𑁯. 𑀦𑀦𑁆𑀤𑀢𑁆𑀣𑁂𑀭𑀯𑀢𑁆𑀣𑀼

𑀬𑀣𑀸 𑀅𑀕𑀸𑀭𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀆𑀬𑀲𑁆𑀫𑀦𑁆𑀢𑀁 𑀦𑀦𑁆𑀤𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑀢𑁆𑀣𑀸 𑀳𑀺 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁄 𑀭𑀸𑀚𑀕𑀳𑀁 𑀕𑀦𑁆𑀢𑁆𑀯𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑁋 ‘‘𑀧𑀼𑀢𑁆𑀢𑀁 𑀫𑁂 𑀆𑀦𑁂𑀢𑁆𑀯𑀸 𑀤𑀲𑁆𑀲𑁂𑀣𑀸’’𑀢𑀺 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑁂𑀦 𑀧𑁂𑀲𑀺𑀢𑀸𑀦𑀁 𑀲𑀳𑀲𑁆𑀲𑀲𑀳𑀲𑁆𑀲𑀧𑀭𑀺𑀯𑀸𑀭𑀸𑀦𑀁 𑀤𑀲𑀦𑁆𑀦𑀁 𑀤𑀽𑀢𑀸𑀦𑀁 𑀲𑀩𑁆𑀩𑀧𑀘𑁆𑀙𑀢𑁄 𑀕𑀦𑁆𑀢𑁆𑀯𑀸 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑁂𑀦 𑀓𑀸𑀴𑀼𑀤𑀸𑀬𑀺𑀢𑁆𑀣𑁂𑀭𑁂𑀦 𑀕𑀫𑀦𑀓𑀸𑀮𑀁 𑀜𑀢𑁆𑀯𑀸 𑀫𑀕𑁆𑀕𑀯𑀡𑁆𑀡𑀁 𑀯𑀡𑁆𑀡𑁂𑀢𑁆𑀯𑀸 𑀯𑀻𑀲𑀢𑀺𑀲𑀳𑀲𑁆𑀲𑀔𑀻𑀡𑀸𑀲𑀯𑀧𑀭𑀺𑀯𑀼𑀢𑁄 𑀓𑀧𑀺𑀮𑀧𑀼𑀭𑀁 𑀦𑀻𑀢𑁄 𑀜𑀸𑀢𑀺𑀲𑀫𑀸𑀕𑀫𑁂 𑀧𑁄𑀓𑁆𑀔𑀭𑀯𑀲𑁆𑀲𑀁 𑀅𑀢𑁆𑀣𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀯𑁂𑀲𑁆𑀲𑀦𑁆𑀢𑀭𑀚𑀸𑀢𑀓𑀁 (𑀚𑀸. 𑁨.𑁨𑁨.𑁧𑁬𑁫𑁫 𑀆𑀤𑀬𑁄) 𑀓𑀣𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑁄, ‘‘𑀉𑀢𑁆𑀢𑀺𑀝𑁆𑀞𑁂 𑀦𑀧𑁆𑀧𑀫𑀚𑁆𑀚𑁂𑀬𑁆𑀬𑀸’’𑀢𑀺 (𑀥. 𑀧. 𑁧𑁬𑁮) 𑀕𑀸𑀣𑀸𑀬 𑀧𑀺𑀢𑀭𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸, ‘‘𑀥𑀫𑁆𑀫𑀜𑁆𑀘𑀭𑁂’’𑀢𑀺 (𑀥. 𑀧. 𑁧𑁬𑁯) 𑀕𑀸𑀣𑀸𑀬 𑀫𑀳𑀸𑀧𑀚𑀸𑀧𑀢𑀺𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂, 𑀭𑀸𑀚𑀸𑀦𑀜𑁆𑀘 𑀲𑀓𑀤𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀧𑀦 𑀭𑀸𑀳𑀼𑀮𑀫𑀸𑀢𑀼𑀕𑀼𑀡𑀓𑀣𑀁 𑀦𑀺𑀲𑁆𑀲𑀸𑀬 𑀘𑀦𑁆𑀤𑀓𑀺𑀦𑁆𑀦𑀭𑀻𑀚𑀸𑀢𑀓𑀁 (𑀚𑀸. 𑁧.𑁧𑁪.𑁧𑁮 𑀆𑀤𑀬𑁄) 𑀓𑀣𑁂𑀢𑁆𑀯𑀸 𑀢𑀢𑁄 𑀢𑀢𑀺𑀬𑀤𑀺𑀯𑀲𑁂 𑀦𑀦𑁆𑀤𑀓𑀼𑀫𑀸𑀭𑀲𑁆𑀲 𑀅𑀪𑀺𑀲𑁂𑀓𑀕𑁂𑀳𑀧𑁆𑀧𑀯𑁂𑀲𑀦𑀯𑀺𑀯𑀸𑀳𑀫𑀗𑁆𑀕𑀮𑁂𑀲𑀼 𑀧𑀯𑀢𑁆𑀢𑀫𑀸𑀦𑁂𑀲𑀼 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀢𑁆𑀯𑀸 𑀦𑀦𑁆𑀤𑀓𑀼𑀫𑀸𑀭𑀲𑁆𑀲 𑀳𑀢𑁆𑀣𑁂 𑀧𑀢𑁆𑀢𑀁 𑀤𑀢𑁆𑀯𑀸 𑀫𑀗𑁆𑀕𑀮𑀁 𑀯𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀫𑀦𑁆𑀢𑁄 𑀦𑀦𑁆𑀤𑀓𑀼𑀫𑀸𑀭𑀲𑁆𑀲 𑀳𑀢𑁆𑀣𑀢𑁄 𑀧𑀢𑁆𑀢𑀁 𑀦 𑀕𑀡𑁆𑀳𑀺. 𑀲𑁄𑀧𑀺 𑀢𑀣𑀸𑀕𑀢𑀕𑀸𑀭𑀯𑁂𑀦 ‘‘𑀧𑀢𑁆𑀢𑀁 𑀯𑁄, 𑀪𑀦𑁆𑀢𑁂, 𑀕𑀡𑁆𑀳𑀣𑀸’’𑀢𑀺 𑀯𑀢𑁆𑀢𑀼𑀁 𑀦𑀸𑀲𑀓𑁆𑀔𑀺. 𑀏𑀯𑀁 𑀧𑀦 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑁄𑀧𑀸𑀦𑀲𑀻𑀲𑁂 𑀧𑀢𑁆𑀢𑀁 𑀕𑀡𑁆𑀳𑀺𑀲𑁆𑀲𑀢𑀻’’𑀢𑀺. 𑀲𑀢𑁆𑀣𑀸 𑀢𑀲𑁆𑀫𑀺𑀫𑁆𑀧𑀺 𑀞𑀸𑀦𑁂 𑀦 𑀕𑀡𑁆𑀳𑀺. 𑀇𑀢𑀭𑁄 ‘‘𑀲𑁄𑀧𑀸𑀦𑀧𑀸𑀤𑀫𑀽𑀮𑁂 𑀕𑀡𑁆𑀳𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀲𑀢𑁆𑀣𑀸 𑀢𑀢𑁆𑀣𑀸𑀧𑀺 𑀦 𑀕𑀡𑁆𑀳𑀺. 𑀇𑀢𑀭𑁄 ‘‘𑀭𑀸𑀚𑀗𑁆𑀕𑀡𑁂 𑀕𑀡𑁆𑀳𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀲𑀢𑁆𑀣𑀸 𑀢𑀢𑁆𑀣𑀸𑀧𑀺 𑀦 𑀕𑀡𑁆𑀳𑀺. 𑀓𑀼𑀫𑀸𑀭𑁄 𑀦𑀺𑀯𑀢𑁆𑀢𑀺𑀢𑀼𑀓𑀸𑀫𑁄 𑀅𑀭𑀼𑀘𑀺𑀬𑀸 𑀕𑀘𑁆𑀙𑀦𑁆𑀢𑁄 𑀲𑀢𑁆𑀣𑀼𑀕𑀸𑀭𑀯𑁂𑀦 ‘‘𑀧𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀯𑀢𑁆𑀢𑀼𑀁 𑀦 𑀲𑀓𑁆𑀓𑁄𑀢𑀺. ‘‘𑀇𑀥 𑀕𑀡𑁆𑀳𑀺𑀲𑁆𑀲𑀢𑀺, 𑀏𑀢𑁆𑀣 𑀕𑀡𑁆𑀳𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀕𑀘𑁆𑀙𑀢𑀺.

𑀢𑀲𑁆𑀫𑀺𑀁 𑀔𑀡𑁂 𑀅𑀜𑁆𑀜𑀸 𑀇𑀢𑁆𑀣𑀺𑀬𑁄 𑀢𑀁 𑀤𑀺𑀲𑁆𑀯𑀸 𑀚𑀦𑀧𑀤𑀓𑀮𑁆𑀬𑀸𑀡𑀺𑀬𑀸 𑀆𑀘𑀺𑀓𑁆𑀔𑀺𑀁𑀲𑀼 𑁋 ‘‘𑀅𑀬𑁆𑀬𑁂, 𑀪𑀕𑀯𑀸 𑀦𑀦𑁆𑀤𑀓𑀼𑀫𑀸𑀭𑀁 𑀕𑀳𑁂𑀢𑁆𑀯𑀸 𑀕𑀢𑁄, 𑀢𑀼𑀫𑁆𑀳𑁂𑀳𑀺 𑀢𑀁 𑀯𑀺𑀦𑀸 𑀓𑀭𑀺𑀲𑁆𑀲𑀢𑀻’’𑀢𑀺. 𑀲𑀸 𑀉𑀤𑀓𑀩𑀺𑀦𑁆𑀤𑀽𑀳𑀺 𑀧𑀕𑁆𑀖𑀭𑀦𑁆𑀢𑁂𑀳𑁂𑀯 𑀅𑀟𑁆𑀠𑀼𑀮𑁆𑀮𑀺𑀔𑀺𑀢𑁂𑀳𑀺 𑀓𑁂𑀲𑁂𑀳𑀺 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸, ‘‘𑀢𑀼𑀯𑀝𑀁 𑀔𑁄, 𑀅𑀬𑁆𑀬𑀧𑀼𑀢𑁆𑀢, 𑀆𑀕𑀘𑁆𑀙𑁂𑀬𑁆𑀬𑀸𑀲𑀻’’𑀢𑀺 𑀆𑀳. 𑀢𑀁 𑀢𑀲𑁆𑀲𑀸 𑀯𑀘𑀦𑀁 𑀢𑀲𑁆𑀲 𑀳𑀤𑀬𑁂 𑀢𑀺𑀭𑀺𑀬𑀁 𑀧𑀢𑀺𑀢𑁆𑀯𑀸 𑀯𑀺𑀬 𑀞𑀺𑀢𑀁. 𑀲𑀢𑁆𑀣𑀸𑀧𑀺𑀲𑁆𑀲 𑀳𑀢𑁆𑀣𑀢𑁄 𑀧𑀢𑁆𑀢𑀁 𑀅𑀕𑁆𑀕𑀡𑁆𑀳𑀺𑀢𑁆𑀯𑀸𑀯 𑀢𑀁 𑀯𑀺𑀳𑀸𑀭𑀁 𑀦𑁂𑀢𑁆𑀯𑀸, ‘‘𑀧𑀩𑁆𑀩𑀚𑀺𑀲𑁆𑀲𑀲𑀺 𑀦𑀦𑁆𑀤𑀸’’𑀢𑀺𑀆𑀳. 𑀲𑁄 𑀩𑀼𑀤𑁆𑀥𑀕𑀸𑀭𑀯𑁂𑀦 ‘‘𑀦 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀅𑀯𑀢𑁆𑀯𑀸, ‘‘𑀆𑀫, 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀲𑀢𑁆𑀣𑀸 ‘‘𑀢𑁂𑀦 𑀳𑀺 𑀦𑀦𑁆𑀤𑀁 𑀧𑀩𑁆𑀩𑀸𑀚𑁂𑀣𑀸’’𑀢𑀺 𑀆𑀳. 𑀲𑀢𑁆𑀣𑀸 𑀓𑀧𑀺𑀮𑀧𑀼𑀭𑀁 𑀕𑀦𑁆𑀢𑁆𑀯𑀸 𑀢𑀢𑀺𑀬𑀤𑀺𑀯𑀲𑁂 𑀦𑀦𑁆𑀤𑀁 𑀧𑀩𑁆𑀩𑀸𑀚𑁂𑀲𑀺.

𑀲𑀢𑁆𑀢𑀫𑁂 𑀤𑀺𑀯𑀲𑁂 𑀭𑀸𑀳𑀼𑀮𑀫𑀸𑀢𑀸 𑀓𑀼𑀫𑀸𑀭𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀧𑁂𑀲𑁂𑀲𑀺 𑁋 ‘‘𑀧𑀲𑁆𑀲, 𑀢𑀸𑀢, 𑀏𑀢𑀁 𑀯𑀻𑀲𑀢𑀺𑀲𑀳𑀲𑁆𑀲𑀲𑀫𑀡𑀧𑀭𑀺𑀯𑀼𑀢𑀁 𑀲𑀼𑀯𑀡𑁆𑀡𑀯𑀡𑁆𑀡𑀁 𑀩𑁆𑀭𑀳𑁆𑀫𑀭𑀽𑀧𑀺𑀯𑀡𑁆𑀡𑀁 𑀲𑀫𑀡𑀁, 𑀅𑀬𑀁 𑀢𑁂 𑀧𑀺𑀢𑀸, 𑀏𑀢𑀲𑁆𑀲 𑀫𑀳𑀦𑁆𑀢𑀸 𑀦𑀺𑀥𑀺𑀓𑀼𑀫𑁆𑀪𑀺𑀬𑁄 𑀅𑀳𑁂𑀲𑀼𑀁. 𑀢𑁆𑀬𑀸𑀲𑁆𑀲 𑀦𑀺𑀓𑁆𑀔𑀫𑀦𑀢𑁄 𑀧𑀝𑁆𑀞𑀸𑀬 𑀦 𑀧𑀲𑁆𑀲𑀸𑀫, 𑀕𑀘𑁆𑀙 𑀦𑀁 𑀤𑀸𑀬𑀚𑁆𑀚𑀁 𑀬𑀸𑀘𑀲𑁆𑀲𑀼 𑁋 ‘𑀅𑀳𑀁, 𑀢𑀸𑀢, 𑀓𑀼𑀫𑀸𑀭𑁄, 𑀅𑀪𑀺𑀲𑁂𑀓𑀁 𑀧𑀢𑁆𑀯𑀸 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀸𑀫𑀺, 𑀥𑀦𑁂𑀦 𑀫𑁂 𑀅𑀢𑁆𑀣𑁄, 𑀥𑀦𑀁 𑀫𑁂 𑀤𑁂𑀳𑀺. 𑀲𑀸𑀫𑀺𑀓𑁄 𑀳𑀺 𑀧𑀼𑀢𑁆𑀢𑁄 𑀧𑀺𑀢𑀼𑀲𑀦𑁆𑀢𑀓𑀲𑁆𑀲𑀸’’’𑀢𑀺. 𑀓𑀼𑀫𑀸𑀭𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸𑀯 𑀧𑀺𑀢𑀼𑀲𑀺𑀦𑁂𑀳𑀁 𑀧𑀝𑀺𑀮𑀪𑀺𑀢𑁆𑀯𑀸 𑀳𑀝𑁆𑀞𑀘𑀺𑀢𑁆𑀢𑁄 ‘‘𑀲𑀼𑀔𑀸 𑀢𑁂, 𑀲𑀫𑀡, 𑀙𑀸𑀬𑀸’’𑀢𑀺 𑀯𑀢𑁆𑀯𑀸 𑀅𑀜𑁆𑀜𑀫𑁆𑀧𑀺 𑀩𑀳𑀼𑀁 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑀁 𑀯𑀤𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀪𑀕𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺. 𑀓𑀼𑀫𑀸𑀭𑁄𑀧𑀺 ‘‘𑀤𑀸𑀬𑀚𑁆𑀚𑀁 𑀫𑁂, 𑀲𑀫𑀡, 𑀤𑁂𑀳𑀺, 𑀤𑀸𑀬𑀚𑁆𑀚𑀁 𑀫𑁂, 𑀲𑀫𑀡, 𑀤𑁂𑀳𑀻’’𑀢𑀺 𑀪𑀕𑀯𑀦𑁆𑀢𑀁 𑀅𑀦𑀼𑀩𑀦𑁆𑀥𑀺. 𑀪𑀕𑀯𑀸𑀧𑀺 𑀓𑀼𑀫𑀸𑀭𑀁 𑀦 𑀦𑀺𑀯𑀢𑁆𑀢𑀸𑀧𑁂𑀲𑀺. 𑀧𑀭𑀺𑀚𑀦𑁄𑀧𑀺 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀕𑀘𑁆𑀙𑀦𑁆𑀢𑀁 𑀦𑀺𑀯𑀢𑁆𑀢𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀇𑀢𑀺 𑀲𑁄 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀆𑀭𑀸𑀫𑀫𑁂𑀯 𑀅𑀕𑀫𑀸𑀲𑀺.

𑀢𑀢𑁄 𑀪𑀕𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀬𑀁 𑀅𑀬𑀁 𑀧𑀺𑀢𑀼𑀲𑀦𑁆𑀢𑀓𑀁 𑀥𑀦𑀁 𑀇𑀘𑁆𑀙𑀢𑀺, 𑀢𑀁 𑀯𑀝𑁆𑀝𑀸𑀦𑀼𑀕𑀢𑀁 𑀲𑀯𑀺𑀖𑀸𑀢𑀁, 𑀳𑀦𑁆𑀤𑀲𑁆𑀲 𑀩𑁄𑀥𑀺𑀢𑀮𑁂 𑀧𑀝𑀺𑀮𑀤𑁆𑀥𑀁 𑀲𑀢𑁆𑀢𑀯𑀺𑀥𑀁 𑀅𑀭𑀺𑀬𑀥𑀦𑀁 𑀤𑁂𑀫𑀺, 𑀮𑁄𑀓𑀼𑀢𑁆𑀢𑀭𑀤𑀸𑀬𑀚𑁆𑀚𑀲𑁆𑀲 𑀦𑀁 𑀲𑀸𑀫𑀺𑀓𑀁 𑀓𑀭𑁄𑀫𑀻’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑁂𑀦 𑀳𑀺 𑀢𑁆𑀯𑀁, 𑀲𑀸𑀭𑀺𑀧𑀼𑀢𑁆𑀢, 𑀭𑀸𑀳𑀼𑀮𑀓𑀼𑀫𑀸𑀭𑀁 𑀧𑀩𑁆𑀩𑀸𑀚𑁂𑀳𑀻’’𑀢𑀺. 𑀣𑁂𑀭𑁄 𑀓𑀼𑀫𑀸𑀭𑀁 𑀧𑀩𑁆𑀩𑀸𑀚𑁂𑀲𑀺. 𑀧𑀩𑁆𑀩𑀚𑀺𑀢𑁂 𑀘 𑀧𑀦 𑀓𑀼𑀫𑀸𑀭𑁂 𑀭𑀜𑁆𑀜𑁄 𑀅𑀥𑀺𑀫𑀢𑁆𑀢𑀁 𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀺. 𑀢𑀁 𑀅𑀥𑀺𑀯𑀸𑀲𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀪𑀕𑀯𑀢𑁄 𑀦𑀺𑀯𑁂𑀤𑁂𑀢𑁆𑀯𑀸, ‘‘𑀲𑀸𑀥𑀼, 𑀪𑀦𑁆𑀢𑁂, 𑀅𑀬𑁆𑀬𑀸, 𑀫𑀸𑀢𑀸𑀧𑀺𑀢𑀽𑀳𑀺 𑀅𑀦𑀦𑀼𑀜𑁆𑀜𑀸𑀢𑀁 𑀧𑀼𑀢𑁆𑀢𑀁 𑀦 𑀧𑀩𑁆𑀩𑀸𑀚𑁂𑀬𑁆𑀬𑀼’’𑀦𑁆𑀢𑀺 𑀯𑀭𑀁 𑀬𑀸𑀘𑀺. 𑀪𑀕𑀯𑀸 𑀢𑀲𑁆𑀲 𑀢𑀁 𑀯𑀭𑀁 𑀤𑀢𑁆𑀯𑀸 𑀧𑀼𑀦𑁂𑀓𑀤𑀺𑀯𑀲𑀁 𑀭𑀸𑀚𑀦𑀺𑀯𑁂𑀲𑀦𑁂 𑀓𑀢𑀧𑀸𑀢𑀭𑀸𑀲𑁄 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁂𑀦 𑀭𑀜𑁆𑀜𑀸, ‘‘𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀤𑀼𑀓𑁆𑀓𑀭𑀓𑀸𑀭𑀺𑀓𑀓𑀸𑀮𑁂 𑀏𑀓𑀸 𑀤𑁂𑀯𑀢𑀸 𑀫𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, ‘𑀧𑀼𑀢𑁆𑀢𑁄 𑀢𑁂 𑀓𑀸𑀮𑀓𑀢𑁄’𑀢𑀺 𑀆𑀳. 𑀅𑀳𑀁 𑀢𑀲𑁆𑀲𑀸 𑀯𑀘𑀦𑀁 𑀅𑀲𑀤𑁆𑀤𑀳𑀦𑁆𑀢𑁄 ‘𑀦 𑀫𑀬𑁆𑀳𑀁 𑀧𑀼𑀢𑁆𑀢𑁄 𑀩𑁄𑀥𑀺𑀁 𑀅𑀧𑁆𑀧𑀢𑁆𑀯𑀸 𑀓𑀸𑀮𑀁 𑀓𑀭𑁄𑀢𑀻’𑀢𑀺 𑀧𑀝𑀺𑀓𑁆𑀔𑀺𑀧𑀺’’𑀦𑁆𑀢𑀺 𑀯𑀼𑀢𑁆𑀢𑁂 𑁋 ‘‘𑀇𑀤𑀸𑀦𑀺 𑀓𑀺𑀁 𑀲𑀤𑁆𑀤𑀳𑀺𑀲𑁆𑀲𑀣, 𑀧𑀼𑀩𑁆𑀩𑁂𑀧𑀺 𑀅𑀝𑁆𑀞𑀺𑀓𑀸𑀦𑀺 𑀤𑀲𑁆𑀲𑁂𑀢𑁆𑀯𑀸, ‘𑀧𑀼𑀢𑁆𑀢𑁄 𑀢𑁂 𑀫𑀢𑁄’𑀢𑀺 𑀯𑀼𑀢𑁆𑀢𑁂 𑀦 𑀲𑀤𑁆𑀤𑀳𑀺𑀢𑁆𑀯𑀸’’𑀢𑀺 𑀇𑀫𑀺𑀲𑁆𑀲𑀸 𑀅𑀢𑁆𑀣𑀼𑀧𑁆𑀧𑀢𑁆𑀢𑀺𑀬𑀸 𑀫𑀳𑀸𑀥𑀫𑁆𑀫𑀧𑀸𑀮𑀚𑀸𑀢𑀓𑀁 (𑀚𑀸. 𑁧.𑁧𑁦.𑁯𑁨 𑀆𑀤𑀬𑁄) 𑀓𑀣𑁂𑀲𑀺. 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀭𑀸𑀚𑀸 𑀅𑀦𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀇𑀢𑀺 𑀪𑀕𑀯𑀸 𑀧𑀺𑀢𑀭𑀁 𑀢𑀻𑀲𑀼 𑀨𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀧𑀼𑀦𑀤𑁂𑀯 𑀭𑀸𑀚𑀕𑀳𑀁 𑀕𑀦𑁆𑀢𑁆𑀯𑀸 𑀢𑀢𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁂𑀦 𑀲𑀸𑀯𑀢𑁆𑀣𑀺𑀁 𑀆𑀕𑀫𑀦𑀢𑁆𑀣𑀸𑀬 𑀕𑀳𑀺𑀢𑀧𑀝𑀺𑀜𑁆𑀜𑁄 𑀦𑀺𑀝𑁆𑀞𑀺𑀢𑁂 𑀚𑁂𑀢𑀯𑀦𑁂 𑀯𑀺𑀳𑀸𑀭𑁂 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀯𑀸𑀲𑀁 𑀓𑀧𑁆𑀧𑁂𑀲𑀺.

𑀏𑀯𑀁 𑀲𑀢𑁆𑀣𑀭𑀺 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁂 𑀆𑀬𑀲𑁆𑀫𑀸 𑀦𑀦𑁆𑀤𑁄 𑀉𑀓𑁆𑀓𑀡𑁆𑀞𑀺𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺 𑁋 ‘‘𑀅𑀦𑀪𑀺𑀭𑀢𑁄 𑀅𑀳𑀁, 𑀆𑀯𑀼𑀲𑁄, 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀸𑀫𑀺, 𑀦 𑀲𑀓𑁆𑀓𑁄𑀫𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀦𑁆𑀥𑀸𑀭𑁂𑀢𑀼𑀁, 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀺𑀲𑁆𑀲𑀸𑀫𑀻’’𑀢𑀺. 𑀪𑀕𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀦𑀦𑁆𑀤𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀏𑀢𑀤𑀯𑁄𑀘 𑁋 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀦𑀦𑁆𑀤, 𑀲𑀫𑁆𑀩𑀳𑀼𑀮𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀆𑀭𑁄𑀘𑁂𑀲𑀺 𑁋 ‘𑀅𑀦𑀪𑀺𑀭𑀢𑁄, 𑀆𑀯𑀼𑀲𑁄, 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀸𑀫𑀺, 𑀦 𑀲𑀓𑁆𑀓𑁄𑀫𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀦𑁆𑀥𑀸𑀭𑁂𑀢𑀼𑀁, 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀺𑀲𑁆𑀲𑀸𑀫𑀻’’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’𑀢𑀺. ‘‘𑀓𑀺𑀲𑁆𑀲 𑀧𑀦 𑀢𑁆𑀯𑀁, 𑀦𑀦𑁆𑀤, 𑀅𑀦𑀪𑀺𑀭𑀢𑁄 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀲𑀺, 𑀦 𑀲𑀓𑁆𑀓𑁄𑀲𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀦𑁆𑀥𑀸𑀭𑁂𑀢𑀼𑀁, 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀺𑀲𑁆𑀲𑀲𑀻’’𑀢𑀺? ‘‘𑀲𑀸𑀓𑀺𑀬𑀸𑀦𑀻 𑀫𑀁, 𑀪𑀦𑁆𑀢𑁂, 𑀚𑀦𑀧𑀤𑀓𑀮𑁆𑀬𑀸𑀡𑀻 𑀖𑀭𑀸 𑀦𑀺𑀓𑁆𑀔𑀫𑀦𑁆𑀢𑀲𑁆𑀲 𑀅𑀟𑁆𑀠𑀼𑀮𑁆𑀮𑀺𑀔𑀺𑀢𑁂𑀳𑀺 𑀓𑁂𑀲𑁂𑀳𑀺 𑀅𑀧𑀮𑁄𑀓𑁂𑀢𑁆𑀯𑀸 𑀫𑀁 𑀏𑀢𑀤𑀯𑁄𑀘 𑁋 ‘𑀢𑀼𑀯𑀝𑀁 𑀔𑁄, 𑀅𑀬𑁆𑀬𑀧𑀼𑀢𑁆𑀢, 𑀆𑀕𑀘𑁆𑀙𑁂𑀬𑁆𑀬𑀸𑀲𑀻’𑀢𑀺, 𑀲𑁄 𑀔𑁄 𑀅𑀳𑀁, 𑀪𑀦𑁆𑀢𑁂, 𑀢𑀁 𑀅𑀦𑀼𑀲𑁆𑀲𑀭𑀫𑀸𑀦𑁄 𑀅𑀦𑀪𑀺𑀭𑀢𑁄 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀸𑀫𑀺, 𑀦 𑀲𑀓𑁆𑀓𑁄𑀫𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀦𑁆𑀥𑀸𑀭𑁂𑀢𑀼𑀁, 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀺𑀲𑁆𑀲𑀸𑀫𑀻’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀦𑀦𑁆𑀤𑀁 𑀩𑀸𑀳𑀸𑀬𑀁 𑀕𑀳𑁂𑀢𑁆𑀯𑀸 𑀇𑀤𑁆𑀥𑀺𑀩𑀮𑁂𑀦 𑀢𑀸𑀯𑀢𑀺𑀁𑀲𑀤𑁂𑀯𑀮𑁄𑀓𑀁 𑀆𑀦𑁂𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀏𑀓𑀲𑁆𑀫𑀺𑀁 𑀛𑀸𑀫𑀓𑁆𑀔𑁂𑀢𑁆𑀢𑁂 𑀛𑀸𑀫𑀔𑀸𑀡𑀼𑀓𑁂 𑀦𑀺𑀲𑀺𑀦𑁆𑀦𑀁 𑀙𑀺𑀦𑁆𑀦𑀓𑀡𑁆𑀡𑀦𑀸𑀲𑀦𑀗𑁆𑀕𑀼𑀝𑁆𑀞𑀁 𑀏𑀓𑀁 𑀧𑀮𑀼𑀝𑁆𑀞𑀫𑀓𑁆𑀓𑀝𑀺𑀁 𑀤𑀲𑁆𑀲𑁂𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀲𑀓𑁆𑀓𑀲𑁆𑀲 𑀤𑁂𑀯𑀭𑀜𑁆𑀜𑁄 𑀉𑀧𑀝𑁆𑀞𑀸𑀦𑀁 𑀆𑀕𑀢𑀸𑀦𑀺 𑀓𑀓𑀼𑀝𑀧𑀸𑀤𑀸𑀦𑀺 𑀧𑀜𑁆𑀘 𑀅𑀘𑁆𑀙𑀭𑀸𑀲𑀢𑀸𑀦𑀺 𑀤𑀲𑁆𑀲𑁂𑀲𑀺. 𑀓𑀓𑀼𑀝𑀧𑀸𑀤𑀸𑀦𑀻𑀢𑀺 𑀭𑀢𑁆𑀢𑀯𑀡𑁆𑀡𑀢𑀸𑀬 𑀧𑀸𑀭𑁂𑀯𑀢𑀧𑀸𑀤𑀲𑀤𑀺𑀲𑀧𑀸𑀤𑀸𑀦𑀺. 𑀤𑀲𑁆𑀲𑁂𑀢𑁆𑀯𑀸 𑀘 𑀧𑀦𑀸𑀳 𑁋 ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀦𑀦𑁆𑀤, 𑀓𑀢𑀫𑀸 𑀦𑀼 𑀔𑁄 𑀅𑀪𑀺𑀭𑀽𑀧𑀢𑀭𑀸 𑀯𑀸 𑀤𑀲𑁆𑀲𑀦𑀻𑀬𑀢𑀭𑀸 𑀯𑀸 𑀧𑀸𑀲𑀸𑀤𑀺𑀓𑀢𑀭𑀸 𑀯𑀸 𑀲𑀸𑀓𑀺𑀬𑀸𑀦𑀻 𑀯𑀸 𑀚𑀦𑀧𑀤𑀓𑀮𑁆𑀬𑀸𑀡𑀻, 𑀇𑀫𑀸𑀦𑀺 𑀯𑀸 𑀧𑀜𑁆𑀘 𑀅𑀘𑁆𑀙𑀭𑀸𑀲𑀢𑀸𑀦𑀺 𑀓𑀓𑀼𑀝𑀧𑀸𑀤𑀸𑀦𑀻’’𑀢𑀺? 𑀢𑀁 𑀲𑀼𑀢𑁆𑀯𑀸 𑀆𑀳 𑁋 ‘‘𑀲𑁂𑀬𑁆𑀬𑀣𑀸𑀧𑀺 𑀲𑀸, 𑀪𑀦𑁆𑀢𑁂, 𑀙𑀺𑀦𑁆𑀦𑀓𑀡𑁆𑀡𑀦𑀸𑀲𑀦𑀗𑁆𑀕𑀼𑀝𑁆𑀞𑀸 𑀧𑀮𑀼𑀝𑁆𑀞𑀫𑀓𑁆𑀓𑀝𑀻, 𑀏𑀯𑀫𑁂𑀯 𑀔𑁄, 𑀪𑀦𑁆𑀢𑁂, 𑀲𑀸𑀓𑀺𑀬𑀸𑀦𑀻 𑀚𑀦𑀧𑀤𑀓𑀮𑁆𑀬𑀸𑀡𑀻, 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀅𑀘𑁆𑀙𑀭𑀸𑀲𑀢𑀸𑀦𑀁 𑀉𑀧𑀦𑀺𑀥𑀸𑀬 𑀲𑀗𑁆𑀔𑁆𑀬𑀫𑁆𑀧𑀺 𑀦 𑀉𑀧𑁂𑀢𑀺, 𑀓𑀮𑀫𑁆𑀧𑀺 𑀦 𑀉𑀧𑁂𑀢𑀺, 𑀓𑀮𑀪𑀸𑀕𑀫𑁆𑀧𑀺 𑀦 𑀉𑀧𑁂𑀢𑀺. 𑀅𑀣 𑀔𑁄 𑀇𑀫𑀸𑀦𑁂𑀯 𑀧𑀜𑁆𑀘 𑀅𑀘𑁆𑀙𑀭𑀸𑀲𑀢𑀸𑀦𑀺 𑀅𑀪𑀺𑀭𑀽𑀧𑀢𑀭𑀸𑀦𑀺 𑀘𑁂𑀯 𑀤𑀲𑁆𑀲𑀦𑀻𑀬𑀢𑀭𑀸𑀦𑀺 𑀘 𑀧𑀸𑀲𑀸𑀤𑀺𑀓𑀢𑀭𑀸𑀦𑀺 𑀘𑀸’’𑀢𑀺. ‘‘𑀅𑀪𑀺𑀭𑀫, 𑀦𑀦𑁆𑀤, 𑀅𑀪𑀺𑀭𑀫, 𑀦𑀦𑁆𑀤, 𑀅𑀳𑀁 𑀢𑁂 𑀧𑀸𑀝𑀺𑀪𑁄𑀕𑁄 𑀧𑀜𑁆𑀘𑀦𑁆𑀦𑀁 𑀅𑀘𑁆𑀙𑀭𑀸𑀲𑀢𑀸𑀦𑀁 𑀧𑀝𑀺𑀮𑀸𑀪𑀸𑀬 𑀓𑀓𑀼𑀝𑀧𑀸𑀤𑀸𑀦’’𑀦𑁆𑀢𑀺. ‘‘𑀲𑀘𑁂 𑀫𑁂, 𑀪𑀦𑁆𑀢𑁂 𑀪𑀕𑀯𑀸, 𑀧𑀸𑀝𑀺𑀪𑁄𑀕𑁄 𑀧𑀜𑁆𑀘𑀦𑁆𑀦𑀁 𑀅𑀘𑁆𑀙𑀭𑀸𑀲𑀢𑀸𑀦𑀁 𑀧𑀝𑀺𑀮𑀸𑀪𑀸𑀬 𑀓𑀓𑀼𑀝𑀧𑀸𑀤𑀸𑀦𑀁, 𑀅𑀪𑀺𑀭𑀫𑀺𑀲𑁆𑀲𑀸𑀫𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑁂’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀦𑀦𑁆𑀤𑀁 𑀕𑀳𑁂𑀢𑁆𑀯𑀸 𑀢𑀢𑁆𑀣 𑀅𑀦𑁆𑀢𑀭𑀳𑀺𑀢𑁄 𑀚𑁂𑀢𑀯𑀦𑁂𑀬𑁂𑀯 𑀧𑀸𑀢𑀼𑀭𑀳𑁄𑀲𑀺. 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀽, ‘‘𑀆𑀬𑀲𑁆𑀫𑀸 𑀓𑀺𑀭 𑀦𑀦𑁆𑀤𑁄 𑀪𑀕𑀯𑀢𑁄 𑀪𑀸𑀢𑀸 𑀫𑀸𑀢𑀼𑀘𑁆𑀙𑀸𑀧𑀼𑀢𑁆𑀢𑁄 𑀅𑀘𑁆𑀙𑀭𑀸𑀦𑀁 𑀳𑁂𑀢𑀼 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀺. 𑀪𑀕𑀯𑀸 𑀓𑀺𑀭𑀲𑁆𑀲 𑀧𑀸𑀝𑀺𑀪𑁄𑀕𑁄 𑀧𑀜𑁆𑀘𑀦𑁆𑀦𑀁 𑀅𑀘𑁆𑀙𑀭𑀸𑀲𑀢𑀸𑀦𑀁 𑀧𑀝𑀺𑀮𑀸𑀪𑀸𑀬 𑀓𑀓𑀼𑀝𑀧𑀸𑀤𑀸𑀦’’𑀦𑁆𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀦𑀦𑁆𑀤𑀲𑁆𑀲 𑀲𑀳𑀸𑀬𑀓𑀸 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀦𑀦𑁆𑀤𑀁 𑀪𑀢𑀓𑀯𑀸𑀤𑁂𑀦 𑀘 𑀉𑀧𑀓𑁆𑀓𑀺𑀢𑀓𑀯𑀸𑀤𑁂𑀦 𑀘 𑀲𑀫𑀼𑀤𑀸𑀘𑀭𑀦𑁆𑀢𑀺, ‘‘𑀪𑀢𑀓𑁄 𑀓𑀺𑀭𑀸𑀬𑀲𑁆𑀫𑀸 𑀦𑀦𑁆𑀤𑁄, 𑀉𑀧𑀓𑁆𑀓𑀺𑀢𑀓𑁄 𑀓𑀺𑀭𑀸𑀬𑀲𑁆𑀫𑀸 𑀦𑀦𑁆𑀤𑁄, 𑀅𑀘𑁆𑀙𑀭𑀸𑀦𑀁 𑀳𑁂𑀢𑀼 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀺. 𑀪𑀕𑀯𑀸 𑀓𑀺𑀭𑀲𑁆𑀲 𑀧𑀸𑀝𑀺𑀪𑁄𑀕𑁄 𑀧𑀜𑁆𑀘𑀦𑁆𑀦𑀁 𑀅𑀘𑁆𑀙𑀭𑀸𑀲𑀢𑀸𑀦𑀁 𑀧𑀝𑀺𑀮𑀸𑀪𑀸𑀬 𑀓𑀓𑀼𑀝𑀧𑀸𑀤𑀸𑀦’’𑀦𑁆𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀦𑀦𑁆𑀤𑁄 𑀲𑀳𑀸𑀬𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀪𑀢𑀓𑀯𑀸𑀤𑁂𑀦 𑀘 𑀉𑀧𑀓𑁆𑀓𑀺𑀢𑀓𑀯𑀸𑀤𑁂𑀦 𑀘 𑀅𑀝𑁆𑀝𑀺𑀬𑀫𑀸𑀦𑁄 𑀳𑀭𑀸𑀬𑀫𑀸𑀦𑁄 𑀚𑀺𑀕𑀼𑀘𑁆𑀙𑀫𑀸𑀦𑁄 𑀏𑀓𑁄 𑀯𑀽𑀧𑀓𑀝𑁆𑀞𑁄 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑀦𑁆𑀢𑁄 𑀦 𑀘𑀺𑀭𑀲𑁆𑀲𑁂𑀯 𑀬𑀲𑁆𑀲𑀢𑁆𑀣𑀸𑀬 𑀓𑀼𑀮𑀧𑀼𑀢𑁆𑀢𑀸 𑀲𑀫𑁆𑀫𑀤𑁂𑀯 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀦𑁆𑀢𑀺, 𑀢𑀤𑀦𑀼𑀢𑁆𑀢𑀭𑀁 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀺, ‘‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’’𑀢𑀺 𑀅𑀩𑁆𑀪𑀜𑁆𑀜𑀸𑀲𑀺. 𑀅𑀜𑁆𑀜𑀢𑀭𑁄 𑀘 𑀔𑁄 𑀧𑀦𑀸𑀬𑀲𑁆𑀫𑀸 𑀦𑀦𑁆𑀤𑁄 𑀅𑀭𑀳𑀢𑀁 𑀅𑀳𑁄𑀲𑀺.

𑀅𑀣𑁂𑀓𑀸 𑀤𑁂𑀯𑀢𑀸 𑀭𑀢𑁆𑀢𑀺𑀪𑀸𑀕𑁂 𑀲𑀓𑀮𑀁 𑀚𑁂𑀢𑀯𑀦𑀁 𑀑𑀪𑀸𑀲𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀆𑀭𑁄𑀘𑁂𑀲𑀺 𑁋 ‘‘𑀆𑀬𑀲𑁆𑀫𑀸, 𑀪𑀦𑁆𑀢𑁂, 𑀦𑀦𑁆𑀤𑁄 𑀪𑀕𑀯𑀢𑁄 𑀪𑀸𑀢𑀸 𑀫𑀸𑀢𑀼𑀘𑁆𑀙𑀸𑀧𑀼𑀢𑁆𑀢𑁄 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’𑀢𑀺. 𑀪𑀕𑀯𑀢𑁄𑀧𑀺 𑀔𑁄 𑀜𑀸𑀡𑀁 𑀉𑀤𑀧𑀸𑀤𑀺 ‘‘𑀦𑀦𑁆𑀤𑁄 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’𑀢𑀺. 𑀲𑁄𑀧𑀸𑀬𑀲𑁆𑀫𑀸 𑀦𑀦𑁆𑀤𑁄 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀢𑀤𑀯𑁄𑀘 𑁋 ‘‘𑀬𑀁 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀧𑀸𑀝𑀺𑀪𑁄𑀕𑁄 𑀧𑀜𑁆𑀘𑀦𑁆𑀦𑀁 𑀅𑀘𑁆𑀙𑀭𑀸𑀲𑀢𑀸𑀦𑀁 𑀧𑀝𑀺𑀮𑀸𑀪𑀸𑀬 𑀓𑀓𑀼𑀝𑀧𑀸𑀤𑀸𑀦𑀁, 𑀫𑀼𑀜𑁆𑀘𑀸𑀫𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀏𑀢𑀲𑁆𑀫𑀸 𑀧𑀝𑀺𑀲𑁆𑀲𑀯𑀸’’𑀢𑀺. ‘‘𑀫𑀬𑀸𑀧𑀺 𑀔𑁄 𑀢𑁂, 𑀦𑀦𑁆𑀤, 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀯𑀺𑀤𑀺𑀢𑁄 ‘𑀦𑀦𑁆𑀤𑁄 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’𑀢𑀺. 𑀤𑁂𑀯𑀢𑀸𑀧𑀺 𑀫𑁂 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺 𑁋 ‘𑀆𑀬𑀲𑁆𑀫𑀸, 𑀪𑀦𑁆𑀢𑁂, 𑀦𑀦𑁆𑀤𑁄 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’𑀢𑀺. 𑀬𑀤𑁂𑀯 𑀔𑁄 𑀢𑁂, 𑀦𑀦𑁆𑀤, 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀢𑁆𑀢𑀁, 𑀅𑀣𑀸𑀳𑀁 𑀫𑀼𑀢𑁆𑀢𑁄 𑀏𑀢𑀲𑁆𑀫𑀸 𑀧𑀝𑀺𑀲𑁆𑀲𑀯𑀸’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀬𑀲𑁆𑀲 𑀦𑀺𑀢𑁆𑀢𑀺𑀡𑁆𑀡𑁄 𑀧𑀗𑁆𑀓𑁄, 𑀫𑀤𑁆𑀤𑀺𑀢𑁄 𑀓𑀸𑀫𑀓𑀡𑁆𑀝𑀓𑁄;

𑀫𑁄𑀳𑀓𑁆𑀔𑀬𑀁 𑀅𑀦𑀼𑀧𑁆𑀧𑀢𑁆𑀢𑁄, 𑀲𑀼𑀔𑀤𑀼𑀓𑁆𑀔𑁂𑀲𑀼 𑀦 𑀯𑁂𑀥𑀢𑀻 𑀲 𑀪𑀺𑀓𑁆𑀔𑀽’’𑀢𑀺. (𑀉𑀤𑀸. 𑁨𑁨);

𑀅𑀣𑁂𑀓𑀤𑀺𑀯𑀲𑀁 𑀪𑀺𑀓𑁆𑀔𑀽 𑀢𑀁 𑀆𑀬𑀲𑁆𑀫𑀦𑁆𑀢𑀁 𑀦𑀦𑁆𑀤𑀁 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀆𑀯𑀼𑀲𑁄 𑀦𑀦𑁆𑀤, 𑀧𑀼𑀩𑁆𑀩𑁂 𑀢𑁆𑀯𑀁 ‘𑀉𑀓𑁆𑀓𑀡𑁆𑀞𑀺𑀢𑁄𑀫𑀻’𑀢𑀺 𑀯𑀤𑁂𑀲𑀺, 𑀇𑀤𑀸𑀦𑀺 𑀢𑁂 𑀓𑀣’’𑀦𑁆𑀢𑀺? ‘‘𑀦𑀢𑁆𑀣𑀺 𑀫𑁂, 𑀆𑀯𑀼𑀲𑁄, 𑀕𑀺𑀳𑀺𑀪𑀸𑀯𑀸𑀬 𑀆𑀮𑀬𑁄’’𑀢𑀺. 𑀢𑀁 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽 𑁋 ‘‘𑀅𑀪𑀽𑀢𑀁 𑀆𑀬𑀲𑁆𑀫𑀸 𑀦𑀦𑁆𑀤𑁄 𑀓𑀣𑁂𑀢𑀺, 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀢𑀺, 𑀅𑀢𑀻𑀢𑀤𑀺𑀯𑀲𑁂𑀲𑀼 ‘𑀉𑀓𑁆𑀓𑀡𑁆𑀞𑀺𑀢𑁄𑀫𑁆𑀳𑀻’𑀢𑀺 𑀯𑀢𑁆𑀯𑀸 𑀇𑀤𑀸𑀦𑀺 ‘𑀦𑀢𑁆𑀣𑀺 𑀫𑁂 𑀕𑀺𑀳𑀺𑀪𑀸𑀯𑀸𑀬 𑀆𑀮𑀬𑁄’𑀢𑀺 𑀓𑀣𑁂𑀢𑀻’’𑀢𑀺 𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀪𑀕𑀯𑀸 ‘‘𑀪𑀺𑀓𑁆𑀔𑀯𑁂, 𑀅𑀢𑀻𑀢𑀤𑀺𑀯𑀲𑁂𑀲𑀼 𑀦𑀦𑁆𑀤𑀲𑁆𑀲 𑀅𑀢𑁆𑀢𑀪𑀸𑀯𑁄 𑀤𑀼𑀘𑁆𑀙𑀦𑁆𑀦𑀕𑁂𑀳𑀲𑀤𑀺𑀲𑁄 𑀅𑀳𑁄𑀲𑀺, 𑀇𑀤𑀸𑀦𑀺 𑀲𑀼𑀘𑁆𑀙𑀦𑁆𑀦𑀕𑁂𑀳𑀲𑀤𑀺𑀲𑁄 𑀚𑀸𑀢𑁄. 𑀅𑀬𑀜𑁆𑀳𑀺 𑀤𑀺𑀩𑁆𑀩𑀘𑁆𑀙𑀭𑀸𑀦𑀁 𑀤𑀺𑀝𑁆𑀞𑀓𑀸𑀮𑀢𑁄 𑀧𑀝𑁆𑀞𑀸𑀬 𑀧𑀩𑁆𑀩𑀚𑀺𑀢𑀓𑀺𑀘𑁆𑀘𑀲𑁆𑀲 𑀫𑀢𑁆𑀣𑀓𑀁 𑀧𑀸𑀧𑁂𑀢𑀼𑀁 𑀯𑀸𑀬𑀫𑀦𑁆𑀢𑁄 𑀢𑀁 𑀓𑀺𑀘𑁆𑀘𑀁 𑀧𑀢𑁆𑀢𑁄’’𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁩. ‘‘𑀬𑀣𑀸 𑀅𑀕𑀸𑀭𑀁 𑀤𑀼𑀘𑁆𑀙𑀦𑁆𑀦𑀁, 𑀯𑀼𑀝𑁆𑀞𑀻 𑀲𑀫𑀢𑀺𑀯𑀺𑀚𑁆𑀛𑀢𑀺;

𑀏𑀯𑀁 𑀅𑀪𑀸𑀯𑀺𑀢𑀁 𑀘𑀺𑀢𑁆𑀢𑀁, 𑀭𑀸𑀕𑁄 𑀲𑀫𑀢𑀺𑀯𑀺𑀚𑁆𑀛𑀢𑀺.

𑁧𑁪. ‘‘𑀬𑀣𑀸 𑀅𑀕𑀸𑀭𑀁 𑀲𑀼𑀘𑁆𑀙𑀦𑁆𑀦𑀁, 𑀯𑀼𑀝𑁆𑀞𑀻 𑀦 𑀲𑀫𑀢𑀺𑀯𑀺𑀚𑁆𑀛𑀢𑀺;

𑀏𑀯𑀁 𑀲𑀼𑀪𑀸𑀯𑀺𑀢𑀁 𑀘𑀺𑀢𑁆𑀢𑀁, 𑀭𑀸𑀕𑁄 𑀦 𑀲𑀫𑀢𑀺𑀯𑀺𑀚𑁆𑀛𑀢𑀻’’𑀢𑀺.

𑀢𑀢𑁆𑀣 𑀅𑀕𑀸𑀭𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀕𑁂𑀳𑀁. 𑀤𑀼𑀘𑁆𑀙𑀦𑁆𑀦𑀦𑁆𑀢𑀺 𑀯𑀺𑀭𑀴𑀘𑁆𑀙𑀦𑁆𑀦𑀁 𑀙𑀺𑀤𑁆𑀤𑀸𑀯𑀙𑀺𑀤𑁆𑀤𑀁. 𑀲𑀫𑀢𑀺𑀯𑀺𑀚𑁆𑀛𑀢𑀻𑀢𑀺 𑀯𑀲𑁆𑀲𑀯𑀼𑀝𑁆𑀞𑀺 𑀯𑀺𑀦𑀺𑀯𑀺𑀚𑁆𑀛𑀢𑀺. 𑀅𑀪𑀸𑀯𑀺𑀢𑀦𑁆𑀢𑀺 𑀢𑀁 𑀅𑀕𑀸𑀭𑀁 𑀯𑀼𑀝𑁆𑀞𑀺 𑀯𑀺𑀬 𑀪𑀸𑀯𑀦𑀸𑀬 𑀭𑀳𑀺𑀢𑀢𑁆𑀢𑀸 𑀅𑀪𑀸𑀯𑀺𑀢𑀁 𑀘𑀺𑀢𑁆𑀢𑀁 𑀭𑀸𑀕𑁄 𑀲𑀫𑀢𑀺 𑀯𑀺𑀚𑁆𑀛𑀢𑀺. 𑀦 𑀓𑁂𑀯𑀮𑀁 𑀭𑀸𑀕𑁄𑀯, 𑀤𑁄𑀲𑀫𑁄𑀳𑀫𑀸𑀦𑀸𑀤𑀬𑁄 𑀲𑀩𑁆𑀩𑀓𑀺𑀮𑁂𑀲𑀸 𑀢𑀣𑀸𑀭𑀽𑀧𑀁 𑀘𑀺𑀢𑁆𑀢𑀁 𑀅𑀢𑀺𑀯𑀺𑀬 𑀯𑀺𑀚𑁆𑀛𑀦𑁆𑀢𑀺𑀬𑁂𑀯. 𑀲𑀼𑀪𑀸𑀯𑀺𑀢𑀦𑁆𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸𑀳𑀺 𑀲𑀼𑀪𑀸𑀯𑀺𑀢𑀁. 𑀏𑀯𑀭𑀽𑀧𑀁 𑀘𑀺𑀢𑁆𑀢𑀁 𑀲𑀼𑀘𑁆𑀙𑀦𑁆𑀦𑀁 𑀕𑁂𑀳𑀁 𑀯𑀼𑀝𑁆𑀞𑀺 𑀯𑀺𑀬 𑀭𑀸𑀕𑀸𑀤𑀬𑁄 𑀓𑀺𑀮𑁂𑀲𑀸 𑀅𑀢𑀺𑀯𑀺𑀚𑁆𑀛𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻𑀢𑀺.

𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀼. 𑀫𑀳𑀸𑀚𑀦𑀲𑁆𑀲 𑀤𑁂𑀲𑀦𑀸 𑀲𑀸𑀢𑁆𑀣𑀺𑀓𑀸 𑀅𑀳𑁄𑀲𑀺.

𑀅𑀣 𑀔𑁄 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁, ‘‘𑀆𑀯𑀼𑀲𑁄, 𑀩𑀼𑀤𑁆𑀥𑀸 𑀦𑀸𑀫 𑀅𑀘𑁆𑀙𑀭𑀺𑀬𑀸, 𑀚𑀦𑀧𑀤𑀓𑀮𑁆𑀬𑀸𑀡𑀺𑀁 𑀦𑀺𑀲𑁆𑀲𑀸𑀬 𑀉𑀓𑁆𑀓𑀡𑁆𑀞𑀺𑀢𑁄 𑀦𑀸𑀫𑀸𑀬𑀲𑁆𑀫𑀸 𑀦𑀦𑁆𑀤𑁄 𑀲𑀢𑁆𑀣𑀸𑀭𑀸 𑀤𑁂𑀯𑀘𑁆𑀙𑀭𑀸 𑀆𑀫𑀺𑀲𑀁 𑀓𑀢𑁆𑀯𑀸 𑀯𑀺𑀦𑀻𑀢𑁄’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 𑁋 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂, ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑁂𑀲 𑀫𑀬𑀸 𑀫𑀸𑀢𑀼𑀕𑀸𑀫𑁂𑀦 𑀧𑀮𑁄𑀪𑁂𑀢𑁆𑀯𑀸 𑀯𑀺𑀦𑀻𑀢𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺 𑁋

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑀸𑀭𑀸𑀡𑀲𑀺𑀯𑀸𑀲𑀻 𑀓𑀧𑁆𑀧𑀝𑁄 𑀦𑀸𑀫 𑀯𑀸𑀡𑀺𑀚𑁄 𑀅𑀳𑁄𑀲𑀺. 𑀢𑀲𑁆𑀲𑁂𑀓𑁄 𑀕𑀤𑁆𑀭𑀪𑁄 𑀓𑀼𑀫𑁆𑀪𑀪𑀸𑀭𑀁 𑀯𑀳𑀢𑀺, 𑀏𑀓𑀤𑀺𑀯𑀲𑁂𑀦 𑀲𑀢𑁆𑀢 𑀬𑁄𑀚𑀦𑀸𑀦𑀺 𑀕𑀘𑁆𑀙𑀢𑀺. 𑀲𑁄 𑀏𑀓𑀲𑁆𑀫𑀺𑀁 𑀲𑀫𑀬𑁂 𑀕𑀤𑁆𑀭𑀪𑀪𑀸𑀭𑀓𑁂𑀳𑀺 𑀲𑀤𑁆𑀥𑀺𑀁 𑀢𑀓𑁆𑀓𑀲𑀺𑀮𑀁 𑀕𑀦𑁆𑀢𑁆𑀯𑀸 𑀬𑀸𑀯 𑀪𑀡𑁆𑀟𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑀁, 𑀢𑀸𑀯 𑀕𑀤𑁆𑀭𑀪𑀁 𑀘𑀭𑀺𑀢𑀼𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀅𑀣𑀲𑁆𑀲 𑀲𑁄 𑀕𑀤𑁆𑀭𑀪𑁄 𑀧𑀭𑀺𑀔𑀸𑀧𑀺𑀝𑁆𑀞𑁂 𑀘𑀭𑀫𑀸𑀦𑁄 𑀏𑀓𑀁 𑀕𑀤𑁆𑀭𑀪𑀺𑀁 𑀤𑀺𑀲𑁆𑀯𑀸 𑀉𑀧𑀲𑀗𑁆𑀓𑀫𑀺. 𑀲𑀸 𑀢𑁂𑀦 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀭𑁄𑀦𑁆𑀢𑀻 𑀆𑀳 𑁋 ‘‘𑀓𑀼𑀢𑁄 𑀆𑀕𑀢𑁄𑀲𑀻’’𑀢𑀺? ‘‘𑀩𑀸𑀭𑀸𑀡𑀲𑀺𑀢𑁄’’𑀢𑀺. ‘‘𑀓𑁂𑀦 𑀓𑀫𑁆𑀫𑁂𑀦𑀸’’𑀢𑀺? ‘‘𑀯𑀸𑀡𑀺𑀚𑁆𑀚𑀓𑀫𑁆𑀫𑁂𑀦𑀸’’𑀢𑀺. ‘‘𑀓𑀺𑀢𑁆𑀢𑀓𑀁 𑀪𑀸𑀭𑀁 𑀯𑀳𑀲𑀻’’𑀢𑀺? ‘‘𑀓𑀼𑀫𑁆𑀪𑀪𑀸𑀭’’𑀦𑁆𑀢𑀺? ‘‘𑀏𑀢𑁆𑀢𑀓𑀁 𑀪𑀸𑀭𑀁 𑀯𑀳𑀦𑁆𑀢𑁄 𑀓𑀢𑀺 𑀬𑁄𑀚𑀦𑀸𑀦𑀺 𑀕𑀘𑁆𑀙𑀲𑀻’’𑀢𑀺? ‘‘𑀲𑀢𑁆𑀢 𑀬𑁄𑀚𑀦𑀸𑀦𑀻’’𑀢𑀺. ‘‘𑀕𑀢𑀕𑀢𑀝𑁆𑀞𑀸𑀦𑁂 𑀢𑁂 𑀓𑀸𑀘𑀺 𑀧𑀸𑀤𑀧𑀭𑀺𑀓𑀫𑁆𑀫𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀓𑀭𑀸 𑀅𑀢𑁆𑀣𑀻’’𑀢𑀺? ‘‘𑀦𑀢𑁆𑀣𑀻’’𑀢𑀺. ‘‘𑀏𑀯𑀁 𑀲𑀦𑁆𑀢𑁂 𑀫𑀳𑀸𑀤𑀼𑀓𑁆𑀔𑀁 𑀦𑀸𑀫 𑀅𑀦𑀼𑀪𑁄𑀲𑀻’’𑀢𑀺? ‘‘𑀓𑀺𑀜𑁆𑀘𑀸𑀧𑀺 𑀳𑀺 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁 𑀧𑀸𑀤𑀧𑀭𑀺𑀓𑀫𑁆𑀫𑀸𑀤𑀺𑀓𑀸𑀭𑀓𑀸 𑀦𑀸𑀫 𑀦𑀢𑁆𑀣𑀺, 𑀓𑀸𑀫𑀲𑀁𑀬𑁄𑀚𑀦𑀖𑀝𑁆𑀝𑀦𑀢𑁆𑀣𑀸𑀬 𑀧𑀦 𑀏𑀯𑀭𑀽𑀧𑀁 𑀓𑀣𑀁 𑀓𑀣𑁂𑀲𑀺’’? 𑀲𑁄 𑀢𑀲𑁆𑀲𑀸 𑀓𑀣𑀸𑀬 𑀉𑀓𑁆𑀓𑀡𑁆𑀞𑀺. 𑀓𑀧𑁆𑀧𑀝𑁄𑀧𑀺 𑀪𑀡𑁆𑀟𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 𑁋 ‘‘𑀏𑀳𑀺, 𑀢𑀸𑀢, 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀆𑀳. ‘‘𑀕𑀘𑁆𑀙𑀣 𑀢𑀼𑀫𑁆𑀳𑁂, 𑀦𑀸𑀳𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺. 𑀅𑀣 𑀦𑀁 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀺𑀢𑁆𑀯𑀸, ‘‘𑀅𑀦𑀺𑀘𑁆𑀙𑀦𑁆𑀢𑀁 𑀧𑀭𑀺𑀪𑀸𑀲𑁂𑀢𑁆𑀯𑀸 𑀦𑀁 𑀦𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀕𑀸𑀣𑀫𑀸𑀳 𑁋

‘‘𑀧𑀢𑁄𑀤𑀁 𑀢𑁂 𑀓𑀭𑀺𑀲𑁆𑀲𑀸𑀫𑀺, 𑀲𑀸𑀴𑀲𑀗𑁆𑀕𑀼𑀮𑀺𑀓𑀡𑁆𑀝𑀓𑀁;

𑀲𑀜𑁆𑀙𑀺𑀦𑁆𑀤𑀺𑀲𑁆𑀲𑀸𑀫𑀺 𑀢𑁂 𑀓𑀸𑀬𑀁, 𑀏𑀯𑀁 𑀚𑀸𑀦𑀸𑀳𑀺 𑀕𑀤𑁆𑀭𑀪𑀸’’𑀢𑀺.

𑀢𑀁 𑀲𑀼𑀢𑁆𑀯𑀸 𑀕𑀤𑁆𑀭𑀪𑁄 ‘‘𑀏𑀯𑀁 𑀲𑀦𑁆𑀢𑁂 𑀅𑀳𑀫𑁆𑀧𑀺 𑀢𑁂 𑀓𑀢𑁆𑀢𑀩𑁆𑀩𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀧𑀢𑁄𑀤𑀁 𑀫𑁂 𑀓𑀭𑀺𑀲𑁆𑀲𑀲𑀺, 𑀲𑁄𑀴𑀲𑀗𑁆𑀕𑀼𑀮𑀺𑀓𑀡𑁆𑀝𑀓𑀁;

𑀧𑀼𑀭𑀢𑁄 𑀧𑀢𑀺𑀝𑁆𑀞𑀳𑀺𑀢𑁆𑀯𑀸𑀦, 𑀉𑀤𑁆𑀥𑀭𑀺𑀢𑁆𑀯𑀸𑀦 𑀧𑀘𑁆𑀙𑀢𑁄;

𑀤𑀦𑁆𑀢𑀁 𑀢𑁂 𑀧𑀸𑀢𑀬𑀺𑀲𑁆𑀲𑀸𑀫𑀺, 𑀏𑀯𑀁 𑀚𑀸𑀦𑀸𑀳𑀺 𑀓𑀧𑁆𑀧𑀝𑀸’’𑀢𑀺.

𑀢𑀁 𑀲𑀼𑀢𑁆𑀯𑀸 𑀯𑀸𑀡𑀺𑀚𑁄 𑁋 ‘‘𑀓𑁂𑀦 𑀦𑀼 𑀔𑁄 𑀓𑀸𑀭𑀡𑁂𑀦 𑀏𑀲 𑀏𑀯𑀁 𑀯𑀤𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, 𑀇𑀢𑁄 𑀘𑀺𑀢𑁄 𑀘 𑀑𑀮𑁄𑀓𑁂𑀦𑁆𑀢𑁄 𑀢𑀁 𑀕𑀤𑁆𑀭𑀪𑀺𑀁 𑀤𑀺𑀲𑁆𑀯𑀸, ‘‘𑀇𑀫𑀸𑀬𑁂𑀲 𑀏𑀯𑀁 𑀲𑀺𑀓𑁆𑀔𑀸𑀧𑀺𑀢𑁄 𑀪𑀯𑀺𑀲𑁆𑀲𑀢𑀺, ‘𑀏𑀯𑀭𑀽𑀧𑀺𑀁 𑀦𑀸𑀫 𑀢𑁂 𑀕𑀤𑁆𑀭𑀪𑀺𑀁 𑀆𑀦𑁂𑀲𑁆𑀲𑀸𑀫𑀻’𑀢𑀺 𑀫𑀸𑀢𑀼𑀕𑀸𑀫𑁂𑀦 𑀦𑀁 𑀧𑀮𑁄𑀪𑁂𑀢𑁆𑀯𑀸 𑀦𑁂𑀲𑁆𑀲𑀸𑀫𑀻’’𑀢𑀺 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀘𑀢𑀼𑀧𑁆𑀧𑀤𑀺𑀁 𑀲𑀗𑁆𑀔𑀫𑀼𑀔𑀺𑀁, 𑀦𑀸𑀭𑀺𑀁 𑀲𑀩𑁆𑀩𑀗𑁆𑀕𑀲𑁄𑀪𑀺𑀦𑀺𑀁;

𑀪𑀭𑀺𑀬𑀁 𑀢𑁂 𑀆𑀦𑀬𑀺𑀲𑁆𑀲𑀸𑀫𑀺, 𑀏𑀯𑀁 𑀚𑀸𑀦𑀸𑀳𑀺 𑀕𑀤𑁆𑀭𑀪𑀸’’𑀢𑀺.

𑀢𑀁 𑀲𑀼𑀢𑁆𑀯𑀸 𑀢𑀼𑀝𑁆𑀞𑀘𑀺𑀢𑁆𑀢𑁄 𑀕𑀤𑁆𑀭𑀪𑁄 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀘𑀢𑀼𑀧𑁆𑀧𑀤𑀺𑀁 𑀲𑀗𑁆𑀔𑀫𑀼𑀔𑀺𑀁, 𑀦𑀸𑀭𑀺𑀁 𑀲𑀩𑁆𑀩𑀗𑁆𑀕𑀲𑁄𑀪𑀺𑀦𑀺𑀁;

𑀪𑀭𑀺𑀬𑀁 𑀫𑁂 𑀆𑀦𑀬𑀺𑀲𑁆𑀲𑀲𑀺, 𑀏𑀯𑀁 𑀚𑀸𑀦𑀸𑀳𑀺 𑀓𑀧𑁆𑀧𑀝;

𑀓𑀧𑁆𑀧𑀝 𑀪𑀺𑀬𑁆𑀬𑁄 𑀕𑀫𑀺𑀲𑁆𑀲𑀸𑀫𑀺, 𑀬𑁄𑀚𑀦𑀸𑀦𑀺 𑀘𑀢𑀼𑀤𑁆𑀤𑀲𑀸’’𑀢𑀺.

𑀅𑀣 𑀦𑀁 𑀓𑀧𑁆𑀧𑀝𑁄, ‘‘𑀢𑁂𑀦 𑀳𑀺 𑀏𑀳𑀻’’𑀢𑀺 𑀕𑀳𑁂𑀢𑁆𑀯𑀸 𑀲𑀓𑀝𑁆𑀞𑀸𑀦𑀁 𑀅𑀕𑀫𑀸𑀲𑀺. 𑀲𑁄 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀦𑀁 𑀆𑀳 𑁋 ‘‘𑀦𑀦𑀼 𑀫𑀁 𑀢𑀼𑀫𑁆𑀳𑁂 ‘𑀪𑀭𑀺𑀬𑀁 𑀢𑁂 𑀆𑀦𑀬𑀺𑀲𑁆𑀲𑀸𑀫𑀻’𑀢𑀺 𑀅𑀯𑁄𑀘𑀼𑀢𑁆𑀣𑀸’’𑀢𑀺? ‘‘𑀆𑀫, 𑀯𑀼𑀢𑁆𑀢𑀁, 𑀦𑀸𑀳𑀁 𑀅𑀢𑁆𑀢𑀦𑁄 𑀓𑀣𑀁 𑀪𑀺𑀦𑁆𑀤𑀺𑀲𑁆𑀲𑀸𑀫𑀺, 𑀪𑀭𑀺𑀬𑀁 𑀢𑁂 𑀆𑀦𑁂𑀲𑁆𑀲𑀸𑀫𑀺, 𑀯𑁂𑀢𑀦𑀁 𑀧𑀦 𑀢𑀼𑀬𑁆𑀳𑀁 𑀏𑀓𑀓𑀲𑁆𑀲𑁂𑀯 𑀤𑀲𑁆𑀲𑀸𑀫𑀺, 𑀢𑀼𑀬𑁆𑀳𑀁 𑀯𑁂𑀢𑀦𑀁 𑀤𑀼𑀢𑀺𑀬𑀲𑁆𑀲 𑀧𑀳𑁄𑀢𑀼 𑀯𑀸 𑀫𑀸 𑀯𑀸, 𑀢𑁆𑀯𑀫𑁂𑀯 𑀚𑀸𑀦𑁂𑀬𑁆𑀬𑀸𑀲𑀺. 𑀉𑀪𑀺𑀦𑁆𑀦𑀁 𑀧𑀦 𑀯𑁄 𑀲𑀁𑀯𑀸𑀲𑀫𑀦𑁆𑀯𑀸𑀬 𑀧𑀼𑀢𑁆𑀢𑀸 𑀯𑀺𑀚𑀸𑀬𑀺𑀲𑁆𑀲𑀦𑁆𑀢𑀺, 𑀢𑁂𑀳𑀺𑀧𑀺 𑀩𑀳𑀽𑀳𑀺 𑀲𑀤𑁆𑀥𑀺𑀁 𑀢𑀼𑀬𑁆𑀳𑀁 𑀢𑀁 𑀧𑀳𑁄𑀢𑀼 𑀯𑀸 𑀫𑀸 𑀯𑀸, 𑀢𑁆𑀯𑀫𑁂𑀯 𑀚𑀸𑀦𑁂𑀬𑁆𑀬𑀸𑀲𑀻’’𑀢𑀺. 𑀕𑀤𑁆𑀭𑀪𑁄 𑀢𑀲𑁆𑀫𑀺𑀁 𑀓𑀣𑁂𑀦𑁆𑀢𑁂𑀬𑁂𑀯 𑀅𑀦𑀧𑁂𑀓𑁆𑀔𑁄 𑀅𑀳𑁄𑀲𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸, ‘‘𑀢𑀤𑀸, 𑀪𑀺𑀓𑁆𑀔𑀯𑁂, 𑀕𑀤𑁆𑀭𑀪𑀻 𑀚𑀦𑀧𑀤𑀓𑀮𑁆𑀬𑀸𑀡𑀻 𑀅𑀳𑁄𑀲𑀺, 𑀕𑀤𑁆𑀭𑀪𑁄 𑀦𑀦𑁆𑀤𑁄, 𑀯𑀸𑀡𑀺𑀚𑁄 𑀅𑀳𑀫𑁂𑀯. 𑀏𑀯𑀁 𑀧𑀼𑀩𑁆𑀩𑁂𑀧𑁂𑀲 𑀫𑀬𑀸 𑀫𑀸𑀢𑀼𑀕𑀸𑀫𑁂𑀦 𑀧𑀮𑁄𑀪𑁂𑀢𑁆𑀯𑀸 𑀯𑀺𑀦𑀻𑀢𑁄’’𑀢𑀺 𑀚𑀸𑀢𑀓𑀁 𑀦𑀺𑀝𑁆𑀞𑀸𑀧𑁂𑀲𑀻𑀢𑀺.

𑀦𑀦𑁆𑀤𑀢𑁆𑀣𑁂𑀭𑀯𑀢𑁆𑀣𑀼 𑀦𑀯𑀫𑀁.