𑁧. 𑀯𑀺𑀪𑀗𑁆𑀕𑀯𑀸𑀭𑁄

𑀦𑀳𑁂𑀢𑀼𑀧𑀘𑁆𑀘𑀬𑁄

𑁨𑁪𑁩. 𑀘𑀺𑀢𑁆𑀢𑀲𑀳𑀪𑀼𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀘𑀺𑀢𑁆𑀢𑀲𑀳𑀪𑀽 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀦𑀳𑁂𑀢𑀼𑀧𑀘𑁆𑀘𑀬𑀸 𑁋 𑀅𑀳𑁂𑀢𑀼𑀓𑀁 𑀘𑀺𑀢𑁆𑀢𑀲𑀳𑀪𑀼𑀁 𑀏𑀓𑀁 𑀔𑀦𑁆𑀥𑀁 𑀧𑀝𑀺𑀘𑁆𑀘 𑀤𑁆𑀯𑁂 𑀔𑀦𑁆𑀥𑀸 𑀘𑀺𑀢𑁆𑀢𑀲𑀳𑀪𑀼 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀜𑁆𑀘 𑀭𑀽𑀧𑀁, 𑀤𑁆𑀯𑁂 𑀔𑀦𑁆𑀥𑁂…𑀧𑁂… 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂…𑀧𑁂… 𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑁂 𑀉𑀤𑁆𑀥𑀘𑁆𑀘𑀲𑀳𑀕𑀢𑁂 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑁄 𑀉𑀤𑁆𑀥𑀘𑁆𑀘𑀲𑀳𑀕𑀢𑁄 𑀫𑁄𑀳𑁄. (𑀏𑀯𑀁 𑀦𑀯𑀧𑀺 𑀧𑀜𑁆𑀳𑀸 𑀓𑀸𑀢𑀩𑁆𑀩𑀸. ‘‘𑀅𑀳𑁂𑀢𑀼𑀓’’𑀦𑁆𑀢𑀺 𑀦𑀺𑀬𑀸𑀫𑁂𑀢𑀩𑁆𑀩𑀁. 𑀬𑀣𑀸 𑀅𑀦𑀼𑀮𑁄𑀫𑁂 𑀮𑀩𑁆𑀪𑀢𑀺 𑀏𑀯𑀁 𑀓𑀸𑀢𑀩𑁆𑀩𑀁. 𑀢𑀻𑀡𑀺 𑀫𑁄𑀳𑁄 𑀬𑀣𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀤𑀼𑀓𑁂 𑀏𑀯𑀫𑁂𑀯 𑀓𑀸𑀢𑀩𑁆𑀩𑀸.)

𑀦𑀓𑀫𑁆𑀫𑀧𑀘𑁆𑀘𑀬𑁄

𑁨𑁪𑁪. 𑀘𑀺𑀢𑁆𑀢𑀲𑀳𑀪𑀼𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀘𑀺𑀢𑁆𑀢𑀲𑀳𑀪𑀽 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀦𑀓𑀫𑁆𑀫𑀧𑀘𑁆𑀘𑀬𑀸 𑁋 𑀘𑀺𑀢𑁆𑀢𑀲𑀳𑀪𑀽 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀘𑀺𑀢𑁆𑀢𑀲𑀳𑀪𑀽 𑀘𑁂𑀢𑀦𑀸.

𑀦𑁄𑀘𑀺𑀢𑁆𑀢𑀲𑀳𑀪𑀼𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀦𑁄𑀘𑀺𑀢𑁆𑀢𑀲𑀳𑀪𑀽 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀦𑀓𑀫𑁆𑀫𑀧𑀘𑁆𑀘𑀬𑀸 𑁋 𑀩𑀸𑀳𑀺𑀭𑀁… 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀁… 𑀉𑀢𑀼𑀲𑀫𑀼𑀝𑁆𑀞𑀸𑀦𑀁…𑀧𑁂….

𑀦𑁄𑀘𑀺𑀢𑁆𑀢𑀲𑀳𑀪𑀼𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀘𑀺𑀢𑁆𑀢𑀲𑀳𑀪𑀽 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀦𑀓𑀫𑁆𑀫𑀧𑀘𑁆𑀘𑀬𑀸 𑁋 𑀘𑀺𑀢𑁆𑀢𑀁 𑀧𑀝𑀺𑀘𑁆𑀘 𑀲𑀫𑁆𑀧𑀬𑀼𑀢𑁆𑀢𑀓𑀸 𑀘𑁂𑀢𑀦𑀸.

𑀘𑀺𑀢𑁆𑀢𑀲𑀳𑀪𑀼𑀜𑁆𑀘 𑀦𑁄𑀘𑀺𑀢𑁆𑀢𑀲𑀳𑀪𑀼𑀜𑁆𑀘 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀘𑀺𑀢𑁆𑀢𑀲𑀳𑀪𑀽 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀦𑀓𑀫𑁆𑀫𑀧𑀘𑁆𑀘𑀬𑀸 𑁋 𑀘𑀺𑀢𑁆𑀢𑀲𑀳𑀪𑀽 𑀔𑀦𑁆𑀥𑁂 𑀘 𑀘𑀺𑀢𑁆𑀢𑀜𑁆𑀘 𑀧𑀝𑀺𑀘𑁆𑀘 𑀲𑀫𑁆𑀧𑀬𑀼𑀢𑁆𑀢𑀓𑀸 𑀘𑁂𑀢𑀦𑀸.

𑀦𑀛𑀸𑀦𑀧𑀘𑁆𑀘𑀬𑁄

𑁨𑁪𑁫. 𑀘𑀺𑀢𑁆𑀢𑀲𑀳𑀪𑀼𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀘𑀺𑀢𑁆𑀢𑀲𑀳𑀪𑀽 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀦𑀛𑀸𑀦𑀧𑀘𑁆𑀘𑀬𑀸 𑁋 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀳𑀕𑀢𑀁…𑀧𑁂….