𑁭. 𑀲𑀫𑀸𑀧𑀦𑁆𑀦𑁄 𑀅𑀲𑁆𑀲𑀸𑀤𑁂𑀢𑀻𑀢𑀺𑀓𑀣𑀸𑀯𑀡𑁆𑀡𑀦𑀸

𑁬𑁭𑁧-𑁬𑁭𑁩. 𑀇𑀤𑀸𑀦𑀺 𑀲𑀫𑀸𑀧𑀦𑁆𑀦𑁄 𑀅𑀲𑁆𑀲𑀸𑀤𑁂𑀢𑀻𑀢𑀺𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 ‘‘𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀲𑁄 𑀢𑀤𑀲𑁆𑀲𑀸𑀤𑁂𑀢𑀻’’𑀢𑀺𑀆𑀤𑀺𑀯𑀘𑀦𑀁 (𑀅. 𑀦𑀺. 𑁪.𑁧𑁨𑁩) 𑀦𑀺𑀲𑁆𑀲𑀸𑀬 ‘‘𑀲𑀫𑀸𑀧𑀦𑁆𑀦𑁄 𑀅𑀲𑁆𑀲𑀸𑀤𑁂𑀢𑀺, 𑀲𑀸 𑀘𑀲𑁆𑀲 𑀛𑀸𑀦𑀦𑀺𑀓𑀦𑁆𑀢𑀺 𑀛𑀸𑀦𑀸𑀭𑀫𑁆𑀫𑀡𑀸 𑀳𑁄𑀢𑀻’’𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀅𑀦𑁆𑀥𑀓𑀸𑀦𑀁, 𑀢𑁂 𑀲𑀦𑁆𑀥𑀸𑀬 𑀲𑀫𑀸𑀧𑀦𑁆𑀦𑁄𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀢𑀁 𑀛𑀸𑀦𑀁 𑀢𑀲𑁆𑀲 𑀛𑀸𑀦𑀲𑁆𑀲 𑀆𑀭𑀫𑁆𑀫𑀡𑀦𑁆𑀢𑀺 𑀧𑀜𑁆𑀳𑁂𑀲𑀼 𑀢𑀲𑁆𑀲𑁂𑀯 𑀢𑀤𑀸𑀭𑀫𑁆𑀫𑀡𑀢𑀁 𑀅𑀧𑀲𑁆𑀲𑀦𑁆𑀢𑁄 𑀲𑀼𑀢𑁆𑀢𑀯𑀺𑀭𑁄𑀥𑀪𑀬𑁂𑀦 𑀧𑀝𑀺𑀓𑁆𑀔𑀺𑀧𑀢𑀺, ‘‘𑀢𑀤𑀲𑁆𑀲𑀸𑀤𑁂𑀢𑀻’’𑀢𑀺𑀯𑀘𑀦𑀫𑀢𑁆𑀢𑁂𑀦 𑀧𑀝𑀺𑀚𑀸𑀦𑀸𑀢𑀺. 𑀲𑁄 𑀢𑀤𑀲𑁆𑀲𑀸𑀤𑁂𑀢𑀻𑀢𑀺 𑀲𑀼𑀢𑁆𑀢𑀁 𑀛𑀸𑀦𑀮𑀸𑀪𑀺𑀦𑁄 𑀛𑀸𑀦𑀸 𑀯𑀼𑀝𑁆𑀞𑀸𑀬 𑀛𑀸𑀦𑀲𑁆𑀲𑀸𑀤𑀁 𑀲𑀸𑀥𑁂𑀢𑀺, 𑀦 𑀅𑀦𑁆𑀢𑁄𑀲𑀫𑀸𑀧𑀢𑁆𑀢𑀺𑀬𑀁𑀬𑁂𑀯 𑀛𑀸𑀦𑀦𑀺𑀓𑀦𑁆𑀢𑀺𑀬𑀸 𑀛𑀸𑀦𑀸𑀭𑀫𑁆𑀫𑀡𑀢𑀁, 𑀢𑀲𑁆𑀫𑀸 𑀅𑀲𑀸𑀥𑀓𑀦𑁆𑀢𑀺.

𑀲𑀫𑀸𑀧𑀦𑁆𑀦𑁄 𑀅𑀲𑁆𑀲𑀸𑀤𑁂𑀢𑀻𑀢𑀺𑀓𑀣𑀸𑀯𑀡𑁆𑀡𑀦𑀸.