𑁨. 𑀥𑀫𑁆𑀫𑀯𑀸𑀭𑁄

(𑁧) 𑀉𑀧𑁆𑀧𑀸𑀤𑀦𑀺𑀭𑁄𑀥𑀓𑀸𑀮𑀲𑀫𑁆𑀪𑁂𑀤𑀯𑀸𑀭𑁄

𑁮𑁪. (𑀓) 𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑀦 𑀦𑀺𑀭𑀼𑀚𑁆𑀛𑀢𑀺 𑀢𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺? 𑀆𑀫𑀦𑁆𑀢𑀸.

(𑀔) 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑀦 𑀦𑀺𑀭𑀼𑀚𑁆𑀛𑀢𑀻𑀢𑀺? 𑀆𑀫𑀦𑁆𑀢𑀸.

(𑀓) 𑀬𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺 𑀦𑀺𑀭𑀼𑀚𑁆𑀛𑀢𑀺 𑀢𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺? 𑀦𑁄.

(𑀔) 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺 𑀦𑀺𑀭𑀼𑀚𑁆𑀛𑀢𑀻𑀢𑀺? 𑀦𑀢𑁆𑀣𑀺.

(𑁨) 𑀉𑀧𑁆𑀧𑀸𑀤𑀼𑀧𑁆𑀧𑀦𑁆𑀦𑀯𑀸𑀭𑁄

𑁮𑁫. (𑀓) 𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀦𑁆𑀢𑀺? 𑀆𑀫𑀦𑁆𑀢𑀸.

(𑀔) 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀻𑀢𑀺?

𑀪𑀗𑁆𑀕𑀓𑁆𑀔𑀡𑁂 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁, 𑀦𑁄 𑀘 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀉𑀧𑁆𑀧𑀸𑀤𑀓𑁆𑀔𑀡𑁂 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀜𑁆𑀘𑁂𑀯 𑀉𑀧𑁆𑀧𑀚𑁆𑀚𑀢𑀺 𑀘.

(𑀓) 𑀬𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀦𑁆𑀢𑀺?

𑀪𑀗𑁆𑀕𑀓𑁆𑀔𑀡𑁂 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺, 𑀦𑁄 𑀘 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁. 𑀅𑀢𑀻𑀢𑀸𑀦𑀸𑀕𑀢𑀁 𑀘𑀺𑀢𑁆𑀢𑀁 𑀦 𑀘𑁂𑀯 𑀉𑀧𑁆𑀧𑀚𑁆𑀚𑀢𑀺 𑀦 𑀘 𑀉𑀧𑁆𑀧𑀦𑁆𑀦𑀁.

(𑀔) 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀆𑀫𑀦𑁆𑀢𑀸.

(𑁩) 𑀦𑀺𑀭𑁄𑀥𑀼𑀧𑁆𑀧𑀦𑁆𑀦𑀯𑀸𑀭𑁄

𑁮𑁬. (𑀓) 𑀬𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀢𑀺 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀦𑁆𑀢𑀺? 𑀆𑀫𑀦𑁆𑀢𑀸.

(𑀔) 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀢𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀢𑀻𑀢𑀺?

𑀉𑀧𑁆𑀧𑀸𑀤𑀓𑁆𑀔𑀡𑁂 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁, 𑀦𑁄 𑀘 𑀢𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀢𑀺. 𑀪𑀗𑁆𑀕𑀓𑁆𑀔𑀡𑁂 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀜𑁆𑀘𑁂𑀯 𑀦𑀺𑀭𑀼𑀚𑁆𑀛𑀢𑀺 𑀘.

(𑀓) 𑀬𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀢𑀺 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀦𑁆𑀢𑀺?

𑀉𑀧𑁆𑀧𑀸𑀤𑀓𑁆𑀔𑀡𑁂 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀢𑀺, 𑀦𑁄 𑀘 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁. 𑀅𑀢𑀻𑀢𑀸𑀦𑀸𑀕𑀢𑀁 𑀘𑀺𑀢𑁆𑀢𑀁 𑀦 𑀘𑁂𑀯 𑀦𑀺𑀭𑀼𑀚𑁆𑀛𑀢𑀺 𑀦 𑀘 𑀉𑀧𑁆𑀧𑀦𑁆𑀦𑀁.

(𑀔) 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁 𑀢𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀢𑀻𑀢𑀺? 𑀆𑀫𑀦𑁆𑀢𑀸.

(𑁪) 𑀉𑀧𑁆𑀧𑀸𑀤𑀯𑀸𑀭𑁄

𑁮𑁭. (𑀓) 𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺? 𑀦𑁄.

(𑀔) 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀦𑁄.

(𑀓) 𑀬𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺?

𑀅𑀢𑀻𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺, 𑀦𑁄 𑀘 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣. 𑀪𑀗𑁆𑀕𑀓𑁆𑀔𑀡𑁂 𑀅𑀦𑀸𑀕𑀢𑀜𑁆𑀘 𑀘𑀺𑀢𑁆𑀢𑀁 𑀦 𑀘𑁂𑀯 𑀉𑀧𑁆𑀧𑀚𑁆𑀚𑀢𑀺 𑀦 𑀘 𑀉𑀧𑁆𑀧𑀚𑁆𑀚𑀺𑀢𑁆𑀣.

(𑀔) 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀻𑀢𑀺?

𑀉𑀧𑁆𑀧𑀸𑀤𑀓𑁆𑀔𑀡𑁂 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀦𑁄 𑀘 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺. 𑀪𑀗𑁆𑀕𑀓𑁆𑀔𑀡𑁂 𑀅𑀦𑀸𑀕𑀢𑀜𑁆𑀘 𑀘𑀺𑀢𑁆𑀢𑀁 𑀦 𑀘𑁂𑀯 𑀉𑀧𑁆𑀧𑀚𑁆𑀚𑀺𑀢𑁆𑀣 𑀦 𑀘 𑀉𑀧𑁆𑀧𑀚𑁆𑀚𑀢𑀺.

𑁮𑁮. (𑀓) 𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺? 𑀦𑁄.

(𑀔) 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀦𑁄.

(𑀓) 𑀬𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺?

𑀅𑀦𑀸𑀕𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺, 𑀦𑁄 𑀘 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀪𑀗𑁆𑀕𑀓𑁆𑀔𑀡𑁂 𑀅𑀢𑀻𑀢𑀜𑁆𑀘 𑀘𑀺𑀢𑁆𑀢𑀁 𑀦 𑀘𑁂𑀯 𑀉𑀧𑁆𑀧𑀚𑁆𑀚𑀢𑀺 𑀦 𑀘 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺.

(𑀔) 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀻𑀢𑀺?

𑀉𑀧𑁆𑀧𑀸𑀤𑀓𑁆𑀔𑀡𑁂 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀦𑁄 𑀘 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺. 𑀪𑀗𑁆𑀕𑀓𑁆𑀔𑀡𑁂 𑀅𑀢𑀻𑀢𑀜𑁆𑀘 𑀘𑀺𑀢𑁆𑀢𑀁 𑀦 𑀘𑁂𑀯 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀦 𑀘 𑀉𑀧𑁆𑀧𑀚𑁆𑀚𑀢𑀺.

𑁮𑁯. (𑀓) 𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺? 𑀦𑁄.

(𑀔) 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺? 𑀦𑁄.

(𑀓) 𑀬𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺?

𑀅𑀦𑀸𑀕𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀦𑁄 𑀘 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀘𑀺𑀢𑁆𑀢𑀁 𑀦 𑀘𑁂𑀯 𑀉𑀧𑁆𑀧𑀚𑁆𑀚𑀺𑀢𑁆𑀣 𑀦 𑀘 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺.

(𑀔) 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺?

𑀅𑀢𑀻𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀦𑁄 𑀘 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣. 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀘𑀺𑀢𑁆𑀢𑀁 𑀦 𑀘𑁂𑀯 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀦 𑀘 𑀉𑀧𑁆𑀧𑀚𑁆𑀚𑀺𑀢𑁆𑀣.

(𑁫) 𑀦𑀺𑀭𑁄𑀥𑀯𑀸𑀭𑁄

𑁯𑁦. (𑀓) 𑀬𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀢𑀺 𑀢𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀢𑁆𑀣𑀸𑀢𑀺? 𑀦𑁄.

(𑀔) 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀢𑁆𑀣 𑀢𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀢𑀻𑀢𑀺? 𑀦𑁄.

(𑀓) 𑀬𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀢𑀺 𑀢𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀢𑁆𑀣𑀸𑀢𑀺?

𑀅𑀢𑀻𑀢𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀢𑀺, 𑀦𑁄 𑀘 𑀢𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀢𑁆𑀣. 𑀉𑀧𑁆𑀧𑀸𑀤𑀓𑁆𑀔𑀡𑁂 𑀅𑀦𑀸𑀕𑀢𑀜𑁆𑀘 𑀘𑀺𑀢𑁆𑀢𑀁 𑀦 𑀘𑁂𑀯 𑀦𑀺𑀭𑀼𑀚𑁆𑀛𑀢𑀺 𑀦 𑀘 𑀦𑀺𑀭𑀼𑀚𑁆𑀛𑀺𑀢𑁆𑀣.

(𑀔) 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀢𑁆𑀣 𑀢𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀢𑀻𑀢𑀺?

𑀪𑀗𑁆𑀕𑀓𑁆𑀔𑀡𑁂 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀢𑁆𑀣, 𑀦𑁄 𑀘 𑀢𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀢𑀺. 𑀉𑀧𑁆𑀧𑀸𑀤𑀓𑁆𑀔𑀡𑁂 𑀅𑀦𑀸𑀕𑀢𑀜𑁆𑀘 𑀘𑀺𑀢𑁆𑀢𑀁 𑀦 𑀘𑁂𑀯 𑀦𑀺𑀭𑀼𑀚𑁆𑀛𑀺𑀢𑁆𑀣 𑀦 𑀘 𑀦𑀺𑀭𑀼𑀚𑁆𑀛𑀢𑀺.

𑁯𑁧. (𑀓) 𑀬𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀢𑀺 𑀢𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻𑀢𑀺? 𑀦𑁄.

(𑀔) 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀢𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀢𑀻𑀢𑀺? 𑀦𑁄.

(𑀓) 𑀬𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀢𑀺 𑀢𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻𑀢𑀺?

𑀉𑀧𑁆𑀧𑀸𑀤𑀓𑁆𑀔𑀡𑁂 𑀅𑀦𑀸𑀕𑀢𑀜𑁆𑀘 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀢𑀺, 𑀦𑁄 𑀘 𑀢𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺. 𑀅𑀢𑀻𑀢𑀁 𑀘𑀺𑀢𑁆𑀢𑀁 𑀦 𑀘𑁂𑀯 𑀦𑀺𑀭𑀼𑀚𑁆𑀛𑀢𑀺 𑀦 𑀘 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺.

(𑀔) 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀢𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀢𑀻𑀢𑀺?

𑀪𑀗𑁆𑀕𑀓𑁆𑀔𑀡𑁂 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀦𑁄 𑀘 𑀢𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀢𑀺. 𑀅𑀢𑀻𑀢𑀁 𑀘𑀺𑀢𑁆𑀢𑀁 𑀦 𑀘𑁂𑀯 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀦 𑀘 𑀦𑀺𑀭𑀼𑀚𑁆𑀛𑀢𑀺.

𑁯𑁨. (𑀓) 𑀬𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀢𑁆𑀣 𑀢𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻𑀢𑀺? 𑀦𑁄.

(𑀔) 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀢𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀢𑁆𑀣𑀸𑀢𑀺? 𑀦𑁄.

(𑀓) 𑀬𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀢𑁆𑀣 𑀢𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻𑀢𑀺?

𑀉𑀧𑁆𑀧𑀸𑀤𑀓𑁆𑀔𑀡𑁂 𑀅𑀦𑀸𑀕𑀢𑀜𑁆𑀘 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀢𑁆𑀣, 𑀦𑁄 𑀘 𑀢𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺. 𑀪𑀗𑁆𑀕𑀓𑁆𑀔𑀡𑁂 𑀘𑀺𑀢𑁆𑀢𑀁 𑀦 𑀘𑁂𑀯 𑀦𑀺𑀭𑀼𑀚𑁆𑀛𑀺𑀢𑁆𑀣 𑀦 𑀘 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺.

(𑀔) 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀢𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀢𑁆𑀣𑀸𑀢𑀺?

𑀅𑀢𑀻𑀢𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀦𑁄 𑀘 𑀢𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀢𑁆𑀣. 𑀪𑀗𑁆𑀕𑀓𑁆𑀔𑀡𑁂 𑀘𑀺𑀢𑁆𑀢𑀁 𑀦 𑀘𑁂𑀯 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀦 𑀘 𑀦𑀺𑀭𑀼𑀚𑁆𑀛𑀺𑀢𑁆𑀣.

(𑁬) 𑀉𑀧𑁆𑀧𑀸𑀤𑀦𑀺𑀭𑁄𑀥𑀯𑀸𑀭𑁄

𑁯𑁩. (𑀓) 𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑀢𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀢𑁆𑀣𑀸𑀢𑀺? 𑀦𑁄.

(𑀔) 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀢𑁆𑀣 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀦𑁄.

(𑀓) 𑀬𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺 𑀢𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀢𑁆𑀣𑀸𑀢𑀺?

𑀅𑀢𑀻𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺, 𑀦𑁄 𑀘 𑀢𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀢𑁆𑀣. 𑀪𑀗𑁆𑀕𑀓𑁆𑀔𑀡𑁂 𑀅𑀦𑀸𑀕𑀢𑀜𑁆𑀘 𑀘𑀺𑀢𑁆𑀢𑀁 𑀦 𑀘𑁂𑀯 𑀉𑀧𑁆𑀧𑀚𑁆𑀚𑀢𑀺 𑀦 𑀘 𑀦𑀺𑀭𑀼𑀚𑁆𑀛𑀺𑀢𑁆𑀣.

(𑀔) 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀢𑁆𑀣 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀻𑀢𑀺?

𑀉𑀧𑁆𑀧𑀸𑀤𑀓𑁆𑀔𑀡𑁂 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀢𑁆𑀣, 𑀦𑁄 𑀘 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺. 𑀪𑀗𑁆𑀕𑀓𑁆𑀔𑀡𑁂 𑀅𑀦𑀸𑀕𑀢𑀜𑁆𑀘 𑀘𑀺𑀢𑁆𑀢𑀁 𑀦 𑀘𑁂𑀯 𑀦𑀺𑀭𑀼𑀚𑁆𑀛𑀺𑀢𑁆𑀣 𑀦 𑀘 𑀉𑀧𑁆𑀧𑀚𑁆𑀚𑀢𑀺.

𑁯𑁪. (𑀓) 𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑀢𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻𑀢𑀺? 𑀆𑀫𑀦𑁆𑀢𑀸.

(𑀔) 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀻𑀢𑀺?

𑀅𑀦𑀸𑀕𑀢𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀦𑁄 𑀘 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀉𑀧𑁆𑀧𑀸𑀤𑀓𑁆𑀔𑀡𑁂 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀘𑁂𑀯 𑀉𑀧𑁆𑀧𑀚𑁆𑀚𑀢𑀺 𑀘.

(𑀓) 𑀬𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺 𑀢𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻𑀢𑀺?

𑀅𑀦𑀸𑀕𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺, 𑀦𑁄 𑀘 𑀢𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺. 𑀪𑀗𑁆𑀕𑀓𑁆𑀔𑀡𑁂 𑀅𑀢𑀻𑀢𑀜𑁆𑀘 𑀘𑀺𑀢𑁆𑀢𑀁 𑀦 𑀘𑁂𑀯 𑀉𑀧𑁆𑀧𑀚𑁆𑀚𑀢𑀺 𑀦 𑀘 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺.

(𑀔) 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀆𑀫𑀦𑁆𑀢𑀸.

𑁯𑁫. (𑀓) 𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣 𑀢𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻𑀢𑀺? 𑀦𑁄.

(𑀔) 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺? 𑀦𑁄.

(𑀓) 𑀬𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣 𑀢𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻𑀢𑀺?

𑀉𑀧𑁆𑀧𑀸𑀤𑀓𑁆𑀔𑀡𑁂 𑀅𑀦𑀸𑀕𑀢𑀜𑁆𑀘 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀦𑁄 𑀘 𑀢𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺. 𑀪𑀗𑁆𑀕𑀓𑁆𑀔𑀡𑁂 𑀘𑀺𑀢𑁆𑀢𑀁 𑀦 𑀘𑁂𑀯 𑀉𑀧𑁆𑀧𑀚𑁆𑀚𑀺𑀢𑁆𑀣 𑀦 𑀘 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺.

(𑀔) 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺?

𑀅𑀢𑀻𑀢𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀦𑁄 𑀘 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣. 𑀪𑀗𑁆𑀕𑀓𑁆𑀔𑀡𑁂 𑀘𑀺𑀢𑁆𑀢𑀁 𑀦 𑀘𑁂𑀯 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀦 𑀘 𑀉𑀧𑁆𑀧𑀚𑁆𑀚𑀺𑀢𑁆𑀣.

(𑁭) 𑀉𑀧𑁆𑀧𑀚𑁆𑀚𑀫𑀸𑀦-𑀦𑀦𑀺𑀭𑁄𑀥𑀯𑀸𑀭𑁄

𑁯𑁬. (𑀓) 𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑀢𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀢𑀻𑀢𑀺? 𑀆𑀫𑀦𑁆𑀢𑀸.

(𑀔) 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀢𑀺 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀻𑀢𑀺?

𑀅𑀢𑀻𑀢𑀸𑀦𑀸𑀕𑀢𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀢𑀺, 𑀦𑁄 𑀘 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀉𑀧𑁆𑀧𑀸𑀤𑀓𑁆𑀔𑀡𑁂 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀢𑀺 𑀘𑁂𑀯 𑀉𑀧𑁆𑀧𑀚𑁆𑀚𑀢𑀺 𑀘.

(𑀓) 𑀬𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺 𑀢𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀢𑀻𑀢𑀺?

𑀅𑀢𑀻𑀢𑀸𑀦𑀸𑀕𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺, 𑀦𑁄 𑀘 𑀢𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀢𑀺. 𑀪𑀗𑁆𑀕𑀓𑁆𑀔𑀡𑁂 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺 𑀘𑁂𑀯 𑀦𑀺𑀭𑀼𑀚𑁆𑀛𑀢𑀺 𑀘.

(𑀔) 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀢𑀺 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀆𑀫𑀦𑁆𑀢𑀸.

(𑁮) 𑀉𑀧𑁆𑀧𑀚𑁆𑀚𑀫𑀸𑀦𑀼𑀧𑁆𑀧𑀦𑁆𑀦𑀯𑀸𑀭𑁄

𑁯𑁭. (𑀓) 𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀦𑁆𑀢𑀺? 𑀆𑀫𑀦𑁆𑀢𑀸.

(𑀔) 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑀦𑁆𑀢𑀺?

𑀪𑀗𑁆𑀕𑀓𑁆𑀔𑀡𑁂 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁, 𑀦𑁄 𑀘 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑀁. 𑀉𑀧𑁆𑀧𑀸𑀤𑀓𑁆𑀔𑀡𑁂 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀜𑁆𑀘𑁂𑀯 𑀉𑀧𑁆𑀧𑀚𑁆𑀚𑀫𑀸𑀦𑀜𑁆𑀘.

(𑀓) 𑀬𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀫𑀸𑀦𑀁 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀦𑁆𑀢𑀺?

𑀪𑀗𑁆𑀕𑀓𑁆𑀔𑀡𑁂 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀫𑀸𑀦𑀁, 𑀦𑁄 𑀘 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁. 𑀅𑀢𑀻𑀢𑀸𑀦𑀸𑀕𑀢𑀁 𑀘𑀺𑀢𑁆𑀢𑀁 𑀦 𑀘𑁂𑀯 𑀉𑀧𑁆𑀧𑀚𑁆𑀚𑀫𑀸𑀦𑀁 𑀦 𑀘 𑀉𑀧𑁆𑀧𑀦𑁆𑀦𑀁.

(𑀔) 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀫𑀸𑀦𑀦𑁆𑀢𑀺? 𑀆𑀫𑀦𑁆𑀢𑀸.

(𑁯) 𑀦𑀺𑀭𑀼𑀚𑁆𑀛𑀫𑀸𑀦𑀼𑀧𑁆𑀧𑀦𑁆𑀦𑀯𑀸𑀭𑁄

𑁯𑁮. (𑀓) 𑀬𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀫𑀸𑀦𑀁 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀦𑁆𑀢𑀺? 𑀆𑀫𑀦𑁆𑀢𑀸.

(𑀔) 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀢𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀫𑀸𑀦𑀦𑁆𑀢𑀺?

𑀉𑀧𑁆𑀧𑀸𑀤𑀓𑁆𑀔𑀡𑁂 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁, 𑀦𑁄 𑀘 𑀢𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀫𑀸𑀦𑀁. 𑀪𑀗𑁆𑀕𑀓𑁆𑀔𑀡𑁂 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀜𑁆𑀘𑁂𑀯 𑀦𑀺𑀭𑀼𑀚𑁆𑀛𑀫𑀸𑀦𑀜𑁆𑀘.

(𑀓) 𑀬𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀫𑀸𑀦𑀁 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀦𑁆𑀢𑀺?

𑀉𑀧𑁆𑀧𑀸𑀤𑀓𑁆𑀔𑀡𑁂 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀫𑀸𑀦𑀁, 𑀦𑁄 𑀘 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁. 𑀅𑀢𑀻𑀢𑀸𑀦𑀸𑀕𑀢𑀁 𑀘𑀺𑀢𑁆𑀢𑀁 𑀦 𑀘𑁂𑀯 𑀦𑀺𑀭𑀼𑀚𑁆𑀛𑀫𑀸𑀦𑀁 𑀦 𑀘 𑀉𑀧𑁆𑀧𑀦𑁆𑀦𑀁.

(𑀔) 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁 𑀢𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀫𑀸𑀦𑀦𑁆𑀢𑀺? 𑀆𑀫𑀦𑁆𑀢𑀸.

(𑁧𑁦) 𑀉𑀧𑁆𑀧𑀦𑁆𑀦𑀼𑀧𑁆𑀧𑀸𑀤𑀯𑀸𑀭𑁄

𑁯𑁯. (𑀓) 𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺? 𑀦𑁄.

(𑀔) 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀦𑁆𑀢𑀺? 𑀦𑁄.

(𑀓) 𑀬𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺?

𑀅𑀢𑀻𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁, 𑀦𑁄 𑀘 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣. 𑀅𑀦𑀸𑀕𑀢𑀁 𑀘𑀺𑀢𑁆𑀢𑀁 𑀦 𑀘𑁂𑀯 𑀉𑀧𑁆𑀧𑀦𑁆𑀦𑀁 𑀦 𑀘 𑀉𑀧𑁆𑀧𑀚𑁆𑀚𑀺𑀢𑁆𑀣.

(𑀔) 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀦𑁆𑀢𑀺?

𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀦𑁄 𑀘 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁. 𑀅𑀦𑀸𑀕𑀢𑀁 𑀘𑀺𑀢𑁆𑀢𑀁 𑀦 𑀘𑁂𑀯 𑀉𑀧𑁆𑀧𑀚𑁆𑀚𑀺𑀢𑁆𑀣 𑀦 𑀘 𑀉𑀧𑁆𑀧𑀦𑁆𑀦𑀁.

𑁧𑁦𑁦. (𑀓) 𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺? 𑀦𑁄.

(𑀔) 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀦𑁆𑀢𑀺? 𑀦𑁄.

(𑀓) 𑀬𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺?

𑀅𑀦𑀸𑀕𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁, 𑀦𑁄 𑀘 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀅𑀢𑀻𑀢𑀁 𑀘𑀺𑀢𑁆𑀢𑀁 𑀦 𑀘𑁂𑀯 𑀉𑀧𑁆𑀧𑀦𑁆𑀦𑀁 𑀦 𑀘 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺.

(𑀔) 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀦𑁆𑀢𑀺?

𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀦𑁄 𑀘 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁. 𑀅𑀢𑀻𑀢𑀁 𑀘𑀺𑀢𑁆𑀢𑀁 𑀦 𑀘𑁂𑀯 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀦 𑀘 𑀉𑀧𑁆𑀧𑀦𑁆𑀦𑀁.

(𑁧𑁧) 𑀅𑀢𑀻𑀢𑀸𑀦𑀸𑀕𑀢𑀯𑀸𑀭𑁄

𑁧𑁦𑁧. (𑀓) 𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣 𑀦𑁄 𑀘 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁, 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺? 𑀦𑁄.

(𑀔) 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀦𑁄 𑀘 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁, 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺? 𑀦𑁄.

(𑀓) 𑀬𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣 𑀦𑁄 𑀘 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁, 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺? 𑀆𑀫𑀦𑁆𑀢𑀸.

(𑀔) 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀦𑁄 𑀘 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀦𑁆𑀦𑀁, 𑀢𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺? 𑀆𑀫𑀦𑁆𑀢𑀸.

(𑁧𑁨) 𑀉𑀧𑁆𑀧𑀦𑁆𑀦𑀼𑀧𑁆𑀧𑀚𑁆𑀚𑀫𑀸𑀦𑀯𑀸𑀭𑁄

𑁧𑁦𑁨. (𑀓) 𑀉𑀧𑁆𑀧𑀦𑁆𑀦𑀁 𑀉𑀧𑁆𑀧𑀚𑁆𑀚𑀫𑀸𑀦𑀦𑁆𑀢𑀺?

𑀪𑀗𑁆𑀕𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁, 𑀦𑁄 𑀘 𑀉𑀧𑁆𑀧𑀚𑁆𑀚𑀫𑀸𑀦𑀁. 𑀉𑀧𑁆𑀧𑀸𑀤𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀜𑁆𑀘𑁂𑀯 𑀉𑀧𑁆𑀧𑀚𑁆𑀚𑀫𑀸𑀦𑀜𑁆𑀘.

(𑀔) 𑀉𑀧𑁆𑀧𑀚𑁆𑀚𑀫𑀸𑀦𑀁 𑀉𑀧𑁆𑀧𑀦𑁆𑀦𑀦𑁆𑀢𑀺? 𑀆𑀫𑀦𑁆𑀢𑀸.

(𑀓) 𑀦 𑀉𑀧𑁆𑀧𑀦𑁆𑀦𑀁 𑀦 𑀉𑀧𑁆𑀧𑀚𑁆𑀚𑀫𑀸𑀦𑀦𑁆𑀢𑀺? 𑀆𑀫𑀦𑁆𑀢𑀸.

(𑀔) 𑀦 𑀉𑀧𑁆𑀧𑀚𑁆𑀚𑀫𑀸𑀦𑀁 𑀦 𑀉𑀧𑁆𑀧𑀦𑁆𑀦𑀦𑁆𑀢𑀺?

𑀪𑀗𑁆𑀕𑀓𑁆𑀔𑀡𑁂 𑀦 𑀉𑀧𑁆𑀧𑀚𑁆𑀚𑀫𑀸𑀦𑀁, 𑀦𑁄 𑀘 𑀦 𑀉𑀧𑁆𑀧𑀦𑁆𑀦𑀁. 𑀅𑀢𑀻𑀢𑀸𑀦𑀸𑀕𑀢𑀁 𑀘𑀺𑀢𑁆𑀢𑀁 𑀦 𑀘𑁂𑀯 𑀉𑀧𑁆𑀧𑀚𑁆𑀚𑀫𑀸𑀦𑀁 𑀦 𑀘 𑀉𑀧𑁆𑀧𑀦𑁆𑀦𑀁.

(𑁧𑁩) 𑀦𑀺𑀭𑀼𑀤𑁆𑀥𑀦𑀺𑀭𑀼𑀚𑁆𑀛𑀫𑀸𑀦𑀯𑀸𑀭𑁄

𑁧𑁦𑁩. (𑀓) 𑀦𑀺𑀭𑀼𑀤𑁆𑀥𑀁 𑀦𑀺𑀭𑀼𑀚𑁆𑀛𑀫𑀸𑀦𑀦𑁆𑀢𑀺? 𑀦𑁄.

(𑀔) 𑀦𑀺𑀭𑀼𑀚𑁆𑀛𑀫𑀸𑀦𑀁 𑀦𑀺𑀭𑀼𑀤𑁆𑀥𑀦𑁆𑀢𑀺? 𑀦𑁄.

(𑀓) 𑀦 𑀦𑀺𑀭𑀼𑀤𑁆𑀥𑀁 𑀦 𑀦𑀺𑀭𑀼𑀚𑁆𑀛𑀫𑀸𑀦𑀦𑁆𑀢𑀺?

𑀪𑀗𑁆𑀕𑀓𑁆𑀔𑀡𑁂 𑀦 𑀦𑀺𑀭𑀼𑀤𑁆𑀥𑀁, 𑀦𑁄 𑀘 𑀦 𑀦𑀺𑀭𑀼𑀚𑁆𑀛𑀫𑀸𑀦𑀁. 𑀉𑀧𑁆𑀧𑀸𑀤𑀓𑁆𑀔𑀡𑁂 𑀅𑀦𑀸𑀕𑀢𑀜𑁆𑀘 𑀘𑀺𑀢𑁆𑀢𑀁 𑀦 𑀘𑁂𑀯 𑀦𑀺𑀭𑀼𑀤𑁆𑀥𑀁 𑀦 𑀘 𑀦𑀺𑀭𑀼𑀚𑁆𑀛𑀫𑀸𑀦𑀁.

(𑀔) 𑀦 𑀦𑀺𑀭𑀼𑀚𑁆𑀛𑀫𑀸𑀦𑀁 𑀦 𑀦𑀺𑀭𑀼𑀤𑁆𑀥𑀦𑁆𑀢𑀺?

𑀅𑀢𑀻𑀢𑀁 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀫𑀸𑀦𑀁, 𑀦𑁄 𑀘 𑀦 𑀦𑀺𑀭𑀼𑀤𑁆𑀥𑀁. 𑀉𑀧𑁆𑀧𑀸𑀤𑀓𑁆𑀔𑀡𑁂 𑀅𑀦𑀸𑀕𑀢𑀜𑁆𑀘 𑀘𑀺𑀢𑁆𑀢𑀁 𑀦 𑀘𑁂𑀯 𑀦𑀺𑀭𑀼𑀚𑁆𑀛𑀫𑀸𑀦𑀁 𑀦 𑀘 𑀦𑀺𑀭𑀼𑀤𑁆𑀥𑀁.

(𑁧𑁪) 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀯𑀸𑀭𑁄

𑁧𑁦𑁪. (𑀓) 𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀔𑀡𑀁 𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀁, 𑀦𑀺𑀭𑀼𑀚𑁆𑀛𑀫𑀸𑀦𑀁 𑀔𑀡𑀁 𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀁 𑀢𑀁 𑀘𑀺𑀢𑁆𑀢𑀦𑁆𑀢𑀺?

𑀪𑀗𑁆𑀕𑀓𑁆𑀔𑀡𑁂 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑀓𑁆𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀪𑀗𑁆𑀕𑀓𑁆𑀔𑀡𑀁 𑀅𑀯𑀻𑀢𑀺𑀓𑁆𑀓𑀦𑁆𑀢𑀁, 𑀅𑀢𑀻𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑀓𑁆𑀔𑀡𑀜𑁆𑀘 𑀯𑀻𑀢𑀺𑀓𑁆𑀓𑀦𑁆𑀢𑀁 𑀪𑀗𑁆𑀕𑀓𑁆𑀔𑀡𑀜𑁆𑀘 𑀯𑀻𑀢𑀺𑀓𑁆𑀓𑀦𑁆𑀢𑀁.

(𑀔) 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀫𑀸𑀦𑀁 𑀔𑀡𑀁 𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀁, 𑀉𑀧𑁆𑀧𑀚𑁆𑀚𑀫𑀸𑀦𑀁 𑀔𑀡𑀁 𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀁 𑀢𑀁 𑀘𑀺𑀢𑁆𑀢𑀦𑁆𑀢𑀺?

𑀅𑀢𑀻𑀢𑀁 𑀘𑀺𑀢𑁆𑀢𑀁.

(𑀓) 𑀬𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀫𑀸𑀦𑀁 𑀔𑀡𑀁 𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀁, 𑀦 𑀦𑀺𑀭𑀼𑀚𑁆𑀛𑀫𑀸𑀦𑀁 𑀔𑀡𑀁 𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀁 𑀢𑀁 𑀘𑀺𑀢𑁆𑀢𑀦𑁆𑀢𑀺?

𑀉𑀧𑁆𑀧𑀸𑀤𑀓𑁆𑀔𑀡𑁂 𑀅𑀦𑀸𑀕𑀢𑀁 𑀘𑀺𑀢𑁆𑀢𑀁.

(𑀔) 𑀬𑀁 𑀯𑀸 𑀧𑀦 𑀘𑀺𑀢𑁆𑀢𑀁 𑀦 𑀦𑀺𑀭𑀼𑀚𑁆𑀛𑀫𑀸𑀦𑀁 𑀔𑀡𑀁 𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀁, 𑀦 𑀉𑀧𑁆𑀧𑀚𑁆𑀚𑀫𑀸𑀦𑀁 𑀔𑀡𑀁 𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀁 𑀢𑀁 𑀘𑀺𑀢𑁆𑀢𑀦𑁆𑀢𑀺?

𑀪𑀗𑁆𑀕𑀓𑁆𑀔𑀡𑁂 𑀘𑀺𑀢𑁆𑀢𑀁 𑀪𑀗𑁆𑀕𑀓𑁆𑀔𑀡𑀁 𑀅𑀯𑀻𑀢𑀺𑀓𑁆𑀓𑀦𑁆𑀢𑀁 𑀦𑁄 𑀘 𑀉𑀧𑁆𑀧𑀸𑀤𑀓𑁆𑀔𑀡𑀁 𑀅𑀯𑀻𑀢𑀺𑀓𑁆𑀓𑀦𑁆𑀢𑀁, 𑀉𑀧𑁆𑀧𑀸𑀤𑀓𑁆𑀔𑀡𑁂 𑀅𑀦𑀸𑀕𑀢𑀜𑁆𑀘 𑀘𑀺𑀢𑁆𑀢𑀁 𑀪𑀗𑁆𑀕𑀓𑁆𑀔𑀡𑀜𑁆𑀘 𑀅𑀯𑀻𑀢𑀺𑀓𑁆𑀓𑀦𑁆𑀢𑀁 𑀉𑀧𑁆𑀧𑀸𑀤𑀓𑁆𑀔𑀡𑀜𑁆𑀘 𑀅𑀯𑀻𑀢𑀺𑀓𑁆𑀓𑀦𑁆𑀢𑀁.