𑁯. 𑀅𑀓𑀼𑀲𑀮𑀦𑀺𑀤𑁆𑀤𑁂𑀲𑁄

𑁨𑁮𑁦. 𑀓𑀢𑀫𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸? 𑀬𑀲𑁆𑀫𑀺𑀁 𑀲𑀫𑀬𑁂 𑀅𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀤𑀺𑀝𑁆𑀞𑀺𑀕𑀢𑀲𑀫𑁆𑀧𑀬𑀼𑀢𑁆𑀢𑀁 𑀲𑀲𑀗𑁆𑀔𑀸𑀭𑁂𑀦…𑀧𑁂… 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀤𑀺𑀝𑁆𑀞𑀺𑀕𑀢𑀯𑀺𑀧𑁆𑀧𑀬𑀼𑀢𑁆𑀢𑀁 𑀭𑀽𑀧𑀸𑀭𑀫𑁆𑀫𑀡𑀁 𑀯𑀸…𑀧𑁂… 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀤𑀺𑀝𑁆𑀞𑀺𑀕𑀢𑀯𑀺𑀧𑁆𑀧𑀬𑀼𑀢𑁆𑀢𑀁 𑀲𑀲𑀗𑁆𑀔𑀸𑀭𑁂𑀦 𑀭𑀽𑀧𑀸𑀭𑀫𑁆𑀫𑀡𑀁 𑀯𑀸 𑀲𑀤𑁆𑀤𑀸𑀭𑀫𑁆𑀫𑀡𑀁 𑀯𑀸 𑀕𑀦𑁆𑀥𑀸𑀭𑀫𑁆𑀫𑀡𑀁 𑀯𑀸 𑀭𑀲𑀸𑀭𑀫𑁆𑀫𑀡𑀁 𑀯𑀸 𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑀁 𑀯𑀸 𑀥𑀫𑁆𑀫𑀸𑀭𑀫𑁆𑀫𑀡𑀁 𑀯𑀸 𑀬𑀁 𑀬𑀁 𑀯𑀸 𑀧𑀦𑀸𑀭𑀩𑁆𑀪, 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑁄, 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀁, 𑀦𑀸𑀫𑀧𑀘𑁆𑀘𑀬𑀸 𑀙𑀝𑁆𑀞𑀸𑀬𑀢𑀦𑀁, 𑀙𑀝𑁆𑀞𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄, 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸, 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸, 𑀢𑀡𑁆𑀳𑀸𑀧𑀘𑁆𑀘𑀬𑀸 𑀅𑀥𑀺𑀫𑁄𑀓𑁆𑀔𑁄, 𑀅𑀥𑀺𑀫𑁄𑀓𑁆𑀔𑀧𑀘𑁆𑀘𑀬𑀸 𑀪𑀯𑁄, 𑀪𑀯𑀧𑀘𑁆𑀘𑀬𑀸 𑀚𑀸𑀢𑀺, 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀁. 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀺.

𑁨𑁮𑁧. 𑀢𑀢𑁆𑀣 𑀓𑀢𑀫𑀸 𑀅𑀯𑀺𑀚𑁆𑀚𑀸? 𑀬𑀁 𑀅𑀜𑁆𑀜𑀸𑀡𑀁 𑀅𑀤𑀲𑁆𑀲𑀦𑀁…𑀧𑁂… 𑀅𑀯𑀺𑀚𑁆𑀚𑀸𑀮𑀗𑁆𑀕𑀻 𑀫𑁄𑀳𑁄 𑀅𑀓𑀼𑀲𑀮𑀫𑀽𑀮𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀅𑀯𑀺𑀚𑁆𑀚𑀸’’.

𑀢𑀢𑁆𑀣 𑀓𑀢𑀫𑁄 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑁄? 𑀬𑀸 𑀘𑁂𑀢𑀦𑀸 𑀲𑀜𑁆𑀘𑁂𑀢𑀦𑀸 𑀲𑀜𑁆𑀘𑁂𑀢𑀬𑀺𑀢𑀢𑁆𑀢𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑁄…𑀧𑁂….

𑀢𑀢𑁆𑀣 𑀓𑀢𑀫𑁄 𑀢𑀡𑁆𑀳𑀸𑀧𑀘𑁆𑀘𑀬𑀸 𑀅𑀥𑀺𑀫𑁄𑀓𑁆𑀔𑁄? 𑀬𑁄 𑀘𑀺𑀢𑁆𑀢𑀲𑁆𑀲 𑀅𑀥𑀺𑀫𑁄𑀓𑁆𑀔𑁄 𑀅𑀥𑀺𑀫𑀼𑀘𑁆𑀘𑀦𑀸 𑀢𑀤𑀥𑀺𑀫𑀼𑀢𑁆𑀢𑀢𑀸 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀢𑀡𑁆𑀳𑀸𑀧𑀘𑁆𑀘𑀬𑀸 𑀅𑀥𑀺𑀫𑁄𑀓𑁆𑀔𑁄’’.

𑀢𑀢𑁆𑀣 𑀓𑀢𑀫𑁄 𑀅𑀥𑀺𑀫𑁄𑀓𑁆𑀔𑀧𑀘𑁆𑀘𑀬𑀸 𑀪𑀯𑁄? 𑀞𑀧𑁂𑀢𑁆𑀯𑀸 𑀅𑀥𑀺𑀫𑁄𑀓𑁆𑀔𑀁, 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀅𑀥𑀺𑀫𑁄𑀓𑁆𑀔𑀧𑀘𑁆𑀘𑀬𑀸 𑀪𑀯𑁄’’…𑀧𑁂… 𑀢𑁂𑀦 𑀯𑀼𑀘𑁆𑀘𑀢𑀺 ‘‘𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀻’’𑀢𑀺.

𑁨𑁮𑁨. 𑀓𑀢𑀫𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸? 𑀬𑀲𑁆𑀫𑀺𑀁 𑀲𑀫𑀬𑁂 𑀅𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀤𑀺𑀝𑁆𑀞𑀺𑀕𑀢𑀲𑀫𑁆𑀧𑀬𑀼𑀢𑁆𑀢𑀁 𑀭𑀽𑀧𑀸𑀭𑀫𑁆𑀫𑀡𑀁 𑀯𑀸 𑀲𑀤𑁆𑀤𑀸𑀭𑀫𑁆𑀫𑀡𑀁 𑀯𑀸 𑀕𑀦𑁆𑀥𑀸𑀭𑀫𑁆𑀫𑀡𑀁 𑀯𑀸 𑀭𑀲𑀸𑀭𑀫𑁆𑀫𑀡𑀁 𑀯𑀸 𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑀁 𑀯𑀸 𑀥𑀫𑁆𑀫𑀸𑀭𑀫𑁆𑀫𑀡𑀁 𑀯𑀸 𑀬𑀁 𑀬𑀁 𑀯𑀸 𑀧𑀦𑀸𑀭𑀩𑁆𑀪, 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑁄, 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀁, 𑀦𑀸𑀫𑀧𑀘𑁆𑀘𑀬𑀸 𑀙𑀝𑁆𑀞𑀸𑀬𑀢𑀦𑀁, 𑀙𑀝𑁆𑀞𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄, 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸, 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸, 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦𑀁, 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄, 𑀪𑀯𑀧𑀘𑁆𑀘𑀬𑀸 𑀚𑀸𑀢𑀺, 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀁. 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀺.

𑁨𑁮𑁩. 𑀢𑀢𑁆𑀣 𑀓𑀢𑀫𑀸 𑀅𑀯𑀺𑀚𑁆𑀚𑀸? 𑀬𑀁 𑀅𑀜𑁆𑀜𑀸𑀡𑀁 𑀅𑀤𑀲𑁆𑀲𑀦𑀁…𑀧𑁂… 𑀅𑀯𑀺𑀚𑁆𑀚𑀸𑀮𑀗𑁆𑀕𑀻 𑀫𑁄𑀳𑁄 𑀅𑀓𑀼𑀲𑀮𑀫𑀽𑀮𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀅𑀯𑀺𑀚𑁆𑀚𑀸…𑀧𑁂….

𑀢𑀢𑁆𑀣 𑀓𑀢𑀫𑀸 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸? 𑀬𑀁 𑀘𑁂𑀢𑀲𑀺𑀓𑀁 𑀦𑁂𑀯 𑀲𑀸𑀢𑀁 𑀦𑀸𑀲𑀸𑀢𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀁 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀬𑀺𑀢𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸’’…𑀧𑁂… 𑀢𑁂𑀦 𑀯𑀼𑀘𑁆𑀘𑀢𑀺 ‘‘𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀻’’𑀢𑀺.

𑁨𑁮𑁪. 𑀓𑀢𑀫𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸? 𑀬𑀲𑁆𑀫𑀺𑀁 𑀲𑀫𑀬𑁂 𑀅𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀤𑀺𑀝𑁆𑀞𑀺𑀕𑀢𑀲𑀫𑁆𑀧𑀬𑀼𑀢𑁆𑀢𑀁 𑀲𑀲𑀗𑁆𑀔𑀸𑀭𑁂𑀦…𑀧𑁂… 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀤𑀺𑀝𑁆𑀞𑀺𑀕𑀢𑀯𑀺𑀧𑁆𑀧𑀬𑀼𑀢𑁆𑀢𑀁 𑀭𑀽𑀧𑀸𑀭𑀫𑁆𑀫𑀡𑀁 𑀯𑀸…𑀧𑁂… 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀤𑀺𑀝𑁆𑀞𑀺𑀕𑀢𑀯𑀺𑀧𑁆𑀧𑀬𑀼𑀢𑁆𑀢𑀁 𑀲𑀲𑀗𑁆𑀔𑀸𑀭𑁂𑀦 𑀭𑀽𑀧𑀸𑀭𑀫𑁆𑀫𑀡𑀁 𑀯𑀸 𑀲𑀤𑁆𑀤𑀸𑀭𑀫𑁆𑀫𑀡𑀁 𑀯𑀸 𑀕𑀦𑁆𑀥𑀸𑀭𑀫𑁆𑀫𑀡𑀁 𑀯𑀸 𑀭𑀲𑀸𑀭𑀫𑁆𑀫𑀡𑀁 𑀯𑀸 𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑀁 𑀯𑀸 𑀥𑀫𑁆𑀫𑀸𑀭𑀫𑁆𑀫𑀡𑀁 𑀯𑀸 𑀬𑀁 𑀬𑀁 𑀯𑀸 𑀧𑀦𑀸𑀭𑀩𑁆𑀪, 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑁄, 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀁, 𑀦𑀸𑀫𑀧𑀘𑁆𑀘𑀬𑀸 𑀙𑀝𑁆𑀞𑀸𑀬𑀢𑀦𑀁, 𑀙𑀝𑁆𑀞𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄, 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸, 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸, 𑀢𑀡𑁆𑀳𑀸𑀧𑀘𑁆𑀘𑀬𑀸 𑀅𑀥𑀺𑀫𑁄𑀓𑁆𑀔𑁄, 𑀅𑀥𑀺𑀫𑁄𑀓𑁆𑀔𑀧𑀘𑁆𑀘𑀬𑀸 𑀪𑀯𑁄, 𑀪𑀯𑀧𑀘𑁆𑀘𑀬𑀸 𑀚𑀸𑀢𑀺, 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀁. 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀺.

𑁨𑁮𑁫. 𑀢𑀢𑁆𑀣 𑀓𑀢𑀫𑀸 𑀅𑀯𑀺𑀚𑁆𑀚𑀸…𑀧𑁂… 𑀢𑁂𑀦 𑀯𑀼𑀘𑁆𑀘𑀢𑀺 ‘‘𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀻’’𑀢𑀺.

𑁨𑁮𑁬. 𑀓𑀢𑀫𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸? 𑀬𑀲𑁆𑀫𑀺𑀁 𑀲𑀫𑀬𑁂 𑀅𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺 𑀤𑁄𑀫𑀦𑀲𑁆𑀲𑀲𑀳𑀕𑀢𑀁 𑀧𑀝𑀺𑀖𑀲𑀫𑁆𑀧𑀬𑀼𑀢𑁆𑀢𑀁 𑀭𑀽𑀧𑀸𑀭𑀫𑁆𑀫𑀡𑀁 𑀯𑀸…𑀧𑁂… 𑀤𑁄𑀫𑀦𑀲𑁆𑀲𑀲𑀳𑀕𑀢𑀁 𑀧𑀝𑀺𑀖𑀲𑀫𑁆𑀧𑀬𑀼𑀢𑁆𑀢𑀁 𑀲𑀲𑀗𑁆𑀔𑀸𑀭𑁂𑀦 𑀭𑀽𑀧𑀸𑀭𑀫𑁆𑀫𑀡𑀁 𑀯𑀸 𑀲𑀤𑁆𑀤𑀸𑀭𑀫𑁆𑀫𑀡𑀁 𑀯𑀸 𑀕𑀦𑁆𑀥𑀸𑀭𑀫𑁆𑀫𑀡𑀁 𑀯𑀸 𑀭𑀲𑀸𑀭𑀫𑁆𑀫𑀡𑀁 𑀯𑀸 𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑀁 𑀯𑀸 𑀥𑀫𑁆𑀫𑀸𑀭𑀫𑁆𑀫𑀡𑀁 𑀯𑀸 𑀬𑀁 𑀬𑀁 𑀯𑀸 𑀧𑀦𑀸𑀭𑀩𑁆𑀪, 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑁄, 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀁, 𑀦𑀸𑀫𑀧𑀘𑁆𑀘𑀬𑀸 𑀙𑀝𑁆𑀞𑀸𑀬𑀢𑀦𑀁, 𑀙𑀝𑁆𑀞𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄, 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸, 𑀯𑁂𑀤𑀦𑀸𑀧𑀘𑁆𑀘𑀬𑀸 𑀧𑀝𑀺𑀖𑀁, 𑀧𑀝𑀺𑀖𑀧𑀘𑁆𑀘𑀬𑀸 𑀅𑀥𑀺𑀫𑁄𑀓𑁆𑀔𑁄, 𑀅𑀥𑀺𑀫𑁄𑀓𑁆𑀔𑀧𑀘𑁆𑀘𑀬𑀸 𑀪𑀯𑁄, 𑀪𑀯𑀧𑀘𑁆𑀘𑀬𑀸 𑀚𑀸𑀢𑀺, 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀁. 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀺.

𑁨𑁮𑁭. 𑀢𑀢𑁆𑀣 𑀓𑀢𑀫𑀸 𑀅𑀯𑀺𑀚𑁆𑀚𑀸? 𑀬𑀁 𑀅𑀜𑁆𑀜𑀸𑀡𑀁 𑀅𑀤𑀲𑁆𑀲𑀦𑀁…𑀧𑁂… 𑀅𑀯𑀺𑀚𑁆𑀚𑀸𑀮𑀗𑁆𑀕𑀻 𑀫𑁄𑀳𑁄 𑀅𑀓𑀼𑀲𑀮𑀫𑀽𑀮𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀅𑀯𑀺𑀚𑁆𑀚𑀸’’…𑀧𑁂… 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀙𑀝𑁆𑀞𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄’’.

𑀢𑀢𑁆𑀣 𑀓𑀢𑀫𑀸 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸? 𑀬𑀁 𑀘𑁂𑀢𑀲𑀺𑀓𑀁 𑀅𑀲𑀸𑀢𑀁 𑀘𑁂𑀢𑀲𑀺𑀓𑀁 𑀤𑀼𑀓𑁆𑀔𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀁 𑀅𑀲𑀸𑀢𑀁 𑀤𑀼𑀓𑁆𑀔𑀁 𑀯𑁂𑀤𑀬𑀺𑀢𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀸 𑀅𑀲𑀸𑀢𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸’’.

𑀢𑀢𑁆𑀣 𑀓𑀢𑀫𑀁 𑀯𑁂𑀤𑀦𑀸𑀧𑀘𑁆𑀘𑀬𑀸 𑀧𑀝𑀺𑀖𑀁? 𑀬𑁄 𑀘𑀺𑀢𑁆𑀢𑀲𑁆𑀲 𑀆𑀖𑀸𑀢𑁄…𑀧𑁂… 𑀘𑀡𑁆𑀟𑀺𑀓𑁆𑀓𑀁 𑀅𑀲𑀼𑀭𑁄𑀧𑁄 [𑀅𑀲𑀼𑀮𑁄𑀧𑁄 (𑀲𑁆𑀬𑀸.)] 𑀅𑀦𑀢𑁆𑀢𑀫𑀦𑀢𑀸 𑀘𑀺𑀢𑁆𑀢𑀲𑁆𑀲 𑁋 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀯𑁂𑀤𑀦𑀸𑀧𑀘𑁆𑀘𑀬𑀸 𑀧𑀝𑀺𑀖𑀁’’.

𑀢𑀢𑁆𑀣 𑀓𑀢𑀫𑁄 𑀧𑀝𑀺𑀖𑀧𑀘𑁆𑀘𑀬𑀸 𑀅𑀥𑀺𑀫𑁄𑀓𑁆𑀔𑁄? 𑀬𑁄 𑀘𑀺𑀢𑁆𑀢𑀲𑁆𑀲 𑀅𑀥𑀺𑀫𑁄𑀓𑁆𑀔𑁄 𑀅𑀥𑀺𑀫𑀼𑀘𑁆𑀘𑀦𑀸 𑀢𑀤𑀥𑀺𑀫𑀼𑀢𑁆𑀢𑀢𑀸 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀧𑀝𑀺𑀖𑀧𑀘𑁆𑀘𑀬𑀸 𑀅𑀥𑀺𑀫𑁄𑀓𑁆𑀔𑁄’’.

𑀢𑀢𑁆𑀣 𑀓𑀢𑀫𑁄 𑀅𑀥𑀺𑀫𑁄𑀓𑁆𑀔𑀧𑀘𑁆𑀘𑀬𑀸 𑀪𑀯𑁄? 𑀞𑀧𑁂𑀢𑁆𑀯𑀸 𑀅𑀥𑀺𑀫𑁄𑀓𑁆𑀔𑀁, 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀅𑀥𑀺𑀫𑁄𑀓𑁆𑀔𑀧𑀘𑁆𑀘𑀬𑀸 𑀪𑀯𑁄’’…𑀧𑁂… 𑀢𑁂𑀦 𑀯𑀼𑀘𑁆𑀘𑀢𑀺 ‘‘𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀻’’𑀢𑀺.

𑁨𑁮𑁮. 𑀓𑀢𑀫𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸? 𑀬𑀲𑁆𑀫𑀺𑀁 𑀲𑀫𑀬𑁂 𑀅𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀯𑀺𑀘𑀺𑀓𑀺𑀘𑁆𑀙𑀸𑀲𑀫𑁆𑀧𑀬𑀼𑀢𑁆𑀢𑀁 𑀭𑀽𑀧𑀸𑀭𑀫𑁆𑀫𑀡𑀁 𑀯𑀸 𑀲𑀤𑁆𑀤𑀸𑀭𑀫𑁆𑀫𑀡𑀁 𑀯𑀸 𑀕𑀦𑁆𑀥𑀸𑀭𑀫𑁆𑀫𑀡𑀁 𑀯𑀸 𑀭𑀲𑀸𑀭𑀫𑁆𑀫𑀡𑀁 𑀯𑀸 𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑀁 𑀯𑀸 𑀥𑀫𑁆𑀫𑀸𑀭𑀫𑁆𑀫𑀡𑀁 𑀯𑀸 𑀬𑀁 𑀬𑀁 𑀯𑀸 𑀧𑀦𑀸𑀭𑀩𑁆𑀪, 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑁄, 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀁, 𑀦𑀸𑀫𑀧𑀘𑁆𑀘𑀬𑀸 𑀙𑀝𑁆𑀞𑀸𑀬𑀢𑀦𑀁, 𑀙𑀝𑁆𑀞𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄, 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸, 𑀯𑁂𑀤𑀦𑀸𑀧𑀘𑁆𑀘𑀬𑀸 𑀯𑀺𑀘𑀺𑀓𑀺𑀘𑁆𑀙𑀸, 𑀯𑀺𑀘𑀺𑀓𑀺𑀘𑁆𑀙𑀸𑀧𑀘𑁆𑀘𑀬𑀸 𑀪𑀯𑁄, 𑀪𑀯𑀧𑀘𑁆𑀘𑀬𑀸 𑀚𑀸𑀢𑀺, 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀁. 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀺.

𑁨𑁮𑁯. 𑀢𑀢𑁆𑀣 𑀓𑀢𑀫𑀸 𑀅𑀯𑀺𑀚𑁆𑀚𑀸? 𑀬𑀁 𑀅𑀜𑁆𑀜𑀸𑀡𑀁 𑀅𑀤𑀲𑁆𑀲𑀦𑀁…𑀧𑁂… 𑀅𑀯𑀺𑀚𑁆𑀚𑀸𑀮𑀗𑁆𑀕𑀻 𑀫𑁄𑀳𑁄 𑀅𑀓𑀼𑀲𑀮𑀫𑀽𑀮𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀅𑀯𑀺𑀚𑁆𑀚𑀸’’…𑀧𑁂… 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀙𑀝𑁆𑀞𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄’’.

𑀢𑀢𑁆𑀣 𑀓𑀢𑀫𑀸 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸? 𑀬𑀁 𑀘𑁂𑀢𑀲𑀺𑀓𑀁 𑀦𑁂𑀯 𑀲𑀸𑀢𑀁 𑀦𑀸𑀲𑀸𑀢𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀁 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀬𑀺𑀢𑀁, 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸’’.

𑀢𑀢𑁆𑀣 𑀓𑀢𑀫𑀸 𑀯𑁂𑀤𑀦𑀸𑀧𑀘𑁆𑀘𑀬𑀸 𑀯𑀺𑀘𑀺𑀓𑀺𑀘𑁆𑀙𑀸? 𑀬𑀸 𑀓𑀗𑁆𑀔𑀸 𑀓𑀗𑁆𑀔𑀸𑀬𑀦𑀸 𑀓𑀗𑁆𑀔𑀸𑀬𑀺𑀢𑀢𑁆𑀢𑀁 𑀯𑀺𑀫𑀢𑀺 𑀯𑀺𑀘𑀺𑀓𑀺𑀘𑁆𑀙𑀸 𑀤𑁆𑀯𑁂𑀴𑁆𑀳𑀓𑀁 𑀤𑁆𑀯𑀺𑀥𑀸𑀧𑀣𑁄 [𑀤𑁆𑀯𑁂𑀥𑀸𑀧𑀣𑁄 (𑀲𑀻. 𑀲𑁆𑀬𑀸.)] 𑀲𑀁𑀲𑀬𑁄 𑀅𑀦𑁂𑀓𑀁𑀲𑀕𑁆𑀕𑀸𑀳𑁄 𑀆𑀲𑀧𑁆𑀧𑀦𑀸 𑀧𑀭𑀺𑀲𑀧𑁆𑀧𑀦𑀸 𑀅𑀧𑀭𑀺𑀬𑁄𑀕𑀸𑀳𑀡𑀸 [𑀅𑀧𑀭𑀺𑀬𑁄𑀕𑀸𑀳𑀦𑀸 (𑀲𑀻. 𑀲𑁆𑀬𑀸. 𑀓.)] 𑀙𑀫𑁆𑀪𑀺𑀢𑀢𑁆𑀢𑀁 𑀘𑀺𑀢𑁆𑀢𑀲𑁆𑀲 𑀫𑀦𑁄𑀯𑀺𑀮𑁂𑀔𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀯𑁂𑀤𑀦𑀸𑀧𑀘𑁆𑀘𑀬𑀸 𑀯𑀺𑀘𑀺𑀓𑀺𑀘𑁆𑀙𑀸’’.

𑀢𑀢𑁆𑀣 𑀓𑀢𑀫𑁄 𑀯𑀺𑀘𑀺𑀓𑀺𑀘𑁆𑀙𑀸𑀧𑀘𑁆𑀘𑀬𑀸 𑀪𑀯𑁄? 𑀞𑀧𑁂𑀢𑁆𑀯𑀸 𑀯𑀺𑀘𑀺𑀓𑀺𑀘𑁆𑀙𑀁, 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀯𑀺𑀘𑀺𑀓𑀺𑀘𑁆𑀙𑀸𑀧𑀘𑁆𑀘𑀬𑀸 𑀪𑀯𑁄’’…𑀧𑁂… 𑀢𑁂𑀦 𑀯𑀼𑀘𑁆𑀘𑀢𑀺 ‘‘𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀻’’𑀢𑀺.

𑁨𑁯𑁦. 𑀓𑀢𑀫𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸? 𑀬𑀲𑁆𑀫𑀺𑀁 𑀲𑀫𑀬𑁂 𑀅𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀉𑀤𑁆𑀥𑀘𑁆𑀘𑀲𑀫𑁆𑀧𑀬𑀼𑀢𑁆𑀢𑀁 𑀭𑀽𑀧𑀸𑀭𑀫𑁆𑀫𑀡𑀁 𑀯𑀸 𑀲𑀤𑁆𑀤𑀸𑀭𑀫𑁆𑀫𑀡𑀁 𑀯𑀸 𑀕𑀦𑁆𑀥𑀸𑀭𑀫𑁆𑀫𑀡𑀁 𑀯𑀸 𑀭𑀲𑀸𑀭𑀫𑁆𑀫𑀡𑀁 𑀯𑀸 𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑀁 𑀯𑀸 𑀥𑀫𑁆𑀫𑀸𑀭𑀫𑁆𑀫𑀡𑀁 𑀯𑀸 𑀬𑀁 𑀬𑀁 𑀯𑀸 𑀧𑀦𑀸𑀭𑀩𑁆𑀪, 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑁄, 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀁, 𑀦𑀸𑀫𑀧𑀘𑁆𑀘𑀬𑀸 𑀙𑀝𑁆𑀞𑀸𑀬𑀢𑀦𑀁, 𑀙𑀝𑁆𑀞𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄, 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸, 𑀯𑁂𑀤𑀦𑀸𑀧𑀘𑁆𑀘𑀬𑀸 𑀉𑀤𑁆𑀥𑀘𑁆𑀘𑀁, 𑀉𑀤𑁆𑀥𑀘𑁆𑀘𑀧𑀘𑁆𑀘𑀬𑀸 𑀅𑀥𑀺𑀫𑁄𑀓𑁆𑀔𑁄, 𑀅𑀥𑀺𑀫𑁄𑀓𑁆𑀔𑀧𑀘𑁆𑀘𑀬𑀸 𑀪𑀯𑁄, 𑀪𑀯𑀧𑀘𑁆𑀘𑀬𑀸 𑀚𑀸𑀢𑀺, 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀁. 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀺.

𑁨𑁯𑁧. 𑀢𑀢𑁆𑀣 𑀓𑀢𑀫𑀸 𑀅𑀯𑀺𑀚𑁆𑀚𑀸? 𑀬𑀁 𑀅𑀜𑁆𑀜𑀸𑀡𑀁 𑀅𑀤𑀲𑁆𑀲𑀦𑀁…𑀧𑁂… 𑀅𑀯𑀺𑀚𑁆𑀚𑀸𑀮𑀗𑁆𑀕𑀻 𑀫𑁄𑀳𑁄 𑀅𑀓𑀼𑀲𑀮𑀫𑀽𑀮𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀅𑀯𑀺𑀚𑁆𑀚𑀸’’…𑀧𑁂… 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀙𑀝𑁆𑀞𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄’’.

𑀢𑀢𑁆𑀣 𑀓𑀢𑀫𑀸 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸? 𑀬𑀁 𑀘𑁂𑀢𑀲𑀺𑀓𑀁 𑀦𑁂𑀯 𑀲𑀸𑀢𑀁 𑀦𑀸𑀲𑀸𑀢𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀁 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀬𑀺𑀢𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸’’.

𑀢𑀢𑁆𑀣 𑀓𑀢𑀫𑀁 𑀯𑁂𑀤𑀦𑀸𑀧𑀘𑁆𑀘𑀬𑀸 𑀉𑀤𑁆𑀥𑀘𑁆𑀘𑀁? 𑀬𑀁 𑀘𑀺𑀢𑁆𑀢𑀲𑁆𑀲 𑀉𑀤𑁆𑀥𑀘𑁆𑀘𑀁 𑀅𑀯𑀽𑀧𑀲𑀫𑁄 𑀘𑁂𑀢𑀲𑁄 𑀯𑀺𑀓𑁆𑀔𑁂𑀧𑁄 𑀪𑀦𑁆𑀢𑀢𑁆𑀢𑀁 𑀘𑀺𑀢𑁆𑀢𑀲𑁆𑀲 𑁋 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀯𑁂𑀤𑀦𑀸𑀧𑀘𑁆𑀘𑀬𑀸 𑀉𑀤𑁆𑀥𑀘𑁆𑀘𑀁’’.

𑀢𑀢𑁆𑀣 𑀓𑀢𑀫𑁄 𑀉𑀤𑁆𑀥𑀘𑁆𑀘𑀧𑀘𑁆𑀘𑀬𑀸 𑀅𑀥𑀺𑀫𑁄𑀓𑁆𑀔𑁄? 𑀬𑁄 𑀘𑀺𑀢𑁆𑀢𑀲𑁆𑀲 𑀅𑀥𑀺𑀫𑁄𑀓𑁆𑀔𑁄 𑀅𑀥𑀺𑀫𑀼𑀘𑁆𑀘𑀦𑀸 𑀢𑀤𑀥𑀺𑀫𑀼𑀢𑁆𑀢𑀢𑀸 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀉𑀤𑁆𑀥𑀘𑁆𑀘𑀧𑀘𑁆𑀘𑀬𑀸 𑀅𑀥𑀺𑀫𑁄𑀓𑁆𑀔𑁄’’.

𑀢𑀢𑁆𑀣 𑀓𑀢𑀫𑁄 𑀅𑀥𑀺𑀫𑁄𑀓𑁆𑀔𑀧𑀘𑁆𑀘𑀬𑀸 𑀪𑀯𑁄? 𑀞𑀧𑁂𑀢𑁆𑀯𑀸 𑀅𑀥𑀺𑀫𑁄𑀓𑁆𑀔𑀁, 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀅𑀥𑀺𑀫𑁄𑀓𑁆𑀔𑀧𑀘𑁆𑀘𑀬𑀸 𑀪𑀯𑁄’’…𑀧𑁂… 𑀢𑁂𑀦 𑀯𑀼𑀘𑁆𑀘𑀢𑀺 ‘‘𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀻’’𑀢𑀺.

𑀅𑀓𑀼𑀲𑀮𑀦𑀺𑀤𑁆𑀤𑁂𑀲𑁄.