(𑁩) 𑀫𑀽𑀮𑀓𑀦𑀬𑁄

𑁬𑁮. (𑀓) 𑀬𑁂 𑀓𑁂𑀘𑀺 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀅𑀓𑀼𑀲𑀮𑀫𑀽𑀮𑀓𑀸𑀢𑀺?

𑀅𑀳𑁂𑀢𑀼𑀓𑀁 𑀅𑀓𑀼𑀲𑀮𑀁 𑀦 𑀅𑀓𑀼𑀲𑀮𑀫𑀽𑀮𑀓𑀁. 𑀲𑀳𑁂𑀢𑀼𑀓𑀁 𑀅𑀓𑀼𑀲𑀮𑀁 𑀅𑀓𑀼𑀲𑀮𑀫𑀽𑀮𑀓𑀁.

(𑀔) 𑀬𑁂 𑀯𑀸 𑀧𑀦 𑀅𑀓𑀼𑀲𑀮𑀫𑀽𑀮𑀓𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸𑀢𑀺?

𑀅𑀓𑀼𑀲𑀮𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀁 𑀅𑀓𑀼𑀲𑀮𑀫𑀽𑀮𑀓𑀁 𑀦 𑀅𑀓𑀼𑀲𑀮𑀁. 𑀅𑀓𑀼𑀲𑀮𑀁 𑀅𑀓𑀼𑀲𑀮𑀫𑀽𑀮𑀓𑀜𑁆𑀘𑁂𑀯 𑀅𑀓𑀼𑀲𑀮𑀜𑁆𑀘.

𑁬𑁯. (𑀓) 𑀬𑁂 𑀓𑁂𑀘𑀺 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀅𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀓𑀸𑀢𑀺?

𑀅𑀳𑁂𑀢𑀼𑀓𑀁 𑀅𑀓𑀼𑀲𑀮𑀁 𑀅𑀓𑀼𑀲𑀮𑀫𑀽𑀮𑁂𑀦 𑀦 𑀏𑀓𑀫𑀽𑀮𑀓𑀁. 𑀲𑀳𑁂𑀢𑀼𑀓𑀁 𑀅𑀓𑀼𑀲𑀮𑀁 𑀅𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀓𑀁.

(𑀔) 𑀬𑁂 𑀯𑀸 𑀧𑀦 𑀅𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀓𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸𑀢𑀺?

𑀅𑀓𑀼𑀲𑀮𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀁 𑀅𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀓𑀁, 𑀦 𑀅𑀓𑀼𑀲𑀮𑀁. 𑀅𑀓𑀼𑀲𑀮𑀁 𑀅𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀓𑀜𑁆𑀘𑁂𑀯 𑀅𑀓𑀼𑀲𑀮𑀜𑁆𑀘.

𑁭𑁦. (𑀓) 𑀬𑁂 𑀓𑁂𑀘𑀺 𑀅𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀓𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀅𑀓𑀼𑀲𑀮𑀫𑀽𑀮𑁂𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑀓𑀸𑀢𑀺?

𑀫𑀽𑀮𑀸𑀦𑀺 𑀬𑀸𑀦𑀺 𑀏𑀓𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀓𑀼𑀲𑀮𑀫𑀽𑀮𑀸𑀦𑀺 𑀏𑀓𑀫𑀽𑀮𑀓𑀸𑀦𑀺 𑀘𑁂𑀯 𑀅𑀜𑁆𑀜𑀫𑀜𑁆𑀜𑀫𑀽𑀮𑀓𑀸𑀦𑀺 𑀘. 𑀅𑀯𑀲𑁂𑀲𑀸 𑀅𑀓𑀼𑀲𑀮𑀫𑀽𑀮𑀲𑀳𑀚𑀸𑀢𑀸 𑀥𑀫𑁆𑀫𑀸 𑀅𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀓𑀸 𑀦 𑀘 𑀅𑀜𑁆𑀜𑀫𑀜𑁆𑀜𑀫𑀽𑀮𑀓𑀸.

(𑀔) 𑀬𑁂 𑀯𑀸 𑀧𑀦 𑀅𑀓𑀼𑀲𑀮𑀫𑀽𑀮𑁂𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑀓𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸𑀢𑀺? 𑀆𑀫𑀦𑁆𑀢𑀸.