𑀥𑀫𑁆𑀫𑀼𑀤𑁆𑀤𑁂𑀲𑀯𑀸𑀭𑁄

𑀨𑀲𑁆𑀲𑀧𑀜𑁆𑀘𑀫𑀓𑀭𑀸𑀲𑀺𑀯𑀡𑁆𑀡𑀦𑀸

𑀢𑀲𑁆𑀫𑀺𑀁 𑀲𑀫𑀬𑁂𑀢𑀺 𑀇𑀤𑀁 𑀅𑀦𑀺𑀬𑀫𑀦𑀺𑀤𑁆𑀤𑀺𑀝𑁆𑀞𑀲𑁆𑀲 𑀲𑀫𑀬𑀲𑁆𑀲 𑀦𑀺𑀬𑀫𑀢𑁄 𑀧𑀝𑀺𑀦𑀺𑀤𑁆𑀤𑁂𑀲𑀯𑀘𑀦𑀁. 𑀢𑀲𑁆𑀫𑀸 ‘𑀬𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀢𑀲𑁆𑀫𑀺𑀁𑀬𑁂𑀯 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺…𑀧𑁂… 𑀅𑀯𑀺𑀓𑁆𑀔𑁂𑀧𑁄 𑀳𑁄𑀢𑀻’𑀢𑀺 𑀅𑀬𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀬𑀣𑁂𑀯 𑀘𑀺𑀢𑁆𑀢𑀁 𑀏𑀯𑀁 𑀨𑀲𑁆𑀲𑀸𑀤𑀻𑀲𑀼𑀧𑀺 𑀨𑀲𑁆𑀲𑁄 𑀳𑁄𑀢𑀺. 𑀓𑀺𑀁 𑀳𑁄𑀢𑀺? ‘𑀓𑀸𑀫𑀸𑀯𑀘𑀭𑁄 𑀳𑁄𑀢𑀺, 𑀓𑀼𑀲𑀮𑁄 𑀳𑁄𑀢𑀺, 𑀉𑀧𑁆𑀧𑀦𑁆𑀦𑁄 𑀳𑁄𑀢𑀺, 𑀲𑁄𑀫𑀦𑀲𑁆𑀲𑀲𑀳𑀕𑀢𑁄 𑀳𑁄𑀢𑀻’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀮𑀩𑁆𑀪𑀫𑀸𑀦𑀧𑀤𑀯𑀲𑁂𑀦 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀯𑁂𑀤𑀦𑀸𑀬𑀜𑁆𑀳𑀺 ‘𑀲𑁄𑀫𑀦𑀲𑁆𑀲𑀲𑀳𑀕𑀢𑀸’𑀢𑀺 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑁂 𑀘 ‘𑀜𑀸𑀡𑀲𑀫𑁆𑀧𑀬𑀼𑀢𑁆𑀢’𑀦𑁆𑀢𑀺 𑀦 𑀮𑀩𑁆𑀪𑀢𑀺, 𑀢𑀲𑁆𑀫𑀸 ‘𑀮𑀩𑁆𑀪𑀫𑀸𑀦𑀧𑀤𑀯𑀲𑁂𑀦𑀸’𑀢𑀺 𑀯𑀼𑀢𑁆𑀢𑀁. 𑀇𑀤𑀁 𑀅𑀝𑁆𑀞𑀓𑀣𑀸𑀫𑀼𑀢𑁆𑀢𑀓𑀁 𑀆𑀘𑀭𑀺𑀬𑀸𑀦𑀁 𑀫𑀢𑀁; 𑀦 𑀧𑀦𑁂𑀢𑀁 𑀲𑀸𑀭𑀢𑁄 𑀤𑀝𑁆𑀞𑀩𑁆𑀩𑀁.

𑀓𑀲𑁆𑀫𑀸 𑀧𑀦𑁂𑀢𑁆𑀣 𑀨𑀲𑁆𑀲𑁄𑀯 𑀧𑀞𑀫𑀁 𑀯𑀼𑀢𑁆𑀢𑁄𑀢𑀺? 𑀘𑀺𑀢𑁆𑀢𑀲𑁆𑀲 𑀧𑀞𑀫𑀸𑀪𑀺𑀦𑀺𑀧𑀸𑀢𑀢𑁆𑀢𑀸. 𑀆𑀭𑀫𑁆𑀫𑀡𑀲𑁆𑀫𑀺𑀜𑁆𑀳𑀺 𑀘𑀺𑀢𑁆𑀢𑀲𑁆𑀲 𑀧𑀞𑀫𑀸𑀪𑀺𑀦𑀺𑀧𑀸𑀢𑁄 𑀳𑀼𑀢𑁆𑀯𑀸 𑀨𑀲𑁆𑀲𑁄 𑀆𑀭𑀫𑁆𑀫𑀡𑀁 𑀨𑀼𑀲𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀧𑀞𑀫𑀁 𑀯𑀼𑀢𑁆𑀢𑁄. 𑀨𑀲𑁆𑀲𑁂𑀦 𑀧𑀦 𑀨𑀼𑀲𑀺𑀢𑁆𑀯𑀸 𑀯𑁂𑀤𑀦𑀸𑀬 𑀯𑁂𑀤𑀬𑀢𑀺, 𑀲𑀜𑁆𑀜𑀸𑀬 𑀲𑀜𑁆𑀚𑀸𑀦𑀸𑀢𑀺, 𑀘𑁂𑀢𑀦𑀸𑀬 𑀘𑁂𑀢𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀨𑀼𑀝𑁆𑀞𑁄, 𑀪𑀺𑀓𑁆𑀔𑀯𑁂, 𑀯𑁂𑀤𑁂𑀢𑀺, 𑀨𑀼𑀝𑁆𑀞𑁄 𑀲𑀜𑁆𑀚𑀸𑀦𑀸𑀢𑀺 𑀨𑀼𑀝𑁆𑀞𑁄 𑀘𑁂𑀢𑁂𑀢𑀻’’𑀢𑀺.

𑀅𑀧𑀺𑀘, 𑀅𑀬𑀁 𑀨𑀲𑁆𑀲𑁄 𑀦𑀸𑀫 𑀬𑀣𑀸 𑀧𑀸𑀲𑀸𑀤𑀁 𑀧𑀢𑁆𑀯𑀸 𑀣𑀫𑁆𑀪𑁄 𑀦𑀸𑀫 𑀲𑁂𑀲𑀤𑀩𑁆𑀩𑀲𑀫𑁆𑀪𑀸𑀭𑀸𑀦𑀁 𑀩𑀮𑀯𑀧𑀘𑁆𑀘𑀬𑁄, 𑀢𑀼𑀮𑀸𑀲𑀗𑁆𑀖𑀸𑀝𑀪𑀺𑀢𑁆𑀢𑀺𑀧𑀸𑀤𑀓𑀽𑀝𑀕𑁄𑀧𑀸𑀦𑀲𑀻𑀧𑀓𑁆𑀔𑀧𑀸𑀲𑀓𑀫𑀼𑀔𑀯𑀝𑁆𑀝𑀺𑀬𑁄 𑀣𑀫𑁆𑀪𑀸𑀩𑀤𑁆𑀥𑀸 𑀣𑀫𑁆𑀪𑁂 𑀧𑀢𑀺𑀝𑁆𑀞𑀺𑀢𑀸, 𑀏𑀯𑀫𑁂𑀯 𑀲𑀳𑀚𑀸𑀢𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀩𑀮𑀯𑀧𑀘𑁆𑀘𑀬𑁄 𑀳𑁄𑀢𑀺. 𑀣𑀫𑁆𑀪𑀲𑀤𑀺𑀲𑁄 𑀳𑀺 𑀏𑀲. 𑀅𑀯𑀲𑁂𑀲𑀸 𑀤𑀩𑁆𑀩𑀲𑀫𑁆𑀪𑀸𑀭𑀲𑀤𑀺𑀲𑀸𑀢𑀺. 𑀢𑀲𑁆𑀫𑀸𑀧𑀺 𑀧𑀞𑀫𑀁 𑀯𑀼𑀢𑁆𑀢𑁄. 𑀇𑀤𑀁 𑀧𑀦 𑀅𑀓𑀸𑀭𑀡𑀁. 𑀏𑀓𑀘𑀺𑀢𑁆𑀢𑀲𑁆𑀫𑀺𑀜𑁆𑀳𑀺 𑀉𑀧𑁆𑀧𑀦𑁆𑀦𑀥𑀫𑁆𑀫𑀸𑀦𑀁 ‘𑀅𑀬𑀁 𑀧𑀞𑀫𑀁 𑀉𑀧𑁆𑀧𑀦𑁆𑀦𑁄 𑀅𑀬𑀁 𑀧𑀘𑁆𑀙𑀸’𑀢𑀺 𑀇𑀤𑀁 𑀯𑀢𑁆𑀢𑀼𑀁 𑀦 𑀮𑀩𑁆𑀪𑀸. 𑀩𑀮𑀯𑀧𑀘𑁆𑀘𑀬𑀪𑀸𑀯𑁂𑀧𑀺 𑀨𑀲𑁆𑀲𑀲𑁆𑀲 𑀓𑀸𑀭𑀡𑀁 𑀦 𑀤𑀺𑀲𑁆𑀲𑀢𑀺. 𑀤𑁂𑀲𑀦𑀸𑀯𑀸𑀭𑁂𑀦𑁂𑀯 𑀧𑀦 𑀨𑀲𑁆𑀲𑁄 𑀧𑀞𑀫𑀁 𑀯𑀼𑀢𑁆𑀢𑁄. 𑀯𑁂𑀤𑀦𑀸 𑀳𑁄𑀢𑀺 𑀨𑀲𑁆𑀲𑁄 𑀳𑁄𑀢𑀺, 𑀲𑀜𑁆𑀜𑀸 𑀳𑁄𑀢𑀺 𑀨𑀲𑁆𑀲𑁄 𑀳𑁄𑀢𑀺, 𑀘𑁂𑀢𑀦𑀸 𑀳𑁄𑀢𑀺 𑀨𑀲𑁆𑀲𑁄 𑀳𑁄𑀢𑀺, 𑀘𑀺𑀢𑁆𑀢𑀁 𑀳𑁄𑀢𑀺 𑀨𑀲𑁆𑀲𑁄 𑀳𑁄𑀢𑀺, 𑀯𑁂𑀤𑀦𑀸 𑀳𑁄𑀢𑀺 𑀲𑀜𑁆𑀜𑀸 𑀳𑁄𑀢𑀺, 𑀘𑁂𑀢𑀦𑀸 𑀳𑁄𑀢𑀺 𑀯𑀺𑀢𑀓𑁆𑀓𑁄 𑀳𑁄𑀢𑀻𑀢𑀺 𑀆𑀳𑀭𑀺𑀢𑀼𑀫𑁆𑀧𑀺 𑀳𑀺 𑀯𑀝𑁆𑀝𑁂𑀬𑁆𑀬. 𑀤𑁂𑀲𑀦𑀸𑀯𑀸𑀭𑁂𑀦 𑀧𑀦 𑀨𑀲𑁆𑀲𑁄𑀯 𑀧𑀞𑀫𑀁 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸 𑀘𑁂𑀢𑁆𑀣 𑀏𑀯𑀁 𑀲𑁂𑀲𑀥𑀫𑁆𑀫𑁂𑀲𑀼𑀧𑀺 𑀧𑀼𑀩𑁆𑀩𑀸𑀧𑀭𑀓𑁆𑀓𑀫𑁄 𑀦𑀸𑀫 𑀦 𑀧𑀭𑀺𑀬𑁂𑀲𑀺𑀢𑀩𑁆𑀩𑁄. 𑀯𑀘𑀦𑀢𑁆𑀣𑀮𑀓𑁆𑀔𑀡𑀭𑀲𑀸𑀤𑀻𑀳𑀺 𑀧𑀦 𑀥𑀫𑁆𑀫𑀸 𑀏𑀯 𑀧𑀭𑀺𑀬𑁂𑀲𑀺𑀢𑀩𑁆𑀩𑀸.

𑀲𑁂𑀬𑁆𑀬𑀣𑀺𑀤𑀁 𑁋 𑀨𑀼𑀲𑀢𑀻𑀢𑀺 𑀨𑀲𑁆𑀲𑁄. 𑀲𑁆𑀯𑀸𑀬𑀁 𑀨𑀼𑀲𑀦𑀮𑀓𑁆𑀔𑀡𑁄, 𑀲𑀗𑁆𑀖𑀝𑁆𑀝𑀦𑀭𑀲𑁄, 𑀲𑀦𑁆𑀦𑀺𑀧𑀸𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀆𑀧𑀸𑀣𑀕𑀢𑀯𑀺𑀲𑀬𑀧𑀤𑀝𑁆𑀞𑀸𑀦𑁄.

𑀅𑀬𑀜𑁆𑀳𑀺 𑀅𑀭𑀽𑀧𑀥𑀫𑁆𑀫𑁄𑀧𑀺 𑀲𑀫𑀸𑀦𑁄 𑀆𑀭𑀫𑁆𑀫𑀡𑁂 𑀨𑀼𑀲𑀦𑀸𑀓𑀸𑀭𑁂𑀦𑁂𑀯 𑀧𑀯𑀢𑁆𑀢𑀢𑀻𑀢𑀺 𑀨𑀼𑀲𑀦𑀮𑀓𑁆𑀔𑀡𑁄. 𑀏𑀓𑀤𑁂𑀲𑁂𑀦 𑀘 𑀅𑀦𑀮𑁆𑀮𑀻𑀬𑀫𑀸𑀦𑁄𑀧𑀺 𑀭𑀽𑀧𑀁 𑀯𑀺𑀬 𑀘𑀓𑁆𑀔𑀼𑀁, 𑀲𑀤𑁆𑀤𑁄 𑀯𑀺𑀬 𑀘 𑀲𑁄𑀢𑀁, 𑀘𑀺𑀢𑁆𑀢𑀁 𑀆𑀭𑀫𑁆𑀫𑀡𑀜𑁆𑀘 𑀲𑀗𑁆𑀖𑀝𑁆𑀝𑁂𑀢𑀻𑀢𑀺 𑀲𑀗𑁆𑀖𑀝𑁆𑀝𑀦𑀭𑀲𑁄. 𑀯𑀢𑁆𑀣𑀸𑀭𑀫𑁆𑀫𑀡𑀲𑀗𑁆𑀖𑀝𑁆𑀝𑀦𑀢𑁄 𑀯𑀸 𑀉𑀧𑁆𑀧𑀦𑁆𑀦𑀢𑁆𑀢𑀸 𑀲𑀫𑁆𑀧𑀢𑁆𑀢𑀺𑀅𑀢𑁆𑀣𑁂𑀦𑀧𑀺 𑀭𑀲𑁂𑀦 𑀲𑀗𑁆𑀖𑀝𑁆𑀝𑀦𑀭𑀲𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀝𑁆𑀞𑀓𑀣𑀸𑀬𑀁 𑁋 ‘‘𑀘𑀢𑀼𑀪𑀽𑀫𑀓𑀨𑀲𑁆𑀲𑁄 𑀳𑀺 𑀦𑁄𑀨𑀼𑀲𑀦𑀮𑀓𑁆𑀔𑀡𑁄 𑀦𑀸𑀫 𑀦𑀢𑁆𑀣𑀺. 𑀲𑀗𑁆𑀖𑀝𑁆𑀝𑀦𑀭𑀲𑁄 𑀧𑀦 𑀧𑀜𑁆𑀘𑀤𑁆𑀯𑀸𑀭𑀺𑀓𑁄𑀯 𑀳𑁄𑀢𑀺. 𑀧𑀜𑁆𑀘𑀤𑁆𑀯𑀸𑀭𑀺𑀓𑀲𑁆𑀲 𑀳𑀺 𑀨𑀼𑀲𑀦𑀮𑀓𑁆𑀔𑀡𑁄𑀢𑀺𑀧𑀺 𑀲𑀗𑁆𑀖𑀝𑁆𑀝𑀦𑀭𑀲𑁄𑀢𑀺𑀧𑀺 𑀦𑀸𑀫𑀁; 𑀫𑀦𑁄𑀤𑁆𑀯𑀸𑀭𑀺𑀓𑀲𑁆𑀲 𑀨𑀼𑀲𑀦𑀮𑀓𑁆𑀔𑀡𑁄𑀢𑁆𑀯𑁂𑀯 𑀦𑀸𑀫𑀁, 𑀦 𑀲𑀗𑁆𑀖𑀝𑁆𑀝𑀦𑀭𑀲𑁄’’𑀢𑀺.

𑀇𑀤𑀜𑁆𑀘 𑀯𑀢𑁆𑀯𑀸 𑀇𑀤𑀁 𑀲𑀼𑀢𑁆𑀢𑀁 𑀆𑀪𑀢𑀁 𑁋 ‘‘𑀬𑀣𑀸, 𑀫𑀳𑀸𑀭𑀸𑀚, 𑀤𑁆𑀯𑁂 𑀫𑁂𑀡𑁆𑀟𑀸 𑀬𑀼𑀚𑁆𑀛𑁂𑀬𑁆𑀬𑀼𑀁, 𑀢𑁂𑀲𑀼 𑀬𑀣𑀸 𑀏𑀓𑁄 𑀫𑁂𑀡𑁆𑀟𑁄 𑀏𑀯𑀁 𑀘𑀓𑁆𑀔𑀼 𑀤𑀝𑁆𑀞𑀩𑁆𑀩𑀁, 𑀬𑀣𑀸 𑀤𑀼𑀢𑀺𑀬𑁄 𑀫𑁂𑀡𑁆𑀟𑁄 𑀏𑀯𑀁 𑀭𑀽𑀧𑀁 𑀤𑀝𑁆𑀞𑀩𑁆𑀩𑀁; 𑀬𑀣𑀸 𑀢𑁂𑀲𑀁 𑀲𑀦𑁆𑀦𑀺𑀧𑀸𑀢𑁄 𑀏𑀯𑀁 𑀨𑀲𑁆𑀲𑁄 𑀤𑀝𑁆𑀞𑀩𑁆𑀩𑁄’’. 𑀏𑀯𑀁 𑀨𑀼𑀲𑀦𑀮𑀓𑁆𑀔𑀡𑁄 𑀘 𑀨𑀲𑁆𑀲𑁄, 𑀲𑀗𑁆𑀖𑀝𑁆𑀝𑀦𑀭𑀲𑁄 𑀘. ‘‘𑀬𑀣𑀸, 𑀫𑀳𑀸𑀭𑀸𑀚, 𑀤𑁆𑀯𑁂 𑀲𑀫𑁆𑀫𑀸 𑀯𑀚𑁆𑀚𑁂𑀬𑁆𑀬𑀼𑀁…𑀧𑁂… 𑀤𑁆𑀯𑁂 𑀧𑀸𑀡𑀻 𑀯𑀚𑁆𑀚𑁂𑀬𑁆𑀬𑀼𑀁, 𑀬𑀣𑀸 𑀏𑀓𑁄 𑀧𑀸𑀡𑀺 𑀏𑀯𑀁 𑀘𑀓𑁆𑀔𑀼 𑀤𑀝𑁆𑀞𑀩𑁆𑀩𑀁, 𑀬𑀣𑀸 𑀤𑀼𑀢𑀺𑀬𑁄 𑀧𑀸𑀡𑀺 𑀏𑀯𑀁 𑀭𑀽𑀧𑀁 𑀤𑀝𑁆𑀞𑀩𑁆𑀩𑀁, 𑀬𑀣𑀸 𑀢𑁂𑀲𑀁 𑀲𑀦𑁆𑀦𑀺𑀧𑀸𑀢𑁄 𑀏𑀯𑀁 𑀨𑀲𑁆𑀲𑁄 𑀤𑀝𑁆𑀞𑀩𑁆𑀩𑁄. 𑀏𑀯𑀁 𑀨𑀼𑀲𑀦𑀮𑀓𑁆𑀔𑀡𑁄 𑀘 𑀨𑀲𑁆𑀲𑁄 𑀲𑀗𑁆𑀖𑀝𑁆𑀝𑀦𑀭𑀲𑁄 𑀘𑀸’’𑀢𑀺 (𑀫𑀺. 𑀧. 𑁨.𑁩.𑁮) 𑀯𑀺𑀢𑁆𑀣𑀸𑀭𑁄.

𑀬𑀣𑀸 𑀯𑀸 ‘‘𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸’’𑀢𑀺𑀆𑀤𑀻𑀲𑀼 (𑀥. 𑀲. 𑁧𑁩𑁫𑁨, 𑁧𑁩𑁫𑁪) 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀘𑀓𑁆𑀔𑀼𑀆𑀤𑀺𑀦𑀸𑀫𑁂𑀦 𑀯𑀼𑀢𑁆𑀢𑀸𑀦𑀺, 𑀏𑀯𑀫𑀺𑀥𑀸𑀧𑀺 𑀢𑀸𑀦𑀺 𑀘𑀓𑁆𑀔𑀼𑀆𑀤𑀺𑀦𑀸𑀫𑁂𑀦 𑀯𑀼𑀢𑁆𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑀲𑁆𑀫𑀸 ‘𑀏𑀯𑀁 𑀘𑀓𑁆𑀔𑀼 𑀤𑀝𑁆𑀞𑀩𑁆𑀩’𑀦𑁆𑀢𑀺𑀆𑀤𑀻𑀲𑀼 𑀏𑀯𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀤𑀝𑁆𑀞𑀩𑁆𑀩𑀦𑁆𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀲𑀦𑁆𑀢𑁂 𑀘𑀺𑀢𑁆𑀢𑀸𑀭𑀫𑁆𑀫𑀡𑀲𑀗𑁆𑀖𑀝𑁆𑀝𑀦𑀢𑁄 𑀇𑀫𑀲𑁆𑀫𑀺𑀫𑁆𑀧𑀺 𑀲𑀼𑀢𑁆𑀢𑁂 𑀓𑀺𑀘𑁆𑀘𑀝𑁆𑀞𑁂𑀦𑁂𑀯 𑀭𑀲𑁂𑀦 𑀲𑀗𑁆𑀖𑀝𑁆𑀝𑀦𑀭𑀲𑁄𑀢𑀺 𑀲𑀺𑀤𑁆𑀥𑁄 𑀳𑁄𑀢𑀺.

𑀢𑀺𑀓𑀲𑀦𑁆𑀦𑀺𑀧𑀸𑀢𑀲𑀗𑁆𑀔𑀸𑀢𑀲𑁆𑀲 𑀧𑀦 𑀅𑀢𑁆𑀢𑀦𑁄 𑀓𑀸𑀭𑀡𑀲𑁆𑀲 𑀯𑀲𑁂𑀦 𑀧𑀯𑁂𑀤𑀺𑀢𑀢𑁆𑀢𑀸 𑀲𑀦𑁆𑀦𑀺𑀧𑀸𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀅𑀬𑀜𑁆𑀳𑀺 𑀢𑀢𑁆𑀣 𑀢𑀢𑁆𑀣 ‘‘𑀢𑀺𑀡𑁆𑀡𑀁 𑀲𑀗𑁆𑀕𑀢𑀺 𑀨𑀲𑁆𑀲𑁄’’𑀢𑀺 𑀏𑀯𑀁 𑀓𑀸𑀭𑀡𑀲𑁆𑀲 𑀯𑀲𑁂𑀦 𑀧𑀯𑁂𑀤𑀺𑀢𑁄𑀢𑀺. 𑀇𑀫𑀲𑁆𑀲 𑀘 𑀲𑀼𑀢𑁆𑀢𑀧𑀤𑀲𑁆𑀲 𑀢𑀺𑀡𑁆𑀡𑀁 𑀲𑀗𑁆𑀕𑀢𑀺𑀬𑀸 𑀨𑀲𑁆𑀲𑁄𑀢𑀺 𑀅𑀬𑀫𑀢𑁆𑀣𑁄; 𑀦 𑀲𑀗𑁆𑀕𑀢𑀺𑀫𑀢𑁆𑀢𑀫𑁂𑀯 𑀨𑀲𑁆𑀲𑁄𑀢𑀺.

𑀏𑀯𑀁 𑀧𑀯𑁂𑀤𑀺𑀢𑀢𑁆𑀢𑀸 𑀧𑀦 𑀢𑁂𑀦𑁂𑀯𑀸𑀓𑀸𑀭𑁂𑀦 𑀧𑀘𑁆𑀘𑀼𑀧𑀝𑁆𑀞𑀸𑀢𑀻𑀢𑀺 𑀲𑀦𑁆𑀦𑀺𑀧𑀸𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑁄𑀢𑀺 𑀯𑀼𑀢𑁆𑀢𑁄. 𑀨𑀮𑀝𑁆𑀞𑁂𑀦 𑀧𑀦 𑀧𑀘𑁆𑀘𑀼𑀧𑀝𑁆𑀞𑀸𑀦𑁂𑀦𑁂𑀲 𑀯𑁂𑀤𑀦𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀦𑀸𑀫 𑀳𑁄𑀢𑀺. 𑀯𑁂𑀤𑀦𑀜𑁆𑀳𑁂𑀲 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑀺 𑀉𑀧𑁆𑀧𑀸𑀤𑁂𑀢𑀻𑀢𑀺 𑀅𑀢𑁆𑀣𑁄. 𑀉𑀧𑁆𑀧𑀸𑀤𑀬𑀫𑀸𑀦𑁄 𑀘 𑀬𑀣𑀸 𑀩𑀳𑀺𑀤𑁆𑀥𑀸 𑀉𑀡𑁆𑀳𑀧𑀘𑁆𑀘𑀬𑀸𑀧𑀺 𑀮𑀸𑀔𑀸𑀲𑀗𑁆𑀔𑀸𑀢𑀥𑀸𑀢𑀼𑀦𑀺𑀲𑁆𑀲𑀺𑀢𑀸 𑀉𑀲𑁆𑀫𑀸 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑁂 𑀫𑀼𑀤𑀼𑀪𑀸𑀯𑀓𑀸𑀭𑀻 𑀳𑁄𑀢𑀺, 𑀦 𑀅𑀢𑁆𑀢𑀦𑁄 𑀧𑀘𑁆𑀘𑀬𑀪𑀽𑀢𑁂𑀧𑀺 𑀩𑀳𑀺𑀤𑁆𑀥𑀸 𑀯𑀻𑀢𑀘𑁆𑀘𑀺𑀢𑀗𑁆𑀕𑀸𑀭𑀲𑀗𑁆𑀔𑀸𑀢𑁂 𑀉𑀡𑁆𑀳𑀪𑀸𑀯𑁂, 𑀏𑀯𑀁 𑀯𑀢𑁆𑀣𑀸𑀭𑀫𑁆𑀫𑀡𑀲𑀗𑁆𑀔𑀸𑀢𑀅𑀜𑁆𑀜𑀧𑀘𑁆𑀘𑀬𑁄𑀧𑀺 𑀲𑀫𑀸𑀦𑁄, 𑀘𑀺𑀢𑁆𑀢𑀦𑀺𑀲𑁆𑀲𑀺𑀢𑀢𑁆𑀢𑀸 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑀪𑀽𑀢𑁂 𑀘𑀺𑀢𑁆𑀢𑁂 𑀏𑀯 𑀏𑀲 𑀯𑁂𑀤𑀦𑀼𑀧𑁆𑀧𑀸𑀤𑀓𑁄 𑀳𑁄𑀢𑀺, 𑀦 𑀅𑀢𑁆𑀢𑀦𑁄 𑀧𑀘𑁆𑀘𑀬𑀪𑀽𑀢𑁂𑀧𑀺 𑀯𑀢𑁆𑀣𑀼𑀫𑁆𑀳𑀺 𑀆𑀭𑀫𑁆𑀫𑀡𑁂 𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀚𑁆𑀚𑀸𑀲𑀫𑀦𑁆𑀦𑀸𑀳𑀸𑀭𑁂𑀦 𑀧𑀦 𑀇𑀦𑁆𑀤𑁆𑀭𑀺𑀬𑁂𑀦 𑀘 𑀧𑀭𑀺𑀓𑁆𑀔𑀢𑁂 𑀯𑀺𑀲𑀬𑁂 𑀅𑀦𑀦𑁆𑀢𑀭𑀸𑀬𑁂𑀦 𑀉𑀧𑁆𑀧𑀚𑁆𑀚𑀦𑀢𑁄 𑀏𑀲 𑀆𑀧𑀸𑀣𑀕𑀢𑀯𑀺𑀲𑀬𑀧𑀤𑀝𑁆𑀞𑀸𑀦𑁄𑀢𑀺 𑀯𑀼𑀘𑁆𑀘𑀢𑀺.

𑀯𑁂𑀤𑀬𑀢𑀻𑀢𑀺 𑀯𑁂𑀤𑀦𑀸. 𑀲𑀸 𑀯𑁂𑀤𑀬𑀺𑀢𑀮𑀓𑁆𑀔𑀡𑀸, 𑀅𑀦𑀼𑀪𑀯𑀦𑀭𑀲𑀸 𑀇𑀝𑁆𑀞𑀸𑀓𑀸𑀭𑀲𑀫𑁆𑀪𑁄𑀕𑀭𑀲𑀸 𑀯𑀸, 𑀘𑁂𑀢𑀲𑀺𑀓𑀅𑀲𑁆𑀲𑀸𑀤𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀧𑀲𑁆𑀲𑀤𑁆𑀥𑀺𑀧𑀤𑀝𑁆𑀞𑀸𑀦𑀸.

‘𑀘𑀢𑀼𑀪𑀽𑀫𑀺𑀓𑀯𑁂𑀤𑀦𑀸 𑀳𑀺 𑀦𑁄𑀯𑁂𑀤𑀬𑀺𑀢𑀮𑀓𑁆𑀔𑀡𑀸 𑀦𑀸𑀫 𑀦𑀢𑁆𑀣𑀺. 𑀅𑀦𑀼𑀪𑀯𑀦𑀭𑀲𑀢𑀸 𑀧𑀦 𑀲𑀼𑀔𑀯𑁂𑀤𑀦𑀸𑀬𑀫𑁂𑀯 𑀮𑀩𑁆𑀪𑀢𑀻’𑀢𑀺 𑀯𑀢𑁆𑀯𑀸 𑀧𑀼𑀦 𑀢𑀁 𑀯𑀸𑀤𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ‘𑀲𑀼𑀔𑀯𑁂𑀤𑀦𑀸 𑀯𑀸 𑀳𑁄𑀢𑀼, 𑀤𑀼𑀓𑁆𑀔𑀯𑁂𑀤𑀦𑀸 𑀯𑀸, 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀸 𑀯𑀸, 𑀲𑀩𑁆𑀩𑀸 𑀅𑀦𑀼𑀪𑀯𑀦𑀭𑀲𑀸’𑀢𑀺 𑀯𑀢𑁆𑀯𑀸 𑀅𑀬𑀫𑀢𑁆𑀣𑁄 𑀤𑀻𑀧𑀺𑀢𑁄 𑁋 𑀆𑀭𑀫𑁆𑀫𑀡𑀭𑀲𑀸𑀦𑀼𑀪𑀯𑀦𑀝𑁆𑀞𑀸𑀦𑀁 𑀧𑀢𑁆𑀯𑀸 𑀲𑁂𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀏𑀓𑀤𑁂𑀲𑀫𑀢𑁆𑀢𑀓𑀫𑁂𑀯 𑀅𑀦𑀼𑀪𑀯𑀦𑁆𑀢𑀺. 𑀨𑀲𑁆𑀲𑀲𑁆𑀲 𑀳𑀺 𑀨𑀼𑀲𑀦𑀫𑀢𑁆𑀢𑀓𑀫𑁂𑀯 𑀳𑁄𑀢𑀺, 𑀲𑀜𑁆𑀜𑀸𑀬 𑀲𑀜𑁆𑀚𑀸𑀦𑀦𑀫𑀢𑁆𑀢𑀓𑀫𑁂𑀯, 𑀘𑁂𑀢𑀦𑀸𑀬 𑀘𑁂𑀢𑀦𑀸𑀫𑀢𑁆𑀢𑀓𑀫𑁂𑀯, 𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀚𑀸𑀦𑀦𑀫𑀢𑁆𑀢𑀓𑀫𑁂𑀯. 𑀏𑀓𑀁𑀲𑀢𑁄 𑀧𑀦 𑀇𑀲𑁆𑀲𑀭𑀯𑀢𑀸𑀬 𑀯𑀺𑀲𑁆𑀲𑀯𑀺𑀢𑀸𑀬 𑀲𑀸𑀫𑀺𑀪𑀸𑀯𑁂𑀦 𑀯𑁂𑀤𑀦𑀸𑀯 𑀆𑀭𑀫𑁆𑀫𑀡𑀭𑀲𑀁 𑀅𑀦𑀼𑀪𑀯𑀢𑀺.

𑀭𑀸𑀚𑀸 𑀯𑀺𑀬 𑀳𑀺 𑀯𑁂𑀤𑀦𑀸, 𑀲𑀽𑀤𑁄 𑀯𑀺𑀬 𑀲𑁂𑀲𑀥𑀫𑁆𑀫𑀸. 𑀬𑀣𑀸 𑀲𑀽𑀤𑁄 𑀦𑀸𑀦𑀸𑀭𑀲𑀪𑁄𑀚𑀦𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀧𑁂𑀴𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸 𑀮𑀜𑁆𑀙𑀦𑀁 𑀤𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑁂 𑀑𑀢𑀸𑀭𑁂𑀢𑁆𑀯𑀸 𑀮𑀜𑁆𑀙𑀦𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑁂𑀴𑀁 𑀯𑀺𑀯𑀭𑀺𑀢𑁆𑀯𑀸 𑀲𑀩𑁆𑀩𑀲𑀽𑀧𑀩𑁆𑀬𑀜𑁆𑀚𑀦𑁂𑀳𑀺 𑀅𑀕𑁆𑀕𑀕𑁆𑀕𑀁 𑀆𑀤𑀸𑀬 𑀪𑀸𑀚𑀦𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀲𑀤𑁄𑀲𑀦𑀺𑀤𑁆𑀤𑁄𑀲𑀪𑀸𑀯𑀯𑀻𑀫𑀁𑀲𑀦𑀢𑁆𑀣𑀁 𑀅𑀚𑁆𑀛𑁄𑀳𑀭𑀢𑀺, 𑀢𑀢𑁄 𑀭𑀜𑁆𑀜𑁄 𑀦𑀸𑀦𑀕𑁆𑀕𑀭𑀲𑀪𑁄𑀚𑀦𑀁 𑀉𑀧𑀦𑀸𑀫𑁂𑀢𑀺. 𑀭𑀸𑀚𑀸 𑀇𑀲𑁆𑀲𑀭𑀯𑀢𑀸𑀬 𑀯𑀺𑀲𑁆𑀲𑀯𑀺𑀢𑀸𑀬 𑀲𑀸𑀫𑀻 𑀳𑀼𑀢𑁆𑀯𑀸 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀁 𑀪𑀼𑀜𑁆𑀚𑀢𑀺. 𑀢𑀢𑁆𑀣 𑀳𑀺 𑀲𑀽𑀤𑀲𑁆𑀲 𑀪𑀢𑁆𑀢𑀯𑀻𑀫𑀁𑀲𑀦𑀫𑀢𑁆𑀢𑀫𑀺𑀯 𑀅𑀯𑀲𑁂𑀲𑀥𑀫𑁆𑀫𑀸𑀦𑀁 𑀆𑀭𑀫𑁆𑀫𑀡𑀭𑀲𑀲𑁆𑀲 𑀏𑀓𑀤𑁂𑀲𑀸𑀦𑀼𑀪𑀯𑀦𑀁. 𑀬𑀣𑀸 𑀳𑀺 𑀲𑀽𑀤𑁄 𑀪𑀢𑁆𑀢𑁂𑀓𑀤𑁂𑀲𑀫𑀢𑁆𑀢𑀫𑁂𑀯 𑀯𑀻𑀫𑀁𑀲𑀢𑀺 𑀏𑀯𑀁 𑀲𑁂𑀲𑀥𑀫𑁆𑀫𑀸𑀧𑀺 𑀆𑀭𑀫𑁆𑀫𑀡𑀭𑀲𑁂𑀓𑀤𑁂𑀲𑀫𑁂𑀯 𑀅𑀦𑀼𑀪𑀯𑀦𑁆𑀢𑀺. 𑀬𑀣𑀸 𑀧𑀦 𑀭𑀸𑀚𑀸 𑀇𑀲𑁆𑀲𑀭𑀯𑀢𑀸𑀬 𑀯𑀺𑀲𑁆𑀲𑀯𑀺𑀢𑀸𑀬 𑀲𑀸𑀫𑀻 𑀳𑀼𑀢𑁆𑀯𑀸 𑀬𑀤𑀺𑀘𑁆𑀙𑀓𑀁 𑀪𑀼𑀜𑁆𑀚𑀢𑀺, 𑀏𑀯𑀁 𑀯𑁂𑀤𑀦𑀸𑀧𑀺 𑀇𑀲𑁆𑀲𑀭𑀯𑀢𑀸𑀬 𑀯𑀺𑀲𑁆𑀲𑀯𑀺𑀢𑀸𑀬 𑀲𑀸𑀫𑀺𑀪𑀸𑀯𑁂𑀦 𑀆𑀭𑀫𑁆𑀫𑀡𑀭𑀲𑀁 𑀅𑀦𑀼𑀪𑀯𑀢𑀺. 𑀢𑀲𑁆𑀫𑀸 𑀅𑀦𑀼𑀪𑀯𑀦𑀭𑀲𑀸𑀢𑀺 𑀯𑀼𑀘𑁆𑀘𑀢𑀺.

𑀤𑀼𑀢𑀺𑀬𑁂 𑀅𑀢𑁆𑀣𑀯𑀺𑀓𑀧𑁆𑀧𑁂 𑀅𑀬𑀁 𑀇𑀥 𑀅𑀥𑀺𑀧𑁆𑀧𑁂𑀢𑀸 𑀯𑁂𑀤𑀦𑀸 𑀬𑀣𑀸 𑀯𑀸 𑀢𑀣𑀸 𑀯𑀸 𑀆𑀭𑀫𑁆𑀫𑀡𑀲𑁆𑀲 𑀇𑀝𑁆𑀞𑀸𑀓𑀸𑀭𑀫𑁂𑀯 𑀲𑀫𑁆𑀪𑀼𑀜𑁆𑀚𑀢𑀻𑀢𑀺 𑀇𑀝𑁆𑀞𑀸𑀓𑀸𑀭𑀲𑀫𑁆𑀪𑁄𑀕𑀭𑀲𑀸𑀢𑀺 𑀯𑀼𑀢𑁆𑀢𑀸. 𑀘𑁂𑀢𑀲𑀺𑀓𑀅𑀲𑁆𑀲𑀸𑀤𑀢𑁄 𑀧𑀦𑁂𑀲𑀸 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦𑁂𑀯 𑀉𑀧𑀝𑁆𑀞𑀸𑀦𑀁 𑀲𑀦𑁆𑀥𑀸𑀬 𑀘𑁂𑀢𑀲𑀺𑀓𑀅𑀲𑁆𑀲𑀸𑀤𑀧𑀘𑁆𑀘𑀼𑀧𑀝𑁆𑀞𑀸𑀦𑀸𑀢𑀺 𑀯𑀼𑀢𑁆𑀢𑀸. 𑀬𑀲𑁆𑀫𑀸 𑀧𑀦 ‘‘𑀧𑀲𑁆𑀲𑀤𑁆𑀥𑀺𑀓𑀸𑀬𑁄 𑀲𑀼𑀔𑀁 𑀯𑁂𑀤𑁂𑀢𑀺’’ 𑀢𑀲𑁆𑀫𑀸 𑀧𑀲𑁆𑀲𑀤𑁆𑀥𑀺𑀧𑀤𑀝𑁆𑀞𑀸𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀦𑀻𑀮𑀸𑀤𑀺𑀪𑁂𑀤𑀁 𑀆𑀭𑀫𑁆𑀫𑀡𑀁 𑀲𑀜𑁆𑀚𑀸𑀦𑀸𑀢𑀻𑀢𑀺 𑀲𑀜𑁆𑀜𑀸. 𑀲𑀸 𑀲𑀜𑁆𑀚𑀸𑀦𑀦𑀮𑀓𑁆𑀔𑀡𑀸 𑀧𑀘𑁆𑀘𑀸𑀪𑀺𑀜𑁆𑀜𑀸𑀡𑀭𑀲𑀸. 𑀘𑀢𑀼𑀪𑀽𑀫𑀺𑀓𑀲𑀜𑁆𑀜𑀸 𑀳𑀺 𑀦𑁄𑀲𑀜𑁆𑀚𑀸𑀦𑀦𑀮𑀓𑁆𑀔𑀡𑀸 𑀦𑀸𑀫 𑀦𑀢𑁆𑀣𑀺. 𑀲𑀩𑁆𑀩𑀸 𑀲𑀜𑁆𑀚𑀸𑀦𑀦𑀮𑀓𑁆𑀔𑀡𑀸𑀯. 𑀬𑀸 𑀧𑀦𑁂𑀢𑁆𑀣 𑀅𑀪𑀺𑀜𑁆𑀜𑀸𑀡𑁂𑀦 𑀲𑀜𑁆𑀚𑀸𑀦𑀸𑀢𑀺 𑀲𑀸 𑀧𑀘𑁆𑀘𑀸𑀪𑀺𑀜𑁆𑀜𑀸𑀡𑀭𑀲𑀸 𑀦𑀸𑀫 𑀳𑁄𑀢𑀺.

𑀢𑀲𑁆𑀲𑀸, 𑀯𑀟𑁆𑀠𑀓𑀺𑀲𑁆𑀲 𑀤𑀸𑀭𑀼𑀫𑁆𑀳𑀺 𑀅𑀪𑀺𑀜𑁆𑀜𑀸𑀡𑀁 𑀓𑀢𑁆𑀯𑀸 𑀧𑀼𑀦 𑀢𑁂𑀦 𑀅𑀪𑀺𑀜𑁆𑀜𑀸𑀡𑁂𑀦 𑀢𑀁 𑀧𑀘𑁆𑀘𑀸𑀪𑀺𑀚𑀸𑀦𑀦𑀓𑀸𑀮𑁂, 𑀧𑀼𑀭𑀺𑀲𑀲𑁆𑀲 𑀓𑀸𑀴𑀢𑀺𑀮𑀓𑀸𑀤𑀺𑀅𑀪𑀺𑀜𑁆𑀜𑀸𑀡𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀧𑀼𑀦 𑀢𑁂𑀦 𑀅𑀪𑀺𑀜𑁆𑀜𑀸𑀡𑁂𑀦 𑀅𑀲𑀼𑀓𑁄 𑀦𑀸𑀫 𑀏𑀲𑁄𑀢𑀺 𑀢𑀲𑁆𑀲 𑀧𑀘𑁆𑀘𑀸𑀪𑀺𑀚𑀸𑀦𑀦𑀓𑀸𑀮𑁂, 𑀭𑀜𑁆𑀜𑁄 𑀧𑀺𑀴𑀦𑁆𑀥𑀦𑀕𑁄𑀧𑀓𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀧𑀺𑀴𑀦𑁆𑀥𑀦𑁂 𑀦𑀸𑀫𑀧𑀡𑁆𑀡𑀓𑀁 𑀩𑀦𑁆𑀥𑀺𑀢𑁆𑀯𑀸 ‘𑀅𑀲𑀼𑀓𑀁 𑀧𑀺𑀴𑀦𑁆𑀥𑀦𑀁 𑀦𑀸𑀫 𑀆𑀳𑀭𑀸’𑀢𑀺 𑀯𑀼𑀢𑁆𑀢𑁂 𑀤𑀻𑀧𑀁 𑀚𑀸𑀮𑁂𑀢𑁆𑀯𑀸 𑀭𑀢𑀦𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀧𑀡𑁆𑀡𑀁 𑀯𑀸𑀘𑁂𑀢𑁆𑀯𑀸 𑀢𑀲𑁆𑀲 𑀢𑀲𑁆𑀲𑁂𑀯 𑀧𑀺𑀴𑀦𑁆𑀥𑀦𑀲𑁆𑀲 𑀆𑀳𑀭𑀡𑀓𑀸𑀮𑁂 𑀘 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀧𑀭𑁄 𑀦𑀬𑁄 𑁋 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀯𑀲𑁂𑀦 𑀳𑀺 𑀲𑀜𑁆𑀚𑀸𑀦𑀦𑀮𑀓𑁆𑀔𑀡𑀸 𑀲𑀜𑁆𑀜𑀸. 𑀧𑀼𑀦𑀲𑀜𑁆𑀚𑀸𑀦𑀦𑀧𑀘𑁆𑀘𑀬𑀦𑀺𑀫𑀺𑀢𑁆𑀢𑀓𑀭𑀡𑀭𑀲𑀸, 𑀤𑀸𑀭𑀼𑀆𑀤𑀻𑀲𑀼 𑀢𑀘𑁆𑀙𑀓𑀸𑀤𑀬𑁄 𑀯𑀺𑀬. 𑀬𑀣𑀸𑀕𑀳𑀺𑀢𑀦𑀺𑀫𑀺𑀢𑁆𑀢𑀯𑀲𑁂𑀦 𑀅𑀪𑀺𑀦𑀺𑀯𑁂𑀲𑀓𑀭𑀡𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀳𑀢𑁆𑀣𑀺𑀤𑀲𑁆𑀲𑀓𑀅𑀦𑁆𑀥𑀸 𑀯𑀺𑀬. 𑀆𑀭𑀫𑁆𑀫𑀡𑁂 𑀅𑀦𑁄𑀕𑀸𑀴𑁆𑀳𑀯𑀼𑀢𑁆𑀢𑀺𑀢𑀸𑀬 𑀅𑀘𑀺𑀭𑀝𑁆𑀞𑀸𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀯𑀸, 𑀯𑀺𑀚𑁆𑀚𑀼 𑀯𑀺𑀬. 𑀬𑀣𑀸𑀉𑀧𑀝𑁆𑀞𑀺𑀢𑀯𑀺𑀲𑀬𑀧𑀤𑀝𑁆𑀞𑀸𑀦𑀸, 𑀢𑀺𑀡𑀧𑀼𑀭𑀺𑀲𑀓𑁂𑀲𑀼 𑀫𑀺𑀕𑀧𑁄𑀢𑀓𑀸𑀦𑀁 ‘𑀧𑀼𑀭𑀺𑀲𑀸’𑀢𑀺 𑀉𑀧𑁆𑀧𑀦𑁆𑀦𑀲𑀜𑁆𑀜𑀸 𑀯𑀺𑀬. 𑀬𑀸 𑀧𑀦𑁂𑀢𑁆𑀣 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀳𑁄𑀢𑀺 𑀲𑀸 𑀲𑀜𑁆𑀜𑀸 𑀜𑀸𑀡𑀫𑁂𑀯 𑀅𑀦𑀼𑀯𑀢𑁆𑀢𑀢𑀺. 𑀲𑀲𑀫𑁆𑀪𑀸𑀭𑀧𑀣𑀯𑀻𑀆𑀤𑀻𑀲𑀼 𑀲𑁂𑀲𑀥𑀫𑁆𑀫𑀸 𑀧𑀣𑀯𑀻𑀆𑀤𑀻𑀦𑀺 𑀯𑀺𑀬𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀘𑁂𑀢𑀬𑀢𑀻𑀢𑀺 𑀘𑁂𑀢𑀦𑀸 𑀲𑀤𑁆𑀥𑀺𑀁 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀆𑀭𑀫𑁆𑀫𑀡𑁂 𑀅𑀪𑀺𑀲𑀦𑁆𑀤𑀳𑀢𑀻𑀢𑀺 𑀅𑀢𑁆𑀣𑁄. 𑀲𑀸 𑀘𑁂𑀢𑀬𑀺𑀢𑀮𑀓𑁆𑀔𑀡𑀸, 𑀘𑁂𑀢𑀦𑀸𑀪𑀸𑀯𑀮𑀓𑁆𑀔𑀡𑀸𑀢𑀺 𑀅𑀢𑁆𑀣𑁄. 𑀆𑀬𑀽𑀳𑀦𑀭𑀲𑀸. 𑀘𑀢𑀼𑀪𑀽𑀫𑀺𑀓𑀘𑁂𑀢𑀦𑀸 𑀳𑀺 𑀦𑁄𑀘𑁂𑀢𑀬𑀺𑀢𑀮𑀓𑁆𑀔𑀡𑀸 𑀦𑀸𑀫 𑀦𑀢𑁆𑀣𑀺. 𑀲𑀩𑁆𑀩𑀸 𑀘𑁂𑀢𑀬𑀺𑀢𑀮𑀓𑁆𑀔𑀡𑀸𑀯. 𑀆𑀬𑀽𑀳𑀦𑀭𑀲𑀢𑀸 𑀧𑀦 𑀓𑀼𑀲𑀮𑀸𑀓𑀼𑀲𑀮𑁂𑀲𑀼 𑀏𑀯 𑀳𑁄𑀢𑀺. 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀸𑀬𑀽𑀳𑀦𑀝𑁆𑀞𑀸𑀦𑀜𑁆𑀳𑀺 𑀧𑀢𑁆𑀯𑀸 𑀲𑁂𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀏𑀓𑀤𑁂𑀲𑀫𑀢𑁆𑀢𑀓𑀫𑁂𑀯 𑀓𑀺𑀘𑁆𑀘𑀁 𑀳𑁄𑀢𑀺. 𑀘𑁂𑀢𑀦𑀸 𑀧𑀦 𑀅𑀢𑀺𑀭𑁂𑀓𑀉𑀲𑁆𑀲𑀸𑀳𑀸 𑀅𑀢𑀺𑀭𑁂𑀓𑀯𑀸𑀬𑀸𑀫𑀸, 𑀤𑀺𑀕𑀼𑀡𑀼𑀲𑁆𑀲𑀸𑀳𑀸 𑀤𑀺𑀕𑀼𑀡𑀯𑀸𑀬𑀸𑀫𑀸. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋 ‘‘𑀣𑀸𑀯𑀭𑀺𑀬𑀲𑀪𑀸𑀯𑀲𑀡𑁆𑀞𑀺𑀢𑀸 𑀘 𑀧𑀦𑁂𑀲𑀸 𑀘𑁂𑀢𑀦𑀸’’𑀢𑀺. 𑀣𑀸𑀯𑀭𑀺𑀬𑁄𑀢𑀺 𑀔𑁂𑀢𑁆𑀢𑀲𑀸𑀫𑀻 𑀯𑀼𑀘𑁆𑀘𑀢𑀺. 𑀬𑀣𑀸 𑀔𑁂𑀢𑁆𑀢𑀲𑀸𑀫𑀻 𑀧𑀼𑀭𑀺𑀲𑁄 𑀧𑀜𑁆𑀘𑀧𑀡𑁆𑀡𑀸𑀲 𑀩𑀮𑀺𑀧𑀼𑀭𑀺𑀲𑁂 𑀕𑀳𑁂𑀢𑁆𑀯𑀸 ‘𑀮𑀸𑀬𑀺𑀲𑁆𑀲𑀸𑀫𑀻’𑀢𑀺 𑀏𑀓𑀢𑁄 𑀔𑁂𑀢𑁆𑀢𑀁 𑀑𑀢𑀭𑀢𑀺. 𑀢𑀲𑁆𑀲 𑀅𑀢𑀺𑀭𑁂𑀓𑁄 𑀉𑀲𑁆𑀲𑀸𑀳𑁄 𑀅𑀢𑀺𑀭𑁂𑀓𑁄 𑀯𑀸𑀬𑀸𑀫𑁄, 𑀤𑀺𑀕𑀼𑀡𑁄 𑀉𑀲𑁆𑀲𑀸𑀳𑁄 𑀤𑀺𑀕𑀼𑀡𑁄 𑀯𑀸𑀬𑀸𑀫𑁄 𑀳𑁄𑀢𑀺, ‘𑀦𑀺𑀭𑀦𑁆𑀢𑀭𑀁 𑀕𑀡𑁆𑀳𑀣𑀸’𑀢𑀺𑀆𑀤𑀻𑀦𑀺 𑀯𑀤𑀢𑀺, 𑀲𑀻𑀫𑀁 𑀆𑀘𑀺𑀓𑁆𑀔𑀢𑀺, 𑀢𑁂𑀲𑀁 𑀲𑀼𑀭𑀸𑀪𑀢𑁆𑀢𑀕𑀦𑁆𑀥𑀫𑀸𑀮𑀸𑀤𑀻𑀦𑀺 𑀚𑀸𑀦𑀸𑀢𑀺, 𑀫𑀕𑁆𑀕𑀁 𑀲𑀫𑀓𑀁 𑀳𑀭𑀢𑀺. 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀯𑁂𑀤𑀺𑀢𑀩𑁆𑀩𑀁. 𑀔𑁂𑀢𑁆𑀢𑀲𑀸𑀫𑀺𑀧𑀼𑀭𑀺𑀲𑁄 𑀯𑀺𑀬 𑀳𑀺 𑀘𑁂𑀢𑀦𑀸. 𑀧𑀜𑁆𑀘𑀧𑀡𑁆𑀡𑀸𑀲 𑀩𑀮𑀺𑀧𑀼𑀭𑀺𑀲𑀸 𑀯𑀺𑀬 𑀘𑀺𑀢𑁆𑀢𑀗𑁆𑀕𑀯𑀲𑁂𑀦 𑀉𑀧𑁆𑀧𑀦𑁆𑀦𑀸 𑀧𑀜𑁆𑀘𑀧𑀡𑁆𑀡𑀸𑀲 𑀓𑀼𑀲𑀮𑀸 𑀥𑀫𑁆𑀫𑀸. 𑀔𑁂𑀢𑁆𑀢𑀲𑀸𑀫𑀺𑀧𑀼𑀭𑀺𑀲𑀲𑁆𑀲 𑀤𑀺𑀕𑀼𑀡𑀼𑀲𑁆𑀲𑀸𑀳𑀤𑀺𑀕𑀼𑀡𑀯𑀸𑀬𑀸𑀫𑀓𑀭𑀡𑀓𑀸𑀮𑁄 𑀯𑀺𑀬 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀸𑀬𑀽𑀳𑀦𑀝𑁆𑀞𑀸𑀦𑀁 𑀧𑀢𑁆𑀯𑀸 𑀘𑁂𑀢𑀦𑀸𑀬 𑀤𑀺𑀕𑀼𑀡𑀼𑀲𑁆𑀲𑀸𑀳𑁄 𑀤𑀺𑀕𑀼𑀡𑀯𑀸𑀬𑀸𑀫𑁄 𑀳𑁄𑀢𑀺. 𑀏𑀯𑀫𑀲𑁆𑀲𑀸 𑀆𑀬𑀽𑀳𑀦𑀭𑀲𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀲𑀸 𑀧𑀦𑁂𑀲𑀸 𑀲𑀁𑀯𑀺𑀤𑀳𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀲𑀁𑀯𑀺𑀤𑀳𑀫𑀸𑀦𑀸 𑀳𑀺 𑀅𑀬𑀁 𑀉𑀧𑀝𑁆𑀞𑀸𑀢𑀺, 𑀲𑀓𑀺𑀘𑁆𑀘𑀧𑀭𑀓𑀺𑀘𑁆𑀘𑀲𑀸𑀥𑀓𑀸, 𑀚𑁂𑀝𑁆𑀞𑀲𑀺𑀲𑁆𑀲𑀫𑀳𑀸𑀯𑀟𑁆𑀠𑀓𑀻𑀆𑀤𑀬𑁄 𑀯𑀺𑀬. 𑀬𑀣𑀸 𑀳𑀺 𑀚𑁂𑀝𑁆𑀞𑀲𑀺𑀲𑁆𑀲𑁄 𑀉𑀧𑀚𑁆𑀛𑀸𑀬𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀲𑀬𑀁 𑀅𑀥𑀻𑀬𑀫𑀸𑀦𑁄 𑀇𑀢𑀭𑁂𑀧𑀺 𑀤𑀸𑀭𑀓𑁂 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀅𑀚𑁆𑀛𑀬𑀦𑀓𑀫𑁆𑀫𑁂 𑀧𑀯𑀢𑁆𑀢𑀬𑀢𑀺, 𑀢𑀲𑁆𑀫𑀺𑀜𑁆𑀳𑀺 𑀅𑀥𑀻𑀬𑀺𑀢𑀼𑀁 𑀆𑀭𑀤𑁆𑀥𑁂 𑀢𑁂𑀧𑀺 𑀅𑀥𑀻𑀬𑀦𑁆𑀢𑀺, 𑀢𑀤𑀦𑀼𑀯𑀢𑁆𑀢𑀺𑀢𑀸𑀬. 𑀬𑀣𑀸 𑀘 𑀫𑀳𑀸𑀯𑀟𑁆𑀠𑀓𑀻 𑀲𑀬𑀁 𑀢𑀘𑁆𑀙𑀦𑁆𑀢𑁄 𑀇𑀢𑀭𑁂𑀧𑀺 𑀢𑀘𑁆𑀙𑀓𑁂 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀢𑀘𑁆𑀙𑀦𑀓𑀫𑁆𑀫𑁂 𑀧𑀯𑀢𑁆𑀢𑀬𑀢𑀺, 𑀢𑀲𑁆𑀫𑀺𑀜𑁆𑀳𑀺 𑀢𑀘𑁆𑀙𑀺𑀢𑀼𑀁 𑀆𑀭𑀤𑁆𑀥𑁂 𑀢𑁂𑀧𑀺 𑀢𑀘𑁆𑀙𑀦𑁆𑀢𑀺, 𑀢𑀤𑀦𑀼𑀯𑀢𑁆𑀢𑀺𑀢𑀸𑀬. 𑀬𑀣𑀸 𑀘 𑀬𑁄𑀥𑀦𑀸𑀬𑀓𑁄 𑀲𑀬𑀁 𑀬𑀼𑀚𑁆𑀛𑀫𑀸𑀦𑁄 𑀇𑀢𑀭𑁂𑀧𑀺 𑀬𑁄𑀥𑁂 𑀲𑀫𑁆𑀧𑀳𑀸𑀭𑀯𑀼𑀢𑁆𑀢𑀺𑀬𑀁 𑀧𑀯𑀢𑁆𑀢𑀬𑀢𑀺, 𑀢𑀲𑁆𑀫𑀺𑀜𑁆𑀳𑀺 𑀬𑀼𑀚𑁆𑀛𑀺𑀢𑀼𑀁 𑀆𑀭𑀤𑁆𑀥𑁂 𑀢𑁂𑀧𑀺 𑀅𑀦𑀺𑀯𑀢𑁆𑀢𑀫𑀸𑀦𑀸 𑀬𑀼𑀚𑁆𑀛𑀦𑁆𑀢𑀺, 𑀢𑀤𑀦𑀼𑀯𑀢𑁆𑀢𑀺𑀢𑀸𑀬. 𑀏𑀯𑀫𑁂𑀲𑀸𑀧𑀺 𑀅𑀢𑁆𑀢𑀦𑁄 𑀓𑀺𑀘𑁆𑀘𑁂𑀦 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀫𑀸𑀦𑀸 𑀅𑀜𑁆𑀜𑁂𑀧𑀺 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀓𑀺𑀭𑀺𑀬𑀸𑀬 𑀧𑀯𑀢𑁆𑀢𑁂𑀢𑀺. 𑀢𑀲𑁆𑀲𑀸 𑀳𑀺 𑀅𑀢𑁆𑀢𑀦𑁄 𑀓𑀺𑀘𑁆𑀘𑀁 𑀆𑀭𑀤𑁆𑀥𑀸𑀬, 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀧𑀺 𑀆𑀭𑀪𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘𑀲𑀓𑀺𑀘𑁆𑀘𑀧𑀭𑀓𑀺𑀘𑁆𑀘𑀲𑀸𑀥𑀓𑀸, 𑀚𑁂𑀝𑁆𑀞𑀲𑀺𑀲𑁆𑀲𑀫𑀳𑀸𑀯𑀟𑁆𑀠𑀓𑀻𑀆𑀤𑀬𑁄 𑀯𑀺𑀬𑀸’𑀢𑀺. 𑀅𑀘𑁆𑀘𑀸𑀬𑀺𑀓𑀓𑀫𑁆𑀫𑀸𑀦𑀼𑀲𑁆𑀲𑀭𑀡𑀸𑀤𑀻𑀲𑀼 𑀘 𑀧𑀦𑀸𑀬𑀁 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀉𑀲𑁆𑀲𑀸𑀳𑀦𑀪𑀸𑀯𑁂𑀦 𑀧𑀯𑀢𑁆𑀢𑀫𑀸𑀦𑀸 𑀧𑀸𑀓𑀝𑀸 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

‘𑀆𑀭𑀫𑁆𑀫𑀡𑀁 𑀘𑀺𑀦𑁆𑀢𑁂𑀢𑀻’𑀢𑀺 𑀘𑀺𑀢𑁆𑀢𑀦𑁆𑀢𑀺 𑀦𑀬𑁂𑀦 𑀘𑀺𑀢𑁆𑀢𑀲𑁆𑀲 𑀯𑀘𑀦𑀢𑁆𑀣𑁄 𑀯𑀼𑀢𑁆𑀢𑁄 𑀏𑀯. 𑀮𑀓𑁆𑀔𑀡𑀸𑀤𑀺𑀢𑁄 𑀧𑀦 𑀯𑀺𑀚𑀸𑀦𑀦𑀮𑀓𑁆𑀔𑀡𑀁 𑀘𑀺𑀢𑁆𑀢𑀁, 𑀧𑀼𑀩𑁆𑀩𑀗𑁆𑀕𑀫𑀭𑀲𑀁, 𑀲𑀦𑁆𑀤𑀳𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀦𑀸𑀫𑀭𑀽𑀧𑀧𑀤𑀝𑁆𑀞𑀸𑀦𑀁. 𑀘𑀢𑀼𑀪𑀽𑀫𑀓𑀘𑀺𑀢𑁆𑀢𑀜𑁆𑀳𑀺 𑀦𑁄𑀯𑀺𑀚𑀸𑀦𑀦𑀮𑀓𑁆𑀔𑀡𑀁 𑀦𑀸𑀫 𑀦𑀢𑁆𑀣𑀺. 𑀲𑀩𑁆𑀩𑀁 𑀯𑀺𑀚𑀸𑀦𑀦𑀮𑀓𑁆𑀔𑀡𑀫𑁂𑀯. 𑀤𑁆𑀯𑀸𑀭𑀁 𑀧𑀦 𑀧𑀢𑁆𑀯𑀸 𑀆𑀭𑀫𑁆𑀫𑀡𑀯𑀺𑀪𑀸𑀯𑀦𑀝𑁆𑀞𑀸𑀦𑁂 𑀘𑀺𑀢𑁆𑀢𑀁 𑀧𑀼𑀩𑁆𑀩𑀗𑁆𑀕𑀫𑀁 𑀧𑀼𑀭𑁂𑀘𑀸𑀭𑀺𑀓𑀁 𑀳𑁄𑀢𑀺. 𑀘𑀓𑁆𑀔𑀼𑀦𑀸 𑀳𑀺 𑀤𑀺𑀝𑁆𑀞𑀁 𑀭𑀽𑀧𑀸𑀭𑀫𑁆𑀫𑀡𑀁 𑀘𑀺𑀢𑁆𑀢𑁂𑀦𑁂𑀯 𑀯𑀺𑀚𑀸𑀦𑀸𑀢𑀺…𑀧𑁂… 𑀫𑀦𑁂𑀦 𑀯𑀺𑀜𑁆𑀜𑀸𑀢𑀁 𑀥𑀫𑁆𑀫𑀸𑀭𑀫𑁆𑀫𑀡𑀁 𑀘𑀺𑀢𑁆𑀢𑁂𑀦𑁂𑀯 𑀯𑀺𑀚𑀸𑀦𑀸𑀢𑀺. 𑀬𑀣𑀸 𑀳𑀺 𑀦𑀕𑀭𑀕𑀼𑀢𑁆𑀢𑀺𑀓𑁄 𑀦𑀸𑀫 𑀦𑀕𑀭𑀫𑀚𑁆𑀛𑁂 𑀲𑀺𑀗𑁆𑀖𑀸𑀝𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 ‘𑀅𑀬𑀁 𑀦𑁂𑀯𑀸𑀲𑀺𑀓𑁄 𑀅𑀬𑀁 𑀆𑀕𑀦𑁆𑀢𑀼𑀓𑁄’𑀢𑀺 𑀆𑀕𑀢𑀸𑀕𑀢𑀁 𑀚𑀦𑀁 𑀉𑀧𑀥𑀸𑀭𑁂𑀢𑀺 𑀯𑀯𑀢𑁆𑀣𑀧𑁂𑀢𑀺 𑁋 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀫𑀳𑀸𑀣𑁂𑀭𑁂𑀦 𑁋 ‘‘𑀬𑀣𑀸, 𑀫𑀳𑀸𑀭𑀸𑀚, 𑀦𑀕𑀭𑀕𑀼𑀢𑁆𑀢𑀺𑀓𑁄 𑀦𑀸𑀫 𑀫𑀚𑁆𑀛𑁂 𑀦𑀕𑀭𑀲𑁆𑀲 𑀲𑀺𑀗𑁆𑀖𑀸𑀝𑀓𑁂 𑀦𑀺𑀲𑀺𑀦𑁆𑀦𑁄 𑀧𑀼𑀭𑀢𑁆𑀣𑀺𑀫𑀢𑁄 𑀤𑀺𑀲𑀢𑁄 𑀧𑀼𑀭𑀺𑀲𑀁 𑀆𑀕𑀘𑁆𑀙𑀦𑁆𑀢𑀁 𑀧𑀲𑁆𑀲𑁂𑀬𑁆𑀬… 𑀧𑀘𑁆𑀙𑀺𑀫𑀢𑁄… 𑀤𑀓𑁆𑀔𑀺𑀡𑀢𑁄… 𑀉𑀢𑁆𑀢𑀭𑀢𑁄 𑀤𑀺𑀲𑀢𑁄 𑀧𑀼𑀭𑀺𑀲𑀁 𑀆𑀕𑀘𑁆𑀙𑀦𑁆𑀢𑀁 𑀧𑀲𑁆𑀲𑁂𑀬𑁆𑀬, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑀁 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀧𑀲𑁆𑀲𑀢𑀺 𑀢𑀁 𑀯𑀺𑀜𑁆𑀜𑀸𑀡𑁂𑀦 𑀯𑀺𑀚𑀸𑀦𑀸𑀢𑀺, 𑀬𑀁 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀡𑀸𑀢𑀺, 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀢𑀺, 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀢𑀺, 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀢𑀺, 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀚𑀸𑀦𑀸𑀢𑀺, 𑀢𑀁 𑀯𑀺𑀜𑁆𑀜𑀸𑀡𑁂𑀦 𑀯𑀺𑀚𑀸𑀦𑀸𑀢𑀻’’𑀢𑀺 (𑀫𑀺. 𑀧. 𑁨.𑁩.𑁧𑁨). 𑀏𑀯𑀁 𑀤𑁆𑀯𑀸𑀭𑀁 𑀧𑀢𑁆𑀯𑀸 𑀆𑀭𑀫𑁆𑀫𑀡𑀯𑀺𑀪𑀸𑀯𑀦𑀝𑁆𑀞𑀸𑀦𑁂 𑀘𑀺𑀢𑁆𑀢𑀫𑁂𑀯 𑀧𑀼𑀩𑁆𑀩𑀗𑁆𑀕𑀫𑀁 𑀧𑀼𑀭𑁂𑀘𑀸𑀭𑀺𑀓𑀁. 𑀢𑀲𑁆𑀫𑀸 𑀧𑀼𑀩𑁆𑀩𑀗𑁆𑀕𑀫𑀭𑀲𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀢𑀤𑁂𑀢𑀁 𑀧𑀘𑁆𑀙𑀺𑀫𑀁 𑀧𑀘𑁆𑀙𑀺𑀫𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀧𑀼𑀭𑀺𑀫𑀁 𑀧𑀼𑀭𑀺𑀫𑀁 𑀦𑀺𑀭𑀦𑁆𑀢𑀭𑀁 𑀓𑀢𑁆𑀯𑀸 𑀲𑀦𑁆𑀤𑀳𑀦𑀫𑁂𑀯 𑀉𑀧𑀝𑁆𑀞𑀸𑀢𑀻𑀢𑀺 𑀲𑀦𑁆𑀤𑀳𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀧𑀦𑀲𑁆𑀲 𑀦𑀺𑀬𑀫𑀢𑁄 𑀦𑀸𑀫𑀭𑀽𑀧𑀁, 𑀘𑀢𑀼𑀯𑁄𑀓𑀸𑀭𑀪𑀯𑁂 𑀦𑀸𑀫𑀫𑁂𑀯 𑀧𑀤𑀝𑁆𑀞𑀸𑀦𑀁. 𑀢𑀲𑁆𑀫𑀸 𑀦𑀸𑀫𑀭𑀽𑀧𑀧𑀤𑀝𑁆𑀞𑀸𑀦𑀦𑁆𑀢𑀺 𑀯𑀼𑀢𑁆𑀢𑀁.

𑀓𑀺𑀁 𑀧𑀦𑁂𑀢𑀁 𑀘𑀺𑀢𑁆𑀢𑀁 𑀧𑀼𑀭𑀺𑀫𑀦𑀺𑀤𑁆𑀤𑀺𑀝𑁆𑀞𑀘𑀺𑀢𑁆𑀢𑁂𑀦 𑀲𑀤𑁆𑀥𑀺𑀁 𑀏𑀓𑀫𑁂𑀯 𑀉𑀤𑀸𑀳𑀼 𑀅𑀜𑁆𑀜𑀦𑁆𑀢𑀺? 𑀏𑀓𑀫𑁂𑀯. 𑀅𑀣 𑀓𑀲𑁆𑀫𑀸 𑀧𑀼𑀭𑀺𑀫𑀦𑀺𑀤𑁆𑀤𑀺𑀝𑁆𑀞𑀁 𑀧𑀼𑀦 𑀯𑀼𑀢𑁆𑀢𑀦𑁆𑀢𑀺? 𑀅𑀯𑀺𑀘𑀸𑀭𑀺𑀢𑀁 𑀏𑀢𑀁 𑀅𑀝𑁆𑀞𑀓𑀣𑀸𑀬𑀁. 𑀅𑀬𑀁 𑀧𑀦𑁂𑀢𑁆𑀣 𑀬𑀼𑀢𑁆𑀢𑀺 𑁋 𑀬𑀣𑀸 𑀳𑀺 𑀭𑀽𑀧𑀸𑀤𑀻𑀦𑀺 𑀉𑀧𑀸𑀤𑀸𑀬 𑀧𑀜𑁆𑀜𑀢𑁆𑀢𑀸 𑀲𑀽𑀭𑀺𑀬𑀸𑀤𑀬𑁄 𑀦 𑀅𑀢𑁆𑀣𑀢𑁄 𑀭𑀽𑀧𑀸𑀤𑀻𑀳𑀺 𑀅𑀜𑁆𑀜𑁂 𑀳𑁄𑀦𑁆𑀢𑀺, 𑀢𑁂𑀦𑁂𑀯 𑀬𑀲𑁆𑀫𑀺𑀁 𑀲𑀫𑀬𑁂 𑀲𑀽𑀭𑀺𑀬𑁄 𑀉𑀤𑁂𑀢𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀢𑀲𑁆𑀲 𑀢𑁂𑀚𑀲𑀗𑁆𑀔𑀸𑀢𑀁 𑀭𑀽𑀧𑀫𑁆𑀧𑀻𑀢𑀺. 𑀏𑀯𑀁 𑀯𑀼𑀘𑁆𑀘𑀫𑀸𑀦𑁂𑀧𑀺 𑀦 𑀭𑀽𑀧𑀸𑀤𑀻𑀳𑀺 𑀅𑀜𑁆𑀜𑁄 𑀲𑀽𑀭𑀺𑀬𑁄 𑀦𑀸𑀫 𑀅𑀢𑁆𑀣𑀺. 𑀦 𑀢𑀣𑀸 𑀘𑀺𑀢𑁆𑀢𑀁; 𑀨𑀲𑁆𑀲𑀸𑀤𑀬𑁄 𑀥𑀫𑁆𑀫𑁂 𑀉𑀧𑀸𑀤𑀸𑀬 𑀧𑀜𑁆𑀜𑀸𑀧𑀺𑀬𑀢𑀺; 𑀅𑀢𑁆𑀣𑀢𑁄 𑀧𑀦𑁂𑀢𑀁 𑀢𑁂𑀳𑀺 𑀅𑀜𑁆𑀜𑀫𑁂𑀯. 𑀢𑁂𑀦 ‘𑀬𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺 𑀏𑀓𑀁𑀲𑁂𑀦𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑀸𑀤𑀻𑀳𑀺 𑀅𑀢𑁆𑀣𑀢𑁄 𑀅𑀜𑁆𑀜𑀫𑁂𑀯 𑀢𑀁 𑀳𑁄𑀢𑀻’𑀢𑀺 𑀇𑀫𑀲𑁆𑀲𑀢𑁆𑀣𑀲𑁆𑀲 𑀤𑀻𑀧𑀦𑀢𑁆𑀣𑀸𑀬 𑀏𑀢𑀁 𑀧𑀼𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀬𑀣𑀸 𑀘 ‘‘𑀬𑀲𑁆𑀫𑀺𑀁 𑀲𑀫𑀬𑁂 𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀺…𑀧𑁂… 𑀧𑀣𑀯𑀻𑀓𑀲𑀺𑀡𑀁, 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺 𑀯𑁂𑀤𑀦𑀸 𑀳𑁄𑀢𑀻’’𑀢𑀺𑀆𑀤𑀻𑀲𑀼 (𑀥. 𑀲. 𑁧𑁬𑁦) 𑀧𑀦 𑀪𑀸𑀯𑁂𑀦𑁆𑀢𑁂𑀦 𑀯𑀯𑀢𑁆𑀣𑀸𑀧𑀺𑀢𑁂 𑀲𑀫𑀬𑁂 𑀬𑁄 𑀪𑀸𑀯𑁂𑀢𑀺 𑀦 𑀲𑁄 𑀅𑀢𑁆𑀣𑀢𑁄 𑀉𑀧𑁆𑀧𑀚𑁆𑀚𑀢𑀺 𑀦𑀸𑀫, 𑀢𑁂𑀦𑁂𑀯 𑀢𑀢𑁆𑀣 𑀬𑀣𑀸 ‘‘𑀨𑀲𑁆𑀲𑁄 𑀳𑁄𑀢𑀺 𑀯𑁂𑀤𑀦𑀸 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁, 𑀦 𑀏𑀯𑀁 ‘‘𑀬𑁄 𑀪𑀸𑀯𑁂𑀢𑀺 𑀲𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. ‘‘𑀬𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀻’’𑀢𑀺𑀆𑀤𑀻𑀲𑀼 𑀧𑀦 𑀘𑀺𑀢𑁆𑀢𑁂𑀦 𑀯𑀯𑀢𑁆𑀣𑀸𑀧𑀺𑀢𑁂 𑀲𑀫𑀬𑁂 𑀲𑀫𑀬𑀯𑀯𑀢𑁆𑀣𑀸𑀧𑀺𑀢𑀁 𑀘𑀺𑀢𑁆𑀢𑀁 𑀦 𑀢𑀣𑀸 𑀅𑀢𑁆𑀣𑀢𑁄 𑀦𑀼𑀧𑁆𑀧𑀚𑁆𑀚𑀢𑀺. 𑀬𑀣𑁂𑀯 𑀧𑀦 𑀢𑀤𑀸 ‘𑀨𑀲𑁆𑀲𑁄 𑀳𑁄𑀢𑀺 𑀯𑁂𑀤𑀦𑀸 𑀳𑁄𑀢𑀺’, 𑀢𑀣𑀸 ‘𑀘𑀺𑀢𑁆𑀢𑀫𑁆𑀧𑀺 𑀳𑁄𑀢𑀻’𑀢𑀺 𑀇𑀫𑀲𑁆𑀲𑀧𑀺 𑀅𑀢𑁆𑀣𑀲𑁆𑀲 𑀤𑀻𑀧𑀦𑀢𑁆𑀣𑀫𑀺𑀤𑀁 𑀧𑀼𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀤𑀁 𑀧𑀦𑁂𑀢𑁆𑀣 𑀲𑀦𑁆𑀦𑀺𑀝𑁆𑀞𑀸𑀦𑀁 𑁋 𑀉𑀤𑁆𑀤𑁂𑀲𑀯𑀸𑀭𑁂 𑀲𑀗𑁆𑀕𑀡𑁆𑀳𑀦𑀢𑁆𑀣𑀁 𑀦𑀺𑀤𑁆𑀤𑁂𑀲𑀯𑀸𑀭𑁂 𑀘 𑀯𑀺𑀪𑀚𑀦𑀢𑁆𑀣𑀁 𑀧𑀼𑀭𑀺𑀫𑁂𑀦 𑀳𑀺 ‘𑀘𑀺𑀢𑁆𑀢’-𑀲𑀤𑁆𑀤𑁂𑀦 𑀓𑁂𑀯𑀮𑀁 𑀲𑀫𑀬𑁄 𑀯𑀯𑀢𑁆𑀣𑀸𑀧𑀺𑀢𑁄. 𑀢𑀲𑁆𑀫𑀺𑀁 𑀧𑀦 𑀘𑀺𑀢𑁆𑀢𑁂𑀦 𑀯𑀯𑀢𑁆𑀣𑀸𑀧𑀺𑀢𑀲𑀫𑀬𑁂 𑀬𑁂 𑀥𑀫𑁆𑀫𑀸 𑀳𑁄𑀦𑁆𑀢𑀺 𑀢𑁂𑀲𑀁 𑀤𑀲𑁆𑀲𑀦𑀢𑁆𑀣𑀁 ‘‘𑀨𑀲𑁆𑀲𑁄 𑀳𑁄𑀢𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀘𑀺𑀢𑁆𑀢𑀜𑁆𑀘𑀸𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀳𑁄𑀢𑀺𑀬𑁂𑀯. 𑀢𑀲𑁆𑀫𑀸 𑀢𑀲𑁆𑀲𑀸𑀧𑀺 𑀲𑀗𑁆𑀕𑀡𑁆𑀳𑀦𑀢𑁆𑀣𑀫𑁂𑀢𑀁 𑀧𑀼𑀦 𑀯𑀼𑀢𑁆𑀢𑀁. 𑀇𑀫𑀲𑁆𑀫𑀺𑀜𑁆𑀘 𑀞𑀸𑀦𑁂 𑀏𑀢𑀲𑁆𑀫𑀺𑀁 𑀅𑀯𑀼𑀘𑁆𑀘𑀫𑀸𑀦𑁂 ‘‘𑀓𑀢𑀫𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢’’𑀦𑁆𑀢𑀺 𑀦 𑀲𑀓𑁆𑀓𑀸 𑀪𑀯𑁂𑀬𑁆𑀬 𑀦𑀺𑀤𑁆𑀤𑁂𑀲𑀯𑀸𑀭𑁂 𑀯𑀺𑀪𑀚𑀺𑀢𑀼𑀁. 𑀏𑀯𑀫𑀲𑁆𑀲 𑀯𑀺𑀪𑀚𑀦𑀁𑀬𑁂𑀯 𑀧𑀭𑀺𑀳𑀸𑀬𑁂𑀣. 𑀢𑀲𑁆𑀫𑀸 𑀢𑀲𑁆𑀲 𑀦𑀺𑀤𑁆𑀤𑁂𑀲𑀯𑀸𑀭𑁂 𑀯𑀺𑀪𑀚𑀦𑀢𑁆𑀣𑀫𑁆𑀧𑀺 𑀏𑀢𑀜𑁆𑀘 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀬𑀲𑁆𑀫𑀸 𑀯𑀸 ‘‘𑀉𑀧𑁆𑀧𑀦𑁆𑀦𑀁 𑀳𑁄𑀢𑀻’’𑀢𑀺 𑀏𑀢𑁆𑀣 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀦𑁆𑀢𑀺 𑀏𑀢𑀁 𑀤𑁂𑀲𑀦𑀸𑀲𑀻𑀲𑀫𑁂𑀯, ‘𑀦 𑀧𑀦 𑀘𑀺𑀢𑁆𑀢𑀁 𑀏𑀓𑀫𑁂𑀯 𑀉𑀧𑁆𑀧𑀚𑁆𑀚𑀢𑀻’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀺𑀘𑀸𑀭𑀺𑀢𑀁, 𑀢𑀲𑁆𑀫𑀸 𑀘𑀺𑀢𑁆𑀢𑀁 ‘‘𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀏𑀢𑁆𑀣𑀸𑀧𑀺 𑀘𑀺𑀢𑁆𑀢𑀫𑀢𑁆𑀢𑀫𑁂𑀯 𑀅𑀕𑁆𑀕𑀳𑁂𑀢𑁆𑀯𑀸 𑀧𑀭𑁄𑀧𑀡𑁆𑀡𑀸𑀲𑀓𑀼𑀲𑀮𑀥𑀫𑁆𑀫𑁂𑀳𑀺 𑀲𑀤𑁆𑀥𑀺𑀁𑀬𑁂𑀯 𑀘𑀺𑀢𑁆𑀢𑀁 𑀕𑀳𑀺𑀢𑀁. 𑀏𑀯𑀁 𑀢𑀢𑁆𑀣 𑀲𑀗𑁆𑀔𑁂𑀧𑀢𑁄 𑀲𑀩𑁆𑀩𑁂𑀧𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀥𑀫𑁆𑀫𑁂 𑀕𑀳𑁂𑀢𑁆𑀯𑀸 𑀇𑀥 𑀲𑀭𑀽𑀧𑁂𑀦 𑀧𑀪𑁂𑀤𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀨𑀲𑁆𑀲𑁄 𑀳𑁄𑀢𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀇𑀢𑀺 𑀨𑀲𑁆𑀲𑀸𑀤𑀬𑁄 𑀯𑀺𑀬 𑀘𑀺𑀢𑁆𑀢𑀫𑁆𑀧𑀺 𑀯𑀼𑀢𑁆𑀢𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.