𑁨𑁩. 𑀢𑁂𑀯𑀻𑀲𑀢𑀺𑀫𑀯𑀕𑁆𑀕𑁄

(𑁨𑁨𑁬) 𑁯. 𑀅𑀧𑀭𑀺𑀦𑀺𑀧𑁆𑀨𑀦𑁆𑀦𑀓𑀣𑀸

𑁯𑁧𑁭. 𑀭𑀽𑀧𑀁 𑀅𑀧𑀭𑀺𑀦𑀺𑀧𑁆𑀨𑀦𑁆𑀦𑀦𑁆𑀢𑀺? 𑀆𑀫𑀦𑁆𑀢𑀸. 𑀭𑀽𑀧𑀁 𑀦 𑀅𑀦𑀺𑀘𑁆𑀘𑀁 𑀦 𑀲𑀗𑁆𑀔𑀢𑀁 𑀦 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀦 𑀔𑀬𑀥𑀫𑁆𑀫𑀁 𑀦 𑀯𑀬𑀥𑀫𑁆𑀫𑀁 𑀦 𑀯𑀺𑀭𑀸𑀕𑀥𑀫𑁆𑀫𑀁 𑀦 𑀦𑀺𑀭𑁄𑀥𑀥𑀫𑁆𑀫𑀁 𑀦 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀦𑀦𑀼 𑀭𑀽𑀧𑀁 𑀅𑀦𑀺𑀘𑁆𑀘𑀁 𑀲𑀗𑁆𑀔𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀔𑀬𑀥𑀫𑁆𑀫𑀁 𑀯𑀬𑀥𑀫𑁆𑀫𑀁 𑀯𑀺𑀭𑀸𑀕𑀥𑀫𑁆𑀫𑀁 𑀦𑀺𑀭𑁄𑀥𑀥𑀫𑁆𑀫𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀦𑁆𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀭𑀽𑀧𑀁 𑀅𑀦𑀺𑀘𑁆𑀘𑀁 𑀲𑀗𑁆𑀔𑀢𑀁…𑀧𑁂… 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀭𑀽𑀧𑀁 𑀅𑀧𑀭𑀺𑀦𑀺𑀧𑁆𑀨𑀦𑁆𑀦’’𑀦𑁆𑀢𑀺.

𑀤𑀼𑀓𑁆𑀔𑀜𑁆𑀜𑁂𑀯 𑀧𑀭𑀺𑀦𑀺𑀧𑁆𑀨𑀦𑁆𑀦𑀦𑁆𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀬𑀤𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔𑀁 [𑀲𑀁. 𑀦𑀺. 𑁩.𑁧𑁫] 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀭𑀽𑀧𑀁 𑀅𑀦𑀺𑀘𑁆𑀘’’𑀦𑁆𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀬𑀤𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀭𑀽𑀧𑀁 𑀅𑀦𑀺𑀘𑁆𑀘𑀁’’, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀤𑀼𑀓𑁆𑀔𑀜𑁆𑀜𑁂𑀯 𑀧𑀭𑀺𑀦𑀺𑀧𑁆𑀨𑀦𑁆𑀦’’𑀦𑁆𑀢𑀺…𑀧𑁂….

𑁯𑁧𑁮. 𑀯𑁂𑀤𑀦𑀸 …𑀧𑁂… 𑀲𑀜𑁆𑀜𑀸… 𑀲𑀗𑁆𑀔𑀸𑀭𑀸… 𑀯𑀺𑀜𑁆𑀜𑀸𑀡𑀁… 𑀘𑀓𑁆𑀔𑀸𑀬𑀢𑀦𑀁…𑀧𑁂… 𑀥𑀫𑁆𑀫𑀸𑀬𑀢𑀦𑀁… 𑀘𑀓𑁆𑀔𑀼𑀥𑀸𑀢𑀼… 𑀥𑀫𑁆𑀫𑀥𑀸𑀢𑀼… 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁…𑀧𑁂… 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁 𑀅𑀧𑀭𑀺𑀦𑀺𑀧𑁆𑀨𑀦𑁆𑀦𑀦𑁆𑀢𑀺? 𑀆𑀫𑀦𑁆𑀢𑀸. 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁 𑀦 𑀅𑀦𑀺𑀘𑁆𑀘𑀁…𑀧𑁂… 𑀦 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀦𑁆𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂…𑀧𑁂… 𑀦𑀦𑀼 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁 𑀅𑀦𑀺𑀘𑁆𑀘𑀁 𑀲𑀗𑁆𑀔𑀢𑀁…𑀧𑁂… 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀦𑁆𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁 𑀅𑀦𑀺𑀘𑁆𑀘𑀁 𑀲𑀗𑁆𑀔𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀔𑀬𑀥𑀫𑁆𑀫𑀁 𑀯𑀬𑀥𑀫𑁆𑀫𑀁 𑀯𑀺𑀭𑀸𑀕𑀥𑀫𑁆𑀫𑀁 𑀦𑀺𑀭𑁄𑀥𑀥𑀫𑁆𑀫𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁 𑀅𑀧𑀭𑀺𑀦𑀺𑀧𑁆𑀨𑀦𑁆𑀦’’𑀦𑁆𑀢𑀺.

𑀤𑀼𑀓𑁆𑀔𑀜𑁆𑀜𑁂𑀯 𑀧𑀭𑀺𑀦𑀺𑀧𑁆𑀨𑀦𑁆𑀦𑀦𑁆𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀬𑀤𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁 𑀅𑀦𑀺𑀘𑁆𑀘’’𑀦𑁆𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀬𑀤𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁 𑀅𑀦𑀺𑀘𑁆𑀘𑀁’’, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀤𑀼𑀓𑁆𑀔𑀜𑁆𑀜𑁂𑀯 𑀧𑀭𑀺𑀦𑀺𑀧𑁆𑀨𑀦𑁆𑀦’’𑀦𑁆𑀢𑀺.

𑀅𑀧𑀭𑀺𑀦𑀺𑀧𑁆𑀨𑀦𑁆𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀢𑁂𑀯𑀻𑀲𑀢𑀺𑀫𑀯𑀕𑁆𑀕𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀏𑀓𑀸𑀥𑀺𑀧𑁆𑀧𑀸𑀬𑁂𑀦 𑀫𑁂𑀣𑀼𑀦𑁄 𑀥𑀫𑁆𑀫𑁄 𑀧𑀝𑀺𑀲𑁂𑀯𑀺𑀢𑀩𑁆𑀩𑁄, 𑀅𑀭𑀳𑀦𑁆𑀢𑀸𑀦𑀁 𑀯𑀡𑁆𑀡𑁂𑀦 𑀅𑀫𑀦𑀼𑀲𑁆𑀲𑀸 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑀺, 𑀩𑁄𑀥𑀺𑀲𑀢𑁆𑀢𑁄 𑀇𑀲𑁆𑀲𑀭𑀺𑀬𑀓𑀸𑀫𑀓𑀸𑀭𑀺𑀓𑀸𑀳𑁂𑀢𑀼 𑀯𑀺𑀦𑀺𑀧𑀸𑀢𑀁 𑀕𑀘𑁆𑀙𑀢𑀺, 𑀕𑀩𑁆𑀪𑀲𑁂𑀬𑁆𑀬𑀁 𑀑𑀓𑁆𑀓𑀫𑀢𑀺, 𑀤𑀼𑀓𑁆𑀓𑀭𑀓𑀸𑀭𑀺𑀓𑀁 𑀅𑀓𑀸𑀲𑀺, 𑀅𑀧𑀭𑀦𑁆𑀢𑀧𑀁 𑀅𑀓𑀸𑀲𑀺, 𑀅𑀜𑁆𑀜𑀁 𑀲𑀢𑁆𑀣𑀸𑀭𑀁 𑀉𑀤𑁆𑀤𑀺𑀲𑀺, 𑀅𑀢𑁆𑀣𑀺 𑀦 𑀭𑀸𑀕𑁄 𑀭𑀸𑀕𑀧𑀢𑀺𑀭𑀽𑀧𑀓𑁄 𑀅𑀢𑁆𑀣𑀺 𑀦 𑀤𑁄𑀲𑁄 𑀤𑁄𑀲𑀧𑀢𑀺𑀭𑀽𑀧𑀓𑁄 𑀅𑀢𑁆𑀣𑀺 𑀦 𑀫𑁄𑀳𑁄 𑀫𑁄𑀳𑀧𑀢𑀺𑀭𑀽𑀧𑀓𑁄 𑀅𑀢𑁆𑀣𑀺 𑀦 𑀓𑀺𑀮𑁂𑀲𑁄 𑀓𑀺𑀮𑁂𑀲𑀧𑀢𑀺𑀭𑀽𑀧𑀓𑁄, 𑀭𑀽𑀧𑀁 𑀅𑀧𑀭𑀺𑀦𑀺𑀧𑁆𑀨𑀦𑁆𑀦𑀁 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁 𑀅𑀧𑀭𑀺𑀦𑀺𑀧𑁆𑀨𑀦𑁆𑀦𑀦𑁆𑀢𑀺.

𑀔𑀼𑀤𑁆𑀤𑀓𑁄 𑀅𑀟𑁆𑀠𑀧𑀡𑁆𑀡𑀸𑀲𑀓𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀦𑀯𑀁, 𑀦𑀺𑀩𑁆𑀩𑀼𑀢𑀺, 𑀏𑀓𑀸𑀥𑀺𑀧𑁆𑀧𑀸𑀬𑁄𑀢𑀺.

𑀧𑀡𑁆𑀡𑀸𑀲𑀓𑀼𑀤𑁆𑀤𑀸𑀦𑀁 𑁋

𑀫𑀳𑀸𑀦𑀺𑀬𑀸𑀫𑁄, 𑀅𑀦𑀼𑀲𑀬𑀸, 𑀦𑀺𑀕𑁆𑀕𑀳𑁄, 𑀔𑀼𑀤𑁆𑀤𑀓𑀧𑀜𑁆𑀘𑀫𑁄;

𑀧𑀭𑀧𑁆𑀧𑀯𑀸𑀤𑀫𑀤𑁆𑀤𑀦𑀸, 𑀲𑀼𑀢𑁆𑀢𑀫𑀽𑀮𑀲𑀫𑀸𑀳𑀺𑀢𑀸;

𑀉𑀚𑁆𑀚𑁄𑀢𑀦𑀸 𑀲𑀢𑁆𑀣𑀼𑀲𑀫𑀬𑁂, 𑀓𑀣𑀸𑀯𑀢𑁆𑀣𑀼𑀧𑀓𑀭𑀡𑁂𑀢𑀺.

𑀧𑀜𑁆𑀘𑀢𑁆𑀢𑀺𑀁𑀲𑀪𑀸𑀡𑀯𑀸𑀭𑀁

𑀓𑀣𑀸𑀯𑀢𑁆𑀣𑀼𑀧𑀓𑀭𑀡𑀁 𑀦𑀺𑀝𑁆𑀞𑀺𑀢𑀁.