𑁧𑁧. 𑀲𑀼𑀔𑀲𑀸𑀫𑀡𑁂𑀭𑀯𑀢𑁆𑀣𑀼

𑀉𑀤𑀓𑀜𑁆𑀳𑀺 𑀦𑀬𑀦𑁆𑀢𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀼𑀔𑀲𑀸𑀫𑀡𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀅𑀢𑀻𑀢𑀲𑁆𑀫𑀺𑀜𑁆𑀳𑀺 𑀩𑀸𑀭𑀸𑀡𑀲𑀺𑀲𑁂𑀝𑁆𑀞𑀺𑀦𑁄 𑀕𑀦𑁆𑀥𑀓𑀼𑀫𑀸𑀭𑁄 𑀦𑀸𑀫 𑀧𑀼𑀢𑁆𑀢𑁄 𑀅𑀳𑁄𑀲𑀺. 𑀭𑀸𑀚𑀸 𑀢𑀲𑁆𑀲 𑀧𑀺𑀢𑀭𑀺 𑀓𑀸𑀮𑀓𑀢𑁂 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀫𑀳𑀦𑁆𑀢𑁂𑀦 𑀲𑀓𑁆𑀓𑀸𑀭𑁂𑀦 𑀢𑀲𑁆𑀲𑁂𑀯 𑀲𑁂𑀝𑁆𑀞𑀺𑀝𑁆𑀞𑀸𑀦𑀁 𑀅𑀤𑀸𑀲𑀺. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀕𑀦𑁆𑀥𑀲𑁂𑀝𑁆𑀞𑀻𑀢𑀺 𑀧𑀜𑁆𑀜𑀸𑀬𑀺. 𑀅𑀣𑀲𑁆𑀲 𑀪𑀡𑁆𑀟𑀸𑀕𑀸𑀭𑀺𑀓𑁄 𑀥𑀦𑀕𑀩𑁆𑀪𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸, ‘‘𑀲𑀸𑀫𑀺, 𑀇𑀤𑀁 𑀢𑁂 𑀏𑀢𑁆𑀢𑀓𑀁 𑀧𑀺𑀢𑀼 𑀥𑀦𑀁, 𑀏𑀢𑁆𑀢𑀓𑀁 𑀧𑀺𑀢𑀸𑀫𑀳𑀸𑀤𑀻𑀦’’𑀦𑁆𑀢𑀺 𑀦𑀻𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀲𑀺. 𑀲𑁄 𑀢𑀁 𑀥𑀦𑀭𑀸𑀲𑀺𑀁 𑀑𑀮𑁄𑀓𑁂𑀢𑁆𑀯𑀸 𑀆𑀳 𑁋 ‘‘𑀓𑀺𑀁 𑀧𑀦 𑀢𑁂 𑀇𑀫𑀁 𑀥𑀦𑀁 𑀕𑀳𑁂𑀢𑁆𑀯𑀸 𑀦 𑀕𑀫𑀺𑀁𑀲𑀽’’𑀢𑀺. ‘‘𑀲𑀸𑀫𑀺, 𑀥𑀦𑀁 𑀕𑀳𑁂𑀢𑁆𑀯𑀸 𑀕𑀢𑀸 𑀦𑀸𑀫 𑀦𑀢𑁆𑀣𑀺. 𑀅𑀢𑁆𑀢𑀦𑀸 𑀓𑀢𑀁 𑀓𑀼𑀲𑀮𑀸𑀓𑀼𑀲𑀮𑀫𑁂𑀯 𑀳𑀺 𑀆𑀤𑀸𑀬 𑀲𑀢𑁆𑀢𑀸 𑀕𑀘𑁆𑀙𑀦𑁆𑀢𑀻’’𑀢𑀺. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀢𑁂 𑀩𑀸𑀮𑀢𑀸𑀬 𑀥𑀦𑀁 𑀲𑀡𑁆𑀞𑀸𑀧𑁂𑀢𑁆𑀯𑀸 𑀧𑀳𑀸𑀬 𑀕𑀢𑀸, 𑀅𑀳𑀁 𑀧𑀦𑁂𑀢𑀁 𑀕𑀳𑁂𑀢𑁆𑀯𑀸𑀯 𑀕𑀫𑀺𑀲𑁆𑀲𑀸𑀫𑀻’’𑀢𑀺. 𑀏𑀯𑀁 𑀧𑀦 𑀘𑀺𑀦𑁆𑀢𑁂𑀦𑁆𑀢𑁄 ‘‘𑀤𑀸𑀦𑀁 𑀯𑀸 𑀤𑀲𑁆𑀲𑀸𑀫𑀺, 𑀧𑀽𑀚𑀁 𑀯𑀸 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀅𑀘𑀺𑀦𑁆𑀢𑁂𑀢𑁆𑀯𑀸 ‘‘𑀇𑀤𑀁 𑀲𑀩𑁆𑀩𑀁 𑀔𑀸𑀤𑀺𑀢𑁆𑀯𑀸𑀯 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀲𑁄 𑀲𑀢𑀲𑀳𑀲𑁆𑀲𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀨𑀮𑀺𑀓𑀫𑀬𑀁 𑀦𑁆𑀳𑀸𑀦𑀓𑁄𑀝𑁆𑀞𑀓𑀁 𑀓𑀸𑀭𑁂𑀲𑀺, 𑀲𑀢𑀲𑀳𑀲𑁆𑀲𑀁 𑀤𑀢𑁆𑀯𑀸 𑀨𑀮𑀺𑀓𑀫𑀬𑀫𑁂𑀯 𑀦𑁆𑀳𑀸𑀦𑀨𑀮𑀓𑀁, 𑀲𑀢𑀲𑀳𑀲𑁆𑀲𑀁 𑀤𑀢𑁆𑀯𑀸 𑀦𑀺𑀲𑀻𑀤𑀦𑀧𑀮𑁆𑀮𑀗𑁆𑀓𑀁, 𑀲𑀢𑀲𑀳𑀲𑁆𑀲𑀁 𑀤𑀢𑁆𑀯𑀸 𑀪𑁄𑀚𑀦𑀧𑀸𑀢𑀺𑀁, 𑀲𑀢𑀲𑀳𑀲𑁆𑀲𑀫𑁂𑀯 𑀤𑀢𑁆𑀯𑀸 𑀪𑁄𑀚𑀦𑀝𑁆𑀞𑀸𑀦𑁂 𑀫𑀡𑁆𑀟𑀧𑀁 𑀓𑀸𑀭𑀸𑀧𑁂𑀲𑀺, 𑀲𑀢𑀲𑀳𑀲𑁆𑀲𑀁 𑀤𑀢𑁆𑀯𑀸 𑀪𑁄𑀚𑀦𑀧𑀸𑀢𑀺𑀬𑀸 𑀆𑀲𑀺𑀢𑁆𑀢𑀓𑀽𑀧𑀥𑀸𑀦𑀁 𑀓𑀸𑀭𑁂𑀲𑀺, 𑀲𑀢𑀲𑀳𑀲𑁆𑀲𑁂𑀦𑁂𑀯 𑀕𑁂𑀳𑁂 𑀲𑀻𑀳𑀧𑀜𑁆𑀚𑀭𑀁 𑀲𑀡𑁆𑀞𑀸𑀧𑁂𑀲𑀺, 𑀅𑀢𑁆𑀢𑀦𑁄 𑀧𑀸𑀢𑀭𑀸𑀲𑀢𑁆𑀣𑀸𑀬 𑀲𑀳𑀲𑁆𑀲𑀁 𑀅𑀤𑀸𑀲𑀺, 𑀲𑀸𑀬𑀫𑀸𑀲𑀢𑁆𑀣𑀸𑀬𑀧𑀺 𑀲𑀳𑀲𑁆𑀲𑀫𑁂𑀯. 𑀧𑀼𑀡𑁆𑀡𑀫𑀤𑀺𑀯𑀲𑁂 𑀧𑀦 𑀪𑁄𑀚𑀦𑀢𑁆𑀣𑀸𑀬 𑀲𑀢𑀲𑀳𑀲𑁆𑀲𑀁 𑀤𑀸𑀧𑁂𑀲𑀺, 𑀢𑀁 𑀪𑀢𑁆𑀢𑀁 𑀪𑀼𑀜𑁆𑀚𑀦𑀤𑀺𑀯𑀲𑁂 𑀲𑀢𑀲𑀳𑀲𑁆𑀲𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀦𑀕𑀭𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺 𑁋 ‘‘𑀕𑀦𑁆𑀥𑀲𑁂𑀝𑁆𑀞𑀺𑀲𑁆𑀲 𑀓𑀺𑀭 𑀪𑀢𑁆𑀢𑀪𑀼𑀜𑁆𑀚𑀦𑀸𑀓𑀸𑀭𑀁 𑀑𑀮𑁄𑀓𑁂𑀦𑁆𑀢𑀽’’𑀢𑀺.

𑀫𑀳𑀸𑀚𑀦𑁄 𑀫𑀜𑁆𑀘𑀸𑀢𑀺𑀫𑀜𑁆𑀘𑁂 𑀩𑀦𑁆𑀥𑀺𑀢𑁆𑀯𑀸 𑀲𑀦𑁆𑀦𑀺𑀧𑀢𑀺. 𑀲𑁄𑀧𑀺 𑀲𑀢𑀲𑀳𑀲𑁆𑀲𑀕𑁆𑀖𑀦𑀓𑁂 𑀦𑁆𑀳𑀸𑀦𑀓𑁄𑀝𑁆𑀞𑀓𑁂 𑀲𑀢𑀲𑀳𑀲𑁆𑀲𑀕𑁆𑀖𑀦𑀓𑁂 𑀨𑀮𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑁄𑀴𑀲𑀳𑀺 𑀕𑀦𑁆𑀥𑁄𑀤𑀓𑀖𑀝𑁂𑀳𑀺 𑀦𑁆𑀳𑀢𑁆𑀯𑀸 𑀢𑀁 𑀲𑀻𑀳𑀧𑀜𑁆𑀚𑀭𑀁 𑀯𑀺𑀯𑀭𑀺𑀢𑁆𑀯𑀸 𑀢𑀲𑁆𑀫𑀺𑀁 𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀺. 𑀅𑀣𑀲𑁆𑀲 𑀢𑀲𑁆𑀫𑀺𑀁 𑀆𑀲𑀺𑀢𑁆𑀢𑀓𑀽𑀧𑀥𑀸𑀦𑁂 𑀢𑀁 𑀧𑀸𑀢𑀺𑀁 𑀞𑀧𑁂𑀢𑁆𑀯𑀸 𑀲𑀢𑀲𑀳𑀲𑁆𑀲𑀕𑁆𑀖𑀦𑀓𑀁 𑀪𑁄𑀚𑀦𑀁 𑀯𑀟𑁆𑀠𑁂𑀲𑀼𑀁. 𑀲𑁄 𑀦𑀸𑀝𑀓𑀧𑀭𑀺𑀯𑀼𑀢𑁄 𑀏𑀯𑀭𑀽𑀧𑀸𑀬 𑀲𑀫𑁆𑀧𑀢𑁆𑀢𑀺𑀬𑀸 𑀢𑀁 𑀪𑁄𑀚𑀦𑀁 𑀪𑀼𑀜𑁆𑀚𑀢𑀺. 𑀅𑀧𑀭𑁂𑀦 𑀲𑀫𑀬𑁂𑀦 𑀏𑀓𑁄 𑀕𑀸𑀫𑀺𑀓𑀫𑀦𑀼𑀲𑁆𑀲𑁄 𑀅𑀢𑁆𑀢𑀦𑁄 𑀧𑀭𑀺𑀩𑁆𑀩𑀬𑀸𑀳𑀭𑀡𑀢𑁆𑀣𑀁 𑀤𑀸𑀭𑀼𑀆𑀤𑀻𑀦𑀺 𑀬𑀸𑀦𑀓𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀦𑀕𑀭𑀁 𑀕𑀦𑁆𑀢𑁆𑀯𑀸 𑀲𑀳𑀸𑀬𑀓𑀲𑁆𑀲 𑀕𑁂𑀳𑁂 𑀦𑀺𑀯𑀸𑀲𑀁 𑀕𑀡𑁆𑀳𑀺. 𑀢𑀤𑀸 𑀧𑀦 𑀧𑀼𑀡𑁆𑀡𑀫𑀤𑀺𑀯𑀲𑁄 𑀳𑁄𑀢𑀺. ‘‘𑀕𑀦𑁆𑀥𑀲𑁂𑀝𑁆𑀞𑀺𑀦𑁄 𑀪𑀼𑀜𑁆𑀚𑀦𑀮𑀻𑀴𑀁 𑀑𑀮𑁄𑀓𑁂𑀦𑁆𑀢𑀽’’𑀢𑀺 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺. 𑀅𑀣 𑀦𑀁 𑀲𑀳𑀸𑀬𑀓𑁄 𑀆𑀳 𑁋 ‘‘𑀲𑀫𑁆𑀫, 𑀕𑀦𑁆𑀥𑀲𑁂𑀝𑁆𑀞𑀺𑀦𑁄 𑀢𑁂 𑀪𑀼𑀜𑁆𑀚𑀦𑀮𑀻𑀴𑀁 𑀤𑀺𑀝𑁆𑀞𑀧𑀼𑀩𑁆𑀩’’𑀦𑁆𑀢𑀺. ‘‘𑀦 𑀤𑀺𑀝𑁆𑀞𑀧𑀼𑀩𑁆𑀩𑀁, 𑀲𑀫𑁆𑀫𑀸’’𑀢𑀺. ‘‘𑀢𑁂𑀦 𑀳𑀺 𑀏𑀳𑀺, 𑀕𑀘𑁆𑀙𑀸𑀫, 𑀅𑀬𑀁 𑀦𑀕𑀭𑁂 𑀪𑁂𑀭𑀻 𑀘𑀭𑀢𑀺, 𑀏𑀢𑀲𑁆𑀲 𑀫𑀳𑀸𑀲𑀫𑁆𑀧𑀢𑁆𑀢𑀺𑀁 𑀧𑀲𑁆𑀲𑀸𑀫𑀸’’𑀢𑀺 𑀦𑀕𑀭𑀯𑀸𑀲𑀻 𑀚𑀦𑀧𑀤𑀯𑀸𑀲𑀺𑀁 𑀕𑀳𑁂𑀢𑁆𑀯𑀸 𑀅𑀕𑀫𑀸𑀲𑀺. 𑀫𑀳𑀸𑀚𑀦𑁄𑀧𑀺 𑀫𑀜𑁆𑀘𑀸𑀢𑀺𑀫𑀜𑁆𑀘𑁂 𑀅𑀪𑀺𑀭𑀼𑀳𑀺𑀢𑁆𑀯𑀸 𑀧𑀲𑁆𑀲𑀢𑀺. 𑀕𑀸𑀫𑀯𑀸𑀲𑀻 𑀪𑀢𑁆𑀢𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸𑀯 𑀦𑀕𑀭𑀯𑀸𑀲𑀺𑀁 𑀆𑀳 𑁋 ‘‘𑀫𑀬𑁆𑀳𑀁 𑀏𑀢𑀸𑀬 𑀧𑀸𑀢𑀺𑀬𑀸 𑀪𑀢𑁆𑀢𑀧𑀺𑀡𑁆𑀟𑁂 𑀧𑀺𑀧𑀸𑀲𑀸 𑀚𑀸𑀢𑀸’’𑀢𑀺. 𑀲𑀫𑁆𑀫, 𑀫𑀸 𑀏𑀢𑀁 𑀧𑀢𑁆𑀣𑀬𑀺, 𑀦 𑀲𑀓𑁆𑀓𑀸 𑀮𑀤𑁆𑀥𑀼𑀦𑁆𑀢𑀺. 𑀲𑀫𑁆𑀫, 𑀅𑀮𑀪𑀦𑁆𑀢𑁄 𑀦 𑀚𑀻𑀯𑀺𑀲𑁆𑀲𑀸𑀫𑀻𑀢𑀺. 𑀲𑁄 𑀢𑀁 𑀧𑀝𑀺𑀩𑀸𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀧𑀭𑀺𑀲𑀧𑀭𑀺𑀬𑀦𑁆𑀢𑁂 𑀞𑀢𑁆𑀯𑀸 ‘‘𑀧𑀡𑀫𑀸𑀫𑀺 𑀢𑁂, 𑀲𑀸𑀫𑀻’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀫𑀳𑀸𑀲𑀤𑁆𑀤𑀁 𑀦𑀺𑀘𑁆𑀙𑀸𑀭𑁂𑀢𑁆𑀯𑀸 ‘‘𑀓𑁄 𑀏𑀲𑁄’’𑀢𑀺 𑀯𑀼𑀢𑁆𑀢𑁂 𑀅𑀳𑀁, 𑀲𑀸𑀫𑀻𑀢𑀺. ‘‘𑀓𑀺𑀫𑁂𑀢’’𑀦𑁆𑀢𑀺. ‘‘𑀅𑀬𑀁 𑀏𑀓𑁄 𑀕𑀸𑀫𑀯𑀸𑀲𑀻 𑀢𑀼𑀫𑁆𑀳𑀸𑀓𑀁 𑀧𑀸𑀢𑀺𑀬𑀁 𑀪𑀢𑁆𑀢𑀧𑀺𑀡𑁆𑀟𑁂 𑀧𑀺𑀧𑀸𑀲𑀁 𑀉𑀧𑀸𑀤𑁂𑀲𑀺, 𑀏𑀓𑀁 𑀪𑀢𑁆𑀢𑀧𑀺𑀡𑁆𑀟𑀁 𑀤𑀸𑀧𑁂𑀣𑀸’’𑀢𑀺. ‘‘𑀦 𑀲𑀓𑁆𑀓𑀸 𑀮𑀤𑁆𑀥𑀼’’𑀦𑁆𑀢𑀺. ‘‘𑀓𑀺𑀁, 𑀲𑀫𑁆𑀫, 𑀲𑀼𑀢𑀁 𑀢𑁂’’𑀢𑀺? ‘‘𑀲𑀼𑀢𑀁 𑀫𑁂, 𑀅𑀧𑀺𑀘 𑀮𑀪𑀦𑁆𑀢𑁄 𑀚𑀻𑀯𑀺𑀲𑁆𑀲𑀸𑀫𑀺, 𑀅𑀮𑀪𑀦𑁆𑀢𑀲𑁆𑀲 𑀫𑁂 𑀫𑀭𑀡𑀁 𑀪𑀯𑀺𑀲𑁆𑀲𑀢𑀻’’𑀢𑀺. 𑀲𑁄 𑀧𑀼𑀦𑀧𑀺 𑀯𑀺𑀭𑀯𑀺 𑁋 ‘‘𑀅𑀬𑀁 𑀓𑀺𑀭, 𑀲𑀸𑀫𑀺, 𑀅𑀮𑀪𑀦𑁆𑀢𑁄 𑀫𑀭𑀺𑀲𑁆𑀲𑀢𑀺, 𑀚𑀻𑀯𑀺𑀢𑀫𑀲𑁆𑀲 𑀤𑁂𑀣𑀸’’𑀢𑀺. 𑀅𑀫𑁆𑀪𑁄 𑀪𑀢𑁆𑀢𑀧𑀺𑀡𑁆𑀟𑁄 𑀦𑀸𑀫 𑀲𑀢𑀫𑁆𑀧𑀺 𑀅𑀕𑁆𑀖𑀢𑀺, 𑀲𑀢𑀤𑁆𑀯𑀬𑀫𑁆𑀧𑀺 𑀅𑀕𑁆𑀖𑀢𑀺. 𑀬𑁄 𑀬𑁄 𑀬𑀸𑀘𑀢𑀺, 𑀢𑀲𑁆𑀲 𑀢𑀲𑁆𑀲 𑀤𑀤𑀫𑀸𑀦𑁄 𑀅𑀳𑀁 𑀓𑀺𑀁 𑀪𑀼𑀜𑁆𑀚𑀺𑀲𑁆𑀲𑀸𑀫𑀻𑀢𑀺? 𑀲𑀸𑀫𑀺, 𑀅𑀬𑀁 𑀅𑀮𑀪𑀦𑁆𑀢𑁄 𑀫𑀭𑀺𑀲𑁆𑀲𑀢𑀺, 𑀚𑀻𑀯𑀺𑀢𑀫𑀲𑁆𑀲 𑀤𑁂𑀣𑀸𑀢𑀺. 𑀦 𑀲𑀓𑁆𑀓𑀸𑀯 𑀫𑀼𑀥𑀸 𑀮𑀤𑁆𑀥𑀼𑀁, 𑀬𑀤𑀺 𑀧𑀦 𑀅𑀮𑀪𑀦𑁆𑀢𑁄 𑀦 𑀚𑀻𑀯𑀢𑀺, 𑀢𑀻𑀡𑀺 𑀲𑀁𑀯𑀘𑁆𑀙𑀭𑀸𑀦𑀺 𑀫𑀫 𑀕𑁂𑀳𑁂 𑀪𑀢𑀺𑀁 𑀓𑀭𑁄𑀢𑀼, 𑀏𑀯𑀫𑀲𑁆𑀲 𑀪𑀢𑁆𑀢𑀧𑀸𑀢𑀺𑀁 𑀤𑀸𑀧𑁂𑀲𑁆𑀲𑀸𑀫𑀻𑀢𑀺. 𑀕𑀸𑀫𑀯𑀸𑀲𑀻 𑀢𑀁 𑀲𑀼𑀢𑁆𑀯𑀸 ‘‘𑀏𑀯𑀁 𑀳𑁄𑀢𑀼, 𑀲𑀫𑁆𑀫𑀸’’𑀢𑀺 𑀲𑀳𑀸𑀬𑀓𑀁 𑀯𑀢𑁆𑀯𑀸 𑀧𑀼𑀢𑁆𑀢𑀤𑀸𑀭𑀁 𑀧𑀳𑀸𑀬 ‘‘𑀪𑀢𑁆𑀢𑀧𑀸𑀢𑀺𑀅𑀢𑁆𑀣𑀸𑀬 𑀢𑀻𑀡𑀺 𑀲𑀁𑀯𑀘𑁆𑀙𑀭𑀸𑀦𑀺 𑀪𑀢𑀺𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀲𑁂𑀝𑁆𑀞𑀺𑀲𑁆𑀲 𑀕𑁂𑀳𑀁 𑀧𑀸𑀯𑀺𑀲𑀺. 𑀲𑁄 𑀪𑀢𑀺𑀁 𑀓𑀭𑁄𑀦𑁆𑀢𑁄 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀲𑀓𑁆𑀓𑀘𑁆𑀘𑀁 𑀅𑀓𑀸𑀲𑀺. 𑀕𑁂𑀳𑁂 𑀯𑀸 𑀅𑀭𑀜𑁆𑀜𑁂 𑀯𑀸 𑀭𑀢𑁆𑀢𑀺𑀁 𑀯𑀸 𑀤𑀺𑀯𑀸 𑀯𑀸 𑀲𑀩𑁆𑀩𑀸𑀦𑀺 𑀓𑀢𑁆𑀢𑀩𑁆𑀩𑀓𑀫𑁆𑀫𑀸𑀦𑀺 𑀓𑀢𑀸𑀦𑁂𑀯 𑀧𑀜𑁆𑀜𑀸𑀬𑀺𑀁𑀲𑀼. ‘‘𑀪𑀢𑁆𑀢𑀪𑀢𑀺𑀓𑁄’’𑀢𑀺 𑀘 𑀯𑀼𑀢𑁆𑀢𑁂 𑀲𑀓𑀮𑀦𑀕𑀭𑁂𑀧𑀺 𑀧𑀜𑁆𑀜𑀸𑀬𑀺. 𑀅𑀣𑀲𑁆𑀲 𑀤𑀺𑀯𑀲𑁂 𑀧𑀭𑀺𑀧𑀼𑀡𑁆𑀡𑁂 𑀪𑀢𑁆𑀢𑀯𑁂𑀬𑁆𑀬𑀸𑀯𑀝𑀺𑀓𑁄 ‘‘𑀪𑀢𑁆𑀢𑀪𑀢𑀺𑀓𑀲𑁆𑀲, 𑀲𑀸𑀫𑀺, 𑀤𑀺𑀯𑀲𑁄 𑀧𑀼𑀡𑁆𑀡𑁄, 𑀤𑀼𑀓𑁆𑀓𑀭𑀁 𑀢𑁂𑀦 𑀓𑀢𑀁 𑀢𑀻𑀡𑀺 𑀲𑀁𑀯𑀘𑁆𑀙𑀭𑀸𑀦𑀺 𑀪𑀢𑀺𑀁 𑀓𑀭𑁄𑀦𑁆𑀢𑁂𑀦, 𑀏𑀓𑀫𑁆𑀧𑀺 𑀓𑀫𑁆𑀫𑀁 𑀦 𑀓𑁄𑀧𑀺𑀢𑀧𑀼𑀩𑁆𑀩’’𑀦𑁆𑀢𑀺 𑀆𑀳.

𑀅𑀣𑀲𑁆𑀲 𑀲𑁂𑀝𑁆𑀞𑀺 𑀅𑀢𑁆𑀢𑀦𑁄 𑀲𑀸𑀬𑀧𑀸𑀢𑀭𑀸𑀲𑀢𑁆𑀣𑀸𑀬 𑀤𑁆𑀯𑁂 𑀲𑀳𑀲𑁆𑀲𑀸𑀦𑀺, 𑀢𑀲𑁆𑀲 𑀧𑀸𑀢𑀭𑀸𑀲𑀢𑁆𑀣𑀸𑀬 𑀲𑀳𑀲𑁆𑀲𑀦𑁆𑀢𑀺 𑀢𑀻𑀡𑀺 𑀲𑀳𑀲𑁆𑀲𑀸𑀦𑀺 𑀤𑀸𑀧𑁂𑀢𑁆𑀯𑀸 𑀆𑀳 𑁋 ‘‘𑀅𑀚𑁆𑀚 𑀫𑀬𑁆𑀳𑀁 𑀓𑀢𑁆𑀢𑀩𑁆𑀩𑀁 𑀧𑀭𑀺𑀳𑀸𑀭𑀁 𑀢𑀲𑁆𑀲𑁂𑀯 𑀓𑀭𑁄𑀣𑀸’’𑀢𑀺. 𑀯𑀢𑁆𑀯𑀸 𑀘 𑀧𑀦 𑀞𑀧𑁂𑀢𑁆𑀯𑀸 𑀏𑀓𑀁 𑀘𑀺𑀦𑁆𑀢𑀸𑀫𑀡𑀺𑀁 𑀦𑀸𑀫 𑀧𑀺𑀬𑀪𑀭𑀺𑀬𑀁 𑀅𑀯𑀲𑁂𑀲𑀚𑀦𑀫𑁆𑀧𑀺 ‘‘𑀅𑀚𑁆𑀚 𑀢𑀫𑁂𑀯 𑀧𑀭𑀺𑀯𑀸𑀭𑁂𑀣𑀸’’𑀢𑀺 𑀯𑀢𑁆𑀯𑀸 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀢𑀲𑁆𑀲 𑀦𑀺𑀬𑁆𑀬𑀸𑀤𑁂𑀲𑀺. 𑀲𑁄 𑀲𑁂𑀝𑁆𑀞𑀺𑀦𑁄 𑀦𑁆𑀳𑀸𑀦𑁄𑀤𑀓𑁂𑀦 𑀢𑀲𑁆𑀲𑁂𑀯 𑀓𑁄𑀝𑁆𑀞𑀓𑁂 𑀢𑀲𑁆𑀫𑀺𑀁 𑀨𑀮𑀓𑁂 𑀦𑀺𑀲𑀺𑀦𑁆𑀦𑁄 𑀦𑁆𑀳𑀢𑁆𑀯𑀸 𑀢𑀲𑁆𑀲𑁂𑀯 𑀦𑀺𑀯𑀸𑀲𑀦𑀲𑀸𑀝𑀓𑁂 𑀦𑀺𑀯𑀸𑀲𑁂𑀢𑁆𑀯𑀸 𑀢𑀲𑁆𑀲𑁂𑀯 𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀺. 𑀲𑁂𑀝𑁆𑀞𑀺𑀧𑀺 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺 𑁋 ‘‘𑀪𑀢𑁆𑀢𑀪𑀢𑀺𑀓𑁄 𑀕𑀦𑁆𑀥𑀲𑁂𑀝𑁆𑀞𑀺𑀲𑁆𑀲 𑀕𑁂𑀳𑁂 𑀢𑀻𑀡𑀺 𑀲𑀁𑀯𑀘𑁆𑀙𑀭𑀸𑀦𑀺 𑀪𑀢𑀺𑀁 𑀓𑀢𑁆𑀯𑀸 𑀧𑀸𑀢𑀺𑀁 𑀮𑀪𑀺, 𑀢𑀲𑁆𑀲 𑀪𑀼𑀜𑁆𑀚𑀦𑀲𑀫𑁆𑀧𑀢𑁆𑀢𑀺𑀁 𑀑𑀮𑁄𑀓𑁂𑀦𑁆𑀢𑀽’’𑀢𑀺. 𑀫𑀳𑀸𑀚𑀦𑁄 𑀫𑀜𑁆𑀘𑀸𑀢𑀺𑀫𑀜𑁆𑀘𑁂 𑀅𑀪𑀺𑀭𑀼𑀳𑀺𑀢𑁆𑀯𑀸 𑀧𑀲𑁆𑀲𑀢𑀺, 𑀕𑀸𑀫𑀯𑀸𑀲𑀺𑀲𑁆𑀲 𑀑𑀮𑁄𑀓𑀺𑀢𑁄𑀮𑁄𑀓𑀺𑀢𑀝𑁆𑀞𑀸𑀦𑀁 𑀓𑀫𑁆𑀧𑀦𑀸𑀓𑀸𑀭𑀧𑁆𑀧𑀢𑁆𑀢𑀁 𑀅𑀳𑁄𑀲𑀺. 𑀦𑀸𑀝𑀓𑀸 𑀧𑀭𑀺𑀯𑀸𑀭𑁂𑀢𑁆𑀯𑀸 𑀅𑀝𑁆𑀞𑀲𑀼𑀁, 𑀢𑀲𑁆𑀲 𑀧𑀼𑀭𑀢𑁄 𑀪𑀢𑁆𑀢𑀧𑀸𑀢𑀺𑀁 𑀯𑀟𑁆𑀠𑁂𑀢𑁆𑀯𑀸 𑀞𑀧𑀬𑀺𑀁𑀲𑀼. 𑀅𑀣𑀲𑁆𑀲 𑀳𑀢𑁆𑀣𑀥𑁄𑀯𑀦𑀯𑁂𑀮𑀸𑀬 𑀕𑀦𑁆𑀥𑀫𑀸𑀤𑀦𑁂 𑀏𑀓𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 ‘‘𑀓𑀢𑁆𑀣 𑀦𑀼 𑀔𑁄 𑀅𑀚𑁆𑀚 𑀪𑀺𑀓𑁆𑀔𑀸𑀘𑀸𑀭𑀢𑁆𑀣𑀸𑀬 𑀕𑀘𑁆𑀙𑀸𑀫𑀻’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 𑀪𑀢𑁆𑀢𑀪𑀢𑀺𑀓𑀁 𑀅𑀤𑁆𑀤𑀲. 𑀅𑀣 𑀲𑁄 ‘‘𑀅𑀬𑀁 𑀢𑀻𑀡𑀺 𑀲𑀁𑀯𑀘𑁆𑀙𑀭𑀸𑀦𑀺 𑀪𑀢𑀺𑀁 𑀓𑀢𑁆𑀯𑀸 𑀪𑀢𑁆𑀢𑀧𑀸𑀢𑀺𑀁 𑀮𑀪𑀺, 𑀅𑀢𑁆𑀣𑀺 𑀦𑀼 𑀔𑁄 𑀏𑀢𑀲𑁆𑀲 𑀲𑀤𑁆𑀥𑀸, 𑀦𑀢𑁆𑀣𑀻’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 ‘‘𑀅𑀢𑁆𑀣𑀻’’𑀢𑀺 𑀜𑀢𑁆𑀯𑀸 ‘‘𑀲𑀤𑁆𑀥𑀸𑀧𑀺 𑀏𑀓𑀘𑁆𑀘𑁂 𑀲𑀗𑁆𑀕𑀳𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀲𑀓𑁆𑀔𑀺𑀲𑁆𑀲𑀢𑀺 𑀦𑀼 𑀔𑁄 𑀫𑁂 𑀲𑀗𑁆𑀕𑀳𑀁 𑀓𑀸𑀢𑀼’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀲𑀓𑁆𑀔𑀺𑀲𑁆𑀲𑀢𑀺 𑀘𑁂𑀯 𑀫𑀫 𑀘 𑀲𑀗𑁆𑀕𑀳𑀓𑀭𑀡𑀁 𑀦𑀺𑀲𑁆𑀲𑀸𑀬 𑀫𑀳𑀸𑀲𑀫𑁆𑀧𑀢𑁆𑀢𑀺𑀁 𑀮𑀪𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀧𑀢𑁆𑀢𑀫𑀸𑀤𑀸𑀬 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀧𑀭𑀺𑀲𑀦𑁆𑀢𑀭𑁂𑀦 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀧𑀼𑀭𑀢𑁄 𑀞𑀺𑀢𑀫𑁂𑀯 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀺.

𑀲𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀧𑀼𑀩𑁆𑀩𑁂 𑀅𑀤𑀺𑀦𑁆𑀦𑀪𑀸𑀯𑁂𑀦 𑀏𑀓𑀺𑀲𑁆𑀲𑀸 𑀪𑀢𑁆𑀢𑀧𑀸𑀢𑀺𑀬𑀸 𑀅𑀢𑁆𑀣𑀸𑀬 𑀢𑀻𑀡𑀺 𑀲𑀁𑀯𑀘𑁆𑀙𑀭𑀸𑀦𑀺 𑀧𑀭𑀕𑁂𑀳𑁂 𑀪𑀢𑀺𑀁 𑀅𑀓𑀸𑀲𑀺𑀁, 𑀇𑀤𑀸𑀦𑀺 𑀫𑁂 𑀇𑀤𑀁 𑀪𑀢𑁆𑀢𑀁 𑀏𑀓𑀁 𑀭𑀢𑁆𑀢𑀺𑀦𑁆𑀤𑀺𑀯𑀁 𑀭𑀓𑁆𑀔𑁂𑀬𑁆𑀬, 𑀲𑀘𑁂 𑀧𑀦 𑀦𑀁 𑀅𑀬𑁆𑀬𑀲𑁆𑀲 𑀤𑀲𑁆𑀲𑀸𑀫𑀺, 𑀅𑀦𑁂𑀓𑀸𑀦𑀺𑀧𑀺 𑀓𑀧𑁆𑀧𑀓𑁄𑀝𑀺𑀲𑀳𑀲𑁆𑀲𑀸𑀦𑀺 𑀭𑀓𑁆𑀔𑀺𑀲𑁆𑀲𑀢𑀺, 𑀅𑀬𑁆𑀬𑀲𑁆𑀲𑁂𑀯 𑀦𑀁 𑀤𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑀻𑀡𑀺 𑀲𑀁𑀯𑀘𑁆𑀙𑀭𑀸𑀦𑀺 𑀪𑀢𑀺𑀁 𑀓𑀢𑁆𑀯𑀸 𑀮𑀤𑁆𑀥𑀪𑀢𑁆𑀢𑀧𑀸𑀢𑀺𑀢𑁄 𑀏𑀓𑀧𑀺𑀡𑁆𑀟𑀫𑁆𑀧𑀺 𑀫𑀼𑀔𑁂 𑀅𑀝𑁆𑀞𑀧𑁂𑀢𑁆𑀯𑀸 𑀢𑀡𑁆𑀳𑀁 𑀯𑀺𑀦𑁄𑀤𑁂𑀢𑁆𑀯𑀸 𑀲𑀬𑀫𑁂𑀯 𑀧𑀸𑀢𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀸𑀢𑀺𑀁 𑀅𑀜𑁆𑀜𑀲𑁆𑀲 𑀳𑀢𑁆𑀣𑁂 𑀤𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀧𑀸𑀢𑀺𑀁 𑀯𑀸𑀫𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀤𑀓𑁆𑀔𑀺𑀡𑀳𑀢𑁆𑀣𑁂𑀦 𑀢𑀲𑁆𑀲 𑀧𑀢𑁆𑀢𑁂 𑀪𑀢𑁆𑀢𑀁 𑀆𑀓𑀺𑀭𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀪𑀢𑁆𑀢𑀲𑁆𑀲 𑀉𑀧𑀟𑁆𑀠𑀲𑁂𑀲𑀓𑀸𑀮𑁂 𑀧𑀢𑁆𑀢𑀁 𑀳𑀢𑁆𑀣𑁂𑀦 𑀧𑀺𑀤𑀳𑀺. 𑀅𑀣 𑀦𑀁 𑀲𑁄 𑀆𑀳 𑁋 ‘‘𑀪𑀦𑁆𑀢𑁂, 𑀏𑀓𑁄𑀯 𑀧𑀝𑀺𑀯𑀺𑀲𑁄 𑀦 𑀲𑀓𑁆𑀓𑀸 𑀤𑁆𑀯𑀺𑀥𑀸 𑀓𑀸𑀢𑀼𑀁, 𑀫𑀸 𑀫𑀁 𑀇𑀥𑀮𑁄𑀓𑁂𑀦 𑀲𑀗𑁆𑀕𑀡𑁆𑀳𑀣, 𑀧𑀭𑀮𑁄𑀓𑁂𑀦 𑀲𑀗𑁆𑀕𑀳𑀫𑁂𑀯 𑀓𑀭𑁄𑀣, 𑀲𑀸𑀯𑀲𑁂𑀲𑀁 𑀅𑀓𑀢𑁆𑀯𑀸 𑀦𑀺𑀭𑀯𑀲𑁂𑀲𑀫𑁂𑀯 𑀤𑀲𑁆𑀲𑀸𑀫𑀻’’𑀢𑀺. 𑀅𑀢𑁆𑀢𑀦𑁄 𑀳𑀺 𑀣𑁄𑀓𑀫𑁆𑀧𑀺 𑀅𑀦𑀯𑀲𑁂𑀲𑁂𑀢𑁆𑀯𑀸 𑀤𑀺𑀦𑁆𑀦𑀁 𑀦𑀺𑀭𑀯𑀲𑁂𑀲𑀤𑀸𑀦𑀁 𑀦𑀸𑀫, 𑀢𑀁 𑀫𑀳𑀧𑁆𑀨𑀮𑀁 𑀳𑁄𑀢𑀺. 𑀲𑁄 𑀢𑀣𑀸 𑀓𑀭𑁄𑀦𑁆𑀢𑁄 𑀲𑀩𑁆𑀩𑀁 𑀤𑀢𑁆𑀯𑀸 𑀧𑀼𑀦 𑀯𑀦𑁆𑀤𑀺𑀢𑁆𑀯𑀸 𑀆𑀳 𑁋 ‘‘𑀪𑀦𑁆𑀢𑁂, 𑀏𑀓𑀁 𑀪𑀢𑁆𑀢𑀧𑀸𑀢𑀺𑀁 𑀦𑀺𑀲𑁆𑀲𑀸𑀬 𑀢𑀻𑀡𑀺 𑀲𑀁𑀯𑀘𑁆𑀙𑀭𑀸𑀦𑀺 𑀫𑁂 𑀧𑀭𑀕𑁂𑀳𑁂 𑀪𑀢𑀺𑀁 𑀓𑀭𑁄𑀦𑁆𑀢𑁂𑀦 𑀤𑀼𑀓𑁆𑀔𑀁 𑀅𑀦𑀼𑀪𑀽𑀢𑀁, 𑀇𑀤𑀸𑀦𑀺 𑀫𑁂 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀲𑀼𑀔𑀫𑁂𑀯 𑀳𑁄𑀢𑀼, 𑀢𑀼𑀫𑁆𑀳𑁂𑀳𑀺 𑀤𑀺𑀝𑁆𑀞𑀥𑀫𑁆𑀫𑀲𑁆𑀲𑁂𑀯 𑀪𑀸𑀕𑀻 𑀅𑀲𑁆𑀲’’𑀦𑁆𑀢𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 ‘‘𑀏𑀯𑀁 𑀳𑁄𑀢𑀼, 𑀘𑀺𑀦𑁆𑀢𑀸𑀫𑀡𑀺 𑀯𑀺𑀬 𑀢𑁂 𑀲𑀩𑁆𑀩𑀓𑀸𑀫𑀤𑀤𑁄 𑀫𑀦𑁄𑀲𑀗𑁆𑀓𑀧𑁆𑀧𑀸 𑀧𑀼𑀡𑁆𑀡𑀘𑀦𑁆𑀤𑁄 𑀯𑀺𑀬 𑀧𑀽𑀭𑁂𑀦𑁆𑀢𑀽’’𑀢𑀺 𑀅𑀦𑀼𑀫𑁄𑀤𑀦𑀁 𑀓𑀭𑁄𑀦𑁆𑀢𑁄 𑁋

‘‘𑀇𑀘𑁆𑀙𑀺𑀢𑀁 𑀧𑀢𑁆𑀣𑀺𑀢𑀁 𑀢𑀼𑀬𑁆𑀳𑀁, 𑀲𑀩𑁆𑀩𑀫𑁂𑀯 𑀲𑀫𑀺𑀚𑁆𑀛𑀢𑀼;

𑀲𑀩𑁆𑀩𑁂 𑀧𑀽𑀭𑁂𑀦𑁆𑀢𑀼 𑀲𑀗𑁆𑀓𑀧𑁆𑀧𑀸, 𑀘𑀦𑁆𑀤𑁄 𑀧𑀦𑁆𑀦𑀭𑀲𑁄 𑀬𑀣𑀸.

‘‘𑀇𑀘𑁆𑀙𑀺𑀢𑀁 𑀧𑀢𑁆𑀣𑀺𑀓𑀁 𑀢𑀼𑀬𑁆𑀳𑀁, 𑀔𑀺𑀧𑁆𑀧𑀫𑁂𑀯 𑀲𑀫𑀺𑀚𑁆𑀛𑀢𑀼;

𑀲𑀩𑁆𑀩𑁂 𑀧𑀽𑀭𑁂𑀦𑁆𑀢𑀼 𑀲𑀗𑁆𑀓𑀧𑁆𑀧𑀸, 𑀫𑀡𑀺 𑀚𑁄𑀢𑀺𑀭𑀲𑁄 𑀬𑀣𑀸’’𑀢𑀺. 𑁋

𑀯𑀢𑁆𑀯𑀸 ‘‘𑀅𑀬𑀁 𑀫𑀳𑀸𑀚𑀦𑁄 𑀬𑀸𑀯 𑀕𑀦𑁆𑀥𑀫𑀸𑀤𑀦𑀧𑀩𑁆𑀩𑀢𑀕𑀫𑀦𑀸 𑀫𑀁 𑀧𑀲𑁆𑀲𑀦𑁆𑀢𑁄 𑀢𑀺𑀝𑁆𑀞𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀬 𑀆𑀓𑀸𑀲𑁂𑀦 𑀕𑀦𑁆𑀥𑀫𑀸𑀤𑀦𑀁 𑀅𑀕𑀫𑀸𑀲𑀺.

𑀫𑀳𑀸𑀚𑀦𑁄𑀧𑀺 𑀦𑀁 𑀧𑀲𑁆𑀲𑀦𑁆𑀢𑁄𑀯 𑀅𑀝𑁆𑀞𑀸𑀲𑀺. 𑀲𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀢𑀁 𑀧𑀺𑀡𑁆𑀟𑀧𑀸𑀢𑀁 𑀧𑀜𑁆𑀘𑀲𑀢𑀸𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀯𑀺𑀪𑀚𑀺𑀢𑁆𑀯𑀸 𑀅𑀤𑀸𑀲𑀺. 𑀲𑀩𑁆𑀩𑁂 𑀅𑀢𑁆𑀢𑀦𑁄 𑀧𑀳𑁄𑀦𑀓𑀁 𑀕𑀡𑁆𑀳𑀺𑀁𑀲𑀼. ‘‘𑀅𑀧𑁆𑀧𑁄 𑀧𑀺𑀡𑁆𑀟𑀧𑀸𑀢𑁄 𑀓𑀣𑀁 𑀧𑀳𑁄𑀲𑀻’’𑀢𑀺 𑀦 𑀘𑀺𑀦𑁆𑀢𑁂𑀢𑀩𑁆𑀩𑀁. 𑀘𑀢𑁆𑀢𑀸𑀭𑀺 𑀳𑀺 𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀺 (𑀅. 𑀦𑀺. 𑁪.𑁭𑁭) 𑀯𑀼𑀢𑁆𑀢𑀸𑀦𑀺, 𑀢𑀢𑁆𑀭𑀸𑀬𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀯𑀺𑀲𑀬𑁄𑀢𑀺. 𑀫𑀳𑀸𑀚𑀦𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀧𑀺𑀡𑁆𑀟𑀧𑀸𑀢𑀁 𑀯𑀺𑀪𑀚𑀺𑀢𑁆𑀯𑀸 𑀤𑀺𑀬𑁆𑀬𑀫𑀸𑀦𑀁 𑀤𑀺𑀲𑁆𑀯𑀸 𑀲𑀸𑀥𑀼𑀓𑀸𑀭𑀲𑀳𑀲𑁆𑀲𑀸𑀦𑀺 𑀧𑀯𑀢𑁆𑀢𑁂𑀲𑀺, 𑀅𑀲𑀦𑀺𑀲𑀢𑀦𑀺𑀧𑀸𑀓𑀲𑀤𑁆𑀤𑁄 𑀯𑀺𑀬 𑀅𑀳𑁄𑀲𑀺. 𑀢𑀁 𑀲𑀼𑀢𑁆𑀯𑀸 𑀕𑀦𑁆𑀥𑀲𑁂𑀝𑁆𑀞𑀺 𑀘𑀺𑀦𑁆𑀢𑁂𑀲𑀺 𑁋 ‘‘𑀪𑀢𑁆𑀢𑀪𑀢𑀺𑀓𑁄 𑀫𑀬𑀸 𑀤𑀺𑀦𑁆𑀦𑀲𑀫𑁆𑀧𑀢𑁆𑀢𑀺𑀁 𑀥𑀸𑀭𑁂𑀢𑀼𑀁 𑀦𑀸𑀲𑀓𑁆𑀔𑀺 𑀫𑀜𑁆𑀜𑁂, 𑀢𑁂𑀦𑀸𑀬𑀁 𑀫𑀳𑀸𑀚𑀦𑁄 𑀧𑀭𑀺𑀳𑀸𑀲𑀁 𑀓𑀭𑁄𑀦𑁆𑀢𑁄 𑀲𑀦𑁆𑀦𑀺𑀧𑀢𑀺𑀢𑁄 𑀦𑀤𑀢𑀻’’𑀢𑀺. 𑀲𑁄 𑀢𑀧𑁆𑀧𑀯𑀢𑁆𑀢𑀺𑀚𑀸𑀦𑀦𑀢𑁆𑀣𑀁 𑀫𑀦𑀼𑀲𑁆𑀲𑁂 𑀧𑁂𑀲𑁂𑀲𑀺. 𑀢𑁂 𑀆𑀕𑀦𑁆𑀢𑁆𑀯𑀸 ‘‘𑀲𑀫𑁆𑀧𑀢𑁆𑀢𑀺𑀥𑀸𑀭𑀓𑀸 𑀦𑀸𑀫, 𑀲𑀸𑀫𑀺, 𑀏𑀯𑀁 𑀳𑁄𑀦𑁆𑀢𑀽’’𑀢𑀺 𑀯𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀼𑀁. 𑀲𑁂𑀝𑁆𑀞𑀺 𑀢𑀁 𑀲𑀼𑀢𑁆𑀯𑀸𑀯 𑀧𑀜𑁆𑀘𑀯𑀡𑁆𑀡𑀸𑀬 𑀧𑀻𑀢𑀺𑀬𑀸 𑀨𑀼𑀝𑁆𑀞𑀲𑀭𑀻𑀭𑁄 𑀳𑀼𑀢𑁆𑀯𑀸 ‘‘𑀅𑀳𑁄 𑀤𑀼𑀓𑁆𑀓𑀭𑀁 𑀢𑁂𑀦 𑀓𑀢𑀁, 𑀅𑀳𑀁 𑀏𑀢𑁆𑀢𑀓𑀁 𑀓𑀸𑀮𑀁 𑀏𑀯𑀭𑀽𑀧𑀸𑀬 𑀲𑀫𑁆𑀧𑀢𑁆𑀢𑀺𑀬𑀸 𑀞𑀺𑀢𑁄 𑀓𑀺𑀜𑁆𑀘𑀺 𑀤𑀸𑀢𑀼𑀁 𑀦𑀸𑀲𑀓𑁆𑀔𑀺’’𑀦𑁆𑀢𑀺 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑀬𑀸 𑀇𑀤𑀁 𑀦𑀸𑀫 𑀓𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀆𑀫, 𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂, ‘‘𑀳𑀦𑁆𑀤, 𑀲𑀳𑀲𑁆𑀲𑀁 𑀕𑀳𑁂𑀢𑁆𑀯𑀸 𑀢𑀯 𑀤𑀸𑀦𑁂 𑀫𑀬𑁆𑀳𑀫𑁆𑀧𑀺 𑀧𑀢𑁆𑀢𑀺𑀁 𑀤𑁂𑀳𑀻’’𑀢𑀺 𑀆𑀳. 𑀲𑁄 𑀢𑀣𑀸 𑀅𑀓𑀸𑀲𑀺. 𑀲𑁂𑀝𑁆𑀞𑀺𑀧𑀺𑀲𑁆𑀲 𑀲𑀩𑁆𑀩𑀁 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀫𑀚𑁆𑀛𑁂 𑀪𑀺𑀦𑁆𑀤𑀺𑀢𑁆𑀯𑀸 𑀅𑀤𑀸𑀲𑀺.

𑀘𑀢𑀲𑁆𑀲𑁄 𑀳𑀺 𑀲𑀫𑁆𑀧𑀤𑀸 𑀦𑀸𑀫 𑁋 𑀯𑀢𑁆𑀣𑀼𑀲𑀫𑁆𑀧𑀤𑀸, 𑀧𑀘𑁆𑀘𑀬𑀲𑀫𑁆𑀧𑀤𑀸, 𑀘𑁂𑀢𑀦𑀸𑀲𑀫𑁆𑀧𑀤𑀸, 𑀕𑀼𑀡𑀸𑀢𑀺𑀭𑁂𑀓𑀲𑀫𑁆𑀧𑀤𑀸𑀢𑀺. 𑀢𑀢𑁆𑀣 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀭𑀳𑁄 𑀅𑀭𑀳𑀸 𑀯𑀸 𑀅𑀦𑀸𑀕𑀸𑀫𑀻 𑀯𑀸 𑀤𑀓𑁆𑀔𑀺𑀡𑁂𑀬𑁆𑀬𑁄 𑀯𑀢𑁆𑀣𑀼𑀲𑀫𑁆𑀧𑀤𑀸 𑀦𑀸𑀫. 𑀧𑀘𑁆𑀘𑀬𑀸𑀦𑀁 𑀥𑀫𑁆𑀫𑁂𑀦 𑀲𑀫𑁂𑀦 𑀉𑀧𑁆𑀧𑀢𑁆𑀢𑀺 𑀧𑀘𑁆𑀘𑀬𑀲𑀫𑁆𑀧𑀤𑀸 𑀦𑀸𑀫. 𑀤𑀸𑀦𑀢𑁄 𑀧𑀼𑀩𑁆𑀩𑁂 𑀤𑀸𑀦𑀓𑀸𑀮𑁂 𑀧𑀘𑁆𑀙𑀸 𑀪𑀸𑀕𑁂𑀢𑀺 𑀢𑀻𑀲𑀼 𑀓𑀸𑀮𑁂𑀲𑀼 𑀘𑁂𑀢𑀦𑀸𑀬 𑀲𑁄𑀫𑀦𑀲𑁆𑀲𑀲𑀳𑀕𑀢𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀪𑀸𑀯𑁄 𑀘𑁂𑀢𑀦𑀸𑀲𑀫𑁆𑀧𑀤𑀸 𑀦𑀸𑀫. 𑀤𑀓𑁆𑀔𑀺𑀡𑁂𑀬𑁆𑀬𑀲𑁆𑀲 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀺𑀢𑀪𑀸𑀯𑁄 𑀕𑀼𑀡𑀸𑀢𑀺𑀭𑁂𑀓𑀲𑀫𑁆𑀧𑀤𑀸 𑀦𑀸𑀫𑀸𑀢𑀺. 𑀇𑀫𑀲𑁆𑀲 𑀘 𑀔𑀻𑀡𑀸𑀲𑀯𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀤𑀓𑁆𑀔𑀺𑀡𑁂𑀬𑁆𑀬𑀸, 𑀪𑀢𑀺𑀁 𑀓𑀢𑁆𑀯𑀸 𑀮𑀤𑁆𑀥𑀪𑀸𑀯𑁂𑀦 𑀧𑀘𑁆𑀘𑀬𑁄 𑀥𑀫𑁆𑀫𑀢𑁄 𑀉𑀧𑁆𑀧𑀦𑁆𑀦𑁄, 𑀢𑀻𑀲𑀼 𑀓𑀸𑀮𑁂𑀲𑀼 𑀧𑀭𑀺𑀲𑀼𑀤𑁆𑀥𑀸 𑀘𑁂𑀢𑀦𑀸, 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀺𑀢𑀫𑀢𑁆𑀢𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀕𑀼𑀡𑀸𑀢𑀺𑀭𑁂𑀓𑁄𑀢𑀺 𑀘𑀢𑀲𑁆𑀲𑁄𑀧𑀺 𑀲𑀫𑁆𑀧𑀤𑀸 𑀦𑀺𑀧𑁆𑀨𑀦𑁆𑀦𑀸. 𑀏𑀢𑀸𑀲𑀁 𑀆𑀦𑀼𑀪𑀸𑀯𑁂𑀦 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀫𑀳𑀸𑀲𑀫𑁆𑀧𑀢𑁆𑀢𑀺𑀁 𑀧𑀸𑀧𑀼𑀡𑀦𑁆𑀢𑀺. 𑀢𑀲𑁆𑀫𑀸 𑀲𑁄 𑀲𑁂𑀝𑁆𑀞𑀺𑀦𑁄 𑀲𑀦𑁆𑀢𑀺𑀓𑀸 𑀲𑀫𑁆𑀧𑀢𑁆𑀢𑀺𑀁 𑀮𑀪𑀺. 𑀅𑀧𑀭𑀪𑀸𑀕𑁂 𑀘 𑀭𑀸𑀚𑀸𑀧𑀺 𑀇𑀫𑀺𑀦𑀸 𑀓𑀢𑀓𑀫𑁆𑀫𑀁 𑀲𑀼𑀢𑁆𑀯𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀲𑀳𑀲𑁆𑀲𑀁 𑀤𑀢𑁆𑀯𑀸 𑀧𑀢𑁆𑀢𑀺𑀁 𑀕𑀳𑁂𑀢𑁆𑀯𑀸 𑀢𑀼𑀝𑁆𑀞𑀫𑀸𑀦𑀲𑁄 𑀫𑀳𑀦𑁆𑀢𑀁 𑀪𑁄𑀕𑀓𑁆𑀔𑀦𑁆𑀥𑀁 𑀤𑀢𑁆𑀯𑀸 𑀲𑁂𑀝𑁆𑀞𑀺𑀝𑁆𑀞𑀸𑀦𑀁 𑀅𑀤𑀸𑀲𑀺. 𑀪𑀢𑁆𑀢𑀪𑀢𑀺𑀓𑀲𑁂𑀝𑁆𑀞𑀻𑀢𑀺𑀲𑁆𑀲 𑀦𑀸𑀫𑀁 𑀅𑀓𑀸𑀲𑀺. 𑀲𑁄 𑀕𑀦𑁆𑀥𑀲𑁂𑀝𑁆𑀞𑀺𑀦𑀸 𑀲𑀤𑁆𑀥𑀺𑀁 𑀲𑀳𑀸𑀬𑁄 𑀳𑀼𑀢𑁆𑀯𑀸 𑀏𑀓𑀢𑁄 𑀔𑀸𑀤𑀦𑁆𑀢𑁄 𑀧𑀺𑀯𑀦𑁆𑀢𑁄 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲𑀽𑀧𑀝𑁆𑀞𑀸𑀓𑀓𑀼𑀮𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀅𑀣𑀲𑁆𑀲 𑀫𑀸𑀢𑀸 𑀮𑀤𑁆𑀥𑀕𑀩𑁆𑀪𑀧𑀭𑀺𑀳𑀸𑀭𑀸 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 ‘‘𑀅𑀳𑁄 𑀯𑀢𑀸𑀳𑀁 𑀧𑀜𑁆𑀘𑀲𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀲𑀢𑀭𑀲𑀪𑁄𑀚𑀦𑀁 𑀤𑀢𑁆𑀯𑀸 𑀓𑀸𑀲𑀸𑀬𑀯𑀢𑁆𑀣𑀦𑀺𑀯𑀢𑁆𑀣𑀸 𑀲𑀼𑀯𑀡𑁆𑀡𑀲𑀭𑀓𑀁 𑀆𑀤𑀸𑀬 𑀆𑀲𑀦𑀧𑀭𑀺𑀬𑀦𑁆𑀢𑁂 𑀦𑀺𑀲𑀺𑀦𑁆𑀦𑀸 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀉𑀘𑁆𑀙𑀺𑀝𑁆𑀞𑀸𑀯𑀲𑁂𑀲𑀓𑀁 𑀧𑀭𑀺𑀪𑀼𑀜𑁆𑀚𑁂𑀬𑁆𑀬’’𑀦𑁆𑀢𑀺 𑀤𑁄𑀳𑀴𑀺𑀦𑀻 𑀳𑀼𑀢𑁆𑀯𑀸 𑀢𑀣𑁂𑀯 𑀓𑀢𑁆𑀯𑀸 𑀤𑁄𑀳𑀴𑀁 𑀧𑀝𑀺𑀯𑀺𑀦𑁄𑀤𑁂𑀲𑀺. 𑀲𑀸 𑀲𑁂𑀲𑀫𑀗𑁆𑀕𑀮𑁂𑀲𑀼𑀧𑀺 𑀢𑀣𑀸𑀭𑀽𑀧𑀫𑁂𑀯 𑀤𑀸𑀦𑀁 𑀤𑀢𑁆𑀯𑀸 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺𑀢𑁆𑀯𑀸 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 ‘‘𑀧𑀼𑀢𑁆𑀢𑀲𑁆𑀲 𑀫𑁂, 𑀪𑀦𑁆𑀢𑁂, 𑀲𑀺𑀓𑁆𑀔𑀸𑀧𑀤𑀸𑀦𑀺 𑀤𑁂𑀣𑀸’’𑀢𑀺 𑀣𑁂𑀭𑀁 𑀆𑀳. 𑀣𑁂𑀭𑁄 ‘‘𑀓𑀺𑀫𑀲𑁆𑀲 𑀦𑀸𑀫’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀪𑀦𑁆𑀢𑁂, 𑀧𑀼𑀢𑁆𑀢𑀲𑁆𑀲 𑀫𑁂 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀢𑁄 𑀧𑀝𑁆𑀞𑀸𑀬 𑀇𑀫𑀲𑁆𑀫𑀺𑀁 𑀕𑁂𑀳𑁂 𑀓𑀲𑁆𑀲𑀘𑀺 𑀤𑀼𑀓𑁆𑀔𑀁 𑀦𑀸𑀫 𑀦 𑀪𑀽𑀢𑀧𑀼𑀩𑁆𑀩𑀁, 𑀢𑁂𑀦𑁂𑀯𑀲𑁆𑀲 𑀲𑀼𑀔𑀓𑀼𑀫𑀸𑀭𑁄𑀢𑀺 𑀦𑀸𑀫𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑁂 𑀢𑀤𑁂𑀯𑀲𑁆𑀲 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀲𑀺𑀓𑁆𑀔𑀸𑀧𑀤𑀸𑀦𑀺 𑀅𑀤𑀸𑀲𑀺.

𑀢𑀤𑀸 𑀏𑀯𑀜𑁆𑀘𑀲𑁆𑀲 𑀫𑀸𑀢𑀼 ‘‘𑀦𑀸𑀳𑀁 𑀫𑀫 𑀧𑀼𑀢𑁆𑀢𑀲𑁆𑀲 𑀅𑀚𑁆𑀛𑀸𑀲𑀬𑀁 𑀪𑀺𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺. 𑀲𑀸 𑀢𑀲𑁆𑀲 𑀓𑀡𑁆𑀡𑀯𑀺𑀚𑁆𑀛𑀦𑀫𑀗𑁆𑀕𑀮𑀸𑀤𑀻𑀲𑀼𑀧𑀺 𑀢𑀣𑁂𑀯 𑀤𑀸𑀦𑀁 𑀅𑀤𑀸𑀲𑀺. 𑀓𑀼𑀫𑀸𑀭𑁄𑀧𑀺 𑀲𑀢𑁆𑀢𑀯𑀲𑁆𑀲𑀺𑀓𑀓𑀸𑀮𑁂 ‘‘𑀇𑀘𑁆𑀙𑀸𑀫𑀳𑀁, 𑀅𑀫𑁆𑀫, 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑀼’’𑀦𑁆𑀢𑀺 𑀆𑀳. 𑀲𑀸 ‘‘𑀲𑀸𑀥𑀼, 𑀢𑀸𑀢, 𑀦𑀸𑀳𑀁 𑀢𑀯 𑀅𑀚𑁆𑀛𑀸𑀲𑀬𑀁 𑀪𑀺𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀣𑁂𑀭𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀪𑁄𑀚𑁂𑀢𑁆𑀯𑀸, ‘‘𑀪𑀦𑁆𑀢𑁂, 𑀧𑀼𑀢𑁆𑀢𑁄 𑀫𑁂 𑀧𑀩𑁆𑀩𑀚𑀺𑀢𑀼𑀁 𑀇𑀘𑁆𑀙𑀢𑀺, 𑀇𑀫𑀸𑀳𑀁 𑀲𑀸𑀬𑀦𑁆𑀳𑀲𑀫𑀬𑁂 𑀯𑀺𑀳𑀸𑀭𑀁 𑀆𑀦𑁂𑀲𑁆𑀲𑀸𑀫𑀻’’𑀢𑀺 𑀣𑁂𑀭𑀁 𑀉𑀬𑁆𑀬𑁄𑀚𑁂𑀢𑁆𑀯𑀸 𑀜𑀸𑀢𑀓𑁂 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 ‘‘𑀧𑀼𑀢𑁆𑀢𑀲𑁆𑀲 𑀫𑁂 𑀕𑀺𑀳𑀺𑀓𑀸𑀮𑁂 𑀓𑀢𑁆𑀢𑀩𑁆𑀩𑀁 𑀓𑀺𑀘𑁆𑀘𑀁 𑀅𑀚𑁆𑀚𑁂𑀯 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀧𑀼𑀢𑁆𑀢𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀫𑀳𑀦𑁆𑀢𑁂𑀦 𑀲𑀺𑀭𑀺𑀲𑁄𑀪𑀕𑁆𑀕𑁂𑀦 𑀯𑀺𑀳𑀸𑀭𑀁 𑀦𑁂𑀢𑁆𑀯𑀸 𑀣𑁂𑀭𑀲𑁆𑀲 𑀦𑀺𑀬𑁆𑀬𑀸𑀤𑁂𑀲𑀺. 𑀣𑁂𑀭𑁄𑀧𑀺 𑀢𑀁, ‘‘𑀢𑀸𑀢, 𑀧𑀩𑁆𑀩𑀚𑁆𑀚𑀸 𑀦𑀸𑀫 𑀤𑀼𑀓𑁆𑀓𑀭𑀸, 𑀲𑀓𑁆𑀔𑀺𑀲𑁆𑀲𑀲𑀺 𑀅𑀪𑀺𑀭𑀫𑀺𑀢𑀼’’𑀦𑁆𑀢𑀺 𑀯𑀢𑁆𑀯𑀸 ‘‘𑀓𑀭𑀺𑀲𑁆𑀲𑀸𑀫𑀺 𑀯𑁄, 𑀪𑀦𑁆𑀢𑁂, 𑀑𑀯𑀸𑀤’’𑀦𑁆𑀢𑀺 𑀯𑀼𑀢𑁆𑀢𑁂 𑀓𑀫𑁆𑀫𑀝𑁆𑀞𑀸𑀦𑀁 𑀤𑀢𑁆𑀯𑀸 𑀧𑀩𑁆𑀩𑀸𑀚𑁂𑀲𑀺. 𑀫𑀸𑀢𑀸𑀧𑀺𑀢𑀭𑁄𑀧𑀺𑀲𑁆𑀲 𑀧𑀩𑁆𑀩𑀚𑁆𑀚𑀸𑀬 𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑀸 𑀅𑀦𑁆𑀢𑁄𑀯𑀺𑀳𑀸𑀭𑁂𑀬𑁂𑀯 𑀲𑀢𑁆𑀢𑀸𑀳𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑀢𑀭𑀲𑀪𑁄𑀚𑀦𑀁 𑀤𑀢𑁆𑀯𑀸 𑀲𑀸𑀬𑀁 𑀅𑀢𑁆𑀢𑀦𑁄 𑀕𑁂𑀳𑀁 𑀅𑀕𑀫𑀁𑀲𑀼. 𑀅𑀝𑁆𑀞𑀫𑁂 𑀤𑀺𑀯𑀲𑁂 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀪𑀺𑀓𑁆𑀔𑀼𑀲𑀗𑁆𑀖𑁂 𑀕𑀸𑀫𑀁 𑀧𑀯𑀺𑀝𑁆𑀞𑁂 𑀯𑀺𑀳𑀸𑀭𑁂 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀓𑀢𑁆𑀯𑀸 𑀲𑀸𑀫𑀡𑁂𑀭𑀁 𑀧𑀢𑁆𑀢𑀘𑀻𑀯𑀭𑀁 𑀕𑀸𑀳𑀸𑀧𑁂𑀢𑁆𑀯𑀸 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀲𑀸𑀫𑀡𑁂𑀭𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀫𑀸𑀢𑀺𑀓𑀸𑀤𑀻𑀦𑀺 𑀤𑀺𑀲𑁆𑀯𑀸 𑀧𑀡𑁆𑀟𑀺𑀢𑀲𑀸𑀫𑀡𑁂𑀭𑁄 𑀯𑀺𑀬 𑀧𑀼𑀘𑁆𑀙𑀺. 𑀣𑁂𑀭𑁄𑀧𑀺 𑀢𑀲𑁆𑀲 𑀢𑀣𑁂𑀯 𑀩𑁆𑀬𑀸𑀓𑀸𑀲𑀺. 𑀲𑀸𑀫𑀡𑁂𑀭𑁄 𑀢𑀸𑀦𑀺 𑀓𑀸𑀭𑀡𑀸𑀦𑀺 𑀲𑀼𑀢𑁆𑀯𑀸 ‘‘𑀲𑀘𑁂 𑀢𑀼𑀫𑁆𑀳𑁂 𑀅𑀢𑁆𑀢𑀦𑁄 𑀧𑀢𑁆𑀢𑀘𑀻𑀯𑀭𑀁 𑀕𑀡𑁆𑀳𑁂𑀬𑁆𑀬𑀸𑀣, 𑀅𑀳𑀁 𑀦𑀺𑀯𑀢𑁆𑀢𑁂𑀬𑁆𑀬’’𑀦𑁆𑀢𑀺 𑀯𑀢𑁆𑀯𑀸 𑀣𑁂𑀭𑁂𑀦 𑀢𑀲𑁆𑀲 𑀅𑀚𑁆𑀛𑀸𑀲𑀬𑀁 𑀅𑀪𑀺𑀦𑁆𑀤𑀺𑀢𑁆𑀯𑀸, ‘‘𑀲𑀸𑀫𑀡𑁂𑀭, 𑀤𑁂𑀳𑀺 𑀫𑀫 𑀧𑀢𑁆𑀢𑀘𑀻𑀯𑀭’’𑀦𑁆𑀢𑀺 𑀧𑀢𑁆𑀢𑀘𑀻𑀯𑀭𑁂 𑀕𑀳𑀺𑀢𑁂 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀯𑀢𑁆𑀢𑀫𑀸𑀦𑁄, ‘‘𑀪𑀦𑁆𑀢𑁂, 𑀫𑀬𑁆𑀳𑀁 𑀆𑀳𑀸𑀭𑀁 𑀆𑀳𑀭𑀫𑀸𑀦𑁄 𑀲𑀢𑀭𑀲𑀪𑁄𑀚𑀦𑀁 𑀆𑀳𑀭𑁂𑀬𑁆𑀬𑀸𑀣𑀸’’𑀢𑀺 𑀆𑀳. 𑀓𑀼𑀢𑁄 𑀢𑀁 𑀮𑀪𑀺𑀲𑁆𑀲𑀸𑀫𑀻𑀢𑀺? 𑀅𑀢𑁆𑀢𑀦𑁄 𑀧𑀼𑀜𑁆𑀜𑁂𑀦 𑀅𑀮𑀪𑀦𑁆𑀢𑁄 𑀫𑀫 𑀧𑀼𑀜𑁆𑀜𑁂𑀦 𑀮𑀪𑀺𑀲𑁆𑀲𑀣, 𑀪𑀦𑁆𑀢𑁂𑀢𑀺. 𑀅𑀣𑀲𑁆𑀲 𑀣𑁂𑀭𑁄 𑀓𑀼𑀜𑁆𑀘𑀺𑀓𑀁 𑀤𑀢𑁆𑀯𑀸 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀲𑁄𑀧𑀺 𑀯𑀺𑀳𑀸𑀭𑀁 𑀆𑀕𑀦𑁆𑀢𑁆𑀯𑀸 𑀣𑁂𑀭𑀲𑁆𑀲 𑀕𑀩𑁆𑀪𑀁 𑀯𑀺𑀯𑀭𑀺𑀢𑁆𑀯𑀸 𑀧𑀯𑀺𑀲𑀺𑀢𑁆𑀯𑀸 𑀤𑁆𑀯𑀸𑀭𑀁 𑀧𑀺𑀥𑀸𑀬 𑀅𑀢𑁆𑀢𑀦𑁄 𑀓𑀸𑀬𑁂 𑀜𑀸𑀡𑀁 𑀑𑀢𑀸𑀭𑁂𑀢𑁆𑀯𑀸 𑀦𑀺𑀲𑀻𑀤𑀺.

𑀢𑀲𑁆𑀲 𑀕𑀼𑀡𑀢𑁂𑀚𑁂𑀦 𑀲𑀓𑁆𑀓𑀲𑁆𑀲 𑀆𑀲𑀦𑀁 𑀉𑀡𑁆𑀳𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀲𑀓𑁆𑀓𑁄 ‘‘𑀓𑀺𑀁 𑀦𑀼 𑀔𑁄 𑀏𑀢’’𑀦𑁆𑀢𑀺 𑀑𑀮𑁄𑀓𑁂𑀦𑁆𑀢𑁄 𑀲𑀸𑀫𑀡𑁂𑀭𑀁 𑀤𑀺𑀲𑁆𑀯𑀸 ‘‘𑀲𑀼𑀔𑀲𑀸𑀫𑀡𑁂𑀭𑁄 𑀅𑀢𑁆𑀢𑀦𑁄 𑀉𑀧𑀚𑁆𑀛𑀸𑀬𑀲𑁆𑀲 𑀧𑀢𑁆𑀢𑀘𑀻𑀯𑀭𑀁 𑀤𑀢𑁆𑀯𑀸 ‘𑀲𑀫𑀡𑀥𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺 𑀦𑀺𑀯𑀢𑁆𑀢𑁄, 𑀫𑀬𑀸 𑀢𑀢𑁆𑀣 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀕𑀘𑁆𑀙𑀣, 𑀢𑀸𑀢𑀸, 𑀯𑀺𑀳𑀸𑀭𑀲𑁆𑀲𑀽𑀧𑀯𑀦𑁂 𑀤𑀼𑀲𑁆𑀲𑀤𑁆𑀤𑀓𑁂 𑀲𑀓𑀼𑀡𑁂 𑀧𑀮𑀸𑀧𑁂𑀣𑀸’’𑀢𑀺 𑀉𑀬𑁆𑀬𑁄𑀚𑁂𑀲𑀺. 𑀢𑁂 𑀢𑀣𑀸 𑀓𑀢𑁆𑀯𑀸 𑀲𑀸𑀫𑀦𑁆𑀢𑀸 𑀆𑀭𑀓𑁆𑀔𑀁 𑀕𑀡𑁆𑀳𑀺𑀁𑀲𑀼. 𑀘𑀦𑁆𑀤𑀺𑀫𑀲𑀽𑀭𑀺𑀬𑁂 ‘‘𑀅𑀢𑁆𑀢𑀦𑁄 𑀯𑀺𑀫𑀸𑀦𑀸𑀦𑀺 𑀕𑀳𑁂𑀢𑁆𑀯𑀸 𑀢𑀺𑀝𑁆𑀞𑀣𑀸’’𑀢𑀺 𑀆𑀡𑀸𑀧𑁂𑀲𑀺. 𑀢𑁂𑀧𑀺 𑀢𑀣𑀸 𑀓𑀭𑀺𑀁𑀲𑀼. 𑀲𑀬𑀫𑁆𑀧𑀺 𑀆𑀯𑀺𑀜𑁆𑀙𑀦𑀝𑁆𑀞𑀸𑀦𑁂 𑀆𑀭𑀓𑁆𑀔𑀁 𑀕𑀡𑁆𑀳𑀺. 𑀯𑀺𑀳𑀸𑀭𑁄 𑀲𑀦𑁆𑀦𑀺𑀲𑀺𑀦𑁆𑀦𑁄 𑀦𑀺𑀭𑀯𑁄 𑀅𑀳𑁄𑀲𑀺. 𑀲𑀸𑀫𑀡𑁂𑀭𑁄 𑀏𑀓𑀕𑁆𑀕𑀘𑀺𑀢𑁆𑀢𑁂𑀦 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀢𑀻𑀡𑀺 𑀫𑀕𑁆𑀕𑀨𑀮𑀸𑀦𑀺 𑀧𑀸𑀧𑀼𑀡𑀺. 𑀣𑁂𑀭𑁄 ‘‘𑀲𑀸𑀫𑀡𑁂𑀭𑁂𑀦 ‘𑀲𑀢𑀭𑀲𑀪𑁄𑀚𑀦𑀁 𑀆𑀳𑀭𑁂𑀬𑁆𑀬𑀸𑀣𑀸’𑀢𑀺 𑀯𑀼𑀢𑁆𑀢𑀁, 𑀓𑀲𑁆𑀲 𑀦𑀼 𑀔𑁄 𑀖𑀭𑁂 𑀲𑀓𑁆𑀓𑀸 𑀮𑀤𑁆𑀥𑀼’’𑀦𑁆𑀢𑀺 𑀑𑀮𑁄𑀓𑁂𑀦𑁆𑀢𑁄 𑀏𑀓𑀁 𑀅𑀚𑁆𑀛𑀸𑀲𑀬𑀲𑀫𑁆𑀧𑀦𑁆𑀦𑀁 𑀉𑀧𑀝𑁆𑀞𑀸𑀓𑀢𑀼𑀮𑀁 𑀤𑀺𑀲𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸, ‘‘𑀪𑀦𑁆𑀢𑁂, 𑀲𑀸𑀥𑀼 𑀯𑁄 𑀓𑀢𑀁 𑀅𑀚𑁆𑀚 𑀇𑀥𑀸𑀕𑀘𑁆𑀙𑀦𑁆𑀢𑁂𑀳𑀻’’𑀢𑀺 𑀢𑁂𑀳𑀺 𑀢𑀼𑀝𑁆𑀞𑀫𑀸𑀦𑀲𑁂𑀳𑀺 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀬𑀸𑀕𑀼𑀔𑀚𑁆𑀚𑀓𑀁 𑀤𑀢𑁆𑀯𑀸 𑀬𑀸𑀯 𑀪𑀢𑁆𑀢𑀓𑀸𑀮𑀁 𑀥𑀫𑁆𑀫𑀓𑀣𑀁 𑀬𑀸𑀘𑀺𑀢𑁄 𑀢𑁂𑀲𑀁 𑀲𑀸𑀭𑀡𑀻𑀬𑀥𑀫𑁆𑀫𑀓𑀣𑀁 𑀓𑀣𑁂𑀢𑁆𑀯𑀸 𑀓𑀸𑀮𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺. 𑀅𑀣𑀲𑁆𑀲 𑀲𑀢𑀭𑀲𑀪𑁄𑀚𑀦𑀁 𑀤𑀢𑁆𑀯𑀸 𑀢𑀁 𑀆𑀤𑀸𑀬 𑀕𑀦𑁆𑀢𑀼𑀓𑀸𑀫𑀁 𑀣𑁂𑀭𑀁 𑀤𑀺𑀲𑁆𑀯𑀸 ‘‘𑀪𑀼𑀜𑁆𑀚𑀣, 𑀪𑀦𑁆𑀢𑁂, 𑀅𑀧𑀭𑀫𑁆𑀧𑀺 𑀢𑁂 𑀤𑀲𑁆𑀲𑀸𑀫𑀸’’𑀢𑀺 𑀣𑁂𑀭𑀁 𑀪𑁄𑀚𑁂𑀢𑁆𑀯𑀸 𑀧𑀼𑀦 𑀧𑀢𑁆𑀢𑀧𑀽𑀭𑀁 𑀅𑀤𑀁𑀲𑀼. 𑀣𑁂𑀭𑁄 𑀢𑀁 𑀆𑀤𑀸𑀬 ‘‘𑀲𑀸𑀫𑀡𑁂𑀭𑁄 𑀫𑁂 𑀙𑀸𑀢𑁄’’𑀢𑀺 𑀢𑀼𑀭𑀺𑀢𑀢𑀼𑀭𑀺𑀢𑁄 𑀯𑀺𑀳𑀸𑀭𑀁 𑀧𑀸𑀬𑀸𑀲𑀺. 𑀢𑀁 𑀤𑀺𑀯𑀲𑀁 𑀲𑀢𑁆𑀣𑀸 𑀧𑀸𑀢𑁄𑀯 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀬𑀁 𑀦𑀺𑀲𑀺𑀦𑁆𑀦𑁄𑀯 𑀆𑀯𑀚𑁆𑀚𑁂𑀲𑀺 𑁋 ‘‘𑀅𑀚𑁆𑀚 𑀲𑀼𑀔𑀲𑀸𑀫𑀡𑁂𑀭𑁄 𑀉𑀧𑀚𑁆𑀛𑀸𑀬𑀲𑁆𑀲 𑀧𑀢𑁆𑀢𑀘𑀻𑀯𑀭𑀁 𑀤𑀢𑁆𑀯𑀸 ‘𑀲𑀫𑀡𑀥𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺 𑀦𑀺𑀯𑀢𑁆𑀢𑁄, 𑀦𑀺𑀧𑁆𑀨𑀦𑁆𑀦𑀁 𑀦𑀼 𑀔𑁄 𑀢𑀲𑁆𑀲 𑀓𑀺𑀘𑁆𑀘’’𑀦𑁆𑀢𑀺. 𑀲𑁄 𑀢𑀺𑀡𑁆𑀡𑀁𑀬𑁂𑀯 𑀫𑀕𑁆𑀕𑀨𑀮𑀸𑀦𑀁 𑀧𑀢𑁆𑀢𑀪𑀸𑀯𑀁 𑀤𑀺𑀲𑁆𑀯𑀸 𑀉𑀢𑁆𑀢𑀭𑀺𑀧𑀺 𑀉𑀧𑀥𑀸𑀭𑁂𑀦𑁆𑀢𑁄 ‘‘𑀲𑀓𑁆𑀔𑀺𑀲𑁆𑀲𑀢𑀸𑀬𑀁 𑀅𑀚𑁆𑀚 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑀼𑀁, 𑀲𑀸𑀭𑀺𑀧𑀼𑀢𑁆𑀢𑁄 𑀧𑀦 ‘𑀲𑀸𑀫𑀡𑁂𑀭𑁄 𑀫𑁂 𑀙𑀸𑀢𑁄’𑀢𑀺 𑀯𑁂𑀕𑁂𑀦 𑀪𑀢𑁆𑀢𑀁 𑀆𑀤𑀸𑀬 𑀦𑀺𑀓𑁆𑀔𑀫𑀢𑀺, 𑀲𑀘𑁂 𑀇𑀫𑀲𑁆𑀫𑀺𑀁 𑀅𑀭𑀳𑀢𑁆𑀢𑀁 𑀅𑀧𑁆𑀧𑀢𑁆𑀢𑁂 𑀪𑀢𑁆𑀢𑀁 𑀆𑀳𑀭𑀺𑀲𑁆𑀲𑀢𑀺, 𑀇𑀫𑀲𑁆𑀲 𑀅𑀦𑁆𑀢𑀭𑀸𑀬𑁄 𑀪𑀯𑀺𑀲𑁆𑀲𑀢𑀺, 𑀫𑀬𑀸 𑀕𑀦𑁆𑀢𑁆𑀯𑀸 𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀆𑀭𑀓𑁆𑀔𑀁 𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀞𑀢𑁆𑀯𑀸 𑀆𑀭𑀓𑁆𑀔𑀁 𑀕𑀡𑁆𑀳𑀺.

𑀣𑁂𑀭𑁄𑀧𑀺 𑀪𑀢𑁆𑀢𑀁 𑀆𑀳𑀭𑀺. 𑀅𑀣 𑀦𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀘𑀢𑁆𑀢𑀸𑀭𑁄 𑀧𑀜𑁆𑀳𑁂 𑀧𑀼𑀘𑁆𑀙𑀺. 𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑀸𑀯𑀲𑀸𑀦𑁂 𑀲𑀸𑀫𑀡𑁂𑀭𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀲𑀢𑁆𑀣𑀸 𑀣𑁂𑀭𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀕𑀘𑁆𑀙, 𑀲𑀸𑀭𑀺𑀧𑀼𑀢𑁆𑀢, 𑀲𑀸𑀫𑀡𑁂𑀭𑀲𑁆𑀲 𑀢𑁂 𑀪𑀢𑁆𑀢𑀁 𑀤𑁂𑀳𑀻’’𑀢𑀺 𑀆𑀳. 𑀣𑁂𑀭𑁄 𑀕𑀦𑁆𑀢𑁆𑀯𑀸 𑀤𑁆𑀯𑀸𑀭𑀁 𑀆𑀓𑁄𑀝𑁂𑀲𑀺. 𑀲𑀸𑀫𑀡𑁂𑀭𑁄𑀧𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀉𑀧𑀚𑁆𑀛𑀸𑀬𑀲𑁆𑀲 𑀯𑀢𑁆𑀢𑀁 𑀓𑀢𑁆𑀯𑀸 ‘‘𑀪𑀢𑁆𑀢𑀓𑀺𑀘𑁆𑀘𑀁 𑀓𑀭𑁄𑀳𑀻’’𑀢𑀺 𑀯𑀼𑀢𑁆𑀢𑁂 𑀣𑁂𑀭𑀲𑁆𑀲 𑀪𑀢𑁆𑀢𑁂𑀦 𑀅𑀦𑀢𑁆𑀣𑀺𑀓𑀪𑀸𑀯𑀁 𑀜𑀢𑁆𑀯𑀸 𑀲𑀢𑁆𑀢𑀯𑀲𑁆𑀲𑀺𑀓𑀓𑀼𑀫𑀸𑀭𑁄 𑀢𑀗𑁆𑀔𑀡𑀜𑁆𑀜𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀦𑀻𑀘𑀸𑀲𑀦𑀝𑁆𑀞𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀧𑀢𑁆𑀢𑀁 𑀥𑁄𑀯𑀺. 𑀢𑀲𑁆𑀫𑀺𑀁 𑀓𑀸𑀮𑁂 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀆𑀭𑀓𑁆𑀔𑀁 𑀯𑀺𑀲𑁆𑀲𑀚𑁆𑀚𑁂𑀲𑀼𑀁. 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀧𑀺 𑀯𑀺𑀫𑀸𑀦𑀸𑀦𑀺 𑀫𑀼𑀜𑁆𑀘𑀺𑀁𑀲𑀼. 𑀲𑀓𑁆𑀓𑁄𑀧𑀺 𑀆𑀯𑀺𑀜𑁆𑀙𑀦𑀝𑁆𑀞𑀸𑀦𑁂 𑀆𑀭𑀓𑁆𑀔𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀲𑀽𑀭𑀺𑀬𑁄 𑀦𑀪𑀫𑀚𑁆𑀛𑀁 𑀅𑀢𑀺𑀓𑁆𑀓𑀦𑁆𑀢𑁄𑀬𑁂𑀯 𑀧𑀜𑁆𑀜𑀸𑀬𑀺. 𑀪𑀺𑀓𑁆𑀔𑀽 ‘‘𑀲𑀸𑀬𑀦𑁆𑀳𑁄 𑀧𑀜𑁆𑀜𑀸𑀬𑀢𑀺, 𑀲𑀸𑀫𑀡𑁂𑀭𑁂𑀦 𑀘 𑀇𑀤𑀸𑀦𑁂𑀯 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑀁, 𑀓𑀺𑀁 𑀦𑀼 𑀔𑁄 𑀅𑀚𑁆𑀚 𑀧𑀼𑀩𑁆𑀩𑀡𑁆𑀳𑁄 𑀩𑀮𑀯𑀸 𑀚𑀸𑀢𑁄, 𑀲𑀸𑀬𑀦𑁆𑀳𑁄 𑀫𑀦𑁆𑀤𑁄’’𑀢𑀺 𑀯𑀤𑀺𑀁𑀲𑀼. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀅𑀚𑁆𑀚 𑀧𑀼𑀩𑁆𑀩𑀡𑁆𑀳𑁄 𑀩𑀮𑀯𑀸 𑀚𑀸𑀢𑁄, 𑀲𑀸𑀬𑀦𑁆𑀳𑁄 𑀫𑀦𑁆𑀤𑁄, 𑀲𑀸𑀫𑀡𑁂𑀭𑁂𑀦 𑀘 𑀇𑀤𑀸𑀦𑁂𑀯 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑀁, 𑀅𑀣 𑀘 𑀧𑀦 𑀲𑀽𑀭𑀺𑀬𑁄 𑀦𑀪𑀫𑀚𑁆𑀛𑀁 𑀅𑀢𑀺𑀓𑁆𑀓𑀦𑁆𑀢𑁄𑀬𑁂𑀯 𑀧𑀜𑁆𑀜𑀸𑀬𑀢𑀻’’𑀢𑀺 𑀯𑀼𑀢𑁆𑀢𑁂, ‘‘𑀪𑀺𑀓𑁆𑀔𑀯𑁂, 𑀏𑀯𑀫𑁂𑀯𑀁 𑀳𑁄𑀢𑀺 𑀧𑀼𑀜𑁆𑀜𑀯𑀦𑁆𑀢𑀸𑀦𑀁 𑀲𑀫𑀡𑀥𑀫𑁆𑀫𑀓𑀭𑀡𑀓𑀸𑀮𑁂. 𑀅𑀚𑁆𑀚 𑀳𑀺 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀲𑀸𑀫𑀦𑁆𑀢𑀸 𑀆𑀭𑀓𑁆𑀔𑀁 𑀕𑀡𑁆𑀳𑀺𑀁𑀲𑀼, 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀯𑀺𑀫𑀸𑀦𑀸𑀦𑀺 𑀕𑀳𑁂𑀢𑁆𑀯𑀸 𑀅𑀝𑁆𑀞𑀁𑀲𑀼, 𑀲𑀓𑁆𑀓𑁄 𑀆𑀯𑀺𑀜𑁆𑀙𑀦𑀓𑁂 𑀆𑀭𑀓𑁆𑀔𑀁 𑀕𑀡𑁆𑀳𑀺, 𑀅𑀳𑀫𑁆𑀧𑀺 𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀆𑀭𑀓𑁆𑀔𑀁 𑀕𑀡𑁆𑀳𑀺𑀁, 𑀅𑀚𑁆𑀚 𑀲𑀼𑀔𑀲𑀸𑀫𑀡𑁂𑀭𑁄 𑀫𑀸𑀢𑀺𑀓𑀸𑀬 𑀉𑀤𑀓𑀁 𑀳𑀭𑀦𑁆𑀢𑁂, 𑀉𑀲𑀼𑀓𑀸𑀭𑁂 𑀉𑀲𑀼𑀁 𑀉𑀚𑀼𑀁 𑀓𑀭𑁄𑀦𑁆𑀢𑁂, 𑀢𑀘𑁆𑀙𑀓𑁂 𑀘𑀓𑁆𑀓𑀸𑀤𑀻𑀦𑀺 𑀓𑀭𑁄𑀦𑁆𑀢𑁂 𑀤𑀺𑀲𑁆𑀯𑀸 𑀅𑀢𑁆𑀢𑀸𑀦𑀁 𑀤𑀫𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁪𑁫. ‘‘𑀉𑀤𑀓𑀜𑁆𑀳𑀺 𑀦𑀬𑀦𑁆𑀢𑀺 𑀦𑁂𑀢𑁆𑀢𑀺𑀓𑀸, 𑀉𑀲𑀼𑀓𑀸𑀭𑀸 𑀦𑀫𑀬𑀦𑁆𑀢𑀺 𑀢𑁂𑀚𑀦𑀁;

𑀤𑀸𑀭𑀼𑀁 𑀦𑀫𑀬𑀦𑁆𑀢𑀺 𑀢𑀘𑁆𑀙𑀓𑀸, 𑀅𑀢𑁆𑀢𑀸𑀦𑀁 𑀤𑀫𑀬𑀦𑁆𑀢𑀺 𑀲𑀼𑀩𑁆𑀩𑀢𑀸’’𑀢𑀺.

𑀢𑀢𑁆𑀣 𑀲𑀼𑀩𑁆𑀩𑀢𑀸𑀢𑀺 𑀲𑀼𑀯𑀤𑀸, 𑀲𑀼𑀔𑁂𑀦 𑀑𑀯𑀤𑀺𑀢𑀩𑁆𑀩𑀸 𑀅𑀦𑀼𑀲𑀸𑀲𑀺𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀲𑀼𑀔𑀲𑀸𑀫𑀡𑁂𑀭𑀯𑀢𑁆𑀣𑀼 𑀏𑀓𑀸𑀤𑀲𑀫𑀁.

𑀤𑀡𑁆𑀟𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀲𑀫𑁄 𑀯𑀕𑁆𑀕𑁄.