𑁮. 𑀓𑀸𑀮𑀢𑁆𑀣𑁂𑀭𑀯𑀢𑁆𑀣𑀼

𑀬𑁄 𑀲𑀸𑀲𑀦𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑀸𑀮𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑀸𑀯𑀢𑁆𑀣𑀺𑀬𑀁 𑀓𑀺𑀭𑁂𑀓𑀸 𑀇𑀢𑁆𑀣𑀻 𑀫𑀸𑀢𑀼𑀝𑁆𑀞𑀸𑀦𑁂 𑀞𑀢𑁆𑀯𑀸 𑀢𑀁 𑀣𑁂𑀭𑀁 𑀉𑀧𑀝𑁆𑀞𑀳𑀺. 𑀢𑀲𑁆𑀲𑀸 𑀧𑀝𑀺𑀯𑀺𑀲𑁆𑀲𑀓𑀕𑁂𑀳𑁂 𑀫𑀦𑀼𑀲𑁆𑀲𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 ‘‘𑀅𑀳𑁄 𑀩𑀼𑀤𑁆𑀥𑀸 𑀦𑀸𑀫 𑀅𑀘𑁆𑀙𑀭𑀺𑀬𑀸, 𑀅𑀳𑁄 𑀥𑀫𑁆𑀫𑀤𑁂𑀲𑀦𑀸 𑀫𑀥𑀼𑀭𑀸’’𑀢𑀺 𑀧𑀲𑀁𑀲𑀦𑁆𑀢𑀺. 𑀲𑀸 𑀇𑀢𑁆𑀣𑀻 𑀢𑁂𑀲𑀁 𑀓𑀣𑀁 𑀲𑀼𑀢𑁆𑀯𑀸, ‘‘𑀪𑀦𑁆𑀢𑁂, 𑀅𑀳𑀫𑁆𑀧𑀺 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑁄𑀢𑀼𑀓𑀸𑀫𑀸’’𑀢𑀺 𑀢𑀲𑁆𑀲 𑀆𑀭𑁄𑀘𑁂𑀲𑀺. 𑀲𑁄 ‘‘𑀢𑀢𑁆𑀣 𑀫𑀸 𑀕𑀫𑀻’’𑀢𑀺 𑀢𑀁 𑀦𑀺𑀯𑀸𑀭𑁂𑀲𑀺. 𑀲𑀸 𑀧𑀼𑀦𑀤𑀺𑀯𑀲𑁂 𑀧𑀼𑀦𑀤𑀺𑀯𑀲𑁂𑀧𑀻𑀢𑀺 𑀬𑀸𑀯𑀢𑀢𑀺𑀬𑀁 𑀢𑁂𑀦 𑀦𑀺𑀯𑀸𑀭𑀺𑀬𑀫𑀸𑀦𑀸𑀧𑀺 𑀲𑁄𑀢𑀼𑀓𑀸𑀫𑀸𑀯 𑀅𑀳𑁄𑀲𑀺. 𑀓𑀲𑁆𑀫𑀸 𑀲𑁄 𑀧𑀦𑁂𑀢𑀁 𑀦𑀺𑀯𑀸𑀭𑁂𑀲𑀻𑀢𑀺? 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀫𑀬𑀺 𑀪𑀺𑀚𑁆𑀚𑀺𑀲𑁆𑀲𑀢𑀻’’𑀢𑀺. 𑀲𑀸 𑀏𑀓𑀤𑀺𑀯𑀲𑀁 𑀧𑀸𑀢𑁄𑀯 𑀪𑀼𑀢𑁆𑀢𑀧𑀸𑀢𑀭𑀸𑀲𑀸 𑀉𑀧𑁄𑀲𑀣𑀁 𑀲𑀫𑀸𑀤𑀺𑀬𑀺𑀢𑁆𑀯𑀸, ‘‘𑀅𑀫𑁆𑀫, 𑀲𑀸𑀥𑀼𑀓𑀁 𑀅𑀬𑁆𑀬𑀁 𑀧𑀭𑀺𑀯𑀺𑀲𑁂𑀬𑁆𑀬𑀸𑀲𑀻’’𑀢𑀺 𑀥𑀻𑀢𑀭𑀁 𑀆𑀡𑀸𑀧𑁂𑀢𑁆𑀯𑀸 𑀯𑀺𑀳𑀸𑀭𑀁 𑀅𑀕𑀫𑀸𑀲𑀺. 𑀥𑀻𑀢𑀸𑀧𑀺𑀲𑁆𑀲𑀸 𑀢𑀁 𑀪𑀺𑀓𑁆𑀔𑀼𑀁 𑀆𑀕𑀢𑀓𑀸𑀮𑁂 𑀧𑀭𑀺𑀯𑀺𑀲𑀺𑀢𑁆𑀯𑀸 ‘‘𑀓𑀼𑀳𑀺𑀁 𑀫𑀳𑀸𑀉𑀧𑀸𑀲𑀺𑀓𑀸’’𑀢𑀺 𑀯𑀼𑀢𑁆𑀢𑀸 ‘‘𑀥𑀫𑁆𑀫𑀲𑁆𑀲𑀯𑀦𑀸𑀬 𑀯𑀺𑀳𑀸𑀭𑀁 𑀕𑀢𑀸’’𑀢𑀺 𑀆𑀳. 𑀲𑁄 𑀢𑀁 𑀲𑀼𑀢𑁆𑀯𑀸𑀯 𑀓𑀼𑀘𑁆𑀙𑀺𑀬𑀁 𑀉𑀝𑁆𑀞𑀺𑀢𑁂𑀦 𑀟𑀸𑀳𑁂𑀦 𑀲𑀦𑁆𑀢𑀧𑁆𑀧𑀫𑀸𑀦𑁄 ‘‘𑀇𑀤𑀸𑀦𑀺 𑀲𑀸 𑀫𑀬𑀺 𑀪𑀺𑀦𑁆𑀦𑀸’’𑀢𑀺 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀡𑀫𑀸𑀦𑀁 𑀤𑀺𑀲𑁆𑀯𑀸 𑀲𑀢𑁆𑀣𑀸𑀭𑀁 𑀆𑀳, ‘‘𑀪𑀦𑁆𑀢𑁂, 𑀅𑀬𑀁 𑀇𑀢𑁆𑀣𑀻 𑀤𑀦𑁆𑀥𑀸 𑀲𑀼𑀔𑀼𑀫𑀁 𑀥𑀫𑁆𑀫𑀓𑀣𑀁 𑀦 𑀚𑀸𑀦𑀸𑀢𑀺, 𑀇𑀫𑀺𑀲𑁆𑀲𑀸 𑀔𑀦𑁆𑀥𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑀁 𑀲𑀼𑀔𑀼𑀫𑀁 𑀥𑀫𑁆𑀫𑀓𑀣𑀁 𑀅𑀓𑀣𑁂𑀢𑁆𑀯𑀸 𑀤𑀸𑀦𑀓𑀣𑀁 𑀯𑀸 𑀲𑀻𑀮𑀓𑀣𑀁 𑀯𑀸 𑀓𑀣𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑀢𑁆𑀣𑀸 𑀢𑀲𑁆𑀲𑀚𑁆𑀛𑀸𑀲𑀬𑀁 𑀯𑀺𑀤𑀺𑀢𑁆𑀯𑀸 ‘‘𑀢𑁆𑀯𑀁 𑀤𑀼𑀧𑁆𑀧𑀜𑁆𑀜𑁄 𑀧𑀸𑀧𑀺𑀓𑀁 𑀤𑀺𑀝𑁆𑀞𑀺𑀁 𑀦𑀺𑀲𑁆𑀲𑀸𑀬 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑀁 𑀧𑀝𑀺𑀓𑁆𑀓𑁄𑀲𑀲𑀺. 𑀅𑀢𑁆𑀢𑀖𑀸𑀢𑀸𑀬𑁂𑀯 𑀯𑀸𑀬𑀫𑀲𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁬𑁪. ‘‘𑀬𑁄 𑀲𑀸𑀲𑀦𑀁 𑀅𑀭𑀳𑀢𑀁, 𑀅𑀭𑀺𑀬𑀸𑀦𑀁 𑀥𑀫𑁆𑀫𑀚𑀻𑀯𑀺𑀦𑀁;

𑀧𑀝𑀺𑀓𑁆𑀓𑁄𑀲𑀢𑀺 𑀤𑀼𑀫𑁆𑀫𑁂𑀥𑁄, 𑀤𑀺𑀝𑁆𑀞𑀺𑀁 𑀦𑀺𑀲𑁆𑀲𑀸𑀬 𑀧𑀸𑀧𑀺𑀓𑀁;

𑀨𑀮𑀸𑀦𑀺 𑀓𑀝𑁆𑀞𑀓𑀲𑁆𑀲𑁂𑀯, 𑀅𑀢𑁆𑀢𑀖𑀸𑀢𑀸𑀬 𑀨𑀮𑁆𑀮𑀢𑀻’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀬𑁄 𑀤𑀼𑀫𑁆𑀫𑁂𑀥𑁄 𑀧𑀼𑀕𑁆𑀕𑀮𑁄 𑀅𑀢𑁆𑀢𑀦𑁄 𑀲𑀓𑁆𑀓𑀸𑀭𑀳𑀸𑀦𑀺𑀪𑀬𑁂𑀦 𑀧𑀸𑀧𑀺𑀓𑀁 𑀤𑀺𑀝𑁆𑀞𑀺𑀁 𑀦𑀺𑀲𑁆𑀲𑀸𑀬 ‘‘𑀥𑀫𑁆𑀫𑀁 𑀯𑀸 𑀲𑁄𑀲𑁆𑀲𑀸𑀫, 𑀤𑀸𑀦𑀁 𑀯𑀸 𑀤𑀲𑁆𑀲𑀸𑀫𑀸’’𑀢𑀺 𑀯𑀤𑀦𑁆𑀢𑁂 𑀧𑀝𑀺𑀓𑁆𑀓𑁄𑀲𑀦𑁆𑀢𑁄 𑀅𑀭𑀳𑀢𑀁 𑀅𑀭𑀺𑀬𑀸𑀦𑀁 𑀥𑀫𑁆𑀫𑀚𑀻𑀯𑀺𑀦𑀁 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑀁 𑀧𑀝𑀺𑀓𑁆𑀓𑁄𑀲𑀢𑀺, 𑀢𑀲𑁆𑀲 𑀢𑀁 𑀧𑀝𑀺𑀓𑁆𑀓𑁄𑀲𑀦𑀁 𑀲𑀸 𑀘 𑀧𑀸𑀧𑀺𑀓𑀸 𑀤𑀺𑀝𑁆𑀞𑀺 𑀯𑁂𑀴𑀼𑀲𑀗𑁆𑀔𑀸𑀢𑀲𑁆𑀲 𑀓𑀝𑁆𑀞𑀓𑀲𑁆𑀲 𑀨𑀮𑀸𑀦𑀺 𑀯𑀺𑀬 𑀳𑁄𑀢𑀺. 𑀢𑀲𑁆𑀫𑀸 𑀬𑀣𑀸 𑀓𑀝𑁆𑀞𑀓𑁄 𑀨𑀮𑀸𑀦𑀺 𑀕𑀡𑁆𑀳𑀦𑁆𑀢𑁄 𑀅𑀢𑁆𑀢𑀖𑀸𑀢𑀸𑀬 𑀨𑀮𑁆𑀮𑀢𑀺, 𑀅𑀢𑁆𑀢𑀦𑁄 𑀖𑀸𑀢𑀢𑁆𑀣𑀫𑁂𑀯 𑀨𑀮𑀢𑀺, 𑀏𑀯𑀁 𑀲𑁄𑀧𑀺 𑀅𑀢𑁆𑀢𑀖𑀸𑀢𑀸𑀬 𑀨𑀮𑁆𑀮𑀢𑀻𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀨𑀮𑀁 𑀯𑁂 𑀓𑀤𑀮𑀺𑀁 𑀳𑀦𑁆𑀢𑀺, 𑀨𑀮𑀁 𑀯𑁂𑀴𑀼𑀁 𑀨𑀮𑀁 𑀦𑀴𑀁;

𑀲𑀓𑁆𑀓𑀸𑀭𑁄 𑀓𑀸𑀧𑀼𑀭𑀺𑀲𑀁 𑀳𑀦𑁆𑀢𑀺, 𑀕𑀩𑁆𑀪𑁄 𑀅𑀲𑁆𑀲𑀢𑀭𑀺𑀁 𑀬𑀣𑀸’’𑀢𑀺. (𑀘𑀽𑀴𑀯. 𑁩𑁩𑁫; 𑀅. 𑀦𑀺. 𑁪.𑁬𑁮);

𑀤𑁂𑀲𑀦𑀸𑀯𑀲𑀸𑀦𑁂 𑀉𑀧𑀸𑀲𑀺𑀓𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺, 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀓𑀸𑀮𑀢𑁆𑀣𑁂𑀭𑀯𑀢𑁆𑀣𑀼 𑀅𑀝𑁆𑀞𑀫𑀁.