𑁧. 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀯𑀸𑀭𑁄

𑁯𑁭𑁮. 𑀓𑀢𑀺 𑀔𑀦𑁆𑀥𑀸, 𑀓𑀢𑀺 𑀆𑀬𑀢𑀦𑀸𑀦𑀺, 𑀓𑀢𑀺 𑀥𑀸𑀢𑀼𑀬𑁄, 𑀓𑀢𑀺 𑀲𑀘𑁆𑀘𑀸𑀦𑀺, 𑀓𑀢𑀺 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀓𑀢𑀺 𑀳𑁂𑀢𑀽, 𑀓𑀢𑀺 𑀆𑀳𑀸𑀭𑀸, 𑀓𑀢𑀺 𑀨𑀲𑁆𑀲𑀸, 𑀓𑀢𑀺 𑀯𑁂𑀤𑀦𑀸, 𑀓𑀢𑀺 𑀲𑀜𑁆𑀜𑀸, 𑀓𑀢𑀺 𑀘𑁂𑀢𑀦𑀸, 𑀓𑀢𑀺 𑀘𑀺𑀢𑁆𑀢𑀸𑀦𑀺?

𑀧𑀜𑁆𑀘𑀓𑁆𑀔𑀦𑁆𑀥𑀸, 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺, 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄, 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺, 𑀩𑀸𑀯𑀻𑀲𑀢𑀺𑀦𑁆𑀤𑁆𑀭𑀺𑀬𑀸𑀦𑀺, 𑀦𑀯 𑀳𑁂𑀢𑀽, 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸, 𑀲𑀢𑁆𑀢 𑀨𑀲𑁆𑀲𑀸, 𑀲𑀢𑁆𑀢 𑀯𑁂𑀤𑀦𑀸, 𑀲𑀢𑁆𑀢 𑀲𑀜𑁆𑀜𑀸, 𑀲𑀢𑁆𑀢 𑀘𑁂𑀢𑀦𑀸, 𑀲𑀢𑁆𑀢 𑀘𑀺𑀢𑁆𑀢𑀸𑀦𑀺.

𑁯𑁭𑁯. 𑀢𑀢𑁆𑀣 𑀓𑀢𑀫𑁂 𑀧𑀜𑁆𑀘𑀓𑁆𑀔𑀦𑁆𑀥𑀸? 𑀭𑀽𑀧𑀓𑁆𑀔𑀦𑁆𑀥𑁄, 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄, 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑁋 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 ‘‘𑀧𑀜𑁆𑀘𑀓𑁆𑀔𑀦𑁆𑀥𑀸’’.

𑁯𑁮𑁦. 𑀢𑀢𑁆𑀣 𑀓𑀢𑀫𑀸𑀦𑀺 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺? 𑀘𑀓𑁆𑀔𑀸𑀬𑀢𑀦𑀁, 𑀭𑀽𑀧𑀸𑀬𑀢𑀦𑀁, 𑀲𑁄𑀢𑀸𑀬𑀢𑀦𑀁, 𑀲𑀤𑁆𑀤𑀸𑀬𑀢𑀦𑀁, 𑀖𑀸𑀦𑀸𑀬𑀢𑀦𑀁, 𑀕𑀦𑁆𑀥𑀸𑀬𑀢𑀦𑀁, 𑀚𑀺𑀯𑁆𑀳𑀸𑀬𑀢𑀦𑀁, 𑀭𑀲𑀸𑀬𑀢𑀦𑀁, 𑀓𑀸𑀬𑀸𑀬𑀢𑀦𑀁, 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁, 𑀫𑀦𑀸𑀬𑀢𑀦𑀁, 𑀥𑀫𑁆𑀫𑀸𑀬𑀢𑀦𑀁 𑁋 𑀇𑀫𑀸𑀦𑀺 𑀯𑀼𑀘𑁆𑀘𑀦𑁆𑀢𑀺 ‘‘𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺’’.

𑁯𑁮𑁧. 𑀢𑀢𑁆𑀣 𑀓𑀢𑀫𑀸 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄? 𑀘𑀓𑁆𑀔𑀼𑀥𑀸𑀢𑀼, 𑀭𑀽𑀧𑀥𑀸𑀢𑀼, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼, 𑀲𑁄𑀢𑀥𑀸𑀢𑀼, 𑀲𑀤𑁆𑀤𑀥𑀸𑀢𑀼, 𑀲𑁄𑀢𑀯𑀺𑀜𑁆𑀜𑀸𑀡𑀥𑀸𑀢𑀼, 𑀖𑀸𑀦𑀥𑀸𑀢𑀼, 𑀕𑀦𑁆𑀥𑀥𑀸𑀢𑀼, 𑀖𑀸𑀦𑀯𑀺𑀜𑁆𑀜𑀸𑀡𑀥𑀸𑀢𑀼, 𑀚𑀺𑀯𑁆𑀳𑀸𑀥𑀸𑀢𑀼, 𑀭𑀲𑀥𑀸𑀢𑀼, 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀥𑀸𑀢𑀼, 𑀓𑀸𑀬𑀥𑀸𑀢𑀼, 𑀨𑁄𑀝𑁆𑀞𑀩𑁆𑀩𑀥𑀸𑀢𑀼, 𑀓𑀸𑀬𑀯𑀺𑀜𑁆𑀜𑀸𑀡𑀥𑀸𑀢𑀼, 𑀫𑀦𑁄𑀥𑀸𑀢𑀼, 𑀥𑀫𑁆𑀫𑀥𑀸𑀢𑀼, 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑁋 𑀇𑀫𑀸 𑀯𑀼𑀘𑁆𑀘𑀦𑁆𑀢𑀺 ‘‘𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄’’.

𑁯𑁮𑁨. 𑀢𑀢𑁆𑀣 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺? 𑀤𑀼𑀓𑁆𑀔𑀲𑀘𑁆𑀘𑀁, 𑀲𑀫𑀼𑀤𑀬𑀲𑀘𑁆𑀘𑀁, 𑀦𑀺𑀭𑁄𑀥𑀲𑀘𑁆𑀘𑀁, 𑀫𑀕𑁆𑀕𑀲𑀘𑁆𑀘𑀁 𑁋 𑀇𑀫𑀸𑀦𑀺 𑀯𑀼𑀘𑁆𑀘𑀦𑁆𑀢𑀺 ‘‘𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺’’.

𑁯𑁮𑁩. 𑀢𑀢𑁆𑀣 𑀓𑀢𑀫𑀸𑀦𑀺 𑀩𑀸𑀯𑀻𑀲𑀢𑀺𑀦𑁆𑀤𑁆𑀭𑀺𑀬𑀸𑀦𑀺? 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀲𑁄𑀢𑀺𑀦𑁆𑀤𑁆𑀭𑀺𑀬𑀁, 𑀖𑀸𑀦𑀺𑀦𑁆𑀤𑁆𑀭𑀺𑀬𑀁, 𑀚𑀺𑀯𑁆𑀳𑀺𑀦𑁆𑀤𑁆𑀭𑀺𑀬𑀁, 𑀓𑀸𑀬𑀺𑀦𑁆𑀤𑁆𑀭𑀺𑀬𑀁, 𑀫𑀦𑀺𑀦𑁆𑀤𑁆𑀭𑀺𑀬𑀁, 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁, 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁, 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁, 𑀲𑀼𑀔𑀺𑀦𑁆𑀤𑁆𑀭𑀺𑀬𑀁, 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁, 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁, 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁, 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀁, 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁, 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁, 𑀲𑀢𑀺𑀦𑁆𑀤𑁆𑀭𑀺𑀬𑀁, 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁, 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁, 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁, 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁, 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁 𑁋 𑀇𑀫𑀸𑀦𑀺 𑀯𑀼𑀘𑁆𑀘𑀦𑁆𑀢𑀺 ‘‘𑀩𑀸𑀯𑀻𑀲𑀢𑀺𑀦𑁆𑀤𑁆𑀭𑀺𑀬𑀸𑀦𑀺’’.

𑁯𑁮𑁪. 𑀢𑀢𑁆𑀣 𑀓𑀢𑀫𑁂 𑀦𑀯 𑀳𑁂𑀢𑀽? 𑀢𑀬𑁄 𑀓𑀼𑀲𑀮𑀳𑁂𑀢𑀽, 𑀢𑀬𑁄 𑀅𑀓𑀼𑀲𑀮𑀳𑁂𑀢𑀽, 𑀢𑀬𑁄 𑀅𑀩𑁆𑀬𑀸𑀓𑀢𑀳𑁂𑀢𑀽.

𑀢𑀢𑁆𑀣 𑀓𑀢𑀫𑁂 𑀢𑀬𑁄 𑀓𑀼𑀲𑀮𑀳𑁂𑀢𑀽? 𑀅𑀮𑁄𑀪𑁄 𑀓𑀼𑀲𑀮𑀳𑁂𑀢𑀼, 𑀅𑀤𑁄𑀲𑁄 𑀓𑀼𑀲𑀮𑀳𑁂𑀢𑀼, 𑀅𑀫𑁄𑀳𑁄 𑀓𑀼𑀲𑀮𑀳𑁂𑀢𑀼 𑁋 𑀇𑀫𑁂 𑀢𑀬𑁄 𑀓𑀼𑀲𑀮𑀳𑁂𑀢𑀽.

𑀢𑀢𑁆𑀣 𑀓𑀢𑀫𑁂 𑀢𑀬𑁄 𑀅𑀓𑀼𑀲𑀮𑀳𑁂𑀢𑀽? 𑀮𑁄𑀪𑁄 𑀅𑀓𑀼𑀲𑀮𑀳𑁂𑀢𑀼, 𑀤𑁄𑀲𑁄 𑀅𑀓𑀼𑀲𑀮𑀳𑁂𑀢𑀼, 𑀫𑁄𑀳𑁄 𑀅𑀓𑀼𑀲𑀮𑀳𑁂𑀢𑀼 𑁋 𑀇𑀫𑁂 𑀢𑀬𑁄 𑀅𑀓𑀼𑀲𑀮𑀳𑁂𑀢𑀽.

𑀢𑀢𑁆𑀣 𑀓𑀢𑀫𑁂 𑀢𑀬𑁄 𑀅𑀩𑁆𑀬𑀸𑀓𑀢𑀳𑁂𑀢𑀽? 𑀓𑀼𑀲𑀮𑀸𑀦𑀁 𑀯𑀸 𑀥𑀫𑁆𑀫𑀸𑀦𑀁 𑀯𑀺𑀧𑀸𑀓𑀢𑁄 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑁂𑀲𑀼 𑀯𑀸 𑀥𑀫𑁆𑀫𑁂𑀲𑀼 𑀅𑀮𑁄𑀪𑁄, 𑀅𑀤𑁄𑀲𑁄, 𑀅𑀫𑁄𑀳𑁄 𑁋 𑀇𑀫𑁂 𑀢𑀬𑁄 𑀅𑀩𑁆𑀬𑀸𑀓𑀢𑀳𑁂𑀢𑀽. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 ‘‘𑀦𑀯 𑀳𑁂𑀢𑀽’’.

𑁯𑁮𑁫. 𑀢𑀢𑁆𑀣 𑀓𑀢𑀫𑁂 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸? 𑀓𑀩𑀴𑀻𑀓𑀸𑀭𑀸𑀳𑀸𑀭𑁄 [𑀓𑀩𑀴𑀺𑀁𑀓𑀸𑀭𑁄 𑀆𑀳𑀸𑀭𑁄 (𑀲𑀻. 𑀲𑁆𑀬𑀸.)], 𑀨𑀲𑁆𑀲𑀸𑀳𑀸𑀭𑁄, 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑁄, 𑀯𑀺𑀜𑁆𑀜𑀸𑀡𑀸𑀳𑀸𑀭𑁄 𑁋 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 ‘‘𑀘𑀢𑁆𑀢𑀸𑀭𑁄 𑀆𑀳𑀸𑀭𑀸’’.

𑁯𑁮𑁬. 𑀢𑀢𑁆𑀣 𑀓𑀢𑀫𑁂 𑀲𑀢𑁆𑀢 𑀨𑀲𑁆𑀲𑀸? 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄, 𑀲𑁄𑀢𑀲𑀫𑁆𑀨𑀲𑁆𑀲𑁄, 𑀖𑀸𑀦𑀲𑀫𑁆𑀨𑀲𑁆𑀲𑁄, 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑁄, 𑀓𑀸𑀬𑀲𑀫𑁆𑀨𑀲𑁆𑀲𑁄, 𑀫𑀦𑁄𑀥𑀸𑀢𑀼𑀲𑀫𑁆𑀨𑀲𑁆𑀲𑁄, 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀫𑁆𑀨𑀲𑁆𑀲𑁄 𑁋 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 ‘‘𑀲𑀢𑁆𑀢 𑀨𑀲𑁆𑀲𑀸’’.

𑁯𑁮𑁭. 𑀢𑀢𑁆𑀣 𑀓𑀢𑀫𑀸 𑀲𑀢𑁆𑀢 𑀯𑁂𑀤𑀦𑀸? 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸, 𑀲𑁄𑀢𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸, 𑀖𑀸𑀦𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸, 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸, 𑀓𑀸𑀬𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸, 𑀫𑀦𑁄𑀥𑀸𑀢𑀼𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸, 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑁋 𑀇𑀫𑀸 𑀯𑀼𑀘𑁆𑀘𑀦𑁆𑀢𑀺 ‘‘𑀲𑀢𑁆𑀢 𑀯𑁂𑀤𑀦𑀸’’.

𑁯𑁮𑁮. 𑀢𑀢𑁆𑀣 𑀓𑀢𑀫𑀸 𑀲𑀢𑁆𑀢 𑀲𑀜𑁆𑀜𑀸? 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀲𑀜𑁆𑀜𑀸, 𑀲𑁄𑀢𑀲𑀫𑁆𑀨𑀲𑁆𑀲𑀚𑀸 𑀲𑀜𑁆𑀜𑀸, 𑀖𑀸𑀦𑀲𑀫𑁆𑀨𑀲𑁆𑀲𑀚𑀸 𑀲𑀜𑁆𑀜𑀸, 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑀚𑀸 𑀲𑀜𑁆𑀜𑀸, 𑀓𑀸𑀬𑀲𑀫𑁆𑀨𑀲𑁆𑀲𑀚𑀸 𑀲𑀜𑁆𑀜𑀸, 𑀫𑀦𑁄𑀥𑀸𑀢𑀼𑀲𑀫𑁆𑀨𑀲𑁆𑀲𑀚𑀸 𑀲𑀜𑁆𑀜𑀸, 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀫𑁆𑀨𑀲𑁆𑀲𑀚𑀸 𑀲𑀜𑁆𑀜𑀸 𑁋 𑀇𑀫𑀸 𑀯𑀼𑀘𑁆𑀘𑀦𑁆𑀢𑀺 ‘‘𑀲𑀢𑁆𑀢 𑀲𑀜𑁆𑀜𑀸’’.

𑁯𑁮𑁯. 𑀢𑀢𑁆𑀣 𑀓𑀢𑀫𑀸 𑀲𑀢𑁆𑀢 𑀘𑁂𑀢𑀦𑀸? 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀘𑁂𑀢𑀦𑀸, 𑀲𑁄𑀢𑀲𑀫𑁆𑀨𑀲𑁆𑀲𑀚𑀸 𑀘𑁂𑀢𑀦𑀸, 𑀖𑀸𑀦𑀲𑀫𑁆𑀨𑀲𑁆𑀲𑀚𑀸 𑀘𑁂𑀢𑀦𑀸, 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑀚𑀸 𑀘𑁂𑀢𑀦𑀸, 𑀓𑀸𑀬𑀲𑀫𑁆𑀨𑀲𑁆𑀲𑀚𑀸 𑀘𑁂𑀢𑀦𑀸, 𑀫𑀦𑁄𑀥𑀸𑀢𑀼𑀲𑀫𑁆𑀨𑀲𑁆𑀲𑀚𑀸 𑀘𑁂𑀢𑀦𑀸, 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀫𑁆𑀨𑀲𑁆𑀲𑀚𑀸 𑀘𑁂𑀢𑀦𑀸 𑁋 𑀇𑀫𑀸 𑀯𑀼𑀘𑁆𑀘𑀦𑁆𑀢𑀺 ‘‘𑀲𑀢𑁆𑀢 𑀘𑁂𑀢𑀦𑀸’’.

𑁯𑁯𑁦. 𑀢𑀢𑁆𑀣 𑀓𑀢𑀫𑀸𑀦𑀺 𑀲𑀢𑁆𑀢 𑀘𑀺𑀢𑁆𑀢𑀸𑀦𑀺? 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀲𑁄𑀢𑀯𑀺𑀜𑁆𑀜𑀸𑀡𑀁, 𑀖𑀸𑀦𑀯𑀺𑀜𑁆𑀜𑀸𑀡𑀁, 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁, 𑀓𑀸𑀬𑀯𑀺𑀜𑁆𑀜𑀸𑀡𑀁, 𑀫𑀦𑁄𑀥𑀸𑀢𑀼, 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑁋 𑀇𑀫𑀸𑀦𑀺 𑀯𑀼𑀘𑁆𑀘𑀦𑁆𑀢𑀺 ‘‘𑀲𑀢𑁆𑀢 𑀘𑀺𑀢𑁆𑀢𑀸𑀦𑀺’’.