𑁪. 𑀲𑀘𑁆𑀘𑀯𑀺𑀪𑀗𑁆𑀕𑁄

𑁧. 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀁

𑁧𑁮𑁯. 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑁋 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁, 𑀤𑀼𑀓𑁆𑀔𑀲𑀫𑀼𑀤𑀬𑀁 [𑀤𑀼𑀓𑁆𑀔𑀲𑀫𑀼𑀤𑀬𑁄 (𑀲𑁆𑀬𑀸.)] 𑀅𑀭𑀺𑀬𑀲𑀘𑁆𑀘𑀁, 𑀤𑀼𑀓𑁆𑀔𑀦𑀺𑀭𑁄𑀥𑀁 [𑀤𑀼𑀓𑁆𑀔𑀦𑀺𑀭𑁄𑀥𑁄 (𑀲𑁆𑀬𑀸.)] 𑀅𑀭𑀺𑀬𑀲𑀘𑁆𑀘𑀁, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀅𑀭𑀺𑀬𑀲𑀘𑁆𑀘𑀁.

𑁧. 𑀤𑀼𑀓𑁆𑀔𑀲𑀘𑁆𑀘𑀁

𑁧𑁯𑁦. 𑀢𑀢𑁆𑀣 𑀓𑀢𑀫𑀁 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁? 𑀚𑀸𑀢𑀺𑀧𑀺 𑀤𑀼𑀓𑁆𑀔𑀸, 𑀚𑀭𑀸𑀧𑀺 𑀤𑀼𑀓𑁆𑀔𑀸, 𑀫𑀭𑀡𑀫𑁆𑀧𑀺 𑀤𑀼𑀓𑁆𑀔𑀁, 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸𑀧𑀺 𑀤𑀼𑀓𑁆𑀔𑀸, 𑀅𑀧𑁆𑀧𑀺𑀬𑁂𑀳𑀺 𑀲𑀫𑁆𑀧𑀬𑁄𑀕𑁄 𑀤𑀼𑀓𑁆𑀔𑁄, 𑀧𑀺𑀬𑁂𑀳𑀺 𑀯𑀺𑀧𑁆𑀧𑀬𑁄𑀕𑁄 𑀤𑀼𑀓𑁆𑀔𑁄, 𑀬𑀁 𑀧𑀺𑀘𑁆𑀙𑀁 𑀦 𑀮𑀪𑀢𑀺 𑀢𑀫𑁆𑀧𑀺 𑀤𑀼𑀓𑁆𑀔𑀁, 𑀲𑀁𑀔𑀺𑀢𑁆𑀢𑁂𑀦 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀸.

𑁧𑁯𑁧. 𑀢𑀢𑁆𑀣 𑀓𑀢𑀫𑀸 𑀚𑀸𑀢𑀺? 𑀬𑀸 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀢𑀫𑁆𑀳𑀺 𑀢𑀫𑁆𑀳𑀺 𑀲𑀢𑁆𑀢𑀦𑀺𑀓𑀸𑀬𑁂 𑀚𑀸𑀢𑀺 𑀲𑀜𑁆𑀚𑀸𑀢𑀺 𑀑𑀓𑁆𑀓𑀦𑁆𑀢𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑀺 𑀔𑀦𑁆𑀥𑀸𑀦𑀁 𑀧𑀸𑀢𑀼𑀪𑀸𑀯𑁄 𑀆𑀬𑀢𑀦𑀸𑀦𑀁 𑀧𑀝𑀺𑀮𑀸𑀪𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀚𑀸𑀢𑀺’’.

𑁧𑁯𑁨. 𑀢𑀢𑁆𑀣 𑀓𑀢𑀫𑀸 𑀚𑀭𑀸? 𑀬𑀸 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀢𑀫𑁆𑀳𑀺 𑀢𑀫𑁆𑀳𑀺 𑀲𑀢𑁆𑀢𑀦𑀺𑀓𑀸𑀬𑁂 𑀚𑀭𑀸 𑀚𑀻𑀭𑀡𑀢𑀸 𑀔𑀡𑁆𑀟𑀺𑀘𑁆𑀘𑀁 𑀧𑀸𑀮𑀺𑀘𑁆𑀘𑀁 𑀯𑀮𑀺𑀢𑁆𑀢𑀘𑀢𑀸 𑀆𑀬𑀼𑀦𑁄 𑀲𑀁𑀳𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑀺𑀧𑀸𑀓𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀚𑀭𑀸’’.

𑁧𑁯𑁩. 𑀢𑀢𑁆𑀣 𑀓𑀢𑀫𑀁 𑀫𑀭𑀡𑀁? 𑀬𑀸 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀢𑀫𑁆𑀳𑀸 𑀢𑀫𑁆𑀳𑀸 𑀲𑀢𑁆𑀢𑀦𑀺𑀓𑀸𑀬𑀸 𑀘𑀼𑀢𑀺 𑀘𑀯𑀦𑀢𑀸 𑀪𑁂𑀤𑁄 𑀅𑀦𑁆𑀢𑀭𑀥𑀸𑀦𑀁 𑀫𑀘𑁆𑀘𑀼 𑀫𑀭𑀡𑀁 𑀓𑀸𑀮𑀓𑀺𑀭𑀺𑀬𑀸 𑀔𑀦𑁆𑀥𑀸𑀦𑀁 𑀪𑁂𑀤𑁄 𑀓𑀴𑁂𑀯𑀭𑀲𑁆𑀲 𑀦𑀺𑀓𑁆𑀔𑁂𑀧𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲𑀼𑀧𑀘𑁆𑀙𑁂𑀤𑁄 𑁋 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀫𑀭𑀡𑀁’’.

𑁧𑁯𑁪. 𑀢𑀢𑁆𑀣 𑀓𑀢𑀫𑁄 𑀲𑁄𑀓𑁄? 𑀜𑀸𑀢𑀺𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀪𑁄𑀕𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀭𑁄𑀕𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀲𑀻𑀮𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀤𑀺𑀝𑁆𑀞𑀺𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀩𑁆𑀬𑀲𑀦𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀤𑀼𑀓𑁆𑀔𑀥𑀫𑁆𑀫𑁂𑀦 𑀨𑀼𑀝𑁆𑀞𑀲𑁆𑀲 𑀲𑁄𑀓𑁄 𑀲𑁄𑀘𑀦𑀸 𑀲𑁄𑀘𑀺𑀢𑀢𑁆𑀢𑀁 𑀅𑀦𑁆𑀢𑁄𑀲𑁄𑀓𑁄 𑀅𑀦𑁆𑀢𑁄𑀧𑀭𑀺𑀲𑁄𑀓𑁄 𑀘𑁂𑀢𑀲𑁄 𑀧𑀭𑀺𑀚𑁆𑀛𑀸𑀬𑀦𑀸 𑀤𑁄𑀫𑀦𑀲𑁆𑀲𑀁 𑀲𑁄𑀓𑀲𑀮𑁆𑀮𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀲𑁄𑀓𑁄’’.

𑁧𑁯𑁫. 𑀢𑀢𑁆𑀣 𑀓𑀢𑀫𑁄 𑀧𑀭𑀺𑀤𑁂𑀯𑁄? 𑀜𑀸𑀢𑀺𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀪𑁄𑀕𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀭𑁄𑀕𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀲𑀻𑀮𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀤𑀺𑀝𑁆𑀞𑀺𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀩𑁆𑀬𑀲𑀦𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀤𑀼𑀓𑁆𑀔𑀥𑀫𑁆𑀫𑁂𑀦 𑀨𑀼𑀝𑁆𑀞𑀲𑁆𑀲 𑀆𑀤𑁂𑀯𑁄 𑀧𑀭𑀺𑀤𑁂𑀯𑁄 𑀆𑀤𑁂𑀯𑀦𑀸 𑀧𑀭𑀺𑀤𑁂𑀯𑀦𑀸 𑀆𑀤𑁂𑀯𑀺𑀢𑀢𑁆𑀢𑀁 𑀧𑀭𑀺𑀤𑁂𑀯𑀺𑀢𑀢𑁆𑀢𑀁 𑀯𑀸𑀘𑀸 𑀧𑀮𑀸𑀧𑁄 𑀯𑀺𑀧𑁆𑀧𑀮𑀸𑀧𑁄 𑀮𑀸𑀮𑀧𑁆𑀧𑁄 𑀮𑀸𑀮𑀧𑁆𑀧𑀦𑀸 𑀮𑀸𑀮𑀧𑁆𑀧𑀺𑀢𑀢𑁆𑀢𑀁 [𑀮𑀸𑀮𑀧𑁄 𑀮𑀸𑀮𑀧𑀦𑀸 𑀮𑀸𑀮𑀧𑀺𑀢𑀢𑁆𑀢𑀁 (𑀲𑁆𑀬𑀸.)] 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀧𑀭𑀺𑀤𑁂𑀯𑁄’’.

𑁧𑁯𑁬. 𑀢𑀢𑁆𑀣 𑀓𑀢𑀫𑀁 𑀤𑀼𑀓𑁆𑀔𑀁? 𑀬𑀁 𑀓𑀸𑀬𑀺𑀓𑀁 𑀅𑀲𑀸𑀢𑀁 𑀓𑀸𑀬𑀺𑀓𑀁 𑀤𑀼𑀓𑁆𑀔𑀁 𑀓𑀸𑀬𑀲𑀫𑁆𑀨𑀲𑁆𑀲𑀚𑀁 𑀅𑀲𑀸𑀢𑀁 𑀤𑀼𑀓𑁆𑀔𑀁 𑀯𑁂𑀤𑀬𑀺𑀢𑀁 𑀓𑀸𑀬𑀲𑀫𑁆𑀨𑀲𑁆𑀲𑀚𑀸 𑀅𑀲𑀸𑀢𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸 𑁋 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀤𑀼𑀓𑁆𑀔𑀁’’.

𑁧𑁯𑁭. 𑀢𑀢𑁆𑀣 𑀓𑀢𑀫𑀁 𑀤𑁄𑀫𑀦𑀲𑁆𑀲𑀁? 𑀬𑀁 𑀘𑁂𑀢𑀲𑀺𑀓𑀁 𑀅𑀲𑀸𑀢𑀁 𑀘𑁂𑀢𑀲𑀺𑀓𑀁 𑀤𑀼𑀓𑁆𑀔𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀁 𑀅𑀲𑀸𑀢𑀁 𑀤𑀼𑀓𑁆𑀔𑀁 𑀯𑁂𑀤𑀬𑀺𑀢𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀸 𑀅𑀲𑀸𑀢𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸 𑁋 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀤𑁄𑀫𑀦𑀲𑁆𑀲𑀁’’.

𑁧𑁯𑁮. 𑀢𑀢𑁆𑀣 𑀓𑀢𑀫𑁄 𑀉𑀧𑀸𑀬𑀸𑀲𑁄? 𑀜𑀸𑀢𑀺𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀪𑁄𑀕𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀭𑁄𑀕𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀲𑀻𑀮𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀤𑀺𑀝𑁆𑀞𑀺𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀩𑁆𑀬𑀲𑀦𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀤𑀼𑀓𑁆𑀔𑀥𑀫𑁆𑀫𑁂𑀦 𑀨𑀼𑀝𑁆𑀞𑀲𑁆𑀲 𑀆𑀬𑀸𑀲𑁄 𑀉𑀧𑀸𑀬𑀸𑀲𑁄 𑀆𑀬𑀸𑀲𑀺𑀢𑀢𑁆𑀢𑀁 𑀉𑀧𑀸𑀬𑀸𑀲𑀺𑀢𑀢𑁆𑀢𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀉𑀧𑀸𑀬𑀸𑀲𑁄’’.

𑁧𑁯𑁯. 𑀢𑀢𑁆𑀣 𑀓𑀢𑀫𑁄 𑀅𑀧𑁆𑀧𑀺𑀬𑁂𑀳𑀺 𑀲𑀫𑁆𑀧𑀬𑁄𑀕𑁄 𑀤𑀼𑀓𑁆𑀔𑁄? 𑀇𑀥 𑀬𑀲𑁆𑀲 𑀢𑁂 𑀳𑁄𑀦𑁆𑀢𑀺 𑀅𑀦𑀺𑀝𑁆𑀞𑀸 𑀅𑀓𑀦𑁆𑀢𑀸 𑀅𑀫𑀦𑀸𑀧𑀸 𑀭𑀽𑀧𑀸 𑀲𑀤𑁆𑀤𑀸 𑀕𑀦𑁆𑀥𑀸 𑀭𑀲𑀸 𑀨𑁄𑀝𑁆𑀞𑀩𑁆𑀩𑀸, 𑀬𑁂 𑀯𑀸 𑀧𑀦𑀲𑁆𑀲 𑀢𑁂 𑀳𑁄𑀦𑁆𑀢𑀺 𑀅𑀦𑀢𑁆𑀣𑀓𑀸𑀫𑀸 𑀅𑀳𑀺𑀢𑀓𑀸𑀫𑀸 𑀅𑀨𑀸𑀲𑀼𑀓𑀓𑀸𑀫𑀸 𑀅𑀬𑁄𑀕𑀓𑁆𑀔𑁂𑀫𑀓𑀸𑀫𑀸; 𑀬𑀸 𑀢𑁂𑀳𑀺 𑀲𑀗𑁆𑀕𑀢𑀺 𑀲𑀫𑀸𑀕𑀫𑁄 𑀲𑀫𑁄𑀥𑀸𑀦𑀁 𑀫𑀺𑀲𑁆𑀲𑀻𑀪𑀸𑀯𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀅𑀧𑁆𑀧𑀺𑀬𑁂𑀳𑀺 𑀲𑀫𑁆𑀧𑀬𑁄𑀕𑁄 𑀤𑀼𑀓𑁆𑀔𑁄’’.

𑁨𑁦𑁦. 𑀢𑀢𑁆𑀣 𑀓𑀢𑀫𑁄 𑀧𑀺𑀬𑁂𑀳𑀺 𑀯𑀺𑀧𑁆𑀧𑀬𑁄𑀕𑁄 𑀤𑀼𑀓𑁆𑀔𑁄? 𑀇𑀥 𑀬𑀲𑁆𑀲 𑀢𑁂 𑀳𑁄𑀦𑁆𑀢𑀺 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀭𑀽𑀧𑀸 𑀲𑀤𑁆𑀤𑀸 𑀕𑀦𑁆𑀥𑀸 𑀭𑀲𑀸 𑀨𑁄𑀝𑁆𑀞𑀩𑁆𑀩𑀸, 𑀬𑁂 𑀯𑀸 𑀧𑀦𑀲𑁆𑀲 𑀢𑁂 𑀳𑁄𑀦𑁆𑀢𑀺 𑀅𑀢𑁆𑀣𑀓𑀸𑀫𑀸 𑀳𑀺𑀢𑀓𑀸𑀫𑀸 𑀨𑀸𑀲𑀼𑀓𑀓𑀸𑀫𑀸 𑀬𑁄𑀕𑀓𑁆𑀔𑁂𑀫𑀓𑀸𑀫𑀸 𑀫𑀸𑀢𑀸 𑀯𑀸 𑀧𑀺𑀢𑀸 𑀯𑀸 𑀪𑀸𑀢𑀸 𑀯𑀸 𑀪𑀕𑀺𑀦𑀻 𑀯𑀸 𑀫𑀺𑀢𑁆𑀢𑀸 𑀯𑀸 𑀅𑀫𑀘𑁆𑀘𑀸 𑀯𑀸 𑀜𑀸𑀢𑀻 𑀯𑀸 𑀲𑀸𑀮𑁄𑀳𑀺𑀢𑀸 𑀯𑀸; 𑀬𑀸 𑀢𑁂𑀳𑀺 𑀅𑀲𑀗𑁆𑀕𑀢𑀺 𑀅𑀲𑀫𑀸𑀕𑀫𑁄 𑀅𑀲𑀫𑁄𑀥𑀸𑀦𑀁 𑀅𑀫𑀺𑀲𑁆𑀲𑀻𑀪𑀸𑀯𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀧𑀺𑀬𑁂𑀳𑀺 𑀯𑀺𑀧𑁆𑀧𑀬𑁄𑀕𑁄 𑀤𑀼𑀓𑁆𑀔𑁄’’.

𑁨𑁦𑁧. 𑀢𑀢𑁆𑀣 𑀓𑀢𑀫𑀁 𑀬𑀫𑁆𑀧𑀺𑀘𑁆𑀙𑀁 𑀦 𑀮𑀪𑀢𑀺 𑀢𑀫𑁆𑀧𑀺 𑀤𑀼𑀓𑁆𑀔𑀁? 𑀚𑀸𑀢𑀺𑀥𑀫𑁆𑀫𑀸𑀦𑀁 𑀲𑀢𑁆𑀢𑀸𑀦𑀁 𑀏𑀯𑀁 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺 𑁋 ‘‘𑀅𑀳𑁄 𑀯𑀢, 𑀫𑀬𑀁 𑀦 𑀚𑀸𑀢𑀺𑀥𑀫𑁆𑀫𑀸 𑀅𑀲𑁆𑀲𑀸𑀫; 𑀦 𑀘, 𑀯𑀢, 𑀦𑁄 𑀚𑀸𑀢𑀺 𑀆𑀕𑀘𑁆𑀙𑁂𑀬𑁆𑀬𑀸’’𑀢𑀺! 𑀦 𑀔𑁄 𑀧𑀦𑁂𑀢𑀁 𑀇𑀘𑁆𑀙𑀸𑀬 𑀧𑀢𑁆𑀢𑀩𑁆𑀩𑀁. 𑀇𑀤𑀫𑁆𑀧𑀺 ‘‘𑀬𑀫𑁆𑀧𑀺𑀘𑁆𑀙𑀁 𑀦 𑀮𑀪𑀢𑀺 𑀢𑀫𑁆𑀧𑀺 𑀤𑀼𑀓𑁆𑀔𑀁’’.

𑀚𑀭𑀸𑀥𑀫𑁆𑀫𑀸𑀦𑀁 𑀲𑀢𑁆𑀢𑀸𑀦𑀁…𑀧𑁂… 𑀩𑁆𑀬𑀸𑀥𑀺𑀥𑀫𑁆𑀫𑀸𑀦𑀁 𑀲𑀢𑁆𑀢𑀸𑀦𑀁…𑀧𑁂… 𑀫𑀭𑀡𑀥𑀫𑁆𑀫𑀸𑀦𑀁 𑀲𑀢𑁆𑀢𑀸𑀦𑀁…𑀧𑁂… 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀥𑀫𑁆𑀫𑀸𑀦𑀁 𑀲𑀢𑁆𑀢𑀸𑀦𑀁 𑀏𑀯𑀁 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺 𑁋 ‘‘𑀅𑀳𑁄 𑀯𑀢, 𑀫𑀬𑀁 𑀦 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀥𑀫𑁆𑀫𑀸 𑀅𑀲𑁆𑀲𑀸𑀫; 𑀦 𑀘, 𑀯𑀢, 𑀦𑁄 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀆𑀕𑀘𑁆𑀙𑁂𑀬𑁆𑀬𑀼’’𑀦𑁆𑀢𑀺! 𑀦 𑀔𑁄 𑀧𑀦𑁂𑀢𑀁 𑀇𑀘𑁆𑀙𑀸𑀬 𑀧𑀢𑁆𑀢𑀩𑁆𑀩𑀁. 𑀇𑀤𑀫𑁆𑀧𑀺 ‘‘𑀬𑀫𑁆𑀧𑀺𑀘𑁆𑀙𑀁 𑀦 𑀮𑀪𑀢𑀺 𑀢𑀫𑁆𑀧𑀺 𑀤𑀼𑀓𑁆𑀔𑀁’’.

𑁨𑁦𑁨. 𑀢𑀢𑁆𑀣 𑀓𑀢𑀫𑁂 𑀲𑀁𑀔𑀺𑀢𑁆𑀢𑁂𑀦 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀸? 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀽𑀧𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀯𑁂𑀤𑀦𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀲𑀜𑁆𑀜𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀲𑀗𑁆𑀔𑀸𑀭𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀯𑀺𑀜𑁆𑀜𑀸𑀡𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 ‘‘𑀲𑀁𑀔𑀺𑀢𑁆𑀢𑁂𑀦 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀸’’.

𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁’’.

𑁨. 𑀲𑀫𑀼𑀤𑀬𑀲𑀘𑁆𑀘𑀁

𑁨𑁦𑁩. 𑀢𑀢𑁆𑀣 𑀓𑀢𑀫𑀁 𑀤𑀼𑀓𑁆𑀔𑀲𑀫𑀼𑀤𑀬𑀁 𑀅𑀭𑀺𑀬𑀲𑀘𑁆𑀘𑀁? 𑀬𑀸𑀬𑀁 𑀢𑀡𑁆𑀳𑀸 𑀧𑁄𑀦𑁄𑀪𑀯𑀺𑀓𑀸 [𑀧𑁄𑀦𑁄𑀩𑁆𑀪𑀯𑀺𑀓𑀸 (𑀲𑁆𑀬𑀸. 𑀓.)] 𑀦𑀦𑁆𑀤𑀺𑀭𑀸𑀕𑀲𑀳𑀕𑀢𑀸 𑀢𑀢𑁆𑀭𑀢𑀢𑁆𑀭𑀸𑀪𑀺𑀦𑀦𑁆𑀤𑀺𑀦𑀻, 𑀲𑁂𑀬𑁆𑀬𑀣𑀺𑀤𑀁 𑁋 𑀓𑀸𑀫𑀢𑀡𑁆𑀳𑀸, 𑀪𑀯𑀢𑀡𑁆𑀳𑀸, 𑀯𑀺𑀪𑀯𑀢𑀡𑁆𑀳𑀸.

𑀲𑀸 𑀔𑁄 𑀧𑀦𑁂𑀲𑀸 𑀢𑀡𑁆𑀳𑀸 𑀓𑀢𑁆𑀣 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀓𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺? 𑀬𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺.

𑀓𑀺𑀜𑁆𑀘 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁? 𑀘𑀓𑁆𑀔𑀼𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁. 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺. 𑀲𑁄𑀢𑀁 𑀮𑁄𑀓𑁂…𑀧𑁂… 𑀖𑀸𑀦𑀁 𑀮𑁄𑀓𑁂… 𑀚𑀺𑀯𑁆𑀳𑀸 𑀮𑁄𑀓𑁂… 𑀓𑀸𑀬𑁄 𑀮𑁄𑀓𑁂… 𑀫𑀦𑁄 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁. 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺.

𑀭𑀽𑀧𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁. 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺. 𑀲𑀤𑁆𑀤𑀸 𑀮𑁄𑀓𑁂…𑀧𑁂… 𑀕𑀦𑁆𑀥𑀸 𑀮𑁄𑀓𑁂… 𑀭𑀲𑀸 𑀮𑁄𑀓𑁂… 𑀨𑁄𑀝𑁆𑀞𑀩𑁆𑀩𑀸 𑀮𑁄𑀓𑁂… 𑀥𑀫𑁆𑀫𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁. 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺.

𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁. 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺. 𑀲𑁄𑀢𑀯𑀺𑀜𑁆𑀜𑀸𑀡𑀁 𑀮𑁄𑀓𑁂…𑀧𑁂… 𑀖𑀸𑀦𑀯𑀺𑀜𑁆𑀜𑀸𑀡𑀁 𑀮𑁄𑀓𑁂… 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁 𑀮𑁄𑀓𑁂… 𑀓𑀸𑀬𑀯𑀺𑀜𑁆𑀜𑀸𑀡𑀁 𑀮𑁄𑀓𑁂… 𑀫𑀦𑁄𑀯𑀺𑀜𑁆𑀜𑀸𑀡𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁. 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺.

𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁. 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺. 𑀲𑁄𑀢𑀲𑀫𑁆𑀨𑀲𑁆𑀲𑁄 𑀮𑁄𑀓𑁂…𑀧𑁂… 𑀖𑀸𑀦𑀲𑀫𑁆𑀨𑀲𑁆𑀲𑁄 𑀮𑁄𑀓𑁂… 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑁄 𑀮𑁄𑀓𑁂… 𑀓𑀸𑀬𑀲𑀫𑁆𑀨𑀲𑁆𑀲𑁄 𑀮𑁄𑀓𑁂… 𑀫𑀦𑁄𑀲𑀫𑁆𑀨𑀲𑁆𑀲𑁄 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁. 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺.

𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁. 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺. 𑀲𑁄𑀢𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀮𑁄𑀓𑁂…𑀧𑁂… 𑀖𑀸𑀦𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀮𑁄𑀓𑁂… 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀮𑁄𑀓𑁂… 𑀓𑀸𑀬𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀮𑁄𑀓𑁂… 𑀫𑀦𑁄𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁. 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺.

𑀭𑀽𑀧𑀲𑀜𑁆𑀜𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁. 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺. 𑀲𑀤𑁆𑀤𑀲𑀜𑁆𑀜𑀸 𑀮𑁄𑀓𑁂…𑀧𑁂… 𑀕𑀦𑁆𑀥𑀲𑀜𑁆𑀜𑀸 𑀮𑁄𑀓𑁂… 𑀭𑀲𑀲𑀜𑁆𑀜𑀸 𑀮𑁄𑀓𑁂… 𑀨𑁄𑀝𑁆𑀞𑀩𑁆𑀩𑀲𑀜𑁆𑀜𑀸 𑀮𑁄𑀓𑁂… 𑀥𑀫𑁆𑀫𑀲𑀜𑁆𑀜𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁. 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺.

𑀭𑀽𑀧𑀲𑀜𑁆𑀘𑁂𑀢𑀦𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁. 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺. 𑀲𑀤𑁆𑀤𑀲𑀜𑁆𑀘𑁂𑀢𑀦𑀸 𑀮𑁄𑀓𑁂…𑀧𑁂… 𑀕𑀦𑁆𑀥𑀲𑀜𑁆𑀘𑁂𑀢𑀦𑀸 𑀮𑁄𑀓𑁂… 𑀭𑀲𑀲𑀜𑁆𑀘𑁂𑀢𑀦𑀸 𑀮𑁄𑀓𑁂… 𑀨𑁄𑀝𑁆𑀞𑀩𑁆𑀩𑀲𑀜𑁆𑀘𑁂𑀢𑀦𑀸 𑀮𑁄𑀓𑁂… 𑀥𑀫𑁆𑀫𑀲𑀜𑁆𑀘𑁂𑀢𑀦𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁. 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺.

𑀭𑀽𑀧𑀢𑀡𑁆𑀳𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁. 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺. 𑀲𑀤𑁆𑀤𑀢𑀡𑁆𑀳𑀸 𑀮𑁄𑀓𑁂…𑀧𑁂… 𑀕𑀦𑁆𑀥𑀢𑀡𑁆𑀳𑀸 𑀮𑁄𑀓𑁂… 𑀭𑀲𑀢𑀡𑁆𑀳𑀸 𑀮𑁄𑀓𑁂… 𑀨𑁄𑀝𑁆𑀞𑀩𑁆𑀩𑀢𑀡𑁆𑀳𑀸 𑀮𑁄𑀓𑁂… 𑀥𑀫𑁆𑀫𑀢𑀡𑁆𑀳𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁. 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺.

𑀭𑀽𑀧𑀯𑀺𑀢𑀓𑁆𑀓𑁄 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁. 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺. 𑀲𑀤𑁆𑀤𑀯𑀺𑀢𑀓𑁆𑀓𑁄 𑀮𑁄𑀓𑁂…𑀧𑁂… 𑀕𑀦𑁆𑀥𑀯𑀺𑀢𑀓𑁆𑀓𑁄 𑀮𑁄𑀓𑁂… 𑀭𑀲𑀯𑀺𑀢𑀓𑁆𑀓𑁄 𑀮𑁄𑀓𑁂… 𑀨𑁄𑀝𑁆𑀞𑀩𑁆𑀩𑀯𑀺𑀢𑀓𑁆𑀓𑁄 𑀮𑁄𑀓𑁂… 𑀥𑀫𑁆𑀫𑀯𑀺𑀢𑀓𑁆𑀓𑁄 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁. 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺.

𑀭𑀽𑀧𑀯𑀺𑀘𑀸𑀭𑁄 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁. 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺. 𑀲𑀤𑁆𑀤𑀯𑀺𑀘𑀸𑀭𑁄 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁. 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺. 𑀕𑀦𑁆𑀥𑀯𑀺𑀘𑀸𑀭𑁄 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁. 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺. 𑀭𑀲𑀯𑀺𑀘𑀸𑀭𑁄 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁. 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺. 𑀨𑁄𑀝𑁆𑀞𑀩𑁆𑀩𑀯𑀺𑀘𑀸𑀭𑁄 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁. 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺. 𑀥𑀫𑁆𑀫𑀯𑀺𑀘𑀸𑀭𑁄 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁. 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺.

𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀤𑀼𑀓𑁆𑀔𑀲𑀫𑀼𑀤𑀬𑀁 𑀅𑀭𑀺𑀬𑀲𑀘𑁆𑀘𑀁’’.

𑁩. 𑀦𑀺𑀭𑁄𑀥𑀲𑀘𑁆𑀘𑀁

𑁨𑁦𑁪. 𑀢𑀢𑁆𑀣 𑀓𑀢𑀫𑀁 𑀤𑀼𑀓𑁆𑀔𑀦𑀺𑀭𑁄𑀥𑀁 𑀅𑀭𑀺𑀬𑀲𑀘𑁆𑀘𑀁? 𑀬𑁄 𑀢𑀲𑁆𑀲𑀸𑀬𑁂𑀯 𑀢𑀡𑁆𑀳𑀸𑀬 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑁄 𑀘𑀸𑀕𑁄 𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀫𑀼𑀢𑁆𑀢𑀺 𑀅𑀦𑀸𑀮𑀬𑁄.

𑀲𑀸 𑀔𑁄 𑀧𑀦𑁂𑀲𑀸 𑀢𑀡𑁆𑀳𑀸 𑀓𑀢𑁆𑀣 𑀧𑀳𑀻𑀬𑀫𑀸𑀦𑀸 𑀧𑀳𑀻𑀬𑀢𑀺, 𑀓𑀢𑁆𑀣 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀺𑀭𑀼𑀚𑁆𑀛𑀢𑀺? 𑀬𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀧𑀳𑀻𑀬𑀫𑀸𑀦𑀸 𑀧𑀳𑀻𑀬𑀢𑀺, 𑀏𑀢𑁆𑀣 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀺𑀭𑀼𑀚𑁆𑀛𑀢𑀺.

𑀓𑀺𑀜𑁆𑀘 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁? 𑀘𑀓𑁆𑀔𑀼𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁. 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀧𑀳𑀻𑀬𑀫𑀸𑀦𑀸 𑀧𑀳𑀻𑀬𑀢𑀺, 𑀏𑀢𑁆𑀣 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀺𑀭𑀼𑀚𑁆𑀛𑀢𑀺. 𑀲𑁄𑀢𑀁 𑀮𑁄𑀓𑁂…𑀧𑁂… 𑀖𑀸𑀦𑀁 𑀮𑁄𑀓𑁂… 𑀚𑀺𑀯𑁆𑀳𑀸 𑀮𑁄𑀓𑁂… 𑀓𑀸𑀬𑁄 𑀮𑁄𑀓𑁂… 𑀫𑀦𑁄 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁. 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀧𑀳𑀻𑀬𑀫𑀸𑀦𑀸 𑀧𑀳𑀻𑀬𑀢𑀺, 𑀏𑀢𑁆𑀣 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀺𑀭𑀼𑀚𑁆𑀛𑀢𑀺.

𑀭𑀽𑀧𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁. 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀧𑀳𑀻𑀬𑀫𑀸𑀦𑀸 𑀧𑀳𑀻𑀬𑀢𑀺, 𑀏𑀢𑁆𑀣 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀺𑀭𑀼𑀚𑁆𑀛𑀢𑀺. 𑀲𑀤𑁆𑀤𑀸 𑀮𑁄𑀓𑁂…𑀧𑁂… 𑀕𑀦𑁆𑀥𑀸 𑀮𑁄𑀓𑁂… 𑀭𑀲𑀸 𑀮𑁄𑀓𑁂… 𑀨𑁄𑀝𑁆𑀞𑀩𑁆𑀩𑀸 𑀮𑁄𑀓𑁂… 𑀥𑀫𑁆𑀫𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁. 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀧𑀳𑀻𑀬𑀫𑀸𑀦𑀸 𑀧𑀳𑀻𑀬𑀢𑀺, 𑀏𑀢𑁆𑀣 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀺𑀭𑀼𑀚𑁆𑀛𑀢𑀺.

𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁. 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀧𑀳𑀻𑀬𑀫𑀸𑀦𑀸 𑀧𑀳𑀻𑀬𑀢𑀺, 𑀏𑀢𑁆𑀣 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀺𑀭𑀼𑀚𑁆𑀛𑀢𑀺. 𑀲𑁄𑀢𑀯𑀺𑀜𑁆𑀜𑀸𑀡𑀁 𑀮𑁄𑀓𑁂…𑀧𑁂… 𑀖𑀸𑀦𑀯𑀺𑀜𑁆𑀜𑀸𑀡𑀁 𑀮𑁄𑀓𑁂… 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁 𑀮𑁄𑀓𑁂… 𑀓𑀸𑀬𑀯𑀺𑀜𑁆𑀜𑀸𑀡𑀁 𑀮𑁄𑀓𑁂… 𑀫𑀦𑁄𑀯𑀺𑀜𑁆𑀜𑀸𑀡𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁. 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀧𑀳𑀻𑀬𑀫𑀸𑀦𑀸 𑀧𑀳𑀻𑀬𑀢𑀺, 𑀏𑀢𑁆𑀣 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀺𑀭𑀼𑀚𑁆𑀛𑀢𑀺.

𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁. 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀧𑀳𑀻𑀬𑀫𑀸𑀦𑀸 𑀧𑀳𑀻𑀬𑀢𑀺, 𑀏𑀢𑁆𑀣 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀺𑀭𑀼𑀚𑁆𑀛𑀢𑀺. 𑀲𑁄𑀢𑀲𑀫𑁆𑀨𑀲𑁆𑀲𑁄 𑀮𑁄𑀓𑁂…𑀧𑁂… 𑀖𑀸𑀦𑀲𑀫𑁆𑀨𑀲𑁆𑀲𑁄 𑀮𑁄𑀓𑁂… 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑁄 𑀮𑁄𑀓𑁂… 𑀓𑀸𑀬𑀲𑀫𑁆𑀨𑀲𑁆𑀲𑁄 𑀮𑁄𑀓𑁂… 𑀫𑀦𑁄𑀲𑀫𑁆𑀨𑀲𑁆𑀲𑁄 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁. 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀧𑀳𑀻𑀬𑀫𑀸𑀦𑀸 𑀧𑀳𑀻𑀬𑀢𑀺, 𑀏𑀢𑁆𑀣 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀺𑀭𑀼𑀚𑁆𑀛𑀢𑀺.

𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁. 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀧𑀳𑀻𑀬𑀫𑀸𑀦𑀸 𑀧𑀳𑀻𑀬𑀢𑀺, 𑀏𑀢𑁆𑀣 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀺𑀭𑀼𑀚𑁆𑀛𑀢𑀺. 𑀲𑁄𑀢𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀮𑁄𑀓𑁂…𑀧𑁂… 𑀖𑀸𑀦𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀮𑁄𑀓𑁂… 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀮𑁄𑀓𑁂… 𑀓𑀸𑀬𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀮𑁄𑀓𑁂… 𑀫𑀦𑁄𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁. 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀧𑀳𑀻𑀬𑀫𑀸𑀦𑀸 𑀧𑀳𑀻𑀬𑀢𑀺, 𑀏𑀢𑁆𑀣 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀺𑀭𑀼𑀚𑁆𑀛𑀢𑀺.

𑀭𑀽𑀧𑀲𑀜𑁆𑀜𑀸 𑀮𑁄𑀓𑁂… 𑀲𑀤𑁆𑀤𑀲𑀜𑁆𑀜𑀸 𑀮𑁄𑀓𑁂… 𑀕𑀦𑁆𑀥𑀲𑀜𑁆𑀜𑀸 𑀮𑁄𑀓𑁂… 𑀭𑀲𑀲𑀜𑁆𑀜𑀸 𑀮𑁄𑀓𑁂… 𑀨𑁄𑀝𑁆𑀞𑀩𑁆𑀩𑀲𑀜𑁆𑀜𑀸 𑀮𑁄𑀓𑁂… 𑀥𑀫𑁆𑀫𑀲𑀜𑁆𑀜𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁. 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀧𑀳𑀻𑀬𑀫𑀸𑀦𑀸 𑀧𑀳𑀻𑀬𑀢𑀺, 𑀏𑀢𑁆𑀣 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀺𑀭𑀼𑀚𑁆𑀛𑀢𑀺.

𑀭𑀽𑀧𑀲𑀜𑁆𑀘𑁂𑀢𑀦𑀸 𑀮𑁄𑀓𑁂… 𑀲𑀤𑁆𑀤𑀲𑀜𑁆𑀘𑁂𑀢𑀦𑀸 𑀮𑁄𑀓𑁂… 𑀕𑀦𑁆𑀥𑀲𑀜𑁆𑀘𑁂𑀢𑀦𑀸 𑀮𑁄𑀓𑁂… 𑀭𑀲𑀲𑀜𑁆𑀘𑁂𑀢𑀦𑀸 𑀮𑁄𑀓𑁂… 𑀨𑁄𑀝𑁆𑀞𑀩𑁆𑀩𑀲𑀜𑁆𑀘𑁂𑀢𑀦𑀸 𑀮𑁄𑀓𑁂… 𑀥𑀫𑁆𑀫𑀲𑀜𑁆𑀘𑁂𑀢𑀦𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁. 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀧𑀳𑀻𑀬𑀫𑀸𑀦𑀸 𑀧𑀳𑀻𑀬𑀢𑀺, 𑀏𑀢𑁆𑀣 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀺𑀭𑀼𑀚𑁆𑀛𑀢𑀺.

𑀭𑀽𑀧𑀢𑀡𑁆𑀳𑀸 𑀮𑁄𑀓𑁂… 𑀲𑀤𑁆𑀤𑀢𑀡𑁆𑀳𑀸 𑀮𑁄𑀓𑁂… 𑀕𑀦𑁆𑀥𑀢𑀡𑁆𑀳𑀸 𑀮𑁄𑀓𑁂… 𑀭𑀲𑀢𑀡𑁆𑀳𑀸 𑀮𑁄𑀓𑁂… 𑀨𑁄𑀝𑁆𑀞𑀩𑁆𑀩𑀢𑀡𑁆𑀳𑀸 𑀮𑁄𑀓𑁂… 𑀥𑀫𑁆𑀫𑀢𑀡𑁆𑀳𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁. 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀧𑀳𑀻𑀬𑀫𑀸𑀦𑀸 𑀧𑀳𑀻𑀬𑀢𑀺, 𑀏𑀢𑁆𑀣 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀺𑀭𑀼𑀚𑁆𑀛𑀢𑀺.

𑀭𑀽𑀧𑀯𑀺𑀢𑀓𑁆𑀓𑁄 𑀮𑁄𑀓𑁂… 𑀲𑀤𑁆𑀤𑀯𑀺𑀢𑀓𑁆𑀓𑁄 𑀮𑁄𑀓𑁂… 𑀕𑀦𑁆𑀥𑀯𑀺𑀢𑀓𑁆𑀓𑁄 𑀮𑁄𑀓𑁂… 𑀭𑀲𑀯𑀺𑀢𑀓𑁆𑀓𑁄 𑀮𑁄𑀓𑁂… 𑀨𑁄𑀝𑁆𑀞𑀩𑁆𑀩𑀯𑀺𑀢𑀓𑁆𑀓𑁄 𑀮𑁄𑀓𑁂… 𑀥𑀫𑁆𑀫𑀯𑀺𑀢𑀓𑁆𑀓𑁄 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁. 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀧𑀳𑀻𑀬𑀫𑀸𑀦𑀸 𑀧𑀳𑀻𑀬𑀢𑀺, 𑀏𑀢𑁆𑀣 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀺𑀭𑀼𑀚𑁆𑀛𑀢𑀺.

𑀭𑀽𑀧𑀯𑀺𑀘𑀸𑀭𑁄 𑀮𑁄𑀓𑁂… 𑀲𑀤𑁆𑀤𑀯𑀺𑀘𑀸𑀭𑁄 𑀮𑁄𑀓𑁂… 𑀕𑀦𑁆𑀥𑀯𑀺𑀘𑀸𑀭𑁄 𑀮𑁄𑀓𑁂… 𑀭𑀲𑀯𑀺𑀘𑀸𑀭𑁄 𑀮𑁄𑀓𑁂… 𑀨𑁄𑀝𑁆𑀞𑀩𑁆𑀩𑀯𑀺𑀘𑀸𑀭𑁄 𑀮𑁄𑀓𑁂… 𑀥𑀫𑁆𑀫𑀯𑀺𑀘𑀸𑀭𑁄 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁. 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀧𑀳𑀻𑀬𑀫𑀸𑀦𑀸 𑀧𑀳𑀻𑀬𑀢𑀺, 𑀏𑀢𑁆𑀣 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀺𑀭𑀼𑀚𑁆𑀛𑀢𑀺.

𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀤𑀼𑀓𑁆𑀔𑀦𑀺𑀭𑁄𑀥𑀁 𑀅𑀭𑀺𑀬𑀲𑀘𑁆𑀘𑀁’’.

𑁪. 𑀫𑀕𑁆𑀕𑀲𑀘𑁆𑀘𑀁

𑁨𑁦𑁫. 𑀢𑀢𑁆𑀣 𑀓𑀢𑀫𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀅𑀭𑀺𑀬𑀲𑀘𑁆𑀘𑀁? 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄, 𑀲𑀫𑁆𑀫𑀸𑀯𑀸𑀘𑀸, 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄, 𑀲𑀫𑁆𑀫𑀸𑀆𑀚𑀻𑀯𑁄, 𑀲𑀫𑁆𑀫𑀸𑀯𑀸𑀬𑀸𑀫𑁄, 𑀲𑀫𑁆𑀫𑀸𑀲𑀢𑀺, 𑀲𑀫𑁆𑀫𑀸𑀲𑀫𑀸𑀥𑀺.

𑀢𑀢𑁆𑀣 𑀓𑀢𑀫𑀸 𑀲𑀫𑁆𑀫𑀸𑀤𑀺𑀝𑁆𑀞𑀺? 𑀤𑀼𑀓𑁆𑀔𑁂 𑀜𑀸𑀡𑀁, 𑀤𑀼𑀓𑁆𑀔𑀲𑀫𑀼𑀤𑀬𑁂 𑀜𑀸𑀡𑀁, 𑀤𑀼𑀓𑁆𑀔𑀦𑀺𑀭𑁄𑀥𑁂 𑀜𑀸𑀡𑀁, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀜𑀸𑀡𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀲𑀫𑁆𑀫𑀸𑀤𑀺𑀝𑁆𑀞𑀺’’.

𑀢𑀢𑁆𑀣 𑀓𑀢𑀫𑁄 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄? 𑀦𑁂𑀓𑁆𑀔𑀫𑁆𑀫𑀲𑀗𑁆𑀓𑀧𑁆𑀧𑁄, 𑀅𑀩𑁆𑀬𑀸𑀧𑀸𑀤𑀲𑀗𑁆𑀓𑀧𑁆𑀧𑁄, 𑀅𑀯𑀺𑀳𑀺𑀁𑀲𑀸𑀲𑀗𑁆𑀓𑀧𑁆𑀧𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄’’.

𑀢𑀢𑁆𑀣 𑀓𑀢𑀫𑀸 𑀲𑀫𑁆𑀫𑀸𑀯𑀸𑀘𑀸? 𑀫𑀼𑀲𑀸𑀯𑀸𑀤𑀸 𑀯𑁂𑀭𑀫𑀡𑀻, 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀯𑁂𑀭𑀫𑀡𑀻, 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀯𑁂𑀭𑀫𑀡𑀻, 𑀲𑀫𑁆𑀨𑀧𑁆𑀧𑀮𑀸𑀧𑀸 𑀯𑁂𑀭𑀫𑀡𑀻 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀲𑀫𑁆𑀫𑀸𑀯𑀸𑀘𑀸’’.

𑀢𑀢𑁆𑀣 𑀓𑀢𑀫𑁄 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄? 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀻, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀯𑁂𑀭𑀫𑀡𑀻, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀯𑁂𑀭𑀫𑀡𑀻 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄’’.

𑀢𑀢𑁆𑀣 𑀓𑀢𑀫𑁄 𑀲𑀫𑁆𑀫𑀸𑀆𑀚𑀻𑀯𑁄? 𑀇𑀥 𑀅𑀭𑀺𑀬𑀲𑀸𑀯𑀓𑁄 𑀫𑀺𑀘𑁆𑀙𑀸𑀆𑀚𑀻𑀯𑀁 𑀧𑀳𑀸𑀬 𑀲𑀫𑁆𑀫𑀸𑀆𑀚𑀻𑀯𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀲𑀫𑁆𑀫𑀸𑀆𑀚𑀻𑀯𑁄’’.

𑀢𑀢𑁆𑀣 𑀓𑀢𑀫𑁄 𑀲𑀫𑁆𑀫𑀸𑀯𑀸𑀬𑀸𑀫𑁄? 𑀇𑀥 𑀪𑀺𑀓𑁆𑀔𑀼 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀼𑀧𑁆𑀧𑀸𑀤𑀸𑀬 𑀙𑀦𑁆𑀤𑀁 𑀚𑀦𑁂𑀢𑀺, 𑀯𑀸𑀬𑀫𑀢𑀺, 𑀯𑀻𑀭𑀺𑀬𑀁 𑀆𑀭𑀪𑀢𑀺, 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺, 𑀧𑀤𑀳𑀢𑀺. 𑀉𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬 𑀙𑀦𑁆𑀤𑀁 𑀚𑀦𑁂𑀢𑀺, 𑀯𑀸𑀬𑀫𑀢𑀺, 𑀯𑀻𑀭𑀺𑀬𑀁 𑀆𑀭𑀪𑀢𑀺, 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺, 𑀧𑀤𑀳𑀢𑀺. 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑁆𑀧𑀸𑀤𑀸𑀬 𑀙𑀦𑁆𑀤𑀁 𑀚𑀦𑁂𑀢𑀺, 𑀯𑀸𑀬𑀫𑀢𑀺, 𑀯𑀻𑀭𑀺𑀬𑀁 𑀆𑀭𑀪𑀢𑀺, 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺, 𑀧𑀤𑀳𑀢𑀺. 𑀉𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀞𑀺𑀢𑀺𑀬𑀸 𑀅𑀲𑀫𑁆𑀫𑁄𑀲𑀸𑀬 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸 𑀙𑀦𑁆𑀤𑀁 𑀚𑀦𑁂𑀢𑀺, 𑀯𑀸𑀬𑀫𑀢𑀺, 𑀯𑀻𑀭𑀺𑀬𑀁 𑀆𑀭𑀪𑀢𑀺, 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺, 𑀧𑀤𑀳𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀲𑀫𑁆𑀫𑀸𑀯𑀸𑀬𑀸𑀫𑁄’’.

𑀢𑀢𑁆𑀣 𑀓𑀢𑀫𑀸 𑀲𑀫𑁆𑀫𑀸𑀲𑀢𑀺? 𑀇𑀥 𑀪𑀺𑀓𑁆𑀔𑀼 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸, 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁. 𑀯𑁂𑀤𑀦𑀸𑀲𑀼…𑀧𑁂… 𑀘𑀺𑀢𑁆𑀢𑁂…𑀧𑁂… 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸, 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁. 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀲𑀫𑁆𑀫𑀸𑀲𑀢𑀺’’.

𑀢𑀢𑁆𑀣 𑀓𑀢𑀫𑁄 𑀲𑀫𑁆𑀫𑀸𑀲𑀫𑀸𑀥𑀺? 𑀇𑀥 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺, 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺, 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸, 𑀅𑀚𑁆𑀛𑀢𑁆𑀢𑀁 𑀲𑀫𑁆𑀧𑀲𑀸𑀤𑀦𑀁, 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯𑀁 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀁 𑀲𑀫𑀸𑀥𑀺𑀚𑀁 𑀧𑀻𑀢𑀺𑀲𑀼𑀔𑀁 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸, 𑀉𑀧𑁂𑀓𑁆𑀔𑀓𑁄 𑀘 𑀯𑀺𑀳𑀭𑀢𑀺, 𑀲𑀢𑁄 𑀘 𑀲𑀫𑁆𑀧𑀚𑀸𑀦𑁄, 𑀲𑀼𑀔𑀜𑁆𑀘 𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀬𑀁 𑀢𑀁 𑀅𑀭𑀺𑀬𑀸 𑀆𑀘𑀺𑀓𑁆𑀔𑀦𑁆𑀢𑀺 𑁋 ‘‘𑀉𑀧𑁂𑀓𑁆𑀔𑀓𑁄 𑀲𑀢𑀺𑀫𑀸 𑀲𑀼𑀔𑀯𑀺𑀳𑀸𑀭𑀻’’𑀢𑀺, 𑀢𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸, 𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸, 𑀧𑀼𑀩𑁆𑀩𑁂𑀯 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸, 𑀅𑀤𑀼𑀓𑁆𑀔𑀫𑀲𑀼𑀔𑀁 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀁 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀲𑀫𑁆𑀫𑀸𑀲𑀫𑀸𑀥𑀺’’.

𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀅𑀭𑀺𑀬𑀲𑀘𑁆𑀘𑀁’’.

𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀁.

𑁨. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀁

𑁨𑁦𑁬. 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑁋 𑀤𑀼𑀓𑁆𑀔𑀁, 𑀤𑀼𑀓𑁆𑀔𑀲𑀫𑀼𑀤𑀬𑁄, 𑀤𑀼𑀓𑁆𑀔𑀦𑀺𑀭𑁄𑀥𑁄, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸.

𑀢𑀢𑁆𑀣 𑀓𑀢𑀫𑁄 𑀤𑀼𑀓𑁆𑀔𑀲𑀫𑀼𑀤𑀬𑁄? 𑀢𑀡𑁆𑀳𑀸 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀤𑀼𑀓𑁆𑀔𑀲𑀫𑀼𑀤𑀬𑁄’’.

𑀢𑀢𑁆𑀣 𑀓𑀢𑀫𑀁 𑀤𑀼𑀓𑁆𑀔𑀁? 𑀅𑀯𑀲𑁂𑀲𑀸 𑀘 𑀓𑀺𑀮𑁂𑀲𑀸, 𑀅𑀯𑀲𑁂𑀲𑀸 𑀘 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀢𑀻𑀡𑀺 𑀘 𑀓𑀼𑀲𑀮𑀫𑀽𑀮𑀸𑀦𑀺 𑀲𑀸𑀲𑀯𑀸𑀦𑀺, 𑀅𑀯𑀲𑁂𑀲𑀸 𑀘 𑀲𑀸𑀲𑀯𑀸 𑀓𑀼𑀲𑀮𑀸 𑀥𑀫𑁆𑀫𑀸, 𑀲𑀸𑀲𑀯𑀸 𑀘 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀧𑀸𑀓𑀸, 𑀬𑁂 𑀘 𑀥𑀫𑁆𑀫𑀸 𑀓𑀺𑀭𑀺𑀬𑀸 𑀦𑁂𑀯 𑀓𑀼𑀲𑀮𑀸 𑀦𑀸𑀓𑀼𑀲𑀮𑀸 𑀦 𑀘 𑀓𑀫𑁆𑀫𑀯𑀺𑀧𑀸𑀓𑀸, 𑀲𑀩𑁆𑀩𑀜𑁆𑀘 𑀭𑀽𑀧𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀤𑀼𑀓𑁆𑀔𑀁’’.

𑀢𑀢𑁆𑀣 𑀓𑀢𑀫𑁄 𑀤𑀼𑀓𑁆𑀔𑀦𑀺𑀭𑁄𑀥𑁄? 𑀢𑀡𑁆𑀳𑀸𑀬 𑀧𑀳𑀸𑀦𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀤𑀼𑀓𑁆𑀔𑀦𑀺𑀭𑁄𑀥𑁄’’.

𑀢𑀢𑁆𑀣 𑀓𑀢𑀫𑀸 𑀲𑀫𑁆𑀫𑀸𑀤𑀺𑀝𑁆𑀞𑀺? 𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸…𑀧𑁂… 𑀅𑀫𑁄𑀳𑁄 𑀥𑀫𑁆𑀫𑀯𑀺𑀘𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀫𑀕𑁆𑀕𑀗𑁆𑀕𑀁 𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀲𑀫𑁆𑀫𑀸𑀤𑀺𑀝𑁆𑀞𑀺’’.

𑀢𑀢𑁆𑀣 𑀓𑀢𑀫𑁄 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄? 𑀬𑁄 𑀢𑀓𑁆𑀓𑁄 𑀯𑀺𑀢𑀓𑁆𑀓𑁄…𑀧𑁂… 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀫𑀕𑁆𑀕𑀗𑁆𑀕𑀁 𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄’’.

𑀢𑀢𑁆𑀣 𑀓𑀢𑀫𑀸 𑀲𑀫𑁆𑀫𑀸𑀯𑀸𑀘𑀸? 𑀬𑀸 𑀘𑀢𑀽𑀳𑀺 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀳𑀺 𑀆𑀭𑀢𑀺 𑀯𑀺𑀭𑀢𑀺 𑀧𑀝𑀺𑀯𑀺𑀭𑀢𑀺 𑀯𑁂𑀭𑀫𑀡𑀻 [𑀯𑁂𑀭𑀫𑀡𑀺 (𑀓.) 𑀏𑀯𑀫𑀼𑀧𑀭𑀺𑀧𑀺] 𑀅𑀓𑀺𑀭𑀺𑀬𑀸 𑀅𑀓𑀭𑀡𑀁 𑀅𑀦𑀚𑁆𑀛𑀸𑀧𑀢𑁆𑀢𑀺 𑀯𑁂𑀮𑀸𑀅𑀦𑀢𑀺𑀓𑁆𑀓𑀫𑁄 𑀲𑁂𑀢𑀼𑀖𑀸𑀢𑁄 𑀲𑀫𑁆𑀫𑀸𑀯𑀸𑀘𑀸 𑀫𑀕𑁆𑀕𑀗𑁆𑀕𑀁 𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀲𑀫𑁆𑀫𑀸𑀯𑀸𑀘𑀸’’.

𑀢𑀢𑁆𑀣 𑀓𑀢𑀫𑁄 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄? 𑀬𑀸 𑀢𑀻𑀳𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀳𑀺 𑀆𑀭𑀢𑀺 𑀯𑀺𑀭𑀢𑀺 𑀧𑀝𑀺𑀯𑀺𑀭𑀢𑀺 𑀯𑁂𑀭𑀫𑀡𑀻 𑀅𑀓𑀺𑀭𑀺𑀬𑀸 𑀅𑀓𑀭𑀡𑀁 𑀅𑀦𑀚𑁆𑀛𑀸𑀧𑀢𑁆𑀢𑀺 𑀯𑁂𑀮𑀸𑀅𑀦𑀢𑀺𑀓𑁆𑀓𑀫𑁄 𑀲𑁂𑀢𑀼𑀖𑀸𑀢𑁄 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀫𑀕𑁆𑀕𑀗𑁆𑀕𑀁 𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄’’.

𑀢𑀢𑁆𑀣 𑀓𑀢𑀫𑁄 𑀲𑀫𑁆𑀫𑀸𑀆𑀚𑀻𑀯𑁄? 𑀬𑀸 𑀫𑀺𑀘𑁆𑀙𑀸 𑀆𑀚𑀻𑀯𑀸 𑀆𑀭𑀢𑀺 𑀯𑀺𑀭𑀢𑀺 𑀧𑀝𑀺𑀯𑀺𑀭𑀢𑀺 𑀯𑁂𑀭𑀫𑀡𑀻 𑀅𑀓𑀺𑀭𑀺𑀬𑀸 𑀅𑀓𑀭𑀡𑀁 𑀅𑀦𑀚𑁆𑀛𑀸𑀧𑀢𑁆𑀢𑀺 𑀯𑁂𑀮𑀸𑀅𑀦𑀢𑀺𑀓𑁆𑀓𑀫𑁄 𑀲𑁂𑀢𑀼𑀖𑀸𑀢𑁄 𑀲𑀫𑁆𑀫𑀸𑀆𑀚𑀻𑀯𑁄 𑀫𑀕𑁆𑀕𑀗𑁆𑀕𑀁 𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀲𑀫𑁆𑀫𑀸𑀆𑀚𑀻𑀯𑁄’’.

𑀢𑀢𑁆𑀣 𑀓𑀢𑀫𑁄 𑀲𑀫𑁆𑀫𑀸𑀯𑀸𑀬𑀸𑀫𑁄? 𑀬𑁄 𑀘𑁂𑀢𑀲𑀺𑀓𑁄 𑀯𑀻𑀭𑀺𑀬𑀸𑀭𑀫𑁆𑀪𑁄 [𑀯𑀺𑀭𑀺𑀬𑀸𑀭𑀫𑁆𑀪𑁄 (𑀲𑀻. 𑀲𑁆𑀬𑀸.)] …𑀧𑁂… 𑀲𑀫𑁆𑀫𑀸𑀯𑀸𑀬𑀸𑀫𑁄 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀫𑀕𑁆𑀕𑀗𑁆𑀕𑀁 𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀲𑀫𑁆𑀫𑀸𑀯𑀸𑀬𑀸𑀫𑁄’’.

𑀢𑀢𑁆𑀣 𑀓𑀢𑀫𑀸 𑀲𑀫𑁆𑀫𑀸𑀲𑀢𑀺? 𑀬𑀸 𑀲𑀢𑀺 𑀅𑀦𑀼𑀲𑁆𑀲𑀢𑀺…𑀧𑁂… 𑀲𑀫𑁆𑀫𑀸𑀲𑀢𑀺 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀫𑀕𑁆𑀕𑀗𑁆𑀕𑀁 𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀲𑀫𑁆𑀫𑀸𑀲𑀢𑀺’’.

𑀢𑀢𑁆𑀣 𑀓𑀢𑀫𑁄 𑀲𑀫𑁆𑀫𑀸𑀲𑀫𑀸𑀥𑀺? 𑀬𑀸 𑀘𑀺𑀢𑁆𑀢𑀲𑁆𑀲 𑀞𑀺𑀢𑀺 𑀲𑀡𑁆𑀞𑀺𑀢𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀫𑀕𑁆𑀕𑀗𑁆𑀕𑀁 𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀲𑀫𑁆𑀫𑀸𑀲𑀫𑀸𑀥𑀺’’. 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’. 𑀅𑀯𑀲𑁂𑀲𑀸 𑀥𑀫𑁆𑀫𑀸 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀲𑀫𑁆𑀧𑀬𑀼𑀢𑁆𑀢𑀸.

𑁨𑁦𑁭. 𑀢𑀢𑁆𑀣 𑀓𑀢𑀫𑁄 𑀤𑀼𑀓𑁆𑀔𑀲𑀫𑀼𑀤𑀬𑁄? 𑀢𑀡𑁆𑀳𑀸 𑀘 𑀅𑀯𑀲𑁂𑀲𑀸 𑀘 𑀓𑀺𑀮𑁂𑀲𑀸 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀤𑀼𑀓𑁆𑀔𑀲𑀫𑀼𑀤𑀬𑁄’’.

𑀢𑀢𑁆𑀣 𑀓𑀢𑀫𑀁 𑀤𑀼𑀓𑁆𑀔𑀁? 𑀅𑀯𑀲𑁂𑀲𑀸 𑀘 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀢𑀻𑀡𑀺 𑀘 𑀓𑀼𑀲𑀮𑀫𑀽𑀮𑀸𑀦𑀺 𑀲𑀸𑀲𑀯𑀸𑀦𑀺, 𑀅𑀯𑀲𑁂𑀲𑀸 𑀘 𑀲𑀸𑀲𑀯𑀸 𑀓𑀼𑀲𑀮𑀸 𑀥𑀫𑁆𑀫𑀸, 𑀲𑀸𑀲𑀯𑀸 𑀘 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀧𑀸𑀓𑀸, 𑀬𑁂 𑀘 𑀥𑀫𑁆𑀫𑀸 𑀓𑀺𑀭𑀺𑀬𑀸 𑀦𑁂𑀯 𑀓𑀼𑀲𑀮𑀸 𑀦𑀸𑀓𑀼𑀲𑀮𑀸 𑀦 𑀘 𑀓𑀫𑁆𑀫𑀯𑀺𑀧𑀸𑀓𑀸, 𑀲𑀩𑁆𑀩𑀜𑁆𑀘 𑀭𑀽𑀧𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀤𑀼𑀓𑁆𑀔𑀁’’.

𑀢𑀢𑁆𑀣 𑀓𑀢𑀫𑁄 𑀤𑀼𑀓𑁆𑀔𑀦𑀺𑀭𑁄𑀥𑁄? 𑀢𑀡𑁆𑀳𑀸𑀬 𑀘, 𑀅𑀯𑀲𑁂𑀲𑀸𑀦𑀜𑁆𑀘 𑀓𑀺𑀮𑁂𑀲𑀸𑀦𑀁 𑀧𑀳𑀸𑀦𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀤𑀼𑀓𑁆𑀔𑀦𑀺𑀭𑁄𑀥𑁄’’.

𑀢𑀢𑁆𑀣 𑀓𑀢𑀫𑀸 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸? 𑀇𑀥 𑀪𑀺𑀓𑁆𑀔𑀼 𑀬𑀲𑁆𑀫𑀺𑀁 𑀲𑀫𑀬𑁂 𑀮𑁄𑀓𑀼𑀢𑁆𑀢𑀭𑀁 𑀛𑀸𑀦𑀁 𑀪𑀸𑀯𑁂𑀢𑀺 𑀦𑀺𑀬𑁆𑀬𑀸𑀦𑀺𑀓𑀁 𑀅𑀧𑀘𑀬𑀕𑀸𑀫𑀺𑀁 𑀤𑀺𑀝𑁆𑀞𑀺𑀕𑀢𑀸𑀦𑀁 𑀧𑀳𑀸𑀦𑀸𑀬 𑀧𑀞𑀫𑀸𑀬 𑀪𑀽𑀫𑀺𑀬𑀸 𑀧𑀢𑁆𑀢𑀺𑀬𑀸, 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀤𑀼𑀓𑁆𑀔𑀧𑀝𑀺𑀧𑀤𑀁 𑀤𑀦𑁆𑀥𑀸𑀪𑀺𑀜𑁆𑀜𑀁, 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀳𑁄𑀢𑀺 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑁋 ‘‘𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’. 𑀅𑀯𑀲𑁂𑀲𑀸 𑀥𑀫𑁆𑀫𑀸 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀲𑀫𑁆𑀧𑀬𑀼𑀢𑁆𑀢𑀸.

𑁨𑁦𑁮. 𑀢𑀢𑁆𑀣 𑀓𑀢𑀫𑁄 𑀤𑀼𑀓𑁆𑀔𑀲𑀫𑀼𑀤𑀬𑁄? 𑀢𑀡𑁆𑀳𑀸 𑀘 𑀅𑀯𑀲𑁂𑀲𑀸 𑀘 𑀓𑀺𑀮𑁂𑀲𑀸, 𑀅𑀯𑀲𑁂𑀲𑀸 𑀘 𑀅𑀓𑀼𑀲𑀮𑀸 𑀥𑀫𑁆𑀫𑀸 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀤𑀼𑀓𑁆𑀔𑀲𑀫𑀼𑀤𑀬𑁄’’.

𑀢𑀢𑁆𑀣 𑀓𑀢𑀫𑀁 𑀤𑀼𑀓𑁆𑀔𑀁? 𑀢𑀻𑀡𑀺 𑀘 𑀓𑀼𑀲𑀮𑀫𑀽𑀮𑀸𑀦𑀺 𑀲𑀸𑀲𑀯𑀸𑀦𑀺, 𑀅𑀯𑀲𑁂𑀲𑀸 𑀘 𑀲𑀸𑀲𑀯𑀸 𑀓𑀼𑀲𑀮𑀸 𑀥𑀫𑁆𑀫𑀸, 𑀲𑀸𑀲𑀯𑀸 𑀘 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀧𑀸𑀓𑀸, 𑀬𑁂 𑀘 𑀥𑀫𑁆𑀫𑀸 𑀓𑀺𑀭𑀺𑀬𑀸 𑀦𑁂𑀯 𑀓𑀼𑀲𑀮𑀸 𑀦𑀸𑀓𑀼𑀲𑀮𑀸 𑀦 𑀘 𑀓𑀫𑁆𑀫𑀯𑀺𑀧𑀸𑀓𑀸, 𑀲𑀩𑁆𑀩𑀜𑁆𑀘 𑀭𑀽𑀧𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀤𑀼𑀓𑁆𑀔𑀁’’.

𑀢𑀢𑁆𑀣 𑀓𑀢𑀫𑁄 𑀤𑀼𑀓𑁆𑀔𑀦𑀺𑀭𑁄𑀥𑁄? 𑀢𑀡𑁆𑀳𑀸𑀬 𑀘, 𑀅𑀯𑀲𑁂𑀲𑀸𑀦𑀜𑁆𑀘 𑀓𑀺𑀮𑁂𑀲𑀸𑀦𑀁, 𑀅𑀯𑀲𑁂𑀲𑀸𑀦𑀜𑁆𑀘 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀤𑀼𑀓𑁆𑀔𑀦𑀺𑀭𑁄𑀥𑁄’’.

𑀢𑀢𑁆𑀣 𑀓𑀢𑀫𑀸 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸? 𑀇𑀥 𑀪𑀺𑀓𑁆𑀔𑀼 𑀬𑀲𑁆𑀫𑀺𑀁 𑀲𑀫𑀬𑁂 𑀮𑁄𑀓𑀼𑀢𑁆𑀢𑀭𑀁 𑀛𑀸𑀦𑀁 𑀪𑀸𑀯𑁂𑀢𑀺 𑀦𑀺𑀬𑁆𑀬𑀸𑀦𑀺𑀓𑀁 𑀅𑀧𑀘𑀬𑀕𑀸𑀫𑀺𑀁 𑀤𑀺𑀝𑁆𑀞𑀺𑀕𑀢𑀸𑀦𑀁 𑀧𑀳𑀸𑀦𑀸𑀬 𑀧𑀞𑀫𑀸𑀬 𑀪𑀽𑀫𑀺𑀬𑀸 𑀧𑀢𑁆𑀢𑀺𑀬𑀸 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀤𑀼𑀓𑁆𑀔𑀧𑀝𑀺𑀧𑀤𑀁 𑀤𑀦𑁆𑀥𑀸𑀪𑀺𑀜𑁆𑀜𑀁, 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀳𑁄𑀢𑀺 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺. 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’. 𑀅𑀯𑀲𑁂𑀲𑀸 𑀥𑀫𑁆𑀫𑀸 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀲𑀫𑁆𑀧𑀬𑀼𑀢𑁆𑀢𑀸.

𑁨𑁦𑁯. 𑀢𑀢𑁆𑀣 𑀓𑀢𑀫𑁄 𑀤𑀼𑀓𑁆𑀔𑀲𑀫𑀼𑀤𑀬𑁄? 𑀢𑀡𑁆𑀳𑀸 𑀘 𑀅𑀯𑀲𑁂𑀲𑀸 𑀘 𑀓𑀺𑀮𑁂𑀲𑀸, 𑀅𑀯𑀲𑁂𑀲𑀸 𑀘 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀢𑀻𑀡𑀺 𑀘 𑀓𑀼𑀲𑀮𑀫𑀽𑀮𑀸𑀦𑀺 𑀲𑀸𑀲𑀯𑀸𑀦𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀤𑀼𑀓𑁆𑀔𑀲𑀫𑀼𑀤𑀬𑁄’’.

𑀢𑀢𑁆𑀣 𑀓𑀢𑀫𑀁 𑀤𑀼𑀓𑁆𑀔𑀁? 𑀅𑀯𑀲𑁂𑀲𑀸 𑀘 𑀲𑀸𑀲𑀯𑀸 𑀓𑀼𑀲𑀮𑀸 𑀥𑀫𑁆𑀫𑀸, 𑀲𑀸𑀲𑀯𑀸 𑀘 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀧𑀸𑀓𑀸, 𑀬𑁂 𑀘 𑀥𑀫𑁆𑀫𑀸 𑀓𑀺𑀭𑀺𑀬𑀸 𑀦𑁂𑀯 𑀓𑀼𑀲𑀮𑀸 𑀦𑀸𑀓𑀼𑀲𑀮𑀸 𑀦 𑀘 𑀓𑀫𑁆𑀫𑀯𑀺𑀧𑀸𑀓𑀸, 𑀲𑀩𑁆𑀩𑀜𑁆𑀘 𑀭𑀽𑀧𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀤𑀼𑀓𑁆𑀔𑀁’’.

𑀢𑀢𑁆𑀣 𑀓𑀢𑀫𑁄 𑀤𑀼𑀓𑁆𑀔𑀦𑀺𑀭𑁄𑀥𑁄? 𑀢𑀡𑁆𑀳𑀸𑀬 𑀘, 𑀅𑀯𑀲𑁂𑀲𑀸𑀦𑀜𑁆𑀘 𑀓𑀺𑀮𑁂𑀲𑀸𑀦𑀁, 𑀅𑀯𑀲𑁂𑀲𑀸𑀦𑀜𑁆𑀘 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁, 𑀢𑀺𑀡𑁆𑀡𑀜𑁆𑀘 𑀓𑀼𑀲𑀮𑀫𑀽𑀮𑀸𑀦𑀁 𑀲𑀸𑀲𑀯𑀸𑀦𑀁 𑀧𑀳𑀸𑀦𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀤𑀼𑀓𑁆𑀔𑀦𑀺𑀭𑁄𑀥𑁄’’.

𑁨𑁧𑁦. 𑀢𑀢𑁆𑀣 𑀓𑀢𑀫𑁄 𑀤𑀼𑀓𑁆𑀔𑀲𑀫𑀼𑀤𑀬𑁄? 𑀢𑀡𑁆𑀳𑀸 𑀘, 𑀅𑀯𑀲𑁂𑀲𑀸 𑀘 𑀓𑀺𑀮𑁂𑀲𑀸, 𑀅𑀯𑀲𑁂𑀲𑀸 𑀘 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀢𑀻𑀡𑀺 𑀘 𑀓𑀼𑀲𑀮𑀫𑀽𑀮𑀸𑀦𑀺 𑀲𑀸𑀲𑀯𑀸𑀦𑀺, 𑀅𑀯𑀲𑁂𑀲𑀸 𑀘 𑀲𑀸𑀲𑀯𑀸 𑀓𑀼𑀲𑀮𑀸 𑀥𑀫𑁆𑀫𑀸 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀤𑀼𑀓𑁆𑀔𑀲𑀫𑀼𑀤𑀬𑁄’’.

𑀢𑀢𑁆𑀣 𑀓𑀢𑀫𑀁 𑀤𑀼𑀓𑁆𑀔𑀁? 𑀲𑀸𑀲𑀯𑀸 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀧𑀸𑀓𑀸, 𑀬𑁂 𑀘 𑀥𑀫𑁆𑀫𑀸 𑀓𑀺𑀭𑀺𑀬𑀸 𑀦𑁂𑀯 𑀓𑀼𑀲𑀮𑀸 𑀦𑀸𑀓𑀼𑀲𑀮𑀸 𑀦 𑀘 𑀓𑀫𑁆𑀫𑀯𑀺𑀧𑀸𑀓𑀸, 𑀲𑀩𑁆𑀩𑀜𑁆𑀘 𑀭𑀽𑀧𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀤𑀼𑀓𑁆𑀔𑀁’’.

𑀢𑀢𑁆𑀣 𑀓𑀢𑀫𑁄 𑀤𑀼𑀓𑁆𑀔𑀦𑀺𑀭𑁄𑀥𑁄? 𑀢𑀡𑁆𑀳𑀸𑀬 𑀘, 𑀅𑀯𑀲𑁂𑀲𑀸𑀦𑀜𑁆𑀘 𑀓𑀺𑀮𑁂𑀲𑀸𑀦𑀁, 𑀅𑀯𑀲𑁂𑀲𑀸𑀦𑀜𑁆𑀘 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁, 𑀢𑀺𑀡𑁆𑀡𑀜𑁆𑀘 𑀓𑀼𑀲𑀮𑀫𑀽𑀮𑀸𑀦𑀁 𑀲𑀸𑀲𑀯𑀸𑀦𑀁, 𑀅𑀯𑀲𑁂𑀲𑀸𑀦𑀜𑁆𑀘 𑀲𑀸𑀲𑀯𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀤𑀼𑀓𑁆𑀔𑀦𑀺𑀭𑁄𑀥𑁄’’.

𑀢𑀢𑁆𑀣 𑀓𑀢𑀫𑀸 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸? 𑀇𑀥 𑀪𑀺𑀓𑁆𑀔𑀼 𑀬𑀲𑁆𑀫𑀺𑀁 𑀲𑀫𑀬𑁂 𑀮𑁄𑀓𑀼𑀢𑁆𑀢𑀭𑀁 𑀛𑀸𑀦𑀁 𑀪𑀸𑀯𑁂𑀢𑀺 𑀦𑀺𑀬𑁆𑀬𑀸𑀦𑀺𑀓𑀁 𑀅𑀧𑀘𑀬𑀕𑀸𑀫𑀺𑀁 𑀤𑀺𑀝𑁆𑀞𑀺𑀕𑀢𑀸𑀦𑀁 𑀧𑀳𑀸𑀦𑀸𑀬 𑀧𑀞𑀫𑀸𑀬 𑀪𑀽𑀫𑀺𑀬𑀸 𑀧𑀢𑁆𑀢𑀺𑀬𑀸, 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀤𑀼𑀓𑁆𑀔𑀧𑀝𑀺𑀧𑀤𑀁 𑀤𑀦𑁆𑀥𑀸𑀪𑀺𑀜𑁆𑀜𑀁, 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀳𑁄𑀢𑀺 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺. 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’. 𑀅𑀯𑀲𑁂𑀲𑀸 𑀥𑀫𑁆𑀫𑀸 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀲𑀫𑁆𑀧𑀬𑀼𑀢𑁆𑀢𑀸.

𑁨𑁧𑁧. 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑁋 𑀤𑀼𑀓𑁆𑀔𑀁, 𑀤𑀼𑀓𑁆𑀔𑀲𑀫𑀼𑀤𑀬𑁄, 𑀤𑀼𑀓𑁆𑀔𑀦𑀺𑀭𑁄𑀥𑁄, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸.

𑀢𑀢𑁆𑀣 𑀓𑀢𑀫𑀸 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸? 𑀇𑀥 𑀪𑀺𑀓𑁆𑀔𑀼 𑀬𑀲𑁆𑀫𑀺𑀁 𑀲𑀫𑀬𑁂 𑀮𑁄𑀓𑀼𑀢𑁆𑀢𑀭𑀁 𑀛𑀸𑀦𑀁 𑀪𑀸𑀯𑁂𑀢𑀺 𑀦𑀺𑀬𑁆𑀬𑀸𑀦𑀺𑀓𑀁 𑀅𑀧𑀘𑀬𑀕𑀸𑀫𑀺𑀁 𑀤𑀺𑀝𑁆𑀞𑀺𑀕𑀢𑀸𑀦𑀁 𑀧𑀳𑀸𑀦𑀸𑀬 𑀧𑀞𑀫𑀸𑀬 𑀪𑀽𑀫𑀺𑀬𑀸 𑀧𑀢𑁆𑀢𑀺𑀬𑀸, 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀤𑀼𑀓𑁆𑀔𑀧𑀝𑀺𑀧𑀤𑀁 𑀤𑀦𑁆𑀥𑀸𑀪𑀺𑀜𑁆𑀜𑀁, 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀜𑁆𑀘𑀗𑁆𑀕𑀺𑀓𑁄 𑀫𑀕𑁆𑀕𑁄 𑀳𑁄𑀢𑀺 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄, 𑀲𑀫𑁆𑀫𑀸𑀯𑀸𑀬𑀸𑀫𑁄, 𑀲𑀫𑁆𑀫𑀸𑀲𑀢𑀺, 𑀲𑀫𑁆𑀫𑀸𑀲𑀫𑀸𑀥𑀺.

𑀢𑀢𑁆𑀣 𑀓𑀢𑀫𑁄 𑀲𑀫𑁆𑀫𑀸𑀯𑀸𑀬𑀸𑀫𑁄? 𑀬𑁄 𑀘𑁂𑀢𑀲𑀺𑀓𑁄 𑀯𑀻𑀭𑀺𑀬𑀸𑀭𑀫𑁆𑀪𑁄…𑀧𑁂… 𑀲𑀫𑁆𑀫𑀸𑀯𑀸𑀬𑀸𑀫𑁄 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀫𑀕𑁆𑀕𑀗𑁆𑀕𑀁 𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀲𑀫𑁆𑀫𑀸𑀯𑀸𑀬𑀸𑀫𑁄’’.

𑀢𑀢𑁆𑀣 𑀓𑀢𑀫𑁄 𑀲𑀫𑁆𑀫𑀸𑀲𑀫𑀸𑀥𑀺? 𑀬𑀸 𑀘𑀺𑀢𑁆𑀢𑀲𑁆𑀲 𑀞𑀺𑀢𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀫𑀕𑁆𑀕𑀗𑁆𑀕𑀁 𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀲𑀫𑁆𑀫𑀸𑀲𑀫𑀸𑀥𑀺’’. 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’. 𑀅𑀯𑀲𑁂𑀲𑀸 𑀥𑀫𑁆𑀫𑀸 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀲𑀫𑁆𑀧𑀬𑀼𑀢𑁆𑀢𑀸.

𑁨𑁧𑁨. 𑀢𑀢𑁆𑀣 𑀓𑀢𑀫𑁄 𑀤𑀼𑀓𑁆𑀔𑀲𑀫𑀼𑀤𑀬𑁄? 𑀢𑀡𑁆𑀳𑀸 𑀘, 𑀅𑀯𑀲𑁂𑀲𑀸 𑀘 𑀓𑀺𑀮𑁂𑀲𑀸, 𑀅𑀯𑀲𑁂𑀲𑀸 𑀘 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀢𑀻𑀡𑀺 𑀘 𑀓𑀼𑀲𑀮𑀫𑀽𑀮𑀸𑀦𑀺 𑀲𑀸𑀲𑀯𑀸𑀦𑀺, 𑀅𑀯𑀲𑁂𑀲𑀸 𑀘 𑀲𑀸𑀲𑀯𑀸 𑀓𑀼𑀲𑀮𑀸 𑀥𑀫𑁆𑀫𑀸 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀤𑀼𑀓𑁆𑀔𑀲𑀫𑀼𑀤𑀬𑁄’’.

𑀢𑀢𑁆𑀣 𑀓𑀢𑀫𑀸 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸? 𑀇𑀥 𑀪𑀺𑀓𑁆𑀔𑀼 𑀬𑀲𑁆𑀫𑀺𑀁 𑀲𑀫𑀬𑁂 𑀮𑁄𑀓𑀼𑀢𑁆𑀢𑀭𑀁 𑀛𑀸𑀦𑀁 𑀪𑀸𑀯𑁂𑀢𑀺 𑀦𑀺𑀬𑁆𑀬𑀸𑀦𑀺𑀓𑀁 𑀅𑀧𑀘𑀬𑀕𑀸𑀫𑀺𑀁 𑀤𑀺𑀝𑁆𑀞𑀺𑀕𑀢𑀸𑀦𑀁 𑀧𑀳𑀸𑀦𑀸𑀬 𑀧𑀞𑀫𑀸𑀬 𑀪𑀽𑀫𑀺𑀬𑀸 𑀧𑀢𑁆𑀢𑀺𑀬𑀸, 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀤𑀼𑀓𑁆𑀔𑀧𑀝𑀺𑀧𑀤𑀁 𑀤𑀦𑁆𑀥𑀸𑀪𑀺𑀜𑁆𑀜𑀁, 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀜𑁆𑀘𑀗𑁆𑀕𑀺𑀓𑁄 𑀫𑀕𑁆𑀕𑁄 𑀳𑁄𑀢𑀺 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄, 𑀲𑀫𑁆𑀫𑀸𑀯𑀸𑀬𑀸𑀫𑁄, 𑀲𑀫𑁆𑀫𑀸𑀲𑀢𑀺, 𑀲𑀫𑁆𑀫𑀸𑀲𑀫𑀸𑀥𑀺. 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’. 𑀅𑀯𑀲𑁂𑀲𑀸 𑀥𑀫𑁆𑀫𑀸 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀲𑀫𑁆𑀧𑀬𑀼𑀢𑁆𑀢𑀸.

𑁨𑁧𑁩. 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑁋 𑀤𑀼𑀓𑁆𑀔𑀁, 𑀤𑀼𑀓𑁆𑀔𑀲𑀫𑀼𑀤𑀬𑁄, 𑀤𑀼𑀓𑁆𑀔𑀦𑀺𑀭𑁄𑀥𑁄, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸.

𑀢𑀢𑁆𑀣 𑀓𑀢𑀫𑀸 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸? 𑀇𑀥 𑀪𑀺𑀓𑁆𑀔𑀼 𑀬𑀲𑁆𑀫𑀺𑀁 𑀲𑀫𑀬𑁂 𑀮𑁄𑀓𑀼𑀢𑁆𑀢𑀭𑀁 𑀛𑀸𑀦𑀁 𑀪𑀸𑀯𑁂𑀢𑀺 𑀦𑀺𑀬𑁆𑀬𑀸𑀦𑀺𑀓𑀁 𑀅𑀧𑀘𑀬𑀕𑀸𑀫𑀺𑀁 𑀤𑀺𑀝𑁆𑀞𑀺𑀕𑀢𑀸𑀦𑀁 𑀧𑀳𑀸𑀦𑀸𑀬 𑀧𑀞𑀫𑀸𑀬 𑀪𑀽𑀫𑀺𑀬𑀸 𑀧𑀢𑁆𑀢𑀺𑀬𑀸 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀤𑀼𑀓𑁆𑀔𑀧𑀝𑀺𑀧𑀤𑀁 𑀤𑀦𑁆𑀥𑀸𑀪𑀺𑀜𑁆𑀜𑀁, 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺…𑀧𑁂… 𑀅𑀯𑀺𑀓𑁆𑀔𑁂𑀧𑁄 𑀳𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’.

𑁨𑁧𑁪. 𑀢𑀢𑁆𑀣 𑀓𑀢𑀫𑁄 𑀤𑀼𑀓𑁆𑀔𑀲𑀫𑀼𑀤𑀬𑁄? 𑀢𑀡𑁆𑀳𑀸 𑀘, 𑀅𑀯𑀲𑁂𑀲𑀸 𑀘 𑀓𑀺𑀮𑁂𑀲𑀸, 𑀅𑀯𑀲𑁂𑀲𑀸 𑀘 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀢𑀻𑀡𑀺 𑀘 𑀓𑀼𑀲𑀮𑀫𑀽𑀮𑀸𑀦𑀺 𑀲𑀸𑀲𑀯𑀸𑀦𑀺, 𑀅𑀯𑀲𑁂𑀲𑀸 𑀘 𑀲𑀸𑀲𑀯𑀸 𑀓𑀼𑀲𑀮𑀸 𑀥𑀫𑁆𑀫𑀸 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀤𑀼𑀓𑁆𑀔𑀲𑀫𑀼𑀤𑀬𑁄’’.

𑀢𑀢𑁆𑀣 𑀓𑀢𑀫𑀸 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸? 𑀇𑀥 𑀪𑀺𑀓𑁆𑀔𑀼 𑀬𑀲𑁆𑀫𑀺𑀁 𑀲𑀫𑀬𑁂 𑀮𑁄𑀓𑀼𑀢𑁆𑀢𑀭𑀁 𑀛𑀸𑀦𑀁 𑀪𑀸𑀯𑁂𑀢𑀺 𑀦𑀺𑀬𑁆𑀬𑀸𑀦𑀺𑀓𑀁 𑀅𑀧𑀘𑀬𑀕𑀸𑀫𑀺𑀁 𑀤𑀺𑀝𑁆𑀞𑀺𑀕𑀢𑀸𑀦𑀁 𑀧𑀳𑀸𑀦𑀸𑀬 𑀧𑀞𑀫𑀸𑀬 𑀪𑀽𑀫𑀺𑀬𑀸 𑀧𑀢𑁆𑀢𑀺𑀬𑀸 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀤𑀼𑀓𑁆𑀔𑀧𑀝𑀺𑀧𑀤𑀁 𑀤𑀦𑁆𑀥𑀸𑀪𑀺𑀜𑁆𑀜𑀁, 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺…𑀧𑁂… 𑀅𑀯𑀺𑀓𑁆𑀔𑁂𑀧𑁄 𑀳𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’.

𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀁.

𑁩. 𑀧𑀜𑁆𑀳𑀸𑀧𑀼𑀘𑁆𑀙𑀓𑀁

𑁨𑁧𑁫. 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑁋 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁, 𑀤𑀼𑀓𑁆𑀔𑀲𑀫𑀼𑀤𑀬𑀁 𑀅𑀭𑀺𑀬𑀲𑀘𑁆𑀘𑀁, 𑀤𑀼𑀓𑁆𑀔𑀦𑀺𑀭𑁄𑀥𑀁 𑀅𑀭𑀺𑀬𑀲𑀘𑁆𑀘𑀁, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀅𑀭𑀺𑀬𑀲𑀘𑁆𑀘𑀁.

𑁨𑁧𑁬. 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀓𑀢𑀺 𑀓𑀼𑀲𑀮𑀸, 𑀓𑀢𑀺 𑀅𑀓𑀼𑀲𑀮𑀸, 𑀓𑀢𑀺 𑀅𑀩𑁆𑀬𑀸𑀓𑀢𑀸…𑀧𑁂… 𑀓𑀢𑀺 𑀲𑀭𑀡𑀸, 𑀓𑀢𑀺 𑀅𑀭𑀡𑀸?

𑁧. 𑀢𑀺𑀓𑀁

𑁨𑁧𑁭. 𑀲𑀫𑀼𑀤𑀬𑀲𑀘𑁆𑀘𑀁 𑀅𑀓𑀼𑀲𑀮𑀁. 𑀫𑀕𑁆𑀕𑀲𑀘𑁆𑀘𑀁 𑀓𑀼𑀲𑀮𑀁. 𑀦𑀺𑀭𑁄𑀥𑀲𑀘𑁆𑀘𑀁 𑀅𑀩𑁆𑀬𑀸𑀓𑀢𑀁. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀓𑀼𑀲𑀮𑀁, 𑀲𑀺𑀬𑀸 𑀅𑀓𑀼𑀲𑀮𑀁, 𑀲𑀺𑀬𑀸 𑀅𑀩𑁆𑀬𑀸𑀓𑀢𑀁. 𑀤𑁆𑀯𑁂 𑀲𑀘𑁆𑀘𑀸 𑀲𑀺𑀬𑀸 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸, 𑀲𑀺𑀬𑀸 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸. 𑀦𑀺𑀭𑁄𑀥𑀲𑀘𑁆𑀘𑀁 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢’’𑀦𑁆𑀢𑀺𑀧𑀺, ‘‘𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢’’𑀦𑁆𑀢𑀺𑀧𑀺, ‘‘𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢’’𑀦𑁆𑀢𑀺𑀧𑀺. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀁, 𑀲𑀺𑀬𑀸 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀁, 𑀲𑀺𑀬𑀸 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀁, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢’’𑀦𑁆𑀢𑀺𑀧𑀺, ‘‘𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢’’𑀦𑁆𑀢𑀺𑀧𑀺, ‘‘𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢’’𑀦𑁆𑀢𑀺𑀧𑀺. 𑀤𑁆𑀯𑁂 𑀲𑀘𑁆𑀘𑀸 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸. 𑀦𑀺𑀭𑁄𑀥𑀲𑀘𑁆𑀘𑀁 𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀁. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀯𑀺𑀧𑀸𑀓𑀁, 𑀲𑀺𑀬𑀸 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀁, 𑀲𑀺𑀬𑀸 𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀁. 𑀲𑀫𑀼𑀤𑀬𑀲𑀘𑁆𑀘𑀁 𑀅𑀦𑀼𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀁. 𑀤𑁆𑀯𑁂 𑀲𑀘𑁆𑀘𑀸 𑀅𑀦𑀼𑀧𑀸𑀤𑀺𑀦𑁆𑀦𑀅𑀦𑀼𑀧𑀸𑀤𑀸𑀦𑀺𑀬𑀸. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀁, 𑀲𑀺𑀬𑀸 𑀅𑀦𑀼𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀁.

𑀲𑀫𑀼𑀤𑀬𑀲𑀘𑁆𑀘𑀁 𑀲𑀁𑀓𑀺𑀮𑀺𑀝𑁆𑀞𑀲𑀁𑀓𑀺𑀮𑁂𑀲𑀺𑀓𑀁. 𑀤𑁆𑀯𑁂 𑀲𑀘𑁆𑀘𑀸 𑀅𑀲𑀁𑀓𑀺𑀮𑀺𑀝𑁆𑀞𑀅𑀲𑀁𑀓𑀺𑀮𑁂𑀲𑀺𑀓𑀸. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀲𑀁𑀓𑀺𑀮𑀺𑀝𑁆𑀞𑀲𑀁𑀓𑀺𑀮𑁂𑀲𑀺𑀓𑀁, 𑀲𑀺𑀬𑀸 𑀅𑀲𑀁𑀓𑀺𑀮𑀺𑀝𑁆𑀞𑀲𑀁𑀓𑀺𑀮𑁂𑀲𑀺𑀓𑀁. 𑀲𑀫𑀼𑀤𑀬𑀲𑀘𑁆𑀘𑀁 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀁. 𑀦𑀺𑀭𑁄𑀥𑀲𑀘𑁆𑀘𑀁 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀁. 𑀫𑀕𑁆𑀕𑀲𑀘𑁆𑀘𑀁 𑀲𑀺𑀬𑀸 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀁, 𑀲𑀺𑀬𑀸 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀁, 𑀲𑀺𑀬𑀸 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀁. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀁, 𑀲𑀺𑀬𑀸 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀁, 𑀲𑀺𑀬𑀸 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀁, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭’’𑀦𑁆𑀢𑀺𑀧𑀺, ‘‘𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢’’𑀦𑁆𑀢𑀺𑀧𑀺, ‘‘𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭’’𑀦𑁆𑀢𑀺𑀧𑀺. 𑀤𑁆𑀯𑁂 𑀲𑀘𑁆𑀘𑀸 𑀲𑀺𑀬𑀸 𑀧𑀻𑀢𑀺𑀲𑀳𑀕𑀢𑀸, 𑀲𑀺𑀬𑀸 𑀲𑀼𑀔𑀲𑀳𑀕𑀢𑀸, 𑀲𑀺𑀬𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀸. 𑀦𑀺𑀭𑁄𑀥𑀲𑀘𑁆𑀘𑀁 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀧𑀻𑀢𑀺𑀲𑀳𑀕𑀢’’𑀦𑁆𑀢𑀺𑀧𑀺, ‘‘𑀲𑀼𑀔𑀲𑀳𑀕𑀢’’𑀦𑁆𑀢𑀺𑀧𑀺, ‘‘𑀉𑀧𑁂𑀓𑁆𑀔𑀸𑀲𑀳𑀕𑀢’’𑀦𑁆𑀢𑀺𑀧𑀺. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀧𑀻𑀢𑀺𑀲𑀳𑀕𑀢𑀁, 𑀲𑀺𑀬𑀸 𑀲𑀼𑀔𑀲𑀳𑀕𑀢𑀁, 𑀲𑀺𑀬𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀁, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀧𑀻𑀢𑀺𑀲𑀳𑀕𑀢’’𑀦𑁆𑀢𑀺𑀧𑀺, ‘‘𑀲𑀼𑀔𑀲𑀳𑀕𑀢’’𑀦𑁆𑀢𑀺𑀧𑀺, ‘‘𑀉𑀧𑁂𑀓𑁆𑀔𑀸𑀲𑀳𑀕𑀢’’𑀦𑁆𑀢𑀺𑀧𑀺.

𑀤𑁆𑀯𑁂 𑀲𑀘𑁆𑀘𑀸 𑀦𑁂𑀯 𑀤𑀲𑁆𑀲𑀦𑁂𑀦 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸. 𑀲𑀫𑀼𑀤𑀬𑀲𑀘𑁆𑀘𑀁 𑀲𑀺𑀬𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀁, 𑀲𑀺𑀬𑀸 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀁. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀁, 𑀲𑀺𑀬𑀸 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀁, 𑀲𑀺𑀬𑀸 𑀦𑁂𑀯 𑀤𑀲𑁆𑀲𑀦𑁂𑀦 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀁. 𑀤𑁆𑀯𑁂 𑀲𑀘𑁆𑀘𑀸 𑀦𑁂𑀯 𑀤𑀲𑁆𑀲𑀦𑁂𑀦 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸. 𑀲𑀫𑀼𑀤𑀬𑀲𑀘𑁆𑀘𑀁 𑀲𑀺𑀬𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀁, 𑀲𑀺𑀬𑀸 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀁. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀁, 𑀲𑀺𑀬𑀸 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀁, 𑀲𑀺𑀬𑀸 𑀦𑁂𑀯 𑀤𑀲𑁆𑀲𑀦𑁂𑀦 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀁. 𑀲𑀫𑀼𑀤𑀬𑀲𑀘𑁆𑀘𑀁 𑀆𑀘𑀬𑀕𑀸𑀫𑀺. 𑀫𑀕𑁆𑀕𑀲𑀘𑁆𑀘𑀁 𑀅𑀧𑀘𑀬𑀕𑀸𑀫𑀺. 𑀦𑀺𑀭𑁄𑀥𑀲𑀘𑁆𑀘𑀁 𑀦𑁂𑀯𑀸𑀘𑀬𑀕𑀸𑀫𑀺𑀦𑀸𑀧𑀘𑀬𑀕𑀸𑀫𑀺. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀆𑀘𑀬𑀕𑀸𑀫𑀺, 𑀲𑀺𑀬𑀸 𑀦𑁂𑀯𑀸𑀘𑀬𑀕𑀸𑀫𑀺𑀦𑀸𑀧𑀘𑀬𑀕𑀸𑀫𑀺. 𑀫𑀕𑁆𑀕𑀲𑀘𑁆𑀘𑀁 𑀲𑁂𑀓𑁆𑀔𑀁. 𑀢𑀻𑀡𑀺 𑀲𑀘𑁆𑀘𑀸𑀦𑀺 𑀦𑁂𑀯𑀲𑁂𑀓𑁆𑀔𑀦𑀸𑀲𑁂𑀓𑁆𑀔𑀸. 𑀲𑀫𑀼𑀤𑀬𑀲𑀘𑁆𑀘𑀁 𑀧𑀭𑀺𑀢𑁆𑀢𑀁. 𑀤𑁆𑀯𑁂 𑀲𑀘𑁆𑀘𑀸 𑀅𑀧𑁆𑀧𑀫𑀸𑀡𑀸. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀧𑀭𑀺𑀢𑁆𑀢𑀁, 𑀲𑀺𑀬𑀸 𑀫𑀳𑀕𑁆𑀕𑀢𑀁. 𑀦𑀺𑀭𑁄𑀥𑀲𑀘𑁆𑀘𑀁 𑀅𑀦𑀸𑀭𑀫𑁆𑀫𑀡𑀁. 𑀫𑀕𑁆𑀕𑀲𑀘𑁆𑀘𑀁 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀁. 𑀲𑀫𑀼𑀤𑀬𑀲𑀘𑁆𑀘𑀁 𑀲𑀺𑀬𑀸 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁, 𑀲𑀺𑀬𑀸 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀁 𑀦 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀁, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀧𑀭𑀺𑀢𑁆𑀢𑀸𑀭𑀫𑁆𑀫𑀡’’𑀦𑁆𑀢𑀺𑀧𑀺, ‘‘𑀫𑀳𑀕𑁆𑀕𑀢𑀸𑀭𑀫𑁆𑀫𑀡’’𑀦𑁆𑀢𑀺𑀧𑀺. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁, 𑀲𑀺𑀬𑀸 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀁, 𑀲𑀺𑀬𑀸 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀁, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀧𑀭𑀺𑀢𑁆𑀢𑀸𑀭𑀫𑁆𑀫𑀡’’𑀦𑁆𑀢𑀺𑀧𑀺, ‘‘𑀫𑀳𑀕𑁆𑀕𑀢𑀸𑀭𑀫𑁆𑀫𑀡’’𑀦𑁆𑀢𑀺𑀧𑀺, ‘‘𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡’’𑀦𑁆𑀢𑀺𑀧𑀺.

𑀲𑀫𑀼𑀤𑀬𑀲𑀘𑁆𑀘𑀁 𑀳𑀻𑀦𑀁. 𑀤𑁆𑀯𑁂 𑀲𑀘𑁆𑀘𑀸 𑀧𑀡𑀻𑀢𑀸. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀳𑀻𑀦𑀁, 𑀲𑀺𑀬𑀸 𑀫𑀚𑁆𑀛𑀺𑀫𑀁. 𑀦𑀺𑀭𑁄𑀥𑀲𑀘𑁆𑀘𑀁 𑀅𑀦𑀺𑀬𑀢𑀁. 𑀫𑀕𑁆𑀕𑀲𑀘𑁆𑀘𑀁 𑀲𑀫𑁆𑀫𑀢𑁆𑀢𑀦𑀺𑀬𑀢𑀁. 𑀤𑁆𑀯𑁂 𑀲𑀘𑁆𑀘𑀸 𑀲𑀺𑀬𑀸 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀸, 𑀲𑀺𑀬𑀸 𑀅𑀦𑀺𑀬𑀢𑀸. 𑀦𑀺𑀭𑁄𑀥𑀲𑀘𑁆𑀘𑀁 𑀅𑀦𑀸𑀭𑀫𑁆𑀫𑀡𑀁. 𑀲𑀫𑀼𑀤𑀬𑀲𑀘𑁆𑀘𑀁 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀫𑀕𑁆𑀕𑀸𑀭𑀫𑁆𑀫𑀡’’𑀦𑁆𑀢𑀺𑀧𑀺, ‘‘𑀫𑀕𑁆𑀕𑀳𑁂𑀢𑀼𑀓’’𑀦𑁆𑀢𑀺𑀧𑀺, ‘‘𑀫𑀕𑁆𑀕𑀸𑀥𑀺𑀧𑀢𑀻’’𑀢𑀺𑀧𑀺. 𑀫𑀕𑁆𑀕𑀲𑀘𑁆𑀘𑀁 𑀦 𑀫𑀕𑁆𑀕𑀸𑀭𑀫𑁆𑀫𑀡𑀁 𑀫𑀕𑁆𑀕𑀳𑁂𑀢𑀼𑀓𑀁, 𑀲𑀺𑀬𑀸 𑀫𑀕𑁆𑀕𑀸𑀥𑀺𑀧𑀢𑀺, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀫𑀕𑁆𑀕𑀸𑀥𑀺𑀧𑀢𑀻’’𑀢𑀺. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀫𑀕𑁆𑀕𑀸𑀭𑀫𑁆𑀫𑀡𑀁 𑀦 𑀫𑀕𑁆𑀕𑀳𑁂𑀢𑀼𑀓𑀁, 𑀲𑀺𑀬𑀸 𑀫𑀕𑁆𑀕𑀸𑀥𑀺𑀧𑀢𑀺, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀫𑀕𑁆𑀕𑀸𑀭𑀫𑁆𑀫𑀡’’𑀦𑁆𑀢𑀺𑀧𑀺, ‘‘𑀫𑀕𑁆𑀕𑀸𑀥𑀺𑀧𑀢𑀻’’𑀢𑀺𑀧𑀺. 𑀤𑁆𑀯𑁂 𑀲𑀘𑁆𑀘𑀸 𑀲𑀺𑀬𑀸 𑀉𑀧𑁆𑀧𑀦𑁆𑀦𑀸, 𑀲𑀺𑀬𑀸 𑀅𑀦𑀼𑀧𑁆𑀧𑀦𑁆𑀦𑀸, 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀉𑀧𑁆𑀧𑀸𑀤𑀺𑀦𑁄’’𑀢𑀺. 𑀦𑀺𑀭𑁄𑀥𑀲𑀘𑁆𑀘𑀁 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀉𑀧𑁆𑀧𑀦𑁆𑀦’’𑀦𑁆𑀢𑀺𑀧𑀺, ‘‘𑀅𑀦𑀼𑀧𑁆𑀧𑀦𑁆𑀦’’𑀦𑁆𑀢𑀺𑀧𑀺, ‘‘𑀉𑀧𑁆𑀧𑀸𑀤𑀻’’𑀢𑀺𑀧𑀺. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀉𑀧𑁆𑀧𑀦𑁆𑀦𑀁, 𑀲𑀺𑀬𑀸 𑀅𑀦𑀼𑀧𑁆𑀧𑀦𑁆𑀦𑀁, 𑀲𑀺𑀬𑀸 𑀉𑀧𑁆𑀧𑀸𑀤𑀺. 𑀢𑀻𑀡𑀺 𑀲𑀘𑁆𑀘𑀸𑀦𑀺 𑀲𑀺𑀬𑀸 𑀅𑀢𑀻𑀢𑀸, 𑀲𑀺𑀬𑀸 𑀅𑀦𑀸𑀕𑀢𑀸, 𑀲𑀺𑀬𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸. 𑀦𑀺𑀭𑁄𑀥𑀲𑀘𑁆𑀘𑀁 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀅𑀢𑀻𑀢’’𑀦𑁆𑀢𑀺𑀧𑀺, ‘‘𑀅𑀦𑀸𑀕𑀢’’𑀦𑁆𑀢𑀺𑀧𑀺, ‘‘𑀧𑀘𑁆𑀘𑀼𑀧𑁆𑀧𑀦𑁆𑀦’’𑀦𑁆𑀢𑀺𑀧𑀺. 𑀦𑀺𑀭𑁄𑀥𑀲𑀘𑁆𑀘𑀁 𑀅𑀦𑀸𑀭𑀫𑁆𑀫𑀡𑀁. 𑀫𑀕𑁆𑀕𑀲𑀘𑁆𑀘𑀁 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀅𑀢𑀻𑀢𑀸𑀭𑀫𑁆𑀫𑀡’’𑀦𑁆𑀢𑀺𑀧𑀺, ‘‘𑀅𑀦𑀸𑀕𑀢𑀸𑀭𑀫𑁆𑀫𑀡’’𑀦𑁆𑀢𑀺𑀧𑀺, ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡’’𑀦𑁆𑀢𑀺𑀧𑀺. 𑀤𑁆𑀯𑁂 𑀲𑀘𑁆𑀘𑀸 𑀲𑀺𑀬𑀸 𑀅𑀢𑀻𑀢𑀸𑀭𑀫𑁆𑀫𑀡𑀸, 𑀲𑀺𑀬𑀸 𑀅𑀦𑀸𑀕𑀢𑀸𑀭𑀫𑁆𑀫𑀡𑀸, 𑀲𑀺𑀬𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀅𑀢𑀻𑀢𑀸𑀭𑀫𑁆𑀫𑀡𑀸’’𑀢𑀺𑀧𑀺, ‘‘𑀅𑀦𑀸𑀕𑀢𑀸𑀭𑀫𑁆𑀫𑀡𑀸’’𑀢𑀺𑀧𑀺, ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸’’𑀢𑀺𑀧𑀺. 𑀦𑀺𑀭𑁄𑀥𑀲𑀘𑁆𑀘𑀁 𑀩𑀳𑀺𑀤𑁆𑀥𑀸. 𑀢𑀻𑀡𑀺 𑀲𑀘𑁆𑀘𑀸𑀦𑀺 𑀲𑀺𑀬𑀸 𑀅𑀚𑁆𑀛𑀢𑁆𑀢𑀸, 𑀲𑀺𑀬𑀸 𑀩𑀳𑀺𑀤𑁆𑀥𑀸, 𑀲𑀺𑀬𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸. 𑀦𑀺𑀭𑁄𑀥𑀲𑀘𑁆𑀘𑀁 𑀅𑀦𑀸𑀭𑀫𑁆𑀫𑀡𑀁. 𑀫𑀕𑁆𑀕𑀲𑀘𑁆𑀘𑀁 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀁. 𑀲𑀫𑀼𑀤𑀬𑀲𑀘𑁆𑀘𑀁 𑀲𑀺𑀬𑀸 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀁, 𑀲𑀺𑀬𑀸 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀁, 𑀲𑀺𑀬𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀁. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀁, 𑀲𑀺𑀬𑀸 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀁, 𑀲𑀺𑀬𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀁, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡’’𑀦𑁆𑀢𑀺𑀧𑀺, ‘‘𑀩𑀳𑀺𑀤𑁆𑀥𑀸𑀭𑀫𑁆𑀫𑀡’’𑀦𑁆𑀢𑀺𑀧𑀺, ‘‘𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡’’𑀦𑁆𑀢𑀺𑀧𑀺. 𑀢𑀻𑀡𑀺 𑀲𑀘𑁆𑀘𑀸𑀦𑀺 𑀅𑀦𑀺𑀤𑀲𑁆𑀲𑀦𑀅𑀧𑁆𑀧𑀝𑀺𑀖𑀸. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀲𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀁, 𑀲𑀺𑀬𑀸 𑀅𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀁, 𑀲𑀺𑀬𑀸 𑀅𑀦𑀺𑀤𑀲𑁆𑀲𑀦𑀅𑀧𑁆𑀧𑀝𑀺𑀖𑀁.

𑁨. 𑀤𑀼𑀓𑀁

𑁨𑁧𑁮. 𑀲𑀫𑀼𑀤𑀬𑀲𑀘𑁆𑀘𑀁 𑀳𑁂𑀢𑀼. 𑀦𑀺𑀭𑁄𑀥𑀲𑀘𑁆𑀘𑀁 𑀦 𑀳𑁂𑀢𑀼. 𑀤𑁆𑀯𑁂 𑀲𑀘𑁆𑀘𑀸 𑀲𑀺𑀬𑀸 𑀳𑁂𑀢𑀽, 𑀲𑀺𑀬𑀸 𑀦 𑀳𑁂𑀢𑀽. 𑀤𑁆𑀯𑁂 𑀲𑀘𑁆𑀘𑀸 𑀲𑀳𑁂𑀢𑀼𑀓𑀸. 𑀦𑀺𑀭𑁄𑀥𑀲𑀘𑁆𑀘𑀁 𑀅𑀳𑁂𑀢𑀼𑀓𑀁. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀲𑀳𑁂𑀢𑀼𑀓𑀁, 𑀲𑀺𑀬𑀸 𑀅𑀳𑁂𑀢𑀼𑀓𑀁. 𑀤𑁆𑀯𑁂 𑀲𑀘𑁆𑀘𑀸 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀸. 𑀦𑀺𑀭𑁄𑀥𑀲𑀘𑁆𑀘𑀁 𑀳𑁂𑀢𑀼𑀯𑀺𑀧𑁆𑀧𑀬𑀼𑀢𑁆𑀢𑀁. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀁, 𑀲𑀺𑀬𑀸 𑀳𑁂𑀢𑀼𑀯𑀺𑀧𑁆𑀧𑀬𑀼𑀢𑁆𑀢𑀁. 𑀲𑀫𑀼𑀤𑀬𑀲𑀘𑁆𑀘𑀁 𑀳𑁂𑀢𑀼 𑀘𑁂𑀯 𑀲𑀳𑁂𑀢𑀼𑀓𑀜𑁆𑀘. 𑀦𑀺𑀭𑁄𑀥𑀲𑀘𑁆𑀘𑀁 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀳𑁂𑀢𑀼 𑀘𑁂𑀯 𑀲𑀳𑁂𑀢𑀼𑀓𑀜𑁆𑀘𑀸’’𑀢𑀺𑀧𑀺, ‘‘𑀲𑀳𑁂𑀢𑀼𑀓𑀜𑁆𑀘𑁂𑀯 𑀦 𑀘 𑀳𑁂𑀢𑀽’’𑀢𑀺𑀧𑀺. 𑀫𑀕𑁆𑀕𑀲𑀘𑁆𑀘𑀁 𑀲𑀺𑀬𑀸 𑀳𑁂𑀢𑀼 𑀘𑁂𑀯 𑀲𑀳𑁂𑀢𑀼𑀓𑀜𑁆𑀘, 𑀲𑀺𑀬𑀸 𑀲𑀳𑁂𑀢𑀼𑀓𑀜𑁆𑀘𑁂𑀯 𑀦 𑀘 𑀳𑁂𑀢𑀼. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀳𑁂𑀢𑀼 𑀘𑁂𑀯 𑀲𑀳𑁂𑀢𑀼𑀓𑀜𑁆𑀘, 𑀲𑀺𑀬𑀸 𑀲𑀳𑁂𑀢𑀼𑀓𑀜𑁆𑀘𑁂𑀯 𑀦 𑀘 𑀳𑁂𑀢𑀼, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀳𑁂𑀢𑀼 𑀘𑁂𑀯 𑀲𑀳𑁂𑀢𑀼𑀓𑀜𑁆𑀘𑀸’’𑀢𑀺𑀧𑀺, ‘‘𑀲𑀳𑁂𑀢𑀼𑀓𑀜𑁆𑀘𑁂𑀯 𑀦 𑀘 𑀳𑁂𑀢𑀽’’𑀢𑀺𑀧𑀺. 𑀲𑀫𑀼𑀤𑀬𑀲𑀘𑁆𑀘𑀁 𑀳𑁂𑀢𑀼 𑀘𑁂𑀯 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀜𑁆𑀘. 𑀦𑀺𑀭𑁄𑀥𑀲𑀘𑁆𑀘𑀁 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀳𑁂𑀢𑀼 𑀘𑁂𑀯 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑀸’’𑀢𑀺𑀧𑀺, ‘‘𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑁂𑀯 𑀦 𑀘 𑀳𑁂𑀢𑀽’’𑀢𑀺𑀧𑀺. 𑀫𑀕𑁆𑀕𑀲𑀘𑁆𑀘𑀁 𑀲𑀺𑀬𑀸 𑀳𑁂𑀢𑀼 𑀘𑁂𑀯 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀜𑁆𑀘, 𑀲𑀺𑀬𑀸 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑁂𑀯 𑀦 𑀘 𑀳𑁂𑀢𑀼. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀳𑁂𑀢𑀼 𑀘𑁂𑀯 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀜𑁆𑀘, 𑀲𑀺𑀬𑀸 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑁂𑀯 𑀦 𑀘 𑀳𑁂𑀢𑀼, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀳𑁂𑀢𑀼 𑀘𑁂𑀯 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑀸’’𑀢𑀺𑀧𑀺, ‘‘𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑁂𑀯 𑀦 𑀘 𑀳𑁂𑀢𑀽’’𑀢𑀺𑀧𑀺. 𑀦𑀺𑀭𑁄𑀥𑀲𑀘𑁆𑀘𑀁 𑀦 𑀳𑁂𑀢𑀼𑀅𑀳𑁂𑀢𑀼𑀓𑀁. 𑀲𑀫𑀼𑀤𑀬𑀲𑀘𑁆𑀘𑀁 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀦 𑀳𑁂𑀢𑀼𑀲𑀳𑁂𑀢𑀼𑀓’’𑀦𑁆𑀢𑀺𑀧𑀺, ‘‘𑀦 𑀳𑁂𑀢𑀼𑀅𑀳𑁂𑀢𑀼𑀓’’𑀦𑁆𑀢𑀺𑀧𑀺. 𑀫𑀕𑁆𑀕𑀲𑀘𑁆𑀘𑀁 𑀲𑀺𑀬𑀸 𑀦 𑀳𑁂𑀢𑀼𑀲𑀳𑁂𑀢𑀼𑀓𑀁, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀦 𑀳𑁂𑀢𑀼𑀲𑀳𑁂𑀢𑀼𑀓’’𑀦𑁆𑀢𑀺𑀧𑀺, ‘‘𑀦 𑀳𑁂𑀢𑀼𑀅𑀳𑁂𑀢𑀼𑀓’’𑀦𑁆𑀢𑀺𑀧𑀺. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀦 𑀳𑁂𑀢𑀼𑀲𑀳𑁂𑀢𑀼𑀓𑀁, 𑀲𑀺𑀬𑀸 𑀦 𑀳𑁂𑀢𑀼𑀅𑀳𑁂𑀢𑀼𑀓𑀁, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀦 𑀳𑁂𑀢𑀼𑀲𑀳𑁂𑀢𑀼𑀓’’𑀦𑁆𑀢𑀺𑀧𑀺, ‘‘𑀦 𑀳𑁂𑀢𑀼𑀅𑀳𑁂𑀢𑀼𑀓’’𑀦𑁆𑀢𑀺𑀧𑀺.

𑀢𑀻𑀡𑀺 𑀲𑀘𑁆𑀘𑀸𑀦𑀺 𑀲𑀧𑁆𑀧𑀘𑁆𑀘𑀬𑀸. 𑀦𑀺𑀭𑁄𑀥𑀲𑀘𑁆𑀘𑀁 𑀅𑀧𑁆𑀧𑀘𑁆𑀘𑀬𑀁. 𑀢𑀻𑀡𑀺 𑀲𑀘𑁆𑀘𑀸𑀦𑀺 𑀲𑀗𑁆𑀔𑀢𑀸. 𑀦𑀺𑀭𑁄𑀥𑀲𑀘𑁆𑀘𑀁 𑀅𑀲𑀗𑁆𑀔𑀢𑀁. 𑀢𑀻𑀡𑀺 𑀲𑀘𑁆𑀘𑀸𑀦𑀺 𑀅𑀦𑀺𑀤𑀲𑁆𑀲𑀦𑀸. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀲𑀦𑀺𑀤𑀲𑁆𑀲𑀦𑀁, 𑀲𑀺𑀬𑀸 𑀅𑀦𑀺𑀤𑀲𑁆𑀲𑀦𑀁. 𑀢𑀻𑀡𑀺 𑀲𑀘𑁆𑀘𑀸𑀦𑀺 𑀅𑀧𑁆𑀧𑀝𑀺𑀖𑀸. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀲𑀧𑁆𑀧𑀝𑀺𑀖𑀁, 𑀲𑀺𑀬𑀸 𑀅𑀧𑁆𑀧𑀝𑀺𑀖𑀁. 𑀢𑀻𑀡𑀺 𑀲𑀘𑁆𑀘𑀸𑀦𑀺 𑀅𑀭𑀽𑀧𑀸𑀦𑀺. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀭𑀽𑀧𑀁, 𑀲𑀺𑀬𑀸 𑀅𑀭𑀽𑀧𑀁. 𑀤𑁆𑀯𑁂 𑀲𑀘𑁆𑀘𑀸 𑀮𑁄𑀓𑀺𑀬𑀸. 𑀤𑁆𑀯𑁂 𑀲𑀘𑁆𑀘𑀸 𑀮𑁄𑀓𑀼𑀢𑁆𑀢𑀭𑀸; 𑀓𑁂𑀦𑀘𑀺 𑀯𑀺𑀜𑁆𑀜𑁂𑀬𑁆𑀬𑀸, 𑀓𑁂𑀦𑀘𑀺 𑀦 𑀯𑀺𑀜𑁆𑀜𑁂𑀬𑁆𑀬𑀸.

𑀲𑀫𑀼𑀤𑀬𑀲𑀘𑁆𑀘𑀁 𑀆𑀲𑀯𑁄. 𑀤𑁆𑀯𑁂 𑀲𑀘𑁆𑀘𑀸 𑀦𑁄 𑀆𑀲𑀯𑀸. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀆𑀲𑀯𑁄, 𑀲𑀺𑀬𑀸 𑀦𑁄 𑀆𑀲𑀯𑁄. 𑀤𑁆𑀯𑁂 𑀲𑀘𑁆𑀘𑀸 𑀲𑀸𑀲𑀯𑀸. 𑀤𑁆𑀯𑁂 𑀲𑀘𑁆𑀘𑀸 𑀅𑀦𑀸𑀲𑀯𑀸. 𑀲𑀫𑀼𑀤𑀬𑀲𑀘𑁆𑀘𑀁 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀁. 𑀤𑁆𑀯𑁂 𑀲𑀘𑁆𑀘𑀸 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀸. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀁, 𑀲𑀺𑀬𑀸 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀁. 𑀲𑀫𑀼𑀤𑀬𑀲𑀘𑁆𑀘𑀁 𑀆𑀲𑀯𑁄 𑀘𑁂𑀯 𑀲𑀸𑀲𑀯𑀜𑁆𑀘. 𑀤𑁆𑀯𑁂 𑀲𑀘𑁆𑀘𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀆𑀲𑀯𑀸 𑀘𑁂𑀯 𑀲𑀸𑀲𑀯𑀸 𑀘𑀸’’𑀢𑀺𑀧𑀺, ‘‘𑀲𑀸𑀲𑀯𑀸 𑀘𑁂𑀯 𑀦𑁄 𑀘 𑀆𑀲𑀯𑀸’’𑀢𑀺𑀧𑀺. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀆𑀲𑀯𑁄 𑀘𑁂𑀯 𑀲𑀸𑀲𑀯𑀜𑁆𑀘, 𑀲𑀺𑀬𑀸 𑀲𑀸𑀲𑀯𑀜𑁆𑀘𑁂𑀯 𑀦𑁄 𑀘 𑀆𑀲𑀯𑁄. 𑀲𑀫𑀼𑀤𑀬𑀲𑀘𑁆𑀘𑀁 𑀆𑀲𑀯𑁄 𑀘𑁂𑀯 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀜𑁆𑀘. 𑀤𑁆𑀯𑁂 𑀲𑀘𑁆𑀘𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀆𑀲𑀯𑀸 𑀘𑁂𑀯 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀸 𑀘𑀸’’𑀢𑀺𑀧𑀺, ‘‘𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀯 𑀦𑁄 𑀘 𑀆𑀲𑀯𑀸’’𑀢𑀺𑀧𑀺. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀆𑀲𑀯𑁄 𑀘𑁂𑀯 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀜𑁆𑀘, 𑀲𑀺𑀬𑀸 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑁂𑀯 𑀦𑁄 𑀘 𑀆𑀲𑀯𑁄, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀆𑀲𑀯𑁄 𑀘𑁂𑀯 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑀸’’𑀢𑀺𑀧𑀺, ‘‘𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑁂𑀯 𑀦𑁄 𑀘 𑀆𑀲𑀯𑁄’’𑀢𑀺𑀧𑀺. 𑀤𑁆𑀯𑁂 𑀲𑀘𑁆𑀘𑀸 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀅𑀦𑀸𑀲𑀯𑀸. 𑀲𑀫𑀼𑀤𑀬𑀲𑀘𑁆𑀘𑀁 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀲𑀸𑀲𑀯’’𑀦𑁆𑀢𑀺𑀧𑀺, ‘‘𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀅𑀦𑀸𑀲𑀯’’𑀦𑁆𑀢𑀺𑀧𑀺. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀲𑀸𑀲𑀯𑀁, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀲𑀸𑀲𑀯’’𑀦𑁆𑀢𑀺𑀧𑀺, ‘‘𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀅𑀦𑀸𑀲𑀯’’𑀦𑁆𑀢𑀺𑀧𑀺.

𑀲𑀫𑀼𑀤𑀬𑀲𑀘𑁆𑀘𑀁 𑀲𑀁𑀬𑁄𑀚𑀦𑀁. 𑀤𑁆𑀯𑁂 𑀲𑀘𑁆𑀘𑀸 𑀦𑁄 𑀲𑀁𑀬𑁄𑀚𑀦𑀸. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀲𑀁𑀬𑁄𑀚𑀦𑀁, 𑀲𑀺𑀬𑀸 𑀦𑁄 𑀲𑀁𑀬𑁄𑀚𑀦𑀁. 𑀤𑁆𑀯𑁂 𑀲𑀘𑁆𑀘𑀸 𑀲𑀁𑀬𑁄𑀚𑀦𑀺𑀬𑀸. 𑀤𑁆𑀯𑁂 𑀲𑀘𑁆𑀘𑀸 𑀅𑀲𑀁𑀬𑁄𑀚𑀦𑀺𑀬𑀸. 𑀲𑀫𑀼𑀤𑀬𑀲𑀘𑁆𑀘𑀁 𑀲𑀁𑀬𑁄𑀚𑀦𑀲𑀫𑁆𑀧𑀬𑀼𑀢𑁆𑀢𑀁. 𑀤𑁆𑀯𑁂 𑀲𑀘𑁆𑀘𑀸 𑀲𑀁𑀬𑁄𑀚𑀦𑀯𑀺𑀧𑁆𑀧𑀬𑀼𑀢𑁆𑀢𑀸. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀲𑀁𑀬𑁄𑀚𑀦𑀲𑀫𑁆𑀧𑀬𑀼𑀢𑁆𑀢𑀁, 𑀲𑀺𑀬𑀸 𑀲𑀁𑀬𑁄𑀚𑀦𑀯𑀺𑀧𑁆𑀧𑀬𑀼𑀢𑁆𑀢𑀁. 𑀲𑀫𑀼𑀤𑀬𑀲𑀘𑁆𑀘𑀁 𑀲𑀁𑀬𑁄𑀚𑀦𑀜𑁆𑀘𑁂𑀯 𑀲𑀁𑀬𑁄𑀚𑀦𑀺𑀬𑀜𑁆𑀘. 𑀤𑁆𑀯𑁂 𑀲𑀘𑁆𑀘𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀲𑀁𑀬𑁄𑀚𑀦𑀸 𑀘𑁂𑀯 𑀲𑀁𑀬𑁄𑀚𑀦𑀺𑀬𑀸 𑀘𑀸’’𑀢𑀺𑀧𑀺, ‘‘𑀲𑀁𑀬𑁄𑀚𑀦𑀺𑀬𑀸 𑀘𑁂𑀯 𑀦𑁄 𑀘 𑀲𑀁𑀬𑁄𑀚𑀦𑀸’’𑀢𑀺𑀧𑀺. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀲𑀁𑀬𑁄𑀚𑀦𑀜𑁆𑀘𑁂𑀯 𑀲𑀁𑀬𑁄𑀚𑀦𑀺𑀬𑀜𑁆𑀘, 𑀲𑀺𑀬𑀸 𑀲𑀁𑀬𑁄𑀚𑀦𑀺𑀬𑀜𑁆𑀘𑁂𑀯 𑀦𑁄 𑀘 𑀲𑀁𑀬𑁄𑀚𑀦𑀁. 𑀲𑀫𑀼𑀤𑀬𑀲𑀘𑁆𑀘𑀁 𑀲𑀁𑀬𑁄𑀚𑀦𑀜𑁆𑀘𑁂𑀯 𑀲𑀁𑀬𑁄𑀚𑀦𑀲𑀫𑁆𑀧𑀬𑀼𑀢𑁆𑀢𑀜𑁆𑀘. 𑀤𑁆𑀯𑁂 𑀲𑀘𑁆𑀘𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀲𑀁𑀬𑁄𑀚𑀦𑀸 𑀘𑁂𑀯 𑀲𑀁𑀬𑁄𑀚𑀦𑀲𑀫𑁆𑀧𑀬𑀼𑀢𑁆𑀢𑀸 𑀘𑀸’’𑀢𑀺𑀧𑀺, ‘‘𑀲𑀁𑀬𑁄𑀚𑀦𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀯 𑀦𑁄 𑀘 𑀲𑀁𑀬𑁄𑀚𑀦𑀸’’𑀢𑀺𑀧𑀺. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀲𑀁𑀬𑁄𑀚𑀦𑀜𑁆𑀘𑁂𑀯 𑀲𑀁𑀬𑁄𑀚𑀦𑀲𑀫𑁆𑀧𑀬𑀼𑀢𑁆𑀢𑀜𑁆𑀘, 𑀲𑀺𑀬𑀸 𑀲𑀁𑀬𑁄𑀚𑀦𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑁂𑀯 𑀦𑁄 𑀘 𑀲𑀁𑀬𑁄𑀚𑀦𑀁, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀁𑀬𑁄𑀚𑀦𑀜𑁆𑀘𑁂𑀯 𑀲𑀁𑀬𑁄𑀚𑀦𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑀸’’𑀢𑀺𑀧𑀺, ‘‘𑀲𑀁𑀬𑁄𑀚𑀦𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑁂𑀯 𑀦𑁄 𑀘 𑀲𑀁𑀬𑁄𑀚𑀦’’𑀦𑁆𑀢𑀺𑀧𑀺. 𑀤𑁆𑀯𑁂 𑀲𑀘𑁆𑀘𑀸 𑀲𑀁𑀬𑁄𑀚𑀦𑀯𑀺𑀧𑁆𑀧𑀬𑀼𑀢𑁆𑀢𑀅𑀲𑀁𑀬𑁄𑀚𑀦𑀺𑀬𑀸. 𑀲𑀫𑀼𑀤𑀬𑀲𑀘𑁆𑀘𑀁 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀁𑀬𑁄𑀚𑀦𑀯𑀺𑀧𑁆𑀧𑀬𑀼𑀢𑁆𑀢𑀲𑀁𑀬𑁄𑀚𑀦𑀺𑀬’’𑀦𑁆𑀢𑀺𑀧𑀺, ‘‘𑀲𑀁𑀬𑁄𑀚𑀦𑀯𑀺𑀧𑁆𑀧𑀬𑀼𑀢𑁆𑀢𑀅𑀲𑀁𑀬𑁄𑀚𑀦𑀺𑀬’’𑀦𑁆𑀢𑀺𑀧𑀺. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀲𑀁𑀬𑁄𑀚𑀦𑀯𑀺𑀧𑁆𑀧𑀬𑀼𑀢𑁆𑀢𑀲𑀁𑀬𑁄𑀚𑀦𑀺𑀬𑀁, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀁𑀬𑁄𑀚𑀦𑀯𑀺𑀧𑁆𑀧𑀬𑀼𑀢𑁆𑀢𑀲𑀁𑀬𑁄𑀚𑀦𑀺𑀬’’𑀦𑁆𑀢𑀺𑀧𑀺, ‘‘𑀲𑀁𑀬𑁄𑀚𑀦𑀯𑀺𑀧𑁆𑀧𑀬𑀼𑀢𑁆𑀢𑀅𑀲𑀁𑀬𑁄𑀚𑀦𑀺𑀬’’𑀦𑁆𑀢𑀺𑀧𑀺.

𑀲𑀫𑀼𑀤𑀬𑀲𑀘𑁆𑀘𑀁 𑀕𑀦𑁆𑀣𑁄. 𑀤𑁆𑀯𑁂 𑀲𑀘𑁆𑀘𑀸 𑀦𑁄 𑀕𑀦𑁆𑀣𑀸. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀕𑀦𑁆𑀣𑁄, 𑀲𑀺𑀬𑀸 𑀦𑁄 𑀕𑀦𑁆𑀣𑁄. 𑀤𑁆𑀯𑁂 𑀲𑀘𑁆𑀘𑀸 𑀕𑀦𑁆𑀣𑀦𑀺𑀬𑀸. 𑀤𑁆𑀯𑁂 𑀲𑀘𑁆𑀘𑀸 𑀅𑀕𑀦𑁆𑀣𑀦𑀺𑀬𑀸. 𑀤𑁆𑀯𑁂 𑀲𑀘𑁆𑀘𑀸 𑀕𑀦𑁆𑀣𑀯𑀺𑀧𑁆𑀧𑀬𑀼𑀢𑁆𑀢𑀸. 𑀤𑁆𑀯𑁂 𑀲𑀘𑁆𑀘𑀸 𑀲𑀺𑀬𑀸 𑀕𑀦𑁆𑀣𑀲𑀫𑁆𑀧𑀬𑀼𑀢𑁆𑀢𑀸, 𑀲𑀺𑀬𑀸 𑀕𑀦𑁆𑀣𑀯𑀺𑀧𑁆𑀧𑀬𑀼𑀢𑁆𑀢𑀸. 𑀲𑀫𑀼𑀤𑀬𑀲𑀘𑁆𑀘𑀁 𑀕𑀦𑁆𑀣𑁄 𑀘𑁂𑀯 𑀕𑀦𑁆𑀣𑀦𑀺𑀬𑀜𑁆𑀘. 𑀤𑁆𑀯𑁂 𑀲𑀘𑁆𑀘𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀕𑀦𑁆𑀣𑀸 𑀘𑁂𑀯 𑀕𑀦𑁆𑀣𑀦𑀺𑀬𑀸 𑀘𑀸’’𑀢𑀺𑀧𑀺, ‘‘𑀕𑀦𑁆𑀣𑀦𑀺𑀬𑀸 𑀘𑁂𑀯 𑀦𑁄 𑀘 𑀕𑀦𑁆𑀣𑀸’’𑀢𑀺𑀧𑀺. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀕𑀦𑁆𑀣𑁄 𑀘𑁂𑀯 𑀕𑀦𑁆𑀣𑀦𑀺𑀬𑀜𑁆𑀘, 𑀲𑀺𑀬𑀸 𑀕𑀦𑁆𑀣𑀦𑀺𑀬𑀜𑁆𑀘𑁂𑀯 𑀦𑁄 𑀘 𑀕𑀦𑁆𑀣𑁄. 𑀲𑀫𑀼𑀤𑀬𑀲𑀘𑁆𑀘𑀁 𑀕𑀦𑁆𑀣𑁄 𑀘𑁂𑀯 𑀕𑀦𑁆𑀣𑀲𑀫𑁆𑀧𑀬𑀼𑀢𑁆𑀢𑀜𑁆𑀘, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀕𑀦𑁆𑀣𑁄 𑀘𑁂𑀯 𑀕𑀦𑁆𑀣𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑀸’’𑀢𑀺𑀧𑀺, ‘‘𑀕𑀦𑁆𑀣𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑁂𑀯 𑀦𑁄 𑀘 𑀕𑀦𑁆𑀣𑁄’’𑀢𑀺𑀧𑀺. 𑀤𑁆𑀯𑁂 𑀲𑀘𑁆𑀘𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀕𑀦𑁆𑀣𑀸 𑀘𑁂𑀯 𑀕𑀦𑁆𑀣𑀲𑀫𑁆𑀧𑀬𑀼𑀢𑁆𑀢𑀸 𑀘𑀸’’𑀢𑀺𑀧𑀺, ‘‘𑀕𑀦𑁆𑀣𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀯 𑀦𑁄 𑀘 𑀕𑀦𑁆𑀣𑀸’’𑀢𑀺𑀧𑀺. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀕𑀦𑁆𑀣𑁄 𑀘𑁂𑀯 𑀕𑀦𑁆𑀣𑀲𑀫𑁆𑀧𑀬𑀼𑀢𑁆𑀢𑀜𑁆𑀘, 𑀲𑀺𑀬𑀸 𑀕𑀦𑁆𑀣𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑁂𑀯 𑀦𑁄 𑀘 𑀕𑀦𑁆𑀣𑁄, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀕𑀦𑁆𑀣𑁄 𑀘𑁂𑀯 𑀕𑀦𑁆𑀣𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑀸’’𑀢𑀺𑀧𑀺, ‘‘𑀕𑀦𑁆𑀣𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑁂𑀯 𑀦𑁄 𑀘 𑀕𑀦𑁆𑀣𑁄’’𑀢𑀺𑀧𑀺. 𑀤𑁆𑀯𑁂 𑀲𑀘𑁆𑀘𑀸 𑀕𑀦𑁆𑀣𑀯𑀺𑀧𑁆𑀧𑀬𑀼𑀢𑁆𑀢𑀅𑀕𑀦𑁆𑀣𑀦𑀺𑀬𑀸. 𑀤𑁆𑀯𑁂 𑀲𑀘𑁆𑀘𑀸 𑀲𑀺𑀬𑀸 𑀕𑀦𑁆𑀣𑀯𑀺𑀧𑁆𑀧𑀬𑀼𑀢𑁆𑀢𑀕𑀦𑁆𑀣𑀦𑀺𑀬𑀸, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀕𑀦𑁆𑀣𑀯𑀺𑀧𑁆𑀧𑀬𑀼𑀢𑁆𑀢𑀕𑀦𑁆𑀣𑀦𑀺𑀬𑀸’’𑀢𑀺𑀧𑀺, ‘‘𑀕𑀦𑁆𑀣𑀯𑀺𑀧𑁆𑀧𑀬𑀼𑀢𑁆𑀢𑀅𑀕𑀦𑁆𑀣𑀦𑀺𑀬𑀸’’𑀢𑀺𑀧𑀺.

𑀲𑀫𑀼𑀤𑀬𑀲𑀘𑁆𑀘𑀁 𑀑𑀖𑁄…𑀧𑁂… 𑀬𑁄𑀕𑁄…𑀧𑁂… 𑀦𑀻𑀯𑀭𑀡𑀁. 𑀤𑁆𑀯𑁂 𑀲𑀘𑁆𑀘𑀸 𑀦𑁄 𑀦𑀻𑀯𑀭𑀡𑀸. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀦𑀻𑀯𑀭𑀡𑀁, 𑀲𑀺𑀬𑀸 𑀦𑁄 𑀦𑀻𑀯𑀭𑀡𑀁. 𑀤𑁆𑀯𑁂 𑀲𑀘𑁆𑀘𑀸 𑀦𑀻𑀯𑀭𑀡𑀺𑀬𑀸 𑀤𑁆𑀯𑁂 𑀲𑀘𑁆𑀘𑀸 𑀅𑀦𑀻𑀯𑀭𑀡𑀺𑀬𑀸. 𑀲𑀫𑀼𑀤𑀬𑀲𑀘𑁆𑀘𑀁 𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢𑀁. 𑀤𑁆𑀯𑁂 𑀲𑀘𑁆𑀘𑀸 𑀦𑀻𑀯𑀭𑀡𑀯𑀺𑀧𑁆𑀧𑀬𑀼𑀢𑁆𑀢𑀸. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢𑀁, 𑀲𑀺𑀬𑀸 𑀦𑀻𑀯𑀭𑀡𑀯𑀺𑀧𑁆𑀧𑀬𑀼𑀢𑁆𑀢𑀁. 𑀲𑀫𑀼𑀤𑀬𑀲𑀘𑁆𑀘𑀁 𑀦𑀻𑀯𑀭𑀡𑀜𑁆𑀘𑁂𑀯 𑀦𑀻𑀯𑀭𑀡𑀺𑀬𑀜𑁆𑀘. 𑀤𑁆𑀯𑁂 𑀲𑀘𑁆𑀘𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀦𑀻𑀯𑀭𑀡𑀸 𑀘𑁂𑀯 𑀦𑀻𑀯𑀭𑀡𑀺𑀬𑀸 𑀘𑀸’’𑀢𑀺𑀧𑀺, ‘‘𑀦𑀻𑀯𑀭𑀡𑀺𑀬𑀸 𑀘𑁂𑀯 𑀦𑁄 𑀘 𑀦𑀻𑀯𑀭𑀡𑀸’’𑀢𑀺𑀧𑀺. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀦𑀻𑀯𑀭𑀡𑀜𑁆𑀘𑁂𑀯 𑀦𑀻𑀯𑀭𑀡𑀺𑀬𑀜𑁆𑀘, 𑀲𑀺𑀬𑀸 𑀦𑀻𑀯𑀭𑀡𑀺𑀬𑀜𑁆𑀘𑁂𑀯 𑀦𑁄 𑀘 𑀦𑀻𑀯𑀭𑀡𑀁. 𑀲𑀫𑀼𑀤𑀬𑀲𑀘𑁆𑀘𑀁 𑀦𑀻𑀯𑀭𑀡𑀜𑁆𑀘𑁂𑀯 𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢𑀜𑁆𑀘. 𑀤𑁆𑀯𑁂 𑀲𑀘𑁆𑀘𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀦𑀻𑀯𑀭𑀡𑀸 𑀘𑁂𑀯 𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢𑀸 𑀘𑀸’’𑀢𑀺𑀧𑀺, ‘‘𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀯 𑀦𑁄 𑀘 𑀦𑀻𑀯𑀭𑀡𑀸’’𑀢𑀺𑀧𑀺. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀦𑀻𑀯𑀭𑀡𑀜𑁆𑀘𑁂𑀯 𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢𑀜𑁆𑀘, 𑀲𑀺𑀬𑀸 𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑁂𑀯 𑀦𑁄 𑀘 𑀦𑀻𑀯𑀭𑀡𑀁, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀦𑀻𑀯𑀭𑀡𑀜𑁆𑀘𑁂𑀯 𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑀸’’𑀢𑀺𑀧𑀺, ‘‘𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑁂𑀯 𑀦𑁄 𑀘 𑀦𑀻𑀯𑀭𑀡’’𑀦𑁆𑀢𑀺𑀧𑀺. 𑀤𑁆𑀯𑁂 𑀲𑀘𑁆𑀘𑀸 𑀦𑀻𑀯𑀭𑀡𑀯𑀺𑀧𑁆𑀧𑀬𑀼𑀢𑁆𑀢𑀅𑀦𑀻𑀯𑀭𑀡𑀺𑀬𑀸. 𑀲𑀫𑀼𑀤𑀬𑀲𑀘𑁆𑀘𑀁 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀦𑀻𑀯𑀭𑀡𑀯𑀺𑀧𑁆𑀧𑀬𑀼𑀢𑁆𑀢𑀦𑀻𑀯𑀭𑀡𑀺𑀬’’𑀦𑁆𑀢𑀺𑀧𑀺, ‘‘𑀦𑀻𑀯𑀭𑀡𑀯𑀺𑀧𑁆𑀧𑀬𑀼𑀢𑁆𑀢𑀅𑀦𑀻𑀯𑀭𑀡𑀺𑀬’’𑀦𑁆𑀢𑀺𑀧𑀺. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀦𑀻𑀯𑀭𑀡𑀯𑀺𑀧𑁆𑀧𑀬𑀼𑀢𑁆𑀢𑀦𑀻𑀯𑀭𑀡𑀺𑀬𑀁, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀦𑀻𑀯𑀭𑀡𑀯𑀺𑀧𑁆𑀧𑀬𑀼𑀢𑁆𑀢𑀦𑀻𑀯𑀭𑀡𑀺𑀬’’𑀦𑁆𑀢𑀺𑀧𑀺, ‘‘𑀦𑀻𑀯𑀭𑀡𑀯𑀺𑀧𑁆𑀧𑀬𑀼𑀢𑁆𑀢𑀅𑀦𑀻𑀯𑀭𑀡𑀺𑀬’’𑀦𑁆𑀢𑀺𑀧𑀺.

𑀢𑀻𑀡𑀺 𑀲𑀘𑁆𑀘𑀸𑀦𑀺 𑀦𑁄 𑀧𑀭𑀸𑀫𑀸𑀲𑀸. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀧𑀭𑀸𑀫𑀸𑀲𑁄, 𑀲𑀺𑀬𑀸 𑀦𑁄 𑀧𑀭𑀸𑀫𑀸𑀲𑁄. 𑀤𑁆𑀯𑁂 𑀲𑀘𑁆𑀘𑀸 𑀧𑀭𑀸𑀫𑀝𑁆𑀞𑀸. 𑀤𑁆𑀯𑁂 𑀲𑀘𑁆𑀘𑀸 𑀅𑀧𑀭𑀸𑀫𑀝𑁆𑀞𑀸. 𑀤𑁆𑀯𑁂 𑀲𑀘𑁆𑀘𑀸 𑀧𑀭𑀸𑀫𑀸𑀲𑀯𑀺𑀧𑁆𑀧𑀬𑀼𑀢𑁆𑀢𑀸. 𑀲𑀫𑀼𑀤𑀬𑀲𑀘𑁆𑀘𑀁 𑀲𑀺𑀬𑀸 𑀧𑀭𑀸𑀫𑀸𑀲𑀲𑀫𑁆𑀧𑀬𑀼𑀢𑁆𑀢𑀁, 𑀲𑀺𑀬𑀸 𑀧𑀭𑀸𑀫𑀸𑀲𑀯𑀺𑀧𑁆𑀧𑀬𑀼𑀢𑁆𑀢𑀁. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀧𑀭𑀸𑀫𑀸𑀲𑀲𑀫𑁆𑀧𑀬𑀼𑀢𑁆𑀢𑀁, 𑀲𑀺𑀬𑀸 𑀧𑀭𑀸𑀫𑀸𑀲𑀯𑀺𑀧𑁆𑀧𑀬𑀼𑀢𑁆𑀢𑀁, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀧𑀭𑀸𑀫𑀸𑀲𑀲𑀫𑁆𑀧𑀬𑀼𑀢𑁆𑀢’’𑀦𑁆𑀢𑀺𑀧𑀺, ‘‘𑀧𑀭𑀸𑀫𑀸𑀲𑀯𑀺𑀧𑁆𑀧𑀬𑀼𑀢𑁆𑀢’’𑀦𑁆𑀢𑀺𑀧𑀺. 𑀲𑀫𑀼𑀤𑀬𑀲𑀘𑁆𑀘𑀁 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀧𑀭𑀸𑀫𑀸𑀲𑁄 𑀘𑁂𑀯 𑀧𑀭𑀸𑀫𑀝𑁆𑀞𑀜𑁆𑀘𑀸’’𑀢𑀺, 𑀧𑀭𑀸𑀫𑀝𑁆𑀞𑀜𑁆𑀘𑁂𑀯 𑀦𑁄 𑀘 𑀧𑀭𑀸𑀫𑀸𑀲𑁄. 𑀤𑁆𑀯𑁂 𑀲𑀘𑁆𑀘𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀧𑀭𑀸𑀫𑀸𑀲𑀸 𑀘𑁂𑀯 𑀧𑀭𑀸𑀫𑀝𑁆𑀞𑀸 𑀘𑀸’’𑀢𑀺𑀧𑀺, ‘‘𑀧𑀭𑀸𑀫𑀝𑁆𑀞𑀸 𑀘𑁂𑀯 𑀦𑁄 𑀘 𑀧𑀭𑀸𑀫𑀸𑀲𑀸’’𑀢𑀺𑀧𑀺. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀧𑀭𑀸𑀫𑀸𑀲𑁄 𑀘𑁂𑀯 𑀧𑀭𑀸𑀫𑀝𑁆𑀞𑀜𑁆𑀘, 𑀲𑀺𑀬𑀸 𑀧𑀭𑀸𑀫𑀝𑁆𑀞𑀜𑁆𑀘𑁂𑀯 𑀦𑁄 𑀘 𑀧𑀭𑀸𑀫𑀸𑀲𑁄. 𑀤𑁆𑀯𑁂 𑀲𑀘𑁆𑀘𑀸 𑀧𑀭𑀸𑀫𑀸𑀲𑀯𑀺𑀧𑁆𑀧𑀬𑀼𑀢𑁆𑀢𑀅𑀧𑀭𑀸𑀫𑀝𑁆𑀞𑀸. 𑀤𑁆𑀯𑁂 𑀲𑀘𑁆𑀘𑀸 𑀲𑀺𑀬𑀸 𑀧𑀭𑀸𑀫𑀸𑀲𑀯𑀺𑀧𑁆𑀧𑀬𑀼𑀢𑁆𑀢𑀧𑀭𑀸𑀫𑀝𑁆𑀞𑀸, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀧𑀭𑀸𑀫𑀸𑀲𑀯𑀺𑀧𑁆𑀧𑀬𑀼𑀢𑁆𑀢𑀧𑀭𑀸𑀫𑀝𑁆𑀞𑀸’’𑀢𑀺𑀧𑀺, ‘‘𑀧𑀭𑀸𑀫𑀸𑀲𑀯𑀺𑀧𑁆𑀧𑀬𑀼𑀢𑁆𑀢𑀅𑀧𑀭𑀸𑀫𑀝𑁆𑀞𑀸’’𑀢𑀺𑀧𑀺.

𑀤𑁆𑀯𑁂 𑀲𑀘𑁆𑀘𑀸 𑀲𑀸𑀭𑀫𑁆𑀫𑀡𑀸. 𑀦𑀺𑀭𑁄𑀥𑀲𑀘𑁆𑀘𑀁 𑀅𑀦𑀸𑀭𑀫𑁆𑀫𑀡𑀁. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀲𑀸𑀭𑀫𑁆𑀫𑀡𑀁, 𑀲𑀺𑀬𑀸 𑀅𑀦𑀸𑀭𑀫𑁆𑀫𑀡𑀁. 𑀢𑀻𑀡𑀺 𑀲𑀘𑁆𑀘𑀸𑀦𑀺 𑀦𑁄 𑀘𑀺𑀢𑁆𑀢𑀸. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀘𑀺𑀢𑁆𑀢𑀁, 𑀲𑀺𑀬𑀸 𑀦𑁄 𑀘𑀺𑀢𑁆𑀢𑀁. 𑀤𑁆𑀯𑁂 𑀲𑀘𑁆𑀘𑀸 𑀘𑁂𑀢𑀲𑀺𑀓𑀸. 𑀦𑀺𑀭𑁄𑀥𑀲𑀘𑁆𑀘𑀁 𑀅𑀘𑁂𑀢𑀲𑀺𑀓𑀁. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀘𑁂𑀢𑀲𑀺𑀓𑀁, 𑀲𑀺𑀬𑀸 𑀅𑀘𑁂𑀢𑀲𑀺𑀓𑀁. 𑀤𑁆𑀯𑁂 𑀲𑀘𑁆𑀘𑀸 𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸. 𑀦𑀺𑀭𑁄𑀥𑀲𑀘𑁆𑀘𑀁 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀁. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀁, 𑀲𑀺𑀬𑀸 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀁, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀘𑀺𑀢𑁆𑀢𑁂𑀦 𑀲𑀫𑁆𑀧𑀬𑀼𑀢𑁆𑀢’’𑀦𑁆𑀢𑀺𑀧𑀺, ‘‘𑀘𑀺𑀢𑁆𑀢𑁂𑀦 𑀯𑀺𑀧𑁆𑀧𑀬𑀼𑀢𑁆𑀢’’𑀦𑁆𑀢𑀺𑀧𑀺. 𑀤𑁆𑀯𑁂 𑀲𑀘𑁆𑀘𑀸 𑀘𑀺𑀢𑁆𑀢𑀲𑀁𑀲𑀝𑁆𑀞𑀸. 𑀦𑀺𑀭𑁄𑀥𑀲𑀘𑁆𑀘𑀁 𑀘𑀺𑀢𑁆𑀢𑀯𑀺𑀲𑀁𑀲𑀝𑁆𑀞𑀁. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀘𑀺𑀢𑁆𑀢𑀲𑀁𑀲𑀝𑁆𑀞𑀁, 𑀲𑀺𑀬𑀸 𑀘𑀺𑀢𑁆𑀢𑀯𑀺𑀲𑀁𑀲𑀝𑁆𑀞𑀁, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀘𑀺𑀢𑁆𑀢𑁂𑀦 𑀲𑀁𑀲𑀝𑁆𑀞’’𑀦𑁆𑀢𑀺𑀧𑀺, ‘‘𑀘𑀺𑀢𑁆𑀢𑁂𑀦 𑀯𑀺𑀲𑀁𑀲𑀝𑁆𑀞’’𑀦𑁆𑀢𑀺𑀧𑀺. 𑀤𑁆𑀯𑁂 𑀲𑀘𑁆𑀘𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸. 𑀦𑀺𑀭𑁄𑀥𑀲𑀘𑁆𑀘𑀁 𑀦𑁄 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁, 𑀲𑀺𑀬𑀸 𑀦𑁄 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁. 𑀤𑁆𑀯𑁂 𑀲𑀘𑁆𑀘𑀸 𑀘𑀺𑀢𑁆𑀢𑀲𑀳𑀪𑀼𑀦𑁄. 𑀦𑀺𑀭𑁄𑀥𑀲𑀘𑁆𑀘𑀁 𑀦𑁄 𑀘𑀺𑀢𑁆𑀢𑀲𑀳𑀪𑀽. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀘𑀺𑀢𑁆𑀢𑀲𑀳𑀪𑀽, 𑀲𑀺𑀬𑀸 𑀦𑁄 𑀘𑀺𑀢𑁆𑀢𑀲𑀳𑀪𑀽. 𑀤𑁆𑀯𑁂 𑀲𑀘𑁆𑀘𑀸 𑀘𑀺𑀢𑁆𑀢𑀸𑀦𑀼𑀧𑀭𑀺𑀯𑀢𑁆𑀢𑀺𑀦𑁄. 𑀦𑀺𑀭𑁄𑀥𑀲𑀘𑁆𑀘𑀁 𑀦𑁄 𑀘𑀺𑀢𑁆𑀢𑀸𑀦𑀼𑀧𑀭𑀺𑀯𑀢𑁆𑀢𑀺. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀘𑀺𑀢𑁆𑀢𑀸𑀦𑀼𑀧𑀭𑀺𑀯𑀢𑁆𑀢𑀺, 𑀲𑀺𑀬𑀸 𑀦𑁄 𑀘𑀺𑀢𑁆𑀢𑀸𑀦𑀼𑀧𑀭𑀺𑀯𑀢𑁆𑀢𑀺. 𑀤𑁆𑀯𑁂 𑀲𑀘𑁆𑀘𑀸 𑀘𑀺𑀢𑁆𑀢𑀲𑀁𑀲𑀝𑁆𑀞𑀲𑀫𑀼𑀝𑁆𑀞𑀸𑀦𑀸. 𑀦𑀺𑀭𑁄𑀥𑀲𑀘𑁆𑀘𑀁 𑀦𑁄 𑀘𑀺𑀢𑁆𑀢𑀲𑀁𑀲𑀝𑁆𑀞𑀲𑀫𑀼𑀝𑁆𑀞𑀸𑀦𑀁. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀘𑀺𑀢𑁆𑀢𑀲𑀁𑀲𑀝𑁆𑀞𑀲𑀫𑀼𑀝𑁆𑀞𑀸𑀦𑀁, 𑀲𑀺𑀬𑀸 𑀦𑁄 𑀘𑀺𑀢𑁆𑀢𑀲𑀁𑀲𑀝𑁆𑀞𑀲𑀫𑀼𑀝𑁆𑀞𑀸𑀦𑀁. 𑀤𑁆𑀯𑁂 𑀲𑀘𑁆𑀘𑀸 𑀘𑀺𑀢𑁆𑀢𑀲𑀁𑀲𑀝𑁆𑀞𑀲𑀫𑀼𑀝𑁆𑀞𑀸𑀦𑀲𑀳𑀪𑀼𑀦𑁄. 𑀦𑀺𑀭𑁄𑀥𑀲𑀘𑁆𑀘𑀁 𑀦𑁄 𑀘𑀺𑀢𑁆𑀢𑀲𑀁𑀲𑀝𑁆𑀞𑀲𑀫𑀼𑀝𑁆𑀞𑀸𑀦𑀲𑀳𑀪𑀽. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀘𑀺𑀢𑁆𑀢𑀲𑀁𑀲𑀝𑁆𑀞𑀲𑀫𑀼𑀝𑁆𑀞𑀸𑀦𑀲𑀳𑀪𑀽, 𑀲𑀺𑀬𑀸 𑀦𑁄 𑀘𑀺𑀢𑁆𑀢𑀲𑀁𑀲𑀝𑁆𑀞𑀲𑀫𑀼𑀝𑁆𑀞𑀸𑀦𑀲𑀳𑀪𑀽. 𑀤𑁆𑀯𑁂 𑀲𑀘𑁆𑀘𑀸 𑀘𑀺𑀢𑁆𑀢𑀲𑀁𑀲𑀝𑁆𑀞𑀲𑀫𑀼𑀝𑁆𑀞𑀸𑀦𑀸𑀦𑀼𑀧𑀭𑀺𑀯𑀢𑁆𑀢𑀺𑀦𑁄. 𑀦𑀺𑀭𑁄𑀥𑀲𑀘𑁆𑀘𑀁 𑀦𑁄 𑀘𑀺𑀢𑁆𑀢𑀲𑀁𑀲𑀝𑁆𑀞𑀲𑀫𑀼𑀝𑁆𑀞𑀸𑀦𑀸𑀦𑀼𑀧𑀭𑀺𑀯𑀢𑁆𑀢𑀺. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀘𑀺𑀢𑁆𑀢𑀲𑀁𑀲𑀝𑁆𑀞𑀲𑀫𑀼𑀝𑁆𑀞𑀸𑀦𑀸𑀦𑀼𑀧𑀭𑀺𑀯𑀢𑁆𑀢𑀺, 𑀲𑀺𑀬𑀸 𑀦𑁄 𑀘𑀺𑀢𑁆𑀢𑀲𑀁𑀲𑀝𑁆𑀞𑀲𑀫𑀼𑀝𑁆𑀞𑀸𑀦𑀸𑀦𑀼𑀧𑀭𑀺𑀯𑀢𑁆𑀢𑀺. 𑀢𑀻𑀡𑀺 𑀲𑀘𑁆𑀘𑀸𑀦𑀺 𑀩𑀸𑀳𑀺𑀭𑀸. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀅𑀚𑁆𑀛𑀢𑁆𑀢𑀁, 𑀲𑀺𑀬𑀸 𑀩𑀸𑀳𑀺𑀭𑀁.

𑀢𑀻𑀡𑀺 𑀲𑀘𑁆𑀘𑀸𑀦𑀺 𑀦𑁄 𑀉𑀧𑀸𑀤𑀸. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀉𑀧𑀸𑀤𑀸, 𑀲𑀺𑀬𑀸 𑀦𑁄 𑀉𑀧𑀸𑀤𑀸. 𑀢𑀻𑀡𑀺 𑀲𑀘𑁆𑀘𑀸𑀦𑀺 𑀅𑀦𑀼𑀧𑀸𑀤𑀺𑀦𑁆𑀦𑀸. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀉𑀧𑀸𑀤𑀺𑀦𑁆𑀦𑀁, 𑀲𑀺𑀬𑀸 𑀅𑀦𑀼𑀧𑀸𑀤𑀺𑀦𑁆𑀦𑀁. 𑀲𑀫𑀼𑀤𑀬𑀲𑀘𑁆𑀘𑀁 𑀉𑀧𑀸𑀤𑀸𑀦𑀁. 𑀤𑁆𑀯𑁂 𑀲𑀘𑁆𑀘𑀸 𑀦𑁄 𑀉𑀧𑀸𑀤𑀸𑀦𑀸. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀉𑀧𑀸𑀤𑀸𑀦𑀁, 𑀲𑀺𑀬𑀸 𑀦𑁄 𑀉𑀧𑀸𑀤𑀸𑀦𑀁. 𑀤𑁆𑀯𑁂 𑀲𑀘𑁆𑀘𑀸 𑀉𑀧𑀸𑀤𑀸𑀦𑀺𑀬𑀸. 𑀤𑁆𑀯𑁂 𑀲𑀘𑁆𑀘𑀸 𑀅𑀦𑀼𑀧𑀸𑀤𑀸𑀦𑀺𑀬𑀸. 𑀤𑁆𑀯𑁂 𑀲𑀘𑁆𑀘𑀸 𑀉𑀧𑀸𑀤𑀸𑀦𑀯𑀺𑀧𑁆𑀧𑀬𑀼𑀢𑁆𑀢𑀸. 𑀤𑁆𑀯𑁂 𑀲𑀘𑁆𑀘𑀸 𑀲𑀺𑀬𑀸 𑀉𑀧𑀸𑀤𑀸𑀦𑀲𑀫𑁆𑀧𑀬𑀼𑀢𑁆𑀢𑀸, 𑀲𑀺𑀬𑀸 𑀉𑀧𑀸𑀤𑀸𑀦𑀯𑀺𑀧𑁆𑀧𑀬𑀼𑀢𑁆𑀢𑀸. 𑀲𑀫𑀼𑀤𑀬𑀲𑀘𑁆𑀘𑀁 𑀉𑀧𑀸𑀤𑀸𑀦𑀜𑁆𑀘𑁂𑀯 𑀉𑀧𑀸𑀤𑀸𑀦𑀺𑀬𑀜𑁆𑀘. 𑀤𑁆𑀯𑁂 𑀲𑀘𑁆𑀘𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀉𑀧𑀸𑀤𑀸𑀦𑀸 𑀘𑁂𑀯 𑀉𑀧𑀸𑀤𑀸𑀦𑀺𑀬𑀸 𑀘𑀸’’𑀢𑀺𑀧𑀺, ‘‘𑀉𑀧𑀸𑀤𑀸𑀦𑀺𑀬𑀸 𑀘𑁂𑀯 𑀦𑁄 𑀘 𑀉𑀧𑀸𑀤𑀸𑀦𑀸’’𑀢𑀺𑀧𑀺. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀉𑀧𑀸𑀤𑀸𑀦𑀜𑁆𑀘𑁂𑀯 𑀉𑀧𑀸𑀤𑀸𑀦𑀺𑀬𑀜𑁆𑀘, 𑀲𑀺𑀬𑀸 𑀉𑀧𑀸𑀤𑀸𑀦𑀺𑀬𑀜𑁆𑀘𑁂𑀯 𑀦𑁄 𑀘 𑀉𑀧𑀸𑀤𑀸𑀦𑀁. 𑀲𑀫𑀼𑀤𑀬𑀲𑀘𑁆𑀘𑀁 𑀲𑀺𑀬𑀸 𑀉𑀧𑀸𑀤𑀸𑀦𑀜𑁆𑀘𑁂𑀯 𑀉𑀧𑀸𑀤𑀸𑀦𑀲𑀫𑁆𑀧𑀬𑀼𑀢𑁆𑀢𑀜𑁆𑀘, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀉𑀧𑀸𑀤𑀸𑀦𑀜𑁆𑀘𑁂𑀯 𑀉𑀧𑀸𑀤𑀸𑀦𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑀸’’𑀢𑀺𑀧𑀺, ‘‘𑀉𑀧𑀸𑀤𑀸𑀦𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑁂𑀯 𑀦𑁄 𑀘 𑀉𑀧𑀸𑀤𑀸𑀦’’𑀦𑁆𑀢𑀺𑀧𑀺. 𑀤𑁆𑀯𑁂 𑀲𑀘𑁆𑀘𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀉𑀧𑀸𑀤𑀸𑀦𑀸 𑀘𑁂𑀯 𑀉𑀧𑀸𑀤𑀸𑀦𑀲𑀫𑁆𑀧𑀬𑀼𑀢𑁆𑀢𑀸 𑀘𑀸’’𑀢𑀺𑀧𑀺, ‘‘𑀉𑀧𑀸𑀤𑀸𑀦𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀯 𑀦𑁄 𑀘 𑀉𑀧𑀸𑀤𑀸𑀦𑀸’’𑀢𑀺𑀧𑀺. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀉𑀧𑀸𑀤𑀸𑀦𑀜𑁆𑀘𑁂𑀯 𑀉𑀧𑀸𑀤𑀸𑀦𑀲𑀫𑁆𑀧𑀬𑀼𑀢𑁆𑀢𑀜𑁆𑀘, 𑀲𑀺𑀬𑀸 𑀉𑀧𑀸𑀤𑀸𑀦𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑁂𑀯 𑀦𑁄 𑀘 𑀉𑀧𑀸𑀤𑀸𑀦𑀁, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀉𑀧𑀸𑀤𑀸𑀦𑀜𑁆𑀘𑁂𑀯 𑀉𑀧𑀸𑀤𑀸𑀦𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑀸’’ 𑀢𑀺𑀧𑀺, ‘‘𑀉𑀧𑀸𑀤𑀸𑀦𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑁂𑀯 𑀦𑁄 𑀘 𑀉𑀧𑀸𑀤𑀸𑀦’’𑀦𑁆𑀢𑀺𑀧𑀺. 𑀤𑁆𑀯𑁂 𑀲𑀘𑁆𑀘𑀸 𑀉𑀧𑀸𑀤𑀸𑀦𑀯𑀺𑀧𑁆𑀧𑀬𑀼𑀢𑁆𑀢𑀅𑀦𑀼𑀧𑀸𑀤𑀸𑀦𑀺𑀬𑀸. 𑀤𑁆𑀯𑁂 𑀲𑀘𑁆𑀘𑀸 𑀲𑀺𑀬𑀸 𑀉𑀧𑀸𑀤𑀸𑀦𑀯𑀺𑀧𑁆𑀧𑀬𑀼𑀢𑁆𑀢𑀉𑀧𑀸𑀤𑀸𑀦𑀺𑀬𑀸, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀉𑀧𑀸𑀤𑀸𑀦𑀯𑀺𑀧𑁆𑀧𑀬𑀼𑀢𑁆𑀢𑀉𑀧𑀸𑀤𑀸𑀦𑀺𑀬𑀸’’𑀢𑀺𑀧𑀺, ‘‘𑀉𑀧𑀸𑀤𑀸𑀦𑀯𑀺𑀧𑁆𑀧𑀬𑀼𑀢𑁆𑀢𑀅𑀦𑀼𑀧𑀸𑀤𑀸𑀦𑀺𑀬𑀸’’𑀢𑀺𑀧𑀺.

𑀲𑀫𑀼𑀤𑀬𑀲𑀘𑁆𑀘𑀁 𑀓𑀺𑀮𑁂𑀲𑁄. 𑀤𑁆𑀯𑁂 𑀲𑀘𑁆𑀘𑀸 𑀦𑁄 𑀓𑀺𑀮𑁂𑀲𑀸. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀓𑀺𑀮𑁂𑀲𑁄, 𑀲𑀺𑀬𑀸 𑀦𑁄 𑀓𑀺𑀮𑁂𑀲𑁄. 𑀤𑁆𑀯𑁂 𑀲𑀘𑁆𑀘𑀸 𑀲𑀁𑀓𑀺𑀮𑁂𑀲𑀺𑀓𑀸. 𑀤𑁆𑀯𑁂 𑀲𑀘𑁆𑀘𑀸 𑀅𑀲𑀁𑀓𑀺𑀮𑁂𑀲𑀺𑀓𑀸. 𑀲𑀫𑀼𑀤𑀬𑀲𑀘𑁆𑀘𑀁 𑀲𑀁𑀓𑀺𑀮𑀺𑀝𑁆𑀞𑀁. 𑀤𑁆𑀯𑁂 𑀲𑀘𑁆𑀘𑀸 𑀅𑀲𑀁𑀓𑀺𑀮𑀺𑀝𑁆𑀞𑀸. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀲𑀁𑀓𑀺𑀮𑀺𑀝𑁆𑀞𑀁, 𑀲𑀺𑀬𑀸 𑀅𑀲𑀁𑀓𑀺𑀮𑀺𑀝𑁆𑀞𑀁. 𑀲𑀫𑀼𑀤𑀬𑀲𑀘𑁆𑀘𑀁 𑀓𑀺𑀮𑁂𑀲𑀲𑀫𑁆𑀧𑀬𑀼𑀢𑁆𑀢𑀁. 𑀤𑁆𑀯𑁂 𑀲𑀘𑁆𑀘𑀸 𑀓𑀺𑀮𑁂𑀲𑀯𑀺𑀧𑁆𑀧𑀬𑀼𑀢𑁆𑀢𑀸. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀓𑀺𑀮𑁂𑀲𑀲𑀫𑁆𑀧𑀬𑀼𑀢𑁆𑀢𑀁, 𑀲𑀺𑀬𑀸 𑀓𑀺𑀮𑁂𑀲𑀯𑀺𑀧𑁆𑀧𑀬𑀼𑀢𑁆𑀢𑀁. 𑀲𑀫𑀼𑀤𑀬𑀲𑀘𑁆𑀘𑀁 𑀓𑀺𑀮𑁂𑀲𑁄 𑀘𑁂𑀯 𑀲𑀁𑀓𑀺𑀮𑁂𑀲𑀺𑀓𑀜𑁆𑀘. 𑀤𑁆𑀯𑁂 𑀲𑀘𑁆𑀘𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀓𑀺𑀮𑁂𑀲𑀸 𑀘𑁂𑀯 𑀲𑀁𑀓𑀺𑀮𑁂𑀲𑀺𑀓𑀸 𑀘𑀸’’𑀢𑀺𑀧𑀺, ‘‘𑀲𑀁𑀓𑀺𑀮𑁂𑀲𑀺𑀓𑀸 𑀘𑁂𑀯 𑀦𑁄 𑀘 𑀓𑀺𑀮𑁂𑀲𑀸’’𑀢𑀺𑀧𑀺. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀓𑀺𑀮𑁂𑀲𑁄 𑀘𑁂𑀯 𑀲𑀁𑀓𑀺𑀮𑁂𑀲𑀺𑀓𑀜𑁆𑀘, 𑀲𑀺𑀬𑀸 𑀲𑀁𑀓𑀺𑀮𑁂𑀲𑀺𑀓𑀜𑁆𑀘𑁂𑀯 𑀦𑁄 𑀘 𑀓𑀺𑀮𑁂𑀲𑁄. 𑀲𑀫𑀼𑀤𑀬𑀲𑀘𑁆𑀘𑀁 𑀓𑀺𑀮𑁂𑀲𑁄 𑀘𑁂𑀯 𑀲𑀁𑀓𑀺𑀮𑀺𑀝𑁆𑀞𑀜𑁆𑀘. 𑀤𑁆𑀯𑁂 𑀲𑀘𑁆𑀘𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀓𑀺𑀮𑁂𑀲𑀸 𑀘𑁂𑀯 𑀲𑀁𑀓𑀺𑀮𑀺𑀝𑁆𑀞𑀸 𑀘𑀸’’𑀢𑀺𑀧𑀺, ‘‘𑀲𑀁𑀓𑀺𑀮𑀺𑀝𑁆𑀞𑀸 𑀘𑁂𑀯 𑀦𑁄 𑀘 𑀓𑀺𑀮𑁂𑀲𑀸’’𑀢𑀺𑀧𑀺. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀓𑀺𑀮𑁂𑀲𑁄 𑀘𑁂𑀯 𑀲𑀁𑀓𑀺𑀮𑀺𑀝𑁆𑀞𑀜𑁆𑀘, 𑀲𑀺𑀬𑀸 𑀲𑀁𑀓𑀺𑀮𑀺𑀝𑁆𑀞𑀜𑁆𑀘𑁂𑀯 𑀦𑁄 𑀘 𑀓𑀺𑀮𑁂𑀲𑁄, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀓𑀺𑀮𑁂𑀲𑁄 𑀘𑁂𑀯 𑀲𑀁𑀓𑀺𑀮𑀺𑀝𑁆𑀞𑀜𑁆𑀘𑀸’’𑀢𑀺𑀧𑀺, ‘‘𑀲𑀁𑀓𑀺𑀮𑀺𑀝𑁆𑀞𑀜𑁆𑀘𑁂𑀯 𑀦𑁄 𑀘 𑀓𑀺𑀮𑁂𑀲𑁄’’𑀢𑀺𑀧𑀺. 𑀲𑀫𑀼𑀤𑀬𑀲𑀘𑁆𑀘𑀁 𑀓𑀺𑀮𑁂𑀲𑁄 𑀘𑁂𑀯 𑀓𑀺𑀮𑁂𑀲𑀲𑀫𑁆𑀧𑀬𑀼𑀢𑁆𑀢𑀜𑁆𑀘. 𑀤𑁆𑀯𑁂 𑀲𑀘𑁆𑀘𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀓𑀺𑀮𑁂𑀲𑀸 𑀘𑁂𑀯 𑀓𑀺𑀮𑁂𑀲𑀲𑀫𑁆𑀧𑀬𑀼𑀢𑁆𑀢𑀸 𑀘𑀸’’𑀢𑀺𑀧𑀺, ‘‘𑀓𑀺𑀮𑁂𑀲𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀯 𑀦𑁄 𑀘 𑀓𑀺𑀮𑁂𑀲𑀸’’𑀢𑀺𑀧𑀺. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀓𑀺𑀮𑁂𑀲𑁄 𑀘𑁂𑀯 𑀓𑀺𑀮𑁂𑀲𑀲𑀫𑁆𑀧𑀬𑀼𑀢𑁆𑀢𑀜𑁆𑀘, 𑀲𑀺𑀬𑀸 𑀓𑀺𑀮𑁂𑀲𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑁂𑀯 𑀦𑁄 𑀘 𑀓𑀺𑀮𑁂𑀲𑁄, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀓𑀺𑀮𑁂𑀲𑁄 𑀘𑁂𑀯 𑀓𑀺𑀮𑁂𑀲𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑀸’’ 𑀢𑀺𑀧𑀺, ‘‘𑀓𑀺𑀮𑁂𑀲𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑁂𑀯 𑀦𑁄 𑀘 𑀓𑀺𑀮𑁂𑀲𑁄’’𑀢𑀺𑀧𑀺. 𑀤𑁆𑀯𑁂 𑀲𑀘𑁆𑀘𑀸 𑀓𑀺𑀮𑁂𑀲𑀯𑀺𑀧𑁆𑀧𑀬𑀼𑀢𑁆𑀢𑀅𑀲𑀁𑀓𑀺𑀮𑁂𑀲𑀺𑀓𑀸. 𑀲𑀫𑀼𑀤𑀬𑀲𑀘𑁆𑀘𑀁 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀓𑀺𑀮𑁂𑀲𑀯𑀺𑀧𑁆𑀧𑀬𑀼𑀢𑁆𑀢𑀲𑀁𑀓𑀺𑀮𑁂𑀲𑀺𑀓’’𑀦𑁆𑀢𑀺𑀧𑀺, ‘‘𑀓𑀺𑀮𑁂𑀲𑀯𑀺𑀧𑁆𑀧𑀬𑀼𑀢𑁆𑀢𑀅𑀲𑀁𑀓𑀺𑀮𑁂𑀲𑀺𑀓’’𑀦𑁆𑀢𑀺𑀧𑀺. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀓𑀺𑀮𑁂𑀲𑀯𑀺𑀧𑁆𑀧𑀬𑀼𑀢𑁆𑀢𑀲𑀁𑀓𑀺𑀮𑁂𑀲𑀺𑀓𑀁, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀓𑀺𑀮𑁂𑀲𑀯𑀺𑀧𑁆𑀧𑀬𑀼𑀢𑁆𑀢𑀲𑀁𑀓𑀺𑀮𑁂𑀲𑀺𑀓’’𑀦𑁆𑀢𑀺𑀧𑀺, ‘‘𑀓𑀺𑀮𑁂𑀲𑀯𑀺𑀧𑁆𑀧𑀬𑀼𑀢𑁆𑀢𑀅𑀲𑀁𑀓𑀺𑀮𑁂𑀲𑀺𑀓’’𑀦𑁆𑀢𑀺𑀧𑀺.

𑀤𑁆𑀯𑁂 𑀲𑀘𑁆𑀘𑀸 𑀦 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸. 𑀤𑁆𑀯𑁂 𑀲𑀘𑁆𑀘𑀸 𑀲𑀺𑀬𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸, 𑀲𑀺𑀬𑀸 𑀦 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸. 𑀤𑁆𑀯𑁂 𑀲𑀘𑁆𑀘𑀸 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸. 𑀤𑁆𑀯𑁂 𑀲𑀘𑁆𑀘𑀸 𑀲𑀺𑀬𑀸 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸, 𑀲𑀺𑀬𑀸 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸. 𑀤𑁆𑀯𑁂 𑀲𑀘𑁆𑀘𑀸 𑀦 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸. 𑀤𑁆𑀯𑁂 𑀲𑀘𑁆𑀘𑀸 𑀲𑀺𑀬𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸, 𑀲𑀺𑀬𑀸 𑀦 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸. 𑀤𑁆𑀯𑁂 𑀲𑀘𑁆𑀘𑀸 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸. 𑀤𑁆𑀯𑁂 𑀲𑀘𑁆𑀘𑀸 𑀲𑀺𑀬𑀸 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸, 𑀲𑀺𑀬𑀸 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸. 𑀲𑀫𑀼𑀤𑀬𑀲𑀘𑁆𑀘𑀁 𑀲𑀯𑀺𑀢𑀓𑁆𑀓𑀁. 𑀦𑀺𑀭𑁄𑀥𑀲𑀘𑁆𑀘𑀁 𑀅𑀯𑀺𑀢𑀓𑁆𑀓𑀁. 𑀤𑁆𑀯𑁂 𑀲𑀘𑁆𑀘𑀸 𑀲𑀺𑀬𑀸 𑀲𑀯𑀺𑀢𑀓𑁆𑀓𑀸, 𑀲𑀺𑀬𑀸 𑀅𑀯𑀺𑀢𑀓𑁆𑀓𑀸. 𑀲𑀫𑀼𑀤𑀬𑀲𑀘𑁆𑀘𑀁 𑀲𑀯𑀺𑀘𑀸𑀭𑀁. 𑀦𑀺𑀭𑁄𑀥𑀲𑀘𑁆𑀘𑀁 𑀅𑀯𑀺𑀘𑀸𑀭𑀁. 𑀤𑁆𑀯𑁂 𑀲𑀘𑁆𑀘𑀸 𑀲𑀺𑀬𑀸 𑀲𑀯𑀺𑀘𑀸𑀭𑀸, 𑀲𑀺𑀬𑀸 𑀅𑀯𑀺𑀘𑀸𑀭𑀸. 𑀦𑀺𑀭𑁄𑀥𑀲𑀘𑁆𑀘𑀁 𑀅𑀧𑁆𑀧𑀻𑀢𑀺𑀓𑀁. 𑀢𑀻𑀡𑀺 𑀲𑀘𑁆𑀘𑀸𑀦𑀺 𑀲𑀺𑀬𑀸 𑀲𑀧𑁆𑀧𑀻𑀢𑀺𑀓𑀸, 𑀲𑀺𑀬𑀸 𑀅𑀧𑁆𑀧𑀻𑀢𑀺𑀓𑀸. 𑀦𑀺𑀭𑁄𑀥𑀲𑀘𑁆𑀘𑀁 𑀦 𑀧𑀻𑀢𑀺𑀲𑀳𑀕𑀢𑀁. 𑀢𑀻𑀡𑀺 𑀲𑀘𑁆𑀘𑀸𑀦𑀺 𑀲𑀺𑀬𑀸 𑀧𑀻𑀢𑀺𑀲𑀳𑀕𑀢𑀸, 𑀲𑀺𑀬𑀸 𑀦 𑀧𑀻𑀢𑀺𑀲𑀳𑀕𑀢𑀸. 𑀦𑀺𑀭𑁄𑀥𑀲𑀘𑁆𑀘𑀁 𑀦 𑀲𑀼𑀔𑀲𑀳𑀕𑀢𑀁. 𑀢𑀻𑀡𑀺 𑀲𑀘𑁆𑀘𑀸𑀦𑀺 𑀲𑀺𑀬𑀸 𑀲𑀼𑀔𑀲𑀳𑀕𑀢𑀸, 𑀲𑀺𑀬𑀸 𑀦 𑀲𑀼𑀔𑀲𑀳𑀕𑀢𑀸. 𑀦𑀺𑀭𑁄𑀥𑀲𑀘𑁆𑀘𑀁 𑀦 𑀉𑀧𑁂𑀓𑁆𑀔𑀸𑀲𑀳𑀕𑀢𑀁. 𑀢𑀻𑀡𑀺 𑀲𑀘𑁆𑀘𑀸𑀦𑀺 𑀲𑀺𑀬𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀸, 𑀲𑀺𑀬𑀸 𑀦 𑀉𑀧𑁂𑀓𑁆𑀔𑀸𑀲𑀳𑀕𑀢𑀸.

𑀲𑀫𑀼𑀤𑀬𑀲𑀘𑁆𑀘𑀁 𑀓𑀸𑀫𑀸𑀯𑀘𑀭𑀁. 𑀤𑁆𑀯𑁂 𑀲𑀘𑁆𑀘𑀸 𑀦 𑀓𑀸𑀫𑀸𑀯𑀘𑀭𑀸. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀓𑀸𑀫𑀸𑀯𑀘𑀭𑀁, 𑀲𑀺𑀬𑀸 𑀦 𑀓𑀸𑀫𑀸𑀯𑀘𑀭𑀁. 𑀢𑀻𑀡𑀺 𑀲𑀘𑁆𑀘𑀸𑀦𑀺 𑀦 𑀭𑀽𑀧𑀸𑀯𑀘𑀭𑀸. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀭𑀽𑀧𑀸𑀯𑀘𑀭𑀁, 𑀲𑀺𑀬𑀸 𑀦 𑀭𑀽𑀧𑀸𑀯𑀘𑀭𑀁. 𑀢𑀻𑀡𑀺 𑀲𑀘𑁆𑀘𑀸𑀦𑀺 𑀦 𑀅𑀭𑀽𑀧𑀸𑀯𑀘𑀭𑀸. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀅𑀭𑀽𑀧𑀸𑀯𑀘𑀭𑀁, 𑀲𑀺𑀬𑀸 𑀦 𑀅𑀭𑀽𑀧𑀸𑀯𑀘𑀭𑀁. 𑀤𑁆𑀯𑁂 𑀲𑀘𑁆𑀘𑀸 𑀧𑀭𑀺𑀬𑀸𑀧𑀦𑁆𑀦𑀸. 𑀤𑁆𑀯𑁂 𑀲𑀘𑁆𑀘𑀸 𑀅𑀧𑀭𑀺𑀬𑀸𑀧𑀦𑁆𑀦𑀸. 𑀫𑀕𑁆𑀕𑀲𑀘𑁆𑀘𑀁 𑀦𑀺𑀬𑁆𑀬𑀸𑀦𑀺𑀓𑀁. 𑀢𑀻𑀡𑀺 𑀲𑀘𑁆𑀘𑀸𑀦𑀺 𑀅𑀦𑀺𑀬𑁆𑀬𑀸𑀦𑀺𑀓𑀸. 𑀫𑀕𑁆𑀕𑀲𑀘𑁆𑀘𑀁 𑀦𑀺𑀬𑀢𑀁. 𑀦𑀺𑀭𑁄𑀥𑀲𑀘𑁆𑀘𑀁 𑀅𑀦𑀺𑀬𑀢𑀁. 𑀤𑁆𑀯𑁂 𑀲𑀘𑁆𑀘𑀸 𑀲𑀺𑀬𑀸 𑀦𑀺𑀬𑀢𑀸, 𑀲𑀺𑀬𑀸 𑀅𑀦𑀺𑀬𑀢𑀸. 𑀤𑁆𑀯𑁂 𑀲𑀘𑁆𑀘𑀸 𑀲𑀉𑀢𑁆𑀢𑀭𑀸. 𑀤𑁆𑀯𑁂 𑀲𑀘𑁆𑀘𑀸 𑀅𑀦𑀼𑀢𑁆𑀢𑀭𑀸. 𑀲𑀫𑀼𑀤𑀬𑀲𑀘𑁆𑀘𑀁 𑀲𑀭𑀡𑀁. 𑀤𑁆𑀯𑁂 𑀲𑀘𑁆𑀘𑀸 𑀅𑀭𑀡𑀸. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀲𑀭𑀡𑀁, 𑀲𑀺𑀬𑀸 𑀅𑀭𑀡𑀦𑁆𑀢𑀺.

𑀧𑀜𑁆𑀳𑀸𑀧𑀼𑀘𑁆𑀙𑀓𑀁.

𑀲𑀘𑁆𑀘𑀯𑀺𑀪𑀗𑁆𑀕𑁄 𑀦𑀺𑀝𑁆𑀞𑀺𑀢𑁄.