𑁧. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀁

𑁨𑁧𑁯. 𑀩𑀸𑀯𑀻𑀲𑀢𑀺𑀦𑁆𑀤𑁆𑀭𑀺𑀬𑀸𑀦𑀺 𑁋 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀲𑁄𑀢𑀺𑀦𑁆𑀤𑁆𑀭𑀺𑀬𑀁, 𑀖𑀸𑀦𑀺𑀦𑁆𑀤𑁆𑀭𑀺𑀬𑀁, 𑀚𑀺𑀯𑁆𑀳𑀺𑀦𑁆𑀤𑁆𑀭𑀺𑀬𑀁, 𑀓𑀸𑀬𑀺𑀦𑁆𑀤𑁆𑀭𑀺𑀬𑀁, 𑀫𑀦𑀺𑀦𑁆𑀤𑁆𑀭𑀺𑀬𑀁, 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁, 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁, 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁, 𑀲𑀼𑀔𑀺𑀦𑁆𑀤𑁆𑀭𑀺𑀬𑀁, 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁, 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁, 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁, 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀁, 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁, 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 [𑀯𑀺𑀭𑀺𑀬𑀺𑀦𑁆𑀤𑁆𑀭𑀺𑀬𑀁 (𑀲𑀻. 𑀲𑁆𑀬𑀸.)], 𑀲𑀢𑀺𑀦𑁆𑀤𑁆𑀭𑀺𑀬𑀁, 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁, 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁, 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁, 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁, 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁.

𑁨𑁨𑁦. 𑀢𑀢𑁆𑀣 𑀓𑀢𑀫𑀁 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁? 𑀬𑀁 𑀘𑀓𑁆𑀔𑀼 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀧𑀲𑀸𑀤𑁄…𑀧𑁂… 𑀲𑀼𑀜𑁆𑀜𑁄 𑀕𑀸𑀫𑁄𑀧𑁂𑀲𑁄 𑁋 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁’’.

𑀢𑀢𑁆𑀣 𑀓𑀢𑀫𑀁 𑀲𑁄𑀢𑀺𑀦𑁆𑀤𑁆𑀭𑀺𑀬𑀁…𑀧𑁂… 𑀖𑀸𑀦𑀺𑀦𑁆𑀤𑁆𑀭𑀺𑀬𑀁…𑀧𑁂… 𑀚𑀺𑀯𑁆𑀳𑀺𑀦𑁆𑀤𑁆𑀭𑀺𑀬𑀁…𑀧𑁂… 𑀓𑀸𑀬𑀺𑀦𑁆𑀤𑁆𑀭𑀺𑀬𑀁? 𑀬𑁄 𑀓𑀸𑀬𑁄 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀧𑀲𑀸𑀤𑁄…𑀧𑁂… 𑀲𑀼𑀜𑁆𑀜𑁄 𑀕𑀸𑀫𑁄𑀧𑁂𑀲𑁄 𑁋 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀓𑀸𑀬𑀺𑀦𑁆𑀤𑁆𑀭𑀺𑀬𑀁’’.

𑀢𑀢𑁆𑀣 𑀓𑀢𑀫𑀁 𑀫𑀦𑀺𑀦𑁆𑀤𑁆𑀭𑀺𑀬𑀁? 𑀏𑀓𑀯𑀺𑀥𑁂𑀦 𑀫𑀦𑀺𑀦𑁆𑀤𑁆𑀭𑀺𑀬𑀁 𑁋 𑀨𑀲𑁆𑀲𑀲𑀫𑁆𑀧𑀬𑀼𑀢𑁆𑀢𑀁. 𑀤𑀼𑀯𑀺𑀥𑁂𑀦 𑀫𑀦𑀺𑀦𑁆𑀤𑁆𑀭𑀺𑀬𑀁 𑁋 𑀅𑀢𑁆𑀣𑀺 𑀲𑀳𑁂𑀢𑀼𑀓𑀁, 𑀅𑀢𑁆𑀣𑀺 𑀅𑀳𑁂𑀢𑀼𑀓𑀁. 𑀢𑀺𑀯𑀺𑀥𑁂𑀦 𑀫𑀦𑀺𑀦𑁆𑀤𑁆𑀭𑀺𑀬𑀁 𑁋 𑀅𑀢𑁆𑀣𑀺 𑀓𑀼𑀲𑀮𑀁, 𑀅𑀢𑁆𑀣𑀺 𑀅𑀓𑀼𑀲𑀮𑀁, 𑀅𑀢𑁆𑀣𑀺 𑀅𑀩𑁆𑀬𑀸𑀓𑀢𑀁. 𑀘𑀢𑀼𑀩𑁆𑀩𑀺𑀥𑁂𑀦 𑀫𑀦𑀺𑀦𑁆𑀤𑁆𑀭𑀺𑀬𑀁 𑁋 𑀅𑀢𑁆𑀣𑀺 𑀓𑀸𑀫𑀸𑀯𑀘𑀭𑀁, 𑀅𑀢𑁆𑀣𑀺 𑀭𑀽𑀧𑀸𑀯𑀘𑀭𑀁, 𑀅𑀢𑁆𑀣𑀺 𑀅𑀭𑀽𑀧𑀸𑀯𑀘𑀭𑀁, 𑀅𑀢𑁆𑀣𑀺 𑀅𑀧𑀭𑀺𑀬𑀸𑀧𑀦𑁆𑀦𑀁. 𑀧𑀜𑁆𑀘𑀯𑀺𑀥𑁂𑀦 𑀫𑀦𑀺𑀦𑁆𑀤𑁆𑀭𑀺𑀬𑀁 𑁋 𑀅𑀢𑁆𑀣𑀺 𑀲𑀼𑀔𑀺𑀦𑁆𑀤𑁆𑀭𑀺𑀬𑀲𑀫𑁆𑀧𑀬𑀼𑀢𑁆𑀢𑀁, 𑀅𑀢𑁆𑀣𑀺 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀲𑀫𑁆𑀧𑀬𑀼𑀢𑁆𑀢𑀁, 𑀅𑀢𑁆𑀣𑀺 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀲𑀫𑁆𑀧𑀬𑀼𑀢𑁆𑀢𑀁, 𑀅𑀢𑁆𑀣𑀺 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀲𑀫𑁆𑀧𑀬𑀼𑀢𑁆𑀢𑀁, 𑀅𑀢𑁆𑀣𑀺 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀲𑀫𑁆𑀧𑀬𑀼𑀢𑁆𑀢𑀁. 𑀙𑀩𑁆𑀩𑀺𑀥𑁂𑀦 𑀫𑀦𑀺𑀦𑁆𑀤𑁆𑀭𑀺𑀬𑀁 𑁋 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁…𑀧𑁂… 𑀫𑀦𑁄𑀯𑀺𑀜𑁆𑀜𑀸𑀡𑀁. 𑀏𑀯𑀁 𑀙𑀩𑁆𑀩𑀺𑀥𑁂𑀦 𑀫𑀦𑀺𑀦𑁆𑀤𑁆𑀭𑀺𑀬𑀁.

𑀲𑀢𑁆𑀢𑀯𑀺𑀥𑁂𑀦 𑀫𑀦𑀺𑀦𑁆𑀤𑁆𑀭𑀺𑀬𑀁 𑁋 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁…𑀧𑁂… 𑀓𑀸𑀬𑀯𑀺𑀜𑁆𑀜𑀸𑀡𑀁, 𑀫𑀦𑁄𑀥𑀸𑀢𑀼, 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼. 𑀏𑀯𑀁 𑀲𑀢𑁆𑀢𑀯𑀺𑀥𑁂𑀦 𑀫𑀦𑀺𑀦𑁆𑀤𑁆𑀭𑀺𑀬𑀁.

𑀅𑀝𑁆𑀞𑀯𑀺𑀥𑁂𑀦 𑀫𑀦𑀺𑀦𑁆𑀤𑁆𑀭𑀺𑀬𑀁 𑁋 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁…𑀧𑁂… 𑀓𑀸𑀬𑀯𑀺𑀜𑁆𑀜𑀸𑀡𑀁 𑀅𑀢𑁆𑀣𑀺 𑀲𑀼𑀔𑀲𑀳𑀕𑀢𑀁, 𑀅𑀢𑁆𑀣𑀺 𑀤𑀼𑀓𑁆𑀔𑀲𑀳𑀕𑀢𑀁, 𑀫𑀦𑁄𑀥𑀸𑀢𑀼, 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼. 𑀏𑀯𑀁 𑀅𑀝𑁆𑀞𑀯𑀺𑀥𑁂𑀦 𑀫𑀦𑀺𑀦𑁆𑀤𑁆𑀭𑀺𑀬𑀁.

𑀦𑀯𑀯𑀺𑀥𑁂𑀦 𑀫𑀦𑀺𑀦𑁆𑀤𑁆𑀭𑀺𑀬𑀁 𑁋 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁…𑀧𑁂… 𑀓𑀸𑀬𑀯𑀺𑀜𑁆𑀜𑀸𑀡𑀁, 𑀫𑀦𑁄𑀥𑀸𑀢𑀼, 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀅𑀢𑁆𑀣𑀺 𑀓𑀼𑀲𑀮𑀸, 𑀅𑀢𑁆𑀣𑀺 𑀅𑀓𑀼𑀲𑀮𑀸, 𑀅𑀢𑁆𑀣𑀺 𑀅𑀩𑁆𑀬𑀸𑀓𑀢𑀸. 𑀏𑀯𑀁 𑀦𑀯𑀯𑀺𑀥𑁂𑀦 𑀫𑀦𑀺𑀦𑁆𑀤𑁆𑀭𑀺𑀬𑀁.

𑀤𑀲𑀯𑀺𑀥𑁂𑀦 𑀫𑀦𑀺𑀦𑁆𑀤𑁆𑀭𑀺𑀬𑀁 𑁋 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁…𑀧𑁂… 𑀓𑀸𑀬𑀯𑀺𑀜𑁆𑀜𑀸𑀡𑀁 𑀅𑀢𑁆𑀣𑀺 𑀲𑀼𑀔𑀲𑀳𑀕𑀢𑀁, 𑀅𑀢𑁆𑀣𑀺 𑀤𑀼𑀓𑁆𑀔𑀲𑀳𑀕𑀢𑀁, 𑀫𑀦𑁄𑀥𑀸𑀢𑀼, 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀅𑀢𑁆𑀣𑀺 𑀓𑀼𑀲𑀮𑀸, 𑀅𑀢𑁆𑀣𑀺 𑀅𑀓𑀼𑀲𑀮𑀸, 𑀅𑀢𑁆𑀣𑀺 𑀅𑀩𑁆𑀬𑀸𑀓𑀢𑀸. 𑀏𑀯𑀁 𑀤𑀲𑀯𑀺𑀥𑁂𑀦 𑀫𑀦𑀺𑀦𑁆𑀤𑁆𑀭𑀺𑀬𑀁…𑀧𑁂… 𑀏𑀯𑀁 𑀩𑀳𑀼𑀯𑀺𑀥𑁂𑀦 𑀫𑀦𑀺𑀦𑁆𑀤𑁆𑀭𑀺𑀬𑀁. 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀫𑀦𑀺𑀦𑁆𑀤𑁆𑀭𑀺𑀬𑀁’’.

𑀢𑀢𑁆𑀣 𑀓𑀢𑀫𑀁 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁? 𑀬𑀁 𑀇𑀢𑁆𑀣𑀺𑀬𑀸 𑀇𑀢𑁆𑀣𑀺𑀮𑀺𑀗𑁆𑀕𑀁 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀁 𑀇𑀢𑁆𑀣𑀺𑀓𑀼𑀢𑁆𑀢𑀁 𑀇𑀢𑁆𑀣𑀸𑀓𑀧𑁆𑀧𑁄 𑀇𑀢𑁆𑀣𑀢𑁆𑀢𑀁 𑀇𑀢𑁆𑀣𑀺𑀪𑀸𑀯𑁄 𑁋 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁’’.

𑀢𑀢𑁆𑀣 𑀓𑀢𑀫𑀁 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁? 𑀬𑀁 𑀧𑀼𑀭𑀺𑀲𑀲𑁆𑀲 𑀧𑀼𑀭𑀺𑀲𑀮𑀺𑀗𑁆𑀕𑀁 𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑀁 𑀧𑀼𑀭𑀺𑀲𑀓𑀼𑀢𑁆𑀢𑀁 𑀧𑀼𑀭𑀺𑀲𑀸𑀓𑀧𑁆𑀧𑁄 𑀧𑀼𑀭𑀺𑀲𑀢𑁆𑀢𑀁 𑀧𑀼𑀭𑀺𑀲𑀪𑀸𑀯𑁄 𑁋 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁’’.

𑀢𑀢𑁆𑀣 𑀓𑀢𑀫𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁? 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀤𑀼𑀯𑀺𑀥𑁂𑀦 𑁋 𑀅𑀢𑁆𑀣𑀺 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁, 𑀅𑀢𑁆𑀣𑀺 𑀅𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁.

𑀢𑀢𑁆𑀣 𑀓𑀢𑀫𑀁 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁? 𑀬𑁄 𑀢𑁂𑀲𑀁 𑀭𑀽𑀧𑀻𑀦𑀁 𑀥𑀫𑁆𑀫𑀸𑀦𑀁 𑀆𑀬𑀼 𑀞𑀺𑀢𑀺 𑀬𑀧𑀦𑀸 𑀬𑀸𑀧𑀦𑀸 𑀇𑀭𑀺𑀬𑀦𑀸 𑀯𑀢𑁆𑀢𑀦𑀸 𑀧𑀸𑀮𑀦𑀸 𑀚𑀻𑀯𑀺𑀢𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁’’.

𑀢𑀢𑁆𑀣 𑀓𑀢𑀫𑀁 𑀅𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁? 𑀬𑁄 𑀢𑁂𑀲𑀁 𑀅𑀭𑀽𑀧𑀻𑀦𑀁 𑀥𑀫𑁆𑀫𑀸𑀦𑀁 𑀆𑀬𑀼 𑀞𑀺𑀢𑀺 𑀬𑀧𑀦𑀸 𑀬𑀸𑀧𑀦𑀸 𑀇𑀭𑀺𑀬𑀦𑀸 𑀯𑀢𑁆𑀢𑀦𑀸 𑀧𑀸𑀮𑀦𑀸 𑀚𑀻𑀯𑀺𑀢𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀅𑀭𑀽𑀧𑀚𑀻𑀯𑀢𑀺𑀦𑁆𑀤𑁆𑀭𑀺𑀬𑀁’’. 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁’’.

𑀢𑀢𑁆𑀣 𑀓𑀢𑀫𑀁 𑀲𑀼𑀔𑀺𑀦𑁆𑀤𑁆𑀭𑀺𑀬𑀁? 𑀬𑀁 𑀓𑀸𑀬𑀺𑀓𑀁 𑀲𑀸𑀢𑀁 𑀓𑀸𑀬𑀺𑀓𑀁 𑀲𑀼𑀔𑀁 𑀓𑀸𑀬𑀲𑀫𑁆𑀨𑀲𑁆𑀲𑀚𑀁 𑀲𑀸𑀢𑀁 𑀲𑀼𑀔𑀁 𑀯𑁂𑀤𑀬𑀺𑀢𑀁 𑀓𑀸𑀬𑀲𑀫𑁆𑀨𑀲𑁆𑀲𑀚𑀸 𑀲𑀸𑀢𑀸 𑀲𑀼𑀔𑀸 𑀯𑁂𑀤𑀦𑀸 𑁋 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀲𑀼𑀔𑀺𑀦𑁆𑀤𑁆𑀭𑀺𑀬𑀁’’.

𑀢𑀢𑁆𑀣 𑀓𑀢𑀫𑀁 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁? 𑀬𑀁 𑀓𑀸𑀬𑀺𑀓𑀁 𑀅𑀲𑀸𑀢𑀁 𑀓𑀸𑀬𑀺𑀓𑀁 𑀤𑀼𑀓𑁆𑀔𑀁 𑀓𑀸𑀬𑀲𑀫𑁆𑀨𑀲𑁆𑀲𑀚𑀁 𑀅𑀲𑀸𑀢𑀁 𑀤𑀼𑀓𑁆𑀔𑀁 𑀯𑁂𑀤𑀬𑀺𑀢𑀁 𑀓𑀸𑀬𑀲𑀫𑁆𑀨𑀲𑁆𑀲𑀚𑀸 𑀅𑀲𑀸𑀢𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸 𑁋 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁’’.

𑀢𑀢𑁆𑀣 𑀓𑀢𑀫𑀁 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁? 𑀬𑀁 𑀘𑁂𑀢𑀲𑀺𑀓𑀁 𑀲𑀸𑀢𑀁 𑀘𑁂𑀢𑀲𑀺𑀓𑀁 𑀲𑀼𑀔𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀁 𑀲𑀸𑀢𑀁 𑀲𑀼𑀔𑀁 𑀯𑁂𑀤𑀬𑀺𑀢𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀸 𑀲𑀸𑀢𑀸 𑀲𑀼𑀔𑀸 𑀯𑁂𑀤𑀦𑀸 𑁋 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁’’.

𑀢𑀢𑁆𑀣 𑀓𑀢𑀫𑀁 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁? 𑀬𑀁 𑀘𑁂𑀢𑀲𑀺𑀓𑀁 𑀅𑀲𑀸𑀢𑀁 𑀘𑁂𑀢𑀲𑀺𑀓𑀁 𑀤𑀼𑀓𑁆𑀔𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀁 𑀅𑀲𑀸𑀢𑀁 𑀤𑀼𑀓𑁆𑀔𑀁 𑀯𑁂𑀤𑀬𑀺𑀢𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀸 𑀅𑀲𑀸𑀢𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸 𑁋 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁’’.

𑀢𑀢𑁆𑀣 𑀓𑀢𑀫𑀁 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀁? 𑀬𑀁 𑀘𑁂𑀢𑀲𑀺𑀓𑀁 𑀦𑁂𑀯 𑀲𑀸𑀢𑀁 𑀦𑀸𑀲𑀸𑀢𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀁 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀬𑀺𑀢𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑁋 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀁’’.

𑀢𑀢𑁆𑀣 𑀓𑀢𑀫𑀁 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁? 𑀬𑀸 𑀲𑀤𑁆𑀥𑀸 𑀲𑀤𑁆𑀤𑀳𑀦𑀸 𑀑𑀓𑀧𑁆𑀧𑀦𑀸 𑀅𑀪𑀺𑀧𑁆𑀧𑀲𑀸𑀤𑁄 𑀲𑀤𑁆𑀥𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀲𑀤𑁆𑀥𑀸𑀩𑀮𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁’’.

𑀢𑀢𑁆𑀣 𑀓𑀢𑀫𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁? 𑀬𑁄 𑀘𑁂𑀢𑀲𑀺𑀓𑁄 𑀯𑀻𑀭𑀺𑀬𑀸𑀭𑀫𑁆𑀪𑁄 𑀦𑀺𑀓𑁆𑀓𑀫𑁄 𑀧𑀭𑀓𑁆𑀓𑀫𑁄 𑀉𑀬𑁆𑀬𑀸𑀫𑁄 𑀯𑀸𑀬𑀸𑀫𑁄 𑀉𑀲𑁆𑀲𑀸𑀳𑁄 𑀉𑀲𑁆𑀲𑁄𑀴𑁆𑀳𑀻 𑀣𑀸𑀫𑁄 𑀞𑀺𑀢𑀺 𑀅𑀲𑀺𑀣𑀺𑀮𑀧𑀭𑀓𑁆𑀓𑀫𑀢𑀸 𑀅𑀦𑀺𑀓𑁆𑀔𑀺𑀢𑁆𑀢𑀙𑀦𑁆𑀤𑀢𑀸 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀢𑀸 𑀥𑀼𑀭𑀲𑀫𑁆𑀧𑀕𑁆𑀕𑀸𑀳𑁄 𑀯𑀻𑀭𑀺𑀬𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀯𑀻𑀭𑀺𑀬𑀩𑀮𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁’’.

𑀢𑀢𑁆𑀣 𑀓𑀢𑀫𑀁 𑀲𑀢𑀺𑀦𑁆𑀤𑁆𑀭𑀺𑀬𑀁? 𑀬𑀸 𑀲𑀢𑀺 𑀅𑀦𑀼𑀲𑁆𑀲𑀢𑀺 𑀧𑀝𑀺𑀲𑁆𑀲𑀢𑀺 𑀲𑀢𑀺 𑀲𑀭𑀡𑀢𑀸 𑀥𑀸𑀭𑀡𑀢𑀸 𑀅𑀧𑀺𑀮𑀸𑀧𑀦𑀢𑀸 𑀅𑀲𑀫𑁆𑀫𑀼𑀲𑁆𑀲𑀦𑀢𑀸 𑀲𑀢𑀺 𑀲𑀢𑀺𑀦𑁆𑀤𑁆𑀭𑀺𑀬𑀁 𑀲𑀢𑀺𑀩𑀮𑀁 𑀲𑀫𑁆𑀫𑀸𑀲𑀢𑀺 𑁋 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀲𑀢𑀺𑀦𑁆𑀤𑁆𑀭𑀺𑀬𑀁’’.

𑀢𑀢𑁆𑀣 𑀓𑀢𑀫𑀁 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁? 𑀬𑀸 𑀘𑀺𑀢𑁆𑀢𑀲𑁆𑀲 𑀞𑀺𑀢𑀺 𑀲𑀡𑁆𑀞𑀺𑀢𑀺 𑀅𑀯𑀝𑁆𑀞𑀺𑀢𑀺 𑀅𑀯𑀺𑀲𑀸𑀳𑀸𑀭𑁄 𑀅𑀯𑀺𑀓𑁆𑀔𑁂𑀧𑁄 𑀅𑀯𑀺𑀲𑀸𑀳𑀝𑀫𑀸𑀦𑀲𑀢𑀸 𑀲𑀫𑀣𑁄 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀲𑀫𑀸𑀥𑀺𑀩𑀮𑀁 𑀲𑀫𑁆𑀫𑀸𑀲𑀫𑀸𑀥𑀺 𑁋 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁’’.

𑀢𑀢𑁆𑀣 𑀓𑀢𑀫𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁? 𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸…𑀧𑁂… 𑀅𑀫𑁄𑀳𑁄 𑀥𑀫𑁆𑀫𑀯𑀺𑀘𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺 𑁋 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁’’.

𑀢𑀢𑁆𑀣 𑀓𑀢𑀫𑀁 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁? 𑀬𑀸 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀦𑀜𑁆𑀜𑀸𑀢𑀸𑀦𑀁 𑀅𑀤𑀺𑀝𑁆𑀞𑀸𑀦𑀁 𑀅𑀧𑁆𑀧𑀢𑁆𑀢𑀸𑀦𑀁 𑀅𑀯𑀺𑀤𑀺𑀢𑀸𑀦𑀁 𑀅𑀲𑀘𑁆𑀙𑀺𑀓𑀢𑀸𑀦𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀜𑁆𑀜𑀸 𑀧𑀚𑀸𑀦𑀦𑀸…𑀧𑁂… 𑀅𑀫𑁄𑀳𑁄 𑀥𑀫𑁆𑀫𑀯𑀺𑀘𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀫𑀕𑁆𑀕𑀗𑁆𑀕𑀁 𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁’’.

𑀢𑀢𑁆𑀣 𑀓𑀢𑀫𑀁 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁? 𑀬𑀸 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀜𑀸𑀢𑀸𑀦𑀁 𑀤𑀺𑀝𑁆𑀞𑀸𑀦𑀁 𑀧𑀢𑁆𑀢𑀸𑀦𑀁 𑀯𑀺𑀤𑀺𑀢𑀸𑀦𑀁 𑀲𑀘𑁆𑀙𑀺𑀓𑀢𑀸𑀦𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀜𑁆𑀜𑀸 𑀧𑀚𑀸𑀦𑀦𑀸…𑀧𑁂… 𑀅𑀫𑁄𑀳𑁄 𑀥𑀫𑁆𑀫𑀯𑀺𑀘𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀫𑀕𑁆𑀕𑀗𑁆𑀕𑀁 𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁.

𑀢𑀢𑁆𑀣 𑀓𑀢𑀫𑀁 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁? 𑀬𑀸 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀜𑁆𑀜𑀸𑀢𑀸𑀯𑀻𑀦𑀁 𑀤𑀺𑀝𑁆𑀞𑀸𑀦𑀁 𑀧𑀢𑁆𑀢𑀸𑀦𑀁 𑀯𑀺𑀤𑀺𑀢𑀸𑀦𑀁 𑀲𑀘𑁆𑀙𑀺𑀓𑀢𑀸𑀦𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀜𑁆𑀜𑀸 𑀧𑀚𑀸𑀦𑀦𑀸…𑀧𑁂… 𑀅𑀫𑁄𑀳𑁄 𑀥𑀫𑁆𑀫𑀯𑀺𑀘𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀫𑀕𑁆𑀕𑀗𑁆𑀕𑀁 𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁’’.

𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀁.