𑁧. 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀁

𑁧. 𑀲𑀗𑁆𑀕𑀳𑀯𑀸𑀭𑁄

𑁭𑁧𑁮. 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸 𑁋 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸, 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸, 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸, 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸 [𑀧𑀝𑀺𑀪𑀸𑀡𑀧𑀝𑀺𑀲𑀫𑁆𑀪𑀺𑀤𑀸 (𑀲𑁆𑀬𑀸.) 𑀏𑀯𑀫𑀼𑀧𑀭𑀺𑀧𑀺]. 𑀅𑀢𑁆𑀣𑁂 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸, 𑀥𑀫𑁆𑀫𑁂 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸, 𑀢𑀢𑁆𑀭 𑀥𑀫𑁆𑀫𑀦𑀺𑀭𑀼𑀢𑁆𑀢𑀸𑀪𑀺𑀮𑀸𑀧𑁂 𑀜𑀸𑀡𑀁 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸, 𑀜𑀸𑀡𑁂𑀲𑀼 𑀜𑀸𑀡𑀁 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸. 𑀅𑀬𑀁 𑀲𑀗𑁆𑀕𑀳𑀯𑀸𑀭𑁄.

𑁨. 𑀲𑀘𑁆𑀘𑀯𑀸𑀭𑁄

𑁭𑁧𑁯. 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸 𑁋 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸, 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸, 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸, 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸. 𑀤𑀼𑀓𑁆𑀔𑁂 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸, 𑀤𑀼𑀓𑁆𑀔𑀲𑀫𑀼𑀤𑀬𑁂 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸, 𑀤𑀼𑀓𑁆𑀔𑀦𑀺𑀭𑁄𑀥𑁂 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸, 𑀢𑀢𑁆𑀭 𑀥𑀫𑁆𑀫𑀦𑀺𑀭𑀼𑀢𑁆𑀢𑀸𑀪𑀺𑀮𑀸𑀧𑁂 𑀜𑀸𑀡𑀁 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸, 𑀜𑀸𑀡𑁂𑀲𑀼 𑀜𑀸𑀡𑀁 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸. 𑀅𑀬𑀁 𑀲𑀘𑁆𑀘𑀯𑀸𑀭𑁄.

𑁩. 𑀳𑁂𑀢𑀼𑀯𑀸𑀭𑁄

𑁭𑁨𑁦. 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸 𑁋 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸, 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸, 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸. 𑀳𑁂𑀢𑀼𑀫𑁆𑀳𑀺 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸, 𑀳𑁂𑀢𑀼𑀨𑀮𑁂 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸, 𑀢𑀢𑁆𑀭 𑀥𑀫𑁆𑀫𑀦𑀺𑀭𑀼𑀢𑁆𑀢𑀸𑀪𑀺𑀮𑀸𑀧𑁂 𑀜𑀸𑀡𑀁 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸, 𑀜𑀸𑀡𑁂𑀲𑀼 𑀜𑀸𑀡𑀁 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸. 𑀅𑀬𑀁 𑀳𑁂𑀢𑀼𑀯𑀸𑀭𑁄.

𑁪. 𑀥𑀫𑁆𑀫𑀯𑀸𑀭𑁄

𑁭𑁨𑁧. 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸 𑁋 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸, 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸, 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸, 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸. 𑀬𑁂 𑀥𑀫𑁆𑀫𑀸 𑀚𑀸𑀢𑀸 𑀪𑀽𑀢𑀸 𑀲𑀜𑁆𑀚𑀸𑀢𑀸 𑀦𑀺𑀩𑁆𑀩𑀢𑁆𑀢𑀸 𑀅𑀪𑀺𑀦𑀺𑀩𑁆𑀩𑀢𑁆𑀢𑀸 𑀧𑀸𑀢𑀼𑀪𑀽𑀢𑀸, 𑀇𑀫𑁂𑀲𑀼 𑀥𑀫𑁆𑀫𑁂𑀲𑀼 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸; 𑀬𑀫𑁆𑀳𑀸 𑀥𑀫𑁆𑀫𑀸 𑀢𑁂 𑀥𑀫𑁆𑀫𑀸 𑀚𑀸𑀢𑀸 𑀪𑀽𑀢𑀸 𑀲𑀜𑁆𑀚𑀸𑀢𑀸 𑀦𑀺𑀩𑁆𑀩𑀢𑁆𑀢𑀸 𑀅𑀪𑀺𑀦𑀺𑀩𑁆𑀩𑀢𑁆𑀢𑀸 𑀧𑀸𑀢𑀼𑀪𑀽𑀢𑀸, 𑀢𑁂𑀲𑀼 𑀥𑀫𑁆𑀫𑁂𑀲𑀼 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸; 𑀢𑀢𑁆𑀭 𑀥𑀫𑁆𑀫𑀦𑀺𑀭𑀼𑀢𑁆𑀢𑀸𑀪𑀺𑀮𑀸𑀧𑁂 𑀜𑀸𑀡𑀁 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸; 𑀜𑀸𑀡𑁂𑀲𑀼 𑀜𑀸𑀡𑀁 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸. 𑀅𑀬𑀁 𑀥𑀫𑁆𑀫𑀯𑀸𑀭𑁄.

𑁫. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀸𑀭𑁄

𑁭𑁨𑁨. 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸 𑁋 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸, 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸, 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸, 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸. 𑀚𑀭𑀸𑀫𑀭𑀡𑁂 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸, 𑀚𑀭𑀸𑀫𑀭𑀡𑀲𑀫𑀼𑀤𑀬𑁂 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸, 𑀚𑀭𑀸𑀫𑀭𑀡𑀦𑀺𑀭𑁄𑀥𑁂 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸, 𑀚𑀭𑀸𑀫𑀭𑀡𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸, 𑀢𑀢𑁆𑀭 𑀥𑀫𑁆𑀫𑀦𑀺𑀭𑀼𑀢𑁆𑀢𑀸𑀪𑀺𑀮𑀸𑀧𑁂 𑀜𑀸𑀡𑀁 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸, 𑀜𑀸𑀡𑁂𑀲𑀼 𑀜𑀸𑀡𑀁 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸.

𑁭𑁨𑁩. 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸 𑁋 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸, 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸, 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸, 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸. 𑀚𑀸𑀢𑀺𑀬𑀸 𑀜𑀸𑀡𑀁…𑀧𑁂… 𑀪𑀯𑁂 𑀜𑀸𑀡𑀁…𑀧𑁂… 𑀉𑀧𑀸𑀤𑀸𑀦𑁂 𑀜𑀸𑀡𑀁…𑀧𑁂… 𑀢𑀡𑁆𑀳𑀸𑀬 𑀜𑀸𑀡𑀁…𑀧𑁂… 𑀯𑁂𑀤𑀦𑀸𑀬 𑀜𑀸𑀡𑀁…𑀧𑁂… 𑀨𑀲𑁆𑀲𑁂 𑀜𑀸𑀡𑀁…𑀧𑁂… 𑀲𑀴𑀸𑀬𑀢𑀦𑁂 𑀜𑀸𑀡𑀁…𑀧𑁂… 𑀦𑀸𑀫𑀭𑀽𑀧𑁂 𑀜𑀸𑀡𑀁…𑀧𑁂… 𑀯𑀺𑀜𑁆𑀜𑀸𑀡𑁂 𑀜𑀸𑀡𑀁…𑀧𑁂… 𑀲𑀗𑁆𑀔𑀸𑀭𑁂𑀲𑀼 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸, 𑀲𑀗𑁆𑀔𑀸𑀭𑀲𑀫𑀼𑀤𑀬𑁂 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸, 𑀲𑀗𑁆𑀔𑀸𑀭𑀦𑀺𑀭𑁄𑀥𑁂 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸, 𑀲𑀗𑁆𑀔𑀸𑀭𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸, 𑀢𑀢𑁆𑀭 𑀥𑀫𑁆𑀫𑀦𑀺𑀭𑀼𑀢𑁆𑀢𑀸𑀪𑀺𑀮𑀸𑀧𑁂 𑀜𑀸𑀡𑀁 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸, 𑀜𑀸𑀡𑁂𑀲𑀼 𑀜𑀸𑀡𑀁 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸. 𑀅𑀬𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀸𑀭𑁄.

𑁬. 𑀧𑀭𑀺𑀬𑀢𑁆𑀢𑀺𑀯𑀸𑀭𑁄

𑁭𑁨𑁪. 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸 𑁋 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸, 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸, 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸, 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸.

𑀢𑀢𑁆𑀣 𑀓𑀢𑀫𑀸 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸? 𑀇𑀥 𑀪𑀺𑀓𑁆𑀔𑀼 𑀥𑀫𑁆𑀫𑀁 𑀚𑀸𑀦𑀸𑀢𑀺 𑁋 𑀲𑀼𑀢𑁆𑀢𑀁 𑀕𑁂𑀬𑁆𑀬𑀁 𑀯𑁂𑀬𑁆𑀬𑀸𑀓𑀭𑀡𑀁 𑀕𑀸𑀣𑀁 𑀉𑀤𑀸𑀦𑀁 𑀇𑀢𑀺𑀯𑀼𑀢𑁆𑀢𑀓𑀁 𑀚𑀸𑀢𑀓𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀯𑁂𑀤𑀮𑁆𑀮𑀁. 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸’’. 𑀲𑁄 𑀢𑀲𑁆𑀲 𑀢𑀲𑁆𑀲𑁂𑀯 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀚𑀸𑀦𑀸𑀢𑀺 𑁋 ‘‘𑀅𑀬𑀁 𑀇𑀫𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑁄, 𑀅𑀬𑀁 𑀇𑀫𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑁄’’𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸’’. 𑀢𑀢𑁆𑀭 𑀥𑀫𑁆𑀫𑀦𑀺𑀭𑀼𑀢𑁆𑀢𑀸𑀪𑀺𑀮𑀸𑀧𑁂 𑀜𑀸𑀡𑀁 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸. 𑀜𑀸𑀡𑁂𑀲𑀼 𑀜𑀸𑀡𑀁 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸. 𑀅𑀬𑀁 𑀧𑀭𑀺𑀬𑀢𑁆𑀢𑀺𑀯𑀸𑀭𑁄.

𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀁.