𑁧. 𑀯𑀺𑀪𑀗𑁆𑀕𑀯𑀸𑀭𑁄

𑀳𑁂𑀢𑀼𑀧𑀘𑁆𑀘𑀬𑁄

𑁮. 𑀲𑀧𑁆𑀧𑀘𑁆𑀘𑀬𑁄 𑀥𑀫𑁆𑀫𑁄 𑀲𑀧𑁆𑀧𑀘𑁆𑀘𑀬𑀲𑁆𑀲 𑀥𑀫𑁆𑀫𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑁋 𑀲𑀧𑁆𑀧𑀘𑁆𑀘𑀬𑀸 𑀳𑁂𑀢𑀽 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀔𑀦𑁆𑀥𑀸𑀦𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄; 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂…𑀧𑁂….

𑀆𑀭𑀫𑁆𑀫𑀡𑀧𑀘𑁆𑀘𑀬𑁄

𑁯. 𑀲𑀧𑁆𑀧𑀘𑁆𑀘𑀬𑁄 𑀥𑀫𑁆𑀫𑁄 𑀲𑀧𑁆𑀧𑀘𑁆𑀘𑀬𑀲𑁆𑀲 𑀥𑀫𑁆𑀫𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑁋 𑀤𑀸𑀦𑀁 𑀤𑀢𑁆𑀯𑀸, 𑀲𑀻𑀮𑀁 𑀲𑀫𑀸𑀤𑀺𑀬𑀺𑀢𑁆𑀯𑀸, 𑀉𑀧𑁄𑀲𑀣𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀧𑀼𑀩𑁆𑀩𑁂 𑀲𑀼𑀘𑀺𑀡𑁆𑀡𑀸𑀦𑀺…𑀧𑁂… 𑀛𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸…𑀧𑁂… 𑀅𑀭𑀺𑀬𑀸 𑀫𑀕𑁆𑀕𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀫𑀕𑁆𑀕𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀺, 𑀨𑀮𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀺; 𑀧𑀳𑀻𑀦𑁂 𑀓𑀺𑀮𑁂𑀲𑁂…𑀧𑁂… 𑀯𑀺𑀓𑁆𑀔𑀫𑁆𑀪𑀺𑀢𑁂 𑀓𑀺𑀮𑁂𑀲𑁂…𑀧𑁂… 𑀧𑀼𑀩𑁆𑀩𑁂 𑀲𑀫𑀼𑀤𑀸𑀘𑀺𑀡𑁆𑀡𑁂 𑀓𑀺𑀮𑁂𑀲𑁂 𑀚𑀸𑀦𑀦𑁆𑀢𑀺, 𑀘𑀓𑁆𑀔𑀼𑀁…𑀧𑁂… 𑀯𑀢𑁆𑀣𑀼𑀁… 𑀲𑀧𑁆𑀧𑀘𑁆𑀘𑀬𑁂 𑀔𑀦𑁆𑀥𑁂 𑀅𑀦𑀺𑀘𑁆𑀘𑀢𑁄…𑀧𑁂… 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺; 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀧𑀲𑁆𑀲𑀢𑀺, 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸 𑀲𑀤𑁆𑀤𑀁 𑀲𑀼𑀡𑀸𑀢𑀺. 𑀘𑁂𑀢𑁄𑀧𑀭𑀺𑀬𑀜𑀸𑀡𑁂𑀦 𑀲𑀧𑁆𑀧𑀘𑁆𑀘𑀬𑀘𑀺𑀢𑁆𑀢𑀲𑀫𑀗𑁆𑀕𑀺𑀲𑁆𑀲 𑀘𑀺𑀢𑁆𑀢𑀁 𑀚𑀸𑀦𑀸𑀢𑀺, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑁆𑀲…𑀧𑁂… 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑁆𑀲…𑀧𑁂… 𑀭𑀽𑀧𑀸𑀬𑀢𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲…𑀧𑁂… 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀓𑀸𑀬𑀯𑀺𑀜𑁆𑀜𑀸𑀡𑀲𑁆𑀲…𑀧𑁂… 𑀲𑀧𑁆𑀧𑀘𑁆𑀘𑀬𑀸 𑀔𑀦𑁆𑀥𑀸 𑀇𑀤𑁆𑀥𑀺𑀯𑀺𑀥𑀜𑀸𑀡𑀲𑁆𑀲, 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲, 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀲𑁆𑀲, 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑀲𑁆𑀲, 𑀅𑀦𑀸𑀕𑀢𑀁𑀲𑀜𑀸𑀡𑀲𑁆𑀲, 𑀆𑀯𑀚𑁆𑀚𑀦𑀸𑀬 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. (𑁧)

𑀅𑀧𑁆𑀧𑀘𑁆𑀘𑀬𑁄 𑀥𑀫𑁆𑀫𑁄 𑀲𑀧𑁆𑀧𑀘𑁆𑀘𑀬𑀲𑁆𑀲 𑀥𑀫𑁆𑀫𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑁋 𑀅𑀭𑀺𑀬𑀸 𑀦𑀺𑀩𑁆𑀩𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀺; 𑀦𑀺𑀩𑁆𑀩𑀸𑀦𑀁 𑀕𑁄𑀢𑁆𑀭𑀪𑀼𑀲𑁆𑀲, 𑀯𑁄𑀤𑀸𑀦𑀲𑁆𑀲, 𑀫𑀕𑁆𑀕𑀲𑁆𑀲, 𑀨𑀮𑀲𑁆𑀲, 𑀆𑀯𑀚𑁆𑀚𑀦𑀸𑀬 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. (𑁧)

𑀅𑀥𑀺𑀧𑀢𑀺𑀧𑀘𑁆𑀘𑀬𑁄

𑁧𑁦. 𑀲𑀧𑁆𑀧𑀘𑁆𑀘𑀬𑁄 𑀥𑀫𑁆𑀫𑁄 𑀲𑀧𑁆𑀧𑀘𑁆𑀘𑀬𑀲𑁆𑀲 𑀥𑀫𑁆𑀫𑀲𑁆𑀲 𑀅𑀥𑀺𑀧𑀢𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑁋 𑀆𑀭𑀫𑁆𑀫𑀡𑀸𑀥𑀺𑀧𑀢𑀺, 𑀲𑀳𑀚𑀸𑀢𑀸𑀥𑀺𑀧𑀢𑀺. 𑀆𑀭𑀫𑁆𑀫𑀡𑀸𑀥𑀺𑀧𑀢𑀺 𑁋 𑀤𑀸𑀦𑀁 𑀤𑀢𑁆𑀯𑀸 𑀲𑀻𑀮𑀁…𑀧𑁂… 𑀉𑀧𑁄𑀲𑀣𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀕𑀭𑀼𑀁 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀧𑀼𑀩𑁆𑀩𑁂…𑀧𑁂… 𑀛𑀸𑀦𑀸…𑀧𑁂… 𑀅𑀭𑀺𑀬𑀸 𑀫𑀕𑁆𑀕𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀫𑀕𑁆𑀕𑀁 𑀕𑀭𑀼𑀁 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀺, 𑀨𑀮𑀁 𑀕𑀭𑀼𑀁 𑀓𑀢𑁆𑀯𑀸…𑀧𑁂… 𑀘𑀓𑁆𑀔𑀼𑀁…𑀧𑁂… 𑀯𑀢𑁆𑀣𑀼𑀁… 𑀲𑀧𑁆𑀧𑀘𑁆𑀘𑀬𑁂 𑀔𑀦𑁆𑀥𑁂 𑀕𑀭𑀼𑀁 𑀓𑀢𑁆𑀯𑀸 𑀅𑀲𑁆𑀲𑀸𑀤𑁂𑀢𑀺 𑀅𑀪𑀺𑀦𑀦𑁆𑀤𑀢𑀺; 𑀢𑀁 𑀕𑀭𑀼𑀁 𑀓𑀢𑁆𑀯𑀸 𑀭𑀸𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺. 𑀲𑀳𑀚𑀸𑀢𑀸𑀥𑀺𑀧𑀢𑀺 𑁋 𑀲𑀧𑁆𑀧𑀘𑁆𑀘𑀬𑀸𑀥𑀺𑀧𑀢𑀺 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀔𑀦𑁆𑀥𑀸𑀦𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀅𑀥𑀺𑀧𑀢𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. (𑁧)

𑀅𑀧𑁆𑀧𑀘𑁆𑀘𑀬𑁄 𑀥𑀫𑁆𑀫𑁄 𑀲𑀧𑁆𑀧𑀘𑁆𑀘𑀬𑀲𑁆𑀲 𑀥𑀫𑁆𑀫𑀲𑁆𑀲 𑀅𑀥𑀺𑀧𑀢𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀆𑀭𑀫𑁆𑀫𑀡𑀸𑀥𑀺𑀧𑀢𑀺 𑁋 𑀅𑀭𑀺𑀬𑀸 𑀦𑀺𑀩𑁆𑀩𑀸𑀦𑀁 𑀕𑀭𑀼𑀁 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀺; 𑀦𑀺𑀩𑁆𑀩𑀸𑀦𑀁 𑀕𑁄𑀢𑁆𑀭𑀪𑀼𑀲𑁆𑀲, 𑀯𑁄𑀤𑀸𑀦𑀲𑁆𑀲, 𑀫𑀕𑁆𑀕𑀲𑁆𑀲, 𑀨𑀮𑀲𑁆𑀲 𑀅𑀥𑀺𑀧𑀢𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. (𑁧)

𑀅𑀦𑀦𑁆𑀢𑀭𑀧𑀘𑁆𑀘𑀬𑀸𑀤𑀺

𑁧𑁧. 𑀲𑀧𑁆𑀧𑀘𑁆𑀘𑀬𑁄 𑀥𑀫𑁆𑀫𑁄 𑀲𑀧𑁆𑀧𑀘𑁆𑀘𑀬𑀲𑁆𑀲 𑀥𑀫𑁆𑀫𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄…𑀧𑁂… 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄…𑀧𑁂… (𑀤𑁆𑀯𑁂 𑀧𑀜𑁆𑀳𑀸 𑀉𑀧𑀦𑀺𑀲𑁆𑀲𑀬𑀫𑀽𑀮𑀁) 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄…𑀧𑁂… 𑀅𑀯𑀺𑀕𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 (𑀲𑀩𑁆𑀩𑀢𑁆𑀣 𑀏𑀓𑀸𑀬𑁂𑀯 𑀧𑀜𑁆𑀳𑀸).