆𑀳𑀭𑀸𑀧𑁂𑀢𑁆𑀯𑀸 𑀢𑀸𑀧𑀲𑀁 𑀯𑀦𑁆𑀤𑀸𑀧𑁂𑀢𑀼𑀁 𑀅𑀪𑀺𑀳𑀭𑀺, 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀸𑀤𑀸 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀢𑀸𑀧𑀲𑀲𑁆𑀲 𑀚𑀝𑀸𑀲𑀼 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀳𑀺 𑀢𑁂𑀦𑀢𑁆𑀢𑀪𑀸𑀯𑁂𑀦 𑀯𑀦𑁆𑀤𑀺𑀢𑀩𑁆𑀩𑀬𑀼𑀢𑁆𑀢𑀓𑁄 𑀦𑀸𑀫 𑀅𑀜𑁆𑀜𑁄 𑀦𑀢𑁆𑀣𑀺. 𑀲𑀘𑁂 𑀳𑀺 𑀅𑀚𑀸𑀦𑀦𑁆𑀢𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀻𑀲𑀁 𑀢𑀸𑀧𑀲𑀲𑁆𑀲 𑀧𑀸𑀤𑀫𑀽𑀮𑁂 𑀞𑀧𑁂𑀬𑁆𑀬𑀼𑀁, 𑀲𑀢𑁆𑀢𑀥𑀸 𑀢𑀲𑁆𑀲 𑀫𑀼𑀤𑁆𑀥𑀸 𑀨𑀮𑁂𑀬𑁆𑀬. 𑀢𑀸𑀧𑀲𑁄 ‘‘𑀦 𑀫𑁂 𑀅𑀢𑁆𑀢𑀸𑀦𑀁 𑀦𑀸𑀲𑁂𑀢𑀼𑀁 𑀬𑀼𑀢𑁆𑀢’’𑀦𑁆𑀢𑀺 𑀉𑀝𑁆𑀞𑀸𑀬𑀸𑀲𑀦𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀲𑀺. 𑀭𑀸𑀚𑀸 𑀢𑀁 𑀅𑀘𑁆𑀙𑀭𑀺𑀬𑀁 𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀧𑀼𑀢𑁆𑀢𑀁 𑀯𑀦𑁆𑀤𑀺.

𑀢𑀸𑀧𑀲𑁄 𑀅𑀢𑀻𑀢𑁂 𑀘𑀢𑁆𑀢𑀸𑀮𑀻𑀲 𑀓𑀧𑁆𑀧𑁂, 𑀅𑀦𑀸𑀕𑀢𑁂 𑀘𑀢𑁆𑀢𑀸𑀮𑀻𑀲𑀸𑀢𑀺 𑀅𑀲𑀻𑀢𑀺 𑀓𑀧𑁆𑀧𑁂 𑀅𑀦𑀼𑀲𑁆𑀲𑀭𑀢𑀺. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀮𑀓𑁆𑀔𑀡𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 ‘‘𑀪𑀯𑀺𑀲𑁆𑀲𑀢𑀺 𑀦𑀼 𑀔𑁄 𑀩𑀼𑀤𑁆𑀥𑁄, 𑀉𑀤𑀸𑀳𑀼 𑀦𑁄’’𑀢𑀺 𑀆𑀯𑀚𑁆𑀚𑁂𑀢𑁆𑀯𑀸 𑀉𑀧𑀥𑀸𑀭𑁂𑀦𑁆𑀢𑁄 ‘‘𑀦𑀺𑀲𑁆𑀲𑀁𑀲𑀬𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 ‘‘𑀅𑀘𑁆𑀙𑀭𑀺𑀬𑀧𑀼𑀭𑀺𑀲𑁄 𑀅𑀬’’𑀦𑁆𑀢𑀺 𑀲𑀺𑀢𑀁 𑀅𑀓𑀸𑀲𑀺. 𑀢𑀢𑁄 ‘‘𑀅𑀳𑀁 𑀇𑀫𑀁 𑀩𑀼𑀤𑁆𑀥𑀪𑀽𑀢𑀁 𑀤𑀝𑁆𑀞𑀼𑀁 𑀮𑀪𑀺𑀲𑁆𑀲𑀸𑀫𑀺 𑀦𑀼 𑀔𑁄, 𑀦𑁄’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 ‘‘𑀦 𑀮𑀪𑀺𑀲𑁆𑀲𑀸𑀫𑀺, 𑀅𑀦𑁆𑀢𑀭𑀸𑀬𑁂𑀯 𑀓𑀸𑀮𑀁 𑀓𑀢𑁆𑀯𑀸 𑀩𑀼𑀤𑁆𑀥𑀲𑀢𑁂𑀦𑀧𑀺 𑀩𑀼𑀤𑁆𑀥𑀲𑀳𑀲𑁆𑀲𑁂𑀦𑀧𑀺 𑀕𑀦𑁆𑀢𑁆𑀯𑀸 𑀩𑁄𑀥𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁂 𑀅𑀭𑀽𑀧𑀪𑀯𑁂 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀸𑀫𑀻’’𑀢𑀺 𑀤𑀺𑀲𑁆𑀯𑀸 ‘‘𑀏𑀯𑀭𑀽𑀧𑀁 𑀦𑀸𑀫 𑀅𑀘𑁆𑀙𑀭𑀺𑀬𑀧𑀼𑀭𑀺𑀲𑀁 𑀩𑀼𑀤𑁆𑀥𑀪𑀽𑀢𑀁 𑀤𑀝𑁆𑀞𑀼𑀁 𑀦 𑀮𑀪𑀺𑀲𑁆𑀲𑀸𑀫𑀺, 𑀫𑀳𑀢𑀻 𑀯𑀢 𑀫𑁂 𑀚𑀸𑀦𑀺 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀭𑁄𑀤𑀺.

𑀫𑀦𑀼𑀲𑁆𑀲𑀸 𑀤𑀺𑀲𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀅𑀬𑁆𑀬𑁄 𑀇𑀤𑀸𑀦𑁂𑀯 𑀳𑀲𑀺𑀢𑁆𑀯𑀸 𑀧𑀼𑀦 𑀧𑀭𑁄𑀤𑀺. 𑀓𑀺𑀁 𑀦𑀼 𑀔𑁄, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀅𑀬𑁆𑀬𑀧𑀼𑀢𑁆𑀢𑀲𑁆𑀲 𑀓𑁄𑀘𑀺 𑀅𑀦𑁆𑀢𑀭𑀸𑀬𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀼𑀘𑁆𑀙𑀺𑀁𑀲𑀼. ‘‘𑀦𑀢𑁆𑀣𑁂𑀢𑀲𑁆𑀲 𑀅𑀦𑁆𑀢𑀭𑀸𑀬𑁄, 𑀦𑀺𑀲𑁆𑀲𑀁𑀲𑀬𑁂𑀦 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀅𑀣 ‘‘𑀓𑀲𑁆𑀫𑀸 𑀧𑀭𑁄𑀤𑀺𑀢𑁆𑀣𑀸’’𑀢𑀺? ‘‘𑀏𑀯𑀭𑀽𑀧𑀁 𑀧𑀼𑀭𑀺𑀲𑀁 𑀩𑀼𑀤𑁆𑀥𑀪𑀽𑀢𑀁 𑀤𑀝𑁆𑀞𑀼𑀁 𑀦 𑀮𑀪𑀺𑀲𑁆𑀲𑀸𑀫𑀺, ‘𑀫𑀳𑀢𑀻 𑀯𑀢 𑀫𑁂 𑀚𑀸𑀦𑀺 𑀪𑀯𑀺𑀲𑁆𑀲𑀢𑀻’𑀢𑀺 𑀅𑀢𑁆𑀢𑀸𑀦𑀁 𑀅𑀦𑀼𑀲𑁄𑀘𑀦𑁆𑀢𑁄 𑀭𑁄𑀤𑀸𑀫𑀻’’𑀢𑀺 𑀆𑀳. 𑀢𑀢𑁄 𑀲𑁄 ‘‘𑀓𑀺𑀁 𑀦𑀼 𑀔𑁄 𑀫𑁂 𑀜𑀸𑀢𑀓𑁂𑀲𑀼 𑀓𑁄𑀘𑀺 𑀏𑀢𑀁 𑀩𑀼𑀤𑁆𑀥𑀪𑀽𑀢𑀁 𑀤𑀝𑁆𑀞𑀼𑀁 𑀮𑀪𑀺𑀲𑁆𑀲𑀢𑀺, 𑀦 𑀮𑀪𑀺𑀲𑁆𑀲𑀢𑀻’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 𑀅𑀢𑁆𑀢𑀦𑁄 𑀪𑀸𑀕𑀺𑀦𑁂𑀬𑁆𑀬𑀁 𑀦𑀸𑀴𑀓𑀤𑀸𑀭𑀓𑀁 𑀅𑀤𑁆𑀤𑀲. 𑀲𑁄 𑀪𑀕𑀺𑀦𑀺𑀬𑀸 𑀕𑁂𑀳𑀁 𑀕𑀦𑁆𑀢𑁆𑀯𑀸 ‘‘𑀓𑀳𑀁 𑀢𑁂 𑀧𑀼𑀢𑁆𑀢𑁄 𑀦𑀸𑀴𑀓𑁄’’𑀢𑀺? ‘‘𑀅𑀢𑁆𑀣𑀺 𑀕𑁂𑀳𑁂, 𑀅𑀬𑁆𑀬𑀸’’𑀢𑀺. ‘‘𑀧𑀓𑁆𑀓𑁄𑀲𑀸𑀳𑀺 𑀦’’𑀦𑁆𑀢𑀺 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀆𑀕𑀢𑀁 𑀓𑀼𑀫𑀸𑀭𑀁 𑀆𑀳 𑁋 ‘‘𑀢𑀸𑀢, 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀲𑁆𑀲 𑀓𑀼𑀮𑁂 𑀧𑀼𑀢𑁆𑀢𑁄 𑀚𑀸𑀢𑁄, 𑀩𑀼𑀤𑁆𑀥𑀗𑁆𑀓𑀼𑀭𑁄 𑀏𑀲, 𑀧𑀜𑁆𑀘𑀢𑀺𑀁𑀲 𑀯𑀲𑁆𑀲𑀸𑀦𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺, 𑀢𑁆𑀯𑀁 𑀏𑀢𑀁 𑀤𑀝𑁆𑀞𑀼𑀁 𑀮𑀪𑀺𑀲𑁆𑀲𑀲𑀺, 𑀅𑀚𑁆𑀚𑁂𑀯 𑀧𑀩𑁆𑀩𑀚𑀸𑀳𑀻’’𑀢𑀺. 𑀲𑀢𑁆𑀢𑀸𑀲𑀻𑀢𑀺𑀓𑁄𑀝𑀺𑀥𑀦𑁂 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀤𑀸𑀭𑀓𑁄𑀧𑀺 ‘‘𑀦 𑀫𑀁 𑀫𑀸𑀢𑀼𑀮𑁄 𑀅𑀦𑀢𑁆𑀣𑁂 𑀦𑀺𑀬𑁄𑀚𑁂𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀸𑀯𑀤𑁂𑀯 𑀅𑀦𑁆𑀢𑀭𑀸𑀧𑀡𑀢𑁄 𑀓𑀸𑀲𑀸𑀬𑀸𑀦𑀺 𑀘𑁂𑀯 𑀫𑀢𑁆𑀢𑀺𑀓𑀸𑀧𑀢𑁆𑀢𑀜𑁆𑀘 𑀆𑀳𑀭𑀸𑀧𑁂𑀢𑁆𑀯𑀸 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 ‘‘𑀬𑁄 𑀮𑁄𑀓𑁂 𑀉𑀢𑁆𑀢𑀫𑀧𑀼𑀕𑁆𑀕𑀮𑁄, 𑀢𑀁 𑀉𑀤𑁆𑀤𑀺𑀲𑁆𑀲 𑀫𑀬𑁆𑀳𑀁 𑀧𑀩𑁆𑀩𑀚𑁆𑀚𑀸’’𑀢𑀺 𑀩𑁄𑀥𑀺𑀲𑀢𑁆𑀢𑀸𑀪𑀺𑀫𑀼𑀔𑀁 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀧𑀢𑁆𑀢𑀁 𑀣𑀯𑀺𑀓𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸 𑀅𑀁𑀲𑀓𑀽𑀝𑁂 𑀮𑀕𑁆𑀕𑁂𑀢𑁆𑀯𑀸 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀅𑀓𑀸𑀲𑀺. 𑀲𑁄 𑀧𑀭𑀫𑀸𑀪𑀺𑀲𑀫𑁆𑀩𑁄𑀥𑀺𑀁 𑀧𑀢𑁆𑀢𑀁 𑀢𑀣𑀸𑀕𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀦𑀸𑀴𑀓𑀧𑀝𑀺𑀧𑀤𑀁 𑀓𑀣𑀸𑀧𑁂𑀢𑁆𑀯𑀸 𑀧𑀼𑀦 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀉𑀓𑁆𑀓𑀝𑁆𑀞𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄 𑀲𑀢𑁆𑀢𑁂𑀯 𑀫𑀸𑀲𑁂 𑀆𑀬𑀼𑀁 𑀧𑀸𑀮𑁂𑀢𑁆𑀯𑀸 𑀏𑀓𑀁 𑀲𑀼𑀯𑀡𑁆𑀡𑀧𑀩𑁆𑀩𑀢𑀁 𑀦𑀺𑀲𑁆𑀲𑀸𑀬 𑀞𑀺𑀢𑀓𑁄𑀯 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺.

𑀩𑁄𑀥𑀺𑀲𑀢𑁆𑀢𑀫𑁆𑀧𑀺 𑀔𑁄 𑀧𑀜𑁆𑀘𑀫𑁂 𑀤𑀺𑀯𑀲𑁂 𑀲𑀻𑀲𑀁 𑀦𑁆𑀳𑀸𑀧𑁂𑀢𑁆𑀯𑀸 ‘‘𑀦𑀸𑀫𑀕𑁆𑀕𑀳𑀡𑀁 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀭𑀸𑀚𑀪𑀯𑀦𑀁 𑀘𑀢𑀼𑀚𑁆𑀚𑀸𑀢𑀺𑀓𑀕𑀦𑁆𑀥𑁂𑀳𑀺 𑀯𑀺𑀮𑀺𑀫𑁆𑀧𑀺𑀢𑁆𑀯𑀸 𑀮𑀸𑀚𑀸𑀧𑀜𑁆𑀘𑀫𑀓𑀸𑀦𑀺 𑀧𑀼𑀧𑁆𑀨𑀸𑀦𑀺 𑀯𑀺𑀓𑀺𑀭𑀺𑀢𑁆𑀯𑀸 𑀅𑀲𑀫𑁆𑀪𑀺𑀦𑁆𑀦𑀧𑀸𑀬𑀸𑀲𑀁 𑀧𑀘𑀸𑀧𑁂𑀢𑁆𑀯𑀸 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀗𑁆𑀕𑀢𑁂 𑀅𑀝𑁆𑀞𑀲𑀢𑀩𑁆𑀭𑀸𑀳𑁆𑀫𑀡𑁂 𑀦𑀺𑀫𑀦𑁆𑀢𑁂𑀢𑁆𑀯𑀸 𑀭𑀸𑀚𑀪𑀯𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀲𑀼𑀪𑁄𑀚𑀦𑀁 𑀪𑁄𑀚𑁂𑀢𑁆𑀯𑀸 𑀫𑀳𑀸𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀮𑀓𑁆𑀔𑀡𑀸𑀦𑀺 𑀧𑀭𑀺𑀕𑁆𑀕𑀳𑀸𑀧𑁂𑀲𑀼𑀁. 𑀢𑁂𑀲𑀼 𑁋

‘‘𑀭𑀸𑀫𑁄 𑀥𑀚𑁄 𑀮𑀓𑁆𑀔𑀡𑁄 𑀘𑀸𑀧𑀺 𑀫𑀦𑁆𑀢𑀻, 𑀓𑁄𑀡𑁆𑀟𑀜𑁆𑀜𑁄 𑀘 𑀪𑁄𑀚𑁄 𑀲𑀼𑀬𑀸𑀫𑁄 𑀲𑀼𑀤𑀢𑁆𑀢𑁄;

𑀏𑀢𑁂 𑀢𑀤𑀸 𑀅𑀝𑁆𑀞 𑀅𑀳𑁂𑀲𑀼𑀁 𑀩𑁆𑀭𑀸𑀳𑁆𑀫𑀡𑀸, 𑀙𑀴𑀗𑁆𑀕𑀯𑀸 𑀫𑀦𑁆𑀢𑀁 𑀯𑀺𑀬𑀸𑀓𑀭𑀺𑀁𑀲𑀽’’𑀢𑀺. 𑁋

𑀇𑀫𑁂 𑀅𑀝𑁆𑀞𑁂𑀯 𑀩𑁆𑀭𑀸𑀳𑁆𑀫𑀡𑀸 𑀮𑀓𑁆𑀔𑀡𑀧𑀭𑀺𑀕𑁆𑀕𑀸𑀳𑀓𑀸 𑀅𑀳𑁂𑀲𑀼𑀁. 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀤𑀺𑀯𑀲𑁂 𑀲𑀼𑀧𑀺𑀦𑁄𑀧𑀺 𑀏𑀢𑁂𑀳𑁂𑀯 𑀧𑀭𑀺𑀕𑁆𑀕𑀳𑀺𑀢𑁄. 𑀢𑁂𑀲𑀼 𑀲𑀢𑁆𑀢 𑀚𑀦𑀸 𑀤𑁆𑀯𑁂 𑀅𑀗𑁆𑀕𑀼𑀮𑀺𑀬𑁄 𑀉𑀓𑁆𑀔𑀺𑀧𑀺𑀢𑁆𑀯𑀸 𑀤𑁆𑀯𑁂𑀥𑀸 𑀩𑁆𑀬𑀸𑀓𑀭𑀺𑀁𑀲𑀼 𑁋 ‘‘𑀇𑀫𑁂𑀳𑀺 𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀫𑀸𑀦𑁄 𑀭𑀸𑀚𑀸 𑀳𑁄𑀢𑀺 𑀘𑀓𑁆𑀓𑀯𑀢𑁆𑀢𑀻, 𑀧𑀩𑁆𑀩𑀚𑀫𑀸𑀦𑁄 𑀩𑀼𑀤𑁆𑀥𑁄’’𑀢𑀺, 𑀲𑀩𑁆𑀩𑀁 𑀘𑀓𑁆𑀓𑀯𑀢𑁆𑀢𑀺𑀭𑀜𑁆𑀜𑁄 𑀲𑀺𑀭𑀺𑀯𑀺𑀪𑀯𑀁 𑀆𑀘𑀺𑀓𑁆𑀔𑀺𑀁𑀲𑀼. 𑀢𑁂𑀲𑀁 𑀧𑀦 𑀲𑀩𑁆𑀩𑀤𑀳𑀭𑁄 𑀕𑁄𑀢𑁆𑀢𑀢𑁄 𑀓𑁄𑀡𑁆𑀟𑀜𑁆𑀜𑁄 𑀦𑀸𑀫 𑀫𑀸𑀡𑀯𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀭𑀮𑀓𑁆𑀔𑀡𑀦𑀺𑀧𑁆𑀨𑀢𑁆𑀢𑀺𑀁 𑀑𑀮𑁄𑀓𑁂𑀢𑁆𑀯𑀸 𑁋 ‘‘𑀇𑀫𑀲𑁆𑀲 𑀅𑀕𑀸𑀭𑀫𑀚𑁆𑀛𑁂 𑀞𑀸𑀦𑀓𑀸𑀭𑀡𑀁 𑀦𑀢𑁆𑀣𑀺, 𑀏𑀓𑀦𑁆𑀢𑁂𑀦𑁂𑀲 𑀯𑀺𑀯𑀝𑁆𑀝𑀘𑁆𑀙𑀤𑁄 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀓𑀫𑁂𑀯 𑀅𑀗𑁆𑀕𑀼𑀮𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀏𑀓𑀁𑀲𑀩𑁆𑀬𑀸𑀓𑀭𑀡𑀁 𑀩𑁆𑀬𑀸𑀓𑀸𑀲𑀺. 𑀅𑀬𑀜𑁆𑀳𑀺 𑀓𑀢𑀸𑀥𑀺𑀓𑀸𑀭𑁄 𑀧𑀘𑁆𑀙𑀺𑀫𑀪𑀯𑀺𑀓𑀲𑀢𑁆𑀢𑁄 𑀧𑀜𑁆𑀜𑀸𑀬 𑀇𑀢𑀭𑁂 𑀲𑀢𑁆𑀢 𑀚𑀦𑁂 𑀅𑀪𑀺𑀪𑀯𑀺𑀢𑁆𑀯𑀸 ‘‘𑀇𑀫𑁂𑀳𑀺 𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀅𑀕𑀸𑀭𑀫𑀚𑁆𑀛𑁂 𑀞𑀸𑀦𑀁 𑀦𑀸𑀫 𑀦𑀢𑁆𑀣𑀺, 𑀅𑀲𑀁𑀲𑀬𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀓𑀫𑁂𑀯 𑀕𑀢𑀺𑀁 𑀅𑀤𑁆𑀤𑀲, 𑀢𑀲𑁆𑀫𑀸 𑀏𑀓𑀁 𑀅𑀗𑁆𑀕𑀼𑀮𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀏𑀯𑀁 𑀩𑁆𑀬𑀸𑀓𑀸𑀲𑀺. 𑀅𑀣𑀲𑁆𑀲 𑀦𑀸𑀫𑀁 𑀕𑀡𑁆𑀳𑀦𑁆𑀢𑀸 𑀲𑀩𑁆𑀩𑀮𑁄𑀓𑀲𑁆𑀲 𑀅𑀢𑁆𑀣𑀲𑀺𑀤𑁆𑀥𑀺𑀓𑀭𑀢𑁆𑀢𑀸 ‘‘𑀲𑀺𑀤𑁆𑀥𑀢𑁆𑀣𑁄’’𑀢𑀺 𑀦𑀸𑀫𑀫𑀓𑀁𑀲𑀼.

𑀅𑀣 𑀢𑁂 𑀩𑁆𑀭𑀸𑀳𑁆𑀫𑀡𑀸 𑀅𑀢𑁆𑀢𑀦𑁄 𑀖𑀭𑀸𑀦𑀺 𑀕𑀦𑁆𑀢𑁆𑀯𑀸 𑀧𑀼𑀢𑁆𑀢𑁂 𑀆𑀫𑀦𑁆𑀢𑀬𑀺𑀁𑀲𑀼 𑁋 ‘‘𑀢𑀸𑀢𑀸, 𑀅𑀫𑁆𑀳𑁂 𑀫𑀳𑀮𑁆𑀮𑀓𑀸, 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀲𑁆𑀲 𑀧𑀼𑀢𑁆𑀢𑀁 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑀁 𑀫𑀬𑀁 𑀲𑀫𑁆𑀪𑀯𑁂𑀬𑁆𑀬𑀸𑀫 𑀯𑀸 𑀦𑁄 𑀯𑀸, 𑀢𑀼𑀫𑁆𑀳𑁂 𑀢𑀲𑁆𑀫𑀺𑀁 𑀓𑀼𑀫𑀸𑀭𑁂 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁂 𑀢𑀲𑁆𑀲 𑀲𑀸𑀲𑀦𑁂 𑀧𑀩𑁆𑀩𑀚𑁂𑀬𑁆𑀬𑀸𑀣𑀸’’𑀢𑀺. 𑀢𑁂 𑀲𑀢𑁆𑀢𑀧𑀺 𑀚𑀦𑀸 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑀸, 𑀓𑁄𑀡𑁆𑀟𑀜𑁆𑀜𑀫𑀸𑀡𑀯𑁄𑀯 𑀅𑀭𑁄𑀕𑁄 𑀅𑀳𑁄𑀲𑀺. 𑀲𑁄 𑀫𑀳𑀸𑀲𑀢𑁆𑀢𑁂 𑀯𑀼𑀟𑁆𑀠𑀺𑀫𑀦𑁆𑀯𑀸𑀬 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀅𑀪𑀺𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀉𑀭𑀼𑀯𑁂𑀮𑀁 𑀕𑀦𑁆𑀢𑁆𑀯𑀸 ‘‘𑀭𑀫𑀡𑀻𑀬𑁄, 𑀯𑀢 𑀅𑀬𑀁 𑀪𑀽𑀫𑀺𑀪𑀸𑀕𑁄, 𑀅𑀮𑀁 𑀯𑀢𑀺𑀤𑀁 𑀓𑀼𑀮𑀧𑀼𑀢𑁆𑀢𑀲𑁆𑀲 𑀧𑀥𑀸𑀦𑀢𑁆𑀣𑀺𑀓𑀲𑁆𑀲 𑀧𑀥𑀸𑀦𑀸𑀬𑀸’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀢𑁆𑀣 𑀯𑀸𑀲𑀁 𑀉𑀧𑀕𑀢𑁂 ‘‘𑀫𑀳𑀸𑀧𑀼𑀭𑀺𑀲𑁄 𑀧𑀩𑁆𑀩𑀚𑀺𑀢𑁄’’𑀢𑀺 𑀲𑀼𑀢𑁆𑀯𑀸 𑀢𑁂𑀲𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀼𑀢𑁆𑀢𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀳 ‘‘𑀲𑀺𑀤𑁆𑀥𑀢𑁆𑀣𑀓𑀼𑀫𑀸𑀭𑁄 𑀓𑀺𑀭 𑀧𑀩𑁆𑀩𑀚𑀺𑀢𑁄, 𑀲𑁄 𑀦𑀺𑀲𑁆𑀲𑀁𑀲𑀬𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺. 𑀲𑀘𑁂 𑀢𑀼𑀫𑁆𑀳𑀸𑀓𑀁 𑀧𑀺𑀢𑀭𑁄 𑀅𑀭𑁄𑀕𑀸 𑀅𑀲𑁆𑀲𑀼, 𑀅𑀚𑁆𑀚 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑁂𑀬𑁆𑀬𑀼𑀁. 𑀲𑀘𑁂 𑀢𑀼𑀫𑁆𑀳𑁂𑀧𑀺 𑀇𑀘𑁆𑀙𑁂𑀬𑁆𑀬𑀸𑀣, 𑀏𑀣, 𑀅𑀳𑀁 𑀢𑀁 𑀧𑀼𑀭𑀺𑀲𑀁 𑀅𑀦𑀼𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. 𑀢𑁂 𑀲𑀩𑁆𑀩𑁂 𑀏𑀓𑀘𑁆𑀙𑀦𑁆𑀤𑀸 𑀪𑀯𑀺𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼, 𑀢𑀬𑁄 𑀚𑀦𑀸 𑀦 𑀧𑀩𑁆𑀩𑀚𑀺𑀁𑀲𑀼. 𑀓𑁄𑀡𑁆𑀟𑀜𑁆𑀜𑀩𑁆𑀭𑀸𑀳𑁆𑀫𑀡𑀁 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀇𑀢𑀭𑁂 𑀘𑀢𑁆𑀢𑀸𑀭𑁄 𑀧𑀩𑁆𑀩𑀚𑀺𑀁𑀲𑀼. 𑀢𑁂 𑀧𑀜𑁆𑀘𑀧𑀺 𑀚𑀦𑀸 𑀧𑀜𑁆𑀘𑀯𑀕𑁆𑀕𑀺𑀬𑀢𑁆𑀣𑁂𑀭𑀸 𑀦𑀸𑀫 𑀚𑀸𑀢𑀸.

𑀢𑀤𑀸 𑀧𑀦 𑀭𑀸𑀚𑀸 ‘‘𑀓𑀺𑀁 𑀤𑀺𑀲𑁆𑀯𑀸 𑀫𑀬𑁆𑀳𑀁 𑀧𑀼𑀢𑁆𑀢𑁄 𑀧𑀩𑁆𑀩𑀚𑀺𑀲𑁆𑀲𑀢𑀻’’𑀢𑀺 𑀧𑀼𑀘𑁆𑀙𑀺. ‘‘𑀘𑀢𑁆𑀢𑀸𑀭𑀺 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀻’’𑀢𑀺. ‘‘𑀓𑀢𑀭𑀜𑁆𑀘 𑀓𑀢𑀭𑀜𑁆𑀘𑀸’’𑀢𑀺? ‘‘𑀚𑀭𑀸𑀚𑀺𑀡𑁆𑀡𑀁, 𑀩𑁆𑀬𑀸𑀥𑀺𑀢𑀁, 𑀓𑀸𑀮𑀓𑀢𑀁, 𑀧𑀩𑁆𑀩𑀚𑀺𑀢’’𑀦𑁆𑀢𑀺. 𑀭𑀸𑀚𑀸 ‘‘𑀇𑀢𑁄 𑀧𑀝𑁆𑀞𑀸𑀬 𑀏𑀯𑀭𑀽𑀧𑀸𑀦𑀁 𑀫𑀫 𑀧𑀼𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀉𑀧𑀲𑀗𑁆𑀓𑀫𑀺𑀢𑀼𑀁 𑀫𑀸 𑀅𑀤𑀢𑁆𑀣, 𑀫𑀬𑁆𑀳𑀁 𑀧𑀼𑀢𑁆𑀢𑀲𑁆𑀲 𑀩𑀼𑀤𑁆𑀥𑀪𑀸𑀯𑁂𑀦 𑀓𑀫𑁆𑀫𑀁 𑀦𑀢𑁆𑀣𑀺, 𑀅𑀳𑀁 𑀫𑀫 𑀧𑀼𑀢𑁆𑀢𑀁 𑀤𑁆𑀯𑀺𑀲𑀳𑀲𑁆𑀲𑀤𑀻𑀧𑀧𑀭𑀺𑀯𑀸𑀭𑀸𑀦𑀁 𑀘𑀢𑀼𑀦𑁆𑀦𑀁 𑀫𑀳𑀸𑀤𑀻𑀧𑀸𑀦𑀁 𑀇𑀲𑁆𑀲𑀭𑀺𑀬𑀸𑀥𑀺𑀧𑀘𑁆𑀘𑀁 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑀁 𑀙𑀢𑁆𑀢𑀺𑀁𑀲𑀬𑁄𑀚𑀦𑀧𑀭𑀺𑀫𑀡𑁆𑀟𑀮𑀸𑀬 𑀧𑀭𑀺𑀲𑀸𑀬 𑀧𑀭𑀺𑀯𑀼𑀢𑀁 𑀕𑀕𑀦𑀢𑀮𑁂 𑀯𑀺𑀘𑀭𑀫𑀸𑀦𑀁 𑀧𑀲𑁆𑀲𑀺𑀢𑀼𑀓𑀸𑀫𑁄’’𑀢𑀺. 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀇𑀫𑁂𑀲𑀁 𑀘𑀢𑀼𑀧𑁆𑀧𑀓𑀸𑀭𑀸𑀦𑀁 𑀦𑀺𑀫𑀺𑀢𑁆𑀢𑀸𑀦𑀁 𑀓𑀼𑀫𑀸𑀭𑀲𑁆𑀲 𑀘𑀓𑁆𑀔𑀼𑀧𑀣𑁂 𑀆𑀕𑀫𑀦𑀦𑀺𑀯𑀸𑀭𑀡𑀢𑁆𑀣𑀁 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀕𑀸𑀯𑀼𑀢𑁂 𑀕𑀸𑀯𑀼𑀢𑁂 𑀆𑀭𑀓𑁆𑀔𑀁 𑀞𑀧𑁂𑀲𑀺. 𑀢𑀁 𑀤𑀺𑀯𑀲𑀁 𑀧𑀦 𑀫𑀗𑁆𑀕𑀮𑀝𑁆𑀞𑀸𑀦𑁂 𑀲𑀦𑁆𑀦𑀺𑀧𑀢𑀺𑀢𑁂𑀲𑀼 𑀅𑀲𑀻𑀢𑀺𑀬𑀸 𑀜𑀸𑀢𑀺𑀓𑀼𑀮𑀲𑀳𑀲𑁆𑀲𑁂𑀲𑀼 𑀏𑀓𑁂𑀓𑁄 𑀏𑀓𑀫𑁂𑀓𑀁 𑀧𑀼𑀢𑁆𑀢𑀁 𑀧𑀝𑀺𑀚𑀸𑀦𑀺 𑁋 ‘‘𑀅𑀬𑀁 𑀩𑀼𑀤𑁆𑀥𑁄 𑀯𑀸 𑀳𑁄𑀢𑀼 𑀭𑀸𑀚𑀸 𑀯𑀸, 𑀫𑀬𑀁 𑀏𑀓𑀫𑁂𑀓𑀁 𑀧𑀼𑀢𑁆𑀢𑀁 𑀤𑀲𑁆𑀲𑀸𑀫. 𑀲𑀘𑁂𑀧𑀺 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺, 𑀔𑀢𑁆𑀢𑀺𑀬𑀲𑀫𑀡𑁂𑀳𑁂𑀯 𑀧𑀼𑀭𑀓𑁆𑀔𑀢𑀧𑀭𑀺𑀯𑀸𑀭𑀺𑀢𑁄 𑀯𑀺𑀘𑀭𑀺𑀲𑁆𑀲𑀢𑀺. 𑀲𑀘𑁂𑀧𑀺 𑀭𑀸𑀚𑀸 𑀪𑀯𑀺𑀲𑁆𑀲𑀢𑀺, 𑀔𑀢𑁆𑀢𑀺𑀬𑀓𑀼𑀫𑀸𑀭𑁂𑀳𑁂𑀯 𑀧𑀼𑀭𑀓𑁆𑀔𑀢𑀧𑀭𑀺𑀯𑀸𑀭𑀺𑀢𑁄 𑀯𑀺𑀘𑀭𑀺𑀲𑁆𑀲𑀢𑀻’’𑀢𑀺. 𑀭𑀸𑀚𑀸𑀧𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀉𑀢𑁆𑀢𑀫𑀭𑀽𑀧𑀲𑀫𑁆𑀧𑀦𑁆𑀦𑀸 𑀯𑀺𑀕𑀢𑀲𑀩𑁆𑀩𑀤𑁄𑀲𑀸 𑀥𑀸𑀢𑀺𑀬𑁄 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀅𑀦𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀫𑀳𑀦𑁆𑀢𑁂𑀦 𑀲𑀺𑀭𑀺𑀲𑁄𑀪𑀕𑁆𑀕𑁂𑀦 𑀯𑀟𑁆𑀠𑀢𑀺.

𑀅𑀣𑁂𑀓𑀤𑀺𑀯𑀲𑀁 𑀭𑀜𑁆𑀜𑁄 𑀯𑀧𑁆𑀧𑀫𑀗𑁆𑀕𑀮𑀁 𑀦𑀸𑀫 𑀅𑀳𑁄𑀲𑀺. 𑀢𑀁 𑀤𑀺𑀯𑀲𑀁 𑀲𑀓𑀮𑀦𑀕𑀭𑀁 𑀤𑁂𑀯𑀯𑀺𑀫𑀸𑀦𑀁 𑀯𑀺𑀬 𑀅𑀮𑀗𑁆𑀓𑀭𑁄𑀦𑁆𑀢𑀺. 𑀲𑀩𑁆𑀩𑁂 𑀤𑀸𑀲𑀓𑀫𑁆𑀫𑀓𑀭𑀸𑀤𑀬𑁄 𑀅𑀳𑀢𑀯𑀢𑁆𑀣𑀦𑀺𑀯𑀢𑁆𑀣𑀸 𑀕𑀦𑁆𑀥𑀫𑀸𑀮𑀸𑀤𑀺𑀧𑀝𑀺𑀫𑀡𑁆𑀟𑀺𑀢𑀸 𑀭𑀸𑀚𑀓𑀼𑀮𑁂 𑀲𑀦𑁆𑀦𑀺𑀧𑀢𑀦𑁆𑀢𑀺. 𑀭𑀜𑁆𑀜𑁄 𑀓𑀫𑁆𑀫𑀦𑁆𑀢𑁂 𑀦𑀗𑁆𑀕𑀮𑀲𑀳𑀲𑁆𑀲𑀁 𑀬𑁄𑀚𑀻𑀬𑀢𑀺. 𑀢𑀲𑁆𑀫𑀺𑀁 𑀧𑀦 𑀤𑀺𑀯𑀲𑁂 𑀏𑀓𑁂𑀦𑀽𑀦𑀅𑀝𑁆𑀞𑀲𑀢𑀦𑀗𑁆𑀕𑀮𑀸𑀦𑀺 𑀲𑀤𑁆𑀥𑀺𑀁 𑀩𑀮𑀺𑀩𑀤𑁆𑀤𑀭𑀲𑁆𑀫𑀺𑀬𑁄𑀢𑁆𑀢𑁂𑀳𑀺 𑀭𑀚𑀢𑀧𑀭𑀺𑀓𑁆𑀔𑀢𑀸𑀦𑀺 𑀳𑁄𑀦𑁆𑀢𑀺, 𑀭𑀜𑁆𑀜𑁄 𑀆𑀮𑀫𑁆𑀩𑀦𑀦𑀗𑁆𑀕𑀮𑀁 𑀧𑀦 𑀭𑀢𑁆𑀢𑀲𑀼𑀯𑀡𑁆𑀡𑀧𑀭𑀺𑀓𑁆𑀔𑀢𑀁 𑀳𑁄𑀢𑀺. 𑀩𑀮𑀺𑀩𑀤𑁆𑀤𑀸𑀦𑀁 𑀲𑀺𑀗𑁆𑀕𑀭𑀲𑁆𑀫𑀺𑀧𑀢𑁄𑀤𑀸𑀧𑀺 𑀲𑀼𑀯𑀡𑁆𑀡𑀧𑀭𑀺𑀓𑁆𑀔𑀢𑀸𑀯 𑀳𑁄𑀦𑁆𑀢𑀺. 𑀭𑀸𑀚𑀸 𑀫𑀳𑀢𑀸 𑀧𑀭𑀺𑀯𑀸𑀭𑁂𑀦 𑀦𑀺𑀓𑁆𑀔𑀦𑁆𑀢𑁄 𑀧𑀼𑀢𑁆𑀢𑀁 𑀕𑀳𑁂𑀢𑁆𑀯𑀸 𑀅𑀕𑀫𑀸𑀲𑀺. 𑀓𑀫𑁆𑀫𑀦𑁆𑀢𑀝𑁆𑀞𑀸𑀦𑁂 𑀏𑀓𑁄 𑀚𑀫𑁆𑀩𑀼𑀭𑀼𑀓𑁆𑀔𑁄 𑀩𑀳𑀮𑀧𑀮𑀸𑀲𑁄 𑀲𑀦𑁆𑀤𑀘𑁆𑀙𑀸𑀬𑁄 𑀅𑀳𑁄𑀲𑀺. 𑀢𑀲𑁆𑀲 𑀳𑁂𑀝𑁆𑀞𑀸 𑀓𑀼𑀫𑀸𑀭𑀲𑁆𑀲 𑀲𑀬𑀦𑀁 𑀧𑀜𑁆𑀜𑀧𑀸𑀧𑁂𑀢𑁆𑀯𑀸 𑀉𑀧𑀭𑀺 𑀲𑀼𑀯𑀡𑁆𑀡𑀢𑀸𑀭𑀓𑀔𑀘𑀺𑀢𑀁 𑀯𑀺𑀢𑀸𑀦𑀁 𑀩𑀦𑁆𑀥𑀸𑀧𑁂𑀢𑁆𑀯𑀸 𑀲𑀸𑀡𑀺𑀧𑀸𑀓𑀸𑀭𑁂𑀦 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀆𑀭𑀓𑁆𑀔𑀁 𑀞𑀧𑀸𑀧𑁂𑀢𑁆𑀯𑀸 𑀭𑀸𑀚𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀅𑀫𑀘𑁆𑀘𑀕𑀡𑀧𑀭𑀺𑀯𑀼𑀢𑁄 𑀦𑀗𑁆𑀕𑀮𑀓𑀭𑀡𑀝𑁆𑀞𑀸𑀦𑀁 𑀅𑀕𑀫𑀸𑀲𑀺. 𑀢𑀢𑁆𑀣 𑀭𑀸𑀚𑀸 𑀲𑀼𑀯𑀡𑁆𑀡𑀦𑀗𑁆𑀕𑀮𑀁 𑀕𑀡𑁆𑀳𑀸𑀢𑀺, 𑀅𑀫𑀘𑁆𑀘𑀸 𑀏𑀓𑁂𑀦𑀽𑀦𑀝𑁆𑀞𑀲𑀢𑀭𑀚𑀢𑀦𑀗𑁆𑀕𑀮𑀸𑀦𑀺, 𑀓𑀲𑁆𑀲𑀓𑀸 𑀲𑁂𑀲𑀦𑀗𑁆𑀕𑀮𑀸𑀦𑀺. 𑀢𑁂 𑀢𑀸𑀦𑀺 𑀕𑀳𑁂𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀓𑀲𑀦𑁆𑀢𑀺. 𑀭𑀸𑀚𑀸 𑀧𑀦 𑀑𑀭𑀢𑁄 𑀯𑀸 𑀧𑀸𑀭𑀁 𑀕𑀘𑁆𑀙𑀢𑀺, 𑀧𑀸𑀭𑀢𑁄 𑀯𑀸 𑀑𑀭𑀁 𑀆𑀕𑀘𑁆𑀙𑀢𑀺. 𑀏𑀢𑀲𑁆𑀫𑀺𑀁 𑀞𑀸𑀦𑁂 𑀫𑀳𑀸𑀲𑀫𑁆𑀧𑀢𑁆𑀢𑀺 𑀅𑀳𑁄𑀲𑀺. 𑀩𑁄𑀥𑀺𑀲𑀢𑁆𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸 𑀥𑀸𑀢𑀺𑀬𑁄 ‘‘𑀭𑀜𑁆𑀜𑁄 𑀲𑀫𑁆𑀧𑀢𑁆𑀢𑀺𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀅𑀦𑁆𑀢𑁄𑀲𑀸𑀡𑀺𑀢𑁄 𑀩𑀳𑀺 𑀦𑀺𑀓𑁆𑀔𑀦𑁆𑀢𑀸. 𑀩𑁄𑀥𑀺𑀲𑀢𑁆𑀢𑁄 𑀇𑀢𑁄 𑀘𑀺𑀢𑁄 𑀘 𑀑𑀮𑁄𑀓𑁂𑀦𑁆𑀢𑁄 𑀓𑀜𑁆𑀘𑀺 𑀅𑀤𑀺𑀲𑁆𑀯𑀸 𑀯𑁂𑀕𑁂𑀦 𑀉𑀝𑁆𑀞𑀸𑀬 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀆𑀦𑀸𑀧𑀸𑀦𑁂 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀧𑀞𑀫𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀲𑀺. 𑀥𑀸𑀢𑀺𑀬𑁄 𑀔𑀚𑁆𑀚𑀪𑁄𑀚𑁆𑀚𑀦𑁆𑀢𑀭𑁂 𑀯𑀺𑀘𑀭𑀫𑀸𑀦𑀸 𑀣𑁄𑀓𑀁 𑀘𑀺𑀭𑀸𑀬𑀺𑀁𑀲𑀼. 𑀲𑁂𑀲𑀭𑀼𑀓𑁆𑀔𑀸𑀦𑀁 𑀙𑀸𑀬𑀸 𑀦𑀺𑀯𑀢𑁆𑀢𑀸, 𑀢𑀲𑁆𑀲 𑀧𑀦 𑀭𑀼𑀓𑁆𑀔𑀲𑁆𑀲 𑀧𑀭𑀺𑀫𑀡𑁆𑀟𑀮𑀸 𑀳𑀼𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀥𑀸𑀢𑀺𑀬𑁄 ‘‘𑀅𑀬𑁆𑀬𑀧𑀼𑀢𑁆𑀢𑁄 𑀏𑀓𑀢𑁄’’𑀢𑀺 𑀯𑁂𑀕𑁂𑀦 𑀲𑀸𑀡𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀅𑀦𑁆𑀢𑁄 𑀧𑀯𑀺𑀲𑀫𑀸𑀦𑀸 𑀩𑁄𑀥𑀺𑀲𑀢𑁆𑀢𑀁 𑀲𑀬𑀦𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀺𑀦𑁆𑀦𑀁 𑀢𑀜𑁆𑀘 𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁 𑁋 ‘‘𑀤𑁂𑀯, 𑀓𑀼𑀫𑀸𑀭𑁄 𑀏𑀯𑀁 𑀦𑀺𑀲𑀺𑀦𑁆𑀦𑁄, 𑀅𑀜𑁆𑀜𑁂𑀲𑀁 𑀭𑀼𑀓𑁆𑀔𑀸𑀦𑀁 𑀙𑀸𑀬𑀸 𑀦𑀺𑀯𑀢𑁆𑀢𑀸, 𑀚𑀫𑁆𑀩𑀼𑀭𑀼𑀓𑁆𑀔𑀲𑁆𑀲 𑀧𑀦 𑀧𑀭𑀺𑀫𑀡𑁆𑀟𑀮𑀸 𑀞𑀺𑀢𑀸’’𑀢𑀺. 𑀭𑀸𑀚𑀸 𑀯𑁂𑀕𑁂𑀦𑀸𑀕𑀦𑁆𑀢𑁆𑀯𑀸 𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸 𑁋 ‘‘𑀇𑀤𑀁 𑀢𑁂, 𑀢𑀸𑀢, 𑀤𑀼𑀢𑀺𑀬𑀁 𑀯𑀦𑁆𑀤𑀦’’𑀦𑁆𑀢𑀺 𑀧𑀼𑀢𑁆𑀢𑀁 𑀯𑀦𑁆𑀤𑀺.

𑀅𑀣 𑀅𑀦𑀼𑀓𑁆𑀓𑀫𑁂𑀦 𑀩𑁄𑀥𑀺𑀲𑀢𑁆𑀢𑁄 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑁄 𑀚𑀸𑀢𑁄. 𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀢𑀺𑀡𑁆𑀡𑀁 𑀉𑀢𑀽𑀦𑀁 𑀅𑀦𑀼𑀘𑁆𑀙𑀯𑀺𑀓𑁂 𑀢𑀬𑁄 𑀧𑀸𑀲𑀸𑀤𑁂 𑀓𑀸𑀭𑁂𑀲𑀺 𑁋 𑀏𑀓𑀁 𑀦𑀯𑀪𑀽𑀫𑀓𑀁, 𑀏𑀓𑀁 𑀲𑀢𑁆𑀢𑀪𑀽𑀫𑀓𑀁, 𑀏𑀓𑀁 𑀧𑀜𑁆𑀘𑀪𑀽𑀫𑀓𑀁, 𑀘𑀢𑁆𑀢𑀸𑀮𑀻𑀲𑀲𑀳𑀲𑁆𑀲𑀸 𑀘 𑀦𑀸𑀝𑀓𑀺𑀢𑁆𑀣𑀺𑀬𑁄 𑀉𑀧𑀝𑁆𑀞𑀸𑀧𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀤𑁂𑀯𑁄 𑀯𑀺𑀬 𑀅𑀘𑁆𑀙𑀭𑀸𑀲𑀗𑁆𑀖𑀧𑀭𑀺𑀯𑀼𑀢𑁄, 𑀅𑀮𑀗𑁆𑀓𑀢𑀦𑀸𑀝𑀓𑀧𑀭𑀺𑀯𑀼𑀢𑁄, 𑀦𑀺𑀧𑁆𑀧𑀼𑀭𑀺𑀲𑁂𑀳𑀺 𑀢𑀽𑀭𑀺𑀬𑁂𑀳𑀺 𑀧𑀭𑀺𑀘𑀸𑀭𑀺𑀬𑀫𑀸𑀦𑁄 𑀫𑀳𑀸𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑁄 𑀉𑀢𑀼𑀯𑀸𑀭𑁂𑀦 𑀢𑁂𑀲𑀼 𑀧𑀸𑀲𑀸𑀤𑁂𑀲𑀼 𑀯𑀺𑀳𑀭𑀢𑀺. 𑀭𑀸𑀳𑀼𑀮𑀫𑀸𑀢𑀸 𑀧𑀦𑀲𑁆𑀲 𑀤𑁂𑀯𑀻 𑀅𑀕𑁆𑀕𑀫𑀳𑁂𑀲𑀻 𑀅𑀳𑁄𑀲𑀺.

𑀢𑀲𑁆𑀲𑁂𑀯𑀁 𑀫𑀳𑀸𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑀲𑁆𑀲 𑀏𑀓𑀤𑀺𑀯𑀲𑀁 𑀜𑀸𑀢𑀺𑀲𑀗𑁆𑀖𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀅𑀬𑀁 𑀓𑀣𑀸 𑀉𑀤𑀧𑀸𑀤𑀺 𑁋 ‘‘𑀲𑀺𑀤𑁆𑀥𑀢𑁆𑀣𑁄 𑀓𑀻𑀴𑀸𑀧𑀲𑀼𑀢𑁄𑀯 𑀯𑀺𑀘𑀭𑀢𑀺, 𑀓𑀺𑀜𑁆𑀘𑀺 𑀲𑀺𑀧𑁆𑀧𑀁 𑀦 𑀲𑀺𑀓𑁆𑀔𑀢𑀺, 𑀲𑀗𑁆𑀕𑀸𑀫𑁂 𑀧𑀘𑁆𑀘𑀼𑀧𑀝𑁆𑀞𑀺𑀢𑁂 𑀓𑀺𑀁 𑀓𑀭𑀺𑀲𑁆𑀲𑀢𑀻’’𑀢𑀺. 𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑁋 ‘‘𑀢𑀸𑀢, 𑀢𑀯 𑀜𑀸𑀢𑀓𑀸 ‘𑀲𑀺𑀤𑁆𑀥𑀢𑁆𑀣𑁄 𑀓𑀺𑀜𑁆𑀘𑀺 𑀲𑀺𑀧𑁆𑀧𑀁 𑀅𑀲𑀺𑀓𑁆𑀔𑀺𑀢𑁆𑀯𑀸 𑀓𑀻𑀴𑀸𑀧𑀲𑀼𑀢𑁄𑀯 𑀯𑀺𑀘𑀭𑀢𑀻’𑀢𑀺 𑀯𑀤𑀦𑁆𑀢𑀺, 𑀏𑀢𑁆𑀣 𑀓𑀺𑀁 𑀧𑀢𑁆𑀢𑀓𑀸𑀮𑁂 𑀫𑀜𑁆𑀜𑀲𑀻’’𑀢𑀺. 𑀤𑁂𑀯, 𑀫𑀫 𑀲𑀺𑀧𑁆𑀧𑀁 𑀲𑀺𑀓𑁆𑀔𑀦𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀦𑀕𑀭𑁂 𑀫𑀫 𑀲𑀺𑀧𑁆𑀧𑀤𑀲𑁆𑀲𑀦𑀢𑁆𑀣𑀁 𑀪𑁂𑀭𑀺𑀁 𑀘𑀭𑀸𑀧𑁂𑀣 ‘‘𑀇𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀜𑀸𑀢𑀓𑀸𑀦𑀁 𑀲𑀺𑀧𑁆𑀧𑀁 𑀤𑀲𑁆𑀲𑁂𑀲𑁆𑀲𑀸𑀫𑀻’’𑀢𑀺. 𑀭𑀸𑀚𑀸 𑀢𑀣𑀸 𑀅𑀓𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀅𑀓𑁆𑀔𑀡𑀯𑁂𑀥𑀺𑀯𑀸𑀮𑀯𑁂𑀥𑀺𑀥𑀦𑀼𑀕𑁆𑀕𑀳𑁂 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀫𑀚𑁆𑀛𑁂 𑀅𑀜𑁆𑀜𑁂𑀳𑀺 𑀥𑀦𑀼𑀕𑁆𑀕𑀳𑁂𑀳𑀺 𑀅𑀲𑀸𑀥𑀸𑀭𑀡𑀁 𑀜𑀸𑀢𑀓𑀸𑀦𑀁 𑀤𑁆𑀯𑀸𑀤𑀲𑀯𑀺𑀥𑀁 𑀲𑀺𑀧𑁆𑀧𑀁 𑀤𑀲𑁆𑀲𑁂𑀲𑀺. 𑀢𑀁 𑀲𑀭𑀪𑀗𑁆𑀕𑀚𑀸𑀢𑀓𑁂 𑀆𑀕𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀢𑀤𑀸𑀲𑁆𑀲 𑀜𑀸𑀢𑀺𑀲𑀗𑁆𑀖𑁄 𑀦𑀺𑀓𑁆𑀓𑀗𑁆𑀔𑁄 𑀅𑀳𑁄𑀲𑀺.

𑀅𑀣𑁂𑀓𑀤𑀺𑀯𑀲𑀁 𑀩𑁄𑀥𑀺𑀲𑀢𑁆𑀢𑁄 𑀉𑀬𑁆𑀬𑀸𑀦𑀪𑀽𑀫𑀺𑀁 𑀕𑀦𑁆𑀢𑀼𑀓𑀸𑀫𑁄 𑀲𑀸𑀭𑀣𑀺𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀭𑀣𑀁 𑀬𑁄𑀚𑁂𑀳𑀻’’𑀢𑀺 𑀆𑀳. 𑀲𑁄 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀫𑀳𑀸𑀭𑀳𑀁 𑀉𑀢𑁆𑀢𑀫𑀭𑀣𑀁 𑀲𑀩𑁆𑀩𑀸𑀮𑀗𑁆𑀓𑀸𑀭𑁂𑀦 𑀅𑀮𑀗𑁆𑀓𑀭𑀺𑀢𑁆𑀯𑀸 𑀓𑀼𑀫𑀼𑀤𑀧𑀢𑁆𑀢𑀯𑀡𑁆𑀡𑁂 𑀘𑀢𑁆𑀢𑀸𑀭𑁄 𑀫𑀗𑁆𑀕𑀮𑀲𑀺𑀦𑁆𑀥𑀯𑁂 𑀬𑁄𑀚𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀝𑀺𑀯𑁂𑀤𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀤𑁂𑀯𑀯𑀺𑀫𑀸𑀦𑀲𑀤𑀺𑀲𑀁 𑀭𑀣𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀉𑀬𑁆𑀬𑀸𑀦𑀸𑀪𑀺𑀫𑀼𑀔𑁄 𑀅𑀕𑀫𑀸𑀲𑀺. 𑀤𑁂𑀯𑀢𑀸 ‘‘𑀲𑀺𑀤𑁆𑀥𑀢𑁆𑀣𑀓𑀼𑀫𑀸𑀭𑀲𑁆𑀲 𑀅𑀪𑀺𑀲𑀫𑁆𑀩𑀼𑀚𑁆𑀛𑀦𑀓𑀸𑀮𑁄 𑀆𑀲𑀦𑁆𑀦𑁄, 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁 𑀤𑀲𑁆𑀲𑁂𑀲𑁆𑀲𑀸𑀫𑀸’’𑀢𑀺 𑀏𑀓𑀁 𑀤𑁂𑀯𑀧𑀼𑀢𑁆𑀢𑀁 𑀚𑀭𑀸𑀚𑀚𑁆𑀚𑀭𑀁 𑀔𑀡𑁆𑀟𑀤𑀦𑁆𑀢𑀁 𑀧𑀮𑀺𑀢𑀓𑁂𑀲𑀁 𑀯𑀗𑁆𑀓𑀁 𑀑𑀪𑀕𑁆𑀕𑀲𑀭𑀻𑀭𑀁 𑀤𑀡𑁆𑀟𑀳𑀢𑁆𑀣𑀁 𑀧𑀯𑁂𑀥𑀫𑀸𑀦𑀁 𑀓𑀢𑁆𑀯𑀸 𑀤𑀲𑁆𑀲𑁂𑀲𑀼𑀁. 𑀢𑀁 𑀩𑁄𑀥𑀺𑀲𑀢𑁆𑀢𑁄 𑀘𑁂𑀯 𑀲𑀸𑀭𑀣𑀺 𑀘 𑀧𑀲𑁆𑀲𑀦𑁆𑀢𑀺. 𑀢𑀢𑁄 𑀩𑁄𑀥𑀺𑀲𑀢𑁆𑀢𑁄 𑀲𑀸𑀭𑀣𑀺𑀁 𑁋 ‘‘𑀲𑀫𑁆𑀫, 𑀓𑁄 𑀦𑀸𑀫𑁂𑀲 𑀧𑀼𑀭𑀺𑀲𑁄, 𑀓𑁂𑀲𑀸𑀧𑀺𑀲𑁆𑀲 𑀦 𑀬𑀣𑀸 𑀅𑀜𑁆𑀜𑁂𑀲’’𑀦𑁆𑀢𑀺 𑀫𑀳𑀸𑀧𑀤𑀸𑀦𑁂 𑀆𑀕𑀢𑀦𑀬𑁂𑀦 𑀧𑀼𑀘𑁆𑀙𑀺𑀢𑁆𑀯𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀥𑀻𑀭𑀢𑁆𑀣𑀼 𑀯𑀢 𑀪𑁄 𑀚𑀸𑀢𑀺, 𑀬𑀢𑁆𑀭 𑀳𑀺 𑀦𑀸𑀫 𑀚𑀸𑀢𑀲𑁆𑀲 𑀚𑀭𑀸 𑀧𑀜𑁆𑀜𑀸𑀬𑀺𑀲𑁆𑀲𑀢𑀻’’𑀢𑀺 𑀲𑀁𑀯𑀺𑀕𑁆𑀕𑀳𑀤𑀬𑁄 𑀢𑀢𑁄𑀯 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑀸𑀲𑀸𑀤𑀫𑁂𑀯 𑀅𑀪𑀺𑀭𑀼𑀳𑀺. 𑀭𑀸𑀚𑀸 ‘‘𑀓𑀺𑀁 𑀓𑀸𑀭𑀡𑀸 𑀫𑀫 𑀧𑀼𑀢𑁆𑀢𑁄 𑀔𑀺𑀧𑁆𑀧𑀁 𑀧𑀝𑀺𑀦𑀺𑀯𑀢𑁆𑀢𑀻’’𑀢𑀺 𑀧𑀼𑀘𑁆𑀙𑀺. ‘‘𑀚𑀺𑀡𑁆𑀡𑀓𑀁 𑀧𑀼𑀭𑀺𑀲𑀁 𑀤𑀺𑀲𑁆𑀯𑀸 𑀤𑁂𑀯𑀸’’𑀢𑀺. ‘‘𑀚𑀺𑀡𑁆𑀡𑀓𑀁 𑀤𑀺𑀲𑁆𑀯𑀸 𑀧𑀩𑁆𑀩𑀚𑀺𑀲𑁆𑀲𑀢𑀻𑀢𑀺 𑀆𑀳𑀁𑀲𑀼, 𑀓𑀲𑁆𑀫𑀸 𑀫𑀁 𑀦𑀸𑀲𑁂𑀣, 𑀲𑀻𑀖𑀁 𑀧𑀼𑀢𑁆𑀢𑀲𑁆𑀲 𑀦𑀸𑀝𑀓𑀸𑀦𑀺 𑀲𑀚𑁆𑀚𑁂𑀣, 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑁄 𑀧𑀩𑁆𑀩𑀚𑁆𑀚𑀸𑀬 𑀲𑀢𑀺𑀁 𑀦 𑀓𑀭𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀯𑀸 𑀆𑀭𑀓𑁆𑀔𑀁 𑀯𑀟𑁆𑀠𑁂𑀢𑁆𑀯𑀸 𑀲𑀩𑁆𑀩𑀤𑀺𑀲𑀸𑀲𑀼 𑀅𑀟𑁆𑀠𑀬𑁄𑀚𑀦𑁂 𑀅𑀟𑁆𑀠𑀬𑁄𑀚𑀦𑁂 𑀞𑀧𑁂𑀲𑀺.

𑀧𑀼𑀦𑁂𑀓𑀤𑀺𑀯𑀲𑀁 𑀩𑁄𑀥𑀺𑀲𑀢𑁆𑀢𑁄 𑀢𑀣𑁂𑀯 𑀉𑀬𑁆𑀬𑀸𑀦𑀁 𑀕𑀘𑁆𑀙𑀦𑁆𑀢𑁄 𑀤𑁂𑀯𑀢𑀸𑀳𑀺 𑀦𑀺𑀫𑁆𑀫𑀺𑀢𑀁 𑀩𑁆𑀬𑀸𑀥𑀺𑀢𑀁 𑀧𑀼𑀭𑀺𑀲𑀁 𑀤𑀺𑀲𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀧𑀼𑀘𑁆𑀙𑀺𑀢𑁆𑀯𑀸 𑀲𑀁𑀯𑀺𑀕𑁆𑀕𑀳𑀤𑀬𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀺. 𑀭𑀸𑀚𑀸𑀧𑀺 𑀧𑀼𑀘𑁆𑀙𑀺𑀢𑁆𑀯𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀁𑀯𑀺𑀤𑀳𑀺𑀢𑁆𑀯𑀸 𑀧𑀼𑀦 𑀯𑀟𑁆𑀠𑁂𑀢𑁆𑀯𑀸 𑀲𑀫𑀦𑁆𑀢𑀸 𑀢𑀺𑀕𑀸𑀯𑀼𑀢𑀧𑁆𑀧𑀫𑀸𑀡𑁂 𑀧𑀤𑁂𑀲𑁂 𑀆𑀭𑀓𑁆𑀔𑀁 𑀞𑀧𑁂𑀲𑀺. 𑀅𑀧𑀭𑀁 𑀏𑀓𑀤𑀺𑀯𑀲𑀁 𑀩𑁄𑀥𑀺𑀲𑀢𑁆𑀢𑁄 𑀢𑀣𑁂𑀯 𑀉𑀬𑁆𑀬𑀸𑀦𑀁 𑀕𑀘𑁆𑀙𑀦𑁆𑀢𑁄 𑀤𑁂𑀯𑀢𑀸𑀳𑀺 𑀦𑀺𑀫𑁆𑀫𑀺𑀢𑀁 𑀓𑀸𑀮𑀓𑀢𑀁 𑀤𑀺𑀲𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀧𑀼𑀘𑁆𑀙𑀺𑀢𑁆𑀯𑀸 𑀲𑀁𑀯𑀺𑀕𑁆𑀕𑀳𑀤𑀬𑁄 𑀧𑀼𑀦 𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀺. 𑀭𑀸𑀚𑀸𑀧𑀺 𑀧𑀼𑀘𑁆𑀙𑀺𑀢𑁆𑀯𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀁𑀯𑀺𑀤𑀳𑀺𑀢𑁆𑀯𑀸 𑀧𑀼𑀦 𑀯𑀟𑁆𑀠𑁂𑀢𑁆𑀯𑀸 𑀲𑀫𑀦𑁆𑀢𑀸 𑀬𑁄𑀚𑀦𑀧𑁆𑀧𑀫𑀸𑀡𑁂 𑀧𑀤𑁂𑀲𑁂 𑀆𑀭𑀓𑁆𑀔𑀁 𑀞𑀧𑁂𑀲𑀺. 𑀅𑀧𑀭𑀁 𑀧𑀦 𑀏𑀓𑀤𑀺𑀯𑀲𑀁 𑀉𑀬𑁆𑀬𑀸𑀦𑀁 𑀕𑀘𑁆𑀙𑀦𑁆𑀢𑁄 𑀢𑀣𑁂𑀯 𑀤𑁂𑀯𑀢𑀸𑀳𑀺 𑀦𑀺𑀫𑁆𑀫𑀺𑀢𑀁 𑀲𑀼𑀦𑀺𑀯𑀢𑁆𑀣𑀁 𑀲𑀼𑀧𑀸𑀭𑀼𑀢𑀁 𑀧𑀩𑁆𑀩𑀚𑀺𑀢𑀁 𑀤𑀺𑀲𑁆𑀯𑀸 ‘‘𑀓𑁄 𑀦𑀸𑀫𑁂𑀲𑁄 𑀲𑀫𑁆𑀫𑀸’’𑀢𑀺 𑀲𑀸𑀭𑀣𑀺𑀁 𑀧𑀼𑀘𑁆𑀙𑀺. 𑀲𑀸𑀭𑀣𑀺 𑀓𑀺𑀜𑁆𑀘𑀸𑀧𑀺 𑀩𑀼𑀤𑁆𑀥𑀼𑀧𑁆𑀧𑀸𑀤𑀲𑁆𑀲 𑀅𑀪𑀸𑀯𑀸 𑀧𑀩𑁆𑀩𑀚𑀺𑀢𑀁 𑀯𑀸 𑀧𑀩𑁆𑀩𑀚𑀺𑀢𑀕𑀼𑀡𑁂 𑀯𑀸 𑀦 𑀚𑀸𑀦𑀸𑀢𑀺, 𑀤𑁂𑀯𑀢𑀸𑀦𑀼𑀪𑀸𑀯𑁂𑀦 𑀧𑀦 ‘‘𑀧𑀩𑁆𑀩𑀚𑀺𑀢𑁄 𑀦𑀸𑀫𑀸𑀬𑀁 𑀤𑁂𑀯𑀸’’𑀢𑀺 𑀯𑀢𑁆𑀯𑀸 𑀧𑀩𑁆𑀩𑀚𑁆𑀚𑀸𑀬 𑀕𑀼𑀡𑁂 𑀯𑀡𑁆𑀡𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀧𑀩𑁆𑀩𑀚𑁆𑀚𑀸𑀬 𑀭𑀼𑀘𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀁 𑀤𑀺𑀯𑀲𑀁 𑀉𑀬𑁆𑀬𑀸𑀦𑀁 𑀅𑀕𑀫𑀸𑀲𑀺. 𑀤𑀻𑀖𑀪𑀸𑀡𑀓𑀸 𑀧𑀦𑀸𑀳𑀼 ‘‘𑀘𑀢𑁆𑀢𑀸𑀭𑀺 𑀦𑀺𑀫𑀺𑀢𑁆𑀢𑀸𑀦𑀺 𑀏𑀓𑀤𑀺𑀯𑀲𑁂𑀦𑁂𑀯 𑀤𑀺𑀲𑁆𑀯𑀸 𑀅𑀕𑀫𑀸𑀲𑀻’’𑀢𑀺.

𑀲𑁄 𑀢𑀢𑁆𑀣 𑀤𑀺𑀯𑀲𑀪𑀸𑀕𑀁 𑀓𑀻𑀴𑀺𑀢𑁆𑀯𑀸 𑀫𑀗𑁆𑀕𑀮𑀧𑁄𑀓𑁆𑀔𑀭𑀡𑀺𑀬𑀁 𑀦𑁆𑀳𑀸𑀬𑀺𑀢𑁆𑀯𑀸 𑀅𑀢𑁆𑀣𑀗𑁆𑀕𑀢𑁂 𑀲𑀽𑀭𑀺𑀬𑁂 𑀫𑀗𑁆𑀕𑀮𑀲𑀺𑀮𑀸𑀧𑀝𑁆𑀝𑁂 𑀦𑀺𑀲𑀻𑀤𑀺 𑀅𑀢𑁆𑀢𑀸𑀦𑀁 𑀅𑀮𑀗𑁆𑀓𑀸𑀭𑀸𑀧𑁂𑀢𑀼𑀓𑀸𑀫𑁄. 𑀅𑀣𑀲𑁆𑀲 𑀧𑀭𑀺𑀘𑀸𑀭𑀓𑀧𑀼𑀭𑀺𑀲𑀸 𑀦𑀸𑀦𑀸𑀯𑀡𑁆𑀡𑀸𑀦𑀺 𑀤𑀼𑀲𑁆𑀲𑀸𑀦𑀺 𑀦𑀸𑀦𑀧𑁆𑀧𑀓𑀸𑀭𑀸 𑀆𑀪𑀭𑀡𑀯𑀺𑀓𑀢𑀺𑀬𑁄 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀸𑀦𑀺 𑀘 𑀆𑀤𑀸𑀬 𑀲𑀫𑀦𑁆𑀢𑀸 𑀧𑀭𑀺𑀯𑀸𑀭𑁂𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀢𑀲𑁆𑀫𑀺𑀁 𑀔𑀡𑁂 𑀲𑀓𑁆𑀓𑀲𑁆𑀲 𑀦𑀺𑀲𑀺𑀦𑁆𑀦𑀸𑀲𑀦𑀁 𑀉𑀡𑁆𑀳𑀁 𑀅𑀳𑁄𑀲𑀺. 𑀲𑁄 ‘‘𑀓𑁄 𑀦𑀼 𑀔𑁄 𑀫𑀁 𑀇𑀫𑀫𑁆𑀳𑀸 𑀞𑀸𑀦𑀸 𑀘𑀸𑀯𑁂𑀢𑀼𑀓𑀸𑀫𑁄’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀅𑀮𑀗𑁆𑀓𑀸𑀭𑁂𑀢𑀼𑀓𑀸𑀫𑀢𑀁 𑀜𑀢𑁆𑀯𑀸 𑀯𑀺𑀲𑁆𑀲𑀓𑀫𑁆𑀫𑀁 𑀆𑀫𑀦𑁆𑀢𑁂𑀲𑀺 ‘‘𑀲𑀫𑁆𑀫 𑀯𑀺𑀲𑁆𑀲𑀓𑀫𑁆𑀫, 𑀲𑀺𑀤𑁆𑀥𑀢𑁆𑀣𑀓𑀼𑀫𑀸𑀭𑁄 𑀅𑀚𑁆𑀚 𑀅𑀟𑁆𑀠𑀭𑀢𑁆𑀢𑀲𑀫𑀬𑁂 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀲𑁆𑀲𑀢𑀺, 𑀅𑀬𑀫𑀲𑁆𑀲 𑀧𑀘𑁆𑀙𑀺𑀫𑁄 𑀅𑀮𑀗𑁆𑀓𑀸𑀭𑁄, 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀫𑀳𑀸𑀧𑀼𑀭𑀺𑀲𑀁 𑀤𑀺𑀩𑁆𑀩𑀸𑀮𑀗𑁆𑀓𑀸𑀭𑁂𑀳𑀺 𑀅𑀮𑀗𑁆𑀓𑀭𑁄𑀳𑀻’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀤𑁂𑀯𑀢𑀸𑀦𑀼𑀪𑀸𑀯𑁂𑀦 𑀢𑀗𑁆𑀔𑀡𑀁𑀬𑁂𑀯 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀲𑁆𑀲𑁂𑀯 𑀓𑀧𑁆𑀧𑀓𑀲𑀤𑀺𑀲𑁄 𑀳𑀼𑀢𑁆𑀯𑀸 𑀓𑀧𑁆𑀧𑀓𑀲𑁆𑀲 𑀳𑀢𑁆𑀣𑀢𑁄 𑀯𑁂𑀞𑀦𑀤𑀼𑀲𑁆𑀲𑀁 𑀕𑀳𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀻𑀲𑀁 𑀯𑁂𑀞𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀳𑀢𑁆𑀣𑀲𑀫𑁆𑀨𑀲𑁆𑀲𑁂𑀦𑁂𑀯 ‘‘𑀦𑀸𑀬𑀁 𑀫𑀦𑀼𑀲𑁆𑀲𑁄, 𑀤𑁂𑀯𑀧𑀼𑀢𑁆𑀢𑁄 𑀏𑀲𑁄’’𑀢𑀺 𑀅𑀜𑁆𑀜𑀸𑀲𑀺. 𑀯𑁂𑀞𑀦𑁂𑀦 𑀯𑁂𑀞𑀺𑀢𑀫𑀢𑁆𑀢𑁂 𑀲𑀻𑀲𑁂 𑀫𑁄𑀴𑀺𑀬𑀁 𑀫𑀡𑀺𑀭𑀢𑀦𑀸𑀓𑀸𑀭𑁂𑀦 𑀤𑀼𑀲𑁆𑀲𑀲𑀳𑀲𑁆𑀲𑀁 𑀅𑀩𑁆𑀪𑀼𑀕𑁆𑀕𑀜𑁆𑀙𑀺. 𑀧𑀼𑀦 𑀯𑁂𑀞𑁂𑀦𑁆𑀢𑀲𑁆𑀲 𑀤𑀼𑀲𑁆𑀲𑀲𑀳𑀲𑁆𑀲𑀦𑁆𑀢𑀺 𑀤𑀲𑀓𑁆𑀔𑀢𑁆𑀢𑀼𑀁 𑀯𑁂𑀞𑁂𑀦𑁆𑀢𑀲𑁆𑀲 𑀤𑀲 𑀤𑀼𑀲𑁆𑀲𑀲𑀳𑀲𑁆𑀲𑀸𑀦𑀺 𑀅𑀩𑁆𑀪𑀼𑀕𑁆𑀕𑀘𑁆𑀙𑀺𑀁𑀲𑀼. ‘‘𑀲𑀻𑀲𑀁 𑀔𑀼𑀤𑁆𑀤𑀓𑀁, 𑀤𑀼𑀲𑁆𑀲𑀸𑀦𑀺 𑀩𑀳𑀽𑀦𑀺, 𑀓𑀣𑀁 𑀅𑀩𑁆𑀪𑀼𑀕𑁆𑀕𑀢𑀸𑀦𑀻’’𑀢𑀺 𑀦 𑀘𑀺𑀦𑁆𑀢𑁂𑀢𑀩𑁆𑀩𑀁. 𑀢𑁂𑀲𑀼 𑀳𑀺 𑀲𑀩𑁆𑀩𑀫𑀳𑀦𑁆𑀢𑀁 𑀆𑀫𑀮𑀓𑀧𑀼𑀧𑁆𑀨𑀧𑁆𑀧𑀫𑀸𑀡𑀁, 𑀅𑀯𑀲𑁂𑀲𑀸𑀦𑀺 𑀓𑀼𑀲𑀼𑀫𑁆𑀩𑀓𑀧𑀼𑀧𑁆𑀨𑀧𑁆𑀧𑀫𑀸𑀡𑀸𑀦𑀺 𑀅𑀳𑁂𑀲𑀼𑀁. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀻𑀲𑀁 𑀓𑀺𑀜𑁆𑀚𑀓𑁆𑀔𑀕𑀯𑀘𑁆𑀙𑀺𑀢𑀁 𑀯𑀺𑀬 𑀓𑀼𑀬𑁆𑀬𑀓𑀧𑀼𑀧𑁆𑀨𑀁 𑀅𑀳𑁄𑀲𑀺.

𑀅𑀣𑀲𑁆𑀲 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀲𑁆𑀲 𑀲𑀩𑁆𑀩𑀢𑀸𑀮𑀸𑀯𑀘𑀭𑁂𑀲𑀼 𑀲𑀓𑀸𑀦𑀺 𑀲𑀓𑀸𑀦𑀺 𑀧𑀝𑀺𑀪𑀸𑀦𑀸𑀦𑀺 𑀤𑀲𑁆𑀲𑀬𑀦𑁆𑀢𑁂𑀲𑀼, 𑀩𑁆𑀭𑀸𑀳𑁆𑀫𑀡𑁂𑀲𑀼 ‘‘𑀚𑀬𑀦𑀦𑁆𑀤𑀸’’𑀢𑀺𑀆𑀤𑀺𑀯𑀘𑀦𑁂𑀳𑀺, 𑀲𑀽𑀢𑀫𑀸𑀕𑀥𑀸𑀤𑀻𑀲𑀼 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀫𑀗𑁆𑀕𑀮𑀯𑀘𑀦𑀢𑁆𑀣𑀼𑀢𑀺𑀖𑁄𑀲𑁂𑀳𑀺 𑀲𑀫𑁆𑀪𑀸𑀯𑁂𑀦𑁆𑀢𑁂𑀲𑀼 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀁 𑀭𑀣𑀯𑀭𑀁 𑀅𑀪𑀺𑀭𑀼𑀳𑀺. 𑀢𑀲𑁆𑀫𑀺𑀁 𑀲𑀫𑀬𑁂 ‘‘𑀭𑀸𑀳𑀼𑀮𑀫𑀸𑀢𑀸 𑀧𑀼𑀢𑁆𑀢𑀁 𑀯𑀺𑀚𑀸𑀢𑀸’’𑀢𑀺 𑀲𑀼𑀢𑁆𑀯𑀸 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸 ‘‘𑀧𑀼𑀢𑁆𑀢𑀲𑁆𑀲 𑀫𑁂 𑀢𑀼𑀝𑁆𑀞𑀺𑀁 𑀦𑀺𑀯𑁂𑀤𑁂𑀣𑀸’’𑀢𑀺 𑀲𑀸𑀲𑀦𑀁 𑀧𑀳𑀺𑀡𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀲𑀼𑀢𑁆𑀯𑀸 ‘‘𑀭𑀸𑀳𑀼 𑀚𑀸𑀢𑁄, 𑀩𑀦𑁆𑀥𑀦𑀁 𑀚𑀸𑀢’’𑀦𑁆𑀢𑀺 𑀆𑀳. 𑀭𑀸𑀚𑀸 ‘‘𑀓𑀺𑀁 𑀫𑁂 𑀧𑀼𑀢𑁆𑀢𑁄 𑀅𑀯𑀘𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀇𑀢𑁄 𑀧𑀝𑁆𑀞𑀸𑀬 𑀫𑁂 𑀦𑀢𑁆𑀢𑀸 𑀭𑀸𑀳𑀼𑀮𑀓𑀼𑀫𑀸𑀭𑁄𑀬𑁂𑀯 𑀦𑀸𑀫 𑀳𑁄𑀢𑀽’’𑀢𑀺 𑀆𑀳.

𑀩𑁄𑀥𑀺𑀲𑀢𑁆𑀢𑁄𑀧𑀺 𑀔𑁄 𑀭𑀣𑀯𑀭𑀁 𑀆𑀭𑀼𑀬𑁆𑀳 𑀫𑀳𑀦𑁆𑀢𑁂𑀦 𑀬𑀲𑁂𑀦 𑀅𑀢𑀺𑀫𑀦𑁄𑀭𑀫𑁂𑀦 𑀲𑀺𑀭𑀺𑀲𑁄𑀪𑀕𑁆𑀕𑁂𑀦 𑀦𑀕𑀭𑀁 𑀧𑀸𑀯𑀺𑀲𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀓𑀺𑀲𑀸𑀕𑁄𑀢𑀫𑀻 𑀦𑀸𑀫 𑀔𑀢𑁆𑀢𑀺𑀬𑀓𑀜𑁆𑀜𑀸 𑀉𑀧𑀭𑀺𑀧𑀸𑀲𑀸𑀤𑀯𑀭𑀢𑀮𑀕𑀢𑀸 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀼𑀭𑀼𑀫𑀸𑀦𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀭𑀽𑀧𑀲𑀺𑀭𑀺𑀁 𑀤𑀺𑀲𑁆𑀯𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑀸 𑀇𑀤𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀦𑀺𑀩𑁆𑀩𑀼𑀢𑀸 𑀦𑀽𑀦 𑀲𑀸 𑀫𑀸𑀢𑀸, 𑀦𑀺𑀩𑁆𑀩𑀼𑀢𑁄 𑀦𑀽𑀦 𑀲𑁄 𑀧𑀺𑀢𑀸;

𑀦𑀺𑀩𑁆𑀩𑀼𑀢𑀸 𑀦𑀽𑀦 𑀲𑀸 𑀦𑀸𑀭𑀻, 𑀬𑀲𑁆𑀲𑀸𑀬𑀁 𑀈𑀤𑀺𑀲𑁄 𑀧𑀢𑀻’’𑀢𑀺.

𑀩𑁄𑀥𑀺𑀲𑀢𑁆𑀢𑁄 𑀢𑀁 𑀲𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀏𑀯𑀫𑀸𑀳 ‘𑀏𑀯𑀭𑀽𑀧𑀁 𑀅𑀢𑁆𑀢𑀪𑀸𑀯𑀁 𑀧𑀲𑁆𑀲𑀦𑁆𑀢𑀺𑀬𑀸 𑀫𑀸𑀢𑀼 𑀳𑀤𑀬𑀁 𑀦𑀺𑀩𑁆𑀩𑀸𑀬𑀢𑀺, 𑀧𑀺𑀢𑀼 𑀳𑀤𑀬𑀁 𑀦𑀺𑀩𑁆𑀩𑀸𑀬𑀢𑀺, 𑀧𑀚𑀸𑀧𑀢𑀺𑀬𑀸 𑀳𑀤𑀬𑀁 𑀦𑀺𑀩𑁆𑀩𑀸𑀬𑀢𑀻’𑀢𑀺! 𑀓𑀺𑀲𑁆𑀫𑀺𑀁 𑀦𑀼 𑀔𑁄 𑀦𑀺𑀩𑁆𑀩𑀼𑀢𑁂 𑀳𑀤𑀬𑀁 𑀦𑀺𑀩𑁆𑀩𑀼𑀢𑀁 𑀦𑀸𑀫 𑀳𑁄𑀢𑀻’’𑀢𑀺? 𑀅𑀣𑀲𑁆𑀲 𑀓𑀺𑀮𑁂𑀲𑁂𑀲𑀼 𑀯𑀺𑀭𑀢𑁆𑀢𑀫𑀸𑀦𑀲𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀭𑀸𑀕𑀕𑁆𑀕𑀺𑀫𑁆𑀳𑀺 𑀦𑀺𑀩𑁆𑀩𑀼𑀢𑁂 𑀦𑀺𑀩𑁆𑀩𑀼𑀢𑀁 𑀦𑀸𑀫 𑀳𑁄𑀢𑀺, 𑀤𑁄𑀲𑀕𑁆𑀕𑀺𑀫𑁆𑀳𑀺 𑀦𑀺𑀩𑁆𑀩𑀼𑀢𑁂 𑀦𑀺𑀩𑁆𑀩𑀼𑀢𑀁 𑀦𑀸𑀫 𑀳𑁄𑀢𑀺, 𑀫𑁄𑀳𑀕𑁆𑀕𑀺𑀫𑁆𑀳𑀺 𑀦𑀺𑀩𑁆𑀩𑀼𑀢𑁂 𑀦𑀺𑀩𑁆𑀩𑀼𑀢𑀁 𑀦𑀸𑀫 𑀳𑁄𑀢𑀺, 𑀫𑀸𑀦𑀤𑀺𑀝𑁆𑀞𑀺𑀆𑀤𑀻𑀲𑀼 𑀲𑀩𑁆𑀩𑀓𑀺𑀮𑁂𑀲𑀤𑀭𑀣𑁂𑀲𑀼 𑀦𑀺𑀩𑁆𑀩𑀼𑀢𑁂𑀲𑀼 𑀦𑀺𑀩𑁆𑀩𑀼𑀢𑀁 𑀦𑀸𑀫 𑀳𑁄𑀢𑀺. 𑀅𑀬𑀁 𑀫𑁂 𑀲𑀼𑀲𑁆𑀲𑀯𑀦𑀁 𑀲𑀸𑀯𑁂𑀲𑀺, 𑀅𑀳𑀜𑁆𑀳𑀺 𑀦𑀺𑀩𑁆𑀩𑀸𑀦𑀁 𑀕𑀯𑁂𑀲𑀦𑁆𑀢𑁄 𑀘𑀭𑀸𑀫𑀺, 𑀅𑀚𑁆𑀚𑁂𑀯 𑀫𑀬𑀸 𑀖𑀭𑀸𑀯𑀸𑀲𑀁 𑀙𑀟𑁆𑀟𑁂𑀢𑁆𑀯𑀸 𑀦𑀺𑀓𑁆𑀔𑀫𑁆𑀫 𑀧𑀩𑁆𑀩𑀚𑀺𑀢𑁆𑀯𑀸 𑀦𑀺𑀩𑁆𑀩𑀸𑀦𑀁 𑀕𑀯𑁂𑀲𑀺𑀢𑀼𑀁 𑀯𑀝𑁆𑀝𑀢𑀺, 𑀅𑀬𑀁 𑀇𑀫𑀺𑀲𑁆𑀲𑀸 𑀆𑀘𑀭𑀺𑀬𑀪𑀸𑀕𑁄 𑀳𑁄𑀢𑀽’’𑀢𑀺 𑀓𑀡𑁆𑀞𑀢𑁄 𑀑𑀫𑀼𑀜𑁆𑀘𑀺𑀢𑁆𑀯𑀸 𑀓𑀺𑀲𑀸𑀕𑁄𑀢𑀫𑀺𑀬𑀸 𑀲𑀢𑀲𑀳𑀲𑁆𑀲𑀕𑁆𑀖𑀦𑀓𑀁 𑀫𑀼𑀢𑁆𑀢𑀸𑀳𑀸𑀭𑀁 𑀧𑁂𑀲𑁂𑀲𑀺. 𑀲𑀸 ‘‘𑀲𑀺𑀤𑁆𑀥𑀢𑁆𑀣𑀓𑀼𑀫𑀸𑀭𑁄 𑀫𑀬𑀺 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀧𑀡𑁆𑀡𑀸𑀓𑀸𑀭𑀁 𑀧𑁂𑀲𑁂𑀲𑀻’’𑀢𑀺 𑀲𑁄𑀫𑀦𑀲𑁆𑀲𑀚𑀸𑀢𑀸 𑀅𑀳𑁄𑀲𑀺.

𑀩𑁄𑀥𑀺𑀲𑀢𑁆𑀢𑁄𑀧𑀺 𑀫𑀳𑀦𑁆𑀢𑁂𑀦 𑀲𑀺𑀭𑀺𑀲𑁄𑀪𑀕𑁆𑀕𑁂𑀦 𑀅𑀢𑁆𑀢𑀦𑁄 𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀲𑀺𑀭𑀺𑀲𑀬𑀦𑁂 𑀦𑀺𑀧𑀚𑁆𑀚𑀺. 𑀢𑀸𑀯𑀤𑁂𑀯 𑀘 𑀦𑀁 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀸 𑀦𑀘𑁆𑀘𑀕𑀻𑀢𑀸𑀤𑀻𑀲𑀼 𑀲𑀼𑀲𑀺𑀓𑁆𑀔𑀺𑀢𑀸 𑀤𑁂𑀯𑀓𑀜𑁆𑀜𑀸 𑀯𑀺𑀬 𑀭𑀽𑀧𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀸 𑀇𑀢𑁆𑀣𑀺𑀬𑁄 𑀦𑀸𑀦𑀸𑀢𑀽𑀭𑀺𑀬𑀸𑀦𑀺 𑀕𑀳𑁂𑀢𑁆𑀯𑀸 𑀲𑀫𑁆𑀧𑀭𑀺𑀯𑀸𑀭𑀬𑀺𑀢𑁆𑀯𑀸 𑀅𑀪𑀺𑀭𑀫𑀸𑀧𑁂𑀦𑁆𑀢𑀺𑀬𑁄 𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑀸𑀦𑀺 𑀧𑀬𑁄𑀚𑀬𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 𑀓𑀺𑀮𑁂𑀲𑁂𑀲𑀼 𑀯𑀺𑀭𑀢𑁆𑀢𑀘𑀺𑀢𑁆𑀢𑀢𑀸𑀬 𑀦𑀘𑁆𑀘𑀸𑀤𑀻𑀲𑀼 𑀅𑀦𑀪𑀺𑀭𑀢𑁄 𑀫𑀼𑀳𑀼𑀢𑁆𑀢𑀁 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺. 𑀢𑀸𑀧𑀺 𑀇𑀢𑁆𑀣𑀺𑀬𑁄 ‘‘𑀬𑀲𑁆𑀲𑀢𑁆𑀣𑀸𑀬 𑀫𑀬𑀁 𑀦𑀘𑁆𑀘𑀸𑀤𑀻𑀦𑀺 𑀧𑀬𑁄𑀚𑁂𑀫, 𑀲𑁄 𑀦𑀺𑀤𑁆𑀤𑀁 𑀉𑀧𑀕𑀢𑁄, 𑀇𑀤𑀸𑀦𑀺 𑀓𑀺𑀫𑀢𑁆𑀣𑀁 𑀓𑀺𑀮𑀫𑀸𑀫𑀸’’𑀢𑀺 𑀕𑀳𑀺𑀢𑀕𑁆𑀕𑀳𑀺𑀢𑀸𑀦𑀺 𑀢𑀽𑀭𑀺𑀬𑀸𑀦𑀺 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀦𑀺𑀧𑀚𑁆𑀚𑀺𑀁𑀲𑀼, 𑀕𑀦𑁆𑀥𑀢𑁂𑀮𑀧𑁆𑀧𑀤𑀻𑀧𑀸 𑀛𑀸𑀬𑀦𑁆𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀧𑀩𑀼𑀚𑁆𑀛𑀺𑀢𑁆𑀯𑀸 𑀲𑀬𑀦𑀧𑀺𑀝𑁆𑀞𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀺𑀦𑁆𑀦𑁄 𑀅𑀤𑁆𑀤𑀲 𑀢𑀸 𑀇𑀢𑁆𑀣𑀺𑀬𑁄 𑀢𑀽𑀭𑀺𑀬𑀪𑀡𑁆𑀟𑀸𑀦𑀺 𑀅𑀯𑀢𑁆𑀣𑀭𑀺𑀢𑁆𑀯𑀸 𑀦𑀺𑀤𑁆𑀤𑀸𑀬𑀦𑁆𑀢𑀺𑀬𑁄 𑁋 𑀏𑀓𑀘𑁆𑀘𑀸 𑀧𑀕𑁆𑀖𑀭𑀺𑀢𑀔𑁂𑀴𑀸, 𑀮𑀸𑀮𑀸𑀓𑀺𑀮𑀺𑀦𑁆𑀦𑀕𑀢𑁆𑀢𑀸, 𑀏𑀓𑀘𑁆𑀘𑀸 𑀤𑀦𑁆𑀢𑁂 𑀔𑀸𑀤𑀦𑁆𑀢𑀺𑀬𑁄, 𑀏𑀓𑀘𑁆𑀘𑀸 𑀓𑀸𑀓𑀘𑁆𑀙𑀦𑁆𑀢𑀺𑀬𑁄, 𑀏𑀓𑀘𑁆𑀘𑀸 𑀯𑀺𑀧𑁆𑀧𑀮𑀧𑀦𑁆𑀢𑀺𑀬𑁄, 𑀏𑀓𑀘𑁆𑀘𑀸 𑀯𑀺𑀯𑀝𑀫𑀼𑀔𑀸, 𑀏𑀓𑀘𑁆𑀘𑀸 𑀅𑀧𑀕𑀢𑀯𑀢𑁆𑀣𑀸, 𑀧𑀸𑀓𑀝𑀩𑀻𑀪𑀘𑁆𑀙𑀲𑀫𑁆𑀩𑀸𑀥𑀝𑁆𑀞𑀸𑀦𑀸. 𑀲𑁄 𑀢𑀸𑀲𑀁 𑀢𑀁 𑀯𑀺𑀧𑁆𑀧𑀓𑀸𑀭𑀁 𑀤𑀺𑀲𑁆𑀯𑀸 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀓𑀸𑀫𑁂𑀲𑀼 𑀯𑀺𑀭𑀢𑁆𑀢𑀘𑀺𑀢𑁆𑀢𑁄 𑀅𑀳𑁄𑀲𑀺. 𑀢𑀲𑁆𑀲 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀁 𑀲𑀓𑁆𑀓𑀪𑀯𑀦𑀲𑀤𑀺𑀲𑀫𑁆𑀧𑀺 𑀢𑀁 𑀫𑀳𑀸𑀢𑀮𑀁 𑀅𑀧𑀯𑀺𑀤𑁆𑀥𑀦𑀸𑀦𑀸𑀓𑀼𑀡𑀧𑀪𑀭𑀺𑀢𑀁 𑀆𑀫𑀓𑀲𑀼𑀲𑀸𑀦𑀁 𑀯𑀺𑀬 𑀉𑀧𑀝𑁆𑀞𑀸𑀲𑀺, 𑀢𑀬𑁄 𑀪𑀯𑀸 𑀆𑀤𑀺𑀢𑁆𑀢𑀕𑁂𑀳𑀲𑀤𑀺𑀲𑀸 𑀔𑀸𑀬𑀺𑀁𑀲𑀼 𑁋 ‘‘𑀉𑀧𑀤𑁆𑀤𑀼𑀢𑀁 𑀯𑀢 𑀪𑁄, 𑀉𑀧𑀲𑁆𑀲𑀝𑁆𑀞𑀁 𑀯𑀢 𑀪𑁄’’𑀢𑀺 𑀉𑀤𑀸𑀦𑀁 𑀧𑀯𑀢𑁆𑀢𑁂𑀲𑀺, 𑀅𑀢𑀺𑀯𑀺𑀬 𑀧𑀩𑁆𑀩𑀚𑁆𑀚𑀸𑀬 𑀘𑀺𑀢𑁆𑀢𑀁 𑀦𑀫𑀺.

𑀲𑁄 ‘‘𑀅𑀚𑁆𑀚𑁂𑀯 𑀫𑀬𑀸 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀲𑀬𑀦𑀸 𑀉𑀝𑁆𑀞𑀸𑀬 𑀤𑁆𑀯𑀸𑀭𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 ‘‘𑀓𑁄 𑀏𑀢𑁆𑀣𑀸’’𑀢𑀺 𑀆𑀳. 𑀉𑀫𑁆𑀫𑀸𑀭𑁂 𑀲𑀻𑀲𑀁 𑀓𑀢𑁆𑀯𑀸 𑀦𑀺𑀧𑀦𑁆𑀦𑁄 𑀙𑀦𑁆𑀦𑁄 ‘‘𑀅𑀳𑀁 𑀅𑀬𑁆𑀬𑀧𑀼𑀢𑁆𑀢 𑀙𑀦𑁆𑀦𑁄’’𑀢𑀺 𑀆𑀳. ‘‘𑀅𑀳𑀁 𑀅𑀚𑁆𑀚 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀢𑀼𑀓𑀸𑀫𑁄, 𑀏𑀓𑀁 𑀫𑁂 𑀅𑀲𑁆𑀲𑀁 𑀓𑀧𑁆𑀧𑁂𑀳𑀻’’𑀢𑀺 𑀆𑀳. 𑀲𑁄 ‘‘𑀲𑀸𑀥𑀼 𑀤𑁂𑀯𑀸’’𑀢𑀺 𑀅𑀲𑁆𑀲𑀪𑀡𑁆𑀟𑀺𑀓𑀁 𑀕𑀳𑁂𑀢𑁆𑀯𑀸 𑀅𑀲𑁆𑀲𑀲𑀸𑀮𑀁 𑀕𑀦𑁆𑀢𑁆𑀯𑀸 𑀕𑀦𑁆𑀥𑀢𑁂𑀮𑀧𑀤𑀻𑀧𑁂𑀲𑀼 𑀚𑀮𑀦𑁆𑀢𑁂𑀲𑀼 𑀲𑀼𑀫𑀦𑀧𑀝𑁆𑀝𑀯𑀺𑀢𑀸𑀦𑀲𑁆𑀲 𑀳𑁂𑀝𑁆𑀞𑀸 𑀭𑀫𑀡𑀻𑀬𑁂 𑀪𑀽𑀫𑀺𑀪𑀸𑀕𑁂 𑀞𑀺𑀢𑀁 𑀓𑀡𑁆𑀟𑀓𑀁 𑀅𑀲𑁆𑀲𑀭𑀸𑀚𑀸𑀦𑀁 𑀤𑀺𑀲𑁆𑀯𑀸 ‘‘𑀅𑀚𑁆𑀚 𑀫𑀬𑀸 𑀇𑀫𑀫𑁂𑀯 𑀓𑀧𑁆𑀧𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀓𑀡𑁆𑀟𑀓𑀁 𑀓𑀧𑁆𑀧𑁂𑀲𑀺. 𑀲𑁄 𑀓𑀧𑁆𑀧𑀺𑀬𑀫𑀸𑀦𑁄𑀯 𑀅𑀜𑁆𑀜𑀸𑀲𑀺 ‘‘𑀅𑀬𑀁 𑀓𑀧𑁆𑀧𑀦𑀸 𑀅𑀢𑀺𑀕𑀸𑀴𑁆𑀳𑀸, 𑀅𑀜𑁆𑀜𑁂𑀲𑀼 𑀤𑀺𑀯𑀲𑁂𑀲𑀼 𑀉𑀬𑁆𑀬𑀸𑀦𑀓𑀻𑀴𑀸𑀤𑀺𑀕𑀫𑀦𑁂 𑀓𑀧𑁆𑀧𑀦𑀸 𑀯𑀺𑀬 𑀦 𑀳𑁄𑀢𑀺, 𑀫𑀬𑁆𑀳𑀁 𑀅𑀬𑁆𑀬𑀧𑀼𑀢𑁆𑀢𑁄 𑀅𑀚𑁆𑀚 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀢𑀼𑀓𑀸𑀫𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀢𑀢𑁄 𑀢𑀼𑀝𑁆𑀞𑀫𑀸𑀦𑀲𑁄 𑀫𑀳𑀸𑀳𑀲𑀺𑀢𑀁 𑀳𑀲𑀺. 𑀲𑁄 𑀲𑀤𑁆𑀤𑁄 𑀲𑀓𑀮𑀦𑀕𑀭𑀁 𑀧𑀢𑁆𑀣𑀭𑀺𑀢𑁆𑀯𑀸 𑀕𑀘𑁆𑀙𑁂𑀬𑁆𑀬, 𑀤𑁂𑀯𑀢𑀸 𑀧𑀦 𑀢𑀁 𑀲𑀤𑁆𑀤𑀁 𑀦𑀺𑀭𑀼𑀫𑁆𑀪𑀺𑀢𑁆𑀯𑀸 𑀦 𑀓𑀲𑁆𑀲𑀘𑀺 𑀲𑁄𑀢𑀼𑀁 𑀅𑀤𑀁𑀲𑀼.

𑀩𑁄𑀥𑀺𑀲𑀢𑁆𑀢𑁄𑀧𑀺 𑀔𑁄 𑀙𑀦𑁆𑀦𑀁 𑀧𑁂𑀲𑁂𑀢𑁆𑀯𑀸𑀯 ‘‘𑀧𑀼𑀢𑁆𑀢𑀁 𑀢𑀸𑀯 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀧𑀮𑁆𑀮𑀗𑁆𑀓𑀢𑁄 𑀉𑀝𑁆𑀞𑀸𑀬 𑀭𑀸𑀳𑀼𑀮𑀫𑀸𑀢𑀸𑀬 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀕𑀩𑁆𑀪𑀤𑁆𑀯𑀸𑀭𑀁 𑀯𑀺𑀯𑀭𑀺. 𑀢𑀲𑁆𑀫𑀺𑀁 𑀔𑀡𑁂 𑀅𑀦𑁆𑀢𑁄𑀕𑀩𑁆𑀪𑁂 𑀕𑀦𑁆𑀥𑀢𑁂𑀮𑀧𑀤𑀻𑀧𑁄 𑀛𑀸𑀬𑀢𑀺, 𑀭𑀸𑀳𑀼𑀮𑀫𑀸𑀢𑀸 𑀲𑀼𑀫𑀦𑀫𑀮𑁆𑀮𑀺𑀓𑀸𑀤𑀻𑀦𑀁 𑀧𑀼𑀧𑁆𑀨𑀸𑀦𑀁 𑀅𑀫𑁆𑀩𑀡𑀫𑀢𑁆𑀢𑁂𑀦 𑀅𑀪𑀺𑀧𑁆𑀧𑀓𑀺𑀡𑁆𑀡𑀲𑀬𑀦𑁂 𑀧𑀼𑀢𑁆𑀢𑀲𑁆𑀲 𑀫𑀢𑁆𑀣𑀓𑁂 𑀳𑀢𑁆𑀣𑀁 𑀞𑀧𑁂𑀢𑁆𑀯𑀸 𑀦𑀺𑀤𑁆𑀤𑀸𑀬𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀉𑀫𑁆𑀫𑀸𑀭𑁂 𑀧𑀸𑀤𑀁 𑀞𑀧𑁂𑀢𑁆𑀯𑀸 𑀞𑀺𑀢𑀓𑁄𑀯 𑀑𑀮𑁄𑀓𑁂𑀢𑁆𑀯𑀸 ‘‘𑀲𑀘𑀸𑀳𑀁 𑀤𑁂𑀯𑀺𑀬𑀸 𑀳𑀢𑁆𑀣𑀁 𑀅𑀧𑀦𑁂𑀢𑁆𑀯𑀸 𑀫𑀫 𑀧𑀼𑀢𑁆𑀢𑀁 𑀕𑀡𑁆𑀳𑀺𑀲𑁆𑀲𑀸𑀫𑀺, 𑀤𑁂𑀯𑀻 𑀧𑀩𑀼𑀚𑁆𑀛𑀺𑀲𑁆𑀲𑀢𑀺, 𑀏𑀯𑀁 𑀫𑁂 𑀕𑀫𑀦𑀦𑁆𑀢𑀭𑀸𑀬𑁄 𑀪𑀯𑀺𑀲𑁆𑀲𑀢𑀺, 𑀩𑀼𑀤𑁆𑀥𑁄 𑀳𑀼𑀢𑁆𑀯𑀸𑀯 𑀆𑀕𑀦𑁆𑀢𑁆𑀯𑀸 𑀧𑀼𑀢𑁆𑀢𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀧𑀸𑀲𑀸𑀤𑀢𑀮𑀢𑁄 𑀑𑀢𑀭𑀺. 𑀬𑀁 𑀧𑀦 𑀚𑀸𑀢𑀓𑀝𑁆𑀞𑀓𑀣𑀸𑀬𑀁 ‘‘𑀢𑀤𑀸 𑀲𑀢𑁆𑀢𑀸𑀳𑀚𑀸𑀢𑁄 𑀭𑀸𑀳𑀼𑀮𑀓𑀼𑀫𑀸𑀭𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀁 𑀲𑁂𑀲𑀝𑁆𑀞𑀓𑀣𑀸𑀲𑀼 𑀦𑀢𑁆𑀣𑀺, 𑀢𑀲𑁆𑀫𑀸 𑀇𑀤𑀫𑁂𑀯 𑀕𑀳𑁂𑀢𑀩𑁆𑀩𑀁.

𑀏𑀯𑀁 𑀩𑁄𑀥𑀺𑀲𑀢𑁆𑀢𑁄 𑀧𑀸𑀲𑀸𑀤𑀢𑀮𑀸 𑀑𑀢𑀭𑀺𑀢𑁆𑀯𑀸 𑀅𑀲𑁆𑀲𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀢𑀸𑀢 𑀓𑀡𑁆𑀟𑀓, 𑀢𑁆𑀯𑀁 𑀅𑀚𑁆𑀚 𑀏𑀓𑀭𑀢𑁆𑀢𑀺𑀁 𑀫𑀁 𑀢𑀸𑀭𑀬, 𑀅𑀳𑀁 𑀢𑀁 𑀦𑀺𑀲𑁆𑀲𑀸𑀬 𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀲𑀤𑁂𑀯𑀓𑀁 𑀮𑁄𑀓𑀁 𑀢𑀸𑀭𑁂𑀲𑁆𑀲𑀸𑀫𑀻’’𑀢𑀺. 𑀢𑀢𑁄 𑀉𑀮𑁆𑀮𑀗𑁆𑀖𑀺𑀢𑁆𑀯𑀸 𑀓𑀡𑁆𑀟𑀓𑀲𑁆𑀲 𑀧𑀺𑀝𑁆𑀞𑀺𑀁 𑀅𑀪𑀺𑀭𑀼𑀳𑀺. 𑀓𑀡𑁆𑀟𑀓𑁄 𑀕𑀻𑀯𑀢𑁄 𑀧𑀝𑁆𑀞𑀸𑀬 𑀆𑀬𑀸𑀫𑁂𑀦 𑀅𑀝𑁆𑀞𑀸𑀭𑀲𑀳𑀢𑁆𑀣𑁄 𑀳𑁄𑀢𑀺 𑀢𑀤𑀦𑀼𑀘𑁆𑀙𑀯𑀺𑀓𑁂𑀦 𑀉𑀩𑁆𑀩𑁂𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀣𑀸𑀫𑀚𑀯𑀲𑀫𑁆𑀧𑀦𑁆𑀦𑁄 𑀲𑀩𑁆𑀩𑀲𑁂𑀢𑁄 𑀥𑁄𑀢𑀲𑀗𑁆𑀔𑀲𑀤𑀺𑀲𑁄. 𑀲𑁄 𑀲𑀘𑁂 𑀳𑀲𑁂𑀬𑁆𑀬 𑀯𑀸 𑀧𑀤𑀲𑀤𑁆𑀤𑀁 𑀯𑀸 𑀓𑀭𑁂𑀬𑁆𑀬, 𑀲𑀤𑁆𑀤𑁄 𑀲𑀓𑀮𑀦𑀕𑀭𑀁 𑀅𑀯𑀢𑁆𑀣𑀭𑁂𑀬𑁆𑀬. 𑀢𑀲𑁆𑀫𑀸 𑀤𑁂𑀯𑀢𑀸 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀢𑀲𑁆𑀲 𑀬𑀣𑀸 𑀦 𑀓𑁄𑀘𑀺 𑀲𑀼𑀡𑀸𑀢𑀺, 𑀏𑀯𑀁 𑀳𑀲𑀺𑀢𑀲𑀤𑁆𑀤𑀁 𑀲𑀦𑁆𑀦𑀺𑀭𑀼𑀫𑁆𑀪𑀺𑀢𑁆𑀯𑀸 𑀅𑀓𑁆𑀓𑀫𑀦𑀅𑀓𑁆𑀓𑀫𑀦𑀧𑀤𑀯𑀸𑀭𑁂 𑀳𑀢𑁆𑀣𑀢𑀮𑀸𑀦𑀺 𑀉𑀧𑀦𑀸𑀫𑁂𑀲𑀼𑀁. 𑀩𑁄𑀥𑀺𑀲𑀢𑁆𑀢𑁄 𑀅𑀲𑁆𑀲𑀯𑀭𑀲𑁆𑀲 𑀧𑀺𑀝𑁆𑀞𑀺𑀯𑁂𑀫𑀚𑁆𑀛𑀕𑀢𑁄 𑀙𑀦𑁆𑀦𑀁 𑀅𑀲𑁆𑀲𑀲𑁆𑀲 𑀯𑀸𑀮𑀥𑀺𑀁 𑀕𑀸𑀳𑀸𑀧𑁂𑀢𑁆𑀯𑀸 𑀅𑀟𑁆𑀠𑀭𑀢𑁆𑀢𑀲𑀫𑀬𑁂 𑀫𑀳𑀸𑀤𑁆𑀯𑀸𑀭𑀲𑀫𑀻𑀧𑀁 𑀧𑀢𑁆𑀢𑁄. 𑀢𑀤𑀸 𑀧𑀦 𑀭𑀸𑀚𑀸 ‘‘𑀏𑀯𑀁 𑀩𑁄𑀥𑀺𑀲𑀢𑁆𑀢𑁄 𑀬𑀸𑀬 𑀓𑀸𑀬𑀘𑀺 𑀯𑁂𑀮𑀸𑀬 𑀦𑀕𑀭𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺 𑀤𑁆𑀯𑀻𑀲𑀼 𑀤𑁆𑀯𑀸𑀭𑀓𑀯𑀸𑀝𑁂𑀲𑀼 𑀏𑀓𑁂𑀓𑀁 𑀧𑀼𑀭𑀺𑀲𑀲𑀳𑀲𑁆𑀲𑁂𑀦 𑀯𑀺𑀯𑀭𑀺𑀢𑀩𑁆𑀩𑀁 𑀓𑀸𑀭𑀸𑀧𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀣𑀸𑀫𑀩𑀮𑀲𑀫𑁆𑀧𑀦𑁆𑀦𑁄, 𑀳𑀢𑁆𑀣𑀺𑀕𑀡𑀦𑀸𑀬 𑀓𑁄𑀝𑀺𑀲𑀳𑀲𑁆𑀲𑀳𑀢𑁆𑀣𑀻𑀦𑀁 𑀩𑀮𑀁 𑀥𑀸𑀭𑁂𑀢𑀺, 𑀧𑀼𑀭𑀺𑀲𑀕𑀡𑀦𑀸𑀬 𑀤𑀲𑀓𑁄𑀝𑀺𑀲𑀳𑀲𑁆𑀲𑀧𑀼𑀭𑀺𑀲𑀸𑀦𑀁. 𑀲𑁄 𑀘𑀺𑀦𑁆𑀢𑁂𑀲𑀺 ‘‘𑀲𑀘𑁂 𑀤𑁆𑀯𑀸𑀭𑀁 𑀦 𑀯𑀺𑀯𑀭𑀻𑀬𑀢𑀺, 𑀅𑀚𑁆𑀚 𑀓𑀡𑁆𑀟𑀓𑀲𑁆𑀲 𑀧𑀺𑀝𑁆𑀞𑁂 𑀦𑀺𑀲𑀺𑀦𑁆𑀦𑁄𑀯 𑀯𑀸𑀮𑀥𑀺𑀁 𑀕𑀳𑁂𑀢𑁆𑀯𑀸 𑀞𑀺𑀢𑁂𑀦 𑀙𑀦𑁆𑀦𑁂𑀦 𑀲𑀤𑁆𑀥𑀺𑀁𑀬𑁂𑀯 𑀓𑀡𑁆𑀟𑀓𑀁 𑀊𑀭𑀽𑀳𑀺 𑀦𑀺𑀧𑁆𑀧𑀻𑀴𑁂𑀢𑁆𑀯𑀸 𑀅𑀝𑁆𑀞𑀸𑀭𑀲𑀳𑀢𑁆𑀣𑀼𑀩𑁆𑀩𑁂𑀥𑀁 𑀧𑀸𑀓𑀸𑀭𑀁 𑀉𑀧𑁆𑀧𑀢𑀺𑀢𑁆𑀯𑀸 𑀅𑀢𑀺𑀓𑁆𑀓𑀫𑀺𑀲𑁆𑀲𑀸𑀫𑀻’’𑀢𑀺. 𑀙𑀦𑁆𑀦𑁄𑀧𑀺 𑀘𑀺𑀦𑁆𑀢𑁂𑀲𑀺 ‘‘𑀲𑀘𑁂 𑀤𑁆𑀯𑀸𑀭𑀁 𑀦 𑀯𑀺𑀯𑀭𑀻𑀬𑀢𑀺, 𑀅𑀳𑀁 𑀅𑀬𑁆𑀬𑀧𑀼𑀢𑁆𑀢𑀁 𑀔𑀦𑁆𑀥𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀓𑀡𑁆𑀟𑀓𑀁 𑀤𑀓𑁆𑀔𑀺𑀡𑁂𑀦 𑀳𑀢𑁆𑀣𑁂𑀦 𑀓𑀼𑀘𑁆𑀙𑀺𑀬𑀁 𑀧𑀭𑀺𑀓𑁆𑀔𑀺𑀧𑀦𑁆𑀢𑁄 𑀉𑀧𑀓𑀘𑁆𑀙𑀦𑁆𑀢𑀭𑁂 𑀓𑀢𑁆𑀯𑀸 𑀧𑀸𑀓𑀸𑀭𑀁 𑀉𑀧𑁆𑀧𑀢𑀺𑀢𑁆𑀯𑀸 𑀅𑀢𑀺𑀓𑁆𑀓𑀫𑀺𑀲𑁆𑀲𑀸𑀫𑀻’’𑀢𑀺. 𑀓𑀡𑁆𑀟𑀓𑁄𑀧𑀺 𑀘𑀺𑀦𑁆𑀢𑁂𑀲𑀺 ‘‘𑀲𑀘𑁂 𑀤𑁆𑀯𑀸𑀭𑀁 𑀦 𑀯𑀺𑀯𑀭𑀻𑀬𑀢𑀺, 𑀅𑀳𑀁 𑀅𑀢𑁆𑀢𑀦𑁄 𑀲𑀸𑀫𑀺𑀓𑀁 𑀧𑀺𑀝𑁆𑀞𑀺𑀬𑀁 𑀬𑀣𑀸𑀦𑀺𑀲𑀺𑀦𑁆𑀦𑀫𑁂𑀯 𑀙𑀦𑁆𑀦𑁂𑀦 𑀯𑀸𑀮𑀥𑀺𑀁 𑀕𑀳𑁂𑀢𑁆𑀯𑀸 𑀞𑀺𑀢𑁂𑀦 𑀲𑀤𑁆𑀥𑀺𑀁𑀬𑁂𑀯 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀸𑀓𑀸𑀭𑀁 𑀉𑀧𑁆𑀧𑀢𑀺𑀢𑁆𑀯𑀸 𑀅𑀢𑀺𑀓𑁆𑀓𑀫𑀺𑀲𑁆𑀲𑀸𑀫𑀻’’𑀢𑀺. 𑀲𑀘𑁂 𑀤𑁆𑀯𑀸𑀭𑀁 𑀦 𑀅𑀯𑀸𑀧𑀼𑀭𑀻𑀬𑀺𑀢𑁆𑀣, 𑀬𑀣𑀸𑀘𑀺𑀦𑁆𑀢𑀺𑀢𑀫𑁂𑀯 𑀢𑁂𑀲𑀼 𑀢𑀻𑀲𑀼 𑀚𑀦𑁂𑀲𑀼 𑀅𑀜𑁆𑀜𑀢𑀭𑁄 𑀲𑀫𑁆𑀧𑀸𑀤𑁂𑀬𑁆𑀬. 𑀤𑁆𑀯𑀸𑀭𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀧𑀦 𑀤𑁆𑀯𑀸𑀭𑀁 𑀯𑀺𑀯𑀭𑀺.

𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀫𑀸𑀭𑁄 ‘‘𑀩𑁄𑀥𑀺𑀲𑀢𑁆𑀢𑀁 𑀦𑀺𑀯𑀢𑁆𑀢𑁂𑀲𑁆𑀲𑀸𑀫𑀻’’𑀢𑀺 𑀆𑀕𑀦𑁆𑀢𑁆𑀯𑀸 𑀆𑀓𑀸𑀲𑁂 𑀞𑀺𑀢𑁄 𑀆𑀳 𑁋 ‘‘𑀫𑀸𑀭𑀺𑀲, 𑀫𑀸 𑀦𑀺𑀓𑁆𑀔𑀫, 𑀇𑀢𑁄 𑀢𑁂 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀘𑀓𑁆𑀓𑀭𑀢𑀦𑀁 𑀧𑀸𑀢𑀼𑀪𑀯𑀺𑀲𑁆𑀲𑀢𑀺, 𑀤𑁆𑀯𑀺𑀲𑀳𑀲𑁆𑀲𑀧𑀭𑀺𑀢𑁆𑀢𑀤𑀻𑀧𑀧𑀭𑀺𑀯𑀸𑀭𑀸𑀦𑀁 𑀘𑀢𑀼𑀦𑁆𑀦𑀁 𑀫𑀳𑀸𑀤𑀻𑀧𑀸𑀦𑀁 𑀭𑀚𑁆𑀚𑀁 𑀓𑀸𑀭𑁂𑀲𑁆𑀲𑀲𑀺, 𑀦𑀺𑀯𑀢𑁆𑀢 𑀫𑀸𑀭𑀺𑀲𑀸’’𑀢𑀺. ‘‘𑀓𑁄𑀲𑀺 𑀢𑁆𑀯’’𑀦𑁆𑀢𑀺? ‘‘𑀅𑀳𑀁 𑀯𑀲𑀯𑀢𑁆𑀢𑀻’’𑀢𑀺. ‘‘𑀫𑀸𑀭, 𑀚𑀸𑀦𑀸𑀫𑀳𑀁 𑀫𑀬𑁆𑀳𑀁 𑀘𑀓𑁆𑀓𑀭𑀢𑀦𑀲𑁆𑀲 𑀧𑀸𑀢𑀼𑀪𑀸𑀯𑀁, 𑀅𑀦𑀢𑁆𑀣𑀺𑀓𑁄𑀳𑀁 𑀭𑀚𑁆𑀚𑁂𑀦, 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀉𑀦𑁆𑀦𑀸𑀤𑁂𑀢𑁆𑀯𑀸 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀫𑀸𑀭𑁄 ‘‘𑀇𑀢𑁄 𑀤𑀸𑀦𑀺 𑀢𑁂 𑀧𑀝𑁆𑀞𑀸𑀬 𑀓𑀸𑀫𑀯𑀺𑀢𑀓𑁆𑀓𑀁 𑀯𑀸 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀁 𑀯𑀸 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀁 𑀯𑀸 𑀘𑀺𑀦𑁆𑀢𑀺𑀢𑀓𑀸𑀮𑁂 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀑𑀢𑀸𑀭𑀸𑀧𑁂𑀓𑁆𑀔𑁄 𑀙𑀸𑀬𑀸 𑀯𑀺𑀬 𑀅𑀦𑀧𑀕𑀘𑁆𑀙𑀦𑁆𑀢𑁄 𑀅𑀦𑀼𑀩𑀦𑁆𑀥𑀺.

𑀩𑁄𑀥𑀺𑀲𑀢𑁆𑀢𑁄𑀧𑀺 𑀳𑀢𑁆𑀣𑀕𑀢𑀁 𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀁 𑀔𑁂𑀴𑀧𑀺𑀡𑁆𑀟𑀁 𑀯𑀺𑀬 𑀅𑀦𑀧𑁂𑀓𑁆𑀔𑁄 𑀙𑀟𑁆𑀟𑁂𑀢𑁆𑀯𑀸 𑀫𑀳𑀦𑁆𑀢𑁂𑀦 𑀲𑀓𑁆𑀓𑀸𑀭𑁂𑀦 𑀦𑀕𑀭𑀸 𑀦𑀺𑀓𑁆𑀔𑀫𑀺 𑀆𑀲𑀸𑀴𑁆𑀳𑀺𑀧𑀼𑀡𑁆𑀡𑀫𑀸𑀬 𑀉𑀢𑁆𑀢𑀭𑀸𑀲𑀸𑀴𑁆𑀳𑀦𑀓𑁆𑀔𑀢𑁆𑀢𑁂 𑀯𑀢𑁆𑀢𑀫𑀸𑀦𑁂. 𑀦𑀺𑀓𑁆𑀔𑀫𑀺𑀢𑁆𑀯𑀸 𑀘 𑀧𑀼𑀦 𑀦𑀕𑀭𑀁 𑀑𑀮𑁄𑀓𑁂𑀢𑀼𑀓𑀸𑀫𑁄 𑀚𑀸𑀢𑁄. 𑀏𑀯𑀜𑁆𑀘 𑀧𑀦𑀲𑁆𑀲 𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑀫𑀢𑁆𑀢𑁂𑀬𑁂𑀯 ‘‘𑀫𑀳𑀸𑀧𑀼𑀭𑀺𑀲, 𑀦 𑀢𑀬𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀑𑀮𑁄𑀓𑀦𑀓𑀫𑁆𑀫𑀁 𑀓𑀢’’𑀦𑁆𑀢𑀺 𑀯𑀤𑀫𑀸𑀦𑀸 𑀯𑀺𑀬 𑀫𑀳𑀸𑀧𑀣𑀯𑀻 𑀓𑀼𑀮𑀸𑀮𑀘𑀓𑁆𑀓𑀁 𑀯𑀺𑀬 𑀪𑀺𑀚𑁆𑀚𑀺𑀢𑁆𑀯𑀸 𑀧𑀭𑀺𑀯𑀢𑁆𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀦𑀕𑀭𑀸𑀪𑀺𑀫𑀼𑀔𑁄 𑀞𑀢𑁆𑀯𑀸 𑀦𑀕𑀭𑀁 𑀑𑀮𑁄𑀓𑁂𑀢𑁆𑀯𑀸 𑀢𑀲𑁆𑀫𑀺𑀁 𑀧𑀣𑀯𑀺𑀧𑁆𑀧𑀤𑁂𑀲𑁂 𑀓𑀡𑁆𑀟𑀓𑀦𑀺𑀯𑀢𑁆𑀢𑀦𑀘𑁂𑀢𑀺𑀬𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀫𑀕𑁆𑀕𑀸𑀪𑀺𑀫𑀼𑀔𑀁 𑀓𑀡𑁆𑀟𑀓𑀁 𑀓𑀢𑁆𑀯𑀸 𑀧𑀸𑀬𑀸𑀲𑀺 𑀫𑀳𑀦𑁆𑀢𑁂𑀦 𑀲𑀓𑁆𑀓𑀸𑀭𑁂𑀦 𑀉𑀴𑀸𑀭𑁂𑀦 𑀲𑀺𑀭𑀺𑀲𑁄𑀪𑀕𑁆𑀕𑁂𑀦. 𑀢𑀤𑀸 𑀓𑀺𑀭𑀲𑁆𑀲 𑀤𑁂𑀯𑀢𑀸 𑀧𑀼𑀭𑀢𑁄 𑀲𑀝𑁆𑀞𑀺 𑀉𑀓𑁆𑀓𑀸𑀲𑀳𑀲𑁆𑀲𑀸𑀦𑀺 𑀥𑀸𑀭𑀬𑀺𑀁𑀲𑀼, 𑀧𑀘𑁆𑀙𑀢𑁄 𑀲𑀝𑁆𑀞𑀺, 𑀤𑀓𑁆𑀔𑀺𑀡𑀧𑀲𑁆𑀲𑀢𑁄 𑀲𑀝𑁆𑀞𑀺, 𑀯𑀸𑀫𑀧𑀲𑁆𑀲𑀢𑁄 𑀲𑀝𑁆𑀞𑀺, 𑀅𑀧𑀭𑀸 𑀤𑁂𑀯𑀢𑀸 𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀅𑀧𑀭𑀺𑀫𑀸𑀡𑀸 𑀉𑀓𑁆𑀓𑀸 𑀥𑀸𑀭𑀬𑀺𑀁𑀲𑀼, 𑀅𑀧𑀭𑀸 𑀤𑁂𑀯𑀢𑀸 𑀘 𑀦𑀸𑀕𑀲𑀼𑀧𑀡𑁆𑀡𑀸𑀤𑀬𑁄 𑀘 𑀤𑀺𑀩𑁆𑀩𑁂𑀳𑀺 𑀕𑀦𑁆𑀥𑁂𑀳𑀺 𑀫𑀸𑀮𑀸𑀳𑀺 𑀘𑀼𑀡𑁆𑀡𑁂𑀳𑀺 𑀥𑀽𑀫𑁂𑀳𑀺 𑀧𑀽𑀚𑀬𑀫𑀸𑀦𑀸 𑀕𑀘𑁆𑀙𑀦𑁆𑀢𑀺. 𑀧𑀸𑀭𑀺𑀘𑁆𑀙𑀢𑁆𑀢𑀓𑀧𑀼𑀧𑁆𑀨𑁂𑀳𑀺 𑀘𑁂𑀯 𑀫𑀦𑁆𑀤𑀸𑀭𑀯𑀧𑀼𑀧𑁆𑀨𑁂𑀳𑀺 𑀘 𑀖𑀦𑀫𑁂𑀖𑀯𑀼𑀝𑁆𑀞𑀺𑀓𑀸𑀮𑁂 𑀥𑀸𑀭𑀸𑀳𑀺 𑀯𑀺𑀬 𑀦𑀪𑀁 𑀦𑀺𑀭𑀦𑁆𑀢𑀭𑀁 𑀅𑀳𑁄𑀲𑀺, 𑀤𑀺𑀩𑁆𑀩𑀸𑀦𑀺 𑀲𑀁𑀕𑀻𑀢𑀸𑀦𑀺 𑀧𑀯𑀢𑁆𑀢𑀺𑀁𑀲𑀼, 𑀲𑀫𑀦𑁆𑀢𑀢𑁄 𑀅𑀝𑁆𑀞𑀲𑀝𑁆𑀞𑀺 𑀢𑀽𑀭𑀺𑀬𑀲𑀢𑀲𑀳𑀲𑁆𑀲𑀸𑀦𑀺 𑀧𑀯𑀚𑁆𑀚𑀺𑀁𑀲𑀼, 𑀲𑀫𑀼𑀤𑁆𑀤𑀓𑀼𑀘𑁆𑀙𑀺𑀬𑀁 𑀫𑁂𑀖𑀢𑁆𑀣𑀦𑀺𑀢𑀓𑀸𑀮𑁄 𑀯𑀺𑀬 𑀬𑀼𑀕𑀦𑁆𑀥𑀭𑀓𑀼𑀘𑁆𑀙𑀺𑀬𑀁 𑀲𑀸𑀕𑀭𑀦𑀺𑀕𑁆𑀖𑁄𑀲𑀓𑀸𑀮𑁄 𑀯𑀺𑀬 𑀯𑀢𑁆𑀢𑀢𑀺.

𑀇𑀫𑀺𑀦𑀸 𑀲𑀺𑀭𑀺𑀲𑁄𑀪𑀕𑁆𑀕𑁂𑀦 𑀕𑀘𑁆𑀙𑀦𑁆𑀢𑁄 𑀩𑁄𑀥𑀺𑀲𑀢𑁆𑀢𑁄 𑀏𑀓𑀭𑀢𑁆𑀢𑁂𑀦𑁂𑀯 𑀢𑀻𑀡𑀺 𑀭𑀚𑁆𑀚𑀸𑀦𑀺 𑀅𑀢𑀺𑀓𑁆𑀓𑀫𑁆𑀫 𑀢𑀺𑀁𑀲𑀬𑁄𑀚𑀦𑀫𑀢𑁆𑀣𑀓𑁂 𑀅𑀦𑁄𑀫𑀸𑀦𑀤𑀻𑀢𑀻𑀭𑀁 𑀧𑀸𑀧𑀼𑀡𑀺. ‘‘𑀓𑀺𑀁 𑀧𑀦 𑀅𑀲𑁆𑀲𑁄 𑀢𑀢𑁄 𑀧𑀭𑀁 𑀕𑀦𑁆𑀢𑀼𑀁 𑀦 𑀲𑀓𑁆𑀓𑁄𑀢𑀻’’𑀢𑀺? ‘‘𑀦𑁄, 𑀦 𑀲𑀓𑁆𑀓𑁄’’𑀢𑀺. 𑀲𑁄 𑀳𑀺 𑀏𑀓𑀁 𑀘𑀓𑁆𑀓𑀯𑀸𑀴𑀕𑀩𑁆𑀪𑀁 𑀦𑀸𑀪𑀺𑀬𑀸 𑀞𑀺𑀢𑀘𑀓𑁆𑀓𑀲𑁆𑀲 𑀦𑁂𑀫𑀺𑀯𑀝𑁆𑀝𑀺𑀁 𑀫𑀤𑁆𑀤𑀦𑁆𑀢𑁄 𑀯𑀺𑀬 𑀅𑀦𑁆𑀢𑀦𑁆𑀢𑁂𑀦 𑀘𑀭𑀺𑀢𑁆𑀯𑀸 𑀧𑀼𑀭𑁂𑀧𑀸𑀢𑀭𑀸𑀲𑀫𑁂𑀯 𑀆𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀲𑀫𑁆𑀧𑀸𑀤𑀺𑀢𑀁 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑀼𑀁 𑀲𑀫𑀢𑁆𑀣𑁄. 𑀢𑀤𑀸 𑀧𑀦 𑀤𑁂𑀯𑀦𑀸𑀕𑀲𑀼𑀧𑀡𑁆𑀡𑀸𑀤𑀻𑀳𑀺 𑀆𑀓𑀸𑀲𑁂 𑀞𑀢𑁆𑀯𑀸 𑀑𑀲𑁆𑀲𑀝𑁆𑀞𑁂𑀳𑀺 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀬𑀸𑀯 𑀊𑀭𑀼𑀧𑁆𑀧𑀤𑁂𑀲𑀸 𑀲𑀜𑁆𑀙𑀦𑁆𑀦𑀁 𑀲𑀭𑀻𑀭𑀁 𑀆𑀓𑀟𑁆𑀠𑀺𑀢𑁆𑀯𑀸 𑀕𑀦𑁆𑀥𑀫𑀸𑀮𑀸𑀚𑀝𑀁 𑀙𑀺𑀦𑁆𑀤𑀦𑁆𑀢𑀲𑁆𑀲 𑀅𑀢𑀺𑀧𑁆𑀧𑀧𑀜𑁆𑀘𑁄 𑀅𑀳𑁄𑀲𑀺, 𑀢𑀲𑁆𑀫𑀸 𑀢𑀺𑀁𑀲𑀬𑁄𑀚𑀦𑀫𑀢𑁆𑀢𑀫𑁂𑀯 𑀅𑀕𑀫𑀸𑀲𑀺. 𑀅𑀣 𑀩𑁄𑀥𑀺𑀲𑀢𑁆𑀢𑁄 𑀦𑀤𑀻𑀢𑀻𑀭𑁂 𑀞𑀢𑁆𑀯𑀸 𑀙𑀦𑁆𑀦𑀁 𑀧𑀼𑀘𑁆𑀙𑀺 𑁋 ‘‘𑀓𑀺𑀦𑁆𑀦𑀸𑀫𑀸 𑀅𑀬𑀁 𑀦𑀤𑀻’’𑀢𑀺? ‘‘𑀅𑀦𑁄𑀫𑀸 𑀦𑀸𑀫, 𑀤𑁂𑀯𑀸’’𑀢𑀺. ‘‘𑀅𑀫𑁆𑀳𑀸𑀓𑀫𑁆𑀧𑀺 𑀧𑀩𑁆𑀩𑀚𑁆𑀚𑀸 𑀅𑀦𑁄𑀫𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀡𑁆𑀳𑀺𑀬𑀸 𑀖𑀝𑁆𑀝𑁂𑀦𑁆𑀢𑁄 𑀅𑀲𑁆𑀲𑀲𑁆𑀲 𑀲𑀜𑁆𑀜𑀁 𑀅𑀤𑀸𑀲𑀺. 𑀅𑀲𑁆𑀲𑁄 𑀉𑀧𑁆𑀧𑀢𑀺𑀢𑁆𑀯𑀸 𑀅𑀝𑁆𑀞𑀽𑀲𑀪𑀯𑀺𑀢𑁆𑀣𑀸𑀭𑀸𑀬 𑀦𑀤𑀺𑀬𑀸 𑀧𑀸𑀭𑀺𑀫𑀢𑀻𑀭𑁂 𑀅𑀝𑁆𑀞𑀸𑀲𑀺.

𑀩𑁄𑀥𑀺𑀲𑀢𑁆𑀢𑁄 𑀅𑀲𑁆𑀲𑀧𑀺𑀝𑁆𑀞𑀺𑀢𑁄 𑀑𑀭𑀼𑀬𑁆𑀳 𑀭𑀚𑀢𑀧𑀝𑁆𑀝𑀲𑀤𑀺𑀲𑁂 𑀯𑀸𑀮𑀼𑀓𑀸𑀧𑀼𑀮𑀺𑀦𑁂 𑀞𑀢𑁆𑀯𑀸 𑀙𑀦𑁆𑀦𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀲𑀫𑁆𑀫, 𑀙𑀦𑁆𑀦, 𑀢𑁆𑀯𑀁 𑀫𑀬𑁆𑀳𑀁 𑀆𑀪𑀭𑀡𑀸𑀦𑀺 𑀘𑁂𑀯 𑀓𑀡𑁆𑀟𑀓𑀜𑁆𑀘 𑀆𑀤𑀸𑀬 𑀕𑀘𑁆𑀙, 𑀅𑀳𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. ‘‘𑀅𑀳𑀫𑁆𑀧𑀺, 𑀤𑁂𑀯, 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀦 𑀮𑀩𑁆𑀪𑀸 𑀢𑀬𑀸 𑀧𑀩𑁆𑀩𑀚𑀺𑀢𑀼𑀁, 𑀕𑀘𑁆𑀙 𑀢𑁆𑀯’’𑀦𑁆𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀆𑀪𑀭𑀡𑀸𑀦𑀺 𑀘𑁂𑀯 𑀓𑀡𑁆𑀟𑀓𑀜𑁆𑀘 𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀇𑀫𑁂 𑀫𑀬𑁆𑀳𑀁 𑀓𑁂𑀲𑀸 𑀲𑀫𑀡𑀲𑀸𑀭𑀼𑀧𑁆𑀧𑀸 𑀦 𑀳𑁄𑀦𑁆𑀢𑀻’’𑀢𑀺. 𑀅𑀜𑁆𑀜𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀓𑁂𑀲𑁂 𑀙𑀺𑀦𑁆𑀤𑀺𑀢𑀼𑀁 𑀬𑀼𑀢𑁆𑀢𑀭𑀽𑀧𑁄 𑀦𑀢𑁆𑀣𑀺, 𑀢𑀢𑁄 ‘‘𑀲𑀬𑀫𑁂𑀯 𑀔𑀕𑁆𑀕𑁂𑀦 𑀙𑀺𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀤𑀓𑁆𑀔𑀺𑀡𑁂𑀦 𑀳𑀢𑁆𑀣𑁂𑀦 𑀅𑀲𑀺𑀁 𑀕𑀡𑁆𑀳𑀺𑀢𑁆𑀯𑀸 𑀯𑀸𑀫𑀳𑀢𑁆𑀣𑁂𑀦 𑀫𑁄𑀴𑀺𑀬𑀸 𑀲𑀤𑁆𑀥𑀺𑀁 𑀘𑀽𑀴𑀁 𑀕𑀳𑁂𑀢𑁆𑀯𑀸 𑀙𑀺𑀦𑁆𑀤𑀺, 𑀓𑁂𑀲𑀸 𑀤𑁆𑀯𑀗𑁆𑀕𑀼𑀮𑀫𑀢𑁆𑀢𑀸 𑀳𑀼𑀢𑁆𑀯𑀸 𑀤𑀓𑁆𑀔𑀺𑀡𑀢𑁄 𑀆𑀯𑀢𑁆𑀢𑀫𑀸𑀦𑀸 𑀲𑀻𑀲𑀁 𑀅𑀮𑁆𑀮𑀻𑀬𑀺𑀁𑀲𑀼. 𑀢𑁂𑀲𑀁 𑀬𑀸𑀯𑀚𑀻𑀯𑀁 𑀢𑀤𑁂𑀯 𑀧𑀫𑀸𑀡𑀁 𑀅𑀳𑁄𑀲𑀺, 𑀫𑀲𑁆𑀲𑀼 𑀘 𑀢𑀤𑀦𑀼𑀭𑀽𑀧𑀁, 𑀧𑀼𑀦 𑀓𑁂𑀲𑀫𑀲𑁆𑀲𑀼𑀑𑀳𑀸𑀭𑀡𑀓𑀺𑀘𑁆𑀘𑀁 𑀦𑀸𑀫 𑀦𑀸𑀳𑁄𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀲𑀳 𑀫𑁄𑀴𑀺𑀬𑀸 𑀘𑀼𑀴𑀁 𑀕𑀳𑁂𑀢𑁆𑀯𑀸 ‘‘𑀲𑀘𑀸𑀳𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀸𑀫𑀺, 𑀆𑀓𑀸𑀲𑁂 𑀢𑀺𑀝𑁆𑀞𑀢𑀼, 𑀦𑁄 𑀘𑁂, 𑀪𑀽𑀫𑀺𑀬𑀁 𑀧𑀢𑀢𑀽’’𑀢𑀺 𑀅𑀦𑁆𑀢𑀮𑀺𑀓𑁆𑀔𑁂 𑀔𑀺𑀧𑀺. 𑀢𑀁 𑀘𑀽𑀴𑀸𑀫𑀡𑀺𑀯𑁂𑀞𑀦𑀁 𑀬𑁄𑀚𑀦𑀧𑁆𑀧𑀫𑀸𑀡𑀁 𑀞𑀸𑀦𑀁 𑀕𑀦𑁆𑀢𑁆𑀯𑀸 𑀆𑀓𑀸𑀲𑁂 𑀅𑀝𑁆𑀞𑀸𑀲𑀺. 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀑𑀮𑁄𑀓𑁂𑀢𑁆𑀯𑀸 𑀬𑁄𑀚𑀦𑀺𑀬𑀭𑀢𑀦𑀘𑀗𑁆𑀓𑁄𑀝𑀓𑁂𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀘𑀽𑀴𑀸𑀫𑀡𑀺𑀘𑁂𑀢𑀺𑀬𑀁 𑀦𑀸𑀫 𑀧𑀢𑀺𑀝𑁆𑀞𑀸𑀧𑁂𑀲𑀺.

‘‘𑀙𑁂𑀢𑁆𑀯𑀸𑀦 𑀫𑁄𑀴𑀺𑀁 𑀯𑀭𑀕𑀦𑁆𑀥𑀯𑀸𑀲𑀺𑀢𑀁, 𑀯𑁂𑀳𑀸𑀬𑀲𑀁 𑀉𑀓𑁆𑀔𑀺𑀧𑀺 𑀅𑀕𑁆𑀕𑀧𑀼𑀕𑁆𑀕𑀮𑁄;

𑀲𑀳𑀲𑁆𑀲𑀦𑁂𑀢𑁆𑀢𑁄 𑀲𑀺𑀭𑀲𑀸 𑀧𑀝𑀺𑀕𑁆𑀕𑀳𑀺, 𑀲𑀼𑀯𑀡𑁆𑀡𑀘𑀗𑁆𑀓𑁄𑀝𑀯𑀭𑁂𑀦 𑀯𑀸𑀲𑀯𑁄’’𑀢𑀺.

𑀧𑀼𑀦 𑀩𑁄𑀥𑀺𑀲𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 ‘‘𑀇𑀫𑀸𑀦𑀺 𑀓𑀸𑀲𑀺𑀓𑀯𑀢𑁆𑀣𑀸𑀦𑀺 𑀫𑀬𑁆𑀳𑀁 𑀦 𑀲𑀫𑀡𑀲𑀸𑀭𑀼𑀧𑁆𑀧𑀸𑀦𑀻’’𑀢𑀺. 𑀅𑀣𑀲𑁆𑀲 𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑁂 𑀧𑀼𑀭𑀸𑀡𑀲𑀳𑀸𑀬𑀓𑁄 𑀖𑀝𑀻𑀓𑀸𑀭𑀫𑀳𑀸𑀩𑁆𑀭𑀳𑁆𑀫𑀸 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀚𑀭𑀁 𑀅𑀧𑀢𑁆𑀢𑁂𑀦 𑀫𑀺𑀢𑁆𑀢𑀪𑀸𑀯𑁂𑀦 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀚𑁆𑀚 𑀫𑁂 𑀲𑀳𑀸𑀬𑀓𑁄 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀦𑁆𑀢𑁄, 𑀲𑀫𑀡𑀧𑀭𑀺𑀓𑁆𑀔𑀸𑀭𑀫𑀲𑁆𑀲 𑀕𑀳𑁂𑀢𑁆𑀯𑀸 𑀕𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺.

‘‘𑀢𑀺𑀘𑀻𑀯𑀭𑀜𑁆𑀘 𑀧𑀢𑁆𑀢𑁄 𑀘, 𑀯𑀸𑀲𑀻 𑀲𑀽𑀘𑀺 𑀘 𑀩𑀦𑁆𑀥𑀦𑀁;

𑀧𑀭𑀺𑀲𑁆𑀲𑀸𑀯𑀦𑁂𑀦 𑀅𑀝𑁆𑀞𑁂𑀢𑁂, 𑀬𑀼𑀢𑁆𑀢𑀬𑁄𑀕𑀲𑁆𑀲 𑀪𑀺𑀓𑁆𑀔𑀼𑀦𑁄’’𑀢𑀺. 𑁋

𑀇𑀫𑁂 𑀅𑀝𑁆𑀞 𑀲𑀫𑀡𑀧𑀭𑀺𑀓𑁆𑀔𑀸𑀭𑁂 𑀆𑀳𑀭𑀺𑀢𑁆𑀯𑀸 𑀅𑀤𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀅𑀭𑀳𑀤𑁆𑀥𑀚𑀁 𑀦𑀺𑀯𑀸𑀲𑁂𑀢𑁆𑀯𑀸 𑀉𑀢𑁆𑀢𑀫𑀧𑀩𑁆𑀩𑀚𑁆𑀚𑀸𑀯𑁂𑀲𑀁 𑀕𑀡𑁆𑀳𑀺𑀢𑁆𑀯𑀸 ‘‘𑀙𑀦𑁆𑀦, 𑀫𑀫 𑀯𑀘𑀦𑁂𑀦 𑀫𑀸𑀢𑀸𑀧𑀺𑀢𑀽𑀦𑀁 𑀆𑀭𑁄𑀕𑁆𑀬𑀁 𑀯𑀤𑁂𑀳𑀻’’𑀢𑀺 𑀯𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺. 𑀙𑀦𑁆𑀦𑁄 𑀩𑁄𑀥𑀺𑀲𑀢𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀓𑀡𑁆𑀟𑀓𑁄 𑀧𑀦 𑀙𑀦𑁆𑀦𑁂𑀦 𑀲𑀤𑁆𑀥𑀺𑀁 𑀫𑀦𑁆𑀢𑀬𑀫𑀸𑀦𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀘𑀦𑀁 𑀲𑀼𑀡𑀦𑁆𑀢𑁄 𑀞𑀢𑁆𑀯𑀸 ‘‘𑀦𑀢𑁆𑀣𑀺 𑀤𑀸𑀦𑀺 𑀫𑀬𑁆𑀳𑀁 𑀧𑀼𑀦 𑀲𑀸𑀫𑀺𑀦𑁄 𑀤𑀲𑁆𑀲𑀦’’𑀦𑁆𑀢𑀺 𑀘𑀓𑁆𑀔𑀼𑀧𑀣𑀁 𑀯𑀺𑀚𑀳𑀦𑁆𑀢𑁄 𑀲𑁄𑀓𑀁 𑀅𑀥𑀺𑀯𑀸𑀲𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀳𑀤𑀬𑁂𑀦 𑀨𑀮𑀺𑀢𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀓𑀡𑁆𑀟𑀓𑁄 𑀦𑀸𑀫 𑀤𑁂𑀯𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀙𑀦𑁆𑀦𑀲𑁆𑀲 𑀧𑀞𑀫𑀁 𑀏𑀓𑁄𑀯 𑀲𑁄𑀓𑁄 𑀅𑀳𑁄𑀲𑀺, 𑀓𑀡𑁆𑀟𑀓𑀲𑁆𑀲 𑀧𑀦 𑀓𑀸𑀮𑀓𑀺𑀭𑀺𑀬𑀸𑀬 𑀤𑀼𑀢𑀺𑀬𑁂𑀦 𑀲𑁄𑀓𑁂𑀦 𑀧𑀻𑀴𑀺𑀢𑁄 𑀭𑁄𑀤𑀦𑁆𑀢𑁄 𑀧𑀭𑀺𑀤𑁂𑀯𑀦𑁆𑀢𑁄 𑀦𑀕𑀭𑀁 𑀅𑀕𑀫𑀸𑀲𑀺.

𑀩𑁄𑀥𑀺𑀲𑀢𑁆𑀢𑁄𑀧𑀺 𑀧𑀩𑁆𑀩𑀚𑀺𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀧𑀤𑁂𑀲𑁂 𑀅𑀦𑀼𑀧𑀺𑀬𑀁 𑀦𑀸𑀫 𑀅𑀫𑁆𑀩𑀯𑀦𑀁 𑀅𑀢𑁆𑀣𑀺, 𑀢𑀢𑁆𑀣 𑀲𑀢𑁆𑀢𑀸𑀳𑀁 𑀧𑀩𑁆𑀩𑀚𑁆𑀚𑀸𑀲𑀼𑀔𑁂𑀦 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀏𑀓𑀤𑀺𑀯𑀲𑁂𑀦𑁂𑀯 𑀢𑀺𑀁𑀲𑀬𑁄𑀚𑀦𑀫𑀕𑁆𑀕𑀁 𑀧𑀤𑀲𑀸 𑀕𑀦𑁆𑀢𑁆𑀯𑀸 𑀭𑀸𑀚𑀕𑀳𑀁 𑀧𑀸𑀯𑀺𑀲𑀺. 𑀧𑀯𑀺𑀲𑀺𑀢𑁆𑀯𑀸 𑀲𑀧𑀤𑀸𑀦𑀁 𑀧𑀺𑀡𑁆𑀟𑀸𑀬 𑀘𑀭𑀺. 𑀲𑀓𑀮𑀦𑀕𑀭𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀭𑀽𑀧𑀤𑀲𑁆𑀲𑀦𑁂𑀦 𑀥𑀦𑀧𑀸𑀮𑀓𑁂𑀦 𑀧𑀯𑀺𑀝𑁆𑀞𑀭𑀸𑀚𑀕𑀳𑀁 𑀯𑀺𑀬 𑀅𑀲𑀼𑀭𑀺𑀦𑁆𑀤𑁂𑀦 𑀧𑀯𑀺𑀝𑁆𑀞𑀤𑁂𑀯𑀦𑀕𑀭𑀁 𑀯𑀺𑀬 𑀘 𑀲𑀗𑁆𑀔𑁄𑀪𑀁 𑀅𑀕𑀫𑀸𑀲𑀺. 𑀭𑀸𑀚𑀧𑀼𑀭𑀺𑀲𑀸 𑀕𑀦𑁆𑀢𑁆𑀯𑀸 ‘‘𑀤𑁂𑀯, 𑀏𑀯𑀭𑀽𑀧𑁄 𑀦𑀸𑀫 𑀲𑀢𑁆𑀢𑁄 𑀦𑀕𑀭𑁂 𑀧𑀺𑀡𑁆𑀟𑀸𑀬 𑀘𑀭𑀢𑀺, ‘𑀤𑁂𑀯𑁄 𑀯𑀸 𑀫𑀦𑀼𑀲𑁆𑀲𑁄 𑀯𑀸 𑀦𑀸𑀕𑁄 𑀯𑀸 𑀲𑀼𑀧𑀡𑁆𑀡𑁄 𑀯𑀸 𑀓𑁄 𑀦𑀸𑀫𑁂𑀲𑁄’𑀢𑀺 𑀦 𑀚𑀸𑀦𑀸𑀫𑀸’’𑀢𑀺 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 𑀧𑀸𑀲𑀸𑀤𑀢𑀮𑁂 𑀞𑀢𑁆𑀯𑀸 𑀫𑀳𑀸𑀧𑀼𑀭𑀺𑀲𑀁 𑀤𑀺𑀲𑁆𑀯𑀸 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀚𑀸𑀢𑁄 𑀧𑀼𑀭𑀺𑀲𑁂 𑀆𑀡𑀸𑀧𑁂𑀲𑀺 𑁋 ‘‘𑀕𑀘𑁆𑀙𑀣 𑀪𑀡𑁂, 𑀯𑀻𑀫𑀁𑀲𑀣, 𑀲𑀘𑁂 𑀅𑀫𑀦𑀼𑀲𑁆𑀲𑁄 𑀪𑀯𑀺𑀲𑁆𑀲𑀢𑀺, 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑁆𑀢𑀭𑀥𑀸𑀬𑀺𑀲𑁆𑀲𑀢𑀺, 𑀲𑀘𑁂 𑀤𑁂𑀯𑀢𑀸 𑀪𑀯𑀺𑀲𑁆𑀲𑀢𑀺, 𑀆𑀓𑀸𑀲𑁂𑀦 𑀕𑀘𑁆𑀙𑀺𑀲𑁆𑀲𑀢𑀺, 𑀲𑀘𑁂 𑀦𑀸𑀕𑁄 𑀪𑀯𑀺𑀲𑁆𑀲𑀢𑀺, 𑀧𑀣𑀯𑀺𑀬𑀁 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀕𑀫𑀺𑀲𑁆𑀲𑀢𑀺, 𑀲𑀘𑁂 𑀫𑀦𑀼𑀲𑁆𑀲𑁄 𑀪𑀯𑀺𑀲𑁆𑀲𑀢𑀺, 𑀬𑀣𑀸𑀮𑀤𑁆𑀥𑀁 𑀪𑀺𑀓𑁆𑀔𑀁 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀢𑀻’’𑀢𑀺.

𑀫𑀳𑀸𑀧𑀼𑀭𑀺𑀲𑁄𑀧𑀺 𑀔𑁄 𑀫𑀺𑀲𑁆𑀲𑀓𑀪𑀢𑁆𑀢𑀁 𑀲𑀁𑀳𑀭𑀺𑀢𑁆𑀯𑀸 ‘‘𑀅𑀮𑀁 𑀫𑁂 𑀏𑀢𑁆𑀢𑀓𑀁 𑀬𑀸𑀧𑀦𑀸𑀬𑀸’’𑀢𑀺 𑀜𑀢𑁆𑀯𑀸 𑀧𑀯𑀺𑀝𑁆𑀞𑀤𑁆𑀯𑀸𑀭𑁂𑀦𑁂𑀯 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀡𑁆𑀟𑀯𑀧𑀩𑁆𑀩𑀢𑀘𑁆𑀙𑀸𑀬𑀸𑀬 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑁄 𑀦𑀺𑀲𑀻𑀤𑀺𑀢𑁆𑀯𑀸 𑀆𑀳𑀸𑀭𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀆𑀭𑀤𑁆𑀥𑁄. 𑀅𑀣𑀲𑁆𑀲 𑀅𑀦𑁆𑀢𑀸𑀦𑀺 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀫𑀼𑀔𑁂𑀦 𑀦𑀺𑀓𑁆𑀔𑀫𑀦𑀸𑀓𑀸𑀭𑀧𑁆𑀧𑀢𑁆𑀢𑀸𑀦𑀺 𑀯𑀺𑀬 𑀅𑀳𑁂𑀲𑀼𑀁. 𑀢𑀢𑁄 𑀢𑁂𑀦 𑀅𑀢𑁆𑀢𑀪𑀸𑀯𑁂𑀦 𑀏𑀯𑀭𑀽𑀧𑀲𑁆𑀲 𑀆𑀳𑀸𑀭𑀲𑁆𑀲 𑀘𑀓𑁆𑀔𑀼𑀦𑀸𑀧𑀺 𑀅𑀤𑀺𑀝𑁆𑀞𑀧𑀼𑀩𑁆𑀩𑀢𑀸𑀬 𑀢𑁂𑀦 𑀧𑀝𑀺𑀓𑀽𑀮𑀸𑀳𑀸𑀭𑁂𑀦 𑀅𑀝𑁆𑀝𑀺𑀬𑀫𑀸𑀦𑁄 𑀏𑀯𑀁 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀑𑀯𑀤𑀺 ‘‘𑀲𑀺𑀤𑁆𑀥𑀢𑁆𑀣, 𑀢𑁆𑀯𑀁 𑀲𑀼𑀮𑀪𑀦𑁆𑀦𑀧𑀸𑀦𑁂 𑀓𑀼𑀮𑁂 𑀢𑀺𑀯𑀲𑁆𑀲𑀺𑀓𑀕𑀦𑁆𑀥𑀲𑀸𑀮𑀺𑀪𑁄𑀚𑀦𑀁 𑀦𑀸𑀦𑀕𑁆𑀕𑀭𑀲𑁂𑀳𑀺 𑀪𑀼𑀜𑁆𑀚𑀦𑀝𑁆𑀞𑀸𑀦𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸𑀧𑀺 𑀏𑀓𑀁 𑀧𑀁𑀲𑀼𑀓𑀽𑀮𑀺𑀓𑀁 𑀤𑀺𑀲𑁆𑀯𑀸 ‘𑀓𑀤𑀸 𑀦𑀼 𑀔𑁄 𑀅𑀳𑀫𑁆𑀧𑀺 𑀏𑀯𑀭𑀽𑀧𑁄 𑀳𑀼𑀢𑁆𑀯𑀸 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀪𑀼𑀜𑁆𑀚𑀺𑀲𑁆𑀲𑀸𑀫𑀺, 𑀪𑀯𑀺𑀲𑁆𑀲𑀢𑀺 𑀦𑀼 𑀔𑁄 𑀫𑁂 𑀲𑁄 𑀓𑀸𑀮𑁄’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑁄, 𑀇𑀤𑀸𑀦𑀺 𑀓𑀺𑀁 𑀦𑀸𑀫𑁂𑀢𑀁 𑀓𑀭𑁄𑀲𑀻’’𑀢𑀺. 𑀏𑀯𑀁 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀑𑀯𑀤𑀺𑀢𑁆𑀯𑀸 𑀦𑀺𑀩𑁆𑀩𑀺𑀓𑀸𑀭𑁄 𑀳𑀼𑀢𑁆𑀯𑀸 𑀆𑀳𑀸𑀭𑀁 𑀧𑀭𑀺𑀪𑀼𑀜𑁆𑀚𑀺.

𑀭𑀸𑀚𑀧𑀼𑀭𑀺𑀲𑀸 𑀢𑀁 𑀧𑀯𑀢𑁆𑀢𑀺𑀁 𑀤𑀺𑀲𑁆𑀯𑀸 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 𑀤𑀽𑀢𑀯𑀘𑀦𑀁 𑀲𑀼𑀢𑁆𑀯𑀸 𑀯𑁂𑀕𑁂𑀦 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀇𑀭𑀺𑀬𑀸𑀧𑀣𑀲𑁆𑀫𑀺𑀁𑀬𑁂𑀯 𑀧𑀲𑀻𑀤𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀩𑁆𑀩𑀁 𑀇𑀲𑁆𑀲𑀭𑀺𑀬𑀁 𑀦𑀺𑀬𑁆𑀬𑀸𑀤𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀫𑀬𑁆𑀳𑀁, 𑀫𑀳𑀸𑀭𑀸𑀚, 𑀯𑀢𑁆𑀣𑀼𑀓𑀸𑀫𑁂𑀳𑀺 𑀯𑀸 𑀓𑀺𑀮𑁂𑀲𑀓𑀸𑀫𑁂𑀳𑀺 𑀯𑀸 𑀅𑀢𑁆𑀣𑁄 𑀦𑀢𑁆𑀣𑀺, 𑀅𑀳𑀁 𑀧𑀭𑀫𑀸𑀪𑀺𑀲𑀫𑁆𑀩𑁄𑀥𑀺𑀁 𑀧𑀢𑁆𑀣𑀬𑀦𑁆𑀢𑁄 𑀦𑀺𑀓𑁆𑀔𑀦𑁆𑀢𑁄’’𑀢𑀺 𑀆𑀳. 𑀭𑀸𑀚𑀸 𑀅𑀦𑁂𑀓𑀧𑁆𑀧𑀓𑀸𑀭𑀁 𑀬𑀸𑀘𑀦𑁆𑀢𑁄𑀧𑀺 𑀢𑀲𑁆𑀲 𑀘𑀺𑀢𑁆𑀢𑀁 𑀅𑀮𑀪𑀺𑀢𑁆𑀯𑀸 ‘‘𑀅𑀤𑁆𑀥𑀸 𑀢𑁆𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺, 𑀩𑀼𑀤𑁆𑀥𑀪𑀽𑀢𑁂𑀦 𑀧𑀦 𑀢𑁂 𑀧𑀞𑀫𑀁 𑀫𑀫 𑀯𑀺𑀚𑀺𑀢𑀁 𑀆𑀕𑀦𑁆𑀢𑀩𑁆𑀩’’𑀦𑁆𑀢𑀺 𑀧𑀝𑀺𑀜𑁆𑀜𑀁 𑀕𑀡𑁆𑀳𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 ‘‘𑀧𑀩𑁆𑀩𑀚𑁆𑀚𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀬𑀣𑀸 𑀧𑀩𑁆𑀩𑀚𑀺 𑀘𑀓𑁆𑀔𑀼𑀫𑀸’’𑀢𑀺 𑀇𑀫𑀁 𑀧𑀩𑁆𑀩𑀚𑁆𑀚𑀸𑀲𑀼𑀢𑁆𑀢𑀁 (𑀲𑀼. 𑀦𑀺. 𑁪𑁦𑁭 𑀆𑀤𑀬𑁄) 𑀲𑀤𑁆𑀥𑀺𑀁 𑀅𑀝𑁆𑀞𑀓𑀣𑀸𑀬 𑀑𑀮𑁄𑀓𑁂𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑁄.

𑀩𑁄𑀥𑀺𑀲𑀢𑁆𑀢𑁄𑀧𑀺 𑀭𑀜𑁆𑀜𑁄 𑀧𑀝𑀺𑀜𑁆𑀜𑀁 𑀤𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀆𑀴𑀸𑀭𑀜𑁆𑀘 𑀓𑀸𑀮𑀸𑀫𑀁 𑀉𑀤𑀓𑀜𑁆𑀘 𑀭𑀸𑀫𑀧𑀼𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 ‘‘𑀦𑀸𑀬𑀁 𑀫𑀕𑁆𑀕𑁄 𑀩𑁄𑀥𑀸𑀬𑀸’’𑀢𑀺 𑀢𑀫𑁆𑀧𑀺 𑀲𑀫𑀸𑀧𑀢𑁆𑀢𑀺𑀪𑀸𑀯𑀦𑀁 𑀅𑀦𑀮𑀗𑁆𑀓𑀭𑀺𑀢𑁆𑀯𑀸 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀅𑀢𑁆𑀢𑀦𑁄 𑀣𑀸𑀫𑀯𑀻𑀭𑀺𑀬𑀲𑀦𑁆𑀤𑀲𑁆𑀲𑀦𑀢𑁆𑀣𑀁 𑀫𑀳𑀸𑀧𑀥𑀸𑀦𑀁 𑀧𑀤𑀳𑀺𑀢𑀼𑀓𑀸𑀫𑁄 𑀉𑀭𑀼𑀯𑁂𑀮𑀁 𑀕𑀦𑁆𑀢𑁆𑀯𑀸 ‘‘𑀭𑀫𑀡𑀻𑀬𑁄 𑀯𑀢𑀸𑀬𑀁 𑀪𑀽𑀫𑀺𑀪𑀸𑀕𑁄’’𑀢𑀺 𑀢𑀢𑁆𑀣𑁂𑀯 𑀯𑀸𑀲𑀁 𑀉𑀧𑀕𑀦𑁆𑀢𑁆𑀯𑀸 𑀫𑀳𑀸𑀧𑀥𑀸𑀦𑀁 𑀧𑀤𑀳𑀺. 𑀢𑁂𑀧𑀺 𑀔𑁄 𑀓𑁄𑀡𑁆𑀟𑀜𑁆𑀜𑀧𑁆𑀧𑀫𑀼𑀔𑀸 𑀧𑀜𑁆𑀘 𑀧𑀩𑁆𑀩𑀚𑀺𑀢𑀸 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀻𑀲𑀼 𑀪𑀺𑀓𑁆𑀔𑀸𑀬 𑀘𑀭𑀦𑁆𑀢𑀸 𑀢𑀢𑁆𑀣 𑀩𑁄𑀥𑀺𑀲𑀢𑁆𑀢𑀁 𑀲𑀫𑁆𑀧𑀸𑀧𑀼𑀡𑀺𑀁𑀲𑀼. 𑀅𑀣 𑀦𑀁 𑀙𑀩𑁆𑀩𑀲𑁆𑀲𑀸𑀦𑀺 𑀫𑀳𑀸𑀧𑀥𑀸𑀦𑀁 𑀧𑀤𑀳𑀦𑁆𑀢𑀁 ‘‘𑀇𑀤𑀸𑀦𑀺 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺, 𑀇𑀤𑀸𑀦𑀺 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀭𑀺𑀯𑁂𑀡𑀲𑀫𑁆𑀫𑀚𑁆𑀚𑀦𑀸𑀤𑀺𑀓𑀸𑀬 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀬𑀸 𑀉𑀧𑀝𑁆𑀞𑀳𑀫𑀸𑀦𑀸 𑀲𑀦𑁆𑀢𑀺𑀓𑀸𑀯𑀘𑀭𑀸𑀯𑀲𑁆𑀲 𑀅𑀳𑁂𑀲𑀼𑀁. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀔𑁄 ‘‘𑀓𑁄𑀝𑀺𑀧𑁆𑀧𑀢𑁆𑀢𑀁 𑀤𑀼𑀓𑁆𑀓𑀭𑀓𑀸𑀭𑀺𑀬𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀏𑀓𑀢𑀺𑀮𑀢𑀡𑁆𑀟𑀼𑀮𑀸𑀤𑀻𑀳𑀺𑀧𑀺 𑀯𑀻𑀢𑀺𑀦𑀸𑀫𑁂𑀲𑀺, 𑀲𑀩𑁆𑀩𑀲𑁄𑀧𑀺 𑀆𑀳𑀸𑀭𑀽𑀧𑀘𑁆𑀙𑁂𑀤𑀁 𑀅𑀓𑀸𑀲𑀺, 𑀤𑁂𑀯𑀢𑀸𑀧𑀺 𑀮𑁄𑀫𑀓𑀽𑀧𑁂𑀳𑀺 𑀑𑀚𑀁 𑀉𑀧𑀲𑀁𑀳𑀭𑀫𑀸𑀦𑀸 𑀧𑀝𑀺𑀓𑁆𑀔𑀺𑀧𑀺.

𑀅𑀣𑀲𑁆𑀲 𑀢𑀸𑀬 𑀦𑀺𑀭𑀸𑀳𑀸𑀭𑀢𑀸𑀬 𑀧𑀭𑀫𑀓𑀲𑀺𑀫𑀸𑀦𑀧𑁆𑀧𑀢𑁆𑀢𑀓𑀸𑀬𑀲𑁆𑀲 𑀲𑀼𑀯𑀡𑁆𑀡𑀯𑀡𑁆𑀡𑁄 𑀓𑀸𑀬𑁄 𑀓𑀸𑀴𑀯𑀡𑁆𑀡𑁄 𑀅𑀳𑁄𑀲𑀺. 𑀩𑀸𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺 𑀧𑀝𑀺𑀘𑁆𑀙𑀦𑁆𑀦𑀸𑀦𑀺 𑀅𑀳𑁂𑀲𑀼𑀁. 𑀅𑀧𑁆𑀧𑁂𑀓𑀤𑀸 𑀅𑀧𑁆𑀧𑀸𑀡𑀓𑀁 𑀛𑀸𑀦𑀁 𑀛𑀸𑀬𑀦𑁆𑀢𑁄 𑀫𑀳𑀸𑀯𑁂𑀤𑀦𑀸𑀳𑀺 𑀅𑀪𑀺𑀢𑀼𑀦𑁆𑀦𑁄 𑀯𑀺𑀲𑀜𑁆𑀜𑀻𑀪𑀽𑀢𑁄 𑀘𑀗𑁆𑀓𑀫𑀦𑀓𑁄𑀝𑀺𑀬𑀁 𑀧𑀢𑀢𑀺. 𑀅𑀣 𑀦𑀁 𑀏𑀓𑀘𑁆𑀘𑀸 𑀤𑁂𑀯𑀢𑀸 ‘‘𑀓𑀸𑀮𑀓𑀢𑁄 𑀲𑀫𑀡𑁄 𑀕𑁄𑀢𑀫𑁄’’𑀢𑀺 𑀯𑀤𑀦𑁆𑀢𑀺, 𑀏𑀓𑀘𑁆𑀘𑀸 ‘‘𑀯𑀺𑀳𑀸𑀭𑁄𑀯𑁂𑀲𑁄 𑀅𑀭𑀳𑀢’’𑀦𑁆𑀢𑀺 𑀆𑀳𑀁𑀲𑀼. 𑀢𑀢𑁆𑀣 𑀬𑀸𑀲𑀁 ‘‘𑀓𑀸𑀮𑀓𑀢𑁄’’𑀢𑀺 𑀅𑀳𑁄𑀲𑀺, 𑀢𑀸 𑀕𑀦𑁆𑀢𑁆𑀯𑀸 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀲𑁆𑀲 𑀆𑀭𑁄𑀘𑁂𑀲𑀼𑀁 ‘‘𑀢𑀼𑀫𑁆𑀳𑀸𑀓𑀁 𑀧𑀼𑀢𑁆𑀢𑁄 𑀓𑀸𑀮𑀓𑀢𑁄’’𑀢𑀺. 𑀫𑀫 𑀧𑀼𑀢𑁆𑀢𑁄 𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀓𑀸𑀮𑀓𑀢𑁄, 𑀅𑀳𑀼𑀢𑁆𑀯𑀸𑀢𑀺? 𑀩𑀼𑀤𑁆𑀥𑁄 𑀪𑀯𑀺𑀢𑀼𑀁 𑀦𑀸𑀲𑀓𑁆𑀔𑀺, 𑀧𑀥𑀸𑀦𑀪𑀽𑀫𑀺𑀬𑀁𑀬𑁂𑀯 𑀧𑀢𑀺𑀢𑁆𑀯𑀸 𑀓𑀸𑀮𑀓𑀢𑁄𑀢𑀺. 𑀇𑀤𑀁 𑀲𑀼𑀢𑁆𑀯𑀸 𑀭𑀸𑀚𑀸 ‘‘𑀦𑀸𑀳𑀁 𑀲𑀤𑁆𑀤𑀳𑀸𑀫𑀺, 𑀫𑀫 𑀧𑀼𑀢𑁆𑀢𑀲𑁆𑀲 𑀩𑁄𑀥𑀺𑀁 𑀅𑀧𑁆𑀧𑀢𑁆𑀯𑀸 𑀓𑀸𑀮𑀓𑀺𑀭𑀺𑀬𑀸 𑀦𑀸𑀫 𑀦𑀢𑁆𑀣𑀻’’𑀢𑀺 𑀧𑀝𑀺𑀓𑁆𑀔𑀺𑀧𑀺. 𑀓𑀲𑁆𑀫𑀸 𑀧𑀦 𑀭𑀸𑀚𑀸 𑀦 𑀲𑀤𑁆𑀤𑀳𑀢𑀻𑀢𑀺? 𑀓𑀸𑀴𑀤𑁂𑀯𑀻𑀮𑀢𑀸𑀧𑀲𑀲𑁆𑀲 𑀯𑀦𑁆𑀤𑀸𑀧𑀦𑀤𑀺𑀯𑀲𑁂 𑀚𑀫𑁆𑀩𑀼𑀭𑀼𑀓𑁆𑀔𑀫𑀽𑀮𑁂 𑀘 𑀧𑀸𑀝𑀺𑀳𑀸𑀭𑀺𑀬𑀸𑀦𑀁 𑀤𑀺𑀝𑁆𑀞𑀢𑁆𑀢𑀸.

𑀧𑀼𑀦 𑀩𑁄𑀥𑀺𑀲𑀢𑁆𑀢𑁂 𑀲𑀜𑁆𑀜𑀁 𑀧𑀝𑀺𑀮𑀪𑀺𑀢𑁆𑀯𑀸 𑀉𑀝𑁆𑀞𑀺𑀢𑁂 𑀢𑀸 𑀤𑁂𑀯𑀢𑀸 𑀕𑀦𑁆𑀢𑁆𑀯𑀸 ‘‘𑀅𑀭𑁄𑀕𑁄 𑀢𑁂 𑀫𑀳𑀸𑀭𑀸𑀚 𑀧𑀼𑀢𑁆𑀢𑁄’’𑀢𑀺 𑀆𑀭𑁄𑀘𑁂𑀦𑁆𑀢𑀺. 𑀭𑀸𑀚𑀸 ‘‘𑀚𑀸𑀦𑀸𑀫𑀳𑀁 𑀧𑀼𑀢𑁆𑀢𑀲𑁆𑀲 𑀅𑀫𑀭𑀡𑀪𑀸𑀯’’𑀦𑁆𑀢𑀺 𑀯𑀤𑀢𑀺. 𑀫𑀳𑀸𑀲𑀢𑁆𑀢𑀲𑁆𑀲 𑀙𑀩𑁆𑀩𑀲𑁆𑀲𑀸𑀦𑀺 𑀤𑀼𑀓𑁆𑀓𑀭𑀓𑀸𑀭𑀺𑀬𑀁 𑀓𑀭𑁄𑀦𑁆𑀢𑀲𑁆𑀲 𑀆𑀓𑀸𑀲𑁂 𑀕𑀡𑁆𑀞𑀺𑀓𑀭𑀡𑀓𑀸𑀮𑁄 𑀯𑀺𑀬 𑀅𑀳𑁄𑀲𑀺. 𑀲𑁄 ‘‘𑀅𑀬𑀁 𑀤𑀼𑀓𑁆𑀓𑀭𑀓𑀸𑀭𑀺𑀓𑀸 𑀦𑀸𑀫 𑀩𑁄𑀥𑀸𑀬 𑀫𑀕𑁆𑀕𑁄 𑀦 𑀳𑁄𑀢𑀻’’𑀢𑀺 𑀑𑀴𑀸𑀭𑀺𑀓𑀁 𑀆𑀳𑀸𑀭𑀁 𑀆𑀳𑀸𑀭𑁂𑀢𑀼𑀁 𑀕𑀸𑀫𑀦𑀺𑀕𑀫𑁂𑀲𑀼 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀆𑀳𑀸𑀭𑀁 𑀆𑀳𑀭𑀺, 𑀅𑀣𑀲𑁆𑀲 𑀩𑀸𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺 𑀧𑀸𑀓𑀢𑀺𑀓𑀸𑀦𑀺 𑀅𑀳𑁂𑀲𑀼𑀁, 𑀓𑀸𑀬𑁄 𑀲𑀼𑀯𑀡𑁆𑀡𑀯𑀡𑁆𑀡𑁄 𑀅𑀳𑁄𑀲𑀺. 𑀧𑀜𑁆𑀘𑀯𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 ‘‘𑀅𑀬𑀁 𑀙𑀩𑁆𑀩𑀲𑁆𑀲𑀸𑀦𑀺 𑀤𑀼𑀓𑁆𑀓𑀭𑀓𑀸𑀭𑀺𑀓𑀁 𑀓𑀭𑁄𑀦𑁆𑀢𑁄𑀧𑀺 𑀲𑀩𑁆𑀩𑀜𑁆𑀜𑀼𑀢𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀦𑀸𑀲𑀓𑁆𑀔𑀺, 𑀇𑀤𑀸𑀦𑀺 𑀕𑀸𑀫𑀸𑀤𑀻𑀲𑀼 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀑𑀴𑀸𑀭𑀺𑀓𑀁 𑀆𑀳𑀸𑀭𑀁 𑀆𑀳𑀭𑀺𑀬𑀫𑀸𑀦𑁄 𑀓𑀺𑀁 𑀲𑀓𑁆𑀔𑀺𑀲𑁆𑀲𑀢𑀺, 𑀩𑀸𑀳𑀼𑀮𑀺𑀓𑁄 𑀏𑀲 𑀧𑀥𑀸𑀦𑀯𑀺𑀩𑁆𑀪𑀦𑁆𑀢𑁄, 𑀲𑀻𑀲𑀁 𑀦𑁆𑀳𑀸𑀬𑀺𑀢𑀼𑀓𑀸𑀫𑀲𑁆𑀲 𑀉𑀲𑁆𑀲𑀸𑀯𑀩𑀺𑀦𑁆𑀤𑀼𑀢𑀓𑁆𑀓𑀦𑀁 𑀯𑀺𑀬 𑀅𑀫𑁆𑀳𑀸𑀓𑀁 𑀏𑀢𑀲𑁆𑀲 𑀲𑀦𑁆𑀢𑀺𑀓𑀸 𑀯𑀺𑀲𑁂𑀲𑀢𑀓𑁆𑀓𑀦𑀁, 𑀓𑀺𑀁 𑀦𑁄 𑀇𑀫𑀺𑀦𑀸’’𑀢𑀺 𑀫𑀳𑀸𑀧𑀼𑀭𑀺𑀲𑀁 𑀧𑀳𑀸𑀬 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀅𑀝𑁆𑀞𑀸𑀭𑀲𑀬𑁄𑀚𑀦𑀫𑀕𑁆𑀕𑀁 𑀕𑀦𑁆𑀢𑁆𑀯𑀸 𑀇𑀲𑀺𑀧𑀢𑀦𑀁 𑀧𑀯𑀺𑀲𑀺𑀁𑀲𑀼.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀉𑀭𑀼𑀯𑁂𑀮𑀸𑀬𑀁 𑀲𑁂𑀦𑀸𑀦𑀺𑀕𑀫𑁂 𑀲𑁂𑀦𑀸𑀦𑀺𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀸 𑀲𑀼𑀚𑀸𑀢𑀸 𑀦𑀸𑀫 𑀤𑀸𑀭𑀺𑀓𑀸 𑀯𑀬𑀧𑁆𑀧𑀢𑁆𑀢𑀸 𑀏𑀓𑀲𑁆𑀫𑀺𑀁 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑁂 𑀧𑀢𑁆𑀣𑀦𑀁 𑀅𑀓𑀸𑀲𑀺 ‘‘𑀲𑀘𑁂 𑀲𑀫𑀚𑀸𑀢𑀺𑀓𑀁 𑀓𑀼𑀮𑀖𑀭𑀁 𑀕𑀦𑁆𑀢𑁆𑀯𑀸 𑀧𑀞𑀫𑀕𑀩𑁆𑀪𑁂 𑀧𑀼𑀢𑁆𑀢𑀁 𑀮𑀪𑀺𑀲𑁆𑀲𑀸𑀫𑀺, 𑀅𑀦𑀼𑀲𑀁𑀯𑀘𑁆𑀙𑀭𑀁 𑀢𑁂 𑀲𑀢𑀲𑀳𑀲𑁆𑀲𑀧𑀭𑀺𑀘𑁆𑀘𑀸𑀕𑁂𑀦 𑀩𑀮𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀢𑀲𑁆𑀲𑀸 𑀲𑀸 𑀧𑀢𑁆𑀣𑀦𑀸 𑀲𑀫𑀺𑀚𑁆𑀛𑀺. 𑀲𑀸 𑀫𑀳𑀸𑀲𑀢𑁆𑀢𑀲𑁆𑀲 𑀤𑀼𑀓𑁆𑀓𑀭𑀓𑀸𑀭𑀺𑀓𑀁 𑀓𑀭𑁄𑀦𑁆𑀢𑀲𑁆𑀲 𑀙𑀝𑁆𑀞𑁂 𑀯𑀲𑁆𑀲𑁂 𑀧𑀭𑀺𑀧𑀼𑀡𑁆𑀡𑁂 𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬𑀁 𑀩𑀮𑀺𑀓𑀫𑁆𑀫𑀁 𑀓𑀸𑀢𑀼𑀓𑀸𑀫𑀸 𑀳𑀼𑀢𑁆𑀯𑀸 𑀧𑀼𑀭𑁂𑀢𑀭𑀁 𑀥𑁂𑀦𑀼𑀲𑀳𑀲𑁆𑀲𑀁 𑀮𑀝𑁆𑀞𑀺𑀫𑀥𑀼𑀓𑀯𑀦𑁂 𑀘𑀭𑀸𑀧𑁂𑀢𑁆𑀯𑀸 𑀢𑀸𑀲𑀁 𑀔𑀻𑀭𑀁 𑀧𑀜𑁆𑀘 𑀥𑁂𑀦𑀼𑀲𑀢𑀸𑀦𑀺 𑀧𑀸𑀬𑁂𑀢𑁆𑀯𑀸 𑀢𑀸𑀲𑀁 𑀔𑀻𑀭𑀁 𑀅𑀟𑁆𑀠𑀢𑀺𑀬𑀸𑀦𑀻𑀢𑀺 𑀏𑀯𑀁 𑀬𑀸𑀯 𑀲𑁄𑀴𑀲𑀦𑁆𑀦𑀁 𑀥𑁂𑀦𑀽𑀦𑀁 𑀔𑀻𑀭𑀁 𑀅𑀝𑁆𑀞 𑀥𑁂𑀦𑀼𑀬𑁄 𑀧𑀺𑀯𑀦𑁆𑀢𑀺, 𑀢𑀸𑀯 𑀔𑀻𑀭𑀲𑁆𑀲 𑀩𑀳𑀮𑀢𑀜𑁆𑀘 𑀫𑀥𑀼𑀭𑀢𑀜𑁆𑀘 𑀑𑀚𑀯𑀦𑁆𑀢𑀢𑀜𑁆𑀘 𑀧𑀢𑁆𑀣𑀬𑀫𑀸𑀦𑀸 𑀔𑀻𑀭𑀧𑀭𑀺𑀯𑀢𑁆𑀢𑀦𑀁 𑀦𑀸𑀫 𑀅𑀓𑀸𑀲𑀺. 𑀲𑀸 𑀯𑀺𑀲𑀸𑀔𑀧𑀼𑀡𑁆𑀡𑀫𑀤𑀺𑀯𑀲𑁂 ‘‘𑀧𑀸𑀢𑁄𑀯 𑀩𑀮𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀧𑀘𑁆𑀘𑀼𑀝𑁆𑀞𑀸𑀬 𑀢𑀸 𑀅𑀝𑁆𑀞 𑀥𑁂𑀦𑀼𑀬𑁄 𑀤𑀼𑀳𑀸𑀧𑁂𑀲𑀺. 𑀯𑀘𑁆𑀙𑀓𑀸 𑀥𑁂𑀦𑀽𑀦𑀁 𑀣𑀦𑀫𑀽𑀮𑀁 𑀦𑀸𑀕𑀫𑀺𑀁𑀲𑀼, 𑀣𑀦𑀫𑀽𑀮𑁂 𑀧𑀦 𑀦𑀯𑀪𑀸𑀚𑀦𑁂 𑀉𑀧𑀦𑀻𑀢𑀫𑀢𑁆𑀢𑁂 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀔𑀻𑀭𑀥𑀸𑀭𑀸 𑀧𑀯𑀢𑁆𑀢𑀺𑀁𑀲𑀼. 𑀢𑀁 𑀅𑀘𑁆𑀙𑀭𑀺𑀬𑀁 𑀤𑀺𑀲𑁆𑀯𑀸 𑀲𑀼𑀚𑀸𑀢𑀸 𑀲𑀳𑀢𑁆𑀣𑁂𑀦𑁂𑀯 𑀔𑀻𑀭𑀁 𑀕𑀳𑁂𑀢𑁆𑀯𑀸 𑀦𑀯𑀪𑀸𑀚𑀦𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀲𑀳𑀢𑁆𑀣𑁂𑀦𑁂𑀯 𑀅𑀕𑁆𑀕𑀺𑀁 𑀓𑀢𑁆𑀯𑀸 𑀧𑀘𑀺𑀢𑀼𑀁 𑀆𑀭𑀪𑀺.

𑀢𑀲𑁆𑀫𑀺𑀁 𑀧𑀸𑀬𑀸𑀲𑁂 𑀧𑀘𑁆𑀘𑀫𑀸𑀦𑁂 𑀫𑀳𑀦𑁆𑀢𑀫𑀳𑀦𑁆𑀢𑀸 𑀩𑀼𑀩𑁆𑀩𑀼𑀴𑀸 𑀉𑀝𑁆𑀞𑀳𑀺𑀢𑁆𑀯𑀸 𑀤𑀓𑁆𑀔𑀺𑀡𑀸𑀯𑀢𑁆𑀢𑀸 𑀳𑀼𑀢𑁆𑀯𑀸 𑀲𑀜𑁆𑀘𑀭𑀦𑁆𑀢𑀺, 𑀏𑀓𑀨𑀼𑀲𑀺𑀢𑀫𑁆𑀧𑀺 𑀩𑀳𑀺 𑀦 𑀧𑀢𑀢𑀺, 𑀉𑀤𑁆𑀥𑀦𑀢𑁄 𑀅𑀧𑁆𑀧𑀫𑀢𑁆𑀢𑀓𑁄𑀧𑀺 𑀥𑀽𑀫𑁄 𑀦 𑀉𑀝𑁆𑀞𑀳𑀢𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀢𑁆𑀢𑀸𑀭𑁄 𑀮𑁄𑀓𑀧𑀸𑀮𑀸 𑀆𑀕𑀦𑁆𑀢𑁆𑀯𑀸 𑀉𑀤𑁆𑀥𑀦𑁂 𑀆𑀭𑀓𑁆𑀔𑀁 𑀕𑀡𑁆𑀳𑀺𑀁𑀲𑀼, 𑀫𑀳𑀸𑀩𑁆𑀭𑀳𑁆𑀫𑀸 𑀙𑀢𑁆𑀢𑀁 𑀥𑀸𑀭𑁂𑀲𑀺, 𑀲𑀓𑁆𑀓𑁄 𑀅𑀮𑀸𑀢𑀸𑀦𑀺 𑀲𑀫𑀸𑀦𑁂𑀦𑁆𑀢𑁄 𑀅𑀕𑁆𑀕𑀺𑀁 𑀚𑀸𑀮𑁂𑀲𑀺. 𑀤𑁂𑀯𑀢𑀸 𑀤𑁆𑀯𑀺𑀲𑀳𑀲𑁆𑀲𑀤𑀻𑀧𑀧𑀭𑀺𑀯𑀸𑀭𑁂𑀲𑀼 𑀘𑀢𑀽𑀲𑀼 𑀫𑀳𑀸𑀤𑀻𑀧𑁂𑀲𑀼 𑀤𑁂𑀯𑀸𑀦𑀜𑁆𑀘 𑀫𑀦𑀼𑀲𑁆𑀲𑀸𑀦𑀜𑁆𑀘 𑀉𑀧𑀓𑀧𑁆𑀧𑀦𑀑𑀚𑀁 𑀅𑀢𑁆𑀢𑀦𑁄 𑀤𑁂𑀯𑀸𑀦𑀼𑀪𑀸𑀯𑁂𑀦 𑀤𑀡𑁆𑀟𑀓𑀩𑀤𑁆𑀥𑀁 𑀫𑀥𑀼𑀧𑀝𑀮𑀁 𑀧𑀻𑀴𑁂𑀢𑁆𑀯𑀸 𑀫𑀥𑀼𑀁 𑀕𑀡𑁆𑀳𑀫𑀸𑀦𑀸 𑀯𑀺𑀬 𑀲𑀁𑀳𑀭𑀺𑀢𑁆𑀯𑀸 𑀢𑀢𑁆𑀣 𑀧𑀓𑁆𑀔𑀺𑀧𑀺𑀁𑀲𑀼. 𑀅𑀜𑁆𑀜𑁂𑀲𑀼 𑀳𑀺 𑀓𑀸𑀮𑁂𑀲𑀼 𑀤𑁂𑀯𑀢𑀸 𑀓𑀩𑀴𑁂 𑀓𑀩𑀴𑁂 𑀑𑀚𑀁 𑀧𑀓𑁆𑀔𑀺𑀧𑀦𑁆𑀢𑀺, 𑀲𑀫𑁆𑀩𑁄𑀥𑀺𑀤𑀺𑀯𑀲𑁂 𑀘 𑀧𑀦 𑀧𑀭𑀺𑀦𑀺𑀩𑁆𑀩𑀸𑀦𑀤𑀺𑀯𑀲𑁂 𑀘 𑀉𑀓𑁆𑀔𑀮𑀺𑀬𑀁𑀬𑁂𑀯 𑀧𑀓𑁆𑀔𑀺𑀧𑀦𑁆𑀢𑀺. 𑀲𑀼𑀚𑀸𑀢𑀸 𑀏𑀓𑀤𑀺𑀯𑀲𑁂𑀬𑁂𑀯 𑀢𑀢𑁆𑀣 𑀅𑀢𑁆𑀢𑀦𑁄 𑀧𑀸𑀓𑀝𑀸𑀦𑀺 𑀅𑀦𑁂𑀓𑀸𑀦𑀺 𑀅𑀘𑁆𑀙𑀭𑀺𑀬𑀸𑀦𑀺 𑀤𑀺𑀲𑁆𑀯𑀸 𑀧𑀼𑀡𑁆𑀡𑀁 𑀤𑀸𑀲𑀺𑀁 𑀆𑀫𑀦𑁆𑀢𑁂𑀲𑀺 ‘‘𑀅𑀫𑁆𑀫 𑀧𑀼𑀡𑁆𑀡𑁂, 𑀅𑀚𑁆𑀚 𑀅𑀫𑁆𑀳𑀸𑀓𑀁 𑀤𑁂𑀯𑀢𑀸 𑀅𑀢𑀺𑀯𑀺𑀬 𑀧𑀲𑀦𑁆𑀦𑀸, 𑀫𑀬𑀸 𑀏𑀢𑁆𑀢𑀓𑁂 𑀓𑀸𑀮𑁂 𑀏𑀯𑀭𑀽𑀧𑀁 𑀅𑀘𑁆𑀙𑀭𑀺𑀬𑀁 𑀦𑀸𑀫 𑀦 𑀤𑀺𑀝𑁆𑀞𑀧𑀼𑀩𑁆𑀩𑀁, 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀤𑁂𑀯𑀝𑁆𑀞𑀸𑀦𑀁 𑀧𑀝𑀺𑀚𑀕𑁆𑀕𑀸𑀳𑀻’’𑀢𑀺. 𑀲𑀸 ‘‘𑀲𑀸𑀥𑀼, 𑀅𑀬𑁆𑀬𑁂’’𑀢𑀺 𑀢𑀲𑁆𑀲𑀸 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀼𑀭𑀺𑀢𑀢𑀼𑀭𑀺𑀢𑀸 𑀭𑀼𑀓𑁆𑀔𑀫𑀽𑀮𑀁 𑀅𑀕𑀫𑀸𑀲𑀺.

𑀩𑁄𑀥𑀺𑀲𑀢𑁆𑀢𑁄𑀧𑀺 𑀔𑁄 𑀢𑀲𑁆𑀫𑀺𑀁 𑀭𑀢𑁆𑀢𑀺𑀪𑀸𑀕𑁂 𑀧𑀜𑁆𑀘 𑀫𑀳𑀸𑀲𑀼𑀧𑀺𑀦𑁂 𑀤𑀺𑀲𑁆𑀯𑀸 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 ‘‘𑀦𑀺𑀲𑁆𑀲𑀁𑀲𑀬𑁂𑀦𑀸𑀳𑀁 𑀅𑀚𑁆𑀚 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀓𑀢𑀲𑀦𑁆𑀦𑀺𑀝𑁆𑀞𑀸𑀦𑁄 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀓𑀢𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑁄 𑀪𑀺𑀓𑁆𑀔𑀸𑀘𑀸𑀭𑀓𑀸𑀮𑀁 𑀆𑀕𑀫𑀬𑀫𑀸𑀦𑁄 𑀧𑀸𑀢𑁄𑀯 𑀆𑀕𑀦𑁆𑀢𑁆𑀯𑀸 𑀢𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺 𑀅𑀢𑁆𑀢𑀦𑁄 𑀧𑀪𑀸𑀬 𑀲𑀓𑀮𑀭𑀼𑀓𑁆𑀔𑀁 𑀑𑀪𑀸𑀲𑀬𑀫𑀸𑀦𑁄. 𑀅𑀣 𑀔𑁄 𑀲𑀸 𑀧𑀼𑀡𑁆𑀡𑀸 𑀆𑀕𑀦𑁆𑀢𑁆𑀯𑀸 𑀅𑀤𑁆𑀤𑀲 𑀩𑁄𑀥𑀺𑀲𑀢𑁆𑀢𑀁 𑀭𑀼𑀓𑁆𑀔𑀫𑀽𑀮𑁂 𑀧𑀸𑀘𑀻𑀦𑀮𑁄𑀓𑀥𑀸𑀢𑀼𑀁 𑀑𑀮𑁄𑀓𑀬𑀫𑀸𑀦𑀁 𑀦𑀺𑀲𑀺𑀦𑁆𑀦𑀁, 𑀲𑀭𑀻𑀭𑀢𑁄 𑀘𑀲𑁆𑀲 𑀦𑀺𑀓𑁆𑀔𑀦𑁆𑀢𑀸𑀳𑀺 𑀧𑀪𑀸𑀳𑀺 𑀲𑀓𑀮𑀭𑀼𑀓𑁆𑀔𑀁 𑀲𑀼𑀯𑀡𑁆𑀡𑀯𑀡𑁆𑀡𑀁. 𑀤𑀺𑀲𑁆𑀯𑀸 𑀢𑀲𑁆𑀲𑀸 𑀏𑀢𑀤𑀳𑁄𑀲𑀺 𑁋 ‘‘𑀅𑀚𑁆𑀚 𑀅𑀫𑁆𑀳𑀸𑀓𑀁 𑀤𑁂𑀯𑀢𑀸 𑀭𑀼𑀓𑁆𑀔𑀢𑁄 𑀑𑀭𑀼𑀬𑁆𑀳 𑀲𑀳𑀢𑁆𑀣𑁂𑀦𑁂𑀯 𑀩𑀮𑀺𑀓𑀫𑁆𑀫𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀦𑀺𑀲𑀺𑀦𑁆𑀦𑀸 𑀫𑀜𑁆𑀜𑁂’’𑀢𑀺 𑀉𑀩𑁆𑀩𑁂𑀕𑀧𑁆𑀧𑀢𑁆𑀢𑀸 𑀳𑀼𑀢𑁆𑀯𑀸 𑀯𑁂𑀕𑁂𑀦𑀸𑀕𑀦𑁆𑀢𑁆𑀯𑀸 𑀲𑀼𑀚𑀸𑀢𑀸𑀬 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺.

𑀲𑀼𑀚𑀸𑀢𑀸 𑀢𑀲𑁆𑀲𑀸 𑀯𑀘𑀦𑀁 𑀲𑀼𑀢𑁆𑀯𑀸 𑀢𑀼𑀝𑁆𑀞𑀫𑀸𑀦𑀲𑀸 𑀳𑀼𑀢𑁆𑀯𑀸 ‘‘𑀅𑀚𑁆𑀚 𑀤𑀸𑀦𑀺 𑀧𑀝𑁆𑀞𑀸𑀬 𑀫𑀫 𑀚𑁂𑀝𑁆𑀞𑀥𑀻𑀢𑀼𑀝𑁆𑀞𑀸𑀦𑁂 𑀢𑀺𑀝𑁆𑀞𑀸𑀳𑀻’’𑀢𑀺 𑀥𑀻𑀢𑀼 𑀅𑀦𑀼𑀘𑁆𑀙𑀯𑀺𑀓𑀁 𑀲𑀩𑁆𑀩𑀸𑀮𑀗𑁆𑀓𑀸𑀭𑀁 𑀅𑀤𑀸𑀲𑀺. 𑀬𑀲𑁆𑀫𑀸 𑀧𑀦 𑀩𑀼𑀤𑁆𑀥𑀪𑀸𑀯𑀁 𑀧𑀸𑀧𑀼𑀡𑀦𑀤𑀺𑀯𑀲𑁂 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀁 𑀲𑀼𑀯𑀡𑁆𑀡𑀧𑀸𑀢𑀺𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺, 𑀢𑀲𑁆𑀫𑀸 𑀲𑀸 ‘‘𑀲𑀼𑀯𑀡𑁆𑀡𑀧𑀸𑀢𑀺𑀬𑀁 𑀧𑀸𑀬𑀸𑀲𑀁 𑀧𑀓𑁆𑀔𑀺𑀧𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀁 𑀲𑀼𑀯𑀡𑁆𑀡𑀧𑀸𑀢𑀺𑀁 𑀦𑀻𑀳𑀭𑀸𑀧𑁂𑀢𑁆𑀯𑀸 𑀢𑀢𑁆𑀣 𑀧𑀸𑀬𑀸𑀲𑀁 𑀧𑀓𑁆𑀔𑀺𑀧𑀺𑀢𑀼𑀓𑀸𑀫𑀸 𑀧𑀓𑁆𑀓𑀪𑀸𑀚𑀦𑀁 𑀆𑀯𑀚𑁆𑀚𑁂𑀲𑀺. ‘𑀲𑀩𑁆𑀩𑁄 𑀧𑀸𑀬𑀸𑀲𑁄 𑀧𑀤𑀼𑀫𑀧𑀢𑁆𑀢𑀸 𑀉𑀤𑀓𑀁 𑀯𑀺𑀬 𑀯𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑀸𑀢𑀺𑀬𑀁 𑀧𑀢𑀺𑀝𑁆𑀞𑀸𑀲𑀺, 𑀏𑀓𑀧𑀸𑀢𑀺𑀧𑀽𑀭𑀫𑀢𑁆𑀢𑁄𑀯 𑀅𑀳𑁄𑀲𑀺’. 𑀲𑀸 𑀢𑀁 𑀧𑀸𑀢𑀺𑀁 𑀅𑀜𑁆𑀜𑀸𑀬 𑀲𑀼𑀯𑀡𑁆𑀡𑀧𑀸𑀢𑀺𑀬𑀸 𑀧𑀝𑀺𑀓𑀼𑀚𑁆𑀚𑀺𑀢𑁆𑀯𑀸 𑀑𑀤𑀸𑀢𑀯𑀢𑁆𑀣𑁂𑀦 𑀯𑁂𑀞𑁂𑀢𑁆𑀯𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑁂𑀳𑀺 𑀅𑀢𑁆𑀢𑀪𑀸𑀯𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀢𑀁 𑀧𑀸𑀢𑀺𑀁 𑀅𑀢𑁆𑀢𑀦𑁄 𑀲𑀻𑀲𑁂 𑀞𑀧𑁂𑀢𑁆𑀯𑀸 𑀫𑀳𑀦𑁆𑀢𑁂𑀦 𑀆𑀦𑀼𑀪𑀸𑀯𑁂𑀦 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑀫𑀽𑀮𑀁 𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀑𑀮𑁄𑀓𑁂𑀢𑁆𑀯𑀸 𑀩𑀮𑀯𑀲𑁄𑀫𑀦𑀲𑁆𑀲𑀚𑀸𑀢𑀸 ‘‘𑀭𑀼𑀓𑁆𑀔𑀤𑁂𑀯𑀢𑀸’’𑀢𑀺 𑀲𑀜𑁆𑀜𑀸𑀬 𑀤𑀺𑀝𑁆𑀞𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀑𑀦𑀢𑁄𑀦𑀢𑀸 𑀕𑀦𑁆𑀢𑁆𑀯𑀸 𑀲𑀻𑀲𑀢𑁄 𑀧𑀸𑀢𑀺𑀁 𑀑𑀢𑀸𑀭𑁂𑀢𑁆𑀯𑀸 𑀯𑀺𑀯𑀭𑀺𑀢𑁆𑀯𑀸 𑀲𑀼𑀯𑀡𑁆𑀡𑀪𑀺𑀗𑁆𑀓𑀸𑀭𑁂𑀦 𑀕𑀦𑁆𑀥𑀧𑀼𑀧𑁆𑀨𑀯𑀸𑀲𑀺𑀢𑀁 𑀉𑀤𑀓𑀁 𑀕𑀳𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀉𑀧𑀕𑀦𑁆𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀖𑀝𑀻𑀓𑀸𑀭𑀫𑀳𑀸𑀩𑁆𑀭𑀳𑁆𑀫𑀼𑀦𑀸 𑀤𑀺𑀦𑁆𑀦𑁄 𑀫𑀢𑁆𑀢𑀺𑀓𑀸𑀧𑀢𑁆𑀢𑁄 𑀏𑀢𑁆𑀢𑀓𑀁 𑀅𑀤𑁆𑀥𑀸𑀦𑀁 𑀩𑁄𑀥𑀺𑀲𑀢𑁆𑀢𑀁 𑀅𑀯𑀺𑀚𑀳𑀺𑀢𑁆𑀯𑀸 𑀢𑀲𑁆𑀫𑀺𑀁 𑀔𑀡𑁂 𑀅𑀤𑀲𑁆𑀲𑀦𑀁 𑀕𑀢𑁄, 𑀩𑁄𑀥𑀺𑀲𑀢𑁆𑀢𑁄 𑀧𑀢𑁆𑀢𑀁 𑀅𑀧𑀲𑁆𑀲𑀦𑁆𑀢𑁄 𑀤𑀓𑁆𑀔𑀺𑀡𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑀉𑀤𑀓𑀁 𑀲𑀫𑁆𑀧𑀝𑀺𑀘𑁆𑀙𑀺. 𑀲𑀼𑀚𑀸𑀢𑀸 𑀲𑀳𑁂𑀯 𑀧𑀸𑀢𑀺𑀬𑀸 𑀧𑀸𑀬𑀸𑀲𑀁 𑀫𑀳𑀸𑀧𑀼𑀭𑀺𑀲𑀲𑁆𑀲 𑀳𑀢𑁆𑀣𑁂 𑀞𑀧𑁂𑀲𑀺, 𑀫𑀳𑀸𑀧𑀼𑀭𑀺𑀲𑁄 𑀲𑀼𑀚𑀸𑀢𑀁 𑀑𑀮𑁄𑀓𑁂𑀲𑀺. 𑀲𑀸 𑀆𑀓𑀸𑀭𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀅𑀬𑁆𑀬, 𑀫𑀬𑀸 𑀢𑀼𑀫𑁆𑀳𑀸𑀓𑀁 𑀧𑀭𑀺𑀘𑁆𑀘𑀢𑁆𑀢𑀁, 𑀕𑀡𑁆𑀳𑀺𑀢𑁆𑀯𑀸 𑀬𑀣𑀸𑀭𑀼𑀘𑀺𑀁 𑀕𑀘𑁆𑀙𑀣𑀸’’𑀢𑀺 𑀯𑀦𑁆𑀤𑀺𑀢𑁆𑀯𑀸 ‘‘𑀬𑀣𑀸 𑀫𑀬𑁆𑀳𑀁 𑀫𑀦𑁄𑀭𑀣𑁄 𑀦𑀺𑀧𑁆𑀨𑀦𑁆𑀦𑁄, 𑀏𑀯𑀁 𑀢𑀼𑀫𑁆𑀳𑀸𑀓𑀫𑁆𑀧𑀺 𑀦𑀺𑀧𑁆𑀨𑀚𑁆𑀚𑀢𑀽’’𑀢𑀺 𑀯𑀢𑁆𑀯𑀸 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀸𑀬 𑀲𑀼𑀯𑀡𑁆𑀡𑀧𑀸𑀢𑀺𑀬𑀸 𑀧𑀼𑀭𑀸𑀡𑀧𑀡𑁆𑀡𑁂 𑀯𑀺𑀬 𑀅𑀦𑀧𑁂𑀓𑁆𑀔𑀸 𑀳𑀼𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀩𑁄𑀥𑀺𑀲𑀢𑁆𑀢𑁄𑀧𑀺 𑀔𑁄 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀸 𑀉𑀝𑁆𑀞𑀸𑀬 𑀭𑀼𑀓𑁆𑀔𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀸𑀢𑀺𑀁 𑀆𑀤𑀸𑀬 𑀦𑁂𑀭𑀜𑁆𑀚𑀭𑀸𑀬 𑀢𑀻𑀭𑀁 𑀕𑀦𑁆𑀢𑁆𑀯𑀸 𑀅𑀦𑁂𑀓𑁂𑀲𑀁 𑀩𑁄𑀥𑀺𑀲𑀢𑁆𑀢𑀲𑀳𑀲𑁆𑀲𑀸𑀦𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀦𑀤𑀺𑀯𑀲𑁂 𑀑𑀢𑀭𑀺𑀢𑁆𑀯𑀸 𑀦𑁆𑀳𑀸𑀦𑀝𑁆𑀞𑀸𑀦𑀁 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀢𑀺𑀢𑁆𑀣𑀁 𑀦𑀸𑀫 𑀅𑀢𑁆𑀣𑀺, 𑀢𑀲𑁆𑀲 𑀢𑀻𑀭𑁂 𑀧𑀸𑀢𑀺𑀁 𑀞𑀧𑁂𑀢𑁆𑀯𑀸 𑀑𑀢𑀭𑀺𑀢𑁆𑀯𑀸 𑀦𑁆𑀳𑀢𑁆𑀯𑀸 𑀅𑀦𑁂𑀓𑀩𑀼𑀤𑁆𑀥𑀲𑀢𑀲𑀳𑀲𑁆𑀲𑀸𑀦𑀁 𑀦𑀺𑀯𑀸𑀲𑀦𑀁 𑀅𑀭𑀳𑀤𑁆𑀥𑀚𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑁄 𑀦𑀺𑀲𑀻𑀤𑀺𑀢𑁆𑀯𑀸 𑀏𑀓𑀝𑁆𑀞𑀺𑀢𑀸𑀮𑀧𑀓𑁆𑀓𑀧𑁆𑀧𑀫𑀸𑀡𑁂 𑀏𑀓𑀽𑀦𑀧𑀜𑁆𑀜𑀸𑀲 𑀧𑀺𑀡𑁆𑀟𑁂 𑀓𑀢𑁆𑀯𑀸 𑀲𑀩𑁆𑀩𑀁 𑀅𑀧𑁆𑀧𑁄𑀤𑀓𑀁 𑀫𑀥𑀼𑀧𑀸𑀬𑀸𑀲𑀁 𑀧𑀭𑀺𑀪𑀼𑀜𑁆𑀚𑀺. 𑀲𑁄 𑀏𑀯 𑀳𑀺𑀲𑁆𑀲 𑀩𑀼𑀤𑁆𑀥𑀪𑀽𑀢𑀲𑁆𑀲 𑀲𑀢𑁆𑀢𑀲𑀢𑁆𑀢𑀸𑀳𑀁 𑀩𑁄𑀥𑀺𑀫𑀡𑁆𑀟𑁂 𑀯𑀲𑀦𑁆𑀢𑀲𑁆𑀲 𑀏𑀓𑀽𑀦𑀧𑀜𑁆𑀜𑀸𑀲 𑀤𑀺𑀯𑀲𑀸𑀦𑀺 𑀆𑀳𑀸𑀭𑁄 𑀅𑀳𑁄𑀲𑀺. 𑀏𑀢𑁆𑀢𑀓𑀁 𑀓𑀸𑀮𑀁 𑀦𑁂𑀯 𑀅𑀜𑁆𑀜𑁄 𑀆𑀳𑀸𑀭𑁄 𑀅𑀢𑁆𑀣𑀺, 𑀦 𑀦𑁆𑀳𑀸𑀦𑀁, 𑀦 𑀫𑀼𑀔𑀥𑁄𑀯𑀦𑀁, 𑀦 𑀲𑀭𑀻𑀭𑀯𑀴𑀜𑁆𑀚𑁄, 𑀛𑀸𑀦𑀲𑀼𑀔𑁂𑀦 𑀫𑀕𑁆𑀕𑀲𑀼𑀔𑁂𑀦 𑀨𑀮𑀲𑀼𑀔𑁂𑀦 𑀘 𑀯𑀻𑀢𑀺𑀦𑀸𑀫𑁂𑀲𑀺. 𑀢𑀁 𑀧𑀦 𑀧𑀸𑀬𑀸𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀲𑀼𑀯𑀡𑁆𑀡𑀧𑀸𑀢𑀺𑀁 𑀕𑀳𑁂𑀢𑁆𑀯𑀸 ‘‘𑀲𑀘𑀸𑀳𑀁, 𑀅𑀚𑁆𑀚 𑀩𑀼𑀤𑁆𑀥𑁄 𑀪𑀯𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀅𑀬𑀁 𑀧𑀸𑀢𑀺 𑀧𑀝𑀺𑀲𑁄𑀢𑀁 𑀕𑀘𑁆𑀙𑀢𑀼, 𑀦𑁄 𑀘𑁂 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀅𑀦𑀼𑀲𑁄𑀢𑀁 𑀕𑀘𑁆𑀙𑀢𑀽’’𑀢𑀺 𑀯𑀢𑁆𑀯𑀸 𑀦𑀤𑀻𑀲𑁄𑀢𑁂 𑀧𑀓𑁆𑀔𑀺𑀧𑀺. 𑀲𑀸 𑀲𑁄𑀢𑀁 𑀙𑀺𑀦𑁆𑀤𑀫𑀸𑀦𑀸 𑀦𑀤𑀻𑀫𑀚𑁆𑀛𑀁 𑀕𑀦𑁆𑀢𑁆𑀯𑀸 𑀫𑀚𑁆𑀛𑀫𑀚𑁆𑀛𑀝𑁆𑀞𑀸𑀦𑁂𑀦𑁂𑀯 𑀚𑀯𑀲𑀫𑁆𑀧𑀦𑁆𑀦𑁄 𑀅𑀲𑁆𑀲𑁄 𑀯𑀺𑀬 𑀅𑀲𑀻𑀢𑀺𑀳𑀢𑁆𑀣𑀫𑀢𑁆𑀢𑀝𑁆𑀞𑀸𑀦𑀁 𑀧𑀝𑀺𑀲𑁄𑀢𑀁 𑀕𑀦𑁆𑀢𑁆𑀯𑀸 𑀏𑀓𑀲𑁆𑀫𑀺𑀁 𑀆𑀯𑀝𑁆𑀝𑁂 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀓𑀸𑀴𑀦𑀸𑀕𑀭𑀸𑀚𑀪𑀯𑀦𑀁 𑀕𑀦𑁆𑀢𑁆𑀯𑀸 𑀢𑀺𑀡𑁆𑀡𑀁 𑀩𑀼𑀤𑁆𑀥𑀸𑀦𑀁 𑀧𑀭𑀺𑀪𑁄𑀕𑀧𑀸𑀢𑀺𑀬𑁄 ‘‘𑀓𑀺𑀮𑀺 𑀓𑀺𑀮𑀻’’𑀢𑀺 𑀭𑀯𑀁 𑀓𑀸𑀭𑀬𑀫𑀸𑀦𑀸 𑀧𑀳𑀭𑀺𑀢𑁆𑀯𑀸𑀯 𑀢𑀸𑀲𑀁 𑀲𑀩𑁆𑀩𑀳𑁂𑀝𑁆𑀞𑀺𑀫𑀸 𑀳𑀼𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀓𑀸𑀴𑁄 𑀦𑀸𑀕𑀭𑀸𑀚𑀸 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀳𑀺𑀬𑁆𑀬𑁄 𑀏𑀓𑁄 𑀩𑀼𑀤𑁆𑀥𑁄 𑀦𑀺𑀩𑁆𑀩𑀢𑁆𑀢𑁄, 𑀧𑀼𑀦 𑀅𑀚𑁆𑀚 𑀏𑀓𑁄 𑀦𑀺𑀩𑁆𑀩𑀢𑁆𑀢𑁄’’𑀢𑀺 𑀯𑀢𑁆𑀯𑀸 𑀅𑀦𑁂𑀓𑁂𑀳𑀺 𑀧𑀤𑀲𑀢𑁂𑀳𑀺 𑀣𑀼𑀢𑀺𑀬𑁄 𑀯𑀤𑀫𑀸𑀦𑁄 𑀉𑀝𑁆𑀞𑀸𑀲𑀺. 𑀢𑀲𑁆𑀲 𑀓𑀺𑀭 𑀫𑀳𑀸𑀧𑀣𑀯𑀺𑀬𑀸 𑀏𑀓𑀬𑁄𑀚𑀦𑀢𑀺𑀕𑀸𑀯𑀼𑀢𑀧𑁆𑀧𑀫𑀸𑀡𑀁 𑀦𑀪𑀁 𑀧𑀽𑀭𑁂𑀢𑁆𑀯𑀸 𑀆𑀭𑁄𑀳𑀦𑀓𑀸𑀮𑁄 ‘‘𑀅𑀚𑁆𑀚 𑀯𑀸 𑀳𑀺𑀬𑁆𑀬𑁄 𑀯𑀸’’𑀢𑀺 𑀲𑀤𑀺𑀲𑁄 𑀅𑀳𑁄𑀲𑀺.

𑀩𑁄𑀥𑀺𑀲𑀢𑁆𑀢𑁄𑀧𑀺 𑀦𑀤𑀻𑀢𑀻𑀭𑀫𑁆𑀳𑀺 𑀲𑀼𑀧𑀼𑀧𑁆𑀨𑀺𑀢𑀲𑀸𑀮𑀯𑀦𑁂 𑀤𑀺𑀯𑀸𑀯𑀺𑀳𑀸𑀭𑀁 𑀓𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀧𑀼𑀧𑁆𑀨𑀸𑀦𑀁 𑀯𑀡𑁆𑀝𑀢𑁄 𑀫𑀼𑀘𑁆𑀘𑀦𑀓𑀸𑀮𑁂 𑀤𑁂𑀯𑀢𑀸𑀳𑀺 𑀅𑀮𑀗𑁆𑀓𑀢𑁂𑀦 𑀅𑀝𑁆𑀞𑀽𑀲𑀪𑀯𑀺𑀢𑁆𑀣𑀸𑀭𑁂𑀦 𑀫𑀕𑁆𑀕𑁂𑀦 𑀲𑀻𑀳𑁄 𑀯𑀺𑀬 𑀯𑀺𑀚𑀫𑁆𑀪𑀫𑀸𑀦𑁄 𑀩𑁄𑀥𑀺𑀭𑀼𑀓𑁆𑀔𑀸𑀪𑀺𑀫𑀼𑀔𑁄 𑀧𑀸𑀬𑀸𑀲𑀺. 𑀦𑀸𑀕𑀬𑀓𑁆𑀔𑀲𑀼𑀧𑀡𑁆𑀡𑀸𑀤𑀬𑁄 𑀤𑀺𑀩𑁆𑀩𑁂𑀳𑀺 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀳𑀺 𑀧𑀽𑀚𑀬𑀺𑀁𑀲𑀼, 𑀤𑀺𑀩𑁆𑀩𑀲𑀗𑁆𑀕𑀻𑀢𑀸𑀤𑀻𑀦𑀺 𑀧𑀯𑀢𑁆𑀢𑀬𑀺𑀁𑀲𑀼, 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀏𑀓𑀕𑀦𑁆𑀥𑀸 𑀏𑀓𑀫𑀸𑀮𑀸 𑀏𑀓𑀲𑀸𑀥𑀼𑀓𑀸𑀭𑀸 𑀅𑀳𑁄𑀲𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀲𑁄𑀢𑁆𑀣𑀺𑀬𑁄 𑀦𑀸𑀫 𑀢𑀺𑀡𑀳𑀸𑀭𑀓𑁄 𑀢𑀺𑀡𑀁 𑀆𑀤𑀸𑀬 𑀧𑀝𑀺𑀧𑀣𑁂 𑀆𑀕𑀘𑁆𑀙𑀦𑁆𑀢𑁄 𑀫𑀳𑀸𑀧𑀼𑀭𑀺𑀲𑀲𑁆𑀲 𑀆𑀓𑀸𑀭𑀁 𑀜𑀢𑁆𑀯𑀸 𑀅𑀝𑁆𑀞 𑀢𑀺𑀡𑀫𑀼𑀝𑁆𑀞𑀺𑀬𑁄 𑀅𑀤𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀺𑀡𑀁 𑀕𑀳𑁂𑀢𑁆𑀯𑀸 𑀩𑁄𑀥𑀺𑀫𑀡𑁆𑀟𑀁 𑀆𑀭𑀼𑀬𑁆𑀳 𑀤𑀓𑁆𑀔𑀺𑀡𑀤𑀺𑀲𑀸𑀪𑀸𑀕𑁂 𑀉𑀢𑁆𑀢𑀭𑀸𑀪𑀺𑀫𑀼𑀔𑁄 𑀅𑀝𑁆𑀞𑀸𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀤𑀓𑁆𑀔𑀺𑀡𑀘𑀓𑁆𑀓𑀯𑀸𑀴𑀁 𑀑𑀲𑀻𑀤𑀺𑀢𑁆𑀯𑀸 𑀳𑁂𑀝𑁆𑀞𑀸 𑀅𑀯𑀻𑀘𑀺𑀲𑀫𑁆𑀧𑀢𑁆𑀢𑀁 𑀯𑀺𑀬 𑀅𑀳𑁄𑀲𑀺, 𑀉𑀢𑁆𑀢𑀭𑀘𑀓𑁆𑀓𑀯𑀸𑀴𑀁 𑀉𑀮𑁆𑀮𑀗𑁆𑀖𑀺𑀢𑁆𑀯𑀸 𑀉𑀧𑀭𑀺 𑀪𑀯𑀕𑁆𑀕𑀧𑁆𑀧𑀢𑁆𑀢𑀁 𑀯𑀺𑀬 𑀅𑀳𑁄𑀲𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀇𑀤𑀁 𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀦𑀝𑁆𑀞𑀸𑀦𑀁 𑀦 𑀪𑀯𑀺𑀲𑁆𑀲𑀢𑀺 𑀫𑀜𑁆𑀜𑁂’’𑀢𑀺 𑀧𑀤𑀓𑁆𑀔𑀺𑀡𑀁 𑀓𑀭𑁄𑀦𑁆𑀢𑁄 𑀧𑀘𑁆𑀙𑀺𑀫𑀤𑀺𑀲𑀸𑀪𑀸𑀕𑀁 𑀕𑀦𑁆𑀢𑁆𑀯𑀸 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑁄 𑀅𑀝𑁆𑀞𑀸𑀲𑀺, 𑀢𑀢𑁄 𑀧𑀘𑁆𑀙𑀺𑀫𑀘𑀓𑁆𑀓𑀯𑀸𑀴𑀁 𑀑𑀲𑀻𑀤𑀺𑀢𑁆𑀯𑀸 𑀳𑁂𑀝𑁆𑀞𑀸 𑀅𑀯𑀻𑀘𑀺𑀲𑀫𑁆𑀧𑀢𑁆𑀢𑀁 𑀯𑀺𑀬 𑀅𑀳𑁄𑀲𑀺, 𑀧𑀼𑀭𑀢𑁆𑀣𑀺𑀫𑀘𑀓𑁆𑀓𑀯𑀸𑀴𑀁 𑀉𑀮𑁆𑀮𑀗𑁆𑀖𑀺𑀢𑁆𑀯𑀸 𑀉𑀧𑀭𑀺 𑀪𑀯𑀕𑁆𑀕𑀧𑁆𑀧𑀢𑁆𑀢𑀁 𑀯𑀺𑀬 𑀅𑀳𑁄𑀲𑀺. 𑀞𑀺𑀢𑀝𑁆𑀞𑀺𑀢𑀝𑁆𑀞𑀸𑀦𑁂 𑀓𑀺𑀭𑀲𑁆𑀲 𑀦𑁂𑀫𑀺𑀯𑀝𑁆𑀝𑀺𑀧𑀭𑀺𑀬𑀦𑁆𑀢𑁂 𑀅𑀓𑁆𑀓𑀦𑁆𑀢𑁂 𑀦𑀸𑀪𑀺𑀬𑀸 𑀧𑀢𑀺𑀝𑁆𑀞𑀺𑀢𑀫𑀳𑀸𑀲𑀓𑀝𑀘𑀓𑁆𑀓𑀁 𑀯𑀺𑀬 𑀫𑀳𑀸𑀧𑀣𑀯𑀻 𑀑𑀦𑀢𑀼𑀦𑁆𑀦𑀢𑀸 𑀅𑀳𑁄𑀲𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀇𑀤𑀫𑁆𑀧𑀺 𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀦𑀝𑁆𑀞𑀸𑀦𑀁 𑀦 𑀪𑀯𑀺𑀲𑁆𑀲𑀢𑀺 𑀫𑀜𑁆𑀜𑁂’’𑀢𑀺 𑀧𑀤𑀓𑁆𑀔𑀺𑀡𑀁 𑀓𑀭𑁄𑀦𑁆𑀢𑁄 𑀉𑀢𑁆𑀢𑀭𑀤𑀺𑀲𑀸𑀪𑀸𑀕𑀁 𑀕𑀦𑁆𑀢𑁆𑀯𑀸 𑀤𑀓𑁆𑀔𑀺𑀡𑀸𑀪𑀺𑀫𑀼𑀔𑁄 𑀅𑀝𑁆𑀞𑀸𑀲𑀺, 𑀢𑀢𑁄 𑀉𑀢𑁆𑀢𑀭𑀘𑀓𑁆𑀓𑀯𑀸𑀴𑀁 𑀑𑀲𑀻𑀤𑀺𑀢𑁆𑀯𑀸 𑀳𑁂𑀝𑁆𑀞𑀸 𑀅𑀯𑀻𑀘𑀺𑀲𑀫𑁆𑀧𑀢𑁆𑀢𑀁 𑀯𑀺𑀬 𑀅𑀳𑁄𑀲𑀺, 𑀤𑀓𑁆𑀔𑀺𑀡𑀘𑀓𑁆𑀓𑀯𑀸𑀴𑀁 𑀉𑀮𑁆𑀮𑀗𑁆𑀖𑀺𑀢𑁆𑀯𑀸 𑀉𑀧𑀭𑀺 𑀪𑀯𑀕𑁆𑀕𑀧𑁆𑀧𑀢𑁆𑀢𑀁 𑀯𑀺𑀬 𑀅𑀳𑁄𑀲𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀇𑀤𑀫𑁆𑀧𑀺 𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀦𑀝𑁆𑀞𑀸𑀦𑀁 𑀦 𑀪𑀯𑀺𑀲𑁆𑀲𑀢𑀺 𑀫𑀜𑁆𑀜𑁂’’𑀢𑀺 𑀧𑀤𑀓𑁆𑀔𑀺𑀡𑀁 𑀓𑀭𑁄𑀦𑁆𑀢𑁄 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀪𑀸𑀕𑀁 𑀕𑀦𑁆𑀢𑁆𑀯𑀸 𑀧𑀘𑁆𑀙𑀺𑀫𑀸𑀪𑀺𑀫𑀼𑀔𑁄 𑀅𑀝𑁆𑀞𑀸𑀲𑀺. 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀪𑀸𑀕𑁂 𑀧𑀦 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀧𑀮𑁆𑀮𑀗𑁆𑀓𑀝𑁆𑀞𑀸𑀦𑀁, 𑀢𑀁 𑀦𑁂𑀯 𑀙𑀫𑁆𑀪𑀢𑀺, 𑀦 𑀓𑀫𑁆𑀧𑀢𑀺. 𑀫𑀳𑀸𑀲𑀢𑁆𑀢𑁄 ‘‘𑀇𑀤𑀁 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀅𑀯𑀺𑀚𑀳𑀺𑀢𑀁 𑀅𑀘𑀮𑀝𑁆𑀞𑀸𑀦𑀁 𑀓𑀺𑀮𑁂𑀲𑀧𑀜𑁆𑀚𑀭𑀯𑀺𑀤𑁆𑀥𑀁𑀲𑀦𑀝𑁆𑀞𑀸𑀦’’𑀦𑁆𑀢𑀺 𑀜𑀢𑁆𑀯𑀸 𑀢𑀸𑀦𑀺 𑀢𑀺𑀡𑀸𑀦𑀺 𑀅𑀕𑁆𑀕𑁂 𑀕𑀳𑁂𑀢𑁆𑀯𑀸 𑀘𑀸𑀮𑁂𑀲𑀺, 𑀢𑀸𑀯𑀤𑁂𑀯 𑀘𑀼𑀤𑁆𑀤𑀲𑀳𑀢𑁆𑀣𑁄 𑀧𑀮𑁆𑀮𑀗𑁆𑀓𑁄 𑀅𑀳𑁄𑀲𑀺. 𑀢𑀸𑀦𑀺𑀧𑀺 𑀔𑁄 𑀢𑀺𑀡𑀸𑀦𑀺 𑀢𑀣𑀸𑀭𑀽𑀧𑁂𑀦 𑀲𑀡𑁆𑀞𑀸𑀦𑁂𑀦 𑀲𑀡𑁆𑀞𑀳𑀺𑀁𑀲𑀼, 𑀬𑀣𑀸𑀭𑀽𑀧𑀁 𑀲𑀼𑀓𑀼𑀲𑀮𑁄𑀧𑀺 𑀘𑀺𑀢𑁆𑀢𑀓𑀸𑀭𑁄 𑀯𑀸 𑀧𑁄𑀢𑁆𑀣𑀓𑀸𑀭𑁄 𑀯𑀸 𑀆𑀮𑀺𑀔𑀺𑀢𑀼𑀫𑁆𑀧𑀺 𑀲𑀫𑀢𑁆𑀣𑁄 𑀦𑀢𑁆𑀣𑀺. 𑀩𑁄𑀥𑀺𑀲𑀢𑁆𑀢𑁄 𑀩𑁄𑀥𑀺𑀓𑁆𑀔𑀦𑁆𑀥𑀁 𑀧𑀺𑀝𑁆𑀞𑀺𑀢𑁄 𑀓𑀢𑁆𑀯𑀸 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑁄 𑀤𑀴𑁆𑀳𑀫𑀸𑀦𑀲𑁄 𑀳𑀼𑀢𑁆𑀯𑀸 𑁋

‘‘𑀓𑀸𑀫𑀁 𑀢𑀘𑁄 𑀘 𑀦𑁆𑀳𑀸𑀭𑀼 𑀘, 𑀅𑀝𑁆𑀞𑀺 𑀘 𑀅𑀯𑀲𑀺𑀲𑁆𑀲𑀢𑀼;

𑀉𑀧𑀲𑀼𑀲𑁆𑀲𑀢𑀼 𑀦𑀺𑀲𑁆𑀲𑁂𑀲𑀁, 𑀲𑀭𑀻𑀭𑁂 𑀫𑀁𑀲𑀮𑁄𑀳𑀺𑀢𑀁’’.

𑀦 𑀢𑁆𑀯𑁂𑀯𑀸𑀳𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀧𑁆𑀧𑀢𑁆𑀯𑀸 𑀇𑀫𑀁 𑀧𑀮𑁆𑀮𑀗𑁆𑀓𑀁 𑀪𑀺𑀦𑁆𑀤𑀺𑀲𑁆𑀲𑀸𑀫𑀻𑀢𑀺 𑀅𑀲𑀦𑀺𑀲𑀢𑀲𑀦𑁆𑀦𑀺𑀧𑀸𑀢𑁂𑀦𑀧𑀺 𑀅𑀪𑁂𑀚𑁆𑀚𑀭𑀽𑀧𑀁 𑀅𑀧𑀭𑀸𑀚𑀺𑀢𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀦𑀺𑀲𑀻𑀤𑀺.

𑀢𑀲𑁆𑀫𑀺𑀁 𑀲𑀫𑀬𑁂 𑀫𑀸𑀭𑁄 𑀤𑁂𑀯𑀧𑀼𑀢𑁆𑀢𑁄 ‘‘𑀲𑀺𑀤𑁆𑀥𑀢𑁆𑀣𑀓𑀼𑀫𑀸𑀭𑁄 𑀫𑀬𑁆𑀳𑀁 𑀯𑀲𑀁 𑀅𑀢𑀺𑀓𑁆𑀓𑀫𑀺𑀢𑀼𑀓𑀸𑀫𑁄, 𑀦 𑀤𑀸𑀦𑀺𑀲𑁆𑀲 𑀅𑀢𑀺𑀓𑁆𑀓𑀫𑀺𑀢𑀼𑀁 𑀤𑀲𑁆𑀲𑀸𑀫𑀻’’𑀢𑀺 𑀫𑀸𑀭𑀩𑀮𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸 𑀫𑀸𑀭𑀖𑁄𑀲𑀦𑀁 𑀦𑀸𑀫 𑀖𑁄𑀲𑀸𑀧𑁂𑀢𑁆𑀯𑀸 𑀫𑀸𑀭𑀩𑀮𑀁 𑀆𑀤𑀸𑀬 𑀦𑀺𑀓𑁆𑀔𑀫𑀺. 𑀲𑀸 𑀫𑀸𑀭𑀲𑁂𑀦𑀸 𑀫𑀸𑀭𑀲𑁆𑀲 𑀧𑀼𑀭𑀢𑁄 𑀤𑁆𑀯𑀸𑀤𑀲𑀬𑁄𑀚𑀦𑀸 𑀳𑁄𑀢𑀺, 𑀤𑀓𑁆𑀔𑀺𑀡𑀢𑁄 𑀘 𑀯𑀸𑀫𑀢𑁄 𑀘 𑀤𑁆𑀯𑀸𑀤𑀲𑀬𑁄𑀚𑀦𑀸, 𑀧𑀘𑁆𑀙𑀢𑁄 𑀬𑀸𑀯 𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀞𑀺𑀢𑀸, 𑀉𑀤𑁆𑀥𑀁 𑀦𑀯𑀬𑁄𑀚𑀦𑀼𑀩𑁆𑀩𑁂𑀥𑀸, 𑀬𑀲𑁆𑀲𑀸 𑀉𑀦𑁆𑀦𑀤𑀦𑁆𑀢𑀺𑀬𑀸 𑀉𑀦𑁆𑀦𑀸𑀤𑀲𑀤𑁆𑀤𑁄 𑀬𑁄𑀚𑀦𑀲𑀳𑀲𑁆𑀲𑀢𑁄 𑀧𑀝𑁆𑀞𑀸𑀬 𑀧𑀣𑀯𑀺𑀉𑀦𑁆𑀤𑁆𑀭𑀺𑀬𑀦𑀲𑀤𑁆𑀤𑁄 𑀯𑀺𑀬 𑀲𑀼𑀬𑁆𑀬𑀢𑀺. 𑀅𑀣 𑀫𑀸𑀭𑁄 𑀤𑁂𑀯𑀧𑀼𑀢𑁆𑀢𑁄 𑀤𑀺𑀬𑀟𑁆𑀠𑀬𑁄𑀚𑀦𑀲𑀢𑀺𑀓𑀁 𑀕𑀺𑀭𑀺𑀫𑁂𑀔𑀮𑀁 𑀦𑀸𑀫 𑀳𑀢𑁆𑀣𑀺𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀩𑀸𑀳𑀼𑀲𑀳𑀲𑁆𑀲𑀁 𑀫𑀸𑀧𑁂𑀢𑁆𑀯𑀸 𑀦𑀸𑀦𑀸𑀯𑀼𑀥𑀸𑀦𑀺 𑀅𑀕𑁆𑀕𑀳𑁂𑀲𑀺. 𑀅𑀯𑀲𑁂𑀲𑀸𑀬𑀧𑀺 𑀫𑀸𑀭𑀧𑀭𑀺𑀲𑀸𑀬 𑀤𑁆𑀯𑁂 𑀚𑀦𑀸 𑀏𑀓𑀲𑀤𑀺𑀲𑀁 𑀆𑀯𑀼𑀥𑀁 𑀦 𑀕𑀡𑁆𑀳𑀺𑀁𑀲𑀼, 𑀦𑀸𑀦𑀧𑁆𑀧𑀓𑀸𑀭𑀯𑀡𑁆𑀡𑀸 𑀦𑀸𑀦𑀧𑁆𑀧𑀓𑀸𑀭𑀫𑀼𑀔𑀸 𑀳𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑀁 𑀅𑀚𑁆𑀛𑁄𑀢𑁆𑀣𑀭𑀫𑀸𑀦𑀸 𑀆𑀕𑀫𑀺𑀁𑀲𑀼.

𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀤𑁂𑀯𑀢𑀸 𑀧𑀦 𑀫𑀳𑀸𑀲𑀢𑁆𑀢𑀲𑁆𑀲 𑀣𑀼𑀢𑀺𑀬𑁄 𑀯𑀤𑀫𑀸𑀦𑀸 𑀅𑀝𑁆𑀞𑀁𑀲𑀼. 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀯𑀺𑀚𑀬𑀼𑀢𑁆𑀢𑀭𑀲𑀗𑁆𑀔𑀁 𑀥𑀫𑀫𑀸𑀦𑁄 𑀅𑀝𑁆𑀞𑀸𑀲𑀺. 𑀲𑁄 𑀓𑀺𑀭 𑀲𑀗𑁆𑀔𑁄 𑀯𑀻𑀲𑀳𑀢𑁆𑀣𑀲𑀢𑀺𑀓𑁄 𑀳𑁄𑀢𑀺. 𑀲𑀓𑀺𑀁 𑀯𑀸𑀢𑀁 𑀕𑀸𑀳𑀸𑀧𑁂𑀢𑁆𑀯𑀸 𑀥𑀫𑀦𑁆𑀢𑁄 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀲𑀤𑁆𑀤𑀁 𑀓𑀭𑀺𑀢𑁆𑀯𑀸 𑀦𑀺𑀲𑁆𑀲𑀤𑁆𑀤𑁄 𑀳𑁄𑀢𑀺. 𑀫𑀳𑀸𑀓𑀸𑀴𑀦𑀸𑀕𑀭𑀸𑀚𑀸 𑀅𑀢𑀺𑀭𑁂𑀓𑀧𑀤𑀲𑀢𑁂𑀦 𑀯𑀡𑁆𑀡𑀁 𑀯𑀤𑀦𑁆𑀢𑁄 𑀅𑀝𑁆𑀞𑀸𑀲𑀺, 𑀫𑀳𑀸𑀩𑁆𑀭𑀳𑁆𑀫𑀸 𑀲𑁂𑀢𑀘𑁆𑀙𑀢𑁆𑀢𑀁 𑀥𑀸𑀭𑀬𑀫𑀸𑀦𑁄 𑀅𑀝𑁆𑀞𑀸𑀲𑀺. 𑀫𑀸𑀭𑀩𑀮𑁂 𑀧𑀦 𑀩𑁄𑀥𑀺𑀫𑀡𑁆𑀟𑀁 𑀉𑀧𑀲𑀗𑁆𑀓𑀫𑀦𑁆𑀢𑁂 𑀢𑁂𑀲𑀁 𑀏𑀓𑁄𑀧𑀺 𑀞𑀸𑀢𑀼𑀁 𑀦𑀸𑀲𑀓𑁆𑀔𑀺, 𑀲𑀫𑁆𑀫𑀼𑀔𑀲𑀫𑁆𑀫𑀼𑀔𑀝𑁆𑀞𑀸𑀦𑁂𑀦𑁂𑀯 𑀧𑀮𑀸𑀬𑀺𑀁𑀲𑀼. 𑀓𑀸𑀴𑁄 𑀦𑀸𑀕𑀭𑀸𑀚𑀸 𑀧𑀣𑀯𑀺𑀬𑀁 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀧𑀜𑁆𑀘𑀬𑁄𑀚𑀦𑀲𑀢𑀺𑀓𑀁 𑀫𑀜𑁆𑀚𑁂𑀭𑀺𑀓𑀦𑀸𑀕𑀪𑀯𑀦𑀁 𑀕𑀦𑁆𑀢𑁆𑀯𑀸 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀫𑀼𑀔𑀁 𑀧𑀺𑀤𑀳𑀺𑀢𑁆𑀯𑀸 𑀦𑀺𑀧𑀦𑁆𑀦𑁄. 𑀲𑀓𑁆𑀓𑁄 𑀯𑀺𑀚𑀬𑀼𑀢𑁆𑀢𑀭𑀲𑀗𑁆𑀔𑀁 𑀧𑀺𑀝𑁆𑀞𑀺𑀬𑀁 𑀓𑀢𑁆𑀯𑀸 𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀅𑀝𑁆𑀞𑀸𑀲𑀺. 𑀫𑀳𑀸𑀩𑁆𑀭𑀳𑁆𑀫𑀸 𑀲𑁂𑀢𑀘𑁆𑀙𑀢𑁆𑀢𑀁 𑀘𑀓𑁆𑀓𑀯𑀸𑀴𑀓𑁄𑀝𑀺𑀬𑀁 𑀞𑀧𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀫𑁂𑀯 𑀅𑀕𑀫𑀸𑀲𑀺. 𑀏𑀓𑀸 𑀤𑁂𑀯𑀢𑀸𑀧𑀺 𑀞𑀸𑀢𑀼𑀁 𑀲𑀫𑀢𑁆𑀣𑀸 𑀦𑀸𑀳𑁄𑀲𑀺, 𑀫𑀳𑀸𑀧𑀼𑀭𑀺𑀲𑁄 𑀏𑀓𑀓𑁄𑀯 𑀦𑀺𑀲𑀻𑀤𑀺.

𑀫𑀸𑀭𑁄𑀧𑀺 𑀅𑀢𑁆𑀢𑀦𑁄 𑀧𑀭𑀺𑀲𑀁 𑀆𑀳 ‘‘𑀢𑀸𑀢𑀸 𑀲𑀼𑀤𑁆𑀥𑁄𑀤𑀦𑀧𑀼𑀢𑁆𑀢𑁂𑀦 𑀲𑀺𑀤𑁆𑀥𑀢𑁆𑀣𑁂𑀦 𑀲𑀤𑀺𑀲𑁄 𑀅𑀜𑁆𑀜𑁄 𑀧𑀼𑀭𑀺𑀲𑁄 𑀦𑀸𑀫 𑀦𑀢𑁆𑀣𑀺, 𑀫𑀬𑀁 𑀲𑀫𑁆𑀫𑀼𑀔𑀸 𑀬𑀼𑀤𑁆𑀥𑀁 𑀤𑀸𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫, 𑀧𑀘𑁆𑀙𑀸𑀪𑀸𑀕𑁂𑀦 𑀤𑀲𑁆𑀲𑀸𑀫𑀸’’𑀢𑀺. 𑀫𑀳𑀸𑀧𑀼𑀭𑀺𑀲𑁄𑀧𑀺 𑀢𑀻𑀡𑀺 𑀧𑀲𑁆𑀲𑀸𑀦𑀺 𑀑𑀮𑁄𑀓𑁂𑀢𑁆𑀯𑀸 𑀲𑀩𑁆𑀩𑀤𑁂𑀯𑀢𑀸𑀦𑀁 𑀧𑀮𑀸𑀢𑀢𑁆𑀢𑀸 𑀲𑀼𑀜𑁆𑀜𑀸𑀦𑀺 𑀅𑀤𑁆𑀤𑀲. 𑀧𑀼𑀦 𑀉𑀢𑁆𑀢𑀭𑀧𑀲𑁆𑀲𑁂𑀦 𑀫𑀸𑀭𑀩𑀮𑀁 𑀅𑀚𑁆𑀛𑁄𑀢𑁆𑀣𑀭𑀫𑀸𑀦𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀏𑀢𑁆𑀢𑀓𑁄 𑀚𑀦𑁄 𑀫𑀁 𑀏𑀓𑀓𑀁 𑀲𑀦𑁆𑀥𑀸𑀬 𑀫𑀳𑀦𑁆𑀢𑀁 𑀯𑀸𑀬𑀸𑀫𑀁 𑀧𑀭𑀓𑁆𑀓𑀫𑀁 𑀓𑀭𑁄𑀢𑀺, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀫𑀬𑁆𑀳𑀁 𑀫𑀸𑀢𑀸 𑀯𑀸 𑀧𑀺𑀢𑀸 𑀯𑀸 𑀪𑀸𑀢𑀸 𑀯𑀸 𑀅𑀜𑁆𑀜𑁄 𑀯𑀸 𑀓𑁄𑀘𑀺 𑀜𑀸𑀢𑀓𑁄 𑀦𑀢𑁆𑀣𑀺, 𑀇𑀫𑀸 𑀧𑀦 𑀤𑀲 𑀧𑀸𑀭𑀫𑀺𑀬𑁄𑀯 𑀫𑀬𑁆𑀳𑀁 𑀤𑀻𑀖𑀭𑀢𑁆𑀢𑀁 𑀧𑀼𑀝𑁆𑀞𑀧𑀭𑀺𑀚𑀦𑀲𑀤𑀺𑀲𑀸, 𑀢𑀲𑁆𑀫𑀸 𑀧𑀸𑀭𑀫𑀺𑀬𑁄𑀯 𑀨𑀮𑀓𑀁 𑀓𑀢𑁆𑀯𑀸 𑀧𑀸𑀭𑀫𑀺𑀲𑀢𑁆𑀣𑁂𑀦𑁂𑀯 𑀧𑀳𑀭𑀺𑀢𑁆𑀯𑀸 𑀅𑀬𑀁 𑀩𑀮𑀓𑀸𑀬𑁄 𑀫𑀬𑀸 𑀯𑀺𑀤𑁆𑀥𑀁𑀲𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀤𑀲 𑀧𑀸𑀭𑀫𑀺𑀬𑁄 𑀆𑀯𑀚𑁆𑀚𑀫𑀸𑀦𑁄 𑀦𑀺𑀲𑀻𑀤𑀺.

𑀅𑀣 𑀔𑁄 𑀫𑀸𑀭𑁄 𑀤𑁂𑀯𑀧𑀼𑀢𑁆𑀢𑁄 ‘‘𑀏𑀢𑁂𑀦𑁂𑀯 𑀲𑀺𑀤𑁆𑀥𑀢𑁆𑀣𑀁 𑀧𑀮𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀯𑀸𑀢𑀫𑀡𑁆𑀟𑀮𑀁 𑀲𑀫𑀼𑀝𑁆𑀞𑀸𑀧𑁂𑀲𑀺. 𑀢𑀗𑁆𑀔𑀡𑀁𑀬𑁂𑀯 𑀧𑀼𑀭𑀢𑁆𑀣𑀺𑀫𑀸𑀤𑀺𑀪𑁂𑀤𑀸 𑀯𑀸𑀢𑀸 𑀲𑀫𑀼𑀝𑁆𑀞𑀳𑀺𑀢𑁆𑀯𑀸 𑀅𑀟𑁆𑀠𑀬𑁄𑀚𑀦𑀏𑀓𑀬𑁄𑀚𑀦𑀤𑁆𑀯𑀺𑀬𑁄𑀚𑀦𑀢𑀺𑀬𑁄𑀚𑀦𑀧𑁆𑀧𑀫𑀸𑀡𑀸𑀦𑀺 𑀧𑀩𑁆𑀩𑀢𑀓𑀽𑀝𑀸𑀦𑀺 𑀧𑀤𑀸𑀮𑁂𑀢𑁆𑀯𑀸 𑀯𑀦𑀕𑀘𑁆𑀙𑀭𑀼𑀓𑁆𑀔𑀸𑀤𑀻𑀦𑀺 𑀉𑀫𑁆𑀫𑀽𑀮𑁂𑀢𑁆𑀯𑀸 𑀲𑀫𑀦𑁆𑀢𑀸 𑀕𑀸𑀫𑀦𑀺𑀕𑀫𑁂 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀁 𑀓𑀸𑀢𑀼𑀁 𑀲𑀫𑀢𑁆𑀣𑀸𑀧𑀺 𑀫𑀳𑀸𑀧𑀼𑀭𑀺𑀲𑀲𑁆𑀲 𑀧𑀼𑀜𑁆𑀜𑀢𑁂𑀚𑁂𑀦 𑀯𑀺𑀳𑀢𑀸𑀦𑀼𑀪𑀸𑀯𑀸 𑀩𑁄𑀥𑀺𑀲𑀢𑁆𑀢𑀁 𑀧𑀢𑁆𑀯𑀸 𑀘𑀻𑀯𑀭𑀓𑀡𑁆𑀡𑀫𑀢𑁆𑀢𑀫𑁆𑀧𑀺 𑀘𑀸𑀮𑁂𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀢𑀢𑁄 ‘‘𑀉𑀤𑀓𑁂𑀦 𑀦 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀫𑀳𑀸𑀯𑀲𑁆𑀲𑀁 𑀲𑀫𑀼𑀝𑁆𑀞𑀸𑀧𑁂𑀲𑀺. 𑀢𑀲𑁆𑀲𑀸𑀦𑀼𑀪𑀸𑀯𑁂𑀦 𑀉𑀧𑀭𑀽𑀧𑀭𑀺 𑀲𑀢𑀧𑀝𑀮𑀲𑀳𑀲𑁆𑀲𑀧𑀝𑀮𑀸𑀤𑀺𑀪𑁂𑀤𑀸 𑀯𑀮𑀸𑀳𑀓𑀸 𑀉𑀝𑁆𑀞𑀳𑀺𑀢𑁆𑀯𑀸 𑀯𑀲𑁆𑀲𑀺𑀁𑀲𑀼. 𑀯𑀼𑀝𑁆𑀞𑀺𑀥𑀸𑀭𑀸𑀯𑁂𑀕𑁂𑀦 𑀧𑀣𑀯𑀻 𑀙𑀺𑀤𑁆𑀤𑀸 𑀅𑀳𑁄𑀲𑀺. 𑀯𑀦𑀭𑀼𑀓𑁆𑀔𑀸𑀤𑀻𑀦𑀁 𑀉𑀧𑀭𑀺𑀪𑀸𑀕𑁂𑀦 𑀫𑀳𑀸𑀫𑁂𑀖𑁄 𑀆𑀕𑀦𑁆𑀢𑁆𑀯𑀸 𑀫𑀳𑀸𑀲𑀢𑁆𑀢𑀲𑁆𑀲 𑀘𑀻𑀯𑀭𑁂 𑀉𑀲𑁆𑀲𑀸𑀯𑀩𑀺𑀦𑁆𑀤𑀼𑀝𑁆𑀞𑀸𑀦𑀫𑀢𑁆𑀢𑀫𑁆𑀧𑀺 𑀢𑁂𑀫𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀢𑀢𑁄 𑀧𑀸𑀲𑀸𑀡𑀯𑀲𑁆𑀲𑀁 𑀲𑀫𑀼𑀝𑁆𑀞𑀸𑀧𑁂𑀲𑀺. 𑀫𑀳𑀦𑁆𑀢𑀸𑀦𑀺 𑀫𑀳𑀦𑁆𑀢𑀸𑀦𑀺 𑀧𑀩𑁆𑀩𑀢𑀓𑀽𑀝𑀸𑀦𑀺 𑀥𑀽𑀫𑀸𑀬𑀦𑁆𑀢𑀸𑀦𑀺 𑀧𑀚𑁆𑀚𑀮𑀦𑁆𑀢𑀸𑀦𑀺 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀧𑀢𑁆𑀯𑀸 𑀤𑀺𑀩𑁆𑀩𑀫𑀸𑀮𑀸𑀕𑀼𑀴𑀪𑀸𑀯𑀁 𑀆𑀧𑀚𑁆𑀚𑀺𑀁𑀲𑀼. 𑀢𑀢𑁄 𑀧𑀳𑀭𑀡𑀯𑀲𑁆𑀲𑀁 𑀲𑀫𑀼𑀝𑁆𑀞𑀸𑀧𑁂𑀲𑀺. 𑀏𑀓𑀢𑁄𑀥𑀸𑀭𑀸𑀉𑀪𑀢𑁄𑀥𑀸𑀭𑀸𑀅𑀲𑀺𑀲𑀢𑁆𑀢𑀺𑀔𑀼𑀭𑀧𑁆𑀧𑀸𑀤𑀬𑁄 𑀥𑀽𑀫𑀸𑀬𑀦𑁆𑀢𑀸 𑀧𑀚𑁆𑀚𑀮𑀦𑁆𑀢𑀸 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀧𑀢𑁆𑀯𑀸 𑀤𑀺𑀩𑁆𑀩𑀧𑀼𑀧𑁆𑀨𑀸𑀦𑀺 𑀅𑀳𑁂𑀲𑀼𑀁. 𑀢𑀢𑁄 𑀅𑀗𑁆𑀕𑀸𑀭𑀯𑀲𑁆𑀲𑀁 𑀲𑀫𑀼𑀝𑁆𑀞𑀸𑀧𑁂𑀲𑀺. 𑀓𑀺𑀁𑀲𑀼𑀓𑀯𑀡𑁆𑀡𑀸 𑀅𑀗𑁆𑀕𑀸𑀭𑀸 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀸𑀤𑀫𑀽𑀮𑁂 𑀤𑀺𑀩𑁆𑀩𑀧𑀼𑀧𑁆𑀨𑀸𑀦𑀺 𑀳𑀼𑀢𑁆𑀯𑀸 𑀯𑀺𑀓𑀺𑀭𑀺𑀁𑀲𑀼. 𑀢𑀢𑁄 𑀓𑀼𑀓𑁆𑀓𑀼𑀴𑀯𑀲𑁆𑀲𑀁 𑀲𑀫𑀼𑀝𑁆𑀞𑀸𑀧𑁂𑀲𑀺. 𑀅𑀘𑁆𑀘𑀼𑀡𑁆𑀳𑁄 𑀅𑀕𑁆𑀕𑀺𑀯𑀡𑁆𑀡𑁄 𑀓𑀼𑀓𑁆𑀓𑀼𑀴𑁄 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀸𑀤𑀫𑀽𑀮𑁂 𑀤𑀺𑀩𑁆𑀩𑀘𑀦𑁆𑀤𑀦𑀘𑀼𑀡𑁆𑀡𑀁 𑀳𑀼𑀢𑁆𑀯𑀸 𑀦𑀺𑀧𑀢𑀺. 𑀢𑀢𑁄 𑀯𑀸𑀮𑀼𑀓𑀸𑀯𑀲𑁆𑀲𑀁 𑀲𑀫𑀼𑀝𑁆𑀞𑀸𑀧𑁂𑀲𑀺. 𑀅𑀢𑀺𑀲𑀼𑀔𑀼𑀫𑀯𑀸𑀮𑀼𑀓𑀸 𑀥𑀽𑀫𑀸𑀬𑀦𑁆𑀢𑀸 𑀧𑀚𑁆𑀚𑀮𑀦𑁆𑀢𑀸 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀸𑀤𑀫𑀽𑀮𑁂 𑀤𑀺𑀩𑁆𑀩𑀧𑀼𑀧𑁆𑀨𑀸𑀦𑀺 𑀳𑀼𑀢𑁆𑀯𑀸 𑀦𑀺𑀧𑀢𑀺𑀁𑀲𑀼. 𑀢𑀢𑁄 𑀓𑀮𑀮𑀯𑀲𑁆𑀲𑀁 𑀲𑀫𑀼𑀝𑁆𑀞𑀸𑀧𑁂𑀲𑀺. 𑀢𑀁 𑀓𑀮𑀮𑀁 𑀥𑀽𑀫𑀸𑀬𑀦𑁆𑀢𑀁 𑀧𑀚𑁆𑀚𑀮𑀦𑁆𑀢𑀁 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀸𑀤𑀫𑀽𑀮𑁂 𑀤𑀺𑀩𑁆𑀩𑀯𑀺𑀮𑁂𑀧𑀦𑀁 𑀳𑀼𑀢𑁆𑀯𑀸 𑀦𑀺𑀧𑀢𑀺. 𑀢𑀢𑁄 ‘‘𑀇𑀫𑀺𑀦𑀸 𑀪𑀺𑀁𑀲𑁂𑀢𑁆𑀯𑀸 𑀲𑀺𑀤𑁆𑀥𑀢𑁆𑀣𑀁 𑀧𑀮𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀅𑀦𑁆𑀥𑀓𑀸𑀭𑀁 𑀲𑀫𑀼𑀝𑁆𑀞𑀸𑀧𑁂𑀲𑀺. 𑀢𑀁 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀯𑀺𑀬 𑀫𑀳𑀸𑀢𑀫𑀁 𑀳𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀧𑀢𑁆𑀯𑀸 𑀲𑀽𑀭𑀺𑀬𑀧𑁆𑀧𑀪𑀸𑀯𑀺𑀳𑀢𑀁 𑀯𑀺𑀬 𑀅𑀦𑁆𑀥𑀓𑀸𑀭𑀁 𑀅𑀦𑁆𑀢𑀭𑀥𑀸𑀬𑀺.

𑀏𑀯𑀁 𑀫𑀸𑀭𑁄 𑀇𑀫𑀸𑀳𑀺 𑀦𑀯𑀳𑀺 𑀯𑀸𑀢𑀯𑀲𑁆𑀲𑀧𑀸𑀲𑀸𑀡𑀧𑀳𑀭𑀡𑀅𑀗𑁆𑀕𑀸𑀭𑀓𑀼𑀓𑁆𑀓𑀼𑀴𑀯𑀸𑀮𑀼𑀓𑀸𑀓𑀮𑀮𑀅𑀦𑁆𑀥𑀓𑀸𑀭𑀯𑀼𑀝𑁆𑀞𑀻𑀳𑀺 𑀩𑁄𑀥𑀺𑀲𑀢𑁆𑀢𑀁 𑀧𑀮𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀓𑀺𑀁 𑀪𑀡𑁂, 𑀢𑀺𑀝𑁆𑀞𑀣, 𑀇𑀫𑀁 𑀲𑀺𑀤𑁆𑀥𑀢𑁆𑀣𑀓𑀼𑀫𑀸𑀭𑀁 𑀕𑀡𑁆𑀳𑀣 𑀳𑀦𑀣 𑀧𑀮𑀸𑀧𑁂𑀣𑀸’’𑀢𑀺 𑀧𑀭𑀺𑀲𑀁 𑀆𑀡𑀸𑀧𑁂𑀢𑁆𑀯𑀸 𑀲𑀬𑀫𑁆𑀧𑀺 𑀕𑀺𑀭𑀺𑀫𑁂𑀔𑀮𑀲𑁆𑀲 𑀳𑀢𑁆𑀣𑀺𑀦𑁄 𑀔𑀦𑁆𑀥𑁂 𑀦𑀺𑀲𑀺𑀦𑁆𑀦𑁄 𑀘𑀓𑁆𑀓𑀸𑀯𑀼𑀥𑀁 𑀆𑀤𑀸𑀬 𑀩𑁄𑀥𑀺𑀲𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀲𑀺𑀤𑁆𑀥𑀢𑁆𑀣 𑀉𑀝𑁆𑀞𑀸𑀳𑀺 𑀏𑀢𑀲𑁆𑀫𑀸 𑀧𑀮𑁆𑀮𑀗𑁆𑀓𑀸, 𑀦𑀸𑀬𑀁 𑀢𑀼𑀬𑁆𑀳𑀁 𑀧𑀸𑀧𑀼𑀡𑀸𑀢𑀺, 𑀫𑀬𑁆𑀳𑀁 𑀏𑀯 𑀧𑀸𑀧𑀼𑀡𑀸𑀢𑀻’’𑀢𑀺 𑀆𑀳. 𑀫𑀳𑀸𑀲𑀢𑁆𑀢𑁄 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀅𑀯𑁄𑀘 𑁋 ‘‘𑀫𑀸𑀭, 𑀦𑁂𑀯 𑀢𑀬𑀸 𑀤𑀲 𑀧𑀸𑀭𑀫𑀺𑀬𑁄 𑀧𑀽𑀭𑀺𑀢𑀸, 𑀦 𑀉𑀧𑀧𑀸𑀭𑀫𑀺𑀬𑁄, 𑀦 𑀧𑀭𑀫𑀢𑁆𑀣𑀧𑀸𑀭𑀫𑀺𑀬𑁄, 𑀦𑀸𑀧𑀺 𑀧𑀜𑁆𑀘 𑀫𑀳𑀸𑀧𑀭𑀺𑀘𑁆𑀘𑀸𑀕𑀸 𑀧𑀭𑀺𑀘𑁆𑀘𑀢𑁆𑀢𑀸, 𑀦 𑀜𑀸𑀢𑀢𑁆𑀣𑀘𑀭𑀺𑀬𑀸, 𑀦 𑀮𑁄𑀓𑀢𑁆𑀣𑀘𑀭𑀺𑀬𑀸, 𑀦 𑀩𑀼𑀤𑁆𑀥𑀺𑀘𑀭𑀺𑀬𑀸 𑀧𑀽𑀭𑀺𑀢𑀸, 𑀲𑀩𑁆𑀩𑀸 𑀢𑀸 𑀫𑀬𑀸𑀬𑁂𑀯 𑀧𑀽𑀭𑀺𑀢𑀸, 𑀢𑀲𑁆𑀫𑀸 𑀦𑀸𑀬𑀁 𑀧𑀮𑁆𑀮𑀗𑁆𑀓𑁄 𑀢𑀼𑀬𑁆𑀳𑀁 𑀧𑀸𑀧𑀼𑀡𑀸𑀢𑀺, 𑀫𑀬𑁆𑀳𑁂𑀯𑁂𑀲𑁄 𑀧𑀸𑀧𑀼𑀡𑀸𑀢𑀻’’𑀢𑀺.

𑀫𑀸𑀭𑁄 𑀓𑀼𑀤𑁆𑀥𑁄 𑀓𑁄𑀥𑀯𑁂𑀕𑀁 𑀅𑀲𑀳𑀦𑁆𑀢𑁄 𑀫𑀳𑀸𑀧𑀼𑀭𑀺𑀲𑀲𑁆𑀲 𑀘𑀓𑁆𑀓𑀸𑀯𑀼𑀥𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀢𑀁 𑀢𑀲𑁆𑀲 𑀤𑀲 𑀧𑀸𑀭𑀫𑀺𑀬𑁄 𑀆𑀯𑀚𑁆𑀚𑁂𑀦𑁆𑀢𑀲𑁆𑀲 𑀉𑀧𑀭𑀺𑀪𑀸𑀕𑁂 𑀫𑀸𑀮𑀸𑀯𑀺𑀢𑀸𑀦𑀁 𑀳𑀼𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀢𑀁 𑀓𑀺𑀭 𑀔𑀼𑀭𑀥𑀸𑀭𑀘𑀓𑁆𑀓𑀸𑀯𑀼𑀥𑀁 𑀅𑀜𑁆𑀜𑀤𑀸 𑀢𑁂𑀦 𑀓𑀼𑀤𑁆𑀥𑁂𑀦 𑀯𑀺𑀲𑁆𑀲𑀝𑁆𑀞𑀁 𑀏𑀓𑀖𑀦𑀧𑀸𑀲𑀸𑀡𑀢𑁆𑀣𑀫𑁆𑀪𑁂 𑀯𑀁𑀲𑀓𑀴𑀻𑀭𑁂 𑀯𑀺𑀬 𑀙𑀺𑀦𑁆𑀤𑀦𑁆𑀢𑀁 𑀕𑀘𑁆𑀙𑀢𑀺, 𑀇𑀤𑀸𑀦𑀺 𑀧𑀦 𑀢𑀲𑁆𑀫𑀺𑀁 𑀫𑀸𑀮𑀸𑀯𑀺𑀢𑀸𑀦𑀁 𑀳𑀼𑀢𑁆𑀯𑀸 𑀞𑀺𑀢𑁂 𑀅𑀯𑀲𑁂𑀲𑀸 𑀫𑀸𑀭𑀧𑀭𑀺𑀲𑀸 ‘‘𑀇𑀤𑀸𑀦𑀺 𑀧𑀮𑁆𑀮𑀗𑁆𑀓𑀢𑁄 𑀯𑀼𑀝𑁆𑀞𑀸𑀬 𑀧𑀮𑀸𑀬𑀺𑀲𑁆𑀲𑀢𑀻’’𑀢𑀺 𑀫𑀳𑀦𑁆𑀢𑀫𑀳𑀦𑁆𑀢𑀸𑀦𑀺 𑀲𑁂𑀮𑀓𑀽𑀝𑀸𑀦𑀺 𑀯𑀺𑀲𑁆𑀲𑀚𑁆𑀚𑁂𑀲𑀼𑀁. 𑀢𑀸𑀦𑀺𑀧𑀺 𑀫𑀳𑀸𑀧𑀼𑀭𑀺𑀲𑀲𑁆𑀲 𑀤𑀲 𑀧𑀸𑀭𑀫𑀺𑀬𑁄 𑀆𑀯𑀚𑁆𑀚𑁂𑀦𑁆𑀢𑀲𑁆𑀲 𑀫𑀸𑀮𑀸𑀕𑀼𑀴𑀪𑀸𑀯𑀁 𑀆𑀧𑀚𑁆𑀚𑀺𑀢𑁆𑀯𑀸 𑀪𑀽𑀫𑀺𑀬𑀁 𑀧𑀢𑀺𑀁𑀲𑀼. 𑀤𑁂𑀯𑀢𑀸 𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀞𑀺𑀢𑀸 𑀕𑀻𑀯𑀁 𑀧𑀲𑀸𑀭𑁂𑀢𑁆𑀯𑀸 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 ‘‘𑀦𑀝𑁆𑀞𑁄 𑀯𑀢 𑀲𑁄 𑀲𑀺𑀤𑁆𑀥𑀢𑁆𑀣𑀓𑀼𑀫𑀸𑀭𑀲𑁆𑀲 𑀭𑀽𑀧𑀕𑁆𑀕𑀧𑁆𑀧𑀢𑁆𑀢𑁄 𑀅𑀢𑁆𑀢𑀪𑀸𑀯𑁄, 𑀓𑀺𑀁 𑀦𑀼 𑀔𑁄 𑀓𑀭𑀺𑀲𑁆𑀲𑀢𑀻’’𑀢𑀺 𑀑𑀮𑁄𑀓𑁂𑀦𑁆𑀢𑀺.

𑀢𑀢𑁄 𑀫𑀳𑀸𑀧𑀼𑀭𑀺𑀲𑁄 ‘‘𑀧𑀽𑀭𑀺𑀢𑀧𑀸𑀭𑀫𑀻𑀦𑀁 𑀩𑁄𑀥𑀺𑀲𑀢𑁆𑀢𑀸𑀦𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀦𑀤𑀺𑀯𑀲𑁂 𑀧𑀢𑁆𑀢𑀧𑀮𑁆𑀮𑀗𑁆𑀓𑁄 𑀫𑀬𑁆𑀳𑀁𑀯 𑀧𑀸𑀧𑀼𑀡𑀸𑀢𑀻’’𑀢𑀺 𑀯𑀢𑁆𑀯𑀸 𑀞𑀺𑀢𑀁 𑀫𑀸𑀭𑀁 𑀆𑀳 𑁋 ‘‘𑀫𑀸𑀭 𑀢𑀼𑀬𑁆𑀳𑀁 𑀤𑀸𑀦𑀲𑁆𑀲 𑀤𑀺𑀦𑁆𑀦𑀪𑀸𑀯𑁂 𑀓𑁄 𑀲𑀓𑁆𑀔𑀻’’𑀢𑀺. 𑀫𑀸𑀭𑁄 ‘‘𑀇𑀫𑁂 𑀏𑀢𑁆𑀢𑀓𑀸 𑀚𑀦𑀸 𑀲𑀓𑁆𑀔𑀺𑀦𑁄’’𑀢𑀺 𑀫𑀸𑀭𑀩𑀮𑀸𑀪𑀺𑀫𑀼𑀔𑀁 𑀳𑀢𑁆𑀣𑀁 𑀧𑀲𑀸𑀭𑁂𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀫𑀸𑀭𑀧𑀭𑀺𑀲𑀸𑀬 ‘‘𑀅𑀳𑀁 𑀲𑀓𑁆𑀔𑀻, 𑀅𑀳𑀁 𑀲𑀓𑁆𑀔𑀻’’𑀢𑀺 𑀧𑀯𑀢𑁆𑀢𑀲𑀤𑁆𑀤𑁄 𑀧𑀣𑀯𑀺𑀉𑀦𑁆𑀤𑁆𑀭𑀺𑀬𑀦𑀲𑀤𑁆𑀤𑀲𑀤𑀺𑀲𑁄 𑀅𑀳𑁄𑀲𑀺. 𑀅𑀣 𑀫𑀸𑀭𑁄 𑀫𑀳𑀸𑀧𑀼𑀭𑀺𑀲𑀁 𑀆𑀳 ‘‘𑀲𑀺𑀤𑁆𑀥𑀢𑁆𑀣, 𑀢𑀼𑀬𑁆𑀳𑀁 𑀤𑀸𑀦𑀲𑁆𑀲 𑀤𑀺𑀦𑁆𑀦𑀪𑀸𑀯𑁂 𑀓𑁄 𑀲𑀓𑁆𑀔𑀻’’𑀢𑀺. 𑀫𑀳𑀸𑀧𑀼𑀭𑀺𑀲𑁄 ‘‘𑀢𑀼𑀬𑁆𑀳𑀁 𑀢𑀸𑀯 𑀤𑀸𑀦𑀲𑁆𑀲 𑀤𑀺𑀦𑁆𑀦𑀪𑀸𑀯𑁂 𑀲𑀘𑁂𑀢𑀦𑀸 𑀲𑀓𑁆𑀔𑀺𑀦𑁄, 𑀫𑀬𑁆𑀳𑀁 𑀧𑀦 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀲𑀘𑁂𑀢𑀦𑁄 𑀓𑁄𑀘𑀺 𑀲𑀓𑁆𑀔𑀻 𑀦𑀸𑀫 𑀦𑀢𑁆𑀣𑀺, 𑀢𑀺𑀝𑁆𑀞𑀢𑀼 𑀢𑀸𑀯 𑀫𑁂 𑀅𑀯𑀲𑁂𑀲𑀢𑁆𑀢𑀪𑀸𑀯𑁂𑀲𑀼 𑀤𑀺𑀦𑁆𑀦𑀤𑀸𑀦𑀁, 𑀯𑁂𑀲𑁆𑀲𑀦𑁆𑀢𑀭𑀢𑁆𑀢𑀪𑀸𑀯𑁂 𑀧𑀦 𑀞𑀢𑁆𑀯𑀸 𑀫𑀬𑁆𑀳𑀁 𑀲𑀢𑁆𑀢𑀲𑀢𑀓𑀫𑀳𑀸𑀤𑀸𑀦𑀲𑁆𑀲 𑀤𑀺𑀦𑁆𑀦𑀪𑀸𑀯𑁂 𑀅𑀬𑀁 𑀅𑀘𑁂𑀢𑀦𑀸𑀧𑀺 𑀖𑀦𑀫𑀳𑀸𑀧𑀣𑀯𑀻 𑀲𑀓𑁆𑀔𑀻’’𑀢𑀺 𑀘𑀻𑀯𑀭𑀕𑀩𑁆𑀪𑀦𑁆𑀢𑀭𑀢𑁄 𑀤𑀓𑁆𑀔𑀺𑀡𑀳𑀢𑁆𑀣𑀁 𑀅𑀪𑀺𑀦𑀻𑀳𑀭𑀺𑀢𑁆𑀯𑀸 ‘‘𑀯𑁂𑀲𑁆𑀲𑀦𑁆𑀢𑀭𑀢𑁆𑀢𑀪𑀸𑀯𑁂 𑀞𑀢𑁆𑀯𑀸 𑀫𑀬𑁆𑀳𑀁 𑀲𑀢𑁆𑀢𑀲𑀢𑀓𑀫𑀳𑀸𑀤𑀸𑀦𑀲𑁆𑀲 𑀤𑀺𑀦𑁆𑀦𑀪𑀸𑀯𑁂 𑀢𑁆𑀯𑀁 𑀲𑀓𑁆𑀔𑀻 𑀦 𑀲𑀓𑁆𑀔𑀻’’𑀢𑀺 𑀫𑀳𑀸𑀧𑀣𑀯𑀺𑀅𑀪𑀺𑀫𑀼𑀔𑀁 𑀳𑀢𑁆𑀣𑀁 𑀧𑀲𑀸𑀭𑁂𑀲𑀺. 𑀫𑀳𑀸𑀧𑀣𑀯𑀻 ‘‘𑀅𑀳𑀁 𑀢𑁂 𑀢𑀤𑀸 𑀲𑀓𑁆𑀔𑀻’’𑀢𑀺 𑀯𑀺𑀭𑀯𑀲𑀢𑁂𑀦 𑀯𑀺𑀭𑀯𑀲𑀳𑀲𑁆𑀲𑁂𑀦 𑀯𑀺𑀭𑀯𑀲𑀢𑀲𑀳𑀲𑁆𑀲𑁂𑀦 𑀫𑀸𑀭𑀩𑀮𑀁 𑀅𑀯𑀢𑁆𑀣𑀭𑀫𑀸𑀦𑀸 𑀯𑀺𑀬 𑀉𑀦𑁆𑀦𑀤𑀺.

𑀢𑀢𑁄 𑀫𑀳𑀸𑀧𑀼𑀭𑀺𑀲𑁂 ‘‘𑀤𑀺𑀦𑁆𑀦𑀁 𑀢𑁂 𑀲𑀺𑀤𑁆𑀥𑀢𑁆𑀣 𑀫𑀳𑀸𑀤𑀸𑀦𑀁 𑀉𑀢𑁆𑀢𑀫𑀤𑀸𑀦’’𑀦𑁆𑀢𑀺 𑀯𑁂𑀲𑁆𑀲𑀦𑁆𑀢𑀭𑀤𑀸𑀦𑀁 𑀲𑀫𑁆𑀫𑀲𑀦𑁆𑀢𑁂 𑀤𑀺𑀬𑀟𑁆𑀠𑀬𑁄𑀚𑀦𑀲𑀢𑀺𑀓𑁄 𑀕𑀺𑀭𑀺𑀫𑁂𑀔𑀮𑀳𑀢𑁆𑀣𑀻 𑀚𑀡𑁆𑀡𑀼𑀓𑁂𑀳𑀺 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀸𑀲𑀺, 𑀫𑀸𑀭𑀧𑀭𑀺𑀲𑀸 𑀤𑀺𑀲𑀸𑀯𑀺𑀤𑀺𑀲𑀸 𑀧𑀮𑀸𑀬𑀺, 𑀤𑁆𑀯𑁂 𑀏𑀓𑀫𑀕𑁆𑀕𑁂𑀦 𑀕𑀢𑀸 𑀦𑀸𑀫 𑀦𑀢𑁆𑀣𑀺, 𑀲𑀻𑀲𑀸𑀪𑀭𑀡𑀸𑀦𑀺 𑀘𑁂𑀯 𑀦𑀺𑀯𑀢𑁆𑀣𑀯𑀢𑁆𑀣𑀸𑀦𑀺 𑀘 𑀧𑀳𑀸𑀬 𑀲𑀫𑁆𑀫𑀼𑀔𑀲𑀫𑁆𑀫𑀼𑀔𑀤𑀺𑀲𑀸𑀳𑀺𑀬𑁂𑀯 𑀧𑀮𑀸𑀬𑀺𑀁𑀲𑀼. 𑀢𑀢𑁄 𑀤𑁂𑀯𑀲𑀗𑁆𑀖𑀸 𑀧𑀮𑀸𑀬𑀫𑀸𑀦𑀁 𑀫𑀸𑀭𑀩𑀮𑀁 𑀤𑀺𑀲𑁆𑀯𑀸 ‘‘𑀫𑀸𑀭𑀲𑁆𑀲 𑀧𑀭𑀸𑀚𑀬𑁄 𑀚𑀸𑀢𑁄, 𑀲𑀺𑀤𑁆𑀥𑀢𑁆𑀣𑀓𑀼𑀫𑀸𑀭𑀲𑁆𑀲 𑀚𑀬𑁄, 𑀚𑀬𑀧𑀽𑀚𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀦𑀸𑀕𑀸 𑀦𑀸𑀕𑀸𑀦𑀁, 𑀲𑀼𑀧𑀡𑁆𑀡𑀸 𑀲𑀼𑀧𑀡𑁆𑀡𑀸𑀦𑀁, 𑀤𑁂𑀯𑀢𑀸 𑀤𑁂𑀯𑀢𑀸𑀦𑀁, 𑀩𑁆𑀭𑀳𑁆𑀫𑀸𑀦𑁄 𑀩𑁆𑀭𑀳𑁆𑀫𑀸𑀦𑀁, 𑀉𑀕𑁆𑀖𑁄𑀲𑁂𑀢𑁆𑀯𑀸 𑀕𑀦𑁆𑀥𑀫𑀸𑀮𑀸𑀤𑀺𑀳𑀢𑁆𑀣𑀸 𑀫𑀳𑀸𑀧𑀼𑀭𑀺𑀲𑀲𑁆𑀲 𑀲𑀦𑁆𑀢𑀺𑀓𑀁 𑀩𑁄𑀥𑀺𑀧𑀮𑁆𑀮𑀗𑁆𑀓𑀁 𑀅𑀕𑀫𑀁𑀲𑀼.

𑀏𑀯𑀁 𑀕𑀢𑁂𑀲𑀼 𑀘 𑀧𑀦 𑀢𑁂𑀲𑀼 𑁋

‘‘𑀚𑀬𑁄 𑀳𑀺 𑀩𑀼𑀤𑁆𑀥𑀲𑁆𑀲 𑀲𑀺𑀭𑀻𑀫𑀢𑁄 𑀅𑀬𑀁, 𑀫𑀸𑀭𑀲𑁆𑀲 𑀘 𑀧𑀸𑀧𑀺𑀫𑀢𑁄 𑀧𑀭𑀸𑀚𑀬𑁄;

𑀉𑀕𑁆𑀖𑁄𑀲𑀬𑀼𑀁 𑀩𑁄𑀥𑀺𑀫𑀡𑁆𑀟𑁂 𑀧𑀫𑁄𑀤𑀺𑀢𑀸, 𑀚𑀬𑀁 𑀢𑀤𑀸 𑀦𑀸𑀕𑀕𑀡𑀸 𑀫𑀳𑁂𑀲𑀺𑀦𑁄.

‘‘𑀚𑀬𑁄 𑀳𑀺 𑀩𑀼𑀤𑁆𑀥𑀲𑁆𑀲 𑀲𑀺𑀭𑀻𑀫𑀢𑁄 𑀅𑀬𑀁, 𑀫𑀸𑀭𑀲𑁆𑀲 𑀘 𑀧𑀸𑀧𑀺𑀫𑀢𑁄 𑀧𑀭𑀸𑀚𑀬𑁄;

𑀉𑀕𑁆𑀖𑁄𑀲𑀬𑀼𑀁 𑀩𑁄𑀥𑀺𑀫𑀡𑁆𑀟𑁂 𑀧𑀫𑁄𑀤𑀺𑀢𑀸, 𑀲𑀼𑀧𑀡𑁆𑀡𑀲𑀗𑁆𑀖𑀸𑀧𑀺 𑀚𑀬𑀁 𑀫𑀳𑁂𑀲𑀺𑀦𑁄.

‘‘𑀚𑀬𑁄 𑀳𑀺 𑀩𑀼𑀤𑁆𑀥𑀲𑁆𑀲 𑀲𑀺𑀭𑀻𑀫𑀢𑁄 𑀅𑀬𑀁, 𑀫𑀸𑀭𑀲𑁆𑀲 𑀘 𑀧𑀸𑀧𑀺𑀫𑀢𑁄 𑀧𑀭𑀸𑀚𑀬𑁄;

𑀉𑀕𑁆𑀖𑁄𑀲𑀬𑀼𑀁 𑀩𑁄𑀥𑀺𑀫𑀡𑁆𑀟𑁂 𑀧𑀫𑁄𑀤𑀺𑀢𑀸, 𑀚𑀬𑀁 𑀢𑀤𑀸 𑀤𑁂𑀯𑀕𑀡𑀸 𑀫𑀳𑁂𑀲𑀺𑀦𑁄.

‘‘𑀚𑀬𑁄 𑀳𑀺 𑀩𑀼𑀤𑁆𑀥𑀲𑁆𑀲 𑀲𑀺𑀭𑀻𑀫𑀢𑁄 𑀅𑀬𑀁, 𑀫𑀸𑀭𑀲𑁆𑀲 𑀘 𑀧𑀸𑀧𑀺𑀫𑀢𑁄 𑀧𑀭𑀸𑀚𑀬𑁄;

𑀉𑀕𑁆𑀖𑁄𑀲𑀬𑀼𑀁 𑀩𑁄𑀥𑀺𑀫𑀡𑁆𑀟𑁂 𑀧𑀫𑁄𑀤𑀺𑀢𑀸, 𑀚𑀬𑀁 𑀢𑀤𑀸 𑀩𑁆𑀭𑀳𑁆𑀫𑀕𑀡𑀸𑀧𑀺 𑀢𑀸𑀤𑀺𑀦𑁄’’𑀢𑀺.

𑀅𑀯𑀲𑁂𑀲𑀸 𑀤𑀲𑀲𑀼 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂𑀲𑀼 𑀤𑁂𑀯𑀢𑀸 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑁂𑀳𑀺 𑀘 𑀧𑀽𑀚𑀬𑀫𑀸𑀦𑀸 𑀦𑀸𑀦𑀧𑁆𑀧𑀓𑀸𑀭𑀸 𑀣𑀼𑀢𑀺𑀬𑁄 𑀘 𑀯𑀤𑀫𑀸𑀦𑀸 𑀅𑀝𑁆𑀞𑀁𑀲𑀼. 𑀏𑀯𑀁 𑀅𑀦𑀢𑁆𑀣𑀗𑁆𑀕𑀢𑁂𑀬𑁂𑀯 𑀲𑀽𑀭𑀺𑀬𑁂 𑀫𑀳𑀸𑀧𑀼𑀭𑀺𑀲𑁄 𑀫𑀸𑀭𑀩𑀮𑀁 𑀯𑀺𑀥𑀫𑁂𑀢𑁆𑀯𑀸 𑀘𑀻𑀯𑀭𑀽𑀧𑀭𑀺 𑀧𑀢𑀫𑀸𑀦𑁂𑀳𑀺 𑀩𑁄𑀥𑀺𑀭𑀼𑀓𑁆𑀔𑀗𑁆𑀓𑀼𑀭𑁂𑀳𑀺 𑀭𑀢𑁆𑀢𑀧𑀯𑀸𑀴𑀧𑀮𑁆𑀮𑀯𑁂𑀳𑀺 𑀯𑀺𑀬 𑀧𑀽𑀚𑀺𑀬𑀫𑀸𑀦𑁄 𑀧𑀞𑀫𑀬𑀸𑀫𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸, 𑀫𑀚𑁆𑀛𑀺𑀫𑀬𑀸𑀫𑁂 𑀤𑀺𑀩𑁆𑀩𑀘𑀓𑁆𑀔𑀼𑀁 𑀯𑀺𑀲𑁄𑀥𑁂𑀢𑁆𑀯𑀸, 𑀧𑀘𑁆𑀙𑀺𑀫𑀬𑀸𑀫𑁂 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂 𑀜𑀸𑀡𑀁 𑀑𑀢𑀸𑀭𑁂𑀲𑀺. 𑀅𑀣𑀲𑁆𑀲 𑀤𑁆𑀯𑀸𑀤𑀲𑀧𑀤𑀺𑀓𑀁 𑀧𑀘𑁆𑀘𑀬𑀸𑀓𑀸𑀭𑀁 𑀯𑀝𑁆𑀝𑀯𑀺𑀯𑀝𑁆𑀝𑀯𑀲𑁂𑀦 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄 𑀲𑀫𑁆𑀫𑀲𑀦𑁆𑀢𑀲𑁆𑀲 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀉𑀤𑀓𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀤𑁆𑀯𑀸𑀤𑀲𑀓𑁆𑀔𑀢𑁆𑀢𑀼𑀁 𑀲𑀫𑁆𑀧𑀓𑀫𑁆𑀧𑀺.

𑀫𑀳𑀸𑀧𑀼𑀭𑀺𑀲𑁂 𑀧𑀦 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀉𑀦𑁆𑀦𑀸𑀤𑁂𑀢𑁆𑀯𑀸 𑀅𑀭𑀼𑀡𑀼𑀕𑁆𑀕𑀫𑀦𑀯𑁂𑀮𑀸𑀬 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑁂 𑀲𑀓𑀮𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀸 𑀅𑀳𑁄𑀲𑀺. 𑀧𑀸𑀘𑀻𑀦𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀉𑀲𑁆𑀲𑀸𑀧𑀺𑀢𑀸𑀦𑀁 𑀥𑀚𑀸𑀦𑀁 𑀧𑀝𑀸𑀓𑀸𑀦𑀁 𑀭𑀁𑀲𑀺𑀬𑁄 𑀧𑀘𑁆𑀙𑀺𑀫𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀧𑀳𑀭𑀦𑁆𑀢𑀺, 𑀢𑀣𑀸 𑀧𑀘𑁆𑀙𑀺𑀫𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀉𑀲𑁆𑀲𑀸𑀧𑀺𑀢𑀸𑀦𑀁 𑀧𑀸𑀘𑀻𑀦𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁, 𑀤𑀓𑁆𑀔𑀺𑀡𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀉𑀲𑁆𑀲𑀸𑀧𑀺𑀢𑀸𑀦𑀁 𑀉𑀢𑁆𑀢𑀭𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁, 𑀉𑀢𑁆𑀢𑀭𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀉𑀲𑁆𑀲𑀸𑀧𑀺𑀢𑀸𑀦𑀁 𑀤𑀓𑁆𑀔𑀺𑀡𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀧𑀳𑀭𑀦𑁆𑀢𑀺, 𑀧𑀣𑀯𑀺𑀢𑀮𑁂 𑀉𑀲𑁆𑀲𑀸𑀧𑀺𑀢𑀸𑀦𑀁 𑀧𑀦 𑀥𑀚𑀸𑀦𑀁 𑀧𑀝𑀸𑀓𑀸𑀦𑀁 𑀩𑁆𑀭𑀳𑁆𑀫𑀮𑁄𑀓𑀁 𑀆𑀳𑀘𑁆𑀘 𑀅𑀝𑁆𑀞𑀁𑀲𑀼, 𑀩𑁆𑀭𑀳𑁆𑀫𑀮𑁄𑀓𑁂 𑀩𑀤𑁆𑀥𑀸𑀦𑀁 𑀧𑀣𑀯𑀺𑀢𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼, 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀲𑀼 𑀧𑀼𑀧𑁆𑀨𑀽𑀧𑀕𑀭𑀼𑀓𑁆𑀔𑀸 𑀧𑀼𑀧𑁆𑀨𑀁 𑀕𑀡𑁆𑀳𑀺𑀁𑀲𑀼, 𑀨𑀮𑀽𑀧𑀕𑀭𑀼𑀓𑁆𑀔𑀸 𑀨𑀮𑀧𑀺𑀡𑁆𑀟𑀻𑀪𑀸𑀭𑀪𑀭𑀺𑀢𑀸 𑀅𑀳𑁂𑀲𑀼𑀁. 𑀔𑀦𑁆𑀥𑁂𑀲𑀼 𑀔𑀦𑁆𑀥𑀧𑀤𑀼𑀫𑀸𑀦𑀺 𑀧𑀼𑀧𑁆𑀨𑀺𑀁𑀲𑀼, 𑀲𑀸𑀔𑀸𑀲𑀼 𑀲𑀸𑀔𑀸𑀧𑀤𑀼𑀫𑀸𑀦𑀺, 𑀮𑀢𑀸𑀲𑀼 𑀮𑀢𑀸𑀧𑀤𑀼𑀫𑀸𑀦𑀺, 𑀆𑀓𑀸𑀲𑁂 𑀑𑀮𑀫𑁆𑀩𑀓𑀧𑀤𑀼𑀫𑀸𑀦𑀺, 𑀲𑀺𑀮𑀸𑀢𑀮𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀉𑀧𑀭𑀽𑀧𑀭𑀺 𑀲𑀢𑁆𑀢 𑀲𑀢𑁆𑀢 𑀳𑀼𑀢𑁆𑀯𑀸 𑀤𑀡𑁆𑀟𑀓𑀧𑀤𑀼𑀫𑀸𑀦𑀺 𑀉𑀝𑁆𑀞𑀳𑀺𑀁𑀲𑀼. 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀯𑀝𑁆𑀝𑁂𑀢𑁆𑀯𑀸 𑀯𑀺𑀲𑁆𑀲𑀝𑁆𑀞𑀫𑀸𑀮𑀸𑀕𑀼𑀴𑀸 𑀯𑀺𑀬 𑀲𑀼𑀲𑀦𑁆𑀣𑀢𑀧𑀼𑀧𑁆𑀨𑀲𑀦𑁆𑀣𑀸𑀭𑁄 𑀯𑀺𑀬 𑀘 𑀅𑀳𑁄𑀲𑀺. 𑀘𑀓𑁆𑀓𑀯𑀸𑀴𑀦𑁆𑀢𑀭𑁂𑀲𑀼 𑀅𑀝𑁆𑀞𑀬𑁄𑀚𑀦𑀲𑀳𑀲𑁆𑀲𑀮𑁄𑀓𑀦𑁆𑀢𑀭𑀺𑀓𑀸 𑀲𑀢𑁆𑀢𑀲𑀽𑀭𑀺𑀬𑀧𑁆𑀧𑀪𑀸𑀬𑀧𑀺 𑀅𑀦𑁄𑀪𑀸𑀲𑀺𑀢𑀧𑀼𑀩𑁆𑀩𑀸 𑀏𑀓𑁄𑀪𑀸𑀲𑀸 𑀅𑀳𑁂𑀲𑀼𑀁, 𑀘𑀢𑀼𑀭𑀸𑀲𑀻𑀢𑀺𑀬𑁄𑀚𑀦𑀲𑀳𑀲𑁆𑀲𑀕𑀫𑁆𑀪𑀻𑀭𑁄 𑀫𑀳𑀸𑀲𑀫𑀼𑀤𑁆𑀤𑁄 𑀫𑀥𑀼𑀭𑁄𑀤𑀓𑁄 𑀅𑀳𑁄𑀲𑀺, 𑀦𑀤𑀺𑀬𑁄 𑀦𑀧𑁆𑀧𑀯𑀢𑁆𑀢𑀺𑀁𑀲𑀼, 𑀚𑀘𑁆𑀘𑀦𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀺𑀁𑀲𑀼, 𑀚𑀸𑀢𑀺𑀩𑀥𑀺𑀭𑀸 𑀲𑀤𑁆𑀤𑀁 𑀲𑀼𑀡𑀺𑀁𑀲𑀼, 𑀚𑀸𑀢𑀺𑀧𑀻𑀞𑀲𑀧𑁆𑀧𑀺𑀦𑁄 𑀧𑀤𑀲𑀸 𑀕𑀘𑁆𑀙𑀺𑀁𑀲𑀼, 𑀅𑀦𑁆𑀤𑀼𑀩𑀦𑁆𑀥𑀦𑀸𑀤𑀻𑀦𑀺 𑀙𑀺𑀚𑁆𑀚𑀺𑀢𑁆𑀯𑀸 𑀧𑀢𑀺𑀁𑀲𑀼.

𑀏𑀯𑀁 𑀅𑀧𑀭𑀺𑀫𑀸𑀡𑁂𑀦 𑀲𑀺𑀭𑀺𑀯𑀺𑀪𑀯𑁂𑀦 𑀧𑀽𑀚𑀺𑀬𑀫𑀸𑀦𑁄 𑀫𑀳𑀸𑀧𑀼𑀭𑀺𑀲𑁄 𑀅𑀦𑁂𑀓𑀧𑁆𑀧𑀓𑀸𑀭𑁂𑀲𑀼 𑀅𑀘𑁆𑀙𑀭𑀺𑀬𑀥𑀫𑁆𑀫𑁂𑀲𑀼 𑀧𑀸𑀢𑀼𑀪𑀽𑀢𑁂𑀲𑀼 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀅𑀯𑀺𑀚𑀳𑀺𑀢𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭𑀁, 𑀲𑀦𑁆𑀥𑀸𑀯𑀺𑀲𑁆𑀲𑀁 𑀅𑀦𑀺𑀩𑁆𑀩𑀺𑀲𑀁;

𑀕𑀳𑀓𑀸𑀭𑀁 𑀕𑀯𑁂𑀲𑀦𑁆𑀢𑁄, 𑀤𑀼𑀓𑁆𑀔𑀸 𑀚𑀸𑀢𑀺 𑀧𑀼𑀦𑀧𑁆𑀧𑀼𑀦𑀁.

‘‘𑀕𑀳𑀓𑀸𑀭𑀓 𑀤𑀺𑀝𑁆𑀞𑁄𑀲𑀺, 𑀧𑀼𑀦 𑀕𑁂𑀳𑀁 𑀦 𑀓𑀸𑀳𑀲𑀺;

𑀲𑀩𑁆𑀩𑀸 𑀢𑁂 𑀨𑀸𑀲𑀼𑀓𑀸 𑀪𑀕𑁆𑀕𑀸, 𑀕𑀳𑀓𑀽𑀝𑀁 𑀯𑀺𑀲𑀗𑁆𑀔𑀢𑀁;

𑀯𑀺𑀲𑀗𑁆𑀔𑀸𑀭𑀕𑀢𑀁 𑀘𑀺𑀢𑁆𑀢𑀁, 𑀢𑀡𑁆𑀳𑀸𑀦𑀁 𑀔𑀬𑀫𑀚𑁆𑀛𑀕𑀸’’𑀢𑀺. (𑀥. 𑀧. 𑁧𑁫𑁩-𑁧𑁫𑁪);

𑀇𑀢𑀺 𑀢𑀼𑀲𑀺𑀢𑀧𑀼𑀭𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀬𑀁 𑀩𑁄𑀥𑀺𑀫𑀡𑁆𑀟𑁂 𑀲𑀩𑁆𑀩𑀜𑁆𑀜𑀼𑀢𑀧𑁆𑀧𑀢𑁆𑀢𑀺, 𑀏𑀢𑁆𑀢𑀓𑀁 𑀞𑀸𑀦𑀁 𑀅𑀯𑀺𑀤𑀽𑀭𑁂𑀦𑀺𑀤𑀸𑀦𑀁 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀯𑀺𑀤𑀽𑀭𑁂𑀦𑀺𑀤𑀸𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.