𑁧𑁩. 𑀲𑀼𑀫𑀦𑀸𑀤𑁂𑀯𑀻𑀯𑀢𑁆𑀣𑀼

𑀇𑀥 𑀦𑀦𑁆𑀤𑀢𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀼𑀫𑀦𑀸𑀤𑁂𑀯𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑀸𑀯𑀢𑁆𑀣𑀺𑀬𑀜𑁆𑀳𑀺 𑀤𑁂𑀯𑀲𑀺𑀓𑀁 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀕𑁂𑀳𑁂 𑀤𑁆𑀯𑁂 𑀪𑀺𑀓𑁆𑀔𑀽𑀲𑀳𑀲𑁆𑀲𑀸𑀦𑀺 𑀪𑀼𑀜𑁆𑀚𑀦𑁆𑀢𑀺, 𑀢𑀣𑀸 𑀯𑀺𑀲𑀸𑀔𑀸𑀬 𑀫𑀳𑀸𑀉𑀧𑀸𑀲𑀺𑀓𑀸𑀬. 𑀲𑀸𑀯𑀢𑁆𑀣𑀺𑀬𑀁 𑀬𑁄 𑀬𑁄 𑀤𑀸𑀦𑀁 𑀤𑀸𑀢𑀼𑀓𑀸𑀫𑁄 𑀳𑁄𑀢𑀺, 𑀲𑁄 𑀲𑁄 𑀢𑁂𑀲𑀁 𑀉𑀪𑀺𑀦𑁆𑀦𑀁 𑀑𑀓𑀸𑀲𑀁 𑀮𑀪𑀺𑀢𑁆𑀯𑀸𑀯 𑀓𑀭𑁄𑀢𑀺. 𑀓𑀺𑀁 𑀓𑀸𑀭𑀡𑀸? ‘‘𑀢𑀼𑀫𑁆𑀳𑀸𑀓𑀁 𑀤𑀸𑀦𑀕𑁆𑀕𑀁 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀯𑀸 𑀯𑀺𑀲𑀸𑀔𑀸 𑀯𑀸 𑀆𑀕𑀢𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀦𑀸𑀕𑀢𑀸’’𑀢𑀺 𑀯𑀼𑀢𑁆𑀢𑁂 𑀲𑀢𑀲𑀳𑀲𑁆𑀲𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀓𑀢𑀤𑀸𑀦𑀫𑁆𑀧𑀺 ‘‘𑀓𑀺𑀁 𑀤𑀸𑀦𑀁 𑀦𑀸𑀫𑁂𑀢’’𑀦𑁆𑀢𑀺 𑀕𑀭𑀳𑀦𑁆𑀢𑀺. 𑀉𑀪𑁄𑀧𑀺 𑀳𑀺 𑀢𑁂 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀭𑀼𑀘𑀺𑀜𑁆𑀘 𑀅𑀦𑀼𑀘𑁆𑀙𑀯𑀺𑀓𑀓𑀺𑀘𑁆𑀘𑀸𑀦𑀺 𑀘 𑀅𑀢𑀺𑀯𑀺𑀬 𑀚𑀸𑀦𑀦𑁆𑀢𑀺, 𑀢𑁂𑀲𑀼 𑀯𑀺𑀘𑀸𑀭𑁂𑀦𑁆𑀢𑁂𑀲𑀼 𑀪𑀺𑀓𑁆𑀔𑀽 𑀘𑀺𑀢𑁆𑀢𑀭𑀽𑀧𑀁 𑀪𑀼𑀜𑁆𑀚𑀦𑁆𑀢𑀺. 𑀢𑀲𑁆𑀫𑀸 𑀲𑀩𑁆𑀩𑁂 𑀤𑀸𑀦𑀁 𑀤𑀸𑀢𑀼𑀓𑀸𑀫𑀸 𑀢𑁂 𑀕𑀳𑁂𑀢𑁆𑀯𑀸𑀯 𑀕𑀘𑁆𑀙𑀦𑁆𑀢𑀺. 𑀇𑀢𑀺 𑀢𑁂 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀖𑀭𑁂 𑀪𑀺𑀓𑁆𑀔𑀽 𑀧𑀭𑀺𑀯𑀺𑀲𑀺𑀢𑀼𑀁 𑀦 𑀮𑀪𑀦𑁆𑀢𑀺. 𑀢𑀢𑁄 𑀯𑀺𑀲𑀸𑀔𑀸, ‘‘𑀓𑁄 𑀦𑀼 𑀔𑁄 𑀫𑀫 𑀞𑀸𑀦𑁂 𑀞𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀯𑀺𑀲𑀺𑀲𑁆𑀲𑀢𑀻’’𑀢𑀺 𑀉𑀧𑀥𑀸𑀭𑁂𑀦𑁆𑀢𑀻 𑀧𑀼𑀢𑁆𑀢𑀲𑁆𑀲 𑀥𑀻𑀢𑀭𑀁 𑀤𑀺𑀲𑁆𑀯𑀸 𑀢𑀁 𑀅𑀢𑁆𑀢𑀦𑁄 𑀞𑀸𑀦𑁂 𑀞𑀧𑁂𑀲𑀺. 𑀲𑀸 𑀢𑀲𑁆𑀲𑀸 𑀦𑀺𑀯𑁂𑀲𑀦𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀯𑀺𑀲𑀢𑀺. 𑀅𑀦𑀸𑀣𑀧𑀺𑀡𑁆𑀟𑀺𑀓𑁄𑀧𑀺 𑀫𑀳𑀸𑀲𑀼𑀪𑀤𑁆𑀤𑀁 𑀦𑀸𑀫 𑀚𑁂𑀝𑁆𑀞𑀥𑀻𑀢𑀭𑀁 𑀞𑀧𑁂𑀲𑀺. 𑀲𑀸 𑀪𑀺𑀓𑁆𑀔𑀽𑀦𑀁 𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀭𑁄𑀦𑁆𑀢𑀻 𑀥𑀫𑁆𑀫𑀁 𑀲𑀼𑀡𑀦𑁆𑀢𑀻 𑀲𑁄𑀢𑀸𑀧𑀦𑁆𑀦𑀸 𑀳𑀼𑀢𑁆𑀯𑀸 𑀧𑀢𑀺𑀓𑀼𑀮𑀁 𑀅𑀕𑀫𑀸𑀲𑀺. 𑀢𑀢𑁄 𑀘𑀽𑀴𑀲𑀼𑀪𑀤𑁆𑀤𑀁 𑀞𑀧𑁂𑀲𑀺. 𑀲𑀸𑀧𑀺 𑀢𑀣𑁂𑀯 𑀓𑀭𑁄𑀦𑁆𑀢𑀻 𑀲𑁄𑀢𑀸𑀧𑀦𑁆𑀦𑀸 𑀳𑀼𑀢𑁆𑀯𑀸 𑀧𑀢𑀺𑀓𑀼𑀮𑀁 𑀕𑀢𑀸. 𑀅𑀣 𑀲𑀼𑀫𑀦𑀤𑁂𑀯𑀺𑀁 𑀦𑀸𑀫 𑀓𑀦𑀺𑀝𑁆𑀞𑀥𑀻𑀢𑀭𑀁 𑀞𑀧𑁂𑀲𑀺. 𑀲𑀸 𑀧𑀦 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑀓𑀤𑀸𑀕𑀸𑀫𑀺𑀨𑀮𑀁 𑀧𑀢𑁆𑀯𑀸 𑀓𑀼𑀫𑀸𑀭𑀺𑀓𑀸𑀯 𑀳𑀼𑀢𑁆𑀯𑀸 𑀢𑀣𑀸𑀭𑀽𑀧𑁂𑀦 𑀅𑀨𑀸𑀲𑀼𑀓𑁂𑀦 𑀆𑀢𑀼𑀭𑀸 𑀆𑀳𑀸𑀭𑀼𑀧𑀘𑁆𑀙𑁂𑀤𑀁 𑀓𑀢𑁆𑀯𑀸 𑀧𑀺𑀢𑀭𑀁 𑀤𑀝𑁆𑀞𑀼𑀓𑀸𑀫𑀸 𑀳𑀼𑀢𑁆𑀯𑀸 𑀧𑀓𑁆𑀓𑁄𑀲𑀸𑀧𑁂𑀲𑀺. 𑀲𑁄 𑀏𑀓𑀲𑁆𑀫𑀺𑀁 𑀤𑀸𑀦𑀕𑁆𑀕𑁂 𑀢𑀲𑁆𑀲𑀸 𑀲𑀸𑀲𑀦𑀁 𑀲𑀼𑀢𑁆𑀯𑀸𑀯 𑀆𑀕𑀦𑁆𑀢𑁆𑀯𑀸, ‘‘𑀓𑀺𑀁, 𑀅𑀫𑁆𑀫 𑀲𑀼𑀫𑀦𑁂’’𑀢𑀺 𑀆𑀳. 𑀲𑀸𑀧𑀺 𑀦𑀁 𑀆𑀳 𑁋 ‘‘𑀓𑀺𑀁, 𑀢𑀸𑀢 𑀓𑀦𑀺𑀝𑁆𑀞𑀪𑀸𑀢𑀺𑀓𑀸’’𑀢𑀺? ‘‘𑀯𑀺𑀮𑀧𑀲𑀺 𑀅𑀫𑁆𑀫𑀸’’𑀢𑀺? ‘‘𑀦 𑀯𑀺𑀮𑀧𑀸𑀫𑀺, 𑀓𑀦𑀺𑀝𑁆𑀞𑀪𑀸𑀢𑀺𑀓𑀸’’𑀢𑀺. ‘‘𑀪𑀸𑀬𑀲𑀺, 𑀅𑀫𑁆𑀫𑀸’’𑀢𑀺? ‘‘𑀦 𑀪𑀸𑀬𑀸𑀫𑀺, 𑀓𑀦𑀺𑀝𑁆𑀞𑀪𑀸𑀢𑀺𑀓𑀸’’𑀢𑀺. 𑀏𑀢𑁆𑀢𑀓𑀁 𑀯𑀢𑁆𑀯𑀸𑀬𑁂𑀯 𑀧𑀦 𑀲𑀸 𑀓𑀸𑀮𑀫𑀓𑀸𑀲𑀺. 𑀲𑁄 𑀲𑁄𑀢𑀸𑀧𑀦𑁆𑀦𑁄𑀧𑀺 𑀲𑀫𑀸𑀦𑁄 𑀲𑁂𑀝𑁆𑀞𑀺𑀥𑀻𑀢𑀭𑀺 𑀉𑀧𑁆𑀧𑀦𑁆𑀦𑀲𑁄𑀓𑀁 𑀅𑀥𑀺𑀯𑀸𑀲𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀥𑀻𑀢𑀼 𑀲𑀭𑀻𑀭𑀓𑀺𑀘𑁆𑀘𑀁 𑀓𑀸𑀭𑁂𑀢𑁆𑀯𑀸 𑀭𑁄𑀤𑀦𑁆𑀢𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, ‘‘𑀓𑀺𑀁, 𑀕𑀳𑀧𑀢𑀺, 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀅𑀲𑁆𑀲𑀼𑀫𑀼𑀔𑁄 𑀭𑁄𑀤𑀫𑀸𑀦𑁄 𑀆𑀕𑀢𑁄𑀲𑀻’’𑀢𑀺 𑀯𑀼𑀢𑁆𑀢𑁂, ‘‘𑀥𑀻𑀢𑀸 𑀫𑁂, 𑀪𑀦𑁆𑀢𑁂, 𑀲𑀼𑀫𑀦𑀤𑁂𑀯𑀻 𑀓𑀸𑀮𑀓𑀢𑀸’’𑀢𑀺 𑀆𑀳. ‘‘𑀅𑀣 𑀓𑀲𑁆𑀫𑀸 𑀲𑁄𑀘𑀲𑀺, 𑀦𑀦𑀼 𑀲𑀩𑁆𑀩𑁂𑀲𑀁 𑀏𑀓𑀁𑀲𑀺𑀓𑀁 𑀫𑀭𑀡’’𑀦𑁆𑀢𑀺? ‘‘𑀚𑀸𑀦𑀸𑀫𑁂𑀢𑀁, 𑀪𑀦𑁆𑀢𑁂, 𑀏𑀯𑀭𑀽𑀧𑀸 𑀦𑀸𑀫 𑀫𑁂 𑀳𑀺𑀭𑀺𑀑𑀢𑁆𑀢𑀧𑁆𑀧𑀲𑀫𑁆𑀧𑀦𑁆𑀦𑀸 𑀥𑀻𑀢𑀸, 𑀲𑀸 𑀫𑀭𑀡𑀓𑀸𑀮𑁂 𑀲𑀢𑀺𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀯𑀺𑀮𑀧𑀫𑀸𑀦𑀸 𑀫𑀢𑀸, 𑀢𑁂𑀦 𑀫𑁂 𑀅𑀦𑀧𑁆𑀧𑀓𑀁 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺. ‘‘𑀓𑀺𑀁 𑀧𑀦 𑀢𑀸𑀬 𑀓𑀣𑀺𑀢𑀁 𑀫𑀳𑀸𑀲𑁂𑀝𑁆𑀞𑀻’’𑀢𑀺? ‘‘𑀅𑀳𑀁 𑀢𑀁, 𑀪𑀦𑁆𑀢𑁂, ‘𑀅𑀫𑁆𑀫, 𑀲𑀼𑀫𑀦𑁂’𑀢𑀺 𑀆𑀫𑀦𑁆𑀢𑁂𑀲𑀺𑀁. 𑀅𑀣 𑀫𑀁 𑀆𑀳 𑁋 ‘𑀓𑀺𑀁, 𑀢𑀸𑀢, 𑀓𑀦𑀺𑀝𑁆𑀞𑀪𑀸𑀢𑀺𑀓𑀸’𑀢𑀺? ‘𑀯𑀺𑀮𑀧𑀲𑀺, 𑀅𑀫𑁆𑀫𑀸’𑀢𑀺? ‘𑀦 𑀯𑀺𑀮𑀧𑀸𑀫𑀺, 𑀓𑀦𑀺𑀝𑁆𑀞𑀪𑀸𑀢𑀺𑀓𑀸’𑀢𑀺. ‘𑀪𑀸𑀬𑀲𑀺, 𑀅𑀫𑁆𑀫𑀸’𑀢𑀺? ‘𑀦 𑀪𑀸𑀬𑀸𑀫𑀺 𑀓𑀦𑀺𑀝𑁆𑀞𑀪𑀸𑀢𑀺𑀓𑀸’𑀢𑀺. 𑀏𑀢𑁆𑀢𑀓𑀁 𑀯𑀢𑁆𑀯𑀸 𑀓𑀸𑀮𑀫𑀓𑀸𑀲𑀻’’𑀢𑀺. 𑀅𑀣 𑀦𑀁 𑀪𑀕𑀯𑀸 𑀆𑀳 𑁋 ‘‘𑀦 𑀢𑁂 𑀫𑀳𑀸𑀲𑁂𑀝𑁆𑀞𑀺 𑀥𑀻𑀢𑀸 𑀯𑀺𑀮𑀧𑀢𑀻’’𑀢𑀺. ‘‘𑀅𑀣 𑀓𑀲𑁆𑀫𑀸 𑀪𑀦𑁆𑀢𑁂 𑀏𑀯𑀫𑀸𑀳𑀸’’𑀢𑀺? ‘‘𑀓𑀦𑀺𑀝𑁆𑀞𑀢𑁆𑀢𑀸𑀬𑁂𑀯. 𑀥𑀻𑀢𑀸 𑀳𑀺 𑀢𑁂, 𑀕𑀳𑀧𑀢𑀺, 𑀫𑀕𑁆𑀕𑀨𑀮𑁂𑀳𑀺 𑀢𑀬𑀸 𑀫𑀳𑀮𑁆𑀮𑀺𑀓𑀸. 𑀢𑁆𑀯𑀜𑁆𑀳𑀺 𑀲𑁄𑀢𑀸𑀧𑀦𑁆𑀦𑁄, 𑀥𑀻𑀢𑀸 𑀧𑀦 𑀢𑁂 𑀲𑀓𑀤𑀸𑀕𑀸𑀫𑀺𑀦𑀻. 𑀲𑀸 𑀫𑀕𑁆𑀕𑀨𑀮𑁂𑀳𑀺 𑀢𑀬𑀸 𑀫𑀳𑀮𑁆𑀮𑀺𑀓𑀢𑁆𑀢𑀸 𑀢𑀁 𑀏𑀯𑀫𑀸𑀳𑀸’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺? ‘‘𑀏𑀯𑀁, 𑀕𑀳𑀧𑀢𑀻’’𑀢𑀺. ‘‘𑀇𑀤𑀸𑀦𑀺 𑀓𑀼𑀳𑀺𑀁 𑀦𑀺𑀩𑁆𑀩𑀢𑁆𑀢𑀸, 𑀪𑀦𑁆𑀢𑁂’’𑀢𑀺? ‘‘𑀢𑀼𑀲𑀺𑀢𑀪𑀯𑀦𑁂, 𑀕𑀳𑀧𑀢𑀻’’𑀢𑀺. ‘‘𑀪𑀦𑁆𑀢𑁂, 𑀫𑀫 𑀥𑀻𑀢𑀸 𑀇𑀥 𑀜𑀸𑀢𑀓𑀸𑀦𑀁 𑀅𑀦𑁆𑀢𑀭𑁂 𑀦𑀦𑁆𑀤𑀫𑀸𑀦𑀸 𑀯𑀺𑀘𑀭𑀺𑀢𑁆𑀯𑀸 𑀇𑀢𑁄 𑀕𑀦𑁆𑀢𑁆𑀯𑀸𑀧𑀺 𑀦𑀦𑁆𑀤𑀦𑀝𑁆𑀞𑀸𑀦𑁂𑀬𑁂𑀯 𑀦𑀺𑀩𑁆𑀩𑀢𑁆𑀢𑀸’’𑀢𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀆𑀫, 𑀕𑀳𑀧𑀢𑀺, 𑀅𑀧𑁆𑀧𑀫𑀢𑁆𑀢𑀸 𑀦𑀸𑀫 𑀕𑀳𑀝𑁆𑀞𑀸 𑀯𑀸 𑀧𑀩𑁆𑀩𑀚𑀺𑀢𑀸 𑀯𑀸 𑀇𑀥 𑀮𑁄𑀓𑁂 𑀘 𑀧𑀭𑀮𑁄𑀓𑁂 𑀘 𑀦𑀦𑁆𑀤𑀦𑁆𑀢𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁮. ‘‘𑀇𑀥 𑀦𑀦𑁆𑀤𑀢𑀺 𑀧𑁂𑀘𑁆𑀘 𑀦𑀦𑁆𑀤𑀢𑀺, 𑀓𑀢𑀧𑀼𑀜𑁆𑀜𑁄 𑀉𑀪𑀬𑀢𑁆𑀣 𑀦𑀦𑁆𑀤𑀢𑀺;

𑀧𑀼𑀜𑁆𑀜𑀁 𑀫𑁂 𑀓𑀢𑀦𑁆𑀢𑀺 𑀦𑀦𑁆𑀤𑀢𑀺, 𑀪𑀺𑀬𑁆𑀬𑁄 𑀦𑀦𑁆𑀤𑀢𑀺 𑀲𑀼𑀕𑁆𑀕𑀢𑀺𑀁 𑀕𑀢𑁄’’𑀢𑀺.

𑀢𑀢𑁆𑀣 𑀇𑀥𑀸𑀢𑀺 𑀇𑀥 𑀮𑁄𑀓𑁂 𑀓𑀫𑁆𑀫𑀦𑀦𑁆𑀤𑀦𑁂𑀦 𑀦𑀦𑁆𑀤𑀢𑀺. 𑀧𑁂𑀘𑁆𑀘𑀸𑀢𑀺 𑀧𑀭𑀮𑁄𑀓𑁂 𑀯𑀺𑀧𑀸𑀓𑀦𑀦𑁆𑀤𑀦𑁂𑀦 𑀦𑀦𑁆𑀤𑀢𑀺. 𑀓𑀢𑀧𑀼𑀜𑁆𑀜𑁄𑀢𑀺 𑀦𑀸𑀦𑀧𑁆𑀧𑀓𑀸𑀭𑀲𑁆𑀲 𑀧𑀼𑀜𑁆𑀜𑀲𑁆𑀲 𑀓𑀢𑁆𑀢𑀸. 𑀉𑀪𑀬𑀢𑁆𑀣𑀸𑀢𑀺 𑀇𑀥 ‘‘𑀓𑀢𑀁 𑀫𑁂 𑀓𑀼𑀲𑀮𑀁, 𑀅𑀓𑀢𑀁 𑀫𑁂 𑀧𑀸𑀧’’𑀦𑁆𑀢𑀺 𑀦𑀦𑁆𑀤𑀢𑀺, 𑀧𑀭𑀢𑁆𑀣 𑀯𑀺𑀧𑀸𑀓𑀁 𑀅𑀦𑀼𑀪𑀯𑀦𑁆𑀢𑁄 𑀦𑀦𑁆𑀤𑀢𑀺. 𑀧𑀼𑀜𑁆𑀜𑀁 𑀫𑁂𑀢𑀺 𑀇𑀥 𑀦𑀦𑁆𑀤𑀦𑁆𑀢𑁄 𑀧𑀦 ‘‘𑀧𑀼𑀜𑁆𑀜𑀁 𑀫𑁂 𑀓𑀢’’𑀦𑁆𑀢𑀺 𑀲𑁄𑀫𑀦𑀲𑁆𑀲𑀫𑀢𑁆𑀢𑁂𑀦𑁂𑀯 𑀓𑀫𑁆𑀫𑀦𑀦𑁆𑀤𑀦𑀁 𑀉𑀧𑀸𑀤𑀸𑀬 𑀦𑀦𑁆𑀤𑀢𑀺. 𑀪𑀺𑀬𑁆𑀬𑁄𑀢𑀺 𑀯𑀺𑀧𑀸𑀓𑀦𑀦𑁆𑀤𑀦𑁂𑀦 𑀧𑀦 𑀲𑀼𑀕𑀢𑀺𑀁 𑀕𑀢𑁄 𑀲𑀢𑁆𑀢𑀧𑀜𑁆𑀜𑀸𑀲𑀯𑀲𑁆𑀲𑀓𑁄𑀝𑀺𑀬𑁄 𑀲𑀝𑁆𑀞𑀺𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑁄 𑀢𑀼𑀲𑀺𑀢𑀧𑀼𑀭𑁂 𑀅𑀢𑀺𑀯𑀺𑀬 𑀦𑀦𑁆𑀤𑀢𑀻𑀢𑀺.

𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀅𑀳𑁂𑀲𑀼𑀁. 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀚𑀸𑀢𑀸𑀢𑀺.

𑀲𑀼𑀫𑀦𑀸𑀤𑁂𑀯𑀻𑀯𑀢𑁆𑀣𑀼 𑀢𑁂𑀭𑀲𑀫𑀁.