𑁧. 𑀅𑀢𑀻𑀢𑀸𑀤𑀺𑀏𑀓𑀘𑁆𑀘𑀓𑀣𑀸

𑁨𑁯𑁯. 𑀅𑀢𑀻𑀢𑀁 𑀅𑀢𑁆𑀣𑀻𑀢𑀺? 𑀏𑀓𑀘𑁆𑀘𑀁 𑀅𑀢𑁆𑀣𑀺, 𑀏𑀓𑀘𑁆𑀘𑀁 𑀦𑀢𑁆𑀣𑀻𑀢𑀺. 𑀏𑀓𑀘𑁆𑀘𑀁 𑀦𑀺𑀭𑀼𑀤𑁆𑀥𑀁, 𑀏𑀓𑀘𑁆𑀘𑀁 𑀦 𑀦𑀺𑀭𑀼𑀤𑁆𑀥𑀁; 𑀏𑀓𑀘𑁆𑀘𑀁 𑀯𑀺𑀕𑀢𑀁, 𑀏𑀓𑀘𑁆𑀘𑀁 𑀅𑀯𑀺𑀕𑀢𑀁; 𑀏𑀓𑀘𑁆𑀘𑀁 𑀅𑀢𑁆𑀣𑀗𑁆𑀕𑀢𑀁, 𑀏𑀓𑀘𑁆𑀘𑀁 𑀦 𑀅𑀢𑁆𑀣𑀗𑁆𑀕𑀢𑀁; 𑀏𑀓𑀘𑁆𑀘𑀁 𑀅𑀩𑁆𑀪𑀢𑁆𑀣𑀗𑁆𑀕𑀢𑀁, 𑀏𑀓𑀘𑁆𑀘𑀁 𑀦 𑀅𑀩𑁆𑀪𑀢𑁆𑀣𑀗𑁆𑀕𑀢𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀅𑀢𑀻𑀢𑀁 𑀏𑀓𑀘𑁆𑀘𑀁 𑀅𑀢𑁆𑀣𑀺, 𑀏𑀓𑀘𑁆𑀘𑀁 𑀦𑀢𑁆𑀣𑀻𑀢𑀺? 𑀆𑀫𑀦𑁆𑀢𑀸. 𑀅𑀢𑀻𑀢𑀸 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀸 𑀥𑀫𑁆𑀫𑀸 𑀏𑀓𑀘𑁆𑀘𑁂 𑀅𑀢𑁆𑀣𑀺, 𑀏𑀓𑀘𑁆𑀘𑁂 𑀦𑀢𑁆𑀣𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀅𑀢𑀻𑀢𑀁 𑀏𑀓𑀘𑁆𑀘𑀁 𑀅𑀢𑁆𑀣𑀺, 𑀏𑀓𑀘𑁆𑀘𑀁 𑀦𑀢𑁆𑀣𑀻𑀢𑀺? 𑀆𑀫𑀦𑁆𑀢𑀸. 𑀅𑀢𑀻𑀢𑀸 𑀯𑀺𑀧𑀓𑁆𑀓𑀯𑀺𑀧𑀸𑀓𑀸 𑀥𑀫𑁆𑀫𑀸 𑀏𑀓𑀘𑁆𑀘𑁂 𑀅𑀢𑁆𑀣𑀺, 𑀏𑀓𑀘𑁆𑀘𑁂 𑀦𑀢𑁆𑀣𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀅𑀢𑀻𑀢𑀁 𑀏𑀓𑀘𑁆𑀘𑀁 𑀅𑀢𑁆𑀣𑀺, 𑀏𑀓𑀘𑁆𑀘𑀁 𑀦𑀢𑁆𑀣𑀻𑀢𑀺? 𑀆𑀫𑀦𑁆𑀢𑀸. 𑀅𑀢𑀻𑀢𑀸 𑀅𑀯𑀺𑀧𑀸𑀓𑀸 𑀥𑀫𑁆𑀫𑀸 𑀏𑀓𑀘𑁆𑀘𑁂 𑀅𑀢𑁆𑀣𑀺 𑀏𑀓𑀘𑁆𑀘𑁂 𑀦𑀢𑁆𑀣𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀅𑀢𑀻𑀢𑀁 𑀏𑀓𑀘𑁆𑀘𑀁 𑀅𑀢𑁆𑀣𑀺 𑀏𑀓𑀘𑁆𑀘𑀁 𑀦𑀢𑁆𑀣𑀻𑀢𑀺? 𑀆𑀫𑀦𑁆𑀢𑀸. 𑀓𑀺𑀁 𑀅𑀢𑁆𑀣𑀺 𑀓𑀺𑀁 𑀦𑀢𑁆𑀣𑀻𑀢𑀺? 𑀅𑀢𑀻𑀢𑀸 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀸 𑀥𑀫𑁆𑀫𑀸 𑁋 𑀢𑁂 𑀅𑀢𑁆𑀣𑀺; 𑀅𑀢𑀻𑀢𑀸 𑀯𑀺𑀧𑀓𑁆𑀓𑀯𑀺𑀧𑀸𑀓𑀸 𑀥𑀫𑁆𑀫𑀸 𑁋 𑀢𑁂 𑀦𑀢𑁆𑀣𑀻𑀢𑀺. 𑀅𑀢𑀻𑀢𑀸 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀸 𑀥𑀫𑁆𑀫𑀸 𑁋 𑀢𑁂 𑀅𑀢𑁆𑀣𑀻𑀢𑀺? 𑀆𑀫𑀦𑁆𑀢𑀸. 𑀅𑀢𑀻𑀢𑀸 𑀯𑀺𑀧𑀓𑁆𑀓𑀯𑀺𑀧𑀸𑀓𑀸 𑀥𑀫𑁆𑀫𑀸 𑁋 𑀢𑁂 𑀅𑀢𑁆𑀣𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀅𑀢𑀻𑀢𑀸 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀸 𑀥𑀫𑁆𑀫𑀸 𑁋 𑀢𑁂 𑀅𑀢𑁆𑀣𑀻𑀢𑀺? 𑀆𑀫𑀦𑁆𑀢𑀸. 𑀅𑀢𑀻𑀢𑀸 𑀅𑀯𑀺𑀧𑀸𑀓𑀸 𑀥𑀫𑁆𑀫𑀸 𑁋 𑀢𑁂 𑀅𑀢𑁆𑀣𑀻𑀢𑀺 [𑀅𑀢𑀻𑀢𑀸 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀸 𑀥𑀫𑁆𑀫𑀸 𑀢𑁂 𑀦𑀢𑁆𑀣𑀻𑀢𑀺 (𑀓.)]? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀅𑀢𑀻𑀢𑀸 𑀯𑀺𑀧𑀓𑁆𑀓𑀯𑀺𑀧𑀸𑀓𑀸 𑀥𑀫𑁆𑀫𑀸 𑁋 𑀢𑁂 𑀦𑀢𑁆𑀣𑀻𑀢𑀺? 𑀆𑀫𑀦𑁆𑀢𑀸. 𑀅𑀢𑀻𑀢𑀸 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀸 𑀥𑀫𑁆𑀫𑀸 𑁋 𑀢𑁂 𑀦𑀢𑁆𑀣𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂 …𑀧𑁂….

𑀅𑀢𑀻𑀢𑀸 𑀅𑀯𑀺𑀧𑀸𑀓𑀸 [𑀯𑀺𑀧𑀓𑁆𑀓𑀯𑀺𑀧𑀸𑀓𑀸 (𑀲𑁆𑀬𑀸.), 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀸 (𑀓.)] 𑀥𑀫𑁆𑀫𑀸 𑁋 𑀢𑁂 𑀦𑀢𑁆𑀣𑀻𑀢𑀺? 𑀆𑀫𑀦𑁆𑀢𑀸. 𑀅𑀢𑀻𑀢𑀸 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀸 [𑀅𑀯𑀺𑀧𑀸𑀓𑀸 (𑀲𑁆𑀬𑀸.)] 𑀥𑀫𑁆𑀫𑀸 𑁋 𑀢𑁂 𑀦𑀢𑁆𑀣𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀅𑀢𑀻𑀢𑀸 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀸 𑀥𑀫𑁆𑀫𑀸 𑁋 𑀢𑁂 𑀅𑀢𑁆𑀣𑀻𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀅𑀢𑀻𑀢𑀸 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀸 𑀥𑀫𑁆𑀫𑀸 𑀦𑀺𑀭𑀼𑀤𑁆𑀥𑀸𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀅𑀢𑀻𑀢𑀸 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀸 𑀥𑀫𑁆𑀫𑀸 𑀦𑀺𑀭𑀼𑀤𑁆𑀥𑀸, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀅𑀢𑀻𑀢𑀸 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀸 𑀥𑀫𑁆𑀫𑀸 𑁋 𑀢𑁂 [𑀥𑀫𑁆𑀫𑀸 𑀦𑀺𑀭𑀼𑀤𑁆𑀥𑀸 𑀢𑁂 (𑀲𑁆𑀬𑀸. 𑀓.)] 𑀅𑀢𑁆𑀣𑀻’’𑀢𑀺.

𑀅𑀢𑀻𑀢𑀸 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀸 𑀥𑀫𑁆𑀫𑀸 𑀦𑀺𑀭𑀼𑀤𑁆𑀥𑀸 𑁋 𑀢𑁂 𑀅𑀢𑁆𑀣𑀻𑀢𑀺? 𑀆𑀫𑀦𑁆𑀢𑀸. 𑀅𑀢𑀻𑀢𑀸 𑀯𑀺𑀧𑀓𑁆𑀓𑀯𑀺𑀧𑀸𑀓𑀸 𑀥𑀫𑁆𑀫𑀸 𑀦𑀺𑀭𑀼𑀤𑁆𑀥𑀸 𑁋 𑀢𑁂 𑀅𑀢𑁆𑀣𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀅𑀢𑀻𑀢𑀸 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀸 𑀥𑀫𑁆𑀫𑀸 𑀦𑀺𑀭𑀼𑀤𑁆𑀥𑀸 𑁋 𑀢𑁂 𑀅𑀢𑁆𑀣𑀻𑀢𑀺? 𑀆𑀫𑀦𑁆𑀢𑀸. 𑀅𑀢𑀻𑀢𑀸 𑀅𑀯𑀺𑀧𑀸𑀓𑀸 [𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀸 (𑀲𑀻. 𑀓.)] 𑀥𑀫𑁆𑀫𑀸 𑀦𑀺𑀭𑀼𑀤𑁆𑀥𑀸 𑁋 𑀢𑁂 𑀅𑀢𑁆𑀣𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀅𑀢𑀻𑀢𑀸 𑀯𑀺𑀧𑀓𑁆𑀓𑀯𑀺𑀧𑀸𑀓𑀸 𑀥𑀫𑁆𑀫𑀸 𑀦𑀺𑀭𑀼𑀤𑁆𑀥𑀸 𑁋 𑀢𑁂 𑀦𑀢𑁆𑀣𑀻𑀢𑀺? 𑀆𑀫𑀦𑁆𑀢𑀸. 𑀅𑀢𑀻𑀢𑀸 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀸 𑀥𑀫𑁆𑀫𑀸 𑀦𑀺𑀭𑀼𑀤𑁆𑀥𑀸 𑁋 𑀢𑁂 𑀦𑀢𑁆𑀣𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀅𑀢𑀻𑀢𑀸 𑀅𑀯𑀺𑀧𑀸𑀓𑀸 [𑀯𑀺𑀧𑀓𑁆𑀓𑀯𑀺𑀧𑀸𑀓𑀸 (𑀲𑁆𑀬𑀸.), 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀸 (𑀓.)] 𑀥𑀫𑁆𑀫𑀸 𑀦𑀺𑀭𑀼𑀤𑁆𑀥𑀸 𑁋 𑀢𑁂 𑀦𑀢𑁆𑀣𑀻𑀢𑀺? 𑀆𑀫𑀦𑁆𑀢𑀸. 𑀅𑀢𑀻𑀢𑀸 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀸 [𑀅𑀯𑀺𑀧𑀸𑀓𑀸 (𑀲𑁆𑀬𑀸.)] 𑀥𑀫𑁆𑀫𑀸 𑀦𑀺𑀭𑀼𑀤𑁆𑀥𑀸 𑁋 𑀢𑁂 𑀦𑀢𑁆𑀣𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀅𑀢𑀻𑀢𑀸 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀸 𑀥𑀫𑁆𑀫𑀸 𑀦𑀺𑀭𑀼𑀤𑁆𑀥𑀸 𑁋 𑀢𑁂 𑀅𑀢𑁆𑀣𑀻𑀢𑀺? 𑀆𑀫𑀦𑁆𑀢𑀸. 𑀅𑀢𑀻𑀢𑀸 𑀯𑀺𑀧𑀓𑁆𑀓𑀯𑀺𑀧𑀸𑀓𑀸 𑀥𑀫𑁆𑀫𑀸 𑀦𑀺𑀭𑀼𑀤𑁆𑀥𑀸 𑁋 𑀢𑁂 𑀦𑀢𑁆𑀣𑀻𑀢𑀺? 𑀆𑀫𑀦𑁆𑀢𑀸. 𑀅𑀢𑀻𑀢𑀸 𑀏𑀓𑀤𑁂𑀲𑀁 𑀯𑀺𑀧𑀓𑁆𑀓𑀯𑀺𑀧𑀸𑀓𑀸 𑀥𑀫𑁆𑀫𑀸 𑀏𑀓𑀤𑁂𑀲𑀁 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀸 𑀥𑀫𑁆𑀫𑀸 𑀦𑀺𑀭𑀼𑀤𑁆𑀥𑀸 𑁋 𑀢𑁂 𑀏𑀓𑀘𑁆𑀘𑁂 𑀅𑀢𑁆𑀣𑀺 𑀏𑀓𑀘𑁆𑀘𑁂 𑀦𑀢𑁆𑀣𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….

𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀅𑀢𑀻𑀢𑀸 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀸 𑀥𑀫𑁆𑀫𑀸 𑁋 𑀢𑁂 𑀅𑀢𑁆𑀣𑀻’’𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀅𑀢𑀻𑀢𑀸 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀸 𑀥𑀫𑁆𑀫𑀸 𑀯𑀺𑀧𑀘𑁆𑀘𑀺𑀲𑁆𑀲𑀦𑁆𑀢𑀻𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀅𑀢𑀻𑀢𑀸 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀸 𑀥𑀫𑁆𑀫𑀸 𑀯𑀺𑀧𑀘𑁆𑀘𑀺𑀲𑁆𑀲𑀦𑁆𑀢𑀺, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀅𑀢𑀻𑀢𑀸 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀸 𑀥𑀫𑁆𑀫𑀸 𑁋 𑀢𑁂 𑀅𑀢𑁆𑀣𑀻’’𑀢𑀺.

𑀅𑀢𑀻𑀢𑀸 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀸 𑀥𑀫𑁆𑀫𑀸 𑀯𑀺𑀧𑀘𑁆𑀘𑀺𑀲𑁆𑀲𑀦𑁆𑀢𑀻𑀢𑀺 𑀓𑀢𑁆𑀯𑀸 𑀢𑁂 𑀅𑀢𑁆𑀣𑀻𑀢𑀺? 𑀆𑀫𑀦𑁆𑀢𑀸. 𑀯𑀺𑀧𑀘𑁆𑀘𑀺𑀲𑁆𑀲𑀦𑁆𑀢𑀻𑀢𑀺 𑀓𑀢𑁆𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀯𑀺𑀧𑀘𑁆𑀘𑀺𑀲𑁆𑀲𑀦𑁆𑀢𑀻𑀢𑀺 𑀓𑀢𑁆𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀢𑀺? 𑀆𑀫𑀦𑁆𑀢𑀸. 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀥𑀫𑁆𑀫𑀸 𑀦𑀺𑀭𑀼𑀚𑁆𑀛𑀺𑀲𑁆𑀲𑀦𑁆𑀢𑀻𑀢𑀺 𑀓𑀢𑁆𑀯𑀸 𑀢𑁂 𑀦𑀢𑁆𑀣𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂….