𑁬. 𑀩𑀸𑀳𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀙𑀝𑁆𑀞𑀸𑀧𑀤𑀸𑀦𑁂 𑀇𑀢𑁄 𑀲𑀢𑀲𑀳𑀲𑁆𑀲𑀫𑁆𑀳𑀻𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀩𑀸𑀳𑀺𑀬𑀲𑁆𑀲 𑀤𑀸𑀭𑀼𑀘𑀻𑀭𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀲𑀺𑀧𑁆𑀧𑁂𑀲𑀼 𑀦𑀺𑀧𑁆𑀨𑀢𑁆𑀢𑀺𑀁 𑀕𑀦𑁆𑀢𑁆𑀯𑀸 𑀯𑁂𑀤𑀗𑁆𑀕𑁂𑀲𑀼 𑀅𑀦𑀯𑀬𑁄 𑀏𑀓𑀤𑀺𑀯𑀲𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀧𑀲𑀦𑁆𑀦𑀫𑀸𑀦𑀲𑁄 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀢𑀁 𑀞𑀸𑀦𑀁 𑀧𑀢𑁆𑀢𑀼𑀓𑀸𑀫𑁄 𑀲𑀢𑁆𑀢𑀸𑀳𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀲𑀢𑁆𑀢𑀸𑀳𑀲𑁆𑀲 𑀅𑀘𑁆𑀘𑀬𑁂𑀦 𑀪𑀕𑀯𑀢𑁄 𑀧𑀸𑀤𑀫𑀽𑀮𑁂 𑀦𑀺𑀧𑀦𑁆𑀦𑁄 ‘‘𑀪𑀕𑀯𑀸, 𑀪𑀦𑁆𑀢𑁂, 𑀇𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀬𑀁 𑀪𑀺𑀓𑁆𑀔𑀼𑀁 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀺, 𑀲𑁄 𑀯𑀺𑀬 𑀅𑀳𑀫𑁆𑀧𑀺 𑀅𑀦𑀸𑀕𑀢𑁂 𑀏𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀦𑀁 𑀅𑀕𑁆𑀕𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀦𑀁 𑀅𑀓𑀸𑀲𑀺. 𑀪𑀕𑀯𑀸 𑀅𑀦𑀸𑀕𑀢𑀁𑀲𑀜𑀸𑀡𑁂𑀦 𑀑𑀮𑁄𑀓𑁂𑀢𑁆𑀯𑀸 𑀲𑀫𑀺𑀚𑁆𑀛𑀦𑀪𑀸𑀯𑀁 𑀜𑀢𑁆𑀯𑀸 ‘‘𑀅𑀦𑀸𑀕𑀢𑁂 𑀕𑁄𑀢𑀫𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀦𑀁 𑀅𑀕𑁆𑀕𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀲𑁄 𑀬𑀸𑀯𑀢𑀸𑀬𑀼𑀓𑀁 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄 𑀢𑀢𑁆𑀣 𑀙 𑀓𑀸𑀫𑀸𑀯𑀘𑀭𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀧𑀼𑀦 𑀫𑀦𑀼𑀲𑁆𑀲𑁂𑀲𑀼 𑀘𑀓𑁆𑀓𑀯𑀢𑁆𑀢𑀺𑀆𑀤𑀺𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑁂𑀓𑀓𑀧𑁆𑀧𑀓𑁄𑀝𑀺𑀲𑀢𑁂𑀲𑀼 𑀅𑀦𑀼𑀪𑀯𑀺𑀢𑁆𑀯𑀸 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀏𑀓𑀲𑁆𑀫𑀺𑀁 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄, 𑀪𑀕𑀯𑀢𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀧𑀩𑁆𑀩𑀚𑀺𑀢𑁄 𑀬𑀤𑀸 𑀲𑀸𑀲𑀦𑁂 𑀑𑀲𑀓𑁆𑀓𑀫𑀸𑀦𑁂 𑀲𑀢𑁆𑀢 𑀪𑀺𑀓𑁆𑀔𑀽 𑀘𑀢𑀼𑀦𑁆𑀦𑀁 𑀧𑀭𑀺𑀲𑀸𑀦𑀁 𑀅𑀚𑁆𑀛𑀸𑀘𑀸𑀭𑀁 𑀤𑀺𑀲𑁆𑀯𑀸 𑀲𑀁𑀯𑁂𑀕𑀧𑁆𑀧𑀢𑁆𑀢𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 ‘‘𑀬𑀸𑀯 𑀲𑀸𑀲𑀦𑀲𑁆𑀲 𑀅𑀦𑁆𑀢𑀭𑀥𑀸𑀦𑀁 𑀦 𑀳𑁄𑀢𑀺, 𑀢𑀸𑀯 𑀅𑀢𑁆𑀢𑀦𑁄 𑀧𑀢𑀺𑀝𑁆𑀞𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀲𑀼𑀯𑀡𑁆𑀡𑀘𑁂𑀢𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 𑀢𑀢𑁆𑀣 𑀅𑀭𑀜𑁆𑀜𑁂 𑀏𑀓𑀁 𑀧𑀩𑁆𑀩𑀢𑀁 𑀤𑀺𑀲𑁆𑀯𑀸 ‘‘𑀚𑀻𑀯𑀺𑀢𑀲𑀸𑀮𑀬𑀸 𑀦𑀺𑀯𑀢𑁆𑀢𑀦𑁆𑀢𑀼, 𑀦𑀺𑀭𑀸𑀮𑀬𑀸 𑀇𑀫𑀁 𑀧𑀩𑁆𑀩𑀢𑀁 𑀅𑀪𑀺𑀭𑀼𑀳𑀦𑁆𑀢𑀽’’𑀢𑀺 𑀦𑀺𑀲𑁆𑀲𑁂𑀡𑀺𑀁 𑀩𑀦𑁆𑀥𑀺𑀢𑁆𑀯𑀸 𑀲𑀩𑁆𑀩𑁂 𑀢𑀁 𑀧𑀩𑁆𑀩𑀢𑀁 𑀅𑀪𑀺𑀭𑀼𑀬𑁆𑀳 𑀦𑀺𑀲𑁆𑀲𑁂𑀡𑀺𑀁 𑀧𑀸𑀢𑁂𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑀺𑀁𑀲𑀼. 𑀢𑁂𑀲𑀼 𑀲𑀗𑁆𑀖𑀢𑁆𑀣𑁂𑀭𑁄 𑀏𑀓𑀭𑀢𑁆𑀢𑀸𑀢𑀺𑀓𑁆𑀓𑀫𑁂𑀦 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀲𑁄 𑀅𑀦𑁄𑀢𑀢𑁆𑀢𑀤𑀳𑁂 𑀦𑀸𑀕𑀮𑀢𑀸𑀤𑀦𑁆𑀢𑀓𑀝𑁆𑀞𑀁 𑀔𑀸𑀤𑀺𑀢𑁆𑀯𑀸 𑀫𑀼𑀔𑀁 𑀥𑁄𑀯𑀺𑀢𑁆𑀯𑀸 𑀉𑀢𑁆𑀢𑀭𑀓𑀼𑀭𑀼𑀢𑁄 𑀧𑀺𑀡𑁆𑀟𑀧𑀸𑀢𑀁 𑀆𑀳𑀭𑀺𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀆𑀳 𑁋 ‘‘𑀆𑀯𑀼𑀲𑁄, 𑀇𑀫𑀁 𑀧𑀺𑀡𑁆𑀟𑀧𑀸𑀢𑀁 𑀪𑀼𑀜𑁆𑀚𑀣𑀸’’𑀢𑀺. 𑀢𑁂 𑀆𑀳𑀁𑀲𑀼 𑁋 ‘‘𑀓𑀺𑀁, 𑀪𑀦𑁆𑀢𑁂, 𑀅𑀫𑁆𑀳𑁂𑀳𑀺 𑀏𑀯𑀁 𑀓𑀢𑀺𑀓𑀸 𑀓𑀢𑀸 ‘𑀬𑁄 𑀧𑀞𑀫𑀁 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀢𑁂𑀦𑀸𑀪𑀢𑀁 𑀧𑀺𑀡𑁆𑀟𑀧𑀸𑀢𑀁 𑀅𑀯𑀲𑁂𑀲𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀽’’’𑀢𑀺? ‘‘𑀦𑁄 𑀳𑁂𑀢𑀁, 𑀆𑀯𑀼𑀲𑁄’’𑀢𑀺. ‘‘𑀢𑁂𑀦 𑀳𑀺 𑀲𑀘𑁂 𑀫𑀬𑀫𑁆𑀧𑀺 𑀢𑀼𑀫𑁆𑀳𑁂 𑀯𑀺𑀬 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀲𑁆𑀲𑀸𑀫, 𑀲𑀬𑀁 𑀆𑀳𑀭𑀺𑀢𑁆𑀯𑀸 𑀪𑀼𑀜𑁆𑀚𑀺𑀲𑁆𑀲𑀸𑀫𑀸’’𑀢𑀺 𑀦 𑀇𑀘𑁆𑀙𑀺𑀁𑀲𑀼.

𑀤𑀼𑀢𑀺𑀬𑀤𑀺𑀯𑀲𑁂 𑀤𑀼𑀢𑀺𑀬𑀢𑁆𑀣𑁂𑀭𑁄 𑀅𑀦𑀸𑀕𑀸𑀫𑀻 𑀳𑀼𑀢𑁆𑀯𑀸 𑀢𑀣𑁂𑀯 𑀧𑀺𑀡𑁆𑀟𑀧𑀸𑀢𑀁 𑀆𑀳𑀭𑀺𑀢𑁆𑀯𑀸 𑀇𑀢𑀭𑁂 𑀦𑀺𑀫𑀦𑁆𑀢𑁂𑀲𑀺. 𑀢𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀓𑀺𑀁 𑀧𑀦𑀸𑀯𑀼𑀲𑁄, 𑀓𑀢𑀺𑀓𑀸 𑀓𑀢𑀸, ‘𑀫𑀳𑀸𑀣𑁂𑀭𑁂𑀦 𑀆𑀪𑀢𑀁 𑀧𑀺𑀡𑁆𑀟𑀧𑀸𑀢𑀁 𑀅𑀪𑀼𑀜𑁆𑀚𑀺𑀢𑁆𑀯𑀸 𑀅𑀦𑀼𑀣𑁂𑀭𑁂𑀦 𑀆𑀪𑀢𑀁 𑀪𑀼𑀜𑁆𑀚𑀺𑀲𑁆𑀲𑀸𑀫𑀸’’’𑀢𑀺? ‘‘𑀦𑁄 𑀳𑁂𑀢𑀁, 𑀆𑀯𑀼𑀲𑁄’’𑀢𑀺. ‘‘𑀏𑀯𑀁 𑀲𑀦𑁆𑀢𑁂 𑀢𑀼𑀫𑁆𑀳𑁂 𑀯𑀺𑀬 𑀫𑀬𑀫𑁆𑀧𑀺 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀼𑀭𑀺𑀲𑀓𑀸𑀭𑁂𑀦 𑀪𑀼𑀜𑁆𑀚𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀸 𑀪𑀼𑀜𑁆𑀚𑀺𑀲𑁆𑀲𑀸𑀫𑀸’’𑀢𑀺 𑀦 𑀇𑀘𑁆𑀙𑀺𑀁𑀲𑀼. 𑀢𑁂𑀲𑀼 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀢𑁆𑀣𑁂𑀭𑁄 𑀧𑀭𑀺𑀦𑀺𑀩𑁆𑀩𑀸𑀬𑀺, 𑀤𑀼𑀢𑀺𑀬𑁄 𑀅𑀦𑀸𑀕𑀸𑀫𑀻 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺, 𑀇𑀢𑀭𑁂 𑀧𑀜𑁆𑀘 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀲𑀼𑀲𑁆𑀲𑀺𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀓𑀸𑀮𑀁 𑀓𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀢𑀢𑁆𑀣 𑀤𑀺𑀩𑁆𑀩𑀲𑀼𑀔𑀁 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀢𑀢𑁄 𑀘𑀯𑀺𑀢𑁆𑀯𑀸 𑀫𑀦𑀼𑀲𑁆𑀲𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀢𑁂𑀲𑀼 𑀏𑀓𑁄 𑀧𑀼𑀓𑁆𑀓𑀼𑀲𑀸𑀢𑀺 𑀭𑀸𑀚𑀸 𑀅𑀳𑁄𑀲𑀺, 𑀏𑀓𑁄 𑀕𑀦𑁆𑀥𑀸𑀭𑀭𑀝𑁆𑀞𑁂 𑀢𑀓𑁆𑀓𑀲𑀺𑀮𑀸𑀬𑀁 𑀓𑀼𑀫𑀸𑀭𑀓𑀲𑁆𑀲𑀧𑁄, 𑀏𑀓𑁄 𑀩𑀸𑀳𑀺𑀬𑁄 𑀤𑀸𑀭𑀼𑀘𑀻𑀭𑀺𑀬𑁄, 𑀏𑀓𑁄 𑀤𑀩𑁆𑀩𑁄 𑀫𑀮𑁆𑀮𑀧𑀼𑀢𑁆𑀢𑁄, 𑀏𑀓𑁄 𑀲𑀪𑀺𑀬𑁄 𑀧𑀭𑀺𑀩𑁆𑀩𑀸𑀚𑀓𑁄𑀢𑀺. 𑀢𑁂𑀲𑀼 𑀅𑀬𑀁 𑀩𑀸𑀳𑀺𑀬𑁄 𑀤𑀸𑀭𑀼𑀘𑀻𑀭𑀺𑀬𑁄 𑀲𑀼𑀧𑁆𑀧𑀸𑀭𑀓𑀧𑀝𑁆𑀝𑀦𑁂 𑀯𑀸𑀡𑀺𑀚𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀸𑀡𑀺𑀚𑀓𑀫𑁆𑀫𑁂 𑀦𑀺𑀧𑁆𑀨𑀢𑁆𑀢𑀺𑀁 𑀕𑀢𑁄 𑀫𑀳𑀤𑁆𑀥𑀦𑁄 𑀫𑀳𑀸𑀪𑁄𑀕𑁄, 𑀲𑁄 𑀲𑀼𑀯𑀡𑁆𑀡𑀪𑀽𑀫𑀺𑀁 𑀕𑀘𑁆𑀙𑀦𑁆𑀢𑁂𑀳𑀺 𑀯𑀸𑀡𑀺𑀚𑁂𑀳𑀺 𑀲𑀤𑁆𑀥𑀺𑀁 𑀦𑀸𑀯𑀫𑀸𑀭𑀼𑀬𑁆𑀳 𑀯𑀺𑀤𑁂𑀲𑀁 𑀕𑀘𑁆𑀙𑀦𑁆𑀢𑁄 𑀓𑀢𑀺𑀧𑀸𑀳𑀁 𑀕𑀦𑁆𑀢𑁆𑀯𑀸 𑀪𑀺𑀦𑁆𑀦𑀸𑀬 𑀦𑀸𑀯𑀸𑀬 𑀲𑁂𑀲𑁂𑀲𑀼 𑀫𑀘𑁆𑀙𑀓𑀘𑁆𑀙𑀧𑀪𑀓𑁆𑀔𑁂𑀲𑀼 𑀚𑀸𑀢𑁂𑀲𑀼 𑀏𑀓𑁄𑀬𑁂𑀯 𑀅𑀯𑀲𑀺𑀝𑁆𑀞𑁄 𑀏𑀓𑀁 𑀨𑀮𑀓𑀁 𑀕𑀳𑁂𑀢𑁆𑀯𑀸 𑀯𑀸𑀬𑀫𑀦𑁆𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀼𑀧𑁆𑀧𑀸𑀭𑀓𑀧𑀝𑁆𑀝𑀦𑀢𑀻𑀭𑀁 𑀑𑀓𑁆𑀓𑀫𑀺. 𑀢𑀲𑁆𑀲 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀁 𑀦𑀢𑁆𑀣𑀺, 𑀲𑁄 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀅𑀧𑀲𑁆𑀲𑀦𑁆𑀢𑁄 𑀲𑀼𑀓𑁆𑀔𑀓𑀝𑁆𑀞𑀤𑀡𑁆𑀟𑀓𑁂 𑀯𑀸𑀓𑁂𑀳𑀺 𑀧𑀮𑀺𑀯𑁂𑀞𑁂𑀢𑁆𑀯𑀸 𑀦𑀺𑀯𑀸𑀲𑁂𑀢𑁆𑀯𑀸 𑀧𑀸𑀭𑀼𑀧𑀺𑀢𑁆𑀯𑀸 𑀘 𑀤𑁂𑀯𑀓𑀼𑀮𑀢𑁄 𑀓𑀧𑀸𑀮𑀁 𑀕𑀳𑁂𑀢𑁆𑀯𑀸 𑀲𑀼𑀧𑁆𑀧𑀸𑀭𑀓𑀧𑀝𑁆𑀝𑀦𑀁 𑀅𑀕𑀫𑀸𑀲𑀺. 𑀫𑀦𑀼𑀲𑁆𑀲𑀸 𑀢𑀁 𑀤𑀺𑀲𑁆𑀯𑀸 𑀬𑀸𑀕𑀼𑀪𑀢𑁆𑀢𑀸𑀤𑀻𑀦𑀺 𑀤𑀢𑁆𑀯𑀸 ‘‘𑀅𑀬𑀁 𑀏𑀓𑁄 𑀅𑀭𑀳𑀸’’𑀢𑀺 𑀲𑀫𑁆𑀪𑀸𑀯𑁂𑀲𑀼𑀁. 𑀲𑁄 𑀯𑀢𑁆𑀣𑁂𑀲𑀼 𑀉𑀧𑀦𑀻𑀢𑁂𑀲𑀼 ‘‘𑀲𑀘𑀸𑀳𑀁 𑀦𑀺𑀯𑀸𑀲𑁂𑀫𑀺, 𑀧𑀸𑀭𑀼𑀧𑀸𑀫𑀺 𑀯𑀸, 𑀮𑀸𑀪𑀲𑀓𑁆𑀓𑀸𑀭𑁄 𑀫𑁂 𑀧𑀭𑀺𑀳𑀸𑀬𑀺𑀲𑁆𑀲𑀢𑀻’’𑀢𑀺 𑀢𑀸𑀦𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀤𑀸𑀭𑀼𑀘𑀻𑀭𑀸𑀦𑁂𑀯 𑀧𑀭𑀺𑀳𑀭𑀺.

𑀅𑀣𑀲𑁆𑀲 ‘‘𑀅𑀭𑀳𑀸, 𑀅𑀭𑀳𑀸’’𑀢𑀺 𑀩𑀳𑀽𑀳𑀺 𑀲𑀫𑁆𑀪𑀸𑀯𑀺𑀬𑀫𑀸𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 ‘‘𑀬𑁂 𑀓𑁂𑀘𑀺 𑀮𑁄𑀓𑁂 𑀅𑀭𑀳𑀦𑁆𑀢𑁄 𑀯𑀸 𑀅𑀭𑀳𑀢𑁆𑀢𑀫𑀕𑁆𑀕𑀁 𑀯𑀸 𑀲𑀫𑀸𑀧𑀦𑁆𑀦𑀸, 𑀅𑀳𑀁 𑀢𑁂𑀲𑀁 𑀅𑀜𑁆𑀜𑀢𑀭𑁄’’𑀢𑀺 𑀲𑁄 𑀢𑁂𑀦 𑀦𑀺𑀬𑀸𑀫𑁂𑀦 𑀓𑀼𑀳𑀦𑀓𑀫𑁆𑀫𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺.

𑀓𑀲𑁆𑀲𑀧𑀤𑀲𑀩𑀮𑀲𑁆𑀲 𑀲𑀸𑀲𑀦𑁂 𑀲𑀢𑁆𑀢𑀲𑀼 𑀚𑀦𑁂𑀲𑀼 𑀧𑀩𑁆𑀩𑀢𑀁 𑀆𑀭𑀼𑀬𑁆𑀳 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁂𑀲𑀼 𑀏𑀓𑁄 𑀅𑀦𑀸𑀕𑀸𑀫𑀻 𑀳𑀼𑀢𑁆𑀯𑀸 𑀲𑀼𑀤𑁆𑀥𑀸𑀯𑀸𑀲𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀅𑀢𑁆𑀢𑀦𑁄 𑀩𑁆𑀭𑀳𑁆𑀫𑀲𑀫𑁆𑀧𑀢𑁆𑀢𑀺𑀁 𑀑𑀮𑁄𑀓𑁂𑀦𑁆𑀢𑁄 𑀆𑀕𑀢𑀝𑁆𑀞𑀸𑀦𑀁 𑀆𑀯𑀚𑁆𑀚𑁂𑀦𑁆𑀢𑁄 𑀧𑀩𑁆𑀩𑀢𑀫𑀸𑀭𑀼𑀬𑁆𑀳 𑀲𑀫𑀡𑀥𑀫𑁆𑀫𑀁 𑀓𑀭𑀡𑀝𑁆𑀞𑀸𑀦𑀁 𑀤𑀺𑀲𑁆𑀯𑀸 𑀲𑁂𑀲𑀸𑀦𑀁 𑀦𑀺𑀩𑁆𑀩𑀢𑁆𑀢𑀦𑀝𑁆𑀞𑀸𑀦𑀁 𑀆𑀯𑀚𑁆𑀚𑁂𑀦𑁆𑀢𑁄 𑀏𑀓𑀲𑁆𑀲 𑀧𑀭𑀺𑀦𑀺𑀩𑁆𑀩𑀼𑀢𑀪𑀸𑀯𑀁 𑀇𑀢𑀭𑁂𑀲𑀜𑁆𑀘 𑀧𑀜𑁆𑀘𑀦𑁆𑀦𑀁 𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀪𑀸𑀯𑀁 𑀜𑀢𑁆𑀯𑀸 𑀢𑁂 𑀓𑀸𑀮𑀸𑀦𑀼𑀓𑀸𑀮𑀁 𑀆𑀯𑀚𑁆𑀚𑁂𑀲𑀺 ‘‘𑀇𑀫𑀲𑁆𑀫𑀺𑀁 𑀧𑀦 𑀓𑀸𑀮𑁂 𑀓𑀳𑀁 𑀦𑀼 𑀔𑁄 𑀢𑁂’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀤𑀸𑀭𑀼𑀘𑀻𑀭𑀺𑀬𑀁 𑀲𑀼𑀧𑁆𑀧𑀸𑀭𑀓𑀧𑀝𑁆𑀝𑀦𑀁 𑀦𑀺𑀲𑁆𑀲𑀸𑀬 𑀓𑀼𑀳𑀦𑀓𑀫𑁆𑀫𑁂𑀦 𑀚𑀻𑀯𑀺𑀢𑀁 𑀓𑀧𑁆𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀦𑀝𑁆𑀞𑁄 𑀯𑀢𑀸𑀬𑀁 𑀩𑀸𑀮𑁄, 𑀧𑀼𑀩𑁆𑀩𑁂 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄 𑀅𑀢𑀺𑀉𑀓𑁆𑀓𑀝𑁆𑀞𑀪𑀸𑀯𑁂𑀦 𑀅𑀭𑀳𑀢𑀸𑀧𑀺 𑀆𑀪𑀢𑀁 𑀧𑀺𑀡𑁆𑀟𑀧𑀸𑀢𑀁 𑀅𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀇𑀤𑀸𑀦𑀺 𑀉𑀤𑀭𑀳𑁂𑀢𑀼 𑀅𑀦𑀸𑀭𑀳𑀸𑀯 𑀲𑀫𑀸𑀦𑁄 𑀅𑀭𑀳𑀢𑁆𑀢𑀁 𑀧𑀝𑀺𑀚𑀸𑀦𑀺𑀢𑁆𑀯𑀸 𑀮𑁄𑀓𑀁 𑀯𑀜𑁆𑀘𑁂𑀦𑁆𑀢𑁄 𑀯𑀺𑀘𑀭𑀢𑀺, 𑀤𑀲𑀩𑀮𑀲𑁆𑀲 𑀉𑀧𑁆𑀧𑀦𑁆𑀦𑀪𑀸𑀯𑀁 𑀦 𑀚𑀸𑀦𑀸𑀢𑀺, 𑀕𑀘𑁆𑀙𑀸𑀫𑀺 𑀦𑀁 𑀲𑀁𑀯𑁂𑀚𑁂𑀢𑁆𑀯𑀸 𑀩𑀼𑀤𑁆𑀥𑀼𑀧𑁆𑀧𑀸𑀤𑀁 𑀚𑀸𑀦𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀔𑀡𑁂𑀦𑁂𑀯 𑀩𑁆𑀭𑀳𑁆𑀫𑀮𑁄𑀓𑀢𑁄 𑀑𑀢𑀭𑀺𑀢𑁆𑀯𑀸 𑀲𑀼𑀧𑁆𑀧𑀸𑀭𑀓𑀧𑀝𑁆𑀝𑀦𑁂 𑀭𑀢𑁆𑀢𑀺𑀪𑀸𑀕𑀲𑀫𑀦𑀦𑁆𑀢𑀭𑁂 𑀤𑀸𑀭𑀼𑀘𑀻𑀭𑀺𑀬𑀲𑁆𑀲 𑀲𑀫𑁆𑀫𑀼𑀔𑁂 𑀧𑀸𑀢𑀼𑀭𑀳𑁄𑀲𑀺. 𑀲𑁄 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑁂 𑀑𑀪𑀸𑀲𑀁 𑀤𑀺𑀲𑁆𑀯𑀸 𑀩𑀳𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀳𑀸𑀩𑁆𑀭𑀳𑁆𑀫𑀸𑀦𑀁 𑀤𑀺𑀲𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 ‘‘𑀓𑁂 𑀢𑀼𑀫𑁆𑀳𑁂’’𑀢𑀺 𑀧𑀼𑀘𑁆𑀙𑀺. ‘‘𑀅𑀳𑀁 𑀢𑀼𑀫𑁆𑀳𑀸𑀓𑀁 𑀧𑁄𑀭𑀸𑀡𑀓𑀲𑀳𑀸𑀬𑁄 𑀅𑀦𑀸𑀕𑀸𑀫𑀺𑀨𑀮𑀁 𑀧𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄, 𑀅𑀫𑁆𑀳𑀸𑀓𑀁 𑀲𑀩𑁆𑀩𑀚𑁂𑀝𑁆𑀞𑀓𑁄 𑀅𑀭𑀳𑀸 𑀳𑀼𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀢𑀼𑀫𑁆𑀳𑁂 𑀧𑀦 𑀧𑀜𑁆𑀘𑀚𑀦𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀸. 𑀲𑁆𑀯𑀸𑀳𑀁 𑀤𑀸𑀦𑀺 𑀢𑀁 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀓𑀼𑀳𑀦𑀓𑀫𑁆𑀫𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀤𑀫𑀺𑀢𑀼𑀁 𑀆𑀕𑀢𑁄’’𑀢𑀺 𑀯𑀢𑁆𑀯𑀸 𑀇𑀤𑀁 𑀓𑀸𑀭𑀡𑀁 𑀆𑀳 𑁋 ‘‘𑀦𑁂𑀯 𑀔𑁄 𑀢𑁆𑀯𑀁, 𑀩𑀸𑀳𑀺𑀬, 𑀅𑀭𑀳𑀸 𑀦𑀸𑀧𑀺 𑀅𑀭𑀳𑀢𑁆𑀢𑀫𑀕𑁆𑀕𑀁 𑀯𑀸 𑀲𑀫𑀸𑀧𑀦𑁆𑀦𑁄, 𑀲𑀸𑀧𑀺 𑀢𑁂 𑀧𑀝𑀺𑀧𑀤𑀸 𑀦𑀢𑁆𑀣𑀺, 𑀬𑀸𑀬 𑀢𑁆𑀯𑀁 𑀅𑀭𑀳𑀸 𑀯𑀸 𑀅𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑀁 𑀯𑀸 𑀲𑀫𑀸𑀧𑀦𑁆𑀦𑁄’’𑀢𑀺. 𑀅𑀣𑀲𑁆𑀲 𑀲𑀢𑁆𑀣𑀼 𑀉𑀧𑁆𑀧𑀦𑁆𑀦𑀪𑀸𑀯𑀁 𑀲𑀸𑀯𑀢𑁆𑀣𑀺𑀬𑀁 𑀯𑀲𑀦𑀪𑀸𑀯𑀜𑁆𑀘 𑀆𑀘𑀺𑀓𑁆𑀔𑀺𑀢𑁆𑀯𑀸 ‘‘𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀘𑁆𑀙𑀸’’𑀢𑀺 𑀢𑀁 𑀉𑀬𑁆𑀬𑁄𑀚𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀫𑁂𑀯 𑀅𑀕𑀫𑀸𑀲𑀺.

𑀩𑀸𑀳𑀺𑀬𑁄 𑀧𑀦 𑀆𑀓𑀸𑀲𑁂 𑀞𑀢𑁆𑀯𑀸 𑀓𑀣𑁂𑀦𑁆𑀢𑀁 𑀫𑀳𑀸𑀩𑁆𑀭𑀳𑁆𑀫𑀸𑀦𑀁 𑀑𑀮𑁄𑀓𑁂𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑁄 𑀪𑀸𑀭𑀺𑀬𑀁 𑀓𑀫𑁆𑀫𑀁 𑀫𑀬𑀸 𑀓𑀢𑀁, 𑀅𑀦𑀭𑀳𑀁 𑀅𑀭𑀳𑀸 𑀅𑀳𑀦𑁆𑀢𑀺 𑀘𑀺𑀦𑁆𑀢𑁂𑀲𑀺𑀁, 𑀅𑀬𑀜𑁆𑀘 𑀫𑀁 ‘𑀦 𑀢𑁆𑀯𑀁 𑀅𑀭𑀳𑀸, 𑀦𑀸𑀧𑀺 𑀅𑀭𑀳𑀢𑁆𑀢𑀫𑀕𑁆𑀕𑀁 𑀯𑀸 𑀲𑀫𑀸𑀧𑀦𑁆𑀦𑀸𑀲𑀻’𑀢𑀺 𑀯𑀤𑀢𑀺, 𑀅𑀢𑁆𑀣𑀺 𑀦𑀼 𑀔𑁄 𑀮𑁄𑀓𑁂 𑀅𑀜𑁆𑀜𑁄 𑀅𑀭𑀳𑀸’’𑀢𑀺. 𑀅𑀣 𑀦𑀁 𑀧𑀼𑀘𑁆𑀙𑀺 𑁋 ‘‘𑀅𑀣 𑀓𑁂 𑀘𑀭𑀳𑀺 𑀲𑀤𑁂𑀯𑀓𑁂 𑀮𑁄𑀓𑁂 𑀅𑀭𑀳𑀦𑁆𑀢𑁄 𑀯𑀸 𑀅𑀭𑀳𑀢𑁆𑀢𑀫𑀕𑁆𑀕𑀁 𑀯𑀸 𑀲𑀫𑀸𑀧𑀦𑁆𑀦𑀸’’𑀢𑀺. 𑀅𑀣𑀲𑁆𑀲 𑀤𑁂𑀯𑀢𑀸 𑀆𑀘𑀺𑀓𑁆𑀔𑀺 𑁋 ‘‘𑀅𑀢𑁆𑀣𑀺, 𑀩𑀸𑀳𑀺𑀬, 𑀉𑀢𑁆𑀢𑀭𑁂𑀲𑀼 𑀚𑀦𑀧𑀤𑁂𑀲𑀼 𑀲𑀸𑀯𑀢𑁆𑀣𑀺 𑀦𑀸𑀫 𑀦𑀕𑀭𑀁, 𑀢𑀢𑁆𑀣 𑀲𑁄 𑀪𑀕𑀯𑀸 𑀏𑀢𑀭𑀳𑀺 𑀯𑀺𑀳𑀭𑀢𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄. 𑀲𑁄 𑀳𑀺, 𑀩𑀸𑀳𑀺𑀬, 𑀪𑀕𑀯𑀸 𑀅𑀭𑀳𑀸 𑀘𑁂𑀯 𑀅𑀭𑀳𑀢𑁆𑀢𑀸𑀬 𑀘 𑀥𑀫𑁆𑀫𑀁 𑀤𑁂𑀲𑁂𑀲𑀻’’𑀢𑀺. 𑀩𑀸𑀳𑀺𑀬𑁄 𑀭𑀢𑁆𑀢𑀺𑀪𑀸𑀕𑁂 𑀤𑁂𑀯𑀢𑀸𑀬 𑀓𑀣𑀁 𑀲𑀼𑀢𑁆𑀯𑀸 𑀲𑀁𑀯𑀺𑀕𑁆𑀕𑀫𑀸𑀦𑀲𑁄 𑀢𑀁𑀔𑀡𑀁𑀬𑁂𑀯 𑀲𑀼𑀧𑁆𑀧𑀸𑀭𑀓𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀏𑀓𑀭𑀢𑁆𑀢𑀺𑀯𑀸𑀲𑁂𑀦 𑀲𑀸𑀯𑀢𑁆𑀣𑀺𑀁 𑀅𑀕𑀫𑀸𑀲𑀺, 𑀕𑀘𑁆𑀙𑀦𑁆𑀢𑁄 𑀘 𑀧𑀦 𑀤𑁂𑀯𑀢𑀸𑀦𑀼𑀪𑀸𑀯𑁂𑀦 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀘 𑀯𑀻𑀲𑀬𑁄𑀚𑀦𑀲𑀢𑀺𑀓𑀁 𑀫𑀕𑁆𑀕𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀸𑀯𑀢𑁆𑀣𑀺𑀁 𑀅𑀦𑀼𑀧𑁆𑀧𑀢𑁆𑀢𑁄, 𑀢𑀲𑁆𑀫𑀺𑀁 𑀔𑀡𑁂 𑀲𑀢𑁆𑀣𑀸 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑁄 𑀳𑁄𑀢𑀺. 𑀲𑁄 𑀚𑁂𑀢𑀯𑀦𑀁 𑀧𑀯𑀺𑀲𑀺𑀢𑁆𑀯𑀸 𑀅𑀩𑁆𑀪𑁄𑀓𑀸𑀲𑁂 𑀘𑀗𑁆𑀓𑀫𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀧𑀼𑀘𑁆𑀙𑀺 𑁋 ‘‘𑀓𑀼𑀳𑀺𑀁 𑀏𑀢𑀭𑀳𑀺 𑀲𑀢𑁆𑀣𑀸’’𑀢𑀺? 𑀪𑀺𑀓𑁆𑀔𑀽 ‘‘𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑁄’’𑀢𑀺 𑀯𑀢𑁆𑀯𑀸 ‘‘𑀢𑁆𑀯𑀁 𑀧𑀦 𑀓𑀼𑀢𑁄 𑀆𑀕𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀁𑀲𑀼. ‘‘𑀲𑀼𑀧𑁆𑀧𑀸𑀭𑀓𑀸 𑀆𑀕𑀢𑁄𑀫𑁆𑀳𑀻’’𑀢𑀺. ‘‘𑀓𑀤𑀸 𑀦𑀺𑀓𑁆𑀔𑀦𑁆𑀢𑁄𑀲𑀻’’𑀢𑀺? ‘‘𑀳𑀺𑀬𑁆𑀬𑁄 𑀲𑀸𑀬𑀦𑁆𑀳𑀲𑀫𑀬𑁂 𑀦𑀺𑀓𑁆𑀔𑀦𑁆𑀢𑁄𑀫𑁆𑀳𑀻’’𑀢𑀺. ‘‘𑀤𑀽𑀭𑀢𑁄𑀧𑀺 𑀆𑀕𑀢𑁄, 𑀦𑀺𑀲𑀻𑀤 𑀢𑀸𑀯 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀢𑁂𑀮𑁂𑀦 𑀫𑀓𑁆𑀔𑁂𑀢𑁆𑀯𑀸 𑀣𑁄𑀓𑀁 𑀯𑀺𑀲𑁆𑀲𑀫𑀸𑀳𑀺, 𑀆𑀕𑀢𑀓𑀸𑀮𑁂 𑀲𑀢𑁆𑀣𑀸𑀭𑀁 𑀤𑀓𑁆𑀔𑀺𑀲𑁆𑀲𑀢𑀻’’𑀢𑀺 𑀆𑀳𑀁𑀲𑀼. ‘‘𑀅𑀳𑀁, 𑀪𑀦𑁆𑀢𑁂, 𑀲𑀢𑁆𑀣𑀼 𑀯𑀸 𑀅𑀢𑁆𑀢𑀦𑁄 𑀯𑀸 𑀚𑀻𑀯𑀺𑀢𑀦𑁆𑀢𑀭𑀸𑀬𑀁 𑀦 𑀚𑀸𑀦𑀸𑀫𑀺, 𑀓𑀢𑁆𑀣𑀘𑀺 𑀅𑀝𑁆𑀞𑀢𑁆𑀯𑀸 𑀅𑀦𑀺𑀲𑀻𑀤𑀺𑀢𑁆𑀯𑀸 𑀏𑀓𑀭𑀢𑁆𑀢𑁂𑀦𑁂𑀯 𑀯𑀻𑀲𑀬𑁄𑀚𑀦𑀲𑀢𑀺𑀓𑀁 𑀫𑀕𑁆𑀕𑀁 𑀆𑀕𑀢𑁄, 𑀲𑀢𑁆𑀣𑀸𑀭𑀁 𑀧𑀲𑁆𑀲𑀺𑀢𑁆𑀯𑀸𑀯 𑀯𑀺𑀲𑁆𑀲𑀫𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀲𑁄 𑀏𑀯𑀁 𑀯𑀢𑁆𑀯𑀸 𑀢𑀭𑀫𑀸𑀦𑀭𑀽𑀧𑁄 𑀲𑀸𑀯𑀢𑁆𑀣𑀺𑀁 𑀧𑀯𑀺𑀲𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀦𑁄𑀧𑀫𑀸𑀬 𑀩𑀼𑀤𑁆𑀥𑀲𑀺𑀭𑀺𑀬𑀸 𑀘𑀭𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀘𑀺𑀭𑀲𑁆𑀲𑀁 𑀯𑀢 𑀫𑁂 𑀕𑁄𑀢𑀫𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀤𑀺𑀝𑁆𑀞𑁄’’𑀢𑀺 𑀤𑀺𑀝𑁆𑀞𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀑𑀦𑀢𑀲𑀭𑀻𑀭𑁄 𑀕𑀦𑁆𑀢𑁆𑀯𑀸 𑀅𑀦𑁆𑀢𑀭𑀯𑀻𑀣𑀺𑀬𑀁 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀕𑁄𑀧𑁆𑀨𑀓𑁂𑀲𑀼 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀤𑁂𑀲𑁂𑀢𑀼, 𑀪𑀦𑁆𑀢𑁂 𑀪𑀕𑀯𑀸, 𑀥𑀫𑁆𑀫𑀁, 𑀤𑁂𑀲𑁂𑀢𑀼 𑀲𑀼𑀕𑀢𑁄 𑀥𑀫𑁆𑀫𑀁, 𑀬𑀁 𑀫𑀫𑀲𑁆𑀲 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’’𑀢𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀅𑀓𑀸𑀮𑁄 𑀔𑁄 𑀢𑀸𑀯, 𑀩𑀸𑀳𑀺𑀬, 𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑀫𑁆𑀳𑀸 𑀧𑀺𑀡𑁆𑀟𑀸𑀬𑀸’’𑀢𑀺 𑀧𑀝𑀺𑀓𑁆𑀔𑀺𑀧𑀺.

𑀢𑀁 𑀲𑀼𑀢𑁆𑀯𑀸 𑀩𑀸𑀳𑀺𑀬𑁄, ‘‘𑀪𑀦𑁆𑀢𑁂, 𑀲𑀁𑀲𑀸𑀭𑁂 𑀲𑀁𑀲𑀭𑀦𑁆𑀢𑁂𑀦 𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀦 𑀅𑀮𑀤𑁆𑀥𑀧𑀼𑀩𑁆𑀩𑁄, 𑀢𑀼𑀫𑁆𑀳𑀸𑀓𑀁 𑀯𑀸 𑀫𑀬𑁆𑀳𑀁 𑀯𑀸 𑀚𑀻𑀯𑀺𑀢𑀦𑁆𑀢𑀭𑀸𑀬𑀁 𑀦 𑀚𑀸𑀦𑀸𑀫𑀺, 𑀤𑁂𑀲𑁂𑀢𑀼 𑀫𑁂, 𑀪𑀦𑁆𑀢𑁂 𑀪𑀕𑀯𑀸, 𑀥𑀫𑁆𑀫𑀁, 𑀤𑁂𑀲𑁂𑀢𑀼 𑀲𑀼𑀕𑀢𑁄 𑀥𑀫𑁆𑀫’’𑀦𑁆𑀢𑀺 𑀧𑀼𑀦 𑀬𑀸𑀘𑀺. 𑀲𑀢𑁆𑀣𑀸 𑀤𑀼𑀢𑀺𑀬𑀫𑁆𑀧𑀺 𑀢𑀣𑁂𑀯 𑀧𑀝𑀺𑀓𑁆𑀔𑀺𑀧𑀺. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀇𑀫𑀲𑁆𑀲 𑀤𑀺𑀝𑁆𑀞𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀓𑀮𑀲𑀭𑀻𑀭𑀁 𑀧𑀻𑀢𑀺𑀬𑀸 𑀦𑀺𑀭𑀦𑁆𑀢𑀭𑀁 𑀅𑀚𑁆𑀛𑁄𑀢𑁆𑀣𑀝𑀁 𑀳𑁄𑀢𑀺, 𑀩𑀮𑀯𑀧𑀻𑀢𑀺𑀯𑁂𑀕𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸𑀧𑀺 𑀦 𑀲𑀓𑁆𑀔𑀺𑀲𑁆𑀲𑀢𑀺 𑀧𑀝𑀺𑀯𑀺𑀚𑁆𑀛𑀺𑀢𑀼𑀁, 𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸𑀬 𑀢𑀸𑀯 𑀢𑀺𑀝𑁆𑀞𑀢𑀼, 𑀏𑀓𑀭𑀢𑁆𑀢𑁂𑀦𑁂𑀯 𑀯𑀻𑀲𑀬𑁄𑀚𑀦𑀲𑀢𑀺𑀓𑀁 𑀫𑀕𑁆𑀕𑀁 𑀆𑀕𑀢𑀲𑁆𑀲𑀧𑀺 𑀘𑀲𑁆𑀲 𑀤𑀭𑀣𑁄 𑀩𑀮𑀯𑀸 𑀲𑁄𑀧𑀺 𑀢𑀸𑀯 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀽’’𑀢𑀺. 𑀢𑀲𑁆𑀫𑀸 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀢𑀺𑀬𑀁 𑀬𑀸𑀘𑀺𑀢𑁄 𑀅𑀦𑁆𑀢𑀭𑀯𑀻𑀣𑀺𑀬𑀁 𑀞𑀺𑀢𑁄𑀯 ‘‘𑀢𑀲𑁆𑀫𑀸𑀢𑀺𑀳 𑀢𑁂, 𑀩𑀸𑀳𑀺𑀬, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁, 𑀤𑀺𑀝𑁆𑀞𑁂 𑀤𑀺𑀝𑁆𑀞𑀫𑀢𑁆𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 (𑀉𑀤𑀸. 𑁧𑁦) 𑀦𑀬𑁂𑀦 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑁄 𑀲𑀢𑁆𑀣𑀼 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄𑀬𑁂𑀯 𑀲𑀩𑁆𑀩𑀸𑀲𑀯𑁂 𑀔𑁂𑀧𑁂𑀢𑁆𑀯𑀸 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑁧𑁭𑁮. 𑀲𑁄 𑀅𑀭𑀳𑀢𑁆𑀢𑀁 𑀧𑀢𑁆𑀢𑀓𑁆𑀔𑀡𑁂𑀬𑁂𑀯 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑀜𑁆𑀚𑀸𑀢𑀲𑁄𑀫𑀦𑀲𑁆𑀲𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀇𑀢𑁄 𑀲𑀢𑀲𑀳𑀲𑁆𑀲𑀫𑁆𑀳𑀻𑀢𑀺𑀆𑀤𑀺𑀫𑀸𑀳. 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀅𑀦𑀼𑀢𑁆𑀢𑀸𑀦𑀧𑀤𑀯𑀡𑁆𑀡𑀦𑀫𑁂𑀯 𑀓𑀭𑀺𑀲𑁆𑀲𑀸𑀫.

𑁧𑁮𑁧. 𑀳𑀲𑀦𑀁 𑀧𑀘𑁆𑀘𑀯𑁂𑀓𑁆𑀔𑀡𑀦𑁆𑀢𑀺 𑀧𑀭𑀺𑀧𑀼𑀡𑁆𑀡𑀲𑁄𑀫𑀦𑀲𑁆𑀲𑀚𑀸𑀢𑀁 𑀧𑀘𑁆𑀘𑀯𑁂𑀓𑁆𑀔𑀡𑀁, 𑀓𑁄𑀫𑀸𑀭𑀯𑀡𑁆𑀡𑀁 𑀅𑀢𑀺𑀓𑁄𑀫𑀮𑀦𑁆𑀢𑀺 𑀅𑀢𑁆𑀣𑁄.

𑁧𑁮𑁨. 𑀳𑁂𑀫𑀬𑀜𑁆𑀜𑁄𑀧𑀘𑀺𑀢𑀗𑁆𑀕𑀦𑁆𑀢𑀺 𑀲𑀼𑀯𑀡𑁆𑀡𑀲𑀼𑀢𑁆𑀢𑀬𑀜𑁆𑀜𑁄𑀧𑀘𑀺𑀢𑀲𑀼𑀢𑁆𑀢𑀅𑀯𑀬𑀯𑀁 𑀲𑀭𑀻𑀭𑀁 𑀤𑁂𑀳𑀦𑁆𑀢𑀺 𑀅𑀢𑁆𑀣𑁄. 𑀧𑀮𑀫𑁆𑀩𑀩𑀺𑀫𑁆𑀩𑀢𑀫𑁆𑀩𑁄𑀝𑁆𑀞𑀦𑁆𑀢𑀺 𑀑𑀮𑀫𑁆𑀩𑀺𑀢𑀩𑀺𑀫𑁆𑀩𑀨𑀮𑀲𑀤𑀺𑀲𑀁 𑀭𑀢𑁆𑀢𑀯𑀡𑁆𑀡𑀁 𑀑𑀝𑁆𑀞𑀤𑁆𑀯𑀬𑀲𑀫𑀦𑁆𑀦𑀸𑀕𑀢𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀢𑀢𑀺𑀡𑁆𑀳𑀲𑀫𑀁 𑀤𑀺𑀚𑀦𑁆𑀢𑀺 𑀲𑀼𑀦𑀺𑀲𑀺𑀢𑀢𑀺𑀔𑀺𑀡𑀅𑀬𑀮𑁄𑀳𑀖𑀁𑀲𑀦𑁂𑀦 𑀖𑀁𑀲𑀺𑀢𑁆𑀯𑀸 𑀲𑀫𑀁 𑀓𑀢𑀁 𑀯𑀺𑀬 𑀲𑀫𑀤𑀦𑁆𑀢𑀦𑁆𑀢𑀺 𑀅𑀢𑁆𑀣𑁄.

𑁧𑁮𑁩. 𑀧𑀻𑀢𑀺𑀲𑀫𑁆𑀨𑀼𑀮𑁆𑀮𑀺𑀢𑀸𑀦𑀦𑀦𑁆𑀢𑀺 𑀧𑀻𑀢𑀺𑀬𑀸 𑀲𑀼𑀝𑁆𑀞𑀼 𑀨𑀼𑀮𑁆𑀮𑀺𑀢𑀁 𑀯𑀺𑀓𑀲𑀺𑀢𑀁 𑀆𑀦𑀦𑀁 𑀫𑀼𑀔𑀁 𑀆𑀤𑀸𑀲𑀢𑀮𑀲𑀤𑀺𑀲𑀫𑀼𑀔𑀯𑀦𑁆𑀢𑀦𑁆𑀢𑀺 𑀅𑀢𑁆𑀣𑁄.

𑁧𑁮𑁪. 𑀔𑀺𑀧𑁆𑀧𑀸𑀪𑀺𑀜𑁆𑀜𑀲𑁆𑀲 𑀪𑀺𑀓𑁆𑀔𑀼𑀦𑁄𑀢𑀺 𑀔𑀺𑀧𑁆𑀧𑀁 𑀤𑁂𑀲𑀦𑀸𑀬 𑀲𑀫𑀼𑀕𑁆𑀖𑀸𑀝𑀺𑀢𑀓𑁆𑀔𑀡𑁂𑀬𑁂𑀯 𑀅𑀪𑀺𑀯𑀺𑀲𑁂𑀲𑁂𑀦 𑀜𑀸𑀢𑀼𑀁 𑀲𑀫𑀢𑁆𑀣𑀲𑁆𑀲 𑀪𑀺𑀓𑁆𑀔𑀼𑀦𑁄𑀢𑀺 𑀅𑀢𑁆𑀣𑁄.

𑁧𑁮𑁬. 𑀲𑀕𑁆𑀕𑀁 𑀅𑀕𑀁 𑀲𑀪𑀯𑀦𑀁 𑀬𑀣𑀸𑀢𑀺 𑀅𑀢𑁆𑀢𑀦𑁄 𑀕𑁂𑀳𑀁 𑀯𑀺𑀬 𑀲𑀕𑁆𑀕𑀁 𑀮𑁄𑀓𑀁 𑀅𑀕𑀫𑀸𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁧𑁯𑁬. 𑀦 𑀢𑁆𑀯𑀁 𑀉𑀧𑀸𑀬𑀫𑀕𑁆𑀕𑀜𑁆𑀜𑀽𑀢𑀺 𑀢𑁆𑀯𑀁 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀽𑀧𑀸𑀬𑀪𑀽𑀢𑀫𑀕𑁆𑀕𑀜𑁆𑀜𑀽 𑀦 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄.

𑁨𑁦𑁦. 𑀲𑀢𑁆𑀣𑀼𑀦𑁄 𑀲𑀤𑀸 𑀚𑀺𑀦𑀦𑁆𑀢𑀺 𑀲𑀤𑀸 𑀲𑀩𑁆𑀩𑀓𑀸𑀮𑀁 𑀚𑀺𑀦𑀁 𑀚𑀺𑀦𑀦𑁆𑀢𑁄 𑀧𑀭𑀸𑀚𑀺𑀢𑀓𑁄𑀧𑁄 𑀲𑀢𑁆𑀣𑀼𑀦𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀯𑀺𑀫𑀮𑀸𑀦𑀦𑀁 𑀆𑀤𑀸𑀲𑀢𑀮𑀲𑀤𑀺𑀲𑀫𑀼𑀔𑀁 𑀧𑀲𑁆𑀲𑀺𑀲𑁆𑀲𑀸𑀫𑀺 𑀧𑀲𑁆𑀲𑀺𑀢𑀼𑀁 𑀦𑀺𑀓𑁆𑀔𑀫𑀸𑀫𑀻𑀢𑀺 𑀬𑁄𑀚𑀦𑀸. 𑀤𑀺𑀚𑁂 𑀅𑀧𑀼𑀘𑁆𑀙𑀺𑀁 𑀓𑀼𑀳𑀺𑀁 𑀮𑁄𑀓𑀦𑀦𑁆𑀤𑀦𑁄𑀢𑀺 𑀓𑀼𑀳𑀺𑀁 𑀞𑀸𑀦𑁂 𑀮𑁄𑀓𑀧𑀲𑀸𑀤𑀓𑀭𑁄 𑀲𑀢𑁆𑀣𑀸𑀢𑀺 𑀤𑀺𑀚𑁂 𑀩𑁆𑀭𑀸𑀳𑁆𑀫𑀡𑁂 𑀅𑀳𑀁 𑀪𑀺𑀓𑁆𑀔𑀽 𑀅𑀧𑀼𑀘𑁆𑀙𑀺𑀦𑁆𑀢𑀺 𑀅𑀢𑁆𑀣𑁄.

𑁨𑁦𑁧. 𑀲𑀲𑁄𑀯 𑀔𑀺𑀧𑁆𑀧𑀁 𑀫𑀼𑀦𑀺𑀤𑀲𑁆𑀲𑀦𑀼𑀲𑁆𑀲𑀼𑀓𑁄𑀢𑀺 𑀫𑀼𑀦𑀺𑀤𑀲𑁆𑀲𑀦𑁂 𑀢𑀣𑀸𑀕𑀢𑀤𑀲𑁆𑀲𑀦𑁂 𑀉𑀲𑁆𑀲𑀼𑀓𑁄 𑀉𑀲𑁆𑀲𑀸𑀳𑀚𑀸𑀢𑁄 𑀲𑀲𑁄 𑀇𑀯 𑀔𑀺𑀧𑁆𑀧𑀁 𑀧𑀸𑀧𑀼𑀡𑀸𑀢𑀻𑀢𑀺 𑀅𑀢𑁆𑀣𑁄.

𑁨𑁦𑁨. 𑀢𑀼𑀯𑀝𑀁 𑀕𑀦𑁆𑀢𑁆𑀯𑀸𑀢𑀺 𑀲𑀻𑀖𑀁 𑀕𑀦𑁆𑀢𑁆𑀯𑀸. 𑀧𑀺𑀡𑁆𑀟𑀢𑁆𑀣𑀁 𑀅𑀧𑀺𑀳𑀸𑀕𑀺𑀥𑀦𑁆𑀢𑀺 𑀧𑀺𑀡𑁆𑀟𑀧𑀸𑀢𑀁 𑀧𑀝𑀺𑀘𑁆𑀘 𑀅𑀧𑀺𑀳𑀁 𑀅𑀧𑀕𑀢𑀧𑀺𑀳𑀁 𑀅𑀕𑀺𑀥𑀁 𑀦𑀺𑀢𑁆𑀢𑀡𑁆𑀳𑀁.

𑁨𑁦𑁩. 𑀅𑀮𑁄𑀮𑀓𑁆𑀔𑀦𑁆𑀢𑀺 𑀇𑀢𑁄 𑀘𑀺𑀢𑁄 𑀘 𑀅𑀦𑁄𑀮𑁄𑀓𑀬𑀫𑀸𑀦𑀁 𑀉𑀢𑁆𑀢𑀫𑁂 𑀲𑀸𑀯𑀢𑁆𑀣𑀺𑀦𑀕𑀭𑁂 𑀧𑀺𑀡𑁆𑀟𑀸𑀬 𑀯𑀺𑀘𑀭𑀦𑁆𑀢𑀁 𑀅𑀤𑀓𑁆𑀔𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀺𑀭𑀻𑀦𑀺𑀮𑀬𑀲𑀗𑁆𑀓𑀸𑀲𑀦𑁆𑀢𑀺 𑀲𑀺𑀭𑀺𑀬𑀸 𑀮𑀓𑁆𑀔𑀡𑀸𑀦𑀼𑀩𑁆𑀬𑀜𑁆𑀚𑀦𑀲𑁄𑀪𑀸𑀬 𑀦𑀺𑀮𑀬𑀁 𑀲𑀗𑁆𑀓𑀸𑀲𑀁 𑀚𑀮𑀫𑀸𑀦𑀢𑁄𑀭𑀡𑀲𑀤𑀺𑀲𑀁. 𑀭𑀯𑀺𑀤𑀺𑀢𑁆𑀢𑀺𑀳𑀭𑀸𑀦𑀦𑀦𑁆𑀢𑀺 𑀯𑀺𑀚𑁆𑀚𑁄𑀢𑀫𑀸𑀦𑀲𑀽𑀭𑀺𑀬𑀫𑀡𑁆𑀟𑀮𑀁 𑀯𑀺𑀬 𑀯𑀺𑀚𑁆𑀚𑁄𑀢𑀫𑀸𑀦𑀫𑀼𑀔𑀫𑀡𑁆𑀟𑀮𑀁.

𑁨𑁦𑁪. 𑀓𑀼𑀧𑀣𑁂 𑀯𑀺𑀧𑁆𑀧𑀦𑀝𑁆𑀞𑀲𑁆𑀲𑀸𑀢𑀺 𑀓𑀼𑀘𑁆𑀙𑀺𑀢𑀧𑀣𑁂 𑀲𑁄𑀧𑀤𑁆𑀤𑀯𑀫𑀕𑁆𑀕𑁂 𑀫𑀽𑀴𑁆𑀳𑀲𑁆𑀲 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑀲𑁆𑀲 𑀫𑁂 𑀲𑀭𑀡𑀁 𑀳𑁄𑀳𑀺 𑀧𑀢𑀺𑀝𑁆𑀞𑀸 𑀳𑁄𑀳𑀺. 𑀕𑁄𑀢𑀫𑀸𑀢𑀺 𑀪𑀕𑀯𑀦𑁆𑀢𑀁 𑀕𑁄𑀢𑁆𑀢𑁂𑀦 𑀆𑀮𑀧𑀢𑀺.

𑁨𑁧𑁮. 𑀦 𑀢𑀢𑁆𑀣 𑀲𑀼𑀓𑁆𑀓𑀸 𑀚𑁄𑀢𑀦𑁆𑀢𑀻𑀢𑀺 𑀲𑀼𑀓𑁆𑀓𑀧𑀪𑀸𑀲𑀫𑁆𑀧𑀦𑁆𑀦𑀸 𑀚𑁄𑀢𑀫𑀸𑀦𑀑𑀲𑀥𑀺𑀢𑀸𑀭𑀓𑀸𑀤𑀬𑁄 𑀦 𑀚𑁄𑀢𑀦𑁆𑀢𑀺 𑀦𑀧𑁆𑀧𑀪𑀸𑀲𑀦𑁆𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀲𑁄 𑀏𑀯𑀁 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀢𑁆𑀯𑀸 𑀢𑀸𑀯𑀤𑁂𑀯 𑀘 𑀪𑀕𑀯𑀦𑁆𑀢𑀁 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. ‘‘𑀧𑀭𑀺𑀧𑀼𑀡𑁆𑀡𑀁 𑀢𑁂 𑀧𑀢𑁆𑀢𑀘𑀻𑀯𑀭’’𑀦𑁆𑀢𑀺 𑀘 𑀧𑀼𑀝𑁆𑀞𑁄 ‘‘𑀦 𑀧𑀭𑀺𑀧𑀼𑀡𑁆𑀡’’𑀦𑁆𑀢𑀺 𑀆𑀳. 𑀅𑀣 𑀦𑀁 𑀲𑀢𑁆𑀣𑀸 ‘‘𑀢𑁂𑀦 𑀳𑀺 𑀧𑀢𑁆𑀢𑀘𑀻𑀯𑀭𑀁 𑀧𑀭𑀺𑀬𑁂𑀲𑀸𑀳𑀻’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑁄 𑀓𑀺𑀭 𑀯𑀻𑀲𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄 ‘‘𑀪𑀺𑀓𑁆𑀔𑀼𑀦𑀸 𑀦𑀸𑀫 𑀅𑀢𑁆𑀢𑀦𑀸 𑀧𑀘𑁆𑀘𑀬𑁂 𑀮𑀪𑀺𑀢𑁆𑀯𑀸 𑀅𑀜𑁆𑀜𑀁 𑀅𑀦𑁄𑀮𑁄𑀓𑁂𑀢𑁆𑀯𑀸 𑀲𑀬𑀫𑁂𑀯 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀯𑀸 𑀏𑀓𑀪𑀺𑀓𑁆𑀔𑀼𑀲𑁆𑀲𑀸𑀧𑀺 𑀧𑀢𑁆𑀢𑁂𑀦 𑀯𑀸 𑀘𑀻𑀯𑀭𑁂𑀦 𑀯𑀸 𑀲𑀗𑁆𑀕𑀳𑀁 𑀦𑀸𑀓𑀸𑀲𑀺, ‘‘𑀦 𑀢𑁂𑀦𑀲𑁆𑀲 𑀇𑀤𑁆𑀥𑀺𑀫𑀬𑀁 𑀧𑀢𑁆𑀢𑀘𑀻𑀯𑀭𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀪𑀕𑀯𑀸 𑀏𑀳𑀺𑀪𑀺𑀓𑁆𑀔𑀼𑀪𑀸𑀯𑁂𑀦 𑀧𑀩𑁆𑀩𑀚𑁆𑀚𑀁 𑀦𑀸𑀤𑀸𑀲𑀺. 𑀢𑀫𑁆𑀧𑀺 𑀧𑀢𑁆𑀢𑀘𑀻𑀯𑀭𑀁 𑀧𑀭𑀺𑀬𑁂𑀲𑀫𑀸𑀦𑀫𑁂𑀯 𑀲𑀗𑁆𑀓𑀸𑀭𑀝𑁆𑀞𑀸𑀦𑀢𑁄 𑀘𑁄𑀴𑀓𑁆𑀔𑀡𑁆𑀟𑀸𑀦𑀺 𑀲𑀁𑀓𑀟𑁆𑀠𑁂𑀦𑁆𑀢𑀁 𑀧𑀼𑀩𑁆𑀩𑀯𑁂𑀭𑀺𑀓𑁄 𑀅𑀫𑀦𑀼𑀲𑁆𑀲𑁄 𑀏𑀓𑀺𑀲𑁆𑀲𑀸 𑀢𑀭𑀼𑀡𑀯𑀘𑁆𑀙𑀸𑀬 𑀕𑀸𑀯𑀺𑀬𑀸 𑀲𑀭𑀻𑀭𑁂 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀯𑀸𑀫𑀊𑀭𑀼𑀫𑁆𑀳𑀺 𑀧𑀳𑀭𑀺𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀲𑀺. 𑀲𑀢𑁆𑀣𑀸 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀲𑀫𑁆𑀩𑀳𑀼𑀮𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀦𑀺𑀓𑁆𑀔𑀫𑀦𑁆𑀢𑁄 𑀩𑀸𑀳𑀺𑀬𑀲𑁆𑀲 𑀲𑀭𑀻𑀭𑀁 𑀲𑀗𑁆𑀓𑀸𑀭𑀝𑁆𑀞𑀸𑀦𑁂 𑀧𑀢𑀺𑀢𑀁 𑀤𑀺𑀲𑁆𑀯𑀸 ‘‘𑀕𑀡𑁆𑀳𑀣, 𑀪𑀺𑀓𑁆𑀔𑀯𑁂, 𑀏𑀢𑀁 𑀩𑀸𑀳𑀺𑀬𑀁 𑀤𑀸𑀭𑀼𑀘𑀻𑀭𑀺𑀬𑀦𑁆𑀢𑀺 𑀏𑀓𑀲𑁆𑀫𑀺𑀁 𑀕𑁂𑀳𑀤𑁆𑀯𑀸𑀭𑁂 𑀞𑀢𑁆𑀯𑀸 𑀫𑀜𑁆𑀘𑀓𑀁 𑀆𑀳𑀭𑀸𑀧𑁂𑀢𑁆𑀯𑀸 𑀇𑀫𑀁 𑀲𑀭𑀻𑀭𑀁 𑀦𑀕𑀭𑀤𑁆𑀯𑀸𑀭𑀢𑁄 𑀦𑀻𑀳𑀭𑀺𑀢𑁆𑀯𑀸 𑀛𑀸𑀧𑁂𑀢𑁆𑀯𑀸 𑀥𑀸𑀢𑀼𑀬𑁄 𑀕𑀳𑁂𑀢𑁆𑀯𑀸 𑀣𑀽𑀧𑀁 𑀓𑀭𑁄𑀣𑀸’’𑀢𑀺 𑀪𑀺𑀓𑁆𑀔𑀽 𑀆𑀡𑀸𑀧𑁂𑀲𑀺.

𑀢𑁂 𑀪𑀺𑀓𑁆𑀔𑀽 𑀥𑀸𑀢𑀼𑀁 𑀫𑀳𑀸𑀧𑀣𑁂 𑀣𑀽𑀧𑀁 𑀓𑀸𑀭𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀢𑁆𑀢𑀦𑁄 𑀓𑀢𑀓𑀫𑁆𑀫𑀁 𑀆𑀭𑁄𑀘𑁂𑀲𑀼𑀁. 𑀢𑀢𑁄 𑀲𑀗𑁆𑀖𑀫𑀚𑁆𑀛𑁂 𑀓𑀣𑀸 𑀉𑀤𑀧𑀸𑀤𑀺 𑁋 ‘‘𑀢𑀣𑀸𑀕𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀭𑀻𑀭𑀛𑀸𑀧𑀦𑀓𑀺𑀘𑁆𑀘𑀁 𑀓𑀸𑀭𑁂𑀲𑀺, 𑀥𑀸𑀢𑀼𑀬𑁄 𑀘 𑀕𑀸𑀳𑀸𑀧𑁂𑀢𑁆𑀯𑀸 𑀘𑁂𑀢𑀺𑀬𑀁 𑀓𑀸𑀭𑀸𑀧𑁂𑀲𑀺, 𑀓𑀢𑀭𑀫𑀕𑁆𑀕𑁄 𑀦𑀼 𑀔𑁄 𑀢𑁂𑀦 𑀲𑀫𑀥𑀺𑀕𑀢𑁄, 𑀲𑀸𑀫𑀡𑁂𑀭𑁄 𑀦𑀼 𑀔𑁄 𑀲𑁄, 𑀪𑀺𑀓𑁆𑀔𑀼 𑀦𑀼 𑀔𑁄’’𑀢𑀺. 𑀲𑀢𑁆𑀣𑀸 𑀢𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 ‘‘𑀧𑀢𑀺𑀝𑁆𑀞𑀺𑀢𑁄, 𑀪𑀺𑀓𑁆𑀔𑀯𑁂, 𑀩𑀸𑀳𑀺𑀬𑁄 𑀤𑀸𑀭𑀼𑀘𑀻𑀭𑀺𑀬𑁄 𑀅𑀭𑀳𑀢𑁆𑀢𑁄’’𑀢𑀺 𑀉𑀧𑀭𑀺 𑀥𑀫𑁆𑀫𑀤𑁂𑀲𑀦𑀁 𑀯𑀟𑁆𑀠𑁂𑀢𑀺. 𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀼𑀢𑀪𑀸𑀯𑀜𑁆𑀘 𑀆𑀘𑀺𑀓𑁆𑀔𑀺𑀢𑁆𑀯𑀸 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀦𑀁 𑀬𑀤𑀺𑀤𑀁 𑀩𑀸𑀳𑀺𑀬𑁄 𑀤𑀸𑀭𑀼𑀘𑀻𑀭𑀺𑀬𑁄’’𑀢𑀺 (𑀅. 𑀦𑀺. 𑁧.𑁨𑁦𑁯, 𑁨𑁧𑁬) 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺.

𑀅𑀣 𑀦𑀁 𑀪𑀺𑀓𑁆𑀔𑀽 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀢𑀼𑀫𑁆𑀳𑁂, 𑀪𑀦𑁆𑀢𑁂, ‘𑀩𑀸𑀳𑀺𑀬𑁄 𑀤𑀸𑀭𑀼𑀘𑀻𑀭𑀺𑀬𑁄 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄’𑀢𑀺 𑀯𑀤𑁂𑀣, 𑀓𑀤𑀸 𑀲𑁄 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄’’𑀢𑀺? ‘‘𑀫𑀫 𑀥𑀫𑁆𑀫𑀁 𑀲𑀼𑀢𑀓𑀸𑀮𑁂, 𑀪𑀺𑀓𑁆𑀔𑀯𑁂’’𑀢𑀺. ‘‘𑀓𑀤𑀸 𑀧𑀦𑀲𑁆𑀲, 𑀪𑀦𑁆𑀢𑁂, 𑀢𑀼𑀫𑁆𑀳𑁂𑀳𑀺 𑀥𑀫𑁆𑀫𑁄 𑀓𑀣𑀺𑀢𑁄’’𑀢𑀺? ‘‘𑀪𑀺𑀓𑁆𑀔𑀸𑀬 𑀘𑀭𑀦𑁆𑀢𑁂𑀦 𑀅𑀦𑁆𑀢𑀭𑀯𑀻𑀣𑀺𑀬𑀁 𑀞𑀺𑀢𑁂𑀦𑀸’’𑀢𑀺. ‘‘𑀅𑀧𑁆𑀧𑀫𑀢𑁆𑀢𑀓𑁄, 𑀪𑀦𑁆𑀢𑁂, 𑀢𑀼𑀫𑁆𑀳𑁂𑀳𑀺 𑀅𑀦𑁆𑀢𑀭𑀯𑀻𑀣𑀺𑀬𑀁 𑀞𑀢𑁆𑀯𑀸 𑀓𑀣𑀺𑀢𑀥𑀫𑁆𑀫𑁄; 𑀓𑀣𑀁 𑀲𑁄 𑀢𑀸𑀯𑀢𑁆𑀢𑀓𑁂𑀦 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀲𑀻’’𑀢𑀺? 𑀅𑀣 𑀦𑁂 𑀲𑀢𑁆𑀣𑀸, ‘‘𑀪𑀺𑀓𑁆𑀔𑀯𑁂, 𑀫𑀫 𑀥𑀫𑁆𑀫𑀁 ‘𑀅𑀧𑁆𑀧𑀁’ 𑀯𑀸 ‘𑀩𑀳𑀼𑀁 𑀯𑀸’𑀢𑀺 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣. 𑀅𑀦𑁂𑀓𑀸𑀦𑀺𑀧𑀺 𑀳𑀺 𑀅𑀦𑀢𑁆𑀣𑀧𑀤𑀲𑀁𑀳𑀺𑀢𑀸𑀦𑀺 𑀕𑀸𑀣𑀸𑀲𑀳𑀲𑁆𑀲𑀸𑀦𑀺 𑀦 𑀲𑁂𑀬𑁆𑀬𑁄, 𑀅𑀢𑁆𑀣𑀦𑀺𑀲𑁆𑀲𑀺𑀢𑀁 𑀧𑀦 𑀏𑀓𑀫𑁆𑀧𑀺 𑀕𑀸𑀣𑀸𑀧𑀤𑀁 𑀲𑁂𑀬𑁆𑀬𑁄’’𑀢𑀺 𑀯𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀲𑀳𑀲𑁆𑀲𑀫𑀧𑀺 𑀘𑁂 𑀕𑀸𑀣𑀸, 𑀅𑀦𑀢𑁆𑀣𑀧𑀤𑀲𑀁𑀳𑀺𑀢𑀸;

𑀏𑀓𑀁 𑀕𑀸𑀣𑀸𑀧𑀤𑀁 𑀲𑁂𑀬𑁆𑀬𑁄, 𑀬𑀁 𑀲𑀼𑀢𑁆𑀯𑀸 𑀉𑀧𑀲𑀫𑁆𑀫𑀢𑀻’’𑀢𑀺. (𑀥. 𑀧. 𑁧𑁦𑁧) 𑁋

𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀻𑀢𑀺.

𑀩𑀸𑀳𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.