𑁩. 𑀧𑀘𑁆𑀘𑀬𑀯𑀸𑀭𑀯𑀡𑁆𑀡𑀦𑀸

𑁨𑁪𑁩. 𑀧𑀘𑁆𑀘𑀬𑀯𑀸𑀭𑁂 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀘𑁆𑀘𑀬𑀸𑀢𑀺 𑀓𑀼𑀲𑀮𑀥𑀫𑁆𑀫𑁂 𑀧𑀢𑀺𑀝𑁆𑀞𑀺𑀢𑁄 𑀳𑀼𑀢𑁆𑀯𑀸 𑀓𑀼𑀲𑀮𑀁 𑀥𑀫𑁆𑀫𑀁 𑀦𑀺𑀲𑁆𑀲𑀬𑀝𑁆𑀞𑁂𑀦 𑀧𑀘𑁆𑀘𑀬𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀓𑀼𑀲𑀮𑀁 𑀏𑀓𑀁 𑀔𑀦𑁆𑀥𑀁 𑀧𑀘𑁆𑀘𑀬𑀸𑀢𑀺 𑀓𑀼𑀲𑀮𑀁 𑀏𑀓𑀁 𑀔𑀦𑁆𑀥𑀁 𑀦𑀺𑀲𑁆𑀲𑀬𑀧𑀘𑁆𑀘𑀬𑀁 𑀓𑀢𑁆𑀯𑀸 𑀢𑀬𑁄 𑀔𑀦𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀳𑁂𑀢𑀼𑀧𑀘𑁆𑀘𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀫𑀺𑀦𑀸𑀯𑀼𑀧𑀸𑀬𑁂𑀦 𑀲𑀩𑁆𑀩𑀧𑀤𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀯𑀢𑁆𑀣𑀼𑀁 𑀧𑀘𑁆𑀘𑀬𑀸 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀸 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸 𑀔𑀦𑁆𑀥𑀸𑀢𑀺 𑀇𑀤𑀁 𑀧𑀜𑁆𑀘𑀯𑁄𑀓𑀸𑀭𑁂 𑀧𑀯𑀢𑁆𑀢𑀺𑀯𑀲𑁂𑀦 𑀯𑀼𑀢𑁆𑀢𑀁. 𑀧𑀜𑁆𑀘𑀯𑁄𑀓𑀸𑀭𑁂 𑀧𑀯𑀢𑁆𑀢𑀺𑀬𑀜𑁆𑀳𑀺 𑀔𑀦𑁆𑀥𑀸𑀦𑀁 𑀧𑀼𑀭𑁂𑀚𑀸𑀢𑀁 𑀯𑀢𑁆𑀣𑀼 𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀳𑁄𑀢𑀺. 𑀧𑀝𑀺𑀘𑁆𑀘𑀝𑁆𑀞𑀲𑁆𑀲 𑀧𑀦 𑀲𑀳𑀚𑀸𑀢𑀝𑁆𑀞𑀢𑁆𑀢𑀸 𑀧𑀝𑀺𑀘𑁆𑀘𑀯𑀸𑀭𑁂 𑀏𑀲 𑀦𑀬𑁄 𑀦 𑀮𑀩𑁆𑀪𑀢𑀻𑀢𑀺 𑀧𑀝𑀺𑀲𑀦𑁆𑀥𑀺𑀬𑀁 𑀲𑀳𑀚𑀸𑀢𑀫𑁂𑀯 𑀯𑀢𑁆𑀣𑀼𑀁 𑀲𑀦𑁆𑀥𑀸𑀬 ‘‘𑀯𑀢𑁆𑀣𑀼𑀁 𑀧𑀝𑀺𑀘𑁆𑀘 𑀔𑀦𑁆𑀥𑀸’’𑀢𑀺 𑀯𑀼𑀢𑁆𑀢𑀁. 𑀓𑀼𑀲𑀮𑀁 𑀏𑀓𑀁 𑀔𑀦𑁆𑀥𑀜𑁆𑀘 𑀯𑀢𑁆𑀣𑀼𑀜𑁆𑀘 𑀧𑀘𑁆𑀘𑀬𑀸 𑀢𑀬𑁄 𑀔𑀦𑁆𑀥𑀸𑀢𑀺𑀆𑀤𑀻𑀲𑀼𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀩𑁆𑀬𑀸𑀓𑀢𑀁 𑀥𑀫𑁆𑀫𑀁 𑀧𑀘𑁆𑀘𑀬𑀸 𑀓𑀼𑀲𑀮𑁄 𑀘 𑀅𑀩𑁆𑀬𑀸𑀓𑀢𑁄 𑀘𑀸𑀢𑀺 𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑀯𑀲𑁂𑀦 𑀏𑀓𑀢𑁄 𑀉𑀧𑁆𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀓𑀼𑀲𑀮𑀼𑀧𑁆𑀧𑀢𑁆𑀢𑀺𑀓𑁆𑀔𑀡𑀲𑁆𑀫𑀺𑀜𑁆𑀳𑀺 𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀓𑀼𑀲𑀮𑀸 𑀔𑀦𑁆𑀥𑀸, 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑁂 𑀘 𑀫𑀳𑀸𑀪𑀽𑀢𑁂 𑀦𑀺𑀲𑁆𑀲𑀸𑀬 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀉𑀧𑀸𑀤𑀸𑀭𑀽𑀧𑀁 𑀳𑁂𑀢𑀼𑀧𑀘𑁆𑀘𑀬𑀯𑀲𑁂𑀦 𑀏𑀓𑀢𑁄 𑀉𑀧𑁆𑀧𑀚𑁆𑀚𑀢𑀺. 𑀇𑀢𑀺 𑀧𑀘𑁆𑀘𑀬𑀪𑀽𑀢𑀲𑁆𑀲 𑀅𑀩𑁆𑀬𑀸𑀓𑀢𑀲𑁆𑀲 𑀦𑀸𑀦𑀢𑁆𑀢𑁂𑀧𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑀯𑀲𑁂𑀦 𑀏𑀓𑀢𑁄 𑀉𑀧𑁆𑀧𑀢𑁆𑀢𑀺𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀜𑁆𑀜𑁂𑀲𑀼𑀧𑀺 𑀏𑀯𑀭𑀽𑀧𑁂𑀲𑀼 𑀞𑀸𑀦𑁂𑀲𑀼 𑀏𑀲𑁂𑀯 𑀦𑀬𑁄. 𑀏𑀯𑀁 𑀇𑀫𑀲𑁆𑀫𑀺𑀁 𑀳𑁂𑀢𑀼𑀧𑀘𑁆𑀘𑀬𑁂 𑀲𑀳𑀚𑀸𑀢𑀜𑁆𑀘 𑀧𑀼𑀭𑁂𑀚𑀸𑀢𑀜𑁆𑀘 𑀦𑀺𑀲𑁆𑀲𑀬𑀝𑁆𑀞𑁂𑀦 𑀧𑀘𑁆𑀘𑀬𑀁 𑀓𑀢𑁆𑀯𑀸 𑀲𑀢𑁆𑀢𑀭𑀲 𑀧𑀜𑁆𑀳𑀸 𑀯𑀺𑀲𑁆𑀲𑀚𑁆𑀚𑀺𑀢𑀸. 𑀢𑀢𑁆𑀣 𑀔𑀦𑁆𑀥𑀸 𑀘𑁂𑀯 𑀪𑀽𑀢𑀸 𑀘 𑀲𑀳𑀚𑀸𑀢𑀯𑀲𑁂𑀦, 𑀯𑀢𑁆𑀣𑀼 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀯𑀲𑁂𑀦 𑀕𑀳𑀺𑀢𑀁. 𑀧𑀝𑀺𑀘𑁆𑀘𑀯𑀸𑀭𑁂 𑀧𑀦 𑀲𑀳𑀚𑀸𑀢𑀯𑀲𑁂𑀦 𑀧𑀘𑁆𑀘𑀬𑁄 𑀮𑀩𑁆𑀪𑀢𑀺, 𑀢𑀲𑁆𑀫𑀸 𑀢𑀢𑁆𑀣 𑀦𑀯𑁂𑀯 𑀧𑀜𑁆𑀳𑀸 𑀯𑀺𑀲𑁆𑀲𑀚𑁆𑀚𑀺𑀢𑀸. 𑀬𑁂 𑀧𑀦𑁂𑀢𑁂 𑀏𑀢𑁆𑀣 𑀲𑀢𑁆𑀢𑀭𑀲 𑀧𑀜𑁆𑀳𑀸 𑀯𑀺𑀲𑁆𑀲𑀚𑁆𑀚𑀺𑀢𑀸, 𑀢𑁂𑀲𑀼 𑀏𑀓𑀸𑀤𑀺𑀓𑁂 𑀏𑀓𑀸𑀯𑀲𑀸𑀦𑁂 𑀯𑀺𑀲𑁆𑀲𑀚𑁆𑀚𑀦𑁂 𑀓𑀼𑀲𑀮𑀸𑀤𑀻𑀲𑀼 𑀏𑀓𑀧𑀘𑁆𑀘𑀬𑀢𑁄 𑀏𑀓𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁄. 𑀏𑀓𑀸𑀤𑀺𑀓𑁂 𑀤𑀼𑀓𑀸𑀯𑀲𑀸𑀦𑁂 𑀏𑀓𑀧𑀘𑁆𑀘𑀬𑀢𑁄 𑀦𑀸𑀦𑀸𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁄. 𑀤𑀼𑀓𑀸𑀤𑀺𑀓𑁂 𑀏𑀓𑀸𑀯𑀲𑀸𑀦𑁂 𑀦𑀸𑀦𑀸𑀧𑀘𑁆𑀘𑀬𑀢𑁄 𑀏𑀓𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁄. 𑀤𑀼𑀓𑀸𑀤𑀺𑀓𑁂 𑀤𑀼𑀓𑀸𑀯𑀲𑀸𑀦𑁂 𑀦𑀸𑀦𑀸𑀧𑀘𑁆𑀘𑀬𑀢𑁄 𑀦𑀸𑀦𑀸𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁄.

𑁨𑁪𑁮-𑁨𑁫𑁨. 𑀆𑀭𑀫𑁆𑀫𑀡𑀧𑀘𑁆𑀘𑀬𑀸𑀤𑀻𑀲𑀼𑀧𑀺 𑀇𑀫𑀺𑀦𑀸𑀯𑀼𑀧𑀸𑀬𑁂𑀦 𑀧𑀜𑁆𑀳𑀸𑀯𑀺𑀲𑁆𑀲𑀚𑁆𑀚𑀦𑀧𑁆𑀧𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀁 𑀧𑀦𑁂𑀢𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁂 𑀯𑀢𑁆𑀣𑀼𑀁 𑀧𑀘𑁆𑀘𑀬𑀸 𑀔𑀦𑁆𑀥𑀸𑀢𑀺 𑀯𑀼𑀢𑁆𑀢𑀁, 𑀢𑀁 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀺𑀧𑀸𑀓𑀓𑁆𑀔𑀦𑁆𑀥𑁂𑀬𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀅𑀩𑁆𑀬𑀸𑀓𑀢𑀁 𑀦𑀺𑀲𑁆𑀲𑀸𑀬 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀸𑀦𑀁 𑀧𑀪𑁂𑀤𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀸𑀦𑀺. 𑀧𑀼𑀦 𑀯𑀢𑁆𑀣𑀼𑀁 𑀧𑀘𑁆𑀘𑀬𑀸𑀢𑀺 𑀧𑀯𑀢𑁆𑀢𑁂 𑀯𑀺𑀧𑀸𑀓𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸𑀦𑀁 𑀉𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀲𑁂𑀲𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀇𑀫𑀲𑁆𑀫𑀺𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁂 𑀲𑀳𑀚𑀸𑀢𑀜𑁆𑀘 𑀧𑀼𑀭𑁂𑀚𑀸𑀢𑀜𑁆𑀘 𑀧𑀘𑁆𑀘𑀬𑀁 𑀓𑀢𑁆𑀯𑀸 𑀲𑀢𑁆𑀢 𑀧𑀜𑁆𑀳𑀸 𑀯𑀺𑀲𑁆𑀲𑀚𑁆𑀚𑀺𑀢𑀸. 𑀢𑀢𑁆𑀣 𑀔𑀦𑁆𑀥𑀸 𑀲𑀳𑀚𑀸𑀢𑀯𑀲𑁂𑀦, 𑀯𑀢𑁆𑀣𑀼 𑀲𑀳𑀚𑀸𑀢𑀧𑀼𑀭𑁂𑀚𑀸𑀢𑀯𑀲𑁂𑀦, 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀺 𑀧𑀼𑀭𑁂𑀚𑀸𑀢𑀯𑀲𑁂𑀦𑁂𑀯 𑀕𑀳𑀺𑀢𑀸𑀦𑀺. 𑀧𑀝𑀺𑀘𑁆𑀘𑀯𑀸𑀭𑁂 𑀧𑀦 𑀲𑀳𑀚𑀸𑀢𑀯𑀲𑁂𑀦𑁂𑀯 𑀧𑀘𑁆𑀘𑀬𑁄 𑀮𑀩𑁆𑀪𑀢𑀺. 𑀢𑀲𑁆𑀫𑀸 𑀢𑀢𑁆𑀣 𑀢𑀬𑁄𑀯 𑀧𑀜𑁆𑀳𑀸 𑀯𑀺𑀲𑁆𑀲𑀚𑁆𑀚𑀺𑀢𑀸.

𑁨𑁫𑁩-𑁨𑁫𑁪. 𑀅𑀥𑀺𑀧𑀢𑀺𑀧𑀘𑁆𑀘𑀬𑁂 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀁 𑀮𑁄𑀓𑀼𑀢𑁆𑀢𑀭𑀫𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀸 𑀭𑀽𑀧𑀸𑀪𑀸𑀯𑁂𑀦 𑀆𑀭𑀫𑁆𑀫𑀡𑀲𑀤𑀺𑀲𑀸. 𑀧𑀭𑀢𑁄 𑀆𑀲𑁂𑀯𑀦𑀦𑀢𑁆𑀣𑀺𑀯𑀺𑀕𑀢𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁨𑁫𑁫. 𑀲𑀳𑀚𑀸𑀢𑀧𑀘𑁆𑀘𑀬𑁂 𑀓𑀝𑀢𑁆𑀢𑀸𑀭𑀽𑀧𑀁 𑀉𑀧𑀸𑀤𑀸𑀭𑀽𑀧𑀦𑁆𑀢𑀺 𑀉𑀧𑀸𑀤𑀸𑀭𑀽𑀧𑀲𑀗𑁆𑀔𑀸𑀢𑀁 𑀓𑀝𑀢𑁆𑀢𑀸𑀭𑀽𑀧𑀁. 𑀇𑀤𑀁 𑀅𑀲𑀜𑁆𑀜𑀲𑀢𑁆𑀢𑀸𑀦𑀜𑁆𑀜𑁂𑀯 𑀭𑀽𑀧𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀺 𑀧𑀜𑁆𑀘𑀯𑁄𑀓𑀸𑀭𑀯𑀲𑁂𑀦 𑀯𑀼𑀢𑁆𑀢𑀸𑀦𑀺.

𑁨𑁫𑁬-𑁨𑁫𑁭. 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁂 𑀘 𑀬𑀣𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑀸 𑀏𑀯𑀦𑁆𑀢𑀺 𑀯𑀺𑀲𑁆𑀲𑀚𑁆𑀚𑀦𑀲𑀫𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂𑀲𑀼 𑀧𑀦 𑀦𑀸𑀦𑀢𑁆𑀢𑀁 𑀅𑀢𑁆𑀣𑀺.

𑁨𑁫𑁮. 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂 𑀆𑀭𑀫𑁆𑀫𑀡𑀧𑀘𑁆𑀘𑀬𑀲𑀤𑀺𑀲𑀦𑁆𑀢𑀺 𑀭𑀽𑀧𑀸𑀪𑀸𑀯𑀢𑁄𑀧𑀺 𑀯𑀺𑀲𑁆𑀲𑀚𑁆𑀚𑀦𑀲𑀫𑀢𑀸𑀬𑀧𑀺 𑀯𑀼𑀢𑁆𑀢𑀁.

𑁨𑁫𑁯-𑁨𑁬𑁦. 𑀯𑀢𑁆𑀣𑀼𑀁 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀸𑀢𑀺𑀆𑀤𑀻𑀦𑀁 𑀧𑀝𑀺𑀘𑁆𑀘𑀯𑀸𑀭𑁂 𑀯𑀼𑀢𑁆𑀢𑀦𑀬𑁂𑀦𑁂𑀯𑀢𑁆𑀣𑁄 𑀕𑀳𑁂𑀢𑀩𑁆𑀩𑁄.

𑁨𑁬𑁧-𑁨𑁬𑁬. 𑀓𑀫𑁆𑀫𑀧𑀘𑁆𑀘𑀬𑁂 𑀢𑀻𑀡𑀻𑀢𑀺 𑀓𑀼𑀲𑀮𑀁 𑀧𑀘𑁆𑀘𑀬𑀸 𑀓𑀼𑀲𑀮𑁄 𑀅𑀩𑁆𑀬𑀸𑀓𑀢𑁄 𑀓𑀼𑀲𑀮𑀸𑀩𑁆𑀬𑀸𑀓𑀢𑁄 𑀘𑀸𑀢𑀺 𑀏𑀯𑀁 𑀢𑀻𑀡𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀅𑀓𑀼𑀲𑀮𑁂𑀧𑀺 𑀏𑀲𑁂𑀯 𑀦𑀬𑁄.

𑁨𑁬𑁭-𑁨𑁬𑁮. 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂 𑀔𑀦𑁆𑀥𑁂 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸𑀢𑀺 𑀔𑀦𑁆𑀥𑁂 𑀦𑀺𑀲𑁆𑀲𑀸𑀬 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀔𑀦𑁆𑀥𑀸 𑀯𑀢𑁆𑀣𑀼𑀁 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸𑀢𑀺 𑀔𑀦𑁆𑀥𑀸 𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁨𑁬𑁯-𑁨𑁭𑁬. 𑀇𑀤𑀸𑀦𑀺 𑀬𑀣𑀸𑀮𑀤𑁆𑀥𑀸𑀦𑀺 𑀯𑀺𑀲𑁆𑀲𑀚𑁆𑀚𑀦𑀸𑀦𑀺 𑀕𑀡𑀦𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 𑀳𑁂𑀢𑀼𑀬𑀸 𑀲𑀢𑁆𑀢𑀭𑀲𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀳𑁂𑀢𑀼𑀬𑀸 𑀲𑀢𑁆𑀢𑀭𑀲𑀸𑀢𑀺 𑀓𑀼𑀲𑀮𑁂𑀦 𑀓𑀼𑀲𑀮𑀁, 𑀓𑀼𑀲𑀮𑁂𑀦 𑀅𑀩𑁆𑀬𑀸𑀓𑀢𑀁, 𑀓𑀼𑀲𑀮𑁂𑀦 𑀓𑀼𑀲𑀮𑀸𑀩𑁆𑀬𑀸𑀓𑀢𑀦𑁆𑀢𑀺 𑀏𑀯𑀁 𑀓𑀼𑀲𑀮𑀯𑀲𑁂𑀦 𑀏𑀓𑀸𑀤𑀺𑀓𑀸𑀦𑀺 𑀏𑀓𑀸𑀯𑀲𑀸𑀦𑀸𑀦𑀺 𑀤𑁆𑀯𑁂, 𑀤𑀼𑀓𑀸𑀯𑀲𑀸𑀦𑀁 𑀏𑀓𑀦𑁆𑀢𑀺 𑀢𑀻𑀡𑀺 𑀯𑀼𑀢𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀢𑀣𑀸 𑀅𑀓𑀼𑀲𑀮𑀯𑀲𑁂𑀦. 𑀅𑀩𑁆𑀬𑀸𑀓𑀢𑁂𑀦 𑀅𑀩𑁆𑀬𑀸𑀓𑀢𑀁, 𑀢𑁂𑀦𑁂𑀯 𑀓𑀼𑀲𑀮𑀁, 𑀅𑀓𑀼𑀲𑀮𑀁, 𑀓𑀼𑀲𑀮𑀸𑀩𑁆𑀬𑀸𑀓𑀢𑀁 𑀅𑀓𑀼𑀲𑀮𑀸𑀩𑁆𑀬𑀸𑀓𑀢𑀜𑁆𑀘; 𑀓𑀼𑀲𑀮𑀸𑀩𑁆𑀬𑀸𑀓𑀢𑁂𑀳𑀺 𑀓𑀼𑀲𑀮𑀁, 𑀅𑀩𑁆𑀬𑀸𑀓𑀢𑀁, 𑀓𑀼𑀲𑀮𑀸𑀩𑁆𑀬𑀸𑀓𑀢𑀁; 𑀅𑀓𑀼𑀲𑀮𑀸𑀩𑁆𑀬𑀸𑀓𑀢𑁂𑀳𑀺 𑀅𑀓𑀼𑀲𑀮𑀁, 𑀅𑀩𑁆𑀬𑀸𑀓𑀢𑀁, 𑀅𑀓𑀼𑀲𑀮𑀸𑀩𑁆𑀬𑀸𑀓𑀢𑀦𑁆𑀢𑀺 𑀏𑀯𑀁 𑀲𑀢𑁆𑀢𑀭𑀲 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀆𑀭𑀫𑁆𑀫𑀡𑁂 𑀲𑀢𑁆𑀢𑀸𑀢𑀺 𑀓𑀼𑀲𑀮𑁂𑀦 𑀓𑀼𑀲𑀮𑀁; 𑀅𑀓𑀼𑀲𑀮𑁂𑀦 𑀅𑀓𑀼𑀲𑀮𑀁, 𑀅𑀩𑁆𑀬𑀸𑀓𑀢𑁂𑀦 𑀅𑀩𑁆𑀬𑀸𑀓𑀢𑀁, 𑀓𑀼𑀲𑀮𑀁, 𑀅𑀓𑀼𑀲𑀮𑀁; 𑀓𑀼𑀲𑀮𑀸𑀩𑁆𑀬𑀸𑀓𑀢𑁂𑀦 𑀓𑀼𑀲𑀮𑀁; 𑀅𑀓𑀼𑀲𑀮𑀸𑀩𑁆𑀬𑀸𑀓𑀢𑁂𑀦 𑀅𑀓𑀼𑀲𑀮𑀦𑁆𑀢𑀺 𑀏𑀯𑀁 𑀲𑀢𑁆𑀢.

𑀯𑀺𑀧𑀸𑀓𑁂 𑀏𑀓𑀦𑁆𑀢𑀺 𑀅𑀩𑁆𑀬𑀸𑀓𑀢𑁂𑀦 𑀅𑀩𑁆𑀬𑀸𑀓𑀢𑀫𑁂𑀯. 𑀏𑀯𑀫𑁂𑀢𑁆𑀣 𑀲𑀢𑁆𑀢𑀭𑀲, 𑀲𑀢𑁆𑀢, 𑀏𑀓𑀦𑁆𑀢𑀺 𑀢𑀬𑁄 𑀯𑀸𑀭𑀧𑀭𑀺𑀘𑁆𑀙𑁂𑀤𑀸 𑀳𑁄𑀦𑁆𑀢𑀺. 𑀢𑁂𑀲𑀼 𑀤𑁆𑀯𑀸𑀤𑀲 𑀲𑀢𑁆𑀢𑀭𑀲𑀓𑀸, 𑀤𑀲 𑀲𑀢𑁆𑀢𑀓𑀸, 𑀏𑀓𑀁 𑀏𑀓𑀓𑀦𑁆𑀢𑀺 𑀢𑁂 𑀲𑀩𑁆𑀩𑁂 𑀲𑀸𑀥𑀼𑀓𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀧𑀭𑀢𑁄 𑀤𑀼𑀓𑀢𑀺𑀓𑀸𑀤𑀺𑀯𑀲𑁂𑀦 𑀧𑀘𑁆𑀘𑀬𑀲𑀁𑀲𑀦𑁆𑀤𑀦𑁂 𑀊𑀦𑀢𑀭𑀕𑀡𑀦𑀲𑁆𑀲 𑀯𑀲𑁂𑀦 𑀕𑀡𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀲𑀓𑁆𑀓𑀸 𑀳𑀺 𑀇𑀫𑀸𑀬 𑀕𑀡𑀦𑀸𑀬 𑀤𑀼𑀓𑀫𑀽𑀮𑀸𑀤𑀻𑀲𑀼 𑀯𑀸𑀭𑀧𑀭𑀺𑀘𑁆𑀙𑁂𑀤𑁂 𑀚𑀸𑀦𑀺𑀢𑀼𑀦𑁆𑀢𑀺 𑀧𑀼𑀦 ‘‘𑀓𑀼𑀲𑀮𑀁 𑀥𑀫𑁆𑀫𑀁 𑀧𑀘𑁆𑀘𑀬𑀸 𑀓𑀼𑀲𑀮𑁄 𑀥𑀫𑁆𑀫𑁄’’𑀢𑀺 𑀅𑀦𑀸𑀫𑀲𑀺𑀢𑁆𑀯𑀸 𑀕𑀡𑀦𑀯𑀲𑁂𑀦𑁂𑀯 𑀯𑀸𑀭𑀧𑀭𑀺𑀘𑁆𑀙𑁂𑀤𑀁 𑀤𑀲𑁆𑀲𑁂𑀢𑀼𑀁 𑀳𑁂𑀢𑀼𑀧𑀘𑁆𑀘𑀬𑀸 𑀆𑀭𑀫𑁆𑀫𑀡𑁂 𑀲𑀢𑁆𑀢𑀸𑀢𑀺𑀆𑀤𑀺 𑀆𑀭𑀤𑁆𑀥𑀁.

𑀢𑀢𑁆𑀣 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀘𑁆𑀘𑀬𑀸 𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀳𑁂𑀢𑀼𑀧𑀘𑁆𑀘𑀬𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑀸. 𑀓𑀼𑀲𑀮𑀁 𑀏𑀓𑀁 𑀔𑀦𑁆𑀥𑀁 𑀧𑀘𑁆𑀘𑀬𑀸 𑀢𑀬𑁄 𑀔𑀦𑁆𑀥𑀸𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀆𑀭𑀫𑁆𑀫𑀡𑁂 𑀮𑀤𑁆𑀥𑀯𑀺𑀲𑁆𑀲𑀚𑁆𑀚𑀦𑀸𑀦𑀺 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀸𑀦𑀺. 𑀅𑀬𑀁 𑀢𑀸𑀯 𑀅𑀦𑀼𑀮𑁄𑀫𑁂 𑀦𑀬𑁄.

𑁨𑁭𑁭-𑁨𑁮𑁫. 𑀧𑀘𑁆𑀘𑀦𑀻𑀬𑁂 𑀧𑀦 𑀓𑀼𑀲𑀮𑀁 𑀦 𑀮𑀩𑁆𑀪𑀢𑀻𑀢𑀺 𑀅𑀓𑀼𑀲𑀮𑀁 𑀥𑀫𑁆𑀫𑀁 𑀧𑀘𑁆𑀘𑀬𑀸𑀢𑀺 𑀅𑀓𑀼𑀲𑀮𑀫𑁂𑀯 𑀆𑀤𑀺𑀁 𑀓𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑀁 𑀆𑀭𑀤𑁆𑀥𑀁. 𑀢𑀁 𑀬𑀣𑀸𑀧𑀸𑀴𑀺𑀫𑁂𑀯 𑀦𑀺𑀬𑁆𑀬𑀸𑀢𑀺. 𑀬𑀜𑁆𑀳𑁂𑀢𑁆𑀣 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀁 𑀧𑀝𑀺𑀘𑁆𑀘𑀯𑀸𑀭𑀲𑁆𑀲 𑀧𑀘𑁆𑀘𑀦𑀻𑀬𑁂 𑀯𑀼𑀢𑁆𑀢𑀫𑁂𑀯.

𑁨𑁮𑁬-𑁨𑁮𑁭. 𑀬𑀁 𑀧𑀦𑁂𑀢𑀁 𑀧𑀘𑁆𑀘𑀦𑀻𑀬𑁂 𑀮𑀤𑁆𑀥𑀯𑀺𑀲𑁆𑀲𑀚𑁆𑀚𑀦𑀧𑀭𑀺𑀘𑁆𑀙𑁂𑀤𑀁 𑀕𑀡𑀦𑀢𑁄 𑀤𑀲𑁆𑀲𑁂𑀢𑀼𑀁 𑀦𑀳𑁂𑀢𑀼𑀬𑀸 𑀘𑀢𑁆𑀢𑀸𑀭𑀻𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀢𑁆𑀣 𑀘𑀢𑁆𑀢𑀸𑀭𑀺, 𑀲𑀢𑁆𑀢𑀭𑀲, 𑀲𑀢𑁆𑀢, 𑀧𑀜𑁆𑀘, 𑀢𑀻𑀡𑀺, 𑀏𑀓𑀦𑁆𑀢𑀺 𑀙 𑀧𑀭𑀺𑀘𑁆𑀙𑁂𑀤𑀸. 𑀢𑁂𑀲𑀁 𑀯𑀲𑁂𑀦 𑀤𑀼𑀓𑀢𑀺𑀓𑀸𑀤𑀻𑀲𑀼 𑀧𑀘𑁆𑀘𑀬𑀲𑀁𑀲𑀦𑁆𑀤𑀦𑁂 𑀕𑀡𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀬𑁄 𑀳𑀺 𑀧𑀘𑁆𑀘𑀬𑁄 𑀲𑀢𑁆𑀢𑀭𑀲 𑀯𑀺𑀲𑁆𑀲𑀚𑁆𑀚𑀦𑀸𑀦𑀺 𑀮𑀪𑀢𑀺, 𑀢𑁂𑀦 𑀲𑀤𑁆𑀥𑀺𑀁 𑀲𑀤𑀺𑀲𑀲𑀁𑀲𑀦𑁆𑀤𑀦𑁂 𑀲𑀢𑁆𑀢𑀭𑀲, 𑀊𑀦𑀢𑀭𑀲𑀁𑀲𑀦𑁆𑀤𑀦𑁂 𑀲𑁂𑀲𑀸 𑀙𑀧𑀺 𑀧𑀭𑀺𑀘𑁆𑀙𑁂𑀤𑀸 𑀮𑀩𑁆𑀪𑀦𑁆𑀢𑀺. 𑀏𑀯𑀁 𑀲𑁂𑀲𑁂𑀲𑀼𑀧𑀺 𑀅𑀥𑀺𑀓𑀧𑀭𑀺𑀘𑁆𑀙𑁂𑀤𑀁 𑀞𑀧𑁂𑀢𑁆𑀯𑀸 𑀲𑀫𑀲𑀫𑀸 𑀊𑀦𑀢𑀭𑀸 𑀘 𑀮𑀩𑁆𑀪𑀦𑁆𑀢𑀻𑀢𑀺.

𑀏𑀢𑁆𑀣 𑀘 𑀅𑀥𑀺𑀓𑀢𑀭𑀸 𑀦 𑀮𑀩𑁆𑀪𑀦𑁆𑀢𑀻𑀢𑀺 𑀅𑀬𑀫𑁂𑀢𑁆𑀣 𑀦𑀺𑀬𑀫𑁄. 𑀲𑀫𑀲𑀫𑀸 𑀧𑀦 𑀊𑀦𑀢𑀭𑀸 𑀘 𑀅𑀢𑁆𑀣𑀸 𑀯𑀺𑀭𑁄𑀥𑁂 𑀲𑀢𑀺 𑀮𑀩𑁆𑀪𑀦𑁆𑀢𑀺. 𑀢𑁂𑀦𑁂𑀢𑁆𑀣 ‘‘𑀦𑀳𑁂𑀢𑀼𑀧𑀘𑁆𑀘𑀬𑀸 𑀦𑀸𑀭𑀫𑁆𑀫𑀡𑁂 𑀏𑀓’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀳𑀺 𑀦𑀳𑁂𑀢𑀼𑀬𑀸 𑀘𑀢𑀼𑀦𑁆𑀦𑀁, 𑀦𑀸𑀭𑀫𑁆𑀫𑀡𑁂 𑀧𑀜𑁆𑀘𑀦𑁆𑀦𑀁 𑀆𑀕𑀢𑀢𑁆𑀢𑀸 𑀦𑀳𑁂𑀢𑀼𑀯𑀲𑁂𑀦 𑀘𑀢𑁆𑀢𑀸𑀭𑀻𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀦𑀸𑀭𑀫𑁆𑀫𑀡𑁂𑀦 𑀲𑀤𑁆𑀥𑀺𑀁 𑀖𑀝𑀺𑀢𑀢𑁆𑀢𑀸 𑀧𑀦 𑀆𑀭𑀫𑁆𑀫𑀡𑀥𑀫𑁆𑀫𑁄 𑀯𑀺𑀭𑀼𑀚𑁆𑀛𑀢𑀻𑀢𑀺 𑀅𑀓𑀼𑀲𑀮𑀁 𑀥𑀫𑁆𑀫𑀁 𑀧𑀘𑁆𑀘𑀬𑀸 𑀅𑀓𑀼𑀲𑀮𑁄 𑀥𑀫𑁆𑀫𑁄, 𑀅𑀩𑁆𑀬𑀸𑀓𑀢𑀁 𑀥𑀫𑁆𑀫𑀁 𑀧𑀘𑁆𑀘𑀬𑀸 𑀅𑀓𑀼𑀲𑀮𑁄, 𑀅𑀓𑀼𑀲𑀮𑀜𑁆𑀘 𑀅𑀩𑁆𑀬𑀸𑀓𑀢𑀜𑁆𑀘 𑀥𑀫𑁆𑀫𑀁 𑀧𑀘𑁆𑀘𑀬𑀸 𑀅𑀓𑀼𑀲𑀮𑁄𑀢𑀺 𑀢𑀻𑀡𑀺 𑀯𑀺𑀲𑁆𑀲𑀚𑁆𑀚𑀦𑀸𑀦𑀺 𑀧𑀭𑀺𑀳𑀻𑀦𑀸𑀦𑀺. 𑀅𑀩𑁆𑀬𑀸𑀓𑀢𑀁 𑀥𑀫𑁆𑀫𑀁 𑀧𑀘𑁆𑀘𑀬𑀸 𑀅𑀩𑁆𑀬𑀸𑀓𑀢𑁄𑀢𑀺 𑀭𑀽𑀧𑀯𑀲𑁂𑀦 𑀏𑀓𑀫𑁂𑀯 𑀯𑀼𑀢𑁆𑀢𑀁. 𑀏𑀯𑀁 𑀲𑀩𑁆𑀩𑀢𑁆𑀣 𑀯𑀺𑀭𑀼𑀤𑁆𑀥𑀸𑀯𑀺𑀭𑀼𑀤𑁆𑀥𑀁 𑀜𑀢𑁆𑀯𑀸 𑀮𑀩𑁆𑀪𑀫𑀸𑀦𑀧𑀭𑀺𑀘𑁆𑀙𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀧𑀺𑀘𑁂𑀢𑁆𑀣 𑀇𑀤𑀁 𑀦𑀬𑀫𑀢𑁆𑀢𑀤𑀲𑁆𑀲𑀦𑀁. 𑀦𑀸𑀥𑀺𑀧𑀢𑀺𑀬𑀸 𑀘𑀢𑁆𑀢𑀸𑀭𑀻𑀢𑀺 𑀦𑀳𑁂𑀢𑀼𑀬𑀸 𑀮𑀤𑁆𑀥𑀸𑀦𑁂𑀯. 𑀲𑁂𑀲𑀘𑀢𑀼𑀓𑁆𑀓𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀦𑀸𑀦𑀦𑁆𑀢𑀭𑁂 𑀏𑀓𑀦𑁆𑀢𑀺 𑀅𑀳𑁂𑀢𑀼𑀓𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀲𑁆𑀲 𑀘𑁂𑀯 𑀲𑁂𑀲𑀭𑀽𑀧𑀲𑁆𑀲 𑀘 𑀯𑀲𑁂𑀦 𑀅𑀩𑁆𑀬𑀸𑀓𑀢𑁂𑀦 𑀅𑀩𑁆𑀬𑀸𑀓𑀢𑀁. 𑀏𑀯𑀁 𑀲𑀩𑁆𑀩𑁂𑀲𑀼 𑀏𑀓𑀓𑁂𑀲𑀼 𑀬𑀼𑀚𑁆𑀚𑀫𑀸𑀦𑀓𑀭𑀽𑀧𑀁 𑀚𑀸𑀦𑀺𑀢𑀩𑁆𑀩𑀁. 𑀦𑀧𑀼𑀭𑁂𑀚𑀸𑀢𑁂 𑀤𑁆𑀯𑁂𑀢𑀺 𑀇𑀥𑀸𑀧𑀺 𑀦𑀳𑁂𑀢𑀼𑀯𑀲𑁂𑀦 𑀘𑀢𑁆𑀢𑀸𑀭𑀻𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀦𑀧𑀼𑀭𑁂𑀚𑀸𑀢𑁂𑀦 𑀲𑀤𑁆𑀥𑀺𑀁 𑀖𑀝𑀺𑀢𑀢𑁆𑀢𑀸 𑀧𑀦 𑀅𑀩𑁆𑀬𑀸𑀓𑀢𑀁 𑀥𑀫𑁆𑀫𑀁 𑀧𑀘𑁆𑀘𑀬𑀸 𑀅𑀓𑀼𑀲𑀮𑁄, 𑀅𑀓𑀼𑀲𑀮𑀜𑁆𑀘 𑀅𑀩𑁆𑀬𑀸𑀓𑀢𑀜𑁆𑀘 𑀥𑀫𑁆𑀫𑀁 𑀧𑀘𑁆𑀘𑀬𑀸 𑀅𑀓𑀼𑀲𑀮𑁄𑀢𑀺 𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑀯𑀲𑁂𑀦 𑀤𑁆𑀯𑁂 𑀯𑀺𑀲𑁆𑀲𑀚𑁆𑀚𑀦𑀸𑀦𑀺 𑀧𑀭𑀺𑀳𑀻𑀦𑀸𑀦𑀺. 𑀆𑀭𑀼𑀧𑁆𑀧𑁂 𑀧𑀦 𑀅𑀳𑁂𑀢𑀼𑀓𑀫𑁄𑀳𑀲𑁆𑀲 𑀅𑀳𑁂𑀢𑀼𑀓𑀓𑀺𑀭𑀺𑀬𑀲𑁆𑀲 𑀘 𑀯𑀲𑁂𑀦 𑀤𑁆𑀯𑁂 𑀯𑀼𑀢𑁆𑀢𑀸𑀦𑀺. 𑀦𑀯𑀺𑀧𑁆𑀧𑀬𑀼𑀢𑁆𑀢𑁂 𑀤𑁆𑀯𑁂𑀢𑀺 𑀆𑀭𑀼𑀧𑁆𑀧𑁂 𑀅𑀳𑁂𑀢𑀼𑀓𑀸𑀓𑀼𑀲𑀮𑀓𑀺𑀭𑀺𑀬𑀯𑀲𑁂𑀦 𑀤𑁆𑀯𑁂. 𑀦𑁄𑀦𑀢𑁆𑀣𑀺 𑀦𑁄𑀯𑀺𑀕𑀢𑁂𑀲𑀼 𑀏𑀓𑀦𑁆𑀢𑀺 𑀲𑀩𑁆𑀩𑀲𑁆𑀲 𑀭𑀽𑀧𑀲𑁆𑀲 𑀯𑀲𑁂𑀦 𑀅𑀩𑁆𑀬𑀸𑀓𑀢𑁂𑀦 𑀅𑀩𑁆𑀬𑀸𑀓𑀢𑀁 𑀤𑀝𑁆𑀞𑀩𑁆𑀩𑀁. 𑀢𑀺𑀓𑀸𑀤𑀻𑀲𑀼 𑀅𑀧𑀼𑀩𑁆𑀩𑀁 𑀦𑀢𑁆𑀣𑀺.

𑁨𑁮𑁮. 𑀦𑀸𑀭𑀫𑁆𑀫𑀡𑀫𑀽𑀮𑀓𑁂 𑀧𑀦 𑀦𑀅𑀥𑀺𑀧𑀢𑀺𑀬𑀸 𑀧𑀜𑁆𑀘𑀸𑀢𑀺 𑀦𑀸𑀭𑀫𑁆𑀫𑀡𑁂 𑀮𑀤𑁆𑀥𑀸𑀦𑁂𑀯. 𑀦𑀓𑀫𑁆𑀫𑁂 𑀏𑀓𑀦𑁆𑀢𑀺 𑀏𑀢𑁆𑀣 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀜𑁆𑀘 𑀓𑀝𑀢𑁆𑀢𑀸𑀭𑀽𑀧𑀜𑁆𑀘 𑀅𑀕𑁆𑀕𑀳𑁂𑀢𑁆𑀯𑀸 𑀲𑁂𑀲𑀭𑀽𑀧𑀯𑀲𑁂𑀦 𑀅𑀩𑁆𑀬𑀸𑀓𑀢𑁂𑀦 𑀅𑀩𑁆𑀬𑀸𑀓𑀢𑀁 𑀯𑁂𑀤𑀺𑀢𑀩𑁆𑀩𑀁.

𑁨𑁮𑁯-𑁨𑁯𑁬. 𑀦𑀸𑀥𑀺𑀧𑀢𑀺𑀫𑀽𑀮𑀓𑁂 𑀦𑀧𑀼𑀭𑁂𑀚𑀸𑀢𑁂 𑀲𑀢𑁆𑀢𑀸𑀢𑀺 𑀦𑀧𑀼𑀭𑁂𑀚𑀸𑀢𑁂 𑀮𑀤𑁆𑀥𑀸𑀦𑁂𑀯. 𑀦𑀧𑀘𑁆𑀙𑀸𑀚𑀸𑀢𑁂 𑀲𑀢𑁆𑀢𑀭𑀲𑀸𑀢𑀺 𑀇𑀫𑀸𑀦𑀺𑀧𑀺 𑀢𑀢𑁆𑀣 𑀮𑀤𑁆𑀥𑀸𑀦𑀺 𑀲𑀢𑁆𑀢𑀭𑀲𑁂𑀯. 𑀦𑀸𑀦𑀦𑁆𑀢𑀭𑀦𑀲𑀫𑀦𑀦𑁆𑀢𑀭𑀦𑀅𑀜𑁆𑀜𑀫𑀜𑁆𑀜𑀦𑀉𑀧𑀦𑀺𑀲𑁆𑀲𑀬𑀦𑀲𑀫𑁆𑀧𑀬𑀼𑀢𑁆𑀢𑀦𑁄𑀦𑀢𑁆𑀣𑀺𑀦𑁄𑀯𑀺𑀕𑀢𑀫𑀽𑀮𑀓𑀸𑀦𑀺 𑀦𑀸𑀭𑀫𑁆𑀫𑀡𑀫𑀽𑀮𑀓𑀲𑀤𑀺𑀲𑀸𑀦𑁂𑀯. 𑀇𑀫𑀺𑀦𑀸𑀯 𑀦𑀬𑀫𑀢𑁆𑀢𑀤𑀲𑁆𑀲𑀦𑁂𑀦 𑀲𑀩𑁆𑀩𑀢𑁆𑀣 𑀆𑀕𑀢𑀸𑀦𑀸𑀕𑀢𑀁 𑀮𑀩𑁆𑀪𑀫𑀸𑀦𑀸𑀮𑀩𑁆𑀪𑀫𑀸𑀦𑀜𑁆𑀘 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀧𑀘𑁆𑀘𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨𑁯𑁭-𑁩𑁨𑁮. 𑀇𑀫𑀺𑀦𑀸𑀬𑁂𑀯 𑀧𑀦 𑀮𑀓𑁆𑀔𑀡𑁂𑀦 𑀅𑀦𑀼𑀮𑁄𑀫𑀁 𑀧𑀼𑀭𑀢𑁄 𑀓𑀢𑁆𑀯𑀸 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑁂 𑀧𑀘𑁆𑀘𑀦𑀻𑀬𑀁 𑀧𑀼𑀭𑀢𑁄 𑀓𑀢𑁆𑀯𑀸 𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑁂 𑀘 𑀕𑀡𑀦𑀧𑀭𑀺𑀘𑁆𑀙𑁂𑀤𑁄 𑀆𑀕𑀢𑀸𑀦𑀸𑀕𑀢𑀁 𑀮𑀩𑁆𑀪𑀫𑀸𑀦𑀸𑀮𑀩𑁆𑀪𑀫𑀸𑀦𑀜𑁆𑀘 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀧𑀘𑁆𑀘𑀬𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.