𑁩. 𑀢𑀢𑀺𑀬𑀯𑀕𑁆𑀕𑁄

𑁧. 𑀩𑀮𑀓𑀣𑀸𑀯𑀡𑁆𑀡𑀦𑀸

𑁩𑁫𑁪. 𑀇𑀤𑀸𑀦𑀺 𑀩𑀮𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑁂𑀲𑀁 𑀅𑀦𑀼𑀭𑀼𑀤𑁆𑀥𑀲𑀁𑀬𑀼𑀢𑁆𑀢𑁂 ‘‘𑀇𑀫𑁂𑀲𑀜𑁆𑀘 𑀧𑀦𑀸𑀳𑀁, 𑀆𑀯𑀼𑀲𑁄, 𑀘𑀢𑀼𑀦𑁆𑀦𑀁 𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸 𑀞𑀸𑀦𑀜𑁆𑀘 𑀞𑀸𑀦𑀢𑁄 𑀅𑀝𑁆𑀞𑀸𑀦𑀜𑁆𑀘 𑀅𑀝𑁆𑀞𑀸𑀦𑀢𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀫𑀻’’𑀢𑀺𑀆𑀤𑀻𑀦𑀺 (𑀲𑀁. 𑀦𑀺. 𑁫.𑁯𑁧𑁩) 𑀤𑀲𑀲𑀼𑀢𑁆𑀢𑀸𑀦𑀺 𑀅𑀬𑁄𑀦𑀺𑀲𑁄 𑀕𑀳𑁂𑀢𑁆𑀯𑀸 ‘‘𑀢𑀣𑀸𑀕𑀢𑀩𑀮𑀁 𑀲𑀸𑀯𑀓𑀲𑀸𑀥𑀸𑀭𑀡’’𑀦𑁆𑀢𑀺 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀏𑀢𑀭𑀳𑀺 𑀅𑀦𑁆𑀥𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀮𑀤𑁆𑀥𑀺𑀬𑀁 𑀞𑀢𑁆𑀯𑀸 𑀧𑀝𑀺𑀜𑁆𑀜𑀸 𑀧𑀭𑀯𑀸𑀤𑀺𑀲𑁆𑀲. 𑀢𑀣𑀸𑀕𑀢𑀩𑀮𑀜𑁆𑀘 𑀦𑀸𑀫𑁂𑀢𑀁 𑀲𑀸𑀯𑀓𑁂𑀳𑀺 𑀲𑀸𑀥𑀸𑀭𑀡𑀫𑁆𑀧𑀺 𑀅𑀢𑁆𑀣𑀺 𑀅𑀲𑀸𑀥𑀸𑀭𑀡𑀫𑁆𑀧𑀺 𑀲𑀸𑀥𑀸𑀭𑀡𑀸𑀲𑀸𑀥𑀸𑀭𑀡𑀫𑁆𑀧𑀺. 𑀢𑀢𑁆𑀣 𑀆𑀲𑀯𑀸𑀦𑀁 𑀔𑀬𑁂 𑀜𑀸𑀡𑀁 𑀲𑀸𑀥𑀸𑀭𑀡𑀁. 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀺𑀜𑀸𑀡𑀁 𑀅𑀲𑀸𑀥𑀸𑀭𑀡𑀁. 𑀲𑁂𑀲𑀁 𑀲𑀸𑀥𑀸𑀭𑀡𑀜𑁆𑀘 𑀅𑀲𑀸𑀥𑀸𑀭𑀡𑀜𑁆𑀘. 𑀞𑀸𑀦𑀸𑀝𑁆𑀞𑀸𑀦𑀸𑀤𑀻𑀦𑀺 𑀳𑀺 𑀲𑀸𑀯𑀓𑀸 𑀧𑀤𑁂𑀲𑁂𑀦 𑀚𑀸𑀦𑀦𑁆𑀢𑀺, 𑀢𑀣𑀸𑀕𑀢𑀸 𑀦𑀺𑀧𑁆𑀧𑀤𑁂𑀲𑁂𑀦. 𑀇𑀢𑀺 𑀢𑀸𑀦𑀺 𑀉𑀤𑁆𑀤𑁂𑀲𑀢𑁄 𑀲𑀸𑀥𑀸𑀭𑀡𑀸𑀦𑀺, 𑀦 𑀦𑀺𑀤𑁆𑀤𑁂𑀲𑀢𑁄. 𑀅𑀬𑀁 𑀧𑀦 𑀅𑀯𑀺𑀲𑁂𑀲𑁂𑀦 𑀲𑀩𑁆𑀩𑀫𑁆𑀧𑀺 𑀲𑀸𑀥𑀸𑀭𑀡𑀦𑁆𑀢𑀺 𑀆𑀳. 𑀢𑀫𑁂𑀦𑀁 𑀢𑀢𑁄 𑀯𑀺𑀯𑁂𑀘𑁂𑀢𑀼𑀁 𑀢𑀣𑀸𑀕𑀢𑀩𑀮𑀁 𑀲𑀸𑀯𑀓𑀩𑀮𑀦𑁆𑀢𑀺 𑀧𑀼𑀦 𑀅𑀦𑀼𑀬𑁄𑀕𑁄 𑀆𑀭𑀤𑁆𑀥𑁄. 𑀢𑀢𑁆𑀣 𑀧𑀞𑀫𑀧𑀜𑁆𑀳𑁂 𑀦𑀺𑀤𑁆𑀤𑁂𑀲𑀢𑁄 𑀲𑀩𑁆𑀩𑀸𑀓𑀸𑀭𑀯𑀺𑀲𑀬𑀢𑀁 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺. 𑀤𑀼𑀢𑀺𑀬𑀧𑀜𑁆𑀳𑁂 𑀉𑀤𑁆𑀤𑁂𑀲𑀢𑁄 𑀞𑀸𑀦𑀸𑀝𑁆𑀞𑀸𑀦𑀫𑀢𑁆𑀢𑀸𑀤𑀺𑀚𑀸𑀦𑀦𑀯𑀲𑁂𑀦 𑀧𑀝𑀺𑀚𑀸𑀦𑀸𑀢𑀺. 𑀢𑀜𑁆𑀜𑁂𑀯𑀸𑀢𑀺𑀆𑀤𑀺𑀧𑀜𑁆𑀳𑁂𑀲𑀼 𑀲𑀩𑁆𑀩𑀸𑀓𑀸𑀭𑁂𑀦 𑀦𑀺𑀦𑁆𑀦𑀸𑀦𑀸𑀓𑀭𑀡𑀢𑀸𑀬 𑀅𑀪𑀸𑀯𑁂𑀦 𑀧𑀝𑀺𑀓𑁆𑀔𑀺𑀧𑀢𑀺. 𑀧𑀼𑀩𑁆𑀩𑀬𑁄𑀕𑁄 𑀘 𑀧𑀼𑀩𑁆𑀩𑀘𑀭𑀺𑀬𑀸 𑀘 𑀅𑀢𑁆𑀣𑀢𑁄 𑀏𑀓𑀁, 𑀢𑀣𑀸 𑀥𑀫𑁆𑀫𑀓𑁆𑀔𑀸𑀦𑀜𑁆𑀘 𑀥𑀫𑁆𑀫𑀤𑁂𑀲𑀦𑀸 𑀘.

𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀺𑀧𑀜𑁆𑀳𑁂 𑀏𑀓𑀤𑁂𑀲𑁂𑀦 𑀲𑀸𑀥𑀸𑀭𑀡𑀢𑀁 𑀲𑀦𑁆𑀥𑀸𑀬 𑀲𑀸𑀯𑀓𑀯𑀺𑀲𑀬𑁂 𑀧𑀝𑀺𑀚𑀸𑀦𑀸𑀢𑀺.

𑁩𑁫𑁫. 𑀇𑀤𑀸𑀦𑀺 𑀬𑀲𑁆𑀫𑀸 𑀉𑀤𑁆𑀤𑁂𑀲𑀢𑁄 𑀞𑀸𑀦𑀸𑀝𑁆𑀞𑀸𑀦𑀸𑀤𑀻𑀦𑀺 𑀲𑀸𑀯𑀓𑁄 𑀚𑀸𑀦𑀸𑀢𑀺, 𑀢𑀲𑁆𑀫𑀸 𑀲𑀸𑀯𑀓𑀲𑁆𑀲 𑀢𑀣𑀸 𑀚𑀸𑀦𑀦𑀁 𑀧𑀓𑀸𑀲𑁂𑀢𑁆𑀯𑀸 𑀢𑁂𑀦 𑀚𑀸𑀦𑀦𑀫𑀢𑁆𑀢𑀲𑀸𑀫𑀜𑁆𑀜𑁂𑀦 𑀢𑁂𑀲𑀁 𑀲𑀸𑀯𑀓𑀲𑀸𑀥𑀸𑀭𑀡𑀢𑁆𑀢𑀁 𑀧𑀢𑀺𑀝𑁆𑀞𑀸𑀧𑁂𑀢𑀼𑀁 𑀲𑀸𑀯𑀓𑁄 𑀞𑀸𑀦𑀸𑀝𑁆𑀞𑀸𑀦𑀁 𑀚𑀸𑀦𑀸𑀢𑀻𑀢𑀺𑀆𑀤𑀬𑁄 𑀧𑀭𑀯𑀸𑀤𑀺𑀧𑀜𑁆𑀳𑀸 𑀳𑁄𑀦𑁆𑀢𑀺. 𑀢𑀢𑁆𑀣 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀺𑀜𑀸𑀡𑀁 𑀙𑀦𑁆𑀦𑀁 𑀅𑀲𑀸𑀥𑀸𑀭𑀡𑀜𑀸𑀡𑀸𑀦𑀁 𑀅𑀜𑁆𑀜𑀢𑀭𑀦𑁆𑀢𑀺 𑀦 𑀕𑀳𑀺𑀢𑀁. 𑀆𑀲𑀯𑀓𑁆𑀔𑀬𑁂𑀦 𑀯𑀸 𑀆𑀲𑀯𑀓𑁆𑀔𑀬𑀦𑁆𑀢𑀺 𑀬𑀁 𑀢𑀣𑀸𑀕𑀢𑀲𑁆𑀲 𑀆𑀲𑀯𑀓𑁆𑀔𑀬𑁂𑀦 𑀲𑀤𑁆𑀥𑀺𑀁 𑀲𑀸𑀯𑀓𑀲𑁆𑀲 𑀆𑀲𑀯𑀓𑁆𑀔𑀬𑀁 𑀧𑀝𑀺𑀘𑁆𑀘 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸 𑀦𑀸𑀦𑀸𑀓𑀭𑀡𑀁, 𑀢𑀁 𑀦𑀢𑁆𑀣𑀺. 𑀯𑀺𑀫𑀼𑀢𑁆𑀢𑀺𑀬𑀸 𑀯𑀸 𑀯𑀺𑀫𑀼𑀢𑁆𑀢𑀺𑀦𑁆𑀢𑀺 𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁩𑁫𑁬. 𑀇𑀤𑀸𑀦𑀺 𑀬𑀁 𑀲𑀓𑀯𑀸𑀤𑀺𑀦𑀸 ‘‘𑀆𑀲𑀯𑀸𑀦𑀁 𑀔𑀬𑁂 𑀜𑀸𑀡𑀁 𑀲𑀸𑀥𑀸𑀭𑀡’’𑀦𑁆𑀢𑀺 𑀅𑀦𑀼𑀜𑁆𑀜𑀸𑀢𑀁, 𑀢𑁂𑀦 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 𑀲𑁂𑀲𑀸𑀦𑀫𑁆𑀧𑀺 𑀲𑀸𑀥𑀸𑀭𑀡𑀪𑀸𑀯𑀁 𑀧𑀼𑀘𑁆𑀙𑀺𑀢𑀼𑀁 𑀧𑀼𑀦 𑀆𑀲𑀯𑀸𑀦𑀁 𑀔𑀬𑁂𑀢𑀺𑀆𑀤𑀬𑁄 𑀧𑀭𑀯𑀸𑀤𑀺𑀧𑀜𑁆𑀳𑀸𑀯 𑀳𑁄𑀦𑁆𑀢𑀺. 𑀢𑁂𑀲𑀁 𑀯𑀺𑀲𑁆𑀲𑀚𑁆𑀚𑀦𑁂 𑀲𑀓𑀯𑀸𑀤𑀺𑀦𑀸 𑀆𑀲𑀯𑀓𑁆𑀔𑀬𑁂 𑀯𑀺𑀲𑁂𑀲𑀸𑀪𑀸𑀯𑁂𑀦 𑀢𑀁 𑀜𑀸𑀡𑀁 𑀲𑀸𑀥𑀸𑀭𑀡𑀦𑁆𑀢𑀺 𑀅𑀦𑀼𑀜𑁆𑀜𑀸𑀢𑀁. 𑀇𑀢𑀭𑁂𑀲𑀼𑀧𑀺 𑀯𑀺𑀲𑁂𑀲𑀸𑀪𑀸𑀯𑁂𑀦 𑀲𑀸𑀥𑀸𑀭𑀡𑀢𑀸 𑀧𑀝𑀺𑀓𑁆𑀔𑀺𑀢𑁆𑀢𑀸. 𑀧𑀼𑀦 𑀞𑀸𑀦𑀸𑀝𑁆𑀞𑀸𑀦𑀸𑀤𑀻𑀦𑀁 𑀆𑀲𑀯𑀓𑁆𑀔𑀬𑁂𑀦𑁂𑀯 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 𑀅𑀲𑀸𑀥𑀸𑀭𑀡𑀧𑀼𑀘𑁆𑀙𑀸 𑀧𑀭𑀯𑀸𑀤𑀺𑀲𑁆𑀲𑁂𑀯. 𑀢𑀢𑁆𑀣 𑀆𑀲𑀯𑀓𑁆𑀔𑀬𑀜𑀸𑀡𑁂 𑀧𑀝𑀺𑀓𑁆𑀔𑁂𑀧𑁄, 𑀲𑁂𑀲𑁂𑀲𑀼 𑀘 𑀧𑀝𑀺𑀜𑁆𑀜𑀸 𑀲𑀓𑀯𑀸𑀤𑀺𑀲𑁆𑀲. 𑀢𑀢𑁄 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑁂𑀦 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 𑀅𑀲𑀸𑀥𑀸𑀭𑀡𑀧𑀼𑀘𑁆𑀙𑀸 𑀧𑀭𑀯𑀸𑀤𑀺𑀲𑁆𑀲. 𑀲𑀸 𑀲𑀗𑁆𑀔𑀺𑀧𑀺𑀢𑁆𑀯𑀸 𑀤𑀲𑁆𑀲𑀺𑀢𑀸. 𑀢𑀣𑀸𑀧𑀺 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑁂 𑀧𑀝𑀺𑀜𑁆𑀜𑀸, 𑀲𑁂𑀲𑁂𑀲𑀼 𑀘 𑀧𑀝𑀺𑀓𑁆𑀔𑁂𑀧𑁄 𑀲𑀓𑀯𑀸𑀤𑀺𑀲𑁆𑀲. 𑀢𑀢𑁄 𑀞𑀸𑀦𑀸𑀝𑁆𑀞𑀸𑀦𑀸𑀤𑀻𑀳𑀺 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀲𑁆𑀲 𑀲𑀸𑀥𑀸𑀭𑀡𑀧𑀼𑀘𑁆𑀙𑀸 𑀧𑀭𑀯𑀸𑀤𑀺𑀲𑁆𑀲. 𑀲𑀸𑀧𑀺 𑀲𑀗𑁆𑀔𑀺𑀧𑀺𑀢𑁆𑀯𑀸𑀯 𑀤𑀲𑁆𑀲𑀺𑀢𑀸. 𑀢𑀢𑁆𑀣 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑁂 𑀧𑀝𑀺𑀓𑁆𑀔𑁂𑀧𑁄. 𑀲𑁂𑀲𑁂𑀲𑀼 𑀘 𑀧𑀝𑀺𑀜𑁆𑀜𑀸 𑀲𑀓𑀯𑀸𑀤𑀺𑀲𑁆𑀲𑀸𑀢𑀺.

𑀩𑀮𑀓𑀣𑀸𑀯𑀡𑁆𑀡𑀦𑀸.

𑁨. 𑀅𑀭𑀺𑀬𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁩𑁫𑁭. 𑀇𑀤𑀸𑀦𑀺 𑀅𑀭𑀺𑀬𑀦𑁆𑀢𑀺𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑁂𑀲𑀁 ‘‘𑀦 𑀓𑁂𑀯𑀮𑀁 𑀆𑀲𑀯𑀓𑁆𑀔𑀬𑀜𑀸𑀡𑀫𑁂𑀯 𑀅𑀭𑀺𑀬𑀁, 𑀅𑀣 𑀔𑁄 𑀧𑀼𑀭𑀺𑀫𑀸𑀦𑀺𑀧𑀺 𑀦𑀯 𑀩𑀮𑀸𑀦𑀺 𑀅𑀭𑀺𑀬𑀸𑀦𑀺’’𑀘𑁆𑀘𑁂𑀯 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀏𑀢𑀭𑀳𑀺 𑀅𑀦𑁆𑀥𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀅𑀭𑀺𑀬𑀦𑁆𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀧𑀼𑀦 𑀬𑀤𑀺 𑀢𑀁 𑀅𑀭𑀺𑀬𑀁, 𑀫𑀕𑁆𑀕𑀸𑀤𑀻𑀲𑀼 𑀢𑁂𑀦 𑀅𑀜𑁆𑀜𑀢𑀭𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀫𑀕𑁆𑀕𑀸𑀤𑀺𑀯𑀲𑁂𑀦 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀓𑁆𑀔𑁂𑀧𑁄 𑀇𑀢𑀭𑀲𑁆𑀲.

𑀧𑀼𑀦 𑀲𑀼𑀜𑁆𑀜𑀢𑀸𑀭𑀫𑁆𑀫𑀡𑀸𑀤𑀺𑀯𑀲𑁂𑀦 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲. 𑀢𑀢𑁆𑀣 𑀤𑁆𑀯𑁂 𑀲𑀼𑀜𑁆𑀜𑀢𑀸 𑁋 𑀲𑀢𑁆𑀢𑀲𑀼𑀜𑁆𑀜𑀢𑀸 𑀘 𑀲𑀗𑁆𑀔𑀸𑀭𑀲𑀼𑀜𑁆𑀜𑀢𑀸 𑀘. 𑀲𑀢𑁆𑀢𑀲𑀼𑀜𑁆𑀜𑀢𑀸 𑀦𑀸𑀫 𑀤𑀺𑀝𑁆𑀞𑀺𑀬𑀸 𑀧𑀭𑀺𑀓𑀧𑁆𑀧𑀺𑀢𑁂𑀦 𑀲𑀢𑁆𑀢𑁂𑀦 𑀲𑀼𑀜𑁆𑀜𑀸 𑀧𑀜𑁆𑀘𑀓𑁆𑀔𑀦𑁆𑀥𑀸. 𑀲𑀗𑁆𑀔𑀸𑀭𑀲𑀼𑀜𑁆𑀜𑀢𑀸 𑀦𑀸𑀫 𑀲𑀩𑁆𑀩𑀲𑀗𑁆𑀔𑀸𑀭𑁂𑀳𑀺 𑀲𑀼𑀜𑁆𑀜𑀁 𑀯𑀺𑀯𑀺𑀢𑁆𑀢𑀁 𑀦𑀺𑀲𑁆𑀲𑀝𑀁 𑀦𑀺𑀩𑁆𑀩𑀸𑀦𑀁. 𑀢𑀢𑁆𑀣 𑀧𑀭𑀯𑀸𑀤𑀻 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑀁 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺, 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀢𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀫𑀦𑀲𑀺 𑀓𑀭𑁄𑀢𑀻𑀢𑀺 𑀧𑀼𑀝𑁆𑀞𑁄𑀧𑀺 𑀦𑀺𑀩𑁆𑀩𑀸𑀦𑀫𑁂𑀯 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺, 𑀲𑀗𑁆𑀔𑀸𑀭𑁂 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀢𑀢𑁄 𑀲𑀓𑀯𑀸𑀤𑀺𑀦𑀸 ‘‘𑀞𑀸𑀦𑀸𑀝𑁆𑀞𑀸𑀦𑀸𑀤𑀺𑀫𑀦𑀲𑀺𑀓𑀸𑀭𑁄 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑁄, 𑀲𑀼𑀜𑁆𑀜𑀢𑀫𑀦𑀲𑀺𑀓𑀸𑀭𑁄 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑁄’’𑀢𑀺 𑀇𑀫𑀁 𑀦𑀬𑀁 𑀕𑀳𑁂𑀢𑁆𑀯𑀸 ‘‘𑀤𑁆𑀯𑀺𑀦𑁆𑀦𑀁 𑀨𑀲𑁆𑀲𑀸𑀦𑀁 𑀤𑁆𑀯𑀺𑀦𑁆𑀦𑀁 𑀘𑀺𑀢𑁆𑀢𑀸𑀦𑀁 𑀲𑀫𑁄𑀥𑀸𑀦𑀁 𑀳𑁄𑀢𑀻’’𑀢𑀺 𑀧𑀼𑀝𑁆𑀞𑁄 𑀮𑁂𑀲𑁄𑀓𑀸𑀲𑀁 𑀅𑀮𑀪𑀦𑁆𑀢𑁄 𑀧𑀝𑀺𑀓𑁆𑀔𑀺𑀧𑀢𑀺. 𑀅𑀦𑀺𑀫𑀺𑀢𑁆𑀢𑀸𑀧𑀡𑀺𑀳𑀺𑀢𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀢𑁆𑀢𑀦𑀺𑀫𑀺𑀢𑁆𑀢𑀸𑀪𑀸𑀯𑀢𑁄 𑀳𑀺 𑀔𑀦𑁆𑀥𑀸 𑀅𑀦𑀺𑀫𑀺𑀢𑁆𑀢𑀸. 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀸𑀪𑀸𑀯𑀢𑁄 𑀦𑀺𑀩𑁆𑀩𑀸𑀦𑀁. 𑀏𑀓𑀥𑀫𑁆𑀫𑀲𑁆𑀫𑀺𑀫𑁆𑀧𑀺 𑀆𑀭𑁄𑀧𑁂𑀢𑁆𑀯𑀸 𑀞𑀧𑁂𑀢𑀩𑁆𑀩𑀲𑀗𑁆𑀔𑀸𑀢𑁂𑀦 𑀘 𑀧𑀡𑀺𑀤𑀳𑀺𑀢𑀩𑁆𑀩𑀝𑁆𑀞𑁂𑀦 𑀧𑀡𑀺𑀳𑀺𑀢𑀲𑀗𑁆𑀔𑀁 𑀕𑀢𑁂𑀦 𑀲𑀢𑁆𑀢𑀧𑀡𑀺𑀥𑀺𑀦𑀸 𑀅𑀧𑁆𑀧𑀡𑀺𑀳𑀺𑀢𑀸 𑀔𑀦𑁆𑀥𑀸. 𑀢𑀡𑁆𑀳𑀸𑀧𑀡𑀺𑀥𑀺𑀦𑀸 𑀢𑀡𑁆𑀳𑀸𑀬 𑀯𑀸 𑀆𑀭𑀫𑁆𑀫𑀡𑀪𑀽𑀢𑁂𑀦 𑀲𑀩𑁆𑀩𑀲𑀗𑁆𑀔𑀸𑀭𑀧𑀡𑀺𑀥𑀺𑀦𑀸 𑀅𑀧𑁆𑀧𑀡𑀺𑀳𑀺𑀢𑀁 𑀦𑀺𑀩𑁆𑀩𑀸𑀦𑀁. 𑀢𑀲𑁆𑀫𑀸 𑀇𑀥𑀸𑀧𑀺 𑀧𑀝𑀺𑀓𑁆𑀔𑁂𑀧𑁄 𑀘 𑀧𑀝𑀺𑀜𑁆𑀜𑀸 𑀘 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸.

𑁩𑁫𑁮. 𑀢𑀢𑁄 ‘‘𑀬𑀣𑀸 𑀲𑀢𑀺𑀧𑀝𑁆𑀞𑀸𑀦𑀸𑀤𑀬𑁄 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸 𑀅𑀭𑀺𑀬𑀸 𑀘𑁂𑀯 𑀲𑀼𑀜𑁆𑀜𑀢𑀸𑀤𑀺𑀆𑀭𑀫𑁆𑀫𑀡𑀸 𑀘, 𑀓𑀺𑀁 𑀢𑁂 𑀏𑀯𑀁 𑀞𑀸𑀦𑀸𑀝𑁆𑀞𑀸𑀦𑀜𑀸𑀡’’𑀦𑁆𑀢𑀺 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀧𑀼𑀘𑁆𑀙𑀸 𑀳𑁄𑀦𑁆𑀢𑀺. 𑀢𑀢𑁆𑀣 𑀲𑀩𑁆𑀩𑀸𑀧𑀺 𑀧𑀝𑀺𑀜𑁆𑀜𑀸 𑀲𑀩𑁆𑀩𑁂 𑀘 𑀧𑀝𑀺𑀓𑁆𑀔𑁂𑀧𑀸 𑀧𑀭𑀯𑀸𑀤𑀺𑀲𑁆𑀲𑁂𑀯. 𑀇𑀫𑀺𑀦𑀸𑀯𑀼𑀧𑀸𑀬𑁂𑀦 𑀲𑁂𑀲𑀜𑀸𑀡𑁂𑀲𑀼𑀧𑀺 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀧𑀸𑀴𑀺𑀬𑀁 𑀧𑀦 𑀲𑁂𑀲𑀸𑀦𑀺 𑀲𑀗𑁆𑀔𑀺𑀧𑀺𑀢𑁆𑀯𑀸 𑀅𑀯𑀲𑀸𑀦𑁂 𑀘𑀼𑀢𑀽𑀧𑀧𑀸𑀢𑀜𑀸𑀡𑀫𑁂𑀯 𑀯𑀺𑀪𑀢𑁆𑀢𑀁. 𑀢𑀢𑁄 𑀧𑀭𑀁 𑀲𑀓𑀲𑀫𑀬𑁂𑀧𑀺 ‘‘𑀅𑀭𑀺𑀬’’𑀦𑁆𑀢𑀺 𑀲𑀺𑀤𑁆𑀥𑁂𑀦 𑀆𑀲𑀯𑀸𑀦𑀁 𑀔𑀬𑀜𑀸𑀡𑁂𑀦 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 𑀲𑁂𑀲𑀜𑀸𑀡𑀸𑀦𑀁 𑀅𑀦𑀼𑀮𑁄𑀫𑀢𑁄 𑀘 𑀧𑀝𑀺𑀮𑁄𑀫𑀢𑁄 𑀘 𑀅𑀭𑀺𑀬𑀪𑀸𑀯𑀧𑀼𑀘𑁆𑀙𑀸 𑀳𑁄𑀦𑁆𑀢𑀺. 𑀢𑀸 𑀲𑀩𑁆𑀩𑀸 𑀧𑀭𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀧𑀝𑀺𑀓𑁆𑀔𑁂𑀧𑁄 𑀘 𑀲𑀓𑀯𑀸𑀤𑀺𑀲𑁆𑀲. 𑀢𑁂 𑀉𑀢𑁆𑀢𑀸𑀦𑀢𑁆𑀣𑀸𑀬𑁂𑀯. 𑀧𑀸𑀴𑀺𑀬𑀁 𑀧𑀦𑁂𑀢𑁆𑀣 𑀧𑀞𑀫𑀦𑀯𑀫𑀸𑀦𑁂𑀯 𑀤𑀲𑁆𑀲𑁂𑀢𑁆𑀯𑀸 𑀲𑀢𑁆𑀢 𑀜𑀸𑀡𑀸𑀦𑀺 𑀲𑀗𑁆𑀔𑀺𑀢𑁆𑀢𑀸𑀦𑀻𑀢𑀺.

𑀅𑀭𑀺𑀬𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸.

𑁩. 𑀯𑀺𑀫𑀼𑀢𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁩𑁬𑁩. 𑀇𑀤𑀸𑀦𑀺 𑀯𑀺𑀫𑀼𑀢𑁆𑀢𑀺𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑁂𑀲𑀁 ‘‘𑀯𑀻𑀢𑀭𑀸𑀕𑀘𑀺𑀢𑁆𑀢𑀸𑀦𑀁 𑀯𑀺𑀫𑀼𑀢𑁆𑀢𑀺𑀧𑀬𑁄𑀚𑀦𑀁 𑀦𑀸𑀫 𑀦𑀢𑁆𑀣𑀺. 𑀬𑀣𑀸 𑀧𑀦 𑀫𑀮𑀻𑀦𑀁 𑀯𑀢𑁆𑀣𑀁 𑀥𑁄𑀯𑀺𑀬𑀫𑀸𑀦𑀁 𑀫𑀮𑀸 𑀯𑀺𑀫𑀼𑀘𑁆𑀘𑀢𑀺, 𑀏𑀯𑀁 𑀲𑀭𑀸𑀕𑀁 𑀘𑀺𑀢𑁆𑀢𑀁 𑀭𑀸𑀕𑀢𑁄 𑀯𑀺𑀫𑀼𑀘𑁆𑀘𑀢𑀻’’𑀢𑀺 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀏𑀢𑀭𑀳𑀺 𑀅𑀦𑁆𑀥𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀲𑀭𑀸𑀕𑀦𑁆𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀢𑀢𑁄 𑀭𑀸𑀕𑀲𑀳𑀕𑀢𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀼𑀝𑁆𑀞𑁄 𑀫𑀕𑁆𑀕𑀓𑁆𑀔𑀡𑁂 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺 𑀦𑀸𑀫. 𑀢𑀤𑀸 𑀘 𑀏𑀯𑀭𑀽𑀧𑀁 𑀘𑀺𑀢𑁆𑀢𑀁 𑀦𑀢𑁆𑀣𑀻𑀢𑀺 𑀧𑀝𑀺𑀓𑁆𑀔𑀺𑀧𑀢𑀺.

𑀲𑀨𑀲𑁆𑀲𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀼𑀝𑁆𑀞𑁄𑀧𑀺 𑀬𑀣𑀸 𑀨𑀲𑁆𑀲𑁄 𑀘 𑀘𑀺𑀢𑁆𑀢𑀜𑁆𑀘 𑀉𑀪𑁄 𑀭𑀸𑀕𑀢𑁄 𑀯𑀺𑀫𑀼𑀘𑁆𑀘𑀦𑁆𑀢𑀺, 𑀏𑀯𑀁 𑀭𑀸𑀕𑀲𑁆𑀲 𑀯𑀺𑀫𑀼𑀢𑁆𑀢𑀺𑀁 𑀅𑀧𑀲𑁆𑀲𑀫𑀸𑀦𑁄 𑀧𑀝𑀺𑀓𑁆𑀔𑀺𑀧𑀢𑀺. 𑀲𑀤𑁄𑀲𑀸𑀤𑀻𑀲𑀼𑀧𑀺 𑀇𑀫𑀺𑀦𑀸𑀯𑀼𑀧𑀸𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀯𑀺𑀫𑀼𑀢𑁆𑀢𑀺𑀓𑀣𑀸𑀯𑀡𑁆𑀡𑀦𑀸.

𑁪. 𑀯𑀺𑀫𑀼𑀘𑁆𑀘𑀫𑀸𑀦𑀓𑀣𑀸𑀯𑀡𑁆𑀡𑀦𑀸

𑁩𑁬𑁬. 𑀇𑀤𑀸𑀦𑀺 𑀯𑀺𑀫𑀼𑀘𑁆𑀘𑀫𑀸𑀦𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑁂𑀲𑀁 ‘‘𑀛𑀸𑀦𑁂𑀦 𑀯𑀺𑀓𑁆𑀔𑀫𑁆𑀪𑀦𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀢𑁆𑀢𑀁, 𑀫𑀕𑁆𑀕𑀓𑁆𑀔𑀡𑁂 𑀲𑀫𑀼𑀘𑁆𑀙𑁂𑀤𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀘𑁆𑀘𑀫𑀸𑀦𑀁 𑀦𑀸𑀫 𑀳𑁄𑀢𑀻’’𑀢𑀺 𑀮𑀤𑁆𑀥𑀺, 𑀢𑁂 𑀲𑀦𑁆𑀥𑀸𑀬 𑀯𑀺𑀫𑀼𑀢𑁆𑀢𑀁 𑀯𑀺𑀫𑀼𑀘𑁆𑀘𑀫𑀸𑀦𑀦𑁆𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲.

𑀧𑀼𑀦 𑀏𑀓𑀤𑁂𑀲𑀦𑁆𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲. 𑀢𑀢𑁆𑀣 𑀏𑀓𑀤𑁂𑀲𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀁. 𑀬𑀣𑀸 𑀯𑀺𑀫𑀼𑀢𑁆𑀢𑀁, 𑀏𑀓𑀤𑁂𑀲𑁂𑀦 𑀯𑀸 𑀏𑀓𑀤𑁂𑀲𑁂 𑀯𑀸 𑀅𑀯𑀺𑀫𑀼𑀢𑁆𑀢𑀁 𑀳𑁄𑀢𑀺 𑀓𑀺𑀁 𑀏𑀯𑀁 𑀏𑀓𑀤𑁂𑀲𑀁 𑀯𑀺𑀫𑀼𑀢𑁆𑀢𑀁, 𑀏𑀓𑀤𑁂𑀲𑀁 𑀅𑀯𑀺𑀫𑀼𑀢𑁆𑀢𑀦𑁆𑀢𑀺 𑀧𑀼𑀘𑁆𑀙𑀢𑀺. 𑀓𑀺𑀁 𑀓𑀸𑀭𑀡𑀸 𑀏𑀯𑀁 𑀧𑀼𑀘𑁆𑀙𑀢𑀻𑀢𑀺? ‘‘𑀯𑀺𑀫𑀼𑀢𑁆𑀢𑀁 𑀯𑀺𑀫𑀼𑀘𑁆𑀘𑀫𑀸𑀦’’𑀦𑁆𑀢𑀺 𑀯𑀺𑀧𑁆𑀧𑀓𑀢𑀪𑀸𑀯𑁂𑀦 𑀯𑀼𑀢𑁆𑀢𑀢𑁆𑀢𑀸. 𑀬𑀣𑀸 𑀳𑀺 𑀓𑀭𑀺𑀬𑀫𑀸𑀦𑀸 𑀓𑀝𑀸𑀤𑀬𑁄 𑀯𑀺𑀧𑁆𑀧𑀓𑀢𑀢𑁆𑀢𑀸 𑀏𑀓𑀤𑁂𑀲𑁂𑀦 𑀓𑀢𑀸 𑀏𑀓𑀤𑁂𑀲𑁂𑀦 𑀅𑀓𑀢𑀸 𑀳𑁄𑀦𑁆𑀢𑀺, 𑀢𑀣𑀸 𑀇𑀤𑀫𑁆𑀧𑀺 𑀏𑀓𑀤𑁂𑀲𑀁 𑀯𑀺𑀫𑀼𑀢𑁆𑀢𑀁 𑀏𑀓𑀤𑁂𑀲𑀁 𑀅𑀯𑀺𑀫𑀼𑀢𑁆𑀢𑀦𑁆𑀢𑀺 𑀆𑀧𑀚𑁆𑀚𑀢𑀺. 𑀢𑀢𑁄 𑀧𑀭𑀯𑀸𑀤𑀻 𑀓𑀝𑀸𑀤𑀻𑀦𑀁 𑀯𑀺𑀬 𑀘𑀺𑀢𑁆𑀢𑀲𑁆𑀲 𑀏𑀓𑀤𑁂𑀲𑀸𑀪𑀸𑀯𑀸 𑀧𑀞𑀫𑀧𑀜𑁆𑀳𑁂 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀤𑀼𑀢𑀺𑀬𑁂 𑀯𑀺𑀫𑀼𑀘𑁆𑀘𑀫𑀸𑀦𑀲𑁆𑀲 𑀅𑀧𑀭𑀺𑀦𑀺𑀝𑁆𑀞𑀺𑀢𑀯𑀺𑀫𑀼𑀢𑁆𑀢𑀺𑀢𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀮𑁄𑀓𑀺𑀬𑀚𑁆𑀛𑀸𑀦𑀓𑁆𑀔𑀡𑀁 𑀯𑀸 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺. 𑀦 𑀳𑀺 𑀢𑀁 𑀢𑀤𑀸 𑀲𑀫𑀼𑀘𑁆𑀙𑁂𑀤𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀘𑁆𑀘𑀫𑀸𑀦𑀁. 𑀮𑁄𑀓𑀼𑀢𑁆𑀢𑀭𑀚𑁆𑀛𑀸𑀦𑀓𑁆𑀔𑀡𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀢𑀜𑁆𑀳𑀺 𑀢𑀤𑀸 𑀲𑀫𑀼𑀘𑁆𑀙𑁂𑀤𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀢𑁆𑀢𑁂𑀓𑀤𑁂𑀲𑁂𑀦 𑀯𑀺𑀫𑀼𑀘𑁆𑀘𑀫𑀸𑀦𑀦𑁆𑀢𑀺𑀲𑁆𑀲 𑀮𑀤𑁆𑀥𑀺. 𑀢𑀢𑁄 𑀲𑀓𑀯𑀸𑀤𑀻 ‘‘𑀬𑀤𑀺 𑀢𑁂 𑀏𑀓𑀫𑁂𑀯 𑀘𑀺𑀢𑁆𑀢𑀁 𑀏𑀓𑀤𑁂𑀲𑀁 𑀯𑀺𑀫𑀼𑀢𑁆𑀢𑀁 𑀏𑀓𑀤𑁂𑀲𑀁 𑀅𑀯𑀺𑀫𑀼𑀢𑁆𑀢𑀁, 𑀏𑀯𑀁 𑀲𑀦𑁆𑀢𑁂 𑀬𑁄 𑀏𑀓𑁂𑀦𑁂𑀯 𑀘𑀺𑀢𑁆𑀢𑁂𑀦 𑀲𑁄𑀢𑀸𑀧𑀦𑁆𑀦𑁄 𑀳𑁄𑀢𑀺, 𑀲𑁄𑀧𑀺 𑀢𑁂 𑀏𑀓𑀤𑁂𑀲𑀁 𑀲𑁄𑀢𑀸𑀧𑀦𑁆𑀦𑁄, 𑀏𑀓𑀤𑁂𑀲𑀁 𑀦 𑀲𑁄𑀢𑀸𑀧𑀦𑁆𑀦𑁄 𑀆𑀧𑀚𑁆𑀚𑀢𑀻’’𑀢𑀺 𑀘𑁄𑀤𑀦𑀢𑁆𑀣𑀁 𑀏𑀓𑀤𑁂𑀲𑀁 𑀲𑁄𑀢𑀸𑀧𑀦𑁆𑀦𑁄𑀢𑀺𑀆𑀤𑀺𑀫𑀸𑀳. 𑀇𑀢𑀭𑁄 𑀢𑀁 𑀯𑀺𑀥𑀸𑀦𑀁 𑀅𑀧𑀲𑁆𑀲𑀦𑁆𑀢𑁄 𑀧𑀝𑀺𑀓𑁆𑀔𑀺𑀧𑀢𑀺. 𑀲𑁂𑀲𑀯𑀸𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀉𑀧𑁆𑀧𑀸𑀤𑀓𑁆𑀔𑀡𑀧𑀜𑁆𑀳𑁂 𑀬𑀤𑀺 𑀏𑀓𑀫𑁂𑀯 𑀘𑀺𑀢𑁆𑀢𑀁 𑀯𑀺𑀫𑀼𑀢𑁆𑀢𑀜𑁆𑀘 𑀯𑀺𑀫𑀼𑀘𑁆𑀘𑀫𑀸𑀦𑀜𑁆𑀘, 𑀏𑀓𑀲𑁆𑀫𑀺𑀁 𑀔𑀡𑁂 𑀯𑀺𑀫𑀼𑀢𑁆𑀢𑀁 𑀏𑀓𑀲𑁆𑀫𑀺𑀁 𑀯𑀺𑀫𑀼𑀘𑁆𑀘𑀫𑀸𑀦𑀁 𑀆𑀧𑀚𑁆𑀚𑀢𑀺. 𑀓𑀺𑀁 𑀢𑁂 𑀏𑀯𑀭𑀽𑀧𑀁 𑀘𑀺𑀢𑁆𑀢𑀦𑁆𑀢𑀺 𑀅𑀢𑁆𑀣𑁄.

𑁩𑁬𑁭. 𑀲𑀼𑀢𑁆𑀢𑀲𑀸𑀥𑀦𑁂 𑀧𑀞𑀫𑀲𑀼𑀢𑁆𑀢𑀁 𑀧𑀭𑀯𑀸𑀤𑀺𑀲𑁆𑀲. 𑀢𑀢𑁆𑀭𑀸𑀲𑁆𑀲𑀸𑀬𑀫𑀥𑀺𑀧𑁆𑀧𑀸𑀬𑁄 𑁋 𑀯𑀺𑀫𑀼𑀘𑁆𑀘𑀢𑀻𑀢𑀺 𑀯𑀺𑀧𑁆𑀧𑀓𑀢𑀦𑀺𑀤𑁆𑀤𑁂𑀲𑁄. 𑀢𑀲𑁆𑀫𑀸 𑀬𑀁 𑀢𑀲𑁆𑀲 𑀬𑁄𑀕𑀺𑀦𑁄 𑀏𑀯𑀁 𑀚𑀸𑀦𑀢𑁄 𑀏𑀯𑀁 𑀧𑀲𑁆𑀲𑀢𑁄 𑀏𑀢𑁂𑀳𑀺 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺, 𑀢𑀁 𑀯𑀺𑀫𑀼𑀘𑁆𑀘𑀫𑀸𑀦𑀁 𑀦𑀸𑀫 𑀳𑁄𑀢𑀻𑀢𑀺. 𑀤𑀼𑀢𑀺𑀬𑀲𑀼𑀢𑁆𑀢𑀁 𑀲𑀓𑀯𑀸𑀤𑀺𑀲𑁆𑀲. 𑀢𑀢𑁆𑀭𑀸𑀲𑁆𑀲𑀸𑀬𑀫𑀥𑀺𑀧𑁆𑀧𑀸𑀬𑁄 𑁋 𑀬𑀤𑀺 𑀢𑁂 𑀯𑀺𑀫𑀼𑀘𑁆𑀘𑀢𑀻𑀢𑀺 𑀯𑀘𑀦𑀢𑁄 𑀯𑀺𑀫𑀼𑀢𑁆𑀢𑀁 𑀯𑀺𑀫𑀼𑀘𑁆𑀘𑀫𑀸𑀦𑀁, 𑀇𑀥 𑀯𑀺𑀫𑀼𑀘𑁆𑀘𑀢𑀻𑀢𑀺 𑀯𑀘𑀦𑀸𑀪𑀸𑀯𑀢𑁄 𑀯𑀺𑀫𑀼𑀢𑁆𑀢𑀫𑁂𑀯 𑀲𑀺𑀬𑀸, 𑀦 𑀯𑀺𑀫𑀼𑀘𑁆𑀘𑀫𑀸𑀦𑀦𑁆𑀢𑀺.

𑀇𑀤𑀸𑀦𑀺 ‘‘𑀬𑀣𑀸 𑀢𑁂 𑀯𑀺𑀧𑁆𑀧𑀓𑀢𑀯𑀺𑀫𑀼𑀢𑁆𑀢𑀺𑀢𑀸𑀬 𑀯𑀺𑀫𑀼𑀘𑁆𑀘𑀫𑀸𑀦𑀁, 𑀓𑀺𑀁 𑀏𑀯𑀁 𑀯𑀺𑀧𑁆𑀧𑀓𑀢𑀭𑀸𑀕𑀸𑀤𑀺𑀢𑀸𑀬 𑀭𑀚𑁆𑀚𑀫𑀸𑀦𑀸𑀤𑀻𑀦𑀺𑀧𑀺 𑀅𑀢𑁆𑀣𑀻’’𑀢𑀺 𑀘𑁄𑀤𑀦𑀢𑁆𑀣𑀁 𑀧𑀼𑀦 𑀅𑀢𑁆𑀣𑀺 𑀘𑀺𑀢𑁆𑀢𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀧𑀭𑀯𑀸𑀤𑀺𑀦𑀸𑀧𑀺 𑀢𑀣𑀸𑀭𑀽𑀧𑀁 𑀘𑀺𑀢𑁆𑀢𑀁 𑀅𑀧𑀲𑁆𑀲𑀦𑁆𑀢𑁂𑀦 𑀲𑀩𑁆𑀩𑀁 𑀧𑀝𑀺𑀓𑁆𑀔𑀺𑀢𑁆𑀢𑀁. 𑀅𑀣 𑀦𑀁 𑀲𑀓𑀯𑀸𑀤𑀻 ‘‘𑀤𑁆𑀯𑁂𑀬𑁂𑀯 𑀓𑁄𑀝𑀺𑀬𑁄, 𑀢𑀢𑀺𑀬𑀸 𑀦𑀢𑁆𑀣𑀻’’𑀢𑀺 𑀅𑀦𑀼𑀩𑁄𑀥𑁂𑀦𑁆𑀢𑁄 𑀦𑀦𑀼 𑀭𑀢𑁆𑀢𑀜𑁆𑀘𑁂𑀯 𑀅𑀭𑀢𑁆𑀢𑀜𑁆𑀘𑀸𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀦𑀦𑀼 𑀪𑀤𑁆𑀭𑀫𑀼𑀔, 𑀭𑀸𑀕𑀲𑀫𑁆𑀧𑀬𑀼𑀢𑁆𑀢𑀁 𑀘𑀺𑀢𑁆𑀢𑀁 𑀭𑀢𑁆𑀢𑀁 𑀯𑀺𑀧𑁆𑀧𑀬𑀼𑀢𑁆𑀢𑀁 𑀅𑀭𑀢𑁆𑀢𑀦𑁆𑀢𑀺 𑀤𑁆𑀯𑁂𑀯 𑀓𑁄𑀝𑀺𑀬𑁄, 𑀭𑀚𑁆𑀚𑀫𑀸𑀦𑀁 𑀦𑀸𑀫 𑀢𑀢𑀺𑀬𑀸 𑀓𑁄𑀝𑀺 𑀦𑀢𑁆𑀣𑀻𑀢𑀺? 𑀤𑀼𑀝𑁆𑀞𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀣 𑀦𑀁 𑀆𑀫𑀦𑁆𑀢𑀸𑀢𑀺 𑀧𑀝𑀺𑀚𑀸𑀦𑀺𑀢𑁆𑀯𑀸 𑀞𑀺𑀢𑀁. 𑀯𑀺𑀫𑀼𑀢𑁆𑀢𑀺𑀧𑀓𑁆𑀔𑁂𑀧𑀺 𑀤𑁆𑀯𑁂𑀬𑁂𑀯 𑀓𑁄𑀝𑀺𑀬𑁄 𑀤𑀲𑁆𑀲𑁂𑀢𑀼𑀁 𑀳𑀜𑁆𑀘𑀺 𑀭𑀢𑁆𑀢𑀜𑁆𑀘𑁂𑀯𑀸𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀬𑀤𑀺 𑀏𑀢𑀸 𑀤𑁆𑀯𑁂 𑀓𑁄𑀝𑀺𑀬𑁄 𑀲𑀫𑁆𑀧𑀝𑀺𑀘𑁆𑀙𑀲𑀺, 𑀅𑀯𑀺𑀫𑀼𑀢𑁆𑀢𑀜𑁆𑀘𑁂𑀯 𑀯𑀺𑀫𑀼𑀢𑁆𑀢𑀜𑁆𑀘𑀸 𑀢𑀺 𑀇𑀫𑀸𑀧𑀺 𑀲𑀫𑁆𑀧𑀝𑀺𑀘𑁆𑀙. 𑀓𑀺𑀮𑁂𑀲𑀲𑀫𑁆𑀧𑀬𑀼𑀢𑁆𑀢𑀜𑁆𑀳𑀺 𑀘𑀺𑀢𑁆𑀢𑀁 𑀅𑀯𑀺𑀫𑀼𑀢𑁆𑀢𑀁, 𑀯𑀺𑀧𑁆𑀧𑀬𑀼𑀢𑁆𑀢𑀁 𑀯𑀺𑀫𑀼𑀢𑁆𑀢𑀁. 𑀯𑀺𑀫𑀼𑀘𑁆𑀘𑀫𑀸𑀦𑀁 𑀦𑀸𑀫𑀸𑀢𑀺 𑀧𑀭𑀫𑀢𑁆𑀣𑀢𑁄 𑀢𑀢𑀺𑀬𑀸 𑀓𑁄𑀝𑀺 𑀦𑀢𑁆𑀣𑀻𑀢𑀺.

𑀯𑀺𑀫𑀼𑀘𑁆𑀘𑀫𑀸𑀦𑀓𑀣𑀸𑀯𑀡𑁆𑀡𑀦𑀸.

𑁫. 𑀅𑀝𑁆𑀞𑀫𑀓𑀓𑀣𑀸𑀯𑀡𑁆𑀡𑀦𑀸

𑁩𑁬𑁮. 𑀇𑀤𑀸𑀦𑀺 𑀅𑀝𑁆𑀞𑀫𑀓𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑁂𑀲𑀁 𑀅𑀦𑀼𑀮𑁄𑀫𑀕𑁄𑀢𑁆𑀭𑀪𑀼𑀫𑀕𑁆𑀕𑀓𑁆𑀔𑀡𑁂 𑀓𑀺𑀮𑁂𑀲𑀸𑀦𑀁 𑀲𑀫𑀼𑀤𑀸𑀘𑀸𑀭𑀸𑀪𑀸𑀯𑀢𑁄 𑀅𑀝𑁆𑀞𑀫𑀓𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀝𑁆𑀞𑀧𑀼𑀕𑁆𑀕𑀮𑀲𑁆𑀲 𑀤𑁆𑀯𑁂 𑀧𑀭𑀺𑀬𑀼𑀝𑁆𑀞𑀸𑀦𑀸 𑀧𑀳𑀻𑀦𑀸𑀢𑀺 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀏𑀢𑀭𑀳𑀺 𑀅𑀦𑁆𑀥𑀓𑀸𑀦𑀜𑁆𑀘𑁂𑀯 𑀲𑀫𑁆𑀫𑀺𑀢𑀺𑀬𑀸𑀦𑀜𑁆𑀘; 𑀢𑁂𑀲𑀁 𑀅𑀜𑁆𑀜𑀢𑀭𑀁 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀫𑀕𑁆𑀕𑀓𑁆𑀔𑀡𑀢𑁄 𑀧𑀝𑁆𑀞𑀸𑀬 𑀤𑀺𑀝𑁆𑀞𑀺𑀬𑀸 𑀅𑀦𑀼𑀧𑁆𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀢𑀢𑁄 𑀬𑀲𑁆𑀫𑀸 𑀤𑀺𑀝𑁆𑀞𑀺 𑀦𑀸𑀫𑁂𑀲𑀸 𑀲𑁄𑀢𑀸𑀧𑀦𑁆𑀦𑀲𑁆𑀲𑁂𑀯 𑀧𑀳𑀻𑀦𑀸, 𑀦 𑀫𑀕𑁆𑀕𑀝𑁆𑀞𑀲𑁆𑀲, 𑀢𑀲𑁆𑀫𑀸 𑀅𑀝𑁆𑀞𑀫𑀓𑁄 𑀧𑀼𑀕𑁆𑀕𑀮𑁄 𑀲𑁄𑀢𑀸𑀧𑀦𑁆𑀦𑁄𑀢𑀺 𑀅𑀦𑀼𑀬𑁄𑀕𑁄 𑀲𑀓𑀯𑀸𑀤𑀺𑀲𑁆𑀲. 𑀯𑀺𑀘𑀺𑀓𑀺𑀘𑁆𑀙𑀸𑀧𑀜𑁆𑀳𑁂𑀧𑀺 𑀏𑀲𑁂𑀯 𑀦𑀬𑁄. 𑀅𑀦𑀼𑀲𑀬𑀧𑀜𑁆𑀳𑁂 𑀧𑀭𑀺𑀬𑀼𑀝𑁆𑀞𑀸𑀦𑀢𑁄 𑀅𑀜𑁆𑀜𑁄 𑀅𑀦𑀼𑀲𑀬𑁄𑀢𑀺 𑀢𑁂𑀲𑀁 𑀮𑀤𑁆𑀥𑀺, 𑀢𑀲𑁆𑀫𑀸 ‘‘𑀦 𑀳𑁂𑀯’’𑀦𑁆𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑀁.

𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀧𑀜𑁆𑀳𑁂𑀧𑀺 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀧𑀭𑀺𑀬𑀼𑀝𑁆𑀞𑀸𑀦𑀦𑁆𑀢𑀺 𑀯𑁄𑀳𑀸𑀭𑀁 𑀦 𑀧𑀲𑁆𑀲𑀢𑀺, 𑀢𑀲𑁆𑀫𑀸 𑀧𑀝𑀺𑀓𑁆𑀔𑀺𑀧𑀢𑀺. 𑀧𑀭𑀺𑀬𑀼𑀝𑁆𑀞𑀸𑀦𑀫𑁂𑀯𑀲𑁆𑀲 𑀧𑀳𑀻𑀦𑀦𑁆𑀢𑀺 𑀮𑀤𑁆𑀥𑀺.

𑁩𑁬𑁯. 𑀫𑀕𑁆𑀕𑁄 𑀪𑀸𑀯𑀺𑀢𑁄𑀢𑀺 𑀧𑀜𑁆𑀳𑁂 𑀢𑀲𑁆𑀫𑀺𑀁 𑀔𑀡𑁂 𑀪𑀸𑀯𑁂𑀢𑀺, 𑀦 𑀪𑀸𑀯𑀺𑀢𑁄. 𑀢𑀲𑁆𑀫𑀸 𑀧𑀝𑀺𑀓𑁆𑀔𑀺𑀧𑀢𑀺. 𑀅𑀫𑀕𑁆𑀕𑁂𑀦𑀸𑀢𑀺𑀆𑀤𑀺𑀅𑀦𑀼𑀬𑁄𑀕𑁂 𑀧𑀞𑀫𑀫𑀕𑁆𑀕𑁂𑀦𑁂𑀯 𑀧𑀳𑀻𑀦𑀪𑀸𑀯𑀁 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺. 𑀬𑀤𑀺 𑀳𑀺 𑀅𑀫𑀕𑁆𑀕𑁂𑀦 𑀧𑀳𑀻𑀬𑁂𑀣, 𑀕𑁄𑀢𑁆𑀭𑀪𑀼𑀧𑀼𑀕𑁆𑀕𑀮𑀸𑀤𑀻𑀦𑀫𑁆𑀧𑀺 𑀧𑀳𑀻𑀬𑁂𑀣𑀸𑀢𑀺 𑀆𑀧𑀚𑁆𑀚𑀦𑀢𑁄. 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀧𑀼𑀘𑁆𑀙𑀸 𑀧𑀭𑀯𑀸𑀤𑀺𑀲𑁆𑀲, 𑀯𑀺𑀲𑁆𑀲𑀚𑁆𑀚𑀦𑀁 𑀲𑀓𑀯𑀸𑀤𑀺𑀲𑁆𑀲. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀅𑀝𑁆𑀞𑀫𑀓𑀓𑀣𑀸𑀯𑀡𑁆𑀡𑀦𑀸.

𑁬. 𑀅𑀝𑁆𑀞𑀫𑀓𑀲𑁆𑀲 𑀇𑀦𑁆𑀤𑁆𑀭𑀺𑀬𑀓𑀣𑀸𑀯𑀡𑁆𑀡𑀦𑀸

𑁩𑁭𑁧. 𑀇𑀤𑀸𑀦𑀺 𑀅𑀝𑁆𑀞𑀫𑀓𑀲𑁆𑀲 𑀇𑀦𑁆𑀤𑁆𑀭𑀺𑀬𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑁂𑀲𑀁 ‘‘𑀅𑀝𑁆𑀞𑀫𑀓𑁄 𑀫𑀕𑁆𑀕𑀓𑁆𑀔𑀡𑁂 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀝𑀺𑀮𑀪𑀢𑀺 𑀦𑀸𑀫, 𑀦𑁄 𑀘𑀲𑁆𑀲 𑀧𑀝𑀺𑀮𑀤𑁆𑀥𑀸𑀦𑀺 𑀳𑁄𑀦𑁆𑀢𑀻’’𑀢𑀺 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀏𑀢𑀭𑀳𑀺 𑀅𑀦𑁆𑀥𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀦𑀢𑁆𑀣𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀦𑀢𑁆𑀣𑀺 𑀲𑀤𑁆𑀥𑀸𑀢𑀺 𑀧𑀼𑀝𑁆𑀞𑁄 𑀧𑀦 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀢𑁄 𑀲𑀤𑁆𑀥𑀸𑀬 𑀦𑀸𑀦𑀢𑁆𑀢𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀧𑀝𑀺𑀓𑁆𑀔𑀺𑀧𑀢𑀺. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀬𑀣𑀸 𑀧𑀦 𑀬𑀲𑁆𑀲 𑀅𑀢𑁆𑀣𑀺 𑀫𑀦𑁄, 𑀢𑀲𑁆𑀲 𑀫𑀦𑀺𑀦𑁆𑀤𑁆𑀭𑀺𑀬𑀫𑁆𑀧𑀺 𑀅𑀢𑁆𑀣𑀺; 𑀏𑀯𑀁 𑀬𑀲𑁆𑀲 𑀲𑀤𑁆𑀥𑀸𑀤𑀬𑁄 𑀅𑀢𑁆𑀣𑀺, 𑀢𑀲𑁆𑀲 𑀅𑀢𑁆𑀣𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀺𑀧𑀻𑀢𑀺 𑀤𑀻𑀧𑀦𑀢𑁆𑀣𑀁 𑀅𑀢𑁆𑀣𑀺 𑀫𑀦𑁄 𑀅𑀢𑁆𑀣𑀺 𑀫𑀦𑀺𑀦𑁆𑀤𑁆𑀭𑀺𑀬𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀁 𑀲𑀩𑁆𑀩𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯 𑀲𑀤𑁆𑀥𑀺𑀁 𑀲𑀼𑀢𑁆𑀢𑀲𑀸𑀥𑀦𑁂𑀦𑀸𑀢𑀺.

𑀅𑀝𑁆𑀞𑀫𑀓𑀲𑁆𑀲 𑀇𑀦𑁆𑀤𑁆𑀭𑀺𑀬𑀓𑀣𑀸𑀯𑀡𑁆𑀡𑀦𑀸.

𑁭. 𑀤𑀺𑀩𑁆𑀩𑀘𑀓𑁆𑀔𑀼𑀓𑀣𑀸𑀯𑀡𑁆𑀡𑀦𑀸

𑁩𑁭𑁩. 𑀇𑀤𑀸𑀦𑀺 𑀤𑀺𑀩𑁆𑀩𑀘𑀓𑁆𑀔𑀼𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑁂𑀲𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀥𑀫𑁆𑀫𑀽𑀧𑀢𑁆𑀣𑀤𑁆𑀥𑀁 𑀫𑀁𑀲𑀘𑀓𑁆𑀔𑀼𑀫𑁂𑀯 𑀤𑀺𑀩𑁆𑀩𑀘𑀓𑁆𑀔𑀼 𑀦𑀸𑀫 𑀳𑁄𑀢𑀻𑀢𑀺 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀏𑀢𑀭𑀳𑀺 𑀅𑀦𑁆𑀥𑀓𑀸𑀦𑀜𑁆𑀘𑁂𑀯 𑀲𑀫𑁆𑀫𑀺𑀢𑀺𑀬𑀸𑀦𑀜𑁆𑀘; 𑀢𑁂 𑀲𑀦𑁆𑀥𑀸𑀬 𑀫𑀁𑀲𑀘𑀓𑁆𑀔𑀼𑀦𑁆𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲.

𑀧𑀼𑀦 ‘‘𑀫𑀁𑀲𑀘𑀓𑁆𑀔𑀼 𑀤𑀺𑀩𑁆𑀩𑀘𑀓𑁆𑀔𑀼, 𑀤𑀺𑀩𑁆𑀩𑀘𑀓𑁆𑀔𑀼 𑀫𑀁𑀲𑀘𑀓𑁆𑀔𑀽’’𑀢𑀺 𑀧𑀼𑀝𑁆𑀞𑁄 𑀢𑀁 𑀫𑀢𑁆𑀢𑀫𑁂𑀯 𑀢𑀁 𑀦 𑀳𑁄𑀢𑀻𑀢𑀺 𑀧𑀝𑀺𑀓𑁆𑀔𑀺𑀧𑀢𑀺. 𑀬𑀸𑀤𑀺𑀲𑀦𑁆𑀢𑀺𑀆𑀤𑀺𑀧𑀼𑀘𑁆𑀙𑀸𑀲𑀼𑀧𑀺 𑀉𑀪𑀺𑀦𑁆𑀦𑀁 𑀏𑀓𑀲𑀪𑀸𑀯𑀸𑀪𑀸𑀯𑁂𑀦𑁂𑀯 𑀧𑀝𑀺𑀓𑁆𑀔𑀺𑀧𑀢𑀺.

𑀯𑀺𑀲𑀬𑁄𑀢𑀺𑀆𑀤𑀻𑀲𑀼 𑀉𑀪𑀺𑀦𑁆𑀦𑀫𑁆𑀧𑀺 𑀭𑀽𑀧𑀸𑀬𑀢𑀦𑀫𑁂𑀯 𑀯𑀺𑀲𑀬𑁄. 𑀫𑀁𑀲𑀘𑀓𑁆𑀔𑀼 𑀧𑀦 𑀆𑀧𑀸𑀣𑀕𑀢𑀫𑁂𑀯 𑀧𑀲𑁆𑀲𑀢𑀺. 𑀇𑀢𑀭𑀁 𑀅𑀦𑀸𑀧𑀸𑀣𑀕𑀢𑀁 𑀢𑀺𑀭𑁄𑀧𑀩𑁆𑀩𑀢𑀸𑀤𑀺𑀕𑀢𑀫𑁆𑀧𑀺. 𑀤𑀺𑀩𑁆𑀩𑀘𑀓𑁆𑀔𑀼𑀲𑁆𑀲 𑀘 𑀅𑀢𑀺𑀲𑀼𑀔𑀼𑀫𑀫𑁆𑀧𑀺 𑀭𑀽𑀧𑀁 𑀕𑁄𑀘𑀭𑁄, 𑀦 𑀢𑀸𑀤𑀺𑀲𑀁 𑀇𑀢𑀭𑀲𑁆𑀲𑀸𑀢𑀺 𑀏𑀯𑀫𑁂𑀢𑁂𑀲𑀁 𑀆𑀦𑀼𑀪𑀸𑀯𑀕𑁄𑀘𑀭𑀸 𑀅𑀲𑀤𑀺𑀲𑀸.

𑀉𑀧𑀸𑀤𑀺𑀡𑁆𑀡𑀁 𑀳𑀼𑀢𑁆𑀯𑀸 𑀅𑀦𑀼𑀧𑀸𑀤𑀺𑀡𑁆𑀡𑀁 𑀳𑁄𑀢𑀻𑀢𑀺 𑀧𑀼𑀝𑁆𑀞𑁄 𑀬𑀲𑁆𑀫𑀸 𑀫𑀁𑀲𑀘𑀓𑁆𑀔𑀼 𑀉𑀧𑀸𑀤𑀺𑀡𑁆𑀡𑀁, 𑀤𑀺𑀩𑁆𑀩𑀘𑀓𑁆𑀔𑀼 𑀅𑀦𑀼𑀧𑀸𑀤𑀺𑀡𑁆𑀡𑀁, 𑀦 𑀘 𑀫𑀁𑀲𑀘𑀓𑁆𑀔𑀼𑀫𑁂𑀯 𑀤𑀺𑀩𑁆𑀩𑀘𑀓𑁆𑀔𑀽𑀢𑀺 𑀇𑀘𑁆𑀙𑀢𑀺, 𑀢𑀲𑁆𑀫𑀸 𑀧𑀝𑀺𑀓𑁆𑀔𑀺𑀧𑀢𑀺. 𑀤𑀼𑀢𑀺𑀬𑀁 𑀧𑀼𑀝𑁆𑀞𑁄 𑀬𑀲𑁆𑀫𑀸 ‘‘𑀫𑀁𑀲𑀘𑀓𑁆𑀔𑀼𑀲𑁆𑀲 𑀉𑀧𑁆𑀧𑀸𑀤𑁄, 𑀫𑀕𑁆𑀕𑁄 𑀤𑀺𑀩𑁆𑀩𑀲𑁆𑀲 𑀘𑀓𑁆𑀔𑀼𑀦𑁄’’𑀢𑀺 𑀯𑀘𑀦𑀁 𑀦𑀺𑀲𑁆𑀲𑀸𑀬 𑀫𑀁𑀲𑀘𑀓𑁆𑀔𑀼𑀧𑀘𑁆𑀘𑀬𑀸 𑀤𑀺𑀩𑁆𑀩𑀘𑀓𑁆𑀔𑀼 𑀉𑀧𑁆𑀧𑀚𑁆𑀚𑀢𑀺, 𑀢𑀜𑁆𑀘 𑀭𑀽𑀧𑀸𑀯𑀘𑀭𑀺𑀓𑀸𑀦𑀁 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀧𑀲𑀸𑀤𑁄𑀢𑀺 𑀇𑀘𑁆𑀙𑀢𑀺, 𑀢𑀲𑁆𑀫𑀸 𑀧𑀝𑀺𑀚𑀸𑀦𑀸𑀢𑀺. 𑀓𑀸𑀫𑀸𑀯𑀘𑀭𑀁 𑀳𑀼𑀢𑁆𑀯𑀸𑀢𑀺 𑀧𑀼𑀝𑁆𑀞𑁄𑀧𑀺 𑀬𑀲𑁆𑀫𑀸 𑀦 𑀫𑀁𑀲𑀘𑀓𑁆𑀔𑀼𑀫𑁂𑀯 𑀤𑀺𑀩𑁆𑀩𑀘𑀓𑁆𑀔𑀽𑀢𑀺 𑀇𑀘𑁆𑀙𑀢𑀺, 𑀢𑀲𑁆𑀫𑀸 𑀧𑀝𑀺𑀓𑁆𑀔𑀺𑀧𑀢𑀺. 𑀤𑀼𑀢𑀺𑀬𑀁 𑀧𑀼𑀝𑁆𑀞𑁄 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀧𑀘𑁆𑀘𑀬𑁂𑀦 𑀉𑀧𑁆𑀧𑀦𑁆𑀦𑀢𑁆𑀢𑀸 𑀭𑀽𑀧𑀸𑀯𑀘𑀭𑀁 𑀦𑀸𑀫 𑀚𑀸𑀢𑀦𑁆𑀢𑀺 𑀧𑀝𑀺𑀚𑀸𑀦𑀸𑀢𑀺.

𑀭𑀽𑀧𑀸𑀯𑀘𑀭𑀁 𑀳𑀼𑀢𑁆𑀯𑀸 𑀅𑀭𑀽𑀧𑀸𑀯𑀘𑀭𑀦𑁆𑀢𑀺 𑀧𑀼𑀝𑁆𑀞𑁄𑀧𑀺 𑀢𑀢𑁄 𑀧𑀭𑀁 𑀪𑀸𑀯𑀦𑀸𑀬 𑀅𑀭𑀽𑀧𑀸𑀯𑀘𑀭𑀓𑁆𑀔𑀡𑁂 𑀭𑀽𑀧𑀸𑀯𑀘𑀭𑀘𑀺𑀢𑁆𑀢𑀲𑁆𑀲 𑀅𑀪𑀸𑀯𑀸 𑀧𑀝𑀺𑀓𑁆𑀔𑀺𑀧𑀢𑀺. 𑀤𑀼𑀢𑀺𑀬𑀁 𑀧𑀼𑀝𑁆𑀞𑁄 𑀅𑀭𑀽𑀧𑀸𑀯𑀘𑀭𑀺𑀓𑀸𑀦𑀁 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀧𑀲𑀸𑀤𑁄 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀮𑀤𑁆𑀥𑀺𑀬𑀸 𑀧𑀝𑀺𑀚𑀸𑀦𑀸𑀢𑀺. 𑀅𑀧𑀭𑀺𑀬𑀸𑀧𑀦𑁆𑀦𑀪𑀸𑀯𑀁 𑀧𑀦𑀲𑁆𑀲 𑀦 𑀇𑀘𑁆𑀙𑀢𑀺, 𑀢𑀲𑁆𑀫𑀸 𑀧𑀝𑀺𑀓𑁆𑀔𑀺𑀧𑀢𑀺𑀬𑁂𑀯.

𑁩𑁭𑁪. 𑀤𑀺𑀩𑁆𑀩𑀘𑀓𑁆𑀔𑀼𑀁 𑀥𑀫𑁆𑀫𑀼𑀧𑀢𑁆𑀣𑀤𑁆𑀥𑀦𑁆𑀢𑀺 𑀓𑀸𑀫𑀸𑀯𑀘𑀭𑀥𑀫𑁆𑀫𑁂𑀦 𑀉𑀧𑀢𑁆𑀣𑀫𑁆𑀪𑀺𑀢𑀁 𑀳𑀼𑀢𑁆𑀯𑀸. 𑀧𑀼𑀦 𑀥𑀫𑁆𑀫𑀼𑀧𑀢𑁆𑀣𑀤𑁆𑀥𑀦𑁆𑀢𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂𑀦 𑀉𑀧𑀢𑁆𑀣𑀤𑁆𑀥𑀁. 𑀤𑁆𑀯𑁂𑀯 𑀘𑀓𑁆𑀔𑀽𑀦𑀻𑀢𑀺 𑀧𑀼𑀝𑁆𑀞𑁄 𑀓𑀺𑀜𑁆𑀘𑀸𑀧𑀺 𑀤𑀺𑀩𑁆𑀩𑀘𑀓𑁆𑀔𑀼𑀦𑁄 𑀥𑀫𑁆𑀫𑀼𑀧𑀢𑁆𑀣𑀤𑁆𑀥𑀲𑁆𑀲 𑀧𑀜𑁆𑀜𑀸𑀘𑀓𑁆𑀔𑀼𑀪𑀸𑀯𑀁 𑀦 𑀇𑀘𑁆𑀙𑀢𑀺, 𑀧𑀜𑁆𑀜𑀸𑀘𑀓𑁆𑀔𑀼𑀲𑁆𑀲 𑀧𑀦 𑀅𑀢𑁆𑀣𑀺𑀢𑀸𑀬 𑀧𑀝𑀺𑀓𑁆𑀔𑀺𑀧𑀢𑀺. 𑀧𑀼𑀦 𑀧𑀼𑀝𑁆𑀞𑁄 𑀫𑀁𑀲𑀘𑀓𑁆𑀔𑀼 𑀥𑀫𑁆𑀫𑀼𑀧𑀢𑁆𑀣𑀤𑁆𑀥𑀁 𑀤𑀺𑀩𑁆𑀩𑀘𑀓𑁆𑀔𑀼 𑀳𑁄𑀢𑀻𑀢𑀺 𑀮𑀤𑁆𑀥𑀺𑀯𑀲𑁂𑀦 𑀧𑀝𑀺𑀚𑀸𑀦𑀸𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀤𑀺𑀩𑁆𑀩𑀘𑀓𑁆𑀔𑀼𑀓𑀣𑀸𑀯𑀡𑁆𑀡𑀦𑀸.

𑁮. 𑀤𑀺𑀩𑁆𑀩𑀲𑁄𑀢𑀓𑀣𑀸𑀯𑀡𑁆𑀡𑀦𑀸

𑁩𑁭𑁫. 𑀇𑀤𑀸𑀦𑀺 𑀤𑀺𑀩𑁆𑀩𑀲𑁄𑀢𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀏𑀓𑀁𑀬𑁂𑀯 𑀲𑁄𑀢𑀦𑁆𑀢𑀺 𑀧𑀼𑀝𑁆𑀞𑁄 𑀤𑁆𑀯𑀺𑀦𑁆𑀦𑀁 𑀅𑀢𑁆𑀣𑀺𑀢𑀸𑀬 𑀧𑀝𑀺𑀓𑁆𑀔𑀺𑀧𑀢𑀺. 𑀧𑀼𑀦 𑀧𑀼𑀝𑁆𑀞𑁄 𑀬𑀲𑁆𑀫𑀸 𑀢𑀤𑁂𑀯 𑀥𑀫𑁆𑀫𑀼𑀧𑀢𑁆𑀣𑀤𑁆𑀥𑀁 𑀤𑀺𑀩𑁆𑀩𑀲𑁄𑀢𑀁 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀧𑀝𑀺𑀚𑀸𑀦𑀸𑀢𑀺. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀤𑀺𑀩𑁆𑀩𑀲𑁄𑀢𑀓𑀣𑀸𑀯𑀡𑁆𑀡𑀦𑀸.

𑁯. 𑀬𑀣𑀸𑀓𑀫𑁆𑀫𑀽𑀧𑀕𑀢𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁩𑁭𑁭. 𑀇𑀤𑀸𑀦𑀺 𑀬𑀣𑀸𑀓𑀫𑁆𑀫𑀽𑀧𑀕𑀢𑀜𑀸𑀡𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑁂𑀲𑀁 ‘‘𑀇𑀢𑀺 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦…𑀧𑁂… 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀻’’𑀢𑀺 (𑀤𑀻. 𑀦𑀺. 𑁧.𑁨𑁪𑁬; 𑀧𑀝𑀺. 𑀫. 𑁧.𑁧𑁦𑁬) 𑀲𑀼𑀢𑁆𑀢𑀁 𑀅𑀬𑁄𑀦𑀺𑀲𑁄 𑀕𑀳𑁂𑀢𑁆𑀯𑀸 𑀬𑀣𑀸𑀓𑀫𑁆𑀫𑀽𑀧𑀕𑀢𑀜𑀸𑀡𑀫𑁂𑀯 𑀤𑀺𑀩𑁆𑀩𑀘𑀓𑁆𑀔𑀼𑀦𑁆𑀢𑀺 𑀮𑀤𑁆𑀥𑀺, 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀧𑀼𑀦 𑀬𑀣𑀸𑀓𑀫𑁆𑀫𑀽𑀧𑀕𑀢𑀜𑁆𑀘 𑀫𑀦𑀲𑀺 𑀓𑀭𑁄𑀢𑀻𑀢𑀺 𑀧𑀼𑀝𑁆𑀞𑁄 𑀏𑀓𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑀤𑁆𑀯𑀬𑀸𑀪𑀸𑀯𑀸 𑀧𑀝𑀺𑀓𑁆𑀔𑀺𑀧𑀢𑀺. 𑀤𑀼𑀢𑀺𑀬𑀁 𑀧𑀼𑀝𑁆𑀞𑁄 𑀦𑀸𑀦𑀸𑀘𑀺𑀢𑁆𑀢𑀯𑀲𑁂𑀦 𑀧𑀝𑀺𑀚𑀸𑀦𑀸𑀢𑀺. 𑀧𑀼𑀦 𑀮𑁂𑀲𑁄𑀓𑀸𑀲𑀁 𑀅𑀤𑀢𑁆𑀯𑀸 𑀤𑁆𑀯𑀺𑀦𑁆𑀦𑀁 𑀨𑀲𑁆𑀲𑀸𑀦𑀦𑁆𑀢𑀺 𑀧𑀼𑀝𑁆𑀞𑁄 𑀧𑀝𑀺𑀓𑁆𑀔𑀺𑀧𑀢𑀺. 𑀇𑀢𑀺 𑀬𑀣𑀸 𑀇𑀫𑀺𑀦𑀸 𑀬𑀣𑀸𑀓𑀫𑁆𑀫𑀽𑀧𑀕𑀢𑀧𑀤𑁂𑀦, 𑀏𑀯𑀫𑁂𑀯 𑀇𑀫𑁂 𑀯𑀢 𑀪𑁄𑀦𑁆𑀢𑁄, 𑀲𑀢𑁆𑀢𑀸𑀢𑀺𑀆𑀤𑀺𑀧𑀤𑁂𑀳𑀺𑀧𑀺 𑀲𑀤𑁆𑀥𑀺𑀁 𑀬𑁄𑀚𑀦𑀸𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁩𑁭𑁮. 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀬𑀣𑀸𑀓𑀫𑁆𑀫𑀽𑀧𑀕𑀢𑀁 𑀜𑀸𑀡𑀁 𑀚𑀸𑀦𑀸𑀢𑀻𑀢𑀺 𑀇𑀤𑀁 𑀲𑀓𑀯𑀸𑀤𑀻 𑀬𑀲𑁆𑀫𑀸 𑀣𑁂𑀭𑁄 𑀅𑀧𑁆𑀧𑀺𑀘𑁆𑀙𑀢𑀸𑀬 𑀅𑀪𑀺𑀜𑁆𑀜𑀸𑀜𑀸𑀡𑀸𑀦𑀺 𑀦 𑀯𑀴𑀜𑁆𑀚𑁂𑀢𑀻𑀢𑀺 𑀏𑀓𑀘𑁆𑀘𑁂 𑀦 𑀚𑀸𑀦𑀦𑁆𑀢𑀺, 𑀢𑀸𑀦𑀺 𑀧𑀦𑀲𑁆𑀲 𑀦𑁂𑀯 𑀅𑀢𑁆𑀣𑀻𑀢𑀺 𑀫𑀜𑁆𑀜𑀦𑁆𑀢𑀺, 𑀢𑀲𑁆𑀫𑀸 𑀢𑀁 ‘‘𑀤𑀺𑀩𑁆𑀩𑀘𑀓𑁆𑀔𑀼𑀦𑁄 𑀅𑀮𑀸𑀪𑀻 𑀣𑁂𑀭𑁄’’𑀢𑀺 𑀫𑀜𑁆𑀜𑀫𑀸𑀦𑀁 𑀧𑀼𑀘𑁆𑀙𑀢𑀺. 𑀢𑁂𑀦𑁂𑀯 𑀓𑀸𑀭𑀡𑁂𑀦 ‘‘𑀅𑀢𑁆𑀣𑀸𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀤𑀺𑀩𑁆𑀩𑀘𑀓𑁆𑀔𑀽’’𑀢𑀺 𑀧𑀭𑀢𑁄 𑀧𑀼𑀝𑁆𑀞𑁄 𑀧𑀝𑀺𑀓𑁆𑀔𑀺𑀧𑀢𑀺. 𑀤𑀼𑀢𑀺𑀬𑀁 𑀧𑀼𑀝𑁆𑀞𑁄 𑀬𑀁𑀓𑀺𑀜𑁆𑀘𑀺 𑀲𑀸𑀯𑀓𑁂𑀦 𑀧𑀢𑁆𑀢𑀩𑁆𑀩𑀁, 𑀲𑀩𑁆𑀩𑀁 𑀢𑀁 𑀣𑁂𑀭𑁂𑀦 𑀅𑀦𑀼𑀧𑁆𑀧𑀢𑁆𑀢𑀦𑁆𑀢𑀺 𑀧𑀝𑀺𑀚𑀸𑀦𑀸𑀢𑀺. 𑀇𑀤𑀸𑀦𑀺𑀲𑁆𑀲 𑀯𑀺𑀓𑁆𑀔𑁂𑀧𑀁 𑀓𑀭𑁄𑀦𑁆𑀢𑁄 𑀲𑀓𑀯𑀸𑀤𑀻 𑀦𑀦𑀼 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄𑀢𑀺𑀆𑀤𑀺𑀫𑀸𑀳. 𑀇𑀫𑀜𑁆𑀳𑀺 𑀕𑀸𑀣𑀁 𑀣𑁂𑀭𑁄 𑀯𑀴𑀜𑁆𑀚𑀦𑀧𑀡𑀺𑀥𑀺𑀬𑀸 𑀏𑀯 𑀅𑀪𑀸𑀯𑁂𑀦 𑀆𑀳, 𑀦 𑀅𑀪𑀺𑀜𑁆𑀜𑀸𑀜𑀸𑀡𑀲𑁆𑀲 𑀅𑀪𑀸𑀯𑁂𑀦. 𑀧𑀭𑀯𑀸𑀤𑀻 𑀧𑀦 𑀅𑀪𑀸𑀯𑁂𑀦𑁂𑀯𑀸𑀢𑀺 𑀅𑀢𑁆𑀣𑀁 𑀲𑀮𑁆𑀮𑀓𑁆𑀔𑁂𑀢𑀺. 𑀢𑀲𑁆𑀫𑀸 𑀢𑀲𑁆𑀲 𑀮𑀤𑁆𑀥𑀺𑀬𑀸 𑀣𑁂𑀭𑀲𑁆𑀲 𑀬𑀣𑀸𑀓𑀫𑁆𑀫𑀽𑀧𑀕𑀢𑀜𑀸𑀡𑀫𑁂𑀯 𑀅𑀢𑁆𑀣𑀺, 𑀦𑁄 𑀤𑀺𑀩𑁆𑀩𑀘𑀓𑁆𑀔𑀼. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑁂𑀦 𑀳𑀺 𑀦 𑀯𑀢𑁆𑀢𑀩𑁆𑀩𑀁 𑀬𑀣𑀸𑀓𑀫𑁆𑀫𑀽𑀧𑀕𑀢𑀜𑀸𑀡𑀁 𑀤𑀺𑀩𑁆𑀩𑀘𑀓𑁆𑀔𑀽’’𑀢𑀺.

𑀬𑀣𑀸𑀓𑀫𑁆𑀫𑀽𑀧𑀕𑀢𑀜𑀸𑀡𑀓𑀣𑀸𑀯𑀡𑁆𑀡𑀦𑀸.

𑁧𑁦. 𑀲𑀁𑀯𑀭𑀓𑀣𑀸𑀯𑀡𑁆𑀡𑀦𑀸

𑁩𑁭𑁯. 𑀇𑀤𑀸𑀦𑀺 𑀲𑀁𑀯𑀭𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑁂𑀲𑀁 𑀢𑀸𑀯𑀢𑀺𑀁𑀲𑁂 𑀤𑁂𑀯𑁂 𑀉𑀧𑀸𑀤𑀸𑀬 𑀢𑀢𑀼𑀢𑁆𑀢𑀭𑀺 𑀤𑁂𑀯𑁂𑀲𑀼 𑀬𑀲𑁆𑀫𑀸 𑀢𑁂 𑀧𑀜𑁆𑀘 𑀯𑁂𑀭𑀸𑀦𑀺 𑀦 𑀲𑀫𑀸𑀘𑀭𑀦𑁆𑀢𑀺, 𑀢𑀲𑁆𑀫𑀸 𑀲𑀁𑀯𑀭𑁄 𑀅𑀢𑁆𑀣𑀻𑀢𑀺 𑀮𑀤𑁆𑀥𑀺, 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀯𑁂𑀭𑀲𑀫𑀼𑀤𑀸𑀘𑀸𑀭𑀁 𑀅𑀧𑀲𑁆𑀲𑀢𑁄 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀢𑀢𑁄 𑀬𑀲𑁆𑀫𑀸 𑀲𑀁𑀯𑀭𑁄 𑀦𑀸𑀫 𑀲𑀁𑀯𑀭𑀺𑀢𑀩𑁆𑀩𑁂 𑀅𑀲𑀁𑀯𑀭𑁂 𑀲𑀢𑀺 𑀳𑁄𑀢𑀺, 𑀢𑀲𑁆𑀫𑀸 𑀅𑀲𑀁𑀯𑀭𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀤𑁂𑀯𑁂𑀲𑀼 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀁 𑀅𑀪𑀸𑀯𑁂𑀦 𑀧𑀝𑀺𑀓𑁆𑀔𑁂𑀧𑁄 𑀇𑀢𑀭𑀲𑁆𑀲.

𑀅𑀢𑁆𑀣𑀺 𑀫𑀦𑀼𑀲𑁆𑀲𑁂𑀲𑀽𑀢𑀺𑀆𑀤𑀺 𑀲𑀁𑀯𑀭𑁂 𑀲𑀢𑀺 𑀅𑀲𑀁𑀯𑀭𑀲𑁆𑀲 𑀅𑀲𑀁𑀯𑀭𑁂 𑀘 𑀲𑀢𑀺 𑀲𑀁𑀯𑀭𑀲𑁆𑀲 𑀧𑀯𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁.

𑁩𑁮𑁦. 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀻𑀢𑀺 𑀆𑀤𑀺𑀧𑀜𑁆𑀳𑁂𑀲𑀼 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀁 𑀅𑀲𑀫𑀸𑀘𑀭𑀡𑀯𑀲𑁂𑀦 𑀧𑀝𑀺𑀜𑁆𑀜𑀸, 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀁 𑀦𑀢𑁆𑀣𑀺𑀢𑀸𑀬 𑀧𑀝𑀺𑀓𑁆𑀔𑁂𑀧𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀝𑀺𑀮𑁄𑀫𑀧𑀜𑁆𑀳𑀸 𑀉𑀢𑁆𑀢𑀸𑀦𑀢𑁆𑀣𑀸𑀬𑁂𑀯.

𑀅𑀯𑀲𑀸𑀦𑁂 𑀦𑀢𑁆𑀣𑀺 𑀤𑁂𑀯𑁂𑀲𑀼 𑀲𑀁𑀯𑀭𑁄𑀢𑀺𑀧𑀜𑁆𑀳𑁂 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀓𑀢𑁆𑀯𑀸 𑀧𑀼𑀦 𑀢𑀢𑁄 𑀲𑀁𑀯𑀭𑀸𑀪𑀸𑀯𑀁 𑀲𑀦𑁆𑀥𑀸𑀬 𑀧𑀝𑀺𑀜𑁆𑀜𑀸 𑀲𑀓𑀯𑀸𑀤𑀺𑀲𑁆𑀲. 𑀢𑀢𑁄 𑀙𑀮𑀯𑀲𑁂𑀦 𑀬𑀤𑀺 𑀲𑀁𑀯𑀭𑁄 𑀦𑀢𑁆𑀣𑀺, 𑀲𑀩𑁆𑀩𑁂 𑀤𑁂𑀯𑀸 𑀧𑀸𑀡𑀸𑀢𑀺𑀧𑀸𑀢𑀺𑀦𑁄𑀢𑀺𑀆𑀤𑀺𑀧𑀼𑀘𑁆𑀙𑀸 𑀧𑀭𑀯𑀸𑀤𑀺𑀲𑁆𑀲. 𑀤𑁂𑀯𑀸𑀦𑀁 𑀯𑁂𑀭𑀲𑀫𑀼𑀤𑀸𑀘𑀸𑀭𑀲𑁆𑀲 𑀅𑀪𑀸𑀯𑁂𑀦 𑀧𑀝𑀺𑀓𑁆𑀔𑁂𑀧𑁄 𑀲𑀓𑀯𑀸𑀤𑀺𑀲𑁆𑀲. 𑀦𑀳𑁂𑀯𑀦𑁆𑀢𑀺 𑀯𑀘𑀦𑀫𑀢𑁆𑀢𑀁 𑀕𑀳𑁂𑀢𑁆𑀯𑀸 𑀮𑀤𑁆𑀥𑀺𑀧𑀢𑀺𑀝𑁆𑀞𑀸𑀧𑀦𑀁 𑀧𑀭𑀯𑀸𑀤𑀺𑀲𑁆𑀲. 𑀏𑀯𑀁 𑀧𑀢𑀺𑀝𑁆𑀞𑀺𑀢𑀸 𑀧𑀦 𑀮𑀤𑁆𑀥𑀺 𑀅𑀧𑁆𑀧𑀢𑀺𑀝𑁆𑀞𑀺𑀢𑀸𑀯 𑀳𑁄𑀢𑀻𑀢𑀺.

𑀲𑀁𑀯𑀭𑀓𑀣𑀸𑀯𑀡𑁆𑀡𑀦𑀸.

𑁧𑁧. 𑀅𑀲𑀜𑁆𑀜𑀓𑀣𑀸𑀯𑀡𑁆𑀡𑀦𑀸

𑁩𑁮𑁧. 𑀇𑀤𑀸𑀦𑀺 𑀅𑀲𑀜𑁆𑀜𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑁂𑀲𑀁 ‘‘𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀯𑀘𑀦𑀢𑁄 𑀯𑀺𑀦𑀸 𑀯𑀺𑀜𑁆𑀜𑀸𑀡𑁂𑀦 𑀧𑀝𑀺𑀲𑀦𑁆𑀥𑀺 𑀦𑀸𑀫 𑀦𑀢𑁆𑀣𑀺. ‘‘𑀲𑀜𑁆𑀜𑀼𑀧𑁆𑀧𑀸𑀤𑀸 𑀘 𑀧𑀦 𑀢𑁂 𑀤𑁂𑀯𑀸 𑀢𑀫𑁆𑀳𑀸 𑀓𑀸𑀬𑀸 𑀘𑀯𑀦𑁆𑀢𑀻’’𑀢𑀺 𑀯𑀘𑀦𑀢𑁄 𑀅𑀲𑀜𑁆𑀜𑀲𑀢𑁆𑀢𑀸𑀦𑀫𑁆𑀧𑀺 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀲𑀜𑁆𑀜𑀸 𑀅𑀢𑁆𑀣𑀻𑀢𑀺 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀏𑀢𑀭𑀳𑀺 𑀅𑀦𑁆𑀥𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀢𑀢𑁄 𑀦𑀁 𑀲𑀓𑀯𑀸𑀤𑀻 ‘‘𑀓𑀺𑀁 𑀢𑁂 𑀢𑀁 𑀞𑀸𑀦𑀁 𑀲𑀜𑁆𑀜𑀸𑀪𑀯𑁄’’𑀢𑀺𑀆𑀤𑀻𑀳𑀺 𑀘𑁄𑀤𑁂𑀢𑀼𑀁 𑀲𑀜𑁆𑀜𑀸𑀪𑀯𑁄 𑀲𑀜𑁆𑀜𑀸𑀕𑀢𑀻𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀩𑁆𑀩𑀁 𑀢𑀢𑁄 𑀧𑀭𑀜𑁆𑀘 𑀧𑀸𑀴𑀺𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀅𑀲𑀜𑁆𑀜𑀓𑀣𑀸𑀯𑀡𑁆𑀡𑀦𑀸.

𑁧𑁨. 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀓𑀣𑀸𑀯𑀡𑁆𑀡𑀦𑀸

𑁩𑁮𑁪. 𑀇𑀤𑀸𑀦𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑁂𑀲𑀁 ‘‘𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦’’𑀦𑁆𑀢𑀺 𑀯𑀘𑀦𑀢𑁄 𑀦 𑀯𑀢𑁆𑀢𑀩𑁆𑀩𑀁 ‘‘𑀢𑀲𑁆𑀫𑀺𑀁 𑀪𑀯𑁂 𑀲𑀜𑁆𑀜𑀸 𑀅𑀢𑁆𑀣𑀻’’𑀢𑀺 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀏𑀢𑀭𑀳𑀺 𑀅𑀦𑁆𑀥𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀧𑀝𑀺𑀜𑁆𑀜𑀸 𑀇𑀢𑀭𑀲𑁆𑀲. 𑀲𑁂𑀲𑀫𑁂𑀢𑁆𑀣 𑀲𑀩𑁆𑀩𑀁 𑀧𑀸𑀴𑀺𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀓𑀣𑀸𑀯𑀡𑁆𑀡𑀦𑀸.

𑀢𑀢𑀺𑀬𑁄 𑀯𑀕𑁆𑀕𑁄.