𑁩-𑁩. 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸

𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄𑀢𑁆𑀬𑀸𑀤𑀺𑀓𑀁 𑀆𑀬𑀲𑁆𑀫𑀢𑁄 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲 𑀅𑀧𑀤𑀸𑀦𑀁. 𑀅𑀬𑀫𑁆𑀧𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀸𑀦𑀺 𑀧𑀼𑀜𑁆𑀜𑀲𑀫𑁆𑀪𑀸𑀭𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀪𑀕𑀯𑀢𑁄 𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀯𑁂𑀤𑁂𑀳𑁄 𑀦𑀸𑀫 𑀅𑀲𑀻𑀢𑀺𑀓𑁄𑀝𑀺𑀯𑀺𑀪𑀯𑁄 𑀓𑀼𑀝𑀼𑀫𑁆𑀩𑀺𑀓𑁄 𑀅𑀳𑁄𑀲𑀺. 𑀲𑁄 𑀩𑀼𑀤𑁆𑀥𑀫𑀸𑀫𑀓𑁄, 𑀥𑀫𑁆𑀫𑀫𑀸𑀫𑀓𑁄, 𑀲𑀗𑁆𑀖𑀫𑀸𑀫𑀓𑁄, 𑀉𑀧𑀸𑀲𑀓𑁄 𑀳𑀼𑀢𑁆𑀯𑀸 𑀯𑀺𑀳𑀭𑀦𑁆𑀢𑁄 𑀏𑀓𑀲𑁆𑀫𑀺𑀁 𑀉𑀧𑁄𑀲𑀣𑀤𑀺𑀯𑀲𑁂 𑀧𑀸𑀢𑁄𑀯 𑀲𑀼𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀉𑀧𑁄𑀲𑀣𑀗𑁆𑀕𑀸𑀦𑀺 𑀅𑀥𑀺𑀝𑁆𑀞𑀸𑀬 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀧𑀽𑀚𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺.

𑀢𑀲𑁆𑀫𑀺𑀜𑁆𑀘 𑀔𑀡𑁂 𑀲𑀢𑁆𑀣𑀸 𑀫𑀳𑀸𑀦𑀺𑀲𑀪𑀢𑁆𑀣𑁂𑀭𑀁 𑀦𑀸𑀫 𑀢𑀢𑀺𑀬𑀲𑀸𑀯𑀓𑀁 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀥𑀼𑀢𑀯𑀸𑀤𑀸𑀦𑀁 𑀬𑀤𑀺𑀤𑀁 𑀦𑀺𑀲𑀪𑁄’’𑀢𑀺 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺. 𑀉𑀧𑀸𑀲𑀓𑁄 𑀢𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑁄 𑀥𑀫𑁆𑀫𑀓𑀣𑀸𑀯𑀲𑀸𑀦𑁂 𑀫𑀳𑀸𑀚𑀦𑁂 𑀉𑀝𑁆𑀞𑀸𑀬 𑀕𑀢𑁂 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀲𑁆𑀯𑁂, 𑀪𑀦𑁆𑀢𑁂, 𑀫𑀬𑁆𑀳𑀁 𑀪𑀺𑀓𑁆𑀔𑀁 𑀅𑀥𑀺𑀯𑀸𑀲𑁂𑀣𑀸’’𑀢𑀺 𑀦𑀺𑀫𑀦𑁆𑀢𑁂𑀲𑀺. ‘‘𑀫𑀳𑀸 𑀔𑁄, 𑀉𑀧𑀸𑀲𑀓, 𑀪𑀺𑀓𑁆𑀔𑀼𑀲𑀗𑁆𑀖𑁄’’𑀢𑀺. ‘‘𑀓𑀺𑀢𑁆𑀢𑀓𑁄, 𑀪𑀦𑁆𑀢𑁂’’𑀢𑀺? ‘‘𑀅𑀝𑁆𑀞𑀲𑀝𑁆𑀞𑀺𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲’’𑀦𑁆𑀢𑀺. ‘‘𑀪𑀦𑁆𑀢𑁂, 𑀏𑀓𑀁 𑀲𑀸𑀫𑀡𑁂𑀭𑀫𑁆𑀧𑀺 𑀯𑀺𑀳𑀸𑀭𑁂 𑀅𑀲𑁂𑀲𑁂𑀢𑁆𑀯𑀸 𑀫𑀬𑁆𑀳𑀁 𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺. 𑀲𑀢𑁆𑀣𑀸 𑀅𑀥𑀺𑀯𑀸𑀲𑁂𑀲𑀺. 𑀉𑀧𑀸𑀲𑀓𑁄 𑀲𑀢𑁆𑀣𑀼 𑀅𑀥𑀺𑀯𑀸𑀲𑀦𑀁 𑀜𑀢𑁆𑀯𑀸 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀫𑀳𑀸𑀤𑀸𑀦𑀁 𑀲𑀚𑁆𑀚𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀲𑀢𑁆𑀣𑀼 𑀓𑀸𑀮𑀁 𑀆𑀭𑁄𑀘𑀸𑀧𑁂𑀲𑀺. 𑀲𑀢𑁆𑀣𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀉𑀧𑀸𑀲𑀓𑀲𑁆𑀲 𑀖𑀭𑀁 𑀕𑀦𑁆𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀤𑀓𑁆𑀔𑀺𑀡𑁄𑀤𑀓𑀸𑀯𑀲𑀸𑀦𑁂 𑀬𑀸𑀕𑀼𑀆𑀤𑀻𑀦𑀺 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁄 𑀪𑀢𑁆𑀢𑀯𑀺𑀲𑁆𑀲𑀕𑁆𑀕𑀁 𑀅𑀓𑀸𑀲𑀺. 𑀉𑀧𑀸𑀲𑀓𑁄𑀧𑀺 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀺.

𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀫𑀳𑀸𑀦𑀺𑀲𑀪𑀢𑁆𑀣𑁂𑀭𑁄 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀢𑀫𑁂𑀯 𑀯𑀻𑀣𑀺𑀁 𑀧𑀝𑀺𑀧𑀚𑁆𑀚𑀺. 𑀉𑀧𑀸𑀲𑀓𑁄 𑀤𑀺𑀲𑁆𑀯𑀸 𑀉𑀝𑁆𑀞𑀸𑀬 𑀕𑀦𑁆𑀢𑁆𑀯𑀸 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀧𑀢𑁆𑀢𑀁, 𑀪𑀦𑁆𑀢𑁂, 𑀤𑁂𑀣𑀸’’𑀢𑀺 𑀆𑀳. 𑀣𑁂𑀭𑁄 𑀧𑀢𑁆𑀢𑀁 𑀅𑀤𑀸𑀲𑀺. ‘‘𑀪𑀦𑁆𑀢𑁂, 𑀇𑀥𑁂𑀯 𑀧𑀯𑀺𑀲𑀣, 𑀲𑀢𑁆𑀣𑀸𑀧𑀺 𑀕𑁂𑀳𑁂 𑀦𑀺𑀲𑀺𑀦𑁆𑀦𑁄’’𑀢𑀺. ‘‘𑀦 𑀯𑀝𑁆𑀝𑀺𑀲𑁆𑀲𑀢𑀺, 𑀉𑀧𑀸𑀲𑀓𑀸’’𑀢𑀺. 𑀲𑁄 𑀣𑁂𑀭𑀲𑁆𑀲 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀲𑁆𑀲 𑀧𑀽𑀭𑁂𑀢𑁆𑀯𑀸 𑀅𑀤𑀸𑀲𑀺. 𑀢𑀢𑁄 𑀣𑁂𑀭𑀁 𑀅𑀦𑀼𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀫𑀳𑀸𑀦𑀺𑀲𑀪𑀢𑁆𑀣𑁂𑀭𑁄, 𑀪𑀦𑁆𑀢𑁂, ‘𑀲𑀢𑁆𑀣𑀸𑀧𑀺 𑀕𑁂𑀳𑁂 𑀦𑀺𑀲𑀺𑀦𑁆𑀦𑁄’𑀢𑀺 𑀯𑀼𑀢𑁆𑀢𑁂𑀧𑀺 𑀧𑀯𑀺𑀲𑀺𑀢𑀼𑀁 𑀦 𑀇𑀘𑁆𑀙𑀺. 𑀅𑀢𑁆𑀣𑀺 𑀦𑀼 𑀔𑁄 𑀏𑀢𑀲𑁆𑀲 𑀢𑀼𑀫𑁆𑀳𑀸𑀓𑀁 𑀕𑀼𑀡𑁂𑀳𑀺 𑀅𑀢𑀺𑀭𑁂𑀓𑀕𑀼𑀡𑁄’’𑀢𑀺? 𑀩𑀼𑀤𑁆𑀥𑀸𑀦𑀜𑁆𑀘 𑀯𑀡𑁆𑀡𑀫𑀘𑁆𑀙𑁂𑀭𑀁 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀲𑀢𑁆𑀣𑀸 𑀏𑀯𑀫𑀸𑀳 𑁋 ‘‘𑀉𑀧𑀸𑀲𑀓, 𑀫𑀬𑀁 𑀪𑀺𑀓𑁆𑀔𑀁 𑀆𑀕𑀫𑀬𑀫𑀸𑀦𑀸 𑀕𑁂𑀳𑁂 𑀦𑀺𑀲𑀻𑀤𑀸𑀫, 𑀲𑁄 𑀪𑀺𑀓𑁆𑀔𑀼 𑀦 𑀏𑀯𑀁 𑀦𑀺𑀲𑀻𑀤𑀺𑀢𑁆𑀯𑀸 𑀪𑀺𑀓𑁆𑀔𑀁 𑀉𑀤𑀺𑀓𑁆𑀔𑀢𑀺. 𑀫𑀬𑀁 𑀕𑀸𑀫𑀦𑁆𑀢𑀲𑁂𑀦𑀸𑀲𑀦𑁂 𑀯𑀲𑀸𑀫, 𑀲𑁄 𑀅𑀭𑀜𑁆𑀜𑁂𑀬𑁂𑀯 𑀯𑀲𑀢𑀺. 𑀫𑀬𑀁 𑀙𑀦𑁆𑀦𑁂 𑀯𑀲𑀸𑀫, 𑀲𑁄 𑀅𑀩𑁆𑀪𑁄𑀓𑀸𑀲𑁂𑀬𑁂𑀯 𑀯𑀲𑀢𑀻’’𑀢𑀺 𑀪𑀕𑀯𑀸 ‘‘𑀅𑀬𑀜𑁆𑀘 𑀅𑀬𑀜𑁆𑀘𑁂𑀢𑀲𑁆𑀲 𑀕𑀼𑀡𑁄’’𑀢𑀺 𑀫𑀳𑀸𑀲𑀫𑀼𑀤𑁆𑀤𑀁 𑀧𑀽𑀭𑀬𑀫𑀸𑀦𑁄 𑀯𑀺𑀬 𑀢𑀲𑁆𑀲 𑀕𑀼𑀡𑀁 𑀓𑀣𑁂𑀲𑀺.

𑀉𑀧𑀸𑀲𑀓𑁄𑀧𑀺 𑀧𑀓𑀢𑀺𑀬𑀸 𑀚𑀮𑀫𑀸𑀦𑀤𑀻𑀧𑁄 𑀢𑁂𑀮𑁂𑀦 𑀆𑀲𑀺𑀢𑁆𑀢𑁄 𑀯𑀺𑀬 𑀲𑀼𑀝𑁆𑀞𑀼𑀢𑀭𑀁 𑀧𑀲𑀦𑁆𑀦𑁄 𑀳𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀓𑀺𑀁 𑀫𑀬𑁆𑀳𑀁 𑀅𑀜𑁆𑀜𑀸𑀬 𑀲𑀫𑁆𑀧𑀢𑁆𑀢𑀺𑀬𑀸, 𑀬𑀁𑀦𑀽𑀦𑀸𑀳𑀁 𑀅𑀦𑀸𑀕𑀢𑁂 𑀏𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂 𑀥𑀼𑀢𑀯𑀸𑀤𑀸𑀦𑀁 𑀅𑀕𑁆𑀕𑀪𑀸𑀯𑀢𑁆𑀣𑀸𑀬 𑀧𑀢𑁆𑀣𑀦𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀧𑀼𑀦𑀧𑀺 𑀲𑀢𑁆𑀣𑀸𑀭𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀢𑁂𑀦𑁂𑀯 𑀦𑀺𑀬𑀸𑀫𑁂𑀦 𑀲𑀢𑁆𑀢 𑀤𑀺𑀯𑀲𑁂 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀢𑀺𑀘𑀻𑀯𑀭𑀸𑀦𑀺 𑀤𑀢𑁆𑀯𑀸 𑀲𑀢𑁆𑀣𑀼 𑀧𑀸𑀤𑀫𑀽𑀮𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀬𑀁 𑀫𑁂, 𑀪𑀦𑁆𑀢𑁂, 𑀲𑀢𑁆𑀢 𑀤𑀺𑀯𑀲𑁂 𑀤𑀸𑀦𑀁 𑀤𑁂𑀦𑁆𑀢𑀲𑁆𑀲 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁 𑀫𑁂𑀢𑁆𑀢𑀁 𑀯𑀘𑀻𑀓𑀫𑁆𑀫𑀁 𑀫𑁂𑀢𑁆𑀢𑀁 𑀫𑀦𑁄𑀓𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁, 𑀇𑀫𑀺𑀦𑀸𑀳𑀁 𑀦 𑀅𑀜𑁆𑀜𑀁 𑀤𑁂𑀯𑀲𑀫𑁆𑀧𑀢𑁆𑀢𑀺𑀁 𑀯𑀸 𑀲𑀓𑁆𑀓𑀫𑀸𑀭𑀩𑁆𑀭𑀳𑁆𑀫𑀲𑀫𑁆𑀧𑀢𑁆𑀢𑀺𑀁 𑀯𑀸 𑀧𑀢𑁆𑀣𑁂𑀫𑀺, 𑀇𑀤𑀁 𑀧𑀦 𑀫𑁂 𑀓𑀫𑁆𑀫𑀁 𑀅𑀦𑀸𑀕𑀢𑁂 𑀏𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂 𑀫𑀳𑀸𑀦𑀺𑀲𑀪𑀢𑁆𑀣𑁂𑀭𑁂𑀦 𑀧𑀢𑁆𑀢𑀝𑁆𑀞𑀸𑀦𑀦𑁆𑀢𑀭𑀁 𑀧𑀸𑀧𑀼𑀡𑀦𑀢𑁆𑀣𑀸𑀬 𑀢𑁂𑀭𑀲𑀥𑀼𑀢𑀗𑁆𑀕𑀥𑀭𑀸𑀦𑀁 𑀅𑀕𑁆𑀕𑀪𑀸𑀯𑀲𑁆𑀲 𑀅𑀥𑀺𑀓𑀸𑀭𑁄 𑀳𑁄𑀢𑀽’’𑀢𑀺. 𑀲𑀢𑁆𑀣𑀸 ‘‘𑀫𑀳𑀦𑁆𑀢𑀁 𑀞𑀸𑀦𑀁 𑀇𑀫𑀺𑀦𑀸 𑀧𑀢𑁆𑀣𑀺𑀢𑀁, 𑀲𑀫𑀺𑀚𑁆𑀛𑀺𑀲𑁆𑀲𑀢𑀺 𑀦𑀼 𑀔𑁄, 𑀦𑁄’’𑀢𑀺 𑀑𑀮𑁄𑀓𑁂𑀦𑁆𑀢𑁄 𑀲𑀫𑀺𑀚𑁆𑀛𑀦𑀪𑀸𑀯𑀁 𑀤𑀺𑀲𑁆𑀯𑀸 𑀆𑀳 𑁋 ‘‘𑀫𑀦𑀸𑀧𑀁 𑀢𑁂 𑀞𑀸𑀦𑀁 𑀧𑀢𑁆𑀣𑀺𑀢𑀁, 𑀅𑀦𑀸𑀕𑀢𑁂 𑀲𑀢𑀲𑀳𑀲𑁆𑀲𑀓𑀧𑁆𑀧𑀸𑀯𑀲𑀸𑀦𑁂 𑀕𑁄𑀢𑀫𑁄 𑀦𑀸𑀫 𑀩𑀼𑀤𑁆𑀥𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀢𑁆𑀯𑀁 𑀢𑀢𑀺𑀬𑀲𑀸𑀯𑀓𑁄 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀦𑀸𑀫 𑀪𑀯𑀺𑀲𑁆𑀲𑀲𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀢𑀁 𑀲𑀼𑀢𑁆𑀯𑀸 𑀉𑀧𑀸𑀲𑀓𑁄 ‘‘𑀩𑀼𑀤𑁆𑀥𑀸𑀦𑀁 𑀤𑁆𑀯𑁂 𑀓𑀣𑀸 𑀦𑀸𑀫 𑀦𑀢𑁆𑀣𑀻’’𑀢𑀺 𑀧𑀼𑀦𑀤𑀺𑀯𑀲𑁂 𑀧𑀢𑁆𑀢𑀩𑁆𑀩𑀁 𑀯𑀺𑀬 𑀢𑀁 𑀲𑀫𑁆𑀧𑀢𑁆𑀢𑀺𑀁 𑀅𑀫𑀜𑁆𑀜𑀺𑀢𑁆𑀣. 𑀲𑁄 𑀬𑀸𑀯𑀢𑀸𑀬𑀼𑀓𑀁 𑀤𑀸𑀦𑀁 𑀤𑀢𑁆𑀯𑀸 𑀲𑀻𑀮𑀁 𑀲𑀫𑀸𑀤𑀸𑀬 𑀭𑀓𑁆𑀔𑀺𑀢𑁆𑀯𑀸 𑀦𑀸𑀦𑀧𑁆𑀧𑀓𑀸𑀭𑀁 𑀧𑀼𑀜𑁆𑀜𑀓𑀫𑁆𑀫𑀁 𑀓𑀢𑁆𑀯𑀸 𑀓𑀸𑀮𑀁𑀓𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀺.

𑀢𑀢𑁄 𑀧𑀝𑁆𑀞𑀸𑀬 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑁄 𑀇𑀢𑁄 𑀏𑀓𑀦𑀯𑀼𑀢𑀺𑀓𑀧𑁆𑀧𑁂 𑀯𑀺𑀧𑀲𑁆𑀲𑀺𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀩𑀦𑁆𑀥𑀼𑀫𑀢𑀻𑀦𑀕𑀭𑀁 𑀉𑀧𑀦𑀺𑀲𑁆𑀲𑀸𑀬 𑀔𑁂𑀫𑁂 𑀫𑀺𑀕𑀤𑀸𑀬𑁂 𑀯𑀺𑀳𑀭𑀦𑁆𑀢𑁂 𑀤𑁂𑀯𑀮𑁄𑀓𑀸 𑀘𑀯𑀺𑀢𑁆𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀧𑀭𑀺𑀚𑀺𑀡𑁆𑀡𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀫𑀺𑀜𑁆𑀘 𑀓𑀸𑀮𑁂 𑀯𑀺𑀧𑀲𑁆𑀲𑀻 𑀪𑀕𑀯𑀸 𑀲𑀢𑁆𑀢𑀫𑁂 𑀲𑀁𑀯𑀘𑁆𑀙𑀭𑁂 𑀥𑀫𑁆𑀫𑀁 𑀓𑀣𑁂𑀲𑀺, 𑀫𑀳𑀦𑁆𑀢𑀁 𑀓𑁄𑀮𑀸𑀳𑀮𑀁 𑀅𑀳𑁄𑀲𑀺. 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀤𑁂𑀯𑀢𑀸 ‘‘𑀲𑀢𑁆𑀣𑀸 𑀥𑀫𑁆𑀫𑀁 𑀓𑀣𑁂𑀲𑁆𑀲𑀢𑀻’’𑀢𑀺 𑀆𑀭𑁄𑀘𑁂𑀲𑀼𑀁. 𑀩𑁆𑀭𑀸𑀳𑁆𑀫𑀡𑁄 𑀢𑀁 𑀲𑀸𑀲𑀦𑀁 𑀅𑀲𑁆𑀲𑁄𑀲𑀺. 𑀢𑀲𑁆𑀲 𑀦𑀺𑀯𑀸𑀲𑀦𑀲𑀸𑀝𑀓𑁄 𑀏𑀓𑁄𑀬𑁂𑀯, 𑀢𑀣𑀸 𑀩𑁆𑀭𑀸𑀳𑁆𑀫𑀡𑀺𑀬𑀸. 𑀧𑀸𑀭𑀼𑀧𑀦𑀁 𑀧𑀦 𑀤𑁆𑀯𑀺𑀦𑁆𑀦𑀫𑁆𑀧𑀺 𑀏𑀓𑀫𑁂𑀯. 𑀲𑁄 𑀲𑀓𑀮𑀦𑀕𑀭𑁂 ‘‘𑀏𑀓𑀲𑀸𑀝𑀓𑀩𑁆𑀭𑀸𑀳𑁆𑀫𑀡𑁄’’𑀢𑀺 𑀧𑀜𑁆𑀜𑀸𑀬𑀺. 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀓𑁂𑀦𑀘𑀺𑀤𑁂𑀯 𑀓𑀺𑀘𑁆𑀘𑁂𑀦 𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀦𑁆𑀦𑀺𑀧𑀸𑀢𑁂 𑀲𑀢𑀺 𑀩𑁆𑀭𑀸𑀳𑁆𑀫𑀡𑀺𑀁 𑀕𑁂𑀳𑁂 𑀞𑀧𑁂𑀢𑁆𑀯𑀸 𑀲𑀬𑀁 𑀢𑀁 𑀯𑀢𑁆𑀣𑀁 𑀧𑀸𑀭𑀼𑀧𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀩𑁆𑀭𑀸𑀳𑁆𑀫𑀡𑀻𑀦𑀁 𑀲𑀦𑁆𑀦𑀺𑀧𑀸𑀢𑁂 𑀲𑀢𑀺 𑀲𑀬𑀁 𑀕𑁂𑀳𑁂 𑀅𑀘𑁆𑀙𑀢𑀺, 𑀩𑁆𑀭𑀸𑀳𑁆𑀫𑀡𑀻 𑀢𑀁 𑀯𑀢𑁆𑀣𑀁 𑀧𑀸𑀭𑀼𑀧𑀺𑀢𑁆𑀯𑀸 𑀕𑀘𑁆𑀙𑀢𑀺. 𑀢𑀲𑁆𑀫𑀺𑀁 𑀧𑀦 𑀤𑀺𑀯𑀲𑁂 𑀲𑁄 𑀩𑁆𑀭𑀸𑀳𑁆𑀫𑀡𑀺𑀁 𑀆𑀳 𑁋 ‘‘𑀪𑁄𑀢𑀺, 𑀓𑀺𑀁 𑀢𑁆𑀯𑀁 𑀭𑀢𑁆𑀢𑀺𑀁 𑀥𑀫𑁆𑀫𑀁 𑀲𑀼𑀡𑀺𑀲𑁆𑀲𑀲𑀺, 𑀉𑀤𑀸𑀳𑀼 𑀤𑀺𑀯𑀸’’𑀢𑀺? ‘‘𑀲𑀸𑀫𑀺, 𑀅𑀳𑀁 𑀫𑀸𑀢𑀼𑀕𑀸𑀫𑁄 𑀪𑀻𑀭𑀼𑀓𑀚𑀸𑀢𑀺𑀓𑀸 𑀭𑀢𑁆𑀢𑀺𑀁 𑀲𑁄𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀤𑀺𑀯𑀸 𑀲𑁄𑀲𑁆𑀲𑀸𑀫𑀻’’𑀢𑀺 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀕𑁂𑀳𑁂 𑀞𑀧𑁂𑀢𑁆𑀯𑀸 𑀢𑀁 𑀯𑀢𑁆𑀣𑀁 𑀧𑀸𑀭𑀼𑀧𑀺𑀢𑁆𑀯𑀸 𑀉𑀧𑀸𑀲𑀺𑀓𑀸𑀳𑀺 𑀲𑀤𑁆𑀥𑀺𑀁 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀉𑀧𑀸𑀲𑀺𑀓𑀸𑀳𑀺 𑀲𑀤𑁆𑀥𑀺𑀁 𑀅𑀕𑀫𑀸𑀲𑀺. 𑀅𑀣 𑀩𑁆𑀭𑀸𑀳𑁆𑀫𑀡𑁄 𑀢𑀁 𑀕𑁂𑀳𑁂 𑀞𑀧𑁂𑀢𑁆𑀯𑀸 𑀢𑀁 𑀯𑀢𑁆𑀣𑀁 𑀧𑀸𑀭𑀼𑀧𑀺𑀢𑁆𑀯𑀸 𑀯𑀺𑀳𑀸𑀭𑀁 𑀕𑀢𑁄.

𑀢𑀲𑁆𑀫𑀺𑀜𑁆𑀘 𑀲𑀫𑀬𑁂 𑀲𑀢𑁆𑀣𑀸 𑀧𑀭𑀺𑀲𑀫𑀚𑁆𑀛𑁂 𑀅𑀮𑀗𑁆𑀓𑀢𑀥𑀫𑁆𑀫𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀘𑀺𑀢𑁆𑀢𑀩𑀻𑀚𑀦𑀺𑀁 𑀕𑀳𑁂𑀢𑁆𑀯𑀸 𑀆𑀓𑀸𑀲𑀕𑀗𑁆𑀕𑀁 𑀑𑀢𑀸𑀭𑁂𑀦𑁆𑀢𑁄 𑀯𑀺𑀬 𑀲𑀺𑀦𑁂𑀭𑀼𑀁 𑀫𑀦𑁆𑀣𑀁 𑀓𑀢𑁆𑀯𑀸 𑀲𑀸𑀕𑀭𑀁 𑀦𑀺𑀫𑁆𑀫𑀦𑁆𑀣𑁂𑀦𑁆𑀢𑁄 𑀯𑀺𑀬 𑀘 𑀥𑀫𑁆𑀫𑀓𑀣𑀁 𑀓𑀣𑁂𑀲𑀺. 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀭𑀺𑀲𑀧𑀭𑀺𑀬𑀦𑁆𑀢𑁂𑀦 𑀦𑀺𑀲𑀺𑀦𑁆𑀦𑀲𑁆𑀲 𑀥𑀫𑁆𑀫𑀁 𑀲𑀼𑀡𑀦𑁆𑀢𑀲𑁆𑀲 𑀧𑀞𑀫𑀬𑀸𑀫𑁂𑀬𑁂𑀯 𑀲𑀓𑀮𑀲𑀭𑀻𑀭𑀁 𑀧𑀽𑀭𑀬𑀫𑀸𑀦𑀸 𑀧𑀜𑁆𑀘𑀯𑀡𑁆𑀡𑀸 𑀧𑀻𑀢𑀺 𑀉𑀧𑁆𑀧𑀚𑁆𑀚𑀺. 𑀲𑁄 𑀧𑀸𑀭𑀼𑀢𑀯𑀢𑁆𑀣𑀁 𑀲𑀗𑁆𑀖𑀭𑀺𑀢𑁆𑀯𑀸 ‘‘𑀤𑀲𑀩𑀮𑀲𑁆𑀲 𑀤𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀅𑀣𑀲𑁆𑀲 𑀆𑀤𑀻𑀦𑀯𑀲𑀳𑀲𑁆𑀲𑀁 𑀤𑀲𑁆𑀲𑀬𑀫𑀸𑀦𑀁 𑀫𑀘𑁆𑀙𑁂𑀭𑀁 𑀉𑀧𑁆𑀧𑀚𑁆𑀚𑀺. 𑀲𑁄 ‘‘𑀩𑁆𑀭𑀸𑀳𑁆𑀫𑀡𑀺𑀬𑀸 𑀢𑀼𑀬𑁆𑀳𑀜𑁆𑀘 𑀏𑀓𑀫𑁂𑀯 𑀯𑀢𑁆𑀣𑀁, 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀧𑀸𑀭𑀼𑀧𑀦𑀁 𑀦𑀸𑀫 𑀦𑀢𑁆𑀣𑀺, 𑀅𑀧𑀸𑀭𑀼𑀧𑀺𑀢𑁆𑀯𑀸 𑀩𑀳𑀺 𑀯𑀺𑀘𑀭𑀺𑀢𑀼𑀁 𑀦 𑀲𑀓𑁆𑀓𑁄𑀫𑀻’’𑀢𑀺 𑀲𑀩𑁆𑀩𑀣𑀸𑀧𑀺 𑀅𑀤𑀸𑀢𑀼𑀓𑀸𑀫𑁄 𑀅𑀳𑁄𑀲𑀺. 𑀅𑀣𑀲𑁆𑀲 𑀦𑀺𑀓𑁆𑀔𑀦𑁆𑀢𑁂 𑀧𑀞𑀫𑁂 𑀫𑀚𑁆𑀛𑀺𑀫𑀬𑀸𑀫𑁂𑀢𑀺 𑀢𑀣𑁂𑀯 𑀧𑀻𑀢𑀺 𑀉𑀧𑁆𑀧𑀚𑁆𑀚𑀺. 𑀲𑁄 𑀢𑀣𑁂𑀯 𑀘𑀺𑀦𑁆𑀢𑁂𑀢𑁆𑀯𑀸 𑀢𑀣𑁂𑀯 𑀅𑀤𑀸𑀢𑀼𑀓𑀸𑀫𑁄 𑀅𑀳𑁄𑀲𑀺. 𑀅𑀣𑀲𑁆𑀲 𑀫𑀚𑁆𑀛𑀺𑀫𑁂 𑀬𑀸𑀫𑁂 𑀦𑀺𑀓𑁆𑀔𑀦𑁆𑀢𑁂 𑀧𑀘𑁆𑀙𑀺𑀫𑀬𑀸𑀫𑁂𑀧𑀺 𑀢𑀣𑁂𑀯 𑀧𑀻𑀢𑀺 𑀉𑀧𑁆𑀧𑀚𑁆𑀚𑀺. 𑀢𑀤𑀸 𑀲𑁄 𑀫𑀘𑁆𑀙𑁂𑀭𑀁 𑀚𑀺𑀦𑀺𑀢𑁆𑀯𑀸 𑀯𑀢𑁆𑀣𑀁 𑀲𑀗𑁆𑀖𑀭𑀺𑀢𑁆𑀯𑀸 𑀲𑀢𑁆𑀣𑀼 𑀧𑀸𑀤𑀫𑀽𑀮𑁂 𑀞𑀧𑁂𑀲𑀺. 𑀢𑀢𑁄 𑀯𑀸𑀫𑀳𑀢𑁆𑀣𑀁 𑀆𑀪𑀼𑀚𑀺𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀳𑀢𑁆𑀣𑁂𑀦 𑀅𑀧𑁆𑀨𑁄𑀝𑁂𑀢𑁆𑀯𑀸 ‘‘𑀚𑀺𑀢𑀁 𑀫𑁂, 𑀚𑀺𑀢𑀁 𑀫𑁂’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀦𑀤𑀺.

𑀢𑀲𑁆𑀫𑀺𑀁 𑀲𑀫𑀬𑁂 𑀩𑀦𑁆𑀥𑀼𑀫𑀸 𑀭𑀸𑀚𑀸 𑀥𑀫𑁆𑀫𑀸𑀲𑀦𑀲𑁆𑀲 𑀧𑀘𑁆𑀙𑀢𑁄 𑀅𑀦𑁆𑀢𑁄𑀲𑀸𑀡𑀺𑀬𑀁 𑀦𑀺𑀲𑀺𑀦𑁆𑀦𑁄 𑀥𑀫𑁆𑀫𑀁 𑀲𑀼𑀡𑀸𑀢𑀺. 𑀭𑀜𑁆𑀜𑁄 𑀘 𑀦𑀸𑀫 ‘‘𑀚𑀺𑀢𑀁 𑀫𑁂’’𑀢𑀺 𑀲𑀤𑁆𑀤𑁄 𑀅𑀫𑀦𑀸𑀧𑁄 𑀳𑁄𑀢𑀺. 𑀭𑀸𑀚𑀸 𑀧𑀼𑀭𑀺𑀲𑀁 𑀆𑀡𑀸𑀧𑁂𑀲𑀺 ‘‘𑀕𑀘𑁆𑀙, 𑀪𑀡𑁂, 𑀏𑀢𑀁 𑀧𑀼𑀘𑁆𑀙 𑁋 ‘𑀓𑀺𑀁 𑀲𑁄 𑀯𑀤𑀢𑀻’’’𑀢𑀺? 𑀩𑁆𑀭𑀸𑀳𑁆𑀫𑀡𑁄 𑀢𑁂𑀦𑀸𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀺𑀢𑁄 ‘‘𑀅𑀯𑀲𑁂𑀲𑀸 𑀳𑀢𑁆𑀣𑀺𑀬𑀸𑀦𑀸𑀤𑀻𑀦𑀺 𑀆𑀭𑀼𑀬𑁆𑀳 𑀅𑀲𑀺𑀘𑀫𑁆𑀫𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀧𑀭𑀲𑁂𑀦𑀁 𑀚𑀺𑀦𑀦𑁆𑀢𑀺, 𑀦 𑀢𑀁 𑀅𑀘𑁆𑀙𑀭𑀺𑀬𑀁. 𑀅𑀳𑀁 𑀧𑀦 𑀧𑀘𑁆𑀙𑀢𑁄 𑀆𑀕𑀘𑁆𑀙𑀦𑁆𑀢𑀲𑁆𑀲 𑀓𑀽𑀝𑀕𑁄𑀡𑀲𑁆𑀲 𑀫𑀼𑀕𑁆𑀕𑀭𑁂𑀦 𑀲𑀻𑀲𑀁 𑀪𑀺𑀦𑁆𑀤𑀺𑀢𑁆𑀯𑀸 𑀢𑀁 𑀧𑀮𑀸𑀧𑁂𑀦𑁆𑀢𑁄 𑀯𑀺𑀬 𑀫𑀘𑁆𑀙𑁂𑀭𑀘𑀺𑀢𑁆𑀢𑀁 𑀚𑀺𑀦𑀺𑀢𑁆𑀯𑀸 𑀧𑀸𑀭𑀼𑀢𑀯𑀢𑁆𑀣𑀁 𑀤𑀲𑀩𑀮𑀲𑁆𑀲 𑀅𑀤𑀸𑀲𑀺𑀁, 𑀢𑀁 𑀫𑁂 𑀚𑀺𑀢𑀁 𑀫𑀘𑁆𑀙𑁂𑀭𑀁 𑀅𑀘𑁆𑀙𑀭𑀺𑀬’’𑀦𑁆𑀢𑀺 𑀆𑀳. 𑀲𑁄 𑀆𑀕𑀦𑁆𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 ‘‘𑀅𑀫𑁆𑀳𑁂, 𑀪𑀡𑁂, 𑀤𑀲𑀩𑀮𑀲𑁆𑀲 𑀅𑀦𑀼𑀭𑀽𑀧𑀁 𑀦 𑀚𑀸𑀦𑀸𑀫, 𑀩𑁆𑀭𑀸𑀳𑁆𑀫𑀡𑁄 𑀚𑀸𑀦𑀸𑀢𑀻’’𑀢𑀺 𑀢𑀲𑁆𑀲 𑀧𑀲𑀻𑀤𑀺𑀢𑁆𑀯𑀸 𑀯𑀢𑁆𑀣𑀬𑀼𑀕𑀁 𑀧𑁂𑀲𑁂𑀲𑀺. 𑀢𑀁 𑀤𑀺𑀲𑁆𑀯𑀸 𑀩𑁆𑀭𑀸𑀳𑁆𑀫𑀡𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀭𑀸𑀚𑀸 𑀫𑀬𑁆𑀳𑀁 𑀢𑀼𑀡𑁆𑀳𑀻 𑀦𑀺𑀲𑀺𑀦𑁆𑀦𑀲𑁆𑀲 𑀧𑀞𑀫𑀁 𑀓𑀺𑀜𑁆𑀘𑀺 𑀅𑀤𑀢𑁆𑀯𑀸 𑀲𑀢𑁆𑀣𑀼 𑀕𑀼𑀡𑁂 𑀓𑀣𑁂𑀦𑁆𑀢𑀲𑁆𑀲 𑀅𑀤𑀸𑀲𑀺, 𑀲𑀢𑁆𑀣𑀼 𑀕𑀼𑀡𑁂 𑀧𑀝𑀺𑀘𑁆𑀘 𑀇𑀤𑀁 𑀉𑀧𑁆𑀧𑀦𑁆𑀦𑀁, 𑀲𑀢𑁆𑀣𑀼𑀬𑁂𑀯 𑀅𑀦𑀼𑀘𑁆𑀙𑀯𑀺𑀓’’𑀦𑁆𑀢𑀺 𑀢𑀫𑁆𑀧𑀺 𑀯𑀢𑁆𑀣𑀬𑀼𑀕𑀁 𑀤𑀲𑀩𑀮𑀲𑁆𑀲 𑀅𑀤𑀸𑀲𑀺. 𑀭𑀸𑀚𑀸 ‘‘𑀓𑀺𑀁 𑀩𑁆𑀭𑀸𑀳𑁆𑀫𑀡𑁂𑀦 𑀓𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀢𑀫𑁆𑀧𑀺 𑀢𑁂𑀦 𑀯𑀢𑁆𑀣𑀬𑀼𑀕𑀁 𑀢𑀣𑀸𑀕𑀢𑀲𑁆𑀲𑁂𑀯 𑀤𑀺𑀦𑁆𑀦’’𑀦𑁆𑀢𑀺 𑀲𑀼𑀢𑁆𑀯𑀸 𑀅𑀜𑁆𑀜𑀸𑀦𑀺𑀧𑀺 𑀤𑁆𑀯𑁂 𑀯𑀢𑁆𑀣𑀬𑀼𑀕𑀸𑀦𑀺 𑀧𑁂𑀲𑁂𑀲𑀺, 𑀲𑁄 𑀢𑀸𑀦𑀺𑀧𑀺 𑀲𑀢𑁆𑀣𑀼 𑀅𑀤𑀸𑀲𑀺. 𑀧𑀼𑀦 𑀭𑀸𑀚𑀸 ‘𑀅𑀜𑁆𑀜𑀸𑀦𑀺𑀧𑀺 𑀘𑀢𑁆𑀢𑀸𑀭𑀻’𑀢𑀺 𑀏𑀯𑀁 𑀯𑀢𑁆𑀯𑀸 𑀬𑀸𑀯 𑀏𑀯𑀁 𑀤𑁆𑀯𑀢𑁆𑀢𑀺𑀁𑀲 𑀯𑀢𑁆𑀣𑀬𑀼𑀕𑀸𑀦𑀺 𑀧𑁂𑀲𑁂𑀲𑀺. 𑀅𑀣 𑀩𑁆𑀭𑀸𑀳𑁆𑀫𑀡𑁄 ‘‘𑀇𑀤𑀁 𑀯𑀟𑁆𑀠𑁂𑀢𑁆𑀯𑀸 𑀯𑀟𑁆𑀠𑁂𑀢𑁆𑀯𑀸 𑀕𑀳𑀡𑀁 𑀯𑀺𑀬 𑀳𑁄𑀢𑀻’’𑀢𑀺 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀏𑀓𑀁, 𑀩𑁆𑀭𑀸𑀳𑁆𑀫𑀡𑀺𑀬𑀸 𑀏𑀓𑀦𑁆𑀢𑀺 𑀤𑁆𑀯𑁂 𑀯𑀢𑁆𑀣𑀬𑀼𑀕𑀸𑀦𑀺 𑀕𑀳𑁂𑀢𑁆𑀯𑀸, 𑀢𑀺𑀁𑀲 𑀬𑀼𑀕𑀸𑀦𑀺 𑀢𑀣𑀸𑀕𑀢𑀲𑁆𑀲𑁂𑀯 𑀅𑀤𑀸𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀘 𑀲𑁄 𑀲𑀢𑁆𑀣𑀼 𑀯𑀺𑀲𑁆𑀲𑀸𑀲𑀺𑀓𑁄 𑀚𑀸𑀢𑁄.

𑀅𑀣 𑀢𑀁 𑀭𑀸𑀚𑀸 𑀏𑀓𑀤𑀺𑀯𑀲𑀁 𑀲𑀻𑀢𑀲𑀫𑀬𑁂 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀡𑀦𑁆𑀢𑀁 𑀤𑀺𑀲𑁆𑀯𑀸 𑀲𑀢𑀲𑀳𑀲𑁆𑀲𑀕𑁆𑀖𑀦𑀓𑀁 𑀅𑀢𑁆𑀢𑀦𑁄 𑀧𑀸𑀭𑀼𑀢𑀁 𑀭𑀢𑁆𑀢𑀓𑀫𑁆𑀩𑀮𑀁 𑀤𑀢𑁆𑀯𑀸 𑀆𑀳 𑁋 ‘‘𑀇𑀢𑁄 𑀧𑀝𑁆𑀞𑀸𑀬 𑀇𑀫𑀁 𑀧𑀸𑀭𑀼𑀧𑀺𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀸𑀳𑀻’’𑀢𑀺. 𑀲𑁄 ‘‘𑀓𑀺𑀁 𑀫𑁂 𑀇𑀫𑀺𑀦𑀸 𑀓𑀫𑁆𑀩𑀮𑁂𑀦 𑀇𑀫𑀲𑁆𑀫𑀺𑀁 𑀧𑀽𑀢𑀺𑀓𑀸𑀬𑁂 𑀉𑀧𑀦𑀻𑀢𑁂𑀦𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀦𑁆𑀢𑁄𑀕𑀦𑁆𑀥𑀓𑀼𑀝𑀺𑀬𑀁 𑀢𑀣𑀸𑀕𑀢𑀲𑁆𑀲 𑀫𑀜𑁆𑀘𑀲𑁆𑀲 𑀉𑀧𑀭𑀺 𑀯𑀺𑀢𑀸𑀦𑀁 𑀓𑀢𑁆𑀯𑀸 𑀅𑀕𑀫𑀸𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀭𑀸𑀚𑀸 𑀧𑀸𑀢𑁄𑀯 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀅𑀦𑁆𑀢𑁄𑀕𑀦𑁆𑀥𑀓𑀼𑀝𑀺𑀬𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀺. 𑀢𑀲𑁆𑀫𑀺𑀁 𑀔𑀡𑁂 𑀙𑀩𑁆𑀩𑀡𑁆𑀡𑀸 𑀩𑀼𑀤𑁆𑀥𑀭𑀲𑁆𑀫𑀺𑀬𑁄 𑀓𑀫𑁆𑀩𑀮𑁂 𑀧𑀝𑀺𑀳𑀜𑁆𑀜𑀦𑁆𑀢𑀺, 𑀓𑀫𑁆𑀩𑀮𑁄 𑀅𑀢𑀺𑀯𑀺𑀬 𑀯𑀺𑀭𑁄𑀘𑀺𑀢𑁆𑀣. 𑀭𑀸𑀚𑀸 𑀉𑀮𑁆𑀮𑁄𑀓𑁂𑀦𑁆𑀢𑁄 𑀲𑀜𑁆𑀚𑀸𑀦𑀺𑀢𑁆𑀯𑀸 𑀆𑀳 𑁋 ‘‘𑀅𑀫𑁆𑀳𑀸𑀓𑀁, 𑀪𑀦𑁆𑀢𑁂, 𑀏𑀲 𑀓𑀫𑁆𑀩𑀮𑁄, 𑀅𑀫𑁆𑀳𑁂𑀳𑀺 𑀏𑀓𑀲𑀸𑀝𑀓𑀩𑁆𑀭𑀸𑀳𑁆𑀫𑀡𑀲𑁆𑀲 𑀤𑀺𑀦𑁆𑀦𑁄’’𑀢𑀺. ‘‘𑀢𑀼𑀫𑁆𑀳𑁂𑀳𑀺, 𑀫𑀳𑀸𑀭𑀸𑀚, 𑀩𑁆𑀭𑀸𑀳𑁆𑀫𑀡𑁄 𑀧𑀽𑀚𑀺𑀢𑁄, 𑀩𑁆𑀭𑀸𑀳𑁆𑀫𑀡𑁂𑀦 𑀫𑀬𑀁 𑀧𑀽𑀚𑀺𑀢𑀸’’𑀢𑀺. 𑀭𑀸𑀚𑀸 ‘‘𑀩𑁆𑀭𑀸𑀳𑁆𑀫𑀡𑁄 𑀬𑀼𑀢𑁆𑀢𑀁 𑀅𑀜𑁆𑀜𑀸𑀲𑀺, 𑀦 𑀫𑀬’’𑀦𑁆𑀢𑀺 𑀧𑀲𑀻𑀤𑀺𑀢𑁆𑀯𑀸 𑀬𑀁 𑀫𑀦𑀼𑀲𑁆𑀲𑀸𑀦𑀁 𑀉𑀧𑀓𑀸𑀭𑀪𑀽𑀢𑀁, 𑀢𑀁 𑀲𑀩𑁆𑀩𑀁 𑀅𑀝𑁆𑀞𑀝𑁆𑀞𑀓𑀁 𑀓𑀢𑁆𑀯𑀸 𑀲𑀩𑁆𑀩𑀝𑁆𑀞𑀓𑀁 𑀦𑀸𑀫 𑀤𑀸𑀦𑀁 𑀤𑀢𑁆𑀯𑀸 𑀧𑀼𑀭𑁄𑀳𑀺𑀢𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀲𑁄𑀧𑀺 ‘‘𑀅𑀝𑁆𑀞𑀝𑁆𑀞𑀓𑀁 𑀦𑀸𑀫 𑀘𑀢𑀼𑀲𑀝𑁆𑀞𑀺 𑀳𑁄𑀢𑀻’’𑀢𑀺 𑀘𑀢𑀼𑀲𑀝𑁆𑀞𑀺𑀲𑀮𑀸𑀓𑀪𑀢𑁆𑀢𑀸𑀦𑀺 𑀉𑀧𑀝𑁆𑀞𑀧𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀤𑀸𑀦𑀁 𑀤𑀢𑁆𑀯𑀸 𑀲𑀻𑀮𑀁 𑀭𑀓𑁆𑀔𑀺𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀺.

𑀧𑀼𑀦 𑀢𑀢𑁄 𑀘𑀼𑀢𑁄 𑀇𑀫𑀲𑁆𑀫𑀺𑀁 𑀓𑀧𑁆𑀧𑁂 𑀪𑀕𑀯𑀢𑁄 𑀓𑁄𑀡𑀸𑀕𑀫𑀦𑀲𑁆𑀲 𑀪𑀕𑀯𑀢𑁄 𑀓𑀲𑁆𑀲𑀧𑀲𑁆𑀲 𑀘𑀸𑀢𑀺 𑀤𑁆𑀯𑀺𑀦𑁆𑀦𑀁 𑀅𑀦𑁆𑀢𑀭𑁂 𑀩𑀸𑀭𑀸𑀡𑀲𑀺𑀬𑀁 𑀓𑀼𑀝𑀼𑀫𑁆𑀩𑀺𑀬𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄. 𑀲𑁄 𑀯𑀟𑁆𑀠𑀺𑀫𑀦𑁆𑀯𑀸𑀬 𑀖𑀭𑀸𑀯𑀸𑀲𑀁 𑀯𑀲𑀦𑁆𑀢𑁄 𑀏𑀓𑀤𑀺𑀯𑀲𑀁 𑀅𑀭𑀜𑁆𑀜𑁂 𑀚𑀗𑁆𑀖𑀯𑀺𑀳𑀸𑀭𑀁 𑀯𑀺𑀘𑀭𑀢𑀺. 𑀢𑀲𑁆𑀫𑀺𑀜𑁆𑀘 𑀲𑀫𑀬𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀦𑀤𑀻𑀢𑀻𑀭𑁂 𑀘𑀻𑀯𑀭𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀅𑀦𑀼𑀯𑀸𑀢𑁂 𑀅𑀧𑁆𑀧𑀳𑁄𑀦𑁆𑀢𑁂 𑀲𑀗𑁆𑀖𑀭𑀺𑀢𑁆𑀯𑀸 𑀞𑀧𑁂𑀢𑀼𑀫𑀸𑀭𑀤𑁆𑀥𑁄. 𑀲𑁄 𑀢𑀁 𑀤𑀺𑀲𑁆𑀯𑀸 ‘‘𑀓𑀲𑁆𑀫𑀸, 𑀪𑀦𑁆𑀢𑁂, 𑀲𑀗𑁆𑀖𑀭𑀺𑀢𑁆𑀯𑀸 𑀞𑀧𑁂𑀣𑀸’’𑀢𑀺 𑀆𑀳. ‘‘𑀅𑀦𑀼𑀯𑀸𑀢𑁄 𑀦𑀧𑁆𑀧𑀳𑁄𑀢𑀻’’𑀢𑀺. ‘‘𑀇𑀫𑀺𑀦𑀸, 𑀪𑀦𑁆𑀢𑁂, 𑀓𑀭𑁄𑀣𑀸’’𑀢𑀺 𑀉𑀢𑁆𑀢𑀭𑀺𑀲𑀸𑀝𑀓𑀁 𑀤𑀢𑁆𑀯𑀸 ‘‘𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀫𑁂 𑀓𑀸𑀘𑀺 𑀳𑀸𑀦𑀺 𑀫𑀸 𑀳𑁄𑀢𑀽’’𑀢𑀺 𑀧𑀢𑁆𑀣𑀦𑀁 𑀅𑀓𑀸𑀲𑀺.

𑀖𑀭𑁂𑀧𑀺𑀲𑁆𑀲 𑀪𑀕𑀺𑀦𑀺𑀬𑀸 𑀲𑀤𑁆𑀥𑀺𑀁 𑀪𑀭𑀺𑀬𑀸𑀬 𑀓𑀮𑀳𑀁 𑀓𑀭𑁄𑀦𑁆𑀢𑀺𑀬𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀅𑀣𑀲𑁆𑀲 𑀪𑀕𑀺𑀦𑀻 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀧𑀺𑀡𑁆𑀟𑀧𑀸𑀢𑀁 𑀤𑀢𑁆𑀯𑀸 𑀢𑀲𑁆𑀲 𑀪𑀭𑀺𑀬𑀁 𑀲𑀦𑁆𑀥𑀸𑀬 𑁋 ‘‘𑀏𑀯𑀭𑀽𑀧𑀁 𑀩𑀸𑀮𑀁 𑀬𑁄𑀚𑀦𑀲𑀢𑁂 𑀧𑀭𑀺𑀯𑀚𑁆𑀚𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀦𑀁 𑀞𑀧𑁂𑀲𑀺. 𑀲𑀸 𑀕𑁂𑀳𑀗𑁆𑀕𑀡𑁂 𑀞𑀺𑀢𑀸 𑀲𑀼𑀢𑁆𑀯𑀸 ‘‘𑀇𑀫𑀸𑀬 𑀤𑀺𑀦𑁆𑀦𑀪𑀢𑁆𑀢𑀁 𑀏𑀲 𑀫𑀸 𑀪𑀼𑀜𑁆𑀚𑀢𑀽’’𑀢𑀺 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀪𑀢𑁆𑀢𑀁 𑀙𑀟𑁆𑀟𑁂𑀢𑁆𑀯𑀸 𑀓𑀮𑀮𑀲𑁆𑀲 𑀧𑀽𑀭𑁂𑀢𑁆𑀯𑀸 𑀅𑀤𑀸𑀲𑀺. 𑀇𑀢𑀭𑀸 𑀤𑀺𑀲𑁆𑀯𑀸 ‘‘𑀩𑀸𑀮𑁂, 𑀫𑀁 𑀢𑀸𑀯 𑀅𑀓𑁆𑀓𑁄𑀲 𑀯𑀸 𑀧𑀳𑀭 𑀯𑀸, 𑀏𑀯𑀭𑀽𑀧𑀲𑁆𑀲 𑀧𑀦 𑀤𑁆𑀯𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀧𑀽𑀭𑀺𑀢𑀧𑀸𑀭𑀫𑀺𑀲𑁆𑀲 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀧𑀢𑁆𑀢𑀢𑁄 𑀪𑀢𑁆𑀢𑀁 𑀙𑀟𑁆𑀟𑁂𑀢𑁆𑀯𑀸 𑀓𑀮𑀮𑀁 𑀤𑀸𑀢𑀼𑀁 𑀦 𑀬𑀼𑀢𑁆𑀢’’𑀦𑁆𑀢𑀺 𑀆𑀳. 𑀅𑀣𑀲𑁆𑀲 𑀪𑀭𑀺𑀬𑀸𑀬 𑀧𑀝𑀺𑀲𑀗𑁆𑀔𑀸𑀦𑀁 𑀉𑀧𑁆𑀧𑀚𑁆𑀚𑀺. 𑀲𑀸 ‘‘𑀢𑀺𑀝𑁆𑀞𑀣, 𑀪𑀦𑁆𑀢𑁂’’𑀢𑀺 𑀓𑀮𑀮𑀁 𑀙𑀟𑁆𑀟𑁂𑀢𑁆𑀯𑀸 𑀧𑀢𑁆𑀢𑀁 𑀥𑁄𑀯𑀺𑀢𑁆𑀯𑀸 𑀕𑀦𑁆𑀥𑀘𑀼𑀡𑁆𑀡𑁂𑀦 𑀉𑀩𑁆𑀩𑀝𑁆𑀝𑁂𑀢𑁆𑀯𑀸 𑀧𑀡𑀻𑀢𑀪𑀢𑁆𑀢𑀲𑁆𑀲 𑀘𑀢𑀼𑀫𑀥𑀼𑀭𑀲𑁆𑀲 𑀘 𑀧𑀽𑀭𑁂𑀢𑁆𑀯𑀸 𑀉𑀧𑀭𑀺 𑀆𑀲𑀺𑀢𑁆𑀢𑁂𑀦 𑀧𑀤𑀼𑀫𑀕𑀩𑁆𑀪𑀯𑀡𑁆𑀡𑁂𑀦 𑀲𑀧𑁆𑀧𑀺𑀦𑀸 𑀯𑀺𑀚𑁆𑀚𑁄𑀢𑀫𑀸𑀦𑀁 𑀧𑀢𑁆𑀢𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀳𑀢𑁆𑀣𑁂 𑀞𑀧𑁂𑀢𑁆𑀯𑀸 ‘‘𑀬𑀣𑀸 𑀅𑀬𑀁 𑀧𑀺𑀡𑁆𑀟𑀧𑀸𑀢𑁄 𑀑𑀪𑀸𑀲𑀚𑀸𑀢𑁄, 𑀏𑀯𑀁 𑀑𑀪𑀸𑀲𑀚𑀸𑀢𑀁 𑀫𑁂 𑀲𑀭𑀻𑀭𑀁 𑀳𑁄𑀢𑀽’’𑀢𑀺 𑀧𑀢𑁆𑀣𑀦𑀁 𑀅𑀓𑀸𑀲𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀅𑀦𑀼𑀫𑁄𑀤𑀺𑀢𑁆𑀯𑀸 𑀆𑀓𑀸𑀲𑀁 𑀧𑀓𑁆𑀔𑀦𑁆𑀤𑀺. 𑀢𑁂𑀧𑀺 𑀤𑁆𑀯𑁂 𑀚𑀸𑀬𑀫𑁆𑀧𑀢𑀺𑀓𑀸 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀢𑀢𑁄 𑀘𑀼𑀢𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀧𑀼𑀦 𑀢𑀢𑁄 𑀘𑀯𑀺𑀢𑁆𑀯𑀸 𑀉𑀧𑀸𑀲𑀓𑁄 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀩𑀸𑀭𑀸𑀡𑀲𑀺𑀬𑀁 𑀅𑀲𑀻𑀢𑀺𑀓𑁄𑀝𑀺𑀯𑀺𑀪𑀯𑀲𑀫𑁆𑀧𑀦𑁆𑀦𑁂 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺, 𑀇𑀢𑀭𑀸𑀧𑀺 𑀢𑀸𑀤𑀺𑀲𑀲𑁆𑀲𑁂𑀯 𑀲𑁂𑀝𑁆𑀞𑀺𑀦𑁄 𑀥𑀻𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀢𑀲𑁆𑀲 𑀯𑀬𑀧𑁆𑀧𑀢𑁆𑀢𑀲𑁆𑀲 𑀢𑀫𑁂𑀯 𑀲𑁂𑀝𑁆𑀞𑀺𑀥𑀻𑀢𑀭𑀁 𑀆𑀦𑀬𑀺𑀁𑀲𑀼. 𑀢𑀲𑁆𑀲𑀸 𑀧𑀼𑀩𑁆𑀩𑁂 𑀅𑀦𑀺𑀝𑁆𑀞𑀯𑀺𑀧𑀸𑀓𑀲𑁆𑀲 𑀧𑀸𑀧𑀓𑀫𑁆𑀫𑀲𑁆𑀲 𑀆𑀦𑀼𑀪𑀸𑀯𑁂𑀦 𑀧𑀢𑀺𑀓𑀼𑀮𑀁 𑀧𑀯𑀺𑀝𑁆𑀞𑀫𑀢𑁆𑀢𑀸𑀬 𑀉𑀫𑁆𑀫𑀸𑀭𑀦𑁆𑀢𑀭𑀢𑁄 𑀧𑀝𑁆𑀞𑀸𑀬 𑀲𑀓𑀮𑀁 𑀕𑁂𑀳𑀁 𑀉𑀕𑁆𑀖𑀸𑀝𑀺𑀢𑀯𑀘𑁆𑀘𑀓𑀽𑀧𑁄 𑀯𑀺𑀬 𑀤𑀼𑀕𑁆𑀕𑀦𑁆𑀥𑀁 𑀚𑀸𑀢𑀁. 𑀓𑀼𑀫𑀸𑀭𑁄 ‘‘𑀓𑀲𑁆𑀲𑀸𑀬𑀁 𑀕𑀦𑁆𑀥𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑁂𑀝𑁆𑀞𑀺𑀓𑀜𑁆𑀜𑀸𑀬𑀸’’𑀢𑀺 𑀲𑀼𑀢𑁆𑀯𑀸 ‘‘𑀦𑀻𑀳𑀭𑀣 𑀦’’𑀦𑁆𑀢𑀺 𑀢𑀲𑁆𑀲𑀸𑀬𑁂𑀯 𑀓𑀼𑀮𑀖𑀭𑀁 𑀧𑁂𑀲𑁂𑀲𑀺. 𑀲𑀸 𑀢𑁂𑀦𑁂𑀯 𑀦𑀻𑀳𑀸𑀭𑁂𑀦 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀧𑀝𑀺𑀦𑀺𑀯𑀢𑁆𑀢𑀺.

𑀢𑁂𑀦 𑀲𑀫𑀬𑁂𑀦 𑀓𑀲𑁆𑀲𑀧𑀤𑀲𑀩𑀮𑁄 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀢𑀲𑁆𑀲 𑀲𑀢𑀲𑀳𑀲𑀕𑁆𑀖𑀦𑀺𑀓𑀸𑀳𑀺 𑀲𑀼𑀯𑀡𑁆𑀡𑀺𑀝𑁆𑀞𑀓𑀸𑀳𑀺 𑀬𑁄𑀚𑀦𑀼𑀩𑁆𑀩𑁂𑀥𑀁 𑀘𑁂𑀢𑀺𑀬𑀁 𑀆𑀭𑀪𑀺𑀁𑀲𑀼. 𑀢𑀲𑁆𑀫𑀺𑀁 𑀘𑁂𑀢𑀺𑀬𑁂 𑀓𑀭𑀺𑀬𑀫𑀸𑀦𑁂 𑀲𑀸 𑀲𑁂𑀝𑁆𑀞𑀺𑀥𑀻𑀢𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀧𑀝𑀺𑀦𑀺𑀯𑀢𑁆𑀢𑀸, 𑀓𑀺𑀁 𑀫𑁂 𑀚𑀻𑀯𑀺𑀢𑁂𑀦𑀸’’𑀢𑀺 𑀅𑀢𑁆𑀢𑀦𑁄 𑀆𑀪𑀭𑀡𑀪𑀡𑁆𑀟𑀁 𑀪𑀜𑁆𑀚𑀸𑀧𑁂𑀢𑁆𑀯𑀸 𑀲𑀼𑀯𑀡𑁆𑀡𑀺𑀝𑁆𑀞𑀓𑀁 𑀓𑀸𑀭𑁂𑀲𑀺 𑀭𑀢𑀦𑀸𑀬𑀢𑀁 𑀯𑀺𑀤𑀢𑁆𑀣𑀺𑀯𑀺𑀢𑁆𑀣𑀺𑀡𑁆𑀡𑀁 𑀘𑀢𑀼𑀭𑀗𑁆𑀕𑀼𑀮𑀼𑀩𑁆𑀩𑁂𑀥𑀁. 𑀢𑀢𑁄 𑀳𑀭𑀺𑀢𑀸𑀮𑀫𑀦𑁄𑀲𑀺𑀮𑀸𑀧𑀺𑀡𑁆𑀟𑀁 𑀕𑀳𑁂𑀢𑁆𑀯𑀸 𑀅𑀝𑁆𑀞 𑀉𑀧𑁆𑀧𑀮𑀧𑀼𑀧𑁆𑀨𑀳𑀢𑁆𑀣𑀓𑁂 𑀆𑀤𑀸𑀬 𑀘𑁂𑀢𑀺𑀬𑀓𑀭𑀡𑀝𑁆𑀞𑀸𑀦𑀁 𑀕𑀢𑀸. 𑀢𑀲𑁆𑀫𑀺𑀜𑁆𑀘 𑀔𑀡𑁂 𑀏𑀓𑀸 𑀇𑀝𑁆𑀞𑀓𑀸𑀧𑀦𑁆𑀢𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀆𑀕𑀘𑁆𑀙𑀫𑀸𑀦𑀸 𑀖𑀝𑀦𑀺𑀝𑁆𑀞𑀓𑀸𑀬 𑀊𑀦𑀸 𑀳𑁄𑀢𑀺. 𑀲𑁂𑀝𑁆𑀞𑀺𑀥𑀻𑀢𑀸 𑀯𑀟𑁆𑀠𑀓𑀺𑀁 𑀆𑀳 ‘‘𑀇𑀫𑀁 𑀫𑁂 𑀇𑀝𑁆𑀞𑀓𑀁 𑀏𑀢𑁆𑀣 𑀞𑀧𑁂𑀣𑀸’’𑀢𑀺. ‘‘𑀅𑀫𑁆𑀫 𑀪𑀤𑁆𑀤𑀓𑁂, 𑀓𑀸𑀮𑁂 𑀆𑀕𑀢𑀸𑀲𑀺, 𑀲𑀬𑀫𑁂𑀯 𑀞𑀧𑁂𑀳𑀻’’𑀢𑀺. 𑀲𑀸 𑀆𑀭𑀼𑀬𑁆𑀳 𑀢𑁂𑀮𑁂𑀦 𑀳𑀭𑀺𑀢𑀸𑀮𑀫𑀦𑁄𑀲𑀺𑀮𑀸𑀧𑀺𑀡𑁆𑀟𑀁 𑀬𑁄𑀚𑁂𑀢𑁆𑀯𑀸 𑀢𑁂𑀦 𑀩𑀦𑁆𑀥𑀦𑁂𑀦 𑀇𑀝𑁆𑀞𑀓𑀁 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀉𑀧𑀭𑀺 𑀅𑀝𑁆𑀞𑀳𑀺 𑀉𑀧𑁆𑀧𑀮𑀧𑀼𑀧𑁆𑀨𑀳𑀢𑁆𑀣𑀓𑁂𑀳𑀺 𑀧𑀽𑀚𑀁 𑀓𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀫𑁂 𑀓𑀸𑀬𑀢𑁄 𑀘𑀦𑁆𑀤𑀦𑀕𑀦𑁆𑀥𑁄 𑀯𑀸𑀬𑀢𑀼, 𑀫𑀼𑀔𑀢𑁄 𑀉𑀧𑁆𑀧𑀮𑀕𑀦𑁆𑀥𑁄’’𑀢𑀺 𑀧𑀢𑁆𑀣𑀦𑀁 𑀓𑀢𑁆𑀯𑀸 𑀘𑁂𑀢𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀕𑁂𑀳𑀁 𑀅𑀕𑀫𑀸𑀲𑀺.

𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀲𑀸 𑀬𑀲𑁆𑀲 𑀲𑁂𑀝𑁆𑀞𑀺𑀧𑀼𑀢𑁆𑀢𑀲𑁆𑀲 𑀧𑀞𑀫𑀁 𑀕𑁂𑀳𑀁 𑀦𑀻𑀢𑀸, 𑀢𑀲𑁆𑀲 𑀢𑀁 𑀆𑀭𑀩𑁆𑀪 𑀲𑀢𑀺 𑀉𑀤𑀧𑀸𑀤𑀺. 𑀦𑀕𑀭𑁂𑀧𑀺 𑀦𑀓𑁆𑀔𑀢𑁆𑀢𑀁 𑀲𑀗𑁆𑀖𑀼𑀝𑁆𑀞𑀁 𑀳𑁄𑀢𑀺. 𑀲𑁄 𑀉𑀧𑀝𑁆𑀞𑀸𑀓𑁂 𑀆𑀳 ‘‘𑀇𑀥 𑀆𑀦𑀻𑀢𑀸 𑀲𑁂𑀝𑁆𑀞𑀺𑀥𑀻𑀢𑀸 𑀓𑀼𑀳𑀺’’𑀦𑁆𑀢𑀺? ‘‘𑀓𑀼𑀮𑀕𑁂𑀳𑁂, 𑀲𑀸𑀫𑀻’’𑀢𑀺. ‘‘𑀆𑀦𑁂𑀣 𑀦𑀁, 𑀦𑀓𑁆𑀔𑀢𑁆𑀢𑀁 𑀓𑀻𑀴𑀺𑀲𑁆𑀲𑀸𑀫𑀻’’𑀢𑀺. 𑀢𑁂 𑀕𑀦𑁆𑀢𑁆𑀯𑀸 𑀢𑀁 𑀯𑀦𑁆𑀤𑀺𑀢𑁆𑀯𑀸 𑀞𑀺𑀢𑀸. ‘‘𑀓𑀺𑀁, 𑀢𑀸𑀢𑀸, 𑀆𑀕𑀢𑀢𑁆𑀣𑀸’’𑀢𑀺 𑀢𑀸𑀬 𑀧𑀼𑀝𑁆𑀞𑀸 𑀢𑀲𑁆𑀲𑀸 𑀢𑀁 𑀧𑀯𑀢𑁆𑀢𑀺𑀁 𑀆𑀘𑀺𑀓𑁆𑀔𑀺𑀁𑀲𑀼. ‘‘𑀢𑀸𑀢𑀸, 𑀫𑀬𑀸 𑀆𑀪𑀭𑀡𑀪𑀡𑁆𑀟𑁂𑀳𑀺 𑀘𑁂𑀢𑀺𑀬𑀁 𑀧𑀽𑀚𑀺𑀢𑀁, 𑀆𑀪𑀭𑀡𑀁 𑀫𑁂 𑀦𑀢𑁆𑀣𑀻’’𑀢𑀺. 𑀢𑁂 𑀕𑀦𑁆𑀢𑁆𑀯𑀸 𑀲𑁂𑀝𑁆𑀞𑀺𑀧𑀼𑀢𑁆𑀢𑀲𑁆𑀲 𑀆𑀭𑁄𑀘𑁂𑀲𑀼𑀁. ‘‘𑀆𑀦𑁂𑀣 𑀦𑀁, 𑀧𑀺𑀴𑀦𑁆𑀥𑀦𑀁 𑀮𑀪𑀺𑀲𑁆𑀲𑀢𑀻’’𑀢𑀺. 𑀢𑁂 𑀢𑀁 𑀆𑀦𑀬𑀺𑀁𑀲𑀼. 𑀢𑀲𑁆𑀲𑀸 𑀲𑀳 𑀕𑁂𑀳𑀧𑀯𑁂𑀲𑀦𑁂𑀦 𑀲𑀓𑀮𑀕𑁂𑀳𑀁 𑀘𑀦𑁆𑀤𑀦𑀕𑀦𑁆𑀥𑁄 𑀘𑁂𑀯 𑀉𑀧𑁆𑀧𑀮𑀕𑀦𑁆𑀥𑁄 𑀘 𑀯𑀸𑀬𑀺. 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀢𑀁 𑀧𑀼𑀘𑁆𑀙𑀺 𑁋 ‘‘𑀪𑀤𑁆𑀤𑁂, 𑀢𑀯 𑀲𑀭𑀻𑀭𑀢𑁄 𑀧𑀞𑀫𑀁 𑀤𑀼𑀕𑁆𑀕𑀦𑁆𑀥𑁄 𑀯𑀸𑀬𑀺, 𑀇𑀤𑀸𑀦𑀺 𑀧𑀦 𑀢𑁂 𑀲𑀭𑀻𑀭𑀢𑁄 𑀘𑀦𑁆𑀤𑀦𑀕𑀦𑁆𑀥𑁄, 𑀫𑀼𑀔𑀢𑁄 𑀉𑀧𑁆𑀧𑀮𑀕𑀦𑁆𑀥𑁄 𑀯𑀸𑀬𑀢𑀺, 𑀓𑀺𑀫𑁂𑀢’’𑀦𑁆𑀢𑀺? 𑀲𑀸 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑀁 𑀆𑀭𑁄𑀘𑁂𑀲𑀺. 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 ‘‘𑀦𑀺𑀬𑁆𑀬𑀸𑀦𑀺𑀓𑀁 𑀯𑀢 𑀩𑀼𑀤𑁆𑀥𑀲𑀸𑀲𑀦’’𑀦𑁆𑀢𑀺 𑀧𑀲𑀻𑀤𑀺𑀢𑁆𑀯𑀸 𑀬𑁄𑀚𑀦𑀺𑀓𑀁 𑀲𑀼𑀯𑀡𑁆𑀡𑀘𑁂𑀢𑀺𑀬𑀁 𑀓𑀫𑁆𑀩𑀮𑀓𑀜𑁆𑀘𑀼𑀓𑁂𑀦 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀭𑀣𑀘𑀓𑁆𑀓𑀧𑀫𑀸𑀡𑁂𑀳𑀺 𑀲𑀼𑀯𑀡𑁆𑀡𑀧𑀤𑀼𑀫𑁂𑀳𑀺 𑀅𑀮𑀗𑁆𑀓𑀭𑀺. 𑀢𑁂𑀲𑀁 𑀤𑁆𑀯𑀸𑀤𑀲𑀳𑀢𑁆𑀣𑀸 𑀑𑀮𑀫𑁆𑀩𑀓𑀸 𑀳𑁄𑀦𑁆𑀢𑀺.

𑀲𑁄 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸, 𑀧𑀼𑀦 𑀢𑀢𑁄 𑀘𑀯𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀢𑁄 𑀬𑁄𑀚𑀦𑀫𑀢𑁆𑀢𑁂 𑀞𑀸𑀦𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀅𑀫𑀘𑁆𑀘𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺. 𑀪𑀭𑀺𑀬𑀸 𑀧𑀦𑀲𑁆𑀲 𑀤𑁂𑀯𑀮𑁄𑀓𑀢𑁄 𑀘𑀯𑀺𑀢𑁆𑀯𑀸 𑀭𑀸𑀚𑀓𑀼𑀮𑁂 𑀚𑁂𑀝𑁆𑀞𑀭𑀸𑀚𑀥𑀻𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑁂𑀲𑀼 𑀯𑀬𑀧𑁆𑀧𑀢𑁆𑀢𑁂𑀲𑀼 𑀓𑀼𑀫𑀸𑀭𑀲𑁆𑀲 𑀯𑀲𑀦𑀕𑀸𑀫𑁂 𑀦𑀓𑁆𑀔𑀢𑁆𑀢𑀁 𑀲𑀗𑁆𑀖𑀼𑀝𑁆𑀞𑀁. 𑀲𑁄 𑀫𑀸𑀢𑀭𑀁 𑀆𑀳 𑁋 ‘‘𑀅𑀫𑁆𑀫, 𑀲𑀸𑀝𑀓𑀁 𑀫𑁂 𑀤𑁂𑀳𑀺, 𑀦𑀓𑁆𑀔𑀢𑁆𑀢𑀁 𑀓𑀻𑀴𑀺𑀲𑁆𑀲𑀸𑀫𑀻’’𑀢𑀺. 𑀲𑀸 𑀥𑁄𑀢𑀯𑀢𑁆𑀣𑀁 𑀦𑀻𑀳𑀭𑀺𑀢𑁆𑀯𑀸 𑀅𑀤𑀸𑀲𑀺. ‘‘𑀅𑀫𑁆𑀫, 𑀣𑀽𑀮𑀫𑀺𑀤’’𑀦𑁆𑀢𑀺 𑀆𑀳. 𑀲𑀸 𑀅𑀜𑁆𑀜𑀁 𑀦𑀻𑀳𑀭𑀺𑀢𑁆𑀯𑀸 𑀅𑀤𑀸𑀲𑀺. 𑀲𑁄 𑀢𑀫𑁆𑀧𑀺 𑀧𑀝𑀺𑀓𑁆𑀔𑀺𑀧𑀺. 𑀅𑀣 𑀦𑀁 𑀫𑀸𑀢𑀸 𑀆𑀳 𑁋 ‘‘𑀢𑀸𑀢, 𑀬𑀸𑀤𑀺𑀲𑁂 𑀕𑁂𑀳𑁂 𑀫𑀬𑀁 𑀚𑀸𑀢𑀸, 𑀦𑀢𑁆𑀣𑀺 𑀦𑁄 𑀇𑀢𑁄 𑀲𑀼𑀔𑀼𑀫𑀢𑀭𑀲𑁆𑀲 𑀧𑀝𑀺𑀮𑀸𑀪𑀸𑀬 𑀧𑀼𑀜𑁆𑀜’’𑀦𑁆𑀢𑀺. ‘‘𑀢𑁂𑀦 𑀳𑀺 𑀮𑀪𑀦𑀝𑁆𑀞𑀸𑀦𑀁 𑀕𑀘𑁆𑀙𑀸𑀫𑀺, 𑀅𑀫𑁆𑀫𑀸’’𑀢𑀺. ‘‘𑀧𑀼𑀢𑁆𑀢, 𑀅𑀳𑀁 𑀅𑀚𑁆𑀚𑁂𑀯 𑀢𑀼𑀬𑁆𑀳𑀁 𑀩𑀸𑀭𑀸𑀡𑀲𑀺𑀦𑀕𑀭𑀭𑀚𑁆𑀚𑀧𑀝𑀺𑀮𑀸𑀪𑀁 𑀇𑀘𑁆𑀙𑀸𑀫𑀻’’𑀢𑀺. 𑀲𑁄 𑀫𑀸𑀢𑀭𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀕𑀘𑁆𑀙𑀸𑀫𑀺, 𑀅𑀫𑁆𑀫𑀸’’𑀢𑀺. ‘‘𑀕𑀘𑁆𑀙, 𑀢𑀸𑀢𑀸’’𑀢𑀺. 𑀲𑁄 𑀧𑀦 𑀧𑀼𑀜𑁆𑀜𑀦𑀺𑀬𑀸𑀫𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀉𑀬𑁆𑀬𑀸𑀦𑁂 𑀫𑀗𑁆𑀕𑀮𑀲𑀺𑀮𑀸𑀧𑀝𑁆𑀝𑁂 𑀲𑀲𑀻𑀲𑀁 𑀧𑀸𑀭𑀼𑀧𑀺𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀲𑁄 𑀘 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀓𑀸𑀮𑀗𑁆𑀓𑀢𑀲𑁆𑀲 𑀲𑀢𑁆𑀢𑀫𑁄 𑀤𑀺𑀯𑀲𑁄 𑀳𑁄𑀢𑀺.

𑀅𑀫𑀘𑁆𑀘𑀸 𑀭𑀜𑁆𑀜𑁄 𑀲𑀭𑀻𑀭𑀓𑀺𑀘𑁆𑀘𑀁 𑀓𑀢𑁆𑀯𑀸 𑀭𑀸𑀚𑀗𑁆𑀕𑀡𑁂 𑀦𑀺𑀲𑀻𑀤𑀺𑀢𑁆𑀯𑀸 𑀫𑀦𑁆𑀢𑀬𑀺𑀁𑀲𑀼 𑁋 ‘‘𑀭𑀜𑁆𑀜𑁄 𑀏𑀓𑀸 𑀥𑀻𑀢𑀸𑀯 𑀅𑀢𑁆𑀣𑀺, 𑀧𑀼𑀢𑁆𑀢𑁄 𑀦𑀢𑁆𑀣𑀺, 𑀅𑀭𑀸𑀚𑀓𑀁 𑀭𑀚𑁆𑀚𑀁 𑀦𑀲𑁆𑀲𑀺𑀲𑁆𑀲𑀢𑀺, 𑀓𑁄 𑀭𑀸𑀚𑀸 𑀪𑀯𑀺𑀢𑀼𑀁 𑀅𑀭𑀳𑀢𑀻’’𑀢𑀺? ‘‘𑀢𑁆𑀯𑀁 𑀳𑁄𑀳𑀺, 𑀢𑁆𑀯𑀁 𑀳𑁄𑀳𑀻’’𑀢𑀺. 𑀧𑀼𑀭𑁄𑀳𑀺𑀢𑁄 𑀆𑀳 𑁋 ‘‘𑀩𑀳𑀼𑀁 𑀑𑀮𑁄𑀓𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀨𑀼𑀲𑁆𑀲𑀭𑀣𑀁 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀸𑀫𑀸’’𑀢𑀺. 𑀢𑁂 𑀓𑀼𑀫𑀼𑀤𑀯𑀡𑁆𑀡𑁂 𑀘𑀢𑁆𑀢𑀸𑀭𑁄 𑀲𑀺𑀦𑁆𑀥𑀯𑁂 𑀬𑁄𑀚𑁂𑀢𑁆𑀯𑀸 𑀧𑀜𑁆𑀘𑀯𑀺𑀥𑀭𑀸𑀚𑀓𑀓𑀼𑀥𑀪𑀡𑁆𑀟𑀁 𑀲𑁂𑀢𑀘𑁆𑀙𑀢𑁆𑀢𑀜𑁆𑀘 𑀢𑀲𑁆𑀫𑀺𑀁 𑀞𑀧𑁂𑀢𑁆𑀯𑀸 𑀭𑀣𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀧𑀘𑁆𑀙𑀢𑁄 𑀢𑀽𑀭𑀺𑀬𑀸𑀦𑀺 𑀧𑀕𑁆𑀕𑀡𑁆𑀳𑀸𑀧𑁂𑀲𑀼𑀁. 𑀭𑀣𑁄 𑀧𑀸𑀘𑀻𑀦𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀉𑀬𑁆𑀬𑀸𑀦𑀸𑀪𑀺𑀫𑀼𑀔𑁄 𑀅𑀕𑀫𑀸𑀲𑀺. ‘‘𑀧𑀭𑀺𑀘𑀬𑁂𑀦 𑀉𑀬𑁆𑀬𑀸𑀦𑀸𑀪𑀺𑀫𑀼𑀔𑁄 𑀕𑀘𑁆𑀙𑀢𑀺, 𑀦𑀺𑀯𑀢𑁆𑀢𑁂𑀫𑀸’’𑀢𑀺 𑀓𑁂𑀘𑀺 𑀆𑀳𑀁𑀲𑀼. 𑀧𑀼𑀭𑁄𑀳𑀺𑀢𑁄 ‘‘𑀫𑀸 𑀦𑀺𑀯𑀢𑁆𑀢𑀬𑀺𑀢𑁆𑀣𑀸’’𑀢𑀺 𑀆𑀳. 𑀭𑀣𑁄 𑀕𑀦𑁆𑀢𑁆𑀯𑀸 𑀓𑀼𑀫𑀸𑀭𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀆𑀭𑀼𑀳𑀦𑀲𑀚𑁆𑀚𑁄 𑀳𑀼𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀧𑀼𑀭𑁄𑀳𑀺𑀢𑁄 𑀧𑀸𑀭𑀼𑀧𑀦𑀓𑀡𑁆𑀡𑀁 𑀅𑀧𑀦𑁂𑀢𑁆𑀯𑀸 𑀧𑀸𑀤𑀢𑀮𑀸𑀦𑀺 𑀑𑀮𑁄𑀓𑁂𑀦𑁆𑀢𑁄 ‘‘𑀢𑀺𑀝𑁆𑀞𑀢𑀼 𑀅𑀬𑀁 𑀤𑀻𑀧𑁄, 𑀤𑁆𑀯𑀺𑀲𑀳𑀲𑁆𑀲𑀧𑀭𑀺𑀢𑁆𑀢𑀤𑀻𑀧𑀯𑀸𑀭𑁂𑀲𑀼 𑀘𑀢𑀽𑀲𑀼 𑀫𑀳𑀸𑀤𑀻𑀧𑁂𑀲𑀼 𑀏𑀲 𑀭𑀚𑁆𑀚𑀁 𑀓𑀸𑀭𑁂𑀢𑀼𑀁 𑀬𑀼𑀢𑁆𑀢𑁄’’𑀢𑀺 𑀯𑀢𑁆𑀯𑀸 ‘‘𑀢𑀽𑀭𑀺𑀬𑀸𑀦𑀺 𑀧𑀕𑁆𑀕𑀡𑁆𑀳𑀣𑀸’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀢𑀽𑀭𑀺𑀬𑀸𑀦𑀺 𑀧𑀕𑁆𑀕𑀡𑁆𑀳𑀸𑀧𑁂𑀢𑀺.

𑀅𑀣 𑀓𑀼𑀫𑀸𑀭𑁄 𑀫𑀼𑀔𑀁 𑀯𑀺𑀯𑀭𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 ‘‘𑀓𑁂𑀦 𑀓𑀫𑁆𑀫𑁂𑀦 𑀆𑀕𑀢𑀢𑁆𑀣𑀸’’𑀢𑀺 𑀆𑀳. ‘‘𑀤𑁂𑀯, 𑀢𑀼𑀫𑁆𑀳𑀸𑀓𑀁 𑀭𑀚𑁆𑀚𑀁 𑀧𑀸𑀧𑀼𑀡𑀸𑀢𑀻’’𑀢𑀺. ‘‘𑀭𑀸𑀚𑀸 𑀯𑁄 𑀓𑀳’’𑀦𑁆𑀢𑀺? ‘‘𑀤𑁂𑀯𑀢𑁆𑀢𑀁 𑀕𑀢𑁄, 𑀲𑀸𑀫𑀻’’𑀢𑀺. ‘‘𑀓𑀢𑀺 𑀤𑀺𑀯𑀲𑀸 𑀅𑀢𑀺𑀓𑁆𑀓𑀦𑁆𑀢𑀸’’𑀢𑀺? ‘‘𑀅𑀚𑁆𑀚 𑀲𑀢𑁆𑀢𑀫𑁄 𑀤𑀺𑀯𑀲𑁄’’𑀢𑀺. ‘‘𑀧𑀼𑀢𑁆𑀢𑁄 𑀯𑀸 𑀥𑀻𑀢𑀸 𑀯𑀸 𑀦𑀢𑁆𑀣𑀻’’𑀢𑀺? ‘‘𑀥𑀻𑀢𑀸 𑀅𑀢𑁆𑀣𑀺, 𑀤𑁂𑀯, 𑀧𑀼𑀢𑁆𑀢𑁄 𑀦𑀢𑁆𑀣𑀻’’𑀢𑀺. ‘‘𑀢𑁂𑀦 𑀳𑀺 𑀓𑀭𑀺𑀲𑁆𑀲𑀸𑀫𑀺 𑀭𑀚𑁆𑀚’’𑀦𑁆𑀢𑀺. 𑀢𑁂 𑀢𑀸𑀯𑀤𑁂𑀯 𑀅𑀪𑀺𑀲𑁂𑀓𑀫𑀡𑁆𑀟𑀧𑀁 𑀓𑀸𑀭𑁂𑀢𑁆𑀯𑀸 𑀭𑀸𑀚𑀥𑀻𑀢𑀭𑀁 𑀲𑀩𑁆𑀩𑀸𑀮𑀗𑁆𑀓𑀸𑀭𑁂𑀳𑀺 𑀅𑀮𑀗𑁆𑀓𑀭𑀺𑀢𑁆𑀯𑀸 𑀉𑀬𑁆𑀬𑀸𑀦𑀁 𑀆𑀦𑁂𑀢𑁆𑀯𑀸 𑀓𑀼𑀫𑀸𑀭𑀲𑁆𑀲 𑀅𑀪𑀺𑀲𑁂𑀓𑀁 𑀅𑀓𑀁𑀲𑀼. 𑀅𑀣𑀲𑁆𑀲 𑀓𑀢𑀸𑀪𑀺𑀲𑁂𑀓𑀲𑁆𑀲 𑀲𑀢𑀲𑀳𑀲𑁆𑀲𑀕𑁆𑀖𑀦𑀓𑀁 𑀯𑀢𑁆𑀣𑀁 𑀉𑀧𑀦𑀬𑀺𑀁𑀲𑀼. 𑀲𑁄 ‘‘𑀓𑀺𑀫𑀺𑀤𑀁, 𑀢𑀸𑀢𑀸’’𑀢𑀺 𑀆𑀳. ‘‘𑀦𑀺𑀯𑀸𑀲𑀦𑀯𑀢𑁆𑀣𑀁, 𑀤𑁂𑀯𑀸’’𑀢𑀺. ‘‘𑀦𑀦𑀼, 𑀢𑀸𑀢𑀸, 𑀣𑀽𑀮’’𑀦𑁆𑀢𑀺? ‘‘𑀫𑀦𑀼𑀲𑁆𑀲𑀧𑀭𑀺𑀪𑁄𑀕𑀯𑀢𑁆𑀣𑁂𑀲𑀼 𑀇𑀢𑁄 𑀫𑀼𑀤𑀼𑀢𑀭𑀁 𑀦𑀢𑁆𑀣𑀺, 𑀤𑁂𑀯𑀸’’𑀢𑀺. ‘‘𑀢𑀼𑀫𑁆𑀳𑀸𑀓𑀁 𑀭𑀸𑀚𑀸 𑀏𑀯𑀭𑀽𑀧𑀁 𑀦𑀺𑀯𑀸𑀲𑁂𑀲𑀻’’𑀢𑀺? ‘‘𑀆𑀫, 𑀤𑁂𑀯𑀸’’𑀢𑀺. ‘‘𑀦 𑀫𑀜𑁆𑀜𑁂 𑀧𑀼𑀜𑁆𑀜𑀯𑀸 𑀢𑀼𑀫𑁆𑀳𑀸𑀓𑀁 𑀭𑀸𑀚𑀸’’𑀢𑀺 ‘‘𑀲𑀼𑀯𑀡𑁆𑀡𑀪𑀺𑀗𑁆𑀕𑀸𑀭𑀁 𑀆𑀳𑀭𑀣, 𑀮𑀪𑀺𑀲𑁆𑀲𑀸𑀫𑀺 𑀯𑀢𑁆𑀣’’𑀦𑁆𑀢𑀺 𑀲𑀼𑀯𑀡𑁆𑀡𑀪𑀺𑀗𑁆𑀕𑀸𑀭𑀁 𑀆𑀳𑀭𑀸𑀧𑁂𑀢𑁆𑀯𑀸 𑀉𑀝𑁆𑀞𑀸𑀬 𑀳𑀢𑁆𑀣𑁂 𑀥𑁄𑀯𑀺𑀢𑁆𑀯𑀸 𑀫𑀼𑀔𑀁 𑀯𑀺𑀓𑁆𑀔𑀸𑀮𑁂𑀢𑁆𑀯𑀸 𑀳𑀢𑁆𑀣𑁂𑀦 𑀉𑀤𑀓𑀁 𑀕𑀳𑁂𑀢𑁆𑀯𑀸 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀬𑀁 𑀅𑀩𑁆𑀪𑀼𑀓𑁆𑀓𑀺𑀭𑀺. 𑀖𑀦𑀧𑀣𑀯𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀅𑀝𑁆𑀞 𑀓𑀧𑁆𑀧𑀭𑀼𑀓𑁆𑀔𑀸 𑀉𑀝𑁆𑀞𑀳𑀺𑀁𑀲𑀼. 𑀧𑀼𑀦 𑀉𑀤𑀓𑀁 𑀕𑀳𑁂𑀢𑁆𑀯𑀸 𑀤𑀓𑁆𑀔𑀺𑀡𑀧𑀘𑁆𑀙𑀺𑀫𑀉𑀢𑁆𑀢𑀭𑀤𑀺𑀲𑀸𑀬𑀦𑁆𑀢𑀺 𑀏𑀯𑀁 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀅𑀩𑁆𑀪𑀼𑀓𑁆𑀓𑀺𑀭𑀺. 𑀲𑀩𑁆𑀩𑀤𑀺𑀲𑀸𑀲𑀼 𑀅𑀝𑁆𑀞𑀅𑀝𑁆𑀞𑀓𑀁 𑀓𑀢𑁆𑀯𑀸 𑀤𑁆𑀯𑀢𑁆𑀢𑀺𑀁𑀲 𑀓𑀧𑁆𑀧𑀭𑀼𑀓𑁆𑀔𑀸 𑀉𑀝𑁆𑀞𑀳𑀺𑀁𑀲𑀼. 𑀲𑁄 𑀏𑀓𑀁 𑀤𑀺𑀩𑁆𑀩𑀤𑀼𑀲𑁆𑀲𑀁 𑀦𑀺𑀯𑀸𑀲𑁂𑀢𑁆𑀯𑀸 𑀏𑀓𑀁 𑀧𑀸𑀭𑀼𑀧𑀺𑀢𑁆𑀯𑀸 ‘‘𑀦𑀦𑁆𑀤𑀭𑀜𑁆𑀜𑁄 𑀯𑀺𑀚𑀺𑀢𑁂 𑀲𑀼𑀢𑁆𑀢𑀓𑀦𑁆𑀢𑀺𑀓𑀸 𑀇𑀢𑁆𑀣𑀺𑀬𑁄 ‘𑀫𑀸 𑀲𑀼𑀢𑁆𑀢𑀁 𑀓𑀦𑁆𑀢𑀺𑀁𑀲𑀽’𑀢𑀺 𑀏𑀯𑀁 𑀪𑁂𑀭𑀺𑀁 𑀘𑀭𑀸𑀧𑁂𑀣𑀸’’𑀢𑀺 𑀯𑀢𑁆𑀯𑀸 𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑁄 𑀳𑀢𑁆𑀣𑀺𑀓𑁆𑀔𑀦𑁆𑀥𑀯𑀭𑀕𑀢𑁄 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀧𑀸𑀲𑀸𑀤𑀁 𑀅𑀪𑀺𑀭𑀼𑀬𑁆𑀳 𑀫𑀳𑀸𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺.

𑀏𑀯𑀁 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀤𑁂𑀯𑀻 𑀭𑀜𑁆𑀜𑁄 𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 ‘‘𑀅𑀳𑁄 𑀯𑀢 𑀢𑀧𑀲𑁆𑀲𑀻’’𑀢𑀺 𑀓𑀸𑀭𑀼𑀜𑁆𑀜𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. ‘‘𑀓𑀺𑀫𑀺𑀤𑀁, 𑀤𑁂𑀯𑀻’’𑀢𑀺 𑀧𑀼𑀝𑁆𑀞𑀸 ‘‘𑀅𑀢𑀺𑀫𑀳𑀢𑀻, 𑀤𑁂𑀯, 𑀢𑁂 𑀲𑀫𑁆𑀧𑀢𑁆𑀢𑀺, 𑀅𑀢𑀻𑀢𑁂 𑀩𑀼𑀤𑁆𑀥𑀸𑀦𑀁 𑀲𑀤𑁆𑀤𑀳𑀺𑀢𑁆𑀯𑀸 𑀓𑀢𑀓𑀮𑁆𑀬𑀸𑀡𑀲𑁆𑀲 𑀨𑀮𑀁, 𑀇𑀤𑀸𑀦𑀺 𑀅𑀦𑀸𑀕𑀢𑀲𑁆𑀲 𑀧𑀘𑁆𑀘𑀬𑀁 𑀧𑀼𑀜𑁆𑀜𑀁 𑀦 𑀓𑀭𑁄𑀣𑀸’’𑀢𑀺 𑀆𑀳. 𑀓𑀲𑁆𑀲 𑀤𑀲𑁆𑀲𑀸𑀫, 𑀲𑀻𑀮𑀯𑀦𑁆𑀢𑁄 𑀦𑀢𑁆𑀣𑀻𑀢𑀺. ‘‘𑀅𑀲𑀼𑀜𑁆𑀜𑁄, 𑀤𑁂𑀯, 𑀚𑀫𑁆𑀩𑀼𑀤𑀻𑀧𑁄 𑀅𑀭𑀳𑀦𑁆𑀢𑁂𑀳𑀺; 𑀢𑀼𑀫𑁆𑀳𑁂, 𑀤𑁂𑀯, 𑀤𑀸𑀦𑀁 𑀲𑀚𑁆𑀚𑁂𑀣, 𑀅𑀳𑀁 𑀅𑀭𑀳𑀦𑁆𑀢𑁂 𑀮𑀘𑁆𑀙𑀸𑀫𑀻’’𑀢𑀺 𑀆𑀳. 𑀧𑀼𑀦𑀤𑀺𑀯𑀲𑁂 𑀭𑀸𑀚𑀸 𑀧𑀸𑀘𑀻𑀦𑀤𑁆𑀯𑀸𑀭𑁂 𑀤𑀸𑀦𑀁 𑀲𑀚𑁆𑀚𑀸𑀧𑁂𑀲𑀺. 𑀤𑁂𑀯𑀻 𑀧𑀸𑀢𑁄𑀯 𑀉𑀧𑁄𑀲𑀣𑀗𑁆𑀕𑀸𑀦𑀺 𑀅𑀥𑀺𑀝𑁆𑀞𑀸𑀬 𑀉𑀧𑀭𑀺𑀧𑀸𑀲𑀸𑀤𑁂 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑀸 𑀉𑀭𑁂𑀦 𑀦𑀺𑀧𑀚𑁆𑀚𑀺𑀢𑁆𑀯𑀸 ‘‘𑀲𑀘𑁂 𑀏𑀢𑀺𑀲𑁆𑀲𑀸𑀬 𑀤𑀺𑀲𑀸𑀬 𑀅𑀭𑀳𑀦𑁆𑀢𑁄 𑀅𑀢𑁆𑀣𑀺, 𑀲𑁆𑀯𑁂 𑀆𑀕𑀦𑁆𑀢𑁆𑀯𑀸 𑀅𑀫𑁆𑀳𑀸𑀓𑀁 𑀪𑀺𑀓𑁆𑀔𑀁 𑀕𑀡𑁆𑀳𑀦𑁆𑀢𑀽’’𑀢𑀺 𑀆𑀳. 𑀢𑀲𑁆𑀲𑀁 𑀤𑀺𑀲𑀸𑀬𑀁 𑀅𑀭𑀳𑀦𑁆𑀢𑁄 𑀦𑀸𑀳𑁂𑀲𑀼𑀁, 𑀢𑀁 𑀲𑀓𑁆𑀓𑀸𑀭𑀁 𑀓𑀧𑀡𑀬𑀸𑀘𑀓𑀸𑀦𑀁 𑀅𑀤𑀁𑀲𑀼.

𑀧𑀼𑀦𑀤𑀺𑀯𑀲𑁂 𑀤𑀓𑁆𑀔𑀺𑀡𑀤𑁆𑀯𑀸𑀭𑁂 𑀲𑀚𑁆𑀚𑁂𑀢𑁆𑀯𑀸 𑀢𑀣𑁂𑀯 𑀤𑀓𑁆𑀔𑀺𑀡𑁂𑀬𑁆𑀬𑀁 𑀦𑀸𑀮𑀢𑁆𑀣, 𑀧𑀼𑀦𑀤𑀺𑀯𑀲𑁂𑀧𑀺 𑀧𑀘𑁆𑀙𑀺𑀫𑀤𑁆𑀯𑀸𑀭𑁂 𑀢𑀣𑁂𑀯. 𑀉𑀢𑁆𑀢𑀭𑀤𑁆𑀯𑀸𑀭𑁂 𑀲𑀚𑁆𑀚𑀺𑀢𑀤𑀺𑀯𑀲𑁂𑀦 𑀧𑀦 𑀤𑁂𑀯𑀺𑀬𑀸 𑀢𑀣𑁂𑀯 𑀦𑀺𑀫𑀦𑁆𑀢𑁂𑀦𑁆𑀢𑀺𑀬𑀸 𑀳𑀺𑀫𑀯𑀦𑁆𑀢𑁂 𑀯𑀲𑀦𑁆𑀢𑀸𑀦𑀁 𑀧𑀤𑀼𑀫𑀯𑀢𑀺𑀬𑀸 𑀧𑀼𑀢𑁆𑀢𑀸𑀦𑀁 𑀧𑀜𑁆𑀘𑀲𑀢𑀸𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀚𑁂𑀝𑁆𑀞𑀓𑁄 𑀫𑀳𑀸𑀧𑀤𑀼𑀫𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀪𑀸𑀢𑀺𑀓𑁂 𑀆𑀫𑀦𑁆𑀢𑁂𑀲𑀺 𑁋 ‘‘𑀫𑀸𑀭𑀺𑀲𑀸, 𑀦𑀦𑁆𑀤𑀭𑀸𑀚𑀸 𑀢𑀼𑀫𑁆𑀳𑁂 𑀦𑀺𑀫𑀦𑁆𑀢𑁂𑀢𑀺, 𑀅𑀥𑀺𑀯𑀸𑀲𑁂𑀣 𑀢𑀲𑁆𑀲𑀸’’𑀢𑀺. 𑀢𑁂 𑀅𑀥𑀺𑀯𑀸𑀲𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀅𑀦𑁄𑀢𑀢𑁆𑀢𑀤𑀳𑁂 𑀫𑀼𑀔𑀁 𑀥𑁄𑀯𑀺𑀢𑁆𑀯𑀸 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀉𑀢𑁆𑀢𑀭𑀤𑁆𑀯𑀸𑀭𑁂 𑀑𑀢𑀭𑀺𑀁𑀲𑀼. 𑀫𑀦𑀼𑀲𑁆𑀲𑀸 𑀤𑀺𑀲𑁆𑀯𑀸 𑀕𑀦𑁆𑀢𑁆𑀯𑀸 ‘‘𑀧𑀜𑁆𑀘𑀲𑀢𑀸, 𑀤𑁂𑀯, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀆𑀕𑀢𑀸’’𑀢𑀺 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 𑀲𑀤𑁆𑀥𑀺𑀁 𑀤𑁂𑀯𑀺𑀬𑀸 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀧𑀸𑀲𑀸𑀤𑀁 𑀆𑀭𑁄𑀧𑁂𑀢𑁆𑀯𑀸 𑀢𑀢𑁆𑀭 𑀦𑁂𑀲𑀁 𑀤𑀸𑀦𑀁 𑀤𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀭𑀸𑀚𑀸 𑀲𑀗𑁆𑀖𑀢𑁆𑀣𑁂𑀭𑀲𑁆𑀲, 𑀤𑁂𑀯𑀻 𑀲𑀗𑁆𑀖𑀦𑀯𑀓𑀲𑁆𑀲 𑀧𑀸𑀤𑀫𑀽𑀮𑁂 𑀦𑀺𑀧𑀢𑀺𑀢𑁆𑀯𑀸 ‘‘𑀅𑀬𑁆𑀬𑀸, 𑀪𑀦𑁆𑀢𑁂, 𑀧𑀘𑁆𑀘𑀬𑁂𑀳𑀺 𑀦 𑀓𑀺𑀮𑀫𑀺𑀲𑁆𑀲𑀦𑁆𑀢𑀺, 𑀫𑀬𑀜𑁆𑀘 𑀧𑀼𑀜𑁆𑀜𑁂𑀦 𑀦 𑀧𑀭𑀺𑀳𑀸𑀬𑀺𑀲𑁆𑀲𑀸𑀫𑀻, 𑀅𑀫𑁆𑀳𑀸𑀓𑀁 𑀬𑀸𑀯𑀚𑀻𑀯𑀁 𑀇𑀥 𑀦𑀺𑀯𑀸𑀲𑀸𑀬 𑀧𑀝𑀺𑀜𑁆𑀜𑀁 𑀤𑁂𑀣𑀸’’𑀢𑀺 𑀧𑀝𑀺𑀜𑁆𑀜𑀁 𑀓𑀸𑀭𑁂𑀢𑁆𑀯𑀸 𑀉𑀬𑁆𑀬𑀸𑀦𑁂 𑀧𑀜𑁆𑀘 𑀧𑀡𑁆𑀡𑀲𑀸𑀮𑀸𑀲𑀢𑀸𑀦𑀺, 𑀧𑀜𑁆𑀘 𑀘𑀗𑁆𑀓𑀫𑀦𑀲𑀢𑀸𑀦𑀻𑀢𑀺 𑀲𑀩𑁆𑀩𑀸𑀓𑀸𑀭𑁂𑀦 𑀦𑀺𑀯𑀸𑀲𑀦𑀝𑁆𑀞𑀸𑀦𑀸𑀦𑀺 𑀲𑀫𑁆𑀧𑀸𑀤𑁂𑀢𑁆𑀯𑀸 𑀢𑀢𑁆𑀣 𑀯𑀲𑀸𑀧𑁂𑀲𑀼𑀁.

𑀏𑀯𑀁 𑀓𑀸𑀮𑁂 𑀕𑀘𑁆𑀙𑀦𑁆𑀢𑁂 𑀭𑀜𑁆𑀜𑁄 𑀧𑀘𑁆𑀘𑀦𑁆𑀢𑁂 𑀓𑀼𑀧𑀺𑀢𑁂 𑀭𑀸𑀚𑀸 ‘‘𑀅𑀳𑀁 𑀧𑀘𑁆𑀘𑀦𑁆𑀢𑀁 𑀯𑀽𑀧𑀲𑀫𑁂𑀢𑀼𑀁 𑀕𑀘𑁆𑀙𑀸𑀫𑀺, 𑀢𑁆𑀯𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀲𑀼 𑀫𑀸 𑀧𑀫𑀚𑁆𑀚𑀸’’𑀢𑀺 𑀤𑁂𑀯𑀺𑀁 𑀑𑀯𑀤𑀺𑀢𑁆𑀯𑀸 𑀕𑀢𑁄. 𑀢𑀲𑁆𑀫𑀺𑀁 𑀅𑀦𑀸𑀕𑀢𑁂𑀬𑁂𑀯 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀆𑀬𑀼𑀲𑀗𑁆𑀔𑀸𑀭𑀸 𑀔𑀻𑀡𑀸. 𑀫𑀳𑀸𑀧𑀤𑀼𑀫𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀢𑀺𑀬𑀸𑀫𑀭𑀢𑁆𑀢𑀺𑀁 𑀛𑀸𑀦𑀓𑀻𑀴𑀁 𑀓𑀻𑀴𑀺𑀢𑁆𑀯𑀸 𑀅𑀭𑀼𑀡𑀼𑀕𑁆𑀕𑀫𑀦𑀲𑀫𑀬𑁂 𑀆𑀮𑀫𑁆𑀩𑀦𑀨𑀮𑀓𑀁 𑀆𑀮𑀫𑁆𑀩𑀺𑀢𑁆𑀯𑀸 𑀞𑀺𑀢𑀓𑁄𑀯 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀏𑀢𑁂𑀦𑀼𑀧𑀸𑀬𑁂𑀦 𑀲𑁂𑀲𑀸𑀧𑀻𑀢𑀺 𑀲𑀩𑁆𑀩𑁂𑀯 𑀧𑀭𑀺𑀦𑀺𑀩𑁆𑀩𑀼𑀢𑀸. 𑀧𑀼𑀦𑀤𑀺𑀯𑀲𑁂 𑀤𑁂𑀯𑀻 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀦𑀺𑀲𑀻𑀤𑀦𑀝𑁆𑀞𑀸𑀦𑀸𑀦𑀺 𑀲𑀚𑁆𑀚𑁂𑀢𑁆𑀯𑀸 𑀧𑀼𑀧𑁆𑀨𑀸𑀦𑀺 𑀯𑀺𑀓𑀺𑀭𑀺𑀢𑁆𑀯𑀸 𑀥𑀽𑀧𑀁 𑀯𑀸𑀲𑁂𑀢𑁆𑀯𑀸 𑀢𑁂𑀲𑀁 𑀆𑀕𑀫𑀦𑀁 𑀑𑀮𑁄𑀓𑁂𑀦𑁆𑀢𑀻 𑀦𑀺𑀲𑀺𑀦𑁆𑀦𑀸 𑀆𑀕𑀫𑀦𑀁 𑀅𑀤𑀺𑀲𑁆𑀯𑀸 𑀧𑀼𑀭𑀺𑀲𑁂 𑀧𑁂𑀲𑁂𑀲𑀺 𑁋 ‘‘𑀕𑀘𑁆𑀙𑀣, 𑀢𑀸𑀢𑀸, 𑀚𑀸𑀦𑀸𑀣 𑀓𑀺𑀁 𑀅𑀬𑁆𑀬𑀸𑀦𑀁 𑀅𑀨𑀸𑀲𑀼𑀓’’𑀦𑁆𑀢𑀺? 𑀢𑁂 𑀕𑀦𑁆𑀢𑁆𑀯𑀸 𑀫𑀳𑀸𑀧𑀤𑀼𑀫𑀲𑁆𑀲 𑀧𑀡𑁆𑀡𑀲𑀸𑀮𑀸𑀬 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀢𑀢𑁆𑀣 𑀢𑀁 𑀅𑀧𑀲𑁆𑀲𑀦𑁆𑀢𑀸 𑀘𑀗𑁆𑀓𑀫𑀦𑀁 𑀕𑀦𑁆𑀢𑁆𑀯𑀸 𑀆𑀮𑀫𑁆𑀩𑀦𑀨𑀮𑀓𑀁 𑀦𑀺𑀲𑁆𑀲𑀸𑀬 𑀞𑀺𑀢𑀁 𑀤𑀺𑀲𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀓𑀸𑀮𑁄, 𑀪𑀦𑁆𑀢𑁂’’𑀢𑀺 𑀆𑀳𑀁𑀲𑀼. 𑀧𑀭𑀺𑀦𑀺𑀩𑁆𑀩𑀼𑀢𑀲𑀭𑀻𑀭𑀁 𑀓𑀺𑀁 𑀓𑀣𑁂𑀲𑁆𑀲𑀢𑀺, 𑀢𑁂 ‘‘𑀦𑀺𑀤𑁆𑀤𑀸𑀬𑀢𑀺 𑀫𑀜𑁆𑀜𑁂’’𑀢𑀺 𑀯𑀢𑁆𑀯𑀸 𑀧𑀺𑀝𑁆𑀞𑀺𑀧𑀸𑀤𑁂 𑀳𑀢𑁆𑀣𑁂𑀦 𑀧𑀭𑀸𑀫𑀲𑀺𑀢𑁆𑀯𑀸 𑀧𑀸𑀤𑀸𑀦𑀁 𑀲𑀻𑀢𑀮𑀢𑀸𑀬 𑀘𑁂𑀯 𑀣𑀤𑁆𑀥𑀢𑀸𑀬 𑀘 𑀧𑀭𑀺𑀦𑀺𑀩𑁆𑀩𑀼𑀢𑀪𑀸𑀯𑀁 𑀜𑀢𑁆𑀯𑀸 𑀤𑀼𑀢𑀺𑀬𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀣𑁂𑀯 𑀜𑀢𑁆𑀯𑀸 𑀧𑀼𑀦 𑀢𑀢𑀺𑀬𑀲𑁆𑀲𑀸𑀢𑀺 𑀏𑀯𑀁 𑀲𑀩𑁆𑀩𑁂𑀧𑀺 𑀧𑀭𑀺𑀦𑀺𑀩𑁆𑀩𑀼𑀢𑀪𑀸𑀯𑀁 𑀜𑀢𑁆𑀯𑀸 𑀭𑀸𑀚𑀓𑀼𑀮𑀁 𑀆𑀕𑀫𑀺𑀁𑀲𑀼. ‘‘𑀓𑀳𑀁, 𑀢𑀸𑀢𑀸, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸’’𑀢𑀺 𑀧𑀼𑀝𑁆𑀞𑀸 ‘‘𑀧𑀭𑀺𑀦𑀺𑀩𑁆𑀩𑀼𑀢𑀸, 𑀤𑁂𑀯𑀻’’𑀢𑀺 𑀆𑀳𑀁𑀲𑀼. 𑀤𑁂𑀯𑀻 𑀓𑀦𑁆𑀤𑀦𑁆𑀢𑀻 𑀭𑁄𑀤𑀦𑁆𑀢𑀻 𑀦𑀺𑀓𑁆𑀔𑀫𑀺𑀢𑁆𑀯𑀸 𑀦𑀸𑀕𑀭𑁂𑀳𑀺 𑀲𑀤𑁆𑀥𑀺𑀁 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀲𑀸𑀥𑀼𑀓𑀻𑀴𑀺𑀢𑀁 𑀓𑀸𑀭𑁂𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀲𑀭𑀻𑀭𑀓𑀺𑀘𑁆𑀘𑀁 𑀓𑀸𑀭𑁂𑀢𑁆𑀯𑀸 𑀥𑀸𑀢𑀼𑀬𑁄 𑀕𑀸𑀳𑀸𑀧𑁂𑀢𑁆𑀯𑀸 𑀘𑁂𑀢𑀺𑀬𑀁 𑀧𑀢𑀺𑀝𑁆𑀞𑀸𑀧𑁂𑀲𑀺.

𑀭𑀸𑀚𑀸 𑀧𑀘𑁆𑀘𑀦𑁆𑀢𑀁 𑀯𑀽𑀧𑀲𑀫𑁂𑀢𑁆𑀯𑀸 𑀆𑀕𑀢𑁄 𑀧𑀘𑁆𑀘𑀼𑀕𑁆𑀕𑀫𑀦𑀁 𑀆𑀕𑀢𑀁 𑀤𑁂𑀯𑀺𑀁 𑀧𑀼𑀘𑁆𑀙𑀺 𑁋 ‘‘𑀓𑀺𑀁, 𑀪𑀤𑁆𑀤𑁂, 𑀢𑁆𑀯𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀲𑀼 𑀦 𑀧𑀫𑀚𑁆𑀚𑀲𑀺, 𑀦𑀺𑀭𑁄𑀕𑀸 𑀘 𑀅𑀬𑁆𑀬𑀸’’𑀢𑀺? ‘‘𑀧𑀭𑀺𑀦𑀺𑀩𑁆𑀩𑀼𑀢𑀸, 𑀤𑁂𑀯𑀸’’𑀢𑀺. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀏𑀯𑀭𑀽𑀧𑀸𑀦𑀫𑁆𑀧𑀺 𑀧𑀡𑁆𑀟𑀺𑀢𑀸𑀦𑀁 𑀫𑀭𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀅𑀫𑁆𑀳𑀸𑀓𑀁 𑀓𑀼𑀢𑁄 𑀫𑁄𑀓𑁆𑀔𑀸’’𑀢𑀺? 𑀲𑁄 𑀦𑀕𑀭𑀁 𑀅𑀧𑀯𑀺𑀲𑀺𑀢𑁆𑀯𑀸 𑀉𑀬𑁆𑀬𑀸𑀦𑀫𑁂𑀯 𑀕𑀦𑁆𑀢𑁆𑀯𑀸 𑀚𑁂𑀝𑁆𑀞𑀧𑀼𑀢𑁆𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀢𑀲𑁆𑀲 𑀭𑀚𑁆𑀚𑀁 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀲𑀬𑀁 𑀲𑀫𑀡𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺. 𑀤𑁂𑀯𑀻𑀧𑀺 ‘‘𑀭𑀜𑁆𑀜𑁂 𑀧𑀩𑁆𑀩𑀚𑀺𑀢𑁂 𑀅𑀳𑀁 𑀓𑀺𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀢𑀣𑁂𑀯 𑀉𑀬𑁆𑀬𑀸𑀦𑁂 𑀧𑀩𑁆𑀩𑀚𑀺. 𑀤𑁆𑀯𑁂𑀧𑀺 𑀛𑀸𑀦𑀁 𑀪𑀸𑀯𑁂𑀢𑁆𑀯𑀸 𑀢𑀢𑁄 𑀘𑀼𑀢𑀸 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀁𑀲𑀼.

𑀢𑁂𑀲𑀼 𑀢𑀢𑁆𑀣𑁂𑀯 𑀯𑀲𑀦𑁆𑀢𑁂𑀲𑀼 𑀅𑀫𑁆𑀳𑀸𑀓𑀁 𑀲𑀢𑁆𑀣𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁄 𑀅𑀦𑀼𑀧𑀼𑀩𑁆𑀩𑁂𑀦 𑀭𑀸𑀚𑀕𑀳𑀁 𑀧𑀸𑀧𑀼𑀡𑀺. 𑀲𑀢𑁆𑀣𑀭𑀺 𑀢𑀢𑁆𑀣 𑀧𑀝𑀺𑀯𑀲𑀦𑁆𑀢𑁂 𑀅𑀬𑀁 𑀧𑀺𑀧𑁆𑀧𑀮𑀺𑀫𑀸𑀡𑀯𑁄 𑀫𑀕𑀥𑀭𑀝𑁆𑀞𑁂 𑀫𑀳𑀸𑀢𑀺𑀢𑁆𑀣𑀩𑁆𑀭𑀸𑀳𑁆𑀫𑀡𑀕𑀸𑀫𑁂 𑀓𑀧𑀺𑀮𑀩𑁆𑀭𑀸𑀳𑁆𑀫𑀡𑀲𑁆𑀲 𑀪𑀭𑀺𑀬𑀸𑀬 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑁄. 𑀅𑀬𑀁 𑀪𑀤𑁆𑀤𑀓𑀸𑀧𑀺𑀮𑀸𑀦𑀻 𑀫𑀤𑁆𑀤𑀭𑀝𑁆𑀞𑁂 𑀲𑀸𑀕𑀮𑀦𑀕𑀭𑁂 𑀓𑁄𑀲𑀺𑀬𑀕𑁄𑀢𑁆𑀢𑀩𑁆𑀭𑀸𑀳𑁆𑀫𑀡𑀲𑁆𑀲 𑀪𑀭𑀺𑀬𑀸𑀬 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀸. 𑀢𑁂𑀲𑀁 𑀅𑀦𑀼𑀓𑁆𑀓𑀫𑁂𑀦 𑀯𑀟𑁆𑀠𑀫𑀸𑀦𑀸𑀦𑀁 𑀧𑀺𑀧𑁆𑀧𑀮𑀺𑀫𑀸𑀡𑀯𑀲𑁆𑀲 𑀯𑀻𑀲𑀢𑀺𑀫𑁂, 𑀪𑀤𑁆𑀤𑀸𑀬 𑀲𑁄𑀴𑀲𑀫𑁂 𑀯𑀬𑁂 𑀲𑀫𑁆𑀧𑀢𑁆𑀢𑁂 𑀫𑀸𑀢𑀸𑀧𑀺𑀢𑀭𑁄 𑀧𑀼𑀢𑁆𑀢𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀢𑀸𑀢, 𑀢𑁆𑀯𑀁 𑀯𑀬𑀧𑁆𑀧𑀢𑁆𑀢𑁄, 𑀓𑀼𑀮𑀯𑀁𑀲𑀁 𑀧𑀢𑀺𑀝𑁆𑀞𑀧𑁂𑀢𑀼𑀁 𑀬𑀼𑀢𑁆𑀢𑁄’’𑀢𑀺 𑀅𑀢𑀺𑀯𑀺𑀬 𑀦𑀺𑀧𑁆𑀧𑀻𑀴𑀺𑀬𑀺𑀁𑀲𑀼. 𑀫𑀸𑀡𑀯𑁄 𑀆𑀳 𑁋 ‘‘𑀫𑀬𑁆𑀳𑀁 𑀲𑁄𑀢𑀧𑀣𑁂 𑀏𑀯𑀭𑀽𑀧𑀁 𑀓𑀣𑀁 𑀫𑀸 𑀓𑀣𑀬𑀺𑀢𑁆𑀣, 𑀅𑀳𑀁 𑀬𑀸𑀯 𑀢𑀼𑀫𑁆𑀳𑁂 𑀥𑀭𑀣, 𑀢𑀸𑀯 𑀧𑀝𑀺𑀚𑀕𑁆𑀕𑀺𑀲𑁆𑀲𑀸𑀫𑀺, 𑀢𑀼𑀫𑁆𑀳𑀸𑀓𑀁 𑀅𑀘𑁆𑀘𑀬𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. 𑀢𑁂 𑀓𑀢𑀺𑀧𑀸𑀳𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀼𑀦 𑀓𑀣𑀬𑀺𑀁𑀲𑀼. 𑀲𑁄𑀧𑀺 𑀧𑀼𑀦 𑀧𑀝𑀺𑀓𑁆𑀔𑀺𑀧𑀺. 𑀢𑀢𑁄 𑀧𑀝𑁆𑀞𑀸𑀬 𑀫𑀸𑀢𑀸 𑀦𑀺𑀭𑀦𑁆𑀢𑀭𑀁 𑀓𑀣𑁂𑀢𑀺𑀬𑁂𑀯.

𑀫𑀸𑀡𑀯𑁄 ‘‘𑀫𑀸𑀢𑀭𑀁 𑀲𑀜𑁆𑀜𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀭𑀢𑁆𑀢𑀲𑀼𑀯𑀡𑁆𑀡𑀲𑁆𑀲 𑀦𑀺𑀓𑁆𑀔𑀲𑀳𑀲𑁆𑀲𑀁 𑀤𑀢𑁆𑀯𑀸 𑀲𑀼𑀯𑀡𑁆𑀡𑀓𑀸𑀭𑁂𑀳𑀺 𑀇𑀢𑁆𑀣𑀺𑀭𑀽𑀧𑀓𑀁 𑀓𑀸𑀭𑁂𑀢𑁆𑀯𑀸 𑀢𑀲𑁆𑀲 𑀫𑀚𑁆𑀚𑀦𑀖𑀝𑁆𑀝𑀦𑀸𑀤𑀺𑀓𑀫𑁆𑀫𑀧𑀭𑀺𑀬𑁄𑀲𑀸𑀦𑁂 𑀢𑀁 𑀭𑀢𑁆𑀢𑀯𑀢𑁆𑀣𑀁 𑀦𑀺𑀯𑀸𑀲𑁂𑀢𑁆𑀯𑀸 𑀲𑀼𑀯𑀡𑁆𑀡𑀲𑀫𑁆𑀧𑀦𑁆𑀦𑁂𑀳𑀺 𑀧𑀼𑀧𑁆𑀨𑁂𑀳𑀺 𑀘𑁂𑀯 𑀦𑀸𑀦𑀸𑀮𑀗𑁆𑀓𑀸𑀭𑁂𑀳𑀺 𑀘 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 ‘‘𑀅𑀫𑁆𑀫, 𑀏𑀯𑀭𑀽𑀧𑀁 𑀆𑀭𑀫𑁆𑀫𑀡𑀁 𑀮𑀪𑀦𑁆𑀢𑁄 𑀕𑁂𑀳𑁂 𑀯𑀲𑀺𑀲𑁆𑀲𑀸𑀫𑀺, 𑀅𑀮𑀪𑀦𑁆𑀢𑁄 𑀦 𑀯𑀲𑀺𑀲𑁆𑀲𑀸𑀫𑀻’’𑀢𑀺. 𑀧𑀡𑁆𑀟𑀺𑀢𑀸 𑀩𑁆𑀭𑀸𑀳𑁆𑀫𑀡𑀻 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀬𑁆𑀳𑀁 𑀧𑀼𑀢𑁆𑀢𑁄 𑀧𑀼𑀜𑁆𑀜𑀯𑀸 𑀤𑀺𑀦𑁆𑀦𑀤𑀸𑀦𑁄 𑀓𑀢𑀸𑀪𑀺𑀦𑀻𑀳𑀸𑀭𑁄 𑀧𑀼𑀩𑁆𑀩𑁂 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑁄 𑀦 𑀏𑀓𑀓𑁄𑀯 𑀅𑀓𑀸𑀲𑀺, 𑀅𑀤𑁆𑀥𑀸 𑀏𑀢𑁂𑀦 𑀲𑀳 𑀓𑀢𑀧𑀼𑀜𑁆𑀜𑀸 𑀲𑀼𑀯𑀡𑁆𑀡𑀭𑀽𑀧𑀓𑀧𑀝𑀺𑀪𑀸𑀕𑀸 𑀪𑀯𑀺𑀲𑁆𑀲𑀢𑀻’’𑀢𑀺. 𑀅𑀝𑁆𑀞 𑀩𑁆𑀭𑀸𑀳𑁆𑀫𑀡𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀲𑀩𑁆𑀩𑀪𑁄𑀕𑁂𑀳𑀺 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀲𑀼𑀯𑀡𑁆𑀡𑀭𑀽𑀧𑀓𑀁 𑀭𑀣𑁂 𑀆𑀭𑁄𑀧𑁂𑀢𑁆𑀯𑀸 ‘‘𑀕𑀘𑁆𑀙𑀣, 𑀢𑀸𑀢𑀸, 𑀬𑀢𑁆𑀣 𑀅𑀫𑁆𑀳𑁂𑀳𑀺 𑀚𑀸𑀢𑀺𑀕𑁄𑀢𑁆𑀢𑀪𑁄𑀕𑀸𑀤𑀺𑀲𑀫𑀸𑀦𑀓𑀼𑀮𑁂 𑀏𑀯𑀭𑀽𑀧𑀁 𑀤𑀸𑀭𑀺𑀓𑀁 𑀧𑀲𑁆𑀲𑀣, 𑀢𑀢𑁆𑀣 𑀇𑀤𑀫𑁂𑀯 𑀲𑀼𑀯𑀡𑁆𑀡𑀭𑀽𑀧𑀓𑀁 𑀲𑀘𑁆𑀘𑀸𑀓𑀸𑀭𑀁 𑀓𑀢𑁆𑀯𑀸 𑀤𑁂𑀣𑀸’’𑀢𑀺 𑀉𑀬𑁆𑀬𑁄𑀚𑁂𑀲𑀺.

𑀢𑁂 ‘‘𑀅𑀫𑁆𑀳𑀸𑀓𑀁 𑀦𑀸𑀫 𑀏𑀢𑀁 𑀓𑀫𑁆𑀫’’𑀦𑁆𑀢𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 ‘‘𑀓𑀢𑁆𑀣 𑀮𑀪𑀺𑀲𑁆𑀲𑀸𑀫, 𑀫𑀤𑁆𑀤𑀭𑀝𑁆𑀞𑀁 𑀦𑀸𑀫 𑀇𑀢𑁆𑀣𑀸𑀕𑀸𑀭𑀁, 𑀫𑀤𑁆𑀤𑀭𑀝𑁆𑀞𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀫𑀤𑁆𑀤𑀭𑀝𑁆𑀞𑁂 𑀲𑀸𑀕𑀮𑀦𑀕𑀭𑀁 𑀅𑀕𑀫𑀁𑀲𑀼. 𑀅𑀢𑁆𑀣 𑀢𑀁 𑀲𑀼𑀯𑀡𑁆𑀡𑀭𑀽𑀧𑀓𑀁 𑀦𑁆𑀳𑀸𑀦𑀢𑀺𑀢𑁆𑀣𑁂 𑀞𑀧𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀅𑀣 𑀪𑀤𑁆𑀤𑀸𑀬 𑀥𑀸𑀢𑀻 𑀪𑀤𑁆𑀤𑀁 𑀦𑁆𑀳𑀸𑀧𑁂𑀢𑁆𑀯𑀸 𑀅𑀮𑀗𑁆𑀓𑀭𑀺𑀢𑁆𑀯𑀸 𑀲𑀬𑀁 𑀦𑁆𑀳𑀸𑀬𑀺𑀢𑀼𑀁 𑀉𑀤𑀓𑀢𑀺𑀢𑁆𑀣𑀁 𑀕𑀦𑁆𑀢𑁆𑀯𑀸 𑀲𑀼𑀯𑀡𑁆𑀡𑀭𑀽𑀧𑀓𑀁 𑀤𑀺𑀲𑁆𑀯𑀸 ‘‘𑀓𑀺𑀲𑁆𑀲𑀸𑀬𑀁 𑀅𑀯𑀺𑀦𑀻𑀢𑀸 𑀇𑀥𑀸𑀕𑀦𑁆𑀢𑁆𑀯𑀸 𑀞𑀺𑀢𑀸’’𑀢𑀺 𑀧𑀺𑀝𑁆𑀞𑀺𑀧𑀲𑁆𑀲𑁂 𑀧𑀳𑀭𑀺𑀢𑁆𑀯𑀸 𑀲𑀼𑀯𑀡𑁆𑀡𑀭𑀽𑀧𑀓𑀁 𑀜𑀢𑁆𑀯𑀸 ‘‘𑀅𑀬𑁆𑀬𑀥𑀻𑀢𑀸 𑀫𑁂𑀢𑀺 𑀲𑀜𑁆𑀜𑀁 𑀉𑀧𑁆𑀧𑀸𑀤𑁂𑀲𑀺, 𑀅𑀬𑀁 𑀧𑀦 𑀅𑀬𑁆𑀬𑀥𑀻𑀢𑀸𑀬 𑀦𑀺𑀯𑀸𑀲𑀦𑀧𑀝𑀺𑀕𑁆𑀕𑀳𑀺𑀢𑀸𑀬𑀧𑀺 𑀅𑀲𑀤𑀺𑀲𑀸’’𑀢𑀺 𑀆𑀳. 𑀅𑀣 𑀦𑀁 𑀢𑁂 𑀩𑁆𑀭𑀸𑀳𑁆𑀫𑀡𑀸 ‘‘𑀏𑀯𑀭𑀽𑀧𑀸 𑀓𑀺𑀭 𑀢𑁂 𑀲𑀸𑀫𑀺𑀥𑀻𑀢𑀸’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀲𑀸 ‘‘𑀇𑀫𑀸𑀬 𑀲𑀼𑀯𑀡𑁆𑀡𑀧𑀝𑀺𑀫𑀸𑀬 𑀲𑀢𑀕𑀼𑀡𑁂𑀦 𑀲𑀳𑀲𑁆𑀲𑀕𑀼𑀡𑁂𑀦 𑀫𑀬𑁆𑀳𑀁 𑀅𑀬𑁆𑀬𑀥𑀻𑀢𑀸 𑀅𑀪𑀺𑀭𑀽𑀧𑀢𑀭𑀸’’, 𑀢𑀣𑀸 𑀳𑀺 ‘‘𑀅𑀧𑁆𑀧𑀤𑀻𑀧𑁂𑀧𑀺 𑀤𑁆𑀯𑀸𑀤𑀲𑀳𑀢𑁆𑀣𑁂 𑀕𑀩𑁆𑀪𑁂 𑀦𑀺𑀲𑀺𑀦𑁆𑀦𑀸 𑀲𑀭𑀻𑀭𑁄𑀪𑀸𑀲𑁂𑀦 𑀢𑀫𑀁 𑀯𑀺𑀥𑀫𑀢𑀻’’𑀢𑀺 𑀆𑀳. ‘‘𑀢𑁂𑀦 𑀳𑀺 𑀢𑀲𑁆𑀲𑀸 𑀫𑀸𑀢𑀸𑀧𑀺𑀢𑀽𑀦𑀁 𑀲𑀦𑁆𑀢𑀺𑀓𑀁 𑀕𑀘𑁆𑀙𑀸𑀫𑀸’’𑀢𑀺 𑀲𑀼𑀯𑀡𑁆𑀡𑀭𑀽𑀧𑀓𑀁 𑀭𑀣𑁂 𑀆𑀭𑁄𑀧𑁂𑀢𑁆𑀯𑀸 𑀢𑀁 𑀥𑀸𑀢𑀺𑀁 𑀅𑀦𑀼𑀕𑀦𑁆𑀢𑁆𑀯𑀸 𑀓𑁄𑀲𑀺𑀬𑀕𑁄𑀢𑁆𑀢𑀲𑁆𑀲 𑀖𑀭𑀤𑁆𑀯𑀸𑀭𑁂 𑀞𑀢𑁆𑀯𑀸 𑀆𑀕𑀫𑀦𑀁 𑀆𑀭𑁄𑀘𑀬𑀺𑀁𑀲𑀼.

𑀩𑁆𑀭𑀸𑀳𑁆𑀫𑀡𑁄 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 ‘‘𑀓𑀼𑀢𑁄 𑀆𑀕𑀢𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺. 𑀢𑁂 ‘‘𑀫𑀕𑀥𑀭𑀝𑁆𑀞𑁂 𑀫𑀳𑀸𑀢𑀺𑀢𑁆𑀣𑀕𑀸𑀫𑁂 𑀓𑀧𑀺𑀮𑀩𑁆𑀭𑀸𑀳𑁆𑀫𑀡𑀲𑁆𑀲 𑀖𑀭𑀢𑁄 𑀇𑀫𑀺𑀦𑀸 𑀦𑀸𑀫 𑀓𑀸𑀭𑀡𑁂𑀦 𑀆𑀕𑀢𑀫𑁆𑀳𑀸’’𑀢𑀺 𑀆𑀳𑀁𑀲𑀼. ‘‘𑀲𑀸𑀥𑀼, 𑀢𑀸𑀢𑀸, 𑀅𑀫𑁆𑀳𑁂𑀳𑀺 𑀲𑀫𑀚𑀸𑀢𑀺𑀕𑁄𑀢𑁆𑀢𑀯𑀺𑀪𑀯𑁄 𑀲𑁄 𑀩𑁆𑀭𑀸𑀳𑁆𑀫𑀡𑁄, 𑀤𑀲𑁆𑀲𑀸𑀫 𑀤𑀸𑀭𑀺𑀓’’𑀦𑁆𑀢𑀺 𑀧𑀡𑁆𑀡𑀸𑀓𑀸𑀭𑀁 𑀕𑀡𑁆𑀳𑀺. 𑀢𑁂 𑀓𑀧𑀺𑀮𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀸𑀲𑀦𑀁 𑀧𑀳𑀺𑀡𑀺𑀁𑀲𑀼 𑁋 ‘‘𑀮𑀤𑁆𑀥𑀸 𑀦𑁄 𑀪𑀤𑁆𑀤𑀸 𑀦𑀸𑀫 𑀤𑀸𑀭𑀺𑀓𑀸, 𑀓𑀢𑁆𑀢𑀩𑁆𑀩𑀁 𑀚𑀸𑀦𑀸𑀣𑀸’’𑀢𑀺. 𑀢𑀁 𑀲𑀸𑀲𑀦𑀁 𑀲𑀼𑀢𑁆𑀯𑀸 𑀧𑀺𑀧𑁆𑀧𑀮𑀺𑀫𑀸𑀡𑀯𑀲𑁆𑀲 𑀆𑀭𑁄𑀘𑀬𑀺𑀁𑀲𑀼 ‘‘𑀮𑀤𑁆𑀥𑀸 𑀤𑀸𑀭𑀺𑀓𑀸’’𑀢𑀺. 𑀧𑀺𑀧𑁆𑀧𑀮𑀺𑀫𑀸𑀡𑀯𑁄 ‘‘𑀅𑀳𑀁 ‘𑀦 𑀮𑀪𑀺𑀲𑁆𑀲𑀦𑁆𑀢𑀻’𑀢𑀺 𑀘𑀺𑀦𑁆𑀢𑁂𑀲𑀺𑀁, 𑀇𑀫𑁂 ‘𑀮𑀤𑁆𑀥𑀸’𑀢𑀺 𑀧𑁂𑀲𑁂𑀦𑁆𑀢𑀺, 𑀅𑀦𑀢𑁆𑀣𑀺𑀓𑁄 𑀳𑀼𑀢𑁆𑀯𑀸 𑀧𑀡𑁆𑀡𑀁 𑀧𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀭𑀳𑁄𑀕𑀢𑁄 𑀧𑀡𑁆𑀡𑀁 𑀮𑀺𑀔𑀺 ‘‘𑀪𑀤𑁆𑀤𑀸 𑀅𑀢𑁆𑀢𑀦𑁄 𑀚𑀸𑀢𑀺𑀕𑁄𑀢𑁆𑀢𑀪𑁄𑀕𑀸𑀦𑀼𑀭𑀽𑀧𑀁 𑀧𑀢𑀺𑀁 𑀮𑀪𑀢𑀼, 𑀅𑀳𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀲𑁆𑀲𑀸𑀫𑀺, 𑀫𑀸 𑀧𑀘𑁆𑀙𑀸 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑀻 𑀅𑀳𑁄𑀲𑀻’’𑀢𑀺. 𑀪𑀤𑁆𑀤𑀸𑀧𑀺 ‘‘𑀅𑀲𑀼𑀓𑀲𑁆𑀲 𑀓𑀺𑀭 𑀫𑀁 𑀤𑀸𑀢𑀼𑀓𑀸𑀫𑀸’’𑀢𑀺 𑀲𑀼𑀢𑁆𑀯𑀸 𑀭𑀳𑁄𑀕𑀢𑀸 𑀧𑀡𑁆𑀡𑀁 𑀮𑀺𑀔𑀺 𑁋 ‘‘𑀅𑀬𑁆𑀬𑀧𑀼𑀢𑁆𑀢𑁄 𑀅𑀢𑁆𑀢𑀦𑁄 𑀚𑀸𑀢𑀺𑀕𑁄𑀢𑁆𑀢𑀪𑁄𑀕𑀸𑀦𑀼𑀭𑀽𑀧𑀁 𑀤𑀸𑀭𑀺𑀓𑀁 𑀮𑀪𑀢𑀼, 𑀅𑀳𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀺, 𑀫𑀸 𑀧𑀘𑁆𑀙𑀸 𑀯𑀺𑀧𑁆𑀧𑀝𑀺𑀲𑀸𑀭𑀻 𑀪𑀯𑀸𑀳𑀻’’𑀢𑀺. 𑀤𑁆𑀯𑁂𑀧𑀺 𑀧𑀡𑁆𑀡𑀸𑀦𑀺 𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑀫𑀸𑀕𑀘𑁆𑀙𑀺𑀁𑀲𑀼. ‘‘𑀇𑀤𑀁 𑀓𑀲𑁆𑀲 𑀧𑀡𑁆𑀡’’𑀦𑁆𑀢𑀺? ‘‘𑀧𑀺𑀧𑁆𑀧𑀮𑀺𑀫𑀸𑀡𑀯𑁂𑀦 𑀪𑀤𑁆𑀤𑀸𑀬 𑀧𑀳𑀺𑀢’’𑀦𑁆𑀢𑀺. ‘‘𑀇𑀤𑀁 𑀓𑀲𑁆𑀲𑀸’’𑀢𑀺? ‘‘𑀪𑀤𑁆𑀤𑀸𑀬 𑀧𑀺𑀧𑁆𑀧𑀮𑀺𑀫𑀸𑀡𑀯𑀲𑁆𑀲 𑀧𑀳𑀺𑀢’’𑀦𑁆𑀢𑀺 𑀘 𑀯𑀼𑀢𑁆𑀢𑁂 𑀢𑁂 𑀤𑁆𑀯𑁂𑀧𑀺 𑀯𑀸𑀘𑁂𑀢𑁆𑀯𑀸 ‘‘𑀧𑀲𑁆𑀲𑀣 𑀤𑀸𑀭𑀓𑀸𑀦𑀁 𑀓𑀫𑁆𑀫’’𑀦𑁆𑀢𑀺 𑀨𑀸𑀮𑁂𑀢𑁆𑀯𑀸 𑀅𑀭𑀜𑁆𑀜𑁂 𑀙𑀟𑁆𑀟𑁂𑀢𑁆𑀯𑀸 𑀅𑀜𑁆𑀜𑀁 𑀢𑀁𑀲𑀫𑀸𑀦𑀁 𑀧𑀡𑁆𑀡𑀁 𑀮𑀺𑀔𑀺𑀢𑁆𑀯𑀸 𑀇𑀢𑁄 𑀏𑀢𑁆𑀢𑁄 𑀘 𑀧𑁂𑀲𑁂𑀲𑀼𑀁. 𑀇𑀢𑀺 𑀓𑀼𑀫𑀸𑀭𑀲𑁆𑀲 𑀓𑀼𑀫𑀸𑀭𑀺𑀓𑀸𑀬 𑀘 𑀲𑀤𑀺𑀲𑀁 𑀧𑀡𑁆𑀡𑀁 𑀮𑁄𑀓𑀲𑁆𑀲𑀸𑀤𑀭𑀳𑀺𑀢𑀫𑁂𑀯𑀸𑀢𑀺 𑀅𑀦𑀺𑀘𑁆𑀙𑀫𑀸𑀦𑀸𑀦𑀫𑁆𑀧𑀺 𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀲𑀫𑀸𑀕𑀫𑁄 𑀅𑀳𑁄𑀲𑀺.

𑀢𑀁𑀤𑀺𑀯𑀲𑀫𑁂𑀯 𑀧𑀺𑀧𑁆𑀧𑀮𑀺𑀫𑀸𑀡𑀯𑁄𑀧𑀺 𑀪𑀤𑁆𑀤𑀁 𑀏𑀓𑀁 𑀧𑀼𑀧𑁆𑀨𑀤𑀸𑀫𑀁 𑀕𑀡𑁆𑀳𑀸𑀧𑁂𑀲𑀺. 𑀪𑀤𑁆𑀤𑀸𑀧𑀺 𑀢𑀸𑀦𑀺 𑀲𑀬𑀦𑀫𑀚𑁆𑀛𑁂 𑀞𑀧𑁂𑀲𑀺. 𑀉𑀪𑁄𑀧𑀺 𑀪𑀼𑀢𑁆𑀢𑀲𑀸𑀬𑀫𑀸𑀲𑀸 𑀲𑀬𑀦𑀁 𑀆𑀭𑀼𑀳𑀺𑀢𑀼𑀁 𑀆𑀭𑀪𑀺𑀁𑀲𑀼. 𑀢𑁂𑀲𑀼 𑀫𑀸𑀡𑀯𑁄 𑀤𑀓𑁆𑀔𑀺𑀡𑀧𑀲𑁆𑀲𑁂𑀦 𑀲𑀬𑀦𑀁 𑀆𑀭𑀼𑀳𑀺, 𑀪𑀤𑁆𑀤𑀸 𑀯𑀸𑀫𑀧𑀲𑁆𑀲𑁂𑀦 𑀅𑀪𑀺𑀭𑀼𑀳𑀺𑀢𑁆𑀯𑀸 𑀆𑀳 𑁋 ‘‘𑀬𑀲𑁆𑀲 𑀧𑀲𑁆𑀲𑁂 𑀧𑀼𑀧𑁆𑀨𑀸𑀦𑀺 𑀫𑀺𑀮𑀸𑀬𑀦𑁆𑀢𑀺, 𑀢𑀲𑁆𑀲 𑀭𑀸𑀕𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀦𑁆𑀢𑀺 𑀯𑀺𑀚𑀸𑀦𑀺𑀲𑁆𑀲𑀸𑀫, 𑀇𑀫𑀁 𑀧𑀼𑀧𑁆𑀨𑀤𑀸𑀫𑀁 𑀦 𑀅𑀮𑁆𑀮𑀻𑀬𑀺𑀢𑀩𑁆𑀩’’𑀦𑁆𑀢𑀺. 𑀢𑁂 𑀧𑀦 𑀅𑀜𑁆𑀜𑀫𑀜𑁆𑀜𑀁 𑀲𑀭𑀻𑀭𑀲𑀫𑁆𑀨𑀲𑁆𑀲𑀪𑀬𑁂𑀦 𑀲𑀓𑀮𑀭𑀢𑁆𑀢𑀺𑀁 𑀦𑀺𑀤𑁆𑀤𑀁 𑀅𑀦𑁄𑀓𑁆𑀓𑀫𑀦𑁆𑀢𑀸𑀯 𑀯𑀻𑀢𑀺𑀦𑀸𑀫𑁂𑀲𑀼𑀁. 𑀤𑀺𑀯𑀸 𑀧𑀦 𑀳𑀲𑀺𑀢𑀫𑀢𑁆𑀢𑀫𑁆𑀧𑀺 𑀦𑀸𑀓𑀁𑀲𑀼. 𑀢𑁂 𑀮𑁄𑀓𑀸𑀫𑀺𑀲𑁂𑀦 𑀅𑀲𑀁𑀲𑀝𑁆𑀞𑀸 𑀬𑀸𑀯 𑀫𑀸𑀢𑀸𑀧𑀺𑀢𑀭𑁄 𑀥𑀭𑀦𑁆𑀢𑀺, 𑀢𑀸𑀯 𑀓𑀼𑀝𑀼𑀫𑁆𑀩𑀁 𑀅𑀯𑀺𑀘𑀸𑀭𑁂𑀢𑁆𑀯𑀸 𑀢𑁂𑀲𑀼 𑀓𑀸𑀮𑀗𑁆𑀓𑀢𑁂𑀲𑀼 𑀯𑀺𑀘𑀸𑀭𑀬𑀺𑀁𑀲𑀼. 𑀫𑀳𑀢𑀻 𑀫𑀸𑀡𑀯𑀲𑁆𑀲 𑀲𑀫𑁆𑀧𑀢𑁆𑀢𑀺. 𑀏𑀓𑀤𑀺𑀯𑀲𑀁 𑀲𑀭𑀻𑀭𑀁 𑀉𑀩𑁆𑀩𑀝𑁆𑀝𑁂𑀢𑁆𑀯𑀸 𑀙𑀟𑁆𑀟𑁂𑀢𑀩𑁆𑀩𑀁 𑀲𑀼𑀯𑀡𑁆𑀡𑀘𑀼𑀡𑁆𑀡𑀁 𑀏𑀯 𑀫𑀕𑀥𑀦𑀸𑀴𑀺𑀬𑀸 𑀤𑁆𑀯𑀸𑀤𑀲𑀦𑀸𑀴𑀺𑀫𑀢𑁆𑀢𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺. 𑀬𑀦𑁆𑀢𑀩𑀤𑁆𑀥𑀸𑀦𑀺 𑀲𑀝𑁆𑀞𑀺 𑀫𑀳𑀸𑀢𑀴𑀸𑀓𑀸𑀦𑀺, 𑀓𑀫𑁆𑀫𑀦𑁆𑀢𑁄 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑁄, 𑀅𑀦𑀼𑀭𑀸𑀥𑀧𑀼𑀭𑀧𑁆𑀧𑀫𑀸𑀡𑀸 𑀘𑀼𑀤𑁆𑀤𑀲𑀕𑀸𑀫𑀸, 𑀘𑀼𑀤𑁆𑀤𑀲 𑀳𑀢𑁆𑀣𑀸𑀦𑀻𑀓𑀸𑀦𑀺, 𑀘𑀼𑀤𑁆𑀤𑀲 𑀅𑀲𑁆𑀲𑀸𑀦𑀻𑀓𑀸𑀦𑀺, 𑀘𑀼𑀤𑁆𑀤𑀲 𑀭𑀣𑀸𑀦𑀻𑀓𑀸𑀦𑀺.

𑀲𑁄 𑀏𑀓𑀤𑀺𑀯𑀲𑀁 𑀅𑀮𑀗𑁆𑀓𑀢𑀅𑀲𑁆𑀲𑀁 𑀆𑀭𑀼𑀬𑁆𑀳 𑀫𑀳𑀸𑀚𑀦𑀧𑀭𑀺𑀯𑀼𑀢𑁄 𑀓𑀫𑁆𑀫𑀦𑁆𑀢𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀔𑁂𑀢𑁆𑀢𑀓𑁄𑀝𑀺𑀬𑀁 𑀞𑀺𑀢𑁄 𑀦𑀗𑁆𑀕𑀮𑁂𑀳𑀺 𑀙𑀺𑀦𑁆𑀦𑀝𑁆𑀞𑀸𑀦𑀢𑁄 𑀓𑀸𑀓𑀸𑀤𑀬𑁄 𑀲𑀓𑀼𑀡𑁂 𑀕𑀡𑁆𑀟𑀼𑀧𑁆𑀧𑀸𑀤𑀸𑀤𑀺𑀓𑁂 𑀧𑀸𑀡𑀓𑁂 𑀉𑀤𑁆𑀥𑀭𑀺𑀢𑁆𑀯𑀸 𑀔𑀸𑀤𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀢𑀸𑀢𑀸, 𑀇𑀫𑁂 𑀓𑀺𑀁 𑀔𑀸𑀤𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀺. ‘‘𑀕𑀡𑁆𑀟𑀼𑀧𑁆𑀧𑀸𑀤𑁂, 𑀅𑀬𑁆𑀬𑀸’’𑀢𑀺. ‘‘𑀏𑀢𑁂𑀳𑀺 𑀓𑀢𑀧𑀸𑀧𑀁 𑀓𑀲𑁆𑀲 𑀳𑁄𑀢𑀻’’𑀢𑀺? ‘‘𑀢𑀼𑀫𑁆𑀳𑀸𑀓𑀁, 𑀅𑀬𑁆𑀬𑀸’’𑀢𑀺. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑁂 𑀏𑀢𑁂𑀳𑀺 𑀓𑀢𑀧𑀸𑀧𑀁 𑀫𑀬𑁆𑀳𑀁 𑀳𑁄𑀢𑀺, 𑀓𑀺𑀁 𑀫𑁂 𑀓𑀭𑀺𑀲𑁆𑀲𑀢𑀺 𑀲𑀢𑁆𑀢𑀅𑀲𑀻𑀢𑀺𑀓𑁄𑀝𑀺𑀥𑀦𑀁, 𑀤𑁆𑀯𑀸𑀤𑀲𑀬𑁄𑀚𑀦𑀓𑀫𑁆𑀫𑀦𑁆𑀢𑁄 𑀓𑀺𑀁 𑀓𑀭𑀺𑀲𑁆𑀲𑀢𑀺, 𑀓𑀺𑀁 𑀬𑀦𑁆𑀢𑀩𑀤𑁆𑀥𑀸𑀦𑀺 𑀢𑀴𑀸𑀓𑀸𑀦𑀺, 𑀓𑀺𑀁 𑀘𑀼𑀤𑁆𑀤𑀲 𑀕𑀸𑀫𑀸𑀦𑀺, 𑀲𑀩𑁆𑀩𑀫𑁂𑀢𑀁 𑀪𑀤𑁆𑀤𑀸𑀬 𑀓𑀸𑀧𑀺𑀮𑀸𑀦𑀺𑀬𑀸 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀦𑀺𑀓𑁆𑀔𑀫𑁆𑀫 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺.

𑀪𑀤𑁆𑀤𑀸 𑀓𑀸𑀧𑀺𑀮𑀸𑀦𑀻 𑀢𑀲𑁆𑀫𑀺𑀁 𑀔𑀡𑁂 𑀅𑀦𑁆𑀢𑀭𑀯𑀢𑁆𑀣𑀼𑀲𑁆𑀫𑀺𑀁 𑀢𑀬𑁄 𑀢𑀺𑀮𑀓𑀼𑀫𑁆𑀪𑁂 𑀧𑀢𑁆𑀣𑀭𑀺𑀢𑁆𑀯𑀸 𑀥𑀸𑀢𑀻𑀳𑀺 𑀧𑀭𑀺𑀯𑀼𑀢𑀸 𑀦𑀺𑀲𑀺𑀦𑁆𑀦𑀸 𑀓𑀸𑀓𑁂 𑀢𑀺𑀮𑀧𑀸𑀡𑀓𑁂 𑀔𑀸𑀤𑀫𑀸𑀦𑁂 𑀤𑀺𑀲𑁆𑀯𑀸 ‘‘𑀅𑀫𑁆𑀫𑀸, 𑀓𑀺𑀁 𑀇𑀫𑁂 𑀔𑀸𑀤𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀺. ‘‘𑀧𑀸𑀡𑀓𑁂, 𑀅𑀬𑁆𑀬𑁂’’𑀢𑀺. ‘‘𑀅𑀓𑀼𑀲𑀮𑀁 𑀓𑀲𑁆𑀲 𑀳𑁄𑀢𑀻’’𑀢𑀺? ‘‘𑀢𑀼𑀫𑁆𑀳𑀸𑀓𑀁, 𑀅𑀬𑁆𑀬𑁂’’𑀢𑀺. 𑀲𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀬𑁆𑀳𑀁 𑀘𑀢𑀼𑀳𑀢𑁆𑀣𑀁 𑀯𑀢𑁆𑀣𑀁 𑀦𑀸𑀴𑀺𑀓𑁄𑀤𑀦𑀫𑀢𑁆𑀢𑀜𑁆𑀘 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺, 𑀬𑀤𑀺 𑀧𑀦𑁂𑀢𑀁 𑀏𑀢𑁂𑀳𑀺 𑀓𑀢𑀁 𑀅𑀓𑀼𑀲𑀮𑀁 𑀫𑀬𑁆𑀳𑀁 𑀳𑁄𑀢𑀺, 𑀪𑀯𑀲𑀳𑀲𑁆𑀲𑁂𑀦𑀧𑀺 𑀯𑀝𑁆𑀝𑀢𑁄 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑀼𑀁 𑀦 𑀲𑀓𑁆𑀓𑀸, 𑀅𑀬𑁆𑀬𑀧𑀼𑀢𑁆𑀢𑁂 𑀆𑀕𑀢𑀫𑀢𑁆𑀢𑁂𑀬𑁂𑀯 𑀲𑀩𑁆𑀩𑀁 𑀢𑀲𑁆𑀲 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀦𑀺𑀓𑁆𑀔𑀫𑁆𑀫 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺.

𑀫𑀸𑀡𑀯𑁄 𑀆𑀕𑀦𑁆𑀢𑁆𑀯𑀸 𑀦𑁆𑀳𑀢𑁆𑀯𑀸 𑀧𑀸𑀲𑀸𑀤𑀁 𑀆𑀭𑀼𑀬𑁆𑀳 𑀫𑀳𑀸𑀭𑀳𑁂 𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀺, 𑀅𑀣𑀲𑁆𑀲 𑀘𑀓𑁆𑀓𑀯𑀢𑁆𑀢𑀺𑀦𑁄 𑀅𑀦𑀼𑀘𑁆𑀙𑀯𑀺𑀓𑀪𑁄𑀚𑀦𑀁 𑀉𑀧𑀦𑀬𑀺𑀁𑀲𑀼. 𑀤𑁆𑀯𑁂𑀧𑀺 𑀪𑀼𑀜𑁆𑀚𑀺𑀢𑁆𑀯𑀸 𑀧𑀭𑀺𑀚𑀦𑁂 𑀦𑀺𑀓𑁆𑀔𑀦𑁆𑀢𑁂 𑀭𑀳𑁄𑀕𑀢𑀸 𑀨𑀸𑀲𑀼𑀓𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀁𑀲𑀼. 𑀢𑀢𑁄 𑀫𑀸𑀡𑀯𑁄 𑀪𑀤𑁆𑀤𑀁 𑀆𑀳 𑁋 ‘‘𑀪𑀤𑁆𑀤𑁂, 𑀇𑀫𑀁 𑀖𑀭𑀁 𑀆𑀕𑀘𑁆𑀙𑀦𑁆𑀢𑀻 𑀓𑀺𑀢𑁆𑀢𑀓𑀁 𑀥𑀦𑀫𑀸𑀳𑀭𑀲𑀻’’𑀢𑀺? ‘‘𑀧𑀜𑁆𑀘𑀧𑀡𑁆𑀡𑀸𑀲 𑀲𑀓𑀝𑀲𑀳𑀲𑁆𑀲𑀸𑀦𑀺, 𑀅𑀬𑁆𑀬𑀸’’𑀢𑀺. ‘‘𑀲𑀩𑁆𑀩𑀁 𑀢𑀁, 𑀬𑀸 𑀘 𑀇𑀫𑀲𑁆𑀫𑀺𑀁 𑀖𑀭𑁂 𑀲𑀢𑁆𑀢𑀸𑀲𑀻𑀢𑀺 𑀓𑁄𑀝𑀺𑀬𑁄 𑀬𑀦𑁆𑀢𑀩𑀤𑁆𑀥𑀸𑀦𑀺 𑀲𑀝𑁆𑀞𑀺 𑀢𑀴𑀸𑀓𑀸𑀦𑀻𑀢𑀺 𑀏𑀯𑀫𑀸𑀤𑀺𑀪𑁂𑀤𑀸 𑀲𑀫𑁆𑀧𑀢𑁆𑀢𑀺 𑀅𑀢𑁆𑀣𑀺, 𑀢𑀁 𑀲𑀩𑁆𑀩𑀁 𑀢𑀼𑀬𑁆𑀳𑁂𑀯 𑀦𑀺𑀬𑁆𑀬𑀸𑀢𑁂𑀫𑀻’’𑀢𑀺. ‘‘𑀢𑀼𑀫𑁆𑀳𑁂 𑀧𑀦 𑀓𑀼𑀳𑀺𑀁 𑀕𑀘𑁆𑀙𑀣, 𑀅𑀬𑁆𑀬𑀸’’𑀢𑀺? ‘‘𑀅𑀳𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. ‘‘𑀅𑀬𑁆𑀬, 𑀅𑀳𑀫𑁆𑀧𑀺 𑀢𑀼𑀫𑁆𑀳𑀸𑀓𑀁 𑀆𑀕𑀫𑀦𑀁 𑀑𑀮𑁄𑀓𑀬𑀫𑀸𑀦𑀸 𑀦𑀺𑀲𑀺𑀦𑁆𑀦𑀸, 𑀅𑀳𑀫𑁆𑀧𑀺 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. 𑀢𑁂𑀲𑀁 𑀆𑀤𑀺𑀢𑁆𑀢𑀧𑀡𑁆𑀡𑀓𑀼𑀝𑀺 𑀯𑀺𑀬 𑀢𑀬𑁄 𑀪𑀯𑀸 𑀉𑀧𑀝𑁆𑀞𑀳𑀦𑁆𑀢𑀺. 𑀢𑁂 ‘‘𑀧𑀩𑁆𑀩𑀚𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀅𑀦𑁆𑀢𑀭𑀸𑀧𑀡𑀢𑁄 𑀓𑀸𑀲𑀸𑀬𑀭𑀲𑀧𑀻𑀢𑀸𑀦𑀺 𑀘𑀻𑀯𑀭𑀸𑀦𑀺 𑀫𑀢𑁆𑀢𑀺𑀓𑀸𑀧𑀢𑁆𑀢𑁂 𑀘 𑀆𑀳𑀭𑀸𑀧𑁂𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀓𑁂𑀲𑁂 𑀑𑀳𑀸𑀭𑁂𑀢𑁆𑀯𑀸 ‘‘𑀬𑁂 𑀮𑁄𑀓𑁂 𑀅𑀭𑀳𑀦𑁆𑀢𑁄 𑀅𑀢𑁆𑀣𑀺, 𑀢𑁂 𑀉𑀤𑁆𑀤𑀺𑀲𑁆𑀲 𑀅𑀫𑁆𑀳𑀸𑀓𑀁 𑀧𑀩𑁆𑀩𑀚𑁆𑀚𑀸’’𑀢𑀺 𑀧𑀩𑁆𑀩𑀚𑀺𑀢𑁆𑀯𑀸 𑀣𑀯𑀺𑀓𑀸𑀲𑀼 𑀧𑀢𑁆𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀅𑀁𑀲𑁂 𑀮𑀕𑁆𑀕𑁂𑀢𑁆𑀯𑀸 𑀧𑀸𑀲𑀸𑀤𑀢𑁄 𑀑𑀢𑀭𑀺𑀁𑀲𑀼. 𑀕𑁂𑀳𑁂 𑀤𑀸𑀲𑁂𑀲𑀼 𑀘 𑀓𑀫𑁆𑀫𑀓𑀸𑀭𑁂𑀲𑀼 𑀘 𑀦 𑀓𑁄𑀘𑀺 𑀲𑀜𑁆𑀚𑀸𑀦𑀺.

𑀅𑀣 𑀦𑁂 𑀩𑁆𑀭𑀸𑀳𑁆𑀫𑀡𑀕𑀸𑀫𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀤𑀸𑀲𑀕𑀸𑀫𑀤𑁆𑀯𑀸𑀭𑁂𑀦 𑀕𑀘𑁆𑀙𑀦𑁆𑀢𑁂 𑀆𑀓𑀧𑁆𑀧𑀓𑀼𑀢𑀯𑀲𑁂𑀦 𑀤𑀸𑀲𑀕𑀸𑀫𑀯𑀸𑀲𑀺𑀦𑁄 𑀲𑀜𑁆𑀚𑀸𑀦𑀺𑀁𑀲𑀼. 𑀢𑁂 𑀭𑁄𑀤𑀦𑁆𑀢𑀸 𑀧𑀸𑀤𑁂𑀲𑀼 𑀧𑀢𑀺𑀢𑁆𑀯𑀸 ‘‘𑀓𑀺𑀁 𑀅𑀫𑁆𑀳𑁂 𑀅𑀦𑀸𑀣𑁂 𑀓𑀭𑁄𑀣, 𑀅𑀬𑁆𑀬𑀸’’𑀢𑀺 𑀆𑀳𑀁𑀲𑀼. ‘‘𑀫𑀬𑀁, 𑀪𑀡𑁂, ‘𑀢𑀬𑁄 𑀪𑀯𑀸 𑀆𑀤𑀺𑀢𑁆𑀢𑀧𑀡𑁆𑀡𑀲𑀸𑀮𑀸 𑀯𑀺𑀬𑀸’𑀢𑀺 𑀧𑀩𑁆𑀩𑀚𑀺𑀫𑁆𑀳, 𑀲𑀘𑁂 𑀢𑀼𑀫𑁆𑀳𑁂𑀲𑀼 𑀏𑀓𑁂𑀓𑀁 𑀪𑀼𑀚𑀺𑀲𑁆𑀲𑀁 𑀓𑀭𑁄𑀫, 𑀯𑀲𑁆𑀲𑀲𑀢𑀫𑁆𑀧𑀺 𑀦𑀧𑁆𑀧𑀳𑁄𑀢𑀺. 𑀢𑀼𑀫𑁆𑀳𑁂𑀯 𑀢𑀼𑀫𑁆𑀳𑀸𑀓𑀁 𑀲𑀻𑀲𑀁 𑀥𑁄𑀯𑀺𑀢𑁆𑀯𑀸 𑀪𑀼𑀚𑀺𑀲𑁆𑀲𑀸 𑀳𑀼𑀢𑁆𑀯𑀸 𑀚𑀻𑀯𑀣𑀸’’𑀢𑀺 𑀯𑀢𑁆𑀯𑀸 𑀢𑁂𑀲𑀁 𑀭𑁄𑀤𑀦𑁆𑀢𑀸𑀦𑀁𑀬𑁂𑀯 𑀧𑀓𑁆𑀓𑀫𑀺𑀁𑀲𑀼.

𑀣𑁂𑀭𑁄 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀪𑀤𑁆𑀤𑀸 𑀓𑀸𑀧𑀺𑀮𑀸𑀦𑀻 𑀲𑀓𑀮𑀚𑀫𑁆𑀩𑀼𑀤𑀻𑀧𑀕𑁆𑀖𑀦𑀺𑀓𑀸 𑀇𑀢𑁆𑀣𑀻 𑀫𑀬𑁆𑀳𑀁 𑀧𑀘𑁆𑀙𑀢𑁄 𑀆𑀕𑀘𑁆𑀙𑀢𑀺, 𑀞𑀸𑀦𑀁 𑀔𑁄 𑀧𑀦𑁂𑀢𑀁 𑀯𑀺𑀚𑁆𑀚𑀢𑀺, 𑀬𑀁 𑀓𑁄𑀘𑀺𑀤𑁂𑀯 𑀏𑀯𑀁 𑀘𑀺𑀦𑁆𑀢𑁂𑀬𑁆𑀬 ‘𑀇𑀫𑁂 𑀧𑀩𑁆𑀩𑀚𑀺𑀢𑀸𑀧𑀺 𑀯𑀺𑀦𑀸 𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀅𑀦𑀦𑀼𑀘𑁆𑀙𑀯𑀺𑀓𑀁 𑀓𑀭𑁄𑀦𑁆𑀢𑀻’𑀢𑀺. 𑀏𑀯𑀁 𑀓𑁄𑀘𑀺 𑀧𑀸𑀧𑀓𑁂𑀦 𑀫𑀦𑀲𑀸 𑀧𑀤𑀽𑀲𑁂𑀢𑁆𑀯𑀸 𑀅𑀧𑀸𑀬𑀧𑀽𑀭𑀓𑁄 𑀪𑀯𑁂𑀬𑁆𑀬, 𑀇𑀫𑀁 𑀧𑀳𑀸𑀬 𑀫𑀬𑀸 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑁄 𑀤𑁆𑀯𑁂𑀥𑀸𑀧𑀣𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀫𑀢𑁆𑀣𑀓𑁂 𑀅𑀝𑁆𑀞𑀸𑀲𑀺. 𑀪𑀤𑁆𑀤𑀸𑀧𑀺 𑀆𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀆𑀳 𑁋 ‘‘𑀪𑀤𑁆𑀤𑁂, 𑀢𑀸𑀤𑀺𑀲𑀺𑀁 𑀇𑀢𑁆𑀣𑀺𑀁 𑀫𑀫 𑀧𑀘𑁆𑀙𑀢𑁄 𑀆𑀕𑀘𑁆𑀙𑀦𑁆𑀢𑀺𑀁 𑀤𑀺𑀲𑁆𑀯𑀸 ‘𑀇𑀫𑁂 𑀧𑀩𑁆𑀩𑀚𑀺𑀢𑀸𑀧𑀺 𑀯𑀺𑀦𑀸 𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻’𑀢𑀺 𑀅𑀫𑁆𑀳𑁂𑀲𑀼 𑀧𑀤𑀼𑀝𑁆𑀞𑀘𑀺𑀢𑁆𑀢𑁄 𑀫𑀳𑀸𑀚𑀦𑁄 𑀅𑀧𑀸𑀬𑀧𑀽𑀭𑀓𑁄 𑀪𑀯𑁂𑀬𑁆𑀬. 𑀇𑀫𑀲𑁆𑀫𑀺𑀁 𑀤𑁆𑀯𑁂𑀥𑀸𑀧𑀣𑁂 𑀢𑁆𑀯𑀁 𑀏𑀢𑀁 𑀕𑀡𑁆𑀳, 𑀅𑀳𑀁 𑀏𑀓𑁂𑀦 𑀕𑀫𑀺𑀲𑁆𑀲𑀸𑀫𑀻’’𑀢𑀺. ‘‘𑀆𑀫, 𑀅𑀬𑁆𑀬, 𑀫𑀸𑀢𑀼𑀕𑀸𑀫𑁄 ‘𑀧𑀩𑁆𑀩𑀚𑀺𑀢𑀸𑀦𑀁 𑀧𑀮𑀺𑀩𑁄𑀥𑁄, 𑀧𑀩𑁆𑀩𑀚𑀺𑀢𑀸𑀧𑀺 𑀯𑀺𑀦𑀸 𑀦 𑀪𑀯𑀦𑁆𑀢𑀻’𑀢𑀺 𑀅𑀫𑁆𑀳𑀸𑀓𑀁 𑀤𑁄𑀲𑀁 𑀤𑀲𑁆𑀲𑁂𑀬𑁆𑀬𑀼’’𑀦𑁆𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀤𑀲𑀦𑀔𑀲𑀫𑁄𑀥𑀸𑀦𑀲𑀫𑀼𑀚𑁆𑀚𑀮𑀁 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 ‘‘𑀲𑀢𑀲𑀳𑀲𑁆𑀲𑀓𑀧𑁆𑀧𑀧𑀫𑀸𑀡𑁂 𑀅𑀤𑁆𑀥𑀸𑀦𑁂 𑀓𑀢𑁄 𑀫𑀺𑀢𑁆𑀢𑀲𑀦𑁆𑀣𑀯𑁄 𑀅𑀚𑁆𑀚 𑀪𑀺𑀚𑁆𑀚𑀢𑀺, 𑀢𑀼𑀫𑁆𑀳𑁂𑀯 𑀤𑀓𑁆𑀔𑀺𑀡𑀸 𑀦𑀸𑀫, 𑀢𑀼𑀫𑁆𑀳𑀸𑀓𑀁 𑀤𑀓𑁆𑀔𑀺𑀡𑀫𑀕𑁆𑀕𑁄 𑀯𑀝𑁆𑀝𑀢𑀺, 𑀫𑀬𑀁 𑀫𑀸𑀢𑀼𑀕𑀸𑀫𑀸 𑀦𑀸𑀫 𑀯𑀸𑀫𑀚𑀸𑀢𑀺𑀓𑀸, 𑀅𑀫𑁆𑀳𑀸𑀓𑀁 𑀯𑀸𑀫𑀫𑀕𑁆𑀕𑁄 𑀯𑀝𑁆𑀝𑀢𑀻’’𑀢𑀺 𑀯𑀦𑁆𑀤𑀺𑀢𑁆𑀯𑀸 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. 𑀢𑁂𑀲𑀁 𑀤𑁆𑀯𑁂𑀥𑀸𑀪𑀽𑀢𑀓𑀸𑀮𑁂 𑀅𑀬𑀁 𑀫𑀳𑀸𑀧𑀣𑀯𑀻 ‘‘𑀅𑀳𑀁 𑀘𑀓𑁆𑀓𑀯𑀸𑀴𑀲𑀺𑀦𑁂𑀭𑀼𑀧𑀩𑁆𑀩𑀢𑀸𑀤𑀬𑁄 𑀥𑀸𑀭𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀻𑀧𑀺 𑀢𑀼𑀫𑁆𑀳𑀸𑀓𑀁 𑀕𑀼𑀡𑁂 𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀫𑀻’’𑀢𑀺 𑀯𑀤𑀦𑁆𑀢𑀻 𑀯𑀺𑀬 𑀯𑀺𑀭𑀯𑀫𑀸𑀦𑀸 𑀅𑀓𑀫𑁆𑀧𑀺𑀢𑁆𑀣. 𑀆𑀓𑀸𑀲𑁂 𑀅𑀲𑀦𑀺𑀲𑀤𑁆𑀤𑁄 𑀯𑀺𑀬 𑀧𑀯𑀢𑁆𑀢𑀺, 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑁄 𑀉𑀦𑁆𑀦𑀸𑀤𑀺.

𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀧𑀺 𑀯𑁂𑀴𑀼𑀯𑀦𑀫𑀳𑀸𑀯𑀺𑀳𑀸𑀭𑁂 𑀓𑀼𑀝𑀺𑀬𑀁 𑀦𑀺𑀲𑀺𑀦𑁆𑀦𑁄 𑀧𑀣𑀯𑀻𑀓𑀫𑁆𑀧𑀦𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀓𑀺𑀲𑁆𑀲 𑀦𑀼 𑀔𑁄 𑀧𑀣𑀯𑀻 𑀓𑀫𑁆𑀧𑀢𑀻’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 ‘‘𑀧𑀺𑀧𑁆𑀧𑀮𑀺𑀫𑀸𑀡𑀯𑁄 𑀘 𑀪𑀤𑁆𑀤𑀸 𑀘 𑀓𑀸𑀧𑀺𑀮𑀸𑀦𑀻 𑀫𑀁 𑀉𑀤𑁆𑀤𑀺𑀲𑁆𑀲 𑀅𑀧𑁆𑀧𑀫𑁂𑀬𑁆𑀬𑀁 𑀲𑀫𑁆𑀧𑀢𑁆𑀢𑀺𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑀸, 𑀢𑁂𑀲𑀁 𑀯𑀺𑀬𑁄𑀕𑀝𑁆𑀞𑀸𑀦𑁂 𑀉𑀪𑀺𑀦𑁆𑀦𑀁 𑀕𑀼𑀡𑀩𑀮𑁂𑀦 𑀅𑀬𑀁 𑀧𑀣𑀯𑀻𑀓𑀫𑁆𑀧𑁄 𑀚𑀸𑀢𑁄, 𑀫𑀬𑀸𑀧𑀺 𑀏𑀢𑁂𑀲𑀁 𑀲𑀗𑁆𑀕𑀳𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑁆𑀫 𑀲𑀬𑀫𑁂𑀯 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀅𑀲𑀻𑀢𑀺𑀫𑀳𑀸𑀣𑁂𑀭𑁂𑀲𑀼 𑀓𑀜𑁆𑀘𑀺 𑀅𑀦𑀸𑀧𑀼𑀘𑁆𑀙𑀸 𑀢𑀺𑀕𑀸𑀯𑀼𑀢𑀫𑀕𑁆𑀕𑀁 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 𑀭𑀸𑀚𑀕𑀳𑀲𑁆𑀲 𑀘 𑀦𑀸𑀮𑀦𑁆𑀤𑀸𑀬 𑀘 𑀅𑀦𑁆𑀢𑀭𑁂 𑀩𑀳𑀼𑀧𑀼𑀢𑁆𑀢𑀦𑀺𑀕𑁆𑀭𑁄𑀥𑀫𑀽𑀮𑁂 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀦𑀺𑀲𑀺𑀦𑁆𑀦𑁄 𑀧𑀦 𑀅𑀜𑁆𑀜𑀢𑀭𑀧𑀁𑀲𑀼𑀓𑀽𑀮𑀺𑀓𑁄 𑀯𑀺𑀬 𑀅𑀦𑀺𑀲𑀻𑀤𑀺𑀢𑁆𑀯𑀸 𑀩𑀼𑀤𑁆𑀥𑀯𑁂𑀲𑀁 𑀕𑀳𑁂𑀢𑁆𑀯𑀸 𑀅𑀲𑀻𑀢𑀺𑀳𑀢𑁆𑀣𑀸 𑀩𑀼𑀤𑁆𑀥𑀭𑀁𑀲𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀦𑀺𑀲𑀻𑀤𑀺. 𑀇𑀢𑀺 𑀢𑀲𑁆𑀫𑀺𑀁 𑀔𑀡𑁂 𑀧𑀡𑁆𑀡𑀘𑁆𑀙𑀢𑁆𑀢𑀲𑀓𑀝𑀘𑀓𑁆𑀓𑀓𑀽𑀝𑀸𑀕𑀸𑀭𑀸𑀤𑀺𑀧𑁆𑀧𑀫𑀸𑀡𑀸 𑀩𑀼𑀤𑁆𑀥𑀭𑀁𑀲𑀺𑀬𑁄 𑀇𑀢𑁄 𑀘𑀺𑀢𑁄 𑀘 𑀯𑀺𑀧𑁆𑀨𑀭𑀦𑁆𑀢𑀺𑀬𑁄 𑀯𑀺𑀥𑀸𑀯𑀦𑁆𑀢𑀺𑀬𑁄 𑀘𑀦𑁆𑀤𑀲𑀳𑀲𑁆𑀲𑀲𑀽𑀭𑀺𑀬𑀲𑀳𑀲𑁆𑀲𑀉𑀕𑁆𑀕𑀫𑀦𑀓𑀸𑀮𑀁 𑀯𑀺𑀬 𑀓𑀼𑀭𑀼𑀫𑀸𑀦𑀸 𑀢𑀁 𑀯𑀦𑀦𑁆𑀢𑀭𑀁 𑀏𑀓𑁄𑀪𑀸𑀲𑀁 𑀅𑀓𑀁𑀲𑀼. 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀲𑀺𑀭𑀺𑀬𑀸 𑀲𑀫𑀼𑀚𑁆𑀚𑀮𑀢𑀸𑀭𑀸𑀕𑀡𑁂𑀦 𑀯𑀺𑀬 𑀕𑀕𑀦𑀁, 𑀲𑀼𑀧𑀼𑀧𑁆𑀨𑀺𑀢𑀓𑀫𑀮𑀓𑀼𑀯𑀮𑀬𑁂𑀦 𑀯𑀺𑀬 𑀲𑀮𑀺𑀮𑀁 𑀯𑀦𑀦𑁆𑀢𑀭𑀁 𑀯𑀺𑀭𑁄𑀘𑀺𑀢𑁆𑀣. 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑀲𑁆𑀲 𑀔𑀦𑁆𑀥𑁄 𑀧𑀓𑀢𑀺𑀬𑀸 𑀲𑁂𑀢𑁄 𑀳𑁄𑀢𑀺, 𑀧𑀢𑁆𑀢𑀸𑀦𑀺 𑀦𑀻𑀮𑀸𑀦𑀺 𑀧𑀓𑁆𑀓𑀸𑀦𑀺 𑀭𑀢𑁆𑀢𑀸𑀦𑀺. 𑀢𑀲𑁆𑀫𑀺𑀁 𑀧𑀦 𑀤𑀺𑀯𑀲𑁂 𑀲𑀩𑁆𑀩𑁄 𑀦𑀺𑀕𑁆𑀭𑁄𑀥𑁄 𑀲𑀼𑀯𑀡𑁆𑀡𑀯𑀡𑁆𑀡𑁄𑀯 𑀅𑀳𑁄𑀲𑀺.

𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀢𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀅𑀫𑁆𑀳𑀸𑀓𑀁 𑀲𑀢𑁆𑀣𑀸 𑀪𑀯𑀺𑀲𑁆𑀲𑀢𑀺, 𑀇𑀫𑀁 𑀅𑀳𑀁 𑀉𑀤𑁆𑀤𑀺𑀲𑁆𑀲 𑀧𑀩𑁆𑀩𑀚𑀺𑀢𑁄’’𑀢𑀺 𑀤𑀺𑀝𑁆𑀞𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀑𑀦𑀢𑁄 𑀕𑀦𑁆𑀢𑁆𑀯𑀸 𑀢𑀻𑀲𑀼 𑀞𑀸𑀦𑁂𑀲𑀼 𑀯𑀦𑁆𑀤𑀺𑀢𑁆𑀯𑀸 ‘‘𑀲𑀢𑁆𑀣𑀸 𑀫𑁂, 𑀪𑀦𑁆𑀢𑁂, 𑀪𑀕𑀯𑀸, 𑀲𑀸𑀯𑀓𑁄𑀳𑀫𑀲𑁆𑀫𑀺, 𑀲𑀢𑁆𑀣𑀸 𑀫𑁂, 𑀪𑀦𑁆𑀢𑁂, 𑀪𑀕𑀯𑀸, 𑀲𑀸𑀯𑀓𑁄𑀳𑀫𑀲𑁆𑀫𑀻’’𑀢𑀺 (𑀲𑀁. 𑀦𑀺. 𑁨.𑁧𑁫𑁪) 𑀆𑀳. 𑀅𑀣 𑀦𑀁 𑀪𑀕𑀯𑀸 𑀆𑀳 𑁋 ‘‘𑀓𑀲𑁆𑀲𑀧, 𑀲𑀘𑁂 𑀢𑁆𑀯𑀁 𑀇𑀫𑀁 𑀦𑀺𑀧𑀘𑁆𑀘𑀓𑀸𑀭𑀁 𑀫𑀳𑀸𑀧𑀣𑀯𑀺𑀬𑀸 𑀓𑀭𑁂𑀬𑁆𑀬𑀸𑀲𑀺, 𑀲𑀸𑀧𑀺 𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑀼𑀡𑁂𑀬𑁆𑀬. 𑀢𑀣𑀸𑀕𑀢𑀲𑁆𑀲 𑀧𑀦 𑀏𑀯𑀁 𑀕𑀼𑀡𑀫𑀳𑀦𑁆𑀢𑀢𑀁 𑀚𑀸𑀦𑀢𑀸 𑀢𑀬𑀸 𑀓𑀢𑁄 𑀦𑀺𑀧𑀘𑁆𑀘𑀓𑀸𑀭𑁄 𑀫𑀬𑁆𑀳𑀁 𑀮𑁄𑀫𑀫𑁆𑀧𑀺 𑀘𑀸𑀮𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀦𑀺𑀲𑀻𑀤, 𑀓𑀲𑁆𑀲𑀧, 𑀤𑀸𑀬𑀚𑁆𑀚𑀁 𑀢𑁂 𑀤𑀲𑁆𑀲𑀸𑀫𑀻’’𑀢𑀺. 𑀅𑀣𑀲𑁆𑀲 𑀪𑀕𑀯𑀸 𑀢𑀻𑀳𑀺 𑀑𑀯𑀸𑀤𑁂𑀳𑀺 𑀉𑀧𑀲𑀫𑁆𑀧𑀤𑀁 𑀅𑀤𑀸𑀲𑀺. 𑀤𑀢𑁆𑀯𑀸 𑀘 𑀩𑀳𑀼𑀧𑀼𑀢𑁆𑀢𑀦𑀺𑀕𑁆𑀭𑁄𑀥𑀫𑀽𑀮𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀣𑁂𑀭𑀁 𑀧𑀘𑁆𑀙𑀸𑀲𑀫𑀡𑀁 𑀓𑀢𑁆𑀯𑀸 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. 𑀲𑀢𑁆𑀣𑀼 𑀲𑀭𑀻𑀭𑀁 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀯𑀺𑀘𑀺𑀢𑁆𑀢𑀁, 𑀫𑀳𑀸𑀓𑀲𑁆𑀲𑀧𑀲𑁆𑀲 𑀲𑀢𑁆𑀢𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀧𑀝𑀺𑀫𑀡𑁆𑀟𑀺𑀢𑀁, 𑀲𑁄 𑀓𑀜𑁆𑀘𑀦𑀦𑀸𑀯𑀸𑀬 𑀧𑀘𑁆𑀙𑀸𑀩𑀤𑁆𑀥𑁄 𑀯𑀺𑀬 𑀲𑀢𑁆𑀣𑀼 𑀧𑀤𑀸𑀦𑀼𑀧𑀤𑀺𑀓𑀁 𑀅𑀦𑀼𑀕𑀜𑁆𑀙𑀺. 𑀲𑀢𑁆𑀣𑀸 𑀣𑁄𑀓𑀁 𑀫𑀕𑁆𑀕𑀁 𑀕𑀦𑁆𑀢𑁆𑀯𑀸 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀚𑁆𑀚𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀣𑁂𑀭𑁄 ‘‘𑀲𑀢𑁆𑀣𑀸 𑀦𑀺𑀲𑀻𑀤𑀺𑀢𑀼𑀓𑀸𑀫𑁄’’𑀢𑀺 𑀜𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀧𑀺𑀮𑁄𑀢𑀺𑀓𑀁 𑀲𑀗𑁆𑀖𑀸𑀝𑀺𑀁 𑀘𑀢𑀼𑀕𑁆𑀕𑀼𑀡𑀁 𑀓𑀢𑁆𑀯𑀸 𑀧𑀜𑁆𑀜𑀧𑁂𑀲𑀺.

𑀲𑀢𑁆𑀣𑀸 𑀢𑀢𑁆𑀣 𑀦𑀺𑀲𑀻𑀤𑀺𑀢𑁆𑀯𑀸 𑀳𑀢𑁆𑀣𑁂𑀦 𑀘𑀻𑀯𑀭𑀁 𑀧𑀭𑀺𑀫𑀚𑁆𑀚𑀦𑁆𑀢𑁄 ‘‘𑀫𑀼𑀤𑀼𑀓𑀸 𑀔𑁄 𑀢𑁆𑀬𑀸𑀬𑀁, 𑀓𑀲𑁆𑀲𑀧, 𑀧𑀝𑀧𑀺𑀮𑁄𑀢𑀺𑀓𑀸 𑀲𑀗𑁆𑀖𑀸𑀝𑀻’’𑀢𑀺 𑀆𑀳 (𑀲𑀁. 𑀦𑀺. 𑁨.𑁧𑁫𑁪). 𑀲𑁄 ‘‘𑀲𑀢𑁆𑀣𑀸 𑀫𑁂 𑀲𑀗𑁆𑀖𑀸𑀝𑀺𑀬𑀸 𑀫𑀼𑀤𑀼𑀪𑀸𑀯𑀁 𑀓𑀣𑁂𑀲𑀺, 𑀧𑀸𑀭𑀼𑀧𑀺𑀢𑀼𑀓𑀸𑀫𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 ‘‘𑀧𑀸𑀭𑀼𑀧𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀲𑀗𑁆𑀖𑀸𑀝𑀺’’𑀦𑁆𑀢𑀺 𑀆𑀳. ‘‘𑀓𑀺𑀁 𑀢𑁆𑀯𑀁 𑀧𑀸𑀭𑀼𑀧𑀺𑀲𑁆𑀲𑀲𑀺, 𑀓𑀲𑁆𑀲𑀧𑀸’’𑀢𑀺? ‘‘𑀢𑀼𑀫𑁆𑀳𑀸𑀓𑀁 𑀦𑀺𑀯𑀸𑀲𑀦𑀁 𑀮𑀪𑀦𑁆𑀢𑁄 𑀧𑀸𑀭𑀼𑀧𑀺𑀲𑁆𑀲𑀸𑀫𑀺, 𑀪𑀦𑁆𑀢𑁂’’𑀢𑀺. ‘‘𑀓𑀺𑀁 𑀧𑀦 𑀢𑁆𑀯𑀁, 𑀓𑀲𑁆𑀲𑀧, 𑀇𑀫𑀁 𑀧𑀭𑀺𑀪𑁄𑀕𑀚𑀺𑀡𑁆𑀡𑀁 𑀧𑀁𑀲𑀼𑀓𑀽𑀮𑀁 𑀥𑀸𑀭𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀺, 𑀫𑀬𑀸 𑀳𑀺 𑀇𑀫𑀲𑁆𑀲 𑀧𑀁𑀲𑀼𑀓𑀽𑀮𑀲𑁆𑀲 𑀕𑀳𑀺𑀢𑀤𑀺𑀯𑀲𑁂 𑀉𑀤𑀓𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀫𑀳𑀸𑀧𑀣𑀯𑀻 𑀓𑀫𑁆𑀧𑀺, 𑀇𑀫𑀁 𑀩𑀼𑀤𑁆𑀥𑀧𑀭𑀺𑀪𑁄𑀕𑀚𑀺𑀡𑁆𑀡𑀘𑀻𑀯𑀭𑀁 𑀦𑀸𑀫 𑀦 𑀲𑀓𑁆𑀓𑀸 𑀧𑀭𑀺𑀢𑁆𑀢𑀕𑀼𑀡𑁂𑀦 𑀥𑀸𑀭𑁂𑀢𑀼𑀁, 𑀧𑀝𑀺𑀩𑀮𑁂𑀦𑁂𑀯𑀺𑀤𑀁 𑀧𑀝𑀺𑀧𑀢𑁆𑀢𑀺𑀧𑀽𑀭𑀡𑀲𑀫𑀢𑁆𑀣𑁂𑀦 𑀚𑀸𑀢𑀺𑀧𑀁𑀲𑀼𑀓𑀽𑀮𑀺𑀓𑁂𑀦 𑀥𑀸𑀭𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀯𑀸 𑀣𑁂𑀭𑁂𑀦 𑀲𑀤𑁆𑀥𑀺𑀁 𑀘𑀻𑀯𑀭𑀁 𑀧𑀭𑀺𑀯𑀢𑁆𑀢𑁂𑀲𑀺.

𑀏𑀯𑀁 𑀘𑀻𑀯𑀭𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀣𑁂𑀭𑀲𑁆𑀲 𑀘𑀻𑀯𑀭𑀁 𑀪𑀕𑀯𑀸 𑀧𑀸𑀭𑀼𑀧𑀺, 𑀲𑀢𑁆𑀣𑀼 𑀘𑀻𑀯𑀭𑀁 𑀣𑁂𑀭𑁄. 𑀢𑀲𑁆𑀫𑀺𑀁 𑀔𑀡𑁂 𑀅𑀘𑁂𑀢𑀦𑀸𑀧𑀺 𑀅𑀬𑀁 𑀫𑀳𑀸𑀧𑀣𑀯𑀻 ‘‘𑀤𑀼𑀓𑁆𑀓𑀭𑀁, 𑀪𑀦𑁆𑀢𑁂, 𑀅𑀓𑀢𑁆𑀣, 𑀅𑀢𑁆𑀢𑀦𑁄 𑀧𑀸𑀭𑀼𑀢𑀘𑀻𑀯𑀭𑀁 𑀲𑀸𑀯𑀓𑁂𑀦 𑀧𑀭𑀺𑀯𑀢𑁆𑀢𑀺𑀢𑀧𑀼𑀩𑁆𑀩𑀁 𑀦𑀸𑀫 𑀦𑀸𑀳𑁄𑀲𑀺, 𑀅𑀳𑀁 𑀢𑀼𑀫𑁆𑀳𑀸𑀓𑀁 𑀕𑀼𑀡𑀁 𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀫𑀻’’𑀢𑀺 𑀯𑀤𑀦𑁆𑀢𑀻 𑀯𑀺𑀬 𑀉𑀤𑀓𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀓𑀫𑁆𑀧𑀺. 𑀣𑁂𑀭𑁄𑀧𑀺 ‘‘𑀮𑀤𑁆𑀥𑀁 𑀫𑁂 𑀩𑀼𑀤𑁆𑀥𑀸𑀦𑀁 𑀧𑀭𑀺𑀪𑁄𑀕𑀘𑀻𑀯𑀭𑀁, 𑀓𑀺𑀁 𑀫𑁂 𑀇𑀤𑀸𑀦𑀺 𑀉𑀢𑁆𑀢𑀭𑀺 𑀓𑀢𑁆𑀢𑀩𑁆𑀩’’𑀦𑁆𑀢𑀺 𑀉𑀦𑁆𑀦𑀢𑀺𑀁 𑀅𑀓𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂𑀬𑁂𑀯 𑀢𑁂𑀭𑀲 𑀥𑀼𑀢𑀕𑀼𑀡𑁂 𑀲𑀫𑀸𑀤𑀸𑀬 𑀲𑀢𑁆𑀢𑀤𑀺𑀯𑀲𑀫𑀢𑁆𑀢𑀁 𑀧𑀼𑀣𑀼𑀚𑁆𑀚𑀦𑁄 𑀅𑀳𑁄𑀲𑀺. 𑀅𑀝𑁆𑀞𑀫𑁂 𑀤𑀺𑀯𑀲𑁂 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀓𑀲𑁆𑀲𑀧𑁄, 𑀪𑀺𑀓𑁆𑀔𑀯𑁂, 𑀘𑀦𑁆𑀤𑀽𑀧𑀫𑁄 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀢𑀺, 𑀅𑀧𑀓𑀲𑁆𑀲𑁂𑀯 𑀓𑀸𑀬𑀁 𑀅𑀧𑀓𑀲𑁆𑀲 𑀘𑀺𑀢𑁆𑀢𑀁 𑀦𑀺𑀘𑁆𑀘𑀦𑀯𑀓𑁄 𑀓𑀼𑀮𑁂𑀲𑀼 𑀅𑀧𑁆𑀧𑀕𑀩𑁆𑀪𑁄’’𑀢𑀺 (𑀲𑀁. 𑀦𑀺. 𑁨.𑁧𑁪𑁬) 𑀏𑀯𑀫𑀸𑀤𑀺𑀦𑀸 𑀧𑀲𑀁𑀲𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀅𑀭𑀺𑀬𑀕𑀡𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀥𑀼𑀢𑀯𑀸𑀤𑀸𑀦𑀁 𑀬𑀤𑀺𑀤𑀁 𑀫𑀳𑀸𑀓𑀲𑁆𑀲𑀧𑁄’’𑀢𑀺 (𑀅. 𑀦𑀺. 𑁧.𑁧𑁮𑁮, 𑁧𑁯𑁧) 𑀥𑀼𑀢𑀯𑀸𑀤𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀺.

𑁩𑁯𑁮. 𑀏𑀯𑀁 𑀪𑀕𑀯𑀢𑀸 𑀏𑀢𑀤𑀕𑁆𑀕𑀝𑁆𑀞𑀸𑀦𑁂 𑀞𑀧𑀺𑀢𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀫𑀳𑀸𑀲𑀸𑀯𑀓𑀪𑀸𑀯𑀁 𑀧𑀢𑁆𑀢𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀯𑀲𑁂𑀦𑀁 𑀧𑀼𑀩𑁆𑀩𑀘𑀭𑀺𑀢𑀸𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀤𑀼𑀫𑀼𑀢𑁆𑀢𑀭𑀲𑁆𑀲𑀸𑀢𑀺 𑀢𑀲𑁆𑀲 𑀓𑀺𑀭 𑀪𑀕𑀯𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀧𑀸𑀤𑀸𑀦𑀁 𑀦𑀺𑀓𑁆𑀔𑁂𑀧𑀦𑀲𑀫𑀬𑁂 𑀅𑀓𑁆𑀓𑀦𑁆𑀢𑀓𑁆𑀓𑀦𑁆𑀢𑀧𑀸𑀤𑁂 𑀲𑀢𑀲𑀳𑀲𑁆𑀲𑀧𑀢𑁆𑀢𑀸 𑀧𑀤𑀼𑀫𑀸 𑀧𑀣𑀯𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀉𑀝𑁆𑀞𑀳𑀺𑀁𑀲𑀼. 𑀢𑀲𑁆𑀫𑀸𑀲𑁆𑀲 𑀢𑀁 𑀦𑀸𑀫𑀁 𑀅𑀳𑁄𑀲𑀺. 𑀲𑀓𑀮𑀲𑀢𑁆𑀢𑀦𑀺𑀓𑀸𑀬𑁂𑀲𑀼 𑀏𑀓𑁂𑀓𑁂𑀦 𑀲𑀢𑀲𑀢𑀧𑀼𑀜𑁆𑀜𑁂 𑀓𑀢𑁂 𑀢𑀲𑁆𑀲 𑀧𑀼𑀜𑁆𑀜𑀲𑁆𑀲 𑀲𑀢𑀕𑀼𑀡𑀧𑀼𑀜𑁆𑀜𑀸𑀦𑀁 𑀓𑀢𑀢𑁆𑀢𑀸 𑀪𑀕𑀯𑀢𑁄𑀢𑀺 𑀅𑀢𑁆𑀣𑁄. 𑀮𑁄𑀓𑀚𑁂𑀝𑁆𑀞𑀲𑁆𑀲 𑀢𑀸𑀤𑀺𑀦𑁄𑀢𑀺 𑀲𑀢𑁆𑀢𑀮𑁄𑀓𑀲𑁆𑀲 𑀧𑀥𑀸𑀦𑀪𑀽𑀢𑀲𑁆𑀲 𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼 𑀅𑀓𑀫𑁆𑀧𑀺𑀬𑀪𑀸𑀯𑀁 𑀧𑀢𑁆𑀢𑀢𑁆𑀢𑀸 𑀢𑀸𑀤𑀺𑀦𑁄. 𑀦𑀺𑀩𑁆𑀩𑀼𑀢𑁂 𑀮𑁄𑀓𑀦𑀸𑀣𑀫𑁆𑀳𑀻𑀢𑀺 𑀲𑀢𑁆𑀢𑀮𑁄𑀓𑀲𑁆𑀲 𑀧𑀝𑀺𑀲𑀭𑀡𑀪𑀽𑀢𑁂 𑀪𑀕𑀯𑀢𑀺 𑀔𑀦𑁆𑀥𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀼𑀢𑁂, 𑀅𑀤𑀲𑁆𑀲𑀦𑀁 𑀕𑀢𑁂𑀢𑀺 𑀅𑀢𑁆𑀣𑁄. 𑀧𑀽𑀚𑀁 𑀓𑀼𑀩𑁆𑀩𑀦𑁆𑀢𑀺 𑀲𑀦𑁆𑀣𑀼𑀦𑁄𑀢𑀺 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀲𑀸𑀲𑀦𑀢𑁄 ‘‘𑀲𑀢𑁆𑀣𑀸’’𑀢𑀺 𑀮𑀤𑁆𑀥𑀦𑀸𑀫𑀲𑁆𑀲 𑀪𑀕𑀯𑀢𑁄 𑀲𑀸𑀥𑀼𑀓𑀻𑀴𑀁 𑀓𑀻𑀴𑀦𑁆𑀢𑀸 𑀧𑀽𑀚𑀁 𑀓𑀭𑁄𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁩𑁯𑁯. 𑀅𑀕𑁆𑀕𑀺𑀁 𑀘𑀺𑀦𑀦𑁆𑀢𑀻 𑀚𑀦𑀢𑀸𑀢𑀺 𑀚𑀦𑀲𑀫𑀽𑀳𑀸 𑀆𑀴𑀸𑀳𑀦𑀢𑁆𑀣𑀸𑀬 𑀅𑀕𑁆𑀕𑀺𑀁 𑀘𑀺𑀦𑀦𑁆𑀢𑀸 𑀭𑀸𑀲𑀺𑀁 𑀓𑀭𑁄𑀦𑁆𑀢𑀸 𑀆𑀲𑀫𑀦𑁆𑀢𑀢𑁄 𑀫𑁄𑀤𑀺𑀢𑀸 𑀲𑀦𑁆𑀢𑀼𑀝𑁆𑀞𑀸 𑀧𑀓𑀸𑀭𑁂𑀦 𑀫𑁄𑀤𑀺𑀢𑀸 𑀲𑀦𑁆𑀢𑀼𑀝𑁆𑀞𑀸 𑀧𑀽𑀚𑀁 𑀓𑀭𑁄𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀲𑀼 𑀲𑀁𑀯𑁂𑀕𑀚𑀸𑀢𑁂𑀲𑀽𑀢𑀺 𑀢𑁂𑀲𑀼 𑀚𑀦𑀲𑀫𑀽𑀳𑁂𑀲𑀼 𑀲𑀁𑀯𑁂𑀕𑀧𑁆𑀧𑀢𑁆𑀢𑁂𑀲𑀼 𑀉𑀢𑁆𑀭𑀸𑀲𑀁 𑀮𑀪𑀦𑁆𑀢𑁂𑀲𑀼 𑀫𑁂 𑀫𑀬𑁆𑀳𑀁 𑀧𑀻𑀢𑀺 𑀳𑀸𑀲𑁄 𑀉𑀤𑀧𑀚𑁆𑀚𑀣 𑀧𑀸𑀢𑀼𑀪𑀯𑀻𑀢𑀺 𑀅𑀢𑁆𑀣𑁄.

𑁪𑁦𑁦. 𑀜𑀸𑀢𑀺𑀫𑀺𑀢𑁆𑀢𑁂 𑀲𑀫𑀸𑀦𑁂𑀢𑁆𑀯𑀸𑀢𑀺 𑀫𑀫 𑀩𑀦𑁆𑀥𑀼𑀲𑀳𑀸𑀬𑁂 𑀲𑀫𑀸𑀦𑁂𑀢𑁆𑀯𑀸 𑀭𑀸𑀲𑀺𑀁 𑀓𑀢𑁆𑀯𑀸. 𑀫𑀳𑀸𑀯𑀻𑀭𑁄 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁄 𑀅𑀤𑀲𑁆𑀲𑀦𑀁 𑀅𑀕𑀫𑀸𑀲𑀻𑀢𑀺 𑀇𑀤𑀁 𑀯𑀘𑀦𑀁 𑀅𑀩𑁆𑀭𑀯𑀺𑀁 𑀓𑀣𑁂𑀲𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀳𑀦𑁆𑀤 𑀧𑀽𑀚𑀁 𑀓𑀭𑁄𑀫𑀲𑁂𑀢𑀺 𑀳𑀦𑁆𑀤𑀸𑀢𑀺 𑀯𑁄𑀲𑁆𑀲𑀕𑁆𑀕𑀢𑁆𑀣𑁂 𑀦𑀺𑀧𑀸𑀢𑁄, 𑀢𑁂𑀦 𑀓𑀸𑀭𑀡𑁂𑀦 𑀫𑀬𑀁 𑀲𑀩𑁆𑀩𑁂 𑀲𑀫𑀸𑀕𑀢𑀸 𑀧𑀽𑀚𑀁 𑀓𑀭𑁄𑀫𑀸𑀢𑀺 𑀅𑀢𑁆𑀣𑁄. 𑀲𑁂𑀢𑀺 𑀦𑀺𑀧𑀸𑀢𑁄.

𑁪𑁦𑁧. 𑀲𑀸𑀥𑀽𑀢𑀺 𑀢𑁂 𑀧𑀝𑀺𑀲𑁆𑀲𑀼𑀢𑁆𑀯𑀸𑀢𑀺 𑀢𑁂 𑀫𑀫 𑀜𑀸𑀢𑀺𑀫𑀺𑀢𑁆𑀢𑀸 𑀲𑀸𑀥𑀼 𑀇𑀢𑀺 𑀲𑀼𑀦𑁆𑀤𑀭𑀁 𑀪𑀤𑁆𑀤𑀓𑀁 𑀇𑀢𑀺 𑀧𑀝𑀺𑀲𑀼𑀡𑀺𑀢𑁆𑀯𑀸 𑀫𑀫 𑀯𑀘𑀦𑀁 𑀲𑀫𑁆𑀧𑀝𑀺𑀙𑀺𑀢𑁆𑀯𑀸 𑀫𑁂 𑀫𑀬𑁆𑀳𑀁 𑀪𑀺𑀬𑁆𑀬𑁄 𑀅𑀢𑀺𑀭𑁂𑀓𑀁 𑀳𑀸𑀲𑀁 𑀧𑀻𑀢𑀺𑀁 𑀚𑀦𑀺𑀁𑀲𑀼 𑀉𑀧𑁆𑀧𑀸𑀤𑁂𑀲𑀼𑀦𑁆𑀢𑀺 𑀅𑀢𑁆𑀣𑁄.

𑁪𑁦𑁨. 𑀢𑀢𑁄 𑀅𑀢𑁆𑀢𑀦𑁄 𑀓𑀢𑀧𑀼𑀜𑁆𑀜𑀲𑀜𑁆𑀘𑀬𑀁 𑀤𑀲𑁆𑀲𑁂𑀦𑁆𑀢𑁄 𑀩𑀼𑀤𑁆𑀥𑀲𑁆𑀫𑀺𑀁 𑀮𑁄𑀓𑀦𑀸𑀣𑀫𑁆𑀳𑀻𑀢𑀺𑀆𑀤𑀺𑀫𑀸𑀳. 𑀲𑀢𑀳𑀢𑁆𑀣𑀁 𑀉𑀕𑁆𑀕𑀢𑀁 𑀉𑀩𑁆𑀩𑀺𑀤𑁆𑀥𑀁 𑀤𑀺𑀬𑀟𑁆𑀠𑀳𑀢𑁆𑀣𑀲𑀢𑀁 𑀯𑀺𑀢𑁆𑀣𑀢𑀁, 𑀯𑀺𑀫𑀸𑀦𑀁 𑀦𑀪𑀲𑀺 𑀆𑀓𑀸𑀲𑁂 𑀉𑀕𑁆𑀕𑀢𑀁 𑀅𑀕𑁆𑀖𑀺𑀬𑀁, 𑀲𑀼𑀓𑀢𑀁 𑀲𑀼𑀦𑁆𑀤𑀭𑀸𑀓𑀸𑀭𑁂𑀦 𑀓𑀢𑀁, 𑀓𑀢𑁆𑀯𑀸 𑀓𑀸𑀭𑁂𑀢𑁆𑀯𑀸 𑀘 𑀧𑀼𑀜𑁆𑀜𑀲𑀜𑁆𑀘𑀬𑀁 𑀧𑀼𑀜𑁆𑀜𑀭𑀸𑀲𑀺𑀁 𑀓𑀸𑀳𑀸𑀲𑀺𑀁 𑀅𑀓𑀸𑀲𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁪𑁦𑁩. 𑀓𑀢𑁆𑀯𑀸𑀦 𑀅𑀕𑁆𑀖𑀺𑀬𑀁 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀘𑁂𑀢𑀺𑀬𑀧𑀽𑀚𑀦𑀝𑁆𑀞𑀸𑀦𑁂 𑀢𑀸𑀮𑀧𑀦𑁆𑀢𑀻𑀳𑀺 𑀢𑀸𑀮𑀧𑀸𑀴𑀻𑀳𑀺 𑀘𑀺𑀢𑁆𑀢𑀺𑀢𑀁 𑀲𑁄𑀪𑀺𑀢𑀁 𑀅𑀕𑁆𑀖𑀺𑀬𑀁 𑀓𑀢𑁆𑀯𑀸𑀦 𑀓𑀸𑀭𑁂𑀢𑁆𑀯𑀸 𑀘 𑀲𑀓𑀁 𑀘𑀺𑀢𑁆𑀢𑀁 𑀅𑀢𑁆𑀢𑀦𑁄 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀘𑁂𑀢𑀺𑀬𑀁 𑀧𑀽𑀚𑀬𑀼𑀢𑁆𑀢𑀫𑀦𑁆𑀢𑀺 𑀉𑀢𑁆𑀢𑀫𑀁 𑀩𑀼𑀤𑁆𑀥𑀥𑀸𑀢𑀼𑀦𑀺𑀥𑀸𑀧𑀺𑀢𑀁 𑀘𑁂𑀢𑀺𑀬𑀁 𑀧𑀽𑀚𑀬𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁪𑁦𑁪. 𑀢𑀲𑁆𑀲 𑀘𑁂𑀢𑀺𑀬𑀲𑁆𑀲 𑀫𑀳𑀺𑀫𑀁 𑀤𑀲𑁆𑀲𑁂𑀦𑁆𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀯𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀯𑀸𑀢𑀺 𑀆𑀓𑀸𑀲𑁂 𑀚𑀮𑀫𑀸𑀦𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀯 𑀅𑀕𑁆𑀕𑀺𑀭𑀸𑀲𑀺 𑀇𑀯 𑀢𑀁 𑀘𑁂𑀢𑀺𑀬𑀁 𑀲𑀢𑁆𑀢𑀳𑀺 𑀭𑀢𑀦𑁂𑀳𑀺 𑀚𑀮𑀢𑀺 𑀨𑀼𑀮𑁆𑀮𑀺𑀢𑁄 𑀯𑀺𑀓𑀲𑀺𑀢𑀧𑀼𑀧𑁆𑀨𑁄 𑀲𑀸𑀮𑀭𑀼𑀓𑁆𑀔𑀭𑀸𑀚𑀸 𑀇𑀯 𑀆𑀓𑀸𑀲𑁂 𑀇𑀦𑁆𑀤𑀮𑀝𑁆𑀞𑀻𑀯 𑀇𑀦𑁆𑀤𑀥𑀦𑀼 𑀇𑀯 𑀘 𑀘𑀢𑀼𑀤𑁆𑀤𑀺𑀲𑀸 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀑𑀪𑀸𑀲𑀢𑀺 𑀯𑀺𑀚𑁆𑀚𑁄𑀢𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁪𑁦𑁫. 𑀢𑀢𑁆𑀣 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸𑀢𑀺 𑀢𑀲𑁆𑀫𑀺𑀁 𑀚𑁄𑀢𑀫𑀸𑀦𑀥𑀸𑀢𑀼𑀕𑀩𑁆𑀪𑀫𑁆𑀳𑀺 𑀘𑀺𑀢𑁆𑀢𑀁 𑀫𑀦𑀁 𑀧𑀲𑀸𑀤𑁂𑀢𑁆𑀯𑀸 𑀲𑁄𑀫𑀦𑀲𑁆𑀲𑀁 𑀓𑀢𑁆𑀯𑀸 𑀢𑁂𑀦 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦 𑀩𑀳𑀼𑀁 𑀅𑀦𑁂𑀓𑀧𑁆𑀧𑀓𑀸𑀭𑀁 𑀓𑀼𑀲𑀮𑀁 𑀧𑀼𑀜𑁆𑀜𑀁 𑀓𑀢𑁆𑀯𑀸𑀦 ‘‘𑀥𑀸𑀢𑀼𑀕𑀩𑁆𑀪𑁂 𑀘 𑀲𑀸𑀲𑀦𑁂 𑀘 𑀏𑀢𑁆𑀢𑀓𑀸𑀦𑀺 𑀧𑀼𑀜𑁆𑀜𑀸𑀦𑀺 𑀫𑀬𑀸 𑀓𑀢𑀸𑀦𑀻’’𑀢𑀺 𑀏𑀯𑀁 𑀧𑀼𑀜𑁆𑀜𑀓𑀫𑁆𑀫𑀁 𑀲𑀭𑀺𑀢𑁆𑀯𑀸𑀦 𑀓𑀸𑀮𑀁𑀓𑀢𑁆𑀯𑀸 𑀢𑀺𑀤𑀲𑀁 𑀢𑀸𑀯𑀢𑀺𑀁𑀲𑀪𑀯𑀦𑀁 𑀲𑀼𑀢𑁆𑀢𑀧𑁆𑀧𑀩𑀼𑀤𑁆𑀥𑁄 𑀯𑀺𑀬 𑀅𑀳𑀁 𑀉𑀧𑀧𑀚𑁆𑀚𑀺𑀁 𑀚𑀸𑀢𑁄𑀢𑀺 𑀲𑀫𑁆𑀩𑀦𑁆𑀥𑁄.

𑁪𑁦𑁬. 𑀅𑀢𑁆𑀢𑀦𑁄 𑀉𑀧𑁆𑀧𑀦𑁆𑀦𑀤𑁂𑀯𑀮𑁄𑀓𑁂 𑀮𑀤𑁆𑀥𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 𑀲𑀳𑀲𑁆𑀲𑀬𑀼𑀢𑁆𑀢𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀳𑀬𑀯𑀸𑀳𑀺𑀁 𑀲𑀺𑀦𑁆𑀥𑀯𑀲𑀳𑀲𑁆𑀲𑀬𑁄𑀚𑀺𑀢𑀁 𑀤𑀺𑀩𑁆𑀩𑀭𑀣𑀁 𑀅𑀥𑀺𑀝𑁆𑀞𑀺𑀢𑁄. 𑀲𑀢𑁆𑀢𑀳𑀺 𑀪𑀽𑀫𑀻𑀳𑀺 𑀲𑀁 𑀲𑀼𑀝𑁆𑀞𑀼 𑀉𑀕𑁆𑀕𑀢𑀁 𑀉𑀩𑁆𑀩𑀺𑀤𑁆𑀥𑀁 𑀉𑀘𑁆𑀘𑀁 𑀫𑀬𑁆𑀳𑀁 𑀪𑀯𑀦𑀁 𑀯𑀺𑀫𑀸𑀦𑀁 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄.

𑁪𑁦𑁭. 𑀢𑀲𑁆𑀫𑀺𑀁 𑀯𑀺𑀫𑀸𑀦𑁂 𑀲𑀩𑁆𑀩𑀲𑁄𑀯𑀡𑁆𑀡𑀫𑀬𑀸 𑀲𑀓𑀮𑀲𑁄𑀯𑀡𑁆𑀡𑀫𑀬𑀸𑀦𑀺 𑀓𑀽𑀝𑀸𑀕𑀸𑀭𑀲𑀳𑀲𑁆𑀲𑀸𑀦𑀺 𑀅𑀳𑀼𑀁 𑀅𑀳𑁂𑀲𑀼𑀦𑁆𑀢𑀺 𑀅𑀢𑁆𑀣𑁄. 𑀲𑀓𑀢𑁂𑀚𑁂𑀦 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀲𑀩𑁆𑀩𑀸 𑀤𑀲 𑀤𑀺𑀲𑀸 𑀧𑀪𑀸𑀲𑀬𑀁 𑀑𑀪𑀸𑀲𑁂𑀦𑁆𑀢𑀸𑀦𑀺 𑀚𑀮𑀦𑁆𑀢𑀺 𑀯𑀺𑀚𑁆𑀚𑁄𑀢𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁪𑁦𑁮. 𑀢𑀲𑁆𑀫𑀺𑀁 𑀫𑀬𑁆𑀳𑀁 𑀧𑀸𑀢𑀼𑀪𑀽𑀢𑀯𑀺𑀫𑀸𑀦𑁂 𑀅𑀜𑁆𑀜𑁂𑀧𑀺 𑀦𑀺𑀬𑁆𑀬𑀽𑀳𑀸 𑀧𑀫𑀼𑀔𑀲𑀸𑀮𑀸𑀬𑁄 𑀲𑀦𑁆𑀢𑀺 𑀯𑀺𑀚𑁆𑀚𑀦𑁆𑀢𑀺. 𑀓𑀺𑀁 𑀪𑀽𑀢𑀸? 𑀮𑁄𑀳𑀺𑀢𑀗𑁆𑀕𑀫𑀬𑀸 𑀭𑀢𑁆𑀢𑀫𑀡𑀺𑀫𑀬𑀸 𑀢𑀤𑀸 𑀢𑁂𑀧𑀺 𑀦𑀺𑀬𑁆𑀬𑀽𑀳𑀸 𑀘𑀢𑀲𑁆𑀲𑁄 𑀤𑀺𑀲𑀸 𑀆𑀪𑀸𑀬 𑀧𑀪𑀸𑀬 𑀚𑁄𑀢𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁪𑁧𑁦. 𑀲𑀩𑁆𑀩𑁂 𑀤𑁂𑀯𑁂 𑀲𑀓𑀮𑀙𑀤𑁂𑀯𑀮𑁄𑀓𑁂 𑀤𑁂𑀯𑁂 𑀅𑀪𑀺𑀪𑁄𑀫𑀺 𑀅𑀪𑀺𑀪𑀯𑀸𑀫𑀺. 𑀓𑀲𑁆𑀲 𑀨𑀮𑀦𑁆𑀢𑀺 𑀘𑁂? 𑀫𑀬𑀸 𑀓𑀢𑀲𑁆𑀲 𑀧𑀼𑀜𑁆𑀜𑀓𑀫𑁆𑀫𑀲𑁆𑀲 𑀇𑀤𑀁 𑀨𑀮𑀦𑁆𑀢𑀺 𑀅𑀢𑁆𑀣𑁄.

𑁪𑁧𑁧. 𑀢𑀢𑁄 𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 𑀲𑀝𑁆𑀞𑀺𑀓𑀧𑁆𑀧𑀲𑀳𑀲𑁆𑀲𑀫𑁆𑀳𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀇𑀢𑁄 𑀓𑀧𑁆𑀧𑀢𑁄 𑀳𑁂𑀝𑁆𑀞𑀸 𑀲𑀝𑁆𑀞𑀺𑀲𑀳𑀲𑁆𑀲𑀓𑀧𑁆𑀧𑀫𑀢𑁆𑀣𑀓𑁂 𑀘𑀸𑀢𑀼𑀭𑀦𑁆𑀢𑁄 𑀘𑀢𑀼𑀫𑀳𑀸𑀤𑀻𑀧𑀯𑀦𑁆𑀢𑁄 𑀯𑀺𑀚𑀺𑀢𑀸𑀯𑀻 𑀲𑀩𑁆𑀩𑀁 𑀧𑀘𑁆𑀘𑀢𑁆𑀣𑀺𑀓𑀁 𑀯𑀺𑀚𑀺𑀢𑀯𑀦𑁆𑀢𑁄 𑀅𑀳𑀁 𑀉𑀩𑁆𑀩𑀺𑀤𑁆𑀥𑁄 𑀦𑀸𑀫 𑀘𑀓𑁆𑀓𑀯𑀢𑁆𑀢𑀻 𑀭𑀸𑀚𑀸 𑀳𑀼𑀢𑁆𑀯𑀸 𑀧𑀣𑀯𑀺𑀁 𑀆𑀯𑀲𑀺𑀁 𑀭𑀚𑁆𑀚𑀁 𑀓𑀸𑀭𑁂𑀲𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁪𑁧𑁨-𑁪. 𑀢𑀣𑁂𑀯 𑀪𑀤𑁆𑀤𑀓𑁂 𑀓𑀧𑁆𑀧𑁂𑀢𑀺 𑀧𑀜𑁆𑀘𑀩𑀼𑀤𑁆𑀥𑀧𑀝𑀺𑀫𑀡𑁆𑀟𑀺𑀢𑀢𑁆𑀢𑀸 𑀪𑀤𑁆𑀤𑀓𑁂 𑀦𑀸𑀫 𑀓𑀧𑁆𑀧𑁂. 𑀢𑀺𑀁𑀲𑀓𑁆𑀔𑀢𑁆𑀢𑀼𑀁 𑀢𑀺𑀁𑀲𑀚𑀸𑀢𑀺𑀬𑀸 𑀘𑀢𑀼𑀤𑀻𑀧𑀫𑁆𑀳𑀺 𑀇𑀲𑁆𑀲𑀭𑁄 𑀧𑀥𑀸𑀦𑁄 𑀘𑀓𑁆𑀓𑀭𑀢𑀦𑀸𑀤𑀻𑀳𑀺 𑀲𑀢𑁆𑀢𑀳𑀺 𑀭𑀢𑀦𑁂𑀳𑀺 𑀲𑀫𑁆𑀧𑀦𑁆𑀦𑁄 𑀲𑀫𑀗𑁆𑀕𑀻𑀪𑀽𑀢𑁄 𑀲𑀓𑀓𑀫𑁆𑀫𑀸𑀪𑀺𑀭𑀤𑁆𑀥𑁄 𑀅𑀢𑁆𑀢𑀦𑁄 𑀓𑀫𑁆𑀫𑁂 𑀤𑀲 𑀭𑀸𑀚𑀥𑀫𑁆𑀫𑁂 𑀅𑀪𑀺𑀭𑀤𑁆𑀥𑁄 𑀅𑀮𑁆𑀮𑀻𑀦𑁄 𑀘𑀓𑁆𑀓𑀯𑀢𑁆𑀢𑀻 𑀭𑀸𑀚𑀸 𑀅𑀫𑁆𑀳𑀻 𑀅𑀳𑁄𑀲𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀢𑁆𑀢𑀦𑁄 𑀘𑀓𑁆𑀓𑀯𑀢𑁆𑀢𑀺𑀓𑀸𑀮𑁂 𑀅𑀦𑀼𑀪𑀽𑀢𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀣𑀸𑀧𑀺 𑀪𑀯𑀦𑀁 𑀫𑀬𑁆𑀳’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀲𑁆𑀫𑀺𑀁 𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀫𑁆𑀳𑀺 𑀫𑀬𑁆𑀳𑀁 𑀪𑀯𑀦𑀁 𑀫𑀫 𑀧𑀸𑀲𑀸𑀤𑀁 𑀇𑀦𑁆𑀤𑀮𑀝𑁆𑀞𑀻𑀯 𑀉𑀕𑁆𑀕𑀢𑀁 𑀆𑀓𑀸𑀲𑁂 𑀞𑀺𑀢𑀯𑀺𑀚𑁆𑀚𑁄𑀢𑀫𑀸𑀦𑀸 𑀯𑀺𑀚𑁆𑀚𑀼𑀮𑁆𑀮𑀢𑀸 𑀇𑀯 𑀉𑀕𑁆𑀕𑀢𑀁 𑀲𑀢𑁆𑀢𑀪𑀽𑀫𑀺𑀓𑀸𑀤𑀺𑀪𑁂𑀤𑁂𑀳𑀺 𑀉𑀘𑁆𑀘𑀁 𑀆𑀬𑀸𑀫𑀢𑁄 𑀤𑀻𑀖𑀢𑁄 𑀘 𑀉𑀘𑁆𑀘𑀢𑁄 𑀘 𑀘𑀢𑀼𑀯𑀻𑀲𑀢𑀺𑀬𑁄𑀚𑀦𑀁 𑀯𑀺𑀢𑁆𑀣𑀸𑀭𑀢𑁄 𑀤𑁆𑀯𑀸𑀤𑀲𑀬𑁄𑀚𑀦𑀁 𑀅𑀳𑁄𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀩𑁆𑀩𑁂𑀲𑀁 𑀚𑀦𑀸𑀦𑀁 𑀫𑀦𑀁 𑀅𑀮𑁆𑀮𑀻𑀦𑀪𑀸𑀯𑁂𑀦 𑀭𑀫𑁆𑀫𑀡𑀁 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄. 𑀤𑀴𑁆𑀳𑁂𑀳𑀺 𑀤𑁆𑀯𑀸𑀤𑀲𑀳𑀢𑁆𑀣𑁂𑀳𑀺 𑀯𑀸 𑀢𑀺𑀁𑀲𑀳𑀢𑁆𑀣𑁂𑀳𑀺 𑀯𑀸 𑀉𑀘𑁆𑀘𑁂𑀳𑀺 𑀧𑀸𑀓𑀸𑀭𑀢𑁄𑀭𑀡𑁂𑀳𑀺 𑀲𑀫𑁆𑀧𑀦𑁆𑀦𑀦𑁆𑀢𑀺 𑀤𑀲𑁆𑀲𑁂𑀢𑀺.

𑁪𑁧𑁫-𑁨𑁦. 𑀢𑀤𑀟𑁆𑀠𑀓𑀁 𑀢𑀢𑁄 𑀅𑀟𑁆𑀠𑀓𑀁 𑀅𑀟𑁆𑀠𑀢𑀺𑀬𑀲𑀢𑀬𑁄𑀚𑀦𑀦𑁆𑀢𑀺 𑀅𑀢𑁆𑀣𑁄. 𑀧𑀓𑁆𑀔𑀺𑀢𑁆𑀢𑀸 𑀧𑀡𑁆𑀡𑀯𑀻𑀲𑀢𑀻𑀢𑀺 𑀯𑀻𑀲𑀢𑀺𑀆𑀧𑀡𑀧𑀓𑁆𑀔𑀺𑀢𑁆𑀢𑀁 𑀦𑀺𑀭𑀦𑁆𑀢𑀭𑀁 𑀯𑀻𑀣𑀺𑀧𑀭𑀺𑀘𑁆𑀙𑁂𑀤𑀦𑁆𑀢𑀺 𑀅𑀢𑁆𑀣𑁄. 𑀩𑁆𑀭𑀸𑀳𑁆𑀫𑀜𑁆𑀜𑀓𑀼𑀮𑀲𑀫𑁆𑀪𑀽𑀢𑁄𑀢𑀺 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀲𑀼𑀚𑀸𑀢𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀢𑁆𑀢𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.