𑁧. 𑀯𑀺𑀪𑀗𑁆𑀕𑀯𑀸𑀭𑁄

𑀳𑁂𑀢𑀼𑀧𑀘𑁆𑀘𑀬𑁄

𑁧𑁪𑁯. 𑀲𑀧𑁆𑀧𑀻𑀢𑀺𑀓𑁄 𑀥𑀫𑁆𑀫𑁄 𑀲𑀧𑁆𑀧𑀻𑀢𑀺𑀓𑀲𑁆𑀲 𑀥𑀫𑁆𑀫𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑁋 𑀲𑀧𑁆𑀧𑀻𑀢𑀺𑀓𑀸 𑀳𑁂𑀢𑀽 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀔𑀦𑁆𑀥𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄; 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂…𑀧𑁂…. 𑀲𑀧𑁆𑀧𑀻𑀢𑀺𑀓𑁄 𑀥𑀫𑁆𑀫𑁄 𑀅𑀧𑁆𑀧𑀻𑀢𑀺𑀓𑀲𑁆𑀲 𑀥𑀫𑁆𑀫𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑁋 𑀲𑀧𑁆𑀧𑀻𑀢𑀺𑀓𑀸 𑀳𑁂𑀢𑀽 𑀧𑀻𑀢𑀺𑀬𑀸 𑀘 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄; 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂…𑀧𑁂…. (𑀫𑀽𑀮𑀁 𑀓𑀸𑀢𑀩𑁆𑀩𑀁.) 𑀲𑀧𑁆𑀧𑀻𑀢𑀺𑀓𑀸 𑀳𑁂𑀢𑀽 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀔𑀦𑁆𑀥𑀸𑀦𑀁 𑀧𑀻𑀢𑀺𑀬𑀸 𑀘 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄; 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂…𑀧𑁂…. (𑁩)

𑀅𑀧𑁆𑀧𑀻𑀢𑀺𑀓𑁄 𑀥𑀫𑁆𑀫𑁄 𑀅𑀧𑁆𑀧𑀻𑀢𑀺𑀓𑀲𑁆𑀲 𑀥𑀫𑁆𑀫𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑁋 𑀅𑀧𑁆𑀧𑀻𑀢𑀺𑀓𑀸 𑀳𑁂𑀢𑀽 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀔𑀦𑁆𑀥𑀸𑀦𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄; 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂…𑀧𑁂…. (𑁧)

𑀆𑀭𑀫𑁆𑀫𑀡𑀧𑀘𑁆𑀘𑀬𑁄

𑁧𑁫𑁦. 𑀲𑀧𑁆𑀧𑀻𑀢𑀺𑀓𑁄 𑀥𑀫𑁆𑀫𑁄 𑀲𑀧𑁆𑀧𑀻𑀢𑀺𑀓𑀲𑁆𑀲 𑀥𑀫𑁆𑀫𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑁋 𑀲𑀧𑁆𑀧𑀻𑀢𑀺𑀓𑁂 𑀔𑀦𑁆𑀥𑁂 𑀆𑀭𑀩𑁆𑀪 𑀲𑀧𑁆𑀧𑀻𑀢𑀺𑀓𑀸 𑀔𑀦𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. (𑀫𑀽𑀮𑀁 𑀓𑀸𑀢𑀩𑁆𑀩𑀁.) 𑀲𑀧𑁆𑀧𑀻𑀢𑀺𑀓𑁂 𑀔𑀦𑁆𑀥𑁂 𑀆𑀭𑀩𑁆𑀪 𑀅𑀧𑁆𑀧𑀻𑀢𑀺𑀓𑀸 𑀔𑀦𑁆𑀥𑀸 𑀘 𑀧𑀻𑀢𑀺 𑀘 𑀉𑀧𑁆𑀧𑀚𑁆𑀚𑀦𑁆𑀢𑀺. (𑀫𑀽𑀮𑀁 𑀓𑀸𑀢𑀩𑁆𑀩𑀁.) 𑀲𑀧𑁆𑀧𑀻𑀢𑀺𑀓𑁂 𑀔𑀦𑁆𑀥𑁂 𑀆𑀭𑀩𑁆𑀪 𑀲𑀧𑁆𑀧𑀻𑀢𑀺𑀓𑀸 𑀔𑀦𑁆𑀥𑀸 𑀘 𑀧𑀻𑀢𑀺 𑀘 𑀉𑀧𑁆𑀧𑀚𑁆𑀚𑀦𑁆𑀢𑀺. (𑁩)

𑁧𑁫𑁧. 𑀅𑀧𑁆𑀧𑀻𑀢𑀺𑀓𑁄 𑀥𑀫𑁆𑀫𑁄 𑀅𑀧𑁆𑀧𑀻𑀢𑀺𑀓𑀲𑁆𑀲 𑀥𑀫𑁆𑀫𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑁋 𑀅𑀧𑁆𑀧𑀻𑀢𑀺𑀓𑁂𑀦 𑀘𑀺𑀢𑁆𑀢𑁂𑀦 𑀤𑀸𑀦𑀁 𑀤𑀢𑁆𑀯𑀸 𑀲𑀻𑀮𑀁…𑀧𑁂… 𑀉𑀧𑁄𑀲𑀣𑀓𑀫𑁆𑀫𑀁 𑀓𑀢𑁆𑀯𑀸 𑀅𑀧𑁆𑀧𑀻𑀢𑀺𑀓𑁂𑀦 𑀘𑀺𑀢𑁆𑀢𑁂𑀦 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀅𑀲𑁆𑀲𑀸𑀤𑁂𑀢𑀺 𑀅𑀪𑀺𑀦𑀦𑁆𑀤𑀢𑀺, 𑀢𑀁 𑀆𑀭𑀩𑁆𑀪 𑀅𑀧𑁆𑀧𑀻𑀢𑀺𑀓𑁄 𑀭𑀸𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺, 𑀯𑀺𑀘𑀺𑀓𑀺𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺, 𑀉𑀤𑁆𑀥𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀺, 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺; 𑀅𑀧𑁆𑀧𑀻𑀢𑀺𑀓𑀸 𑀛𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸…𑀧𑁂… 𑀫𑀕𑁆𑀕𑀸 𑀯𑀼𑀝𑁆𑀞𑀳𑀺𑀢𑁆𑀯𑀸…𑀧𑁂… 𑀨𑀮𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀅𑀧𑁆𑀧𑀻𑀢𑀺𑀓𑁂𑀦 𑀘𑀺𑀢𑁆𑀢𑁂𑀦 𑀨𑀮𑀁 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀅𑀭𑀺𑀬𑀸 𑀅𑀧𑁆𑀧𑀻𑀢𑀺𑀓𑁂𑀦 𑀘𑀺𑀢𑁆𑀢𑁂𑀦 𑀦𑀺𑀩𑁆𑀩𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀺, 𑀦𑀺𑀩𑁆𑀩𑀸𑀦𑀁 𑀅𑀧𑁆𑀧𑀻𑀢𑀺𑀓𑀲𑁆𑀲 𑀕𑁄𑀢𑁆𑀭𑀪𑀼𑀲𑁆𑀲, 𑀯𑁄𑀤𑀸𑀦𑀲𑁆𑀲, 𑀫𑀕𑁆𑀕𑀲𑁆𑀲, 𑀨𑀮𑀲𑁆𑀲, 𑀆𑀯𑀚𑁆𑀚𑀦𑀸𑀬 𑀧𑀻𑀢𑀺𑀬𑀸 𑀘 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄; 𑀅𑀭𑀺𑀬𑀸 𑀅𑀧𑁆𑀧𑀻𑀢𑀺𑀓𑁂𑀦 𑀘𑀺𑀢𑁆𑀢𑁂𑀦 𑀅𑀧𑁆𑀧𑀻𑀢𑀺𑀓𑁂 𑀧𑀳𑀻𑀦𑁂 𑀓𑀺𑀮𑁂𑀲𑁂…𑀧𑁂… 𑀯𑀺𑀓𑁆𑀔𑀫𑁆𑀪𑀺𑀢𑁂 𑀓𑀺𑀮𑁂𑀲𑁂…𑀧𑁂… 𑀧𑀼𑀩𑁆𑀩𑁂…𑀧𑁂… 𑀘𑀓𑁆𑀔𑀼𑀁…𑀧𑁂… 𑀯𑀢𑁆𑀣𑀼𑀁 𑀅𑀧𑁆𑀧𑀻𑀢𑀺𑀓𑁂 𑀔𑀦𑁆𑀥𑁂 𑀘 𑀧𑀻𑀢𑀺𑀜𑁆𑀘 𑀅𑀧𑁆𑀧𑀻𑀢𑀺𑀓𑁂𑀦 𑀘𑀺𑀢𑁆𑀢𑁂𑀦 𑀅𑀦𑀺𑀘𑁆𑀘𑀢𑁄…𑀧𑁂… 𑀯𑀺𑀧𑀲𑁆𑀲𑀢𑀺 𑀅𑀲𑁆𑀲𑀸𑀤𑁂𑀢𑀺 𑀅𑀪𑀺𑀦𑀦𑁆𑀤𑀢𑀺, 𑀢𑀁 𑀆𑀭𑀩𑁆𑀪 𑀅𑀧𑁆𑀧𑀻𑀢𑀺𑀓𑁄 𑀭𑀸𑀕𑁄 𑀉𑀧𑁆𑀧𑀚𑁆𑀚𑀢𑀺…𑀧𑁂… 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺; 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀧𑀲𑁆𑀲𑀢𑀺…𑀧𑁂… 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀓𑀸𑀬𑀯𑀺𑀜𑁆𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄; 𑀅𑀧𑁆𑀧𑀻𑀢𑀺𑀓𑀸 𑀔𑀦𑁆𑀥𑀸 𑀇𑀤𑁆𑀥𑀺𑀯𑀺𑀥𑀜𑀸𑀡𑀲𑁆𑀲 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲, 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀲𑁆𑀲, 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑀲𑁆𑀲, 𑀅𑀦𑀸𑀕𑀢𑀁𑀲𑀜𑀸𑀡𑀲𑁆𑀲, 𑀆𑀯𑀚𑁆𑀚𑀦𑀸𑀬 𑀧𑀻𑀢𑀺𑀬𑀸 𑀘 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄; 𑀅𑀧𑁆𑀧𑀻𑀢𑀺𑀓𑁂 𑀔𑀦𑁆𑀥𑁂 𑀘 𑀧𑀻𑀢𑀺𑀜𑁆𑀘 𑀆𑀭𑀩𑁆𑀪 𑀅𑀧𑁆𑀧𑀻𑀢𑀺𑀓𑀸 𑀔𑀦𑁆𑀥𑀸 𑀘 𑀧𑀻𑀢𑀺 𑀘 𑀉𑀧𑁆𑀧𑀚𑁆𑀚𑀦𑁆𑀢𑀺. (𑁧)

𑀅𑀧𑁆𑀧𑀻𑀢𑀺𑀓𑁄 𑀥𑀫𑁆𑀫𑁄 𑀲𑀧𑁆𑀧𑀻𑀢𑀺𑀓𑀲𑁆𑀲 𑀥𑀫𑁆𑀫𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑁋 𑀅𑀧𑁆𑀧𑀻𑀢𑀺𑀓𑁂𑀦 𑀘𑀺𑀢𑁆𑀢𑁂𑀦 𑀤𑀸𑀦𑀁 𑀤𑀢𑁆𑀯𑀸 𑀲𑀻𑀮𑀁…𑀧𑁂… 𑀉𑀧𑁄𑀲𑀣𑀓𑀫𑁆𑀫𑀁…𑀧𑁂… 𑀲𑀧𑁆𑀧𑀻𑀢𑀺𑀓𑁂𑀦 𑀘𑀺𑀢𑁆𑀢𑁂𑀦 𑀧𑀘𑁆𑀘𑀯𑁂𑀓𑁆𑀔𑀢𑀺 𑀅𑀲𑁆𑀲𑀸𑀤𑁂𑀢𑀺 𑀅𑀪𑀺𑀦𑀦𑁆𑀤𑀢𑀺, 𑀢𑀁 𑀆𑀭𑀩𑁆𑀪 𑀲𑀧𑁆𑀧𑀻𑀢𑀺𑀓𑁄 𑀭𑀸𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺; 𑀅𑀧𑁆𑀧𑀻𑀢𑀺𑀓𑀸 𑀛𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸…𑀧𑁂… 𑀫𑀕𑁆𑀕𑀸 𑀯𑀼𑀝𑁆𑀞𑀳𑀺𑀢𑁆𑀯𑀸…𑀧𑁂… 𑀨𑀮𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀲𑀧𑁆𑀧𑀻𑀢𑀺𑀓𑁂𑀦 𑀘𑀺𑀢𑁆𑀢𑁂𑀦 𑀨𑀮𑀁 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀅𑀭𑀺𑀬𑀸 𑀲𑀧𑁆𑀧𑀻𑀢𑀺𑀓𑁂𑀦 𑀘𑀺𑀢𑁆𑀢𑁂𑀦 𑀦𑀺𑀩𑁆𑀩𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀺, 𑀦𑀺𑀩𑁆𑀩𑀸𑀦𑀁 𑀲𑀧𑁆𑀧𑀻𑀢𑀺𑀓𑀲𑁆𑀲 𑀕𑁄𑀢𑁆𑀭𑀪𑀼𑀲𑁆𑀲, 𑀯𑁄𑀤𑀸𑀦𑀲𑁆𑀲, 𑀫𑀕𑁆𑀕𑀲𑁆𑀲, 𑀨𑀮𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄; 𑀅𑀭𑀺𑀬𑀸 𑀲𑀧𑁆𑀧𑀻𑀢𑀺𑀓𑁂𑀦 𑀘𑀺𑀢𑁆𑀢𑁂𑀦 𑀅𑀧𑁆𑀧𑀻𑀢𑀺𑀓𑁂 𑀧𑀳𑀻𑀦𑁂 𑀓𑀺𑀮𑁂𑀲𑁂…𑀧𑁂… 𑀯𑀺𑀓𑁆𑀔𑀫𑁆𑀪𑀺𑀢𑁂 𑀓𑀺𑀮𑁂𑀲𑁂 …𑀧𑁂… 𑀧𑀼𑀩𑁆𑀩𑁂…𑀧𑁂… 𑀘𑀓𑁆𑀔𑀼𑀁…𑀧𑁂… 𑀯𑀢𑁆𑀣𑀼𑀁 𑀅𑀧𑁆𑀧𑀻𑀢𑀺𑀓𑁂 𑀔𑀦𑁆𑀥𑁂 𑀘 𑀧𑀻𑀢𑀺𑀜𑁆𑀘 𑀲𑀧𑁆𑀧𑀻𑀢𑀺𑀓𑁂𑀦 𑀘𑀺𑀢𑁆𑀢𑁂𑀦 𑀅𑀦𑀺𑀘𑁆𑀘𑀢𑁄…𑀧𑁂… 𑀯𑀺𑀧𑀲𑁆𑀲𑀢𑀺 𑀅𑀲𑁆𑀲𑀸𑀤𑁂𑀢𑀺 𑀅𑀪𑀺𑀦𑀦𑁆𑀤𑀢𑀺, 𑀢𑀁 𑀆𑀭𑀩𑁆𑀪 𑀲𑀧𑁆𑀧𑀻𑀢𑀺𑀓𑁄 𑀭𑀸𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺; 𑀅𑀧𑁆𑀧𑀻𑀢𑀺𑀓𑁂 𑀔𑀦𑁆𑀥𑁂 𑀘 𑀧𑀻𑀢𑀺𑀜𑁆𑀘 𑀆𑀭𑀩𑁆𑀪 𑀲𑀧𑁆𑀧𑀻𑀢𑀺𑀓𑀸 𑀔𑀦𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. (𑁨)

𑀅𑀧𑁆𑀧𑀻𑀢𑀺𑀓𑁄 𑀥𑀫𑁆𑀫𑁄 𑀲𑀧𑁆𑀧𑀻𑀢𑀺𑀓𑀲𑁆𑀲 𑀘 𑀅𑀧𑁆𑀧𑀻𑀢𑀺𑀓𑀲𑁆𑀲 𑀘 𑀥𑀫𑁆𑀫𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑁋 𑀅𑀧𑁆𑀧𑀻𑀢𑀺𑀓𑁂𑀦 𑀘𑀺𑀢𑁆𑀢𑁂𑀦 𑀤𑀸𑀦𑀁 𑀤𑀢𑁆𑀯𑀸 𑀲𑀻𑀮𑀁…𑀧𑁂… 𑀉𑀧𑁄𑀲𑀣𑀓𑀫𑁆𑀫𑀁…𑀧𑁂… 𑀲𑀧𑁆𑀧𑀻𑀢𑀺𑀓𑁂𑀦 𑀘𑀺𑀢𑁆𑀢𑁂𑀦 𑀧𑀘𑁆𑀘𑀯𑁂𑀓𑁆𑀔𑀢𑀺 𑀅𑀲𑁆𑀲𑀸𑀤𑁂𑀢𑀺 𑀅𑀪𑀺𑀦𑀦𑁆𑀤𑀢𑀺, 𑀢𑀁 𑀆𑀭𑀩𑁆𑀪 𑀲𑀧𑁆𑀧𑀻𑀢𑀺𑀓𑀸 𑀔𑀦𑁆𑀥𑀸 𑀘 𑀧𑀻𑀢𑀺 𑀘 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀅𑀧𑁆𑀧𑀻𑀢𑀺𑀓𑀸 𑀛𑀸𑀦𑀸…𑀧𑁂… 𑀫𑀕𑁆𑀕𑀸…𑀧𑁂… 𑀨𑀮𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀲𑀧𑁆𑀧𑀻𑀢𑀺𑀓𑁂𑀦 𑀘𑀺𑀢𑁆𑀢𑁂𑀦 𑀨𑀮𑀁 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀅𑀭𑀺𑀬𑀸 𑀲𑀧𑁆𑀧𑀻𑀢𑀺𑀓𑁂𑀦 𑀘𑀺𑀢𑁆𑀢𑁂𑀦 𑀦𑀺𑀩𑁆𑀩𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀺, 𑀦𑀺𑀩𑁆𑀩𑀸𑀦𑀁 𑀲𑀧𑁆𑀧𑀻𑀢𑀺𑀓𑀲𑁆𑀲 𑀕𑁄𑀢𑁆𑀭𑀪𑀼𑀲𑁆𑀲, 𑀯𑁄𑀤𑀸𑀦𑀲𑁆𑀲, 𑀫𑀕𑁆𑀕𑀲𑁆𑀲, 𑀨𑀮𑀲𑁆𑀲, 𑀧𑀻𑀢𑀺𑀬𑀸 𑀘 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄; 𑀅𑀭𑀺𑀬𑀸 𑀲𑀧𑁆𑀧𑀻𑀢𑀺𑀓𑁂𑀦 𑀘𑀺𑀢𑁆𑀢𑁂𑀦 𑀅𑀧𑁆𑀧𑀻𑀢𑀺𑀓𑁂 𑀧𑀳𑀻𑀦𑁂 𑀓𑀺𑀮𑁂𑀲𑁂 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀺, 𑀯𑀺𑀓𑁆𑀔𑀫𑁆𑀪𑀺𑀢𑁂 𑀓𑀺𑀮𑁂𑀲𑁂…𑀧𑁂… 𑀧𑀼𑀩𑁆𑀩𑁂…𑀧𑁂… 𑀘𑀓𑁆𑀔𑀼𑀁…𑀧𑁂… 𑀯𑀢𑁆𑀣𑀼𑀁 𑀅𑀧𑁆𑀧𑀻𑀢𑀺𑀓𑁂 𑀔𑀦𑁆𑀥𑁂 𑀘 𑀧𑀻𑀢𑀺𑀜𑁆𑀘 𑀲𑀧𑁆𑀧𑀻𑀢𑀺𑀓𑁂𑀦 𑀘𑀺𑀢𑁆𑀢𑁂𑀦 𑀅𑀦𑀺𑀘𑁆𑀘𑀢𑁄…𑀧𑁂… 𑀯𑀺𑀧𑀲𑁆𑀲𑀢𑀺 𑀅𑀲𑁆𑀲𑀸𑀤𑁂𑀢𑀺 𑀅𑀪𑀺𑀦𑀦𑁆𑀤𑀢𑀺, 𑀢𑀁 𑀆𑀭𑀩𑁆𑀪 𑀲𑀧𑁆𑀧𑀻𑀢𑀺𑀓𑀸 𑀔𑀦𑁆𑀥𑀸 𑀘 𑀧𑀻𑀢𑀺 𑀘 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀅𑀧𑁆𑀧𑀻𑀢𑀺𑀓𑁂 𑀔𑀦𑁆𑀥𑁂 𑀘 𑀧𑀻𑀢𑀺𑀜𑁆𑀘 𑀆𑀭𑀩𑁆𑀪 𑀲𑀧𑁆𑀧𑀻𑀢𑀺𑀓𑀸 𑀔𑀦𑁆𑀥𑀸 𑀘 𑀧𑀻𑀢𑀺 𑀘 𑀉𑀧𑁆𑀧𑀚𑁆𑀚𑀦𑁆𑀢𑀺. (𑁩)

𑁧𑁫𑁨. 𑀲𑀧𑁆𑀧𑀻𑀢𑀺𑀓𑁄 𑀘 𑀅𑀧𑁆𑀧𑀻𑀢𑀺𑀓𑁄 𑀘 𑀥𑀫𑁆𑀫𑀸 𑀲𑀧𑁆𑀧𑀻𑀢𑀺𑀓𑀲𑁆𑀲 𑀥𑀫𑁆𑀫𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑁋 𑀲𑀧𑁆𑀧𑀻𑀢𑀺𑀓𑁂 𑀔𑀦𑁆𑀥𑁂 𑀘 𑀧𑀻𑀢𑀺𑀜𑁆𑀘 𑀆𑀭𑀩𑁆𑀪 𑀲𑀧𑁆𑀧𑀻𑀢𑀺𑀓𑀸 𑀔𑀦𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. (𑀫𑀽𑀮𑀁 𑀓𑀸𑀢𑀩𑁆𑀩𑀁.) 𑀲𑀧𑁆𑀧𑀻𑀢𑀺𑀓𑁂 𑀔𑀦𑁆𑀥𑁂 𑀘 𑀧𑀻𑀢𑀺𑀜𑁆𑀘 𑀆𑀭𑀩𑁆𑀪 𑀅𑀧𑁆𑀧𑀻𑀢𑀺𑀓𑀸 𑀔𑀦𑁆𑀥𑀸 𑀘 𑀧𑀻𑀢𑀺 𑀘 𑀉𑀧𑁆𑀧𑀚𑁆𑀚𑀦𑁆𑀢𑀺.

(𑀫𑀽𑀮𑀁 𑀓𑀸𑀢𑀩𑁆𑀩𑀁.) 𑀲𑀧𑁆𑀧𑀻𑀢𑀺𑀓𑁂 𑀔𑀦𑁆𑀥𑁂 𑀘 𑀧𑀻𑀢𑀺𑀜𑁆𑀘 𑀆𑀭𑀩𑁆𑀪 𑀲𑀧𑁆𑀧𑀻𑀢𑀺𑀓𑀸 𑀔𑀦𑁆𑀥𑀸 𑀘 𑀧𑀻𑀢𑀺 𑀘 𑀉𑀧𑁆𑀧𑀚𑁆𑀚𑀦𑁆𑀢𑀺. (𑁩)

𑀅𑀥𑀺𑀧𑀢𑀺𑀧𑀘𑁆𑀘𑀬𑁄

𑁧𑁫𑁩. 𑀲𑀧𑁆𑀧𑀻𑀢𑀺𑀓𑁄 𑀥𑀫𑁆𑀫𑁄 𑀲𑀧𑁆𑀧𑀻𑀢𑀺𑀓𑀲𑁆𑀲 𑀥𑀫𑁆𑀫𑀲𑁆𑀲 𑀅𑀥𑀺𑀧𑀢𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑁋 𑀆𑀭𑀫𑁆𑀫𑀡𑀸𑀥𑀺𑀧𑀢𑀺, 𑀲𑀳𑀚𑀸𑀢𑀸𑀥𑀺𑀧𑀢𑀺. 𑀆𑀭𑀫𑁆𑀫𑀡𑀸𑀥𑀺𑀧𑀢𑀺 𑁋 𑀲𑀧𑁆𑀧𑀻𑀢𑀺𑀓𑁂 𑀔𑀦𑁆𑀥𑁂 𑀕𑀭𑀼𑀁 𑀓𑀢𑁆𑀯𑀸 𑀲𑀧𑁆𑀧𑀻𑀢𑀺𑀓𑀸 𑀔𑀦𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀲𑀳𑀚𑀸𑀢𑀸𑀥𑀺𑀧𑀢𑀺 𑁋 𑀲𑀧𑁆𑀧𑀻𑀢𑀺𑀓𑀸𑀥𑀺𑀧𑀢𑀺 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀔𑀦𑁆𑀥𑀸𑀦𑀁 𑀅𑀥𑀺𑀧𑀢𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. (𑁧)

𑀲𑀧𑁆𑀧𑀻𑀢𑀺𑀓𑁄 𑀥𑀫𑁆𑀫𑁄 𑀅𑀧𑁆𑀧𑀻𑀢𑀺𑀓𑀲𑁆𑀲 𑀥𑀫𑁆𑀫𑀲𑁆𑀲 𑀅𑀥𑀺𑀧𑀢𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑁋 𑀆𑀭𑀫𑁆𑀫𑀡𑀸𑀥𑀺𑀧𑀢𑀺, 𑀲𑀳𑀚𑀸𑀢𑀸𑀥𑀺𑀧𑀢𑀺. 𑀆𑀭𑀫𑁆𑀫𑀡𑀸𑀥𑀺𑀧𑀢𑀺 𑁋 𑀲𑀧𑁆𑀧𑀻𑀢𑀺𑀓𑁂 𑀔𑀦𑁆𑀥𑁂 𑀕𑀭𑀼𑀁 𑀓𑀢𑁆𑀯𑀸 𑀅𑀧𑁆𑀧𑀻𑀢𑀺𑀓𑀸 𑀔𑀦𑁆𑀥𑀸 𑀘 𑀧𑀻𑀢𑀺 𑀘 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀲𑀳𑀚𑀸𑀢𑀸𑀥𑀺𑀧𑀢𑀺 𑁋 𑀲𑀧𑁆𑀧𑀻𑀢𑀺𑀓𑀸𑀥𑀺𑀧𑀢𑀺 𑀧𑀻𑀢𑀺𑀬𑀸 𑀘 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀅𑀥𑀺𑀧𑀢𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. (𑁨)

𑀲𑀧𑁆𑀧𑀻𑀢𑀺𑀓𑁄 𑀥𑀫𑁆𑀫𑁄 𑀲𑀧𑁆𑀧𑀻𑀢𑀺𑀓𑀲𑁆𑀲 𑀘 𑀅𑀧𑁆𑀧𑀻𑀢𑀺𑀓𑀲𑁆𑀲 𑀘 𑀥𑀫𑁆𑀫𑀲𑁆𑀲 𑀅𑀥𑀺𑀧𑀢𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑁋 𑀆𑀭𑀫𑁆𑀫𑀡𑀸𑀥𑀺𑀧𑀢𑀺, 𑀲𑀳𑀚𑀸𑀢𑀸𑀥𑀺𑀧𑀢𑀺. 𑀆𑀭𑀫𑁆𑀫𑀡𑀸𑀥𑀺𑀧𑀢𑀺 𑁋 𑀲𑀧𑁆𑀧𑀻𑀢𑀺𑀓𑁂 𑀔𑀦𑁆𑀥𑁂 𑀕𑀭𑀼𑀁 𑀓𑀢𑁆𑀯𑀸 𑀲𑀧𑁆𑀧𑀻𑀢𑀺𑀓𑀸 𑀔𑀦𑁆𑀥𑀸 𑀘 𑀧𑀻𑀢𑀺 𑀘 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀲𑀳𑀚𑀸𑀢𑀸𑀥𑀺𑀧𑀢𑀺 𑁋 𑀲𑀧𑁆𑀧𑀻𑀢𑀺𑀓𑀸𑀥𑀺𑀧𑀢𑀺 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀔𑀦𑁆𑀥𑀸𑀦𑀁 𑀧𑀻𑀢𑀺𑀬𑀸 𑀘 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀅𑀥𑀺𑀧𑀢𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. (𑁩)

𑁧𑁫𑁪. 𑀅𑀧𑁆𑀧𑀻𑀢𑀺𑀓𑁄 𑀥𑀫𑁆𑀫𑁄 𑀅𑀧𑁆𑀧𑀻𑀢𑀺𑀓𑀲𑁆𑀲 𑀥𑀫𑁆𑀫𑀲𑁆𑀲 𑀅𑀥𑀺𑀧𑀢𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑁋 𑀆𑀭𑀫𑁆𑀫𑀡𑀸𑀥𑀺𑀧𑀢𑀺, 𑀲𑀳𑀚𑀸𑀢𑀸𑀥𑀺𑀧𑀢𑀺. 𑀆𑀭𑀫𑁆𑀫𑀡𑀸𑀥𑀺𑀧𑀢𑀺 𑁋 𑀅𑀧𑁆𑀧𑀻𑀢𑀺𑀓𑁂𑀦 𑀘𑀺𑀢𑁆𑀢𑁂𑀦 𑀤𑀸𑀦𑀁…𑀧𑁂… 𑀲𑀻𑀮𑀁…𑀧𑁂… 𑀉𑀧𑁄𑀲𑀣𑀓𑀫𑁆𑀫𑀁…𑀧𑁂… 𑀅𑀧𑁆𑀧𑀻𑀢𑀺𑀓𑁂𑀦 𑀘𑀺𑀢𑁆𑀢𑁂𑀦 𑀢𑀁 𑀕𑀭𑀼𑀁 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀢𑀺 𑀅𑀲𑁆𑀲𑀸𑀤𑁂𑀢𑀺 𑀅𑀪𑀺𑀦𑀦𑁆𑀤𑀢𑀺, 𑀢𑀁 𑀕𑀭𑀼𑀁 𑀓𑀢𑁆𑀯𑀸 𑀅𑀧𑁆𑀧𑀻𑀢𑀺𑀓𑁄 𑀭𑀸𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺; 𑀅𑀧𑁆𑀧𑀻𑀢𑀺𑀓𑀸 𑀛𑀸𑀦𑀸…𑀧𑁂… 𑀫𑀕𑁆𑀕𑀸…𑀧𑁂… 𑀨𑀮𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀅𑀧𑁆𑀧𑀻𑀢𑀺𑀓𑁂𑀦 𑀘𑀺𑀢𑁆𑀢𑁂𑀦 𑀨𑀮𑀁 𑀕𑀭𑀼𑀁 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀢𑀺; 𑀅𑀭𑀺𑀬𑀸 𑀅𑀧𑁆𑀧𑀻𑀢𑀺𑀓𑁂𑀦 𑀘𑀺𑀢𑁆𑀢𑁂𑀦 𑀦𑀺𑀩𑁆𑀩𑀸𑀦𑀁 𑀕𑀭𑀼𑀁 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀺, 𑀦𑀺𑀩𑁆𑀩𑀸𑀦𑀁 𑀅𑀧𑁆𑀧𑀻𑀢𑀺𑀓𑀲𑁆𑀲 𑀕𑁄𑀢𑁆𑀭𑀪𑀼𑀲𑁆𑀲, 𑀯𑁄𑀤𑀸𑀦𑀲𑁆𑀲, 𑀫𑀕𑁆𑀕𑀲𑁆𑀲, 𑀨𑀮𑀲𑁆𑀲 𑀅𑀥𑀺𑀧𑀢𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄; 𑀘𑀓𑁆𑀔𑀼𑀁…𑀧𑁂… 𑀯𑀢𑁆𑀣𑀼𑀁 𑀅𑀧𑁆𑀧𑀻𑀢𑀺𑀓𑁂 𑀔𑀦𑁆𑀥𑁂 𑀘 𑀧𑀻𑀢𑀺𑀜𑁆𑀘 𑀅𑀧𑁆𑀧𑀻𑀢𑀺𑀓𑁂𑀦 𑀘𑀺𑀢𑁆𑀢𑁂𑀦 𑀕𑀭𑀼𑀁 𑀓𑀢𑁆𑀯𑀸 𑀅𑀲𑁆𑀲𑀸𑀤𑁂𑀢𑀺 𑀅𑀪𑀺𑀦𑀦𑁆𑀤𑀢𑀺, 𑀢𑀁 𑀕𑀭𑀼𑀁 𑀓𑀢𑁆𑀯𑀸 𑀅𑀧𑁆𑀧𑀻𑀢𑀺𑀓𑁄 𑀭𑀸𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺, 𑀅𑀧𑁆𑀧𑀻𑀢𑀺𑀓𑁂 𑀔𑀦𑁆𑀥𑁂 𑀘 𑀧𑀻𑀢𑀺𑀜𑁆𑀘 𑀕𑀭𑀼𑀁 𑀓𑀢𑁆𑀯𑀸 𑀅𑀧𑁆𑀧𑀻𑀢𑀺𑀓𑀸 𑀔𑀦𑁆𑀥𑀸 𑀘 𑀧𑀻𑀢𑀺 𑀘 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀲𑀳𑀚𑀸𑀢𑀸𑀥𑀺𑀧𑀢𑀺 𑁋 𑀅𑀧𑁆𑀧𑀻𑀢𑀺𑀓𑀸𑀥𑀺𑀧𑀢𑀺 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀔𑀦𑁆𑀥𑀸𑀦𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀅𑀥𑀺𑀧𑀢𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. (𑁧)

𑀅𑀧𑁆𑀧𑀻𑀢𑀺𑀓𑁄 𑀥𑀫𑁆𑀫𑁄 𑀲𑀧𑁆𑀧𑀻𑀢𑀺𑀓𑀲𑁆𑀲 𑀥𑀫𑁆𑀫𑀲𑁆𑀲 𑀅𑀥𑀺𑀧𑀢𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀆𑀭𑀫𑁆𑀫𑀡𑀸𑀥𑀺𑀧𑀢𑀺 𑁋 𑀅𑀧𑁆𑀧𑀻𑀢𑀺𑀓𑁂𑀦 𑀘𑀺𑀢𑁆𑀢𑁂𑀦 𑀤𑀸𑀦𑀁…𑀧𑁂… 𑀲𑀻𑀮𑀁…𑀧𑁂… 𑀉𑀧𑁄𑀲𑀣𑀓𑀫𑁆𑀫𑀁…𑀧𑁂… (𑀲𑀁𑀔𑀺𑀢𑁆𑀢𑀁) 𑀦𑀺𑀩𑁆𑀩𑀸𑀦𑀁 𑀲𑀧𑁆𑀧𑀻𑀢𑀺𑀓𑀲𑁆𑀲 𑀕𑁄𑀢𑁆𑀭𑀪𑀼𑀲𑁆𑀲, 𑀯𑁄𑀤𑀸𑀦𑀲𑁆𑀲, 𑀫𑀕𑁆𑀕𑀲𑁆𑀲, 𑀨𑀮𑀲𑁆𑀲 𑀅𑀥𑀺𑀧𑀢𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄; 𑀘𑀓𑁆𑀔𑀼𑀁…𑀧𑁂… 𑀯𑀢𑁆𑀣𑀼𑀁 𑀅𑀧𑁆𑀧𑀻𑀢𑀺𑀓𑁂 𑀔𑀦𑁆𑀥𑁂 𑀘 𑀧𑀻𑀢𑀺𑀜𑁆𑀘 𑀲𑀧𑁆𑀧𑀻𑀢𑀺𑀓𑁂𑀦 𑀘𑀺𑀢𑁆𑀢𑁂𑀦 𑀕𑀭𑀼𑀁 𑀓𑀢𑁆𑀯𑀸 𑀅𑀲𑁆𑀲𑀸𑀤𑁂𑀢𑀺 𑀅𑀪𑀺𑀦𑀦𑁆𑀤𑀢𑀺, 𑀢𑀁 𑀕𑀭𑀼𑀁 𑀓𑀢𑁆𑀯𑀸 𑀲𑀧𑁆𑀧𑀻𑀢𑀺𑀓𑁄 𑀭𑀸𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺; 𑀅𑀧𑁆𑀧𑀻𑀢𑀺𑀓𑁂 𑀔𑀦𑁆𑀥𑁂 𑀘 𑀧𑀻𑀢𑀺𑀜𑁆𑀘 𑀕𑀭𑀼𑀁 𑀓𑀢𑁆𑀯𑀸 𑀲𑀧𑁆𑀧𑀻𑀢𑀺𑀓𑀸 𑀔𑀦𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. (𑁨)

𑀅𑀧𑁆𑀧𑀻𑀢𑀺𑀓𑁄 𑀥𑀫𑁆𑀫𑁄 𑀲𑀧𑁆𑀧𑀻𑀢𑀺𑀓𑀲𑁆𑀲 𑀘 𑀅𑀧𑁆𑀧𑀻𑀢𑀺𑀓𑀲𑁆𑀲 𑀘 𑀥𑀫𑁆𑀫𑀲𑁆𑀲 𑀅𑀥𑀺𑀧𑀢𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀆𑀭𑀫𑁆𑀫𑀡𑀸𑀥𑀺𑀧𑀢𑀺 𑁋 𑀤𑀸𑀦𑀁…𑀧𑁂… (𑀲𑀁𑀔𑀺𑀢𑁆𑀢𑀁) 𑀦𑀺𑀩𑁆𑀩𑀸𑀦𑀁 𑀲𑀧𑁆𑀧𑀻𑀢𑀺𑀓𑀲𑁆𑀲 𑀕𑁄𑀢𑁆𑀭𑀪𑀼𑀲𑁆𑀲, 𑀯𑁄𑀤𑀸𑀦𑀲𑁆𑀲, 𑀫𑀕𑁆𑀕𑀲𑁆𑀲, 𑀨𑀮𑀲𑁆𑀲, 𑀧𑀻𑀢𑀺𑀬𑀸 𑀘 𑀅𑀥𑀺𑀧𑀢𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄; 𑀘𑀓𑁆𑀔𑀼𑀁…𑀧𑁂… 𑀯𑀢𑁆𑀣𑀼𑀁 𑀅𑀧𑁆𑀧𑀻𑀢𑀺𑀓𑁂 𑀔𑀦𑁆𑀥𑁂 𑀘 𑀧𑀻𑀢𑀺𑀜𑁆𑀘 𑀲𑀧𑁆𑀧𑀻𑀢𑀺𑀓𑁂𑀦 𑀘𑀺𑀢𑁆𑀢𑁂𑀦 𑀕𑀭𑀼𑀁 𑀓𑀢𑁆𑀯𑀸 𑀅𑀲𑁆𑀲𑀸𑀤𑁂𑀢𑀺 𑀅𑀪𑀺𑀦𑀦𑁆𑀤𑀢𑀺, 𑀢𑀁 𑀕𑀭𑀼𑀁 𑀓𑀢𑁆𑀯𑀸 𑀭𑀸𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺 𑀅𑀧𑁆𑀧𑀻𑀢𑀺𑀓𑁂 𑀔𑀦𑁆𑀥𑁂 𑀘 𑀧𑀻𑀢𑀺𑀜𑁆𑀘 𑀕𑀭𑀼𑀁 𑀓𑀢𑁆𑀯𑀸 𑀲𑀧𑁆𑀧𑀻𑀢𑀺𑀓𑀸 𑀔𑀦𑁆𑀥𑀸 𑀘 𑀧𑀻𑀢𑀺 𑀘 𑀉𑀧𑁆𑀧𑀚𑁆𑀚𑀦𑁆𑀢𑀺. (𑁩)

𑁧𑁫𑁫. 𑀲𑀧𑁆𑀧𑀻𑀢𑀺𑀓𑁄 𑀘 𑀅𑀧𑁆𑀧𑀻𑀢𑀺𑀓𑁄 𑀘 𑀥𑀫𑁆𑀫𑀸 𑀲𑀧𑁆𑀧𑀻𑀢𑀺𑀓𑀲𑁆𑀲 𑀥𑀫𑁆𑀫𑀲𑁆𑀲 𑀅𑀥𑀺𑀧𑀢𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀆𑀭𑀫𑁆𑀫𑀡𑀸𑀥𑀺𑀧𑀢𑀺 𑁋 𑀲𑀧𑁆𑀧𑀻𑀢𑀺𑀓𑁂 𑀔𑀦𑁆𑀥𑁂 𑀘 𑀧𑀻𑀢𑀺𑀜𑁆𑀘 𑀕𑀭𑀼𑀁 𑀓𑀢𑁆𑀯𑀸 𑀲𑀧𑁆𑀧𑀻𑀢𑀺𑀓𑀸 𑀔𑀦𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. (𑀫𑀽𑀮𑀁 𑀓𑀸𑀢𑀩𑁆𑀩𑀁.) 𑀲𑀧𑁆𑀧𑀻𑀢𑀺𑀓𑁂 𑀔𑀦𑁆𑀥𑁂 𑀘 𑀧𑀻𑀢𑀺𑀜𑁆𑀘 𑀕𑀭𑀼𑀁 𑀓𑀢𑁆𑀯𑀸 𑀅𑀧𑁆𑀧𑀻𑀢𑀺𑀓𑀸 𑀔𑀦𑁆𑀥𑀸 𑀘 𑀧𑀻𑀢𑀺 𑀘 𑀉𑀧𑁆𑀧𑀚𑁆𑀚𑀦𑁆𑀢𑀺. (𑀫𑀽𑀮𑀁 𑀓𑀸𑀢𑀩𑁆𑀩𑀁.) 𑀲𑀧𑁆𑀧𑀻𑀢𑀺𑀓𑁂 𑀔𑀦𑁆𑀥𑁂 𑀘 𑀧𑀻𑀢𑀺𑀜𑁆𑀘 𑀕𑀭𑀼𑀁 𑀓𑀢𑁆𑀯𑀸 𑀲𑀧𑁆𑀧𑀻𑀢𑀺𑀓𑀸 𑀔𑀦𑁆𑀥𑀸 𑀘 𑀧𑀻𑀢𑀺 𑀘 𑀉𑀧𑁆𑀧𑀚𑁆𑀚𑀦𑁆𑀢𑀺. (𑁩)

𑀅𑀦𑀦𑁆𑀢𑀭𑀧𑀘𑁆𑀘𑀬𑀸𑀤𑀺

𑁧𑁫𑁬. 𑀲𑀧𑁆𑀧𑀻𑀢𑀺𑀓𑁄 𑀥𑀫𑁆𑀫𑁄 𑀲𑀧𑁆𑀧𑀻𑀢𑀺𑀓𑀲𑁆𑀲 𑀥𑀫𑁆𑀫𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑁋 𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀲𑀧𑁆𑀧𑀻𑀢𑀺𑀓𑀸 𑀔𑀦𑁆𑀥𑀸 𑀧𑀘𑁆𑀙𑀺𑀫𑀸𑀦𑀁 𑀧𑀘𑁆𑀙𑀺𑀫𑀸𑀦𑀁 𑀲𑀧𑁆𑀧𑀻𑀢𑀺𑀓𑀸𑀦𑀁 𑀔𑀦𑁆𑀥𑀸𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. (𑀫𑀽𑀮𑀁 𑀓𑀸𑀢𑀩𑁆𑀩𑀁.) 𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀲𑀧𑁆𑀧𑀻𑀢𑀺𑀓𑀸 𑀔𑀦𑁆𑀥𑀸 𑀧𑀘𑁆𑀙𑀺𑀫𑀸𑀬 𑀧𑀘𑁆𑀙𑀺𑀫𑀸𑀬 𑀧𑀻𑀢𑀺𑀬𑀸 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑁋 𑀲𑀧𑁆𑀧𑀻𑀢𑀺𑀓𑀁 𑀘𑀼𑀢𑀺𑀘𑀺𑀢𑁆𑀢𑀁 𑀅𑀧𑁆𑀧𑀻𑀢𑀺𑀓𑀲𑁆𑀲 𑀉𑀧𑀧𑀢𑁆𑀢𑀺𑀘𑀺𑀢𑁆𑀢𑀲𑁆𑀲, 𑀲𑀧𑁆𑀧𑀻𑀢𑀺𑀓𑀁 𑀪𑀯𑀗𑁆𑀕𑀁 𑀆𑀯𑀚𑁆𑀚𑀦𑀸𑀬, 𑀲𑀧𑁆𑀧𑀻𑀢𑀺𑀓𑀸 𑀔𑀦𑁆𑀥𑀸 𑀅𑀧𑁆𑀧𑀻𑀢𑀺𑀓𑀲𑁆𑀲 𑀯𑀼𑀝𑁆𑀞𑀸𑀦𑀲𑁆𑀲, 𑀧𑀻𑀢𑀺𑀲𑀳𑀕𑀢𑀸 𑀯𑀺𑀧𑀸𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀓𑀺𑀭𑀺𑀬𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸, 𑀲𑀧𑁆𑀧𑀻𑀢𑀺𑀓𑀁 𑀪𑀯𑀗𑁆𑀕𑀁 𑀅𑀧𑁆𑀧𑀻𑀢𑀺𑀓𑀲𑁆𑀲 𑀪𑀯𑀗𑁆𑀕𑀲𑁆𑀲, 𑀲𑀧𑁆𑀧𑀻𑀢𑀺𑀓𑀁 𑀓𑀼𑀲𑀮𑀸𑀓𑀼𑀲𑀮𑀁 𑀅𑀧𑁆𑀧𑀻𑀢𑀺𑀓𑀲𑁆𑀲 𑀯𑀼𑀝𑁆𑀞𑀸𑀦𑀲𑁆𑀲, 𑀓𑀺𑀭𑀺𑀬𑀁 𑀯𑀼𑀝𑁆𑀞𑀸𑀦𑀲𑁆𑀲, 𑀨𑀮𑀁 𑀯𑀼𑀝𑁆𑀞𑀸𑀦𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. (𑀫𑀽𑀮𑀁 𑀓𑀸𑀢𑀩𑁆𑀩𑀁.) 𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀲𑀧𑁆𑀧𑀻𑀢𑀺𑀓𑀸 𑀔𑀦𑁆𑀥𑀸 𑀧𑀘𑁆𑀙𑀺𑀫𑀸𑀦𑀁 𑀧𑀘𑁆𑀙𑀺𑀫𑀸𑀦𑀁 𑀲𑀧𑁆𑀧𑀻𑀢𑀺𑀓𑀸𑀦𑀁 𑀔𑀦𑁆𑀥𑀸𑀦𑀁 𑀧𑀻𑀢𑀺𑀬𑀸 𑀘 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. (𑁩)

𑁧𑁫𑁭. 𑀅𑀧𑁆𑀧𑀻𑀢𑀺𑀓𑁄 𑀥𑀫𑁆𑀫𑁄 𑀅𑀧𑁆𑀧𑀻𑀢𑀺𑀓𑀲𑁆𑀲 𑀥𑀫𑁆𑀫𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑁋 𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀧𑀻𑀢𑀺 𑀧𑀘𑁆𑀙𑀺𑀫𑀸𑀬 𑀧𑀘𑁆𑀙𑀺𑀫𑀸𑀬 𑀧𑀻𑀢𑀺𑀬𑀸 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄; 𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀅𑀧𑁆𑀧𑀻𑀢𑀺𑀓𑀸 𑀔𑀦𑁆𑀥𑀸 𑀧𑀘𑁆𑀙𑀺𑀫𑀸𑀦𑀁 𑀧𑀘𑁆𑀙𑀺𑀫𑀸𑀦𑀁 𑀅𑀧𑁆𑀧𑀻𑀢𑀺𑀓𑀸𑀦𑀁 𑀔𑀦𑁆𑀥𑀸𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄; 𑀅𑀦𑀼𑀮𑁄𑀫𑀁 𑀕𑁄𑀢𑁆𑀭𑀪𑀼𑀲𑁆𑀲…𑀧𑁂… 𑀅𑀧𑁆𑀧𑀻𑀢𑀺𑀓𑀸𑀬 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀧𑀻𑀢𑀺𑀬𑀸 𑀘 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. (𑀫𑀽𑀮𑀁 𑀓𑀸𑀢𑀩𑁆𑀩𑀁.) 𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀧𑀻𑀢𑀺 𑀧𑀘𑁆𑀙𑀺𑀫𑀸𑀦𑀁 𑀧𑀘𑁆𑀙𑀺𑀫𑀸𑀦𑀁 𑀲𑀧𑁆𑀧𑀻𑀢𑀺𑀓𑀸𑀦𑀁 𑀔𑀦𑁆𑀥𑀸𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄; 𑀅𑀧𑁆𑀧𑀻𑀢𑀺𑀓𑀁 𑀘𑀼𑀢𑀺𑀘𑀺𑀢𑁆𑀢𑀁 𑀲𑀧𑁆𑀧𑀻𑀢𑀺𑀓𑀲𑁆𑀲 𑀉𑀧𑀧𑀢𑁆𑀢𑀺𑀘𑀺𑀢𑁆𑀢𑀲𑁆𑀲, 𑀆𑀯𑀚𑁆𑀚𑀦𑀸 𑀲𑀧𑁆𑀧𑀻𑀢𑀺𑀓𑀸𑀦𑀁 𑀔𑀦𑁆𑀥𑀸𑀦𑀁, 𑀅𑀧𑁆𑀧𑀻𑀢𑀺𑀓𑀸 𑀔𑀦𑁆𑀥𑀸 𑀲𑀧𑁆𑀧𑀻𑀢𑀺𑀓𑀲𑁆𑀲 𑀯𑀼𑀝𑁆𑀞𑀸𑀦𑀲𑁆𑀲, 𑀯𑀺𑀧𑀸𑀓𑀫𑀦𑁄𑀥𑀸𑀢𑀼 𑀲𑀧𑁆𑀧𑀻𑀢𑀺𑀓𑀸𑀬 𑀯𑀺𑀧𑀸𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸, 𑀅𑀧𑁆𑀧𑀻𑀢𑀺𑀓𑀁 𑀪𑀯𑀗𑁆𑀕𑀁 𑀲𑀧𑁆𑀧𑀻𑀢𑀺𑀓𑀲𑁆𑀲 𑀪𑀯𑀗𑁆𑀕𑀲𑁆𑀲, 𑀅𑀧𑁆𑀧𑀻𑀢𑀺𑀓𑀁 𑀓𑀼𑀲𑀮𑀸𑀓𑀼𑀲𑀮𑀁 𑀲𑀧𑁆𑀧𑀻𑀢𑀺𑀓𑀲𑁆𑀲 𑀯𑀼𑀝𑁆𑀞𑀸𑀦𑀲𑁆𑀲, 𑀓𑀺𑀭𑀺𑀬𑀁 𑀯𑀼𑀝𑁆𑀞𑀸𑀦𑀲𑁆𑀲, 𑀨𑀮𑀁 𑀯𑀼𑀝𑁆𑀞𑀸𑀦𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄; 𑀦𑀺𑀭𑁄𑀥𑀸 𑀯𑀼𑀝𑁆𑀞𑀳𑀦𑁆𑀢𑀲𑁆𑀲 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀧𑁆𑀧𑀻𑀢𑀺𑀓𑀸𑀬 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. (𑁨)

𑀅𑀧𑁆𑀧𑀻𑀢𑀺𑀓𑁄 𑀥𑀫𑁆𑀫𑁄 𑀲𑀧𑁆𑀧𑀻𑀢𑀺𑀓𑀲𑁆𑀲 𑀘 𑀅𑀧𑁆𑀧𑀻𑀢𑀺𑀓𑀲𑁆𑀲 𑀘 𑀥𑀫𑁆𑀫𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑁋 𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀧𑀻𑀢𑀺 𑀧𑀘𑁆𑀙𑀺𑀫𑀸𑀦𑀁 𑀧𑀘𑁆𑀙𑀺𑀫𑀸𑀦𑀁 𑀲𑀧𑁆𑀧𑀻𑀢𑀺𑀓𑀸𑀦𑀁 𑀔𑀦𑁆𑀥𑀸𑀦𑀁 𑀧𑀻𑀢𑀺𑀬𑀸 𑀘 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. (𑁩)

𑁧𑁫𑁮. 𑀲𑀧𑁆𑀧𑀻𑀢𑀺𑀓𑁄 𑀘 𑀅𑀧𑁆𑀧𑀻𑀢𑀺𑀓𑁄 𑀘 𑀥𑀫𑁆𑀫𑀸 𑀲𑀧𑁆𑀧𑀻𑀢𑀺𑀓𑀲𑁆𑀲 𑀥𑀫𑁆𑀫𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑁋 𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀲𑀧𑁆𑀧𑀻𑀢𑀺𑀓𑀸 𑀔𑀦𑁆𑀥𑀸 𑀘 𑀧𑀻𑀢𑀺 𑀘 𑀧𑀘𑁆𑀙𑀺𑀫𑀸𑀦𑀁 𑀧𑀘𑁆𑀙𑀺𑀫𑀸𑀦𑀁 𑀲𑀧𑁆𑀧𑀻𑀢𑀺𑀓𑀸𑀦𑀁 𑀔𑀦𑁆𑀥𑀸𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. (𑁧)

𑀲𑀧𑁆𑀧𑀻𑀢𑀺𑀓𑁄 𑀘 𑀅𑀧𑁆𑀧𑀻𑀢𑀺𑀓𑁄 𑀘 𑀥𑀫𑁆𑀫𑀸 𑀅𑀧𑁆𑀧𑀻𑀢𑀺𑀓𑀲𑁆𑀲 𑀥𑀫𑁆𑀫𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑁋 𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀲𑀧𑁆𑀧𑀻𑀢𑀺𑀓𑀸 𑀔𑀦𑁆𑀥𑀸 𑀘 𑀧𑀻𑀢𑀺 𑀘 𑀧𑀘𑁆𑀙𑀺𑀫𑀸𑀬 𑀧𑀘𑁆𑀙𑀺𑀫𑀸𑀬 𑀧𑀻𑀢𑀺𑀬𑀸 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄; 𑀲𑀧𑁆𑀧𑀻𑀢𑀺𑀓𑀁 𑀘𑀼𑀢𑀺𑀘𑀺𑀢𑁆𑀢𑀜𑁆𑀘 𑀧𑀻𑀢𑀺 𑀘 𑀅𑀧𑁆𑀧𑀻𑀢𑀺𑀓𑀲𑁆𑀲 𑀉𑀧𑀧𑀢𑁆𑀢𑀺𑀘𑀺𑀢𑁆𑀢𑀲𑁆𑀲… 𑀲𑀧𑁆𑀧𑀻𑀢𑀺𑀓𑀁 𑀪𑀯𑀗𑁆𑀕𑀜𑁆𑀘 𑀧𑀻𑀢𑀺 𑀘 𑀆𑀯𑀚𑁆𑀚𑀦𑀸𑀬… 𑀲𑀧𑁆𑀧𑀻𑀢𑀺𑀓𑀸 𑀔𑀦𑁆𑀥𑀸 𑀘 𑀧𑀻𑀢𑀺 𑀘 𑀅𑀧𑁆𑀧𑀻𑀢𑀺𑀓𑀲𑁆𑀲 𑀯𑀼𑀝𑁆𑀞𑀸𑀦𑀲𑁆𑀲… 𑀲𑀧𑁆𑀧𑀻𑀢𑀺𑀓𑀸 𑀯𑀺𑀧𑀸𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀘 𑀧𑀻𑀢𑀺 𑀘 𑀓𑀺𑀭𑀺𑀬𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸… 𑀲𑀧𑁆𑀧𑀻𑀢𑀺𑀓𑀁 𑀪𑀯𑀗𑁆𑀕𑀜𑁆𑀘 𑀧𑀻𑀢𑀺 𑀘 𑀅𑀧𑁆𑀧𑀻𑀢𑀺𑀓𑀲𑁆𑀲 𑀪𑀯𑀗𑁆𑀕𑀲𑁆𑀲… 𑀲𑀧𑁆𑀧𑀻𑀢𑀺𑀓𑀁 𑀓𑀼𑀲𑀮𑀸𑀓𑀼𑀲𑀮𑀜𑁆𑀘 𑀧𑀻𑀢𑀺 𑀘 𑀅𑀧𑁆𑀧𑀻𑀢𑀺𑀓𑀲𑁆𑀲 𑀯𑀼𑀝𑁆𑀞𑀸𑀦𑀲𑁆𑀲… 𑀓𑀺𑀭𑀺𑀬𑀜𑁆𑀘 𑀧𑀻𑀢𑀺 𑀘 𑀯𑀼𑀝𑁆𑀞𑀸𑀦𑀲𑁆𑀲… 𑀨𑀮𑀜𑁆𑀘 𑀧𑀻𑀢𑀺 𑀘 𑀯𑀼𑀝𑁆𑀞𑀸𑀦𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. (𑁨)

𑀲𑀧𑁆𑀧𑀻𑀢𑀺𑀓𑁄 𑀘 𑀅𑀧𑁆𑀧𑀻𑀢𑀺𑀓𑁄 𑀘 𑀥𑀫𑁆𑀫𑀸 𑀲𑀧𑁆𑀧𑀻𑀢𑀺𑀓𑀲𑁆𑀲 𑀘 𑀅𑀧𑁆𑀧𑀻𑀢𑀺𑀓𑀲𑁆𑀲 𑀘 𑀥𑀫𑁆𑀫𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑁋 𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀲𑀧𑁆𑀧𑀻𑀢𑀺𑀓𑀸 𑀔𑀦𑁆𑀥𑀸 𑀘 𑀧𑀻𑀢𑀺 𑀘 𑀧𑀘𑁆𑀙𑀺𑀫𑀸𑀦𑀁 𑀧𑀘𑁆𑀙𑀺𑀫𑀸𑀦𑀁 𑀲𑀧𑁆𑀧𑀻𑀢𑀺𑀓𑀸𑀦𑀁 𑀔𑀦𑁆𑀥𑀸𑀦𑀁 𑀧𑀻𑀢𑀺𑀬𑀸 𑀘 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. (𑁩)

𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄… 𑀦𑀯… 𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄… 𑀦𑀯… 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄… 𑀦𑀯… 𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄… 𑀦𑀯.

𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄

𑁧𑁫𑁯. 𑀲𑀧𑁆𑀧𑀻𑀢𑀺𑀓𑁄 𑀥𑀫𑁆𑀫𑁄 𑀲𑀧𑁆𑀧𑀻𑀢𑀺𑀓𑀲𑁆𑀲 𑀥𑀫𑁆𑀫𑀲𑁆𑀲 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑁋 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁄, 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑁄, 𑀧𑀓𑀢𑀽𑀧𑀦𑀺𑀲𑁆𑀲𑀬𑁄…𑀧𑁂…. 𑀧𑀓𑀢𑀽𑀧𑀦𑀺𑀲𑁆𑀲𑀬𑁄 𑁋 𑀲𑀧𑁆𑀧𑀻𑀢𑀺𑀓𑀸 𑀔𑀦𑁆𑀥𑀸 𑀲𑀧𑁆𑀧𑀻𑀢𑀺𑀓𑀸𑀦𑀁 𑀔𑀦𑁆𑀥𑀸𑀦𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. (𑀫𑀽𑀮𑀁 𑀓𑀸𑀢𑀩𑁆𑀩𑀁.) 𑀲𑀧𑁆𑀧𑀻𑀢𑀺𑀓𑀸 𑀔𑀦𑁆𑀥𑀸 𑀅𑀧𑁆𑀧𑀻𑀢𑀺𑀓𑀸𑀦𑀁 𑀔𑀦𑁆𑀥𑀸𑀦𑀁 𑀧𑀻𑀢𑀺𑀬𑀸 𑀘 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. (𑀫𑀽𑀮𑀁 𑀓𑀸𑀢𑀩𑁆𑀩𑀁.) 𑀲𑀧𑁆𑀧𑀻𑀢𑀺𑀓𑀸 𑀔𑀦𑁆𑀥𑀸 𑀲𑀧𑁆𑀧𑀻𑀢𑀺𑀓𑀸𑀦𑀁 𑀔𑀦𑁆𑀥𑀸𑀦𑀁 𑀧𑀻𑀢𑀺𑀬𑀸 𑀘 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. (𑁩)

𑁧𑁬𑁦. 𑀅𑀧𑁆𑀧𑀻𑀢𑀺𑀓𑁄 𑀥𑀫𑁆𑀫𑁄 𑀅𑀧𑁆𑀧𑀻𑀢𑀺𑀓𑀲𑁆𑀲 𑀥𑀫𑁆𑀫𑀲𑁆𑀲 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑁋 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁄, 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑁄, 𑀧𑀓𑀢𑀽𑀧𑀦𑀺𑀲𑁆𑀲𑀬𑁄…𑀧𑁂…. 𑀧𑀓𑀢𑀽𑀧𑀦𑀺𑀲𑁆𑀲𑀬𑁄 𑁋 𑀅𑀧𑁆𑀧𑀻𑀢𑀺𑀓𑀁 𑀲𑀤𑁆𑀥𑀁 𑀉𑀧𑀦𑀺𑀲𑁆𑀲𑀸𑀬 𑀅𑀧𑁆𑀧𑀻𑀢𑀺𑀓𑁂𑀦 𑀘𑀺𑀢𑁆𑀢𑁂𑀦 𑀤𑀸𑀦𑀁 𑀤𑁂𑀢𑀺, 𑀲𑀻𑀮𑀁 𑀲𑀫𑀸𑀤𑀺𑀬𑀢𑀺, 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑁄𑀢𑀺; 𑀅𑀧𑁆𑀧𑀻𑀢𑀺𑀓𑀁 𑀛𑀸𑀦𑀁…𑀧𑁂… 𑀯𑀺𑀧𑀲𑁆𑀲𑀦𑀁… 𑀫𑀕𑁆𑀕𑀁… 𑀅𑀪𑀺𑀜𑁆𑀜𑀁… 𑀲𑀫𑀸𑀧𑀢𑁆𑀢𑀺𑀁 𑀉𑀧𑁆𑀧𑀸𑀤𑁂𑀢𑀺, 𑀫𑀸𑀦𑀁 𑀚𑀧𑁆𑀧𑁂𑀢𑀺, 𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀢𑀺; 𑀅𑀧𑁆𑀧𑀻𑀢𑀺𑀓𑀁 𑀲𑀻𑀮𑀁…𑀧𑁂… 𑀧𑀜𑁆𑀜𑀁… 𑀭𑀸𑀕𑀁… 𑀤𑁄𑀲𑀁… 𑀫𑁄𑀳𑀁… 𑀫𑀸𑀦𑀁… 𑀤𑀺𑀝𑁆𑀞𑀺𑀁… 𑀧𑀢𑁆𑀣𑀦𑀁… 𑀓𑀸𑀬𑀺𑀓𑀁 𑀲𑀼𑀔𑀁… 𑀓𑀸𑀬𑀺𑀓𑀁 𑀤𑀼𑀓𑁆𑀔𑀁… 𑀉𑀢𑀼𑀁… 𑀪𑁄𑀚𑀦𑀁… 𑀲𑁂𑀦𑀸𑀲𑀦𑀁… 𑀧𑀻𑀢𑀺𑀁 𑀉𑀧𑀦𑀺𑀲𑁆𑀲𑀸𑀬 𑀅𑀧𑁆𑀧𑀻𑀢𑀺𑀓𑁂𑀦 𑀘𑀺𑀢𑁆𑀢𑁂𑀦 𑀤𑀸𑀦𑀁 𑀤𑁂𑀢𑀺…𑀧𑁂… 𑀲𑀫𑀸𑀧𑀢𑁆𑀢𑀺𑀁 𑀉𑀧𑁆𑀧𑀸𑀤𑁂𑀢𑀺, 𑀧𑀸𑀡𑀁 𑀳𑀦𑀢𑀺…𑀧𑁂… 𑀲𑀗𑁆𑀖𑀁 𑀪𑀺𑀦𑁆𑀤𑀢𑀺; 𑀅𑀧𑁆𑀧𑀻𑀢𑀺𑀓𑀸 𑀲𑀤𑁆𑀥𑀸…𑀧𑁂… 𑀲𑁂𑀦𑀸𑀲𑀦𑀁 𑀧𑀻𑀢𑀺 𑀘 𑀅𑀧𑁆𑀧𑀻𑀢𑀺𑀓𑀸𑀬 𑀲𑀤𑁆𑀥𑀸𑀬…𑀧𑁂… 𑀧𑀢𑁆𑀣𑀦𑀸𑀬… 𑀓𑀸𑀬𑀺𑀓𑀲𑁆𑀲 𑀲𑀼𑀔𑀲𑁆𑀲… 𑀓𑀸𑀬𑀺𑀓𑀲𑁆𑀲 𑀤𑀼𑀓𑁆𑀔𑀲𑁆𑀲… 𑀫𑀕𑁆𑀕𑀲𑁆𑀲 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀧𑀻𑀢𑀺𑀬𑀸 𑀘 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. (𑁧)

𑀅𑀧𑁆𑀧𑀻𑀢𑀺𑀓𑁄 𑀥𑀫𑁆𑀫𑁄 𑀲𑀧𑁆𑀧𑀻𑀢𑀺𑀓𑀲𑁆𑀲 𑀥𑀫𑁆𑀫𑀲𑁆𑀲 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 (𑀢𑀻𑀡𑀺 𑀉𑀧𑀦𑀺𑀲𑁆𑀲𑀬𑀸). 𑀅𑀧𑁆𑀧𑀻𑀢𑀺𑀓𑀁 𑀲𑀤𑁆𑀥𑀁 𑀉𑀧𑀦𑀺𑀲𑁆𑀲𑀸𑀬 𑀲𑀧𑁆𑀧𑀻𑀢𑀺𑀓𑁂𑀦 𑀘𑀺𑀢𑁆𑀢𑁂𑀦 𑀤𑀸𑀦𑀁 𑀤𑁂𑀢𑀺…𑀧𑁂… 𑀅𑀧𑁆𑀧𑀻𑀢𑀺𑀓𑀸 𑀛𑀸𑀦𑀸…𑀧𑁂… 𑀫𑀸𑀦𑀁 𑀚𑀧𑁆𑀧𑁂𑀢𑀺, 𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀢𑀺; 𑀅𑀧𑁆𑀧𑀻𑀢𑀺𑀓𑀁 𑀲𑀻𑀮𑀁…𑀧𑁂… 𑀲𑁂𑀦𑀸𑀲𑀦𑀁 𑀧𑀻𑀢𑀺𑀁 𑀉𑀧𑀦𑀺𑀲𑁆𑀲𑀸𑀬 𑀲𑀧𑁆𑀧𑀻𑀢𑀺𑀓𑁂𑀦 𑀘𑀺𑀢𑁆𑀢𑁂𑀦 𑀤𑀸𑀦𑀁 𑀤𑁂𑀢𑀺…𑀧𑁂… 𑀲𑀫𑀸𑀧𑀢𑁆𑀢𑀺𑀁 𑀉𑀧𑁆𑀧𑀸𑀤𑁂𑀢𑀺; 𑀲𑀧𑁆𑀧𑀻𑀢𑀺𑀓𑁂𑀦 𑀘𑀺𑀢𑁆𑀢𑁂𑀦 𑀅𑀤𑀺𑀦𑁆𑀦𑀁 𑀆𑀤𑀺𑀬𑀢𑀺, 𑀫𑀼𑀲𑀸…𑀧𑁂… 𑀧𑀺𑀲𑀼𑀡𑀁…𑀧𑁂… 𑀲𑀫𑁆𑀨𑀁…𑀧𑁂… 𑀲𑀦𑁆𑀥𑀺𑀁…𑀧𑁂… 𑀦𑀺𑀮𑁆𑀮𑁄𑀧𑀁…𑀧𑁂… 𑀏𑀓𑀸𑀕𑀸𑀭𑀺𑀓𑀁…𑀧𑁂… 𑀧𑀭𑀺𑀧𑀦𑁆𑀣𑁂…𑀧𑁂… 𑀧𑀭𑀤𑀸𑀭𑀁…𑀧𑁂… 𑀕𑀸𑀫𑀖𑀸𑀢𑀁…𑀧𑁂… 𑀦𑀺𑀕𑀫𑀖𑀸𑀢𑀁 𑀓𑀭𑁄𑀢𑀺; 𑀅𑀧𑁆𑀧𑀻𑀢𑀺𑀓𑀸 𑀲𑀤𑁆𑀥𑀸…𑀧𑁂… 𑀲𑁂𑀦𑀸𑀲𑀦𑀁 𑀧𑀻𑀢𑀺 𑀘 𑀲𑀧𑁆𑀧𑀻𑀢𑀺𑀓𑀸𑀬 𑀲𑀤𑁆𑀥𑀸𑀬…𑀧𑁂… 𑀧𑀜𑁆𑀜𑀸𑀬 𑀭𑀸𑀕𑀲𑁆𑀲, 𑀫𑁄𑀳𑀲𑁆𑀲… 𑀫𑀸𑀦𑀲𑁆𑀲… 𑀤𑀺𑀝𑁆𑀞𑀺𑀬𑀸… 𑀧𑀢𑁆𑀣𑀦𑀸𑀬… 𑀫𑀕𑁆𑀕𑀲𑁆𑀲, 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. (𑁨)

𑀅𑀧𑁆𑀧𑀻𑀢𑀺𑀓𑁄 𑀥𑀫𑁆𑀫𑁄 𑀲𑀧𑁆𑀧𑀻𑀢𑀺𑀓𑀲𑁆𑀲 𑀘 𑀅𑀧𑁆𑀧𑀻𑀢𑀺𑀓𑀲𑁆𑀲 𑀘 𑀥𑀫𑁆𑀫𑀲𑁆𑀲 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 (𑀢𑀻𑀡𑀺 𑀉𑀧𑀦𑀺𑀲𑁆𑀲𑀬𑀸). 𑀅𑀧𑁆𑀧𑀻𑀢𑀺𑀓𑀁 𑀲𑀤𑁆𑀥𑀁 𑀉𑀧𑀦𑀺𑀲𑁆𑀲𑀸𑀬 𑀲𑀧𑁆𑀧𑀻𑀢𑀺𑀓𑁂𑀦 𑀘𑀺𑀢𑁆𑀢𑁂𑀦 𑀤𑀸𑀦𑀁 𑀤𑁂𑀢𑀺…𑀧𑁂… 𑀲𑀫𑀸𑀧𑀢𑁆𑀢𑀺𑀁 𑀉𑀧𑁆𑀧𑀸𑀤𑁂𑀢𑀺, 𑀫𑀸𑀦𑀁 𑀚𑀧𑁆𑀧𑁂𑀢𑀺, 𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀢𑀺; 𑀅𑀧𑁆𑀧𑀻𑀢𑀺𑀓𑀁 𑀲𑀻𑀮𑀁…𑀧𑁂… 𑀲𑁂𑀦𑀸𑀲𑀦𑀁 𑀧𑀻𑀢𑀺𑀁 𑀉𑀧𑀦𑀺𑀲𑁆𑀲𑀸𑀬 𑀲𑀧𑁆𑀧𑀻𑀢𑀺𑀓𑁂𑀦 𑀘𑀺𑀢𑁆𑀢𑁂𑀦 𑀤𑀸𑀦𑀁 𑀤𑁂𑀢𑀺…𑀧𑁂… 𑀲𑀫𑀸𑀧𑀢𑁆𑀢𑀺𑀁 𑀉𑀧𑁆𑀧𑀸𑀤𑁂𑀢𑀺; 𑀲𑀧𑁆𑀧𑀻𑀢𑀺𑀓𑁂𑀦 𑀘𑀺𑀢𑁆𑀢𑁂𑀦 𑀅𑀤𑀺𑀦𑁆𑀦𑀁 𑀆𑀤𑀺𑀬𑀢𑀺…𑀧𑁂… (𑀤𑀼𑀢𑀺𑀬𑀯𑀸𑀭𑀲𑀤𑀺𑀲𑀁) 𑀦𑀺𑀕𑀫𑀖𑀸𑀢𑀁 𑀓𑀭𑁄𑀢𑀺; 𑀅𑀧𑁆𑀧𑀻𑀢𑀺𑀓𑀸 𑀲𑀤𑁆𑀥𑀸…𑀧𑁂… 𑀲𑁂𑀦𑀸𑀲𑀦𑀁 𑀧𑀻𑀢𑀺 𑀘 𑀲𑀧𑁆𑀧𑀻𑀢𑀺𑀓𑀸𑀬 𑀲𑀤𑁆𑀥𑀸𑀬…𑀧𑁂… 𑀧𑀜𑁆𑀜𑀸𑀬… 𑀭𑀸𑀕𑀲𑁆𑀲… 𑀫𑁄𑀳𑀲𑁆𑀲… 𑀫𑀸𑀦𑀲𑁆𑀲… 𑀤𑀺𑀝𑁆𑀞𑀺𑀬𑀸… 𑀧𑀢𑁆𑀣𑀦𑀸𑀬… 𑀫𑀕𑁆𑀕𑀲𑁆𑀲, 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀧𑀻𑀢𑀺𑀬𑀸 𑀘 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. (𑁩)

𑀲𑀧𑁆𑀧𑀻𑀢𑀺𑀓𑁄 𑀘 𑀅𑀧𑁆𑀧𑀻𑀢𑀺𑀓𑁄 𑀘 𑀥𑀫𑁆𑀫𑀸 𑀲𑀧𑁆𑀧𑀻𑀢𑀺𑀓𑀲𑁆𑀲 𑀥𑀫𑁆𑀫𑀲𑁆𑀲 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 (𑀢𑀻𑀡𑀺𑀧𑀺 𑀉𑀧𑀦𑀺𑀲𑁆𑀲𑀬𑀸). 𑀲𑀧𑁆𑀧𑀻𑀢𑀺𑀓𑀸 𑀔𑀦𑁆𑀥𑀸 𑀘 𑀧𑀻𑀢𑀺 𑀘 𑀲𑀧𑁆𑀧𑀻𑀢𑀺𑀓𑀸𑀦𑀁 𑀔𑀦𑁆𑀥𑀸𑀦𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. (𑀫𑀽𑀮𑀁 𑀓𑀸𑀢𑀩𑁆𑀩𑀁.) 𑀲𑀧𑁆𑀧𑀻𑀢𑀺𑀓𑀸 𑀔𑀦𑁆𑀥𑀸 𑀘 𑀧𑀻𑀢𑀺 𑀘 𑀅𑀧𑁆𑀧𑀻𑀢𑀺𑀓𑀸𑀦𑀁 𑀔𑀦𑁆𑀥𑀸𑀦𑀁 𑀧𑀻𑀢𑀺𑀬𑀸 𑀘 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. (𑀫𑀽𑀮𑀁 𑀓𑀸𑀢𑀩𑁆𑀩𑀁.) 𑀲𑀧𑁆𑀧𑀻𑀢𑀺𑀓𑀸 𑀔𑀦𑁆𑀥𑀸 𑀘 𑀧𑀻𑀢𑀺 𑀘 𑀲𑀧𑁆𑀧𑀻𑀢𑀺𑀓𑀸𑀦𑀁 𑀔𑀦𑁆𑀥𑀸𑀦𑀁 𑀧𑀻𑀢𑀺𑀬𑀸 𑀘 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. (𑁩)

𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄

𑁧𑁬𑁧. 𑀅𑀧𑁆𑀧𑀻𑀢𑀺𑀓𑁄 𑀥𑀫𑁆𑀫𑁄 𑀅𑀧𑁆𑀧𑀻𑀢𑀺𑀓𑀲𑁆𑀲 𑀥𑀫𑁆𑀫𑀲𑁆𑀲 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑁋 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀁, 𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑀁. 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀁 𑁋 𑀘𑀓𑁆𑀔𑀼𑀁…𑀧𑁂… 𑀯𑀢𑁆𑀣𑀼𑀁 𑀅𑀧𑁆𑀧𑀻𑀢𑀺𑀓𑁂𑀦 𑀘𑀺𑀢𑁆𑀢𑁂𑀦 𑀅𑀦𑀺𑀘𑁆𑀘𑀢𑁄…𑀧𑁂… 𑀯𑀺𑀧𑀲𑁆𑀲𑀢𑀺, 𑀅𑀲𑁆𑀲𑀸𑀤𑁂𑀢𑀺 𑀅𑀪𑀺𑀦𑀦𑁆𑀤𑀢𑀺, 𑀢𑀁 𑀆𑀭𑀩𑁆𑀪 𑀅𑀧𑁆𑀧𑀻𑀢𑀺𑀓𑁄 𑀭𑀸𑀕𑁄…𑀧𑁂… 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺, 𑀧𑀻𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀧𑀲𑁆𑀲𑀢𑀺…𑀧𑁂… 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀓𑀸𑀬𑀯𑀺𑀜𑁆𑀜𑀸𑀡𑀲𑁆𑀲…𑀧𑁂…. 𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑀁 𑁋 𑀘𑀓𑁆𑀔𑀸𑀬𑀢𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲…𑀧𑁂… 𑀓𑀸𑀬𑀸𑀬𑀢𑀦𑀁 𑀓𑀸𑀬𑀯𑀺𑀜𑁆𑀜𑀸𑀡𑀲𑁆𑀲…𑀧𑁂… 𑀯𑀢𑁆𑀣𑀼 𑀅𑀧𑁆𑀧𑀻𑀢𑀺𑀓𑀸𑀦𑀁 𑀔𑀦𑁆𑀥𑀸𑀦𑀁 𑀧𑀻𑀢𑀺𑀬𑀸 𑀘 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. (𑁧)

𑀅𑀧𑁆𑀧𑀻𑀢𑀺𑀓𑁄 𑀥𑀫𑁆𑀫𑁄 𑀲𑀧𑁆𑀧𑀻𑀢𑀺𑀓𑀲𑁆𑀲 𑀥𑀫𑁆𑀫𑀲𑁆𑀲 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑁋 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀁, 𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑀁. 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀁 𑁋 𑀘𑀓𑁆𑀔𑀼𑀁…𑀧𑁂… 𑀯𑀢𑁆𑀣𑀼𑀁 𑀲𑀧𑁆𑀧𑀻𑀢𑀺𑀓𑁂𑀦 𑀘𑀺𑀢𑁆𑀢𑁂𑀦 𑀅𑀦𑀺𑀘𑁆𑀘𑀢𑁄…𑀧𑁂… 𑀯𑀺𑀧𑀲𑁆𑀲𑀢𑀺, 𑀅𑀲𑁆𑀲𑀸𑀤𑁂𑀢𑀺 𑀅𑀪𑀺𑀦𑀦𑁆𑀤𑀢𑀺, 𑀢𑀁 𑀆𑀭𑀩𑁆𑀪 𑀲𑀧𑁆𑀧𑀻𑀢𑀺𑀓𑁄 𑀭𑀸𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺. 𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑀁 𑁋 𑀯𑀢𑁆𑀣𑀼 𑀲𑀧𑁆𑀧𑀻𑀢𑀺𑀓𑀸𑀦𑀁 𑀔𑀦𑁆𑀥𑀸𑀦𑀁 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. (𑁨)

𑀅𑀧𑁆𑀧𑀻𑀢𑀺𑀓𑁄 𑀥𑀫𑁆𑀫𑁄 𑀲𑀧𑁆𑀧𑀻𑀢𑀺𑀓𑀲𑁆𑀲 𑀘 𑀅𑀧𑁆𑀧𑀻𑀢𑀺𑀓𑀲𑁆𑀲 𑀘 𑀥𑀫𑁆𑀫𑀲𑁆𑀲 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑁋 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀁, 𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑀁. 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀁 𑁋 𑀘𑀓𑁆𑀔𑀼𑀁…𑀧𑁂… 𑀯𑀢𑁆𑀣𑀼𑀁 𑀲𑀧𑁆𑀧𑀻𑀢𑀺𑀓𑁂𑀦 𑀘𑀺𑀢𑁆𑀢𑁂𑀦 𑀅𑀦𑀺𑀘𑁆𑀘𑀢𑁄…𑀧𑁂… 𑀯𑀺𑀧𑀲𑁆𑀲𑀢𑀺 𑀅𑀲𑁆𑀲𑀸𑀤𑁂𑀢𑀺 𑀅𑀪𑀺𑀦𑀦𑁆𑀤𑀢𑀺, 𑀢𑀁 𑀆𑀭𑀩𑁆𑀪 𑀧𑀻𑀢𑀺 𑀘 𑀲𑀫𑁆𑀧𑀬𑀼𑀢𑁆𑀢𑀓𑀸 𑀔𑀦𑁆𑀥𑀸 𑀘 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑀁 𑁋 𑀯𑀢𑁆𑀣𑀼 𑀲𑀧𑁆𑀧𑀻𑀢𑀺𑀓𑀸𑀦𑀁 𑀔𑀦𑁆𑀥𑀸𑀦𑀁 𑀧𑀻𑀢𑀺𑀬𑀸 𑀘 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. (𑁩)

𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀸𑀤𑀺

𑁧𑁬𑁨. 𑀲𑀧𑁆𑀧𑀻𑀢𑀺𑀓𑁄 𑀥𑀫𑁆𑀫𑁄 𑀅𑀧𑁆𑀧𑀻𑀢𑀺𑀓𑀲𑁆𑀲 𑀥𑀫𑁆𑀫𑀲𑁆𑀲 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄… 𑀢𑀻𑀡𑀺… 𑀆𑀲𑁂𑀯𑀦𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄… 𑀦𑀯… 𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄… 𑀙 (𑀲𑀳𑀚𑀸𑀢𑀸𑀧𑀺 𑀦𑀸𑀦𑀸𑀓𑁆𑀔𑀡𑀺𑀓𑀸𑀧𑀺 𑀓𑀸𑀢𑀩𑁆𑀩𑀸… 𑀤𑁆𑀯𑁂 𑀦𑀸𑀦𑀸𑀓𑁆𑀔𑀡𑀺𑀓𑀸)… 𑀯𑀺𑀧𑀸𑀓𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄… 𑀦𑀯… 𑀆𑀳𑀸𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄… 𑀘𑀢𑁆𑀢𑀸𑀭𑀺… 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄… 𑀘𑀢𑁆𑀢𑀸𑀭𑀺… 𑀛𑀸𑀦𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄… 𑀦𑀯… 𑀫𑀕𑁆𑀕𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄… 𑀘𑀢𑁆𑀢𑀸𑀭𑀺… 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄… 𑀙… 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄… 𑀧𑀜𑁆𑀘… 𑀅𑀢𑁆𑀣𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄… 𑀦𑀯 (𑀲𑀁𑀔𑀺𑀢𑁆𑀢𑀁. 𑀲𑀯𑀺𑀢𑀓𑁆𑀓𑀤𑀼𑀓𑀲𑀤𑀺𑀲𑀁 𑀓𑀸𑀢𑀩𑁆𑀩𑀁.)… 𑀦𑀢𑁆𑀣𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄… 𑀯𑀺𑀕𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄… 𑀅𑀯𑀺𑀕𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄… 𑀦𑀯.