𑁩. 𑀲𑀤𑁆𑀤𑁄 𑀯𑀺𑀧𑀸𑀓𑁄𑀢𑀺𑀓𑀣𑀸𑀯𑀡𑁆𑀡𑀦𑀸

𑁬𑁩𑁬-𑁬𑁩𑁭. 𑀇𑀤𑀸𑀦𑀺 𑀲𑀤𑁆𑀤𑁄 𑀯𑀺𑀧𑀸𑀓𑁄𑀢𑀺𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 ‘‘𑀲𑁄 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸 𑀉𑀲𑁆𑀲𑀦𑁆𑀦𑀢𑁆𑀢𑀸 𑀯𑀺𑀧𑀼𑀮𑀢𑁆𑀢𑀸 𑀩𑁆𑀭𑀳𑁆𑀫𑀲𑁆𑀲𑀭𑁄 𑀳𑁄𑀢𑀻’’𑀢𑀺𑀆𑀤𑀻𑀦𑀺 (𑀤𑀻. 𑀦𑀺. 𑁩.𑁨𑁩𑁬) 𑀅𑀬𑁄𑀦𑀺𑀲𑁄 𑀕𑀳𑁂𑀢𑁆𑀯𑀸 ‘‘𑀲𑀤𑁆𑀤𑁄 𑀯𑀺𑀧𑀸𑀓𑁄’’𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀫𑀳𑀸𑀲𑀁𑀖𑀺𑀓𑀸𑀦𑀁; 𑀢𑁂𑀲𑀁 ‘‘𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸 𑀅𑀭𑀽𑀧𑀥𑀫𑁆𑀫𑀸𑀯 𑀯𑀺𑀧𑀸𑀓𑀸𑀢𑀺 𑀦𑀸𑀫𑀁 𑀮𑀪𑀦𑁆𑀢𑀺. 𑀭𑀽𑀧𑀥𑀫𑁆𑀫𑁂𑀲𑀼 𑀧𑀦𑀸𑀬𑀁 𑀯𑁄𑀳𑀸𑀭𑁄 𑀦𑀢𑁆𑀣𑀻’’𑀢𑀺 𑀤𑀲𑁆𑀲𑁂𑀢𑀼𑀁 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀲𑀼𑀔𑀯𑁂𑀤𑀦𑀻𑀬𑁄𑀢𑀺𑀆𑀤𑀺 ‘‘𑀯𑀺𑀧𑀸𑀓𑁄 𑀦𑀸𑀫 𑀏𑀯𑀭𑀽𑀧𑁄 𑀳𑁄𑀢𑀻’’𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. ‘‘𑀲𑁄 𑀢𑀲𑁆𑀲 𑀓𑀫𑁆𑀫𑀲𑁆𑀲𑀸’’𑀢𑀺 𑀲𑀼𑀢𑁆𑀢𑀁 𑀮𑀓𑁆𑀔𑀡𑀧𑀝𑀺𑀮𑀸𑀪𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀫𑀳𑀸𑀧𑀼𑀭𑀺𑀲𑁄 𑀳𑀺 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀲𑀼𑀘𑀺𑀧𑀭𑀺𑀯𑀸𑀭𑁄𑀧𑀺 𑀳𑁄𑀢𑀺, 𑀦 𑀘 𑀧𑀭𑀺𑀯𑀸𑀭𑁄 𑀯𑀺𑀧𑀸𑀓𑁄, 𑀢𑀲𑁆𑀫𑀸 𑀅𑀲𑀸𑀥𑀓𑀫𑁂𑀢𑀦𑁆𑀢𑀺.

𑀲𑀤𑁆𑀤𑁄 𑀯𑀺𑀧𑀸𑀓𑁄𑀢𑀺𑀓𑀣𑀸𑀯𑀡𑁆𑀡𑀦𑀸.