𑁭. 𑀫𑀳𑀸𑀲𑀫𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑀦𑀺𑀤𑀸𑀦𑀯𑀡𑁆𑀡𑀦𑀸

𑁩𑁩𑁧. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀫𑀳𑀸𑀲𑀫𑀬𑀲𑀼𑀢𑁆𑀢𑀁. 𑀢𑀢𑁆𑀭𑀸𑀬𑀫𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸 𑁋 𑀲𑀓𑁆𑀓𑁂𑀲𑀽𑀢𑀺 𑀅𑀫𑁆𑀩𑀝𑁆𑀞𑀲𑀼𑀢𑁆𑀢𑁂 𑀯𑀼𑀢𑁆𑀢𑁂𑀦 𑀉𑀧𑁆𑀧𑀢𑁆𑀢𑀺𑀦𑀬𑁂𑀦 ‘‘𑀲𑀓𑁆𑀬𑀸 𑀯𑀢, 𑀪𑁄 𑀓𑀼𑀫𑀸𑀭𑀸’’𑀢𑀺 𑀉𑀤𑀸𑀦𑀁 𑀧𑀝𑀺𑀘𑁆𑀘 𑀲𑀓𑁆𑀓𑀸𑀢𑀺 𑀮𑀤𑁆𑀥𑀦𑀸𑀫𑀸𑀦𑀁 𑀭𑀸𑀚𑀓𑀼𑀫𑀸𑀭𑀸𑀦𑀁 𑀦𑀺𑀯𑀸𑀲𑁄 𑀏𑀓𑁄𑀧𑀺 𑀚𑀦𑀧𑀤𑁄 𑀭𑀼𑀴𑁆𑀳𑀻𑀲𑀤𑁆𑀤𑁂𑀦 ‘‘𑀲𑀓𑁆𑀓𑀸’’𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀺𑀁 𑀲𑀓𑁆𑀓𑁂𑀲𑀼 𑀚𑀦𑀧𑀤𑁂. 𑀫𑀳𑀸𑀯𑀦𑁂𑀢𑀺 𑀲𑀬𑀁𑀚𑀸𑀢𑁂 𑀅𑀭𑁄𑀧𑀺𑀢𑁂 𑀳𑀺𑀫𑀯𑀦𑁆𑀢𑁂𑀦 𑀲𑀤𑁆𑀥𑀺𑀁 𑀏𑀓𑀸𑀩𑀤𑁆𑀥𑁂 𑀫𑀳𑀢𑀺 𑀯𑀦𑁂. 𑀲𑀩𑁆𑀩𑁂𑀳𑁂𑀯 𑀅𑀭𑀳𑀦𑁆𑀢𑁂𑀳𑀻𑀢𑀺 𑀇𑀫𑀁 𑀲𑀼𑀢𑁆𑀢𑀁 𑀓𑀣𑀺𑀢𑀤𑀺𑀯𑀲𑁂𑀬𑁂𑀯 𑀧𑀢𑁆𑀢𑀅𑀭𑀳𑀢𑁆𑀢𑁂𑀳𑀺.

𑀢𑀢𑁆𑀭𑀸𑀬𑀁 𑀅𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀲𑀸𑀓𑀺𑀬𑀓𑁄𑀮𑀺𑀬𑀸 𑀓𑀺𑀭 𑀓𑀧𑀺𑀮𑀯𑀢𑁆𑀣𑀼𑀦𑀕𑀭𑀲𑁆𑀲 𑀘 𑀓𑁄𑀮𑀺𑀬𑀦𑀕𑀭𑀲𑁆𑀲 𑀘 𑀅𑀦𑁆𑀢𑀭𑁂 𑀭𑁄𑀳𑀺𑀡𑀺𑀁 𑀦𑀸𑀫 𑀦𑀤𑀺𑀁 𑀏𑀓𑁂𑀦𑁂𑀯 𑀆𑀯𑀭𑀡𑁂𑀦 𑀩𑀦𑁆𑀥𑀸𑀧𑁂𑀢𑁆𑀯𑀸 𑀲𑀲𑁆𑀲𑀸𑀦𑀺 𑀓𑀭𑁄𑀦𑁆𑀢𑀺, 𑀅𑀣 𑀚𑁂𑀝𑁆𑀞𑀫𑀽𑀮𑀫𑀸𑀲𑁂 𑀲𑀲𑁆𑀲𑁂𑀲𑀼 𑀫𑀺𑀮𑀸𑀬𑀦𑁆𑀢𑁂𑀲𑀼 𑀉𑀪𑀬𑀦𑀕𑀭𑀯𑀸𑀲𑀺𑀓𑀸𑀦𑀫𑁆𑀧𑀺 𑀓𑀫𑁆𑀫𑀓𑀭𑀸 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀢𑀢𑁆𑀣 𑀓𑁄𑀮𑀺𑀬𑀦𑀕𑀭𑀯𑀸𑀲𑀺𑀦𑁄 𑀆𑀳𑀁𑀲𑀼 𑁋 ‘‘𑀇𑀤𑀁 𑀉𑀤𑀓𑀁 𑀉𑀪𑀢𑁄 𑀳𑀭𑀺𑀬𑀫𑀸𑀦𑀁 𑀦 𑀢𑀼𑀫𑁆𑀳𑀸𑀓𑀁 𑀦 𑀅𑀫𑁆𑀳𑀸𑀓𑀁 𑀧𑀳𑁄𑀲𑁆𑀲𑀢𑀺, 𑀅𑀫𑁆𑀳𑀸𑀓𑀁 𑀧𑀦 𑀲𑀲𑁆𑀲𑀁 𑀏𑀓𑁂𑀦 𑀉𑀤𑀓𑁂𑀦𑁂𑀯 𑀦𑀺𑀧𑁆𑀨𑀚𑁆𑀚𑀺𑀲𑁆𑀲𑀢𑀺, 𑀇𑀤𑀁 𑀉𑀤𑀓𑀁 𑀅𑀫𑁆𑀳𑀸𑀓𑀁 𑀤𑁂𑀣𑀸’’𑀢𑀺. 𑀓𑀧𑀺𑀮𑀯𑀢𑁆𑀣𑀼𑀦𑀕𑀭𑀯𑀸𑀲𑀺𑀦𑁄 𑀆𑀳𑀁𑀲𑀼 𑁋 ‘‘𑀢𑀼𑀫𑁆𑀳𑁂𑀲𑀼 𑀓𑁄𑀝𑁆𑀞𑁂 𑀧𑀽𑀭𑁂𑀢𑁆𑀯𑀸 𑀞𑀺𑀢𑁂𑀲𑀼 𑀫𑀬𑀁 𑀭𑀢𑁆𑀢𑀲𑀼𑀯𑀡𑁆𑀡𑀦𑀻𑀮𑀫𑀡𑀺𑀓𑀸𑀴𑀓𑀳𑀸𑀧𑀡𑁂 𑀘 𑀕𑀳𑁂𑀢𑁆𑀯𑀸 𑀧𑀘𑁆𑀙𑀺𑀧𑀲𑀺𑀩𑁆𑀩𑀓𑀸𑀤𑀺𑀳𑀢𑁆𑀣𑀸 𑀦 𑀲𑀓𑁆𑀔𑀺𑀲𑁆𑀲𑀸𑀫 𑀢𑀼𑀫𑁆𑀳𑀸𑀓𑀁 𑀖𑀭𑀤𑁆𑀯𑀸𑀭𑁂 𑀯𑀺𑀘𑀭𑀺𑀢𑀼𑀁, 𑀅𑀫𑁆𑀳𑀸𑀓𑀫𑁆𑀧𑀺 𑀲𑀲𑁆𑀲𑀁 𑀏𑀓𑁂𑀦𑁂𑀯 𑀉𑀤𑀓𑁂𑀦 𑀦𑀺𑀧𑁆𑀨𑀚𑁆𑀚𑀺𑀲𑁆𑀲𑀢𑀺, 𑀇𑀤𑀁 𑀉𑀤𑀓𑀁 𑀅𑀫𑁆𑀳𑀸𑀓𑀁 𑀤𑁂𑀣𑀸’’𑀢𑀺. ‘‘𑀦 𑀫𑀬𑀁 𑀤𑀲𑁆𑀲𑀸𑀫𑀸’’𑀢𑀺. ‘‘𑀫𑀬𑀫𑁆𑀧𑀺 𑀦 𑀤𑀲𑁆𑀲𑀸𑀫𑀸’’𑀢𑀺. 𑀏𑀯𑀁 𑀓𑀮𑀳𑀁 𑀯𑀟𑁆𑀠𑁂𑀢𑁆𑀯𑀸 𑀏𑀓𑁄 𑀉𑀝𑁆𑀞𑀸𑀬 𑀏𑀓𑀲𑁆𑀲 𑀧𑀳𑀸𑀭𑀁 𑀅𑀤𑀸𑀲𑀺, 𑀲𑁄𑀧𑀺 𑀅𑀜𑁆𑀜𑀲𑁆𑀲𑀸𑀢𑀺 𑀏𑀯𑀁 𑀅𑀜𑁆𑀜𑀫𑀜𑁆𑀜𑀁 𑀧𑀳𑀭𑀺𑀢𑁆𑀯𑀸 𑀭𑀸𑀚𑀓𑀼𑀮𑀸𑀦𑀁 𑀚𑀸𑀢𑀺𑀁 𑀖𑀝𑁆𑀝𑁂𑀢𑁆𑀯𑀸 𑀓𑀮𑀳𑀁 𑀯𑀟𑁆𑀠𑀬𑀺𑀁𑀲𑀼.

𑀓𑁄𑀮𑀺𑀬𑀓𑀫𑁆𑀫𑀓𑀭𑀸 𑀯𑀤𑀦𑁆𑀢𑀺 𑁋 ‘‘𑀢𑀼𑀫𑁆𑀳𑁂 𑀓𑀧𑀺𑀮𑀯𑀢𑁆𑀣𑀼𑀯𑀸𑀲𑀺𑀓𑁂 𑀕𑀳𑁂𑀢𑁆𑀯𑀸 𑀕𑀚𑁆𑀚𑀣, 𑀬𑁂 𑀲𑁄𑀡𑀲𑀺𑀗𑁆𑀕𑀸𑀮𑀸𑀤𑀬𑁄 𑀯𑀺𑀬 𑀅𑀢𑁆𑀢𑀦𑁄 𑀪𑀕𑀺𑀦𑀻𑀳𑀺 𑀲𑀤𑁆𑀥𑀺𑀁 𑀲𑀁𑀯𑀲𑀺𑀁𑀲𑀼. 𑀏𑀢𑁂𑀲𑀁 𑀳𑀢𑁆𑀣𑀺𑀦𑁄 𑀘 𑀅𑀲𑁆𑀲𑀸 𑀘 𑀨𑀮𑀓𑀸𑀯𑀼𑀥𑀸𑀦𑀺 𑀘 𑀅𑀫𑁆𑀳𑀸𑀓𑀁 𑀓𑀺𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺? 𑀲𑀸𑀓𑀺𑀬𑀓𑀫𑁆𑀫𑀓𑀭𑀸𑀧𑀺 𑀯𑀤𑀦𑁆𑀢𑀺 𑁋 ‘‘𑀢𑀼𑀫𑁆𑀳𑁂 𑀤𑀸𑀦𑀺 𑀓𑀼𑀝𑁆𑀞𑀺𑀦𑁄 𑀤𑀸𑀭𑀓𑁂 𑀕𑀳𑁂𑀢𑁆𑀯𑀸 𑀕𑀚𑁆𑀚𑀣, 𑀬𑁂 𑀅𑀦𑀸𑀣𑀸 𑀦𑀺𑀕𑁆𑀕𑀢𑀺𑀓𑀸 𑀢𑀺𑀭𑀘𑁆𑀙𑀸𑀦𑀸 𑀯𑀺𑀬 𑀓𑁄𑀮𑀭𑀼𑀓𑁆𑀔𑁂 𑀯𑀲𑀺𑀁𑀲𑀼, 𑀏𑀢𑁂𑀲𑀁 𑀳𑀢𑁆𑀣𑀺𑀦𑁄 𑀘 𑀅𑀲𑁆𑀲𑀸 𑀘 𑀨𑀮𑀓𑀸𑀯𑀼𑀥𑀸𑀦𑀺 𑀘 𑀅𑀫𑁆𑀳𑀸𑀓𑀁 𑀓𑀺𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺? 𑀢𑁂 𑀕𑀦𑁆𑀢𑁆𑀯𑀸 𑀢𑀲𑁆𑀫𑀺𑀁 𑀓𑀫𑁆𑀫𑁂 𑀦𑀺𑀬𑀼𑀢𑁆𑀢𑀅𑀫𑀘𑁆𑀘𑀸𑀦𑀁 𑀓𑀣𑁂𑀲𑀼𑀁, 𑀅𑀫𑀘𑁆𑀘𑀸 𑀭𑀸𑀚𑀓𑀼𑀮𑀸𑀦𑀁 𑀓𑀣𑁂𑀲𑀼𑀁, 𑀢𑀢𑁄 𑀲𑀸𑀓𑀺𑀬𑀸 𑁋 ‘‘𑀪𑀕𑀺𑀦𑀻𑀳𑀺 𑀲𑀤𑁆𑀥𑀺𑀁 𑀲𑀁𑀯𑀸𑀲𑀺𑀓𑀸𑀦𑀁 𑀣𑀸𑀫𑀜𑁆𑀘 𑀩𑀮𑀜𑁆𑀘 𑀤𑀲𑁆𑀲𑁂𑀲𑁆𑀲𑀸𑀫𑀸’’𑀢𑀺 𑀬𑀼𑀤𑁆𑀥𑀲𑀚𑁆𑀚𑀸 𑀦𑀺𑀓𑁆𑀔𑀫𑀺𑀁𑀲𑀼. 𑀓𑁄𑀮𑀺𑀬𑀸𑀧𑀺 𑁋 ‘‘𑀓𑁄𑀮𑀭𑀼𑀓𑁆𑀔𑀯𑀸𑀲𑀻𑀦𑀁 𑀣𑀸𑀫𑀜𑁆𑀘 𑀩𑀮𑀜𑁆𑀘 𑀤𑀲𑁆𑀲𑁂𑀲𑁆𑀲𑀸𑀫𑀸’’𑀢𑀺 𑀬𑀼𑀤𑁆𑀥𑀲𑀚𑁆𑀚𑀸 𑀦𑀺𑀓𑁆𑀔𑀫𑀺𑀁𑀲𑀼.

𑀪𑀕𑀯𑀸𑀧𑀺 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑁂𑀯 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀇𑀫𑁂 𑀏𑀯𑀁 𑀬𑀼𑀤𑁆𑀥𑀲𑀚𑁆𑀚𑁂 𑀦𑀺𑀓𑁆𑀔𑀫𑀦𑁆𑀢𑁂 𑀅𑀤𑁆𑀤𑀲. 𑀤𑀺𑀲𑁆𑀯𑀸 𑁋 ‘‘𑀫𑀬𑀺 𑀕𑀢𑁂 𑀅𑀬𑀁 𑀓𑀮𑀳𑁄 𑀯𑀽𑀧𑀲𑀫𑀺𑀲𑁆𑀲𑀢𑀺 𑀦𑀼 𑀔𑁄 𑀉𑀤𑀸𑀳𑀼 𑀦𑁄’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 𑁋 ‘‘𑀅𑀳𑀫𑁂𑀢𑁆𑀣 𑀕𑀦𑁆𑀢𑁆𑀯𑀸 𑀓𑀮𑀳𑀯𑀽𑀧𑀲𑀫𑀦𑀢𑁆𑀣𑀁 𑀢𑀻𑀡𑀺 𑀚𑀸𑀢𑀓𑀸𑀦𑀺 𑀓𑀣𑁂𑀲𑁆𑀲𑀸𑀫𑀺, 𑀢𑀢𑁄 𑀓𑀮𑀳𑁄 𑀯𑀽𑀧𑀲𑀫𑀺𑀲𑁆𑀲𑀢𑀺. 𑀅𑀣 𑀲𑀸𑀫𑀕𑁆𑀕𑀺𑀤𑀻𑀧𑀦𑀢𑁆𑀣𑀸𑀬 𑀤𑁆𑀯𑁂 𑀚𑀸𑀢𑀓𑀸𑀦𑀺 𑀓𑀣𑁂𑀢𑁆𑀯𑀸 𑀅𑀢𑁆𑀢𑀤𑀡𑁆𑀟𑀲𑀼𑀢𑁆𑀢𑀁 𑀤𑁂𑀲𑁂𑀲𑁆𑀲𑀸𑀫𑀺. 𑀤𑁂𑀲𑀦𑀁 𑀲𑀼𑀢𑁆𑀯𑀸 𑀉𑀪𑀬𑀦𑀕𑀭𑀯𑀸𑀲𑀺𑀦𑁄𑀧𑀺 𑀅𑀟𑁆𑀠𑀢𑀺𑀬𑀸𑀦𑀺 𑀅𑀟𑁆𑀠𑀢𑀺𑀬𑀸𑀦𑀺 𑀓𑀼𑀫𑀸𑀭𑀲𑀢𑀸𑀦𑀺 𑀤𑀲𑁆𑀲𑀦𑁆𑀢𑀺, 𑀅𑀳𑀁 𑀢𑁂 𑀧𑀩𑁆𑀩𑀚𑀺𑀲𑁆𑀲𑀸𑀫𑀺, 𑀢𑀤𑀸 𑀫𑀳𑀸𑀲𑀫𑀸𑀕𑀫𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀫𑀓𑀸𑀲𑀺. 𑀢𑀲𑁆𑀫𑀸 𑀇𑀫𑁂𑀲𑀼 𑀬𑀼𑀤𑁆𑀥𑀲𑀚𑁆𑀚𑁂𑀲𑀼 𑀦𑀺𑀓𑁆𑀔𑀫𑀦𑁆𑀢𑁂𑀲𑀼 𑀓𑀲𑁆𑀲𑀘𑀺 𑀅𑀦𑀸𑀭𑁄𑀘𑁂𑀢𑁆𑀯𑀸 𑀲𑀬𑀫𑁂𑀯 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀕𑀦𑁆𑀢𑁆𑀯𑀸 𑀤𑁆𑀯𑀺𑀦𑁆𑀦𑀁 𑀲𑁂𑀦𑀸𑀦𑀁 𑀅𑀦𑁆𑀢𑀭𑁂 𑀆𑀓𑀸𑀲𑁂 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀙𑀩𑁆𑀩𑀡𑁆𑀡𑀭𑀲𑁆𑀫𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀦𑀺𑀲𑀻𑀤𑀺.

𑀓𑀧𑀺𑀮𑀯𑀢𑁆𑀣𑀼𑀯𑀸𑀲𑀺𑀦𑁄 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸𑀯 𑁋 ‘‘𑀅𑀫𑁆𑀳𑀸𑀓𑀁 𑀜𑀸𑀢𑀺𑀲𑁂𑀝𑁆𑀞𑁄 𑀲𑀢𑁆𑀣𑀸 𑀆𑀕𑀢𑁄, 𑀤𑀺𑀝𑁆𑀞𑁄 𑀦𑀼 𑀔𑁄 𑀢𑁂𑀦 𑀅𑀫𑁆𑀳𑀸𑀓𑀁 𑀓𑀮𑀳𑀓𑀸𑀭𑀡𑀪𑀸𑀯𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑁋 ‘‘𑀦 𑀔𑁄 𑀧𑀦 𑀲𑀓𑁆𑀓𑀸 𑀪𑀕𑀯𑀢𑀺 𑀆𑀕𑀢𑁂 𑀅𑀫𑁆𑀳𑁂𑀳𑀺 𑀧𑀭𑀲𑁆𑀲 𑀲𑀭𑀻𑀭𑁂 𑀲𑀢𑁆𑀣𑀁 𑀧𑀸𑀢𑁂𑀢𑀼𑀁, 𑀓𑁄𑀮𑀺𑀬𑀦𑀕𑀭𑀯𑀸𑀲𑀺𑀦𑁄 𑀅𑀫𑁆𑀳𑁂 𑀳𑀦𑀦𑁆𑀢𑀼 𑀯𑀸 𑀧𑀘𑀦𑁆𑀢𑀼 𑀯𑀸’’𑀢𑀺 𑀆𑀯𑀼𑀥𑀸𑀦𑀺 𑀙𑀟𑁆𑀟𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀓𑁄𑀮𑀺𑀬𑀦𑀕𑀭𑀯𑀸𑀲𑀺𑀦𑁄𑀧𑀺 𑀢𑀣𑁂𑀯 𑀘𑀺𑀦𑁆𑀢𑁂𑀢𑁆𑀯𑀸 𑀆𑀯𑀼𑀥𑀸𑀦𑀺 𑀙𑀟𑁆𑀟𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼.

𑀪𑀕𑀯𑀸 𑀚𑀸𑀦𑀦𑁆𑀢𑁄𑀯 𑁋 ‘‘𑀓𑀲𑁆𑀫𑀸 𑀆𑀕𑀢𑀢𑁆𑀣 𑀫𑀳𑀸𑀭𑀸𑀚𑀸’’𑀢𑀺 𑀧𑀼𑀘𑁆𑀙𑀺. 𑀪𑀕𑀯𑀸, 𑀦 𑀢𑀺𑀢𑁆𑀣𑀓𑀻𑀴𑀸𑀬 𑀦 𑀧𑀩𑁆𑀩𑀢𑀓𑀻𑀴𑀸𑀬 𑀦 𑀦𑀤𑀻𑀓𑀻𑀴𑀸𑀬 𑀦 𑀕𑀺𑀭𑀺𑀤𑀲𑁆𑀲𑀦𑀢𑁆𑀣𑀁, 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀲𑀗𑁆𑀕𑀸𑀫𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸 𑀆𑀕𑀢𑀫𑁆𑀳𑀸𑀢𑀺. 𑀓𑀺𑀁 𑀦𑀺𑀲𑁆𑀲𑀸𑀬 𑀯𑁄 𑀓𑀮𑀳𑁄 𑀫𑀳𑀸𑀭𑀸𑀚𑀸𑀢𑀺? 𑀉𑀤𑀓𑀁, 𑀪𑀦𑁆𑀢𑁂𑀢𑀺. 𑀉𑀤𑀓𑀁 𑀓𑀺𑀁 𑀅𑀕𑁆𑀖𑀢𑀺 𑀫𑀳𑀸𑀭𑀸𑀚𑀸𑀢𑀺? 𑀅𑀧𑁆𑀧𑀕𑁆𑀖𑀁, 𑀪𑀦𑁆𑀢𑁂𑀢𑀺. 𑀧𑀣𑀯𑀻 𑀦𑀸𑀫 𑀓𑀺𑀁 𑀅𑀕𑁆𑀖𑀢𑀺 𑀫𑀳𑀸𑀭𑀸𑀚𑀸𑀢𑀺? 𑀅𑀦𑀕𑁆𑀖𑀸, 𑀪𑀦𑁆𑀢𑁂𑀢𑀺. 𑀔𑀢𑁆𑀢𑀺𑀬𑀸 𑀓𑀺𑀁 𑀅𑀕𑁆𑀖𑀦𑁆𑀢𑀺 𑀫𑀳𑀸𑀭𑀸𑀚𑀸𑀢𑀺? 𑀔𑀢𑁆𑀢𑀺𑀬𑀸 𑀦𑀸𑀫 𑀅𑀦𑀕𑁆𑀖𑀸 𑀪𑀦𑁆𑀢𑁂𑀢𑀺. 𑀅𑀧𑁆𑀧𑀫𑀽𑀮𑀓𑀁 𑀉𑀤𑀓𑀁 𑀦𑀺𑀲𑁆𑀲𑀸𑀬 𑀓𑀺𑀫𑀢𑁆𑀣𑀁 𑀅𑀦𑀕𑁆𑀖𑁂 𑀔𑀢𑁆𑀢𑀺𑀬𑁂 𑀦𑀸𑀲𑁂𑀣, 𑀫𑀳𑀸𑀭𑀸𑀚𑀸𑀢𑀺? ‘‘𑀓𑀮𑀳𑁂 𑀅𑀲𑁆𑀲𑀸𑀤𑁄 𑀦𑀸𑀫 𑀦𑀢𑁆𑀣𑀺, 𑀓𑀮𑀳𑀯𑀲𑁂𑀦 𑀫𑀳𑀸𑀭𑀸𑀚𑀸 𑀅𑀝𑁆𑀞𑀸𑀦𑁂 𑀯𑁂𑀭𑀁 𑀓𑀢𑁆𑀯𑀸 𑀏𑀓𑀸𑀬 𑀭𑀼𑀓𑁆𑀔𑀤𑁂𑀯𑀢𑀸𑀬 𑀓𑀸𑀴𑀲𑀻𑀳𑁂𑀦 𑀲𑀤𑁆𑀥𑀺𑀁 𑀩𑀤𑁆𑀥𑀸𑀖𑀸𑀢𑁄 𑀲𑀓𑀮𑀫𑁆𑀧𑀺 𑀇𑀫𑀁 𑀓𑀧𑁆𑀧𑀁 𑀅𑀦𑀼𑀧𑁆𑀧𑀢𑁆𑀢𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀨𑀦𑁆𑀤𑀦𑀚𑀸𑀢𑀓𑀁 𑀓𑀣𑁂𑀲𑀺. 𑀢𑀢𑁄 ‘‘𑀧𑀭𑀧𑀢𑁆𑀢𑀺𑀬𑁂𑀦 𑀦𑀸𑀫 𑀫𑀳𑀸𑀭𑀸𑀚𑀸 𑀦 𑀪𑀯𑀺𑀢𑀩𑁆𑀩𑀁. 𑀧𑀭𑀧𑀢𑁆𑀢𑀺𑀬𑀸 𑀳𑀼𑀢𑁆𑀯𑀸 𑀳𑀺 𑀏𑀓𑀲𑁆𑀲 𑀲𑀲𑀓𑀲𑁆𑀲 𑀓𑀣𑀸𑀬 𑀢𑀺𑀬𑁄𑀚𑀦𑀲𑀳𑀲𑁆𑀲𑀯𑀺𑀢𑁆𑀣𑀢𑁂 𑀳𑀺𑀫𑀯𑀦𑁆𑀢𑁂 𑀘𑀢𑀼𑀧𑁆𑀧𑀤𑀕𑀡𑀸 𑀫𑀳𑀸𑀲𑀫𑀼𑀤𑁆𑀤𑀁 𑀧𑀓𑁆𑀔𑀦𑁆𑀤𑀺𑀦𑁄 𑀅𑀳𑁂𑀲𑀼𑀁. 𑀢𑀲𑁆𑀫𑀸 𑀧𑀭𑀧𑀢𑁆𑀢𑀺𑀬𑁂𑀦 𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 𑀧𑀣𑀯𑀻𑀉𑀦𑁆𑀤𑁆𑀭𑀺𑀬𑀚𑀸𑀢𑀓𑀁 𑀓𑀣𑁂𑀲𑀺. 𑀢𑀢𑁄 𑁋 ‘‘𑀓𑀤𑀸𑀘𑀺, 𑀫𑀳𑀸𑀭𑀸𑀚𑀸, 𑀤𑀼𑀩𑁆𑀩𑀮𑁄𑀧𑀺 𑀫𑀳𑀩𑁆𑀩𑀮𑀲𑁆𑀲 𑀭𑀦𑁆𑀥𑀁 𑀯𑀺𑀯𑀭𑀁 𑀧𑀲𑁆𑀲𑀢𑀺, 𑀓𑀤𑀸𑀘𑀺 𑀫𑀳𑀩𑁆𑀩𑀮𑁄 𑀤𑀼𑀩𑁆𑀩𑀮𑀲𑁆𑀲. 𑀮𑀝𑀼𑀓𑀺𑀓𑀸𑀧𑀺 𑀳𑀺 𑀲𑀓𑀼𑀡𑀺𑀓𑀸 𑀳𑀢𑁆𑀣𑀺𑀦𑀸𑀕𑀁 𑀖𑀸𑀢𑁂𑀲𑀻’’𑀢𑀺 𑀯𑀢𑁆𑀯𑀸 𑀮𑀝𑀼𑀓𑀺𑀓𑀚𑀸𑀢𑀓𑀁 𑀓𑀣𑁂𑀲𑀺. 𑀏𑀯𑀁 𑀓𑀮𑀳𑀯𑀽𑀧𑀲𑀫𑀢𑁆𑀣𑀸𑀬 𑀢𑀻𑀡𑀺 𑀚𑀸𑀢𑀓𑀸𑀦𑀺 𑀓𑀣𑁂𑀢𑁆𑀯𑀸 𑀲𑀸𑀫𑀕𑁆𑀕𑀺𑀧𑀭𑀺𑀤𑀻𑀧𑀦𑀢𑁆𑀣𑀸𑀬 𑀤𑁆𑀯𑁂 𑀚𑀸𑀢𑀓𑀸𑀦𑀺 𑀓𑀣𑁂𑀲𑀺. 𑀓𑀣𑀁? 𑀲𑀫𑀕𑁆𑀕𑀸𑀦𑀜𑁆𑀳𑀺 𑀫𑀳𑀸𑀭𑀸𑀚𑀸 𑀓𑁄𑀘𑀺 𑀑𑀢𑀸𑀭𑀁 𑀦𑀸𑀫 𑀧𑀲𑁆𑀲𑀺𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀯𑀢𑁆𑀯𑀸 𑀭𑀼𑀓𑁆𑀔𑀥𑀫𑁆𑀫𑀚𑀸𑀢𑀓𑀁 𑀓𑀣𑁂𑀲𑀺. 𑀢𑀢𑁄 ‘‘𑀲𑀫𑀕𑁆𑀕𑀸𑀦𑀁 𑀫𑀳𑀸𑀭𑀸𑀚𑀸 𑀓𑁄𑀘𑀺 𑀯𑀺𑀯𑀭𑀁 𑀧𑀲𑁆𑀲𑀺𑀢𑀼𑀁 𑀦𑀸𑀲𑀓𑁆𑀔𑀺. 𑀬𑀤𑀸 𑀧𑀦 𑀅𑀜𑁆𑀜𑀫𑀜𑁆𑀜𑀁 𑀯𑀺𑀯𑀸𑀤𑀫𑀓𑀁𑀲𑀼, 𑀅𑀣 𑀢𑁂 𑀦𑁂𑀲𑀸𑀤𑀧𑀼𑀢𑁆𑀢𑁄 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑁆𑀯𑀸 𑀆𑀤𑀸𑀬 𑀕𑀢𑁄. 𑀯𑀺𑀯𑀸𑀤𑁂 𑀅𑀲𑁆𑀲𑀸𑀤𑁄 𑀦𑀸𑀫 𑀦𑀢𑁆𑀣𑀻’’𑀢𑀺 𑀯𑀢𑁆𑀯𑀸 𑀯𑀝𑁆𑀝𑀓𑀚𑀸𑀢𑀓𑀁 𑀓𑀣𑁂𑀲𑀺. 𑀏𑀯𑀁 𑀇𑀫𑀸𑀦𑀺 𑀧𑀜𑁆𑀘 𑀚𑀸𑀢𑀓𑀸𑀦𑀺 𑀓𑀣𑁂𑀢𑁆𑀯𑀸 𑀅𑀯𑀲𑀸𑀦𑁂 𑀅𑀢𑁆𑀢𑀤𑀡𑁆𑀟𑀲𑀼𑀢𑁆𑀢𑀁 𑀓𑀣𑁂𑀲𑀺.

𑀭𑀸𑀚𑀸𑀦𑁄 𑀧𑀲𑀦𑁆𑀦𑀸 𑁋 ‘‘𑀲𑀘𑁂 𑀲𑀢𑁆𑀣𑀸 𑀦𑀸𑀕𑀫𑀺𑀲𑁆𑀲, 𑀫𑀬𑀁 𑀲𑀳𑀢𑁆𑀣𑀸 𑀅𑀜𑁆𑀜𑀫𑀜𑁆𑀜𑀁𑀬𑁂𑀯 𑀯𑀥𑀺𑀢𑁆𑀯𑀸 𑀮𑁄𑀳𑀺𑀢𑀦𑀤𑀺𑀁 𑀧𑀯𑀢𑁆𑀢𑀬𑀺𑀲𑁆𑀲𑀸𑀫, 𑀅𑀫𑁆𑀳𑀸𑀓𑀁 𑀧𑀼𑀢𑁆𑀢𑀪𑀸𑀢𑀭𑁄 𑀕𑁂𑀳𑀤𑁆𑀯𑀸𑀭𑁂 𑀦 𑀧𑀲𑁆𑀲𑁂𑀬𑁆𑀬𑀸𑀫, 𑀲𑀸𑀲𑀦𑀧𑀝𑀺𑀲𑀸𑀲𑀦𑀫𑁆𑀧𑀺 𑀦𑁄 𑀆𑀳𑀭𑀡𑀓𑁄 𑀦 𑀪𑀯𑀺𑀲𑁆𑀲𑀢𑀺. 𑀲𑀢𑁆𑀣𑀸𑀭𑀁 𑀦𑀺𑀲𑁆𑀲𑀸𑀬 𑀦𑁄 𑀚𑀻𑀯𑀺𑀢𑀁 𑀮𑀤𑁆𑀥𑀁. 𑀲𑀘𑁂 𑀧𑀦 𑀲𑀢𑁆𑀣𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀺𑀲𑁆𑀲, 𑀤𑁆𑀯𑀺𑀲𑀳𑀲𑁆𑀲𑀤𑀻𑀧𑀧𑀭𑀺𑀯𑀸𑀭𑁂𑀲𑀼 𑀘𑀢𑀽𑀲𑀼 𑀫𑀳𑀸𑀤𑀻𑀧𑁂𑀲𑀼 𑀭𑀚𑁆𑀚𑀫𑀲𑁆𑀲 𑀳𑀢𑁆𑀣𑀕𑀢𑀁 𑀅𑀪𑀯𑀺𑀲𑁆𑀲, 𑀅𑀢𑀺𑀭𑁂𑀓𑀲𑀳𑀲𑁆𑀲𑀁 𑀔𑁄 𑀧𑀦𑀲𑁆𑀲 𑀧𑀼𑀢𑁆𑀢𑀸 𑀅𑀪𑀯𑀺𑀲𑁆𑀲𑀁𑀲𑀼, 𑀢𑀢𑁄 𑀔𑀢𑁆𑀢𑀺𑀬𑀧𑀭𑀺𑀯𑀸𑀭𑁄𑀯 𑀅𑀯𑀺𑀘𑀭𑀺𑀲𑁆𑀲. 𑀢𑀁 𑀔𑁄 𑀧𑀦𑁂𑀲 𑀲𑀫𑁆𑀧𑀢𑁆𑀢𑀺𑀁 𑀧𑀳𑀸𑀬 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀫𑁆𑀩𑁄𑀥𑀺𑀁 𑀧𑀢𑁆𑀢𑁄, 𑀇𑀤𑀸𑀦𑀺𑀧𑀺 𑀔𑀢𑁆𑀢𑀺𑀬𑀧𑀭𑀺𑀯𑀸𑀭𑁄𑀬𑁂𑀯 𑀯𑀺𑀘𑀭𑀢𑀽’’𑀢𑀺 𑀉𑀪𑀬𑀦𑀕𑀭𑀯𑀸𑀲𑀺𑀦𑁄 𑀅𑀟𑁆𑀠𑀢𑀺𑀬𑀸𑀦𑀺 𑀅𑀟𑁆𑀠𑀢𑀺𑀬𑀸𑀦𑀺 𑀓𑀼𑀫𑀸𑀭𑀲𑀢𑀸𑀦𑀺 𑀅𑀤𑀁𑀲𑀼. 𑀪𑀕𑀯𑀸 𑀢𑁂 𑀧𑀩𑁆𑀩𑀸𑀚𑁂𑀢𑁆𑀯𑀸 𑀫𑀳𑀸𑀯𑀦𑀁 𑀅𑀕𑀫𑀸𑀲𑀺. 𑀢𑁂𑀲𑀁 𑀕𑀭𑀼𑀕𑀸𑀭𑀯𑀯𑀲𑁂𑀦 𑀦 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀧𑀩𑁆𑀩𑀚𑀺𑀢𑀸𑀦𑀁 𑀅𑀦𑀪𑀺𑀭𑀢𑀺 𑀉𑀧𑁆𑀧𑀚𑁆𑀚𑀺. 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀬𑁄𑀧𑀺 𑀦𑁂𑀲𑀁 ‘‘𑀅𑀬𑁆𑀬𑀧𑀼𑀢𑁆𑀢𑀸 𑀉𑀓𑁆𑀓𑀡𑁆𑀞𑀦𑁆𑀢𑀼, 𑀖𑀭𑀸𑀯𑀸𑀲𑁄 𑀦 𑀲𑀡𑁆𑀞𑀸𑀢𑀻’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀲𑀸𑀲𑀦𑀁 𑀧𑁂𑀲𑁂𑀦𑁆𑀢𑀺. 𑀢𑁂 𑀅𑀢𑀺𑀭𑁂𑀓𑀢𑀭𑀁 𑀉𑀓𑁆𑀓𑀡𑁆𑀞𑀺𑀁𑀲𑀼.

𑀪𑀕𑀯𑀸 𑀆𑀯𑀚𑁆𑀚𑀦𑁆𑀢𑁄 𑀢𑁂𑀲𑀁 𑀅𑀦𑀪𑀺𑀭𑀢𑀪𑀸𑀯𑀁 𑀜𑀢𑁆𑀯𑀸 ‘‘𑀇𑀫𑁂 𑀪𑀺𑀓𑁆𑀔𑀽 𑀫𑀸𑀤𑀺𑀲𑁂𑀦 𑀩𑀼𑀤𑁆𑀥𑁂𑀦 𑀲𑀤𑁆𑀥𑀺𑀁 𑀏𑀓𑀢𑁄 𑀯𑀲𑀦𑁆𑀢𑀸 𑀉𑀓𑁆𑀓𑀡𑁆𑀞𑀦𑁆𑀢𑀺, 𑀳𑀦𑁆𑀤 𑀦𑁂𑀲𑀁 𑀓𑀼𑀡𑀸𑀮𑀤𑀳𑀲𑁆𑀲 𑀯𑀡𑁆𑀡𑀁 𑀓𑀣𑁂𑀢𑁆𑀯𑀸 𑀢𑀢𑁆𑀣 𑀦𑁂𑀢𑁆𑀯𑀸 𑀅𑀦𑀪𑀺𑀭𑀢𑀺𑀁 𑀯𑀺𑀦𑁄𑀤𑁂𑀲𑁆𑀲𑀸𑀫𑀻’’𑀢𑀺 𑀓𑀼𑀡𑀸𑀮𑀤𑀳𑀲𑁆𑀲 𑀯𑀡𑁆𑀡𑀁 𑀓𑀣𑁂𑀲𑀺. 𑀢𑁂 𑀢𑀁 𑀤𑀝𑁆𑀞𑀼𑀓𑀸𑀫𑀸 𑀅𑀳𑁂𑀲𑀼𑀁. 𑀤𑀝𑁆𑀞𑀼𑀓𑀸𑀫𑀢𑁆𑀣, 𑀪𑀺𑀓𑁆𑀔𑀯𑁂, 𑀓𑀼𑀡𑀸𑀮𑀤𑀳𑀦𑁆𑀢𑀺? 𑀆𑀫 𑀪𑀕𑀯𑀸𑀢𑀺. 𑀬𑀤𑀺 𑀏𑀯𑀁, 𑀏𑀣, 𑀕𑀘𑁆𑀙𑀸𑀫𑀸𑀢𑀺. 𑀇𑀤𑁆𑀥𑀺𑀫𑀦𑁆𑀢𑀸𑀦𑀁 𑀪𑀕𑀯𑀸 𑀕𑀫𑀦𑀝𑁆𑀞𑀸𑀦𑀁 𑀫𑀬𑀁 𑀓𑀣𑀁 𑀕𑀫𑀺𑀲𑁆𑀲𑀸𑀫𑀸𑀢𑀺? 𑀢𑀼𑀫𑁆𑀳𑁂 𑀕𑀦𑁆𑀢𑀼𑀓𑀸𑀫𑀸 𑀳𑁄𑀣, 𑀅𑀳𑀁 𑀫𑀫𑀸𑀦𑀼𑀪𑀸𑀯𑁂𑀦 𑀕𑀳𑁂𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀻𑀢𑀺. 𑀲𑀸𑀥𑀼, 𑀪𑀦𑁆𑀢𑁂𑀢𑀺. 𑀅𑀣 𑀪𑀕𑀯𑀸 𑀧𑀜𑁆𑀘 𑀪𑀺𑀓𑁆𑀔𑀼𑀲𑀢𑀸𑀦𑀺 𑀕𑀳𑁂𑀢𑁆𑀯𑀸 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸 𑀓𑀼𑀡𑀸𑀮𑀤𑀳𑁂 𑀧𑀢𑀺𑀝𑁆𑀞𑀸𑀬 𑀢𑁂 𑀪𑀺𑀓𑁆𑀔𑀽 𑀆𑀳 𑁋 ‘‘𑀪𑀺𑀓𑁆𑀔𑀯𑁂, 𑀇𑀫𑀲𑁆𑀫𑀺𑀁 𑀓𑀼𑀡𑀸𑀮𑀤𑀳𑁂 𑀬𑁂𑀲𑀁 𑀫𑀘𑁆𑀙𑀸𑀦𑀁 𑀦𑀸𑀫𑀁 𑀦 𑀚𑀸𑀦𑀸𑀣, 𑀢𑁂𑀲𑀁 𑀦𑀸𑀫𑀁 𑀧𑀼𑀘𑁆𑀙𑀣𑀸’’𑀢𑀺.

𑀢𑁂 𑀧𑀼𑀘𑁆𑀙𑀺𑀁𑀲𑀼, 𑀪𑀕𑀯𑀸 𑀧𑀼𑀘𑁆𑀙𑀺𑀢𑀧𑀼𑀘𑁆𑀙𑀺𑀢𑀁 𑀓𑀣𑁂𑀲𑀺. 𑀦 𑀓𑁂𑀯𑀮𑀁 𑀫𑀘𑁆𑀙𑀸𑀦𑀁𑀬𑁂𑀯, 𑀢𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀭𑀼𑀓𑁆𑀔𑀸𑀦𑀫𑁆𑀧𑀺 𑀧𑀩𑁆𑀩𑀢𑀧𑀸𑀤𑁂 𑀤𑁆𑀯𑀺𑀧𑀤𑀘𑀢𑀼𑀧𑁆𑀧𑀤𑀲𑀓𑀼𑀡𑀸𑀦𑀫𑁆𑀧𑀺 𑀦𑀸𑀫𑀸𑀦𑀺 𑀧𑀼𑀘𑁆𑀙𑀸𑀧𑁂𑀢𑁆𑀯𑀸 𑀓𑀣𑁂𑀲𑀺. 𑀅𑀣 𑀤𑁆𑀯𑀻𑀳𑀺 𑀲𑀓𑀼𑀡𑁂𑀳𑀺 𑀫𑀼𑀔𑀢𑀼𑀡𑁆𑀟𑀓𑁂𑀦 𑀟𑀁𑀲𑀺𑀢𑁆𑀯𑀸 𑀕𑀳𑀺𑀢𑀤𑀡𑁆𑀟𑀓𑁂 𑀦𑀺𑀲𑀺𑀦𑁆𑀦𑁄 𑀓𑀼𑀡𑀸𑀮𑀲𑀓𑀼𑀡𑀭𑀸𑀚𑀸 𑀧𑀼𑀭𑀢𑁄 𑀧𑀘𑁆𑀙𑀢𑁄 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀲𑀓𑀼𑀡𑀲𑀗𑁆𑀖𑀧𑀭𑀺𑀯𑀼𑀢𑁄 𑀆𑀕𑀘𑁆𑀙𑀢𑀺. 𑀪𑀺𑀓𑁆𑀔𑀽 𑀢𑀁 𑀤𑀺𑀲𑁆𑀯𑀸 𑁋 ‘‘𑀏𑀲, 𑀪𑀦𑁆𑀢𑁂, 𑀇𑀫𑁂𑀲𑀁 𑀲𑀓𑀼𑀡𑀸𑀦𑀁 𑀭𑀸𑀚𑀸 𑀪𑀯𑀺𑀲𑁆𑀲𑀢𑀺, 𑀧𑀭𑀺𑀯𑀸𑀭𑀸 𑀏𑀢𑁂 𑀏𑀢𑀲𑁆𑀲𑀸’’𑀢𑀺 𑀫𑀜𑁆𑀜𑀸𑀫𑀸𑀢𑀺. 𑀏𑀯𑀫𑁂𑀯, 𑀪𑀺𑀓𑁆𑀔𑀯𑁂, 𑀅𑀬𑀫𑁆𑀧𑀺 𑀫𑀫 𑀯𑀁𑀲𑁄 𑀫𑀫 𑀧𑀯𑁂𑀡𑀻𑀢𑀺. 𑀇𑀤𑀸𑀦𑀺 𑀢𑀸𑀯 𑀫𑀬𑀁, 𑀪𑀦𑁆𑀢𑁂, 𑀏𑀢𑁂 𑀲𑀓𑀼𑀡𑁂 𑀧𑀲𑁆𑀲𑀸𑀫. 𑀬𑀁 𑀧𑀦 𑀪𑀕𑀯𑀸 ‘‘𑀅𑀬𑀫𑁆𑀧𑀺 𑀫𑀫 𑀯𑀁𑀲𑁄 𑀫𑀫 𑀧𑀯𑁂𑀡𑀻’’𑀢𑀺 𑀆𑀳, 𑀢𑀁 𑀲𑁄𑀢𑀼𑀓𑀸𑀫𑀫𑁆𑀳𑀸𑀢𑀺. 𑀲𑁄𑀢𑀼𑀓𑀸𑀫𑀢𑁆𑀣 𑀪𑀺𑀓𑁆𑀔𑀯𑁂𑀢𑀺? 𑀆𑀫, 𑀪𑀕𑀯𑀸𑀢𑀺. 𑀢𑁂𑀦 𑀳𑀺 𑀲𑀼𑀡𑀸𑀣𑀸𑀢𑀺 𑀢𑀻𑀳𑀺 𑀕𑀸𑀣𑀸𑀲𑀢𑁂𑀳𑀺 𑀫𑀡𑁆𑀟𑁂𑀢𑁆𑀯𑀸 𑀓𑀼𑀡𑀸𑀮𑀚𑀸𑀢𑀓𑀁 𑀓𑀣𑁂𑀦𑁆𑀢𑁄 𑀅𑀦𑀪𑀺𑀭𑀢𑀺𑀁 𑀯𑀺𑀦𑁄𑀤𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀲𑀩𑁆𑀩𑁂𑀧𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼, 𑀫𑀕𑁆𑀕𑁂𑀦𑁂𑀯 𑀘 𑀦𑁂𑀲𑀁 𑀇𑀤𑁆𑀥𑀺𑀧𑀺 𑀆𑀕𑀢𑀸. 𑀪𑀕𑀯𑀸 𑁋 ‘‘𑀳𑁄𑀢𑀼 𑀢𑀸𑀯 𑀏𑀢𑁆𑀢𑀓𑀁 𑀏𑀢𑁂𑀲𑀁 𑀪𑀺𑀓𑁆𑀔𑀽𑀦’’𑀦𑁆𑀢𑀺 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸 𑀫𑀳𑀸𑀯𑀦𑀫𑁂𑀯 𑀅𑀕𑀫𑀸𑀲𑀺. 𑀢𑁂𑀧𑀺 𑀪𑀺𑀓𑁆𑀔𑀽 𑀕𑀫𑀦𑀓𑀸𑀮𑁂 𑀤𑀲𑀩𑀮𑀲𑁆𑀲 𑀆𑀦𑀼𑀪𑀸𑀯𑁂𑀦 𑀕𑀦𑁆𑀢𑁆𑀯𑀸 𑀆𑀕𑀫𑀦𑀓𑀸𑀮𑁂 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀪𑀕𑀯𑀦𑁆𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀫𑀳𑀸𑀯𑀦𑁂 𑀑𑀢𑀭𑀺𑀁𑀲𑀼.

𑀪𑀕𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀢𑁆𑀯𑀸 𑁋 ‘‘𑀏𑀣, 𑀪𑀺𑀓𑁆𑀔𑀯𑁂, 𑀦𑀺𑀲𑀻𑀤𑀣, 𑀉𑀧𑀭𑀺𑀫𑀕𑁆𑀕𑀢𑁆𑀢𑀬𑀯𑀚𑁆𑀛𑀸𑀦𑀁 𑀯𑁄 𑀓𑀺𑀮𑁂𑀲𑀸𑀦𑀁 𑀧𑀳𑀸𑀦𑀸𑀬 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀲𑀺. 𑀪𑀺𑀓𑁆𑀔𑀽 𑀘𑀺𑀦𑁆𑀢𑁂𑀲𑀼𑀁 𑁋 ‘‘𑀪𑀕𑀯𑀸 𑀅𑀫𑁆𑀳𑀸𑀓𑀁 𑀅𑀦𑀪𑀺𑀭𑀢𑀪𑀸𑀯𑀁 𑀜𑀢𑁆𑀯𑀸 𑀓𑀼𑀡𑀸𑀮𑀤𑀳𑀁 𑀦𑁂𑀢𑁆𑀯𑀸 𑀅𑀦𑀪𑀺𑀭𑀢𑀺𑀁 𑀯𑀺𑀦𑁄𑀤𑁂𑀲𑀺, 𑀢𑀢𑁆𑀣 𑀲𑁄𑀢𑀸𑀧𑀢𑁆𑀢𑀺𑀨𑀮𑀧𑁆𑀧𑀢𑁆𑀢𑀸𑀦𑀁 𑀦𑁄 𑀇𑀤𑀸𑀦𑀺 𑀇𑀥 𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀁 𑀓𑀫𑁆𑀫𑀝𑁆𑀞𑀸𑀦𑀁 𑀅𑀤𑀸𑀲𑀺, 𑀦 𑀔𑁄 𑀧𑀦𑀫𑁆𑀳𑁂𑀳𑀺 ‘𑀲𑁄𑀢𑀸𑀧𑀦𑁆𑀦𑀸 𑀫𑀬’𑀦𑁆𑀢𑀺 𑀯𑀻𑀢𑀺𑀦𑀸𑀫𑁂𑀢𑀼𑀁 𑀯𑀝𑁆𑀝𑀢𑀺, 𑀉𑀢𑁆𑀢𑀫𑀧𑀼𑀭𑀺𑀲𑀲𑀤𑀺𑀲𑁂𑀳𑀺 𑀦𑁄 𑀪𑀯𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀢𑁂 𑀤𑀲𑀩𑀮𑀲𑁆𑀲 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀉𑀝𑁆𑀞𑀸𑀬 𑀦𑀺𑀲𑀻𑀤𑀦𑀁 𑀧𑀧𑁆𑀨𑁄𑀝𑁂𑀢𑁆𑀯𑀸 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀩𑁆𑀪𑀸𑀭𑀭𑀼𑀓𑁆𑀔𑀫𑀽𑀮𑁂𑀲𑀼 𑀦𑀺𑀲𑀻𑀤𑀺𑀁𑀲𑀼.

𑀪𑀕𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑁂 𑀪𑀺𑀓𑁆𑀔𑀽 𑀧𑀓𑀢𑀺𑀬𑀸𑀧𑀺 𑀅𑀯𑀺𑀲𑁆𑀲𑀝𑁆𑀞𑀓𑀫𑁆𑀫𑀝𑁆𑀞𑀸𑀦𑀸, 𑀮𑀤𑁆𑀥𑀼𑀧𑀸𑀬𑀲𑁆𑀲 𑀧𑀦 𑀪𑀺𑀓𑁆𑀔𑀼𑀦𑁄 𑀓𑀺𑀮𑀫𑀦𑀓𑀸𑀭𑀡𑀁 𑀦𑀸𑀫 𑀦𑀢𑁆𑀣𑀺. 𑀕𑀘𑁆𑀙𑀦𑁆𑀢𑀸 𑀕𑀘𑁆𑀙𑀦𑁆𑀢𑀸 𑀘 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑁋 ‘‘𑀅𑀢𑁆𑀢𑀦𑀸 𑀅𑀢𑁆𑀢𑀦𑀸 𑀧𑀝𑀺𑀮𑀤𑁆𑀥𑀕𑀼𑀡𑀁 𑀆𑀭𑁄𑀘𑁂𑀲𑁆𑀲𑀸𑀫𑀸’𑀢𑀺 𑀫𑀫 𑀲𑀦𑁆𑀢𑀺𑀓𑀁 𑀆𑀕𑀫𑀺𑀲𑁆𑀲𑀦𑁆𑀢𑀺. 𑀏𑀢𑁂𑀲𑀼 𑀆𑀕𑀢𑁂𑀲𑀼 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂 𑀤𑁂𑀯𑀢𑀸 𑀏𑀓𑀘𑀓𑁆𑀓𑀯𑀸𑀴𑁂 𑀲𑀦𑁆𑀦𑀺𑀧𑀢𑀺𑀲𑁆𑀲𑀦𑁆𑀢𑀺, 𑀫𑀳𑀸𑀲𑀫𑀬𑁄 𑀪𑀯𑀺𑀲𑁆𑀲𑀢𑀺, 𑀯𑀺𑀯𑀺𑀢𑁆𑀢𑁂 𑀑𑀓𑀸𑀲𑁂 𑀫𑀬𑀸 𑀦𑀺𑀲𑀻𑀤𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀢𑀢𑁄 𑀯𑀺𑀯𑀺𑀢𑁆𑀢𑁂 𑀑𑀓𑀸𑀲𑁂 𑀩𑀼𑀤𑁆𑀥𑀸𑀲𑀦𑀁 𑀧𑀜𑁆𑀜𑀧𑁂𑀢𑁆𑀯𑀸 𑀦𑀺𑀲𑀻𑀤𑀺.

𑀲𑀩𑁆𑀩𑀧𑀞𑀫𑀁 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀕𑀢𑀣𑁂𑀭𑁄 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑀢𑁄 𑀅𑀧𑀭𑁄 𑀢𑀢𑁄 𑀅𑀧𑀭𑁄𑀢𑀺 𑀧𑀜𑁆𑀘𑀲𑀢𑀸𑀧𑀺 𑀧𑀤𑀼𑀫𑀺𑀦𑀺𑀬𑀁 𑀧𑀤𑀼𑀫𑀸𑀦𑀺 𑀯𑀺𑀬 𑀯𑀺𑀓𑀲𑀺𑀁𑀲𑀼. 𑀲𑀩𑁆𑀩𑀧𑀞𑀫𑀁 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀪𑀺𑀓𑁆𑀔𑀼 𑁋 ‘‘𑀪𑀕𑀯𑀢𑁄 𑀆𑀭𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀧𑀮𑁆𑀮𑀗𑁆𑀓𑀁 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀦𑀺𑀲𑀻𑀤𑀦𑀁 𑀧𑀧𑁆𑀨𑁄𑀝𑁂𑀢𑁆𑀯𑀸 𑀉𑀝𑁆𑀞𑀸𑀬 𑀤𑀲𑀩𑀮𑀸𑀪𑀺𑀫𑀼𑀔𑁄 𑀅𑀳𑁄𑀲𑀺. 𑀏𑀯𑀁 𑀅𑀧𑀭𑁄𑀧𑀺 𑀅𑀧𑀭𑁄𑀧𑀻𑀢𑀺 𑀧𑀜𑁆𑀘𑀲𑀢𑀸𑀧𑀺 𑀪𑀢𑁆𑀢𑀲𑀸𑀮𑀁 𑀧𑀯𑀺𑀲𑀦𑁆𑀢𑀸 𑀯𑀺𑀬 𑀧𑀝𑀺𑀧𑀸𑀝𑀺𑀬𑀸𑀯 𑀆𑀕𑀫𑀁𑀲𑀼. 𑀧𑀞𑀫𑀁 𑀆𑀕𑀢𑁄 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀦𑀁 𑀧𑀜𑁆𑀜𑀧𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀢𑁆𑀯𑀸 𑀧𑀝𑀺𑀮𑀤𑁆𑀥𑀕𑀼𑀡𑀁 𑀆𑀭𑁄𑀘𑁂𑀢𑀼𑀓𑀸𑀫𑁄 𑁋 ‘‘𑀅𑀢𑁆𑀣𑀺 𑀦𑀼 𑀔𑁄 𑀅𑀜𑁆𑀜𑁄 𑀓𑁄𑀘𑀺, 𑀦𑀢𑁆𑀣𑀻’’𑀢𑀺 𑀦𑀺𑀯𑀢𑁆𑀢𑀺𑀢𑁆𑀯𑀸 𑀆𑀕𑀫𑀦𑀫𑀕𑁆𑀕𑀁 𑀑𑀮𑁄𑀓𑁂𑀦𑁆𑀢𑁄 𑀅𑀧𑀭𑀫𑁆𑀧𑀺 𑀅𑀤𑁆𑀤𑀲 𑀅𑀧𑀭𑀫𑁆𑀧𑀺 𑀅𑀤𑁆𑀤𑀲. 𑀇𑀢𑀺 𑀲𑀩𑁆𑀩𑁂𑀧𑀺 𑀢𑁂 𑀆𑀕𑀦𑁆𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀬𑀁 𑀇𑀫𑀲𑁆𑀲 𑀳𑀭𑀸𑀬𑀫𑀸𑀦𑁄 𑀦 𑀓𑀣𑁂𑀲𑀺, 𑀅𑀬𑀁 𑀇𑀫𑀲𑁆𑀲 𑀳𑀭𑀸𑀬𑀫𑀸𑀦𑁄 𑀦 𑀓𑀣𑁂𑀲𑀻𑀢𑀺. 𑀔𑀻𑀡𑀸𑀲𑀯𑀸𑀦𑀁 𑀓𑀺𑀭 𑀤𑁆𑀯𑁂 𑀆𑀓𑀸𑀭𑀸 𑀳𑁄𑀦𑁆𑀢𑀺 𑁋 ‘‘𑀅𑀳𑁄 𑀯𑀢 𑀫𑀬𑀸 𑀧𑀝𑀺𑀮𑀤𑁆𑀥𑀕𑀼𑀡𑀁 𑀲𑀤𑁂𑀯𑀓𑁄 𑀮𑁄𑀓𑁄 𑀔𑀺𑀧𑁆𑀧𑀫𑁂𑀯 𑀧𑀝𑀺𑀯𑀺𑀚𑁆𑀛𑁂𑀬𑁆𑀬𑀸’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀧𑀝𑀺𑀮𑀤𑁆𑀥𑀪𑀸𑀯𑀁 𑀧𑀦 𑀦𑀺𑀥𑀺𑀮𑀤𑁆𑀥𑀧𑀼𑀭𑀺𑀲𑁄 𑀯𑀺𑀬 𑀦 𑀅𑀜𑁆𑀜𑀲𑁆𑀲 𑀆𑀭𑁄𑀘𑁂𑀢𑀼𑀓𑀸𑀫𑁄 𑀳𑁄𑀢𑀺.

𑀏𑀯𑀁 𑀑𑀲𑀻𑀤𑀫𑀢𑁆𑀢𑁂 𑀧𑀦 𑀢𑀲𑁆𑀫𑀺𑀁 𑀅𑀭𑀺𑀬𑀫𑀡𑁆𑀟𑀮𑁂 𑀧𑀸𑀘𑀻𑀦𑀬𑀼𑀕𑀦𑁆𑀥𑀭𑀧𑀭𑀺𑀓𑁆𑀔𑁂𑀧𑀢𑁄 𑀅𑀩𑁆𑀪𑀸, 𑀫𑀳𑀺𑀓𑀸, 𑀥𑀽𑀫𑁄, 𑀭𑀚𑁄, 𑀭𑀸𑀳𑀽𑀢𑀺 𑀇𑀫𑁂𑀳𑀺 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀯𑀺𑀧𑁆𑀧𑀫𑀼𑀢𑁆𑀢𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑀧𑀝𑀺𑀫𑀡𑁆𑀟𑀺𑀢𑀲𑁆𑀲 𑀮𑁄𑀓𑀲𑁆𑀲 𑀭𑀸𑀫𑀡𑁂𑀬𑁆𑀬𑀓𑀤𑀲𑁆𑀲𑀦𑀢𑁆𑀣𑀁 𑀧𑀸𑀘𑀻𑀦𑀤𑀺𑀲𑀸𑀬 𑀉𑀓𑁆𑀔𑀺𑀢𑁆𑀢𑀭𑀚𑀢𑀫𑀬𑀫𑀳𑀸𑀆𑀤𑀸𑀲𑀫𑀡𑁆𑀟𑀮𑀁 𑀯𑀺𑀬, 𑀦𑁂𑀫𑀺𑀯𑀝𑁆𑀝𑀺𑀬𑀁 𑀕𑀳𑁂𑀢𑁆𑀯𑀸 𑀧𑀭𑀺𑀯𑀢𑁆𑀢𑀺𑀬𑀫𑀸𑀦𑀭𑀚𑀢𑀘𑀓𑁆𑀓𑀲𑀲𑁆𑀲𑀺𑀭𑀺𑀓𑀁 𑀧𑀼𑀡𑁆𑀡𑀘𑀦𑁆𑀤𑀫𑀡𑁆𑀟𑀮𑀁 𑀉𑀮𑁆𑀮𑀗𑁆𑀖𑀺𑀢𑁆𑀯𑀸 𑀅𑀦𑀺𑀮𑀧𑀣𑀁 𑀧𑀝𑀺𑀧𑀚𑁆𑀚𑀺𑀢𑁆𑀣. 𑀇𑀢𑀺 𑀏𑀯𑀭𑀽𑀧𑁂 𑀔𑀡𑁂 𑀮𑀬𑁂 𑀫𑀼𑀳𑀼𑀢𑁆𑀢𑁂 𑀪𑀕𑀯𑀸 𑀲𑀓𑁆𑀓𑁂𑀲𑀼 𑀯𑀺𑀳𑀭𑀢𑀺 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀫𑀳𑀸𑀯𑀦𑁂 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀩𑁆𑀩𑁂𑀳𑁂𑀯 𑀅𑀭𑀳𑀦𑁆𑀢𑁂𑀳𑀺.

𑀢𑀢𑁆𑀣 𑀪𑀕𑀯𑀸𑀧𑀺 𑀫𑀳𑀸𑀲𑀫𑁆𑀫𑀢𑀲𑁆𑀲 𑀯𑀁𑀲𑁂 𑀉𑀧𑁆𑀧𑀦𑁆𑀦𑁄, 𑀢𑁂𑀧𑀺 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽 𑀫𑀳𑀸𑀲𑀫𑁆𑀫𑀢𑀲𑁆𑀲 𑀓𑀼𑀮𑁂 𑀉𑀧𑁆𑀧𑀦𑁆𑀦𑀸. 𑀪𑀕𑀯𑀸𑀧𑀺 𑀔𑀢𑁆𑀢𑀺𑀬𑀕𑀩𑁆𑀪𑁂 𑀚𑀸𑀢𑁄, 𑀢𑁂𑀧𑀺 𑀔𑀢𑁆𑀢𑀺𑀬𑀕𑀩𑁆𑀪𑁂 𑀚𑀸𑀢𑀸. 𑀪𑀕𑀯𑀸𑀧𑀺 𑀭𑀸𑀚𑀧𑀩𑁆𑀩𑀚𑀺𑀢𑁄, 𑀢𑁂𑀧𑀺 𑀭𑀸𑀚𑀧𑀩𑁆𑀩𑀚𑀺𑀢𑀸. 𑀪𑀕𑀯𑀸𑀧𑀺 𑀲𑁂𑀢𑀘𑁆𑀙𑀢𑁆𑀢𑀁 𑀧𑀳𑀸𑀬 𑀳𑀢𑁆𑀣𑀕𑀢𑀁 𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀁 𑀦𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑁄, 𑀢𑁂𑀧𑀺 𑀲𑁂𑀢𑀘𑁆𑀙𑀢𑁆𑀢𑀁 𑀧𑀳𑀸𑀬 𑀳𑀢𑁆𑀣𑀕𑀢𑀸𑀦𑀺 𑀭𑀚𑁆𑀚𑀸𑀦𑀺 𑀦𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑀸. 𑀇𑀢𑀺 𑀪𑀕𑀯𑀸 𑀧𑀭𑀺𑀲𑀼𑀤𑁆𑀥𑁂 𑀑𑀓𑀸𑀲𑁂 𑀧𑀭𑀺𑀲𑀼𑀤𑁆𑀥𑁂 𑀭𑀢𑁆𑀢𑀺𑀪𑀸𑀕𑁂 𑀲𑀬𑀁 𑀧𑀭𑀺𑀲𑀼𑀤𑁆𑀥𑁄 𑀧𑀭𑀺𑀲𑀼𑀤𑁆𑀥𑀧𑀭𑀺𑀯𑀸𑀭𑁄 𑀯𑀻𑀢𑀭𑀸𑀕𑁄 𑀯𑀻𑀢𑀭𑀸𑀕𑀧𑀭𑀺𑀯𑀸𑀭𑁄 𑀯𑀻𑀢𑀤𑁄𑀲𑁄 𑀯𑀻𑀢𑀤𑁄𑀲𑀧𑀭𑀺𑀯𑀸𑀭𑁄 𑀯𑀻𑀢𑀫𑁄𑀳𑁄 𑀯𑀻𑀢𑀫𑁄𑀳𑀧𑀭𑀺𑀯𑀸𑀭𑁄 𑀦𑀺𑀢𑁆𑀢𑀡𑁆𑀳𑁄 𑀦𑀺𑀢𑁆𑀢𑀡𑁆𑀳𑀧𑀭𑀺𑀯𑀸𑀭𑁄 𑀦𑀺𑀓𑁆𑀓𑀺𑀮𑁂𑀲𑁄 𑀦𑀺𑀓𑁆𑀓𑀺𑀮𑁂𑀲𑀧𑀭𑀺𑀯𑀸𑀭𑁄 𑀲𑀦𑁆𑀢𑁄 𑀲𑀦𑁆𑀢𑀧𑀭𑀺𑀯𑀸𑀭𑁄 𑀤𑀦𑁆𑀢𑁄 𑀤𑀦𑁆𑀢𑀧𑀭𑀺𑀯𑀸𑀭𑁄 𑀫𑀼𑀢𑁆𑀢𑁄 𑀫𑀼𑀢𑁆𑀢𑀧𑀭𑀺𑀯𑀸𑀭𑁄 𑀅𑀢𑀺𑀯𑀺𑀬 𑀯𑀺𑀭𑁄𑀘𑀢𑀻𑀢𑀺. 𑀯𑀡𑁆𑀡𑀪𑀽𑀫𑀺 𑀦𑀸𑀫𑁂𑀲𑀸, 𑀬𑀢𑁆𑀢𑀓𑀁 𑀲𑀓𑁆𑀓𑁄𑀢𑀺, 𑀢𑀢𑁆𑀢𑀓𑀁 𑀯𑀢𑁆𑀢𑀩𑁆𑀩𑀁. 𑀇𑀢𑀺 𑀇𑀫𑁂 𑀪𑀺𑀓𑁆𑀔𑀽 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀩𑁆𑀩𑁂𑀳𑁂𑀯 𑀅𑀭𑀳𑀦𑁆𑀢𑁂𑀳𑀻’’𑀢𑀺.

𑀬𑁂𑀪𑀼𑀬𑁆𑀬𑁂𑀦𑀸𑀢𑀺 𑀩𑀳𑀼𑀢𑀭𑀸 𑀲𑀦𑁆𑀦𑀺𑀧𑀢𑀺𑀢𑀸, 𑀫𑀦𑁆𑀤𑀸 𑀦 𑀲𑀦𑁆𑀦𑀺𑀧𑀢𑀺𑀢𑀸 𑀅𑀲𑀜𑁆𑀜𑀸 𑀅𑀭𑀽𑀧𑀸𑀯𑀘𑀭𑀤𑁂𑀯𑀢𑀸 𑀲𑀫𑀸𑀧𑀦𑁆𑀦𑀤𑁂𑀯𑀢𑀸 𑀘. 𑀢𑀢𑁆𑀭𑀸𑀬𑀁 𑀲𑀦𑁆𑀦𑀺𑀧𑀸𑀢𑀓𑁆𑀓𑀫𑁄 𑀫𑀳𑀸𑀯𑀦𑀲𑁆𑀲 𑀓𑀺𑀭 𑀲𑀸𑀫𑀦𑁆𑀢𑀸 𑀤𑁂𑀯𑀢𑀸 𑀘𑀮𑀺𑀁𑀲𑀼 𑁋 ‘‘𑀆𑀬𑀸𑀫, 𑀪𑁄 𑀩𑀼𑀤𑁆𑀥𑀤𑀲𑁆𑀲𑀦𑀁 𑀦𑀸𑀫 𑀩𑀳𑀽𑀧𑀓𑀸𑀭𑀁, 𑀥𑀫𑁆𑀫𑀲𑁆𑀲𑀯𑀦𑀁 𑀩𑀳𑀽𑀧𑀓𑀸𑀭𑀁, 𑀪𑀺𑀓𑁆𑀔𑀼𑀲𑀗𑁆𑀖𑀤𑀲𑁆𑀲𑀦𑀁 𑀩𑀳𑀽𑀧𑀓𑀸𑀭𑀁, 𑀆𑀬𑀸𑀫 𑀆𑀬𑀸𑀫𑀸’’𑀢𑀺 𑀫𑀳𑀸𑀲𑀤𑁆𑀤𑀁 𑀓𑀼𑀭𑀼𑀫𑀸𑀦𑀸 𑀆𑀕𑀦𑁆𑀢𑁆𑀯𑀸 𑀪𑀕𑀯𑀦𑁆𑀢𑀜𑁆𑀘 𑀢𑀁𑀫𑀼𑀳𑀼𑀢𑁆𑀢𑀁 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀔𑀻𑀡𑀸𑀲𑀯𑁂 𑀘 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼. 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀢𑀸𑀲𑀁 𑀢𑀸𑀲𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀲𑀤𑁆𑀤𑀦𑁆𑀢𑀭𑀅𑀟𑁆𑀠𑀕𑀸𑀯𑀼𑀢𑀕𑀸𑀯𑀼𑀢𑀅𑀟𑁆𑀠𑀬𑁄𑀚𑀦𑀬𑁄𑀚𑀦𑀸𑀤𑀺𑀯𑀲𑁂𑀦 𑀢𑀺𑀬𑁄𑀚𑀦𑀲𑀳𑀲𑁆𑀲𑀯𑀺𑀢𑁆𑀣𑀢𑁂 𑀳𑀺𑀫𑀯𑀦𑁆𑀢𑁂, 𑀢𑀺𑀓𑁆𑀔𑀢𑁆𑀢𑀼𑀁 𑀢𑁂𑀲𑀝𑁆𑀞𑀺𑀬𑀸 𑀦𑀕𑀭𑀲𑀳𑀲𑁆𑀲𑁂𑀲𑀼, 𑀦𑀯𑀦𑀯𑀼𑀢𑀺𑀬𑀸 𑀤𑁄𑀡𑀫𑀼𑀔𑀲𑀢𑀲𑀳𑀲𑁆𑀲𑁂𑀲𑀼, 𑀙𑀦𑁆𑀦𑀯𑀼𑀢𑀺𑀬𑀸 𑀧𑀝𑁆𑀝𑀦𑀓𑁄𑀝𑀺𑀲𑀢𑀲𑀳𑀲𑁆𑀲𑁂𑀲𑀼, 𑀙𑀧𑀡𑁆𑀡𑀸𑀲𑀸𑀬 𑀭𑀢𑀦𑀸𑀓𑀭𑁂𑀲𑀽𑀢𑀺 𑀲𑀓𑀮𑀚𑀫𑁆𑀩𑀼𑀤𑀻𑀧𑁂, 𑀧𑀼𑀩𑁆𑀩𑀯𑀺𑀤𑁂𑀳𑁂, 𑀅𑀧𑀭𑀕𑁄𑀬𑀸𑀦𑁂, 𑀉𑀢𑁆𑀢𑀭𑀓𑀼𑀭𑀼𑀫𑁆𑀳𑀺, 𑀤𑁆𑀯𑀻𑀲𑀼 𑀧𑀭𑀺𑀢𑁆𑀢𑀤𑀻𑀧𑀲𑀳𑀲𑁆𑀲𑁂𑀲𑀽𑀢𑀺 𑀲𑀓𑀮𑀘𑀓𑁆𑀓𑀯𑀸𑀴𑁂, 𑀢𑀢𑁄 𑀤𑀼𑀢𑀺𑀬𑀢𑀢𑀺𑀬𑀘𑀓𑁆𑀓𑀯𑀸𑀴𑁂𑀢𑀺 𑀏𑀯𑀁 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀲𑀼 𑀤𑁂𑀯𑀢𑀸 𑀲𑀦𑁆𑀦𑀺𑀧𑀢𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀜𑁆𑀳𑀺 𑀇𑀥 𑀤𑀲𑀮𑁄𑀓𑀥𑀸𑀢𑀼𑀬𑁄𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀤𑀲𑀳𑀺 𑀘 𑀮𑁄𑀓𑀥𑀸𑀢𑀽𑀳𑀺 𑀤𑁂𑀯𑀢𑀸 𑀬𑁂𑀪𑀼𑀬𑁆𑀬𑁂𑀦 𑀲𑀦𑁆𑀦𑀺𑀧𑀢𑀺𑀢𑀸 𑀳𑁄𑀦𑁆𑀢𑀻’’𑀢𑀺.

𑀏𑀯𑀁 𑀲𑀦𑁆𑀦𑀺𑀧𑀢𑀺𑀢𑀸𑀳𑀺 𑀤𑁂𑀯𑀢𑀸𑀳𑀺 𑀲𑀓𑀮𑀘𑀓𑁆𑀓𑀯𑀸𑀴𑀕𑀩𑁆𑀪𑀁 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀲𑀽𑀘𑀺𑀖𑀭𑁂 𑀦𑀺𑀭𑀦𑁆𑀢𑀭𑀁 𑀧𑀓𑁆𑀔𑀺𑀢𑁆𑀢𑀲𑀽𑀘𑀻𑀳𑀺 𑀯𑀺𑀬 𑀧𑀭𑀺𑀧𑀼𑀡𑁆𑀡𑀁 𑀳𑁄𑀢𑀺. 𑀢𑀢𑁆𑀭 𑀩𑁆𑀭𑀳𑁆𑀫𑀮𑁄𑀓𑀲𑁆𑀲 𑀏𑀯𑀁 𑀉𑀘𑁆𑀘𑀢𑁆𑀢𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀮𑁄𑀳𑀧𑀸𑀲𑀸𑀤𑁂 𑀓𑀺𑀭 𑀲𑀢𑁆𑀢𑀓𑀽𑀝𑀸𑀕𑀸𑀭𑀲𑀫𑁄 𑀧𑀸𑀲𑀸𑀡𑁄 𑀩𑁆𑀭𑀳𑁆𑀫𑀮𑁄𑀓𑁂 𑀞𑀢𑁆𑀯𑀸 𑀅𑀥𑁄 𑀔𑀺𑀢𑁆𑀢𑁄 𑀘𑀢𑀽𑀳𑀺 𑀫𑀸𑀲𑁂𑀳𑀺 𑀧𑀣𑀯𑀺𑀁 𑀧𑀸𑀧𑀼𑀡𑀸𑀢𑀺. 𑀏𑀯𑀁 𑀫𑀳𑀦𑁆𑀢𑁂 𑀑𑀓𑀸𑀲𑁂 𑀬𑀣𑀸 𑀳𑁂𑀝𑁆𑀞𑀸 𑀞𑀢𑁆𑀯𑀸 𑀔𑀺𑀢𑁆𑀢𑀸𑀦𑀺 𑀧𑀼𑀧𑁆𑀨𑀸𑀦𑀺 𑀯𑀸 𑀥𑀽𑀫𑁄 𑀯𑀸 𑀉𑀧𑀭𑀺 𑀕𑀦𑁆𑀢𑀼𑀁, 𑀉𑀧𑀭𑀺 𑀯𑀸 𑀞𑀢𑁆𑀯𑀸 𑀔𑀺𑀢𑁆𑀢𑀲𑀸𑀲𑀧𑀸 𑀳𑁂𑀝𑁆𑀞𑀸 𑀑𑀢𑀭𑀺𑀢𑀼𑀁 𑀅𑀦𑁆𑀢𑀭𑀁 𑀦 𑀮𑀪𑀦𑁆𑀢𑀺, 𑀏𑀯𑀁 𑀦𑀺𑀭𑀦𑁆𑀢𑀭𑀁 𑀤𑁂𑀯𑀢𑀸 𑀅𑀳𑁂𑀲𑀼𑀁. 𑀬𑀣𑀸 𑀔𑁄 𑀧𑀦 𑀘𑀓𑁆𑀓𑀯𑀢𑁆𑀢𑀺𑀭𑀜𑁆𑀜𑁄 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀁 𑀅𑀲𑀫𑁆𑀩𑀸𑀥𑀁 𑀳𑁄𑀢𑀺, 𑀆𑀕𑀢𑀸𑀕𑀢𑀸 𑀫𑀳𑁂𑀲𑀓𑁆𑀔𑀸 𑀔𑀢𑁆𑀢𑀺𑀬𑀸 𑀑𑀓𑀸𑀲𑀁 𑀮𑀪𑀦𑁆𑀢𑀺𑀬𑁂𑀯, 𑀧𑀭𑀢𑁄 𑀧𑀭𑀢𑁄 𑀧𑀦 𑀅𑀢𑀺𑀲𑀫𑁆𑀩𑀸𑀥𑀁 𑀳𑁄𑀢𑀺, 𑀏𑀯𑀫𑁂𑀯 𑀪𑀕𑀯𑀢𑁄 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀁 𑀅𑀲𑀫𑁆𑀩𑀸𑀥𑀁, 𑀆𑀕𑀢𑀸𑀕𑀢𑀸 𑀫𑀳𑁂𑀲𑀓𑁆𑀔𑀸 𑀤𑁂𑀯𑀢𑀸 𑀘 𑀫𑀳𑀸𑀩𑁆𑀭𑀳𑁆𑀫𑀸𑀦𑁄 𑀘 𑀑𑀓𑀸𑀲𑀁 𑀮𑀪𑀦𑁆𑀢𑀺𑀬𑁂𑀯. 𑀅𑀧𑀺𑀲𑀼𑀤𑀁 𑀪𑀕𑀯𑀢𑁄 𑀆𑀲𑀦𑁆𑀦𑀸𑀲𑀦𑁆𑀦𑀝𑁆𑀞𑀸𑀦𑁂 𑀫𑀳𑀸𑀧𑀭𑀺𑀦𑀺𑀩𑁆𑀩𑀸𑀦𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀸𑀮𑀕𑁆𑀕𑀓𑁄𑀝𑀺𑀦𑀺𑀢𑀼𑀤𑀦𑀫𑀢𑁆𑀢𑁂 𑀧𑀤𑁂𑀲𑁂 𑀤𑀲𑀧𑀺 𑀯𑀻𑀲𑀫𑁆𑀧𑀺 𑀲𑀩𑁆𑀩𑀧𑀭𑀢𑁄 𑀢𑀺𑀁𑀲𑀫𑁆𑀧𑀺 𑀤𑁂𑀯𑀢𑀸 𑀲𑀼𑀔𑀼𑀫𑁂 𑀲𑀼𑀔𑀼𑀫𑁂 𑀅𑀢𑁆𑀢𑀪𑀸𑀯𑁂 𑀫𑀸𑀧𑁂𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀲𑀝𑁆𑀞𑀺 𑀲𑀝𑁆𑀞𑀺 𑀤𑁂𑀯𑀢𑀸 𑀅𑀝𑁆𑀞𑀁𑀲𑀼.

𑀲𑀼𑀤𑁆𑀥𑀸𑀯𑀸𑀲𑀓𑀸𑀬𑀺𑀓𑀸𑀦𑀦𑁆𑀢𑀺 𑀲𑀼𑀤𑁆𑀥𑀸𑀯𑀸𑀲𑀯𑀸𑀲𑀻𑀦𑀁. 𑀲𑀼𑀤𑁆𑀥𑀸𑀯𑀸𑀲𑀸 𑀦𑀸𑀫 𑀲𑀼𑀤𑁆𑀥𑀸𑀦𑀁 𑀅𑀦𑀸𑀕𑀸𑀫𑀺𑀔𑀻𑀡𑀸𑀲𑀯𑀸𑀦𑀁 𑀆𑀯𑀸𑀲𑀸 𑀧𑀜𑁆𑀘 𑀩𑁆𑀭𑀳𑁆𑀫𑀮𑁄𑀓𑀸. 𑀏𑀢𑀤𑀳𑁄𑀲𑀻𑀢𑀺 𑀓𑀲𑁆𑀫𑀸 𑀅𑀳𑁄𑀲𑀺? 𑀢𑁂 𑀓𑀺𑀭 𑀩𑁆𑀭𑀳𑁆𑀫𑀸𑀦𑁄 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀬𑀣𑀸𑀧𑀭𑀺𑀘𑁆𑀙𑁂𑀤𑁂𑀦 𑀯𑀼𑀝𑁆𑀞𑀺𑀢𑀸 𑀩𑁆𑀭𑀳𑁆𑀫𑀪𑀯𑀦𑀁 𑀑𑀮𑁄𑀓𑁂𑀦𑁆𑀢𑀸 𑀧𑀘𑁆𑀙𑀸𑀪𑀢𑁆𑀢𑁂 𑀪𑀢𑁆𑀢𑀕𑁂𑀳𑀁 𑀯𑀺𑀬 𑀲𑀼𑀜𑁆𑀜𑀢𑀁 𑀅𑀤𑁆𑀤𑀲𑀁𑀲𑀼. 𑀢𑀢𑁄 ‘‘𑀓𑀼𑀳𑀺𑀁 𑀩𑁆𑀭𑀳𑁆𑀫𑀸𑀦𑁄 𑀕𑀢𑀸’’𑀢𑀺 𑀆𑀯𑀚𑁆𑀚𑀦𑁆𑀢𑀸 𑀫𑀳𑀸𑀲𑀫𑀸𑀕𑀫𑀁 𑀜𑀢𑁆𑀯𑀸 𑁋 ‘‘𑀅𑀬𑀁 𑀲𑀫𑀸𑀕𑀫𑁄 𑀫𑀳𑀸, 𑀫𑀬𑀁 𑀑𑀳𑀻𑀦𑀸, 𑀑𑀳𑀻𑀦𑀓𑀸𑀦𑀁 𑀑𑀓𑀸𑀲𑁄 𑀤𑀼𑀮𑁆𑀮𑀪𑁄 𑀳𑁄𑀢𑀺, 𑀢𑀲𑁆𑀫𑀸 𑀕𑀘𑁆𑀙𑀦𑁆𑀢𑀸 𑀅𑀢𑀼𑀘𑁆𑀙𑀳𑀢𑁆𑀣𑀸 𑀳𑀼𑀢𑁆𑀯𑀸 𑀏𑀓𑁂𑀓𑀁 𑀕𑀸𑀣𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀕𑀘𑁆𑀙𑀸𑀫. 𑀢𑀸𑀬 𑀫𑀳𑀸𑀲𑀫𑀸𑀕𑀫𑁂 𑀘 𑀅𑀢𑁆𑀢𑀦𑁄 𑀆𑀕𑀢𑀪𑀸𑀯𑀁 𑀚𑀸𑀦𑀸𑀧𑁂𑀲𑁆𑀲𑀸𑀫, 𑀤𑀲𑀩𑀮𑀲𑁆𑀲 𑀘 𑀯𑀡𑁆𑀡𑀁 𑀪𑀸𑀲𑀺𑀲𑁆𑀲𑀸𑀫𑀸’’𑀢𑀺. 𑀇𑀢𑀺 𑀢𑁂𑀲𑀁 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀆𑀯𑀚𑁆𑀚𑀺𑀢𑀢𑁆𑀢𑀸 𑀏𑀢𑀤𑀳𑁄𑀲𑀺.

𑁩𑁩𑁨. 𑀪𑀕𑀯𑀢𑁄 𑀧𑀼𑀭𑀢𑁄 𑀧𑀸𑀢𑀼𑀭𑀳𑁂𑀲𑀼𑀦𑁆𑀢𑀺 𑀧𑀸𑀴𑀺𑀬𑀁 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀅𑀪𑀺𑀫𑀼𑀔𑀝𑁆𑀞𑀸𑀦𑁂𑀬𑁂𑀯 𑀑𑀢𑀺𑀡𑁆𑀡𑀸 𑀯𑀺𑀬 𑀓𑀢𑁆𑀯𑀸 𑀯𑀼𑀢𑁆𑀢𑀸, 𑀦 𑀔𑁄 𑀧𑀦𑁂𑀢𑁆𑀣 𑀏𑀯𑀁 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑁂 𑀧𑀦 𑀩𑁆𑀭𑀳𑁆𑀫𑀮𑁄𑀓𑁂 𑀞𑀺𑀢𑀸𑀬𑁂𑀯 𑀕𑀸𑀣𑀸 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀏𑀓𑁄 𑀧𑀼𑀭𑀢𑁆𑀣𑀺𑀫𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀑𑀢𑀭𑀺, 𑀏𑀓𑁄 𑀤𑀓𑁆𑀔𑀺𑀡𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁, 𑀏𑀓𑁄 𑀧𑀘𑁆𑀙𑀺𑀫𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁, 𑀏𑀓𑁄 𑀉𑀢𑁆𑀢𑀭𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀑𑀢𑀭𑀺. 𑀢𑀢𑁄 𑀧𑀼𑀭𑀢𑁆𑀣𑀺𑀫𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀑𑀢𑀺𑀡𑁆𑀡𑀩𑁆𑀭𑀳𑁆𑀫𑀸 𑀦𑀻𑀮𑀓𑀲𑀺𑀡𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀦𑀻𑀮𑀭𑀲𑁆𑀫𑀺𑀬𑁄 𑀯𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀤𑁂𑀯𑀢𑀸𑀦𑀁 𑀫𑀡𑀺𑀘𑀫𑁆𑀫𑀁 𑀧𑀝𑀺𑀫𑀼𑀜𑁆𑀘𑀦𑁆𑀢𑁄 𑀯𑀺𑀬 𑀅𑀢𑁆𑀢𑀦𑁄 𑀆𑀕𑀢𑀪𑀸𑀯𑀁 𑀚𑀸𑀦𑀸𑀧𑁂𑀢𑁆𑀯𑀸 𑀩𑀼𑀤𑁆𑀥𑀯𑀻𑀣𑀺 𑀦𑀸𑀫 𑀓𑁂𑀦𑀘𑀺 𑀑𑀢𑁆𑀣𑀭𑀺𑀢𑀼𑀁 𑀦 𑀲𑀓𑁆𑀓𑀸, 𑀢𑀲𑁆𑀫𑀸 𑀧𑀳𑀝𑀩𑀼𑀤𑁆𑀥𑀯𑀻𑀣𑀺𑀬𑀸𑀯 𑀆𑀕𑀦𑁆𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀅𑀢𑁆𑀢𑀦𑀸 𑀅𑀪𑀺𑀲𑀗𑁆𑀔𑀢𑀁 𑀕𑀸𑀣𑀁 𑀅𑀪𑀸𑀲𑀺.

𑀤𑀓𑁆𑀔𑀺𑀡𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀑𑀢𑀺𑀡𑁆𑀡𑀩𑁆𑀭𑀳𑁆𑀫𑀸𑀧𑀺 𑀧𑀻𑀢𑀓𑀲𑀺𑀡𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀧𑀻𑀢𑀭𑀲𑁆𑀫𑀺𑀬𑁄 𑀲𑀼𑀯𑀡𑁆𑀡𑀧𑀪𑀁 𑀫𑀼𑀜𑁆𑀘𑀺𑀢𑁆𑀯𑀸 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀤𑁂𑀯𑀢𑀸𑀦𑀁 𑀲𑀼𑀯𑀡𑁆𑀡𑀧𑀝𑀁 𑀧𑀸𑀭𑀼𑀧𑁂𑀦𑁆𑀢𑁄 𑀯𑀺𑀬 𑀅𑀢𑁆𑀢𑀦𑁄 𑀆𑀕𑀢𑀪𑀸𑀯𑀁 𑀚𑀸𑀦𑀸𑀧𑁂𑀢𑁆𑀯𑀸 𑀢𑀣𑁂𑀯 𑀅𑀝𑁆𑀞𑀸𑀲𑀺. 𑀧𑀘𑁆𑀙𑀺𑀫𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀑𑀢𑀺𑀡𑁆𑀡𑀩𑁆𑀭𑀳𑁆𑀫𑀸𑀧𑀺 𑀮𑁄𑀳𑀺𑀢𑀓𑀲𑀺𑀡𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀮𑁄𑀳𑀺𑀢𑀭𑀲𑁆𑀫𑀺𑀬𑁄 𑀫𑀼𑀜𑁆𑀘𑀺𑀢𑁆𑀯𑀸 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀤𑁂𑀯𑀢𑀸𑀦𑀁 𑀭𑀢𑁆𑀢𑀯𑀭𑀓𑀫𑁆𑀩𑀮𑁂𑀦 𑀧𑀭𑀺𑀓𑁆𑀔𑀺𑀧𑀦𑁆𑀢𑁄 𑀯𑀺𑀬 𑀅𑀢𑁆𑀢𑀦𑁄 𑀆𑀕𑀢𑀪𑀸𑀯𑀁 𑀚𑀸𑀦𑀸𑀧𑁂𑀢𑁆𑀯𑀸 𑀢𑀣𑁂𑀯 𑀅𑀝𑁆𑀞𑀸𑀲𑀺. 𑀉𑀢𑁆𑀢𑀭𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀑𑀢𑀺𑀡𑁆𑀡𑀩𑁆𑀭𑀳𑁆𑀫𑀸𑀧𑀺 𑀑𑀤𑀸𑀢𑀓𑀲𑀺𑀡𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀑𑀤𑀸𑀢𑀭𑀲𑁆𑀫𑀺𑀬𑁄 𑀫𑀼𑀜𑁆𑀘𑀺𑀢𑁆𑀯𑀸 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀤𑁂𑀯𑀢𑀸𑀦𑀁 𑀲𑀼𑀫𑀦𑀧𑀝𑀁 𑀧𑀸𑀭𑀼𑀧𑀦𑁆𑀢𑁄 𑀯𑀺𑀬 𑀅𑀢𑁆𑀢𑀦𑁄 𑀆𑀕𑀢𑀪𑀸𑀯𑀁 𑀚𑀸𑀦𑀸𑀧𑁂𑀢𑁆𑀯𑀸 𑀢𑀣𑁂𑀯 𑀅𑀝𑁆𑀞𑀸𑀲𑀺.

𑀧𑀸𑀴𑀺𑀬𑀁 𑀧𑀦 ‘‘𑀪𑀕𑀯𑀢𑁄 𑀧𑀼𑀭𑀢𑁄 𑀧𑀸𑀢𑀼𑀭𑀳𑁂𑀲𑀼𑀁. 𑀅𑀣 𑀔𑁄 𑀢𑀸 𑀤𑁂𑀯𑀢𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀽’’𑀢𑀺 𑀏𑀯𑀁 𑀏𑀓𑀓𑁆𑀔𑀡𑀁 𑀯𑀺𑀬 𑀧𑀼𑀭𑀢𑁄 𑀧𑀸𑀢𑀼𑀪𑀸𑀯𑁄 𑀘 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀺𑀢𑀪𑀸𑀯𑁄 𑀘 𑀯𑀼𑀢𑁆𑀢𑁄, 𑀲𑁄 𑀇𑀫𑀺𑀦𑀸 𑀅𑀦𑀼𑀓𑁆𑀓𑀫𑁂𑀦 𑀅𑀳𑁄𑀲𑀺, 𑀏𑀓𑀢𑁄 𑀓𑀢𑁆𑀯𑀸 𑀧𑀦 𑀤𑀲𑁆𑀲𑀺𑀢𑁄. 𑀕𑀸𑀣𑀸𑀪𑀸𑀲𑀦𑀁 𑀧𑀦 𑀧𑀸𑀴𑀺𑀬𑀁 𑀯𑀺𑀲𑀼𑀁 𑀯𑀺𑀲𑀼𑀁𑀬𑁂𑀯 𑀯𑀼𑀢𑁆𑀢𑀁.

𑀢𑀢𑁆𑀣 𑀫𑀳𑀸𑀲𑀫𑀬𑁄𑀢𑀺 𑀫𑀳𑀸𑀲𑀫𑀽𑀳𑁄. 𑀧𑀯𑀦𑀁 𑀯𑀼𑀘𑁆𑀘𑀢𑀺 𑀯𑀦𑀲𑀡𑁆𑀟𑁄. 𑀉𑀪𑀬𑁂𑀦𑀧𑀺 𑀪𑀕𑀯𑀸 𑀇𑀫𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀅𑀚𑁆𑀚 𑀫𑀳𑀸𑀲𑀫𑀽𑀳𑁄 𑀫𑀳𑀸𑀲𑀦𑁆𑀦𑀺𑀧𑀸𑀢𑁄𑀢𑀺 𑀆𑀳. 𑀢𑀢𑁄 𑀬𑁂𑀲𑀁 𑀲𑁄 𑀲𑀦𑁆𑀦𑀺𑀧𑀸𑀢𑁄, 𑀢𑁂 𑀤𑀲𑁆𑀲𑁂𑀢𑀼𑀁 𑀤𑁂𑀯𑀓𑀸𑀬𑀸 𑀲𑀫𑀸𑀕𑀢𑀸𑀢𑀺 𑀆𑀳. 𑀢𑀢𑁆𑀣 𑀤𑁂𑀯𑀓𑀸𑀬𑀸𑀢𑀺 𑀤𑁂𑀯𑀖𑀝𑀸. 𑀆𑀕𑀢𑀫𑁆𑀳 𑀇𑀫𑀁 𑀥𑀫𑁆𑀫𑀲𑀫𑀬𑀦𑁆𑀢𑀺 𑀏𑀯𑀁 𑀲𑀫𑀸𑀕𑀢𑁂 𑀤𑁂𑀯𑀓𑀸𑀬𑁂 𑀤𑀺𑀲𑁆𑀯𑀸 𑀫𑀬𑀫𑁆𑀧𑀺 𑀇𑀫𑀁 𑀥𑀫𑁆𑀫𑀲𑀫𑀽𑀳𑀁 𑀆𑀕𑀢𑀸. 𑀓𑀺𑀁 𑀓𑀸𑀭𑀡𑀸? 𑀤𑀓𑁆𑀔𑀺𑀢𑀸𑀬𑁂 𑀅𑀧𑀭𑀸𑀚𑀺𑀢𑀲𑀗𑁆𑀖𑀁, 𑀓𑁂𑀦𑀘𑀺 𑀅𑀧𑀭𑀸𑀚𑀺𑀢𑀁 𑀅𑀚𑁆𑀚𑁂𑀯 𑀢𑀬𑁄 𑀫𑀸𑀭𑁂 𑀫𑀤𑁆𑀤𑀺𑀢𑁆𑀯𑀸 𑀯𑀺𑀚𑀺𑀢𑀲𑀗𑁆𑀕𑀸𑀫𑀁 𑀇𑀫𑀁 𑀅𑀧𑀭𑀸𑀚𑀺𑀢𑀲𑀗𑁆𑀖𑀁 𑀤𑀲𑁆𑀲𑀦𑀢𑁆𑀣𑀸𑀬 𑀆𑀕𑀢𑀫𑁆𑀳𑀸𑀢𑀺 𑀅𑀢𑁆𑀣𑁄. 𑀲𑁄 𑀧𑀦 𑀩𑁆𑀭𑀳𑁆𑀫𑀸 𑀇𑀫𑀁 𑀕𑀸𑀣𑀁 𑀪𑀸𑀲𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀼𑀭𑀢𑁆𑀣𑀺𑀫𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁𑀬𑁂𑀯 𑀅𑀝𑁆𑀞𑀸𑀲𑀺.

𑀅𑀣 𑀤𑀼𑀢𑀺𑀬𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀆𑀕𑀦𑁆𑀢𑁆𑀯𑀸 𑀅𑀪𑀸𑀲𑀺. 𑀢𑀢𑁆𑀣 𑀢𑀢𑁆𑀭 𑀪𑀺𑀓𑁆𑀔𑀯𑁄𑀢𑀺 𑀢𑀲𑁆𑀫𑀺𑀁 𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑁂 𑀪𑀺𑀓𑁆𑀔𑀽. 𑀲𑀫𑀸𑀤𑀳𑀁𑀲𑀽𑀢𑀺 𑀲𑀫𑀸𑀥𑀺𑀦𑀸 𑀬𑁄𑀚𑁂𑀲𑀼𑀁. 𑀘𑀺𑀢𑁆𑀢𑀫𑀢𑁆𑀢𑀦𑁄 𑀉𑀚𑀼𑀓𑀁 𑀅𑀓𑀁𑀲𑀽𑀢𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑀁 𑀲𑀩𑁆𑀩𑁂 𑀯𑀗𑁆𑀓𑀓𑀼𑀝𑀺𑀮𑀚𑀺𑀫𑁆𑀳𑀪𑀸𑀯𑁂 𑀳𑀭𑀺𑀢𑁆𑀯𑀸 𑀉𑀚𑀼𑀓𑀁 𑀅𑀓𑀭𑀺𑀁𑀲𑀼. 𑀲𑀸𑀭𑀣𑀻𑀯 𑀦𑁂𑀢𑁆𑀢𑀸𑀦𑀺 𑀕𑀳𑁂𑀢𑁆𑀯𑀸𑀢𑀺 𑀬𑀣𑀸 𑀲𑀫𑀧𑁆𑀧𑀯𑀢𑁆𑀢𑁂𑀲𑀼 𑀲𑀺𑀦𑁆𑀥𑀯𑁂𑀲𑀼 𑀑𑀥𑀲𑁆𑀢𑀧𑀢𑁄𑀤𑁄 𑀲𑀸𑀭𑀣𑀺 𑀲𑀩𑁆𑀩𑀬𑁄𑀢𑁆𑀢𑀸𑀦𑀺 𑀕𑀳𑁂𑀢𑁆𑀯𑀸 𑀅𑀘𑁄𑀤𑁂𑀦𑁆𑀢𑁄 𑀅𑀯𑀸𑀭𑁂𑀦𑁆𑀢𑁄 𑀢𑀺𑀝𑁆𑀞𑀢𑀺, 𑀏𑀯𑀁 𑀙𑀴𑀗𑁆𑀕𑀼𑀧𑁂𑀓𑁆𑀔𑀸𑀲𑀫𑀦𑁆𑀦𑀸𑀕𑀢𑀸 𑀕𑀼𑀢𑁆𑀢𑀤𑁆𑀯𑀸𑀭𑀸 𑀲𑀩𑁆𑀩𑁂𑀧𑁂𑀢𑁂 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽 𑀇𑀦𑁆𑀤𑁆𑀭𑀺𑀬𑀸𑀦𑀺 𑀭𑀓𑁆𑀔𑀦𑁆𑀢𑀺 𑀧𑀡𑁆𑀟𑀺𑀢𑀸, 𑀏𑀢𑁂 𑀤𑀝𑁆𑀞𑀼𑀁 𑀇𑀥𑀸𑀕𑀢𑀫𑁆𑀳 𑀪𑀕𑀯𑀸𑀢𑀺. 𑀲𑁄𑀧𑀺 𑀕𑀦𑁆𑀢𑁆𑀯𑀸 𑀬𑀣𑀸𑀞𑀸𑀦𑁂𑀬𑁂𑀯 𑀅𑀝𑁆𑀞𑀸𑀲𑀺.

𑀅𑀣 𑀢𑀢𑀺𑀬𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀆𑀕𑀦𑁆𑀢𑁆𑀯𑀸 𑀅𑀪𑀸𑀲𑀺. 𑀢𑀢𑁆𑀣 𑀙𑁂𑀢𑁆𑀯𑀸 𑀔𑀻𑀮𑀦𑁆𑀢𑀺 𑀭𑀸𑀕𑀤𑁄𑀲𑀫𑁄𑀳𑀔𑀻𑀮𑀁 𑀙𑀺𑀦𑁆𑀤𑀺𑀢𑁆𑀯𑀸. 𑀧𑀮𑀺𑀖𑀦𑁆𑀢𑀺 𑀭𑀸𑀕𑀤𑁄𑀲𑀫𑁄𑀳𑀧𑀮𑀺𑀖𑀫𑁂𑀯. 𑀇𑀦𑁆𑀤𑀔𑀻𑀮𑀦𑁆𑀢𑀺𑀧𑀺 𑀭𑀸𑀕𑀤𑁄𑀲𑀫𑁄𑀳𑀇𑀦𑁆𑀤𑀔𑀻𑀮𑀫𑁂𑀯. 𑀊𑀳𑀘𑁆𑀘 𑀫𑀦𑁂𑀚𑀸𑀢𑀺 𑀏𑀢𑁂 𑀢𑀡𑁆𑀳𑀸𑀏𑀚𑀸𑀬 𑀅𑀪𑀸𑀯𑁂𑀦 𑀅𑀦𑁂𑀚𑀸 𑀪𑀺𑀓𑁆𑀔𑀽 𑀇𑀦𑁆𑀤𑀔𑀻𑀮𑀁 𑀊𑀳𑀘𑁆𑀘 𑀲𑀫𑀽𑀳𑀦𑀺𑀢𑁆𑀯𑀸. 𑀢𑁂 𑀘𑀭𑀦𑁆𑀢𑀻𑀢𑀺 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀅𑀧𑁆𑀧𑀝𑀺𑀳𑀢𑀘𑀸𑀭𑀺𑀓𑀁 𑀘𑀭𑀦𑁆𑀢𑀺. 𑀲𑀼𑀤𑁆𑀥𑀸𑀢𑀺 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀸. 𑀯𑀺𑀫𑀮𑀸𑀢𑀺 𑀦𑀺𑀫𑁆𑀫𑀮𑀸. 𑀇𑀤𑀁 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀘𑀓𑁆𑀔𑀼𑀫𑀢𑀸𑀢𑀺 𑀧𑀜𑁆𑀘𑀳𑀺 𑀘𑀓𑁆𑀔𑀽𑀳𑀺 𑀘𑀓𑁆𑀔𑀼𑀫𑀦𑁆𑀢𑁂𑀦. 𑀲𑀼𑀤𑀦𑁆𑀢𑀸𑀢𑀺 𑀘𑀓𑁆𑀔𑀼𑀢𑁄𑀧𑀺 𑀤𑀦𑁆𑀢𑀸, 𑀲𑁄𑀢𑀢𑁄𑀧𑀺 𑀖𑀸𑀦𑀢𑁄𑀧𑀺 𑀚𑀺𑀯𑁆𑀳𑀸𑀢𑁄𑀧𑀺 𑀓𑀸𑀬𑀢𑁄𑀧𑀺 𑀫𑀦𑀢𑁄𑀧𑀺 𑀤𑀦𑁆𑀢𑀸. 𑀲𑀼𑀲𑀼𑀦𑀸𑀕𑀸𑀢𑀺 𑀢𑀭𑀼𑀡𑀦𑀸𑀕𑀸. 𑀢𑁂 𑀏𑀯𑀭𑀽𑀧𑁂𑀦 𑀅𑀦𑀼𑀢𑁆𑀢𑀭𑁂𑀦 𑀬𑁄𑀕𑀸𑀘𑀭𑀺𑀬𑁂𑀦 𑀤𑀫𑀺𑀢𑁂 𑀢𑀭𑀼𑀡𑀦𑀸𑀕𑁂 𑀤𑀲𑁆𑀲𑀦𑀸𑀬 𑀆𑀕𑀢𑀫𑁆𑀳 𑀪𑀕𑀯𑀸𑀢𑀺. 𑀲𑁄𑀧𑀺 𑀕𑀦𑁆𑀢𑁆𑀯𑀸 𑀬𑀣𑀸𑀞𑀸𑀦𑁂𑀬𑁂𑀯 𑀅𑀝𑁆𑀞𑀸𑀲𑀺.

𑀅𑀣 𑀘𑀢𑀼𑀢𑁆𑀣𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀆𑀕𑀦𑁆𑀢𑁆𑀯𑀸 𑀅𑀪𑀸𑀲𑀺. 𑀢𑀢𑁆𑀣 𑀕𑀢𑀸𑀲𑁂𑀢𑀺 𑀦𑀺𑀩𑁆𑀩𑁂𑀫𑀢𑀺𑀓𑀲𑀭𑀡𑀕𑀫𑀦𑁂𑀦 𑀕𑀢𑀸. 𑀲𑁄𑀧𑀺 𑀕𑀦𑁆𑀢𑁆𑀯𑀸 𑀬𑀣𑀸𑀞𑀸𑀦𑁂𑀬𑁂𑀯 𑀅𑀝𑁆𑀞𑀸𑀲𑀺.

𑀤𑁂𑀯𑀢𑀸𑀲𑀦𑁆𑀦𑀺𑀧𑀸𑀢𑀯𑀡𑁆𑀡𑀦𑀸

𑁩𑁩𑁩. 𑀅𑀣 𑀪𑀕𑀯𑀸 𑀑𑀮𑁄𑀓𑁂𑀦𑁆𑀢𑁄 𑀧𑀣𑀯𑀻𑀢𑀮𑀢𑁄 𑀬𑀸𑀯 𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀧𑀭𑀺𑀘𑁆𑀙𑁂𑀤𑀸 𑀬𑀸𑀯 𑀅𑀓𑀦𑀺𑀝𑁆𑀞𑀩𑁆𑀭𑀳𑁆𑀫𑀮𑁄𑀓𑀸 𑀤𑁂𑀯𑀢𑀸𑀲𑀦𑁆𑀦𑀺𑀧𑀸𑀢𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀳𑀸 𑀅𑀬𑀁 𑀤𑁂𑀯𑀢𑀸𑀲𑀫𑀸𑀕𑀫𑁄, 𑀪𑀺𑀓𑁆𑀔𑀽 𑀧𑀦 𑀏𑀯𑀁 𑀫𑀳𑀸 𑀤𑁂𑀯𑀢𑀸𑀬 𑀲𑀫𑀸𑀕𑀫𑁄𑀢𑀺 𑀦 𑀚𑀸𑀦𑀦𑁆𑀢𑀺, 𑀳𑀦𑁆𑀤, 𑀦𑁂𑀲𑀁 𑀆𑀘𑀺𑀓𑁆𑀔𑀸𑀫𑀻’’𑀢𑀺, 𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀅𑀣 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀻’’𑀢𑀺 𑀲𑀩𑁆𑀩𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀢𑀢𑁆𑀣 𑀏𑀢𑀧𑀭𑀫𑀸𑀢𑀺 𑀏𑀢𑀁 𑀧𑀭𑀫𑀁 𑀧𑀫𑀸𑀡𑀁 𑀏𑀢𑁂𑀲𑀦𑁆𑀢𑀺 𑀏𑀢𑀧𑀭𑀫𑀸. 𑀇𑀤𑀸𑀦𑀺 𑀩𑀼𑀤𑁆𑀥𑀸𑀦𑀁 𑀧𑀦 𑀅𑀪𑀸𑀯𑀸 ‘‘𑀬𑁂𑀧𑀺 𑀢𑁂, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀻’’𑀢𑀺 𑀢𑀢𑀺𑀬𑁄 𑀯𑀸𑀭𑁄 𑀦 𑀯𑀼𑀢𑁆𑀢𑁄. 𑀆𑀘𑀺𑀓𑁆𑀔𑀺𑀲𑁆𑀲𑀸𑀫𑀺, 𑀪𑀺𑀓𑁆𑀔𑀯𑁂𑀢𑀺 𑀓𑀲𑁆𑀫𑀸 𑀆𑀳? 𑀤𑁂𑀯𑀢𑀸𑀦𑀁 𑀘𑀺𑀢𑁆𑀢𑀓𑀮𑁆𑀮𑀢𑀸𑀚𑀦𑀦𑀢𑁆𑀣𑀁. 𑀤𑁂𑀯𑀢𑀸 𑀓𑀺𑀭 𑀘𑀺𑀦𑁆𑀢𑁂𑀲𑀼𑀁 𑁋 ‘‘𑀪𑀕𑀯𑀸 𑀏𑀯𑀁 𑀫𑀳𑀦𑁆𑀢𑁂 𑀲𑀫𑀸𑀕𑀫𑁂 𑀫𑀳𑁂𑀲𑀓𑁆𑀔𑀸𑀦𑀁𑀬𑁂𑀯 𑀤𑁂𑀯𑀢𑀸𑀦𑀁 𑀦𑀸𑀫𑀕𑁄𑀢𑁆𑀢𑀸𑀦𑀺 𑀓𑀣𑁂𑀲𑁆𑀲𑀢𑀺, 𑀅𑀧𑁆𑀧𑁂𑀲𑀓𑁆𑀔𑀸𑀦𑀁 𑀓𑀺𑀁 𑀓𑀣𑁂𑀲𑁆𑀲𑀢𑀻’’𑀢𑀺? 𑀅𑀣 𑀪𑀕𑀯𑀸 ‘‘𑀇𑀫𑀸 𑀤𑁂𑀯𑀢𑀸 𑀓𑀺𑀁 𑀘𑀺𑀦𑁆𑀢𑁂𑀦𑁆𑀢𑀻’’𑀢𑀺 𑀆𑀯𑀚𑁆𑀚𑀦𑁆𑀢𑁄 𑀫𑀼𑀔𑁂𑀦 𑀳𑀢𑁆𑀣𑀁 𑀧𑀯𑁂𑀲𑁂𑀢𑁆𑀯𑀸 𑀳𑀤𑀬𑀫𑀁𑀲𑀁 𑀫𑀤𑁆𑀤𑀦𑁆𑀢𑁄 𑀯𑀺𑀬 𑀲𑀪𑀡𑁆𑀟𑀁 𑀘𑁄𑀭𑀁 𑀕𑀡𑁆𑀳𑀦𑁆𑀢𑁄 𑀯𑀺𑀬 𑀘 𑀢𑀁 𑀢𑀸𑀲𑀁 𑀘𑀺𑀢𑁆𑀢𑀸𑀘𑀸𑀭𑀁 𑀜𑀢𑁆𑀯𑀸 𑁋 ‘‘𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀢𑁄 𑀆𑀕𑀢𑀸𑀕𑀢𑀸𑀦𑀁 𑀅𑀧𑁆𑀧𑁂𑀲𑀓𑁆𑀔𑀫𑀳𑁂𑀲𑀓𑁆𑀔𑀸𑀦𑀁 𑀲𑀩𑁆𑀩𑀸𑀲𑀫𑁆𑀧𑀺 𑀤𑁂𑀯𑀢𑀸𑀦𑀁 𑀦𑀸𑀫𑀕𑁄𑀢𑁆𑀢𑀁 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀲𑀺.

𑀩𑀼𑀤𑁆𑀥𑀸 𑀦𑀸𑀫 𑀫𑀳𑀦𑁆𑀢𑀸 𑀏𑀢𑁂 𑀲𑀢𑁆𑀢𑀯𑀺𑀲𑁂𑀲𑀸, 𑀬𑀁 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢𑀁 𑀯𑀺𑀜𑁆𑀜𑀸𑀢𑀁 𑀧𑀢𑁆𑀢𑀁 𑀧𑀭𑀺𑀬𑁂𑀲𑀺𑀢𑀁 𑀅𑀦𑀼𑀯𑀺𑀘𑀭𑀺𑀢𑀁 𑀫𑀦𑀲𑀸, 𑀦 𑀓𑀺𑀜𑁆𑀘𑀺 𑀓𑀢𑁆𑀣𑀘𑀺 𑀦𑀻𑀮𑀸𑀤𑀺𑀯𑀲𑁂𑀦 𑀯𑀺𑀪𑀢𑁆𑀢𑀭𑀽𑀧𑀸𑀭𑀫𑁆𑀫𑀡𑁂𑀲𑀼 𑀭𑀽𑀧𑀸𑀭𑀫𑁆𑀫𑀡𑀁 𑀯𑀸 𑀪𑁂𑀭𑀻𑀲𑀤𑁆𑀤𑀸𑀤𑀺𑀯𑀲𑁂𑀦 𑀯𑀺𑀪𑀢𑁆𑀢𑀲𑀤𑁆𑀤𑀸𑀭𑀫𑁆𑀫𑀡𑀸𑀤𑀻𑀲𑀼 𑀯𑀺𑀲𑀼𑀁 𑀯𑀺𑀲𑀼𑀁 𑀲𑀤𑁆𑀤𑀸𑀤𑀺𑀆𑀭𑀫𑁆𑀫𑀡𑀁 𑀯𑀸 𑀅𑀢𑁆𑀣𑀺, 𑀬𑀁 𑀏𑀢𑁂𑀲𑀁 𑀜𑀸𑀡𑀫𑀼𑀔𑁂 𑀆𑀧𑀸𑀣𑀁 𑀦𑀸𑀕𑀘𑁆𑀙𑀢𑀺. 𑀬𑀣𑀸𑀳 𑁋

‘‘𑀬𑀁 𑀪𑀺𑀓𑁆𑀔𑀯𑁂 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲…𑀧𑁂… 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢𑀁 𑀯𑀺𑀜𑁆𑀜𑀸𑀢𑀁 𑀧𑀢𑁆𑀢𑀁 𑀧𑀭𑀺𑀬𑁂𑀲𑀺𑀢𑀁 𑀅𑀦𑀼𑀯𑀺𑀘𑀭𑀺𑀢𑀁 𑀫𑀦𑀲𑀸, 𑀢𑀫𑀳𑀁 𑀚𑀸𑀦𑀸𑀫𑀺, 𑀢𑀫𑀳𑀁 𑀧𑀲𑁆𑀲𑀸𑀫𑀺, 𑀢𑀫𑀳𑀁 𑀅𑀩𑁆𑀪𑀜𑁆𑀜𑀸𑀲𑀺’’𑀦𑁆𑀢𑀺 (𑀅. 𑀦𑀺. 𑁪.𑁨𑁪).

𑀏𑀯𑀁 𑀲𑀩𑁆𑀩𑀢𑁆𑀣 𑀅𑀧𑁆𑀧𑀝𑀺𑀳𑀢𑀜𑀸𑀡𑁄 𑀪𑀕𑀯𑀸 𑀲𑀩𑁆𑀩𑀸𑀧𑀺 𑀢𑀸 𑀤𑁂𑀯𑀢𑀸 𑀪𑀩𑁆𑀩𑀸𑀪𑀩𑁆𑀩𑀯𑀲𑁂𑀦 𑀤𑁆𑀯𑁂 𑀓𑁄𑀝𑁆𑀞𑀸𑀲𑁂 𑀅𑀓𑀸𑀲𑀺. ‘‘𑀓𑀫𑁆𑀫𑀸𑀯𑀭𑀡𑁂𑀦 𑀯𑀸 𑀲𑀫𑀦𑁆𑀦𑀸𑀕𑀢𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀸 𑀲𑀢𑁆𑀢𑀸 𑀅𑀪𑀩𑁆𑀩𑀸 𑀦𑀸𑀫. 𑀢𑁂 𑀏𑀓𑀯𑀺𑀳𑀸𑀭𑁂 𑀯𑀲𑀦𑁆𑀢𑁂𑀧𑀺 𑀩𑀼𑀤𑁆𑀥𑀸 𑀦 𑀑𑀮𑁄𑀓𑁂𑀦𑁆𑀢𑀺. 𑀯𑀺𑀧𑀭𑀻𑀢𑀸 𑀧𑀦 𑀪𑀩𑁆𑀩𑀸 𑀦𑀸𑀫, 𑀢𑁂 𑀤𑀽𑀭𑁂 𑀯𑀲𑀦𑁆𑀢𑁂𑀧𑀺 𑀕𑀦𑁆𑀢𑁆𑀯𑀸 𑀲𑀗𑁆𑀕𑀡𑁆𑀳𑀦𑁆𑀢𑀺. 𑀢𑀲𑁆𑀫𑀸 𑀢𑀲𑁆𑀫𑀺𑀫𑁆𑀧𑀺 𑀤𑁂𑀯𑀢𑀸𑀲𑀦𑁆𑀦𑀺𑀧𑀸𑀢𑁂 𑀬𑁂 𑀅𑀪𑀩𑁆𑀩𑀸, 𑀢𑁂 𑀧𑀳𑀸𑀬 𑀪𑀩𑁆𑀩𑁂 𑀧𑀭𑀺𑀕𑁆𑀕𑀳𑁂𑀲𑀺. 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑁋 ‘‘𑀏𑀢𑁆𑀢𑀓𑀸 𑀏𑀢𑁆𑀣 𑀭𑀸𑀕𑀘𑀭𑀺𑀢𑀸, 𑀏𑀢𑁆𑀢𑀓𑀸 𑀤𑁄𑀲𑀘𑀭𑀺𑀢𑀸, 𑀏𑀢𑁆𑀢𑀓𑀸 𑀫𑁄𑀳𑀘𑀭𑀺𑀢𑀸’’𑀢𑀺 𑀘𑀭𑀺𑀢𑀯𑀲𑁂𑀦 𑀙 𑀓𑁄𑀝𑁆𑀞𑀸𑀲𑁂 𑀅𑀓𑀸𑀲𑀺. 𑀅𑀣 𑀦𑁂𑀲𑀁 𑀲𑀧𑁆𑀧𑀸𑀬𑀁 𑀥𑀫𑁆𑀫𑀤𑁂𑀲𑀦𑀁 𑀉𑀧𑀥𑀸𑀭𑀬𑀦𑁆𑀢𑁄 𑁋 ‘‘𑀭𑀸𑀕𑀘𑀭𑀺𑀢𑀸𑀦𑀁 𑀤𑁂𑀯𑀢𑀸𑀦𑀁 𑀲𑀫𑁆𑀫𑀸𑀧𑀭𑀺𑀩𑁆𑀩𑀸𑀚𑀦𑀺𑀬𑀲𑀼𑀢𑁆𑀢𑀁 𑀓𑀣𑁂𑀲𑁆𑀲𑀸𑀫𑀺, 𑀤𑁄𑀲𑀘𑀭𑀺𑀢𑀸𑀦𑀁 𑀓𑀮𑀳𑀯𑀺𑀯𑀸𑀤𑀲𑀼𑀢𑁆𑀢𑀁, 𑀫𑁄𑀳𑀘𑀭𑀺𑀢𑀸𑀦𑀁 𑀫𑀳𑀸𑀩𑁆𑀬𑀽𑀳𑀲𑀼𑀢𑁆𑀢𑀁, 𑀯𑀺𑀢𑀓𑁆𑀓𑀘𑀭𑀺𑀢𑀸𑀦𑀁 𑀘𑀽𑀴𑀩𑁆𑀬𑀽𑀳𑀲𑀼𑀢𑁆𑀢𑀁, 𑀲𑀤𑁆𑀥𑀸𑀘𑀭𑀺𑀢𑀸𑀦𑀁 𑀢𑀼𑀯𑀝𑁆𑀝𑀓𑀧𑀝𑀺𑀧𑀤𑀁, 𑀩𑀼𑀤𑁆𑀥𑀺𑀘𑀭𑀺𑀢𑀸𑀦𑀁 𑀧𑀼𑀭𑀸𑀪𑁂𑀤𑀲𑀼𑀢𑁆𑀢𑀁 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀤𑁂𑀲𑀦𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 𑀧𑀼𑀦 𑀢𑀁 𑀧𑀭𑀺𑀲𑀁 𑀫𑀦𑀲𑀸𑀓𑀸𑀲𑀺 𑁋 ‘‘𑀅𑀢𑁆𑀢𑀚𑁆𑀛𑀸𑀲𑀬𑁂𑀦 𑀦𑀼 𑀔𑁄 𑀚𑀸𑀦𑁂𑀬𑁆𑀬, 𑀧𑀭𑀚𑁆𑀛𑀸𑀲𑀬𑁂𑀦 𑀅𑀢𑁆𑀣𑀼𑀧𑁆𑀧𑀢𑁆𑀢𑀺𑀓𑁂𑀦 𑀧𑀼𑀘𑁆𑀙𑀸𑀯𑀲𑁂𑀦𑀸’’𑀢𑀺. 𑀢𑀢𑁄 ‘‘𑀧𑀼𑀘𑁆𑀙𑀸𑀯𑀲𑁂𑀦 𑀚𑀸𑀦𑁂𑀬𑁆𑀬𑀸’’𑀢𑀺 𑀜𑀢𑁆𑀯𑀸 ‘‘𑀅𑀢𑁆𑀣𑀺 𑀦𑀼 𑀔𑁄 𑀓𑁄𑀘𑀺 𑀤𑁂𑀯𑀢𑀸𑀦𑀁 𑀅𑀚𑁆𑀛𑀸𑀲𑀬𑀁 𑀕𑀳𑁂𑀢𑁆𑀯𑀸 𑀘𑀭𑀺𑀢𑀯𑀲𑁂𑀦 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀼𑀁 𑀲𑀫𑀢𑁆𑀣𑁄’’𑀢𑀺 ‘‘𑀢𑁂𑀲𑀼 𑀧𑀜𑁆𑀘𑀲𑀢𑁂𑀲𑀼 𑀪𑀺𑀓𑁆𑀔𑀽𑀲𑀼 𑀏𑀓𑁄𑀧𑀺 𑀦 𑀲𑀓𑁆𑀓𑁄𑀢𑀻’’𑀢𑀺 𑀅𑀤𑁆𑀤𑀲. 𑀢𑀢𑁄 𑀅𑀲𑀻𑀢𑀺𑀫𑀳𑀸𑀲𑀸𑀯𑀓𑁂 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑁂 𑀘 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 ‘‘𑀢𑁂𑀧𑀺 𑀦 𑀲𑀓𑁆𑀓𑁄𑀦𑁆𑀢𑀻’’𑀢𑀺 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀲𑀘𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀪𑀯𑁂𑀬𑁆𑀬, 𑀲𑀓𑁆𑀓𑀼𑀡𑁂𑀬𑁆𑀬 𑀦𑀼 𑀔𑁄’’𑀢𑀺 ‘‘𑀲𑁄𑀧𑀺 𑀦 𑀲𑀓𑁆𑀓𑀼𑀡𑁂𑀬𑁆𑀬𑀸’’𑀢𑀺 𑀜𑀢𑁆𑀯𑀸 ‘‘𑀲𑀓𑁆𑀓𑀲𑀼𑀬𑀸𑀫𑀸𑀤𑀻𑀲𑀼 𑀓𑁄𑀘𑀺 𑀲𑀓𑁆𑀓𑀼𑀡𑁂𑀬𑁆𑀬𑀸’’𑀢𑀺 𑀲𑀫𑀦𑁆𑀦𑀸𑀳𑀭𑀺. 𑀲𑀘𑁂 𑀳𑀺 𑀢𑁂𑀲𑀼 𑀓𑁄𑀘𑀺 𑀲𑀓𑁆𑀓𑀼𑀡𑁂𑀬𑁆𑀬, 𑀢𑀁 𑀧𑀼𑀘𑁆𑀙𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑀸 𑀯𑀺𑀲𑁆𑀲𑀚𑁆𑀚𑁂𑀬𑁆𑀬, 𑀦 𑀧𑀦 𑀢𑁂𑀲𑀼𑀧𑀺 𑀓𑁄𑀘𑀺 𑀲𑀓𑁆𑀓𑁄𑀢𑀺.

𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀫𑀸𑀤𑀺𑀲𑁄 𑀩𑀼𑀤𑁆𑀥𑁄𑀬𑁂𑀯 𑀲𑀓𑁆𑀓𑀼𑀡𑁂𑀬𑁆𑀬, 𑀅𑀢𑁆𑀣𑀺 𑀧𑀦 𑀓𑀢𑁆𑀣𑀘𑀺 𑀅𑀜𑁆𑀜𑁄 𑀩𑀼𑀤𑁆𑀥𑁄’’𑀢𑀺 𑀅𑀦𑀦𑁆𑀢𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀅𑀦𑀦𑁆𑀢𑀜𑀸𑀡𑀁 𑀧𑀢𑁆𑀣𑀭𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀅𑀜𑁆𑀜𑀁 𑀩𑀼𑀤𑁆𑀥𑀁 𑀦 𑀅𑀤𑁆𑀤𑀲. 𑀅𑀦𑀘𑁆𑀙𑀭𑀺𑀬𑀜𑁆𑀘𑁂𑀢𑀁, 𑀬𑀁 𑀇𑀤𑀸𑀦𑀺 𑀅𑀢𑁆𑀢𑀦𑀸 𑀲𑀫𑀁 𑀦 𑀧𑀲𑁆𑀲𑁂𑀬𑁆𑀬, 𑀲𑁄 𑀚𑀸𑀢𑀤𑀺𑀯𑀲𑁂𑀧𑀺 𑀩𑁆𑀭𑀳𑁆𑀫𑀚𑀸𑀮𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀢𑀦𑀸 𑀲𑀫𑀁 𑀅𑀧𑀲𑁆𑀲𑀦𑁆𑀢𑁄 𑁋 ‘‘𑀅𑀕𑁆𑀕𑁄𑀳𑀫𑀲𑁆𑀫𑀺 𑀮𑁄𑀓𑀲𑁆𑀲𑀸’’𑀢𑀺 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀁 𑀲𑀻𑀳𑀦𑀸𑀤𑀁 𑀦𑀤𑀺. 𑀏𑀯𑀁 𑀅𑀜𑁆𑀜𑀁 𑀅𑀢𑁆𑀢𑀦𑀸 𑀲𑀫𑀁 𑀅𑀧𑀲𑁆𑀲𑀺𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑁂 𑀅𑀳𑀁 𑀧𑀼𑀘𑁆𑀙𑀺𑀢𑁆𑀯𑀸 𑀅𑀳𑀫𑁂𑀯 𑀯𑀺𑀲𑁆𑀲𑀚𑁆𑀚𑁂𑀬𑁆𑀬𑀁, 𑀏𑀯𑀫𑁆𑀧𑁂𑀢𑀸 𑀤𑁂𑀯𑀢𑀸 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀺 𑀧𑀝𑀺𑀯𑀺𑀚𑁆𑀛𑀺𑀢𑀼𑀁. 𑀅𑀜𑁆𑀜𑀲𑁆𑀫𑀺𑀁 𑀧𑀦 𑀩𑀼𑀤𑁆𑀥𑁂𑀬𑁂𑀯 𑀧𑀼𑀘𑁆𑀙𑀦𑁆𑀢𑁂 𑀫𑀬𑀺 𑀘 𑀯𑀺𑀲𑁆𑀲𑀚𑁆𑀚𑀦𑁆𑀢𑁂 𑀅𑀘𑁆𑀙𑁂𑀭𑀓𑀁 𑀪𑀯𑀺𑀲𑁆𑀲𑀢𑀺, 𑀲𑀓𑁆𑀔𑀺𑀲𑁆𑀲𑀦𑁆𑀢𑀺 𑀘 𑀤𑁂𑀯𑀢𑀸 𑀧𑀝𑀺𑀯𑀺𑀚𑁆𑀛𑀺𑀢𑀼𑀁, 𑀢𑀲𑁆𑀫𑀸 𑀦𑀺𑀫𑁆𑀫𑀺𑀢𑀩𑀼𑀤𑁆𑀥𑀁 𑀫𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀅𑀪𑀺𑀜𑁆𑀜𑀸𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑁋 ‘‘𑀧𑀢𑁆𑀢𑀘𑀻𑀯𑀭𑀕𑀳𑀡𑀁 𑀆𑀮𑁄𑀓𑀺𑀢𑀯𑀺𑀮𑁄𑀓𑀺𑀢𑀁 𑀲𑀫𑀺𑀜𑁆𑀚𑀺𑀢𑀧𑀲𑀸𑀭𑀺𑀢𑀜𑁆𑀘 𑀫𑀫 𑀲𑀤𑀺𑀲𑀁𑀬𑁂𑀯 𑀳𑁄𑀢𑀽’’𑀢𑀺 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑁂𑀳𑀺 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀧𑀸𑀘𑀻𑀦𑀬𑀼𑀕𑀦𑁆𑀥𑀭𑀧𑀭𑀺𑀓𑁆𑀔𑁂𑀧𑀢𑁄 𑀉𑀮𑁆𑀮𑀗𑁆𑀖𑀫𑀸𑀦𑀁 𑀘𑀦𑁆𑀤𑀫𑀡𑁆𑀟𑀮𑀁 𑀪𑀺𑀦𑁆𑀤𑀺𑀢𑁆𑀯𑀸 𑀦𑀺𑀓𑁆𑀔𑀫𑀦𑁆𑀢𑀁 𑀯𑀺𑀬 𑀭𑀽𑀧𑀸𑀯𑀘𑀭𑀘𑀺𑀢𑁆𑀢𑁂𑀦 𑀅𑀥𑀺𑀝𑁆𑀞𑀸𑀲𑀺.

𑀤𑁂𑀯𑀲𑀗𑁆𑀖𑁄 𑀢𑀁 𑀤𑀺𑀲𑁆𑀯𑀸 𑁋 ‘‘𑀅𑀜𑁆𑀜𑁄𑀧𑀺 𑀦𑀼 𑀔𑁄, 𑀪𑁄, 𑀘𑀦𑁆𑀤𑁄 𑀉𑀕𑁆𑀕𑀢𑁄’’𑀢𑀺 𑀆𑀳. 𑀅𑀣 𑀘𑀦𑁆𑀤𑀁 𑀑𑀳𑀸𑀬 𑀆𑀲𑀦𑁆𑀦𑀢𑀭𑁂 𑀚𑀸𑀢𑁂 ‘‘𑀦 𑀘𑀦𑁆𑀤𑁄, 𑀲𑀽𑀭𑀺𑀬𑁄 𑀉𑀕𑁆𑀕𑀢𑁄’’𑀢𑀺, 𑀧𑀼𑀦 𑀆𑀲𑀦𑁆𑀦𑀢𑀭𑁂 𑀚𑀸𑀢𑁂 ‘‘𑀦 𑀲𑀽𑀭𑀺𑀬𑁄, 𑀤𑁂𑀯𑀯𑀺𑀫𑀸𑀦𑀁 𑀏𑀓’’𑀦𑁆𑀢𑀺, 𑀧𑀼𑀦 𑀆𑀲𑀦𑁆𑀦𑀢𑀭𑁂 𑀚𑀸𑀢𑁂 ‘‘𑀦 𑀤𑁂𑀯𑀯𑀺𑀫𑀸𑀦𑀁, 𑀤𑁂𑀯𑀧𑀼𑀢𑁆𑀢𑁄 𑀏𑀓𑁄’’𑀢𑀺, 𑀧𑀼𑀦 𑀆𑀲𑀦𑁆𑀦𑀢𑀭𑁂 𑀚𑀸𑀢𑁂 ‘‘𑀦 𑀤𑁂𑀯𑀧𑀼𑀢𑁆𑀢𑁄, 𑀫𑀳𑀸𑀩𑁆𑀭𑀳𑁆𑀫𑀸 𑀏𑀓𑁄’’𑀢𑀺, 𑀧𑀼𑀦 𑀆𑀲𑀦𑁆𑀦𑀢𑀭𑁂 𑀚𑀸𑀢𑁂 ‘‘𑀦 𑀫𑀳𑀸𑀩𑁆𑀭𑀳𑁆𑀫𑀸, 𑀅𑀧𑀭𑁄𑀧𑀺 𑀪𑁄 𑀩𑀼𑀤𑁆𑀥𑁄 𑀆𑀕𑀢𑁄’’𑀢𑀺 𑀆𑀳. 𑀢𑀢𑁆𑀣 𑀧𑀼𑀣𑀼𑀚𑁆𑀚𑀦𑀤𑁂𑀯𑀢𑀸 𑀘𑀺𑀦𑁆𑀢𑀬𑀺𑀁𑀲𑀼 𑁋 ‘‘𑀏𑀓𑀩𑀼𑀤𑁆𑀥𑀲𑁆𑀲 𑀢𑀸𑀯 𑀅𑀬𑀁 𑀤𑁂𑀯𑀢𑀸𑀲𑀦𑁆𑀦𑀺𑀧𑀸𑀢𑁄, 𑀤𑁆𑀯𑀺𑀦𑁆𑀦𑀁 𑀓𑀻𑀯 𑀫𑀳𑀦𑁆𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀅𑀭𑀺𑀬𑀤𑁂𑀯𑀢𑀸 𑀘𑀺𑀦𑁆𑀢𑀬𑀺𑀁𑀲𑀼 𑁋 ‘‘𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸 𑀤𑁆𑀯𑁂 𑀩𑀼𑀤𑁆𑀥𑀸 𑀦𑀸𑀫 𑀦𑀢𑁆𑀣𑀺, 𑀅𑀤𑁆𑀥𑀸 𑀪𑀕𑀯𑀢𑀸 𑀅𑀢𑁆𑀢𑀦𑀸 𑀲𑀤𑀺𑀲𑁄 𑀅𑀜𑁆𑀜𑁄 𑀏𑀓𑁄 𑀩𑀼𑀤𑁆𑀥𑁄 𑀦𑀺𑀫𑁆𑀫𑀺𑀢𑁄’’𑀢𑀺.

𑀅𑀣 𑀢𑀲𑁆𑀲 𑀤𑁂𑀯𑀲𑀗𑁆𑀖𑀲𑁆𑀲 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀦𑀺𑀫𑁆𑀫𑀺𑀢𑀩𑀼𑀤𑁆𑀥𑁄 𑀆𑀕𑀦𑁆𑀢𑁆𑀯𑀸 𑀤𑀲𑀩𑀮𑀁 𑀅𑀯𑀦𑁆𑀤𑀺𑀢𑁆𑀯𑀸𑀯 𑀲𑀫𑁆𑀫𑀼𑀔𑀝𑁆𑀞𑀸𑀦𑁂 𑀲𑀫𑀲𑀫𑀁 𑀓𑀢𑁆𑀯𑀸 𑀫𑀸𑀧𑀺𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀪𑀕𑀯𑀢𑁄𑀧𑀺 𑀤𑁆𑀯𑀢𑁆𑀢𑀺𑀁𑀲 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺, 𑀦𑀺𑀫𑁆𑀫𑀺𑀢𑀲𑁆𑀲𑀸𑀧𑀺 𑀤𑁆𑀯𑀢𑁆𑀢𑀺𑀁𑀲𑀸𑀯, 𑀪𑀕𑀯𑀢𑁄𑀧𑀺 𑀲𑀭𑀻𑀭𑀸 𑀙𑀩𑁆𑀩𑀡𑁆𑀡𑀭𑀲𑁆𑀫𑀺𑀬𑁄 𑀦𑀺𑀓𑁆𑀔𑀫𑀦𑁆𑀢𑀺, 𑀦𑀺𑀫𑁆𑀫𑀺𑀢𑀲𑁆𑀲𑀸𑀧𑀺, 𑀪𑀕𑀯𑀢𑁄 𑀲𑀭𑀻𑀭𑀭𑀲𑁆𑀫𑀺𑀬𑁄 𑀦𑀺𑀫𑁆𑀫𑀺𑀢𑀲𑁆𑀲 𑀲𑀭𑀻𑀭𑁂 𑀧𑀝𑀺𑀳𑀜𑁆𑀜𑀦𑁆𑀢𑀺, 𑀦𑀺𑀫𑁆𑀫𑀺𑀢𑀲𑁆𑀲 𑀲𑀭𑀻𑀭𑀭𑀲𑁆𑀫𑀺𑀬𑁄 𑀪𑀕𑀯𑀢𑁄 𑀓𑀸𑀬𑁂 𑀧𑀝𑀺𑀳𑀜𑁆𑀜𑀦𑁆𑀢𑀺. 𑀢𑀸 𑀤𑁆𑀯𑀺𑀦𑁆𑀦𑀫𑁆𑀧𑀺 𑀩𑀼𑀤𑁆𑀥𑀸𑀦𑀁 𑀲𑀭𑀻𑀭𑀢𑁄 𑀉𑀕𑁆𑀕𑀫𑁆𑀫 𑀅𑀓𑀦𑀺𑀝𑁆𑀞𑀪𑀯𑀦𑀁 𑀆𑀳𑀘𑁆𑀘 𑀢𑀢𑁄 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀤𑁂𑀯𑀢𑀸𑀦𑀁 𑀫𑀢𑁆𑀣𑀓𑀧𑀭𑀺𑀬𑀦𑁆𑀢𑁂 𑀑𑀢𑀭𑀺𑀢𑁆𑀯𑀸 𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀲𑀓𑀮𑀘𑀓𑁆𑀓𑀯𑀸𑀴𑀕𑀩𑁆𑀪𑀁 𑀲𑀼𑀯𑀡𑁆𑀡𑀫𑀬𑀯𑀗𑁆𑀓𑀕𑁄𑀧𑀸𑀦𑀲𑀻𑀯𑀺𑀦𑀤𑁆𑀥𑀫𑀺𑀯 𑀘𑁂𑀢𑀺𑀬𑀖𑀭𑀁 𑀯𑀺𑀭𑁄𑀘𑀺𑀢𑁆𑀣. 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀤𑁂𑀯𑀢𑀸 𑀏𑀓𑀘𑀓𑁆𑀓𑀯𑀸𑀴𑁂 𑀭𑀸𑀲𑀺𑀪𑀽𑀢𑀸 𑀤𑁆𑀯𑀺𑀦𑁆𑀦𑀁 𑀩𑀼𑀤𑁆𑀥𑀸𑀦𑀁 𑀭𑀲𑁆𑀫𑀺𑀕𑀩𑁆𑀪𑀦𑁆𑀢𑀭𑀁 𑀧𑀯𑀺𑀲𑀺𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀦𑀺𑀫𑁆𑀫𑀺𑀢𑀩𑀼𑀤𑁆𑀥𑁄 𑀦𑀺𑀲𑀻𑀤𑀦𑁆𑀢𑁄𑀬𑁂𑀯 𑀤𑀲𑀩𑀮𑀲𑁆𑀲 𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀓𑀺𑀮𑁂𑀲𑀧𑁆𑀧𑀳𑀸𑀦𑀁 𑀅𑀪𑀺𑀢𑁆𑀣𑀯𑀦𑁆𑀢𑁄 𑁋

‘‘𑀧𑀼𑀘𑁆𑀙𑀸𑀫𑀺 𑀫𑀼𑀦𑀺𑀁 𑀧𑀳𑀽𑀢𑀧𑀜𑁆𑀜𑀁,

𑀢𑀺𑀡𑁆𑀡𑀁 𑀧𑀸𑀭𑀗𑁆𑀕𑀢𑀁 𑀧𑀭𑀺𑀦𑀺𑀩𑁆𑀩𑀼𑀢𑀁 𑀞𑀺𑀢𑀢𑁆𑀢𑀁;

𑀦𑀺𑀓𑁆𑀔𑀫𑁆𑀫 𑀖𑀭𑀸 𑀧𑀦𑀼𑀚𑁆𑀚 𑀓𑀸𑀫𑁂,

𑀓𑀣𑀁 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀲𑁄 𑀮𑁄𑀓𑁂 𑀧𑀭𑀺𑀩𑁆𑀩𑀚𑁂𑀬𑁆𑀬𑀸’’𑀢𑀺. (𑀲𑀼. 𑀦𑀺. 𑁩𑁬𑁧) 𑁋

𑀕𑀸𑀣𑀁 𑀅𑀪𑀸𑀲𑀺. 𑀲𑀢𑁆𑀣𑀸 𑀤𑁂𑀯𑀢𑀸𑀦𑀁 𑀢𑀸𑀯 𑀘𑀺𑀢𑁆𑀢𑀓𑀮𑁆𑀮𑀢𑀸𑀚𑀦𑀦𑀢𑁆𑀣𑀁 𑀆𑀕𑀢𑀸𑀕𑀢𑀸𑀦𑀁 𑀦𑀸𑀫𑀕𑁄𑀢𑁆𑀢𑀸𑀦𑀺 𑀓𑀣𑁂𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀆𑀘𑀺𑀓𑁆𑀔𑀺𑀲𑁆𑀲𑀸𑀫𑀺, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳.

𑁩𑁩𑁪. 𑀢𑀢𑁆𑀣 𑀲𑀺𑀮𑁄𑀓𑀫𑀦𑀼𑀓𑀲𑁆𑀲𑀸𑀫𑀻𑀢𑀺 𑀅𑀓𑁆𑀔𑀭𑀧𑀤𑀦𑀺𑀬𑀫𑀺𑀢𑀁 𑀯𑀘𑀦𑀲𑀗𑁆𑀖𑀸𑀢𑀁 𑀧𑀯𑀢𑁆𑀢𑀬𑀺𑀲𑁆𑀲𑀸𑀫𑀺. 𑀬𑀢𑁆𑀣 𑀪𑀼𑀫𑁆𑀫𑀸 𑀢𑀤𑀲𑁆𑀲𑀺𑀢𑀸𑀢𑀺 𑀬𑁂𑀲𑀼 𑀬𑁂𑀲𑀼 𑀞𑀸𑀦𑁂𑀲𑀼 𑀪𑀼𑀫𑁆𑀫𑀸 𑀤𑁂𑀯𑀢𑀸 𑀢𑀁 𑀢𑀁 𑀦𑀺𑀲𑁆𑀲𑀺𑀢𑀸. 𑀬𑁂 𑀲𑀺𑀢𑀸 𑀕𑀺𑀭𑀺𑀕𑀩𑁆𑀪𑀭𑀦𑁆𑀢𑀺𑀆𑀤𑀻𑀳𑀺 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀯𑀡𑁆𑀡𑀁 𑀓𑀣𑁂𑀲𑀺, 𑀬𑁂 𑀪𑀺𑀓𑁆𑀔𑀽 𑀕𑀺𑀭𑀺𑀓𑀼𑀘𑁆𑀙𑀺𑀁 𑀦𑀺𑀲𑁆𑀲𑀺𑀢𑀸𑀢𑀺 𑀅𑀢𑁆𑀣𑁄. 𑀧𑀳𑀺𑀢𑀢𑁆𑀢𑀸𑀢𑀺 𑀧𑁂𑀲𑀺𑀢𑀘𑀺𑀢𑁆𑀢𑀸. 𑀲𑀫𑀸𑀳𑀺𑀢𑀸𑀢𑀺 𑀅𑀯𑀺𑀓𑁆𑀔𑀺𑀢𑁆𑀢𑀸.

𑀧𑀼𑀣𑀽𑀢𑀺 𑀩𑀳𑀼𑀚𑀦𑀸. 𑀲𑀻𑀳𑀸𑀯 𑀲𑀮𑁆𑀮𑀻𑀦𑀸𑀢𑀺 𑀲𑀻𑀳𑀸 𑀯𑀺𑀬 𑀦𑀺𑀮𑀻𑀦𑀸 𑀏𑀓𑀢𑁆𑀢𑀁 𑀉𑀧𑀕𑀢𑀸. 𑀮𑁄𑀫𑀳𑀁𑀲𑀸𑀪𑀺𑀲𑀫𑁆𑀪𑀼𑀦𑁄𑀢𑀺 𑀮𑁄𑀫𑀳𑀁𑀲𑀁 𑀅𑀪𑀺𑀪𑀯𑀺𑀢𑁆𑀯𑀸 𑀞𑀺𑀢𑀸, 𑀦𑀺𑀩𑁆𑀪𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀑𑀤𑀸𑀢𑀫𑀦𑀲𑀸 𑀲𑀼𑀤𑁆𑀥𑀸𑀢𑀺 𑀑𑀤𑀸𑀢𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀲𑀼𑀤𑁆𑀥𑀸. 𑀯𑀺𑀧𑁆𑀧𑀲𑀦𑁆𑀦𑀸𑀫𑀦𑀸𑀯𑀺𑀮𑀸𑀢𑀺 𑀯𑀺𑀧𑁆𑀧𑀲𑀦𑁆𑀦𑀅𑀦𑀸𑀯𑀺𑀮𑀸.

𑀪𑀺𑀬𑁆𑀬𑁄𑀧𑀜𑁆𑀘𑀲𑀢𑁂 𑀜𑀢𑁆𑀯𑀸𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀲𑀤𑁆𑀥𑀺𑀁 𑀅𑀢𑀺𑀭𑁂𑀓𑀧𑀜𑁆𑀘𑀲𑀢𑁂 𑀪𑀺𑀓𑁆𑀔𑀽 𑀚𑀸𑀦𑀺𑀢𑁆𑀯𑀸. 𑀯𑀦𑁂 𑀓𑀸𑀧𑀺𑀮𑀯𑀢𑁆𑀣𑀯𑁂𑀢𑀺 𑀓𑀧𑀺𑀮𑀯𑀢𑁆𑀣𑀼𑀲𑀫𑀻𑀧𑀫𑁆𑀳𑀺 𑀚𑀸𑀢𑁂 𑀯𑀦𑀲𑀡𑁆𑀟𑁂. 𑀢𑀢𑁄 𑀆𑀫𑀦𑁆𑀢𑀬𑀻 𑀲𑀢𑁆𑀣𑀸𑀢𑀺 𑀢𑀤𑀸 𑀆𑀫𑀦𑁆𑀢𑀬𑀺. 𑀲𑀸𑀯𑀓𑁂 𑀲𑀸𑀲𑀦𑁂 𑀭𑀢𑁂𑀢𑀺 𑀅𑀢𑁆𑀢𑀦𑁄 𑀥𑀫𑁆𑀫𑀤𑁂𑀲𑀦𑀸𑀬 𑀲𑀯𑀦𑀦𑁆𑀢𑁂 𑀚𑀸𑀢𑀢𑁆𑀢𑀸 𑀲𑀸𑀯𑀓𑁂 𑀲𑀺𑀓𑁆𑀔𑀢𑁆𑀢𑀬𑀲𑀸𑀲𑀦𑁂 𑀭𑀢𑀢𑁆𑀢𑀸 𑀲𑀸𑀲𑀦𑁂 𑀭𑀢𑁂. 𑀇𑀤𑀁 𑀲𑀩𑁆𑀩𑀁 𑁋 ‘‘𑀲𑀺𑀮𑁄𑀓𑀫𑀦𑀼𑀓𑀲𑁆𑀲𑀸𑀫𑀻’’𑀢𑀺 𑀯𑀘𑀦𑀢𑁄 𑀅𑀜𑁆𑀜𑁂𑀦 𑀯𑀼𑀢𑁆𑀢𑀁 𑀯𑀺𑀬 𑀓𑀢𑁆𑀯𑀸 𑀯𑀤𑀢𑀺.

𑀤𑁂𑀯𑀓𑀸𑀬𑀸 𑀅𑀪𑀺𑀓𑁆𑀓𑀦𑁆𑀢𑀸, 𑀢𑁂 𑀯𑀺𑀚𑀸𑀦𑀸𑀣 𑀪𑀺𑀓𑁆𑀔𑀯𑁄𑀢𑀺 𑀢𑁂 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀯𑀺𑀚𑀸𑀦𑀸𑀣𑀸𑀢𑀺 𑀦𑁂𑀲𑀁 𑀪𑀺𑀓𑁆𑀔𑀽𑀦𑀁 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀸𑀪𑀺𑀦𑀻𑀳𑀸𑀭𑀢𑁆𑀣𑀸𑀬 𑀓𑀣𑁂𑀲𑀺. 𑀢𑁂 𑀘 𑀆𑀢𑀧𑁆𑀧𑀫𑀓𑀭𑀼𑀁, 𑀲𑀼𑀢𑁆𑀯𑀸 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀦𑁆𑀢𑀺 𑀢𑁂 𑀘 𑀪𑀺𑀓𑁆𑀔𑀽 𑀢𑀁 𑀩𑀼𑀤𑁆𑀥𑀲𑀸𑀲𑀦𑀁 𑀲𑀼𑀢𑁆𑀯𑀸 𑀢𑀸𑀯𑀤𑁂𑀯 𑀢𑀤𑀢𑁆𑀣𑀸𑀬 𑀯𑀻𑀭𑀺𑀬𑀁 𑀓𑀭𑀺𑀁𑀲𑀼.

𑀏𑀯𑀁 𑀓𑀢𑀫𑀢𑁆𑀢𑀸𑀢𑀧𑁆𑀧𑀸𑀦𑀁𑀬𑁂𑀯 𑀢𑁂𑀲𑀁 𑀧𑀸𑀢𑀼𑀭𑀳𑀼 𑀜𑀸𑀡𑀁. 𑀓𑀻𑀤𑀺𑀲𑀁? 𑀅𑀫𑀦𑀼𑀲𑁆𑀲𑀸𑀦𑀁 𑀤𑀲𑁆𑀲𑀦𑀁 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁 𑀉𑀧𑁆𑀧𑀚𑁆𑀚𑀺. 𑀦 𑀢𑀁 𑀢𑁂𑀳𑀺 𑀢𑀲𑁆𑀫𑀺𑀁 𑀔𑀡𑁂 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀉𑀧𑁆𑀧𑀸𑀤𑀺𑀢𑀁. 𑀅𑀭𑀺𑀬𑀫𑀕𑁆𑀕𑁂𑀦𑁂𑀯 𑀳𑀺 𑀢𑀁 𑀦𑀺𑀧𑁆𑀨𑀦𑁆𑀦𑀁. 𑀅𑀫𑀦𑀼𑀲𑁆𑀲𑀤𑀲𑁆𑀲𑀦𑀢𑁆𑀣𑀁 𑀧𑀦𑀲𑁆𑀲 𑀅𑀪𑀺𑀦𑀻𑀳𑀸𑀭𑀫𑀢𑁆𑀢𑀫𑁂𑀯 𑀓𑀢𑀁. 𑀲𑀢𑁆𑀣𑀸𑀧𑀺 𑁋 ‘‘𑀅𑀢𑁆𑀣𑀺 𑀢𑀼𑀫𑁆𑀳𑀸𑀓𑀁 𑀜𑀸𑀡𑀁, 𑀢𑀁 𑀦𑀻𑀳𑀭𑀺𑀢𑁆𑀯𑀸 𑀢𑁂𑀦 𑀳𑀺 𑀢𑁂 𑀯𑀺𑀚𑀸𑀦𑀸𑀣𑀸’’𑀢𑀺 𑀇𑀤𑀫𑁂𑀯 𑀲𑀦𑁆𑀥𑀸𑀬 ‘‘𑀢𑁂 𑀯𑀺𑀚𑀸𑀦𑀸𑀣, 𑀪𑀺𑀓𑁆𑀔𑀯𑁄’’𑀢𑀺 𑀆𑀳.

𑀅𑀧𑁆𑀧𑁂𑀓𑁂 𑀲𑀢𑀫𑀤𑁆𑀤𑀓𑁆𑀔𑀼𑀦𑁆𑀢𑀺 𑀢𑁂𑀲𑀼 𑀪𑀺𑀓𑁆𑀔𑀽𑀲𑀼 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀅𑀫𑀦𑀼𑀲𑁆𑀲𑀸𑀦𑀁 𑀲𑀢𑀁 𑀅𑀤𑁆𑀤𑀲𑀁𑀲𑀼. 𑀲𑀳𑀲𑁆𑀲𑀁 𑀅𑀣 𑀲𑀢𑁆𑀢𑀭𑀺𑀦𑁆𑀢𑀺 𑀏𑀓𑁂 𑀲𑀳𑀲𑁆𑀲𑀁. 𑀏𑀓𑁂 𑀲𑀢𑁆𑀢𑀢𑀺 𑀲𑀳𑀲𑁆𑀲𑀸𑀦𑀺.

𑀲𑀢𑀁 𑀏𑀓𑁂 𑀲𑀳𑀲𑁆𑀲𑀸𑀦𑀦𑁆𑀢𑀺 𑀏𑀓𑁂 𑀲𑀢𑀲𑀳𑀲𑁆𑀲𑀁 𑀅𑀤𑁆𑀤𑀲𑀁𑀲𑀼. 𑀅𑀧𑁆𑀧𑁂𑀓𑁂𑀦𑀦𑁆𑀢𑀫𑀤𑁆𑀤𑀓𑁆𑀔𑀼𑀦𑁆𑀢𑀺 𑀯𑀺𑀧𑀼𑀮𑀁 𑀅𑀤𑁆𑀤𑀲𑀁𑀲𑀼, 𑀲𑀢𑀯𑀲𑁂𑀦 𑀲𑀳𑀲𑁆𑀲𑀯𑀲𑁂𑀦 𑀘 𑀅𑀧𑀭𑀺𑀘𑁆𑀙𑀺𑀦𑁆𑀦𑁂𑀧𑀺 𑀅𑀤𑁆𑀤𑀲𑀁𑀲𑀽𑀢𑀺 𑀅𑀢𑁆𑀣𑁄. 𑀓𑀲𑁆𑀫𑀸? 𑀬𑀲𑁆𑀫𑀸 𑀤𑀺𑀲𑀸 𑀲𑀩𑁆𑀩𑀸 𑀨𑀼𑀝𑀸 𑀅𑀳𑀼𑀁, 𑀪𑀭𑀺𑀢𑀸 𑀲𑀫𑁆𑀧𑀼𑀡𑁆𑀡𑀸𑀯 𑀅𑀳𑁂𑀲𑀼𑀁.

𑀢𑀜𑁆𑀘 𑀲𑀩𑁆𑀩𑀁 𑀅𑀪𑀺𑀜𑁆𑀜𑀸𑀬𑀸𑀢𑀺 𑀬𑀁 𑀢𑁂𑀲𑀼 𑀏𑀓𑁂𑀦𑁂𑀓𑁂𑀦 𑀤𑀺𑀝𑁆𑀞𑀁, 𑀢𑀜𑁆𑀘 𑀲𑀩𑁆𑀩𑀁 𑀚𑀸𑀦𑀺𑀢𑁆𑀯𑀸. 𑀯𑀯𑀢𑁆𑀣𑀺𑀢𑁆𑀯𑀸𑀦 𑀘𑀓𑁆𑀔𑀼𑀫𑀸𑀢𑀺 𑀳𑀢𑁆𑀣𑀢𑀮𑁂 𑀮𑁂𑀔𑀁 𑀯𑀺𑀬 𑀧𑀘𑁆𑀘𑀓𑁆𑀔𑀢𑁄 𑀯𑀯𑀢𑁆𑀣𑀧𑁂𑀢𑁆𑀯𑀸 𑀧𑀜𑁆𑀘𑀳𑀺 𑀘𑀓𑁆𑀔𑀽𑀳𑀺 𑀘𑀓𑁆𑀔𑀼𑀫𑀸 𑀲𑀢𑁆𑀣𑀸. 𑀢𑀢𑁄 𑀆𑀫𑀦𑁆𑀢𑀬𑀻𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀕𑀸𑀣𑀫𑁂𑀯 𑀦𑀸𑀫𑀕𑁄𑀢𑁆𑀢𑀓𑀺𑀢𑁆𑀢𑀦𑀢𑁆𑀣𑀸𑀬 𑀆𑀳. 𑀢𑀼𑀫𑁆𑀳𑁂 𑀏𑀢𑁂 𑀯𑀺𑀚𑀸𑀦𑀸𑀣, 𑀧𑀲𑁆𑀲𑀣, 𑀑𑀮𑁄𑀓𑁂𑀣, 𑀬𑁂 𑀯𑁄𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀻𑀢𑀺 𑀅𑀬𑀫𑁂𑀢𑁆𑀣 𑀲𑀫𑁆𑀩𑀦𑁆𑀥𑁄. 𑀕𑀺𑀭𑀸𑀳𑀻𑀢𑀺 𑀯𑀘𑀦𑁂𑀳𑀺. 𑀅𑀦𑀼𑀧𑀼𑀩𑁆𑀩𑀲𑁄𑀢𑀺 𑀅𑀦𑀼𑀧𑀝𑀺𑀧𑀸𑀝𑀺𑀬𑀸.

𑁩𑁩𑁫. 𑀲𑀢𑁆𑀢𑀲𑀳𑀲𑁆𑀲𑀸 𑀢𑁂 𑀬𑀓𑁆𑀔𑀸, 𑀪𑀼𑀫𑁆𑀫𑀸 𑀓𑀸𑀧𑀺𑀮𑀯𑀢𑁆𑀣𑀯𑀸𑀢𑀺 𑀲𑀢𑁆𑀢𑀲𑀳𑀲𑁆𑀲𑀸 𑀢𑀸𑀯𑁂𑀢𑁆𑀣 𑀓𑀧𑀺𑀮𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀦𑀺𑀩𑁆𑀩𑀢𑁆𑀢𑀸 𑀪𑀼𑀫𑁆𑀫𑀸 𑀬𑀓𑁆𑀔𑀸𑀬𑁂𑀯𑀸𑀢𑀺 𑀯𑀤𑀢𑀺. 𑀇𑀤𑁆𑀥𑀺𑀫𑀦𑁆𑀢𑁄𑀢𑀺 𑀤𑀺𑀩𑁆𑀩𑀇𑀤𑁆𑀥𑀺𑀬𑀼𑀢𑁆𑀢𑀸. 𑀚𑀼𑀢𑀺𑀫𑀦𑁆𑀢𑁄𑀢𑀺 𑀆𑀦𑀼𑀪𑀸𑀯𑀲𑀫𑁆𑀧𑀦𑁆𑀦𑀸. 𑀯𑀡𑁆𑀡𑀯𑀦𑁆𑀢𑁄𑀢𑀺 𑀲𑀭𑀻𑀭𑀯𑀡𑁆𑀡𑀲𑀫𑁆𑀧𑀦𑁆𑀦𑀸. 𑀬𑀲𑀲𑁆𑀲𑀺𑀦𑁄𑀢𑀺 𑀧𑀭𑀺𑀯𑀸𑀭𑀲𑀫𑁆𑀧𑀦𑁆𑀦𑀸. 𑀫𑁄𑀤𑀫𑀸𑀦𑀸 𑀅𑀪𑀺𑀓𑁆𑀓𑀸𑀫𑀼𑀦𑁆𑀢𑀺 𑀢𑀼𑀝𑁆𑀞𑀘𑀺𑀢𑁆𑀢𑀸 𑀆𑀕𑀢𑀸. 𑀪𑀺𑀓𑁆𑀔𑀽𑀦𑀁 𑀲𑀫𑀺𑀢𑀺𑀁 𑀯𑀦𑀦𑁆𑀢𑀺 𑀇𑀫𑀁 𑀫𑀳𑀸𑀯𑀦𑀁 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑀁 𑀪𑀺𑀓𑁆𑀔𑀽𑀦𑀁 𑀤𑀲𑁆𑀲𑀦𑀢𑁆𑀣𑀸𑀬 𑀆𑀕𑀢𑀸. 𑀅𑀣 𑀯𑀸 𑀲𑀫𑀺𑀢𑀺𑀦𑁆𑀢𑀺 𑀲𑀫𑀽𑀳𑀁, 𑀪𑀺𑀓𑁆𑀔𑀼𑀲𑀫𑀽𑀳𑀁 𑀤𑀲𑁆𑀲𑀦𑀸𑀬 𑀆𑀕𑀢𑀸𑀢𑀺𑀧𑀺 𑀅𑀢𑁆𑀣𑁄.

𑀙𑀲𑀳𑀲𑁆𑀲𑀸 𑀳𑁂𑀫𑀯𑀢𑀸, 𑀬𑀓𑁆𑀔𑀸 𑀦𑀸𑀦𑀢𑁆𑀢𑀯𑀡𑁆𑀡𑀺𑀦𑁄𑀢𑀺 𑀙𑀲𑀳𑀲𑁆𑀲𑀸 𑀳𑁂𑀫𑀯𑀢𑀧𑀩𑁆𑀩𑀢𑁂 𑀦𑀺𑀩𑁆𑀩𑀢𑁆𑀢𑀬𑀓𑁆𑀔𑀸, 𑀢𑁂 𑀘 𑀲𑀩𑁆𑀩𑁂𑀧𑀺 𑀦𑀻𑀮𑀸𑀤𑀺𑀯𑀡𑁆𑀡𑀯𑀲𑁂𑀦 𑀦𑀸𑀦𑀢𑁆𑀢𑀯𑀡𑁆𑀡𑀸.

𑀲𑀸𑀢𑀸𑀕𑀺𑀭𑀸 𑀢𑀺𑀲𑀳𑀲𑁆𑀲𑀸𑀢𑀺 𑀲𑀸𑀢𑀸𑀕𑀺𑀭𑀺𑀧𑀩𑁆𑀩𑀢𑁂 𑀦𑀺𑀩𑁆𑀩𑀢𑁆𑀢𑀬𑀓𑁆𑀔𑀸 𑀢𑀺𑀲𑀳𑀲𑁆𑀲𑀸.

𑀇𑀘𑁆𑀘𑁂𑀢𑁂 𑀲𑁄𑀴𑀲𑀲𑀳𑀲𑁆𑀲𑀸𑀢𑀺 𑀏𑀢𑁂 𑀲𑀩𑁆𑀩𑁂𑀧𑀺 𑀲𑁄𑀴𑀲𑀲𑀳𑀲𑁆𑀲𑀸 𑀳𑁄𑀦𑁆𑀢𑀺.

𑀯𑁂𑀲𑁆𑀲𑀸𑀫𑀺𑀢𑁆𑀢𑀸 𑀧𑀜𑁆𑀘𑀲𑀢𑀸𑀢𑀺 𑀯𑁂𑀲𑁆𑀲𑀸𑀫𑀺𑀢𑁆𑀢𑀧𑀩𑁆𑀩𑀢𑁂 𑀦𑀺𑀩𑁆𑀩𑀢𑁆𑀢𑀸 𑀧𑀜𑁆𑀘𑀲𑀢𑀸.

𑀓𑀼𑀫𑁆𑀪𑀻𑀭𑁄 𑀭𑀸𑀚𑀕𑀳𑀺𑀓𑁄𑀢𑀺 𑀭𑀸𑀚𑀕𑀳𑀦𑀕𑀭𑁂 𑀦𑀺𑀩𑁆𑀩𑀢𑁆𑀢𑁄 𑀓𑀼𑀫𑁆𑀪𑀻𑀭𑁄 𑀦𑀸𑀫 𑀬𑀓𑁆𑀔𑁄. 𑀯𑁂𑀧𑀼𑀮𑁆𑀮𑀲𑁆𑀲 𑀦𑀺𑀯𑁂𑀲𑀦𑀦𑁆𑀢𑀺 𑀢𑀲𑁆𑀲 𑀯𑁂𑀧𑀼𑀮𑁆𑀮𑀧𑀩𑁆𑀩𑀢𑁄 𑀦𑀺𑀯𑁂𑀲𑀦𑀁 𑀦𑀺𑀯𑀸𑀲𑀦𑀝𑁆𑀞𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀪𑀺𑀬𑁆𑀬𑁄 𑀦𑀁 𑀲𑀢𑀲𑀳𑀲𑁆𑀲𑀁, 𑀬𑀓𑁆𑀔𑀸𑀦𑀁 𑀧𑀬𑀺𑀭𑀼𑀧𑀸𑀲𑀢𑀻𑀢𑀺 𑀢𑀁 𑀅𑀢𑀺𑀭𑁂𑀓𑀁 𑀬𑀓𑁆𑀔𑀸𑀦𑀁 𑀲𑀢𑀲𑀳𑀲𑁆𑀲𑀁 𑀧𑀬𑀺𑀭𑀼𑀧𑀸𑀲𑀢𑀺. 𑀓𑀼𑀫𑁆𑀪𑀻𑀭𑁄 𑀭𑀸𑀚𑀕𑀳𑀺𑀓𑁄, 𑀲𑁄𑀧𑀸𑀕𑀸 𑀲𑀫𑀺𑀢𑀺𑀁 𑀯𑀦𑀦𑁆𑀢𑀺 𑀲𑁄𑀧𑀺 𑀓𑀼𑀫𑁆𑀪𑀻𑀭𑁄 𑀲𑀧𑀭𑀺𑀯𑀸𑀭𑁄 𑀇𑀫𑀁 𑀯𑀦𑀁 𑀪𑀺𑀓𑁆𑀔𑀼𑀲𑀫𑀺𑀢𑀺𑀁 𑀤𑀲𑁆𑀲𑀦𑀢𑁆𑀣𑀸𑀬 𑀆𑀕𑀢𑁄.

𑁩𑁩𑁬. 𑀧𑀼𑀭𑀺𑀫𑀜𑁆𑀘 𑀤𑀺𑀲𑀁 𑀭𑀸𑀚𑀸, 𑀥𑀢𑀭𑀝𑁆𑀞𑁄 𑀧𑀲𑀸𑀲𑀢𑀻𑀢𑀺 𑀧𑀸𑀘𑀻𑀦𑀤𑀺𑀲𑀁 𑀅𑀦𑀼𑀲𑀸𑀲𑀢𑀺. 𑀕𑀦𑁆𑀥𑀩𑁆𑀩𑀸𑀦𑀁 𑀅𑀥𑀺𑀧𑀢𑀻𑀢𑀺 𑀘𑀢𑀽𑀲𑀼𑀧𑀺 𑀤𑀺𑀲𑀸𑀲𑀼 𑀕𑀦𑁆𑀥𑀩𑁆𑀩𑀸𑀦𑀁 𑀚𑁂𑀝𑁆𑀞𑀓𑁄. 𑀲𑀩𑁆𑀩𑁂 𑀢𑁂 𑀢𑀲𑁆𑀲 𑀯𑀲𑁂 𑀯𑀢𑁆𑀢𑀦𑁆𑀢𑀺. 𑀫𑀳𑀸𑀭𑀸𑀚𑀸 𑀬𑀲𑀲𑁆𑀲𑀺𑀲𑁄𑀢𑀺 𑀫𑀳𑀸𑀧𑀭𑀺𑀯𑀸𑀭𑁄 𑀏𑀲𑁄 𑀫𑀳𑀸𑀭𑀸𑀚𑀸.

𑀧𑀼𑀢𑁆𑀢𑀸𑀧𑀺 𑀢𑀲𑁆𑀲 𑀩𑀳𑀯𑁄, 𑀇𑀦𑁆𑀤𑀦𑀸𑀫𑀸 𑀫𑀳𑀩𑁆𑀩𑀮𑀸𑀢𑀺 𑀢𑀲𑁆𑀲 𑀥𑀢𑀭𑀝𑁆𑀞𑀲𑁆𑀲 𑀩𑀳𑀯𑁄 𑀫𑀳𑀩𑁆𑀩𑀮𑀸 𑀧𑀼𑀢𑁆𑀢𑀸, 𑀢𑁂 𑀲𑀩𑁆𑀩𑁂 𑀲𑀓𑁆𑀓𑀲𑁆𑀲 𑀤𑁂𑀯𑀭𑀜𑁆𑀜𑁄 𑀦𑀸𑀫𑀥𑀸𑀭𑀓𑀸.

𑀯𑀺𑀭𑀽𑀴𑁆𑀳𑁄 𑀢𑀁 𑀧𑀲𑀸𑀲𑀢𑀻𑀢𑀺 𑀢𑀁 𑀤𑀺𑀲𑀁 𑀯𑀺𑀭𑀽𑀴𑁆𑀳𑁄 𑀅𑀦𑀼𑀲𑀸𑀲𑀢𑀺.

𑀧𑀼𑀢𑁆𑀢𑀸𑀧𑀺 𑀢𑀲𑁆𑀲𑀸𑀢𑀺 𑀢𑀲𑁆𑀲𑀸𑀧𑀺 𑀢𑀸𑀤𑀺𑀲𑀸𑀬𑁂𑀯 𑀧𑀼𑀢𑁆𑀢𑀸. 𑀧𑀸𑀴𑀺𑀬𑀁 𑀧𑀦 ‘‘𑀫𑀳𑀩𑁆𑀩𑀮𑀸’’𑀢𑀺 𑀮𑀺𑀔𑀦𑁆𑀢𑀺. 𑀅𑀝𑁆𑀞𑀓𑀣𑀸𑀬𑀁 𑀲𑀩𑁆𑀩𑀯𑀸𑀭𑁂𑀲𑀼 ‘‘𑀫𑀳𑀸𑀩𑀮𑀸’’𑀢𑀺 𑀧𑀸𑀞𑁄.

‘‘𑀧𑀼𑀭𑀺𑀫𑀁 𑀤𑀺𑀲𑀁 𑀥𑀢𑀭𑀝𑁆𑀞𑁄, 𑀤𑀓𑁆𑀔𑀺𑀡𑁂𑀦 𑀯𑀺𑀭𑀽𑀴𑁆𑀳𑀓𑁄;

𑀧𑀘𑁆𑀙𑀺𑀫𑁂𑀦 𑀯𑀺𑀭𑀽𑀧𑀓𑁆𑀔𑁄, 𑀓𑀼𑀯𑁂𑀭𑁄 𑀉𑀢𑁆𑀢𑀭𑀁 𑀤𑀺𑀲𑀁.

𑀘𑀢𑁆𑀢𑀸𑀭𑁄 𑀢𑁂 𑀫𑀳𑀸𑀭𑀸𑀚𑀸, 𑀲𑀫𑀦𑁆𑀢𑀸 𑀘𑀢𑀼𑀭𑁄 𑀤𑀺𑀲𑀸;

𑀤𑀤𑁆𑀤𑀮𑁆𑀮𑀫𑀸𑀦𑀸 𑀅𑀝𑁆𑀞𑀁𑀲𑀼, 𑀯𑀦𑁂 𑀓𑀸𑀧𑀺𑀮𑀯𑀢𑁆𑀣𑀯𑁂’’𑀢𑀺.

𑀇𑀫𑀸 𑀧𑀦 𑀕𑀸𑀣𑀸 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀯𑀲𑁂𑀦 𑀯𑀼𑀢𑁆𑀢𑀸.

𑀅𑀬𑀜𑁆𑀘𑁂𑀢𑁆𑀣 𑀅𑀢𑁆𑀣𑁄 𑁋 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂 𑀥𑀢𑀭𑀝𑁆𑀞𑀸 𑀦𑀸𑀫 𑀫𑀳𑀸𑀭𑀸𑀚𑀸𑀦𑁄 𑀅𑀢𑁆𑀣𑀺. 𑀢𑁂 𑀲𑀩𑁆𑀩𑁂𑀧𑀺 𑀓𑁄𑀝𑀺𑀲𑀢𑀲𑀳𑀲𑁆𑀲𑀓𑁄𑀝𑀺𑀲𑀢𑀲𑀳𑀲𑁆𑀲𑀕𑀦𑁆𑀥𑀩𑁆𑀩𑀧𑀭𑀺𑀯𑀸𑀭𑀸 𑀆𑀕𑀦𑁆𑀢𑁆𑀯𑀸 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀓𑀧𑀺𑀮𑀯𑀢𑁆𑀣𑀼𑀫𑀳𑀸𑀯𑀦𑀢𑁄 𑀧𑀝𑁆𑀞𑀸𑀬 𑀘𑀓𑁆𑀓𑀯𑀸𑀴𑀕𑀩𑁆𑀪𑀁 𑀧𑀽𑀭𑁂𑀢𑁆𑀯𑀸 𑀞𑀺𑀢𑀸. 𑀏𑀯𑀁 𑀤𑀓𑁆𑀔𑀺𑀡𑀤𑀺𑀲𑀸𑀤𑀻𑀲𑀼 𑀯𑀺𑀭𑀽𑀴𑁆𑀳𑀓𑀸𑀤𑀬𑁄. 𑀢𑁂𑀦𑁂𑀯𑀸𑀳 𑁋 ‘‘𑀲𑀫𑀦𑁆𑀢𑀸 𑀘𑀢𑀼𑀭𑁄 𑀤𑀺𑀲𑀸, 𑀤𑀤𑁆𑀤𑀮𑁆𑀮𑀫𑀸𑀦𑀸 𑀅𑀝𑁆𑀞𑀁𑀲𑀽’’𑀢𑀺. 𑀇𑀤𑀜𑁆𑀳𑀺 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀲𑀫𑀦𑁆𑀢𑀸 𑀘𑀓𑁆𑀓𑀯𑀸𑀴𑁂𑀳𑀺 𑀆𑀕𑀦𑁆𑀢𑁆𑀯𑀸 𑀘𑀢𑀼𑀭𑁄 𑀤𑀺𑀲𑀸 𑀧𑀩𑁆𑀩𑀢𑀫𑀢𑁆𑀣𑀓𑁂𑀲𑀼 𑀅𑀕𑁆𑀕𑀺𑀓𑁆𑀔𑀦𑁆𑀥𑀸 𑀯𑀺𑀬 𑀲𑀼𑀝𑁆𑀞𑀼 𑀚𑀮𑀫𑀸𑀦𑀸 𑀞𑀺𑀢𑀸’’𑀢𑀺. 𑀢𑁂 𑀧𑀦 𑀬𑀲𑁆𑀫𑀸 𑀓𑀧𑀺𑀮𑀯𑀢𑁆𑀣𑀼𑀯𑀦𑀫𑁂𑀯 𑀲𑀦𑁆𑀥𑀸𑀬 𑀆𑀕𑀢𑀸, 𑀢𑀲𑁆𑀫𑀸 𑀘𑀓𑁆𑀓𑀯𑀸𑀴𑀁 𑀧𑀽𑀭𑁂𑀢𑁆𑀯𑀸 𑀘𑀓𑁆𑀓𑀯𑀸𑀴𑁂𑀦 𑀲𑀫𑀲𑀫𑀸 𑀞𑀺𑀢𑀸𑀧𑀺 𑁋 ‘‘𑀯𑀦𑁂 𑀓𑀸𑀧𑀺𑀮𑀯𑀢𑁆𑀣𑀯𑁂’’𑀢𑀺 𑀯𑀼𑀢𑁆𑀢𑀸.

𑁩𑁩𑁭. 𑀢𑁂𑀲𑀁 𑀫𑀸𑀬𑀸𑀯𑀺𑀦𑁄 𑀤𑀸𑀲𑀸, 𑀆𑀕𑀼𑀁 𑀯𑀜𑁆𑀘𑀦𑀺𑀓𑀸 𑀲𑀞𑀸𑀢𑀺 𑀢𑁂𑀲𑀁 𑀫𑀳𑀸𑀭𑀸𑀚𑀸𑀦𑀁 𑀓𑀢𑀧𑀸𑀧𑀧𑀝𑀺𑀘𑁆𑀙𑀸𑀤𑀦𑀮𑀓𑁆𑀔𑀡𑀸𑀬 𑀫𑀸𑀬𑀸𑀬 𑀬𑀼𑀢𑁆𑀢𑀸 𑀓𑀼𑀝𑀺𑀮𑀸𑀘𑀸𑀭𑀸 𑀤𑀸𑀲𑀸 𑀅𑀢𑁆𑀣𑀺, 𑀬𑁂 𑀲𑀫𑁆𑀫𑀼𑀔𑀧𑀭𑀫𑁆𑀫𑀼𑀔𑀯𑀜𑁆𑀘𑀦𑀸𑀳𑀺 𑀮𑁄𑀓𑀁 𑀯𑀜𑁆𑀘𑀦𑀢𑁄 ‘‘𑀯𑀜𑁆𑀘𑀦𑀺𑀓𑀸’’𑀢𑀺 𑀘, 𑀓𑁂𑀭𑀸𑀝𑀺𑀬𑀲𑀸𑀞𑁂𑀬𑁆𑀬𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 ‘‘𑀲𑀞𑀸’’𑀢𑀺 𑀘 𑀯𑀼𑀘𑁆𑀘𑀦𑁆𑀢𑀺, 𑀢𑁂𑀧𑀺 𑀆𑀕𑀢𑀸𑀢𑀺 𑀅𑀢𑁆𑀣𑁄. 𑀫𑀸𑀬𑀸 𑀓𑀼𑀝𑁂𑀡𑁆𑀟𑀼 𑀯𑀺𑀝𑁂𑀡𑁆𑀟𑀼, 𑀯𑀺𑀝𑀼𑀘𑁆𑀘 𑀯𑀺𑀝𑀼𑀝𑁄 𑀲𑀳𑀸𑀢𑀺 𑀢𑁂 𑀤𑀸𑀲𑀸 𑀲𑀩𑁆𑀩𑁂𑀧𑀺 𑀫𑀸𑀬𑀸𑀓𑀸𑀭𑀓𑀸𑀯. 𑀦𑀸𑀫𑁂𑀦 𑀧𑀦𑁂𑀢𑁆𑀣 𑀏𑀓𑁄 𑀓𑀼𑀝𑁂𑀡𑁆𑀟𑀼 𑀦𑀸𑀫, 𑀏𑀓𑁄 𑀯𑀺𑀝𑁂𑀡𑁆𑀟𑀼 𑀦𑀸𑀫. 𑀧𑀸𑀴𑀺𑀬𑀁 𑀧𑀦 ‘‘𑀯𑁂𑀝𑁂𑀡𑁆𑀟𑀽’’𑀢𑀺 𑀮𑀺𑀔𑀦𑁆𑀢𑀺. 𑀏𑀓𑁄 𑀯𑀺𑀝𑀼𑀘𑁆𑀘 𑀦𑀸𑀫, 𑀏𑀓𑁄 𑀯𑀺𑀝𑀼𑀝𑁄 𑀦𑀸𑀫. 𑀲𑀳𑀸𑀢𑀺 𑀲𑁄𑀧𑀺 𑀯𑀺𑀝𑀼𑀝𑁄 𑀢𑁂𑀳𑀺 𑀲𑀳𑁂𑀯 𑀆𑀕𑀢𑁄.

𑀘𑀦𑁆𑀤𑀦𑁄 𑀓𑀸𑀫𑀲𑁂𑀝𑁆𑀞𑁄 𑀘, 𑀓𑀺𑀦𑁆𑀦𑀺𑀖𑀡𑁆𑀟𑀼 𑀦𑀺𑀖𑀡𑁆𑀟𑀼 𑀘𑀸𑀢𑀺 𑀅𑀧𑀭𑁄 𑀓𑀺𑀦𑁆𑀦𑀺𑀖𑀡𑁆𑀟𑀼 𑀦𑀸𑀫. 𑀧𑀸𑀴𑀺𑀬𑀁 𑀧𑀦 ‘‘𑀓𑀺𑀦𑁆𑀦𑀼𑀖𑀡𑁆𑀟𑀽’’𑀢𑀺 𑀮𑀺𑀔𑀦𑁆𑀢𑀺. 𑀦𑀺𑀖𑀡𑁆𑀟𑀼 𑀘𑀸𑀢𑀺 𑀅𑀜𑁆𑀜𑁄 𑀦𑀺𑀖𑀡𑁆𑀟𑀼 𑀦𑀸𑀫, 𑀏𑀢𑁆𑀢𑀓𑀸 𑀤𑀸𑀲𑀸. 𑀇𑀢𑁄 𑀧𑀭𑁂 𑀧𑀦 𑁋

‘‘𑀧𑀦𑀸𑀤𑁄 𑀑𑀧𑀫𑀜𑁆𑀜𑁄 𑀘, 𑀤𑁂𑀯𑀲𑀼𑀢𑁄 𑀘 𑀫𑀸𑀢𑀮𑀺;

𑀘𑀺𑀢𑁆𑀢𑀲𑁂𑀦𑁄 𑀘 𑀕𑀦𑁆𑀥𑀩𑁆𑀩𑁄, 𑀦𑀴𑁄 𑀭𑀸𑀚𑀸 𑀚𑀦𑁂𑀲𑀪𑁄;

𑀆𑀕𑀼𑀁 𑀧𑀜𑁆𑀘𑀲𑀺𑀔𑁄 𑀘𑁂𑀯, 𑀢𑀺𑀫𑁆𑀩𑀭𑀽 𑀲𑀽𑀭𑀺𑀬𑀯𑀘𑁆𑀙𑀲𑀸’’𑀢𑀺. 𑁋

𑀇𑀫𑁂 𑀤𑁂𑀯𑀭𑀸𑀚𑀸𑀦𑁄. 𑀢𑀢𑁆𑀣 𑀤𑁂𑀯𑀲𑀼𑀢𑁄𑀢𑀺 𑀤𑁂𑀯𑀲𑀸𑀭𑀣𑀺. 𑀘𑀺𑀢𑁆𑀢𑀲𑁂𑀦𑁄𑀢𑀺 𑀘𑀺𑀢𑁆𑀢𑁄 𑀘 𑀲𑁂𑀦𑁄 𑀘 𑀘𑀺𑀢𑁆𑀢𑀲𑁂𑀦𑁄 𑀘. 𑀕𑀦𑁆𑀥𑀩𑁆𑀩𑁄𑀢𑀺 𑀅𑀬𑀁 𑀘𑀺𑀢𑁆𑀢𑀲𑁂𑀦𑁄 𑀕𑀦𑁆𑀥𑀩𑁆𑀩𑀓𑀸𑀬𑀺𑀓𑁄 𑀤𑁂𑀯𑀧𑀼𑀢𑁆𑀢𑁄, 𑀦 𑀓𑁂𑀯𑀮𑀁 𑀘𑁂𑀲, 𑀲𑀩𑁆𑀩𑁂 𑀧𑁂𑀢𑁂 𑀧𑀦𑀸𑀤𑀸𑀤𑀬𑁄 𑀕𑀦𑁆𑀥𑀩𑁆𑀩𑀸 𑀏𑀯. 𑀦𑀴𑁄𑀭𑀸𑀚𑀸𑀢𑀺 𑀦𑀴𑀓𑀸𑀭𑀤𑁂𑀯𑀧𑀼𑀢𑁆𑀢𑁄 𑀦𑀸𑀫𑁂𑀓𑁄. 𑀚𑀦𑁂𑀲𑀪𑁄𑀢𑀺 𑀚𑀦𑀯𑀲𑀪𑁄 𑀤𑁂𑀯𑀧𑀼𑀢𑁆𑀢𑁄. 𑀆𑀕𑀼𑀁 𑀧𑀜𑁆𑀘𑀲𑀺𑀔𑁄 𑀘𑁂𑀯𑀸𑀢𑀺 𑀧𑀜𑁆𑀘𑀲𑀺𑀔𑁄 𑀘𑁂𑀯 𑀤𑁂𑀯𑀧𑀼𑀢𑁆𑀢𑁄 𑀆𑀕𑀢𑁄. 𑀢𑀺𑀫𑁆𑀩𑀭𑀽𑀢𑀺 𑀢𑀺𑀫𑁆𑀩𑀭𑀽 𑀦𑀸𑀫 𑀕𑀦𑁆𑀥𑀩𑁆𑀩𑀤𑁂𑀯𑀭𑀸𑀚𑀸. 𑀲𑀽𑀭𑀺𑀬𑀯𑀘𑁆𑀙𑀲𑀸𑀢𑀺 𑀢𑀲𑁆𑀲𑁂𑀯 𑀥𑀻𑀢𑀸.

𑀏𑀢𑁂 𑀘𑀜𑁆𑀜𑁂 𑀘 𑀭𑀸𑀚𑀸𑀦𑁄, 𑀕𑀦𑁆𑀥𑀩𑁆𑀩𑀸 𑀲𑀳 𑀭𑀸𑀚𑀼𑀪𑀻𑀢𑀺 𑀏𑀢𑁂 𑀘 𑀦𑀸𑀫𑀯𑀲𑁂𑀦 𑀯𑀼𑀢𑁆𑀢𑀕𑀦𑁆𑀥𑀩𑁆𑀩𑀭𑀸𑀚𑀸𑀦𑁄 𑀅𑀜𑁆𑀜𑁂 𑀘 𑀏𑀢𑁂𑀳𑀺 𑀭𑀸𑀚𑀽𑀳𑀺 𑀲𑀤𑁆𑀥𑀺𑀁 𑀩𑀳𑀽 𑀕𑀦𑁆𑀥𑀩𑁆𑀩𑀸. 𑀫𑁄𑀤𑀫𑀸𑀦𑀸 𑀅𑀪𑀺𑀓𑁆𑀓𑀸𑀫𑀼𑀁, 𑀪𑀺𑀓𑁆𑀔𑀽𑀦𑀁 𑀲𑀫𑀺𑀢𑀺𑀁 𑀯𑀦𑀦𑁆𑀢𑀺 𑀳𑀝𑁆𑀞𑀢𑀼𑀝𑁆𑀞𑀘𑀺𑀢𑁆𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑀫𑀺𑀢𑀺𑀁 𑀇𑀫𑀁 𑀯𑀦𑀁 𑀆𑀕𑀢𑀸𑀢𑀺 𑀅𑀢𑁆𑀣𑁄.

𑁩𑁩𑁮. 𑀅𑀣𑀸𑀕𑀼𑀁 𑀦𑀸𑀕𑀲𑀸 𑀦𑀸𑀕𑀸, 𑀯𑁂𑀲𑀸𑀮𑀸 𑀲𑀳𑀢𑀘𑁆𑀙𑀓𑀸𑀢𑀺 𑀦𑀸𑀕𑀲𑀤𑀳𑀯𑀸𑀲𑀺𑀓𑀸 𑀘 𑀯𑁂𑀲𑀸𑀮𑀻𑀯𑀸𑀲𑀺𑀓𑀸 𑀘 𑀦𑀸𑀕𑀸 𑀲𑀳 𑀢𑀘𑁆𑀙𑀓𑀦𑀸𑀕𑀧𑀭𑀺𑀲𑀸𑀬 𑀆𑀕𑀢𑀸𑀢𑀺 𑀅𑀢𑁆𑀣𑁄. 𑀓𑀫𑁆𑀩𑀮𑀲𑁆𑀲𑀢𑀭𑀸𑀢𑀺 𑀓𑀫𑁆𑀩𑀮𑁄 𑀘 𑀅𑀲𑁆𑀲𑀢𑀭𑁄 𑀘. 𑀏𑀢𑁂 𑀓𑀺𑀭 𑀲𑀺𑀦𑁂𑀭𑀼𑀧𑀸𑀤𑁂 𑀯𑀲𑀦𑁆𑀢𑀺, 𑀲𑀼𑀧𑀡𑁆𑀡𑁂𑀳𑀺𑀧𑀺 𑀅𑀦𑀼𑀤𑁆𑀥𑀭𑀡𑀻𑀬𑀸 𑀫𑀳𑁂𑀲𑀓𑁆𑀔𑀦𑀸𑀕𑀸 𑀧𑀸𑀬𑀸𑀕𑀸 𑀲𑀳 𑀜𑀸𑀢𑀺𑀪𑀻𑀢𑀺 𑀧𑀬𑀸𑀕𑀢𑀺𑀢𑁆𑀣𑀯𑀸𑀲𑀺𑀦𑁄 𑀘 𑀲𑀳 𑀜𑀸𑀢𑀺𑀲𑀗𑁆𑀖𑁂𑀦 𑀆𑀕𑀢𑀸.

𑀬𑀸𑀫𑀼𑀦𑀸 𑀥𑀢𑀭𑀝𑁆𑀞𑀸 𑀘𑀸𑀢𑀺 𑀬𑀫𑀼𑀦𑀯𑀸𑀲𑀺𑀦𑁄 𑀘 𑀥𑀢𑀭𑀝𑁆𑀞𑀓𑀼𑀮𑁂 𑀉𑀧𑁆𑀧𑀦𑁆𑀦𑀸 𑀦𑀸𑀕𑀸 𑀘. 𑀏𑀭𑀸𑀯𑀡𑁄 𑀫𑀳𑀸𑀦𑀸𑀕𑁄𑀢𑀺 𑀏𑀭𑀸𑀯𑀡𑁄 𑀘 𑀤𑁂𑀯𑀧𑀼𑀢𑁆𑀢𑁄, 𑀚𑀸𑀢𑀺𑀬𑀸 𑀦𑀸𑀕𑁄 𑀦 𑀳𑁄𑀢𑀺. 𑀦𑀸𑀕𑀯𑁄𑀳𑀸𑀭𑁂𑀦 𑀧𑀦𑁂𑀲 𑀯𑁄𑀳𑀭𑀺𑀬𑀢𑀺. 𑀲𑁄𑀧𑀸𑀕𑀸𑀢𑀺 𑀲𑁄𑀧𑀺 𑀆𑀕𑀢𑁄.

𑀬𑁂 𑀦𑀸𑀕𑀭𑀸𑀚𑁂 𑀲𑀳𑀲𑀸 𑀳𑀭𑀦𑁆𑀢𑀻𑀢𑀺 𑀬𑁂 𑀇𑀫𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀦𑀸𑀕𑁂 𑀮𑁄𑀪𑀸𑀪𑀺𑀪𑀽𑀢𑀸 𑀲𑀸𑀳𑀲𑀁 𑀓𑀢𑁆𑀯𑀸 𑀳𑀭𑀦𑁆𑀢𑀺 𑀕𑀡𑁆𑀳𑀦𑁆𑀢𑀺. 𑀤𑀺𑀩𑁆𑀩𑀸 𑀤𑀺𑀚𑀸 𑀧𑀓𑁆𑀔𑀻 𑀯𑀺𑀲𑀼𑀤𑁆𑀥𑀘𑀓𑁆𑀔𑀽𑀢𑀺 𑀤𑀺𑀩𑁆𑀩𑀸𑀦𑀼𑀪𑀸𑀯𑀢𑁄 𑀤𑀺𑀩𑁆𑀩𑀸 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀘 𑀅𑀡𑁆𑀟𑀓𑁄𑀲𑀢𑁄 𑀘𑀸𑀢𑀺 𑀤𑁆𑀯𑁂 𑀯𑀸𑀭𑁂 𑀚𑀸𑀢𑀸𑀢𑀺 𑀤𑀺𑀚𑀸 𑀧𑀓𑁆𑀔𑀬𑀼𑀢𑁆𑀢𑀢𑀸𑀬 𑀧𑀓𑁆𑀔𑀻 𑀬𑁄𑀚𑀦𑀲𑀢𑀦𑁆𑀢𑀭𑁂𑀧𑀺 𑀬𑁄𑀚𑀦𑀲𑀳𑀲𑁆𑀲𑀦𑁆𑀢𑀭𑁂𑀧𑀺 𑀦𑀸𑀕𑁂 𑀤𑀲𑁆𑀲𑀦𑀲𑀫𑀢𑁆𑀣𑀘𑀓𑁆𑀔𑀼𑀢𑀸𑀬 𑀯𑀺𑀲𑀼𑀤𑁆𑀥𑀘𑀓𑁆𑀔𑀽. 𑀯𑁂𑀳𑀸𑀬𑀲𑀸 𑀢𑁂 𑀯𑀦𑀫𑀚𑁆𑀛𑀧𑁆𑀧𑀢𑁆𑀢𑀸𑀢𑀺 𑀢𑁂 𑀆𑀓𑀸𑀲𑁂𑀦𑁂𑀯 𑀇𑀫𑀁 𑀫𑀳𑀸𑀯𑀦𑀁 𑀲𑀫𑁆𑀧𑀢𑁆𑀢𑀸. 𑀘𑀺𑀢𑁆𑀭𑀸 𑀲𑀼𑀧𑀡𑁆𑀡𑀸 𑀇𑀢𑀺 𑀢𑁂𑀲 𑀦𑀸𑀫𑀦𑁆𑀢𑀺 𑀢𑁂𑀲𑀁 ‘‘𑀘𑀺𑀢𑁆𑀭𑀲𑀼𑀧𑀡𑁆𑀡𑀸’’𑀢𑀺 𑀦𑀸𑀫𑀁.

𑀅𑀪𑀬𑀁 𑀢𑀤𑀸 𑀦𑀸𑀕𑀭𑀸𑀚𑀸𑀦𑀫𑀸𑀲𑀺, 𑀲𑀼𑀧𑀡𑁆𑀡𑀢𑁄 𑀔𑁂𑀫𑀫𑀓𑀸𑀲𑀺 𑀩𑀼𑀤𑁆𑀥𑁄𑀢𑀺 𑀢𑀲𑁆𑀫𑀸 𑀲𑀩𑁆𑀩𑁂𑀧𑀺 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀲𑀡𑁆𑀳𑀸𑀳𑀺 𑀯𑀸𑀘𑀸𑀳𑀺 𑀉𑀧𑀯𑁆𑀳𑀬𑀦𑁆𑀢𑀸 𑀫𑀺𑀢𑁆𑀢𑀸 𑀯𑀺𑀬 𑀩𑀦𑁆𑀥𑀯𑀸 𑀯𑀺𑀬 𑀘 𑀲𑀫𑀼𑀮𑁆𑀮𑀧𑀦𑁆𑀢𑀸 𑀲𑀫𑁆𑀫𑁄𑀤𑀫𑀸𑀦𑀸 𑀆𑀮𑀺𑀗𑁆𑀕𑀦𑁆𑀢𑀸 𑀳𑀢𑁆𑀣𑁂 𑀕𑀡𑁆𑀳𑀦𑁆𑀢𑀸 𑀅𑀁𑀲𑀓𑀽𑀝𑁂 𑀳𑀢𑁆𑀣𑀁 𑀞𑀧𑁂𑀦𑁆𑀢𑀸 𑀳𑀝𑁆𑀞𑀢𑀼𑀝𑁆𑀞𑀘𑀺𑀢𑁆𑀢𑀸. 𑀦𑀸𑀕𑀸 𑀲𑀼𑀧𑀡𑁆𑀡𑀸 𑀲𑀭𑀡𑀫𑀓𑀁𑀲𑀼 𑀩𑀼𑀤𑁆𑀥𑀦𑁆𑀢𑀺 𑀩𑀼𑀤𑁆𑀥𑀁𑀬𑁂𑀯 𑀲𑀭𑀡𑀁 𑀕𑀢𑀸.

𑁩𑁩𑁯. 𑀚𑀺𑀢𑀸 𑀯𑀚𑀺𑀭𑀳𑀢𑁆𑀣𑁂𑀦𑀸𑀢𑀺 𑀇𑀦𑁆𑀤𑁂𑀦 𑀤𑁂𑀯𑀭𑀜𑁆𑀜𑀸 𑀚𑀺𑀢𑀸. 𑀲𑀫𑀼𑀤𑁆𑀤𑀁 𑀅𑀲𑀼𑀭𑀸𑀲𑀺𑀢𑀸𑀢𑀺 𑀫𑀳𑀸𑀲𑀫𑀼𑀤𑁆𑀤𑀯𑀸𑀲𑀺𑀦𑁄 𑀲𑀼𑀚𑀸𑀢𑀸𑀬 𑀅𑀲𑀼𑀭𑀓𑀜𑁆𑀜𑀸𑀬 𑀓𑀸𑀭𑀡𑀸 𑀲𑀩𑁆𑀩𑁂𑀧𑀺 𑀪𑀸𑀢𑀭𑁄 𑀯𑀸𑀲𑀯𑀲𑁆𑀲𑁂𑀢𑁂, 𑀇𑀤𑁆𑀥𑀺𑀫𑀦𑁆𑀢𑁄 𑀬𑀲𑀲𑁆𑀲𑀺𑀦𑁄.

𑀢𑁂𑀲𑀼 𑀓𑀸𑀮𑀓𑀜𑁆𑀘𑀸 𑀫𑀳𑀸𑀪𑀺𑀲𑁆𑀫𑀸𑀢𑀺 𑀓𑀸𑀮𑀓𑀜𑁆𑀘𑀸 𑀘 𑀫𑀳𑀦𑁆𑀢𑁂 𑀪𑀺𑀁𑀲𑀦𑁂 𑀅𑀢𑁆𑀢𑀪𑀸𑀯𑁂 𑀫𑀸𑀧𑁂𑀢𑁆𑀯𑀸 𑀆𑀕𑀫𑀺𑀁𑀲𑀼. 𑀅𑀲𑀼𑀭𑀸 𑀤𑀸𑀦𑀯𑁂𑀖𑀲𑀸𑀢𑀺 𑀤𑀸𑀦𑀯𑁂𑀖𑀲𑀸 𑀦𑀸𑀫 𑀅𑀜𑁆𑀜𑁂 𑀥𑀦𑀼𑀕𑁆𑀕𑀳𑀅𑀲𑀼𑀭𑀸. 𑀯𑁂𑀧𑀘𑀺𑀢𑁆𑀢𑀺 𑀲𑀼𑀘𑀺𑀢𑁆𑀢𑀺 𑀘, 𑀧𑀳𑀸𑀭𑀸𑀤𑁄 𑀦𑀫𑀼𑀘𑀻 𑀲𑀳𑀸𑀢𑀺 𑀯𑁂𑀧𑀘𑀺𑀢𑁆𑀢𑀺𑀅𑀲𑀼𑀭𑁄, 𑀲𑀼𑀘𑀺𑀢𑁆𑀢𑀺𑀅𑀲𑀼𑀭𑁄 𑀘𑀸𑀢𑀺 𑀏𑀢𑁂 𑀘 𑀅𑀲𑀼𑀭𑀸 𑀦𑀫𑀼𑀘𑀺 𑀘 𑀫𑀸𑀭𑁄 𑀤𑁂𑀯𑀧𑀼𑀢𑁆𑀢𑁄 𑀏𑀢𑁂𑀳𑀺 𑀲𑀳𑁂𑀯 𑀆𑀕𑀢𑁄. 𑀇𑀫𑁂 𑀅𑀲𑀼𑀭𑀸 𑀫𑀳𑀸𑀲𑀫𑀼𑀤𑁆𑀤𑀯𑀸𑀲𑀺𑀦𑁄, 𑀅𑀬𑀁 𑀧𑀭𑀦𑀺𑀫𑁆𑀫𑀺𑀢𑀤𑁂𑀯𑀮𑁄𑀓𑀯𑀸𑀲𑀻, 𑀓𑀲𑁆𑀫𑀸 𑀏𑀢𑁂𑀳𑀺 𑀲𑀳𑀸𑀕𑀢𑁄𑀢𑀺? 𑀅𑀘𑁆𑀙𑀦𑁆𑀤𑀺𑀓𑀢𑁆𑀢𑀸. 𑀢𑁂𑀧𑀺 𑀳𑀺 𑀅𑀘𑁆𑀙𑀦𑁆𑀤𑀺𑀓𑀸 𑀅𑀪𑀩𑁆𑀩𑀸, 𑀅𑀬𑀫𑁆𑀧𑀺 𑀢𑀸𑀤𑀺𑀲𑁄𑀬𑁂𑀯. 𑀢𑀲𑁆𑀫𑀸 𑀥𑀸𑀢𑀼𑀲𑁄 𑀲𑀁𑀲𑀦𑁆𑀤𑀫𑀸𑀦𑁄 𑀆𑀕𑀢𑁄.

𑀲𑀢𑀜𑁆𑀘 𑀩𑀮𑀺𑀧𑀼𑀢𑁆𑀢𑀸𑀦𑀦𑁆𑀢𑀺 𑀩𑀮𑀺𑀦𑁄 𑀫𑀳𑀸𑀅𑀲𑀼𑀭𑀲𑁆𑀲 𑀧𑀼𑀢𑁆𑀢𑀸𑀦𑀁 𑀲𑀢𑀁. 𑀲𑀩𑁆𑀩𑁂 𑀯𑁂𑀭𑁄𑀘𑀦𑀸𑀫𑀓𑀸𑀢𑀺 𑀲𑀩𑁆𑀩𑁂 𑀅𑀢𑁆𑀢𑀦𑁄 𑀫𑀸𑀢𑀼𑀮𑀲𑁆𑀲 𑀭𑀸𑀳𑀼𑀲𑁆𑀲𑁂𑀯 𑀦𑀸𑀫𑀥𑀭𑀸. 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀩𑀮𑀺𑀲𑁂𑀦𑀦𑁆𑀢𑀺 𑀅𑀢𑁆𑀢𑀦𑁄 𑀩𑀮𑀺𑀲𑁂𑀦𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀲𑀩𑁆𑀩𑁂 𑀓𑀢𑀲𑀦𑁆𑀦𑀸𑀳𑀸𑀯 𑀳𑀼𑀢𑁆𑀯𑀸. 𑀭𑀸𑀳𑀼𑀪𑀤𑁆𑀤𑀫𑀼𑀧𑀸𑀕𑀫𑀼𑀦𑁆𑀢𑀺 𑀭𑀸𑀳𑀼𑀅𑀲𑀼𑀭𑀺𑀦𑁆𑀤𑀁 𑀉𑀧𑀲𑀗𑁆𑀓𑀫𑀺𑀁𑀲𑀼. 𑀲𑀫𑀬𑁄 𑀤𑀸𑀦𑀺 𑀪𑀤𑁆𑀤𑀦𑁆𑀢𑁂𑀢𑀺 𑀪𑀤𑁆𑀤𑀁 𑀢𑀯 𑀳𑁄𑀢𑀼, 𑀲𑀫𑀬𑁄 𑀢𑁂 𑀪𑀺𑀓𑁆𑀔𑀽𑀦𑀁 𑀲𑀫𑀺𑀢𑀺𑀁 𑀯𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀤𑀲𑁆𑀲𑀦𑀸𑀬𑀸𑀢𑀺 𑀅𑀢𑁆𑀣𑁄.

𑁩𑁪𑁦. 𑀆𑀧𑁄 𑀘 𑀤𑁂𑀯𑀸 𑀧𑀣𑀯𑀻, 𑀢𑁂𑀚𑁄 𑀯𑀸𑀬𑁄 𑀢𑀤𑀸𑀕𑀫𑀼𑀦𑁆𑀢𑀺 𑀆𑀧𑁄𑀓𑀲𑀺𑀡𑀸𑀤𑀻𑀲𑀼 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀸 𑀆𑀧𑁄𑀢𑀺𑀆𑀤𑀺𑀦𑀸𑀫𑀓𑀸 𑀤𑁂𑀯𑀸 𑀆𑀕𑀫𑀼𑀁. 𑀯𑀭𑀼𑀡𑀸 𑀯𑀸𑀭𑀡𑀸 𑀤𑁂𑀯𑀸, 𑀲𑁄𑀫𑁄 𑀘 𑀬𑀲𑀲𑀸 𑀲𑀳𑀸𑀢𑀺 𑀯𑀭𑀼𑀡𑀤𑁂𑀯𑀢𑀸, 𑀯𑀸𑀭𑀡𑀤𑁂𑀯𑀢𑀸, 𑀲𑁄𑀫𑀤𑁂𑀯𑀢𑀸𑀢𑀺 𑀏𑀯𑀁 𑀦𑀸𑀫𑀓𑀸 𑀘 𑀤𑁂𑀯𑀸 𑀬𑀲𑀲𑀸 𑀦𑀸𑀫 𑀤𑁂𑀯𑁂𑀦 𑀲𑀳𑀸𑀕𑀢𑀸𑀢𑀺 𑀅𑀢𑁆𑀣𑁄. 𑀫𑁂𑀢𑁆𑀢𑀸𑀓𑀭𑀼𑀡𑀸𑀓𑀸𑀬𑀺𑀓𑀸𑀢𑀺 𑀫𑁂𑀢𑁆𑀢𑀸𑀛𑀸𑀦𑁂 𑀘 𑀓𑀭𑀼𑀡𑀸𑀛𑀸𑀦𑁂 𑀘 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀤𑁂𑀯𑀸. 𑀆𑀕𑀼𑀁 𑀤𑁂𑀯𑀸 𑀬𑀲𑀲𑁆𑀲𑀺𑀦𑁄𑀢𑀺 𑀏𑀢𑁂𑀧𑀺 𑀫𑀳𑀸𑀬𑀲𑀸 𑀤𑁂𑀯𑀸 𑀆𑀕𑀢𑀸.

𑀤𑀲𑁂𑀢𑁂 𑀤𑀲𑀥𑀸 𑀓𑀸𑀬𑀸, 𑀲𑀩𑁆𑀩𑁂 𑀦𑀸𑀦𑀢𑁆𑀢𑀯𑀡𑁆𑀡𑀺𑀦𑁄𑀢𑀺 𑀢𑁂 𑀤𑀲𑀥𑀸 𑀞𑀺𑀢𑀸 𑀤𑀲 𑀤𑁂𑀯𑀓𑀸𑀬𑀸 𑀲𑀩𑁆𑀩𑁂 𑀦𑀻𑀮𑀸𑀤𑀺𑀯𑀲𑁂𑀦 𑀦𑀸𑀦𑀢𑁆𑀢𑀯𑀡𑁆𑀡𑀸 𑀆𑀕𑀢𑀸𑀢𑀺 𑀅𑀢𑁆𑀣𑁄.

𑀯𑁂𑀡𑁆𑀟𑀽 𑀘 𑀤𑁂𑀯𑀸𑀢𑀺 𑀯𑁂𑀡𑁆𑀟𑀼𑀤𑁂𑀯𑀢𑀸 𑀘. 𑀲𑀳𑀮𑀺 𑀘𑀸𑀢𑀺 𑀲𑀳𑀮𑀺𑀤𑁂𑀯𑀢𑀸 𑀘. 𑀅𑀲𑀫𑀸 𑀘 𑀤𑀼𑀯𑁂 𑀬𑀫𑀸𑀢𑀺 𑀅𑀲𑀫𑀤𑁂𑀯𑀢𑀸 𑀘 𑀤𑁆𑀯𑁂 𑀘 𑀬𑀫𑀓𑀸 𑀤𑁂𑀯𑀸. 𑀘𑀦𑁆𑀤𑀲𑁆𑀲𑀼𑀧𑀦𑀺𑀲𑀸 𑀤𑁂𑀯𑀸, 𑀘𑀦𑁆𑀤𑀫𑀸𑀕𑀼𑀁 𑀧𑀼𑀭𑀓𑁆𑀔𑀢𑁆𑀯𑀸𑀢𑀺 𑀘𑀦𑁆𑀤𑀦𑀺𑀲𑁆𑀲𑀺𑀢𑀓𑀸 𑀤𑁂𑀯𑀸 𑀘𑀦𑁆𑀤𑀁 𑀧𑀼𑀭𑀢𑁄 𑀓𑀢𑁆𑀯𑀸 𑀆𑀕𑀢𑀸. 𑀢𑀣𑀸 𑀲𑀽𑀭𑀺𑀬𑀦𑀺𑀲𑁆𑀲𑀺𑀢𑀓𑀸 𑀤𑁂𑀯𑀸 𑀲𑀽𑀭𑀺𑀬𑀁 𑀧𑀼𑀭𑀓𑁆𑀔𑀢𑁆𑀯𑀸. 𑀦𑀓𑁆𑀔𑀢𑁆𑀢𑀸𑀦𑀺 𑀧𑀼𑀭𑀓𑁆𑀔𑀢𑁆𑀯𑀸𑀢𑀺 𑀦𑀓𑁆𑀔𑀢𑁆𑀢𑀦𑀺𑀲𑁆𑀲𑀺𑀢𑀸𑀧𑀺 𑀤𑁂𑀯𑀸 𑀦𑀓𑁆𑀔𑀢𑁆𑀢𑀸𑀦𑀺 𑀧𑀼𑀭𑀢𑁄 𑀓𑀢𑁆𑀯𑀸 𑀆𑀕𑀢𑀸. 𑀆𑀕𑀼𑀁 𑀫𑀦𑁆𑀤𑀯𑀮𑀸𑀳𑀓𑀸𑀢𑀺 𑀯𑀸𑀢𑀯𑀮𑀸𑀳𑀓𑀸, 𑀅𑀩𑁆𑀪𑀯𑀮𑀸𑀳𑀓𑀸, 𑀉𑀡𑁆𑀳𑀯𑀮𑀸𑀳𑀓𑀸 𑀏𑀢𑁂 𑀲𑀩𑁆𑀩𑁂𑀧𑀺 𑀯𑀮𑀸𑀳𑀓𑀸𑀬𑀺𑀓𑀸 ‘‘𑀫𑀦𑁆𑀤𑀯𑀮𑀸𑀳𑀓𑀸’’ 𑀦𑀸𑀫 𑀯𑀼𑀘𑁆𑀘𑀦𑁆𑀢𑀺. 𑀢𑁂𑀧𑀺 𑀆𑀕𑀢𑀸𑀢𑀺 𑀅𑀢𑁆𑀣𑁄. 𑀯𑀲𑀽𑀦𑀁 𑀯𑀸𑀲𑀯𑁄 𑀲𑁂𑀝𑁆𑀞𑁄, 𑀲𑀓𑁆𑀓𑁄𑀧𑀸𑀕𑀸 𑀧𑀼𑀭𑀺𑀦𑁆𑀤𑀤𑁄𑀢𑀺 𑀯𑀲𑀽𑀦𑀁 𑀤𑁂𑀯𑀢𑀸𑀦𑀁 𑀲𑁂𑀝𑁆𑀞𑁄 𑀯𑀸𑀲𑀯𑁄 𑀬𑁄 𑀲𑀓𑁆𑀓𑁄𑀢𑀺 𑀘, 𑀧𑀼𑀭𑀺𑀦𑁆𑀤𑀤𑁄𑀢𑀺 𑀘 𑀯𑀼𑀘𑁆𑀘𑀢𑀺, 𑀲𑁄𑀧𑀺 𑀆𑀕𑀢𑁄.

𑀤𑀲𑁂𑀢𑁂 𑀤𑀲𑀥𑀸 𑀓𑀸𑀬𑀸𑀢𑀺 𑀏𑀢𑁂𑀧𑀺 𑀤𑀲 𑀤𑁂𑀯𑀓𑀸𑀬𑀸 𑀤𑀲𑀥𑀸𑀯 𑀆𑀕𑀢𑀸. 𑀲𑀩𑁆𑀩𑁂 𑀦𑀸𑀦𑀢𑁆𑀢𑀯𑀡𑁆𑀡𑀺𑀦𑁄𑀢𑀺 𑀦𑀻𑀮𑀸𑀤𑀺𑀯𑀲𑁂𑀦 𑀦𑀸𑀦𑀢𑁆𑀢𑀯𑀡𑁆𑀡𑀸.

𑀅𑀣𑀸𑀕𑀼𑀁 𑀲𑀳𑀪𑀽 𑀤𑁂𑀯𑀸𑀢𑀺 𑀅𑀣 𑀲𑀳𑀪𑀽 𑀦𑀸𑀫 𑀤𑁂𑀯𑀸 𑀆𑀕𑀢𑀸. 𑀚𑀮𑀫𑀕𑁆𑀕𑀺𑀲𑀺𑀔𑀸𑀭𑀺𑀯𑀸𑀢𑀺 𑀅𑀕𑁆𑀕𑀺𑀲𑀺𑀔𑀸 𑀯𑀺𑀬 𑀚𑀮𑀦𑁆𑀢𑀸. 𑀚𑀮𑀫𑀕𑁆𑀕𑀺 𑀘 𑀲𑀺𑀔𑀸𑀭𑀺𑀯𑀸𑀢𑀺 𑀇𑀫𑀸𑀦𑀺 𑀢𑁂𑀲𑀁 𑀦𑀸𑀫𑀸𑀦𑀻𑀢𑀺𑀧𑀺 𑀯𑀼𑀢𑁆𑀢𑀁. 𑀅𑀭𑀺𑀝𑁆𑀞𑀓𑀸 𑀘 𑀭𑁄𑀚𑀸 𑀘𑀸𑀢𑀺 𑀅𑀭𑀺𑀝𑁆𑀞𑀓𑀤𑁂𑀯𑀸 𑀘 𑀭𑁄𑀚𑀤𑁂𑀯𑀸 𑀘. 𑀉𑀫𑀸𑀧𑀼𑀧𑁆𑀨𑀦𑀺𑀪𑀸𑀲𑀺𑀦𑁄𑀢𑀺 𑀉𑀫𑀸𑀧𑀼𑀧𑁆𑀨𑀤𑁂𑀯𑀸 𑀦𑀸𑀫 𑀏𑀢𑁂 𑀤𑁂𑀯𑀸. 𑀉𑀫𑀸𑀧𑀼𑀧𑁆𑀨𑀲𑀤𑀺𑀲𑀸 𑀳𑀺 𑀢𑁂𑀲𑀁 𑀲𑀭𑀻𑀭𑀸𑀪𑀸, 𑀢𑀲𑁆𑀫𑀸 ‘‘𑀉𑀫𑀸𑀧𑀼𑀧𑁆𑀨𑀦𑀺𑀪𑀸𑀲𑀺𑀦𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺.

𑀯𑀭𑀼𑀡𑀸 𑀲𑀳𑀥𑀫𑁆𑀫𑀸 𑀘𑀸𑀢𑀺 𑀏𑀢𑁂 𑀘 𑀤𑁆𑀯𑁂 𑀚𑀦𑀸. 𑀅𑀘𑁆𑀘𑀼𑀢𑀸 𑀘 𑀅𑀦𑁂𑀚𑀓𑀸𑀢𑀺 𑀅𑀘𑁆𑀘𑀼𑀢𑀤𑁂𑀯𑀢𑀸 𑀘 𑀅𑀦𑁂𑀚𑀓𑀤𑁂𑀯𑀢𑀸 𑀘. 𑀲𑀼𑀮𑁂𑀬𑁆𑀬𑀭𑀼𑀘𑀺𑀭𑀸 𑀆𑀕𑀼𑀦𑁆𑀢𑀺 𑀲𑀼𑀮𑁂𑀬𑁆𑀬𑀸 𑀘 𑀭𑀼𑀘𑀺𑀭𑀸 𑀘 𑀆𑀕𑀢𑀸. 𑀆𑀕𑀼𑀁 𑀯𑀸𑀲𑀯𑀦𑁂𑀲𑀺𑀦𑁄𑀢𑀺 𑀯𑀸𑀲𑀯𑀦𑁂𑀲𑀻𑀤𑁂𑀯𑀸 𑀦𑀸𑀫 𑀆𑀕𑀢𑀸. 𑀤𑀲𑁂𑀢𑁂 𑀤𑀲𑀥𑀸 𑀓𑀸𑀬𑀸𑀢𑀺 𑀏𑀢𑁂𑀧𑀺 𑀤𑀲𑀤𑁂𑀯𑀓𑀸𑀬𑀸 𑀤𑀲𑀥𑀸𑀯 𑀆𑀕𑀢𑀸.

𑀲𑀫𑀸𑀦𑀸 𑀫𑀳𑀸𑀲𑀫𑀸𑀦𑀸𑀢𑀺 𑀲𑀫𑀸𑀦𑀸 𑀘 𑀫𑀳𑀸𑀲𑀫𑀸𑀦𑀸 𑀘. 𑀫𑀸𑀦𑀼𑀲𑀸 𑀫𑀸𑀦𑀼𑀲𑀼𑀢𑁆𑀢𑀫𑀸𑀢𑀺 𑀫𑀸𑀦𑀼𑀲𑀸 𑀘 𑀫𑀸𑀦𑀼𑀲𑀼𑀢𑁆𑀢𑀫𑀸 𑀘. 𑀔𑀺𑀟𑁆𑀟𑀸𑀧𑀤𑁄𑀲𑀺𑀓𑀸 𑀆𑀕𑀼𑀁, 𑀆𑀕𑀼𑀁 𑀫𑀦𑁄𑀧𑀤𑁄𑀲𑀺𑀓𑀸𑀢𑀺 𑀔𑀺𑀟𑁆𑀟𑀸𑀧𑀤𑁄𑀲𑀺𑀓𑀸 𑀫𑀦𑁄𑀧𑀤𑁄𑀲𑀺𑀓𑀸 𑀘 𑀤𑁂𑀯𑀸 𑀆𑀕𑀢𑀸.

𑀅𑀣𑀸𑀕𑀼𑀁 𑀳𑀭𑀬𑁄 𑀤𑁂𑀯𑀸𑀢𑀺 𑀳𑀭𑀺𑀤𑁂𑀯𑀸 𑀦𑀸𑀫 𑀆𑀕𑀢𑀸. 𑀬𑁂 𑀘 𑀮𑁄𑀳𑀺𑀢𑀯𑀸𑀲𑀺𑀦𑁄𑀢𑀺 𑀮𑁄𑀳𑀺𑀢𑀯𑀸𑀲𑀺𑀦𑁄 𑀘 𑀆𑀕𑀢𑀸. 𑀧𑀸𑀭𑀕𑀸 𑀫𑀳𑀸𑀧𑀸𑀭𑀕𑀸𑀢𑀺 𑀏𑀢𑁂 𑀘 𑀤𑀼𑀯𑀺𑀥𑀸 𑀆𑀕𑀢𑀸. 𑀤𑀲𑁂𑀢𑁂 𑀤𑀲𑀥𑀸 𑀓𑀸𑀬𑀸𑀢𑀺 𑀏𑀢𑁂𑀧𑀺 𑀤𑀲𑀤𑁂𑀯𑀓𑀸𑀬𑀸 𑀤𑀲𑀥𑀸𑀯 𑀆𑀕𑀢𑀸.

𑀲𑀼𑀓𑁆𑀓𑀸 𑀓𑀭𑀫𑁆𑀪𑀸 𑀅𑀭𑀼𑀡𑀸, 𑀆𑀕𑀼𑀁 𑀯𑁂𑀖𑀦𑀲𑀸 𑀲𑀳𑀸𑀢𑀺 𑀏𑀢𑁂 𑀲𑀼𑀓𑁆𑀓𑀸𑀤𑀬𑁄 𑀢𑀬𑁄, 𑀢𑁂𑀳𑀺 𑀲𑀳 𑀯𑁂𑀖𑀦𑀲𑀸 𑀘 𑀆𑀕𑀢𑀸. 𑀑𑀤𑀸𑀢𑀕𑀬𑁆𑀳𑀸 𑀧𑀸𑀫𑁄𑀓𑁆𑀔𑀸𑀢𑀺 𑀑𑀤𑀸𑀢𑀕𑀬𑁆𑀳𑀸 𑀦𑀸𑀫 𑀧𑀸𑀫𑁄𑀓𑁆𑀔𑀤𑁂𑀯𑀸 𑀆𑀕𑀢𑀸. 𑀆𑀕𑀼𑀁 𑀤𑁂𑀯𑀸 𑀯𑀺𑀘𑀓𑁆𑀔𑀡𑀸𑀢𑀺 𑀯𑀺𑀘𑀓𑁆𑀔𑀡𑀸 𑀦𑀸𑀫 𑀤𑁂𑀯𑀸 𑀆𑀕𑀢𑀸.

𑀲𑀤𑀸𑀫𑀢𑁆𑀢𑀸 𑀳𑀸𑀭𑀕𑀚𑀸𑀢𑀺 𑀲𑀤𑀸𑀫𑀢𑁆𑀢𑀸 𑀘 𑀳𑀸𑀭𑀕𑀚𑀸 𑀘. 𑀫𑀺𑀲𑁆𑀲𑀓𑀸 𑀘 𑀬𑀲𑀲𑁆𑀲𑀺𑀦𑁄𑀢𑀺 𑀬𑀲𑀲𑀫𑁆𑀧𑀦𑁆𑀦𑀸 𑀫𑀺𑀲𑁆𑀲𑀓𑀤𑁂𑀯𑀸 𑀘. 𑀣𑀦𑀬𑀁 𑀆𑀕 𑀧𑀚𑁆𑀚𑀼𑀦𑁆𑀦𑁄𑀢𑀺 𑀧𑀚𑁆𑀚𑀼𑀦𑁆𑀦𑁄 𑀘 𑀤𑁂𑀯𑀭𑀸𑀚𑀸 𑀣𑀦𑀬𑀦𑁆𑀢𑁄 𑀆𑀕𑀢𑁄. 𑀬𑁄 𑀤𑀺𑀲𑀸 𑀅𑀪𑀺𑀯𑀲𑁆𑀲𑀢𑀻𑀢𑀺 𑀬𑁄 𑀬𑀁 𑀬𑀁 𑀤𑀺𑀲𑀁 𑀬𑀸𑀢𑀺, 𑀢𑀢𑁆𑀣 𑀢𑀢𑁆𑀣 𑀤𑁂𑀯𑁄 𑀯𑀲𑁆𑀲𑀢𑀺. 𑀤𑀲𑁂𑀢𑁂 𑀤𑀲𑀥𑀸 𑀓𑀸𑀬𑀸𑀢𑀺 𑀏𑀢𑁂𑀧𑀺 𑀤𑀲𑀤𑁂𑀯𑀓𑀸𑀬𑀸 𑀤𑀲𑀥𑀸 𑀆𑀕𑀢𑀸.

𑀔𑁂𑀫𑀺𑀬𑀸 𑀢𑀼𑀲𑀺𑀢𑀸 𑀬𑀸𑀫𑀸𑀢𑀺 𑀔𑁂𑀫𑀺𑀬𑀸 𑀤𑁂𑀯𑀸 𑀢𑀼𑀲𑀺𑀢𑀧𑀼𑀭𑀯𑀸𑀲𑀺𑀦𑁄 𑀘 𑀬𑀸𑀫𑀸𑀤𑁂𑀯𑀮𑁄𑀓𑀯𑀸𑀲𑀺𑀦𑁄 𑀘. 𑀓𑀣𑀓𑀸 𑀘 𑀬𑀲𑀲𑁆𑀲𑀺𑀦𑁄𑀢𑀺 𑀬𑀲𑀲𑀫𑁆𑀧𑀦𑁆𑀦𑀸 𑀓𑀣𑀓𑀤𑁂𑀯𑀸 𑀘. 𑀧𑀸𑀴𑀺𑀬𑀁 𑀧𑀦 ‘‘𑀓𑀝𑁆𑀞𑀓𑀸 𑀘𑀸’’𑀢𑀺 𑀮𑀺𑀔𑀦𑁆𑀢𑀺. 𑀮𑀫𑁆𑀩𑀻𑀢𑀓𑀸 𑀮𑀸𑀫𑀲𑁂𑀝𑁆𑀞𑀸𑀢𑀺 𑀮𑀫𑁆𑀩𑀺𑀢𑀓𑀤𑁂𑀯𑀸 𑀘 𑀮𑀸𑀫𑀲𑁂𑀝𑁆𑀞𑀤𑁂𑀯𑀸 𑀘. 𑀚𑁄𑀢𑀺𑀦𑀸𑀫𑀸 𑀘 𑀆𑀲𑀯𑀸𑀢𑀺 𑀧𑀩𑁆𑀩𑀢𑀫𑀢𑁆𑀣𑀓𑁂 𑀓𑀢𑀦𑀴𑀕𑁆𑀕𑀺𑀓𑁆𑀔𑀦𑁆𑀥𑁄 𑀯𑀺𑀬 𑀚𑁄𑀢𑀫𑀸𑀦𑀸 𑀚𑁄𑀢𑀺𑀤𑁂𑀯𑀸 𑀦𑀸𑀫 𑀅𑀢𑁆𑀣𑀺, 𑀢𑁂 𑀘 𑀆𑀲𑀸 𑀘 𑀤𑁂𑀯𑀸 𑀆𑀕𑀢𑀸𑀢𑀺 𑀅𑀢𑁆𑀣𑁄. 𑀧𑀸𑀴𑀺𑀬𑀁 𑀧𑀦 ‘‘𑀚𑀸𑀢𑀺𑀦𑀸𑀫𑀸’’𑀢𑀺 𑀮𑀺𑀔𑀦𑁆𑀢𑀺. 𑀆𑀲𑀸 𑀤𑁂𑀯𑀢𑀸 𑀙𑀦𑁆𑀤𑀯𑀲𑁂𑀦 𑀆𑀲𑀯𑀸𑀢𑀺 𑀯𑀼𑀢𑁆𑀢𑀸. 𑀦𑀺𑀫𑁆𑀫𑀸𑀦𑀭𑀢𑀺𑀦𑁄 𑀆𑀕𑀼𑀁, 𑀅𑀣𑀸𑀕𑀼𑀁 𑀧𑀭𑀦𑀺𑀫𑁆𑀫𑀺𑀢𑀸. 𑀤𑀲𑁂𑀢𑁂 𑀤𑀲𑀥𑀸 𑀓𑀸𑀬𑀸𑀢𑀺 𑀏𑀢𑁂𑀧𑀺 𑀤𑀲 𑀤𑁂𑀯𑀓𑀸𑀬𑀸 𑀤𑀲𑀥𑀸𑀯 𑀆𑀕𑀢𑀸.

𑀲𑀝𑁆𑀞𑁂𑀢𑁂 𑀤𑁂𑀯𑀦𑀺𑀓𑀸𑀬𑀸𑀢𑀺 𑀏𑀢𑁂 𑀘 𑀆𑀧𑁄 𑀘 𑀤𑁂𑀯𑀸𑀢𑀺𑀆𑀤𑀺𑀓𑀸 𑀙 𑀤𑀲𑀓𑀸 𑀲𑀝𑁆𑀞𑀺 𑀤𑁂𑀯𑀦𑀺𑀓𑀸𑀬𑀸 𑀲𑀩𑁆𑀩𑁂 𑀦𑀻𑀮𑀸𑀤𑀺𑀯𑀲𑁂𑀦 𑀦𑀸𑀦𑀢𑁆𑀢𑀯𑀡𑁆𑀡𑀺𑀦𑁄. 𑀦𑀸𑀫𑀦𑁆𑀯𑀬𑁂𑀦 𑀆𑀕𑀘𑁆𑀙𑀼𑀦𑁆𑀢𑀺 𑀦𑀸𑀫𑀪𑀸𑀕𑁂𑀦 𑀦𑀸𑀫𑀓𑁄𑀝𑁆𑀞𑀸𑀲𑁂𑀦 𑀆𑀕𑀢𑀸. 𑀬𑁂 𑀘𑀜𑁆𑀜𑁂 𑀲𑀤𑀺𑀲𑀸 𑀲𑀳𑀸𑀢𑀺 𑀬𑁂 𑀘 𑀅𑀜𑁆𑀜𑁂𑀧𑀺 𑀢𑁂𑀳𑀺 𑀲𑀤𑀺𑀲𑀸 𑀯𑀡𑁆𑀡𑀢𑁄𑀧𑀺 𑀦𑀸𑀫𑀢𑁄𑀧𑀺 𑀏𑀢𑀸𑀤𑀺𑀲𑀸𑀬𑁂𑀯 𑀲𑁂𑀲𑀘𑀓𑁆𑀓𑀯𑀸𑀴𑁂𑀲𑀼 𑀤𑁂𑀯𑀸, 𑀢𑁂𑀧𑀺 𑀆𑀕𑀢𑀸𑀬𑁂𑀯𑀸𑀢𑀺 𑀏𑀓𑀧𑀤𑁂𑀦𑁂𑀯 𑀓𑀮𑀸𑀧𑀁 𑀯𑀺𑀬 𑀧𑀼𑀝𑀓𑀁 𑀯𑀺𑀬 𑀘 𑀓𑀢𑁆𑀯𑀸 𑀲𑀩𑁆𑀩𑀸 𑀤𑁂𑀯𑀢𑀸 𑀦𑀺𑀤𑁆𑀤𑀺𑀲𑀢𑀺.

𑀏𑀯𑀁 𑀤𑀲𑀲𑀼 𑀮𑁄𑀓𑀥𑀸𑀢𑀼𑀲𑀳𑀲𑁆𑀲𑁂𑀲𑀼 𑀤𑁂𑀯𑀓𑀸𑀬𑁂 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀇𑀤𑀸𑀦𑀺 𑀬𑀤𑀢𑁆𑀣𑀁 𑀢𑁂 𑀆𑀕𑀢𑀸, 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀧𑀯𑀼𑀝𑁆𑀞𑀚𑀸𑀢𑀺𑀦𑁆𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀧𑀯𑀼𑀝𑁆𑀞𑀸 𑀯𑀺𑀕𑀢𑀸 𑀚𑀸𑀢𑀺 𑀅𑀲𑁆𑀲𑀸𑀢𑀺 𑀅𑀭𑀺𑀬𑀲𑀗𑁆𑀖𑁄 𑀧𑀯𑀼𑀝𑁆𑀞𑀚𑀸𑀢𑀺 𑀦𑀸𑀫, 𑀢𑀁 𑀧𑀯𑀼𑀝𑁆𑀞𑀚𑀸𑀢𑀺𑀁 𑀭𑀸𑀕𑀤𑁄𑀲𑀫𑁄𑀳𑀔𑀻𑀮𑀸𑀦𑀁 𑀅𑀪𑀸𑀯𑀸 𑀅𑀔𑀻𑀮𑀁 𑀘𑀢𑁆𑀢𑀸𑀭𑁄 𑀑𑀖𑁂 𑀢𑀭𑀺𑀢𑁆𑀯𑀸 𑀞𑀺𑀢𑀢𑁆𑀢𑀸 𑀑𑀖𑀢𑀺𑀡𑁆𑀡𑀁 𑀘𑀢𑀼𑀦𑁆𑀦𑀁 𑀆𑀲𑀯𑀸𑀦𑀁 𑀅𑀪𑀸𑀯𑁂𑀦 𑀅𑀦𑀸𑀲𑀯𑀁 𑀅𑀭𑀺𑀬𑀲𑀗𑁆𑀖𑀁 𑀤𑀓𑁆𑀔𑁂𑀫 𑀧𑀲𑁆𑀲𑀺𑀲𑁆𑀲𑀸𑀫. 𑀢𑁂𑀲𑀜𑁆𑀜𑁂𑀯 𑀑𑀖𑀸𑀦𑀁 𑀢𑀺𑀡𑁆𑀡𑀢𑁆𑀢𑀸 𑀑𑀖𑀢𑀭𑀁 𑀆𑀕𑀼𑀁 𑀅𑀓𑀭𑀡𑀢𑁄 𑀦𑀸𑀕𑀁. 𑀅𑀲𑀺𑀢𑀸𑀢𑀺𑀕𑀦𑁆𑀢𑀺 𑀓𑀸𑀴𑀓𑀪𑀸𑀯𑀸𑀢𑀻𑀢𑀁 𑀘𑀦𑁆𑀤𑀁𑀯 𑀲𑀺𑀭𑀺𑀬𑀸 𑀯𑀺𑀭𑁄𑀘𑀫𑀸𑀦𑀁 𑀤𑀲𑀩𑀮𑀜𑁆𑀘 𑀤𑀓𑁆𑀔𑁂𑀫 𑀧𑀲𑁆𑀲𑀺𑀲𑁆𑀲𑀸𑀫𑀸𑀢𑀺 𑀏𑀢𑀤𑀢𑁆𑀣𑀁 𑀲𑀩𑁆𑀩𑁂𑀧𑀺 𑀢𑁂 𑀦𑀸𑀫𑀦𑁆𑀯𑀬𑁂𑀦 𑀆𑀕𑀘𑁆𑀙𑀼𑀁, 𑀬𑁂 𑀘𑀜𑁆𑀜𑁂 𑀲𑀤𑀺𑀲𑀸 𑀲𑀳𑀸𑀢𑀺.

𑁩𑁪𑁧. 𑀇𑀤𑀸𑀦𑀺 𑀩𑁆𑀭𑀳𑁆𑀫𑀸𑀦𑁄 𑀤𑀲𑁆𑀲𑁂𑀦𑁆𑀢𑁄 𑀲𑀼𑀩𑁆𑀭𑀳𑁆𑀫𑀸 𑀧𑀭𑀫𑀢𑁆𑀢𑁄 𑀘𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀼𑀩𑁆𑀭𑀳𑁆𑀫𑀸𑀢𑀺 𑀏𑀓𑁄 𑀩𑁆𑀭𑀳𑁆𑀫𑀸. 𑀧𑀭𑀫𑀢𑁆𑀢𑁄𑀧𑀺 𑀩𑁆𑀭𑀳𑁆𑀫𑀸𑀯. 𑀧𑀼𑀢𑁆𑀢𑀸 𑀇𑀤𑁆𑀥𑀺𑀫𑀢𑁄 𑀲𑀳𑀸𑀢𑀺 𑀏𑀢𑁂 𑀇𑀤𑁆𑀥𑀺𑀫𑀢𑁄 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀧𑀼𑀢𑁆𑀢𑀸 𑀅𑀭𑀺𑀬𑀩𑁆𑀭𑀳𑁆𑀫𑀸𑀦𑁄 𑀲𑀳𑁂𑀯 𑀆𑀕𑀢𑀸. 𑀲𑀦𑀗𑁆𑀓𑀼𑀫𑀸𑀭𑁄 𑀢𑀺𑀲𑁆𑀲𑁄 𑀘𑀸𑀢𑀺 𑀲𑀦𑀗𑁆𑀓𑀼𑀫𑀸𑀭𑁄 𑀘 𑀢𑀺𑀲𑁆𑀲𑀫𑀳𑀸𑀩𑁆𑀭𑀳𑁆𑀫𑀸 𑀘. 𑀲𑁄𑀧𑀸𑀕𑀸𑀢𑀺 𑀲𑁄𑀧𑀺 𑀆𑀕𑀢𑁄.

‘‘𑀲𑀳𑀲𑁆𑀲𑀁 𑀩𑁆𑀭𑀳𑁆𑀫𑀮𑁄𑀓𑀸𑀦𑀁, 𑀫𑀳𑀸𑀩𑁆𑀭𑀳𑁆𑀫𑀸𑀪𑀺𑀢𑀺𑀝𑁆𑀞𑀢𑀺;

𑀉𑀧𑀧𑀦𑁆𑀦𑁄 𑀚𑀼𑀢𑀺𑀫𑀦𑁆𑀢𑁄, 𑀪𑀺𑀲𑁆𑀫𑀸𑀓𑀸𑀬𑁄 𑀬𑀲𑀲𑁆𑀲𑀺 𑀲𑁄’’𑀢𑀺. 𑁋

𑀏𑀢𑁆𑀣 𑀲𑀳𑀲𑁆𑀲𑀁 𑀩𑁆𑀭𑀳𑁆𑀫𑀮𑁄𑀓𑀸𑀦𑀦𑁆𑀢𑀺 𑀏𑀓𑀗𑁆𑀕𑀼𑀮𑀺𑀬𑀸 𑀏𑀓𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂 𑀤𑀲𑀳𑀺 𑀅𑀗𑁆𑀕𑀼𑀮𑀻𑀳𑀺 𑀤𑀲𑀲𑀳𑀲𑁆𑀲𑀺𑀘𑀓𑁆𑀓𑀯𑀸𑀴𑁂 𑀆𑀮𑁄𑀓𑀨𑀭𑀡𑀲𑀫𑀢𑁆𑀣𑀸𑀦𑀁 𑀫𑀳𑀸𑀩𑁆𑀭𑀳𑁆𑀫𑀸𑀦𑀁 𑀲𑀳𑀲𑁆𑀲𑀁 𑀆𑀕𑀢𑀁. 𑀫𑀳𑀸𑀩𑁆𑀭𑀳𑁆𑀫𑀸𑀪𑀺𑀢𑀺𑀝𑁆𑀞𑀢𑀻𑀢𑀺 𑀬𑀢𑁆𑀣 𑀏𑀓𑁂𑀓𑁄 𑀫𑀳𑀸𑀩𑁆𑀭𑀳𑁆𑀫𑀸 𑀅𑀜𑁆𑀜𑁂 𑀩𑁆𑀭𑀳𑁆𑀫𑁂 𑀅𑀪𑀺𑀪𑀯𑀺𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀉𑀧𑀧𑀦𑁆𑀦𑁄𑀢𑀺 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄. 𑀚𑀼𑀢𑀺𑀫𑀦𑁆𑀢𑁄𑀢𑀺 𑀆𑀦𑀼𑀪𑀸𑀯𑀲𑀫𑁆𑀧𑀦𑁆𑀦𑁄. 𑀪𑀺𑀲𑁆𑀫𑀸𑀓𑀸𑀬𑁄𑀢𑀺 𑀫𑀳𑀸𑀓𑀸𑀬𑁄, 𑀤𑁆𑀯𑀻𑀳𑀺 𑀢𑀻𑀳𑀺 𑀫𑀸𑀕𑀥𑀺𑀓𑁂𑀳𑀺 𑀕𑀸𑀫𑀓𑁆𑀔𑁂𑀢𑁆𑀢𑁂𑀳𑀺 𑀲𑀫𑀧𑁆𑀧𑀫𑀸𑀡𑀅𑀢𑁆𑀢𑀪𑀸𑀯𑁄. 𑀬𑀲𑀲𑁆𑀲𑀺𑀲𑁄𑀢𑀺 𑀅𑀢𑁆𑀢𑀪𑀸𑀯𑀲𑀺𑀭𑀻𑀲𑀗𑁆𑀔𑀸𑀢𑁂𑀦 𑀬𑀲𑁂𑀦 𑀲𑀫𑀦𑁆𑀦𑀸𑀕𑀢𑁄.

𑀤𑀲𑁂𑀢𑁆𑀣 𑀇𑀲𑁆𑀲𑀭𑀸 𑀆𑀕𑀼𑀁, 𑀧𑀘𑁆𑀘𑁂𑀓𑀯𑀲𑀯𑀢𑁆𑀢𑀺𑀦𑁄𑀢𑀺 𑀏𑀢𑀲𑁆𑀫𑀺𑀜𑁆𑀘 𑀩𑁆𑀭𑀳𑁆𑀫𑀲𑀳𑀲𑁆𑀲𑁂 𑀬𑁂 𑀧𑀸𑀝𑀺𑀬𑁂𑀓𑁆𑀓𑀁 𑀧𑀸𑀝𑀺𑀬𑁂𑀓𑁆𑀓𑀁 𑀯𑀲𑀁 𑀯𑀢𑁆𑀢𑁂𑀦𑁆𑀢𑀺, 𑀏𑀯𑀭𑀽𑀧𑀸 𑀤𑀲 𑀇𑀲𑁆𑀲𑀭𑀸 𑀫𑀳𑀸𑀩𑁆𑀭𑀳𑁆𑀫𑀸𑀦𑁄 𑀆𑀕𑀢𑀸. 𑀢𑁂𑀲𑀜𑁆𑀘 𑀫𑀚𑁆𑀛𑀢𑁄 𑀆𑀕, 𑀳𑀸𑀭𑀺𑀢𑁄 𑀧𑀭𑀺𑀯𑀸𑀭𑀺𑀢𑁄𑀢𑀺 𑀢𑁂𑀲𑀁 𑀩𑁆𑀭𑀳𑁆𑀫𑀸𑀦𑀁 𑀫𑀚𑁆𑀛𑁂 𑀳𑀸𑀭𑀺𑀢𑁄 𑀦𑀸𑀫 𑀫𑀳𑀸𑀩𑁆𑀭𑀳𑁆𑀫𑀸 𑀲𑀢𑀲𑀳𑀲𑁆𑀲𑀩𑁆𑀭𑀳𑁆𑀫𑀧𑀭𑀺𑀯𑀸𑀭𑁄 𑀆𑀕𑀢𑁄.

𑁩𑁪𑁨. 𑀢𑁂 𑀘 𑀲𑀩𑁆𑀩𑁂 𑀅𑀪𑀺𑀓𑁆𑀓𑀦𑁆𑀢𑁂, 𑀲𑀇𑀦𑁆𑀤𑁂 𑀤𑁂𑀯𑁂 𑀲𑀩𑁆𑀭𑀳𑁆𑀫𑀓𑁂𑀢𑀺 𑀢𑁂 𑀲𑀩𑁆𑀩𑁂𑀧𑀺 𑀲𑀓𑁆𑀓𑀁 𑀤𑁂𑀯𑀭𑀸𑀚𑀸𑀦𑀁 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀆𑀕𑀢𑁂 𑀤𑁂𑀯𑀓𑀸𑀬𑁂, 𑀳𑀸𑀭𑀺𑀢𑀫𑀳𑀸𑀩𑁆𑀭𑀳𑁆𑀫𑀸𑀦𑀁 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀆𑀕𑀢𑁂 𑀩𑁆𑀭𑀳𑁆𑀫𑀓𑀸𑀬𑁂 𑀘. 𑀫𑀸𑀭𑀲𑁂𑀦𑀸 𑀅𑀪𑀺𑀓𑁆𑀓𑀸𑀫𑀻𑀢𑀺 𑀫𑀸𑀭𑀲𑁂𑀦𑀸 𑀅𑀪𑀺𑀕𑀢𑀸. 𑀧𑀲𑁆𑀲 𑀓𑀡𑁆𑀳𑀲𑁆𑀲 𑀫𑀦𑁆𑀤𑀺𑀬𑀦𑁆𑀢𑀺 𑀓𑀸𑀴𑀓𑀲𑁆𑀲 𑀫𑀸𑀭𑀲 𑀩𑀸𑀮𑀪𑀸𑀯𑀁 𑀧𑀲𑁆𑀲𑀣.

𑀏𑀣 𑀕𑀡𑁆𑀳𑀣 𑀩𑀦𑁆𑀥𑀣𑀸𑀢𑀺 𑀏𑀯𑀁 𑀅𑀢𑁆𑀢𑀦𑁄 𑀧𑀭𑀺𑀲𑀁 𑀆𑀡𑀸𑀧𑁂𑀲𑀺. 𑀭𑀸𑀕𑁂𑀦 𑀩𑀤𑁆𑀥𑀫𑀢𑁆𑀣𑀼 𑀯𑁄𑀢𑀺 𑀲𑀩𑁆𑀩𑀁 𑀯𑁄 𑀇𑀤𑀁 𑀤𑁂𑀯𑀫𑀡𑁆𑀟𑀮𑀁 𑀭𑀸𑀕𑁂𑀦 𑀩𑀤𑁆𑀥𑀁 𑀳𑁄𑀢𑀼. 𑀲𑀫𑀦𑁆𑀢𑀸 𑀧𑀭𑀺𑀯𑀸𑀭𑁂𑀣, 𑀫𑀸 𑀯𑁄 𑀫𑀼𑀜𑁆𑀘𑀺𑀢𑁆𑀣 𑀓𑁄𑀘𑀺 𑀦𑀦𑁆𑀢𑀺 𑀢𑀼𑀫𑁆𑀳𑀸𑀓𑀁 𑀏𑀓𑁄𑀧𑀺 𑀏𑀢𑁂𑀲𑀼 𑀏𑀓𑀫𑁆𑀧𑀺 𑀫𑀸 𑀫𑀼𑀜𑁆𑀘𑀺. ‘‘𑀫𑀸 𑀯𑁄 𑀫𑀼𑀜𑁆𑀘𑁂𑀣𑀸’’𑀢𑀺𑀧𑀺 𑀧𑀸𑀞𑁄, 𑀏𑀲𑁂𑀯𑀢𑁆𑀣𑁄.

𑀇𑀢𑀺 𑀢𑀢𑁆𑀣 𑀫𑀳𑀸𑀲𑁂𑀦𑁄, 𑀓𑀡𑁆𑀳𑁄 𑀲𑁂𑀦𑀁 𑀅𑀧𑁂𑀲𑀬𑀻𑀢𑀺 𑀏𑀯𑀁 𑀢𑀢𑁆𑀣 𑀫𑀳𑀸𑀲𑀫𑀬𑁂 𑀫𑀳𑀸𑀲𑁂𑀦𑁄 𑀫𑀸𑀭𑁄 𑀫𑀸𑀭𑀲𑁂𑀦𑀁 𑀅𑀧𑁂𑀲𑀬𑀺. 𑀧𑀸𑀡𑀺𑀦𑀸 𑀢𑀮𑀫𑀸𑀳𑀘𑁆𑀘𑀸𑀢𑀺 𑀳𑀢𑁆𑀣𑁂𑀦 𑀧𑀣𑀯𑀻𑀢𑀮𑀁 𑀧𑀳𑀭𑀺𑀢𑁆𑀯𑀸. 𑀲𑀭𑀁 𑀓𑀢𑁆𑀯𑀸𑀦 𑀪𑁂𑀭𑀯𑀦𑁆𑀢𑀺 𑀫𑀸𑀭𑀯𑀺𑀪𑀺𑀁𑀲𑀓𑀤𑀲𑁆𑀲𑀦𑀢𑁆𑀣𑀁 𑀪𑀬𑀸𑀦𑀓𑀁 𑀲𑀭𑀜𑁆𑀘 𑀓𑀢𑁆𑀯𑀸.

𑀬𑀣𑀸 𑀧𑀸𑀯𑀼𑀲𑁆𑀲𑀓𑁄 𑀫𑁂𑀖𑁄, 𑀣𑀦𑀬𑀦𑁆𑀢𑁄 𑀲𑀯𑀺𑀚𑁆𑀚𑀼𑀓𑁄𑀢𑀺 𑀲𑀯𑀺𑀚𑁆𑀚𑀼𑀓𑁄 𑀧𑀸𑀯𑀼𑀲𑁆𑀲𑀓𑀫𑁂𑀖𑁄 𑀯𑀺𑀬 𑀫𑀳𑀸𑀕𑀚𑁆𑀚𑀺𑀢𑀁 𑀕𑀚𑁆𑀚𑀦𑁆𑀢𑁄. 𑀢𑀤𑀸 𑀲𑁄 𑀧𑀘𑁆𑀘𑀼𑀤𑀸𑀯𑀢𑁆𑀢𑀻𑀢𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀲𑁄 𑀫𑀸𑀭𑁄 𑀢𑀁 𑀯𑀺𑀪𑀺𑀁𑀲𑀦𑀓𑀁 𑀤𑀲𑁆𑀲𑁂𑀢𑁆𑀯𑀸 𑀧𑀝𑀺𑀦𑀺𑀯𑀢𑁆𑀢𑁄. 𑀲𑀗𑁆𑀓𑀼𑀤𑁆𑀥𑁄 𑀅𑀲𑀬𑀁 𑀯𑀲𑁂𑀢𑀺 𑀲𑀼𑀝𑁆𑀞𑀼 𑀓𑀼𑀤𑁆𑀥𑁄 𑀓𑀼𑀧𑀺𑀢𑁄 𑀓𑀜𑁆𑀘𑀺 𑀯𑀲𑁂 𑀯𑀢𑁆𑀢𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀅𑀲𑀬𑀁𑀯𑀲𑁂 𑀅𑀲𑀬𑀁𑀯𑀲𑀻 𑀅𑀢𑁆𑀢𑀦𑁄 𑀯𑀲𑁂𑀦 𑀅𑀓𑀸𑀫𑀓𑁄 𑀳𑀼𑀢𑁆𑀯𑀸 𑀦𑀺𑀯𑀢𑁆𑀢𑁄. 𑀪𑀕𑀯𑀸 𑀓𑀺𑀭 ‘‘𑀅𑀬𑀁 𑀫𑀸𑀭𑁄 𑀇𑀫𑀁 𑀫𑀳𑀸𑀲𑀫𑀸𑀕𑀫𑀁 𑀤𑀺𑀲𑁆𑀯𑀸 ‘𑀅𑀪𑀺𑀲𑀫𑀬𑀦𑁆𑀢𑀭𑀸𑀬𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺 𑀅𑀦𑁆𑀢𑀭𑀦𑁆𑀢𑀭𑁂 𑀫𑀸𑀭𑀲𑁂𑀦𑀁 𑀧𑁂𑀲𑁂𑀢𑁆𑀯𑀸 𑀫𑀸𑀭𑀁 𑀯𑀺𑀪𑀺𑀁𑀲𑀓𑀁 𑀤𑀲𑁆𑀲𑁂𑀢𑀻’’𑀢𑀺 𑀅𑀜𑁆𑀜𑀸𑀲𑀺. 𑀧𑀓𑀢𑀺 𑀘𑁂𑀲𑀸 𑀪𑀕𑀯𑀢𑁄, 𑀬𑀢𑁆𑀣 𑀅𑀪𑀺𑀲𑀫𑀬𑁄 𑀦 𑀪𑀯𑀺𑀲𑁆𑀲𑀢𑀺, 𑀢𑀢𑁆𑀣 𑀫𑀸𑀭𑀁 𑀯𑀺𑀪𑀺𑀁𑀲𑀓𑀁 𑀤𑀲𑁆𑀲𑁂𑀦𑁆𑀢𑀁 𑀦 𑀦𑀺𑀯𑀸𑀭𑁂𑀢𑀺. 𑀬𑀢𑁆𑀣 𑀧𑀦 𑀅𑀪𑀺𑀲𑀫𑀬𑁄 𑀳𑁄𑀢𑀺, 𑀢𑀢𑁆𑀣 𑀬𑀣𑀸 𑀧𑀭𑀺𑀲𑀸 𑀦𑁂𑀯 𑀫𑀸𑀭𑀲𑁆𑀲 𑀭𑀽𑀧𑀁 𑀧𑀲𑁆𑀲𑀢𑀺, 𑀦 𑀲𑀤𑁆𑀤𑀁 𑀲𑀼𑀡𑀸𑀢𑀺, 𑀏𑀯𑀁 𑀅𑀥𑀺𑀝𑁆𑀞𑀸𑀢𑀻𑀢𑀺. 𑀇𑀫𑀲𑁆𑀫𑀺𑀜𑁆𑀘 𑀲𑀫𑀸𑀕𑀫𑁂 𑀫𑀳𑀸𑀪𑀺𑀲𑀫𑀬𑁄 𑀪𑀯𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀬𑀣𑀸 𑀤𑁂𑀯𑀢𑀸 𑀦𑁂𑀯 𑀢𑀲𑁆𑀲 𑀭𑀽𑀧𑀁 𑀧𑀲𑁆𑀲𑀦𑁆𑀢𑀺, 𑀦 𑀲𑀤𑁆𑀤𑀁 𑀲𑀼𑀡𑀦𑁆𑀢𑀺, 𑀏𑀯𑀁 𑀅𑀥𑀺𑀝𑁆𑀞𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋‘‘𑀢𑀤𑀸 𑀲𑁄 𑀧𑀘𑁆𑀘𑀼𑀤𑀸𑀯𑀢𑁆𑀢𑀺, 𑀲𑀗𑁆𑀓𑀼𑀤𑁆𑀥𑁄 𑀅𑀲𑀬𑀁𑀯𑀲𑁂’’𑀢𑀺.

𑁩𑁪𑁩. 𑀢𑀜𑁆𑀘 𑀲𑀩𑁆𑀩𑀁 𑀅𑀪𑀺𑀜𑁆𑀜𑀸𑀬, 𑀯𑀯𑀢𑁆𑀣𑀺𑀢𑁆𑀯𑀸𑀦 𑀘𑀓𑁆𑀔𑀼𑀫𑀸𑀢𑀺 𑀢𑀁 𑀲𑀩𑁆𑀩𑀁 𑀪𑀕𑀯𑀸 𑀚𑀸𑀦𑀺𑀢𑁆𑀯𑀸 𑀯𑀯𑀢𑁆𑀣𑀧𑁂𑀢𑁆𑀯𑀸 𑀘.

𑀫𑀸𑀭𑀲𑁂𑀦𑀸 𑀅𑀪𑀺𑀓𑁆𑀓𑀦𑁆𑀢𑀸, 𑀢𑁂 𑀯𑀺𑀚𑀸𑀦𑀸𑀣 𑀪𑀺𑀓𑁆𑀔𑀯𑁄𑀢𑀺 𑀪𑀺𑀓𑁆𑀔𑀯𑁂 𑀫𑀸𑀭𑀲𑁂𑀦𑀸 𑀅𑀪𑀺𑀓𑁆𑀓𑀦𑁆𑀢𑀸, 𑀢𑁂 𑀢𑀼𑀫𑁆𑀳𑁂 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑀁 𑀯𑀺𑀚𑀸𑀦𑀸𑀣, 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀣𑀸𑀢𑀺 𑀯𑀤𑀢𑀺. 𑀆𑀢𑀧𑁆𑀧𑀫𑀓𑀭𑀼𑀦𑁆𑀢𑀺 𑀨𑀮𑀲𑀫𑀸𑀧𑀢𑁆𑀢𑀺𑀁 𑀧𑀯𑀺𑀲𑀦𑀢𑁆𑀣𑀸𑀬 𑀯𑀻𑀭𑀺𑀬𑀁 𑀆𑀭𑀪𑀺𑀁𑀲𑀼. 𑀯𑀻𑀢𑀭𑀸𑀕𑁂𑀳𑀺 𑀧𑀓𑁆𑀓𑀸𑀫𑀼𑀦𑁆𑀢𑀺 𑀫𑀸𑀭𑁄 𑀘 𑀫𑀸𑀭𑀲𑁂𑀦𑀸 𑀘 𑀯𑀻𑀢𑀭𑀸𑀕𑁂𑀳𑀺 𑀅𑀭𑀺𑀬𑁂𑀳𑀺 𑀤𑀽𑀭𑀢𑁄𑀯 𑀅𑀧𑀓𑁆𑀓𑀫𑀼𑀁. 𑀦𑁂𑀲𑀁 𑀮𑁄𑀫𑀸𑀧𑀺 𑀇𑀜𑁆𑀚𑀬𑀼𑀦𑁆𑀢𑀺 𑀢𑁂𑀲𑀁 𑀯𑀻𑀢𑀭𑀸𑀕𑀸𑀦𑀁 𑀮𑁄𑀫𑀸𑀦𑀺𑀧𑀺 𑀦 𑀘𑀸𑀮𑀬𑀺𑀁𑀲𑀼. 𑀅𑀣 𑀫𑀸𑀭𑁄 𑀪𑀺𑀓𑁆𑀔𑀼𑀲𑀗𑁆𑀖𑀁 𑀆𑀭𑀩𑁆𑀪 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀲𑀩𑁆𑀩𑁂 𑀯𑀺𑀚𑀺𑀢𑀲𑀗𑁆𑀕𑀸𑀫𑀸, 𑀪𑀬𑀸𑀢𑀻𑀢𑀸 𑀬𑀲𑀲𑁆𑀲𑀺𑀦𑁄;

𑀫𑁄𑀤𑀦𑁆𑀢𑀺 𑀲𑀳 𑀪𑀽𑀢𑁂𑀳𑀺, 𑀲𑀸𑀯𑀓𑀸 𑀢𑁂 𑀚𑀦𑁂𑀲𑀼𑀢𑀸’’𑀢𑀺.

𑀢𑀢𑁆𑀣 𑀫𑁄𑀤𑀦𑁆𑀢𑀺 𑀲𑀳 𑀪𑀽𑀢𑁂𑀳𑀻𑀢𑀺 𑀤𑀲𑀩𑀮𑀲𑁆𑀲 𑀲𑀸𑀲𑀦𑁂 𑀪𑀽𑀢𑁂𑀳𑀺 𑀲𑀜𑁆𑀚𑀸𑀢𑁂𑀳𑀺 𑀅𑀭𑀺𑀬𑁂𑀳𑀺 𑀲𑀤𑁆𑀥𑀺𑀁 𑀫𑁄𑀤𑀦𑁆𑀢𑀺 𑀧𑀫𑁄𑀤𑀦𑁆𑀢𑀺. 𑀚𑀦𑁂𑀲𑀼𑀢𑀸𑀢𑀺 𑀚𑀦𑁂 𑀯𑀺𑀲𑁆𑀲𑀼𑀢𑀸 𑀧𑀸𑀓𑀝𑀸 𑀅𑀪𑀺𑀜𑁆𑀜𑀸𑀢𑀸.

𑀇𑀤𑀁 𑀧𑀦 𑀫𑀳𑀸𑀲𑀫𑀬𑀲𑀼𑀢𑁆𑀢𑀁 𑀦𑀸𑀫 𑀤𑁂𑀯𑀢𑀸𑀦𑀁 𑀧𑀺𑀬𑀁 𑀫𑀦𑀸𑀧𑀁, 𑀢𑀲𑁆𑀫𑀸 𑀫𑀗𑁆𑀕𑀮𑀁 𑀯𑀤𑀦𑁆𑀢𑁂𑀦 𑀅𑀪𑀺𑀦𑀯𑀝𑁆𑀞𑀸𑀦𑁂𑀲𑀼 𑀇𑀤𑀫𑁂𑀯 𑀲𑀼𑀢𑁆𑀢𑀁 𑀯𑀢𑁆𑀢𑀩𑁆𑀩𑀁. 𑀤𑁂𑀯𑀢𑀸 𑀓𑀺𑀭 𑁋‘‘𑀇𑀫𑀁 𑀲𑀼𑀢𑁆𑀢𑀁 𑀲𑀼𑀡𑀺𑀲𑁆𑀲𑀸𑀫𑀸’’𑀢𑀺 𑀑𑀳𑀺𑀢𑀲𑁄𑀢𑀸 𑀯𑀺𑀘𑀭𑀦𑁆𑀢𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀧𑀦𑀲𑁆𑀲 𑀓𑁄𑀝𑀺𑀲𑀢𑀲𑀳𑀲𑁆𑀲𑀤𑁂𑀯𑀢𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸, 𑀲𑁄𑀢𑀸𑀧𑀦𑁆𑀦𑀸𑀤𑀻𑀦𑀁 𑀕𑀡𑀦𑀸 𑀦𑀢𑁆𑀣𑀺.

𑀤𑁂𑀯𑀢𑀸𑀦𑀜𑁆𑀘𑀲𑁆𑀲 𑀧𑀺𑀬𑀫𑀦𑀸𑀧𑀪𑀸𑀯𑁂 𑀇𑀤𑀁 𑀯𑀢𑁆𑀣𑀼 𑁋 𑀓𑁄𑀝𑀺𑀧𑀩𑁆𑀩𑀢𑀯𑀺𑀳𑀸𑀭𑁂 𑀓𑀺𑀭 𑀦𑀸𑀕𑀮𑁂𑀡𑀤𑁆𑀯𑀸𑀭𑁂 𑀦𑀸𑀕𑀭𑀼𑀓𑁆𑀔𑁂 𑀏𑀓𑀸 𑀤𑁂𑀯𑀥𑀻𑀢𑀸 𑀯𑀲𑀢𑀺. 𑀏𑀓𑁄 𑀤𑀳𑀭𑁄 𑀅𑀦𑁆𑀢𑁄𑀮𑁂𑀡𑁂 𑀇𑀫𑀁 𑀲𑀼𑀢𑁆𑀢𑀁 𑀲𑀚𑁆𑀛𑀸𑀬𑀢𑀺. 𑀤𑁂𑀯𑀥𑀻𑀢𑀸 𑀲𑀼𑀢𑁆𑀯𑀸 𑀲𑀼𑀢𑁆𑀢𑀧𑀭𑀺𑀬𑁄𑀲𑀸𑀦𑁂 𑀫𑀳𑀸𑀲𑀤𑁆𑀤𑁂𑀦 𑀲𑀸𑀥𑀼𑀓𑀸𑀭𑀫𑀤𑀸𑀲𑀺. 𑀓𑁄 𑀏𑀲𑁄𑀢𑀺. 𑀅𑀳𑀁, 𑀪𑀦𑁆𑀢𑁂, 𑀤𑁂𑀯𑀥𑀻𑀢𑀸𑀢𑀺. 𑀓𑀲𑁆𑀫𑀸 𑀲𑀸𑀥𑀼𑀓𑀸𑀭𑀫𑀤𑀸𑀲𑀻𑀢𑀺? 𑀪𑀦𑁆𑀢𑁂, 𑀤𑀲𑀩𑀮𑁂𑀦 𑀫𑀳𑀸𑀯𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀓𑀣𑀺𑀢𑀤𑀺𑀯𑀲𑁂 𑀇𑀫𑀁 𑀲𑀼𑀢𑁆𑀢𑀁 𑀲𑀼𑀢𑁆𑀯𑀸 𑀅𑀚𑁆𑀚 𑀅𑀲𑁆𑀲𑁄𑀲𑀺𑀁, 𑀪𑀕𑀯𑀢𑀸 𑀓𑀣𑀺𑀢𑀢𑁄 𑀏𑀓𑀓𑁆𑀔𑀭𑀫𑁆𑀧𑀺 𑀅𑀳𑀸𑀧𑁂𑀢𑁆𑀯𑀸 𑀲𑀼𑀕𑁆𑀕𑀳𑀺𑀢𑁄 𑀅𑀬𑀁 𑀥𑀫𑁆𑀫𑁄 𑀢𑀼𑀫𑁆𑀳𑁂𑀳𑀻𑀢𑀺. 𑀤𑀲𑀩𑀮𑀲𑁆𑀲 𑀓𑀣𑀬𑀢𑁄 𑀲𑀼𑀢𑀁 𑀢𑀬𑀸𑀢𑀺? 𑀆𑀫, 𑀪𑀦𑁆𑀢𑁂𑀢𑀺. 𑀫𑀳𑀸 𑀓𑀺𑀭 𑀤𑁂𑀯𑀢𑀸𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺, 𑀢𑁆𑀯𑀁 𑀓𑀢𑁆𑀣 𑀞𑀺𑀢𑀸 𑀲𑀼𑀡𑀻𑀢𑀺?

𑀅𑀳𑀁, 𑀪𑀦𑁆𑀢𑁂, 𑀫𑀳𑀸𑀯𑀦𑀯𑀸𑀲𑀺𑀬𑀸 𑀤𑁂𑀯𑀢𑀸, 𑀫𑀳𑁂𑀲𑀓𑁆𑀔𑀸𑀲𑀼 𑀧𑀦 𑀤𑁂𑀯𑀢𑀸𑀲𑀼 𑀆𑀕𑀘𑁆𑀙𑀦𑁆𑀢𑀻𑀲𑀼 𑀚𑀫𑁆𑀩𑀼𑀤𑀻𑀧𑁂 𑀑𑀓𑀸𑀲𑀁 𑀦𑀸𑀮𑀢𑁆𑀣𑀁, 𑀅𑀣 𑀇𑀫𑀁 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀁 𑀆𑀕𑀦𑁆𑀢𑁆𑀯𑀸 𑀚𑀫𑁆𑀩𑀼𑀓𑁄𑀮𑀧𑀝𑁆𑀝𑀦𑁂 𑀞𑀢𑁆𑀯𑀸 𑀲𑁄𑀢𑀼𑀁 𑀆𑀭𑀤𑁆𑀥𑀫𑁆𑀳𑀺, 𑀢𑀢𑁆𑀭𑀸𑀧𑀺 𑀫𑀳𑁂𑀲𑀓𑁆𑀔𑀸𑀲𑀼 𑀤𑁂𑀯𑀢𑀸𑀲𑀼 𑀆𑀕𑀘𑁆𑀙𑀦𑁆𑀢𑀻𑀲𑀼 𑀅𑀦𑀼𑀓𑁆𑀓𑀫𑁂𑀦 𑀧𑀝𑀺𑀓𑁆𑀓𑀫𑀫𑀸𑀦𑀸 𑀭𑁄𑀳𑀡𑀚𑀦𑀧𑀤𑁂 𑀫𑀳𑀸𑀕𑀸𑀫𑀲𑁆𑀲 𑀧𑀺𑀝𑁆𑀞𑀺𑀪𑀸𑀕𑀢𑁄 𑀲𑀫𑀼𑀤𑁆𑀤𑁂 𑀕𑀮𑀧𑁆𑀧𑀫𑀸𑀡𑀁 𑀉𑀤𑀓𑀁 𑀧𑀯𑀺𑀲𑀺𑀢𑁆𑀯𑀸 𑀢𑀢𑁆𑀣 𑀞𑀺𑀢𑀸 𑀅𑀲𑁆𑀲𑁄𑀲𑀺𑀦𑁆𑀢𑀺. 𑀢𑀼𑀬𑁆𑀳𑀁 𑀞𑀺𑀢𑀝𑁆𑀞𑀸𑀦𑀢𑁄 𑀤𑀽𑀭𑁂 𑀲𑀢𑁆𑀣𑀸𑀭𑀁 𑀧𑀲𑁆𑀲𑀲𑀺 𑀤𑁂𑀯𑀢𑁂𑀢𑀺? 𑀓𑀺𑀁 𑀓𑀣𑁂𑀣, 𑀪𑀦𑁆𑀢𑁂, 𑀲𑀢𑁆𑀣𑀸 𑀫𑀳𑀸𑀯𑀦𑁂 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀦𑀺𑀭𑀦𑁆𑀢𑀭𑀁 𑀫𑀫𑀜𑁆𑀜𑁂𑀯 𑀑𑀮𑁄𑀓𑁂𑀢𑀻𑀢𑀺 𑀫𑀜𑁆𑀜𑀫𑀸𑀦𑀸 𑀑𑀢𑀧𑁆𑀧𑀫𑀸𑀦𑀸 𑀊𑀫𑀻𑀲𑀼 𑀦𑀺𑀮𑀬𑀸𑀫𑀻𑀢𑀺.

𑀢𑀁 𑀤𑀺𑀯𑀲𑀁 𑀓𑀺𑀭 𑀓𑁄𑀝𑀺𑀲𑀢𑀲𑀳𑀲𑁆𑀲𑀤𑁂𑀯𑀢𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸, 𑀢𑀼𑀫𑁆𑀳𑁂𑀧𑀺 𑀢𑀤𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸𑀢𑀺? 𑀦𑀢𑁆𑀣𑀺, 𑀪𑀦𑁆𑀢𑁂. 𑀅𑀦𑀸𑀕𑀸𑀫𑀺𑀨𑀮𑀁 𑀧𑀢𑁆𑀢𑀢𑁆𑀣 𑀫𑀜𑁆𑀜𑁂𑀢𑀺? 𑀦𑀢𑁆𑀣𑀺, 𑀪𑀦𑁆𑀢𑁂. 𑀲𑀓𑀤𑀸𑀕𑀸𑀫𑀺𑀨𑀮𑀁 𑀧𑀢𑁆𑀢𑀢𑁆𑀣 𑀫𑀜𑁆𑀜𑁂𑀢𑀺? 𑀦𑀢𑁆𑀣𑀺, 𑀪𑀦𑁆𑀢𑁂. 𑀢𑀬𑁄 𑀫𑀕𑁆𑀕𑁂 𑀧𑀢𑁆𑀢𑀸 𑀤𑁂𑀯𑀢𑀸 𑀓𑀺𑀭 𑀕𑀡𑀦𑀧𑀣𑀁 𑀅𑀢𑀻𑀢𑀸, 𑀲𑁄𑀢𑀸𑀧𑀦𑁆𑀦𑀸 𑀚𑀸𑀢𑀢𑁆𑀣 𑀫𑀜𑁆𑀜𑁂𑀢𑀺? 𑀤𑁂𑀯𑀢𑀸 𑀢𑀁 𑀤𑀺𑀯𑀲𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀢𑀢𑁆𑀢𑀸 𑀳𑀭𑀸𑀬𑀫𑀸𑀦𑀸 𑁋‘‘𑀅𑀧𑀼𑀘𑁆𑀙𑀺𑀢𑀩𑁆𑀩𑀁 𑀧𑀼𑀘𑁆𑀙𑀢𑀺 𑀅𑀬𑁆𑀬𑁄’’𑀢𑀺 𑀆𑀳. 𑀢𑀢𑁄 𑀦𑀁 𑀲𑁄 𑀪𑀺𑀓𑁆𑀔𑀼 𑀆𑀳 𑁋 ‘‘𑀲𑀓𑁆𑀓𑀸 𑀧𑀦 𑀤𑁂𑀯𑀢𑁂, 𑀢𑀯 𑀅𑀢𑁆𑀢𑀪𑀸𑀯𑀁 𑀅𑀫𑁆𑀳𑀸𑀓𑀁 𑀤𑀲𑁆𑀲𑁂𑀢𑀼’’𑀦𑁆𑀢𑀺? 𑀦 𑀲𑀓𑁆𑀓𑀸 𑀪𑀦𑁆𑀢𑁂 𑀲𑀓𑀮𑀓𑀸𑀬𑀁 𑀤𑀲𑁆𑀲𑁂𑀢𑀼𑀁, 𑀅𑀗𑁆𑀕𑀼𑀮𑀺𑀧𑀩𑁆𑀩𑀫𑀢𑁆𑀢𑀁 𑀤𑀲𑁆𑀲𑁂𑀲𑁆𑀲𑀸𑀫𑀺 𑀅𑀬𑁆𑀬𑀲𑁆𑀲𑀸𑀢𑀺 𑀓𑀼𑀜𑁆𑀘𑀺𑀓𑀙𑀺𑀤𑁆𑀤𑁂𑀦 𑀅𑀗𑁆𑀕𑀼𑀮𑀺𑀁 𑀅𑀦𑁆𑀢𑁄𑀮𑁂𑀡𑀸𑀪𑀺𑀫𑀼𑀔𑀁 𑀅𑀓𑀸𑀲𑀺, 𑀘𑀦𑁆𑀤𑀲𑀳𑀲𑁆𑀲𑀲𑀽𑀭𑀺𑀬𑀲𑀳𑀲𑁆𑀲𑀉𑀕𑁆𑀕𑀫𑀦𑀓𑀸𑀮𑁄 𑀯𑀺𑀬 𑀅𑀳𑁄𑀲𑀺. 𑀤𑁂𑀯𑀥𑀻𑀢𑀸 ‘‘𑀅𑀧𑁆𑀧𑀫𑀢𑁆𑀢𑀸, 𑀪𑀦𑁆𑀢𑁂, 𑀳𑁄𑀣𑀸’’𑀢𑀺 𑀤𑀳𑀭𑀪𑀺𑀓𑁆𑀔𑀼𑀁 𑀯𑀦𑁆𑀤𑀺𑀢𑁆𑀯𑀸 𑀅𑀕𑀫𑀸𑀲𑀺. 𑀏𑀯𑀁 𑀇𑀫𑀁 𑀲𑀼𑀢𑁆𑀢𑀁 𑀤𑁂𑀯𑀢𑀸𑀦𑀁 𑀧𑀺𑀬𑀁 𑀫𑀦𑀸𑀧𑀁, 𑀫𑀫𑀸𑀬𑀦𑁆𑀢𑀺 𑀦𑀁 𑀤𑁂𑀯𑀢𑀸𑀢𑀺.

𑀇𑀢𑀺 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁

𑀫𑀳𑀸𑀲𑀫𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.