𑁨. 𑀆𑀬𑀢𑀦𑀯𑀺𑀪𑀗𑁆𑀕𑁄

𑁧. 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀁

𑁧𑁫𑁪. 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺 𑁋 𑀘𑀓𑁆𑀔𑀸𑀬𑀢𑀦𑀁, 𑀭𑀽𑀧𑀸𑀬𑀢𑀦𑀁, 𑀲𑁄𑀢𑀸𑀬𑀢𑀦𑀁, 𑀲𑀤𑁆𑀤𑀸𑀬𑀢𑀦𑀁, 𑀖𑀸𑀦𑀸𑀬𑀢𑀦𑀁, 𑀕𑀦𑁆𑀥𑀸𑀬𑀢𑀦𑀁, 𑀚𑀺𑀯𑁆𑀳𑀸𑀬𑀢𑀦𑀁, 𑀭𑀲𑀸𑀬𑀢𑀦𑀁, 𑀓𑀸𑀬𑀸𑀬𑀢𑀦𑀁, 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁, 𑀫𑀦𑀸𑀬𑀢𑀦𑀁, 𑀥𑀫𑁆𑀫𑀸𑀬𑀢𑀦𑀁.

𑀘𑀓𑁆𑀔𑀼𑀁 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁. 𑀭𑀽𑀧𑀸 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀅𑀦𑀢𑁆𑀢𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸. 𑀲𑁄𑀢𑀁 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁. 𑀲𑀤𑁆𑀤𑀸 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀅𑀦𑀢𑁆𑀢𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸. 𑀖𑀸𑀦𑀁 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁. 𑀕𑀦𑁆𑀥𑀸 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀅𑀦𑀢𑁆𑀢𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸. 𑀚𑀺𑀯𑁆𑀳𑀸 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀅𑀦𑀢𑁆𑀢𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸. 𑀭𑀲𑀸 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀅𑀦𑀢𑁆𑀢𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸. 𑀓𑀸𑀬𑁄 𑀅𑀦𑀺𑀘𑁆𑀘𑁄 𑀤𑀼𑀓𑁆𑀔𑁄 𑀅𑀦𑀢𑁆𑀢𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄. 𑀨𑁄𑀝𑁆𑀞𑀩𑁆𑀩𑀸 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀅𑀦𑀢𑁆𑀢𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸. 𑀫𑀦𑁄 𑀅𑀦𑀺𑀘𑁆𑀘𑁄 𑀤𑀼𑀓𑁆𑀔𑁄 𑀅𑀦𑀢𑁆𑀢𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄. 𑀥𑀫𑁆𑀫𑀸 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀅𑀦𑀢𑁆𑀢𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸.

𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀁.

𑁨. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀁

𑁧𑁫𑁫. 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺 𑁋 𑀘𑀓𑁆𑀔𑀸𑀬𑀢𑀦𑀁, 𑀲𑁄𑀢𑀸𑀬𑀢𑀦𑀁, 𑀖𑀸𑀦𑀸𑀬𑀢𑀦𑀁, 𑀚𑀺𑀯𑁆𑀳𑀸𑀬𑀢𑀦𑀁, 𑀓𑀸𑀬𑀸𑀬𑀢𑀦𑀁, 𑀫𑀦𑀸𑀬𑀢𑀦𑀁, 𑀭𑀽𑀧𑀸𑀬𑀢𑀦𑀁, 𑀲𑀤𑁆𑀤𑀸𑀬𑀢𑀦𑀁, 𑀕𑀦𑁆𑀥𑀸𑀬𑀢𑀦𑀁, 𑀭𑀲𑀸𑀬𑀢𑀦𑀁, 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁, 𑀥𑀫𑁆𑀫𑀸𑀬𑀢𑀦𑀁.

𑁧𑁫𑁬. 𑀢𑀢𑁆𑀣 𑀓𑀢𑀫𑀁 𑀘𑀓𑁆𑀔𑀸𑀬𑀢𑀦𑀁? 𑀬𑀁 𑀘𑀓𑁆𑀔𑀼 [𑀘𑀓𑁆𑀔𑀼𑀁 (𑀲𑀻. 𑀲𑁆𑀬𑀸. 𑀓.) 𑀥. 𑀲. 𑁫𑁯𑁬-𑁫𑁯𑁯] 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀧𑀲𑀸𑀤𑁄 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑁄 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄, 𑀬𑁂𑀦 𑀘𑀓𑁆𑀔𑀼𑀦𑀸 𑀅𑀦𑀺𑀤𑀲𑁆𑀲𑀦𑁂𑀦 𑀲𑀧𑁆𑀧𑀝𑀺𑀖𑁂𑀦 𑀭𑀽𑀧𑀁 𑀲𑀦𑀺𑀤𑀲𑁆𑀲𑀦𑀁 𑀲𑀧𑁆𑀧𑀝𑀺𑀖𑀁 𑀧𑀲𑁆𑀲𑀺 𑀯𑀸 𑀧𑀲𑁆𑀲𑀢𑀺 𑀯𑀸 𑀧𑀲𑁆𑀲𑀺𑀲𑁆𑀲𑀢𑀺 𑀯𑀸 𑀧𑀲𑁆𑀲𑁂 𑀯𑀸, 𑀘𑀓𑁆𑀔𑀼𑀫𑁆𑀧𑁂𑀢𑀁 𑀘𑀓𑁆𑀔𑀸𑀬𑀢𑀦𑀫𑁆𑀧𑁂𑀢𑀁 𑀘𑀓𑁆𑀔𑀼𑀥𑀸𑀢𑀼𑀧𑁂𑀲𑀸 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀫𑁆𑀧𑁂𑀢𑀁 𑀮𑁄𑀓𑁄𑀧𑁂𑀲𑁄 𑀤𑁆𑀯𑀸𑀭𑀸𑀧𑁂𑀲𑀸 𑀲𑀫𑀼𑀤𑁆𑀤𑁄𑀧𑁂𑀲𑁄 𑀧𑀡𑁆𑀟𑀭𑀫𑁆𑀧𑁂𑀢𑀁 𑀔𑁂𑀢𑁆𑀢𑀫𑁆𑀧𑁂𑀢𑀁 𑀯𑀢𑁆𑀣𑀼𑀫𑁆𑀧𑁂𑀢𑀁 𑀦𑁂𑀢𑁆𑀢𑀫𑁆𑀧𑁂𑀢𑀁 𑀦𑀬𑀦𑀫𑁆𑀧𑁂𑀢𑀁 𑀑𑀭𑀺𑀫𑀁 𑀢𑀻𑀭𑀫𑁆𑀧𑁂𑀢𑀁 𑀲𑀼𑀜𑁆𑀜𑁄 𑀕𑀸𑀫𑁄𑀧𑁂𑀲𑁄. 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀘𑀓𑁆𑀔𑀸𑀬𑀢𑀦𑀁’’.

𑁧𑁫𑁭. 𑀢𑀢𑁆𑀣 𑀓𑀢𑀫𑀁 𑀲𑁄𑀢𑀸𑀬𑀢𑀦𑀁? 𑀬𑀁 𑀲𑁄𑀢𑀁 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀧𑀲𑀸𑀤𑁄 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑁄 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄, 𑀬𑁂𑀦 𑀲𑁄𑀢𑁂𑀦 𑀅𑀦𑀺𑀤𑀲𑁆𑀲𑀦𑁂𑀦 𑀲𑀧𑁆𑀧𑀝𑀺𑀖𑁂𑀦 𑀲𑀤𑁆𑀤𑀁 𑀅𑀦𑀺𑀤𑀲𑁆𑀲𑀦𑀁 𑀲𑀧𑁆𑀧𑀝𑀺𑀖𑀁 𑀲𑀼𑀡𑀺 𑀯𑀸 𑀲𑀼𑀡𑀸𑀢𑀺 𑀯𑀸 𑀲𑀼𑀡𑀺𑀲𑁆𑀲𑀢𑀺 𑀯𑀸 𑀲𑀼𑀡𑁂 𑀯𑀸, 𑀲𑁄𑀢𑀫𑁆𑀧𑁂𑀢𑀁 𑀲𑁄𑀢𑀸𑀬𑀢𑀦𑀫𑁆𑀧𑁂𑀢𑀁 𑀲𑁄𑀢𑀥𑀸𑀢𑀼𑀧𑁂𑀲𑀸 𑀲𑁄𑀢𑀺𑀦𑁆𑀤𑁆𑀭𑀺𑀬𑀫𑁆𑀧𑁂𑀢𑀁 𑀮𑁄𑀓𑁄𑀧𑁂𑀲𑁄 𑀤𑁆𑀯𑀸𑀭𑀸𑀧𑁂𑀲𑀸 𑀲𑀫𑀼𑀤𑁆𑀤𑁄𑀧𑁂𑀲𑁄 𑀧𑀡𑁆𑀟𑀭𑀫𑁆𑀧𑁂𑀢𑀁 𑀔𑁂𑀢𑁆𑀢𑀫𑁆𑀧𑁂𑀢𑀁 𑀯𑀢𑁆𑀣𑀼𑀫𑁆𑀧𑁂𑀢𑀁 𑀑𑀭𑀺𑀫𑀁 𑀢𑀻𑀭𑀫𑁆𑀧𑁂𑀢𑀁 𑀲𑀼𑀜𑁆𑀜𑁄 𑀕𑀸𑀫𑁄𑀧𑁂𑀲𑁄. 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀲𑁄𑀢𑀸𑀬𑀢𑀦𑀁’’.

𑁧𑁫𑁮. 𑀢𑀢𑁆𑀣 𑀓𑀢𑀫𑀁 𑀖𑀸𑀦𑀸𑀬𑀢𑀦𑀁? 𑀬𑀁 𑀖𑀸𑀦𑀁 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀧𑀲𑀸𑀤𑁄 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑁄 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄, 𑀬𑁂𑀦 𑀖𑀸𑀦𑁂𑀦 𑀅𑀦𑀺𑀤𑀲𑁆𑀲𑀦𑁂𑀦 𑀲𑀧𑁆𑀧𑀝𑀺𑀖𑁂𑀦 𑀕𑀦𑁆𑀥𑀁 𑀅𑀦𑀺𑀤𑀲𑁆𑀲𑀦𑀁 𑀲𑀧𑁆𑀧𑀝𑀺𑀖𑀁 𑀖𑀸𑀬𑀺 𑀯𑀸 𑀖𑀸𑀬𑀢𑀺 𑀯𑀸 𑀖𑀸𑀬𑀺𑀲𑁆𑀲𑀢𑀺 𑀯𑀸 𑀖𑀸𑀬𑁂 𑀯𑀸, 𑀖𑀸𑀦𑀫𑁆𑀧𑁂𑀢𑀁 𑀖𑀸𑀦𑀸𑀬𑀢𑀦𑀫𑁆𑀧𑁂𑀢𑀁 𑀖𑀸𑀦𑀥𑀸𑀢𑀼𑀧𑁂𑀲𑀸 𑀖𑀸𑀦𑀺𑀦𑁆𑀤𑁆𑀭𑀺𑀬𑀫𑁆𑀧𑁂𑀢𑀁 𑀮𑁄𑀓𑁄𑀧𑁂𑀲𑁄 𑀤𑁆𑀯𑀸𑀭𑀸𑀧𑁂𑀲𑀸 𑀲𑀫𑀼𑀤𑁆𑀤𑁄𑀧𑁂𑀲𑁄 𑀧𑀡𑁆𑀟𑀭𑀫𑁆𑀧𑁂𑀢𑀁 𑀔𑁂𑀢𑁆𑀢𑀫𑁆𑀧𑁂𑀢𑀁 𑀯𑀢𑁆𑀣𑀼𑀫𑁆𑀧𑁂𑀢𑀁 𑀑𑀭𑀺𑀫𑀁 𑀢𑀻𑀭𑀫𑁆𑀧𑁂𑀢𑀁 𑀲𑀼𑀜𑁆𑀜𑁄 𑀕𑀸𑀫𑁄𑀧𑁂𑀲𑁄. 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀖𑀸𑀦𑀸𑀬𑀢𑀦𑀁’’.

𑁧𑁫𑁯. 𑀢𑀢𑁆𑀣 𑀓𑀢𑀫𑀁 𑀚𑀺𑀯𑁆𑀳𑀸𑀬𑀢𑀦𑀁? 𑀬𑀸 𑀚𑀺𑀯𑁆𑀳𑀸 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀧𑀲𑀸𑀤𑁄 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑁄 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄, 𑀬𑀸𑀬 𑀚𑀺𑀯𑁆𑀳𑀸𑀬 𑀅𑀦𑀺𑀤𑀲𑁆𑀲𑀦𑀸𑀬 𑀲𑀧𑁆𑀧𑀝𑀺𑀖𑀸𑀬 𑀭𑀲𑀁 𑀅𑀦𑀺𑀤𑀲𑁆𑀲𑀦𑀁 𑀲𑀧𑁆𑀧𑀝𑀺𑀖𑀁 𑀲𑀸𑀬𑀺 𑀯𑀸 𑀲𑀸𑀬𑀢𑀺 𑀯𑀸 𑀲𑀸𑀬𑀺𑀲𑁆𑀲𑀢𑀺 𑀯𑀸 𑀲𑀸𑀬𑁂 𑀯𑀸, 𑀚𑀺𑀯𑁆𑀳𑀸𑀧𑁂𑀲𑀸 𑀚𑀺𑀯𑁆𑀳𑀸𑀬𑀢𑀦𑀫𑁆𑀧𑁂𑀢𑀁 𑀚𑀺𑀯𑁆𑀳𑀸𑀥𑀸𑀢𑀼𑀧𑁂𑀲𑀸 𑀚𑀻𑀯𑁆𑀳𑀺𑀦𑁆𑀤𑁆𑀭𑀺𑀬𑀫𑁆𑀧𑁂𑀢𑀁 𑀮𑁄𑀓𑁄𑀧𑁂𑀲𑁄 𑀤𑁆𑀯𑀸𑀭𑀸𑀧𑁂𑀲𑀸 𑀲𑀫𑀼𑀤𑁆𑀤𑁄𑀧𑁂𑀲𑁄 𑀧𑀡𑁆𑀟𑀭𑀫𑁆𑀧𑁂𑀢𑀁 𑀔𑁂𑀢𑁆𑀢𑀫𑁆𑀧𑁂𑀢𑀁 𑀯𑀢𑁆𑀣𑀼𑀫𑁆𑀧𑁂𑀢𑀁 𑀑𑀭𑀺𑀫𑀁 𑀢𑀻𑀭𑀫𑁆𑀧𑁂𑀢𑀁 𑀲𑀼𑀜𑁆𑀜𑁄 𑀕𑀸𑀫𑁄𑀧𑁂𑀲𑁄. 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀚𑀺𑀯𑁆𑀳𑀸𑀬𑀢𑀦𑀁’’.

𑁧𑁬𑁦. 𑀢𑀢𑁆𑀣 𑀓𑀢𑀫𑀁 𑀓𑀸𑀬𑀸𑀬𑀢𑀦𑀁? 𑀬𑁄 𑀓𑀸𑀬𑁄 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀧𑀲𑀸𑀤𑁄 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑁄 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄, 𑀬𑁂𑀦 𑀓𑀸𑀬𑁂𑀦 𑀅𑀦𑀺𑀤𑀲𑁆𑀲𑀦𑁂𑀦 𑀲𑀧𑁆𑀧𑀝𑀺𑀖𑁂𑀦 𑀨𑁄𑀝𑁆𑀞𑀩𑁆𑀩𑀁 𑀅𑀦𑀺𑀤𑀲𑁆𑀲𑀦𑀁 𑀲𑀧𑁆𑀧𑀝𑀺𑀖𑀁 𑀨𑀼𑀲𑀺 𑀯𑀸 𑀨𑀼𑀲𑀢𑀺 𑀯𑀸 𑀨𑀼𑀲𑀺𑀲𑁆𑀲𑀢𑀺 𑀯𑀸 𑀨𑀼𑀲𑁂 𑀯𑀸, 𑀓𑀸𑀬𑁄𑀧𑁂𑀲𑁄 𑀓𑀸𑀬𑀸𑀬𑀢𑀦𑀫𑁆𑀧𑁂𑀢𑀁 𑀓𑀸𑀬𑀥𑀸𑀢𑀼𑀧𑁂𑀲𑀸 𑀓𑀸𑀬𑀺𑀦𑁆𑀤𑁆𑀭𑀺𑀬𑀫𑁆𑀧𑁂𑀢𑀁 𑀮𑁄𑀓𑁄𑀧𑁂𑀲𑁄 𑀤𑁆𑀯𑀸𑀭𑀸𑀧𑁂𑀲𑀸 𑀲𑀫𑀼𑀤𑁆𑀤𑁄𑀧𑁂𑀲𑁄 𑀧𑀡𑁆𑀟𑀭𑀫𑁆𑀧𑁂𑀢𑀁 𑀔𑁂𑀢𑁆𑀢𑀫𑁆𑀧𑁂𑀢𑀁 𑀯𑀢𑁆𑀣𑀼𑀫𑁆𑀧𑁂𑀢𑀁 𑀑𑀭𑀺𑀫𑀁 𑀢𑀻𑀭𑀫𑁆𑀧𑁂𑀢𑀁 𑀲𑀼𑀜𑁆𑀜𑁄 𑀕𑀸𑀫𑁄𑀧𑁂𑀲𑁄. 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀓𑀸𑀬𑀸𑀬𑀢𑀦𑀁’’.

𑁧𑁬𑁧. 𑀢𑀢𑁆𑀣 𑀓𑀢𑀫𑀁 𑀫𑀦𑀸𑀬𑀢𑀦𑀁? 𑀏𑀓𑀯𑀺𑀥𑁂𑀦 𑀫𑀦𑀸𑀬𑀢𑀦𑀁 𑁋 𑀨𑀲𑁆𑀲𑀲𑀫𑁆𑀧𑀬𑀼𑀢𑁆𑀢𑀁.

𑀤𑀼𑀯𑀺𑀥𑁂𑀦 𑀫𑀦𑀸𑀬𑀢𑀦𑀁 𑁋 𑀅𑀢𑁆𑀣𑀺 𑀲𑀳𑁂𑀢𑀼𑀓𑀁, 𑀅𑀢𑁆𑀣𑀺 𑀅𑀳𑁂𑀢𑀼𑀓𑀁.

𑀢𑀺𑀯𑀺𑀥𑁂𑀦 𑀫𑀦𑀸𑀬𑀢𑀦𑀁 𑁋 𑀅𑀢𑁆𑀣𑀺 𑀓𑀼𑀲𑀮𑀁, 𑀅𑀢𑁆𑀣𑀺 𑀅𑀓𑀼𑀲𑀮𑀁, 𑀅𑀢𑁆𑀣𑀺 𑀅𑀩𑁆𑀬𑀸𑀓𑀢𑀁.

𑀘𑀢𑀼𑀩𑁆𑀩𑀺𑀥𑁂𑀦 𑀫𑀦𑀸𑀬𑀢𑀦𑀁 𑁋 𑀅𑀢𑁆𑀣𑀺 𑀓𑀸𑀫𑀸𑀯𑀘𑀭𑀁, 𑀅𑀢𑁆𑀣𑀺 𑀭𑀽𑀧𑀸𑀯𑀘𑀭𑀁, 𑀅𑀢𑁆𑀣𑀺 𑀅𑀭𑀽𑀧𑀸𑀯𑀘𑀭𑀁, 𑀅𑀢𑁆𑀣𑀺 𑀅𑀧𑀭𑀺𑀬𑀸𑀧𑀦𑁆𑀦𑀁.

𑀧𑀜𑁆𑀘𑀯𑀺𑀥𑁂𑀦 𑀫𑀦𑀸𑀬𑀢𑀦𑀁 𑁋 𑀅𑀢𑁆𑀣𑀺 𑀲𑀼𑀔𑀺𑀦𑁆𑀤𑁆𑀭𑀺𑀬𑀲𑀫𑁆𑀧𑀬𑀼𑀢𑁆𑀢𑀁, 𑀅𑀢𑁆𑀣𑀺 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀲𑀫𑁆𑀧𑀬𑀼𑀢𑁆𑀢𑀁, 𑀅𑀢𑁆𑀣𑀺 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀲𑀫𑁆𑀧𑀬𑀼𑀢𑁆𑀢𑀁, 𑀅𑀢𑁆𑀣𑀺 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀲𑀫𑁆𑀧𑀬𑀼𑀢𑁆𑀢𑀁, 𑀅𑀢𑁆𑀣𑀺 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀲𑀫𑁆𑀧𑀬𑀼𑀢𑁆𑀢𑀁.

𑀙𑀩𑁆𑀩𑀺𑀥𑁂𑀦 𑀫𑀦𑀸𑀬𑀢𑀦𑀁 𑁋 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀲𑁄𑀢𑀯𑀺𑀜𑁆𑀜𑀸𑀡𑀁, 𑀖𑀸𑀦𑀯𑀺𑀜𑁆𑀜𑀸𑀡𑀁, 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁, 𑀓𑀸𑀬𑀯𑀺𑀜𑁆𑀜𑀸𑀡𑀁, 𑀫𑀦𑁄𑀯𑀺𑀜𑁆𑀜𑀸𑀡𑀁. 𑀏𑀯𑀁 𑀙𑀩𑁆𑀩𑀺𑀥𑁂𑀦 𑀫𑀦𑀸𑀬𑀢𑀦𑀁.

𑀲𑀢𑁆𑀢𑀯𑀺𑀥𑁂𑀦 𑀫𑀦𑀸𑀬𑀢𑀦𑀁 𑁋 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀲𑁄𑀢𑀯𑀺𑀜𑁆𑀜𑀸𑀡𑀁, 𑀖𑀸𑀦𑀯𑀺𑀜𑁆𑀜𑀸𑀡𑀁, 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁, 𑀓𑀸𑀬𑀯𑀺𑀜𑁆𑀜𑀸𑀡𑀁, 𑀫𑀦𑁄𑀥𑀸𑀢𑀼, 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼. 𑀏𑀯𑀁 𑀲𑀢𑁆𑀢𑀯𑀺𑀥𑁂𑀦 𑀫𑀦𑀸𑀬𑀢𑀦𑀁.

𑀅𑀝𑁆𑀞𑀯𑀺𑀥𑁂𑀦 𑀫𑀦𑀸𑀬𑀢𑀦𑀁 𑁋 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀲𑁄𑀢𑀯𑀺𑀜𑁆𑀜𑀸𑀡𑀁, 𑀖𑀸𑀦𑀯𑀺𑀜𑁆𑀜𑀸𑀡𑀁, 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁, 𑀓𑀸𑀬𑀯𑀺𑀜𑁆𑀜𑀸𑀡𑀁 𑀅𑀢𑁆𑀣𑀺 𑀲𑀼𑀔𑀲𑀳𑀕𑀢𑀁, 𑀅𑀢𑁆𑀣𑀺 𑀤𑀼𑀓𑁆𑀔𑀲𑀳𑀕𑀢𑀁, 𑀫𑀦𑁄𑀥𑀸𑀢𑀼, 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼. 𑀏𑀯𑀁 𑀅𑀝𑁆𑀞𑀯𑀺𑀥𑁂𑀦 𑀫𑀦𑀸𑀬𑀢𑀦𑀁.

𑀦𑀯𑀯𑀺𑀥𑁂𑀦 𑀫𑀦𑀸𑀬𑀢𑀦𑀁 𑁋 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀲𑁄𑀢𑀯𑀺𑀜𑁆𑀜𑀸𑀡𑀁, 𑀖𑀸𑀦𑀯𑀺𑀜𑁆𑀜𑀸𑀡𑀁, 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁, 𑀓𑀸𑀬𑀯𑀺𑀜𑁆𑀜𑀸𑀡𑀁, 𑀫𑀦𑁄𑀥𑀸𑀢𑀼, 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀅𑀢𑁆𑀣𑀺 𑀓𑀼𑀲𑀮𑀁, 𑀅𑀢𑁆𑀣𑀺 𑀅𑀓𑀼𑀲𑀮𑀁, 𑀅𑀢𑁆𑀣𑀺 𑀅𑀩𑁆𑀬𑀸𑀓𑀢𑀁. 𑀏𑀯𑀁 𑀦𑀯𑀯𑀺𑀥𑁂𑀦 𑀫𑀦𑀸𑀬𑀢𑀦𑀁.

𑀤𑀲𑀯𑀺𑀥𑁂𑀦 𑀫𑀦𑀸𑀬𑀢𑀦𑀁 𑁋 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀲𑁄𑀢𑀯𑀺𑀜𑁆𑀜𑀸𑀡𑀁, 𑀖𑀸𑀦𑀯𑀺𑀜𑁆𑀜𑀸𑀡𑀁, 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁, 𑀓𑀸𑀬𑀯𑀺𑀜𑁆𑀜𑀸𑀡𑀁 𑀅𑀢𑁆𑀣𑀺 𑀲𑀼𑀔𑀲𑀳𑀕𑀢𑀁, 𑀅𑀢𑁆𑀣𑀺 𑀤𑀼𑀓𑁆𑀔𑀲𑀳𑀕𑀢𑀁, 𑀫𑀦𑁄𑀥𑀸𑀢𑀼, 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀅𑀢𑁆𑀣𑀺 𑀓𑀼𑀲𑀮𑀁, 𑀅𑀢𑁆𑀣𑀺 𑀅𑀓𑀼𑀲𑀮𑀁, 𑀅𑀢𑁆𑀣𑀺 𑀅𑀩𑁆𑀬𑀸𑀓𑀢𑀁. 𑀏𑀯𑀁 𑀤𑀲𑀯𑀺𑀥𑁂𑀦 𑀫𑀦𑀸𑀬𑀢𑀦𑀁.

𑀏𑀓𑀯𑀺𑀥𑁂𑀦 𑀫𑀦𑀸𑀬𑀢𑀦𑀁 𑁋 𑀨𑀲𑁆𑀲𑀲𑀫𑁆𑀧𑀬𑀼𑀢𑁆𑀢𑀁.

𑀤𑀼𑀯𑀺𑀥𑁂𑀦 𑀫𑀦𑀸𑀬𑀢𑀦𑀁 𑁋 𑀅𑀢𑁆𑀣𑀺 𑀲𑀳𑁂𑀢𑀼𑀓𑀁, 𑀅𑀢𑁆𑀣𑀺 𑀅𑀳𑁂𑀢𑀼𑀓𑀁.

𑀢𑀺𑀯𑀺𑀥𑁂𑀦 𑀫𑀦𑀸𑀬𑀢𑀦𑀁 𑁋 𑀅𑀢𑁆𑀣𑀺 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀁, 𑀅𑀢𑁆𑀣𑀺 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀁, 𑀅𑀢𑁆𑀣𑀺 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀁…𑀧𑁂…. 𑀏𑀯𑀁 𑀩𑀳𑀼𑀯𑀺𑀥𑁂𑀦 𑀫𑀦𑀸𑀬𑀢𑀦𑀁. 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀫𑀦𑀸𑀬𑀢𑀦𑀁’’.

𑁧𑁬𑁨. 𑀢𑀢𑁆𑀣 𑀓𑀢𑀫𑀁 𑀭𑀽𑀧𑀸𑀬𑀢𑀦𑀁? 𑀬𑀁 𑀭𑀽𑀧𑀁 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀯𑀡𑁆𑀡𑀦𑀺𑀪𑀸 𑀲𑀦𑀺𑀤𑀲𑁆𑀲𑀦𑀁 𑀲𑀧𑁆𑀧𑀝𑀺𑀖𑀁 𑀦𑀻𑀮𑀁 𑀧𑀻𑀢𑀓𑀁 𑀮𑁄𑀳𑀺𑀢𑀓𑀁 [𑀧𑀻𑀢𑀁 𑀮𑁄𑀳𑀺𑀢𑀁 (𑀲𑀻.)] 𑀑𑀤𑀸𑀢𑀁 𑀓𑀸𑀴𑀓𑀁 𑀫𑀜𑁆𑀚𑀺𑀝𑁆𑀞𑀓𑀁 [𑀫𑀜𑁆𑀚𑁂𑀝𑁆𑀞𑀓𑀁 (𑀲𑀻. 𑀲𑁆𑀬𑀸.)] 𑀳𑀭𑀺 𑀳𑀭𑀺𑀯𑀡𑁆𑀡𑀁 𑀅𑀫𑁆𑀩𑀗𑁆𑀓𑀼𑀭𑀯𑀡𑁆𑀡𑀁 𑀤𑀻𑀖𑀁 𑀭𑀲𑁆𑀲𑀁 𑀅𑀡𑀼𑀁 𑀣𑀽𑀮𑀁 𑀯𑀝𑁆𑀝𑀁 𑀧𑀭𑀺𑀫𑀡𑁆𑀟𑀮𑀁 𑀘𑀢𑀼𑀭𑀲𑁆𑀲𑀁 𑀙𑀴𑀁𑀲𑀁 𑀅𑀝𑁆𑀞𑀁𑀲𑀁 𑀲𑁄𑀴𑀲𑀁𑀲𑀁 𑀦𑀺𑀦𑁆𑀦𑀁 𑀣𑀮𑀁 𑀙𑀸𑀬𑀸 𑀆𑀢𑀧𑁄 𑀆𑀮𑁄𑀓𑁄 𑀅𑀦𑁆𑀥𑀓𑀸𑀭𑁄 𑀅𑀩𑁆𑀪𑀸 𑀫𑀳𑀺𑀓𑀸 𑀥𑀽𑀫𑁄 𑀭𑀚𑁄 𑀘𑀦𑁆𑀤𑀫𑀡𑁆𑀟𑀮𑀲𑁆𑀲 𑀯𑀡𑁆𑀡𑀦𑀺𑀪𑀸 𑀲𑀽𑀭𑀺𑀬𑀫𑀡𑁆𑀟𑀮𑀲𑁆𑀲 [𑀲𑀼𑀭𑀺𑀬𑀫𑀡𑁆𑀟𑀮𑀲𑁆𑀲 (𑀲𑀻. 𑀲𑁆𑀬𑀸. 𑀓𑀁.)] 𑀯𑀡𑁆𑀡𑀦𑀺𑀪𑀸 𑀢𑀸𑀭𑀓𑀭𑀽𑀧𑀸𑀦𑀁 𑀯𑀡𑁆𑀡𑀦𑀺𑀪𑀸 𑀆𑀤𑀸𑀲𑀫𑀡𑁆𑀟𑀮𑀲𑁆𑀲 𑀯𑀡𑁆𑀡𑀦𑀺𑀪𑀸 𑀫𑀡𑀺𑀲𑀗𑁆𑀔𑀫𑀼𑀢𑁆𑀢𑀯𑁂𑀴𑀼𑀭𑀺𑀬𑀲𑁆𑀲 𑀯𑀡𑁆𑀡𑀦𑀺𑀪𑀸 𑀚𑀸𑀢𑀭𑀽𑀧𑀭𑀚𑀢𑀲𑁆𑀲 𑀯𑀡𑁆𑀡𑀦𑀺𑀪𑀸, 𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀺 𑀅𑀢𑁆𑀣𑀺 𑀭𑀽𑀧𑀁 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀯𑀡𑁆𑀡𑀦𑀺𑀪𑀸 𑀲𑀦𑀺𑀤𑀲𑁆𑀲𑀦𑀁 𑀲𑀧𑁆𑀧𑀝𑀺𑀖𑀁, 𑀬𑀁 𑀭𑀽𑀧𑀁 𑀲𑀦𑀺𑀤𑀲𑁆𑀲𑀦𑀁 𑀲𑀧𑁆𑀧𑀝𑀺𑀖𑀁 𑀘𑀓𑁆𑀔𑀼𑀦𑀸 𑀅𑀦𑀺𑀤𑀲𑁆𑀲𑀦𑁂𑀦 𑀲𑀧𑁆𑀧𑀝𑀺𑀖𑁂𑀦 𑀧𑀲𑁆𑀲𑀺 𑀯𑀸 𑀧𑀲𑁆𑀲𑀢𑀺 𑀯𑀸 𑀧𑀲𑁆𑀲𑀺𑀲𑁆𑀲𑀢𑀺 𑀯𑀸 𑀧𑀲𑁆𑀲𑁂 𑀯𑀸, 𑀭𑀽𑀧𑀫𑁆𑀧𑁂𑀢𑀁 𑀭𑀽𑀧𑀸𑀬𑀢𑀦𑀫𑁆𑀧𑁂𑀢𑀁 𑀭𑀽𑀧𑀥𑀸𑀢𑀼𑀧𑁂𑀲𑀸. 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀭𑀽𑀧𑀸𑀬𑀢𑀦𑀁’’.

𑁧𑁬𑁩. 𑀢𑀢𑁆𑀣 𑀓𑀢𑀫𑀁 𑀲𑀤𑁆𑀤𑀸𑀬𑀢𑀦𑀁? 𑀬𑁄 𑀲𑀤𑁆𑀤𑁄 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄 𑀪𑁂𑀭𑀺𑀲𑀤𑁆𑀤𑁄 𑀫𑀼𑀤𑀺𑀗𑁆𑀕𑀲𑀤𑁆𑀤𑁄 [𑀫𑀼𑀢𑀺𑀗𑁆𑀕𑀲𑀤𑁆𑀥𑁄 (𑀲𑀻.)] 𑀲𑀗𑁆𑀔𑀲𑀤𑁆𑀤𑁄 𑀧𑀡𑀯𑀲𑀤𑁆𑀤𑁄 𑀕𑀻𑀢𑀲𑀤𑁆𑀤𑁄 𑀯𑀸𑀤𑀺𑀢𑀲𑀤𑁆𑀤𑁄 𑀲𑀫𑁆𑀫𑀲𑀤𑁆𑀤𑁄 𑀧𑀸𑀡𑀺𑀲𑀤𑁆𑀤𑁄 𑀲𑀢𑁆𑀢𑀸𑀦𑀁 𑀦𑀺𑀕𑁆𑀖𑁄𑀲𑀲𑀤𑁆𑀤𑁄 𑀥𑀸𑀢𑀽𑀦𑀁 𑀲𑀦𑁆𑀦𑀺𑀖𑀸𑀢𑀲𑀤𑁆𑀤𑁄 𑀯𑀸𑀢𑀲𑀤𑁆𑀤𑁄 𑀉𑀤𑀓𑀲𑀤𑁆𑀤𑁄 𑀫𑀦𑀼𑀲𑁆𑀲𑀲𑀤𑁆𑀤𑁄 𑀅𑀫𑀦𑀼𑀲𑁆𑀲𑀲𑀤𑁆𑀤𑁄, 𑀬𑁄 𑀯𑀸 𑀧𑀦𑀜𑁆𑀜𑁄𑀧𑀺 𑀅𑀢𑁆𑀣𑀺 𑀲𑀤𑁆𑀤𑁄 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄, 𑀬𑀁 𑀲𑀤𑁆𑀤𑀁 𑀅𑀦𑀺𑀤𑀲𑁆𑀲𑀦𑀁 𑀲𑀧𑁆𑀧𑀝𑀺𑀖𑀁 𑀲𑁄𑀢𑁂𑀦 𑀅𑀦𑀺𑀤𑀲𑁆𑀲𑀦𑁂𑀦 𑀲𑀧𑁆𑀧𑀝𑀺𑀖𑁂𑀦 𑀲𑀼𑀡𑀺 𑀯𑀸 𑀲𑀼𑀡𑀸𑀢𑀺 𑀯𑀸 𑀲𑀼𑀡𑀺𑀲𑁆𑀲𑀢𑀺 𑀯𑀸 𑀲𑀼𑀡𑁂 𑀯𑀸, 𑀲𑀤𑁆𑀤𑁄𑀧𑁂𑀲𑁄 𑀲𑀤𑁆𑀤𑀸𑀬𑀢𑀦𑀫𑁆𑀧𑁂𑀢𑀁 𑀲𑀤𑁆𑀤𑀥𑀸𑀢𑀼𑀧𑁂𑀲𑀸. 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀲𑀤𑁆𑀤𑀸𑀬𑀢𑀦𑀁’’.

𑁧𑁬𑁪. 𑀢𑀢𑁆𑀣 𑀓𑀢𑀫𑀁 𑀕𑀦𑁆𑀥𑀸𑀬𑀢𑀦𑀁? 𑀬𑁄 𑀕𑀦𑁆𑀥𑁄 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄 𑀫𑀽𑀮𑀕𑀦𑁆𑀥𑁄 𑀲𑀸𑀭𑀕𑀦𑁆𑀥𑁄 𑀢𑀘𑀕𑀦𑁆𑀥𑁄 𑀧𑀢𑁆𑀢𑀕𑀦𑁆𑀥𑁄 𑀧𑀼𑀧𑁆𑀨𑀕𑀦𑁆𑀥𑁄 𑀨𑀮𑀕𑀦𑁆𑀥𑁄 𑀆𑀫𑀕𑀦𑁆𑀥𑁄 𑀯𑀺𑀲𑁆𑀲𑀕𑀦𑁆𑀥𑁄 𑀲𑀼𑀕𑀦𑁆𑀥𑁄 𑀤𑀼𑀕𑁆𑀕𑀦𑁆𑀥𑁄, 𑀬𑁄 𑀯𑀸 𑀧𑀦𑀜𑁆𑀜𑁄𑀧𑀺 𑀅𑀢𑁆𑀣𑀺 𑀕𑀦𑁆𑀥𑁄 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄, 𑀬𑀁 𑀕𑀦𑁆𑀥𑀁 𑀅𑀦𑀺𑀤𑀲𑁆𑀲𑀦𑀁 𑀲𑀧𑁆𑀧𑀝𑀺𑀖𑀁 𑀖𑀸𑀦𑁂𑀦 𑀅𑀦𑀺𑀤𑀲𑁆𑀲𑀦𑁂𑀦 𑀲𑀧𑁆𑀧𑀝𑀺𑀖𑁂𑀦 𑀖𑀸𑀬𑀺 𑀯𑀸 𑀖𑀸𑀬𑀢𑀺 𑀯𑀸 𑀖𑀸𑀬𑀺𑀲𑁆𑀲𑀢𑀺 𑀯𑀸 𑀖𑀸𑀬𑁂 𑀯𑀸, 𑀕𑀦𑁆𑀥𑁄𑀧𑁂𑀲𑁄 𑀕𑀦𑁆𑀥𑀸𑀬𑀢𑀦𑀫𑁆𑀧𑁂𑀢𑀁 𑀕𑀦𑁆𑀥𑀥𑀸𑀢𑀼𑀧𑁂𑀲𑀸. 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀕𑀦𑁆𑀥𑀸𑀬𑀢𑀦𑀁’’.

𑁧𑁬𑁫. 𑀢𑀢𑁆𑀣 𑀓𑀢𑀫𑀁 𑀭𑀲𑀸𑀬𑀢𑀦𑀁? 𑀬𑁄 𑀭𑀲𑁄 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄 𑀫𑀽𑀮𑀭𑀲𑁄 𑀔𑀦𑁆𑀥𑀭𑀲𑁄 𑀢𑀘𑀭𑀲𑁄 𑀧𑀢𑁆𑀢𑀭𑀲𑁄 𑀧𑀼𑀧𑁆𑀨𑀭𑀲𑁄 𑀨𑀮𑀭𑀲𑁄 𑀅𑀫𑁆𑀩𑀺𑀮𑀁 𑀫𑀥𑀼𑀭𑀁 𑀢𑀺𑀢𑁆𑀢𑀓𑀁 𑀓𑀝𑀼𑀓𑀁 𑀮𑁄𑀡𑀺𑀓𑀁 [𑀮𑀧𑀺𑀮𑀓𑀁 (𑀲𑀻.), 𑀮𑀫𑁆𑀧𑀺𑀓𑀁 (𑀓. 𑀲𑀻.)] 𑀔𑀸𑀭𑀺𑀓𑀁 𑀮𑀫𑁆𑀩𑀺𑀓𑀁 𑀓𑀲𑀸𑀯𑁄 𑀲𑀸𑀤𑀼 𑀅𑀲𑀸𑀤𑀼, 𑀬𑁄 𑀯𑀸 𑀧𑀦𑀜𑁆𑀜𑁄𑀧𑀺 𑀅𑀢𑁆𑀣𑀺 𑀭𑀲𑁄 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄, 𑀬𑀁 𑀭𑀲𑀁 𑀅𑀦𑀺𑀤𑀲𑁆𑀲𑀦𑀁 𑀲𑀧𑁆𑀧𑀝𑀺𑀖𑀁 𑀚𑀺𑀯𑁆𑀳𑀸𑀬 𑀅𑀦𑀺𑀤𑀲𑁆𑀲𑀦𑀸𑀬 𑀲𑀧𑁆𑀧𑀝𑀺𑀖𑀸𑀬 𑀲𑀸𑀬𑀺 𑀯𑀸 𑀲𑀸𑀬𑀢𑀺 𑀯𑀸 𑀲𑀸𑀬𑀺𑀲𑁆𑀲𑀢𑀺 𑀯𑀸 𑀲𑀸𑀬𑁂 𑀯𑀸, 𑀭𑀲𑁄𑀧𑁂𑀲𑁄 𑀭𑀲𑀸𑀬𑀢𑀦𑀫𑁆𑀧𑁂𑀢𑀁 𑀭𑀲𑀥𑀸𑀢𑀼𑀧𑁂𑀲𑀸. 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀭𑀲𑀸𑀬𑀢𑀦𑀁’’.

𑁧𑁬𑁬. 𑀢𑀢𑁆𑀣 𑀓𑀢𑀫𑀁 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁? 𑀧𑀣𑀯𑀻𑀥𑀸𑀢𑀼 𑀢𑁂𑀚𑁄𑀥𑀸𑀢𑀼 𑀯𑀸𑀬𑁄𑀥𑀸𑀢𑀼 𑀓𑀓𑁆𑀔𑀴𑀁 𑀫𑀼𑀤𑀼𑀓𑀁 𑀲𑀡𑁆𑀳𑀁 𑀨𑀭𑀼𑀲𑀁 𑀲𑀼𑀔𑀲𑀫𑁆𑀨𑀲𑁆𑀲𑀁 𑀤𑀼𑀓𑁆𑀔𑀲𑀫𑁆𑀨𑀲𑁆𑀲𑀁 𑀕𑀭𑀼𑀓𑀁 𑀮𑀳𑀼𑀓𑀁, 𑀬𑀁 𑀨𑁄𑀝𑁆𑀞𑀩𑁆𑀩𑀁 𑀅𑀦𑀺𑀤𑀲𑁆𑀲𑀦𑀁 𑀲𑀧𑁆𑀧𑀝𑀺𑀖𑀁 𑀓𑀸𑀬𑁂𑀦 𑀅𑀦𑀺𑀤𑀲𑁆𑀲𑀦𑁂𑀦 𑀲𑀧𑁆𑀧𑀝𑀺𑀖𑁂𑀦 𑀨𑀼𑀲𑀺 𑀯𑀸 𑀨𑀼𑀲𑀢𑀺 𑀯𑀸 𑀨𑀼𑀲𑀺𑀲𑁆𑀲𑀢𑀺 𑀯𑀸 𑀨𑀼𑀲𑁂 𑀯𑀸, 𑀨𑁄𑀝𑁆𑀞𑀩𑁆𑀩𑁄𑀧𑁂𑀲𑁄 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀫𑁆𑀧𑁂𑀢𑀁 𑀨𑁄𑀝𑁆𑀞𑀩𑁆𑀩𑀥𑀸𑀢𑀼𑀧𑁂𑀲𑀸. 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁’’.

𑁧𑁬𑁭. 𑀢𑀢𑁆𑀣 𑀓𑀢𑀫𑀁 𑀥𑀫𑁆𑀫𑀸𑀬𑀢𑀦𑀁? 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄, 𑀬𑀜𑁆𑀘 𑀭𑀽𑀧𑀁 𑀅𑀦𑀺𑀤𑀲𑁆𑀲𑀦𑀅𑀧𑁆𑀧𑀝𑀺𑀖𑀁 𑀥𑀫𑁆𑀫𑀸𑀬𑀢𑀦𑀧𑀭𑀺𑀬𑀸𑀧𑀦𑁆𑀦𑀁, 𑀅𑀲𑀗𑁆𑀔𑀢𑀸 𑀘 𑀥𑀸𑀢𑀼.

𑀢𑀢𑁆𑀣 𑀓𑀢𑀫𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑁄? 𑀏𑀓𑀯𑀺𑀥𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑁋 𑀨𑀲𑁆𑀲𑀲𑀫𑁆𑀧𑀬𑀼𑀢𑁆𑀢𑁄. 𑀤𑀼𑀯𑀺𑀥𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑁋 𑀅𑀢𑁆𑀣𑀺 𑀲𑀳𑁂𑀢𑀼𑀓𑁄, 𑀅𑀢𑁆𑀣𑀺 𑀅𑀳𑁂𑀢𑀼𑀓𑁄. 𑀢𑀺𑀯𑀺𑀥𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑁋 𑀅𑀢𑁆𑀣𑀺 𑀓𑀼𑀲𑀮𑁄, 𑀅𑀢𑁆𑀣𑀺 𑀅𑀓𑀼𑀲𑀮𑁄, 𑀅𑀢𑁆𑀣𑀺 𑀅𑀩𑁆𑀬𑀸𑀓𑀢𑁄…𑀧𑁂… 𑀏𑀯𑀁 𑀤𑀲𑀯𑀺𑀥𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀏𑀯𑀁 𑀩𑀳𑀼𑀯𑀺𑀥𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑁄. 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀯𑁂𑀤𑀦𑀸𑀓𑁆𑀔𑀦𑁆𑀥𑁄’’.

𑀢𑀢𑁆𑀣 𑀓𑀢𑀫𑁄 𑀲𑀜𑁆𑀜𑀸𑀓𑁆𑀔𑀦𑁆𑀥𑁄? 𑀏𑀓𑀯𑀺𑀥𑁂𑀦 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 𑁋 𑀨𑀲𑁆𑀲𑀲𑀫𑁆𑀧𑀬𑀼𑀢𑁆𑀢𑁄. 𑀤𑀼𑀯𑀺𑀥𑁂𑀦 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 𑁋 𑀅𑀢𑁆𑀣𑀺 𑀲𑀳𑁂𑀢𑀼𑀓𑁄, 𑀅𑀢𑁆𑀣𑀺 𑀅𑀳𑁂𑀢𑀼𑀓𑁄. 𑀢𑀺𑀯𑀺𑀥𑁂𑀦 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 𑁋 𑀅𑀢𑁆𑀣𑀺 𑀓𑀼𑀲𑀮𑁄, 𑀅𑀢𑁆𑀣𑀺 𑀅𑀓𑀼𑀲𑀮𑁄, 𑀅𑀢𑁆𑀣𑀺 𑀅𑀩𑁆𑀬𑀸𑀓𑀢𑁄…𑀧𑁂… 𑀏𑀯𑀁 𑀤𑀲𑀯𑀺𑀥𑁂𑀦 𑀲𑀜𑁆𑀜𑀸𑀓𑁆𑀔𑀦𑁆𑀥𑁄…𑀧𑁂… 𑀏𑀯𑀁 𑀩𑀳𑀼𑀯𑀺𑀥𑁂𑀦 𑀲𑀜𑁆𑀜𑀸𑀓𑁆𑀔𑀦𑁆𑀥𑁄. 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀲𑀜𑁆𑀜𑀸𑀓𑁆𑀔𑀦𑁆𑀥𑁄’’.

𑀢𑀢𑁆𑀣 𑀓𑀢𑀫𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄? 𑀏𑀓𑀯𑀺𑀥𑁂𑀦 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑁋 𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑁄. 𑀤𑀼𑀯𑀺𑀥𑁂𑀦 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑁋 𑀅𑀢𑁆𑀣𑀺 𑀳𑁂𑀢𑀼, 𑀅𑀢𑁆𑀣𑀺 𑀦 𑀳𑁂𑀢𑀼. 𑀢𑀺𑀯𑀺𑀥𑁂𑀦 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑁋 𑀅𑀢𑁆𑀣𑀺 𑀓𑀼𑀲𑀮𑁄, 𑀅𑀢𑁆𑀣𑀺 𑀅𑀓𑀼𑀲𑀮𑁄, 𑀅𑀢𑁆𑀣𑀺 𑀅𑀩𑁆𑀬𑀸𑀓𑀢𑁄…𑀧𑁂… 𑀏𑀯𑀁 𑀤𑀲𑀯𑀺𑀥𑁂𑀦 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄…𑀧𑁂… 𑀏𑀯𑀁 𑀩𑀳𑀼𑀯𑀺𑀥𑁂𑀦 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄. 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄’’.

𑀢𑀢𑁆𑀣 𑀓𑀢𑀫𑀁 𑀭𑀽𑀧𑀁 𑀅𑀦𑀺𑀤𑀲𑁆𑀲𑀦𑀅𑀧𑁆𑀧𑀝𑀺𑀖𑀁 𑀥𑀫𑁆𑀫𑀸𑀬𑀢𑀦𑀧𑀭𑀺𑀬𑀸𑀧𑀦𑁆𑀦𑀁? 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁…𑀧𑁂… 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄. 𑀇𑀤𑀁 𑀯𑀼𑀘𑁆𑀘𑀢𑀺 𑀭𑀽𑀧𑀁 ‘‘𑀅𑀦𑀺𑀤𑀲𑁆𑀲𑀦𑀅𑀧𑁆𑀧𑀝𑀺𑀖𑀁 𑀥𑀫𑁆𑀫𑀸𑀬𑀢𑀦𑀧𑀭𑀺𑀬𑀸𑀧𑀦𑁆𑀦𑀁’’.

𑀢𑀢𑁆𑀣 𑀓𑀢𑀫𑀸 𑀅𑀲𑀗𑁆𑀔𑀢𑀸 𑀥𑀸𑀢𑀼? 𑀭𑀸𑀕𑀓𑁆𑀔𑀬𑁄, 𑀤𑁄𑀲𑀓𑁆𑀔𑀬𑁄, 𑀫𑁄𑀳𑀓𑁆𑀔𑀬𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀅𑀲𑀗𑁆𑀔𑀢𑀸 𑀥𑀸𑀢𑀼’’.

𑀇𑀤𑀁 𑀯𑀼𑀘𑁆𑀘𑀢𑀺 𑀥𑀫𑁆𑀫𑀸𑀬𑀢𑀦𑀁.

𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀁.

𑁩. 𑀧𑀜𑁆𑀳𑀸𑀧𑀼𑀘𑁆𑀙𑀓𑀁

𑁧𑁬𑁮. 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺 𑁋 𑀘𑀓𑁆𑀔𑀸𑀬𑀢𑀦𑀁, 𑀭𑀽𑀧𑀸𑀬𑀢𑀦𑀁, 𑀲𑁄𑀢𑀸𑀬𑀢𑀦𑀁, 𑀲𑀤𑁆𑀤𑀸𑀬𑀢𑀦𑀁, 𑀖𑀸𑀦𑀸𑀬𑀢𑀦𑀁, 𑀕𑀦𑁆𑀥𑀸𑀬𑀢𑀦𑀁, 𑀚𑀺𑀯𑁆𑀳𑀸𑀬𑀢𑀦𑀁, 𑀭𑀲𑀸𑀬𑀢𑀦𑀁, 𑀓𑀸𑀬𑀸𑀬𑀢𑀦𑀁, 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁, 𑀫𑀦𑀸𑀬𑀢𑀦𑀁, 𑀥𑀫𑁆𑀫𑀸𑀬𑀢𑀦𑀁.

𑁧𑁬𑁯. 𑀤𑁆𑀯𑀸𑀤𑀲𑀦𑁆𑀦𑀁 𑀆𑀬𑀢𑀦𑀸𑀦𑀁 𑀓𑀢𑀺 𑀓𑀼𑀲𑀮𑀸, 𑀓𑀢𑀺 𑀅𑀓𑀼𑀲𑀮𑀸, 𑀓𑀢𑀺 𑀅𑀩𑁆𑀬𑀸𑀓𑀢𑀸…𑀧𑁂… 𑀓𑀢𑀺 𑀲𑀭𑀡𑀸, 𑀓𑀢𑀺 𑀅𑀭𑀡𑀸?

𑁧. 𑀢𑀺𑀓𑀁

𑁧𑁭𑁦. 𑀤𑀲𑀸𑀬𑀢𑀦𑀸 𑀅𑀩𑁆𑀬𑀸𑀓𑀢𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀓𑀼𑀲𑀮𑀸, 𑀲𑀺𑀬𑀸 𑀅𑀓𑀼𑀲𑀮𑀸, 𑀲𑀺𑀬𑀸 𑀅𑀩𑁆𑀬𑀸𑀓𑀢𑀸. 𑀤𑀲𑀸𑀬𑀢𑀦𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺𑀧𑀺, ‘‘𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺𑀧𑀺, ‘‘𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺𑀧𑀺. 𑀫𑀦𑀸𑀬𑀢𑀦𑀁 𑀲𑀺𑀬𑀸 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀁, 𑀲𑀺𑀬𑀸 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀁, 𑀲𑀺𑀬𑀸 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀁. 𑀥𑀫𑁆𑀫𑀸𑀬𑀢𑀦𑀁 𑀲𑀺𑀬𑀸 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀁, 𑀲𑀺𑀬𑀸 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀁, 𑀲𑀺𑀬𑀸 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀁, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢’’𑀦𑁆𑀢𑀺𑀧𑀺, ‘‘𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢’’𑀦𑁆𑀢𑀺𑀧𑀺, ‘‘𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢’’𑀦𑁆𑀢𑀺𑀧𑀺. 𑀤𑀲𑀸𑀬𑀢𑀦𑀸 𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀯𑀺𑀧𑀸𑀓𑀸, 𑀲𑀺𑀬𑀸 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸, 𑀲𑀺𑀬𑀸 𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸.

𑀧𑀜𑁆𑀘𑀸𑀬𑀢𑀦𑀸 𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀸. 𑀲𑀤𑁆𑀤𑀸𑀬𑀢𑀦𑀁 𑀅𑀦𑀼𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀁. 𑀘𑀢𑁆𑀢𑀸𑀭𑁄 𑀆𑀬𑀢𑀦𑀸 𑀲𑀺𑀬𑀸 𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀸, 𑀲𑀺𑀬𑀸 𑀅𑀦𑀼𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀸, 𑀲𑀺𑀬𑀸 𑀅𑀦𑀼𑀧𑀸𑀤𑀸𑀦𑀺𑀬𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀸, 𑀲𑀺𑀬𑀸 𑀅𑀦𑀼𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀸, 𑀲𑀺𑀬𑀸 𑀅𑀦𑀼𑀧𑀸𑀤𑀺𑀦𑁆𑀦𑀅𑀦𑀼𑀧𑀸𑀤𑀸𑀦𑀺𑀬𑀸. 𑀤𑀲𑀸𑀬𑀢𑀦𑀸 𑀅𑀲𑀁𑀓𑀺𑀮𑀺𑀝𑁆𑀞𑀲𑀁𑀓𑀺𑀮𑁂𑀲𑀺𑀓𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀲𑀁𑀓𑀺𑀮𑀺𑀝𑁆𑀞𑀲𑀁𑀓𑀺𑀮𑁂𑀲𑀺𑀓𑀸, 𑀲𑀺𑀬𑀸 𑀅𑀲𑀁𑀓𑀺𑀮𑀺𑀝𑁆𑀞𑀲𑀁𑀓𑀺𑀮𑁂𑀲𑀺𑀓𑀸, 𑀲𑀺𑀬𑀸 𑀅𑀲𑀁𑀓𑀺𑀮𑀺𑀝𑁆𑀞𑀅𑀲𑀁𑀓𑀺𑀮𑁂𑀲𑀺𑀓𑀸. 𑀤𑀲𑀸𑀬𑀢𑀦𑀸 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸. 𑀫𑀦𑀸𑀬𑀢𑀦𑀁 𑀲𑀺𑀬𑀸 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀁, 𑀲𑀺𑀬𑀸 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀁, 𑀲𑀺𑀬𑀸 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀁. 𑀥𑀫𑁆𑀫𑀸𑀬𑀢𑀦𑀁 𑀲𑀺𑀬𑀸 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀁, 𑀲𑀺𑀬𑀸 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀁, 𑀲𑀺𑀬𑀸 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀁, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭’’𑀦𑁆𑀢𑀺𑀧𑀺, ‘‘𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢’’𑀦𑁆𑀢𑀺𑀧𑀺, ‘‘𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭’’𑀦𑁆𑀢𑀺𑀧𑀺. 𑀤𑀲𑀸𑀬𑀢𑀦𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀧𑀻𑀢𑀺𑀲𑀳𑀕𑀢𑀸’’𑀢𑀺𑀧𑀺, ‘‘𑀲𑀼𑀔𑀲𑀳𑀕𑀢𑀸’’𑀢𑀺𑀧𑀺, ‘‘𑀉𑀧𑁂𑀓𑁆𑀔𑀸𑀲𑀳𑀕𑀢𑀸’’𑀢𑀺𑀧𑀺. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀧𑀻𑀢𑀺𑀲𑀳𑀕𑀢𑀸, 𑀲𑀺𑀬𑀸 𑀲𑀼𑀔𑀲𑀳𑀕𑀢𑀸, 𑀲𑀺𑀬𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀸, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀧𑀻𑀢𑀺𑀲𑀳𑀕𑀢𑀸’’𑀢𑀺𑀧𑀺, ‘‘𑀲𑀼𑀔𑀲𑀳𑀕𑀢𑀸’’𑀢𑀺𑀧𑀺, ‘‘𑀉𑀧𑁂𑀓𑁆𑀔𑀸𑀲𑀳𑀕𑀢𑀸’’𑀢𑀺𑀧𑀺.

𑀤𑀲𑀸𑀬𑀢𑀦𑀸 𑀦𑁂𑀯 𑀤𑀲𑁆𑀲𑀦𑁂𑀦 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸, 𑀲𑀺𑀬𑀸 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸, 𑀲𑀺𑀬𑀸 𑀦𑁂𑀯 𑀤𑀲𑁆𑀲𑀦𑁂𑀦 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸. 𑀤𑀲𑀸𑀬𑀢𑀦𑀸 𑀦𑁂𑀯 𑀤𑀲𑁆𑀲𑀦𑁂𑀦 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸, 𑀲𑀺𑀬𑀸 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸, 𑀲𑀺𑀬𑀸 𑀦𑁂𑀯 𑀤𑀲𑁆𑀲𑀦𑁂𑀦 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸. 𑀤𑀲𑀸𑀬𑀢𑀦𑀸 𑀦𑁂𑀯𑀸𑀘𑀬𑀕𑀸𑀫𑀺𑀦𑀸𑀧𑀘𑀬𑀕𑀸𑀫𑀺𑀦𑁄. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀆𑀘𑀬𑀕𑀸𑀫𑀺𑀦𑁄, 𑀲𑀺𑀬𑀸 𑀅𑀧𑀘𑀬𑀕𑀸𑀫𑀺𑀦𑁄, 𑀲𑀺𑀬𑀸 𑀦𑁂𑀯𑀸𑀘𑀬𑀕𑀸𑀫𑀺𑀦𑀸𑀧𑀘𑀬𑀕𑀸𑀫𑀺𑀦𑁄. 𑀤𑀲𑀸𑀬𑀢𑀦𑀸 𑀦𑁂𑀯𑀲𑁂𑀓𑁆𑀔𑀦𑀸𑀲𑁂𑀓𑁆𑀔𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀲𑁂𑀓𑁆𑀔𑀸, 𑀲𑀺𑀬𑀸 𑀅𑀲𑁂𑀓𑁆𑀔𑀸, 𑀲𑀺𑀬𑀸 𑀦𑁂𑀯𑀲𑁂𑀓𑁆𑀔𑀦𑀸𑀲𑁂𑀓𑁆𑀔𑀸. 𑀤𑀲𑀸𑀬𑀢𑀦𑀸 𑀧𑀭𑀺𑀢𑁆𑀢𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀧𑀭𑀺𑀢𑁆𑀢𑀸, 𑀲𑀺𑀬𑀸 𑀫𑀳𑀕𑁆𑀕𑀢𑀸, 𑀲𑀺𑀬𑀸 𑀅𑀧𑁆𑀧𑀫𑀸𑀡𑀸. 𑀤𑀲𑀸𑀬𑀢𑀦𑀸 𑀅𑀦𑀸𑀭𑀫𑁆𑀫𑀡𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸, 𑀲𑀺𑀬𑀸 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀸, 𑀲𑀺𑀬𑀸 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀸, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸’’𑀢𑀺𑀧𑀺, ‘‘𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀸’’𑀢𑀺𑀧𑀺, ‘‘𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀸’’𑀢𑀺𑀧𑀺. 𑀤𑀲𑀸𑀬𑀢𑀦𑀸 𑀫𑀚𑁆𑀛𑀺𑀫𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀳𑀻𑀦𑀸, 𑀲𑀺𑀬𑀸 𑀫𑀚𑁆𑀛𑀺𑀫𑀸, 𑀲𑀺𑀬𑀸 𑀧𑀡𑀻𑀢𑀸. 𑀤𑀲𑀸𑀬𑀢𑀦𑀸 𑀅𑀦𑀺𑀬𑀢𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀸, 𑀲𑀺𑀬𑀸 𑀲𑀫𑁆𑀫𑀢𑁆𑀢𑀦𑀺𑀬𑀢𑀸, 𑀲𑀺𑀬𑀸 𑀅𑀦𑀺𑀬𑀢𑀸.

𑀤𑀲𑀸𑀬𑀢𑀦𑀸 𑀅𑀦𑀸𑀭𑀫𑁆𑀫𑀡𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀫𑀕𑁆𑀕𑀸𑀭𑀫𑁆𑀫𑀡𑀸, 𑀲𑀺𑀬𑀸 𑀫𑀕𑁆𑀕𑀳𑁂𑀢𑀼𑀓𑀸, 𑀲𑀺𑀬𑀸 𑀫𑀕𑁆𑀕𑀸𑀥𑀺𑀧𑀢𑀺𑀦𑁄, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀫𑀕𑁆𑀕𑀸𑀭𑀫𑁆𑀫𑀡𑀸’’𑀢𑀺𑀧𑀺, ‘‘𑀫𑀕𑁆𑀕𑀳𑁂𑀢𑀼𑀓𑀸’’𑀢𑀺𑀧𑀺, ‘‘𑀫𑀕𑁆𑀕𑀸𑀥𑀺𑀧𑀢𑀺𑀦𑁄’’𑀢𑀺𑀧𑀺. 𑀧𑀜𑁆𑀘𑀸𑀬𑀢𑀦𑀸 𑀲𑀺𑀬𑀸 𑀉𑀧𑁆𑀧𑀦𑁆𑀦𑀸, 𑀲𑀺𑀬𑀸 𑀉𑀧𑁆𑀧𑀸𑀤𑀺𑀦𑁄, 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀅𑀦𑀼𑀧𑁆𑀧𑀦𑁆𑀦𑀸’’𑀢𑀺. 𑀲𑀤𑁆𑀤𑀸𑀬𑀢𑀦𑀁 𑀲𑀺𑀬𑀸 𑀉𑀧𑁆𑀧𑀦𑁆𑀦𑀁, 𑀲𑀺𑀬𑀸 𑀅𑀦𑀼𑀧𑁆𑀧𑀦𑁆𑀦𑀁, 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀉𑀧𑁆𑀧𑀸𑀤𑀻’’𑀢𑀺. 𑀧𑀜𑁆𑀘𑀸𑀬𑀢𑀦𑀸 𑀲𑀺𑀬𑀸 𑀉𑀧𑁆𑀧𑀦𑁆𑀦𑀸, 𑀲𑀺𑀬𑀸 𑀅𑀦𑀼𑀧𑁆𑀧𑀦𑁆𑀦𑀸, 𑀲𑀺𑀬𑀸 𑀉𑀧𑁆𑀧𑀸𑀤𑀺𑀦𑁄. 𑀥𑀫𑁆𑀫𑀸𑀬𑀢𑀦𑀁 𑀲𑀺𑀬𑀸 𑀉𑀧𑁆𑀧𑀦𑁆𑀦𑀁, 𑀲𑀺𑀬𑀸 𑀅𑀦𑀼𑀧𑁆𑀧𑀦𑁆𑀦𑀁, 𑀲𑀺𑀬𑀸 𑀉𑀧𑁆𑀧𑀸𑀤𑀺, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀉𑀧𑁆𑀧𑀦𑁆𑀦’’𑀦𑁆𑀢𑀺𑀧𑀺, ‘‘𑀅𑀦𑀼𑀧𑁆𑀧𑀦𑁆𑀦’’𑀦𑁆𑀢𑀺𑀧𑀺, ‘‘𑀉𑀧𑁆𑀧𑀸𑀤𑀻’’𑀢𑀺𑀧𑀺. 𑀏𑀓𑀸𑀤𑀲𑀸𑀬𑀢𑀦𑀸 𑀲𑀺𑀬𑀸 𑀅𑀢𑀻𑀢𑀸, 𑀲𑀺𑀬𑀸 𑀅𑀦𑀸𑀕𑀢𑀸, 𑀲𑀺𑀬𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸. 𑀥𑀫𑁆𑀫𑀸𑀬𑀢𑀦𑀁 𑀲𑀺𑀬𑀸 𑀅𑀢𑀻𑀢𑀁, 𑀲𑀺𑀬𑀸 𑀅𑀦𑀸𑀕𑀢𑀁, 𑀲𑀺𑀬𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀁, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀅𑀢𑀻𑀢’’𑀦𑁆𑀢𑀺𑀧𑀺, ‘‘𑀅𑀦𑀸𑀕𑀢’’𑀦𑁆𑀢𑀺𑀧𑀺, ‘‘𑀧𑀘𑁆𑀘𑀼𑀧𑁆𑀧𑀦𑁆𑀦’’𑀦𑁆𑀢𑀺𑀧𑀺. 𑀤𑀲𑀸𑀬𑀢𑀦𑀸 𑀅𑀦𑀸𑀭𑀫𑁆𑀫𑀡𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀅𑀢𑀻𑀢𑀸𑀭𑀫𑁆𑀫𑀡𑀸, 𑀲𑀺𑀬𑀸 𑀅𑀦𑀸𑀕𑀢𑀸𑀭𑀫𑁆𑀫𑀡𑀸, 𑀲𑀺𑀬𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀅𑀢𑀻𑀢𑀸𑀭𑀫𑁆𑀫𑀡𑀸’’𑀢𑀺𑀧𑀺, ‘‘𑀅𑀦𑀸𑀕𑀢𑀸𑀭𑀫𑁆𑀫𑀡𑀸’’𑀢𑀺𑀧𑀺, ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸’’𑀢𑀺𑀧𑀺; 𑀲𑀺𑀬𑀸 𑀅𑀚𑁆𑀛𑀢𑁆𑀢𑀸, 𑀲𑀺𑀬𑀸 𑀩𑀳𑀺𑀤𑁆𑀥𑀸, 𑀲𑀺𑀬𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸. 𑀤𑀲𑀸𑀬𑀢𑀦𑀸 𑀅𑀦𑀸𑀭𑀫𑁆𑀫𑀡𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸, 𑀲𑀺𑀬𑀸 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸, 𑀲𑀺𑀬𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸’’𑀢𑀺𑀧𑀺, ‘‘𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸’’𑀢𑀺𑀧𑀺, ‘‘𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸’’𑀢𑀺𑀧𑀺. 𑀭𑀽𑀧𑀸𑀬𑀢𑀦𑀁 𑀲𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀁. 𑀦𑀯𑀸𑀬𑀢𑀦𑀸 𑀅𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀸. 𑀤𑁆𑀯𑀸𑀬𑀢𑀦𑀸 𑀅𑀦𑀺𑀤𑀲𑁆𑀲𑀦𑀅𑀧𑁆𑀧𑀝𑀺𑀖𑀸.

𑁨. 𑀤𑀼𑀓𑀁

𑁧𑁭𑁧. 𑀏𑀓𑀸𑀤𑀲𑀸𑀬𑀢𑀦𑀸 𑀦 𑀳𑁂𑀢𑀽. 𑀥𑀫𑁆𑀫𑀸𑀬𑀢𑀦𑀁 𑀲𑀺𑀬𑀸 𑀳𑁂𑀢𑀼, 𑀲𑀺𑀬𑀸 𑀦 𑀳𑁂𑀢𑀼. 𑀤𑀲𑀸𑀬𑀢𑀦𑀸 𑀅𑀳𑁂𑀢𑀼𑀓𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀲𑀳𑁂𑀢𑀼𑀓𑀸, 𑀲𑀺𑀬𑀸 𑀅𑀳𑁂𑀢𑀼𑀓𑀸. 𑀤𑀲𑀸𑀬𑀢𑀦𑀸 𑀳𑁂𑀢𑀼𑀯𑀺𑀧𑁆𑀧𑀬𑀼𑀢𑁆𑀢𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀸, 𑀲𑀺𑀬𑀸 𑀳𑁂𑀢𑀼𑀯𑀺𑀧𑁆𑀧𑀬𑀼𑀢𑁆𑀢𑀸. 𑀤𑀲𑀸𑀬𑀢𑀦𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀳𑁂𑀢𑀽 𑀘𑁂𑀯 𑀲𑀳𑁂𑀢𑀼𑀓𑀸 𑀘𑀸’’𑀢𑀺𑀧𑀺, ‘‘𑀲𑀳𑁂𑀢𑀼𑀓𑀸 𑀘𑁂𑀯 𑀦 𑀘 𑀳𑁂𑀢𑀽’’𑀢𑀺𑀧𑀺. 𑀫𑀦𑀸𑀬𑀢𑀦𑀁 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀳𑁂𑀢𑀼 𑀘𑁂𑀯 𑀲𑀳𑁂𑀢𑀼𑀓𑀜𑁆𑀘𑀸’’𑀢𑀺, 𑀲𑀺𑀬𑀸 𑀲𑀳𑁂𑀢𑀼𑀓𑀜𑁆𑀘𑁂𑀯 𑀦 𑀘 𑀳𑁂𑀢𑀼, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀳𑁂𑀢𑀼𑀓𑀜𑁆𑀘𑁂𑀯 𑀦 𑀘 𑀳𑁂𑀢𑀽’’𑀢𑀺. 𑀥𑀫𑁆𑀫𑀸𑀬𑀢𑀦𑀁 𑀲𑀺𑀬𑀸 𑀳𑁂𑀢𑀼 𑀘𑁂𑀯 𑀲𑀳𑁂𑀢𑀼𑀓𑀜𑁆𑀘, 𑀲𑀺𑀬𑀸 𑀲𑀳𑁂𑀢𑀼𑀓𑀜𑁆𑀘𑁂𑀯 𑀦 𑀘 𑀳𑁂𑀢𑀼, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀳𑁂𑀢𑀼 𑀘𑁂𑀯 𑀲𑀳𑁂𑀢𑀼𑀓𑀜𑁆𑀘𑀸’’𑀢𑀺𑀧𑀺, ‘‘𑀲𑀳𑁂𑀢𑀼𑀓𑀜𑁆𑀘𑁂𑀯 𑀦 𑀘 𑀳𑁂𑀢𑀽’’𑀢𑀺𑀧𑀺. 𑀤𑀲𑀸𑀬𑀢𑀦𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀳𑁂𑀢𑀽 𑀘𑁂𑀯 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀸 𑀘𑀸’’𑀢𑀺𑀧𑀺, ‘‘𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀯 𑀦 𑀘 𑀳𑁂𑀢𑀽’’𑀢𑀺𑀧𑀺. 𑀫𑀦𑀸𑀬𑀢𑀦𑀁 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀳𑁂𑀢𑀼 𑀘𑁂𑀯 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑀸’’𑀢𑀺, 𑀲𑀺𑀬𑀸 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑁂𑀯 𑀦 𑀘 𑀳𑁂𑀢𑀼, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑁂𑀯 𑀦 𑀘 𑀳𑁂𑀢𑀽’’𑀢𑀺. 𑀥𑀫𑁆𑀫𑀸𑀬𑀢𑀦𑀁 𑀲𑀺𑀬𑀸 𑀳𑁂𑀢𑀼 𑀘𑁂𑀯 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀜𑁆𑀘, 𑀲𑀺𑀬𑀸 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑁂𑀯 𑀦 𑀘 𑀳𑁂𑀢𑀼, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀳𑁂𑀢𑀼 𑀘𑁂𑀯 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑀸’’𑀢𑀺𑀧𑀺, ‘‘𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑁂𑀯 𑀦 𑀘 𑀳𑁂𑀢𑀽’’𑀢𑀺𑀧𑀺. 𑀤𑀲𑀸𑀬𑀢𑀦𑀸 𑀦 𑀳𑁂𑀢𑀽𑀅𑀳𑁂𑀢𑀼𑀓𑀸. 𑀫𑀦𑀸𑀬𑀢𑀦𑀁 𑀲𑀺𑀬𑀸 𑀦 𑀳𑁂𑀢𑀼𑀲𑀳𑁂𑀢𑀼𑀓𑀁, 𑀲𑀺𑀬𑀸 𑀦 𑀳𑁂𑀢𑀼𑀅𑀳𑁂𑀢𑀼𑀓𑀁. 𑀥𑀫𑁆𑀫𑀸𑀬𑀢𑀦𑀁 𑀲𑀺𑀬𑀸 𑀦 𑀳𑁂𑀢𑀼𑀲𑀳𑁂𑀢𑀼𑀓𑀁, 𑀲𑀺𑀬𑀸 𑀦 𑀳𑁂𑀢𑀼𑀅𑀳𑁂𑀢𑀼𑀓𑀁, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀦 𑀳𑁂𑀢𑀼𑀲𑀳𑁂𑀢𑀼𑀓’’𑀦𑁆𑀢𑀺𑀧𑀺, ‘‘𑀦 𑀳𑁂𑀢𑀼𑀅𑀳𑁂𑀢𑀼𑀓’’𑀦𑁆𑀢𑀺𑀧𑀺.

𑀏𑀓𑀸𑀤𑀲𑀸𑀬𑀢𑀦𑀸 𑀲𑀧𑁆𑀧𑀘𑁆𑀘𑀬𑀸. 𑀥𑀫𑁆𑀫𑀸𑀬𑀢𑀦𑀁 𑀲𑀺𑀬𑀸 𑀲𑀧𑁆𑀧𑀘𑁆𑀘𑀬𑀁, 𑀲𑀺𑀬𑀸 𑀅𑀧𑁆𑀧𑀘𑁆𑀘𑀬𑀁. 𑀏𑀓𑀸𑀤𑀲𑀸𑀬𑀢𑀦𑀸 𑀲𑀗𑁆𑀔𑀢𑀸. 𑀥𑀫𑁆𑀫𑀸𑀬𑀢𑀦𑀁 𑀲𑀺𑀬𑀸 𑀲𑀗𑁆𑀔𑀢𑀁, 𑀲𑀺𑀬𑀸 𑀅𑀲𑀗𑁆𑀔𑀢𑀁. 𑀭𑀽𑀧𑀸𑀬𑀢𑀦𑀁 𑀲𑀦𑀺𑀤𑀲𑁆𑀲𑀦𑀁. 𑀏𑀓𑀸𑀤𑀲𑀸𑀬𑀢𑀦𑀸 𑀅𑀦𑀺𑀤𑀲𑁆𑀲𑀦𑀸. 𑀤𑀲𑀸𑀬𑀢𑀦𑀸 𑀲𑀧𑁆𑀧𑀝𑀺𑀖𑀸. 𑀤𑁆𑀯𑀸𑀬𑀢𑀦𑀸 𑀅𑀧𑁆𑀧𑀝𑀺𑀖𑀸. 𑀤𑀲𑀸𑀬𑀢𑀦𑀸 𑀭𑀽𑀧𑀸. 𑀫𑀦𑀸𑀬𑀢𑀦𑀁 𑀅𑀭𑀽𑀧𑀁. 𑀥𑀫𑁆𑀫𑀸𑀬𑀢𑀦𑀁 𑀲𑀺𑀬𑀸 𑀭𑀽𑀧𑀁, 𑀲𑀺𑀬𑀸 𑀅𑀭𑀽𑀧𑀁. 𑀤𑀲𑀸𑀬𑀢𑀦𑀸 𑀮𑁄𑀓𑀺𑀬𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀮𑁄𑀓𑀺𑀬𑀸, 𑀲𑀺𑀬𑀸 𑀮𑁄𑀓𑀼𑀢𑁆𑀢𑀭𑀸; 𑀓𑁂𑀦𑀘𑀺 𑀯𑀺𑀜𑁆𑀜𑁂𑀬𑁆𑀬𑀸, 𑀓𑁂𑀦𑀘𑀺 𑀦 𑀯𑀺𑀜𑁆𑀜𑁂𑀬𑁆𑀬𑀸.

𑀏𑀓𑀸𑀤𑀲𑀸𑀬𑀢𑀦𑀸 𑀦𑁄 𑀆𑀲𑀯𑀸. 𑀥𑀫𑁆𑀫𑀸𑀬𑀢𑀦𑀁 𑀲𑀺𑀬𑀸 𑀆𑀲𑀯𑁄, 𑀲𑀺𑀬𑀸 𑀦𑁄 𑀆𑀲𑀯𑁄. 𑀤𑀲𑀸𑀬𑀢𑀦𑀸 𑀲𑀸𑀲𑀯𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀲𑀸𑀲𑀯𑀸, 𑀲𑀺𑀬𑀸 𑀅𑀦𑀸𑀲𑀯𑀸. 𑀤𑀲𑀸𑀬𑀢𑀦𑀸 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀸, 𑀲𑀺𑀬𑀸 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀸. 𑀤𑀲𑀸𑀬𑀢𑀦𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀆𑀲𑀯𑀸 𑀘𑁂𑀯 𑀲𑀸𑀲𑀯𑀸 𑀘𑀸’’𑀢𑀺, ‘‘𑀲𑀸𑀲𑀯𑀸 𑀘𑁂𑀯 𑀦𑁄 𑀘 𑀆𑀲𑀯𑀸’’. 𑀫𑀦𑀸𑀬𑀢𑀦𑀁 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀆𑀲𑀯𑁄 𑀘𑁂𑀯 𑀲𑀸𑀲𑀯𑀜𑁆𑀘𑀸’’𑀢𑀺, 𑀲𑀺𑀬𑀸 𑀲𑀸𑀲𑀯𑀜𑁆𑀘𑁂𑀯 𑀦𑁄 𑀘 𑀆𑀲𑀯𑁄, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀸𑀲𑀯𑀜𑁆𑀘𑁂𑀯 𑀦𑁄 𑀘 𑀆𑀲𑀯𑁄’’𑀢𑀺. 𑀥𑀫𑁆𑀫𑀸𑀬𑀢𑀦𑀁 𑀲𑀺𑀬𑀸 𑀆𑀲𑀯𑁄 𑀘𑁂𑀯 𑀲𑀸𑀲𑀯𑀜𑁆𑀘, 𑀲𑀺𑀬𑀸 𑀲𑀸𑀲𑀯𑀜𑁆𑀘𑁂𑀯 𑀦𑁄 𑀘 𑀆𑀲𑀯𑁄, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀆𑀲𑀯𑁄 𑀘𑁂𑀯 𑀲𑀸𑀲𑀯𑀜𑁆𑀘𑀸’’𑀢𑀺𑀧𑀺, ‘‘𑀲𑀸𑀲𑀯𑀜𑁆𑀘𑁂𑀯 𑀦𑁄 𑀘 𑀆𑀲𑀯𑁄’’𑀢𑀺𑀧𑀺. 𑀤𑀲𑀸𑀬𑀢𑀦𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀆𑀲𑀯𑀸 𑀘𑁂𑀯 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀸 𑀘𑀸’’𑀢𑀺𑀧𑀺, ‘‘𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀯 𑀦𑁄 𑀘 𑀆𑀲𑀯𑀸’’𑀢𑀺𑀧𑀺. 𑀫𑀦𑀸𑀬𑀢𑀦𑀁 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀆𑀲𑀯𑁄 𑀘𑁂𑀯 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑀸’’𑀢𑀺, 𑀲𑀺𑀬𑀸 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑁂𑀯 𑀦𑁄 𑀘 𑀆𑀲𑀯𑁄, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑁂𑀯 𑀦𑁄 𑀘 𑀆𑀲𑀯𑁄’’𑀢𑀺. 𑀥𑀫𑁆𑀫𑀸𑀬𑀢𑀦𑀁 𑀲𑀺𑀬𑀸 𑀆𑀲𑀯𑁄 𑀘𑁂𑀯 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀜𑁆𑀘, 𑀲𑀺𑀬𑀸 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑁂𑀯 𑀦𑁄 𑀘 𑀆𑀲𑀯𑁄, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀆𑀲𑀯𑁄 𑀘𑁂𑀯 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑀸’’𑀢𑀺𑀧𑀺, ‘‘𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑁂𑀯 𑀦𑁄 𑀘 𑀆𑀲𑀯𑁄’’𑀢𑀺𑀧𑀺. 𑀤𑀲𑀸𑀬𑀢𑀦𑀸 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀲𑀸𑀲𑀯𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀲𑀸𑀲𑀯𑀸, 𑀲𑀺𑀬𑀸 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀅𑀦𑀸𑀲𑀯𑀸, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀲𑀸𑀲𑀯𑀸’’𑀢𑀺𑀧𑀺, ‘‘𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀅𑀦𑀸𑀲𑀯𑀸’’𑀢𑀺𑀧𑀺.

𑀏𑀓𑀸𑀤𑀲𑀸𑀬𑀢𑀦𑀸 𑀦𑁄 𑀲𑀁𑀬𑁄𑀚𑀦𑀸. 𑀥𑀫𑁆𑀫𑀸𑀬𑀢𑀦𑀁 𑀲𑀺𑀬𑀸 𑀲𑀁𑀬𑁄𑀚𑀦𑀁, 𑀲𑀺𑀬𑀸 𑀦𑁄 𑀲𑀁𑀬𑁄𑀚𑀦𑀁. 𑀤𑀲𑀸𑀬𑀢𑀦𑀸 𑀲𑀁𑀬𑁄𑀚𑀦𑀺𑀬𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀲𑀁𑀬𑁄𑀚𑀦𑀺𑀬𑀸, 𑀲𑀺𑀬𑀸 𑀅𑀲𑀁𑀬𑁄𑀚𑀦𑀺𑀬𑀸. 𑀤𑀲𑀸𑀬𑀢𑀦𑀸 𑀲𑀁𑀬𑁄𑀚𑀦𑀯𑀺𑀧𑁆𑀧𑀬𑀼𑀢𑁆𑀢𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀲𑀁𑀬𑁄𑀚𑀦𑀲𑀫𑁆𑀧𑀬𑀼𑀢𑁆𑀢𑀸, 𑀲𑀺𑀬𑀸 𑀲𑀁𑀬𑁄𑀚𑀦𑀯𑀺𑀧𑁆𑀧𑀬𑀼𑀢𑁆𑀢𑀸. 𑀤𑀲𑀸𑀬𑀢𑀦𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀲𑀁𑀬𑁄𑀚𑀦𑀸 𑀘𑁂𑀯 𑀲𑀁𑀬𑁄𑀚𑀦𑀺𑀬𑀸 𑀘𑀸’’𑀢𑀺, 𑀲𑀁𑀬𑁄𑀚𑀦𑀺𑀬𑀸 𑀘𑁂𑀯 𑀦𑁄 𑀘 𑀲𑀁𑀬𑁄𑀚𑀦𑀸. 𑀫𑀦𑀸𑀬𑀢𑀦𑀁 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀁𑀬𑁄𑀚𑀦𑀜𑁆𑀘𑁂𑀯 𑀲𑀁𑀬𑁄𑀚𑀦𑀺𑀬𑀜𑁆𑀘𑀸’’𑀢𑀺, 𑀲𑀺𑀬𑀸 𑀲𑀁𑀬𑁄𑀚𑀦𑀺𑀬𑀜𑁆𑀘𑁂𑀯 𑀦𑁄 𑀘 𑀲𑀁𑀬𑁄𑀚𑀦𑀁, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀁𑀬𑁄𑀚𑀦𑀺𑀬𑀜𑁆𑀘𑁂𑀯 𑀦𑁄 𑀘 𑀲𑀁𑀬𑁄𑀚𑀦’’𑀦𑁆𑀢𑀺. 𑀥𑀫𑁆𑀫𑀸𑀬𑀢𑀦𑀁 𑀲𑀺𑀬𑀸 𑀲𑀁𑀬𑁄𑀚𑀦𑀜𑁆𑀘𑁂𑀯 𑀲𑀁𑀬𑁄𑀚𑀦𑀺𑀬𑀜𑁆𑀘, 𑀲𑀺𑀬𑀸 𑀲𑀁𑀬𑁄𑀚𑀦𑀺𑀬𑀜𑁆𑀘𑁂𑀯 𑀦𑁄 𑀘 𑀲𑀁𑀬𑁄𑀚𑀦𑀁, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀁𑀬𑁄𑀚𑀦𑀜𑁆𑀘𑁂𑀯 𑀲𑀁𑀬𑁄𑀚𑀦𑀺𑀬’’𑀦𑁆𑀢𑀺𑀧𑀺, ‘‘𑀲𑀁𑀬𑁄𑀚𑀦𑀺𑀬𑀜𑁆𑀘𑁂𑀯 𑀦𑁄 𑀘 𑀲𑀁𑀬𑁄𑀚𑀦’’𑀦𑁆𑀢𑀺𑀧𑀺. 𑀤𑀲𑀸𑀬𑀢𑀦𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀲𑀁𑀬𑁄𑀚𑀦𑀸 𑀘𑁂𑀯 𑀲𑀁𑀬𑁄𑀚𑀦𑀲𑀫𑁆𑀧𑀬𑀼𑀢𑁆𑀢𑀸 𑀘𑀸’’𑀢𑀺𑀧𑀺, ‘‘𑀲𑀁𑀬𑁄𑀚𑀦𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀯 𑀦𑁄 𑀘 𑀲𑀁𑀬𑁄𑀚𑀦𑀸’’𑀢𑀺𑀧𑀺. 𑀫𑀦𑀸𑀬𑀢𑀦𑀁 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀁𑀬𑁄𑀚𑀦𑀜𑁆𑀘𑁂𑀯 𑀲𑀁𑀬𑁄𑀚𑀦𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑀸’’𑀢𑀺, 𑀲𑀺𑀬𑀸 𑀲𑀁𑀬𑁄𑀚𑀦𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑁂𑀯 𑀦𑁄 𑀘 𑀲𑀁𑀬𑁄𑀚𑀦𑀁, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀁𑀬𑁄𑀚𑀦𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑁂𑀯 𑀦𑁄 𑀘 𑀲𑀁𑀬𑁄𑀚𑀦’’𑀦𑁆𑀢𑀺. 𑀥𑀫𑁆𑀫𑀸𑀬𑀢𑀦𑀁 𑀲𑀺𑀬𑀸 𑀲𑀁𑀬𑁄𑀚𑀦𑀜𑁆𑀘𑁂𑀯 𑀲𑀁𑀬𑁄𑀚𑀦𑀲𑀫𑁆𑀧𑀬𑀼𑀢𑁆𑀢𑀜𑁆𑀘, 𑀲𑀺𑀬𑀸 𑀲𑀁𑀬𑁄𑀚𑀦𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑁂𑀯 𑀦𑁄 𑀘 𑀲𑀁𑀬𑁄𑀚𑀦𑀁, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀁𑀬𑁄𑀚𑀦𑀜𑁆𑀘𑁂𑀯 𑀲𑀁𑀬𑁄𑀚𑀦𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑀸’’𑀢𑀺𑀧𑀺, ‘‘𑀲𑀁𑀬𑁄𑀚𑀦𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑁂𑀯 𑀦𑁄 𑀘 𑀲𑀁𑀬𑁄𑀚𑀦’’𑀦𑁆𑀢𑀺𑀧𑀺. 𑀤𑀲𑀸𑀬𑀢𑀦𑀸 𑀲𑀁𑀬𑁄𑀚𑀦𑀯𑀺𑀧𑁆𑀧𑀬𑀼𑀢𑁆𑀢𑀲𑀁𑀬𑁄𑀚𑀦𑀺𑀬𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀲𑀁𑀬𑁄𑀚𑀦𑀯𑀺𑀧𑁆𑀧𑀬𑀼𑀢𑁆𑀢𑀲𑀁𑀬𑁄𑀚𑀦𑀺𑀬𑀸, 𑀲𑀺𑀬𑀸 𑀲𑀁𑀬𑁄𑀚𑀦𑀯𑀺𑀧𑁆𑀧𑀬𑀼𑀢𑁆𑀢𑀅𑀲𑀁𑀬𑁄𑀚𑀦𑀺𑀬𑀸, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀲𑀁𑀬𑁄𑀚𑀦𑀯𑀺𑀧𑁆𑀧𑀬𑀼𑀢𑁆𑀢𑀲𑀁𑀬𑁄𑀚𑀦𑀺𑀬𑀸’’𑀢𑀺𑀧𑀺, ‘‘𑀲𑀁𑀬𑁄𑀚𑀦𑀯𑀺𑀧𑁆𑀧𑀬𑀼𑀢𑁆𑀢𑀅𑀲𑀁𑀬𑁄𑀚𑀦𑀺𑀬𑀸’’𑀢𑀺𑀧𑀺.

𑀏𑀓𑀸𑀤𑀲𑀸𑀬𑀢𑀦𑀸 𑀦𑁄 𑀕𑀦𑁆𑀣𑀸. 𑀥𑀫𑁆𑀫𑀸𑀬𑀢𑀦𑀁 𑀲𑀺𑀬𑀸 𑀕𑀦𑁆𑀣𑁄, 𑀲𑀺𑀬𑀸 𑀦𑁄 𑀕𑀦𑁆𑀣𑁄. 𑀤𑀲𑀸𑀬𑀢𑀦𑀸 𑀕𑀦𑁆𑀣𑀦𑀺𑀬𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀕𑀦𑁆𑀣𑀦𑀺𑀬𑀸, 𑀲𑀺𑀬𑀸 𑀅𑀕𑀦𑁆𑀣𑀦𑀺𑀬𑀸. 𑀤𑀲𑀸𑀬𑀢𑀦𑀸 𑀕𑀦𑁆𑀣𑀯𑀺𑀧𑁆𑀧𑀬𑀼𑀢𑁆𑀢𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀕𑀦𑁆𑀣𑀲𑀫𑁆𑀧𑀬𑀼𑀢𑁆𑀢𑀸, 𑀲𑀺𑀬𑀸 𑀕𑀦𑁆𑀣𑀯𑀺𑀧𑁆𑀧𑀬𑀼𑀢𑁆𑀢𑀸. 𑀤𑀲𑀸𑀬𑀢𑀦𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀕𑀦𑁆𑀣𑀸 𑀘𑁂𑀯 𑀕𑀦𑁆𑀣𑀦𑀺𑀬𑀸 𑀘𑀸’’𑀢𑀺, 𑀕𑀦𑁆𑀣𑀦𑀺𑀬𑀸 𑀘𑁂𑀯 𑀦𑁄 𑀘 𑀕𑀦𑁆𑀣𑀸. 𑀫𑀦𑀸𑀬𑀢𑀦𑀁 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀕𑀦𑁆𑀣𑁄 𑀘𑁂𑀯 𑀕𑀦𑁆𑀣𑀦𑀺𑀬𑀜𑁆𑀘𑀸’’𑀢𑀺, 𑀲𑀺𑀬𑀸 𑀕𑀦𑁆𑀣𑀦𑀺𑀬𑀜𑁆𑀘𑁂𑀯 𑀦𑁄 𑀘 𑀕𑀦𑁆𑀣𑁄, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀕𑀦𑁆𑀣𑀦𑀺𑀬𑀜𑁆𑀘𑁂𑀯 𑀦𑁄 𑀘 𑀕𑀦𑁆𑀣𑁄’’𑀢𑀺. 𑀥𑀫𑁆𑀫𑀸𑀬𑀢𑀦𑀁 𑀲𑀺𑀬𑀸 𑀕𑀦𑁆𑀣𑁄 𑀘𑁂𑀯 𑀕𑀦𑁆𑀣𑀦𑀺𑀬𑀜𑁆𑀘, 𑀲𑀺𑀬𑀸 𑀕𑀦𑁆𑀣𑀦𑀺𑀬𑀜𑁆𑀘𑁂𑀯 𑀦𑁄 𑀘 𑀕𑀦𑁆𑀣𑁄, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀕𑀦𑁆𑀣𑁄 𑀘𑁂𑀯 𑀕𑀦𑁆𑀣𑀦𑀺𑀬𑀜𑁆𑀘𑀸’’𑀢𑀺𑀧𑀺, ‘‘𑀕𑀦𑁆𑀣𑀦𑀺𑀬𑀜𑁆𑀘𑁂𑀯 𑀦𑁄 𑀘 𑀕𑀦𑁆𑀣𑁄’’𑀢𑀺𑀧𑀺. 𑀤𑀲𑀸𑀬𑀢𑀦𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀕𑀦𑁆𑀣𑀸 𑀘𑁂𑀯 𑀕𑀦𑁆𑀣𑀲𑀫𑁆𑀧𑀬𑀼𑀢𑁆𑀢𑀸 𑀘𑀸’’𑀢𑀺𑀧𑀺, ‘‘𑀕𑀦𑁆𑀣𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀯 𑀦𑁄 𑀘 𑀕𑀦𑁆𑀣𑀸’’𑀢𑀺𑀧𑀺. 𑀫𑀦𑀸𑀬𑀢𑀦𑀁 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀕𑀦𑁆𑀣𑁄 𑀘𑁂𑀯 𑀕𑀦𑁆𑀣𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑀸’’𑀢𑀺, 𑀲𑀺𑀬𑀸 𑀕𑀦𑁆𑀣𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑁂𑀯 𑀦𑁄 𑀘 𑀕𑀦𑁆𑀣𑁄, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀕𑀦𑁆𑀣𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑁂𑀯 𑀦𑁄 𑀘 𑀕𑀦𑁆𑀣𑁄’’𑀢𑀺. 𑀥𑀫𑁆𑀫𑀸𑀬𑀢𑀦𑀁 𑀲𑀺𑀬𑀸 𑀕𑀦𑁆𑀣𑁄 𑀘𑁂𑀯 𑀕𑀦𑁆𑀣𑀲𑀫𑁆𑀧𑀬𑀼𑀢𑁆𑀢𑀜𑁆𑀘, 𑀲𑀺𑀬𑀸 𑀕𑀦𑁆𑀣𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑁂𑀯 𑀦𑁄 𑀘 𑀕𑀦𑁆𑀣𑁄, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀕𑀦𑁆𑀣𑁄 𑀘𑁂𑀯 𑀕𑀦𑁆𑀣𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑀸’’𑀢𑀺𑀧𑀺, ‘‘𑀕𑀦𑁆𑀣𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑁂𑀯 𑀦𑁄 𑀘 𑀕𑀦𑁆𑀣𑁄’’𑀢𑀺𑀧𑀺. 𑀤𑀲𑀸𑀬𑀢𑀦𑀸 𑀕𑀦𑁆𑀣𑀯𑀺𑀧𑁆𑀧𑀬𑀼𑀢𑁆𑀢𑀕𑀦𑁆𑀣𑀦𑀺𑀬𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀕𑀦𑁆𑀣𑀯𑀺𑀧𑁆𑀧𑀬𑀼𑀢𑁆𑀢𑀕𑀦𑁆𑀣𑀦𑀺𑀬𑀸, 𑀲𑀺𑀬𑀸 𑀕𑀦𑁆𑀣𑀯𑀺𑀧𑁆𑀧𑀬𑀼𑀢𑁆𑀢𑀅𑀕𑀦𑁆𑀣𑀦𑀺𑀬𑀸, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀕𑀦𑁆𑀣𑀯𑀺𑀧𑁆𑀧𑀬𑀼𑀢𑁆𑀢𑀕𑀦𑁆𑀣𑀦𑀺𑀬𑀸’’𑀢𑀺𑀧𑀺, ‘‘𑀕𑀦𑁆𑀣𑀯𑀺𑀧𑁆𑀧𑀬𑀼𑀢𑁆𑀢𑀅𑀕𑀦𑁆𑀣𑀦𑀺𑀬𑀸’’𑀢𑀺𑀧𑀺.

𑀏𑀓𑀸𑀤𑀲𑀸𑀬𑀢𑀦𑀸 𑀦𑁄 𑀑𑀖𑀸…𑀧𑁂… 𑀦𑁄 𑀬𑁄𑀕𑀸…𑀧𑁂… 𑀦𑁄 𑀦𑀻𑀯𑀭𑀡𑀸. 𑀥𑀫𑁆𑀫𑀸𑀬𑀢𑀦𑀁 𑀲𑀺𑀬𑀸 𑀦𑀻𑀯𑀭𑀡𑀁, 𑀲𑀺𑀬𑀸 𑀦𑁄 𑀦𑀻𑀯𑀭𑀡𑀁. 𑀤𑀲𑀸𑀬𑀢𑀦𑀸 𑀦𑀻𑀯𑀭𑀡𑀺𑀬𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀦𑀻𑀯𑀭𑀡𑀺𑀬𑀸, 𑀲𑀺𑀬𑀸 𑀅𑀦𑀻𑀯𑀭𑀡𑀺𑀬𑀸. 𑀤𑀲𑀸𑀬𑀢𑀦𑀸 𑀦𑀻𑀯𑀭𑀡𑀯𑀺𑀧𑁆𑀧𑀬𑀼𑀢𑁆𑀢𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢𑀸, 𑀲𑀺𑀬𑀸 𑀦𑀻𑀯𑀭𑀡𑀯𑀺𑀧𑁆𑀧𑀬𑀼𑀢𑁆𑀢𑀸. 𑀤𑀲𑀸𑀬𑀢𑀦𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀦𑀻𑀯𑀭𑀡𑀸 𑀘𑁂𑀯 𑀦𑀻𑀯𑀭𑀡𑀺𑀬𑀸 𑀘𑀸’’𑀢𑀺, 𑀦𑀻𑀯𑀭𑀡𑀺𑀬𑀸 𑀘𑁂𑀯 𑀦𑁄 𑀘 𑀦𑀻𑀯𑀭𑀡𑀸. 𑀫𑀦𑀸𑀬𑀢𑀦𑀁 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀦𑀻𑀯𑀭𑀡𑀜𑁆𑀘𑁂𑀯 𑀦𑀻𑀯𑀭𑀡𑀺𑀬𑀜𑁆𑀘𑀸’’𑀢𑀺, 𑀲𑀺𑀬𑀸 𑀦𑀻𑀯𑀭𑀡𑀺𑀬𑀜𑁆𑀘𑁂𑀯 𑀦𑁄 𑀘 𑀦𑀻𑀯𑀭𑀡𑀁, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀦𑀻𑀯𑀭𑀡𑀺𑀬𑀜𑁆𑀘𑁂𑀯 𑀦𑁄 𑀘 𑀦𑀻𑀯𑀭𑀡’’𑀦𑁆𑀢𑀺. 𑀥𑀫𑁆𑀫𑀸𑀬𑀢𑀦𑀁 𑀲𑀺𑀬𑀸 𑀦𑀻𑀯𑀭𑀡𑀜𑁆𑀘𑁂𑀯 𑀦𑀻𑀯𑀭𑀡𑀺𑀬𑀜𑁆𑀘, 𑀲𑀺𑀬𑀸 𑀦𑀻𑀯𑀭𑀡𑀺𑀬𑀜𑁆𑀘𑁂𑀯 𑀦𑁄 𑀘 𑀦𑀻𑀯𑀭𑀡𑀁, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀦𑀻𑀯𑀭𑀡𑀜𑁆𑀘𑁂𑀯 𑀦𑀻𑀯𑀭𑀡𑀺𑀬𑀜𑁆𑀘𑀸’’𑀢𑀺𑀧𑀺, ‘‘𑀦𑀻𑀯𑀭𑀡𑀺𑀬𑀜𑁆𑀘𑁂𑀯 𑀦𑁄 𑀘 𑀦𑀻𑀯𑀭𑀡’’𑀦𑁆𑀢𑀺𑀧𑀺. 𑀤𑀲𑀸𑀬𑀢𑀦𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀦𑀻𑀯𑀭𑀡𑀸 𑀘𑁂𑀯 𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢𑀸 𑀘𑀸’’𑀢𑀺𑀧𑀺, ‘‘𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀯 𑀦𑁄 𑀘 𑀦𑀻𑀯𑀭𑀡𑀸’’𑀢𑀺𑀧𑀺. 𑀫𑀦𑀸𑀬𑀢𑀦𑀁 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀦𑀻𑀯𑀭𑀡𑀜𑁆𑀘𑁂𑀯 𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑀸’’𑀢𑀺, 𑀲𑀺𑀬𑀸 𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑁂𑀯 𑀦𑁄 𑀘 𑀦𑀻𑀯𑀭𑀡𑀁, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑁂𑀯 𑀦𑁄 𑀘 𑀦𑀻𑀯𑀭𑀡’’𑀦𑁆𑀢𑀺. 𑀥𑀫𑁆𑀫𑀸𑀬𑀢𑀦𑀁 𑀲𑀺𑀬𑀸 𑀦𑀻𑀯𑀭𑀡𑀜𑁆𑀘𑁂𑀯 𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢𑀜𑁆𑀘, 𑀲𑀺𑀬𑀸 𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑁂𑀯 𑀦𑁄 𑀘 𑀦𑀻𑀯𑀭𑀡𑀁, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀦𑀻𑀯𑀭𑀡𑀜𑁆𑀘𑁂𑀯 𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑀸’’𑀢𑀺𑀧𑀺, ‘‘𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑁂𑀯 𑀦𑁄 𑀘 𑀦𑀻𑀯𑀭𑀡’’𑀦𑁆𑀢𑀺𑀧𑀺. 𑀤𑀲𑀸𑀬𑀢𑀦𑀸 𑀦𑀻𑀯𑀭𑀡𑀯𑀺𑀧𑁆𑀧𑀬𑀼𑀢𑁆𑀢𑀦𑀻𑀯𑀭𑀡𑀺𑀬𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀦𑀻𑀯𑀭𑀡𑀯𑀺𑀧𑁆𑀧𑀬𑀼𑀢𑁆𑀢𑀦𑀻𑀯𑀭𑀡𑀺𑀬𑀸, 𑀲𑀺𑀬𑀸 𑀦𑀻𑀯𑀭𑀡𑀯𑀺𑀧𑁆𑀧𑀬𑀼𑀢𑁆𑀢𑀅𑀦𑀻𑀯𑀭𑀡𑀺𑀬𑀸, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀦𑀻𑀯𑀭𑀡𑀯𑀺𑀧𑁆𑀧𑀬𑀼𑀢𑁆𑀢𑀦𑀻𑀯𑀭𑀡𑀺𑀬𑀸’’𑀢𑀺𑀧𑀺, ‘‘𑀦𑀻𑀯𑀭𑀡𑀯𑀺𑀧𑁆𑀧𑀬𑀼𑀢𑁆𑀢𑀅𑀦𑀻𑀯𑀭𑀡𑀺𑀬𑀸’’𑀢𑀺𑀧𑀺.

𑀏𑀓𑀸𑀤𑀲𑀸𑀬𑀢𑀦𑀸 𑀦𑁄 𑀧𑀭𑀸𑀫𑀸𑀲𑀸. 𑀥𑀫𑁆𑀫𑀸𑀬𑀢𑀦𑀁 𑀲𑀺𑀬𑀸 𑀧𑀭𑀸𑀫𑀸𑀲𑁄, 𑀲𑀺𑀬𑀸 𑀦𑁄 𑀧𑀭𑀸𑀫𑀸𑀲𑁄. 𑀤𑀲𑀸𑀬𑀢𑀦𑀸 𑀧𑀭𑀸𑀫𑀝𑁆𑀞𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀧𑀭𑀸𑀫𑀝𑁆𑀞𑀸, 𑀲𑀺𑀬𑀸 𑀅𑀧𑀭𑀸𑀫𑀝𑁆𑀞𑀸. 𑀤𑀲𑀸𑀬𑀢𑀦𑀸 𑀧𑀭𑀸𑀫𑀸𑀲𑀯𑀺𑀧𑁆𑀧𑀬𑀼𑀢𑁆𑀢𑀸. 𑀫𑀦𑀸𑀬𑀢𑀦𑀁 𑀲𑀺𑀬𑀸 𑀧𑀭𑀸𑀫𑀸𑀲𑀲𑀫𑁆𑀧𑀬𑀼𑀢𑁆𑀢𑀁, 𑀲𑀺𑀬𑀸 𑀧𑀭𑀸𑀫𑀸𑀲𑀯𑀺𑀧𑁆𑀧𑀬𑀼𑀢𑁆𑀢𑀁. 𑀥𑀫𑁆𑀫𑀸𑀬𑀢𑀦𑀁 𑀲𑀺𑀬𑀸 𑀧𑀭𑀸𑀫𑀸𑀲𑀲𑀫𑁆𑀧𑀬𑀼𑀢𑁆𑀢𑀁, 𑀲𑀺𑀬𑀸 𑀧𑀭𑀸𑀫𑀸𑀲𑀯𑀺𑀧𑁆𑀧𑀬𑀼𑀢𑁆𑀢𑀁, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀧𑀭𑀸𑀫𑀸𑀲𑀲𑀫𑁆𑀧𑀬𑀼𑀢𑁆𑀢’’𑀦𑁆𑀢𑀺𑀧𑀺, ‘‘𑀧𑀭𑀸𑀫𑀸𑀲𑀯𑀺𑀧𑁆𑀧𑀬𑀼𑀢𑁆𑀢’’𑀦𑁆𑀢𑀺𑀧𑀺. 𑀤𑀲𑀸𑀬𑀢𑀦𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀧𑀭𑀸𑀫𑀸𑀲𑀸 𑀘𑁂𑀯 𑀧𑀭𑀸𑀫𑀝𑁆𑀞𑀸 𑀘𑀸’’𑀢𑀺, ‘‘𑀧𑀭𑀸𑀫𑀝𑁆𑀞𑀸 𑀘𑁂𑀯 𑀦𑁄 𑀘 𑀧𑀭𑀸𑀫𑀸𑀲𑀸’’. 𑀫𑀦𑀸𑀬𑀢𑀦𑀁 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀧𑀭𑀸𑀫𑀸𑀲𑁄 𑀘𑁂𑀯 𑀧𑀭𑀸𑀫𑀝𑁆𑀞𑀜𑁆𑀘𑀸’’𑀢𑀺, 𑀲𑀺𑀬𑀸 𑀧𑀭𑀸𑀫𑀝𑁆𑀞𑀜𑁆𑀘𑁂𑀯 𑀦𑁄 𑀘 𑀧𑀭𑀸𑀫𑀸𑀲𑁄, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀧𑀭𑀸𑀫𑀝𑁆𑀞𑀜𑁆𑀘𑁂𑀯 𑀦𑁄 𑀘 𑀧𑀭𑀸𑀫𑀸𑀲𑁄’’𑀢𑀺. 𑀥𑀫𑁆𑀫𑀸𑀬𑀢𑀦𑀁 𑀲𑀺𑀬𑀸 𑀧𑀭𑀸𑀫𑀸𑀲𑁄 𑀘𑁂𑀯 𑀧𑀭𑀸𑀫𑀝𑁆𑀞𑀜𑁆𑀘, 𑀲𑀺𑀬𑀸 𑀧𑀭𑀸𑀫𑀝𑁆𑀞𑀜𑁆𑀘𑁂𑀯 𑀦𑁄 𑀘 𑀧𑀭𑀸𑀫𑀸𑀲𑁄, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀧𑀭𑀸𑀫𑀸𑀲𑁄 𑀘𑁂𑀯 𑀧𑀭𑀸𑀫𑀝𑁆𑀞𑀜𑁆𑀘𑀸’’𑀢𑀺𑀧𑀺, ‘‘𑀧𑀭𑀸𑀫𑀝𑁆𑀞𑀜𑁆𑀘𑁂𑀯 𑀦𑁄 𑀘 𑀧𑀭𑀸𑀫𑀸𑀲𑁄’’𑀢𑀺𑀧𑀺. 𑀤𑀲𑀸𑀬𑀢𑀦𑀸 𑀧𑀭𑀸𑀫𑀸𑀲𑀯𑀺𑀧𑁆𑀧𑀬𑀼𑀢𑁆𑀢𑀧𑀭𑀸𑀫𑀝𑁆𑀞𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀧𑀭𑀸𑀫𑀸𑀲𑀯𑀺𑀧𑁆𑀧𑀬𑀼𑀢𑁆𑀢𑀧𑀭𑀸𑀫𑀝𑁆𑀞𑀸, 𑀲𑀺𑀬𑀸 𑀧𑀭𑀸𑀫𑀸𑀲𑀯𑀺𑀧𑁆𑀧𑀬𑀼𑀢𑁆𑀢𑀅𑀧𑀭𑀸𑀫𑀝𑁆𑀞𑀸, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀧𑀭𑀸𑀫𑀸𑀲𑀯𑀺𑀧𑁆𑀧𑀬𑀼𑀢𑁆𑀢𑀧𑀭𑀸𑀫𑀝𑁆𑀞𑀸’’𑀢𑀺𑀧𑀺, ‘‘𑀧𑀭𑀸𑀫𑀸𑀲𑀯𑀺𑀧𑁆𑀧𑀬𑀼𑀢𑁆𑀢𑀅𑀧𑀭𑀸𑀫𑀝𑁆𑀞𑀸’’𑀢𑀺𑀧𑀺.

𑀤𑀲𑀸𑀬𑀢𑀦𑀸 𑀅𑀦𑀸𑀭𑀫𑁆𑀫𑀡𑀸. 𑀫𑀦𑀸𑀬𑀢𑀦𑀁 𑀲𑀸𑀭𑀫𑁆𑀫𑀡𑀁. 𑀥𑀫𑁆𑀫𑀸𑀬𑀢𑀦𑀁 𑀲𑀺𑀬𑀸 𑀲𑀸𑀭𑀫𑁆𑀫𑀡𑀁, 𑀲𑀺𑀬𑀸 𑀅𑀦𑀸𑀭𑀫𑁆𑀫𑀡𑀁. 𑀫𑀦𑀸𑀬𑀢𑀦𑀁 𑀘𑀺𑀢𑁆𑀢𑀁. 𑀏𑀓𑀸𑀤𑀲𑀸𑀬𑀢𑀦𑀸 𑀦𑁄 𑀘𑀺𑀢𑁆𑀢𑀸. 𑀏𑀓𑀸𑀤𑀲𑀸𑀬𑀢𑀦𑀸 𑀅𑀘𑁂𑀢𑀲𑀺𑀓𑀸. 𑀥𑀫𑁆𑀫𑀸𑀬𑀢𑀦𑀁 𑀲𑀺𑀬𑀸 𑀘𑁂𑀢𑀲𑀺𑀓𑀁, 𑀲𑀺𑀬𑀸 𑀅𑀘𑁂𑀢𑀲𑀺𑀓𑀁. 𑀤𑀲𑀸𑀬𑀢𑀦𑀸 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀸. 𑀥𑀫𑁆𑀫𑀸𑀬𑀢𑀦𑀁 𑀲𑀺𑀬𑀸 𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀁, 𑀲𑀺𑀬𑀸 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀁. 𑀫𑀦𑀸𑀬𑀢𑀦𑀁 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀘𑀺𑀢𑁆𑀢𑁂𑀦 𑀲𑀫𑁆𑀧𑀬𑀼𑀢𑁆𑀢’’𑀦𑁆𑀢𑀺𑀧𑀺, ‘‘𑀘𑀺𑀢𑁆𑀢𑁂𑀦 𑀯𑀺𑀧𑁆𑀧𑀬𑀼𑀢𑁆𑀢’’𑀦𑁆𑀢𑀺𑀧𑀺. 𑀤𑀲𑀸𑀬𑀢𑀦𑀸 𑀘𑀺𑀢𑁆𑀢𑀯𑀺𑀲𑀁𑀲𑀝𑁆𑀞𑀸. 𑀥𑀫𑁆𑀫𑀸𑀬𑀢𑀦𑀁 𑀲𑀺𑀬𑀸 𑀘𑀺𑀢𑁆𑀢𑀲𑀁𑀲𑀝𑁆𑀞𑀁, 𑀲𑀺𑀬𑀸 𑀘𑀺𑀢𑁆𑀢𑀯𑀺𑀲𑀁𑀲𑀝𑁆𑀞𑀁. 𑀫𑀦𑀸𑀬𑀢𑀦𑀁 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀘𑀺𑀢𑁆𑀢𑁂𑀦 𑀲𑀁𑀲𑀝𑁆𑀞’’𑀦𑁆𑀢𑀺𑀧𑀺, ‘‘𑀘𑀺𑀢𑁆𑀢𑁂𑀦 𑀯𑀺𑀲𑀁𑀲𑀝𑁆𑀞’’𑀦𑁆𑀢𑀺𑀧𑀺. 𑀙𑀸𑀬𑀢𑀦𑀸 𑀦𑁄 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸. 𑀙𑀸𑀬𑀢𑀦𑀸 𑀲𑀺𑀬𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸, 𑀲𑀺𑀬𑀸 𑀦𑁄 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸. 𑀏𑀓𑀸𑀤𑀲𑀸𑀬𑀢𑀦𑀸 𑀦𑁄 𑀘𑀺𑀢𑁆𑀢𑀲𑀳𑀪𑀼𑀦𑁄. 𑀥𑀫𑁆𑀫𑀸𑀬𑀢𑀦𑀁 𑀲𑀺𑀬𑀸 𑀘𑀺𑀢𑁆𑀢𑀲𑀳𑀪𑀽, 𑀲𑀺𑀬𑀸 𑀦𑁄 𑀘𑀺𑀢𑁆𑀢𑀲𑀳𑀪𑀽. 𑀏𑀓𑀸𑀤𑀲𑀸𑀬𑀢𑀦𑀸 𑀦𑁄 𑀘𑀺𑀢𑁆𑀢𑀸𑀦𑀼𑀧𑀭𑀺𑀯𑀢𑁆𑀢𑀺𑀦𑁄. 𑀥𑀫𑁆𑀫𑀸𑀬𑀢𑀦𑀁 𑀲𑀺𑀬𑀸 𑀘𑀺𑀢𑁆𑀢𑀸𑀦𑀼𑀧𑀭𑀺𑀯𑀢𑁆𑀢𑀺, 𑀲𑀺𑀬𑀸 𑀦𑁄 𑀘𑀺𑀢𑁆𑀢𑀸𑀦𑀼𑀧𑀭𑀺𑀯𑀢𑁆𑀢𑀺. 𑀏𑀓𑀸𑀤𑀲𑀸𑀬𑀢𑀦𑀸 𑀦𑁄 𑀘𑀺𑀢𑁆𑀢𑀲𑀁𑀲𑀝𑁆𑀞𑀲𑀫𑀼𑀝𑁆𑀞𑀸𑀦𑀸. 𑀥𑀫𑁆𑀫𑀸𑀬𑀢𑀦𑀁 𑀲𑀺𑀬𑀸 𑀘𑀺𑀢𑁆𑀢𑀲𑀁𑀲𑀝𑁆𑀞𑀲𑀫𑀼𑀝𑁆𑀞𑀸𑀦𑀁, 𑀲𑀺𑀬𑀸 𑀦𑁄 𑀘𑀺𑀢𑁆𑀢𑀲𑀁𑀲𑀝𑁆𑀞𑀲𑀫𑀼𑀝𑁆𑀞𑀸𑀦𑀁. 𑀏𑀓𑀸𑀤𑀲𑀸𑀬𑀢𑀦𑀸 𑀦𑁄 𑀘𑀺𑀢𑁆𑀢𑀲𑀁𑀲𑀝𑁆𑀞𑀲𑀫𑀼𑀝𑁆𑀞𑀸𑀦𑀲𑀳𑀪𑀼𑀦𑁄. 𑀥𑀫𑁆𑀫𑀸𑀬𑀢𑀦𑀁 𑀲𑀺𑀬𑀸 𑀘𑀺𑀢𑁆𑀢𑀲𑀁𑀲𑀝𑁆𑀞𑀲𑀫𑀼𑀝𑁆𑀞𑀸𑀦𑀲𑀳𑀪𑀽, 𑀲𑀺𑀬𑀸 𑀦𑁄 𑀘𑀺𑀢𑁆𑀢𑀲𑀁𑀲𑀝𑁆𑀞𑀲𑀫𑀼𑀝𑁆𑀞𑀸𑀦𑀲𑀳𑀪𑀽. 𑀏𑀓𑀸𑀤𑀲𑀸𑀬𑀢𑀦𑀸 𑀦𑁄 𑀘𑀺𑀢𑁆𑀢𑀲𑀁𑀲𑀝𑁆𑀞𑀲𑀫𑀼𑀝𑁆𑀞𑀸𑀦𑀸𑀦𑀼𑀧𑀭𑀺𑀯𑀢𑁆𑀢𑀺𑀦𑁄. 𑀥𑀫𑁆𑀫𑀸𑀬𑀢𑀦𑀁 𑀲𑀺𑀬𑀸 𑀘𑀺𑀢𑁆𑀢𑀲𑀁𑀲𑀝𑁆𑀞𑀲𑀫𑀼𑀝𑁆𑀞𑀸𑀦𑀸𑀦𑀼𑀧𑀭𑀺𑀯𑀢𑁆𑀢𑀺, 𑀲𑀺𑀬𑀸 𑀦𑁄 𑀘𑀺𑀢𑁆𑀢𑀲𑀁𑀲𑀝𑁆𑀞𑀲𑀫𑀼𑀝𑁆𑀞𑀸𑀦𑀸𑀦𑀼𑀧𑀭𑀺𑀯𑀢𑁆𑀢𑀺.

𑀙𑀸𑀬𑀢𑀦𑀸 𑀅𑀚𑁆𑀛𑀢𑁆𑀢𑀺𑀓𑀸. 𑀙𑀸𑀬𑀢𑀦𑀸 𑀩𑀸𑀳𑀺𑀭𑀸. 𑀦𑀯𑀸𑀬𑀢𑀦𑀸 𑀉𑀧𑀸𑀤𑀸. 𑀤𑁆𑀯𑀸𑀬𑀢𑀦𑀸 𑀦𑁄 𑀉𑀧𑀸𑀤𑀸. 𑀥𑀫𑁆𑀫𑀸𑀬𑀢𑀦𑀁 𑀲𑀺𑀬𑀸 𑀉𑀧𑀸𑀤𑀸, 𑀲𑀺𑀬𑀸 𑀦𑁄 𑀉𑀧𑀸𑀤𑀸. 𑀧𑀜𑁆𑀘𑀸𑀬𑀢𑀦𑀸 𑀉𑀧𑀸𑀤𑀺𑀦𑁆𑀦𑀸. 𑀲𑀤𑁆𑀤𑀸𑀬𑀢𑀦𑀁 𑀅𑀦𑀼𑀧𑀸𑀤𑀺𑀦𑁆𑀦𑀁. 𑀙𑀸𑀬𑀢𑀦𑀸 𑀲𑀺𑀬𑀸 𑀉𑀧𑀸𑀤𑀺𑀦𑁆𑀦𑀸, 𑀲𑀺𑀬𑀸 𑀅𑀦𑀼𑀧𑀸𑀤𑀺𑀦𑁆𑀦𑀸. 𑀏𑀓𑀸𑀤𑀲𑀸𑀬𑀢𑀦𑀸 𑀦𑁄 𑀉𑀧𑀸𑀤𑀸𑀦𑀸. 𑀥𑀫𑁆𑀫𑀸𑀬𑀢𑀦𑀁 𑀲𑀺𑀬𑀸 𑀉𑀧𑀸𑀤𑀸𑀦𑀁, 𑀲𑀺𑀬𑀸 𑀦𑁄 𑀉𑀧𑀸𑀤𑀸𑀦𑀁. 𑀤𑀲𑀸𑀬𑀢𑀦𑀸 𑀉𑀧𑀸𑀤𑀸𑀦𑀺𑀬𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀉𑀧𑀸𑀤𑀸𑀦𑀺𑀬𑀸, 𑀲𑀺𑀬𑀸 𑀅𑀦𑀼𑀧𑀸𑀤𑀸𑀦𑀺𑀬𑀸. 𑀤𑀲𑀸𑀬𑀢𑀦𑀸 𑀉𑀧𑀸𑀤𑀸𑀦𑀯𑀺𑀧𑁆𑀧𑀬𑀼𑀢𑁆𑀢𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀉𑀧𑀸𑀤𑀸𑀦𑀲𑀫𑁆𑀧𑀬𑀼𑀢𑁆𑀢𑀸, 𑀲𑀺𑀬𑀸 𑀉𑀧𑀸𑀤𑀸𑀦𑀯𑀺𑀧𑁆𑀧𑀬𑀼𑀢𑁆𑀢𑀸. 𑀤𑀲𑀸𑀬𑀢𑀦𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀉𑀧𑀸𑀤𑀸𑀦𑀸 𑀘𑁂𑀯 𑀉𑀧𑀸𑀤𑀸𑀦𑀺𑀬𑀸 𑀘𑀸’’𑀢𑀺, 𑀉𑀧𑀸𑀤𑀸𑀦𑀺𑀬𑀸 𑀘𑁂𑀯 𑀦𑁄 𑀘 𑀉𑀧𑀸𑀤𑀸𑀦𑀸. 𑀫𑀦𑀸𑀬𑀢𑀦𑀁 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀉𑀧𑀸𑀤𑀸𑀦𑀜𑁆𑀘𑁂𑀯 𑀉𑀧𑀸𑀤𑀸𑀦𑀺𑀬𑀜𑁆𑀘𑀸’’𑀢𑀺, 𑀲𑀺𑀬𑀸 𑀉𑀧𑀸𑀤𑀸𑀦𑀺𑀬𑀜𑁆𑀘𑁂𑀯 𑀦𑁄 𑀘 𑀉𑀧𑀸𑀤𑀸𑀦𑀁, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀉𑀧𑀸𑀤𑀸𑀦𑀺𑀬𑀜𑁆𑀘𑁂𑀯 𑀦𑁄 𑀘 𑀉𑀧𑀸𑀤𑀸𑀦’’𑀦𑁆𑀢𑀺. 𑀥𑀫𑁆𑀫𑀸𑀬𑀢𑀦𑀁 𑀲𑀺𑀬𑀸 𑀉𑀧𑀸𑀤𑀸𑀦𑀜𑁆𑀘𑁂𑀯 𑀉𑀧𑀸𑀤𑀸𑀦𑀺𑀬𑀜𑁆𑀘, 𑀲𑀺𑀬𑀸 𑀉𑀧𑀸𑀤𑀸𑀦𑀺𑀬𑀜𑁆𑀘𑁂𑀯 𑀦𑁄 𑀘 𑀉𑀧𑀸𑀤𑀸𑀦𑀁, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀉𑀧𑀸𑀤𑀸𑀦𑀜𑁆𑀘𑁂𑀯 𑀉𑀧𑀸𑀤𑀸𑀦𑀺𑀬𑀜𑁆𑀘𑀸’’𑀢𑀺𑀧𑀺, ‘‘𑀉𑀧𑀸𑀤𑀸𑀦𑀺𑀬𑀜𑁆𑀘𑁂𑀯 𑀦𑁄 𑀘 𑀉𑀧𑀸𑀤𑀸𑀦’’𑀦𑁆𑀢𑀺𑀧𑀺. 𑀤𑀲𑀸𑀬𑀢𑀦𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀉𑀧𑀸𑀤𑀸𑀦𑀸 𑀘𑁂𑀯 𑀉𑀧𑀸𑀤𑀸𑀦𑀲𑀫𑁆𑀧𑀬𑀼𑀢𑁆𑀢𑀸 𑀘𑀸’’𑀢𑀺𑀧𑀺, ‘‘𑀉𑀧𑀸𑀤𑀸𑀦𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀯 𑀦𑁄 𑀘 𑀉𑀧𑀸𑀤𑀸𑀦𑀸’’𑀢𑀺𑀧𑀺. 𑀫𑀦𑀸𑀬𑀢𑀦𑀁 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀉𑀧𑀸𑀤𑀸𑀦𑀺𑀬𑀜𑁆𑀘𑁂𑀯 𑀉𑀧𑀸𑀤𑀸𑀦𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑀸’’𑀢𑀺, 𑀲𑀺𑀬𑀸 𑀉𑀧𑀸𑀤𑀸𑀦𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑁂𑀯 𑀦𑁄 𑀘 𑀉𑀧𑀸𑀤𑀸𑀦𑀁, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀉𑀧𑀸𑀤𑀸𑀦𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑁂𑀯 𑀦𑁄 𑀘 𑀉𑀧𑀸𑀤𑀸𑀦’’𑀦𑁆𑀢𑀺. 𑀥𑀫𑁆𑀫𑀸𑀬𑀢𑀦𑀁 𑀲𑀺𑀬𑀸 𑀉𑀧𑀸𑀤𑀸𑀦𑀜𑁆𑀘𑁂𑀯 𑀉𑀧𑀸𑀤𑀸𑀦𑀲𑀫𑁆𑀧𑀬𑀼𑀢𑁆𑀢𑀜𑁆𑀘, 𑀲𑀺𑀬𑀸 𑀉𑀧𑀸𑀤𑀸𑀦𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑁂𑀯 𑀦𑁄 𑀘 𑀉𑀧𑀸𑀤𑀸𑀦𑀁, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀉𑀧𑀸𑀤𑀸𑀦𑀜𑁆𑀘𑁂𑀯 𑀉𑀧𑀸𑀤𑀸𑀦𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑀸’’𑀢𑀺𑀧𑀺, ‘‘𑀉𑀧𑀸𑀤𑀸𑀦𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑁂𑀯 𑀦𑁄 𑀘 𑀉𑀧𑀸𑀤𑀸𑀦’’𑀦𑁆𑀢𑀺𑀧𑀺. 𑀤𑀲𑀸𑀬𑀢𑀦𑀸 𑀉𑀧𑀸𑀤𑀸𑀦𑀯𑀺𑀧𑁆𑀧𑀬𑀼𑀢𑁆𑀢𑀉𑀧𑀸𑀤𑀸𑀦𑀺𑀬𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀉𑀧𑀸𑀤𑀸𑀦𑀲𑀫𑁆𑀧𑀬𑀼𑀢𑁆𑀢𑀉𑀧𑀸𑀤𑀸𑀦𑀺𑀬𑀸, 𑀲𑀺𑀬𑀸 𑀉𑀧𑀸𑀤𑀸𑀦𑀯𑀺𑀧𑁆𑀧𑀬𑀼𑀢𑁆𑀢𑀅𑀦𑀼𑀧𑀸𑀤𑀸𑀦𑀺𑀬𑀸, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀉𑀧𑀸𑀤𑀸𑀦𑀯𑀺𑀧𑁆𑀧𑀬𑀼𑀢𑁆𑀢𑀉𑀧𑀸𑀤𑀸𑀦𑀺𑀬𑀸’’𑀢𑀺𑀧𑀺, ‘‘𑀉𑀧𑀸𑀤𑀸𑀦𑀯𑀺𑀧𑁆𑀧𑀬𑀼𑀢𑁆𑀢𑀅𑀦𑀼𑀧𑀸𑀤𑀸𑀦𑀺𑀬𑀸’’𑀢𑀺𑀧𑀺.

𑀏𑀓𑀸𑀤𑀲𑀸𑀬𑀢𑀦𑀸 𑀦𑁄 𑀓𑀺𑀮𑁂𑀲𑀸. 𑀥𑀫𑁆𑀫𑀸𑀬𑀢𑀦𑀁 𑀲𑀺𑀬𑀸 𑀓𑀺𑀮𑁂𑀲𑁄, 𑀲𑀺𑀬𑀸 𑀦𑁄 𑀓𑀺𑀮𑁂𑀲𑁄. 𑀤𑀲𑀸𑀬𑀢𑀦𑀸 𑀲𑀁𑀓𑀺𑀮𑁂𑀲𑀺𑀓𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀲𑀁𑀓𑀺𑀮𑁂𑀲𑀺𑀓𑀸, 𑀲𑀺𑀬𑀸 𑀅𑀲𑀁𑀓𑀺𑀮𑁂𑀲𑀺𑀓𑀸. 𑀤𑀲𑀸𑀬𑀢𑀦𑀸 𑀅𑀲𑀁𑀓𑀺𑀮𑀺𑀝𑁆𑀞𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀲𑀁𑀓𑀺𑀮𑀺𑀝𑁆𑀞𑀸, 𑀲𑀺𑀬𑀸 𑀅𑀲𑀁𑀓𑀺𑀮𑀺𑀝𑁆𑀞𑀸. 𑀤𑀲𑀸𑀬𑀢𑀦𑀸 𑀓𑀺𑀮𑁂𑀲𑀯𑀺𑀧𑁆𑀧𑀬𑀼𑀢𑁆𑀢𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀓𑀺𑀮𑁂𑀲𑀲𑀫𑁆𑀧𑀬𑀼𑀢𑁆𑀢𑀸, 𑀲𑀺𑀬𑀸 𑀓𑀺𑀮𑁂𑀲𑀯𑀺𑀧𑁆𑀧𑀬𑀼𑀢𑁆𑀢𑀸. 𑀤𑀲𑀸𑀬𑀢𑀦𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀓𑀺𑀮𑁂𑀲𑀸 𑀘𑁂𑀯 𑀲𑀁𑀓𑀺𑀮𑁂𑀲𑀺𑀓𑀸 𑀘𑀸’’𑀢𑀺, ‘‘𑀲𑀁𑀓𑀺𑀮𑁂𑀲𑀺𑀓𑀸 𑀘𑁂𑀯 𑀦𑁄 𑀘 𑀓𑀺𑀮𑁂𑀲𑀸’’. 𑀫𑀦𑀸𑀬𑀢𑀦𑀁 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀓𑀺𑀮𑁂𑀲𑁄 𑀘𑁂𑀯 𑀲𑀁𑀓𑀺𑀮𑁂𑀲𑀺𑀓𑀜𑁆𑀘𑀸’’𑀢𑀺, 𑀲𑀺𑀬𑀸 𑀲𑀁𑀓𑀺𑀮𑁂𑀲𑀺𑀓𑀜𑁆𑀘𑁂𑀯 𑀦𑁄 𑀘 𑀓𑀺𑀮𑁂𑀲𑁄, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀁𑀓𑀺𑀮𑁂𑀲𑀺𑀓𑀜𑁆𑀘𑁂𑀯 𑀦𑁄 𑀘 𑀓𑀺𑀮𑁂𑀲𑁄’’𑀢𑀺. 𑀥𑀫𑁆𑀫𑀸𑀬𑀢𑀦𑀁 𑀲𑀺𑀬𑀸 𑀓𑀺𑀮𑁂𑀲𑁄 𑀘𑁂𑀯 𑀲𑀁𑀓𑀺𑀮𑁂𑀲𑀺𑀓𑀜𑁆𑀘, 𑀲𑀺𑀬𑀸 𑀲𑀁𑀓𑀺𑀮𑁂𑀲𑀺𑀓𑀜𑁆𑀘𑁂𑀯 𑀦𑁄 𑀘 𑀓𑀺𑀮𑁂𑀲𑁄, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀓𑀺𑀮𑁂𑀲𑁄 𑀘𑁂𑀯 𑀲𑀁𑀓𑀺𑀮𑁂𑀲𑀺𑀓𑀜𑁆𑀘𑀸’’𑀢𑀺𑀧𑀺, ‘‘𑀲𑀁𑀓𑀺𑀮𑁂𑀲𑀺𑀓𑀜𑁆𑀘𑁂𑀯 𑀦𑁄 𑀘 𑀓𑀺𑀮𑁂𑀲𑁄’’𑀢𑀺𑀧𑀺. 𑀤𑀲𑀸𑀬𑀢𑀦𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀓𑀺𑀮𑁂𑀲𑀸 𑀘𑁂𑀯 𑀲𑀁𑀓𑀺𑀮𑀺𑀝𑁆𑀞𑀸 𑀘𑀸’’𑀢𑀺𑀧𑀺, ‘‘𑀲𑀁𑀓𑀺𑀮𑀺𑀝𑁆𑀞𑀸 𑀘𑁂𑀯 𑀦𑁄 𑀘 𑀓𑀺𑀮𑁂𑀲𑀸’’𑀢𑀺𑀧𑀺. 𑀫𑀦𑀸𑀬𑀢𑀦𑀁 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀓𑀺𑀮𑁂𑀲𑁄 𑀘𑁂𑀯 𑀲𑀁𑀓𑀺𑀮𑀺𑀝𑁆𑀞𑀜𑁆𑀘𑀸’’𑀢𑀺, 𑀲𑀺𑀬𑀸 𑀲𑀁𑀓𑀺𑀮𑀺𑀝𑁆𑀞𑀜𑁆𑀘𑁂𑀯 𑀦𑁄 𑀘 𑀓𑀺𑀮𑁂𑀲𑁄, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀁𑀓𑀺𑀮𑀺𑀝𑁆𑀞𑀜𑁆𑀘𑁂𑀯 𑀦𑁄 𑀘 𑀓𑀺𑀮𑁂𑀲𑁄’’𑀢𑀺. 𑀥𑀫𑁆𑀫𑀸𑀬𑀢𑀦𑀁 𑀲𑀺𑀬𑀸 𑀓𑀺𑀮𑁂𑀲𑁄 𑀘𑁂𑀯 𑀲𑀁𑀓𑀺𑀮𑀺𑀝𑁆𑀞𑀜𑁆𑀘, 𑀲𑀺𑀬𑀸 𑀲𑀁𑀓𑀺𑀮𑀺𑀝𑁆𑀞𑀜𑁆𑀘𑁂𑀯 𑀦𑁄 𑀘 𑀓𑀺𑀮𑁂𑀲𑁄, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀓𑀺𑀮𑁂𑀲𑁄 𑀘𑁂𑀯 𑀲𑀁𑀓𑀺𑀮𑀺𑀝𑁆𑀞𑀜𑁆𑀘𑀸’’𑀢𑀺𑀧𑀺, ‘‘𑀲𑀁𑀓𑀺𑀮𑀺𑀝𑁆𑀞𑀜𑁆𑀘𑁂𑀯 𑀦𑁄 𑀘 𑀓𑀺𑀮𑁂𑀲𑁄’’𑀢𑀺𑀧𑀺.

𑀤𑀲𑀸𑀬𑀢𑀦𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀓𑀺𑀮𑁂𑀲𑀸 𑀘𑁂𑀯 𑀓𑀺𑀮𑁂𑀲𑀲𑀫𑁆𑀧𑀬𑀼𑀢𑁆𑀢𑀸 𑀘𑀸’’𑀢𑀺𑀧𑀺, ‘‘𑀓𑀺𑀮𑁂𑀲𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀯 𑀦𑁄 𑀘 𑀦 𑀓𑀺𑀮𑁂𑀲𑀸’’𑀢𑀺𑀧𑀺. 𑀫𑀦𑀸𑀬𑀢𑀦𑀁 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀓𑀺𑀮𑁂𑀲𑁄 𑀘𑁂𑀯 𑀓𑀺𑀮𑁂𑀲𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑀸’’𑀢𑀺, 𑀲𑀺𑀬𑀸 𑀓𑀺𑀮𑁂𑀲𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑁂𑀯 𑀦𑁄 𑀘 𑀓𑀺𑀮𑁂𑀲𑁄, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀓𑀺𑀮𑁂𑀲𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑁂𑀯 𑀦𑁄 𑀘 𑀓𑀺𑀮𑁂𑀲𑁄’’𑀢𑀺. 𑀥𑀫𑁆𑀫𑀸𑀬𑀢𑀦𑀁 𑀲𑀺𑀬𑀸 𑀓𑀺𑀮𑁂𑀲𑁄 𑀘𑁂𑀯 𑀓𑀺𑀮𑁂𑀲𑀲𑀫𑁆𑀧𑀬𑀼𑀢𑁆𑀢𑀜𑁆𑀘, 𑀲𑀺𑀬𑀸 𑀓𑀺𑀮𑁂𑀲𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑁂𑀯 𑀦𑁄 𑀘 𑀓𑀺𑀮𑁂𑀲𑁄, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀓𑀺𑀮𑁂𑀲𑁄 𑀘𑁂𑀯 𑀓𑀺𑀮𑁂𑀲𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑀸’’𑀢𑀺𑀧𑀺, ‘‘𑀓𑀺𑀮𑁂𑀲𑀲𑀫𑁆𑀧𑀬𑀼𑀢𑁆𑀢𑀜𑁆𑀘𑁂𑀯 𑀦𑁄 𑀘 𑀓𑀺𑀮𑁂𑀲𑁄’’𑀢𑀺𑀧𑀺. 𑀤𑀲𑀸𑀬𑀢𑀦𑀸 𑀓𑀺𑀮𑁂𑀲𑀯𑀺𑀧𑁆𑀧𑀬𑀼𑀢𑁆𑀢𑀲𑀁𑀓𑀺𑀮𑁂𑀲𑀺𑀓𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀓𑀺𑀮𑁂𑀲𑀯𑀺𑀧𑁆𑀧𑀬𑀼𑀢𑁆𑀢𑀲𑀁𑀓𑀺𑀮𑁂𑀲𑀺𑀓𑀸, 𑀲𑀺𑀬𑀸 𑀓𑀺𑀮𑁂𑀲𑀯𑀺𑀧𑁆𑀧𑀬𑀼𑀢𑁆𑀢𑀅𑀲𑀁𑀓𑀺𑀮𑁂𑀲𑀺𑀓𑀸, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀓𑀺𑀮𑁂𑀲𑀯𑀺𑀧𑁆𑀧𑀬𑀼𑀢𑁆𑀢𑀲𑀁𑀓𑀺𑀮𑁂𑀲𑀺𑀓𑀸’’𑀢𑀺𑀧𑀺, ‘‘𑀓𑀺𑀮𑁂𑀲𑀯𑀺𑀧𑁆𑀧𑀬𑀼𑀢𑁆𑀢𑀅𑀲𑀁𑀓𑀺𑀮𑁂𑀲𑀺𑀓𑀸’’𑀢𑀺𑀧𑀺.

𑀤𑀲𑀸𑀬𑀢𑀦𑀸 𑀦 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸, 𑀲𑀺𑀬𑀸 𑀦 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸. 𑀤𑀲𑀸𑀬𑀢𑀦𑀸 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸, 𑀲𑀺𑀬𑀸 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸. 𑀤𑀲𑀸𑀬𑀢𑀦𑀸 𑀦 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸, 𑀲𑀺𑀬𑀸 𑀦 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸. 𑀤𑀲𑀸𑀬𑀢𑀦𑀸 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸, 𑀲𑀺𑀬𑀸 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸. 𑀤𑀲𑀸𑀬𑀢𑀦𑀸 𑀅𑀯𑀺𑀢𑀓𑁆𑀓𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀲𑀯𑀺𑀢𑀓𑁆𑀓𑀸, 𑀲𑀺𑀬𑀸 𑀅𑀯𑀺𑀢𑀓𑁆𑀓𑀸. 𑀤𑀲𑀸𑀬𑀢𑀦𑀸 𑀅𑀯𑀺𑀘𑀸𑀭𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀲𑀯𑀺𑀘𑀸𑀭𑀸, 𑀲𑀺𑀬𑀸 𑀅𑀯𑀺𑀘𑀸𑀭𑀸. 𑀤𑀲𑀸𑀬𑀢𑀦𑀸 𑀅𑀧𑁆𑀧𑀻𑀢𑀺𑀓𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀲𑀧𑁆𑀧𑀻𑀢𑀺𑀓𑀸, 𑀲𑀺𑀬𑀸 𑀅𑀧𑁆𑀧𑀻𑀢𑀺𑀓𑀸. 𑀤𑀲𑀸𑀬𑀢𑀦𑀸 𑀦 𑀧𑀻𑀢𑀺𑀲𑀳𑀕𑀢𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀧𑀻𑀢𑀺𑀲𑀳𑀕𑀢𑀸, 𑀲𑀺𑀬𑀸 𑀦 𑀧𑀻𑀢𑀺𑀲𑀳𑀕𑀢𑀸. 𑀤𑀲𑀸𑀬𑀢𑀦𑀸 𑀦 𑀲𑀼𑀔𑀲𑀳𑀕𑀢𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀲𑀼𑀔𑀲𑀳𑀕𑀢𑀸, 𑀲𑀺𑀬𑀸 𑀦 𑀲𑀼𑀔𑀲𑀳𑀕𑀢𑀸. 𑀤𑀲𑀸𑀬𑀢𑀦𑀸 𑀦 𑀉𑀧𑁂𑀓𑁆𑀔𑀸𑀲𑀳𑀕𑀢𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀸, 𑀲𑀺𑀬𑀸 𑀦 𑀉𑀧𑁂𑀓𑁆𑀔𑀸𑀲𑀳𑀕𑀢𑀸.

𑀤𑀲𑀸𑀬𑀢𑀦𑀸 𑀓𑀸𑀫𑀸𑀯𑀘𑀭𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀓𑀸𑀫𑀸𑀯𑀘𑀭𑀸, 𑀲𑀺𑀬𑀸 𑀦 𑀓𑀸𑀫𑀸𑀯𑀘𑀭𑀸. 𑀤𑀲𑀸𑀬𑀢𑀦𑀸 𑀦 𑀭𑀽𑀧𑀸𑀯𑀘𑀭𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀭𑀽𑀧𑀸𑀯𑀘𑀭𑀸, 𑀲𑀺𑀬𑀸 𑀦 𑀭𑀽𑀧𑀸𑀯𑀘𑀭𑀸. 𑀤𑀲𑀸𑀬𑀢𑀦𑀸 𑀦 𑀅𑀭𑀽𑀧𑀸𑀯𑀘𑀭𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀅𑀭𑀽𑀧𑀸𑀯𑀘𑀭𑀸, 𑀲𑀺𑀬𑀸 𑀦 𑀅𑀭𑀽𑀧𑀸𑀯𑀘𑀭𑀸. 𑀤𑀲𑀸𑀬𑀢𑀦𑀸 𑀧𑀭𑀺𑀬𑀸𑀧𑀦𑁆𑀦𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀧𑀭𑀺𑀬𑀸𑀧𑀦𑁆𑀦𑀸, 𑀲𑀺𑀬𑀸 𑀅𑀧𑀭𑀺𑀬𑀸𑀧𑀦𑁆𑀦𑀸. 𑀤𑀲𑀸𑀬𑀢𑀦𑀸 𑀅𑀦𑀺𑀬𑁆𑀬𑀸𑀦𑀺𑀓𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀦𑀺𑀬𑁆𑀬𑀸𑀦𑀺𑀓𑀸, 𑀲𑀺𑀬𑀸 𑀅𑀦𑀺𑀬𑁆𑀬𑀸𑀦𑀺𑀓𑀸. 𑀤𑀲𑀸𑀬𑀢𑀦𑀸 𑀅𑀦𑀺𑀬𑀢𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀦𑀺𑀬𑀢𑀸, 𑀲𑀺𑀬𑀸 𑀅𑀦𑀺𑀬𑀢𑀸. 𑀤𑀲𑀸𑀬𑀢𑀦𑀸 𑀲𑀉𑀢𑁆𑀢𑀭𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀲𑀉𑀢𑁆𑀢𑀭𑀸, 𑀲𑀺𑀬𑀸 𑀅𑀦𑀼𑀢𑁆𑀢𑀭𑀸. 𑀤𑀲𑀸𑀬𑀢𑀦𑀸 𑀅𑀭𑀡𑀸. 𑀤𑁆𑀯𑀸𑀬𑀢𑀦𑀸 𑀲𑀺𑀬𑀸 𑀲𑀭𑀡𑀸, 𑀲𑀺𑀬𑀸 𑀅𑀭𑀡𑀸𑀢𑀺.

𑀧𑀜𑁆𑀳𑀸𑀧𑀼𑀘𑁆𑀙𑀓𑀁.

𑀆𑀬𑀢𑀦𑀯𑀺𑀪𑀗𑁆𑀕𑁄 𑀦𑀺𑀝𑁆𑀞𑀺𑀢𑁄.