𑁧. 𑀢𑀺𑀓𑀁

𑁧𑁫𑁨. 𑀭𑀽𑀧𑀓𑁆𑀔𑀦𑁆𑀥𑁄 𑀅𑀩𑁆𑀬𑀸𑀓𑀢𑁄. 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀲𑀺𑀬𑀸 𑀓𑀼𑀲𑀮𑀸, 𑀲𑀺𑀬𑀸 𑀅𑀓𑀼𑀲𑀮𑀸, 𑀲𑀺𑀬𑀸 𑀅𑀩𑁆𑀬𑀸𑀓𑀢𑀸. 𑀤𑁆𑀯𑁂 𑀔𑀦𑁆𑀥𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺𑀧𑀺, ‘‘𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺𑀧𑀺, ‘‘𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺𑀧𑀺. 𑀢𑀬𑁄 𑀔𑀦𑁆𑀥𑀸 𑀲𑀺𑀬𑀸 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸, 𑀲𑀺𑀬𑀸 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸, 𑀲𑀺𑀬𑀸 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸. 𑀭𑀽𑀧𑀓𑁆𑀔𑀦𑁆𑀥𑁄 𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑁄. 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀲𑀺𑀬𑀸 𑀯𑀺𑀧𑀸𑀓𑀸, 𑀲𑀺𑀬𑀸 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸, 𑀲𑀺𑀬𑀸 𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸. 𑀭𑀽𑀧𑀓𑁆𑀔𑀦𑁆𑀥𑁄 𑀲𑀺𑀬𑀸 𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑁄, 𑀲𑀺𑀬𑀸 𑀅𑀦𑀼𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑁄. 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀲𑀺𑀬𑀸 𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀸, 𑀲𑀺𑀬𑀸 𑀅𑀦𑀼𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀸, 𑀲𑀺𑀬𑀸 𑀅𑀦𑀼𑀧𑀸𑀤𑀺𑀦𑁆𑀦𑀅𑀦𑀼𑀧𑀸𑀤𑀸𑀦𑀺𑀬𑀸.

𑀭𑀽𑀧𑀓𑁆𑀔𑀦𑁆𑀥𑁄 𑀅𑀲𑀁𑀓𑀺𑀮𑀺𑀝𑁆𑀞𑀲𑀁𑀓𑀺𑀮𑁂𑀲𑀺𑀓𑁄. 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀲𑀺𑀬𑀸 𑀲𑀁𑀓𑀺𑀮𑀺𑀝𑁆𑀞𑀲𑀁𑀓𑀺𑀮𑁂𑀲𑀺𑀓𑀸, 𑀲𑀺𑀬𑀸 𑀅𑀲𑀁𑀓𑀺𑀮𑀺𑀝𑁆𑀞𑀲𑀁𑀓𑀺𑀮𑁂𑀲𑀺𑀓𑀸, 𑀲𑀺𑀬𑀸 𑀅𑀲𑀁𑀓𑀺𑀮𑀺𑀝𑁆𑀞𑀅𑀲𑀁𑀓𑀺𑀮𑁂𑀲𑀺𑀓𑀸. 𑀭𑀽𑀧𑀓𑁆𑀔𑀦𑁆𑀥𑁄 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑁄. 𑀢𑀬𑁄 𑀔𑀦𑁆𑀥𑀸 𑀲𑀺𑀬𑀸 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸, 𑀲𑀺𑀬𑀸 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀸, 𑀲𑀺𑀬𑀸 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸. 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀲𑀺𑀬𑀸 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑁄, 𑀲𑀺𑀬𑀸 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑁄, 𑀲𑀺𑀬𑀸 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑁄, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑁄 𑁋 ‘‘𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑁄’’𑀢𑀺𑀧𑀺, ‘‘𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑁄’’𑀢𑀺𑀧𑀺, ‘‘𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑁄’’𑀢𑀺𑀧𑀺. 𑀭𑀽𑀧𑀓𑁆𑀔𑀦𑁆𑀥𑁄 𑀦 𑀯𑀢𑁆𑀢𑀩𑁆𑀩𑁄 𑁋 ‘‘𑀧𑀻𑀢𑀺𑀲𑀳𑀕𑀢𑁄’’𑀢𑀺𑀧𑀺, ‘‘𑀲𑀼𑀔𑀲𑀳𑀕𑀢𑁄’’𑀢𑀺𑀧𑀺, ‘‘𑀉𑀧𑁂𑀓𑁆𑀔𑀸𑀲𑀳𑀕𑀢𑁄’’𑀢𑀺𑀧𑀺. 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀲𑀺𑀬𑀸 𑀧𑀻𑀢𑀺𑀲𑀳𑀕𑀢𑁄 𑀦 𑀲𑀼𑀔𑀲𑀳𑀕𑀢𑁄 𑀦 𑀉𑀧𑁂𑀓𑁆𑀔𑀸𑀲𑀳𑀕𑀢𑁄, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑁄 𑁋 ‘‘𑀧𑀻𑀢𑀺𑀲𑀳𑀕𑀢𑁄’’𑀢𑀺. 𑀢𑀬𑁄 𑀔𑀦𑁆𑀥𑀸 𑀲𑀺𑀬𑀸 𑀧𑀻𑀢𑀺𑀲𑀳𑀕𑀢𑀸, 𑀲𑀺𑀬𑀸 𑀲𑀼𑀔𑀲𑀳𑀕𑀢𑀸, 𑀲𑀺𑀬𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀸, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀧𑀻𑀢𑀺𑀲𑀳𑀕𑀢𑀸’’𑀢𑀺𑀧𑀺, ‘‘𑀲𑀼𑀔𑀲𑀳𑀕𑀢𑀸’’𑀢𑀺𑀧𑀺, ‘‘𑀉𑀧𑁂𑀓𑁆𑀔𑀸𑀲𑀳𑀕𑀢𑀸’’𑀢𑀺𑀧𑀺.

𑀭𑀽𑀧𑀓𑁆𑀔𑀦𑁆𑀥𑁄 𑀦𑁂𑀯 𑀤𑀲𑁆𑀲𑀦𑁂𑀦 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑁄. 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀲𑀺𑀬𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸, 𑀲𑀺𑀬𑀸 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸, 𑀲𑀺𑀬𑀸 𑀦𑁂𑀯 𑀤𑀲𑁆𑀲𑀦𑁂𑀦 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸. 𑀭𑀽𑀧𑀓𑁆𑀔𑀦𑁆𑀥𑁄 𑀦𑁂𑀯 𑀤𑀲𑁆𑀲𑀦𑁂𑀦 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑁄. 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀲𑀺𑀬𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸, 𑀲𑀺𑀬𑀸 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸, 𑀲𑀺𑀬𑀸 𑀦𑁂𑀯 𑀤𑀲𑁆𑀲𑀦𑁂𑀦 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸. 𑀭𑀽𑀧𑀓𑁆𑀔𑀦𑁆𑀥𑁄 𑀦𑁂𑀯𑀸𑀘𑀬𑀕𑀸𑀫𑀺𑀦𑀸𑀧𑀘𑀬𑀕𑀸𑀫𑀻. 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀲𑀺𑀬𑀸 𑀆𑀘𑀬𑀕𑀸𑀫𑀺𑀦𑁄, 𑀲𑀺𑀬𑀸 𑀅𑀧𑀘𑀬𑀕𑀸𑀫𑀺𑀦𑁄, 𑀲𑀺𑀬𑀸 𑀦𑁂𑀯𑀸𑀘𑀬𑀕𑀸𑀫𑀺𑀦𑀸𑀧𑀘𑀬𑀕𑀸𑀫𑀺𑀦𑁄. 𑀭𑀽𑀧𑀓𑁆𑀔𑀦𑁆𑀥𑁄 𑀦𑁂𑀯𑀲𑁂𑀓𑁆𑀔𑀦𑀸𑀲𑁂𑀓𑁆𑀔𑁄. 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀲𑀺𑀬𑀸 𑀲𑁂𑀓𑁆𑀔𑀸, 𑀲𑀺𑀬𑀸 𑀅𑀲𑁂𑀓𑁆𑀔𑀸, 𑀲𑀺𑀬𑀸 𑀦𑁂𑀯𑀲𑁂𑀓𑁆𑀔𑀦𑀸𑀲𑁂𑀓𑁆𑀔𑀸. 𑀭𑀽𑀧𑀓𑁆𑀔𑀦𑁆𑀥𑁄 𑀧𑀭𑀺𑀢𑁆𑀢𑁄. 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀲𑀺𑀬𑀸 𑀧𑀭𑀺𑀢𑁆𑀢𑀸, 𑀲𑀺𑀬𑀸 𑀫𑀳𑀕𑁆𑀕𑀢𑀸, 𑀲𑀺𑀬𑀸 𑀅𑀧𑁆𑀧𑀫𑀸𑀡𑀸. 𑀭𑀽𑀧𑀓𑁆𑀔𑀦𑁆𑀥𑁄 𑀅𑀦𑀸𑀭𑀫𑁆𑀫𑀡𑁄. 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀲𑀺𑀬𑀸 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸, 𑀲𑀺𑀬𑀸 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀸, 𑀲𑀺𑀬𑀸 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀸, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸’’𑀢𑀺𑀧𑀺, ‘‘𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀸’’𑀢𑀺𑀧𑀺, ‘‘𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀸’’𑀢𑀺𑀧𑀺. 𑀭𑀽𑀧𑀓𑁆𑀔𑀦𑁆𑀥𑁄 𑀫𑀚𑁆𑀛𑀺𑀫𑁄. 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀲𑀺𑀬𑀸 𑀳𑀻𑀦𑀸, 𑀲𑀺𑀬𑀸 𑀫𑀚𑁆𑀛𑀺𑀫𑀸, 𑀲𑀺𑀬𑀸 𑀧𑀡𑀻𑀢𑀸. 𑀭𑀽𑀧𑀓𑁆𑀔𑀦𑁆𑀥𑁄 𑀅𑀦𑀺𑀬𑀢𑁄. 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀲𑀺𑀬𑀸 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀸, 𑀲𑀺𑀬𑀸 𑀲𑀫𑁆𑀫𑀢𑁆𑀢𑀦𑀺𑀬𑀢𑀸, 𑀲𑀺𑀬𑀸 𑀅𑀦𑀺𑀬𑀢𑀸.

𑀭𑀽𑀧𑀓𑁆𑀔𑀦𑁆𑀥𑁄 𑀅𑀦𑀸𑀭𑀫𑁆𑀫𑀡𑁄. 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀲𑀺𑀬𑀸 𑀫𑀕𑁆𑀕𑀸𑀭𑀫𑁆𑀫𑀡𑀸, 𑀲𑀺𑀬𑀸 𑀫𑀕𑁆𑀕𑀳𑁂𑀢𑀼𑀓𑀸, 𑀲𑀺𑀬𑀸 𑀫𑀕𑁆𑀕𑀸𑀥𑀺𑀧𑀢𑀺𑀦𑁄, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀫𑀕𑁆𑀕𑀸𑀭𑀫𑁆𑀫𑀡𑀸’’𑀢𑀺𑀧𑀺, ‘‘𑀫𑀕𑁆𑀕𑀳𑁂𑀢𑀼𑀓𑀸’’𑀢𑀺𑀧𑀺, ‘‘𑀫𑀕𑁆𑀕𑀸𑀥𑀺𑀧𑀢𑀺𑀦𑁄’’𑀢𑀺𑀧𑀺; 𑀲𑀺𑀬𑀸 𑀉𑀧𑁆𑀧𑀦𑁆𑀦𑀸, 𑀲𑀺𑀬𑀸 𑀅𑀦𑀼𑀧𑁆𑀧𑀦𑁆𑀦𑀸, 𑀲𑀺𑀬𑀸 𑀉𑀧𑁆𑀧𑀸𑀤𑀺𑀦𑁄; 𑀲𑀺𑀬𑀸 𑀅𑀢𑀻𑀢𑀸, 𑀲𑀺𑀬𑀸 𑀅𑀦𑀸𑀕𑀢𑀸, 𑀲𑀺𑀬𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸. 𑀭𑀽𑀧𑀓𑁆𑀔𑀦𑁆𑀥𑁄 𑀅𑀦𑀸𑀭𑀫𑁆𑀫𑀡𑁄. 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀲𑀺𑀬𑀸 𑀅𑀢𑀻𑀢𑀸𑀭𑀫𑁆𑀫𑀡𑀸, 𑀲𑀺𑀬𑀸 𑀅𑀦𑀸𑀕𑀢𑀸𑀭𑀫𑁆𑀫𑀡𑀸, 𑀲𑀺𑀬𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀅𑀢𑀻𑀢𑀸𑀭𑀫𑁆𑀫𑀡𑀸’’𑀢𑀺𑀧𑀺, ‘‘𑀅𑀦𑀸𑀕𑀢𑀸𑀭𑀫𑁆𑀫𑀡𑀸’’𑀢𑀺𑀧𑀺, ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸’’𑀢𑀺𑀧𑀺; 𑀲𑀺𑀬𑀸 𑀅𑀚𑁆𑀛𑀢𑁆𑀢𑀸, 𑀲𑀺𑀬𑀸 𑀩𑀳𑀺𑀤𑁆𑀥𑀸, 𑀲𑀺𑀬𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸. 𑀭𑀽𑀧𑀓𑁆𑀔𑀦𑁆𑀥𑁄 𑀅𑀦𑀸𑀭𑀫𑁆𑀫𑀡𑁄. 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀲𑀺𑀬𑀸 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸, 𑀲𑀺𑀬𑀸 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸, 𑀲𑀺𑀬𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸’’𑀢𑀺𑀧𑀺, ‘‘𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸’’𑀢𑀺𑀧𑀺, ‘‘𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸’’𑀢𑀺𑀧𑀺. 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀅𑀦𑀺𑀤𑀲𑁆𑀲𑀦𑀅𑀧𑁆𑀧𑀝𑀺𑀖𑀸. 𑀭𑀽𑀧𑀓𑁆𑀔𑀦𑁆𑀥𑁄 𑀲𑀺𑀬𑀸 𑀲𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑁄, 𑀲𑀺𑀬𑀸 𑀅𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑁄, 𑀲𑀺𑀬𑀸 𑀅𑀦𑀺𑀤𑀲𑁆𑀲𑀦𑀅𑀧𑁆𑀧𑀝𑀺𑀖𑁄.