𑁮. 𑀘𑀺𑀢𑁆𑀢𑀬𑀫𑀓𑀁

𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁧-𑁬𑁨. 𑀇𑀤𑀸𑀦𑀺 𑀢𑁂𑀲𑀜𑁆𑀜𑁂𑀯 𑀫𑀽𑀮𑀬𑀫𑀓𑁂 𑀤𑁂𑀲𑀺𑀢𑀸𑀦𑀁 𑀓𑀼𑀲𑀮𑀸𑀤𑀺𑀥𑀫𑁆𑀫𑀸𑀦𑀁 𑀮𑀩𑁆𑀪𑀫𑀸𑀦𑀯𑀲𑁂𑀦 𑀏𑀓𑀤𑁂𑀲𑀫𑁂𑀯 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀅𑀦𑀼𑀲𑀬𑀬𑀫𑀓𑀸𑀦𑀦𑁆𑀢𑀭𑀁 𑀤𑁂𑀲𑀺𑀢𑀲𑁆𑀲 𑀘𑀺𑀢𑁆𑀢𑀬𑀫𑀓𑀲𑁆𑀲 𑀅𑀢𑁆𑀣𑀯𑀡𑁆𑀡𑀦𑀸 𑀳𑁄𑀢𑀺. 𑀢𑀢𑁆𑀣 𑀧𑀸𑀴𑀺𑀯𑀯𑀢𑁆𑀣𑀸𑀦𑀁 𑀢𑀸𑀯 𑀯𑁂𑀤𑀺𑀢𑀩𑁆𑀩𑀁. 𑀇𑀫𑀲𑁆𑀫𑀺𑀜𑁆𑀳𑀺 𑀘𑀺𑀢𑁆𑀢𑀬𑀫𑀓𑁂 𑀫𑀸𑀢𑀺𑀓𑀸𑀞𑀧𑀦𑀁, 𑀞𑀧𑀺𑀢𑀫𑀸𑀢𑀺𑀓𑀸𑀬 𑀯𑀺𑀲𑁆𑀲𑀚𑁆𑀚𑀦𑀦𑁆𑀢𑀺 𑀤𑁆𑀯𑁂 𑀯𑀸𑀭𑀸 𑀳𑁄𑀦𑁆𑀢𑀺. 𑀢𑀢𑁆𑀣 𑀫𑀸𑀢𑀺𑀓𑀸𑀞𑀧𑀦𑁂 𑀧𑀼𑀕𑁆𑀕𑀮𑀯𑀸𑀭𑁄, 𑀥𑀫𑁆𑀫𑀯𑀸𑀭𑁄, 𑀧𑀼𑀕𑁆𑀕𑀮𑀥𑀫𑁆𑀫𑀯𑀸𑀭𑁄𑀢𑀺 𑀆𑀤𑀺𑀢𑁄𑀯 𑀢𑀬𑁄 𑀲𑀼𑀤𑁆𑀥𑀺𑀓𑀫𑀳𑀸𑀯𑀸𑀭𑀸 𑀳𑁄𑀦𑁆𑀢𑀺.

𑀢𑀢𑁆𑀣 ‘‘𑀬𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀦 𑀦𑀺𑀭𑀼𑀚𑁆𑀛𑀢𑀻’’𑀢𑀺 𑀏𑀯𑀁 𑀧𑀼𑀕𑁆𑀕𑀮𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀦𑀦𑀺𑀭𑀼𑀚𑁆𑀛𑀦𑀸𑀤𑀺𑀪𑁂𑀤𑀁 𑀤𑀻𑀧𑁂𑀦𑁆𑀢𑁄 𑀕𑀢𑁄 𑀧𑀼𑀕𑁆𑀕𑀮𑀯𑀸𑀭𑁄 𑀦𑀸𑀫. ‘‘𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀦 𑀦𑀺𑀭𑀼𑀚𑁆𑀛𑀢𑀻’’𑀢𑀺 𑀏𑀯𑀁 𑀥𑀫𑁆𑀫𑀯𑀲𑁂𑀦𑁂𑀯 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀦𑀦𑀺𑀭𑀼𑀚𑁆𑀛𑀦𑀸𑀤𑀺𑀪𑁂𑀤𑀁 𑀤𑀻𑀧𑁂𑀦𑁆𑀢𑁄 𑀕𑀢𑁄 𑀥𑀫𑁆𑀫𑀯𑀸𑀭𑁄 𑀦𑀸𑀫. ‘‘𑀬𑀲𑁆𑀲 𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀦 𑀦𑀺𑀭𑀼𑀚𑁆𑀛𑀢𑀻’’𑀢𑀺 𑀏𑀯𑀁 𑀉𑀪𑀬𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀦𑀦𑀺𑀭𑀼𑀚𑁆𑀛𑀦𑀸𑀤𑀺𑀪𑁂𑀤𑀁 𑀤𑀻𑀧𑁂𑀦𑁆𑀢𑁄 𑀕𑀢𑁄 𑀧𑀼𑀕𑁆𑀕𑀮𑀥𑀫𑁆𑀫𑀯𑀸𑀭𑁄 𑀦𑀸𑀫. 𑀢𑀢𑁄 ‘‘𑀬𑀲𑁆𑀲 𑀲𑀭𑀸𑀕𑀁 𑀘𑀺𑀢𑁆𑀢’’𑀦𑁆𑀢𑀺 𑀲𑁄𑀴𑀲𑀦𑁆𑀦𑀁 𑀧𑀤𑀸𑀦𑀁 𑀯𑀲𑁂𑀦 𑀅𑀧𑀭𑁂 𑀲𑀭𑀸𑀕𑀸𑀤𑀺𑀧𑀤𑀯𑀺𑀲𑁂𑀲𑀺𑀢𑀸 𑀲𑁄𑀴𑀲 𑀧𑀼𑀕𑁆𑀕𑀮𑀯𑀸𑀭𑀸, 𑀲𑁄𑀴𑀲 𑀥𑀫𑁆𑀫𑀯𑀸𑀭𑀸, 𑀲𑁄𑀴𑀲 𑀧𑀼𑀕𑁆𑀕𑀮𑀥𑀫𑁆𑀫𑀯𑀸𑀭𑀸𑀢𑀺 𑀅𑀝𑁆𑀞𑀘𑀢𑁆𑀢𑀸𑀮𑀻𑀲𑀁 𑀫𑀺𑀲𑁆𑀲𑀓𑀯𑀸𑀭𑀸 𑀳𑁄𑀦𑁆𑀢𑀺. 𑀢𑁂 𑀲𑀭𑀸𑀕𑀸𑀤𑀺𑀧𑀤𑀫𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀲𑀗𑁆𑀔𑀺𑀢𑁆𑀢𑀸. 𑀢𑀢𑁄 ‘‘𑀬𑀲𑁆𑀲 𑀓𑀼𑀲𑀮𑀁 𑀘𑀺𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀙𑀲𑀝𑁆𑀞𑀺𑀤𑁆𑀯𑀺𑀲𑀢𑀲𑀗𑁆𑀔𑀸𑀦𑀁 𑀅𑀪𑀺𑀥𑀫𑁆𑀫𑀫𑀸𑀢𑀺𑀓𑀸𑀧𑀤𑀸𑀦𑀁 𑀯𑀲𑁂𑀦 𑀅𑀧𑀭𑁂 𑀓𑀼𑀲𑀮𑀸𑀤𑀺𑀧𑀤𑀯𑀺𑀲𑁂𑀲𑀺𑀢𑀸 𑀙𑀲𑀝𑁆𑀞𑀺𑀤𑁆𑀯𑀺𑀲𑀢𑀧𑀼𑀕𑁆𑀕𑀮𑀯𑀸𑀭𑀸, 𑀙𑀲𑀝𑁆𑀞𑀺𑀤𑁆𑀯𑀺𑀲𑀢𑀥𑀫𑁆𑀫𑀯𑀸𑀭𑀸 𑀙𑀲𑀝𑁆𑀞𑀺𑀤𑁆𑀯𑀺𑀲𑀢𑀧𑀼𑀕𑁆𑀕𑀮𑀥𑀫𑁆𑀫𑀯𑀸𑀭𑀸𑀢𑀺 𑀅𑀝𑁆𑀞𑀦𑀯𑀼𑀢𑀺𑀲𑀢𑁆𑀢𑀲𑀢𑀸 𑀫𑀺𑀲𑁆𑀲𑀓𑀯𑀸𑀭𑀸 𑀳𑁄𑀦𑁆𑀢𑀺. 𑀢𑁂𑀧𑀺 𑀓𑀼𑀲𑀮𑀸𑀤𑀺𑀧𑀤𑀫𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀲𑀗𑁆𑀔𑀺𑀢𑁆𑀢𑀸𑀬𑁂𑀯. 𑀬𑀸𑀦𑀺𑀧𑁂𑀢𑁆𑀣 𑀲𑀦𑀺𑀤𑀲𑁆𑀲𑀦𑀸𑀤𑀻𑀦𑀺 𑀧𑀤𑀸𑀦𑀺 𑀘𑀺𑀢𑁆𑀢𑁂𑀦 𑀲𑀤𑁆𑀥𑀺𑀁 𑀦 𑀬𑀼𑀚𑁆𑀚𑀦𑁆𑀢𑀺, 𑀢𑀸𑀦𑀺 𑀫𑁄𑀖𑀧𑀼𑀘𑁆𑀙𑀸𑀯𑀲𑁂𑀦 𑀞𑀧𑀺𑀢𑀸𑀦𑀺.

𑀢𑁂𑀲𑀼 𑀧𑀦 𑀢𑀻𑀲𑀼 𑀯𑀸𑀭𑁂𑀲𑀼 𑀲𑀩𑁆𑀩𑀧𑀞𑀫𑁂 𑀲𑀼𑀤𑁆𑀥𑀺𑀓𑀧𑀼𑀕𑁆𑀕𑀮𑀫𑀳𑀸𑀯𑀸𑀭𑁂 𑀉𑀧𑁆𑀧𑀸𑀤𑀦𑀺𑀭𑁄𑀥𑀓𑀸𑀮𑀲𑀫𑁆𑀪𑁂𑀤𑀯𑀸𑀭𑁄, 𑀉𑀧𑁆𑀧𑀸𑀤𑀼𑀧𑁆𑀧𑀦𑁆𑀦𑀯𑀸𑀭𑁄, 𑀦𑀺𑀭𑁄𑀥𑀼𑀧𑁆𑀧𑀦𑁆𑀦𑀯𑀸𑀭𑁄, 𑀉𑀧𑁆𑀧𑀸𑀤𑀯𑀸𑀭𑁄, 𑀦𑀺𑀭𑁄𑀥𑀯𑀸𑀭𑁄, 𑀉𑀧𑁆𑀧𑀸𑀤𑀦𑀺𑀭𑁄𑀥𑀯𑀸𑀭𑁄 𑀉𑀧𑁆𑀧𑀚𑁆𑀚𑀫𑀸𑀦𑀦𑀺𑀭𑁄𑀥𑀯𑀸𑀭𑁄, 𑀉𑀧𑁆𑀧𑀚𑁆𑀚𑀫𑀸𑀦𑀼𑀧𑁆𑀧𑀦𑁆𑀦𑀯𑀸𑀭𑁄, 𑀦𑀺𑀭𑀼𑀚𑁆𑀛𑀫𑀸𑀦𑀼𑀧𑁆𑀧𑀦𑁆𑀦𑀯𑀸𑀭𑁄, 𑀉𑀧𑁆𑀧𑀦𑁆𑀦𑀼𑀧𑁆𑀧𑀸𑀤𑀯𑀸𑀭𑁄, 𑀅𑀢𑀻𑀢𑀸𑀦𑀸𑀕𑀢𑀯𑀸𑀭𑁄, 𑀉𑀧𑁆𑀧𑀦𑁆𑀦𑀼𑀧𑁆𑀧𑀚𑁆𑀚𑀫𑀸𑀦𑀯𑀸𑀭𑁄, 𑀦𑀺𑀭𑀼𑀤𑁆𑀥𑀦𑀺𑀭𑀼𑀚𑁆𑀛𑀫𑀸𑀦𑀯𑀸𑀭𑁄, 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀯𑀸𑀭𑁄𑀢𑀺 𑀘𑀼𑀤𑁆𑀤𑀲 𑀅𑀦𑁆𑀢𑀭𑀯𑀸𑀭𑀸. 𑀢𑁂𑀲𑀼 𑀉𑀧𑁆𑀧𑀸𑀤𑀯𑀸𑀭𑁄, 𑀦𑀺𑀭𑁄𑀥𑀯𑀸𑀭𑁄, 𑀉𑀧𑁆𑀧𑀸𑀤𑀦𑀺𑀭𑁄𑀥𑀯𑀸𑀭𑁄𑀢𑀺 𑀇𑀫𑁂𑀲𑀼 𑀢𑀻𑀲𑀼 𑀯𑀸𑀭𑁂𑀲𑀼 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀯𑀲𑁂𑀦 𑀙 𑀙 𑀓𑀢𑁆𑀯𑀸 𑀅𑀝𑁆𑀞𑀸𑀭𑀲 𑀬𑀫𑀓𑀸𑀦𑀺. 𑀉𑀧𑁆𑀧𑀦𑁆𑀦𑀼𑀧𑁆𑀧𑀸𑀤𑀯𑀸𑀭𑁂 𑀅𑀢𑀻𑀢𑀸𑀦𑀸𑀕𑀢𑀓𑀸𑀮𑀯𑀲𑁂𑀦 𑀅𑀦𑀼𑀮𑁄𑀫𑀢𑁄 𑀤𑁆𑀯𑁂, 𑀧𑀝𑀺𑀮𑁄𑀫𑀢𑁄 𑀤𑁆𑀯𑁂𑀢𑀺 𑀘𑀢𑁆𑀢𑀸𑀭𑀺 𑀬𑀫𑀓𑀸𑀦𑀺. 𑀲𑁂𑀲𑁂𑀲𑀼 𑀆𑀤𑀺𑀢𑁄 𑀦𑀺𑀤𑁆𑀤𑀺𑀝𑁆𑀞𑁂𑀲𑀼 𑀢𑀻𑀲𑀼, 𑀅𑀦𑀦𑁆𑀢𑀭𑁂 𑀦𑀺𑀤𑁆𑀤𑀺𑀝𑁆𑀞𑁂𑀲𑀼 𑀢𑀻𑀲𑀼; 𑀅𑀯𑀲𑀸𑀦𑁂 𑀦𑀺𑀤𑁆𑀤𑀺𑀝𑁆𑀞𑁂𑀲𑀼 𑀘𑀢𑀽𑀲𑀽𑀢𑀺 𑀤𑀲𑀲𑀼 𑀯𑀸𑀭𑁂𑀲𑀼 𑀅𑀦𑀼𑀮𑁄𑀫𑀢𑁄 𑀏𑀓𑀁, 𑀧𑀝𑀺𑀮𑁄𑀫𑀢𑁄 𑀏𑀓𑀦𑁆𑀢𑀺 𑀤𑁆𑀯𑁂 𑀤𑁆𑀯𑁂 𑀓𑀢𑁆𑀯𑀸 𑀯𑀻𑀲𑀢𑀺 𑀬𑀫𑀓𑀸𑀦𑀺. 𑀏𑀯𑀁 𑀲𑀩𑁆𑀩𑁂𑀲𑀼𑀧𑀺 𑀘𑀼𑀤𑁆𑀤𑀲𑀲𑀼 𑀅𑀦𑁆𑀢𑀭𑀯𑀸𑀭𑁂𑀲𑀼 𑀤𑁆𑀯𑀸𑀘𑀢𑁆𑀢𑀸𑀮𑀻𑀲 𑀬𑀫𑀓𑀸𑀦𑀺, 𑀘𑀢𑀼𑀭𑀸𑀲𑀻𑀢𑀺 𑀧𑀼𑀘𑁆𑀙𑀸 𑀅𑀝𑁆𑀞𑀲𑀝𑁆𑀞𑀺𑀅𑀢𑁆𑀣𑀲𑀢𑀁 𑀳𑁄𑀢𑀺. 𑀬𑀣𑀸 𑀘 𑀏𑀓𑀲𑁆𑀫𑀺𑀁 𑀲𑀼𑀤𑁆𑀥𑀺𑀓𑀧𑀼𑀕𑁆𑀕𑀮𑀫𑀳𑀸𑀯𑀸𑀭𑁂, 𑀢𑀣𑀸 𑀲𑀼𑀤𑁆𑀥𑀺𑀓𑀥𑀫𑁆𑀫𑀯𑀸𑀭𑁂𑀧𑀺 𑀲𑀼𑀤𑁆𑀥𑀺𑀓𑀧𑀼𑀕𑁆𑀕𑀮𑀥𑀫𑁆𑀫𑀯𑀸𑀭𑁂𑀧𑀻𑀢𑀺 𑀢𑀻𑀲𑀼 𑀫𑀳𑀸𑀯𑀸𑀭𑁂𑀲𑀼 𑀙𑀩𑁆𑀩𑀻𑀲𑀢𑀺𑀬𑀫𑀓𑀲𑀢𑀁, 𑀢𑀢𑁄 𑀤𑀺𑀕𑀼𑀡𑀸 𑀧𑀼𑀘𑁆𑀙𑀸, 𑀢𑀢𑁄 𑀤𑀺𑀕𑀼𑀡𑀸 𑀅𑀢𑁆𑀣𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀇𑀤𑀁 𑀧𑀦 𑀯𑀸𑀭𑀢𑁆𑀢𑀬𑀁 𑀲𑀭𑀸𑀕𑀸𑀤𑀺𑀯𑀲𑁂𑀦 𑀲𑁄𑀴𑀲𑀕𑀼𑀡𑀁, 𑀓𑀼𑀲𑀮𑀸𑀤𑀺𑀯𑀲𑁂𑀦 𑀙𑀲𑀝𑁆𑀞𑀺𑀤𑁆𑀯𑀺𑀲𑀢𑀕𑀼𑀡𑀁 𑀓𑀢𑁆𑀯𑀸 𑀇𑀫𑀲𑁆𑀫𑀺𑀁 𑀘𑀺𑀢𑁆𑀢𑀬𑀫𑀓𑁂 𑀅𑀦𑁂𑀓𑀸𑀦𑀺 𑀬𑀫𑀓𑀲𑀳𑀲𑁆𑀲𑀸𑀦𑀺, 𑀢𑀢𑁄 𑀤𑀺𑀕𑀼𑀡𑀸 𑀧𑀼𑀘𑁆𑀙𑀸, 𑀢𑀢𑁄 𑀤𑀺𑀕𑀼𑀡𑀸 𑀅𑀢𑁆𑀣𑀸 𑀘 𑀳𑁄𑀦𑁆𑀢𑀻𑀢𑀺. 𑀧𑀸𑀞𑁄 𑀧𑀦 𑀲𑀁𑀔𑀺𑀢𑁆𑀢𑁄𑀢𑀺. 𑀏𑀯𑀁 𑀢𑀸𑀯 𑀇𑀫𑀲𑁆𑀫𑀺𑀁 𑀘𑀺𑀢𑁆𑀢𑀬𑀫𑀓𑁂 𑀧𑀸𑀴𑀺𑀯𑀯𑀢𑁆𑀣𑀸𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀫𑀸𑀢𑀺𑀓𑀸𑀞𑀧𑀦𑀯𑀡𑁆𑀡𑀦𑀸.

𑀦𑀺𑀤𑁆𑀤𑁂𑀲𑁄

𑁧. 𑀧𑀼𑀕𑁆𑀕𑀮𑀯𑀸𑀭𑀯𑀡𑁆𑀡𑀦𑀸

𑁬𑁩. 𑀇𑀤𑀸𑀦𑀺 𑀞𑀧𑀺𑀢𑀸𑀦𑀼𑀓𑁆𑀓𑀫𑁂𑀦 𑀫𑀸𑀢𑀺𑀓𑀁 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 𑀬𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑀦 𑀦𑀺𑀭𑀼𑀚𑁆𑀛𑀢𑀻𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀉𑀧𑁆𑀧𑀚𑁆𑀚𑀢𑀻𑀢𑀺 𑀉𑀧𑁆𑀧𑀸𑀤𑀓𑁆𑀔𑀡𑀲𑀫𑀗𑁆𑀕𑀺𑀢𑀸𑀬 𑀉𑀧𑁆𑀧𑀚𑁆𑀚𑀢𑀺 𑀦 𑀦𑀺𑀭𑀼𑀚𑁆𑀛𑀢𑀻𑀢𑀺 𑀦𑀺𑀭𑁄𑀥𑀓𑁆𑀔𑀡𑀁 𑀅𑀧𑁆𑀧𑀢𑁆𑀢𑀢𑀸𑀬 𑀦 𑀦𑀺𑀭𑀼𑀚𑁆𑀛𑀢𑀺. 𑀢𑀲𑁆𑀲 𑀘𑀺𑀢𑁆𑀢𑀦𑁆𑀢𑀺 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀢𑀢𑁄 𑀧𑀝𑁆𑀞𑀸𑀬 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀢𑁂𑀲𑀁 𑀘𑀺𑀢𑁆𑀢𑀦𑁆𑀢𑀺 𑀬𑁂𑀲𑀁 𑀧𑀭𑀺𑀘𑁆𑀙𑀺𑀦𑁆𑀦𑀯𑀝𑁆𑀝𑀤𑀼𑀓𑁆𑀔𑀸𑀦𑀁 𑀔𑀻𑀡𑀸𑀲𑀯𑀸𑀦𑀁 𑀲𑀩𑁆𑀩𑀧𑀘𑁆𑀙𑀺𑀫𑀲𑁆𑀲 𑀘𑀼𑀢𑀺𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁄 𑀯𑀢𑁆𑀢𑀢𑀺, 𑀏𑀢𑁂𑀲𑀁 𑀢𑀤𑁂𑀯 𑀘𑀼𑀢𑀺𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑀧𑁆𑀧𑀢𑁆𑀢𑀢𑀸𑀬 𑀉𑀧𑁆𑀧𑀚𑁆𑀚𑀢𑀺 𑀦𑀸𑀫, 𑀪𑀗𑁆𑀕𑀁 𑀅𑀧𑁆𑀧𑀢𑁆𑀢𑀢𑀸𑀬 𑀦 𑀦𑀺𑀭𑀼𑀚𑁆𑀛𑀢𑀺. 𑀇𑀤𑀸𑀦𑀺 𑀧𑀦 𑀪𑀗𑁆𑀕𑀁 𑀧𑀢𑁆𑀯𑀸 𑀢𑀁 𑀢𑁂𑀲𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀢𑀢𑁄 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀢𑁆𑀢𑀸 𑀅𑀜𑁆𑀜𑀁 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀇𑀢𑀭𑁂𑀲𑀦𑁆𑀢𑀺 𑀧𑀘𑁆𑀙𑀺𑀫𑀘𑀺𑀢𑁆𑀢𑀲𑀫𑀗𑁆𑀕𑀺𑀁 𑀔𑀻𑀡𑀸𑀲𑀯𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸𑀦𑀁 𑀲𑁂𑀓𑁆𑀔𑀸𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀸𑀦𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀘𑁂𑀯 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀘𑀸𑀢𑀺 𑀬𑀁 𑀢𑀁 𑀉𑀧𑁆𑀧𑀸𑀤𑀓𑁆𑀔𑀡𑀧𑁆𑀧𑀢𑁆𑀢𑀁 𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑁂𑀯. 𑀅𑀜𑁆𑀜𑀁 𑀧𑀦 𑀢𑀲𑁆𑀫𑀺𑀁 𑀯𑀸 𑀅𑀜𑁆𑀜𑀲𑁆𑀫𑀺𑀁 𑀯𑀸 𑀅𑀢𑁆𑀢𑀪𑀸𑀯𑁂 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀘𑁂𑀯 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀘. 𑀤𑀼𑀢𑀺𑀬𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑁂𑀧𑀺 𑀢𑀣𑀸𑀭𑀽𑀧𑀲𑁆𑀲𑁂𑀯 𑀔𑀻𑀡𑀸𑀲𑀯𑀲𑁆𑀲 𑀘𑀺𑀢𑁆𑀢𑀁 𑀲𑀦𑁆𑀥𑀸𑀬 ‘𑀆𑀫𑀦𑁆𑀢𑀸’𑀢𑀺 𑀯𑀼𑀢𑁆𑀢𑀁. 𑀦𑀼𑀧𑁆𑀧𑀚𑁆𑀚𑀢𑀺 𑀦𑀺𑀭𑀼𑀚𑁆𑀛𑀢𑀻𑀢𑀺 𑀪𑀗𑁆𑀕𑀓𑁆𑀔𑀡𑁂 𑀅𑀭𑀳𑀢𑁄 𑀧𑀘𑁆𑀙𑀺𑀫𑀘𑀺𑀢𑁆𑀢𑀫𑁆𑀧𑀺 𑀲𑁂𑀲𑀸𑀦𑀁 𑀪𑀺𑀚𑁆𑀚𑀫𑀸𑀦𑀘𑀺𑀢𑁆𑀢𑀫𑁆𑀧𑀺. 𑀢𑀢𑁄 𑀧𑀝𑁆𑀞𑀸𑀬 𑀧𑀦 𑀅𑀭𑀳𑀢𑁄 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀧𑀦 𑀦 𑀲𑀓𑁆𑀓𑀸. 𑀲𑁂𑀲𑀸𑀦𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻𑀢𑀺 𑀦 𑀲𑀓𑁆𑀓𑀸. 𑀢𑀲𑁆𑀫𑀸 ‘𑀦𑁄’𑀢𑀺 𑀧𑀝𑀺𑀲𑁂𑀥𑁄 𑀓𑀢𑁄. 𑀤𑀼𑀢𑀺𑀬𑀧𑀜𑁆𑀳𑁂 𑀬𑀲𑁆𑀲 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀲𑁄 𑀧𑀼𑀕𑁆𑀕𑀮𑁄𑀬𑁂𑀯 𑀦𑀢𑁆𑀣𑀺, 𑀢𑀲𑁆𑀫𑀸 𑀦𑀢𑁆𑀣𑀻𑀢𑀺 𑀧𑀝𑀺𑀓𑁆𑀔𑁂𑀧𑁄 𑀓𑀢𑁄.

𑁬𑁫-𑁮𑁨. 𑀉𑀧𑁆𑀧𑀦𑁆𑀦𑀦𑁆𑀢𑀺 𑀉𑀧𑁆𑀧𑀸𑀤𑀲𑀫𑀗𑁆𑀕𑀺𑀦𑁄𑀧𑁂𑀢𑀁 𑀦𑀸𑀫𑀁. 𑀉𑀧𑁆𑀧𑀸𑀤𑀁 𑀧𑀢𑁆𑀯𑀸 𑀅𑀦𑀺𑀭𑀼𑀤𑁆𑀥𑀲𑁆𑀲𑀸𑀧𑀺. 𑀢𑀢𑁆𑀣 𑀉𑀧𑁆𑀧𑀸𑀤𑀲𑀫𑀗𑁆𑀕𑀺𑀢𑀁 𑀲𑀦𑁆𑀥𑀸𑀬 ‘𑀆𑀫𑀦𑁆𑀢𑀸’𑀢𑀺, 𑀉𑀧𑁆𑀧𑀸𑀤𑀁 𑀧𑀢𑁆𑀯𑀸 𑀅𑀦𑀺𑀭𑀼𑀤𑁆𑀥𑀪𑀸𑀯𑀁 𑀲𑀦𑁆𑀥𑀸𑀬 ‘‘𑀢𑁂𑀲𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀦𑀼𑀧𑁆𑀧𑀦𑁆𑀦𑀦𑁆𑀢𑀺 𑀉𑀧𑁆𑀧𑀸𑀤𑀁 𑀅𑀧𑁆𑀧𑀢𑁆𑀢𑀁. 𑀢𑁂𑀲𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺 𑀏𑀢𑁆𑀣𑀸𑀧𑀺 𑀲𑀩𑁆𑀩𑁂𑀲𑀁 𑀢𑀸𑀯 𑀘𑀺𑀢𑁆𑀢𑀁 𑀔𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁂𑀯 𑀳𑀼𑀢𑁆𑀯𑀸 𑀉𑀧𑁆𑀧𑀸𑀤𑀓𑁆𑀔𑀡𑀁 𑀅𑀢𑀻𑀢𑀢𑁆𑀢𑀸 𑀉𑀧𑁆𑀧𑀚𑁆𑀚𑀺𑀢𑁆𑀣 𑀦𑀸𑀫, 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑀸𑀦𑀁 𑀦𑀺𑀭𑁄𑀥𑀢𑁄 𑀧𑀼𑀩𑁆𑀩𑁂 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀢𑁆𑀢𑀸, 𑀅𑀲𑀜𑁆𑀜𑀲𑀢𑁆𑀢𑀸𑀦𑀁 𑀲𑀜𑁆𑀜𑀻𑀪𑀯𑁂 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀢𑁆𑀢𑀸. 𑀉𑀧𑁆𑀧𑀚𑁆𑀚𑀺𑀢𑁆𑀣 𑀘𑁂𑀯 𑀉𑀧𑁆𑀧𑀚𑁆𑀚𑀢𑀺 𑀘𑀸𑀢𑀺 𑀉𑀧𑁆𑀧𑀸𑀤𑀁 𑀧𑀢𑁆𑀢𑀢𑁆𑀢𑀸 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀅𑀦𑀢𑀻𑀢𑀢𑁆𑀢𑀸 𑀉𑀧𑁆𑀧𑀚𑁆𑀚𑀢𑀺 𑀦𑀸𑀫𑀸𑀢𑀺 𑀅𑀢𑁆𑀣𑁄.

𑀉𑀧𑁆𑀧𑀸𑀤𑀓𑁆𑀔𑀡𑁂 𑀅𑀦𑀸𑀕𑀢𑀜𑁆𑀘𑀸𑀢𑀺 𑀉𑀧𑁆𑀧𑀸𑀤𑀓𑁆𑀔𑀡𑁂 𑀘 𑀘𑀺𑀢𑁆𑀢𑀁 𑀅𑀦𑀸𑀕𑀢𑀜𑁆𑀘 𑀘𑀺𑀢𑁆𑀢𑀦𑁆𑀢𑀺 𑀅𑀢𑁆𑀣𑁄.

𑁮𑁩. 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀯𑀸𑀭𑁂 𑀉𑀧𑁆𑀧𑀚𑁆𑀚𑀫𑀸𑀦𑀁 𑀔𑀡𑀦𑁆𑀢𑀺 𑀉𑀧𑁆𑀧𑀸𑀤𑀓𑁆𑀔𑀡𑀁. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀉𑀧𑁆𑀧𑀸𑀤𑀓𑁆𑀔𑀡𑁄 𑀉𑀧𑁆𑀧𑀚𑁆𑀚𑀫𑀸𑀦𑁄 𑀦𑀸𑀫 𑀦 𑀳𑁄𑀢𑀺, 𑀉𑀧𑁆𑀧𑀚𑁆𑀚𑀫𑀸𑀦𑀲𑁆𑀲 𑀧𑀦 𑀔𑀡𑀢𑁆𑀢𑀸 𑀏𑀯𑀁 𑀯𑀼𑀢𑁆𑀢𑁄. 𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀦𑁆𑀢𑀺 𑀦 𑀘𑀺𑀭𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀢𑀫𑁂𑀯 𑀧𑀦 𑀉𑀧𑁆𑀧𑀸𑀤𑀓𑁆𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀳𑀼𑀢𑁆𑀯𑀸 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀦𑁆𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀦𑀺𑀭𑀼𑀚𑁆𑀛𑀫𑀸𑀦𑀁 𑀔𑀡𑀦𑁆𑀢𑀺 𑀦𑀺𑀭𑁄𑀥𑀓𑁆𑀔𑀡𑀁. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀦𑀺𑀭𑁄𑀥𑀓𑁆𑀔𑀡𑁄 𑀦𑀺𑀭𑀼𑀚𑁆𑀛𑀫𑀸𑀦𑁄 𑀦𑀸𑀫 𑀦 𑀳𑁄𑀢𑀺, 𑀦𑀺𑀭𑀼𑀚𑁆𑀛𑀫𑀸𑀦𑀲𑁆𑀲 𑀧𑀦 𑀔𑀡𑀢𑁆𑀢𑀸 𑀏𑀯𑀁 𑀯𑀼𑀢𑁆𑀢𑁄. 𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀦𑁆𑀢𑀺 𑀓𑀺𑀁 𑀢𑀲𑁆𑀲 𑀘𑀺𑀢𑁆𑀢𑀁 𑀏𑀯𑀁 𑀦𑀺𑀭𑁄𑀥𑀓𑁆𑀔𑀡𑀫𑁆𑀧𑀺 𑀯𑀻𑀢𑀺𑀓𑁆𑀓𑀦𑁆𑀢𑀁 𑀳𑀼𑀢𑁆𑀯𑀸 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀁 𑀦𑀸𑀫 𑀳𑁄𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀢𑀢𑁆𑀣 𑀬𑀲𑁆𑀫𑀸 𑀪𑀗𑁆𑀕𑀓𑁆𑀔𑀡𑁂 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑀓𑁆𑀔𑀡𑀁 𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀳𑀼𑀢𑁆𑀯𑀸 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀁 𑀳𑁄𑀢𑀺, 𑀦𑀺𑀭𑁄𑀥𑀓𑁆𑀔𑀡𑀁 𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀳𑀼𑀢𑁆𑀯𑀸 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀁 𑀦𑀸𑀫 𑀦 𑀳𑁄𑀢𑀺. 𑀅𑀢𑀻𑀢𑀁 𑀧𑀦 𑀘𑀺𑀢𑁆𑀢𑀁 𑀉𑀪𑁄𑀧𑀺 𑀔𑀡𑁂 𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀳𑀼𑀢𑁆𑀯𑀸 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀁 𑀦𑀸𑀫, 𑀢𑀲𑁆𑀫𑀸 ‘‘𑀪𑀗𑁆𑀕𑀓𑁆𑀔𑀡𑁂 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑀓𑁆𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁, 𑀪𑀗𑁆𑀕𑀓𑁆𑀔𑀡𑀁 𑀅𑀯𑀻𑀢𑀺𑀓𑁆𑀓𑀦𑁆𑀢𑀁, 𑀅𑀢𑀻𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑀓𑁆𑀔𑀡𑀜𑁆𑀘 𑀯𑀻𑀢𑀺𑀓𑁆𑀓𑀦𑁆𑀢𑀁 𑀪𑀗𑁆𑀕𑀓𑁆𑀔𑀡𑀜𑁆𑀘 𑀯𑀻𑀢𑀺𑀓𑁆𑀓𑀦𑁆𑀢𑀦𑁆𑀢𑀺 𑀯𑀺𑀲𑁆𑀲𑀚𑁆𑀚𑀦𑀫𑀸𑀳. 𑀤𑀼𑀢𑀺𑀬𑀧𑀜𑁆𑀳𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑁂 𑀬𑀲𑁆𑀫𑀸 𑀅𑀢𑀻𑀢𑀁 𑀘𑀺𑀢𑁆𑀢𑀁 𑀉𑀪𑁄𑀧𑀺 𑀔𑀡𑁂 𑀯𑀻𑀢𑀺𑀓𑁆𑀓𑀦𑁆𑀢𑀁 𑀳𑀼𑀢𑁆𑀯𑀸 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀁 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀅𑀢𑀻𑀢𑀁 𑀘𑀺𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀝𑀺𑀮𑁄𑀫𑀧𑀜𑁆𑀳𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑁂 𑀬𑀲𑁆𑀫𑀸 𑀉𑀧𑁆𑀧𑀸𑀤𑀓𑁆𑀔𑀡𑁂 𑀘 𑀘𑀺𑀢𑁆𑀢𑀁 𑀅𑀦𑀸𑀕𑀢𑀜𑁆𑀘 𑀘𑀺𑀢𑁆𑀢𑀁 𑀉𑀪𑁄𑀧𑀺 𑀔𑀡𑁂 𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀳𑀼𑀢𑁆𑀯𑀸 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀁 𑀦𑀸𑀫 𑀦 𑀳𑁄𑀢𑀺, 𑀢𑁂𑀲𑀁 𑀔𑀡𑀸𑀦𑀁 𑀅𑀯𑀻𑀢𑀺𑀓𑁆𑀓𑀦𑁆𑀢𑀢𑁆𑀢𑀸. 𑀢𑀲𑁆𑀫𑀸 ‘‘𑀉𑀧𑁆𑀧𑀸𑀤𑀓𑁆𑀔𑀡𑁂 𑀘𑀺𑀢𑁆𑀢𑀁 𑀅𑀦𑀸𑀕𑀢𑀁 𑀘𑀺𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀤𑀼𑀢𑀺𑀬𑀯𑀺𑀲𑁆𑀲𑀚𑁆𑀚𑀦𑀁 𑀧𑀸𑀓𑀝𑀫𑁂𑀯.

𑁮𑁪-𑁧𑁧𑁩. 𑀥𑀫𑁆𑀫𑀯𑀸𑀭𑁂𑀧𑀺 𑀇𑀫𑀺𑀦𑀸𑀯𑀼𑀧𑀸𑀬𑁂𑀦 𑀲𑀩𑁆𑀩𑀯𑀺𑀲𑁆𑀲𑀚𑁆𑀚𑀦𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀼𑀕𑁆𑀕𑀮𑀥𑀫𑁆𑀫𑀯𑀸𑀭𑁄 𑀥𑀫𑁆𑀫𑀯𑀸𑀭𑀕𑀢𑀺𑀓𑁄𑀬𑁂𑀯.

𑁧𑁧𑁪-𑁧𑁧𑁬. 𑀲𑀩𑁆𑀩𑁂𑀧𑀺 𑀫𑀺𑀲𑁆𑀲𑀓𑀯𑀸𑀭𑀸 𑀬𑀲𑁆𑀲 𑀲𑀭𑀸𑀕𑀁 𑀘𑀺𑀢𑁆𑀢𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀫𑀼𑀔𑀫𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀲𑀗𑁆𑀔𑀺𑀢𑁆𑀢𑀸. 𑀯𑀺𑀢𑁆𑀣𑀸𑀭𑁄 𑀧𑀦 𑀦𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀲𑀼 𑀧𑀦 ‘‘𑀬𑀲𑁆𑀲 𑀲𑀭𑀸𑀕𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀦 𑀦𑀺𑀭𑀼𑀚𑁆𑀛𑀢𑀺; 𑀢𑀲𑁆𑀲 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀢𑀸𑀬 𑀧𑀼𑀘𑁆𑀙𑀸𑀯 𑀲𑀤𑀺𑀲𑀸 𑀳𑁄𑀢𑀺. 𑀬𑀲𑁆𑀫𑀸 𑀧𑀦 𑀲𑀭𑀸𑀕𑀁 𑀘𑀺𑀢𑁆𑀢𑀁 𑀧𑀘𑁆𑀙𑀺𑀫𑀘𑀺𑀢𑁆𑀢𑀁 𑀦 𑀳𑁄𑀢𑀺, 𑀢𑀲𑁆𑀫𑀸 ‘‘𑀬𑀲𑁆𑀲 𑀲𑀭𑀸𑀕𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀦 𑀦𑀺𑀭𑀼𑀚𑁆𑀛𑀢𑀺; 𑀢𑀲𑁆𑀲 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀦𑁄’’𑀢𑀺 𑀏𑀯𑀁 𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀢𑁆𑀢𑀸 𑀯𑀺𑀲𑁆𑀲𑀚𑁆𑀚𑀦𑀁 𑀅𑀲𑀤𑀺𑀲𑀁 𑀳𑁄𑀢𑀺. 𑀢𑀁 𑀢𑀁 𑀢𑀲𑁆𑀲𑀸 𑀢𑀲𑁆𑀲𑀸 𑀧𑀼𑀘𑁆𑀙𑀸𑀬 𑀅𑀦𑀼𑀭𑀽𑀧𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀘𑀺𑀢𑁆𑀢𑀬𑀫𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.