𑁪. 𑀧𑀼𑀧𑁆𑀨𑀘𑁆𑀙𑀤𑀦𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀲𑀼𑀦𑀦𑁆𑀤𑁄 𑀦𑀸𑀫 𑀦𑀸𑀫𑁂𑀦𑀸𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑁄 𑀧𑀼𑀧𑁆𑀨𑀘𑁆𑀙𑀤𑀦𑀺𑀬𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀅𑀦𑁂𑀓𑁂𑀲𑀼 𑀪𑀯𑁂𑀲𑀼 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀯𑀸 𑀲𑀓𑀲𑀺𑀧𑁆𑀧𑁂𑀲𑀼 𑀦𑀺𑀧𑁆𑀨𑀢𑁆𑀢𑀺𑀁 𑀧𑀢𑁆𑀢𑁄 𑀫𑀳𑀸𑀪𑁄𑀕𑁄 𑀫𑀳𑀸𑀬𑀲𑁄 𑀤𑀸𑀦𑀸𑀪𑀺𑀭𑀢𑁄 𑀅𑀳𑁄𑀲𑀺. 𑀏𑀓𑀤𑀺𑀯𑀲𑀁 𑀲𑁄 ‘‘𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀇𑀫𑁂 𑀬𑀸𑀘𑀓𑀸 𑀦𑀸𑀫 ‘𑀅𑀳𑀁 𑀤𑀸𑀦𑀁 𑀦 𑀮𑀤𑁆𑀥𑁄𑀲𑁆𑀫𑀻’𑀢𑀺 𑀯𑀢𑁆𑀢𑀼𑀁 𑀫𑀸 𑀮𑀪𑀦𑁆𑀢𑀽’’𑀢𑀺 𑀫𑀳𑀸𑀤𑀸𑀦𑀁 𑀲𑀚𑁆𑀚𑁂𑀲𑀺. 𑀢𑀤𑀸 𑀧𑀤𑀼𑀫𑀼𑀢𑁆𑀢𑀭𑁄 𑀪𑀕𑀯𑀸 𑀲𑀧𑀭𑀺𑀯𑀸𑀭𑁄 𑀆𑀓𑀸𑀲𑁂𑀦 𑀕𑀘𑁆𑀙𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀓𑀲𑀺𑀲𑁆𑀲𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀧𑀼𑀧𑁆𑀨𑀸𑀦𑀺 𑀆𑀳𑀭𑀸𑀧𑁂𑀢𑁆𑀯𑀸 𑀆𑀓𑀸𑀲𑁂 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀽𑀚𑁂𑀲𑀺. 𑀢𑀸𑀦𑀺 𑀲𑀓𑀮𑀦𑀕𑀭𑀁 𑀙𑀸𑀤𑁂𑀢𑁆𑀯𑀸 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀅𑀝𑁆𑀞𑀁𑀲𑀼.

𑁨𑁬. 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀼𑀔𑀁 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀲𑀤𑁆𑀥𑀸𑀚𑀸𑀢𑁄 𑀧𑀩𑁆𑀩𑀚𑀺𑀢𑁆𑀯𑀸 𑀔𑀼𑀭𑀕𑁆𑀕𑁂𑀬𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀲𑀼𑀦𑀦𑁆𑀤𑁄 𑀦𑀸𑀫 𑀦𑀸𑀫𑁂𑀦𑀸𑀢𑀺𑀆𑀤𑀺𑀫𑀸𑀳. 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀧𑀼𑀧𑁆𑀨𑀘𑁆𑀙𑀤𑀦𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.