𑁬. 𑀤𑀼𑀓𑀤𑀼𑀓𑀧𑀝𑁆𑀞𑀸𑀦𑀯𑀡𑁆𑀡𑀦𑀸

𑀤𑀼𑀓𑀤𑀼𑀓𑀧𑀝𑁆𑀞𑀸𑀦𑁂𑀧𑀺 𑀳𑁂𑀢𑀼𑀲𑀳𑁂𑀢𑀼𑀓𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀳𑁂𑀢𑀼𑀲𑀳𑁂𑀢𑀼𑀓𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀳𑁂𑀢𑀼𑀧𑀘𑁆𑀘𑀬𑀸𑀢𑀺 𑀧𑀜𑁆𑀳𑀼𑀤𑁆𑀥𑀸𑀭𑀯𑀲𑁂𑀦𑁂𑀯 𑀲𑀗𑁆𑀔𑁂𑀧𑀢𑁄 𑀤𑁂𑀲𑀦𑀸 𑀓𑀢𑀸. 𑀢𑀢𑁆𑀣 𑀳𑁂𑀢𑀼𑀤𑀼𑀓𑀁 𑀲𑀳𑁂𑀢𑀼𑀓𑀤𑀼𑀓𑀸𑀤𑀻𑀳𑀺, 𑀲𑀳𑁂𑀢𑀼𑀓𑀤𑀼𑀓𑀸𑀤𑀻𑀦𑀺 𑀘 𑀢𑁂𑀦 𑀲𑀤𑁆𑀥𑀺𑀁 𑀬𑁄𑀚𑀺𑀢𑀸𑀦𑀺. 𑀏𑀓𑁂𑀓𑀁 𑀧𑀦 𑀤𑀼𑀓𑀁 𑀲𑁂𑀲𑁂𑀳𑀺, 𑀲𑁂𑀲𑀸 𑀘 𑀢𑁂𑀳𑀺 𑀲𑀤𑁆𑀥𑀺𑀁 𑀧𑀝𑀺𑀧𑀸𑀝𑀺𑀬𑀸 𑀬𑁄𑀚𑁂𑀢𑀩𑁆𑀩𑀸. 𑀇𑀤𑀜𑁆𑀳𑀺 𑀤𑀼𑀓𑀤𑀼𑀓𑀧𑀝𑁆𑀞𑀸𑀦𑀁 𑀦𑀸𑀫 ‘𑀤𑀼𑀓𑁂𑀲𑀼𑀬𑁂𑀯 𑀤𑀼𑀓𑁂 𑀧𑀓𑁆𑀔𑀺𑀧𑀺𑀢𑁆𑀯𑀸’ 𑀤𑁂𑀲𑀺𑀢𑀁. 𑀢𑁂𑀦𑁂𑀢𑁆𑀣 𑀲𑀩𑁆𑀩𑀤𑀼𑀓𑁂𑀳𑀺 𑀲𑀤𑁆𑀥𑀺𑀁 𑀲𑀩𑁆𑀩𑀤𑀼𑀓𑀸𑀦𑀁 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀧𑀸𑀴𑀺 𑀧𑀦 𑀲𑀗𑁆𑀔𑀺𑀢𑁆𑀢𑀸. 𑀬𑁂𑀦 𑀬𑁂𑀦 𑀘 𑀧𑀤𑁂𑀦 𑀲𑀤𑁆𑀥𑀺𑀁 𑀬𑀁 𑀬𑀁 𑀧𑀤𑀁 𑀬𑁄𑀚𑀦𑀁 𑀦 𑀕𑀘𑁆𑀙𑀢𑀺, 𑀢𑀁 𑀢𑀁 𑀳𑀸𑀧𑁂𑀢𑁆𑀯𑀸𑀯 𑀤𑁂𑀲𑀦𑀸 𑀓𑀢𑀸𑀢𑀺.

𑀤𑀼𑀓𑀤𑀼𑀓𑀧𑀝𑁆𑀞𑀸𑀦𑀯𑀡𑁆𑀡𑀦𑀸.

𑀏𑀢𑁆𑀢𑀸𑀯𑀢𑀸 𑁋

𑀢𑀺𑀓𑀜𑁆𑀘 𑀧𑀝𑁆𑀞𑀸𑀦𑀯𑀭𑀁 𑀤𑀼𑀓𑀼𑀢𑁆𑀢𑀫𑀁,

𑀤𑀼𑀓𑀁 𑀢𑀺𑀓𑀜𑁆𑀘𑁂𑀯 𑀢𑀺𑀓𑀁 𑀤𑀼𑀓𑀜𑁆𑀘;

𑀢𑀺𑀓𑀁 𑀢𑀺𑀓𑀜𑁆𑀘𑁂𑀯 𑀤𑀼𑀓𑀁 𑀤𑀼𑀓𑀜𑁆𑀘,

𑀙 𑀅𑀦𑀼𑀮𑁄𑀫𑀫𑁆𑀳𑀺 𑀦𑀬𑀸 𑀲𑀼𑀕𑀫𑁆𑀪𑀻𑀭𑀸𑀢𑀺. 𑁋

𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀕𑀸𑀣𑀸𑀬 𑀤𑀻𑀧𑀺𑀢𑀸. 𑀥𑀫𑁆𑀫𑀸𑀦𑀼𑀮𑁄𑀫𑀧𑀝𑁆𑀞𑀸𑀦𑁂 𑀙 𑀦𑀬𑀸 𑀦𑀺𑀤𑁆𑀤𑀺𑀝𑁆𑀞𑀸 𑀳𑁄𑀦𑁆𑀢𑀺. 𑀧𑀘𑁆𑀘𑀬𑀯𑀲𑁂𑀦 𑀧𑀦𑁂𑀢𑁆𑀣 𑀏𑀓𑁂𑀓𑀲𑁆𑀫𑀺𑀁 𑀧𑀝𑁆𑀞𑀸𑀦𑁂 𑀅𑀦𑀼𑀮𑁄𑀫𑀸𑀤𑀬𑁄 𑀘𑀢𑁆𑀢𑀸𑀭𑁄 𑀘𑀢𑁆𑀢𑀸𑀭𑁄 𑀦𑀬𑀸𑀢𑀺 𑀏𑀓𑁂𑀦 𑀧𑀭𑀺𑀬𑀸𑀬𑁂𑀦 𑀘𑀢𑀼𑀯𑀻𑀲𑀢𑀺𑀦𑀬𑀧𑀝𑀺𑀫𑀡𑁆𑀟𑀺𑀢𑀁 𑀅𑀦𑀼𑀮𑁄𑀫𑀧𑀝𑁆𑀞𑀸𑀦𑀁𑀬𑁂𑀯 𑀯𑁂𑀤𑀺𑀢𑀩𑁆𑀩𑀁.