𑁮. 𑀲𑀢𑀺𑀧𑀝𑁆𑀞𑀸𑀦𑀓𑀣𑀸

𑁩𑁦𑁧. 𑀲𑀩𑁆𑀩𑁂 𑀥𑀫𑁆𑀫𑀸 𑀲𑀢𑀺𑀧𑀝𑁆𑀞𑀸𑀦𑀸𑀢𑀺? 𑀆𑀫𑀦𑁆𑀢𑀸. 𑀲𑀩𑁆𑀩𑁂 𑀥𑀫𑁆𑀫𑀸 𑀲𑀢𑀺 𑀲𑀢𑀺𑀦𑁆𑀤𑁆𑀭𑀺𑀬𑀁 𑀲𑀢𑀺𑀩𑀮𑀁 𑀲𑀫𑁆𑀫𑀸𑀲𑀢𑀺 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀏𑀓𑀸𑀬𑀦𑀫𑀕𑁆𑀕𑁄 𑀔𑀬𑀕𑀸𑀫𑀻 𑀩𑁄𑀥𑀕𑀸𑀫𑀻 𑀅𑀧𑀘𑀬𑀕𑀸𑀫𑀻 𑀅𑀦𑀸𑀲𑀯𑀸 𑀅𑀲𑀁𑀬𑁄𑀚𑀦𑀺𑀬𑀸 𑀅𑀕𑀦𑁆𑀣𑀦𑀺𑀬𑀸 𑀅𑀦𑁄𑀖𑀦𑀺𑀬𑀸 𑀅𑀬𑁄𑀕𑀦𑀺𑀬𑀸 𑀅𑀦𑀻𑀯𑀭𑀡𑀺𑀬𑀸 𑀅𑀧𑀭𑀸𑀫𑀝𑁆𑀞𑀸 𑀅𑀦𑀼𑀧𑀸𑀤𑀸𑀦𑀺𑀬𑀸 𑀅𑀲𑀁𑀓𑀺𑀮𑁂𑀲𑀺𑀓𑀸, 𑀲𑀩𑁆𑀩𑁂 𑀥𑀫𑁆𑀫𑀸 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺 𑀥𑀫𑁆𑀫𑀸𑀦𑀼𑀲𑁆𑀲𑀢𑀺 𑀲𑀗𑁆𑀖𑀸𑀦𑀼𑀲𑁆𑀲𑀢𑀺 𑀲𑀻𑀮𑀸𑀦𑀼𑀲𑁆𑀲𑀢𑀺 𑀘𑀸𑀕𑀸𑀦𑀼𑀲𑁆𑀲𑀢𑀺 𑀤𑁂𑀯𑀢𑀸𑀦𑀼𑀲𑁆𑀲𑀢𑀺 𑀆𑀦𑀸𑀧𑀸𑀦𑀲𑁆𑀲𑀢𑀺 𑀫𑀭𑀡𑀸𑀦𑀼𑀲𑁆𑀲𑀢𑀺 𑀓𑀸𑀬𑀕𑀢𑀸𑀲𑀢𑀺 𑀉𑀧𑀲𑀫𑀸𑀦𑀼𑀲𑁆𑀲𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀲𑀩𑁆𑀩𑁂 𑀥𑀫𑁆𑀫𑀸 𑀲𑀢𑀺𑀧𑀝𑁆𑀞𑀸𑀦𑀸𑀢𑀺? 𑀆𑀫𑀦𑁆𑀢𑀸. 𑀘𑀓𑁆𑀔𑀸𑀬𑀢𑀦𑀁 𑀲𑀢𑀺𑀧𑀝𑁆𑀞𑀸𑀦𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀘𑀓𑁆𑀔𑀸𑀬𑀢𑀦𑀁 𑀲𑀢𑀺𑀧𑀝𑁆𑀞𑀸𑀦𑀦𑁆𑀢𑀺? 𑀆𑀫𑀦𑁆𑀢𑀸. 𑀘𑀓𑁆𑀔𑀸𑀬𑀢𑀦𑀁 𑀲𑀢𑀺 𑀲𑀢𑀺𑀦𑁆𑀤𑁆𑀭𑀺𑀬𑀁 𑀲𑀢𑀺𑀩𑀮𑀁 𑀲𑀫𑁆𑀫𑀸𑀲𑀢𑀺 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀏𑀓𑀸𑀬𑀦𑀫𑀕𑁆𑀕𑁄 𑀔𑀬𑀕𑀸𑀫𑀻 𑀩𑁄𑀥𑀕𑀸𑀫𑀻 𑀅𑀧𑀘𑀬𑀕𑀸𑀫𑀻 𑀅𑀦𑀸𑀲𑀯𑀁 𑀅𑀲𑀁𑀬𑁄𑀚𑀦𑀺𑀬𑀁…𑀧𑁂… 𑀅𑀲𑀁𑀓𑀺𑀮𑁂𑀲𑀺𑀓𑀁, 𑀘𑀓𑁆𑀔𑀸𑀬𑀢𑀦𑀁 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺 𑀥𑀫𑁆𑀫𑀸𑀦𑀼𑀲𑁆𑀲𑀢𑀺 𑀲𑀗𑁆𑀖𑀸𑀦𑀼𑀲𑁆𑀲𑀢𑀺 𑀲𑀻𑀮𑀸𑀦𑀼𑀲𑁆𑀲𑀢𑀺 𑀘𑀸𑀕𑀸𑀦𑀼𑀲𑁆𑀲𑀢𑀺 𑀤𑁂𑀯𑀢𑀸𑀦𑀼𑀲𑁆𑀲𑀢𑀺 𑀆𑀦𑀸𑀧𑀸𑀦𑀲𑁆𑀲𑀢𑀺 𑀫𑀭𑀡𑀸𑀦𑀼𑀲𑁆𑀲𑀢𑀺 𑀓𑀸𑀬𑀕𑀢𑀸𑀲𑀢𑀺 𑀉𑀧𑀲𑀫𑀸𑀦𑀼𑀲𑁆𑀲𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀲𑁄𑀢𑀸𑀬𑀢𑀦𑀁… 𑀖𑀸𑀦𑀸𑀬𑀢𑀦𑀁… 𑀚𑀺𑀯𑁆𑀳𑀸𑀬𑀢𑀦𑀁… 𑀓𑀸𑀬𑀸𑀬𑀢𑀦𑀁… 𑀭𑀽𑀧𑀸𑀬𑀢𑀦𑀁… 𑀲𑀤𑁆𑀤𑀸𑀬𑀢𑀦𑀁… 𑀕𑀦𑁆𑀥𑀸𑀬𑀢𑀦𑀁… 𑀭𑀲𑀸𑀬𑀢𑀦𑀁… 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁… 𑀭𑀸𑀕𑁄… 𑀤𑁄𑀲𑁄… 𑀫𑁄𑀳𑁄… 𑀫𑀸𑀦𑁄… 𑀤𑀺𑀝𑁆𑀞𑀺… 𑀯𑀺𑀘𑀺𑀓𑀺𑀘𑁆𑀙𑀸… 𑀣𑀺𑀦𑀁… 𑀉𑀤𑁆𑀥𑀘𑁆𑀘𑀁… 𑀅𑀳𑀺𑀭𑀺𑀓𑀁… 𑀅𑀦𑁄𑀢𑁆𑀢𑀧𑁆𑀧𑀁 𑀲𑀢𑀺𑀧𑀝𑁆𑀞𑀸𑀦𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀅𑀦𑁄𑀢𑁆𑀢𑀧𑁆𑀧𑀁 𑀲𑀢𑀺𑀧𑀝𑁆𑀞𑀸𑀦𑀦𑁆𑀢𑀺? 𑀆𑀫𑀦𑁆𑀢𑀸. 𑀅𑀦𑁄𑀢𑁆𑀢𑀧𑁆𑀧𑀁 𑀲𑀢𑀺 𑀲𑀢𑀺𑀦𑁆𑀤𑁆𑀭𑀺𑀬𑀁 𑀲𑀢𑀺𑀩𑀮𑀁 𑀲𑀫𑁆𑀫𑀸𑀲𑀢𑀺…𑀧𑁂… 𑀓𑀸𑀬𑀕𑀢𑀸𑀲𑀢𑀺 𑀉𑀧𑀲𑀫𑀸𑀦𑀼𑀲𑁆𑀲𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀲𑀢𑀺 𑀲𑀢𑀺𑀧𑀝𑁆𑀞𑀸𑀦𑀸, 𑀲𑀸 𑀘 𑀲𑀢𑀻𑀢𑀺? 𑀆𑀫𑀦𑁆𑀢𑀸. 𑀘𑀓𑁆𑀔𑀸𑀬𑀢𑀦𑀁 𑀲𑀢𑀺𑀧𑀝𑁆𑀞𑀸𑀦𑀁, 𑀢𑀜𑁆𑀘 𑀲𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀲𑀢𑀺 𑀲𑀢𑀺𑀧𑀝𑁆𑀞𑀸𑀦𑀸, 𑀲𑀸 𑀘 𑀲𑀢𑀻𑀢𑀺? 𑀆𑀫𑀦𑁆𑀢𑀸. 𑀲𑁄𑀢𑀸𑀬𑀢𑀦𑀁…𑀧𑁂… 𑀓𑀸𑀬𑀸𑀬𑀢𑀦𑀁… 𑀭𑀽𑀧𑀸𑀬𑀢𑀦𑀁…𑀧𑁂… 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁… 𑀭𑀸𑀕𑁄… 𑀤𑁄𑀲𑁄… 𑀫𑁄𑀳𑁄…𑀧𑁂… 𑀅𑀦𑁄𑀢𑁆𑀢𑀧𑁆𑀧𑀁 𑀲𑀢𑀺𑀧𑀝𑁆𑀞𑀸𑀦𑀁, 𑀢𑀜𑁆𑀘 𑀲𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀘𑀓𑁆𑀔𑀸𑀬𑀢𑀦𑀁 𑀲𑀢𑀺𑀧𑀝𑁆𑀞𑀸𑀦𑀁, 𑀢𑀜𑁆𑀘 𑀦 𑀲𑀢𑀻𑀢𑀺? 𑀆𑀫𑀦𑁆𑀢𑀸. 𑀲𑀢𑀺 𑀲𑀢𑀺𑀧𑀝𑁆𑀞𑀸𑀦𑀸, 𑀲𑀸 𑀘 𑀦 𑀲𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀲𑁄𑀢𑀸𑀬𑀢𑀦𑀁…𑀧𑁂… 𑀓𑀸𑀬𑀸𑀬𑀢𑀦𑀁… 𑀭𑀽𑀧𑀸𑀬𑀢𑀦𑀁…𑀧𑁂… 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁… 𑀭𑀸𑀕𑁄 … 𑀤𑁄𑀲𑁄… 𑀫𑁄𑀳𑁄…𑀧𑁂… 𑀅𑀦𑁄𑀢𑁆𑀢𑀧𑁆𑀧𑀁 𑀲𑀢𑀺𑀧𑀝𑁆𑀞𑀸𑀦𑀁, 𑀢𑀜𑁆𑀘 𑀦 𑀲𑀢𑀻𑀢𑀺? 𑀆𑀫𑀦𑁆𑀢𑀸. 𑀲𑀢𑀺 𑀲𑀢𑀺𑀧𑀝𑁆𑀞𑀸𑀦𑀸, 𑀲𑀸 𑀘 𑀦 𑀲𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁩𑁦𑁨. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀲𑀩𑁆𑀩𑁂 𑀥𑀫𑁆𑀫𑁂 𑀆𑀭𑀩𑁆𑀪 𑀲𑀢𑀺 𑀲𑀦𑁆𑀢𑀺𑀝𑁆𑀞𑀢𑀻𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀲𑀩𑁆𑀩𑁂 𑀥𑀫𑁆𑀫𑁂 𑀆𑀭𑀩𑁆𑀪 𑀲𑀢𑀺 𑀲𑀦𑁆𑀢𑀺𑀝𑁆𑀞𑀢𑀻𑀢𑀺, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺.

𑀲𑀩𑁆𑀩𑀁 𑀥𑀫𑁆𑀫𑀁 𑀆𑀭𑀩𑁆𑀪 𑀲𑀢𑀺 𑀲𑀦𑁆𑀢𑀺𑀝𑁆𑀞𑀢𑀻𑀢𑀺 𑀲𑀩𑁆𑀩𑁂 𑀥𑀫𑁆𑀫𑀸 𑀲𑀢𑀺𑀧𑀝𑁆𑀞𑀸𑀦𑀸𑀢𑀺? 𑀆𑀫𑀦𑁆𑀢𑀸. 𑀲𑀩𑁆𑀩𑀁 𑀥𑀫𑁆𑀫𑀁 𑀆𑀭𑀩𑁆𑀪 𑀨𑀲𑁆𑀲𑁄 𑀲𑀦𑁆𑀢𑀺𑀝𑁆𑀞𑀢𑀻𑀢𑀺 𑀲𑀩𑁆𑀩𑁂 𑀥𑀫𑁆𑀫𑀸 𑀨𑀲𑁆𑀲𑀧𑀝𑁆𑀞𑀸𑀦𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀲𑀩𑁆𑀩𑀁 𑀥𑀫𑁆𑀫𑀁 𑀆𑀭𑀩𑁆𑀪 𑀲𑀢𑀺 𑀲𑀦𑁆𑀢𑀺𑀝𑁆𑀞𑀢𑀻𑀢𑀺 𑀲𑀩𑁆𑀩𑁂 𑀥𑀫𑁆𑀫𑀸 𑀲𑀢𑀺𑀧𑀝𑁆𑀞𑀸𑀦𑀸𑀢𑀺? 𑀆𑀫𑀦𑁆𑀢𑀸. 𑀲𑀩𑁆𑀩𑀁 𑀥𑀫𑁆𑀫𑀁 𑀆𑀭𑀩𑁆𑀪 𑀯𑁂𑀤𑀦𑀸 𑀲𑀦𑁆𑀢𑀺𑀝𑁆𑀞𑀢𑀺… 𑀲𑀜𑁆𑀜𑀸 𑀲𑀦𑁆𑀢𑀺𑀝𑁆𑀞𑀢𑀺… 𑀘𑁂𑀢𑀦𑀸 𑀲𑀦𑁆𑀢𑀺𑀝𑁆𑀞𑀢𑀺… 𑀘𑀺𑀢𑁆𑀢𑀁 𑀲𑀦𑁆𑀢𑀺𑀝𑁆𑀞𑀢𑀻𑀢𑀺 𑀲𑀩𑁆𑀩𑁂 𑀥𑀫𑁆𑀫𑀸 𑀘𑀺𑀢𑁆𑀢𑀧𑀝𑁆𑀞𑀸𑀦𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀲𑀩𑁆𑀩𑁂 𑀥𑀫𑁆𑀫𑀸 𑀲𑀢𑀺𑀧𑀝𑁆𑀞𑀸𑀦𑀸𑀢𑀺? 𑀆𑀫𑀦𑁆𑀢𑀸. 𑀲𑀩𑁆𑀩𑁂 𑀲𑀢𑁆𑀢𑀸 𑀉𑀧𑀝𑁆𑀞𑀺𑀢𑀲𑀢𑀺𑀦𑁄 𑀲𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑀸 𑀲𑀢𑀺𑀬𑀸 𑀲𑀫𑁄𑀳𑀺𑀢𑀸; 𑀲𑀩𑁆𑀩𑁂𑀲𑀁 𑀲𑀢𑁆𑀢𑀸𑀦𑀁 𑀲𑀢𑀺 𑀧𑀘𑁆𑀘𑀼𑀧𑀝𑁆𑀞𑀺𑀢𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑁩𑁦𑁩. 𑀲𑀩𑁆𑀩𑁂 𑀥𑀫𑁆𑀫𑀸 𑀲𑀢𑀺𑀧𑀝𑁆𑀞𑀸𑀦𑀸𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀅𑀫𑀢𑀁 𑀢𑁂, 𑀪𑀺𑀓𑁆𑀔𑀯𑁂, 𑀦 𑀧𑀭𑀺𑀪𑀼𑀜𑁆𑀚𑀦𑁆𑀢𑀺 𑀬𑁂 𑀓𑀸𑀬𑀕𑀢𑀸𑀲𑀢𑀺𑀁 𑀦 𑀧𑀭𑀺𑀪𑀼𑀜𑁆𑀚𑀦𑁆𑀢𑀺. 𑀅𑀫𑀢𑀁 𑀢𑁂, 𑀪𑀺𑀓𑁆𑀔𑀯𑁂, 𑀧𑀭𑀺𑀪𑀼𑀜𑁆𑀚𑀦𑁆𑀢𑀺 𑀬𑁂 𑀓𑀸𑀬𑀕𑀢𑀸𑀲𑀢𑀺𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀻’’𑀢𑀺 [𑀅. 𑀦𑀺. 𑁧.𑁬𑁦𑁦]. 𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀲𑀩𑁆𑀩𑁂 𑀲𑀢𑁆𑀢𑀸 𑀓𑀸𑀬𑀕𑀢𑀸𑀲𑀢𑀺𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀺 𑀧𑀝𑀺𑀮𑀪𑀦𑁆𑀢𑀺 𑀆𑀲𑁂𑀯𑀦𑁆𑀢𑀺 𑀪𑀸𑀯𑁂𑀦𑁆𑀢𑀺 𑀩𑀳𑀼𑀮𑀻𑀓𑀭𑁄𑀦𑁆𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀲𑀩𑁆𑀩𑁂 𑀥𑀫𑁆𑀫𑀸 𑀲𑀢𑀺𑀧𑀝𑁆𑀞𑀸𑀦𑀸𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀏𑀓𑀸𑀬𑀦𑁄 𑀅𑀬𑀁, 𑀪𑀺𑀓𑁆𑀔𑀯𑁂, 𑀫𑀕𑁆𑀕𑁄 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀬𑀸 𑀲𑁄𑀓𑀧𑀭𑀺𑀤𑁂𑀯𑀸𑀦𑀁 𑀲𑀫𑀢𑀺𑀓𑁆𑀓𑀫𑀸𑀬 𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸𑀬 𑀜𑀸𑀬𑀲𑁆𑀲 𑀅𑀥𑀺𑀕𑀫𑀸𑀬 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀬𑀤𑀺𑀤𑀁 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺 [𑀤𑀻. 𑀦𑀺. 𑁨.𑁩𑁭𑁩; 𑀫. 𑀦𑀺. 𑁧.𑁧𑁦𑁬; 𑀲𑀁. 𑀦𑀺. 𑁫.𑁩𑁬𑁭]! 𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸? 𑀲𑀩𑁆𑀩𑁂 𑀥𑀫𑁆𑀫𑀸 𑀏𑀓𑀸𑀬𑀦𑀫𑀕𑁆𑀕𑁄𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀲𑀩𑁆𑀩𑁂 𑀥𑀫𑁆𑀫𑀸 𑀲𑀢𑀺𑀧𑀝𑁆𑀞𑀸𑀦𑀸𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀭𑀜𑁆𑀜𑁄, 𑀪𑀺𑀓𑁆𑀔𑀯𑁂, 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀧𑀸𑀢𑀼𑀪𑀸𑀯𑀸 𑀲𑀢𑁆𑀢𑀦𑁆𑀦𑀁 𑀭𑀢𑀦𑀸𑀦𑀁 𑀧𑀸𑀢𑀼𑀪𑀸𑀯𑁄 𑀳𑁄𑀢𑀺. 𑀓𑀢𑀫𑁂𑀲𑀁 𑀲𑀢𑁆𑀢𑀦𑁆𑀦𑀁? 𑀘𑀓𑁆𑀓𑀭𑀢𑀦𑀲𑁆𑀲 𑀧𑀸𑀢𑀼𑀪𑀸𑀯𑁄 𑀳𑁄𑀢𑀺, 𑀳𑀢𑁆𑀣𑀺𑀭𑀢𑀦𑀲𑁆𑀲 𑀧𑀸𑀢𑀼𑀪𑀸𑀯𑁄 𑀳𑁄𑀢𑀺, 𑀅𑀲𑁆𑀲𑀭𑀢𑀦𑀲𑁆𑀲… 𑀫𑀡𑀺𑀭𑀢𑀦𑀲𑁆𑀲… 𑀇𑀢𑁆𑀣𑀺𑀭𑀢𑀦𑀲𑁆𑀲 … 𑀕𑀳𑀧𑀢𑀺𑀭𑀢𑀦𑀲𑁆𑀲… 𑀧𑀭𑀺𑀡𑀸𑀬𑀓𑀭𑀢𑀦𑀲𑁆𑀲 𑀧𑀸𑀢𑀼𑀪𑀸𑀯𑁄 𑀳𑁄𑀢𑀺. 𑀭𑀜𑁆𑀜𑁄, 𑀪𑀺𑀓𑁆𑀔𑀯𑁂, 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀧𑀸𑀢𑀼𑀪𑀸𑀯𑀸 𑀇𑀫𑁂𑀲𑀁 𑀲𑀢𑁆𑀢𑀦𑁆𑀦𑀁 𑀭𑀢𑀦𑀸𑀦𑀁 𑀧𑀸𑀢𑀼𑀪𑀸𑀯𑁄 𑀳𑁄𑀢𑀺.

‘‘𑀢𑀣𑀸𑀕𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀸𑀢𑀼𑀪𑀸𑀯𑀸 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀢𑁆𑀢𑀦𑁆𑀦𑀁 𑀩𑁄𑀚𑁆𑀛𑀗𑁆𑀕𑀭𑀢𑀦𑀸𑀦𑀁 𑀧𑀸𑀢𑀼𑀪𑀸𑀯𑁄 𑀳𑁄𑀢𑀺. 𑀓𑀢𑀫𑁂𑀲𑀁 𑀲𑀢𑁆𑀢𑀦𑁆𑀦𑀁? 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀭𑀢𑀦𑀲𑁆𑀲 𑀧𑀸𑀢𑀼𑀪𑀸𑀯𑁄 𑀳𑁄𑀢𑀺, 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀭𑀢𑀦𑀲𑁆𑀲 𑀧𑀸𑀢𑀼𑀪𑀸𑀯𑁄 𑀳𑁄𑀢𑀺, 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀭𑀢𑀦𑀲𑁆𑀲 𑀧𑀸𑀢𑀼𑀪𑀸𑀯𑁄 𑀳𑁄𑀢𑀺, 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀭𑀢𑀦𑀲𑁆𑀲 𑀧𑀸𑀢𑀼𑀪𑀸𑀯𑁄 𑀳𑁄𑀢𑀺, 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀭𑀢𑀦𑀲𑁆𑀲 𑀧𑀸𑀢𑀼𑀪𑀸𑀯𑁄 𑀳𑁄𑀢𑀺, 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀭𑀢𑀦𑀲𑁆𑀲 𑀧𑀸𑀢𑀼𑀪𑀸𑀯𑁄 𑀳𑁄𑀢𑀺, 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀭𑀢𑀦𑀲𑁆𑀲 𑀧𑀸𑀢𑀼𑀪𑀸𑀯𑁄 𑀳𑁄𑀢𑀺. 𑀢𑀣𑀸𑀕𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀸𑀢𑀼𑀪𑀸𑀯𑀸 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀇𑀫𑁂𑀲𑀁 𑀲𑀢𑁆𑀢𑀦𑁆𑀦𑀁 𑀩𑁄𑀚𑁆𑀛𑀗𑁆𑀕𑀭𑀢𑀦𑀸𑀦𑀁 𑀧𑀸𑀢𑀼𑀪𑀸𑀯𑁄 𑀳𑁄𑀢𑀻’’𑀢𑀺 [𑀲𑀁. 𑀦𑀺. 𑁫.𑁨𑁨𑁩]. 𑀅𑀢𑁆𑀣𑁂𑀯 𑀲𑀼𑀢𑁆𑀢𑀦𑁆𑀢𑁄𑀢𑀺? 𑀆𑀫𑀦𑁆𑀢𑀸. 𑀢𑀣𑀸𑀕𑀢𑀲𑁆𑀲 𑀧𑀸𑀢𑀼𑀪𑀸𑀯𑀸 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀩𑁆𑀩𑁂 𑀥𑀫𑁆𑀫𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀭𑀢𑀦𑀸𑀯 𑀳𑁄𑀦𑁆𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀲𑀩𑁆𑀩𑁂 𑀥𑀫𑁆𑀫𑀸 𑀲𑀢𑀺𑀧𑀝𑁆𑀞𑀸𑀦𑀸𑀢𑀺? 𑀆𑀫𑀦𑁆𑀢𑀸. 𑀲𑀩𑁆𑀩𑁂 𑀥𑀫𑁆𑀫𑀸 𑀲𑀫𑁆𑀫𑀧𑁆𑀧𑀥𑀸𑀦𑀸… 𑀇𑀤𑁆𑀥𑀺𑀧𑀸𑀤𑀸… 𑀇𑀦𑁆𑀤𑁆𑀭𑀺𑀬𑀸… 𑀩𑀮𑀸… 𑀩𑁄𑀚𑁆𑀛𑀗𑁆𑀕𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀲𑀢𑀺𑀧𑀝𑁆𑀞𑀸𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.