𑁧𑁨. 𑀲𑀼𑀧𑁆𑀧𑀩𑀼𑀤𑁆𑀥𑀲𑀓𑁆𑀬𑀯𑀢𑁆𑀣𑀼

𑀦 𑀅𑀦𑁆𑀢𑀮𑀺𑀓𑁆𑀔𑁂𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀦𑀺𑀕𑁆𑀭𑁄𑀥𑀸𑀭𑀸𑀫𑁂 𑀯𑀺𑀳𑀭𑀦𑁆𑀢𑁄 𑀲𑀼𑀧𑁆𑀧𑀩𑀼𑀤𑁆𑀥𑀁 𑀲𑀓𑁆𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭 ‘‘𑀅𑀬𑀁 𑀫𑀫 𑀥𑀻𑀢𑀭𑀁 𑀙𑀟𑁆𑀟𑁂𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑁄 𑀘, 𑀫𑀫 𑀧𑀼𑀢𑁆𑀢𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 𑀢𑀲𑁆𑀲 𑀯𑁂𑀭𑀺𑀝𑁆𑀞𑀸𑀦𑁂 𑀞𑀺𑀢𑁄 𑀘𑀸’’𑀢𑀺 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀲𑀢𑁆𑀣𑀭𑀺 𑀆𑀖𑀸𑀢𑀁 𑀩𑀦𑁆𑀥𑀺𑀢𑁆𑀯𑀸 𑀏𑀓𑀤𑀺𑀯𑀲𑀁 ‘‘𑀦 𑀤𑀸𑀦𑀺𑀲𑁆𑀲 𑀦𑀺𑀫𑀦𑁆𑀢𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀪𑀼𑀜𑁆𑀚𑀺𑀢𑀼𑀁 𑀤𑀲𑁆𑀲𑀸𑀫𑀻’’𑀢𑀺 𑀕𑀫𑀦𑀫𑀕𑁆𑀕𑀁 𑀧𑀺𑀤𑀳𑀺𑀢𑁆𑀯𑀸 𑀅𑀦𑁆𑀢𑀭𑀯𑀻𑀣𑀺𑀬𑀁 𑀲𑀼𑀭𑀁 𑀧𑀺𑀯𑀦𑁆𑀢𑁄 𑀦𑀺𑀲𑀻𑀤𑀺. 𑀅𑀣𑀲𑁆𑀲 𑀲𑀢𑁆𑀣𑀭𑀺 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁂 𑀢𑀁 𑀞𑀸𑀦𑀁 𑀆𑀕𑀢𑁂 ‘‘𑀲𑀢𑁆𑀣𑀸 𑀆𑀕𑀢𑁄’’𑀢𑀺 𑀆𑀭𑁄𑀘𑁂𑀲𑀼𑀁. 𑀲𑁄 𑀆𑀳 𑁋 ‘‘𑀧𑀼𑀭𑀢𑁄 𑀕𑀘𑁆𑀙𑀸𑀢𑀺 𑀢𑀲𑁆𑀲 𑀯𑀤𑁂𑀣, 𑀦𑀸𑀬𑀁 𑀫𑀬𑀸 𑀫𑀳𑀮𑁆𑀮𑀓𑀢𑀭𑁄, 𑀦𑀸𑀲𑁆𑀲 𑀫𑀕𑁆𑀕𑀁 𑀤𑀲𑁆𑀲𑀸𑀫𑀻’’𑀢𑀺 𑀧𑀼𑀦𑀧𑁆𑀧𑀼𑀦𑀁 𑀯𑀼𑀘𑁆𑀘𑀫𑀸𑀦𑁄𑀧𑀺 𑀢𑀣𑁂𑀯 𑀯𑀢𑁆𑀯𑀸 𑀦𑀺𑀲𑀻𑀤𑀺. 𑀲𑀢𑁆𑀣𑀸 𑀫𑀸𑀢𑀼𑀮𑀲𑁆𑀲 𑀲𑀦𑁆𑀢𑀺𑀓𑀸 𑀫𑀕𑁆𑀕𑀁 𑀅𑀮𑀪𑀺𑀢𑁆𑀯𑀸 𑀢𑀢𑁄 𑀦𑀺𑀯𑀢𑁆𑀢𑀺. 𑀲𑁄𑀧𑀺 𑀏𑀓𑀁 𑀘𑀭𑀧𑀼𑀭𑀺𑀲𑀁 𑀧𑁂𑀲𑁂𑀲𑀺 ‘‘𑀕𑀘𑁆𑀙, 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀏𑀳𑀻’’𑀢𑀺. 𑀲𑀢𑁆𑀣𑀸𑀧𑀺 𑀦𑀺𑀯𑀢𑁆𑀢𑀦𑁆𑀢𑁄 𑀲𑀺𑀢𑀁 𑀓𑀢𑁆𑀯𑀸 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 ‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀲𑀺𑀢𑀲𑁆𑀲 𑀧𑀸𑀢𑀼𑀓𑀫𑁆𑀫𑀲𑁆𑀲 𑀧𑀘𑁆𑀘𑀬𑁄’’𑀢𑀺 𑀧𑀼𑀝𑁆𑀞𑁄 𑀆𑀳 𑁋 ‘‘𑀧𑀲𑁆𑀲𑀲𑀺, 𑀆𑀦𑀦𑁆𑀤, 𑀲𑀼𑀧𑁆𑀧𑀩𑀼𑀤𑁆𑀥’’𑀦𑁆𑀢𑀺. 𑀧𑀲𑁆𑀲𑀸𑀫𑀺, 𑀪𑀦𑁆𑀢𑁂𑀢𑀺. 𑀪𑀸𑀭𑀺𑀬𑀁 𑀢𑁂𑀦 𑀓𑀫𑁆𑀫𑀁 𑀓𑀢𑀁 𑀫𑀸𑀤𑀺𑀲𑀲𑁆𑀲 𑀩𑀼𑀤𑁆𑀥𑀲𑁆𑀲 𑀫𑀕𑁆𑀕𑀁 𑀅𑀤𑁂𑀦𑁆𑀢𑁂𑀦, 𑀇𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀳𑁂𑀝𑁆𑀞𑀸𑀧𑀸𑀲𑀸𑀤𑁂 𑀲𑁄𑀧𑀸𑀦𑀧𑀸𑀤𑀫𑀽𑀮𑁂 𑀧𑀣𑀯𑀺𑀁 𑀧𑀯𑀺𑀲𑀺𑀲𑁆𑀲𑀢𑀻𑀢𑀺. 𑀘𑀭𑀧𑀼𑀭𑀺𑀲𑁄 𑀢𑀁 𑀓𑀣𑀁 𑀲𑀼𑀢𑁆𑀯𑀸 𑀲𑀼𑀧𑁆𑀧𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀓𑀺𑀁 𑀫𑀫 𑀪𑀸𑀕𑀺𑀦𑁂𑀬𑁆𑀬𑁂𑀦 𑀦𑀺𑀯𑀢𑁆𑀢𑀦𑁆𑀢𑁂𑀦 𑀯𑀼𑀢𑁆𑀢’’𑀦𑁆𑀢𑀺 𑀧𑀼𑀝𑁆𑀞𑁄 𑀬𑀣𑀸𑀲𑀼𑀢𑀁 𑀆𑀭𑁄𑀘𑁂𑀲𑀺. 𑀲𑁄 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀦 𑀤𑀸𑀦𑀺 𑀫𑀫 𑀪𑀸𑀕𑀺𑀦𑁂𑀬𑁆𑀬𑀲𑁆𑀲 𑀓𑀣𑀸𑀬 𑀤𑁄𑀲𑁄 𑀅𑀢𑁆𑀣𑀺, 𑀅𑀤𑁆𑀥𑀸 𑀬𑀁 𑀲𑁄 𑀯𑀤𑀢𑀺, 𑀢𑀁 𑀢𑀣𑁂𑀯 𑀳𑁄𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀦𑀁 𑀇𑀤𑀸𑀦𑀺 𑀫𑀼𑀲𑀸𑀯𑀸𑀤𑁂𑀦 𑀦𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀺. 𑀲𑁄 𑀳𑀺 𑀫𑀁 ‘𑀲𑀢𑁆𑀢𑀫𑁂 𑀤𑀺𑀯𑀲𑁂 𑀧𑀣𑀯𑀺𑀁 𑀧𑀯𑀺𑀲𑀺𑀲𑁆𑀲𑀢𑀻’𑀢𑀺 𑀅𑀦𑀺𑀬𑀫𑁂𑀦 𑀅𑀯𑀢𑁆𑀯𑀸 ‘𑀳𑁂𑀝𑁆𑀞𑀸𑀧𑀸𑀲𑀸𑀤𑁂 𑀲𑁄𑀧𑀸𑀦𑀧𑀸𑀤𑀫𑀽𑀮𑁂 𑀧𑀣𑀯𑀺𑀁 𑀧𑀯𑀺𑀲𑀺𑀲𑁆𑀲𑀢𑀻’’’𑀢𑀺 𑀆𑀳. ‘‘𑀇𑀢𑁄 𑀤𑀸𑀦𑀺 𑀧𑀝𑁆𑀞𑀸𑀬𑀸𑀳𑀁 𑀢𑀁 𑀞𑀸𑀦𑀁 𑀦 𑀕𑀫𑀺𑀲𑁆𑀲𑀸𑀫𑀺, 𑀅𑀣 𑀦𑀁 𑀢𑀲𑁆𑀫𑀺𑀁 𑀞𑀸𑀦𑁂 𑀧𑀣𑀯𑀺𑀁 𑀅𑀧𑀯𑀺𑀲𑀺𑀢𑁆𑀯𑀸 𑀫𑀼𑀲𑀸𑀯𑀸𑀤𑁂𑀦 𑀦𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀦𑁄 𑀉𑀧𑀪𑁄𑀕𑀚𑀸𑀢𑀁 𑀲𑀩𑁆𑀩𑀁 𑀲𑀢𑁆𑀢𑀪𑀽𑀫𑀺𑀓𑀧𑀸𑀲𑀸𑀤𑀲𑁆𑀲 𑀉𑀧𑀭𑀺 𑀆𑀭𑁄𑀧𑁂𑀢𑁆𑀯𑀸 𑀲𑁄𑀧𑀸𑀦𑀁 𑀳𑀭𑀸𑀧𑁂𑀢𑁆𑀯𑀸 𑀤𑁆𑀯𑀸𑀭𑀁 𑀧𑀺𑀤𑀳𑀸𑀧𑁂𑀢𑁆𑀯𑀸 𑀏𑀓𑁂𑀓𑀲𑁆𑀫𑀺𑀁 𑀤𑁆𑀯𑀸𑀭𑁂 𑀤𑁆𑀯𑁂 𑀤𑁆𑀯𑁂 𑀫𑀮𑁆𑀮𑁂 𑀞𑀧𑁂𑀢𑁆𑀯𑀸 ‘‘𑀲𑀘𑀸𑀳𑀁 𑀧𑀫𑀸𑀤𑁂𑀦 𑀳𑁂𑀝𑁆𑀞𑀸 𑀑𑀭𑁄𑀳𑀺𑀢𑀼𑀓𑀸𑀫𑁄 𑀳𑁄𑀫𑀺, 𑀦𑀺𑀯𑀸𑀭𑁂𑀬𑁆𑀬𑀸𑀣 𑀫’’𑀦𑁆𑀢𑀺 𑀯𑀢𑁆𑀯𑀸 𑀲𑀢𑁆𑀢𑀫𑁂 𑀧𑀸𑀲𑀸𑀤𑀢𑀮𑁂 𑀲𑀺𑀭𑀺𑀕𑀩𑁆𑀪𑁂 𑀦𑀺𑀲𑀻𑀤𑀺. 𑀲𑀢𑁆𑀣𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸, ‘‘𑀪𑀺𑀓𑁆𑀔𑀯𑁂, 𑀲𑀼𑀧𑁆𑀧𑀩𑀼𑀤𑁆𑀥𑁄 𑀦 𑀓𑁂𑀯𑀮𑀁 𑀧𑀸𑀲𑀸𑀤𑀢𑀮𑁂 𑀯𑁂𑀳𑀸𑀲𑀁 𑀉𑀧𑁆𑀧𑀢𑀺𑀢𑁆𑀯𑀸 𑀆𑀓𑀸𑀲𑁂 𑀯𑀸 𑀦𑀺𑀲𑀻𑀤𑀢𑀼, 𑀦𑀸𑀯𑀸𑀬 𑀯𑀸 𑀲𑀫𑀼𑀤𑁆𑀤𑀁 𑀧𑀓𑁆𑀔𑀦𑁆𑀤𑀢𑀼, 𑀧𑀩𑁆𑀩𑀢𑀦𑁆𑀢𑀭𑀁 𑀯𑀸 𑀧𑀯𑀺𑀲𑀢𑀼, 𑀩𑀼𑀤𑁆𑀥𑀸𑀦𑀁 𑀓𑀣𑀸𑀬 𑀤𑁆𑀯𑀺𑀥𑀸𑀪𑀸𑀯𑁄 𑀦𑀸𑀫 𑀦𑀢𑁆𑀣𑀺, 𑀫𑀬𑀸 𑀯𑀼𑀢𑁆𑀢𑀝𑁆𑀞𑀸𑀦𑁂𑀬𑁂𑀯 𑀲𑁄 𑀧𑀣𑀯𑀺𑀁 𑀧𑀯𑀺𑀲𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁨𑁮. ‘‘𑀦 𑀅𑀦𑁆𑀢𑀮𑀺𑀓𑁆𑀔𑁂 𑀦 𑀲𑀫𑀼𑀤𑁆𑀤𑀫𑀚𑁆𑀛𑁂, 𑀦 𑀧𑀩𑁆𑀩𑀢𑀸𑀦𑀁 𑀯𑀺𑀯𑀭𑀁 𑀧𑀯𑀺𑀲𑁆𑀲;

𑀦 𑀯𑀺𑀚𑁆𑀚𑀢𑀻 𑀲𑁄 𑀚𑀕𑀢𑀺𑀧𑁆𑀧𑀤𑁂𑀲𑁄, 𑀬𑀢𑁆𑀣𑀝𑁆𑀞𑀺𑀢𑀁 𑀦𑀧𑁆𑀧𑀲𑀳𑁂𑀬𑁆𑀬 𑀫𑀘𑁆𑀘𑀽’’𑀢𑀺.

𑀢𑀢𑁆𑀣 𑀬𑀢𑁆𑀣 𑀞𑀺𑀢𑀁 𑀦𑀧𑁆𑀧𑀲𑀳𑁂𑀬𑁆𑀬, 𑀫𑀘𑁆𑀘𑀽𑀢𑀺 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀞𑀺𑀢𑀁 𑀫𑀭𑀡𑀁 𑀦𑀧𑁆𑀧𑀲𑀳𑁂𑀬𑁆𑀬 𑀦𑀸𑀪𑀺𑀪𑀯𑁂𑀬𑁆𑀬, 𑀓𑁂𑀲𑀕𑁆𑀕𑀫𑀢𑁆𑀢𑁄𑀧𑀺 𑀧𑀣𑀯𑀺𑀧𑁆𑀧𑀤𑁂𑀲𑁄 𑀦𑀢𑁆𑀣𑀺. 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯𑀸𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀢𑁆𑀣𑀼 𑀪𑀺𑀓𑁆𑀔𑀸𑀘𑀸𑀭𑀫𑀕𑁆𑀕𑀲𑁆𑀲 𑀦𑀺𑀭𑀼𑀤𑁆𑀥𑀯𑁂𑀮𑀸𑀬 𑀳𑁂𑀝𑁆𑀞𑀸𑀧𑀸𑀲𑀸𑀤𑁂 𑀲𑀼𑀧𑁆𑀧𑀩𑀼𑀤𑁆𑀥𑀲𑁆𑀲 𑀫𑀗𑁆𑀕𑀮𑀲𑁆𑀲𑁄 𑀉𑀤𑁆𑀤𑀸𑀫𑁄 𑀳𑀼𑀢𑁆𑀯𑀸 𑀢𑀁 𑀢𑀁 𑀪𑀺𑀢𑁆𑀢𑀺𑀁 𑀧𑀳𑀭𑀺. 𑀲𑁄 𑀉𑀧𑀭𑀺 𑀦𑀺𑀲𑀺𑀦𑁆𑀦𑁄𑀯𑀲𑁆𑀲 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀓𑀺𑀫𑁂𑀢’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀫𑀗𑁆𑀕𑀮𑀲𑁆𑀲𑁄 𑀉𑀤𑁆𑀤𑀸𑀫𑁄’’𑀢𑀺. 𑀲𑁄 𑀧𑀦𑀲𑁆𑀲𑁄 𑀲𑀼𑀧𑁆𑀧𑀩𑀼𑀤𑁆𑀥𑀁 𑀤𑀺𑀲𑁆𑀯𑀸𑀯 𑀲𑀦𑁆𑀦𑀺𑀲𑀻𑀤𑀢𑀺. 𑀅𑀣 𑀦𑀁 𑀲𑁄 𑀕𑀡𑁆𑀳𑀺𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀸 𑀉𑀝𑁆𑀞𑀸𑀬 𑀤𑁆𑀯𑀸𑀭𑀸𑀪𑀺𑀫𑀼𑀔𑁄 𑀅𑀳𑁄𑀲𑀺, 𑀤𑁆𑀯𑀸𑀭𑀸𑀦𑀺 𑀲𑀬𑀫𑁂𑀯 𑀯𑀺𑀯𑀝𑀸𑀦𑀺, 𑀲𑁄𑀧𑀸𑀦𑀁 𑀲𑀓𑀝𑁆𑀞𑀸𑀦𑁂𑀬𑁂𑀯 𑀞𑀺𑀢𑀁. 𑀤𑁆𑀯𑀸𑀭𑁂 𑀞𑀺𑀢𑀸 𑀫𑀮𑁆𑀮𑀸 𑀢𑀁 𑀕𑀻𑀯𑀸𑀬𑀁 𑀕𑀳𑁂𑀢𑁆𑀯𑀸 𑀳𑁂𑀝𑁆𑀞𑀸𑀪𑀺𑀫𑀼𑀔𑀁 𑀔𑀺𑀧𑀺𑀁𑀲𑀼. 𑀏𑀢𑁂𑀦𑀼𑀧𑀸𑀬𑁂𑀦 𑀲𑀢𑁆𑀢𑀲𑀼𑀧𑀺 𑀢𑀮𑁂𑀲𑀼 𑀤𑁆𑀯𑀸𑀭𑀸𑀦𑀺 𑀲𑀬𑀫𑁂𑀯 𑀯𑀺𑀯𑀝𑀸𑀦𑀺, 𑀲𑁄𑀧𑀸𑀦𑀸𑀦𑀺 𑀬𑀣𑀸𑀞𑀸𑀦𑁂 𑀞𑀺𑀢𑀸𑀦𑀺. 𑀢𑀢𑁆𑀣 𑀢𑀢𑁆𑀣 𑀫𑀮𑁆𑀮𑀸 𑀢𑀁 𑀕𑀻𑀯𑀸𑀬𑀫𑁂𑀯 𑀕𑀳𑁂𑀢𑁆𑀯𑀸 𑀳𑁂𑀝𑁆𑀞𑀸𑀪𑀺𑀫𑀼𑀔𑀁 𑀔𑀺𑀧𑀺𑀁𑀲𑀼. 𑀅𑀣 𑀦𑀁 𑀳𑁂𑀝𑁆𑀞𑀸𑀧𑀸𑀲𑀸𑀤𑁂 𑀲𑁄𑀧𑀸𑀦𑀧𑀸𑀤𑀫𑀽𑀮𑀁 𑀲𑀫𑁆𑀧𑀢𑁆𑀢𑀫𑁂𑀯 𑀫𑀳𑀸𑀧𑀣𑀯𑀻 𑀯𑀺𑀯𑀭𑀫𑀸𑀦𑀸 𑀪𑀺𑀚𑁆𑀚𑀺𑀢𑁆𑀯𑀸 𑀲𑀫𑁆𑀧𑀝𑀺𑀘𑁆𑀙𑀺, 𑀲𑁄 𑀕𑀦𑁆𑀢𑁆𑀯𑀸 𑀅𑀯𑀻𑀘𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀻𑀢𑀺.

𑀲𑀼𑀧𑁆𑀧𑀩𑀼𑀤𑁆𑀥𑀲𑀓𑁆𑀬𑀯𑀢𑁆𑀣𑀼 𑀤𑁆𑀯𑀸𑀤𑀲𑀫𑀁.

𑀧𑀸𑀧𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀯𑀫𑁄 𑀯𑀕𑁆𑀕𑁄.