(𑁨𑁬) 𑁬. 𑀅𑀪𑀺𑀜𑁆𑀜𑀸𑀯𑀕𑁆𑀕𑁄

𑁧-𑁩. 𑀅𑀪𑀺𑀜𑁆𑀜𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁫𑁪-𑁨𑁫𑁬. 𑀙𑀝𑁆𑀞𑀲𑁆𑀲 𑀧𑀞𑀫𑁂 𑀅𑀪𑀺𑀜𑁆𑀜𑀸𑀬𑀸𑀢𑀺 𑀚𑀸𑀦𑀺𑀢𑁆𑀯𑀸. 𑀲𑀫𑀣𑁄 𑀘 𑀯𑀺𑀧𑀲𑁆𑀲𑀦𑀸 𑀘𑀸𑀢𑀺 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀘 𑀲𑀗𑁆𑀔𑀸𑀭𑀧𑀭𑀺𑀕𑁆𑀕𑀳𑀯𑀺𑀧𑀲𑁆𑀲𑀦𑀸𑀜𑀸𑀡𑀜𑁆𑀘. 𑀯𑀺𑀚𑁆𑀚𑀸 𑀘 𑀯𑀺𑀫𑀼𑀢𑁆𑀢𑀺 𑀘𑀸𑀢𑀺 𑀫𑀕𑁆𑀕𑀜𑀸𑀡𑀯𑀺𑀚𑁆𑀚𑀸 𑀘 𑀲𑁂𑀲𑀸 𑀲𑀫𑁆𑀧𑀬𑀼𑀢𑁆𑀢𑀓𑀥𑀫𑁆𑀫𑀸 𑀘. 𑀤𑀼𑀢𑀺𑀬𑁂 𑀅𑀦𑀭𑀺𑀬𑀧𑀭𑀺𑀬𑁂𑀲𑀦𑀸𑀢𑀺 𑀅𑀦𑀭𑀺𑀬𑀸𑀦𑀁 𑀏𑀲𑀦𑀸 𑀕𑀯𑁂𑀲𑀦𑀸. 𑀚𑀭𑀸𑀥𑀫𑁆𑀫𑀦𑁆𑀢𑀺 𑀚𑀭𑀸𑀲𑀪𑀸𑀯𑀁. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑀺𑀬𑀁 𑀉𑀢𑁆𑀢𑀸𑀦𑀫𑁂𑀯.

𑁪. 𑀫𑀸𑀮𑀼𑀓𑁆𑀬𑀧𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫𑁭. 𑀘𑀢𑀼𑀢𑁆𑀣𑁂 𑀫𑀸𑀮𑀼𑀓𑁆𑀬𑀧𑀼𑀢𑁆𑀢𑁄𑀢𑀺 𑀫𑀸𑀮𑀼𑀓𑁆𑀬𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀼𑀢𑁆𑀢𑁄. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀢𑀯 𑀑𑀯𑀸𑀤𑀬𑀸𑀘𑀦𑁂. 𑀇𑀫𑀺𑀦𑀸 𑀣𑁂𑀭𑀁 𑀅𑀧𑀲𑀸𑀤𑁂𑀢𑀺𑀧𑀺 𑀉𑀲𑁆𑀲𑀸𑀤𑁂𑀢𑀺𑀧𑀺. 𑀓𑀣𑀁? 𑀅𑀬𑀁 𑀓𑀺𑀭 𑀤𑀳𑀭𑀓𑀸𑀮𑁂 𑀧𑀘𑁆𑀘𑀬𑁂𑀲𑀼 𑀮𑀕𑁆𑀕𑁄 𑀳𑀼𑀢𑁆𑀯𑀸 𑀧𑀘𑁆𑀙𑀸 𑀫𑀳𑀮𑁆𑀮𑀓𑀓𑀸𑀮𑁂 𑀅𑀭𑀜𑁆𑀜𑀯𑀸𑀲𑀁 𑀧𑀢𑁆𑀣𑁂𑀦𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀬𑀸𑀘𑀢𑀺. 𑀅𑀣 𑀪𑀕𑀯𑀸 ‘‘𑀏𑀢𑁆𑀣 𑀤𑀳𑀭𑁂 𑀓𑀺𑀁 𑀯𑀓𑁆𑀔𑀸𑀫, 𑀫𑀸𑀮𑀼𑀓𑁆𑀬𑀧𑀼𑀢𑁆𑀢𑁄 𑀯𑀺𑀬 𑀢𑀼𑀫𑁆𑀳𑁂𑀧𑀺 𑀢𑀭𑀼𑀡𑀓𑀸𑀮𑁂 𑀧𑀘𑁆𑀘𑀬𑁂𑀲𑀼 𑀮𑀕𑁆𑀕𑀺𑀢𑁆𑀯𑀸 𑀫𑀳𑀮𑁆𑀮𑀓𑀓𑀸𑀮𑁂 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁂𑀬𑁆𑀬𑀸𑀣𑀸’’𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀪𑀡𑀦𑁆𑀢𑁄 𑀣𑁂𑀭𑀁 𑀅𑀧𑀲𑀸𑀤𑁂𑀢𑀺 𑀦𑀸𑀫. 𑀬𑀲𑁆𑀫𑀸 𑀧𑀦 𑀣𑁂𑀭𑁄 𑀫𑀳𑀮𑁆𑀮𑀓𑀓𑀸𑀮𑁂𑀯 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀸𑀢𑀼𑀓𑀸𑀫𑁄, 𑀢𑀲𑁆𑀫𑀸 𑀪𑀕𑀯𑀸 ‘‘𑀏𑀢𑁆𑀣 𑀤𑀳𑀭𑁂 𑀓𑀺𑀁 𑀯𑀓𑁆𑀔𑀸𑀫, 𑀅𑀬𑀁 𑀅𑀫𑁆𑀳𑀸𑀓𑀁 𑀫𑀸𑀮𑀼𑀓𑁆𑀬𑀧𑀼𑀢𑁆𑀢𑁄 𑀫𑀳𑀮𑁆𑀮𑀓𑀓𑀸𑀮𑁂𑀧𑀺 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀸𑀢𑀼𑀓𑀸𑀫𑁄 𑀓𑀫𑁆𑀫𑀝𑁆𑀞𑀸𑀦𑀁 𑀬𑀸𑀘𑀢𑀺. 𑀢𑀼𑀫𑁆𑀳𑁂 𑀢𑀸𑀯 𑀢𑀭𑀼𑀡𑀓𑀸𑀮𑁂𑀧𑀺 𑀯𑀻𑀭𑀺𑀬𑀁 𑀦 𑀓𑀭𑁄𑀣𑀸’’𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀪𑀡𑀦𑁆𑀢𑁄 𑀣𑁂𑀭𑀁 𑀉𑀲𑁆𑀲𑀸𑀤𑁂𑀢𑀺 𑀦𑀸𑀫𑀸𑀢𑀺 𑀬𑁄𑀚𑀦𑀸.

𑁫-𑁧𑁦. 𑀓𑀼𑀮𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁫𑁮-𑁨𑁬𑁩. 𑀧𑀜𑁆𑀘𑀫𑁂 𑀆𑀥𑀺𑀧𑀘𑁆𑀘𑁂 𑀞𑀧𑁂𑀦𑁆𑀢𑀻𑀢𑀺 𑀪𑀡𑁆𑀟𑀸𑀕𑀸𑀭𑀺𑀓𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀺. 𑀙𑀝𑁆𑀞𑁂 𑀯𑀡𑁆𑀡𑀲𑀫𑁆𑀧𑀦𑁆𑀦𑁄𑀢𑀺 𑀲𑀭𑀻𑀭𑀯𑀡𑁆𑀡𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀩𑀮𑀲𑀫𑁆𑀧𑀦𑁆𑀦𑁄𑀢𑀺 𑀓𑀸𑀬𑀩𑀮𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀪𑀺𑀓𑁆𑀔𑀼𑀯𑀸𑀭𑁂 𑀯𑀡𑁆𑀡𑀲𑀫𑁆𑀧𑀦𑁆𑀦𑁄𑀢𑀺 𑀕𑀼𑀡𑀯𑀡𑁆𑀡𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀩𑀮𑀲𑀫𑁆𑀧𑀦𑁆𑀦𑁄𑀢𑀺 𑀯𑀻𑀭𑀺𑀬𑀩𑀮𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀚𑀯𑀲𑀫𑁆𑀧𑀦𑁆𑀦𑁄𑀢𑀺 𑀜𑀸𑀡𑀚𑀯𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀲𑀢𑁆𑀢𑀫𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀅𑀪𑀺𑀜𑁆𑀜𑀸𑀯𑀕𑁆𑀕𑁄 𑀙𑀝𑁆𑀞𑁄.