𑁧𑁧. 𑀤𑀲𑀼𑀢𑁆𑀢𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁫𑁦. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀤𑀲𑀼𑀢𑁆𑀢𑀭𑀲𑀼𑀢𑁆𑀢𑀁. 𑀢𑀢𑁆𑀭𑀸𑀬𑀁 𑀅𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸 𑁋 𑀆𑀯𑀼𑀲𑁄 𑀪𑀺𑀓𑁆𑀔𑀯𑁂𑀢𑀺 𑀲𑀸𑀯𑀓𑀸𑀦𑀁 𑀆𑀮𑀧𑀦𑀫𑁂𑀢𑀁. 𑀩𑀼𑀤𑁆𑀥𑀸 𑀳𑀺 𑀧𑀭𑀺𑀲𑀁 𑀆𑀫𑀦𑁆𑀢𑀬𑀫𑀸𑀦𑀸 ‘𑀪𑀺𑀓𑁆𑀔𑀯𑁂’𑀢𑀺 𑀯𑀤𑀦𑁆𑀢𑀺. 𑀲𑀸𑀯𑀓𑀸 𑀲𑀢𑁆𑀣𑀸𑀭𑀁 𑀉𑀘𑁆𑀘𑀝𑁆𑀞𑀸𑀦𑁂 𑀞𑀧𑁂𑀲𑁆𑀲𑀸𑀫𑀸𑀢𑀺 𑀲𑀢𑁆𑀣𑀼 𑀆𑀮𑀧𑀦𑁂𑀦 𑀅𑀦𑀸𑀮𑀧𑀺𑀢𑁆𑀯𑀸 𑀆𑀯𑀼𑀲𑁄𑀢𑀺 𑀆𑀮𑀧𑀦𑁆𑀢𑀺. 𑀢𑁂 𑀪𑀺𑀓𑁆𑀔𑀽𑀢𑀺 𑀢𑁂 𑀥𑀫𑁆𑀫𑀲𑁂𑀦𑀸𑀧𑀢𑀺𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸 𑀪𑀺𑀓𑁆𑀔𑀽. 𑀓𑁂 𑀧𑀦 𑀢𑁂 𑀪𑀺𑀓𑁆𑀔𑀽𑀢𑀺? 𑀅𑀦𑀺𑀩𑀤𑁆𑀥𑀯𑀸𑀲𑀸 𑀤𑀺𑀲𑀸𑀕𑀫𑀦𑀻𑀬𑀸 𑀪𑀺𑀓𑁆𑀔𑀽. 𑀩𑀼𑀤𑁆𑀥𑀓𑀸𑀮𑁂 𑀤𑁆𑀯𑁂 𑀯𑀸𑀭𑁂 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺 𑁋 𑀉𑀧𑀓𑀝𑁆𑀞𑀯𑀲𑁆𑀲𑀽𑀧𑀦𑀸𑀬𑀺𑀓𑀓𑀸𑀮𑁂 𑀘 𑀧𑀯𑀸𑀭𑀡𑀓𑀸𑀮𑁂 𑀘. 𑀉𑀧𑀓𑀝𑁆𑀞𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀤𑀲𑀧𑀺 𑀯𑀻𑀲𑀢𑀺𑀧𑀺 𑀢𑀺𑀁𑀲𑀫𑁆𑀧𑀺 𑀘𑀢𑁆𑀢𑀸𑀮𑀻𑀲𑀫𑁆𑀧𑀺 𑀧𑀜𑁆𑀜𑀸𑀲𑀫𑁆𑀧𑀺 𑀪𑀺𑀓𑁆𑀔𑀽 𑀯𑀕𑁆𑀕𑀸 𑀯𑀕𑁆𑀕𑀸 𑀓𑀫𑁆𑀫𑀝𑁆𑀞𑀸𑀦𑀢𑁆𑀣𑀸𑀬 𑀆𑀕𑀘𑁆𑀙𑀦𑁆𑀢𑀺. 𑀪𑀕𑀯𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀢𑁆𑀯𑀸 𑀓𑀲𑁆𑀫𑀸, 𑀪𑀺𑀓𑁆𑀔𑀯𑁂, 𑀉𑀧𑀓𑀝𑁆𑀞𑀸𑀬 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀯𑀺𑀘𑀭𑀣𑀸𑀢𑀺 𑀧𑀼𑀘𑁆𑀙𑀢𑀺. 𑀅𑀣 𑀢𑁂 ‘‘𑀪𑀕𑀯𑀸 𑀓𑀫𑁆𑀫𑀝𑁆𑀞𑀸𑀦𑀢𑁆𑀣𑀁 𑀆𑀕𑀢𑀫𑁆𑀳, 𑀓𑀫𑁆𑀫𑀝𑁆𑀞𑀸𑀦𑀁 𑀦𑁄 𑀤𑁂𑀣𑀸’’𑀢𑀺 𑀬𑀸𑀘𑀦𑁆𑀢𑀺.

𑀲𑀢𑁆𑀣𑀸 𑀢𑁂𑀲𑀁 𑀘𑀭𑀺𑀬𑀯𑀲𑁂𑀦 𑀭𑀸𑀕𑀘𑀭𑀺𑀢𑀲𑁆𑀲 𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑀁 𑀤𑁂𑀢𑀺. 𑀤𑁄𑀲𑀘𑀭𑀺𑀢𑀲𑁆𑀲 𑀫𑁂𑀢𑁆𑀢𑀸𑀓𑀫𑁆𑀫𑀝𑁆𑀞𑀸𑀦𑀁, 𑀫𑁄𑀳𑀘𑀭𑀺𑀢𑀲𑁆𑀲 𑀉𑀤𑁆𑀤𑁂𑀲𑁄 𑀧𑀭𑀺𑀧𑀼𑀘𑁆𑀙𑀸 𑁋 ‘𑀓𑀸𑀮𑁂𑀦 𑀥𑀫𑁆𑀫𑀲𑁆𑀲𑀯𑀦𑀁, 𑀓𑀸𑀮𑁂𑀦 𑀥𑀫𑁆𑀫𑀲𑀸𑀓𑀘𑁆𑀙𑀸, 𑀇𑀤𑀁 𑀢𑀼𑀬𑁆𑀳𑀁 𑀲𑀧𑁆𑀧𑀸𑀬’𑀦𑁆𑀢𑀺 𑀆𑀘𑀺𑀓𑁆𑀔𑀢𑀺. 𑀯𑀺𑀢𑀓𑁆𑀓𑀘𑀭𑀺𑀢𑀲𑁆𑀲 𑀆𑀦𑀸𑀧𑀸𑀦𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀁 𑀤𑁂𑀢𑀺. 𑀲𑀤𑁆𑀥𑀸𑀘𑀭𑀺𑀢𑀲𑁆𑀲 𑀧𑀲𑀸𑀤𑀦𑀻𑀬𑀲𑀼𑀢𑁆𑀢𑀦𑁆𑀢𑁂 𑀩𑀼𑀤𑁆𑀥𑀲𑀼𑀩𑁄𑀥𑀺𑀁 𑀥𑀫𑁆𑀫𑀲𑀼𑀥𑀫𑁆𑀫𑀢𑀁 𑀲𑀗𑁆𑀖𑀲𑀼𑀧𑁆𑀧𑀝𑀺𑀧𑀢𑁆𑀢𑀺𑀜𑁆𑀘 𑀧𑀓𑀸𑀲𑁂𑀢𑀺. 𑀜𑀸𑀡𑀘𑀭𑀺𑀢𑀲𑁆𑀲 𑀅𑀦𑀺𑀘𑁆𑀘𑀢𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑁂 𑀕𑀫𑁆𑀪𑀻𑀭𑁂 𑀲𑀼𑀢𑁆𑀢𑀦𑁆𑀢𑁂 𑀓𑀣𑁂𑀢𑀺. 𑀢𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀲𑀘𑁂 𑀲𑀧𑁆𑀧𑀸𑀬𑀁 𑀳𑁄𑀢𑀺, 𑀢𑀢𑁆𑀣𑁂𑀯 𑀯𑀲𑀦𑁆𑀢𑀺. 𑀦𑁄 𑀘𑁂 𑀳𑁄𑀢𑀺, 𑀲𑀧𑁆𑀧𑀸𑀬𑀁 𑀲𑁂𑀦𑀸𑀲𑀦𑀁 𑀧𑀼𑀘𑁆𑀙𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀢𑁂 𑀢𑀢𑁆𑀣 𑀯𑀲𑀦𑁆𑀢𑀸 𑀢𑁂𑀫𑀸𑀲𑀺𑀓𑀁 𑀧𑀝𑀺𑀧𑀤𑀁 𑀕𑀳𑁂𑀢𑁆𑀯𑀸 𑀖𑀝𑁂𑀢𑁆𑀯𑀸 𑀯𑀸𑀬𑀫𑀦𑁆𑀢𑀸 𑀲𑁄𑀢𑀸𑀧𑀦𑁆𑀦𑀸𑀧𑀺 𑀳𑁄𑀦𑁆𑀢𑀺 𑀲𑀓𑀤𑀸𑀕𑀸𑀫𑀺𑀦𑁄𑀧𑀺 𑀅𑀦𑀸𑀕𑀸𑀫𑀺𑀦𑁄𑀧𑀺 𑀅𑀭𑀳𑀦𑁆𑀢𑁄𑀧𑀺.

𑀢𑀢𑁄 𑀯𑀼𑀢𑁆𑀣𑀯𑀲𑁆𑀲𑀸 𑀧𑀯𑀸𑀭𑁂𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀪𑀕𑀯𑀸 𑀅𑀳𑀁 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀢𑁄…𑀧𑁂… 𑀅𑀳𑀁 𑀅𑀕𑁆𑀕𑀨𑀮𑀁 𑀅𑀭𑀳𑀢𑁆𑀢’’𑀦𑁆𑀢𑀺 𑀧𑀝𑀺𑀮𑀤𑁆𑀥𑀕𑀼𑀡𑀁 𑀆𑀭𑁄𑀘𑁂𑀦𑁆𑀢𑀺. 𑀢𑀢𑁆𑀣 𑀇𑀫𑁂 𑀪𑀺𑀓𑁆𑀔𑀽 𑀉𑀧𑀓𑀝𑁆𑀞𑀸𑀬 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀆𑀕𑀢𑀸. 𑀏𑀯𑀁 𑀆𑀕𑀦𑁆𑀢𑁆𑀯𑀸 𑀕𑀘𑁆𑀙𑀦𑁆𑀢𑁂 𑀧𑀦 𑀪𑀺𑀓𑁆𑀔𑀽 𑀪𑀕𑀯𑀸 𑀅𑀕𑁆𑀕𑀲𑀸𑀯𑀓𑀸𑀦𑀁 𑀲𑀦𑁆𑀢𑀺𑀓𑀁 𑀧𑁂𑀲𑁂𑀢𑀺, 𑀬𑀣𑀸𑀳 ‘‘𑀅𑀧𑀮𑁄𑀓𑁂𑀣 𑀧𑀦, 𑀪𑀺𑀓𑁆𑀔𑀯𑁂, 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂’’𑀢𑀺. 𑀪𑀺𑀓𑁆𑀔𑀽 𑀘 𑀯𑀤𑀦𑁆𑀢𑀺 ‘‘𑀓𑀺𑀁 𑀦𑀼 𑀔𑁄 𑀫𑀬𑀁, 𑀪𑀦𑁆𑀢𑁂, 𑀅𑀧𑀮𑁄𑀓𑁂𑀫 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂’’𑀢𑀺 (𑀲𑀁. 𑀦𑀺. 𑁩.𑁨). 𑀅𑀣 𑀦𑁂 𑀪𑀕𑀯𑀸 𑀢𑁂𑀲𑀁 𑀤𑀲𑁆𑀲𑀦𑁂 𑀉𑀬𑁆𑀬𑁄𑀚𑁂𑀲𑀺. ‘‘𑀲𑁂𑀯𑀣, 𑀪𑀺𑀓𑁆𑀔𑀯𑁂, 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂; 𑀪𑀚𑀣, 𑀪𑀺𑀓𑁆𑀔𑀯𑁂, 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂. 𑀧𑀡𑁆𑀟𑀺𑀢𑀸 𑀪𑀺𑀓𑁆𑀔𑀽 𑀅𑀦𑀼𑀕𑁆𑀕𑀸𑀳𑀓𑀸 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀚𑀦𑁂𑀢𑀸 𑀏𑀯𑀁 𑀲𑀸𑀭𑀺𑀧𑀼𑀢𑁆𑀢𑁄. 𑀲𑁂𑀬𑁆𑀬𑀣𑀸𑀧𑀺 𑀚𑀸𑀢𑀲𑁆𑀲 𑀆𑀧𑀸𑀤𑁂𑀢𑀸 𑀏𑀯𑀁 𑀫𑁄𑀕𑁆𑀕𑀮𑁆𑀮𑀸𑀦𑁄. 𑀲𑀸𑀭𑀺𑀧𑀼𑀢𑁆𑀢𑁄, 𑀪𑀺𑀓𑁆𑀔𑀯𑁂, 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀯𑀺𑀦𑁂𑀢𑀺, 𑀫𑁄𑀕𑁆𑀕𑀮𑁆𑀮𑀸𑀦𑁄 𑀉𑀢𑁆𑀢𑀫𑀢𑁆𑀣𑁂’’𑀢𑀺 (𑀫. 𑀦𑀺. 𑁩.𑁩𑁭𑁧).

𑀢𑀤𑀸𑀧𑀺 𑀪𑀕𑀯𑀸 𑀇𑀫𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀆𑀲𑀬𑀁 𑀉𑀧𑀧𑀭𑀺𑀓𑁆𑀔𑀦𑁆𑀢𑁄 ‘‘𑀇𑀫𑁂 𑀪𑀺𑀓𑁆𑀔𑀽 𑀲𑀸𑀯𑀓𑀯𑀺𑀦𑁂𑀬𑁆𑀬𑀸’’𑀢𑀺 𑀅𑀤𑁆𑀤𑀲. 𑀲𑀸𑀯𑀓𑀯𑀺𑀦𑁂𑀬𑁆𑀬𑀸 𑀦𑀸𑀫 𑀬𑁂 𑀩𑀼𑀤𑁆𑀥𑀸𑀦𑀫𑁆𑀧𑀺 𑀥𑀫𑁆𑀫𑀤𑁂𑀲𑀦𑀸𑀬 𑀩𑀼𑀚𑁆𑀛𑀦𑁆𑀢𑀺 𑀲𑀸𑀯𑀓𑀸𑀦𑀫𑁆𑀧𑀺. 𑀩𑀼𑀤𑁆𑀥𑀯𑀺𑀦𑁂𑀬𑁆𑀬𑀸 𑀧𑀦 𑀲𑀸𑀯𑀓𑀸 𑀩𑁄𑀥𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀲𑀸𑀯𑀓𑀯𑀺𑀦𑁂𑀬𑁆𑀬𑀪𑀸𑀯𑀁 𑀧𑀦 𑀏𑀢𑁂𑀲𑀁 𑀜𑀢𑁆𑀯𑀸 𑀓𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑁂𑀲𑀦𑀸𑀬 𑀩𑀼𑀚𑁆𑀛𑀺𑀲𑁆𑀲𑀦𑁆𑀢𑀻𑀢𑀺 𑀑𑀮𑁄𑀓𑁂𑀦𑁆𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲𑀸𑀢𑀺 𑀤𑀺𑀲𑁆𑀯𑀸 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀧𑁂𑀲𑁂𑀲𑀺. 𑀣𑁂𑀭𑁄 𑀢𑁂 𑀪𑀺𑀓𑁆𑀔𑀽 𑀧𑀼𑀘𑁆𑀙𑀺 ‘‘𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀢𑀢𑁆𑀣 𑀆𑀯𑀼𑀲𑁄’’𑀢𑀺. ‘‘𑀆𑀫, 𑀕𑀢𑀫𑁆𑀳 𑀲𑀢𑁆𑀣𑀸𑀭𑀸 𑀧𑀦 𑀅𑀫𑁆𑀳𑁂 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀁 𑀧𑁂𑀲𑀺𑀢𑀸’’𑀢𑀺. 𑀢𑀢𑁄 𑀣𑁂𑀭𑁄 ‘‘𑀇𑀫𑁂 𑀪𑀺𑀓𑁆𑀔𑀽 𑀫𑀬𑁆𑀳𑀁 𑀤𑁂𑀲𑀦𑀸𑀬 𑀩𑀼𑀚𑁆𑀛𑀺𑀲𑁆𑀲𑀦𑁆𑀢𑀺, 𑀓𑀻𑀤𑀺𑀲𑀻 𑀦𑀼 𑀔𑁄 𑀢𑁂𑀲𑀁 𑀤𑁂𑀲𑀦𑀸 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 ‘‘𑀇𑀫𑁂 𑀪𑀺𑀓𑁆𑀔𑀽 𑀲𑀫𑀕𑁆𑀕𑀸𑀭𑀸𑀫𑀸, 𑀲𑀸𑀫𑀕𑁆𑀕𑀺𑀭𑀲𑀲𑁆𑀲 𑀤𑀻𑀧𑀺𑀓𑀸 𑀦𑁂𑀲𑀁 𑀤𑁂𑀲𑀦𑀸 𑀯𑀝𑁆𑀝𑀢𑀻’’𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀢𑀣𑀸𑀭𑀽𑀧𑀁 𑀤𑁂𑀲𑀦𑀁 𑀤𑁂𑀲𑁂𑀢𑀼𑀓𑀸𑀫𑁄 𑀤𑀲𑀼𑀢𑁆𑀢𑀭𑀁 𑀧𑀯𑀓𑁆𑀔𑀸𑀫𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀤𑀲𑀥𑀸 𑀫𑀸𑀢𑀺𑀓𑀁 𑀞𑀧𑁂𑀢𑁆𑀯𑀸 𑀯𑀺𑀪𑀢𑁆𑀢𑁄𑀢𑀺 𑀤𑀲𑀼𑀢𑁆𑀢𑀭𑁄, 𑀏𑀓𑀓𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀤𑀲𑀓𑀸 𑀕𑀢𑁄𑀢𑀺𑀧𑀺 𑀤𑀲𑀼𑀢𑁆𑀢𑀭𑁄, 𑀏𑀓𑁂𑀓𑀲𑁆𑀫𑀺𑀁 𑀧𑀩𑁆𑀩𑁂 𑀤𑀲 𑀤𑀲 𑀧𑀜𑁆𑀳𑀸 𑀯𑀺𑀲𑁂𑀲𑀺𑀢𑀸𑀢𑀺𑀧𑀺 𑀤𑀲𑀼𑀢𑁆𑀢𑀭𑁄, 𑀢𑀁 𑀤𑀲𑀼𑀢𑁆𑀢𑀭𑀁. 𑀧𑀯𑀓𑁆𑀔𑀸𑀫𑀻𑀢𑀺 𑀓𑀣𑁂𑀲𑁆𑀲𑀸𑀫𑀺. 𑀥𑀫𑁆𑀫𑀦𑁆𑀢𑀺 𑀲𑀼𑀢𑁆𑀢𑀁. 𑀦𑀺𑀩𑁆𑀩𑀸𑀦𑀧𑀢𑁆𑀢𑀺𑀬𑀸𑀢𑀺 𑀦𑀺𑀩𑁆𑀩𑀸𑀦𑀧𑀝𑀺𑀮𑀸𑀪𑀢𑁆𑀣𑀸𑀬. 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀺𑀭𑀺𑀬𑀸𑀬𑀸𑀢𑀺 𑀲𑀓𑀮𑀲𑁆𑀲 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀧𑀭𑀺𑀬𑀦𑁆𑀢𑀓𑀭𑀡𑀢𑁆𑀣𑀁. 𑀲𑀩𑁆𑀩𑀕𑀦𑁆𑀣𑀧𑁆𑀧𑀫𑁄𑀘𑀦𑀦𑁆𑀢𑀺 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑀸𑀤𑀻𑀦𑀁 𑀲𑀩𑁆𑀩𑀕𑀦𑁆𑀣𑀸𑀦𑀁 𑀧𑀫𑁄𑀘𑀦𑀁.

𑀇𑀢𑀺 𑀣𑁂𑀭𑁄 𑀤𑁂𑀲𑀦𑀁 𑀉𑀘𑁆𑀘𑀁 𑀓𑀭𑁄𑀦𑁆𑀢𑁄 𑀪𑀺𑀓𑁆𑀔𑀽𑀦𑀁 𑀢𑀢𑁆𑀣 𑀧𑁂𑀫𑀁 𑀚𑀦𑁂𑀦𑁆𑀢𑁄 𑀏𑀯𑀫𑁂𑀢𑀁 𑀉𑀕𑁆𑀕𑀳𑁂𑀢𑀩𑁆𑀩𑀁 𑀧𑀭𑀺𑀬𑀸𑀧𑀼𑀡𑀺𑀢𑀩𑁆𑀩𑀁 𑀥𑀸𑀭𑁂𑀢𑀩𑁆𑀩𑀁 𑀯𑀸𑀘𑁂𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀦𑁆𑀢𑀻𑀢𑀺 𑀘𑀢𑀽𑀳𑀺 𑀧𑀤𑁂𑀳𑀺 𑀯𑀡𑁆𑀡𑀁 𑀓𑀣𑁂𑀲𑀺, ‘‘𑀏𑀓𑀸𑀬𑀦𑁄 𑀅𑀬𑀁, 𑀪𑀺𑀓𑁆𑀔𑀯𑁂, 𑀫𑀕𑁆𑀕𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀢𑁂𑀲𑀁 𑀢𑁂𑀲𑀁 𑀲𑀼𑀢𑁆𑀢𑀸𑀦𑀁 𑀪𑀕𑀯𑀸 𑀯𑀺𑀬.

𑀏𑀓𑀥𑀫𑁆𑀫𑀯𑀡𑁆𑀡𑀦𑀸

𑁩𑁫𑁧. (𑀓) 𑀢𑀢𑁆𑀣 𑀩𑀳𑀼𑀓𑀸𑀭𑁄𑀢𑀺 𑀩𑀳𑀽𑀧𑀓𑀸𑀭𑁄.

(𑀔) 𑀪𑀸𑀯𑁂𑀢𑀩𑁆𑀩𑁄𑀢𑀺 𑀯𑀟𑁆𑀠𑁂𑀢𑀩𑁆𑀩𑁄.

(𑀕) 𑀧𑀭𑀺𑀜𑁆𑀜𑁂𑀬𑁆𑀬𑁄𑀢𑀺 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺 𑀧𑀭𑀺𑀚𑀸𑀦𑀺𑀢𑀩𑁆𑀩𑁄.

(𑀖) 𑀧𑀳𑀸𑀢𑀩𑁆𑀩𑁄𑀢𑀺 𑀧𑀳𑀸𑀦𑀸𑀦𑀼𑀧𑀲𑁆𑀲𑀦𑀸𑀬 𑀧𑀚𑀳𑀺𑀢𑀩𑁆𑀩𑁄.

(𑀗) 𑀳𑀸𑀦𑀪𑀸𑀕𑀺𑀬𑁄𑀢𑀺 𑀅𑀧𑀸𑀬𑀕𑀸𑀫𑀺𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑀓𑁄.

(𑀘) 𑀯𑀺𑀲𑁂𑀲𑀪𑀸𑀕𑀺𑀬𑁄𑀢𑀺 𑀯𑀺𑀲𑁂𑀲𑀕𑀸𑀫𑀺𑀯𑀺𑀲𑁂𑀲𑀸𑀬 𑀲𑀁𑀯𑀢𑁆𑀢𑀦𑀓𑁄.

(𑀙) 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑁄𑀢𑀺 𑀤𑀼𑀧𑁆𑀧𑀘𑁆𑀘𑀓𑁆𑀔𑀓𑀭𑁄.

(𑀚) 𑀉𑀧𑁆𑀧𑀸𑀤𑁂𑀢𑀩𑁆𑀩𑁄𑀢𑀺 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑁄.

(𑀛) 𑀅𑀪𑀺𑀜𑁆𑀜𑁂𑀬𑁆𑀬𑁄𑀢𑀺 𑀜𑀸𑀢𑀧𑀭𑀺𑀜𑁆𑀜𑀸𑀬 𑀅𑀪𑀺𑀚𑀸𑀦𑀺𑀢𑀩𑁆𑀩𑁄.

(𑀜) 𑀲𑀘𑁆𑀙𑀺𑀓𑀸𑀢𑀩𑁆𑀩𑁄𑀢𑀺 𑀧𑀘𑁆𑀘𑀓𑁆𑀔𑀁 𑀓𑀸𑀢𑀩𑁆𑀩𑁄.

𑀏𑀯𑀁 𑀲𑀩𑁆𑀩𑀢𑁆𑀣 𑀫𑀸𑀢𑀺𑀓𑀸𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀢𑀺 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀬𑀣𑀸 𑀦𑀸𑀫 𑀤𑀓𑁆𑀔𑁄 𑀯𑁂𑀴𑀼𑀓𑀸𑀭𑁄 𑀲𑀫𑁆𑀫𑀼𑀔𑀻𑀪𑀽𑀢𑀁 𑀯𑁂𑀴𑀼𑀁 𑀙𑁂𑀢𑁆𑀯𑀸 𑀦𑀺𑀕𑁆𑀕𑀡𑁆𑀞𑀺𑀁 𑀓𑀢𑁆𑀯𑀸 𑀤𑀲𑀥𑀸 𑀔𑀡𑁆𑀟𑁂 𑀓𑀢𑁆𑀯𑀸 𑀏𑀓𑀫𑁂𑀓𑀁 𑀔𑀡𑁆𑀟𑀁 𑀳𑀻𑀭𑀁 𑀳𑀻𑀭𑀁 𑀓𑀭𑁄𑀦𑁆𑀢𑁄 𑀨𑀸𑀮𑁂𑀢𑀺, 𑀏𑀯𑀫𑁂𑀯 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀲𑀧𑁆𑀧𑀸𑀬𑀁 𑀤𑁂𑀲𑀦𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀤𑀲𑀥𑀸 𑀫𑀸𑀢𑀺𑀓𑀁 𑀞𑀧𑁂𑀢𑁆𑀯𑀸 𑀏𑀓𑁂𑀓𑀓𑁄𑀝𑁆𑀞𑀸𑀲𑁂 𑀏𑀓𑁂𑀓𑀧𑀤𑀁 𑀯𑀺𑀪𑀚𑀦𑁆𑀢𑁄 ‘‘𑀓𑀢𑀫𑁄 𑀏𑀓𑁄 𑀥𑀫𑁆𑀫𑁄 𑀩𑀳𑀼𑀓𑀸𑀭𑁄, 𑀅𑀧𑁆𑀧𑀫𑀸𑀤𑁄 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽𑀢𑀺’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀤𑁂𑀲𑀦𑀁 𑀯𑀺𑀢𑁆𑀣𑀸𑀭𑁂𑀢𑀼𑀁 𑀆𑀭𑀤𑁆𑀥𑁄.

𑀢𑀢𑁆𑀣 𑀅𑀧𑁆𑀧𑀫𑀸𑀤𑁄 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀲𑀩𑁆𑀩𑀢𑁆𑀣𑀓𑀁 𑀉𑀧𑀓𑀸𑀭𑀓𑀁 𑀅𑀧𑁆𑀧𑀫𑀸𑀤𑀁 𑀓𑀣𑁂𑀲𑀺. 𑀅𑀬𑀜𑁆𑀳𑀺 𑀅𑀧𑁆𑀧𑀫𑀸𑀤𑁄 𑀦𑀸𑀫 𑀲𑀻𑀮𑀧𑀽𑀭𑀡𑁂, 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁂, 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸𑀬, 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑁂, 𑀲𑀢𑁆𑀢𑀲𑀼 𑀲𑀤𑁆𑀥𑀫𑁆𑀫𑁂𑀲𑀼, 𑀯𑀺𑀧𑀲𑁆𑀲𑀦𑀸𑀕𑀩𑁆𑀪𑀁 𑀕𑀡𑁆𑀳𑀸𑀧𑀦𑁂, 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀤𑀻𑀲𑀼, 𑀲𑀻𑀮𑀓𑁆𑀔𑀦𑁆𑀥𑀸𑀤𑀺𑀧𑀜𑁆𑀘𑀥𑀫𑁆𑀫𑀓𑁆𑀔𑀦𑁆𑀥𑁂𑀲𑀼, 𑀞𑀸𑀦𑀸𑀝𑁆𑀞𑀸𑀦𑁂𑀲𑀼, 𑀫𑀳𑀸𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑀁, 𑀅𑀭𑀺𑀬𑀲𑀘𑁆𑀘𑁂𑀲𑀼, 𑀲𑀢𑀺𑀧𑀝𑁆𑀞𑀸𑀦𑀸𑀤𑀻𑀲𑀼, 𑀩𑁄𑀥𑀺𑀧𑀓𑁆𑀔𑀺𑀬𑁂𑀲𑀼, 𑀯𑀺𑀧𑀲𑁆𑀲𑀦𑀸𑀜𑀸𑀡𑀸𑀤𑀻𑀲𑀼 𑀅𑀝𑁆𑀞𑀲𑀼 𑀯𑀺𑀚𑁆𑀚𑀸𑀲𑀽𑀢𑀺 𑀲𑀩𑁆𑀩𑁂𑀲𑀼 𑀅𑀦𑀯𑀚𑁆𑀚𑀝𑁆𑀞𑁂𑀦 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀩𑀳𑀽𑀧𑀓𑀸𑀭𑁄.

𑀢𑁂𑀦𑁂𑀯 𑀦𑀁 𑀪𑀕𑀯𑀸 ‘‘𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀅𑀧𑀤𑀸 𑀯𑀸…𑀧𑁂… 𑀢𑀣𑀸𑀕𑀢𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑁂 𑀓𑁂𑀘𑀺 𑀓𑀼𑀲𑀮𑀸 𑀥𑀫𑁆𑀫𑀸, 𑀲𑀩𑁆𑀩𑁂𑀢𑁂 𑀅𑀧𑁆𑀧𑀫𑀸𑀤𑀫𑀽𑀮𑀓𑀸 𑀅𑀧𑁆𑀧𑀫𑀸𑀤𑀲𑀫𑁄𑀲𑀭𑀡𑀸, 𑀅𑀧𑁆𑀧𑀫𑀸𑀤𑁄 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀻’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁫.𑁧𑁩𑁯) 𑀦𑀬𑁂𑀦 𑀳𑀢𑁆𑀣𑀺𑀧𑀤𑀸𑀤𑀻𑀳𑀺 𑀑𑀧𑀫𑁆𑀫𑁂𑀳𑀺 𑀑𑀧𑀫𑁂𑀦𑁆𑀢𑁄 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁂 𑀅𑀧𑁆𑀧𑀫𑀸𑀤𑀯𑀕𑁆𑀕𑁂 𑀦𑀸𑀦𑀧𑁆𑀧𑀓𑀸𑀭𑀁 𑀣𑁄𑀫𑁂𑀢𑀺. 𑀢𑀁 𑀲𑀩𑁆𑀩𑀁 𑀏𑀓𑀧𑀤𑁂𑀦𑁂𑀯 𑀲𑀗𑁆𑀕𑀳𑁂𑀢𑁆𑀯𑀸 𑀣𑁂𑀭𑁄 𑀅𑀧𑁆𑀧𑀫𑀸𑀤𑁄 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀆𑀳. 𑀥𑀫𑁆𑀫𑀧𑀤𑁂 𑀅𑀧𑁆𑀧𑀫𑀸𑀤𑀯𑀕𑁆𑀕𑁂𑀦𑀸𑀧𑀺𑀲𑁆𑀲 𑀩𑀳𑀽𑀧𑀓𑀸𑀭𑀢𑀸 𑀤𑀻𑀧𑁂𑀢𑀩𑁆𑀩𑀸. 𑀅𑀲𑁄𑀓𑀯𑀢𑁆𑀣𑀼𑀦𑀸𑀧𑀺 𑀤𑀻𑀧𑁂𑀢𑀩𑁆𑀩𑀸 𑁋

(𑀓) 𑀅𑀲𑁄𑀓𑀭𑀸𑀚𑀸 𑀳𑀺 𑀦𑀺𑀕𑁆𑀭𑁄𑀥𑀲𑀸𑀫𑀡𑁂𑀭𑀲𑁆𑀲 ‘‘𑀅𑀧𑁆𑀧𑀫𑀸𑀤𑁄 𑀅𑀫𑀢𑀧𑀤’’𑀦𑁆𑀢𑀺 𑀕𑀸𑀣𑀁 𑀲𑀼𑀢𑁆𑀯𑀸 𑀏𑀯 ‘‘𑀢𑀺𑀝𑁆𑀞, 𑀢𑀸𑀢, 𑀫𑀬𑁆𑀳𑀁 𑀢𑀬𑀸 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁 𑀓𑀣𑀺𑀢’’𑀦𑁆𑀢𑀺 𑀲𑀸𑀫𑀡𑁂𑀭𑁂 𑀧𑀲𑀻𑀤𑀺𑀢𑁆𑀯𑀸 𑀘𑀢𑀼𑀭𑀸𑀲𑀻𑀢𑀺𑀯𑀺𑀳𑀸𑀭𑀲𑀳𑀲𑁆𑀲𑀸𑀦𑀺 𑀓𑀸𑀭𑁂𑀲𑀺. 𑀇𑀢𑀺 𑀣𑀸𑀫𑀲𑀫𑁆𑀧𑀦𑁆𑀦𑁂𑀦 𑀪𑀺𑀓𑁆𑀔𑀼𑀦𑀸 𑀅𑀧𑁆𑀧𑀫𑀸𑀤𑀲𑁆𑀲 𑀩𑀳𑀽𑀧𑀓𑀸𑀭𑀢𑀸 𑀢𑀻𑀳𑀺 𑀧𑀺𑀝𑀓𑁂𑀳𑀺 𑀤𑀻𑀧𑁂𑀢𑁆𑀯𑀸 𑀓𑀣𑁂𑀢𑀩𑁆𑀩𑀸. 𑀬𑀁𑀓𑀺𑀜𑁆𑀘𑀺 𑀲𑀼𑀢𑁆𑀢𑀁 𑀯𑀸 𑀕𑀸𑀣𑀁 𑀯𑀸 𑀅𑀧𑁆𑀧𑀫𑀸𑀤𑀤𑀻𑀧𑀦𑀢𑁆𑀣𑀁 𑀆𑀳𑀭𑀦𑁆𑀢𑁄 ‘‘𑀅𑀝𑁆𑀞𑀸𑀦𑁂 𑀞𑀢𑁆𑀯𑀸 𑀆𑀳𑀭𑀲𑀺, 𑀅𑀢𑀺𑀢𑁆𑀣𑁂𑀦 𑀧𑀓𑁆𑀔𑀦𑁆𑀤𑁄’’𑀢𑀺 𑀦 𑀯𑀢𑁆𑀢𑀩𑁆𑀩𑁄. 𑀥𑀫𑁆𑀫𑀓𑀣𑀺𑀓𑀲𑁆𑀲𑁂𑀯𑁂𑀢𑁆𑀣 𑀣𑀸𑀫𑁄 𑀘 𑀩𑀮𑀜𑁆𑀘 𑀧𑀫𑀸𑀡𑀁.

(𑀔) 𑀓𑀸𑀬𑀕𑀢𑀸𑀲𑀢𑀻𑀢𑀺 𑀆𑀦𑀸𑀧𑀸𑀦𑀁 𑀘𑀢𑀼𑀇𑀭𑀺𑀬𑀸𑀧𑀣𑁄 𑀲𑀢𑀺𑀲𑀫𑁆𑀧𑀚𑀜𑁆𑀜𑀁 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑁄 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀁 𑀤𑀲 𑀅𑀲𑀼𑀪𑀸 𑀦𑀯 𑀲𑀺𑀯𑀣𑀺𑀓𑀸 𑀘𑀼𑀡𑁆𑀡𑀺𑀓𑀫𑀦𑀲𑀺𑀓𑀸𑀭𑁄 𑀓𑁂𑀲𑀸𑀤𑀻𑀲𑀼 𑀘𑀢𑁆𑀢𑀸𑀭𑀺 𑀭𑀽𑀧𑀚𑁆𑀛𑀸𑀦𑀸𑀦𑀻𑀢𑀺 𑀏𑀢𑁆𑀣 𑀉𑀧𑁆𑀧𑀦𑁆𑀦𑀲𑀢𑀺𑀬𑀸 𑀏𑀢𑀁 𑀅𑀥𑀺𑀯𑀘𑀦𑀁. 𑀲𑀸𑀢𑀲𑀳𑀕𑀢𑀸𑀢𑀺 𑀞𑀧𑁂𑀢𑁆𑀯𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀅𑀜𑁆𑀜𑀢𑁆𑀣 𑀲𑀸𑀢𑀲𑀳𑀕𑀢𑀸 𑀳𑁄𑀢𑀺 𑀲𑀼𑀔𑀲𑀫𑁆𑀧𑀬𑀼𑀢𑁆𑀢𑀸, 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁.

(𑀕) 𑀲𑀸𑀲𑀯𑁄 𑀉𑀧𑀸𑀤𑀸𑀦𑀺𑀬𑁄𑀢𑀺 𑀆𑀲𑀯𑀸𑀦𑀜𑁆𑀘𑁂𑀯 𑀉𑀧𑀸𑀤𑀸𑀦𑀸𑀦𑀜𑁆𑀘 𑀧𑀘𑁆𑀘𑀬𑀪𑀽𑀢𑁄. 𑀇𑀢𑀺 𑀢𑁂𑀪𑀽𑀫𑀓𑀥𑀫𑁆𑀫𑀫𑁂𑀯 𑀦𑀺𑀬𑀫𑁂𑀢𑀺.

(𑀖) 𑀅𑀲𑁆𑀫𑀺𑀫𑀸𑀦𑁄𑀢𑀺 𑀭𑀽𑀧𑀸𑀤𑀻𑀲𑀼 𑀅𑀲𑁆𑀫𑀻𑀢𑀺 𑀫𑀸𑀦𑁄.

(𑀗) 𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄𑀢𑀺 𑀅𑀦𑀺𑀘𑁆𑀘𑁂 𑀦𑀺𑀘𑁆𑀘𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀯𑀢𑁆𑀢𑁄 𑀉𑀧𑁆𑀧𑀣𑀫𑀦𑀲𑀺𑀓𑀸𑀭𑁄.

(𑀘) 𑀯𑀺𑀧𑀭𑀺𑀬𑀸𑀬𑁂𑀦 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄 𑀯𑁂𑀤𑀺𑀢𑀩𑁆𑀩𑁄.

(𑀙) 𑀆𑀦𑀦𑁆𑀢𑀭𑀺𑀓𑁄 𑀘𑁂𑀢𑁄𑀲𑀫𑀸𑀥𑀻𑀢𑀺 𑀅𑀜𑁆𑀜𑀢𑁆𑀣 𑀫𑀕𑁆𑀕𑀸𑀦𑀦𑁆𑀢𑀭𑀁 𑀨𑀮𑀁 𑀆𑀦𑀦𑁆𑀢𑀭𑀺𑀓𑁄 𑀘𑁂𑀢𑁄𑀲𑀫𑀸𑀥𑀺 𑀦𑀸𑀫. 𑀇𑀥 𑀧𑀦 𑀯𑀺𑀧𑀲𑁆𑀲𑀦𑀸𑀦𑀦𑁆𑀢𑀭𑁄 𑀫𑀕𑁆𑀕𑁄 𑀯𑀺𑀧𑀲𑁆𑀲𑀦𑀸𑀬 𑀯𑀸 𑀅𑀦𑀦𑁆𑀢𑀭𑀢𑁆𑀢𑀸 𑀅𑀢𑁆𑀢𑀦𑁄 𑀯𑀸 𑀅𑀦𑀦𑁆𑀢𑀭𑀁 𑀨𑀮𑀤𑀸𑀬𑀓𑀢𑁆𑀢𑀸 𑀆𑀦𑀦𑁆𑀢𑀭𑀺𑀓𑁄 𑀘𑁂𑀢𑁄𑀲𑀫𑀸𑀥𑀻𑀢𑀺 𑀅𑀥𑀺𑀧𑁆𑀧𑁂𑀢𑁄.

(𑀚) 𑀅𑀓𑀼𑀧𑁆𑀧𑀁 𑀜𑀸𑀡𑀦𑁆𑀢𑀺 𑀅𑀜𑁆𑀜𑀢𑁆𑀣 𑀨𑀮𑀧𑀜𑁆𑀜𑀸 𑀅𑀓𑀼𑀧𑁆𑀧𑀜𑀸𑀡𑀁 𑀦𑀸𑀫. 𑀇𑀥 𑀧𑀘𑁆𑀘𑀯𑁂𑀓𑁆𑀔𑀡𑀧𑀜𑁆𑀜𑀸 𑀅𑀥𑀺𑀧𑁆𑀧𑁂𑀢𑀸.

(𑀛) 𑀆𑀳𑀸𑀭𑀝𑁆𑀞𑀺𑀢𑀺𑀓𑀸𑀢𑀺 𑀧𑀘𑁆𑀘𑀬𑀝𑁆𑀞𑀺𑀢𑀺𑀓𑀸. 𑀅𑀬𑀁 𑀏𑀓𑁄 𑀥𑀫𑁆𑀫𑁄𑀢𑀺 𑀬𑁂𑀦 𑀧𑀘𑁆𑀘𑀬𑁂𑀦 𑀢𑀺𑀝𑁆𑀞𑀦𑁆𑀢𑀺, 𑀅𑀬𑀁 𑀏𑀓𑁄 𑀥𑀫𑁆𑀫𑁄 𑀜𑀸𑀢𑀧𑀭𑀺𑀜𑁆𑀜𑀸𑀬 𑀅𑀪𑀺𑀜𑁆𑀜𑁂𑀬𑁆𑀬𑁄.

(𑀜) 𑀅𑀓𑀼𑀧𑁆𑀧𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀻𑀢𑀺 𑀅𑀭𑀳𑀢𑁆𑀢𑀨𑀮𑀯𑀺𑀫𑀼𑀢𑁆𑀢𑀺.

𑀇𑀫𑀲𑁆𑀫𑀺𑀁 𑀯𑀸𑀭𑁂 𑀅𑀪𑀺𑀜𑁆𑀜𑀸𑀬 𑀜𑀸𑀢𑀧𑀭𑀺𑀜𑁆𑀜𑀸 𑀓𑀣𑀺𑀢𑀸. 𑀧𑀭𑀺𑀜𑁆𑀜𑀸𑀬 𑀢𑀻𑀭𑀡𑀧𑀭𑀺𑀜𑁆𑀜𑀸. 𑀧𑀳𑀸𑀢𑀩𑁆𑀩𑀲𑀘𑁆𑀙𑀺𑀓𑀸𑀢𑀩𑁆𑀩𑁂𑀳𑀺 𑀧𑀳𑀸𑀦𑀧𑀭𑀺𑀜𑁆𑀜𑀸. 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑁄𑀢𑀺 𑀏𑀢𑁆𑀣 𑀧𑀦 𑀫𑀕𑁆𑀕𑁄 𑀓𑀣𑀺𑀢𑁄. 𑀲𑀘𑁆𑀙𑀺𑀓𑀸𑀢𑀩𑁆𑀩𑁄𑀢𑀺 𑀨𑀮𑀁 𑀓𑀣𑀺𑀢𑀁, 𑀫𑀕𑁆𑀕𑁄 𑀏𑀓𑀲𑁆𑀫𑀺𑀁𑀬𑁂𑀯 𑀧𑀤𑁂 𑀮𑀩𑁆𑀪𑀢𑀺. 𑀨𑀮𑀁 𑀧𑀦 𑀅𑀦𑁂𑀓𑁂𑀲𑀼𑀧𑀺 𑀮𑀩𑁆𑀪𑀢𑀺𑀬𑁂𑀯.

𑀪𑀽𑀢𑀸𑀢𑀺 𑀲𑀪𑀸𑀯𑀢𑁄 𑀯𑀺𑀚𑁆𑀚𑀫𑀸𑀦𑀸. 𑀢𑀘𑁆𑀙𑀸𑀢𑀺 𑀬𑀸𑀣𑀸𑀯𑀸. 𑀢𑀣𑀸𑀢𑀺 𑀬𑀣𑀸 𑀯𑀼𑀢𑁆𑀢𑀸 𑀢𑀣𑀸𑀲𑀪𑀸𑀯𑀸. 𑀅𑀯𑀺𑀢𑀣𑀸𑀢𑀺 𑀬𑀣𑀸 𑀯𑀼𑀢𑁆𑀢𑀸 𑀦 𑀢𑀣𑀸 𑀦 𑀳𑁄𑀦𑁆𑀢𑀺. 𑀅𑀦𑀜𑁆𑀜𑀣𑀸𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀢𑁄 𑀦 𑀅𑀜𑁆𑀜𑀣𑀸. 𑀲𑀫𑁆𑀫𑀸 𑀢𑀣𑀸𑀕𑀢𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑀸𑀢𑀺 𑀢𑀣𑀸𑀕𑀢𑁂𑀦 𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀳𑁂𑀢𑀼𑀦𑀸 𑀓𑀸𑀭𑀡𑁂𑀦 𑀲𑀬𑀫𑁂𑀯 𑀅𑀪𑀺𑀲𑀫𑁆𑀩𑀼𑀤𑁆𑀥𑀸 𑀜𑀸𑀢𑀸 𑀯𑀺𑀤𑀺𑀢𑀸 𑀲𑀘𑁆𑀙𑀺𑀓𑀢𑀸. 𑀇𑀫𑀺𑀦𑀸 𑀣𑁂𑀭𑁄 ‘‘𑀇𑀫𑁂 𑀥𑀫𑁆𑀫𑀸 𑀢𑀣𑀸𑀕𑀢𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑀸, 𑀅𑀳𑀁 𑀧𑀦 𑀢𑀼𑀫𑁆𑀳𑀸𑀓𑀁 𑀭𑀜𑁆𑀜𑁄 𑀮𑁂𑀔𑀯𑀸𑀘𑀓𑀲𑀤𑀺𑀲𑁄’’𑀢𑀺 𑀚𑀺𑀦𑀲𑀼𑀢𑁆𑀢𑀁 𑀤𑀲𑁆𑀲𑁂𑀦𑁆𑀢𑁄 𑀑𑀓𑀧𑁆𑀧𑀦𑀁 𑀚𑀦𑁂𑀲𑀺.

𑀏𑀓𑀥𑀫𑁆𑀫𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑁆𑀯𑁂𑀥𑀫𑁆𑀫𑀯𑀡𑁆𑀡𑀦𑀸

𑁩𑁫𑁨. (𑀓) 𑀇𑀫𑁂 𑀤𑁆𑀯𑁂 𑀥𑀫𑁆𑀫𑀸 𑀩𑀳𑀼𑀓𑀸𑀭𑀸𑀢𑀺 𑀇𑀫𑁂 𑀤𑁆𑀯𑁂 𑀲𑀢𑀺𑀲𑀫𑁆𑀧𑀚𑀜𑁆𑀜𑀸 𑀥𑀫𑁆𑀫𑀸 𑀲𑀻𑀮𑀧𑀽𑀭𑀡𑀸𑀤𑀻𑀲𑀼 𑀅𑀧𑁆𑀧𑀫𑀸𑀤𑁄 𑀯𑀺𑀬 𑀲𑀩𑁆𑀩𑀢𑁆𑀣 𑀉𑀧𑀓𑀸𑀭𑀓𑀸 𑀳𑀺𑀢𑀸𑀯𑀳𑀸.

(𑀔) 𑀲𑀫𑀣𑁄 𑀘 𑀯𑀺𑀧𑀲𑁆𑀲𑀦𑀸 𑀘𑀸𑀢𑀺 𑀇𑀫𑁂 𑀤𑁆𑀯𑁂 𑀲𑀗𑁆𑀕𑀻𑀢𑀺𑀲𑀼𑀢𑁆𑀢𑁂 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸 𑀓𑀣𑀺𑀢𑀸. 𑀇𑀫𑀲𑁆𑀫𑀺𑀁 𑀤𑀲𑀼𑀢𑁆𑀢𑀭𑀲𑀼𑀢𑁆𑀢𑁂 𑀧𑀼𑀩𑁆𑀩𑀪𑀸𑀕𑀸 𑀓𑀣𑀺𑀢𑀸.

(𑀙) 𑀲𑀢𑁆𑀢𑀸𑀦𑀁 𑀲𑀁𑀓𑀺𑀮𑁂𑀲𑀸𑀬 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀬𑀸𑀢𑀺 𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄 𑀳𑁂𑀢𑀼 𑀘𑁂𑀯 𑀧𑀘𑁆𑀘𑀬𑁄 𑀘 𑀲𑀢𑁆𑀢𑀸𑀦𑀁 𑀲𑀁𑀓𑀺𑀮𑁂𑀲𑀸𑀬, 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄 𑀯𑀺𑀲𑀼𑀤𑁆𑀥𑀺𑀬𑀸. 𑀢𑀣𑀸 𑀤𑁄𑀯𑀘𑀲𑁆𑀲𑀢𑀸 𑀧𑀸𑀧𑀫𑀺𑀢𑁆𑀢𑀢𑀸 𑀲𑀁𑀓𑀺𑀮𑁂𑀲𑀸𑀬; 𑀲𑁄𑀯𑀘𑀲𑁆𑀲𑀢𑀸 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸 𑀯𑀺𑀲𑀼𑀤𑁆𑀥𑀺𑀬𑀸. 𑀢𑀣𑀸 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺; 𑀢𑀻𑀡𑀺 𑀓𑀼𑀲𑀮𑀫𑀽𑀮𑀸𑀦𑀺. 𑀘𑀢𑁆𑀢𑀸𑀭𑁄 𑀬𑁄𑀕𑀸 𑀘𑀢𑁆𑀢𑀸𑀭𑁄 𑀯𑀺𑀲𑀁𑀬𑁄𑀕𑀸. 𑀧𑀜𑁆𑀘 𑀘𑁂𑀢𑁄𑀔𑀺𑀮𑀸 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺. 𑀙 𑀅𑀕𑀸𑀭𑀯𑀸 𑀙 𑀕𑀸𑀭𑀯𑀸. 𑀲𑀢𑁆𑀢 𑀅𑀲𑀤𑁆𑀥𑀫𑁆𑀫𑀸 𑀲𑀢𑁆𑀢 𑀲𑀤𑁆𑀥𑀫𑁆𑀫𑀸. 𑀅𑀝𑁆𑀞 𑀓𑀼𑀲𑀻𑀢𑀯𑀢𑁆𑀣𑀽𑀦𑀺 𑀅𑀝𑁆𑀞 𑀆𑀭𑀫𑁆𑀪𑀯𑀢𑁆𑀣𑀽𑀦𑀺. 𑀦𑀯 𑀆𑀖𑀸𑀢𑀯𑀢𑁆𑀣𑀽𑀦𑀺 𑀦𑀯 𑀆𑀖𑀸𑀢𑀧𑁆𑀧𑀝𑀺𑀯𑀺𑀦𑀬𑀸. 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑀸 𑀤𑀲 𑀓𑀼𑀲𑀮𑀓𑀫𑁆𑀫𑀧𑀣𑀸𑀢𑀺 𑀏𑀯𑀁 𑀧𑀪𑁂𑀤𑀸 𑀇𑀫𑁂 𑀤𑁆𑀯𑁂 𑀥𑀫𑁆𑀫𑀸 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

(𑀛) 𑀲𑀗𑁆𑀔𑀢𑀸 𑀥𑀸𑀢𑀽𑀢𑀺 𑀧𑀘𑁆𑀘𑀬𑁂𑀳𑀺 𑀓𑀢𑀸 𑀧𑀜𑁆𑀘𑀓𑁆𑀔𑀦𑁆𑀥𑀸. 𑀅𑀲𑀗𑁆𑀔𑀢𑀸 𑀥𑀸𑀢𑀽𑀢𑀺 𑀧𑀘𑁆𑀘𑀬𑁂𑀳𑀺 𑀅𑀓𑀢𑀁 𑀦𑀺𑀩𑁆𑀩𑀸𑀦𑀁.

(𑀜) 𑀯𑀺𑀚𑁆𑀚𑀸 𑀘 𑀯𑀺𑀫𑀼𑀢𑁆𑀢𑀺 𑀘𑀸𑀢𑀺 𑀏𑀢𑁆𑀣 𑀯𑀺𑀚𑁆𑀚𑀸𑀢𑀺 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸. 𑀯𑀺𑀫𑀼𑀢𑁆𑀢𑀻𑀢𑀺 𑀅𑀭𑀳𑀢𑁆𑀢𑀨𑀮𑀁.

𑀇𑀫𑀲𑁆𑀫𑀺𑀁 𑀯𑀸𑀭𑁂 𑀅𑀪𑀺𑀜𑁆𑀜𑀸𑀤𑀻𑀦𑀺 𑀏𑀓𑀓𑀲𑀤𑀺𑀲𑀸𑀦𑁂𑀯, 𑀉𑀧𑁆𑀧𑀸𑀤𑁂𑀢𑀩𑁆𑀩𑀧𑀤𑁂 𑀧𑀦 𑀫𑀕𑁆𑀕𑁄 𑀓𑀣𑀺𑀢𑁄, 𑀲𑀘𑁆𑀙𑀺𑀓𑀸𑀢𑀩𑁆𑀩𑀧𑀤𑁂 𑀨𑀮𑀁.

𑀤𑁆𑀯𑁂𑀥𑀫𑁆𑀫𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀬𑁄𑀥𑀫𑁆𑀫𑀯𑀡𑁆𑀡𑀦𑀸

𑁩𑁫𑁩. (𑀙) 𑀓𑀸𑀫𑀸𑀦𑀫𑁂𑀢𑀁 𑀦𑀺𑀲𑁆𑀲𑀭𑀡𑀁 𑀬𑀤𑀺𑀤𑀁 𑀦𑁂𑀓𑁆𑀔𑀫𑁆𑀫𑀦𑁆𑀢𑀺 𑀏𑀢𑁆𑀣 𑀦𑁂𑀓𑁆𑀔𑀫𑁆𑀫𑀦𑁆𑀢𑀺 𑀅𑀦𑀸𑀕𑀸𑀫𑀺𑀫𑀕𑁆𑀕𑁄 𑀅𑀥𑀺𑀧𑁆𑀧𑁂𑀢𑁄. 𑀲𑁄 𑀳𑀺 𑀲𑀩𑁆𑀩𑀲𑁄 𑀓𑀸𑀫𑀸𑀦𑀁 𑀦𑀺𑀲𑁆𑀲𑀭𑀡𑀁. 𑀭𑀽𑀧𑀸𑀦𑀁 𑀦𑀺𑀲𑁆𑀲𑀭𑀡𑀁 𑀬𑀤𑀺𑀤𑀁 𑀆𑀭𑀼𑀧𑁆𑀧𑀦𑁆𑀢𑀺 𑀏𑀢𑁆𑀣 𑀆𑀭𑀼𑀧𑁆𑀧𑁂𑀧𑀺 𑀅𑀭𑀳𑀢𑁆𑀢𑀫𑀕𑁆𑀕𑁄. 𑀧𑀼𑀦 𑀉𑀧𑁆𑀧𑀢𑁆𑀢𑀺𑀦𑀺𑀯𑀸𑀭𑀡𑀢𑁄 𑀲𑀩𑁆𑀩𑀲𑁄 𑀭𑀽𑀧𑀸𑀦𑀁 𑀦𑀺𑀲𑁆𑀲𑀭𑀡𑀁 𑀦𑀸𑀫. 𑀦𑀺𑀭𑁄𑀥𑁄 𑀢𑀲𑁆𑀲 𑀦𑀺𑀲𑁆𑀲𑀭𑀡𑀦𑁆𑀢𑀺 𑀇𑀥 𑀅𑀭𑀳𑀢𑁆𑀢𑀨𑀮𑀁 𑀦𑀺𑀭𑁄𑀥𑁄𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀅𑀭𑀳𑀢𑁆𑀢𑀨𑀮𑁂𑀦 𑀳𑀺 𑀦𑀺𑀩𑁆𑀩𑀸𑀦𑁂 𑀤𑀺𑀝𑁆𑀞𑁂 𑀧𑀼𑀦 𑀆𑀬𑀢𑀺𑀁 𑀲𑀩𑁆𑀩𑀲𑀗𑁆𑀔𑀸𑀭𑀸 𑀦 𑀳𑁄𑀦𑁆𑀢𑀻𑀢𑀺 𑀅𑀭𑀳𑀢𑁆𑀢𑀁 𑀲𑀗𑁆𑀔𑀢𑀦𑀺𑀭𑁄𑀥𑀲𑁆𑀲 𑀧𑀘𑁆𑀘𑀬𑀢𑁆𑀢𑀸 𑀦𑀺𑀭𑁄𑀥𑁄𑀢𑀺 𑀯𑀼𑀢𑁆𑀢𑀁.

(𑀚) 𑀅𑀢𑀻𑀢𑀁𑀲𑁂 𑀜𑀸𑀡𑀦𑁆𑀢𑀺 𑀅𑀢𑀻𑀢𑀁𑀲𑀸𑀭𑀫𑁆𑀫𑀡𑀁 𑀜𑀸𑀡𑀁 𑀇𑀢𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀇𑀫𑀲𑁆𑀫𑀺𑀫𑁆𑀧𑀺 𑀯𑀸𑀭𑁂 𑀅𑀪𑀺𑀜𑁆𑀜𑀸𑀤𑀬𑁄 𑀏𑀓𑀓𑀲𑀤𑀺𑀲𑀸𑀯. 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀧𑀤𑁂 𑀧𑀦 𑀫𑀕𑁆𑀕𑁄 𑀓𑀣𑀺𑀢𑁄, 𑀲𑀘𑁆𑀙𑀺𑀓𑀸𑀢𑀩𑁆𑀩𑁂 𑀨𑀮𑀁.

𑀢𑀬𑁄𑀥𑀫𑁆𑀫𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀢𑁆𑀢𑀸𑀭𑁄𑀥𑀫𑁆𑀫𑀯𑀡𑁆𑀡𑀦𑀸

𑁩𑁫𑁪. (𑀓) 𑀘𑀢𑁆𑀢𑀸𑀭𑀺 𑀘𑀓𑁆𑀓𑀸𑀦𑀻𑀢𑀺 𑀏𑀢𑁆𑀣 𑀘𑀓𑁆𑀓𑀁 𑀦𑀸𑀫 𑀤𑀸𑀭𑀼𑀘𑀓𑁆𑀓𑀁, 𑀭𑀢𑀦𑀘𑀓𑁆𑀓𑀁, 𑀥𑀫𑁆𑀫𑀘𑀓𑁆𑀓𑀁, 𑀇𑀭𑀺𑀬𑀸𑀧𑀣𑀘𑀓𑁆𑀓𑀁, 𑀲𑀫𑁆𑀧𑀢𑁆𑀢𑀺𑀘𑀓𑁆𑀓𑀦𑁆𑀢𑀺 𑀧𑀜𑁆𑀘𑀯𑀺𑀥𑀁. 𑀢𑀢𑁆𑀣 ‘‘𑀬𑀁 𑀧𑀦𑀺𑀤𑀁 𑀲𑀫𑁆𑀫, 𑀭𑀣𑀓𑀸𑀭, 𑀘𑀓𑁆𑀓𑀁 𑀙𑀳𑀺 𑀫𑀸𑀲𑁂𑀳𑀺 𑀦𑀺𑀝𑁆𑀞𑀺𑀢𑀁, 𑀙𑀸𑀭𑀢𑁆𑀢𑀽𑀦𑁂𑀳𑀻’’𑀢𑀺 (𑀅. 𑀦𑀺. 𑁩.𑁧𑁫) 𑀇𑀤𑀁 𑀤𑀸𑀭𑀼𑀘𑀓𑁆𑀓𑀁. ‘‘𑀧𑀺𑀢𑀭𑀸 𑀧𑀯𑀢𑁆𑀢𑀺𑀢𑀁 𑀘𑀓𑁆𑀓𑀁 𑀅𑀦𑀼𑀧𑁆𑀧𑀯𑀢𑁆𑀢𑁂𑀢𑀻’’𑀢𑀺 (𑀅. 𑀦𑀺. 𑁫.𑁧𑁩𑁨) 𑀇𑀤𑀁 𑀭𑀢𑀦𑀘𑀓𑁆𑀓𑀁. ‘‘𑀧𑀯𑀢𑁆𑀢𑀺𑀢𑀁 𑀘𑀓𑁆𑀓’’𑀦𑁆𑀢𑀺 (𑀫. 𑀦𑀺. 𑁨.𑁩𑁯𑁯) 𑀇𑀤𑀁 𑀥𑀫𑁆𑀫𑀘𑀓𑁆𑀓𑀁. ‘‘𑀘𑀢𑀼𑀘𑀓𑁆𑀓𑀁 𑀦𑀯𑀤𑁆𑀯𑀸𑀭’’𑀦𑁆𑀢𑀺 (𑀲𑀁. 𑀦𑀺. 𑁧.𑁨𑁯) 𑀇𑀤𑀁 𑀇𑀭𑀺𑀬𑀸𑀧𑀣𑀘𑀓𑁆𑀓𑀁. ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀘𑀓𑁆𑀓𑀸𑀦𑀺, 𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀸𑀦𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀘𑀢𑀼𑀘𑀓𑁆𑀓𑀁 𑀧𑀯𑀢𑁆𑀢𑀢𑀻’’𑀢𑀺 (𑀅. 𑀦𑀺. 𑁪.𑁩𑁧) 𑀇𑀤𑀁 𑀲𑀫𑁆𑀧𑀢𑁆𑀢𑀺𑀘𑀓𑁆𑀓𑀁. 𑀇𑀥𑀸𑀧𑀺 𑀏𑀢𑀤𑁂𑀯 𑀅𑀥𑀺𑀧𑁆𑀧𑁂𑀢𑀁.

𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑁄𑀢𑀺 𑀬𑀢𑁆𑀣 𑀘𑀢𑀲𑁆𑀲𑁄 𑀧𑀭𑀺𑀲𑀸 𑀲𑀦𑁆𑀤𑀺𑀲𑁆𑀲𑀦𑁆𑀢𑀺, 𑀏𑀯𑀭𑀽𑀧𑁂 𑀅𑀦𑀼𑀘𑁆𑀙𑀯𑀺𑀓𑁂 𑀤𑁂𑀲𑁂 𑀯𑀸𑀲𑁄. 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑁄𑀢𑀺 𑀩𑀼𑀤𑁆𑀥𑀸𑀤𑀻𑀦𑀁 𑀲𑀧𑁆𑀧𑀼𑀭𑀺𑀲𑀸𑀦𑀁 𑀅𑀯𑀲𑁆𑀲𑀬𑀦𑀁 𑀲𑁂𑀯𑀦𑀁 𑀪𑀚𑀦𑀁. 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀻𑀢𑀺 𑀅𑀢𑁆𑀢𑀦𑁄 𑀲𑀫𑁆𑀫𑀸 𑀞𑀧𑀦𑀁, 𑀲𑀘𑁂 𑀧𑀦 𑀧𑀼𑀩𑁆𑀩𑁂 𑀅𑀲𑁆𑀲𑀤𑁆𑀥𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀢𑀸𑀦𑀺 𑀧𑀳𑀸𑀬 𑀲𑀤𑁆𑀥𑀸𑀤𑀻𑀲𑀼 𑀧𑀢𑀺𑀝𑁆𑀞𑀸𑀧𑀦𑀁. 𑀧𑀼𑀩𑁆𑀩𑁂 𑀘 𑀓𑀢𑀧𑀼𑀜𑁆𑀜𑀢𑀸𑀢𑀺 𑀧𑀼𑀩𑁆𑀩𑁂 𑀉𑀧𑀘𑀺𑀢𑀓𑀼𑀲𑀮𑀢𑀸. 𑀇𑀤𑀫𑁂𑀯𑁂𑀢𑁆𑀣 𑀧𑀫𑀸𑀡𑀁. 𑀬𑁂𑀦 𑀳𑀺 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀦 𑀓𑀼𑀲𑀮𑀁 𑀓𑀢𑀁 𑀳𑁄𑀢𑀺, 𑀢𑀤𑁂𑀯 𑀓𑀼𑀲𑀮𑀁 𑀢𑀁 𑀧𑀼𑀭𑀺𑀲𑀁 𑀧𑀢𑀺𑀭𑀽𑀧𑀤𑁂𑀲𑁂 𑀉𑀧𑀦𑁂𑀢𑀺, 𑀲𑀧𑁆𑀧𑀼𑀭𑀺𑀲𑁂 𑀪𑀚𑀸𑀧𑁂𑀲𑀺. 𑀲𑁄 𑀏𑀯 𑀘 𑀧𑀼𑀕𑁆𑀕𑀮𑁄 𑀅𑀢𑁆𑀢𑀸𑀦𑀁 𑀲𑀫𑁆𑀫𑀸 𑀞𑀧𑁂𑀢𑀺. 𑀘𑀢𑀽𑀲𑀼 𑀆𑀳𑀸𑀭𑁂𑀲𑀼 𑀧𑀞𑀫𑁄 𑀮𑁄𑀓𑀺𑀬𑁄𑀯. 𑀲𑁂𑀲𑀸 𑀧𑀦 𑀢𑀬𑁄 𑀲𑀗𑁆𑀕𑀻𑀢𑀺𑀲𑀼𑀢𑁆𑀢𑁂 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸 𑀓𑀣𑀺𑀢𑀸. 𑀇𑀥 𑀧𑀼𑀩𑁆𑀩𑀪𑀸𑀕𑁂 𑀮𑁄𑀓𑀺𑀬𑀸.

(𑀘) 𑀓𑀸𑀫𑀬𑁄𑀕𑀯𑀺𑀲𑀁𑀬𑁄𑀕𑀸𑀤𑀬𑁄 𑀅𑀦𑀸𑀕𑀸𑀫𑀺𑀫𑀕𑁆𑀕𑀸𑀤𑀺𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸.

(𑀙) 𑀳𑀸𑀦𑀪𑀸𑀕𑀺𑀬𑀸𑀤𑀻𑀲𑀼 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻 𑀓𑀸𑀫𑀲𑀳𑀕𑀢𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀲𑀫𑀼𑀤𑀸𑀘𑀭𑀦𑁆𑀢𑀺 𑀳𑀸𑀦𑀪𑀸𑀕𑀺𑀬𑁄 𑀲𑀫𑀸𑀥𑀺. 𑀢𑀤𑀦𑀼𑀥𑀫𑁆𑀫𑀢𑀸 𑀲𑀢𑀺 𑀲𑀦𑁆𑀢𑀺𑀝𑁆𑀞𑀢𑀺 𑀞𑀺𑀢𑀺𑀪𑀸𑀕𑀺𑀬𑁄 𑀲𑀫𑀸𑀥𑀺. 𑀯𑀺𑀢𑀓𑁆𑀓𑀲𑀳𑀕𑀢𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀲𑀫𑀼𑀤𑀸𑀘𑀭𑀦𑁆𑀢𑀺 𑀯𑀺𑀲𑁂𑀲𑀪𑀸𑀕𑀺𑀬𑁄 𑀲𑀫𑀸𑀥𑀺. 𑀦𑀺𑀩𑁆𑀩𑀺𑀤𑀸𑀲𑀳𑀕𑀢𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀲𑀫𑀼𑀤𑀸𑀘𑀭𑀦𑁆𑀢𑀺 𑀯𑀺𑀭𑀸𑀕𑀽𑀧𑀲𑀜𑁆𑀳𑀺𑀢𑁄 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑁄 𑀲𑀫𑀸𑀥𑀻𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀲𑀫𑀸𑀧𑀢𑁆𑀢𑀺𑀬𑁄 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀧𑀦𑀲𑁆𑀲 𑀯𑀺𑀦𑀺𑀘𑁆𑀙𑀬𑀓𑀣𑀸 𑀓𑀣𑀺𑀢𑀸𑀯.

𑀇𑀫𑀲𑁆𑀫𑀺𑀫𑁆𑀧𑀺 𑀯𑀸𑀭𑁂 𑀅𑀪𑀺𑀜𑁆𑀜𑀸𑀤𑀻𑀦𑀺 𑀏𑀓𑀓𑀲𑀤𑀺𑀲𑀸𑀦𑁂𑀯. 𑀅𑀪𑀺𑀜𑁆𑀜𑀸𑀧𑀤𑁂 𑀧𑀦𑁂𑀢𑁆𑀣 𑀫𑀕𑁆𑀕𑁄 𑀓𑀣𑀺𑀢𑁄. 𑀲𑀘𑁆𑀙𑀺𑀓𑀸𑀢𑀩𑁆𑀩𑀧𑀤𑁂 𑀨𑀮𑀁.

𑀘𑀢𑁆𑀢𑀸𑀭𑁄𑀥𑀫𑁆𑀫𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀜𑁆𑀘𑀥𑀫𑁆𑀫𑀯𑀡𑁆𑀡𑀦𑀸

𑁩𑁫𑁫. (𑀔) 𑀧𑀻𑀢𑀺𑀨𑀭𑀡𑀢𑀸𑀤𑀻𑀲𑀼 𑀧𑀻𑀢𑀺𑀁 𑀨𑀭𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀤𑁆𑀯𑀻𑀲𑀼 𑀛𑀸𑀦𑁂𑀲𑀼 𑀧𑀜𑁆𑀜𑀸 𑀧𑀻𑀢𑀺𑀨𑀭𑀡𑀢𑀸 𑀦𑀸𑀫. 𑀲𑀼𑀔𑀁 𑀨𑀭𑀫𑀸𑀦𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀢𑀻𑀲𑀼 𑀛𑀸𑀦𑁂𑀲𑀼 𑀧𑀜𑁆𑀜𑀸 𑀲𑀼𑀔𑀨𑀭𑀡𑀢𑀸 𑀦𑀸𑀫. 𑀧𑀭𑁂𑀲𑀁 𑀘𑁂𑀢𑁄 𑀨𑀭𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀘𑁂𑀢𑁄𑀧𑀭𑀺𑀬𑀧𑀜𑁆𑀜𑀸 𑀘𑁂𑀢𑁄𑀨𑀭𑀡𑀢𑀸 𑀦𑀸𑀫. 𑀆𑀮𑁄𑀓𑀨𑀭𑀡𑁂 𑀉𑀧𑁆𑀧𑀚𑁆𑀚𑀢𑀻𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀧𑀜𑁆𑀜𑀸 𑀆𑀮𑁄𑀓𑀨𑀭𑀡𑀢𑀸 𑀦𑀸𑀫. 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁 𑀧𑀘𑁆𑀘𑀯𑁂𑀓𑁆𑀔𑀡𑀦𑀺𑀫𑀺𑀢𑁆𑀢𑀁 𑀦𑀸𑀫. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀤𑁆𑀯𑀻𑀲𑀼 𑀛𑀸𑀦𑁂𑀲𑀼 𑀧𑀜𑁆𑀜𑀸 𑀧𑀻𑀢𑀺𑀨𑀭𑀡𑀢𑀸, 𑀢𑀻𑀲𑀼 𑀛𑀸𑀦𑁂𑀲𑀼 𑀧𑀜𑁆𑀜𑀸 𑀲𑀼𑀔𑀨𑀭𑀡𑀢𑀸. 𑀧𑀭𑀘𑀺𑀢𑁆𑀢𑁂 𑀧𑀜𑁆𑀜𑀸 𑀘𑁂𑀢𑁄𑀨𑀭𑀡𑀢𑀸, 𑀤𑀺𑀩𑁆𑀩𑀘𑀓𑁆𑀔𑀼 𑀆𑀮𑁄𑀓𑀨𑀭𑀡𑀢𑀸. 𑀢𑀫𑁆𑀳𑀸 𑀢𑀫𑁆𑀳𑀸 𑀲𑀫𑀸𑀥𑀺𑀫𑁆𑀳𑀸 𑀯𑀼𑀝𑁆𑀞𑀺𑀢𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁 𑀧𑀘𑁆𑀘𑀯𑁂𑀓𑁆𑀔𑀡𑀦𑀺𑀫𑀺𑀢𑁆𑀢’’𑀦𑁆𑀢𑀺 (𑀯𑀺𑀪. 𑁮𑁦𑁪).

𑀢𑀢𑁆𑀣 𑀧𑀻𑀢𑀺𑀨𑀭𑀡𑀢𑀸 𑀲𑀼𑀔𑀨𑀭𑀡𑀢𑀸 𑀤𑁆𑀯𑁂 𑀧𑀸𑀤𑀸 𑀯𑀺𑀬. 𑀘𑁂𑀢𑁄𑀨𑀭𑀡𑀢𑀸 𑀆𑀮𑁄𑀓𑀨𑀭𑀡𑀢𑀸 𑀤𑁆𑀯𑁂 𑀳𑀢𑁆𑀣𑀸 𑀯𑀺𑀬. 𑀅𑀪𑀺𑀜𑁆𑀜𑀸𑀧𑀸𑀤𑀓𑀚𑁆𑀛𑀸𑀦𑀁 𑀫𑀚𑁆𑀛𑀺𑀫𑀓𑀸𑀬𑁄 𑀯𑀺𑀬. 𑀧𑀘𑁆𑀘𑀯𑁂𑀓𑁆𑀔𑀡𑀦𑀺𑀫𑀺𑀢𑁆𑀢𑀁 𑀲𑀻𑀲𑀁 𑀯𑀺𑀬. 𑀇𑀢𑀺 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀧𑀜𑁆𑀘𑀗𑁆𑀕𑀺𑀓𑀁 𑀲𑀫𑁆𑀫𑀸𑀲𑀫𑀸𑀥𑀺𑀁 𑀅𑀗𑁆𑀕𑀧𑀘𑁆𑀘𑀗𑁆𑀕𑀲𑀫𑁆𑀧𑀦𑁆𑀦𑀁 𑀧𑀼𑀭𑀺𑀲𑀁 𑀓𑀢𑁆𑀯𑀸 𑀤𑀲𑁆𑀲𑁂𑀲𑀺.

(𑀚) 𑀅𑀬𑀁 𑀲𑀫𑀸𑀥𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀼𑀔𑁄 𑀘𑁂 𑀯𑀸𑀢𑀺𑀆𑀤𑀻𑀲𑀼 𑀅𑀭𑀳𑀢𑁆𑀢𑀨𑀮𑀲𑀫𑀸𑀥𑀺 𑀅𑀥𑀺𑀧𑁆𑀧𑁂𑀢𑁄. 𑀲𑁄 𑀳𑀺 𑀅𑀧𑁆𑀧𑀺𑀢𑀧𑁆𑀧𑀺𑀢𑀓𑁆𑀔𑀡𑁂 𑀲𑀼𑀔𑀢𑁆𑀢𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀼𑀔𑁄. 𑀧𑀼𑀭𑀺𑀫𑁄 𑀧𑀼𑀭𑀺𑀫𑁄 𑀧𑀘𑁆𑀙𑀺𑀫𑀲𑁆𑀲 𑀧𑀘𑁆𑀙𑀺𑀫𑀲𑁆𑀲 𑀲𑀫𑀸𑀥𑀺𑀲𑀼𑀔𑀲𑁆𑀲 𑀧𑀘𑁆𑀘𑀬𑀢𑁆𑀢𑀸 𑀆𑀬𑀢𑀺𑀁 𑀲𑀼𑀔𑀯𑀺𑀧𑀸𑀓𑁄.

𑀓𑀺𑀮𑁂𑀲𑁂𑀳𑀺 𑀆𑀭𑀓𑀢𑁆𑀢𑀸 𑀅𑀭𑀺𑀬𑁄. 𑀓𑀸𑀫𑀸𑀫𑀺𑀲𑀯𑀝𑁆𑀝𑀸𑀫𑀺𑀲𑀮𑁄𑀓𑀸𑀫𑀺𑀲𑀸𑀦𑀁 𑀅𑀪𑀸𑀯𑀸 𑀦𑀺𑀭𑀸𑀫𑀺𑀲𑁄. 𑀩𑀼𑀤𑁆𑀥𑀸𑀤𑀻𑀳𑀺 𑀫𑀳𑀸𑀧𑀼𑀭𑀺𑀲𑁂𑀳𑀺 𑀲𑁂𑀯𑀺𑀢𑀢𑁆𑀢𑀸 𑀅𑀓𑀸𑀧𑀼𑀭𑀺𑀲𑀲𑁂𑀯𑀺𑀢𑁄. 𑀅𑀗𑁆𑀕𑀲𑀦𑁆𑀢𑀢𑀸𑀬 𑀆𑀭𑀫𑁆𑀫𑀡𑀲𑀦𑁆𑀢𑀢𑀸𑀬 𑀲𑀩𑁆𑀩𑀓𑀺𑀮𑁂𑀲𑀤𑀭𑀣𑀲𑀦𑁆𑀢𑀢𑀸𑀬 𑀘 𑀲𑀦𑁆𑀢𑁄. 𑀅𑀢𑀧𑁆𑀧𑀦𑀻𑀬𑀝𑁆𑀞𑁂𑀦 𑀧𑀡𑀻𑀢𑁄. 𑀓𑀺𑀮𑁂𑀲𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀮𑀤𑁆𑀥𑀢𑁆𑀢𑀸 𑀓𑀺𑀮𑁂𑀲𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀪𑀸𑀯𑀁 𑀯𑀸 𑀮𑀤𑁆𑀥𑀢𑁆𑀢𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀮𑀤𑁆𑀥𑁄. 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀻𑀢𑀺 𑀳𑀺 𑀇𑀤𑀁 𑀅𑀢𑁆𑀣𑀢𑁄 𑀏𑀓𑀁. 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀓𑀺𑀮𑁂𑀲𑁂𑀦 𑀯𑀸 𑀅𑀭𑀳𑀢𑀸 𑀮𑀤𑁆𑀥𑀢𑁆𑀢𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀮𑀤𑁆𑀥𑁄. 𑀏𑀓𑁄𑀤𑀺𑀪𑀸𑀯𑁂𑀦 𑀅𑀥𑀺𑀕𑀢𑀢𑁆𑀢𑀸 𑀏𑀓𑁄𑀤𑀺𑀪𑀸𑀯𑀫𑁂𑀯 𑀯𑀸 𑀅𑀥𑀺𑀕𑀢𑀢𑁆𑀢𑀸 𑀏𑀓𑁄𑀤𑀺𑀪𑀸𑀯𑀸𑀥𑀺𑀕𑀢𑁄. 𑀅𑀧𑁆𑀧𑀕𑀼𑀡𑀲𑀸𑀲𑀯𑀲𑀫𑀸𑀥𑀺 𑀯𑀺𑀬 𑀲𑀲𑀗𑁆𑀔𑀸𑀭𑁂𑀦 𑀲𑀧𑁆𑀧𑀬𑁄𑀕𑁂𑀦 𑀘𑀺𑀢𑁆𑀢𑁂𑀦 𑀧𑀘𑁆𑀘𑀦𑀻𑀓𑀥𑀫𑁆𑀫𑁂 𑀦𑀺𑀕𑁆𑀕𑀬𑁆𑀳 𑀓𑀺𑀮𑁂𑀲𑁂 𑀯𑀸𑀭𑁂𑀢𑁆𑀯𑀸 𑀅𑀦𑀥𑀺𑀕𑀢𑀢𑁆𑀢𑀸 𑀦𑀲𑀲𑀗𑁆𑀔𑀸𑀭𑀦𑀺𑀕𑁆𑀕𑀬𑁆𑀳𑀯𑀸𑀭𑀺𑀢𑀕𑀢𑁄. 𑀢𑀜𑁆𑀘 𑀲𑀫𑀸𑀥𑀺𑀁 𑀲𑀫𑀸𑀧𑀚𑁆𑀚𑀦𑁆𑀢𑁄 𑀢𑀢𑁄 𑀯𑀸 𑀯𑀼𑀝𑁆𑀞𑀳𑀦𑁆𑀢𑁄 𑀲𑀢𑀺𑀯𑁂𑀧𑀼𑀮𑁆𑀮𑀧𑀢𑁆𑀢𑀢𑁆𑀢𑀸. 𑀲𑀢𑁄𑀯 𑀲𑀫𑀸𑀧𑀚𑁆𑀚𑀢𑀺 𑀲𑀢𑁄 𑀯𑀼𑀝𑁆𑀞𑀳𑀢𑀺. 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀯𑀲𑁂𑀦 𑀯𑀸 𑀲𑀢𑁄 𑀲𑀫𑀸𑀧𑀚𑁆𑀚𑀢𑀺 𑀲𑀢𑁄 𑀯𑀼𑀝𑁆𑀞𑀳𑀢𑀺. 𑀢𑀲𑁆𑀫𑀸 𑀬𑀤𑁂𑀢𑁆𑀣 ‘‘𑀅𑀬𑀁 𑀲𑀫𑀸𑀥𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀼𑀔𑁄 𑀘𑁂𑀯 𑀆𑀬𑀢𑀺𑀜𑁆𑀘 𑀲𑀼𑀔𑀯𑀺𑀧𑀸𑀓𑁄’’𑀢𑀺 𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑀲𑁆𑀲 𑀧𑀘𑁆𑀘𑀢𑁆𑀢𑀁𑀬𑁂𑀯 𑀅𑀧𑀭𑀧𑁆𑀧𑀘𑁆𑀘𑀬𑀁 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀏𑀓𑀫𑀗𑁆𑀕𑀁. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀏𑀯𑀫𑀺𑀫𑁂𑀳𑀺 𑀧𑀜𑁆𑀘𑀳𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑁂𑀳𑀺 𑀅𑀬𑀁 𑀲𑀫𑀸𑀥𑀺 ‘‘𑀧𑀜𑁆𑀘𑀜𑀸𑀡𑀺𑀓𑁄 𑀲𑀫𑁆𑀫𑀸𑀲𑀫𑀸𑀥𑀻’’𑀢𑀺 𑀯𑀼𑀢𑁆𑀢𑁄.

𑀇𑀫𑀲𑁆𑀫𑀺𑀁 𑀯𑀸𑀭𑁂 𑀯𑀺𑀲𑁂𑀲𑀪𑀸𑀕𑀺𑀬𑀧𑀤𑁂 𑀫𑀕𑁆𑀕𑁄 𑀓𑀣𑀺𑀢𑁄. 𑀲𑀘𑁆𑀙𑀺𑀓𑀸𑀢𑀩𑁆𑀩𑀧𑀤𑁂 𑀨𑀮𑀁. 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯.

𑀙𑀥𑀫𑁆𑀫𑀯𑀡𑁆𑀡𑀦𑀸

𑁩𑁫𑁬. 𑀙𑀓𑁆𑀓𑁂𑀲𑀼 𑀲𑀩𑁆𑀩𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀧𑀤𑁂 𑀧𑀦𑁂𑀢𑁆𑀣 𑀫𑀕𑁆𑀕𑁄 𑀓𑀣𑀺𑀢𑁄. 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀁.

𑀲𑀢𑁆𑀢𑀥𑀫𑁆𑀫𑀯𑀡𑁆𑀡𑀦𑀸

𑁩𑁫𑁭. (𑀜) 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀲𑀼𑀤𑀺𑀝𑁆𑀞𑀸 𑀳𑁄𑀦𑁆𑀢𑀻𑀢𑀺 𑀳𑁂𑀢𑀼𑀦𑀸 𑀦𑀬𑁂𑀦 𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀦 𑀲𑀼𑀤𑀺𑀝𑁆𑀞𑀸 𑀳𑁄𑀦𑁆𑀢𑀺. 𑀓𑀸𑀫𑀸𑀢𑀺 𑀯𑀢𑁆𑀣𑀼𑀓𑀸𑀫𑀸 𑀘 𑀓𑀺𑀮𑁂𑀲𑀓𑀸𑀫𑀸 𑀘, 𑀤𑁆𑀯𑁂𑀧𑀺 𑀲𑀧𑀭𑀺𑀴𑀸𑀳𑀝𑁆𑀞𑁂𑀦 𑀅𑀗𑁆𑀕𑀸𑀭𑀓𑀸𑀲𑀼 𑀯𑀺𑀬 𑀲𑀼𑀤𑀺𑀝𑁆𑀞𑀸 𑀳𑁄𑀦𑁆𑀢𑀺. 𑀯𑀺𑀯𑁂𑀓𑀦𑀺𑀦𑁆𑀦𑀦𑁆𑀢𑀺 𑀦𑀺𑀩𑁆𑀩𑀸𑀦𑀦𑀺𑀦𑁆𑀦𑀁. 𑀧𑁄𑀡𑀁 𑀧𑀩𑁆𑀪𑀸𑀭𑀦𑁆𑀢𑀺 𑀦𑀺𑀦𑁆𑀦𑀲𑁆𑀲𑁂𑀢𑀁 𑀯𑁂𑀯𑀘𑀦𑀁. 𑀩𑁆𑀬𑀦𑁆𑀢𑀻𑀪𑀽𑀢𑀦𑁆𑀢𑀺 𑀦𑀺𑀬𑀢𑀺𑀪𑀽𑀢𑀁. 𑀦𑀺𑀢𑁆𑀢𑀡𑁆𑀳𑀦𑁆𑀢𑀺 𑀅𑀢𑁆𑀣𑁄. 𑀓𑀼𑀢𑁄? 𑀲𑀩𑁆𑀩𑀲𑁄 𑀆𑀲𑀯𑀝𑁆𑀞𑀸𑀦𑀻𑀬𑁂𑀳𑀺 𑀥𑀫𑁆𑀫𑁂𑀳𑀺 𑀢𑁂𑀪𑀽𑀫𑀓𑀥𑀫𑁆𑀫𑁂𑀳𑀻𑀢𑀺 𑀅𑀢𑁆𑀣𑁄. 𑀇𑀥 𑀪𑀸𑀯𑁂𑀢𑀩𑁆𑀩𑀧𑀤𑁂 𑀫𑀕𑁆𑀕𑁄 𑀓𑀣𑀺𑀢𑁄. 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯.

𑀅𑀝𑁆𑀞𑀥𑀫𑁆𑀫𑀯𑀡𑁆𑀡𑀦𑀸

𑁩𑁫𑁮. (𑀓) 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀺𑀓𑀸𑀬 𑀧𑀜𑁆𑀜𑀸𑀬𑀸𑀢𑀺 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀲𑁆𑀲 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀆𑀤𑀺𑀪𑀽𑀢𑀸𑀬 𑀧𑀼𑀩𑁆𑀩𑀪𑀸𑀕𑁂 𑀢𑀭𑀼𑀡𑀲𑀫𑀣𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬. 𑀅𑀝𑁆𑀞𑀗𑁆𑀕𑀺𑀓𑀲𑁆𑀲 𑀯𑀸 𑀫𑀕𑁆𑀕𑀲𑁆𑀲 𑀆𑀤𑀺𑀪𑀽𑀢𑀸𑀬 𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀜𑁆𑀜𑀸𑀬. 𑀢𑀺𑀩𑁆𑀩𑀦𑁆𑀢𑀺 𑀩𑀮𑀯𑀁. 𑀳𑀺𑀭𑁄𑀢𑁆𑀢𑀧𑁆𑀧𑀦𑁆𑀢𑀺 𑀳𑀺𑀭𑀻 𑀘 𑀑𑀢𑁆𑀢𑀧𑁆𑀧𑀜𑁆𑀘. 𑀧𑁂𑀫𑀦𑁆𑀢𑀺 𑀕𑁂𑀳𑀲𑁆𑀲𑀺𑀢𑀧𑁂𑀫𑀁. 𑀕𑀸𑀭𑀯𑁄𑀢𑀺 𑀕𑀭𑀼𑀘𑀺𑀢𑁆𑀢𑀪𑀸𑀯𑁄. 𑀕𑀭𑀼𑀪𑀸𑀯𑀦𑀻𑀬𑀜𑁆𑀳𑀺 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑁄 𑀓𑀺𑀮𑁂𑀲𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀺 𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀁 𑀮𑀪𑀢𑀺. 𑀢𑀲𑁆𑀫𑀸 𑀢𑀁 𑀦𑀺𑀲𑁆𑀲𑀸𑀬 𑀯𑀺𑀳𑀸𑀭𑁄 𑀧𑀜𑁆𑀜𑀸𑀧𑀝𑀺𑀮𑀸𑀪𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺.

(𑀙) 𑀅𑀓𑁆𑀔𑀡𑁂𑀲𑀼 𑀬𑀲𑁆𑀫𑀸 𑀧𑁂𑀢𑀸 𑀅𑀲𑀼𑀭𑀸𑀦𑀁 𑀆𑀯𑀸𑀳𑀦𑀁 𑀕𑀘𑁆𑀙𑀦𑁆𑀢𑀺, 𑀯𑀺𑀯𑀸𑀳𑀦𑀁 𑀕𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 𑀧𑁂𑀢𑁆𑀢𑀺𑀯𑀺𑀲𑀬𑁂𑀦𑁂𑀯 𑀅𑀲𑀼𑀭𑀓𑀸𑀬𑁄 𑀕𑀳𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

(𑀚) 𑀅𑀧𑁆𑀧𑀺𑀘𑁆𑀙𑀲𑁆𑀲𑀸𑀢𑀺 𑀏𑀢𑁆𑀣 𑀧𑀘𑁆𑀘𑀬𑀅𑀧𑁆𑀧𑀺𑀘𑁆𑀙𑁄, 𑀅𑀥𑀺𑀕𑀫𑀅𑀧𑁆𑀧𑀺𑀘𑁆𑀙𑁄, 𑀧𑀭𑀺𑀬𑀢𑁆𑀢𑀺𑀅𑀧𑁆𑀧𑀺𑀘𑁆𑀙𑁄, 𑀥𑀼𑀢𑀗𑁆𑀕𑀅𑀧𑁆𑀧𑀺𑀘𑁆𑀙𑁄𑀢𑀺 𑀘𑀢𑁆𑀢𑀸𑀭𑁄 𑀅𑀧𑁆𑀧𑀺𑀘𑁆𑀙𑀸. 𑀢𑀢𑁆𑀣 𑀧𑀘𑁆𑀘𑀬𑀅𑀧𑁆𑀧𑀺𑀘𑁆𑀙𑁄 𑀩𑀳𑀼𑀁 𑀤𑁂𑀦𑁆𑀢𑁂 𑀅𑀧𑁆𑀧𑀁 𑀕𑀡𑁆𑀳𑀸𑀢𑀺, 𑀅𑀧𑁆𑀧𑀁 𑀤𑁂𑀦𑁆𑀢𑁂 𑀅𑀧𑁆𑀧𑀢𑀭𑀁 𑀯𑀸 𑀕𑀡𑁆𑀳𑀸𑀢𑀺, 𑀦 𑀯𑀸 𑀕𑀡𑁆𑀳𑀸𑀢𑀺, 𑀦 𑀅𑀦𑀯𑀲𑁂𑀲𑀕𑀸𑀳𑀻 𑀳𑁄𑀢𑀺. 𑀅𑀥𑀺𑀕𑀫𑀅𑀧𑁆𑀧𑀺𑀘𑁆𑀙𑁄 𑀫𑀚𑁆𑀛𑀦𑁆𑀢𑀺𑀓𑀢𑁆𑀣𑁂𑀭𑁄 𑀯𑀺𑀬 𑀅𑀢𑁆𑀢𑀦𑁄 𑀅𑀥𑀺𑀕𑀫𑀁 𑀅𑀜𑁆𑀜𑁂𑀲𑀁 𑀚𑀸𑀦𑀺𑀢𑀼𑀁 𑀦 𑀤𑁂𑀢𑀺. 𑀧𑀭𑀺𑀬𑀢𑁆𑀢𑀺𑀅𑀧𑁆𑀧𑀺𑀘𑁆𑀙𑁄 𑀢𑁂𑀧𑀺𑀝𑀓𑁄𑀧𑀺 𑀲𑀫𑀸𑀦𑁄 𑀦 𑀩𑀳𑀼𑀲𑁆𑀲𑀼𑀢𑀪𑀸𑀯𑀁 𑀚𑀸𑀦𑀸𑀧𑁂𑀢𑀼𑀓𑀸𑀫𑁄 𑀳𑁄𑀢𑀺 𑀲𑀸𑀓𑁂𑀢𑀢𑀺𑀲𑁆𑀲𑀢𑁆𑀣𑁂𑀭𑁄 𑀯𑀺𑀬. 𑀥𑀼𑀢𑀗𑁆𑀕𑀅𑀧𑁆𑀧𑀺𑀘𑁆𑀙𑁄 𑀥𑀼𑀢𑀗𑁆𑀕𑀧𑀭𑀺𑀳𑀭𑀡𑀪𑀸𑀯𑀁 𑀅𑀜𑁆𑀜𑁂𑀲𑀁 𑀚𑀸𑀦𑀺𑀢𑀼𑀁 𑀦 𑀤𑁂𑀢𑀺 𑀤𑁆𑀯𑁂𑀪𑀸𑀢𑀺𑀓𑀢𑁆𑀣𑁂𑀭𑁂𑀲𑀼 𑀚𑁂𑀝𑁆𑀞𑀓𑀢𑁆𑀣𑁂𑀭𑁄 𑀯𑀺𑀬. 𑀯𑀢𑁆𑀣𑀼 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀓𑀣𑀺𑀢𑀁. 𑀅𑀬𑀁 𑀥𑀫𑁆𑀫𑁄𑀢𑀺 𑀏𑀯𑀁 𑀲𑀦𑁆𑀢𑀕𑀼𑀡𑀦𑀺𑀕𑀽𑀳𑀦𑁂𑀦 𑀘 𑀧𑀘𑁆𑀘𑀬𑀧𑀝𑀺𑀕𑁆𑀕𑀳𑀡𑁂 𑀫𑀢𑁆𑀢𑀜𑁆𑀜𑀼𑀢𑀸𑀬 𑀘 𑀅𑀧𑁆𑀧𑀺𑀘𑁆𑀙𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀬𑀁 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀲𑀫𑁆𑀧𑀚𑁆𑀚𑀢𑀺, 𑀦𑁄 𑀫𑀳𑀺𑀘𑁆𑀙𑀲𑁆𑀲. 𑀏𑀯𑀁 𑀲𑀩𑁆𑀩𑀢𑁆𑀣 𑀬𑁄𑀚𑁂𑀢𑀩𑁆𑀩𑀁.

𑀲𑀦𑁆𑀢𑀼𑀝𑁆𑀞𑀲𑁆𑀲𑀸𑀢𑀺 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀢𑀻𑀳𑀺 𑀲𑀦𑁆𑀢𑁄𑀲𑁂𑀳𑀺 𑀲𑀦𑁆𑀢𑀼𑀝𑁆𑀞𑀲𑁆𑀲. 𑀧𑀯𑀺𑀯𑀺𑀢𑁆𑀢𑀲𑁆𑀲𑀸𑀢𑀺 𑀓𑀸𑀬𑀘𑀺𑀢𑁆𑀢𑀉𑀧𑀥𑀺𑀯𑀺𑀯𑁂𑀓𑁂𑀳𑀺 𑀯𑀺𑀯𑀺𑀢𑁆𑀢𑀲𑁆𑀲. 𑀢𑀢𑁆𑀣 𑀓𑀸𑀬𑀯𑀺𑀯𑁂𑀓𑁄 𑀦𑀸𑀫 𑀕𑀡𑀲𑀗𑁆𑀕𑀡𑀺𑀓𑀁 𑀯𑀺𑀦𑁄𑀤𑁂𑀢𑁆𑀯𑀸 𑀅𑀝𑁆𑀞𑀆𑀭𑀫𑁆𑀪𑀯𑀢𑁆𑀣𑀼𑀯𑀲𑁂𑀦 𑀏𑀓𑀻𑀪𑀸𑀯𑁄. 𑀏𑀓𑀻𑀪𑀸𑀯𑀫𑀢𑁆𑀢𑁂𑀦 𑀧𑀦 𑀓𑀫𑁆𑀫𑀁 𑀦 𑀦𑀺𑀧𑁆𑀨𑀚𑁆𑀚𑀢𑀻𑀢𑀺 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑀺, 𑀅𑀬𑀁 𑀘𑀺𑀢𑁆𑀢𑀯𑀺𑀯𑁂𑀓𑁄 𑀦𑀸𑀫. 𑀲𑀫𑀸𑀧𑀢𑁆𑀢𑀺𑀫𑀢𑁆𑀢𑁂𑀦𑁂𑀯 𑀓𑀫𑁆𑀫𑀁 𑀦 𑀦𑀺𑀧𑁆𑀨𑀚𑁆𑀚𑀢𑀻𑀢𑀺 𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀺𑀢𑁆𑀯𑀸 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀅𑀬𑀁 𑀉𑀧𑀥𑀺𑀯𑀺𑀯𑁂𑀓𑁄 𑀦𑀸𑀫. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀓𑀸𑀬𑀯𑀺𑀯𑁂𑀓𑁄 𑀘 𑀯𑀺𑀯𑁂𑀓𑀝𑁆𑀞𑀓𑀸𑀬𑀸𑀦𑀁 𑀦𑁂𑀓𑁆𑀔𑀫𑁆𑀫𑀸𑀪𑀺𑀭𑀢𑀸𑀦𑀁. 𑀘𑀺𑀢𑁆𑀢𑀯𑀺𑀯𑁂𑀓𑁄 𑀘 𑀧𑀭𑀺𑀲𑀼𑀤𑁆𑀥𑀘𑀺𑀢𑁆𑀢𑀸𑀦𑀁 𑀧𑀭𑀫𑀯𑁄𑀤𑀸𑀦𑀧𑁆𑀧𑀢𑁆𑀢𑀸𑀦𑀁. 𑀉𑀧𑀥𑀺𑀯𑀺𑀯𑁂𑀓𑁄 𑀘 𑀦𑀺𑀭𑀼𑀧𑀥𑀻𑀦𑀁 𑀧𑀼𑀕𑁆𑀕𑀮𑀸𑀦𑀁 𑀯𑀺𑀲𑀗𑁆𑀔𑀸𑀭𑀕𑀢𑀸𑀦’’𑀦𑁆𑀢𑀺 (𑀫𑀳𑀸𑀦𑀺. 𑁪𑁯).

𑀲𑀗𑁆𑀕𑀡𑀺𑀓𑀸𑀭𑀸𑀫𑀲𑁆𑀲𑀸𑀢𑀺 𑀕𑀡𑀲𑀗𑁆𑀕𑀡𑀺𑀓𑀸𑀬 𑀘𑁂𑀯 𑀓𑀺𑀮𑁂𑀲𑀲𑀗𑁆𑀕𑀡𑀺𑀓𑀸𑀬 𑀘 𑀭𑀢𑀲𑁆𑀲. 𑀆𑀭𑀤𑁆𑀥𑀯𑀻𑀭𑀺𑀬𑀲𑁆𑀲𑀸𑀢𑀺 𑀓𑀸𑀬𑀺𑀓𑀘𑁂𑀢𑀲𑀺𑀓𑀯𑀻𑀭𑀺𑀬𑀯𑀲𑁂𑀦 𑀆𑀭𑀤𑁆𑀥𑀯𑀻𑀭𑀺𑀬𑀲𑁆𑀲. 𑀉𑀧𑀝𑁆𑀞𑀺𑀢𑀲𑀢𑀺𑀲𑁆𑀲𑀸𑀢𑀺 𑀘𑀢𑀼𑀲𑀢𑀺𑀧𑀝𑁆𑀞𑀸𑀦𑀯𑀲𑁂𑀦 𑀉𑀧𑀝𑁆𑀞𑀺𑀢𑀲𑀢𑀺𑀲𑁆𑀲. 𑀲𑀫𑀸𑀳𑀺𑀢𑀲𑁆𑀲𑀸𑀢𑀺 𑀏𑀓𑀕𑁆𑀕𑀘𑀺𑀢𑁆𑀢𑀲𑁆𑀲. 𑀧𑀜𑁆𑀜𑀯𑀢𑁄𑀢𑀺 𑀓𑀫𑁆𑀫𑀲𑁆𑀲𑀓𑀢𑀧𑀜𑁆𑀜𑀸𑀬 𑀧𑀜𑁆𑀜𑀯𑀢𑁄. 𑀦𑀺𑀧𑁆𑀧𑀧𑀜𑁆𑀘𑀲𑁆𑀲𑀸𑀢𑀺 𑀯𑀺𑀕𑀢𑀫𑀸𑀦𑀢𑀡𑁆𑀳𑀸𑀤𑀺𑀝𑁆𑀞𑀺𑀧𑀧𑀜𑁆𑀘𑀲𑁆𑀲.

𑀇𑀥 𑀪𑀸𑀯𑁂𑀢𑀩𑁆𑀩𑀧𑀤𑁂 𑀫𑀕𑁆𑀕𑁄 𑀓𑀣𑀺𑀢𑁄. 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯.

𑀦𑀯𑀥𑀫𑁆𑀫𑀯𑀡𑁆𑀡𑀦𑀸

𑁩𑁫𑁯. (𑀔) 𑀲𑀻𑀮𑀯𑀺𑀲𑀼𑀤𑁆𑀥𑀻𑀢𑀺 𑀯𑀺𑀲𑀼𑀤𑁆𑀥𑀺𑀁 𑀧𑀸𑀧𑁂𑀢𑀼𑀁 𑀲𑀫𑀢𑁆𑀣𑀁 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁. 𑀧𑀸𑀭𑀺𑀲𑀼𑀤𑁆𑀥𑀺𑀧𑀥𑀸𑀦𑀺𑀬𑀗𑁆𑀕𑀦𑁆𑀢𑀺 𑀧𑀭𑀺𑀲𑀼𑀤𑁆𑀥𑀪𑀸𑀯𑀲𑁆𑀲 𑀧𑀥𑀸𑀦𑀗𑁆𑀕𑀁. 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀻𑀢𑀺 𑀯𑀺𑀧𑀲𑁆𑀲𑀦𑀸𑀬 𑀧𑀤𑀝𑁆𑀞𑀸𑀦𑀪𑀽𑀢𑀸 𑀅𑀝𑁆𑀞 𑀧𑀕𑀼𑀡𑀲𑀫𑀸𑀧𑀢𑁆𑀢𑀺𑀬𑁄. 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀻𑀢𑀺 𑀲𑀧𑀘𑁆𑀘𑀬𑀦𑀸𑀫𑀭𑀽𑀧𑀤𑀲𑁆𑀲𑀦𑀁. 𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀻𑀢𑀺 𑀧𑀘𑁆𑀘𑀬𑀸𑀓𑀸𑀭𑀜𑀸𑀡𑀁. 𑀅𑀤𑁆𑀥𑀢𑁆𑀢𑀬𑁂𑀧𑀺 𑀳𑀺 𑀧𑀘𑁆𑀘𑀬𑀯𑀲𑁂𑀦𑁂𑀯 𑀥𑀫𑁆𑀫𑀸 𑀧𑀯𑀢𑁆𑀢𑀦𑁆𑀢𑀻𑀢𑀺 𑀧𑀲𑁆𑀲𑀢𑁄 𑀓𑀗𑁆𑀔𑀁 𑀯𑀺𑀢𑀭𑀢𑀺. 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀻𑀢𑀺 𑀑𑀪𑀸𑀲𑀸𑀤𑀬𑁄 𑀦 𑀫𑀕𑁆𑀕𑁄, 𑀯𑀻𑀣𑀺𑀧𑁆𑀧𑀝𑀺𑀧𑀦𑁆𑀦𑀁 𑀉𑀤𑀬𑀩𑁆𑀩𑀬𑀜𑀸𑀡𑀁 𑀫𑀕𑁆𑀕𑁄𑀢𑀺 𑀏𑀯𑀁 𑀫𑀕𑁆𑀕𑀸𑀫𑀕𑁆𑀕𑁂 𑀜𑀸𑀡𑀁. 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀻𑀢𑀺 𑀭𑀣𑀯𑀺𑀦𑀻𑀢𑁂 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸 𑀓𑀣𑀺𑀢𑀸, 𑀇𑀥 𑀢𑀭𑀼𑀡𑀯𑀺𑀧𑀲𑁆𑀲𑀦𑀸. 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀻𑀢𑀺 𑀭𑀣𑀯𑀺𑀦𑀻𑀢𑁂 𑀫𑀕𑁆𑀕𑁄 𑀓𑀣𑀺𑀢𑁄, 𑀇𑀥 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸. 𑀏𑀢𑀸 𑀧𑀦 𑀲𑀢𑁆𑀢𑀧𑀺 𑀯𑀺𑀲𑀼𑀤𑁆𑀥𑀺𑀬𑁄 𑀯𑀺𑀢𑁆𑀣𑀸𑀭𑁂𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀓𑀣𑀺𑀢𑀸. 𑀧𑀜𑁆𑀜𑀸𑀢𑀺 𑀅𑀭𑀳𑀢𑁆𑀢𑀨𑀮𑀧𑀜𑁆𑀜𑀸. 𑀯𑀺𑀫𑀼𑀢𑁆𑀢𑀺𑀧𑀺 𑀅𑀭𑀳𑀢𑁆𑀢𑀨𑀮𑀯𑀺𑀫𑀼𑀢𑁆𑀢𑀺𑀬𑁂𑀯.

(𑀙) 𑀥𑀸𑀢𑀼𑀦𑀸𑀦𑀢𑁆𑀢𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀨𑀲𑁆𑀲𑀦𑀸𑀦𑀢𑁆𑀢𑀦𑁆𑀢𑀺 𑀘𑀓𑁆𑀔𑀸𑀤𑀺𑀥𑀸𑀢𑀼𑀦𑀸𑀦𑀢𑁆𑀢𑀁 𑀧𑀝𑀺𑀘𑁆𑀘 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀺𑀦𑀸𑀦𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀨𑀲𑁆𑀲𑀦𑀸𑀦𑀢𑁆𑀢𑀁 𑀧𑀝𑀺𑀘𑁆𑀘𑀸𑀢𑀺 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀺𑀦𑀸𑀦𑀢𑁆𑀢𑀁 𑀧𑀝𑀺𑀘𑁆𑀘. 𑀯𑁂𑀤𑀦𑀸𑀦𑀸𑀦𑀢𑁆𑀢𑀦𑁆𑀢𑀺 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸𑀤𑀺𑀯𑁂𑀤𑀦𑀸𑀦𑀸𑀦𑀢𑁆𑀢𑀁. 𑀲𑀜𑁆𑀜𑀸𑀦𑀸𑀦𑀢𑁆𑀢𑀁 𑀧𑀝𑀺𑀘𑁆𑀘𑀸𑀢𑀺 𑀓𑀸𑀫𑀲𑀜𑁆𑀜𑀸𑀤𑀺𑀦𑀸𑀦𑀢𑁆𑀢𑀁 𑀧𑀝𑀺𑀘𑁆𑀘. 𑀲𑀗𑁆𑀓𑀧𑁆𑀧𑀦𑀸𑀦𑀢𑁆𑀢𑀦𑁆𑀢𑀺 𑀓𑀸𑀫𑀲𑀗𑁆𑀓𑀧𑁆𑀧𑀸𑀤𑀺𑀦𑀸𑀦𑀢𑁆𑀢𑀁. 𑀲𑀗𑁆𑀓𑀧𑁆𑀧𑀦𑀸𑀦𑀢𑁆𑀢𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀙𑀦𑁆𑀤𑀦𑀸𑀦𑀢𑁆𑀢𑀦𑁆𑀢𑀺 𑀲𑀗𑁆𑀓𑀧𑁆𑀧𑀦𑀸𑀦𑀢𑁆𑀢𑀢𑀸𑀬 𑀭𑀽𑀧𑁂 𑀙𑀦𑁆𑀤𑁄 𑀲𑀤𑁆𑀤𑁂 𑀙𑀦𑁆𑀤𑁄𑀢𑀺 𑀏𑀯𑀁 𑀙𑀦𑁆𑀤𑀦𑀸𑀦𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀧𑀭𑀺𑀴𑀸𑀳𑀦𑀸𑀦𑀢𑁆𑀢𑀦𑁆𑀢𑀺 𑀙𑀦𑁆𑀤𑀦𑀸𑀦𑀢𑁆𑀢𑀢𑀸𑀬 𑀭𑀽𑀧𑀧𑀭𑀺𑀴𑀸𑀳𑁄 𑀲𑀤𑁆𑀤𑀧𑀭𑀺𑀴𑀸𑀳𑁄𑀢𑀺 𑀏𑀯𑀁 𑀧𑀭𑀺𑀴𑀸𑀳𑀦𑀸𑀦𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀧𑀭𑀺𑀬𑁂𑀲𑀦𑀸𑀦𑀸𑀦𑀢𑁆𑀢𑀦𑁆𑀢𑀺 𑀧𑀭𑀺𑀴𑀸𑀳𑀦𑀸𑀦𑀢𑁆𑀢𑀢𑀸𑀬 𑀭𑀽𑀧𑀧𑀭𑀺𑀬𑁂𑀲𑀦𑀸𑀤𑀺𑀦𑀸𑀦𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀮𑀸𑀪𑀦𑀸𑀦𑀢𑁆𑀢𑀦𑁆𑀢𑀺 𑀧𑀭𑀺𑀬𑁂𑀲𑀦𑀸𑀦𑀸𑀦𑀢𑁆𑀢𑀢𑀸𑀬 𑀭𑀽𑀧𑀧𑀝𑀺𑀮𑀸𑀪𑀸𑀤𑀺𑀦𑀸𑀦𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺.

(𑀚) 𑀲𑀜𑁆𑀜𑀸𑀲𑀼 𑀫𑀭𑀡𑀲𑀜𑁆𑀜𑀸𑀢𑀺 𑀫𑀭𑀡𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑁂 𑀲𑀜𑁆𑀜𑀸. 𑀆𑀳𑀸𑀭𑁂𑀧𑀝𑀺𑀓𑀽𑀮𑀲𑀜𑁆𑀜𑀸𑀢𑀺 𑀆𑀳𑀸𑀭𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀲𑀜𑁆𑀜𑀸. 𑀲𑀩𑁆𑀩𑀮𑁄𑀓𑁂𑀅𑀦𑀪𑀺𑀭𑀢𑀺𑀲𑀜𑁆𑀜𑀸𑀢𑀺 𑀲𑀩𑁆𑀩𑀲𑁆𑀫𑀺𑀁 𑀯𑀝𑁆𑀝𑁂 𑀉𑀓𑁆𑀓𑀡𑁆𑀞𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀲𑀜𑁆𑀜𑀸. 𑀲𑁂𑀲𑀸 𑀳𑁂𑀝𑁆𑀞𑀸 𑀓𑀣𑀺𑀢𑀸 𑀏𑀯. 𑀇𑀥 𑀩𑀳𑀼𑀓𑀸𑀭𑀧𑀤𑁂 𑀫𑀕𑁆𑀕𑁄 𑀓𑀣𑀺𑀢𑁄. 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯.

𑀤𑀲𑀥𑀫𑁆𑀫𑀯𑀡𑁆𑀡𑀦𑀸

𑁩𑁬𑁦. (𑀛) 𑀦𑀺𑀚𑁆𑀚𑀭𑀯𑀢𑁆𑀣𑀽𑀦𑀻𑀢𑀺 𑀦𑀺𑀚𑁆𑀚𑀭𑀓𑀸𑀭𑀡𑀸𑀦𑀺. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀦𑀺𑀚𑁆𑀚𑀺𑀡𑁆𑀡𑀸 𑀳𑁄𑀢𑀻𑀢𑀺 𑀅𑀬𑀁 𑀳𑁂𑀝𑁆𑀞𑀸 𑀯𑀺𑀧𑀲𑁆𑀲𑀦𑀸𑀬𑀧𑀺 𑀦𑀺𑀚𑁆𑀚𑀺𑀡𑁆𑀡𑀸 𑀏𑀯 𑀧𑀳𑀻𑀦𑀸. 𑀓𑀲𑁆𑀫𑀸 𑀧𑀼𑀦 𑀕𑀳𑀺𑀢𑀸𑀢𑀺 𑀅𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸. 𑀯𑀺𑀧𑀲𑁆𑀲𑀦𑀸𑀬 𑀳𑀺 𑀓𑀺𑀜𑁆𑀘𑀸𑀧𑀺 𑀚𑀺𑀡𑁆𑀡𑀸, 𑀦 𑀧𑀦 𑀲𑀫𑀼𑀘𑁆𑀙𑀺𑀦𑁆𑀦𑀸, 𑀫𑀕𑁆𑀕𑁄 𑀧𑀦 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀢𑀁 𑀲𑀫𑀼𑀘𑁆𑀙𑀺𑀦𑁆𑀤𑀢𑀺, 𑀦 𑀧𑀼𑀦 𑀯𑀼𑀝𑁆𑀞𑀸𑀢𑀼𑀁 𑀤𑁂𑀢𑀺. 𑀢𑀲𑁆𑀫𑀸 𑀧𑀼𑀦 𑀕𑀳𑀺𑀢𑀸. 𑀏𑀯𑀁 𑀲𑀩𑁆𑀩𑀧𑀤𑁂𑀲𑀼 𑀦𑀬𑁄 𑀦𑁂𑀢𑀩𑁆𑀩𑁄.

𑀏𑀢𑁆𑀣 𑀘 𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀘𑁆𑀘𑀬𑀸 𑀘𑀢𑀼𑀲𑀝𑁆𑀞𑀺 𑀥𑀫𑁆𑀫𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺. 𑀓𑀢𑀫𑁂 𑀘𑀢𑀼𑀲𑀝𑁆𑀞𑀺? 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀓𑁆𑀔𑀡𑁂 𑀅𑀥𑀺𑀫𑁄𑀓𑁆𑀔𑀝𑁆𑀞𑁂𑀦 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀧𑀭𑀺𑀧𑀽𑀭𑁂𑀢𑀺, 𑀧𑀕𑁆𑀕𑀳𑀝𑁆𑀞𑁂𑀦 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀧𑀭𑀺𑀧𑀽𑀭𑁂𑀢𑀺, 𑀅𑀦𑀼𑀲𑁆𑀲𑀭𑀡𑀝𑁆𑀞𑁂𑀦 𑀲𑀢𑀺𑀦𑁆𑀤𑁆𑀭𑀺𑀬𑀁 𑀧𑀭𑀺𑀧𑀽𑀭𑁂𑀢𑀺, 𑀅𑀯𑀺𑀓𑁆𑀔𑁂𑀧𑀝𑁆𑀞𑁂𑀦 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀧𑀭𑀺𑀧𑀽𑀭𑁂𑀢𑀺, 𑀤𑀲𑁆𑀲𑀦𑀝𑁆𑀞𑁂𑀦 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀧𑀭𑀺𑀧𑀽𑀭𑁂𑀢𑀺, 𑀯𑀺𑀚𑀸𑀦𑀦𑀝𑁆𑀞𑁂𑀦 𑀫𑀦𑀺𑀦𑁆𑀤𑁆𑀭𑀺𑀬𑀁, 𑀅𑀪𑀺𑀦𑀦𑁆𑀤𑀦𑀝𑁆𑀞𑁂𑀦 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁, 𑀧𑀯𑀢𑁆𑀢𑀲𑀦𑁆𑀢𑀢𑀺𑀅𑀥𑀺𑀧𑀢𑁂𑀬𑁆𑀬𑀝𑁆𑀞𑁂𑀦 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀧𑀭𑀺𑀧𑀽𑀭𑁂𑀢𑀺…𑀧𑁂… 𑀅𑀭𑀳𑀢𑁆𑀢𑀨𑀮𑀓𑁆𑀔𑀡𑁂 𑀅𑀥𑀺𑀫𑁄𑀓𑁆𑀔𑀝𑁆𑀞𑁂𑀦 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁, 𑀧𑀯𑀢𑁆𑀢𑀲𑀦𑁆𑀢𑀢𑀺𑀅𑀥𑀺𑀧𑀢𑁂𑀬𑁆𑀬𑀝𑁆𑀞𑁂𑀦 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀧𑀭𑀺𑀧𑀽𑀭𑁂𑀢𑀻𑀢𑀺 𑀏𑀯𑀁 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀘𑀢𑀽𑀲𑀼 𑀨𑀮𑁂𑀲𑀼 𑀅𑀝𑁆𑀞 𑀅𑀝𑁆𑀞 𑀳𑀼𑀢𑁆𑀯𑀸 𑀘𑀢𑀼𑀲𑀝𑁆𑀞𑀺 𑀥𑀫𑁆𑀫𑀸 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺. 𑀇𑀥 𑀅𑀪𑀺𑀜𑁆𑀜𑁂𑀬𑁆𑀬𑀧𑀤𑁂 𑀫𑀕𑁆𑀕𑁄 𑀓𑀣𑀺𑀢𑁄. 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯.

𑀇𑀥 𑀞𑀢𑁆𑀯𑀸 𑀧𑀜𑁆𑀳𑀸 𑀲𑀫𑁄𑀥𑀸𑀦𑁂𑀢𑀩𑁆𑀩𑀸. 𑀤𑀲𑀓𑁂 𑀲𑀢𑀁 𑀧𑀜𑁆𑀳𑀸 𑀓𑀣𑀺𑀢𑀸. 𑀏𑀓𑀓𑁂 𑀘 𑀦𑀯𑀓𑁂 𑀘 𑀲𑀢𑀁, 𑀤𑀼𑀓𑁂 𑀘 𑀅𑀝𑁆𑀞𑀓𑁂 𑀘 𑀲𑀢𑀁, 𑀢𑀺𑀓𑁂 𑀘 𑀲𑀢𑁆𑀢𑀓𑁂 𑀘 𑀲𑀢𑀁, 𑀘𑀢𑀼𑀓𑁆𑀓𑁂 𑀘 𑀙𑀓𑁆𑀓𑁂 𑀘 𑀲𑀢𑀁, 𑀧𑀜𑁆𑀘𑀓𑁂 𑀧𑀜𑁆𑀜𑀸𑀲𑀸𑀢𑀺 𑀅𑀟𑁆𑀠𑀙𑀝𑁆𑀞𑀸𑀦𑀺 𑀧𑀜𑁆𑀳𑀲𑀢𑀸𑀦𑀺 𑀓𑀣𑀺𑀢𑀸𑀦𑀺 𑀳𑁄𑀦𑁆𑀢𑀺.

‘‘𑀇𑀤𑀫𑀯𑁄𑀘 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄, 𑀅𑀢𑁆𑀢𑀫𑀦𑀸 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀼’’𑀦𑁆𑀢𑀺 𑀲𑀸𑀥𑀼, 𑀲𑀸𑀥𑀽𑀢𑀺 𑀅𑀪𑀺𑀦𑀦𑁆𑀤𑀦𑁆𑀢𑀸 𑀲𑀺𑀭𑀲𑀸 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼. 𑀢𑀸𑀬 𑀘 𑀧𑀦 𑀅𑀢𑁆𑀢𑀫𑀦𑀢𑀸𑀬 𑀇𑀫𑀫𑁂𑀯 𑀲𑀼𑀢𑁆𑀢𑀁 𑀆𑀯𑀚𑁆𑀚𑀫𑀸𑀦𑀸 𑀧𑀜𑁆𑀘𑀲𑀢𑀸𑀧𑀺 𑀢𑁂 𑀪𑀺𑀓𑁆𑀔𑀽 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀕𑁆𑀕𑀨𑀮𑁂 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀺𑀁𑀲𑀽𑀢𑀺.

𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀤𑀲𑀼𑀢𑁆𑀢𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.