𑁨𑁨. 𑀩𑀸𑀯𑀻𑀲𑀢𑀺𑀫𑀯𑀕𑁆𑀕𑁄

(𑁨𑁧𑁫) 𑁮. 𑀅𑀩𑁆𑀬𑀸𑀓𑀢𑀓𑀣𑀸

𑁯𑁦𑁧. 𑀲𑀩𑁆𑀩𑀁 𑀲𑀼𑀧𑀺𑀦𑀕𑀢𑀲𑁆𑀲 𑀘𑀺𑀢𑁆𑀢𑀁 𑀅𑀩𑁆𑀬𑀸𑀓𑀢𑀦𑁆𑀢𑀺? 𑀆𑀫𑀦𑁆𑀢𑀸. 𑀲𑀼𑀧𑀺𑀦𑀦𑁆𑀢𑁂𑀦 𑀧𑀸𑀡𑀁 𑀳𑀦𑁂𑀬𑁆𑀬𑀸𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀲𑀼𑀧𑀺𑀦𑀦𑁆𑀢𑁂𑀦 𑀧𑀸𑀡𑀁 𑀳𑀦𑁂𑀬𑁆𑀬, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀲𑀩𑁆𑀩𑀁 𑀲𑀼𑀧𑀺𑀦𑀕𑀢𑀲𑁆𑀲 𑀘𑀺𑀢𑁆𑀢𑀁 𑀅𑀩𑁆𑀬𑀸𑀓𑀢’’𑀦𑁆𑀢𑀺.

𑀲𑀼𑀧𑀺𑀦𑀦𑁆𑀢𑁂𑀦 𑀅𑀤𑀺𑀦𑁆𑀦𑀁 𑀆𑀤𑀺𑀬𑁂𑀬𑁆𑀬…𑀧𑁂… 𑀫𑀼𑀲𑀸 𑀪𑀡𑁂𑀬𑁆𑀬, 𑀧𑀺𑀲𑀼𑀡𑀁 𑀪𑀡𑁂𑀬𑁆𑀬, 𑀨𑀭𑀼𑀲𑀁 𑀪𑀡𑁂𑀬𑁆𑀬, 𑀲𑀫𑁆𑀨𑀁 𑀧𑀮𑀧𑁂𑀬𑁆𑀬, 𑀲𑀦𑁆𑀥𑀺𑀁 𑀙𑀺𑀦𑁆𑀤𑁂𑀬𑁆𑀬, 𑀦𑀺𑀮𑁆𑀮𑁄𑀧𑀁 𑀳𑀭𑁂𑀬𑁆𑀬, 𑀏𑀓𑀸𑀕𑀸𑀭𑀺𑀓𑀁 𑀓𑀭𑁂𑀬𑁆𑀬, 𑀧𑀭𑀺𑀧𑀦𑁆𑀣𑁂 𑀢𑀺𑀝𑁆𑀞𑁂𑀬𑁆𑀬, 𑀧𑀭𑀤𑀸𑀭𑀁 𑀕𑀘𑁆𑀙𑁂𑀬𑁆𑀬, 𑀕𑀸𑀫𑀖𑀸𑀢𑀓𑀁 𑀓𑀭𑁂𑀬𑁆𑀬, 𑀦𑀺𑀕𑀫𑀖𑀸𑀢𑀓𑀁 𑀓𑀭𑁂𑀬𑁆𑀬, 𑀲𑀼𑀧𑀺𑀦𑀦𑁆𑀢𑁂𑀦 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑁂𑀬𑁆𑀬, 𑀲𑀼𑀧𑀺𑀦𑀕𑀢𑀲𑁆𑀲 𑀅𑀲𑀼𑀘𑀺 𑀫𑀼𑀘𑁆𑀘𑁂𑀬𑁆𑀬, 𑀲𑀼𑀧𑀺𑀦𑀦𑁆𑀢𑁂𑀦 𑀤𑀸𑀦𑀁 𑀤𑀤𑁂𑀬𑁆𑀬, 𑀘𑀻𑀯𑀭𑀁 𑀤𑀤𑁂𑀬𑁆𑀬, 𑀧𑀺𑀡𑁆𑀟𑀧𑀸𑀢𑀁 𑀤𑀤𑁂𑀬𑁆𑀬, 𑀲𑁂𑀦𑀸𑀲𑀦𑀁 𑀤𑀤𑁂𑀬𑁆𑀬, 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀤𑀤𑁂𑀬𑁆𑀬, 𑀔𑀸𑀤𑀦𑀻𑀬𑀁 𑀤𑀤𑁂𑀬𑁆𑀬, 𑀪𑁄𑀚𑀦𑀻𑀬𑀁 𑀤𑀤𑁂𑀬𑁆𑀬, 𑀧𑀸𑀦𑀻𑀬𑀁 𑀤𑀤𑁂𑀬𑁆𑀬, 𑀘𑁂𑀢𑀺𑀬𑀁 𑀯𑀦𑁆𑀤𑁂𑀬𑁆𑀬, 𑀘𑁂𑀢𑀺𑀬𑁂 𑀫𑀸𑀮𑀁 𑀆𑀭𑁄𑀧𑁂𑀬𑁆𑀬, 𑀕𑀦𑁆𑀥𑀁 𑀆𑀭𑁄𑀧𑁂𑀬𑁆𑀬, 𑀯𑀺𑀮𑁂𑀧𑀦𑀁 𑀆𑀭𑁄𑀧𑁂𑀬𑁆𑀬…𑀧𑁂… 𑀘𑁂𑀢𑀺𑀬𑀁 𑀅𑀪𑀺𑀤𑀓𑁆𑀔𑀺𑀡𑀁 𑀓𑀭𑁂𑀬𑁆𑀬𑀸𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀲𑀼𑀧𑀺𑀦𑀦𑁆𑀢𑁂𑀦 𑀘𑁂𑀢𑀺𑀬𑀁 𑀅𑀪𑀺𑀤𑀓𑁆𑀔𑀺𑀡𑀁 𑀓𑀭𑁂𑀬𑁆𑀬, 𑀦𑁄 𑀘 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀲𑀩𑁆𑀩𑀁 𑀲𑀼𑀧𑀺𑀦𑀕𑀢𑀲𑁆𑀲 𑀘𑀺𑀢𑁆𑀢𑀁 𑀅𑀩𑁆𑀬𑀸𑀓𑀢’’𑀦𑁆𑀢𑀺.

𑁯𑁦𑁨. 𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀲𑀩𑁆𑀩𑀁 𑀲𑀼𑀧𑀺𑀦𑀕𑀢𑀲𑁆𑀲 𑀘𑀺𑀢𑁆𑀢𑀁 𑀅𑀩𑁆𑀬𑀸𑀓𑀢’’𑀦𑁆𑀢𑀺? 𑀆𑀫𑀦𑁆𑀢𑀸. 𑀦𑀦𑀼 𑀲𑀼𑀧𑀺𑀦𑀕𑀢𑀲𑁆𑀲 𑀘𑀺𑀢𑁆𑀢𑀁 𑀅𑀩𑁆𑀩𑁄𑀳𑀸𑀭𑀺𑀬𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸𑀢𑀺? 𑀆𑀫𑀦𑁆𑀢𑀸. 𑀳𑀜𑁆𑀘𑀺 𑀲𑀼𑀧𑀺𑀦𑀕𑀢𑀲𑁆𑀲 𑀘𑀺𑀢𑁆𑀢𑀁 𑀅𑀩𑁆𑀩𑁄𑀳𑀸𑀭𑀺𑀬𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑁋 ‘‘𑀲𑀩𑁆𑀩𑀁 𑀲𑀼𑀧𑀺𑀦𑀕𑀢𑀲𑁆𑀲 𑀘𑀺𑀢𑁆𑀢𑀁 𑀅𑀩𑁆𑀬𑀸𑀓𑀢’’𑀦𑁆𑀢𑀺.

𑀅𑀩𑁆𑀬𑀸𑀓𑀢𑀓𑀣𑀸 𑀦𑀺𑀝𑁆𑀞𑀺𑀢𑀸.