𑁧. 𑀲𑀁𑀯𑀭𑁄 𑀓𑀫𑁆𑀫𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁬𑁩𑁦-𑁬𑁩𑁨. 𑀇𑀤𑀸𑀦𑀺 𑀲𑀁𑀯𑀭𑁄 𑀓𑀫𑁆𑀫𑀦𑁆𑀢𑀺𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 ‘‘𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀺, 𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀻’’𑀢𑀺 𑀲𑀼𑀢𑁆𑀢𑀁 𑀦𑀺𑀲𑁆𑀲𑀸𑀬 ‘‘𑀲𑀁𑀯𑀭𑁄𑀧𑀺 𑀅𑀲𑀁𑀯𑀭𑁄𑀧𑀺 𑀓𑀫𑁆𑀫’’𑀦𑁆𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀫𑀳𑀸𑀲𑀁𑀖𑀺𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲.

𑀅𑀣 𑀦𑀁 𑀬𑀸 𑀲𑀓𑀲𑀫𑀬𑁂 𑀘𑁂𑀢𑀦𑀸 ‘‘𑀓𑀫𑁆𑀫’’𑀦𑁆𑀢𑀺 𑀯𑀼𑀢𑁆𑀢𑀸 𑀬𑀣𑀸 𑀲𑀸 𑀓𑀸𑀬𑀯𑀘𑀻𑀫𑀦𑁄𑀤𑁆𑀯𑀸𑀭𑁂𑀲𑀼 𑀧𑀯𑀢𑁆𑀢𑀫𑀸𑀦𑀸 𑀓𑀸𑀬𑀓𑀫𑁆𑀫𑀸𑀤𑀺𑀦𑀸𑀫𑀁 𑀮𑀪𑀢𑀺, 𑀢𑀣𑀸 ‘‘𑀬𑀤𑀺 𑀢𑁂 𑀲𑀁𑀯𑀭𑁄 𑀓𑀫𑁆𑀫𑀁, 𑀲𑁄𑀧𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀻𑀲𑀼 𑀧𑀯𑀢𑁆𑀢𑀫𑀸𑀦𑁄 𑀘𑀓𑁆𑀔𑀼𑀓𑀫𑁆𑀫𑀸𑀤𑀺𑀦𑀸𑀫𑀁 𑀮𑀪𑁂𑀬𑁆𑀬𑀸’’𑀢𑀺 𑀘𑁄𑀤𑁂𑀢𑀼𑀁 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀘𑀓𑁆𑀔𑀼𑀓𑀫𑁆𑀫𑀦𑁆𑀢𑀺𑀆𑀤𑀺𑀫𑀸𑀳. 𑀇𑀢𑀭𑁄 𑀢𑀸𑀤𑀺𑀲𑀁 𑀲𑀼𑀢𑁆𑀢𑀧𑀤𑀁 𑀅𑀧𑀲𑁆𑀲𑀦𑁆𑀢𑁄 𑀘𑀢𑀽𑀲𑀼 𑀤𑁆𑀯𑀸𑀭𑁂𑀲𑀼 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀜𑁆𑀘𑀫𑁂 𑀓𑀸𑀬𑀤𑁆𑀯𑀸𑀭𑁂 𑀧𑀲𑀸𑀤𑀓𑀸𑀬𑀁 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺, 𑀯𑀺𑀜𑁆𑀜𑀢𑁆𑀢𑀺𑀓𑀸𑀬𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀲𑁄 𑀳𑀺 𑀧𑀲𑀸𑀤𑀓𑀸𑀬𑀫𑁆𑀧𑀺 𑀯𑀺𑀜𑁆𑀜𑀢𑁆𑀢𑀺𑀓𑀸𑀬𑀫𑁆𑀧𑀺 𑀓𑀸𑀬𑀺𑀦𑁆𑀤𑁆𑀭𑀺𑀬𑀦𑁆𑀢𑁆𑀯𑁂𑀯 𑀇𑀘𑁆𑀙𑀢𑀺. 𑀫𑀦𑁄𑀤𑁆𑀯𑀸𑀭𑁂𑀧𑀺 𑀯𑀺𑀧𑀸𑀓𑀤𑁆𑀯𑀸𑀭𑀁 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺, 𑀓𑀫𑁆𑀫𑀤𑁆𑀯𑀸𑀭𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀅𑀲𑀁𑀯𑀭𑁂𑀧𑀺 𑀏𑀲𑁂𑀯 𑀦𑀬𑁄. ‘‘𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸’’𑀢𑀺 𑀲𑀼𑀢𑁆𑀢𑀁 𑀢𑁂𑀲𑀼 𑀤𑁆𑀯𑀸𑀭𑁂𑀲𑀼 𑀲𑀁𑀯𑀭𑀸𑀲𑀁𑀯𑀭𑀫𑁂𑀯 𑀤𑀻𑀧𑁂𑀢𑀺, 𑀦 𑀢𑀲𑁆𑀲 𑀓𑀫𑁆𑀫𑀪𑀸𑀯𑀁, 𑀢𑀲𑁆𑀫𑀸 𑀅𑀲𑀸𑀥𑀓𑀦𑁆𑀢𑀺.

𑀲𑀁𑀯𑀭𑁄 𑀓𑀫𑁆𑀫𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸.