𑁫. 𑀫𑀗𑁆𑀕𑀮𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸

𑀓𑁄𑀡𑁆𑀟𑀜𑁆𑀜𑁂 𑀓𑀺𑀭 𑀲𑀢𑁆𑀣𑀭𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀢𑀲𑁆𑀲 𑀲𑀸𑀲𑀦𑀁 𑀯𑀲𑁆𑀲𑀲𑀢𑀲𑀳𑀲𑁆𑀲𑀁 𑀧𑀯𑀢𑁆𑀢𑀺𑀢𑁆𑀣. 𑀩𑀼𑀤𑁆𑀥𑀸𑀦𑀼𑀩𑀼𑀤𑁆𑀥𑀸𑀦𑀁 𑀲𑀸𑀯𑀓𑀸𑀦𑀁 𑀅𑀦𑁆𑀢𑀭𑀥𑀸𑀦𑁂𑀦 𑀲𑀸𑀲𑀦𑀫𑀲𑁆𑀲 𑀅𑀦𑁆𑀢𑀭𑀥𑀸𑀬𑀺. 𑀓𑁄𑀡𑁆𑀟𑀜𑁆𑀜𑀲𑁆𑀲 𑀧𑀦 𑀅𑀧𑀭𑀪𑀸𑀕𑁂 𑀏𑀓𑀫𑀲𑀗𑁆𑀔𑁆𑀬𑁂𑀬𑁆𑀬𑀫𑀢𑀺𑀓𑁆𑀓𑀫𑀺𑀢𑁆𑀯𑀸 𑀏𑀓𑀲𑁆𑀫𑀺𑀁𑀬𑁂𑀯 𑀓𑀧𑁆𑀧𑁂 𑀘𑀢𑁆𑀢𑀸𑀭𑁄 𑀩𑀼𑀤𑁆𑀥𑀸 𑀦𑀺𑀩𑁆𑀩𑀢𑁆𑀢𑀺𑀁𑀲𑀼 𑀫𑀗𑁆𑀕𑀮𑁄, 𑀲𑀼𑀫𑀦𑁄, 𑀭𑁂𑀯𑀢𑁄, 𑀲𑁄𑀪𑀺𑀢𑁄𑀢𑀺. 𑀢𑀢𑁆𑀣 𑀫𑀗𑁆𑀕𑀮𑁄 𑀧𑀦 𑀮𑁄𑀓𑀦𑀸𑀬𑀓𑁄 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀲𑁄𑀴𑀲 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀢𑀼𑀲𑀺𑀢𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀧𑀜𑁆𑀘𑀲𑀼 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀩𑀼𑀤𑁆𑀥𑀓𑁄𑀮𑀸𑀳𑀮𑀁 𑀦𑀸𑀫 𑀉𑀤𑀧𑀸𑀤𑀺, 𑀢𑀤𑀸 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂 𑀤𑁂𑀯𑀢𑀸𑀬𑁄 𑀏𑀓𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀆𑀬𑀸𑀘𑀦𑁆𑀢𑀺 𑁋

‘‘𑀓𑀸𑀮𑁄 𑀔𑁄 𑀢𑁂 𑀫𑀳𑀸𑀯𑀻𑀭, 𑀉𑀧𑁆𑀧𑀚𑁆𑀚 𑀫𑀸𑀢𑀼𑀓𑀼𑀘𑁆𑀙𑀺𑀬𑀁;

𑀲𑀤𑁂𑀯𑀓𑀁 𑀢𑀸𑀭𑀬𑀦𑁆𑀢𑁄, 𑀩𑀼𑀚𑁆𑀛𑀲𑁆𑀲𑀼 𑀅𑀫𑀢𑀁 𑀧𑀤’’𑀦𑁆𑀢𑀺. (𑀩𑀼. 𑀯𑀁. 𑁧.𑁬𑁭);

𑀏𑀯𑀁 𑀤𑁂𑀯𑁂𑀳𑀺 𑀆𑀬𑀸𑀘𑀺𑀢𑁄 𑀓𑀢𑀧𑀜𑁆𑀘𑀯𑀺𑀮𑁄𑀓𑀦𑁄 𑀢𑀼𑀲𑀺𑀢𑀸 𑀓𑀸𑀬𑀸 𑀘𑀯𑀺𑀢𑁆𑀯𑀸 𑀲𑀩𑁆𑀩𑀦𑀕𑀭𑀼𑀢𑁆𑀢𑀫𑁂 𑀉𑀢𑁆𑀢𑀭𑀦𑀕𑀭𑁂 𑀅𑀦𑀼𑀢𑁆𑀢𑀭𑀲𑁆𑀲 𑀉𑀢𑁆𑀢𑀭𑀲𑁆𑀲 𑀦𑀸𑀫 𑀭𑀜𑁆𑀜𑁄 𑀓𑀼𑀮𑁂 𑀉𑀢𑁆𑀢𑀭𑀸𑀬 𑀦𑀸𑀫 𑀤𑁂𑀯𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀢𑀤𑀸 𑀅𑀦𑁂𑀓𑀸𑀦𑀺 𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀧𑀸𑀢𑀼𑀭𑀳𑀼𑀁. 𑀢𑀸𑀦𑀺 𑀤𑀻𑀧𑀗𑁆𑀓𑀭𑀩𑀼𑀤𑁆𑀥𑀯𑀁𑀲𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑀲𑁆𑀲𑀸 𑀉𑀢𑁆𑀢𑀭𑀸𑀬 𑀓𑀺𑀭 𑀫𑀳𑀸𑀤𑁂𑀯𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀲𑀩𑁆𑀩𑀮𑁄𑀓𑀫𑀗𑁆𑀕𑀮𑀲𑁆𑀲 𑀫𑀗𑁆𑀕𑀮𑀲𑁆𑀲 𑀫𑀳𑀸𑀲𑀢𑁆𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀢𑁄 𑀧𑀝𑁆𑀞𑀸𑀬 𑀲𑀭𑀻𑀭𑀧𑁆𑀧𑀪𑀸 𑀭𑀢𑁆𑀢𑀺𑀦𑁆𑀤𑀺𑀯𑀁 𑀅𑀲𑀻𑀢𑀺𑀳𑀢𑁆𑀣𑀧𑁆𑀧𑀫𑀸𑀡𑀁 𑀧𑀤𑁂𑀲𑀁 𑀨𑀭𑀺𑀢𑁆𑀯𑀸 𑀘𑀦𑁆𑀤𑀸𑀮𑁄𑀓𑀲𑀽𑀭𑀺𑀬𑀸𑀮𑁄𑀓𑁂𑀳𑀺 𑀅𑀦𑀪𑀺𑀪𑀯𑀦𑀻𑀬𑀸 𑀳𑀼𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀲𑀸 𑀘 𑀅𑀜𑁆𑀜𑁂𑀦𑀸𑀮𑁄𑀓𑁂𑀦 𑀯𑀺𑀦𑀸 𑀅𑀢𑁆𑀢𑀦𑁄 𑀲𑀭𑀻𑀭𑀧𑁆𑀧𑀪𑀸𑀲𑀫𑀼𑀤𑀬𑁂𑀦𑁂𑀯 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑀺𑀢𑁆𑀯𑀸 𑀅𑀝𑁆𑀞𑀲𑀝𑁆𑀞𑀺𑀬𑀸 𑀥𑀸𑀢𑀻𑀳𑀺 𑀧𑀭𑀺𑀘𑀸𑀭𑀺𑀬𑀫𑀸𑀦𑀸 𑀯𑀺𑀘𑀭𑀢𑀺.

𑀲𑀸 𑀓𑀺𑀭 𑀤𑁂𑀯𑀢𑀸𑀳𑀺 𑀓𑀢𑀸𑀭𑀓𑁆𑀔𑀸 𑀤𑀲𑀦𑁆𑀦𑀁 𑀫𑀸𑀲𑀸𑀦𑀁 𑀅𑀘𑁆𑀘𑀬𑁂𑀦 𑀧𑀭𑀫𑀲𑀼𑀭𑀪𑀺𑀓𑀼𑀲𑀼𑀫𑀨𑀮𑀥𑀭𑀲𑀸𑀔𑀸𑀯𑀺𑀝𑀧𑁂 𑀓𑀫𑀮𑀓𑀼𑀯𑀮𑀬𑀲𑀫𑀮𑀗𑁆𑀓𑀢𑁂 𑀭𑀼𑀭𑀼-𑀲𑀻𑀳-𑀩𑁆𑀬𑀕𑁆𑀖-𑀕𑀚-𑀕𑀯𑀬-𑀫𑀳𑀺𑀁𑀲𑀧𑀲𑀤𑀯𑀺𑀯𑀺𑀥𑀫𑀺𑀕𑀕𑀡𑀯𑀺𑀘𑀭𑀺𑀢𑁂 𑀧𑀭𑀫𑀭𑀫𑀡𑀻𑀬𑁂 𑀉𑀢𑁆𑀢𑀭𑀫𑀥𑀼𑀭𑀼𑀬𑁆𑀬𑀸𑀦𑁂 𑀦𑀸𑀫 𑀫𑀗𑁆𑀕𑀮𑀼𑀬𑁆𑀬𑀸𑀦𑁂 𑀫𑀗𑁆𑀕𑀮𑀫𑀳𑀸𑀧𑀼𑀭𑀺𑀲𑀁 𑀯𑀺𑀚𑀸𑀬𑀺. 𑀲𑁄 𑀚𑀸𑀢𑀫𑀢𑁆𑀢𑁄𑀯 𑀫𑀳𑀸𑀲𑀢𑁆𑀢𑁄 𑀲𑀩𑁆𑀩𑀸 𑀤𑀺𑀲𑀸 𑀯𑀺𑀮𑁄𑀓𑁂𑀢𑁆𑀯𑀸 𑀉𑀢𑁆𑀢𑀭𑀸𑀪𑀺𑀫𑀼𑀔𑁄 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑁂𑀦 𑀕𑀦𑁆𑀢𑁆𑀯𑀸 𑀆𑀲𑀪𑀺𑀁 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀲𑀺. 𑀢𑀲𑁆𑀫𑀺𑀜𑁆𑀘 𑀔𑀡𑁂 𑀲𑀓𑀮𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀽𑀲𑀼 𑀤𑁂𑀯𑀢𑀸 𑀤𑀺𑀲𑁆𑀲𑀫𑀸𑀦𑀲𑀭𑀻𑀭𑀸 𑀤𑀺𑀩𑁆𑀩𑀫𑀸𑀮𑀸𑀤𑀻𑀳𑀺 𑀲𑀫𑀮𑀗𑁆𑀓𑀢𑀕𑀢𑁆𑀢𑀸 𑀢𑀢𑁆𑀣 𑀢𑀢𑁆𑀣 𑀞𑀢𑁆𑀯𑀸 𑀚𑀬𑀫𑀗𑁆𑀕𑀮𑀣𑀼𑀢𑀺𑀯𑀘𑀦𑀸𑀦𑀺 𑀲𑀫𑁆𑀧𑀯𑀢𑁆𑀢𑁂𑀲𑀼𑀁. 𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀯𑀼𑀢𑁆𑀢𑀦𑀬𑀸𑀦𑁂𑀯. 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀧𑀦𑀲𑁆𑀲 𑀮𑀓𑁆𑀔𑀡𑀧𑀸𑀞𑀓𑀸 𑀲𑀩𑁆𑀩𑀫𑀗𑁆𑀕𑀮𑀲𑀫𑁆𑀧𑀢𑁆𑀢𑀺𑀬𑀸 𑀚𑀸𑀢𑁄𑀢𑀺 ‘‘𑀫𑀗𑁆𑀕𑀮𑀓𑀼𑀫𑀸𑀭𑁄’’ 𑀢𑁆𑀯𑁂𑀯 𑀦𑀸𑀫𑀁 𑀓𑀭𑀺𑀁𑀲𑀼.

𑀢𑀲𑁆𑀲 𑀓𑀺𑀭 𑀬𑀲𑀯𑀸 𑀭𑀼𑀘𑀺𑀫𑀸 𑀲𑀺𑀭𑀺𑀫𑀸𑀢𑀺 𑀢𑀬𑁄 𑀧𑀸𑀲𑀸𑀤𑀸 𑀅𑀳𑁂𑀲𑀼𑀁. 𑀬𑀲𑀯𑀢𑀻𑀤𑁂𑀯𑀺𑀧𑁆𑀧𑀫𑀼𑀔𑀸𑀦𑀺 𑀢𑀺𑀁𑀲𑀦𑀸𑀝𑀓𑀺𑀢𑁆𑀣𑀺𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁. 𑀢𑀢𑁆𑀣 𑀫𑀳𑀸𑀲𑀢𑁆𑀢𑁄 𑀦𑀯𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀤𑀺𑀩𑁆𑀩𑀲𑀼𑀔𑀲𑀤𑀺𑀲𑀁 𑀲𑀼𑀔𑀁 𑀅𑀦𑀼𑀪𑀯𑀺𑀢𑁆𑀯𑀸 𑀬𑀲𑀯𑀢𑀺𑀬𑀸 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀲𑀻𑀮𑀯𑀁 𑀦𑀸𑀫 𑀧𑀼𑀢𑁆𑀢𑀁 𑀮𑀪𑀺𑀢𑁆𑀯𑀸 𑀘𑀢𑁆𑀢𑀸𑀭𑀺 𑀦𑀺𑀫𑀺𑀢𑁆𑀢𑀸𑀦𑀺 𑀤𑀺𑀲𑁆𑀯𑀸 𑀅𑀮𑀗𑁆𑀓𑀢𑀁 𑀧𑀡𑁆𑀟𑀭𑀁 𑀦𑀸𑀫 𑀲𑀼𑀦𑁆𑀤𑀭𑀢𑀼𑀭𑀗𑁆𑀕𑀯𑀭𑀫𑀸𑀭𑀼𑀬𑁆𑀳 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺. 𑀢𑀁 𑀧𑀦 𑀧𑀩𑁆𑀩𑀚𑀦𑁆𑀢𑀁 𑀢𑀺𑀲𑁆𑀲𑁄 𑀫𑀦𑀼𑀲𑁆𑀲𑀓𑁄𑀝𑀺𑀬𑁄 𑀅𑀦𑀼𑀧𑀩𑁆𑀩𑀚𑀺𑀁𑀲𑀼. 𑀢𑁂𑀳𑀺 𑀧𑀭𑀺𑀯𑀼𑀢𑁄 𑀫𑀳𑀸𑀧𑀼𑀭𑀺𑀲𑁄 𑀅𑀝𑁆𑀞 𑀫𑀸𑀲𑁂 𑀧𑀥𑀸𑀦𑀘𑀭𑀺𑀬𑀫𑀘𑀭𑀺.

𑀢𑀢𑁄 𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬 𑀉𑀢𑁆𑀢𑀭𑀕𑀸𑀫𑁂 𑀉𑀢𑁆𑀢𑀭𑀲𑁂𑀝𑁆𑀞𑀺𑀦𑁄 𑀥𑀻𑀢𑀸𑀬 𑀉𑀢𑁆𑀢𑀭𑀸𑀬 𑀦𑀸𑀫 𑀤𑀺𑀦𑁆𑀦𑀁 𑀧𑀓𑁆𑀔𑀺𑀢𑁆𑀢𑀤𑀺𑀩𑁆𑀩𑁄𑀚𑀁 𑀫𑀥𑀼𑀧𑀸𑀬𑀸𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀲𑀼𑀭𑀪𑀺𑀓𑀼𑀲𑀼𑀫𑀸𑀮𑀗𑁆𑀓𑀢𑁂 𑀦𑀻𑀮𑁄𑀪𑀸𑀲𑁂 𑀫𑀦𑁄𑀭𑀫𑁂 𑀲𑀸𑀮𑀯𑀦𑁂 𑀤𑀺𑀯𑀸𑀯𑀺𑀳𑀸𑀭𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀉𑀢𑁆𑀢𑀭𑁂𑀦 𑀦𑀸𑀫 𑀆𑀚𑀻𑀯𑀓𑁂𑀦 𑀤𑀺𑀦𑁆𑀦𑀸 𑀅𑀝𑁆𑀞 𑀢𑀺𑀡𑀫𑀼𑀝𑁆𑀞𑀺𑀬𑁄 𑀕𑀳𑁂𑀢𑁆𑀯𑀸 𑀅𑀲𑀺𑀢𑀜𑁆𑀚𑀦𑀕𑀺𑀭𑀺𑀲𑀗𑁆𑀓𑀸𑀲𑀁 𑀅𑀓𑁆𑀓𑀦𑁆𑀢𑀯𑀭𑀓𑀦𑀓𑀚𑀸𑀮𑀓𑀽𑀝𑀁𑀯 𑀲𑀻𑀢𑀘𑁆𑀙𑀸𑀬𑀁 𑀯𑀺𑀯𑀺𑀥𑀫𑀺𑀕𑀕𑀡𑀲𑀫𑁆𑀧𑀸𑀢𑀯𑀺𑀭𑀳𑀺𑀢𑀁 𑀫𑀦𑁆𑀤𑀫𑀸𑀮𑀼𑀢𑁂𑀭𑀺𑀢𑀸𑀬 𑀖𑀦𑀲𑀸𑀔𑀸𑀬 𑀲𑀫𑀮𑀗𑁆𑀓𑀢𑀁 𑀦𑀘𑁆𑀘𑀦𑁆𑀢𑀫𑀺𑀯 𑀧𑀻𑀢𑀺𑀬𑀸 𑀯𑀺𑀭𑁄𑀘𑀫𑀸𑀦𑀁 𑀦𑀸𑀕𑀩𑁄𑀥𑀺𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀢𑁆𑀢𑀯𑀭𑀦𑀸𑀕𑀕𑀸𑀫𑀻 𑀦𑀸𑀕𑀩𑁄𑀥𑀺𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀼𑀩𑁆𑀩𑀼𑀢𑁆𑀢𑀭𑀧𑀲𑁆𑀲𑁂 𑀞𑀢𑁆𑀯𑀸 𑀅𑀝𑁆𑀞𑀧𑀡𑁆𑀡𑀸𑀲𑀳𑀢𑁆𑀣𑀯𑀺𑀢𑁆𑀣𑀢𑀁 𑀢𑀺𑀡𑀲𑀦𑁆𑀣𑀭𑀁 𑀲𑀦𑁆𑀣𑀭𑀺𑀢𑁆𑀯𑀸 𑀢𑀢𑁆𑀣 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀯𑀻𑀭𑀺𑀬𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀲𑀩𑀮𑀁 𑀫𑀸𑀭𑀩𑀮𑀁 𑀯𑀺𑀤𑁆𑀥𑀁𑀲𑁂𑀢𑁆𑀯𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀸𑀦𑀺 𑀧𑀝𑀺𑀮𑀪𑀺𑀢𑁆𑀯𑀸 𑀧𑀘𑁆𑀘𑀬𑀸𑀓𑀸𑀭𑀲𑀫𑁆𑀫𑀲𑀦𑀁 𑀓𑀢𑁆𑀯𑀸 𑀔𑀦𑁆𑀥𑁂𑀲𑀼 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀧𑀢𑁆𑀯𑀸 𑁋

‘‘𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭𑀁, 𑀲𑀦𑁆𑀥𑀸𑀯𑀺𑀲𑁆𑀲𑀁 𑀅𑀦𑀺𑀩𑁆𑀩𑀺𑀲𑀁;

𑀕𑀳𑀓𑀸𑀭𑀁 𑀕𑀯𑁂𑀲𑀦𑁆𑀢𑁄, 𑀤𑀼𑀓𑁆𑀔𑀸 𑀚𑀸𑀢𑀺 𑀧𑀼𑀦𑀧𑁆𑀧𑀼𑀦𑀁.

‘‘𑀕𑀳𑀓𑀸𑀭𑀓 𑀤𑀺𑀝𑁆𑀞𑁄𑀲𑀺, 𑀧𑀼𑀦 𑀕𑁂𑀳𑀁 𑀦 𑀓𑀸𑀳𑀲𑀺;

𑀲𑀩𑁆𑀩𑀸 𑀢𑁂 𑀨𑀸𑀲𑀼𑀓𑀸 𑀪𑀕𑁆𑀕𑀸, 𑀕𑀳𑀓𑀽𑀝𑀁 𑀯𑀺𑀲𑀗𑁆𑀔𑀢𑀁;

𑀯𑀺𑀲𑀗𑁆𑀔𑀸𑀭𑀕𑀢𑀁 𑀘𑀺𑀢𑁆𑀢𑀁, 𑀢𑀡𑁆𑀳𑀸𑀦𑀁 𑀔𑀬𑀫𑀚𑁆𑀛𑀕𑀸’’𑀢𑀺. (𑀥. 𑀧. 𑁧𑁫𑁩-𑁧𑁫𑁪) 𑁋

𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀫𑀗𑁆𑀕𑀮𑀲𑁆𑀲 𑀧𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀅𑀜𑁆𑀜𑁂𑀳𑀺 𑀩𑀼𑀤𑁆𑀥𑁂𑀳𑀺 𑀅𑀥𑀺𑀓𑀢𑀭𑀸 𑀲𑀭𑀻𑀭𑀧𑁆𑀧𑀪𑀸 𑀅𑀳𑁄𑀲𑀺. 𑀬𑀣𑀸 𑀧𑀦 𑀅𑀜𑁆𑀜𑁂𑀲𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀲𑀫𑀦𑁆𑀢𑀸 𑀅𑀲𑀻𑀢𑀺𑀳𑀢𑁆𑀣𑀧𑁆𑀧𑀫𑀸𑀡𑀸 𑀯𑀸 𑀩𑁆𑀬𑀸𑀫𑀧𑁆𑀧𑀫𑀸𑀡𑀸 𑀯𑀸 𑀲𑀭𑀻𑀭𑀧𑁆𑀧𑀪𑀸 𑀅𑀳𑁄𑀲𑀺, 𑀦 𑀏𑀯𑀁 𑀢𑀲𑁆𑀲. 𑀢𑀲𑁆𑀲 𑀧𑀦 𑀪𑀕𑀯𑀢𑁄 𑀲𑀭𑀻𑀭𑀧𑁆𑀧𑀪𑀸 𑀦𑀺𑀘𑁆𑀘𑀓𑀸𑀮𑀁 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀨𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀢𑀭𑀼𑀕𑀺𑀭𑀺𑀖𑀭𑀧𑀸𑀓𑀸𑀭𑀖𑀝𑀓𑀯𑀸𑀝𑀸𑀤𑀬𑁄 𑀲𑀼𑀯𑀡𑁆𑀡𑀧𑀝𑁆𑀝𑀧𑀭𑀺𑀬𑁄𑀦𑀤𑁆𑀥𑀸 𑀯𑀺𑀬 𑀅𑀳𑁂𑀲𑀼𑀁. 𑀦𑀯𑀼𑀢𑀺𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 𑀆𑀬𑀼 𑀢𑀲𑁆𑀲 𑀅𑀳𑁄𑀲𑀺. 𑀏𑀢𑁆𑀢𑀓𑀁 𑀓𑀸𑀮𑀁 𑀘𑀦𑁆𑀤𑀲𑀽𑀭𑀺𑀬𑀢𑀸𑀭𑀓𑀸𑀤𑀻𑀦𑀁 𑀧𑀪𑀸 𑀦𑀢𑁆𑀣𑀺. 𑀭𑀢𑁆𑀢𑀺𑀦𑁆𑀤𑀺𑀯𑀧𑀭𑀺𑀘𑁆𑀙𑁂𑀤𑁄 𑀦 𑀧𑀜𑁆𑀜𑀸𑀬𑀺𑀢𑁆𑀣. 𑀤𑀺𑀯𑀸 𑀲𑀽𑀭𑀺𑀬𑀸𑀮𑁄𑀓𑁂𑀦 𑀯𑀺𑀬 𑀲𑀢𑁆𑀢𑀸 𑀦𑀺𑀘𑁆𑀘𑀁 𑀩𑀼𑀤𑁆𑀥𑀸𑀮𑁄𑀓𑁂𑀦𑁂𑀯 𑀲𑀩𑁆𑀩𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀸 𑀯𑀺𑀘𑀭𑀺𑀁𑀲𑀼. 𑀲𑀸𑀬𑀁 𑀧𑀼𑀧𑁆𑀨𑀦𑀓𑀓𑀼𑀲𑀼𑀫𑀸𑀦𑀁 𑀧𑀸𑀢𑁄 𑀘 𑀭𑀯𑀦𑀓𑀲𑀓𑀼𑀡𑀸𑀤𑀻𑀦𑀜𑁆𑀘 𑀯𑀲𑁂𑀦 𑀮𑁄𑀓𑁄 𑀭𑀢𑁆𑀢𑀺𑀦𑁆𑀤𑀺𑀯𑀧𑀭𑀺𑀘𑁆𑀙𑁂𑀤𑀁 𑀲𑀮𑁆𑀮𑀓𑁆𑀔𑁂𑀲𑀺.

𑀓𑀺𑀁 𑀧𑀦 𑀅𑀜𑁆𑀜𑁂𑀲𑀁 𑀩𑀼𑀤𑁆𑀥𑀸𑀦𑀁 𑀅𑀬𑀫𑀸𑀦𑀼𑀪𑀸𑀯𑁄 𑀦𑀢𑁆𑀣𑀻𑀢𑀺? 𑀦𑁄 𑀦𑀢𑁆𑀣𑀺. 𑀢𑁂𑀧𑀺 𑀳𑀺 𑀆𑀓𑀗𑁆𑀔𑀫𑀸𑀦𑀸 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀢𑀢𑁄 𑀯𑀸 𑀪𑀺𑀬𑁆𑀬𑁄 𑀆𑀪𑀸𑀬 𑀨𑀭𑁂𑀬𑁆𑀬𑀼𑀁. 𑀫𑀗𑁆𑀕𑀮𑀲𑁆𑀲 𑀧𑀦 𑀪𑀕𑀯𑀢𑁄 𑀧𑀼𑀩𑁆𑀩𑀧𑀢𑁆𑀣𑀦𑀸𑀯𑀲𑁂𑀦 𑀅𑀜𑁆𑀜𑁂𑀲𑀁 𑀩𑁆𑀬𑀸𑀫𑀧𑁆𑀧𑀪𑀸 𑀯𑀺𑀬 𑀲𑀭𑀻𑀭𑀧𑁆𑀧𑀪𑀸 𑀦𑀺𑀘𑁆𑀘𑀫𑁂𑀯 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀨𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀲𑁄 𑀓𑀺𑀭 𑀩𑁄𑀥𑀺𑀲𑀢𑁆𑀢𑀓𑀸𑀮𑁂 𑀯𑁂𑀲𑁆𑀲𑀦𑁆𑀢𑀭𑀢𑁆𑀢𑀪𑀸𑀯𑀲𑀤𑀺𑀲𑁂 𑀅𑀢𑁆𑀢𑀪𑀸𑀯𑁂 𑀲𑀧𑀼𑀢𑁆𑀢𑀤𑀸𑀭𑁄 𑀯𑀗𑁆𑀓𑀧𑀩𑁆𑀩𑀢𑀲𑀤𑀺𑀲𑁂 𑀧𑀩𑁆𑀩𑀢𑁂 𑀯𑀲𑀺. 𑀅𑀣𑁂𑀓𑁄 𑀲𑀩𑁆𑀩𑀚𑀦𑀯𑀺𑀳𑁂𑀞𑀓𑁄 𑀔𑀭𑀤𑀸𑀞𑀺𑀓𑁄 𑀦𑀸𑀫 𑀫𑀦𑀼𑀲𑁆𑀲𑀪𑀓𑁆𑀔𑁄 𑀫𑀳𑁂𑀲𑀓𑁆𑀔𑁄 𑀬𑀓𑁆𑀔𑁄 𑀫𑀳𑀸𑀧𑀼𑀭𑀺𑀲𑀲𑁆𑀲 𑀤𑀸𑀦𑀚𑁆𑀛𑀸𑀲𑀬𑀢𑀁 𑀲𑀼𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀯𑀡𑁆𑀡𑁂𑀦 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀳𑀸𑀲𑀢𑁆𑀢𑀁 𑀤𑁆𑀯𑁂 𑀤𑀸𑀭𑀓𑁂 𑀬𑀸𑀘𑀺. 𑀫𑀳𑀸𑀲𑀢𑁆𑀢𑁄 ‘‘𑀤𑀤𑀸𑀫𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀼𑀢𑁆𑀢𑀓𑁂’’𑀢𑀺 𑀳𑀝𑁆𑀞𑀧𑀳𑀝𑁆𑀞𑁄 𑀉𑀤𑀓𑀧𑀭𑀺𑀬𑀦𑁆𑀢𑀁 𑀧𑀣𑀯𑀺𑀁 𑀓𑀫𑁆𑀧𑁂𑀦𑁆𑀢𑁄 𑀤𑁆𑀯𑁂 𑀤𑀸𑀭𑀓𑁂 𑀅𑀤𑀸𑀲𑀺. 𑀅𑀣 𑀔𑁄 𑀬𑀓𑁆𑀔𑁄 𑀢𑀲𑁆𑀲 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀫𑀳𑀸𑀧𑀼𑀭𑀺𑀲𑀲𑁆𑀲 𑀢𑀁 𑀩𑁆𑀭𑀸𑀳𑁆𑀫𑀡𑀯𑀡𑁆𑀡𑀁 𑀧𑀳𑀸𑀬 𑀅𑀦𑀮𑀚𑀸𑀮𑀧𑀺𑀗𑁆𑀕𑀮𑀯𑀺𑀭𑀽𑀧𑀦𑀬𑀦𑁄 𑀯𑀺𑀲𑀫𑀯𑀺𑀭𑀽𑀧𑀓𑀼𑀝𑀺𑀮𑀪𑀻𑀫𑀤𑀸𑀞𑁄 𑀘𑀺𑀧𑀺𑀝𑀓𑀯𑀺𑀭𑀽𑀧𑀦𑀸𑀲𑁄 𑀓𑀧𑀺𑀮𑀨𑀭𑀼𑀲𑀤𑀻𑀖𑀓𑁂𑀲𑁄 𑀦𑀯𑀤𑀟𑁆𑀠𑀢𑀸𑀮𑀓𑁆𑀔𑀦𑁆𑀥𑀲𑀤𑀺𑀲𑀓𑀸𑀬𑁄 𑀳𑀼𑀢𑁆𑀯𑀸 𑀢𑁂 𑀤𑀸𑀭𑀓𑁂 𑀫𑀼𑀴𑀸𑀮𑀓𑀮𑀸𑀧𑀁 𑀯𑀺𑀬 𑀕𑀳𑁂𑀢𑁆𑀯𑀸 𑀔𑀸𑀤𑀺. 𑀫𑀳𑀸𑀧𑀼𑀭𑀺𑀲𑀲𑁆𑀲 𑀬𑀓𑁆𑀔𑀁 𑀑𑀮𑁄𑀓𑁂𑀢𑁆𑀯𑀸 𑀫𑀼𑀔𑁂 𑀯𑀺𑀯𑀝𑀫𑀢𑁆𑀢𑁂 𑀅𑀕𑁆𑀕𑀺𑀚𑀸𑀮𑀁 𑀯𑀺𑀬 𑀮𑁄𑀳𑀺𑀢𑀥𑀸𑀭𑀁 𑀉𑀕𑁆𑀕𑀺𑀭𑀦𑁆𑀢𑀁 𑀢𑀲𑁆𑀲 𑀫𑀼𑀔𑀁 𑀤𑀺𑀲𑁆𑀯𑀸𑀧𑀺 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀤𑁄𑀫𑀦𑀲𑁆𑀲𑀁 𑀦 𑀉𑀧𑁆𑀧𑀚𑁆𑀚𑀺. ‘‘𑀲𑀼𑀤𑀺𑀦𑁆𑀦𑀁 𑀯𑀢 𑀫𑁂 𑀤𑀸𑀦’’𑀦𑁆𑀢𑀺 𑀘𑀺𑀦𑁆𑀢𑀬𑀢𑁄 𑀧𑀦𑀲𑁆𑀲 𑀲𑀭𑀻𑀭𑁂 𑀫𑀳𑀦𑁆𑀢𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀉𑀤𑀧𑀸𑀤𑀺. 𑀲𑁄 ‘‘𑀇𑀫𑀲𑁆𑀲 𑀫𑁂 𑀦𑀺𑀲𑁆𑀲𑀦𑁆𑀤𑁂𑀦 𑀅𑀦𑀸𑀕𑀢𑁂 𑀇𑀫𑀺𑀦𑀸 𑀦𑀻𑀳𑀸𑀭𑁂𑀦 𑀭𑀲𑁆𑀫𑀺𑀬𑁄 𑀦𑀺𑀓𑁆𑀔𑀫𑀦𑁆𑀢𑀽’’𑀢𑀺 𑀧𑀢𑁆𑀣𑀦𑀫𑀓𑀸𑀲𑀺. 𑀢𑀲𑁆𑀲 𑀢𑀁 𑀧𑀢𑁆𑀣𑀦𑀁 𑀦𑀺𑀲𑁆𑀲𑀸𑀬 𑀩𑀼𑀤𑁆𑀥𑀪𑀽𑀢𑀲𑁆𑀲 𑀲𑀭𑀻𑀭𑀢𑁄 𑀭𑀲𑁆𑀫𑀺𑀬𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀏𑀢𑁆𑀢𑀓𑀁 𑀞𑀸𑀦𑀁 𑀨𑀭𑀺𑀁𑀲𑀼.

𑀅𑀧𑀭𑀫𑁆𑀧𑀺 𑀧𑀼𑀩𑁆𑀩𑀘𑀭𑀺𑀬𑀁 𑀢𑀲𑁆𑀲 𑀅𑀢𑁆𑀣𑀺. 𑀅𑀬𑀁 𑀓𑀺𑀭 𑀩𑁄𑀥𑀺𑀲𑀢𑁆𑀢𑀓𑀸𑀮𑁂 𑀏𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀘𑁂𑀢𑀺𑀬𑀁 𑀤𑀺𑀲𑁆𑀯𑀸 𑁋 ‘‘𑀇𑀫𑀲𑁆𑀲 𑀩𑀼𑀤𑁆𑀥𑀲𑁆𑀲 𑀫𑀫 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀤𑀡𑁆𑀟𑀤𑀻𑀧𑀺𑀓𑀸𑀯𑁂𑀞𑀦𑀦𑀺𑀬𑀸𑀫𑁂𑀦 𑀲𑀓𑀮𑀲𑀭𑀻𑀭𑀁 𑀯𑁂𑀞𑀸𑀧𑁂𑀢𑁆𑀯𑀸 𑀭𑀢𑀦𑀫𑀢𑁆𑀢𑀫𑀓𑀼𑀴𑀁 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀁 𑀲𑀼𑀯𑀡𑁆𑀡𑀧𑀸𑀢𑀺𑀁 𑀲𑀼𑀕𑀦𑁆𑀥𑀲𑀧𑁆𑀧𑀺𑀲𑁆𑀲 𑀧𑀽𑀭𑀸𑀧𑁂𑀢𑁆𑀯𑀸 𑀢𑀢𑁆𑀣 𑀲𑀳𑀲𑁆𑀲𑀯𑀝𑁆𑀝𑀺𑀬𑁄 𑀚𑀸𑀮𑁂𑀢𑁆𑀯𑀸 𑀢𑀁 𑀲𑀻𑀲𑁂𑀦𑀸𑀤𑀸𑀬 𑀲𑀓𑀮𑀲𑀭𑀻𑀭𑀁 𑀚𑀸𑀮𑀸𑀧𑁂𑀢𑁆𑀯𑀸 𑀚𑀺𑀦𑀘𑁂𑀢𑀺𑀬𑀁 𑀧𑀤𑀓𑁆𑀔𑀺𑀡𑀁 𑀓𑀭𑁄𑀦𑁆𑀢𑁄 𑀲𑀓𑀮𑀭𑀢𑁆𑀢𑀺𑀁 𑀯𑀻𑀢𑀺𑀦𑀸𑀫𑁂𑀲𑀺. 𑀏𑀯𑀁 𑀬𑀸𑀯 𑀅𑀭𑀼𑀡𑀼𑀕𑁆𑀕𑀫𑀦𑀸 𑀯𑀸𑀬𑀫𑀦𑁆𑀢𑀲𑁆𑀲 𑀮𑁄𑀫𑀓𑀽𑀧𑀫𑀢𑁆𑀢𑀫𑁆𑀧𑀺 𑀉𑀲𑀼𑀫𑀁 𑀦 𑀕𑀡𑁆𑀳𑀺. 𑀧𑀤𑀼𑀫𑀕𑀩𑁆𑀪𑀁 𑀧𑀯𑀺𑀝𑁆𑀞𑀓𑀸𑀮𑁄 𑀯𑀺𑀬 𑀅𑀳𑁄𑀲𑀺. 𑀥𑀫𑁆𑀫𑁄 𑀳𑀺 𑀦𑀸𑀫𑁂𑀲 𑀅𑀢𑁆𑀢𑀸𑀦𑀁 𑀭𑀓𑁆𑀔𑀦𑁆𑀢𑀁 𑀭𑀓𑁆𑀔𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀥𑀫𑁆𑀫𑁄 𑀳𑀯𑁂 𑀭𑀓𑁆𑀔𑀢𑀺 𑀥𑀫𑁆𑀫𑀘𑀸𑀭𑀺𑀁, 𑀥𑀫𑁆𑀫𑁄 𑀲𑀼𑀘𑀺𑀡𑁆𑀡𑁄 𑀲𑀼𑀔𑀫𑀸𑀯𑀳𑀸𑀢𑀺;

𑀏𑀲𑀸𑀦𑀺𑀲𑀁𑀲𑁄 𑀥𑀫𑁆𑀫𑁂 𑀲𑀼𑀘𑀺𑀡𑁆𑀡𑁂, 𑀦 𑀤𑀼𑀕𑁆𑀕𑀢𑀺𑀁 𑀕𑀘𑁆𑀙𑀢𑀺 𑀥𑀫𑁆𑀫𑀘𑀸𑀭𑀻’’𑀢𑀺. (𑀣𑁂𑀭𑀕𑀸. 𑁩𑁦𑁩; 𑀚𑀸. 𑁧.𑁧𑁦.𑁧𑁦𑁨; 𑁧.𑁧𑁫.𑁩𑁮𑁫);

𑀇𑀫𑀲𑁆𑀲𑀸𑀧𑀺 𑀓𑀫𑁆𑀫𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀢𑀲𑁆𑀲 𑀲𑀭𑀻𑀭𑁄𑀪𑀸𑀲𑁄 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀨𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀺 (𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸). 𑀢𑁂𑀦 𑀯𑀼𑀢𑁆𑀢𑀁 𑁋

𑁧. ‘‘𑀓𑁄𑀡𑁆𑀟𑀜𑁆𑀜𑀲𑁆𑀲 𑀅𑀧𑀭𑁂𑀦, 𑀫𑀗𑁆𑀕𑀮𑁄 𑀦𑀸𑀫 𑀦𑀸𑀬𑀓𑁄;

𑀢𑀫𑀁 𑀮𑁄𑀓𑁂 𑀦𑀺𑀳𑀦𑁆𑀢𑁆𑀯𑀸𑀦, 𑀥𑀫𑁆𑀫𑁄𑀓𑁆𑀓𑀫𑀪𑀺𑀥𑀸𑀭𑀬𑀺.

𑁨. ‘‘𑀅𑀢𑀼𑀮𑀸𑀲𑀺 𑀧𑀪𑀸 𑀢𑀲𑁆𑀲, 𑀚𑀺𑀦𑁂𑀳𑀜𑁆𑀜𑁂𑀳𑀺 𑀉𑀢𑁆𑀢𑀭𑀺𑀁;

𑀘𑀦𑁆𑀤𑀲𑀽𑀭𑀺𑀬𑀧𑁆𑀧𑀪𑀁 𑀳𑀦𑁆𑀢𑁆𑀯𑀸, 𑀤𑀲𑀲𑀳𑀲𑁆𑀲𑀻 𑀯𑀺𑀭𑁄𑀘𑀢𑀻’’𑀢𑀺.

𑀢𑀢𑁆𑀣 𑀢𑀫𑀦𑁆𑀢𑀺 𑀮𑁄𑀓𑀦𑁆𑀥𑀓𑀸𑀭𑀜𑁆𑀘 𑀳𑀤𑀬𑀢𑀫𑀜𑁆𑀘. 𑀦𑀺𑀳𑀦𑁆𑀢𑁆𑀯𑀸𑀦𑀸𑀢𑀺 𑀅𑀪𑀺𑀪𑀯𑀺𑀢𑁆𑀯𑀸. 𑀥𑀫𑁆𑀫𑁄𑀓𑁆𑀓𑀦𑁆𑀢𑀺 𑀏𑀢𑁆𑀣 𑀅𑀬𑀁 𑀧𑀦 𑀉𑀓𑁆𑀓𑀸-𑀲𑀤𑁆𑀤𑁄 𑀲𑀼𑀯𑀡𑁆𑀡𑀓𑀸𑀭𑀫𑀽𑀲𑀸𑀤𑀻𑀲𑀼 𑀅𑀦𑁂𑀓𑁂𑀲𑀼 𑀅𑀢𑁆𑀣𑁂𑀲𑀼 𑀤𑀺𑀲𑁆𑀲𑀢𑀺. 𑀢𑀣𑀸𑀳𑀺 ‘‘𑀲𑀡𑁆𑀟𑀸𑀲𑁂𑀦 𑀚𑀸𑀢𑀭𑀽𑀧𑀁 𑀕𑀳𑁂𑀢𑁆𑀯𑀸 𑀉𑀓𑁆𑀓𑀸𑀫𑀼𑀔𑁂 𑀧𑀓𑁆𑀔𑀺𑀧𑁂𑀬𑁆𑀬𑀸’’𑀢𑀺 (𑀫. 𑀦𑀺. 𑁩.𑁩𑁬𑁦) 𑀆𑀕𑀢𑀝𑁆𑀞𑀸𑀦𑁂 𑀲𑀼𑀯𑀡𑁆𑀡𑀓𑀸𑀭𑀸𑀦𑀁 𑀫𑀽𑀲𑀸 ‘‘𑀉𑀓𑁆𑀓𑀸’’𑀢𑀺 𑀯𑁂𑀤𑀺𑀢𑀩𑁆𑀩𑀸. ‘‘𑀉𑀓𑁆𑀓𑀁 𑀩𑀦𑁆𑀥𑁂𑀬𑁆𑀬, 𑀉𑀓𑁆𑀓𑀁 𑀩𑀦𑁆𑀥𑀺𑀢𑁆𑀯𑀸 𑀉𑀓𑁆𑀓𑀸𑀫𑀼𑀔𑀁 𑀆𑀮𑀺𑀫𑁆𑀧𑁂𑀬𑁆𑀬𑀸’’𑀢𑀺 𑀆𑀕𑀢𑀝𑁆𑀞𑀸𑀦𑁂 𑀓𑀫𑁆𑀫𑀸𑀭𑀸𑀦𑀁 𑀅𑀗𑁆𑀕𑀸𑀭𑀓𑀧𑀮𑁆𑀮𑀁. ‘‘𑀓𑀫𑁆𑀫𑀸𑀭𑀸𑀦𑀁 𑀬𑀣𑀸 𑀉𑀓𑁆𑀓𑀸, 𑀅𑀦𑁆𑀢𑁄 𑀛𑀸𑀬𑀢𑀺 𑀦𑁄 𑀩𑀳𑀻’’𑀢𑀺 (𑀚𑀸. 𑁨.𑁨𑁨.𑁬𑁪𑁯) 𑀆𑀕𑀢𑀝𑁆𑀞𑀸𑀦𑁂 𑀓𑀫𑁆𑀫𑀸𑀭𑀼𑀤𑁆𑀥𑀦𑀁. ‘‘𑀏𑀯𑀁𑀯𑀺𑀧𑀸𑀓𑁄 𑀉𑀓𑁆𑀓𑀸𑀧𑀸𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 (𑀤𑀻. 𑀦𑀺. 𑁧.𑁨𑁪, 𑁨𑁦𑁮) 𑀆𑀕𑀢𑀝𑁆𑀞𑀸𑀦𑁂 𑀯𑀸𑀬𑀼𑀯𑁂𑀕𑁄 ‘‘𑀉𑀓𑁆𑀓𑀸’’𑀢𑀺 𑀯𑀼𑀘𑁆𑀘𑀢𑀺. ‘‘𑀉𑀓𑁆𑀓𑀸𑀲𑀼 𑀥𑀸𑀭𑀺𑀬𑀫𑀸𑀦𑀸𑀲𑀽’’𑀢𑀺 (𑀤𑀻. 𑀦𑀺. 𑁧.𑁧𑁫𑁯) 𑀆𑀕𑀢𑀝𑁆𑀞𑀸𑀦𑁂 𑀤𑀻𑀧𑀺𑀓𑀸 ‘‘𑀉𑀓𑁆𑀓𑀸’’𑀢𑀺 𑀯𑀼𑀘𑁆𑀘𑀢𑀺. 𑀇𑀥𑀸𑀧𑀺 𑀤𑀻𑀧𑀺𑀓𑀸 𑀉𑀓𑁆𑀓𑀸𑀢𑀺 𑀅𑀥𑀺𑀧𑁆𑀧𑁂𑀢𑀸 (𑀫. 𑀦𑀺. 𑀅𑀝𑁆𑀞. 𑁧.𑁭𑁬 𑀆𑀤𑀬𑁄). 𑀢𑀲𑁆𑀫𑀸 𑀇𑀥 𑀥𑀫𑁆𑀫𑀫𑀬𑀁 𑀉𑀓𑁆𑀓𑀁 𑀅𑀪𑀺𑀥𑀸𑀭𑀬𑀺, 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑀧𑀝𑀺𑀘𑁆𑀙𑀦𑁆𑀦𑀲𑁆𑀲 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑀸𑀪𑀺𑀪𑀽𑀢𑀲𑁆𑀲 𑀮𑁄𑀓𑀲𑁆𑀲 𑀥𑀫𑁆𑀫𑀫𑀬𑀁 𑀉𑀓𑁆𑀓𑀁 𑀥𑀸𑀭𑁂𑀲𑀻𑀢𑀺 𑀅𑀢𑁆𑀣𑁄.

𑀅𑀢𑀼𑀮𑀸𑀲𑀻𑀢𑀺 𑀅𑀢𑀼𑀮𑁆𑀬𑀸 𑀆𑀲𑀺. 𑀅𑀬𑀫𑁂𑀯 𑀯𑀸 𑀧𑀸𑀞𑁄, 𑀅𑀜𑁆𑀜𑁂𑀳𑀺 𑀩𑀼𑀤𑁆𑀥𑁂𑀳𑀺 𑀅𑀲𑀤𑀺𑀲𑀸 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄. 𑀚𑀺𑀦𑁂𑀳𑀜𑁆𑀜𑁂𑀳𑀻𑀢𑀺 𑀚𑀺𑀦𑁂𑀳𑀺 𑀅𑀜𑁆𑀜𑁂𑀳𑀺. 𑀘𑀦𑁆𑀤𑀲𑀽𑀭𑀺𑀬𑀧𑁆𑀧𑀪𑀁 𑀳𑀦𑁆𑀢𑁆𑀯𑀸𑀢𑀺 𑀘𑀦𑁆𑀤𑀲𑀽𑀭𑀺𑀬𑀸𑀦𑀁 𑀧𑀪𑀁 𑀅𑀪𑀺𑀳𑀦𑁆𑀢𑁆𑀯𑀸. 𑀤𑀲𑀲𑀳𑀲𑁆𑀲𑀻 𑀯𑀺𑀭𑁄𑀘𑀢𑀻𑀢𑀺 𑀘𑀦𑁆𑀤𑀲𑀽𑀭𑀺𑀬𑀸𑀮𑁄𑀓𑀁 𑀯𑀺𑀦𑀸 𑀩𑀼𑀤𑁆𑀥𑀸𑀮𑁄𑀓𑁂𑀦𑁂𑀯 𑀤𑀲𑀲𑀳𑀲𑁆𑀲𑀻 𑀯𑀺𑀭𑁄𑀘𑀢𑀻𑀢𑀺 𑀅𑀢𑁆𑀣𑁄.

𑀫𑀗𑁆𑀕𑀮𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀧𑀦 𑀅𑀥𑀺𑀕𑀢𑀩𑁄𑀥𑀺𑀜𑀸𑀡𑁄 𑀩𑁄𑀥𑀺𑀫𑀽𑀮𑁂𑀬𑁂𑀯 𑀲𑀢𑁆𑀢𑀲𑀢𑁆𑀢𑀸𑀳𑀸𑀦𑀺 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀩𑁆𑀭𑀳𑁆𑀫𑀼𑀦𑁄 𑀥𑀫𑁆𑀫𑀸𑀬𑀸𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑁋 ‘‘𑀓𑀲𑁆𑀲 𑀦𑀼 𑀔𑁄 𑀅𑀳𑀁 𑀇𑀫𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬’’𑀦𑁆𑀢𑀺 (𑀫. 𑀦𑀺. 𑁧.𑁨𑁮𑁪; 𑁨.𑁩𑁪𑁧; 𑀫𑀳𑀸𑀯. 𑁧𑁦) 𑀉𑀧𑀥𑀸𑀭𑁂𑀦𑁆𑀢𑁄 𑀅𑀢𑁆𑀢𑀦𑀸 𑀲𑀳 𑀧𑀩𑁆𑀩𑀚𑀺𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀢𑀺𑀲𑁆𑀲𑁄 𑀓𑁄𑀝𑀺𑀬𑁄 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀁 𑀅𑀤𑁆𑀤𑀲. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀇𑀫𑁂 𑀓𑀼𑀮𑀧𑀼𑀢𑁆𑀢𑀸 𑀫𑀁 𑀧𑀩𑁆𑀩𑀚𑀦𑁆𑀢𑀁 𑀅𑀦𑀼𑀧𑀩𑁆𑀩𑀚𑀺𑀢𑀸 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀸 𑀘, 𑀢𑁂 𑀫𑀬𑀸 𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬 𑀯𑀺𑀯𑁂𑀓𑀢𑁆𑀣𑀺𑀓𑁂𑀦 𑀯𑀺𑀲𑁆𑀲𑀚𑁆𑀚𑀺𑀢𑀸 𑀲𑀺𑀭𑀺𑀯𑀟𑁆𑀠𑀦𑀦𑀕𑀭𑀁 𑀉𑀧𑀦𑀺𑀲𑁆𑀲𑀸𑀬 𑀲𑀺𑀭𑀺𑀯𑀦𑀕𑀳𑀦𑀁 𑀕𑀦𑁆𑀢𑁆𑀯𑀸 𑀯𑀺𑀳𑀭𑀦𑁆𑀢𑀺, 𑀳𑀦𑁆𑀤𑀸𑀳𑀁 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀢𑁂𑀲𑀁 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀦𑁄 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀳𑀁𑀲𑀭𑀸𑀚𑀸 𑀯𑀺𑀬 𑀕𑀕𑀦𑀢𑀮𑀫𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀲𑀺𑀭𑀺𑀯𑀦𑀕𑀳𑀦𑁂 𑀧𑀘𑁆𑀘𑀼𑀝𑁆𑀞𑀸𑀲𑀺. 𑀢𑁂 𑀘 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀅𑀦𑁆𑀢𑁂𑀯𑀸𑀲𑀺𑀓𑀯𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀢𑁂𑀲𑀁 𑀪𑀕𑀯𑀸 𑀲𑀩𑁆𑀩𑀩𑀼𑀤𑁆𑀥𑀦𑀺𑀲𑁂𑀯𑀺𑀢𑀁 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀲𑀼𑀢𑁆𑀢𑀦𑁆𑀢𑀁 𑀓𑀣𑁂𑀲𑀺. 𑀢𑀢𑁄 𑀢𑀺𑀲𑁆𑀲𑁄 𑀪𑀺𑀓𑁆𑀔𑀼𑀓𑁄𑀝𑀺𑀬𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁩. ‘‘𑀲𑁄𑀧𑀺 𑀩𑀼𑀤𑁆𑀥𑁄 𑀧𑀓𑀸𑀲𑁂𑀲𑀺, 𑀘𑀢𑀼𑀭𑁄 𑀲𑀘𑁆𑀘𑀯𑀭𑀼𑀢𑁆𑀢𑀫𑁂;

𑀢𑁂 𑀢𑁂 𑀲𑀘𑁆𑀘𑀭𑀲𑀁 𑀧𑀻𑀢𑁆𑀯𑀸, 𑀯𑀺𑀦𑁄𑀤𑁂𑀦𑁆𑀢𑀺 𑀫𑀳𑀸𑀢𑀫𑀁.

𑁪. ‘‘𑀧𑀢𑁆𑀯𑀸𑀦 𑀩𑁄𑀥𑀺𑀫𑀢𑀼𑀮𑀁, 𑀧𑀞𑀫𑁂 𑀥𑀫𑁆𑀫𑀤𑁂𑀲𑀦𑁂;

𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁, 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑀽’’𑀢𑀺.

𑀢𑀢𑁆𑀣 𑀘𑀢𑀼𑀭𑁄𑀢𑀺 𑀘𑀢𑁆𑀢𑀸𑀭𑀺. 𑀲𑀘𑁆𑀘𑀯𑀭𑀼𑀢𑁆𑀢𑀫𑁂𑀢𑀺 𑀲𑀘𑁆𑀘𑀸𑀦𑀺 𑀘 𑀯𑀭𑀸𑀦𑀺 𑀘 𑀲𑀘𑁆𑀘𑀯𑀭𑀸𑀦𑀺, 𑀲𑀘𑁆𑀘𑀸𑀦𑀺 𑀉𑀢𑁆𑀢𑀫𑀸𑀦𑀻𑀢𑀺 𑀅𑀢𑁆𑀣𑁄. ‘‘𑀘𑀢𑁆𑀢𑀸𑀭𑁄 𑀲𑀘𑁆𑀘𑀯𑀭𑀼𑀢𑁆𑀢𑀫𑁂’’𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲 𑀘𑀢𑁆𑀢𑀸𑀭𑀺 𑀲𑀘𑁆𑀘𑀯𑀭𑀸𑀦𑀺 𑀉𑀢𑁆𑀢𑀫𑀸𑀦𑀻𑀢𑀺 𑀅𑀢𑁆𑀣𑁄. 𑀢𑁂 𑀢𑁂𑀢𑀺 𑀢𑁂 𑀢𑁂 𑀤𑁂𑀯𑀫𑀦𑀼𑀲𑁆𑀲𑀸 𑀩𑀼𑀤𑁆𑀥𑁂𑀦 𑀪𑀕𑀯𑀢𑀸 𑀯𑀺𑀦𑀻𑀢𑀸. 𑀲𑀘𑁆𑀘𑀭𑀲𑀦𑁆𑀢𑀺 𑀘𑀢𑀼𑀲𑀘𑁆𑀘𑀧𑀝𑀺𑀯𑁂𑀥𑀸𑀫𑀢𑀭𑀲𑀁 𑀧𑀺𑀯𑀺𑀢𑁆𑀯𑀸. 𑀯𑀺𑀦𑁄𑀤𑁂𑀦𑁆𑀢𑀺 𑀫𑀳𑀸𑀢𑀫𑀦𑁆𑀢𑀺 𑀢𑁂𑀦 𑀢𑁂𑀦 𑀫𑀕𑁆𑀕𑁂𑀦 𑀧𑀳𑀸𑀢𑀩𑁆𑀩𑀁 𑀫𑁄𑀳𑀢𑀫𑀁 𑀯𑀺𑀦𑁄𑀤𑁂𑀦𑁆𑀢𑀺, 𑀯𑀺𑀤𑁆𑀥𑀁𑀲𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀧𑀢𑁆𑀯𑀸𑀦𑀸𑀢𑀺 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸. 𑀩𑁄𑀥𑀺𑀦𑁆𑀢𑀺 𑀏𑀢𑁆𑀣 𑀧𑀦𑀸𑀬𑀁 𑀩𑁄𑀥𑀺-𑀲𑀤𑁆𑀤𑁄 𑁋

‘‘𑀫𑀕𑁆𑀕𑁂 𑀨𑀮𑁂 𑀘 𑀦𑀺𑀩𑁆𑀩𑀸𑀦𑁂, 𑀭𑀼𑀓𑁆𑀔𑁂 𑀧𑀜𑁆𑀜𑀢𑁆𑀢𑀺𑀬𑀁 𑀢𑀣𑀸;

𑀲𑀩𑁆𑀩𑀜𑁆𑀜𑀼𑀢𑁂 𑀘 𑀜𑀸𑀡𑀲𑁆𑀫𑀺𑀁, 𑀩𑁄𑀥𑀺𑀲𑀤𑁆𑀤𑁄 𑀧𑀦𑀸𑀕𑀢𑁄’’.

𑀢𑀣𑀸 𑀳𑀺 𑀧𑀦𑁂𑀲 𑁋 ‘‘𑀩𑁄𑀥𑀺 𑀯𑀼𑀘𑁆𑀘𑀢𑀺 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀜𑀸𑀡’’𑀦𑁆𑀢𑀺𑀆𑀤𑀻𑀲𑀼 (𑀘𑀽𑀴𑀦𑀺. 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀦𑀺𑀤𑁆𑀤𑁂𑀲 𑁧𑁨𑁧) 𑀫𑀕𑁆𑀕𑁂 𑀆𑀕𑀢𑁄. ‘‘𑀉𑀧𑀲𑀫𑀸𑀬 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀲𑀁𑀯𑀢𑁆𑀢𑀢𑀻’’𑀢𑀺 (𑀫. 𑀦𑀺. 𑁧.𑁩𑁩; 𑁩.𑁩𑁨𑁩; 𑀫𑀳𑀸𑀯. 𑁧𑁩; 𑀲𑀁. 𑀦𑀺. 𑁫.𑁧𑁦𑁮𑁧; 𑀧𑀝𑀺. 𑀫. 𑁨.𑁩𑁦) 𑀏𑀢𑁆𑀣 𑀨𑀮𑁂. ‘‘𑀧𑀢𑁆𑀯𑀸𑀦 𑀩𑁄𑀥𑀺𑀁 𑀅𑀫𑀢𑀁 𑀅𑀲𑀗𑁆𑀔𑀢’’𑀦𑁆𑀢𑀺 𑀏𑀢𑁆𑀣 𑀦𑀺𑀩𑁆𑀩𑀸𑀦𑁂. ‘‘𑀅𑀦𑁆𑀢𑀭𑀸 𑀘 𑀕𑀬𑀁 𑀅𑀦𑁆𑀢𑀭𑀸 𑀘 𑀩𑁄𑀥𑀺’’𑀦𑁆𑀢𑀺 (𑀫. 𑀦𑀺. 𑁧.𑁨𑁮𑁫; 𑁨.𑁩𑁪𑁧; 𑀫𑀳𑀸𑀯. 𑁧𑁧) 𑀏𑀢𑁆𑀣 𑀅𑀲𑁆𑀲𑀢𑁆𑀣𑀭𑀼𑀓𑁆𑀔𑁂. ‘‘𑀩𑁄𑀥𑀺 𑀔𑁄 𑀭𑀸𑀚𑀓𑀼𑀫𑀸𑀭𑁄 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀢𑀻’’𑀢𑀺 𑀏𑀢𑁆𑀣 (𑀫. 𑀦𑀺. 𑁨.𑁩𑁨𑁪; 𑀘𑀽𑀴𑀯. 𑁨𑁬𑁮) 𑀧𑀜𑁆𑀜𑀢𑁆𑀢𑀺𑀬𑀁. ‘‘𑀧𑀧𑁆𑀧𑁄𑀢𑀺 𑀩𑁄𑀥𑀺𑀁 𑀯𑀭𑀪𑀽𑀭𑀺𑀫𑁂𑀥𑀲𑁄’’𑀢𑀺 (𑀤𑀻. 𑀦𑀺. 𑁩.𑁨𑁧𑁭) 𑀏𑀢𑁆𑀣 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂. 𑀇𑀥𑀸𑀧𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂 𑀤𑀝𑁆𑀞𑀩𑁆𑀩𑁄. 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑁂𑀧𑀺 𑀯𑀝𑁆𑀝𑀢𑀺 (𑀫. 𑀦𑀺. 𑀅𑀝𑁆𑀞. 𑁧.𑁧𑁩; 𑀉𑀤𑀸. 𑀅𑀝𑁆𑀞. 𑁧; 𑀧𑀸𑀭𑀸. 𑀅𑀝𑁆𑀞. 𑁧.𑁧𑁧; 𑀘𑀭𑀺𑀬𑀸. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸). 𑀅𑀢𑀼𑀮𑀦𑁆𑀢𑀺 𑀢𑀼𑀮𑀭𑀳𑀺𑀢𑀁 𑀧𑀫𑀸𑀡𑀸𑀢𑀻𑀢𑀁, 𑀅𑀧𑁆𑀧𑀫𑀸𑀡𑀦𑁆𑀢𑀺 𑀅𑀢𑁆𑀣𑁄. 𑀲𑀫𑁆𑀩𑁄𑀥𑀺𑀁 𑀧𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀲𑁆𑀲 𑀢𑀲𑁆𑀲 𑀪𑀕𑀯𑀢𑁄 𑀧𑀞𑀫𑁂 𑀥𑀫𑁆𑀫𑀤𑁂𑀲𑀦𑁂𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄.

𑀬𑀤𑀸 𑀧𑀦 𑀘𑀺𑀢𑁆𑀢𑀁 𑀦𑀸𑀫 𑀦𑀕𑀭𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀦𑁆𑀢𑁄 𑀘𑀫𑁆𑀧𑀓𑀭𑀼𑀓𑁆𑀔𑀫𑀽𑀮𑁂 𑀓𑀡𑁆𑀟𑀫𑁆𑀩𑀭𑀼𑀓𑁆𑀔𑀫𑀽𑀮𑁂 𑀅𑀫𑁆𑀳𑀸𑀓𑀁 𑀪𑀕𑀯𑀸 𑀯𑀺𑀬 𑀢𑀺𑀢𑁆𑀣𑀺𑀬𑀸𑀦𑀁 𑀫𑀸𑀦𑀫𑀤𑁆𑀤𑀦𑀁 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀓𑀢𑁆𑀯𑀸 𑀲𑀼𑀭𑀸𑀲𑀼𑀭𑀬𑀼𑀯𑀢𑀺𑀭𑀢𑀺𑀲𑀫𑁆𑀪𑀯𑀦𑁂 𑀭𑀼𑀘𑀺𑀭𑀦𑀯𑀓𑀦𑀓𑀭𑀚𑀢𑀫𑀬𑀯𑀭𑀪𑀯𑀦𑁂 𑀢𑀸𑀯𑀢𑀺𑀁𑀲𑀪𑀯𑀦𑁂 𑀧𑀸𑀭𑀺𑀘𑁆𑀙𑀢𑁆𑀢𑀓𑀭𑀼𑀓𑁆𑀔𑀫𑀽𑀮𑁂 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀢𑀮𑁂 𑀦𑀺𑀲𑀻𑀤𑀺𑀢𑁆𑀯𑀸 𑀅𑀪𑀺𑀥𑀫𑁆𑀫𑀁 𑀓𑀣𑁂𑀲𑀺, 𑀢𑀤𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁 𑀤𑁂𑀯𑀢𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺, 𑀅𑀬𑀁 𑀤𑀼𑀢𑀺𑀬𑁄 𑀅𑀪𑀺𑀲𑀫𑀬𑁄. 𑀬𑀤𑀸 𑀧𑀦 𑀲𑀼𑀦𑀦𑁆𑀤𑁄 𑀦𑀸𑀫 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸 𑀲𑀼𑀭𑀪𑀺𑀦𑀕𑀭𑁂 𑀧𑀽𑀭𑀺𑀢𑀘𑀓𑁆𑀓𑀯𑀢𑁆𑀢𑀺𑀯𑀢𑁆𑀢𑁄 𑀳𑀼𑀢𑁆𑀯𑀸 𑀘𑀓𑁆𑀓𑀭𑀢𑀦𑀁 𑀧𑀝𑀺𑀮𑀪𑀺. 𑀢𑀁 𑀓𑀺𑀭 𑀫𑀗𑁆𑀕𑀮𑀤𑀲𑀩𑀮𑁂 𑀮𑁄𑀓𑁂 𑀉𑀧𑁆𑀧𑀦𑁆𑀦𑁂 𑀘𑀓𑁆𑀓𑀭𑀢𑀦𑀁 𑀞𑀸𑀦𑀸 𑀑𑀲𑀓𑁆𑀓𑀺𑀢𑀁 𑀤𑀺𑀲𑁆𑀯𑀸 𑀲𑀼𑀦𑀦𑁆𑀤𑁄 𑀭𑀸𑀚𑀸 𑀯𑀺𑀕𑀢𑀸𑀦𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁂 𑀧𑀭𑀺𑀧𑀼𑀘𑁆𑀙𑀺 𑁋 ‘‘𑀇𑀫𑀁 𑀘𑀓𑁆𑀓𑀭𑀢𑀦𑀁 𑀫𑀫 𑀓𑀼𑀲𑀮𑁂𑀦 𑀦𑀺𑀩𑁆𑀩𑀢𑁆𑀢𑀁, 𑀓𑀲𑁆𑀫𑀸 𑀞𑀸𑀦𑀸 𑀑𑀲𑀓𑁆𑀓𑀺𑀢’’𑀦𑁆𑀢𑀺? 𑀢𑀢𑁄 𑀢𑁂 𑀢𑀲𑁆𑀲 𑀭𑀜𑁆𑀜𑁄 𑀑𑀲𑀓𑁆𑀓𑀦𑀓𑀸𑀭𑀡𑀁 𑀩𑁆𑀬𑀸𑀓𑀭𑀺𑀁𑀲𑀼. ‘‘𑀘𑀓𑁆𑀓𑀯𑀢𑁆𑀢𑀺𑀭𑀜𑁆𑀜𑁄 𑀆𑀬𑀼𑀓𑁆𑀔𑀬𑁂𑀦 𑀯𑀸 𑀧𑀩𑁆𑀩𑀚𑁆𑀚𑀽𑀧𑀕𑀫𑀦𑁂𑀦 𑀯𑀸 𑀩𑀼𑀤𑁆𑀥𑀧𑀸𑀢𑀼𑀪𑀸𑀯𑁂𑀦 𑀯𑀸 𑀘𑀓𑁆𑀓𑀭𑀢𑀦𑀁 𑀞𑀸𑀦𑀸 𑀑𑀲𑀓𑁆𑀓𑀢𑀻𑀢𑀺 𑀯𑀢𑁆𑀯𑀸 𑀢𑀼𑀬𑁆𑀳𑀁 𑀧𑀦, 𑀫𑀳𑀸𑀭𑀸𑀚, 𑀆𑀬𑀼𑀓𑁆𑀔𑀬𑁄 𑀦𑀢𑁆𑀣𑀺, 𑀅𑀢𑀺𑀤𑀻𑀖𑀸𑀬𑀼𑀓𑁄 𑀢𑁆𑀯𑀁, 𑀫𑀗𑁆𑀕𑀮𑁄 𑀧𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄, 𑀢𑁂𑀦 𑀢𑁂 𑀘𑀓𑁆𑀓𑀭𑀢𑀦𑀁 𑀑𑀲𑀓𑁆𑀓𑀺𑀢’’𑀦𑁆𑀢𑀺. 𑀢𑀁 𑀲𑀼𑀢𑁆𑀯𑀸 𑀲𑀼𑀦𑀦𑁆𑀤𑁄 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸 𑀲𑀧𑀭𑀺𑀚𑀦𑁄 𑀢𑀁 𑀘𑀓𑁆𑀓𑀭𑀢𑀦𑀁 𑀲𑀺𑀭𑀲𑀸 𑀯𑀦𑁆𑀤𑀺𑀢𑁆𑀯𑀸 𑀆𑀬𑀸𑀘𑀺 𑁋 ‘‘𑀬𑀸𑀯𑀸𑀳𑀁 𑀢𑀯𑀸𑀦𑀼𑀪𑀸𑀯𑁂𑀦 𑀫𑀗𑁆𑀕𑀮𑀤𑀲𑀩𑀮𑀁 𑀲𑀓𑁆𑀓𑀭𑀺𑀲𑁆𑀲𑀸𑀫𑀺, 𑀢𑀸𑀯 𑀢𑁆𑀯𑀁 𑀫𑀸 𑀅𑀦𑁆𑀢𑀭𑀥𑀸𑀬𑀲𑁆𑀲𑀽’’𑀢𑀺. 𑀅𑀣 𑀦𑀁 𑀘𑀓𑁆𑀓𑀭𑀢𑀦𑀁 𑀬𑀣𑀸𑀞𑀸𑀦𑁂𑀬𑁂𑀯 𑀅𑀝𑁆𑀞𑀸𑀲𑀺.

𑀢𑀢𑁄 𑀲𑀫𑀼𑀧𑀸𑀕𑀢𑀸𑀦𑀦𑁆𑀤𑁄 𑀲𑀼𑀦𑀦𑁆𑀤𑁄 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸 𑀙𑀢𑁆𑀢𑀺𑀁𑀲𑀬𑁄𑀚𑀦𑀧𑀭𑀺𑀫𑀡𑁆𑀟𑀮𑀸𑀬 𑀧𑀭𑀺𑀲𑀸𑀬 𑀧𑀭𑀺𑀯𑀼𑀢𑁄 𑀲𑀩𑁆𑀩𑀮𑁄𑀓𑀫𑀗𑁆𑀕𑀮𑀁 𑀫𑀗𑁆𑀕𑀮𑀤𑀲𑀩𑀮𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀲𑀸𑀯𑀓𑀲𑀗𑁆𑀖𑀁 𑀲𑀢𑁆𑀣𑀸𑀭𑀁 𑀫𑀳𑀸𑀤𑀸𑀦𑁂𑀦 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀅𑀭𑀳𑀦𑁆𑀢𑀸𑀦𑀁 𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁 𑀓𑀸𑀲𑀺𑀓𑀯𑀢𑁆𑀣𑀸𑀦𑀺 𑀤𑀢𑁆𑀯𑀸 𑀢𑀣𑀸𑀕𑀢𑀲𑁆𑀲 𑀲𑀩𑁆𑀩𑀧𑀭𑀺𑀓𑁆𑀔𑀸𑀭𑁂 𑀤𑀢𑁆𑀯𑀸 𑀲𑀓𑀮𑀮𑁄𑀓𑀯𑀺𑀫𑁆𑀳𑀬𑀓𑀭𑀁 𑀪𑀕𑀯𑀢𑁄 𑀧𑀽𑀚𑀁 𑀓𑀢𑁆𑀯𑀸 𑀫𑀗𑁆𑀕𑀮𑀁 𑀲𑀩𑁆𑀩𑀮𑁄𑀓𑀦𑀸𑀣𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀤𑀲𑀦𑀔𑀲𑀫𑁄𑀥𑀸𑀦𑀲𑀫𑀼𑀚𑁆𑀚𑀮𑀁 𑀯𑀺𑀫𑀮𑀓𑀫𑀮𑀫𑀓𑀼𑀴𑀲𑀫𑀫𑀜𑁆𑀚𑀮𑀺𑀁 𑀲𑀺𑀭𑀲𑀺 𑀓𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀸𑀬 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀧𑀼𑀢𑁆𑀢𑁄𑀧𑀺 𑀢𑀲𑁆𑀲 𑀅𑀦𑀼𑀭𑀸𑀚𑀓𑀼𑀫𑀸𑀭𑁄 𑀦𑀸𑀫 𑀢𑀣𑁂𑀯 𑀦𑀺𑀲𑀻𑀤𑀺.

𑀢𑀤𑀸 𑀲𑀼𑀦𑀦𑁆𑀤𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀧𑁆𑀧𑀫𑀼𑀔𑀸𑀦𑀁 𑀢𑁂𑀲𑀁 𑀪𑀕𑀯𑀸 𑀅𑀦𑀼𑀧𑀼𑀩𑁆𑀩𑀺𑀓𑀣𑀁 𑀓𑀣𑁂𑀲𑀺. 𑀲𑀼𑀦𑀦𑁆𑀤𑁄 𑀘𑀓𑁆𑀓𑀯𑀢𑁆𑀢𑀻 𑀲𑀤𑁆𑀥𑀺𑀁 𑀧𑀭𑀺𑀲𑀸𑀬 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀅𑀣 𑀲𑀢𑁆𑀣𑀸 𑀢𑁂𑀲𑀁 𑀧𑀼𑀩𑁆𑀩𑀘𑀭𑀺𑀬𑀁 𑀑𑀮𑁄𑀓𑁂𑀦𑁆𑀢𑁄 𑀇𑀤𑁆𑀥𑀺𑀫𑀬𑀧𑀢𑁆𑀢𑀘𑀻𑀯𑀭𑀲𑁆𑀲 𑀉𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 𑀘𑀓𑁆𑀓𑀚𑀸𑀮𑀲𑀫𑀮𑀗𑁆𑀓𑀢𑀁 𑀤𑀓𑁆𑀔𑀺𑀡𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑁋 ‘‘𑀏𑀣, 𑀪𑀺𑀓𑁆𑀔𑀯𑁄’’𑀢𑀺 𑀆𑀳. 𑀲𑀩𑁆𑀩𑁂 𑀢𑀗𑁆𑀔𑀡𑀁𑀬𑁂𑀯 𑀤𑀼𑀯𑀗𑁆𑀕𑀼𑀮𑀓𑁂𑀲𑀸 𑀇𑀤𑁆𑀥𑀺𑀫𑀬𑀧𑀢𑁆𑀢𑀘𑀻𑀯𑀭𑀥𑀭𑀸 𑀯𑀲𑁆𑀲𑀲𑀝𑁆𑀞𑀺𑀓𑀢𑁆𑀣𑁂𑀭𑀸 𑀯𑀺𑀬 𑀆𑀓𑀧𑁆𑀧𑀲𑀫𑁆𑀧𑀦𑁆𑀦𑀸 𑀳𑀼𑀢𑁆𑀯𑀸 𑀪𑀕𑀯𑀦𑁆𑀢𑀁 𑀧𑀭𑀺𑀯𑀸𑀭𑀬𑀺𑀁𑀲𑀼. 𑀅𑀬𑀁 𑀢𑀢𑀺𑀬𑁄 𑀅𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁫. ‘‘𑀲𑀼𑀭𑀺𑀦𑁆𑀤𑀤𑁂𑀯𑀪𑀯𑀦𑁂, 𑀩𑀼𑀤𑁆𑀥𑁄 𑀥𑀫𑁆𑀫𑀫𑀤𑁂𑀲𑀬𑀺;

𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁, 𑀤𑀼𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀼.

𑁬. ‘‘𑀬𑀤𑀸 𑀲𑀼𑀦𑀦𑁆𑀤𑁄 𑀘𑀓𑁆𑀓𑀯𑀢𑁆𑀢𑀻, 𑀲𑀫𑁆𑀩𑀼𑀤𑁆𑀥𑀁 𑀉𑀧𑀲𑀗𑁆𑀓𑀫𑀺;

𑀢𑀤𑀸 𑀆𑀳𑀦𑀺 𑀲𑀫𑁆𑀩𑀼𑀤𑁆𑀥𑁄, 𑀥𑀫𑁆𑀫𑀪𑁂𑀭𑀺𑀁 𑀯𑀭𑀼𑀢𑁆𑀢𑀫𑀁.

𑁭. ‘‘𑀲𑀼𑀦𑀦𑁆𑀤𑀲𑁆𑀲𑀸𑀦𑀼𑀘𑀭𑀸 𑀚𑀦𑀢𑀸, 𑀢𑀤𑀸𑀲𑀼𑀁 𑀦𑀯𑀼𑀢𑀺𑀓𑁄𑀝𑀺𑀬𑁄;

𑀲𑀩𑁆𑀩𑁂𑀧𑀺 𑀢𑁂 𑀦𑀺𑀭𑀯𑀲𑁂𑀲𑀸, 𑀅𑀳𑁂𑀲𑀼𑀁 𑀏𑀳𑀺𑀪𑀺𑀓𑁆𑀔𑀼𑀓𑀸’’𑀢𑀺.

𑀢𑀢𑁆𑀣 𑀲𑀼𑀭𑀺𑀦𑁆𑀤𑀤𑁂𑀯𑀪𑀯𑀦𑁂𑀢𑀺 𑀧𑀼𑀦 𑀤𑁂𑀯𑀺𑀦𑁆𑀤𑀪𑀯𑀦𑁂𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀦𑁆𑀢𑀺 𑀅𑀪𑀺𑀥𑀫𑁆𑀫𑀁. 𑀆𑀳𑀦𑀻𑀢𑀺 𑀅𑀪𑀺𑀳𑀦𑀺. 𑀯𑀭𑀼𑀢𑁆𑀢𑀫𑀦𑁆𑀢𑀺 𑀯𑀭𑁄 𑀪𑀕𑀯𑀸 𑀉𑀢𑁆𑀢𑀫𑀁 𑀥𑀫𑁆𑀫𑀪𑁂𑀭𑀺𑀦𑁆𑀢𑀺 𑀅𑀢𑁆𑀣𑁄. 𑀅𑀦𑀼𑀘𑀭𑀸𑀢𑀺 𑀦𑀺𑀩𑀤𑁆𑀥𑀘𑀭𑀸 𑀲𑁂𑀯𑀓𑀸. 𑀆𑀲𑀼𑀦𑁆𑀢𑀺 𑀅𑀳𑁂𑀲𑀼𑀁. ‘‘𑀢𑀤𑀸𑀲𑀺 𑀦𑀯𑀼𑀢𑀺𑀓𑁄𑀝𑀺𑀬𑁄’’𑀢𑀺𑀧𑀺 𑀧𑀸𑀞𑁄. 𑀢𑀲𑁆𑀲 𑀚𑀦𑀢𑀸 𑀆𑀲𑀺, 𑀲𑀸 𑀚𑀦𑀢𑀸 𑀓𑀺𑀢𑁆𑀢𑀓𑀸𑀢𑀺 𑀘𑁂, 𑀦𑀯𑀼𑀢𑀺𑀓𑁄𑀝𑀺𑀬𑁄𑀢𑀺 𑀅𑀢𑁆𑀣𑁄.

𑀅𑀣 𑀫𑀗𑁆𑀕𑀮𑁂 𑀓𑀺𑀭 𑀮𑁄𑀓𑀦𑀸𑀣𑁂 𑀫𑁂𑀔𑀮𑁂 𑀧𑀼𑀭𑁂 𑀯𑀺𑀳𑀭𑀦𑁆𑀢𑁂 𑀢𑀲𑁆𑀫𑀺𑀁𑀬𑁂𑀯 𑀧𑀼𑀭𑁂 𑀲𑀼𑀤𑁂𑀯𑁄 𑀘 𑀥𑀫𑁆𑀫𑀲𑁂𑀦𑁄 𑀘 𑀫𑀸𑀡𑀯𑀓𑀸 𑀫𑀸𑀡𑀯𑀓𑀲𑀳𑀲𑁆𑀲𑀧𑀭𑀺𑀯𑀸𑀭𑀸 𑀢𑀲𑁆𑀲 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀏𑀳𑀺𑀪𑀺𑀓𑁆𑀔𑀼𑀧𑀩𑁆𑀩𑀚𑁆𑀚𑀸𑀬 𑀧𑀩𑁆𑀩𑀚𑀺𑀁𑀲𑀼. 𑀫𑀸𑀖𑀧𑀼𑀡𑁆𑀡𑀫𑀸𑀬 𑀤𑁆𑀯𑀻𑀲𑀼 𑀅𑀕𑁆𑀕𑀲𑀸𑀯𑀓𑁂𑀲𑀼 𑀲𑀧𑀭𑀺𑀯𑀸𑀭𑁂𑀲𑀼 𑀅𑀭𑀳𑀢𑁆𑀢𑀁 𑀧𑀢𑁆𑀢𑁂𑀲𑀼 𑀲𑀢𑁆𑀣𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀪𑀺𑀓𑁆𑀔𑀼𑀕𑀡𑀫𑀚𑁆𑀛𑁂 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺, 𑀅𑀬𑀁 𑀧𑀞𑀫𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀧𑀼𑀦 𑀉𑀢𑁆𑀢𑀭𑀸𑀭𑀸𑀫𑁂 𑀦𑀸𑀫 𑀅𑀦𑀼𑀢𑁆𑀢𑀭𑁂 𑀜𑀸𑀢𑀺𑀲𑀫𑀸𑀕𑀫𑁂 𑀧𑀩𑁆𑀩𑀚𑀺𑀢𑀸𑀦𑀁 𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁 𑀲𑀫𑀸𑀕𑀫𑁂 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺, 𑀅𑀬𑀁 𑀤𑀼𑀢𑀺𑀬𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀲𑀼𑀦𑀦𑁆𑀤𑀘𑀓𑁆𑀓𑀯𑀢𑁆𑀢𑀺𑀪𑀺𑀓𑁆𑀔𑀼𑀕𑀡𑀲𑀫𑀸𑀕𑀫𑁂 𑀦𑀯𑀼𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀁 𑀪𑀺𑀓𑁆𑀔𑀽𑀦𑀁 𑀫𑀚𑁆𑀛𑁂 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺, 𑀅𑀬𑀁 𑀢𑀢𑀺𑀬𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁮. ‘‘𑀲𑀦𑁆𑀦𑀺𑀧𑀸𑀢𑀸 𑀢𑀬𑁄 𑀆𑀲𑀼𑀁, 𑀫𑀗𑁆𑀕𑀮𑀲𑁆𑀲 𑀫𑀳𑁂𑀲𑀺𑀦𑁄;

𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁, 𑀧𑀞𑀫𑁄 𑀆𑀲𑀺 𑀲𑀫𑀸𑀕𑀫𑁄.

𑁯. ‘‘𑀤𑀼𑀢𑀺𑀬𑁄 𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁, 𑀢𑀢𑀺𑀬𑁄 𑀦𑀯𑀼𑀢𑀺𑀓𑁄𑀝𑀺𑀦𑀁;

𑀔𑀻𑀡𑀸𑀲𑀯𑀸𑀦𑀁 𑀯𑀺𑀫𑀮𑀸𑀦𑀁, 𑀢𑀤𑀸 𑀆𑀲𑀺 𑀲𑀫𑀸𑀕𑀫𑁄’’𑀢𑀺.

𑀢𑀤𑀸 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 𑀲𑀼𑀭𑀼𑀘𑀺𑀩𑁆𑀭𑀸𑀳𑁆𑀫𑀡𑀕𑀸𑀫𑁂 𑀲𑀼𑀭𑀼𑀘𑀺 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀳𑀼𑀢𑁆𑀯𑀸 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀕𑀽 𑀲𑀦𑀺𑀖𑀡𑁆𑀟𑀼𑀓𑁂𑀝𑀼𑀪𑀸𑀦𑀁 𑀲𑀸𑀓𑁆𑀔𑀭𑀧𑁆𑀧𑀪𑁂𑀤𑀸𑀦𑀁 𑀇𑀢𑀺𑀳𑀸𑀲𑀧𑀜𑁆𑀘𑀫𑀸𑀦𑀁 𑀧𑀤𑀓𑁄 𑀯𑁂𑀬𑁆𑀬𑀸𑀓𑀭𑀡𑁄 𑀮𑁄𑀓𑀸𑀬𑀢𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀲𑀼 𑀅𑀦𑀯𑀬𑁄 𑀅𑀳𑁄𑀲𑀺. 𑀲𑁄 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀤𑀲𑀩𑀮𑀲𑁆𑀲 𑀫𑀥𑀼𑀭𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀪𑀕𑀯𑀢𑀺 𑀧𑀲𑀻𑀤𑀺𑀢𑁆𑀯𑀸 𑀲𑀭𑀡𑀁 𑀕𑀦𑁆𑀢𑁆𑀯𑀸 𑁋 ‘‘𑀲𑁆𑀯𑁂 𑀫𑀬𑁆𑀳𑀁 𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺 𑀲𑀲𑀸𑀯𑀓𑀲𑀗𑁆𑀖𑀁 𑀪𑀕𑀯𑀦𑁆𑀢𑀁 𑀦𑀺𑀫𑀦𑁆𑀢𑁂𑀲𑀺. 𑀲𑁄 𑀪𑀕𑀯𑀢𑀸 ‘‘𑀩𑁆𑀭𑀸𑀳𑁆𑀫𑀡, 𑀓𑀺𑀢𑁆𑀢𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀢𑁂 𑀅𑀢𑁆𑀣𑁄’’𑀢𑀺 𑀯𑀼𑀢𑁆𑀢𑁄 𑁋 ‘‘𑀓𑀺𑀢𑁆𑀢𑀓𑀸 𑀧𑀦 𑀯𑁄, 𑀪𑀦𑁆𑀢𑁂, 𑀧𑀭𑀺𑀯𑀸𑀭𑀸 𑀪𑀺𑀓𑁆𑀔𑀽’’𑀢𑀺 𑀆𑀳. 𑀢𑀤𑀸 𑀧𑀞𑀫𑀲𑀦𑁆𑀦𑀺𑀧𑀸𑀢𑁄𑀯 𑀳𑁄𑀢𑀺, 𑀢𑀲𑁆𑀫𑀸 ‘‘𑀓𑁄𑀝𑀺𑀲𑀢𑀲𑀳𑀲𑁆𑀲’’𑀦𑁆𑀢𑀺 𑀯𑀼𑀢𑁆𑀢𑁂 𑁋 ‘‘𑀬𑀤𑀺 𑀏𑀯𑀁, 𑀪𑀦𑁆𑀢𑁂, 𑀲𑀩𑁆𑀩𑁂𑀳𑀺𑀧𑀺 𑀲𑀤𑁆𑀥𑀺𑀁 𑀫𑀬𑁆𑀳𑀁 𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺 𑀦𑀺𑀫𑀦𑁆𑀢𑁂𑀲𑀺. 𑀲𑀢𑁆𑀣𑀸 𑀅𑀥𑀺𑀯𑀸𑀲𑁂𑀲𑀺.

𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀲𑁆𑀯𑀸𑀢𑀦𑀸𑀬 𑀦𑀺𑀫𑀦𑁆𑀢𑁂𑀢𑁆𑀯𑀸 𑀅𑀢𑁆𑀢𑀦𑁄 𑀖𑀭𑀁 𑀕𑀘𑁆𑀙𑀦𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀏𑀢𑁆𑀢𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀬𑀸𑀕𑀼𑀪𑀢𑁆𑀢𑀯𑀢𑁆𑀣𑀸𑀤𑀻𑀦𑀺 𑀤𑀸𑀢𑀼𑀁 𑀲𑀓𑁆𑀓𑁄𑀫𑀺, 𑀦𑀺𑀲𑀻𑀤𑀦𑀝𑁆𑀞𑀸𑀦𑀁 𑀧𑀦 𑀓𑀣𑀁 𑀪𑀯𑀺𑀲𑁆𑀲𑀢𑀻’’𑀢𑀺. 𑀢𑀲𑁆𑀲 𑀓𑀺𑀭 𑀲𑀸 𑀘𑀺𑀦𑁆𑀢𑀦𑀸 𑀘𑀢𑀼𑀭𑀸𑀲𑀻𑀢𑀺𑀬𑁄𑀚𑀦𑀲𑀳𑀲𑁆𑀲𑀧𑁆𑀧𑀫𑀸𑀡𑁂 𑀫𑁂𑀭𑀼𑀫𑀢𑁆𑀣𑀓𑁂 𑀞𑀺𑀢𑀲𑁆𑀲 𑀤𑁂𑀯𑀭𑀸𑀚𑀲𑁆𑀲 𑀤𑀲𑀲𑀢𑀦𑀬𑀦𑀲𑁆𑀲 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀲𑀦𑀲𑁆𑀲 𑀉𑀡𑁆𑀳𑀸𑀓𑀸𑀭𑀁 𑀚𑀦𑁂𑀲𑀺. 𑀅𑀣 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀆𑀲𑀦𑀲𑁆𑀲 𑀉𑀡𑁆𑀳𑀪𑀸𑀯𑀁 𑀤𑀺𑀲𑁆𑀯𑀸 𑁋 ‘‘𑀓𑁄 𑀦𑀼 𑀔𑁄 𑀫𑀁 𑀇𑀫𑀫𑁆𑀳𑀸 𑀞𑀸𑀦𑀸 𑀘𑀸𑀯𑁂𑀢𑀼𑀓𑀸𑀫𑁄’’𑀢𑀺 𑀲𑀫𑀼𑀧𑁆𑀧𑀦𑁆𑀦𑀧𑀭𑀺𑀯𑀺𑀢𑀓𑁆𑀓𑁄 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀫𑀦𑀼𑀲𑁆𑀲𑀮𑁄𑀓𑀁 𑀑𑀮𑁄𑀓𑁂𑀦𑁆𑀢𑁄 𑀫𑀳𑀸𑀧𑀼𑀭𑀺𑀲𑀁 𑀤𑀺𑀲𑁆𑀯𑀸 𑁋 ‘‘𑀅𑀬𑀁 𑀫𑀳𑀸𑀲𑀢𑁆𑀢𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀢𑀲𑁆𑀲 𑀦𑀺𑀲𑀻𑀤𑀦𑀢𑁆𑀣𑀸𑀬 𑀘𑀺𑀦𑁆𑀢𑁂𑀲𑀺, 𑀫𑀬𑀸𑀧𑀺 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀧𑀼𑀜𑁆𑀜𑀓𑁄𑀝𑁆𑀞𑀸𑀲𑀁 𑀕𑀳𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀟𑁆𑀠𑀓𑀻𑀯𑀡𑁆𑀡𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀯𑀸𑀲𑀺𑀨𑀭𑀲𑀼𑀳𑀢𑁆𑀣𑁄 𑀫𑀳𑀸𑀧𑀼𑀭𑀺𑀲𑀲𑁆𑀲 𑀧𑀼𑀭𑀢𑁄 𑀧𑀸𑀢𑀼𑀭𑀳𑁄𑀲𑀺. 𑀲𑁄 ‘‘𑀅𑀢𑁆𑀣𑀺 𑀦𑀼 𑀔𑁄 𑀓𑀲𑁆𑀲𑀘𑀺 𑀪𑀢𑀺𑀬𑀸 𑀓𑀢𑁆𑀢𑀩𑁆𑀩𑀓𑀫𑁆𑀫’’𑀦𑁆𑀢𑀺 𑀆𑀳.

𑀫𑀳𑀸𑀲𑀢𑁆𑀢𑁄 𑀤𑀺𑀲𑁆𑀯𑀸 ‘‘𑀓𑀺𑀁 𑀓𑀫𑁆𑀫𑀁 𑀓𑀸𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀻’’𑀢𑀺 𑀆𑀳. ‘‘𑀫𑀫 𑀅𑀚𑀸𑀦𑀦𑀲𑀺𑀧𑁆𑀧𑀁 𑀦𑀸𑀫 𑀦𑀢𑁆𑀣𑀺, 𑀬𑁄 𑀬𑁄 𑀬𑀁 𑀬𑀁 𑀇𑀘𑁆𑀙𑀢𑀺 𑀫𑀡𑁆𑀟𑀧𑀁 𑀯𑀸 𑀧𑀸𑀲𑀸𑀤𑀁 𑀯𑀸 𑀅𑀜𑁆𑀜𑀁 𑀯𑀸 𑀓𑀺𑀜𑁆𑀘𑀺 𑀦𑀺𑀯𑁂𑀲𑀦𑀸𑀤𑀺𑀓𑀁, 𑀢𑀲𑁆𑀲 𑀢𑀲𑁆𑀲 𑀢𑀁 𑀢𑀁 𑀓𑀸𑀢𑀼𑀁 𑀲𑀫𑀢𑁆𑀣𑁄𑀫𑁆𑀳𑀻’’𑀢𑀺. ‘‘𑀢𑁂𑀦 𑀳𑀺 𑀫𑀬𑁆𑀳𑀁 𑀓𑀫𑁆𑀫𑀁 𑀅𑀢𑁆𑀣𑀻’’𑀢𑀺. ‘‘𑀓𑀺𑀁, 𑀅𑀬𑁆𑀬𑀸’’𑀢𑀺? ‘‘𑀲𑁆𑀯𑀸𑀢𑀦𑀸𑀬 𑀫𑀬𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀪𑀺𑀓𑁆𑀔𑀽 𑀦𑀺𑀫𑀦𑁆𑀢𑀺𑀢𑀸, 𑀢𑁂𑀲𑀁 𑀦𑀺𑀲𑀻𑀤𑀦𑀫𑀡𑁆𑀟𑀧𑀁 𑀓𑀭𑀺𑀲𑁆𑀲𑀲𑀻’’𑀢𑀺? ‘‘𑀅𑀳𑀁 𑀦𑀸𑀫 𑀓𑀭𑁂𑀬𑁆𑀬𑀁, 𑀲𑀘𑁂 𑀫𑁂 𑀪𑀢𑀺𑀁 𑀤𑀸𑀢𑀼𑀁 𑀲𑀓𑁆𑀔𑀺𑀲𑁆𑀲𑀣𑀸’’𑀢𑀺. ‘‘𑀲𑀓𑁆𑀔𑀺𑀲𑁆𑀲𑀸𑀫𑀺, 𑀢𑀸𑀢𑀸’’𑀢𑀺. ‘‘𑀬𑀤𑀺 𑀏𑀯𑀁, 𑀲𑀸𑀥𑀼, 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀏𑀓𑀁 𑀧𑀤𑁂𑀲𑀁 𑀑𑀮𑁄𑀓𑁂𑀲𑀺. 𑀲𑁄 𑀤𑁆𑀯𑀸𑀤𑀲𑀬𑁄𑀚𑀦𑀧𑁆𑀧𑀫𑀸𑀡𑁄 𑀧𑀤𑁂𑀲𑁄 𑀓𑀲𑀺𑀡𑀫𑀡𑁆𑀟𑀮𑀁 𑀯𑀺𑀬 𑀲𑀫𑀢𑀮𑁄 𑀧𑀭𑀫𑀭𑀫𑀡𑀻𑀬𑁄 𑀅𑀳𑁄𑀲𑀺. 𑀧𑀼𑀦 𑀲𑁄 ‘‘𑀏𑀢𑁆𑀢𑀓𑁂 𑀞𑀸𑀦𑁂 𑀲𑀢𑁆𑀢𑀭𑀢𑀦𑀫𑀬𑁄 𑀤𑀝𑁆𑀞𑀩𑁆𑀩𑀲𑀸𑀭𑀫𑀡𑁆𑀟𑁄 𑀫𑀡𑁆𑀟𑀧𑁄 𑀉𑀝𑁆𑀞𑀳𑀢𑀽’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀑𑀮𑁄𑀓𑁂𑀲𑀺. 𑀢𑀢𑁄 𑀢𑀸𑀯𑀤𑁂𑀯 𑀫𑀡𑁆𑀟𑀧𑀲𑀤𑀺𑀲𑁄 𑀧𑀣𑀯𑀺𑀢𑀮𑀁 𑀪𑀺𑀦𑁆𑀤𑀺𑀢𑁆𑀯𑀸 𑀫𑀡𑁆𑀟𑀧𑁄 𑀉𑀝𑁆𑀞𑀳𑀺. 𑀢𑀲𑁆𑀲 𑀲𑁄𑀯𑀡𑁆𑀡𑀫𑀬𑁂𑀲𑀼 𑀣𑀫𑁆𑀪𑁂𑀲𑀼 𑀭𑀚𑀢𑀫𑀬𑀸 𑀖𑀝𑀓𑀸 𑀅𑀳𑁂𑀲𑀼𑀁, 𑀭𑀚𑀢𑀫𑀬𑁂𑀲𑀼 𑀣𑀫𑁆𑀪𑁂𑀲𑀼 𑀲𑁄𑀯𑀡𑁆𑀡𑀫𑀬𑀸 𑀖𑀝𑀓𑀸, 𑀫𑀡𑀺𑀢𑁆𑀣𑀫𑁆𑀪𑁂𑀲𑀼 𑀧𑀯𑀸𑀴𑀫𑀬𑀸 𑀖𑀝𑀓𑀸, 𑀧𑀯𑀸𑀴𑀫𑀬𑁂𑀲𑀼 𑀣𑀫𑁆𑀪𑁂𑀲𑀼 𑀫𑀡𑀺𑀫𑀬𑀸 𑀖𑀝𑀓𑀸, 𑀲𑀢𑁆𑀢𑀭𑀢𑀦𑀫𑀬𑁂𑀲𑀼 𑀣𑀫𑁆𑀪𑁂𑀲𑀼 𑀲𑀢𑁆𑀢𑀭𑀢𑀦𑀫𑀬𑀸 𑀖𑀝𑀓𑀸 𑀅𑀳𑁂𑀲𑀼𑀁.

𑀢𑀢𑁄 𑀫𑀡𑁆𑀟𑀧𑀲𑁆𑀲 𑀅𑀦𑁆𑀢𑀭𑀦𑁆𑀢𑀭𑀸𑀧𑀺 𑀓𑀺𑀗𑁆𑀓𑀺𑀡𑀺𑀓𑀚𑀸𑀮𑀸 𑀑𑀮𑀫𑁆𑀩𑀢𑀽’’𑀢𑀺 𑀑𑀮𑁄𑀓𑁂𑀲𑀺, 𑀲𑀳 𑀑𑀮𑁄𑀓𑀦𑁂𑀦 𑀓𑀺𑀗𑁆𑀓𑀺𑀡𑀺𑀓𑀚𑀸𑀮𑀸 𑀑𑀮𑀫𑁆𑀩𑀺, 𑀬𑀲𑁆𑀲 𑀫𑀦𑁆𑀤𑀯𑀸𑀢𑁂𑀭𑀺𑀢𑀲𑁆𑀲 𑀧𑀜𑁆𑀘𑀗𑁆𑀕𑀺𑀓𑀲𑁆𑀲𑁂𑀯 𑀢𑀼𑀭𑀺𑀬𑀲𑁆𑀲 𑀧𑀭𑀫𑀫𑀦𑁄𑀭𑀫𑁄 𑀫𑀥𑀼𑀭𑁄 𑀲𑀤𑁆𑀤𑁄 𑀦𑀺𑀘𑁆𑀙𑀭𑀢𑀺, 𑀤𑀺𑀩𑁆𑀩𑀲𑀗𑁆𑀕𑀻𑀢𑀺𑀯𑀢𑁆𑀢𑀦𑀓𑀸𑀮𑁄 𑀯𑀺𑀬 𑀅𑀳𑁄𑀲𑀺. ‘‘𑀅𑀦𑁆𑀢𑀭𑀦𑁆𑀢𑀭𑀸 𑀤𑀺𑀩𑁆𑀩𑀕𑀦𑁆𑀥𑀤𑀸𑀫𑀧𑀼𑀧𑁆𑀨𑀤𑀸𑀫𑀧𑀢𑁆𑀢𑀤𑀸𑀫𑀲𑀢𑁆𑀢𑀭𑀢𑀦𑀤𑀸𑀫𑀸𑀦𑀺 𑀑𑀮𑀫𑁆𑀩𑀦𑁆𑀢𑀽’’𑀢𑀺 𑀘𑀺𑀦𑁆𑀢𑁂𑀲𑀺, 𑀲𑀳 𑀘𑀺𑀦𑁆𑀢𑀸𑀬 𑀤𑀸𑀫𑀸𑀦𑀺 𑀑𑀮𑀫𑁆𑀩𑀺𑀁𑀲𑀼. ‘‘𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀗𑁆𑀔𑀸𑀦𑀁 𑀪𑀺𑀓𑁆𑀔𑀽𑀦𑀁 𑀆𑀲𑀦𑀸𑀦𑀺 𑀘 𑀓𑀧𑁆𑀧𑀺𑀬𑀫𑀳𑀕𑁆𑀖𑀧𑀘𑁆𑀘𑀢𑁆𑀣𑀭𑀡𑀸𑀦𑀺 𑀆𑀥𑀸𑀭𑀓𑀸𑀦𑀺 𑀘 𑀧𑀣𑀯𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀉𑀝𑁆𑀞𑀳𑀦𑁆𑀢𑀽’’𑀢𑀺 𑀘𑀺𑀦𑁆𑀢𑁂𑀲𑀺, 𑀢𑀸𑀯𑀤𑁂𑀯 𑀉𑀝𑁆𑀞𑀳𑀺𑀁𑀲𑀼. ‘‘𑀓𑁄𑀡𑁂 𑀓𑁄𑀡𑁂 𑀏𑀓𑁂𑀓𑀸 𑀉𑀤𑀓𑀘𑀸𑀝𑀺 𑀉𑀝𑁆𑀞𑀳𑀢𑀽’’𑀢𑀺 𑀘𑀺𑀦𑁆𑀢𑁂𑀲𑀺, 𑀢𑀗𑁆𑀔𑀡𑀁𑀬𑁂𑀯 𑀉𑀤𑀓𑀘𑀸𑀝𑀺𑀬𑁄 𑀧𑀭𑀫𑀲𑀻𑀢𑀮𑁂𑀦 𑀫𑀥𑀼𑀭𑁂𑀦 𑀲𑀼𑀯𑀺𑀲𑀼𑀤𑁆𑀥𑀲𑀼𑀕𑀦𑁆𑀥𑀓𑀧𑁆𑀧𑀺𑀬𑀯𑀸𑀭𑀺𑀦𑀸 𑀧𑀼𑀡𑁆𑀡𑀸 𑀓𑀤𑀮𑀺𑀧𑀡𑁆𑀡𑀧𑀺𑀳𑀺𑀢𑀫𑀼𑀔𑀸 𑀉𑀝𑁆𑀞𑀳𑀺𑀁𑀲𑀼. 𑀲𑁄 𑀤𑀲𑀲𑀢𑀦𑀬𑀦𑁄 𑀏𑀢𑁆𑀢𑀓𑀁 𑀫𑀸𑀧𑁂𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑁋 ‘‘𑀏𑀳𑀺, 𑀅𑀬𑁆𑀬, 𑀢𑀯 𑀫𑀡𑁆𑀟𑀧𑀁 𑀤𑀺𑀲𑁆𑀯𑀸 𑀫𑀬𑁆𑀳𑀁 𑀪𑀢𑀺𑀁 𑀤𑁂𑀳𑀻’’𑀢𑀺 𑀆𑀳. 𑀫𑀳𑀸𑀧𑀼𑀭𑀺𑀲𑁄 𑀕𑀦𑁆𑀢𑁆𑀯𑀸 𑀢𑀁 𑀫𑀡𑁆𑀟𑀧𑀁 𑀑𑀮𑁄𑀓𑁂𑀲𑀺. 𑀢𑀲𑁆𑀲 𑀑𑀮𑁄𑀓𑁂𑀦𑁆𑀢𑀲𑁆𑀲𑁂𑀯 𑀲𑀓𑀮𑀲𑀭𑀻𑀭𑀁 𑀧𑀜𑁆𑀘𑀯𑀡𑁆𑀡𑀸𑀬 𑀧𑀻𑀢𑀺𑀬𑀸 𑀦𑀺𑀭𑀦𑁆𑀢𑀭𑀁 𑀨𑀼𑀝𑀁 𑀅𑀳𑁄𑀲𑀺.

𑀅𑀣𑀲𑁆𑀲 𑀫𑀡𑁆𑀟𑀧𑀁 𑀑𑀮𑁄𑀓𑀬𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀦𑀸𑀬𑀁 𑀫𑀡𑁆𑀟𑀧𑁄 𑀫𑀦𑀼𑀲𑁆𑀲𑀪𑀽𑀢𑁂𑀦 𑀓𑀢𑁄, 𑀫𑀬𑁆𑀳𑀁 𑀅𑀚𑁆𑀛𑀸𑀲𑀬𑀁 𑀫𑀬𑁆𑀳𑀁 𑀕𑀼𑀡𑀁 𑀆𑀕𑀫𑁆𑀫 𑀅𑀤𑁆𑀥𑀸 𑀲𑀓𑁆𑀓𑀲𑁆𑀲 𑀤𑁂𑀯𑀭𑀜𑁆𑀜𑁄 𑀪𑀯𑀦𑀁 𑀉𑀡𑁆𑀳𑀁 𑀅𑀳𑁄𑀲𑀺, 𑀢𑀢𑁄 𑀲𑀓𑁆𑀓𑁂𑀦 𑀤𑁂𑀯𑀸𑀦𑀫𑀺𑀦𑁆𑀤𑁂𑀦 𑀅𑀬𑀁 𑀫𑀡𑁆𑀟𑀧𑁄 𑀦𑀺𑀫𑁆𑀫𑀺𑀢𑁄’’𑀢𑀺. ‘‘𑀦 𑀔𑁄 𑀧𑀦 𑀫𑁂 𑀬𑀼𑀢𑁆𑀢𑀁 𑀏𑀯𑀭𑀽𑀧𑁂 𑀫𑀡𑁆𑀟𑀧𑁂 𑀏𑀓𑀤𑀺𑀯𑀲𑀁𑀬𑁂𑀯 𑀤𑀸𑀦𑀁 𑀤𑀸𑀢𑀼𑀁, 𑀲𑀢𑁆𑀢𑀸𑀳𑀁 𑀤𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀩𑀸𑀳𑀺𑀭𑀓𑀤𑀸𑀦𑀁 𑀦𑀸𑀫 𑀢𑀢𑁆𑀢𑀓𑀫𑁆𑀧𑀺 𑀲𑀫𑀸𑀦𑀁 𑀩𑁄𑀥𑀺𑀲𑀢𑁆𑀢𑀸𑀦𑀁 𑀳𑀤𑀬𑀁 𑀢𑀼𑀝𑁆𑀞𑀺𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀮𑀗𑁆𑀓𑀢𑀲𑀻𑀲𑀁 𑀯𑀸 𑀙𑀺𑀦𑁆𑀤𑀺𑀢𑁆𑀯𑀸 𑀅𑀜𑁆𑀚𑀺𑀢𑀸𑀦𑀺 𑀯𑀸 𑀅𑀓𑁆𑀔𑀻𑀦𑀺 𑀉𑀧𑁆𑀧𑀸𑀝𑁂𑀢𑁆𑀯𑀸 𑀳𑀤𑀬𑀫𑀁𑀲𑀁 𑀯𑀸 𑀉𑀩𑁆𑀩𑀝𑁆𑀝𑁂𑀢𑁆𑀯𑀸 𑀤𑀺𑀦𑁆𑀦𑀓𑀸𑀮𑁂 𑀩𑁄𑀥𑀺𑀲𑀢𑁆𑀢𑀸𑀦𑀁 𑀘𑀸𑀕𑀁 𑀦𑀺𑀲𑁆𑀲𑀸𑀬 𑀢𑀼𑀝𑁆𑀞𑀺 𑀦𑀸𑀫 𑀳𑁄𑀢𑀺. 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀳𑀺 𑀲𑀺𑀯𑀺𑀚𑀸𑀢𑀓𑁂 (𑀚𑀸. 𑁧.𑁧𑁫.𑁫𑁨 𑀆𑀤𑀬𑁄) 𑀤𑁂𑀯𑀲𑀺𑀓𑀁 𑀧𑀜𑁆𑀘𑀓𑀳𑀸𑀧𑀡𑀲𑀢𑀲𑀳𑀲𑁆𑀲𑀸𑀦𑀺 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀘𑀢𑀽𑀲𑀼 𑀦𑀕𑀭𑀤𑁆𑀯𑀸𑀭𑁂𑀲𑀼 𑀦𑀕𑀭𑀫𑀚𑁆𑀛𑁂𑀢𑀺 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀤𑀸𑀦𑀁 𑀤𑁂𑀦𑁆𑀢𑀲𑁆𑀲 𑀢𑀁 𑀤𑀸𑀦𑀁 𑀘𑀸𑀕𑀢𑀼𑀝𑁆𑀞𑀺𑀁 𑀉𑀧𑁆𑀧𑀸𑀤𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀬𑀤𑀸 𑀧𑀦𑀲𑁆𑀲 𑀩𑁆𑀭𑀸𑀳𑁆𑀫𑀡𑀯𑀡𑁆𑀡𑁂𑀦 𑀆𑀕𑀦𑁆𑀢𑁆𑀯𑀸 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀅𑀓𑁆𑀔𑀻𑀦𑀺 𑀬𑀸𑀘𑀺, 𑀢𑀤𑀸 𑀲𑁄 𑀢𑀸𑀦𑀺 𑀘𑀓𑁆𑀔𑀽𑀦𑀺 𑀉𑀧𑁆𑀧𑀸𑀝𑁂𑀢𑁆𑀯𑀸 𑀅𑀤𑀸𑀲𑀺, 𑀤𑀤𑀫𑀸𑀦𑀲𑁆𑀲𑁂𑀯 𑀳𑀸𑀲𑁄 𑀉𑀧𑁆𑀧𑀚𑁆𑀚𑀺, 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀘𑀺𑀢𑁆𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁 𑀦𑀸𑀳𑁄𑀲𑀺. 𑀏𑀯𑀁 𑀲𑀩𑁆𑀩𑀜𑁆𑀜𑀼𑀩𑁄𑀥𑀺𑀲𑀢𑁆𑀢𑀸𑀦𑀁 𑀩𑀸𑀳𑀺𑀭𑀤𑀸𑀦𑀁 𑀦𑀺𑀲𑁆𑀲𑀸𑀬 𑀢𑀺𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀫𑀸 𑀲𑁄𑀧𑀺 𑀫𑀳𑀸𑀧𑀼𑀭𑀺𑀲𑁄 𑁋 ‘‘𑀫𑀬𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀗𑁆𑀔𑀸𑀦𑀁 𑀪𑀺𑀓𑁆𑀔𑀽𑀦𑀁 𑀤𑀸𑀦𑀁 𑀤𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀲𑁆𑀫𑀺𑀁 𑀫𑀡𑁆𑀟𑀧𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀕𑀯𑀧𑀸𑀦𑀁 𑀦𑀸𑀫 𑀤𑀸𑀦𑀁 𑀅𑀤𑀸𑀲𑀺.

𑀏𑀢𑁆𑀣 𑀕𑀯𑀧𑀸𑀦𑀦𑁆𑀢𑀺 𑀫𑀳𑀦𑁆𑀢𑁂 𑀫𑀳𑀦𑁆𑀢𑁂 𑀓𑁄𑀮𑀫𑁆𑀩𑁂 𑀔𑀻𑀭𑀲𑁆𑀲 𑀧𑀽𑀭𑁂𑀢𑁆𑀯𑀸 𑀉𑀤𑁆𑀥𑀦𑁂𑀲𑀼 𑀆𑀭𑁄𑀧𑁂𑀢𑁆𑀯𑀸 𑀖𑀦𑀧𑀸𑀓𑀧𑀓𑁆𑀓𑁂 𑀔𑀻𑀭𑁂 𑀣𑁄𑀓𑀣𑁄𑀓𑁂 𑀢𑀡𑁆𑀟𑀼𑀮𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀓𑁆𑀓𑀫𑀥𑀼𑀲𑀓𑁆𑀔𑀭𑀘𑀼𑀡𑁆𑀡𑀲𑀧𑁆𑀧𑀻𑀳𑀺 𑀅𑀪𑀺𑀲𑀗𑁆𑀔𑀢𑀪𑁄𑀚𑀦𑀁 𑀯𑀼𑀘𑁆𑀘𑀢𑀺. 𑀇𑀤𑀫𑁂𑀯 𑀘𑀢𑀼𑀫𑀥𑀼𑀭𑀪𑁄𑀚𑀦𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀫𑀦𑀼𑀲𑁆𑀲𑀸𑀬𑁂𑀯 𑀧𑀦 𑀧𑀭𑀺𑀯𑀺𑀲𑀺𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀤𑁂𑀯𑀸𑀧𑀺 𑀏𑀓𑀦𑁆𑀢𑀭𑀺𑀓𑀸 𑀳𑀼𑀢𑁆𑀯𑀸 𑀧𑀭𑀺𑀯𑀺𑀲𑀺𑀁𑀲𑀼. 𑀤𑁆𑀯𑀸𑀤𑀲𑀬𑁄𑀚𑀦𑀧𑁆𑀧𑀫𑀸𑀡𑀫𑁆𑀧𑀺 𑀢𑀁 𑀞𑀸𑀦𑀁 𑀢𑁂 𑀪𑀺𑀓𑁆𑀔𑀽 𑀕𑀡𑁆𑀳𑀺𑀢𑀼𑀁 𑀦𑀧𑁆𑀧𑀳𑁄𑀲𑀺𑀬𑁂𑀯, 𑀢𑁂 𑀧𑀦 𑀪𑀺𑀓𑁆𑀔𑀽 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀅𑀦𑀼𑀪𑀸𑀯𑁂𑀦 𑀦𑀺𑀲𑀻𑀤𑀺𑀁𑀲𑀼. 𑀧𑀭𑀺𑀬𑁄𑀲𑀸𑀦𑀤𑀺𑀯𑀲𑁂 𑀲𑀩𑁆𑀩𑁂𑀲𑀁 𑀪𑀺𑀓𑁆𑀔𑀽𑀦𑀁 𑀧𑀢𑁆𑀢𑁂 𑀥𑁄𑀯𑀸𑀧𑁂𑀢𑁆𑀯𑀸 𑀪𑁂𑀲𑀚𑁆𑀚𑀢𑁆𑀣𑀸𑀬 𑀲𑀧𑁆𑀧𑀺𑀦𑀯𑀦𑀻𑀢𑀫𑀥𑀼𑀨𑀸𑀡𑀺𑀢𑀸𑀤𑀻𑀦𑀁 𑀧𑀽𑀭𑁂𑀢𑁆𑀯𑀸 𑀢𑀺𑀘𑀻𑀯𑀭𑁂𑀳𑀺 𑀲𑀤𑁆𑀥𑀺𑀁 𑀅𑀤𑀸𑀲𑀺. 𑀢𑀢𑁆𑀣 𑀲𑀗𑁆𑀖𑀦𑀯𑀓𑀪𑀺𑀓𑁆𑀔𑀼𑀦𑀸 𑀮𑀤𑁆𑀥𑀘𑀻𑀯𑀭𑀲𑀸𑀝𑀓𑀸 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀸 𑀅𑀳𑁂𑀲𑀼𑀁.

𑀅𑀣 𑀲𑀢𑁆𑀣𑀸 𑀅𑀦𑀼𑀫𑁄𑀤𑀦𑀁 𑀓𑀭𑁄𑀦𑁆𑀢𑁄 𑁋 ‘‘𑀅𑀬𑀁 𑀫𑀳𑀸𑀧𑀼𑀭𑀺𑀲𑁄 𑀏𑀯𑀭𑀽𑀧𑀁 𑀫𑀳𑀸𑀤𑀸𑀦𑀁 𑀅𑀤𑀸𑀲𑀺, 𑀓𑁄 𑀦𑀼 𑀔𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 𑁋 ‘‘𑀅𑀦𑀸𑀕𑀢𑁂 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀁 𑀤𑁆𑀯𑀺𑀦𑁆𑀦𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀁 𑀫𑀢𑁆𑀣𑀓𑁂 𑀕𑁄𑀢𑀫𑁄 𑀦𑀸𑀫 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀤𑀺𑀲𑁆𑀯𑀸 𑀢𑀢𑁄 𑀫𑀳𑀸𑀲𑀢𑁆𑀢𑀁 𑀆𑀫𑀦𑁆𑀢𑁂𑀢𑁆𑀯𑀸 𑁋 ‘‘𑀢𑁆𑀯𑀁 𑀏𑀢𑁆𑀢𑀓𑀁 𑀦𑀸𑀫 𑀓𑀸𑀮𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀕𑁄𑀢𑀫𑁄 𑀦𑀸𑀫 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀅𑀣 𑀫𑀳𑀸𑀧𑀼𑀭𑀺𑀲𑁄 𑀪𑀕𑀯𑀢𑁄 𑀩𑁆𑀬𑀸𑀓𑀭𑀡𑀁 𑀲𑀼𑀢𑁆𑀯𑀸 𑀧𑀫𑀼𑀤𑀺𑀢𑀳𑀤𑀬𑁄 𑁋 ‘‘𑀅𑀳𑀁 𑀓𑀺𑀭 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀸𑀫𑀺, 𑀦 𑀫𑁂 𑀖𑀭𑀸𑀯𑀸𑀲𑁂𑀦 𑀅𑀢𑁆𑀣𑁄, 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀣𑀸𑀭𑀽𑀧𑀁 𑀲𑀫𑁆𑀧𑀢𑁆𑀢𑀺𑀁 𑀔𑁂𑀴𑀧𑀺𑀡𑁆𑀟𑀁 𑀯𑀺𑀬 𑀧𑀳𑀸𑀬 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀅𑀪𑀺𑀜𑁆𑀜𑀸 𑀘 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑁄 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁦. ‘‘𑀅𑀳𑀁 𑀢𑁂𑀦 𑀲𑀫𑀬𑁂𑀦, 𑀲𑀼𑀭𑀼𑀘𑀻 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄;

𑀅𑀚𑁆𑀛𑀸𑀬𑀓𑁄 𑀫𑀦𑁆𑀢𑀥𑀭𑁄, 𑀢𑀺𑀡𑁆𑀡𑀁 𑀯𑁂𑀤𑀸𑀦 𑀧𑀸𑀭𑀕𑀽.

𑁧𑁧. ‘‘𑀢𑀫𑀳𑀁 𑀉𑀧𑀲𑀗𑁆𑀓𑀫𑁆𑀫, 𑀲𑀭𑀡𑀁 𑀕𑀦𑁆𑀢𑁆𑀯𑀸𑀦 𑀲𑀢𑁆𑀣𑀼𑀦𑁄;

𑀲𑀫𑁆𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀲𑀗𑁆𑀖𑀁, 𑀕𑀦𑁆𑀥𑀫𑀸𑀮𑁂𑀦 𑀧𑀽𑀚𑀬𑀺𑀁;

𑀧𑀽𑀚𑁂𑀢𑁆𑀯𑀸 𑀕𑀦𑁆𑀥𑀫𑀸𑀮𑁂𑀦, 𑀕𑀯𑀧𑀸𑀦𑁂𑀦 𑀢𑀧𑁆𑀧𑀬𑀺𑀁.

𑁧𑁨. ‘‘𑀲𑁄𑀧𑀺 𑀫𑀁 𑀩𑀼𑀤𑁆𑀥𑁄 𑀩𑁆𑀬𑀸𑀓𑀸𑀲𑀺, 𑀫𑀗𑁆𑀕𑀮𑁄 𑀤𑁆𑀯𑀺𑀧𑀤𑀼𑀢𑁆𑀢𑀫𑁄;

𑀅𑀧𑀭𑀺𑀫𑁂𑀬𑁆𑀬𑀺𑀢𑁄 𑀓𑀧𑁆𑀧𑁂, 𑀅𑀬𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺.

𑁧𑁩. ‘‘𑀧𑀥𑀸𑀦𑀁 𑀧𑀤𑀳𑀺𑀢𑁆𑀯𑀸𑀦…𑀧𑁂… 𑀳𑁂𑀲𑁆𑀲𑀸𑀫 𑀲𑀫𑁆𑀫𑀼𑀔𑀸 𑀇𑀫’’𑀦𑁆𑀢𑀺. 𑁋

𑀅𑀝𑁆𑀞 𑀕𑀸𑀣𑀸 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀸.

𑁧𑁪. ‘‘𑀢𑀲𑁆𑀲𑀸𑀧𑀺 𑀯𑀘𑀦𑀁 𑀲𑀼𑀢𑁆𑀯𑀸, 𑀪𑀺𑀬𑁆𑀬𑁄 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁;

𑀉𑀢𑁆𑀢𑀭𑀺𑀁 𑀯𑀢𑀫𑀥𑀺𑀝𑁆𑀞𑀸𑀲𑀺𑀁, 𑀤𑀲𑀧𑀸𑀭𑀫𑀺𑀧𑀽𑀭𑀺𑀬𑀸.

𑁧𑁫. ‘‘𑀢𑀤𑀸 𑀧𑀻𑀢𑀺𑀫𑀦𑀼𑀩𑁆𑀭𑀽𑀳𑀦𑁆𑀢𑁄, 𑀲𑀫𑁆𑀩𑁄𑀥𑀺𑀯𑀭𑀧𑀢𑁆𑀢𑀺𑀬𑀸;

𑀩𑀼𑀤𑁆𑀥𑁂 𑀤𑀢𑁆𑀯𑀸𑀦 𑀫𑀁 𑀕𑁂𑀳𑀁, 𑀧𑀩𑁆𑀩𑀚𑀺𑀁 𑀢𑀲𑁆𑀲 𑀲𑀦𑁆𑀢𑀺𑀓𑁂.

𑁧𑁬. ‘‘𑀲𑀼𑀢𑁆𑀢𑀦𑁆𑀢𑀁 𑀯𑀺𑀦𑀬𑀁 𑀘𑀸𑀧𑀺, 𑀦𑀯𑀗𑁆𑀕𑀁 𑀲𑀢𑁆𑀣𑀼𑀲𑀸𑀲𑀦𑀁;

𑀲𑀩𑁆𑀩𑀁 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸, 𑀲𑁄𑀪𑀬𑀺𑀁 𑀚𑀺𑀦𑀲𑀸𑀲𑀦𑀁.

𑁧𑁭. ‘‘𑀢𑀢𑁆𑀣𑀧𑁆𑀧𑀫𑀢𑁆𑀢𑁄 𑀯𑀺𑀳𑀭𑀦𑁆𑀢𑁄, 𑀩𑁆𑀭𑀳𑁆𑀫𑀁 𑀪𑀸𑀯𑁂𑀢𑁆𑀯 𑀪𑀸𑀯𑀦𑀁;

𑀅𑀪𑀺𑀜𑁆𑀜𑀸𑀧𑀸𑀭𑀫𑀺𑀁 𑀕𑀦𑁆𑀢𑁆𑀯𑀸, 𑀩𑁆𑀭𑀳𑁆𑀫𑀮𑁄𑀓𑀫𑀕𑀜𑁆𑀙𑀳’’𑀦𑁆𑀢𑀺.

𑀢𑀢𑁆𑀣 𑀕𑀦𑁆𑀥𑀫𑀸𑀮𑁂𑀦𑀸𑀢𑀺 𑀕𑀦𑁆𑀥𑁂𑀳𑀺 𑀘𑁂𑀯 𑀫𑀸𑀮𑁂𑀳𑀺 𑀘. 𑀕𑀯𑀧𑀸𑀦𑁂𑀦𑀸𑀢𑀺 𑀇𑀤𑀁 𑀯𑀼𑀢𑁆𑀢𑀫𑁂𑀯. ‘‘𑀖𑀢𑀧𑀸𑀦𑁂𑀦𑀸’’𑀢𑀺𑀧𑀺 𑀓𑁂𑀘𑀺 𑀧𑀞𑀦𑁆𑀢𑀺. 𑀢𑀧𑁆𑀧𑀬𑀺𑀦𑁆𑀢𑀺 𑀢𑀧𑁆𑀧𑁂𑀲𑀺𑀁. 𑀉𑀢𑁆𑀢𑀭𑀺𑀁 𑀯𑀢𑀫𑀥𑀺𑀝𑁆𑀞𑀸𑀲𑀺𑀦𑁆𑀢𑀺 𑀪𑀺𑀬𑁆𑀬𑁄𑀧𑀺 𑀯𑀢𑀫𑀥𑀺𑀝𑁆𑀞𑀸𑀲𑀺𑀁. 𑀤𑀲𑀧𑀸𑀭𑀫𑀺𑀧𑀽𑀭𑀺𑀬𑀸𑀢𑀺 𑀤𑀲𑀦𑁆𑀦𑀁 𑀧𑀸𑀭𑀫𑀻𑀦𑀁 𑀧𑀽𑀭𑀡𑀢𑁆𑀣𑀸𑀬. 𑀧𑀻𑀢𑀺𑀦𑁆𑀢𑀺 𑀳𑀤𑀬𑀢𑀼𑀝𑁆𑀞𑀺𑀁. 𑀅𑀦𑀼𑀩𑁆𑀭𑀽𑀳𑀦𑁆𑀢𑁄𑀢𑀺 𑀯𑀟𑁆𑀠𑁂𑀦𑁆𑀢𑁄. 𑀲𑀫𑁆𑀩𑁄𑀥𑀺𑀯𑀭𑀧𑀢𑁆𑀢𑀺𑀬𑀸𑀢𑀺 𑀩𑀼𑀤𑁆𑀥𑀢𑁆𑀢𑀧𑁆𑀧𑀢𑁆𑀢𑀺𑀬𑀸. 𑀩𑀼𑀤𑁆𑀥𑁂 𑀤𑀢𑁆𑀯𑀸𑀦𑀸𑀢𑀺 𑀩𑀼𑀤𑁆𑀥𑀲𑁆𑀲 𑀧𑀭𑀺𑀘𑁆𑀘𑀚𑀺𑀢𑁆𑀯𑀸. 𑀫𑀁 𑀕𑁂𑀳𑀦𑁆𑀢𑀺 𑀫𑀫 𑀕𑁂𑀳𑀁, 𑀲𑀩𑁆𑀩𑀁 𑀲𑀸𑀧𑀢𑁂𑀬𑁆𑀬𑀁 𑀘𑀢𑀼𑀧𑀘𑁆𑀘𑀬𑀢𑁆𑀣𑀸𑀬 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀧𑀭𑀺𑀘𑁆𑀘𑀚𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀩𑀼𑀤𑁆𑀥𑀲𑀸𑀲𑀦𑁂. 𑀩𑁆𑀭𑀳𑁆𑀫𑀦𑁆𑀢𑀺 𑀩𑁆𑀭𑀳𑁆𑀫𑀯𑀺𑀳𑀸𑀭𑀪𑀸𑀯𑀦𑀁 𑀪𑀸𑀯𑁂𑀢𑁆𑀯𑀸.

𑀫𑀗𑁆𑀕𑀮𑀲𑁆𑀲 𑀧𑀦 𑀪𑀕𑀯𑀢𑁄 𑀦𑀕𑀭𑀁 𑀉𑀢𑁆𑀢𑀭𑀁 𑀦𑀸𑀫 𑀅𑀳𑁄𑀲𑀺, 𑀧𑀺𑀢𑀸𑀧𑀺𑀲𑁆𑀲 𑀉𑀢𑁆𑀢𑀭𑁄 𑀦𑀸𑀫 𑀭𑀸𑀚𑀸 𑀔𑀢𑁆𑀢𑀺𑀬𑁄, 𑀫𑀸𑀢𑀸𑀧𑀺 𑀉𑀢𑁆𑀢𑀭𑀸 𑀦𑀸𑀫, 𑀲𑀼𑀤𑁂𑀯𑁄 𑀘 𑀥𑀫𑁆𑀫𑀲𑁂𑀦𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀧𑀸𑀮𑀺𑀢𑁄 𑀦𑀸𑀫 𑀉𑀧𑀝𑁆𑀞𑀸𑀓𑁄, 𑀲𑀻𑀯𑀮𑀸 𑀘 𑀅𑀲𑁄𑀓𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀦𑀸𑀕𑀭𑀼𑀓𑁆𑀔𑁄 𑀩𑁄𑀥𑀺, 𑀅𑀝𑁆𑀞𑀸𑀲𑀻𑀢𑀺𑀳𑀢𑁆𑀣𑀼𑀩𑁆𑀩𑁂𑀥𑀁 𑀲𑀭𑀻𑀭𑀁 𑀅𑀳𑁄𑀲𑀺, 𑀦𑀯𑀼𑀢𑀺𑀯𑀲𑁆𑀲𑀲𑀳𑀲𑁆𑀲𑀁 𑀆𑀬𑀼𑀧𑀭𑀺𑀫𑀸𑀡𑀁, 𑀪𑀭𑀺𑀬𑀸 𑀧𑀦𑀲𑁆𑀲 𑀬𑀲𑀯𑀢𑀻 𑀦𑀸𑀫, 𑀲𑀻𑀯𑀮𑁄 𑀦𑀸𑀫 𑀧𑀼𑀢𑁆𑀢𑁄, 𑀅𑀲𑁆𑀲𑀬𑀸𑀦𑁂𑀦 𑀦𑀺𑀓𑁆𑀔𑀫𑀺. 𑀉𑀢𑁆𑀢𑀭𑀸𑀭𑀸𑀫𑁂 𑀯𑀲𑀺. 𑀉𑀢𑁆𑀢𑀭𑁄 𑀦𑀸𑀫 𑀉𑀧𑀝𑁆𑀞𑀸𑀓𑁄, 𑀢𑀲𑁆𑀫𑀺𑀁 𑀧𑀦 𑀦𑀯𑀼𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀞𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀤𑀲𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑀸𑀦𑀺 𑀏𑀓𑀦𑁆𑀥𑀓𑀸𑀭𑀸𑀦𑀺 𑀅𑀳𑁂𑀲𑀼𑀁. 𑀲𑀩𑁆𑀩𑀘𑀓𑁆𑀓𑀯𑀸𑀴𑁂𑀲𑀼 𑀫𑀦𑀼𑀲𑁆𑀲𑀸𑀦𑀁 𑀫𑀳𑀦𑁆𑀢𑀁 𑀆𑀭𑁄𑀤𑀦𑀧𑀭𑀺𑀤𑁂𑀯𑀦𑀁 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋

𑁧𑁮. ‘‘𑀉𑀢𑁆𑀢𑀭𑀁 𑀦𑀸𑀫 𑀦𑀕𑀭𑀁, 𑀉𑀢𑁆𑀢𑀭𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀉𑀢𑁆𑀢𑀭𑀸 𑀦𑀸𑀫 𑀚𑀦𑀺𑀓𑀸, 𑀫𑀗𑁆𑀕𑀮𑀲𑁆𑀲 𑀫𑀳𑁂𑀲𑀺𑀦𑁄.

𑁨𑁩. ‘‘𑀲𑀼𑀤𑁂𑀯𑁄 𑀥𑀫𑁆𑀫𑀲𑁂𑀦𑁄 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀓𑀸;

𑀧𑀸𑀮𑀺𑀢𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀫𑀗𑁆𑀕𑀮𑀲𑁆𑀲 𑀫𑀳𑁂𑀲𑀺𑀦𑁄.

𑁨𑁪. ‘‘𑀲𑀻𑀯𑀮𑀸 𑀘 𑀅𑀲𑁄𑀓𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀺𑀓𑀸;

𑀩𑁄𑀥𑀺 𑀢𑀲𑁆𑀲 𑀪𑀕𑀯𑀢𑁄, 𑀦𑀸𑀕𑀭𑀼𑀓𑁆𑀔𑁄𑀢𑀺 𑀯𑀼𑀘𑁆𑀘𑀢𑀺.

𑁨𑁬. ‘‘𑀅𑀝𑁆𑀞𑀸𑀲𑀻𑀢𑀺 𑀭𑀢𑀦𑀸𑀦𑀺, 𑀅𑀘𑁆𑀘𑀼𑀕𑁆𑀕𑀢𑁄 𑀫𑀳𑀸𑀫𑀼𑀦𑀺;

𑀢𑀢𑁄 𑀦𑀺𑀤𑁆𑀥𑀸𑀯𑀢𑀻 𑀭𑀁𑀲𑀻, 𑀅𑀦𑁂𑀓𑀲𑀢𑀲𑀳𑀲𑁆𑀲𑀺𑀬𑁄.

𑁨𑁭. ‘‘𑀦𑀯𑀼𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀆𑀬𑀼 𑀯𑀺𑀚𑁆𑀚𑀢𑀺 𑀢𑀸𑀯𑀤𑁂;

𑀢𑀸𑀯𑀢𑀸 𑀢𑀺𑀝𑁆𑀞𑀫𑀸𑀦𑁄 𑀲𑁄, 𑀢𑀸𑀭𑁂𑀲𑀺 𑀚𑀦𑀢𑀁 𑀩𑀳𑀼𑀁.

𑁨𑁮. ‘‘𑀬𑀣𑀸𑀧𑀺 𑀲𑀸𑀕𑀭𑁂 𑀊𑀫𑀻, 𑀦 𑀲𑀓𑁆𑀓𑀸 𑀢𑀸 𑀕𑀡𑁂𑀢𑀼𑀬𑁂;

𑀢𑀣𑁂𑀯 𑀲𑀸𑀯𑀓𑀸 𑀢𑀲𑁆𑀲, 𑀦 𑀲𑀓𑁆𑀓𑀸 𑀢𑁂 𑀕𑀡𑁂𑀢𑀼𑀬𑁂.

𑁨𑁯. ‘‘𑀬𑀸𑀯 𑀅𑀝𑁆𑀞𑀸𑀲𑀺 𑀲𑀫𑁆𑀩𑀼𑀤𑁆𑀥𑁄, 𑀫𑀗𑁆𑀕𑀮𑁄 𑀮𑁄𑀓𑀦𑀸𑀬𑀓𑁄;

𑀦 𑀢𑀲𑁆𑀲 𑀲𑀸𑀲𑀦𑁂 𑀅𑀢𑁆𑀣𑀺, 𑀲𑀓𑀺𑀮𑁂𑀲𑀫𑀭𑀡𑀁 𑀢𑀤𑀸.

𑁩𑁦. ‘‘𑀥𑀫𑁆𑀫𑁄𑀓𑁆𑀓𑀁 𑀥𑀸𑀭𑀬𑀺𑀢𑁆𑀯𑀸𑀦, 𑀲𑀦𑁆𑀢𑀸𑀭𑁂𑀢𑁆𑀯𑀸 𑀫𑀳𑀸𑀚𑀦𑀁;

𑀚𑀮𑀺𑀢𑁆𑀯𑀸 𑀥𑀼𑀫𑀓𑁂𑀢𑀽𑀯, 𑀦𑀺𑀩𑁆𑀩𑀼𑀢𑁄 𑀲𑁄 𑀫𑀳𑀸𑀬𑀲𑁄.

𑁩𑁧. ‘‘𑀲𑀗𑁆𑀔𑀸𑀭𑀸𑀦𑀁 𑀲𑀪𑀸𑀯𑀢𑁆𑀢𑀁, 𑀤𑀲𑁆𑀲𑀬𑀺𑀢𑁆𑀯𑀸 𑀲𑀤𑁂𑀯𑀓𑁂;

𑀚𑀮𑀺𑀢𑁆𑀯𑀸 𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀯, 𑀲𑀽𑀭𑀺𑀬𑁄 𑀅𑀢𑁆𑀣𑀗𑁆𑀕𑀢𑁄 𑀬𑀣𑀸’’𑀢𑀺.

𑀢𑀢𑁆𑀣 𑀢𑀢𑁄𑀢𑀺 𑀢𑀲𑁆𑀲 𑀫𑀗𑁆𑀕𑀮𑀲𑁆𑀲 𑀲𑀭𑀻𑀭𑀢𑁄. 𑀦𑀺𑀤𑁆𑀥𑀸𑀯𑀢𑀻𑀢𑀺 𑀦𑀺𑀤𑁆𑀥𑀸𑀯𑀦𑁆𑀢𑀺, 𑀯𑀘𑀦𑀯𑀺𑀧𑀭𑀺𑀬𑀸𑀬𑁄 𑀤𑀝𑁆𑀞𑀩𑁆𑀩𑁄. 𑀭𑀁𑀲𑀻𑀢𑀺 𑀭𑀲𑁆𑀫𑀺𑀬𑁄. 𑀅𑀦𑁂𑀓𑀲𑀢𑀲𑀳𑀲𑁆𑀲𑀺𑀬𑁄𑀢𑀺 𑀅𑀦𑁂𑀓𑀲𑀢𑀲𑀳𑀲𑁆𑀲𑀸. 𑀊𑀫𑀻𑀢𑀺 𑀯𑀻𑀘𑀺𑀬𑁄 𑀢𑀭𑀗𑁆𑀕𑀸. 𑀕𑀡𑁂𑀢𑀼𑀬𑁂𑀢𑀺 𑀕𑀡𑁂𑀢𑀼𑀁 𑀲𑀗𑁆𑀔𑀸𑀢𑀼𑀁. 𑀏𑀢𑁆𑀢𑀓𑀸 𑀲𑀸𑀕𑀭𑁂 𑀊𑀫𑀺𑀬𑁄𑀢𑀺 𑀬𑀣𑀸 𑀦 𑀲𑀓𑁆𑀓𑀸 𑀕𑀡𑁂𑀢𑀼𑀁, 𑀏𑀯𑀁 𑀢𑀲𑁆𑀲 𑀪𑀕𑀯𑀢𑁄 𑀲𑀸𑀯𑀓𑀸𑀧𑀺 𑀦 𑀲𑀓𑁆𑀓𑀸 𑀕𑀡𑁂𑀢𑀼𑀁, 𑀅𑀣 𑀔𑁄 𑀕𑀡𑀦𑀧𑀣𑀁 𑀯𑀻𑀢𑀺𑀯𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀬𑀸𑀯𑀸𑀢𑀺 𑀬𑀸𑀯𑀢𑀓𑀁 𑀓𑀸𑀮𑀁. 𑀲𑀓𑀺𑀮𑁂𑀲𑀫𑀭𑀡𑀁 𑀢𑀤𑀸𑀢𑀺 𑀲𑀳 𑀓𑀺𑀮𑁂𑀲𑁂𑀳𑀺 𑀲𑀓𑀺𑀮𑁂𑀲𑁄, 𑀲𑀓𑀺𑀮𑁂𑀲𑀲𑁆𑀲 𑀫𑀭𑀡𑀁 𑀲𑀓𑀺𑀮𑁂𑀲𑀫𑀭𑀡𑀁, 𑀢𑀁 𑀦𑀢𑁆𑀣𑀺. 𑀢𑀤𑀸 𑀓𑀺𑀭 𑀢𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀲𑀸𑀯𑀓𑀸 𑀲𑀩𑁆𑀩𑁂 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸𑀬𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀺𑀁𑀲𑀼. 𑀧𑀼𑀣𑀼𑀚𑁆𑀚𑀦𑀸 𑀯𑀸 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀯𑀸 𑀳𑀼𑀢𑁆𑀯𑀸 𑀦 𑀓𑀸𑀮𑀫𑀓𑀁𑀲𑀽𑀢𑀺 𑀅𑀢𑁆𑀣𑁄. 𑀓𑁂𑀘𑀺 ‘‘𑀲𑀫𑁆𑀫𑁄𑀳𑀫𑀸𑀭𑀡𑀁 𑀢𑀤𑀸’’𑀢𑀺 𑀧𑀞𑀦𑁆𑀢𑀺.

𑀥𑀫𑁆𑀫𑁄𑀓𑁆𑀓𑀦𑁆𑀢𑀺 𑀥𑀫𑁆𑀫𑀤𑀻𑀧𑀓𑀁. 𑀥𑀽𑀫𑀓𑁂𑀢𑀽𑀢𑀺 𑀅𑀕𑁆𑀕𑀺 𑀯𑀼𑀘𑁆𑀘𑀢𑀺, 𑀇𑀥 𑀧𑀦 𑀧𑀤𑀻𑀧𑁄 𑀤𑀝𑁆𑀞𑀩𑁆𑀩𑁄 𑀢𑀲𑁆𑀫𑀸 𑀧𑀤𑀻𑀧𑁄 𑀯𑀺𑀬 𑀚𑀮𑀺𑀢𑁆𑀯𑀸 𑀦𑀺𑀩𑁆𑀩𑀼𑀢𑁄𑀢𑀺 𑀅𑀢𑁆𑀣𑁄. 𑀫𑀳𑀸𑀬𑀲𑁄𑀢𑀺 𑀫𑀳𑀸𑀧𑀭𑀺𑀯𑀸𑀭𑁄. 𑀓𑁂𑀘𑀺 ‘‘𑀦𑀺𑀩𑁆𑀩𑀼𑀢𑁄 𑀲𑁄 𑀲𑀲𑀸𑀯𑀓𑁄’’𑀢𑀺 𑀧𑀞𑀦𑁆𑀢𑀺. 𑀲𑀗𑁆𑀔𑀸𑀭𑀸𑀦𑀦𑁆𑀢𑀺 𑀲𑀗𑁆𑀔𑀸𑀢𑀥𑀫𑁆𑀫𑀸𑀦𑀁 𑀲𑀧𑁆𑀧𑀘𑁆𑀘𑀬𑀥𑀫𑁆𑀫𑀸𑀦𑀁. 𑀲𑀪𑀸𑀯𑀢𑁆𑀢𑀦𑁆𑀢𑀺 𑀅𑀦𑀺𑀘𑁆𑀘𑀸𑀤𑀺𑀲𑀸𑀫𑀜𑁆𑀜𑀮𑀓𑁆𑀔𑀡𑀁. 𑀲𑀽𑀭𑀺𑀬𑁄 𑀅𑀢𑁆𑀣𑀗𑁆𑀕𑀢𑁄 𑀬𑀣𑀸𑀢𑀺 𑀬𑀣𑀸 𑀲𑀳𑀲𑁆𑀲𑀓𑀺𑀭𑀡𑁄 𑀤𑀺𑀯𑀲𑀓𑀭𑁄 𑀲𑀩𑁆𑀩𑀁 𑀢𑀫𑀕𑀡𑀁 𑀯𑀺𑀥𑀫𑀺𑀢𑁆𑀯𑀸 𑀲𑀩𑁆𑀩𑀜𑁆𑀘 𑀮𑁄𑀓𑀁 𑀑𑀪𑀸𑀲𑁂𑀢𑁆𑀯𑀸 𑀅𑀢𑁆𑀣𑀫𑀼𑀧𑀕𑀘𑁆𑀙𑀢𑀺, 𑀏𑀯𑀁 𑀫𑀗𑁆𑀕𑀮𑀤𑀺𑀯𑀲𑀓𑀭𑁄𑀧𑀺 𑀯𑁂𑀦𑁂𑀬𑁆𑀬𑀓𑀫𑀮𑀯𑀦𑀯𑀺𑀓𑀲𑀦𑀓𑀭𑁄 𑀲𑀩𑁆𑀩𑀁 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀮𑁄𑀓𑀢𑀫𑀁 𑀯𑀺𑀥𑀫𑀺𑀢𑁆𑀯𑀸 𑀅𑀢𑁆𑀢𑀦𑁄 𑀲𑀭𑀻𑀭𑀧𑁆𑀧𑀪𑀸𑀬 𑀚𑀮𑀺𑀢𑁆𑀯𑀸 𑀅𑀢𑁆𑀣𑀗𑁆𑀕𑀢𑁄𑀢𑀺 𑀅𑀢𑁆𑀣𑁄. 𑀲𑁂𑀲𑀕𑀸𑀣𑀸 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀸 𑀏𑀯𑀸𑀢𑀺.

𑀫𑀗𑁆𑀕𑀮𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑁄 𑀢𑀢𑀺𑀬𑁄 𑀩𑀼𑀤𑁆𑀥𑀯𑀁𑀲𑁄.