𑁧𑁦. 𑀯𑁄𑀳𑀸𑀭𑀓𑀣𑀸𑀯𑀡𑁆𑀡𑀦𑀸

𑁩𑁪𑁭. 𑀇𑀤𑀸𑀦𑀺 𑀯𑁄𑀳𑀸𑀭𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀩𑀼𑀤𑁆𑀥𑁄 𑀪𑀕𑀯𑀸 𑀮𑁄𑀓𑀼𑀢𑁆𑀢𑀭𑁂𑀦 𑀯𑁄𑀳𑀸𑀭𑁂𑀦 𑀯𑁄𑀳𑀭𑀢𑀻𑀢𑀺 𑀬𑁂𑀲𑀁 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀏𑀢𑀭𑀳𑀺 𑀅𑀦𑁆𑀥𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲, 𑀮𑀤𑁆𑀥𑀺𑀯𑀲𑁂𑀦 𑀧𑀝𑀺𑀜𑁆𑀜𑀸 𑀧𑀭𑀯𑀸𑀤𑀺𑀲𑁆𑀲. 𑀮𑁄𑀓𑀼𑀢𑁆𑀢𑀭𑁂 𑀲𑁄𑀢𑁂𑀢𑀺𑀆𑀤𑀻𑀦𑀺 𑀢𑀲𑁆𑀲 𑀅𑀬𑀼𑀢𑁆𑀢𑀯𑀸𑀤𑀻𑀪𑀸𑀯𑀤𑀻𑀧𑀦𑀢𑁆𑀣𑀁 𑀯𑀼𑀢𑁆𑀢𑀸𑀦𑀺. 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 ‘‘𑀲𑀤𑁆𑀤𑀸𑀬𑀢𑀦𑀫𑁂𑀯 𑀢𑁂 𑀮𑁄𑀓𑀼𑀢𑁆𑀢𑀭𑀁, 𑀉𑀤𑀸𑀳𑀼 𑀲𑁄𑀢𑀸𑀤𑀻𑀦𑀺𑀧𑀻’’𑀢𑀺.

𑀳𑀜𑁆𑀘𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀯𑁄𑀳𑀸𑀭𑁄 𑀮𑁄𑀓𑀺𑀬𑁂 𑀲𑁄𑀢𑁂 𑀧𑀝𑀺𑀳𑀜𑁆𑀜𑀢𑀻𑀢𑀺 𑀏𑀢𑁆𑀣 𑀬𑀤𑀺 𑀲𑁄 𑀮𑁄𑀓𑀼𑀢𑁆𑀢𑀭𑁂 𑀧𑀝𑀺𑀳𑀜𑁆𑀜𑁂𑀬𑁆𑀬. 𑀮𑁄𑀓𑀼𑀢𑁆𑀢𑀭𑁄 𑀲𑀺𑀬𑀸𑀢𑀺 𑀏𑀯𑀫𑀢𑁆𑀣𑁄 𑀦 𑀕𑀳𑁂𑀢𑀩𑁆𑀩𑁄. 𑀮𑁄𑀓𑀺𑀬𑁂 𑀧𑀝𑀺𑀳𑀜𑁆𑀜𑀫𑀸𑀦𑀲𑁆𑀲 𑀧𑀦 𑀮𑁄𑀓𑀼𑀢𑁆𑀢𑀭𑀢𑀸 𑀦𑀸𑀫 𑀦𑀢𑁆𑀣𑀻𑀢𑀺 𑀅𑀬𑀫𑁂𑀢𑁆𑀣𑀸𑀥𑀺𑀧𑁆𑀧𑀸𑀬𑁄. 𑀮𑁄𑀓𑀺𑀬𑁂𑀦 𑀯𑀺𑀜𑁆𑀜𑀸𑀡𑁂𑀦𑀸𑀢𑀺 𑀏𑀢𑁆𑀣𑀸𑀧𑀺 𑀮𑁄𑀓𑀺𑀬𑁂𑀦𑁂𑀯𑀸𑀢𑀺 𑀅𑀢𑁆𑀣𑁄. 𑀇𑀢𑀭𑀣𑀸 𑀅𑀦𑁂𑀓𑀦𑁆𑀢𑀢𑀸 𑀲𑀺𑀬𑀸. 𑀮𑁄𑀓𑀼𑀢𑁆𑀢𑀭𑀜𑁆𑀳𑀺 𑀮𑁄𑀓𑀺𑀬𑁂𑀦𑀧𑀺 𑀜𑀸𑀡𑁂𑀦 𑀜𑀸𑀬𑀢𑀻. 𑀏𑀯𑀁 𑀲𑀩𑁆𑀩𑀁 𑀬𑀣𑀸𑀦𑀼𑀭𑀽𑀧𑀢𑁄 𑀯𑁂𑀤𑀺𑀢𑀩𑁆𑀩𑀁. 𑀲𑀩𑁆𑀩𑁂 𑀢𑁂 𑀫𑀕𑁆𑀕𑀁 𑀪𑀸𑀯𑁂𑀦𑁆𑀢𑀻𑀢𑀺 𑀧𑀜𑁆𑀳𑁂𑀲𑀼 𑀬𑁂 𑀫𑀕𑁆𑀕𑀁 𑀦𑀧𑁆𑀧𑀝𑀺𑀮𑀪𑀦𑁆𑀢𑀺, 𑀢𑁂 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺. 𑀬𑁂 𑀧𑀝𑀺𑀮𑀪𑀦𑁆𑀢𑀺, 𑀢𑁂 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺.

𑁩𑁫𑁧. 𑀲𑁄𑀯𑀡𑁆𑀡𑀫𑀬𑀸𑀬𑀸𑀢𑀺 𑀲𑀼𑀯𑀡𑁆𑀡𑀫𑀬𑀸𑀬. 𑀇𑀤𑀁 𑀧𑀭𑀯𑀸𑀤𑀺𑀲𑁆𑀲 𑀉𑀤𑀸𑀳𑀭𑀡𑀁.

𑀏𑀴𑀡𑁆𑀟𑀺𑀬𑀸𑀬𑀸𑀢𑀺 𑀏𑀴𑀡𑁆𑀟𑀫𑀬𑀸𑀬. 𑀇𑀤𑀁 𑀲𑀓𑀯𑀸𑀤𑀺𑀲𑁆𑀲 𑀉𑀤𑀸𑀳𑀭𑀡𑀁. 𑀮𑁄𑀓𑀺𑀬𑀁 𑀯𑁄𑀳𑀭𑀦𑁆𑀢𑀲𑁆𑀲 𑀮𑁄𑀓𑀺𑀬𑁄𑀢𑀺 𑀅𑀬𑀫𑁆𑀧𑀺 𑀏𑀓𑀸 𑀮𑀤𑁆𑀥𑀺. 𑀲𑀸 𑀏𑀢𑀭𑀳𑀺 𑀏𑀓𑀘𑁆𑀘𑀸𑀦𑀁 𑀅𑀦𑁆𑀥𑀓𑀸𑀦𑀁 𑀮𑀤𑁆𑀥𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀯𑁄𑀳𑀸𑀭𑀓𑀣𑀸𑀯𑀡𑁆𑀡𑀦𑀸.