𑁩. 𑀘𑀽𑀴𑀧𑀦𑁆𑀣𑀓𑀢𑁆𑀣𑁂𑀭𑀯𑀢𑁆𑀣𑀼

𑀉𑀝𑁆𑀞𑀸𑀦𑁂𑀦𑀧𑁆𑀧𑀫𑀸𑀤𑁂𑀦𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀘𑀽𑀴𑀧𑀦𑁆𑀣𑀓𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀭𑀸𑀚𑀕𑀳𑁂 𑀓𑀺𑀭 𑀥𑀦𑀲𑁂𑀝𑁆𑀞𑀺𑀓𑀼𑀮𑀲𑁆𑀲 𑀥𑀻𑀢𑀸 𑀯𑀬𑀧𑁆𑀧𑀢𑁆𑀢𑀓𑀸𑀮𑁂 𑀫𑀸𑀢𑀸𑀧𑀺𑀢𑀽𑀳𑀺 𑀲𑀢𑁆𑀢𑀪𑀽𑀫𑀺𑀓𑀲𑁆𑀲 𑀧𑀸𑀲𑀸𑀤𑀲𑁆𑀲 𑀉𑀧𑀭𑀺𑀫𑀢𑀮𑁂 𑀅𑀢𑀺𑀯𑀺𑀬 𑀭𑀓𑁆𑀔𑀺𑀬𑀫𑀸𑀦𑀸 𑀬𑁄𑀩𑁆𑀩𑀦𑀫𑀤𑀫𑀢𑁆𑀢𑀢𑀸𑀬 𑀧𑀼𑀭𑀺𑀲𑀮𑁄𑀮𑀸 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀤𑀸𑀲𑁂𑀦𑁂𑀯 𑀲𑀤𑁆𑀥𑀺𑀁 𑀲𑀦𑁆𑀣𑀯𑀁 𑀓𑀢𑁆𑀯𑀸, ‘‘𑀅𑀜𑁆𑀜𑁂𑀧𑀺 𑀫𑁂 𑀇𑀤𑀁 𑀓𑀫𑁆𑀫𑀁 𑀚𑀸𑀦𑁂𑀬𑁆𑀬𑀼’’𑀦𑁆𑀢𑀺 𑀪𑀻𑀢𑀸 𑀏𑀯𑀫𑀸𑀳 𑁋 ‘‘𑀅𑀫𑁆𑀳𑁂𑀳𑀺 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀦 𑀲𑀓𑁆𑀓𑀸 𑀯𑀲𑀺𑀢𑀼𑀁. 𑀲𑀘𑁂 𑀫𑁂 𑀫𑀸𑀢𑀸𑀧𑀺𑀢𑀭𑁄 𑀇𑀫𑀁 𑀤𑁄𑀲𑀁 𑀚𑀸𑀦𑀺𑀲𑁆𑀲𑀦𑁆𑀢𑀺, 𑀔𑀡𑁆𑀟𑀸𑀔𑀡𑁆𑀟𑀺𑀓𑀁 𑀫𑀁 𑀓𑀭𑀺𑀲𑁆𑀲𑀦𑁆𑀢𑀺. 𑀯𑀺𑀤𑁂𑀲𑀁 𑀕𑀦𑁆𑀢𑁆𑀯𑀸 𑀯𑀲𑀺𑀲𑁆𑀲𑀸𑀫𑀸’’𑀢𑀺. 𑀢𑁂 𑀳𑀢𑁆𑀣𑀲𑀸𑀭𑀁 𑀕𑀳𑁂𑀢𑁆𑀯𑀸 𑀅𑀕𑁆𑀕𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸, ‘‘𑀬𑀢𑁆𑀣 𑀯𑀸 𑀢𑀢𑁆𑀣 𑀯𑀸 𑀅𑀜𑁆𑀜𑁂𑀳𑀺 𑀅𑀚𑀸𑀦𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀯𑀲𑀺𑀲𑁆𑀲𑀸𑀫𑀸’’𑀢𑀺 𑀉𑀪𑁄𑀧𑀺 𑀅𑀕𑀫𑀁𑀲𑀼. 𑀢𑁂𑀲𑀁 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀯𑀲𑀦𑁆𑀢𑀸𑀦𑀁 𑀲𑀁𑀯𑀸𑀲𑀫𑀦𑁆𑀯𑀸𑀬 𑀢𑀲𑁆𑀲𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀕𑀩𑁆𑀪𑁄 𑀧𑀢𑀺𑀝𑁆𑀞𑀸𑀲𑀺. 𑀲𑀸 𑀕𑀩𑁆𑀪𑀧𑀭𑀺𑀧𑀸𑀓𑀁 𑀆𑀕𑀫𑁆𑀫 𑀢𑁂𑀦 𑀲𑀤𑁆𑀥𑀺𑀁 𑀫𑀦𑁆𑀢𑁂𑀲𑀺, ‘‘𑀕𑀩𑁆𑀪𑁄 𑀫𑁂 𑀧𑀭𑀺𑀧𑀸𑀓𑀁 𑀕𑀢𑁄, 𑀜𑀸𑀢𑀺𑀩𑀦𑁆𑀥𑀼𑀯𑀺𑀭𑀳𑀺𑀢𑁂 𑀞𑀸𑀦𑁂 𑀕𑀩𑁆𑀪𑀯𑀼𑀝𑁆𑀞𑀸𑀦𑀁 𑀦𑀸𑀫 𑀉𑀪𑀺𑀦𑁆𑀦𑀫𑁆𑀧𑀺 𑀅𑀫𑁆𑀳𑀸𑀓𑀁 𑀤𑀼𑀓𑁆𑀔𑀸𑀯𑀳𑀁, 𑀓𑀼𑀮𑀕𑁂𑀳𑀫𑁂𑀯 𑀕𑀘𑁆𑀙𑀸𑀫𑀸’’𑀢𑀺. 𑀲𑁄 ‘‘𑀲𑀘𑀸𑀳𑀁 𑀢𑀢𑁆𑀣 𑀕𑀫𑀺𑀲𑁆𑀲𑀸𑀫𑀺, 𑀚𑀻𑀯𑀺𑀢𑀁 𑀫𑁂 𑀦𑀢𑁆𑀣𑀻’’𑀢𑀺 𑀪𑀬𑁂𑀦 ‘‘𑀅𑀚𑁆𑀚 𑀕𑀘𑁆𑀙𑀸𑀫, 𑀲𑁆𑀯𑁂 𑀕𑀘𑁆𑀙𑀸𑀫𑀸’’𑀢𑀺 𑀤𑀺𑀯𑀲𑁂 𑀅𑀢𑀺𑀓𑁆𑀓𑀸𑀫𑁂𑀲𑀺. 𑀲𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀩𑀸𑀮𑁄 𑀅𑀢𑁆𑀢𑀦𑁄 𑀤𑁄𑀲𑀫𑀳𑀦𑁆𑀢𑀢𑀸𑀬 𑀕𑀦𑁆𑀢𑀼𑀁 𑀦 𑀉𑀲𑁆𑀲𑀳𑀢𑀺, 𑀫𑀸𑀢𑀸𑀧𑀺𑀢𑀭𑁄 𑀦𑀸𑀫 𑀏𑀓𑀦𑁆𑀢𑀳𑀺𑀢𑀸𑀯, 𑀅𑀬𑀁 𑀕𑀘𑁆𑀙𑀢𑀼 𑀯𑀸, 𑀫𑀸 𑀯𑀸, 𑀅𑀳𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺. 𑀲𑀸 𑀢𑀲𑁆𑀫𑀺𑀁 𑀕𑁂𑀳𑀸 𑀦𑀺𑀓𑁆𑀔𑀦𑁆𑀢𑁂 𑀕𑁂𑀳𑀧𑀭𑀺𑀓𑁆𑀔𑀸𑀭𑀁 𑀧𑀝𑀺𑀲𑀸𑀫𑁂𑀢𑁆𑀯𑀸 𑀅𑀢𑁆𑀢𑀦𑁄 𑀓𑀼𑀮𑀖𑀭𑀁 𑀕𑀢𑀪𑀸𑀯𑀁 𑀅𑀦𑀦𑁆𑀢𑀭𑀕𑁂𑀳𑀯𑀸𑀲𑀻𑀦𑀁 𑀆𑀭𑁄𑀘𑁂𑀢𑁆𑀯𑀸 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺.

𑀲𑁄𑀧𑀺 𑀖𑀭𑀁 𑀆𑀕𑀦𑁆𑀢𑁆𑀯𑀸 𑀢𑀁 𑀅𑀤𑀺𑀲𑁆𑀯𑀸 𑀧𑀝𑀺𑀯𑀺𑀲𑁆𑀲𑀓𑁂 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀲𑀸 𑀓𑀼𑀮𑀖𑀭𑀁 𑀕𑀢𑀸’’𑀢𑀺 𑀲𑀼𑀢𑁆𑀯𑀸 𑀯𑁂𑀕𑁂𑀦 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑀫𑁆𑀧𑀸𑀧𑀼𑀡𑀺. 𑀢𑀲𑁆𑀲𑀸𑀧𑀺 𑀢𑀢𑁆𑀣𑁂𑀯 𑀕𑀩𑁆𑀪𑀯𑀼𑀝𑁆𑀞𑀸𑀦𑀁 𑀅𑀳𑁄𑀲𑀺. 𑀲𑁄 ‘‘𑀓𑀺𑀁 𑀇𑀤𑀁, 𑀪𑀤𑁆𑀤𑁂’’𑀢𑀺 𑀧𑀼𑀘𑁆𑀙𑀺. ‘‘𑀲𑀸𑀫𑀺, 𑀫𑁂 𑀏𑀓𑁄 𑀧𑀼𑀢𑁆𑀢𑁄 𑀚𑀸𑀢𑁄’’𑀢𑀺. ‘‘𑀇𑀤𑀸𑀦𑀺 𑀓𑀺𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺? ‘‘𑀬𑀲𑁆𑀲𑀢𑁆𑀣𑀸𑀬 𑀫𑀬𑀁 𑀓𑀼𑀮𑀖𑀭𑀁 𑀕𑀘𑁆𑀙𑁂𑀬𑁆𑀬𑀸𑀫, 𑀢𑀁 𑀓𑀫𑁆𑀫𑀁 𑀅𑀦𑁆𑀢𑀭𑀸𑀫𑀕𑁆𑀕𑁂𑀯 𑀦𑀺𑀧𑁆𑀨𑀦𑁆𑀦𑀁, 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀓𑀺𑀁 𑀓𑀭𑀺𑀲𑁆𑀲𑀸𑀫, 𑀦𑀺𑀯𑀢𑁆𑀢𑀺𑀲𑁆𑀲𑀸𑀫𑀸’’𑀢𑀺 𑀤𑁆𑀯𑁂𑀧𑀺 𑀏𑀓𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀦𑀺𑀯𑀢𑁆𑀢𑀺𑀁𑀲𑀼. 𑀢𑀲𑁆𑀲 𑀘 𑀤𑀸𑀭𑀓𑀲𑁆𑀲 𑀧𑀦𑁆𑀣𑁂 𑀚𑀸𑀢𑀢𑁆𑀢𑀸 𑀧𑀦𑁆𑀣𑀓𑁄𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼. 𑀢𑀲𑁆𑀲𑀸 𑀦𑀘𑀺𑀭𑀲𑁆𑀲𑁂𑀯 𑀅𑀧𑀭𑁄𑀧𑀺 𑀕𑀩𑁆𑀪𑁄 𑀧𑀢𑀺𑀝𑁆𑀞𑀳𑀺. 𑀲𑀩𑁆𑀩𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀢𑀲𑁆𑀲𑀧𑀺 𑀤𑀸𑀭𑀓𑀲𑁆𑀲 𑀧𑀦𑁆𑀣𑁂 𑀚𑀸𑀢𑀢𑁆𑀢𑀸 𑀧𑀞𑀫𑀚𑀸𑀢𑀲𑁆𑀲 𑀫𑀳𑀸𑀧𑀦𑁆𑀣𑀓𑁄𑀢𑀺 𑀦𑀸𑀫𑀁 𑀓𑀢𑁆𑀯𑀸 𑀇𑀢𑀭𑀲𑁆𑀲 𑀘𑀽𑀴𑀧𑀦𑁆𑀣𑀓𑁄𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼. 𑀢𑁂 𑀤𑁆𑀯𑁂𑀧𑀺 𑀤𑀸𑀭𑀓𑁂 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀫𑁂𑀯 𑀕𑀢𑀸. 𑀢𑁂𑀲𑀁 𑀢𑀢𑁆𑀣 𑀯𑀲𑀦𑁆𑀢𑀸𑀦𑀁 𑀫𑀳𑀸𑀧𑀦𑁆𑀣𑀓𑀤𑀸𑀭𑀓𑁄 𑀅𑀜𑁆𑀜𑁂 𑀤𑀸𑀭𑀓𑁂 ‘‘𑀘𑀽𑀴𑀧𑀺𑀢𑀸 𑀫𑀳𑀸𑀧𑀺𑀢𑀸𑀢𑀺, 𑀅𑀬𑁆𑀬𑀓𑁄 𑀅𑀬𑁆𑀬𑀺𑀓𑀸’’𑀢𑀺 𑀘 𑀯𑀤𑀦𑁆𑀢𑁂 𑀲𑀼𑀢𑁆𑀯𑀸 𑀫𑀸𑀢𑀭𑀁 𑀧𑀼𑀘𑁆𑀙𑀺 𑁋 ‘‘𑀅𑀫𑁆𑀫, 𑀅𑀜𑁆𑀜𑁂 𑀤𑀸𑀭𑀓𑀸 ‘𑀅𑀬𑁆𑀬𑀓𑁄 𑀅𑀬𑁆𑀬𑀺𑀓𑀸’𑀢𑀺𑀧𑀺, ‘𑀫𑀳𑀸𑀧𑀺𑀢𑀸 𑀘𑀽𑀴𑀧𑀺𑀢𑀸’𑀢𑀺𑀧𑀺 𑀯𑀤𑀦𑁆𑀢𑀺, 𑀓𑀘𑁆𑀘𑀺 𑀅𑀫𑁆𑀳𑀸𑀓𑀜𑁆𑀜𑁂𑀯 𑀜𑀸𑀢𑀓𑀸 𑀦𑀢𑁆𑀣𑀻’’𑀢𑀺? ‘‘𑀆𑀫, 𑀢𑀸𑀢, 𑀅𑀫𑁆𑀳𑀸𑀓𑀁 𑀏𑀢𑁆𑀣 𑀜𑀸𑀢𑀓𑀸 𑀦𑀢𑁆𑀣𑀺. 𑀭𑀸𑀚𑀕𑀳𑀦𑀕𑀭𑁂 𑀧𑀦 𑀯𑁄 𑀥𑀦𑀲𑁂𑀝𑁆𑀞𑀺 𑀦𑀸𑀫 𑀅𑀬𑁆𑀬𑀓𑁄, 𑀢𑀢𑁆𑀣 𑀅𑀫𑁆𑀳𑀸𑀓𑀁 𑀩𑀳𑀽 𑀜𑀸𑀢𑀓𑀸’’𑀢𑀺. ‘‘𑀓𑀲𑁆𑀫𑀸 𑀢𑀢𑁆𑀣 𑀦 𑀕𑀘𑁆𑀙𑀣, 𑀅𑀫𑁆𑀫𑀸’’𑀢𑀺? 𑀲𑀸 𑀅𑀢𑁆𑀢𑀦𑁄 𑀅𑀕𑀫𑀦𑀓𑀸𑀭𑀡𑀁 𑀧𑀼𑀢𑁆𑀢𑀲𑁆𑀲 𑀅𑀓𑀣𑁂𑀢𑁆𑀯𑀸 𑀧𑀼𑀢𑁆𑀢𑁂𑀲𑀼 𑀧𑀼𑀦𑀧𑁆𑀧𑀼𑀦𑀁 𑀓𑀣𑁂𑀦𑁆𑀢𑁂𑀲𑀼 𑀲𑀸𑀫𑀺𑀓𑀁 𑀆𑀳 𑁋 ‘‘𑀇𑀫𑁂 𑀤𑀸𑀭𑀓𑀸 𑀫𑀁 𑀅𑀢𑀺𑀯𑀺𑀬 𑀓𑀺𑀮𑀫𑁂𑀦𑁆𑀢𑀺, 𑀓𑀺𑀁 𑀦𑁄 𑀫𑀸𑀢𑀸𑀧𑀺𑀢𑀭𑁄 𑀤𑀺𑀲𑁆𑀯𑀸 𑀫𑀁𑀲𑀁 𑀔𑀸𑀤𑀺𑀲𑁆𑀲𑀦𑁆𑀢𑀺, 𑀏𑀳𑀺, 𑀤𑀸𑀭𑀓𑀸𑀦𑀁 𑀅𑀬𑁆𑀬𑀓𑀓𑀼𑀮𑀁 𑀤𑀲𑁆𑀲𑁂𑀲𑁆𑀲𑀸𑀫𑀸’’𑀢𑀺? ‘‘𑀅𑀳𑀁 𑀲𑀫𑁆𑀫𑀼𑀔𑀸 𑀪𑀯𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀢𑁂 𑀧𑀦 𑀦𑀬𑀺𑀲𑁆𑀲𑀸𑀫𑀻’’𑀢𑀺. ‘‘𑀲𑀸𑀥𑀼 𑀬𑁂𑀦 𑀓𑁂𑀦𑀘𑀺 𑀉𑀧𑀸𑀬𑁂𑀦 𑀤𑀸𑀭𑀓𑀸𑀦𑀁 𑀅𑀬𑁆𑀬𑀓𑀓𑀼𑀮𑀫𑁂𑀯 𑀤𑀝𑁆𑀞𑀼𑀁 𑀯𑀝𑁆𑀝𑀢𑀻’’𑀢𑀺. 𑀤𑁆𑀯𑁂𑀧𑀺 𑀚𑀦𑀸 𑀤𑀸𑀭𑀓𑁂 𑀆𑀤𑀸𑀬 𑀅𑀦𑀼𑀧𑀼𑀩𑁆𑀩𑁂𑀦 𑀭𑀸𑀚𑀕𑀳𑀁 𑀧𑀢𑁆𑀯𑀸 𑀦𑀕𑀭𑀤𑁆𑀯𑀸𑀭𑁂 𑀏𑀓𑀺𑀲𑁆𑀲𑀸 𑀲𑀸𑀮𑀸𑀬 𑀧𑀯𑀺𑀲𑀺𑀢𑁆𑀯𑀸 𑀤𑀸𑀭𑀓𑀫𑀸𑀢𑀸 𑀤𑁆𑀯𑁂 𑀤𑀸𑀭𑀓𑁂 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀆𑀕𑀢𑀪𑀸𑀯𑀁 𑀫𑀸𑀢𑀸𑀧𑀺𑀢𑀽𑀦𑀁 𑀆𑀭𑁄𑀘𑀸𑀧𑁂𑀲𑀺. 𑀢𑁂 𑀢𑀁 𑀲𑀸𑀲𑀦𑀁 𑀲𑀼𑀢𑁆𑀯𑀸, ‘‘𑀲𑀁𑀲𑀸𑀭𑁂 𑀯𑀺𑀘𑀭𑀦𑁆𑀢𑀸𑀦𑀁 𑀦 𑀧𑀼𑀢𑁆𑀢𑁄 𑀦 𑀥𑀻𑀢𑀸 𑀪𑀽𑀢𑀧𑀼𑀩𑁆𑀩𑀸 𑀦𑀸𑀫 𑀦𑀢𑁆𑀣𑀺, 𑀢𑁂 𑀅𑀫𑁆𑀳𑀸𑀓𑀁 𑀫𑀳𑀸𑀧𑀭𑀸𑀥𑀺𑀓𑀸, 𑀦 𑀲𑀓𑁆𑀓𑀸 𑀢𑁂𑀳𑀺 𑀅𑀫𑁆𑀳𑀸𑀓𑀁 𑀘𑀓𑁆𑀔𑀼𑀧𑀣𑁂 𑀞𑀸𑀢𑀼𑀁, 𑀏𑀢𑁆𑀢𑀓𑀁 𑀦𑀸𑀫 𑀥𑀦𑀁 𑀕𑀳𑁂𑀢𑁆𑀯𑀸 𑀤𑁆𑀯𑁂𑀧𑀺 𑀚𑀦𑀸 𑀨𑀸𑀲𑀼𑀓𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀚𑀻𑀯𑀦𑁆𑀢𑀼, 𑀤𑀸𑀭𑀓𑁂 𑀧𑀦 𑀇𑀥 𑀧𑁂𑀲𑁂𑀦𑁆𑀢𑀽’’𑀢𑀺 𑀥𑀦𑀁 𑀤𑀢𑁆𑀯𑀸 𑀤𑀽𑀢𑀁 𑀧𑀸𑀳𑁂𑀲𑀼𑀁.

𑀢𑁂𑀳𑀺 𑀧𑁂𑀲𑀺𑀢𑀁 𑀥𑀦𑀁 𑀕𑀳𑁂𑀢𑁆𑀯𑀸 𑀤𑀸𑀭𑀓𑁂 𑀆𑀕𑀢𑀤𑀽𑀢𑀸𑀦𑀜𑁆𑀜𑁂𑀯 𑀳𑀢𑁆𑀣𑁂 𑀤𑀢𑁆𑀯𑀸 𑀧𑀳𑀺𑀡𑀺𑀁𑀲𑀼. 𑀤𑀸𑀭𑀓𑀸 𑀅𑀬𑁆𑀬𑀓𑀓𑀼𑀮𑁂 𑀯𑀟𑁆𑀠𑀦𑁆𑀢𑀺. 𑀢𑁂𑀲𑀼 𑀘𑀽𑀴𑀧𑀦𑁆𑀣𑀓𑁄 𑀅𑀢𑀺𑀤𑀳𑀭𑁄, 𑀫𑀳𑀸𑀧𑀦𑁆𑀣𑀓𑁄 𑀧𑀦 𑀅𑀬𑁆𑀬𑀓𑁂𑀦 𑀲𑀤𑁆𑀥𑀺𑀁 𑀤𑀲𑀩𑀮𑀲𑁆𑀲 𑀥𑀫𑁆𑀫𑀓𑀣𑀁 𑀲𑁄𑀢𑀼𑀁 𑀕𑀘𑁆𑀙𑀢𑀺. 𑀢𑀲𑁆𑀲 𑀦𑀺𑀘𑁆𑀘𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀘𑁆𑀙𑀦𑁆𑀢𑀲𑁆𑀲 𑀧𑀩𑁆𑀩𑀚𑁆𑀚𑀸𑀬 𑀘𑀺𑀢𑁆𑀢𑀁 𑀦𑀫𑀺. 𑀲𑁄 𑀅𑀬𑁆𑀬𑀓𑀁 𑀆𑀳 𑁋 ‘‘𑀲𑀘𑁂 𑀫𑀁 𑀅𑀦𑀼𑀚𑀸𑀦𑁂𑀬𑁆𑀬𑀸𑀣, 𑀅𑀳𑀁 𑀧𑀩𑁆𑀩𑀚𑁂𑀬𑁆𑀬’’𑀦𑁆𑀢𑀺. ‘‘𑀓𑀺𑀁 𑀯𑀤𑁂𑀲𑀺, 𑀢𑀸𑀢, 𑀲𑀓𑀮𑀲𑁆𑀲 𑀮𑁄𑀓𑀲𑁆𑀲𑀧𑀺 𑀫𑁂 𑀧𑀩𑁆𑀩𑀚𑁆𑀚𑀸𑀢𑁄 𑀢𑀯 𑀧𑀩𑁆𑀩𑀚𑁆𑀚𑀸 𑀪𑀤𑁆𑀤𑀺𑀓𑀸. 𑀲𑀘𑁂 𑀲𑀓𑁆𑀓𑁄𑀲𑀺 𑀧𑀩𑁆𑀩𑀚𑀸𑀳𑀻’’𑀢𑀺. 𑀢𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀦𑁂𑀢𑁆𑀯𑀸, ‘‘𑀓𑀺𑀁, 𑀕𑀳𑀧𑀢𑀺, 𑀤𑀸𑀭𑀓𑁄 𑀢𑁂 𑀮𑀤𑁆𑀥𑁄’’𑀢𑀺 𑀯𑀼𑀢𑁆𑀢𑁂, ‘‘𑀆𑀫, 𑀪𑀦𑁆𑀢𑁂, 𑀅𑀬𑀁 𑀫𑁂 𑀦𑀢𑁆𑀢𑀸 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑀼𑀓𑀸𑀫𑁄’’𑀢𑀺 𑀆𑀳. 𑀲𑀢𑁆𑀣𑀸 𑀅𑀜𑁆𑀜𑀢𑀭𑀁 𑀧𑀺𑀡𑁆𑀟𑀧𑀸𑀢𑀘𑀸𑀭𑀺𑀓𑀁 𑀪𑀺𑀓𑁆𑀔𑀼𑀁 ‘‘𑀇𑀫𑀁 𑀤𑀸𑀭𑀓𑀁 𑀧𑀩𑁆𑀩𑀸𑀚𑁂𑀳𑀻’’𑀢𑀺 𑀆𑀡𑀸𑀧𑁂𑀲𑀺. 𑀣𑁂𑀭𑁄 𑀢𑀲𑁆𑀲 𑀢𑀘𑀧𑀜𑁆𑀘𑀓𑀓𑀫𑁆𑀫𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀧𑀩𑁆𑀩𑀸𑀚𑁂𑀲𑀺. 𑀲𑁄 𑀩𑀳𑀼𑀁 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀧𑀭𑀺𑀧𑀼𑀡𑁆𑀡𑀯𑀲𑁆𑀲𑁄 𑀉𑀧𑀲𑀫𑁆𑀧𑀤𑀁 𑀮𑀪𑀺𑀢𑁆𑀯𑀸 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀓𑀫𑁆𑀫𑀝𑁆𑀞𑀸𑀦𑀁 𑀓𑀭𑁄𑀦𑁆𑀢𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀲𑁄 𑀛𑀸𑀦𑀲𑀼𑀔𑁂𑀦 𑀨𑀮𑀲𑀼𑀔𑁂𑀦 𑀯𑀻𑀢𑀺𑀦𑀸𑀫𑁂𑀦𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀓𑁆𑀓𑀸 𑀦𑀼 𑀔𑁄 𑀇𑀤𑀁 𑀲𑀼𑀔𑀁 𑀘𑀽𑀴𑀧𑀦𑁆𑀣𑀓𑀲𑁆𑀲 𑀤𑀸𑀢𑀼’’𑀦𑁆𑀢𑀺! 𑀢𑀢𑁄 𑀅𑀬𑁆𑀬𑀓𑀲𑁂𑀝𑁆𑀞𑀺𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀫𑀳𑀸𑀲𑁂𑀝𑁆𑀞𑀺, 𑀲𑀘𑁂 𑀅𑀦𑀼𑀚𑀸𑀦𑁂𑀬𑁆𑀬𑀸𑀣, 𑀅𑀳𑀁 𑀘𑀽𑀴𑀧𑀦𑁆𑀣𑀓𑀁 𑀧𑀩𑁆𑀩𑀸𑀚𑁂𑀬𑁆𑀬’’𑀦𑁆𑀢𑀺. ‘‘𑀧𑀩𑁆𑀩𑀸𑀚𑁂𑀣, 𑀪𑀦𑁆𑀢𑁂’’𑀢𑀺. 𑀲𑁂𑀝𑁆𑀞𑀺 𑀓𑀺𑀭 𑀲𑀸𑀲𑀦𑁂 𑀘 𑀲𑀼𑀧𑁆𑀧𑀲𑀦𑁆𑀦𑁄, ‘‘𑀓𑀢𑀭𑀥𑀻𑀢𑀸𑀬 𑀯𑁄 𑀏𑀢𑁂 𑀧𑀼𑀢𑁆𑀢𑀸’’𑀢𑀺 𑀧𑀼𑀘𑁆𑀙𑀺𑀬𑀫𑀸𑀦𑁄 𑀘 ‘‘𑀧𑀮𑀸𑀢𑀥𑀻𑀢𑀸𑀬𑀸’’𑀢𑀺 𑀯𑀢𑁆𑀢𑀼𑀁 𑀮𑀚𑁆𑀚𑀢𑀺, 𑀢𑀲𑁆𑀫𑀸 𑀲𑀼𑀔𑁂𑀦𑁂𑀯 𑀢𑁂𑀲𑀁 𑀧𑀩𑁆𑀩𑀚𑁆𑀚𑀁 𑀅𑀦𑀼𑀚𑀸𑀦𑀺. 𑀣𑁂𑀭𑁄 𑀘𑀽𑀴𑀧𑀦𑁆𑀣𑀓𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀲𑁄 𑀧𑀩𑁆𑀩𑀚𑀺𑀢𑁆𑀯𑀸𑀯 𑀤𑀦𑁆𑀥𑁄 𑀅𑀳𑁄𑀲𑀺.

‘‘𑀧𑀤𑁆𑀫𑀁 𑀬𑀣𑀸 𑀓𑁄𑀓𑀦𑀤𑀁 𑀲𑀼𑀕𑀦𑁆𑀥𑀁,

𑀧𑀸𑀢𑁄 𑀲𑀺𑀬𑀸 𑀨𑀼𑀮𑁆𑀮𑀫𑀯𑀻𑀢𑀕𑀦𑁆𑀥𑀁;

𑀅𑀗𑁆𑀕𑀻𑀭𑀲𑀁 𑀧𑀲𑁆𑀲 𑀯𑀺𑀭𑁄𑀘𑀫𑀸𑀦𑀁,

𑀢𑀧𑀦𑁆𑀢𑀫𑀸𑀤𑀺𑀘𑁆𑀘𑀫𑀺𑀯𑀦𑁆𑀢𑀮𑀺𑀓𑁆𑀔𑁂’’𑀢𑀺. (𑀲𑀁. 𑀦𑀺. 𑁧.𑁧𑁨𑁩; 𑀅. 𑀦𑀺. 𑁫.𑁧𑁯𑁫) 𑁋

𑀇𑀫𑀁 𑀏𑀓𑀁 𑀕𑀸𑀣𑀁 𑀘𑀢𑀽𑀳𑀺 𑀫𑀸𑀲𑁂𑀳𑀺 𑀉𑀕𑁆𑀕𑀡𑁆𑀳𑀺𑀢𑀼𑀁 𑀦𑀸𑀲𑀓𑁆𑀔𑀺. 𑀲𑁄 𑀓𑀺𑀭 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀧𑀩𑁆𑀩𑀚𑀺𑀢𑁆𑀯𑀸 𑀧𑀜𑁆𑀜𑀯𑀸 𑀳𑀼𑀢𑁆𑀯𑀸 𑀅𑀜𑁆𑀜𑀢𑀭𑀲𑁆𑀲 𑀤𑀦𑁆𑀥𑀪𑀺𑀓𑁆𑀔𑀼𑀦𑁄 𑀉𑀤𑁆𑀤𑁂𑀲𑀕𑁆𑀕𑀳𑀡𑀓𑀸𑀮𑁂 𑀧𑀭𑀺𑀳𑀸𑀲𑀓𑁂𑀴𑀺𑀁 𑀅𑀓𑀸𑀲𑀺. 𑀲𑁄 𑀪𑀺𑀓𑁆𑀔𑀼 𑀢𑁂𑀦 𑀧𑀭𑀺𑀳𑀸𑀲𑁂𑀦 𑀮𑀚𑁆𑀚𑀺𑀢𑁄 𑀦𑁂𑀯 𑀉𑀤𑁆𑀤𑁂𑀲𑀁 𑀕𑀡𑁆𑀳𑀺, 𑀦 𑀲𑀚𑁆𑀛𑀸𑀬𑀫𑀓𑀸𑀲𑀺. 𑀢𑁂𑀦 𑀓𑀫𑁆𑀫𑁂𑀦 𑀅𑀬𑀁 𑀧𑀩𑁆𑀩𑀚𑀺𑀢𑁆𑀯𑀸𑀯 𑀤𑀦𑁆𑀥𑁄 𑀚𑀸𑀢𑁄, 𑀕𑀳𑀺𑀢𑀕𑀳𑀺𑀢𑀁 𑀧𑀤𑀁 𑀉𑀧𑀭𑀽𑀧𑀭𑀺𑀧𑀤𑀁 𑀕𑀡𑁆𑀳𑀦𑁆𑀢𑀲𑁆𑀲 𑀦𑀲𑁆𑀲𑀢𑀺. 𑀢𑀲𑁆𑀲 𑀇𑀫𑀫𑁂𑀯 𑀕𑀸𑀣𑀁 𑀉𑀕𑁆𑀕𑀳𑁂𑀢𑀼𑀁 𑀯𑀸𑀬𑀫𑀦𑁆𑀢𑀲𑁆𑀲 𑀘𑀢𑁆𑀢𑀸𑀭𑁄 𑀫𑀸𑀲𑀸 𑀅𑀢𑀺𑀓𑁆𑀓𑀦𑁆𑀢𑀸. 𑀅𑀣 𑀦𑀁 𑀫𑀳𑀸𑀧𑀦𑁆𑀣𑀓𑁄, ‘‘𑀘𑀽𑀴𑀧𑀦𑁆𑀣𑀓, 𑀢𑁆𑀯𑀁 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀅𑀪𑀩𑁆𑀩𑁄, 𑀘𑀢𑀽𑀳𑀺 𑀫𑀸𑀲𑁂𑀳𑀺 𑀏𑀓𑀁 𑀕𑀸𑀣𑀫𑁆𑀧𑀺 𑀕𑀡𑁆𑀳𑀺𑀢𑀼𑀁 𑀦 𑀲𑀓𑁆𑀓𑁄𑀲𑀺, 𑀧𑀩𑁆𑀩𑀚𑀺𑀢𑀓𑀺𑀘𑁆𑀘𑀁 𑀧𑀦 𑀓𑀣𑀁 𑀫𑀢𑁆𑀣𑀓𑀁 𑀧𑀸𑀧𑁂𑀲𑁆𑀲𑀲𑀺, 𑀦𑀺𑀓𑁆𑀔𑀫 𑀇𑀢𑁄’’𑀢𑀺 𑀯𑀺𑀳𑀸𑀭𑀸 𑀦𑀺𑀓𑁆𑀓𑀟𑁆𑀠𑀺. 𑀘𑀽𑀴𑀧𑀦𑁆𑀣𑀓𑁄 𑀩𑀼𑀤𑁆𑀥𑀲𑀸𑀲𑀦𑁂 𑀲𑀺𑀦𑁂𑀳𑁂𑀦 𑀕𑀺𑀳𑀺𑀪𑀸𑀯𑀁 𑀦 𑀧𑀢𑁆𑀣𑁂𑀢𑀺.

𑀢𑀲𑁆𑀫𑀺𑀜𑁆𑀘 𑀓𑀸𑀮𑁂 𑀫𑀳𑀸𑀧𑀦𑁆𑀣𑀓𑁄 𑀪𑀢𑁆𑀢𑀼𑀤𑁆𑀤𑁂𑀲𑀓𑁄 𑀅𑀳𑁄𑀲𑀺. 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀩𑀳𑀼𑀁 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀁 𑀆𑀤𑀸𑀬 𑀅𑀢𑁆𑀢𑀦𑁄 𑀅𑀫𑁆𑀩𑀯𑀦𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀧𑀽𑀚𑁂𑀢𑁆𑀯𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀤𑀲𑀩𑀮𑀁 𑀯𑀦𑁆𑀤𑀺𑀢𑁆𑀯𑀸 𑀫𑀳𑀸𑀧𑀦𑁆𑀣𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, ‘‘𑀓𑀺𑀢𑁆𑀢𑀓𑀸, 𑀪𑀦𑁆𑀢𑁂, 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀪𑀺𑀓𑁆𑀔𑀽’’𑀢𑀺 𑀧𑀼𑀘𑁆𑀙𑀺. ‘‘𑀧𑀜𑁆𑀘𑀫𑀢𑁆𑀢𑀸𑀦𑀺 𑀪𑀺𑀓𑁆𑀔𑀼𑀲𑀢𑀸𑀦𑀻’’𑀢𑀺. ‘‘𑀲𑁆𑀯𑁂, 𑀪𑀦𑁆𑀢𑁂, 𑀩𑀼𑀤𑁆𑀥𑀧𑁆𑀧𑀫𑀼𑀔𑀸𑀦𑀺 𑀧𑀜𑁆𑀘 𑀪𑀺𑀓𑁆𑀔𑀼𑀲𑀢𑀸𑀦𑀺 𑀆𑀤𑀸𑀬 𑀅𑀫𑁆𑀳𑀸𑀓𑀁 𑀦𑀺𑀯𑁂𑀲𑀦𑁂 𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺. ‘‘𑀉𑀧𑀸𑀲𑀓, 𑀘𑀽𑀴𑀧𑀦𑁆𑀣𑀓𑁄 𑀦𑀸𑀫 𑀪𑀺𑀓𑁆𑀔𑀼 𑀤𑀦𑁆𑀥𑁄 𑀅𑀯𑀺𑀭𑀼𑀴𑁆𑀳𑀺𑀥𑀫𑁆𑀫𑁄, 𑀢𑀁 𑀞𑀧𑁂𑀢𑁆𑀯𑀸 𑀲𑁂𑀲𑀸𑀦𑀁 𑀦𑀺𑀫𑀦𑁆𑀢𑀦𑀁 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺 𑀣𑁂𑀭𑁄 𑀆𑀳. 𑀢𑀁 𑀲𑀼𑀢𑁆𑀯𑀸 𑀘𑀽𑀴𑀧𑀦𑁆𑀣𑀓𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀣𑁂𑀭𑁄 𑀏𑀢𑁆𑀢𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀦𑀺𑀫𑀦𑁆𑀢𑀦𑀁 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁄 𑀫𑀁 𑀩𑀸𑀳𑀺𑀭𑀁 𑀓𑀢𑁆𑀯𑀸 𑀲𑀫𑁆𑀧𑀝𑀺𑀘𑁆𑀙𑀢𑀺, 𑀦𑀺𑀲𑁆𑀲𑀁𑀲𑀬𑀁 𑀫𑀬𑁆𑀳𑀁 𑀪𑀸𑀢𑀺𑀓𑀲𑁆𑀲 𑀫𑀬𑀺 𑀘𑀺𑀢𑁆𑀢𑀁 𑀪𑀺𑀦𑁆𑀦𑀁 𑀪𑀯𑀺𑀲𑁆𑀲𑀢𑀺, 𑀓𑀺𑀁 𑀤𑀸𑀦𑀺 𑀫𑀬𑁆𑀳𑀁 𑀇𑀫𑀺𑀦𑀸 𑀲𑀸𑀲𑀦𑁂𑀦, 𑀕𑀺𑀳𑀻 𑀳𑀼𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑁄 𑀚𑀻𑀯𑀺𑀲𑁆𑀲𑀸𑀫𑀻’’𑀢𑀺? 𑀲𑁄 𑀧𑀼𑀦𑀤𑀺𑀯𑀲𑁂 𑀧𑀸𑀢𑁄𑀯 𑀯𑀺𑀩𑁆𑀪𑀫𑀺𑀢𑀼𑀁 𑀧𑀸𑀬𑀸𑀲𑀺.

𑀲𑀢𑁆𑀣𑀸 𑀧𑀘𑁆𑀘𑀽𑀲𑀓𑀸𑀮𑁂𑀬𑁂𑀯 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀇𑀫𑀁 𑀓𑀸𑀭𑀡𑀁 𑀤𑀺𑀲𑁆𑀯𑀸 𑀧𑀞𑀫𑀢𑀭𑀁 𑀕𑀦𑁆𑀢𑁆𑀯𑀸 𑀘𑀽𑀴𑀧𑀦𑁆𑀣𑀓𑀲𑁆𑀲 𑀕𑀫𑀦𑀫𑀕𑁆𑀕𑁂 𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀘𑀗𑁆𑀓𑀫𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀘𑀽𑀴𑀧𑀦𑁆𑀣𑀓𑁄 𑀕𑀘𑁆𑀙𑀦𑁆𑀢𑁄 𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀓𑀼𑀳𑀺𑀁 𑀧𑀦 𑀢𑁆𑀯𑀁, 𑀘𑀽𑀴𑀧𑀦𑁆𑀣𑀓, 𑀇𑀫𑀸𑀬 𑀯𑁂𑀮𑀸𑀬 𑀕𑀘𑁆𑀙𑀲𑀻’’𑀢𑀺 𑀆𑀳. ‘‘𑀪𑀸𑀢𑀸 𑀫𑀁, 𑀪𑀦𑁆𑀢𑁂, 𑀦𑀺𑀓𑁆𑀓𑀟𑁆𑀠𑀢𑀺, 𑀢𑁂𑀦𑀸𑀳𑀁 𑀯𑀺𑀩𑁆𑀪𑀫𑀺𑀢𑀼𑀁 𑀕𑀘𑁆𑀙𑀸𑀫𑀻’’𑀢𑀺. ‘‘𑀘𑀽𑀴𑀧𑀦𑁆𑀣𑀓, 𑀢𑀯 𑀧𑀩𑁆𑀩𑀚𑁆𑀚𑀸 𑀦𑀸𑀫 𑀫𑀫 𑀲𑀦𑁆𑀢𑀓𑀸, 𑀪𑀸𑀢𑀭𑀸 𑀦𑀺𑀓𑁆𑀓𑀟𑁆𑀠𑀺𑀢𑁄 𑀓𑀲𑁆𑀫𑀸 𑀫𑀫 𑀲𑀦𑁆𑀢𑀺𑀓𑀁 𑀦𑀸𑀕𑀜𑁆𑀙𑀺, 𑀏𑀳𑀺, 𑀓𑀺𑀁 𑀢𑁂 𑀕𑀺𑀳𑀺𑀪𑀸𑀯𑁂𑀦, 𑀫𑀫 𑀲𑀦𑁆𑀢𑀺𑀓𑁂 𑀪𑀯𑀺𑀲𑁆𑀲𑀲𑀻’’𑀢𑀺 𑀘𑀓𑁆𑀓𑀗𑁆𑀓𑀺𑀢𑀢𑀮𑁂𑀦 𑀧𑀸𑀡𑀺𑀦𑀸 𑀢𑀁 𑀲𑀺𑀭𑀲𑀺 𑀧𑀭𑀸𑀫𑀲𑀺𑀢𑁆𑀯𑀸 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀧𑁆𑀧𑀫𑀼𑀔𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸, ‘‘𑀘𑀽𑀴𑀧𑀦𑁆𑀣𑀓, 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑁄 𑀳𑀼𑀢𑁆𑀯𑀸 𑀇𑀫𑀁 𑀧𑀺𑀮𑁄𑀢𑀺𑀓𑀁 ‘𑀭𑀚𑁄𑀳𑀭𑀡𑀁 𑀭𑀚𑁄𑀳𑀭𑀡’𑀦𑁆𑀢𑀺 𑀧𑀭𑀺𑀫𑀚𑁆𑀚𑀦𑁆𑀢𑁄 𑀇𑀥𑁂𑀯 𑀳𑁄𑀳𑀻’’𑀢𑀺 𑀇𑀤𑁆𑀥𑀺𑀬𑀸 𑀅𑀪𑀺𑀲𑀗𑁆𑀔𑀢𑀁 𑀧𑀭𑀺𑀲𑀼𑀤𑁆𑀥𑀁 𑀧𑀺𑀮𑁄𑀢𑀺𑀓𑀁 𑀤𑀢𑁆𑀯𑀸 𑀓𑀸𑀮𑁂 𑀆𑀭𑁄𑀘𑀺𑀢𑁂 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀚𑀻𑀯𑀓𑀲𑁆𑀲 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺. 𑀘𑀽𑀴𑀧𑀦𑁆𑀣𑀓𑁄𑀧𑀺 𑀲𑀽𑀭𑀺𑀬𑀁 𑀑𑀮𑁄𑀓𑁂𑀦𑁆𑀢𑁄 𑀢𑀁 𑀧𑀺𑀮𑁄𑀢𑀺𑀓𑀁 ‘‘𑀭𑀚𑁄𑀳𑀭𑀡𑀁 𑀭𑀚𑁄𑀳𑀭𑀡’’𑀦𑁆𑀢𑀺 𑀧𑀭𑀺𑀫𑀚𑁆𑀚𑀦𑁆𑀢𑁄 𑀦𑀺𑀲𑀻𑀤𑀺. 𑀢𑀲𑁆𑀲 𑀢𑀁 𑀧𑀺𑀮𑁄𑀢𑀺𑀓𑀔𑀡𑁆𑀟𑀁 𑀧𑀭𑀺𑀫𑀚𑁆𑀚𑀦𑁆𑀢𑀲𑁆𑀲 𑀓𑀺𑀮𑀺𑀝𑁆𑀞𑀁 𑀅𑀳𑁄𑀲𑀺. 𑀢𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀤𑀁 𑀧𑀺𑀮𑁄𑀢𑀺𑀓𑀔𑀡𑁆𑀟𑀁 𑀅𑀢𑀺𑀯𑀺𑀬 𑀧𑀭𑀺𑀲𑀼𑀤𑁆𑀥𑀁, 𑀇𑀫𑀁 𑀧𑀦 𑀅𑀢𑁆𑀢𑀪𑀸𑀯𑀁 𑀦𑀺𑀲𑁆𑀲𑀸𑀬 𑀧𑀼𑀭𑀺𑀫𑀧𑀓𑀢𑀺𑀁 𑀯𑀺𑀚𑀳𑀺𑀢𑁆𑀯𑀸 𑀏𑀯𑀁 𑀓𑀺𑀮𑀺𑀝𑁆𑀞𑀁 𑀚𑀸𑀢𑀁, 𑀅𑀦𑀺𑀘𑁆𑀘𑀸 𑀯𑀢 𑀲𑀗𑁆𑀔𑀸𑀭𑀸’’𑀢𑀺 𑀔𑀬𑀯𑀬𑀁 𑀧𑀝𑁆𑀞𑀧𑁂𑀦𑁆𑀢𑁄 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀲𑀺. 𑀲𑀢𑁆𑀣𑀸 ‘‘𑀘𑀽𑀴𑀧𑀦𑁆𑀣𑀓𑀲𑁆𑀲 𑀘𑀺𑀢𑁆𑀢𑀁 𑀯𑀺𑀧𑀲𑁆𑀲𑀦𑀁 𑀆𑀭𑀼𑀴𑁆𑀳’’𑀦𑁆𑀢𑀺 𑀜𑀢𑁆𑀯𑀸, ‘‘𑀘𑀽𑀴𑀧𑀦𑁆𑀣𑀓, 𑀢𑁆𑀯𑀁 𑀧𑀺𑀮𑁄𑀢𑀺𑀓𑀔𑀡𑁆𑀟𑀫𑁂𑀯 𑀲𑀁𑀓𑀺𑀮𑀺𑀝𑁆𑀞𑀁 ‘𑀭𑀚𑀁 𑀭𑀚’𑀦𑁆𑀢𑀺 𑀫𑀸 𑀲𑀜𑁆𑀜𑀁 𑀓𑀭𑀺, 𑀅𑀩𑁆𑀪𑀦𑁆𑀢𑀭𑁂 𑀧𑀦 𑀢𑁂 𑀭𑀸𑀕𑀭𑀚𑀸𑀤𑀬𑁄 𑀅𑀢𑁆𑀣𑀺, 𑀢𑁂 𑀳𑀭𑀸𑀳𑀻’’𑀢𑀺 𑀯𑀢𑁆𑀯𑀸 𑀑𑀪𑀸𑀲𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀧𑀼𑀭𑀢𑁄 𑀦𑀺𑀲𑀺𑀦𑁆𑀦𑁄 𑀯𑀺𑀬 𑀧𑀜𑁆𑀜𑀸𑀬𑀫𑀸𑀦𑀭𑀽𑀧𑁄 𑀳𑀼𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

‘‘𑀭𑀸𑀕𑁄 𑀭𑀚𑁄 𑀦 𑀘 𑀧𑀦 𑀭𑁂𑀡𑀼 𑀯𑀼𑀘𑁆𑀘𑀢𑀺,

𑀭𑀸𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁 𑀭𑀚𑁄𑀢𑀺;

𑀏𑀢𑀁 𑀭𑀚𑁆𑀚𑀁 𑀯𑀺𑀧𑁆𑀧𑀚𑀳𑀺𑀢𑁆𑀯 𑀪𑀺𑀓𑁆𑀔𑀯𑁄,

𑀯𑀺𑀳𑀭𑀦𑁆𑀢𑀺 𑀢𑁂 𑀯𑀺𑀕𑀢𑀭𑀚𑀲𑁆𑀲 𑀲𑀸𑀲𑀦𑁂.

‘‘𑀤𑁄𑀲𑁄 𑀭𑀚𑁄 𑀦 𑀘 𑀧𑀦 𑀭𑁂𑀡𑀼 𑀯𑀼𑀘𑁆𑀘𑀢𑀺,

𑀤𑁄𑀲𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁 𑀭𑀚𑁄𑀢𑀺;

𑀏𑀢𑀁 𑀭𑀚𑀁 𑀯𑀺𑀧𑁆𑀧𑀚𑀳𑀺𑀢𑁆𑀯 𑀪𑀺𑀓𑁆𑀔𑀯𑁄,

𑀯𑀺𑀳𑀭𑀦𑁆𑀢𑀺 𑀢𑁂 𑀯𑀺𑀕𑀢𑀭𑀚𑀲𑁆𑀲 𑀲𑀸𑀲𑀦𑁂.

‘‘𑀫𑁄𑀳𑁄 𑀭𑀚𑁄 𑀦 𑀘 𑀧𑀦 𑀭𑁂𑀡𑀼 𑀯𑀼𑀘𑁆𑀘𑀢𑀺,

𑀫𑁄𑀳𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁 𑀭𑀚𑁄𑀢𑀺;

𑀏𑀢𑀁 𑀭𑀚𑀁 𑀯𑀺𑀧𑁆𑀧𑀚𑀳𑀺𑀢𑁆𑀯 𑀪𑀺𑀓𑁆𑀔𑀯𑁄,

𑀯𑀺𑀳𑀭𑀦𑁆𑀢𑀺 𑀢𑁂 𑀯𑀺𑀕𑀢𑀭𑀚𑀲𑁆𑀲 𑀲𑀸𑀲𑀦𑁂’’𑀢𑀺. (𑀫𑀳𑀸𑀦𑀺. 𑁨𑁦𑁯);

𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀘𑀽𑀴𑀧𑀦𑁆𑀣𑀓𑁄 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺𑀬𑁂𑀯𑀲𑁆𑀲 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀆𑀕𑀫𑀺𑀁𑀲𑀼.

𑀲𑁄 𑀓𑀺𑀭 𑀧𑀼𑀩𑁆𑀩𑁂 𑀭𑀸𑀚𑀸 𑀳𑀼𑀢𑁆𑀯𑀸 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀭𑁄𑀦𑁆𑀢𑁄 𑀦𑀮𑀸𑀝𑀢𑁄 𑀲𑁂𑀤𑁂 𑀫𑀼𑀘𑁆𑀘𑀦𑁆𑀢𑁂 𑀧𑀭𑀺𑀲𑀼𑀤𑁆𑀥𑁂𑀦 𑀲𑀸𑀝𑀓𑁂𑀦 𑀦𑀮𑀸𑀝𑀦𑁆𑀢𑀁 𑀧𑀼𑀜𑁆𑀙𑀺, 𑀲𑀸𑀝𑀓𑁄 𑀓𑀺𑀮𑀺𑀝𑁆𑀞𑁄 𑀅𑀳𑁄𑀲𑀺. 𑀲𑁄 ‘‘𑀇𑀫𑀁 𑀲𑀭𑀻𑀭𑀁 𑀦𑀺𑀲𑁆𑀲𑀸𑀬 𑀏𑀯𑀭𑀽𑀧𑁄 𑀧𑀭𑀺𑀲𑀼𑀤𑁆𑀥𑁄 𑀲𑀸𑀝𑀓𑁄 𑀧𑀓𑀢𑀺𑀁 𑀚𑀳𑀺𑀢𑁆𑀯𑀸 𑀓𑀺𑀮𑀺𑀝𑁆𑀞𑁄 𑀚𑀸𑀢𑁄, 𑀅𑀦𑀺𑀘𑁆𑀘𑀸 𑀯𑀢 𑀲𑀗𑁆𑀔𑀸𑀭𑀸’’𑀢𑀺 𑀅𑀦𑀺𑀘𑁆𑀘𑀲𑀜𑁆𑀜𑀁 𑀧𑀝𑀺𑀮𑀪𑀺. 𑀢𑁂 𑀓𑀸𑀭𑀡𑁂𑀦𑀲𑁆𑀲 𑀭𑀚𑁄𑀳𑀭𑀡𑀫𑁂𑀯 𑀧𑀘𑁆𑀘𑀬𑁄 𑀚𑀸𑀢𑁄.

𑀚𑀻𑀯𑀓𑁄𑀧𑀺 𑀔𑁄 𑀓𑁄𑀫𑀸𑀭𑀪𑀘𑁆𑀘𑁄 𑀤𑀲𑀩𑀮𑀲𑁆𑀲 𑀤𑀓𑁆𑀔𑀺𑀡𑁄𑀤𑀓𑀁 𑀉𑀧𑀦𑀸𑀫𑁂𑀲𑀺. 𑀲𑀢𑁆𑀣𑀸 ‘‘𑀦𑀦𑀼, 𑀚𑀻𑀯𑀓, 𑀯𑀺𑀳𑀸𑀭𑁂 𑀪𑀺𑀓𑁆𑀔𑀽 𑀅𑀢𑁆𑀣𑀻’’𑀢𑀺 𑀳𑀢𑁆𑀣𑁂𑀦 𑀧𑀢𑁆𑀢𑀁 𑀧𑀺𑀤𑀳𑀺. 𑀫𑀳𑀸𑀧𑀦𑁆𑀣𑀓𑁄 ‘‘𑀦𑀦𑀼, 𑀪𑀦𑁆𑀢𑁂, 𑀯𑀺𑀳𑀸𑀭𑁂 𑀪𑀺𑀓𑁆𑀔𑀽 𑀦𑀢𑁆𑀣𑀻’’𑀢𑀺 𑀆𑀳. 𑀲𑀢𑁆𑀣𑀸 ‘‘𑀅𑀢𑁆𑀣𑀺, 𑀚𑀻𑀯𑀓𑀸’’𑀢𑀺 𑀆𑀳. 𑀚𑀻𑀯𑀓𑁄 ‘‘𑀢𑁂𑀦 𑀳𑀺 𑀪𑀡𑁂 𑀕𑀘𑁆𑀙, 𑀯𑀺𑀳𑀸𑀭𑁂 𑀪𑀺𑀓𑁆𑀔𑀽𑀦𑀁 𑀅𑀢𑁆𑀣𑀺𑀪𑀸𑀯𑀁 𑀯𑀸 𑀦𑀢𑁆𑀣𑀺𑀪𑀸𑀯𑀁 𑀯𑀸 𑀢𑁆𑀯𑀜𑁆𑀜𑁂𑀯 𑀚𑀸𑀦𑀸𑀳𑀻’’𑀢𑀺 𑀧𑀼𑀭𑀺𑀲𑀁 𑀧𑁂𑀲𑁂𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀘𑀽𑀴𑀧𑀦𑁆𑀣𑀓𑁄 ‘‘𑀫𑀬𑁆𑀳𑀁 𑀪𑀸𑀢𑀺𑀓𑁄 ‘𑀯𑀺𑀳𑀸𑀭𑁂 𑀪𑀺𑀓𑁆𑀔𑀽 𑀦𑀢𑁆𑀣𑀻’𑀢𑀺 𑀪𑀡𑀢𑀺, 𑀯𑀺𑀳𑀸𑀭𑁂 𑀪𑀺𑀓𑁆𑀔𑀽𑀦𑀁 𑀅𑀢𑁆𑀣𑀺𑀪𑀸𑀯𑀫𑀲𑁆𑀲 𑀧𑀓𑀸𑀲𑁂𑀲𑁆𑀲𑀸𑀫𑀻’’𑀢𑀺 𑀲𑀓𑀮𑀁 𑀅𑀫𑁆𑀩𑀯𑀦𑀁 𑀪𑀺𑀓𑁆𑀔𑀽𑀦𑀜𑁆𑀜𑁂𑀯 𑀧𑀽𑀭𑁂𑀲𑀺. 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀘𑀻𑀯𑀭𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀏𑀓𑀘𑁆𑀘𑁂 𑀭𑀚𑀦𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀏𑀓𑀘𑁆𑀘𑁂 𑀲𑀚𑁆𑀛𑀸𑀬𑀁 𑀓𑀭𑁄𑀦𑁆𑀢𑀺. 𑀏𑀯𑀁 𑀅𑀜𑁆𑀜𑀫𑀜𑁆𑀜𑀅𑀲𑀤𑀺𑀲𑀁 𑀪𑀺𑀓𑁆𑀔𑀼𑀲𑀳𑀲𑁆𑀲𑀁 𑀫𑀸𑀧𑁂𑀲𑀺. 𑀲𑁄 𑀧𑀼𑀭𑀺𑀲𑁄 𑀯𑀺𑀳𑀸𑀭𑁂 𑀩𑀳𑀽 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸, ‘‘𑀅𑀬𑁆𑀬, 𑀲𑀓𑀮𑀁 𑀅𑀫𑁆𑀩𑀯𑀦𑀁 𑀪𑀺𑀓𑁆𑀔𑀽𑀳𑀺 𑀧𑀭𑀺𑀧𑀼𑀡𑁆𑀡’’𑀦𑁆𑀢𑀺 𑀚𑀻𑀯𑀓𑀲𑁆𑀲 𑀆𑀭𑁄𑀘𑁂𑀲𑀺. 𑀣𑁂𑀭𑁄𑀧𑀺 𑀔𑁄 𑀢𑀢𑁆𑀣𑁂𑀯 𑁋

‘‘𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀫𑀢𑁆𑀢𑀸𑀦𑀁, 𑀦𑀺𑀫𑁆𑀫𑀺𑀦𑀺𑀢𑁆𑀯𑀸𑀦 𑀧𑀦𑁆𑀣𑀓𑁄;

𑀦𑀺𑀲𑀻𑀤𑀫𑁆𑀩𑀯𑀦𑁂 𑀭𑀫𑁆𑀫𑁂, 𑀬𑀸𑀯 𑀓𑀸𑀮𑀧𑁆𑀧𑀯𑁂𑀤𑀦𑀸’’𑀢𑀺.

𑀅𑀣 𑀲𑀢𑁆𑀣𑀸 𑀢𑀁 𑀧𑀼𑀭𑀺𑀲𑀁 𑀆𑀳 𑁋 ‘‘𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 ‘𑀲𑀢𑁆𑀣𑀸 𑀘𑀽𑀴𑀧𑀦𑁆𑀣𑀓𑀁 𑀦𑀸𑀫 𑀧𑀓𑁆𑀓𑁄𑀲𑀢𑀻’𑀢𑀺 𑀯𑀤𑁂𑀳𑀻’’𑀢𑀺. 𑀢𑁂𑀦 𑀕𑀦𑁆𑀢𑁆𑀯𑀸 𑀢𑀣𑀸 𑀯𑀼𑀢𑁆𑀢𑁂, ‘‘𑀅𑀳𑀁 𑀘𑀽𑀴𑀧𑀦𑁆𑀣𑀓𑁄, 𑀅𑀳𑀁 𑀘𑀽𑀴𑀧𑀦𑁆𑀣𑀓𑁄’’𑀢𑀺 𑀫𑀼𑀔𑀲𑀳𑀲𑁆𑀲𑀁 𑀉𑀝𑁆𑀞𑀳𑀺. 𑀲𑁄 𑀧𑀼𑀭𑀺𑀲𑁄 𑀧𑀼𑀦 𑀕𑀦𑁆𑀢𑁆𑀯𑀸, ‘‘𑀲𑀩𑁆𑀩𑁂𑀧𑀺 𑀓𑀺𑀭, 𑀪𑀦𑁆𑀢𑁂, 𑀘𑀽𑀴𑀧𑀦𑁆𑀣𑀓𑀸𑀬𑁂𑀯 𑀦𑀸𑀫𑀸’’𑀢𑀺 𑀆𑀳. ‘‘𑀢𑁂𑀦 𑀳𑀺 𑀕𑀦𑁆𑀢𑁆𑀯𑀸 𑀬𑁄 ‘𑀅𑀳𑀁 𑀘𑀽𑀴𑀧𑀦𑁆𑀣𑀓𑁄’𑀢𑀺 𑀧𑀞𑀫𑀁 𑀯𑀤𑀢𑀺, 𑀢𑀁 𑀳𑀢𑁆𑀣𑁂 𑀕𑀡𑁆𑀳, 𑀅𑀯𑀲𑁂𑀲𑀸 𑀅𑀦𑁆𑀢𑀭𑀥𑀸𑀬𑀺𑀲𑁆𑀲𑀦𑁆𑀢𑀻’’𑀢𑀺. 𑀲𑁄 𑀢𑀣𑀸 𑀅𑀓𑀸𑀲𑀺. 𑀢𑀸𑀯𑀤𑁂𑀯 𑀲𑀳𑀲𑁆𑀲𑀫𑀢𑁆𑀢𑀸 𑀪𑀺𑀓𑁆𑀔𑀽 𑀅𑀦𑁆𑀢𑀭𑀥𑀸𑀬𑀺𑀁𑀲𑀼. 𑀣𑁂𑀭𑁄𑀧𑀺 𑀢𑁂𑀦 𑀧𑀼𑀭𑀺𑀲𑁂𑀦 𑀲𑀤𑁆𑀥𑀺𑀁 𑀅𑀕𑀫𑀸𑀲𑀺. 𑀲𑀢𑁆𑀣𑀸 𑀪𑀢𑁆𑀢𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀚𑀻𑀯𑀓𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀚𑀻𑀯𑀓, 𑀘𑀽𑀴𑀧𑀦𑁆𑀣𑀓𑀲𑁆𑀲 𑀧𑀢𑁆𑀢𑀁 𑀕𑀡𑁆𑀳𑀸𑀳𑀺, 𑀅𑀬𑀁 𑀢𑁂 𑀅𑀦𑀼𑀫𑁄𑀤𑀦𑀁 𑀓𑀭𑀺𑀲𑁆𑀲𑀢𑀻’’𑀢𑀺. 𑀚𑀻𑀯𑀓𑁄 𑀢𑀣𑀸 𑀅𑀓𑀸𑀲𑀺. 𑀣𑁂𑀭𑁄 𑀲𑀻𑀳𑀦𑀸𑀤𑀁 𑀦𑀤𑀦𑁆𑀢𑁄 𑀢𑀭𑀼𑀡𑀲𑀻𑀳𑁄 𑀯𑀺𑀬 𑀢𑀻𑀳𑀺 𑀧𑀺𑀝𑀓𑁂𑀳𑀺 𑀲𑀗𑁆𑀔𑁄𑀪𑁂𑀢𑁆𑀯𑀸 𑀅𑀦𑀼𑀫𑁄𑀤𑀦𑀫𑀓𑀸𑀲𑀺. 𑀲𑀢𑁆𑀣𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽𑀳𑀺 𑀯𑀢𑁆𑀢𑁂 𑀤𑀲𑁆𑀲𑀺𑀢𑁂 𑀕𑀦𑁆𑀥𑀓𑀼𑀝𑀺𑀧𑁆𑀧𑀫𑀼𑀔𑁂 𑀞𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑀼𑀕𑀢𑁄𑀯𑀸𑀤𑀁 𑀤𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀉𑀬𑁆𑀬𑁄𑀚𑁂𑀢𑁆𑀯𑀸 𑀲𑀼𑀭𑀪𑀺𑀕𑀦𑁆𑀥𑀯𑀸𑀲𑀺𑀢𑀁 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀲𑀺𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀲𑀻𑀳𑀲𑁂𑀬𑁆𑀬𑀁 𑀉𑀧𑀕𑀢𑁄. 𑀅𑀣 𑀲𑀸𑀬𑀦𑁆𑀳𑀲𑀫𑀬𑁂 𑀪𑀺𑀓𑁆𑀔𑀽 𑀇𑀢𑁄 𑀘𑀺𑀢𑁄 𑀘 𑀲𑀫𑁄𑀲𑀭𑀺𑀢𑁆𑀯𑀸 𑀭𑀢𑁆𑀢𑀓𑀫𑁆𑀩𑀮𑀲𑀸𑀡𑀺𑀬𑀸 𑀧𑀭𑀺𑀓𑁆𑀔𑀺𑀢𑁆𑀢𑀸 𑀯𑀺𑀬 𑀦𑀺𑀲𑀻𑀤𑀺𑀢𑁆𑀯𑀸 𑀲𑀢𑁆𑀣𑀼 𑀕𑀼𑀡𑀓𑀣𑀁 𑀆𑀭𑀪𑀺𑀁𑀲𑀼, ‘‘𑀆𑀯𑀼𑀲𑁄, 𑀫𑀳𑀸𑀧𑀦𑁆𑀣𑀓𑁄 𑀘𑀽𑀴𑀧𑀦𑁆𑀣𑀓𑀲𑁆𑀲 𑀅𑀚𑁆𑀛𑀸𑀲𑀬𑀁 𑀅𑀚𑀸𑀦𑀦𑁆𑀢𑁄 𑀘𑀢𑀽𑀳𑀺 𑀫𑀸𑀲𑁂𑀳𑀺 𑀏𑀓𑀁 𑀕𑀸𑀣𑀁 𑀉𑀕𑁆𑀕𑀡𑁆𑀳𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, ‘𑀤𑀦𑁆𑀥𑁄 𑀅𑀬’𑀦𑁆𑀢𑀺 𑀯𑀺𑀳𑀸𑀭𑀸 𑀦𑀺𑀓𑁆𑀓𑀟𑁆𑀠𑀺, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀧𑀦 𑀅𑀢𑁆𑀢𑀦𑁄 𑀅𑀦𑀼𑀢𑁆𑀢𑀭𑀥𑀫𑁆𑀫𑀭𑀸𑀚𑀢𑀸𑀬 𑀏𑀓𑀲𑁆𑀫𑀺𑀁𑀬𑁂𑀯𑀲𑁆𑀲 𑀅𑀦𑁆𑀢𑀭𑀪𑀢𑁆𑀢𑁂 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀅𑀤𑀸𑀲𑀺, 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺𑀬𑁂𑀯 𑀆𑀕𑀢𑀸𑀦𑀺, 𑀅𑀳𑁄 𑀩𑀼𑀤𑁆𑀥𑀸𑀦𑀁 𑀩𑀮𑀁 𑀦𑀸𑀫 𑀫𑀳𑀦𑁆𑀢’’𑀦𑁆𑀢𑀺.

𑀅𑀣 𑀪𑀕𑀯𑀸 𑀥𑀫𑁆𑀫𑀲𑀪𑀸𑀬𑀁 𑀇𑀫𑀁 𑀓𑀣𑀸𑀧𑀯𑀢𑁆𑀢𑀺𑀁 𑀜𑀢𑁆𑀯𑀸, ‘‘𑀅𑀚𑁆𑀚 𑀫𑀬𑀸 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀩𑀼𑀤𑁆𑀥𑀲𑁂𑀬𑁆𑀬𑀸𑀬 𑀉𑀝𑁆𑀞𑀸𑀬 𑀲𑀼𑀭𑀢𑁆𑀢𑀤𑀼𑀧𑀝𑁆𑀝𑀁 𑀦𑀺𑀯𑀸𑀲𑁂𑀢𑁆𑀯𑀸 𑀯𑀺𑀚𑁆𑀚𑀼𑀮𑀢𑀁 𑀯𑀺𑀬 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀭𑀢𑁆𑀢𑀓𑀫𑁆𑀩𑀮𑀲𑀤𑀺𑀲𑀁 𑀲𑀼𑀕𑀢𑀫𑀳𑀸𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀲𑀼𑀭𑀪𑀺𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑁆𑀫 𑀫𑀢𑁆𑀢𑀯𑀭𑀯𑀸𑀭𑀡𑀲𑀻𑀳𑀯𑀺𑀚𑀫𑁆𑀪𑀺𑀢𑀯𑀺𑀮𑀸𑀲𑁂𑀦 𑀅𑀦𑀦𑁆𑀢𑀸𑀬 𑀩𑀼𑀤𑁆𑀥𑀮𑀻𑀴𑀸𑀬 𑀥𑀫𑁆𑀫𑀲𑀪𑀁 𑀕𑀦𑁆𑀢𑁆𑀯𑀸 𑀅𑀮𑀗𑁆𑀓𑀢𑀫𑀡𑁆𑀟𑀮𑀫𑀸𑀴𑀫𑀚𑁆𑀛𑁂 𑀲𑀼𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑀁 𑀅𑀪𑀺𑀭𑀼𑀬𑁆𑀳 𑀙𑀩𑁆𑀩𑀡𑁆𑀡𑀩𑀼𑀤𑁆𑀥𑀭𑀁𑀲𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀅𑀡𑁆𑀡𑀯𑀓𑀼𑀘𑁆𑀙𑀺𑀁 𑀔𑁄𑀪𑀬𑀫𑀸𑀦𑁄 𑀬𑀼𑀕𑀦𑁆𑀥𑀭𑀫𑀢𑁆𑀣𑀓𑁂 𑀩𑀸𑀮𑀲𑀽𑀭𑀺𑀬𑁄 𑀯𑀺𑀬 𑀆𑀲𑀦𑀫𑀚𑁆𑀛𑁂 𑀦𑀺𑀲𑀻𑀤𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀧𑀦 𑀆𑀕𑀢𑀫𑀢𑁆𑀢𑁂 𑀪𑀺𑀓𑁆𑀔𑀼𑀲𑀗𑁆𑀖𑁄 𑀓𑀣𑀁 𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀲𑀢𑁆𑀣𑀸 𑀫𑀼𑀤𑀼𑀓𑁂𑀦 𑀫𑁂𑀢𑁆𑀢𑀘𑀺𑀢𑁆𑀢𑁂𑀦 𑀧𑀭𑀺𑀲𑀁 𑀑𑀮𑁄𑀓𑁂𑀢𑁆𑀯𑀸, ‘‘𑀅𑀬𑀁 𑀧𑀭𑀺𑀲𑀸 𑀅𑀢𑀺𑀯𑀺𑀬 𑀲𑁄𑀪𑀢𑀺, 𑀏𑀓𑀲𑁆𑀲𑀧𑀺 𑀳𑀢𑁆𑀣𑀓𑀼𑀓𑁆𑀓𑀼𑀘𑁆𑀘𑀁 𑀯𑀸 𑀧𑀸𑀤𑀓𑀼𑀓𑁆𑀓𑀼𑀘𑁆𑀘𑀁 𑀯𑀸 𑀉𑀓𑁆𑀓𑀸𑀲𑀺𑀢𑀲𑀤𑁆𑀤𑁄 𑀯𑀸 𑀔𑀺𑀧𑀺𑀢𑀲𑀤𑁆𑀤𑁄 𑀯𑀸 𑀦𑀢𑁆𑀣𑀺, 𑀲𑀩𑁆𑀩𑁂𑀧𑀺 𑀇𑀫𑁂 𑀩𑀼𑀤𑁆𑀥𑀕𑀸𑀭𑀯𑁂𑀦 𑀲𑀕𑀸𑀭𑀯𑀸, 𑀩𑀼𑀤𑁆𑀥𑀢𑁂𑀚𑁂𑀦 𑀢𑀚𑁆𑀚𑀺𑀢𑀸. 𑀫𑀬𑀺 𑀆𑀬𑀼𑀓𑀧𑁆𑀧𑀫𑁆𑀧𑀺 𑀅𑀓𑀣𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁂 𑀧𑀞𑀫𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀦 𑀓𑀣𑁂𑀲𑁆𑀲𑀦𑁆𑀢𑀺. 𑀓𑀣𑀸𑀲𑀫𑀼𑀝𑁆𑀞𑀸𑀧𑀦𑀯𑀢𑁆𑀢𑀁 𑀦𑀸𑀫 𑀫𑀬𑀸𑀯 𑀚𑀸𑀦𑀺𑀢𑀩𑁆𑀩𑀁, 𑀅𑀳𑀫𑁂𑀯 𑀧𑀞𑀫𑀁 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀫𑀥𑀼𑀭𑁂𑀦 𑀩𑁆𑀭𑀳𑁆𑀫𑀲𑁆𑀲𑀭𑁂𑀦 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀢𑁆𑀯𑀸, ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸, 𑀓𑀸 𑀘 𑀧𑀦 𑀯𑁄 𑀅𑀦𑁆𑀢𑀭𑀸𑀓𑀣𑀸 𑀯𑀺𑀧𑁆𑀧𑀓𑀢𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂, ‘‘𑀦, 𑀪𑀺𑀓𑁆𑀔𑀯𑁂, 𑀘𑀽𑀴𑀧𑀦𑁆𑀣𑀓𑁄 𑀇𑀤𑀸𑀦𑁂𑀯 𑀤𑀦𑁆𑀥𑁄, 𑀧𑀼𑀩𑁆𑀩𑁂𑀧𑀺 𑀤𑀦𑁆𑀥𑁄𑀬𑁂𑀯. 𑀦 𑀓𑁂𑀯𑀮𑀜𑁆𑀘𑀲𑁆𑀲𑀸𑀳𑀁 𑀇𑀤𑀸𑀦𑁂𑀯 𑀅𑀯𑀲𑁆𑀲𑀬𑁄 𑀚𑀸𑀢𑁄, 𑀧𑀼𑀩𑁆𑀩𑁂𑀧𑀺 𑀅𑀯𑀲𑁆𑀲𑀬𑁄 𑀅𑀳𑁄𑀲𑀺𑀫𑁂𑀯. 𑀧𑀼𑀩𑁆𑀩𑁂 𑀧𑀦𑀸𑀳𑀁 𑀇𑀫𑀁 𑀮𑁄𑀓𑀺𑀬𑀓𑀼𑀝𑀼𑀫𑁆𑀩𑀲𑁆𑀲 𑀲𑀸𑀫𑀺𑀓𑀁 𑀅𑀓𑀸𑀲𑀺𑀁, 𑀇𑀤𑀸𑀦𑀺 𑀮𑁄𑀓𑀼𑀢𑁆𑀢𑀭𑀓𑀼𑀝𑀼𑀫𑁆𑀩𑀲𑁆𑀲𑀸’’𑀢𑀺 𑀯𑀢𑁆𑀯𑀸 𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀲𑁄𑀢𑀼𑀓𑀸𑀫𑁂𑀳𑀺 𑀪𑀺𑀓𑁆𑀔𑀽𑀳𑀺 𑀆𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺 𑁋

‘‘𑀅𑀢𑀻𑀢𑁂, 𑀪𑀺𑀓𑁆𑀔𑀯𑁂, 𑀩𑀸𑀭𑀸𑀡𑀲𑀺𑀦𑀕𑀭𑀯𑀸𑀲𑀻 𑀏𑀓𑁄 𑀫𑀸𑀡𑀯𑁄 𑀢𑀓𑁆𑀓𑀲𑀺𑀮𑀁 𑀕𑀦𑁆𑀢𑁆𑀯𑀸 𑀲𑀺𑀧𑁆𑀧𑀼𑀕𑁆𑀕𑀳𑀡𑀢𑁆𑀣𑀸𑀬 𑀤𑀺𑀲𑀸𑀧𑀸𑀫𑁄𑀓𑁆𑀔𑀲𑁆𑀲 𑀆𑀘𑀭𑀺𑀬𑀲𑁆𑀲 𑀥𑀫𑁆𑀫𑀦𑁆𑀢𑁂𑀯𑀸𑀲𑀺𑀓𑁄 𑀳𑀼𑀢𑁆𑀯𑀸 𑀧𑀜𑁆𑀘𑀦𑁆𑀦𑀁 𑀫𑀸𑀡𑀯𑀓𑀲𑀢𑀸𑀦𑀁 𑀅𑀦𑁆𑀢𑀭𑁂 𑀅𑀢𑀺𑀯𑀺𑀬 𑀆𑀘𑀭𑀺𑀬𑀲𑁆𑀲 𑀉𑀧𑀓𑀸𑀭𑀓𑁄 𑀅𑀳𑁄𑀲𑀺, 𑀧𑀸𑀤𑀧𑀭𑀺𑀓𑀫𑁆𑀫𑀸𑀤𑀻𑀦𑀺 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀓𑀭𑁄𑀢𑀺. 𑀤𑀦𑁆𑀥𑀢𑀸𑀬 𑀧𑀦 𑀓𑀺𑀜𑁆𑀘𑀺 𑀉𑀕𑁆𑀕𑀡𑁆𑀳𑀺𑀢𑀼𑀁 𑀦 𑀲𑀓𑁆𑀓𑁄’’𑀢𑀺. 𑀆𑀘𑀭𑀺𑀬𑁄 ‘‘𑀅𑀬𑀁 𑀫𑀫 𑀩𑀳𑀽𑀧𑀓𑀸𑀭𑁄, 𑀲𑀺𑀓𑁆𑀔𑀸𑀧𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀯𑀸𑀬𑀫𑀦𑁆𑀢𑁄𑀧𑀺 𑀓𑀺𑀜𑁆𑀘𑀺 𑀲𑀺𑀓𑁆𑀔𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀲𑁄 𑀘𑀺𑀭𑀁 𑀯𑀲𑀺𑀢𑁆𑀯𑀸 𑀏𑀓𑀕𑀸𑀣𑀫𑁆𑀧𑀺 𑀉𑀕𑁆𑀕𑀡𑁆𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀉𑀓𑁆𑀓𑀡𑁆𑀞𑀺𑀢𑁆𑀯𑀸 ‘‘𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀆𑀘𑀭𑀺𑀬𑀁 𑀆𑀧𑀼𑀘𑁆𑀙𑀺. 𑀆𑀘𑀭𑀺𑀬𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀫𑀬𑁆𑀳𑀁 𑀉𑀧𑀓𑀸𑀭𑀓𑁄, 𑀧𑀡𑁆𑀟𑀺𑀢𑀪𑀸𑀯𑀫𑀲𑁆𑀲 𑀧𑀘𑁆𑀘𑀸𑀲𑀻𑀲𑀸𑀫𑀺, 𑀦 𑀦𑀁 𑀓𑀸𑀢𑀼𑀁 𑀲𑀓𑁆𑀓𑁄𑀫𑀺, 𑀅𑀯𑀲𑁆𑀲𑀁 𑀫𑀬𑀸 𑀇𑀫𑀲𑁆𑀲 𑀧𑀘𑁆𑀘𑀼𑀧𑀓𑀸𑀭𑁄 𑀓𑀸𑀢𑀩𑁆𑀩𑁄, 𑀏𑀓𑀫𑀲𑁆𑀲 𑀫𑀦𑁆𑀢𑀁 𑀩𑀦𑁆𑀥𑀺𑀢𑁆𑀯𑀸 𑀤𑀲𑁆𑀲𑀸𑀫𑀻’’𑀢𑀺 𑀲𑁄 𑀢𑀁 𑀅𑀭𑀜𑁆𑀜𑀁 𑀦𑁂𑀢𑁆𑀯𑀸 ‘‘𑀖𑀝𑁆𑀝𑁂𑀲𑀺 𑀖𑀝𑁆𑀝𑁂𑀲𑀺, 𑀓𑀺𑀁 𑀓𑀸𑀭𑀡𑀸 𑀖𑀝𑁆𑀝𑁂𑀲𑀺? 𑀅𑀳𑀫𑁆𑀧𑀺 𑀢𑀁 𑀚𑀸𑀦𑀸𑀫𑀺 𑀚𑀸𑀦𑀸𑀫𑀻’’𑀢𑀺 𑀇𑀫𑀁 𑀫𑀦𑁆𑀢𑀁 𑀩𑀦𑁆𑀥𑀺𑀢𑁆𑀯𑀸 𑀉𑀕𑁆𑀕𑀡𑁆𑀳𑀸𑀧𑁂𑀦𑁆𑀢𑁄 𑀅𑀦𑁂𑀓𑀲𑀢𑀓𑁆𑀔𑀢𑁆𑀢𑀼𑀁 𑀧𑀭𑀺𑀯𑀢𑁆𑀢𑀸𑀧𑁂𑀢𑁆𑀯𑀸, ‘‘𑀧𑀜𑁆𑀜𑀸𑀬𑀢𑀺 𑀢𑁂’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀆𑀫, 𑀧𑀜𑁆𑀜𑀸𑀬𑀢𑀻’’𑀢𑀺 𑀯𑀼𑀢𑁆𑀢𑁂 ‘‘𑀤𑀦𑁆𑀥𑁂𑀦 𑀦𑀸𑀫 𑀯𑀸𑀬𑀸𑀫𑀁 𑀓𑀢𑁆𑀯𑀸 𑀧𑀕𑀼𑀡𑀁 𑀓𑀢𑀁 𑀲𑀺𑀧𑁆𑀧𑀁 𑀦 𑀧𑀮𑀸𑀬𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀫𑀕𑁆𑀕𑀧𑀭𑀺𑀩𑁆𑀩𑀬𑀁 𑀤𑀢𑁆𑀯𑀸, ‘‘𑀕𑀘𑁆𑀙, 𑀇𑀫𑀁 𑀫𑀦𑁆𑀢𑀁 𑀦𑀺𑀲𑁆𑀲𑀸𑀬 𑀚𑀻𑀯𑀺𑀲𑁆𑀲𑀲𑀺, 𑀅𑀧𑀮𑀸𑀬𑀦𑀢𑁆𑀣𑀸𑀬 𑀧𑀦𑀲𑁆𑀲 𑀦𑀺𑀘𑁆𑀘𑀁 𑀲𑀚𑁆𑀛𑀸𑀬𑀁 𑀓𑀭𑁂𑀬𑁆𑀬𑀸𑀲𑀻’’𑀢𑀺 𑀯𑀢𑁆𑀯𑀸 𑀢𑀁 𑀉𑀬𑁆𑀬𑁄𑀚𑁂𑀲𑀺. 𑀅𑀣𑀲𑁆𑀲 𑀫𑀸𑀢𑀸 𑀩𑀸𑀭𑀸𑀡𑀲𑀺𑀬𑀁 𑀲𑀫𑁆𑀧𑀢𑁆𑀢𑀓𑀸𑀮𑁂 ‘‘𑀧𑀼𑀢𑁆𑀢𑁄 𑀫𑁂 𑀲𑀺𑀧𑁆𑀧𑀁 𑀲𑀺𑀓𑁆𑀔𑀺𑀢𑁆𑀯𑀸 𑀆𑀕𑀢𑁄’’𑀢𑀺 𑀫𑀳𑀸𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀅𑀓𑀸𑀲𑀺.

𑀢𑀤𑀸 𑀩𑀸𑀭𑀸𑀡𑀲𑀺𑀭𑀸𑀚𑀸 ‘‘𑀅𑀢𑁆𑀣𑀺 𑀦𑀼 𑀔𑁄 𑀫𑁂 𑀓𑀸𑀬𑀓𑀫𑁆𑀫𑀸𑀤𑀻𑀲𑀼 𑀓𑁄𑀘𑀺 𑀤𑁄𑀲𑁄’’𑀢𑀺 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀅𑀢𑁆𑀢𑀦𑁄 𑀅𑀭𑀼𑀘𑁆𑀘𑀦𑀓𑀁 𑀓𑀺𑀜𑁆𑀘𑀺 𑀓𑀫𑁆𑀫𑀁 𑀅𑀤𑀺𑀲𑁆𑀯𑀸 ‘‘𑀅𑀢𑁆𑀢𑀦𑁄 𑀯𑀚𑁆𑀚𑀁 𑀦𑀸𑀫 𑀅𑀢𑁆𑀢𑀦𑁄 𑀦 𑀧𑀜𑁆𑀜𑀸𑀬𑀢𑀺, 𑀧𑀭𑁂𑀲𑀁 𑀧𑀜𑁆𑀜𑀸𑀬𑀢𑀺, 𑀦𑀸𑀕𑀭𑀸𑀦𑀁 𑀧𑀭𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀸𑀬𑀁 𑀅𑀜𑁆𑀜𑀸𑀢𑀓𑀯𑁂𑀲𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸, ‘‘𑀲𑀸𑀬𑀫𑀸𑀲𑀁 𑀪𑀼𑀜𑁆𑀚𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀫𑀦𑀼𑀲𑁆𑀲𑀸𑀦𑀁 𑀓𑀣𑀸𑀲𑀮𑁆𑀮𑀸𑀧𑁄 𑀦𑀸𑀫 𑀦𑀸𑀦𑀧𑁆𑀧𑀓𑀸𑀭𑀓𑁄 𑀳𑁄𑀢𑀺, ‘𑀲𑀘𑀸𑀳𑀁 𑀅𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀫𑀺, 𑀧𑀸𑀧𑁂𑀦 𑀅𑀥𑀫𑁆𑀫𑀺𑀓𑁂𑀦 𑀭𑀜𑁆𑀜𑀸 𑀤𑀡𑁆𑀟𑀩𑀮𑀺𑀆𑀤𑀻𑀳𑀺 𑀳𑀢𑀫𑁆𑀳𑀸’𑀢𑀺 𑀯𑀓𑁆𑀔𑀦𑁆𑀢𑀺. ‘𑀲𑀘𑁂 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀫𑀺, 𑀤𑀻𑀖𑀸𑀬𑀼𑀓𑁄 𑀳𑁄𑀢𑀼 𑀦𑁄 𑀭𑀸𑀚𑀸’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀫𑀫 𑀕𑀼𑀡𑀁 𑀓𑀣𑁂𑀲𑁆𑀲𑀦𑁆𑀢𑀻’’𑀢𑀺 𑀢𑁂𑀲𑀁 𑀢𑁂𑀲𑀁 𑀕𑁂𑀳𑀸𑀦𑀁 𑀪𑀺𑀢𑁆𑀢𑀺𑀅𑀦𑀼𑀲𑀸𑀭𑁂𑀦𑁂𑀯 𑀯𑀺𑀘𑀭𑀢𑀺.

𑀢𑀲𑁆𑀫𑀺𑀁 𑀔𑀡𑁂 𑀉𑀫𑀗𑁆𑀕𑀘𑁄𑀭𑀸 𑀤𑁆𑀯𑀺𑀦𑁆𑀦𑀁 𑀕𑁂𑀳𑀸𑀦𑀁 𑀅𑀦𑁆𑀢𑀭𑁂 𑀉𑀫𑀗𑁆𑀕𑀁 𑀪𑀺𑀦𑁆𑀤𑀦𑁆𑀢𑀺 𑀏𑀓𑀉𑀫𑀗𑁆𑀕𑁂𑀦𑁂𑀯 𑀤𑁆𑀯𑁂 𑀕𑁂𑀳𑀸𑀦𑀺 𑀧𑀯𑀺𑀲𑀦𑀢𑁆𑀣𑀸𑀬. 𑀭𑀸𑀚𑀸 𑀢𑁂 𑀤𑀺𑀲𑁆𑀯𑀸 𑀕𑁂𑀳𑀘𑁆𑀙𑀸𑀬𑀸𑀬 𑀅𑀝𑁆𑀞𑀸𑀲𑀺. 𑀢𑁂𑀲𑀁 𑀉𑀫𑀗𑁆𑀕𑀁 𑀪𑀺𑀦𑁆𑀤𑀺𑀢𑁆𑀯𑀸 𑀕𑁂𑀳𑀁 𑀧𑀯𑀺𑀲𑀺𑀢𑁆𑀯𑀸 𑀪𑀡𑁆𑀟𑀓𑀁 𑀑𑀮𑁄𑀓𑀺𑀢𑀓𑀸𑀮𑁂 𑀫𑀸𑀡𑀯𑁄 𑀧𑀩𑀼𑀚𑁆𑀛𑀺𑀢𑁆𑀯𑀸 𑀢𑀁 𑀫𑀦𑁆𑀢𑀁 𑀲𑀚𑁆𑀛𑀸𑀬𑀦𑁆𑀢𑁄 ‘‘𑀖𑀝𑁆𑀝𑁂𑀲𑀺 𑀖𑀝𑁆𑀝𑁂𑀲𑀺, 𑀓𑀺𑀁 𑀓𑀸𑀭𑀡𑀸 𑀖𑀝𑁆𑀝𑁂𑀲𑀺? 𑀅𑀳𑀫𑁆𑀧𑀺 𑀢𑀁 𑀚𑀸𑀦𑀸𑀫𑀺 𑀚𑀸𑀦𑀸𑀫𑀻’’𑀢𑀺 𑀆𑀳. 𑀢𑁂 𑀢𑀁 𑀲𑀼𑀢𑁆𑀯𑀸, ‘‘𑀇𑀫𑀺𑀦𑀸 𑀓𑀺𑀭𑀫𑁆𑀳𑀸 𑀜𑀸𑀢𑀸, 𑀇𑀤𑀸𑀦𑀺 𑀦𑁄 𑀦𑀸𑀲𑁂𑀲𑁆𑀲𑀢𑀻’’𑀢𑀺 𑀦𑀺𑀯𑀢𑁆𑀣𑀯𑀢𑁆𑀣𑀸𑀦𑀺𑀧𑀺 𑀙𑀟𑁆𑀟𑁂𑀢𑁆𑀯𑀸 𑀪𑀻𑀢𑀸 𑀲𑀫𑁆𑀫𑀼𑀔𑀲𑀫𑁆𑀫𑀼𑀔𑀝𑁆𑀞𑀸𑀦𑁂𑀦𑁂𑀯 𑀧𑀮𑀸𑀬𑀺𑀁𑀲𑀼. 𑀭𑀸𑀚𑀸 𑀢𑁂 𑀧𑀮𑀸𑀬𑀦𑁆𑀢𑁂 𑀤𑀺𑀲𑁆𑀯𑀸 𑀇𑀢𑀭𑀲𑁆𑀲 𑀘 𑀫𑀦𑁆𑀢𑀲𑀚𑁆𑀛𑀸𑀬𑀦𑀲𑀤𑁆𑀤𑀁 𑀲𑀼𑀢𑁆𑀯𑀸 𑀕𑁂𑀳𑀜𑁆𑀜𑁂𑀯 𑀯𑀯𑀢𑁆𑀣𑀧𑁂𑀢𑁆𑀯𑀸 𑀦𑀸𑀕𑀭𑀸𑀦𑀁 𑀧𑀭𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀦𑀺𑀯𑁂𑀲𑀦𑀁 𑀧𑀸𑀯𑀺𑀲𑀺. 𑀲𑁄 𑀯𑀺𑀪𑀸𑀢𑀸𑀬 𑀧𑀦 𑀭𑀢𑁆𑀢𑀺𑀬𑀸 𑀧𑀸𑀢𑁄𑀯𑁂𑀓𑀁 𑀧𑀼𑀭𑀺𑀲𑀁 𑀧𑀓𑁆𑀓𑁄𑀲𑀺𑀢𑁆𑀯𑀸 𑀆𑀳 𑁋 ‘‘𑀕𑀘𑁆𑀙 𑀪𑀡𑁂, 𑀅𑀲𑀼𑀓𑀯𑀻𑀣𑀺𑀬𑀁 𑀦𑀸𑀫 𑀬𑀲𑁆𑀫𑀺𑀁 𑀕𑁂𑀳𑁂 𑀉𑀫𑀗𑁆𑀕𑁄 𑀪𑀺𑀦𑁆𑀦𑁄, 𑀢𑀢𑁆𑀣 𑀢𑀓𑁆𑀓𑀲𑀺𑀮𑀢𑁄 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀆𑀕𑀢𑀫𑀸𑀡𑀯𑁄 𑀅𑀢𑁆𑀣𑀺, 𑀢𑀁 𑀆𑀦𑁂𑀳𑀻’’𑀢𑀺. 𑀲𑁄 𑀕𑀦𑁆𑀢𑁆𑀯𑀸 ‘‘𑀭𑀸𑀚𑀸 𑀢𑀁 𑀧𑀓𑁆𑀓𑁄𑀲𑀢𑀻’’𑀢𑀺 𑀯𑀢𑁆𑀯𑀸 𑀫𑀸𑀡𑀯𑀁 𑀆𑀦𑁂𑀲𑀺. 𑀅𑀣 𑀦𑀁 𑀭𑀸𑀚𑀸 𑀆𑀳 𑁋 ‘‘𑀢𑁆𑀯𑀁, 𑀢𑀸𑀢, 𑀢𑀓𑁆𑀓𑀲𑀺𑀮𑀢𑁄 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀆𑀕𑀢𑀫𑀸𑀡𑀯𑁄’’𑀢𑀺? ‘‘𑀆𑀫, 𑀤𑁂𑀯𑀸’’𑀢𑀺. ‘‘𑀅𑀫𑁆𑀳𑀸𑀓𑀫𑁆𑀧𑀺 𑀢𑀁 𑀲𑀺𑀧𑁆𑀧𑀁 𑀤𑁂𑀳𑀻’’𑀢𑀺. ‘‘𑀲𑀸𑀥𑀼, 𑀤𑁂𑀯, 𑀲𑀫𑀸𑀦𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀕𑀡𑁆𑀳𑀸𑀳𑀻’’𑀢𑀺. 𑀭𑀸𑀚𑀸𑀧𑀺 𑀢𑀣𑀸 𑀓𑀢𑁆𑀯𑀸 𑀫𑀦𑁆𑀢𑀁 𑀕𑀳𑁂𑀢𑁆𑀯𑀸 ‘‘𑀅𑀬𑀁 𑀢𑁂 𑀆𑀘𑀭𑀺𑀬𑀪𑀸𑀕𑁄’’𑀢𑀺 𑀲𑀳𑀲𑁆𑀲𑀁 𑀅𑀤𑀸𑀲𑀺.

𑀢𑀤𑀸 𑀲𑁂𑀦𑀸𑀧𑀢𑀺 𑀭𑀜𑁆𑀜𑁄 𑀓𑀧𑁆𑀧𑀓𑀁 𑀆𑀳 𑁋 ‘‘𑀓𑀤𑀸 𑀭𑀜𑁆𑀜𑁄 𑀫𑀲𑁆𑀲𑀼𑀁 𑀓𑀭𑀺𑀲𑁆𑀲𑀲𑀻’’𑀢𑀺? ‘‘𑀲𑁆𑀯𑁂 𑀯𑀸 𑀧𑀭𑀲𑀼𑀯𑁂 𑀯𑀸’’𑀢𑀺. 𑀲𑁄 𑀢𑀲𑁆𑀲 𑀲𑀳𑀲𑁆𑀲𑀁 𑀤𑀢𑁆𑀯𑀸 ‘‘𑀓𑀺𑀘𑁆𑀘𑀁 𑀫𑁂 𑀅𑀢𑁆𑀣𑀻’’𑀢𑀺 𑀯𑀢𑁆𑀯𑀸, ‘‘𑀓𑀺𑀁, 𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 ‘‘𑀭𑀜𑁆𑀜𑁄 𑀫𑀲𑁆𑀲𑀼𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀯𑀺𑀬 𑀳𑀼𑀢𑁆𑀯𑀸 𑀔𑀼𑀭𑀁 𑀅𑀢𑀺𑀯𑀺𑀬 𑀧𑀳𑀁𑀲𑀺𑀢𑁆𑀯𑀸 𑀕𑀮𑀦𑀸𑀴𑀺𑀁 𑀙𑀺𑀦𑁆𑀤, 𑀢𑁆𑀯𑀁 𑀲𑁂𑀦𑀸𑀧𑀢𑀺 𑀪𑀯𑀺𑀲𑁆𑀲𑀲𑀺, 𑀅𑀳𑀁 𑀭𑀸𑀚𑀸’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀭𑀜𑁆𑀜𑁄 𑀫𑀲𑁆𑀲𑀼𑀓𑀫𑁆𑀫𑀓𑀭𑀡𑀤𑀺𑀯𑀲𑁂 𑀕𑀦𑁆𑀥𑁄𑀤𑀓𑁂𑀦 𑀫𑀲𑁆𑀲𑀼𑀁 𑀢𑁂𑀫𑁂𑀢𑁆𑀯𑀸 𑀔𑀼𑀭𑀁 𑀧𑀳𑀁𑀲𑀺𑀢𑁆𑀯𑀸 𑀦𑀮𑀸𑀝𑀦𑁆𑀢𑁂 𑀕𑀳𑁂𑀢𑁆𑀯𑀸, ‘‘𑀔𑀼𑀭𑁄 𑀣𑁄𑀓𑀁 𑀓𑀼𑀡𑁆𑀞𑀥𑀸𑀭𑁄, 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀕𑀮𑀦𑀸𑀴𑀺𑀁 𑀙𑀺𑀦𑁆𑀤𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀧𑀼𑀦 𑀏𑀓𑀫𑀦𑁆𑀢𑀁 𑀞𑀢𑁆𑀯𑀸 𑀔𑀼𑀭𑀁 𑀧𑀳𑀁𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀭𑀸𑀚𑀸 𑀅𑀢𑁆𑀢𑀦𑁄 𑀫𑀦𑁆𑀢𑀁 𑀲𑀭𑀺𑀢𑁆𑀯𑀸 𑀲𑀚𑁆𑀛𑀸𑀬𑀁 𑀓𑀭𑁄𑀦𑁆𑀢𑁄 ‘‘𑀖𑀝𑁆𑀝𑁂𑀲𑀺 𑀖𑀝𑁆𑀝𑁂𑀲𑀺, 𑀓𑀺𑀁 𑀓𑀸𑀭𑀡𑀸 𑀖𑀝𑁆𑀝𑁂𑀲𑀺? 𑀅𑀳𑀫𑁆𑀧𑀺 𑀢𑀁 𑀚𑀸𑀦𑀸𑀫𑀺 𑀚𑀸𑀦𑀸𑀫𑀻’’𑀢𑀺 𑀆𑀳. 𑀦𑁆𑀳𑀸𑀧𑀺𑀢𑀲𑁆𑀲 𑀦𑀮𑀸𑀝𑀢𑁄 𑀲𑁂𑀤𑀸 𑀫𑀼𑀘𑁆𑀘𑀺𑀁𑀲𑀼. 𑀲𑁄 ‘‘𑀚𑀸𑀦𑀸𑀢𑀺 𑀫𑀫 𑀓𑀸𑀭𑀡𑀁 𑀭𑀸𑀚𑀸’’𑀢𑀺 𑀪𑀻𑀢𑁄 𑀔𑀼𑀭𑀁 𑀪𑀽𑀫𑀺𑀬𑀁 𑀔𑀺𑀧𑀺𑀢𑁆𑀯𑀸 𑀧𑀸𑀤𑀫𑀽𑀮𑁂 𑀉𑀭𑁂𑀦 𑀦𑀺𑀧𑀚𑁆𑀚𑀺. 𑀭𑀸𑀚𑀸𑀦𑁄 𑀦𑀸𑀫 𑀙𑁂𑀓𑀸 𑀳𑁄𑀦𑁆𑀢𑀺, 𑀢𑁂𑀦 𑀢𑀁 𑀏𑀯𑀫𑀸𑀳 𑁋 ‘‘𑀅𑀭𑁂, 𑀤𑀼𑀝𑁆𑀞, 𑀦𑁆𑀳𑀸𑀧𑀺𑀢, ‘𑀦 𑀫𑀁 𑀭𑀸𑀚𑀸 𑀚𑀸𑀦𑀸𑀢𑀻’𑀢𑀺 𑀲𑀜𑁆𑀜𑀁 𑀓𑀭𑁄𑀲𑀻’’𑀢𑀺. ‘‘𑀅𑀪𑀬𑀁 𑀫𑁂 𑀤𑁂𑀳𑀺, 𑀤𑁂𑀯𑀸’’𑀢𑀺. ‘‘𑀳𑁄𑀢𑀼, 𑀫𑀸 𑀪𑀸𑀬𑀺, 𑀓𑀣𑁂𑀳𑀻’’𑀢𑀺. 𑀲𑁂𑀦𑀸𑀧𑀢𑀺 𑀫𑁂, 𑀤𑁂𑀯, 𑀲𑀳𑀲𑁆𑀲𑀁 𑀤𑀢𑁆𑀯𑀸, ‘‘𑀭𑀜𑁆𑀜𑁄 𑀫𑀲𑁆𑀲𑀼𑀁 𑀓𑀭𑁄𑀦𑁆𑀢𑁄 𑀯𑀺𑀬 𑀕𑀮𑀦𑀸𑀴𑀺𑀁 𑀙𑀺𑀦𑁆𑀤, 𑀅𑀳𑀁 𑀭𑀸𑀚𑀸 𑀳𑀼𑀢𑁆𑀯𑀸 𑀢𑀁 𑀲𑁂𑀦𑀸𑀧𑀢𑀺𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀳𑀸𑀢𑀺. 𑀭𑀸𑀚𑀸 𑀢𑀁 𑀲𑀼𑀢𑁆𑀯𑀸 ‘‘𑀆𑀘𑀭𑀺𑀬𑀁 𑀫𑁂 𑀦𑀺𑀲𑁆𑀲𑀸𑀬 𑀚𑀻𑀯𑀺𑀢𑀁 𑀮𑀤𑁆𑀥’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑁂𑀦𑀸𑀧𑀢𑀺𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸, ‘‘𑀅𑀫𑁆𑀪𑁄, 𑀲𑁂𑀦𑀸𑀧𑀢𑀺, 𑀓𑀺𑀁 𑀦𑀸𑀫 𑀢𑀬𑀸 𑀫𑀫 𑀲𑀦𑁆𑀢𑀺𑀓𑀸 𑀦 𑀮𑀤𑁆𑀥𑀁, 𑀇𑀤𑀸𑀦𑀺 𑀢𑀁 𑀤𑀝𑁆𑀞𑀼𑀁 𑀦 𑀲𑀓𑁆𑀓𑁄𑀫𑀺, 𑀫𑀫 𑀭𑀝𑁆𑀞𑀸 𑀦𑀺𑀓𑁆𑀔𑀫𑀸𑀳𑀻’’𑀢𑀺 𑀢𑀁 𑀭𑀝𑁆𑀞𑀸 𑀧𑀩𑁆𑀩𑀸𑀚𑁂𑀢𑁆𑀯𑀸 𑀆𑀘𑀭𑀺𑀬𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸, ‘‘𑀆𑀘𑀭𑀺𑀬, 𑀢𑀁 𑀦𑀺𑀲𑁆𑀲𑀸𑀬 𑀫𑀬𑀸 𑀚𑀻𑀯𑀺𑀢𑀁 𑀮𑀤𑁆𑀥’’𑀦𑁆𑀢𑀺 𑀯𑀢𑁆𑀯𑀸 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀁 𑀓𑀭𑀺𑀢𑁆𑀯𑀸 𑀢𑀲𑁆𑀲 𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑀁 𑀅𑀤𑀸𑀲𑀺. ‘‘𑀲𑁄 𑀢𑀤𑀸 𑀘𑀽𑀴𑀧𑀦𑁆𑀣𑀓𑁄 𑀅𑀳𑁄𑀲𑀺, 𑀲𑀢𑁆𑀣𑀸 𑀤𑀺𑀲𑀸𑀧𑀸𑀫𑁄𑀓𑁆𑀔𑁄 𑀆𑀘𑀭𑀺𑀬𑁄’’𑀢𑀺.

𑀲𑀢𑁆𑀣𑀸 𑀇𑀫𑀁 𑀅𑀢𑀻𑀢𑀁 𑀆𑀳𑀭𑀺𑀢𑁆𑀯𑀸, ‘‘𑀏𑀯𑀁, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂𑀧𑀺 𑀘𑀽𑀴𑀧𑀦𑁆𑀣𑀓𑁄 𑀤𑀦𑁆𑀥𑁄𑀬𑁂𑀯 𑀅𑀳𑁄𑀲𑀺, 𑀢𑀤𑀸𑀧𑀺𑀲𑁆𑀲𑀸𑀳𑀁 𑀅𑀯𑀲𑁆𑀲𑀬𑁄 𑀳𑀼𑀢𑁆𑀯𑀸 𑀢𑀁 𑀮𑁄𑀓𑀺𑀬𑀓𑀼𑀝𑀼𑀫𑁆𑀩𑁂 𑀧𑀢𑀺𑀝𑁆𑀞𑀸𑀧𑁂𑀲𑀺’’𑀦𑁆𑀢𑀺 𑀯𑀢𑁆𑀯𑀸 𑀧𑀼𑀦 𑀏𑀓𑀤𑀺𑀯𑀲𑀁 ‘‘𑀅𑀳𑁄 𑀲𑀢𑁆𑀣𑀸 𑀘𑀽𑀴𑀧𑀦𑁆𑀣𑀓𑀲𑁆𑀲 𑀅𑀯𑀲𑁆𑀲𑀬𑁄 𑀚𑀸𑀢𑁄’’𑀢𑀺 𑀓𑀣𑀸𑀬 𑀲𑀫𑀼𑀝𑁆𑀞𑀺𑀢𑀸𑀬 𑀘𑀽𑀴𑀲𑁂𑀝𑁆𑀞𑀺𑀚𑀸𑀢𑀓𑁂 𑀅𑀢𑀻𑀢𑀯𑀢𑁆𑀣𑀼𑀁 𑀓𑀣𑁂𑀢𑁆𑀯𑀸 𑁋

‘‘𑀅𑀧𑁆𑀧𑀓𑁂𑀦𑀸𑀧𑀺 𑀫𑁂𑀥𑀸𑀯𑀻, 𑀧𑀸𑀪𑀢𑁂𑀦 𑀯𑀺𑀘𑀓𑁆𑀔𑀡𑁄;

𑀲𑀫𑀼𑀝𑁆𑀞𑀸𑀧𑁂𑀢𑀺 𑀅𑀢𑁆𑀢𑀸𑀦𑀁, 𑀅𑀡𑀼𑀁 𑀅𑀕𑁆𑀕𑀺𑀁𑀯 𑀲𑀦𑁆𑀥𑀫’’𑀦𑁆𑀢𑀺. (𑀚𑀸. 𑁧.𑁧.𑁪) 𑁋

𑀕𑀸𑀣𑀁 𑀯𑀢𑁆𑀯𑀸, ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯𑀸𑀳𑀁 𑀇𑀫𑀲𑁆𑀲 𑀅𑀯𑀲𑁆𑀲𑀬𑁄 𑀚𑀸𑀢𑁄, 𑀧𑀼𑀩𑁆𑀩𑁂𑀧𑀺 𑀅𑀯𑀲𑁆𑀲𑀬𑁄 𑀅𑀳𑁄𑀲𑀺𑀫𑁂𑀯. 𑀧𑀼𑀩𑁆𑀩𑁂 𑀧𑀦𑀸𑀳𑀁 𑀇𑀫𑀁 𑀮𑁄𑀓𑀺𑀬𑀓𑀼𑀝𑀼𑀫𑁆𑀩𑀲𑁆𑀲 𑀲𑀸𑀫𑀺𑀓𑀁 𑀅𑀓𑀸𑀲𑀺𑀁, 𑀇𑀤𑀸𑀦𑀺 𑀮𑁄𑀓𑀼𑀢𑁆𑀢𑀭𑀓𑀼𑀝𑀼𑀫𑁆𑀩𑀲𑁆𑀲. 𑀢𑀤𑀸 𑀳𑀺 𑀘𑀽𑀴𑀦𑁆𑀢𑁂𑀯𑀸𑀲𑀺𑀓𑁄 𑀘𑀽𑀴𑀧𑀦𑁆𑀣𑀓𑁄 𑀅𑀳𑁄𑀲𑀺, 𑀘𑀽𑀴𑀲𑁂𑀝𑁆𑀞𑀺 𑀧𑀦 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀦𑀓𑁆𑀔𑀢𑁆𑀢𑀓𑁄𑀯𑀺𑀤𑁄 𑀅𑀳𑀫𑁂𑀯𑀸’’𑀢𑀺 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺.

𑀧𑀼𑀦𑁂𑀓𑀤𑀺𑀯𑀲𑀁 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁, ‘‘𑀆𑀯𑀼𑀲𑁄, 𑀘𑀽𑀴𑀧𑀦𑁆𑀣𑀓𑁄 𑀘𑀢𑀽𑀳𑀺 𑀫𑀸𑀲𑁂𑀳𑀺 𑀘𑀢𑀼𑀧𑁆𑀧𑀤𑀁 𑀕𑀸𑀣𑀁 𑀕𑀳𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄𑀧𑀺 𑀯𑀻𑀭𑀺𑀬𑀁 𑀅𑀦𑁄𑀲𑁆𑀲𑀚𑁆𑀚𑀺𑀢𑁆𑀯𑀸𑀯 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀺𑀢𑁄, 𑀇𑀤𑀸𑀦𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀓𑀼𑀝𑀼𑀫𑁆𑀩𑀲𑁆𑀲 𑀲𑀸𑀫𑀺𑀓𑁄 𑀚𑀸𑀢𑁄’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸, ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂, ‘‘𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀲𑀦𑁂 𑀆𑀭𑀤𑁆𑀥𑀯𑀻𑀭𑀺𑀬𑁄 𑀪𑀺𑀓𑁆𑀔𑀼 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑁆𑀲 𑀲𑀸𑀫𑀺𑀓𑁄 𑀳𑁄𑀢𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁨𑁫. ‘‘𑀉𑀝𑁆𑀞𑀸𑀦𑁂𑀦𑀧𑁆𑀧𑀫𑀸𑀤𑁂𑀦, 𑀲𑀁𑀬𑀫𑁂𑀦 𑀤𑀫𑁂𑀦 𑀘;

𑀤𑀻𑀧𑀁 𑀓𑀬𑀺𑀭𑀸𑀣 𑀫𑁂𑀥𑀸𑀯𑀻, 𑀬𑀁 𑀑𑀖𑁄 𑀦𑀸𑀪𑀺𑀓𑀻𑀭𑀢𑀻’’𑀢𑀺.

𑀢𑀢𑁆𑀣 𑀤𑀻𑀧𑀁 𑀓𑀬𑀺𑀭𑀸𑀣𑀸𑀢𑀺 𑀯𑀻𑀭𑀺𑀬𑀲𑀗𑁆𑀔𑀸𑀢𑁂𑀦 𑀉𑀝𑁆𑀞𑀸𑀦𑁂𑀦, 𑀲𑀢𑀺𑀬𑀸 𑀅𑀯𑀺𑀧𑁆𑀧𑀯𑀸𑀲𑀸𑀓𑀸𑀭𑀲𑀗𑁆𑀔𑀸𑀢𑁂𑀦 𑀅𑀧𑁆𑀧𑀫𑀸𑀤𑁂𑀦, 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀲𑀗𑁆𑀔𑀸𑀢𑁂𑀦 𑀲𑀁𑀬𑀫𑁂𑀦, 𑀇𑀦𑁆𑀤𑁆𑀭𑀺𑀬𑀤𑀫𑁂𑀦 𑀘𑀸𑀢𑀺 𑀇𑀫𑁂𑀳𑀺 𑀓𑀸𑀭𑀡𑀪𑀽𑀢𑁂𑀳𑀺 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀥𑀫𑁆𑀫𑁄𑀚𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄 𑀫𑁂𑀥𑀸𑀯𑀻 𑀇𑀫𑀲𑁆𑀫𑀺𑀁 𑀅𑀢𑀺𑀯𑀺𑀬 𑀤𑀼𑀮𑁆𑀮𑀪𑀧𑀢𑀺𑀝𑁆𑀞𑀢𑀸𑀬 𑀅𑀢𑀺𑀕𑀫𑁆𑀪𑀻𑀭𑁂 𑀲𑀁𑀲𑀸𑀭𑀲𑀸𑀕𑀭𑁂 𑀅𑀢𑁆𑀢𑀦𑁄 𑀧𑀢𑀺𑀝𑁆𑀞𑀸𑀦𑀪𑀽𑀢𑀁 𑀅𑀭𑀳𑀢𑁆𑀢𑀨𑀮𑀁 𑀤𑀻𑀧𑀁 𑀓𑀬𑀺𑀭𑀸𑀣 𑀓𑀭𑁂𑀬𑁆𑀬, 𑀓𑀸𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀓𑀻𑀤𑀺𑀲𑀁? 𑀬𑀁 𑀑𑀖𑁄 𑀦𑀸𑀪𑀺𑀓𑀻𑀭𑀢𑀻𑀢𑀺 𑀬𑀁 𑀘𑀢𑀼𑀩𑁆𑀩𑀺𑀥𑁄𑀧𑀺 𑀓𑀺𑀮𑁂𑀲𑁄𑀖𑁄 𑀅𑀪𑀺𑀓𑀺𑀭𑀺𑀢𑀼𑀁 𑀯𑀺𑀤𑁆𑀥𑀁𑀲𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀦 𑀳𑀺 𑀲𑀓𑁆𑀓𑀸 𑀅𑀭𑀳𑀢𑁆𑀢𑀁 𑀑𑀖𑁂𑀦 𑀅𑀪𑀺𑀓𑀺𑀭𑀺𑀢𑀼𑀦𑁆𑀢𑀺.

𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀅𑀳𑁂𑀲𑀼𑀁. 𑀏𑀯𑀁 𑀤𑁂𑀲𑀦𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀲𑀸𑀢𑁆𑀣𑀺𑀓𑀸 𑀚𑀸𑀢𑀸𑀢𑀺.

𑀘𑀽𑀴𑀧𑀦𑁆𑀣𑀓𑀢𑁆𑀣𑁂𑀭𑀯𑀢𑁆𑀣𑀼 𑀢𑀢𑀺𑀬𑀁.