𑁧𑁩-𑁧𑁮. 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀧𑀝𑁆𑀞𑀸𑀦𑀯𑀡𑁆𑀡𑀦𑀸

𑁧. 𑀇𑀤𑀸𑀦𑀺 𑀓𑀼𑀲𑀮𑀸𑀤𑀻𑀲𑀼 𑀥𑀫𑁆𑀫𑁂𑀲𑀼 𑀧𑀘𑁆𑀘𑀬𑀥𑀫𑁆𑀫𑀁 𑀅𑀧𑁆𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀲𑁆𑀲 𑀓𑀼𑀲𑀮𑀸𑀤𑀺𑀪𑀸𑀯𑀧𑀝𑀺𑀓𑁆𑀔𑁂𑀧𑀯𑀲𑁂𑀦 𑀥𑀫𑁆𑀫𑀸𑀦𑀁 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀢𑀸𑀬 𑀮𑀤𑁆𑀥𑀦𑀸𑀫𑀁 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀧𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑀼𑀁 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀦 𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀳𑁂𑀢𑀼𑀧𑀘𑁆𑀘𑀬𑀸𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘𑀸𑀢𑀺 𑀓𑀼𑀲𑀮𑀲𑁆𑀲 𑀧𑀘𑁆𑀘𑀬𑀪𑀸𑀯𑀁 𑀅𑀦𑀼𑀚𑀸𑀦𑀸𑀢𑀺. 𑀦 𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 𑀓𑀼𑀲𑀮𑀲𑁆𑀲𑁂𑀯 𑀉𑀧𑁆𑀧𑀢𑁆𑀢𑀺𑀁 𑀯𑀸𑀭𑁂𑀢𑀺. 𑀢𑀲𑁆𑀫𑀸 ‘‘𑀓𑀼𑀲𑀮𑁂 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀺𑀲𑁆𑀲𑀚𑁆𑀚𑀦𑀁 𑀤𑀲𑁆𑀲𑀺𑀢𑀁, 𑀢𑀁 𑀲𑀩𑁆𑀩𑀁 𑀧𑀸𑀴𑀺𑀁 𑀑𑀮𑁄𑀓𑁂𑀢𑁆𑀯𑀸 𑀲𑀸𑀥𑀼𑀓𑀁 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀁. 𑀬𑀫𑁆𑀧𑀺 𑀬𑁂𑀦 𑀲𑀤𑀺𑀲𑀁, 𑀬𑀜𑁆𑀘 𑀬𑀢𑁆𑀣 𑀮𑀩𑁆𑀪𑀢𑀺, 𑀬𑁄 𑀘 𑀬𑁂𑀲𑀁 𑀯𑀺𑀲𑁆𑀲𑀚𑁆𑀚𑀦𑀸𑀦𑀁 𑀬𑁂𑀲𑀼 𑀧𑀘𑁆𑀘𑀬𑁂𑀲𑀼 𑀕𑀡𑀦𑀧𑀭𑀺𑀘𑁆𑀙𑁂𑀤𑁄, 𑀲𑁄 𑀲𑀩𑁆𑀩𑁄 𑀧𑀸𑀴𑀺𑀬𑀁 𑀤𑀲𑁆𑀲𑀺𑀢𑁄, 𑀢𑀲𑁆𑀫𑀸 𑀧𑀸𑀴𑀺𑀬𑁂𑀯 𑀏𑀢𑁆𑀣 𑀅𑀢𑁆𑀣𑁄. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀤𑀼𑀓𑀧𑀝𑁆𑀞𑀸𑀦𑀸𑀤𑀻𑀲𑀼𑀧𑀻𑀢𑀺.

𑀏𑀢𑁆𑀢𑀸𑀯𑀢𑀸 𑁋

𑀢𑀺𑀓𑀜𑁆𑀘 𑀧𑀝𑁆𑀞𑀸𑀦𑀯𑀭𑀁 𑀤𑀼𑀓𑀼𑀢𑁆𑀢𑀫𑀁,

𑀤𑀼𑀓𑀁 𑀢𑀺𑀓𑀜𑁆𑀘𑁂𑀯 𑀢𑀺𑀓𑀁 𑀤𑀼𑀓𑀜𑁆𑀘;

𑀢𑀺𑀓𑀁 𑀢𑀺𑀓𑀜𑁆𑀘𑁂𑀯 𑀤𑀼𑀓𑀁 𑀤𑀼𑀓𑀜𑁆𑀘,

𑀙 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀫𑁆𑀳𑀺 𑀦𑀬𑀸 𑀲𑀼𑀕𑀫𑁆𑀪𑀻𑀭𑀸𑀢𑀺. 𑁋

𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀕𑀸𑀣𑀸𑀬 𑀤𑀻𑀧𑀺𑀢𑀸 𑀥𑀫𑁆𑀫𑀸𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀧𑀝𑁆𑀞𑀸𑀦𑁂 𑀙 𑀦𑀬𑀸 𑀦𑀺𑀤𑁆𑀤𑀺𑀝𑁆𑀞𑀸 𑀳𑁄𑀦𑁆𑀢𑀺. 𑀧𑀘𑁆𑀘𑀬𑀯𑀲𑁂𑀦 𑀧𑀦𑁂𑀢𑁆𑀣 𑀏𑀓𑁂𑀓𑀲𑁆𑀫𑀺𑀁 𑀧𑀝𑁆𑀞𑀸𑀦𑁂 𑀅𑀦𑀼𑀮𑁄𑀫𑀸𑀤𑀬𑁄 𑀘𑀢𑁆𑀢𑀸𑀭𑁄 𑀘𑀢𑁆𑀢𑀸𑀭𑁄 𑀦𑀬𑀸𑀢𑀺 𑀏𑀓𑁂𑀦 𑀧𑀭𑀺𑀬𑀸𑀬𑁂𑀦 𑀘𑀢𑀼𑀯𑀻𑀲𑀢𑀺𑀦𑀬𑀧𑀝𑀺𑀫𑀡𑁆𑀟𑀺𑀢𑀁 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀧𑀝𑁆𑀞𑀸𑀦𑀜𑁆𑀜𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀧𑀝𑁆𑀞𑀸𑀦𑀯𑀡𑁆𑀡𑀦𑀸.