𑁧𑁦. 𑀤𑀼𑀢𑀺𑀬𑀧𑀫𑀸𑀤𑀸𑀤𑀺𑀯𑀕𑁆𑀕𑀯𑀡𑁆𑀡𑀦𑀸

𑁯𑁮. 𑀤𑀲𑀫𑁂 𑀅𑀚𑁆𑀛𑀢𑁆𑀢𑀺𑀓𑀦𑁆𑀢𑀺 𑀦𑀺𑀬𑀓𑀚𑁆𑀛𑀢𑁆𑀢𑀯𑀲𑁂𑀦 𑀅𑀚𑁆𑀛𑀢𑁆𑀢𑀺𑀓𑀁. 𑀅𑀗𑁆𑀕𑀦𑁆𑀢𑀺 𑀓𑀸𑀭𑀡𑀁. 𑀇𑀢𑀺 𑀓𑀭𑀺𑀢𑁆𑀯𑀸𑀢𑀺 𑀏𑀯𑀁 𑀓𑀢𑁆𑀯𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀪𑀺𑀓𑁆𑀔𑀯𑁂, 𑀅𑀚𑁆𑀛𑀢𑁆𑀢𑀁 𑀧𑀘𑁆𑀘𑀢𑁆𑀢𑀁 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀲𑀫𑀼𑀝𑁆𑀞𑀺𑀢𑀁 𑀓𑀸𑀭𑀡𑀦𑁆𑀢𑀺 𑀓𑀢𑁆𑀯𑀸 𑀦 𑀅𑀜𑁆𑀜𑀁 𑀏𑀓𑀁 𑀓𑀸𑀭𑀡𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀻𑀢𑀺.

𑁧𑁧𑁦-𑁧𑁧𑁪. 𑀩𑀸𑀳𑀺𑀭𑀦𑁆𑀢𑀺 𑀅𑀚𑁆𑀛𑀢𑁆𑀢𑀲𑀦𑁆𑀢𑀸𑀦𑀢𑁄 𑀩𑀳𑀺 𑀪𑀯𑀁. 𑀲𑀤𑁆𑀥𑀫𑁆𑀫𑀲𑁆𑀲𑀸𑀢𑀺 𑀲𑀼𑀤𑁆𑀥𑀫𑁆𑀫𑀲𑁆𑀲, 𑀲𑀸𑀲𑀦𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀲𑀫𑁆𑀫𑁄𑀲𑀸𑀬𑀸𑀢𑀺 𑀯𑀺𑀦𑀸𑀲𑀸𑀬. 𑀅𑀦𑁆𑀢𑀭𑀥𑀸𑀦𑀸𑀬𑀸𑀢𑀺 𑀅𑀧𑀜𑁆𑀜𑀸𑀡𑀢𑁆𑀣𑀸𑀬.

𑁧𑁧𑁫. 𑀞𑀺𑀢𑀺𑀬𑀸𑀢𑀺 𑀘𑀺𑀭𑀝𑁆𑀞𑀺𑀢𑀢𑁆𑀣𑀁. 𑀅𑀲𑀫𑁆𑀫𑁄𑀲𑀸𑀬 𑀅𑀦𑀦𑁆𑀢𑀭𑀥𑀸𑀦𑀸𑀬𑀸𑀢𑀺 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀲𑁂𑀲𑀫𑁂𑀢𑁆𑀣 𑀘𑀢𑀼𑀓𑁆𑀓𑁄𑀝𑀺𑀓𑁂 𑀯𑀼𑀢𑁆𑀢𑀦𑀬𑀫𑁂𑀯.

𑁧𑁩𑁦. 𑀇𑀢𑁄 𑀧𑀭𑁂𑀲𑀼 𑀅𑀥𑀫𑁆𑀫𑀁 𑀥𑀫𑁆𑀫𑁄𑀢𑀺 𑀤𑀻𑀧𑁂𑀦𑁆𑀢𑀻𑀢𑀺𑀆𑀤𑀻𑀲𑀼 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀢𑀸𑀯 𑀤𑀲 𑀓𑀼𑀲𑀮𑀓𑀫𑁆𑀫𑀧𑀣𑀸 𑀥𑀫𑁆𑀫𑁄, 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑀸 𑀅𑀥𑀫𑁆𑀫𑁄. 𑀢𑀣𑀸 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀧𑀜𑁆𑀘 𑀩𑀮𑀸𑀦𑀺 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄𑀢𑀺 𑀲𑀢𑁆𑀢𑀢𑀺𑀁𑀲 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸 𑀥𑀫𑁆𑀫𑁄 𑀦𑀸𑀫; 𑀢𑀬𑁄 𑀲𑀢𑀺𑀧𑀝𑁆𑀞𑀸𑀦𑀸 𑀢𑀬𑁄 𑀲𑀫𑁆𑀫𑀧𑁆𑀧𑀥𑀸𑀦𑀸 𑀢𑀬𑁄 𑀇𑀤𑁆𑀥𑀺𑀧𑀸𑀤𑀸 𑀙 𑀇𑀦𑁆𑀤𑁆𑀭𑀺𑀬𑀸𑀦𑀺 𑀙 𑀩𑀮𑀸𑀦𑀺 𑀅𑀝𑁆𑀞 𑀩𑁄𑀚𑁆𑀛𑀗𑁆𑀕𑀸 𑀦𑀯𑀗𑁆𑀕𑀺𑀓𑁄 𑀫𑀕𑁆𑀕𑁄𑀢𑀺 𑀘 𑀘𑀢𑁆𑀢𑀸𑀭𑁄 𑀉𑀧𑀸𑀤𑀸𑀦𑀸 𑀧𑀜𑁆𑀘 𑀦𑀻𑀯𑀭𑀡𑀸𑀦𑀺 𑀲𑀢𑁆𑀢 𑀅𑀦𑀼𑀲𑀬𑀸 𑀅𑀝𑁆𑀞 𑀫𑀺𑀘𑁆𑀙𑀢𑁆𑀢𑀸𑀦𑀺 𑀘 𑀅𑀬𑀁 𑀅𑀥𑀫𑁆𑀫𑁄.

𑀢𑀢𑁆𑀣 𑀬𑀁𑀓𑀺𑀜𑁆𑀘𑀺 𑀏𑀓𑀁 𑀅𑀥𑀫𑁆𑀫𑀓𑁄𑀝𑁆𑀞𑀸𑀲𑀁 𑀕𑀳𑁂𑀢𑁆𑀯𑀸 ‘‘𑀇𑀫𑀁 𑀅𑀥𑀫𑁆𑀫𑀁 𑀥𑀫𑁆𑀫𑁄𑀢𑀺 𑀓𑀭𑀺𑀲𑁆𑀲𑀸𑀫, 𑀏𑀯𑀁 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀓𑀼𑀮𑀁 𑀦𑀺𑀬𑁆𑀬𑀸𑀦𑀺𑀓𑀁 𑀪𑀯𑀺𑀲𑁆𑀲𑀢𑀺, 𑀫𑀬𑀁 𑀘 𑀮𑁄𑀓𑁂 𑀧𑀸𑀓𑀝𑀸 𑀪𑀯𑀺𑀲𑁆𑀲𑀸𑀫𑀸’’𑀢𑀺 𑀢𑀁 𑀅𑀥𑀫𑁆𑀫𑀁 ‘‘𑀥𑀫𑁆𑀫𑁄 𑀅𑀬’’𑀦𑁆𑀢𑀺 𑀓𑀣𑀬𑀦𑁆𑀢𑀸 𑀅𑀥𑀫𑁆𑀫𑀁 𑀥𑀫𑁆𑀫𑁄𑀢𑀺 𑀤𑀻𑀧𑁂𑀦𑁆𑀢𑀺 𑀦𑀸𑀫. 𑀢𑀣𑁂𑀯 𑀥𑀫𑁆𑀫𑀓𑁄𑀝𑁆𑀞𑀸𑀲𑁂𑀲𑀼 𑀏𑀓𑀁 𑀕𑀳𑁂𑀢𑁆𑀯𑀸 ‘‘𑀅𑀬𑀁 𑀅𑀥𑀫𑁆𑀫𑁄’’𑀢𑀺 𑀓𑀣𑁂𑀦𑁆𑀢𑀸 𑀥𑀫𑁆𑀫𑀁 𑀅𑀥𑀫𑁆𑀫𑁄𑀢𑀺 𑀤𑀻𑀧𑁂𑀦𑁆𑀢𑀺 𑀦𑀸𑀫. 𑀯𑀺𑀦𑀬𑀧𑀭𑀺𑀬𑀸𑀬𑁂𑀦 𑀧𑀦 𑀪𑀽𑀢𑁂𑀦 𑀯𑀢𑁆𑀣𑀼𑀦𑀸 𑀘𑁄𑀤𑁂𑀢𑁆𑀯𑀸 𑀲𑀸𑀭𑁂𑀢𑁆𑀯𑀸 𑀬𑀣𑀸𑀧𑀝𑀺𑀜𑁆𑀜𑀸𑀬 𑀓𑀢𑁆𑀢𑀩𑁆𑀩𑀁 𑀓𑀫𑁆𑀫𑀁 𑀥𑀫𑁆𑀫𑁄 𑀦𑀸𑀫, 𑀅𑀪𑀽𑀢𑁂𑀦 𑀯𑀢𑁆𑀣𑀼𑀦𑀸 𑀅𑀘𑁄𑀤𑁂𑀢𑁆𑀯𑀸 𑀅𑀲𑀸𑀭𑁂𑀢𑁆𑀯𑀸 𑀅𑀧𑀝𑀺𑀜𑁆𑀜𑀸𑀬 𑀓𑀢𑁆𑀢𑀩𑁆𑀩𑀁 𑀓𑀫𑁆𑀫𑀁 𑀅𑀥𑀫𑁆𑀫𑁄 𑀦𑀸𑀫.

𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀭𑀸𑀕𑀯𑀺𑀦𑀬𑁄 𑀤𑁄𑀲𑀯𑀺𑀦𑀬𑁄 𑀫𑁄𑀳𑀯𑀺𑀦𑀬𑁄 𑀲𑀁𑀯𑀭𑁄 𑀧𑀳𑀸𑀦𑀁 𑀧𑀝𑀺𑀲𑀗𑁆𑀔𑀸𑀢𑀺 𑀅𑀬𑀁 𑀯𑀺𑀦𑀬𑁄 𑀦𑀸𑀫, 𑀭𑀸𑀕𑀸𑀤𑀻𑀦𑀁 𑀅𑀯𑀺𑀦𑀬𑁄 𑀅𑀲𑀁𑀯𑀭𑁄 𑀅𑀧𑁆𑀧𑀳𑀸𑀦𑀁 𑀅𑀧𑀝𑀺𑀲𑀗𑁆𑀔𑀸𑀢𑀺 𑀅𑀬𑀁 𑀅𑀯𑀺𑀦𑀬𑁄 𑀦𑀸𑀫. 𑀯𑀺𑀦𑀬𑀧𑀭𑀺𑀬𑀸𑀬𑁂𑀦 𑀯𑀢𑁆𑀣𑀼𑀲𑀫𑁆𑀧𑀢𑁆𑀢𑀺, 𑀜𑀢𑁆𑀢𑀺𑀲𑀫𑁆𑀧𑀢𑁆𑀢𑀺, 𑀅𑀦𑀼𑀲𑁆𑀲𑀸𑀯𑀦𑀲𑀫𑁆𑀧𑀢𑁆𑀢𑀺, 𑀲𑀻𑀫𑀸𑀲𑀫𑁆𑀧𑀢𑁆𑀢𑀺, 𑀧𑀭𑀺𑀲𑀲𑀫𑁆𑀧𑀢𑁆𑀢𑀻𑀢𑀺 𑀅𑀬𑀁 𑀯𑀺𑀦𑀬𑁄 𑀦𑀸𑀫. 𑀯𑀢𑁆𑀣𑀼𑀯𑀺𑀧𑀢𑁆𑀢𑀺, 𑀜𑀢𑁆𑀢𑀺𑀯𑀺𑀧𑀢𑁆𑀢𑀺, 𑀅𑀦𑀼𑀲𑁆𑀲𑀸𑀯𑀦𑀯𑀺𑀧𑀢𑁆𑀢𑀺, 𑀲𑀻𑀫𑀸𑀯𑀺𑀧𑀢𑁆𑀢𑀺 𑀧𑀭𑀺𑀲𑀯𑀺𑀧𑀢𑁆𑀢𑀻𑀢𑀺 𑀅𑀬𑀁 𑀅𑀯𑀺𑀦𑀬𑁄 𑀦𑀸𑀫.

𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸…𑀧𑁂… 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄𑀢𑀺 𑀇𑀤𑀁 𑀪𑀸𑀲𑀺𑀢𑀁 𑀮𑀧𑀺𑀢𑀁 𑀢𑀣𑀸𑀕𑀢𑁂𑀦; 𑀢𑀬𑁄 𑀲𑀢𑀺𑀧𑀝𑁆𑀞𑀸𑀦𑀸 𑀢𑀬𑁄 𑀲𑀫𑁆𑀫𑀧𑁆𑀧𑀥𑀸𑀦𑀸 𑀢𑀬𑁄 𑀇𑀤𑁆𑀥𑀺𑀧𑀸𑀤𑀸 𑀙 𑀇𑀦𑁆𑀤𑁆𑀭𑀺𑀬𑀸𑀦𑀺 𑀙 𑀩𑀮𑀸𑀦𑀺 𑀅𑀝𑁆𑀞 𑀩𑁄𑀚𑁆𑀛𑀗𑁆𑀕𑀸 𑀦𑀯𑀗𑁆𑀕𑀺𑀓𑁄 𑀫𑀕𑁆𑀕𑁄𑀢𑀺 𑀇𑀤𑀁 𑀅𑀪𑀸𑀲𑀺𑀢𑀁 𑀅𑀮𑀧𑀺𑀢𑀁 𑀢𑀣𑀸𑀕𑀢𑁂𑀦. 𑀯𑀺𑀦𑀬𑀧𑀭𑀺𑀬𑀸𑀬𑁂𑀦 𑀘𑀢𑁆𑀢𑀸𑀭𑁄 𑀧𑀸𑀭𑀸𑀚𑀺𑀓𑀸 𑀢𑁂𑀭𑀲 𑀲𑀗𑁆𑀖𑀸𑀤𑀺𑀲𑁂𑀲𑀸 𑀤𑁆𑀯𑁂 𑀅𑀦𑀺𑀬𑀢𑀸 𑀢𑀺𑀁𑀲 𑀦𑀺𑀲𑁆𑀲𑀕𑁆𑀕𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀸𑀢𑀺 𑀇𑀤𑀁 𑀪𑀸𑀲𑀺𑀢𑀁 𑀮𑀧𑀺𑀢𑀁 𑀢𑀣𑀸𑀕𑀢𑁂𑀦; 𑀢𑀬𑁄 𑀧𑀸𑀭𑀸𑀚𑀺𑀓𑀸 𑀘𑀼𑀤𑁆𑀤𑀲 𑀲𑀗𑁆𑀖𑀸𑀤𑀺𑀲𑁂𑀲𑀸 𑀢𑀬𑁄 𑀅𑀦𑀺𑀬𑀢𑀸 𑀏𑀓𑀢𑀺𑀁𑀲 𑀦𑀺𑀲𑁆𑀲𑀕𑁆𑀕𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀸𑀢𑀺 𑀇𑀤𑀁 𑀅𑀪𑀸𑀲𑀺𑀢𑀁 𑀅𑀮𑀧𑀺𑀢𑀁 𑀢𑀣𑀸𑀕𑀢𑁂𑀦.

𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀤𑁂𑀯𑀲𑀺𑀓𑀁 𑀨𑀮𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑀁 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑀁 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀯𑁄𑀮𑁄𑀓𑀦𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸 𑀚𑀸𑀢𑀓𑀓𑀣𑀸𑀢𑀺 𑀇𑀤𑀁 𑀆𑀘𑀺𑀡𑁆𑀡𑀁, 𑀦 𑀤𑁂𑀯𑀲𑀺𑀓𑀁 𑀨𑀮𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑀁…𑀧𑁂… 𑀦 𑀚𑀸𑀢𑀓𑀓𑀣𑀸𑀢𑀺 𑀇𑀤𑀁 𑀅𑀦𑀸𑀘𑀺𑀡𑁆𑀡𑀁. 𑀯𑀺𑀦𑀬𑀧𑀭𑀺𑀬𑀸𑀬𑁂𑀦 𑀦𑀺𑀫𑀦𑁆𑀢𑀺𑀢𑀲𑁆𑀲 𑀯𑀲𑁆𑀲𑀸𑀯𑀸𑀲𑀁 𑀯𑀲𑀺𑀢𑁆𑀯𑀸 𑀅𑀧𑀮𑁄𑀓𑁂𑀢𑁆𑀯𑀸 𑀘𑀸𑀭𑀺𑀓𑀸𑀧𑀓𑁆𑀓𑀫𑀦𑀁 𑀧𑀯𑀸𑀭𑁂𑀢𑁆𑀯𑀸 𑀘𑀸𑀭𑀺𑀓𑀸𑀧𑀓𑁆𑀓𑀫𑀦𑀁, 𑀆𑀕𑀦𑁆𑀢𑀼𑀓𑁂𑀳𑀺 𑀲𑀤𑁆𑀥𑀺𑀁 𑀧𑀞𑀫𑀁 𑀧𑀝𑀺𑀲𑀦𑁆𑀣𑀸𑀭𑀓𑀭𑀡𑀦𑁆𑀢𑀺 𑀇𑀤𑀁 𑀆𑀘𑀺𑀡𑁆𑀡𑀁, 𑀢𑀲𑁆𑀲𑁂𑀯 𑀆𑀘𑀺𑀡𑁆𑀡𑀲𑁆𑀲 𑀅𑀓𑀭𑀡𑀁 𑀅𑀦𑀸𑀘𑀺𑀡𑁆𑀡𑀁 𑀦𑀸𑀫.

𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸…𑀧𑁂… 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄𑀢𑀺 𑀇𑀤𑀁 𑀧𑀜𑁆𑀜𑀢𑁆𑀢𑀁 𑀦𑀸𑀫; 𑀢𑀬𑁄 𑀲𑀢𑀺𑀧𑀝𑁆𑀞𑀸𑀦𑀸…𑀧𑁂… 𑀦𑀯𑀗𑁆𑀕𑀺𑀓𑁄 𑀫𑀕𑁆𑀕𑁄𑀢𑀺 𑀇𑀤𑀁 𑀅𑀧𑀜𑁆𑀜𑀢𑁆𑀢𑀁 𑀦𑀸𑀫. 𑀯𑀺𑀦𑀬𑀧𑀭𑀺𑀬𑀸𑀬𑁂𑀦 𑀘𑀢𑁆𑀢𑀸𑀭𑁄 𑀧𑀸𑀭𑀸𑀚𑀺𑀓𑀸…𑀧𑁂… 𑀢𑀺𑀁𑀲𑀦𑀺𑀲𑁆𑀲𑀕𑁆𑀕𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀸𑀢𑀺 𑀇𑀤𑀁 𑀧𑀜𑁆𑀜𑀢𑁆𑀢𑀁 𑀦𑀸𑀫; 𑀢𑀬𑁄 𑀧𑀸𑀭𑀸𑀚𑀺𑀓𑀸…𑀧𑁂… 𑀏𑀓𑀢𑀺𑀁𑀲 𑀦𑀺𑀲𑁆𑀲𑀕𑁆𑀕𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀸𑀢𑀺 𑀇𑀤𑀁 𑀅𑀧𑀜𑁆𑀜𑀢𑁆𑀢𑀁 𑀦𑀸𑀫.

𑀬𑀁 𑀧𑀦𑁂𑀢𑀁 𑀲𑀩𑁆𑀩𑀲𑀼𑀢𑁆𑀢𑀸𑀦𑀁 𑀧𑀭𑀺𑀬𑁄𑀲𑀸𑀦𑁂 𑀢𑁂𑀘𑀺𑀫𑀁 𑀲𑀤𑁆𑀥𑀫𑁆𑀫𑀁 𑀅𑀦𑁆𑀢𑀭𑀥𑀸𑀧𑁂𑀦𑁆𑀢𑀻𑀢𑀺 𑀯𑀼𑀢𑁆𑀢𑀁, 𑀢𑀢𑁆𑀣 𑀧𑀜𑁆𑀘 𑀅𑀦𑁆𑀢𑀭𑀥𑀸𑀦𑀸𑀦𑀺 𑀦𑀸𑀫 𑀅𑀥𑀺𑀕𑀫𑀅𑀦𑁆𑀢𑀭𑀥𑀸𑀦𑀁, 𑀧𑀝𑀺𑀧𑀢𑁆𑀢𑀺𑀅𑀦𑁆𑀢𑀭𑀥𑀸𑀦𑀁, 𑀧𑀭𑀺𑀬𑀢𑁆𑀢𑀺𑀅𑀦𑁆𑀢𑀭𑀥𑀸𑀦𑀁, 𑀮𑀺𑀗𑁆𑀕𑀅𑀦𑁆𑀢𑀭𑀥𑀸𑀦𑀁, 𑀥𑀸𑀢𑀼𑀅𑀦𑁆𑀢𑀭𑀥𑀸𑀦𑀦𑁆𑀢𑀺. 𑀢𑀢𑁆𑀣 𑀅𑀥𑀺𑀕𑀫𑁄𑀢𑀺 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸, 𑀘𑀢𑁆𑀢𑀸𑀭𑀺 𑀨𑀮𑀸𑀦𑀺, 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸, 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸, 𑀙 𑀅𑀪𑀺𑀜𑁆𑀜𑀸𑀢𑀺. 𑀲𑁄 𑀧𑀭𑀺𑀳𑀸𑀬𑀫𑀸𑀦𑁄 𑀧𑀝𑀺𑀲𑀫𑁆𑀪𑀺𑀤𑀸𑀢𑁄 𑀧𑀝𑁆𑀞𑀸𑀬 𑀧𑀭𑀺𑀳𑀸𑀬𑀢𑀺. 𑀩𑀼𑀤𑁆𑀥𑀸𑀦𑀁 𑀳𑀺 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀯𑀲𑁆𑀲𑀲𑀳𑀲𑁆𑀲𑀫𑁂𑀯 𑀧𑀝𑀺𑀲𑀫𑁆𑀪𑀺𑀤𑀸 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀢𑀢𑁄 𑀧𑀭𑀁 𑀙 𑀅𑀪𑀺𑀜𑁆𑀜𑀸, 𑀢𑀢𑁄 𑀢𑀸𑀧𑀺 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺. 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀢𑀸𑀧𑀺 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀸 𑀳𑁄𑀦𑁆𑀢𑀺. 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀅𑀦𑀸𑀕𑀸𑀫𑀺𑀦𑁄 𑀲𑀓𑀤𑀸𑀕𑀸𑀫𑀺𑀦𑁄 𑀲𑁄𑀢𑀸𑀧𑀦𑁆𑀦𑀸𑀢𑀺. 𑀢𑁂𑀲𑀼 𑀥𑀭𑀦𑁆𑀢𑁂𑀲𑀼 𑀅𑀥𑀺𑀕𑀫𑁄 𑀅𑀦𑀦𑁆𑀢𑀭𑀳𑀺𑀢𑁄 𑀦𑀸𑀫 𑀦 𑀳𑁄𑀢𑀺. 𑀧𑀘𑁆𑀙𑀺𑀫𑀓𑀲𑁆𑀲 𑀧𑀦 𑀲𑁄𑀢𑀸𑀧𑀦𑁆𑀦𑀲𑁆𑀲 𑀚𑀻𑀯𑀺𑀢𑀓𑁆𑀔𑀬𑁂𑀦 𑀅𑀥𑀺𑀕𑀫𑁄 𑀅𑀦𑁆𑀢𑀭𑀳𑀺𑀢𑁄 𑀦𑀸𑀫 𑀳𑁄𑀢𑀺. 𑀇𑀤𑀁 𑀅𑀥𑀺𑀕𑀫𑀅𑀦𑁆𑀢𑀭𑀥𑀸𑀦𑀁 𑀦𑀸𑀫.

𑀧𑀝𑀺𑀧𑀢𑁆𑀢𑀺𑀅𑀦𑁆𑀢𑀭𑀥𑀸𑀦𑀁 𑀦𑀸𑀫 𑀛𑀸𑀦𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀸𑀦𑀺 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀫𑀢𑁆𑀢𑀁 𑀭𑀓𑁆𑀔𑀦𑁆𑀢𑀺. 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 ‘‘𑀲𑀻𑀮𑀁 𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀭𑀓𑁆𑀔𑀸𑀫, 𑀧𑀥𑀸𑀦𑀜𑁆𑀘 𑀅𑀦𑀼𑀬𑀼𑀜𑁆𑀚𑀸𑀫, 𑀦 𑀘 𑀫𑀕𑁆𑀕𑀁 𑀯𑀸 𑀨𑀮𑀁 𑀯𑀸 𑀲𑀘𑁆𑀙𑀺𑀓𑀸𑀢𑀼𑀁 𑀲𑀓𑁆𑀓𑁄𑀫, 𑀦𑀢𑁆𑀣𑀺 𑀇𑀤𑀸𑀦𑀺 𑀅𑀭𑀺𑀬𑀥𑀫𑁆𑀫𑀧𑀝𑀺𑀯𑁂𑀥𑁄’’𑀢𑀺 𑀯𑁄𑀲𑀸𑀦𑀁 𑀆𑀧𑀚𑁆𑀚𑀺𑀢𑁆𑀯𑀸 𑀓𑁄𑀲𑀚𑁆𑀚𑀩𑀳𑀼𑀮𑀸 𑀅𑀜𑁆𑀜𑀫𑀜𑁆𑀜𑀁 𑀦 𑀘𑁄𑀤𑁂𑀦𑁆𑀢𑀺 𑀦 𑀲𑀸𑀭𑁂𑀦𑁆𑀢𑀺 𑀅𑀓𑀼𑀓𑁆𑀓𑀼𑀘𑁆𑀘𑀓𑀸 𑀳𑁄𑀦𑁆𑀢𑀺, 𑀢𑀢𑁄 𑀧𑀝𑁆𑀞𑀸𑀬 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀺 𑀫𑀤𑁆𑀤𑀦𑁆𑀢𑀺. 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀧𑀸𑀘𑀺𑀢𑁆𑀢𑀺𑀬𑀣𑀼𑀮𑁆𑀮𑀘𑁆𑀘𑀬𑀸𑀦𑀺 𑀆𑀧𑀚𑁆𑀚𑀦𑁆𑀢𑀺, 𑀢𑀢𑁄 𑀕𑀭𑀼𑀓𑀸𑀧𑀢𑁆𑀢𑀺𑀁. 𑀧𑀸𑀭𑀸𑀚𑀺𑀓𑀫𑀢𑁆𑀢𑀫𑁂𑀯 𑀢𑀺𑀝𑁆𑀞𑀢𑀺. 𑀘𑀢𑁆𑀢𑀸𑀭𑀺 𑀧𑀸𑀭𑀸𑀚𑀺𑀓𑀸𑀦𑀺 𑀭𑀓𑁆𑀔𑀦𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀢𑁂𑀧𑀺 𑀲𑀳𑀲𑁆𑀲𑁂𑀧𑀺 𑀥𑀭𑀫𑀸𑀦𑁂 𑀧𑀝𑀺𑀧𑀢𑁆𑀢𑀺 𑀅𑀦𑀦𑁆𑀢𑀭𑀳𑀺𑀢𑀸 𑀦𑀸𑀫 𑀦 𑀳𑁄𑀢𑀺. 𑀧𑀘𑁆𑀙𑀺𑀫𑀓𑀲𑁆𑀲 𑀧𑀦 𑀪𑀺𑀓𑁆𑀔𑀼𑀦𑁄 𑀲𑀻𑀮𑀪𑁂𑀤𑁂𑀦 𑀯𑀸 𑀚𑀻𑀯𑀺𑀢𑀓𑁆𑀔𑀬𑁂𑀦 𑀯𑀸 𑀅𑀦𑁆𑀢𑀭𑀳𑀺𑀢𑀸 𑀳𑁄𑀢𑀻𑀢𑀺 𑀇𑀤𑀁 𑀧𑀝𑀺𑀧𑀢𑁆𑀢𑀺𑀅𑀦𑁆𑀢𑀭𑀥𑀸𑀦𑀁 𑀦𑀸𑀫.

𑀧𑀭𑀺𑀬𑀢𑁆𑀢𑀻𑀢𑀺 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁 𑀲𑀸𑀝𑁆𑀞𑀓𑀣𑀸 𑀧𑀸𑀴𑀺. 𑀬𑀸𑀯 𑀲𑀸 𑀢𑀺𑀝𑁆𑀞𑀢𑀺, 𑀢𑀸𑀯 𑀧𑀭𑀺𑀬𑀢𑁆𑀢𑀺 𑀧𑀭𑀺𑀧𑀼𑀡𑁆𑀡𑀸 𑀦𑀸𑀫 𑀳𑁄𑀢𑀺. 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀭𑀸𑀚𑀬𑀼𑀯𑀭𑀸𑀚𑀸𑀦𑁄 𑀅𑀥𑀫𑁆𑀫𑀺𑀓𑀸 𑀳𑁄𑀦𑁆𑀢𑀺, 𑀢𑁂𑀲𑀼 𑀅𑀥𑀫𑁆𑀫𑀺𑀓𑁂𑀲𑀼 𑀭𑀸𑀚𑀸𑀫𑀘𑁆𑀘𑀸𑀤𑀬𑁄 𑀅𑀥𑀫𑁆𑀫𑀺𑀓𑀸 𑀳𑁄𑀦𑁆𑀢𑀺, 𑀢𑀢𑁄 𑀭𑀝𑁆𑀞𑀚𑀦𑀧𑀤𑀯𑀸𑀲𑀺𑀦𑁄𑀢𑀺. 𑀏𑀢𑁂𑀲𑀁 𑀅𑀥𑀫𑁆𑀫𑀺𑀓𑀢𑀸𑀬 𑀤𑁂𑀯𑁄 𑀦 𑀲𑀫𑁆𑀫𑀸 𑀯𑀲𑁆𑀲𑀢𑀺, 𑀢𑀢𑁄 𑀲𑀲𑁆𑀲𑀸𑀦𑀺 𑀦 𑀲𑀫𑁆𑀧𑀚𑁆𑀚𑀦𑁆𑀢𑀺. 𑀢𑁂𑀲𑀼 𑀅𑀲𑀫𑁆𑀧𑀚𑁆𑀚𑀦𑁆𑀢𑁂𑀲𑀼 𑀧𑀘𑁆𑀘𑀬𑀤𑀸𑀬𑀓𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀘𑁆𑀘𑀬𑁂 𑀤𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀪𑀺𑀓𑁆𑀔𑀽 𑀧𑀘𑁆𑀘𑀬𑁂𑀳𑀺 𑀓𑀺𑀮𑀫𑀦𑁆𑀢𑀸 𑀅𑀦𑁆𑀢𑁂𑀯𑀸𑀲𑀺𑀓𑁂 𑀲𑀗𑁆𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀧𑀭𑀺𑀬𑀢𑁆𑀢𑀺 𑀧𑀭𑀺𑀳𑀸𑀬𑀢𑀺, 𑀅𑀢𑁆𑀣𑀯𑀲𑁂𑀦 𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀧𑀸𑀴𑀺𑀯𑀲𑁂𑀦𑁂𑀯 𑀥𑀸𑀭𑁂𑀦𑁆𑀢𑀺. 𑀢𑀢𑁄 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀧𑀸𑀴𑀺𑀫𑁆𑀧𑀺 𑀲𑀓𑀮𑀁 𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀧𑀞𑀫𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀧𑀭𑀺𑀳𑀸𑀬𑀢𑀺. 𑀧𑀭𑀺𑀳𑀸𑀬𑀫𑀸𑀦𑀁 𑀫𑀢𑁆𑀣𑀓𑀢𑁄 𑀧𑀝𑁆𑀞𑀸𑀬 𑀧𑀭𑀺𑀳𑀸𑀬𑀢𑀺. 𑀧𑀞𑀫𑀫𑁂𑀯 𑀳𑀺 𑀧𑀝𑁆𑀞𑀸𑀦𑀫𑀳𑀸𑀧𑀓𑀭𑀡𑀁 𑀧𑀭𑀺𑀳𑀸𑀬𑀢𑀺, 𑀢𑀲𑁆𑀫𑀺𑀁 𑀧𑀭𑀺𑀳𑀻𑀦𑁂 𑀬𑀫𑀓𑀁, 𑀓𑀣𑀸𑀯𑀢𑁆𑀣𑀼, 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺, 𑀥𑀸𑀢𑀼𑀓𑀣𑀸, 𑀯𑀺𑀪𑀗𑁆𑀕𑁄, 𑀥𑀫𑁆𑀫𑀲𑀗𑁆𑀕𑀳𑁄𑀢𑀺.

𑀏𑀯𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑁂 𑀧𑀭𑀺𑀳𑀻𑀦𑁂 𑀫𑀢𑁆𑀣𑀓𑀢𑁄 𑀧𑀝𑁆𑀞𑀸𑀬 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀁 𑀧𑀭𑀺𑀳𑀸𑀬𑀢𑀺. 𑀧𑀞𑀫𑀜𑁆𑀳𑀺 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁄 𑀧𑀭𑀺𑀳𑀸𑀬𑀢𑀺, 𑀢𑀲𑁆𑀫𑀺𑀫𑁆𑀧𑀺 𑀧𑀞𑀫𑀁 𑀏𑀓𑀸𑀤𑀲𑀓𑀦𑀺𑀧𑀸𑀢𑁄, 𑀢𑀢𑁄 𑀤𑀲𑀓𑀦𑀺𑀧𑀸𑀢𑁄…𑀧𑁂… 𑀢𑀢𑁄 𑀏𑀓𑀓𑀦𑀺𑀧𑀸𑀢𑁄𑀢𑀺. 𑀏𑀯𑀁 𑀅𑀗𑁆𑀕𑀼𑀢𑁆𑀢𑀭𑁂 𑀧𑀭𑀺𑀳𑀻𑀦𑁂 𑀫𑀢𑁆𑀣𑀓𑀢𑁄 𑀧𑀝𑁆𑀞𑀸𑀬 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁄 𑀧𑀭𑀺𑀳𑀸𑀬𑀢𑀺. 𑀧𑀞𑀫𑀁 𑀳𑀺 𑀫𑀳𑀸𑀯𑀕𑁆𑀕𑁄 𑀧𑀭𑀺𑀳𑀸𑀬𑀢𑀺, 𑀢𑀢𑁄 𑀲𑀴𑀸𑀬𑀢𑀦𑀯𑀕𑁆𑀕𑁄, 𑀔𑀦𑁆𑀥𑀯𑀕𑁆𑀕𑁄, 𑀦𑀺𑀤𑀸𑀦𑀯𑀕𑁆𑀕𑁄, 𑀲𑀕𑀸𑀣𑀸𑀯𑀕𑁆𑀕𑁄𑀢𑀺. 𑀏𑀯𑀁 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁂 𑀧𑀭𑀺𑀳𑀻𑀦𑁂 𑀫𑀢𑁆𑀣𑀓𑀢𑁄 𑀧𑀝𑁆𑀞𑀸𑀬 𑀫𑀚𑁆𑀛𑀺𑀫𑀦𑀺𑀓𑀸𑀬𑁄 𑀧𑀭𑀺𑀳𑀸𑀬𑀢𑀺. 𑀧𑀞𑀫𑀁 𑀳𑀺 𑀉𑀧𑀭𑀺𑀧𑀡𑁆𑀡𑀸𑀲𑀓𑁄 𑀧𑀭𑀺𑀳𑀸𑀬𑀢𑀺, 𑀢𑀢𑁄 𑀫𑀚𑁆𑀛𑀺𑀫𑀧𑀡𑁆𑀡𑀸𑀲𑀓𑁄, 𑀢𑀢𑁄 𑀫𑀽𑀮𑀧𑀡𑁆𑀡𑀸𑀲𑀓𑁄𑀢𑀺. 𑀏𑀯𑀁 𑀫𑀚𑁆𑀛𑀺𑀫𑀦𑀺𑀓𑀸𑀬𑁂 𑀧𑀭𑀺𑀳𑀻𑀦𑁂 𑀫𑀢𑁆𑀣𑀓𑀢𑁄 𑀧𑀝𑁆𑀞𑀸𑀬 𑀤𑀻𑀖𑀦𑀺𑀓𑀸𑀬𑁄 𑀧𑀭𑀺𑀳𑀸𑀬𑀢𑀺. 𑀧𑀞𑀫𑀜𑁆𑀳𑀺 𑀧𑀸𑀣𑀺𑀓𑀯𑀕𑁆𑀕𑁄 𑀧𑀭𑀺𑀳𑀸𑀬𑀢𑀺, 𑀢𑀢𑁄 𑀫𑀳𑀸𑀯𑀕𑁆𑀕𑁄, 𑀢𑀢𑁄 𑀲𑀻𑀮𑀓𑁆𑀔𑀦𑁆𑀥𑀯𑀕𑁆𑀕𑁄𑀢𑀺. 𑀏𑀯𑀁 𑀤𑀻𑀖𑀦𑀺𑀓𑀸𑀬𑁂 𑀧𑀭𑀺𑀳𑀻𑀦𑁂 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀁 𑀧𑀭𑀺𑀳𑀻𑀦𑀁 𑀦𑀸𑀫 𑀳𑁄𑀢𑀺. 𑀯𑀺𑀦𑀬𑀧𑀺𑀝𑀓𑁂𑀦 𑀲𑀤𑁆𑀥𑀺𑀁 𑀚𑀸𑀢𑀓𑀫𑁂𑀯 𑀥𑀸𑀭𑁂𑀦𑁆𑀢𑀺. 𑀯𑀺𑀦𑀬𑀧𑀺𑀝𑀓𑀁 𑀮𑀚𑁆𑀚𑀺𑀦𑁄𑀯 𑀥𑀸𑀭𑁂𑀦𑁆𑀢𑀺, 𑀮𑀸𑀪𑀓𑀸𑀫𑀸 𑀧𑀦 ‘‘𑀲𑀼𑀢𑁆𑀢𑀦𑁆𑀢𑁂 𑀓𑀣𑀺𑀢𑁂𑀧𑀺 𑀲𑀮𑁆𑀮𑀓𑁆𑀔𑁂𑀦𑁆𑀢𑀸 𑀦𑀢𑁆𑀣𑀻’’𑀢𑀺 𑀚𑀸𑀢𑀓𑀫𑁂𑀯 𑀥𑀸𑀭𑁂𑀦𑁆𑀢𑀺. 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀚𑀸𑀢𑀓𑀫𑁆𑀧𑀺 𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀅𑀣 𑀢𑁂𑀲𑀁 𑀧𑀞𑀫𑀁 𑀯𑁂𑀲𑁆𑀲𑀦𑁆𑀢𑀭𑀚𑀸𑀢𑀓𑀁 𑀧𑀭𑀺𑀳𑀸𑀬𑀢𑀺, 𑀢𑀢𑁄 𑀧𑀝𑀺𑀮𑁄𑀫𑀓𑁆𑀓𑀫𑁂𑀦 𑀧𑀼𑀡𑁆𑀡𑀓𑀚𑀸𑀢𑀓𑀁, 𑀫𑀳𑀸𑀦𑀸𑀭𑀤𑀚𑀸𑀢𑀓𑀦𑁆𑀢𑀺 𑀧𑀭𑀺𑀬𑁄𑀲𑀸𑀦𑁂 𑀅𑀧𑀡𑁆𑀡𑀓𑀚𑀸𑀢𑀓𑀁 𑀧𑀭𑀺𑀳𑀸𑀬𑀢𑀺. 𑀏𑀯𑀁 𑀚𑀸𑀢𑀓𑁂 𑀧𑀭𑀺𑀳𑀻𑀦𑁂 𑀯𑀺𑀦𑀬𑀧𑀺𑀝𑀓𑀫𑁂𑀯 𑀥𑀸𑀭𑁂𑀦𑁆𑀢𑀺.

𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀯𑀺𑀦𑀬𑀧𑀺𑀝𑀓𑀫𑁆𑀧𑀺 𑀫𑀢𑁆𑀣𑀓𑀢𑁄 𑀧𑀝𑁆𑀞𑀸𑀬 𑀧𑀭𑀺𑀳𑀸𑀬𑀢𑀺. 𑀧𑀞𑀫𑀜𑁆𑀳𑀺 𑀧𑀭𑀺𑀯𑀸𑀭𑁄 𑀧𑀭𑀺𑀳𑀸𑀬𑀢𑀺, 𑀢𑀢𑁄 𑀔𑀦𑁆𑀥𑀓𑁄, 𑀪𑀺𑀓𑁆𑀔𑀼𑀦𑀻𑀯𑀺𑀪𑀗𑁆𑀕𑁄, 𑀫𑀳𑀸𑀯𑀺𑀪𑀗𑁆𑀕𑁄𑀢𑀺 𑀅𑀦𑀼𑀓𑁆𑀓𑀫𑁂𑀦 𑀉𑀧𑁄𑀲𑀣𑀓𑁆𑀔𑀦𑁆𑀥𑀓𑀫𑀢𑁆𑀢𑀫𑁂𑀯 𑀥𑀸𑀭𑁂𑀦𑁆𑀢𑀺. 𑀢𑀤𑀸𑀧𑀺 𑀧𑀭𑀺𑀬𑀢𑁆𑀢𑀺 𑀅𑀦𑁆𑀢𑀭𑀳𑀺𑀢𑀸 𑀦 𑀳𑁄𑀢𑀺. 𑀬𑀸𑀯 𑀧𑀦 𑀫𑀦𑀼𑀲𑁆𑀲𑁂𑀲𑀼 𑀘𑀸𑀢𑀼𑀧𑁆𑀧𑀤𑀺𑀓𑀕𑀸𑀣𑀸𑀧𑀺 𑀧𑀯𑀢𑁆𑀢𑀢𑀺, 𑀢𑀸𑀯 𑀧𑀭𑀺𑀬𑀢𑁆𑀢𑀺 𑀅𑀦𑀦𑁆𑀢𑀭𑀳𑀺𑀢𑀸𑀯 𑀳𑁄𑀢𑀺. 𑀬𑀤𑀸 𑀲𑀤𑁆𑀥𑁄 𑀧𑀲𑀦𑁆𑀦𑁄 𑀭𑀸𑀚𑀸 𑀳𑀢𑁆𑀣𑀺𑀓𑁆𑀔𑀦𑁆𑀥𑁂 𑀲𑀼𑀯𑀡𑁆𑀡𑀘𑀗𑁆𑀓𑁄𑀝𑀓𑀫𑁆𑀳𑀺 𑀲𑀳𑀲𑁆𑀲𑀢𑁆𑀣𑀯𑀺𑀓𑀁 𑀞𑀧𑀸𑀧𑁂𑀢𑁆𑀯𑀸 ‘‘𑀩𑀼𑀤𑁆𑀥𑁂𑀳𑀺 𑀓𑀣𑀺𑀢𑀁 𑀘𑀸𑀢𑀼𑀧𑁆𑀧𑀤𑀺𑀓𑀕𑀸𑀣𑀁 𑀚𑀸𑀦𑀦𑁆𑀢𑁄 𑀇𑀫𑀁 𑀲𑀳𑀲𑁆𑀲𑀁 𑀕𑀡𑁆𑀳𑀢𑀽’’𑀢𑀺 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀕𑀡𑁆𑀳𑀦𑀓𑀁 𑀅𑀮𑀪𑀺𑀢𑁆𑀯𑀸 ‘‘𑀏𑀓𑀯𑀸𑀭𑀁 𑀘𑀭𑀸𑀧𑀺𑀢𑁂 𑀦𑀸𑀫 𑀲𑀼𑀡𑀦𑁆𑀢𑀸𑀧𑀺 𑀳𑁄𑀦𑁆𑀢𑀺 𑀅𑀲𑁆𑀲𑀼𑀡𑀦𑁆𑀢𑀸𑀧𑀻’’𑀢𑀺 𑀬𑀸𑀯𑀢𑀢𑀺𑀬𑀁 𑀘𑀭𑀸𑀧𑁂𑀢𑁆𑀯𑀸 𑀕𑀡𑁆𑀳𑀦𑀓𑀁 𑀅𑀮𑀪𑀺𑀢𑁆𑀯𑀸 𑀭𑀸𑀚𑀧𑀼𑀭𑀺𑀲𑀸 𑀢𑀁 𑀲𑀳𑀲𑁆𑀲𑀢𑁆𑀣𑀯𑀺𑀓𑀁 𑀧𑀼𑀦 𑀭𑀸𑀚𑀓𑀼𑀮𑀁 𑀧𑀯𑁂𑀲𑁂𑀦𑁆𑀢𑀺, 𑀢𑀤𑀸 𑀧𑀭𑀺𑀬𑀢𑁆𑀢𑀺 𑀅𑀦𑁆𑀢𑀭𑀳𑀺𑀢𑀸 𑀦𑀸𑀫 𑀳𑁄𑀢𑀺. 𑀇𑀤𑀁 𑀧𑀭𑀺𑀬𑀢𑁆𑀢𑀺𑀅𑀦𑁆𑀢𑀭𑀥𑀸𑀦𑀁 𑀦𑀸𑀫.

𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀘𑀻𑀯𑀭𑀕𑁆𑀕𑀳𑀡𑀁 𑀧𑀢𑁆𑀢𑀕𑁆𑀕𑀳𑀡𑀁 𑀲𑀫𑁆𑀫𑀺𑀜𑁆𑀚𑀦𑀧𑀲𑀸𑀭𑀡𑀁 𑀆𑀮𑁄𑀓𑀺𑀢𑀯𑀺𑀮𑁄𑀓𑀺𑀢𑀁 𑀦 𑀧𑀸𑀲𑀸𑀤𑀺𑀓𑀁 𑀳𑁄𑀢𑀺. 𑀦𑀺𑀕𑀡𑁆𑀞𑀲𑀫𑀡𑀸 𑀯𑀺𑀬 𑀅𑀮𑀸𑀩𑀼𑀧𑀢𑁆𑀢𑀁 𑀪𑀺𑀓𑁆𑀔𑀽 𑀧𑀢𑁆𑀢𑀁 𑀅𑀕𑁆𑀕𑀩𑀸𑀳𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸 𑀆𑀤𑀸𑀬 𑀯𑀺𑀘𑀭𑀦𑁆𑀢𑀺, 𑀏𑀢𑁆𑀢𑀸𑀯𑀢𑀸𑀧𑀺 𑀮𑀺𑀗𑁆𑀕𑀁 𑀅𑀦𑀦𑁆𑀢𑀭𑀳𑀺𑀢𑀫𑁂𑀯 𑀳𑁄𑀢𑀺. 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀧𑀦 𑀓𑀸𑀮𑁂 𑀅𑀕𑁆𑀕𑀩𑀸𑀳𑀢𑁄 𑀑𑀢𑀸𑀭𑁂𑀢𑁆𑀯𑀸 𑀳𑀢𑁆𑀣𑁂𑀦 𑀯𑀸 𑀲𑀺𑀓𑁆𑀓𑀸𑀬 𑀯𑀸 𑀑𑀮𑀫𑁆𑀩𑀺𑀢𑁆𑀯𑀸 𑀯𑀺𑀘𑀭𑀦𑁆𑀢𑀺, 𑀘𑀻𑀯𑀭𑀫𑁆𑀧𑀺 𑀭𑀚𑀦𑀲𑀸𑀭𑀼𑀧𑁆𑀧𑀁 𑀅𑀓𑀢𑁆𑀯𑀸 𑀑𑀝𑁆𑀞𑀝𑁆𑀞𑀺𑀯𑀡𑁆𑀡𑀁 𑀓𑀢𑁆𑀯𑀸 𑀯𑀺𑀘𑀭𑀦𑁆𑀢𑀺. 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀭𑀚𑀦𑀫𑁆𑀧𑀺 𑀦 𑀳𑁄𑀢𑀺 𑀤𑀲𑀘𑁆𑀙𑀺𑀦𑁆𑀤𑀦𑀫𑁆𑀧𑀺 𑀑𑀯𑀝𑁆𑀝𑀺𑀓𑀯𑀺𑀚𑁆𑀛𑀦𑀫𑁆𑀧𑀺, 𑀓𑀧𑁆𑀧𑀫𑀢𑁆𑀢𑀁 𑀓𑀢𑁆𑀯𑀸 𑀯𑀴𑀜𑁆𑀚𑁂𑀦𑁆𑀢𑀺. 𑀧𑀼𑀦 𑀑𑀯𑀝𑁆𑀝𑀺𑀓𑀁 𑀯𑀺𑀚𑁆𑀛𑀺𑀢𑁆𑀯𑀸 𑀓𑀧𑁆𑀧𑀁 𑀦 𑀓𑀭𑁄𑀦𑁆𑀢𑀺. 𑀢𑀢𑁄 𑀉𑀪𑀬𑀫𑁆𑀧𑀺 𑀅𑀓𑀢𑁆𑀯𑀸 𑀤𑀲𑀸 𑀙𑁂𑀢𑁆𑀯𑀸 𑀧𑀭𑀺𑀩𑁆𑀩𑀸𑀚𑀓𑀸 𑀯𑀺𑀬 𑀘𑀭𑀦𑁆𑀢𑀺. 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 ‘‘𑀓𑁄 𑀇𑀫𑀺𑀦𑀸 𑀅𑀫𑁆𑀳𑀸𑀓𑀁 𑀅𑀢𑁆𑀣𑁄’’𑀢𑀺 𑀔𑀼𑀤𑁆𑀤𑀓𑀁 𑀓𑀸𑀲𑀸𑀯𑀔𑀡𑁆𑀟𑀁 𑀳𑀢𑁆𑀣𑁂 𑀯𑀸 𑀕𑀻𑀯𑀸𑀬 𑀯𑀸 𑀩𑀦𑁆𑀥𑀦𑁆𑀢𑀺, 𑀓𑁂𑀲𑁂𑀲𑀼 𑀯𑀸 𑀅𑀮𑁆𑀮𑀻𑀬𑀸𑀧𑁂𑀦𑁆𑀢𑀺, 𑀤𑀸𑀭𑀪𑀭𑀡𑀁 𑀯𑀸 𑀓𑀭𑁄𑀦𑁆𑀢𑀸 𑀓𑀲𑀺𑀢𑁆𑀯𑀸 𑀯𑀧𑀺𑀢𑁆𑀯𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑀺. 𑀢𑀤𑀸 𑀤𑀓𑁆𑀔𑀺𑀡𑀁 𑀤𑁂𑀦𑁆𑀢𑀸 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀏𑀢𑁂𑀲𑀁 𑀤𑁂𑀦𑁆𑀢𑀺. 𑀇𑀤𑀁 𑀲𑀦𑁆𑀥𑀸𑀬 𑀪𑀕𑀯𑀢𑀸 𑀯𑀼𑀢𑁆𑀢𑀁 𑁋 ‘‘𑀪𑀯𑀺𑀲𑁆𑀲𑀦𑁆𑀢𑀺 𑀔𑁄, 𑀧𑀦𑀸𑀦𑀦𑁆𑀤, 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀕𑁄𑀢𑁆𑀭𑀪𑀼𑀦𑁄 𑀓𑀸𑀲𑀸𑀯𑀓𑀡𑁆𑀞𑀸 𑀤𑀼𑀲𑁆𑀲𑀻𑀮𑀸 𑀧𑀸𑀧𑀥𑀫𑁆𑀫𑀸, 𑀢𑁂𑀲𑀼 𑀤𑀼𑀲𑁆𑀲𑀻𑀮𑁂𑀲𑀼 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀤𑀸𑀦𑀁 𑀤𑀲𑁆𑀲𑀦𑁆𑀢𑀺, 𑀢𑀤𑀸𑀧𑀸𑀳𑀁, 𑀆𑀦𑀦𑁆𑀤, 𑀲𑀗𑁆𑀖𑀕𑀢𑀁 𑀤𑀓𑁆𑀔𑀺𑀡𑀁 𑀅𑀲𑀗𑁆𑀔𑁂𑀬𑁆𑀬𑀁 𑀅𑀧𑁆𑀧𑀫𑁂𑀬𑁆𑀬𑀁 𑀯𑀤𑀸𑀫𑀻’’𑀢𑀺 (𑀫. 𑀦𑀺. 𑁩.𑁩𑁮𑁦). 𑀢𑀢𑁄 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀦𑀸𑀦𑀸𑀯𑀺𑀥𑀸𑀦𑀺 𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀸 ‘‘𑀧𑀧𑀜𑁆𑀘𑁄 𑀏𑀲, 𑀓𑀺𑀁 𑀇𑀫𑀺𑀦𑀸 𑀅𑀫𑁆𑀳𑀸𑀓’’𑀦𑁆𑀢𑀺 𑀓𑀸𑀲𑀸𑀯𑀔𑀡𑁆𑀟𑀁 𑀙𑀺𑀦𑁆𑀤𑀺𑀢𑁆𑀯𑀸 𑀅𑀭𑀜𑁆𑀜𑁂 𑀔𑀺𑀧𑀦𑁆𑀢𑀺. 𑀏𑀢𑀲𑁆𑀫𑀺𑀁 𑀓𑀸𑀮𑁂 𑀮𑀺𑀗𑁆𑀕𑀁 𑀅𑀦𑁆𑀢𑀭𑀳𑀺𑀢𑀁 𑀦𑀸𑀫 𑀳𑁄𑀢𑀺. 𑀓𑀲𑁆𑀲𑀧𑀤𑀲𑀩𑀮𑀲𑁆𑀲 𑀓𑀺𑀭 𑀓𑀸𑀮𑀢𑁄 𑀧𑀝𑁆𑀞𑀸𑀬 𑀬𑁄𑀦𑀓𑀸𑀦𑀁 𑀲𑁂𑀢𑀯𑀢𑁆𑀣𑀁 𑀧𑀸𑀭𑀼𑀧𑀺𑀢𑁆𑀯𑀸 𑀘𑀭𑀡𑀁 𑀘𑀸𑀭𑀺𑀢𑁆𑀢𑀁 𑀚𑀸𑀢𑀦𑁆𑀢𑀺. 𑀇𑀤𑀁 𑀮𑀺𑀗𑁆𑀕𑀅𑀦𑁆𑀢𑀭𑀥𑀸𑀦𑀁 𑀦𑀸𑀫.

𑀥𑀸𑀢𑀼𑀅𑀦𑁆𑀢𑀭𑀥𑀸𑀦𑀁 𑀧𑀦 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁 𑁋 𑀢𑀻𑀡𑀺 𑀧𑀭𑀺𑀦𑀺𑀩𑁆𑀩𑀸𑀦𑀸𑀦𑀺, 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑀁 𑁋 𑀔𑀦𑁆𑀥𑀧𑀭𑀺𑀦𑀺𑀩𑁆𑀩𑀸𑀦𑀁, 𑀥𑀸𑀢𑀼𑀧𑀭𑀺𑀦𑀺𑀩𑁆𑀩𑀸𑀦𑀦𑁆𑀢𑀺. 𑀢𑀢𑁆𑀣 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑀁 𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀅𑀳𑁄𑀲𑀺, 𑀔𑀦𑁆𑀥𑀧𑀭𑀺𑀦𑀺𑀩𑁆𑀩𑀸𑀦𑀁 𑀓𑀼𑀲𑀺𑀦𑀸𑀭𑀸𑀬𑀁, 𑀥𑀸𑀢𑀼𑀧𑀭𑀺𑀦𑀺𑀩𑁆𑀩𑀸𑀦𑀁 𑀅𑀦𑀸𑀕𑀢𑁂 𑀪𑀯𑀺𑀲𑁆𑀲𑀢𑀺. 𑀓𑀣𑀁? 𑀢𑀢𑁄 𑀢𑀢𑁆𑀣 𑀢𑀢𑁆𑀣 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀅𑀮𑀪𑀫𑀸𑀦𑀸 𑀥𑀸𑀢𑀼𑀬𑁄 𑀩𑀼𑀤𑁆𑀥𑀸𑀦𑀁 𑀅𑀥𑀺𑀝𑁆𑀞𑀸𑀦𑀩𑀮𑁂𑀦 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀮𑀪𑀦𑀓𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑀺. 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀲𑀩𑁆𑀩𑀝𑁆𑀞𑀸𑀦𑁂𑀲𑀼 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑁄 𑀦 𑀳𑁄𑀢𑀺. 𑀲𑀸𑀲𑀦𑀲𑁆𑀲 𑀳𑀺 𑀑𑀲𑀓𑁆𑀓𑀦𑀓𑀸𑀮𑁂 𑀇𑀫𑀲𑁆𑀫𑀺𑀁 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀲𑀩𑁆𑀩𑀸 𑀥𑀸𑀢𑀼𑀬𑁄 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀫𑀳𑀸𑀘𑁂𑀢𑀺𑀬𑀁, 𑀢𑀢𑁄 𑀦𑀸𑀕𑀤𑀻𑀧𑁂 𑀭𑀸𑀚𑀸𑀬𑀢𑀦𑀘𑁂𑀢𑀺𑀬𑀁, 𑀢𑀢𑁄 𑀩𑁄𑀥𑀺𑀧𑀮𑁆𑀮𑀗𑁆𑀓𑀁 𑀕𑀫𑀺𑀲𑁆𑀲𑀦𑁆𑀢𑀺. 𑀦𑀸𑀕𑀪𑀯𑀦𑀢𑁄𑀧𑀺 𑀤𑁂𑀯𑀮𑁄𑀓𑀢𑁄𑀧𑀺 𑀩𑁆𑀭𑀳𑁆𑀫𑀮𑁄𑀓𑀢𑁄𑀧𑀺 𑀥𑀸𑀢𑀼𑀬𑁄 𑀫𑀳𑀸𑀩𑁄𑀥𑀺𑀧𑀮𑁆𑀮𑀗𑁆𑀓𑀫𑁂𑀯 𑀕𑀫𑀺𑀲𑁆𑀲𑀦𑁆𑀢𑀺. 𑀲𑀸𑀲𑀧𑀫𑀢𑁆𑀢𑀸𑀧𑀺 𑀥𑀸𑀢𑀼 𑀅𑀦𑁆𑀢𑀭𑀸 𑀦 𑀦𑀲𑁆𑀲𑀺𑀲𑁆𑀲𑀢𑀺. 𑀲𑀩𑁆𑀩𑀸 𑀥𑀸𑀢𑀼𑀬𑁄 𑀫𑀳𑀸𑀩𑁄𑀥𑀺𑀫𑀡𑁆𑀟𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀩𑀼𑀤𑁆𑀥𑀭𑀽𑀧𑀁 𑀕𑀳𑁂𑀢𑁆𑀯𑀸 𑀩𑁄𑀥𑀺𑀫𑀡𑁆𑀟𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀺𑀦𑁆𑀦𑀩𑀼𑀤𑁆𑀥𑀲𑀭𑀻𑀭𑀲𑀺𑀭𑀺𑀁 𑀤𑀲𑁆𑀲𑁂𑀦𑁆𑀢𑀺. 𑀤𑁆𑀯𑀢𑁆𑀢𑀺𑀁𑀲 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺 𑀅𑀲𑀻𑀢𑀺 𑀅𑀦𑀼𑀩𑁆𑀬𑀜𑁆𑀚𑀦𑀸𑀦𑀺 𑀩𑁆𑀬𑀸𑀫𑀧𑁆𑀧𑀪𑀸𑀢𑀺 𑀲𑀩𑁆𑀩𑀁 𑀧𑀭𑀺𑀧𑀼𑀡𑁆𑀡𑀫𑁂𑀯 𑀳𑁄𑀢𑀺. 𑀢𑀢𑁄 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀤𑀺𑀯𑀲𑁂 𑀯𑀺𑀬 𑀧𑀸𑀝𑀺𑀳𑀸𑀭𑀺𑀬𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑀺. 𑀢𑀤𑀸 𑀫𑀦𑀼𑀲𑁆𑀲𑀪𑀽𑀢𑀲𑀢𑁆𑀢𑁄 𑀦𑀸𑀫 𑀢𑀢𑁆𑀣 𑀕𑀢𑁄 𑀦𑀢𑁆𑀣𑀺, 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂 𑀧𑀦 𑀤𑁂𑀯𑀢𑀸 𑀲𑀩𑁆𑀩𑀸𑀯 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀅𑀚𑁆𑀚 𑀤𑀲𑀩𑀮𑁄 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀇𑀢𑁄𑀤𑀸𑀦𑀺 𑀧𑀝𑁆𑀞𑀸𑀬 𑀅𑀦𑁆𑀥𑀓𑀸𑀭𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀭𑀺𑀤𑁂𑀯𑀦𑁆𑀢𑀺. 𑀅𑀣 𑀥𑀸𑀢𑀼𑀲𑀭𑀻𑀭𑀢𑁄 𑀢𑁂𑀚𑁄 𑀲𑀫𑀼𑀝𑁆𑀞𑀸𑀬 𑀢𑀁 𑀲𑀭𑀻𑀭𑀁 𑀅𑀧𑀡𑁆𑀡𑀢𑁆𑀢𑀺𑀓𑀪𑀸𑀯𑀁 𑀕𑀫𑁂𑀢𑀺. 𑀥𑀸𑀢𑀼𑀲𑀭𑀻𑀭𑀢𑁄 𑀲𑀫𑀼𑀝𑁆𑀞𑀺𑀢𑀸 𑀚𑀸𑀮𑀸 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀉𑀕𑁆𑀕𑀘𑁆𑀙𑀺𑀲𑁆𑀲𑀢𑀺, 𑀲𑀸𑀲𑀧𑀫𑀢𑁆𑀢𑀸𑀬 𑀲𑁂𑀲𑀸𑀬𑀧𑀺 𑀥𑀸𑀢𑀼𑀬𑀸 𑀲𑀢𑀺 𑀏𑀓𑀚𑀸𑀮𑀸𑀯 𑀪𑀯𑀺𑀲𑁆𑀲𑀢𑀺. 𑀥𑀸𑀢𑀽𑀲𑀼 𑀧𑀭𑀺𑀬𑀸𑀤𑀸𑀦𑀁 𑀕𑀢𑀸𑀲𑀼 𑀧𑀘𑁆𑀙𑀺𑀚𑁆𑀚𑀺𑀲𑁆𑀲𑀢𑀺. 𑀏𑀯𑀁 𑀫𑀳𑀦𑁆𑀢𑀁 𑀆𑀦𑀼𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀥𑀸𑀢𑀼𑀬𑁄 𑀅𑀦𑁆𑀢𑀭𑀥𑀸𑀬𑀦𑁆𑀢𑀺. 𑀢𑀤𑀸 𑀲𑀦𑁆𑀦𑀺𑀧𑀢𑀺𑀢𑀸 𑀤𑁂𑀯𑀲𑀗𑁆𑀖𑀸 𑀩𑀼𑀤𑁆𑀥𑀸𑀦𑀁 𑀧𑀭𑀺𑀦𑀺𑀩𑁆𑀩𑀼𑀢𑀤𑀺𑀯𑀲𑁂 𑀯𑀺𑀬 𑀤𑀺𑀩𑁆𑀩𑀕𑀦𑁆𑀥𑀫𑀸𑀮𑀸𑀢𑀽𑀭𑀺𑀬𑀸𑀤𑀻𑀳𑀺 𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀅𑀦𑀸𑀕𑀢𑁂 𑀉𑀧𑁆𑀧𑀚𑁆𑀚𑀦𑀓𑀁 𑀩𑀼𑀤𑁆𑀥𑀁 𑀧𑀲𑁆𑀲𑀺𑀢𑀼𑀁 𑀮𑀪𑀺𑀲𑁆𑀲𑀸𑀫 𑀪𑀕𑀯𑀸’’𑀢𑀺 𑀯𑀢𑁆𑀯𑀸 𑀲𑀓𑀲𑀓𑀝𑁆𑀞𑀸𑀦𑀫𑁂𑀯 𑀕𑀘𑁆𑀙𑀦𑁆𑀢𑀺. 𑀇𑀤𑀁 𑀥𑀸𑀢𑀼𑀅𑀦𑁆𑀢𑀭𑀥𑀸𑀦𑀁 𑀦𑀸𑀫.

𑀇𑀫𑀲𑁆𑀲 𑀧𑀜𑁆𑀘𑀯𑀺𑀥𑀲𑁆𑀲 𑀅𑀦𑁆𑀢𑀭𑀥𑀸𑀦𑀲𑁆𑀲 𑀧𑀭𑀺𑀬𑀢𑁆𑀢𑀺𑀅𑀦𑁆𑀢𑀭𑀥𑀸𑀦𑀫𑁂𑀯 𑀫𑀽𑀮𑀁. 𑀧𑀭𑀺𑀬𑀢𑁆𑀢𑀺𑀬𑀸 𑀳𑀺 𑀅𑀦𑁆𑀢𑀭𑀳𑀺𑀢𑀸𑀬 𑀧𑀝𑀺𑀧𑀢𑁆𑀢𑀺 𑀅𑀦𑁆𑀢𑀭𑀥𑀸𑀬𑀢𑀺, 𑀧𑀭𑀺𑀬𑀢𑁆𑀢𑀺𑀬𑀸 𑀞𑀺𑀢𑀸𑀬 𑀧𑀝𑀺𑀧𑀢𑁆𑀢𑀺 𑀧𑀢𑀺𑀝𑁆𑀞𑀸𑀢𑀺. 𑀢𑁂𑀦𑁂𑀯 𑀇𑀫𑀲𑁆𑀫𑀺𑀁 𑀤𑀻𑀧𑁂 𑀘𑀡𑁆𑀟𑀸𑀮𑀢𑀺𑀲𑁆𑀲𑀫𑀳𑀸𑀪𑀬𑁂 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀫𑀳𑀸𑀉𑀴𑀼𑀫𑁆𑀧𑀁 𑀫𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑀸𑀧𑁂𑀲𑀺 ‘‘𑀫𑀳𑀦𑁆𑀢𑀁 𑀪𑀬𑀁 𑀪𑀯𑀺𑀲𑁆𑀲𑀢𑀺, 𑀦 𑀲𑀫𑁆𑀫𑀸 𑀤𑁂𑀯𑁄 𑀯𑀲𑁆𑀲𑀺𑀲𑁆𑀲𑀢𑀺, 𑀪𑀺𑀓𑁆𑀔𑀽 𑀧𑀘𑁆𑀘𑀬𑁂𑀳𑀺 𑀓𑀺𑀮𑀫𑀦𑁆𑀢𑀸 𑀧𑀭𑀺𑀬𑀢𑁆𑀢𑀺𑀁 𑀲𑀦𑁆𑀥𑀸𑀭𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀺, 𑀧𑀭𑀢𑀻𑀭𑀁 𑀕𑀦𑁆𑀢𑁆𑀯𑀸 𑀅𑀬𑁆𑀬𑁂𑀳𑀺 𑀚𑀻𑀯𑀺𑀢𑀁 𑀭𑀓𑁆𑀔𑀺𑀢𑀼𑀁 𑀯𑀝𑁆𑀝𑀢𑀺. 𑀇𑀫𑀁 𑀫𑀳𑀸𑀉𑀴𑀼𑀫𑁆𑀧𑀁 𑀆𑀭𑀼𑀬𑁆𑀳 𑀕𑀘𑁆𑀙𑀣, 𑀪𑀦𑁆𑀢𑁂. 𑀬𑁂𑀲𑀁 𑀏𑀢𑁆𑀣 𑀦𑀺𑀲𑀚𑁆𑀚𑀝𑁆𑀞𑀸𑀦𑀁 𑀦𑀧𑁆𑀧𑀳𑁄𑀢𑀺, 𑀢𑁂 𑀓𑀝𑁆𑀞𑀔𑀡𑁆𑀟𑁂𑀧𑀺 𑀉𑀭𑀁 𑀞𑀧𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀼, 𑀲𑀩𑁆𑀩𑁂𑀲𑀫𑁆𑀧𑀺 𑀪𑀬𑀁 𑀦 𑀪𑀯𑀺𑀲𑁆𑀲𑀢𑀻’’𑀢𑀺. 𑀢𑀤𑀸 𑀲𑀫𑀼𑀤𑁆𑀤𑀢𑀻𑀭𑀁 𑀧𑀢𑁆𑀯𑀸 𑀲𑀝𑁆𑀞𑀺 𑀪𑀺𑀓𑁆𑀔𑀽 𑀓𑀢𑀺𑀓𑀁 𑀓𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀏𑀢𑁆𑀣 𑀕𑀫𑀦𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀫𑀬𑀁 𑀇𑀥𑁂𑀯 𑀳𑀼𑀢𑁆𑀯𑀸 𑀢𑁂𑀧𑀺𑀝𑀓𑀁 𑀭𑀓𑁆𑀔𑀺𑀲𑁆𑀲𑀸𑀫𑀸’’𑀢𑀺 𑀢𑀢𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 𑀤𑀓𑁆𑀔𑀺𑀡𑀫𑀮𑀬𑀚𑀦𑀧𑀤𑀁 𑀕𑀦𑁆𑀢𑁆𑀯𑀸 𑀓𑀦𑁆𑀤𑀫𑀽𑀮𑀧𑀡𑁆𑀡𑁂𑀳𑀺 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑀸 𑀯𑀲𑀺𑀁𑀲𑀼. 𑀓𑀸𑀬𑁂 𑀯𑀳𑀦𑁆𑀢𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀚𑁆𑀛𑀸𑀬𑀁 𑀓𑀭𑁄𑀦𑁆𑀢𑀺, 𑀅𑀯𑀳𑀦𑁆𑀢𑁂 𑀯𑀸𑀮𑀺𑀓𑀁 𑀉𑀲𑁆𑀲𑀸𑀭𑁂𑀢𑁆𑀯𑀸 𑀧𑀭𑀺𑀯𑀸𑀭𑁂𑀢𑁆𑀯𑀸 𑀲𑀻𑀲𑀸𑀦𑀺 𑀏𑀓𑀝𑁆𑀞𑀸𑀦𑁂 𑀓𑀢𑁆𑀯𑀸 𑀧𑀭𑀺𑀬𑀢𑁆𑀢𑀺𑀁 𑀲𑀫𑁆𑀫𑀲𑀦𑁆𑀢𑀺. 𑀇𑀫𑀺𑀦𑀸 𑀦𑀺𑀬𑀸𑀫𑁂𑀦 𑀤𑁆𑀯𑀸𑀤𑀲 𑀲𑀁𑀯𑀘𑁆𑀙𑀭𑀸𑀦𑀺 𑀲𑀸𑀝𑁆𑀞𑀓𑀣𑀁 𑀢𑁂𑀧𑀺𑀝𑀓𑀁 𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀥𑀸𑀭𑀬𑀺𑀁𑀲𑀼.

𑀪𑀬𑁂 𑀯𑀽𑀧𑀲𑀦𑁆𑀢𑁂 𑀲𑀢𑁆𑀢𑀲𑀢𑀸 𑀪𑀺𑀓𑁆𑀔𑀽 𑀅𑀢𑁆𑀢𑀦𑁄 𑀕𑀢𑀝𑁆𑀞𑀸𑀦𑁂 𑀲𑀸𑀝𑁆𑀞𑀓𑀣𑁂 𑀢𑁂𑀧𑀺𑀝𑀓𑁂 𑀏𑀓𑀓𑁆𑀔𑀭𑀫𑁆𑀧𑀺 𑀏𑀓𑀩𑁆𑀬𑀜𑁆𑀚𑀦𑀫𑁆𑀧𑀺 𑀅𑀦𑀸𑀲𑁂𑀢𑁆𑀯𑀸 𑀇𑀫𑀫𑁂𑀯 𑀤𑀻𑀧𑀫𑀸𑀕𑀫𑁆𑀫 𑀓𑀮𑁆𑀮𑀕𑀸𑀫𑀚𑀦𑀧𑀤𑁂 𑀫𑀡𑁆𑀟𑀮𑀸𑀭𑀸𑀫𑀯𑀺𑀳𑀸𑀭𑀁 𑀧𑀯𑀺𑀲𑀺𑀁𑀲𑀼. 𑀣𑁂𑀭𑀸𑀦𑀁 𑀆𑀕𑀫𑀦𑀧𑁆𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀇𑀫𑀲𑁆𑀫𑀺𑀁 𑀤𑀻𑀧𑁂 𑀑𑀳𑀻𑀦𑀸 𑀲𑀝𑁆𑀞𑀺 𑀪𑀺𑀓𑁆𑀔𑀽 ‘‘𑀣𑁂𑀭𑁂 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀕𑀦𑁆𑀢𑁆𑀯𑀸 𑀣𑁂𑀭𑁂𑀳𑀺 𑀲𑀤𑁆𑀥𑀺𑀁 𑀢𑁂𑀧𑀺𑀝𑀓𑀁 𑀲𑁄𑀥𑁂𑀦𑁆𑀢𑀸 𑀏𑀓𑀓𑁆𑀔𑀭𑀫𑁆𑀧𑀺 𑀏𑀓𑀩𑁆𑀬𑀜𑁆𑀚𑀦𑀫𑁆𑀧𑀺 𑀅𑀲𑀫𑁂𑀦𑁆𑀢𑀁 𑀦𑀸𑀫 𑀦 𑀧𑀲𑁆𑀲𑀺𑀁𑀲𑀼. 𑀢𑀲𑁆𑀫𑀺𑀁 𑀞𑀸𑀦𑁂 𑀣𑁂𑀭𑀸𑀦𑀁 𑀅𑀬𑀁 𑀓𑀣𑀸 𑀉𑀤𑀧𑀸𑀤𑀺 ‘‘𑀧𑀭𑀺𑀬𑀢𑁆𑀢𑀺 𑀦𑀼 𑀔𑁄 𑀲𑀸𑀲𑀦𑀲𑁆𑀲 𑀫𑀽𑀮𑀁, 𑀉𑀤𑀸𑀳𑀼 𑀧𑀝𑀺𑀧𑀢𑁆𑀢𑀻’’𑀢𑀺. 𑀧𑀁𑀲𑀼𑀓𑀽𑀮𑀺𑀓𑀢𑁆𑀣𑁂𑀭𑀸 ‘‘𑀧𑀝𑀺𑀧𑀢𑁆𑀢𑀺𑀫𑀽𑀮’’𑀦𑁆𑀢𑀺 𑀆𑀳𑀁𑀲𑀼, 𑀥𑀫𑁆𑀫𑀓𑀣𑀺𑀓𑀸 ‘‘𑀧𑀭𑀺𑀬𑀢𑁆𑀢𑀻’’𑀢𑀺. 𑀅𑀣 𑀦𑁂 𑀣𑁂𑀭𑀸 ‘‘𑀢𑀼𑀫𑁆𑀳𑀸𑀓𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀚𑀦𑀸𑀦𑀁 𑀯𑀘𑀦𑀫𑀢𑁆𑀢𑁂𑀦𑁂𑀯 𑀦 𑀓𑀭𑁄𑀫, 𑀚𑀺𑀦𑀪𑀸𑀲𑀺𑀢𑀁 𑀲𑀼𑀢𑁆𑀢𑀁 𑀆𑀳𑀭𑀣𑀸’’𑀢𑀺 𑀆𑀳𑀁𑀲𑀼. 𑀲𑀼𑀢𑁆𑀢𑀁 𑀆𑀳𑀭𑀺𑀢𑀼𑀁 𑀦 𑀪𑀸𑀭𑁄𑀢𑀺 ‘‘𑀇𑀫𑁂 𑀘, 𑀲𑀼𑀪𑀤𑁆𑀤, 𑀪𑀺𑀓𑁆𑀔𑀽 𑀲𑀫𑁆𑀫𑀸 𑀯𑀺𑀳𑀭𑁂𑀬𑁆𑀬𑀼𑀁, 𑀅𑀲𑀼𑀜𑁆𑀜𑁄 𑀮𑁄𑀓𑁄 𑀅𑀭𑀳𑀦𑁆𑀢𑁂𑀳𑀺 𑀅𑀲𑁆𑀲𑀸𑀢𑀺 (𑀤𑀻. 𑀦𑀺. 𑁨.𑁨𑁧𑁪). 𑀧𑀝𑀺𑀧𑀢𑁆𑀢𑀺𑀫𑀽𑀮𑀓𑀁, 𑀫𑀳𑀸𑀭𑀸𑀚, 𑀲𑀢𑁆𑀣𑀼𑀲𑀸𑀲𑀦𑀁 𑀧𑀝𑀺𑀧𑀢𑁆𑀢𑀺𑀲𑀸𑀭𑀓𑀁. 𑀧𑀝𑀺𑀧𑀢𑁆𑀢𑀺𑀬𑀸 𑀥𑀭𑀦𑁆𑀢𑀸𑀬 𑀢𑀺𑀝𑁆𑀞𑀢𑀻’’𑀢𑀺 (𑀫𑀺. 𑀧. 𑁪.𑁧.𑁭) 𑀲𑀼𑀢𑁆𑀢𑀁 𑀆𑀳𑀭𑀺𑀁𑀲𑀼. 𑀇𑀫𑀁 𑀲𑀼𑀢𑁆𑀢𑀁 𑀲𑀼𑀢𑁆𑀯𑀸 𑀥𑀫𑁆𑀫𑀓𑀣𑀺𑀓𑀸 𑀅𑀢𑁆𑀢𑀦𑁄 𑀯𑀸𑀤𑀞𑀧𑀦𑀢𑁆𑀣𑀸𑀬 𑀇𑀫𑀁 𑀲𑀼𑀢𑁆𑀢𑀁 𑀆𑀳𑀭𑀺𑀁𑀲𑀼 𑁋

‘‘𑀬𑀸𑀯 𑀢𑀺𑀝𑁆𑀞𑀦𑁆𑀢𑀺 𑀲𑀼𑀢𑁆𑀢𑀦𑁆𑀢𑀸, 𑀯𑀺𑀦𑀬𑁄 𑀬𑀸𑀯 𑀤𑀺𑀧𑁆𑀧𑀢𑀺;

𑀢𑀸𑀯 𑀤𑀓𑁆𑀔𑀦𑁆𑀢𑀺 𑀆𑀮𑁄𑀓𑀁, 𑀲𑀽𑀭𑀺𑀬𑁂 𑀅𑀩𑁆𑀪𑀼𑀝𑁆𑀞𑀺𑀢𑁂 𑀬𑀣𑀸.

‘‘𑀲𑀼𑀢𑁆𑀢𑀦𑁆𑀢𑁂𑀲𑀼 𑀅𑀲𑀦𑁆𑀢𑁂𑀲𑀼, 𑀧𑀫𑀼𑀝𑁆𑀞𑁂 𑀯𑀺𑀦𑀬𑀫𑁆𑀳𑀺 𑀘;

𑀢𑀫𑁄 𑀪𑀯𑀺𑀲𑁆𑀲𑀢𑀺 𑀮𑁄𑀓𑁂, 𑀲𑀽𑀭𑀺𑀬𑁂 𑀅𑀢𑁆𑀣𑀗𑁆𑀕𑀢𑁂 𑀬𑀣𑀸.

‘‘𑀲𑀼𑀢𑁆𑀢𑀦𑁆𑀢𑁂 𑀭𑀓𑁆𑀔𑀺𑀢𑁂 𑀲𑀦𑁆𑀢𑁂, 𑀧𑀝𑀺𑀧𑀢𑁆𑀢𑀺 𑀳𑁄𑀢𑀺 𑀭𑀓𑁆𑀔𑀺𑀢𑀸;

𑀧𑀝𑀺𑀧𑀢𑁆𑀢𑀺𑀬𑀁 𑀞𑀺𑀢𑁄 𑀥𑀻𑀭𑁄, 𑀬𑁄𑀕𑀓𑁆𑀔𑁂𑀫𑀸 𑀦 𑀥𑀁𑀲𑀢𑀻’’𑀢𑀺.

𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀆𑀳𑀝𑁂 𑀧𑀁𑀲𑀼𑀓𑀽𑀮𑀺𑀓𑀢𑁆𑀣𑁂𑀭𑀸 𑀢𑀼𑀡𑁆𑀳𑀻 𑀅𑀳𑁂𑀲𑀼𑀁, 𑀥𑀫𑁆𑀫𑀓𑀣𑀺𑀓𑀢𑁆𑀣𑁂𑀭𑀸𑀦𑀁𑀬𑁂𑀯 𑀯𑀘𑀦𑀁 𑀧𑀼𑀭𑀢𑁄 𑀅𑀳𑁄𑀲𑀺. 𑀬𑀣𑀸 𑀳𑀺 𑀕𑀯𑀲𑀢𑀲𑁆𑀲 𑀯𑀸 𑀕𑀯𑀲𑀳𑀲𑁆𑀲𑀲𑁆𑀲 𑀯𑀸 𑀅𑀦𑁆𑀢𑀭𑁂 𑀧𑀯𑁂𑀡𑀺𑀧𑀸𑀮𑀺𑀓𑀸𑀬 𑀥𑁂𑀦𑀼𑀬𑀸 𑀅𑀲𑀢𑀺 𑀲𑁄 𑀯𑀁𑀲𑁄 𑀲𑀸 𑀧𑀯𑁂𑀡𑀺 𑀦 𑀖𑀝𑀻𑀬𑀢𑀺, 𑀏𑀯𑀫𑁂𑀯𑀁 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀢𑁂𑀧𑀺 𑀲𑀳𑀲𑁆𑀲𑁂𑀧𑀺 𑀲𑀁𑀯𑀺𑀚𑁆𑀚𑀫𑀸𑀦𑁂 𑀧𑀭𑀺𑀬𑀢𑁆𑀢𑀺𑀬𑀸 𑀅𑀲𑀢𑀺 𑀅𑀭𑀺𑀬𑀫𑀕𑁆𑀕𑀧𑀝𑀺𑀯𑁂𑀥𑁄 𑀦𑀸𑀫 𑀦 𑀳𑁄𑀢𑀺. 𑀬𑀣𑀸 𑀘 𑀦𑀺𑀥𑀺𑀓𑀼𑀫𑁆𑀪𑀺𑀬𑀸 𑀚𑀸𑀦𑀦𑀢𑁆𑀣𑀸𑀬 𑀧𑀸𑀲𑀸𑀡𑀧𑀺𑀝𑁆𑀞𑁂 𑀅𑀓𑁆𑀔𑀭𑁂𑀲𑀼 𑀞𑀧𑀺𑀢𑁂𑀲𑀼 𑀬𑀸𑀯 𑀅𑀓𑁆𑀔𑀭𑀸𑀦𑀺 𑀥𑀭𑀦𑁆𑀢𑀺, 𑀢𑀸𑀯 𑀦𑀺𑀥𑀺𑀓𑀼𑀫𑁆𑀪𑀺 𑀦𑀝𑁆𑀞𑀸 𑀦𑀸𑀫 𑀦 𑀳𑁄𑀢𑀺. 𑀏𑀯𑀫𑁂𑀯𑀁 𑀧𑀭𑀺𑀬𑀢𑁆𑀢𑀺𑀬𑀸 𑀥𑀭𑀫𑀸𑀦𑀸𑀬 𑀲𑀸𑀲𑀦𑀁 𑀅𑀦𑁆𑀢𑀭𑀳𑀺𑀢𑀁 𑀦𑀸𑀫 𑀦 𑀳𑁄𑀢𑀻𑀢𑀺.

𑀤𑀼𑀢𑀺𑀬𑀧𑀫𑀸𑀤𑀸𑀤𑀺𑀯𑀕𑁆𑀕𑀯𑀡𑁆𑀡𑀦𑀸.