𑀲𑀺𑀔𑀻 𑀩𑀼𑀤𑁆𑀥𑁄

𑀢𑀲𑁆𑀲 𑀅𑀧𑀭𑀪𑀸𑀕𑁂 𑀇𑀢𑁄 𑀏𑀓𑀢𑁆𑀢𑀺𑀁𑀲𑀓𑀧𑁆𑀧𑁂 𑀲𑀺𑀔𑀻 𑀘 𑀯𑁂𑀲𑁆𑀲𑀪𑀽𑀘𑀸𑀢𑀺 𑀤𑁆𑀯𑁂 𑀩𑀼𑀤𑁆𑀥𑀸 𑀅𑀳𑁂𑀲𑀼𑀁. 𑀲𑀺𑀔𑀺𑀲𑁆𑀲𑀸𑀧𑀺 𑀪𑀕𑀯𑀢𑁄 𑀢𑀬𑁄 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸. 𑀧𑀞𑀫𑀲𑀦𑁆𑀦𑀺𑀧𑀸𑀢𑁂 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀁 𑀅𑀳𑁄𑀲𑀺, 𑀤𑀼𑀢𑀺𑀬𑁂 𑀅𑀲𑀻𑀢𑀺𑀲𑀳𑀲𑁆𑀲𑀸𑀦𑀺, 𑀢𑀢𑀺𑀬𑁂 𑀲𑀢𑁆𑀢𑀢𑀺𑀲𑀳𑀲𑁆𑀲𑀸𑀦𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀅𑀭𑀺𑀦𑁆𑀤𑀫𑁄 𑀦𑀸𑀫 𑀭𑀸𑀚𑀸 𑀳𑀼𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑀘𑀻𑀯𑀭𑀁 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸 𑀲𑀢𑁆𑀢𑀭𑀢𑀦𑀧𑀝𑀺𑀫𑀡𑁆𑀟𑀺𑀢𑀁 𑀳𑀢𑁆𑀣𑀺𑀭𑀢𑀦𑀁 𑀤𑀢𑁆𑀯𑀸 𑀳𑀢𑁆𑀣𑀺𑀧𑁆𑀧𑀫𑀸𑀡𑀁 𑀓𑀢𑁆𑀯𑀸 𑀓𑀧𑁆𑀧𑀺𑀬𑀪𑀡𑁆𑀟𑀁 𑀅𑀤𑀸𑀲𑀺. 𑀲𑁄𑀧𑀺 𑀦𑀁 𑀲𑀢𑁆𑀣𑀸 ‘‘𑀇𑀢𑁄 𑀏𑀓𑀢𑁆𑀢𑀺𑀁𑀲𑀓𑀧𑁆𑀧𑁂 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀢𑀲𑁆𑀲 𑀧𑀦 𑀪𑀕𑀯𑀢𑁄 𑀅𑀭𑀼𑀡𑀯𑀢𑀻 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺, 𑀅𑀭𑀼𑀡𑁄 𑀦𑀸𑀫 𑀔𑀢𑁆𑀢𑀺𑀬𑁄 𑀧𑀺𑀢𑀸, 𑀧𑀪𑀸𑀯𑀢𑀻 𑀦𑀸𑀫 𑀫𑀸𑀢𑀸, 𑀅𑀪𑀺𑀪𑀽 𑀘 𑀲𑀫𑁆𑀪𑀯𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀔𑁂𑀫𑀗𑁆𑀓𑀭𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀲𑀔𑀺𑀮𑀸 𑀘 𑀧𑀤𑀼𑀫𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀧𑀼𑀡𑁆𑀟𑀭𑀻𑀓𑀭𑀼𑀓𑁆𑀔𑁄 𑀩𑁄𑀥𑀺, 𑀲𑀭𑀻𑀭𑀁 𑀲𑀢𑁆𑀢𑀢𑀺𑀳𑀢𑁆𑀣𑀼𑀩𑁆𑀩𑁂𑀥𑀁 𑀅𑀳𑁄𑀲𑀺, 𑀲𑀭𑀻𑀭𑀧𑁆𑀧𑀪𑀸 𑀬𑁄𑀚𑀦𑀢𑁆𑀢𑀬𑀁 𑀨𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀺, 𑀲𑀢𑁆𑀢𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀽𑀢𑀺.

‘‘𑀯𑀺𑀧𑀲𑁆𑀲𑀺𑀲𑁆𑀲 𑀅𑀧𑀭𑁂𑀦, 𑀲𑀫𑁆𑀩𑀼𑀤𑁆𑀥𑁄 𑀤𑁆𑀯𑀺𑀧𑀤𑀼𑀢𑁆𑀢𑀫𑁄;

𑀲𑀺𑀔𑀺𑀯𑁆𑀳𑀬𑁄 𑀆𑀲𑀺 𑀚𑀺𑀦𑁄, 𑀅𑀲𑀫𑁄 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄’’𑀢𑀺. (𑀩𑀼. 𑀯𑀁. 𑁨𑁨.𑁧);