𑁧. 𑀓𑀸𑀫𑀥𑀸𑀢𑀼

𑁯𑁯𑁯. 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀓𑀢𑀺 𑀓𑀸𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑀸, 𑀓𑀢𑀺 𑀦 𑀓𑀸𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑀸…𑀧𑁂… 𑀲𑀢𑁆𑀢𑀦𑁆𑀦𑀁 𑀘𑀺𑀢𑁆𑀢𑀸𑀦𑀁 𑀓𑀢𑀺 𑀓𑀸𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑀸, 𑀓𑀢𑀺 𑀦 𑀓𑀸𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑀸?

𑁧𑁦𑁦𑁦. 𑀭𑀽𑀧𑀓𑁆𑀔𑀦𑁆𑀥𑁄 𑀓𑀸𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑁄; 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀲𑀺𑀬𑀸 𑀓𑀸𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑀸, 𑀲𑀺𑀬𑀸 𑀦 𑀓𑀸𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑀸.

𑀤𑀲𑀸𑀬𑀢𑀦𑀸 𑀓𑀸𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑀸; 𑀤𑁆𑀯𑁂 𑀆𑀬𑀢𑀦𑀸 𑀲𑀺𑀬𑀸 𑀓𑀸𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑀸, 𑀲𑀺𑀬𑀸 𑀦 𑀓𑀸𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑀸.

𑀲𑁄𑀴𑀲 𑀥𑀸𑀢𑀼𑀬𑁄 𑀓𑀸𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑀸; 𑀤𑁆𑀯𑁂 𑀥𑀸𑀢𑀼𑀬𑁄 𑀲𑀺𑀬𑀸 𑀓𑀸𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑀸, 𑀲𑀺𑀬𑀸 𑀦 𑀓𑀸𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑀸.

𑀲𑀫𑀼𑀤𑀬𑀲𑀘𑁆𑀘𑀁 𑀓𑀸𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑀁; 𑀤𑁆𑀯𑁂 𑀲𑀘𑁆𑀘𑀸 𑀦 𑀓𑀸𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑀸; 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀓𑀸𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑀁, 𑀲𑀺𑀬𑀸 𑀦 𑀓𑀸𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑀁.

𑀤𑀲𑀺𑀦𑁆𑀤𑁆𑀭𑀺𑀬𑀸 𑀓𑀸𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑀸; 𑀢𑀻𑀡𑀺𑀦𑁆𑀤𑁆𑀭𑀺𑀬𑀸 𑀦 𑀓𑀸𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑀸; 𑀦𑀯𑀺𑀦𑁆𑀤𑁆𑀭𑀺𑀬𑀸 𑀲𑀺𑀬𑀸 𑀓𑀸𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑀸, 𑀲𑀺𑀬𑀸 𑀦 𑀓𑀸𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑀸.

𑀢𑀬𑁄 𑀅𑀓𑀼𑀲𑀮𑀳𑁂𑀢𑀽 𑀓𑀸𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑀸; 𑀙 𑀳𑁂𑀢𑀽 𑀲𑀺𑀬𑀸 𑀓𑀸𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑀸, 𑀲𑀺𑀬𑀸 𑀦 𑀓𑀸𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑀸.

𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀓𑀸𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑁄; 𑀢𑀬𑁄 𑀆𑀳𑀸𑀭𑀸 𑀲𑀺𑀬𑀸 𑀓𑀸𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑀸, 𑀲𑀺𑀬𑀸 𑀦 𑀓𑀸𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑀸.

𑀙 𑀨𑀲𑁆𑀲𑀸 𑀓𑀸𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑀸; 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀫𑁆𑀨𑀲𑁆𑀲𑁄 𑀲𑀺𑀬𑀸 𑀓𑀸𑀫𑀥𑀸𑀢𑀼 𑀧𑀭𑀺𑀬𑀸𑀧𑀦𑁆𑀦𑁄, 𑀲𑀺𑀬𑀸 𑀦 𑀓𑀸𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑁄.

𑀙 𑀯𑁂𑀤𑀦𑀸…𑀧𑁂… 𑀙 𑀲𑀜𑁆𑀜𑀸… 𑀙 𑀘𑁂𑀢𑀦𑀸… 𑀙 𑀘𑀺𑀢𑁆𑀢𑀸 𑀓𑀸𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑀸; 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀲𑀺𑀬𑀸 𑀓𑀸𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑀸, 𑀲𑀺𑀬𑀸 𑀦 𑀓𑀸𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑀸.