𑁯. 𑀳𑁂𑀯𑀢𑁆𑀣𑀺𑀓𑀣𑀸𑀯𑀡𑁆𑀡𑀦𑀸

𑁩𑁦𑁪. 𑀇𑀤𑀸𑀦𑀺 𑀳𑁂𑀯𑀢𑁆𑀣𑀺𑀓𑀣𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑁂𑀲𑀁 ‘‘𑀲𑀩𑁆𑀩𑁂𑀧𑀺 𑀅𑀢𑀻𑀢𑀸𑀤𑀺𑀪𑁂𑀤𑀸 𑀥𑀫𑁆𑀫𑀸 𑀭𑀽𑀧𑀸𑀤𑀺𑀯𑀲𑁂𑀦 𑀅𑀢𑁆𑀣𑀺, 𑀅𑀢𑀻𑀢𑀁 𑀅𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀲𑁂𑀦, 𑀅𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀺 𑀯𑀸 𑀅𑀢𑀻𑀢𑀸𑀤𑀺𑀯𑀲𑁂𑀦 𑀦𑀢𑁆𑀣𑀺; 𑀢𑀲𑁆𑀫𑀸 𑀲𑀩𑁆𑀩𑀫𑁂𑀯𑀺𑀤𑀁 𑀏𑀯𑀁 𑀅𑀢𑁆𑀣𑀺 𑀏𑀯𑀁 𑀦𑀢𑁆𑀣𑀻’’𑀢𑀺 𑀮𑀤𑁆𑀥𑀺, 𑀲𑁂𑀬𑁆𑀬𑀣𑀸𑀧𑀺 𑀏𑀢𑀭𑀳𑀺 𑀯𑀼𑀢𑁆𑀢𑀧𑁆𑀧𑀪𑁂𑀤𑀸𑀦𑀁 𑀅𑀦𑁆𑀥𑀓𑀸𑀦𑀁; 𑀢𑁂 𑀲𑀦𑁆𑀥𑀸𑀬 𑀅𑀢𑀻𑀢𑀁 𑀅𑀢𑁆𑀣𑀻𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲. 𑀳𑁂𑀯𑀢𑁆𑀣𑀺 𑀳𑁂𑀯 𑀦𑀢𑁆𑀣𑀻𑀢𑀺 𑀯𑀺𑀲𑁆𑀲𑀚𑁆𑀚𑀦𑀁 𑀧𑀭𑀯𑀸𑀤𑀺𑀲𑁆𑀲. 𑀢𑀢𑁆𑀣 𑀳𑁂𑀯𑀸𑀢𑀺 𑀏𑀯𑀁. 𑀅𑀣 𑀦𑀁 𑀲𑀓𑀯𑀸𑀤𑀻 ‘‘𑀬𑀤𑀺 𑀅𑀢𑀻𑀢𑁄𑀯 𑀏𑀯𑀁 𑀅𑀢𑁆𑀣𑀺, 𑀏𑀯𑀁 𑀦𑀢𑁆𑀣𑀻𑀢𑀺 𑀮𑀤𑁆𑀥𑀺, 𑀏𑀯𑀁 𑀲𑀦𑁆𑀢𑁂 𑀲𑁄𑀬𑁂𑀯 𑀅𑀢𑁆𑀣𑀺, 𑀲𑁄𑀬𑁂𑀯 𑀦𑀢𑁆𑀣𑀺 𑀦𑀸𑀫𑀸’’𑀢𑀺 𑀧𑀼𑀘𑁆𑀙𑀦𑁆𑀢𑁄 𑀲𑁂𑀯𑀢𑁆𑀣𑀺, 𑀲𑁂𑀯 𑀦𑀢𑁆𑀣𑀻𑀢𑀺 𑀆𑀳. 𑀇𑀢𑀭𑁄 𑀢𑁂𑀦𑁂𑀯 𑀲𑀪𑀸𑀯𑁂𑀦 𑀅𑀢𑁆𑀣𑀺𑀢𑀁, 𑀢𑁂𑀦𑁂𑀯 𑀦𑀢𑁆𑀣𑀺𑀢𑀁 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺. 𑀤𑀼𑀢𑀺𑀬𑀁 𑀧𑀼𑀝𑁆𑀞𑁄 𑀲𑀓𑀪𑀸𑀯𑁂𑀦𑁂𑀯 𑀅𑀢𑁆𑀣𑀺𑀢𑀁, 𑀧𑀭𑀪𑀸𑀯𑁂𑀦𑁂𑀯 𑀦𑀢𑁆𑀣𑀺𑀢𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀢𑀢𑁄 𑀧𑀭𑀁 𑀅𑀢𑁆𑀣𑀝𑁆𑀞𑁄 𑀦𑀢𑁆𑀣𑀝𑁆𑀞𑁄𑀢𑀺 𑀅𑀢𑁆𑀣𑀺𑀲𑀪𑀸𑀯𑁄 𑀦𑀢𑁆𑀣𑀺𑀲𑀪𑀸𑀯𑁄 𑀦𑀸𑀫 𑀳𑁄𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀇𑀫𑀺𑀦𑀸𑀯𑀼𑀧𑀸𑀬𑁂𑀦 𑀲𑀩𑁆𑀩𑀯𑀸𑀭𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀭𑀺𑀬𑁄𑀲𑀸𑀦𑁂 𑀧𑀦 ‘‘𑀢𑁂𑀦 𑀳𑀺 𑀅𑀢𑀻𑀢𑀁 𑀳𑁂𑀯𑀢𑁆𑀣𑀺, 𑀳𑁂𑀯 𑀦𑀢𑁆𑀣𑀻’’𑀢𑀺 𑀘 ‘‘𑀢𑁂𑀦 𑀳𑀺 𑀭𑀽𑀧𑀁 𑀳𑁂𑀯𑀢𑁆𑀣𑀺, 𑀳𑁂𑀯 𑀦𑀢𑁆𑀣𑀻’’𑀢𑀺 𑀘𑀸𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀓𑀺𑀜𑁆𑀘𑀸𑀧𑀺 𑀧𑀭𑀯𑀸𑀤𑀺𑀦𑀸 𑀮𑀤𑁆𑀥𑀺 𑀧𑀢𑀺𑀝𑁆𑀞𑀸𑀧𑀺𑀢𑀸, 𑀅𑀬𑁄𑀦𑀺𑀲𑁄 𑀧𑀢𑀺𑀝𑁆𑀞𑀸𑀧𑀺𑀢𑀢𑁆𑀢𑀸 𑀧𑀦𑁂𑀲𑀸 𑀅𑀧𑁆𑀧𑀢𑀺𑀝𑁆𑀞𑀸𑀧𑀺𑀢𑀸𑀬𑁂𑀯𑀸𑀢𑀺.

𑀳𑁂𑀯𑀢𑁆𑀣𑀺𑀓𑀣𑀸𑀯𑀡𑁆𑀡𑀦𑀸.

𑀫𑀳𑀸𑀯𑀕𑁆𑀕𑁄 𑀦𑀺𑀝𑁆𑀞𑀺𑀢𑁄.